ཚེ་ཡི་ལྷ་ཚོགས་ཐུགས་དམ་སྐོང་བའི་རིམ་པ་འཆི་མེད་ནོར་བུ་དཔག་བསམ་ལྗོན་ཕྲེང་།

Previous Text Back to Volume PageNext Text

Wylie title	tshe yi lha tshogs thugs dam skong ba'i rim pa 'chi med nor bu dpag bsam ljon phreng
Location	bdud 'joms rin po che bka' 'bum Volume 14, Text 11, Pages 157-178 (Folios 1a1 to 11b6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Tshe yi lha tshogs thugs dam skong ba'i rim pa 'chi med nor bu dpag bsam ljon phreng. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 14: 157-178. Kalimpong: Dupjung Lama, 1979-1985.
Side notes	Recto: skong ba   Verso: 'chi med srog thig
More details More details
Tertön	ཟིལ་གནོན་ནམ་མཁའི་རྡོ་རྗེ་ (zil gnon nam mkha'i rdo rje)
Genre	Mending Rituals - bskang chog
Cycle	ཚེ་སྒྲུབ་འཆི་མེད་སྲོག་ཐིག་ (tshe sgrub 'chi med srog thig)
Parent Cycle	དཔལ་རྡོ་རྗེ་ཕུར་པ་ཡང་གསང་འཕྲིན་ལས་བཅུད་དྲིལ་ (dpal rdo rje phur pa yang gsang 'phrin las bcud dril)
Deity	tshe dpag med
Colophon	།ཞེས་རྒྱལ་དབང་མཁའ་ཁྱབ་རྡོ་རྗེའི་གསུང་བྱིན་རླབས་ཅན་ཏེ། འདིའི་ལུང་རྒྱུན་མཛད་པ་པོ་ནས། ཁྱབ་བདག་གཏེར་ཆེན་བླ་མའི་ཞལ་སྔ་ཁོ་བོ་འཇིགས་བྲལ་ཡེ་ཤེས་རྡོ་རྗེ་ལ་བཀའ་དྲིན་དུ་ཐོབ་བོ།།
	zhes rgyal dbang mkha' khyab rdo rje'i gsung byin rlabs can te/___'di'i lung rgyun mdzad pa po nas/___khyab bdag gter chen bla ma'i zhal snga kho bo 'jigs bral ye shes rdo rje la bka' drin du thob bo//

Tibetan Text

[edit]

༄༅། །ཚེ་ཡི་ལྷ་ཚོགས་ཐུགས་དམ་སྐོང་བའི་རིམ་པ་འཆི་མེད་ནོར་བུ་དཔག་བསམ་ལྗོན་ཕྲེང་ཞེས་བྱ་བ་བཞུགས་སོ། །

༄༅། །སྐོང་རྫས་རྣམས། ཨོཾ་པདྨ་ཀྲོདྷ་ཧ་ཡ་གྲཱྀ་ཝ་ཧུ་ལུ་ཧུ་ལུ་ཧཱུྃ་ཕཊ་ཀྱིས་བསང་། སྭ་བྷཱ་ཝ་སོགས་ཆོས་ཉིད་རྣམ་དག་གི་སྔགས་རྒྱས་སྦྱང་། སྟོང་པའི་ངང་ལས་གནས་ཡུལ་རྡོ་རྗེའི་ཞིང་། །པདྨ་རྣམ་པར་རྒྱས་པའི་ཕོ་བྲང་དབུས། །ཕྱི་ནང་གསང་མཆོག་ཁྱད་པར་བླ་མེད་རྫས། །གྲུབ་པའི་བདུད་རྩི་དགོས་འབྱུང་ནོར་བུའི་གཏེར། །ཟག་བྲལ་བདེ་བའི་མཆོད་སྤྲིན་མཐའ་ཀླས་པ། །འགྲིབ་མེད་ནམ་མཁའ་མཛོད་ཀྱི་ལོངས་སྤྱོད་ཆེ། །འདོད་ཡོན་ལྷ་ཚོགས་རྡོ་རྗེའི་ལྷ་མོར་བཅས། །སྐུ་གསུམ་རྒྱལ་བའི་ཞིང་ཁམས་གང་བར་གྱུར། །འབྲུ་གསུམ་དང་། ནམ་མཁའ་མཛོད་ཀྱི་སྔགས་རྒྱས་ལན་གསུམ་རེས་བརླབ་ཅིང་། ཨོཾ་ [2a] བཛྲ་སྥ་ར་ཎ་ཁྃ་གིས་སྤེལ་ལ། དབྱངས་སྙན་རོལ་མོའི་སྒྲ་དང་། དྲི་བཟང་སྤོས་ཀྱིས་གཟི་བྀན་སྤར་ཏེ། ཧྲཱིཿ ཆོས་དབྱིངས་གདལ་པ་ཆེན་པོས་ལས། །རང་བྱུང་ཡེ་ཤེས་ཀུན་ཏུ་སྣང་། །མི་འགྱུར་ཚེ་ཡི་ལྷ་ཚོགས་རྣམས། །འདིར་འདུས་རིག་འཛིན་བདག་ཅག་གིས། །དད་གདུང་མོས་པས་སྤྱན་འདྲེན་ན། །མི་འདའ་རྡོ་རྗེའི་ཡལ་གམ་དགོངས། །དམ་ཚིག་གསང་བའི་གནས་མཆོག་འདིར། །དགྱེས་རབ་རྡོ་རྗེའི་སྐུ་ཡི་གར། །ཕྱིག་རྒྱ་སྟངས་སྟབས་ཤིགས་སེ་ཤིག །ཚངས་དབྱངས་རྡོ་རྗེའི་གསུང་གི་གདངས། །སྐྱེ་འགགས་བྲལ་བའི་དབྱངས་སུ་ལྡིར། །མི་གཡོ་རྡོ་རྗེའི་ཐུགས་ཀྱིས་རྩལ། །[2b] གཞི་གྲོལ་བདེ་ཀློང་འཁྱིལ་བར་གདལ། །ཡོན་ཏན་འཕྲིན་ལས་རྨད་པོ་ཆེའི། །བཀོད་པ་བསམ་ཡས་རོལ་པར་བཅས། །འཇའ་འོད་མེ་ཏོག་ལམས་སེ་ལམ། །རིན་ཆེན་རྒྱན་ཕྲེང་ཁྲལ་ལ། །དར་དཔྱངས་ཅོད་པན་པུ་རུ་རུ། །གདུ་བུ་དྲིལ་གཡེར་སི་ལི་ལི། །ཐོར་ཚུགས་སྙན་ཆ་ལྡེམས་སེ་ལྡེམ། །དགྱེས་པའི་འཛུམ་ཞལ་ཀྱི་ལི་ལི། །ཚེ་དབང་བྱིན་ཆེན་ཐིབས་སེ་ཐིབ། །དངོས་གྲུབ་ཆར་རྒྱུན་ཤ་ར་ར། །ཕོ་ཉ་ལས་བྱེད་ཁྱུགས་སེ་ཁྱུག །སྤོས་སྤྲིན་རོལ་མོའི་སྒྲ་དང་བཅས། །འདིར་བྱོན་དགྱེས་པའི་གདན་ལ་བཞུགས། །འབྱོར་ཚོགས་བཤམས་པའི་མཆོད་སྤྲིན་བཞེས། །ཚོགས་ཁང་འདི་ལ་བྱིན་གྱིས་རློབས། །ཚོགས་རྫས་རྣམས་ལ་བཅུད་གཡང་ཕོབ། །སྤྱན་གཟིགས་བཀོད་པའི་བཀྲག་མདངས་ཕྱུངས། །སྒྲུབ་མཆོག་རྣམས་ལ་ཡེ་ཤེས་སྤོར། །དམ་སྐོང་ཚེ་དབང་དངོས་གྲུབ་སྩོལ། །ཧྲཱིཿ ཀུན་ཏུ་བཟང་པོའི་སྨོན་ལམ་དང་། །ནམ་མཁའ་མཛོད་ཀྱི་ལོངས་སྤྱོད་ལས། །ངོ་མཚར་བཀོད་པ་ཕུལ་བྱུང་བ། །ཧེ་རུ་ཀ་ཡི་ཏིང་འཛིན་འཕྲུལ། །དམིགས་བསམ་བྲལ་བར་རང་ཤར་བ། །བློ་ལས་འདས་པའི་སྤྲིན་རབ་འབྱམས། །སྣང་ཡུལ་ཐམས་ཅད་མཆོད་པའི་རྒྱན། །རྡོ་རྗེའི་ [3a] དབང་པོར་མཉམ་སྦྱོར་བའི། །བདེ་ཆེན་མཆོག་གི་དགའ་སྟོན་ཆེ། །གཉིས་མེད་མཉམ་པའི་ཀློང་དུ་འབུལ། །བླང་དོར་འཛིན་པ་བྲལ་བར་བཞེས། །ཡེ་གྲོལ་གཉུག་མའི་དབྱིངས་སུ་བསྐང་། །ཉམས་ཆག་གདོད་ནས་མ་སྐྱེས་པ། །དག་མཉམ་ལྷུན་འབྱམས་ཡངས་པར་བཤགས། །བདེ་སྟོང་འགྱུར་བ་མེད་པའི་དཔྱིད། །འཕོ་བྲལ་དོན་གྱི་ཚེ་དབང་སྩོལ། །ཧྲཱིཿ ཀ་དག་དབྱིངས་ཀྱི་ནམ་མཁའ་ལས། །ལྷུན་གྲུབ་རིག་རྩལ་མཆོད་པའི་སྤྲིན། །ཆོས་ཉིད་མངོན་སུམ་རོལ་པའི་རྒྱན། །གོང་འཕེལ་ལུ་གུ་རྒྱུད་ཀྱི་ཕྲེང་། །ཚད་ཕེབས་བཀོད་པ་ཆེན་པོར་བཤམས། །གཉིས་སྣང་ཟད་པའི་ལོངས་སྤྱོད་གཏེར། །གཉིས་མེད་རང་གསལ་ཀློང་དུ་གདལ། །རྨད་བྱུང་རྡོ་རྗེའི་ཉེར་མཆོད་རྫས། །འཆི་མེད་བཅུད་ཀྱི་ཨརྒྷཾ་རྒྱུན། །མཚོ་ལྟར་བསྐྱིལ་བ་དྭངས་རེ་སྤྲོ། །མཛེས་སྡུག་མེ་ཏོག་པདྨའི་ཕྲེང་། །གཅལ་དུ་བཀྲམ་པ་བཀོད་རེ་ལེགས། །སྦྱར་དང་རང་བྱུང་དྲི་བཟང་སྤོས། །བསུང་ཞིམ་སྤོས་སྤྲིན་བྱིན་རེ་ཆགས། །ཉི་ཟླ་ནོར་བུ་སྒྲོན་མེའི་འོད། །སྣང་གསལ་དཀྱིལ་འཁོར་འོད་རེ་འབར། །ངད་ཞིམ་རེག་འཇམ་ཁ་དོག་བཟང་། །རྨད་བྱུང་དྲི་ཆབ་ཉམས་ [3b] རེ་དགའ། །བཅའ་མུར་ལྡག་གཞིབ་ཞལ་ཟས་ཚོགས། །ལྷུན་པོར་སྤུངས་པ་བརྗིད་རེ་ཆེ། །སིལ་སྙན་དྲིལ་རྔ་གླིང་བུའི་སྒྲ། །ཟག་མེད་བདེ་བའི་དབྱངས་རེ་སྙན། །གདུང་སེལ་སྲབ་འཇམ་ཡངས་པའི་གོས། །ཟ་འོག་མན་ཏྲི་ལྷབ་མ་ལྷུབ། །གདུང་མེད་རབ་མཛེས་རིན་ཆེན་རྒྱན། །སྐད་སྙན་དྲིལ་གཡེར་སིལ་ཁྲོལ་འབྱིན། །སྒེག་བཞད་གླུ་དང་གར་རྡོ་རྗེ། །མཚར་སྡུག་ལང་ཚོ་ངོམས་པའི་ཚོགས། །རང་རང་མཆོད་པའི་གར་སྒྱུར་མ། །གྲངས་མེད་ཉི་ཟེར་རྡུལ་ལྟར་འཁྲིགས། །གཞན་ཡང་སྤྱན་གཟིགས་ལོངས་སྤྱོད་རྒྱན། །འཁོར་ལོས་སྒྱུར་བའི་བསོད་ནམས་ལས། །གྲུབ་པའི་རྨད་བྱུང་རྒྱལ་སྲིད་བདུན། །མི་དབང་དམ་པའི་ཉེར་སྤྱད་འབུལ། །ཉེ་བའི་རིན་ཆེན་རྣམ་བདུན་བཅས། །དགའ་བའི་ཡེ་ཤེས་རོལ་པའི་སྤྲིན། །སྣ་ཚོགས་ཕྱི་ཡི་མཆོད་པ་འདིས། །ཚེ་ཡི་ལྷ་ཚོགས་ཐུགས་དམ་བསྐང་། །བུམ་དབང་དམ་ཚིག་ཉམས་ཆག་བཤགས། །སྣང་སྟོང་འཆི་མེད་རྡོ་རྗེའི་སྐུ། །འགྱུར་མེད་རྟག་པའི་དངོས་གྲུབ་སྩོལ། །ཧྲཱིཿརང་བྱུང་རོལ་པའི་འདོད་ཡོན་ནི། །ཟག་མེད་བདེ་ཀློང་ཡངས་པའི་འཕྲུལ། །རབ་མཛེས་ [4a] གཟུགས་ཀྱི་རྡོ་རྗེ་མ། །མཚར་སྡུག་མུ་ཏིག་འོད་དུ་འཚེར། །སྣང་སྲིད་གསལ་བའི་ཨཱ་དརྴ། །ངོ་མཚར་ཡིད་འོང་སྣ་ཚོགས་བཀྲ། །སྣང་སྟོང་མཆོད་འབུལ་ལྷ་མོ་འབུམ། །ལང་ཞོའི་དཔལ་གྱི་འཇོ་སྒེག་ངོམས། །ཡིད་འཛིན་སྒྲ་ཡི་རྡོ་རྗེ་མ། །མདངས་མཛེས་གསེར་མཆོག་འོད་དུ་ལྟམ། །འུར་ཏིང་སིང་ཁྲོལ་རོལ་མོའི་སྒྲ། །སྙན་འགྱུར་ཡིད་འཕྲོག་སྣ་ཚོགས་འཁྲོལ། །གྲགས་སྟོང་མཆོད་འབུལ་ལྷ་མོ་འབུམ། །ངད་བཟང་དྲི་ཡི་རྡོ་རྗེ་མ། །བཀྲག་གསར་མརྒད་འོད་དུ་གསལ། །བདེ་སྐྱིད་མདངས་གསལ་བྱུག་པའི་མཆོག །སྣ་ཚོགས་དྲི་ཡི་དུང་ཕོར་བསྣམས། །ཚོར་སྟོང་མཆོད་འབུལ་ལྷ་མོ་འབུམ། །ཚིམ་བྱེད་རོ་ཡི་རྡོ་རྗེ་མ། །དགའ་བསྐྱེད་རཱ་གའི་མདངས་འོད་འབར། །ཁ་དོག་དྲི་རོ་ནུས་པའི་བཅུད། །ཡན་ལག་སྟོང་ལྡན་ཟས་གཞོང་འཛིན། །མྱང་སྟོང་མཆོད་འབུལ་ལྷ་མོ་འབུམ། །འཇམ་འཁྲིལ་རེག་བྱའི་རྡོ་རྗེ་མ། །སྣ་ཚོགས་གསལ་བའི་འོད་དུ་བཀྲ། །པཉྩ་ལཱི་ཀའི་ན་བཟའ་དང་། །ཟག་མེད་དབང་པོའི་རེག་བྱ་སྟོབས། །བདེ་སྟོང་མཆོད་འབུལ་ལྷ་མོ་འབུམ། །ཀུན་ཁྱབ་ཆོས་ཀྱི་རྡོ་རྗེ་མ། །[4b] མུ་མེན་མཐིང་གའི་འོད་དུ་བརྗིད། །འཁོར་བ་མྱ་ངན་འདས་པའི་ཆོས། །ཡོངས་རྫོགས་ཆོས་འབྱུང་སྤྱན་མཚན་ངོམས། །མཉམ་ཉིད་མཆོད་འབུལ་ལྷ་མོ་འབུམ། །གཟི་ལྡན་དབང་ཕྱུག་རྡོ་རྗེ་མ། །སྔོ་དམར་ནཱི་ལའི་མདངས་འོད་ཆགས། །དབང་ལྔ་ཚིལ་ཞུན་རྐང་གླིང་དྲི། །དུག་ལྔ་ཡེ་ཤེས་དབྱིངས་དག་རྫས། །རོལ་པའི་མཆོད་འབུལ་མཁའ་འགྲོ་འབུམ། །གཞན་ཡང་བླ་མེད་གསང་བའི་མཆོག །རྡོ་རྗེའི་དམ་ཚིག་ཆེན་པོའི་རྒྱན། །དངོས་གྲུབ་ཀུན་འབྱུང་གྲུབ་པའི་དབྱིག །འཇིག་རྟེན་དགེ་ལེགས་བྱེད་པའི་ཕྱིར། །རྒྱལ་བས་བྱིན་བརླབས་རྫས་མཆོག་བརྒྱད། །ཐུན་མོང་ལས་ཆེན་དངོས་གྲུབ་རྣམས། །གྲུབ་པའི་ནོར་བུ་རྫས་བརྒྱད་བཅས། །མཆོག་དགའི་ཡེ་ཤེས་འབར་བའི་སྤྲིན། །རང་བྱུང་ནང་གི་མཆོད་པ་འདིས། །ཚེ་ཡི་ལྷ་ཚོགས་ཐུགས་དམ་བསྐང་། །གསང་དབང་དམ་ཚིག་ཉམས་ཆགས་བཤགས། །གྲགས་སྟོང་འཆི་མེད་རྡོ་རྗེའི་གསུང་། །གཞོམ་མེད་དབྱངས་ཀྱི་དངོས་གྲུབ་སྩོལ། །ཧྲཱིཿ གསང་མཆོག་རྡོ་རྗེ་ཚེ་ཡི་བཅུད། །ཐབས་ཀྱི་ཐིག་ལེ་ཤ་ཆེན་ལྔ། །ཤེས་རབ་སྟོང་དབྱིངས་བདུད་རྩི་ལྔ། ། [5a] སྣང་ཞིང་སྲིད་པའི་རྩི་དང་སྨན། །དག་མཉམ་དབྱིངས་སྦྱོར་འཆི་མེད་རྩི། །རཱ་ས་ཡ་ནའི་མཆོད་པ་དང་། །མ་རིག་དག་འཛིན་བག་ཆགས་ལུས། །རིག་པའི་ཕྱག་རྒྱས་ཕུག་པའི་ཁྲག །བདེ་ཀློང་པདྨའི་རཀྟར་བཅས། །འཁོར་བ་ཐུགས་རྗེས་མི་གཏོང་ཕྱིར། །བདེ་ཆེན་ཆགས་པ་བསྐུལ་བའི་རྫས། །ཧེ་རུ་ཀ་ཡི་དམ་ཚིག་ཆེ། །མ་ཧཱ་རཀྟའི་མཆོད་པ་དང་། །སྟོང་ཉིད་གནས་མཆོག་ཀ་པཱ་ལ། །ཆོས་འབྱུང་ཡུམ་གྱི་པདྨོ་རུ། །སྣང་བ་བཅུད་ཀྱི་གཏོར་ཆེན་པོ། །རྡོ་རྗེ་ལྷུན་པོའི་བ་ལིཾ་ཏ། །ཐབས་ཤེས་རྡོ་རྗེ་ཚེ་དང་མགལ། །མཉམ་སྦྱོར་བྱང་སེམས་ཐིག་ལེར་འཁྱིལ། །དགའ་བ་བཅུ་དྲུག་རྒྱན་གྱིས་སྤྲས། །སྟོང་ཉིད་འོད་གསལ་དངས་གུར་ཕུག །ཟག་མེད་དགའ་དང་བདེ་བའི་ཕུལ། །ཀུན་འབྱུང་ཡིད་བཞིན་རིན་ཆེན་གཏེར། །བདེ་ཆེན་ཚོགས་ཀྱི་འཁོར་ལོ་དང་། །སངས་རྒྱས་བསོད་ནམས་མཐུས་གྲུབ་པ། །བཀྲ་ཤིས་རྟགས་ཀྱི་ཕྱག་རྒྱ་བརྒྱད། །ཁྱད་པར་འཆི་མེད་ལྷ་ཚོགས་ཀྱི། །སྐུ་གསུང་ཐུགས་ཡོན་འཕྲིན་ལས་རྟེན། །སྲོག་འཁོར་བླ་རྡོ་རྟེན་རྫས་བཀོད། །བླ་སྲོག་དབུགས་ཚེའི་རྟེན་མཁར་བཤམས། །བསྐྱེད་སྔགས་རྫོགས་དང་ [5b] རྫོགས་པ་ཆེའི། །རྣལ་འབྱོར་རིམ་པ་མཐར་དབྱུངས་ཤིང་། །བཅུད་ལེན་ལས་ཀྱི་སྦྱོར་བ་རྣམས། །གྲུབ་པའི་གཞུང་བཞིན་བརྩམས་པ་སོགས། །དགའ་བྲལ་ཡེ་ཤེས་ལོངས་སྤྱོད་སྤྲིན། །རྨད་བྱུང་གསང་བའི་མཆོད་པ་འདིས། །ཚེ་ཡི་ལྷ་ཚོགས་ཐུགས་དམ་བསྐང་། །ཤེར་དབང་དམ་ཚིག་ཉམས་ཆག་བཤགས། །བདེ་སྟོང་འཆི་མེད་དངོས་གྲུབ་སྩོལ། །ཧྲཱིཿ བསམ་བརྗོད་བྲལ་བའི་ཡེ་ཤེས་དབྱིངས། །མཉམ་ཉིད་འདུ་འབྲལ་མེད་པའི་རྒྱན། །བྱང་ཆུབ་སེམས་ཀྱི་བདེ་བའི་སྤྲིན། །དགའ་བ་བཅུ་དྲུག་ལོངས་སྤྱོད་གཏེར། །ཀུན་ཏུ་བཟང་མོ་དབྱིངས་ཀྱི་མཁའ། །ཆོས་འབྱུང་ཡུམ་གྱི་ཨེ་ཀློང་དུ། །ཀུན་ཏུ་བཟང་པོ་ཆེ་བའི་མཆོག །འགྱུར་མེད་བདེ་ཆེན་ཐིག་ལེ་ཝྃ། །ཁ་སྦྱོར་བདེ་མཆོག་རྒྱས་འདེབས་མ། །རིགས་ལྔའི་ཕྱག་རྒྱ་བཅུ་དྲུག་ཕྲག །འབུམ་ཕྲག་ཡངས་པའི་ཕོ་ཉ་མོ། །སྣ་ཚོགས་རིན་ཆེན་འོད་དུ་འཚེར། །ཡིད་འོང་ལང་ཞོའི་ཕུལ་གྱིས་ཕྱུག །ངོ་མཚར་དམ་པའི་རྒྱན་གྱིས་སྤུད། །རྩེ་འཇོ་རྒོད་པའི་རྣམ་འགྱུར་ངོམས། །འཁྲིལ་འཇམ་རེག་བྱའི་དཔལ་ལྡན་མར། །རྡོ་རྗེ་པདྨ་མཉམ་སྦྱོར་བའི། །གསང་མཆོག་ [6a] བདེ་བའི་མཆོད་པ་དང་། །ཆོས་ཉིད་མཉམ་པའི་ཧོམ་ཁུང་དུ། །ཆོས་ཅན་རྟོག་ཚོགས་རཱུ་ཏྲ་བཀུག །གཉིས་མེད་རྡོ་རྗེའི་མཚོན་ཆ་ཡིས། །སྐྱེ་འཆིའི་མཚན་རྟོག་དབྱིངས་སུ་བསྒྲལ། །དུག་གསུམ་རྡོ་རྗེ་གསུམ་དག་པའི། །ཤ་ཁྲག་རུས་པའི་མཆོད་པ་ཆེ། །ཁམས་གསུམ་ཡོངས་སྒྲོལ་དམ་ཚིག་དང་། །སྣང་གསལ་འོད་དང་མཚན་ལྡན་བམ། །སྲོག་ཆགས་མདངས་ཏེ་དགྱེས་སྐོང་རྫས། །ལྷན་ཅིག་སྐྱེས་དགའི་ལོངས་སྤྱོད་སྤྲིན། །སྦྱོར་སྒྲོལ་བརྟུལ་ཞུགས་རྨད་པོ་ཆེ། །བླ་མེད་མཆོག་གི་མཆོད་པ་འདིས། །ཚེ་ཡི་ལྷ་ཚོགས་ཐུགས་དམ་བསྐང་། །ཀ་དག་ལྟ་བའི་དམ་ཉམས་བཤགས། །དབྱེར་མེད་ཡེ་ཤེས་རྡོ་རྗེའི་དབྱིངས། །ཕྱམ་གདལ་ཆེན་པོའི་དངོས་གྲུབ་སྩོལ། །ཧྲཱིཿ ཡེ་ཤེས་རྣམ་པ་ཐམས་ཅད་པ། །སེམས་ཀྱི་ཡིད་བཞིན་ཀུན་འབྱུང་གཏེར། །ནམ་མཁའ་ཐམས་ཅད་གཞལ་ཡས་ཁང་། །ཉི་ཟླ་གཟའ་སྐར་རྒྱན་དུ་བཀྲམ། །སྤྲིན་དང་འཇའ་ཚོན་འཕན་དར་དཔྱངས། །བཀྲག་གསལ་ལྷུན་སྡུག་བག་རེ་དྲོ། །སྣང་བ་ཐམས་ཅད་འདོད་ཡོན་སྤྲིན། །ལོངས་སྤྱོད་ཚོགས་ཀྱི་རྫས་སུ་བཤམས། །སྐྱེ་འགྲོ་ཐམས་ཅད་མཆོད་པའི་ལྷ། །དཔའ་ [6b] བོ་དཔའ་མོའི་གར་སྟབས་འཁྱུག །སྒྲ་གྲགས་ཐམས་ཅད་སྙིང་པོའི་ཛཔྲ། །བརྗོད་བྲལ་ནཱ་དའི་དབྱིངས་སུ་ལྡིར། །དྲན་རྟོག་ཐམས་ཅད་འོད་གསལ་བ། །རིག་པ་བདེ་གཤེགས་སྙིང་པོར་བཞེངས། །ཡེ་དག་ཀུན་བཟང་ཡངས་པའི་ཀློང་། །གཞི་རྫོགས་དོན་གྱི་ཕྱག་རྒྱ་ཆེ། །སྟོང་སྲོག་གཅིག་ཏུ་དྲིལ་བའི་གདེངས། །མཚན་མའི་རྟོག་པས་མི་ཕྱེད་པ། །བློ་འདས་དགའ་ཆེན་རྡོ་རྗེའི་སྤྲིན། །འཁོར་གསུམ་ཡེ་གྲོལ་མཆོད་པ་འདིས། །ཚེ་ཡི་ལྷ་ཚོགས་ཐུགས་དམ་བསྐང་། །ལྷུན་གྲུབ་དགོངས་པའི་དམ་ཉམས་བཤགས། །ཐ་སྙད་ཟད་པ་བུམ་པ་སྐུར། །འུབ་ཆུབ་ཆེན་པོའི་དངོས་གྲུབ་སྩོལ། །ཧྲཱིཿ སྐྱེ་བ་མེད་པའི་ཡེ་ཤེས་རྩལ། །འགགས་པ་མེད་པའི་ཕྱག་རྒྱར་བཞེངས། །འཆི་མེད་མི་འགྱུར་རྡོ་རྗེའི་སྐུ། །དཀྱིལ་འཁོར་ལྷ་ཚོགས་ཐུགས་དམ་བསྐང་། །ཀུན་ཏུ་བཟང་པོ་འོད་མི་འགྱུར། །འཆི་མེད་བླ་མ་ཚེ་དཔག་མེད། །པདྨ་དབྱིངས་ཕྱུག་ཡུམ་དང་སྦྱོར། །ཡབ་ཡུམ་གཉིས་མེད་ཐུགས་དམ་བསྐང་། །འགྲོ་འདུལ་པདྨ་གར་གྱི་དབང་། །ཐུགས་རྗེ་ཆེན་པོ་ཚེ་དཔག་མེད། །གསང་བ་ཡེ་ཤེས་ཡུམ་དང་འཁྲིལ། །ཡབ་ཡུམ་གཉིས་མེད་ཐུགས་དམ་བསྐང་། ། [7a] དཀྱིལ་འཁོར་དབང་ཕྱུག་བཅོམ་ལྡན་འདས། །ཡེ་ཤེས་རྒྱལ་པོ་ཀུན་ཏུ་འཆང་། །འཆི་མེད་པདྨ་ཐོད་ཕྲེང་རྩལ། །ཚེ་བདག་མགོན་པོའི་ཐུགས་དམ་བསྐང་། །འཁོར་འདས་སྐུ་ཡི་བཀོད་པས་ཁྱབ། །སྒྲ་སྐད་གསུང་གི་གདངས་སུ་རྫོགས། །དྲན་རྟོག་ཐུགས་ཀྱི་དབྱིངས་སུ་བསྟུད། །ཚེ་བདག་མགོན་པོའི༴ རང་བྱུང་པདྨ་ཚེ་ཡི་ལྷ། །ཐུགས་རྗེའི་ཐབས་ཀྱིས་འགྲོ་བ་འདུལ། །འཆི་མེད་མཆོག་སྩོལ་ཡིད་བཞིན་ནོར། །ཚེ་བདག་མགོན་པོའི༴ བདེ་སྟོང་དགའ་བཞིའི་ཡེ་ཤེས་འདྲེན། །ན་བཟའ་དཀར་མོ་ཚེ་ཡི་བདག །དབྱིངས་ཕྱུག་ལྷ་མོ་པདྨའི་ལྕམ། །མནྡཱ་ར་བའི༴ སྐུ་དང་ཡེ་ཤེས་མཐའ་ཡས་མགོན། །ཡོན་ཏན་ཚད་མེད་གངས་ཅན་མཚོ། །རིགས་བཞིའི་ཐོད་ཕྲེང་ཚེ་ཡི་བདག །ཡབ་ཡུམ་གཉིས་མེད༴ རྟག་པ་ལ་སོགས་བདེ་བར་གཤེགས། །ཚེ་ལྷའི་སྐུ་གསུང་ཐུགས་ཡོན་ཏན། །སྲོག་བླ་དབུགས་ཚེའི་རྟེན་མཁར་ཚུལ། །ཕྱག་རྒྱ་ལྷ་ཡི༴ ཡུལ་དང་དབང་པོ་ཕ་རོལ་ཕྱིན། །རྣམ་དག་རྡོ་རྗེའི་མཆོད་སྤྲིན་གྱིས། །ཚེ་ལྷའི་དཀྱིལ་འཁོར་དགྱེས་བསྐྱེད་ཡུམ། །ལྷ་མོ་དྲུག་གི༴ རྟོག་ཚོགས་དག་པ་རྣམ་ཐར་དང་། །ཟིལ་གནོན་འཕགས་ལམ་ [7b] བརྒྱད་རང་བཞིན། །ཚེ་ཡི་ལས་བྱེད་བཀྲ་ཤིས་ལྷ། །མགྱོགས་མ་བརྒྱད་ཀྱི༴ དྲན་པ་ཉེར་བཞག་ཚད་མེད་དང་། །དགའ་བའི་རང་བཞིན་ཕོ་ཉའི་ལྷ། །ཚེ་བདུད་བར་ཆད་བདུད་དཔུང་འཇོམས། །སྒོ་སྲུང་ཡབ་ཡུམ༴ དབང་མཆོག་པདྨ་རིགས་ཀྱི་ལྷ། །འཁོར་འདས་ཟིལ་གནོན་རྟ་སྐད་བཞད། །བགེགས་འདུལ་དཔལ་ཆེན་ཚེ་ཡི་བདག །ཧྱ་གྲཱི་ཝའི་ཐུགས་དམ་བསྐང་། །ཧྲཱིཿ བདེ་མཆོག་འཆི་མེད་གྲུབ་པའི་རྒྱལ། །མཐིང་འོད་འབར་མ་ཚེ་ཡི་བདག །ལཱ་སྱེ་དཀར་མོ་དྷཱ་ཀིའི་གཙོ། །ཡེ་ཤེས་མཚོ་རྒྱལ་ཐུགས་དམ་བསྐང་། །མཁྱེན་བརྩེའི་ཡེ་ཤེས་མུ་མཐའ་མེད། །དེ་ཉིད་གཟིགས་པའི་སྤྱན་དང་ལྡན། །བསྟན་པའི་རྒྱན་གཅིག་ལོ་ཙཱ་བ། །བཻ་རོ་ཙ་ནའི་ཐུགས༴ དྲག་སྔགས་ནུས་རྩལ་རླུང་གི་ཤུགས། །མེ་ལྟར་འབར་བས་བསྟན་པ་བསྲུང་། །ཚེ་དབང་གྲུབ་པའི་ཧེ་རུ་ཀ ། རྡོ་རྗེ་བདུད་འཇོམས༴ འཆི་བདག་ཟིལ་གནོན་རིགས་ཀྱི་བདག །འཆི་མེད་ནམ་མཁའི་རྡོ་རྗེ་གྲུབ། །འཆི་མེད་ཟབ་གསང་གཏེར་སྒོ་འབྱེད། །འཆི་མེད་བླ་མའི་ཐུགས༴ འཆི་མེད་གདམས་པའི་བདུད་རྩི་མཆོག །འཆི་མེད་ཐུགས་ཀྱི་བུམ་པར་བསྐྱིལ། །འཆི་ [8a] མེད་དགའ་སྟོན་འགྱེད་མཁས་པའི། །ཆོས་བདག་རིམ་བྱོན༴ གཞན་ཡང་དམ་ཚིག་སྨོན་ལམ་དང་། །ཐུགས་རྗེའི་མཐུ་ཡིས་དཀྱིལ་འཁོར་འདིར། །ཚོགས་པའི་དཔའ་བོ་ཧེ་རུ་ཀ ། རིག་འཛིན་རྣམས་ཀྱི༴ འཕོ་མེད་མཆོག་དང་ཐུན་མོང་མཐུས། །ཉི་ཟླའི་ཚེ་དང་བཅུད་ལེན་འགྲུབ། །ལྷ་མི་ཀླུ་དང་གནོད་སྦྱིན་གྱི། །དྲང་སྲོང་རྣམས་ཀྱི༴ ཁྲག་འཐུང་སྤྱན་སྔར་དམ་བཅས་ཤིང་། །ཆོས་འཁོར་དབེན་གནས་དམ་ཆོས་སྐྱོང་། །ཉམས་པའི་སྲོག་གི་ཤན་པ་མཛད། །བརྒྱུད་གསུམ་སྲུང་མའི༴ གཏུམ་པོ་འཇིགས་བྱེད་རཱ་ཧུ་ལ། །ཟུར་རྭ་སྐྱེས་སྲོག་ཟན་བཙན། །ཀླུ་སྨན་འོད་འབར་མ་ལ་སོགས། །གཏེར་སྲུང་རྣམས་ཀྱི༴ ཚེ་དབང་དབྱིག་གི་ཆར་འབེབས་པའི། །གནོད་སྦྱིན་ནོར་བདག་ཕོ་མོ་དང་། །རིགས་ཆོས་གཞི་གནས་ཡུལ་གྱི་བདག །མ་ལུས་འཁོར་བཅས༴ འཁོར་བ་མྱ་ངན་འདས་པའི་ཆོས། །ཡེ་སྟོང་ཆོས་ཀྱི་དབྱིངས་སུ་མཉམ། །དག་པ་རབ་འབྱམས་ཚོམ་བུར་གདལ། །སྣང་སྲིད་མགྲོན་གྱི༴ བསྐང་བྱ་ཀུན་བཟང་ཡངས་པའི་མཁའ། །སྐོང་བྱེད་བློ་འདས་དབྱིངས་ཀྱི་སྦུབས། །ཟུང་འཇུག་རྡོ་རྗེ་ནམ་མཁའི་ [8b] དཀྱིལ། །ཀློང་ཡངས་དགོངས་པས་ཐུགས་དམ་བསྐང་། །ཧྲཱིཿ ཐུགས་རྗེ་ཆེ་མངའ་ཚེ་ཡི་ལྷ། །འཁོར་བཅས་ཐུགས་དམ་གཉན་བསྐང་ནས། །གཡར་དམ་ཉམས་ཆག་སོར་སྩོལ་ཏེ། །འདི་ལྟར་བཅོལ་བའི་འཕྲིན་ལས་མཛོད། །བདག་ཅག་རྡོ་རྗེ་སློབ་དཔོན་དང་། །འདུས་པའི་རྣལ་འབྱོར་མཆེད་དང་ལྕམ། །བརྒྱུད་འཛིན་མོས་པའི་བུ་སློབ་བཅས། །མི་ཤེས་རྨོངས་པས་བག་མེད་པས། །གྲངས་མེད་དུས་ནས་ད་ལྟའི་བར། །བསགས་པའི་ལས་དང་འཕྲལ་བྱུང་རྐྱེན། །ཚེ་གེགས་བར་ཆད་མི་མཐུན་ཕྱོགས། །མ་ལུས་ཞི་བར་མཛད་དུ་གསོལ། །རྡོ་རྗེའི་ཚེ་དང་ནོར་བུའི་དཔལ། །ཆོས་འབྱོར་ལེགས་ཚོགས་རྒྱས་པར་མཛོད། །རྩ་རླུང་ཐིག་ལེ་སེམས་སྣང་ཡུལ། །དངོས་གྲུབ་མཆོག་རྣམས་དབང་དུ་མཛོད། །ཚེ་འཕྲང་བྱད་ཕུར་གྲིབ་གདོན་དཔལ། །བཟློག་ཅིང་བརླག་པའི་མངོན་སྤྱོད་མཛོད། །ཁྱད་པར་རིག་འཛིན་བདག་ཅག་གིས། །བླ་མེད་བདེ་ཆེན་མཆོག་འདོད་ཅིང་། །སངས་རྒྱས་བསྟན་དང་སེམས་ཅན་དོན། །རླབས་ཆེན་འདུ་བ་སྤེལ་བའི་ཕྱིར། །འཆི་མེད་རྡོ་རྗེའི་སྲོག་བསྒྲུབ་པའི། །མི་འདོད་བར་ཆད་ཉེར་འཚེ་སེལ། །ལེགས་པའི་དཔལ་ཡོན་ཐམས་ཅད་ [9a] བསྡུས། །སྡོམ་པ་དམ་ཚིག་འགལ་ཉམས་པས། །རྩ་གསུམ་རྒྱལ་བའི་བཀའ་ཆད་ཀྱིས། །བཅད་པའི་ཚེ་རྣམས་གསོ་བར་མཛོད། །བླང་དོར་འཛོལ་དང་སྤྱོད་ངན་ལ། །མ་མོ་མཁའ་འགྲོའི་འཁུ་ལྡོག་གིས། །ཁྱེར་བའི་ཚེ་རྣམས་གནས་སུ་སྐྱོལ། །སྲུང་མ་ལྷ་ལྔ་བདུད་བབས་བས། །སྦས་པའི་ཚེ་རྣམས་ཕྱུང་དུ་གསོལ། །བནྡེ་བོན་སྔགས་མཐུ་ཆེན་གྱིས། །བཀུག་པའི་ཚེ་རྣམས་དྲང་དུ་གསོལ། །བྱད་མས་འབྱུང་བཞིའི་ལས་སྦྱོར་གྱིས། །བརླག་པའི་ཚེ་རྣམས་བསྐྱེད་དུ་གསོལ། །རྦོད་གཏོང་ལྷ་འདྲེ་ཕྲ་མེན་མས། །འཕྲོག་པའི་ཚེ་རྣམས་བཀུག་ཏུ་གསོལ། །སྡེ་བརྒྱད་ཡུལ་ལྷ་ཁྲོས་པ་ཡིས། །བཅོམ་པའི་ཚེ་རྣམས་བླན་དུ་གསོལ། །རྒྱལ་བཙན་ཐེའུ་རང་གཤེད་མ་ཡིས། །བརྐུས་པའི་ཚེ་རྣམས་དབྲོག་ཏུ་གསོལ། །ཕུང་བྱེད་བྱུར་འདྲེ་སྲི་ངན་གྱིས། །གཏོར་བའི་ཚེ་རྣམས་སྡུད་དུ་གསོལ། །ཟ་འདྲེ་ལན་ཆགས་མདངས་འཕྲོག་གིས། །གཞོམ་པའི་ཚེ་རྣམས་གཟུང་དུ་གསོལ། །བསོད་ནམས་ལས་ཀྱིས་འཕངས་པའི་དུས། །ཟད་པའི་ཚེ་རྣམས་བསྣོན་དུ་གསོལ། །འབྱུང་བ་དགྲ་གཤེད་འཐབ་པ་ཡིས། །བཅད་པའི་ཚེ་རྣམས་མཐུད་དུ་གསོལ། །རྟོག་ཚོགས་ [9b] ཡུལ་ལ་ཡེངས་པ་ཡིས། །འཁྱམས་པའི་ཚེ་རྣམས་དགུག་ཏུ་གསོལ། །འཇིགས་སྐྲག་བྲེད་སྔངས་བརྒྱལ་བ་ཡིས། །བྲོས་པའི་ཚེ་རྣམས་བསྐྱིལ་དུ་གསོལ། །སྡུག་བསྔལ་མྱ་ངན་ཞུམ་པ་ཡིས། །བོ་བའི་ཚེ་རྣམས་བླུག་ཏུ་གསོལ། །ཞེ་སྡང་ཁོང་ཁྲོ་དྲག་ཤུལ་གྱིས། །ཡར་བའི་ཚེ་རྣམས་བསྟིམ་ཏུ་གསོལ། །ང་རྒྱལ་ཁེངས་དྲེག་རྒོད་པ་ཡིས། །ཟག་པ་ཚེ་རྣམས་བཅུག་ཏུ་གསོལ། །སྐམ་ཆག་འདོད་པའི་ཟིལ་གནོན་བས། །ཉམས་པའི་ཚེ་རྣམས་གསོ་རུ་གསོལ། །ཕྲག་དོག་ཟུག་རྔུས་གཟིར་བ་ཡིས། །ཆད་པའི་ཚེ་རྣམས་སྦྲེལ་དུ་གསོལ། །བསོད་ནམས་མ་ཡིན་ལས་བསགས་བས། །ཞིག་པའི་ཚེ་རྣམས་སྦུང་དུ་གསོལ། །དབང་ཐང་རླུང་རྟ་ཆག་པ་ཡིས། །རྒུད་པའི་ཚེ་རྣམས་སྤེལ་དུ་གསོལ། །འདུ་འཁྲུགས་ནད་ཀྱིས་མནར་བ་ཡིས། །གྲུམ་པའི་ཚེ་རྣམས་གླན་ལྷན་པོ། མཆན། དུ་གསོལ། །ཁ་ཟས་སྨན་དཔྱད་ལོག་པ་ཡིས། །འཐོར་བའི་ཚེ་རྣམས་འཆོས་སུ་གསོལ། །ཕྱོགས་ངན་རྒྱུ་བར་གདོང་ཐུག་པས། །རལ་བའི་ཚེ་རྣམས་དྲུབ་ཏུ་གསོལ། །དམེ་མནོལ་འབགས་བཙོག་འཁོན་གྲིབ་ཀྱིས། །ཡོ་བའི་ཚེ་རྣམས་བསྲང་དུ་གསོལ། །ལྟ་སྤྱོད་བླང་དོར་ [10a] ལོག་པ་ཡིས། །གསལ་བའི་ཚེ་རྣམས་སྦྱོར་དུ་གསོལ། །གཞན་ཡང་ཕྱི་ནང་གསང་བ་ཡི། །རྟེན་འབྱུང་འཆོལ་ཞིང་འཛོལ་བ་དང་། །བར་ཆད་ཉེར་འཚེ་མ་རུངས་པས། །བསྟུང་བའི་ཚེ་རྣམས་བསྲིང་དུ་གསོལ། །རྡོ་རྗེ་གཡུང་དྲུང་འཁྱིལ་བའི་ཚེ། །མཐུན་པའི་ལེགས་ཚོགས་སྤེལ་དུ་གསོལ། །གཞོམ་མེད་ཕ་ལམ་རྡོ་རྗེའི་རི། །སྲོག་གི་རྟེན་མཁར་བརྩེག་ཏུ་གསོལ། །འཕོ་མེད་གཡུང་དྲུང་གསེར་གྱི་མཛོད། །བླ་ཡི་རྒྱ་མཚོ་བསྐྱིལ་དུ་གསོལ། །འགྲིབ་མེད་ཉི་ཟླ་དཔལ་གྱི་སྒྲོམ། །དབུགས་ཀྱི་གའུ་སྡོམ་དུ་གསོལ། །མི་འགྱུར་ནུབ་མེད་ནམ་མཁའི་རྒྱན། །ཚེ་ཡི་རྒྱལ་མཚན་བསྒྲེང་དུ་གསོལ། །ཆོས་འབྱོར་ཤེས་རབ་བློ་གྲོས་གཏེར། །བསོད་ནམས་ལྗོན་ཤིང་སྤེལ་དུ་གསོལ། །སྙན་གྲགས་མཐུ་རྩལ་གཟི་བརྗིད་སྟོབས། །དབང་ཐང་ར་བ་བསྐྱེད་དུ་གསོལ། །དོན་འགྲུབ་རྣལ་རྒྱལ་ལེགས་ཚོགས་འཕེལ། །རླུང་རྟའི་དར་ཆེན་ཕྱར་དུ་གསོལ། །ལོ་བརྒྱར་བདེ་སྐྱིད་དཔལ་གྱིས་འཚོ། །ཚེ་ཡི་དམུ་ཐག་བསྲིང་དུ་གསོལ། །གླང་པོའི་ཤུགས་དང་གཞོན་ནུའི་ལུས། །ལང་ཚོའི་ནོར་བུ་ཡིད་དུ་འོང་། །འཆི་མེད་ཚེ་དབང་རིག་པ་འཛིན། །བདེ་ཆེན་འོད་སྐུར་གྲུབ་ [10b] པར་མཛོད། །ཧྲཱིཿ རྡོ་རྗེ་ཚེ་ཡི་ལྷ་ཚོགས་རྣམས། །མ་གཡེལ་ཐུགས་དམ་དུས་ལ་བབ། །རྡོ་རྗེ་འཛིན་པ་བདག་ཅག་གིས། །ཕྱི་ནང་རྟེན་རྫས་མཆོད་གཏོར་བཤམས། །བསྙེན་སྒྲུབ་ལས་སྦྱོར་ཚད་དུ་བསྐྱལ། །འདའ་དཀའ་རྡོ་རྗེའི་གཡར་དམ་བསྲུངས། །བཀའ་གསང་གཞུང་བཞིན་སྤྱད་ལགས་ན། །ལེ་ལོ་བཏང་སྙོམས་མ་མཛད་པར། །མ་ཐོགས་ཚེ་ཡི་ལས་ལ་བཞེངས། །བརྟན་གཡོའི་དྭངས་བཅུད་ནུས་པའི་ཚེ། །དྲང་སྲོང་རིག་འཛིན་གྲུབ་པའི་ཚེ། །རྩ་གསུམ་རྒྱལ་བའི་བྱིན་རླབས་ཚེ། །གཞོམ་གཞིག་བྲལ་བ་གཉུག་མའི་ཚེ། །རྟག་བརྟན་འགྱུར་མེད་དོན་གྱི་ཚེ། །ཁུག་ཅིག་སྒྲུབ་པའི་གནས་འདིར་ཁུག །དྲོངས་ཤིག་ཚེ་བཅུད་སྙིང་པོ་དྲོངས། །བསྡུས་ཤིག་དངོས་གྲུབ་མཆོག་རྣམས་བསྡུས། །བསྟིམས་ཤིག་རྡོ་རྗེའི་ཕུང་པོར་བསྟིམ། །གསལ་འགྲིབ་མེད་པའི་འོད་གསལ་རྒྱན། །ཉི་ཟླ་ལྟ་བུའི་ཚེ་ཁུག་ཅིག །འཛད་པ་མེད་པའི་ལོངས་སྤྱོད་གཏེར། །རྒྱ་མཚོ་ལྟ་བུའི་༴ ཟབ་ཅིང་ཡངས་པ་གཞི་ཡི་ཚེ། །ནམ་མཁའ་ལྟ་བུའི༴ རྒྱུན་ཆད་མེད་པ་ལམ་གྱི་ཚེ། །ཆུ་བོ་ལྟ་བུའི༴ མི་འགྱུར་རྟག་པ་འབྲས་བུའི་ཚེ། །རྡོ་རྗེ་ལྟ་བུའི༴ ཡིད་བཞིན་གཏེར་འབྱུང་ལྷུན་གྲུབ་ [11a] ཚེ། །ནོར་བུ་ལྟ་བུའི༴ དགོས་འདོད་རེ་སྐོང་མཆོག་གི་ཚེ། །བུམ་བཟང་ལྟ་བུའི༴ གཡོ་བ་མེད་པ་བརྟན་པའི་ཚེ། །ལྷུན་པོ་ལྟ་བུའི༴ གཞོམ་གཞིག་བྲལ་བ་དོན་གྱི་ཚེ། །གཡུང་དྲུང་ལྟ་བུའི༴ ཕྱོགས་ལས་རྣམ་རྒྱལ་རྟགས་ཀྱི་ཚེ། །རྒྱལ་མཚན་ལྟ་བུའི༴ བདེ་བ་ཆེན་པོའི་བཅུད་ཀྱི་ཚེ། །བདུད་རྩི་ལྟ་བུའི༴ སྐྱེ་འཆི་བྲལ་བ་ཡེ་ཤེས་ཚེ། །འཇའ་ལུས་དྭངས་མའི༴ དོན་གཉིས་མཐར་ཕྱིར་དཔལ་གྱི་ཚེ། །བདེ་བར་གཤེགས་པའི༴ མ་གཡེལ་འཆི་མེད་རིག་འཛིན་རྣམས། །དགོངས་པའི་བྱིན་ཕོབ་དབང་ཆེན་སྐུར། །མ་གཡེལ་འཆི་མེད་དཀྱིལ་འཁོར་བ། །ཐུགས་རྗེའི་རྩལ་སྤྲུགས་དངོས་གྲུབ་སྩོལ། །མ་གཡེལ་ཚེ་བདག་ལས་བྱེད་རྣམས། །མྱུར་བའི་ཤུགས་ཕྱུངས་ཚེ་དཔལ་བསྐྱེད། །མ་གཡེལ་བདེ་ཆེན་རྟ་མཆོག་དཔལ། །ཚེ་མཆོག་དངོས་གྲུབ་དབང་དུ་བསྡུས། །མ་གཡེལ་མ་སྲིང་མཁའ་འགྲོའི་ཚོགས། །འཆི་མེད་ཚེ་ཡི་བྱིན་གཡང་ཕོབས། །མ་གཡེལ་གྲུབ་པའི་དྲང་སྲོང་རྣམས། །བདེ་ལེགས་ཚེ་ཡི་ཕ་འབབས་སྩོལ། །མ་གཡེལ་ཆོས་སྐྱོང་གཏེར་སྲུང་རྣམས། །ཚེ་ཡི་འབྱོར་པའི་མངའ་ཐང་སྤེལ། །གྲུབ་གཉིས་ [11b] དངོས་གྲུབ་གཏེར་ཁ་སྲུངས། །ལྟ་ཉན་སྲོག་ལེན་འབྱུང་པོ་ཐུལ། །ཞལ་བཞེས་གཉན་པོའི་ཐ་ཚིག་དགོངས། །མཐུ་རྩལ་ནུས་པའི་རྣོ་སོ་ཕྱུངས། །འཕྲིན་ལས་རྒྱ་མཚོ་ཡིད་བཞིན་མཛོད། །མདོར་ན་རྩ་གསུམ་ཚེ་ཡི་ལྷ། །རྡོ་རྗེ་གསུམ་དང་མི་ཕྱེད་པའི། །རྡོ་རྗེ་མཆོག་གི་ཚེ་གྲུབ་སྟེ། །རྡོ་རྗེ་མི་ཕྱེད་ཕྱག་རྒྱ་ཆེ། །རྡོ་རྗེ་འཆང་གི་དབང་ཕྱུག་བདུན། །རྡོ་རྗེའི་འདུས་པའི་ཚོམ་བུ་ཡིས། །རྡོ་རྗེའི་སྟན་ཐོག་འདིར་ཐོབ་ཅིང་། །རྡོ་རྗེ་མི་འགྱུར་བཀྲ་ཤིས་དཔལ། །རྡོ་རྗེ་ངོ་མཚར་རྨད་པོ་ཆེ། །རྡོ་རྗེ་རྟག་པའི་རྒྱན་དུ་སྩོལ། །ཞེས་པའི་སྐོང་ཕྲེང་འདི་ལྟ་བུ་ཞིག་བགྱིད་དགོས་པའི་གསལ་སྣང་གཏེར་ཆེན་བླ་མ་རིན་པོ་ཆེར་འཁྲུངས་པའི་རྒྱུ་མཚན་བཀས་གནང་བ་དང་དུས་མཉམ་པར། རང་ཉིད་ལའང་འདི་ལྟ་བུ་ཞིག་སྦྱོར་བའི་བློ་སྐྱེས་པའི་རྟེན་འབྱུང་གི་སྐབས་ཕྱེས་ཏེ། ཚིག་དོན་གཉིས་ཀའི་ཆ་ནས་རོ་བཅུད་མི་ལྡན་ཀྱང་། གང་བྱུང་བསྣོན་ཕྲི་ཆེར་མེད་པར་བྲིས་པ་འདིར་མཁྱེན་ལྡན་རྣམས་ཀྱིས་མི་ཁྲེལ་བ་མཁྱེན་པར་གསོལ་བ་འདེབས་པ་ལགས་སོ། །ཞེས་རྒྱལ་དབང་མཁའ་ཁྱབ་རྡོ་རྗེའི་གསུང་བྱིན་རླབས་ཅན་ཏེ། འདིའི་ལུང་རྒྱུན་མཛད་པ་པོ་ནས། ཁྱབ་བདག་གཏེར་ཆེན་བླ་མའི་ཞལ་སྔ་ཁོ་བོ་འཇིགས་བྲལ་ཡེ་ཤེས་རྡོ་རྗེ་ལ་བཀའ་དྲིན་དུ་ཐོབ་བོ།། །།