Khros ma tshogs bsdus
༁ྃ༔ དག་སྣང་ཡེ་ཤེས་དྲྭ་བ་ལས༔ བླ་མའི་ཐུགས་རྒྱུད་བསྐུལ་བ་སྒོ་གསུམ་རྡོ་རྗེའི་གྲོང་འཕོ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཟོལ་མེད་དོན་གྱི་རྣལ་འབྱོར་ཆེན་པོ་ཡི༔ སྨིན་གྲོལ་དབང་གི་ཀློང་མཛོད་བླ་མ་དེ༔ རང་གི་རིག་པའི་ངོ་བོར་ཤེས་པའི་ངང་༔ དབྱེར་མེད་རོ་གཅིག་མཉམ་པ་ཉིད་དུ་གནས༔ དེ་ནི་དོན་ཀྱི་བླ་མ་སྒྲུབ་པ་མཆོག༔ དེ་མིན་བླ་མ་ཡུལ་དུ་འཛིན་པ་ཡི༔ གང་ཟག་དད་དང་ལྡན་པ་མཐའ་དག་གིས༔ བླ་མ་སྤྱི་མགྲིན་སྙིང་ཁར་བསྒོམས་བྱས་ནས༔ གསོལ་འདེབས་དབང་ལེན་ཐུགས་ཡིད་རོ་གཅིག་བསྲེ༔ དེས་ནི་བླ་མའི་དགོངས་རྒྱུད་སློབ་མར་འཕོ༔ ཡང་དག་ལམ་ལས་ཕྱིར་མི་ལྡོག་པར་འགྱུར༔ དེ་ཕྱིར་འདི་ལ་བརྩོན་པ་གནད་དུ་ཟུངས༔ འཁྲུལ་འཁོར་སྣང་བའི་ཆོས་རྣམས་ཐམས་ཅད་ཀུན༔ སྒྱུ་མའི་འཁྲུལ་འཁོར་དབྱིངས་སུ་ཞིག་པ་བཞིན༔ ཡེ་གཞི་གདོད་མའི་མཁའ་རུ་ཕཊ་ཀྱིས་བཤིག༔ ཕཊ་ཕཊ་ཕཊ༔ རང་སྣང་དོན་གྱི་འོག་མིན་ཆེན་པོའི་དབྱིངས༔ ཡེ་གཞི་དོན་གྱི་སངས་རྒྱས་བླ་མར་ཤར༔ ཧེ་རུ་ཀ་དཔལ་རྡོ་རྗེ་ལྕགས་ཕུར་གདེངས༔ རཱ་གའི་མདངས་ལྡན་འདོར་སྟབས་སྟག་ཤམ་གསོལ༔ གཉིས་སྣང་རཱུ་དྲ་ཕོ་མོ་གདན་དུ་བཏིང་༔ སྣ་ཚོགས་རཏྣ་རུས་པའི་རྒྱན་གྱིས་སྤྲས༔ ཡེ་ཤེས་འཇའ་འོད་ཐིག་ལེ་འཁྲིགས་པའི་ཀློང་༔ འཁོར་འདས་ཡོངས་ཀྱི་སྤྱི་དཔལ་ཆེན་པོར་བསྐྱེད༔ ཕཊ་ཕཊ་ཕཊ༔ ཡེ་གཞི་གདོད་མའི་ངང་ལས་མ་གཡོས་ཀྱང་༔ ཉིད་ལས་མི་གཞན་རང་སྣང་སྟོན་འཁོར་ཤར༔ སྐུ་དང་ཡེ་ཤེས་ཡོན་ཏན་རྫོགས་པའི་དཔལ༔ དཔལ་ལྡན་བླ་མའི་སྐུ་ལ་གསོལ་བ་འདེབས༔ རང་བྱུང་ཡེ་ཤེས་རོལ་པའི་རང་རྩལ་ལས༔ སྨིན་གྲོལ་གདམས་པའི་དགའ་སྟོན་འགྱེད་པའི་སྒོ༔ ཕྱོགས་དང་རིས་མེད་གདུལ་བྱའི་དཔལ་དུ་ཕྱེས༔ དྲིན་ཆེན་བླ་མའི་གསུང་ལ་གསོལ་བ་འདེབས༔ ཐུགས་གསང་ཉག་གཅིག་བདེ་བ་ཆེན་པོའི་ཀློང་༔ འཁོར་འདས་ཐམས་ཅད་མཉམ་པ་ཉིད་དུ་ཆུབ༔ ཆོས་རྣམས་མ་ལུས་ཆོས་ཉིད་ཆེན་པོར་རོལ༔ དྲིན་ཆེན་བླ་མའི་ཐུགས་ལ་གསོལ་བ་འདེབས༔ བདག་འཛིན་བག་ཆགས་འཐས་པའི་སྒྱུ་ལུས་འདི༔ བདག་མེད་མཉམ་ཉིད་དགོངས་པས་བྱིན་གྱིས་རློབས༔ ཡུལ་འཛིན་བག་ཆགས་འཐས་པ་སྣང་བའི་ཡུལ༔ ཡུལ་མེད་ཟང་ཐལ་དགོངས་པས་བྱིན་གྱིས་རློབས༔ སེམས་དང་སེམས་བྱུང་འཁྲུལ་པའི་འཁོར་ལོ་འདི༔ ཀ་དག་ཆོས་སྐུའི་དགོངས་པས་བྱིན་གྱིས་རློབས༔ རེ་དོགས་བདེ་སྡུག་ཉེ་བར་ལེན་པའི་སེམས༔ ཆོས་དབྱིངས་སྤྲོས་བྲལ་དགོངས་པས་བྱིན་གྱིས་རློབས༔ མ་དག་འཁོར་བར་འཕྱན་པའི་སྒོ་གསུམ་འདི༔ རྡོ་རྗེ་གསུམ་གྱི་རོལ་པར་བྱིན་གྱིས་རློབས༔ འདི་ལྟར་འཁྲུལ་པའི་སྣང་དང་སྣང་ཆར་བཅས༔ སྒྱུ་མའི་འཁྲུལ་འཁོར་དབྱིངས་སུ་ཞིག་པ་བཞིན༔ ཀ་དག་གཞོན་ནུ་བུམ་སྐུར་སངས་རྒྱས་ཤོག༔ བླ་མའི་ཐུགས་རྣམ་པར་མི་རྟོག་པའི་ཡེ་ཤེས་དང་གཉིས་སུ་མེད་པར་བསྲེས་ཏེ་ཕཊ་ཀྱི་སྒྲ་དང་བཅས་ཏེ་མཉམ་པར་ཡང་ཡང་བཞག༔ མ་འོངས་པདྨ་འབྱུང་་གནས་བརྒྱུད་འཛིན་རྣམས༔ བསྙེན་སྒྲུབ་སྒོམ་བཟླས་ཀུན་གྱི་ཐོག་མ་རུ༔ བླ་མ་སྒོམ་དང་གསོལ་འདེབས་འདི་ལ་འབད༔ བསམ་པའི་དོན་ཀུན་ཡིད་བཞིན་འགྲུབ་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་རང་སློབ་དམ་པ་ཨོ་རྒྱན་རྡོ་རྗེས་བསྐུལ་ངོར་མ་ནུས་སྤྲང་པོ་ཧར་སངས་ཡན་པས་བྲིས། དགེའོ། །དགེའོ། །དགེའོ།། །།
ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ མཁའ་འགྲོ་འདུས་པའི་ཚོགས་བསྐང་བསྡུས་པ་བཞུགས་སོ༔ ན་མོ་གུ་རུ་ས་ར་ཧ་པ་ཡེ༔ རྣལ་འབྱོར་ཉམས་ཆག་བསྐང་བ་དང་༔ ཚོགས་གཉིས་ཡོངས་སུ་རྫོགས་པའི་ཕྱིར༔ རྟེན་འབྲེལ་ཟབ་མོའི་ཆོ་ག་ལ༔ བརྟེན་ནས་ཚོགས་བསྐང་འདིར་བརྩོན་བྱ༔ ཕཊ༔ བེམ་པོ་ཚོགས་དང་དབྱེར་མེད་བསྲེ༔ སྣང་སྲིད་ཐམས་ཅད་ཐལ་གྱིས་གང་༔ འདོད་རྒུའི་དཔལ་ཡོན་ཅིར་ཡང་འཆར༔ མི་ཟད་རྒྱན་གྱི་འཁོར་ལོར་སྤེལ༔ ཕཊ༔ ངོ་བོ་སྐྱེ་མེད་ཆོས་སྐུ་ཡུམ༔ ལྷུན་གྲུབ་རང་གདངས་ཡུམ་ཆེན་ལྔ༔ ཐུགས་རྗེའི་སྒྱུ་འཕྲུལ་རོལ་པ་ལས༔ སྲིད་པ་མ་མོ་མཁའ་འགྲོའི་དལ༔ མ་ལུས་ལུས་པ་མེད་པ་ཀུན༔ ཚོགས་ཀྱི་འདུ་བར་གཤེགས་སུ་གསོལ༔ དབྱིངས་ལ་གཤེགས་བཞུགས་མི་མངའ་ཡང་༔ འཁོར་བ་དབྱིངས་སུ་བཤིག་པའི་ཕྱིར༔ གང་འདུལ་སྣ་ཚོགས་ཐབས་མང་གིས༔ གདུལ་བྱ་རྗེས་སུ་བཟུང་དུ་གསོལ༔ ཕེཾ་ཛཿ བཛྲ་ས་མ་ཡ༔ དེ་ནས་ཐུགས་དམ་བསྐང་བ་ནི༔ ཕཊ༔ སྣང་བ་སྣོད་ཀྱི་གཞོང་པ་རུ༔ སྲིད་པའི་དཔལ་ཡོན་ཚོགས་སུ་བཤམས༔ བརྡལ་ཁྱབ་པགས་པའི་གཞོང་པ་རུ༔ ཕུང་ཁམས་སྐྱེ་མཆེད་ཚོགས་སུ་བཤམས༔ ཀུན་གཞི་ཡངས་པའི་གཞོང་པ་རུ༔ སེམས་དང་སེམས་བྱུང་ཚོགས་སུ་བཤམས༔ སྐུ་གསུམ་མཁའ་འགྲོའི་ཐུགས་དམ་བསྐང་༔ སྡོམ་དང་བསླབ་པ་དམ་ཉམས་བཤགས༔ གདོད་མའི་དབྱིངས་སུ་དག་མཉམ་རོལ༔ དེ་ནས་ཚོགས་མཆོད་རིམ་པ་ནི༔ ཕཊ༔ ཕྱི་ནང་གསང་བའི་ཚོགས་མཆོད་འདི༔ མ་དང་མཁའ་འགྲོའི་ཚོགས་ལ་འབུལ༔ ཐུགས་དང་འགལ་གྱུར་ཉམས་ཆག་བཤགས༔ གཟུང་འཛིན་བདག་མེད་ཆེན་པོར་སྒོམ༔ དུག་གསུམ་རྒྱུད་འཁྲུལ་ཁམས་གསུམ་འགྲོ༔ སྐུ་གསུམ་འབྲས་བུའི་ས་ཐོབ་ཤོག༔ དེ་ནས་ལྷག་མ་འབུལ་བ་ནི༔ ཕཊ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ ལྷག་གཏོར་འདོད་རྒུ་མི་ཟད་གཏེར༔ ལྷག་སྐྱོང་ཕོ་མོའི་ཚོགས་ལ་འབུལ༔ ཕྲིན་ལས་རབ་འབྱམས་ཡོངས་འགྲུབ་མཛོད༔ དེ་ནས་བསྐུལ་བ་ནི༔ ཧཱུྃ༔ སྤྲོས་བྲལ་བདེ་བ་ཆེན་པོ་ནས༔ དབྱིངས་ཀྱི་བདག་ཉིད་སྤྱི་རྗེ་མོའི༔ སྒྱུ་འཕྲུལ་རོལ་རྩལ་མཁའ་འགྲོ་བསྐུལ༔ འཁོར་བ་མྱང་འདས་ཆེན་པོར་སྒྲོལ༔ དེ་ནས་ཆད་མདོ་བརྟན་སྐྱོང་ནི༔ ཧཱུྃ༔ གཟུང་འཛིན་འཁྲུལ་པའི་རྒྱུས་བསྐྱེད་པའི༔ སྒོ་ཡུལ་རྟོགས་དང་འབྲེལ་བ་ཡི༔ ཐབས་ཤེས་བཀའ་ཡི་སྲུང་མ་རྣམས༔ གཏོར་མ་བཞེས་ལ་ཕྲིན་ལས་སྒྲུབས༔ དེ་ནས་རྟ་བྲོ་ནི༔ ཧཱུྃ༔ བདག་རྟོག་མ་ཏྲཾ་རཱུ་དྲའི་སྡེ༔ བདག་མེད་ཆེན་པོའི་མཁའ་རུ་བྲུབ༔ ཞེན་མེད་ལམ་གྱི་བྲོ་ར་འཁྲབ༔ བརྡལ་ཁྱབ་ཆོས་སྐུའི་ཀློང་རྒྱས་བཏབ༔ སྟྭཾ་བྷ་ཡ་ནན༔ དེ་ནས་དངོས་གྲུབ་ལེན་པ་ནི༔ ཧཱུྃ༔ སྐུ་གསུམ་ལྷུན་གྲུབ་མཁའ་འགྲོ་མའི༔ གསང་གསུམ་རྡོ་རྗེའི་དངོས་གྲུབ་སྩོལ༔ དེ་ནས་བསྔོ་བ་སྨོན་ལམ་ནི༔ བསོད་ནམས་ཚོགས་གཉིས་ཆོས་སྐུར་བསྔོ༔ དོན་གྲུབ་སྐུ་གཉིས་ཐོབ་པར་ཤོག༔ དེ་ནས་བསྡུ་བའི་རིམ་པ་ནི༔ ཧཱུྃ༔ སྣང་སྲིད་གཞིར་བཞེངས་ཆེན་པོར་བསྡུ༔ མ་བཅོས་གདོད་མའི་ས་རུ་སད༔ ཕཊ༔ སླར་ཡང་ཆོས་སྐུའི་རང་རྩལ་གྱི༔ རང་བྱུང་འགྲོ་འདུལ་སྤྲུལ་སྐུར་ཤར༔ ཕཊ་ཕཊ༔ དེ་ནས་བཀྲ་ཤིས་ནི༔ ཧཱུྃ༔ དག་མཉམ་གཞི་ཡི་བཀྲ་ཤིས་ཤོག༔ མ་བསྒོམ་ལམ་གྱི་བཀྲ་ཤིས་ཤོག༔ ཡེ་རྫོགས་འབྲས་བུའི་བཀྲ་ཤིས་ཤོག༔ འཇའ་ལུས་ཟང་ཐལ་བཀྲ་ཤིས་ཤོག༔ ཡང་དག་ལམ་ཞུགས་སྐལ་ལྡན་རྣམས༔ ཕྱི་ནང་བར་ཆད་གེགས་སྒྲོལ་ཞིང་༔ རྣམ་མཁྱེན་ས་ལམ་བགྲོད་པའི་ཕྱིར༔ འདི་ལ་རྟག་ཏུ་བརྩོན་པར་མཛོད༔ འདི་ནི་རྡོ་རྗེ་ཐེག་པའི་བཅུད༔ འབྲེལ་ཚད་རྣམ་པར་གྲོལ་བའི་ཆོས༔ རིམ་གཉིས་ཟབ་མོའི་གནད་ལྡན་པས༔ ཉམས་སུ་ལེན་ཀུན་ངེས་པར་གྲོལ༔ བཀའ་སྲུང་ཁྱབ་འཇུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་ཀྱིས་བུ་སློབ་མཆོག་རབ་རྩལ་གྱི་ངོར་ཆོས་ཉིད་ཀློང་གི་མཛོད་ལས་བསྒྱུར་པའོ། །དགེའོ།། །།
ཐྂ།༔ ཟབ་གསང་མཁའ་འགྲོའི་སྙིང་ཐིག་ལས༔ རྩ་གསུམ་རྒྱ་མཚོའི་ཚོགས་བསྐང་བསྡུས་པ་དངོས་གྲུབ་ཆར་འབེབས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཤ་ཆང་ལ་སོགས་བཟའ་བཏུང་རིགས༔ འབྱོར་ཚོགས་ཐམས་ཅད་བཤམས་བྱས་ཏེ༔ ཡེ་ཤེས་བདུད་རྩིར་བྱིན་གྱིས་བརླབ༔ འདོད་ཡོན་ནམ་མཁའ་མཛོད་དུ་སྤེལ༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ ཆོས་ཉིད་ནམ་མཁའ་མཛོད་ཀྱི་སྒྱུ་འཕྲུལ་ལས༔ ཚོགས་མཆོད་འདོད་རྒུའི་དཔལ་ཡོན་མི་ཟད་གཏེར༔ སྐྱབས་གནས་དཀོན་མཆོག་གསུམ་དང་རྩ་བ་གསུམ༔ ༈ ཡེ་ཤེས་མཁའ་འགྲོའི་ལྷ་ཚོགས་སྲུང་མར་བཅས༔ ༈ འདིར་གཤེགས་ཞལ་ཟས་ཚོགས་ཀྱི་མཆོད་པ་འབུལ༔ རྩ་གསུམ་དམ་ཅན་སྲུང་མའི་ཐུགས་དམ་བསྐང་༔ སྡོམ་དང་བསླབ་པ་དམ་ཚིག་ཉམས་ཆག་བཤགས༔ དགྲ་བགེགས་གནོད་བྱེད་ཤ་ཁྲག་སྲོག་དབུགས་རོལ༔ ལྷག་སྐྱོང་ཕོ་མོས་ལྷག་རོལ་ཕྲིན་ལས་སྒྲུབས༔ བདག་ཅག་ཚོགས་རྫོགས་སྒྲིབ་དག་སངས་རྒྱས་ཤོག༔ དེ་ལྟར་གྲངས་ལྡན་བསགས་བྱས་ན༔ ཚེ་འདིར་བཀྲ་ཤིས་དགེ་ལེགས་འཕེལ༔ ཉམས་ཆག་ཉེས་ལྟུང་ཐམས་ཅད་བྱང་༔ ཚེ་རབས་ཀུན་ཏུ་གསང་སྔགས་ཀྱི༔ སྒོ་དང་འཕྲད་ཅིང་ཉམས་སུ་ལེན༔ མཐར་ཐུག་རྫོགས་སངས་རྒྱས་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་ཉེར་མཁོའི་ཆེད་དུ་བདུད་འཇོམས་རྡོ་རྗེས་མཁའ་འགྲོའི་གསང་མཆོད་ལས་བསྒྱུར་བའོ།། །།
༄༅། །ཨེ་མ། དུས་ཀྱི་ཕུན་སུམ་ཚོགས་པ་ཀ་དག་གི་མཉམ་ཉིད། །གནས་ཀྱི་ཕུན་སུམ་ཚོགས་པ་འོག་མིན་གྱི་ཆོས་དབྱིངས། །སྟོན་མཆོག་ཕུན་སུམ་ཚོགས་པ་ཀུན་བཟང་གི་ཆོས་སྐུ། །འཁོར་གྱི་ཕུན་སུམ་ཚོགས་པ་རིགས་ལྔ་ཡི་སངས་རྒྱས། །ཆོས་ཀྱི་ཕུན་སུམ་ཚོགས་པ་གསང་སྔགས་ཀྱི་ཐེག་པ། །དག་མཉམ་རོལ་པ་ཚོགས་ཀྱི་དགའ་སྟོན་ལ་ཕེབས་བྱུང༌། །བར་གྱི་དུས་ཚིགས་ཕུན་ཚོགས་ཀ་དག་གི་དབྱིངས་སུ། །གནས་ཀྱི་ཕུན་ཚོགས་རི་བོ་མ་ལ་ཡའི་རྩེ་རུ། །སྟོན་པ་ཕུན་ཚོགས་ཁྱབ་བདག་རྡོར་འཆང་གི་དབང་པོ། །འཁོར་གྱི་ཕུན་ཚོགས་སྤྲུལ་སྐུ་སྒྱུ་འཕྲུལ་གྱི་ཚོམ་བུ། །དམ་ཆོས་ཕུན་ཚོགས་ཀ་དག་རྫོགས་ཆེན་གྱི་གསེང་ལམ། །གདུལ་བྱ་འདུལ་ཕྱིར་ཚོགས་ཀྱི་དགའ་སྟོན་ལ་ཕེབས་བྱུང༌། །ཐ་མའི་དུས་ཚིགས་སྐལ་བཟང་རྣམ་རོལ་གྱི་བསྐལ་པར། །གནས་ཀྱི་ཕུན་ཚོགས་དཔལ་གྱི་བསམ་ཡས་དང་ལྷ་ས། །སྟོན་པ་ཕུན་ཚོགས་ཨོ་རྒྱན་པད་འབྱུང་དང་བི་མ། །འཁོར་གྱི་ཕུན་ཚོགས་སྤྲུལ་པའི་རྗེ་འབངས་དང་པཎ་གྲུབ། །ཆོས་ཀྱི་ཕུན་ཚོགས་འོད་གསལ་རྫོགས་ཆེན་གྱི་གསེང་ལམ། །ལས་སྨོན་སྐལ་ལྡན་ཚོགས་ཀྱི་འདུ་བ་ལ་ཕེབས་བྱུང༌། །དེང་དུས་ཕུན་སུམ་ཚོགས་པ་རང་བྱུང་གི་དབུས་སུ། །སྟོན་པ་ཕུན་སུམ་ཚོགས་པ་རང་རིག་གི་བླ་མ། །འཁོར་གྱི་ཕུན་སུམ་ཚོགས་པ་སྐལ་ལྡན་གྱི་ཚོམ་བུ། །དམ་ཆོས་ཕུན་སུམ་ཚོགས་པ་ཐེག་ཆེན་གྱི་གསེང་ལམ། །གནས་ལུགས་མངོན་བྱེད་ཚོགས་ཀྱི་དགའ་སྟོན་ལ་ཕེབས་པས། །ཉམས་དགའ་གླུ་རུ་བླངས་པའི་རྟེན་འབྲེལ་གྱི་མཐུ་དང༌། །ཐབས་དང་ཤེས་རབ་ཟབ་མོའི་བདེན་པ་ཡི་སྟོབས་ཀྱིས། །འདིར་ཚོགས་སྒྱུ་འཕྲུལ་རོལ་པ་སྟོན་འཁོར་གྱི་ཚོམ་བུ། །ཁྱད་ཆོས་དྲུག་ལྡན་གཞོན་ནུ་བུམ་སྐུ་རུ་མཉམ་གྲོལ། །འཇའ་ལུས་འཕོ་ཆེན་འགྲུབ་པའི་སྨོན་ལམ་ཞིག་ཞུའོ། །ཞེས་པ་འདི་ཡང་རྣལ་འབྱོར་པ་ཀརྨ་བསོད་ནམས་ཀྱིས་བསྐུལ་ངོར་བདུད་འཇོམས་པས་སོ། །དགེའོ། །སརྦ་མངྒ་ལཾ།། །།
ཕྚ༔ རྣལ་འབྱོར་ཕོ་མོར་འགྱེད་པ་ནི༔ ཨོཾ་ཨཱཿཧཱུྃ༔ གསང་སྔགས་བླ་ན་མེད་པའི་རྫས༔ ཡེ་ཤེས་བདུད་རྩིར་བྱིན་བརླབས་པའི༔ འདོད་ཡོན་མྱོང་གྲོལ་ཆེན་པོ་ནི༔ རྡོ་རྗེ་ཕུང་པོའི་གྲོང་ཁྱེར་གྱི༔ གཤེགས་པ་དང་ནི་གཤེགས་མ་དང་༔ དཔའ་བོ་དཔའ་མོ་རྣལ་འབྱོར་ཚོགས༔ མཉེས་ཕྱིར་རྗེས་དགོངས་དགྱེས་པར་རོལ༔ ཧོཿ ཚོགས་ཀྱི་སློབ་དཔོན་ཚོགས་ལ་རོལ༔ དཔའ་བོ་དཔའ་མོ་ཚོགས་ལ་རོལ༔ རྣལ་འབྱོར་ཕོ་མོ་ཚོགས་ལ་རོལ༔ མཆེད་དང་ལྕམ་དྲལ་ཚོགས་ལ་རོལ༔ མཆོག་གི་དངོས་གྲུབ་བདེ་བ་ཆེ༔ ཨ་ལ་ལ་སྟེ་དགྱེས་པར་རོལ༔ རྡོ་རྗེ་མཆེད་ལྕམ་གཟུངས་མར་བཅས༔ ཡང་གསང་དཀྱིལ་འཁོར་འདི་ཉིད་དུ༔ ཚོམ་བུ་གཅིག་ཏུ་སངས་རྒྱས་ཤོག༔ ཨོཾ་སིདྡྷི༔ ཨཱཿ སིདྡྷི༔ ཧཱུྃ་སིདྡྷི༔ སྭཱ་སིདྡྷི༔ ཧཱ་སིདྡྷི་ཕ་ལ་ཧཱུྃ་ཨཱཿ
ལྷག་མ་ལ། ཨོཾ་ཨཱཿཧཱུྃ༔ ལན་གསུམ། ལྷག་མའི་གཏོར་མ་དགྲ་བགེགས་ཀྱི་ཤ་ཁྲག་འདོད་ཡོན་བདུད་རྩིའི་ཕུང་པོར་གྱུར༔ རྐང༣་བཅས་ཌཱ་འུར་ནས། ཕཊ༔ རྡོ་རྗེ་རིགས་ཀྱི་མཁའ་འགྲོ་མས༔ ཞེ་སྡང་ལས་གྱུར་ལྷ་འདྲེ་སྡུས༔ རིན་ཆེན་རིགས་ཀྱི་མཁའ་འགྲོ་མས༔ ང་རྒྱལ་ལས་གྱུར་ལྷ་འདྲེ་སྡུས༔ པདྨ་རིགས་ཀྱི་མཁའ་འགྲོ་མས༔ འདོད་ཆགས་ལས་གྱུར་ལྷ་འདྲེ་སྡུས༔ ལས་ཀྱི་རིགས་ཀྱི་མཁའ་འགྲོ་མས༔ ཕྲག་དོག་ལས་གྱུར་ལྷ་འདྲེ་སྡུས༔ སངས་རྒྱས་རིགས་ཀྱི་མཁའ་འགྲོ་མས༔ གཏི་མུག་ལས་གྱུར་ལྷ་འདྲེ་སྡུས༔ འཁོར་བཅས་འདིར་གཤེགས་ལྷག་ལ་རོལ༔ འདོད་ཡོན་རྒྱན་གྱི་ཚོགས་ལྷག་རོལ༔ དམ་རྫས་རྒྱན་གྱི་ཚོགས་ལྷག་རོལ༔ ཤ་ཁྲག་དམར་གྱི་ཚོགས་ལྷག་རོལ༔ ནད་དང་རིམས་དང་སྡུག་བསྔལ་རྣམས༔ བཞེས་ཤིག་རོལ་ཅིག་ལྷག་མེད་མཛོད༔ དགྲ་བགེགས་གནོད་བྱེད་ཚར་ཆོད་ཅིག༔ ཟ་ཁ་སྡང་བའི་དགྲ་ལ་སྟོན༔ བཛྲ་ས་མ་ཡ་བརྣག་པ་དེ་ཁོ་ནའོ༔ ཁས་ཞན་དབང་ཆུང་ཀུན་ལ་སྦྱིན༔ ཚིམ་ནས་བདེ་བའི་དཔལ་ཐོབ་ཤོག༔ ཨུ་ཙྪིཥྟ་བ་ལིཾ་ཏ་ཁཱ་ཧི༔
དེ་ནས་མཆོད་པ་འབུལ་བ་ནི༔ ཕཊ༔ སྣང་སྲིད་གཟུང་འཛིན་རཱུ་དྲ་ཀུན༔ བདག་མེད་བརྟུལ་ཞུགས་ཆེན་པོས་བསྒྲལ༔ ནམ་མཁའ་མཛོད་ཀྱི་དགོངས་རྒྱས་གདབ༔ ཕྱི་ནང་གསང་མཆོད་འདོད་ཡོན་སྤྲིན༔ མི་ཟད་རྒྱན་གྱི་འཁོར་ལོར་ཤར༔ ཡེ་ཤེས་མཁའ་འགྲོའི་དཀྱིལ་འཁོར་གྱི༔ སྒྱུ་འཕྲུལ་རོལ་པའི་ཚོགས་ལ་འབུལ༔ མཆོག་གི་དངོས་གྲུབ་འབད་མེད་སྩོལ༔ མ་ཧཱ་སརྦ་པཉྩ་ག་ཎ་ཙཀྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཨཱཿ ཧཱུྃ༔ ཕཊ་ཕཊ་ཕཊ༔ དེ་ནས་བསྟོད་པ་ནི༔ ཕཊ༔ མ་ཐིག་ལེ་ཉག་གཅིག་དགོངས་ཀློང་དུ༔ སྐྱོན་ཀུན་བྱང་སྟེ་ཡོན་ཏན་ཆུབ༔ མ་ཁྱབ་བརྡལ་སྤྲོས་མེད་དགོངས་ཀློང་དུ༔ འཁོར་འདས་དག་མཉམ་ཆེན་པོར་རྫོགས༔ མ་ཀློང་ཆེན་ཆོས་སྐུའི་བྷ་ག་རུ༔ བཟང་ངན་རོ་སྙོམས་འུབ་ཆུབ་རོལ༔ མ་རྣམ་ཐར་གསུམ་ལྡན་དགོངས་པའི་སྦུབས༔ སྐུ་དང་ཡེ་ཤེས་བུམ་སྐུར་རྫོགས༔ མ་སྐུ་གསུམ་ལྷུན་གྲུབ་མཁའ་འགྲོ་མ༔ སྒྱུ་འཕྲུལ་རོལ་པའི་ཆོ་འཕྲུལ་ངོམས༔ མ་ཡུམ་ཆེན་ལྔ་ལ་ཕྱག་འཚལ་བསྟོད༔ མཉམ་ཉིད་བདེ་ཆེན་དགོངས་པར་རློབས༔ དེ་ནས་དངོས་གྲུབ་བླང་བ་ནི༔ ཕཊ༔ སྐུ་གསུམ་སྒྱུ་འཕྲུལ་མཁའ་འགྲོའི་ཚོགས༔ དམ་ཚིག་ཐུགས་དམ་གནད་ནས་བསྐུལ༔ བདག་ཅག་སྒྲུབ་མཆོག་འཁོར་བཅས་ལ༔ འཇའ་ལུས་ཆེན་པོའི་དངོས་གྲུབ་སྩོལ༔ རྩ་སྔགས་དང་༔ སརྦ་སིདྡྷི་ཕ་ལ་ཧཱུྃ༔ དེ་ནས་བཤགས་པ་བྱ་བ་ནི༔ ཕཊ༔ བདག་གི་ཚེ་རབས་སྡིག་ལྟུང་ཀུན༔ སྐུ་གསུམ་མཁའ་འགྲོའི་ཚོགས་ལ་བཤགས༔ དག་ཅིང་ཚངས་པར་མཛད་ནས་ཀྱང་༔ ཚེ་འདིར་རིག་འཛིན་ས་རུ་སྐྱོལ༔ ཨོཾ་བཛྲ་སཏྭ་ས་མ་ཡ་སོགས་ཡིག་བརྒྱ་བརྗོད༔ དེ་ནས་བསྔོ་བ་སྨོན་ལམ་ནི༔ ཕཊ༔ བདག་གི་དུས་གསུམ་དགེ་རྩ་ཀུན༔ འགྲོ་ཀུན་སངས་རྒྱས་ཐོབ་ཕྱིར་བསྔོ༔ ཁམས་གསུམ་སེམས་ཅན་མ་ལུས་པ༔ ཕྱམ་ཅིག་རྫོགས་སངས་རྒྱས་གྱུར་ཅིག༔ དེ་ནས་བསྡུ་བའི་རིམ་པ་ནི༔ ཕཊ༔ སྣོད་བཅུད་སྣང་སྲིད་ཐམས་ཅད་ཀུན༔ སྒྱུ་མའི་འཁྲུལ་འཁོར་ཞིག་པ་བཞིན༔ ཆོས་སྐུ་སྐྱེ་འགགས་འགྱུར་མེད་ངང་༔ མ་བཅོས་མཉམ་པ་ཉིད་དུ་བརྡལ༔ ལྷར་ལྡང་བ་ནི༔ ཕཊ༔ སླར་ཡང་མཁའ་ལས་གློག་འཁྱུགས་ལྟར༔ མཁའ་འགྲོའི་དཀྱིལ་འཁོར་ཆེན་པོར་སྤྱོད༔ ཕཊ་ཕཊ་ཕཊ༔ དེ་ནས་བཀྲ་ཤིས་ནི༔ དཀོན་མཆོག་གསུམ་གྱི་བདེན་པ་དང་༔ སྐུ་གསུམ་མཁའ་འགྲོའི་བྱིན་རླབས་ཀྱིས༔ བདག་ཅག་འཁོར་དང་བཅས་པ་ལ༔ དཔལ་ཡོན་ཕུན་ཚོགས་བཀྲ་ཤིས་ཤོག༔
