ལས་ཅན་ལྷ་གཅིག་ཨིནྡྲ་བྷུ་ཏི་ཡི།

First text in section. Back to Volume PageLast text in section.

Wylie title	las can lha gcig in+d+ra b+hu ti yi
Location	phrin las nor bu'i gsung 'bum Volume 1, sde tshan 6, Text 6, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Las can lha gcig in+d+ra b+hu ti yi. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །ལས་ཅན་ལྷ་གཅིག་ཨིནྡྲ་བྷུ་ཏི་ཡི། །བཀའ་ལུང་དོ་ཤལ་གྱིས་སྤུད་རྒྱལ་པོའི་ཁྲིམས། །ཕན་དང་བདེ་བར་སྲོང་བའི་མདུན་ན་འདོན། །ཆོས་བློན་ཀྲྀཥྞ་འཛིན་ལ་གསོལ་བ་འདེབས། །དེ་ཡང་རྒྱ་གར་ཡུལ་གྱི་ནུབ་ཕྱོགས་དཔལ་ཨོ་རྒྱན་ཞེས་བྱ་བའི་ཡུལ་རིན་པོ་ཆེ་འབར་བ་ཞེས་བྱ་བའི་གྲོང་ཁྱེར་ན་བཻ་ཌཱུརྱའི་ཕོ་བྲང་རིན་པོ་ཆེ་སྣ་ཚོགས་ཀྱིས་བརྒྱན་པའི་ནང་ན་མཆོག་ཏུ་བརྟན་བརྗིད་ཆགས་པའི་རིན་པོ་ཆེ་རྣམ་པ་སྣ་ཚོགས་ཀྱིས་སྤུངས་པའི་ཁྲི་ཆེན་པོའི་སྟེང་ན་སྐྱེ་བ་མང་པོར་ཚོགས་བསགས་པ་ལས་བྱུང་བའི་ལ༵ས་ཅན༵་ལྷ༵་གཅི༵ག་སྟེ་ཆོས་སྐྱོང་བའི་རྒྱལ་པོ་ཆེན་པོ་ཨི༵ནྡྲ༵་བོ༵་ངྷི་ཞེས་བྱ་བ་བཞུགས། རྒྱལ་པོ་དེ་ལ་བཙུན་མོ་བརྒྱ་རྩ་བརྒྱད་མངའ་ཡང་།རྒྱལ་བརྒྱུད་འཛིན་པའི་སྲས་མེད་ནས། ཚེས་བཅོ་ལྔ་ལ་སོགས་ཟླ་བ་ཉ་བའི་དུས་དང་། གཞན་ཡང་སྔོན་གྱི་སངས་རྒྱས་རྣམས་འཇིག་རྟེན་དུ་བྱོན་པ་དང་། ཆོས་ཀྱི་འཁོར་ལོ་བསྐོར་བ་སོགས་དུས་བཟང་ཁྱད་པར་ཅན་རྣམས་སུ་བླའི་མཆོད་གནས་ཐམས་ཅད་བསྡུས་ཏེ་མདོ་སྡེ་ཆོས་ཀྱི་སྤྲིན་བཀླགས་སུ་གཞུག་པ་དང་། ཡར་དཀོན་མཆོག་ལ་མཆོད་པ། མར་ངན་སློང་ལ་སྦྱིན་པ་གཏོང་བ་སོགས་སྲས་འདོད་པའི་དགེ་བ་རྒྱ་ཆེན་པོ་བསྒྲུབས་པས་རྒྱལ་པོའི་དཀོར་མཛོད་ཐམས་ཅད་སྟོང་ལ་ཉེ་ཡང་། སློང་མཁན་གྱི་འཕྲོ་མ་ཆད་པས་རྒྱལ་པོ་ཐུགས་མུག་སྟེ་ཕྱི་ནང་གི་བློན་པོ་རྣམས་ལ་རྒྱ་མཚོའི་གླིང་དུ་དགོས་འདོད་ཐམས་ཅད་ཟད་མི་ཤེས་པར་འབྱུང་བའི་ནོར་བུ་དགོས་འདོད་ཀུན་འབྱུང་ཞེས་བྱ་བ་ཡོད་ཀྱི་དེ་ངའི་ཕོ་བྲང་གི་དཀོར་མཛོད་དབྱིག་ཏུ་བླངས་ཐུབ་པ་བྱུང་ན་དེའི་མཐུ་ལས་བདག་ཉིད་རྒྱལ་པོ་ལ་སྲས་དང་། འབངས་རྣམས་དབུལ་ཕོངས་ཀྱི་སྡུག་བསྔལ་ལས་སྐྱོབ་ཐུབ་པར་ངེས་སོ་སྙམ་དུ་དགོངས་ཏེ་གྲོས་བཏབས་སོ། །དེ་ལྟ་བུའི་རྒྱལ་པོ་ཡི༵་བཀ༵འ་ལ༵ང་མཆོག་ཏུ་འགངས་ཆེ་བ་རིན་པོ་ཆེའི་ཕྲེངབ་ལྟ་བུའམ་དོ༵་ཤ༵ལ་གྱི༵ས་རང་གི་མགུལ་པའི་རྒྱན་དུ་སྤུད༵་པ་ལ་མཆོག་ཏུ་སྤྲོ་བ་བརྟས་ཤིང་། རྣམ་པ་ཀུན་ཏུ་རང་འདོད་ཡིད་ལ་བྱེད་པའི་གཡོ་སྒྱུ་སྤངས་པས་རང་ཉིད་རྒྱལ༵་པོ༵འི་བཀའ་ཡི་ཁྲི༵མས་ལ་ཚུལ་བཞིན་གནས་པ་དང། འབངས་རྣམས་ལའང་དེ་བཞིན་བྱེད་དུ་བཅུག་པ། རྒྱལ་པོའི་ཐུགས་ལ་གང་དགོངས་པ་རང་གི་སེམས་ཀྱིས་ཤེས་པས་ལས་ཐམས་ཅད་མ་བསྒོས་ཀྱང་བསྒྲུབ་པ་སོགས་ཅི་བྱས་རྗེ་དང་འབངས་ལ་ཕ༵ན་པ་ད༵ང་བདེ༵་བ༵ར་འགྱུར་བའི་ཡིད་གཞུངས་པའམ་སེམས་སྲོང༵་བ༵འི་མདུན༵་ན༵་འདོ༵ན་ཏེ་དེ་ཡང་སྔོན་རྒྱ་གར་དང་ཨོ་རྒྱན་གྱི་ཡུལ་ལ་སོགས་པར་རྒྱལ་པོ་རྣམས་ཀྱི་མདུན་དུ་སྲིད་སྲུང་བའི་སླད་དུ་དྲང་སྲོང་རིགས་བྱེད་ཀྱི་ཆོ་ག་བྱེད་པ་རེ་ཡོད་པས་དེ་ལ་མདུན་ན་འདོན་ཟེར་བ་དང་། དེ་བཞིན་དུ་རྒྱལ་པོ་དང་ཉེ་བར་མཛའ་བའི་ནང་བློན་ཆབ་སྲིད་ཀྱི་དོན་ལ་གྲོས་ཇུས་འདོན་པར་བྱེད་པ་པོ་ལ་མདུན་ན་འདོན་ཞེས་འབོད་སྲོལ་ཡོད་པས་དེའི་སྐབས་སུ་ཕྱི་བློན་དང་ནང་བློན་བར་བློན་མང་པོའི་ཁྲོད་ན་ཆེས་མཆོག་ཏུ་གྱུར་པ་ཆོས་བློན་ཀྲྀཥྞ་འཛིན་གྱིས་རྒྱལ་པོ་ཆེན་པོས་བཀའ་ཇི་ལྟར་བསྒོས་པ་བཞིན་དུ་དེད་དཔོན་དང་ལྷན་ཅིག་གཟིངས་ལ་ཞུགས་ནས་རྒྱ་མཚོའི་གླིང་དུ་སོང་སྟེ། ནོར་བུ་རིན་པོ་ཆེ་བླངས་ནས་ཕྱིར་ཕོ་བྲང་དུ་ལོག་པ་ན་ལམ་དུ་མཚོ་གླིང་ཞིག་ན་རྒྱལ་སྲས་པདྨ་འབྱུང་གནས་ཁྱེའུ་གཞོན་ནུའི་རྣམ་པར་པདྨའི་སྦུབས་ལས་འཁྲུངས་པ་དང་མཇལ། དེ་རྒྱལ་པོའི་སྲས་ཀྱི་སྐལ་པར་སྤྱན་དྲངས་ཤིང་། རྒྱལ་པོའི་ཐུགས་ཀྱི་རེ་བ་ཡོངས་སུ་བསྐངས་ཏེ་དགྱེས་པ་བསྐྱེད། ནོར་བུའི་མཐུ་ལས་འབངས་ཀུན་དབུལ་བའི་སྡུག་བསྔལ་ལས་གྲོལ་ཞིང་། ཨོ་རྒྱན་གྱི་རྒྱལ་ཁམས་སྒོ་ཀུན་ནས་སྐལ་བ་དགེ་བར་བྱས་པ་ཆོ༵ས་བློ༵ན་ཀྲྀ༵ཥྞ༵་འཛི༵ན་ཏེ་དེ་ལ༵་གསོལ་བ༵་འདེ༵བས་སོ། །