སངས་རྒྱས་གཉིས་པ་པདྨ་ཀ་རའི་དྲུང།

First text in section. Back to Volume PageLast text in section.

Wylie title	sangs rgyas gnyis pa pad+ma ka ra'i drung
Location	phrin las nor bu'i gsung 'bum Volume 1, sde tshan 6, Text 8, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Sangs rgyas gnyis pa pad+ma ka ra'i drung. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །སངས་རྒྱས་གཉིས་པ་པདྨ་ཀ་རའི་དྲུང་། །ཉིད་དང་དགོངས་མཉམ་སྔགས་ཀྱི་གྲུབ་བརྙེས་ཚུལ། །ལྟ་སྟངས་ཙམ་གྱིས་ནམ་མཁའི་བྱ་རྣམས་འགུགས། །སངས་རྒྱས་ཉིད་མྱ་ངན་ལས་འདའ་བར་བཞེད་པའི་སྐབས་སུ་ཀུན་དགའ་བོ་ལ་སོགས་པའི་ཐུན་མོང་གི་འཁོར་རྣམས་ལ། མྱ་ངན་མ་བྱེད་ཀུན་དགའ་བོ། །སྨྲེ་ངག་མ་འདོན་ཀུན་དགའ་བོ། །ང་ནི་འདི་ནས་མི་སྣང་ནས། །དྷ་ན་ཀོ་ཤའི་མཚོ་གླིང་དུ། །པདྨ་འབྱུང་གནས་ཞེས་བྱ་བ། །ང་ལས་ལྷག་པའི་སྐྱེས་བུ་འབྱུང་། །ཞེས་ཐུགས་ཀྱིས་བརྩེ་བས་དགོངས་ཏེ། གསུང་གིས་ལུང་བསྟན་པ་བཞིན་སྔར་བརྗོད་པ་ལྟར་ཨོ་རྒྱན་ཡུལ་གྱི་མཚོ་གླིང་དུ་པདྨའི་སྦུབས་ལས་རིག་པ་ཐོལ་སྐྱེས་ཀྱི་ཚུལ་དུ་སྐུ་འཁྲུངས་ཤིང་། ཨོ་རྒྱན་གྱི་རྒྱལ་སྲིད་ཆོས་བཞིན་བསྐྱངས་པ་དང་། དུར་ཁྲོད་བརྒྱད་དུ་བརྟུལ་ཞུགས་ཀྱི་སྤྱོད་པ་སྤྱད་པ་ལ་སོགས་གང་འདུལ་འགྲོ་དོན་གྱི་ཕྲིན་ལས་བསྐྱངས། བོད་དུ་ཕེབས་ཏེ་ཐུན་མོང་མ་ཡིན་པའི་འཁོར་རྣམས་ལ་འབྲས་བུའི་ཆོས་གསང་སྔགས་རྡོ་རྗེའི་ཐེག་པ་གསུངས་ཏེ། ཚེ་ལུས་གཅིག་ལ་ཀུན་བཟང་ཆོས་སྐུའི་རྒྱལ་ཐབས་ལ་འགོད་པར་མཛད་པ་ཆགས་མེད་རང་བྱུང་གི་སང༵ས་རྒྱས༵་གཉི༵ས་པ༵་པ༵དྨ༵་ཀ༵་ར༵འི་དྲུང༵་དུ་ལས་ཅན་དག་པའི་འཁོར་གྱི་ཚོམ་བུ་རྣམས་དང་ལྷན་ཅིག་བཀའ་འདུས་ཆོས་ཀྱི་རྒྱ་མཚོའི་དབང་དང་གདམས་ངག་བུམ་པ་གང་བྱོའི་ཚུལ་དུ་ནོད་དེ་རྩེ་གཅིག་སྒྲུབ་ལ་གཞོལ་བས། ཐུན་མིན་མཆོག་གི་དངོས་གྲུབ་སྐུ་བཞི་ཡེ་ཤེས་ལྔ་ཡི་བདག་ཉིད༵་སློབ་དཔོན་ཆེན་པོ་ད༵ང་དགོ༵ངས་པ་མཉ༵མ་པ་ཉིད་དུ་གྱུར་ཅིང་། སྐལ་ལྡན་གདུལ་བྱའི་སྣང་ངོར་གསང་བ་ཟབ་མོའི་སྔག༵ས་ཀྱི༵་གྲུབ༵་པ་བརྙེས༵་པའི་ཚུ༵ལ་བསྟན་ནས་མིག་གིས་བར་སྣང་ལ་ལྟ༵་སྟང༵ས་བྱས་པ་ཙ༵མ་གྱི༵ས་ནམ༵་མཁ༵འི་བྱ༵་རྣམ༵ས་ཐོགས་མེད་དུ་འགུག༵ས་པ་སྐད་གཉིས་སྨྲ་བའི་དབང་ཕྱུག་འབྲོ༵ག་བ༵ན་ཁེ༵འུ་ཆུང༵་ལོ༵་ཙཱ༵་བ་སྟེ་དེ་ལ༵་གསོ༵ལ་བ༵་འདེ༵བས་སོ། །དེ་ཡང་ལོ་ཙཱ་བ་འདི་ནི་གདུང་རུས་འབྲོག་མི་སྟེ། སྐུ་གཞོན་ནུའི་དུས་ནས་ལོ་ཙཱ་མཁྱེན་པས་མཚན་ཡང་དེ་ལྟར་གྲགས། སློབ་དཔོན་གྱི་དྲུང་དུ་གསང་སྔགས་ཀྱི་ཆོས་ཐམས་ཅད་ལ་མཁས་པར་བསླབས། རྟེན་ཁྱིམ་པ་སྟེ་སྔགས་འཆང་གོས་དཀར་ལྕང་ལོ་ཅན་ནོ། །