སྨྲ་བའི་སེང་གེས་དངོས་སུ་རྗེས་བཟུང་བས།

First text in section. Back to Volume PageLast text in section.

Wylie title	smra ba'i seng ges dngos su rjes bzung bas
Location	phrin las nor bu'i gsung 'bum Volume 1, sde tshan 6, Text 9, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Smra ba'i seng ges dngos su rjes bzung bas. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །སྨྲ་བའི་སེང་གེས་དངོས་སུ་རྗེས་བཟུང་བས། །ཇི་སྙེད་ཆོས་རྣམས་ཇི་བཞིན་ཡོངས་གཟིགས་ནས། །ཐབས་མཁས་མཛད་པས་འགྲོ་སྒྲོལ་སེམས་དཔའ་ཆེ། །ཇོ་བོ་སྨྲྀ་ཏི་ཛྙཱ་ན་ལ་ན་མོ། །གཉིས་འཛིན་རྟག་ཆད་ཀྱི་མཐར་ལྷུང་ཞིང་། ཐར་པའི་ལམ་དང་བྲལ་བའི་ཆོས་སྟོན་པ་གཅན་གཟན་མ་རུངས་པ་ལྟ་བུའི་སྟོན་པ་རྣམས་ཀྱི་མུ་ཅོར་སྨྲ་བའི་སྒྲ་རྣམས་རྨིང་མེད་དུ་ཟིལ་གྱིས་གནོན་པ་རྒྱལ་བ་ཀུན་གྱི་མཁྱེན་རབ་ཡེ་ཤེས་ཀྱི་ཕུང་པོ་སྨྲ༵་བའི༵་སེ༵ང་གེ༵ས་དངོ༵ས་སུ༵་ཞལ་བསྟན་ནས་བྱིན་གྱིས་བརླབས་ཤིང་རྗེས༵་སུ་བཟུ༵ང་བ༵ས། སྣང་བ་ཀུན་རྫོབ་ཀྱི་བདེན་པ་ཇི༵་སྙེད༵་པའི་ཆོ༵ས་སོ་ཅོག་རྣམ༵ས་སོ་སོར་རྟོག་པའི་ཡེ་ཤེས་ཀྱི་རང་རྩལ་དུ་ཇི༵་ལྟ་བ་བཞི༵ན་དུ་མ་འདྲེས་པར་ཡོ༵ངས་སུ་གཟི༵གས་ནས༵། ཐ༵བས་ལ་མཁ༵ས་པའི་བྱང་ཆུབ་སེམས་དཔའི་གང་འདུལ་ཕྲིན་ལས་ཀྱི་མཛ༵ད་པ༵ས་འགྲོ༵་བ་ཉམས་ཐག་པ་རྣམས་འཁོར་བའི་སྡུག་བསྔལ་གྱི་རྒྱ་མཚོ་ལས་སྒྲོལ༵་བའི་ཆོས་སྟོན་པ་སེ༵མས་དཔ༵འ་ཆེ༵་བའི་སློབ་དཔོན་ཏེ་ཇོ༵་བོ༵་སྨྲི༵་ཏི༵་ཛྙཱ་ན༵་ལ༵་གསོ༵ལ་བ༵་འདེ༵བས་སོ། །དེ་ལྟ་བུའི་ཇོ་བོ་སྨྲྀ་ཏི་ཛྙཱ་ན་ནི། རང་དང་གཞན་གྱི་གཞུང་ལུགས་ཐམས་ཅད་མཁྱེན་པས་རྩོད་པ་ལ་སྨྲ་བའི་ཁྱུ་མཆོག་ན་རོ་པཎྜི་ཏ་ལ་སོགས་པ་དགེ་བའི་བཤེས་གཉེན་དུ་མ་བསྟེན་ཅིང་མངོན་པར་ཤེས་པ་མངའ་བ་དེས་ཡུམ་གྱི་དོན་དུ་བོད་དུ་བྱོན། ཁབ་གུང་ཐང་དུ་ཕྱུགས་རྫིའི་ཚུལ་བཟུང་། དེའི་དགོས་པ་རང་གི་མ་ཡུམ་དེའི་གྲོང་པ་གཅིག་གི་སྒྱེད་པུའི་ནང་དུ་སྡིག་པར་སྐྱེས་པ་འདོན་པའི་ཕྱིར་དུ་རྫུས་པ་ཡིན། དེའི་ཚེ་དཔྱལ་ལོ་ཙཱ་བ་རྒྱ་གར་ནས་འཁོར་བ་ལ་ཀུན་དད་དད་རུབ་རུབ་བྱེད། སྨྲྀ་ཏི་ཛྙཱ་ན་པཎྜི་ཏ་ཡིན་པ་མ་ཤེས་པས་མཐོང་མི་བྱེད་པས་གུང་ཐང་གི་སྒོའི་ཡ་ཐེམ་ལ། སཾ་སྐྲྀ་ཏའི་སྐད་དུ། རི་བོང་འཛིན་པ་རྒྱུ་སྐར་འཕྲེང་བ་ཅན། །མཚན་མོ་མཁའ་ལ་རྒྱུ་བ་འདི་དོར་ནས། །དྭངས་པའི་ཆུ་ནང་འདི་ན་ཟླ་བ་ཞེས། །གཟུགས་ལ་ཚད་མར་འཛིན་པ་བྱིས་པའི་བློ། །ཞེས་བྲིས་ཏེ་གླན། དེ་ལོ་ཙཱ་བས་གཟིགས་ནས། འདི་སུས་བཏབ། ཛོ་གི་ཞིག་ཕྱུགས་འཚོ་ཡི་འདུག་པ་དེས་བཏབ་ཟེར། ད་ལྟ་གར་ཡོད། ཕྱུགས་འཚོ་སར། ཙ་ན་བསླེབ། ཉི་མ་ནུབ་ཁ་ནའོ་ཟེར་བས། ལཱཉྩ་ཤིན་ཏུ་ལེགས་པས་ཡི་གེ་ངོ་མཁྱེན་ནས་སྨྲྀ་ཏིའོ་སྙམ་བསྒུགས་པས་མ་བྱོན། སང་སྔ་བར་གཤེགས་ལན་དུ་མའི་མཐར་མཇལ་བར་གནང་སྟེ། སྔ་སོར་ནས་དཔོན་སློབ་ཡིན་པས་ལོ་ཙཱ་བས་བཤུམས་ནས། འདི་ལྟ་བུའི་འོ་བརྒྱལ་བ་ཞུས་པས། ངས་མའི་དོན་དུ་འདི་ལྟར་བྱས་པ་ཡིན། མ་གར། འདི་ནའོ་གསུངས། དེར་ལོ་ཙཱ་བས་ཁོང་རང་གི་ནོར་གྱིས་སྒྱེད་པུ་བསླུས། ཕྱུགས་བཙོས་པའི་ཡོན་བླངས་ཏེ་ངན་སོང་སྦྱོང་བའི་ཆོ་ག་ལ་བརྟེན་ནས་མ་མཐོ་རིས་སུ་དྲངས། ལོ་ཙཱ་བས་སྒོར་མ་ཐུབ་པས་ཁམས་ལ་གཤེགས། ཕྱིས་བོད་དུ་འཕྲིན་ལས་དུམ་བུ་བྱུང་། དེ་ལ་ལོ་ཙཱ་བ་ནས་འདི་ཤིན་ཏུ་མཁས་པས་མུ་སྟེགས་བྱེད་རྣམས་ཀྱིས་ཁོང་གིས་བསྟན་པ་བསྣུབས་དྭོགས་ཀྱིས་བསྐྲད་པ་བྱས་པས་ལན་གསུང་ངོ་། །