བསོད་ནམས་བཀྲ་ཤིས་ལ་གདམས་པའི་གླུ་དབྱངས་གསལ་བའི་མེ་ལོང་།

Previous Text Back to Volume Page Next Text

Wylie title	bsod nams bkra shis la gdams pa'i glu dbyangs gsal ba'i me long
Location	bdud 'joms gling pa zab gter Volume 18, Text 40, Pages 141-144 (Folios 71a1 to 72b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Bsod nams bkra shis la gdams pa'i glu dbyangs gsal ba'i me long. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 141-144. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams · Songs - mgur - glu dbyangs
Colophon	ཞེས་པ་འདི་སློབ་བུའི་མཆོག་གྱུར་དེ་ལ་གདམས་པའོ།།
Colophon	zhes pa 'di slob bu'i mchog gyur de la gdams pa'o//

[edit]

༄༅། །བསོད་ནམས་བཀྲ་ཤིས་ལ་གདམས་པའི་གླུ་དབྱངས་གསལ་བའི་མེ་ལོང་བཞུགས། །རྗེ་དུས་གསུམ་སངས་རྒྱས་འདུས་པའི་ཞལ། །མགོན་རིགས་བརྒྱའི་ཁྱབ་བདག་རྡོ་རྗེ་འཆང་། །དཔལ་ཨོ་རྒྱན་མཚོ་སྐྱེས་རྡོ་རྗེས་སྐྱོངས། །ངའི་བརྒྱུད་འཛིན་བུ་སློབ་རྗེས་སུ་ཟུངས། །སྔོན་སྨོན་ལམ་ལས་ཀྱིས་འབྲེལ་བ་ཡི། །ཁྱོད་སྐལ་པ་བཟང་པོའི་བན་ཆུང་ཉོན། །ངས་གདམས་པའི་ཡང་སྙིང་སྟེར་བའི་ཡུལ། །གྲངས་མང་དུ་མཆིས་ཀྱང་ཁྱོད་འདྲ་དཀོན། །ངས་ཡང་བརྩེས་ཁ་ད་མང་བརྗོད་ཀྱང་། །དོན་དམ་ཚིག་ཐུབ་པ་ཁྱོད་འདྲ་དཀོན། །ངས་གཅེས་སྤྲས་ཕན་སེམས་ཡུལ་མང་ཡང་། །དྲིན་དྲན་པའི་སྐྱེས་བུ་ཁྱོད་འདྲ་དཀོན། །ཆོས་རྫོགས་ཆེན་ཟེར་བ་མང་ན་ཡང་། །དོན་ཉམས་སུ་ལེན་པ་ཁྱོད་འདྲ་དཀོན། །ཚུལ་མཛེས་ཆོས་བླ་མིང་གྲངས་མང་ཡང་། །དོན་མ་འཛོལ་བླ་མ་ཁྱོད་འདྲ་དཀོན། །ཕྱི་ཆོས་གཟུགས་བྱེད་པ་མང་ན་ཡང་། །ཟོལ་མེད་པའི་ཆོས་པ་ཁྱོད་འདྲ་དཀོན། །རྙེད་ཚོལ་ཕྱིར་ཆ་ལུགས་མཛེས་མང་ཡང་། །ཆོག་ཤེས་པའི་སྐལ་ལྡན་ཁྱོད་འདྲ་དཀོན། །ཁས་ཆོས་བཤད་སྨྲ་མི་གྲངས་མང་ཡང་། །ཚེ་མི་རྟག་དྲན་པ་ཁྱོད་འདྲ་དཀོན། །སྔོན་འདས་དུས་སྤྱོད་པ་དེ་ལེགས་ཀྱང་། །ཕྱིས་ཆེ་འདོད་གྲགས་འདོད་གཡོ་སྒྱུ་དང་། །སེམས་ང་རྒྱལ་ཁེངས་སེམས་མ་ཆེ་བར། །རྒྱུད་ཐུལ་ལ་སྤྱོད་པ་མ་འཆོལ་རེམ། །དུས་སྔར་བཞིན་ངེས་འབྱུང་སྐྱོ་ཤས་དང་། །དད་དམ་ཚིག་བརྩོན་འགྲུས་མ་ཞན་རེམ། །ཚེ་འདི་སྣང་རྨི་ལམ་གནས་སྐབས་ཙམ། །དེ་རྟག་འཛིན་བཙན་ཕྱུག་ལྡན་འདོད་སྤོང་། །ངས་སྔར་གྱི་ལབ་མོ་ཅི་བཞིན་དུ། །ད་སྣང་སྲིད་འཁོར་འདས་ཐམས་ཅད་ཀུན། །དཔེ་རྒྱ་མཚོའི་ནང་གི་གཟའ་སྐར་བཞིན། །རང་རིག་པའི་དབྱིངས་སུ་འུབ་ཆུབ་པའི། །ཚུལ་མ་འཕྱུག་ལྟ་བའི་རྒྱལ་པོ་ལགས། །སེམས་བློ་ཡིད་བཅོས་བསྒྱུར་འཛིན་བྲལ་གྱི། །དབྱིངས་ཆོས་ཉིད་ངང་བཞག་བསྒོམ་པའི་མཆོག །ལྟ་སྤྱོད་པ་གཅིག་ཕྱོགས་གཅིག་ཤོར་གྱི། །ལམ་ལོག་པར་མ་འཆོལ་སྤྱོད་པ་ཡིན། །གཞི་ཆོས་ཉིད་མངོན་སུམ་མཐོང་བའི་མཐར། །ཉམས་གོང་འཕེལ་ཆེན་པོ་མ་འཕྱུག་པའི། །ཚུལ་ད་ལྟ་ཁྱོད་ལ་ཤར་བ་དེ། །དབྱིངས་ཐིག་ལེ་མངོན་དང་མི་མངོན་ལ། །འདི་ཡིན་མིན་བསམ་མནོ་མ་བཏང་ཞིག །བློ་ཐེ་ཚོམ་མ་བྱེད་སྐལ་ལྡན་བུ། །མི་གཞན་གྱི་ཁ་ཚོད་མ་བརྟག་ལས། །རང་ཉམས་ལེན་ཟོངས་ལ་བསྒྱུར་ཉེན་ཡོད། །དུས་དེང་སང་རྫོགས་ཆེན་སྐད་མང་ཡང་། །ཚུལ་ཇི་བཞིན་རྟོགས་པ་ཉིན་སྐར་ཙམ། །ཁྱོད་ཉམས་ལེན་ཞན་དུ་སོང་བ་མིན། །རང་ཆོས་ཉིད་བློ་འདས་གཤིས་ཐོག་ཏུ། །ཕེབས་གྱུར་ན་མྱོང་ཞེན་རྡུལ་ཙམ་མེད། །ཡིད་ཐེ་ཚོམ་ཆོད་ཅིག་རིགས་ཀྱི་བུ། །ངས་བསྟན་པའི་འོད་གསལ་གསང་ཆེན་ལམ། །ཁྱོད་ཉམས་སུ་ལེན་པར་མ་ཞན་ན། །ཚེ་འདི་རུ་འཇའ་ལུས་འཕོ་ཆེན་ཐོབ། །དོན་གྲུབ་ཐོབ་རྒྱལ་པོ་དེ་ལ་ཡོད། །ལར་དེང་སང་དུས་ཀྱི་བན་སྨྱོན་འགས།དུས་དང་པོ་འཁོར་བ་བློས་བཏང་སྐད། །ཡང་བར་དུ་གདམས་པ་ཉམས་ལེན་བྱེད། །མཐར་བདུད་ཀྱིས་བསླུས་ནས་བསྟན་བཅོས་རྩོམ། །ང་གཏེར་སྟོན་ཡིན་སྐད་སྒར་ཆེན་སྒྲུབ། །མཐར་སྡུག་རོག་བུད་མེད་གྲོགས་སུ་བརྟེན། །ལས་ལན་ཆགས་དྭ་ཕྲུག་མང་དུ་ཐོན། །དེའི་དུས་སུ་ལྟོ་རྒྱབ་མི་འོང་ནས། །སོས་དལ་དུས་མེད་པར་གྲོང་ཡུལ་དུ། །ཁྱི་བཞིན་དུ་ཉུལ་ལ་ལྟད་མོ་ལྟོས། །ཟས་གསོན་གཤིན་ལག་སྦྲེལ་དོམ་མང་བླངས། །འཆིའི་ནང་པར་འགྱོད་ཆེན་སྙིང་ལ་གཟེར། །བྲང་ལག་པས་བྲད་ཅིང་འཕྲ་ཤད་བྱེད། །ཁོང་གྲུབ་ཆེན་ཤི་བའི་རོ་ལ་ལྟོས། །ཡང་ཅིག་ན་སྙིང་རུས་ཞེ་སྡང་གི། །ཤུར་བློ་ལ་བཏག་ནས་རོ་ཚུག་བཟུང་། །དྲི་ཟ་བའི་རིགས་སུ་གྱུར་པ་ན། །དེས་བསྟན་པའི་བླ་བཙོང་རྐང་ཡང་འདྲེན། །ལས་དེ་འདྲ་མ་འཆོལ་རིགས་ཀྱི་བུ། །ངས་ཤིན་ཏུ་བརྩེ་བའི་སྙིང་གཏམ་ཡིན། །དོན་བློ་ལ་འཆོང་དང་གདམས་ངག་ཡིན། །ཕ་གྲུབ་ཆེན་བརྒྱ་དང་མཇལ་ན་ཡང་། །གནད་ཟབ་པ་འདི་ལས་ལྷག་པ་མེད། །དེ་སྙིང་ལ་འཆོངས་ཤིག་ཕ་ཡི་བུ། །ཞེས་པ་འདི་སློབ་བུའི་མཆོག་གྱུར་དེ་ལ་གདམས་པའོ།། །།