ཐུགས་མཆོག་ལ་གདམས་པའི་གླུ་དབྱངས་དཔེ་ཡི་མེ་ལོང་།

Previous Text Back to Volume Page Next Text

Wylie title	thugs mchog la gdams pa'i glu dbyangs dpe yi me long
Location	bdud 'joms gling pa zab gter Volume 18, Text 69, Pages 249-252 (Folios 125a1 to 126b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Thugs mchog la gdams pa'i glu dbyangs dpe yi me long. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 249-252. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams · Songs - mgur - glu dbyangs
Colophon	ཅེས་བདུད་འཇོམས་པས་སོ། །དགེའོ། །སརྦ་མངྒ་ལཾ།།
Colophon	ces bdud 'joms pas so/_/dge'o/_/sarba mang+ga laM//

[edit]

༄༅། །ཐུགས་མཆོག་ལ་གདམས་པའི་གླུ་དབྱངས་དཔེ་ཡི་མེ་ལོང་བཞུགས་སོ། །དུས་གསུམ་སངས་རྒྱས་འདུས་པའི་དཔལ། །ཨོ་རྒྱན་ཆེན་པོས་རྗེས་སུ་ཟུངས། །བསྐལ་པ་བཟང་པོའི་བན་ཆུང་ཁྱོད། །རྒྱལ་ཁམས་ཡོངས་ལ་ལྟད་མོ་ལྟོས། །གཞན་སྐྱོན་འཆར་བའི་མེ་ལོང་ལ། །བལྟས་པས་ལྟད་མོ་མིག་ལ་མངོན། །མཐོང་བའི་རྐྱེན་ལ་སྐྱུག་རེ་བྲོ། །རང་རྒྱུད་དེ་ལྟར་མི་འཆོལ་གལ། །ཐོབ་ཀྱིས་འཕྲོག་པའི་བླ་གཟུགས་འགས། །གཤིན་པོའི་རོ་དོམ་ཡང་ཡང་ལེན། །ཟླ་གཅིག་མཚམས་སྒྲུབ་བྱེད་ཁོམ་མེད། །རྣམ་སྨིན་རང་གི་ཕྲག་ལ་བཀལ། །འབད་རྩོལ་བྱས་ལ་སུས་དྲིན་དྲན། །དེ་ཚོའི་ལད་མོ་མ་བྱེད་རེམ། །བཟའ་མིའི་ཁ་དཔོན་བླ་ཆུང་འགས། །དལ་མེད་གྲོང་ཡུལ་ཀུན་ཏུ་རྒྱུ། །གཞན་ལ་དབང་བསྐུར་གླ་རྔན་བླངས། །རང་འདོད་བྱ་ཁྱི་ལས་ཀྱང་ཆེ། །ཐ་མ་གཅིག་པུར་ངན་འགྲོར་འཁྱམས། །དེ་འདྲའི་ལད་མོ་མ་བྱེད་རེམ། །བྲེལ་ཚུལ་ཆེ་བའི་གཏོ་པ་འགས། །བསྐྱེད་དང་དམིགས་གསལ་མི་ཤེས་ཀྱང་། །རྔ་རོལ་ཚིག་གྱེར་མཛེས་ཆོས་གཟབ། །རློམ་སེམས་གཡོ་སྒྱུས་རྒྱུད་གང་ནས། །མི་ཚེ་སྟོང་ཟད་འདྲེ་རུ་ཟ། །དེ་འདྲའི་ལད་མོ་མ་བྱེད་རེམ། །ཕོ་ཚོད་ཆེ་བའི་གཅོད་པ་འགས། །ལྷ་འདྲེ་རང་རྒྱུད་པ་རུ་བཟུང་། །གྲོང་ཡུལ་ཀུན་ཏུ་བར་མེད་རྒྱུ། །ཟས་ནོར་ཆོག་ཤེས་མེད་པར་འཚོལ། །ཐ་མ་བག་ཆགས་འདྲེ་རུ་འཁྲུལ། །དེ་འདྲའི་ལད་མོ་མ་བྱེད་རེམ། །སྙིང་ཁམས་མཐོ་བའི་དཔོན་བླ་འགས། །ལྷ་གྲལ་འགྲིམ་ནས་མཐོ་སར་རློམ། །མི་གྲལ་འགྲིམ་ནས་གྱོད་ཁ་རྩོད། །མཐོ་ལ་ཕྲག་དོག་དམའ་ལ་སྡང་། །སྦྲུལ་གདུག་སེམས་འཆང་དམྱལ་བར་འགྲོ། །དེ་འདྲའི་ལད་མོ་མ་བྱེད་རེམ། །ལས་མཐའ་ལོག་པའི་བན་དྲེད་འགས། །གོས་དམར་གྱོན་ནས་དཀོར་ལ་རྒྱུ། །མི་ནག་ཆས་འཛིན་ཚོང་དུས་འགྲིམ། །རང་སྡུག་རང་གིས་ཉོས་ནས་མཐར། །འདི་ཕྱི་གཉིས་ཕུང་རྙེད་ལ་ལྟོས། །དེ་འདྲའི་ལད་མོ་མ་བྱེད་རེམ། །བློ་ཉེས་བྱེད་པའི་བྱ་བྲལ་འགས། །ཁྱིམ་ཆུང་སྤང་ནས་ཁྱིམ་ཆེན་བཟུང་། །ཚེ་གཅིག་རྙེད་ཚོལ་དག་ལ་ཟད། །ཐ་མ་འཁོར་བའི་གཏིང་རྡོར་གྱུར། །ཕ་ཡུལ་སྤང་བ་དོན་མེད་མངོན། །དེ་འདྲའི་ལད་མོ་མ་བྱེད་རེམ། །གཞན་མགོ་བསྐོར་བའི་གཏེར་བརྫུ་འགས། །མོ་གྲོགས་བཀུག་ནས་སྟོབས་རྒྱ་བསྐྱེད། །བསྟན་དང་འགྲོ་བའི་དོན་གཉེར་མེད། །སྒྲུབ་ལ་མི་བརྩོན་རང་མགོ་འཁོར། །ཚེ་གཅིག་ཟས་ནོར་འཚོལ་ལ་ཟད། །དེ་འདྲའི་ལད་མོ་མ་བྱེད་རེམ། །འདི་ཕྱིའི་སྐལ་ཆད་བན་སྨྱོན་འགས། །སྐྱེས་ནས་ཤི་ལ་མ་ཐུག་བར། །ཚོགས་གྲལ་འགྲིམ་ནས་དཀོར་ཟས་སྤྱོད། །རང་ཁྱིམ་བཟུང་ནས་ཕྱུག་ལུག་སྐྱོང་། །མི་ཚེ་སྟོང་ཟད་ཕ་རོལ་འཁྱམས། །དེ་འདྲའི་ལད་མོ་མ་བྱེད་རེམ། །གྲུབ་ཐོབ་སྐད་པའི་གྲུབ་བརྫུ་འགས། །མིག་གཅེར་ལྷ་འདྲེ་འདི་ན་ཟེར། །ལམ་ཁར་འཁྱམས་པའི་ཁྱི་ལྟོག་བཞིན། །ཟས་ནོར་དག་ལ་འདོད་སྲེད་རྔམས། །ཐ་མ་བདུད་དང་རཱུ་དྲཱར་འཁྲུལ། །དེ་འདྲའི་ལད་མོ་མ་བྱེད་རེམ། །དེ་ལྟར་ཀླད་མེད་མགོ་སྟོང་ཚོའི། །རྗེས་སུ་མ་འབྲང་སྐལ་ལྡན་བུ། །དཀའ་བ་དང་དུ་བླངས་ནས་སུ། །གཏན་གྱི་བདེ་བ་དག་ལ་འབུང་། །ངལ་བ་ཁྱད་དུ་བསད་བྱས་ནས། །མཐའ་མེད་འཁོར་བ་སྤང་བར་མཛོད། །རྣམ་གཡེང་ལེ་ལོ་སྤང་བྱས་ནས། །མི་རྟག་འཆི་བ་མ་བརྗེད་བསྒོམ། །མི་ཡི་གྲལ་འཛིན་སྤང་བྱས་ནས། །ལྷ་གྲལ་ངེས་པར་སླེབ་མཛོད་ཅིག །སྐྱ་མིན་སེར་མིན་བསམ་སྤྱོད་སྤོངས། །ཟོལ་མེད་བཙུན་པ་ཞིག་ལ་རེམ། །ན་དགའ་ཤི་སྐྱིད་ཞིག་བྱུང་ན། །སུ་མ་མགུ་ཡང་ཕོ་རབ་ཡིན། །རང་མགོ་ཐོན་པ་ཞིག་བྱུང་ན། །གཞན་གྱིས་བརྙས་ཀྱང་ཁྱུ་མཆོག་ཡིན། །ཁྱོད་ཀྱི་ད་སྔོན་བསམ་སྤྱོད་བཞིན། །ཐོག་མཐའ་མཉམ་པ་ཞིག་བྱུང་ན། །མི་ཁྲེལ་གསུམ་གྱི་ངང་དུ་གྱུར། །ཚེ་འདིར་སངས་རྒྱས་ལ་ཐང་མེད། །རྫོགས་པ་ཆེན་པོ་གཞི་མངོན་གྱུར། །མྱུར་ལམ་ཐོད་རྒལ་གནད་བསྣུན་ན། །འབྲས་བུ་འཇའ་ལུས་འཕོ་ཆེན་དུ། །ཚེ་འདིར་གྲོལ་བར་གདོན་མི་ཟ། །མར་མེ་མཛད་ཀྱི་ཞལ་ཆེམས་ཡིན། །ཤཱཀྱ་ཐུབ་པའི་ཞལ་གདམས་ཡིན། །བྱམས་པ་མགོན་པོའི་ལུང་བསྟན་ཡིན། །གཅེས་པའི་བུ་ལ་གཏད་དོ་རྒྱ། །བདུད་འཇོམས་རྡོ་རྗེའི་སྨྱོ་གླུ་ཡིན། །མ་བརྗེད་སྲོག་གི་གཏའ་རུ་ཟུངས། །ཅེས་བདུད་འཇོམས་པས་སོ། །དགེའོ། །སརྦ་མངྒ་ལཾ།། །།