View source for TTDL-ZABTER-02-KHA-040

{{Text
|classification=Tibetan Publications
|subclass=Tibetan Texts
|fulltitletib=ཟབ་གསང་མཁའ་འགྲོའི་སྙིང་ཐིག་ལས༔ ཚེ་སྒྲུབ་དངོས་གྲུབ་འདོད་འབྱུང་གི་སྐོར་ལས༔ དབང་ཆོག་གསང་ཆེན་བཅུད་དྲིལ༔
|fulltitle=zab gsang mkha' 'gro'i snying thig las: tshe sgrub dngos grub 'dod 'byung gi skor las: dbang chog gsang chen bcud dril:
|citation=Khrag 'thung [[Bdud 'joms gling pa]]. ''Zab gsang mkha' 'gro'i snying thig las tshe sgrub dngos grub 'dod 'byung gi skor las dbang chog gsang chen bcud dril''. In ''Sprul pa'i gter chen bdud 'joms gling pa'i zab gter gsang ba'i chos sde'', Vol. 2: 421-424. Thimphu, Bhutan: Lama Kuenzang Wangdue, 2004.
|collectiontitletib=བདུད་འཇོམས་གླིང་པ་ཟབ་གཏེར།
|collectiontitle=bdud 'joms gling pa zab gter
|author=bdud 'joms gling pa
|sourcerevealer=bdud 'joms gling pa
|tibgenre=Empowerment Ritual - dbang chog - dbang skur
|terma=Yes
|deity=tshe dpag med
|cycle=tshe sgrub dngos grub 'dod 'byung
|cycletib=ཚེ་སྒྲུབ་དངོས་གྲུབ་འདོད་འབྱུང་
|parentcycle=zab gsang mkha' 'gro'i snying thig
|parentcycletib=ཟབ་གསང་མཁའ་འགྲོའི་སྙིང་ཐིག་
|language=Tibetan
|volumenumber=02
|volnumtib=༢
|volyigtib=ཁ
|totalvolumes=21
|textnuminvol=040
|pagenumbers=421-424
|totalpages=4
|beginfolioline=1a1
|endfolioline=2b6
|totalfolios=2
|multivolumework=No
|rectonotes=dbang chog
|versonotes=bdud 'joms tshe sgrub
|colophontib=ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་དབང་ཆེན་གསུང་གི་རྡོ་རྗེའོ། །དགེའོ། །དགེའོ། །དགེའོ།།
|colophonwylie=zhes pa 'di yang khrag 'thung bdud 'joms rdo rje gro lod rtsal gyis gter nas bton te dag par phab pa'i yi ge pa ni dbang chen gsung gi rdo rje'o/_/dge'o/_/dge'o/_/dge'o//
|pdflink=File:TTDL-ZABTER-02-KHA-040.pdf
|authortib=བདུད་འཇོམས་གླིང་པ་
|sourcerevealertib=བདུད་འཇོམས་གླིང་པ་
|volumeLetter=KHA
|InitCategories=Dudjom Tersar Project; TTDL-ZABTER-Volume-02-KHA
}}
<h1>Tibetan Text</h1>
<onlyinclude>
{{TibP|ཐྂ༎༔  ཟབ་གསང་མཁའ་འགྲོའི་སྙིང་ཐིག་ལས༔ ཚེ་སྒྲུབ་དངོས་གྲུབ་འདོད་འབྱུང་གི་སྐོར་ལས༔ དབང་ཆོག་གསང་ཆེན་བཅུད་དྲིལ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ({{TibChung|བརྡ་ཡིག་}})  མ་འོངས་ལྔ་བརྒྱ་སྙིགས་མའི་དུས༔ སྐྱེ་འགྲོའི་ཤེས་རྒྱུད་བདུད་ཀྱིས་བརླབ༔ དགེ་བྱེད་སྨད་ཅིང་བསླུ་མཁན་བཀུར༔ དེ་དུས་ལས་ངན་རྣམ་སྨིན་གྱིས༔ སྐྱེ་འགྲོའི་ཚེ་ཐུང་བསོད་ནམས་དབུལ༔ བསྒྲུབ་ལ་ལོང་མེད་བར་ཆད་མང་༔ དེ་ཚེ་པདྨའི་བརྒྱུད་འཛིན་རྣམས༔ མི་ལུས་རིན་ཆེན་ལ་བརྟེན་ནས༔ ཐར་བའི་གྲོང་དུ་འཇུག་པ་ལ༔ བར་ཆད་གེགས་སྐྱོན་མི་འབྱུང་ཞིང་༔ ཚེ་སྒྲུབ་མཐའ་རུ་ཕྱིན་པའི་ཕྱིར༔ དང་པོ་དབང་གི་སྒོར་ཞུགས་ནས༔ སྒྲུབ་པ་ཟབ་མོ་ལྷུར་ལེན་ཕྱིར༔ སློབ་མ་གྲལ་འཁོད་ཁྲུས་བྱ་ཞིང་༔ བགེགས་བསྐྲད་རྡོ་རྗེའི་སྲུང་འཁོར་བསྒོམ༔ སྐྱབས་སུ་འགྲོ་ཞིང་བྱང་སེམས་བསྐྱེད༔ དེ་ནས་གསོལ་བ་གདབ་པ་ནི༔ ཀྱཻ༔ དུས་གསུམ་སངས་རྒྱས་ཐམས་ཅད་ཀྱི༔ གསང་ཆེན་འདུས་པའི་བདག་ཉིད་དཔལ༔ བླ་མ་རྡོ་རྗེ་འཛིན་ཁྱོད་ཀྱིས༔ བདག་ཅག་སྐལ་ལྡན་སློབ་བུ་ལ༔ འཆི་མེད་མགོན་པོའི་གོ་འཕང་མཆོག༔ ཚེ་ཡི་དབང་དང་དངོས་གྲུབ་སྩོལ༔ དེ་ནས་བླ་མས༔ ཀྱཻ་ཧོ་སྐལ་ལྡན་བུ་ཁྱོད་ཉོན༔ མི་ལུས་ཐོབ་པ་གྲངས་མང་ཡང་༔ དལ་འབྱོར་དོན་ལྡན་ཤིན་ཏུ་དཀོན༔ དེ་དོན་དྲན་ནས་སྲིད་པ་ལས༔ ལྡོག་ནས་ཐར་བ་དོན་གཉེར་ན༔ ཚེ་དབང་ཟབ་མོ་བསྐུར་བར་བགྱི༔ དེ་ནས་སློབ་མས༔ ཀྱཻ༔ ལྷ་དང་བླ་མ་དགོངས་སུ་གསོལ༔ འདི་བཟུང་བྱང་ཆུབ་མ་ཐོབ་བར༔ ལྷ་དང་བླ་མར་རྟེན་བཅའོ༔ ལུས་དང་ལོངས་སྤྱོད་འབུལ་གྱིས་བཞེས༔ དེ་ནས་དམ་ཆུ་ལྕེ་ལ་བཞག་སྟེ༔ ཧཱུྃ༔ གསང་ཆེན་བཅུད་དྲིལ་རྡོ་རྗེའི་ཆུ༔ སློབ་མ་ཁྱོད་ཀྱི་ལྕེ་ལ་བཞག༔ ཚེ་རབས་སྐྱེ་བ་ཐམས་ཅད་དུ༔ འཁོར་བར་མི་ལྡོག་དམ་བཅའ་ཟུངས༔ ས་མ་ཡ༔ དེ་ནས་སློབ་མ་ལྷར་བསྐྱེད་ཡེ་ཤེས་དབབ༔ མིག་དར་བསལ་ནས་མེ་ཏོག་འཐོར༔ དེ་ནས་བུམ་པ་ཐོགས་ལ༔ ཧཱུྃ༔ བུམ་པ་ཆོས་སྐུ་སྟོང་གསལ་དབྱིངས༔ ལྷུན་གྲུབ་ལོངས་སྐུའི་ཚོམ་བུར་གསལ༔ རྩལ་སྣང་མ་ངེས་སྒྱུ་འཕྲུལ་འཆར༔ སྐལ་ལྡན་བུ་ལ་དབང་བསྐུར་རོ༔ འཆི་མེད་མགོན་པོའི་དཀྱིལ་འཁོར་ལྷའི༔ བུམ་པ་སྐུ་ཡི་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ཚེ་དཔག་མེད་པའི་སྐུ་གཏད་ལཧཱུྃ་ཧྲཱིཿདུས་གསུམ་སངས་རྒྱས་ཐམས་ཅད་ཀུན༔ རིགས་འདུས་བདག་ཉིད་ཚེ་མཐའ་ཡས༔ སྐལ་ལྡན་བུ་ལ་དབང་བསྐུར་རོ༔ བསྐྱེད་པ་སྐུ་ཡི་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་དཀྱིལ་འཁོར་གཏད་ལ༔ ཧཱུྃ་ཧྲཱིཿརང་སྣང་ལྷུན་གྲུབ་བདེ་བ་ཅན༔ བཀོད་པ་རབ་རྫོགས་དཀྱིལ་འཁོར་འདིས༔ སྐལ་ལྡན་བུ་ལ་དབང་བསྐུར་རོ༔ དཀྱིལ་འཁོར་ཡོངས་ལ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བྷནྡྷ་བདུད་རྩི་ཐོགས་ལ༔ ཧཱུྃ་ཧྲཱིཿརྒྱལ་བ་ཚེ་དཔག་མེད་མགོན་གྱི༔ གསུང་གི་གསང་ཆེན་རྫོགས་པ་ཡི༔ འཆི་མེད་བདུད་རྩི་ར་ས་ཡ༔ སྐལ་ལྡན་ཁྱོད་ཀྱི་ངག་ཏུ་བླུད༔ གསང་བ་གསུང་གི་དབང་ཐོབ་ནས༔ ཚེ་ཡི་རིག་འཛིན་ཉེར་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་སྔགས་འཁོར་གཏད་ལ༔ ཧཱུྃ་ཧྲཱི༔ སྙིང་པོ་བཅུད་དྲིལ་རྩ་བའི་སྔགས༔ སྐལ་ལྡན་བུ་ལ་དབང་བསྐུར་རོ༔ བཟླས་པ་སྔགས་ཀྱི་དབང་ཐོབ་ནས༔ འཆི་མེད་རྡོ་རྗེའི་ཚེ་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་རིལ་བུ་ཐོགས་ལ༔ ཧཱུྃ་ཧྲཱིཿའཆི་མེད་མགོན་པོའི་ཐུགས་གསང་བཅུད༔ ཡོངས་རྫོགས་དམ་རྫས་ཚེའི་རིལ་བུ༔ སྐལ་ལྡན་བུ་ལ་དབང་བསྐུར་རོ༔ ཤེས་རབ་ཡེ་ཤེས་དབང་ཐོབ་ནས༔ ཅིས་ཀྱང་མི་ཆོད་མི་ཤིགས་པའི༔ འཆི་མེད་རྡོ་རྗེའི་ཚེ་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་མེ་ལོང་གཏད་ལ༔ ཧཱུྃ་ཧྲཱི༔ ཁྱབ་བརྡལ་ལྷུན་འབྱམས་ཆོས་དབྱིངས་ཉིད༔ ཀུན་ནས་ཟླུམ་པ་ཐིག་ལེའི་གདངས༔ ཀ་དག་མེ་ལོང་གསལ་བ་འདི༔ སྐལ་ལྡན་བུ་ལ་དབང་བསྐུར་རོ༔ སྒོམ་པ་ཐུགས་ཀྱི་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་འཇའ་ཤེལ་གཏད་ལ༔ ཧཱུྃ༔ ལྷུན་གྲུབ་བདེ་ཆེན་ཡོངས་རྫོགས་ཀློང་༔ དྲི་མེད་འཇའ་ཤེལ་འདི་གཏད་པས༔ རྡོ་རྗེ་ཚིག་གི་དབང་ཐོབ་ནས༔ འཆི་མེད་རྡོ་རྗེའི་སྲོག་ཐོབ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཧྲཱི༔ དེ་ནས་གཏོར་མ་ཐོགས་ལ༔ ཧཱུྃ༔ སྒྲུབ་པའི་དལ་རྫོགས་གཏོར་མ་འདི༔ སྐལ་ལྡན་བུ་ལ་གཏད་པ་ཡིས༔ འཆི་མེད་མགོན་པོའི་དཀྱིལ་འཁོར་ལྷ༔ བསྒྲུབ་པའི་དབང་མཆོག་ཐོབ་པར་ཤོག༔ རྩ་སྔགས་མཐར༔ ཀཱ་ཡ་ཝཱཀ་ཙིཏྟ་བ་ལིཾ་ཏ་ཨ་བྷི་ཥིཉྩ་ཨཱཿདེ་ནས་མཐའ་བརྟེན་གཏད་ལ་བཀྲ་ཤིས་བརྗོད༔ དབང་འདི་ཐོབ་ནས་ཉམས་ལེན་ན༔ ཚེ་ཟད་པ་ཡང་ཕྱིར་ནུར་ཏེ༔ བར་ཆད་གཡུལ་ལས་རྣམ་པར་རྒྱལ༔ ཐེ་ཚོམ་མེད་དོ་རྡོ་རྗེའི་ཚིག༔ བཀའ་སྲུང་ཁྱབ་འཇུག་ཆེན་པོས་སྲུངས༔ བཀའ་དང་དམ་ཚིག་གཉན་གྱི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་དབང་ཆེན་གསུང་གི་རྡོ་རྗེའོ། །དགེའོ། །དགེའོ། །དགེའོ།། །།}}
</onlyinclude>
{{TsagliCall}}
<headertabs/>