View source for TTDL-ZABTER-16-MA-028

{{Text
|classification=Tibetan Publications
|subclass=Tibetan Texts
|fulltitletib=ཟབ་གསང་མཁའ་འགྲོའི་སྙིང་ཐིག་གི་སྔོན་འགྲོའི་ངག་འདོན་དང་མཐུན་པའི་ཁྲིད༔ དག་སྣང་ཡེ་ཤེས་དྲྭ་བ་དང་འབྲེལ་བའི་ཡན་ལག་བཅུ་པ་བྱིན་རླབས་དངོས་གྲུབ་ཀྱི་བང་མཛོད༔
|fulltitle=zab gsang mkha' 'gro'i snying thig gi sngon 'gro'i ngag 'don dang mthun pa'i khrid: dag snang ye shes drwa ba dang 'brel ba'i yan lag bcu pa byin rlabs dngos grub kyi bang mdzod:
|citation=Khrag 'thung [[Bdud 'joms gling pa]]. ''Zab gsang mkha' 'gro'i snying thig gi sngon 'gro'i ngag 'don dang mthun pa'i khrid dag snang ye shes drwa ba dang 'brel ba'i yan lag bcu pa byin rlabs dngos grub kyi bang mdzod''. In ''Sprul pa'i gter chen bdud 'joms gling pa'i zab gter gsang ba'i chos sde'', Vol. 16: 95-195. Thimphu, Bhutan: Lama Kuenzang Wangdue, 2004.
|collectiontitletib=བདུད་འཇོམས་གླིང་པ་ཟབ་གཏེར།
|collectiontitle=bdud 'joms gling pa zab gter
|author=bdud 'joms gling pa
|sourcerevealer=bdud 'joms gling pa
|tibgenre=Contemplative Guide Books and Instructional Manuals - khrid yig, Preliminary Practices - sngon 'gro
|terma=Yes
|cycle=zab gsang mkha' 'gro'i snying thig
|cycletib=ཟབ་གསང་མཁའ་འགྲོའི་སྙིང་ཐིག་
|language=Tibetan
|volumenumber=16
|volnumtib=༡༦
|volyigtib=མ
|totalvolumes=21
|textnuminvol=028
|pagenumbers=95-195
|totalpages=101
|beginfolioline=1a1
|endfolioline=51a6
|totalfolios=51
|multivolumework=No
|rectonotes=sngon khrid
|versonotes=bdud 'joms zab gter
|colophontib=ཞེས་པ་འདི་ཡང་ས་གཏེར་སྔོན་འགྲོའི་ངག་འདོན་དང་མཐུན་པའི་ཁྲིད་བྱིན་རླབས་དངོས་གྲུབ་ཀྱི་བང་མཛོད་ཅེས་བྱ་བ་འདི་ཉིད་རང་ལོ་ཉེར་ལྔའི་དུས་སུ་ཨོ་རྒྱན་མཚོ་སྐྱེས་རྡོ་རྗེས་རང་གི་ཡིག་རྩིས་སློབ་པའི་སློབ་དཔོན་དུ་སྤྲུལ་ནས་གསུངས་པ་ལ་བརྟེན་ནས། ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་ཏེ་མཐར་སློབ་བུ་མཆོག་རབ་དང་ཀློང་ཆེན་གཉིས་ཀྱིས་ནན་དུ་བསྐུལ་ངོར་ལི་སྟོད་སྐལ་བཟང་དགོན་ནས་གཏན་ལ་ཕབ་པ་དུས་གསུམ་ཀུན་ཏུ་དགེ་བར་གྱུར་ཅིག །ཡི་གེ་པའང་བཙུན་པ་ཀློང་ཆེན་གྱིས་བགྱིས་པའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
|colophonwylie=zhes pa 'di yang sa gter sngon 'gro'i ngag 'don dang mthun pa'i khrid byin rlabs dngos grub kyi bang mdzod ces bya ba 'di nyid rang lo nyer lnga'i dus su o rgyan mtsho skyes rdo rjes rang gi yig rtsis slob pa'i slob dpon du sprul nas gsungs pa la brten nas/_khrag 'thung bdud 'joms rdo rje khro lod rtsal gyis chos nyid nam mkha'i klong mdzod las bsgyur te mthar slob bu mchog rab dang klong chen gnyis kyis nan du bskul ngor li stod skal bzang dgon nas gtan la phab pa dus gsum kun tu dge bar gyur cig_/yi ge pa'ang btsun pa klong chen gyis bgyis pa'o/_/dge'o/_/dge'o/_/dge'o/_/legs so/_/sarba mang+ga laM//
|pdflink=File:TTDL-ZABTER-16-MA-028.pdf
|authortib=བདུད་འཇོམས་གླིང་པ་
|sourcerevealertib=བདུད་འཇོམས་གླིང་པ་
|volumeLetter=MA
|InitCategories=Dudjom Tersar Project; TTDL-ZABTER-Volume-16-MA
}}
<h1>Tibetan Text</h1>
<onlyinclude>
{{TibP|༁ྃ༔   ཟབ་གསང་མཁའ་འགྲོའི་སྙིང་ཐིག་གི་སྔོན་འགྲོའི་ངག་འདོན་དང་མཐུན་པའི་ཁྲིད༔ དག་སྣང་ཡེ་ཤེས་དྲྭ་བ་དང་འབྲེལ་བའི་ཡན་ལག་བཅུ་པ་བྱིན་རླབས་དངོས་གྲུབ་ཀྱི་བང་མཛོད་ཅེས་བྱ་བ་བཞུགས་སོ༔ 


༁ྃ༔   ན་མོ་གུ་རུ་པདྨ་ཀ་ར་ཡེ༔ མ་འོངས་པདྨའི་བརྒྱུད་འཛིན་རྣམས༔ ཐར་པ་དོན་དུ་གཉེར་བ་ཡིས༔ ཟབ་ལམ་ཉམས་སུ་ལེན་པ་ལ༔ དང་པོ་སྔོན་དུ་འགྲོ་བ་ཡི༔ གདམས་པ་འདི་དག་ཉམས་ལེན་གནད༔ ལམ་རྣམས་ཀུན་གྱི་མིག་ལྟ་བུ༔ ཕྱི་ནང་བར་ཆད་གེགས་སེལ་ཞིང་༔ གདམས་ངག་ཀུན་གྱི་སྣོད་རུང་བྱེད༔ དེ་ཕྱིར་འདི་ལ་བརྩོན་པ་གནད༔ ས་མ་ཡ༔ དེ་ནས་སོ་སོ་རང་རང་གི་མདུན་གྱི་ནམ་མཁར་པདྨ་དང་ཉི་ཟླའི་གདན་སུམ་བརྩེགས་ཀྱི་སྟེང་དུ་རྩ་བའི་བླ་མ་དང་གཉིས་སུ་མེད་པའི་ངོ་བོ་ལ་རྣམ་པ་དཔལ་ཨོ་རྒྱན་མཚོ་སྐྱེས་རྡོ་རྗེ་སྐུ་མདོག་མཐིང་ནག་ཞི་འཛུམ་མཚན་དཔེའི་ལང་ཚོས་མཛེས་པ༔ གཞོན་ནུ་ལོ་བརྒྱད་ལོན་པའི་ན་ཚོད་ཅན༔ ཕྱག་གཉིས་རྡོ་རྗེ་དང་དྲིལ་བུ་བསྣོལ་ཐབས་སུ་འཛིན་པ༔ ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་༔ ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་པ་འོད་དང་འོད་ཟེར་རབ་ཏུ་འབར་ཞིང་འཕྲོ་བ་ལ༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ནས་རང་ཅག་ལ་ཞལ་གྱིས་ཕྱོགས༔ སྤྱན་གྱིས་གཟིགས༔ ཐུགས་བརྩེ་ཐུགས་རྗེ་ཆེན་པོ་དང་ལྡན་པའི་སྒོ་ནས་བཞུགས་པར་མོས་ལ༔ དེའི་མདུན་དུ་རང་ཅག་གི་ཡིད་ཁྱེད་ཤེས་ཀྱི་དད་པ་དང་མོས་གུས་དྲག་པོའི་སྒོ་ནས་བློ་སྙིང་བྲང་གསུམ་ལིང་གིས་བཀལ་ཏེ༔ ན་མོ༔ དུས་གསུམ་རྒྱལ་དང་རྒྱལ་སྲས་ཐམས་ཅད་ཀྱི༔ སྤྱི་གཟུགས་མཁྱེན་བརྩེ་ནུས་པའི་བདག་ཉིད་དཔལ༔ གཏན་གྱི་སྐྱབས་གཅིག་དྲིན་ཆེན་བླ་མ་རྗེ༔ མི་འབྲལ་སྤྱི་གཙུག་བདེ་ཆེན་འཁོར་ལོར་བཞུགས༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ས་མ་ཡ༔ དང་པོ་ཐུན་མོང་ཕྱིའི་སྔོན་འགྲོ་བློ་ལྡོག་རྣམ་པ་བཞིའི་ཐོག་མར༔ དལ་འབྱོར་རྙེད་པར་དཀའ་བ་ལ་བསམ་པ་ནི༔ དལ་འབྱོར་བཅོ་བརྒྱད་ཚང་བའི་མི་ལུས་རིན་པོ་ཆེའི་ཡོན་ཏན་དྲན་པར་བྱ་བ་ལ༔ དལ་འབྱོར་རང་གི་ངོ་བོ་ཤེས་པར་བྱ་བ་ནི༔ དལ་ཞེས་པའི་དོན་ནི་དལ་བ་བརྒྱད་ཡིན་ཏེ༔ དེ་ལ་ཕྱིའི་མི་ཁོམ་པ་བཞི་དང་༔ ནང་གི་མི་ཁོམ་པ་བཞི་ཡོད་པ་ལས༔ དང་པོ་ཕྱིའི་མི་ཁོམ་པ་བཞི་ནི༔ དམྱལ་བ་ལ་སྐྱེས་ན་ཚ་གྲང་གི་སྡུག་བསྔལ་འཁོར་མོར་སྤྱོད་པས་དལ་ཁོམ་མེད་པ་དང་༔ ཡི་དྭགས་ཀྱི་གནས་སུ་སྐྱེས་ན་བཀྲེས་སྐོམ་གྱི་སྡུག་བསྔལ་དྲག་པོས་རྟག་ཏུ་གདུངས་པས་དལ་ཁོམ་མེད་པ་དང་༔ དུད་འགྲོ་རུ་སྐྱེས་ན་བླུན་རྨོངས་ཀྱི་མུན་པ་ཆེན་པོའི་མལ་དུ་དུབ་པས་དལ་ཁོམ་མེད་པ་དང་༔ ལྷ་ཚེ་རིང་པོ་རྣམས་སུ་སྐྱེས་ན་ཆོས་བྱེད་པའི་འདུ་ཤེས་མེད་པས་མི་ཁོམ་པ་སྟེ༔ དེ་དག་གང་དུའང་མ་སྐྱེས་པར་མི་ལུས་ཐོབ་པ་ནི་དལ་བའོ༔ ནང་གི་མི་ཁོམ་པ་བཞི་ནི༔ གལ་ཏེ་མི་ལུས་ཐོབ་ཀྱང་དེའི་ནང་ནའང་མི་ཁོམ་པ་འདི་ལྟ་སྟེ༔ ཀླ་ཀློར་སྐྱེས་ན་སངས་རྒྱས་ཀྱི་བསྟན་པ་ལ་མི་དད་པས་མི་ཁོམ་པ་དང་༔ ལོག་ལྟ་ཅན་དུ་སྐྱེས་ན་ཆོས་དང་གང་ཟག་ལ་རྒྱབ་ཀྱིས་ཕྱོགས་པས་མི་ཁོམ་པ་དང་༔ སངས་རྒྱས་ཀྱི་བསྟན་པ་མེད་པའི་ལུས་མཐའ་འཁོབ་ཏུ་སྐྱེས་ན་ཆོས་ཀྱི་སྒྲ་ཙམ་ཡང་མེད་པས་མི་ཁོམ་པ་དང་༔ ལྐུག་པ་རུ་སྐྱེས་ན་ཚིག་དོན་གྱི་བརྡ་འཕྲོད་པའི་ནུས་པ་མེད་པས་མི་ཁོམ་པ་སྟེ༔ བརྒྱད་པོ་གང་དུའང་མ་གྱུར་བ་ལ་དལ་བའི་ཡོན་ཏན་བརྒྱད་ཐོབ་པ་ཡིན་པས་དལ་བ་ཞེས་བྱའོ༔ འབྱོར་པ་ཞེས་པ་ལའང་བཅུ་ཡོད་དེ༔ དེ་ཡང་རང་ངོ་ལ་ལྟོས་པའི་འབྱོར་པ་ལྔ་དང་༔ གཞན་ཡུལ་ལ་ལྟོས་པའི་འབྱོར་བ་ལྔ་ཡོད་དེ༔ རང་འབྱོར་ལྔ་ནི༔ མི་ལུས་མ་ཐོབ་ན་ཆོས་དང་མི་མཇལ་བ་ལས༔ ད་རེས་མི་ལུས་རྟེན་གྱི་འབྱོར་པ་ཐོབ་པ་དང་༔ ཡུལ་གྱི་དབུས་སུ་མ་སྐྱེས་ན་ཆོས་མི་དར་བ་ལས༔ ད་རེས་ཆོས་ཚིག་གི་ཡུལ་དབུས་སུ་སྐྱེས་པས་སྐྱེ་གནས་ཀྱི་འབྱོར་བ་ཐོབ་པ་དང་༔ དབང་པོ་མ་ཚང་ན་ཆོས་ཀྱི་སྣོད་དུ་མི་རུང་བས་ད་ལྟ་དབང་པོ་ཐམས་ཅད་ཚང་བས་དབང་པོ་སྣོད་ཀྱི་འབྱོར་བ་ཐོབ་པ་དང་༔ ལས་ཀྱི་མཐའ་ལོག་པའི་ཁོལ་པོ་ཁོལ་མི་དག་ནི་རང་དབང་བརྟན་པ་དང་བྲལ་ན༔ མི་ཕལ་པ་དག་ཆོས་ལ་འཇུག་པའི་བློ་སྐད་ཅིག་ཙམ་ཡང་མི་སྐྱེ་བ་དང་༔ སྒོ་གསུམ་ཆོས་ལམ་ལས་ལོག་ནས་མི་ནག་སྐྱེ་བོའི་གྲལ་དུ་སྙོགས་པ་དག་ནི་སྐལ་པ་དམན་ཅིང་བདུད་ཀྱིས་རྒྱུད་བསླུས་པ་ཡིན་ཏེ༔ དེ་ལྟར་མ་གྱུར་བར་ད་ལྟ་ལས་ཀྱི་མཐའ་མ་ལོག་པར་ཆོས་ལ་དད་ཅིང་རང་དབང་ཐོབ་པ་ལས་འཕྲོ་བཟང་པོའི་འབྱོར་བ་ཐོབ་པ་དང་༔ དད་པའི་གནས་ཕྱིན་ཅི་ལོག་པའི་ཡུལ་ངན་ཀླ་ཀློ་དང་མུ་སྟེགས་སོགས་ལ་མི་དད་ཅིང་༔ དད་ནས་མི་བསླུ་བའི་བསྟན་པ་ཁྱད་པར་ཅན་དཀོན་མཆོག་གསུམ་ལ་དད་པ་ནི་དད་པའི་ནོར་གྱི་འབྱོར་བ་སྟེ༔ ལྔ་པོ་ནི་རང་ངོས་ལ་ཚང་བ་དང་༔ གཞན་ཡུལ་ལ་ལྟོས་པའི་འབྱོར་བ་ལྔ་ནི༔ སངས་རྒྱས་འཇིག་རྟེན་དུ་མ་བྱོན་ན་ཆོས་མི་དར་བ་ལས༔ ད་རེས་སྟོན་པ་བླ་ན་མེད་པ་རྫོགས་པའི་སངས་རྒྱས་རིན་པོ་ཆེ་འཇིག་རྟེན་གྱི་ཁམས་འདིར་བྱོན་པའི་དུས་ལ་ཐུག་པས་སྟོན་པ་ཁྱད་པར་ཅན་གྱི་འབྱོར་པ་དང་༔ སངས་རྒྱས་བྱོན་ཀྱང་ཆོས་མ་གསུངས་ན་མི་ཕན་པ་ལས༔ ད་རེས་སྐྱེས་བུ་གསུམ་གྱི་འཇུག་སྒོ་སོ་སོར་བསྟན་པའི་ལམ་ཟབ་མོའི་འབྱོར་བ་དང་༔ རྒྱལ་བའི་བསྟན་པ་རིན་པོ་ཆེ་བྱོན་ཡང་ནུབ་པའི་དུས་དང་འཕྲད་ན་མི་ཕན་པ་ལས༔ ད་རེས་བསྟན་པ་མ་ནུབ་པར་གནས་པའི་སྐབས་ལ་ཐུག་པའི་བསྟན་པ་རིན་པོ་ཆེའི་འབྱོར་བ་དང་༔ སངས་རྒྱས་ཀྱི་བསྟན་པ་ཡོད་ཀྱང་རང་ནི་དེའི་སྒོ་རུ་མ་ཞུགས་ན་མི་ཕན་པ་ལས༔ ད་ལྟ་རང་ཡང་བསྟན་པའི་སྒོ་རུ་ཞུགས་སུ་ཟིན་པ་རང་གི་སྐལ་པའི་འབྱོར་བ་དང་༔ བསྟན་པ་ལ་འཇུག་སེམས་ཡོད་ཀྱང་བླ་མ་དགེ་བའི་བཤེས་གཉེན་དང་མ་འཕྲད་ན་ཆོས་ཀྱི་དེ་ཉིད་མི་ཤེས་པ་ལས༔ ད་རེས་དགེ་བའི་བཤེས་གཉེན་བཟང་པོ་དང་འཕྲད་ཅིང་རང་ཉིད་རྗེས་སུ་བཟུང་བ་བླ་མ་དམ་པའི་འབྱོར་པ་སྟེ་འབྱོར་པ་བཅུ་ཞེས་བྱའོ༔ དེ་དག་གཅིག་ཆར་དུ་རྫོགས་པ་ལ་དལ་འབྱོར་གྱི་མི་ལུས་རིན་པོ་ཆེར་གྲགས་པ་སྟེ༔ གཏན་དུ་བདེ་བའི་དངོས་གྲུབ་ཀྱི་འབྱུང་གནས་སུ་གྱུར་པ་ཡིད་བཞིན་གྱི་ནོར་བུ་ལྟ་བུའོ༔ དེ་དག་གི་གཅིག་ཤོས་ཙམ་མ་ཚང་ཡང་མི་ལུས་སུ་སྣང་ཙམ་པ་ལས་དལ་འབྱོར་གྱི་མི་ལུས་ཞེས་འབོད་དུ་མི་རུང་ངོ་༔ དེ་ལྟ་བུའི་མི་ལུས་རིན་པོ་ཆེ་འདི་སྔོན་དགེ་བ་བཟང་པོ་ཞིག་གི་འབྲས་བུ་ཡིན་ཏེ་ལྷ་བས་ལྷག་པའི་ལུས་རྟེན་བཟང་པོ་འདི་མཐོ་རིས་གསུམ་གྱི་མཆོག་ཏུ་གྱུར་བ་ཡིན༔ ད་ལྟ་སྤྱིར་འགྲོ་བ་རིགས་དྲུག་གི་ནང་མི་ལུས་རིན་པོ་ཆེ་ཐོབ་ཚད་ཀྱི་སྐྱེ་འགྲོ་འདི་དག་གིས་རྒྱུ་མི་དགེ་བ་ཁོ་ན་ལ་སྤྱོད་པའི་འབྲས་བུ་ངན་འགྲོ་ཤ་སྟག་ཏུ་འགྲོ་བ་ལས་མེད་པ་ལ་བློས་གཞིག་པར་བྱ་བ་དང་༔ རང་གིས་ད་ལྟ་མི་ལུས་རིན་པོ་ཆེ་འདི་ལ་བརྟེན་ནས་ཐར་པ་དོན་དུ་གཉེར་བ་ཞིག་མ་བྱས་ན་དལ་འབྱོར་གྱི་མི་ལུས་ནི་ཡང་ཡང་རྙེད་པར་མི་འགྱུར་ཞིང་༔ གལ་སྲིད་ད་རེས་རྒྱུ་དགེ་བ་ལ་བརྩོན་ནས་ཕྱི་མར་འབྲས་བུ་མི་ལུས་ཞིག་ཐོབ་སྲིད་ནའང་དེའི་རིང་ལ་དགེ་མི་དགེའི་ལས་ཅི་བྱེད་ཆ་མི་ཆོད་པས་ཐར་ལམ་ཐོབ་པ་དཀའ་མོད༔ ཅིས་ཕྱིར་མི་ལུས་དཀོན་ན་རྒྱུ་དགེ་བ་ལས་འབྲས་བུ་མི་ལུས་བསྐྱེད་པའི་ཕྱིར༔ རྒྱུ་དགེ་བ་ལ་བརྩོན་པའི་སེམས་ཅན་ཤིན་ཏུ་དཀོན་པས་ན་འབྲས་བུ་མི་ལུས་ཀྱང་ཤིན་ཏུ་དཀོན་པར་ཤེས་པར་བྱའོ༔ དལ་འབྱོར་གྱི་མི་ལུས་ནི་དཔེར་ན་རིན་པོ་ཆེ་ཐམས་ཅད་ལས་ཆེས་ཆེར་དཀོན་པའི་ཡིད་བཞིན་གྱི་ནོར་བུ་ལྟ་བུར་བསོད་ནམས་དང་དབང་ཐང་འཛོམ་པའི་འཁོར་ལོས་སྒྱུར་བའི་རྒྱལ་པོ་ལས་མི་རྙེད་པ་ལྟར༔ མི་ལུས་ཀྱང་སྔོན་བསགས་ལས་འཕྲོ་བསོད་ནམས་དུས་འཛོམ་པ་མ་གཏོགས་གང་རུང་རུང་གི་སེམས་ཅན་ཕལ་གྱིས་ཐོབ་པ་མ་ཡིན་པའི་ཚུལ་ལ་བློས་གཞིག་པར་གྱིས་ཤིག༔ ལར་འགྲོ་བ་རིགས་དྲུག་སྤྱིའི་གྲངས་ལ་བསམ་ནས་མི་ལུས་དཀོན་ཚུལ་དང་༔ སྒོས་སུ་མཐོང་ཚོར་གྱི་བྱ་ཁྱི་དང་རི་དྭགས་དང་༔ གཡུང་དྭགས་འབུ་སྲིན་ཡན་ཆད་ཀྱི་གྲངས་དང་རིམ་པ་ལ་བསམ་མནོ་བཏང་ནས་མི་ལུས་དཀོན་ཚུལ་དང་༔ མི་ལུས་ཐོབ་པའི་ནང་ནའང་དལ་འབྱོར་ཐོབ་པ་ཤིན་ཏུ་དཀོན་པ་ལ་བརྟག་ཅིང་དཔྱད་ནས་བློ་སྦྱང་བ་ལ་འབད་པར་བྱ་བ་གནད་ཀྱི་ཡང་ཟབ་དམ་པ་ཡིན་ཏེ་ཤེས་པར་བྱའོ༔ སྔོན་བྱོན་གྱི་སངས་རྒྱས་རྣམས་དང་རིག་འཛིན་གྲུབ་ཐོབ་དམ་པ་དེ་དག་ཀྱང་མི་ལུས་རིན་པོ་ཆེ་འདི་ལ་བརྟེན་ནས་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ལ་གཤེགས་པ་ཤ་སྟག་སྟེ༔ འདི་ལས་ལྷག་པའི་སངས་རྒྱས་བསྒྲུབ་པའི་རྟེན་ཁྱད་པར་ཅན་ནི་གནས་རིགས་གང་ནའང་མེད་དེ་ཡོན་ཏན་དྲན་པར་བྱའོ༔ ད་རེས་དལ་འབྱོར་གྱི་ལུས་རྟེན་ཁྱད་པར་ཅན་འདིས་རང་ལ་ཐར་པའི་ལམ་སྣ་ཞིག་ཟིན་པར་མ་བྱས་ན་དབུལ་པོས་ཡིད་བཞིན་གྱི་ནོར་བུ་ར་གན་ལ་བརྗེ་བ་དང་འདྲ་མཚུངས་པ་དང་༔ མི་ཚེ་སྟོང་ཟད་ལ་གཏོང་བའི་མི་དེའི་ཁོང་པའི་ནང་དུ་དོན་སྙིང་མེད་པ་དང་འདྲ་སྟེ༔ མི་ཚེ་འདི་ལ་བདེ་སྐྱིད་ཅི་ཙམ་ཡོད་ཀྱང་མི་ལུས་སོས་དལ་དུ་རྒ་བའི་མདོ་མེད་རྣམས་ནི་སྡུག་བསྔལ་རིན་གྱིས་ཉོ་བའི་ལས་ངན་ཡིན་པས༔ ད་རེས་དལ་འབྱོར་དོན་ཡོད་པ་ཞིག་བྱེད་དགོས་སྙམ་པའི་བློ་དང་མི་འབྲལ་བ་ནི་གནད་ཀྱི་ཡང་གཅེས་དམ་པ་ཡིན་ཏེ་ཤེས་པར་གྱིས་ཤིག༔ དེ་དོན་ཡིད་ལ་བསྒོམ་ཞིང་དལ་འབྱོར་དོན་ཡོད་པ་ཞིག་འགྲུབ་པར་བླ་མ་ལ་གསོལ་བ་འདེབས་པ་ནི༔ དལ་འབྱོར་འདི་ནི་ཤིན་ཏུ་རྙེད་པར་དཀའ༔ མི་ལུས་དོན་ལྡན་སྙིང་པོ་ལོན་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཞེས་པའི་དོན་བློ་ལ་བསྒོམ་ཞིང་ཚིག་ཁ་ཏོན་དུ་བརྗོད་པར་བྱའོ༔ གཉིས་པ་ཚེ་མི་རྟག་པར་འཆི་བ་ལ་བསམ་པ་ནི༔ དལ་འབྱོར་གྱི་མི་ལུས་ཐོབ་ཟིན་གྱིས་དེ་ཙམ་གྱི་ཆོག་བསམ་ནའང་མི་ཚེ་འདི་ཉིད་རྨི་ལམ་གྱི་སྣང་བ་ཙམ་ལས་སོ་ཟིན་མེད་པར་འཆི་ངེས་པ་ཅན་ཡིན་ཏེ༔ ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་ལ་ཁྱོན་ཡངས་པ༔ ནང་གཡོ་བ་བཅུད་ཀྱི་སེམས་ཅན་གྲངས་མང་ཞིང་འཕེལ་ཁ་ཆེ་བར་ཡོད་ཀྱང་འདི་ཡང་མི་རྟག་སྟེ༔ མཐར་བསྐལ་བ་འཇིག་པའི་དུས་སུ༔ དང་པོ་བཅུད་ཀྱི་སེམས་ཅན་ཐམས་ཅད་སྔ་མ་ཤི་སྟེ་ཕྱི་མ་མི་འབྱུང་ཞིང་མཐར་ས་སྟེང་འདི་རུ་སེམས་ཅན་གཅིག་ཀྱང་མེད་པར་ཡུན་རིང་དུ་གནས་མཐར༔ ཉི་མ་དཔག་ཚད་བདུན་དུ་བབ་པའི་རིམ་པ་རེ་རེ་བཞིན་དུ་དངོས་པོ་ཕྲན་བུ་ནས་རིམ་བཞིན་བསྲེགས་ཏེ་ས་རྡོ་རི་བྲག་ཐམས་ཅད་མེའི་རང་བཞིན་དུ་འབར་ཞིང་ཚིག་ནས་བསམ་གཏན་དང་པོའི་ལྷ་གནས་མན་ཆད་ཐལ་བ་ཙམ་ཡང་མེད་པར་འགྱུར་བ༔ སླར་ཡང་ཆགས་ནས་དེ་ལྟར་ལན་བདུན་རེའི་མཐར་ཆུ་ཡིས་ཞིག་ཚེ་བསམ་གཏན་གཉིས་པའི་ལྷ་གནས་མན་ཆད་ལན་ཚྭ་ཆུ་རུ་ཞུ་བ་ལྟ་བུ་ལན་བདུན་དུ་བྱུང་མཐར་རླུང་གིས་འཇིག་པའི་ཚེ་བསམ་གཏན་གསུམ་པའི་ལྷ་གནས་མན་ཆད་ཞིག་ནས་ཐམས་ཅད་ནམ་མཁའ་སྟོང་པ་གཅིག་ཏུ་འགྱུར་བའི་སྐབས་འབྱུང་ངེས་པ་ཅན་ཡིན་ཏེ༔ བརྟན་གཡོའི་ཁམས་འདི་ལྟ་བུ་ཡང་དེ་ལྟར་མི་རྟག་ན་རང་ལུས་ཆུའི་ལྦུ་བ་ལྟ་བུའམ་མེ་ཏོག་ལྟ་བུ་རྐྱེན་གྱིས་འཇིག་སླ་བ་འདི་ལ་ལྟ་ཅི་སྨོས་བསམ་ཞིང་བློ་སྦྱོང་བ་དང་༔ གཞན་ཡང་སྔོན་བྱོན་གྱི་སངས་རྒྱས་མཚན་དང་དཔེ་བྱད་ཀྱིས་བརྒྱན་པའི་རྡོ་རྗེའི་སྐུ་རྣམས་ཀྱང་མི་རྟག་པར་མྱ་ངན་ལས་འདའ་བས་ན་རང་ཅག་ལ་ལྟ་ཅི་སྨོས་བསམ་པ་དང་༔ དེ་འོག་ལྷ་དང་དྲང་སྲོང་ཚངས་པ་བརྒྱ་བྱིན་ལ་སོགས་བསོད་ནམས་དང་ཏིང་ངེ་འཛིན་གྲུབ་པ་དཔལ་དང་སྟོབས་དབང་གི་བདག་ཉིད་རྣམས་ཀྱང་མི་རྟག་ན་རང་ལ་སྨོས་ཅི་དགོས་བསམ་པ་དང་༔ དེ་འོག་འཁོར་ལོས་སྒྱུར་རྒྱལ་རྣམས་དང་སྔོན་སྐྱེས་ཚད་ཀྱི་སྐྱེ་འགྲོ་ཐམས་ཅད་མ་ཤི་བ་གཅིག་ཀྱང་མེད་པས་རང་ཡང་འཆི་ངེས་པ་ཅན་ཏེ༔ དེ་འོག་རང་གི་ཡིད་ལ་དྲན་ཚུན་ཆད་ཀྱི་སེམས་ཅན་རྣམས་ཤི་བའི་གྲངས་དང་རིམ་པ་ལ་བསམ་ནས་ནམ་འཆི་ཆ་མེད་བསྒོམ༔ ལོ་མི་རྟག་པར་དབྱར་དགུན་གཉིས་སུ་འགྱུར་བ་དང་༔ ཟླ་བ་མི་རྟག་པར་དཀར་ནག་གཉིས་སུ་འགྱུར་བ་དང་༔ ཞག་མི་རྟག་པར་ཉིན་མཚན་གཉིས་ཀྱིས་འགྱུར་བ་དང་༔ ཉིན་མོ་མི་རྟག་པར་དུས་ཚིགས་གསུམ་གྱིས་འགྱུར་བ་རྣམས་ལ་བློས་གཞིག་ནས་རང་གི་ཚེ་མི་རྟག་པ་དྲན་པར་བྱའོ༔ ལར་སྐྱེས་ཙམ་ནས་ཤི་ལ་མ་ཐུག་གི་ཚེ་ནི་སྐད་ཅིག་ཙམ་ཡང་མི་སྡོད་པར་ཟད་པ་སྐྱེན་པོའི་མདའ་ལས་ཀྱང་མྱུར་བ་ཡིན་ཏེ༔ མཐོང་ཚོར་གྱི་སེམས་ཅན་འདི་དག་ཐམས་ཅད་ཀྱི་རང་རང་གི་ཚེ་ཟད་པ་དང་འཆི་དགོས་པའི་ཚུལ་རྒྱུས་མེད་པར་ལོང་བ་ཐང་སྟོང་དུ་མགོ་འཁོར་བ་ལྟ་བུ་རྣམས་ལ་ཞེ་ཁྲེལ་ཞིང་རང་གིས་མི་རྟག་པ་བསྒོམ༔ གཞན་ཡང་མི་ཚེ་སྟོང་ཟད་ལ་བཏང་ནས་མགོ་སྐྲ་དཀར་པོར་སོང་ཁ་ཡི་སོ་རྣམས་འཐོར༔ ལུས་ཀྱི་སྟོབས་ཉམས་ནས་ལངས་འདུག་མི་ཐུབ་པ་དག་ཀྱང་འཁོར་བ་བཟུང་ནས་ད་དུང་འཁོར་བའི་འདུག་ཆས་བསྒྲུབ་ཅིང་ལོ་ཚད་བཅུ་དང་བཅོ་ལྔའི་དུས་ལ་ཁ་ཚད་འདོམས་པ་རྣམས་ལ་བསམ་ནས་རང་གི་མི་རྟག་འཆི་བ་བརྗེད་ཀྱི་དོགས་པ་བསྐྱེད༔ དེ་ལས་ཀྱང་བད་ཀན་གྲེ་ཐོག་དང་ཕོ་འགགས་ལ་སོགས་པ་མི་ཤོར་བའི་ནད་དྲག་པོས་ཐེབས་པ་རྣམས་ཀྱིས་ཀྱང་ད་དུང་སང་ཕོད་དང་གནང་ཕོད་ལ་སོགས་པའི་ལོ་གྲངས་མང་པོའི་བྱ་སྤྱོད་ལ་ཁ་ཚད་འདོམས་པ་རྣམས་ལ་བསམ་ནས་འཆི་བ་བརྗེད་ཀྱི་དོགས་པ་བསྐྱེད་དགོས་པ་ཡིན་པས་གཟབ་པར་བྱ༔ མི་འགའ་རེས་མི་ཚེ་མང་པོར་ལོངས་སྤྱོད་པའི་བློ་སྣ་རིང་པོར་བསྐྱེད་ནས་ཟས་ནོར་གསོག་འཇོག་བྱེད་པ་ལ་དཀའ་ཚེགས་རྒྱ་ཆེན་པོར་སྤྱོད་ནས་ཡོད་པའི་སྐབས་ན་འཆི་བ་ཐོག་རྒྱུག་ཏུ་བྱུང་ནས་ལུས་ལོངས་སྤྱོད་ཐམས་ཅད་ཤུལ་དུ་བོར་ནས་ཡི་ཆད་སྐྱོ་དུང་ངེ་འཇིག་རྟེན་ཕ་རོལ་དུ་འགྲོ་ཞིང་༔ གཅེས་པར་བསྐྱངས་པའི་རོ་ནི་བྱ་ཁྱིར་གཏོང་ཞིང་ཟས་ནོར་ཐམས་ཅད་གཞན་གྱིས་ལོངས་སྤྱོད་པ་དེ་ཚོ་ལ་བསམ་ནས་འཆི་བ་མི་རྟག་པ་བསྒོམ་པར་བྱ༔ མི་འགའ་རེས་སྟོབས་རྒྱ་དང་ཐོབ་ཐང་ཆེན་པོར་བསྐྱེད་ནས་ལྷ་ལེ་ལོར་གཡེང་བ་ལྟ་བུར་མི་ཚེ་སྟོང་ཟད་ལ་སོང་ནས་མཐར་འཆི་བ་བྱུང་ཚེ་བདེ་སྐྱིད་དང་དཔལ་ལ་ཆགས་ནས་ཡི་མུག་ཅིང་ཞེ་འཁུམས་ཏེ་ཤི་མིག་གསོན་ལ་བལྟ་བའང་ཡོད་ཀྱི།དེར་བསམ་ནས་ཚེ་འདིའི་བྱ་བ་བསྒྲུབ་པ་དོན་མེད་དུ་ཤེས་ནས་སྤངས་དགོས༔ མི་འགའ་རེས་ཆེ་བ་དང་སྙན་གྲགས་ཀྱི་ཆེད་དུ་གཞན་ལ་འཐབ་རྩོད་དང་སྡང་བཅོམ་བྱེད་ཅིང་ཡོད་པའི་སྐབས་ན་གློ་བུར་གྱི་ནད་དང་རྐྱེན་དྲག་པོ་ཞིག་གིས་ཤི་ཚེ་ཁེ་རྒྱལ་དང་སྙན་གྲགས་ཐམས་ཅད་དུས་དེ་ཙམ་ནས་རྨི་ལམ་བཞིན་དུ་ཡལ་བ་བློས་གཞིག་ནས་འཆི་བ་མི་རྟག་པ་བསྒོམ༔ མི་ཚེ་ལ་ཚོད་ཟིན་ནི་མེད༔ ལ་ལ་ནི་སྐྱེས་ནས་ཞག་གཉིས་གསུམ་ཙམ་གྱིས་འཆི་བ་དང་༔ ལ་ལ་ནི་གཞོན་ནུའི་དུས་དང་༔ ལ་ལ་ནི་དར་ལ་བབ་པ་དང་༔ ལ་ལ་ནི་རྒས་ནས་འཆི་བ་ལ་སོགས་པ་ཚེ་ལ་ངེས་པ་མེད་པས་ནམ་འཆི་ཆ་མེད་ལ་བློ་སྦྱོང་༔ ལ་ལས་ནི་སྔོན་ཆད་ཁེ་རྒྱལ་དང་ལོངས་སྤྱོད་བསྒྲུབ་ཅིང་ཕྱིས་ཆོས་ཞིག་བསྒྲུབ་པར་འདོད་ཀྱང་འགྲུབ་དུས་མེད་པའི་ངང་དུ་དུས་ཟད་ནས་ཤི་ལ་ཐུག༔ ལ་ལས་ནི་ལོངས་སྤྱོད་བསགས་པ་དང་དགྲ་འདུལ་གཉེན་སྐྱོང་བྱེད་ཅིང་ནམ་ཞིག་གྲུབ་ཟིན་ནས་བདེ་སྐྱིད་དང་ལྡན་པའི་དུས་ཞིག་འོང་བར་རེ་ཞིང་འབད་པས་མི་ཚེ་གར་ཟད་དང་ནམ་ཟད་མེད་པར་འཆི་བའི་ནངས་པར་ལ་ཐུག་པའི་དུས་སུ་ཡང་དཔུང་ལས་དང་བྱ་བའི་འཕྲོ་མ་ཟད་པར་ཡོད་པ་ལ་བསམ་ནས་ནམ་འཆི་ཆ་མེད་བསྒོམ་པ་ལ་འབད་པར་བྱའོ༔ རང་གིའང་ད་ལྟ་ཕན་ཆད་ཀྱི་ཚེ་ནི་སྟོང་ཟད་ལ་སོང་ཞིང་ཉིན་མོ་རྣམས་སུ་རྣམ་གཡེང་དང་ལེ་ལོར་འབྱམས༔ མཚན་མོ་རྣམས་སུ་གཉིད་རོ་ཉལ་ལ་དུས་འདའ་བ་ཡིན༔ ད་སྔོན་མི་ཚེ་འདི་ལ་ལོ་གྲངས་ཟླ་ཞག་གྲངས་མང་པོ་ཐལ་ཟིན་ཡང་སྐད་ཅིག་ཙམ་གྱི་ཡུན་དང་སྣང་བ་ནི་མ་སྐྱེས༔ ད་དུང་ཡང་ལོ་བརྒྱ་ཐུབ་ཀྱང་ཤི་བའི་ཚེ་ན་ས་སྟེང་མིག་གིས་མཐོང་ཙམ་ལས་ནི་མི་སྐྱེ༔ མདོ་མེད་ཀྱི་བྱ་བ་གྲུབ་ཟིན་མེད་པ་འདིའི་འཕྲོ་བཅད་ནས་འཆི་ཆོས་གཤའ་མ་ཞིག་མི་བྱེད་རེ་སྙམ་ནས་བློ་སྣ་བསྟུངས༔ དུས་དང་རྣམ་པ་ཀུན་ཏུ་ངས་མི་ཚེ་ནི་ཟད་སོང་ད་ནི་འཆི་བའི་དུས་ལ་བབ་པའོ༔ ཉེ་འབྲེལ་དང་རྩ་ལག་དག་གིས་ཕན་ནི་མི་ཐོགས༔ རྗེས་སུ་ཡང་མི་འབྲང་༔ ད་ཤི་ནས་ཁོས་ཁྱིམ་མཚེས་ཞིག་ལ་སྐྱེས་ན་དེ་དུས་ཕན་ཚུན་གྱིས་ངོ་ནི་མི་ཤེས་ཤིང་གནོད་བྱེད་དུ་མཐོང་ནས་སྡང་ཡུལ་དུ་གྱུར་པ་ལ་ཆ་ཅི་ཡོད༔ ངས་ཀྱང་ཁོང་རྣམས་ལ་ཕན་སེམས་ཡོད་ཀྱང་རང་རང་གི་བསོད་ནམས་དང་ལས་ཀྱི་དབང་དུ་འགྲོ་བ་ལས་ཕན་ཐོགས་ཀྱང་མེད༔ ད་ནི་རང་གཞན་ཀུན་གྱི་དོན་དུ་ཆོས་ཟབ་མོ་ཞིག་བསྒྲུབ་ན་དེ་ནི་ཕན་ཐོགས་ངེས་པ་ཡིན་སྙམ་དུ་ཡང་ཡང་རྒྱུན་དུ་དྲན་པར་བྱའོ༔ ཟས་ཅི་ཟ་ཡང་འཇིག་རྟེན་འདིའི་ཟས་ཀྱི་ཐ་མའོ་སྙམ་དུ་འཆི་བ་དྲན་པར་བྱ༔ གོས་ཅི་གྱོན་ཡང་འཇིག་རྟེན་འདིའི་གོས་ཀྱི་ཐ་མའོ༔ བྱ་བྱེད་གང་གི་དུས་སུ་ཡང་འཇིག་རྟེན་འདིའི་སྤྱོད་ལམ་ཐམས་ཅད་ཀྱི་ཐ་མའོ༔ བསམ་ཞིང་བློ་སྦྱང་བ་ལ་འབད་པར་བྱའོ༔ མདོར་ན་དུས་དང་རྣམ་པ་ཀུན་ཏུ་ནམ་འཆི་ཆ་མེད་དེ་མི་ཚེ་འདི་ནི་རྨི་ལམ་གྱི་གནས་སྐབས་ཙམ་ལས་ཡུན་མི་རིང་སྟེ༔ ཟས་ལ་མང་ཉུང་མེད༔ གོས་ལ་བཟང་ངན་མེད༔ སྲོག་འཚོ་བ་ཙམ་དང་ལྷག་སྐྱོབ་ཙམ་གྱིས་ངེས་པར་ཆོག་པ་ཡིན༔ གལ་སྲིད་མ་ཤི་ནའང་ཐབས་ཆགས་མི་འོང་སྙམ་ནས་འདུས་བྱས་མི་རྟག་པ་བསྒོམ་པ་འདི་ལ་འབད་པར་གྱིས་ཤིག༔ རྣམ་གཡེང་དང་ལེ་ལོ་མེད་པར་མྱུར་དུ་སྲིད་པའི་ཕ་རོལ་ཏུ་བརྒལ་བའི་དུས་འདའ་བས་དལ་ཁོམ་མེད་པར་ཐར་པ་བསྒྲུབ༔ ལོ་དང་ཟླ་བའི་གསར་རྙིང་བརྗེ་བའི་དུས་སུ་ཡང་རང་གི་མི་ཚེ་ལ་ལོ་ཟླ་ཙམ་བསྟུང་བ་དྲན་ནས་རིག་པར་མཛོད༔ དེ་ལྟ་བུའི་འཆི་བ་ལ་བློ་སྦྱོང་བ་འདི་ནི་ངེས་པར་འབྱུང་བ་ཐམས་ཅད་ཀྱི་ངོ་བོ༔ བརྩོན་འགྲུས་དང་སྙིང་རུས་ཐམས་ཅད་ཀྱི་སྙིང་རྡོ༔ ཐར་པ་དང་རྣམ་མཁྱེན་གྱི་བསྐུལ་མ༔ ཡེ་ཤེས་ཡོན་ཏན་གྱི་འབྱུང་གནས༔ གདམས་ངག་ཐམས་ཅད་ཀྱི་སྣོད་མཆོག༔ དད་པ་དང་དམ་ཚིག་ཐམས་ཅད་ཀྱི་སྲོག་རྩ་ཡིན་པས་ཆོས་པ་ཐམས་ཅད་ཐ་མལ་ལས་ཁྱད་དུ་འཕགས་པའི་ཁྱད་ཆོས་གཅིག་པུ་དང་༔ ཆོས་ལམ་དུ་འཇུག་པའི་སྐྱེས་བུ་ཐམས་ཅད་ཀྱི་སྤྱི་ནོར་བླ་ན་མེད་ཅིང་གོང་ན་མ་མཆིས་པའོ༔ འཆི་བ་མི་རྟག་པའི་ཚུལ་འདི་རྒྱུད་ལ་མ་སྐྱེས་པ་དག་གིས་ཆོས་གང་བསྒྲུབ་ཀྱང་ཡུལ་རྐྱེན་གྱི་ཁ་རུ་འཆོར་ཞིང་༔ ལེ་ལོ་དང་རྣམ་གཡེང་གི་དབང་དུ་བསྒྱུར་སླ་སྟེ་ཆོས་ལམ་དུ་འགྲོ་བ་ནི་རི་བོང་གི་རྭ་དང་མོ་གཤམ་གྱི་བུ་ལྟ་བུའི་ཕྱོགས་སུ་ངེས་པ་ཡིན་ནོ༔ ཅིའི་ཕྱིར་ཞེ་ན༔ དཔེར་ན་རྒྱལ་པོ་ཆེན་པོའི་ཁྲིམས་ཀྱིས་བསྡམ་པའི་དམངས་རྣམས་ཀྱིས་ལས་གང་བཅོལ་ཀྱང་དེ་མ་འགྲུབ་ཀྱི་བར་དུ་གཞན་གང་ལའང་འཆུག་དབང་མེད་པ་ལྟ་བུར༔ འཆི་བ་འདི་རྒྱུད་ལ་ངེས་པར་སྐྱེས་ན་རྣམ་མཁྱེན་གྱི་ལམ་དུ་གྲོལ་བ་མ་ཐོབ་ཀྱི་བར་དུ་ཡུལ་རྐྱེན་དང་ལེ་ལོའི་དབང་དུ་མི་འགྱུར་བའི་ཆིངས་ཆེན་པོ་བླ་ན་མེད་པ་ཡིན་ནོ༔ དེ་དོན་ཡིད་ལ་བསམ་ཞིང་རྟག་ཏུ་རྒྱུད་ལ་འདྲེས་ངེས་པ་ཞིག་ཏུ་བླ་མ་ལ་གསོལ་བ་འདེབས་པ་ནི༔ ཚེ་འདིའི་སྣང་བ་རྨི་ལམ་གནས་སྐབས་ཙམ༔ མི་རྟག་འཆི་བ་སྙིང་ནས་དྲན་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཞེས་གསོལ་བ་སྙིང་ནས་གདབ་བོ༔ དོན་གསུམ་པ་འཁོར་བའི་སྡུག་བསྔལ་ལ་བསམ་པ་ནི༔ ལར་ལུས་འདི་བོར་མ་ཐག་ཏུ་སེམས་ནི་ཅང་མེད་དུ་མི་འགྲོ་སྟེ༔ སླར་ཡང་འགྲོ་བ་རིགས་དྲུག་གི་གནས་རིགས་གང་ཡང་རུང་བ་ཞིག་ཏུ་ལས་ཀྱི་དབང་གིས་འཕངས་ནས་སྡུག་བསྔལ་ལ་སྤྱོད་དགོས་ངེས་པ་ཅན་ཡིན་ཏེ༔ དེ་ལའང་སེམས་ཅན་ཀྱི་ལས་དབང་གིས་འཁོར་བའི་གནས་རིགས་དྲུག་ཏུ་ཡོད་པ་ལས༔ དང་པོ་དམྱལ་བ་ལའང་ཚ་དམྱལ་བརྒྱད་དང་གྲང་དམྱལ་བརྒྱད༔ ཉི་ཚེ་ཉེ་འཁོར་གཉིས་དང་བཅོ་བརྒྱད་ཡོད་ལ༔ ཚ་དམྱལ་བརྒྱད་པོའི་ཡུལ་སྤྱི་མཐུན་ལས་གཞི་ཐམས་ཅད་ལྕགས་བསྲེགས་མེ་འབར་བའི་ས་གཞི་དང་༔ བར་སྣང་ཐམས་ཅད་མེ་ལྕེའི་འཁོར་ལོའི་རང་བཞིན་ཅན་དུ་ཡོད་པ་ལས༔ ཐོག་མར་ཡང་སོས་ཞེས་བྱ་བ་ནི་མདག་མེ་འབར་བའི་ཀློང་དུ་དམྱལ་བའི་སེམས་ཅན་ཁ་ཆར་བབ་པ་ལྟར་ལས་རླུང་གིས་བསྡུས་པ་དེ་དག་ཐམས་ཅད་ཀྱི་གཅིག་གིས་གཅིག་མཐོང་ཚེ་དགྲ་མི་ཤ་བོ་མཐོང་བ་ལྟ་བུའི་ཞེ་སྡང་དྲག་པོ་སྐྱེས་ཏེ་སྐྱེས་ཙམ་ནས་ལས་ཀྱི་དབང་གིས་མཚོན་ཆ་རྣམ་པ་སྣ་ཚོགས་ལག་ཏུ་བབས་ནས་བརྡེག་རེས་བྱས་ཚེ་ཤ་ཁྲག་ཕྱེ་མར་འཐག་ཅིང་གཅིག་ཀྱང་མེད་པར་གྱུར་བའི་ཚེ་ནམ་མཁའ་ནས་ཡང་སོས་པར་གྱུར་ཅིག་ཅེས་པའི་སྒྲ་དེ་གྲགས་མ་ཐག་ཏུ་སྔར་བཞིན་དུ་སོས་ནས་དེ་ལྟར་རྟག་ཏུ་གོ་སྐབས་མེད་པར་སྤྱོད་པའི་སྡུག་བསྔལ་བརྣག་པར་དཀའ་བ་མྱོང་བའོ༔ ཚེའི་ཚད་ནི་མི་ལོ་ལྔ་བཅུ་ལ་ལྷ་རྒྱལ་ཆེན་བཞིའི་རིས་ཀྱི་ལྷའི་ཞག་གཅིག༔ དེ་ལྟར་ཞག་སུམ་ཅུ་ལ་ཟླ་བ་དང་༔ དེའི་ཟླ་བ་བཅུ་གཉིས་ལ་ལོ་གཅིག་ཏུ་བྱས་པའི་ལོ་ལྔ་བརྒྱ་ལྷའི་ཚེ་ཚད༔ དེ་དམྱལ་བ་ཡང་སོས་པས་ཞག་གཅིག་ཏུ་བྱས་པས་རང་ལོ་ལྔ་བརྒྱ་རུ་སྡུག་བསྔལ་དེ་ལ་སྤྱོད་དགོས་པ་ཡིན་ནོ༔ གཉིས་པ་ཐིག་ནག་ཞེས་བྱ་བ་ནི༔ ལྕགས་བསྲེགས་ཀྱི་ས་གཞིར་སེམས་ཅན་རྣམས་ཀྱི་ལུས་ཤིང་ལྟར་བརྒྱངས་བ་ལ་དམྱལ་མི་ལས་མཁན་རྣམས་ཀྱིས་ཐིག་བཞི་ནས་བརྒྱད་དང་༔ དེའི་མཚམས་སུ་ཡང་བརྒྱད་དུ་གདབ་པས་བཅུ་དྲུག་དང་༔ དེ་དག་གི་མཚམས་སུ་བཅུ་དྲུག་བཏབ་པས་སུམ་ཅུ་རྩ་གཉིས་ཀྱི་བར་དུ་བཏབ་ཅིང་ལྕགས་བསྲེགས་ཀྱི་སོག་ལེ་མེ་འབར་བས་དྲག་ཏུ་གཤགས་ཤིང་གཤགས་མ་ཐག་ཏུ་ཡང་འབྱར་ཞིང་དེ་ལྟ་བུའི་སྡུག་བསྔལ་ལ་རྟག་ཏུ་སྤྱོད་པའོ༔ ཚེའི་ཚད་ནི་མི་ལོ་བརྒྱ་ལ་སུམ་ཅུ་རྩ་གསུམ་པའི་ཞག་གཅིག་ཏུ་བྱས་པའི་ལྷའི་ལོ་སྟོང་ཕྲག་གཅིག་ལ་དམྱལ་བ་ཐིག་ནག་པའི་ཞག་གཅིག་ཡིན་ཏེ་རང་ལོ་སྟོང་ཐུབ་པའོ༔ གསུམ་པ་བསྡུས་འཇོམས་ནི༔ ལྕགས་བསྲེགས་ཀྱི་རི་བོ་ལ་ར་དང་ལུག་ལ་སོགས་པ་སྔོན་རང་གིས་བསད་པའི་སེམས་ཅན་གང་ཡང་རུང་བའི་མགོ་བརྙན་ཅན་གཉིས་རེའི་བར་དུ་སེམས་ཅན་གྲངས་མེད་པ་ལས་རླུང་གིས་བསྡུས་ཤིང་རི་གཉིས་ཕན་ཚུན་འཐབ་པ་ན་བྱེ་མ་བཞིན་དུ་འཐག་ཅིང་ཕར་ལ་གྱེས་པའི་ཚེ་ཡང་སྔར་བཞིན་སོས་ནས་གཟུགས་གྲུབ་སྟེ་སྡུག་བསྔལ་བཟོད་བླག་མེད་པ་ལ་ཁོར་མོར་སྤྱོད་པ་དང་༔ ཡང་ལྕགས་ཀྱི་གཏུན་ཁུང་ཡུལ་ལྗོངས་ཙམ་པ་རེའི་ནང་དུ་སེམས་ཅན་གྲངས་མེད་པ་བསྡུས་ཏེ་དམྱལ་མི་ལས་མཁན་རྣམས་ཀྱིས་ལྕགས་བསྲེགས་མེ་འབར་བའི་ཐོ་བ་རི་རབ་ཙམ་མང་པོ་ཀླད་པ་བསྐོར་ཞིང་བརྡེག་པའི་བར་དུ་ཐལ་བ་རྡུལ་བཞིན་འཐབ་ཅིང་འཇིགས་སྐྲག་བཟོད་བླག་མེད་པས་གདུངས་ཤིང་ཡང་ཐོ་བ་བཏེགས་པའི་ཚེ་སྔར་བཞིན་སོས་པའི་སྡུག་བསྔལ་བའོ༔ འདིའི་ཚེ་ཚད་ནི་མི་ལོ་ཉིས་བརྒྱ་ལ་འཐབ་བྲལ་བའི་ལྷ་རྣམས་ཀྱི་ཞག་གཅིག་ཏུ་བརྩིས་པའི་རང་ལོ་ཉིས་སྟོང་ལ་དམྱལ་བ་བསྡུས་འཇོམས་པའི་ཞག་གཅིག་ཏུ་བྱས་པའི་རང་ལོ་སྟོང་ཕྲག་གཉིས་སུ་སྡུག་བསྔལ་ཉམས་སུ་མྱོང་དགོས་པའོ༔ བཞི་པ་ངུ་འབོད་ཆུང་ངུ་ནི༔ ལྕགས་བསྲེགས་ཀྱི་ཁང་པ་སྒོ་དང་སྲུབ་མེད་པའི་ནང་དུ་ཚུད་ནས་འདི་ལས་ཐར་བའི་དུས་དང་སྐབས་མེད་པར་སེམས་ནས་ངུ་ཞིང་འོ་དོད་འབོད་པ་ལ་མིང་དེ་ལྟར་དུ་གྲགས་པ་ཡིན་ནོ༔ ཚེའི་ཚད་ནི་མི་ལོ་བཞི་བརྒྱ་ལ་དགའ་ལྡན་ལྷའི་ཞག་གཅིག་ཏུ་བརྩིས་པའི་ལོ་སྟོང་ཕྲག་བཞི་ལ་དམྱལ་བ་ངུ་འབོད་ཀྱི་ཞག་གཅིག་ཏུ་བྱས་པའི་རང་ལོ་སྟོང་ཕྲག་བཞི་ཐུབ་པའོ༔ ལྔ་པ་ངུ་འབོད་ཆེན་པོ་ནི༔ ལྕགས་ཁང་མེ་འབར་བ་ཉིས་རིམ་གྱི་ནང་དུ་སེམས་ཅན་གྲངས་མེད་པ་ཚུད་པ་ལ་ལས་མཁན་མཚོན་ཆ་ཐོགས་པ་གྲངས་མེད་པས་བརྡེག་ཅིང་སྒོ་ཕྱི་ནང་གཉིས་ཁྲོ་ཆུ་ཞུན་མས་ཞལ་བ་བྱས་ཏེ་ནང་རིམ་ནས་ཐར་ཀྱང་ཕྱི་རིམ་ནས་ཡུན་རིང་དུ་མི་ཐར་སྙམ་དུ་སྡུག་བསྔལ་དྲག་པོས་རྟག་ཏུ་གདུང་ཞིང་ངུ་འབོད་ཆེན་པོ་འདོན་པའོ༔ ཚེའི་ཚད་ནི་མིའི་ལོ་བརྒྱད་བརྒྱ་ལ་འཕྲུལ་དགའི་ལྷ་རྣམས་ཀྱི་ཞག་གཅིག་ཏུ་བརྩིས་པའི་དེའི་ལོ་སྟོང་ཕྲག་བརྒྱད་ལ་ངུ་འབོད་ཆེན་པོའི་ཞག་གཅིག་ཏུ་བྱས་པའི་རང་ལོ་སྟོང་ཕྲག་བརྒྱད་ཐུབ་པའོ༔ དྲུག་པ་ཚ་བ་ནི༔ ལྕགས་ཀྱི་ཡོལ་གོ་སྟོང་གསུམ་ཙམ་ལ་ཁྲོ་ཆུ་ཁོལ་མས་གང་བའི་ནང་དུ་དམྱལ་བའི་སེམས་ཅན་བསམ་གྱིས་མི་ཁྱབ་པ་ཚུད་ཅིང་འཚོད་པས་རབ་ཏུ་ཁོལ་བའི་རྦ་རླབས་ཀྱི་སྟེང་དུ་ཐོན་ཚེ་ལས་མཁན་རྣམས་ཀྱིས་ལྕགས་ཀྱུས་བཟུང་ནས་མགོ་ལ་ཐོ་ལུམ་གྱིས་བསྣུན་ཏེ་བརྒྱལ་བའི་སྐབས་རྣམས་སུ་སྡུག་བསྔལ་གྱི་ཚོར་བ་ཅུང་ཟད་འགགས་པ་བདེ་བ་རུ་འཛིན་པ་དེ་ལྟ་བུའི་སྡུག་བསྔལ་ཉམས་སུ་མྱོང་བའོ༔ ཚེའི་ཚད་ནི་མིའི་ལོ་སྟོང་ཕྲག་གཅིག་དང་དྲུག་བརྒྱ་ལ་གཞན་འཕྲུལ་དབང་བྱེད་ཀྱི་ལྷ་དག་གི་ཞག་གཅིག་ཏུ་བརྩིས་པས་དེའི་ལོ་ཁྲི་ཕྲག་གཅིག་དང་སྟོང་ཕྲག་དྲུག་ལ་ཚ་བའི་ཞག་གཅིག་ཏུ་བྱས་པའི་རང་ལོ་ཁྲི་ཕྲག་གཅིག་དང་སྟོང་ཕྲག་དྲུག་ཐུབ་པའོ༔ བདུན་པ་རབ་ཏུ་ཚ་བ་ནི༔ ལྕགས་བསྲེགས་ཀྱི་ཁང་པ་རབ་ཏུ་ཡངས་ཤིང་རྒྱ་ཆེ་བའི་ནང་དུ་སེམས་ཅན་བསམ་གྱིས་མི་ཁྱབ་པ་བཙུད་དེ་ལས་མཁན་རབ་ཏུ་མི་སྲུན་པ་རྣམས་ཀྱིས་ལྕགས་ཀྱི་མདུང་དམར་རྩེ་གསུམ་པ་མེ་འབར་བས་འོག་སྒོ་ནས་བཏབ་པས་ཕྲག་པ་གཉིས་དང་སྤྱི་བོ་ནས་ཐལ་མར་ཕུག་པ་དང་༔ ལུས་ཀྱི་ཕྱི་ནས་ལྕགས་བསྲེགས་ཀྱི་སྣམ་བུས་དཀྲིས་ཤིང་གཅུད་པས་རྟག་ཏུ་སྡུག་བསྔལ་པའོ༔ ཚེའི་ཚད་ནི་མིའི་ལོ་གྲངས་ཀྱིས་གཞལ་དུ་མེད་པར་བར་བསྐལ་ཕྱེད་དུ་གནས་པའོ༔ བརྒྱད་པ་མནར་མེད་པའི་དམྱལ་བ་ནི༔ ལྕགས་ཀྱི་ཁང་པ་ཤིན་ཏུ་ཡངས་པར་ལྕགས་བསྲེགས་ཀྱི་མགལ་དུམ་རི་རབ་ལྟ་བུར་སྤུངས་པའི་ནང་དུ་སེམས་ཅན་གྲངས་མེད་པ་བཅུག་སྟེ་ཕྱོགས་ཐམས་ཅད་ནས་ལས་མཁན་རྣམས་ཀྱིས་སྟག་དང་གཟིག་གི་སྦུད་པ་བུས་པས་མེ་ལྕེ་དང་སེམས་ཅན་གཉིས་ཀ་འོ་དོད་འབོད་པ་ཙམ་ལས་ལུས་སོ་སོར་མི་འབྱེད་ཅིང་མེ་མཚམས་ཅུང་རེ་ཕྱེ་སྐབས་སུ་འབྲོས་པར་རྩོམ་པ་ན་སྐྱེས་བུ་མཚོན་ཆ་སྣ་ཚོགས་ཐོགས་པ་རྣམས་ཀྱིས་བརྡེག་པ་དང་༔ ཁ་རུ་ལྕགས་ཞུན་ཁོལ་མ་བླུགས་པ་སོགས་ཀྱི་སྟེང་དུ་དམྱལ་ཁམས་གོང་མ་བདུན་པོའི་སྡུག་བསྔལ་མྱོང་དགོས་པའོ༔ ཚེ་ཚད་ནི་བར་གྱི་བསྐལ་པ་གཅིག་ཏུ་གནས་ཤིང་༔ དེ་བས་ལྷག་པ་མནར་རྒྱུ་མེད་པས་ན་མིང་ཡང་མནར་མེད་ཅེས་བྱ་བར་གྲགས་སོ༔ དེའི་མཐའ་བསྐོར་དུ་ཉེ་འཁོར་ལྷག་པ་བཅུ་དྲུག་ཡོད་དེ༔ དེ་དག་ནི་མཚམས་མེད་ཀྱི་ལས་བྱས་པ་དང་༔ གསང་སྔགས་ཀྱི་སྒོར་ཞུགས་ཏེ་བླ་མ་ལ་ལོག་ལྟ་སྐྱེས་པའི་ལས་ཀྱིས་དམྱལ་བ་མནར་མེད་པར་ལྷུང་ནས་ལས་སྲབ་མོར་གྱུར་ཚེ་དེ་ལས་ཐར་ནས་བལྟས་པས་ཐག་རིང་བའི་ས་ཕྱོགས་ཞིག་ཏུ་གྲིབ་མ་ནག་ངམ་མེ་བའི་འོབ་ཞིག་མཐོང་བ་ལ་དགའ་ཞིང་གདུང་ནས་དེར་ཕྱིན་པས་ཐལ་ཚན་གྱི་མདག་མེ་འབར་བར་ཚུད་ནས་ཤ་རུས་གཞོབ་ཏུ་ཚིག་པའི་སྡུག་བསྔལ་ལ་སྤྱོད་པ་དང་༔ ཡང་ཐག་མི་ཉེ་བ་ཞིག་ན་ཆུ་ཀླུང་ཆེན་པོ་མཐོང་སྟེ་བསྐལ་པར་དེ་ལ་བཙོ་བསྲེགས་ཀྱིས་མནར་བས་སྐོམ་ཚད་ཆེན་པོས་གདུང་ནས་ཆུ་ལ་བཏུང་དུ་འགྲོ་བར་འདོད་དེ་ཕྱིན་པས་རོ་རུལ་བ་འདམ་རྫབ་ཏུ་སོང་བའི་ནང་དུ་ཚུད་དེ་སྤྱི་བོ་མན་ཆད་ནུབ་པ་ལ་སྲིན་བུ་ལྕགས་ཀྱི་མཆུ་ཁབ་རྩེ་ལྟར་རྣོ་བ་གྲངས་མེད་པས་ཟ་ཞིང་འབིག་པའི་སྡུག་བསྔལ་བཟོད་བླག་མེད་པར་མྱོང་བ་དང་༔ ཡང་དེ་ལས་ཐར་ནས་ཐང་ཆེན་པོ་ཉམས་དགའ་བ་མདོག་ལྗང་ལ་ཁོད་སྙོམས་པ་ཞིག་མཐོང་ནས་དེར་ཕྱིན་པ་ན་ལྕགས་བསྲེགས་ཀྱི་ས་གཞིའི་སྟེང་དུ་ལྕགས་ཀྱི་ཐུར་མ་རྒྱ་ཁབ་ལྟ་བུར་རྣོ་བ་བར་མཚམས་མེད་པར་སྐྱེས་པའི་གནས་སུ་ཚུད་ནས་རྐང་པ་མར་བཞག་ཚེ་ཐལ་མར་ཕུག་ཅིང་བསྲེག་ལ་བཏེགས་པ་ན་འཚོ་བར་འགྱུར་བས་དེ་རུ་སྡུག་བསྔལ་བ་དང་༔ དེ་ལས་ཐར་བའི་ཚེ་ན་ཡང་བལྟས་པའི་མོད་ལ་ནགས་ཚལ་ཉམས་དགའ་ཞིང་ཡིད་དུ་གདུང་བའི་ཚལ་མཐོང་ནས་ཕྱིན་པས་རལ་གྲིའི་ལོ་མ་ཅན་གྱི་ནགས་ཚལ་དུ་གྱུར་ནས་ལོ་མ་རླུང་གིས་བསྐྱོད་པས་ཤ་རུས་ཚལ་པ་དུམ་བུར་གཏུབས་ནས་ཡང་སོས་ཏེ་སྔར་ལྟར་གཅོད་པའི་སྡུག་བསྔལ་བའོ༔ བཞི་པོ་དེ་མནར་མེད་ཀྱི་ཤར་དུ་ཡོད་པ་དང་༔ ལྷོ་རུ་ཡང་དེ་བཞིན་དུ་བཞི༔ ནུབ་དང་བྱང་དུའང་བཞི་རེ་ཚང་བར་ཡོད་པས་བཅུ་དྲུག་གོ༔ མཚམས་བཞིར་ཤལ་མ་ལིའི་སྡོང་པོ་ཞེས་བྱ་བ༔ ཁྲིམས་འཆལ་དང་འདོད་ལོག་སྤྱོད་པའི་ལས་ཀྱི་སྐྱེ་གནས་ཡིན་ཏེ༔ དེར་སླེབ་ཚེ་རྩེ་མོ་ན་དགའ་གདུང་གི་གྲོགས་ཀྱིས་འབོད་སྣང་བྱུང་བ་ལ་ཡིད་ཕྱོགས་པ་དང་མཉམ་དུ་ལས་རླུང་གིས་བསྐྱོད་ནས་རྩེ་མོར་མ་ཐོན་གྱི་བར་དུ་མཚོན་ཆའི་ལོ་འདབ་ཐུར་བསྟན་གྱི་རྩེ་མོས་གཤག་ཅིང་གཏུབས་ཏེ་རྩེར་སླེབས་ཚེ་བྱ་རྒོད་དང་ཁྭ་ཏ་རྣམས་ཀྱིས་མིག་ཚིལ་བྲུས་ཏེ་ཀླད་པ་འཇོམས་པ་དང་༔ ཡང་སྔར་བཞིན་རྩ་བ་ནས་རང་གི་ལས་ངན་གྱིས་འབྲེལ་བའི་གྲོགས་ཕོ་མོ་གང་ཡང་རུང་བས་འབོད་སྣང་དང་ཆབ་གཅིག་ལས་རླུང་གིས་དེད་ནས་ལོ་མའི་དཔལ་རྩེ་གྱེན་དུ་བསྟན་པའི་རྩེ་རུ་བརྒྱུད་ནས་བཅད་གཏུབས་བྱེད་བཞིན་རྩ་བར་སླེབས་པ་ན་ཡང་སོས་པས་ལྕགས་ཀྱི་སྐྱེས་པ་ཕོ་མོ་རུ་གྱུར་ཏེ་ལུས་ལ་འཁྱུད་ཅིང་མགོ་བོ་ཁ་རུ་བཅུག་ནས་སོ་ཡིས་བསྡམས་པས་ཀླད་པ་སྐྱ་ཆིལ་ཆིལ་འཐོར་བར་བྱེད་ཅིང་དེ་ལྟ་བུའི་སྡུག་བསྔལ་ལ་ཡུན་རིང་དུ་སྤྱོད་པའོ༔ གྲང་བའི་དམྱལ་ཁམས་བརྒྱད་ནི༔ སྤྱི་མཐུན་དུ་གཞི་དང་ཁོར་ཡུག་ཐམས་ཅད་གངས་རི་དང་ཆབ་རོམ་གྱི་རང་བཞིན༔ བར་སྣང་ཐམས་ཅད་ཁ་བ་དང་བུ་ཡུག་གྲང་ལྷག་རླུང་གི་འཁོར་ལོས་མཚམས་དང་བར་མེད་པར་གདུང་བས་ལུས་ལ་ཆུ་བུར་སྐྱ་ཕྲོམ་མེར་བྱུང་བ་ལ་ཆུ་བུར་ཅན་ཞེས་གྲགས་པའོ༔ དེ་ལས་ཀྱང་གྲང་ལྷག་ཤིན་ཏུ་ཆེ་བས་ཆུ་བུར་རྡོལ་རྡོལ་དུ་བྱུང་ནས་རྨ་རུ་སོང་བ་ལ་ཆུ་བུར་རྡོལ་བ་ཞེས་གྲགས་པ་དང་༔ དེ་ལས་ཀྱང་གྲང་ལྷག་གིས་གདུང་བ་བཟོད་དུ་མེད་པས་ཁ་འཐམ་པ་ལ་སོ་འཐམ་པ་ཞེས་གྲགས་པ་ཡིན༔ དེ་ལས་ཀྱང་གྲང་ལྷག་ཤིན་ཏུ་ཆེ་བའི་ཤུགས་ཀྱིས་སྨྲེ་སྔགས་རྒྱུན་ཆད་མེད་པར་འདོན་པ་ལ་ཨ་ཆུ་ཟེར་བའོ༔ དེ་ལས་ཀྱང་གྲང་ལྷག་ཆེས་ཆེར་གྲགས་པའི་སྟོབས་ཀྱིས་ཤུགས་རིང་འཐོན་ཅིང་སྐད་གདངས་ཆགས་པའི་ཀྱི་ཧུད་ཅེས་བྱུང་བ་ལ་ཀྱི་ཧུད་པ་ཞེས་བྱའོ༔ དེ་དག་ལས་ཀྱང་གྲང་ལྷག་བདུན་འགྱུར་དུ་ཆེ་བའི་སྟོབས་ཀྱིས་ལུས་ཀྱི་ལྤགས་མདོག་སྔོ་ནག་ཏུ་སོང་ནས་ཚལ་པ་བཞི་རུ་གས་པ་ཨུཏྤལ་ལྟར་གས་པ་ཞེས་བྱའོ༔ ལུས་ཀྱི་ཤ་ལྤགས་བརྒྱད་ཚལ་དུ་གས་པ་ཕྱིར་ལོག་ནས་ཕྱི་མི་མངོན་པར་དམར་བ་ལ་པདྨ་ལྟར་གས་པ་ཞེས་བྱ་སྟེ༔ དེ་ལས་ཀྱང་བདུན་འགྱུར་གྱི་གྲང་ལྷག་ཆེ་བས་ལུས་ཚལ་པ་བཅུ་དྲུག་ཏུ་གས་ནས་ཆུ་རྒྱུས་ཕྲ་མོས་འབྲེལ་བའི་མང་དུ་གྱེས་ཏེ་ཁ་དོག་དམར་ནག་ཏུ་སོང་བ་ལ་པདྨ་ཆེན་པོ་ལྟར་གས་པ་ཞེས་བྱའོ༔ དེ་ལྟར་རྨའི་ནང་དུ་སྲིན་བུ་ལྕགས་ཀྱི་མཆུ་རྣོན་ཅན་གྲངས་མེད་ཀྱིས་བཟའ་བའི་སྡུག་བསྔལ་བཟོད་བླག་མེད་པའོ༔ གྲང་དམྱལ་བརྒྱད་པོ་དེ་དག་དང་པོ་ནས་འོག་ནས་འོག་ཏུ་གྲང་དབལ་བདུན་འགྱུར་གྱིས་ཆེ་བས་དབྱེ་བ་བརྒྱད་དུ་ཕྱེས་པ་ཡིན་ནོ༔ ཉི་འཚེ་བ་ཞེས་བྱ་བ་ནི༔ གནས་དང་ཡུལ་ངེས་པ་མེད་དེ་རྡོ་དང་བྲག་གི་བར་དུ་བཅར་བ་དང་༔ འཁྱག་པའི་སྤུབས་སུ་འཐུམ་པ་དང་༔ ཆུ་ཚན་དུ་འཚོད་པ་དང་༔ ཆུ་འཁྱག་ནང་དུ་གྲང་བ་དང་༔ ཤིང་སྡོང་ལ་རང་གི་ཕུང་པོར་བདག་ཏུ་བཟུང་ནས་བཅད་གཏུབས་ཀྱི་སྡུག་བསྔལ་ཉེ་བར་ལེན་པ་དང་༔ ཁང་པ་དང་སྒོ་དང་ཀྭ་བ་སབ་མོ་རྣམས་ལ་ཕུང་པོ་བདག་ཏུ་བཟུང་ནས་ཁོང་པའི་ནང་དུ་གཞན་གྱིས་བྱ་བ་བྱེད་པ་དང་༔ སྒོ་འབྱེད་གཅོད་ཀྱི་དུས་སུ་ཡང་ཁོང་པའི་ཁ་ཕྱེ་ཞིང་འདོན་པ་ལྟ་བུའི་སྡུག་བསྔལ་དང་༔ ཁང་པའི་ཡ་ཕུབ་མགོ་ཡིས་བཏེགས་པ་ལྟ་བུ་དང་༔ ལུས་ཀྱིས་སབ་རྟ་ལ་དཀྲིས་ཤིང་བསྡམ་པར་སྣང་བའི་སྡུག་བསྔལ་ཁོལ་མོར་སྤྱོད་པ་དང་༔ སྒྱེད་པུ་ལ་ཕུང་པོར་བཟུང་ནས་ཁོང་པར་མེ་འབར་བ་དང་༔ ཕྱག་མ་དང་ཕྲི་བ་ལ་ཕུང་པོར་བྱས་ནས་གཞན་གྱིས་ལས་བྱེད་པ་དང་༔ ཐག་པ་ལ་ཕུང་པོར་བཟུང་ནས་བདག་དང་གཞན་གྱིས་སྤྱོད་པའི་སྡུག་བསྔལ་དང་༔ སྣོད་དང་ཀ་ཆ་དག་ཀྱང་རང་གི་ཕུང་པོ་རུ་འཛིན་ཅིང་དེ་འགེངས་པ་དང་༔ བྲི་བ་དང་གཞན་གྱིས་ལས་བྱས་ཚད་ཐམས་ཅད་ཁོ་རང་རྣམས་ལ་གནོད་འཚེ་རུ་གྱུར་ནས་སྡུག་བསྔལ་ཉེ་བར་ལེན་པས་ཤིན་ཏུ་ཉམ་ཐག་པའོ༔ དེ་ལྟར་གནས་རིགས་བཅོ་བརྒྱད་པོ་འདི་ཤེས་པར་བྱས་ནས༔ དེ་དག་གི་སྡུག་བསྔལ་རྒྱུད་ཐོག་ཏུ་བླངས་ཏེ་མྱོང་བའི་སྣང་བ་བསྐྱེད་ནས་ནན་དུ་བློ་སྦྱོང་བྱས་པའི་མཐར་བྲེད་སྔངས་འཇིགས་སྐྲག་ཤར་ཚེ་སྡུག་བསྔལ་སེམས་ལ་བསམ་པ་ཙམ་ཡང་དེ་ལྟར་འདུག་གི་མངོན་སུམ་རང་ཐོག་ཏུ་བབ་ཚེ་ཅི་ལ་བཟོད༔ དེ་བས་ན་ཐར་པའི་ཐབས་ལ་མི་བརྩོན་ན་ད་རེ་ཤི་སྙམ་ནས་དགེ་བ་ལ་འབད་པར་བྱའོ༔ མདོར་ན་ད་ལྟ་ལུས་ལ་མེ་སྟག་ཙམ་ཡང་མི་བཟོད་ན་ཚ་དམྱལ་གྱི་མེ་འོབས་དེ་ལྟ་བུ་ཅི་ལ་བཟོད༔ ད་ལྟ་ནང་གཅིག་གི་གྲང་ལྷག་ཙམ་ཡང་མི་བཟོད་ན་གྲང་དམྱལ་གྱི་སྡུག་བསྔལ་དེ་ཙམ་ལྟ་ཅི་སྙམ་ནས་བློ་སྦྱོང་བ་འདི་ལ་ངེས་པར་གོམས་ནས་རང་རྒྱུད་ལ་འདྲེས་ངེས་ཤིག་བྱེད་དགོས༔ ཞེ་སྡང་གི་ལས་ཀྱིས་དམྱལ་བར་སྐྱེ་ངེས་པ་ཅན་ཡིན་ན༔ ངས་སྔོན་ཆད་ཀྱང་ཞེ་སྡང་གི་ལས་བསགས་པ་ལ་ཚད་དང་གྲངས་ནི་མེད༔ ད་དུང་ཡང་དེའི་འཕྲོ་མཐུད་ན་དམྱལ་བའི་གནས་སུ་ལན་གྲངས་ཚད་དང་དཔག་ཏུ་མེད་པ་ལྷུང་ངེས་པ་ཅན་ཡིན་ཏེ༔ ད་རེས་མི་ལུས་རིན་པོ་ཆེ་འདིའི་རིང་ལ་འདི་ལས་གཏན་དུ་ཐར་ཐབས་ཞིག་མི་བྱེད་རེ་སྙམ་དུ་རྟག་པར་བརྗེད་མེད་དུ་རྒྱུད་ལ་སྦྱར་བ་གནད་ཀྱི་དམ་པའོ༔ ངན་སོང་གི་གནས་གཉིས་པ་ཡི་དྭགས་ལའང་སྡུག་བསྔལ་གྱིས་གདུང་བ་ཁོ་ན་ལས་མེད་དོ༔ ཡི་དྭགས་བྱིང་ན་གནས་པ་ལ་ཡང་སྡེ་ཚན་གསུམ་དུ་ཡོད་པ་ལས༔ དང་པོ་ཕྱིའི་སྒྲིབ་པ་ཅན་ནི༔ ལོ་གྲངས་མང་པོ་ལ་ཟས་སྐོམ་གྱི་སྒྲ་ཙམ་ཡང་མི་གྲགས་པར་བཀྲེས་སྐོམ་གྱི་སྡུག་བསྔལ་དྲག་པོས་གདུང་ནས་ཡོད་པས༔ ས་ཕྱོགས་རིང་བ་ཞིག་ན་ཆུ་ཀླུང་ཆེན་པོ་མཐོང་བ་ལ་བཏུང་བར་འདོད་ནས་ཕྱིན་ཀྱང་རྐང་པའི་ལྷུ་ཚིགས་ཀྱིས་ལུས་མི་ཐེག་པར་འགྱེལ་ཞིང་འགྲེ་ལྡོག་བྱེད་བཞིན་ཡུན་རིང་མོ་ཞིག་ནས་ཚལ་དུ་སླེབ་ཚེ་གྲམ་པ་སྐྱ་ཁྲོལ་ལེར་འགྲོ་ཞིང་འགྱེལ་ཏེ་ཐང་ཆད་དེ་སྡུག་བསྔལ་བ་དང་༔ ཡང་རྒྱང་རིང་པོ་ཞིག་ནས་འབྲས་བུ་ཅན་གྱི་ཤིང་གི་ནགས་ཚལ་མཐོང་ནས་དེར་སྔར་བཞིན་དུ་ཕྱིན་པའི་ཚེ་ན་ཚལ་དུ་སླེབ་པ་དང་ཤིང་སྐམ་གྱི་སྡོང་པོ་ཁྲ་ཟང་ངེ་བར་འགྱུར་བ་དང་༔ རེས་འགའ་བཟའ་བཏུང་ལོངས་སྤྱོད་ཀྱི་མཛོད་ཆེན་པོ་ཞིག་ཡོད་པ་མཐོང་བའི་མོད་ལ་དེར་ཕྱིན་པའི་ཚེ་སྐྱེས་བུ་གོ་མཚོན་ཅན་མང་པོས་བསྲུངས་ནས་ཡོད་པའི་མོད་ལ་མཚོན་ཆ་སྣ་ཚོགས་ཀྱིས་བརྡེག་ཅིང་དེད་ནས་སྡུག་བསྔལ་བ་དང་༔ དབྱར་གྱི་དུས་སུ་ཟླ་བའི་འོད་ཀྱིས་འཚིག་པའི་ཚ་རེག་དང་༔ དགུན་གྱི་དུས་སུ་ཉི་མའི་འོད་ཀྱིས་འཁྱག་ཅིང་བསིལ་བའི་གྲང་རེག་དང་དེ་གཉིས་ཀའང་བཟོད་དུ་མེད་པའི་སྡུག་བསྔལ་བའོ༔ ཡི་དྭགས་ནང་གི་སྒྲིབ་པ་ཅན་ནི་མགོ་བོ་རྒྱ་རྫ་ཙམ་པ་ཁ་ཁབ་མིག་ཙམ༔ མགྲིན་པ་རྟ་རྔ་ཙམ་ལྟོ་བ་ཡུལ་ལྗོངས་ཙམ་ལ་རྐང་ལག་འཇག་མ་ཙམ་པ༔ ཁ་ཡི་དུག་གིས་རྒྱ་མཚོའི་ཆུ་ཡང་སྐེམ་པར་བྱེད་པ༔ ཟས་སྐོམ་ཅུང་ཟད་རྙེད་ཀྱང་ཁ་ཁབ་མིག་ཙམ་པར་མི་ཚུད༔ གལ་ཏེ་ཚུད་ཀྱང་མགྲིན་པར་མི་འགྲོ༔ གལ་སྲིད་སོང་ཡང་ལྟོ་བ་མི་འགེངས༔ འགེངས་ཀྱང་རྐང་ལག་གིས་མི་ཐེག་པའི་སྡུག་བསྔལ་བ་དང་༔ བསྔོས་པའི་ཟས་ཆུ་སྦྱིན་དང་དྲི་གསུར་ཙམ་མ་གཏོགས་ཟས་སྐོམ་གཞན་ཉིན་མོ་ལྟོ་བདེ་བ་ཙམ་རྙེད་ཀྱང་མཚན་མོ་རྣམས་སུ་མེ་མདག་ཏུ་གྱུར་ཅིང་ཁོང་པར་མེ་འབར་ནས་བསྲེགས་པའི་སྡུག་བསྔལ་བཟོད་བླག་མེད་པར་མྱོང་དགོས་པའོ༔ ཡི་དྭགས་སྒོས་ཁུར་གྱི་སྒྲིབ་པ་ཅན་ནི༔ ཁ་ཅིག་གི་ལུས་ལ་ལྦ་བ་དང་སྐྲང་དང་རྣག་དང་ཆུ་སེར་དུ་རྡོལ་བ་ལ་ཁ་ཟས་བྱེད་པ་དང་༔ ལ་ལ་ལུས་ལ་རྨ་རྡོལ་བའི་ནང་དུ་སྲོག་ཆགས་བསམ་གྱིས་མི་ཁྱབ་པས་ཟ་བ་རྣམས་ནི་སྒོས་ཁུར་གྱི་སྡུག་བསྔལ་ཅན་ནོ༔ དེ་དག་གི་སྤྱི་མཐུན་དུ་བཀྲེས་སྐོམ་དང་ཚ་རེག་དང་གྲང་རེག་ལ་སོགས་པ་ནི་གོང་མ་གཉིས་དང་མཚུངས་པ་ཡིན༔ མཁའ་ལ་རྒྱུ་བའི་ཡི་དྭགས་ནི༔ བཙན་དང་༔ རྒྱལ་པོ༔ ཤི་འདྲེ༔ འབྱུང་པོ༔ མ་མོ༔ ཐེའུ་རང་ལ་སོགས་འདྲེ་ངན་གྱི་རིགས་ཐ་དད་པ་དབང་ཆེ་བ་དང་༔ ཆུང་བ་དང་ཤིན་ཏུ་ཞན་པ་ལ་སོགས་པ་ཡོད་དེ༔ དེ་དག་ཐམས་ཅད་ཀྱང་ཞེ་སྡང་དང་གནོད་སེམས་འདོད་ཆགས་སྣ་ཚོགས་པས་རྒྱུད་རབ་ཏུ་གདུང་ནས་གཞན་གྱི་བདེ་བ་དང་དཔལ་འབྱོར་བདེ་སྐྱིད་ཐམས་ཅད་རང་ལ་སྤོ་བའི་བསམ་སྤྱོད་བྱས་ནས་གཞན་ལ་གནོད་ཅིང་རང་ལ་ཅུང་ཟད་ཙམ་ཡང་མི་ཕན་པ་དང་༔ སྔོན་ཆད་རང་ཉིད་འཆི་བའི་དུས་ཀྱི་ཚེ་འཆི་རྐྱེན་གང་ཡིན་པ་དེ་ཞག་བདུན་ཕྲག་རེའི་མཚམས་ནས་ཉམས་སུ་མྱོང་སྟེ་སྐྱེ་འཆིའི་སྣང་བས་ཤིན་ཏུ་སྡུག་བསྔལ་ཞིང་༔ འཆི་རྐྱེན་དེ་ཕ་རོལ་པོ་ལ་སྤོ་བའི་བསམ་སྤྱོད་བྱས་པས་གཞན་ལ་གནོད་པ་ཆེན་པོར་གྱུར་ཏེ་རང་གི་མྱོང་བ་ལ་ཅུང་ཟད་ཙམ་ཡང་མི་ཕན་པའི་ཁར་ལས་ངན་ཡང་ཆེས་ཆེར་འཕེལ་བར་འགྱུར་པ་ཡིན༔ གཞན་ཡང་བྱད་མཛེས་པ་དང་སྔོན་གྱི་ཉེ་འབྲེལ་རྩ་ལག་རྣམས་ལ་ཆགས་ཤིང་དགའ་ནས་ཚལ་དུ་ཕྱིན་ཚེ་དེ་རྣམས་ལ་ན་ཚ་དང་སྨྱོ་འབོག་ལ་སོགས་པ་གློ་བུར་དུ་འབྱུང་བ་དང་༔ ཞེ་སྡང་དྲག་པོའི་དབང་གིས་འགྲོ་བ་མི་དང་དུད་འགྲོ་དག་ལ་གནོད་པ་བྱེད་པ་དང་༔ བཟའ་བཏུང་ལ་རེ་ཞིང་ཆགས་ནས་གཞན་ལ་སྡང་ཞིང་འཚེ་བ་དང་༔ སྒྲུབ་པའི་དངོས་གྲུབ་ལ་རྐུ་བ་ལ་སོགས་ཕ་རོལ་པོ་ལ་གནོད་པའི་ལས་བྱེད་དུ་ཡོད་པ་ལ༔ སྔགས་པ་ནུས་ལྡན་འདྲེ་འདུལ་མཁན་རྣམས་ཀྱིས་ཐུན་མཚོན་དྲག་སྔགས་ཀྱིས་གཟིར་བས་མགོ་བོ་ཚལ་པར་འགེམ་པ་དང་༔ ལུས་དུམ་བུར་གཏུབ་ཅིང་མགོ་དང་ཡན་ལག་ཉིང་ལག་ཐམས་ཅད་བཅད་གཏུབ་བྱེད་པ་དང་༔ སྦྱིན་སྲེག་གི་མེ་དབལ་དྲག་པོས་བསྲེགས་ཤིང་མནན་གཏད་བྱས་པས་ས་འོག་ཏུ་ཏིང་འཛིན་འཕྲུལ་གྱིས་ལྕགས་ཁྱིམ་དུ་ལོ་བརྒྱ་སྟོང་མང་པོར་མནན་ཅིང་བཅིངས་པ་དང་༔ བསྡམས་པ་དང་༔ འཁོར་ལོ་དང་རླུང་དར་གྱིས་གཅོད་ཅིང་གཏུབ་པ་ལ་སོགས་པའི་སྡུག་བསྔལ་དཔག་ཏུ་མེད་པ་ཁོར་མོ་ཡུག་ཏུ་སྤྱོད་པ་ཡིན༔ ཆགས་སྡང་གི་གནོད་འཚེ་དེ་དག་ལས་དང་ལས་ཀྱི་རྣམ་སྨིན་ཆུད་མི་ཟ་བར་ཆེར་འཕེལ་ནས་ད་དུང་གནས་ངན་དེ་དང་དམྱལ་ཁམས་རྣམས་སུ་ལྟུང་དགོས་པས་སྡུག་བསྔལ་མུ་མཐའ་མེད་པའོ༔ གཞན་ཡང་ཡི་དྭགས་ལ་སྡུག་བསྔལ་སྤྱི་དང་མཐུན་པ་དག་གི་སྟེང་དུ་སྒོས་སུ་སྡུག་བསྔལ་རིགས་མི་འདྲ་བ་དུ་མ་ཡོད་ཀྱང་བརྗོད་པའི་གྲངས་ལ་དོགས་ནས་འདིར་མ་སྤྲོས༔ དེ་ལྟར་ཡི་དྭགས་ཀྱི་གནས་སུ་སྐྱེ་བའི་རྒྱུ་འདོད་ཆགས་ཀྱི་བསམ་སྤྱོད་ཡིན་ཏེ་སྔོན་ཡང་རང་རང་གིས་འདི་ལྟ་བུའི་ལས་བསགས་པ་ལ་མཐའ་མེད་ཅིང་༔ ད་ལྟའི་དུས་འདིར་ཡང་ལས་འདི་ཁོ་ན་ལ་སྤྱོད་དུ་ཡོད་པས་ད་ནི་ལས་ངན་གྱི་འཕྲོ་མཚམས་བཅད་ནས་མི་ཚེ་འདི་ལ་ཐར་པའི་ལམ་སྣ་ཟིན་པ་ཞིག་མི་བྱེད་རེ་སྙམ་དུ་སྡུག་བསྔལ་བློ་ཐོག་ཏུ་བླང་ཞིང་༔ ད་ལྟའི་ཚེ་ཉིན་གཅིག་གི་བཀྲེས་སྐོམ་མི་ཐེག་ན་ལོ་གྲངས་བརྒྱ་སྟོང་མང་པོར་བཀྲེས་སྐོམ་གྱིས་གདུང་བ་འདི་ཇི་ལྟར་དུ་བཟོད་སྙམ་དུ་བློ་སྦྱོང་བ་ལ་འབད་པར་བྱའོ༔ ངན་སོང་གི་གནས་གསུམ་པ་དུད་འགྲོ་ལ་ཡང་༔ བྱིང་ན་གནས་པ་དང་༔ ཁ་འཐོར་བ་གཉིས་ཡོད་པ་ལས༔ བྱིང་ན་གནས་པ་ནི༔ མཐའི་རྒྱ་མཚོ་ཆེན་པོའི་ནང་ན༔ ཆུ་སྲིན་དང་༔ དུང་དང་༔ ཉ་བོ་ཆེ་དང་༔ སྦལ་ལྕོང་དང་༔ ཆུ་སྦྲུལ་ལ་སོགས་པ་ཆེ་བ་རི་རབ་ཙམ་ནས་ཆུང་བ་སྤུ་རྩེ་ཙམ་གྱི་བར་དུ་ཆེ་ཆུང་གི་ཚད་མ་ངེས་པར་ཆང་འགག་གི་སྦང་མ་ཙམ་ཡོད་ལ༔ དེ་དག་ཐམས་ཅད་ཀྱི་ཆེ་ཆེས་ཆུང་ཆུང་བཟའ་བ་དང་༔ ཆུང་བ་མང་པོས་ཆེན་པོ་རེ་རེ་རུབ་ནས་བཟའ་བ་དང་༔ ལྟོ་བཀྲེས་པ་དང་༔ ལུས་གྲང་བ་དང་༔ ནད་སྣ་ཚོགས་ཀྱིས་གཙེས་པ་དང་༔ གཞན་ཡང་བླུན་ཅིང་རྨོངས་པའི་སྡུག་བསྔལ་བསམ་གྱིས་མི་ཁྱབ་པ་ནི་དུད་འགྲོ་སྤྱི་མཐུན་གྱི་སྡུག་བསྔལ་ཡིན་ཏེ༔ གླིང་བར་མུན་པའི་ཁྲོད་ན་དུད་འགྲོ་གྲངས་མེད་པས་རང་གཞན་གྱི་གཟུགས་མི་མཐོང་ཞིང་རང་ཤ་ལ་ཟོས་པས་ན་ཚའི་ཟུག་རྔུས་གདུང་ཚེ་བྲོས་ཤིང་རྒྱུག་མཆོངས་བྱེད་ནས་གཡང་སར་ལྷུང་ཞིང་རྐང་ལག་དང་རུས་པ་ཆག་པ་སོགས་བླུན་ཅིང་རྨོངས་པའི་སྡུག་བསྔལ་གྱིས་ཉམ་ཐག་པ་ཡིན་ནོ༔ ཁ་འཐོར་བ་ནི་ལྷ་དང་མིའི་གནས་ན་གནས་པའི་དུད་འགྲོ་བླུན་ཅིང་རྨོངས་པ་དང་༔ ཁྱད་པར་དུ་མི་ལ་བརྟེན་པའི་དུད་འགྲོ་འདི་རྣམས་མཐོང་ཆོས་མངོན་སུམ་དུ་ཡོད་པ་བཞིན་དུ་ཁལ་མི་ཐེག་བཞིན་དུ་འགེལ་བ་དང་༔ སྣ་འབིག་པ་དང་༔ སྤུ་བྲེག་པ་དང་༔ ཁྲག་འབྱིན་པ་དང་༔ ཞོ་བཞོ་བ་དང་༔ རྨོས་རྨོ་བ་དང་༔ ཞོན་ནས་འགྲོ་བ་སོགས་བླུན་རྨོངས་ཀྱི་དབང་གིས་འདུལ་བ་འཛིན་པའི་སྡུག་བསྔལ་ཁུར་དུ་མི་བཟོད་པ་ཉམས་སུ་མྱོང་བས་ཤིན་ཏུ་ཉམ་ཐག་པའོ༔ གཞན་ཡང་རི་ལ་གནས་པའི་རི་དྭགས་དང་གཅན་གཟན་ལ་སོགས་པ་རྣམས་ཀྱང་རྩུབ་མོའི་མཚོན་གྱིས་གསོད་པ་དང་༔ རྒྱ་དང་འགགས་རྙི་བཙུགས་ཏེ་བཟུང་ནས་སྐྲག་སྔངས་བཟོད་དུ་མེད་པའི་དབང་གིས་ལུས་ས་ལ་བརྡབ་ནས་བརྡེག་ཅིང་རང་སྲོག་རང་གིས་གཅོད་པའི་སྡུག་བསྔལ་སོགས་མྱོང་བ་དང་༔ བྱ་རིགས་དང་ཁྱི་དང་འབུ་སྲིན་ལ་སོགས་པ་རྣམས་ཀྱིས་ཀྱང་བཟའ་བཏུང་མི་རྙེད་པར་བཀྲེས་སྐོམ་གྱིས་གདུངས་པའི་ཡི་དྭགས་དང་འགྲན་པ་ཙམ་ཡང་འབྱུང་བ་གྲངས་ཀྱིས་མི་དཔོག༔ ཆེ་བས་ཆུང་བ་མང་པོ་ཁ་ཟས་བྱེད་པ་དང་༔ ཆུང་བ་མང་པོས་ཆེན་པོ་རེ་རེ་ལ་བཟའ་བ་དང་༔ དབྱར་གྱི་དུས་སུ་ཚ་བས་གདུངས་པ་དང་༔ དགུན་གྱི་དུས་སུ་གྲང་བས་གདུངས་ཤིང་བརྒྱལ་བ་དང་༔ ཀླུ་རྣམས་ལ་ཡང་ནམ་མཁའ་ལྡིང་གི་འཇིགས་པ་དང་༔ ཉི་ཚན་དང་བྱེ་ཚན་གྱི་འཇིགས་པ་དང་༔ དུག་དང་རྫས་སྔགས་ཀྱི་འཇིགས་པ་དང༔ གཞན་ཡང་བླུན་རྨོངས་ཀྱི་སྡུག་བསྔལ་བསམ་གྱིས་མི་ཁྱབ་པས་རྟག་ཏུ་མནར་ཞིང་ཉམ་ཐག་པའོ༔ གནས་ངན་འདི་རུ་སྐྱེ་བའི་རྒྱུ་གཏི་མུག་ཡིན་པས་རང་རང་གི་སྔོན་ཆད་ཀྱང་ལས་ངན་གྱི་བསམ་སྤྱོད་དེ་ཡང་འདི་མ་བྱས་བྱ་བ་གཅིག་ཀྱང་མེད་པའི་ཁར་ད་དུང་ཡང་དེ་ལྟར་གསོས་བྱས་ནས་སྐྱེ་གནས་ངན་པ་འདི་དག་ལ་མི་སྐྱེ་བའི་ཐབས་མེད་པས་སྐྱེས་ཕན་ཆད་ལས་ངན་གྱི་འཕེལ་ཁ་ཆེར་བསྐྱེད་ནས་འཁོར་བ་མཐའ་མེད་པའི་གནས་སུ་ཁོར་མོ་ཡུག་ཏུ་འཁྱམས་པ་ལས་འོས་མེད་པ་ལ་བསམ་ནས་ད་རེས་ཐར་པ་ཐོབ་པ་ཞིག་བྱེད་དགོས་སྙམ་དུ་བློ་སྦྱོང་བ་ལ་འབད་པར་བྱའོ༔ དེ་ལྟར་དུད་འགྲོ་རྣམས་ཀྱི་ཚེ་ཚད་ལ་ངེས་པ་མེད་དེ༔ ལ་ལ་ནི་སྐྱེས་ཙམ་ནས་འཆི་བ་དང་༔ ལ་ལ་ནི་དབྱར་དགུན་རེ་ཙམ་ཐུབ་པ་དང་༔ ལ་ལ་ནི་ལོ་གྲངས་མང་པོར་གནས་པ་དང་༔ འགའ་རེ་ནི་ལོ་གྲངས་མེད་དུ་ཐུབ་པའང་ཡོད་པས་ན་མཐའ་གཅིག་ཏུ་མ་ངེས་པའོ༔ དེ་ལྟར་ངན་སོང་གི་གནས་དེ་དག་ལས་དབེན་པ་མཐོ་རིས་ལྷ་མིའི་གོ་འཕང་ཙམ་ཐོབ་ན་དེས་ཆོག་གོ་སྙམ་ན་དེ་ལྟར་མ་ཡིན་ཏེ༔ མཐོ་རིས་གསུམ་ནའང་གནས་སྐབས་ཀྱི་བདེ་བ་ཅུང་ཟད་ཡོད་ཀྱང་འདོད་རྒྱུ་བདེ་བ་ནས་སྤྱོད་རྒྱུ་སྡུག་བསྔལ་གྱི་རྒྱུ་ལ་སྤྱོད་དུ་ཡོད་པའི་མཐར་ངན་སོང་ལས་འགྲོ་ས་མེད་པ་ལ་བསམ་མནོ་ཞིབ་ཏུ་བཏང་ཞིང་དཔྱད་ནས་སྲིད་པ་ལས་གཏན་དུ་ཐར་པའི་ཐབས་ཞིག་ལ་འབད་པར་བྱའོ༔ མཐོ་རིས་ཀྱི་གནས་དང་པོ་མིའི་གནས་ནི༔ ལུས་རྟེན་ཁྱད་འཕགས་སུ་གྲགས་ཀྱང་དེ་ལའང་སྐྱེ་རྒ་ན་འཆིའི་ཆུ་བོ་ཆེན་པོ་བཞིའི་སྡུག་བསྔལ་སྤྱི་མཐུན་དུ་ཡོད་པ་གཞིར་བཞག་ནས་དེའི་སྟེང་དུ་སྡུག་བསྔལ་སྒོས་བབས་སུ་ཡོད་པ་མཐོང་ཆོས་མངོན་སུམ་པར་ཡོད་བཞིན་པ་ལས༔ དང་པོ་སྐྱེ་བའི་སྡུག་བསྔལ་ནི་སྐྱེས་པ་ཕོ་མོས་འཁྲིག་པ་སྤྱོད་པའི་སྐབས་སུ་བར་སྲིད་ཀྱི་སེམས་ཅན་དབྱར་གྱི་དུས་སུ་ཤ་རུལ་ལ་སྦྲང་མ་འདུས་པ་བཞིན་དུ་འཚུབ་པའི་ཚེ༔ མི་ལུས་ཀྱི་སྐལ་པ་ཡོད་པའི་སེམས་ཅན་ཞིག་མངལ་དུ་ཞུགས་ཏེ་ཁུ་ཁྲག་གཉིས་ཀ་བཟུང་ནས་བསྡུས་པས་དང་པོ་ནུར་ནུར་དུ་སོང་༔ བར་དུ་མེར་མེར་པོར་སོང་༔ དེ་ནས་ལྟར་ལྟར་དུ་གྱུར་ཏེ་མཐར་ཅུང་ཟད་མཁྲང་བར་གྱུར་བ་དང་༔ སྦལ་པའི་ཤ་མ་ལྟ་བུར་གོར་གོར་དུ་ཡོད་པའི་དུས་སུ་འཐིབ་ཅིང་འཚུབ་པའི་སྡུག་བསྔལ་དྲག་པོ་ཉམས་སུ་མྱོང་བ་དང་༔ ལུས་ཀྱི་ལྷུ་ཚིགས་དང་པོ་ནས་སོར་མོ་རིམ་པ་བཞིན་དུ་ཆགས་ཤིང་དེ་ལྟར་རིམ་གྱིས་དབང་པོ་ཐམས་ཅད་རྫོགས་པའི་མཐར་མའི་མངལ་གནས་དྲི་མི་ཞིམ་པར་མནམ་པ་དང་༔ དཀར་ཁུང་མི་མཐོང་པའི་མུན་ཁང་ལྟ་བུར་བཅིང་ཞིང་གཙུད་པའི་བཙོན་པ་ལྟ་བུ་དང་༔ མ་ཉིད་ཀྱིས་ལྟོ་འགྲངས་པའི་དུས་སུ་བྲག་གི་བར་དུ་བཅར་བ་ལྟ་བུའི་སྡུག་བསྔལ་དང་༔ ཁ་ཟས་ཚ་བ་ཟོས་ཚེ་ཆུ་ཚན་དུ་འཚོད་པ་ལྟ་བུའི་སྡུག་བསྔལ་དང་༔ གྲང་བ་ཟོས་ཚེ་ཆུ་འཁྱགས་ཀྱི་ནང་དུ་བསྐྱིལ་བ་ལྟ་བུའི་སྡུག་བསྔལ་དང་༔ བཀྲེས་པའི་ཚེ་ན་གཡང་སར་ལྷུང་བ་ལྟ་བུའི་སྡུག་བསྔལ་དང་༔ འགུལ་བསྐྱོད་འགྲོ་ལྡང་གི་དུས་སུ་རླུང་གིས་ཁྱེར་བ་ལྟ་བུའི་སྡུག་བསྔལ་དང་༔ ཕོ་མོ་འཁྲིག་པ་སྤྱོད་ཚེ་རི་གཉིས་ཀྱི་བར་དུ་བཅར་བ་ལྟ་བུའི་སྡུག་བསྔལ་ཉམས་སུ་མྱོང་བ་ཡིན༔ ཟླ་བའི་གྲངས་ཚད་རྫོགས་ནས་བཙས་པའི་དུས་སུ་སྲིད་པ་ལས་རླུང་གིས་མགོ་མཇུག་ལོག་ནས་གློ་སྙིང་ཁ་རུ་ཐོན་པ་ལྟ་བུའི་སྡུག་བསྔལ་དང་༔ བཙས་སྒོར་འགྲིམ་ཚེ་ལྕགས་ཀྱི་འདྲེན་ཁུང་དུ་དྲངས་པ་ལྟ་བུའི་སྡུག་བསྔལ་དང་༔ ཐང་ལ་ལྷུང་ཚེ་ཚེར་དོང་དུ་འཕང་པ་ལྟ་བུའི་སྡུག་བསྔལ་དང་༔ ཕྲུ་མ་བཤུས་ཚེ་ལྤགས་པ་བཤུས་པ་ལྟ་བུའམ་རྨ་རྨེན་བྲད་པ་ལྟ་བུའི་སྡུག་བསྔལ་དང་༔ མ་ཡིས་པང་དུ་བླངས་ཚེ་བྱིའུ་ཕྲུག་ཁྲས་ཁྱེར་བ་ལྟ་བུའི་འཇིགས་སྐྲག་དྲག་པོས་གདུངས་པའོ༔ ལྟོག་སྐོམ་ཚ་གྲང་དང་ན་ཚ་ལ་སོགས་པས་གདུངས་ཚེ་ངུ་བ་ལས་ནུས་པ་མེད་པའོ༔ གཉིས་པ་རྒས་པའི་སྡུག་བསྔལ་ནི༔ མི་ཚེ་ཟད་མི་ཤེས་པས་འཇིག་རྟེན་འཁོར་བའི་བྱ་བཞག་ལ་གཡེང་ནས་ལུས་ཀྱི་སྟོབས་རྩལ་ཐམས་ཅད་རིམ་པ་བཞིན་དུ་ཟད་ནས་ཁའི་སོ་འཐོར༔ མགོ་སྐྲ་དཀར་པོར་སོང་༔ ལུས་ཀྱི་ཤ་ཉམས་པས་ལུས་པོ་ཐམས་ཅད་གཉེར་མས་གང་༔ རྐང་ལག་ཐམས་ཅད་ལ་ཕྲ་སྦོམ་ཞན་ནས་སྒྱིད་པ་འདར༔ སྐེད་པ་སྒུར་ཞིང་སོར་ཚིགས་རྣམས་འཁྱོག་ནས་ལྦ་བ་རྡོལ་ལྕེ་རིང་ཞིང་མིག་འགྲིབ་པ་རྣ་བ་འོན་པ་སེམས་ཐིབས་ཤིང་བློ་རྨོངས་པ་དང་༔ ལངས་མི་ཐུབ་ཅིང་འགྲོ་སྟོབས་ཉམས་ནས་ལྷུ་ཚིགས་ན་བ་དང་༔ སྡོད་པའི་སར་མི་ཚུགས་པར་ན་ཚ་མང་བ་དང་༔ ཕ་རོལ་པས་བརྙས་བཅོས་བྱེད་ཅིང་སྡང་བ་དང་༔ དབང་ཆུང་ཞིང་ཟས་གོས་མི་འབྱུང་བས་བཀྲེས་ཤིང་གྲང་ལྷག་གིས་གདུང་བ༔ གཞན་གྱིས་ཤི་སྨོན་བྱེད་པ་ལ་ཡི་ཆད་ནས་སེམས་ལ་སྡུག་བསྔལ་ཆེན་པོ་བཟོད་དུ་མེད་པ་འབྱུང་བའི་སྟེང་དུ་ཅི་སྨྲས་ཅི་བྱས་ཐམས་ཅད་གཞན་གྱིས་ལོག་པར་བལྟས་ནས་ཚིག་རྩུབ་དྲག་པོ་མི་བཟོད་པ་དང་༔ ཉིན་མོ་ཉིན་མི་ཆོད་པ་དང་༔ མཚན་མོ་གཉིད་མི་འབྱུང་ཞིང་ནམ་རིང་བ་དང་༔ ལྕེའི་དབང་པོ་ཉམས་པས་བཟའ་བཏུང་གི་རོ་མི་མྱོང་ཞིང་བཟའ་བའི་ཟས་མི་འཇུ་བར་རྟག་ཏུ་ན་ཚ་ཟུག་རྔུའི་སྡུག་བསྔལ་གྱི་ཚོར་བ་རྒྱུད་ཆད་མེད་པར་ཉམས་སུ་མྱོང་བའོ༔ གསུམ་པ་ན་བའི་སྡུག་བསྔལ་ནི༔ དབང་པོ་བཀྲ་ཞིང་ལང་ཚོ་དར་ལ་བབ་པའི་མི་ཞིག་ཡིན་ཡང་ནད་དྲག་པོ་ཞིག་གིས་ཐེབས་པའི་ཚེ་ན་སྟོབས་དང་རྩལ་ཐམས་ཅད་ཉམས་ནས་རྡོ་ཐང་ལ་ལྷུང་བ་ལྟ་བུར་འགྱུར་ཏེ༔ ལུས་ཀྱི་སྟོབས་ཉམས་ནས་སྡོད་སར་མི་ཚུགས༔ རྩལ་ཉམས་ནས་མལ་ས་རུ་ལྷུང་༔ མིག་གིས་མཐོང་ཚད་ཐམས་ཅད་གནོད་བྱེད་དུ་མངོན་ཞིང་༔ རྣ་བས་སྒྲ་ཐོས་པ་ཐམས་ཅད་མི་སྙན་པར་གོ་བ་དང་༔ སྣས་དྲི་དང་ལྕེས་རོ་མྱོང་བ་ཐམས་ཅད་ཡིད་དུ་མི་འོང་བར་འགྱུར་བ་དང་༔ ལུས་ཀྱི་གོས་དང་རེག་བྱའི་རིགས་རྣམས་ཀྱང་ལྕི་ཞིང་རྩུབ་པར་སོང་༔ ཁྱོད་ཅི་ན་དྲིས་ཀྱང་ལན་འདེབས་མི་ནུས་ཤིང་ཤུགས་རིང་ཐུང་འདོན་པ་དང་མཉམ་དུ་སྐད་དཔང་དམན་པོའི་ཚིག་གི་སྒྲ་མི་གོ་བ་ཙམ་ལས་སྨྲ་མི་ནུས༔ སྨན་དཔྱད་དང་རིམ་གྲོ་ཅི་བྱས་ཀྱང་ཕན་པ་མི་འབྱུང་༔ ཉིན་མོ་ཉིན་རིང་མཚན་མོ་ནམ་མི་ཆོད་པའི་སྡུག་བསྔལ་དང་༔ ཡི་ག་ཆད་ནས་ཟས་སྐོམ་དུག་ལྟ་བུར་འགྱུར་བ་དང་༔ འགུལ་བསྐྱོད་བྱེད་ཚེ་ཟུག་ཟེར་བསླང་ནས་བཟོད་དུ་མེད་པའི་ཚོར་བ་མྱོང་བ་དང་༔ འཆི་སོས་ཀྱི་ཐག་མི་ཆོད་པར་ནད་ལས་གྲོལ་བ་ལ་རེ་ཞིང་གདུང་བ་དང་༔ འཆི་བ་ལ་དོགས་ཤིང་སྐྲག་ནས་སེམས་སྡུག་གིས་རྒྱུད་གང་བ་དང༔ གཞོགས་གཡས་གཡོན་རྒལ་པ་གང་ལྟར་ཉལ་ཡང་མི་བདེ་བ་ཁོ་ན་ལས་བདེ་པའི་གོ་སྐབས་མེད༔ ལ་ལས་འཁྲུལ་སྣང་གི་དབང་གིས་རང་སྲོག་གཅོད་ཅིང་༔ ལ་ལ་ནད་ཡུན་རིང་ཞིང་གཞན་དག་སུན་ནས་ནད་གཡོག་བྱེད་མི་མེད་པ་དང་༔ ནད་ཀྱིས་མནར་བའི་སྟོབས་ཀྱིས་གཞན་ལ་ཚིག་རྩུབ་སྨྲ་ཞིང་ཕན་པ་བྱས་ཚད་གནོད་པ་རུ་ཁྱེར་བ་ལྟ་བུར་གྱུར་ནས་ཀུན་གྱི་བློ་སུན་པ་དང་༔ ལ་ལ་ནི་མཛའ་བཤེས་དང་ཉེ་འབྲེལ་རྩ་ལག་མེད་པའི་ནད་གཡོག་བྱེད་མི་མི་འབྱོར་ཞིང་གྲང་ལྷག་གི་ཚོར་བས་གདུང་སྟེ་མི་གཙང་བའི་འདམ་དུ་ཚུད་པ་ལ་སོགས་པས་ཤིན་ཏུ་ཉམ་ཐག་པར་འགྱུར་བ་དང་༔ སྨན་གྱི་རོ་ནུས་ཡིད་དུ་མི་འོང་བ་དང་༔ མི་འདོད་བཞིན་དུ་གཏར་བསྲེགས་སྣ་ཚོགས་བྱེད་དུ་བཅུག་པ་ལ་སོགས་པ་ན་བའི་སྡུག་བསྔལ་བསམ་གྱིས་མི་ཁྱབ་པའོ༔ བཞི་པ་འཆི་བའི་སྡུག་བསྔལ་ནི༔ ལུས་མལ་དུ་ལྷུང་ནས་འགུལ་མི་ནུས༔ ཟས་སྐོམ་རི་རབ་ཙམ་ཡོད་ཀྱང་ཡི་ཁར་མི་འོང་༔ གཉེན་བཤེས་རྩ་ལག་གིས་མཐའ་ནས་བསྐོར་ཡང་བལྟ་བ་དང་ཉན་པའི་དབང་ནི་མེད༔ འཁྲུལ་པ་རྣམ་པ་སྣ་ཚོགས་པས་གདུང་ཞིང་བུ་ནོར་ཆུང་མ་ཐམས་ཅད་ལ་ཞེ་ཆགས་པས་ཡི་མུག༔ འཆི་བ་ཐོག་ཏུ་བབས་པ་ལ་སེམས་སྡུག་བསྔལ་བཟོད་མེད་དུ་སྐྱེ༔ སྔར་བྱས་ཀྱི་སྡིག་པ་དྲན་ནས་འགྱོད་ཅིང་སྔངས་སྐྲག་སྐྱེ་ཞིང་ད་རེས་འཆི་ཆོས་ཞིག་མ་འགྲུབ་པར་ང་རང་གཅིག་པུ་འཇིག་རྟེན་ཕ་རོལ་ཏུ་འགྲོ་བ་ལ་ཐུག་པ་འདི་ང་རེ་ཕུང་སྙམ་དུ་བྲང་ལ་སྤར་ཤད་བྱེད་པ་དང་༔ གཤིན་རྗེའི་ཕོ་ཉ་སླེབས་པ་ལ་འཇིགས་སྐྲག་དྲག་པོ་སྐྱེ་བ་དང་༔ མིག་གིས་མཐོང་དཀར་བྱེད་ཅིང་སྣ་ཞོམ་ཟས་སྐོམ་ཁ་རུ་བཏུང་བ་སྣ་རུ་ལྡོག་པ་ལུས་ཀྱི་དྲོད་སྡུད་ཅིང་འཁྱག་སྣང་སྐྱེ་བ་ཁ་ལྕེ་སྐམ་ནས་ཡོད་པའི་དུས་སུ་འཆི་ངེས་པའི་ཁོ་ཐག་ཆོད་ཅིང་༔ རྩ་ཆད་དེ་རླུང་གི་གཡོ་འཁྲུགས་ཀྱིས་འཁྲུལ་སྣང་ལ་ཉིང་འཁྲུལ་ཆེན་པོའི་ཚོར་བ་མྱོང་བ་ནི་རྩ་ཆེན་ཆད་ཚེ་ཁང་པ་རྡིབ་པ་ལྟ་བུ་དང་༔ རྩ་ཕྲན་ཆད་ཚེ་ཀྭ་བ་འགྱེལ་བ་ལྟ་བུའི་སྣང་བ་འཆར་ཏེ༔ ཤི་བའི་ཚེ་ན་རི་རབ་སྟེང་དུ་རྙིལ་བ་ལྟ་བུར་བརྒྱལ་ནས་མཐར་བར་དོའི་ཡིད་ལུས་བཟུང་ནས་འཇིགས་སྐྲག་གི་སྣང་བ་བཟོད་བླག་མེད་པར་ཤར་ནས་ལས་ཕྱི་མའི་རྣམ་སྨིན་ལ་གཏུགས་པ་ཡིན་པས་ཤིན་ཏུ་སྡུག་བསྔལ་བའོ༔ གཞན་ཡང་མི་རྣམས་སྤྱི་ལ་ཁྱབ་པའི་སྡུག་བསྔལ་གྱི་ཆུ་བོ་བཞི་དང་༔ དེའི་སྟེང་དུ་མི་རྗེ་རྣམས་ཀྱིས་འབངས་བཀའ་འོག་ཏུ་མི་འདུ་བ་དང་༔ དགྲ་མི་འདུལ་བའི་སྡུག་བསྔལ༔ འབངས་སྡེ་ཐམས་ཅད་རྗེ་དཔོན་གྱིས་ཁྲིམས་རར་ཚུད་པའི་སྡུག་བསྔལ་དང་༔ མི་ཁེ་དྲག་དང་ལྡན་པ་རྣམས་ནི་ཁས་ཞན་དུ་འགྱུར་གྱི་དོགས་པའི་སྡུག་བསྔལ༔ ཁས་ཞན་པ་རྣམས་ཁས་དྲག་ཏུ་རེ་བའི་སྡུག་བསྔལ༔ ཕྱུག་པོ་རྣམས་ནོར་ཕྱུགས་ཀྱི་ཆེད་དུ་དཀའ་སྤྱད་མི་ནུས་པའི་སྡུག་བསྔལ༔ དབུལ་པོ་རྣམས་ལྟོ་རྒྱབ་མི་འབྱུང་བའི་སྡུག་བསྔལ༔ བུ་འདོད་པ་དག་ཀྱང་བུ་འབྱུང་དུ་རེ་བ་དང་༔ བུ་ཡོད་པ་དག་ཀྱང་ཁ་མི་མཐུན་པའི་སྡུག་བསྔལ༔ དགྲ་སྡང་བ་དང་འཕྲད་ཀྱིས་དོགས་པ་དང་༔ གཉེན་བྱམས་པ་དང་བྲལ་གྱིས་དོགས་པའི་སྡུག་བསྔལ༔ འཇིགས་པ་དང་གནོད་འཚེ་ལ་སོགས་པའི་མི་འདོད་པ་ཐོག་ཏུ་འབབ་པ་དང་༔ འདོད་པ་ཐོག་ཏུ་མི་ཁེལ་བའི་སྡུག་བསྔལ་ལ་སོགས་མི་ཆེ་ཆུང་སོ་སོའི་ཐད་དུ་རང་རང་གི་ངོ་སྐལ་གྱི་སྡུག་བསྔལ་རེ་མེད་མི་སྲིད་པ་ཡིན་ཏེ་བློས་ནན་དུ་གཞིག་དང་མི་རྣམས་ཀྱི་རྒྱུ་མཚན་རང་གིས་ཤེས་པར་འགྱུར་རོ༔ མཐོ་རིས་ཀྱི་གནས་གཉིས་པ་ལྷ་མ་ཡིན་ནི་ཕྲག་དོག་གི་དབང་གིས་གནས་དེར་འཕེན་པ་ཡིན་ཏེ་རྒྱུད་ཕྲག་དོག་གིས་གང་ནས་འཐབ་རྩོད་ལ་འབད་པ་ཤ་སྟག་གོ༔ སྤྱིར་ལོངས་སྤྱོད་ལྷ་འགའ་ཞིག་ལ་འགྲན་པ་ཙམ་ཡོད་ཀྱང་གཞན་གྱི་ལོངས་སྤྱོད་མཐོང་བ་ཙམ་གྱིས་ཕྲག་དོག་བཟོད་བླག་མེད་པ་སྐྱེས་ཏེ་རྩོད་པ་ལ་ཞུགས་ཤིང་ཆས་པ་ཡིན༔ སྟེང་གི་ལྷ་རྣམས་ཀྱི་དཔལ་འབྱོར་ལོངས་སྤྱོད་དང་དཔག་བསམ་གྱི་ཤིང་ལས་དགོས་འདོད་སྣ་ཚོགས་འབྱུང་བ་མཐོང་ནས་ཤིང་དེའི་རྩ་བ་ལྷ་མ་ཡིན་གྱི་ཡུལ་དུ་གནས་པ་ལ༔ རྩེ་མོ་ལྷའི་ཡུལ་དུ་འཁྲུངས་པ་མཐོང་ནས་གཅོད་པ་ལ་ཆས་པ་ན༔ ལྷའི་བདུད་རྩི་བཏབ་པས་ཅི་ཙམ་བཅད་པ་དེ་ཙམ་གྱིས་ཆེར་འཕེལ་ནས་གཅོད་མ་ཐུབ་པས་མཐར་ལྷ་རྣམས་བརླག་པར་བྱ་དགོས་ཞེས་གྲོས་བཏབ་ནས་དམག་དཔུང་ཆེན་པོ་བསྡུས་ཏེ་ཕྱིན་པའི་ཚེ༔ ལྷ་རྣམས་ཀྱིས་ཀྱང་རྩུབ་འགྱུར་གྱི་ཚལ་དུ་ཕྱིན་ནས་མཚོན་ཆ་སྣ་ཚོགས་བླངས་ཏེ་གླང་པོ་ཆེ་ས་ལ་རབ་བརྟན་ཞེས་བྱ་བ་མགོ་བོ་སུམ་ཅུ་རྩ་གསུམ་པ་ཅན་ཞིག་གི་མགོ་བོ་སུམ་ཅུ་རྩ་གཉིས་ལ་ཉེ་དབང་སུམ་ཅུ་རྩ་གཉིས་དབུས་ཀྱི་མགོ་བོར་དབང་པོ་བརྒྱ་བྱིན་བཞུགས་ཤིང་དེ་འཁོར་ལྷ་དམག་བསམ་གྱིས་མི་ཁྱབ་པས་བསྐོར་ནས་གཟི་བརྗིད་དང་དཔའ་ཟིལ་འབར་བཞིན་དུ་བྱུང་སྟེ་འཐབ་པས༔ ལྷ་རྣམས་ནི་རྫུ་འཕྲུལ་དང་ལྡན་པས་རི་བོ་རྣམས་འཕེན་པ་དང་མཚོན་ཆའི་ཆར་ཕབ་པས༔ ལྷ་མ་ཡིན་རྣམས་ཀྱི་མགོ་དང་ཡན་ལག་དོན་སྙིང་གང་ལ་ཕོག་ཀྱང་ཐལ་རྡུལ་བཞིན་དུ་བརླག་པ་དང་༔ གསོད་པ་དང་ནང་རོལ་ཕྱིར་འདོན་བཞིན་དུ་ད་དུང་ཡང་འགྲོ་ཞིང་ཉམ་ཐག་པ་དང་༔ ལྷ་རྣམས་ནི་བསོད་ནམས་དང་དཔལ་དང་ལོངས་སྤྱོད་ཀྱིས་ཕྱུག་པའི་སྟོབས་ཀྱིས་སྔོན་གྱི་ལས་དབང་གིས་འགྲོ་བ་རེ་རེ་ཙམ་གྱི་མགོ་བོ་བཅད་ན་ཤི་བ་མ་གཏོགས་ལུས་ལ་རྨ་ཅི་ཙམ་ཡོད་ཀྱང་ལྷའི་འཆི་སོས་ཀྱི་བདུད་རྩི་བླུགས་པས་འཚོ་བར་འགྱུར་ལ༔ ལྷ་མ་ཡིན་རྣམས་ནི་གནད་གང་ལ་ཕོག་ཀྱང་འཆི་བ་དང་བརྒྱལ་བ་དང་རྦབ་གྲིར་འཆི་བ་དང་༔ ལྷའི་གླང་པོ་ཆེའི་སྣ་ལ་མཚོན་ཆའི་འཁོར་ལོ་བཏགས་ཏེ་སྨྱོ་ཆང་བླུད་པས་མྱོས་ཤིང་ཕྱོགས་ཐམས་ཅད་དུ་བསྐོར་བས་ལྷ་མ་ཡིན་གྲངས་མེད་པ་བསད་ཅིང་གཏུབ་ནས་རོ་རྣམས་རི་རབ་ཀྱི་ངོས་ནས་འདྲིལ་ཏེ་བར་མཚམས་སུ་མཚོ་ཡོད་པ་རྣམས་ཀྱི་ནང་དུ་ལྷུང་སྟེ་ཐམས་ཅད་ཁྲག་གི་ཁ་དོག་ཏུ་འགྱུར་བ་དང་༔ ནང་རང་ཡུལ་གྱི་བསོད་ནམས་ལའང་ཕྲག་དོག་སྐྱེས་ནས་གཡུལ་འཁྲུགས་དང་འཐབ་རྩོད་དྲག་པོ་རྒྱུན་མི་ཆད་པར་བྱེད་ཅིང་༔ ལུས་རྨས་པ་དང་རུས་པ་ཆག་པ་སྐྲང་པ་ལ་སོགས་པའི་སྡུག་བསྔལ་གྱི་ཚོར་བ་རྒྱུན་ཆད་མེད་པར་མྱོང་བ་དང་༔ བཟའ་མི་ཐམས་ཅད་ཀྱང་ཕན་ཚུན་མཚོན་དང་དབྱུག་པས་བརྡེག་པ་ལ་སོགས་བདེ་བར་གནས་པའི་དུས་ནི་ཟླ་གཅིག་ཙམ་ཡང་མེད་པས་ཤིན་ཏུ་སྡུག་བསྔལ་བའོ༔ དེ་ལྟ་བུ་ལ་བསམ་ནས་འཁོར་བ་ལ་ངེས་འབྱུང་དང་སྐྱོ་ཤས་བསྐྱེད་པ་གནད་དོ༔ མཐོ་རིས་ཀྱི་གནས་གསུམ་པ་ལྷ་ལ་ཡང་༔ སྟེང་ཕྱོགས་ལྷའི་འཇིག་རྟེན་ཞེས་བྱ་བ་ཡོད་པས་དེ་ལའང་དང་པོ་བདེ་སྐྱིད་དང་ལོངས་སྤྱོད་ཀྱི་དཔལ་ཡོན་བསམ་གྱིས་ཁྱབ་པ་ཡོད་ཀྱང་༔ གཞན་འཕྲུལ་དབང་བྱེད་ཀྱི་གནས་མན་ཆད་ཀྱི་འདོད་ལྷ་རིགས་དྲུག་པོ་ལ་ཐ་མ་རྒུད་ཅིང་ཉམས་ཏེ་སྡུག་བསྔལ་ཐོག་ཏུ་བབ་ནས་ཉ་བྱེ་ཚན་དུ་བསྒྲིལ་བ་ལྟ་བུའི་སྡུག་བསྔལ་ལ་ཡུན་རིང་པོར་སྤྱོད་དགོས་པ་དང་༔ ཚེ་ནི་བསྐལ་པར་ཐུབ་ཀྱང་དགའ་བདེ་ལོངས་སྤྱོད་ཀྱི་རོས་མྱོས་ཤིང་རྣམ་གཡེང་དང་ལེ་ལོར་འབྱམས་ནས་སྐད་ཅིག་ཙམ་གྱི་སྣང་བ་ལས་ཡུན་མི་རིང་བར་རྒུད་པ་ལ་ཐུག་པར་འགྱུར་ཏེ༔ དཔག་ཚད་ཚུན་ཆད་གསལ་བའི་རང་འོད་དང་བཀྲག་མདངས་ཀྱང་ཉམས༔ ལྷའི་མལ་གདན་ལ་ཅི་ཙམ་སྡོད་ཀྱང་མི་བདེ་བ་ཅུང་ཟད་ཙམ་ཡང་མེད་པ་ལ་འདིའི་དུས་སུ་སྡོད་སྙིང་མི་འདོད་པ་དང་སྡོད་སར་མི་ཚུགས༔ ལྷའི་གོས་ཅི་ཙམ་གོན་ཡང་དྲི་མ་དང་རྡུལ་མི་ཆགས་པ་ལ་རྡུལ་དང་དྲི་མ་ཆགས༔ ལྷའི་མེ་ཏོག་གི་ཕྲེང་བ་རྙིང་མི་སྲིད་པ་ལ་དུས་དེར་རྙིང་པ་དང་༔ ལྷའི་ལུས་ལ་རྔུལ་ཆུ་མི་འབྱུང་བ་ལ་རྔུལ་ཆུ་འབྱུང་༔ མཆན་ཁུང་དང་སྒྱིད་ཁུང་རྡུལ་ཞིང་དྲི་ངན་མནམ་པ་ལ༔ ལྷ་གྲོགས་དང་ཆུང་མ་བུ་མོ་རྣམས་ཀྱིས་འཆི་བར་ཤེས་ནས་དཔག་ཚད་ལས་རིང་བར་བསྐྱལ་ཏེ་མེ་ཏོག་འཐོར་ནས་ཁྱོད་འདིི་ནས་འཕོས་མ་ཐག་ཏུ་མིའི་ལུས་རྟེན་ཐོབ་ནས་ཆོས་ལ་སྤྱོད་ཅིང་སླར་ཡང་གནས་འདི་རུ་སྐྱེ་བར་ཤོག་ཅིག་ཟེར་ཞིང་ཕྱོགས་སུ་གྱེས་པ་ལས༔ རང་ཤི་བར་ཤེས་ནས་ཤིན་ཏུ་སྡུག་བསྔལ་དྲག་པོས་གདུང་ཞིང་དེའི་ཁར་འཕོས་པའི་དུས་ཀྱི་ཚེ་གནས་ངན་དུ་ལྟུང་བའི་ཡུལ་གང་དང་གང་ཡིན་པ་དེ་ལྷའི་མིག་གིས་མཐོང་ནས་སྡུག་བསྔལ་སྔ་མའི་ཐོག་ཏུ་ཕྱི་མས་ནོན་ལ་ཁད་པའི་སྡུག་བསྔལ་ལྷའི་ཞག་བདུན་ལ་མྱོང་དགོས་པའི་སྡུག་བསྔལ་དམྱལ་བ་ལ་འགྲན་པ་ཙམ་འབྱུང་བ་དང་༔ ཁམས་གོང་མ་གཉིས་ལ་དེ་ལྟ་བུའི་སྡུག་བསྔལ་མེད་ཀྱང་སྔོན་བསགས་བསོད་ནམས་ཀྱི་འཕྲོ་ཟད་ཙམ་ཉིད་ནས་གནས་རིགས་གཞན་དུ་ལྟུང་བའི་སྡུག་བསྔལ་གྱི་ཐོག་ཏུ་མི་ཕེབས་པ་མེད་མི་སྲིད་དོ༔ དེ་ལྟ་བུའི་སྡུག་བསྔལ་ཡིད་ལ་དྲན་ཞིང་བསམ་མནོ་ཞིབ་ཏུ་བཏང་སྟེ་འཁོར་བ་ལས་ཐར་པའི་ཐབས་ཟབ་མོ་ཉམས་སུ་ལེན་པ་ལ་འབད་པ་ནི་གནད་ཀྱི་དམ་པ་ཡིན་ནོ༔ ལར་དེང་སང་གི་དུས་སུ་ཁ་ཟས་དང་ནོར་ཕྱུག་གོས་རྒྱན་ཐམས་ཅད་འཁོར་བ་དང་ངན་སོང་གི་རྒྱུ་ལས་མེད་པ་དང་༔ ལུས་ཀྱི་བྱ་བྱེད་འགྲོ་འདུག་གི་སྐབས་སུ་སྲོག་ཆགས་ཕྲ་མོ་དབང་མེད་དུ་བསད་པ་དང་༔ ཁལ་རྟ་ཞོན་པ་ལ་ལོངས་སྤྱོད་པ་དང་༔ སེམས་ཀྱི་ཆགས་སྡང་རྨོངས་གསུམ༔ ངག་གིས་མནའ་ཟོས་པ་བདག་བསྟོད་ཅིང་གཞན་སྨད་པ་ལ་སོགས་པ་ལ་བསམ་ན་ངན་སོང་དུ་སྐྱེ་བའི་རྒྱུ་བསགས་པ་ཁོ་ན་ལས་མེད་ངེས་པའི་ཕྱིར༔ འགྲོ་ས་ངན་སོང་དང་མྱོང་རྒྱུ་སྡུག་བསྔལ་ལས་མེད་པའི་ཚུལ་ངེས་པར་ཤེས་ནས་བློས་དོར་ཏེ་སྐྱོ་བ་གཏིང་ནས་སྐྱེ་བ་ཞིག་དགོས༔ དེང་སང་གི་དུས་སུ་ཟས་ནོར་ཅི་ཙམ་ཡོད་ཀྱང་ད་དུང་དེ་ལས་མང་ཞིང་རྒྱ་ཆེ་བ་ཞིག་ལ་རེ་འདོད་ཇེ་ཆེ་རུ་འཕེལ་ཞིང་ཆོག་མི་ཤེས་པ་བྱུང་ནས་དེའི་ཆེད་དུ་དཀའ་ཚེགས་བཟོད་ཅིང་ཚེ་དང་སྲོག་ལའང་མི་ཕངས་པར་ཁོར་མོ་ཡུག་ཏུ་འབད་པ་དང་༔ ལ་ལས་གོ་ས་མཐོན་པོར་རློམ་ནས་རྫུན་དང་གཡོ་སྒྱུའི་དབང་གིས་མི་རྗེ་བླ་ཆེན་དུ་སོང་བའི་དུས་ཞིག་ན་ཟས་ནོར་གྱི་གཏོང་སྒོ་ཆེན་པོར་གྱུར་ནས་མཐོན་པོའི་ཞབས་མི་ཁྱོག༔ གཉེན་བཤེས་རྩ་ལག་གི་ངོ་མི་ལོན༔ དམན་པ་རྣམས་ཀྱི་ཡིད་མི་ཚིམས༔ རང་ཞེ་ལ་ཕན་ཆེན་པོ་བཏགས་པ་ཡོད་ཀྱང་གཞན་ཕལ་པ་དག་ལ་ངོ་ཡོད་པར་མ་ཟད་བླ་བཙག་རྐང་འདྲེན་བྱེད་པའི་མཐའ་ལ་ཆོད་དུས་ནི་མི་འོང་༔ ཚིག་ངན་གྱི་དབལ་བབས་ཚེ་བཟོད་བླག་མེད་བཞིན་དུ་ཚོར་བ་བཟོད་དུ་ཁུར་ནས་མི་སྡོད་པའི་ཐབས་ནི་མེད་ལ༔ མི་ཆེན་གྱི་གོ་སར་སླེབ་པ་དག་ཀྱང་ཧ་ཅང་བཙན་དྲག་ན་ཡང་འབངས་འཁོར་ཐམས་ཅད་ཀྱིས་བསམ་སྦྱོར་གནག་ནས་སྲོག་གཅོད་ཀྱི་གཤེད་མ་ལྟར་འཛིན་པ་དང་༔ ཧ་ཅང་འཇམ་ཆེས་ནའང་འབངས་དང་འཁོར་རྣམས་ཀྱིས་བརྙས་བཅོས་བྱེད་ཅིང་དབང་དུ་མི་འདུ་བ་དང་༔ འཁོར་འདབས་མང་ན་དགྲ་གྱོད་ཀྱང་དེ་བཞིན་དུ་མང་བས་ཁེ་ལམ་རེ་མོས་སུ་འགྱུར་བ་དང་༔ མི་ཆེན་ཐོབ་ཐང་ཇི་ལྟར་ཆེ་ཡང་ཚིག་ངན་སྡུག་བསྔལ་གྱི་ཁུར་བུ་ཡང་དེ་ལྟར་ལྕི་བས་བདེ་སྐྱིད་སྤུ་རྩེ་ཙམ་ཡང་མི་མྱོང་བ་དང་༔ བླ་ཆེན་རྣམས་ཀྱང་གཏོང་ཕོད་ཤིན་ཏུ་རྒྱ་ཆེ་དྲགས་ན་རང་གི་ལྟོ་རྒྱབ་མི་འབྱུང་ཞིང་དཀོར་ལ་སྤྱོད་པའི་རྣམ་སྨིན་ཆེས་ཆེར་འཕེལ་ནས་འཁོར་བ་མཐའ་མེད་པའི་གཏིང་རྡོ་ཆེན་པོ་རུ་འགྱུར་ཞིང་༔ ཚེ་འདི་ཡང་ཟས་ནོར་ཆུ་ཀླུང་ལྟ་བུ་རྒྱུན་ཆད་མེད་པར་འབྱུང་ཡང་བསགས་པ་བསོགས་དུས་ནི་མེད་ཅིང་འདོད་པ་ཐོག་ཏུ་ཁེལ་དུས་ཀྱང་མེད༔ གཞན་སྦྱིན་ཡུལ་རྣམས་ཀྱིས་ཀྱང་ཁོང་རྣམས་ལ་འདིས་ཕན་བཏགས་པར་མི་སེམས་ཤིང་འདིས་རང་ཕུང་རང་བརླག་བྱས་པ་འདི་ཕྱི་གཉིས་ཕུང་ཟེར་ཞིང་རྐང་འདྲེན་པ་དང་༔ བླ་མ་ཧ་ཅང་བཙན་དྲག་ན་གྲྭ་འཁོར་ཐམས་ཅད་ཀྱིས་སྤངས་ཤིང་གནོད་འཚེ་བྱེད་ཅིང་ལོག་པར་ལྟ་བ་དང་༔ འཇམ་ཆེས་ནའང་ཀུན་གྱིས་བརྙས་བཅོས་དང་བཀའ་མི་བརྩི༔ གཏོང་ཕོད་ཆུང་ན་སེར་སྣ་འཇུར་འགག་ཆེ་ཟེར་ཞིང་ཀུན་གྱིས་སྨད་ཅིང་སྤངས་པ་དང་༔ གྲྭ་སློབ་མང་ན་ཡང་བྱ་བྱེད་ཐམས་ཅན་ཟིན་དུས་མེད་ཅིང་མི་འགྲུབ་པའི་དབང་ནི་མེད༔ བླ་ཕྲན་རྣམས་ཀྱང་གོ་ས་མཐོན་པོར་རློམས་ནས་བྱ་བྱེད་མང་ན་ལས་ཀ་ཟད་པའི་མཐའ་མེད་པས་མི་ཁོམ་པ་རིན་གྱིས་ཉོས་པ་ཡིན༔ བན་ཆུང་རྣམས་ཀྱང་དབང་ཆུང་ཞིང་ཐོབ་ཐང་དང་མི་ཆེན་གྱི་གོ་ས་ལ་རློམས་ནས་བྱ་རྒྱུ་མང་ན་མཐའ་མར་ལས་མཐའ་ལོག་ནས་འགྲོ་བ་ལས་འོས་མེད་པས་རྟག་ཏུ་དབང་ཆུང་བ་མི་ངན་གྱི་གོ་སར་འདུག་ཅིང་རང་ཚོད་རང་གིས་ཟིན་ན་འདི་དང་ཕྱི་མ་གཉིས་སུ་སྐྱིད་ངེས་པ་ཡིན་ལ༔ མི་དྲག་དང་བླ་ཆེན་དག་ཀྱང་སྡུག་བསྔལ་མཐའ་མེད་བཟློག་མེད་ཀྱི་ཁུར་ཆེན་པོ་ཐོག་ཏུ་བབ་ཚེ་འདི་ལྟ་བུའི་འཁོར་ཆེན་དུ་མི་སྐྱེ་བར་ཡིད་སྨོན་བྱེད་ཀྱིན་ཡོད་པའི་ཕྱིར་ན༔ རན་ཙམ་ཐོབ་ཆུང་ནི་བླ་ཆུང་དང་ཁུར་ཐང་མེད་པའི་བན་ཆུང་རྣམས་ཀྱིས་རང་ས་བཟུང་ནས་ཆོས་ལ་སྤྱོད་ན་དེ་ལས་ལྷག་པའི་བདེ་སྐྱིད་ཅན་ནི་འཇིག་རྟེན་གྱི་ཁམས་འདི་ན་གཅིག་ཀྱང་ཡོད་པ་མ་ཡིན༔ འཁོར་བའི་བྱ་བ་འདི་ལ་འགྲུབ་ཚར་དུས་དང་ཟིན་པའི་དུས་ནི་འཆི་བའི་ནངས་པར་ལ་ཐུག་གི་བར་དུ་མི་འོང་༔ དེ་རིང་བྱ་བ་ཅི་བསྒྲུབ་ཐམས་ཅད་སང་གི་ཉིན་པར་ཡང་བྱིས་པའི་རྩེད་མོ་བཞིན་དུ་འགྱུར་ཞིང་ཡང་ཡང་ཤི་མཐའ་ལ་ཐུག་གི་བར་དུ་ཟིན་དུས་མེད་པར་ཁོར་མོ་ཡུག་ཏུ་སྤྱོད་ཅིང་མཐར་རྒས་ཤིང་འཁོག་པའི་དུས་སུ་ཡང་འཁར་བ་ཐོགས་ནས་ད་དུང་ཡང་མི་རབ་མང་པོས་ཆས་དོན་གཏམས་ཤིང་སུན་པ་མེད་པར་འཁོར་བའི་འདུག་ཆས་ལ་འབད་རྩོལ་བྱེད་ཅིང་འཆི་བའི་ནངས་པར་ལ་བབ་ཚེ༔ ངས་མི་ཚེ་སྟོང་ཟད་དུ་སོང་ནས་ཕྱི་མའི་འགྲོ་ཆས་ཅུང་ཟད་ཙམ་ཡང་མ་འགྲུབ་པ་འདི་ཕུང་ཆེ་བསམ་ཞིང་འགྱོད་པ་ཕྱིན་ཅིའི་ཡུལ་དུ་ཁྱེར་ཡང་འཕྱི་བ་ཡིན་ཏེ་ཅི་ལ་ཕན༔ དེ་ལྟ་བུའི་དོན་ཡོད་མེད་ཀྱི་བྱ་བཞག་དེ་དག་ལ་བསམ་མནོ་ཞིབ་ཏུ་བཏང་ནས་རང་མགོ་འདོན་པའི་ཐབས་ལ་འབད་པ་ནི་ཆོས་ཐམས་ཅད་ཀྱི་སྲོག་ཤིང་དང་སྙིང་རྡོ་དམ་པ་ཡིན་ནོ༔ གོང་དུ་བཤད་པའི་འཁོར་བའི་སྡུག་བསྔལ་དེ་དག་བློ་ཐོག་ཏུ་བླངས་ནས་ཚིག་འདི་སྐད་དུ་བརྗོད་པར་བྱའོ༔ ཁམས་གསུམ་འཁོར་བ་སྡུག་བསྔལ་རང་བཞིན་ལ༔ ཆགས་ཞེན་འཁྲི་བ་གཏིང་ནས་ཆོད་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཞེས་ངེས་འབྱུང་དང་སྐྱོ་ཤས་དྲག་པོའི་སྒོ་ནས་གསོལ་བ་ཕུར་ཚུགས་སུ་གདབ་བོ༔ དོན་བཞི་པ་ལས་རྒྱུ་འབྲས་ཀྱི་ཁྲིད་ལ༔ ཐར་པ་དང་རྣམ་མཁྱེན་གྱི་གོ་འཕང་དོན་དུ་གཉེར་ཞིང་གཏན་གྱི་བདེ་བ་འདོད་པ་དག་གིས་ལས་རྒྱུ་འབྲས་དཀར་ནག་གི་བླང་དོར་མ་ནོར་བར་ལག་ལེན་ལ་བཏབ་དགོས་པ་ཡིན་ཏེ༔ ཅིའི་ཕྱིར་ཞེ་ན༔ འཁོར་བ་མཐོ་དམན་ཐམས་ཅད་ལས་ལས་སྐྱེས་པ་ཤ་སྟག་ལས་མེད་པ་རྒྱུད་ལུང་མན་ངག་རྣམས་སུ་གསལ་བ་བཞིན་ནོ༔ དེའི་ཕྱིར་ན་ཁམས་གསུམ་འཁོར་བ་སྡུག་བསྔལ་གྱི་རྒྱ་མཚོར་བཟོད་མེད་སྡུག་བསྔལ་དྲག་པོས་གདུང་ཞིང་མནར་བའི་རྒྱུ་གང་ཡིན་ན་སྡིག་པ་མི་དགེ་བའི་ལས་ཡིན༔ སྡིག་པ་གང་ཞེ་ན་མི་དགེ་བ་བཅུ་སྟེ་བཅུ་པོ་ནི་ལས་ངན་པ་དང་མི་དགེ་བ་ཀུན་འདུས་སུ་འདུག་པའི་རྩ་བ་ཡིན་ལ༔ དེའང་ལུས་ཀྱི་ལས་གསུམ༔ ངག་གི་ལས་བཞི༔ ཡིད་ཀྱི་ལས་གསུམ་དང་བཅུའོ༔ དང་པོ་ལུས་ཀྱི་ལས་གསུམ་ལས་སྲོག་གཅོད་པ་ནི༔ སེམས་ཅན་སྲོག་ཆགས་ཕྲ་རགས་གང་གི་སྲོག་བཅད་ཀྱང་དེའི་རྣམ་སྨིན་གྱི་འབྲས་བུ་ནི༔ ཞེ་སྡང་གིས་ཀུན་ནས་བསླངས་པའི་ལས་དེས་དམྱལ་བར་ལྟུང་བ་དང་༔ འདོད་ཆགས་ཀྱིས་ཀུན་ནས་བསླངས་པའི་ལས་ཡི་དྭགས་སུ་ལྟུང་བ་དང་༔ དགེ་སྡིག་ངོ་མི་ཤེས་ཤིང་གཏི་མུག་གིས་ཀུན་ནས་བསླངས་པའི་ལས་དེས་དུད་འགྲོ་རུ་འཕེན་པ་ཡིན་ནོ༔ རྒྱུ་མཐུན་གྱི་འབྲས་བུ་ལ༔ བྱེད་པ་རྒྱུ་མཐུན་དང་མྱོང་བ་རྒྱུ་མཐུན་གཉིས་ལས༔ དང་པོ་བྱེད་པ་རྒྱུ་མཐུན་ནི༔ ངན་སོང་གི་གནས་ལས་ཐར་ཏེ་སྐྱེ་གནས་གཞན་དུ་འཕོས་ནའང་སྲོག་གཅོད་པ་ལ་དགའ་བ་དང་སྲོག་གཅོད་པའི་ནུས་པ་དང་ལྡན་པ་ཤ་སྟག་ཏུ་སྐྱེའོ༔ གཉིས་པ་མྱོང་བ་རྒྱུ་མཐུན་ནི༔ ཚེ་རབས་མང་པོར་ཚེ་ཐུང་བ་དང་ནད་མི་བཟོད་པ་ཐོག་ཏུ་འབབ་པར་འགྱུར་བའོ༔ དབང་གི་འབྲས་བུ་ནི༔ ཡུལ་གཅོང་རོང་ཟབ་མོ་རྩུབ་རེག་ཅན་དུ་སྡིག་སྤྱོད་ཀྱི་ལས་ལ་བརྩོན་པ་ཤ་སྟག་ཏུ་སྐྱེའོ༔ གཉིས་པ་མ་བྱིན་ལེན་པ་ནི༔ དངོས་པོ་ཆེ་ཆུང་གང་ཡང་རུང་བ་གཞན་གྱིས་བྱིན་པའམ་བློས་བཏང་བ་མ་གཏོགས་རྐུ་སེམས་ཡིད་ལ་བཟུང་ནས་བླང་བར་བྱ་བ་དང་༔ ཁྱད་པར་སྒྲུབ་པ་པོའི་ཟས་ནོར་དང་ཕྱོགས་བཅུ་དགེ་འདུན་གྱི་དཀོར་བརྐུས་ཤིང་འཕྲོག་པ་རྣམས་སོ༔ དེའི་རྣམ་སྨིན་གྱི་འབྲས་བུ་ནི༔ ཀུན་སློང་གི་བྱེད་ལས་ཀྱི་ཞེ་སྡང་གིས་དམྱལ་བ༔ འདོད་ཆགས་ཀྱིས་ཡི་དྭགས༔ གཏི་མུག་གིས་དུད་འགྲོ་རུ་ལྟུང་ཞིང་སྡུག་བསྔལ་བའོ༔ བྱེད་པ་རྒྱུ་མཐུན་ནི༔ ཚེ་རབས་མང་པོར་རྐུ་འཕྲོག་དང་དམག་ཇག་གི་ལས་བྱེད་པ་ཤ་སྟག་ཏུ་འགྱུར་བའོ༔ མྱོང་བ་རྒྱུ་མཐུན་ནི༔ ལོངས་སྤྱོད་ཤིན་ཏུ་དབུལ་ཞིང་སྡུག་བསྔལ་དང་ཟས་ནོར་རྟ་ཕྱུགས་ཅུང་ཟད་ཡོད་ཀྱང་དགྲ་ཇག་སོགས་གཞན་དང་ཐུན་མོང་དུ་འགྱུར་བའོ༔ དབང་གི་འབྲས་བུ་ནི༔ ཡུལ་བསེ་རག་ཅན་ལོ་ཏོག་མི་སྐྱེས་ཤིང་འབྲས་བུ་ཉུང་བ་ཟས་སྐོམ་བཙལ་ཀྱང་རྙེད་དཀའ་བའི་ཡུལ་དུ་སྐྱེའོ༔ གསུམ་པ་འདོད་ལོག་སྤྱོད་པ་ནི༔ ཆེ་ཤོས་གཞན་གྱི་སྡོམ་པ་གཏོང་བའི་རྒྱུ་བྱས་པ་དང་༔ རང་ལ་མི་དབང་བ་གཞན་གྱིས་བདག་ཏུ་བཟུང་བ་དང་༔ གླ་རྔན་སྤྲད་ཚར་བ་དང་༔ མྱ་ངན་གྱིས་ནོན་པ་ནད་ཀྱིས་གདུང་བ་ཉིན་མོ་དང་རྟེན་གཉན་པོའི་དྲུང་དུ་འཁྲིག་པ་སྤྱད་པའོ༔ དེའི་རྣམ་སྨིན་གྱི་འབྲས་བུ་ནི༔ ཆེ་ཤོས་ཉེ་བའི་མཚམས་མེད་དང་སྤྱི་མཐུན་དུ་ཞེ་སྡང་གིས་དམྱལ་བ༔ འདོད་ཆགས་ཀྱིས་ཡི་དྭགས༔ གཏི་མུག་གིས་དུད་འགྲོ་འགྲོར་འཕེན་པའོ༔ བྱེད་པ་རྒྱུ་མཐུན་ནི༔ ཚེ་རབས་ཀུན་ཏུ་འདོད་ལོག་སྤྱོད་པ་ལ་དགའ་བ་ཤ་སྟག་གོ༔ མྱོང་བ་རྒྱུ་མཐུན་ནི༔ ཁྱིམ་ཐབས་མི་མཛེས་ཤིང་རྟག་ཏུ་འཐབ་པ་དང་རྩོད་པ་དང་ཕན་ཚུན་ཁོང་ཁྲོ་དྲག་པོས་རྒྱུད་གང་ཞིང་དགྲ་ཟླ་ལྟ་བུར་གྱུར་ཏེ་ཚེ་རབས་མང་པོར་དེ་ལྟ་བུའི་ལས་ཉམས་སུ་མྱོང་བའོ༔ དབང་གི་འབྲས་བུ་ནི༔ ཡུལ་ཡིད་དུ་མི་འོང་བ་དྲི་ངན་མནམ་པ་མི་གཙང་བའི་འདམ་རྫབ་དག་ཏུ་གནས་དགོས་པའོ༔ གཉིས་པ་ངག་གི་ལས་བཞི་ནི༔ རྫུན་དང་ཕྲ་མ་ཚིག་རྩུབ་ངག་འཁྱལ་དང་བཞི་ལས༔ དང་པོ་རྫུན་དུ་སྨྲ་བ་ནི༔ ཆེ་ཤོས་གང་གིས་མི་ཆོས་པར་དཀའ་བ་བླ་མའི་རྫུན་གྲུབ་པ་མ་ཐོབ་ཀྱང་ཐོབ་པར་སྐད་པ་དང༔ མངོན་ཤེས་མེད་པ་ལ་ཡོད་པར་སྨྲ་བ་དང་༔ ས་མ་ཐོབ་པར་ཐོབ་པར་སྐད་པ་ལ་སོགས་རང་ཉིད་ཆེ་གྲགས་མཐོ་རློམས་ཀྱིས་རྒྱུད་ཁེངས་ནས་གཞན་བསླུ་ཚིག་བརྗོད་པ་རྣམས་དང་༔ གཞན་དག་ནི་གཡོ་སྒྱུའི་སེམས་ཀྱིས་རྒྱུད་གང་སྟེ་གཞན་བསླུ་བ་དང་མགོ་སྐོར་བྱེད་པ་གཞན་ཡང་མི་བདེན་པའི་ཚིག་འཆོལ་སྒྲོགས་སུ་སྨྲ་བའོ༔ དེའི་རྣམ་སྨིན་གྱི་འབྲས་བུ་ནི༔ ཀུན་སློང་གི་བྱེད་ལས་དུག་གསུམ་གྱི་དབང་གིས་སྡིག་པ་ལྕི་ཡང་བར་པ་སྟེ་རྣམ་སྨིན་ཡང་དེ་ལྟར་ངན་སོང་གསུམ་དུ་སྡུག་བསྔལ་བ་ཡིན་ནོ༔ བྱེད་པ་རྒྱུ་མཐུན་ནི༔ ཚེ་རབས་མང་པོས་གཏམ་ཅི་སྨྲས་རྫུན་ཁོ་ན་ལས་བདེན་པར་སྨྲ་མི་ཤེས་པས་གཞན་གྱིས་ཡིད་དུ་མི་འོང་ཞིང་བརྙས་བཅོས་ཀྱི་གནས་སུ་གྱུར་ནས་སྨྲས་ཚད་རྫུན་དུ་གྱེར་བ་ལས་དང་དུ་མི་ལེན་པའོ༔ མྱོང་བ་རྒྱུ་མཐུན་ནི༔ ཀུན་གྱིས་སྨད་པ་དང་སྐུར་འདེབས་གླེང་མོ་བྱེད་ཅིང་རྟག་ཏུ་གཞན་གྱིས་བསླུ་བ་མང་བས་རང་གི་སེམས་ལ་སྡུག་བསྔལ་ཉེར་ལེན་གྱི་མྱོང་བ་རྒྱུན་མི་ཆད་པར་འབྱུང་བ་ཡིན་ནོ༔ དབང་གི་འབྲས་བུ་ནི༔ ཤེས་པ་སྔངས་ཤིང་འཇིགས་སྐྲག་རྒྱུན་མི་ཆད་པའི་ཡུལ་དུ་གནས་དགོས་པའོ༔ གཉིས་པ་ཕྲ་མ་ནི༔ ཆེ་ཤོས་དགེ་འདུན་འཁོར་ལོའི་དབྱེན་དང་ཁྱད་པར་དུ་རྡོ་རྗེ་མཆེད་ལྕམ་སྤུན་སྲིང་དབྱེ་བྱེད་ཀྱི་ཕྲ་མ་གཞན་ཡང་ཕན་ཚུན་མཐུན་པ་གང་ཡིན་ཕྲལ་དུ་འབྱེད་པའི་ཐབས་ཀྱི་གཏམ་དབྱེན་དུ་སྨྲ་བ་རྣམས་སོ༔ དེའི་རྣམ་སྨིན་གྱི་འབྲས་བུ་ནི༔ དུག་གསུམ་གྱི་ཀུན་ནས་བསླངས་པའི་དབང་གིས་ངན་སོང་གསུམ་དུ་འདུ་བྱེད་པ་ཡིན་ནོ༔ བྱེད་པ་རྒྱུ་མཐུན་ནི༔ ཚེ་རབས་ཀུན་ཏུ་ཕྲ་མ་སྨྲ་བ་ལ་དགའ་ཞིང་ཕྲ་མ་སྨྲ་བའི་རིགས་སུ་སྐྱེ་བར་འགྱུར་རོ༔ མྱོང་བ་རྒྱུ་མཐུན་ནི༔ རང་གཞན་ཕན་ཚུན་དུ་མི་མཐུན་པར་འཕྲལ་དུ་འབྱེད་པ་དང་༔ འཁོར་གཡོག་རྣམས་མི་མཐུན་པར་ཕྲ་མས་དབྱེ་བ་དང་རང་བཞིན་གྱིས་མི་མཐུན་ཅིང་འབྱེད་པར་འགྱུར་རོ༔ དབང་གི་འབྲས་བུ་ནི༔ ཡུལ་བགྲོད་པར་དཀའ་བ་རི་མཐོ་ལུང་ཟབ་ཏུ་གནས་དགོས་སོ༔ གསུམ་པ་ཚིག་རྩུབ་ནི༔ གཞན་ཕ་རོལ་པོའི་ཞོར་འདེབས་ཤིང་རྒྱུད་ལ་ཞེ་སྡང་དང་ཁོང་ཁྲོ་སློང་ངེས་ཀྱི་ཚིག་ལ་བྱའོ༔ དེའི་རྣམ་སྨིན་གྱི་འབྲས་བུ་ནི༔ གོང་དུ་བཤད་པ་ལྟར་ཀུན་སློང་གི་དབང་གིས་ངན་སོང་གསུམ་དུ་འདུ་བྱེད་པ་ཡིན་ནོ༔ བྱེད་པ་རྒྱུ་མཐུན་ནི༔ སྔར་བཞིན་དུ་ཚིག་རྩུབ་སྨྲ་བ་ལ་དགའ་ཞིང་རྟག་ཏུ་སྨྲ་བར་འགྱུར་རོ༔ མྱོང་བ་རྒྱུ་མཐུན་ནི༔ རྟག་ཏུ་མི་སྙན་པ་སྣ་ཚོགས་ཐོས་ཤིང་རང་གི་སྨྲས་པའི་ཚིག་ཐམས་ཅད་འཐབ་པ་དང་རྩོད་པ་ཅན་དུ་འགྱུར་རོ༔ དབང་གི་འབྲས་བུ་ནི༔ ས་ཕྱོགས་ཉམས་མི་དགའ་ཞིང་ཡིད་མི་བདེ་བའི་ཡུལ་དུ་གནས་དགོས་སོ༔ བཞི་པ་ངག་འཁྱལ་ནི༔ རང་དང་གཞན་གྱི་དགེ་སྦྱོང་གཅིག་པའི་གཏམ་རྣམ་པ་སྣ་ཚོགས་སྨྲ་བ་དང་བསམ་བཞིན་དུ་གཞན་གྱི་དགེ་སྦྱོར་ལ་གནོད་པའི་ཚིག་སྨྲ་བ་ལ་བྱའོ༔ དེའི་རྣམ་སྨིན་གྱི་འབྲས་བུ་ནི༔ དུག་གསུམ་གྱི་ཀུན་ནས་བསླངས་ཏེ་ངན་སོང་གསུམ་དུ་འཕེན་པར་བྱེད་དོ༔ བྱེད་པ་རྒྱུ་མཐུན་ནི༔ ཚེ་རབས་མང་པོར་གླུ་དང་ངག་འཁྱལ་གྱི་རྣམ་པར་གཡེངས་ཏེ་ངག་འཁྱལ་སྨྲ་བ་ལ་དགའ་བ་དང་སྨྲ་བ་ཅན་དུ་འགྱུར་རོ༔ མྱོང་བ་རྒྱུ་མཐུན་ནི༔ རང་གི་ཚིག་མི་བཙུན་ཞིང་རྣམ་པར་གཡེང་བ་དང་ལྷོད་པ་དང་སྤོབས་པ་ཆུང་བ་ཅན་དུ་འགྱུར་རོ༔ དབང་གི་འབྲས་བུ་ནི༔ སོ་ནམ་དང་ལས་ཀ་ཅི་བྱས་ཀྱང་དེ་ལ་འབྲས་བུ་མི་འབྱུང་བར་དུས་ཚིགས་ལོག་ཅིང་འབྱོར་བ་མི་བརྟན་པའི་ཡུལ་དུ་སྐྱེ་བར་འགྱུར་རོ༔ དེ་ལྟར་ལུས་ངག་གི་མི་དགེ་བ་བདུན་པོ་ནི་བསྟན་ཡོད་ཐོགས་བཅས་ཀྱི་གཟུགས་ཡིན་པས༔ གཞི་གང་ཡིན་པ་ལ་ཡིན་པར་ཤེས་པ་དང་༔ བསམ་པ་ངན་པས་རྒོལ་བ༔ སྦྱོར་བ་ལག་ལེན་ལ་བཏབ་པ༔ མཐར་ཐུག་ལོངས་སྤྱོད་པས་བློ་ཚིམ་པ་དང་བཞིའི་ནུས་པ་རྫོགས་པ་ཡིན༔ གསུམ་པ་ཡིད་ཀྱི་ལས་གསུམ་ལས༔ དང་པོ་བརྣབ་སེམས་ནི༔ གཞན་གྱི་ནོར་རྫས་དང་དཔལ་དང་ལོངས་སྤྱོད་མཐོང་བའི་ཚེ་ན་འདི་དག་ཁོ་རང་ལ་མེད་ཅིང་རང་ལ་ཡོད་ན་ཅི་མ་རུང་སྙམ་པ་ལ་བྱའོ༔ དེའི་རྣམ་སྨིན་གྱི་འབྲས་བུ་ནི་ཀུན་སློང་གི་བྱེད་ལས་ཀྱི་རྣམ་སྨིན་ངན་སོང་གསུམ་དུ་ལྟུང་བའོ༔ བྱེད་པ་རྒྱུ་མཐུན་ནི༔ རྟག་ཏུ་བརྣབ་སེམས་ཁོ་ན་ཡིད་ལ་བྱེད་པ་ཅན་དུ་འགྱུར་རོ༔ མྱོང་བ་རྒྱུ་མཐུན་ནི༔ རྟག་ཏུ་ཡིད་ལ་བསམ་པའི་དོན་ཐམས་ཅད་མི་འགྲུབ་བོ༔ དབང་གི་འབྲས་བུ་ནི༔ ལོ་ཏོག་ཉེས་ཤིང་གནས་ངན་པ་དང་དུས་ངན་པ་ལ་ཞུགས་ཤིང་སྡུག་བསྔལ་མང་པོ་འབྱུང་བའི་ཡུལ་དུ་སྐྱེའོ༔ གཉིས་པ་གནོད་སེམས་ནི༔ གཞན་ལ་གནོད་པའི་ནུས་སྟོབས་མེད་ཀྱང་སེམས་ལ་གནོད་པའི་བསམ་པ་བདེ་ན་མི་དགའ་སྡུག་ན་དགའ་བ་ལ་སོགས་པའོ༔ དེའི་རྣམ་སྨིན་གྱི་འབྲས་བུ་ནི༔ ཀུན་སློང་གསུམ་ལ་རག་ལས་ཏེ་ངན་སོང་གསུམ་གང་ཡང་རུང་བ་རུ་ལྟུང་ཞིང་སྡུག་བསྔལ་མྱོང་བའོ༔ བྱེད་པ་རྒྱུ་མཐུན་ནི༔ ཚེ་རབས་མང་པོར་གནོད་སེམས་ཅན་ཤ་སྟག་ཏུ་འགྱུར་རོ༔ མྱོང་བ་རྒྱུ་མཐུན་ནི༔ འཇིགས་པ་དང་འཚེ་བ་མང་པོས་སྡུག་བསྔལ་བ་དང་ཅི་བྱ་གཏོལ་མེད་པ་ལ་ཐུག་པ་དེ་ལྟ་བུ་འབྱུང་བ་ཡིན་ནོ༔ དབང་གི་འབྲས་བུ་ནི༔ སྡིག་སྤྱོད་རྒྱལ་པོ་དང་མི་དཔོན་དགྲ་མི་ཤ་བོ་ལྟ་བུའི་མངའ་འོག་ཏུ་སྐྱེ་ཞིང་དེ་ལྟ་བུའི་ཡུལ་དུ་གནས་དགོས་སོ༔ གསུམ་པ་ལོག་ལྟ་ནི༔ དགེ་བའི་ཕན་ཡོན་དང་ཞིང་ཁམས་ཀྱི་བདེ་སྐྱིད་སྡིག་པའི་ཉེས་དམིགས་དང་འབྲས་བུ་ངན་སོང་གསུམ་གྱི་སྡུག་བསྔལ་ལ་སོགས་དགེ་སྡིག་བླང་དོར་གྱི་གནད་མཐོང་བ་དང་འཆད་པ་ཐོས་པ་རྣམས་ལ་ལོག་པར་བལྟས་ཏེ་མི་བདེན་ནོ་སྙམ་པ་དང་ངག་ནས་ཀྱང་དེ་ལྟར་དུ་སྨྲ་བ༔ གཞན་ཡང་ལྟ་སྒོམ་ཕྱིན་ཅི་ལོག་པ་ལ་གདིང་འཆའ་ཞིང་དཀོན་མཆོག་གསུམ་རྒྱབ་ཀྱིས་ཕྱོགས་པ་དག་ལ་བྱའོ༔ དེའི་རྣམ་སྨིན་གྱི་འབྲས་བུ་ནི༔ འདོད་ཆགས་ཞེ་སྡང་གཏི་མུག་གསུམ་གང་ཡང་རུང་བས་ཀུན་ནས་བསླངས་པའི་རྒྱུས་འབྲས་བུ་ངན་སོང་གསུམ་དུ་ལྟུང་ཞིང་སྡུག་བསྔལ་ཀྱང་དེ་བཞིན་དུ་ཉམས་སུ་མྱོང་བར་འགྱུར་རོ༔ བྱེད་པ་རྒྱུ་མཐུན་ནི༔ ཚེ་རབས་མང་པོར་ལོག་ལྟ་ཅན་དུ་གྱུར་ཏེ་བསྟན་པ་ལ་རྒྱབ་ཀྱིས་ཕྱོགས་པར་འགྱུར་རོ༔ མྱོང་བ་རྒྱུ་མཐུན་ནི༔ ལྟ་བ་ངན་པ་ལ་གནས་ཤིང་གཡོ་སྒྱུས་རྒྱུད་གང་ཞིང་སེམས་འཁྲུགས་པའོ༔ དབང་གི་འབྲས་བུ་ནི༔ འབྱོར་པ་ཉུང་ཞིང་སྐྱབས་དང་དཔུང་གཉེན་མེད་པའི་ཡུལ་དུ་སྐྱེའོ༔ དེ་ལྟར་ཡིད་ཀྱི་ལས་གསུམ་ནི་བསྟན་མེད་ཐོགས་མེད་ཀྱི་ལས་གཟུགས་སུ་འདུ་བའི་གཞི་བསམ་གཉིས་ཀྱིས་དེ་དག་གི་ནུས་པ་རྫོགས་པའོ༔ དེ་ལྟ་བུའི་མི་དགེ་བའི་ལས་ཆེ་འབྲིང་ཆུང་གསུམ་ཐམས་ཅད་དེ་མ་ཐག་ཏུ་དྲན་ཅིང་ཤེས་ནས་བཤགས་སྡོམ་གྱིས་ཟིན་ན་སྦྱངས་སླ་བ་ཡིན་ལ༔ མ་ཟིན་ན་འཆི་བའི་ནད་ཀྱིས་བཏབ་ནས་ནང་དབུགས་ཁྲོག་གེར་ཆད་པའི་བར་དེར་བསམ་པ་གོང་ལྟར་མི་དགེ་བའི་ཀུན་ནས་བསླངས་ཏེ་ལས་ངན་དེ་ལྟ་བུ་བསགས་པ་ན་སྲེད་ལེན་སྤྱོད་པས་གསོས་བཏབ་པ་ཡིན་ཏེ༔ ཚེ་འཕོས་མ་ཐག་དུ་མེ་ལྕེ་རླུང་གིས་བསྐྱོད་པ་བཞིན་དུ་རྣམ་སྨིན་ངན་སོང་དེ་ལྟ་བུ་རུ་ལྟུང་བ་ཡིན༔ སྡིག་པའི་འཕེལ་ཁ་ཆེར་འཕེལ་ཚུལ་ནི་དཔེར་ན་སྲོག་གཅིག་ལ་སྲོག་ལན་ལྔ་བརྒྱ་འཇལ་ཚེ་བྱེད་པ་རྒྱུ་མཐུན་ཡང་དེར་མཚུངས་པ་ཅན་དུ་གྱུར་ནས་བྱི་ལ་དང་བྱིའུ་རེ་རེས་ཀྱང་ཉིན་རེར་སྲོག་ཆགས་གསུམ་བཞི་བརྒྱ་སྟོང་སོགས་གསོད་ཅིང་ཟ་བ་ལ་བློས་གཞལ་ན་ཇི་ལྟར་བསད་པ་དེ་ཙམ་གྱིས་ལུས་ལྔ་བརྒྱ་རེ་བླངས་ནས་སྲོག་ལན་འཇལ་དགོས་པའི་རྒྱུ་མཚན་ལ་ཞིབ་ཏུ་དཔྱད་པས་ཤེས་ལ༔ གཞན་ཡང་དཀར་པོའི་ཆོས་ལ་སྨད་པ་དང་༔ ནག་པོའི་སྡིག་པ་ལ་བསྟོད་པ་དང་༔ དགེ་བ་ཅན་ལ་སྨད་པ༔ སྡིག་པ་ཅན་ལ་བསྟོད་པ༔ སྙིང་པོའི་སྒྲུབ་པ་བསྐྱེད་རྫོགས་ལྷུར་ལེན་བྱེད་པའི་གང་ཟག་རྣམས་ཀྱི་མཐུན་རྐྱེན་ནོར་རྫས་འཕྲོག་ནས་ལུས་ངག་གི་དགེ་སྦྱོར་ལ་བརྩོན་དུ་མི་སྟེར་བ་ནི་སྡིག་པ་ཤིན་ཏུ་ལྕི་ཞིང་ཟབ་པ་ཡིན་ནོ༔ དེ་དག་ལས་ཀྱང་སྡིག་པ་སྟོབས་ཆེ་ཞིང་ཚབ་ཆེ་བ་ནི་མཚམས་མེད་པ་ལྔ་སྟེ༔ ལྔ་གང་ཞེ་ན་ཕ་བསད་པ་དང་༔ མ་བསད་པ་དང་༔ སློབ་དཔོན་བསད་པ་དང་༔ དགྲ་བཅོམ་པ་བསད་པ་དང་༔ རྒྱལ་བའི་སྐུ་ལ་ངན་སེམས་ཀྱིས་ཁྲག་འབྱིན་པ་སྟེ་ལས་དེའི་འབྲས་བུ་ཕྱི་དབུགས་ཆད་ནས་ནང་དབུགས་མ་ཆད་པར་དམྱལ་བ་མནར་མེད་དུ་ལྟུང་སྟེ་འདི་དང་ཕྱི་མའི་བར་མཚམས་མེད་པས་ན་མཚམས་མེད་ཀྱི་ལས་ཞེས་བྱའོ༔ དེ་དང་ཉེ་བའི་མཚམས་མེད་ནི༔ དགེ་སློང་བསད་པའམ་ཕབ་པ༔ དགེ་ཚུལ་བསད་པ༔ བཙུན་མ་ཕབ་པ༔ སྐུ་གཟུགས་མཆོད་རྟེན་ལྷ་ཁང་བཤིག་པ་འདི་དག་ཀྱང་མཚམས་མེད་དང་ཉེ་བས་ཤི་མ་ཐག་ཏུ་དམྱལ་བའི་གནས་སུ་ལྟུང་བ་ཡིན་ལ༔ གཞན་ཡང་རྡོ་རྗེའི་བླ་མ་ལ་དམ་ཚིག་ཉམས་པ་དག་ནི་རྡོ་རྗེའི་དམྱལ་བ་རུ་ངེས་པས་དེ་དང་མཚམས་མེད་པ་རྣམས་ལ་ནི་ངེས་པའི་སྡིག་པ་ཞེས་བྱའོ༔ ཡང་བཤད་སྒྲུབ་ཀྱི་རྒྱུན་བཙན་ཐབས་སུ་བཅད་པ་དགེ་འདུན་གྱི་འདུ་སྒོ་བཀག་པ།ཡོན་ཏན་ཅན་གྱི་ཐུགས་དཀྲུགས་པ་དད་པ་ཅན་གྱི་ཚོགས་བཅག་པ་བརྩོན་འགྲུས་དང་སྙིང་སྟོབས་ཅན་སུན་འབྱིན་པ་སྒྲུབ་པ་གཉན་པོ་འཐབ་མཁོན་དང་སྤྱོད་ངན་གྱིས་དཀྲུགས་ཤིང་གཏོར་བ་འདི་དག་ཀྱང་སྡིག་པ་ཤིན་ཏུ་ལྕི་བ་ཡིན་ཏེ༔ དེ་ལྟར་སྡིག་པ་མི་དགེ་བའི་ལས་དེ་དག་སྤང་བར་བྱ་དགོས་པས་སྤང་བྱ་དང་༔ དེ་དག་ལ་འཛེམས་ཤིང་རབ་ཏུ་སྡོམ་དགོས་པས་ན་སྡོམ་པ་རུ་ཤེས་ཏེ་དྲན་པ་དང་ཤེས་བཞིན་གྱི་སྒོ་ནས་བཤགས་སྡོམ་བགྱི་བ་དང་དམ་བཅའ་བརྟན་པོས་རྟག་ཏུ་གནད་ལག་ལེན་ལ་འདེབས་ཤིང་རང་རྒྱུད་ཆོས་སུ་བཅོས་པ་ལམ་གྱི་གནད་མཆོག་དམ་པ་ཡིན་ནོ༔ སླར་ཡང་བློ་དགེ་བ་བཅུའི་འབྲས་བུ་ལ་བསམ་ཞིང་སྤྲོ་བ་བསྐྱེད་དེ་ཉམས་སུ་ལེན་ཚུལ་ལ༔ དང་པོ་སྲོག་གཅོད་པ་ལས་སླར་ལྡོག་སྟེ་གཞན་གྱི་སྲོག་སྐྱོབ་དང་སྲོག་བསླུ་བྱས་པའི་རྣམ་སྨིན་ནི་མི་ལུས་བཟང་པོ་ཐོབ་པ་དང་༔ བྱེད་པ་སྲོག་གཅོད་པ་ལ་མི་དགའ་བ་དང་སྲོག་གཅོད་པའི་ལས་མི་བྱེད་སར་སྐྱེ་ཞིང་༔ མྱོང་བ་ཚེ་རིང་ཞིང་ནད་མེད་པ་དང་༔ དབང་འབྲས་ས་ཕྱོགས་ཉམས་དགའ་ཞིང་ཡིད་དུ་འོང་བའི་ཡུལ་དུ་སྐྱེ་བ་ཡིན༔ གཉིས་པ་མ་བྱིན་པར་ལེན་པ་སྤངས་ཏེ་མ་བྱིན་པ་ལས་སླར་ལྡོག་སྟེ་ལན་དང་རྣམ་སྨིན་ལ་མི་རེ་བའི་སྦྱིན་པ་བཏང་བས་འབྲས་བུ་དཔལ་འབྱོར་ལོངས་སྤྱོད་དང་ལྡན་ཞིང་༔ བྱེད་པ་རྟག་ཏུ་སྦྱིན་གཏོང་ལ་དགའ་བ་དང་༔ མྱོང་བ་དགྲ་ཟླ་ཉུང་ཞིང་མཐུན་རྐྱེན་འཛོམ་པ་དང་༔ དབང་འབྲས་ཡུལ་ས་བཅུད་ཆེ་ཞིང་འབྲས་བུ་མང་བ་བཞོན་དང་དཀར་ཐོག་རྒྱས་པའི་ཡུལ་དུ་སྐྱེ་བ་ཡིན༔ གསུམ་པ་འདོད་ལོག་སྤྱོད་པ་སྤངས་ཏེ་འདོད་ལོག་སྤྱད་པ་ལས་སླར་ལྡོག་ནས་སྡོམ་པ་བསྲུང་བའི་འབྲས་བུ་མངོན་མཐོའི་བདེ་སྐྱིད་ལ་དབང་འབྱོར་ཞིང་༔ བྱེད་པ་རྟག་ཏུ་ཚུལ་ཁྲིམས་གཙང་མ་ལ་དགའ་ཞིང་བསྲུང་ནུས་པ་དང་༔ མྱོང་བ་ཁྱིམ་ཐབས་མཐུན་ཅིང་ཕན་ཚུན་བྱམས་བརྩེ་ལ་གནས་པ་དང་༔ དབང་འབྲས་དཀར་པོ་དགེ་བའི་ལས་ཁོ་ན་ལ་སྤྱོད་པའི་ཡུལ་དུ་སྐྱེ་བ་ཡིན༔ ངག་གི་དགེ་བ་བཞི་ནི༔ དང་པོ་རྫུན་དུ་སྨྲ་བ་ལས་སླར་ལྡོག་ཅིང་དྲང་པོར་སྨྲས་པའི་རྣམ་སྨིན་མངོན་མཐོ་དང་༔ བྱེད་པ་དེ་དང་མཐུན༔ མྱོང་བ་ཀུན་གྱིས་བསྟོད་ཅིང་བྱམས་པ༔ དབང་འབྲས་འཚེ་བ་ཉུང་ཞིང་སྔངས་སྐྲག་མེད་པའི་ཡུལ་དུ་སྐྱེ་བ་ཡིན༔ གཉིས་པ་ཕྲ་མ་སྤངས་ཏེ་ཕྲ་མ་སྨྲ་བ་ལས་སླར་ལྡོག་ནས་མཁོན་པ་བསྡུམས་ཤིང་མཐུན་པར་བཅོས་པའི་རྣམ་སྨིན་མངོན་པར་མཐོ་བ་དང་༔ བྱེད་པ་དེ་དང་མཚུངས་ལྡན་དུ་གྱུར་པ་དང་༔ མྱོང་བ་ཉེ་འཁོར་རྩ་ལག་ཀུན་གྱིས་གུས་ཤིང་འདུད་པ་དང་༔ དབང་འབྲས་འཐབ་ཅིང་རྩོད་པ་ཉུང་བའི་ཡུལ་དུ་སྐྱེའོ༔ གསུམ་པ་ཚིག་རྩུབ་སྤངས་ཏེ་ཚིག་རྩུབ་སྨྲ་བ་ལས་སླར་ལྡོག་ཅིང་ཞི་དུལ་འཇམ་པོར་སྨྲས་པའི་རྣམ་སྨིན་གོང་ལྟར་དང་༔ བྱེད་པ་ཡང་དེ་དང་མཚུངས་པ་ཅན༔ མྱོང་བ་རྟག་ཏུ་སྙན་པ་ཐོས་པས་ཡིད་བདེ་ཞིང་དགའ་བར་འགྱུར་བ་དང་༔ དབང་འབྲས་ས་ཕྱོགས་མི་བདེ་བ་མེད་པར་ཡིད་གདུང་བའི་ཡུལ་དུ་སྐྱེ་བ་ཡིན༔ བཞི་པ་ངག་འཁྱལ་སྤངས་ཏེ་ངག་འཁྱལ་སྨྲ་བ་ལས་སླར་ལྡོག་ནས་རྟག་ཏུ་དགེ་སྦྱོར་ལ་བརྩོན་པའི་རྣམ་སྨིན་ལྷ་བས་ལྷག་པའི་ལུས་རྟེན་དུ་འགྱུར་ཞིང་༔ བྱེད་པ་དགེ་སྦྱོར་ལ་བརྩོན་པ་ཅན་དུ་འགྱུར་བ་དང་༔ མྱོང་བ་རང་གི་ཚིག་བཙུན་ཞིང་སྤོབས་པ་རྒྱ་ཆེ་བ་དང་༔ དབང་འབྲས་སོ་ནམ་མ་བྱས་ཀྱང་འབྲས་བུ་ཕུན་སུམ་ཚོགས་པ་འབྱུང་ཞིང་དུས་ཚིགས་སྙོམས་པ་དང་འབྱོར་པ་བརྟན་པ་ཡིན༔ ཡིད་ཀྱི་དགེ་བ་གསུམ་ནི༔ དང་པོ་བརྣབ་སེམས་སྤངས་ཏེ་བརྣབ་སེམས་བྱེད་པ་ལས་སླར་ལྡོག་ནས་གཞན་དཔལ་འབྱོར་ལོངས་སྤྱོད་དང་ལྡན་པ་ལ་དགའ་བ་བསྒོམ་པའི་རྣམ་སྨིན་མངོན་མཐོ་དང་༔ བྱེད་པ་དེར་མཚུངས༔ མྱོང་བ་བསམ་པའི་དོན་ཐམས་ཅད་འབད་མེད་དུ་འགྲུབ་པ་དང་༔ དབང་འབྲས་གཞན་གྱིས་ཀྱང་དེ་ལ་རྟག་ཏུ་བྱམས་པ་དང་བརྩེ་བར་འགྱུར་བ་ཡིན༔ གཉིས་པ་གནོད་སེམས་སྤངས་ཏེ་གནོད་པའི་བསམ་པ་ལས་སླར་ལྡོག་སྟེ་ཐམས་ཅད་ཀུན་ལ་ཕན་སེམས་འཆང་བའི་རྣམ་སྨིན་ལྷ་མིའི་བདེ་བ་མྱོང་བ་དང་༔ བྱེད་པ་དེ་དང་མཚུངས་པ་ཅན་དང་༔ མྱོང་བ་རྟག་པར་འཚེ་བ་ཐམས་ཅད་བྲལ་བ་དང་༔ དབང་འབྲས་འཚེ་བའི་རྒོལ་བ་མཐའ་དག་དང་བྲལ་བའི་ཡུལ་དུ་གནས་པར་འགྱུར་བ་ཡིན༔ གསུམ་པ་ལོག་ལྟ་སྤངས་ཏེ་ལོག་པར་ལྟ་བ་ལས་ལྡོག་ནས་དཀོན་མཆོག་གསུམ་ལ་མི་ཕྱེད་པའི་དད་པ་བསྐྱེད་པའི་རྣམ་སྨིན་དལ་འབྱོར་བཅོ་བརྒྱད་ཚང་ཞིང་ཆོས་ལ་སྤྱོད་པའི་སྐལ་བ་དང་ལྡན་པར་འགྱུར་བ་ཡིན༔ བྱེད་པ་རྟག་ཏུ་དད་པ་བརྟན་ཅིང་ལོག་ལྟ་མེད་པ་དང་༔ མྱོང་བ་ལྟ་བ་བཟང་པོ་རྒྱུད་ལ་སྐྱེ་ཞིང་ས་ལམ་མྱུར་བར་བསྒྲོད་ནུས་པར་འགྱུར་རོ༔ དབང་འབྲས་ཆོས་དར་ཞིང་ཆོས་ཀྱི་རྒྱལ་པོའི་མངའ་འོག་ཏུ་སྐྱེ་བ་ཡིན་ནོ༔ དེ་ལྟར་བློ་ལྡོག་རྣམ་པ་བཞིའི་དོན་ཤེས་པར་བྱས་ནས་དགེ་སྡིག་གི་བླང་དོར་ལག་ལེན་ལ་འདེབས་པ་ནི་ཐར་བ་དང་རྣམ་མཁྱེན་གྱི་གོ་འཕང་དོན་དུ་གཉེར་བ་ཡིན་ཏེ་ལམ་གྱི་གཙོ་བོར་ཟུངས་ཤིག༔ དགེ་སྡིག་ལས་ཀྱི་རྣམ་སྨིན་བསླུ་བ་མེད༔ བླང་དོར་གནས་ལ་མཁས་ཤིང་ཚུལ་ལྡན་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཞེས་གསོལ་བ་གདབ་བོ༔ དེ་དག་རྣམས་ནི་ཐུན་མོང་གི་སྔོན་འགྲོ་ཀུན་ལ་མེད་ཐབས་མེད་པའི་མགོ་དང་ཡན་ལག་ལྟ་བུའོ༔ སྐབས་འདིར་སྤྲོ་ན་བཤེས་གཉེན་བསྟེན་ཚུལ་དང་དམ་ཚིག་གི་རྣམ་བཞག་སོགས་ཀྱང་འཆད་ན་ཤིན་ཏུ་ལེགས་ཤིང་གལ་ཆེའོ༔ ༈གཉིས་པ་ཐུན་མོང་མ་ཡིན་པ་ནང་གི་སྔོན་འགྲོ་ལ༔ ཐོག་མར་ཆོས་ཐམས་ཅད་ཀྱི་རྨིང་རྡོ་ལྟ་བུ་སྐྱབས་སུ་འགྲོ་བའི་ཁྲིད་དང་༔ ཐེག་ཆེན་ལམ་གྱི་འཇུག་སྒོ་སེམས་བསྐྱེད་ཀྱི་ཁྲིད་དང་༔ སྒྲིབ་གཉིས་བག་ཆགས་སྦྱོང་བའི་ཐབས་རྡོར་སེམས་བསྒོམ་བཟླས་ཀྱི་ཁྲིད་དང་༔ ཚོགས་གཉིས་རྫོགས་ཕྱིར་མཎྜལ་གྱི་ཁྲིད་དང་༔ བར་ཆད་དང་རྐྱེན་ངན་བཟློག་པའི་ཐབས་ཟབ་མོ་ལུས་ཀྱི་མཆོད་སྦྱིན་གྱི་ཁྲིད་དང་༔ སྒོ་གསུམ་གྱི་སྣོད་དབང་དང་བྱིན་རླབས་ཀྱིས་གང་བར་བྱེད་པ་བླ་མའི་རྣལ་འབྱོར་གྱི་ཁྲིད་དང་༔ ཐར་པའི་ལམ་སྦྱོང་བ་ཟབ་ལམ་འཕོ་བའི་ཁྲིད་དང་བདུན་ནོ༔ དང་པོ་ཆོས་ཐམས་ཅད་ཀྱི་རྨིང་རྡོ་སྐྱབས་སུ་འགྲོ་བའི་ཁྲིད་ལ༔ རྣམ་གསུམ་དད་པའི་སྒོ་ནས་སྐྱབས་སུ་འགྲོ་དགོས་ཏེ༔ དེ་ལ་དང་བའི་དད་པ་ནི༔ ཡུལ་སྐུ་གསུང་ཐུགས་རྟེན་དང་༔ དགེ་འདུན་འདུས་པའི་སྡེ་མཛེས་ཤིང་ཡིད་དུ་འོང་བ་མཐོང་ཚེ་སྐྱབས་སུ་མཆིའོ་སྙམ་པ་དང་༔ འདོད་པའི་དད་པ་ནི་ཚེ་འདིའི་འཇིགས་སྐྱོབ་དང་༔ རེ་བའི་དོན་འགྲུབ་ཕྱིར་དད་པ་བྱེད་པ་དང་༔ མི་ཕྱེད་པའི་དད་པ་ནི་ངན་སོང་གསུམ་དང་འཁོར་བ་སྡུག་བསྔལ་གྱི་འཇིགས་པ་ལ་སྐྲག་ནས་དཀོན་མཆོག་རིན་པོ་ཆེ་རྣམ་པ་གསུམ་ཡིད་ལ་བྱས་ནས་བློ་སྙིང་བྲང་གསུམ་ཕུར་ཚུགས་སུ་གཏོད་པའོ༔ སྐྱབས་སུ་འགྲོ་བ་དངོས་ལ་ཁྱད་པར་དབྱེ་བ༔ སྐྱབས་སུ་འགྲོ་ཚུལ༔ ཕན་ཡོན་བསམ་པ་དང་གསུམ༔ དང་པོ་ཁྱད་པར་དབྱེ་བ་ལ་གསུམ་ལས༔ དང་པོ་ངན་སོང་གི་སྡུག་བསྔལ་ལ་སྐྲག་ནས་བདེ་འགྲོ་ཙམ་དོན་དུ་གཉེར་བ་ནི་སྐྱེས་བུ་ཆུང་ངུའི་ལམ་སྟེ་འབྲས་བུ་ཡང་བདེ་འགྲོ་ལྷ་མིའི་གོ་འཕང་ཙམ་མོ༔ གཉིས་པ་འཁོར་བའི་སྡུག་བསྔལ་ལ་སྐྲག་ནས་རང་ཉིད་གཅིག་པུ་བདེ་འདོད་སྐྱིད་འདོད་ཀྱི་ལས་དོན་དུ་གཉེར་བ་སྐྱེས་བུ་འབྲིང་གི་ལམ་ཡིན་ཏེ་འབྲས་བུ་ཡང་རང་ཉིད་ཐར་བ་ཙམ་མོ༔ གསུམ་པ་མཐའ་མེད་འཁོར་བའི་སེམས་ཅན་ཐམས་ཅད་སྲིད་པ་སྡུག་བསྔལ་གྱི་རྒྱ་མཚོ་ལས་བསྒྲལ་བའི་ཕྱིར་སྐྱབས་སུ་འགྲོ་བ་ནི་སྐྱེས་བུ་ཆེན་པོའི་འཇུག་ངོགས་བསོད་ནམས་ཚད་མེད་པའི་ལམ་ཡང་དག་པ་སྟེ་འདིའི་རྗེས་སུ་བསླབ་པར་བྱའོ༔ གཉིས་པ་སྐྱབས་སུ་འགྲོ་ཚུལ་ནི༔ ཐུན་མོང་སྤྱིའི་སྐྱབས་ཡུལ་སངས་རྒྱས་ལ་སྟོན་པ༔ ཆོས་ལ་ཡང་དག་པའི་ལམ་གྱི་འཇུག་སྒོ༔ དགེ་འདུན་ལམ་བསྒྲུབ་པའི་གྲོགས་སུ་སྐྱབས་སུ་འགྲོ་བའོ༔ ཐུན་མིན་ནང་གི་སྐྱབས་ཡུལ་རང་གི་སྒོ་གསུམ་བླ་མ་ལ་འབུལ༔ ཡི་དམ་ལ་བརྟེན༔ མ་དང་མཁའ་འགྲོ་གྲོགས་ཀྱི་ཚུལ་དུ་སྐྱབས་སུ་བསྟེན་པའོ༔ གསང་བའི་སྐྱབས་ཡུལ་རང་གི་གནས་ལུགས་ཀུན་ཏུ་བཟང་པོ༔ ངོ་བོ་སྐྱེ་བ་མེད་པའི་ཆོས་སྐུ༔ རང་བཞིན་འགགས་པ་མེད་པའི་ལོངས་སྐུ༔ ཐུགས་རྗེ་ཀུན་ལ་ཁྱབ་པའི་སྤྲུལ་སྐུ་སྟེ༔ གཉིས་མེད་ལམ་དུ་བྱེད་པ་གསང་བ་བླ་ན་མེད་པ་གནས་ལུགས་དོན་གྱི་སྐྱབས་འགྲོའོ༔ འདི་ལས་གཞན་འཁོར་བ་ལས་མ་འདས་ཤིང་འཇིག་རྟེན་པ་ལ་བརྟེན་པ་རྣམས་ལ་འཇིགས་སྐྱོབ་ཀྱི་ནུས་པ་མེད་པས་ན་སྐྱབས་སུ་འགྲོ་བའི་གནས་མ་ཡིན་པས༔ དེས་ན་དཀོན་མཆོག་རིན་པོ་ཆེ་རྣམ་པ་གསུམ་མ་གཏོགས་སྐྱབས་གཞན་གང་ལའང་སྐྱབས་སུ་འགྲོ་མི་རུང་སྟེ་ཐར་པ་དང་རྣམ་མཁྱེན་གྱི་གེགས་སུ་འགྱུར་བ་ཡིན་ནོ༔ དེ་ནས་མདུན་མཁར་ཚོགས་ཞིང་བསྐྱེད་པ་ནི༔ མ་དག་པའི་སེམས་དང་སྣང་བ་ཐམས་ཅད་རྨི་ལམ་དབྱིངས་སུ་སད་པ་ལྟར་གནས་འགྱུར་ཏེ་ཕྱི་སྣོད་ཀྱི་འཇིག་རྟེན་འདི་དག་རིན་པོ་ཆེ་སྣ་ཚོགས་ཀྱི་རྣམ་པའི་འོད་ཀྱི་ས་གཞི་མཛེས་ཤིང་ཡིད་དུ་འོང་བ་མེ་ལོང་གི་བྱད་ལྟར་དྭངས་ཤིང་ཁོད་སྙོམས་པ༔ མནན་ན་ནེམ་ཞིང་བཏེགས་ན་སྤར་བ༔ སྨན་གྱི་སྤང་རི་ལ་དྲི་བཟང་གི་ན་བུན་འཐུལ་བ༔ ཁ་དོག་སྣ་ཚོགས་འབར་བའི་མེ་ཏོག་པདྨོ་བཞད་པས་ཡོངས་སུ་ཁེབས་པ༔ དེའི་དབུས་སུ་པདྨའི་སྡོང་པོ་ལོ་འདབ་རབ་ཏུ་རྒྱས་ཤིང་རྒྱ་ཆེ་ལ་ཁྱོན་ཡངས་པ་དབུས་ཀྱི་ཟེའུ་འབྲུའི་སྟེང་དུ་ཉི་མ་ཟླ་བ་བརྩེགས་པའི་གདན་ལ༔ ངོ་བོ་རྩ་བའི་བླ་མ་ཡིན་པ་ལ་རྣམ་པ་སློབ་དཔོན་པདྨ་འབྱུང་གནས་སྐུ་མདོག་དཀར་ལ་དམར་བའི་མདངས་ཆགས་པ༔ ཞལ་གཅིག་ཕྱག་གཉིས་ཞི་མ་ཁྲོ་འཛུམ་གྱི་ཉམས་དང་ལྡན་པ༔ ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས་པ༔ ཕྱག་གཡས་གསེར་གྱི་རྡོ་རྗེ་ས་ལ་བསྡིགས་ཤིང་༔ གཡོན་པའི་མཉམ་བཞག་གི་སྟེང་དུ་ཀ་པཱ་ལ་ཁ་ཁེབས་ཀྱི་སྟེང་དུ་འཆི་མེད་ཡེ་ཤེས་ཀྱི་བདུད་རྩིས་བཀང་བའི་བུམ་པ་དཔག་བསམ་ཤིང་གི་ཁ་རྒྱན་དང་བཅས་པ་བསྣམས་པ༔ དབུ་ལ་ཤྭ་བའི་མཉེན་ཞུ་རྒོད་ཀྱི་ལྡེམ་འཕྲུ་ཅན་དང་༔ སྐུ་ལ་ཕོད་ཁ་དང་ཟ་བེར་ཆོས་གོས་རྣམ་གསུམ་གྱིས་ཀླུབས་པ༔ ཡུམ་རྡོ་རྗེ་ཕག་མོ་སྦས་པའི་ཚུལ་གྱིས་ཁ་ཊྭཱྃ་རྩེ་གསུམ་མཆན་དུ་བརྟེན་པ༔ འཇའ་ཚོན་འོད་ལྔའི་གུར་ཁང་གི་དབུས་སུ་འཇའ་ལུས་སྒྱུ་མའི་སྐུ་སྣང་ལ་རང་བཞིན་མེད་པ་ཞིག་ཏུ་བསྒོམ༔ དེའི་མཐའ་བསྐོར་དུ་རྩ་བ་བརྒྱུད་པའི་བླ་མའི་ཚོགས་མ་ལུས་ཤིང་ལུས་པ་མེད་པས་བཀྲ་དཔུང་ངེ་འོད་ཐིབས་སེ་བསྐོར་ནས་བཞུགས་པར་བསམ༔ གཡས་ཕྱོགས་ཀྱི་འདབ་མ་ལ་ཟླ་བའི་དཀྱིལ་འཁོར་གྱི་སྟེང་དུ་སངས་རྒྱས་ཐམས་ཅད་འདུས་པའི་ངོ་བོ་བཅོམ་ལྡན་འདས་དཔལ་ཤཱཀྱ་ཐུབ་པ་སྐུ་མདོག་གསེར་གྱི་རི་བོ་ལ་ཉི་མ་ཤར་བ་ལྟ་བུ་གཡས་ས་གནོན་དང་གཡོན་མཉམ་བཞག་གི་ཕྱག་རྒྱ་མཛད་པ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་མཚན་དང་དཔེ་བྱད་ཀྱིས་མཛེས་པ༔ ཆོས་གོས་རྣམ་གསུམ་སྐུ་ལ་གསོལ་བ༔ དེ་ལས་བསྐལ་པ་བཟང་པོའི་སངས་རྒྱས་སྟོང་གིས་བསྐོར་ནས་བཞུགས་པར་བསྒོམ༔ རྒྱབ་ཕྱོགས་ཀྱི་འདབ་མ་ལ་ལུང་དང་རྟོགས་པའི་ཆོས་བཀའ་དང་པོ་ཏི་གླེགས་བམ་གྱི་ཚུལ་དུ་གསེར་གདུང་ཁྲ་ཆེམས་མེར་བཞུགས་པར་བསྒོམ༔ གཡོན་ཕྱོགས་ཀྱི་འདབ་མ་ལ་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་བྱང་ཆུབ་སེམས་དཔའི་སྡེ་ཚོགས༔ དེ་མཐར་ཉན་ཐོས་ཆེན་པོ་མཆོག་བརྒྱད་སོགས་དགེ་འདུན་རྒྱ་མཚོའི་ཚོགས་ཀྱིས་བསྐོར་ནས་བཞུགས་པར་བསྒོམ༔ མདུན་གྱི་འདབ་མ་ལ་ཡི་དམ་ཀུན་འདུས་ཀྱི་ངོ་བོ་ལ་དཔལ་ཆེན་རྡོ་རྗེ་གཞོན་ནུ༔ མ་དང་མཁའ་འགྲོ་ཀུན་འདུས་ཀྱི་བདག་ཉིད་ཡུམ་ཆེན་འཁོར་ལོ་རྒྱས་འདེབས་མ་དང་གཉིས་མེད་དུ་སྦྱོར་བ༔ དེ་ལ་ཡི་དམ་རྒྱུད་སྡེ་བཞི་དྲུག་གི་དཀྱིལ་འཁོར་གྱི་ལྷ་ཚོགས་མ་ལུས་ཤིང་ལུས་པ་མེད་པས་བསྐོར་བར་བསམ༔ དེ་དག་གི་མཐའ་བསྐོར་དུ་ཡེ་ཤེས་དང་ལས་ལ་གྲུབ་པའི་བསྟན་སྲུང་དམ་ཅན་རྒྱ་མཚོའི་ཚོགས་ཀྱིས་བཀྲ་དཔུང་ངེ་འོད་ཐིབས་སེ་བསྐོར་ནས་བཞུགས་པར་མོས་ལ༔ སྐྱབས་སུ་འགྲོ་བའི་གང་ཟག་གི་གཡས་སུ་ཕ་རུ་གྱུར་པ་གཡོན་དུ་མ་རུ་གྱུར་པ་མདུན་དུ་དགྲ༔ རྒྱབ་ཏུ་བགེགས་དང་གནོད་བྱེད་དུ་གྱུར་པའི་སེམས་ཅན་ཐམས་ཅད་ཀྱི་ལུས་གུས་པས་ཕྱག་འཚལ༔ ངག་ཏུ་སྐྱབས་སུ་འགྲོ་བའི་ཚིག་འུར་འུར་དིར་དིར་དུ་འདོན༔ ཡིད་ཀྱིས་དུས་དེ་རིང་ནས་བཟུང་སྟེ་ཇི་སྲིད་རྣམ་མཁྱེན་བླ་ན་མེད་པ་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་སྐྱབས་ཀྱི་དམ་པ་ཁྱེད་རྣམས་ལ་སྐྱབས་སུ་མཆིའོ༔ ཁྱེད་རྣམས་ལ་བརྟེན་ནོ༔ ལུས་དང་ལོངས་སྤྱོད་ཐམས་ཅད་ཆགས་ཞེན་འཛིན་པ་དང་བྲལ་བས་འབུལ་ལོ༔ སུ་ལ་མི་རེ་ཁྱོད་ལ་རེ༔ སུ་ལ་མི་སྐྱབས་ཁྱེད་ལ་སྐྱབས་སོ་ཞེས་སྙམ་ཞིང་འདི་ལྟར་བརྗོད་པར་བྱའོ༔ ན་མོ༔ བདག་དང་མཐའ་ཡས་ཕ་མ་མཁའ་མཉམ་འགྲོ༔ ཇི་སྲིད་བྱང་ཆུབ་སྙིང་པོར་མཆིས་ཀྱི་བར༔ བླ་མ་དཀོན་མཆོག་གསུམ་ལ་སྐྱབས་སུ་མཆི༔ སྐད་ཅིག་མི་འབྲལ་བརྩེ་བས་རྗེས་སུ་ཟུངས༔ ཞེས་ཅི་མང་བརྗོད་མཐར་སྐྱབས་ཡུལ་རྣམས་ཀྱི་སྐུ་ལས་འོད་ཕུང་སྤྲིན་ཕུང་ལྟ་བུར་བྱུང་ནས་རང་གཞན་རྣམས་ལ་ཐིམ་པས་སྒྲིབ་གཉིས་བག་ཆགས་ཐམས་ཅད་སངས་ཀྱིས་དག་ནས་འོད་ཀྱི་ཕུང་པོར་གྱུར་ནས་ཨོ་རྒྱན་ཆེན་པོའི་ཐུགས་ཀར་ཐིམ༔ འཁོར་རྣམས་ཀྱང་འོད་དུ་ལྟེམས་ཀྱིས་ཞུ་ནས་གཙོ་བོ་ལ་ཐིམ་པས་གཉིས་སུ་མེད་པར་བསྒོམ་ལ་དམིགས་མེད་ཀྱི་ངང་དུ་འཇོག་པ་ཡིན༔ གསུམ་པ་བསླབ་བྱ་དང་ཕན་ཡོན་བསམ་པ་ལ༔ དང་པོ་སྤང་བྱ་གསུམ་ནི་སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་མི་བཙལ་བ་དང་༔ སེམས་ཅན་གྱི་བློ་ཁ་ཆོས་ལམ་ལས་བཟློག་པའི་ལས་ངན་སྤངས་པ་དང་༔ གྲོགས་ངན་ལོག་ལྟ་ཅན་རྣམས་དང་རྟག་ཏུ་མི་འགྲོགས་པ་དང་གསུམ་ནི་སྤང་བྱ་དང་༔ གཉིས་པ་བླང་བྱ་གསུམ་ནི༔ སངས་རྒྱས་སུ་བློ་བཞག་པའི་སྐུ་གཟུགས་ཆག་དུམ་དང་༔ ཆོས་ཀྱི་ཡན་ལག་ཡི་གེ་འབྲུ་གཅིག་ཡན་ཆད་དང་༔ དགེ་འདུན་གྱི་རྟགས་ཙམ་འཛིན་པ་ལའང་མ་གུས་པ་སྤངས་ཤིང་གུས་པ་བསྐྱེད་པར་བྱ་བ་ནི་བླང་བྱའོ༔ གསུམ་པ་ཆ་མཐུན་གསུམ་ནི༔ རང་གི་བླ་མ་ལ་སངས་རྒྱས་དངོས་ཀྱི་འདུ་ཤེས་བཞག་ཅིང་དད་པ་དང་མོས་གུས་དྲག་པོས་བསྟེན་པ་ལས་མི་འདའ་བ་དང་༔ བླ་མ་དེས་ཅི་གསུང་གི་བཀའ་ཐམས་ཅད་དམ་པའི་ཆོས་དངོས་ཡིན་པར་བསམ་སྟེ་ཚུལ་བཞིན་དུ་བསྒྲུབ་པ་དང་༔ བླ་མའི་འཁོར་དང་ཉེ་བ་རྩ་ལག་ཐམས་ཅད་དགེ་འདུན་གྱི་སྡེ་རུ་བཟུང་སྟེ་བརྩི་བཀུར་དང་མཐུན་པ་བསྒྲུབ་པ་ནི་ཆ་མཐུན་གྱི་བསླབ་བྱའོ༔ བཞི་པ་ཕན་ཡོན་ལ་བསམ་པ་ནི༔ འདི་ནི་དམ་པའི་ཆོས་ཐམས་ཅད་ཀྱི་གཞི་རྟེན་ཡིན་ལ་གང་གི་སྐྱབས་སུ་སོང་བ་ཙམ་གྱིས་ཐར་པའི་ས་བོན་རྒྱུད་ལ་ཐེབས་པ་དང་སྨིན་གྲོལ་གྱི་སྣོད་དུ་རུང་ཞིང་ལས་ངན་དང་རྐྱེན་ངན་ཐམས་ཅད་ཀྱི་དབང་དུ་མི་འགྲོ་བས་ནང་པ་སངས་རྒྱས་ཀྱི་ཁྱུར་ཚུད་ཅིང་མཐར་ཐུག་རྣམ་མཁྱེན་སངས་རྒྱས་ཀྱི་གོ་འཕང་ལ་སྦྱོར་བ་ཡིན་ནོ༔ ༈གཉིས་པ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ལ༔ ཚད་མེད་བཞིས་བློ་སྦྱོང་བ༔ བྱང་ཆུབ་མཆོག་ཏུ་སེམས་བསྐྱེད་པ༔ སྨོན་འཇུག་གི་བསླབ་བྱ་བསྟན་པའོ༔ དང་པོ་ཚད་མེད་བཞི་ནི༔ སྙིང་རྗེ་ཚད་མེད་པ་སེམས་ཅན་ཐམས་ཅད་སྡུག་བསྔལ་གྱིས་གདུང་བ་ལ་མ་ཡི་བུ་སྡུག་བཙོན་ཁང་དུ་མནར་བ་མཐོང་བ་ལྟ་བུ་དང་༔ བྱམས་པ་ཚད་མེད་པ་མཁའ་ཁྱབ་ཀྱི་སེམས་ཅན་ཐམས་ཅད་བཟོད་བླག་མེད་པའི་སྡུག་བསྔལ་དང་བྲལ་འདོད་ཀྱི་བསམ་པ་མའི་བུ་སྡུག་གཅིག་པུ་ལ་བྱམས་པ་ལྟ་བུ་དང་༔ དགའ་བ་ཚད་མེད་པ་སེམས་ཅན་ཐམས་ཅད་གཏན་གྱི་བདེ་བ་ཐོབ་པ་ལ་དགའ་བ་བསྒོམ་པ་ནི་རྨང་པོར་བུ་སྡུག་བཙས་པ་ལྟ་བུ་དང་༔ བཏང་སྙོམས་ཚད་མེད་པ་སེམས་ཅན་ཐམས་ཅད་ལ་ཉེ་རིང་ཕྱོགས་རིས་མེད་པར་ཆོས་ཅི་བྱས་པ་ཐམས་ཅད་ལ་མ་གཅིག་གིས་བུ་མང་ལ་ལོངས་སྤྱོད་སྟེར་བ་ལྟ་བུ་ཞིག་དགོས་པ་ཡིན་ལ༔ དེ་ལྟ་བུའི་ཚད་མེད་པ་བཞིས་བློ་སྦྱོང་ནས༔ གཉིས་པ་སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་པ་དངོས་ལ༔ ཐོག་མར་རང་ཉིད་ཐར་པ་ཐོབ་ནས་ཕྱིས་གཞན་དོན་སྒྲུབ་པར་འདོད་པ་བློ་སྟོབས་ཆུང་ངུ་དང་༔ རང་དང་མཉམ་དུ་སེམས་ཅན་ཐམས་ཅད་ཐར་བར་འདོད་པ་བློ་སྟོབས་འབྲིང་དང་༔ རང་ལ་ཅི་མི་སྙམ་པར་གཞན་སེམས་ཅན་ཐམས་ཅད་རྣམ་མཁྱེན་གྱི་གོ་འཕང་ཐོབ་པར་འདོད་ནས་དེའི་ལས་ལ་བརྩོན་པ་ནི་བློ་སྟོབས་ཆེན་པོའི་ལམ་བསོད་ནམས་ཚད་མེད་པའི་འཇུག་ངོགས་བླ་ན་མེད་པའོ༔ དེ་ནས་མདུན་གྱི་ནམ་མཁར་ཚོགས་ཞིང་གོང་ལྟར་གསལ་བཏབ་པའི་སྤྱན་སྔར་ཉེས་ལྟུང་བཤགས་པའི་ཆེད་དུ་གཉེན་པོ་སྟོབས་བཞིའི་སྒོ་ནས་ཕུང་པོ་གསུམ་པའི་མདོ་འདོན་པ་ལ་སོགས་པ་དང་༔ བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་འབྱོངས་པར་བྱ་བའི་ཕྱིར་ཡོན་ཏན་དང་རིན་ཐང་ལྟ་བུར་ཡན་ལག་བདུན་པ་དང་མཎྜལ་དབུལ་ཞིང་སྡོམ་སེམས་དམ་བཅའ་བཟུང་བ་ལ༔ མགོན་པོ་སྲས་དང་བཅས་པ་བདག་ལ་དགོངས༔ ཚད་མེད་རྣམ་བཞིའི་འགྲོ་དོན་དང་དུ་ལེན༔ བྱང་ཆུབ་སེམས་བཟུང་ཕར་ཕྱིན་དྲུག་ཕར་བསླབ༔ དོན་གཉིས་ལྷུན་གྱིས་གྲུབ་པའི་དཔལ་ཐོབ་ཤོག༔ ཅེས་བརྗོད་ཅིང་ཚོགས་ཞིང་གི་སྤྱན་སྔར་སྔོན་ཆད་ཁྱེད་རྣམས་ཀྱིས་སེམས་ཅན་ཐམས་ཅད་ཀྱི་དོན་དུ་བྱང་ཆུབ་ཀྱི་སེམས་རིན་པོ་ཆེ་ཇི་ལྟར་བསྐྱེད་པ་དེ་བཞིན་དུ་བདག་གིས་ཀྱང་བྱང་ཆུབ་ཀྱི་སེམས་རིན་པོ་ཆེ་བསྐྱེད་པར་བྱའོ༔ བསླབ་པ་ལ་ཇི་ལྟར་གནས་པ་བཞིན་དུ་བདག་གིས་ཀྱང་དེ་བཞིན་དུ་བསླབ་པར་བྱའོ་བསམ་ཞིང་ཞེ་ཐག་པ་ནས་སྡོམ་པ་བླང་ཞིང་དམ་བཅའ་བཟུང་བར་བྱ་བ་ཡིན་ནོ༔ མཐར་ཚོགས་ཞིང་ཐམས་ཅད་རང་ལ་བསྟིམས་ཏེ༔ དེ་དག་གི་ཐུགས་རྒྱུད་རྣམ་པར་མི་རྟོག་པའི་ཡེ་ཤེས་རང་གི་རྒྱུད་ལ་འདྲེས་པར་བསམ་ཞིང་སྟོང་ཉིད་ཀྱི་ངང་དུ་མཉམ་པར་བཞག་གོ༔ གསུམ་པ་སྨོན་འཇུག་གི་བསླབ་བྱ་བསྟན་པ་ལ༔ དང་པོ་སྨོན་པའི་བསླབ་བྱ་ནི༔ བདག་བདེ་ཞིང་སྐྱིད་པར་འདོད་པ་ལྟར་རང་ལ་མི་སེམས་པར་སེམས་ཅན་ཐམས་ཅད་ཀྱང་དེ་བཞིན་དུ་བདེ་བར་འདོད་པ་བདག་གཞན་མཉམ་པ་དང་༔ བདག་གི་བདེ་བ་དང་དགེ་བའི་དངོས་པོ་ཐམས་ཅད་གཞན་ལ་གཏོང་ཞིང་གཞན་གྱི་སྡིག་པ་དང་སྡུག་བསྔལ་རང་ལ་ལེན་པ་ནི་བདག་གཞན་བརྗེ་བ་དང་༔ བདག་དོན་ལ་ཅི་མི་སྙམ་པར་གཞན་དོན་ཁོ་ན་ལ་དམིགས་པ་ནི་བདག་བས་གཞན་གཅེས་ཞེས་བྱ་སྟེ་སྨོན་པའི་བསླབ་བྱའོ༔ གཉིས་པ་འཇུག་པའི་བསླབ་བྱ་ནི་ཕ་རོལ་ཏུ་ཕྱིན་པ་དྲུག་སྟེ༔ དེ་ལ་དབྱེ་ན་རྒྱུ་ཟང་ཟིང་ནོར་གྱི་སྦྱིན་པ༔ ལམ་དམ་པའི་ཆོས་ཀྱི་སྦྱིན་པ༔ གཞན་འཇིགས་པ་ལས་སྐྱོབ་པ་མི་འཇིགས་པ་སྐྱབས་ཀྱི་སྦྱིན་པ་དང་གསུམ་སྦྱིན་པའི་ཕ་རོལ་དུ་ཕྱིན་པའོ༔ མི་དགེ་བའི་སྒོ་སྡོམ་པའི་ཉེས་སྤྱོད་སྡོམ་པའི་ཚུལ་ཁྲིམས༔ དགེ་བ་བཅུ་ལ་རྟག་ཏུ་སྤྱོད་པ་དགེ་བ་ཆོས་སྡུད་ཀྱི་ཚུལ་ཁྲིམས༔ བསམ་སྦྱོར་གཉིས་ཀྱི་སྒོ་ནས་རྟག་ཏུ་སེམས་ཅན་གྱི་དོན་བྱེད་པ་སེམས་ཅན་དོན་བྱེད་ཀྱི་ཚུལ་ཁྲིམས་དང་གསུམ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ༔ གཞན་གྱི་གནོད་པ་དང་རྒོལ་བ་བཟོད་པ༔ ཆོས་ཀྱི་ཕྱིར་དུ་དཀའ་ཚེགས་དང་བཀྲེས་སྐོམ་ལ་སོགས་པ་བཟོད་པ༔ ལྟ་སྒོམ་ཟབ་མོའི་དོན་ལ་མི་སྐྲག་པར་བཟོད་པ་དང་གསུམ་ནི་བཟོད་པའི་ཕ་རོལ་ཏུ་ཕྱིན་པའོ༔ ཆོས་ཕྱིར་སྙིང་སྟོབས་ཆེན་པོའི་ཤུགས་བསྐྱེད་པ་ནི་གོ་ཆའི་བརྩོན་འགྲུས༔ སྒོ་གསུམ་དམ་པའི་ཆོས་སུ་སྦྱོར་བ་ལ་ཐང་ལྷོད་མེད་པར་བརྩོན་པ་ནི་སྦྱོར་བའི་བརྩོན་འགྲུས༔ ཆོས་ལ་ཆོག་ཤེས་མེད་པ་ནི་ཆོག་པར་མི་འཛིན་པའི་བརྩོན་འགྲུས་དང་གསུམ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ༔ རྟག་ཏུ་འཁོར་བའི་གནས་ལས་དབེན་པ་བསྟེན་ཅིང་སེམས་ཀྱི་རྣམ་རྟོག་པ་རྟོག་དཔྱོད་བྱེད་ཅིང་གནས་ཉམས་པ་འཇོག་པ་ནི་བྱིས་པ་ཉེར་སྤྱོད་ཀྱི་བསམ་གཏན༔ རགས་པའི་རྣམ་རྟོག་ཐམས་ཅད་ངང་དུ་ཞི་སྟེ་དཔྱོད་བྱེད་ཀྱི་ཤེས་པ་ཕྲ་མོའི་ཡིད་ཏིང་ངེ་འཛིན་ལ་རྩེ་གཅིག་ཏུ་འཇོག་པ་ནི་དོན་རབ་འབྱེད་པའི་བསམ་གཏན༔ རྟོགས་ཚོགས་ཕྲ་རགས་ཐམས་ཅད་ངོ་བོ་སྟོང་པའི་ངང་དུ་ཞི་ནས་མི་གཡོ་བའི་ངང་དུ་གནས་པ་ནི་དེ་བཞིན་གཤེགས་དགེའི་བསམ་གཏན་ཏེ་དེ་གསུམ་ནི་བསམ་གཏན་གྱི་ཕ་རོལ་ཏུ་ཕྱིན་པའོ༔ བླ་མ་ལས་གདམས་ངག་ཟབ་མོ་ཉན་ཏེ་དོན་ལ་ནོར་འཁྲུལ་མེད་པར་ཁོང་དུ་ཆུབ་པར་བྱ་བ་ནི་ཐོས་པའི་ཤེས་རབ༔ གདམས་ངག་གི་དོན་ལ་ཐེ་ཚོམ་དང་སྒྲོ་འདོགས་གཅོད་པ་ནི་བསམ་པའི་ཤེས་རབ༔ འདི་ལྟར་སྣང་བའི་ཆོས་ཐམས་ཅད་རྨི་ལམ་གྱི་སྣང་བ་རང་ཀློང་དུ་རང་སྣང་བ་ཙམ་ལས་གཞན་དུ་མ་གྲུབ་པ་ལྟ་བུ༔ སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གཞི་སྣང་ལྷུན་གྲུབ་ཀྱི་རྩལ་དུ་ཤར་བ་ལས་གཞན་ན་གྲུབ་པ་རྡུལ་ཙམ་ཡང་མེད་པའི་ངང་ཚུལ་ཇི་ལྟ་བ་བཞིན་དུ་རྟོགས་པ་ནི་ལྟ་བ་དང་༔ ཆོས་སྐུ་གཏིང་གསལ་སྤྲོས་པའི་མཐའ་བརྒྱད་དང་བྲལ་བ་རྣམ་པར་ཐར་པའི་སྒོ་གསུམ་དང་ལྡན་པའི་ངང་ཚུལ་མངོན་དུ་བྱེད་པ་ལས་མི་འདའ་བ་སྒོམ་པ༔ ལྟ་བའི་ཕྱོགས་སུ་སྤྱོད་པ་མི་འཆོལ་བ་ཤེས་བཞིན་བག་ཡོད་དང་ལྡན་པ༔ སྤྱོད་པའི་ཕྱོགས་སུ་ལྟ་བ་མི་འཆོལ་བར་ལམ་ལྟ་སྒོམ་ཡལ་བར་མི་དོར་བ་སྤྱོད་པ་སྟེ་སྒོམ་པའི་ཤེས་རབ་ཡིན་ལ་དེ་གསུམ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ༔ དེ་ལྟར་སེམས་ཅན་ཐམས་ཅད་ཀྱི་དོན་དུ་ཕ་རོལ་ཏུ་ཕྱིན་པ་དྲུག་ལ་བསླབ་པ་ནི་འཇུག་པ་བྱང་ཆུབ་སེམས་ཞེས་བྱ་བའི་བསླབ་བྱ་ཡིན་ནོ༔ སྨོན་འཇུག་བྱང་ཆུབ་ཀྱི་སེམས་རིན་པོ་ཆེ་བསྐྱེད་པའི་འབྲས་བུ་ནི་དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་ལྟ་བུར་མི་ཟད་པའི་གཏེར་ཆེན་པོར་འགྱུར་ཏེ་གོང་ནས་གོང་དུ་འཕེལ་བར་བྱེད་ཅིང་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ལ་འཕེན་པར་བྱེད་དོ༔ རང་དོན་ཡིད་བྱེད་ཀྱི་དགེ་བ་ནི་ཐེག་པ་ཆུང་ངུའི་ལམ་འཁོར་བར་བསོད་ནམས་བསགས་པ་ཙམ་སྟེ་འབྲས་བུ་ལན་གཅིག་ལས་མེད་པ་ཆུ་ཤིང་ལྟ་བུའོ༔ དེ་ཕྱིར་ཐེག་པ་ཆུང་ངུའི་ལམ་ལས་བཟློག་སྟེ་ཐེག་ཆེན་བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་ལ་བརྩོན་པ་ནི་གནད་དང་སྙིང་པོར་གྱུར་པ་ཡིན་ནོ༔ ༈གསུམ་པ་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད་ལ༔ རང་གཞི་དྭངས་གསལ་མེ་ལོང་གི་ངོས་ལྟ་བུ་ལ༔ སྒྲིབ་གཉིས་རྡུལ་གྱི་དྲི་མས་གཡོགས་ཏེ་རྟོགས་པའི་གཟུགས་བརྙན་མི་འཆར་བས་དེ་ཉིད་སྦྱོང་བའི་ཐབས་གཉེན་པོ་སྟོབས་བཞིའི་སྒོ་ནས་བཤགས་སྦྱངས་རྡོ་རྗེ་སེམས་དཔའི་སྒོམ་བཟླས་ལ་གནད་དུ་བསྣུན་པ་ནི༔ རང་གི་སྤྱི་བོར་ཁྲུ་གང་ཙམ་གྱི་ནམ་མཁར་པདྨ་དཀར་པོ་འདབ་མ་བརྒྱད་པའི་སྟེང་དུ་ཟླ་བའི་དཀྱིལ་འཁོར་ཉ་གང་བ༔ དེའི་སྟེང་དུ་ངོ་བོ་དྲིན་ཆེན་རྩ་བའི་བླ་མ་ལ་རྣམ་པ་དཔལ་རྡོ་རྗེ་སེམས་དཔའ་སྐུ་མདོག་དུང་ལྟར་དཀར་ཞིང་ཤེལ་ལྟར་གསལ་བ༔ གཞོན་ནུ་བཅུ་དྲུག་ལོན་པའི་ན་ཚོད་ཅན་མཚན་དཔེས་མཛེས་ཤིང་ལང་ཚོའི་དཔལ་ཡོན་ཕུན་སུམ་ཚོགས་པ་དང་ལྡན་པ༔ ཕྱག་གཡས་པས་གསེར་གྱི་རྡོ་རྗེ་ཐུགས་ཀར་འཛིན་ཅིང་༔ གཡོན་པས་དངུལ་དཀར་གྱི་དྲིལ་བུ་དཀུར་བརྟེན་པ༔ ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པ༔ རིན་པོ་ཆེའི་དབུ་རྒྱན་སྙན་རྒྱན་མགུལ་རྒྱན་དཔུང་རྒྱན་ཕྱག་གདུབ་ཞབས་གདུབ་དོ་ཤལ་སེ་མོ་དོ་སྟེ་རིན་པོ་ཆེའི་རྒྱན་བརྒྱད༔ དར་གྱི་ཅོད་པན་སྟོད་གཡོགས་སྨད་དཀྲིས་གསང་གོས་སྐུ་རགས་ཏེ་དར་གྱི་ཆོས་གོས་ལྔ༔ དེ་ལྟ་བུའི་ལོངས་སྤྱོད་རྫོགས་སྐུའི་ཆས་བཅུ་གསུམ་གྱིས་སྤྲས་པ༔ འཇའ་ཚོན་འོད་ལྔའི་གུར་ཁང་གི་ཀློང་དུ་སྣང་ལ་རང་བཞིན་མེད་པ་རིགས་དང་དཀྱིལ་འཁོར་ཐམས་ཅད་ཀྱི་བདག་ཉིད་དུ་བསྐྱེད་དོ༔ དེའི་པང་དུ་ཡུམ་རྡོ་རྗེ་སྙེམས་མ་དཀར་མོ་གཡས་གྲི་གུག་དང་གཡོན་བྷན་ཐོད་བསྣམས་པ༔ གཅེར་བུ་རིན་པོ་ཆེའི་རྒྱན་དུ་མས་སྤྲས་པ་དང་གཉིས་མེད་དུ་སྦྱོར་བ་སྣང་སྟོང་གཉིས་སུ་མེད་པའི་ངོ་བོར་བསྒོམ་པ་ནི་གཉེན་པོ་རྟེན་གྱི་སྟོབས་ཞེས་བྱ་བ་དང་༔ དེའི་མདུན་དུ་རང་གིས་སྔར་བྱས་ཀྱི་སྡིག་པ་མི་དགེ་བའི་ལས་ཅི་དང་ཅི་བགྱིས་པ་ཐམས་ཅད་གནོང་ཞིང་འགྱོད་པའི་སྒོ་ནས་བཤགས་པ་ནི་ཉེས་བྱས་སུན་འབྱིན་པའི་སྟོབས་དང་༔ ཕྱིན་ཆད་སྲོག་ལ་བབས་ཀྱང་མི་དགེ་བའི་ལས་མི་བགྱིད་སྙམ་དུ་སྡོམ་སེམས་བཟུང་བ་ནི་ཉེས་པ་ལས་བཟློག་པ་སྡོམ་པའི་སྟོབས་དང་༔ སླར་ཡང་གཉེན་པོ་ཀུན་ཏུ་སྤྱོད་པའི་སྟོབས་ལ་སྤྱི་བོའི་རྡོ་རྗེ་སེམས་དཔའི་ཐུགས་ཀར་ཧཱུྃ་ཡིག་དཀར་པོ་ཟླ་བ་ལྟ་བུར་གསལ་བའི་མཐའ་བསྐོར་དུ་སྔགས་ཡི་གེ་བརྒྱ་པའི་ཕྲེང་བ་དངུལ་ཆུའི་ཁ་དོག་ལྟར་ངང་སྒ་ར་ར་འཁོར་བ་ལས་བདུད་རྩི་བྱང་སེམས་ཀྱི་རང་བཞིན་བབས་པ་སྦྱོར་མཚམས་ནས་ཆུ་ཀླུང་དྲག་པོ་ལྟ་བུར་བྱུང་སྟེ་རང་གི་སྤྱི་བོ་ནས་བཞུགས༔ ནད་ཐམས་ཅད་རྣག་ཁྲག་དང་༔ གདོན་ཐམས་ཅད་འབུ་སྲིན་སྣ་ཚོགས༔ སྡིག་སྒྲིབ་ཐམས་ཅད་དུད་ཁུ་དང་སོལ་ཁུའི་རྣམ་པར་འོག་སྒོ་གཉིས་དང་བ་སྤུའི་བུ་ག་ནས་ཐོན་ཏེ་ས་རིམ་པ་དགུའོ་འོག་ཏུ་སོང་བས་འཆི་བདག་ལས་ཀྱི་གཤིན་རྗེ་ལ་སོགས་པ་ལན་ཆགས་ཀྱི་བདག་པོ་དང་བདག་མོ་རྣམས་ཀྱི་ཁ་རུ་སོང་བས་དུས་མ་ཡིན་པའི་འཆི་བ་བཟློག་པར་བསམ་སྟེ༔ རང་གི་སྤྱི་བོར་པདྨ་ཟླ་གདན་ལ༔ བླ་མ་རྡོ་རྗེ་སེམས་དཔའ་ཤེལ་གྱི་མདོག༔ ཞི་འཛུམ་སྐྱིལ་ཀྲུང་མཚན་དཔེའི་ལང་ཚོ་འབར༔ ལོངས་སྐུའི་ཆས་རྫོགས་རྡོར་དྲིལ་བསྣོལ་ཐབས་འཛིན༔ སྙེམས་མ་ཡུམ་དང་འཁྲིལ་བའི་སྦྱོར་མཚམས་ནས༔ བདུད་རྩིའི་རྒྱུན་བབས་ནད་གདོན་སྒྲིབ་སྦྱངས་གྱུར༔ ཨོཾ་བཛྲ་སཏྭ་ས་མ་ཡ་སོགས་སཏྭ་ཨཱཿཞེས་མང་དུ་བཟླ་བ་ནི་སྤྱི་ལྟར་བསྒོམ་བཟླས་དང་༔ རྡོ་རྗེ་སེམས་དཔའི་ཞལ་ནས་ཁྱོད་ཀྱི་སྡིག་སྒྲིབ་ཐམས་ཅད་དག་པ་ཡིན་ནོ་ཞེས་ཞེ་གསུངས་ཤིང་འོད་དུ་ལྟེམས་ཀྱིས་ཞུ་ནས་རང་ལ་ཐིམ་པས་རང་ཉིད་ཀྱང་རྡོ་རྗེ་སེམས་དཔའི་སྐུར་ལམ་གྱིས་གྱུར་པར་བསམ་ལ༔ སྡིག་སྒྲིབ་ཀུན་དག་ཤེལ་སྒོང་ལྟ་བུར་གྱུར༔ སླར་ཡང་འོད་དཀར་རྣམ་པར་མེར་གྱིས་ཞུ༔ བདག་སྣང་དང་འདྲེས་རྡོར་སེམས་སྐུ་རུ་གྱུར༔ སྣང་སྲིད་དག་པ་རབ་འབྱམས་རོལ་པར་བལྟ༔ ཨོཾ་བཛྲ་སཏྭ་ཧཱུྃ༔ ཡི་གེ་དྲུག་པ་ཅི་ནུས་སུ་བཟླ་བ་ནང་ལྟར་བསྒོམ་བཟླས་དང་༔ མཐར་ཆོས་ཉིད་སྤྲོས་པ་དང་བྲལ་བའི་དབྱིངས་སུ་མཉམ་པར་འཇོག་པ་གསང་བ་ལྟར་བསྒོམ་པའོ༔ ༈བཞི་པ་ཚོགས་བསགས་པའི་སྒོ་ཐམས་ཅད་འདུ་བ་མཎྜལ་གྱི་ཁྲིད་ལ༔ རྒྱུ་བསོད་ནམས་ཀྱི་ཚོགས་ལ་བརྟེན་ནས་འབྲས་བུ་ཡེ་ཤེས་ཀྱི་ཚོགས་རྫོགས་པའི་ཕྱིར་དུ༔ མདུན་གྱི་ནམ་མཁར་བླ་མ་སྐུ་གསུམ་གྱི་ཞིང་དང་དཀྱིལ་འཁོར་ཐམས་ཅད་ཐོ་བརྩེགས་སུ་གསལ་གདབ་ལ་དེ་དག་གི་དྲུང་དུ་ཕྱི་ནང་གསང་བའི་མཎྜལ་འབུལ་བ་ལ༔ མཎྜལ་ཀྱི་གཞི་རབ་གསེར་དངུལ་ལས་བྱས་པ་ལ་རིན་པོ་སྣ་ཚོགས་ཀྱི་ཚོམ་བུ་བཀོད་པ་དང་༔ འབྲིང་ལི་དང་འཁར་བ་ངོས་དྭངས་ཤིང་གསལ་བ་ལ་སྨན་སྣ་ཚོགས་ཀྱི་ཚོམ་བུ་བཀོད་པ་དང་༔ ཐ་མ་རྡོ་ལེབ་དང་ཤིང་ལེབ་ངོས་འཇམ་ཞིང་ཁོད་སྙོམས་པ་ལ་འབྲུ་སྣ་དང་ས་དང་བྱེ་མ་ལ་སོགས་པ་གང་ཡང་རུང་བའི་ཚོམ་བུ་བཀོད་དེ༔ སྲིད་གསུམ་རི་རབ་གླིང་བཞི་གླིང་ཕྲན་ལྕགས་རི་མུ་ཁྱུད་དང་བཅས་པར་གསལ་ཞིང་༔ དེ་ལ་དང་པོ་སྟོང་གསུམ་གྱི་སྟོང་ཆུང་ངུ་དང་༔ སྟོང་གཉིས་པ་བར་མའི་འཇིག་རྟེན་དང་༔ སྟོང་གསུམ་གྱི་སྟོང་ཆེན་པོའི་འཇིག་རྟེན་ཏེ༔ དེ་ལ་གཞལ་ན་རི་རབ་གླིང་བཞི་སྟོང་སྟོང་ཆུང་ངུ་དང་༔ སྟོང་ཆུང་ངུ་སྟོང་སྟོང་འབྲིང་བོ༔ སྟོང་འབྲིང་པོ་སྟོང་སྟོང་ཆེན་པོ༔ དེ་དག་གི་སྟེང་ན་ལྷའི་སྲིད་པ༔ བར་མིའི་སྲིད་པ༔ འོག་ཀླུའི་སྲིད་པ་སྟེ་སྟོང་གསུམ་མི་མཇེད་ཀྱི་འཇིག་རྟེན་ཞེས་བྱ་བ་སྟེ༔ དེ་དག་གི་སྣོད་བཅུད་འདོད་ཡོན་ལོངས་སྤྱོད་ཐམས་ཅད་བདག་གིས་བདག་ཏུ་མ་བཟུང་བ་གཅིག་ཀྱང་མེད་པས་ཚོམ་བུ་གཅིག་ཏུ་བསྡུས་ཤིང་དྲིལ་ཏེ་བླ་མ་སྤྲུལ་སྐུའི་དཀྱིལ་འཁོར་དུ་འབུལ་བ་ཕྱིའི་མཎྜལ་དང་༔ རང་ལུས་ཕུང་ཁམས་སྐྱེ་མཆེད་ཐམས་ཅད་རི་རབ་གླིང་བཞི་གླིང་ཕྲན་ལྷ་ཀླུ་མིའི་སྣོད་བཅུད་ལོངས་སྤྱོད་འདོད་རྒུའི་དཔལ་ཡོན་ཏུ་སྤྲུལ་ནས་བླ་མ་ལོངས་སྐུའི་ཞིང་དུ་འབུལ་བ་ནང་གི་མཎྜལ་དང་༔ ཀུན་གཞི་ཡངས་པ་གདལ་ཁྱབ་ཀྱི་གཞི་ལ་རྣམ་ཤེས་ཚོགས་བརྒྱད་སེམས་བྱུང་དང་བཅས་པ་འདོད་རྒུའི་དཔལ་ཡོན་ཕུན་སུམ་ཚོགས་པ་འབྱུང་བའི་གནས་སུ་དམིགས་ཏེ་བླ་མ་ཆོས་སྐུའི་ཞིང་དུ་འབུལ་བ་གསང་བའི་མཎྜལ་ཞེས་བྱ་བ་ཡིན་ནོ༔ ཨོཾ་ཨཱཿཧཱུྃ༔ སྟོང་གསུམ་མི་མཇེད་བཀོད་པ་མཐའ་ཡས་དཔལ༔ བདག་ལུས་ལོངས་སྤྱོད་བསོད་ནམས་དགེ་རྩར་བཅས༔ ཡོངས་རྫོགས་བཀོད་པ་མཛེས་ལྡན་མཎྜལ་འདི༔ ཚོགས་གཉིས་རྫོགས་ཕྱིར་དཀོན་མཆོག་གསུམ་ལ་འབུལ༔ ཞེས་ཅི་མང་བརྗོད་མཐར་ཚོགས་ཞིང་རྣམས་རང་ལ་བསྡུས་ཏེ་དམིགས་མེད་ཀྱི་ངང་དུ་བཞག་གོ༔ དེའི་ཕན་ཡོན་ནི་ལམ་གྱི་འགལ་རྐྱེན་བར་ཆད་ཐམས་ཅད་ཞི་ཞིང་སེལ་བ་དང་༔ ཉམས་རྟོགས་ཁྱད་པར་ཅན་རྒྱུད་ལ་སྐྱེས་ཏེ་མཐར་ཐུག་ཀ་དག་གདོད་མའི་གཞི་རུ་སད་ནས་སངས་རྒྱས་པར་འགྱུར་རོ༔ ༈ལྔ་པ་ཚོགས་བསགས་པ་ཐམས་ཅད་ཀྱི་མཆོག་གཅེས་འཛིན་ཕུང་པོ་མཆོད་སྦྱིན་གྱི་ཁྲིད་ལ༔ དང་པོ་རྣམ་ཤེས་དབྱིངས་སུ་སྤར་བ་ནམ་མཁའ་གོ་འབྱེད་ནི༔ ཕཊ༔ རང་ལུས་ཆེ་ཚོ་རི་རབ་ཙམ་གྱི་དབུས༔ སྒོ་ཡི་དྭངས་མ་རྩ་མཆོག་དབུ་མའི་སྦུབས༔ རྣམ་ཤེས་ངོ་བོ་ཐིག་ལེ་དཀར་དམར་མདངས༔ ཆེ་ཆུང་ཚད་ནི་མ་སར་སྒོ་ང་ཙམ༔ སྐར་མདའ་ཆད་བཞིན་སྟེང་གི་ནམ་མཁར་འཕོས༔ ཕཊ༔ རང་ལུས་འདི་ཆེ་བ་ཚོ་བ་སྣུམ་པ་རི་རབ་ཙམ་དུ་གྱུར་པའི་དབུས་སུ་རྩ་དབུ་མ་ཤེལ་དཀར་གྱི་ཀྭ་བ་བཙུགས་པ་ལྟ་བུའི་ནང་ཁོངས་སུ་རང་གི་རིག་པ་བྱ་མ་སར་གྱི་སྒོ་ང་ལྟ་བུར་འོད་ལྔའི་ཁ་དོག་འཆར་བ་བྱ་ཆེན་གྱི་སྒོ་ང་ཙམ་པ་ཞིག་ཏུ་གྱུར་ཏེ་ཕཊ་ཀྱི་སྒྲ་དང་བཅས་ཏེ་ཆབ་གཅིག་ཏུ་སྐར་མདའ་འཕང་བ་ལྟར་སྟེང་གི་ནམ་མཁའ་ལ་འཕོས་ཤིང་ཐིམ་པར་བསམ༔ སྐད་ཅིག་གིས་ཆུ་ལས་ཆུ་ལྦུར་རྡོལ་བའམ་མཁའ་ལས་འཇའ་ཚོན་ཤར་བ་བཞིན་དུ༔ རང་གི་རིག་པ་མ་ཅིག་ཁྲོས་མ་ནག་མོ་ཞལ་གཅིག་ཕྱག་གཉིས་གཡས་གྲི་གུག་དང་གཡོན་ཐོད་ཁྲག་བསྣམས་པ༔ དབུ་སྐྲ་དམར་སེར་མེ་ལྟར་འབར་བའི་ཁྲོད་དུ་ཕག་ཞལ་ནག་པོ་གྱེན་དུ་ངུར་བ༔ ཞབས་གཉིས་གར་སྟབས་མཛད་ཅིང་ཁ་ཊྭཱྃ་རྩེ་གསུམ་མཆན་དུ་བརྟེན་པ༔ ཐོད་པ་ར་རི་སུམ་བརྩེགས་ཀྱི་ཕྲེང་བས་སྤྲས་ཤིང་༔ ཡེ་ཤེས་ཀྱི་མེ་དཔུང་འབར་བའི་ཀློང་ན་འགྱིང་བ་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ་ཞིག་ཏུ་བསྐྱེད་ལ༔ ཕཊ༔ རང་རིག་ཡེ་ཤེས་ཁྲོས་མ་གྲི་ཐོད་ཅན༔ ཕྱག་གཡས་གྲི་གུག་བེམ་པོར་ཚད་ཙམ་གྱིས༔ ཤ་རི་ཁྲག་མཚོ་རུས་པའི་གྲམ་ཁྲོད་དང་༔ དཀར་དམར་ལ་སོགས་སྲིད་གསུམ་ཟས་ཀྱི་རིགས༔ འདོད་ཡོན་མི་ཟད་ནམ་མཁའ་མཛོད་དུ་སྤེལ༔ ཨོཾ་ཨཱཿཧཱུྃ༔ ལན་གསུམ་བརྗོད༔ མཆོད་དང་སྦྱིན་ཡུལ་གྱི་མགྲོན་ཚོགས་ཞིང་དུ་སྤྱན་འདྲེན་པ་ནི༔ ཕཊ་ཕཊ་ཕཊ༔ དཀོན་མཆོག་སྲི་ཞུ་མགོན་པོ་ཡོན་ཏན་མགྲོན༔ རིགས་དྲུག་སྙིང་རྗེ་བགེགས་རིགས་ལན་ཆགས་མགྲོན༔ མི་མངོན་ནམ་མཁའི་དབྱིངས་ནས་སྐུར་བཞེངས་ལ༔ མ་ཐོགས་མྱུར་དུ་གནས་འདིར་གཤེགས་སུ་གསོལ༔ ཕཊ་ཕཊ་ཕཊ༔ ཕུང་པོ་འདོད་རྒུའི་ལོངས་སྤྱོད་མི་ཟད་གཏེར༔ དཔག་ཡས་ནམ་མཁའི་ཁྱོན་དང་མཉམ་པ་འདིས༔ དཀོན་མཆོག་སྲི་ཞུའི་མགྲོན་གྱུར་ཐམས་ཅད་དང་༔ མགོན་པོ་ཡོན་ཏན་མགྲོན་རྣམས་ཀུན་ལ་མཆོད༔ ཕཊ་ཕཊ་ཕཊ༔ འགྲོ་བ་རིགས་དྲུག་བར་དོའི་སེམས་ཅན་སྤྱི༔ བགེགས་རིགས་ལན་ཆགས་མགྲོན་རྣམས་ཐམས་ཅད་མཆོད༔ ཚོགས་རྫོགས་སྒྲིབ་དག་བུ་ལོན་ལན་ཆགས་བྱང་༔ ཀུན་ཀྱང་ཟག་མེད་བདེ་ལ་སྤྱོད་གྱུར་ཅིག༔ ཕཊ་ཕཊ་ཕཊ༔ མཆོད་བྱ་མཆོད་བྱེད་མཆོད་ཡུལ་མ་ལུས་པ༔ རྨི་ལམ་དབྱིངས་སུ་སད་པ་ཇི་བཞིན་དུ༔ སྐུ་གསུམ་ཡེ་ཤེས་མཁའ་འགྲོའི་དགོངས་པར་འདྲེས༔ ཡུམ་ཆེན་ཆོས་སྐུའི་ཀློང་དུ་བྱང་ཆུབ་བོ༔ ཨ་ཨ་ཨཱཿཕཊ་ཕཊ་ཕཊ༔ དེ་ལྟར་མཆོད་སྦྱིན་གྱི་མཆོག་གདམས་ངག་ཉམས་སུ་ལེན་པ་ལ༔ རྣམ་ཤེས་དབྱིངས་སུ་སྤར་བ་ཁྲོས་མར་བཞེངས་ཏེ་བམ་རོ་ས་ལ་འགྱེལ་བ་ཆེ་ཚོ་སྣུམ་ལ་བརྗིད་པ་སྟོང་གསུམ་ཙམ་དུ་གྱུར་པར་བསམ༔ ཕྱག་གཡས་གྲི་གུག་ཚད་པ་ཙམ་གྱིས་ཐོད་པ་སྨིན་མཚམས་ནས་བྲེག་སྟེ་སྒར་གྱིས་འཕར་ནས་ཐོད་སྒྱེད་རི་རབ་ཙམ་པ་གསུམ་གྱི་ཁར་བབས༔ ལྤགས་པ་ས་གཞི་ཁེབས་པར་བཀྲམ་པའི་སྟེང་དུ་གནས་པར་བསམ༔ སྒྱེད་པུ་གསུམ་གྱི་བར་དུ་ཨ་ཐུང་དང་རཾ་ཡིག་དམར་པོ༔ ཡཾ་ཡིག་ལྗང་གུ་གསུམ་གསལ༔ གྲི་གུག་ཚད་པ་ཙམ་གྱིས་བམ་རོ་བྷནྡྷའི་ནང་དུ་ཁྲོལ་གྱིས་ཞིག་པ་ལ༔ འོག་གི་ཡཾ་ལས་རླུང་གཡོས༔ ཨ་ཐུང་དང་རཾ་ལས་མེ་འབར་ཐོད་པའི་བདུད་རྩི་ཁོལ་ཞིང་༔ མི་གཙང་བ་དང་འབག་བཙོག་དྲི་མ་ཐམས་ཅད་ཤ་ལྦུ་ཕྱིར་ལུད་པ་བཞིན་ཞིང་ལྤགས་ཀྱི་ས་གཞིའི་སྟེང་དུ་བབ་པ་ལས་བྱུང་བའི༔ བཟའ་བ་ཤའི་རི་བོ༔ བཏུང་བ་ཁྲག་གི་རྒྱ་མཚོ༔ བཅའ་བ་རུས་པའི་གྲམ་ཁྲོད༔ ལྡག་པ་ཚིལ་ཞུན་གྱི་ཕུང་པོ༔ གཞིབ་པ་རྐང་དང་ལྷ་བ་རི་ལྟར་སྤུངས་ཤིང་མཚོ་ལྟར་བསྐྱིལ་བ་དཔག་ཡས་ནམ་མཁའི་ཁྱོན་དང་མཉམ་པར་བསྒོམ༔ དབྱིངས་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདུད་རྩི་འཇའི་སྤྲིན་ཕུང་གཏིབས་པ་བཞིན་དུ་བྱུང་ནས་བདུད་རྩི་ལ་ཐིམ་པས༔ བདུད་རྩི་ཁོལ་ཞིང་ལྦུ་བ་དང་ངད་རླངས་ལས་འདོད་ཡོན་ནམ་མཁའ་མཛོད་དུ་སྤྲོ་བའི་རང་བཞིན་ཅན་དུ་དམིགས་ལ༔ ཨོཾ་ཨཱཿཧཱུྃ་གིས་བྱིན་གྱིས་བརླབས་ནས༔ ཕཊ་སྒྲ་གསུམ་བརྗོད་པས་དང་པོས་མགྲོན་བཞིས་ཐོས༔ གཉིས་པས་དབྱིངས་ནས་བཞེངས༔ གསུམ་པས་ཐིབ་ཀྱིས་འདུས་པར་བསམ༔ བདུད་རྩིའི་ཕུད་དང་པོས་དཀོན་མཆོག་སྲི་ཞུའི་མགྲོན༔ བར་པས་མགོན་པོ་ཡོན་ཏན་གྱི་མགྲོན༔ ཐ་མས་རིགས་དྲུག་སྙིང་རྗེའི་མགྲོན་དང་༔ བགེགས་རིགས་ལན་ཆགས་ཀྱི་མགྲོན་རྣམས་ཐམས་ཅད་ལ་མཆོད་ཅིང་ཐོབ་པར་བྱས་ཏེ་དགའ་མགུ་ཡི་རང་ཟག་མེད་ཀྱི་བདེ་བས་ངོམས་ཤིང་ཚིམ་པར་བསམ༔ ལྷག་མ་ཡེ་ཤེས་ཀྱི་བདུད་རྩི་སྣང་སྲིད་ཐམས་ཅད་ཁྱབ་པར་སྤྲུལ་ཏེ་ལྷ་འདྲེ་ཁས་ཉན་དབང་ཆུང་ཞ་ལོང་འོན་ལྐུག་ཉམ་ཐག་ཅིང་བང་བུལ་བ་ཐམས་ཅད་ལ་ཕམ་རྒྱལ་འཐབ་རྩོད་མེད་པར་ཐོབ་ནས་རང་རང་སོ་སོའི་སྡུག་བསྔལ་དང་བྲལ་ཏེ་ཟག་མེད་ཀྱི་བདེ་བ་ཕུན་སུམ་ཚོགས་པ་ལ་དབང་འབྱོར་བར་བསམ༔ མཐར་དགེ་སྡིག་གཏོང་ལེན་གྱི་དམིགས་པ་ལན་གསུམ་ཐམས་ཅད་ལ་དཔོག་རྗེས༔ མཆོད་སྦྱིན་གྱི་ཡུལ་མགྲོན་བཞི་དང་༔ མཆོད་པའི་དངོས་པོ༔ སྦྱིན་པ་པོ་བདག་དང་བཅས་པ་ཕཊ་དང་པོས་སྤྲུལ་སྐུའི་དབྱིངས་སུ་བསྲེ༔ གཉིས་པས་ལོངས་སྐུའི་དབྱིངས་སུ་བསྲེ༔ གསུམ་པས་ཆོས་སྐུའི་དབྱིངས་སུ་བསྲེས་ཏེ་ཁྱབ་བརྡལ་གྱི་ངང་དུ་བཞག༔ མཐར་ཆོས་སྦྱིན་དང་བསྔོ་སྨོན་གྱིས་རྒྱས་གདབ་པའོ༔ ༈དྲུག་པ་བླ་མའི་རྣལ་འབྱོར་གྱི་ཁྲིད་ལ༔ རང་སྣང་གི་བཀོད་པ་འདི་སྐད་ཅིག་གི་བདེ་ཆེན་པདྨ་འོད་ཀྱི་ཞིང་ཁམས་དང་༔ གཞལ་ཡས་ཁང་མཚན་ཉིད་བཀོད་པ་ཐམས་ཅད་ཡོངས་སུ་རྫོགས་པའི་དབུས་སུ༔ རང་ཉིད་འཕོ་ཆེན་གྲུབ་པའི་རྣལ་འབྱོར་མ་ཡེ་ཤེས་མཚོ་རྒྱལ་སྐུ་མདོག་དཀར་དམར་གཞོན་ནུ་བཅུ་དྲུག་ལོན་པའི་ན་ཚོད་ཅན་མཚན་དང་དཔེ་བྱད་ཀྱིས་བརྒྱན་པ༔ གཡས་པས་གྲི་གུག་ཕྱར་ཞིང་གཡོན་པས་བྷན་ཐོད་བདུད་རྩིས་བཀང་བ་ཐུགས་ཀར་བསྣམས་པ༔ ཞབས་གཉིས་འདོར་སྟབས་སུ་བཞེངས་ཤིང་༔ སྤྱན་གསུམ་ནམ་མཁའི་མཐོངས་ལ་གཟིགས་པ༔ གཅེར་མོ་རིན་པོ་ཆེའི་རྒྱན་གྱིས་སྤྲས་པ་འོད་དང་འོད་ཕུང་འབར་བའི་སྐུར་གསལ་ལ༔ དེའི་སྤྱི་བོར་པདྨ་དང་ཉི་ཟླའི་གདན་གྱི་སྟེང་དུ་རྩ་བའི་བླ་མ་དང་གཉིས་སུ་མེད་པ༔ དཔལ་ཨོ་རྒྱན་མཚོ་སྐྱེས་རྡོ་རྗེ་སྐུ་མདོག་དཀར་ལ་དམར་བའི་མདངས་ཆགས་པ༔ མཚན་དང་དཔེ་བྱད་ཀྱིས་བརྒྱན་ཅིང་ཞི་མ་ཁྲོ་འཛུམ་གྱི་ཉམས་དང་ལྡན་པ༔ ཕྱག་གཡས་གསེར་གྱི་རྡོ་རྗེ་དང་གཡོན་པས་ཐོད་བུམ་བདུད་རྩིས་བཀང་བ་བསྣམས་ཤིང་མཉམ་བཞག་མཛད་པ༔ ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་མཆན་ཁུང་གཡོན་དུ་ཡུམ་ལྷ་ལྕམ་མནྡ་ར་བ་སྦས་པའི་ཚུལ་གྱིས་ཁ་ཊྭཱྃ་རྩེ་གསུམ་སྐུ་ལ་བརྟེན་པ༔ ཟ་བེར་དང་ཕོད་ཀ་ཆོས་གོས་རྣམ་པ་གསུམ་གྱིས་ཀླུབས་པ༔ ཡེ་ཤེས་འཇའ་སྐུ་སྟོང་གསལ་འཇའ་འོད་ཀྱི་གུར་ཁང་གི་ཀློང་དུ་བཞུགས་པའོ༔ དེའི་ཕྱི་རིམ་ཁོར་ཡུག་ཏུ་རྩ་བ་བརྒྱུད་པའི་བླ་མ་མ་ལུས་ཤིང་ལུས་པ་མེད་པར་ཉི་མ་དང་འོད་ཟེར་གྱི་ཚུལ་དུ་བསྐོར་ནས་བཞུགས་པ་རྣམས་ཀྱིས་རང་ལ་ཞལ་གྱིས་ཕྱོགས༔ སྤྱན་གྱིས་གཟིགས༔ ཐུགས་བརྩེ་ཐུགས་རྗེ་དང་ལྡན་པའི་ངང་ནས་གཟིགས་ཤིང་དགོངས་པར་བསམ་ལ༔ རང་སྣང་རྣམ་དག་དོན་གྱི་འོག་མིན་ཞིང་༔ རང་ཉིད་མཁའ་སྤྱོད་དབང་མོ་གྲི་ཐོད་ཅན༔ དམར་གསལ་དོར་སྟབས་མཚན་དཔེའི་ལང་ཚོས་མཛེས༔ རིངས་པའི་ཚུལ་གྱིས་སྟེང་གི་ནམ་མཁར་གཟིགས༔ སྣ་ཚོགས་དར་དང་རཏྣ་རུས་པས་བརྒྱན༔ མདུན་གྱི་ནམ་མཁར་འཇའ་འོད་འཁྲིགས་པའི་ཀློང་༔ མ་ཆགས་པདྨ་ཉི་ཟླའི་གདན་སྟེང་དུ༔ བླ་མའི་ངོ་བོ་པདྨ་འབྱུང་གནས་སྐུ༔ དཀར་དམར་མདངས་ལྡན་གཟི་བརྗིད་འོད་ཕུང་འབར༔ གཞོན་ཚུལ་མཚན་དཔེ་རབ་རྫོགས་ཞི་མ་ཁྲོ༔ པད་ཞྭ་བེར་མཐིང་ཆོས་གོས་ཐང་ཤམ་གསོལ༔ ཕྱག་གཡས་རྡོ་རྗེ་གཡོན་པས་ཐོད་བུམ་བསྣམས༔ ཞབས་གཉིས་རོལ་སྟབས་ཁ་ཊྭཱྃ་མཆན་དུ་བརྟེན༔ སྣང་སྲིད་ཟིལ་གྱིས་གནོན་པའི་སྐུར་བསྒོམ་མོ༔ དེ་ལྟར་རིག་འཛིན་བླ་མའི་དཀྱིལ་འཁོར་ཡོངས་སུ་རྫོགས་པར་གསལ་བའི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་པས་སྐུ་གསུམ་དག་པའི་ཞིང་ནས༔ བརྒྱུད་གསུམ་བླ་མ་ཞི་ཁྲོ་རབ་འབྱམས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་སྤྱན་དྲངས་ཏེ་རྒྱ་མཚོ་ཆེན་པོ་ལ་ཁ་ཆར་བབས་པ་ལྟར༔ རྡོ་རྗེ་བླ་མའི་དཀྱིལ་འཁོར་བསྒོམ་པ་ལ་ཐིམ་པས་དབང་བྱིན་དངོས་གྲུབ་ཐམས་ཅད་ཀྱི་གཏེར་མཛོད་དུ་གྱུར་པར་བསམ་ལ༔ ཧཱུྃ༔ རྔ་ཡབ་གླིང་དབུས་ཟངས་མདོག་དཔལ་རིའི་རྩེར༔ བདེ་ཆེན་པདྨ་འོད་ཀྱི་གཞལ་ཡས་སུ༔ རྗེ་བཙུན་བླ་མ་ཨོ་རྒྱན་སྤྲུལ་པའི་སྐུ༔ རིག་འཛིན་དཔའ་བོ་མཁའ་འགྲོའི་ཚོགས་དང་བཅས༔ བརྒྱུད་འཛིན་བྱིན་གྱིས་བརླབས་ཕྱིར་གཤེགས་སུ་གསོལ༔ བཛྲ་གུ་རུ་པདྨ་སིདྡྷི་ཧཱུྃ༔ དེ་ནས་ཡིད་ཁྱེད་ཤེས་ཀྱི་དད་པ་དྲག་པོ་མིག་ནས་མཆི་མ་འདྲིལ་བ་ཙམ་དུ་བསྐྱེད་ལ༔ དབང་དང་བྱིན་རླབས་དངོས་གྲུབ་ཡེ་ཤེས་ཡོན་ཏན་ཐམས་ཅད་རང་གི་རྒྱུད་ལ་སྤར་ཞིང་འཕོ་བའི་ཆེད་དུ་དམིགས་ཏེ༔ བྱིས་པ་ལྟོག་སྐོམ་གྱིས་གདུང་ཚེ་མ་ལ་འབོད་པ་བཞིན་དུ་གསོལ་བ་ཕུར་ཚུགས་སུ་གདབ་པ་ནི༔ ཀྱཻ་ཧོཿདུས་གསུམ་སངས་རྒྱས་ཐམས་ཅད་ཀྱི༔ སྤྱི་དཔལ་བླ་མ་རིན་པོ་ཆེ༔ མཐོང་བས་མ་རིག་མུན་པ་སེལ༔ ཐོས་པས་ཐེ་ཚོམ་དྲྭ་བ་གཅོད༔ དྲན་པས་དགོངས་རྒྱུད་རྟོགས་པ་འཕོ༔ རེག་པས་བྱིན་རླབས་དངོས་གྲུབ་སྟེར༔ བཀའ་དྲིན་བསམ་ན་བརྗོད་ལས་འདས༔ ཡོན་ཏན་ནམ་མཁའི་མཐའ་དང་མཉམ༔ བཟོད་མེད་གདུང་ཤུགས་དྲག་པོ་ཡིས༔ གསོལ་བ་འདེབས་སོ་ཐུགས་རྗེས་དགོངས༔ བདག་ལུས་ལོངས་སྤྱོད་དགེ་རྩར་བཅས༔ ཆགས་ཞེན་མེད་པར་ཁྱོད་ལ་འབུལ༔ འདི་ནས་ཚེ་རབས་ཐམས་ཅད་དུ༔ སྐྱབས་དང་སྐྱེལ་མ་མགོན་དང་དཔུང་༔ གཏན་གྱི་མགོན་པོ་ཁྱེད་ལས་མེད༔ བློ་སྙིང་བྲང་གསུམ་ལིང་གིས་བཀལ༔ སྐྱིད་སྡུག་ལེགས་ཉེས་ཐམས་ཅད་དང་༔ མཐོ་དམན་གར་གཏོང་བླ་མ་མཁྱེན༔ བདག་ནི་ཚེ་རབས་ཐོག་མེད་ནས༔ མ་རིག་འཁྲུལ་པའི་དབང་གྱུར་ཏེ༔ ཁམས་གསུམ་འཁོར་བའི་བཙོན་ཁང་དུ༔ བཟོད་མེད་སྡུག་བསྔལ་གསུམ་གྱིས་གདུངས༔ ཉམ་ཐག་ཟུག་རྔུ་ཁུར་མ་བཟོད༔ སྙིང་ནས་རྗེ་བཙུན་བླ་མར་འབོད༔ བདེ་འདོད་སྡུག་བསྔལ་ལས་ལ་བརྩོན༔ སྣང་བའི་ཡུལ་དུ་བདུད་ཀྱིས་བསླུས༔ ཞེན་པས་གཉིས་འཛིན་འཁྲུལ་པར་འཕྱན༔ དེ་འདྲའི་ལས་ངན་སྐལ་ངན་ལ༔ སྐྱབས་མགོན་ཁྱེད་ལས་སྐྱོབ་པ་སུ༔ གསོལ་བ་འདེབས་སོ་བླ་མ་རྗེ༔ ཐུགས་རྗེས་ཟུངས་ཤིག་བཀའ་དྲིན་ཅན༔ བྱིན་གྱིས་རློབས་ཤིག་ནུས་མཐུ་ཅན༔ རྗེས་སུ་ཟུངས་ཤིག་སྤྱི་དཔལ་མཆོག༔ བློ་སྣ་ཆོས་ལ་བསྒྱུར་དུ་གསོལ༔ དབང་བཞི་བསྐུར་བར་མཛད་དུ་གསོལ༔ སྒྲིབ་བཞི་དག་པར་མཛད་དུ་གསོལ༔ སྐུ་བཞི་ཐོབ་པར་མཛད་དུ་གསོལ༔ དགོངས་རྒྱུད་བྱིན་རླབས་བདག་ལ་འཕོས༔ མ་རིག་མུན་པ་དྲུང་འབྱིན་ནས༔ གཟུང་འཛིན་འཁྲུལ་པའི་འཕྱང་པ་ཁྲོལ༔ མཁྱེན་གཟིགས་ཡེ་ཤེས་མངོན་གྱུར་ཅིང་༔ ཆོས་ཟད་བློ་འདས་ཆེན་པོར་སྐྱོལ༔ ལྷུན་གྲུབ་གཞོན་ནུ་བུམ་པའི་སྐུར༔ འཇའ་ལུས་ཆེན་པོར་དབུགས་འབྱིན་མཛོད༔ དེ་ལྟར་གསོལ་བ་གདབ་སྟེ་མཐར་དབང་བཞི་ལེན་པ་ལ༔ བླ་མའི་དཔྲལ་བར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་མཐིང་ནག་འོད་དང་འོད་ཕུང་འབར་བ་ལ་དུས་གསུམ་གྱི་རྒྱལ་བ་རྣམས་ཀྱི་དབང་བྱིན་དངོས་གྲུབ་མཁྱེན་བརྩེ་ནུས་མཐུ་ཐམས་ཅད་འདུས་ཤིང་རྫོགས་པར་བསྒོམ་ལ༔ བླ་མའི་དཔྲལ་བར་ཨོཾ་དཀར་པོ་གསལ་བ་ལས་འོད་ཟེར་དཀར་པོ་སྐར་མདའ་ཆད་པ་ལྟར་འཕྲོས་ཏེ་རང་གི་སྤྱི་བོ་ནས་ཞུགས༔ ལུས་དང་རྩའི་སྒྲིབ་པ་སྦྱངས༔ སྐུ་བུམ་པའི་དབང་ཐོབ༔ ལུས་རྡོ་རྗེ་སྐུའི་རོལ་པར་བྱིན་གྱིས་བརླབས༔ སྤྲུལ་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ༔ མགྲིན་པར་ཨཱཿཡིག་དམར་པོ་གསལ་བ་ལས་འོད་ཟེར་དམར་པོ་གློག་ཞགས་འཁྱུགས་པ་ལྟ་བུར་བདག་གི་མགྲིན་པ་ནས་ཞུགས༔ ངག་དང་རླུང་གི་སྒྲིབ་པ་སྦྱངས༔ གསུང་གསང་བའི་དབང་ཐོབ༔ ངག་རྡོ་རྗེ་གསུང་གི་རོལ་པར་བྱིན་གྱིས་བརླབས༔ ལོངས་སྤྱོད་རྫོགས་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ༔ ཐུགས་ཀའི་ཧཱུྃ་ཡིག་མཐིང་ནག་གསལ་བ་ལས་འོད་ཟེར་མཐིང་ནག་སྤྲིན་དཔུང་འཐིབས་པ་ལྟ་བུར་བྱུང་ནས་རང་གི་སྙིང་གར་ཐིམ་པས་ཡིད་དང་ཐིག་ལེའི་སྒྲིབ་པ་སྦྱངས༔ ཐུགས་ཤེས་རབ་ཡེ་ཤེས་ཀྱི་དབང་ཐོབ༔ ཡིད་རྡོ་རྗེ་ཐུགས་ཀྱི་རོལ་པར་བྱིན་གྱིས་བརླབས༔ ཆོས་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག་པར་བསམ༔ སླར་ཡང་བླ་མའི་ཐུགས་རྣམ་པར་མི་རྟོག་པའི་ངོ་བོ་ཐིག་ལེ་ཁ་དོག་ལྔ་དང་ལྡན་པ་ཞིག་རང་གི་སྙིང་གར་ཐིམ་པས་སྒྲིབ་གཉིས་བག་ཆགས་ཐམས་ཅད་སངས་ཀྱིས་དག་ནས༔ ཚིག་དབང་རིན་པོ་ཆེ་ཐོབ༔ རྒྱལ་བ་ཐམས་ཅད་ཀྱི་ཡོན་ཏན་དང་ཕྲིན་ལས་མི་ཟད་པ་རྒྱན་གྱི་འཁོར་ལོ་ཡོངས་སུ་རྫོགས་པར་བྱིན་གྱིས་བརླབས༔ ངོ་བོ་ཉིད་ཀྱི་སྐུ་མངོན་དུ་གྱུར་པའི་ས་བོན་རྒྱུད་ལ་བཞག་པར་བསམ༔ ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱཿསླར་ཡང་བླ་མ་འོད་དུ་ཞུ་ནས་རང་ལ་ཐིམ་པས་གཉིས་སུ་མེད་པར་བསྒོམ་ཞིང་ཐུགས་ཡིད་རོ་གཅིག་ཏུ་བསྲེས་ཏེ་མཉམ་པར་བཞག༔ གོང་གི་བསྙེན་སྔགས་ལ་བབ་ཚེ་སྟོང་ངམ་བརྒྱའམ་ཉེར་གཅིག་སོགས་བཟླ་བ་ནི་གནད་ཀྱི་གནད་མཆོག་དམ་པ་ཡིན་ཏེ་ཤེས་པར་བྱའོ༔ རང་དབང་རང་ལ་བསྐུར་བ་ཡི༔ ཡང་ཟབ་བླ་ན་མེད་པ་འདི༔ གཞན་གྱིས་དབང་བསྐུར་བརྒྱ་ལས་ལྷག༔ གསང་སྔགས་ཟབ་མོའི་སྒོར་ཞུགས་པའི༔ ལས་ཅན་སྐལ་ལྡན་ཕོ་མོ་རྣམས༔ རྟག་ཏུ་ཆགས་མེད་ཉམས་ལེན་མཛོད༔ ཐུགས་རྒྱུད་ཡེ་ཤེས་རྒྱུད་ལ་འཕོ༔ ཚེ་གཅིག་རྣམ་གྲོལ་འབྲས་བུ་ཐོབ༔ ༈བདུན་པ་མ་སྒོམ་སངས་རྒྱས་འཕོ་བའི་ལམ་ཟབ་མོ་ཉམས་སུ་ལེན་པའི་ཁྲིད་ལ༔ ཐོག་མར་འཕོ་བ་ཞེས་བྱ་བའི་ངེས་ཚིག་ནི༔ མ་དག་པའི་སེམས་དང་སྣང་བ་ཐམས་ཅད་དག་དབྱིངས་དྭངས་མ་རུ་འཕོ་བ་རབ་ལྟ་བ་རྒྱས་འདེབས་ཀྱི་འཕོ་བ་དང་༔ ཚེ་གཅིག་བསྐྱེད་རིམ་ལ་གོམས་པའི་སྐྱེས་བུ་རྣམས་ཀྱིས་སྣོད་བཅུད་དཀྱིལ་འཁོར་གསུམ་གྱི་རོལ་པ་ལས་མི་འདའ་བར་འཁོར་འདས་དག་མཉམ་གྱི་རོལ་པར་ཤེས་པའི་ངང་ནས་སྐུ་དང་ཞིང་ཁམས་ཀྱི་རོལ་པར་གོ་འཕོས་པ་ནི་འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ་མ་དག་ཞིང་ཁམས་སུ་མངོན་དུ་གྱུར་པ་ཉིད་ཡིན་ལ༔ ཐ་མ་འདུ་ཤེས་གསུམ་ལྡན་གྱི་འཕོ་བ་ནི་རྩ་དབུ་མ་ལམ་གྱི་འདུ་ཤེས༔ རྣམ་ཤེས་ལ་མགྲོན་པོའི་འདུ་ཤེས༔ འཕོ་ཡུལ་སྐུ་དང་ཞིང་ཁམས་བསྐྱེད་པ་ལ་གནས་པོའི་འདུ་ཤེས་རྣམས་སོ༔ དེ་ལ་དང་པོ་རང་གི་གནས་དང་ཡུལ་ཁམས་ཐམས་ཅད་དག་པའི་ཞིང་བདེ་བ་ཅན་དུ་གསལ་བའི་དབུས་སུ་མ་ཆགས་པདྨ་འདབ་བརྒྱད་གྱེས་པའི་སྟེང་དུ་ཟླ་བའི་གདན་ལ༔ རང་ལུས་རྡོ་རྗེ་རྣལ་འབྱོར་མ་སྐུ་མདོག་དམར་མོ་གཞོན་ནུ་བཅུ་དྲུག་ལོན་པའི་ལང་ཚོ་ཅན༔ སྐུ་གཅེར་བུ་རུས་པའི་རྒྱན་དྲུག་གིས་སྤྲས་པ༔ ཞབས་གཉིས་འདོར་སྟབས་སུ་བཞེངས་པ་ཕྱག་གཉིས་གྲི་གུག་དང་ཐོད་ཁྲག་བསྣམས་ཤིང་༔ སྐུ་སྟོང་གསལ་འོད་ཀྱི་གུར་ཁང་དུ་གསལ་བའི་དབུས་སུ་རྩ་དབུ་མ་བྱང་ཆུབ་ཀྱི་རྒྱུད་ལམ་ཕྱི་དཀར་ལ་ནང་དམར་བ་བར་མཐིང་ཤུན་ལྟར་སྔོ་བ༔ ཡར་སྣ་སྤྱི་བོ་ཚངས་པའི་བུ་གར་རྒྱ་མཐོང་གི་ཁ་ཕྱེས་པ་ལྟར་ཧར་གྱིས་ཡོད་པ༔ མར་སྣ་ལྟེ་འོག་གཉེར་པོ་ཆེ་རུ་ཟུག་ཅིང་༔ སྙིང་གར་ཚིགས་ཀྱིས་བཅད་པའི་སྟེང་དུ་རླུང་སེམས་རྣམ་པར་ཤེས་པའི་ངོ་བོ་འོད་ཀྱི་ཐིག་ལེ་ཁ་དོག་ལྔ་དང་ལྡན་པ་བྱ་མ་སར་གྱི་སྒོ་ང་ལྟ་བུ་འཕར་ལིང་ལིང་བྱེད་པ་ཞིག་ཏུ་བསྒོམ༔ སྤྱི་བོར་ཁྲུ་གང་འཕགས་པའི་སྟེང་གི་ནམ་མཁའ་ལ་ཡེ་ཤེས་ཀྱི་འོད་སྣང་ལས་གྲུབ་པའི་ཞིང་ཁམས་རྒྱ་ཆེ་ལ་ཁྱོན་ཡངས་པའི་དབུས་སུ་པདྨ་དང་ཟླ་བའི་གདན་ལ༔ ངོ་བོ་དྲིན་ཆེན་རྩ་བའི་བླ་མ་ལ་རྣམ་པ་སངས་རྒྱས་འོད་དཔག་ཏུ་མེད་པ་སྐུ་མདོག་དམར་པོ་པདྨ་རཱ་གའི་ཕུང་པོ་ལྟར་འོད་དང་འོད་ཟེར་འབར་བ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ༔ ཕྱག་གཉིས་མཉམ་བཞག་མཛད་པའི་སྟེང་དུ་ལྷུང་བཟེད་འཛིན་ཅིང་ཆོས་གོས་རྣམ་གསུམ་སྐུ་ལ་གསོལ་བ༔ འཇའ་ཚོན་འོད་ལྔའི་ཀློང་དུ་འཇའ་ལུས་སྒྱུ་མའི་སྐུ་སྣང་ལ་རང་བཞིན་མེད་པ་ཞིག་ཏུ་བསྒོམས་ཏེ༔ གནས་ཀྱི་མངོན་ཞེན་ལྡོག་པའི་ཕྱིར༔ ཨེ་མ་ ཧོཿ རང་སྣང་རྣམ་དག་དོན་གྱི་འོག་མིན་ཞིང་༔ ལུས་ཀྱི་མངོན་ཞེན་ལྡོག་པའི་ཕྱིར༔ རང་ལུས་རྣལ་འབྱོར་དམར་མོ་གྲི་ཐོད་ཅན༔ ཞི་འཛུམ་དོར་སྟབས་མཚན་དཔེའི་ལང་ཚོས་མཛེས༔ ལམ་གྱི་འདུ་ཤེས་ལ༔ སྐུ་དབུས་དབུ་མ་མདའ་སྙུག་འབྲིང་པོ་ཙམ༔ སྙིང་གའི་གནས་ནས་སྤྱི་བོར་ཐ་ལེར་ཟུག༔ གནས་པོའི་འདུ་ཤེས་ལ༔ རིགས་ཀྱི་བདག་པོ་སངས་རྒྱས་འོད་དཔག་མེད༔ དམར་གསལ་མཉམ་བཞག་སྐྱིལ་ཀྲུང་པད་ཟླར་བཞུགས༔ ཞི་འཛུམ་མཚན་དཔེ་རབ་རྫོགས་སྤྲུལ་སྐུའི་ཆས༔ སྐུ་ལ་བཀོད་པ་རྒྱལ་བའི་དཀྱིལ་འཁོར་རྫོགས༔ མགྲོན་པོའི་འདུ་ཤེས་ལ༔ སྙིང་དབུས་རིག་པ་དྭངས་མའི་ཐིག་ལེར་གསལ༔ དབུ་མའི་ལམ་ནས་སྐར་མདའ་རྒྱུག་པ་བཞིན༔ སངས་རྒྱས་འོད་དཔག་མེད་པའི་ཐུགས་ཀར་འཕོ༔ ཕཊ་ཕཊ་ཕཊ༔ དེ་ནས་མཚན་བརྗོད་ཅིང་མོས་གུས་དྲག་པོ་མཆི་མ་འདྲིལ་བ་ཙམ་དུ་བསྐྱེད་ལ་གདུང་ཤུགས་དྲག་པོས་གསོལ་བ་འདེབས་པ་ནི༔ ཨོཾ་ཨཱཿཧཱུྃ༔ ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་འགྲོ་བའི་མགོན་པོ་པདྨ་འབྱུང་༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ ཟབ་ལམ་འཕོ་བ་འབྱོངས་པར་བྱིན་གྱིས་རློབས༔ ཕཊ་ཕཊ་ཕཊ༔ ཞེས་གསོལ་བ་ཕུར་ཚུགས་སུ་བཏབ་མཐར་ཐུགས་ཀའི་ཧྲཱིཿལས་འོད་ཕུང་དམར་པོ་འཕྲོས་ཏེ་རྣམ་པར་ཤེས་པ་ལ་ཐིམ་པས་མེ་སྟག་ཡར་བའམ་སྐར་མདའ་ཆད་པ་བཞིན་དུ་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་བསམ་ལ་ཕཊ་སྒྲ་གསུམ་གྱིས་སྤར༔ དེ་ལྟར་ཡང་ཡང་བསྐྱར་བའི་རྗེས་སུ་སངས་རྒྱས་འོད་དཔག་མེད་མགོན་འཁོར་ཞིང་ཁམས་དང་བཅས་པ་འོད་དུ་མེར་གྱིས་ཞུ་ནས་དབུ་མའི་ལམ་ནས་མར་བབས་ཏེ་ལུས་ཐམས་ཅད་འཆི་མེད་ཚེའི་ངོ་བོ་འོད་དམར་གྱིས་ལྟེམས་སེ་ཁྱབ་ཅིང་གང་བར་བསྒོམ་ཞིང་༔ རྩ་བར༔ རྟག་ཏུ་སྦྱངས་ཚེ་རིགས་བདག་འོད་དུ་ཞུ༔ དབུ་མའི་ལམ་ནས་སྙིང་གར་ཐིམ་པ་ཡིས༔ འཆི་མེད་མགོན་པོའི་དཔལ་ཡོན་རྫོགས་པར་བསམ༔ ཞེས་སོ༔ དེ་ནས་ཚེ་བསྙེན་ཅུང་ཟད་བཟླས་ཏེ་མཐར་བསྔོ་སྨོན་གྱིས་རྒྱས་གདབ་པར་བྱའོ༔ ལས་ལ་སྦྱར་བའི་སྐབས་སུ་གོང་བཞིན་རྣམ་པར་ཤེས་པ་དཔག་ཆེན་གྱིས་མདའ་འཕང་བ་བཞིན་དུ་སངས་རྒྱས་འོད་དཔག་མེད་ཀྱི་ཐུགས་ཀར་ཕཊ་ཀྱི་སྒྲས་བསྟིམས་ཏེ་ཞིང་ཁམས་རྣམ་དག་ཡིད་ལ་བྱེད་ནུས་ན་རྣམ་དག་དབུགས་ཆེན་འབྱིན་པའི་ཞིང་དུ་གྲོལ་བ་འཐོབ་པར་གདོན་མི་ཟའོ༔ རྩ་བར༔ ལས་ལ་སྦྱར་ཚེ་ཕྱོགས་བཅུའི་སྤྲུལ་པའི་ཞིང་༔ གང་འདོད་ཡིད་ལ་བྱས་ནས་དེ་ཉིད་དུ༔ ཐེ་ཚོམ་ཕྱིར་ཆགས་མེད་པར་འཕོ་ནུས་ན༔ རྣམ་དག་ཞིང་དུ་དབུགས་ཆེན་འབྱིན་འགྱུར་རོ༔ ཞེས་གསུངས་སོ༔ དེ་ལྟར་ཁྲིད་ཀྱི་སྐབས་རྣམས་སུ་སྔོན་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་དགེ་བའི་རྩ་བ་ཇི་ལྟར་བསྔོས་པ་དང་༔ ད་ལྟའི་སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟར་བསྔོ་བར་མཛད་པ་དང་༔ མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟར་བསྔོ་བར་འགྱུར་བ་དེ་བཞིན་དུ་དགེ་བའི་རྩ་བ་འདི་དག་ཀྱང་སེམས་ཅན་ཐམས་ཅད་ལ་ཐར་པ་དང་རྣམ་མཁྱེན་གྱི་གོ་འཕང་ཐོབ་པའི་ཆེད་དུ་བསྔོ་བར་བགྱིའོ་སྙམ་པ་ནི་རྗེས་སུ་མཐུན་པའི་བསྔོ་བ་ཞེས་བྱ་བ་ཡིན་ཏེ་དགེ་བའི་རྩ་བ་གང་བསྒྲུབ་ཀྱང་མེད་ཐབས་མེད་པ་ཡིན༔ མཐར་སྨོན་ལམ་ཅི་རིགས་གདབ་ཅིང་འགྲུབ་པའི་བདེན་ཚིག་དང་སྔགས་བཅས་བརྗོད་པར་བྱ་བ་ནི་གནད་དམ་པ་ཡིན་ཏེ་ཤེས་པར་བྱའོ༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ཡང་ས་གཏེར་སྔོན་འགྲོའི་ངག་འདོན་དང་མཐུན་པའི་ཁྲིད་བྱིན་རླབས་དངོས་གྲུབ་ཀྱི་བང་མཛོད་ཅེས་བྱ་བ་འདི་ཉིད་རང་ལོ་ཉེར་ལྔའི་དུས་སུ་ཨོ་རྒྱན་མཚོ་སྐྱེས་རྡོ་རྗེས་རང་གི་ཡིག་རྩིས་སློབ་པའི་སློབ་དཔོན་དུ་སྤྲུལ་ནས་གསུངས་པ་ལ་བརྟེན་ནས།  ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་ཏེ་མཐར་སློབ་བུ་མཆོག་རབ་དང་ཀློང་ཆེན་གཉིས་ཀྱིས་ནན་དུ་བསྐུལ་ངོར་ལི་སྟོད་སྐལ་བཟང་དགོན་ནས་གཏན་ལ་ཕབ་པ་དུས་གསུམ་ཀུན་ཏུ་དགེ་བར་གྱུར་ཅིག  །ཡི་གེ་པའང་བཙུན་པ་ཀློང་ཆེན་གྱིས་བགྱིས་པའོ།  །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།}}
</onlyinclude>
{{TsagliCall}}
<headertabs/>