View source for TTDL-ZABTER-12-NA-083

༠༠༠༠༠བརྡ་ཡིག༤༧༣ཆོས་ཉིད་ནམ་མཁའི་ཀློང་མཛོད་ལས༔ ཡེ་ཤེས་མཁའ་འགྲོ་རྡོ་རྗེ་རྣལ་འབྱོར་མའི་རྩ་བའི་སྒྲུབ་པ་ཡིད་བཞིན་དབང་རྒྱལ་བཞུགས་སོ༔ 
༠༠༠༠༠བརྡ་ཡིག༤༧༤ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག༤༧༤ལྔ་བརྒྱ་དུས་ཀྱི་ཐ་མ་ལ༔ གསང་སྔགས་བསྟན་པ་ཉམས་དམའ་ནས༔ བཟླས་བརྗོད་ཁ་ཙམ་མ་གཏོགས་པ༔ དོན་གྱི་སྒྲུབ་པ་བྱེད་པ་ཉུང་༔ དེ་ཕྱིར་གྲུབ་རྟགས་ཐོན་པ་དཀོན༔ བསྐལ་པ་མང་པོའི་གོང་རོལ་ནས༔ ཚོགས་སྨོན་ལས་འཕྲོ་འཛོམས་པ་ཡི༔ སྐལ་བཟང་སྐྱེས་བུ་རེ་མཆིས་ན༔ གནད་ཀྱི་སྙིང་བོ་མི་དོར་བ༔ དང་པོ་དབང་གིས་སྨིན་བྱས་ཏེ༔ གྲོལ་བྱེད་གདམས་པ་ཁོང་ཆུབ་སྟེ༔ ཆོས་བརྒྱད་ལས་དབེན་སྐྱེད་ཚལ་དུ༔ སྙིང་པོའི་སྒྲུབ་ལ་བརྩོན་ནུས་ན༔ དཀྱིལ་འཁོར་བཀོད་ལེགས་ཡིད་འོང་ཞིང་༔ སྒོ་གྲུ་ལ་སོགས་སྤྱི་མཐུན་པའི༔ གཞལ་ཡས་ཁང་གི་ཐིག་ཚོན་གྱི༔ མཚན་ཉིད་ཇི་ལྟ་བ་བཞིན་དུ༔ ཚང་བར་བྱ་བ་མཆོག་ཏུ་ཤིས༔ ཡང་ན་ཚོམ་བུའི་དཀྱིལ་འཁོར་ནི༔ དབུས་དང་ཤར་ལྷོ་ནུབ་བྱང་གི༔ འབྲུ་སྣ་ཚོན་གྱི་སྦགས་བྱས་ཏེ༔ མཐིང་ཁ་དཀར་སེར་དམར་ལྗང་གི༔ གྲོང་གི་ཚུལ་དུ་ལེགས་པར་བསྐོར༔ ཡང་ན་གཏོར་མ་གཙོ་དང་འཁོར༔ ཇི་བཞིན་གྲངས་དང་སྦྱར་ཏེ་བཀོད༔ དར་ཚོན་རྣམ་པ་སྣ་ཚོགས་ཀྱི༔ ཤིན་ཏུ་མཛེས་ཤིང་ཡིད་འོང་བྱ༔ འབྱོར་ཚོགས་ཕྱི་ནང་གསང་མཆོད་བཤམས༔ དཀར་ཕྱོགས་སྐྱོང་ལ་དཀར་མཆོད་དང་༔ ནག་ཕྱོགས་རིགས་ལ་དམར་གཏོར་དང་༔ བགེགས་རིགས་མགྲོན་ལ་གླུད་ལན་ཆགས༔ འབྲས་ཆན་ཤ་ཁྲག་ལ་སོགས་བཏང་༔ མདུན་གྱི་ནམ་མཁར་པད་ཟླའི་སྟེང་༔ བླ་མ་རིགས་འདུས་ངོ་བོར་གསལ༔ རྣམ་གསུམ་དད་པས་སྐྱབས་འགྲོ་ལ༔ ན་མོ༔ ཆོས་སྐུ་ཡུམ་ཆེན་ཀུན་བཟང་མོ༔ ལོངས་སྐུ་རྡོ་རྗེ་རྣལ་འབྱོར་མ༔ སྤྲུལ་སྐུ་དབྱིངས་ཀྱི་ཡུམ་ཆེན་ལྔ༔ ཡོངས་འདུས་བདག་ཉིད་བླ་མ་ལ༔ རྣམ་གསུམ་དད་པས་སྐྱབས་སུ་མཆི༔ ལན་གསུམ༔ དེ་ནས་སེམས་བསྐྱེད་པ་ལ༔ ཧཱུྃ༔ བླ་མ་སངས་རྒྱས་བླ་མ་ཆོས༔ དེ་བཞིན་བླ་མ་དགེ་འདུན་དགོངས༔ བདག་གིས་འཁོར་བ་ཡོངས་སྒྲོལ་ཕྱིར༔ མཁའ་འགྲོའི་གོ་འཕང་མངོན་དུ་བྱ༔ ལན་གསུམ་བརྗོད་ཅིང་དམ་བཅའ་བཟུང་༔ དེ་ནས་ཚོགས་བསགས་ཡན་ལག་བདུན་པ་ལ༔ ཧོཿསྐུ་གསུམ་མཁའ་འགྲོའི་གྲོང་ཁྱེར་ལ༔ རྣམ་གསུམ་དད་པས་ཕྱག་འཚལ་ལོ༔ ལུས་དང་ལོངས་སྤྱོད་མཆོད་པ་འབུལ༔ དུས་གསུམ་བསགས་པའི་སྡིག་པ་བཤགས༔ རྣམ་དཀར་དགེ་ལ་རྗེས་ཡི་རང་༔ གང་འདུལ་ཆོས་འཁོར་བསྐོར་བ་དང་༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་འགྲོ་ཀུན་ཡོངས་ལ་བསྔོ༔ ཐམས་ཅད་ཕྱམ་གཅིག་སངས་རྒྱས་ཤོག༔ དེ་ནས་བཀའ་བསྒོ་བ་ལ༔ ཧཱུྃ༔ ང་ནི་ཡེ་ཤེས་མཁའ་འགྲོའི་སྐུ༔ ཆོས་ཉིད་རོལ་པའི་སྒྱུ་འཕྲུལ་ལས༔ སྤྲུལ་པའི་མཁའ་འགྲོས་སྣང་སྲིད་ཁྱབ༔ ཉོན་ཅིག་ལོག་འདྲེན་བགེགས་ཀྱི་ཚོགས༔ ལན་ཆགས་གཏོར་མ་འདི་ལོངས་ལ༔ བརྩེ་ཞིང་བྱམས་པའི་སེམས་ལྡན་གྱིས༔ དགའ་མགུ་ཡི་རང་ཚིམ་བྱས་ལ༔ རང་རང་སོ་སོའི་གནས་སུ་གཤེགས༔ གལ་ཏེ་མི་འགྲོ་འདུག་གྱུར་ན༔ ཡེ་ཤེས་མཁའ་འགྲོའི་སྒྱུ་འཕྲུལ་གར༔ མེ་རླུང་ཐུན་མཚོན་འཁྲུལ་འཁོར་གྱིས༔ ལུས་སེམས་རྡུལ་དུ་བརླག་ཏ་རེ༔ དེ་བས་ད་ལྟ་ཕྱིར་དེངས་ཤིག༔ རྩ་སྔགས་མཐར་ཧཱུྃ་བཞིའི་སྔགས་དང་དྲག་སྔགས་ཐུན་གྱིས་བྲབ༔ དེ་ནས་བསྲུང་བའི་འཁོར་ལོ་བསྒོམ་པ་ལ༔ ཧཱུྃ༔ རང་ཉིད་ཡེ་ཤེས་མཁའ་འགྲོ་མའི༔ སྤྲུལ་པ་ཡེ་ཤེས་རོལ་གར་གྱི༔ འཁོར་ལོ་རྡོ་རྗེ་རིན་པོ་ཆེ༔ པདྨ་རྒྱ་གྲམ་མེ་རླུང་ཆུའི༔ བསྲུང་བའི་འཁོར་ལོ་ལྷུན་གྱིས་གྲུབ༔ ཛྙཱ་ན་པདྨ་རཀྵ་ཙཀྲ་ཧཱུྃ་བྷྲཱུྃ་རཀྵ་རཀྵ་སྭཱ་ཧཱ༔ དེ་ནས་བརྡ་སྒོ་དབྱེ་བ་ལ༔ ཧཱུྃ༔ རང་རིག་རྣམ་ཐར་གསུམ་ལྡན་བཙུན་མོའི་མཁར༔ མ་རིག་ཉོན་ཤེས་དྲི་མས་བསྒྲིབས་པའི་སྒོ༔ དབྱེར་མེད་ཟང་ཐལ་ཆེན་པོར་ཧར་སངས་ཏེ༔ ཀ་དག་སྤྲོས་མཐའ་བྲལ་བར་ཨེ་མ་ཧོ༔ དེ་ནས་བརྡ་ཕྱག་འཚལ་བ་ལ༔ ཧཱུྃ༔ འཁོར་འདས་ཀ་དག་མཉམ་པ་ཉིད་ཀྱི་དབྱིངས༔ མ་རྟོགས་འཁྲུལ་པས་བསླུས་པའི་ངང་མཐོང་ནས༔ གདོད་ནས་རང་རིག་ལྷུན་གྲུབ་རོལ་པའི་ལྷར༔ རང་ངོ་རང་ཞལ་མཇལ་བས་ཕྱག་འཚལ་ལོ༔ དེ་ནས་བྱིན་ཆེན་དབབ་པ་ལ༔ ཧཱུྃ༔ ནམ་མཁའ་རྣམ་པར་དག་པའི་མཁའ་དབྱིངས་ནས༔ ཆོས་སྐུ་ཡུམ་ཆེན་མོ་ཡིས་བྱིན་ཆེན་ཕོབ༔ ཀ་དག་སྤྲོས་མཐའ་བྲལ་བའི་ཀློང་ཡངས་ནས༔ བདེ་ཆེན་ཀུན་ཏུ་བཟང་མོས་བྱིན་ཆེན་ཕོབ༔ ལྷུན་གྲུབ་གསང་ཆེན་རོལ་པའི་དཀྱིལ་འཁོར་ནས༔ རྡོ་རྗེ་རྣལ་འབྱོར་མ་ཡིས་བྱིན་ཆེན་ཕོབ༔ ཕྲིན་ལས་འགྲོ་བ་འདུལ་བའི་དཀྱིལ་འཁོར་ནས༔ རིགས་ལྔ་དབྱིངས་ཀྱི་མཁའ་འགྲོས་བྱིན་ཆེན་ཕོབ༔ དག་པ་མཁའ་སྤྱོད་ཞིང་ཁམས་དམ་པ་ནས༔ གནས་ཡུལ་དཔའ་བོ་མཁའ་འགྲོས་བྱིན་ཆེན་ཕོབ༔ གནས་འདི་མཁའ་སྤྱོད་ཞིང་དུ་བྱིན་གྱིས་རློབས༔ སྒྲུབ་ཁང་གཞལ་ཡས་དམ་པར་བྱིན་གྱིས་རློབས༔ སྒྲུབ་མཆོག་དཔའ་བོ་དཔའ་མོར་བྱིན་གྱིས་རློབས༔ དམ་རྫས་མྱོང་གྲོལ་ཡེ་ཤེས་བདུད་རྩི་རུ༔ བྱིན་གྱིས་རློབས་ཤིག་ཡེ་ཤེས་མཁའ་འགྲོ་མ༔ ཐུགས་དམ་དུས་ལ་བབ་བོ་ས་མ་ཡ༔ ཨོཾ་བཛྲ་ཌཱཀྐི་ནཱི་བྃཿཧཿརིཿནིཿསཿམཿབྷྱོཿཛཿཧྲཱིཾཿབཛྲ་ས་མ་ཡ་ཛ་ཛཿཨ་བེ་ཤ་ཡ་ཨ་ཨཱཿདེ་ནས་མཆོད་རྫས་བྱིན་བརླབ་ལ༔ ཨཱཿསྣང་སྲིད་ཐམས་ཅད་བདག་མེད་སྟོང་པར་ཞུ༔ སྟོང་པའི་ངང་ལས་འཇའ་ཚོན་སྨིག་རྒྱུ་བཞིན༔ ཕྱི་མཆོད་ཉེ་བར་སྤྱོད་པའི་ཡོ་བྱད་དང་༔ ནང་མཆོད་འདོད་ཡོན་ལྔ་ཡི་ལོངས་སྤྱོད་ཚོགས༔ གསང་མཆོད་སྨན་གཏོར་རཀྟའི་ཚོགས་རྣམས་དང་༔ ཁྱད་པར་ཏན་གན་རྨད་དུ་བྱུང་བའི་རྫས༔ མི་ཟད་ནམ་མཁའ་མཛོད་ཀྱི་ལོངས་སྤྱོད་སྤེལ༔ ཨོཾ་བཛྲ་ཨརྒྷཾ་སོགས་ནས༔ རཱུ་པ་ཤབྡ་སོགས༔ སྤཪྵེ་པཱུ་ཛ་ཧོཿསརྦ་ཏ་ན་ག་ན་པཱུ་ཛ་ཧོཿཨོཾ་ཨཱཿཧཱུྃ༔ ལན་གསུམ༔ དེ་ནས་དེ་བཞིན་ཉིད་ཀྱི་ཏིང་ངེ་འཛིན་ལ༔ ཨཱཿགཟུང་དང་འཛིན་པས་བསྡུས་པ་ཡི༔ ཆོས་ཀུན་ཆོས་ཉིད་ཆེན་པོར་ཞིག༔ དྷརྨ་དྷརྟུ་ཨ༔ ཀུན་ཏུ་སྣང་བའི་ཏིང་འཛིན་ལ༔ འདི་ལྟར་མ་རྟོགས་སེམས་ཅན་ལ༔ དམིགས་མེད་སྙིང་རྗེ་ཆེན་པོས་བརྡལ༔ བཛྲ་ས་མ་ཏི་ཨཱཿདེ་ནས་རྒྱུ་ཡི་ཏིང་འཛིན་ལ༔ ཧཱུྃ༔ རང་བྱུང་རྒྱུ་ཡི་ས་བོན་ཧཱུྃ༔ རྟེན་མེད་དབྱིངས་ཀྱི་མཁའ་ལ་ཤར༔ ཧཱུྃ་ཙིཏྟ་བཛྲ་ས་མ་ཏི་ཨཱཿདེ་ནས་རྟེན་བསྐྱེད་པ་ལ༔ ཧཱུྃ་ལས་འོད་དང་འོད་ཟེར་འཕྲོས༔ འབྱུང་བའི་ལྷ་མོ་བཞི་རིམ་མཁར༔ ལྷུན་གྲུབ་བདེ་བ་ཆེན་པོའི་ཞིང་༔ བཀོད་ལེགས་མཛེས་ལྡན་ཡིད་དུ་འོང་༔ དེ་དབུས་ཡེ་ཤེས་ལྔ་ལྡན་པའི༔ འོད་ལྔ་འཕྲུལ་གྱི་གཞལ་ཡས་ཁང་༔ རྒྱན་དང་འཁོར་ཡུག་མཚན་ཉིད་རྫོགས༔ འོད་ཕུང་བསྐལ་བའི་མེ་ལྟར་འབར༔ རང་བྱུང་རང་ཤར་ཆེན་པོའི་དབུས༔ པདྨ་དང་ནི་ཉི་གདན་ལ༔ ཧཱུྃ་དམར་འོད་ཀྱི་རང་བཞིན་བབས༔ འོད་འཕྲོས་རྒྱལ་བ་སྲས་བཅས་མཆོད༔ ཁམས་གསུམ་འཁོར་བ་ཆོས་སྐུར་བསྒྲལ༔ ཚུར་འདུས་ཡོངས་སུ་གྱུར་པ་ལས༔ རང་ཉིད་རྡོ་རྗེ་རྣལ་འབྱོར་མ༔ དམར་གསལ་མཚན་དཔེའི་ལང་ཚོས་མཛེས༔ བཅུ་དྲུག་གཞོན་ནུ་འོད་ཕུང་འབར༔ ཕྱག་གཡས་གྲི་གུག་མཁའ་ལ་ཕྱར༔ གཡོན་པས་ཐོད་ཁྲག་ཐུགས་ཀར་བསྣམས༔ གཅེར་མོ་མཉམ་པའི་སྟབས་ཀྱིས་བཞེངས༔ རིན་པོ་ཆེ་ཡི་རྒྱན་ཕྲེང་དང་༔ པད་དཀར་ཕྲེང་བའི་དོ་ཤལ་མཛད༔ ཞི་འཛུམ་ཆགས་ཤིང་བཞད་པའི་ཞལ༔ ཡེ་ཤེས་ལྔ་ཡི་འོད་ཕུང་འཁྲིགས༔ རྨ་བྱའི་མགྲིན་པའི་སྤུ་ལྟ་བུའི༔ ལྗང་སྔོན་རལ་པས་སྐུ་རྒྱབ་ཁེབས༔ སྤྱན་གསུམ་ནམ་མཁའི་མཐོང་ལ་གཟིགས༔ ཉི་མ་དང་ནི་འོད་ཟེར་བཞིན༔ ཡེ་ཤེས་རོལ་པའི་རང་གདངས་ལས༔ ཤར་དུ་རྡོ་རྗེ་མཁའ་འགྲོ་དཀར༔ ལྷོ་རུ་རིན་ཆེན་མཁའ་འགྲོ་སེར༔ ནུབ་ཏུ་པདྨ་མཁའ་འགྲོ་དམར༔ བྱང་དུ་ལས་ཀྱི་མཁའ་འགྲོ་ལྗང་༔ ཀུན་ཀྱང་གྲི་གུག་ཐོད་ཁྲག་བསྣམས༔ གཞོན་ཚུལ་ཞི་འཛུམ་མཚན་དཔེས་སྤྲས༔ རིན་པོ་ཆེ་དང་པད་ཕྲེང་མཛེས༔ ཞབས་གཉིས་བཞེངས་པའི་སྟབས་སུ་འགྱིང་༔ དཀར་སེར་དམར་ལྗང་འོད་ཕུང་འཁྲིགས༔ བརྒྱུད་འཛིན་རྗེས་སུ་བཟུང་བའི་ཕྱིར༔ ནུ་མ་འབུར་ཞིང་པདྨོ་རྒྱས༔ རབ་འབྱམས་ཕྲིན་ལས་ཡོངས་གྲུབ་ཕྱིར༔ ལྗང་སྔོན་རལ་པས་སྐུ་རྒྱབ་ཁེབས༔ ཁམས་གསུམ་མ་ལུས་དབང་སྡུད་ཅིང་༔ སྲིད་གསུམ་ཟིལ་གྱིས་གནོན་པར་བསྐྱེད༔ ཤར་སྒོར་འགུགས་བྱེད་ཆེན་མོ་དཀར༔ ལྷོ་རུ་འཆིང་བྱེད་ཆེན་མོ་སེར༔ ནུབ་སྒོར་རྨོངས་བྱེད་ཆེན་མོ་དམར༔ བྱང་སྒོར་མྱོས་བྱེད་ཆེན་མོ་ལྗང་༔ གཡས་རྣམས་རང་རྟགས་ཕྱག་རྒྱ་དང་༔ གཡོན་པ་རྣམས་ན་ཐོད་ཁྲག་བསྣམས༔ དཀྱིལ་འཁོར་བར་ཁྱམས་འཁོར་ཡུག་ཏུ༔ བརྒྱུད་གསུམ་བླ་མ་ཡོངས་རྫོགས་པའི༔ ངོ་བོ་ཉིད་དེ་རྣམ་པ་ནི༔ འབུམ་ཕྲག་ཡངས་པའི་མཁའ་འགྲོར་ཤར༔ དེ་ལྟར་ཡེ་ཤེས་རོལ་པའི་ལྷ༔ གནས་གསུམ་རྡོ་རྗེའི་སྙིང་པོ་ལས༔ འོད་དང་འོད་ཟེར་རབ་འཕྲོས་པས༔ སྐུ་གསུམ་དག་པའི་ཞིང་ཁམས་ནས༔ མཁའ་འགྲོ་དང་ནི་མཁའ་འགྲོ་མ༔ མ་ལུས་ལུས་པ་མེད་པ་རུ༔ མཚོ་ལ་ཁ་ཆར་བབ་པ་ལྟར༔ སྤྱན་དྲངས་གཉིས་སུ་མེད་པར་གྱུར༔ དེ་ནས་སྤྱན་འདྲེན་པ་ལ༔ ཧཱུྃ་ཛཿནམ་མཁའ་རྣ་མ་པར་དག་པའི་དབྱིངས་ཆེན་མོ༔ ཡུམ་ཆེན་ཤེས་རབ་ཕར་ཕྱིན་སྐུར་བཞེངས་ཤིག༔ རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ༔ འོག་མིན་ཆོས་དབྱིངས་བརྡལ་ཁྱབ་ཀློང་ཆེན་མོ༔ ཆོས་སྐུ་ཀུན་ཏུ་བཟང་མོ་སྐུར་བཞེངས་ཤིག༔ རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ༔ ལྷུན་གྲུབ་བདེ་བ་ཆེན་པོའི་གཞལ་ཡས་ནས༔ ལོངས་སྐུ་རྡོ་རྗེ་ཕག་མོ་སེང་གེའི་གདོང་༔ ཁྲོས་མ་ནག་མོ་མཁའ་སྤྱོད་བདག་མེད་མ༔ རིགས་ལྔ་དབྱིངས་ཀྱི་ཡུམ་ལྔ་སྤྲུལ་འཁོར་བཅས༔ ཡོངས་འདུས་བདག་ཉིད་རྡོ་རྗེ་རྣལ་འབྱོར་མ༔ མ་ལུས་ལུས་པ་མེད་པ་ཐམས་ཅད་ཀུན༔ རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་ཉེར་བཞི་ཡུལ་ཆེན་སོ་གཉིས་དང་༔ ཧེ་རུ་ཀ་ཡི་གནས་བཅུ་ན་བཞུགས་པའི༔ མཁའ་འགྲོ་དང་ནི་མཁའ་འགྲོ་མ་ཡི་ཚོགས༔ རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ༔ ཁམས་གསུམ་དབང་དུ་སྡུད་ཕྱིར༴སྲིད་གསུམ་ཟིལ་གྱིས་གནོན་ཕྱིར༴བདུད་བགེགས་དམ་སྲི་འདུལ་ཕྱིར༴མཐའ་ཡི་དམག་དཔུང་བཟློག་ཕྱིར༴ནད་མུག་མཚོན་བསྐལ་བཟློག་ཕྱིར༴དུས་མིན་འཆི་བ་བཟློག་ཕྱིར༴རྒྱལ་བསེན་གདུག་པ་འདུལ་ཕྱིར་གཤེགས་སུ་གསོལ༔ བདག་ཅག་རྣལ་འབྱོར་སྒྲུབ་མཆོག་འཁོར་བཅས་ཀྱི༔ སྒྲིབ་གཉིས་བག་ཆགས་དྲི་མ་ཀུན་སྦྱངས་ནས༔ སྒོ་གསུམ་རྡོ་རྗེ་གསུམ་དུ་བྱིན་གྱིས་རློབས༔ ཨོཾ་ཨཱཿ་ཧཱུྃ་བཛྲ་ཌཱཀྐི་ནཱི་བྃཿཧཿརིཿནིཿསཿབཛྲ་ས་མ་ཡ་ཛ་ཛཿལན་གསུམ་བརྗོད༔ དེ་ནས་བཞུགས་སུ་གསོལ་བ་ནི༔ ཧཱུྃ༔ སྐུ་གསུམ་ཡེ་ཤེས་མཁའ་འགྲོའི་ཚོགས༔ ངོ་བོ་རང་བཞིན་ཐུགས་རྗེའི་ངང་༔ མངོན་གྱུར་ཆེན་པོར་གཏན་བཞུགས་ནས༔ རང་ཐོག་རང་གྲོལ་གདིང་ཐོབ་མཛོད༔ བཛྲ་ཌཱཀྐི་ནཱི་ཧ་རི་ནི་ས་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ལ༔ ན་མོ༔ རང་བྱུང་ཀུན་ཁྱབ་བྱང་ཆུབ་སེམས༔ གདོད་ནས་ཡེ་ཤེས་མཁའ་འགྲོར་ཤར༔ འདུ་འབྲལ་མེད་པ་མངོན་གྱུར་པའི༔ རང་བྱུང་རིག་པའི་བརྡ་ཕྱག་འཚལ༔ ཨ་ཏི་པཱུ་ཧོཿཔྲ་ཏཱིཙྪ་ཧོཿདེ་ནས་མཆོད་པ་འབུལ་བ་ལ༔ ཧཱུྃ༔ མཆོད་ཡོན་ཞབས་བསིལ་མེ་ཏོག་དང་༔ བདུག་སྤོས་སྣང་གསལ་དྲི་ཆབ་དང་༔ ཞལ་ཟས་རོལ་མོ་ལ་སོགས་པའི༔ ལྷ་རྫས་ཕྱི་ཡི་མཆོད་པ་འབུལ༔ ཨོཾ་བཛྲ་ཨརྒྷཾ་སོགས་ནས༔ ཤཔྡ་པྲ་ཏཱིཙྪ་པཱུ་ཛ་ཧོཿགཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ འདོད་ཡོན་ལྔ་ཡི་མཆོད་སྤྲིན་ཚོགས༔ ཡེ་ཤེས་མཁའ་འགྲོའི་ཚོགས་ལ་འབུལ༔ ཨོཾ་ཨཱཿཧཱུྃཿརཱུ་པ་ཤཔྡ་སོགས་ནས༔ སྤཪྴེ་པྲ་ཏཱིཙྪ་པཱུ་ཛ་ཧོ༔ རྩ་བརྒྱད་སྟོང་སྦྱར་བདུད་རྩི་སྨན༔ འཁོར་བ་དབྱིངས་སྒྲོལ་རཀྟའི་མཚོ༔ སྣང་སྲིད་བཅུད་དྲིལ་གཏོར་མ་སོགས༔ གསང་མཆོད་རྣམ་པ་སྣ་ཚོགས་ཀུན༔ ཡེ་ཤེས་མཁའ་འགྲོའི་ཚོགས་ལ་འབུལ༔ མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁ་རཾ་ཁཱ་ཧི༔ སྣང་སྟོང་སྦྱར་བའི་བྱང་ཆུབ་སེམས༔ གཟུང་འཛིན་བདག་མེད་དབྱིངས་བསྒྲལ་བའི༔ ཤ་རི་ཁྲག་མཚོ་དང་བཅས་པས༔ ཁྱད་པར་རྨད་བྱུང་མཆོད་པ་འབུལ༔ མ་ཧཱ་བོ་དྷི་ཙིཏྟ་ཏ་ན་ག་ན་སརྦ་པཱུ་ཛ་ཧོ༔ སྐུ་གསུམ་དབྱིངས་བཞུགས་མཁའ་འགྲོའི་ཚོགས༔ ཡོངས་འདུས་རྡོ་རྗེ་རྣལ་འབྱོར་མའི༔ དཀྱིལ་འཁོར་སྣ་ཚོགས་ཐམས་ཅད་ཀྱིས༔ ཕྱི་ནང་གསང་མཆོད་འདི་བཞེས་ལ༔ སྒྲུབ་པའི་རྣལ་འབྱོར་མཆེད་ལྕམ་ལ༔ མཆོག་གི་དངོས་གྲུབ་མྱུར་སྩོལ་ཅིག༔ བཛྲ་ཌཱཀྐི་ནཱི་ཧཿརིཿནིཿསཿགུ་ཧྱ་ཛྙཱ་ན་སིདྡྷི་ཧཱུྃ༔ དེ་ནས་བསྟོད་པ་བྱ་བ་ལ༔ ཧཱུྃ་ཧྲཱིཿཆོས་སྐུའི་དབྱིངས་ན་ཡུམ་ཆེན་ཀུན་བཟང་མོ༔ ལོངས་སྐུ་རྡོ་རྗེ་ཕག་མོ་སེང་གེའི་ཞལ༔ མཁའ་སྤྱོད་མཁའ་འགྲོའི་དབང་མོ་ཁྲོས་མའི་སྐུ༔ སྐུ་བཞིའི་དབང་ཕྱུག་མཁའ་སྤྱོད་དབང་མོ་ཆེ༔ ཡོངས་འདུས་བདག་ཉིད་རྡོ་རྗེ་རྣལ་འབྱོར་མ༔ འཁོར་འདས་མཉམ་པར་སྒྲོལ་བའི་མཐུ་མོ་ཆེ༔ ཡེ་ཤེས་མཁའ་འགྲོ་ཁྱེད་ལ་ཕྱག་འཚལ་བསྟོད༔ སྤྲུལ་པ་སངས་རྒྱས་རྡོ་རྗེ་རིན་ཆེན་དང་༔ པདྨ་མཁའ་འགྲོ་ལས་ཀྱི་མཁའ་འགྲོ་སོགས༔ གནས་ཡུལ་དུར་ཁྲོད་ཀུན་ལ་མངའ་དབང་མཛད༔ སྣ་ཚོགས་ཐབས་ཀྱིས་འགྲོ་བ་གནས་ནས་འདྲེན༔ འབུམ་ཕྲག་ཡངས་པའི་མཁའ་འགྲོ་ལས་ལ་འགྱེད༔ འཁོར་འདས་འུབ་ཆུབ་རོལ་པའི་དབྱིངས་ཆེན་མོ༔ རྣམ་ཐར་གསུམ་ལྡན་མཁའ་འགྲོ་ཁྱོད་ལ་བསྟོད༔ ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་༔ གང་ལ་གང་འདུལ་ཐབས་ཀྱིས་འགྲོ་དོན་མཛད༔ རབ་འབྱམས་ཕྲིན་ལས་དབང་བསྒྱུར་མཐུ་མོ་ཆེ༔ ཡེ་ཤེས་མཁའ་འགྲོའི་ཚོགས་ལ་ཕྱག་འཚལ་བསྟོད༔ དེ་ནས་བཤགས་པ་བྱ་བ་ལ༔ ཀྱེ་མ་བདག་ནི་མ་རིག་དབང་གྱུར་ཏེ༔ ལས་དང་ཉོན་མོངས་དྲག་པོའི་སྟོབས་ཤུགས་ཀྱིས༔ སྒྲིབ་གཉིས་བག་ཆགས་དྲི་མའི་ཆ་དང་བཅས༔ མི་འཆབ་མི་སྦེད་གནོང་འགྱོད་སེམས་ཀྱིས་བཤགས༔ ཨོཾ་བཛྲ་སཏྭ་ས་མ་ཡ༔ སོགས༔ ཨཱཿདེ་ལྟར་བསྐྱེད་ཅིང་བསྒོམ་པའི་གནད༔ ཚུལ་བཞིན་ཉམས་ལེན་གནད་ལྡན་ན༔ མཆོག་གི་དངོས་གྲུབ་མྱུར་འཐོབ་འགྱུར༔ འོད་གསལ་རྫོགས་ཆེན་མྱུར་ལམ་ཆོས༔ ཆོས་རྣམས་ཀུན་གྱི་གྲོལ་ས་ཡིན༔ ཤེས་རབ་གྱིས་ཤིག་སྐལ་ལྡན་བུ༔ ས་མ་ཡ༔ ཨ་ཐམ་རྒྱ༔ དེ་ནས་འཛབ་སྔགས་བཟླ་བ་ལ༔ ཧཱུྃ༔ རང་ཉིད་མཁའ་འགྲོའི་ཐུགས་ཀ་རུ༔ ཡེ་ཤེས་ལྔ་ཡི་འོད་ཐིག་ཀློང་༔ པདྨ་དང་ནི་ཟླ་གདན་ལ༔ བདེ་ཆེན་ཀུན་ཏུ་བཟང་མོ་མཐིང་༔ མཉམ་བཞག་སྐྱིལ་ཀྲུང་མཚན་དཔེས་སྤྲས༔ དེ་ཡི་ཐུགས་ཀར་འོད་ལྔའི་ཀློང་༔ ཧཱུྃ་ཡིག་དམར་པོའི་མཐའ་བསྐོར་དུ༔ སྔགས་ཕྲེང་སྤུ་ཤད་ལྟ་བུས་བསྐོར༔ འོད་ཀྱིས་དུས་གསུམ་སངས་རྒྱས་དང་༔ སྐུ་གསུམ་མཁའ་འགྲོ་རྟེན་བརྟེན་པ༔ སྤྱན་དྲངས་གཉིས་སུ་མེད་པར་གྱུར༔ བྃ་ཌཱཀྐི་ནཱི་བཛྲ་ཤུ་མ་ཧོ་མ་ཧ་རི་ནི་ས་སརྦ་སིདྡྷི་ཧཱུྃ༔ དེ་ནས་སྒྲུབ་པ་བྱ་བ་ལ༔ ཧཱུྃ༔ རང་ཉིད་ཡེ་ཤེས་མཁའ་འགྲོ་མའི༔ ཐུགས་སྲོག་ཧཱུྃ་དང་བྃཿཡིག་ལས༔ འོད་དང་འོད་ཟེར་རབ་འཕྲོས་པས༔ ཕྱོགས་བཅུའི་རྒྱལ་བ་སྲས་དང་བཅས༔ རྟེན་དང་བརྟེན་པའི་འཁོར་ལོར་བཅས༔ འཇའ་ཡི་སྤྲིན་ཕུང་འཐིབས་པ་བཞིན༔ ཚུར་འདུས་ཐུགས་ཀའི་སྲོག་ཡིག་ལ༔ ཐིམ་པས་མཆོག་ཐུན་དངོས་གྲུབ་ཐོབ༔ བྃ་ཌཱཀྐི་ནཱི་བཛྲ་ཤུ་མ་ཧོ་མ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ་ཨཱཿདེ་ལྟར་ཡང་ཡང་གསལ་གདབ་གནད༔ སླར་ཡང་ལས་ལ་སྦྱོར་བ་ནི༔ རང་ཉིད་རྡོ་རྗེ་རྣལ་འབྱོར་མའི༔ ཐུགས་ཀའི་སྔགས་ཀྱི་ཕྲེང་བ་ལས༔ འོད་ཟེར་དཔག་མེད་རབ་འཕྲོས་པས༔ ཞི་ཁྲོ་རྡོ་རྗེ་དབྱིངས་ཀྱི་ལྷ༔ འོད་ཕུང་སྣ་ལྔའི་རྣམ་པ་རུ༔ བསྡུས་ཏེ་ཐུགས་ཀའི་སྔགས་ལ་ཐིམ༔ ནད་གདོན་སྒྲིབ་གཉིས་བག་ཆགས་སྦྱངས༔ ཚེ་བསོད་ཡེ་ཤེས་ཡོན་ཏན་རྒྱས༔ འཁོར་འདས་ཡོངས་ལ་མངའ་དབང་བསྒྱུར༔ དགྲ་བགེགས་གནོད་བྱེད་ཐམས་ཅད་ཀུན༔ མེ་སྟག་ཆུ་ཡིས་བསད་བཞིན་བརླག༔ རབ་འབྱམས་ཕྲིན་ལས་ཡོངས་གྲུབ་བསམ༔ ཨོཾ་བཛྲ་ཌཱཀྐི་ནཱི་བྃཿཧཿརིཿནིཿསཿསརྦ་བིགྷྣཱན་ཧཱུྃ་ཕཊ༔ ཤེས་པ་གཞན་དུ་མི་ཡེངས་པར༔ བསྐྱེད་དང་སྤྲོ་བསྡུའི་གནད་ལ་འབད༔ མི་ཚིག་དག་གིས་བར་མི་གཅོད༔ སྟན་གྱི་དྲོད་མི་ཡལ་བ་ཡིས༔ སྡོད་ས་བཟུང་ཞིང་རལ་བ་སྤངས༔ བསྒོམ་བཟླས་ཕྱི་ཡི་སྒྲུབ་པ་སྟེ༔ སྒོ་གསུམ་རྡོ་རྗེ་གསུམ་དུ་སྦྱང་༔ འཁོར་འདས་སྟོང་ཉིད་ཆེན་པོ་རུ༔ འུབ་ཆུབ་རོལ་པ་ཀུན་བཟང་མོ༔ ནང་གི་སྒྲུབ་པ་བླ་ན་མེད༔ ལྷུན་གྲུབ་སྦུབས་འཇུག་འཕོ་ཆེན་ལམ༔ གསང་བའི་སྒྲུབ་པ་ཆེན་པོ་སྟེ༔ ཀུན་ཀྱང་མཁའ་འགྲོའི་སྒྲུབ་པ་ལགས༔ ཆོས་བརྒྱད་བྱ་བ་ཀུན་བཏང་ནས༔ རྩེ་གཅིག་སྒྲུབ་ལ་བརྩོན་པའི་མི༔ ཤེས་རབ་ཡེ་ཤེས་ཀློང་རྡོལ་ནས༔ ཚེ་འདིར་མངོན་སངས་རྒྱས་འགྱུར་རོ༔ ཨྠིྀ༔ ཉམས་ཆག་རྟོག་སྒྲིབ་སྦྱང་བ་དང་༔ རྣལ་འབྱོར་ཚོགས་གཉིས་རབ་རྫོགས་ཕྱིར༔ ཚོགས་ཀྱི་འཁོར་ལོ་བསྐོར་བ་ལ༔ ཤ་ཆང་ཟན་གྱི་མཆོག་ཏུ་བསགས༔ གཞན་ཡང་བཟའ་བཏུང་ཅི་རིགས་བཤམས༔ འདོད་ཡོན་ནམ་མཁའ་མཛོད་དུ་སྤེལ༔ ཧཱུྃ༔ བཤམས་པའི་རྫས་དང་ཁམས་གསུམ་གྱི༔ དངོས་པོར་སྣང་དང་འཛིན་པ་ཀུན༔ ཡུལ་མེད་ཟང་ཐལ་ཆེན་པོ་རུ༔ མཉམ་བརྡལ་ཆོས་ཉིད་དབྱིངས་སུ་ཨཱཿསྟོང་པའི་ངང་ལས་སྐད་ཅིག་གིས༔ ཆོས་ཉིད་དབྱིངས་ལས་ཆོས་ཀྱི་སྤྲིན༔ འདོད་ཡོན་མི་ཟད་གཏེར་དུ་འཕྲུལ༔ ངོ་བོ་བདེ་སྟོང་ཟག་མེད་པའི༔ ཡེ་ཤེས་བདུད་རྩིའི་རྒྱ་མཚོ་གྱུར༔ ཨོཾ་ཨཱཿཧཱུྃ༔ ལན་གསུམ་བརྗོད་དེ་བྱིན་གྱིས་བརླབས་ནས༔ ཚོགས་ལ་སྤྱན་འདྲེན་བྱ་བ་ལ༔ སྤོས་ཀྱི་དྲི་དང་རོལ་མོའི་སྒྲ༔ གདུང་བའི་དབྱངས་ཀྱིས་འདི་སྐད་དོ༔ ཧཱུྃ་ཛཿརང་སྣང་དོན་གྱི་འོག་མིན་ནས༔ གསུམ་ལྡན་བླ་མ་བརྒྱུད་པར་བཅས༔ ཚོགས་ཀྱི་འདུ་བར་གཤེགས་སུ་གསོལ༔ འོག་མིན་ཆོས་ཀྱི་དབྱིངས་ཉིད་ནས༔ ཆོས་སྐུའི་མཁའ་འགྲོ་འཁོར་དང་བཅས༔ ཚོགས་ཀྱི་འདུ་བར་གཤེགས་སུ་གསོལ༔ ལྷུན་གྲུབ་བདེ་ཆེན་དག་པའི་ཞིང་༔ ཡེ་ཤེས་ལྔ་ཡི་འོད་ཀློང་ནས༔ ལོངས་སྐུའི་མཁའ་འགྲོ་འཁོར་དང་བཅས༔ ཚོགས་ཀྱི་འདུ་བར༴མི་མཇེད་སྤྲུལ་པའི་ཞིང་ཁམས་ནས༔ སྤྲུལ་སྐུ་ཡེ་ཤེས་མཁའ་འགྲོའི་ཚོགས༔ མ་ལུས་ལུས་པ་མེད་པ་རུ༔ ཚོགས་ཀྱི་འདུ་བར༴ཁྱེད་ཅག་གདོད་ནས་ཡེ་སངས་རྒྱས༔ ཐབས་ཀྱིས་འགྲོ་བའི་མཛད་པ་ལ༔ ཟས་ཀྱི་ཉེར་ལེན་མི་མངའ་ཡང་༔ རྣལ་འབྱོར་ཉམས་ཆག་བསྐང་བ་དང་༔ མཆོག་ཐུན་དངོས་གྲུབ་སྩོལ་བའི་ཕྱིར༔ ཚོགས་ཀྱི་འདུ་བར་གཤེགས་སུ་གསོལ༔ བདག་ཅག་རྣལ་འབྱོར་སྒྲུབ་པ་པོས༔ ངལ་བ་ཁྱད་དུ་བསད་བྱས་ཏེ༔ དཀའ་བ་དང་དུ་བླང་ནས་སུ༔ གཏན་གྱི་བདེ་བ་འདོད་པའི་ཕྱིར༔ མ་དང་མཁའ་འགྲོ་བསྒྲུབ་ལ་བརྩོན༔ ཐུགས་རྗེས་དགོངས་ཤིང་འདིར་གཤེགས་ལ༔ ཚོགས་ཀྱི་མཆོད་པ་བཞེས་ནས་ཀྱང་༔ མཆོག་ཐུན་དངོས་གྲུབ་མྱུར་སྩོལ་ཅིག༔ སརྦ་མ་ཧཱ་གུ་རུ་ཧཱུྃ་བཛྲ་ཌཱཀྐི་ནཱི་བྃ་ཧ་རི་ནི་ས་བཛྲ་ས་མ་ཡ་ཛ་ཛཿདེ་ནས་ཚོགས་ཕུད་འབུལ་བ་ལ༔ ཧོཿགསུམ་ལྡན་བླ་མ་རིན་པོ་ཆེ༔ བརྒྱུད་གསུམ་རིག་འཛིན་རྒྱ་མཚོ་དང་༔ རྒྱལ་ཡུམ་རྡོ་རྗེ་རྣལ་འབྱོར་མ༔ རིགས་ལྔ་དབྱིངས་ཀྱི་ཡུམ་ཆེན་མོ༔ འབུམ་ཕྲག་ཡངས་པའི་མཁའ་འགྲོ་ལ༔ ཞལ་ཟས་ཚོགས་ཀྱི་མཆོད་པ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ མ་ཧཱ་གུ་རུ་བིདྱཱ་དྷ་ར་བཛྲ་ཌཱཀྐི་ནཱི་བྃཿཧཿརིཿནིཿསཿསརྦ་ས་མ་ཡ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་ག་ཎ་ཙཀྲ་པཱུ་ཛ་ཁཱ་ཧི༔ དེ་ནས་བཤགས་པ་བྱ་བ་ལ༔ ཧོཿབརྒྱུད་གསུམ་རིག་འཛིན་བླ་མ་དང་༔ སྐུ་གསུམ་མཁའ་འགྲོ་རྒྱ་མཚོ་ལ༔ བདག་ཅག་མ་རིག་དབང་གྱུར་ཏེ༔ ཉེས་བྱས་ཉམས་ཆག་ཅི་མཆིས་པ༔ ཞལ་ཟས་ཚོགས་ཀྱིས་བསྐང་ཞིང་བཤགས༔ དག་ཅིང་ཚངས་པར་སྩལ་དུ་གསོལ༔ ཨོཾ་བཛྲ་སཏྭ་སོགས༔ དེ་ནས་བསྒྲལ་ལས་བྱ་བ་ལ༔ ཧཱུྃ༔ དཀྱིལ་འཁོར་གཙོ་མཆོག་བླ་མ་དང་༔ སྐུ་གསུམ་མཁའ་འགྲོ་དབྱིངས་ནས་བཞེངས༔ བདག་ལྟའི་རཱུ་ཏྲ་གཟུང་འཛིན་འདྲེ༔ བདག་མེད་སྟོང་ཉིད་ཆེན་པོར་སྒྲོལ༔ རྩ་སྔགས་མཐར༔ མ་ཏྲཾ་རཱུ་ཏྲ་ཧ་ལ་པཉྩ་མཱ་ར་ཡ་རྦད་རྦད་སོད༔ དེ་ནས་ཞལ་དུ་བསྟབ་པ་ལ༔ ཧཱུྃ༔ ཡེ་ཤེས་མཁའ་འགྲོ་ཞལ་ཕྱེས་ཤིག༔ བདག་ལྟའི་རཱུ་ཏྲ་འཁོར་བའི་འདྲེ༔ བདག་མེད་མཉམ་ཉིད་ཞལ་དུ་བསྟབས༔ འཁོར་འདས་དག་མཉམ་ཆེན་པོར་རོལ༔ མ་ཧཱ་མཱཾ་ས་རཀྟ་ཙིཏྟ་ཀིཾ་ནི་རི་ཏི་བ་སུ་ཏ་ལ་ཁཱ་ཧིཿདེ་ནས་ལྷག་མ་འབུལ་བ་ལ༔ སྔགས་ཀྱིས་ནམ་མཁའ་མཛོད་དུ་སྤེལ༔ ཨ་མྲྀ་ཏ་ཡིས་བདུད་རྩིར་བསྒྱུར༔ ཧཱུྃ༔ དཔལ་གྱི་བཀའ་སྡོད་ལྷག་སྐྱོང་ཚོགས༔ ཆ་ལུགས་མ་ངེས་སྣ་ཚོགས་གར༔ གནས་བཟང་དེ་ནི་དུར་ཁྲོད་འགྲིམས༔ གོས་བཟང་དེ་ནི་གཡང་གཞི་གསོལ༔ ཟས་བཟང་དེ་ནི་ཤ་ཆེན་བཟའ༔ སྐོམ་བཟང་དེ་ནི་རཀྟ་འཐུང་༔ སྐྱོགས་བཟང་དེ་ནི་བྷནྡྷ་ཐོགས༔ ལས་སུ་སངས་རྒྱས་བསྟན་པ་བསྲུང་༔ དཀྱིལ་འཁོར་གཉན་པོའི་མཐའ་སྐྱོང་ལ༔ སྒྲུབ་པའི་བར་ཆད་རྐྱེན་བཟློག་ཅིང་༔ ལེགས་ཉེས་གཉིས་ཀྱི་སྟངས་འཛིན་ཏེ༔ དམ་ཚིག་གཉན་པོའི་རྗེས་གཅོད་མཛད༔ ཁྱེད་ཅག་ཡེ་སངས་རྒྱས་མོད་ཀྱང་༔ འཇིག་རྟེན་ཚུལ་གྱིས་གདུལ་བྱ་འདུལ༔ རང་དམ་གཉན་པོ་དྲན་མཛོད་ལ༔ འདིར་གཤེགས་ལྷག་མའི་ལོངས་སྤྱོད་རོལ༔ རབ་འབྱམས་ཕྲིན་ལས་ཡོངས་གྲུབ་མཛོད༔ མ་བྷྱོ་ཛ་ཧྲཱིཾ་བ་ལིཾ་ཏ་ཁཱ་ཧི༔ དེ་ནས་བསྐུལ་བ་ལ༔ ཧཱུྃ༔ ཀ་དག་ཁྱབ་བརྡལ་མཁའ་ཀློང་ནས༔ ཆོས་སྐུའི་མཁའ་འགྲོ་སྐུར་བཞེངས་ཤིག༔ ལྷུན་གྲུབ་བདེ་ཆེན་གཞལ་ཡས་ནས༔ ལོངས་སྐུའི་མཁའ་འགྲོ་སྐུར་བཞེངས་ཤིག༔ མི་མཇེད་སྤྲུལ་པའི་ཞིང་ཁམས་ནས༔ སྤྲུལ་སྐུའི་མཁའ་འགྲོ་སྐུར་བཞེངས་ཤིག༔ འཁོར་བའི་འཁྲུལ་འཁོར་དབྱིངས་སུ་བཟློག༔ སྣང་སྲིད་དག་པ་རབ་འབྱམས་ཀྱི༔ རོལ་པ་ཆེན་པོར་དག་མཉམ་རོལ༔ ཆད་མདོ་བཏང་བ་ལ༔ ཧཱུྃ་བྷྱོཿསྔོན་ཚེ་འདས་པའི་བསྐལ་པ་ལ༔ སྤྱི་དཔལ་ཆེ་མཆོག་ཧེ་རུ་ཀས༔ འཁོར་འདས་ཐམས་ཅད་ཀློང་རྒྱས་བཏབ༔ བར་གྱི་བསྐལ་པའི་དུས་ཚིགས་ལ༔ གསང་བདག་ཕྱག་ན་རྡོ་རྗེ་ཡིས༔ བཀའ་ཡི་ལྷ་སྲིན་སྡེ་བརྒྱད་དང་༔ སྣང་ཞིང་སྲིད་པའི་ལྷ་འདྲེ་རྣམས༔ དམ་བཏགས་དབང་བསྐུར་བྲན་དུ་བཀོལ༔ དེ་འོག་དུས་ཀྱི་ཐ་མ་ལ༔ སློབ་དཔོན་པདྨ་ཐོད་ཕྲེང་གིས༔ སྣང་སྲིད་དྲེགས་པའི་ལྷ་འདྲེ་རྣམས༔ དམ་ལ་བཏགས་ཤིང་འབངས་སུ་བཀོལ༔ བསྟན་པ་བསྲུང་བའི་གཉེར་ཀ་གཏད༔ སྒྲུབ་པའི་བར་ཆད་རྐྱེན་བཟློག་ཅིང་༔ བསྟན་དགྲ་འདུལ་བའི་བཀའ་བསྒོས་ཏེ༔ ཕྲིན་ལས་བསྒྲུབ་པར་དམ་བཅས་བཞིན༔ དམར་གྱི་གཏོར་མ་འདི་ལོངས་ལ༔ རབ་འབྱམས་ཕྲིན་ལས་ཡོངས་གྲུབ་ཅིང་༔ དགྲ་བགེགས་གདུག་པ་ཚར་གཅོད་ཅིག༔ དམ་ལ་མ་འདའ་དམ་ཅན་རྣམས༔ དེ་ནས་བརྟན་མ་སྐྱོང་བ་ལ༔ ཆད་དོན་དམར་གཏོར་བཏང་བ་ནི༔ ཧཱུྃ་བྷྱོ༔ སྔོན་ཚེ་པདྨ་ཐོད་ཕྲེང་གི༔ སྤྱན་སྔར་ཁས་བླངས་དམ་བཅས་པའི༔ མ་ཡུམ་བརྟན་མ་བཅུ་གཉིས་དང་༔ དེ་འཁོར་ཡང་འཁོར་འབངས་དང་སྡེ༔ མ་ལུས་འདིར་གཤེགས་གཏོར་མ་ལོངས༔ བདག་ཅག་སྒྲུབ་མཆོག་འཁོར་བཅས་ཀྱི༔ འདོད་དོན་འབད་མེད་ལྷུན་གྲུབ་མཛོད༔ མ་མ་ཧྲཱིཾ་ཧྲཱིཾཿལ་ལ་ལེ་ལེ་ཏེ་ཏེ་ཨེ་དཾ་བ་ལིཾ་ཏ་ཁཱ་ཧི༔ དེ་ནས་རྟ་བྲོ་བརྡུང་བ་ལ༔ ཧོཿཆོས་ཉིད་རོལ་པ་ཨེ་ཡི་མཁར༔ ལོག་རྟོག་མི་སྲུན་རཱུ་ཏྲ་བྲུབ༔ ཐབས་ཤེས་རྔམས་པའི་རྟ་བྲོ་བརྡུངས༔ ཡེ་ཤེས་རོལ་པའི་སྟོབས་ཀྱིས་མནན༔ བྱང་ཆུབ་བར་དུ་མ་ལྡང་ཞིག༔ རཱུ་ཏྲ་ཧ་ལ་པཉྩ་མཱ་ར་ཡ་སྟྭཾ་བྷ་ཡ་ནན༔ དེ་ནས་དངོས་གྲུབ་བླང་བ་ལ༔ ཧོཿཡེ་ཤེས་མཁའ་འགྲོའི་ལྷ་ཚོགས་དགོངས༔ སྐུ་གསུང་ཐུགས་ཀྱི་དཀྱིལ་འཁོར་ནས༔ མི་གནས་ཡེ་ཤེས་གསང་བ་མཆོག༔ རྡོ་རྗེ་གསུམ་གྱི་དབང་དངོས་གྲུབ༔ ད་ལྟ་ཉིད་དུ་ཐོབ་པར་སྩོལ༔ རྩ་སྔགས་མཐར༔ ཨ་ལ་ལ་སིདྡྷི་ཕ་ལ་ཧོཿདེ་ནས་བསྔོ་བ་སྨོན་ལམ་ནི༔ ཧོཿའདི་དང་དུས་གསུམ་བསགས་པའི་དགེ༔ མ་གྱུར་སེམས་ཅན་ཡོངས་ལ་བསྔོ༔ རང་སྣང་དོན་གྱི་འོག་མིན་དུ༔ སད་དེ་རྫོགས་སངས་རྒྱས་གྱུར་ཅིག༔ དེ་ནས་བསྡུ་རིམ་བྱ་བ་ནི༔ ཧོཿརྟེན་དང་བརྟེན་པའི་དཀྱིལ་འཁོར་ལྷ༔ ཐམས་ཅད་རང་གི་སྐུ་ལ་བསྡུ༔ དེ་ཡང་ཐུགས་སྲོག་ཉིད་ལ་ཐིམ༔ ཀ་དག་ཆོས་སྐུའི་མཁའ་རུ་ཨཱཿརྩ་སྔགས་བཟླ༔ དེ་ནས་རྗེས་ཐོབ་ལྷར་ལྡང་ལ༔ ཧོཿམཁའ་ལ་འཇའ་ཚོན་ཤར་བ་བཞིན༔ རང་ཉིད་རྡོ་རྗེ་རྣལ་འབྱོར་མ༔ ཡེ་ཤེས་སྒྱུ་མའི་སྐུ་རུ་གསལ༔ མི་འགྱུར་རྡོ་རྗེའི་གོ་ཁྲབ་བགོ༔ དེ་ནས་བཀྲ་ཤིས་བྱ་བ་ལ༔ ཧོཿཀ་དག་ཆོས་སྐུའི་ནམ་མཁའ་ལ༔ ལྷུན་གྲུབ་སྐུ་དང་ཡེ་ཤེས་ཀྱི༔ གདངས་ལས་ཡེ་ཤེས་མཁའ་འགྲོ་ཤར༔ མངོན་གྱུར་རྫོགས་པའི་བཀྲ་ཤིས་ཤོག༔ རྩེ་གཅིག་སྒྲུབ་ལ་བརྩོན་པ་ཡི༔ རྣལ་འབྱོར་ལས་དང་སྐལ་ལྡན་པས༔ བསྐྱེད་དང་རྫོགས་པའི་གནད་ལྡན་ཅིང་༔ ཆོས་བརྒྱད་ཡུལ་གྱི་དགྲ་སྤངས་ཏེ༔ དབེན་པ་བརྟེན་ཅིང་གཅིག་པུར་གནས༔ སྣང་སྲིད་དག་པ་རབ་འབྱམས་སུ༔ གསལ་བའི་གནད་དང་རྟག་ཏུ་འགྲོགས༔ དེ་ཡིས་རྣམ་གྲོལ་འབྲས་བུ་ཐོབ༔ བཀའ་སྲུང་གནོད་སྦྱིན་དམར་ནག་ལ༔ གཏད་དོ་བཀའ་དང་ཐ་ཚིག་རྒྱ༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ནི་རྣལ་འབྱོར་པ་ཆོས་གསལ་གྱི་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་སྦྲུལ་བའི་སྐུ་ལུང་རྟོགས་རྒྱ་མཚོའོ།།དགེའོ།།དགེའོ།།དགེའོ།།[[Category:Wyckibaat]]