View source for DJYD-KABUM-11-DA-009

{{Text
|classification=Tibetan Publications
|subclass=Tibetan Texts
|fulltitletib=ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་གི་སྦས་དོན་ཟབ་ཁྲིད་རིག་འཛིན་ཌཱ་ཀིའི་ཐུགས་བཅུད་བཀའ་རྒྱ་ཅན།
|fulltitle=phur pa bdud 'joms gnam lcags spu gri'i rdzogs rim rtsa rlung thig le'i man ngag gi sbas don zab khrid rig 'dzin DA ki'i thugs bcud bka' rgya can
|citation=[[Dudjom Rinpoche]] 'Jigs bral ye shes rdo rje. ''Phur pa bdud 'joms gnam lcags spu gri'i rdzogs rim rtsa rlung thig le'i man ngag gi sbas don zab khrid rig 'dzin DA ki'i thugs bcud bka' rgya can''. In ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 11: 347-390. Kalimpong: Dupjung Lama, 1979-1985.
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|collectiontitle=bdud 'joms rin po che bka' 'bum
|author=Dudjom Rinpoche
|sourcerevealer=bdud 'joms gling pa
|tibgenre=Contemplative Guide Books and Instructional Manuals - khrid yig, Completion Stage - rdzogs rim
|terma=Yes
|deity=rdo rje phur pa
|cycle=dpal rdo rje phur bu bdud 'joms gnam lcags spu gri
|cycletib=དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲི་
|parentcycle=thugs sgrub gsang ba rgya can
|parentcycletib=ཐུགས་སྒྲུབ་གསང་བ་རྒྱ་ཅན་
|language=Tibetan
|volumenumber=11
|volnumtib=༡༡
|volyigtib=ད
|totalvolumes=25
|textnuminvol=009
|pagenumbers=347-390
|totalpages=44
|beginfolioline=1a1
|endfolioline=22b5
|totalfolios=22
|multivolumework=No
|rectonotes=zab khrid
|versonotes=gnam lcags spu gri
|colophontib=།ཅེས་ཕུར་པ་བདུད་འཇོམས་གནམ་ལྕགས་སྤུ་གྲིའི་ཐལ་འབྱིན་གྱི་དགོངས་པ་རྣམ་པ་བཞི་ལས་བྱང་སེམས་ཕུར་བུའི་མན་ངག་གི་སྦས་དོན་ཟབ་ཁྲིད་ལྷུག་པར་བཀྲལ་བ་རིག་འཛིན་ཌཱ་ཀིའི་ཐུགས་བཅུད་བཀའ་རྒྱ་མ་འདི་ནི།   རྒྱ་གར་དབང་ཕྱོགས་ཀྱི་སྔགས་བཙུན་ངག་དབང་ཚུལ་ཁྲིམས་དང༌།   མོན་གྱི་སྔགས་སྟོན་པདྨ་དབང་ཆེན་སོགས་དོན་གཉེར་ཅན་དུ་མས་སྔ་ཕྱིར་ནན་ཏན་ཆེན་པོས་བསྐུལ་བ་ལ་བརྟེན་ནས།   ཐབས་ལམ་གསང་བའི་ཟབ་གནད་རྣམས་ལ་མྱོང་གོམས་ཀྱི་བག་ཆགས་སད་པས་མི་དང་མི་མ་ཡིན་པའི་གཞོན་ནུ་མའི་ཚོགས་དང་དགའ་མགུར་རྩེ་བའི་བརྟུལ་ཞུགས་ཀྱི་སྤོབས་པ་དགེ་བ་འཇིགས་བྲལ་ཆགས་ཆེན་དགའ་བའི་ལང་ཚོ་རྡོ་རྗེ་སྙེམས་པའི་སྡེའམ།   ཡོངས་གྲགས་སུ་བདུད་འཇོམས་སྤྲུལ་སྐུར་བརྗོད་པའི་རྗེ་རིགས་ཀྱི་སྔགས་རྒན་ཀུན་ཏུ་རྒྱུས།   ཡུལ་རྒྱ་བོད་མཚམས་ཀྱི་རོང་ཆེན་ཀ་པཱ་ལ་སྤུངས་པར་གྲགས་པའི་རི་སུལ་ཙན་དན་ལྗོན་བཟང་དཀྲིགས་པའི་སྐྱེད་མོས་ཚལ་གྱི་སྨན་ལྗོངས་མེ་ཏོག་བཀྲ་བའི་ལྡིང་ཁང་དུ།   རང་ལོ་ལྔ་བཅུ་ང་ལྔར་སོན་པ་ནོར་འཛིན་ཁམས་ཀྱིས་སྒེག་པའི་ནོར་སྲུང་གི་ལོ་སྟོན་གྱི་ཟླ་བ་འབྲས་བུ་བཅུད་དུ་སྨིན་པའི་དུས་ཀྱི་ཆར་ལེགས་པར་སྦྱར་བ་ལས།   ཐོག་མའི་ཡི་གེ་པ་ནི་མོན་ཁ་ཀུ་རེ་ལུང་གི་སྒོམ་ཆེན་པདྨ་ཀློང་གྲོལ་གྱིས་བགྱིས་པའོ།   །འདིས་ཀྱང་ཟབ་ལམ་སྙིང་པོའི་རིང་ལུགས་ཡུན་དུ་རྟག་ཅིང་སྐལ་པ་ཅན་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག    །སརྦ་དཱ་མངྒ་ལཾ།   །འདི་ཉིད་མན་ངག་ཚུལ་བཞིན་མ་ཐོབ་ཅིང་དམ་ཉམས་དཔེ་ཁྱེར་མཁན་གྱིས་བལྟས་ན་དེའི་སྙིང་ཁྲག་སྔགས་བདག་སྲུང་མའི་ཚོགས་ཀྱིས་དཔའ་སྐྱེམས་སུ་རོལ་ཅིག་ས་མ་ཡ།།
|colophonwylie=ces phur pa bdud 'joms gnam lcags spu gri'i thal 'byin gyi dgongs pa rnam pa bzhi las byang sems phur bu'i man ngag gi sbas don zab khrid lhug par bkral ba rig 'dzin DA ki'i thugs bcud bka' rgya ma 'di ni/___rgya gar dbang phyogs kyi sngags btsun ngag dbang tshul khrims dang*/___mon gyi sngags ston pad+ma dbang chen sogs don gnyer can du mas snga phyir nan tan chen pos bskul ba la brten nas/___thabs lam gsang ba'i zab gnad rnams la myong goms kyi bag chags sad pas mi dang mi ma yin pa'i gzhon nu ma'i tshogs dang dga' mgur rtse ba'i brtul zhugs kyi spobs pa dge ba 'jigs bral chags chen dga' ba'i lang tsho rdo rje snyems pa'i sde'am/___yongs grags su bdud 'joms sprul skur brjod pa'i rje rigs kyi sngags rgan kun tu rgyus/___yul rgya bod mtshams kyi rong chen ka pA la spungs par grags pa'i ri sul tsan dan ljon bzang dkrigs pa'i skyed mos tshal gyi sman ljongs me tog bkra ba'i lding khang du/___rang lo lnga bcu nga lngar son pa nor 'dzin khams kyis sgeg pa'i nor srung gi lo ston gyi zla ba 'bras bu bcud du smin pa'i dus kyi char legs par sbyar ba las/___thog ma'i yi ge pa ni mon kha ku re lung gi sgom chen pad+ma klong grol gyis bgyis pa'o/___/'dis kyang zab lam snying po'i ring lugs yun du rtag cing skal pa can la phan pa rgya chen po 'byung ba'i rgyur gyur cig____/sarba dA mang+ga laM/___/'di nyid man ngag tshul bzhin ma thob cing dam nyams dpe khyer mkhan gyis bltas na de'i snying khrag sngags bdag srung ma'i tshogs kyis dpa' skyems su rol cig sa ma ya//
|pdflink=File:DJYD-KABUM-11-DA-009.pdf
|authortib=བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
|sourcerevealertib=བདུད་འཇོམས་གླིང་པ་
|volumeLetter=DA
|InitCategories=Dudjom Tersar Project; DJYD-KABUM-Volume-11-DA
}}
<h1>Tibetan Text</h1>
<onlyinclude>
{{TibP|༄༅།   །ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་གི་སྦས་དོན་ཟབ་ཁྲིད་རིག་འཛིན་ཌཱ་ཀིའི་ཐུགས་བཅུད་བཀའ་རྒྱ་ཅན་ཞུགས་སོ།   །


༄༅།   །ཨོཾ་སྭསྟི།   རྡོ་རྗེ་ཉི་མ་དགའ་བའི་ལང་ཚོའི་ལྕེས།   །བདེ་ཆེན་ཟླ་བའི་བདུད་རྩི་བཞུས་པའི་རོ།   །རྟག་ཏུ་དགྱེས་རོལ་བླ་མ་ཧེ་རུ་ཀས།   །ཡིད་ལ་འཕོ་མེད་མཆོག་བདེའི་བཀའ་དྲིན་སྩོལ།   །འདིར་ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་གི་སྦས་དོན་སྙིང་པོའི་ཟབ་ཁྲིད་ཐུན་མོང་མ་ཡིན་པ་ཉམས་སུ་ལེན་པའི་ཚུལ་རྗེན་པར་སྟོན་པ་ལ་གཉིས་ཏེ།   ལམ་གྱི་རྨང་གཞི་གཏུམ་མོ་དང༌།   ལམ་གྱི་སྙིང་པོ་ཞུ་བདེའི་རྣལ་འབྱོར་རོ།   །དང་པོ་གཏུམ་མོའི་རྣལ་འབྱོར་ནི།   དེ་ལ་སྤྱིར་ཙནྜ་ལིའི་སྒྲ་ལས་དྲངས་ {{TibChung|[2a]}} ན་མི་མཐུན་པའི་ཕྱོགས་འཇོམས་པར་བྱེད་པས་ན་གཏུམ་མོ་སྟེ།   ཕྱིའི་གཏུམ་མོས་གདོན་སྟོང་ཕྲག་བརྒྱད་ཅུ་རྩ་བཞི་འཇོམས།   ནང་གི་གཏུམ་མོས་ནད་བཞི་བརྒྱ་རྩ་བཞི་འཇོམས།   གསང་བའི་གཏུམ་མོས་ཉོན་མོངས་པ་བརྒྱད་ཁྲི་བཞི་སྟོང་འཇོམས།   དེ་ཁོ་ན་ཉིད་ཀྱི་གཏུམ་མོས་རང་བྱུང་ལྷན་སྐྱེས་ཀྱི་ཡེ་ཤེས་ངོ་སྤྲོད་པར་བྱེད་པའོ།   །གཏུམ་མོའི་ངོ་བོ་ནི་རྡོ་རྗེ་ཉི་མ་སྟེ།   རྡོ་རྗེ་ནི་གང་གིས་ཀྱང་མི་ཤིགས་ཤིང་གཞོམ་མི་ནུས་པ་ཡིན་ལ།   ཉི་མ་ནི་འདི་སྟོབས་སུ་གྱུར་བས་རྩ་རླུང་ཐིག་ལེའི་སྙིགས་མ་ཐམས་ཅད་བསྲེགས་ནས་འཁོར་བའི་སྐྱེ་ {{TibChung|[2b]}} རྒྱུན་གཅོད་པའི་ཕྱིར།   ཡེ་ཤེས་ཀྱི་མེ་དང་དོན་དམ་པའི་མེ་ཞེས་བྱའོ།   དེ་ཉམས་སུ་ལེན་པ་ལ་ཐོག་མར་རླུང་གི་རྣལ་འབྱོར་དང་གཏུམ་མོའི་བདེ་དྲོད་ཀྱི་གཞི་བཅའ་བ་བཅས་རྩ་བའི་གཞུང་བཞིན་འབད་དེ་དྲོད་ཚད་ཅི་རིགས་རྙེད་པ་ན།   འདི་ཉིད་ཀྱི་རྣལ་འབྱོར་རྩེ་གཅིག་ཏུ་བྱེད་པའི་སྙིང་རུས་ཅན་ལ་རས་རྐྱང་ཐུབ་པའི་གདམས་ངག་ཐུན་མོང་མ་ཡིན་པ་ནི།   ལུས་གནད་མེ་ཐབ་དྲུག་ཆིངས་བཅས།   རླུང་རོ་ལན་གསུམ་ཕྱིར་སངས་ཀྱིས་བུས་ལ་འཇམ་རླུང་ཐུན་གསུམ་བཟུང༌།   དམིགས་གནད་རང་ཉིད་ཡི་དམ་གྱི་སྐུར་གསལ་བའི་ལུས་ཀྱི་རྩ་འཁོར་ཐམས་ཅད་ཧ་རེ་ཡོད་པའི་རྐང་འོག་ཏུ་ཡཾ་ལས་རླུང་གི་དཀྱིལ་འཁོར་གཞུ་བདུངས་པའི་རྣམ་པ་ཅན་མཆོག་མ་གཉིས་ལ་བ་དན་རེས་མཚན་པའི་རྒྱུད་གཡས་གཡོན་གྱི་སྟེང་དུ་རྐང་པ་བཞག    །རྐང་བར་ཆངས་བཟུང་ལ་རཾ་ཡིག་དམར་པོ་ཞིག་གསལ།   དེ་ལྟར་དམིགས་པ་གསལ་ཐེབས་པ་དང་རླུང་བུམ་པ་ཅན་དྲག་ཏུ་བཟུང༌།   ཡིད་ཀྱིས་ཡཾ་ཞེས་བརྗོད་པས་མཆོག་མའི་བ་དན་བསྐུལ་ཞིང་བསྐྱོད་པས་རླུང་གཡོས།   ཆངས་བཟུང་གི་རཾ་ལ་ཕོག་པས་རཾ་ལས་མེ་འབར་ནས་རྐང་པའི་སྦུབས་ལས་ཞུགས།   སུམ་མདོའི་ཨ་ཤད་ལ་ཕོག   མེ་ལྕེ་དམར་སི་རི་ {{TibChung|[3a]}} རི་འབར་བ་ལ་ཤེས་པ་གཏད་དེ་རླུང་བཟུང་།   ཕོ་བསྐོར་བརྡབ་སྤྲུགས་སོགས་བྱ།   ཡང་མེ་རིམ་བཞིན་འཁོར་ལོ་རྣམས་བརྒྱུད་དེ་ལུས་ནང་ཐམས་ཅད་ཁེངས།   རླུང་ཕྱིར་འཛིན་ནང་འཛིན་སྤེལ་མར་བཟུང་སྟེ་བརྡབ་སྤྲུགས་བྱ།   དེ་ནས་བ་སྤུའི་བུ་ག་རྣམས་ནས་ཕྱིར་མེ་ལྕེ་དམར་ཉུག་ཉུག་བྱུང་བར་བསམ་ལ།   རླུང་དང་དམིགས་པ་དྲག་ཏུ་གཅུན།   དེ་ནས་གང་མཐོང་བའི་ཡུལ་ཁམས་ཐམས་ཅད་མེས་ཁེངས་པར་བསམ།   རླུང་ཕྱིར་འཛིན་ནང་འཛིན་གོང་ལྟར་ལ་ཕོ་བསྐོར་བརྡབ་སྤྲུགས་བྱ།   མེ་ལཻ་ཁ་དོག་དཀར་པོ་སྤྱི་བོ་ནས་ཐོན།   ཚངས་པའི་འཇིག་རྟེན་མན་ཆད་ཁེངས།   དམར་པོ་ཐུར་དུ་འཕྲོས་མནར་མེད་ཡན་ཆད་འབར།   སྣང་སྲིད་བརྟན་གཏཡོ་སྣོད་བཅུད་ཐམས་ཅད་མེ་ཁ་དོག་ལྔ་ལྡན་དུ་འབར་ཞིང་།   རེག་བྱ་ཤིན་ཏུ་ཚ་བ་ལ་སེམས་བཟུང་ལ་བརྡབ་སྤྲུགས་བྱ།   བོགས་འདོན་དུ་ལུས་གནད་གཞན་སྔ་མ་ལྟར་ལ།   ཙོག་པུའི་རྐང་གཉིས་བར་ལ་མཐོ་གང་ཙམ་ཡོད་པར་བྱ།   ལག་གཉིས་བསྣོལ་བས་གྲུ་མོ་གཉིས་བཟུང་སྟེ་པུས་མོའི་སྟེང་དུ་བཀག    ལུས་ཤོག་བུ་ཁོག་སྟོང་ལྟར་བསམ་ལ་འཕོང་སྒྱིད་པ་ལ་བརྡབ་ནས།   ལུས་ཕྱི་ {{TibChung|[3b]}} ནང་མེད་པར་མེ་དཔུང་དུ་དམར་འུར་འུར་འབར་བས་རྩ་གནས་ཀྱི་དཔའ་བོ་མཁའ་འགྲོ་མ་རྣམས་ཏིལ་གྱི་གང་བུ་བཞིན་བཞུགས་པ་ཐམས་ཅད་ཀྱང་བདེ་དྲོད་མེ་དཔུང་གི་དབུས་ན་གར་བྱེད་ཅིང་།   དེར་མ་ཟད་གནས་གསུམ་གྱི་དཔའ་བོ་མཁའ་འགྲོ་ཐམས་ཅད་ཀྱང་བདེ་བས་ཐུགས་བརྒྱུད་བསྐུལ།   བ་སྤུའི་བུ་ག་རྣམས་ནས་མེ་དམར་ལྷབ་ལྷབ་འབར་བའི་སྣེ་ལ་བྱོན་ཏེ་གར་བྱེད་ཅིང་མེ་དཔུང་གི་ཀློང་ན་བདེ་དྲོད་འབར་བར་བསམ་ལ།   རླུང་ཕྱིར་འཛིན་ནང་འཛིན་སྤེལ་མར་བཟུང་།   ཡང་ཁ་སྦྱོར་དུ་བཟུང་ལ།   བརྡབ་ཆུང་ཉེར་གཅིག་རེ་བྱས་ཏེ།   འཕུལ་ཐུང་བྱ་ཞིང་བཟུང་།   འཇམ་རླུང་ལ་བརྟན་པ་ཐོབ་ནས་དམིགས་པ་འདི་ཉིད་ལ་ཞག་བདུན་གཅིག་བསླབ་པས་རས་རྐྱང་ཐུབ་པར་ཐེ་ཚོམ་མེད་དོ།   །གེགས་སེལ་དུ།   རླུང་བཟུང་སྟེ་ཧར་གྱིས་ལངས་ནས་ཉྭ་བཞི་སྒྲིམ་དཔྱང་ཕྲག་བརྡབ་སྟེ་ལུས་ལ་ཆུན་བཙལ་ལག་སོར་སྤྱི་བོར་བསྣོལ་ལ་དམིགས་གནད་དང་ལྡན་པས་བུམ་ཆེན་རེ་ལ་བརྡབ་ཆེན་བཅུ་རེ་འགྲོ་བར་བྱས་ཏེ་ཡུན་རིང་དུ་བསླབ།   རྗེས་ལ་འཕུལ་ཐུང་དང་ཧ་སྤྲུགས་མང་དུ་བྱས་པས་རླུང་གི་ནུས་པ་བརྟན་པར་བྱ།   ལུས་ལ་བདེ་དྲོད་སྐྱེ་བ་ན།   གོས་སྲབ་ཏུ་གཏོད།    {{TibChung|[4a]}} དང་པོ་དྲོད་སྣང་འཆར་ཡང་གྲང་པོ་མི་བྱ།   བར་དུ་སུན་ཉམས་འོང་ཡང་འཕྲོ་མི་བཅད།   མཐར་གོམས་པ་དང་གཉུག་བསྲིང༌།   དྲོད་ཚད་གཏན་ལ་ཕེབས་ནས་ཀྱང་བཙན་ཐབས་སུ་འཕྲོ་མི་གཅོད་པར་སྦྲུལ་མཇུག་ལྟར་རྒྱུན་ནར་གྱིས་འཕྲོ་བཅད།   སྐབས་སྐབས་སུ་ལུས་ལ་ཁྱད་པར་གྱི་རྫས་དང་སྦྱར་བའི་སྣུམ་མམ།   མ་འབྱོར་ན་སྣུམ་རྐྱང་པས་བྱུག་པ་བྱས་ལ་འཕུར།   དྲོད་སྐྱེས་མཚམས་ནས་བདེ་དྲོད་ཀྱི་རང་ངོ་ལ་ཅེ་རེ་གཏད་དེ་གཉུག་མ་ཡེ་ཤེས་ཀྱི་ལྟ་བ་དང་བསྲེ་བ་གལ་ཆེ།   རྗེས་ཐོབ་ཐུན་མཚམས་སོགས་གནས་སྐབས་ཀུན་ཏུ་གནས་ཁང་གི་ཕྱི་ནང་གོས་སྟན་ཐམས་ཅད་མེའི་རང་བཞིན་མེ་དཔུང་དུ་འབར་བར་བསམ།   མཚན་མོ་པུས་བྲང་སྦྱར་ཏེ་གཞོག་གཡས་ཕབ་ལ་བར་རླུང་ཅུང་ཟད་བཟུང་ནས་མེ་དམིགས་ལ་སེམས་གཏད་དེ་ཉལ།   དམ་ཚིག་སྤང་བླང་གི་གནད་སྤྱི་ལྟར་ལ།   དྲོད་སྐྱེས་ནས་ཞེན་པ་དང་རང་མཐོང་མི་བྱ་ཞིང༌།   ཐོ་ཅོའི་སྤྱོད་པ་མི་བྱེད།   བླ་མ་ལ་མོས་གུས་དང་ཉམས་ལེན་ལ་འབད་པས་བོགས་ཐོན་པར་འགྱུར་རོ།   །དེ་ལྟར་རླུང་དང་གཏུམ་མོའི་རྣལ་འབྱོར་ལ་རྩེ་གཅིག་ཏུ་བརྩོན་པས་འབྱོངས་པའི་རྟགས་ {{TibChung|[4b]}} ནི།   ཕྱི་རྟགས་སུ་དུ་བ་དང་སྨིག་སྒྱུ་ལ་སོགས་པའི་མཐོང་སྣང་སྣ་ཚོགས་པ་འཆར།   ནང་ལྟར་རླུང་བྱང་ཆུབ་ཀྱི་སེམས་སུ་ཞུགས་པའི་རྟགས་སུ་རླུང་ཇེ་རིང་དུ་འགྲོ་ཞིང་བདེ་དྲོད་མགོ་གཡོ།   གནས་པའི་རླུང་རྟགས་འགྲོ་འོང་མེད་པ་སྙམ་བྱེད་ཀྱང་བརྟག་ན་རིག་ཅིང་བདེ་དྲོད་སྐྱེ།   ཐིམ་པའི་རྟགས་སུ་རླུང་རྒྱུ་བ་འགག་ཅིང་བདེ་དྲོད་འབར།   དེ་ནས་རླུང་ལས་སུ་རུང་བས་བདེ་དྲོད་རྒྱུན་ཆད་མེད་པར་འབར་བ་འོང༌།   གསང་བའི་རྟགས་སེམས་རང་བཞིན་གྱིས་བདེ་གསལ་མི་རྟོག་སྟོང་བ་ཟུང་དུ་འཇུག་པའི་ཏིང་འཛིན་འཆར།   དེ་ཡང་རླུང་སེམས་གཉིས་སུ་མེད་པའི་གནད་ཀྱིས་རླུང་ཇི་ལྟར་ཟིན་པ་བཞིན་དུ་སེམས་གནས་ཀྱང་ཇེ་རིང་དང༌།   མཐར་རླུང་ཐིམ་པའི་ཚེ་ན་ཏིང་ངེ་འཛིན་ཁོར་ཡུག་ཏུ་གནས་པ་འབྱུང་ཞིང༌།   སེམས་ལས་སུ་རུང་བས་ཏིང་ངེ་འཛིན་ལ་དབང་འབྱོར་བར་འགྱུར།   ཐུན་མོང་གི་ཡོན་ཏན་ཀྱང༌།   བདེ་དྲོད་འབར་བས་རླུང་གོས་སུ་གྱོན་པ་སྟེ་མི་འཁྱགས།   རླུང་ཟས་སུ་ཟ་བས་བཀྲེས་གདུང་སེལ།   རླུང་རྟར་ཞོན་པས་ལུས་ཡང་ཞིང་མགྱོགས།   རླུང་བཅུད་ལེན་དུ་སོང་བས་རྒས་པ་མེད་ཅིང་ལུས་སྟོབས་རྒྱས་པ་དང་ཚེ་རིང༌།    {{TibChung|[5a]}} འབྱུང་བ་སྙོམས་པས་ནད་མི་འབྱུང༌།   ནང་དུ་རླུང་སེམས་འདུས་པའི་རྟེན་འབྲེལ་གྱིས་ཕྱིའི་སྣང་བ་དབང་དུ་འདུ་ཞིང་མངོན་ཤེས་འཆར་བ་སོགས་ཀྱི་ཡོན་ཏན་འབྱུང་བ་ཡིན་ནོ།   །ཞར་ལ་དབང་པོ་ཐ་མ་རྫས་ཀྱི་གཏུམ་མོ་ནི།   གཡག་རྒོད་ཀྱི་མཁྲིས་པ་དྲོད་མ་ཡལ་བ་ལ་སྨན་ཚ་བ་གསུམ།   སྔོ་ཚ་བ་གསུམ།   ཛཱ་ཏི།   རྒྱ་གཡེར།   ཆང་ཕབ་རྣམས་བཏབ་ལ་སྐམ།   ཕྱེ་མ་ཞིབ་མོ་ཚིལ་ཆེན་དང་ཨ་རག་གིས་རིལ་བུ་དྲིལ།   དེ་ཉིད་ལྷར་བསྐྱེད་ཅིང་སྔགས་བཟླ།   ལྷ་འོད་དུ་ཞུ་བའི་རིལ་བུ་ཆང་བཟང་པོ་དང་སྦྱར་ཏེ་བཏུང༌།   རླུང་སྦྱོར་དང་འཁྲུལ་འཁོར་བྱ།   གོང་གི་རྫས་ཀྱི་ཕྱེ་མ་སྣུམ་དང་སྦྱར་ཏེ་དབང་པོའི་སྒོ་དང་རྨེན་བུ་མ་གཏོགས་པར་བྱུགས་ཤིང་བཀུ་མཉེ་དྲག་ཏུ་བྱས་པས་རྩོལ་མེད་དུ་དྲོད་སྐྱེ་བར་འགྱུར་རོ།   །གཉིས་པ་ཞུ་བདེའི་རྣལ་འབྱོར་ཁམས་གསུམ་རོལ་པའི་མན་ངག་ལ་གསུམ།   རང་ལུས་ཐབས་ལྡན་ལ་བསླབ་པ།   གཞན་ལུས་ཕོ་ཉ་ལ་བསྟེན་པ།   ཐུན་མོང་དུ་གེགས་སེལ་བོགས་འདོན་བསྟན་པའོ།   །དང་པོ་རང་ལུས་ཐབས་ལྡན་ལ་བསླབ་པ་ནི།   རྩ་བའི་གཞུང་བཞིན་སྟེང་སྒོ་འཇུ་འདུལ་གྱི་ {{TibChung|[5b]}} རྣལ་འབྱོར་ལ་ཉམས་མྱོང་ཇི་ལྟར་རིགས་པ་སྐྱེས་ནས་འདི་ཉིད་ཀྱི་ཉམས་ལེན་ལ་འཇུག་པ་ན།   བདེ་བའི་སྟན་ལ་བསམ་གཏན་གྱི་ཆོས་དང་ལྡན་པས་འཁོད་དེ།   རང་ཉིད་སྐད་ཅིག་གིས་སེམས་ཀྱི་ངོ་བོ།   བདེ་བའི་རང་བཞིན།   དྭངས་མ་རླུང་གི་རང་རྩལ་དཔལ་ཆེན་རྡོ་རྗེ་གཞོན་ནུ་ཧེ་རུ་ཀ་རྗེས་སུ་ཆགས་པའི་སྐུ་མདོག་པདྨ་རཱ་ག་ལྟར་དམར་ཞིང༌།   ཁྲོ་ཆགས་སྒེག་པའི་གཟི་བྱིན་མཆོག་ཏུ་འབར་བ།   ཕྱག་གཉིས་ཀྱིས་རྡོ་རྗེ་དང་དྲིལ་བུ་འཁྱུད་སྟབས་སུ་བསྣམས་པ།   དར་དང་རིན་པོ་ཆེ་དང་རུས་པའི་རྒྱན་གྱིས་སྤྲས་པ།   པདྨ་དང་ཉི་མའི་གདན་ལ་ཕྱེད་སྐྱིལ་གྱིས་བཞུགས་པར་གསལ་གདབ།   དེ་ལྟ་བུའི་སྐུ་ཕྱི་གསལ་ནང་གསལ་འོད་ཀྱི་རང་བཞིན་ཅན་གྱི་དབུས་སུ།   རྩ་དབུ་མ་ཕྱི་དཀར་ལ་ནང་དམར་བ་ཡར་སྣ་སྤྱི་བོར་ཟུག་པ།   གཡས་གཡོན་དུ་རོ་རྐྱང་གཉིས་ཡར་སྣ་སྣ་བུག་ཏུ་ཟུག་ཅིང༌།   མར་སྣ་གསང་གནས་ཀྱི་འཁོར་ལོའི་འོག་ཏུ་རྩ་གསུམ་སྦུབས་གཅིག་ཏུ་གྱུར་ཏེ་རྡོ་རྗེ་ནོར་བུའི་རྩེ་མོར་ཟུག་པ།   འཁོར་ལོ་ལྔའི་ཐད་རྣམས་སུ་རྩ་གསུམ་སྦུབས་གཅིག་ཏུ་གྱུར་པ་ལས་རྩ་འདབ་སོ་སོ་གདུགས་ཀྱི་རྩིབས་མ་ལྟར་གསལ་བ།   སྤྱི་བོའི་ {{TibChung|[6a]}} རྩ་འཁོར་གྱི་སྟེང་དུ་བྱང་སེམས་ཐིག་ལེའི་རང་བཞིན་ཧྃ་མགོ་ཐུར་བསྟན་དང༌།   འཁོར་ལོའི་ལྟེ་བར་ཧྃ་གྱེན་བསྟན་དཀར་པོ།   མགྲིན་དབུས་ཨོཾ་དམར་པོ།   སྙིང་དབུས་ཧཱུྃ་སྔོན་པོ།   ལྟེ་དབུས་ཨཱཿདམར་སེར།   གསང་གནས་སུ་ཧོཿ  ལྗང་གུ།   ནོར་བུའི་རྩ་བར་ཨཱཿ སྐེད་པར་ཧཱུྃ།   རྩེ་མོར་ཨོཾ།   རྩ་འདབ་རྣམས་ལ་ལྷའི་ངོ་བོ་བདེ་བའི་རང་བཞིན་ཐིག་ལེ་དཀར་དམར་འོད་འབར་བ་རེས་མཚན་པར་གསལ་གདབ།   བུམ་ཅན་གྱི་རླུང་སྦྱོར་བྱས་པས་རྩ་ཁམས་ཐིག་ལེ་དང་བཅས་པ་ཐམས་ཅད་བདེ་བའི་རང་བཞིན་དུ་ཕྲིལ་གྱིས་སོང་བར་བསམ་ལ་བདེ་ཉམས་སྦར་ཞིང་སྟོང་ཉིད་ལ་བློ་བཞག དེ་ནས་རང་གི་མདུན་དུ་སྔར་འདྲིས་པ་ལྟ་བུའི་ཡིད་དུ་འོང་བའི་བུ་མོ་ལང་ཚོ་དར་ལ་བབས་པ།   ཆགས་པའི་ཉམས་རྒྱས་པ།   དྲན་པ་ཙམ་གྱིས་བདེ་བ་བཟོད་མེད་དུ་གཡོ་ནུས་པ་ཞིག་གིས་ཆགས་པའི་ཉམས་འགྱུར་ཅི་རིགས་སྟོན་པར་བསམ།   ས་མ་ཡ་སྟྭཾ།   ཞེས་ཆགས་པའི་བརྡས་བསྐུལ་བར།   ས་མ་ཡ་ཧོཿ  ཞེས་ལན་གདབ།   སླར་ཡང་རཱ་ག་ཡ་ཧོཿ    ཞེས་སྦྱོར་བའི་བརྡས་བསྐུལ་བར།   རཱ་ག་ཡ་མི།    {{TibChung|[6b]}} ཞེས་ལན་བཏབ་སྟེ།   མཆོག་ཏུ་དགའ་བའི་མིག་ཟིམ་བུར་ལྟ་བ།   སིད་དང་ཧ་ལ་སོགས་པའི་སྒྲ་དབྱུང་བ།   དྲི་ཞིམ་པོས་ཁྱབ་པ།   ཡན་ལག་དང་ཉིང་ལག་ལ་རེག་ཅིང་འོ་བྱ་བ།   མཆུ་དང་ལྕེ་འཇིབ་པ་སོགས་ཀྱིས་ཆགས་པ་ཆེས་ཆེར་བསྐུལ་ཏེ།   ཆུ་སྐྱེས་མཆོག་ཏུ་རྒྱས་པའི་གསང་རྩ་ངོམ་ཞིང་བདུད་རྩིའི་ཟིལ་པ་དང་བཅས་ཏེ་པང་དུ་སླེབས་པ་ན།   སྐད་ཅིག་གིས་འཁོར་ལོ་རྒྱས་འདེབས་མ་དམར་མོ་རྗེས་ཆགས་ཀྱི་ཉམས་འགྱུར་མཆོག་ཏུ་རྒྱས་ཤིང༌།   རྒྱན་ཐམས་ཅད་ཀྱིས་བརྒྱན་པ།   སྣང་སྟོང་ཟུང་འཇུག་འོད་ཀྱི་སྐུར་ལམ་གྱིས་གྱུར་པ་ལ་རྩ་འཁོར་ཡི་གེ་དང་བཅས་པ་གསལ་གདབ།   གསང་བའི་པདྨོའི་དབུས་སུ་རྩ་མཛེས་པའི་རྩེར་ཨ་ཡིག་གིས་མཚན་པར་མོས་ལ།   ཛཿཞེས་པས་ལུས་ཀྱི་ཆ་ཤས་རྣམས་རེག  ཧཱུྃ་ཞེས་པས་ལག་པ་དང་བརླ་འཁྱུད།   བྃ་ཞེས་པས་མཁའ་གསང་དམ་དུ་སྤྲད།   ཐབས་ཁྱད་པར་ཅན་འདི་ཁོ་ན་ལ་བརྟེན་ནས་སེམས་ཅན་ཐམས་ཅད་ཀྱི་དོན་དུ་ལྷན་ཅིག་སྐྱེས་པའི་བདེ་བ་མངོན་དུ་བྱའོ་སྙམ་པས་བྱང་ཆུབ་ཀྱི་སེམས་གསལ་བཏབ་ལ།   ཧོཿ ཞེས་ཡབ་ཀྱིས་གསོར།   ཡུམ་གྱིས་བསྐྱོད་པས་བདེ་བ་ཆེར་གཡོས་ཏེ།   སྤྱི་ {{TibChung|[7a]}} བོའི་ཧཾ་ལས་བྱང་ཆུབ་སེམས་ཀྱི་རྒྱུན་བབས།   རྩ་ཁམས་གཞན་གྱི་དྭངས་མ་རྣམས་ཀྱང་ལྷན་ཅིག་ཏུ་འདུས་ཏེ་སྨིན་མཚམས་ཡན་གྱི་དབུ་མའི་ནང་གང་བས་དགའ་བའི་ཡེ་ཤེས་སྐྱེས།   དེ་ལས་ཆེར་འཕེལ་ཏེ་སྨིན་མཚམས་ཡན་ཆད་ཀྱི་རྩ་ཁམས་ཐམས་ཅད་ལ་ཁྱབ་པས་དགའ་བ་མཐར་ཕྱིན་པར་བསམ་ཞིང༌།   སྤྱི་བོའི་བུམ་པ་ཅན་དྲག་ཏུ་གཅུན།   མཐར་རྣམ་པར་མི་རྟོག་པའི་ངང་ལ་རེ་ཞིག་བཞག་པ་ནི་ཕྱི་མ་རྣམས་ལའང་འགྲེ།   དེ་བཞིན་དུ་བྱང་སེམས་མགྲིན་པར་བབས་པས་མཆོག་ཏུ་དགའ་བ།   སྙིང་གར་བབས་པས་ཁྱད་པར་གྱི་དགའ་བ།   ལྟེ་གསང་གི་རྩ་འཁོར་བརྒྱུད་ནས་ནོར་བུའི་རྩེ་མོའི་བར་སོན་པས་ལྷན་སྐྱེས་ཀྱི་དགའ་བ་ཉམས་སུ་མྱོང་བ་ཁྱབ་ཅིང་བརྟན་པར་མོས།   དེའི་ཚེ་ཡབ་ཡུམ་གཉིས་ཀྱི་རྩ་དབུ་མ།   རླུང་ལྡང་འཇུག ཐིག་ལེ་དཀར་དམར།   དབྱིངས་དང་ཡེ་ཤེས་ཞལ་སྦྱོར་བ་སྟེ་ཁ་སྦྱོར་བཞིའི་བདེ་སྟོང་གི་ཡེ་ཤེས་མངོན་དུ་བྱས་པར་བསམ་པ་ནི་ཡས་བབས་རྒྱུའི་དགའ་བ་བཞིའོ།   །དེ་ནས་དྭངས་མ་ཏིལ་འབྲུ་ཙམ་ཡང་མ་ཉམས་པར་དེ་མ་ཐག་གྱེན་དུ་དྲང་དགོས་པས།   རྐང་ལག་གི་ཉྭ་བཞི་སྒྲིམ་ཞིང་སོར་ {{TibChung|[7b]}} ཚིག་རྣམས་བསྐུམ།   ལྟོ་བ་སྒལ་པར་བརྡབ།   ལྕེ་རྩེ་དང་མིག་གྱེན་དུ་ཕྱོགས་པ་ལུས་འཁྲུལ་འཁོར་གྱི་འདྲེན་དང༌།   གསང་རླུང་གྱེན་དུ་དྲང་ཞིང་ཧཱུྃ་རིང་གི་སྒྲ་བྱ་བ་ངག་གདངས་ཀྱི་འདྲེན་དང༌།   ཤེས་པ་སྤྱི་བོའི་ཧཾ་ལ་གཏད་པས་ཐིག་ལེ་རྣམས་སོག་སྦུབས་ནས་ཆུ་དྲངས་པ་ལྟར་དཀར་ཕྲི་ལི་ལི་གྱེན་ལ་བཙན་ཐབས་སུ་ལྡོག་པར་བསམ་པ་ཡིད་དམིགས་པའི་འདྲེན་ཏེ།   གནད་གསུམ་དང་ལྡན་པའི་སྒོ་ནས་དྲངས་པས།   ལྟེ་བ་མན་ཆད་དུ་བརྟན་པས་དགའ་བ།   སྙིང་གར་མཆོག་དགའ།   མགྲིན་པར་ཁྱད་པར་གྱི་དགའ་བ།   སྤྱི་བོའི་ཧྃ་ཡིག་གི་བར་དུ་སོན་པས་ལྷན་ཅིག་སྐྱེས་པའི་དགའ་བ་སྟེ་མས་བརྟན་འབྲས་བུའི་དགའ་བ་བཞི་ཉམས་སུ་མྱོང་ནས་ཁྱབ་ཅིང་བརྟན་པར་བསམ།   འཁོར་ལོ་སོ་སོར་བུམ་པ་ཅན་དྲག་ཏུ་གཅུན།   སེང་གེ་རྣམ་རོལ་གྱི་འཁྲུལ་འཁོར་གྱིས་ཡུར་བ་ནས་ཞིང་ས་ལ་ཆུ་འགྲེམས་པ་ལྟར་རྩ་ཁམས་ཐམས་ཅད་ལ་ཁྱབ་པར་དགྲམ།   ཧཾ་ཡིག་ལ་རྟེན་བཅས་ཏེ་རང་སེམས་བདེ་བ་གསུམ་དབྱེར་མི་ཕྱེད་པའི་ཀ་དག་དེ་ཁོ་ན་ཉིད་ཀྱི་ངང་ལ་ཡུན་རིང་དུ་མཉམ་པར་གཞག་གོ   །དེ་ལྟར་ནན་ཏན་དུ་བསྒོམས་པས་བདེ་དྲོད་རླུང་ཐིག་གི་ {{TibChung|[8a]}} ཉམས་རྩལ་ཆེར་འབར་ཞིང་ཅུང་ཟད་འབྱོངས་པའི་མཚན་མ་མཐོང་བ་ན།   བོགས་འདོན་ཤཁ་མཟི་འཁྲུལ་འཁོར་ལ་བསླབ་པ་ནི།   སྟན་བདེ་བར་རྐང་པ་སེམས་སྐྱིལ་དང༌།   ལག་གཉིས་རྡོ་རྗེའི་ཁུ་ཚུར་བཅང་པ་བུས་སྟེང་དུ་བཞག་ལ་འཁོད།   དམིགས་གནད་རྣམས་གོང་ལྟར་ལ་དམིགས་བསལ་སཀ་ཁི་ཤཁ་ཁཞར་སྦྱོར་ཡུམ་དང༌།   རོས་པོ་ཤྐ་ཐེ་ཟི་བྷ་གར་བསམ།   ཤཁ་ཁ་ཞར་ཏིལ་མར་རམ་རླན་གྱིས་སྦག་པ་སྠོ་སྖེ་ཤ་ཟགྱུཐ་མཟི་ཚེ་ཡབ་ཡུམ་ལིངྒ་བྷ་གར་བཅུག་པར་བསམ་ཞིང༌།   སངས་རྒྱས་བྱང་སེམས་ཐམས་ཅད་བདེ་བའི་སྒྲས་སྤྱན་དྲངས།   རང་གི་འཁོར་ལོ་ལྔར་བཞུགས་པ་ལ་བདེ་བ་བླ་མེད་མཆོག་གི་མཆོད་པ་ཕུལ་བས་རྟག་ཏུ་མཉེས་ཤིང་སྤྱོད་པར་མོས་ལ་དལ་བུས་བསྐྱོད།   དེའང་བདེ་བ་ཆུང་ན་རྡོ་རྗེའི་སྺེ་པོ་དང༌།   འབྲིང་ན་རྔེཐ་མ།   ཆེ་ན་སྺ་ཕ་ཏར་ཕའུཀ་རྣེ་བསྐྱོད་ཅིང་དགའ་བ་བཞི་རེ་རེ་བཞིན་ངོས་བཟུང་ལ་བསྐྱང༌།   ལས་དང་པོ་པས་ནི་མགྲིན་པར་སླེབ་པ་ཙམ་ལ་ཚོད་བཟུང་སྟེ་ཉམས་སུ་བླང༌།   དེ་ལ་གོམས་ནས་སྙིང་ག་དང་ལྟེ་བར་དལ་གྱིས་རིམ་འགྲོས་སུ་དབབ།   མཐར་འབྱོངས་ནས་ {{TibChung|[8b]}} ཆེར་བསྐྱོད་དེ་བྱང་སེམས་རྡོ་རྗེ་ནོར་བུའི་རྩེ་མོར་སླེབས་པ་ན་གོང་བཞིན་འདྲེན་དགྲམ་གྱི་རླུང་དང་འཁྲུལ་འཁོར་ལ་བརྟེན་ནས་ཐིག་ལེ་འཕོ་མེད་དུ་བཅིང་སྟེ་སླར་ལུགས་ལྡོག་གི་དགའ་བཞིའི་མཐར་ཐུག་པའི་བདེ་སྟོང་གི་ངང་བསྐྱང་ངོ༌།   །དེའང་གཞན་ལུས་བསྟེན་པའི་འོས་སུ་མ་གྱུར་པའི་རྣལ་འབྱོར་པ་ཚངས་སྤྱོད་ཀྱི་སྡོམ་པ་དཀའ་ཐུབ་ལ་གནས་པ་དག་གིས་སམ།   སྔགས་ལམ་པ་ཡིན་ཀྱང་གནས་དུས་ཀྱིས་གཞན་ལུས་བསྟེན་པ་སྐབས་སུ་མ་བབས་པ་དག་གིས་ལམ་འདི་ཁོ་ན་ཉམས་སུ་བླངས་པས་ཀྱང་འགྲུབ་ལ།   འདི་ཉིད་ལ་བརྟན་པ་ཐོབ་ན་གཞན་ལུས་བསྟེན་པར་གེགས་མི་འབྱུང་ཞིང་གནད་དུ་འགྲོ་བའི་ཕྱིར་གཞན་ལུས་ཀྱི་སྔོན་འགྲོར་བཞག་པ་ཡིན་ནོ།   །གཉིས་པ་གཞན་ལུས་ཕོ་ཉའི་ལམ་ལ་བསླབ་པ་ནི།   རང་ལུས་ཀྱི་ཉམས་ལེན་ལ་གོམས་པ་བརྟན་པོ་ཐོབ་ནས་ལས་ཀྱི་ཕྱག་རྒྱ་དངོས་ལ་སློབ་པ་ན།   ཐོག་མར་གཞན་ལུས་དཀྱིལ་འཁོར་འཁོར་ལོ་ནི་ཕོ་ཉའི་མགྱོགས་ལམ་ཡིན་པས་བསྟེན་བྱའི་ཡུལ་མ་ནོར་བར་བཙལ་བ་གལ་ཆེ་སྟེ།   མཚན་ངན་བསྟེན་ན་ཡོན་ཏན་མི་འཕེལ་གྱི་སྟེང་དུ་སྐྱོན་མང་དུ་སྐྱེད་པས་ན་ནུས་པ་མ་ཐོབ་ཀྱི་བར་དུ་སྤང་ {{TibChung|[9a]}} དགོས་པ་ཡིན།   དེའང་པདྨ་ཅན་ནི་རྩ་བཟང་བས་བདེ་བ་ལྷག་པར་སྐྱེད་ཅིང་ཆོས་ཉིད་གསལ་བས་རབ་ཡིན་ལ།   རི་མོ་ཅན་དང་དུང་ཅན་མ་དང་གླང་སྣ་ཅན་དང་རི་དྭགས་མ་བཞི་ནི་རྩ་སྔ་མ་ལས་དམན་པས་འབྲིང་དུ་བཤད།   དེ་ལ་པདྨ་ཅན་གྱི་མཚན་ཉིད་ནི།   ཕྱི་རྟགས་བཞིན་རས་ཟླུམ་པོ་སྔོ་སང་ངམ་པདྨའི་མདོག་ཅན།   སྐྲ་སེར་ཞིང་ལི་བ།   རུས་སྦལ་ལྟར་ཆུ་ཞེང་གབ་པའི་ལུས་དབྱིབས་ཅན།   བྲང་མཛེས་ལ་ནུ་མ་སྲ་ཞིང་མཁྲེགས་པ།   ནང་རྟགས་སུ་ལྟེ་བར་གྱེན་དུ་འགྲེང་པའི་གཉེན་མ་སྟེ་རི་མོ་གསུམ་ཡོད་པ།   གསང་རྟགས་སུ་གསང་རྩ་པད་སྣལ་ལྟར་ཕྲ་ཞིང་འབྱེད་འཛུམ་བྱེད་པས་རྒྱུན་དུའང་རེས་འགའ་རཀྟ་འོ་མའི་མདོག་ཏུ་སྣང་བ་ནི་མཆོག་གྱུར་པདྨའི་རིགས་སོ།   །རི་མོ་ཅན་ནི།   རྒྱུད་ཁྲོ་ཞིང་གཏུམ་ལ་ནུ་མའི་གཏིང་ཟབ་པ།   ལུས་ཀྱི་བོང་ཐུང་ལ་བྱིན་པ་རི་དྭགས་ལྟར་ཕྲ་ཞིང་གསུས་པ་རྒྱས་པས་སྐེད་པ་སྦོམ་པ།   སྐྲ་བཟང་ལ་དཔྲལ་བར་གཉེར་མ་གྱེན་འགྲེང་ཡོད་པ།   གསང་རྩ་རི་མོ་ལྟར་ཕྲ་བ་སྟེ་ལས་ཀྱི་རིགས་སོ།   །དུང་ཅན་མ་ནི།   ལུས་བོང་ཧ་ཅང་རིང་བའམ་ཐུང་བ་མ་ཡིན་པས་འཚམས་ཞིང་ {{TibChung|[9b]}} བཞིན་རས་ཡིད་དུ་འོང་བ།   སྐྲ་ནག་ལ་རིང་བ་དང་སྣའི་རྩེ་མོའང་ལེབ་མོར་མིན་པར་རིང་ཞིང་ནུ་མ་རྒྱས་ལ་མཁྲེགས་པ།   གསང་རྩ་དུང་ལྟར་འཁྱིལ་བ་སྟེ་རིན་ཆེན་རིགས་སོ།   །གླང་སྣ་ཅན་ནི།   ལུས་བོང་ཆེ་ཞིང་བྱིན་པ་སྦོམ་པ།   སྐྲ་ངན་ལ་བཞིན་རས་ཀྱི་གདངས་གསལ་བ།   ངོ་ཚ་ཆུང་བའི་ཆགས་པ་དང་ལྡན་ལ་ལུས་ལས་ཆང་དྲི་མནམ་པ།   གསང་རྩ་གླང་ཆེན་སྣ་ལྟར་བལྟབས་པ་སྟེ་སངས་རྒྱས་རིགས་སོ།   །རི་དྭགས་ཅན་མ་ནི།   བཞིན་མདོག་དཀར་ལ་དམར་བའི་མདངས་ཅན་རི་དྭགས་ལྟ་བུའི་མིག་མཛེས་པ།   དཔྲལ་བ་དབྱེས་ཆེ་ཞིང་སྐྲ་རྩུབ་པ་སྤྱོད་ལམ་ཧ་ཅང་དལ་བའམ་བྲེལ་བ་མིན་པར་སྙོམས་ཞིང་ནུ་མ་ཟླུམ་ལ་འཁྱིལ་བ།   གསང་རྩ་རི་དྭགས་ཀྱི་རྩི་ལྟ་བུས་བཀབ་པ་སྟེ་རྡོ་རྗེའི་རིགས་སོ།   །དེ་ལྟར་རིགས་རྣམ་པ་ལྔ་པོ་རེ་རེ་ལའང་ཕྱི་ནང་གསང་རྟགས་རྫོགས་མ་རྫོགས་ཁྱད་པར་གྱིས་རབ་འབྲིང་ཐ་མ་གསུམ་གསུམ་དུ་འགྱུར་བ་ཡིན་ལ།   གང་ཡང་སྤྱིར་ཕྱིའི་མཚན་ཉིད་ནི།   གཟུགས་མཛེས་ཤིང་ཡིད་དུ་འོང་བ།   ལུས་ཀྱི་ཆ་དང་ཁའི་དྲི་ཞིམ་པ།   ངག་སྙན་ཅིང་སྤྱོད་འགྲོས་ཞིབ་པ།   མཐོང་བ་ཙམ་གྱིས་སྙིང་དུ་སྡུག་ཅིང་བདེ་བ་སྐྱེ་བ་དང༌།   ནང་གི་ {{TibChung|[10a]}} མཚན་ཉིད་ནི།   པདྨའི་ཤ་རྒྱས་ཤིང་འབུར་བ།   ཁ་རུབ་ཅིང་དམ་ལ་ཟེའུ་འབྲུ་རྒྱས་པ།   དྲོད་རླན་ཆེ་ཞིང་རྡོ་རྗེ་སྡོམ་འཇིབ་ཤེས་པ།   པདྨའི་སྟེང་དུ་རྡོ་རྗེས་རེག་མི་བཟོད་ཅིང་སྐད་ངན་འདོན་པ།   ཅུང་ཟད་བསྲུབ་ན་ལུས་འདར་ཞིང་དངངས་པ་དང༌།   གསང་བའི་མཚན་ཉིད་ནི།   དད་པ་ཆེ་བས་རྣལ་འབྱོར་པ་དང་དམ་པའི་ཆོས་ལ་མོས་པ།   ཤེས་རབ་ཆེ་བས་ཆོས་དང་ཆོས་མིན་ཤན་འབྱེད་ཤེས་པ།   བློ་ཁོག་ཆེ་བས་གསང་སྔགས་ཀྱི་སྤྱོད་པ་བློར་ཤོང་བ།   གསང་ཚིག་ཐུབ་པས་གསང་བའི་ལྟ་སྤྱོད་གཞན་དུ་མི་འཆལ་བ།   མིག་སེར་ཆུང་བས་རྣལ་འབྱོར་པ་ལ་སྐྱེ་བོས་སྒྲོ་སྐུར་མི་འབྱུང་བ།   སྙིང་ཉེ་ཞིང་ཁྲེལ་ཆེ་བས་ཅི་གསུངས་བཀའ་བཞིན་སྒྲུབ་ཅིང་ཞབས་ཏོག་ལ་བརྩོན་པ།   ལུས་ཚུགས་ཐུབ་ཅིང་བློ་བརྟན་པས་གཞན་གྱིས་བསྒྱུར་དཀའ་བ།   འདོད་པའི་སྒྱུ་རྩལ་ལ་མཁས་པས་བདེ་བ་དབང་མེད་དུ་འདྲེན་ནུས་པའོ།   །ན་ཚོད་ཀྱང་ལོ་བཅུ་དྲུག་ནས་རབ།   ཉི་ཤུ་ནས་འབྲིང༌།   ཉེར་ལྔ་ནས་ཐ་མར་བཤད་ལ།   མདོར་བསྡུ་ན།   གཟུགསདང་ལང་ཚོ་དར་ལ་བབས་པ།   དམེ་ཅན་གདོལ་ཤན་ཡུག་ {{TibChung|[10b]}} གྲིབ་སོགས་ཀྱིས་མ་གོས་པ།   ལྷག་པར་དམ་ཚིག་ཉམས་པའི་མི་དང་མ་འཕྲད་པ།   སྒྲུབ་པ་པོ་རང་ཉིད་ལ་གུས་ཤིང་སྙིང་བརྩེ་བ།   གསང་བ་མཆོག་གི་ཀུན་སྤྱོད་ལ་མི་སྐྲག་ཅིང་མོས་པ་བརྟན་པ།   སྒོ་གསུམ་འཆལ་བར་མ་ཤོར་ཞིང་གསང་ཐུབ་པ།   མཐོང་བའམ་དྲན་པ་ཙམ་གྱིས་ཀྱང་བདེ་བ་རྩོལ་མེད་དུ་སྐྱེད་ནུས་པ།   ཆགས་པ་ཆེ་ཞིང་སྦྱོར་ཐབས་ལ་མཁས་པ་སྟེ་དེ་རྣམས་ནི་མེད་དུ་མི་རུང་བའི་མཚན་ཉིད་ཡིན་ནོ།   །དེ་ལྟ་བུ་ལེགས་པར་བརྟགས་ལ་རྙེད་ནས་རང་བཞིན་གྱིས་མ་ཁུག་ན།   འགུག་པའི་ཐབས་རྫས་ཀྱི་རྟེན་འབྲེལ་དང༌།   སྔགས་བཟླ་བ་དང༌།   ཏིང་ངེ་འཛིན་གྱི་སྦྱོར་བ་རྣམས་མན་ངག་གཞན་ནས་འབྱུང་བ་ལྟ་བུས་བཀུག་སྟེ་རང་དབང་དུ་བྱ།   དབང་དུ་གྱུར་ནས་རྒྱུད་སྦྱོང་བའི་ཕྱིར།   ཕྱི་དྲང་བ་དང་ངེས་པའི་དོན་གྱི་ཆོས་བཤད།   ནང་ཟབ་མོའི་དབང་བསྐུར་ཞིང་དམ་ཚིག་ལ་གནས་པར་བྱ།   གསང་བ་བསྐྱེད་རྫོགས་ཀྱི་མན་ངག་ཕོག་སྟེ་ཉམས་མྱོང་ཅི་རིགས་མ་སྐྱེས་ཀྱི་བར་དུ་སྒོམ་དུ་གཞུག    །དེ་ནས་སྟ་གོན་གྱི་རིམ་པ་ལ།   ཡབ་ཡུམ་གཉིས་ཀ་ཁྲུས་དང་བཀུ་མཉེ་བྱ།   རོ་ཙ་བའི་སྨན་གྱི་བཅུད་ལེན་དང༌།   ཁ་ཟས་བཟང་པོས་ཁམས་སྤེལ།   དབེན་ {{TibChung|[11a]}} པའི་གནས་ཡིད་དུ་འོང་བར་འབོལ་ཞིང་བདེ་བའི་སྟན་ལ་འཁོད།   གཟུགས་ལ་བལྟ་བ་དང༌།   དགོད་པ་ལ་སོགས་པའི་གཟུགས་ཀྱི་བདེ་བ་ལ་བསླབ།   དེའི་ངོ་བོ་སྟོང་ཉིད་དུ་ཉམས་བསྐྱང༌།   དེ་བཞིན་དུ་ཆགས་པའི་གཏམ་གླེང་བ་སོགས་སྒྲ་ལ་བསླབ།   ལུས་ཀྱི་དྲི་ཞིམ་པོ་སྣོམ་པ་སོགས་དྲི་ལ་བསླབ།   མཆུ་དང་ལྕེ་འཇིབ་པ་སོགས་རོ་ལ་བསླབ།   འཁྱུད་པ་དང༌།   ཙུམྦྷ་ན་དང༌།   ནུ་མ་མཉེ་བ།   གསང་བའི་གནས་ལ་རེག་པ་སོགས་རེག་བྱ་ལ་བསླབ།   དེ་ཐམས་ཅད་ཀྱིས་བདེ་དྲོད་སྐྱེས་པའི་ངོ་བོ་སྟོང་པ་ཉིད་དུ་རོ་མཉམ་པའི་ངང་བསྐྱང༌།   དེ་ནི་བསླབ་པ་ལྔས་བདེ་བ་བསླང་བའོ།   །དེ་ནས་དངོས་གཞི་ཆགས་པའི་བརྡ་དང་ལན་གྱིས་བསྐུལ།   གོང་བཞིན་རང་ཉིད་རྡོ་རྗེ་གཞོན་ནུ་དང༌།   རིག་མ་འཁོར་ལོ་རྒྱས་འདེབས་མའི་སྐུར་གསལ་བ་ལྷའི་འདུ་ཤེས།   ཡབ་ཀྱི་གསང་བ་ཧཱུྃ་ལས་རྡོ་རྗེ་དཀར་པོ་རྩེ་གཅིག་པ་ལྟེ་བར་ཧཱུྃ་དང་བུ་གར་ཕཊ་ཀྱིས་མཚན་པ།   ཡུམ་གྱི་མཁའ་ཨཱཿལས་པདྨ་དམར་པོ་འདབ་མ་བརྒྱད་པ་ཟེའུ་འབྲུར་ཨཱཿདང་སྣ་རྩེར་མཱུྃ་གྱིས་མཚན་པ་སྔགས་ཀྱི་འདུ་ཤེས།   ཡབ་ཡུམ་ཐབས་ཤེས་སྙོམས་འཇུག་རྩ་རླུང་ཐིག་ལེ་ཁ་སྦྱོར་བདེ་སྟོང་ {{TibChung|[11b]}} དཔེའི་ཡེ་ཤེས་ལ་བརྟེན་ནས་ཟུང་འཇུག་དོན་གྱི་ཡེ་ཤེས་རྡོ་རྗེ་གཞོན་ནུའི་གོ་འཕང་བསྒྲུབ་སྟེ་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་བྱའོ་སྙམ་པ་ཆོས་ཀྱི་འདུ་ཤེས་ཏེ།   འདུ་ཤེས་གསུམ་ལ་གནས་པས་ཐ་མལ་པའི་འདོད་ཆགས་རྣམ་རྟོག་གི་རྒྱུན་བཅད།   ཡབ་རྡོ་རྗེ་སྐྱིལ་ཀྲུང་གི་པང་དུ་ཡུམ་པདྨའི་སྐྱིལ་ཀྲུང་གིས་འཁྲིལ་ཞིང༌།   ཡབ་ཀྱི་ལག་གཉིས་ཡུམ་གྱི་སྐེད་པ་དང༌།   ཡུམ་གྱི་ལག་གཡས་ཀྱིས་ཡབ་ཀྱི་མགུལ་དང་གཡོན་པས་སྐེད་ནས་འཁྱུད་ཅིང་རྡོ་རྗེ་ལས་རུང་པདྨར་དལ་བུས་བཅུག་སྟེ་སྙོམས་པར་འཇུག་པའམ།   གཞན་ཡང་པདྨ་ཅན་ལ་སྟེང་ནས་སྦྱོར་བ་དང༌།   རི་མོ་ཅན་ལ་རྒྱབ་ནས་དང༌།   དུང་ཅན་མ་ལ་འདེགས་པའི་ཚུལ་གྱིས་དང༌།   གླང་སྣ་ཅན་ལ་ཕན་ཚུན་མཉམ་པར་ལྟ་བས་དང༌།   རི་དྭགས་ཅན་ལ་འོག་ནས་སྦྱོར་བའི་འཁྲིག་ཐབས་གཙོ་བོར་བྱ་བ་སོགས་མཐའ་གཅིག་ཏུ་མ་ངེས་པར་གཡས་རོལ་གཡོན་རོལ་མདུན་ནས་རོལ་བ་ལ་སོགས་པ་འདོད་པའི་སྒྱུ་རྩལ་གྱི་རྩེ་འཇོ་མིག་འཕྲུལ་ལྟ་བུས་སྙོམས་པར་འཇུག་ཅིང༌།   སྦྱོར་ཐབས་ཀྱི་བྱེ་བྲག་རེ་རེས་བདེ་བའི་ཡེ་ཤེས་མི་འདྲ་བ་རེ་རེ་འདྲེན་ནུས་པར་བྱ།   དེ་ལ་དགོས་པའི་གནད་བཞི་ལས།   དང་ {{TibChung|[12a]}} པོ་དབབ་པ་ལ་མཁས་པ་དལ་བུ་རུས་སྦལ་གྱི་འགྲོས་ལྟ་བུ་ནི།   མཁའ་གསང་སྤྲད་ནས་དྲག་ཏུ་མི་ཤོར་བར་དལ་བུས་བསྲུབ་ལ།   བདེ་བ་གཡོ་བ་ན་བསྲུབ་འཕྲོ་བཤོལ།   ཡང་བདེ་བ་ཆད་ན་བསྲུབ་སྟེ།   དེ་ལྟར་ལན་བཞིའམ་ལྔ་སོགས་ཇི་ཙམ་འོས་པ་བསྐྱོད་པས་སྔར་རང་ལུས་ཀྱི་སྐབས་བཞིན་འཁོར་ལོ་ལྔར་རིམ་གྱིས་དབབ་སྟེ་བྱང་སེམས་ནོར་བུའི་བུམ་པའི་མཐར་ཐུག་པར་ཕབ་ནས་ཁ་སྦྱོར་ལྷན་སྐྱེས་ཀྱི་བདེ་བ་མྱང་རྗེས།   བར་དུ་བཟུང་བ་ལ་མཁས་པ་རྫ་སྣོད་ཐེམ་བུས་བཀག་པ་ལྟ་བུ་ལ།   སྟེང་རླུང་མནན་པས་འོག་རླུང་ཤུགས་ཀྱིས་འགོག་པ་རིལ་པ་ཞབས་ཚག་ཅན་ལྟར་གསུས་པ་སྒལ་ཚིག་ལ་སྦྱར།   མིག་བགྲད།   སྙིང་གའི་ཐད་དབུ་མའི་ནང་དུ་དྭངས་མ་མི་ཤིགས་པའི་ཐིག་ལེ་རྩ་བའི་བླ་མའི་ངོ་བོ་ལ་སེམས་གཏད།   དེས་མ་ཟིན་ན་ཆོས་ཐམས་ཅད་ནམ་མཁའ་ལྟ་བུ་ངོ་བོ་མ་གྲུབ་པའི་སྟོང་ཉིད་དང་རང་སེམས་སྐད་ཅིག་གིས་བསྲེས་ལ་ཕཊ་ཅེས་རིག་པ་མཁར་བཞག    །དེས་ཀྱང་མ་ཟིན་ན་ཤཁ་མཟི་པདེཕ་པཚུཕ་ཀྱིས་གསང་བའི་མགྲིན་པ་ཕཝིས་ནེ་རྩ་ལམ་དགག    །དེས་མི་ཟིན་མི་སྲིད་དོ།   །ཟིན་ནས་ལྡོག་པ་ལ་མཁས་ {{TibChung|[12b]}} པ་བཙན་ཐབས་ཀྱི་སྦྱོར་བས་སྐྱེན་པོའི་མདའ་ལྟར་རང་གནས་སུ་འཕང་བ་ལ།   འདྲེན་པའི་གནད་གསུམ་དང་ལྡན་པས་འཁོར་ལོ་ལྔ་མས་བརྟན་དུ་དྲངས་ཤིང༌།   སྤྱི་བོར་བླ་མ་ཡབ་ཡུམ་ཐིག་ལེ་ཧྃ་ཡིག་བདེ་བའི་ངོ་བོར་བཞུགས་པ་ལ་སེམས་དྲག་ཏུ་གཏད་པས་མི་དྲོང་མི་སྲིད་དོ།   །དྲོངས་ནས་མཐར་འགྲེམས་པ་ལ་མཁས་པ་ཞིང་པས་ཡུར་བ་ལ་ཆུ་དྲངས་པ་ལྟ་བུ་ལ།   རླུང་ཕྱིར་འཛིན་གྱིས་ལག་གཉིས་ཀྱི་མཐེ་བོས་རྣ་བ་གཉིས།   མཛུབ་མོས་མིག་གཉིས།   གུང་མོས་སྣ་བུག་གཉིས།   སྲིན་མཛུབ་དང་མཐེའུ་ཆུང་བཞིས་མཆུ་བསྡམ་ལ་སྟེང་རླུང་མ་རྔུབ་པར་མནན་ནས།   མགོ་ལུས་ལྷག་གིས་གཡས་སྐོར་གསུམ།   གཡོན་སྐོར་གསུམ་བྱ།   རྗེས་སོར་མོ་རྣམས་བཀྲོལ་ལ་ཧ་སྤྲུགས་ལན་གསུམ་བྱ་བ་ནི་སེང་གེའི་རྣམ་རོལ་གྱི་སྦྱིན་ཤུགས་འགྱེད་པ་ལྟ་བུའོ།   །གཞན་ཡང་འགྲེམས་པའི་རླུང་གནད་རིན་པོ་ཆེའི་ལན་ཚར་ལྟ་བུའི་འཁྲུལ་འཁོར་བདུན་ནི།   ལུས་རྒུར།   ལངས་ལ་ལག་པས་རྐང་མཐེབ་སོ་སོར་བཟུང༌།   རྐང་ལག་བར་དུ་རྐང་གང་བཞག    །དམིགས་བ་གོང་ལྟར་ལ་ཐིག་ལེ་སྤྱི་བོར་བསྐྱལ་བ་དེ་རྩ་གསུམ་འཁོར་ལོ་བཞི་བརྒྱུད་ནས་ལུས་ཐམས་ཅད་ལ་ {{TibChung|[13a]}} ཁྲེམས་བར་བསམ་ཞིང༌།   ངག་ཏུ་ཧ་ཧ་ཞེས་རླུང་འདོན།   རླུང་ཟད་པ་ན་མིག་གྱེན་ལ་ལྡོག    །ལྟག་པ་དགྱེ།   ལྕེ་ཡ་རྐན་ལ་སྦྱར།   ཉྭ་བཞིའི་ཤ་སྒྲིམ།   ལྟོ་བ་སྒལ་ཚིག་ལ་སྦྱར།   མཐར་ཁ་ནས་རླུང་དྲག་ཏུ་འདོན་ཅིང་ལུས་ཐམས་ཅད་ལན་གསུམ་སྤྲུགས་པ་ནི་སེང་གེའི་བཞད་ཚུལ་ཞེས་བྱའོ།   །ཡང་ལུས་རྒུར།   ཁུ་ཚུར་བརླ་སྟེང་དུ་བཞག    །ཧཱུྃ་ཧཱུྃ་ཞེས་སྣ་ནས་རླུང་སྣོམ་ཚུལ་གྱིས་གཡས་གཡོན་ནས་གཅུ།   དབུས་སུ་དྲང༌།   ནང་དུ་འཐེན།   ལྟོ་བ་སྦྱར།   གང་བ་དང་སླར་འཕུལ།   ལུས་ཐམས་ཅད་སྤྲུགས་པ་ནི་ཝ་མོའི་སྣོམ་ཚུལ་ཞེས་བྱའོ།   །ཡང་ལུས་རྒུར།   ལག་པ་རྐང་པའི་བར་དུ་གན་རྐྱལ་བཞག    །སྟེང་འོག་གི་རླུང་བཟུང་བ་ཁ་སྦྱར་སྤྲུགས་ཅིང་སྒྱུར་བ་ལན་གསུམ་བྱ་བ་ནི་འཚའ་མོའི་སྐྱིལ་ཚུལ་ཞེས་བྱའོ།   །ཡང་རྐང་མཐིལ་མཉམ་པར་བཞག    །སོར་མོ་བཙུག    །ལག་གཉིས་ཁུ་ཚུར་པུས་སྟེང་དུ་བཞག    །སྟོང་འདྲེན་དྲག་པོས་རྒྱུ་ཞབས་ཡར་འཐེན་ཞིང༌།   ངག་ཏུ་ཧྲཱིཾ་ཧྲཱིཾ་ཞེས་བརྗོད།   ཁུ་ཚུར་ཡར་གཞོག་དྲུད་མཆན་ཁུང་འོག་ཏུ་སླེབས་ནས།   སླར་མར་གཞོག་དྲུད་ {{TibChung|[13b]}} པུས་སྟེང་དུ་བཞག རླུང་རྫོགས་པ་ན་ལྟོ་བ་སྤྲུགས་པ་ནི་རི་དྭགས་སྤུངས་ཚུལ་ཞེས་བྱའོ།   །ཡང་ལུས་རྒུར།   རྐང་པའི་བར་དུ་མཐོ་གང་འོང་བར་བྱ།   ལག་གཉིས་མཐེ་བོང་ཁུ་ཚུར་བཅང༌།   སྟེང་རླུང་ལན་གཅིག་མནན་རྗེས་ངག་ནས་ཧ་རིང་རྗེས་སུ་ཧག་ཧས་དབྱུང་ཞིང༌།   རྒྱུ་ཞབས་སྒལ་ཚིགས་ལ་སྦྱར་བ་ལན་གསུམ་དང༌།   མཐར་ལུས་ཐམས་ཅད་ལན་གསུམ་སྤྲུགས་པ་ནི་སྟག་མོའི་སྐྱུག་སྟངས་ཞེས་བྱའོ།   །ཡང་ལུས་རྒུར།   རྐང་པའི་བར་དུ་ཁྲུ་གང་ཡོད་པར་བྱས་ལ།   སྟེང་འོག་གི་རླུང་ཁ་སྦྱར་བཟུང༌།   ལས་ཐམས་ཅད་སིལ་སིལ་སྤྲུགས་པ་ལན་གསུམ་བྱ།   དབྱིངས་རིག་བསྲེ་བ་ནི་གཡང་མོའི་སྤྲུགས་སྟངས་ཞེས་བྱའོ།   །ཡང་ལུས་རྒུར།   རྐང་ལག་སོ་སོར་དྲང་པོར་བཙུག    །བར་དུ་ཁྲུ་གང་ལྷག་ཙམ་ཡོད་པར་བྱ།   རླུང་སྟེང་འོག་ཁ་སྦྱར་བཟུང༌།   རྟིང་པ་གཡས་པ་བརླ་གཡས་པའི་རྩར་སྦྱར་ཞིང་ཤད་ཀྱི་བརྐྱང་བ་ལན་གསུམ།   གཡོན་པ་ལའང་དེ་འདྲ་ལན་གསུམ།   སླར་གན་རྐྱལ་དུ་ཉལ་ནས་རྩིབ་ལོགས་གཡས་གཡོན་སར་ཕབ་ལ་འགྲེ།   དེ་རྗེས་རྐང་ལག་བཞི་ལྷན་ཅིག་བརྐྱང་བརྡབ་བྱ་བ་དང༌།   སྒལ་ {{TibChung|[14a]}} ཚིགས་སར་ཕབ་པའི་ལུས་འཕར་བ་ལན་གསུམ་བྱ།   དེའི་ཚེ་སེམས་དང་རླུང་མི་ཤིགས་པའི་ཐིག་ལེར་དྭངས་པ་ནི་གྱི་ལིང་གི་འཕྲ་ཚུལ་ཞེས་བྱའོ།   །དེ་ལྟར་རླུང་དང་འཁྲུལ་འཁོར་དམིགས་པའི་སྦྱོར་བས་འདྲེན་ལྡོག་བྱས་པའི་ཐིག་ལེའི་བདེ་བ་ལུས་གནད་རྩ་ཁམས་ཐམས་ཅད་དུ་ཁྱབ་པར་བཀྲམ་རྗེས་སུ་ལུས་སེམས་ཁོང་ཀློད།   བདེ་བའི་རང་ངོ་ལ་བལྟས་པས་གང་དུའང་འཛིན་པ་མེད་པ་ནམ་མཁའ་བཞིན་རྣམ་པར་དག་པའི་སྟོང་པ་ཉིད་དུ་གྲོལ།   སྟོང་པའི་རྩལ་མ་འགག་པར་བདེ་བ་ཆེན་པོར་ཤར།   རྣམ་པ་བདེ་བ་དང་ངོ་བོ་སྟོང་པ་ཡ་བྲལ་མ་ཡིན་པར་དབྱེར་མེད་ཟུང་དུ་འཇུག་པའི་ཡེ་ཤེས་ངོས་བཟུང་ལ།   ཟག་བཅས་བདེ་བ་རྟོག་པའི་རོ་མྱོང་བས་ཟག་ཏུ་མི་གཞུག་པར་ཟག་མེད་དྭངས་མའི་ཐིག་ལེ་སྙིང་ག་མི་ཤིགས་པའི་མཛོད་དུ་སྦས་ཏེ་བརྗོད་བྲལ་ཀ་དག་གི་ངང་ལ་ཡུན་རིང་དུ་མཉམ་པར་བཞག་གོ   །འདིར་རྣལ་འབྱོར་མས་ཉམས་ལེན་མོ་ཁྲིད་ཀྱི་ཁྱད་པར་ལ།   རླུང་དང་གཏུམ་མོ་ཞུ་བདེའི་ཚུལ་རྣམས་གོང་དང་འདྲ་བ་ལས།   རང་ལུས་ཀྱི་སྐབས་ཡིད་དུ་འོང་བའི་དཔའ་བོ་མཛེས་ལྡན་མདུན་དུ་ཡོད་པར་དམིགས་པ་ལ་རྩལ་སྦྱར་ཞིང༌།   བོགས་འདོན་ཕོཤ་ {{TibChung|[14b]}} ཤཟི་སྦྱོར་བ་ལག་ཏུ་ལེན་ཚུལ་ནི་ཞལ་ལས་ཤེས།   ཐབས་ཀྱི་གྲོགས་བསྟེན་པ་སྐབས་སུ་བབས་ན།   ལམ་ལ་གནས་ཤིང་དམ་ཚིག་མ་ཉམས་པ་དང༌།   ཕྱི་ནང་གསང་བའི་མཚན་ཉིད་ཐབས་ལམ་གྱི་གཞུང་ནས་བཤད་པ་ལྟར་ལེགས་པར་ཚང་བའི་དཔའ་བོ་རབ་བླ་མའི་ཚུལ་དུ་དད་པ་དང་བཅས་ཏེ་བསྟེན།   ཡོན་ཏན་ཕྱེད་ཙམ་ལྡན་པ་འབྲིང་མཆེད་པོ་མཛའ་བོའི་ཚུལ་དུ་བརྩེ་གདུང་དང་བཅས་ཏེ་བསྟེན།   ཡོན་ཏན་སུམ་ཆ་ཙམ་ལྡན་པ་ཐ་མ་མཛེས་ལྡན་བྲན་གྱི་ཚུལ་དུ་བྱམས་སེམས་དང་བཅས་ཏེ་བསྟེན།   གང་ཡང་འདུ་ཤེས་གསུམ་དང་མཁས་པ་བཞིའི་གནད་ཀྱིས་བདེ་བ་ཉམས་དང་སྦྱར་ཏེ་ཚོད་འཛིན་གྱིན་དབབ།   ཕེབས་པ་ན་བཟུང་བའི་གནད་རབ་ལྟ་བས་འཛིན་པ་ཀ་དག་གི་ངོ་བོ་བདེ་སྟོང་ཐུག་ཕྲད་དུ་བསྐྱང༌།   འབྲིང་རླུང་སྦྱོར་གྱིས་འཛིན་པ་བར་རླུང་ཐད་ཀར་བརྒྱང་ལ།   དཔྲལ་བའི་དཀྱིལ་དུ་གཡུང་དྲུང་དམར་པོ་གཡས་སྐོར་དུ་འཁྱིལ་བ་ལ་དམིགས་པ་གཏད།   ཐ་མ་ཐེམ་བུས་བཟུང་བ་སྤུ་དཀར་ནག་མཚམས་ཀྱི་སུར་མ་ཞོཐ་པེཐ་ཀྱི་གསུང་པ་ཤཁ་མཟི་པཚུཕ་པོ་ཕ་ཡིར་ཚིར་གྱིས་མནན་པ་དང༌།   དམིགས་པ་སྤྱི་བོའི་བླ་མ་ཡབ་ཡུམ་སྦྱོར་བ་བྱེད་པ་ལ་གཏོད།    {{TibChung|[15a]}} དེས་བདེ་བ་འཛག་མེད་དུ་འཆིང༌།   དེ་ནས་འདྲེན་པ་དང་དགྲམ་པ་སོགས་རྩོལ་བ་མི་ཞན་པར་བྱ།   གཞན་ཡང་ལུས་ཀྱི་རྩ་མདུད་རྣམས་དྭངས་མས་གང་བའི་བདེ་བ་རྒྱས་ཆེས་པས་འཛག་པ་སྙམ་བྱེད་ན།   རླུང་སྟོང་འདྲེན་དྲག་པོའི་སྒོ་ནས་རྐང་མཐིལ་སྤྲད།   ལག་པ་སོར་མོ་བསྣོལ་བས་རྐང་མགོ་བསྡམས་ཏེ་རྐང་པས་མར་འཐེན།   ལག་པས་སྟེང་དུ་འཐེན།   རྒྱ་མཚོ་རི་རབ་ལ་སྦྱར།   ཨོལ་ཀོས་ཨོལ་མདུད་མནན།   ཉི་ཟླ་གྱེན་ལ་ལྡོག    །རོ་འཛིན་སྟེང་དུ་བསྐྱོད།   དམིགས་པ་བྷ་གའི་ནང་ནས་ཁམས་དཀར་དམར་འདྲེས་པ་དབུ་མའི་ལམ་བརྒྱུད་སྤྱི་བོའི་བླ་མ་ཡབ་ཡུམ་ལ་མཆོད་པའི་ཚུལ་གྱིས་ཕུལ་བར་བསམ་ཞིང་རླུང་ནང་དུ་བཟུང༌།   རྗེས་གདན་ལ་རྐང་པ་དང་འཕོང་རེ་མོས་སུ་བརྡབ་ཅིང་སྤྲུགས།   ཀ་དག་གི་ངང་ལ་ཡུན་རིང་དུ་བཞག    །དེས་བདེ་བ་ལུས་ལ་ཁྲེམས་ཤིང་བདེ་བའི་ཟུག་གཟེར་གྱི་ནད་ཞི་བར་ངེས་པ་སྟེ་མོ་ཁྲིད་ཉམས་ལེན་གྱི་ཁྱད་པར་རོ།   །ཡང་རང་གི་དྭངས་མ་འདྲེན་པ་ལ་དབང་ཐོབ་པའི་རྣལ་འབྱོར་པས་མཚན་ལྡན་ཤེས་རབ་མའི་ཉི་མ་དྲང་བའི་གདམས་པའང་མཆིས་མོད་ཀྱི།   དེང་སང་ {{TibChung|[15b]}} དཀྱུས་ཀྱིས་ཉམས་སུ་མི་ལོན་པས་འདིར་མ་སྤྲོས་ལ།   སྐབས་སུ་བབས་ན་མན་ངག་གཞན་ལས་རྟོགས་པར་བྱའོ།   །གསུམ་པ་གེགས་སེལ་བོགས་འདོན་གྱི་རིམ་པ་ལ་གསུམ།   རྟེན་གྱི་གེགས་སེལ།   ཉམས་པའི་གེགས་སེལ།   ཉམས་ལེན་གྱི་གེགས་སེལ་བོགས་འདོན་ནོ།   །དང་པོ་རྟེན་གྱི་གེགས་སེལ་ནི།   ཕྱག་རྒྱ་བརྟག་ནོར་བས་རིགས་ངན་ཤ་ཟ་མ།   ཁྲག་འཐུང་མ།   རྐང་འཇིབ་མ།   བཅུད་འཕྲོག་མ།   ཕྲ་མེན་མའི་རིག་སོགས་དང་འཕྲད་པ་དང༌།   ཕྱག་རྒྱ་སྔོན་ནས་རང་དམ་གཞན་ལ་དམ་ཚིག་ཉམས་པ་དང༌།   མཛེ་མོ་དང༌།   ཡུག་ས་མ་དང༌།   དམེ་མོ་ལ་སོགས་པ་བསྟེན་པས་རང་གི་ཐིག་ལེ་དང་བྱང་ཆུབ་ཀྱི་བར་གཅོད་དུ་འགྱུར།   ལྷ་སྲུང་ཁྲོས་ཤིང་འཁྲུགས་ཏེ་སྐྱོན་ཐམས་ཅད་སྐྱེད་པར་བྱེད་པས་ན་ཐོག་མ་ནས་ཕྱག་རྒྱ་བརྟག་པ་མ་ནོར་བ་གལ་ཤིན་ཏུ་ཆེ།   གལ་ཏེ་ནོར་བའམ།   ཐུག་ཕྲད་སྟབས་ཉེས་ཀྱིས་ཕྱག་རྒྱ་བསྟེན་ཉེས་ན་དེ་ཉིད་སྤང་སྟེ།   ཚོགས་སྐོང་།   ཞི་བའི་སྦྱིན་སྲེག ཡིག་བརྒྱའི་བཟླས་པ་སོགས་བཤགས་སྦྱང་དང་གྲིབ་སེལ་ལ་འབད།   སླར་ཕྱག་རྒྱ་མཚན་ལྡན་འབད་པས་བཙལ་ནས་ {{TibChung|[16a]}} ཉམས་ལེན་ལ་འབད་འབུང་སྔ་མ་བས་བདུན་འགྱུར་གྱིས་ཆེ་བ་བྱ་དགོས་སོ།   །གཉིས་པ་ཉམས་པའི་གེགས་སེལ་ནི།   རང་དང་རིག་མ་ལྷར་གསལ་མ་ཐེབས་པ་སོགས་འདུ་ཤེས་གསུམ་ལས་ཉམས་པས་ཐ་མལ་དུ་གྱུར་པ་དང༌།   དགའ་བཞིའི་ཡེ་ཤེས་ངོས་མ་ཟིན་པས་འདོད་ཆགས་རང་ག་མར་སོང་བ་དང༌།   འདོད་སྲེད་ཆགས་སྣང་འཚོ་བའི་བདེ་བ་ལ་བློ་ཕྱོགས་པས་ཟག་བཅས་འཇིག་རྟེན་པའི་བདེ་བར་སོང་བ་རྣམས་ནི་སྔར་ལྟར་བཤགས་སྡོམ་བྱ་ཞིང་ཉམས་ལེན་ལ་འབད།   ཁྱད་པར་བདེ་བའི་རྟེན་བྱང་སེམས་ཡིན་པས་ཡུངས་འབྲུ་ཙམ་ཞིག་ཀྱང་མ་ཉམས་པ་གལ་ཆེ།   བྱང་སེམས་ཐིག་ལེ་དེ་ལ་དྭངས་སྙིགས་གཉིས་ལས།   སྙིགས་མ་ནི་དངོས་སུ་འབྱུང་བའི་སྐྱ་ལྷུག་ལྷུག་འདི་ཡིན་ལ།   དྭངས་མ་ནི་དེའི་གསེབ་ན་དཀར་ལ་འཚེར་བ་ཉུང་འབྲུ་ཙམ་ལ་མིག་གི་འབྲས་བུ་འདྲ་བ་དྲུག་ཡོད།   དེ་ཉིད་མ་ཡི་ཁུ་བ་རྒྱ་སྐྱེགས་ཀྱི་མེ་ཏོག་གམ་ཟིལ་པ་འདྲ་བ་ཆུང་ཞིང་སྣུམ་པ་དང་འཕྲད་པས་སྲིད་པའི་ས་བོན་སྐྱེད་པར་བྱེད་དོ།   སྙིགས་མ་དཀར་ལྷུག་གེ་བ་དེ་ནི་མོའི་བྷ་ག་ནས་ཕྱིར་འབོའོ།   །རྣལ་འབྱོར་པས་ཐིག་ལེ་ཐམས་ཅད་བཟུང་དགོས་པ་ {{TibChung|[16b]}} ཡང་དྭངས་མ་དངུལ་ཆུ་ལྟ་བུ་དེ་ཤོར་གྱིས་དོགས་པས་སྙིགས་མའང་འཛིན་དགོས་པར་བྱུང་བའོ།   །གལ་ཏེ་སྙིགས་མ་ཤོར་བ་བྱུང་ན་ཡང་དྭངས་མ་བཟུང་བའི་དམིགས་པ་ནི།   སྨིན་མཚམས་མཛོད་སྤུ་གཡུང་དྲུང་དམར་པོ་གཡོན་དུ་འཁྱིལ་བའི་སྟེང་དུ་ཐིག་ལེ་དྲུག་མུ་ཏིག་བསྟར་ལ་བརྒྱུས་པ་ལྟར་འོད་འཚེར་རེ་འདུག་པ་ལ་ཤེས་པ་དྲག་ཏུ་གཏད།   དེས་སྙིགས་མ་ཉམས་ཀྱང་དྭངས་མ་མི་ཉམས་པའི་དགོས་པ་ཡོད།   དྭངས་མ་མ་ཉམས་པའི་རྟགས་ནི་སྣའི་རྩེ་མོ་ན་སྣུམ་ཞག་ཆིལ་ལེ་འདུག་པའོ།   །ཡབ་ཡུམ་གཉིས་ལོག་ལྟ་སོགས་དམ་ཚིག་ཉམས་ན་འཆོར་བས་ཁྲུས་དང་བསྐང་བཤགས་བྱ་ཞིང་དབང་བླང་།   གལ་ཏེ་ཡུལ་དུས་ནད་གདོན་ལ་སོགས་པས་དབང་མེད་དུ་ཉམས་ན་དེ་ཉིད་དུ་ཁས་བཏུང་བའམ་མདུན་ཐུར་གྱིས་དྲངས།   བཤགས་སྡོམ་གོང་ལྟར་བྱ།   ཁམས་གསོ་བ་དང༌།   ཐིག་ལེ་སྤེལ་བ་དང༌།   སྟོབས་བསྐྱེད་པ་རོ་ཙའི་རྫས་སྨན་གང་ཟབ་ཡུན་དུ་བསྟེན་ནོ།   །གསུམ་པ་ཉམས་ལེན་གྱི་གེགས་སེལ་ནི།   ཐིག་ལེ་འབེབས་དུས་མ་གཟབ་ན་མྱུར་དུ་འཆོར་བས་ཤིན་ཏུ་གཟབ།   སྙོམས་འཇུག་སྲུབ་སྦྱོར་དལ་བུས་ཚོད་འཛིན་གྱིས་བྱ།   བདེ་བ་མགོ་ {{TibChung|[17a]}} གཡོས་ཙམ་ན་ངལ་གསོ།   ཕྱག་རྒྱ་མ་རྩ་བཟང་ན་གཟབ་མི་དགོས་པར་ཤུགས་ཀྱིས་ལམ་དུ་འགྲོ་བ་འོང༌།   ཟིན་ནས་མྱུར་དུ་མ་ལྡོག་ན་ཆུ་དང་བསྡོངས་ནས་འཛག་པས་གྲང་ཤུམ་དང་མཁལ་སྐེད་ཀྱི་ནད་དུ་འགྱུར།   ལྡོག་ནས་མྱུར་དུ་མ་དྲང་ན་ནད་སྣ་ཚོགས་སུ་འགྱུར།   དྲངས་ནས་མྱུར་དུ་མ་བཀྲམ་ན་འབྲས་དང༌།   འབྲུམ་བུ་དང༌།   ཤུ་ཐོར་གྱི་ནད་དུ་འགྱུར།   ཡང་ན་མཛེ་དང་འདྲ་བ་དང༌།   མེ་དབལ་དང༌།   ཤ་བཀྲ་སོགས་འབྱུང༌།   རྩ་ལམ་བྱེར་ན་འབྲས་དང་སྐམ་ཤུ་སོགས་པགས་པའི་ནད་སྣ་ཚོགས་འབྱུང༌།   ཆུ་སོར་ལྷུང་ན་གྲང་བ་བསྐྱེད།   ཆུ་འགག་དང་གྲང་བསིལ་འབྱུང་ཞིང་ཐིག་ལེ་འཛག    །ཐིག་ལེ་སྐམ་པ་དང་རུལ་བར་གྱུར་ན་སྐྱོན་ཆེ་བས་སེལ་ཐབས་ལ་འབད་པ་གལ་ཆེ།   ཐིག་ལེ་རུལ་བའི་རྒྱུ་ནི་མ་ཁྲེམས་པ་ཡིན་པས་དེ་དབྱུང་བའི་ཐབས་རྩ་སྦྱོང་དང་སླར་ཐིག་ལེ་གསོ་བ་རོ་ཙའི་སྨན་ཡུན་རིང་དུ་བསྟེན།   ཐིག་ལེ་སྐམ་པ་ནི་ལུས་སྟོབས་ཉམས་པ་ལས་བྱུང་བས་བཅུད་ལེན་སྨན་མར་ལ་སོགས་པ་བསྟེན།   དང་པོ་གང་གི་གེགས་བྱུང་ཡང་དེའི་ཐད་སོར་སྟོང་ར་དང་ཁྲོལ་ཚག་བསྒོམ་ཞིང་རླུང་བུམ་ {{TibChung|[17b]}} པ་ཅན་བཟུང་ལ་ནད་ཐམས་ཅད་སྤྱི་བོ་དང་བ་སྤུའི་བུ་ག་རྣམས་ནས་དུ་བ་དང་རླངས་པའི་རྣམ་པས་སྔོ་དམར་ཕྱུར་ཕྱུར་ཐོན་པར་བསམ།   ཅིའི་ཕྱིར་ན་སྣང་སེམས་དོན་གཅིག་པའི་གནད་ཀྱིས་ཤིན་ཏུ་ཕན་པར་འགྱུར།   རླུང་བུམ་ཅན་གྱི་རྗེས་སུ་དམིགས་པ་གོང་ལྟར་བཅས་ངག་ཏུ་ཧ་ཧ་ཞེས་རླུང་ཕྱིར་འདོན་པ་མན་ངག་གོ   །སྤྱི་སྟོད་དུ་ཐིག་ལེའི་གེགས་གང་བྱུང་ཡང་གཏུམ་མོ་འབད་དེ་སྒོམ་པ་ཡུན་བསྲིང་ལ་བྱ།   སྨད་དུ་ཐིག་ལེའི་གེགས་གང་བྱུང་ཡང་ཕྱག་རྒྱ་མཚན་ལྡན་བསྟེན་ནས་སྙོམས་འཇུག་འཛིན་འདྲེན་འགྲེམས་པ་སོགས་ལ་འབད།   ཁྱད་པར་ཀ་དག་གི་གནད་མ་ཤེས་པར་དམིགས་པ་མཚན་མ་ཅན་ཁོ་ནས་འཛིན་འདྲེན་དགྲམ་གསུམ་གང་བྱས་ཀྱང་དམིགས་པ་གར་གཏད་དུ་རླུང་འདྲིལ།   དེར་ཐིག་ལེ་འདྲིལ་འགྲོ་བས་ཕུགས་སུ་ནད་དང་གེགས་མང་བའི་རྒྱུ་མཚན་དེ་ཡིན།   ཀ་དག་ལ་རྩེ་གཅིག་ཏུ་གནས་ནུས་ན་འཛིན་འདྲེན་འགྲེམས་གསུམ་རྩོལ་མེད་དུ་འགྲུབ་པའི་གནད་གཅིག་ཆོག་ཡིན་པས་ལྟ་བ་ཀ་དག་གི་ངང་ལ་མཉམ་པར་འཇོག་པ་གལ་ཆེ།   གཞན་ཡང་ཐིག་ལེ་རྒྱས་དྲག་པས་རྡོ་རྗེ་ཤིང་ལྟར་རེངས་ན་འཁྲུལ་འཁོར་མང་དུ་བྱས་པས་སེལ།   དེས་མ་སེལ་ན་ལས་ཀྱི་ཕྱག་རྒྱ་བསྟེན་ {{TibChung|[18a]}} ནས་འདྲེན་འགྲེམས་ཀྱི་འཁྲུལ་འཁོར་མང་དུ་བྱས་པས་སེལ།   དེས་མ་སེལ་ན་ཕྱག་རྒྱ་མ་བུ་མི་འབྱུང་བའི་དུས་སུ་བྷ་གའི་ནང་དུ་ཡི་དམ་གྱི་ལྷ་ཚོགས་དམིགས་ནས་དེ་ལ་མཆོད་པ་ཕུལ་བའི་ཚུལ་གྱིས་བཏང༌།   དེ་ནས་རིག་མའི་མཁའ་ནས་རབ་ལྕེས་ལེན།   འབྲིང་ཐུར་མས་བླངས་ཏེ་བདུད་རྩི་ཨ་མྲྀ་ཏ་དང་སྦྱར་ནས།   རྡོ་རྗེའི་ལུས་ཀྱི་ལྷ་གསལ་བཏབ་སྟེ་དེ་ལ་མཆོད་པའི་ཚུལ་གྱིས་ཁ་ནས་མིད།   དེ་ལྟར་བྱས་པས་ལྟུང་བ་མི་འབྱུང་ཞིང་ལུས་སྟོབས་མི་འཆོར་བའི་དགོས་པ་ཡོད།   ཡང་རྒྱལ་བསེན་འདྲེ་མོ་གདུག་པ་ཅན་གྱི་རིགས་དང༌།   གཞི་བདག་གི་གནོད་པས་ཐིག་ལེ་དངོས་སུ་འཆོར་ན།   གང་ཟག་ནུས་པ་ཅན་གྱི་བདུད་རྩི་དང༌།   པད་རག།   གུ་གུལ།   གོ་རོ་ཙ་ན།   ཉུངས་དཀར་བསྲེགས་པའི་ཐལ་བ།   ཨ་མྲྀ་ཏ།   ཁྱི་ནག་གི་བྲུན་རྣམས་དར་དམར་པོའི་ཁུད་དུ་བསྟུམས་ལ་སྔགས་འདི་གདབ།   ཨོཾ་བཛྲ་ཀརྨ་རཀྵ་ཛྭ་ལ་རྃ།   སརྦ་ཏྲི་ཁྲི་ཧུར་ཐུམ་རྦད།   ཅེས་བརྒྱའམ་སྟོང་བཟླས་པས་རྡོ་རྗེ་ལ་དཀྲི།   དེས་ཐུབ་པར་འགྱུར་ཏེ་ཤིན་ཏུ་ཟབ།   ཡང་ན་རྡོ་རྗེ་ལྕགས་ཀྱི་ཕུར་པ་མེ་འབར་བར་བསྒོམ་སྟེ།   རོ་གོས་དུམ་ {{TibChung|[18b]}} བུས་དྲིལ་ན་ཡང་ཐུབ།   ཡུམ་ལ་ཆགས་པའི་མདངས་ཀྱིས་འཆོར་ན།   ཡུམ་འོད་དུ་ཞུ་བ་གསང་བས་རྔུབས་ཏེ་བདག་གི་སྙིང་གར་ཐིམ།   ཆགས་པ་རང་སེམས་བདེ་སྟོང་ལས་ཕྱིན་མེད་པས་བདེན་མེད་སྒྱུ་མ་ལྟ་བུར་ཡང་ཡང་བསྒོམ་ཞིང༌།   ཆོས་ཉིད་ཀ་དག་གི་ངང་ལ་མཉམ་པར་བཞག་པས་སེལ་བར་འགྱུར།   ལུས་གྲང་བ་ཆེ་བས་འཆོར་ན།   རྩ་བ་ལྔའི་སྨན་མར་ལ་སུཀྨེལ་ཐུན་གཉིས།   པད་རག་ཐུན་གསུམ།   ཚ་བ་གསུམ་ཐུན་རེ་རེ།   དེ་རྣམས་བུ་རམ་དང་སྦྱར་ནས་ཟོས་ན་ཐུབ་ངེས།   ཡང་གསའ་ལ་སོགས་པ་གཅན་གཟན་དྲོད་ཅན་གྱི་པགས་པ་སྐེད་ལ་དཀྲིས་པས་ཀྱང་ཐུབ།   ཟས་ཀྱིས་འཆོར་ན་ཟས་ངན་པ་གང་གནོད་པ་སྤང༌།   རང་གི་བདུད་རྩི་བཟའ།   མེ་ཏོག་གཡུ་ལོའི་རྩ་བ་ཞིབ་ཏུ་བུ་བཏགས་ནས།   འོ་མར་བཏབ་སྟེ་ལྟོ་སྟོང་ལ་འཐུང༌།   སྦྲང་ལ་རྟག་ཏུ་ངུ་དང༌།   དབང་ལག་བཏབ་སྟེ་བཟའོ།   །ཐིག་ལེ་མི་ཉམས་ཤིང་མི་འཛག་པར་བྱེད་པ་ལ།   རྡོ་ཁབ་ལེན།   སྔོ་རྟག་ངུ།   མེ་ཏོག་གཡུ་ལོ།   རང་གི་ཐིག་ལེ་དང་བཞི་རའི་འོ་མ་ལ་སྦྱར་ནས་གདུ།   ལྟོ་སྟོང་ལ་འཐུང་ཞིང་རྐང་མཐིལ་ལ་བྱུག་པས་ཐིག་ལེ་ཉམས་པའི་གེགས་སེལ་བར་ {{TibChung|[19a]}} ངེས།   རྡོ་རྗེ་ལས་སུ་མི་རུང་བའི་གེགས་སེལ་ལ།   མོན་སྲན་འདྲེའུ།   གཟེ་མ།   ད་བྱིད་གསུམ་བ་དམར་པོའི་འོ་མ་ལ་སྦྱར་ནས་ལྟོ་སྟོང་ལ་འཐུང༌།   སྨན་དེ་གསུམ་ཕུག་རོན་གྱི་བྲུན་དང་སྦྱར་ཏེ་གསང་རྡོར་ལ་བྱུག་ནས་ལས་ལ་སྦྱར་བས་འགྲུབ།   ཡང་ལྕམ་པའི་རྩ་བ།   མོན་སྲན།   ཁྱི་དཀར་པོའི་རྡོ་རྗེ་སྐམ་པོ་དང་སྦྱར་ནས་རྡོ་རྗེ་ལ་ཟླ་བ་དྲུག་གི་བར་དུ་བྱུག་ན་ཤིན་ཏུ་ལས་སུ་རུང་བར་འགྱུར།   ཡང་བའི་འོ་མ་ཤིང་མངར་བུ་རམ་དང་སྦྱར་ཏེ་ལྟོ་སྟོང་ལ་འཐུང་ན་ནམ་དགོས་སུ་དོན་འགྲུབ།   ཡང་སྦྲང་རྒོད།   ཁྱི་དཀར་པོའི་རྡོ་རྗེ།   ཤིང་ཀུན་བཅས་མར་དཀར་ལ་སྦྱར་ཏེ།   ཨོཾ་བྷི་རི་དྷ་རི་ཙི་རི་ཨ་ཨ་ཤུམ་ཤིག་སྭཱ་ཧཱཿ ཞེས་ཅི་མང་བཟླས་པས་བསྔགས་ཏེ་གསང་རྡོར་ལ་བྱུག་ན་ལོ་དགུ་བཅུ་ལོན་པས་ཀྱང་མཚན་ལྡན་བརྒྱ་ཕྲག་རེ་ལ་སྤྱོད་པར་ནུས།   ཡང་ལུག་རུ་མེ་ཏོག་གྲིབ་བསྐམ་བྱས།   ཨ་རུ་ར་རྒྱ་གར་མ་དང་སྦྱར་ཏེ་ཞིབ་པར་བཏགས་པ་འོ་མ་དང་སྦྱར་ནས་ནངས་མ་རེ་བཞིན་བཏུང་ནའང་ཡོན་ཏན་གོང་དང་འདྲ།   ཡང་རྟག་ཏུ་ངུ༌།   ག་བུར།   བུ་རམ།   གུར་གུམ།   མཚལ།   ཤིང་མངར།    {{TibChung|[19b]}} ཕུག་རོན་གྱི་བྲུན།   ཁྱི་དཀར་པོའི་རྡོ་རྗེ།   ལྕམ་པ།   གཡེར་མ།   རྒྱ་ཚ་རྣམས་ཞིབ་པར་བཏུལ་བ་སྦྲང་རྒོད་དང་སྦྱར་ཏེ་རྡོ་རྗེ་ལ་བསྐུས་ནས་ཕྱག་རྒྱ་དང་མཉམ་དུ་སྦྱོར་ན་མོའི་སྙིང་ལ་ཟིན་ཏེ་འབྲལ་མི་ཕོད་དོ།   །ལྷག་པར་དུ་ཡང་ཚེའི་གེགས་སེལ་ལ།   རླུང་སྦྱོར་གྱིས་ཚེ་བསྲིང་བ་ནི།   དུས་ཐོ་རངས་སམ་དྲོ་གོང་ཟས་རྙིང་པ་ཞུ་ནས་གསར་པ་མ་ཟོས་ཀྱི་བར་ལ།   ལུས་ཆོས་བདུན་བཅའ།   མིག་ནམ་མཁའ་ལ་བལྟ།   འོག་རླུང་བསྐུམ།   སྟེང་རླུང་རྔུབ་བཞིན་མཆིལ་མ་མིད་པ་དང་ལྷན་དུ།   དམིགས་གནད་ཕྱིའི་ནམ་མཁའ་ཐམས་ཅད་སྔོ་མེ་རེ་རེ་བདག་གི་ལྟེ་བར་འདུས་པར་བསམ་ལ་ཁ་སྦྱོར་དུ་བཟུང༌།   ཡང་ཕྱིར་དལ་བུས་བཏང་སྟེ་སྔོ་ན་ར་ར་དུ་བ་ལྟར་སོང་བ་བར་སྣང་ལ་ཡལ་ཏེ་ཕྱིའི་ནམ་མཁའ་ཡངས་ཕྱད་དེ་སོང་བར་བསམ།   ཡང་རྔུབ་སྟེ་སྔར་བཞིན་རང་གི་ལྟེ་བར་འདུས་པས་སྔོ་མེ་རེ་རེ་ཁེངས་པ་ལ་སེམས་བཟུང༌།   དེ་ལྟར་ཡང་ཡང་སྦྱངས་པས་ཟས་ཀྱི་ཞེན་པ་ཆུང་བ་དང༌།   སེམས་བདེ་ཞིང་ཁམས་དྭངས་པ་དང༌།   རིག་པ་གསལ་ཞིང་བདེ་གསལ་མི་རྟོག་པའི་ཉམས་འཆར་བ་སོགས་ཐུན་མོང་གི་རྟགས་ཀྱང་དུ་མ་འབྱུང་ལ།   འདི་ {{TibChung|[20a]}} ནི་ཚེ་ཉི་ཟླ་དང་མཉམ་པའི་རླུང་སྦྱོར་ཏེ།   གནས་སྐབས་སུ་ཚེ་ཟད་པའི་འཆི་བ་ཡང་བསླུ་ཞིང༌།   ཚེ་རིང་བ་དང༌།   ནད་དཀོན་པ་དང༌།   སེམས་ཟག་པ་ལས་གྲོལ་བ་སོགས་ཕན་ཡོན་དཔག་ཏུ་མེད་དོ།   །ཁྱད་པར་ཞུ་བདེའི་སྒོ་ནས་ཚེ་བསྲིང་བ་ནི།   རྣལ་འབྱོར་པ་ལ་འཆི་ལྟས་བྱུང་ཚེ་འཆི་བསླུའི་གདམས་པ་གང་ཉམས་སུ་བླངས་ཀྱང་བསླུར་མི་བཏུབ་པའི་མཚན་མ་མཐོང་ན།   ཕྱག་རྒྱ་པདྨ་ཅན་ཡིན་ངེས་པ་བཙལ།   སྨིན་པར་བྱ་བ་སོགས་སྦྱོར་དངོས་ཀྱི་ལག་ལེན་གོང་ལྟར་ལ།   ཁྱད་པར་རང་རྡོ་རྗེ་གཞོན་ནུར་གསལ་བའི་ཐུགས་ཀར་ཡེ་ཤེས་སེམས་དཔའ་རྡོར་སེམས་ཚེ་བདག་འོད་ཀྱི་སྐུ་མི་ཤིགས་པའི་ཐིག་ལེའི་རང་བཞིན་ཅན་གྱི་ཐུགས་ཀར་མི་འགྱུར་བའི་སྲོག་ཧཱུྃ་མཐིང་ནག་གི་མཐར་འདྲེན་པའི་སྲོག་ཀཱི་ལ་ཡའི་སྔགས་ཕྲེང་དམར་པོས་བསྐོར་བ།   ཧཱུྃ་གི་ཁོག་པ་རུ་གནས་པའི་སྲོག་ཨ་ཡིག་དམར་པོའི་མཐར་བཏགས་པའི་སྲོག་རང་མིང་གིས་བསྐོར་བར་བསམ།   ཕྱག་རྒྱའི་གསང་བའི་རྩ་མན་ངག་ལྟར་བཙལ།   རྙེད་པ་ན་སྙོམས་པར་ཞུགས་ཏེ་ཕྱག་རྒྱའི་རྩ་སྣེ་རང་གི་རྡོ་རྗེའི་བུ་གར་ཚུད་ངེས་པར་བཅུག་ལ་དལ་བུས་བསྐྱོད་ཅིང་ {{TibChung|[20b]}} བདེ་བ་འབར་བའི་ཚེ།   བདེ་བའི་སྒྲས་བསྐུལ་བས་ས་བོན་སྔགས་ཕྲེང་དང་བཅས་པ་ལས་འོད་ཟེར་བསམ་གྱིས་མི་ཁྱབ་པ་སྣ་བུག་གི་རླུང་ཕྱིར་རྒྱུ་བ་དང་ལྷན་དུ་ཕྱིར་འཕྲོས།   སྣོད་བཅུད་ཐམས་ཅད་ཨ་དམར་པོ་དང་སྔགས་ཕྲེང་གི་རྣམ་པར་གྱུར་པ་བཀུག    །རང་གི་སྣ་བུག་གི་རླུང་ནང་དུ་འཇུག་པ་དང་ལྷན་ཅིག་འུབ་ཀྱིས་དྲངས་ནས་ས་བོན་སྔགས་ཕྲེང་མིང་ཡིག་རྣམས་ལ་སིབ་སིབ་ཐིམ་པར་བསམ་ཞིང༌།   ལུས་སྙོམས་འཇུག    །ངག་བཟླས་པ།   ཡིད་དམིགས་གནད་བཅས་རྣམ་གསུམ་ཡ་མ་བྲལ་བར་ཉམས་སུ་བླང་།   རེས་ཁམས་གསུམ་སྣོད་བཅུད་མ་ལུས་པ་རང་གི་ཁར་འུབ་ཀྱིས་རྔུབ་སྟེ་ལྟེ་བར་བསྐྱིལ་བར་བསམ་ལ་ཁ་རླུང་གིས་གང་བར་རྔུབས་ཤིང་སྙོམས་འཇུག་བྱ།   མཐར་བྱང་སེམས་འཕོ་མེད་དུ་བཅིང་ནས་འཛིན་འདྲེན་འགྲེམས་པའི་རླུང་དམིགས་འཁྲུལ་འཁོར་སོགས་སྔར་ལྟར་འབད།   ཐུན་མཚམས་རྣམས་སུ་རང་རྡོ་རྗེ་གཞོན་ནུར་གསལ་བའི་མིག་རྡོ་རྗེའི་མིག་ཏུ་བསམ་ལ་ནམ་མཁར་གཏད་དེ་དབྱིངས་རིག་བསྲེ།   དུས་རྒྱུན་དུ་སྙིང་དབུས་རླུང་སེམས་ཐིག་ལེ་དྭངས་མའི་ངོ་བོ་མི་ཤིགས་པའི་ཐིག་ལེ་འོད་འབར་བ་ལ་མ་ཡེངས་པར་སེམས་གཏད།    {{TibChung|[21a]}} ནས་མཉམ་པར་བཞག་གོ   །འདི་ལྟར་ཉམས་སུ་བླངས་པས་ངེས་པར་འཆི་བདག་གི་བདུད་ལས་རྒྱལ་ཏེ་རྡོ་རྗེ་གཞོན་ནུའི་ཚེ་དང་ལང་ཚོ་འགྲུབ་པར་འགྱུར་རོ།   །སྤྱིར་གསང་སྔགས་ཟབ་མོ་སྒྲུབ་པའི་སྐབས་སུ་གཙོ་བོར་དུས་རྟག་ཏུ་སྟོན་པ་རྡོ་རྗེ་སློབ་དཔོན་གྱི་ཐུགས་མཉེས་ཤིང༌།   གསང་བའི་དམ་ཚིག་གི་སྤང་བླང་མཐའ་དག་ཚུལ་བཞིན་དུ་འབད་པས་གེགས་དང་གོལ་ས་ཐམས་ཅད་ཤུགས་ཀྱིས་ཉུང་ཞིང༌།   ཉམས་ལེན་ལ་བོགས་ཐོན་པར་འགྱུར་བ་ཡིན་ལ།   དེ་ལས་ལྡོག་ན་དངོས་གྲུབ་མེད་ཀྱི་སྟེང་དུ་བར་ཆད་དང་ཉེས་པ་དུ་མའི་རྒྱུ་རུ་འགྲོ་བ་དང༌།   ཁྱད་པར་ཐབས་ལམ་གྱི་མན་ངག་དང་ལག་ལེན་འདི་དག་ཤིན་ཏུ་གསང་བའི་སྒོ་ནས།   སྐྱེ་བོའི་ཡ་གའི་གནས་དང༌།   བླ་མ་མཆེད་གྲོགས་ཀྱི་ཞབས་འདྲེན་དུ་མི་འགྲོ་བ་གཅེས་ཏེ།   དུག་གིས་ལྟོ་ཡོང་བ་རྨ་བྱ་ལས་མེད་པས་ཀུན་ལ་བསྟན་པར་མི་བྱ།   གལ་ཏེ་སྣོད་མིན་ལ་ཚིག་ཙམ་ཟག་ཀྱང་སྔགས་བདག་སྲུང་མའི་ཚོགས་ཀྱིས་བཀའ་ཆད་དྲག་པོ་འབེབས་པར་གདོན་མི་ཟ་བ་ཡིན་ནོ།   །དེ་ལྟར་ཕོ་ཉའི་ལམ་ལས་འབར་བཞུ་ཁྱད་པར་བའི་ཉམས་ལེན་ལ་གནད་དུ་བསྣུན་ {{TibChung|[21b]}}  པས་འབྱོངས་པའི་རྟགས་ཀྱང༌།   ཐུན་མོང་དུ་ལུས་ལ་བདེ་དྲོད་འབར།   ནད་དཀོན་ཅིང་རྒས་པ་སྲ།   བཀྲག་མདངས་དང་གཟི་བརྗིད་ཆེ།   སྣང་བ་ཟིལ་གྱིས་ནོན།   ལྷ་འདྲེའི་གནོད་པས་མི་ཚུགས།   འབར་བ་གསུམ་དང་འདུ་བ་གསུམ་འབད་མེད་དུ་འབྱུང༌།   ཕྲིན་ལས་གང་བརྩམ་པ་འགྲུབ།   འབྱུང་བ་ལྔ་ལ་རང་དབང་སྒྱུར།   ངག་བདེན་ཚིག་འགྲུབ་པས་མཐུ་བཙན།   རྐྱེན་གང་ལ་བརྟེན་ཀྱང་བདེ་བར་འཆར།   ཤེས་རབ་ཕྱོགས་མེད་དུ་རྒྱས།   འཁྲུལ་རྟོག་དག་ནས་ཟག་མེད་ཀྱི་ཡེ་ཤེས་མངོན་དུ་མཐོང༌།   གསང་སྤྱོད་ཀྱི་འདུ་བར་འབྲེལ་ཚད་ཀུན་ཀྱང་ཕྱི་རོལ་གནས་ཡུལ་གྱི་ཞིང་ན་རོལ་པའི་དཔའ་བོ་རྣལ་འབྱོར་མ་ལྷན་སྐྱེས་མཁའ་འགྲོའི་ཚོགས་དང་སྐལ་བ་མཉམ་པར་འགྱུར་བ་དང༌།   མཆོག་གི་དངོས་གྲུབ་ཟག་མེད་ཀྱི་བདེ་བའི་མཐར་ཐུག་པ་ལྷན་ཅིག་སྐྱེས་པའི་ཡེ་ཤེས་ཆོས་ཀྱི་སྐུ་འཐོབ་པ་སྟེ།   དེའང་བརྩོན་པ་རབ་ཚེ་འདིར་རྡོ་རྗེའི་སྐུ་འགྲུབ།   འབྲིང་བར་དོ་ནས་མཁའ་སྤྱོད་དུ་འགྲོ།   ཐ་མ་སྐྱེ་བ་གཅིག་གིས་འཚང་རྒྱ།   ཡང་ཐ་དམ་ཚིག་མ་ཉམས་ན་སྐྱེ་བ་བདུན་ནས་ཟུང་འཇུག་གི་གོ་འཕང་མཐར་ཕྱིན་པར་འགྱུར་རོ།   །གསང་སྔགས་མྱུར་ {{TibChung|[22a]}} བདེའི་ལམ་ཟབ་བདུད་རྩིའི་བཅུད།   །སྐལ་དམན་ཡི་དྭགས་མགྲིན་པར་ཚུད་དཀའ་ཡང༌།   །མོས་པ་ལམ་བྱེད་སྲིད་མཐའ་མ་བཀག་ཕྱིར།   །དཔེ་ཁྲིད་རྒྱུན་ཙམ་གནས་པར་རེ་བློས་སྤེལ།   །དུས་ཀྱི་མཐར་ཡང་རྡོ་རྗེའི་ལམ་མཆོག་གང༌།   །སྐལ་བཟང་འཇུག་ངོགས་གཅིག་ཏུ་ཡོངས་སྣང་ཞིང༌།   །དེ་ལས་ཁ་སྦྱོར་ཡེ་ཤེས་བདེ་བ་ཆེའི།   །རྒྱལ་ཐབས་རང་དབང་ཉིད་དུ་བསྒྱུར་བྱེད་ཤོག    །ཅེས་ཕུར་པ་བདུད་འཇོམས་གནམ་ལྕགས་སྤུ་གྲིའི་ཐལ་འབྱིན་གྱི་དགོངས་པ་རྣམ་པ་བཞི་ལས་བྱང་སེམས་ཕུར་བུའི་མན་ངག་གི་སྦས་དོན་ཟབ་ཁྲིད་ལྷུག་པར་བཀྲལ་བ་རིག་འཛིན་ཌཱ་ཀིའི་ཐུགས་བཅུད་བཀའ་རྒྱ་མ་འདི་ནི།   རྒྱ་གར་དབང་ཕྱོགས་ཀྱི་སྔགས་བཙུན་ངག་དབང་ཚུལ་ཁྲིམས་དང༌།   མོན་གྱི་སྔགས་སྟོན་པདྨ་དབང་ཆེན་སོགས་དོན་གཉེར་ཅན་དུ་མས་སྔ་ཕྱིར་ནན་ཏན་ཆེན་པོས་བསྐུལ་བ་ལ་བརྟེན་ནས།   ཐབས་ལམ་གསང་བའི་ཟབ་གནད་རྣམས་ལ་མྱོང་གོམས་ཀྱི་བག་ཆགས་སད་པས་མི་དང་མི་མ་ཡིན་པའི་གཞོན་ནུ་མའི་ཚོགས་དང་དགའ་མགུར་རྩེ་བའི་བརྟུལ་ཞུགས་ཀྱི་སྤོབས་པ་དགེ་བ་འཇིགས་བྲལ་ {{TibChung|[22b]}} ཆགས་ཆེན་དགའ་བའི་ལང་ཚོ་རྡོ་རྗེ་སྙེམས་པའི་སྡེའམ།   ཡོངས་གྲགས་སུ་བདུད་འཇོམས་སྤྲུལ་སྐུར་བརྗོད་པའི་རྗེ་རིགས་ཀྱི་སྔགས་རྒན་ཀུན་ཏུ་རྒྱུས།   ཡུལ་རྒྱ་བོད་མཚམས་ཀྱི་རོང་ཆེན་ཀ་པཱ་ལ་སྤུངས་པར་གྲགས་པའི་རི་སུལ་ཙན་དན་ལྗོན་བཟང་དཀྲིགས་པའི་སྐྱེད་མོས་ཚལ་གྱི་སྨན་ལྗོངས་མེ་ཏོག་བཀྲ་བའི་ལྡིང་ཁང་དུ།   རང་ལོ་ལྔ་བཅུ་ང་ལྔར་སོན་པ་ནོར་འཛིན་ཁམས་ཀྱིས་སྒེག་པའི་ནོར་སྲུང་གི་ལོ་སྟོན་གྱི་ཟླ་བ་འབྲས་བུ་བཅུད་དུ་སྨིན་པའི་དུས་ཀྱི་ཆར་ལེགས་པར་སྦྱར་བ་ལས།   ཐོག་མའི་ཡི་གེ་པ་ནི་མོན་ཁ་ཀུ་རེ་ལུང་གི་སྒོམ་ཆེན་པདྨ་ཀློང་གྲོལ་གྱིས་བགྱིས་པའོ།   །འདིས་ཀྱང་ཟབ་ལམ་སྙིང་པོའི་རིང་ལུགས་ཡུན་དུ་རྟག་ཅིང་སྐལ་པ་ཅན་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག    །སརྦ་དཱ་མངྒ་ལཾ།   །འདི་ཉིད་མན་ངག་ཚུལ་བཞིན་མ་ཐོབ་ཅིང་དམ་ཉམས་དཔེ་ཁྱེར་མཁན་གྱིས་བལྟས་ན་དེའི་སྙིང་ཁྲག་སྔགས་བདག་སྲུང་མའི་ཚོགས་ཀྱིས་དཔའ་སྐྱེམས་སུ་རོལ་ཅིག་ས་མ་ཡ།།   །།}}
</onlyinclude>
{{TsagliCall}}
<headertabs/>