View source for DJYD-KABUM-14-PHA-024

{{Text
|classification=Tibetan Publications
|subclass=Tibetan Texts
|fulltitletib=གཏེར་གསར་ཕུར་པ་ཡང་གསང་བཅུད་དྲིལ་གྱི་ཆ་ལག་ཚེ་སྒྲུབ་འཆི་མེད་སྲོག་ཐིག་གི་ཚེ་དབང་སྙིང་པོར་བསྡུས་པ་འཆི་མེད་ཆུ་རྒྱུན།
|fulltitle=gter gsar phur pa yang gsang bcud dril gyi cha lag tshe sgrub 'chi med srog thig gi tshe dbang snying por bsdus pa 'chi med chu rgyun
|citation=[[Karmapa, 15th]]. ''Gter gsar phur pa yang gsang bcud dril gyi cha lag tshe sgrub 'chi med srog thig gi tshe dbang snying por bsdus pa 'chi med chu rgyun''. In ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 14: 407-429. Kalimpong: Dupjung Lama, 1979-1985.
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|collectiontitle=bdud 'joms rin po che bka' 'bum
|author=Karmapa, 15th
|sourcerevealer=zil gnon nam mkha'i rdo rje
|tibgenre=Longevity Empowerment - tshe dbang
|terma=Yes
|deity=tshe dpag med
|cycle=tshe sgrub 'chi med srog thig
|cycletib=ཚེ་སྒྲུབ་འཆི་མེད་སྲོག་ཐིག་
|parentcycle=dpal rdo rje phur pa yang gsang 'phrin las bcud dril
|parentcycletib=དཔལ་རྡོ་རྗེ་ཕུར་པ་ཡང་གསང་འཕྲིན་ལས་བཅུད་དྲིལ་
|language=Tibetan
|volumenumber=14
|volnumtib=༡༤
|volyigtib=ཕ་
|totalvolumes=25
|textnuminvol=024
|pagenumbers=407-429
|totalpages=23
|beginfolioline=1a1
|endfolioline=12a2
|totalfolios=12
|multivolumework=No
|rectonotes=tshe dbang
|versonotes='chi med srog thig
|colophontib=།ཅེས་པའང་གཏེར་འབྱིན་བླ་མ་གང་ནས་འདི་ལྟར་བྲིས་ཤིག་པའི་བསྐུལ་མ་རིང་མོའི་དུས་ནས་ནན་ཆགས་སུ་མཛད་པའི་ཕྱིར།   དུས་ཞབས་ཀྱི་སྔགས་བན་རང་བྱུང་ལྷན་སྐྱེས་རྡོ་རྗེའམ་མིང་གཞན་མཁའ་ཁྱབ་རྡོ་རྗེར་འབོད་པས་བག་ཡོད་ཀྱི་ལོའི་དཔྱིད་འབྲིང་དབོས་ཉ་བ་རྡོ་རྗེ་གདན་བཞིའི་བརྡ་ལས་བཟང་པོར་འབོད་པའི་ཟླ་བའི་ཡར་ཚེས་ཀྱི་རྒྱལ་བ་དང་པོའི་ཐུན་གསེང་གཅིག་ལ་ཤར་མར་བྲིས་པ་ཨ་ཡུ་སིདྡྷི་རསྟུ།།
|colophonwylie=ces pa'ang gter 'byin bla ma gang nas 'di ltar bris shig pa'i bskul ma ring mo'i dus nas nan chags su mdzad pa'i phyir/___dus zhabs kyi sngags ban rang byung lhan skyes rdo rje'am ming gzhan mkha' khyab rdo rjer 'bod pas bag yod kyi lo'i dpyid 'bring dbos nya ba rdo rje gdan bzhi'i brda las bzang por 'bod pa'i zla ba'i yar tshes kyi rgyal ba dang po'i thun gseng gcig la shar mar bris pa a yu sid+d+hi rastu//
|pdflink=File:DJYD-KABUM-14-PHA-024.pdf
|authortib=མཁའ་ཁྱབ་རྡོ་རྗེ་
|sourcerevealertib=ཟིལ་གནོན་ནམ་མཁའི་རྡོ་རྗེ་
|volumeLetter=PHA
|InitCategories=Dudjom Tersar Project; DJYD-KABUM-Volume-14-PHA
}}
<h1>Tibetan Text</h1>
<onlyinclude>
{{TibP|༄༅ །   །གཏེར་གསར་ཕུར་པ་ཡང་གསང་བཅུད་དྲིལ་གྱི་ཆ་ལག་ཚེ་སྒྲུབ་འཆི་མེད་སྲོག་ཐིག་གི་ཚེ་དབང་སྙིང་པོར་བསྡུས་པ་འཆི་མེད་ཆུ་རྒྱུན་ཞེས་བྱ་བ་བཞུགས་སོ།   །


༄༅ །   །ཨོཾ་སྭསྟི།   གཉུག་མ་མི་ཤིགས་རྡོ་རྗེའི་གཟིས།   །འཆི་བའི་མུན་པ་དྲུང་ཕྱུངས་ནས།   །ཚེ་ཡི་པད་ཚལ་རྒྱས་མཛད་མགོན།   །གར་དབང་ཚེ་དཔག་མེད་ལ་འདུད།   །{{TibChung|འདིར་གཏེར་གསར་ཕུར་པའི་ཆ་ལག་ཚེ་སྒྲུབ་ཀྱི་ཚེ་དབང་སྙིང་པོར་བསྡུས་པ་སྤེལ་བ་ལ་གསུམ།   སྦྱོར་དངོས་རྗེས་རིམ་མོ།   །དང་པོ་ནི།   སྟེགས་བུའི་ཁར་རས་བྲིས་སམ་མ་འབྱོར་ན་མཎྜལ་མེ་ཏོག་གི་ཚོམ་བུ་ལྷ་གྲངས་བཀོད་པའི་སྟེང་ཁྲིའུའི་ཁར་བུམ་པ་བཅུད་ལྡན་སོ་ལྔའི་རྫས་སྦྱར་བར་ཁ་རྒྱན་མགུལ་ཆིངས་གཟུངས་རྡོར་སོགས་ཆས་འཛོམ།   རྒྱབ་ཏུ་གཙོ་སྐུ་དང་གླེགས་བམ་མམ་སྔགས་བྱང་།   ཚེ་གཏོར།   ཚེ་མདའ།   གཡས་སུ་ཚེ་རིལ།   གཡོན་དུ་ཚེ་ཆང་།   འབྱུང་ལྔའི་གཟུགས་བྲིས་པའི་ཙ་ཀླི་རྣམས་དང་།   སྤྲོ་ན་བླ་ཚེ་སྲོག་དབུགས་རྟེན་རྒྱལ་མཚན།}}  {{TibChung|[2a]}}  {{TibChung|ཉི་ཟླའི་གྭའུ།   རྡོ་རྗེ།   གཡུང་དྲུང་བཅས་བྲིས་འབུར་གང་རུང་།   མདུན་དུ་མཆོད་གཏོར།   སྨན་རཀ །   ཉེར་སྤྱོད།   ཚོགས།   འབུལ་གཏོར།   གཞན་ཡང་མཎྜལ་མེ་ཏོག་ལས་བུམ་རྡོར་དྲིལ་ཌཱ་མ་རུ་སོགས་ཉེར་མཁོའི་ཡོ་བྱད་རྣམས་འདུ་བྱ་ཞིང་བཀོད་ལེགས་སུ་བཤམ་མོ།   །གཉིས་པ་ནི།   ཕྲིན་ལས་སྔོན་འགྲོ་ནས་བརྩམ་བདག་མདུན་དབྱེར་མེད་ཀྱི་བསྐྱེད་རིམ་སྤྱན་འདྲེན་བཞུགས་ཕྱག་མཆོད་བསྟོད་བཅས་མཐར་ཆགས་སུ་བཏང་།   བཟླས་པའི་སྐབས་ཛཔྲ་ཁང་ཕྱེས་ཏེ་བསྙེན་སྒྲུབ་ལས་སྦྱོར་གྱི་སྤྲོ་བསྡུའི་བཟླས་པ།   ཚེ་འགུགས་བསྟིམ་མཐར་མཆོད་བསྟོད་མདོར་བསྡུས་དང་།   སྤྲོ་ན་སྲུང་མའི་གཏོར་འབུལ།   ཚོགས་མཆོད་བསྟབ་པའི་བར་དུ་བཏང་།   ལས་བུམ་ནུས་ལྡན་དུ་བསྒྲུབས་ནས།   སློབ་མ་རྣམས་ཕྱི་རོལ་དུ་ཁྲུས་ནས་དབྱུང་།   ཕྱག་བཅས་གྲལ་དུ་འཁོད་པ་དང་ལས་}}   {{TibChung|[2b]}}  {{TibChung|བྱང་བཞིན་བགེགས་གཏོར་བསྔོ་ཞིང་བགེགས་བསྐྲད།   སྲུང་འཁོར་བརྟན་པོར་བསྒོམ།   ལས་རྡོར་པས་མེ་ཏོག་བཀྱེ་བསྡུ་ཟིན་ནས།}}  འོ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་མིན་གྱི་འཆི་བ་ལ་སོགས་པའི་འཇིགས་དང་སྡུག་བསྔལ་ཐམས་ཅད་ལས་བསྒྲལ་ཏེ་ཁྱབ་བདག་བླ་མ་འཆི་མེད་གར་གྱི་དབང་པོའི་གོ་འཕང་ལ་དུས་མྱུར་བ་ཉིད་དུ་འགོད་པར་བྱ།   དེ་ཡི་ཆེད་དུ་བྱང་ཆུབ་སྒྲུབ་པའི་ལམ་གྱི་གཞི་རྟེན་འཆི་མེད་ཀྱི་གོ་འཕང་རིན་པོ་ཆེ་འཐོབ་པར་བྱ་པའི་ཕྱིར་རྡོ་རྗེ་ཚེ་ཡི་དབང་བསྐུར་ཟབ་མོ་ཞུ་བར་བགྱིའོ་སྙམ་པའི་སེམས་བསྐྱེད་པ་གསལ་བཏབ་སྟེ་གསན་འཚལ།   དེ་ཡང་ཁམས་གསུམ་པའི་འགྲོ་བ་མཐའ་དག་སྐྱེས་པའི་མཐའ་མ་འཆི་བ་ལས་མ་འདས་ཤིང་།   དེའང་འདོད་པ་དང་གཟུགས་ཀྱི་ལྷ་སོགས་དང་།   གླིང་གཞན་གྱི་མི་རྣམས་ཕལ་ཆེར་ལ་ཚེ་ཚད་ངེས་པ་ཅན་དུ་ཡོད་ཀྱང་།   རང་ཅག་འཛམ་གླིང་གི་མི་རྣམས་ཚེ་ཚད་མ་ངེས་པས།   སོ་སོ་ལ་ཚེ་ཡི་དབང་སྐལ་ཇི་ཙམ་ཡོད་པ་དེ་ཉིད་ཀྱང་མཐར་མ་ཕྱིན་པར།   གློ་བུར་གྱི་རྐྱེན་གྱིས་བསྐྱེད་པས་ཚེ་ཉམས་པ་དང་།   གུད་ཅིང་ཟད་པ་དང་།   ཡར་ཞིང་འདྲོགས་པ།   འཐོར་ཞིང་ཆད་པ།   བྱད་ཕུར་རྦོད་གཏོང་གིས་བཅོམ་པ།   འདྲེ་གདོན་གྱིས་བརྐུས་འཕྲོག་ཁྱེར་བ་ {{TibChung|[3a]}} སོགས་དང་།   གཞན་ཡང་དུས་མིན་དུ་འཆི་བའི་རྐྱེན་དྲག་པོ་དུ་མས་གློ་བུར་དུ་ཚེ་ཡི་དུས་བྱེད་པར་འགྱུར་བ་དེ་ཉིད་ལས་སྐྱོབ་པའི་ཆེད་ཚེ་བསྲིང་བའི་ཐབས་ཁོ་ན་ལ་འབད་པ་གལ་ཆེ་སྟེ།   ཇི་སྐད་དུ།   འཁོར་བར་སྲོག་ལས་གཅེས་པ་ནི།   །འགའ་ཡང་ཡོད་པར་མ་མཐོང་བས།   །དེས་ན་མྱུར་ཏུ་ཐབས་མང་པོས།   །འཆི་བ་བསླུ་བར་ཡང་དག་སྦྱོར།   །ཞེས་གསུངས་པ་ལྟར་ལགས་ལ།   ཁྱད་པར་ཆོས་ལྡན་གྱི་ལུས་འདི་ཉིད་ཡུན་དུ་འཚོ་བ་ནི་འདི་དང་གཏན་གྱི་དོན་གཉིས་མཐའ་དག་བསྒྲུབ་པའི་གཞི་རྟེན་གཅིག་པུར་གྱུར་པས་ན་ཅི་ནས་ཀྱང་ཚེ་བསྲིང་བའི་ཐབས་ལ་བརྩོན་དགོས་ཤིང་།   དེའི་ཐབས་ཚུལ་གྱི་བྱེ་བྲག་ཏུ་མ་ཞིག་ཕྱི་ནང་ཀུན་ལ་འབྱུང་མོད་ཀྱང་རྒྱུ་རྐྱེན་གཉིས་སུ་འདུ་སྟེ།   རྒྱུ་ནི་སྔོན་དང་ད་ལྟར་སྐྱེ་འགྲོ་གཞན་གྱི་སྲོག་བཅད་པ་ལས་བྱུང་བའི་འབྲས་བུས་རང་ཉིད་ཚེ་ཐུང་བར་འགྱུར་བས་དེའི་གཉེན་པོར་སྲོག་གཅོད་པ་སྤོང་ཞིང་གཞན་ཡང་སྤོངས་སུ་གཞུག་པ་དང་།   ཚེ་ཐར་སྲོག་བསླུ་སོགས་ལ་འབད་དགོས་པ་ལགས།   རྐྱེན་གྱི་སྒོ་ནས་ཚེ་བསྲིང་བའི་ཐབས་མཆོག་ཏུ་གྱུར་པ་ནི་བདེ་བར་གཤེགས་པའི་ཐུགས་རྗེ་རྨད་དུ་བྱུང་བའི་འཕྲིན་ལས་ཀྱི་སྒོ་ནས་འཕོ་བཅས་ {{TibChung|[3b]}} ཀྱི་ཚེ་ལ་འཕོ་བྲལ་འཆི་མེད་རྡོ་རྗེའི་ཕྱག་རྒྱས་བཏབ་སྟེ་ཐུན་མཆོག་གི་དངོས་གྲུབ་སྟན་ཐོག་གཅིག་ལ་རང་རང་གི་དད་དམ་མོས་བརྩོན་དང་མཚུངས་པར་ལོ་ཟླ་ཙམ་གྱིས་སྦྱིན་པར་ནུས་པ་རྣམས་ཡིན་ལ།   དེ་ལྟ་བུའི་ཐབས་ཚུལ་བཀའ་གཏེར་དག་སྣང་གི་བཀའ་བབ་སོ་སོས་ལས་བྱོན་པ་དུ་མ་ཞིག་མཆིས་པ་ལས།   ད་ལམ་གྱི་སྐབས་སུ་བབས་པ་རྡོ་རྗེ་ཕུར་པ་ཡང་གསང་བཅུད་དྲིལ་གྱི་ཆ་ལག་ཚེའི་སྒྲུབ་ཐབས་འཆི་མེད་རིག་འཛིན་སྲོག་ཐིག་གི་སྨིན་བྱེད་ཟབ་མོ་བསྒྲུབ་པའི་ཐོག་མར་ལོ་རྒྱུས་ཅུང་ཟད་ཅིག་བརྗོད་ན།   རང་སྣང་རྣམ་དག་རྒྱ་ཆད་ཕྱོགས་ལྷུང་བྲལ་བའི་ཞིང་དུ་ཐོག་མའི་མགོན་པོ་ཀུན་ཏུ་བཟང་པོ་འཆི་མེད་འོད་མི་འགྱུར་བས།   རང་རྩལ་རིག་པའི་འཁོར་ལ་བརྗོད་མེད་རང་ཤར་གྱི་དགོངས་པས་འཆི་མེད་གཉུག་མི་ཏནྟྲ་དུས་བཞི་མཉམ་པ་ཉིད་དུ་བསྟན་པ་ནི་རྒྱལ་བ་དགོངས་པའི་བརྒྱུད་པ་དང་།   འོག་མིན་པདྨ་དབང་ཆེན་རོལ་པའི་དུར་ཁྲོད་ཆེན་པོར་ཀུན་བཟང་ཞི་ཁྲོ་རིགས་ལྔའི་སྟོན་པས་འཁོར་ཉིད་ལས་མི་གཞན་པའི་རིག་འཛིན་རིགས་ལྔའི་མཁའ་འགྲོ་འབུམ་ཕྲག་ཡངས་པའི་ཚོགས་དང་བཅས་པ་རྣམས་ལ་འཆི་མེད་རྡོ་རྗེ་ཚེའི་ཏནྟྲ་བརྡ་ཐབས་བྱིན་རླབས་ཀྱི་སྒོ་ནས་བསྟན་པ་ནི་རིག་འཛིན་བརྡའི་བརྒྱུད་པ།   འགྲོ་འདུལ་འཆི་མེད་གྲུབ་ {{TibChung|[4a]}} པའི་གནས་མཆོག་མཱ་ར་ཏི་ཀར་རང་བྱུང་པདྨ་ཡབ་ཡུམ་གྱི་མདུན་དུ་བཅོམ་ལྡན་མགོན་པོ་ཚེ་དཔག་མེད་པ་དངོས་སུ་བྱོན་ནས་སྐྱེ་འཆི་མེད་པར་དབང་བསྐུར།   བསྒྲེས་རྒུད་བྲལ་བར་བྱིན་གྱིས་བརླབས་ཤིང་།   རྡོ་རྗེ་ཚེ་ཡི་ཏནྟྲ་ཆེན་པོར་བཤད།   སླར་བོད་ཡུལ་དབུས་ཀྱི་སྒྲུབ་གནས་གཡའ་མ་ལུང་ལྷོ་བྲག་མཁར་ཆུ་སོགས་དང་ཁྱད་པར་སེང་གེ་རྫོང་དང་དཔལ་གྱི་སྟག་ཚང་རྣམས་སུ་འཆི་མེད་བླ་མ་པདྨ་ཀ་རས་ལས་ཅན་རྗེ་འབངས་རྣམས་ལ་རྡོ་རྗེ་ཚེའི་དབང་བསྐུར་རྒྱུད་བཤད་མན་ངག་ཚངས་སྤྲུགས་སུ་བསྟན་པ་ནི་གང་ཟག་སྙན་ཁུང་གི་བརྒྱུད་པ།   སྐབས་དེར་གུ་རུ་ཡབ་ཡུམ་རྗེ་འབངས་དང་བཅས་པས་མ་འོངས་པའི་སྐྱེ་འགྲོ་རྣམས་ལ་ཐུགས་བརྩེ་བ་ཆེན་པོས་ཚེ་རྒྱུད་སྒྲུབ་ཐབས་དམ་རྫས་སོགས་སོ་སོར་མི་འཇིགས་པའི་ཕྱག་རྒྱས་བཏབ་སྟེ་ཟབ་མོའི་གཏེར་དུ་བསྩལ་བ་ཉིད།   དེང་སང་འདོན་པའི་དུས་ལ་བབས་པ་ན་རྣམ་སྣང་ལོ་ཆེན་བཻ་རོ་ཙ་ན་དང་རྡོ་རྗེ་བདུད་འཇོམས་ཟུང་གི་རྣམ་འཕྲུལ་རིག་འཛིན་ཆེན་པོ་ཟིལ་གནོན་ནམ་མཁའི་རྡོ་རྗེས་ལྷོ་ཕྱོགས་མོན་ཁ་སེང་རྫོང་གི་མཚོ་རྒྱལ་གསང་ཕུག་ནས།   ཤིང་འབྲུག་གི་ལོར་སྐལ་ལྡན་གྱི་འདུས་པ་དུ་མའི་མིག་ལམ་དུ་རིག་འཛིན་མཁའ་འགྲོས་བྱིན་གྱིས་བརླབས་པའི་ལྟས་དང་།    {{TibChung|[4b]}} གཏེར་སྲུང་ཆོས་སྐྱོང་གིས་འཕྲིན་ལས་སྒྲུབ་པའི་མཚན་མའི་ཆོ་འཕྲུལ་དང་ལྡན་པར་སྤྱན་དྲངས་ཤིང་།   དག་པའི་སྣང་བར་གུ་རུ་ཡབ་ཡུམ་རྗེ་འབངས་དང་བཅས་པས་རྗེས་སུ་བཟུང་ནས་བྱིན་བརླབས་དབང་བསྐུར་རྫོགས་པར་ནོད་ཅིང་རྒྱལ་ཚབས་ཆེན་པོར་མངའ་གསོལ་བ་ནི་སྨོན་ལམ་དབང་བསྐུར་གྱི་བརྒྱུད་པ་སྟེ།   དེ་ལྟར་ཡིད་ཆེས་ལ་ཁུངས་བཙུན་པའི་ཟབ་མོའི་གཏེར་ཆོས་འདི་ཉིད་ཀྱི་སྒོ་ནས་ཚེའི་དབང་བསྐུར་ཟབ་མོ་སྙིང་པོར་བསྡུས་པ་འབུལ་བར་བྱེད་པ་ལ།   བདག་སློབ་དཔོན་གྱིས་བགྱི་བར་འོས་པའི་རིམ་པ་རྣམས་གྲུབ་ཟིན་པ་ལགས་པས།   སྐུ་ཉིད་རྣམས་ཀྱི་ངོ་སྐལ་དུ་གྱུར་པ་ལ་དབང་བསྐུར་ཟབ་མོ་གསན་པའི་ཡོན་དུ་མཎྜལ་འབུལ་བར་ཞུ།   {{TibChung|ཞེས་བརྡ་སྦྱར་ནས་མཎྜལ་འབུལ་དུ་གཞུག   །}} སློབ་དཔོན་དཀྱིལ་འཁོར་གྱི་ཁྱབ་བདག་ཆེན་པོར་བཞུགས་པའི་དྲུང་དུ་དབང་བསྐུར་ཞུ་བའི་དོན་དུ་མེ་ཏོག་དང་བཅས་པའི་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས་ཟློས་མཛོད།   {{TibChung|ཅེས་བརྡ་སྦྱར་ནས།}}  ཨོཾ༔   དཔལ་ལྡན་པདྨ་གར་གྱི་བདག༔   འཆི་མེད་ཡེ་ཤེས་སྐུ་འཆང་བ༔   རྡོ་རྗེ་སློབ་དཔོན་ཆེ་བའི་མཆོག༔   བཀྲ་ཤིས་ཚེ་ཡི་དཀྱིལ་འཁོར་དུ༔   བདག་ཅག་སྐལ་ལྡན་རིགས་ཀྱི་བུ༔   སྨིན་ཅིང་གྲོལ་བར་མཛད་དུ་གསོལ༔    {{TibChung|[5a]}}  {{TibChung|ལན་གསུམ།}}  ཐོག་མར་ཁྱེད་རང་རྣམས་ཀྱི་རྒྱུད་སྡོམ་ལྡན་དུ་བསྒྲུབ་དགོས་པས་དེའི་ཕྱིར་སྐྱབས་སུ་འགྲོ་བའི་སླད་དུ་མདུན་གྱི་ནམ་མཁར་རྡོ་རྗེ་ཚེ་ལྷའི་དཀྱིལ་འཁོར་པ་གཙོ་བོར་གྱུར་པའི་ཕྱོགས་དུས་ཀྱི་རྩ་གསུམ་རབ་འབྱམས་རྣམས་མངོན་སུམ་དུ་བཞུགས་པའི་སྤྱན་སྔར་བདག་སོགས་མཁའ་ཁྱབ་ཀྱིས་སེམས་ཅན་རྣམས་སྒོ་གསུམ་འཇུག་པ་གཅིག་པས་དེང་ནས་བྱང་ཆུབ་ཀྱི་བར་དུ་སྐྱབས་སུ་འགྲོ་བའི་འདུན་པས་འདིའི་རྗེས་ཟློས་མཛོད།   ན་མོཿ བདག་སོགས་མཁའ་མཉམ་{{TibChung|སོགས་ལན་གསུམ།}}  མེད་བཞིན་འཁྲུལ་པའི་འགྲོ་བ་མཐའ་མེད་པའི་སྡུག་བསྔལ་གྱི་རྒྱ་མཚོར་བྱིང་བ་རྣམས་ལ་ཚད་མེད་པའི་བྱམས་དང་སྙིང་རྗེས་ཁྱབ་པར་བྱས་ཏེ་འདི་དག་ཐམས་ཅད་འཆི་མེད་གདོད་མའི་མགོན་པོའི་གོ་འཕང་ལ་འགོད་པར་བྱ་བའི་ཕྱིར་སྨིན་གྲོལ་གྱི་ལམ་ཟབ་མོར་འཇུག་པར་བགྱིའོ་སྙམ་པས་འདིའི་རྗེས་ཟློས་མཛོད།   ཧོཿ  གཟུང་འཛིན་འཁྲུལ་པའི་{{TibChung|སོགས་ལན་གསུམ།}}  ཚོགས་ཀྱི་ཞིང་མཆོག་ཁྱད་པར་དུ་འཕགས་པ་དེ་རྣམས་ཀྱི་སྔན་སྔར་བསགས་སྦྱོང་གི་སྙིང་པོར་གྱུར་པ་ཡན་ལག་བཅུ་པ་ཚིག་རིས་དང་མཐུན་པའི་དོན་གསལ་འདེབས་བཞིན་དུ་འདིའི་རྗེས་ཟློས་མཛོད།   ཨོཾ་ཨཱཿཧཱུྃ༔   འཆི་  {{TibChung|[5b]}} མེད་ཚེ་ཡི་ལྷ་ཚོགས་{{TibChung|སོགས་ལན་གསུམ།}}  ཞིང་མཆོག་དེ་དག་གི་སྤྱན་སྔར་སོ་བྱང་སྔགས་གསུམ་སྤྱི་དང་ཁྱད་པར་གྱི་བསྡུས་པའི་དམ་ཚིག་དང་སྡོམ་པ་མཐའ་དག་ཚུལ་བཞིན་དུ་སྲུང་སྡོམ་བགྱིའོ་སྙམ་པའི་དམ་བཅའ་བརྟན་པོས་འདིའི་རྗེས་ཟློས་མཛོད།   ཨོཾ༔   འཆི་མེད་མགོན་པོ་པདྨ་འབྱུང་༔   སྐུ་གསུམ་འདུས་པ་ཚེ་ཡི་ལྷ༔   བདག་ལ་དགོངས་པར་མཛད་དུ་གསོལ༔   འདི་བཟུང་ཡང་དག་སྙིང་པོའི་བར༔   སོ་སོར་ཐར་པའི་སྡོམ་པ་དང་༔   བྱང་ཆུབ་སེམས་དཔའི་བསླབ་པ་དང་༔   རིག་འཛིན་སྔགས་ཀྱི་འདུལ་བ་དང་༔   ཁྱད་པར་འཆི་མེད་རྡོ་རྗེ་ཡི༔   སྡོམ་པ་དམ་ཚིག་མ་ལུས་པ༔   བདག་གིས་ཡོངས་སུ་བཟུང་བར་གྱི༔   {{TibChung|ལན་གསུམ།}}  ད་དབང་གི་གཞི་མ་རྩ་བར་གྱུར་པ་ཡེ་ཤེས་པ་དབབ་པའི་སླད་དུ་སེམས་གཞན་དུ་མ་ཡེངས་པར་དམིགས་པ་འདི་བཞིན་དུ་མཛད་པར་ཞུ།   སློབ་མ་དཔལ་ཆེན་ཧེ་རུ་ཀ༔   རྟ་མཆོག་རྒྱལ་པོའི་སྐུར་གསལ་བའི༔   སྙིང་གར་འོད་ལྔའི་གུར་ཁྱིམ་དབུས༔   འཆི་མེད་རིག་འཛིན་ཚེ་དཔག་མེད༔   ཡབ་ཡུམ་མཉམ་སྦྱོར་དགའ་བས་རོལ༔   ཐུགས་ཀར་གར་དབང་ཙཎྜ་ལཱི༔   སྟོང་གསལ་བདེ་ཆེན་འབར་བའི་སྐུ༔   བཅུ་དྲུག་ཉམས་ལྡན་ཚོན་གང་པ༔   ཕྱག་གཉིས་གྲི་གུག་ཐོད་ཁྲག་ཅན༔   གསང་ {{TibChung|[6a]}} བར་མེ་ཡི་ཆོས་འབྱུང་དབུས༔   ཉི་མ་ལ་གནས་དགའ་བ་འཁྱིལ༔   ཧྲཱིཿདམར་འབར་འཁྲུག་རྣམ་པ་ཅན༔   ཧ་རི་ནི་སའི་ཡི་གེས་བསྐོར༔   དུང་ཁང་ཟླ་བ་ལ་གནས་པའི༔   ཧྃ་དཀར་ཞུ་ཐིག་རྣམ་པ་ཅན༔   དཔའ་བོ་འབྲུ་བཞིའི་ཡི་གེས་བསྐོར༔   གནས་གསུམ་ཨོཾ་དཀར་ཨཱཿདམར་དང་༔   ཧཱུྃ་མཐིང་རྣམས་ཀྱིས་མཚན་པར་གསལ༔   བདག་གི་ཐུགས་འོད་དྭངས་མའི་ཟེར༔   ཐབས་ཤེས་ཡི་གེའི་འཁོར་ལོ་ལ༔   ཕོག་པས་གཡས་གཡོན་དྲག་ཏུ་འཁོར༔   ཧྲཱིཿའབར་རེག་བྱས་ཧྃ་ཡིག་བསྐུལ༔   ཟླ་ཞུན་ཐིག་པས་གསོས་བཏབ་སྟེ༔   དཔའ་བོ་འབྲུ་བཅུའི་དཀྱིལ་འཁོར་ལས༔   ཡི་གེ་འཁོར་ལོའི་སྤྲིན་ཆེན་འཕྲོས༔   རང་སྒྲ་སྒྲོགས་པས་རྩ་ཁམས་ཁྱབ༔   ལྷ་མོ་བཟོད་མེད་ཉམས་འབར་ཏེ༔   དགའ་བའི་གར་དང་གླུ་སྒྲ་ཡིས༔   ཕྱོགས་དུས་བདེ་གཤེགས་སྲས་བཅས་ཀྱི༔   རྒྱལ་བའི་དཀྱིལ་འཁོར་མ་ལུས་པ༔   སྐུ་གསུམ་ཚེ་ཡི་ལྷ་ཚོགས་ཀྱི༔   གསང་བ་གསུམ་གྱི་རྣམ་པ་རུ༔   ཁ་བ་བུ་ཡུག་འཚུབས་པ་བཞིན༔   བྱོན་ནས་ཆུ་ལ་ཆུ་ཞག་ལྟར༔   གཉིས་སུ་མེད་པར་ཐིམ་པ་ཡིས༔   ཡེ་ཤེས་གཟི་བྱིན་བརྟན་པར་བསམ༔   {{TibChung|དཔོན་སློབ་གཉིས་ཀས་དགོངས་པའི་གདེངས་བསྐྱེད།   འབེབས་རྫས་ཀྱི་དུད་ {{TibChung|[6b]}} པ་དང་།   བཤུག་གླུ་རོལ་མོ་གདུང་བའི་དབྱངས་ཀྱིས་གཟི་བྱིན་སྦར་ལ་ལས་བྱང་གི་བྱིན་འབེབས་དང་ཡེ་ཤེས་དབབ་པའི་སྔགས་བཅས་བརྗོད་མཐར།}}  ཏིཥྛ་བཛྲ་{{TibChung|ས་བརྟན་པར་བྱས།}}  དེ་ནས་དབང་དངོས་ལ་སྐུ་གསུང་ཐུགས་ཡོན་ཏན་འཕྲིན་ལས་ཀྱི་དབང་རྣམས་རྗེས་འབྲེལ་དང་བཅས་པ་རིམ་པར་འབྱུང་བ་ལས།   ཐོག་མར་སྐུའི་དབང་བསྐུར་བ་ནི།   སློབ་དཔོན་དཀྱིལ་འཁོར་གྱི་གཙོ་བོ་དང་ཐ་མི་དད་པས་རྣམ་རྒྱལ་གྱི་བུམ་པའི་དབང་བསྐུར་བས་ཐ་མལ་གྱི་སྣང་ཞེན་གཏོར་ཇི་ལྟར་སྣང་བ་ལྷ་ཡི་འཁོར་ལོར་ཤར་བའི་ནུས་སྟོབས་རྒྱུད་ལ་བླུགས་པར་མོས་ཤིག   །ཨོཾཿ བཀྲ་ཤིས་རྣམ་པར་རྒྱལ་བའི་བུམ་པ་རུ༔   རིགས་འདུས་ཚེ་ཡི་དཀྱིལ་འཁོར་ལྷ་ཚོགས་བཞུགས༔   སྣོད་བཅུད་ཡེ་ཤེས་རོལ་པ་བདུད་རྩིའི་ཆུ༔   ཉོན་མོངས་བདུད་ཚོགས་འཇོམས་པའི་སྨན་ཆེན་པོ༔   ནུས་པའི་ཁྱད་པར་བླ་ན་མེད་པ་འདིས༔   སྐལ་ལྡན་རིགས་ཀྱི་བུ་ལ་དབང་བསྐུར་བས༔   ཐ་མལ་སྣང་བའི་ཞེན་པ་ཀུན་སྦྱངས་ཏེ༔   གདོད་ནས་རྣམ་དག་འཆི་མེད་རྡོ་རྗེའི་ཚེ༔   འགྱུར་མེད་སྐུ་ཡི་དབང་མཆོག་ཐོབ་པར་ཤོག༔   ཨོཾ་པདྨ་ཨཱཿཡུརྫྙཱ་ན་ཀ་ལཱ་ཤ་ཨ་བྷི་ཥིཉྩ་ཨོཾ༔   བཛྲ་ཨཱཿཡུརྫྙཱ་ན་ཀ་ལཱ་ཤ་ཨ་བྷི་ཥིཉྩ་ཨོཾ༔   རཏྣ་ཨཱཿཡུརྫྙཱ་ན་ཀ་ལཱ་ཤ་ཨ་བྷི་ཥིཉྩ་ཏྲཱྃ༔   བུདྡྷ་ཨཱཿཡུརྫྙཱ་ན་ {{TibChung|[7a]}}  ཀ་ལཱ་ཤ་ཨ་བྷི་ཥིཉྩ་ཧྲཱིཿ ཀརྨ་ཨཱ་ཡུརྫྙཱ་ན་ཀ་ལཱ་ཤ་ཨ་བྷི་ཥིཉྩ་ཨ༔   {{TibChung|ཞེས་བརྗོད་ཅིང་བུམ་པ་མགོ་བོའི་གནས་ལྔར་བཞག་བུམ་ཆུ་སྦྱིན།}}  རྗེས་འབྲེལ་དུ་ལྷ་སྐུ་ཕྱག་རྒྱའི་དབང་བསྐུར་བ་ནི་དཀྱིལ་འཁོར་གྱི་གཙོ་བོའི་སྐུ་ལས་སྐུ་གཉིས་པ་འཕྲོས་སྤྱི་བོ་ནས་ཞུགས་ཏེ་སྙིང་གར་ཐིམ་པས་ལུས་སྣང་ལྷ་སྐུ་དབྱེར་མེད་ཆུ་ལ་ཆུ་བཞག་པ་ལྟར་གྱུར་པར་མོས་མཛོད།   ཧྲཱིཿ བདེ་གཤེག་གསུང་མཆོག་དབྱིངས་ཀྱི་ལྷ༔   པདྨ་ཐོད་ཕྲེང་ཚེ་ཡི་བདག༔   གཙོ་མཆོག་རྒྱལ་པོ་ཡབ་ཡུམ་གྱིས༔   སྐལ་ལྡན་ཁྱོད་ལ་དབང་བསྐུར་བས༔   པདྨ་ཚེ་ཡི་དབང་ཐོབ་ཤོག༔   པདྨ་ཀཱ་ཡ་ཨ་བྷི་ཥིཉྩ་ཨོཾ༔   {{TibChung|སྐུ་སྤྱི་བོར་བཞག   །བསྡུས་པར་བྱེད་ན་འདི་མཚམས་དབང་གི་དག་པ་བརྗོད་མཐར་གསུང་དབང་ལ་འཇུག་པ་སོགས་འོག་མ་རྣམས་ལ་རིགས་འགྲེ།   སྤྲོ་ན་རྒྱལ་མཚན་ཐོགས་ལ།}}  དེ་ལྟར་སྐུ་ཡི་དབང་བསྐུར་བ་དེ་ཉིད་མི་ཉམས་པར་བརྟན་པར་བྱ་བའི་ཕྱིར་ཚེ་རྟེན་རྒྱལ་མཚན་སྤྱི་བོར་བཞག་པར་མོས་མཛོད།   ཨོཾ༔   ཚེ་ལྷ་རྒྱལ་བ་རབ་འབྱམས་ཀྱི༔   སྐུ་ཡི་རང་བཞིན་རྒྱལ་མཚན་འདི༔   འགྱུར་མེད་ཚེ་ཡི་རྟེན་མཁར་ཡིན༔   ཁྱོད་ཀྱི་སྤྱི་བོར་རྒྱས་གདབ་པས༔   ནུབ་པ་མེད་པའི་དཔལ་ཐོབ་ཤོག༔   ཀཱ་ཡ་བཛྲ་དྷྭ་ཛ་ཏིཥྛ་བྷྲཱུྃ༔   དེ་ལྟར་དབང་  {{TibChung|[7b]}} བསྐུར་བས་སྣང་བ་ལྷའི་འཁོར་ལོར་བྱིན་གྱིས་བརླབས་ཏེ་སྣང་སྟོང་ལྷ་སྐུ་བསྐྱེད་པའི་རིམ་པ་བསྒོམ་པ་ལ་དབང་བ་ཡིན་ནོ།   །གསུང་གི་དབང་བསྐུར་བའི་དོན་དུ་རྒྱལ་པ་ཀུན་གྱི་གསུང་གི་འཕྲིན་ལས་ཡི་གེའི་གཟུགས་སུ་ཤར་བའི་གླེགས་བམ་མགྲིན་པར་བཞག་པས་ཆོས་སྒོ་རབ་འབྱམས་ལ་འཆད་རྩོམ་ཐོགས་མེད་ཀྱིས་འཇུག་པའི་སྙིང་པོ་ལུང་གི་དབང་མཆོག་ཐོབ་པར་མོས་ཤིག   །ཨཱཿ བརྗོད་པ་ཀུན་སྤང་རྡོ་རྗེའི་སྒྲ༔   ཇི་སྙེད་རྒྱལ་བ་ཀུན་གྱི་གསུང་༔   མ་ལུས་འདུས་པའི་ཆོས་ཀྱི་མཛོད༔   ཁྱོད་ཀྱི་མགྲིན་པར་བཞག་པ་ཡིས༔   སྙིང་པོ་ལུང་གི་དབང་ཐོབ་ཤོག༔   ཨཱཿཡུརྫྙཱ་ན་ཝཱ་ཀ་ཨ་བྷི་ཥིཉྩ་ཨཱཿ {{TibChung|པུ་སྟིའམ་སྔགས་བྱང་མགྲིན་པར་བཞག   །}} གསུང་དབང་ཐོབ་པ་དེ་ཉིད་བརྟན་པར་བྱ་བའི་ཕྱིར་དབུགས་རྟེན་ཉི་ཟླའི་གྭའུ་མགྲིན་པར་བཞག་པར་མོས་མཛོད།   ཨཱཿ ཚེ་ལྷ་རྒྱལ་བ་རབ་འབྱམས་ཀྱི༔   གསུང་གི་རང་བཞིན་གྭའུ་འདི༔   འགྲིབ་མེད་དབུགས་ཀྱི་རྟེན་མཁར་ཡིན༔   ཁྱོད་ཀྱི་མགྲིན་པར་རྒྱས་གདབ་པས༔   འཛད་པ་མེད་པའི་གཏེར་ཐོབ་ཤོག༔   ཝཱ་ཀ་བཛྲ་བུདྡྷ་ཏིཥྛ་བྷྲཱུྃ༔   དེ་ལྟར་གསུང་གི་དབང་བསྐུར་བས་སྒྲ་གྲགས་སྔགས་ཀྱི་འཁོར་ལོར་བྱིན་གྱིས་བརླབས་ཏེ་གྲགས་  {{TibChung|[8a]}} སྟོང་གསལ་སྔགས་ཆུ་བོའི་རྒྱུན་བཞིན་བཟླ་བ་ལ་དབང་བ་ཡིན་ནོ།   །ཐུགས་ཀྱི་དབང་བསྐུར་བའི་དོན་དུ་ཚེ་ལྷ་རྒྱལ་བའི་ཕྱག་མཚན་ཚེ་འབྲང་སྙིང་ཁར་བཞག་པས་འཆི་མེད་གཉུག་མ་དོན་གྱི་ཡེ་ཤེས་སྙིང་དབུས་སུ་ཤར་བས་སྐྱེ་འཆིའི་འཕོ་བ་དང་བྲལ་བའི་རྡོ་རྗེའི་ཚེ་དབང་ཐོབ་པར་མོས་མཛོད༔   ཧཱུྃ༔   ཚེ་ལྷ་རབ་འབྱམས་འདུས་པའི་ཐུགས༔   རྡོ་རྗེའི་རང་བཞིན་འགྱུར་བ་མེད༔   འོད་གསལ་དབྱིངས་ཀྱི་བུམ་པར་འཁྱིལ༔   བཀྲ་ཤིས་ཚེ་ཡི་འབྲང་རྒྱས་འདིས༔   སྐལ་ལྡན་ཁྱོད་ལ་དབང་བསྐུར་བས༔   སྐྱེ་འཆི་བྲལ་བའི་གདིང་ཐོབ་ཤོག༔   ཨཱཿཡུརྫྙཱ་ན་ཙིཏྟ་ཨ་བྷི་ཥིཉྩ་ཧཱུྃ༔   {{TibChung|ཚེ་འབྲང་སྙིང་གར་བཞག   །}} ཐུག་དབང་བརྟན་པར་བྱ་ཕྱིར་སྲོག་རྟེན་རྡོ་རྗེ་སྙིང་གར་བཞག་པར་མོས་མཛོད།   ཧཱུྃཿ ཚེ་ལྷ་རྒྱལ་བ་རབ་འབྱམས་ཀྱི༔   ཐུགས་ཀྱི་རང་བཞིན་རྡོ་རྗེ་འདི༔   མི་ཤིགས་སྲོག་གི་རྟེན་མཁར་ཡིན༔   ཁྱོད་ཀྱི་སྙིང་གར་རྒྱས་གདབ་པས༔   འཕོ་འགྱུར་བྲལ་བའི་གདིང་ཐོབ་ཤོག༔   ཙིཏྟ་བཛྲ་གརྦྷ་ཏིཥྛ་བྷྲཱུྃ༔   དེ་ལྟར་ཐུགས་ཀྱི་དབང་བསྐུར་བས་འཁྲུལ་རྟོག་ཡེ་ཤེས་ཀྱི་འཁོར་ལོར་བྱིན་གྱིས་བརླབས་ཏེ་རིག་སྟོང་ཆོས་ཉིད་ཀྱི་རོལ་བར་ལམ་དུ་ཁྱེར་ནུས་པར་དབང་བར་བྱས་པ་ཡིན་ནོ།   །ཡོན་ཏན་གྱི་དབང་ {{TibChung|[8b]}}  བསྐུར་བ་ནི་ཐབས་ཤེས་ཀྱི་རྫས་མཆོག་འཁོར་འདས་ཀྱི་ཚེ་བཅུད་དྭངས་མ་འདུས་པའི་རིལ་བུ་དང་།   འཆི་མེད་ཀྱི་དངོས་གྲུབ་བཅུད་དུ་འཁྱིལ་བའི་ཨ་མྲྀ་ཏ་ཕྱག་ཏུ་ཕུལ་བ་དེ་ཉིད་མྱང་བ་ཙམ་གྱིས་ལྕགས་ལ་གསེར་འགྱུར་གྱི་རྩིས་ཐེབས་པ་བཞིན་སྙིགས་མའི་ལུས་ངག་ཡིད་གསུམ་འཆི་མེད་དྭངས་མའི་ཐིག་ལེར་སྨིན་པར་བྱས་པའི་ཐུགས་འདུན་མཛད་པར་ཞུ།   {{TibChung|ཐབས་ཀྱི་ཚེ་རྫས་རིལ་བུ་ནི༔   གཡས་བསྐོར་ལག་པ་གཡས་སུ་གཏད༔}}  ཧྲཱིཿ འཁོར་འདས་རྩི་སྨན་ནུས་པའི་བཅུད༔   སྙིང་པོ་དྭངས་མའི་དབྱིག་ཏུ་འཁྱིལ༔   འཆི་མེད་ཚེ་ཡི་རིལ་བུ་འདི༔   དེ་རིང་སྐལ་ལྡན་བུ་ལ་སྦྱིན༔   ཐབས་མཆོག་ཚེ་ལ་དབང་འབྱོར་ཤོག༔   བཛྲ་ཨཱཿཡུ་ཥེ་ཧྲཱྀ་དཱ་ཡ་སིདྡྷི་ཕ་ལ་ཧོཿ  {{TibChung|ཤེས་རབ་ཚེ་ཆང་བདུད་རྩི་ནི༔   གཡོན་བསྐོར་ལག་པ་གཡོན་ཏུ་གཏད༔}}  ཨཱཿ སྣོད་ནི་རྣམ་དག་ཀ་པཱ་ལར༔   བཅུད་ནི་འཆི་མེད་བདུད་རྩི་སྨན༔   བླ་ན་མེད་པའི་དམ་ཚིག་འདི༔   དེ་རིང་སྐལ་ལྡན་བུ་ལ་སྦྱིན༔   ཤེས་རབ་ཚེ་ལ་དབང་འབྱོར་ཤོག༔   བཛྲ་ཨཱཿཡུ་ཥེ་ཨ་མྲྀ་ཏ་སིདྡྷི་ཕ་ལ་ཧོཿ  {{TibChung|གཡུང་དྲུང་ཐོགས་ལ།}}  དེ་ལྟར་ཡོན་ཏན་རིན་པོ་ཆེ་མི་ཟད་པའི་གཏེར་གྱི་དབང་ཐོབ་པ་དེ་ཉིད་མི་ཉམས་ཤིང་བརྟན་པར་བྱ་བའི་སླད་དུ་འགྱུར་མེད་ཀྱི་རང་གཟུགས་གཡུང་དྲུང་ལྟེ་བར་བཞག་པར་  {{TibChung|[9a]}} མོས་མཛོད༔   སྭཱཿ ཚེ་ལྷ་རྒྱལ་བ་རབ་འབྱམས་ཀྱི༔   ཡོན་ཏན་རང་བཞིན་གཡུང་དྲུང་འདི༔   འཕོ་མེད་བླ་ཡི་རྟེན་མཁར་ཡིན༔   ཁྱོད་ཀྱི་ལྟེ་བར་རྒྱས་གདབ་པས༔   ཉམས་པ་མེད་པའི་དབྱིག་ཐོབ་ཤོག༔   གུ་ཎ་བཛྲ་ནྲྀ་བྷྲཱུྃ་ཏིཥྛ་ཧཱུྃཿ དེ་ལྟར་དབང་བསྐུར་བས་འདོད་ཡོན་མ་སྤང་ཡེ་ཤེས་ཀྱི་འཁོར་ལོ་ཡུལ་དབང་མཉམ་སྦྱོར་ཟག་མེད་ཀྱི་ཚོགས་སུ་བསྒྱུར་བའི་ཡོན་ཏན་མི་ཟད་པ་རྒྱན་གྱི་འཁོར་ལོར་དབང་འབྱོར་བ་ཡིན་ནོ།   །ཕྲིན་ལས་ཀྱི་དབང་བསྐུར་བའི་དོན་དུ་འབྱུང་ལྔའི་དཀྱིལ་འཁོར་ལག་ཏུ་གཏད་པས་འབྱུང་ལྔའི་ལས་ཆེན་གྱིས་ཁམས་ལྔའི་ཚེ་སྤེལ་བ་ལ་སོགས་པའི་འཕྲིན་ལས་རབ་འབྱམས་ལ་དབང་ཐོབ་པར་མོས་མཛོད།   ཨཱཿ དབྱིངས་ཕྱུག་མཁའ་ཡི་མེ་ལོང་ངོས༔   འབྱུང་བའི་ཡུམ་ཆེན་ཀུན་ཏུ་གསལ༔   སྐལ་ལྡན་བུ་ལ་དབང་བསྐུར་བས༔   ཕྱི་ནང་འབྱུང་ལྔའི་ལས་ཆེན་ལ༔   བརྟེན་ནས་ཁམས་ལྔའི་ཚེ་སྤེལ་བའི༔   ཕྲིན་ལས་རབ་འབྱམས་དབང་ཐོབ་ཤོག༔   བཛྲ་ཨཱཿཡུརྫྙཱ་ན་སརྦ་ཀརྨ་ཨ་བྷི་ཥིཉྩ་མི༔   དེ་ལྟར་དབང་བསྐུར་བས་འབྱུང་ལྔའི་ལས་ཆེན་ལ་བརྟེན་ནས་རང་དང་གཞན་གྱི་ཁམས་ལྔའི་ཚེ་སྤེལ་བ་ལ་སོགས་ཚེ་ལྷ་རྒྱལ་  {{TibChung|[9b]}} བའི་འཕྲིན་ལས་རབ་འབྱམས་བསྒྲུབ་པ་ལ་དབང་བ་ཡིན་ནོ།   །དེ་རྣམས་ཀྱི་བརྟན་བྱེད་དུ་ཚེ་འགུགས་ཤིང་བཅུད་བསྡུ་བ་དང་།   སྦ་ཞིང་རྒྱས་གདབ་པ་རྣམས་རིམ་པ་བཞིན་དུ་བགྱི་བ་ལགས་པས་སོ་སོའི་ཚིག་རིས་དང་མཐུན་པའི་དམིགས་རིམ་ལ་ཐུགས་རྩེ་གཅིག་ཏུ་གཏོད་པར་ཞུ།   {{TibChung|ཞེས་མཚམས་སྦྱར་ནས།}} ཧྲཱིཿཛཿ བདག་མདུན་དཀྱིལ་འཁོར་ལྷ་ཚོགས་ཐམས་ཅད་ཀྱི༔   ཐུགས་ཀའི་འོད་ཀྱིས་ཕྱོགས་བཅུའི་ཞིང་རྣམས་ནས༔   རྩ་གསུམ་ཚེ་ཡི་ལྷ་ཚོགས་མ་ལུས་རྣམས༔   སྤྱན་དྲངས་མདུན་གྱི་ནམ་མཁར་སྤྲིན་ལྟར་འཁྲིགས༔   སྐུ་ཡི་འོད་ཀྱི་དཀྱིལ་འཁོར་གཙོ་མཆོག་བསྐུལ༔   ཐུགས་སྲོག་སྦྱོར་མཚམས་ཀུན་ནས་འོད་འཕྲོས་པས༔   ཚེ་བདག་རིགས་ལྔའི་རྒྱུད་བསྐུལ་དེ་དག་གི༔   འོད་ཀྱིས་ཚེ་ཡི་ལྷ་མོ་མགྱོགས་མ་དང་༔   སྒོ་བ་ཡབ་ཡུམ་ལ་སོགས་ཕོ་ཉ་རྣམས༔   བསྐུལ་བས་སྔོན་གྱི་ཐུགས་དམ་ལས་བཞེངས་ཏེ༔   དེ་དག་སྐུ་ལས་འོད་ཟེར་ལྕགས་ཀྱུའི་དབྱིབས༔   ཕྱོགས་མཚམས་སྟེང་འོག་ཀུན་ཏུ་སྤྲོས་པའི་རྩེར༔   སྤྲུལ་པ་ཡང་སྤྲུལ་ཉི་ཟེར་རྡུལ་འཚུབས་ལྟར༔   དཔག་ཏུ་མེད་པ་ནམ་མཁའ་ཁྱབ་པར་འཕྲོས༔   རང་གི་བླ་ཚེ་སྲོག་དབུགས་ཉམས་པ་དང་༔   གདོན་བགེགས་འབྱུང་པོས་བརྐུས་ {{TibChung|[10a]}} འཕྲོགས་ཡར་བ་དང་༔   འཁོར་འདས་སྣོད་བཅུད་བརྟན་གཡོའི་དྭངས་མའི་ཚེ༔   རྒྱལ་ཀུན་མཁྱེན་བརྩེ་ནུས་པའི་བྱིན་རླབས་སྟོབས༔   དྲང་སྲོང་རིག་འཛིན་ཚེ་ལ་དབང་བ་ཡི༔   མཐུ་དཔལ་ཡོན་ཏན་འཁོར་ལོས་སྒྱུར་རྒྱལ་གྱི༔   ཚེ་བསོད་སྟོབས་འབྱོར་མངའ་ཐང་ལེགས་ཚོགས་ཀུན༔   འོད་ཟེར་ཐིག་ལེ་སྣུམ་ལ་ལྕི་བ་དང་༔   ཧྲཱིཿནྲྀ་ཨཱཿབྷྲཱུྃ་བཀྲག་མདངས་འབར་བ་ཡི༔   རྣམ་པར་འུབ་ཀྱིས་བསྡུས་ནས་བདག་མདུན་གྱི༔   རྟེན་ལ་སིབ་སིབ་ཐིམ་པས་འཁོར་འདས་ཀྱི༔   ཚེ་བཅུད་དྭངས་མ་གཅིག་ཏུ་འཁྱིལ་བ་ཡི༔   འཇའ་ལུས་རྡོ་རྗེའི་ཚེ་མཆོག་ཐོབ་པར་བསམ༔   {{TibChung|ཞེས་སོགས་ཀྱི་དམིགས་རིམ་གསལ་བཏབ་ནས།   མདའ་དར་གཡབ།   སྤོས་རོལ་དབྱངས་དང་བཅས།   སྐུ་གསུམ་ཚེ་ཡི་ལྷ་ཚོགས་རྣམས༔   ཐུགས་དམ་བསྐུལ་བའི་རིམ་པ་ནི།}}  ཧྲཱིཿ༠ཧྲཱིཿ འགྱུར་མེད་རྡོ་རྗེ་ལྟ་བུའི་ཡེ་ཤེས་ཀྱི༔   {{TibChung|ཞེས་སོགས་ལྷུ་གཅིག་མཐར།}}  ཧྲཱིཿ གཞན་ཡང་རྡོ་རྗེ་ཚེ་ཡི་དཀྱིལ་འཁོར་འདིར༔   {{TibChung|ཞེས་སོགས་སྦྲེལ་བས་ཚེ་འགུགས་བསྐུལ།}}  དེ་ལྟར་བཀུགས་པའི་ཚེ་བཅུད་ཀྱི་དྭངས་མ་རྣམས་ཁབ་ལེན་གྱིས་ལྕགས་ཕྱེ་བསྡུས་པ་ལྟར་འུབ་ཀྱིས་འདུས་སྙིང་དབུས་བླ་ཚེ་སྲོག་རྟེན་རྣམས་ལ་ཐིམ་པས་བཀྲག་མདངས་འོད་དུ་འཚེར།   ཉི་ཟླའི་གྭའུ་ཁ་  {{TibChung|[10b]}} འགྲིགས།   འོག་གི་རྡོ་རྗེའི་རྭ་རྣམས་སྟེང་དུ་མདུད།   དེ་ཕྱིར་འོད་ལྔའི་གུར་ཁྱིམ་གྱིས་གཡོགས་པའི་སྟེང་པདྨ་རཱ་ག་ལས་གྲུབ་པའི་རྡོ་རྗེ་རྩེ་ལྔ་རྭ་གདངས་མེ་ཡི་ཚྭ་ཚྭ་འཕྲོ་བས་མཚན་པ་དང་།   མདའ་དར་གནས་ལྔར་རྒྱ་གྲམ་དུ་བཞག་པས་རྡོ་རྗེའི་རྡུལ་གྱིས་ལུས་ཞུ་ལུགས་སུ་གཡོགས་པས་བསྲུང་།   དབྱིངས་ཡེ་ཟུང་འཇུག་གཉུག་མ་མི་ཤིགས་པའི་ཐིག་ལེའི་ཀློང་དུ་རྒྱས་བཏབ་པས་བར་ཆད་ཀྱི་མཚན་མ་འཇུག་པའི་སྐབས་མེད་པའི་ཐུགས་མོས་མཛོད།   ཨཿ མཁའ་ཁྱབ་ཡེ་ཤེས་ཆེན་པོའི་འོད་ཟེར་སྤྲིན༔   སྤྲོས་པས་འཁོར་འདས་ཀུན་ཁྱབ་ཚེ་ཡི་བཅུད༔   དྭངས་མ་མི་ཤིགས་འཁྱིལ་བའི་ཐིག་ལེར་བསྡུས༔   ཟུང་འཇུག་འདུ་འབྲལ་མེད་པའི་དབྱིངས་སུ་བསྟིམས༔   འོད་གསལ་ཀློང་ཡངས་ཆེན་པོར་རྒྱས་བཏབ་པས༔   གཞོམ་གཞིག་བྲལ་བའི་རྡོ་རྗེའི་ཚེ་ཐོབ་ཤོག༔   དྷརྨ་དྷཱ་ཏུ་མུ་དྲ་ཛྙཱ་ན་བཛྲ་ཏིཥྛ་རཀྵ་རཀྵ་ཧཾཿ {{TibChung|མདའ་དར་གནས་ལྔར་རྒྱ་གྲམ་དུ་འཇོག་བཞིན།}} ཨ༔   སྟོང་གསལ་ཆོས་སྐུའི་སྨྱུག་མ་ལ༔   ལོངས་སྤྱོད་ཡོངས་རྫོགས་སྒྲོ་ཡིས་བརྒྱན༔   མདེའུ་ཐུགས་རྗེ་སྤྲུལ་པའི་སྐུ༔   སྐུ་གསུམ་རྒྱལ་བས་རྒྱས་གདབ་བོ༔   སྐུ་ལྔའི་རང་བཞིན་རིན་ཆེན་ལྔ་༔   སྣང་རིག་ཐབས་ཀྱིས་རྒྱས་གདབ་བོ༔   ཡུམ་ལྔའི་རང་བཞིན་དར་སྣ་ལྔ༔   སྟོང་དབྱིངས་ཤེས་ {{TibChung|[11a]}} རབ་རྒྱས་གདབ་བོ༔   ཡེ་ཤེས་ལྔ་ལྡན་རྨ་བྱའི་མདོངས༔   གཉིས་མེད་ཟུང་འཇུག་རྒྱས་གདབ་བོ༔   སྐྱེ་འཆི་མེད་པ་གཞི་ཡི་ཚེ༔   ཆོས་ཀྱི་དབྱིངས་སུ་རྒྱས་གདབ་པོ༔   འཕོ་འགྱུར་མེད་པ་ལམ་གྱི་ཚེ༔   མཉམ་ཉིད་ཆེན་པོར་རྒྱས་གདབ་བོ༔   བྲལ་ཐོབ་མེད་པ་འབྲས་བུའི་ཚེ༔   ཁྱབ་བརྡལ་ཀློང་དུ་རྒྱས་གདབ་བོ༔   བྱར་མེད་རྒྱས་གདབ་གྲོལ་མི་སྲིད༔   དམིགས་མེད་རྒྱས་གདབ་འཐོར་བ་མེད༔   ངང་མཉམ་རྒྱས་གདབ་ཉམས་པ་མེད༔   ཕྱལ་ཡས་རྒྱས་གདབ་ཆད་པ་མེད༔   ཀུན་ཁྱབ་རྒྱས་གདབ་ཟད་པ་མེད༔   ལྷུན་རྫོགས་རྒྱས་གདབ་ཡར་བ་མེད༔   མི་འགྱུར་སྙིང་པོ་རྡོ་རྗེའི་ཚེ༔   གཞོམ་མེད་ཡེ་ཤེས་མཁའ་ཀློང་དུ༔   སྐྱེ་འཆི་མེད་པར་རྒྱས་གདབ་བོ༔   དྷརྨ་དྷ་ཏུ་བཛྲ་ཛྙཱ་ན་རཀྵ་ཨ་ཧཾཿ {{TibChung|རྟེན་འབྲེལ་སྙིང་པོ་བརྗོད་ཅིང་མེ་ཏོག་འཐོར་རོ།   །}} དེ་ལྟར་ཚེ་བཀུགས་ཤིང་བཅུད་བསྡུས་པ་དེ་ཉིད་རྩ་གསུམ་ལྷའི་དངོས་གྲུབ་བྱིན་རླབས་ཀྱི་དབྱིག་དང་ལྷན་ཅིག་པར་བསྟིམ་ཞིང་རྒྱས་བཏབ་པས་ལུས་གཞོམ་མེད་རྡོ་རྗེའི་ཁམས་སུ་སྨིན།   གཟུང་འཛིན་གཉིས་སྣང་གི་འཆི་བདུད་གཉིས་མེད་དག་མཉམ་བདེ་བ་ཆེན་པོའི་ཕོ་ཉས་བཅོམ་སྟེ་འཆི་མེད་ཀ་དག་ཆོས་སྐུ་ཐིག་ལེ་ཉག་གཐིག་གི་གཏན་སྲིད་ལ་དབང་  {{TibChung|[11b]}} འབྱོར་པའི་ཐུགས་འདུན་དང་བཅས་གཉུག་མའི་རང་ངོ་ལ་མཉམ་པར་འཇོག་མཛོད།   {{TibChung|ཅེས་དར་གཅིག་དགོངས་ཉམས་སྐྱོང་དུ་བཅུག   །མཚམས་སྦྱོར་སྤྱི་མཐུན་བཅས་བཀྲ་ཤིས་ཀྱི་ཚིགས་སུ་བཅད་པ་གང་འོས་བརྗོད།}} དེ་རྣམས་ཀྱི་སྒོ་ནས་རྡོ་རྗེའི་ཚེའི་དབང་བསྐུར་ཟབ་མོ་ལེགས་པར་ཕུལ་ཟིན་པས་དེ་དག་གི་སྐབས་སུ་ཐོབ་པའི་གསང་བའི་དམ་ཚིག་སྤྱི་དང་།   བྱེ་བྲག་སྲོག་གཅོད་བརྡུང་བརྡེག་རྟེན་གསུམ་གཞིག་གཞོམ་སོགས་སྤང་བྱ་དང་།   ཚེ་ཐར་སྲོག་བསླུ་འཇིགས་སྐྱོབ་རྟེན་གསུམ་བཞེངས་པ་སོགས་བསྒྲུབ་བྱ་སྤྱི་དང་ཁྱད་པར་བསྙེན་སྒྲུབ་ལ་བརྩོན་པ་སོགས་དམ་ཚིག་གི་རིམ་པ་ལས་མི་འདའ་བའི་གཡར་དམ་ལྷུར་བཞེས་པ་དང་བཅས་འདིའི་རྗེས་ཟློས་མཛོད།   གཙོ་བོས་ཇི་ལྟར་{{TibChung|སོགས།   གཏང་རག་མཎྜལ་དང་ལུས་དབུལ་དགེ་བསྔོ་བཅས་སྤྱི་ལྟར་གྲུབ་ནས་སློབ་མ་གྱེས།   གསུམ་པ་རྗེས་རིམ་ནི།   ཚོགས་ཡོད་ན་ལྷག་མ་ཕྱིན་དང་།   དེ་མིན་རྗེས་ཀྱི་མཆོད་བསྟོད།   དངོས་གྲུབ་བླང་བ།   ནོངས་བཤགས།   བརྟན་བཞུགས།   བསྡུ་ལྡང་།   བསྔོ་སྨོན་ཤིས་བརྗོད་བཅས་བྱའོ།   །ཚེ་ལམ་གྲུབ་པའི་ཉི་མ་ཡིས།   །འཆི་བདག་མུན་པའི་གཡུལ་ངོ་བཅོམ།   །ཚེ་དབང་པདྨོའི་ཟིལ་དངར་གྱིས།   །འཆི་མེད་ལང་ཚོ་བརྟས་གྱུར་ཅིག   །ཅེས་པའང་གཏེར་འབྱིན་བླ་མ་གང་ནས་འདི་ལྟར་བྲིས་ཤིག་པའི་བསྐུལ་མ་རིང་མོའི་དུས་ནས་ནན་ {{TibChung|[12a]}} ཆགས་སུ་མཛད་པའི་ཕྱིར།   དུས་ཞབས་ཀྱི་སྔགས་བན་རང་བྱུང་ལྷན་སྐྱེས་རྡོ་རྗེའམ་མིང་གཞན་མཁའ་ཁྱབ་རྡོ་རྗེར་འབོད་པས་བག་ཡོད་ཀྱི་ལོའི་དཔྱིད་འབྲིང་དབོས་ཉ་བ་རྡོ་རྗེ་གདན་བཞིའི་བརྡ་ལས་བཟང་པོར་འབོད་པའི་ཟླ་བའི་ཡར་ཚེས་ཀྱི་རྒྱལ་བ་དང་པོའི་ཐུན་གསེང་གཅིག་ལ་ཤར་མར་བྲིས་པ་ཨ་ཡུ་སིདྡྷི་རསྟུ།།   །།}} }}
</onlyinclude>
{{TsagliCall}}
<headertabs/>