View source for DJYD-KABUM-24-YA-025

{{Text
|classification=Tibetan Publications
|subclass=Tibetan Texts
|fulltitletib=སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེའི་ཁ་སྐོང་ངེས་ཤེས་འདྲེན་པའི་ཕོ་ཉ།
|fulltitle=snga 'gyur sdom rgyun mkhan brgyud kyi rnam thar nyung gsal sgron me'i kha skong nges shes 'dren pa'i pho nya
|citation=[[Dudjom Rinpoche]] 'Jigs bral ye shes rdo rje. ''Snga 'gyur sdom rgyun mkhan brgyud kyi rnam thar nyung gsal sgron me'i kha skong nges shes 'dren pa'i pho nya''. In ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 24: 279-299. Kalimpong: Dupjung Lama, 1979-1985.
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|collectiontitle=bdud 'joms rin po che bka' 'bum
|author=Dudjom Rinpoche
|tibgenre=Biographies - Hagiography - rnam thar
|terma=No
|language=Tibetan
|volumenumber=24
|volnumtib=༢༤
|volyigtib=ཡ
|totalvolumes=25
|textnuminvol=025
|pagenumbers=279-299
|totalpages=21
|beginfolioline=1a1
|endfolioline=11a6
|totalfolios=11
|multivolumework=No
|rectonotes=rnam thar
|versonotes=mkhan brgyud kha skong
|colophontib=།ཅེས་སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོལ་མེའི་ཁ་སྐོང་ངེས་ཤེས་འདྲེན་པའི་ཕོ་ཉ་ཞེས་བྱ་བ་འདིའང་།   བསྐལ་ངན་དུས་ཀྱི་རླུང་དམར་ཆེས་ཆེར་འཚུབས་པའི་སྐབས་འདིར་བསྟན་པའི་སྒྲོན་མེ་བཟང་པོ་ཡུན་དུ་མི་མནལ་བའི་ཆ་རྐྱེན་ཁོ་ནར་དམིགས་ཏེ།    སྔ་འགྱུར་བཀའ་མའི་ཆོས་སྡེ་ཡོངས་རྫོགས་ཀྱི་བཀའི་བསྡུ་བ་ལྷུར་ལེན་པའི་སྐབས་ཐོགས་མའི་གཞི་རྩ་མདོ་ཕྱོགས་འདུལ་བའི་ཡིག་ཆ་སོ་ཐར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ལོ་ཆེན་དྷརྨ་ཤྲཱིའི་གསུང་གི་ཁ་སྐོང་དུ་ད་ལྟའི་བར་གྱི་མཁན་རབས་ཀྱི་ལོ་རྒྱུས་ས་བོན་ཙམ་མེད་དུ་མི་རུང་བར་མཐོང་ནས།   རང་གི་འདྲེན་པ་བཤེས་གཉེན་དམ་པ་རྣམས་ཀྱི་གསུང་སྒྲོས་ལ་སྒྲོ་སྐུར་གྱིས་མ་བསླད་པར་མདོར་བསྡུས་སྙིང་པོར་དྲིལ་བའི་ཚུལ་གྱིས་བྲིས་པ་སྟེ།   ལྷ་རིགས་ཤཱཀྱའི་དགེ་བསྙེན་འཇིགས་བྲལ་ཡེ་ཤེས་རྡོ་རྗེས་སྦྱར་བ་ལས།   ཐོག་མའི་ཡི་གེ་པ་ནི་ཤར་ཕྱོགས་མོན་གྱི་དགེ་བསྙེན་ཀུན་བཟང་དབང་འདུས་སོ།   །འདིས་ཀྱང་བསྟན་པ་རིན་པོ་ཆེ་མི་ཉམས་གོང་ནས་གོང་དུ་འཕེལ་བའི་རྒྱུར་གྱུར་ཅིག   །སརྦ་དཱ་མངྒ་ལཾ།།
|colophonwylie=ces snga 'gyur sdom rgyun mkhan brgyud kyi rnam thar nyung gsal sgrol me'i kha skong nges shes 'dren pa'i pho nya zhes bya ba 'di'ang /___bskal ngan dus kyi rlung dmar ches cher 'tshubs pa'i skabs 'dir bstan pa'i sgron me bzang po yun du mi mnal ba'i cha rkyen kho nar dmigs te/____snga 'gyur bka' ma'i chos sde yongs rdzogs kyi bka'i bsdu ba lhur len pa'i skabs thogs ma'i gzhi rtsa mdo phyogs 'dul ba'i yig cha so thar sdom rgyun mkhan brgyud kyi rnam thar lo chen d+harma shrI'i gsung gi kha skong du da lta'i bar gyi mkhan rabs kyi lo rgyus sa bon tsam med du mi rung bar mthong nas/___rang gi 'dren pa bshes gnyen dam pa rnams kyi gsung sgros la sgro skur gyis ma bslad par mdor bsdus snying por dril ba'i tshul gyis bris pa ste/___lha rigs shAkya'i dge bsnyen 'jigs bral ye shes rdo rjes sbyar ba las/___thog ma'i yi ge pa ni shar phyogs mon gyi dge bsnyen kun bzang dbang 'dus so/___/'dis kyang bstan pa rin po che mi nyams gong nas gong du 'phel ba'i rgyur gyur cig___/sarba dA mang+ga laM//
|pdflink=File:DJYD-KABUM-24-YA-025.pdf
|authortib=བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
|volumeLetter=YA
|InitCategories=Dudjom Tersar Project; DJYD-KABUM-Volume-24-YA
}}
<h1>Tibetan Text</h1>
<onlyinclude>
{{TibP|༄༅།   །སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེའི་ཁ་སྐོང་ངེས་ཤེས་འདྲེན་པའི་ཕོ་ཉ་ཞེས་བྱ་བཞུགས་སོ།  །


༄༅།   །ཨོཾ་སྭསྟི།    རྣམ་འདྲེན་སྟོང་རྩའི་དབུས་ན་པད་དཀར་ལྟར།    །ངོ་མཚར་ཐུགས་བསྐྱེད་ཕྲིན་ལས་ཆེས་འཕགས་པ།  །རྩོད་ལྡན་འགྲོ་བའི་སྐྱབས་ཅིག་ཟས་གཙང་སྲས།   །ཁྱོད་ཞབས་ཡན་ལག་དང་པོའི་རྒྱན་དུ་མཆོད།   །གངས་ལྗོངས་མུན་གླིང་མཆོད་ཡོན་ཐུགས་བསྐྱེད་གཟི།   །ཉི་ཟླའི་སྣང་བས་མཛེས་ལས་ཐུབ་པའི་བསྟན།   །ངུར་སྨྲིག་རྒྱལ་མཚན་ཐོག་མར་སྒྲེང་མཛད་མགོན།   །མཁན་ཆེན་ཞི་འཚོའི་བཀའ་དྲིན་བསམ་གྱིན་དད།   །རྒྱལ་བའི་གདུང་འཛིན་སྡོམ་བརྩོན་དམ་པའི་ཕུལ།    །ལྔ་རིགས་སྨྲ་བའི་དབང་པོ་དྷརྨ་ཤྲཱི།   །རིམ་ {{TibChung|[2a]}} བྱོན་མཁན་རབས་གསེར་རིའི་ཕྲེང་བ་ལ།    །ཀུན་ནས་མོས་བློས་བསྟོད་ཕྱག་ལན་བརྒྱར་འབུལ།   །འདི་ནི་བསྟན་རྩ་སོ་ཐར་འདུལ་བའི་ཁྲིམས།   །ཐམས་ཅད་ཡོད་སྨྲའི་ལུགས་བཟང་གསེར་འགྱུར་རྩིས།   །རྣམ་མང་མོས་ལྡན་ལྕགས་ཁམས་རིན་ཆེན་དུ།   །བསྒྲུབས་པའི་ལོ་རྒྱུས་ཁ་སྐོང་མདོ་ཙམ་གླེང་།   དེའང་གངས་ཅན་བོད་ཀྱི་ལྗོངས་སུ་མངའ་བདག་ཆོས་རྒྱལ་ཁྲི་སྲོང་ལྡེའུ་བཙན་གྱིས་རྒྱ་གར་འཕགས་པའི་ཡུལ་ནས་མཁན་སློབ་པཎ་གྲུབ་མང་པོ་སྤྱན་དྲངས་ཏེ་སངས་རྒྱས་ཀྱི་བསྟན་པ་གཞིར་བཞེངས་སུ་བཙུགས་པར་མཛད་པ་ན། {{TibChung|[2b]}} མཁན་ཆེན་ཞི་བ་འཚོའི་ཞལ་སྔ་ནས་སད་མི་མི་བདུན་ལ་སོགས་པ་རབ་ཏུ་བྱུང་བར་མཛད་པ་ནས་བཟུང་བསྟན་རྩ་འདུལ་བ་འཛིན་པའི་སྡེ་ཆེན་པོ་བྱུང་།   བར་སྐབས་རྒྱལ་པོ་གླང་དར་མས་བསྟན་པ་བསྣུབ་པར་ཕྱོགས་པ་ན་སྨར་གཡོ་གཙང་གསུམ་གྱིས་འདུལ་བའི་ཕྱག་དཔེ་བསྣམས་ནས་ཁམས་སུ་བྲོས་ཏེ་བཞུགས།   གླང་དར་བཀྲོང་རྗེས་བླ་ཆེན་དང་དབུས་གཙང་གི་མི་བཅུས་སྡོམ་རྒྱུན་བླངས་ནས་སླར་དབུས་གཙང་དུ་འདུལ་བསྟན་ཉམས་པ་གསོས་ཤིང་རིམ་པར་འཕེལ་རྒྱས་བྱུང་བ་ལ་སྨད་འདུལ་དུ་གྲགས་ཏེ་དོན་ལ་དཔལ་ལྡན་ཞི་འཚོའི་སྡོམ་རྒྱུན་འདི་ལ་ཟེར།   དེ་ལྟར་སྨད་འདུལ་སྡོམ་རྒྱུན་དབུས་གཙང་སྟོད་སྨད་དང་།   ཀཿཐོག་པ་དམ་པ་བདེ་གཤེགས་སོགས་ཀྱི་སྤེལ་བ་ནས་མདོ་ཁམས་ཕྱོགས་སུ་མ་ཉམས་པར་གནས་བཞིན་པའི་ཐོག   །ཕྱིས་རིག་འཛིན་གཏེར་བདག་གླིང་པས་གཡོ་རུ་གྲྭ་ཕྱིར་སྔ་འགྱུར་གྱི་ཆོས་སྡེ་ཨོ་རྒྱན་སྨིན་གྲོལ་གླིང་གསར་དུ་ཕྱག་བཏབ་ཟིན་རྗེས་སྐུའི་གཅུང་ལོ་ཆེན་དྷརྨ་ཤྲཱི་ཉིད་སྔར་དགུང་གྲངས་ཉི་ཤུ་པར་༧གོང་ས་ཀུན་མཁྱེན་ལྔ་པ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས་ཟིན་ནའང་།    ཕྱིས་རྒྱལ་མཆོག་ལྔ་པ་ཆེན་པོ་རང་གི་ལུང་ལས་སྔ་འགྱུར་གྱི་བསྟན་པའི་འབྲེལ་དང་བཅས་སྨད་ {{TibChung|[3a]}} འདུལ་བའི་སྡོམ་རྒྱུན་འཛིན་དགོས་པ་ཡིན་པས།   དེའི་སྡོམ་རྒྱུན་ཁ་རག་ཞལ་སྔ་ནས་ལ་བཞུགས་ཤིང་ཁོང་འདུལ་བའི་ངང་ཚུགས་ཀྱང་ཤིན་ཏུ་བཟང་བས་དེར་བསྐྱར་བསྒྲུབ་གྱིས་ཞེས་བཀས་བསྐུལ་བ་ལྟར་ལོ་ཆེན་དགུང་ལོ་ཉེར་བདུན་པར་སླར་ཡང་མཁན་ཆེན་དཀོན་མཆོག་བསྟན་འཛིན་ལས་དད་པའི་དགེ་འདུན་གྲངས་ཚང་བའི་དབུས་སུ་ཚིག་གསུམ་བར་ཆད་པའི་ཆོ་གས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས།   གུང་ཐང་པཎ་ཆེན་ལ་སོགས་པ་བཤེས་གཉེན་གཞན་དུ་མ་ལས་འདུལ་བའི་བཤད་རྒྱུན་དང་བརྡ་ཆད་ཕྱག་ལེན་སོགས་མཁས་པར་གསན།   ཕྱིས་ཨོ་རྒྱན་སྨིན་གྲོལ་གླིང་གི་གཙང་གྲྭ་གསར་བཙུག་གི་མཁན་པོའི་ཁྲིར་ཕེབས་ཏེ་གཞི་གསུམ་གྱི་ཕྱག་ལེན་རྣམ་པར་གཙང་བས་ཆོས་སྡེ་ཆེན་པོ་བསྐྱངས་ཤིང་།   སྔ་འགྱུར་མཁན་བརྒྱུད་རྣམ་ཐར་དང་།    གཞི་གསུམ་གྱི་ཆོ་ག་སོགས་སོ་ཐར་འདུལ་བའི་ཕྱོགས་སུ་གལ་ཆེ་བའི་ཡིག་ཆའང་མང་དུ་མཛད་པ་བཅས་ཀྱིས་དམ་ཆོས་འདུལ་བའི་བསྟན་རྒྱུན་ལ་ཆེས་བཀའ་དྲིན་གྱི་ཕུལ་དུ་གྱུར།   གཞན་ཐུན་མོང་དང་ཐུན་མོང་མ་ཡིན་པའི་ལོ་རྒྱུས་རྣམ་ཐར་ཞིབ་ཏུ་ནི་རྗེ་ཉིད་ཀྱི་མཛད་རྣམ་ཞལ་གསུང་མ་ལྟར་དང་།    འདིར་དམིགས་བསལ་ {{TibChung|[3b]}} དུ་བརྗོད་བྱ་ལོ་ཆེན་རང་ཉིད་ལ་ཐུག་གི་བར་སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་དཀྱུས་བཞིན་ཤེས་པར་བྱས་ལ།   ༈     །དེ་ནས་དྷརྨ་ཤྲཱིའི་མཁན་བུ་རབ་འབྱམས་པ་འགྱུར་མེད་ཨོ་རྒྱན་ཆོས་གྲགས་ནི།   གཡོ་རུ་གྲྭ་ཕྱིར་སྐུ་འཁྲུངས་ཤིང་།   གཞོན་ནུ་ཉིད་ནས་ཨོ་རྒྱན་སྨིན་གྲོལ་གླིང་གི་ཆོས་གྲྭར་ཞུགས་ཏེ་ཡོན་ཏན་ཐམས་ཅད་ཀྱི་ཕྱི་མོ་ཡི་གེ་འབྲི་ཀློག་ནས་བརྩམས་རིམ་པར་ཆོ་ག་ཆོས་སྤྱོད་བློར་འཛིན་གདངས་དབྱངས་ཕྱག་རྒྱ་རོལ་མོ་དཀྱིལ་འཁོར་བྲིས་ཐིག་གཏོར་བཟོས་མཚོན་པའི་ཕྱག་ལེན་ཆེ་ཕྲ་གང་ལའང་བྱང་ཆུབ་ཅིང་རང་རྐྱ་ཕེར་བ་བསྟན་པའི་མིག་རྒྱན་དུ་གྱུར།   མཁན་ཆེན་རྡོ་རྗེ་འཛིན་པ་ལོ་ཆེན་ཆོས་དཔལ་རྒྱ་མཚོ་གཙུག་གི་ནོར་བུར་བསྟེན་ནས་བསྟན་པའི་གཞི་མ་འདུལ་བ་སོ་ཐར་གྱི་སྡོམ་རྒྱུན་གསན་ཅིང་།   གཞི་གསུམ་གྱི་ཕྱག་ལེན་ལ་སྦྱངས་བརྩོན་ཕུལ་དུ་ཕྱིན་པར་མཛད།   ལྷག་པར་གཏེར་ཆེན་ཆོས་ཀྱི་རྒྱལ་པོ་ལས་སྔ་འགྱུར་བཀའ་གཏེར་ཆོས་སྒོ་རབ་འབྱམས་ཀྱི་སྨིན་གྲོལ་རྒྱབ་བརྟེན་གྱི་རིམ་པ་ཤིན་ཏུ་མང་བར་གསན།   ལོ་ཆེན་དྷརྨ་ཤྲཱི་ལས་རྒྱུད་རྒྱལ་གསང་བ་སྙིང་པོའི་བཤད་ཁྲིད་ཁོ་ནའང་ལོ་བཅུ་གཉིས་ཀྱི་བར་དུ་ལོ་རེར་ཚར་གཉིས་རེ་གསན་ཅིང་།   དེ་རྗེས་ཆོས་གྲྭ་ཆེན་པོར་ལོ་མང་དུ་སྐྱོར་དཔོན་གྱི་ཁུར་ {{TibChung|[4a]}} བཞེས་ཏེ་རྒྱུད་ཀྱི་བཤད་ཁྲིད་མན་ངག་མཐའ་སྤྱོད་དང་བཅས་པ་ལ་གཞན་དྲིང་མི་འཇོག་པའི་མཁས་པ་ཆེན་པོར་གྱུར་ཏེ་སྔགས་རབ་འབྱམས་པའི་མཚན་སྙན་ཕྱོགས་ཀུན་ཏུ་ཁྱབ།   གཞན་ཡང་བཀའ་གཏེར་དུ་མའི་སྒྲུབ་པ་ཕྱག་བཞེས་དང་འབྲེལ་བའི་མན་ངག་ལ་རང་བྱན་ཚུད་པས་ཨོ་རྒྱན་སྨིན་གྲོལ་གླིང་གི་བསྟན་པ་བླར་འདེགས་པའི་ཞབས་ཏོག་ཕུལ་དུ་ཕྱིན་ཏེ་གཏེར་ཆེན་སྐུ་མཆེད་ཀྱི་ཐུགས་ཟིན་སྲས་ཀྱི་དྭངས་མར་གྱུར་ཏོ།   །   ༈     །དེ་མཁན་བུ་སྨིན་གླིང་རྡོར་འཛིན་འགྱུར་མེད་ཆོས་ལྡན་ནི།   འཁྲུངས་ཡུལ་གྲྭ་ཕྱི།   གཞོན་ནུའི་དུས་ནས་སྨིན་གླིང་གི་གྲྭ་སར་ཞུགས་ཏེ་དཔེ་ཆ་འབྲི་ཀློག་དང་ཚོགས་འདོན་བློར་འཛིན་གྱིས་མཚོན་སློབ་སྦྱོང་མང་པོས་ཤེས་རབ་ཀྱི་སྒོ་ཕྱེས།   ཅུང་ནར་སོན་ནས་ཐུན་མོང་རིག་གནས་དང་།   ཐུན་མིན་གཞུང་ལུགས་མང་པོར་གསན་སྦྱོང་མཛད།   དགུང་ལོ་ཉེར་གཅིག་པར་མཁན་པོ་རབ་འབྱམས་པ་ཨོ་རྒྱན་ཆོས་གྲགས་ལས་རང་ལུགས་འདུལ་བའི་སྡོམ་རྒྱུན་གྱི་བསྙེན་པར་རྫོགས་པ་གསན་ཅིང་།   གཞི་གསུམ་གྱི་ཆོ་ག་སོགས་མདོ་ཕྱོགས་ཀྱི་བཤད་ཁྲིད་ལག་ལེན་དང་།   ཁྱད་པར་སྒྱུ་འཕྲུལ་གསང་སྙིང་སོགས་སྔགས་རྒྱུད་ཀྱི་བཤད་པ་ལ་རྩལ་དུ་བཏོན་པས་སྔགས་རམ་པའི་ {{TibChung|[4b]}} མཚན་ཐོགས་ཤིང་བསྟན་པ་ལ་མཛད་རྗེས་ཆེ།   ལྷག་པར་བོད་དུ་བསྟན་དགྲ་སོག་པོ་ཇུན་གར་བའི་རྒོལ་ངན་སླེབས་ཏེ་རང་བསྟན་ལ་ཡོ་འཁྱོམ་ཅི་རིགས་འབྱུང་སྐབས་གོང་གི་སྔགས་རམ་པ་ཨོ་རྒྱན་ཆོས་གྲགས་དང་འདི་གཉིས་ཀྱིས་སྨིན་གླིང་གི་བསྟན་པའི་སྲོག་རྩ་བཟུང་བས་ན་སྐུ་དྲིན་ཤིན་ཏུ་ཆེའོ།  །   ༈     །དེའི་མཁན་བུ་ཨོ་རྒྱན་བསྟན་འཛིན་རྡོ་རྗེ་ནི།   སྨྱོས་གདུང་རྒྱལ་སྲས་དྲིན་ཆེན་རིན་ཆེན་རྣམ་རྒྱལ་གྱི་སྲས་སུ་སྐུ་བལྟམས།   སྐུ་གཞོན་ནུ་ནས་དགེ་བའི་བཤེས་གཉེན་དུ་མའི་ཞབས་ལ་བསྟེན་ནས་གསན་བསམ་ཕྱོགས་མེད་དུ་མཛད།   ཐུན་མོང་རིག་གནས་དང་།    ཐུན་མིན་གཞུང་ལུགས་མཐའ་དག་ལ་སྦྱངས་བརྩོན་ཕུལ་དུ་བྱུང་བས་མཁས་པའི་རྩེ་མོར་སོན།   དགུང་ལོ་བཅོ་ལྔ་པར་རབ་འབྱམས་པ་འཕེལ་རྒྱས་ལས་དགེ་ཚུལ་གྱི་སྡོམ་པ་ནོས།   དགུང་ལོ་ཉི་ཤུ་པར་རབ་འབྱམས་པ་འགྱུར་མེད་ཆོས་ལྡན་ལས་བསྙེན་པར་རྫོགས་པ་གསན།   འདུལ་བའི་བརྡ་ཆད་དང་ཕྱག་ལེན་ལ་བྱང་ཆུབ་པས་མཁས་བཙུན་བཟང་པོའི་ཁྱུ་མཆོག་ཏུ་གྱུར།   ཁྱད་པར་ཡབ་རྗེ་དྲིན་ཆེན་རིན་ཆེན་རྣམ་རྒྱལ་ལས་མདོ་སྒྱུ་སེམས་གསུམ་གཙོ་བོར་གྱུར་པའི་བཀའ་མ།   བཀའ་དགོངས་ཕུར་གསུམ་གཙོ་བོར་གྱུར་པའི་གཏེར་མའི་ཕྱོགས་མང་པོའི་སྨིན་ {{TibChung|[5a]}} གྲོལ་མན་ངག་རྒྱབ་བརྟེན་དང་བཅས་པ་གསན།   རང་དོན་ཉམས་བཞེས་དང་གཞན་དོན་འཆད་སྤེལ་གྱི་ཕྲིན་ལས་ཤིན་ཏུ་རྒྱ་ཆེ་ཞིང་།    ལྷག་པར་ཨོ་རྒྱན་སྨིན་གྲོལ་གླིང་གི་བསྟན་པ་བཤད་སྒྲུབ་གཉིས་ལྡན་གྱི་སྒོ་ནས་བསྐྱངས་པས་སྔ་འགྱུར་བ་སྤྱི་ལ་བཀའ་དྲིན་ཕུལ་དུ་བྱུང་བ་ཡིན་ནོ།   །    ༈     །དེའི་མཁན་བུ་རྒྱལ་སྲས་རིག་འཛིན་བཟང་པོ་ནི།    དཔལ་ལྡན་སྨྱོས་ཀྱི་གདུང་བརྒྱུད་དུ་སྐུ་འཁྲུངས།    སྐུ་གཞོན་ནུའི་དུས་ནས་དགེ་བའི་བཤེས་གཉེན་དུ་མ་ལས་གསན་བསམ་རྒྱ་ཆེན་པོ་མཛད།   དགུང་ལོ་ཉེར་གཅིག་པར་མཁན་ཆེན་ཨོ་རྒྱན་བསྟན་འཛིན་རྡོ་རྗེ་ལས་རབ་ཏུ་བྱུང་སྟེ་བསྙེན་པར་རྫོགས་ཤིང་།   གཞི་གསུམ་གྱི་ཕྱག་ལེན་སོགས་མདོ་ཕྱོགས་ལ་གསན་སྦྱོང་ཞིབ།    ཁྱད་པར་རང་ལུགས་བཀའ་གཏེར་རྒྱ་མཚོའི་སྨིན་གྲོལ་རྒྱབ་བརྟེན་དང་བཅས་པ་བུམ་པ་གང་བྱོས་སུ་ནོས།   ཨོ་རྒྱན་སྨིན་གྲོལ་གླིང་གི་མཁན་ཁྲི་ལ་བཞུགས་སྐབས་མདོ་ཁམས་སྡེ་དགེ་ནས་འཇམ་དབྱངས་མཁྱེན་བརྩེའི་དབང་པོ་དགུང་ལོ་ཉེར་གཅིག་བཞེས་པ་དབུས་ཕེབས་སྐབས་མཁན་ཆེན་རིག་འཛིན་བཟང་པོ་འདི་ཉིད་ཀྱི་གཙོས་དད་པའི་དགེ་འདུན་གྲངས་ཚང་བའི་མདུན་ནས་བསྙེན་རྫོགས་ཀྱི་སྡོམ་པ་བཞེས་པ་སོགས་ {{TibChung|[5b]}} བསྟན་པ་འཕེལ་རྒྱས་ཀྱི་སོན་རྩ་ལྟ་བུར་གྱུར་ཏེ་མཁས་བཙུན་བཟང་པོའི་མཛད་པ་ཕུལ་དུ་བྱུང་བ་ཡོངས་ལ་གྲགས་སོ།   །   ༈     །དེའི་མཁན་བུ་མཁན་ཆེན་པདྨ་བཀྲ་ཤིས།    མདོ་ཁམས་སྒང་དུ་སྐུ་འཁྲུངས།    སྐུ་གཞོན་ནུའི་དུས་ནས་དམ་པའི་རིགས་སད་དེ་ཡོན་ཏན་གསན་སྦྱོང་ལ་དོན་གཉེར་ཆེ།    རུ་དམ་བསམ་གཏན་ཆོས་གླིང་དུ་གཞུང་ལུགས་རབ་འབྱམས་ལ་གསན་བསམ་རྒྱ་ཆེན་པོ་མཛད།    དགུང་ལོ་ཉི་ཤུ་པར་རྒྱལ་སྲས་རིག་འཛིན་བཟང་པོ་ལས་རབ་ཏུ་བྱུང་སྟེ་བསྙེན་པར་རྫོགས།   མདོ་སྔགས་རིག་གཞུང་དང་བཅས་པ་ལ་གཞན་དྲིང་མི་འཇོག་པའི་མཁྱེན་རབ་ཀྱི་རྩལ་རྫོགས།   མཁས་བཙུན་བཟང་པོའི་ཡོན་ཏན་རྨད་དུ་བྱུང་བ་མངའ་ཞིང་།    མདོ་ཁམས་རྫོགས་ཆེན་པའི་མཁན་པོའི་ཁྲི་ལ་ཡུན་རིང་པོར་བཞུགས་ཏེ་བཤད་སྒྲུབ་ལས་གསུམ་གྱི་སྒོ་ནས་མདོ་སྔགས་བསྟན་པའི་ཕྲིན་ལས་རྒྱ་ཆེར་སྤེལ།   སྐུ་ཚེའི་སྨད་ལ་ཡང་དག་སྤོང་བ་པའི་བརྟུལ་ཞུགས་དང་དུ་བཞེས་ཏེ་ངེས་མེད་དབེན་པའི་གནས་སུ་ཚེ་དང་སྒྲུབ་པ་མཉམ་པར་མཛད་དོ།   །   ༈     །དེའི་མཁན་བུ་ཐུབ་བསྟན་པདྨ་རྒྱས་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ནི།   མདོ་ཁམས་རྫ་སྟོད་དགེ་མང་གི་ཕྱོགས་སུ་སྐུ་འཁྲུངས།   འདི་ {{TibChung|[6a]}} ཉིད་མཁན་ཆེན་བོ་ངྷི་སཏྭ་དང་ལོ་ཆེན་བཻ་རོ་ཙ་ན་ཟུང་འཇུག་གི་རྣམ་འཕྲུལ་དུ་དམ་པའི་ལུང་གིས་ཟིན།   སྐུ་ཆུང་ངུའི་དུས་ནས་ཡི་གེ་འབྲི་ཀློག་སོགས་བརྡ་བསྟན་པ་ཙམ་གྱིས་མཁྱེན།   ཐེག་པ་ཆེན་པོའི་རིགས་སད་ཅིང་མཁྱེན་རབ་ཀྱི་རྩལ་ཁ་ཤིན་ཏུ་ཆེ།    རིམ་པར་མི་འགྱུར་ནམ་མཁའི་རྡོ་རྗེ།   འཇིགས་མེད་རྒྱལ་བའི་མྱུ་གུ།    རྡོ་གྲུབ་ཀུན་བཟང་གཞན་ཕན་སོགས་ཁམས་ཕྱོགས་དང་།   ཡུལ་དབུས་སུ་བྱོནནས།    སྨིན་གླིང་ཁྲི་མཁན།   རྡོ་བྲག་རིག་འཛིན་ཆེན་པོ་ཡབ་སྲས།   ལྷོ་བྲག་ལྷ་ལུང་གསུང་སྤྲུལ་ཡབ་སྲས་སོགས་ཕུལ་བྱུང་མཁས་བཙུན་གྲུབ་པའི་རྣམ་ཐར་བསམ་མི་ཁྱབ་པ་ལ་མངའ་དབང་འབྱོར་བའི་སློབ་དཔོན་དགེ་བའི་བཤེས་གཉེན་མང་དུ་བསྟེན་ནས།   ཐུན་མོང་རིག་གནས།   ཐུན་མིན་མདོ་སྔགས་གཞུང་ལུགས།   ཁྱད་པར་གསང་སྔགས་རྡོ་རྗེ་ཐེག་པ་མདོ་སྒྱུ་སེམས་གསུམ་གཙོ་བོར་གྱུར་པའི་བཀའ་མ་དང་།   བཀའ་དགོངས་ཕུར་གསུམ་གཙོ་བོར་གྱུར་པའི་གཏེར་མའི་ཕྱོགས་རྣམས་ཀྱི་དབང་ལུང་མན་ངག་ལ་བཤད་ཁྲིད་མཐའ་ཡས་པ་གསན་ཅིང་བརྒྱུད་འཛིན་བཀའ་བབས་ལུང་ཐོབ་ཀྱི་བདག་པོར་མངའ་བརྙེས།   བར་སྐབས་སུ་སྟོད་གངས་རི་ཏི་སེ་ནས་ {{TibChung|[6b]}} སྨད་རྒྱ་ནག་གླང་ཆེན་འགྱིང་རི་ཡན་སྒྲུབ་གནས་ཁག་ཏུ་གནས་འབྲེལ་བསྙེན་སྒྲུབ་ལ་གཞོལ་ཏེ་གྲུབ་པའི་ས་མཐོར་གཤེགས།   ཚངས་སྤྱོད་རྣམ་དག་གོས་དཀར་ལྕང་ལོའི་ཆ་ལུགས་སུ་བཞུགས་ཤིང་།    ངེས་མེད་ཀྱི་གནས་སུ་སྒྲུབ་པའི་རྒྱལ་མཚན་ཁོ་ན་འཛུག་པར་དགོངས་བཞིན་ཡོད་ནའང་།  ཉིན་གཅིག་གི་ཚེ་ན་འདི་ལྟར་བསྟན་པ་སྤྱིའི་ལམ་སྲོལ་སྔར་ཆོས་རྒྱལ་ཆེན་པོས་བཀས་བཅད་པ་བཞིན་སྤྱོད་པ་མཁན་པོ།   ལྟ་བ་ཀླུ་སྒྲུབ།    ཉམས་ལེན་པདྨ་དང་བི་མ་ལའི་ལུགས་ལྟར་བྱས་ན་སྔ་འགྱུར་བའི་བསྟན་པ་འདི་ཉིད་དུས་ཀྱི་མཐར་ཡང་ཅུང་ཞིག་མི་ནུབ་དར་རྒྱས་སུ་འགྱུར་ངེས་སྙམ་པ་ཐུགས་ལ་གློ་བུར་དུ་འཁྲུངས་པ་ལྟར་དེ་ཁོ་ན་ཕྱག་བཞེས་སུ་བསྟར་རྒྱུའི་ཐུགས་དམ་བཅས་པ་བཞིན།    རྫོགས་ཆེན་མཁན་རབས་དང་པོ་པདྨ་བཀྲ་ཤིས་ལས་རབ་ཏུ་བྱུང་ཞིང་བསྙེན་པར་རྫོགས་ཏེ་འདུལ་བའི་གནང་བཀག་ལ་ཚུལ་བཞིན་བསླབ་པའི་ངང་གིས་ཉེས་ལྟུང་ཕྲ་མོས་ཀྱང་མ་གོས་པ་འཕགས་པ་ཉེ་བར་འཁོར་དང་མཚུངས་པར་བསྔགས་འོས་སུ་གྱུར།    རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་ལུང་བསྟན་པ་ལྟར་དུ་དམ་རྫོགས་ཆེན་དགོན་དུ་ཕེབས་པ་དང་།   རྫོགས་སྤྲུལ་མི་འགྱུར་ {{TibChung|[7a]}} ནམ་མཁའི་རྡོ་རྗེའི་ཞལ་སྔ་ནས་ཉིད་རྫོགས་ཆེན་དགོན་དུ་བཞུགས་ནས་བསྟན་པ་བཤད་སྒྲུབ་ཀྱི་གཞུང་སྲོང་དགོས་པའི་བཀའ་ལུང་གནང་བ་ལྟར།    མདོ་སྔགས་བསྟན་བཅོས་ཀྱི་གཞུང་བཤད་ཅི་རིགས་དང་།    རྒྱལ་བའི་བཀའ་འགྱུར་རོ་ཅོག་གི་ལྗགས་ལུང་།    འདུལ་བ་གཞི་གསུམ་གྱི་ཕྱག་བཞེས་བཟང་པོའི་རྒྱུན་བསྐྱངས་པས་མདོ་ཁམས་ཕྱོགས་ཀྱི་རྙིང་ཕྱོགས་རྣམས་སྨོས་ཅི།    གྲུབ་མཐའ་གཞན་གྱི་དགོན་སྡེ་སྔར་དབྱར་གནས་སོགས་མེད་པ་རྣམས་སུའང་ངང་གིས་ཁྱབ་ཅིང་།   བཀའ་འགྱུར་རོ་ཅོག་གི་ལུང་རྒྱུན་ཀྱང་ཇེ་འཕེལ་དུ་འགྱུར།   ལྷག་པར་སྔ་འགྱུར་བཀའ་མའི་ཆོས་སྡེ་མདོ་སྒྱུ་སེམས་གསུམ་གྱིས་གཙོས་པའི་རྒྱུད་ལུང་མན་ངག་སྒྲུབ་ཕྲིན་སྐོར་རྣམས་བཀའི་བསྡུ་བ་གནང་ཞིང་འཕྲུལ་སྤར་དུ་བསྐྲུན་ཏེ་འཆད་སྤེལ་ཡང་དང་ཡང་དུ་གནང་བ་ལ་བརྟེན་ནས་ད་ལྟའི་བར་སྔ་འགྱུར་གྱིས་གཙོས་པའི་རྒྱུད་ལུང་མན་ངག་སྒྲུབ་ཕྲིན་སྐོར་རྣམས་བཀའི་བསྡུ་བ་གནང་ཞིང་འཕྲུལ་སྤར་དུ་བསྐྲུན་ཏེ་འཆད་སྤེལ་ཡང་དང་ཡང་དུ་གནང་བ་ལ་བརྟེན་ནས་ད་ལྟའི་བར་སྔ་འགྱུར་གྱི་བསྟན་པ་རིན་པོ་ཆེ་མི་ནུབ་དར་ཞིང་རྒྱས་པའི་གསོས་སུ་གྱུར་པ་ནི་དམ་པའི་ཐུགས་བསྐྱེད་སྨོན་ལམ་གྱི་མཐུ་ཁོ་ནར་ངེས།    མཐར་ཞིང་བརྗེ་ཁར་ཁོ་བོ་སྟོན་པ་མཆོག་དེའི་བརྟུལ་ཞུགས་ཀྱི་རྗེས་སུ་སློབ་པའི་རྟེན་འདི་ལས་མ་འགྱུར་བར་ཤི་ན་རང་དོན་དུ་འགྱོད་པ་གང་ཡང་མེད་ལ།    གཞན་དོན་དུ་ནི་ཕྱོགས་གང་ནས་ཀྱང་ {{TibChung|[7b]}} བསྟན་པའི་བྱ་བ་དེའི་འཕྲོ་མཐུད་དེ་བརྩོན་པ་མི་ལྷོད་པ་སྨོན་ལམ་གྱི་དབང་གིས་འོང་ཞེས་འདའ་ཁའི་ཞལ་ཆེམས་སྩལ་ཏེ་ཞིང་ཁམས་སུ་གཤེགས་སོ།   །   ༈     །དེའི་མཁན་བུ་ཐུབ་བསྟན་རྒྱལ་མཚན་ནི།     མདོ་ཁམས་རྫོགས་ཆེན་གླིང་སྤྲུལ་སྐུ་ཕྲེང་རིམ་བྱོན་གྱི་སྐྱེས་བུ་དམ་པའི་གོ་སར་བཞུགས།    གཞོན་ནུའི་དུས་ནས་ཐུན་མོང་རིག་གནས།    ཐུན་མིན་གཞུང་ལུགས།    ཁྱད་པར་བཀའ་གཏེར་ཟབ་དོན་རྒྱ་མཚོའི་མན་ངག་ཡོངས་སུ་རྫོགས་པ་གཞན་དྲིང་མི་འཇོག་པར་གསན།   ལྷག་པར་རྒྱལ་སྲས་གཞན་ཕན་མཐའ་ཡས་ལས་འདུལ་བ་སོ་ཐར་གྱི་སྡོམ་རྒྱུན་རང་ལུགས་ཞི་འཚོའི་བཀའ་སྲོལ་ཉིད་གསན་ཅིང་།    གནང་བཀག་བསླབ་པའི་ཚུལ་ལ་ཕྱག་ལེན་ཤིན་ཏུ་གཙང་།    རང་དོན་ཉམས་བཞེས།   གཞན་དོན་འཆད་སྤེལ་སོགས་མཛད་པ་ཕྲིན་ལས་རྒྱ་ཆེ་ཞིང་།    མདོ་སྔགས་ཀྱི་བསྟན་པ་རིན་པོ་ཆེ་མཐའ་དབུས་ཀུན་ཏུ་སྤེལ་བར་མཛད་པའི་བཀའ་དྲིན་བསམ་གྱིས་མི་ཁྱབ་པ་ཉིད་དོ།    །   ༈     །དེའི་མཁན་བུ་ཚུལ་ཁྲིམས་རྡོ་རྗེ་ནི།    དཔལ་ལྡན་སྨྱོས་རིགས་སུ་སྐུ་བལྟམས།   གསན་བསམ་རྒྱ་མཚོའི་ཕ་མཐར་སན་ཅིང་།    དགུང་ལོའི་དུས་སྐབས་དང་བསྟུན་ཏེ་མཁན་ཆེན་ {{TibChung|[8a]}} ཐུབ་བསྟན་རྒྱལ་མཚན་ལས་བསྙེན་པར་རྫོགས་ནས་ཨོ་རྒྱན་སྨིན་གྲོལ་གླིང་གི་མཁན་ཁྲི་ལ་བཞུགས།   སྤྱིར་མདོ་སྔགས་ཆོས་ཚུལ་རབ་འབྱམས་འཆད་སྤེལ་སོགས་བསྟན་པ་ལ་མཛད་པ་རྒྱ་ཆེ།   ལྷག་པར་དགོན་སྡེ་ནང་གི་དགེ་འདུན་གསར་བུས་མཚོན་ཁམས་བོད་ཕྱོགས་ཀུན་ནས་རང་ལུགས་སྡོམ་རྒྱུན་དོན་དུ་གཉེར་བ་རྣམས་ལ་བསླབ་ནོར་གྱི་རྒྱུན་སྤེལ་བར་མཛད་པས་བསྟན་པ་མི་ནུས་ཡུན་དུ་གནས་པའི་བཙས་སུ་གྱུར་ཏོ།   །   ༈     །དེའི་མཁན་བུ་འགྱུར་མེད་ངག་དབང་ནོར་བུ་ནི།    གཡོ་རུ་གྲྭའི་ཕྱོགས་སུ་སྐུ་འཁྲུངས།   གཞོན་ནུའི་དུས་ནས་སྨིན་གྲོལ་གླིང་གྲྭ་སར་བཞུགས་ཏེ་འབྲི་ཀློག་ནས་བརྩམས་ཐུན་མོང་གི་བཅའ་སྒྲིག་སློབ་གཉེར་ཆོ་ག་ཆོས་སྤྱོད་བློར་འཛིན་གར་ཐིག་དབྱངས་རོལ་གཏོར་བཟོ་སོགས་ཀྱིས་མཚོན་དགོན་སྡེའི་ཕྱག་ལེན་ཆེ་ཕྲ་གང་ལའང་མཁས་པའི་རྩེར་སོན་ཏེ་བསྟན་པའི་མིག་རྒྱན་དུ་གྱུར།    ཐུན་མོང་མ་ཡིན་པའི་རིག་གཞུང་སྨིན་གྲོལ་བསྐྱེད་རྫོགས་ཟབ་གནད་ལ་ཐོས་བསམ་སྒོམ་གསུམ་གྱི་རྩལ་རྫོགས།   ལྷག་པར་མཁན་ཆེན་ཚུལ་ཁྲིམས་རྡོ་རྗེ་གཙོ་བོར་གྱུར་པའི་དགེ་བའི་བཤེས་གཉེན་རྣམས་ལས་སྡོམ་པ་གསུམ་གྱི་བདུད་རྩིས་ཐུགས་རྒྱུད་གཏམས།    {{TibChung|[8b]}} མདོ་སྔགས་གཉིས་ཀྱི་གཞུང་དང་བཀའ་གཏེར་མན་ངག་ལས་ཁྲིགས་ཀྱི་སྐོར་ལ་མཁས་པའི་ཕུལ་དུ་ཕྱིན།   ཚོགས་ཆེན་གྱི་བྱང་འདྲེན་བགྲང་བྱ་བཅུ་ཕྲག་ལྷག་པ་མཛད་ཅིང་།    དེ་ནས་རྡོར་འཛིན་མཁན་པོའི་གོ་སར་ཕེབས་ཏེ་ཨོ་རྒྱན་སྨིན་གྲོལ་གླིང་གི་འདུས་སྡེས་མཚོན་སྔ་འགྱུར་ཆོས་སྡེ་རྣམས་སུ་མདོ་སྔགས་ཀྱི་ཕྱག་བཞེས་གཙང་མ་རང་ལུགས་མ་ཉམས་པའི་རྒྱུན་བསྐྱངས་པར་མཛད་དོ།   །   ༈      །དེའི་མཁན་བུ་གཅུང་འགྱུར་མེད་ངག་དབང་ཆོས་ཀྱི་གྲགས་པ་ནི།   བཻ་རོ་དངོས་སྣང་སྨིན་གླིང་གཏེར་ཆེན་མཆོག་གི་གདུང་རབས་ཆོས་རྒྱུན་དང་བཅས་པ་མི་ཉམས་འཛིན་སྤེལ་གྱི་བཀའ་བབས་གཏེར་སྟོན་རང་རིག་རྡོ་རྗེའི་རིགས་དབོན་དུ་སྐུ་འཁྲུངས།    གཞོན་ནུ་ཉིད་ནས་ཁམས་དབུས་ཀྱི་བཤེས་གཉེན་མང་པོ་ཚུལ་བཞིན་བསྟེན་ནས་སྨིན་གྲོལ་མན་ངག་རྒྱ་མཚོ་ལྟ་བུ་གསན་བསམ་སྒོམ་གསུམ་མཛད་ཅིང་།    དགུང་ལོ་ཉེར་གཅིག་པར་རྡོར་འཛིན་མཁན་ཆེན་ངག་དབང་ནོར་བུ་ལས་བསྙེན་པར་རྫོགས་ཏེ་འདུལ་བའི་ཀུན་སྤྱོད་ཤིན་ཏུ་གཙང་མ་ལ་རྟག་ཏུ་ཐུགས་གཞོལ།   ཇི་ཞིག་ན་སྨིན་གླིང་ཁྲི་ཚབས་ཀྱི་མཚན་གནས་བཞེས་དགོས་བྱུང་བ་ལ་བརྟེན་ནས་སྨིན་དགོན་མ་ལག་དང་བཅས་པར་གཟིགས་བསྐྱངས་ {{TibChung|[9a]}} ཀྱིས་སྣོད་བཅུད་གང་སར་ཉམས་པ་སོར་ཆུད་མི་ཉམས་གོང་འཕེལ་གྱི་འཛིན་སྤྲད་ཕུལ་དུ་བྱུང་བས་བསྟན་པ་རྨང་ནས་གསོས་སོ།   །   ༈      །དེའི་མཁན་བུ་ངག་དབང་ཆོས་ཀྱི་བློ་གྲོས་ནི།    །ཞྭ་དེའི་འཁྲུལ་ཞིག་མདོ་སྔགས་གླིང་པའི་ཡང་སྲིད་དེ་མ་ཐག་པ་སྟེ།    ཡེ་འབྲོག་ཕྱོགས་སུ་སྐུ་བལྟམས།    གཞོན་ནུའི་དུས་ནས་རབ་ཏུ་བྱུང་བ་ལ་དགྱེས་ཤིང་དགུང་གྲངས་སོན་ནས་རྡོར་འཛིན་མཁན་པོ་ངག་དབང་ནོར་བུའི་མཁན་བུ་སྨིན་གླིང་གདུང་བརྒྱུད་ཀྱི་གཅུང་འགྱུར་མེད་ངག་དབང་ཆོས་ཀྱི་གྲགས་པ་ལས་བསྙེན་པར་རྫོགས།    གཞན་ཡང་གྲུབ་མཐའ་རིས་སུ་མ་ཆད་པའི་ཡོངས་འཛིན་དུ་མ་ལས་མདོ་སྔགས་སྨིན་གྲོལ་རྒྱབ་བརྟེན་དང་བཅས་པ་ཤིན་ཏུ་མང་བར་གསན་བཞེས་དང་།    འཁོར་ལོ་གསུམ་གྱི་མཛད་པ་བཟང་པོ་བསྟན་པའི་ལྷག་ཞབས་འདི་ལ་དཔེར་འོས་པ་མཛད།    ལྷག་པར་སྔ་འགྱུར་ཞི་འཚོའི་འདུལ་བའི་སྡོམ་རྒྱུན་གྱི་སྲོག་རྩ་འཛིན་པར་མཛད་པས་ན་ཆེས་བཀའ་དྲིན་གྱི་ཕུལ་དུ་ཕྱིན་པ་ཡིན་ལ།    ད་དུང་ཞབས་པད་བསྐལ་པ་རྒྱ་མཚོར་བརྟན་ནས་བསྟན་པའི་སྒྲོན་མེ་ཡུན་རིང་དུ་མཛད་པར་སྙིང་ནས་སྨོན་ནོ།    །   ༈     །ཡང་ཡར་འབྲོག་ {{TibChung|[9b]}} སྟག་ལུང་བྱང་གཏེར་གྱི་ཆོས་སྡེ་སྐྱོང་བ་རྔོག་ཆོས་སྐུ་རྡོ་རྗེའི་རྣམ་འཕྲུལ་ཀུན་བཟང་ཆོས་སྐུ།   དེའི་ཡང་སྲིད་སྐུ་ཕྲེང་གཉིས་པ་ཐུབ་བསྟན་ཆོས་ཀྱི་ཉི་མ།   སྐུ་ཕྲེང་གསུམ་པ་བཤད་སྒྲུབ་ཉིན་བྱེད་ཕྲིན་ལས་བཟང་པོའམ།    ཡོངས་གྲགས་སུ་སྟག་ལུང་རྩེ་སྤྲུལ་རིན་པོ་ཆེར་གྲགས་པ་འདི་ཉིད་སྤྱིར་སྐུ་གཞོན་ནུའི་དུས་ནས་མ་དགོན་ཐུབ་བསྟན་རྡོ་རྗེ་བྲག་ཏུ་སྒྲིག་ཞུགས་ཐོག་རང་ཁོངས་སྐུ་ཡོན་གྱི་རིགས་རྣམས་གསན་སྦྱོང་མཐར་ཐོན་ཅིང་།    ཡོངས་འཛིན་དགེ་བའི་བཤེས་གཉེན་མང་དུ་བསྟེན་པ་ལས་ཐུན་མོང་རིག་གཞུང་།   ཐུན་མིན་རྒྱུད་ལུང་མན་ངག་གི་སྨིན་གྲོལ་གསན་བསམ་རྒྱ་ཆེ།    ལྷག་པར་རྡོར་འཛིན་འགྱུར་མེད་ངག་དབང་ནོར་བུའི་མཁན་བུ་སྨིན་གླིང་གདུང་བརྒྱུད་ཀྱི་གཅེན་མཁན་ཁྲི་འགྱུར་མེད་མཁྱེན་བརྩེ་ནོར་བུའི་དྲུང་ནས་རང་ལུགས་ཞི་འཚོའི་སྡོམ་རྒྱུན་གྱི་བསྙེན་པར་རྫོགས་པ་བཞེས་ཤིང་།   གཞི་གསུམ་གྱི་ཕྱག་ལེན་ཤིན་ཏུ་ཞིབ།    རིམ་བཞིན་རང་གཞན་དགོན་སྡེ་མང་པོའི་དགེ་འདུན་སོགས་ཕྱོགས་མཐའི་དོན་གཉེར་ཅན་རྣམས་ལ་བསྙེན་པར་རྫོགས་པའི་བསླབ་ནོར་གྱི་དགའ་སྟོན་ཅི་དགར་སྩལ་བས་དཔལ་ལྡན་ཞི་བ་འཚོའི་ཕྲིན་ལས་རྒྱ་ཆེར་སྤེལ་བའི་ཐུགས་བསྐྱེད་ལྷུར་བཞེས་པའི་ངང་ནས་ད་ལྟ་ {{TibChung|[10a]}} འཚོ་ཞིང་གཞེས་བཞིན་པ་འདི་ལགས་ཏེ།   ད་དུང་བགྲང་བྱ་བརྒྱ་ཕྲག་བརྒལ་བར་ཞབས་པད་བརྟན་ཅིང་མཁན་སློབ་གཉིས་ཀྱི་བསྟན་པའི་སྒྲོན་མེ་ཡུན་རིང་དུ་སྤོར་བར་མཛད་པར་སྙིང་ནས་སྨོན་ནོ།    །ཡང་སྔར་ཀཿདམ་པ་བདེ་གཤེགས་སོགས་ནས་བཟུང་ཁྱད་པར་འཕགས་པའི་སྐྱེས་ཆེན་རིམ་པར་བྱོན་པ་རྣམས་ཀྱི་བཀའ་དྲིན་ལ་བརྟེན་མདོ་ཁམས་བོད་ཆེན་པོའི་ཕྱོགས་ཀྱི་སྔ་འགྱུར་དགོན་གནས་ཆོས་སྡེ་རྣམས་སུ་མདོ་སྔགས་ཀྱི་བསྟན་པ་རིན་པོ་ཆེ་སྤྱི་དང་བྱེ་བྲག་སོ་ཐར་གྱི་ཕྱོགས་ལ་རང་ལུགས་ཞི་འཚོའི་སྡོམ་རྒྱུན་མ་ཉམས་པར་གནས་བཞིན་པ་ལ།   བར་ལམ་རྒྱལ་སྲས་གཞན་ཕན་མཐའ་ཡས་སོགས་ཀྱི་སྐབས་ནས་བརྒྱུད་པའི་བཀའ་སྲོལ་ཤིན་ཏུ་མང་བར་གྱེས་པའི་རྣམ་གྲངས་མཐའ་ཡས་པ་ནི་འདིར་བསྡུ་ཞིང་བརྗོད་པའི་སྐབས་མ་རྙེས་མོད།   ད་ལྟའི་དུས་སུ་མདོ་སྔགས་བསྟན་པའི་སྲོག་རྩ་མི་བཅད་པའི་སླད་དུ་འཁོར་ལོ་གསུམ་གྱིས་ཕྲིན་ལས་སྤེལ་བ་ལ་ནམ་ཡང་ཞུམ་པ་མེད་པའི་ཐུགས་བསྐྱེད་ཅན་ནི་དཔལ་ཡུལ་རྣམ་རྒྱལ་བྱང་ཆུབ་གླིང་གི་བསྟན་པའི་མངའ་བདག་གྲུབ་དབང་པདྨ་ནོར་བུའི་མཆོག་སྤྲུལ་འཇིགས་མེད་ཐུབ་བསྟན་བཤད་སྒྲུབ་ཆོས་ཀྱི་སྒྲ་དབྱངས་དཔལ་བཟང་པོ་ཞེས་བསྟན་འགྲོའི་དཔུང་ {{TibChung|[10b]}} གཉེན་དམ་པར་འཚོ་གཞེས་ཀྱི་སྐལ་བཟང་ཀུན་གྱི་མཐུན་སྣང་དུ་གྲུབ་པ་འདི་ལགས་ན།    ད་དུང་ཡང་སྐུ་ཚེའི་འདུ་བྱེད་འཆི་མེད་རྡོ་རྗེའི་ངོ་བོར་བདག་གིར་བཞེས་ཏེ་མཁན་སློབ་ཆོས་གསུམ་གྱི་བསྟན་པའི་འོད་སྟོང་ནམ་མཁའི་ཇི་སྲིད་དུ་བརྡལ་བར་གསོལ་བ་འདེབས་པ་ལགས་སོ།   །མཚུངས་མེད་སྟོན་པའི་ཞལ་སྐྱིན་མཁན་རབས་ཕྲེང་།   །ཇི་ལྟར་བྱོན་པའི་ལོ་རྒྱུས་ཏམྦུ་ར།   །སྐལ་བཟང་རྣ་བར་འཇེབས་ལས་ཡིད་ཆེས་ཀྱི།    །ངེས་ཤེས་འདྲེན་པའི་ཕོ་ཉར་འགྱུར་ལ་རེ།   །ཚུལ་འདི་ངུར་སྨྲིག་འཛིན་པའི་བཤེས་རྣམས་ལས།    །རྨོངས་བླུན་ཕ་ཇོ་བདག་ལྟའི་ཁུར་མིན་ཀྱང་།   །དམ་པའི་རྣམ་ཐར་དབྱིངས་སུ་ཡལ་དོགས་ནས།   །གསང་སྒྲོས་ཡི་གེར་བཀོད་ལ་ཉེས་མེད་སྙམ།   །འོན་ཀྱང་ནོར་བ་མཆིས་ན་རང་གི་སྐྱོན།   །ལགས་ཕྱིར་མཁས་དབང་ཚོགས་ཀྱིས་བཟོད་བཞེས་གསོལ།    །དོན་མཐུན་དངོས་པོའི་ཚུལ་བརྗོད་དགེ་བ་གང་།   །བསྟན་པ་རིན་ཆེན་རྒྱས་པའི་དཔལ་དུ་ཤོག   །རབ་མཛེས་ཆོས་གོས་གསུམ་གྱིས་ལུས་བརྒྱན་ཅིང་།   །ལེགས་གསུང་སྡེ་སྣོད་གསུམ་གྱིས་ངག་རབ་བརྒྱན།   །ཁྱད་ནོར་བསླབ་པ་གསུམ་གྱིས་སེམས་བརྒྱན་ཏེ།    །སྲིད་ན་ཟླ་བྲལ་འཕགས་པའི་ས་ཐོབ་ཤོག   །ཅེས་སྔ་འགྱུར་སྡོམ་རྒྱུན་མཁན་བརྒྱུད་ཀྱི་ {{TibChung|[11a]}} རྣམ་ཐར་ཉུང་གསལ་སྒྲོལ་མེའི་ཁ་སྐོང་ངེས་ཤེས་འདྲེན་པའི་ཕོ་ཉ་ཞེས་བྱ་བ་འདིའང་།   བསྐལ་ངན་དུས་ཀྱི་རླུང་དམར་ཆེས་ཆེར་འཚུབས་པའི་སྐབས་འདིར་བསྟན་པའི་སྒྲོན་མེ་བཟང་པོ་ཡུན་དུ་མི་མནལ་བའི་ཆ་རྐྱེན་ཁོ་ནར་དམིགས་ཏེ།    སྔ་འགྱུར་བཀའ་མའི་ཆོས་སྡེ་ཡོངས་རྫོགས་ཀྱི་བཀའི་བསྡུ་བ་ལྷུར་ལེན་པའི་སྐབས་ཐོགས་མའི་གཞི་རྩ་མདོ་ཕྱོགས་འདུལ་བའི་ཡིག་ཆ་སོ་ཐར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ལོ་ཆེན་དྷརྨ་ཤྲཱིའི་གསུང་གི་ཁ་སྐོང་དུ་ད་ལྟའི་བར་གྱི་མཁན་རབས་ཀྱི་ལོ་རྒྱུས་ས་བོན་ཙམ་མེད་དུ་མི་རུང་བར་མཐོང་ནས།   རང་གི་འདྲེན་པ་བཤེས་གཉེན་དམ་པ་རྣམས་ཀྱི་གསུང་སྒྲོས་ལ་སྒྲོ་སྐུར་གྱིས་མ་བསླད་པར་མདོར་བསྡུས་སྙིང་པོར་དྲིལ་བའི་ཚུལ་གྱིས་བྲིས་པ་སྟེ།   ལྷ་རིགས་ཤཱཀྱའི་དགེ་བསྙེན་འཇིགས་བྲལ་ཡེ་ཤེས་རྡོ་རྗེས་སྦྱར་བ་ལས།   ཐོག་མའི་ཡི་གེ་པ་ནི་ཤར་ཕྱོགས་མོན་གྱི་དགེ་བསྙེན་ཀུན་བཟང་དབང་འདུས་སོ།   །འདིས་ཀྱང་བསྟན་པ་རིན་པོ་ཆེ་མི་ཉམས་གོང་ནས་གོང་དུ་འཕེལ་བའི་རྒྱུར་གྱུར་ཅིག   །སརྦ་དཱ་མངྒ་ལཾ།།     །།}}
</onlyinclude>
{{TsagliCall}}
<headertabs/>