View source for TTDL-ZABTER-08-NYA-019

{{Text
|classification=Tibetan Publications
|subclass=Tibetan Texts
|fulltitletib=ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་དབང་ཕྱུག་ཆེན་པོའི་དྲག་སྒྲུབ་དུག་གི་རྒྱ་མཚོ༔
|fulltitle=zab gsang mkha' 'gro'i snying thig las: lha chen dbang phyug chen po'i drag sgrub dug gi rgya mtsho:
|citation=Khrag 'thung [[Bdud 'joms gling pa]]. ''Zab gsang mkha' 'gro'i snying thig las lha chen dbang phyug chen po'i drag sgrub dug gi rgya mtsho''. In ''Sprul pa'i gter chen bdud 'joms gling pa'i zab gter gsang ba'i chos sde'', Vol. 8: 129-144. Thimphu, Bhutan: Lama Kuenzang Wangdue, 2004.
|collectiontitletib=བདུད་འཇོམས་གླིང་པ་ཟབ་གཏེར།
|collectiontitle=bdud 'joms gling pa zab gter
|author=bdud 'joms gling pa
|sourcerevealer=bdud 'joms gling pa
|tibgenre=Sadhanas - Evocation Ritual - sgrub thabs
|terma=Yes
|cycle=zab gsang mkha' 'gro'i snying thig
|cycletib=ཟབ་གསང་མཁའ་འགྲོའི་སྙིང་ཐིག་
|language=Tibetan
|volumenumber=08
|volnumtib=༨
|volyigtib=ཉ
|totalvolumes=21
|textnuminvol=019
|pagenumbers=129-144
|totalpages=16
|beginfolioline=1a1
|endfolioline=8b3
|totalfolios=8
|multivolumework=No
|rectonotes=drag sgrub
|versonotes=bdud 'joms bka' srung lha chen
|colophontib=ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེ་ནས་གདན་དྲངས་ཏེ་མི་ལོ་ཉེར་བཞིའི་བར་དུ་བཀའ་རྒྱ་བྱས་མཐར་སྨོན་ལམ་ལས་ཀྱིས་འབྲེལ་བའི་སྐྱེས་མཆོག་མཁྱེན་རབ་རྒྱ་མཚོས་བསྐུལ་ངོར་ལྷ་ལུང་ནོར་བུའི་གླིང་དུ་དག་པར་ཕབ་པའི་ཡི་གེ་པ་ཡང་དེ་ཉིད་དོ། །དགེའོ། །ལེགས་སོ། །སརྦ་མངྒ་ལཾ།།
|colophonwylie=zhes pa 'di yang khrag 'thung bdud 'joms rdo rjes gser smad rnga la stag rtse nas gdan drangs te mi lo nyer bzhi'i bar du bka' rgya byas mthar smon lam las kyis 'brel ba'i skyes mchog mkhyen rab rgya mtshos bskul ngor lha lung nor bu'i gling du dag par phab pa'i yi ge pa yang de nyid do/_/dge'o/_/legs so/_/sarba mang+ga laM//
|pdflink=File:TTDL-ZABTER-08-NYA-019.pdf
|authortib=བདུད་འཇོམས་གླིང་པ་
|sourcerevealertib=བདུད་འཇོམས་གླིང་པ་
|volumeLetter=NYA
|InitCategories=Dudjom Tersar Project; TTDL-ZABTER-Volume-08-NYA
}}
<h1>Tibetan Text</h1>
<onlyinclude>
{{TibP|ཐྂ༎༔   ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་དབང་ཕྱུག་ཆེན་པོའི་དྲག་སྒྲུབ་དུག་གི་རྒྱ་མཚོ་བཞུགས་སོ༔ 


ཐྂ༎༔   ན་མོ་གུ་རུ་པདྨ་ཀ་ར་ཡེ༔  ({{TibChung|བརྡ་ཡིག་}})   {{TibChung|ལྷ་ཆེན་དབང་ཕྱུག་ཆེན་པོ་ཡི༔ དྲག་སྒྲུབ་དུག་གི་རྒྱ་མཚོ་ལ༔ མདུན་དུ་དཀྱིལ་འཁོར་ཟླ་གམ་པ༔ ཕྱི་རིམ་དམར་ནག་ཟླ་གམ་གྱིས༔ ནང་རིམ་མཐིང་ནག་ཡང་ཟླ་གམ༔ ལྟེ་བར་ཕུང་ས་སྣ་ཚོགས་ཀྱིས༔ བྲུབ་དོང་ནག་པོ་རིམ་གསུམ་བྱ༔ བང་རིམ་ངོས་ལ་རིམ་པ་བཞིན༔ སྟེང་མར་ལྷ་དབྱེའི་རྫས་རྣམས་བྱུགས༔ བར་པའི་ངོས་ལ་ཕུང་ཤུལ་དང་༔ བརྒྱ་ལམ་གཡུལ་ཆེན་ས་རྣམས་བྱུགས༔ འོག་མར་དུག་ཁྲག་སྣ་ཚོགས་བྱུགས༔ ནང་དུ་དགྲ་བོའི་རཱུ་པ་ལ༔ རབ་ན་རྒྱུ་རྐྱེན་གསོད་པའི་རྫས༔ མི་རྒོད་གྲི་ལ་ཤི་བ་དང་༔ དྲེའུ་རྒོད་དུག་གིས་ཤི་བ་དང་༔ ཁྱི་རྒོད་སྨྱོས་ནས་ཤི་བ་ཡི༔ ཁྲག་གསུམ་ལ་ནི་ཡུག་ས་དགུའི༔ ཁོག་དྲེག་བསྲེས་པའི་སྣག་ཚ་ལ༔ དུག་གི་ཕ་ནི་རེ་ལྕགས་ལ༔ མ་ནི་ཐར་ནུ་བུ་ཐང་ཕྲོམ༔ བསྡེབ་པའི་ཁུ་བ་བསྲེས་པས་བྲིས༔ ཤ་སྐམ་རོ་གཟུགས་ཉམ་ཐག་ཅིང་༔ ཁ་ནི་ངུ་ལ་ཤི་བའི་མིག༔ སྣ་ཞོམ་སྐྲ་གཟེང་རྐང་ལག་བཞི༔ ལྕགས་གཟེར་གྱིས་བསྡམ་སྤྱི་བོ་རུ༔ རུས་སམ་ཡང་ན་མ་ཤེས་ཛ༔ མིག་ལ་ལོང་ལོང་སྣ་ལ་འཚུབས༔ རྣ་བར་འོན་འོན་ཁ་ལ་ལྐུགས༔ ཚིག་བཞིར་ཛཿཧཱུཾ་བཾ་ཧོཿ དང་༔ ལྷུ་བཞིར་ཞ་ཞ་ཆག་ཆག་བྲིས༔ མཚན་མར་ཕཊཿདང་བརླ་གཉིས་ལ༔ བླ་ཁུག་རྐང་མཐིལ་ཆིང་ཆིང་བྲིས༔ ལག་མཐིལ་སྡོམ་སྡོམ་སྟེང་ཕྱོགས་སུ༔ ནན་ནན་ཕྲག་གཡས་སོད་སོད་དང་༔ ཕྲག་པ་གཡོན་དུ་རྦད་རྦད་བྲིས༔ སྙིང་གར་ནྲྀཿལ་ཛ་བཞིས་བསྐོར༔ དེ་མཐར་མིང་རུས་མཁན་གསུམ་མཐར༔ ཁུག་ཛ་མཱ་ར་ཡ་ཐུམ་རི་ལི་ལི་རྦད༔ ཧུར་ཐུམ་རྦད༔ བཛྲ་ཨཾ་གུ་ཤ་ཛཿཛྭ་ལ་པ་ཡ༔ ཛྭ་ལ་པ་ཡ་རྦད༔ ཆིང་ཆིང་མྱོས་མྱོས་རྦད༔ རྨུག་རྨུག་འཐིབ་ཐིབ་སོད༔ ཏ་ཐ་ཡ་ཏ་ཐ་ཡ་རྦད་སོད་ནན༔ རཱུ་པའི་གཡས་གཡོན་སྦྲུལ་ནག་གཉིས་འཁྱུད་ཅིང་༔ རྩེའུ་གཉིས་ལ་སོ་བཏབ་པས་ཟ་བར་བྱས༔ དེ་ལ་དུག་གསུམ་བྱུག་ཅིང་དེའི་ཕྱི་རིམ༔ ཛ་ཁྲམ་གྱིས་བསྐོར་མཚོན་ཆ་མང་པོ་ཡི༔ རྩེ་མོ་ནང་བསྟན་བྲིས་ལ་ཆག་གྲུམ་གྱིས༔ སྣོད་དུ་བཞག་ནས་འགུགས་གཞུག་གྲངས་མང་དང་༔ ནམ་གྱི་སྲོད་ལ་བླ་འགུགས་སྔགས་མང་བརྗོད༔ དེ་ནས་ཤི་ལྤགས་ལྷར་གྲིལ་བྲུབ་ཁུང་དུ༔ འཕང་ནས་སྟེང་དུ་མཉྫིའི་ཁྲི་ཡི་ཁར༔ གཏོར་མ་སྔགས་ཀྱི་སྙིང་པོ་ཅན་གཅིག་བཞག༔ ཕྱོགས་བཞིར་གཏོར་མ་ཆུང་བ་བཞིས་བསྐོར་བཞག༔ བྲུབ་དོང་མཐའ་མར་གཏོར་མ་བརྒྱད་བཞག་ལ༔ སྤྲོ་ན་སྡེ་བརྒྱད་སྐུ་གཟུགས་རིས་བྲིས་གཟུག༔ འཛིན་གཏོར་ལ་ནི་སྲོག་གི་འཁོར་ལོ་བསྟེན༔ སྟེང་དུ་བསྲུང་བའི་ལྷ་གསུམ་སྣང་བརྙན་བཙུག༔ ཕྱི་རིམ་མཚོན་ཆ་སྣ་ཚོགས་ཟངས་ལྕགས་སམ༔ ཡང་ན་དུག་ཤིང་ངམ་ནི་དུག་ཤོག་ལ༔ བྲིས་ནས་ཚོན་གྱིས་སྦག་ལ་བཙུག་ཀྱང་རུང་༔ ཕྱོགས་བཞིར་དགྲ་བོའི་མིང་རུས་བྲིས་པ་ཡི༔ ཤོག་གུས་དཀྲིས་པའི་སྡོང་བུ་རིང་མོ་བརྒྱད༔ གཟུག་ཅིང་དེ་གསོད་དུག་ཁྲག་བསྲེས་པ་བཞག༔ མི་བསད་མཚོན་དང་རྦབ་རྡོའི་ཕྱེ་རྣམས་དང་༔ ཉུང་དཀར་ནག་དང་ཏིལ་གཉིས་ཀེ་ཤངས་མཚེ༔ འབྲུ་ནག་ཟངས་ལྕགས་མཁར་གོང་ཕྱེ་སོགས་པའི༔ དུག་ཐུན་དུག་སྣ་བསགས་པ་གསོད་པའི་རྫས༔ དེའི་མདུན་མཆོད་པའི་ཡོ་བྱད་འབྱོར་ཚད་བཤམས༔ དང་པོ་རང་ཉིད་ཡི་དམ་ལྷར་བསྒོམ་ནས༔ བསྙེན་བསྒྲུབ་མཆོད་བསྟོད་ཐམས་ཅད་གྲུབ་པའི་མཐར༔}} ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ སྐད་ཅིག་དེ་ཉིད་དུ་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་རྒྱ་ཆེ་ཞིང་བཀོད་ལེགས་པ་ལྷུན་གྲུབ་བདེ་བ་ཆེན་པོའི་བཀོད་པ་རབ་ཏུ་རྫོགས་པའི་དབུས་སུ༔ རང་ཉིད་ལྷ་ཆེན་དབང་ཕྱུག་ཆེན་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་པས་ཏྲི་ཤུལ་རྩེ་གསུམ་ཀླད་ལ་བསྐོར་ཞིང་དགྲ་བགེགས་གདུག་པ་ཅན་རྣམས་ཀྱི་མགོ་བོ་ཚལ་པ་བརྒྱ་རུ་འགེམས་ཤིང་ལུས་པོ་དུམ་བུ་སྟོང་དུ་གཏོར་བར་བྱེད་པ༔ གཡོན་པས་ལྕགས་ཀྱུ་འབར་བས་ཁམས་གསུམ་དབང་དུ་སྡུད་པ་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་དུ་དུར་ཁྲོད་ཆས་བརྒྱད་ཀྱིས་བརྒྱན་པར་བསྐྱེད་དོ༔ སྐུ་ཡི་སྟོད་ཀྱི་ཆ་ལ་བཀའ་བརྒྱུད་བླ་མ༔ སྐེད་པ་བར་གྱི་ཆ་ལ་ཡི་དམ་ལྷ་ཚོགས༔ སྐུ་སྨད་ཀྱི་ཆ་ལ་མ་རྒྱུད་མཁའ་འགྲོ༔ མཐའ་བསྐོར་དུ་བསྟན་སྲུང་དམ་ཅན་རྒྱ་མཚོའི་ཚོགས་མ་ལུས་ཤིང་ལུས་པ་མེད་པས་བསྐོར་བར་བསམ༔ མདུན་དུ་དུར་ཁྲོད་རབ་འཇིགས་མེ་རླུང་འཚུབས་མའི་དབུས་སུ་གནམ་ལྕགས་ལས་གྲུབ་པའི་གྲུ་གསུམ་མུན་ཁང་ནག་པོ་རིམ་པ་གསུམ་གྱི་འོག་མར་གཏི་མུག་གི་མུན་པ་འཐིབས་པ༔ བར་ན་ང་རྒྱལ་གྱི་བྲག་རི་རྙིལ་བ༔ སྟེང་རིམ་ན་ཞེ་སྡང་གི་མེ་དཔུང་འབར་བ༔ ནང་གི་འཁོར་ཡུག་ཏུ་ནད་མུག་དུག་མཚོན་གྱི་ན་བུན་སྔོ་དམར་དུ་འཁྲིགས་པ༔ ཕྱི་རིམ་འཁོར་ཡུག་ཏུ་ཕྲག་དོག་གི་རླུང་དམར་འཚུབས་ཤིང་གཡོ་བ༔ ཕྱི་ནང་བར་མཚམས་ཐམས་ཅད་དུ་བླ་འཛིན་གྱི་དྲྭ་བ་བྲེས་ཤིང་བླ་འགུག་གི་ལྕགས་ཀྱུ་འཕྲོ་བ༔ ཕོ་ཉ་སྐར་ལྟར་འཁྲིགས་ཤིང་ལས་མཁན་རླུང་ལྟར་གཡོ་བ༔ ཤན་པ་དང་ལག་དམར་སེར་ལྟར་རྒྱུ་ཞིང་ཐོག་ལྟར་འབེབས་པ༔ ཟ་བྱེད་ཤ་ཟ་དང་ཁྲག་འཐུང་གི་ཚོགས་རྣམས་ཀྱི་གླལ་སྒྲ་ལྡིར་ཞིང་སྡང་མིག་གཡོ་བར་བསྐྱེད་དོ༔ ཐར་མེད་ལས་ཀྱི་བཙོན་ཁང་ནག་པོ་དེའི་ནང་དུ་དགྲ་བོའི་མི་ནོར་འཁོར་དང་བཅས་པའི་སྲོག་འདུས་པའི་ངོ་བོ་ནྲྀ་ཡིག་ལྗང་སྔོན་ལས་འོད་འཕྲོས་པས་དགྲ་བོའི་བླ་ཚེ་སྲོག་གསུམ་ཐམས་ཅད་འུབ་ཏུ་འདུས་ཤིང་ཐིམ་པ་ལས་གནས་སུ་གྱུར་ནས༔ རཱུ་པ་ཁ་ངུ་བ༔ མིག་ཤི་མིག༔ ལག་པ་མྱ་ངན་གྱི་ཕྱག་རྒྱ་ཅན༔ བྱང་སེམས་དཀར་དམར་ཐུར་དུ་འབབ་པ༔ རྐང་ལག་ལྕགས་སྒྲོག་གིས་བསྡམས་ཤིང་༔ ཧམ་པ་སྐྱ་བ་རིད་པ་ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པ་ཞིག་ཏུ་གྱུར༔ དེའི་སྟེང་གི་ནམ་མཁར་འདོམ་གང་འཕགས་པའི་སྟེང་དུ་པདྨ་ཉི་མ་རོ་ཡི་གདན་ལ་ལྷ་ཆེན་དབང་ཕྱུག་ཆེན་པོ་ཁམས་གསུམ་སྣང་སྲིད་ཐམས་ཅད་ཀྱི་ངོ་བོར་གྱུར་པ་སྐུ་མདོག་མཐིང་ནག་ཤིན་ཏུ་ཁྲོས་ཤིང་གཏུམ་པ༔ ཕྱག་གཡས་སྲོག་གཅོད་ཀྱི་སྤུ་གྲི་ཕྱར་ཞིང་གཡོན་པས་འགུགས་བྱེད་ཀྱི་ལྕགས་ཀྱུ་བསྣམས་པ༔ ཞལ་གདངས་པའི་ནང་ནས་དུག་ཁྲག་གི་སྐྱེམས་མདའ་འཕེན་པ་དགྲ་བོའི་ལུས་ལ་ཐེབ་ཅིང་༔ ཤངས་ནས་ནད་ཀྱི་ན་བུན་སྔོ་དམར་དུ་འཕྲོས་ནས་དགྲ་བོའི་སྲོག་ལ་ཐེབ་པ༔ སྤྱན་གསུམ་དམར་ཟླུམ་ཉི་མ་འབུམ་གྱི་འོད་ལྟར་འབར་བ་ལས་འོད་ཟེར་གྱི་དུམ་བུ་སྐར་མདའ་བཞིན་དུ་འཕྲོས་པས་དགྲ་ལ་ཐོག་ཆར་འབེབས་པ༔ རལ་པ་གནམ་དུ་གཟིངས་པའི་གསེབ་ནས་རྩ་གསུམ་རྒྱལ་བ་རྒྱ་མཚོ་འཁྲིགས་ཤིང་འཕྲོ་བ༔ ཟར་བུ་ས་ལ་ཕེབས་པའི་གསེབ་ནས་བཀའ་སྲུང་དང་ཆོས་སྐྱོང་སྡེ་བརྒྱད་དང་ལྷ་འདྲེ་ཐམས་ཅད་ན་བུན་བཞིན་དུ་འཐིབས་ཤིང་རླུང་དམར་བཞིན་དུ་གཡོ་བར་བསམ༔ ཞབས་གཉིས་གྱད་ཀྱི་འདོར་སྟབས་སུ་བསྒྲད་ཅིང་དགྲ་བོའི་ལྷ་སྲུང་ཐམས་ཅད་གནོན་པ༔ སྐུ་ལ་དུར་ཁྲོད་ཀྱི་ཆས་བརྒྱད་གསོལ་ཞིང་བསྐལ་པའི་མེ་རླུང་དྲག་པོ་འབར་ཞིང་གཡོ་བས་བསྐལ་པ་བཤིགས་ནུས་པ༔ བ་སྤུའི་བུ་ག་ནས་མཐའ་མི་ཀླ་ཀློ་ལྟ་ལོག་བསྟན་དགྲ་རྣམས་ཀྱི་རྫས་སྔགས་ཏིང་ངེ་འཛིན་གྱི་ནུས་མཐུ་གསོད་པར་བྱེད་པའི་དྲི་ངན་དང་མེ་རླུང་དུག་གི་ན་བུན་འཕྲོས་ཤིང་གཡོ་བ༔ བསྟན་དགྲ་སྡེ་དང་བཅས་པ་དུག་སྦྲུལ་སྒྱུ་ཁྲག་གིས་མྱོས་པ་ལྟར་ལྡང་ནུས་དང་བྲལ་བར་བྱེད་པ༔ ཕོ་ཉ་ལས་མཁན་འདྲེ་གདོན་སྣ་ཚོགས་བར་མཚམས་མེད་པར་དགྲ་བོའི་ཡུལ་དུ་ཁ་ཆར་བུ་ཡུག་བཞིན་དུ་འཚུབས་ཤིང་འཕྲོ་བ༔ དགྲ་བོའི་བླ་མཆོད་བསྐུལ་ཞིང་སྲུང་བཟློག་བྱས་པར་གྱུར་ན་ཁོ་རང་ལ་རང་གཤེད་དུ་གྱུར་ནས་ལྷ་ཆེན་གྱི་སྤྲུལ་པ་འཆི་བདག་ལས་ཀྱི་གཤིན་རྗེ་ནག་པོ་ཁོ་ཡི་སྨིན་མཚམས་ནས་ལངས་ཏེ་དཔྲལ་བའི་མིག་བཅར་ནས་ཁོག་པའི་སྲོག་གཅོད་པར་བྱེད་པ༔ བདག་གི་སྲུང་མདུད་དང་བྱིན་རླབས་རྟེན་གསུམ་ཐམས་ཅད་དགྲ་ལ་ཐོབ་པ་ཡོད་ནའང་དེ་ལ་ལྷ་ཆེན་གྱི་འོད་ཕོག་ནས་བྱིན་ནུས་སྐུ་ལ་བསྡུས་ཤིང་ལྷག་མ་ལ་ཕོ་གདོན་མོ་གདོན་ཀླུ་གདོན་ཐམས་ཅད་ཚངས་ཁང་འཁྲིགས་པས་ཁོ་ཡི་སྲོག་གི་གཤེད་དུ་བསྒྱུར་བར་བསྒོམ༔ དབང་ཕྱུག་ཆེན་པོའི་གཡོན་དུ་ལྷ་མོ་ཨུ་མ་དཱེ་ཝི་ནག་མོ་གཡས་རལ་གྲི་གཡོན་ཞགས་པ་བསྣམས་པ་སྲིན་མོ་ཁྲོས་པའི་ཉམས་ཅན་ནག་མོ་ཁྲག་གི་རལ་པ་ཅན་འབུམ་ཕྲག་གཅིག་གིས་བསྐོར་ནས་ཐན་དང་ལྟས་ངན་དལ་ཡམས་ནད་མུག་ལས་ལ་འགྱེད་ཅིང་དགྲ་བོ་རྗེས་མེད་དུ་བརླག་ཅིང་ཕུང་བར་བྱེད་པ༔ གཡས་སུ་སྲས་མཆོག་ཚོགས་ཀྱི་བདག་པོ་སྐུ་མདོག་དུད་ཁ་གཡས་གནམ་ལྕགས་ཀྱི་འཁོར་ལོ་དང་གཡོན་བདུད་ཞགས་ནག་པོ་ཐོག་པ་གླང་པོ་ཆེའི་དབུ་ཅན་ཉི་ཟླའི་གདན་ལ་འགྱིང་བ་འཁོར་དུ་ཤ་ཟ་འབུམ་དང་ཁྲག་འཐུང་སྟོང་ལས་མཁན་གྲངས་མེད་པས་བསྐོར་བར་བསམ༔ འོག་གི་ཁྲི་མུན་ནག་པོའི་མཐའ་བསྐོར་དབང་ཕྱུག་ཆེན་པོའི་མདུན་འོག་ཏུ་གཤིན་རྗེ་ཡ་མ་རཱ་ཙ་སྐུ་མདོག་ནག་པོ་གླང་གི་མགོ་ཅན་གཡས་སྲོག་གཅོད་ཀྱི་སྟྭ་ཆེན་དང་གཡོན་པས་ཞགས་པ་ནག་པོ་བསྣམས་པ༔ མ་ཧེ་སྔོ་ནག་ལ་བཅིབས་ཤིང་ལས་མཁན་བྱེ་བ་དུང་ཕྱུར་གྱིས་བསྐོར་བ༔ གཡས་འོག་ཏུ་གཟའ་བདུད་དུག་གི་སྤུ་གྲི་གཟའ་བརྒྱད་སྡེ་བརྒྱད་གདོང་བཞི་རྒྱུ་སྐར་དང་བཅས་པས་བསྐོར་བ༔ རྒྱབ་འོག་ཏུ་དམ་ཅན་རྡོ་རྗེ་ལེགས་པ་མཆེད་འཁོར་སུམ་བརྒྱ་དང་དྲུག་ཅུས་བསྐོར་བ༔ བྱང་དུ་བདུད་པོ་ཕུང་བྱེད་ཆེན་པོ་མི་ནག་རྟ་ནག་ཅན༔ བཙན་རྒྱལ་སྲོག་ལེན་དམར་པོ་མི་དམར་རྟ་དམར་ཅན༔ ཀླུ་བདུད་འཆི་བདག་མགོ་དགུ་མི་སྔོན་རྟ་སྔོན་ཅན་དེ་དག་ལ་འཁོར་ནག་པོའི་ཚོགས་དང་དམར་པོའི་ཚོགས་དང་སྔོན་པོའི་ཚོགས་བསམ་གྱིས་མི་ཁྱབ་ཅིང་གྲངས་ཀྱིས་མི་ལོངས་བར་བསྐྱེད་དོ༔ དེའི་ཕྱི་རིམ་འཁོར་ཡུག་ཏུ་བཀའ་སྲུང་ཆོས་སྐྱོང་སྡེ་བརྒྱད་དང་ལྷ་འདྲེ་དྲེགས་པའི་ཚོགས་བསམ་གྱིས་མི་ཁྱབ་པས་བར་དང་གོ་མཚམས་མེད་པར་གང་བར་བསམ༔ ལྷ་ཚོགས་དེ་དག་ཐམས་ཅད་ཀྱི་ཐུགས་ཀར་རང་རང་རིགས་ཀྱི་སྲོག་ཡིག་ཕྲ་མོའི་མཐར་གསང་སྔགས་རིག་སྔགས་གཟུངས་སྔགས་སྙིང་པོ་ཐམས་ཅད༔ ཨོཾ་མ་ཧཱ་དཱེ་ཝ་ཀཱ་ལ་ལོ་ཀི་ཤྭ་ར་ཧཱུྃ་ཕཊ༔ ཅེས་སྔགས་དེ་ཁོ་ནར་གྱུར་ནས་བཟླས་པ་ཙམ་གྱིས་དབྱེར་མེད་དུ་འགྲུབ་པར་བསྒོམ༔ {{TibChung|དེ་ནས་སྤྱན་འདྲེན་པ་ནི༔}} ཧཱུྃ་ཧྲཱིཿ དགྲ་བོ་དབང་དུ་སྡུད་པའི་ཕྱིར༔ དབང་ཕྱུག་དམར་པོ་གཤེགས་སུ་གསོལ༔ དགྲ་བོ་ཧུར་ཐུམ་གསོད་པའི་ཕྱིར༔ དབང་ཕྱུག་ཐལ་སྐྱ་གཤེགས་སུ་གསོལ༔ དགྲ་བོ་རྗེས་མེད་བརླག་པའི་ཕྱིར༔ དབང་ཕྱུག་ནག་པོ་གཤེགས་སུ་གསོལ༔ དགྲ་བོ་ལྷ་དང་ཕྱེ་བའི་ཕྱིར༔ ཚོགས་བདག་ནག་པོ་གཤེགས་སུ་གསོལ༔ དགྲ་བོའི་སྙིང་ཁྲག་རོལ་པའི་ཕྱིར༔ ཨུ་མ་དཱེ་ཝི་གཤེགས་སུ་གསོལ༔ དགྲ་བོ་བཀུག་བསྒྲལ་ལས་མཛད་ཕྱིར༔ ལས་མཁན་དམ་ཅན་གཤེགས་སུ་གསོལ༔ བཛྲ་ས་མ་ཡ་ཛ་ཛཿ {{TibChung|དེ་ནས་བརྟན་བཞུགས་གསོལ་བ་ནི༔}} ཧཱུྃ་ཧྲཱིཿ གསང་ཆེན་དྲག་པོའི་དཀྱིལ་འཁོར་འདིར༔ བླ་རྡོ་སྲོག་འཁོར་འབྲལ་མེད་རྟེན༔ དམ་ཅན་བསྒྲུབ་པའི་རྟེན་དུ་བཙུགས༔ དབང་ཕྱུག་ཆེན་པོ་རྟེན་ལ་བཞུགས༔ ཨུ་མ་དཱེ་ཝི་རྟེན་ལ་བཞུགས༔ ཚོགས་ཀྱི་བདག་པོ་རྟེན་ལ་བཞུགས༔ གཤིན་རྗེའི་རྒྱལ་པོ་རྟེན་ལ་བཞུགས༔ གཟའ་བདུད་རྒྱལ་པོ་རྟེན་ལ་བཞུགས༔ རྡོ་རྗེ་ལེགས་པ་རྟེན་ལ་བཞུགས༔ བདུད་ཀྱི་རྒྱལ་པོ་རྟེན་ལ་བཞུགས༔ བཙན་གྱི་རྒྱལ་པོ་རྟེན་ལ་བཞུགས༔ ཀླུ་ཡི་རྒྱལ་པོ་རྟེན་ལ་བཞུགས༔ དཔལ་མགོན་བདུན་ཅུ་རྟེན་ལ་བཞུགས༔ དྲེགས་པའི་འཁོར་ཚོགས་རྟེན་ལ་བཞུགས༔ ལྷ་སྲིན་སྡེ་བརྒྱད་རྟེན་ལ་བཞུགས༔ རྟེན་ལ་བཞུགས་ཤིང་མཐུ་མ་ཆུང་༔ རྟེན་ལ་བཞུགས་ཤིང་རྩལ་མ་ཞན༔ རྟེན་ལ་བཞུགས་ཤིང་བང་མ་བུལ༔ རྟེན་ལ་བཞུགས་ཤིང་གོང་མ་གཡེལ༔ རྟེན་ལ་བཞུགས་ཤིང་ཕྲག་མ་དོག༔ རྟེན་ལ་བཞུགས་ཤིང་ཐུགས་མ་གཡེལ༔ རྟེན་ལ་བཞུགས་ཤིང་རྒྱང་མ་རིང་༔ རྟེན་ལ་བཞུགས་ཤིང་ལས་མ་འགྱངས༔ ཅི་བསམ་དོན་ཀུན་གྲུབ་པ་ཡི༔ ཕྲིན་ལས་སྒྲུབ་ལ་རོགས་ལྡན་མཛོད༔ དམ་ལ་མ་འདའ་ས་མ་ཡ༔ མ་ཧཱ་དཱེ་ཝ་སརྦ་ས་པ་རི་ཝཱ་ར་ས་མ་ཡ་སྟྭཾ༔ ས་མ་ཡ་ཏིཥྛ་ལྷན༔ {{TibChung|དེ་ནས་ཕྱག་འཚལ་བ་ནི༔}} ཧཱུྃ་ཧྲཱིཿའཁོར་འདས་དབང་ཕྱུག་སྤྱན་རས་གཟིགས༔ དབང་ཆེན་རྟ་མཆོག་རོལ་པའི་ཐུགས༔ ཁམས་གསུམ་དབང་ཕྱུག་ཆེན་པོ་སྟེ༔ ཀུན་གྱི་གཙོ་ལ་ཕྱག་འཚལ་ལོ༔ སྐད་ཅིག་མི་འབྲལ་སྲུང་སྐྱོབ་མཛོད༔ ན་མོ་མ་ཧཱ་དཱེ་ཝ་ཡེ༔ {{TibChung|དེ་ནས་མཆོད་པ་འབུལ་བ་ནི༔}} ན་མོ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་བདེན་པས་དགྲ་བོ་ཆེ་གེ་མོའི་བླ་ཚེ་སྲོག་གསུམ་ཁ་རྗེ་དབང་ཐང་ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག༔ ཛཿཧཱུྃ་བཾ་ཧོཿ {{TibChung|ལན་བདུན་བརྗོད་མཐར༔}} བདག་མདུན་ལས་སྤྲུལ་པའི་མཚོན་ཐུན་སྣ་ཚོགས་ཀྱི་ཆར་ཕབ་ནས་དགྲ་བོའི་གཟུགས་ཕུང་རྡུལ་དུ་བརླག་ནས་ཤ་ཁྲག་རུས་གསུམ་ཐམས་ཅད་ཕྱི་ནང་གསང་བའི་མཆོད་སྤྲིན་མི་ཟད་པ་རྒྱན་གྱི་འཁོར་ལོ་ནམ་མཁའི་མཐའ་དང་མཉམ་པར་གྱུར༔ ཨོཾ་ཨཱཿཧཱུྃ་ན་མཿསརྦ་ཏ་ཐཱ་ག་ཏ་{{TibChung|སོགས་ནམ་མཁའ་མཛོད་ཀྱི་སྔགས་ལན་བདུན་བརྗོད༔}} ཧཱུྃ་ཧྲཱིཿ དམར་ཆེན་ཁྲག་གི་ཨརྒྷཾ་དང་༔ ཆུ་སེར་དྲོན་མོའི་ཞབས་བསིལ་དང་༔ དབང་པོ་ལྔ་ཡི་མེ་ཏོག་དང་༔ ཤ་ཆེན་བདུག་སྤོས་ཞུན་ཆེན་མེ༔ མཁྲིས་པའི་དྲི་ཆབ་ཤ་རུས་པའི༔ ཞལ་ཟས་རྐང་གླིང་རོལ་མོ་སོགས༔ ཉེར་སྤྱོད་མཆོད་པའི་བྱེ་བྲག་ཀུན༔ ལྷ་ཆེན་དབང་ཕྱུག་ཆེན་པོ་དང་༔ ལས་མཁན་འཁོར་ཚོགས་རྣམས་ལ་འབུལ༔ དགྲ་བོ་བསྒྲལ་བའི་ཕྲིན་ལས་མཛོད༔ ཨོཾ་བཛྲ་ཨརྒྷཾ་པཱདྱཾ་ནས་ཤཔྟ་པྲ་ཏཱིཙྪ་པཱུ་ཛ་ཧོཿ {{TibChung|དེ་ནས་ནང་མཆོད་འབུལ་བ་ལ༔}} ཧཱུྃ་ཧྲཱིཿ གཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ འདོད་ཡོན་ལྔ་ཡི་ལོངས་སྤྱོད་ཚོགས༔ དངོས་འབྱོར་ཡིད་ཀྱིས་རྣམ་སྤྲུལ་ཏེ༔ དབང་ཕྱུག་ཆེན་པོ་ཡབ་ཡུམ་དང་༔ བཀའ་སྡོད་དྲེགས་པའི་ཚོགས་ལ་འབུལ༔ དགྲ་བོ་བཀུག་ནས་བསྒྲལ་བར་མཛོད༔ ཨོཾ་ཨཱཿཧཱུྃ་རཱུ་པ་ཤཔྟ་གནྡྷེ་རཱ་ས་སྤཪྴེ་པྲ་ཏཱིཙྪ་པཱུ་ཛ་ཧོཿ {{TibChung|དེ་ནས་གསང་མཆོད་འབུལ་བ་ལ༔}} ཧཱུྃ་ཧྲཱིཿ དམ་ཉམས་དགྲ་བོ་བསྒྲལ་བ་ཡི༔ བདུད་རྩི་ལྔ་སྦྱོར་སྨན་ཆེན་པོ༔ རཀྟ་ཁྲག་གི་རྒྱ་མཚོ་དང་༔ ཤ་ཁྲག་དོན་སྙིང་གཏོར་མའི་ཚོགས༔ དབང་ཕྱུག་ཆེན་པོ་ཡབ་ཡུམ་དང་༔ བཀའ་སྡོད་དྲེགས་པའི་ཚོགས་ལ་འབུལ༔ དགྲ་བོ་བཀུག་ནས་བསྒྲལ་བར་མཛོད༔ མ་ཧཱ་སརྦ་པཉྩ་ཨ་མྲྀ་ཏ་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་བ་ལིཾ་ཏ་ལ་ཁཱ་ཧི༔ {{TibChung|དེ་ནས་ཁྱད་པར་གྱི་མཆོད་པ་ནི༔}} ཧཱུྃ་ཧྲཱིཿ གདུག་པའི་དགྲ་བོ་བསྒྲལ་བ་ཡི༔ ཞིང་ཆེན་ལྤགས་པ་ལྷབས་མ་ལྷུབ༔ ཤ་ཚིལ་རི་བོ་དཔུངས་སེ་དཔུང་༔ ཁྲག་ཆེན་རྒྱ་མཚོ་མེ་རེ་རེ༔ རུས་པའི་གྲམ་ཁྲོད་ཉི་ལི་ལི༔ འདོད་ཡོན་མཆོད་སྤྲིན་ཐིབས་སེ་ཐིབ༔ དབང་ཕྱུག་ཆེན་པོ་ཡབ་ཡུམ་དང་༔ བཀའ་སྡོད་དྲེགས་པའི་ཚོགས་ལ་འབུལ༔ དགྲ་བོ་བཀུག་ནས་བསྒྲལ་བར་མཛོད༔ མ་ཧཱ་པཉྩ་ལ་ཁཱ་ཧི༔ མ་ཧཱ་མཱཾ་ས་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་ཀིཾ་ནི་རི་ཏི་ཁཱ་ཧི༔ ཧཱུྃ་ཧྲཱིཿ མི་སྲུན་དགྲ་བོ་བསྒྲལ་བ་ཡི༔ དོན་ལྔ་སྣོད་དྲུག་དབང་པོ་ལྔ༔ ཕུང་ལྔ་ཁམས་ལྔ་སྐྱེ་མཆེད་དང་༔ དབང་ཡུལ་ཁམས་ཆེན་ཚེ་བསོད་ནམས༔ ལོངས་སྤྱོད་འདོད་རྒུའི་དཔལ་ཡོན་བཅས༔ དབང་ཕྱུག་ཆེན་པོ་ཡབ་ཡུམ་དང་༔ བཀའ་སྡོད་དྲེགས་པའི་ཚོགས་ལ་འབུལ༔ དགྲ་བོ་བཀུག་ནས་བསྒྲལ་བར་མཛོད༔ སརྦ་ག་ཎ་པཱུ་ཛ་ཧོཿ {{TibChung|དེ་ནས་བསྟོད་པ་བྱ་བ་ནི༔}} ཧཱུྃ་ཧྲཱིཿབརྡལ་ཁྱབ་འཁོར་འདས་ཡོངས་ཀྱི་བདག༔ སྤྱན་རས་གཟིགས་ལ་ཕྱག་འཚལ་བསྟོད༔ ཀུན་འདུས་ཀུན་གཞི་ནམ་མཁའ་ཆེ༔ ཁམས་གསུམ་དབང་ཕྱུག་ཆེ་ལ་བསྟོད༔ སྣང་སྲིད་དུར་ཁྲོད་གཞལ་ཡས་ནས༔ རཱུ་ཏྲའི་ཤ་དང་ཁྲག་ལ་རྔམས༔ འབྱུང་ཆེན་ལྔ་ཡི་ལུས་བཟུང་ནས༔ ལོ་སྐོར་བཅུ་གཉིས་ཕོ་ཉར་འགྱེད༔ སྨེ་བ་དགུ་ཡི་ཁ་དོག་ངོམས༔ སྐྱེ་མཆེད་བཅུ་གཉིས་ཟས་སུ་སྤྱོད༔ དྲག་ཤུལ་ནག་པོ་ཁྱོད་ལ་བསྟོད༔ དུར་ཁྲོད་བརྒྱད་ཀྱི་བདག་པོར་སྤྲུལ༔ གནས་ཡུལ་ཀུན་གྱི་དབང་པོ་བྱེད༔ བསྟན་དགྲའི་སྲོག་གི་གཤེད་དུ་ཆེ༔ དུར་ཁྲོད་བདག་པོ་ཁྱོད་ལ་བསྟོད༔ ལྷ་མགོན་དཔལ་མགོན་ཀུན་གྱི་གཞི༔ སྡེ་བརྒྱད་ལྷ་འདྲེ་ཀུན་གྱི་དཔལ༔ ཞིང་སྐྱོང་ཚོགས་བདག་ཀུན་གྱི་རྒྱལ༔ དབང་ཕྱུག་མ་ཧཱ་དཱེ་ཝར་བསྟོད༔ ཁྱོད་བསྟེན་མཆོད་དང་བསྟོད་པའི་མཐུས༔ སྒྲུབ་པའི་རྣལ་འབྱོར་བདག་ཉིད་ལ༔ དགྱེས་པའི་ཞལ་དང་འགྲུབ་པའི་རྟགས་མཚན་ཀུན༔ རིང་པོར་མ་འགྱང་ད་ལྟ་ཉིད་དུ་སྟོན༔ སྐད་ཅིག་འབྲལ་བ་མེད་པའི་སྲུང་སྐྱོབ་མཛོད༔ ཞི་རྒྱས་དབང་དྲག་ཕྲིན་ལས་ལྷུན་གྲུབ་ཅིང་༔ བརྣག་པའི་དགྲ་བོ་མ་ཤོར་མྱུར་དུ་སོད༔ བསད་རྟགས་དོན་སྙིང་དམར་པོ་ཁྱེར་ལ་ཤོག༔ རིམ་གྲོ་སྲུང་ཟློག་མ་སྒུགས་ཧུར་ཐུམ་སོད༔ རྒྱལ་དང་རྒྱལ་སྲས་རྣམས་ཀྱི་བཀའ་དམ་ཚིག༔ དཔང་དུ་བཙུག་ནས་ཕྲིན་ལས་དེ་བཅོལ་ལོ༔ མི་འདའ་དམ་ཅན་ཡོངས་ཀྱི་སྤྱི་རྗེ་དཔལ༔ བདག་གི་སྒོ་གསུམ་བག་མེད་དབང་གྱུར་པས༔ སྲུང་མ་གཉན་པོའི་ཐུགས་དང་འགལ་གྱུར་གང་༔ མི་འཆབ་མི་སྦེད་སྙིང་ནས་བཤགས་བགྱིའོ༔ ཕྱིན་ཆད་འགལ་བར་གྱུར་ཀྱང་དེ་ཡང་བཤགས༔ ཨོཾ་བཛྲ་སཏྭ་ས་མ་ཡ་{{TibChung|སོགས་ཡི་གེ་བརྒྱ་པ་བརྗོད༔ དེ་ལྟར་དྲག་པོའི་ལས་ལ་བརྩོན་པའི་མི༔ མི་མཐུན་ཕྱོགས་རྣམས་ཀུན་ལས་རྣམ་རྒྱལ་ཞིང་༔ དགྲ་དཔུང་མ་ལུས་ལྷ་ཡང་རུང་སྟེ་བཀུག༔ དམ་ཚིག་གཉན་པོ་སྲོག་གི་གཏའ་རུ་ཟུངས༔ སྲུང་མ་གཉན་པོའི་སྲོག་རྩ་དེ་ཀ་ལེགས༔ དེ་ལྟར་གནད་ལྡན་སྐྱེས་བུ་གང་དག་གིས༔ ཟླ་གསུམ་ནན་ཆེར་བསྒྲུབ་པས་ངེས་པར་འགྲུབ༔ ཐེ་ཚོམ་བྱུང་ན་པད་འབྱུང་བདག་གིས་བསླུས༔ དོན་དེ་ཤེས་པར་མཛོད་ཅིག་སྐལ་ལྡན་རྣམས༔ བཀའ་འདི་གནོད་སྦྱིན་ཤན་པ་ཁྱོད་ལ་གཏད༔ དམ་ཉམས་ལག་ཏུ་མ་བཏང་ས་མ་ཡ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེ་ནས་གདན་དྲངས་ཏེ་མི་ལོ་ཉེར་བཞིའི་བར་དུ་བཀའ་རྒྱ་བྱས་མཐར་སྨོན་ལམ་ལས་ཀྱིས་འབྲེལ་བའི་སྐྱེས་མཆོག་མཁྱེན་རབ་རྒྱ་མཚོས་བསྐུལ་ངོར་ལྷ་ལུང་ནོར་བུའི་གླིང་དུ་དག་པར་ཕབ་པའི་ཡི་གེ་པ་ཡང་དེ་ཉིད་དོ། །དགེའོ། །ལེགས་སོ། །སརྦ་མངྒ་ལཾ།། །།}} }}
</onlyinclude>
{{TsagliCall}}
<headertabs/>