View source for TTDL-ZABTER-19-DZA-001

{{Text
|classification=Tibetan Publications
|subclass=Tibetan Texts
|fulltitletib=གཏེར་ཆེན་ཆོས་ཀྱི་རྒྱལ་པོ་ཁྲག་འཐུང་བདུད་འཇོམས་གླིང་པའི་རྣམ་པར་ཐར་པ་ཞལ་གསུངས་མ།
|fulltitle=gter chen chos kyi rgyal po khrag 'thung bdud 'joms gling pa'i rnam par thar pa zhal gsungs ma
|citation=Khrag 'thung [[Bdud 'joms gling pa]]. ''Gter chen chos kyi rgyal po khrag 'thung bdud 'joms gling pa'i rnam par thar pa zhal gsungs ma''. In ''Sprul pa'i gter chen bdud 'joms gling pa'i zab gter gsang ba'i chos sde'', Vol. 19: 1-269. Thimphu, Bhutan: Lama Kuenzang Wangdue, 2004.
|collectiontitletib=བདུད་འཇོམས་གླིང་པ་ཟབ་གཏེར།
|collectiontitle=bdud 'joms gling pa zab gter
|author=bdud 'joms gling pa
|tibgenre=Biographies - Hagiography - rnam thar
|terma=No
|language=Tibetan
|volumenumber=19
|volnumtib=༡༩
|volyigtib=ཛ
|totalvolumes=21
|textnuminvol=001
|pagenumbers=1-269
|totalpages=269
|beginfolioline=1a1
|endfolioline=135a4
|totalfolios=135
|multivolumework=No
|rectonotes=rnam thar
|versonotes=bdud 'joms
|colophontib=དེ་ལྟར་རྒྱལ་ཀུན་འདུས་པའི་སྤྱི་གཟུགས་གཏེར་ཆེན་ཆོས་ཀྱི་རྒྱལ་པོ་མཚན་བརྗོད་པར་དཀའ་བ་དོན་གྱི་སླད་དུ་ན་རིག་འཛིན་བདུད་འཇོམས་རྡོ་རྗེ་གྲོ་ལོད་རྩལ་གྱིས་ཞལ་སྔ་ནས་རྣམ་པར་ཐར་པ་དགུང་གྲངས་དྲུག་ཅུ་རེ་གཉིས་ལ་ཕེབས་པ་ཚུན་ཞལ་རྩོམ་དུ་གནང་བ་ལ།མཇུག་རྩོམ་གྱི་ཚུལ་འདི་ཡང་གང་གི་བཀས་གནང་བ་ཐོབ་ཅིང་དམ་ལྡན་རྡོ་རྗེའི་མཆེད་པོ་མཁྱེན་རབ་རྒྱ་མཚོས་ཀྱང་བསྐུལ་ངོར།གཏེར་ཆེན་རིན་པོ་ཆེ་དེ་ཉིད་ཀྱིས་ཐུགས་བརྩེ་བ་ཆེན་པོས་རྗེས་སུ་བཟུང་ཞིང་རྒྱུ་མཚན་ཤེས་ཏེ་མི་ཕྱེད་པའི་དད་པ་བརྟན་པོའི་སྒོ་ནས་ཞབས་རྡུལ་སྤྱི་བོས་ལེན་པ་གསར་རྙིང་རིས་མེད་ཀྱི་གཞུང་ལ་ཅུང་ཟད་སྦྱངས་པ་བྱས་རློམས་ཀྱི་སྐྱེས་མིང་འདུ་ཤེས་གསུམ་པ་པདྨ་ལུང་རྟོགས་རྒྱ་མཚོའམ་མིང་གཞན་བློ་བཟང་བསྟན་པའི་རྒྱལ་མཚན་དུ་འབོད་པས་བྲིས་པ་ཀུན་ནས་དགེ་བར་གྱུར་ཅིག།
|colophonwylie=de ltar rgyal kun 'dus pa'i spyi gzugs gter chen chos kyi rgyal po mtshan brjod par dka' ba don gyi slad du na rig 'dzin bdud 'joms rdo rje gro lod rtsal gyis zhal snga nas rnam par thar pa dgung grangs drug cu re gnyis la phebs pa tshun zhal rtsom du gnang ba la/mjug rtsom gyi tshul 'di yang gang gi bkas gnang ba thob cing dam ldan rdo rje'i mched po mkhyen rab rgya mtshos kyang bskul ngor/gter chen rin po che de nyid kyis thugs brtse ba chen pos rjes su bzung zhing rgyu mtshan shes te mi phyed pa'i dad pa brtan po'i sgo nas zhabs rdul spyi bos len pa gsar rnying ris med kyi gzhung la cung zad sbyangs pa byas rloms kyi skyes ming 'du shes gsum pa pad+ma lung rtogs rgya mtsho'am ming gzhan blo bzang bstan pa'i rgyal mtshan du 'bod pas bris pa kun nas dge bar gyur cig/
|pdflink=File:TTDL-ZABTER-19-DZA-001.pdf
|authortib=བདུད་འཇོམས་གླིང་པ་
|volumeLetter=DZA
|InitCategories=Dudjom Tersar Project; TTDL-ZABTER-Volume-19-DZA
}}
<h1>Tibetan Text</h1>
<onlyinclude>
{{TibP|༄༅། །གཏེར་ཆེན་ཆོས་ཀྱི་རྒྱལ་པོ་ཁྲག་འཐུང་བདུད་འཇོམས་གླིང་པའི་རྣམ་པར་ཐར་པ་ཞལ་གསུངས་མ་བཞུགས་སོ།།
 

༄༅།  །ཆོས་ཉིད་སྒྱུ་མར་རོལ་པའི་སྣང་ལམ་གསང་བ་ཉམས་བྱུང་གི་རྟོགས་བརྗོད་གསལ་བའི་མེ་ལོང་ཞེས་བྱ་བ།  ན་མོ་གུ་རུ་པདྨ་ཀ་ར་ཡེ།  དུས་གསུམ་རྒྱལ་བ་ཀུན་གྱི་ཡེ་ཤེས་སྐུ།  །མཁྱེན་བརྩེ་ནུས་པའི་གཏེར་ཆེན་པདྨ་འབྱུང་།  །མི་འབྲལ་སྤྱི་གཙུག་འཁོར་ལོའི་རྒྱན་དུ་བཞུགས།  །བརྒྱུད་འཛིན་རྗེས་སུ་ཟུངས་ལ་དབུགས་དབྱུང་མཛོད།  །སོ་སོའི་སྐྱེ་བོ་འཁོར་བ་མཐའ་མེད་དུ།  །ཁ་བརྒྱུད་ལས་དང་བྱ་བྱེད་སྣ་ཚོགས་པ།  །ཡི་གེར་འབྲི་བ་སྐྱོ་ཞིང་སུན་པའི་རྒྱུར།  །ཤེས་ཏེ་འབྲི་སྙམ་བདག་ལ་ཡོད་མ་ཡིན།  །འོན་ཀྱང་སློབ་མས་ནན་བསྐུལ་མ་བཟོད་པས།  །སྣ་ཚོགས་སྣང་ཉམས་ཆུ་ཡི་གཉེར་མ་ལྟར།  །རྒྱས་པར་བཤད་ན་ཟད་པའི་མཐར་མི་ཐུག།  དག་པའི་སྣང་ཉམས་ཟུར་ཙམ་འདིར་བརྗོད་བྱ།  །དེ་ལ་ཐོག་མར་རང་གི་རིགས་རུས་ཀྱི་འབྱུང་ཁུངས་ཟུར་ཙམ་མ་བཤད་ན་ཕ་མེས་ཀྱི་རིགས་བརྒྱུད་མི་ཤེས་པ་ནི་ནགས་ཚལ་གྱི་སྤྲེའུ་དང་འདྲ་ཟེར་བའི་སྐྱོན་ཡོད་པས་དེའི་ཕྱིར་ཟུར་ཙམ་འཆད་ན།  དཔལ་སྤྱན་སྔ་ལྷ་གཟིགས་རས་པའི་ཡིག་ཚང་ལས།  སྒ་སྡོང་འགྲུ་གསུམ་དབྲ་དང་བཞི།  །ནུ་བོ་དཔའ་སྡ་གཉིས་དང་དྲུག།  ཅེས་གསུངས་པ་ནི་གང་ཟག་ཆེན་པོའི་གསུང་ཡིན་པས་ཁུང་བཙུན་པའི་ཕྱིར་འདིར་ཡང་ཚད་མར་བཟུང་བ་ཡིན།  གནའ་བོའི་ངག་སྒྲོས་འགའ་ཞིག་ཏུ།  དམུ་ཚ་སྒ།  ཨ་སྦོ་སྡོང་།  སེང་ཁྱུང་དབྲ།  ཨ་ལྕགས་འགྲུ།  དཔའ་སྔ་གཉིས་ཞེས་རུས་ཆེན་བཞི་དང་།  རུས་ཆུང་གཉིས་ཏེ་མིའུ་རུས་དྲུག་ཅེས་ཟེར་བ་སྔ་མ་དང་ཕྱོགས་མཚུངས་པར་མངོན་ཅིང་།  མ་ཧཱ་ཙི་ནའི་ལུགས་ཀྱི་འབྱུང་རྩིས་པའི་བསྟན་བཅོས་ལྟར་ན་རིགས་ལྔ་ཁམས་ལྔ་ཁ་དོག་ལྔ་སོགས་སྦྱར་ནས།  སྡོང་སྨུག་པོའི་རིགས་ས་ཁམས།  དབྲ་དཀར་པོའི་རིགས་ལྕགས་ཁམས།  འགྲུ་སྔོན་པོའི་རིགས་ཆུ་ཁམས།  སྒ་དམར་པོའི་རིགས་མེ་ཁམས།  སྒོ་ལྗང་གུའི་རིགས་ཤིང་ཁམས་ཞེས་རུས་ཆེན་སྡེ་ལྔར་བསྡུས་ནས་གསུངས་སོ།  །འདི་རྣམས་ཀྱང་གུང་བསྒྲིགས་པར་བྱས་ན་ཆེར་མི་འགལ་ཏེ།  གོང་དུ་བཤད་པའི་རུས་དྲུག་གི་ཡ་གྱལ་ནུ་བོ་དཔའ་སྔ་གཉིས་ལ་བརྡ་ཆད་རྒྱས་པར་སྦྱར་བའི་དབྱེ་བ་མེད་པར་གཉིས་ཀ་ལྷན་ཅིག་ཏུ་བརྗོད་པའི་རྒྱུ་མཚན་གྱིས་དེ་གཉིས་གཅིག་ཏུ་བསྡུས་པའི་ལྔ་པ་ནི་སྒོ་ཞེས་པར་གྱུར་བར་མངོན་ཏེ་རུས་ཆེན་སྡེ་ལྔར་བསྡུ་བར་རུང་བའི་ལུགས་ཡིན་པའི་ཕྱིར་རོ།  །དེ་ལ་བདག་ཉིད་ནི་ཨ་ལྕགས་འགྲུའམ་འགྲུ་སྔོན་པོའི་རིགས་ལས་ཆད་པ་ཡིན་ནོ་ཞེས་གྲགས་སོ།  །དེ་ཡང་ཡིན་ཏེ།  འདི་ལྟར་སྔོན་གྱི་དུས་ན་འགྲུ་སྔོན་པོའི་རིགས་ཀྱི་མྱུ་གུར་གཏོགས་པའི་སྡེ་ཚན་གཅིག་གནུབས་ཡུལ་དུ་བྱུང་བ་དེ་ལས་འཕགས་ཆེན་དམ་པའི་སར་བཞུགས་སངས་རྒྱས་ཡེ་ཤེས་དང་།  སངས་རྒྱས་གཉིས་པ་པདྨ་སམྦྷ་ཝའི་ཐུགས་སྲས་དགེ་སློང་ནམ་མཁའི་སྙིང་པོ་སོགས་ཀྱིས་གང་དུ་མིའི་སྲིད་པ་བཟུང་བའི་རིགས་ལ་གནུབས་ཀྱི་རིགས་ཞེས་བྱའོ།  །སློབ་དཔོན་དེ་དག་དང་རུས་གཅིག་པར་གྱུར་བའི་གནུབས་རིགས་ཀྱི་སྡེ་ཚན་གཅིག་ཡུལ་དུས་ཀྱི་རྐྱེན་ལས་རིམ་གྱིས་ཡུལ་བརྒྱུད་ནས་ཁམས་ཀྱི་ཤར་ཕྱོགས་མཚོ་ཁྲི་ཤོག་རྒྱལ་མོ་དང་ཉེ་བའི་རྨ་ཁོག་བར་མའི་ཡུལ་གྲུ་ཞིག་ཏུ་གནས་བཅས་སོ།  །དེར་གནུབས་རིགས་ཕྱི་མ་རྣམས་ལས་ཀྱང་འཇིག་རྟེན་པའི་ལུགས་སུ་དཔའ་མཛངས་ཀྱི་རྩེ་མོར་སོན་ཞིང་།  རལ་གྲི་དང་མདའི་འཁྲུལ་འཁོར་ལ་བྱང་བ་མིའི་མཆོག་ལྟ་བུ་འགའ་ཞིག་བྱུང་བའི་ནང་གསེས་གཅིག་རུང་ཆེན་ལ་གནས་པ་ལ་རུང་ཐ་ཞེས་ཟེར།  དེ་ཉིད་རུས་མིང་ལྟ་བུར་གྱུར་ནས་དེ་ཕྱིན་ཆད་དེའི་རིགས་བརྒྱུད་རྣམས་ལ་རུང་ཐ་ཞེས་གྲགས།  མཐར་སོག་པའི་རྒྱལ་པོ་ཞིག་གིས་གཞན་སྡེ་མ་ལུས་པ་མངའ་འོག་ཏུ་བསྡུ་བར་འདོད་ནས་དམག་དཔུང་ཆེན་པོ་བཏང་བ་ལས་གནུབས་རིགས་དེ་དག་ཡུལ་ནས་ཕྱུང་སྟེ་ཡུལ་མང་རིམ་གྱིས་བརྒྱུད་ནས་ལྷོ་རྒྱུད་མདོ་སྨད་ཀྱི་ཕྱོགས་འདྲ་ལྕགས་ཁུང་ཞེས་རྒྱ་མིས་ལྕགས་བརྐོ་བའི་ཁུང་བུ་ཡོད་པ་ལ་ཡུལ་གྱི་མིང་དུ་གྲགས་པའི་སྟོད་དུ་གནས་སོ།  །དེ་ཡན་ཆད་ཀྱི་རུང་ཐའི་མི་རིགས་རྣམས་ལ་གནུབས་རིགས་རུང་བརྒྱུད་སྔ་མ་ཞེས་ཟེར།  ད་ལྟ་རྣུ་ཟོག།  སྟོང་དཔོན།  སྔོ་ཤུལ།  རུང་ཐ་སོགས་ཟེར་བ་རུས་གཅིག་ལ་མིང་སོ་སོར་ཆགས་པ་ཡིན།  འདྲ་ལྕགས་ཁུང་ཞེས་པ་ཡུལ་གང་དུ་གཏོགས་ཞེ་ན།  དེ་ནི་སྨད་མདོ་ཁམས་སྒང་དྲུག་གི་ཡ་གྱལ་ཤར་མི་ཉག་ར་བ་སྒང་གི་སའི་ཐིག་ལེ།  ཁམས་ཀྱི་གནས་ཆེན་ཉི་ཤུ་རྩ་ལྔའི་ཡ་གྱལ།  སྦ་ཞབས་བྲག་དཀར་རམ་ཝ་ཤུལ་སེང་གེ་བྲག་དཀར་ཞེས་སྔོན་དུས་སྦ་མི་ཕམ་མགོན་པོས་ཧེ་རུ་ཀའི་སྒྲུབ་གནས་སུ་བྱིན་གྱིས་བརླབས་པ་དེའི་གཡས་ཕྱོགས་ནས་བབས་པའི་ཆུ་བོའི་རྒྱུན་དང་ལྡན་པ་ལ་འདྲ་ལྕགས་ཁུང་བ་ཞེས་གྲགས་པ་དེའམ།  ཡུལ་དེར་གནས་པའི་གྲོང་ཁྱེར་བ་རྣམས་དང་སྟོད་ཕྱོགས་རྒྱང་འབྲོག་པ་རྣམས་ལའང་སྤྱི་མིང་ལྕགས་ཁུང་བ་ཞེས་ཟེར།  དེར་གནས་པའི་གནུབས་རིགས་རུང་བརྒྱུད་སྔ་མའི་ཁྱིམ་བདག་སྤུན་ཟླ་གསུམ་པ་ཞིག་བྱུང་།  དེ་དག་སོ་སོའི་བུ་དང་།  ཚ་བོ་དང་།  ཡང་ཚ་དང་།  སུམ་ཚའི་བརྒྱུད་པ་ལས།  ཆེ་བརྒྱུད།  འབྲིང་བརྒྱུད།  ཆུང་བརྒྱུད་ཅེས་ཟེར་བ་རྣམས་ལ་གནུབས་རིགས་རུང་བརྒྱུད་ཕྱི་མ་ཞེས་གྲགས།  དེ་ལས་ཆུང་བརྒྱུད་ཀྱི་ཕྱོགས་སུ་སྨར་ཚང་བཀའ་བརྒྱུད་པའི་སྲོལ་བཟང་ལ་བརྟེན་ནས་གྲུབ་པ་བརྙེས་པ་ཐར་བའི་རྒྱལ་མཚན།  ལུང་རྟོགས་ཀྱི་མངའ་བདག་དགེ་བའི་རྒྱལ་མཚན།  རིམ་གཉིས་ཀྱི་རྟོགས་པ་ཕུལ་ཕྱིན་ཤཱཀྱ་རྒྱལ་མཚན་ཏེ་རྒྱལ་མཚན་རྣམ་གསུམ་མམ།  ཕྱི་མ་ལ་ཐར་དགེ་ཤཱཀྱ་རྒྱལ་མཚན་ཞེས་ཀྱང་གྲགས་པ་སོགས་དམ་པ་དུ་མ་བྱུང་བ་ཡིན།  དེ་ནས་གནུབས་རིགས་རུང་བརྒྱུད་ཆུང་བ་ལ་སྐྱོང་གདུགས་གཉིས་ཟེར་བ་དེ་རིམ་གྱིས་ཡུལ་བརྒྱུད་དེ་ཤར་རྒྱལ་མོ་རོང་གི་སྟོད་ཕྱོགས་ཆུ་བོའི་རྒྱུན་གསུམ་དུ་གྱེས་པ་ལ་རྡོ་གསེར་སྨར་གསུམ་དུ་གྲགས་པ་ཡིན་ཏེ།  ཆེ་བ་སྐྱོང་ལོ་ཞེས་ཟེར་བ་ཟླ་ཁོག་སྟོད་དུ་ཕྱིན།  ཆུང་བ་གདུགས་དཀར་ཞེས་བསྟོད་མིང་དུ་ཨ་གདུགས།  གཅེས་མིང་དུ་གདུགས་ལོ་ཞེས་ཟེར་བ་དེ་གསེར་ཡུལ་བདུད་སྙིང་འགོ་ཞེས་པའི་ས་མིག་དེར་གནས་བཅས་པ་ལ་བུ་གསུམ་སྐྱེས་པའི་ཆེ་བ་དཔལ་གྲགས།  འབྲིང་བ་མགོན་སྐྱབས།  ཆུང་བ་དར་རྒྱས་གསུམ་སྟེ།  མགོན་སྐྱབས་ཀྱི་རྡོའི་སྟོད་དུ་ས་བཟུང་བའི་དེའི་རིགས་བརྒྱུད་ལ་གསེར་སྐོར་ཞེས་མཛུ་སྟོད་དུ་ཆད།  དཔལ་གྲགས་ཞེས་བྱ་བ་རྡོའི་སྨད་དུ་ཕྱིན་པ་འདྲ་ལྕགས་ཁུང་ནས་བྱུང་བས་དེ་རུས་སུ་གྲགས་པ་དང་།  སྟོད་སྨད་ཀྱི་གནས་ལ་རྟེན་བཅས་པས་ལྕགས་ཁུང་ཁ་སྟོད་དང་ཁ་སྨད་ཞེས་སུ་གྲགས་ཤིང་།  དར་རྒྱས་ཞེས་པ་རང་སོར་གནས་པས་ལྕགས་མོ་རུ་གྲགས།  དེ་ལྟར་མགོན་སྐྱབས་ཞེས་བྱ་བའི་མི་བརྒྱུད་ལས་ཆད་པའི་རིགས་བརྒྱུད་ཕྱི་མ་ཕ་ཨ་བརྟན་ཞེས་པ་དང་།  མ་དམུ་ཚ་སྒའི་རུས་སུ་གཏོགས་པ་བོ་རྫོགས་ཞེས་བྱ་བ་གཉིས་ཀྱི་བུ་རུ་རབ་བྱུང་བཅུ་བཞི་པའི་ཤིང་མོ་ལུག་གི་ལོར་བདག་སྐྱེས་པ་ཡིན།  རྒྱུ་མཚན་དེས་ན་སོ་ཟུར་གནུབས་གསུམ་སྔགས་པའི་རྒྱལ་པོར་གྲགས་པའི་ནང་གསེས་གནུབས་རིགས་རུང་བརྒྱུད་ཆུང་བ་ཞེས་སྔོན་དུས་རིག་འཛིན་མ་ཏི་རཏྣའི་ཡང་སྲིད་ཤར་གཏེར་ཆེན་པོ་སོགས་དམ་པ་དུ་མ་རྣམས་གང་ལས་སྐུ་འཁྲུངས་པའི་རིགས་སུ་གྱུར་བའི་བརྒྱུད་པ་ལས་བྱུང་བའི་ཕྱིར།  རིགས་ཁྱད་པར་ཅན་ལ་བུ་ཡ་རབས་མི་བརྒྱུད་གཙང་མ་ཡིན་ནོ།  །འགྲུ་གནུབས་ཀྱི་ཆེ་བརྒྱུད་ལ་དཔའ་སྐྱེན་འཛོམ་པ།  འབྲིང་བརྒྱུད་ལ་ལོངས་སྤྱོད་ཆེ་བ།  ཆུང་བརྒྱུད་ལ་གྲུབ་རིགས་དམ་པ་མང་དུ་བྱུང་བ་ཡིན།  དེས་ཕ་མའི་རིགས་རུས་ཟུར་ཙམ་བརྗོད་ཟིན་ཏོ།  །ཐུབ་དབང་མཆོག་གི་བསྟན་པ་ལ།  །རིགས་རུས་གཙོ་བོར་བྱེད་མིན་ཀྱང་།  །མ་སྨད་ལས་ཀྱི་འབྲས་མཚོན་ཕྱིར།  །བདག་ཉིད་ཆེ་རྣམས་འཇིག་རྟེན་འདིར།  །བལྟམས་ཚེ་གྲགས་པའི་རིགས་འཁྲུངས་བཞིན།  །བདག་ཀྱང་ལྗོངས་འདིར་ཁྱད་འཕགས་པའི།  །རིགས་སུ་སྐྱེ་སྲིད་བཟུང་བའི་ཚུལ།  །ཉུང་ངུའི་ཚིག་གིས་གསལ་བར་བྱས།  ། ༈  །  ན་མོ་གུ་རུ་མཉྫུ་ཤྲཱི་ཡེ།  བསོད་ནམས་བྱེ་བའི་དཔལ་མངའ་གཞོན་ནུའི་གཟུགས།  །དམར་སེར་ཉི་མ་འཆར་ཀའི་གཟི་འབར་བ།  །མི་འཇིགས་སེང་སྔོན་སྟེང་ན་མངོན་འགྱིང་བའི།  །འཇམ་དཔལ་སྨྲ་བའི་སེང་གེས་བདེ་ལེགས་སྩོལ།  །འདི་ན་གསང་གསུམ་ཡོན་ཏན་བསམ་ཡས་པའི།  །འཕགས་ཆེན་དམ་པའི་རྣམ་ཐར་ཇི་བཞིན་དུ།  །བསྔགས་འོས་ངོ་མཚར་གྱུར་པ་མ་མཆིས་ཤིང་།  །གཞན་གྱི་དོན་དུ་འགྱུར་བ་ཆེས་དཀའ་ཡང་།  །གཟུར་གནས་བློ་ཡི་དད་པ་སྤེལ་བའི་ཕྱིར།  །རྒན་པོ་རང་གི་ངང་ཚུལ་བརྗོད་པའི་གཏམ།  །ད་ལྟ་ཡིད་ལ་ངེས་ཚོད་སྒྲོ་སྐུར་དང་།  །བྲལ་བ་སྨྲ་བའི་ངལ་བ་ཁུར་དུ་ལེན།  །དེ་ཡང་སྔོན་བྱུང་གི་དུས་ན་ཆོས་སྐུའི་སྟོན་པ་རྡོ་རྗེ་འཆང་ཆེན་པོས་བསྟན་པ་དང་འགྲོ་བའི་དོན་མཛད་པའི་ཕྱིར་གདུལ་བྱའི་ཡུལ་ལ་གཟུགས་ཀྱི་སྐུར་བཞེངས་པ་རྣལ་འབྱོར་དབང་ཕྱུག་ནུས་ལྡན་རྡོ་རྗེ་ཞེས་བྱ་བར་གྲགས་པ་དེ་ཉིད་ཀྱིས་སངས་རྒྱས་སྟོང་ལ་དབང་བསྐུར།  ཁམས་གསུམ་ཆོས་ཀྱི་རྒྱལ་པོར་མངའ་གསོལ།  འགྲོ་བའི་དོན་དུ་སྨོན་ལམ་རྒྱ་ཆེན་པོ་བཏབ།  བསྐལ་པ་བཟང་པོའི་སངས་རྒྱས་སྟོང་གི་བསྟན་པ་མ་རྫོགས་ཀྱི་བར་དུ་ངའི་སྤྲུལ་པའི་སྐུ་མཆོག་དམ་པ་རྒྱུན་མི་འཆད་པར་འབྱུང་ནས་གང་ལ་གང་འདུལ་གྱིས་འགྲོ་བའི་དོན་རྒྱ་ཆེན་པོ་བྱེད་པར་ཤོག་ཅིག།  ཅེས་གསུངས་པའི་སྨོན་ལམ་རྣམ་པར་དག་པའི་མཐུས།  དུས་སྐབས་ཅི་རིགས་སུ་སྤྲུལ་པ་བརྒྱ་ཕྲག་རེས་འགྲོ་བའི་དོན་མཛད་པ་ལས།  བདག་ཅག་གི་སྟོན་པའི་དུས་སུ་སྤྲུལ་པའི་ཉན་ཐོས་ཤཱ་རིའི་བུ་དང་།  དེའི་འོག་ཏུ་རིག་འཛིན་ཧཱུྃ་ཆེན་ཀཱ་ར།  འབྲོག་བན་ཁྱེའུ་ཆུང་ལོ་ཙཱ།  ཀཿཐོག་དམ་པ་བདེ་གཤེགས།  གྲུམ་གྱི་མཁར་ནག་པ།  ཧེ་པ་ཆོས་འབྱུང་སོགས་དང་།  སྔ་མ་རིག་འཛིན་བདུད་འདུལ་རྡོ་རྗེ།  ཕྱི་མ་བདུད་འདུལ་རོལ་པ་རྩལ་ཞེས་གྲགས་པ་དེ་ཉིད་ཀྱིས་གྲ་དཀར་གྲ་ནག་ཅེས་ད་ལྟ་ཡུལ་འདི་ཕྱོགས་སུ་ཀློ་དཀར་ནག་ཟེར་བའི་བདུད་ཀྱི་སྡེ་ཚོགས་མང་པོ་ཆོས་ལ་བཙུད་དེ་ཤིང་ཕོ་སྤྲེའུའི་ལོར་རྔ་ཡབ་པདྨ་འོད་ཀྱི་གཞལ་ཡས་སུ་གཤེགས།  དེ་འོག་ལྔ་བརྒྱ་སྙིགས་མའི་དུས་སུ་རྒྱ་སོགས་ཀླ་ཀློ་མཐའ་དམག་གདུག་པ་ཅན་གྱི་ཁ་གནོན་དུ་ཨོ་རྒྱན་ཆེན་པོས་དབང་བསྐུར་མངའ་གསོལ་སྨོན་ལམ་མཛད་ནས་སྟེང་ཕྱོགས་ནམ་མཁའ་ཡངས་པའི་མཐོངས་ལ་གཟིགས་ཏེ།  ཀྱེ་མ་སྙིགས་མའི་འགྲོ་རྣམས་སྙིང་རེ་རྗེ།  །སྨོན་ལོག་ཀླ་ཀློའི་རྫས་སྔགས་ཏིང་འཛིན་གྱིས།  །ཤེས་རྒྱུད་བརླམས་པས་ཕན་ཚུན་བསླུ་བར་བྱེད།  །བློ་གཏད་ཡུལ་མེད་རང་ལ་ཡིད་མི་ཆེས།  །བསགས་པའི་གནག་ཕྱུགས་རྨི་ལམ་ནོར་བཞིན་ཡལ།  །ས་བོན་བཏབ་པའི་འབྲས་བུ་སད་ཀྱིས་བཅོམ།  །ནད་མུག་མཚོན་གྱི་དུ་རུ་ཀ་ཡིས་མནར།  །ང་ཡི་གདུལ་བྱ་སྨོན་ལམ་ལས་འབྲེལ་བའི།  །སྐྱེས་བུ་ཕོ་མོ་འགའ་ཞིག་མཆིས་ན་ཡང་།  །ལམ་སྟོན་བྱེད་པའི་བཤེས་གཉེན་མ་མཆིས་པས།  །ལོང་བ་བཤེས་མེད་བཞིན་དུ་མགོ་འཁོར་ཏེ།  །མཐའ་མེད་འཁོར་བའི་ཡུལ་དུ་ཁ་དྲངས་པའི།  །བསླུ་བྱེད་ལྟ་ལོག་བླ་གཟུགས་མང་པོ་ཡིས།  །ལྟ་བ་མེད་པའི་མུན་སྒོམ་བློ་ཡིད་ཅན།  །རྣམ་རྟོག་རྗེས་དེད་འཛིན་དང་སྐྱོང་བྱེད་དེ།  །སེམས་ཀྱིས་སེམས་ལ་བལྟ་བས་བདེ་སྡུག་འཚོལ།  །ཐ་མར་ལྟ་བའི་མཐར་ཐུག་ཡིན་སྙམ་ནས།  །ཤེས་པ་བྱར་མེད་རང་གར་ཡན་པར་འདུག།  ཕྱག་རྫོགས་འདི་དང་འདིའོ་སྐད་དུ་བསླུ།  །གཟུགས་ཁམས་ལྷ་ཡི་ལས་བསགས་དེ་རུ་འཕེན།  །རྫོགས་པ་ཆེན་པོའི་ཉི་མ་སྤྲིན་གྱིས་བསྒྲིབ།  །མེ་ཁྱེར་སྲིན་བུ་ཉི་མར་མཐོང་ལ་ལྟོས།  །ཞེས་གསུངས་ཏེ་བབས་ཀྱིས་བཞུགས་པ་ལ།  མཁའ་འགྲོ་ཡེ་ཤེས་མཚོ་རྒྱལ་གྱིས།  །ཀྱེ་མ་ཀྱི་ཧུད་གུ་རུ་རིན་པོ་ཆེ།  །སྙིགས་མ་ལྔ་བདོའི་དུས་ལ་བབས་པའི་ཚེ།  །དམུ་རྒོད་འཁྲུལ་པའི་སེམས་ཅན་སྐྱོབ་དཀའ་ཡང་།  །སྨོན་ལམ་ལས་ཀྱིས་འབྲེལ་བའི་སྐྱེས་བུ་རྣམས།  །ལོག་ལམ་མུན་པའི་ཡུལ་དུ་ཁ་དྲངས་ཏེ།  །མཐའ་མེད་འཁོར་བའི་གནས་སུ་འཕྱན་པ་ལ།  །འདུལ་བྱེད་ཕྲིན་ལས་ལས་ཀྱི་ཕོ་ཉ་རུ།  །སྤྲུལ་པའི་རིག་འཛིན་དམ་པ་སྐུར་བཞེངས་གསོལ།  །ཞེས་ཞུས་པའི་ལན་དུ་ཨོ་རྒྱན་ཆེན་པོའི་ཞལ་ནས།  ཉོན་ཅིག་ཡེ་ཤེས་མཁའ་འགྲོ་མཚོ་རྒྱལ་མ།  །སྔོན་སྦྱངས་ལས་འཕྲོ་ལྡན་པའི་སྐྱེས་བུ་ནི།  །བོད་ཡུལ་མདོ་ཁམས་སྨད་ཀྱི་ས་ཕྱོགས་སུ།  །གསང་སྔགས་བསྟན་པའི་ཉི་འོད་ལྷག་མ་ཙམ།  །དར་བའི་ཡུལ་དེར་གདུལ་བྱ་འགའ་ཞིག་མཆིས།  །རང་ལྟ་མཆོག་འཛིན་བྱེད་པའི་སློབ་དཔོན་གྱི།  །དབང་གྱུར་རང་དབང་བརྟན་པ་བྲལ་ན་ཡང་།  །རྣལ་འབྱོར་ནུས་ལྡན་རྡོ་རྗེའི་སྨོན་ལམ་མཐུས།  །གདུལ་བྱ་འགའ་ཞིག་འདུལ་བའི་ནུས་སྟོབས་ནི།  །རིག་འཛིན་བདུད་འདུལ་དཔལ་གྱི་རྡོ་རྗེ་ལས།  །གཞན་ན་མེད་དོ་དེ་ཉིད་གཟུགས་སྐུར་བཞེངས།  །ཁམས་གསུམ་དབང་ཕྱུག་ལྷ་ཡི་བླ་མ་ཉིད།  །གྲོགས་སུ་བསྟེན་ན་གཞན་སྣང་དབང་དུ་བྱེད།  །ད་ནི་རིག་འཛིན་རྣལ་འབྱོར་ཕོ་མོ་རྣམས།  །དཔག་ཚད་བྱེ་བར་མེ་ཏོག་སིལ་མར་འཐོར།  །དར་གྱི་ལམ་སྐྱོང་རོལ་མོ་སྣ་ཚོགས་ཀྱིས།  །བདུད་འདུལ་དྲག་པོའི་སྐྱེལ་མ་མཛོད་ལ་ཆོས།  །ཞེས་གསུངས་པའི་ལན་དུ་བདག་གིས་འཁོར་བ་ལ་སྐྱོ་སུན་དང་སྙིགས་མའི་སེམས་ཅན་འདུལ་དཀའོ་སྙམ་དུ་བསམ་ནས་གུས་པས་ཐལ་མོ་སྦྱར་ཏེ་འདི་སྐད་ཅེས་ཞུས་སོ།  །ཀྱེ་ཧོ་དུས་གསུམ་རྒྱལ་བའི་སྤྱི་གཟུགས་མཆོག།  གཏན་གྱི་སྐྱབས་མཆོག་ཨོ་རྒྱན་རིན་པོ་ཆེ།  །ཐུགས་བརྩེ་ཐུགས་རྗེ་ཆེན་པོ་ཡིས།  །བདག་ལ་གསན་ཅིང་གནང་བ་སྩོལ།  །ཞེས་ཞུས་པས།  སླར་ཡང་འདི་ལྟར་བཀའ་སྩལ་ཏོ།  །ཉོན་ཅིག་བདུད་འདུལ་དྲག་པོ་རྩལ།  །སྙིགས་མའི་སེམས་ཅན་འདུལ་དཀའ་ཡང་།  །སྔོན་ཚེ་སྨོན་ལམ་ལས་འབྲེལ་གྱིས།  །སྐལ་ལྡན་སྐྱེས་བུ་སྟོང་ཕྲག་གསུམ།  །ཁྱོད་ཀྱི་གདུལ་བྱའི་ཡུལ་དུ་མཆིས།  །ཚེ་གཅིག་གྲོལ་བ་ཐོབ་པ་ཡི།  །སྐྱེས་མཆོག་ལྔ་བརྒྱ་ལྷག་ཙམ་མཆིས།  །ཁྱོད་ཀྱི་ཕྲིན་ལས་ཕོ་ཉ་རུ།  །རྗེ་འབངས་སྤྲུལ་པ་ཉེར་ལྔ་འབྱུང་།  །གཞན་ཡང་འགྲོ་བའི་དོན་བྱེད་པའི།  །སྤྲུལ་པའི་གཏེར་སྟོན་བཅུ་ཕྲག་འབྱུང་།  །གསང་སྔགས་སྟོན་པ་མཆོག་བདུན་གྱི།  །སྤྲུལ་པ་ཁྱོད་ཀྱི་བུ་ཚར་སྤྲུལ།  །འགྲོ་དོན་འབྱུང་འགྱུར་གདོན་མི་ཟ།  །དེ་ཕྱིར་རིག་འཛིན་རྒྱལ་པོ་ཁྱོད།  །རྡོ་རྗེ་ཁྲོ་ལོད་སྐུར་བཞེངས་ཏེ།  །བཀའ་སྲུང་གཉན་པོའི་གྲོགས་དང་འགྲོགས།  །སྔོན་ནས་འབྲེལ་བའི་ཕ་མ་ཡི།  །བུ་རུ་བཞེངས་མཛོད་ངའི་ཕྲིན་ལས།  །དུས་ལ་བབ་ཀྱི་ད་གཤེགས་ཤིག།  ཅེས་གུ་རུ་རིན་པོ་ཆེའི་བཀའ་བཙན་པོ་ལྡོག་པར་མ་ནུས་ཏེ།  སྔོན་ནས་ལས་ཀྱིས་འབྲེལ་བའི་ཕ་མ་གང་ཡིན་བརྟག་ཅིང་དཔྱད་པའི་མོད་ལ།  སྔོན་ཚེ་ཀཿཐོག་བདུད་འདུལ་རྡོ་རྗེའི་ཕ་མ་གཉིས་ཀ་ཚེ་འཕོས་ནས་མིའི་ལུས་རྟེན་ཐོབ་པ་གོང་སྨོས་བཞིན་གྱི་ཕ་ཨ་ལྕགས་འགྲུ་ཡི་རུས་ཁམས་དང་།  མ་དམུ་ཚ་སྒ་ཡི་རུས་སུ་གཏོགས་པ་གཉིས་སྨོན་ལམ་གྱི་དབང་གིས་ཁྱིམ་ཐབས་བྱས་པ་དེ་ལ་ལས་འབྲེལ་ཡོད་པར་མཐོང་ནས་དཔའ་བོ་མཁའ་འགྲོ་མའི་ཚོགས་དཔག་ཏུ་མེད་པས་མེ་ཏོག་གི་ཆར་འབེབས་པ་དང་བཅས་ཕྱིན་ནས་མའི་ལྷུམས་སུ་བཞུགས།  དེ་ནས་རྟག་ཏུ་མའི་རྨི་ལམ་ན་དཔའ་བོ་དང་མཁའ་འགྲོའི་ཚོགས་ཀྱིས་སྲུང་སྐྱོབ་མཛད་པ་དང་ཁྲུས་གསོལ་བྱེད་པ་མཐོང་།  ཤིང་མོ་ལུག་གི་ལོ་བྱ་ཟླའི་ཚེས་བཅུའི་ནུབ་མོ་མ་ལས་བཙས་པའི་ཉི་ཤར་ཁར་སྦྲ་ཁྱིམ་ཕྱི་ནང་ཐམས་ཅད་འཇའ་འོད་ཀྱིས་བསྐོར་བ་དང་འཇའ་སྣེ་ཟུག་པ་ཀུན་གྱིས་མཐོང་།  དེའི་ཚེ་བླ་མ་འཇིགས་མེད་ཞེས་བྱ་བ་གདན་དྲངས་པ་ན་དེས་ཚེ་དབང་བསྐུར་ཏེ་བླ་མའི་ཞལ་ནས།  སྔོན་ཆད་བདག་གིས་ཁྱེད་གཉིས་བཟའ་མི་བྱས་ཏེ་ཁྱིམ་ཐབས་བཟུང་ན་ཤིན་ཏུ་ལེགས་པའི་ཉམས་སྣང་ཤར་བ་དང་།  ད་ནང་སྦྲ་ཁྱིམ་ལ་འཇའ་སྣེ་ཟུག་ཡོད་པ་འདི་གཉིས་མཚུངས།  དེ་རིང་བདག་གི་ཉམས་ཀྱི་སྣང་བ་ལའང་ཁྱོད་ཀྱི་བུ་འདི་སྤྲུལ་པའི་སྐུ་འགྲན་ཟླ་དང་བྲལ་བ་ཞིག་ཡིན་སྙམ་གྱི།  གཞན་བདག་པོ་མེད་ཀྱང་རིགས་སད་དེ་གཞན་ལ་ཕན་ཐོགས་ངེས་ཞིག་ཡོང་བ་འདྲ།  དེས་ན་གཙང་སྦྲ་བྱེད་པ་གནད་དུ་ཟུངས་ལ་བར་མཚམས་སུ་བསང་ཁྲུས་ལ་འབད་པར་གྱིས་ཞེས་གསུངས།  དེ་ནས་བཟུང་སྟེ་ལོ་གསུམ་གྱི་བར་དུ་མཁའ་འགྲོ་མ་རྣམས་ཀྱིས་མཛེས་པའི་གར་བྱེད་ཅིང་སྙན་པའི་གླུ་ལེན་པ་བདག་གིས་མཐོང་སྣང་དུ་ཤར་བ་དང་།  མས་རྨི་ལམ་དུའང་ཡང་ཡང་རྨིས།  མཚན་མོའི་དུས་སྐབས་ཅི་རིགས་པར་རྒྱལ་བསེན་དམ་སྲིའི་ཚོགས་རྣམས་ཀྱིས་སྲོག་ལ་རྒོལ་བ་བྱུང་བས་དཔའ་བོ་མཁའ་འགྲོ་རྣམས་དང་འཐབ་རྩོད་གཡུལ་འགྱེད་བྱེད་པ་མཐོང་ནས་འཇིག་སྐྲག་གི་སྣང་བ་རྒྱུན་མི་ཆད་པ་བྱུང་བར་དེའི་ཚེ་དངངས་བཞིན་མ་ལ་འབོད་པ་དང་སྨྲ་སྙིང་འདོད་ཀྱང་སྨྲ་མ་ཤེས་པར་འགྲེ་ལྡོག་བྱེད་ཅིང་ངུས་ཏེ་གཉིད་མ་བྱུང་བར་མ་བུ་གཉིས་ཀས་སྡུག་བསྔལ་ཉམས་སུ་མྱོང་།  དེ་ནས་ལོ་གསུམ་ལོན་པ་བྱའི་ལོ་ཁྱིམ་ལ་བབས་པ་ཧོར་ཟླ་གཉིས་པའི་ཚེས་བརྒྱད་ཀྱི་ཉིན་མ་རྒན་གྲོ་མ་བརྐོ་རུ་ཆས་པ་མཐོང་བས་ང་ཡང་རྗེས་སུ་འབྲང་ནས་འགྲོ་སྙམ་སྟེ་སོང་ཚེ་མ་དེས་བདག་སྦྲ་སྒོའི་ཆོན་ཐག་ལ་བཏགས་ཏེ་སོང་།  བདག་ངུ་བརྒྱལ་བྱེད་དུ་ཡོད་པའི་ཚེ་བུད་མེད་ཅིག་སླེབ་བྱུང་།  བདག་གི་བསམ་པ་ལ་ཨ་མ་སླེབ་བྱུང་བསམ་ནས་བལྟས་པའི་མོད་ལ།  མཁའ་འགྲོ་མ་དཀར་མོ་ཤིན་ཏུ་མཛེས་མ་ཞིག་སླེབ་འདུག་པ་དེས།  ཁྱོད་ཀྱི་ཨ་མ་ང་ཡིན་པས་འདིར་ཤོག་ཟེར་ཞིང་པང་དུ་བླངས་ཏེ་ནུ་མ་བསྣུན་པ་ལས།  ནུས་མ་ཐག་ཏུ་ལུས་སེམས་ཐམས་ཅད་བདེ་བས་མྱོས་སོ།  །དེ་ནས་བུད་མེད་དེས་བུ་ཁྱོད་ཨ་མའི་ཚལ་དུ་ཨེ་འགྲོ་ཟེར་ནས་དེ་མ་ཐག་ཏུ་བདག་ཁྲིད་ནས་འགྲོ་སྣང་ཤར་ཏེ་བྱང་ཕྱོགས་ཀྱི་འཇིག་རྟེན་མང་པོའི་ཕ་རོལ་ཏུ་སོང་བའི་མོད་ལ་རིན་པོ་ཆེ་བཻཌཱུརྱའི་ཁ་དོག་ཏུ་སྣང་བའི་ཞིང་ཁམས་རྒྱ་ཆེ་ལ་ཁྱོན་ཡངས་པའི་ཁོར་ཡུག་དཔག་བསམ་གྱི་ཤིང་གིས་བསྐོར་བ།  དབུས་སུ་མེ་ཏོག་སྣ་ཚོགས་ཀྱིས་བརྒྱན་པའི་གཞལ་ཡས་ཁང་གྲུ་བཞི་སྒོ་བཞི་དབྱིབས་མཛེས་ཤིང་བཀོད་ལེགས་པ་ཡིད་དུ་འོང་ཞིང་ཉམས་དགའ་བའི་ནང་དུ་རིན་པོ་ཆེའི་ཁྲིའི་ཁར་པདྨ་དང་ཉི་ཟླའི་སྟེང་དུ་བཅོམ་ལྡན་འདས་གདོན་མི་ཟ་བའི་རྒྱལ་པོ་ཞེས་བྱ་བ་མཚན་དང་དཔེ་བྱད་ཀྱིས་བརྒྱན་པ།  གཡས་སྐྱབས་སྦྱིན་དང་གཡོན་མཉམ་བཞག་གི་ཕྱག་རྒྱ་མཛད་པ།  ཆོས་གོས་རྣམ་གསུམ་གསོལ་ཞིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ།  དེའི་གཡས་སུ་བྱང་ཆུབ་སེམས་དཔའ་གསལ་ཁྱབ་དབང་པོ་ཞེས་བྱ་བ་དང་།  གཡོན་དུ་རྣམ་པར་གྲོལ་བའི་རྒྱལ་པོ་ཞེས་བྱ་བ་གཉིས་ཀ་སྐུ་མདོག་དཀར་པོ་དང་དམར་པོའི་ཁ་དོག་འོད་དུ་འབར་བ་མཆོད་པའི་སྤྲིན་གྱིས་རྒྱལ་བ་དེ་ལ་རྟག་ཏུ་མཆོད་ཅིང་གུས་པའི་ངག་གིས་བསྟོད་པ།  གཞན་ཡང་བྱང་ཆུབ་སེམས་དཔའ་དང་སེམས་མའི་ཚོགས་ནམ་མཁའི་སྐར་ཚོགས་ཙམ་གྱིས་རྒྱལ་བ་དེ་ལ་རབ་ཏུ་གུས་པས་ཕྱག་འཚལ་ནས་ཚིགས་སུ་བཅད་པ་དུ་མས་བསྟོད་པར་བྱེད་པ་བཞིན་བདག་གིས་ཀྱང་འདི་སྐད་བརྗོད་དོ།  །ན་མོ།  །རིགས་དང་དཀྱིལ་འཁོར་ཀུན་གྱི་བདག་ཉིད་མཆོག།  བཅོམ་ལྡན་རྒྱལ་བ་ཁྱོད་ལ་ཕྱག་འཚལ་ལོ།  །བདག་སོགས་འཁོར་བར་འཕྱན་པའི་འགྲོ་བ་ཀུན།  །སྲིད་པའི་མཚོ་ལས་བསྒྲལ་ཞིང་དབུགས་དབྱུང་མཛོད།  །ཅེས་གུས་པས་ཕྱག་འཚལ་ཞིང་གསོལ་བ་བཏབ་པས།  རྒྱལ་བ་དེའི་ཐུགས་ཀ་ནས་འོད་ཟེར་ཁ་དོག་ལྔ་དང་ལྡན་པ་བྱུང་ནས་བདག་གི་སྙིང་གར་ཐིམ་པས་བདེ་བ་དང་སྟོང་པའི་ཡེ་ཤེས་ཉམས་སུ་མྱོང་ངོ་།  །དེ་ནས་དེ་བཞིན་གཤེགས་པ་དེའི་ཞལ་ནས།  བུ་ཁྱོད་ངའི་རྒྱལ་ཚབ་དམ་པར་བསྔགས་སོ།  །གསང་སྔགས་རྡོ་རྗེ་ཐེག་པའི་དབང་བསྐུར་རོ།  །མཆོག་ཐུན་མོང་གི་དངོས་གྲུབ་ཐོབ་པ་ཡིན་ནོ།  །ཞེས་གསུངས་ཏེ་ཤེལ་གྱི་སྒྲོམ་བུ་ཞིག་ལག་ཏུ་གཏད་བྱུང་བའི་ནང་དུ་ཡི་གེ་ཨོཾ་ཨཱཿཧཱུྃ་གི་རི་མོ་དཀར་དམར་མཐིང་གའི་ཚོན་གྱིས་བྲིས་པ་ལྟར་གསལ་བ་འདི་ནི་ཕ་ནོར་བུའི་སྐལ་བ་ཡིན་པས་ཁྱོད་ཀྱིས་ཐེ་ཚོམ་མེད་པར་ཁྱུར་མིད་དུ་ཐོངས།  ཞེས་གསུངས་པ་བཞིན་ཁྱུར་མིད་དུ་བཏང་བས་ཆོས་ཀྱི་རྣམ་གྲངས་མང་པོ་དྲན་པ་དང་།  སྔོན་གྱི་སྐྱེ་སྲིད་རྣམས་སུ་ཐོས་པ་དང་སྦྱངས་པའི་འཕྲོ་དང་བསྐྱེད་དང་རྫོགས་པའི་རིམ་པ་ཐམས་ཅད་སྤར་གྱིས་བཏབ་པ་བཞིན་དུ་བཀྲ་ལམ་མེར་ཡིད་ལ་གསལ་བའི་ངང་དུ་ཡུན་ཅིག་གནས་པ་བྱུང་།  དེ་ནས་རྨི་ལམ་སད་པ་བཞིན་དུ་དབྱིངས་སུ་ཡལ་བའི་མོད་ལ་བདག་གི་མ་དེའང་རྩ་བ་རུ་སླེབ་འདུག་ཅིང་འདི་ངུ་བརྒྱལ་དུ་སོང་ནས་འཆིའམ་ནད་ཞིག་བྱུང་བ་རེད་ཟེར་ཞིང་ངུ་སྟེ་ཕ་ལ་བླ་མ་འབོད་དུ་སོང་ཞེས་ཟེར་བས།  བླ་མ་འཇིགས་མེད་གདན་དྲངས་ནས་དེས་ཚེ་དབང་དང་ཚེ་འགུགས་མང་དུ་བྱས་ནས་ན་རེ།  བུ་འདི་ནད་ཀྱིས་ཐེབས་པ་མ་ཡིན་ཏེ་སྔོན་སྦྱངས་ལས་ཀྱི་འཕྲོ་ཞིག་སད་པ་ཡིན་འདྲ་གསུངས།  དེའི་ཚེ་བདག་གི་མངོན་ཤེས་ཀྱིས་བལྟས་པས་སྔོན་ཚེ་བདུད་འདུལ་རྡོ་རྗེའི་ཁུ་བོ་འཚམས་ཕུག་སྒོམ་ཆེན་ཞེས་བྱ་བ་སྨོན་ལམ་སྟོབས་ཀྱིས་བདག་གི་བླ་མ་དང་མི་དཔོན་དུ་གྱུར་པ་ཡིན་པར་མཐོང་།  དེ་ནས་བཟུང་སྟེ་བདུད་བགེགས་ཀྱིས་གླགས་ཚོལ་དང་ལྷ་འདྲེས་འཐབ་མོ་བྱེད་པ་ཐམས་ཅད་རང་ཡལ་དུ་སོང་།  ལོ་དེའི་དབྱར་ཟླ་ར་བའི་ཚེས་བཅུའི་ནུབ་མོ་རྨི་ལམ་ན་ཨོ་རྒྱན་དག་པ་མཁའ་སྤྱོད་ཀྱི་ཞིང་ཁམས་ནས་ཡིན་ནོ་སྐད་པའི་བུད་མེད་ཞིག་བྱུང་ནས།  བདག་ལ་བུ་ཁྱོད་ནུབ་ཕྱོགས་ཨོ་རྒྱན་གྱི་ཡུལ་དུ་འགྲོ་ཞེས་ཟེར་ཞིང་ཁྲིད་ནས་སྟེང་ཕྱོགས་དཔག་ཚད་འདས་པའི་ནམ་མཁར་མདའ་འཕང་བ་ལྟར་སོང་བས།  ཡུལ་ལུང་མང་པོའི་ཕ་མཐའ་བརྒལ་བའི་ཚེ་རི་བོ་ཐམས་ཅད་ཀེང་རུས་སྐམ་པོ་འོད་འབར་བ་རྩི་ཤིང་མེད་པར་མཚོན་ཆ་སྣ་ཚོགས་ཀྱི་ནགས་ཚལ་ལས་མཚོན་ཆའི་ཚྭ་ཚྭ་སྐྱི་སེར་ལྟར་འཕྲོ་བ།  ཆུ་རྣམས་ཐམས་ཅད་ཁྲག་གི་མཚོ་ཀླུང་ཁྲག་གི་ལྦུ་བ་སྦྲ་གུར་ཙམ་གྱི་ནང་དུ་མི་རོ་དང་རྟ་རོ་སྟག་གཟིག་དོམ་དྲེད་ལ་སོགས་སྲོག་ཆགས་ཀྱི་རོས་གང་བ།  འབྱུང་བཞིའི་སྒྲ་དང་སྲོག་ཆགས་ཀྱི་སྐད་ཐམས་ཅད་ཕཊ་ཕེཾ་སོད་རྒྱོབ་ཀྱི་སྒྲ་འབྲུག་སྟོང་དུས་གཅིག་ཏུ་ལྡིར་བ་བཞིན་དུ་གྲགས་པ།  གཟུགས་སྣང་ཐམས་ཅད་ཁྲོ་བོ་དང་ཁྲོ་མོ་མཚོན་ཆ་ཐོགས་པ་དཔག་ཏུ་མེད་པ་དང་།  མི་ནག་ཕོ་མོའི་ཚོགས་ཀྱིས་མཚོན་ཆའི་འཁྲུལ་འཁོར་འགྱེད་པ།  མེ་རླུང་འཚུབས་མ་འབར་འཁྲིགས་འུར་ཆེམ་སྒྲོགས་པ་དེ་ལྟ་བུའི་རབ་འཇིགས་རྔམས་བརྗིད་འཇིགས་སུ་རུང་བའི་ཡུལ་དབུས་སུ་དུར་ཁྲོད་ཀྱི་རུས་པ་གསར་རྙིང་བརྩིག་པའི་ཁང་པ་གྲུ་གསུམ་རྒྱ་ཆེ་ལ་དཔངས་མཐོ་པའི་ནང་དུ་མི་རོ་གསར་རྙིང་མང་པོའི་ཁྲིའི་སྟེང་དུ།  མཁའ་འགྲོའི་གཙོ་མོ་རྡོ་རྗེ་ཕག་མོ་ཞེས་བྱ་བ་སྐུ་མདོག་མཐིང་ནག་རབ་འཇིགས་རྔམས་བརྗིད་ཤིན་ཏུ་ཁྲོས་པའི་ཉམས་ཅན་སྤྱི་བོར་ཕག་ཞལ་ནག་པོ་གྱེན་དུ་ངུར་བ།  ཕྱག་གཡས་པས་གྲི་གུག་མཁའ་ལ་ཕྱར་བས་དཔའ་བོ་དང་མཁའ་འགྲོའི་ཚོགས་དབང་དུ་སྡུད་པ།  གཡོན་པས་ཐོད་པར་སྣང་སྲིད་ཁྲག་ཏུ་བསྒྱུར་ཞིང་རོལ་པ།  ཞབས་གཡས་བསྐུམ་གཡོན་བརྐྱང་གར་སྟབས་ཀྱི་རྣམ་པས་བཞེངས་པ།  ཁ་ཊྭཱྃ་ཀ་མཆན་དུ་བརྟེན་ཅིང་དུར་ཁྲོད་ཀྱི་ཆས་རྫོགས་པ།  མཁའ་འགྲོ་སྐར་ཚོགས་ལྟ་བུའི་དབུས་ན་འགྱིང་བ་ཞིག་དང་མཇལ་ཚེ།  མཁའ་འགྲོ་མ་དེའི་ཞལ་ནས་བདག་ལ་འདི་སྐད་དོ།  །བུ་ཁྱོད་པདྨའི་རྒྱལ་ཚབ་མཆོག་ཏུ་བསྔགས།  །དེང་སང་ནག་ཕྱོགས་བདུད་དཔུང་ཁ་དར་ནས།  །དཀར་ཕྱོགས་སྐྱོང་བའི་ལྷ་སྲུང་ཉམས་རེ་དམའ།  །ཁྱད་པར་ཡུལ་དེར་ལྟ་ལོག་བླ་གཟུགས་ཞིག།  སྲོག་གཅོད་རྒྱལ་འགོང་གདུག་ཅན་ཞིག་ཏུ་སྐྱེས།  །ཤི་རྐྱེན་གྲི་རུ་ཤི་བས་ལས་རྐྱེན་འཐབ།  །དེ་ཡིས་བླ་བཙུན་དམ་ལྡན་ཐམས་ཅད་དང་།  །ཆེ་དྲག་རིགས་རྣམས་ཕྲག་དོག་དབང་གིས་གསོད།  །དེ་དབང་སོང་ཚད་དམ་སྲི་རྒྱལ་པོར་འཁྲུལ།  །དེ་ཡིས་ཁྱོད་ཀྱི་ཚེ་སྲོག་བསྟན་ལ་རྒོལ།  །དེ་ཕྱིར་ང་ཡིས་བསྲུང་སྐྱོབ་བྱིན་རླབས་བྱེད།  །ཅེས་གསུངས་མཐར་ཕྱག་གི་མཐིལ་ནས་བཾ་ཧ་རི་ནི་ས་ཞེས་པའི་ཡིག་འབྲུ་ལྔ་འཕྲོས་ཏེ་བདག་གི་ལུས་ལ་འོད་ཕུང་ཁ་དོག་ལྔའི་གོས་བསྐོན་ཅིང་ནུ་མ་གཡས་ཀྱི་རྩེ་ནས་བྃ་ཡིག་ཞིག་ཆད་དེ་སྙིང་གར་ཞུགས་པས་ལུས་ཐམས་ཅད་འོད་དམར་གྱིས་ཁྱབ་ཅིང་འོད་དུ་གྱུར་པར་སྣང་ངོ་།  །ད་བུ་ཁྱོད་རང་གི་གནས་སུ་སོང་ཞིག་དང་ཚེའི་སྨད་དུ་འགྲོ་དོན་རྒྱ་ཆེན་པོ་འབྱུང་ངོ་།  །ཞེས་གསུངས་ཤིང་མགོ་ལ་ཕྱག་གིས་བྱིལ་བ་མཛད་ཙམ་ནས་གཉིད་སད་པས་སྒྱུ་མའི་འཁྲུལ་འཁོར་ཞིག་པ་བཞིན་དུ་མི་སྣང་བར་གྱུར་ཏོ།  །ལོ་ཁྱིམ་དེའི་དགུན་ཟླ་ཐ་ཆུང་གི་ཚེས་དགུའི་སྔ་དྲོའི་ཆ་ཞིག་ཏུ་ལུག་གི་ར་བའི་ཕྱི་རོལ་ཏུ་རྩེད་མོར་ཕྱིན་པའི་ཚེ་མཐོང་སྣང་དུ།  གཡུའི་མི་ཕོ་ལྕགས་ཀྱི་རྟ་ལ་ཞོན་པ་ལག་གཡས་ན་མདུང་དར་དཀར་པོ་ཕྱར་བ་ཞིག་གིས་བདག་གི་གཡས་ཀྱི་ཕྱོགས་ནས་ལན་གསུམ་བསྐོར་ཏེ་སྟག་ལྤགས་ཀྱི་ཞྭ་མོ་ཕུད་ནས་འདི་སྐད་ཟེར།  ཀྱེ་ཧོ་ཁྱེའུ་ཆུང་ལོ་ཙྭ་བ།  །ང་ངོ་ཁྱོད་ཀྱིས་མ་ཤེས་ན།  །ང་ཕྱི་ལྟར་རྔ་ལ་སྟག་རྩེ་ལགས།  །ནང་ལྟར་བཙན་རྒོད་སྲོག་ལེན་ཞེས།  །གསང་བ་ཞང་བློན་སྡེ་དགུ་ཡིན།  །སྔོན་བྲག་དམར་ཡེར་པ་ཞེས་བྱ་རུ།  །དཔལ་ཨོ་རྒྱན་ཆེན་པོས་དབང་བསྐུར་ནས།  །གཏེར་ཆེན་གསུམ་གྱི་གཉེར་ཁ་བཅོལ།  །ནོར་ལོངས་སྤྱོད་བསམ་ཡས་གནང་ཞིང་གཏད།  །དུས་ལྔ་བརྒྱ་སྙིགས་མ་ལ་བབས་ཚེ།  །ང་ཨ་ལྕགས་འགྲུ་ལ་བུ་རུ་འོང་།  །གཏེར་གཅིག་འདི་གཏོད་ཅེས་བཀའ་སྩལ་པ།  །ཁྱོད་ཨེ་ཡིན་སྙམ་ནས་བལྟ་རུ་འོང་།  །ད་ངོ་ཤེས་ཟེར་ཞིང་འཛུམ་གྱིས་ཡལ།  །དེ་ནས་རང་ལོ་བཞི་པ་ལ་བབས་པ་ཟླ་བ་བཞི་པའི་ཚེས་བདུན་གྱི་ཉིན་རྩེད་མོར་ཕྱིན་པའི་ལམ་ཁ་ཞིག་ཏུ་ཐལ་ཕུང་རྙིང་ཞིང་འཐས་པ་ཞིག་དང་འཕྲད་པས་དེར་ཁུང་བུ་མང་པོ་བྲུས་ནས་བཞག།  ནངས་པར་ཕྱིན་ཏེ་བལྟས་པས་ཁུང་བུ་ཞིག་གི་ཕུག་ན་བྲ་བ་དཀར་པོ་ཞིག་འདུག་པ་མཐོང་བས།  བདག་གིས་བཟུང་བར་འདོད་ཀྱང་འཛིན་ཡང་མ་ཕོད་པར་ཡུན་ཅིག་གི་ཚེ་ཐུར་མས་བཙུག་པས།  བྲ་བ་དེ་ཙོག་བུར་འདུག་ཅིང་འདི་སྐད་ཟེར།  པིའི་པིའི་ཀཾ་ཀཾ་ལེ་ལེ་ཧོ།  སྐྱབས་ཀྱི་དམ་པ་དཀོན་མཆོག་གསུམ།  །སངས་རྒྱས་སྐུ་དང་ཡེ་ཤེས་བདེན།  །དམ་ཆོས་བདེན་པ་གཉིས་ཀྱིས་བདེན།  །དགེ་འདུན་ལུང་རྟོགས་ཡོན་ཏན་བདེན།  །དཀོན་མཆོག་རིན་ཆེན་གསུམ་ལ་སྐྱབས།  །སེམས་ཅན་རང་ངོ་མ་རིག་འཁྲུལ།  །འཁྲུལ་པར་མངོན་ཞེན་བདེ་སྡུག་ཚོར།  །ཚོར་བ་ཐམས་ཅད་སྡུག་བསྔལ་ཏེ།  །དེ་ལྟར་འཁྲུལ་ཚད་སྙིང་རེ་རྗེ།  །ང་ནི་ཨ་ཆུང་ངོ་རེ་མཚར།  །སྟེང་ཕྱོགས་ཚངས་པའི་ཡུལ་ནས་འོང་།  །ལྷ་བུ་བ་བྷོ་བྱ་བ་ཡིན།  །ཨ་མཚར་མཚར་རེ་གད་མོ་བྲོ།  །ཤ་ར་དྭ་ཏིའི་བུ་ལ་ལྟོས།  །དགྲ་བཅོམ་སྐད་དེ་དགྲ་གང་ལགས།  །གྲོལ་བ་སྐད་དེ་སུ་ཞིག་གྲོལ།  །བདུད་འདུལ་སྐད་དེ་བདུད་གང་འདུལ།  །འདས་པར་སྐད་དེ་གང་ལས་འདས།  །སེམས་ཅན་ཡིན་ན་མྱང་འདས་སུ།  །སེམས་ཅན་ངེས་པ་ང་ལ་འཚེ།  །སྙིང་རྗེ་མེད་ན་ཅིའི་བྱང་སེམས།  །རང་མཚང་རང་གིས་སྟོན་པ་དེ།  །མི་མཐོང་ཁ་ཕོ་ཨ་ཁ་ཁ།  །ང་ཟུངས་ཆུ་ཡི་ནང་དུ་འཕོང་།  །ལྷ་ཕྲུག་དུད་འགྲོའི་བུ་རུ་བརྫུ།  །དུད་འགྲོ་ཀླུ་ཡི་བུ་རུ་བརྫུ།  །ཀླུ་བུ་བརྒྱ་བྱིན་གནས་སུ་འགྲོ།  །ངོ་མཚར་རྩེད་མོ་དེ་ན་ཡོད།  །ཅེས་ཟེར་ཞིང་བདག་གི་ལག་མཐིལ་དུ་བབས་ནས་དེ་མ་ཐག་ཏུ་སྦལ་པ་ནག་པོ་ཞིག་ཏུ་གྱུར་པ་ན་ཆུའི་ཁར་མཆོང་རྒྱུག་བྱེད་པའི་མོད་ལ།  ནམ་མཁའི་ཁམས་ནས་འཇའ་ཚོན་ཞིག་ཤར་གྱིས་བརྐྱངས་ཏེ་སྦལ་པའི་སྟེང་དུ་སླེབས་མ་ཐག་ཏུ་སྦལ་པ་དེ་འོད་དུ་དེངས་ནས་ནམ་མཁའ་ལ་ཡལ་སོང་།  དེ་ནས་ཟླ་བ་དེའི་ཚེས་ཉེར་བརྒྱད་ཀྱི་ཉིན་གསེར་ཆུ་ཤིན་ཏུ་ཆེ་བར་ཡོད་པའི་དུས་ན་དེའི་འགྲམ་དུ་རྩེད་མོར་ཕྱིན་པ་ལས་ནགས་ཐད་ཅེས་རིའི་ཞོལ་འགྲམ་ཆུའི་དཀྱིལ་དུ་ཕ་ཝང་ཆེན་པོ་ཞིག་འདུག་པའི་རྩ་བ་ན་མི་རྒན་སྐྲ་དང་སྨ་ར་དཀར་པོ་ཅན་ཞིག་ངེད་རང་ལ་མིག་གཉིས་འབྲུ་ཚུགས་སུ་བལྟ་ཞིང་འདུག་པ་མཐོང་།  བདག་དེ་ལ་ཅུང་ཟད་ཞིག་སྐྲག་བཞིན་དུ།  ཨ་ལེ་ཞེས་གསུམ་བོས་པའི་ཐ་མ་ལ་ཨ་ཟེར།  བདག་གི་བཞིན་ལ་འབྲུ་ཚུགས་སུ་བལྟ་མི་ཁྱོད་སུ་ཡིན་དྲིས་པས་འདི་སྐད་ཟེར།  ཡེ་ཡེ།  རི་ཆེན་པོ་དགུང་ལ་བསྙེགས་པ་འདི།  །ཡེ་སྲིད་པའི་རླུང་རྡུལ་ཚོགས་པ་འདྲ།  །སྟེང་ནམ་མཁའ་སྔོ་སངས་མཐོང་བ་འདི།  །ཡེ་སེམས་ཅན་མི་ཤེས་འཁྲུལ་པ་འདྲ།  །བར་བར་སྣང་སྟོང་ཧད་སྣང་བ་འདི།  །ནང་གཞན་དུ་བཟུང་བས་ལེན་པ་འདྲ།  །མཚོ་ཆེན་པོར་སྐར་མ་སྣང་བ་འདི།  །ནམ་མཁའ་ལ་ཐ་དད་བཟུང་བ་འདྲ།  །རྫས་གཅིག་གིས་མང་པོར་འགྱུར་བ་འདི།  །རང་སྣང་བ་རྫུན་པའི་མཚན་ཉིད་འདྲ།  །མི་མེད་ལ་མི་རྒན་སྣང་བ་དེ།  །ཁྱོད་ཁྱོད་ཉིད་འཁྲུལ་རྒན་ཡིན་པ་འདྲ།  །རྒྱབ་སྲ་བ་རྡོ་ལ་གཏད་པ་འདི།  །ཁྱོད་གཟུང་འཛིན་འཁྲུལ་པ་འཐས་པ་འདྲ།  །ང་ཁྱོད་ཡིན་སྲིད་པའི་མི་རྒན་འདྲ།  །ཁྱོད་སྲིད་པའི་མི་རྒན་འཁྲུལ་སྣང་ལ།  །བུ་བྱིས་པར་སྣང་བ་མཚར་ཆེ་འདྲ།  །ཞེས་བརྡའ་གོའམ་ཟེར་བར་ངས་མ་གོ་སྨྲས་པ་དང་།  ཧ་ཧ་ཞེས་ཟེར་ཞིང་མིག་འཕྲུལ་ལྟ་བུར་དབྱིངས་སུ་ཡལ་ལོ།  །ལོ་དེའི་ཟླ་བ་བརྒྱད་པའི་ཚེས་ལྔའི་ནུབ་མོར་སྟེང་གི་ནམ་མཁར་ཁྲུང་ཁྲུང་བྱ་འཕྲེང་དུ་འགྲོ་བ་མཐོང་ཚེ་དེའི་སྐད་ལ་ཉན་པས་སྒྲ་འདི་ཐོས་སོ།  །ཀུར་ཀུར།  སྔོན་བསྐལ་པ་བཟང་པོའི་དུས་ཞིག་ན།  །དཔལ་སངས་རྒྱས་སྟོན་འཁོར་ཡུལ་ལ་ཚོགས།  །འཁོར་འདུས་པའི་ཚོགས་དེ་སྐྱིད་པ་ལ།  །ད་ལོ་རྒྱུས་ཙམ་ཡང་ཐོས་རྒྱུ་མེད།  །དུས་བར་གྱི་བསྐལ་པ་བཟང་པོ་ལ།  །དཔལ་གྲུབ་དབང་སྐར་ཚོགས་ལྟ་བུ་ཡིས།  །འཁོར་གྲུབ་པའི་ཚོགས་ལ་ཆོས་འཁོར་བསྐོར།  །དེར་སྐྱེས་པའི་གདུལ་བྱ་སྐྱིད་པ་ལ།  །ད་མི་སྣང་བ་ལ་ཞེ་རེ་རྨོངས།  །དུས་ཐ་མའི་བསྐལ་པ་བཟང་པོ་ལ།  །བོད་མ་སངས་བདུད་ཀྱི་ཡུལ་འདི་རུ།  །རྗེ་མཁན་སློབ་ཉི་ཟླ་ཟུང་ཞིག་ཤར་།  །དེར་ལོ་པཎ་སྐར་ཚོགས་ཙམ་གྱིས་བསྐོར།  །བོད་ཁམས་ཀྱི་བསྟན་འགྲོ་སྐྱིད་པ་ལ།  །དུས་དེང་སང་མི་གནས་ཡི་རེ་མུག།  ཡང་བསྐལ་བའི་མར་གཤམ་ལ་བབས་ཚེ།  །རྗེ་གྲུབ་པ་ཐོབ་པའི་གཏེར་ཆེན་རྣམས།  །འཁོར་སློབ་འབངས་ཚོགས་ཀྱིས་བསྐོར་བའི་དུས།  །ཡུལ་བོད་ཁམས་སྐྱིད་པའི་ཉི་མ་ཤར།  །ད་མི་གནས་རྨི་ལམ་བཞིན་དུ་ཡལ།  །དབྱར་སྤང་སྔོན་མེ་ཏོག་གིས་བརྒྱན་ཅིང་།  །རྩི་ཤིང་དང་ལོ་འབྲས་སྣ་ཚོགས་རྒྱས།  །གནས་ན་ཆེན་ཁྲོད་དུ་སྐྱིད་པ་ལ།  །ད་མི་གནས་རྨི་ལམ་བཞིན་དུ་ཡལ།  །ངེད་མ་བུ་ལྷོ་མོན་ཡུལ་དུ་འགྲོ།  །དུས་ལྔ་བརྒྱ་སྙིགས་མའི་མར་གཤམ་འདིར།  །ཡུལ་སེམས་ཅན་དམུ་རྒོད་ཉོན་མོངས་རགས།  །འདུལ་བྱེད་ཀྱི་སྟོན་པ་ཞིག་བྱུང་ཡང་།  །ཁྲུང་མ་བུ་ཁམས་ཡུལ་ལུས་པ་བཞིན།  །ཕྱིས་གདུལ་བྱ་འདུལ་དཀའ་སྡུག་རེ་བསྔལ།  །ད་ཞིང་ཁམས་གཞན་དུ་གཤེགས་ན་བསམ།  །ཕྱི་ས་མཐའི་ཀླ་ཀློ་ལ་བལྟས་ན།  །དུས་མི་རིང་བསྟན་པའི་ཉི་མ་དེ།  །བདུད་ལྟ་ལོག་སྤྲིན་གྱིས་བསྒྲིབ་ལ་ལྟོས།  །ཞེས་ཟེར་ཞིང་ནུབ་ཕྱོགས་ཀྱི་ནམ་མཁའ་ལ་བཞུད་སོང་།  ཡང་རང་ལོ་ལྔ་པ་ཕག་གི་ལོ་ཁྱིམ་ལ་བབས་པའི་ཧོར་ཟླ་དྲུག་པའི་ཚེས་བཅུའི་ཉིན་ལྷོ་ནུབ་མཚམས་ཀྱི་ནམ་མཁར་སྤྲིན་དཀར་འཁྲིགས་པའི་ཀློང་དུ་འཇའ་འོད་ཀྱི་གུར་ཁྱིམ་ཁ་དོག་ལྔ་ལྡན་མུ་ཁྱུད་ལྟར་བསྐོར་བའི་ནང་དུ་མི་དཀར་མཛེས་པ་དར་ཀྱི་ན་བཟའ་ཅན་ཞིག་གིས་འཇའ་ཚོན་གྱི་ལམ་བརྒྱུད་བདག་གི་ཐད་དུ་བྱུང་ནས།  ཤེལ་དཀར་གྱི་ཕྲེང་བ་ཞིག་བདག་ལ་སྤྲད་དེ།  བུ་ཁྱོད་ཀྱིས་ཡིག་དྲུག་དུང་ཕྱུར་གཅིག་འགྲུབ་ན་ཚེའི་སྨད་དུ་འགྲོ་དོན་རྒྱ་ཆེན་པོ་ཞིག་འབྱུང་གི།  ཞེས་ཟེར་ཞིང་བདག་གི་སྙིང་གར་ཐིམ་པའི་སྣང་བ་ཤར།  མཐར་ཞག་འགའ་ཞིག་གི་བར་དུའང་སྣང་བ་ཐམས་ཅད་རི་བོ་ཏ་ལའི་ཞིང་ཁམས་སུ་མཐོང་ནས་མ་དག་པའི་སྣང་བ་རྡུལ་ཕྲན་ཙམ་ཡང་མ་བྱུང་།  ལོ་དེའི་ཟླ་བ་བཅུ་པའི་ཚེས་ཉེར་ལྔའི་ཉིན་ཡར་ཆེན་ཞེས་བྱ་བའི་ལུང་མདོར་རྩེད་མོར་ཕྱིན་པའི་ཚེ།  དེར་སྐྱེས་བུ་མི་དམར་རྟ་དམར་ཅན་ཞིག་གིས་མདའ་དར་ཞིག་བདག་ལ་གཏད་ནས་འདི་སྐད་ཅེས་ཟེར།  ཀྵཿམདའ་འདི་འོམ་མདའ་དམར་པོ་དབང་གི་རྫས།  །དར་མཚོན་སྣ་ལྔས་ཕྲིན་ལས་རྣམ་བཞི་འགྲུབ།  །མ་འོངས་བསྐལ་བ་ཡོས་བུའི་ལོ་ཁྱིམ་དེར།  །ཡ་གིའི་ལུང་པ་ཕུ་རུ་བཙུག་བྱས་ན།  །བསོད་ནམས་སྙན་གྲགས་དཔལ་ཁ་དར་རྒྱས་བྱེད།  །ང་ནི་གནོད་སྦྱིན་ཤན་པ་དམར་ནག་ཡིན།  །སྐྱེ་བ་དུ་མར་ཁྱོད་དང་འབྲལ་མ་མྱོང་།  །ད་ལྟ་ཁྱོད་ཀྱི་ཕྲིན་ལས་གྲོགས་ངས་བྱེད།  །ཅེས་ཟེར་ཞིང་མིག་འཕྲུལ་བཞིན་དུ་ཡལ་སོང་།  ཡང་ལོ་ཁྱིམ་དེའི་དགུན་ཟླ་ར་བའི་ཚེས་བཅོ་ལྔའི་དགུང་མོར་ཡར་ཆུང་ཞེས་བྱ་བའི་ལུང་མདའ་རུ་རྩེད་མོར་སོང་ཚེ།  རི་བོང་དམར་པོ་ཞིག་མཐོང་བའི་རྗེས་སུ་སོང་བས་སྤྲེའུ་ཞིག་ཏུ་གྱུར་པ་ཙོག་པུར་འདུག་ནས་འདི་སྐད་ཟེར།  ང་ནི་ཁྱོད་ཀྱི་ཕའི་བུད་མེད་སྔ་མ་ཁྱོད་རང་གི་མ་ཡར་ཤི་བའི་གཤིན་པོའི་བླ་འཁྱམས་དེ་ཡིན་ཟེར།  དེ་ལ་བདག་གིས་སྲོག་གར་སོང་རྣམ་ཤེས་གར་སོང་དྲིས་པའི་ལན་དུ།  སྲོག་ནི་མོ་འདྲེས་བཅད་རྣམ་ཤེས་ནི་ཀོང་པོའི་ཡུལ་དུ་ཁྱི་མོ་ཞིག་གི་ལུས་བླང་ནས་ཡོད་ཟེར་བ་ལ།  ངས་རྣམ་ཤེས་མེད་ན་ཁྱོད་ཅི་ལས་བྱུང་སྨྲས་པའི་ལན་དུ།  མོ་ན་རེ།  ཧེ།  ང་རུ་འཛིན་དང་བདག་ཏུ་སྣང་།  །ཤེས་པ་དེ་ཡི་རྟེན་འབྲེལ་ལས།  བླ་ཞེས་ཤུལ་མིའི་ཡོད་འཛིན་གྱིས།  །བླ་རུ་སྣང་བ་བྱུང་བ་ཡིན།  །མེད་པར་བྱས་ན་ཡེ་ནས་མེད།  །ཡོད་པར་བཟུང་ན་ང་ཙམ་ཡོད།  །ཅེས་ཟེར་ཞིང་ཡུལ་མེད་དུ་ཡལ་སོང་།  །ཉམས་སྣང་སྒྱུ་མའི་ལྟད་མོ་མང་མཐོང་བས།  །ཆོས་ཀུན་སྒྱུ་མ་ལྟ་བུར་རྟོགས་པ་ཡི།  །ལྟ་བའི་བོགས་ཐོན་ན་ཚོད་ཆུང་ན་ཡང་།  །རྟོགས་པའི་ལུས་སྟོབས་རབ་ཏུ་རྒྱས་པར་གྱུར།  །སེམས་ཅན་ལས་ནུས་བསམ་གྱིས་མི་ཁྱབ་ཅིང་།  །རྣལ་འབྱོར་ཉམས་ཀྱི་མཐོང་སྣང་ཚད་མེད་ཀྱང་།  །ཀློང་ཆེན་གཞི་སྣང་ཕྱི་རུ་གསལ་བ་ལས།  །གཞན་དུ་གྱུར་པའི་ཆོས་འགའ་ཡོད་མ་ཡིན།  །ཡང་རང་ལོ་དྲུག་པ་བྱི་བའི་ལོ་ཁྱིམ་གྱི་ཧོར་ཟླ་དྲུག་པའི་ཚེས་གཅིག་གི་ནངས་པར་མལ་ནས་གཉིད་སད་པའི་མོད་ལ་མདུན་གྱི་ནམ་མཁར་ལྕགས་ཀྱི་སྡིག་པ་ནག་པོ་མགོ་དགུ་ཤིག་ཤིག་འགུལ་བ་ཞིག་མཐོང་བའི་མོད་བདག་བྲེད་ཅིང་མ་བཟོད་པར་མགོ་བསྟུམ་ནས་ཡུན་ཅིག་ངུ་རུ་ཡོད་པའི་ཚེ།  ཨ་ཧོ་ཞེས་འབོད་དུ་བྱུང་མགོ་ཕྱེས་ནས་བལྟས་པས་དེའི་སྟེང་དུ་མི་ཞིག་འདུག་སྟེ།  མི་དེས་བདག་ལ་འདི་སྐད་ཟེར་བར་སྣང་།  ཧོ།  ང་ནི་སྨྱོ་ཁ་སྡིག་ཞོན་བྱ་བ་ཡིན།  །ཁྱོད་ལ་ཕྲིན་གཅིག་སྨྲ་རུ་འོང་བ་ལགས།  །པདྨ་དྲག་པོའི་ཞལ་ནས།  ཁྱོད་ཀྱིས་མཚན་མོ་གཉིད་དུ་འགྲོ་ཁར་རང་ལུས་ལྕགས་ཀྱི་སྡིག་པ་མེ་འབར་བ་ཞིག་ཏུ་སྒོམས་ཤིག།  ལོ་གསུམ་གྱི་བར་དུ་འདི་མ་བརྗེད།  རྟག་ཏུ་དུད་འགྲོ་རུ་བསྒོམ་མི་རུང་ཡང་གནས་སྐབས་འདི་རུ་རྒྱལ་འགོང་གི་གནོད་པ་ལས་རྒྱལ་བའི་ཕྱིར་ཡིན།  སྡིག་པ་ནི་འདི་ཀའོ།  །འདི་ལ་ལྟོས་ཤིག།  འདི་ལྟ་བུ་ཞིག་ཡིད་ཀྱི་ཡུལ་དུ་བཀྲ་ལམ་མེར་བབ་འདུག་པ་ཞིག་གལ་ཆེ།  ལེགས་པར་ལྟོས།  ཞེས་ཟེར་ནས་ཡལ་སོང་།  ཡང་ལོ་ཁྱིམ་དེའི་ཧོར་ཟླ་བདུན་པའི་ནུབ་མོ་མགོ་བསྟུམ་ནས་བསྡད་པས་གཉིད་མ་བྱུང་བའི་སྐབས་ཤིག་ན་འོད་ཀྱི་སྣང་བ་ནམ་ལངས་པ་ལྟ་བུ་ཞིག་བྱུང་།  དེའི་ངང་ནས་སྐར་མདའ་རྒྱུག་པ་ལྟར་ཁྲ་ཤར་རེ་བ་དང་།  གློག་འཁྱུགས་པ་ལྟ་བུའི་དམར་གྱི་ལེ་བའི་ཀློང་དུ་ལྷ་མོ་ཁྲོ་གཉེར་ཅན་ཡིན་སྐད་པའི་བུད་མེད་ཁྲོ་གཏུམ་སྔོ་སངས་འཇིགས་སུ་རུང་བ་ཞིག་གིས་སྡང་མིག་བསྒྲད་ཅིང་བྱུང་ནས་འདི་སྐད་ཟེར།  ཀྱཻ་ཧོ།  རྗེ་བཙུན་འཕགས་མ་ང་ལ་གསོལ་བ་ཐོབ།  །ཁྱོད་ལ་ལྷ་འདྲེ་མང་པོས་རྒོལ་དུ་མཆིས།  །ནངས་པར་མ་བརྗེད་འཕགས་མ་ཡིད་ལ་གྱིས།  །ཕྱག་འཚལ་སྐྱབས་སུ་མཆིའོ་མ་བརྗེད་རེམ།  །དེ་ལ་གསོལ་བ་ཇི་ལྟར་འདེབས་པའི་ཚེ།  །རྗེ་བཙུན་འཕགས་མ་སྒྲོལ་མ་ཁྱོད་མཁྱེན་ནོ།  །འཇིགས་དང་སྡུག་བསྔལ་ཀུན་ལས་བསྐྱབ་ཏུ་གསོལ།  །དེ་སྐད་ཐོབ་ཅེས་ཟེར་ནས་རང་ཡལ་ལོ།  །སླར་ཡང་གཉིད་དུ་སོང་བས་བདེ་སྟོང་གི་ཉམས་ཤིག་ཤར་ཏེ་ནུབ་གཅིག་གི་ཡུན་ལ་སྐད་ཅིག་ཙམ་གྱི་སྣང་བ་ལས་མ་མངོན།  ལོ་ཁྱིམ་དེའི་ཧོར་ཟླ་བཅུ་པའི་ཚེས་ཉེར་ལྔའི་ནུབ་གསེར་གྱི་ངོས་རིང་ལ་ཁ་ཞེས་བྱ་བ་དེར་སླེབ་སྣང་ཤར།  གནས་དེ་རུ་མཁའ་འགྲོ་སྟོང་གི་ཚོགས་འདུས་བྱེད་པའི་ཚོགས་དཔོན་རྡོ་རྗེ་ཕག་མོ་ཡིན་ཟེར་བ་མི་མགོ་རློན་པའི་ཁྲི་ལ་འགྱིང་བ་ཞིག་གིས་བདག་ལ་འདི་སྐད་ཟེར།  ཀྱེ་ཧོ།  སྐལ་པ་བཟང་པོའི་སྐྱེས་བུ་དམ་པ་ཁྱོད།  །ཡི་དམ་རྡོ་རྗེ་གྲོ་ལོད་ལ་བརྟེན་ནས།  །བསྐྱེད་རིམ་གནད་ལྡན་བསྙེན་པ་ཚད་དུ་སྐྱོལ།  །འཇམ་དཔལ་སྨྲ་བའི་སེང་གེ་ལ་བརྟེན་ཏེ།  །བསྐྱེད་རིམ་གནད་ཀྱི་བསྙེན་པ་འབྲུ་འབུམ་སྒྲོངས།  །ཨོ་རྒྱན་ཆེན་པོ་སྤྱི་གཙུག་རྒྱན་དུ་ཟུངས།  །ཚིག་བདུན་གསོལ་འདེབས་འབུམ་ཕྲག་བརྗོད་པ་དང་།  །བསམ་ལྷུན་ཤྭ་ལོ་ཀ་ཞིག་གྲངས་མང་འདོན།  །འཇམ་དཔལ་མཚན་བརྗོད་ཁྲི་ཚར་བརྗོད་བྱས་ན།  །ཚེ་ལོ་ཉེར་གཉིས་དུས་སུ་དགོངས་གཏེར་བརྡོལ།  །ཉེར་བཞིའི་དུས་སུ་ས་གཏེར་སྐོར་གསུམ་འབྱིན།  །བཞི་བཅུ་ཕན་ཆད་འགྲོ་དོན་དཔག་མེད་འབྱུང་།  །ལར་ནི་སྨོན་ལམ་ལོག་པའི་བདུད་རིགས་ཀྱིས།  །གཤེ་སྐུར་འདེབས་ཤིང་དགྲ་རུ་ལང་བ་སོགས།  །བསམ་སྦྱོར་ངན་པའི་ལ་ཡོག་འདོར་བར་བྱེད།  །དེ་ཚེ་དགའ་སྡུག་རེ་དོགས་ཉེར་ལེན་གྱི།  །ཞེན་པ་ཆོད་ལ་རང་ས་བཟུང་བ་གནད།  །གནད་དེས་འགལ་རྐྱེན་ཐམས་ཅད་གྲོགས་སུ་འགྱུར།  །ཞེས་ཟེར་མ་ཐག་རྨི་ལམ་བཞིན་དུ་ཡལ།  ལོ་ཁྱིམ་དེའི་ཧོར་ཟླ་བཅུ་གཉིས་པའི་ཚེས་བཅུའི་ནུབ་མོ་རྨི་ལམ་གྱི་སྣང་ཆ་ལ།  ཤར་ཕྱོགས་ཀྱི་ནམ་མཁར་འོད་དཀར་པོ་བཅོ་ལྔའི་དུང་ཟླའི་ཁ་དོག་ལྟ་བུ་སྤྲིན་དཀར་པོའི་རྣམ་པར་འཁྲིགས་པའི་ཀློང་དུ་ཁྲོམ་མང་འཚོགས་ནས་འདུ་ལོང་བྱེད་པ་དང་།  སྒྲ་རིགས་མི་འདྲ་བ་སྣ་ཚོགས་འུར་བ་ཐོས་བྱུང་བ་དེ་བདག་དང་ཇེ་ཉེར་བྱུང་སྟེ་མཐར་གདོང་ཐད་དུ་སླེབས་བྱུང་།  དེའི་ནང་དུ་འཕགས་མཆོག་ཐུགས་རྗེ་ཆེན་པོ་ཡིན་སྐད་པའི་གཞོན་ནུ་དཀར་གསལ་ལྟ་ན་སྡུག་པ་ཞིག་དཔའ་བོ་དང་མཁའ་འགྲོ་མ་འབུམ་གྱི་དབུས་ན་བཞུགས་བཞིན་བདག་ལ་དགྱེས་པའི་བཞིན་མདངས་བསྟན་ཏེ་འདི་སྐད་ཅེས་གདམས་སོ།  །བུ་ཁྱོད་ང་ཉིད་ཡིད་ལ་སྒོམ་པར་གྱིས།  །རེས་འགའ་གསོལ་འདེབས་ཚུལ་དུ་ཡིག་དྲུག་ཟློས།  །རེས་འགའ་ཁྱོད་ལུས་ང་རུ་གསལ་བ་ཡི།  །སྲོག་གི་སྙིང་པོའི་ཚུལ་དུ་ཡིག་དྲུག་བརྗོད།  །ང་དང་འབྲལ་མེད་འགྲོགས་ཤིང་ལུང་སྟོན་ཏེ།  །ཕྱི་ནང་བར་ཆད་ཐམས་ཅད་ངས་བཟློག་བྱེད།  །ཅེས་ཟེར་མ་ཐག་རྨི་ལམ་གྱི་སྣང་བ་དེ་ལས་སད་དོ།  །དུས་དེ་ནས་བཟུང་སྟེ་རྨི་ལམ་གྱི་སྣང་བར་བྱིས་པ་གོས་དཀར་ཅན་ཞིག་སྐབས་སྐབས་སུ་འགྲོགས་ཏེ།  དེས་བདག་གི་སྐྱིད་སྡུག་ལེགས་ཉེས་དང་གཞན་གྱི་སྐྱིད་སྡུག་ལེགས་ཉེས་སོགས་ལུང་དུ་སྟོན་ཅིང་བརྩེ་གདུང་བྱེད་པར་གྱུར་ཏོ།  །ཡང་རང་ལོ་བདུན་པ་གླང་གི་ལོ་ཁྱིམ་ལ་བབས་པའི་ལོ་གསར་དགའ་སྟོན་བྱེད་ཕྱིར་རི་མཐོ་བའི་སར་ཕྱིན་པས་ནམ་མཁའི་མཐོང་ནས་འཇའ་ཚོན་ཞིག་བྱུང་བ་བདག་གི་ཐད་དུ་ཟུག་པའི་ལམ་བརྒྱུད་དེ་རིག་འཛིན་ཀློང་ཆེན་རབ་འབྱམས་ཡིན་སྐད་པའི་དགེ་སློང་གི་ཆས་གོས་ཅན་གཞོན་ནུ་མཚན་དཔེས་སྤྲས་པ་ཞིག་གིས་བདག་ལ་ཚོགས་རྫས་ཀྱི་རིལ་བུ་གཉིས་སྟེར་བྱུང་བ་ཟོས་པའི་ཚེ་ན་རོ་མངར་བ།  མྱོང་བའི་ཚེ་ན་ལུས་སེམས་བདེ་བས་མྱོས་པར་བྱེད་པ་ཞིག་བྱུང་།  དེའི་ཚེ་བདག་གི་སེམས་ལ་གླུ་འདི་ཤར་ཞིང་བླངས།  ཨཻ།  གནས་སྐྱིད་པོ་བདེ་མོ་འདོད་ན།  །སྟེང་དགའ་ལྡན་ལྷ་ཡི་ཡུལ་ས།  དེ་བསམ་གཏན་བརྟན་པོའི་འབྲས་བུ།  །བསྒོམ་ནུས་ན་མི་རིང་ཐག་ཉེ།  །ཡུལ་མི་འགྱུར་བདེ་བའི་འབྱུང་གནས།  །གནས་དག་པ་མཁའ་སྤྱོད་ཞིང་ཁམས།  །དེ་བསྐྱེད་རིམ་ཟབ་མོའི་འབྲས་བུ།  །བསྒོམ་ནུས་ན་མི་རིང་ཐག་ཉེ།  །གནས་རང་སྣང་དོན་གྱི་འོག་མིན།  །དེ་ཆོས་སྐུའི་རྒྱལ་ས་ངོ་མ།  །རང་རིག་པ་རང་དབང་ཐོབ་པའི།  །ཆོས་རྫོགས་པ་ཆེན་པོ་དེ་ཀ།  ཐག་མི་རིང་ཨེ་མ་ངོ་མཚར།  །ངའི་ཕ་གཅིག་ཀློང་ཆེན་རབ་འབྱམས།  །དུས་དེ་རིང་མངོན་སུམ་མཇལ་ནས།  །ཕོག་མྱོང་གྲོལ་རིལ་བུ་གནང་བྱུང་།  །ངའི་ཤེས་རྒྱུད་བདེ་སྟོང་རོས་མྱོས།  །ད་ཐར་པའི་ལམ་སྣ་ཟིན་བྱུང་།  །ཚེ་སྔོན་མའི་ལས་ཀྱིས་འབྲེལ་བའི།  །གྲོགས་སྐལ་ལྡན་ཕོ་མོའི་ཚོགས་རྣམས།  །རྒྱུད་དཀར་པོའི་དགེ་ལ་དྲིལ་དང་།  །དུས་མྱུར་དུ་ཐར་ལམ་ཟིན་འོང་།  །ཞེས་གླུ་བླངས་པས་ཚོགས་འདུས་པ་དེ་ཐམས་ཅད་ཡི་རང་ཞིང་ངོ་མཚར་བར་གྱུར་རོ།  །ལོ་ཁྱིམ་དེའི་དགུན་ཟླ་ར་བའི་ཚེས་བཅོ་ལྔའི་ཉིན་མོ་ཕུག་ཚ་ཞེས་བྱ་བའི་རི་བོ་དེའི་ངོས་སུ་ཕྱིན་ཏེ་བྲག་གཡའ་མ་འདྲེས་པའི་ངོས་ལ་འཇོར་གྱིས་བརྐོས་པས་ཕ་ཝང་ཆུང་ངུ་ཞིག་ལ་ཐུག་འདུག།  ཡང་དབྱུག་པས་ཡང་ཡང་བཏེགས་ནས་ཕ་ཝང་ཕྱིར་འཕང་པས།  དེར་རི་བོ་ཁོང་གསེང་གི་ནང་དུ་འཇའ་ཚོན་འོད་ལྔའི་དྲྭ་བ་འཁྲིགས་པའི་ཀློང་དུ་ཐིག་ལེ་ཁ་དོག་ལྔ་ལྡན་མཛེས་ཤིང་ཡིད་འཕྲོག་པའི་ཀློང་དུ་དགེ་སློང་གཟུགས་བྱད་མཛེས་ཤིང་ཆོས་གོས་ངུར་སྨྲིག་གསོལ་བ་ཕྱག་གཉིས་ཆོས་འཆད་དང་མཉམ་བཞག་མཛད་ཅིང་ཞབས་ཕྱེད་པའི་སྐྱིལ་མོ་ཀྲུང་གིས་བཞུགས་པ་ཞིག་གིས་ཞལ་འཛུམ་པ་མཛད་ནས།  ངའི་སྡོད་གནས་ཀྱི་སྒོ་ཕྱེས་ནས་ཅི་བྱེད།  ང་འདི་ན་མི་ལོ་སྟོང་ཕྲག་གསུམ་དུ་གནས་པ་ཡིན་ཏེ་འཇིག་རྟེན་མི་དང་འཕྲད་མ་མྱོང་།  སྔོན་གྱི་ལས་སྨོན་གྱི་མཐུས་ཁྱོད་ཀྱིས་ང་མཐོང་བ་ཡིན།  ང་མ་མཐོང་ཡང་ངའི་གནས་ཁང་འདི་ག་མཐོང་བ་ཙམ་གྱིས་ཟབ་མོ་སྟོང་པ་ཉིད་ཀྱི་དོན་རྟོགས་པར་གདོན་མི་ཟ་བ་ཡིན་པས་དགའ་བར་གྱིས་ཤིགང་ནི་མི་གནས་ཆོས་ཀྱི་དབྱིངས།  །ཆོས་རྣམས་ཐམས་ཅད་ཕུང་པོ་ལྔ།  །ཕུང་ལྔ་རྟེན་ཅིང་འབྲེལ་བའི་ཆོས།  །ཐམས་ཅད་སྟོང་པ་ཉིད་དུ་བལྟ།  །ཞེས་གསུངས་ཤིང་མི་སྣང་བར་ཡལ།  དེ་རྗེས་རང་གི་ཕ་ཇོ་དང་ཁྱིམ་རོག་གི་མི་རྒྱལ་ཚེ་ཞེས་བྱ་བ་གཉིས་དེར་ང་རང་འབོད་དུ་བྱུང་བར་ཕུག་པ་མཐོང་བའི་མོད་ལ་བྲེད་ཅིང་དངངས་ནས།  ཨ་ཁ་ཁ་རི་རབ་ཀྱི་ཁོག་པ་ཁ་ཕྱེས་པ་འདི་ནི་མི་བཟང་ངེས་པ་ཡིན་ཟེར་ནས་རྡོ་དང་ས་མང་པོས་ཕུག་པའི་ཁ་བཅད་ནས་བཞག་སོང་།  དེ་ནས་ལོ་ཁྱིམ་བརྒྱད་ལ་བབས་པ་སྟག་གི་ལོ་དབྱར་ཟླ་འབྲིང་པོའི་ཚེས་བཅོ་ལྔའི་ནངས་པར་རང་གི་སྲིང་མོ་དང་ཁྱིམ་མཚེས་ཀྱི་བུ་མོ་ཆུང་བ་གཉིས་དང་འགྲོགས་ནས་གསེར་ཆུའི་རྒྱུད་དུ་མར་སོང་བས་ཆུ་བོ་ཆེར་འཁྲུགས་ཏེ་རྦ་རླབས་རབ་ཏུ་འཕྱོ་བའི་ཕར་ཕྱེད་ཚུར་ཕྱེད་ཀྱི་མཚམས་སུ་ཕ་ཝང་ཆེན་པོ་དཔངས་མཐོ་བ་ཞིག་མཐོང་བ་དེའི་སྟེང་དུ་འགྲོའོ་སྙམ་པ་ན་འཇའ་འོད་ཀྱི་ལམ་སྣམ་བུ་བཏིང་བ་ལྟ་བུ་ཞིག་མཐོང་ནས་དེའི་བརྒྱུད་དུ་སོང་ཚེ་ས་སྟེང་དུ་འགྲོ་བ་ལྟ་བུའི་སྣང་བ་ཤར་ཏེ་ཕྱིན་ནས་ཕ་ཝང་གི་སྟེང་དུ་བསྡད་པའི་སྐབས་ཨ་བོ་མཐར་ཕྱིན་ཅེས་བྱ་བ་དང་།  སོག་པོ་གསེར་རེ་ཞེས་བྱ་བ་གཉིས་རྟ་ལ་ཞོན་ཏེ་ཆུ་ཟུར་ནས་ཡོང་བ་ན་ཨ་ཕ་བོ་ཞེས་ཟེར་ཞིང་དམོད་པ་བྱེད།  གསེར་རེ་ན་རེ་འུ་ཅག་གཉིས་ཆུའི་ནང་དུ་ལྕེབས་ཏེ་ཕྱིན་ན་ཨེ་ཡོང་ཟེར།  མཐར་ཕྱིན་ན་རེ།  རང་སྲོག་འདོར་མི་ཐུབ་ངོ་མ་ཡིན།  འདི་འདྲེས་ཁྲིད་ནས་སོང་བ་རེད།  འདིའི་ཚུལ་ལ་བལྟས་ན་རེ་ཞིག་ཆུ་གྲིར་འཆི་ངེས་པ་རེད།  ཁོ་རང་གི་ཁྱིམ་ཚང་ལ་འཕྲིན་སྐྱེལ་དུ་འགྲོ་ཟེར་ཞིང་སོང་།  དེ་མ་ཐག་ཏུ་བདག་ཆུ་ལས་བརྒལ་ཏེ་ཆུ་བྱ་བཞིན་ཚུ་རི་ལ་སླེབས་ནས་རང་ཁྱིམ་དུ་སོང་ཚེ།  སྔར་གྱི་མི་གཉིས་ན་རེ།  འདི་འདྲེ་བགེགས་ཞིག་གིས་བརླམ་འདུག་པས་རིམ་གྲོ་ཆེན་པོ་བྱེད་པ་གལ་ཆེ།  མོ་ཐོབ།  རྩིས་ཀྱིས།  ཞེས་ཟེར་ཞིང་ཐལ།  དེ་ནས་ལོ་ཁྱིམ་དགུ་ལ་བབ་པ་ཡོས་བུའི་ལོ་དགུན་ཟླ་ར་བའི་ཚེས་བདུན་གྱི་ནུབ་མཁའ་འགྲོ་མ་རས་སྔོན་པོའི་ལྭ་བ་གྱོན་པ་ཞིག་ན་རེ།  བུ་ཁྱོད་སང་ཕོད་འདི་ནས་ནུབ་བྱང་མཚམས་སུ་འགྲོ་དགོས་པ་འབྱུང་བས།  ཨོ་རྒྱན་ཆེན་པོའི་དངོས་སྤྲུལ་བླ་མ་འཇམ་དབྱངས་ཞེས་བྱ་བ་སློབ་དཔོན་ནམ་མཁའི་སྙིང་པོའི་སྐྱེ་བརྒྱུད་དང་འཕྲད་པར་གྱུར་གྱི།  དེ་ལས་ཡི་གེ་སློབ་ཐབས་ཀྱིས་དང་ཁྱོད་ཀྱི་བདེ་སྐྱིད་ཐམས་ཅད་རིམ་པ་བཞིན་དུ་གསལ་འོང་ངེས་པ་ཡིན།  ཞེས་ཟེར་ཞིང་ཐོད་པ་མཛེས་ཤིང་ཡིད་དུ་འོང་བ་ཞིག་གཏད་ནས་བདུད་རྩི་བླུད་བྱུང་བ་ཧུབ་གཅིག་གིས་བཏུང་བས་ལུས་ཐམས་ཅད་བདེ་གྱི་ལེར་འགྲོ་བའི་ཉམས་ཞིག་ཤར།  མཁའ་འགྲོ་མ་དེ་ཉི་མའི་ཟེར་ལ་ཞོན་ནས་དགུང་སྔོན་མཐོང་ལ་ཡལ་ཐལ།  དེ་ནས་ལོ་ཁྱིམ་བཅུའི་ཐོག་ཏུ་བབས་པ་འབྲུག་གི་ལོ་དཔྱིད་ཟླ་ཐ་ཆུང་གི་ཚེས་ལྔའི་ནུབ་ང་ནི་དམ་ཅན་རྡོ་རྗེ་ལེགས་པ་ཞེས་བྱ་བ་ཡིན་ཟེར་བའི་དགེ་བཙུན་གྱི་ཆས་ཅན་མགོ་ལ་སྭག་ཞུ་གྱོན་པ་སེང་གེ་དཀར་མོ་ལ་ཞོན་པ་ཞིག་བདག་གི་ཐད་དུ་འོང་སྟེ།  ཁྱོད་དང་སྔོན་ནས་ལས་ཀྱིས་འབྲེལ་བའི་བླ་མ་དེས་སྐྱེ་བོའི་ཤེས་རྒྱུད་བསྐུལ་ནས་བསུ་བར་དབྱར་འབྲིང་པོའི་ཚེས་བཅུ་བཞིའི་ཉིན་མོར་སླེབས་འོང་གི།  ཁྱོད་དགའ་སྤྲོ་དང་བཅས་པས་དེར་འོང་ཐབས་རེམ་ཟེར་ནས་ཡལ་སོང་།  ཡང་དབྱར་ཟླ་འབྲིང་པོའི་ཚེས་བདུན་གྱི་ནུབ་རྨི་ལམ་ཉམས་ཀྱི་སྣང་ངོར་མི་དམར་པོ་མེ་ལྕེའི་ལུས་ཅན་མེ་ཁྱུང་དམར་པོ་རླུང་གི་གཤོག་པ་ཅན་ལ་ཞོན་པ་ཞིག་བདག་གི་ཐད་ཀྱི་ནམ་མཁའ་ལ་འོང་ནས་འདི་སྐད་ཟེར།  ཀྱཻ།  སྔོན་སྨོན་ལས་འཕྲོ་བཟང་པོ་དུས་འཛོམ་པའི་སྐྱེས་བུ་ཁྱོད་དང་ངེད་གཉིས་ཁྱེའུ་ཆུང་ལོ་ཙཱ་ནས་བཟུང་ད་ལྟའི་བར་དུ་སྐད་ཅིག་ཙམ་ཡང་འབྲལ་མ་མྱོང་བས་ཚེ་རབས་ལས་ཀྱི་སྲུང་མ་ཡིན།  འདི་ནས་ཚེས་བཅུ་བཞིའི་ཉིན་མོ་ཞང་པོ་མི་འགྱུར་ཞེས་བྱ་བ་ཁྱོད་འབོད་དུ་འོང་གི་དེ་རུ་བཞུད་ཅིག།  ཅེས་ཟེར་ཞིང་མི་སྣང་བར་གྱུར་ཏོ།  །དེ་ནས་ཚེས་བཅུ་བཞིའི་ཉིན་ཞང་པོ་སླེབས་པས་ཟླ་བ་ཕྱི་མའི་ཚེས་བཅོ་ལྔའི་ཉིན་ཞང་པོའི་རྗེས་སུ་འགྲོ་དགོས་པའི་རྨི་ལམ་ཡོད་ཚུལ་བདག་གི་ཕ་མ་ལ་སྨྲས་པས།  མའི་ངག་ནས་འདིས་བོར་སྟོར་ལ་སོགས་པའི་ཐག་མ་ཆོད་པ་རྨི་ལམ་ནས་བཤད་པ་ཐམས་ཅད་རྫུན་མ་མྱོང་བས་བཏང་དགོས་པ་ཨེ་ཡིན་ཟེར་བ་ལ།  ཕས་ཀྱང་དེ་བདེན་ཀྱང་འདི་ཤིན་ཏུ་རྒོད་དྲག་པས་གྲི་རུ་ཨེ་འགྲོ་སྙམ་ནས་བློས་མི་ཐོངས་པར་འདུག།  གལ་སྲིད་མི་འགྲོ་ཐབས་མེད་ཡིན་ན་ཡི་གེ་མཁས་པར་གྱུར་པ་ཞིག་ནི་ཅིས་ཀྱང་སློབ་དགོས་ཟེར།  དེར་ཞང་པོ་ན་རེ།  ཡི་གེ་བསླབ་ཀྱང་མ་བསླབ་ཀྱང་ངེད་ཀྱི་ཁྱིམ་གཞིའི་བདག་པོ་ཞིག་ཨེ་ཡོང་སྙམ་པ་ཡིན།  ཞེས་ཟེར་ཞིང་ཁས་མི་ལེན་པར་འདུག།  དེ་ནས་སང་གི་ཉི་མར་ཞང་པོས་ཁྲིད་དེ་སོང་བས་ཞང་པོའི་ཁྱིམ་དུ་བསྡད་ནས་དེར་ཕྱུགས་རྫི་སོགས་ལས་ཀ་ལ་འབད་དགོས་པ་བྱུང་བས།  ཁྲོ་དང་རྫ་མ་ཡོབ་ཆེན་གཞོང་པ་ལ་སོགས་ཀ་ཆ་ཐམས་ཅད་སྨྱུག་མདས་ཁྲོལ་མར་ཕུག་པ་དང་བཅག་གྲུམ་ཤ་སྟག་བྱས་པས།  ཨ་ཕྱི་དང་ཨ་ནེ་གཉིས་ཀྱིས་བུ་འདི་ཐེའུ་རང་གིས་བརླམ་པ་ཡིན་འདུག་པས་ཡི་གེ་ཞིག་བསླབ་ན་བནྡྷེ་རེ་ཨེ་འོང་།  དེ་མ་བྱུང་བར་མི་སྐྱ་བྱས་ཚེ་མི་ཕུང་བདག་བརླག་བྱེད་ངེས་རེད་ཟེར་བ་ལ།  ཞང་པོས་ཀྱང་ད་ནི་དེ་བྱེད་དགོས་ཟེར་ནས་ལོ་ཁྱིམ་བཅུ་གཅིག་པ་སྦྲུལ་གྱི་ལོ་དགུན་ཟླ་ར་བའི་ཚེས་གཅིག་གི་ཉིན་བླ་མ་འཇམ་དབྱངས་ཀྱི་མདུན་སར་ཁྲིད་ནས་སོང་།  དེའི་ཚེ་བླ་མས་ཐུགས་དགྱེས་པའི་བཞིན་མདངས་བསྟན་ནས་བདག་གི་མགོ་ལ་ཕྱག་བྱིལ་མཛད་ཅིང་ཀ་ར་དང་བུ་རམ་གནང་སྟེ།  མདངས་ངས་རྨི་ལམ་བཟང་པོ་རྨིས་ཤིང་དེ་རིང་ཡང་དགའ་བདེའི་ཉམས་ཤིག་ཤར་བས་བནྡྷེ་བཟང་པོ་ཁྱད་འཕགས་ཤིག་ཨེ་འོང་སྙམ།  སོ་སོའི་སྐྱེ་བོ་ལ་ཟག་མེད་ཀྱི་མངོན་ཤེས་ནི་མེད།  ཉམས་རྨི་ལམ་ཙམ་ལ་མཆོག་འཛིན་བྱེད་ཀྱིན་འདུག་པས་དེ་ཚོ་བདེན་ན་བདག་གི་རྨི་ལམ་ཡང་ལོས་བདེན།  ཞེས་གསུངས་ནས་ཀ་སྨད་སུམ་ཅུ་པ་ལན་གསུམ་དུ་བསླབ་ནས་སྨོན་ལམ་ཀྱང་གསུམ་འདེབས་པར་མཛད་དོ།  །དེ་ནས་བཟུང་སྟེ་བླ་མ་དམ་པ་དེས་རྗེས་སུ་བཟུང་ཞིང་ཡི་གེ་བསླབ་པ་ཡིན།  ལོ་ཁྱིམ་བཅུ་གཉིས་པ་རྟ་ལོ་ཧོར་ཟླ་བདུན་པའི་ཚེས་དགུའི་ནུབ་བུད་མེད་གཞོན་ནུ་མ་ཟ་འོག་སྔོན་པོའི་སྟོད་གཡོགས་དང་།  དམར་པོའི་སྨད་དཀྲིས་བྱས་པ་ལ་དར་སེར་པོའི་སྐེད་དཀྲིས་བྱས་པ་ཅན་ཞིག་བྱུང་ནས།  ཁྱོད་དང་ང་གཉིས་བསྡེབ་ནས་བྱང་ཕྱོགས་སིནྡྷའི་གྲོང་ཁྱེར་དུ་འགྲོ་ཟེར་ལག་པའི་མཛུབ་མོ་ནས་བཟུང་སྟེ་ཁྲིད་སོང་བས་མི་མིན་མཁའ་འགྲོའི་གྲོང་ཁྱེར་དུ་སླེབས་པ་ན།  དེར་མཁའ་འགྲོ་དང་མཁའ་འགྲོ་མའི་སྡེ་ཚོགས་ཐམས་ཅད་ཁྲོམ་ཚོགས་པ་ལྟ་བུར་འདུས་པའི་དབུས་སུ་འཇའ་ཚོན་འོད་ཀྱི་གུར་ཁང་རྡོ་རྗེ་ཕྲ་མོའི་ཕྲེང་བས་བསྐོར་བའི་ཀློང་དུ་ཨོ་རྒྱན་ཆེན་པོའི་སྐུ་བྲིས་སྐུ་ལྟ་བུའི་ཆས་རྒྱན་རྫོགས་པ་ཞིག་གིས་མཁའ་འགྲོ་མའི་ཚོགས་ལ་ངེས་གསང་ཐེག་པ་ཆེན་པོའི་ཆོས་འཆད་ནས་འདུག་གོ།  དེའི་མདུན་དུ་གུས་པས་ཕྱག་འཚལ་ཏེ་ཞབས་ལ་བཏུད་པའི་མོད་ལ་ཞལ་འཛུམ་པ་མཛད་དེ་ཕྱག་གཡས་པ་བདག་གི་མགོ་ཐོག་ཏུ་བཞག་ནས།  བུ་ཁྱོད་ཀྱི་རྒྱུད་ལ་དུས་གསུམ་གྱི་རྒྱལ་བ་སྲས་དང་བཅས་པའི་ཐུགས་རྒྱུད་རྣམ་པར་མི་རྟོག་པའི་ཡེ་ཤེས་ད་ལྟ་ཉིད་དུ་འཕོ་བར་གྱུར་ཅིག།  ཁྱོད་ཀྱི་རྒྱུད་སྨིན་ཅིང་གྲོལ་ནས་འབྲེལ་ཚད་རྣམ་པར་གྲོལ་བའི་ས་ལ་འདྲེན་ནུས་པར་ཤོག་ཅིག།  ཅེས་གསུངས་ཤིང་ཁྱོད་ངའི་མདུན་སར་སྡོད་ལ་ངས་བཤད་པའི་ཚིག་འདི་ཉོན་ཅིག་གསུངས་པ་བཞིན་བདག་མདུན་དུ་འདུག་ཅིང་ཉན་པས།  སློབ་དཔོན་ཆེན་པོས་འདི་སྐད་དོ།  །ཁྱོད་ཀྱི་བླ་མ་འཇམ་དབྱངས་ཞེས་བྱ་བ་འདི་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་སྤྲུལ་པ་ཁྱོད་དང་ཚེ་རབས་ལྔ་རུ་འབྲེལ་བའི་བླ་མ་ཡིན་ཏེ།  དེའི་བཀའ་བཞིན་ཉོན་ལ་ཡི་གེ་ལ་སྦྱངས་པ་ཐོན་ངེས་ཞིག་གྱིས་དང་།  ཁྱོད་ཀྱི་ཚེ་མཇུག་ཏུ་དགོན་པ་འདི་ལ་ཕན་ཐོགས་པ་མུན་པའི་གླིང་དུ་ཉི་མ་ཤར་བ་ལྟ་བུ་ཞིག་བྱུང་སྟེ་འོད་གསལ་རྫོགས་པ་ཆེན་པོའི་བསྟན་འཛིན་སྤྲུལ་པའི་སྐུ་སྣ་ཚོགས་རང་གྲོལ་ཅེས་པ་ལང་གྲོ་དཀོན་མཆོག་འབྱུང་གནས་དངོས་སུ་འབྱོན་པར་འགྱུར་བ་ཡིན།  ངའི་ཕྲིན་ལས་ཀྱི་མངའ་བདག་རྨ་བན་རིན་ཆེན་མཆོག་གི་དངོས་སྤྲུལ་སྐྱེས་བུ་ཨ་རྣམ་ཞེས་བྱ་བས་བསྟན་པ་ལ་སོ་ནམ་བྱེད་ཅིང་།  མཐར་ཁོང་གིས་སྔོན་དུས་མྱང་མི་སྣ་བོ་ཆེ་བསྒྲལ་བ་སྨོན་ལམ་ལོག་པའི་སྟོབས་ཀྱིས་སྙི་ལུང་གི་རྒྱལ་འགོང་ཞིག་ཏུ་སྐྱེས་པ་དེས་བར་ཆད་བརྩམ་སྟེ་སྐུ་ཚེ་བསྟུངས་ནས་འགྲོ་དོན་མི་འབྱུང་ལ།  དེའི་འབངས་འཁོར་སྨོན་ལམ་ལས་ཀྱིས་འབྲེལ་བའི་སྐྱེ་བོ་མང་པོ་ཁྱོད་ཀྱི་གདུལ་བྱར་གྱུར་ནས་བསྟན་པའི་སྲོལ་འཛིན་པ་འབྱུང་།  ཁྱོད་ལ་དེ་སྔོན་འཇིགས་སྐྲག་གི་སྣང་བ་འདྲ་ཨེ་བྱུང་གསུངས།  དེ་ལ་བདག་གིས་འདི་སྐད་ཞུས།  ང་ལོ་གྲངས་བདུན་གྱི་དུས་སུ་དགུན་ར་བའི་ཚེས་བཅོ་བརྒྱད་ཀྱི་དགོང་མོ་སྲིང་མོ་ཆེ་བ་དང་འགྲོགས་ནས་བེའུ་ཚོལ་དུ་ཕྱིན་པ་ན་རྡོ་ཕ་ཝང་ཞིག་གི་སྟེང་དུ་ཁྲག་ཤ་དང་རྣག་ཐིག་ཆེན་པོ་ཡོད་པ་མཐོང་བས།  སྲིང་མོས་འདི་ཅི་ཡིན་ཨ་ཙེ་ཙེ་ཞེས་ཟེར་བ་ལ་ཤིན་ཏུ་འཇིགས་ཤིང་སྐྲག་ནས་ངེད་མིང་སྲིང་གཉིས་བྲོས་ཏེ་རང་ཁྱིམ་དུ་ཕྱིན།  དེའི་ལོ་རྒྱུས་ཕ་མ་ལ་བཤད་པས་ཕ་མས་ལྷ་འདྲེའི་ཆོ་འཕྲུལ་རེད་ཟེར་བས།  བདག་ཤིན་ཏུ་སྐྲག་བཞིན་ཉལ་བའི་ཚེ་མིག་བཙུམ་མ་ཐག་ཏུ་སྟེང་ཕྱོགས་ནས་ཁྲག་གི་རྦ་ཀློང་ཆུ་ཀླུང་དྲག་པོ་ལྟ་བུར་འབབས་པའི་སྒྲ་གནམ་ས་འགས་པ་ཙམ་དང་།  ཕྱོགས་མཚམས་ཁོར་ཡུག་ཐམས་ཅད་ནག་ལ་སྟོང་ཧད་དེ་བར་སྣང་བས་བྲེད་ནས་ཉལ་མ་སྤོབས་པར་ཡར་ལངས་ཏེ་ངུ་ཤོམ་དྲག་པོ་བྱེད་དགོས་པ་བྱུང་ཞིང་།  དེ་ནས་བཟུང་སྟེ་ད་ལ་ཐུག་གི་བར་མིག་བཙུམ་མ་ཐག་ཏུ་དེ་ལྟར་སྣང་།  ཁྱད་པར་ལོ་བཅུ་དང་བཅུ་གཅིག་ལོན་ནས་བཟུང་སྟེ་ད་ལྟའི་བར་སྟེང་ན་གནམ་མེད་ཅིང་འོག་ན་ས་མེད་པའི་སྟོང་སང་ངེ་བའི་ཀློང་དུ་ཁྲག་གི་རྦ་ཀློང་ཆེན་པོ་དེ་འོད་ཕུང་དམར་པོ་འཇའ་ཚོན་ལྟ་བུར་གྱུར་ཏེ།  དེ་ལས་འོད་ཕུང་དཔག་ཏུ་མེད་པ་འཕྲོས་པས་ཡུལ་ཡངས་པ་ཆེན་པོའི་སྣོད་བཅུད་ཀྱི་སྣང་བ་སྣང་ལ་རང་བཞིན་མེད་པ་ཆུའི་ཟླ་གཟུགས་ལྟ་བུར་སྣང་བའི་རྐྱེན་ལ་བརྟེན་ནས་སྣོད་བཅུད་ཐམས་ཅད་རང་སྣང་བདེན་མེད་རྨི་ལམ་ལྟ་བུར་གོ་བ་བྱུང་ལགས།  ཞེས་ཞུས་པས།  སློབ་དཔོན་ཆེན་པོའི་ཞལ་ནས།  བུ་ཁྱོད་ལ་མཁའ་འགྲོ་མ་གིརྟི་དམར་མོས་འཁོར་འདས་རང་སྣང་དུ་སྟོན་པའི་གདམས་པ་མངོན་གྱུར་དུ་བསྟན་པ་ཡིན་པས་ངང་ཤེས་ཏེ་གདིང་ཐོབ་པར་གྱིས་ཤིག།  ཅེས་གསུངས་ཤིང་མི་སྣང་བར་ཡལ་ལོ།  །དེ་ལྟར་ཐོག་མར་རྐྱེན་དེས་འཇིགས་སྐྲག་བྱུང་བའི་ནུབ་མོ་དེར་ཕ་མ་གཉིས་ཀྱིས་བུ་འདི་འདྲེས་བརླམ་པ་ཡིན་འདྲ་བས་སང་ཉིན་བླ་མ་གདན་དྲངས་ཏེ་དབང་བཀའ་རྗེས་གནང་ཞིག་ཞུ་དགོས་ཟེར་ནས་བདག་གི་མགོ་པང་དུ་བླངས་ཏེ་ནམ་མ་ལངས་བར་དུ་བསྡད་ཀྱང་འཇིགས་སྐྲག་ལ་ནི་ཕན་པ་མ་འབྱུང་།  ཕྱིར་ཉིན་ཇི་ལྟར་ཟེར་བ་བཞིན་བླ་མ་མཚན་བཟང་ཞེས་བྱ་བ་གདན་དྲངས་ནས་གཅོད་དང་དབང་ཁྲུས་ཞུས།  ལུང་བསྟན་ཡང་ཞུས་པས།  བླ་མའི་ཞལ་ནས།  བུ་ཆུང་འདི་འདྲེ་བགེགས་ཀྱིས་བརླམ་པ་ནི་མ་ཡིན་ཏེ།  མདང་སུམ་མཁའ་འགྲོ་མ་ཞིག་གིས་བདག་ལ་སང་གི་བུ་ཆུང་དེ་འདྲེ་གདོན་གྱིས་བརླམ་པ་མ་ཡིན།  སྔོན་གྱི་ལས་འཕྲོ་སད་ནས་རྟོགས་པ་ཀློང་དུ་གྱུར་པའི་ལྟས་ཡིན་ངེས་པས།  སྲུང་ཟློག་དང་རིམ་གྲོ་མི་དགོས་ཐག་ཆོད་རེད་ཅེས་དབུགས་དབྱུང་བར་མཛད་དོ།  །ཡང་ལོ་ཁྱིམ་བཅུ་གསུམ་ལ་བབས་པ་ཧོར་ཟླ་དགུ་པའི་ཚེས་བཅོ་ལྔའི་ནུབ་སྣང་བ་ཐམས་ཅད་ཆོས་ཉིད་སྤྲོས་མཐའ་དང་བྲལ་བའི་དབྱིངས་སུ་ཞིག་སོང་།  རེ་ཞིག་གི་ཚེ་སྟོང་ཉིད་ནམ་མཁའ་རྣམ་པར་དག་པའི་དབྱིངས་སུ་མཁའ་ལ་འཇའ་ཚོན་ཤར་བ་བཞིན་མེ་དཔུང་ཆེན་པོ་ཕྱོགས་མཚམས་ཁོར་ཡུག་ཀུན་ཏུ་འབར་བའི་ཀློང་དུ་ཁྲོ་བོ་ནག་པོ་བེར་ནག་བགོས་ཤིང་གྲི་ཐོད་བསྣམས་ནས་ཙནྡན་གྱི་བིང་ཆེན་སྐེད་དུ་བཙུགས་པ་འཇིགས་རྔམས་བལྟར་མི་བཟོད་པ་ཞིག་གིས་ན་རེ།  བུ་ཁྱོད་མ་འཇིགས་ཤིག།  མ་སྐྲག་ཅིག།  ང་ནི་སྟེང་ལྷ་ཁམས་ནས་འོང་བ་ཡིན།  ཕོ་རྒྱུད་དབང་དུ་སྡུད་པའི་ཐབས་མཆོག་ཁྲོ་བོ།  མོ་རྒྱུད་དབང་དུ་བྱེད་པའི་ཤེས་རབ་ཁྲོ་མོའང་ཡིན།  ཁྱོད་རང་གི་བླ་མ་འདི་ཀའི་བཀའ་སྲུང་གི་མཆོག་ཆེན་པོ་ང་ཡིན།  བླ་མ་འདིའི་གདུང་བརྒྱུད་ལ་བར་དུ་གཅོད་པའི་རྒྱལ་འགོང་མ་གི་ཨེ་རིག།  གནས་འདི་ནས་གཞན་དུ་མ་འཕོས་ན་མི་བརྒྱུད་ཀྱི་མཐའ་ནི་ཕྲ་མོར་འགྱུར་ཞིང་ལོངས་སྤྱོད་ཀྱི་དཔལ་རྨི་ལམ་དང་མཚུངས་པ་ཞིག་འབྱུང་ངེས་ཡིན་པས་དེ་ཚུལ་མ་བརྗེད་པར་ཡིད་ལ་ཟུངས་ཏེ་སྨྲོས་ཤིག།  ས་གནས་ཕུང་བཤིག་གི་ཤུལ་ཡིན་པ་དང་།  རྒྱབ་རི་རྒྱུན་ཆད་པ་དང་།  ཆུ་ཀླུང་ཀླུ་བདུད་ཀྱི་ཞགས་ཁུག་ཏུ་འདུག་པས་ལེགས་ཉེས་སྤྲིན་བར་གྱི་ཉི་ཞུར་ལྟ་བུར་རེས་མོས་སུ་འོང་བ་ཡིན།  གནས་གཞན་དུ་འཕོ་བ་གལ་ཆེ་བས་དེ་ལུགས་སེམས་ལ་ཞོག།  ད་ལོ་ཁྱོད་ཀྱི་ཞང་པོ་འདིའི་ཚེ་ལ་བར་དུ་གཅོད་པའི་རྒྱལ་འགོང་གདུག་པ་ཅན་ཁ་དར་བ་སུས་ཀྱང་བཟློག་མེད་ཡིན།  འོན་ཀྱང་ཁྱོད་ཀྱིས་ཉི་མ་སང་ཉིན་ནས་གནོད་སྦྱིན་ཤན་པ་དམར་ནག་གི་དབང་ལུང་ཞུས་ལ་གསོལ་མཆོད་ལ་འབད་པར་བྱས་ན་རྒྱལ་འགོང་གིས་མི་ཚུག་གོ།  ཞེས་ཟེར་ཞིང་མི་སྣང་བར་ཡལ་ལོ།  །དེ་བཞིན་བླ་མ་ལ་ཞུས་པས།  བླ་མའི་ཞལ་ནས་དེ་ངའི་སྲུང་མའི་གཙོ་བོ་མ་ནིང་ནག་པོ་ཡིན་པ་འདྲ་སྟེ།  གཞན་ལ་བཤད་ན་བྱིས་པའི་རྨི་ལམ་ལ་བདེན་པ་མེད་ཟེར་ནས་ཀུན་གྱིས་འཕྱ་བགད་བྱེད་པ་ལས་འོས་མེད་མོད།  ཁྱོད་རང་ལ་ངས་གནོད་སྦྱིན་ཤན་པའི་དབང་ལུང་སྦྱིན་གྱི་གསུངས་ནས་དབང་ལུང་གནང་སྟེ་བཀའ་གཏད་སྨོན་ལམ་མཛད་དོ།  །ལོ་ཁྱིམ་བཅུ་བཞི་ལ་བབས་པ་ཧོར་ཟླ་དང་པོའི་ཚེས་བཅུའི་ནུབ་མཁའ་འགྲོ་མ་སྔོ་སངས་གཡུའི་ཕྲེང་བས་ལུས་རབ་ཏུ་བརྒྱན་པ་ཞིག་གིས་འདི་སྐད་ཟེར།  མ་གི་རྒྱལ་འགོང་གདུག་པ་ཅན་དེས་ཁྱོད་ཀྱི་ཞང་པོ་དང་བཙུན་པ་ཕྱུག་སྔོན་གཉིས་ཀྱི་བླ་ཁྱེར་ཐལ་བས་སྟོན་ཟླ་ར་བའི་ནང་དུ་ཤི་འགྲོ་སྟེ་བཟློག་པའི་ཐབས་ནི་ཕུར་བའི་བསྙེན་སྒྲུབ་ལ་གཟབ་ན་ཕན་ཅེས་ཟེར།  ནངས་པར་དེ་ལྟར་སྨྲས་པས་ཁྱོད་ཀྱིས་ཅི་ཡང་མི་ཤེས་ཟེར་ནས་མགོ་ལ་ཐལ་མོས་བརྒྱབ་ནས་སོང་།  སྟོན་ཟླ་ར་བ་ལ་གཉན་རིམས་མཆེད་དེ་ཞང་པོ་ཡང་མགུལ་སྐྲང་ནས་ཤི་སོང་།  དགུན་ཟླ་ར་བའི་ཚེས་གསུམ་གྱི་ནུབ་རྨི་ལམ་ན་བུད་མེད་རྒན་པ་ཞིག་དང་བནྡྷེ་གཉིས་བསྡེབས་ནས་ཁྱོད་འགྲོ་རན།  འུ་ཅག་ཡུལ་མ་ཀི་ན་ཤིན་ཏུ་སྐྱིད་པའི་གནས་ཞིག་ཡོད་པས་དེར་འགྲོ་ཟེར་བ་བྱུང་བའི་མོད་ལ་ངས་འགྲོ་གྲབ་བྱས་པའི་ཚེ།  མི་དམར་པོ་ཁྱུང་དམར་ལ་ཞོན་པ་ཞིག་བྱུང་ནས་བུ་ཁྱོད་འགྲོ་མི་རུང་།  སྲོག་གཅོད་ཀྱི་ལག་ཏུ་ཤོར་ཟིན་ཏེ།  ཁྱོད་ཀྱིས་དམིགས་པ་འདི་བཞིན་དུ་མཛོད་ཅིག།  འདི་ལྟར་སེམས་ཤིག།  ཡིད་ལ་གྱིས་ཤིག།  ཧཱུྃ།  རང་གི་ལུས་ངག་ཡིད་གསུམ་ནི།  །སྟོང་པར་གྱུར་ཏེ་སྟོང་དབྱིངས་ལས།  །བླ་མ་ཡི་དམ་གཉིས་མེད་པའི།  །ངོ་བོ་གུ་རུ་དྲག་པོ་ནི།  །དམར་ནག་ཞལ་གཅིག་ཕྱག་བཞི་པ།  །ཞལ་གདངས་ལྗགས་འདྲིལ་མཆེ་བ་གཙིགས།  །སྨ་ར་སྨིན་མར་མེ་སྟག་འཕྲོ།  །ཁམ་ནག་དབུ་སྐྲ་གྱེན་དུ་བརྫེས།  །དང་པོའི་ཕྱག་གཉིས་རྡོ་རྗེ་དང་།  །ཁ་ཊྭཱྃ་རྩེ་གསུམ་ནམ་མཁར་ཕྱར།  །ཐ་གཉིས་ཕུར་པ་ལྕགས་སྡིག་བསྣམས།  །སྐུ་སྨད་ལྕགས་སྲེག་ཕུར་བུའི་དབལ།  །རྒྱལ་བསེན་གདུག་པའི་སྙིང་གར་གདབ།  །བསྐལ་པའི་མེ་དཔུང་ལྟ་བུའི་ཀློང་།  །ཧཱུྃ་སྒྲ་འབྲུག་སྟོང་ལྡིར་བཞིན་སྒྲོགས།  །ཁྲོ་ཆུང་ལྕགས་སྡིག་ཚྭ་ཚྭ་ཡིས།  །རྒྱལ་བསེན་གདུག་པ་ཀུན་གཞོམ་གྱུར།  །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཅེས་ཟློས་ཤིག་ཟེར།  དེ་བཞིན་གསལ་ནས་སྔགས་བཟླས་པས་རྒྱལ་བསེན་གཉིས་ཀ་བརྒྱལ་ནས་སར་འགྱེལ།  ཡུན་ཅིག་ནས་བརྒྱལ་སངས་མ་ཐག་ཐག་རིང་པོ་ཞིག་ཏུ་བྲོས་ནས་ཡལ་སོང་།  དེ་ནས་མི་དམར་ནག་དེས་འདི་སྐད་ཟེར།  བསྐལ་པ་སྔོན་ནས་བུ་ཁྱོད་དང་སྲུང་མ་ང་གཉིས་སྐད་ཅིག་ཙམ་ཡང་འབྲལ་མ་མྱོང་བས་ང་ལ་བློ་སྙིང་རྩེ་གཅིག་གཏོད་དང་བར་ཆད་ཐམས་ཅད་གཞོམ་པར་བྱེད་དོ།  །ཞེས་ཟེར་བས་གཉིད་སད།  ཡང་ལོ་ཁྱིམ་དེའི་སྟོན་ཟླ་འབྲིང་པོའི་ཚེས་བཅུའི་ནུབ་མི་དམར་འཇིགས་སུ་རུང་བ་བཙན་རྟ་དམར་པོ་བཅིབས་པ་ཞིག་གིས་ན་རེ།  སྤྲུལ་སྐུ་འཇིགས་དགའ་ལ་ངས་འདི་སྐད་ཟེར་གྱིན་ཤོད།  ཁྱོད་ཀྱིས་སྔོན་གནོད་སྦྱིན་ཤན་པས་བཤད་པའི་ལྷ་དེ་འདྲ་སྒོམས་ལ་སྔགས་དེ་ཟློས་ཤིག།  སྙི་སྨད་རྒྱལ་འགོང་འདིས་ཁྱོད་ལ་སྐབས་ལྟ་གླགས་ཚོལ་བྱེད་པར་ཉིན་མཚན་ཀུན་ཏུ་ཁྱི་འཁྱམས་ལྟ་བུར་ཉུལ་འདུག་པས་ཐུགས་དམ་ལ་གཟབ་གལ་ཆེ།  དེ་ལྟར་ངས་ཟེར་བ་སྨྲོས་ཤིག།  དགོན་པ་འདིར་གནས་པ་རྣམས་ཀྱིས་ཀྱང་ཕུར་པའི་ཟླ་སྒྲུབ་དམ་རྒྱ་ཅན་རེ་མ་ཆག་ན་ལེགས་འདྲ་ཡང་བསྒྲུབ་མི་དཀོན་པས་བཤད་དོན་ཆུང་།  བུ་ཁྱོད་རིག་འཛིན་བདུད་འདུལ་རྡོ་རྗེ་དངོས་ཡིན་ཡང་ད་དུང་སྨྲས་པ་ལ་དགོས་པ་མེད་ཅེས་ཟེར་ཞིང་མི་སྣང་བར་ཡལ།  དེ་ནས་ཞག་གསུམ་གྱི་ཉིན་སྤྲུལ་སྐུ་འཇིགས་དགའ་ལ་དེ་སྐད་སྨྲས་པས་འཇིགས་དགའ་ན་རེ།  དེ་རྨི་ལམ་རྟགས་ཅན་ཞིག་ཡིན་ངེས་པས།  ད་ང་རང་གིས་གནམ་ཆོས་ལས་བྱུང་བའི་གུར་དྲག་ཕུར་མཇུག་ཅན་ཉིད་དེ་རིང་ནས་ངེས་པར་བསྒྲུབ་རྒྱུ་ཡིན་ཟེར་ནས་ཟླ་བ་གཅིག་ལ་དམ་རྒྱ་བྱས་ནས་སྒྲུབ་པ་ལ་ཞུགས་སོང་།  ལོ་ཁྱིམ་དེའི་ཧོར་ཟླ་བཅུ་གཉིས་པའི་ཚེས་ལྔའི་ནུབ་སྙི་སྟོད་སེ་ར་དགོན་པའི་གཡོན་ཕྱོགས་ཀྱི་ཆུ་ཆེན་པོའི་ཕ་རིའི་བྲག་ཕུག་གི་སྒོ་ཐད་དུ་མཚེར་ས་སྦོས་པའི་ནུབ་བྱིས་པ་སྐད་གསེང་བ་ཞིག་གིས་ངའི་མིང་ནས་ལན་གསུམ་བོས་བྱུང་བ་ལ།  སྐད་ལན་མ་བྱས་པར་ཉལ་བས་གཉིད་དུ་སོང་།  ཡང་ནམ་ཕྱེད་ཙམ་ན་འབོད་དུ་བྱུང་བ་ལའང་ལན་མ་བཏབ།  ཡང་ནམ་གྱི་སྨད་དུ་འབོད་བྱུང་བའི་ཚེ་གནོད་སྦྱིན་ཤན་པ་དམར་ནག་གིས་ངར་སྐད་ཀྱིས་ཀྵ་སྒྲ་འབྲུག་ལྟར་སྒྲོགས་ཤིང་ནམ་མཁའི་ཁམས་སུ་བྱོན་ནས་འདི་སྐད་ཟེར།  ཁྱོད་ཀྱིས་ཤིང་མདའ་ཤིང་གཞུ་ཟུངས་ལ་འབོད་པའི་སར་སོང་ཞིག་ཟེར།  བདག་གིས་མདའ་གཞུ་བཟུང་ནས་འབོད་པའི་སར་སོང་བས་རྟ་སྒ་ཞིག་གི་ཡོབ་ཆེན་གྱི་ཐོག་ཏུ་བྱིས་པ་གཅེར་བུ་ཞིག་གིས་མིག་ཁྲ་ཧྲིག་གེ་བདག་ལ་བལྟས་འདུག་པ་ལ་མདའ་བརྒྱབ་པས་ངུ་ཚམ་མེ་སོང་བ་བདག་གི་ཨ་ཕྱིས་ཀྱང་ཐོས།  ནངས་པར་སྐྱེར་མདས་ཡོབ་ཆེན་ཐལ་མར་ཕུག་འདུག་པ་ལ་ཨ་ཕྱི་ན་རེ།  ལྕགས་ཤིང་གིས་ཕུག་པ་འདི་ཡང་ན་གྲུབ་རྟགས་ཞིག་ཨེ་ཡིན།  ཡང་ན་ལྷ་འདྲེ་ཞིག་གི་ཆོ་འཕྲུལ་ཞིག་ཡིན་ནམ་ཟེར་ཞིང་།  བླ་མ་ལ་དྲིས་པས།  བླ་མའི་ཞལ་ནས་བུ་འདི་སྐྱེ་བ་བཟང་པོ་ཞིག་ཡིན་པ་འདྲ་བས་གྲུབ་རྟགས་ཡིན་སྲིད་ཟེར།  དེའི་ཕྱི་ནུབ་བུད་མེད་ཤིན་ཏུ་མི་སྲུན་པ་ལྟར་མི་བཟོད་པ་ཞིག་བྱུང་ནས་ན་རེ།  ཁྱེད་ཀྱིས་མདང་སུམ་ང་ཡི་བུ་བསད་པའི་ལན་དུ་ཁྱེད་ཀྱི་བློ་སྙིང་དམར་ཙ་རེ་ཁྱེར་རྒྱུ་ཡིན་ཟེར་ནས་ལྕགས་ཀྱི་སེན་མོ་མཐོ་གང་ཙམ་པ་ངའི་སྙིང་གར་གཟིར་བྱུང་བའི་ཚེ།  ནམ་མཁའི་མཐོངས་ནས་གནོད་བྱིན་ཆེན་པོས་རལ་གྲི་མེ་འབར་བ་བུད་མེད་དེའི་ལུས་ལ་བརྒྱབ་པས་ལུས་སྨྱུག་མ་བཀས་པ་ལྟར་བཏང་ནས་མི་སྣང་བར་ཡལ་སོང་།  ལོ་ཁྱིམ་བཅོ་ལྔ་ལ་བབས་པ་ཟླ་བ་གསུམ་པའི་ཚེས་བཅུའི་ནུབ་བུད་མེད་རྒན་པ་ཞིག་ན་རེ།  ཁྱོད་ཀྱི་ཕ་ཇོ་དབྱར་ཟླ་འབྲིང་པོའི་ཚེས་གཉིས་ལ་སླེབ་རྒྱུ་ཡིན་པས་ཕ་ཡུལ་དུ་འགྲོ་རན་པ་རེད།  རླུང་འཚུབས་མ་གཡོན་འཁོར་ཞིག་གི་ནང་ནས་དམ་སྲི་ཞིག་འབྱུང་བས་རྣམ་འཇོམས་ཀྱི་སྔགས་ཀྱིས་བཏབ་པའི་རྡོ་ཆར་ཕོབ་ལ་གླུ་ལེན་པའི་ངག་བཞིན་བསྒྲུབ་མི་རུང་ཟེར་ནས་ཡལ།  དབྱར་ཟླ་ར་བའི་ཚེས་ལྔའི་ཉིན་ཕྱུག་རྫི་ལ་ཕྱིན་ཚེ་རླུང་ནག་འཚུབས་མ་གཡོན་དུ་འཁོར་བ་ཞིག་བདག་གི་གམ་དུ་བསྙེགས་ནས་བྱུང་བ་བྲོས་ཀྱང་རྗེས་སུ་སླེབས་བྱུང་བ་ན་རྡོ་མང་པོ་ལ་རྡོ་རྗེ་ཕྲ་མོ་ཐོགས་པ་མེད་པའི་གཟུངས་སྔགས་ཀྱིས་བཏབ་ནས་འཕང་བས་དེ་མ་ཐག་ཏུ་སྐྱེས་པ་དང་བུད་མེད་གང་ཡིན་ངོ་མི་ཤེས་པ་ཞིག་ཏུ་གྱུར་ནས་གླུ་འདི་ལེན།  ཡེ་ཡེ་ཡེ།  ཚུར་ཉོན་དང་བུ་ཆུང་ཀླད་མེད།  །ང་ཁྱོད་ཀྱི་ལྷ་སྲུང་ངོ་མ།  །ཁྱོད་ཡུལ་ཕྱོགས་གཞན་དུ་མ་འགྲོ།  །འདིར་ཞང་པོའི་ཁྱིམ་བདག་གྱིས་ལ།  །ལས་སོ་ནམ་བྱ་བར་འབོད་དང་།  །སྡེ་མང་པོའི་དཔོན་དུ་འགྱུར་ཡོང་།  །བཟླ་མི་རུང་དྲག་སྔགས་རྩུབ་མོ།  །རང་སྲོག་གི་གཤེད་དུ་འབབ་སྲིད།  །བསྒོམ་མི་རུང་ཁྲོ་བོ་ཁྲོ་མོ།  །མཐར་འདྲེ་བདུད་དངོས་སུ་འགྱུར་སྲིད།  །ང་བསམ་བཟང་ཁ་ལ་ཉན་ན།  །ཁྱོད་ཆོས་པ་མི་འོང་ཐག་ཆོད།  །སྲིད་འཁོར་བའི་ལས་ལ་འབད་ན།  །ཁྱོད་བདེ་སྐྱིད་གཉིས་ཀ་འཛོམ་འོང་།  །དེ་སེམས་ལ་ཞོག་ཅིག་བུ་ལོ།  །སུའི་ཁ་ལ་མ་ཉན་རེམ་རེམ།  །ཞེས་ཟེར་ཞིང་ཡལ་སོང་ངོ་།  །དབྱར་ཟླ་འབྲིང་པོའི་ནང་དུ་ཕ་སླེབས་ནས་དེ་དང་ལྷན་ཅིག་ཕ་ཡུལ་དུ་སོང་བའི་ལམ་དུ་ནུབ་གཅིག་གི་རྨི་ལམ་ན།  མི་ནག་པོ་བེར་ནག་གྱོན་པ་རྟག་ནག་རྟིང་དཀར་ལ་ཆིབས་པ་ཞིག་ན་རེ།  ཁྱོད་ཀྱི་ཕ་ཡུལ་ན་ཡུལ་འདྲེ་རྒྱལ་གཤེད་གདུག་པ་ཅན་གཞན་གྱིས་མི་ཐུབ་པ་ཞིག་ཡོད་པས།  དེའི་གཉེན་པོར་སྟེང་ཕྱོགས་འོག་མིན་གྱི་གནས་ནས་དཔལ་ཆེན་རྡོ་རྗེ་གཞོན་ནུ་འཁོར་དང་བཅས་པ་མེ་དཔུང་འབར་བའི་རྣམ་པར་བྱུང་ནས་ཁྱོད་རང་ལ་ཐིམ་པར་སྒོམས་ཤིག།  སླར་ཡང་ཁྱོད་རང་གི་སྙིང་ག་ནས་འོད་ཕུང་འཇའ་ཚོན་སྤྲིན་ཕུང་ལྟ་བུ་དཔག་ཏུ་མེད་པ་འཕྲོས་པས་གུ་རུ་ཞི་དྲག་གི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་འཇའ་སྤྲིན་འཐིབ་པའི་རྣམ་པར་བྱུང་ནས་རང་ལ་ཐིམ་པས་རང་ལུས་འོད་ཀྱི་ཕུང་པོར་གྱུར་ནས།  བླ་མ་དང་ཡི་དམ་གཉིས་སུ་མེད་པའི་ངོ་བོ་ལྷ་མཆོག་རྡོ་རྗེ་གྲོ་ལོད་སྐུ་མདོག་དམར་སྨུག་ཞལ་གཅིག་ཕྱག་གཉིས་གཡས་གསེར་གྱི་རྡོ་རྗེ་ཕྱར་ཞིང་གཡོན་པས་ལྕགས་ཕུར་ས་ལ་གཟིར་བ།  སྐུ་ལ་ཟ་བེར་དང་ཐང་ཤམ་དང་ཆོས་གོས་དམར་སེར་གསོལ་བ།  མི་མགོ་ཁྲག་འཛག་པ་ལྔ་བཅུས་དོ་ཤལ་བྱས་པ།  སྤྱན་གསུམ་སྡང་མིག་བགྲད་ཅིང་མཆེ་བ་མན་དུ་གཙིགས་པ།  དབུ་སྐྲ་གཡས་སུ་འཁྱིལ་ཞིང་སྨ་ར་དང་སྨིན་མ་དམར་སེར་ལས་མེའི་ཚྭ་ཚྭ་འཕྲོ་བ།  ཉི་མ་དང་ཟླ་བས་སྙན་རྒྱན་བྱས་ཤིང་རྒྱ་སྟག་དམར་ཁྲའི་སྟེང་དུ་ཞབས་གཉིས་གྱད་ཀྱི་འདོར་ཐབས་སུ་བགྲད་པ།  ཡེ་ཤེས་མེ་དཔུང་འབར་བའི་ཀློང་དུ་འགྱིང་ཞིང་ལྕགས་སྡིག་དང་བྱ་ཁྱུང་གི་ཚྭ་ཚྭ་འཕྲོ་བ།  དེའི་ཐུགས་ཀར་ཡེ་ཤེས་སེམས་དཔའ་གཅེར་བུ་གོས་རྒྱན་མེད་པ་པད་ཉིའི་གདན་ལ་འགྱིང་ཞིང་ཤིན་ཏུ་ཁྲོས་པའི་ངང་ཚུལ་དང་ལྡན་པའི་ཐུགས་ཀར་གསེར་གྱི་རྡོ་རྗེ་རྩེ་ལྔ་པ་འགྲེང་སྟབས་སུ་གནས་པའི་ལྟེ་བ་ཁོང་གསེང་གི་ནང་དུ་ཧཱུྃ་ཡིག་དམར་ནག་གི་མཐར་སྔགས་ཀྱི་ཕྲེང་པས་བསྐོར་བའི་འོད་ཟེར་གྱིས་ཞི་ཁྲོ་རྡོ་རྗེ་དབྱིངས་ཀྱི་དཀྱིལ་འཁོར་ཐམས་ཅད་བསྒོམ་པ་དང་འདྲ་བའི་ལྷ་དེའི་རྣམ་པ་རྒྱ་མཚོ་ལ་ཁ་ཆར་བབས་པ་ལྟར་སིབ་སིབ་ཐིམ་པར་སྒོམས་ཤིགཧཱུྃ།  ཤེས་རབ་སྟོང་ཉིད་ཡུམ་གྱི་མཁར།  །ཐབས་མཆོག་གཞན་གྱིས་མི་ཐུབ་པ།  །ཡེ་ཤེས་སྒྱུ་མའི་སྐུ་རུ་ཤར།  །ཐུགས་གསང་གཞི་ཡི་ཧེ་རུ་ཀའི།  །ཡང་གསང་རྡོ་རྗེ་ཐབས་ཤེས་སྦུབས།  །ཧཱུྃ་ལ་སྔགས་ཀྱི་ཕྲེང་བས་བསྐོར།  །ཨོཾ་ཨཱཿཧཱུྃ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ་ཧཱུྃ།  ཞེས་ཟེར་ཞིང་མི་སྣང་བར་ཡལ་ལོ།  །དེ་ནས་བཟུང་སྟེ་ཚེ་འདིར་བསྒོམ་བཟླས་ཀྱི་གནད་དེ་ལ་བརྟེན་པས་བར་ཆད་ཀྱི་གེགས་རྐྱེན་ལས་གྲོལ་བ་ཡིན།  ཡང་ལོ་ཁྱིམ་དེའི་དགུན་ར་བའི་ཚེས་བཅོ་བརྒྱད་ཀྱི་ནུབ་མཁའ་འགྲོ་མ་གསང་བ་ཡེ་ཤེས་ཀྱི་ཞལ་མཐོང་ཚེ་ཕྱག་བདག་གི་མགོ་ཐོག་ཏུ་བཞག་ནས་བུ་ཁྱོད་ཤེས་རབ་ཀྱི་རྩ་སྒོ་ཕྱེ་བའི་ཐབས་སུ་འཇམ་དཔལ་སྨྲ་བའི་སེང་གེའི་སྒོམ་བཟླས་དང་འཇམ་དཔལ་མཚན་བརྗོད་ལ་འབད་པ་ཐོན་ན་ཤེས་རབ་ཡེ་ཤེས་ཀྱི་རྩ་སྒོ་ཕྱེ་ནས་ཆོས་ཉིད་ནམ་མཁའ་མཛོད་ཀྱི་ཀློང་བརྡོལ་བར་ངེས་པས་དེ་ལུགས་མ་བརྗེད་པར་སེམས་ལ་ཞོག་ཅིག།  ཅེས་ཟེར་བའི་ལན་དུ་བདག་གིས་འདི་སྐད་སྨྲས།  ཀྱཻ།  མ་ཡེ་ཤེས་དབྱིངས་ཀྱི་མཁའ་འགྲོ་མ་ཁྱོད་ཀྱི་གསུང་བཞིན་དུ་བདག་གིས་ངེས་པར་བསྒྲུབ་ལགས་སོ་ཞུས་པས་མི་སྣང་བར་ཡལ་ལོ།  །དེ་ནས་ལོ་གྲངས་བཅུ་དྲུག་པ་ཁྱི་ལོ་དབྱར་ཟླ་ཐ་ཆུང་གི་ཚེས་བཅུའི་ནུབ་མཁའ་འགྲོ་ཡེ་ཤེས་མཚོ་རྒྱལ་ཡིན་སྐད་པའི་བུ་མོ་གཟུགས་བྱད་མཛེས་ཤིང་རྒྱན་སྣ་ཚོགས་ཀྱིས་ལེགས་པར་བརྒྱན་པ་ཞིག་ན་རེ།  ཀྱཻ་ཧོ།  ང་ནི་ཡེ་ཤེས་མཁའ་འགྲོ་སྟེ།  །མི་མོའི་གཟུགས་སུ་སྟོན་པ་ནི།  །ཁྱོད་ཀྱི་མིག་ལ་ངོམས་ཕྱིར་རོ།  །ཡུལ་འདིའི་འདྲེན་སྟོན་འཇིགས་མེད་པ།  །པདྨ་འབྱུང་གནས་ཕྲིན་ལས་གར།  །དེ་ལ་བསྟེན་ནས་ལོ་ཁྱིམ་འདིར།  །སྔོན་འགྲོའི་ཆོ་ག་ཉམས་སུ་ལོངས།  །དངོས་གྲུབ་པྲ་ལྟས་ལེགས་པར་འབྱུང་།  །སྔོན་ནས་ལས་འབྲེལ་བླ་མ་ལགས།  །མ་བརྗེད་སེམས་ལ་ཞོག་ཅིག་བུ།  །ཞེས་གསུངས་ཤིང་མི་སྣང་བར་ཡལ།  ལོ་ཁྱིམ་དེའི་དགུན་ཟླ་འབྲིང་པོའི་ཚེས་གཅིག་ལ་བླ་མའི་དྲུང་དུ་བཅར་ནས་གྲོགས་བཅོ་ལྔ་དང་ལྷན་ཅིག་ཏུ་སྔོན་འགྲོའི་ཟླ་ཆོས་ལ་ཞུགས་ཚེ།  ཚེས་བཅོ་ལྔའི་ནུབ་བླ་མའི་མདུན་སར་སླེབས་པའི་སྣང་བ་ཤར་བ་ན་བླ་མའི་མདུན་ཐད་ཀྱི་ནམ་མཁའ་ཁྲུ་བཞི་ཙམ་འཕགས་པའི་སར་མི་སེར་པོ་དར་སྣ་ཚོགས་ཀྱིས་བརྒྱན་པ་སེང་གེ་དཀར་མོའི་སྟེང་དུ་རྒྱལ་པོ་རོལ་པའི་སྟབས་ཀྱིས་འགྱིང་བ།  གཡས་རྒྱལ་མཚན་དང་གཡོན་པས་ནེའུ་ལེ་བསྣམས་པ།  འོད་དང་འོད་ཟེར་འབར་བའི་ཞབས་ཀྱི་མཐེབ་རྩེ་ནས་འོ་མའི་རྒྱུན་ངང་ན་ར་ར་ཟངས་མོ་ཆེའི་སྣོད་དུ་བབས་པ་ལས།  བླ་མའི་ཞལ་ནས་འོ་མ་དེ་ཉིད་འཐུང་ཞེས་གསུངས་པ་བཞིན་འོ་མ་དེ་མང་དུ་འཐུང་བས་ལུས་སེམས་ཐམས་ཅད་བདེ་དགའ་ཡ་ལེ་བའི་ཉམས་ཤར།  དེའི་ཚེ་བླ་མའི་ཞལ་ནས་ཐུན་མོང་གི་དངོས་གྲུབ་ཐོབ་ཟིན་པ་ཡིན།  ཞེས་གསུངས་ནས་བླ་མ་དང་ལྷ་གཉིས་དབྱིངས་སུ་ཡལ་ལོ།  །གྲུབ་པའི་བྱིན་ལྡན་རིག་པ་འཛིན་རྣམས་དང་།  །ཡེ་ཤེས་ལྷ་དང་བསྟན་སྲུང་རྒྱ་མཚོ་ཡིས།  །སྐུ་དང་གསུང་གི་སྣང་བས་དབུགས་དབྱུང་ཞིང་།  །ཐུགས་ཀྱི་བྱིན་རླབས་སྣ་ཚོགས་བརྡ་ཐབས་ལས།  །འབྱམས་ཀླས་དག་པའི་སྣང་བ་འཆར་བའི་གཞི།  །ཡེ་རིག་གདོད་མའི་སངས་རྒྱས་རང་ཞལ་དེ།  །མ་བཙལ་རང་ལ་གནས་པའི་ཚུལ་དུ་མཇལ།  །དག་མཉམ་དབྱིངས་སུ་གནོད་བྱེད་མིང་མེད་ཀྱང་།  །མ་དག་འཆར་སྒོ་འགགས་མེད་རྟེན་འབྱུང་གིས།  །བར་ཆད་མཚན་མའི་རྫུན་རིས་མང་བྱུང་བ།  །ངང་མདངས་གཉེན་པོར་ཤར་བའི་ལྷ་ཚོགས་ཀྱིས།  །ཕམ་བྱས་སྒྱུ་མའི་རྩེ་འཇོ་ཅིར་ཡང་མཐོང་།  །རྨི་ལམ་ན་ཡེ་ཤེས་དབྱིངས་ཀྱི་མཁའ་འགྲོ་མ་དག་དང་དཔའ་བོའི་ཚོགས་ཀྱིས་སྔོན་འགྲོའི་ཆོས་བཤད་པ་ལ་བརྟེན་ནས་ཐོགས་པ་མེད་པར་འཆད་ཤེས་པ་བྱུང་།  ལོ་ཁྱིམ་ཕྱི་མ་ཕག་གི་ལོ་རང་ལོ་བཅུ་བདུན་ལ་བབས་པའི་དབྱར་ར་བའི་ཚེས་བདུན་ལ།  ད་ནི་སྒོམ་ཞེས་བྱ་བ་ཞིག་མཐོང་ཚོར་གྱི་རྣམ་པར་འབྱུང་དུ་རེ་ནས་རྒྱབ་བྲག་ལ་གཏད་ཅིང་ལུས་དྲང་པོར་བསྲང་ནས་གཡོ་འགུལ་དང་བྲལ་བར་བསྡད་པའི་ཚེ།  ཞག་བདུན་གྱི་ཐ་མ་གཉིད་དུ་སོང་བའི་རྨི་ལམ་ན་བྱིས་པ་གཅེར་བུ་མཐོ་གང་བ་ཞིག་གིས་རྩྭ་འཇག་མ་དང་མེ་ཏོག་གི་སྟེང་དུ་མཆོང་རྒྱུག་བྱེད་ཅིང་མཐར་མིག་འབྲུ་ཚུགས་སུ་བདག་ལ་བལྟས་ནས།  ལུས་ནི་གྲོང་ཁྱིམ་སྟོང་པ་ལྟ་བུ་ལ།  །ངག་ནི་སེམས་ཀྱིས་བྱས་པ་བརྒྱུད་ལས་ཏེ།  །སེམས་ནི་སྣ་ཚོགས་བྱེད་པའི་ཀུན་བྱེད་དོ།  །ཞེས་ཟེར་བའི་ལན་དུ་བུ་མོ་ཆུང་ངུ་ཞིག་བྱུང་ནས།  ཨ་རེ་ཙ།  ལུས་ནི་ཤོག་སྦུབས་སྟོང་པ་ལྟ་བུ་ལ།  །ངག་ནི་སྦུ་གུར་རླུང་རྒྱུ་ལྟ་བུ་སྟེ།  །སེམས་ནི་སྣ་ཚོགས་བྱེད་པའི་མཁན་པོའོ།  །དེ་གསུམ་ནང་ནས་གཙོ་བོ་ངོས་འཛིན་ལས།  །སྒོམ་ཞེས་མཐོང་ཚོར་འབྱུང་འགྱུར་བསྒུག་པ་མཚར།  །ཞེས་ཟེར་ཞིང་ལྷག་ལྷག་དགོད་པའི་སྒྲས་གཉིད་སད་ཚེ་བརྟག་པས་ལུས་སེམས་ཀྱིས་བཟོས།  ལུས་སྣང་བས་ངག་གིས་སྨྲ་བ་བརྗོད་པའི་སྣང་བ་ཤར།  ལུས་མེད་པ་ལ་ལུས་སུ་སྣང་བ་ཙམ་བྱུང་བའང་སེམས།  ངག་མེད་པ་ལ་སྨྲ་བརྗོད་ཀྱི་སྣང་བ་ཤར་བའང་སེམས།  དོན་ལ་སེམས་ལས་མེད་པར་ཐག་ཆོད་པས་བྱིས་པས་བཤད་པ་གསུམ་དུ་སོང་བ་དེ་ཇི་ལྟར་ཡིན་བསམ་ཞིང་།  ཡང་དམར་ཤར་ཞེས་བྱ་བའི་བྲག་ལ་རྒྱབ་གཏད་ནས་སེམས་ཤིང་བུ་ལ་གཏད་པའི་མོད་ལ་རྒྱབ་ཀྱི་བྲག་ངོས་ནས་བྱེའུ་དམར་པོ་ཞིག་གིས་སྐད་སྙན་པའི་ངག་གིས་འདི་སྐད་ཟེར།  ང་བྱིས་པའི་རྫུན་ཚིག་མ་ཡིན་ཏེ།  །དུས་དེང་སང་སློབ་དཔོན་འགའ་ཞིག་གིས།  །སྒོ་མེད་པའི་སྒོ་གསུམ་སྣང་ཙམ་ལ།  །དོན་མི་ཤེས་གསུམ་དུ་བཏགས་པ་འཆད།  །ངས་དེ་ཕྱིར་དེ་དང་མཐུན་པར་བཤད།  །ཁྱོད་སྒོ་གསུམ་དབྱེར་མེད་སྣང་ཙམ་དུ།  །ཐག་ཆོད་པའི་རྟོགས་པ་ཨ་ལ་ལ།  །འོ་དེ་ཡིན་རྡོ་རྗེ་གསུམ་གྱི་ངང་།  །དབྱེར་མེད་དུ་རྫོགས་པ་ཁྱོད་རེ་བདེན།  །ད་སྒོ་གསུམ་སེམས་སུ་རྟོགས་ནའང་།  །སེམས་ཞེས་བྱའི་ཀུན་བྱེད་མཁན་པོ་དེ།  །གཟུགས་དབྱིབས་དང་ཁ་དོག་ཇི་ལྟར་འདུག།  ཚུལ་ཤེས་ན་དཔྱོད་ལྡན་ཁྱོད་ལ་ཟེར།  །ཞེས་ཟེར་ཞིང་འཕུར་སོང་།  དེ་ནས་ཡང་བྲག་དེ་ལ་རྒྱབ་གཏད་ནས་བསྡད་པས་རེ་ཞིག་གི་ཚེ་ནམ་མཁའ་སྟོང་པའི་དབྱིངས་ནས་སྒྲ་འདི་སྐད་ཅེས་གྲགས་སོ།  །སེམས་སྟོང་པ་ཉིད་དོ།  །སྟོང་པ་ཉིད་ལ་གཟུགས་དང་ཁ་དོག་མེད།  སྒྲ་མེད།  དྲི་མེད།  རོ་མེད།  རེག་བྱ་མེད།  ཆོས་མེད་དོ།  །ཞེས་པ་ལ་བློས་གཞིག་ཅིག།  ཅེས་ཟེར་བ་ལ་བློས་གཞིག་ཅིང་བརྟག་དཔྱད་བཏང་བས་ཡུལ་མེད་སྟོང་ཁྱབ་ཀྱི་ངོ་བོར་མཐོང་ཞིང་ཤེས་སོ།  །འོན་ཀྱང་སྒོམ་ཚུལ་ཇི་ལྟར་ཡིན་མ་ངེས་པས་སེམས་གཏད་སོ་མེད་པར་ཡོད་པའི་སྐབས་ཞིག་ན།  ལོ་དེའི་ཧོར་ཟླ་བཅུ་གཉིས་པའི་ཚེས་བཅུའི་ནུབ་སྔར་གྱི་ཁྲག་གི་ཆུ་ཀླུང་ཆེན་པོ་དེ་འོད་མཐིང་ནག་ཆུ་ཀླུང་དྲག་པོ་ལྟ་བུར་བདག་གི་སེམས་ནམ་མཁར་གྱུར་བའི་ཀློང་ནས་འབབས་པ་ལ་སྣང་བ་ཐམས་ཅད་ཐིམ་འགྲོ་བའི་ཉམས་ཤིག་ཤར།  དེ་ནས་རེ་ཞིག་གི་ཚེ་ཨོ་རྒྱན་མཚོ་སྐྱེས་རྡོ་རྗེ་ཡིན་སྐད་པའི་གཞོན་ནུ་སྔོན་པོ་གོས་སྔོན་གྱོན་པ་ཞིག་གིས།  ཁྱོད་སྣང་ཉམས་འདི་ལ་ངོ་མཚར་རམ་གསུངས་པའི་ལན་དུ་ངས་འདི་ལྟར་ཞུས།  སྣང་ཉམས་འདི་ཐོག་མར་ཁྲག་ཏུ་སྣང་བས་འཇིགས་སྐྲག་ཤར།  བར་དུ་མུན་པ་ནག་པོའི་སྣང་ནས་སེམས་ཨ་ཐང་ཆད།  མཐའ་མ་འཇའ་རུ་སྣང་།  ད་ལྟ་འོད་མཐིང་ཆུ་ཀླུང་འབབས་པ་ལྟ་བུར་སྣང་བ་འདིའི་ངང་ཚུལ་ལ་བརྟག་ན།  དཔེར་ན་ནམ་མཁའ་ལས་འཇའ་ཚོན་སྣང་བ་དང་།  ཆུ་ལས་གཟུགས་བརྙན་སྣང་བ་ལྟར།  སྣང་བ་ཐམས་ཅད་ནམ་མཁའ་ལས་གཞན་དུ་མེད་པར་འདུག་སྙམ་མོད་ཀྱི།  ནམ་མཁའ་ནི་སྟོང་ཧད་སྐྱོན་ཡོན་མེད་པ་ཞིག་ཡིན་འདུག་པས་ཇི་ལྟར་ཡིན།  སེམས་ཞེས་བྱ་བ་འདི་དཔེར་ན་མེ་མེད་ན་མེ་སྟག་མི་འབྱུང་བ་དང་།  ཆུ་མེད་ན་ཆུ་སྒྲ་དང་གཟའ་སྐར་གྱི་གཟུགས་བརྙན་མི་སྣང་བ་ལྟར།  སེམས་ལ་གཞི་ཞིག་མེད་ན་སྣང་བ་དང་རྣམ་པར་རྟོག་པ་འཆར་དོན་མེད།  སེམས་འདི་ལུས་ལ་ཡོད་ན་ནི་ཕྱིའི་སྣང་བ་འཆར་དོན་མེད་ཅིང་།  རྨི་ལམ་གྱི་སྣང་བ་ས་རྡོ་རི་བྲག་སྲ་འཐས་སུའང་ཅི་ལ་སྣང་།  ནངས་པར་ཡུལ་མེད་དུ་ཡལ་བ་ལ་བརྟག་ན་སེམས་ཀྱི་ཀློང་དུ་སེམས་ཉིད་སྣང་བ་རེད་སྙམ་གྱི་ཞེས་ཞུས་པས།  ལྟ་བ་ནི་ཧ་ལམ་ཞིག་རྟོགས་འདུག་མོད་ཀྱི།  ཉམས་ལེན་སྒོམ་པ་ཤོད་དང་གསུངས་པ་ལ།  བདག་གི་སྒོམ་མི་ཤེས་པས་ཁྱོད་ཀྱིས་ང་ལ་སྒོམ་པ་ཤོད་དང་སྨྲས་པས།  འོ་རིགས་ཀྱི་བུ་སྒོམ་པ་ལ་སློབ་དཔོན་རེ་རེ་བཞིན་ཁྲིད་མཐའ་རེ་ཡོད།  ལ་ལས་ནི་རྣམ་རྟོག་འདི་བཀག་དགོས་ཟེར་ནས་སློབ།  ལ་ལས་ནི་རྣམ་རྟོག་འདི་ལ་བལྟས་ནས་རིག་དགོས་ཟེར།  ལ་ལས་རྣམ་རྟོག་འཚོ་སྐྱོང་བྱེད་ནས་ངན་པ་བཅོས་དགོས་ཟེར།  ལ་ལས་སེམས་དང་ནམ་མཁའ་བསྲེ་དགོས་ཞེས་འཆད་དོ།  །སེམས་རང་བཞིན་པ་ལྟར་མ་བཞག་པའི་སྐྱོན་གྱིས་བདེ་སྡུག་ན་ཚ་འབྱུང་བ་ལ་ཡ་མཚན་དུ་བརྗོད།  ལ་ལས་ནི་སྟོང་པའོ་ཞེས་ཡིད་ཤེས་ཀྱི་འཛིན་པ་ཕྲ་མོ་ཡོད་དགོས་ཟེར་བའང་ཡོད་དེ།  དེ་དག་ལ་མིང་ཇི་ལྟར་བཏགས་ཀྱང་ཡང་དག་པའི་ལམ་ནི་མིན་ངེས་སོ།  །ད་ཡང་དག་པའི་ལམ་དུ་འཇུག་པར་འདོད་ན་ཡར་དག་པའི་ཞིང་དང་མར་མ་དག་པ་འཁོར་བའི་སྣོད་བཅུད་ཐམས་ཅད་ཆོས་ཉིད་ནམ་མཁའ་ཉིད་ལས་མི་གཞན་པར་ནམ་མཁར་རོ་གཅིག་པའི་ངང་ཤེས་པ་ནི་ནམ་མཁའ་མངོན་དུ་གྱུར་པ་ཡིན་པས་དེའི་ངང་དུ་ཞོག་ལ་མ་ཡེངས་ཤིག།  མ་ཡེངས་ཞེས་བྱ་བ་ནི་གཏད་མེད་དང་འཛིན་མེད།  བསྒོམ་མེད་དང་བལྟར་མེད།  འཚོ་མེད་དང་སྐྱོང་མེད་ཞིག་ཡིན།  སྨྲ་བརྗོད་དང་བྲལ་བ་ཞིག་ཡིན།  སྔར་ཇི་ལྟ་བུར་རང་གར་རྒྱ་ཡན་པ་ཞིག་ཡིན་གསུངས།  དེ་ལ་བདག་གིས་རྣམ་རྟོག་འདི་ཇི་ལྟར་བྱེད་ཅེས་དྲིས་པས།  གཞོན་ནུ་ན་རེ།  རྣམ་རྟོག་ནི་དགག་སྒྲུབ་གང་ཡང་མི་རུང་།  གོ་ཚོར་མྱོང་ཞེན་མེད་པར་རང་གར་ཡན་པ་ཡིན་པས་ཤེས་པར་གྱིས་ཤིག་ཅེས་གསུངས་པ་ལ།  བདག་གིས་ནམ་མཁའ་མིག་གིས་མཐོང་བ་ཡིན་ནམ་སྨྲས་པས།  མ་བཅོས་རང་བབས་སུ་མཐོང་བ་དེ་ཡིན་གསུངས།  བདག་གིས་འདི་ལྟར་ནམ་མཁའ་མིག་གིས་མཐོང་བས་མ་ལགས་ཏེ།  སེམས་ཀྱིས་སེམས་མ་མཐོང་ན་ནམ་མཁའ་མངོན་དུ་གྱུར་པས་ཅི་ལ་ཕན་ཞུས་པས།  སེམས་ཀྱིས་སེམས་ལ་བལྟ་བ་ནི་བལྟ་མཁན་བལྟ་ས་གཉིས་སུ་ཡོད་པས་ཤེས་པས་རྣམ་རྟོག་ལ་བལྟ་བ་མི་རྒན་གྱིས་བྱིས་པའི་རྩེད་མོ་ལ་བལྟ་བ་དོན་མེད་པ་དང་མཚུངས་པ་ཡིན།  འཁོར་འདས་ཐམས་ཅད་ནམ་མཁའ་ཉིད་ལས་མི་གཞན་པར་ནམ་མཁའ་ཉིད་དུ་རོ་གཅིག་པའི་ངང་ཚུལ་ཤེས་ཕན་ཆད་ནམ་མཁའ་མིག་གིས་མ་བོར་ཙམ་གྱིས་ཆོག་པའི་དོན་ནི་ཡེ་གནས་ཀྱི་ཤེས་པ་དེ་མིག་ཤེས་སུ་སྣང་ཞིང་མིག་དེ་ཤེས་པ་དེ་ལས་ངོ་བོ་གཞན་དུ་མེད་པའི་ཚུལ།  ཤི་བའི་རོ་ལ་གཟུགས་སྣང་བའི་མིག་མེད།  རྨི་ལམ་དུ་མིག་མེད་པ་ལས་གཟུགས་སྣང་མངོན་དུ་བྱེད།  བར་དོ་བ་ལ་ཡང་མིག་མེད་དེ་གཟུགས་སྣང་མངོན་དུ་བྱེད་པ་དེས་ཤེས།  ཡེ་གནས་ཀྱི་ཤེས་པ་ཡིན།  སེམས་ཅན་ཐམས་ཅད་ཀྱིས་གཞི་མངོན་དུ་མ་གྱུར་པས་འཁྲུལ་པ་ཡིན་པ་ལས།  དེ་ལས་གཞན་པའི་རྣམ་རྟོག་མ་མཐོང་བས་འཁྲུལ་པ་མ་ཡིན་པའི་ཚུལ།  སེམས་ཅན་ཐམས་ཅད་རྣམ་པར་རྟོག་པ་མངོན་ཞེན་ལ་བརྟེན་ནས་འཁྲུལ་པའི་ཚུལ་ལ་ལྟོས་ཤིག།  དེས་ན་རྣམ་པར་རྟོག་པ་ནི་བསྒྱུར་བྱ་ཡིན།  འཁོར་འདས་ཀྱི་ཆོས་ཐམས་ཅད་ནམ་མཁའི་རང་བཞིན་ལས་མ་འདས་པར་ངེས་ཤེས་གཏིང་ནས་འདྲོངས་པ་ཞིག་བྱུང་ཕན་ཆད་ནམ་མཁའ་རྣམ་པར་དག་པ་ཞེས་བྱ་བ་ཡིན་པས་དུས་གསུམ་དུ་ངང་མངོན་དུ་གྱུར་པ་ལས་འདས་མི་རུང་སྟེ།  འདི་ལ་གོམས་འདྲིས་ཀྱི་གནད་ཐེང་ན་མཐར་ཆོས་ཉིད་སྤྲོས་མཐའ་བྲལ་པའི་དབྱིངས་མངོན་དུ་འགྱུར་བ་ནི་དཔེར་ན་ནམ་ལངས་ཚེ་མུན་པ་མེད་པ་ལྟ་བུར་སྒོམ་སྒྲུབ་འབད་རྩོལ་དང་བྲལ་བ་ཞིག་གི་ཐོག་ཏུ་ཕེབས་པར་འགྱུར་ངེས་སོ།  །ཞེས་གསུངས་ཤིང་མི་སྣང་བར་ཡུལ་ལོ།  །དུས་དེ་ནས་བཟུང་སྟེ་བདག་གིས་ནམ་མཁའ་མིག་གིས་མ་བོར་ཙམ་ལ་ལམ་བྱས་ནས་རྩེ་གཅིག་ཏུ་ཉམས་སུ་བླངས་ནས་ཆོས་ཉིད་ཕྱོགས་མཐའ་དང་བྲལ་བའི་དབྱིངས་ཐོག་ཏུ་ཕེབས་ནས་རྟོགས་པ་ཀློང་བརྡོལ་བ་ཡིན།  འཁོར་འདས་གང་ལས་ཆོས་ཀུན་ཡོངས་སྣང་ཞིང་།  །སྤྲོས་པའི་ཆོས་སོ་ཅོག་དང་རྣམ་བྲལ་བ།  །གདོད་མའི་གཞི་དབྱིངས་ནམ་མཁའི་ངོ་བོ་ཉིད།  །ནམ་མཁའ་ཉིད་ལས་གཞན་གྱི་དཔེས་མི་མཚོན།  །བདེ་བར་གཤེགས་པའི་ཤེར་ཕྱོགས་མདོ་ལས་ཀྱང་།  །ཤེས་རབ་ཕ་རོལ་ཕྱིན་ལ་རྣལ་འབྱོར་དུ།  །བྱེད་ན་ནམ་མཁའ་རྣལ་འབྱོར་བྱེད་དོ་ཞེས།  །གསུངས་པའི་དོན་གྱི་མཐར་ཐུག་དགོངས་པས་རིག།  ཇི་ལྟར་ཕྱི་རོལ་ཇི་བཞིན་ནང་དེ་བཞིན།  །ཕྱི་ནང་གང་ཡིན་ནང་གི་རང་གདངས་ཏེ།  །ནང་གདངས་གང་ཡིན་ཕྱི་རོལ་ལྟ་བུར་མངོན།  །ཐ་དད་ཆོས་སུ་མིང་བརྡས་སྒྲོ་རུ་བཏགས།  །སྨྲ་བསམ་བརྗོད་མེད་བརྗོད་པས་ཚུལ་བྱས་ཤིང་།  །མཚོན་མེད་དོན་དེ་མཚོན་པས་ཡོངས་མཚོན་པ།  །དུས་གསུམ་རྒྱལ་རྣམས་ཐབས་ལ་མཁས་ཚུལ་ཏེ།  །དོན་དམ་དབྱིངས་ལ་དཀྲི་བའི་འཇུག་སྒོ་ལགས།  །ཡེ་རིག་ཡུལ་འཛིན་ཤེས་པར་འཕོས་པ་ལ།  །རིག་རྩལ་ཤེས་རབ་ཆེན་པོས་རྒྱས་ཐེབ་ན།  །མིག་དབྱིངས་ཀ་ཏི་ཤེལ་གྱི་གསང་ལམ་ནས།  །ཕྱི་ནང་དབྱེར་མེད་སྟོང་པའི་དེ་ཉིད་རིག།  ཐེག་མཆོག་རྒྱལ་པོའི་གཏམ་གྱི་སེང་གེའི་སྒྲས།  །བློ་དམན་རི་དྭགས་ཚོགས་རྣམས་སྐྲག་བྱེད་དེ།  །ཤིན་ཏུ་ཟབ་པར་གྱུར་པའི་ཆོས་ཚུལ་ལ།  །ཕལ་གྱིས་བརྒྱུད་མར་རྒོལ་བ་ཆོས་ཉིད་ཡིན།  །ནང་གི་དམ་པ་ཡེ་གནས་ཆོས་སྐུ་དེ།  །རང་གི་ཡེ་ཤེས་མིག་གིས་མཐོང་བ་ལས།  །གཞན་པའི་དོན་གྱི་ཐབས་ཚུལ་འགའ་མཆིས་ན།  །ཟབ་ཞི་སྤྲོས་བྲལ་རྟོགས་དཀར་གསུངས་པ་ཅི།  །དེ་ནས་ལོ་ཁྱིམ་བཅོ་བརྒྱད་ལ་བབས་པའི་དབྱར་ཟླ་འབྲིང་པོའི་ཚེས་བཅུའི་ཉིན་མོ་དགུང་ཐུན་གྱི་མཚམས་སུ་ཟོ་ལག་བཟུང་སྟེ་ཆུ་ལེན་དུ་ཕྱིན་པ་ན་ནམ་མཁའ་ནས་གཏོར་མ་ཞིག་ཟོ་ལག་གི་ནང་དུ་ལྷུང་བྱུང་བས་ནམ་མཁར་གྱེན་དུ་བལྟས་པས་བྱ་རོག་ཞིག་འཕུར་འདུག་པ་མཐོང་བས་དེས་འཕང་བར་ཤེས་ཤིང་དངོས་གྲུབ་ཀྱི་པྲ་ལྟས་སུ་གོ་ནས་གནས་གསུམ་དུ་གཏུག་སྟེ་ཟོས།  དོ་ནུབ་མཁའ་འགྲོ་མ་གསལ་ཁྱབ་དབང་མོ་ཡིན་ཟེར་བའི་བུ་མོ་ཞིག་ན་རེ་ཁར་སང་གི་གཏོར་མ་དེ་ནི་བལ་ཡུལ་ཤིང་ཀུན་གྱི་ཚལ་ནས་བལ་པོ་སུ་ཁ་ཤྲཱི་ཞེས་བྱ་བའི་སྒྲུབ་གཏོར་མགོན་པོ་བྱ་རོག་གདོང་ཅན་ལ་མཁའ་འགྲོ་རྡོ་རྗེ་ཕག་མོས་བསྐུར་བ་ཡིན་ཏེ་ཐུན་མོང་གི་དངོས་གྲུབ་ངེས་པར་ཐོབ་ཟིན་པ་ཡིན་པས་ཁྱོད་དགའ་བར་གྱིས་ཤིག་ཅེས་ཟེར་ཞིང་མི་སྣང་བར་ཡལ།  ལོ་ཁྱིམ་དེའི་དགུན་ཟླ་ར་བའི་ཚེས་བཅུའི་ཉིན་ཕྱུགས་རྫི་ལ་ཕྱིན་པའི་ལམ་ཁ་ཞིག་ཏུ་རྡོའི་རིལ་བུ་ཡུངས་འབྲུ་ཙམ་དགུ་རྡོ་ཕ་ཝང་ཞིག་གི་ཐོག་ཏུ་སྔོ་ཧྲིལ་ལེ་འདུག་པ་མཐོང་པའི་མོད་ལ།  ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧོཿ ཞེས་པས་གནས་ལྔར་གཏུག་སྟེ་རོལ་པར་བྱས།  དོ་ནུབ་མཁའ་འགྲོ་ནམ་མཁའི་དབྱིངས་ཕྱུག་མ་ཡིན་ཟེར་བ་ཞིག་གིས་འདི་སྐད་ཟེར།  ཡེ་ཡེ།  ཨ་མའི་བུ་ཆུང་ཉོན་ཅིག།  ཐེག་པའི་རྣམ་གྲངས་དུ་མ།  །དོན་ཀུན་འདུས་པའི་ཀློང་མཛོད།  །དེ་དག་རྫོགས་པ་ཆེན་པོ།  །ཐིག་ལེ་དགུ་རུ་སྣང་བ།  །ཁྱོད་ལ་ཨ་མས་གནང་ཡོད།  །དངོས་གྲུབ་ཡིན་པར་ཤེས་པའི།  །བུ་ཆུང་ཤེས་རབ་ཅན་ཁྱོད།  །བླ་མེད་མཆོག་གི་དངོས་གྲུབ།  །ངེས་པར་ཐོབ་པ་ཡིན་ནོ།  །ད་ནི་སྒོམ་པ་ཟབ་མོ།  །གནད་དུ་བསྣུན་པར་ནུས་ན།  །དགོངས་པ་ཀློང་དུ་བརྡལ་བའི།  །དགོངས་གཏེར་སྐོར་གསུམ་རྡོལ་ནས།  །འགྲོ་དོན་རྒྱ་ཆེར་འགྲུབ་འོང་།  །ཞེས་ཟེར་ཞིང་མི་སྣང་བར་ཡལ་ལོ།  །ཡང་ལོ་ཁྱིམ་དེའི་དགུན་ཟླ་ཐ་ཆུང་གི་ཚེས་བཅོ་ལྔའི་ཉིན་སྦྱིན་བདག་མགོན་བསྟན་ཞེས་བྱ་བའི་ཀློག་འདོན་དུ་ཡོད་པའི་སྐབས་ཤིག་བུད་མེད་རྒན་མོ་ཞིག་གིས་ཁྱོད་ལ་ཟས་འདི་སྦྱིན་གྱི་ལྷག་མེ་དུ་རོལ་ཅིག་ཟེར་ནས་གྲོ་མ་སྤར་གང་སྟེར་བྱུང་བ་བདག་གིས་ཟ་གྲབ་བྱེད་དུ་ཡོད་པའི་སྐབས་སུ།  མི་དམར་རྟ་དམར་ལ་ཞོན་པ་ཞིག་གིས་མདུང་དར་གྱིས་བདག་གི་ལག་སྐེ་རུ་བརྒྱབ་ནས་ཐར་གྱིས་གཏོར་བ་ལ་བདག་ཞེ་སྡང་སྐྱེས་ཏེ་ཁྱོད་ཀྱིས་ཅི་ཡིན་ཞེས་ང་རོའི་སྐད་ཀྱིས་སྨྲས་པས།  ཁོ་ན་རེ།  མོ་འདྲེས་ནད་ཀྱི་ས་བོན་འདེབས་པ་ཡིན་པས་ཟ་ཨེ་སྲིད་ཟེར།  བདག་གིས་ཁྱོད་སུ་ཡིན་བྱས་པས།  ང་ནི་བཙན་རྒྱལ་སྲོག་ལེན་དམར་པོ་ཡིན།  ཁྱོད་ཀྱི་བར་ཆད་སེལ་བའི་ལས་བྱེད་ཡིན་ཟེར།  ངས་ཁྱོད་མཆོད་ན་ཇི་ལྟར་འདོན་སྨྲས་པས།  ང་དམ་མ་བསྒྲགས་པར་བོས་ན་འོང་བའི་སྐབས་མེད།  དེའི་ཕྱིར་འདི་ལྟར་དམ་སྒྲོགས་ལ་བོས།  །ཧྲཱིཿཞེས་སྲོག་ནས་ཟུངས་ལ།  དད་པ་དང་ནི་དམ་ཚིག་གཉན་པོ་ཡིས།  །གནོད་སྦྱིན་བཙན་རྒྱལ་འཁོར་བཅས་འདིར་གཤེགས་ཤིག།  གསོལ་ལོ་མཆོད་དོ་ཐུགས་དམ་གཉན་པོ་བསྐང་།  །ཅི་འདོད་བསམ་བཞིན་འགྲུབ་པའི་ཕྲིན་ལས་མཛོད།  །ཅེས་བརྗོད་ན་ང་གནས་ནས་སླེབས་འོང་ཞེས་ཟེར་ཞིང་ཉི་མ་ནུབ་ཕྱོགས་སུ་དམར་ཤར་གྱིས་བཞུད་སོང་ངོ་།  །དེ་ནས་ལོ་ཁྱིམ་བཅུ་དགུ་ལ་བབས་པའི་ཚེ་བྲག་ལུང་ཞེས་བྱ་བའི་བྲག་ཕུག་ནང་དུ་སོང་བས་དེའི་ནང་ནས།  བུད་མེད་ན་སོ་རྒན་སོང་ཞིག་གིས་ཁྱོད་གར་འགྲོ་ཅི་ཡིན་ཟེར་བར།  ང་འདི་རུ་ཐུན་ཞིག་བཟུང་ནས་འདུག་འདོད་པ་ཡིན།  ཁྱོད་སུ་ཡིན་དྲིས་པས།  བུད་མེད་ན་རེ།  ང་ནི་གནས་འདིའི་བདག་མོ་བཙན་སྲོག་རྔམ་ཅན་གྱི་བུད་མེད་ཡིན།  ཁྱོད་འདི་རུ་སྡོད་ན་ངས་གསོད་ངེས་པ་ཡིན།  ཞེས་ཟེར་ཞིང་རྒྱབ་ཏུ་མཛུབ་ཚུགས་བྱས་ཏེ་ཕ་ཀི་ནི་ཁྱོད་འཆི་ལྟས་རེད་ཟེར།  བདག་གིས་ཕྱིར་བལྟས་བྱས་པས་སྲེ་མོང་ཞིག་གིས་སྦྲུལ་རོ་ཞིག་དྲུད་ནས་འགྲོ་འདུག་པས་བསམ་པ་ལ་ང་ཤི་ཡང་གསོད་མཁན་ནི་བུད་མེད་འདི་ཡིན་ངེས་པས་འདི་གསོད་དགོས་སྙམ་དུ་ལག་པ་ལ་བརྙབས་པས་ཡལ་སོང་།  དེ་ནས་བདག་དེར་བསྡད་ཅིང་མདོ་བཟློག་ལན་གསུམ་བྱས་ཚེ་བྲག་གི་ནང་ནས་བྲག་ཆ་ལྟར་སྒྲ་འདི་གྲགས་བྱུང་།  དེ་རུ་མ་འདུག་དང་ལྟས་ངན་བསྟན་པ་རྩེད་མོ་མིན་རེ་ཀན་ཟེར།  ལོ་ཁྱིམ་དེའི་དགུན་ཟླ་འབྲིང་པོའི་ནང་དུ་འཇམ་དཔལ་སྨྲ་བའི་སེང་གེའི་བསྒོམ་བཟླས་ལ་ཞུགས་ཚེ་ཟླ་བ་གཅིག་ཙམ་སོང་བའི་མཐར་རིལ་བུ་རྣམས་འཕེལ་ཞིང་འཕུར་བྱུང་།  དེ་ནུབ་འཇམ་དཔལ་གྱི་ཞལ་མཐོང་ནས་འདི་སྐད་ཅེས།  བུ་ཁྱོད་ཀྱི་ཅི་འདོད་པ་ངས་སྦྱིན་གྱི་གསུངས་པ་ལ།  ངས་ཡི་གེ་མཁས་པ་ཞིག་འདོད་ཀྱི་ཞུས་པས།  ཡི་གེ་ནི་མི་སྐྱ་འགས་ཀྱང་ཤེས་སྲིད་དེ་ཅི་བྱེད་གསུངས།  འོ་ན་ཤེས་རབ་ཞིག་འདོད་ཞུས་པས།  ཀྱཻ།  རིགས་ཀྱི་བུ་ཁྱོད་ཚུར་གསོན་དང་།  །ཀློག་འདོན་མཁས་ཙམ་ཤེས་རབ་མིན།  །འདི་བསླབ་ཤེས་པ་ཐུན་མོང་ཡིན།  །ཤེས་རབ་བྱ་བ་དེ་མ་ཡིན།  །ཆོས་ཉིད་དེ་བཞིན་ཉིད་ཀྱི་ངང་།  །མངོན་གྱུར་སྟོང་ཉིད་དོན་རྟོགས་ན།  །ཤེས་རབ་དོན་གྱི་དམ་པ་ཡིན།  །ང་ཉིད་མི་གཡོའི་ངང་དུ་གནས།  །ཁྱབ་བརྡལ་ཆེན་པོར་སྤྲོས་དང་བྲལ།  །ང་ཉིད་གསལ་ཁྱབ་ཆེན་པོར་བརྡལ།  །ཆོས་ཉིད་ནམ་མཁའི་ཁོར་ཡུག་ལ།  །ཤེས་རབ་ཆེན་པོའི་ཉི་མ་ཡིན།  །ལམ་འབྲས་ཆོས་རྣམས་ཐམས་ཅད་ཀུན།  །ཟད་མེད་ཀློང་ནས་བརྡོལ་པའི་ཚེ།  །ང་ཉིད་སྙིང་ལ་ཞུགས་པ་ཡིན།  །འཁོར་འདས་ཆོས་རྣམས་ཐམས་ཅད་ཀུན།  །རྨི་ལམ་སྒྱུ་མ་ལྟར་མཐོང་ཚེ།  །ང་ཡི་དགོངས་བརྒྱུད་འཕོས་པ་ཡིན།  །སེམས་སྣང་ནམ་མཁའི་རོལ་པ་རུ།  །ཕྱམ་བརྡལ་ཉིད་དུ་རྟོགས་པའི་ཚེ།  །ང་ཡི་དགོངས་པ་འཕོས་པ་ཡིན།  །ཤེས་རབ་ཆེན་པོའི་སྤྱན་ཡངས་པས།  །ནམ་མཁའ་མངོན་དུ་གྱུར་པའི་ཚེ།  །ང་དང་གཉིས་སུ་མེད་པ་ཡིན།  །ཤེས་རབ་ཆེན་པོ་ཁྱོད་ལ་ཐོབ།  །ཡེ་ཤེས་མིག་ཀྱང་ཁྱོད་ཀྱིས་ཐོབ།  །ད་ནི་ང་དང་ཁྱོད་གཉིས་པོ།  །གཉིས་སུ་མེད་པའི་ངང་དུ་ཨ།  །ཞེས་གསུངས་ཤིང་སྒྲུབ་ཐབས་སྔགས་དང་བཅས་པ་གནང་ནས་སྙིང་གར་ཐིམ་པས་ཆོས་ཉིད་ཀྱི་ངང་དུ་ཡུན་ཅིག་འབྱམས་ཀླས་སོ།  །ལོ་ཁྱིམ་ཉི་ཤུ་ལ་བབས་པའི་དཔྱིད་ཟླ་འབྲིང་པོའི་ཚེས་བརྒྱད་ཀྱི་ནུབ་རྨི་ལམ་ན་ཡུལ་ཡངས་པ་ཆེན་པོ་མེ་ཏོག་སྣ་ཚོགས་རྒྱས་པའི་ཚལ་ཞིག་ཏུ་རིན་པོ་ཆེ་དུང་ལས་གྲུབ་པའི་མཆོད་རྟེན་ལ་མཁའ་འགྲོ་མ་མང་པོས་བཀུར་སྟི་བྱེད་ཀྱིན་འདུག་པའི་གམ་དུ་སླེབས།  དེའི་ཚེ་བུམ་སྒོའི་ནང་དུ་བཅོམ་ལྡན་འདས་མགོན་པོ་མི་བསྐྱོད་པ་ཡིན་ཟེར་བའི་བླ་མ་ཆོས་གོས་རྣམ་གསུམ་ཀླུབས་ཤིང་ཕྱག་གཉིས་ས་གནོན་དང་མཉམ་བཞག་མཛད་པ་ཞིག་ཞལ་ནས་ཅིའང་མི་གསུང་བར་བཞུགས་པ་ལ།  སྐུ་ལས་སྒྲ་བྲག་ཆ་ལྟ་བུར་རང་བྱུང་དུ་གྲགས་པ་ནི།  ཨ་ཨེ།  འདུས་བྱས་ཆོས་རྣམས་ཐམས་ཅད་ཀུན།  །སྒྱུ་མ་སྒྱུ་མའི་རྫུན་རིས་མང་།  །སྒྱུ་མས་སྒྱུ་མཁན་བསླུས་པའི་དཔེ།  །སྨིག་རྒྱུ་རྒྱུ་རྐྱེན་ཚོགས་པའི་འཕྲུལ།  །རི་དྭགས་ཆུ་རུ་རློམས་པའི་དཔེ།  །རྨི་ལམ་སྣང་བ་སྣ་ཚོགས་པ།  །རྨི་མཁན་དངོས་ཞེན་འཁྲུལ་པའི་དཔེ།  །གཟུགས་བརྙན་མཐོང་བ་མངོན་སུམ་ཡང་།  །འཆར་ཡུལ་ལས་ནི་གཞན་མ་གྲུབ།  །དྲི་ཟའི་གྲོང་ཁྱེར་ཆེན་པོ་ཡང་།  །རང་སྣང་ལས་ནི་གཞན་མ་གྲུབ།  །བྲག་ཆ་སྣང་བར་གྱུར་བ་ཡང་།  །ཀི་སྒྲ་གཅིག་ལས་གཞན་མ་ཡིན།  །ཆུ་ལས་ཆུ་ཟླ་སྣང་ན་ཡང་།  །ཆུ་ཉིད་ལས་ནི་ཟླ་བ་མིན།  །ནམ་མཁར་འཇའ་ཚོན་སྣང་བ་ཡང་།  །ནམ་མཁའ་ཉིད་ལས་གཞན་མ་གྲུབ།  །མིག་ལ་རབ་རིབ་སྣང་བ་དེ།  །མིག་རྐྱེན་ལས་ནི་གཞན་མ་ཡིན།  །མེ་ལས་མེ་འོད་སྣང་བ་ཡང་།  །མེ་ཉིད་ལས་ནི་གཞན་མ་ཡིན།  །ང་ལས་ཕ་རོལ་སྣང་བ་ཡང་།  །བདག་ཉིད་ལས་ནི་གཞན་མ་ཡིན།  །གཞི་ལས་གཞི་སྣང་མཆེད་པ་ཀུན།  །གཞི་ཉིད་ལས་ནི་གཞན་མ་ཡིན།  །སེམས་ལ་སྣང་བའི་ཆོས་སོ་ཅོག།  སེམས་ལས་དངོས་པོ་གཞན་མ་ཡིན།  །ནམ་མཁའ་ནམ་མཁར་འཛིན་པས་འཆིང་།  །གཞི་ཞེས་གཞན་དུ་འཛིན་པས་འཆིང་།  །རྣམ་རྟོག་སེམས་ཀྱི་ཆོ་འཕྲུལ་ལ།  །མངོན་ཞེན་དགྲ་རུ་འཛིན་པས་འཆིང་།  །རྣམ་རྟོག་གནས་གྱུར་ཡེ་ཤེས་ལ།  །འཚོ་སྐྱོང་བཅོས་དང་འགོགས་པས་འཆིང་།  །ཨ་ནི་ནམ་མཁའ་རྣམ་དག་དབྱིངས།  །ཨ་ནི་སྐྱེ་དང་འགགས་པ་མེད།  །ཆོས་དབྱིངས་ཡེ་ཤེས་སྙིང་པོ་ལ།  །བརྗོད་པ་ཙམ་ནས་ཁྱབ་ཅིང་བརྡལ།  །བརྗོད་གཞི་ཀུན་ཏུ་ཨ་རང་བྱུང་།  །ཁྱོད་དང་ང་གཉིས་གཉིས་སུ་མེད།  །བཟང་ངན་རེ་དོགས་སྤང་བླང་མེད།  །ཡོད་དང་མེད་པའི་ཐ་སྙད་མེད།  །ཐོབ་ཤོར་མེད་དོ་ཆོས་སྐུའི་དབྱིངས།  །དོན་འདི་རྟོགས་ན་རྣལ་འབྱོར་ཡིན།  །ཞེས་གསུངས་ཤིང་བདག་ལ་ཐིམ་པའི་སྣང་བ་བྱུང་ངོ་།  །རང་སྣང་སྟོན་པ་རྒྱལ་བ་མི་བསྐྱོད་པས།  །ངག་གི་རྩོལ་བས་འདུ་བྱེད་ཀྱིས་མིན་པར།  །གསལ་སྟོང་སྐུ་ལས་གྲགས་སྟོང་འགགས་མེད་སྒྲས།  །སྣ་ཚོགས་དཔེ་ཡིས་ཀུན་རྫོབ་རྟེན་འབྱུང་ཚུལ།  །སྐྱེ་མེད་ཡི་གེས་གནས་ལུགས་དོན་བསྟན་པས།  །སྣང་སྟོང་གཉིས་མེད་བཅིང་དང་གྲོལ་མེད་པའི།  །ནང་དབྱིངས་གཞི་དང་གཞི་སྣང་གྲོལ་འཁྲུལ་ཚུལ།  །ཇི་བཞིན་རྟོགས་ནས་རྟག་ཆད་གཡང་ལས་གྲོལ།  །སྐུ་གསུང་ཐུགས་དང་སྒོ་གསུམ་དབྱེར་མེད་གྱུར།  །ཧོར་ཟླ་བཅུ་གཉིས་པའི་ཚེས་ལྔའི་ནུབ་རྨི་ལམ་ན་བུད་མེད་དམར་མོ་ཞིག་གིས་སང་ཉིན་མཐོང་བ་མངོན་སུམ་པ་ཞིག་འབྱུང་རྒྱུ་ཡིན།  ཁྲོ་དང་ཐབ་ཆ་ལ་བཅག་གྲུམ་ཆེན་པོ་བྱེད་འོང་ཟེར་ནས་ཡལ་སོང་།  སང་ཉིན་སྦྱིན་བདག་མགོན་བསྟན་གྱི་སྲིང་མོ་སྐྱ་རིས་མ་སླེབས་བྱུང་བ་དང་མཉམ་དུ་བྱིས་པ་ཐལ་སྐྱ་ཞིག་བྱུང་ནས་ལྷག་ལྷག་དགོད་ཅིང་སྒྱེད་པུ་གསུམ་གྱི་ཐོག་ཏུ་འཆམས་སྟབས་བྱེད་པ་མཐོང་བས།  བདག་གིས་སྦྱིན་བདག་མགོན་བསྟན་ལ་ཁྱོད་ཀྱི་ཐབ་ཆ་ལ་གཟབ་པར་རེམ་ཞིག།  ཐེའུ་རང་ཞིག་གིས་སྒྱེད་ཐོག་ན་རྩེ་བགད་བྱེད་འདུག་གི་སྨྲས་པས་གཟབ་པར་བྱེད་ངེས་སོ་ཟེར།  དེ་ནས་ཁལ་བཀལ་ཏེ་དེ་ཐོག་ཏུ་ཁྲོ་ཆེ་ཆུང་གསུམ་གཅིག་གི་ནང་དུ་གཅིག་བཅུག་སྟེ་བཅིང་ཐག་ལེན་དུ་ཕྱིན་པ་ན་གཡག་གིས་གློ་མཆོང་ཞིག་བྱས་ནས་ཁྲོ་གསུམ་པོ་རྡོ་ལ་བརྒྱབ་ནས་གཏོར་ཐལ།  དེ་ནས་རང་ལོ་ཉེར་གཅིག་ལ་བབས་པའི་ཧོར་ཟླ་དང་པོའི་ཚེས་བཅུ་གསུམ་གྱི་ནུབ་མཁའ་འགྲོ་མ་སྔོན་མོ་དར་དཀར་གྱི་ཨང་རག་གསོལ་བ་རིན་པོ་ཆེའི་ཕྲེང་བ་མང་པོའི་རྒྱན་གྱིས་བརྒྱན་པ་ཞིག་བདག་གི་མདུན་དུ་སླེབས་མ་ཐག་མཁའ་ལ་ཉི་མ་ཤར་བ་བཞིན་དུ་སྣང་བ་གསལ་ཞིང་ཁྱོན་ཡངས་པའི་ཡུལ་མེ་ཏོག་སེར་པོས་ས་གཞི་གང་བའི་འོད་ནམ་མཁའ་ལ་འཕགས་པའི་སར་བུད་མེད་རྒན་གཞོན་གྱི་ཚོགས་མང་པོས་གླུ་འདི་ལྟར་གྱེར་འདུག།  ཡེ་ཡེ།  ངེད་མི་མིན་མཁའ་འགྲོའི་གླིང་ན།  །ཁྱོ་མེད་ཞེ་རེ་རྨོངས་ཀྱི།  །སྲིད་པའི་སྡིག་གྲོགས་མི་མཁོ།  །ཟག་མེད་བདེ་བ་སྟེར་བའི།  །ཐབས་མཆོག་བདེ་ཆེན་རྒྱལ་པོ།  །རྙེད་རྒྱུ་ཨེ་ཡོད་སྙམ་ཀྱང་།  །རེ་བའི་རྡོས་ཐག་ཆད་ཐལ།  །ཐབས་མཆོག་བདེ་ཆེན་དབང་པོར།  །བདེ་སྟོང་སྙོམས་པར་ཞུགས་ན།  །གཅེས་པའི་བུ་ཞིག་རྙེད་བསམ།  །འཁོར་བའི་དཔྱང་རྡོའི་བུ་ཚ།  །ཀུན་ལ་ཡོད་ཀྱང་དགོས་མེད།  །ཤེས་རབ་རིག་པའི་བུ་མཆོག།  སུ་ལ་མེད་པས་ཨེ་རྙེད།  །རྙེད་ན་ནམ་མཁའ་མཛོད་ཀྱི།  །དགའ་སྟོན་ཆེན་པོ་ལོས་བྱེད།  །ཅེས་ཡིད་འཕྲོག་པ་ཙམ་དུ་སྙན་པའི་གླུ་རིང་ལེན་ཅིང་།  ཡང་མཁའ་འགྲོ་མ་ཞིག་གི་ངག་ནས་འདི་སྐད་གླུ་རིང་ལེན་འདུག་གོ།  ཡེ་ཡེ།  དགའ་དགའ་མཁའ་འགྲོའི་གྲོང་ཁྱེར།  །སྐྱིད་སྐྱིད་མཁའ་སྤྱོད་གླིང་ཡིན།  །མེད་མེད་གཞན་ན་མེད་དང་།  །ཡོད་ཡོད་རང་ལ་རྫོགས་ཡོད།  །གོ་གོ་གཏིང་ནས་གོ་དགོས།  །ཤེས་ཤེས་དོན་གྱིས་ཤེས་དགོས།  །རྟོགས་རྟོགས་ངང་གིས་རྟོགས་དགོས།  །རིག་རིག་མངོན་དུ་གྱུར་དགོས།  །གྲོལ་གྲོལ་རང་སར་གྲོལ་དགོས།  །མི་མིན་མཁའ་འགྲོའི་གླུ་འདི།  །མ་འོངས་དུས་སུ་བརྡ་ཡིན།  །མ་བརྗེད་རབ་ཏུ་མ་བརྗེད།  །ཁྱབ་ཁྱབ་ཀུན་ཏུ་ཁྱབ་པ།  །བརྡལ་བརྡལ་ཀུན་ཏུ་བརྡལ་བ།  །དག་དག་ཀ་དག་མཁའ་ལས།  །གྲོལ་གྲོལ་ཡེ་གྲོལ་མ་ང་།  །གྲུབ་གྲུབ་ལྷུན་གྲུབ་སྒྱུ་མ།  །རང་རང་གཟུགས་བརྙན་ངོ་མ།  །དོན་དོན་ཁྱོད་ཀྱི་དོན་དུ།  །བཤད་བཤད་ཚིག་གིས་བཤད་ཡོད།  །ད་ནི་ཚིག་འདི་ཉོན་དང་།  །དེང་དུས་དཔག་བསམ་ལྗོན་ཤིང་།  །ཡལ་ག་ལོ་འདབ་ཕྲ་ཞིང་།  །འབྲས་བུ་མེ་ཏོག་མ་སྨིན།  །ཤིང་གཞན་ཞིག་དང་ནོར་བས།  །སུ་ལ་མཁོ་དགོས་མེད་ཀྱང་།  །ཤིང་ལ་སྐྱེ་འགགས་མི་འབྱུང་།  །རྩལ་ལྡན་སེང་གེ་དཀར་མོ།  །ཤར་གྱི་ཕྱོགས་སུ་མཆོང་ཚེ།  །བསྡོངས་ཟླ་སེང་ཆུང་ཟུང་དང་།  །འཕྲད་ནས་རང་སྐད་འདོན་པ།  །སྙན་པའི་དབྱངས་སུ་མངོན་ནས།  །སྡེར་ཆགས་ཁྱུ་ཚོགས་འགུགས་སྲིད།  །རབ་མཐོ་གངས་དཀར་རྩེ་རུ།  །མ་བགྲོད་ངང་གིས་སླེབས་འོང་།  །སྡེར་བཞི་གངས་ལ་བགྲད་ཅིང་།  །སྤྱན་མིག་སྟེང་དུ་གཟིགས་པའི།  །རྩལ་ཆེན་གྲོགས་བཟང་གཉིས་འཛོམ།  །བྱ་བྲལ་བྲག་སྐྱིབ་འཛིན་ཅིང་།  །ཕྲུ་གུ་གཟན་གྱིས་སྐྱོངས་ཏེ།  །ནམ་མཁར་དལ་གྱིས་འགྲོ་བའི།  །ཐང་དཀར་བཅུ་ཕྲག་གཉིས་འབྱུང་།  །རྒྱ་སྟག་ནགས་ཚལ་འཛིན་ཅིང་།  །དཔའ་བའི་རྔམས་སྟབས་མིག་གིས།  །ཡངས་པའི་ཡུལ་ལ་བལྟ་ཞིང་།  །རོ་བརྒྱའི་ཟས་བཅུད་སྤྱོད་པའི།  །རྩལ་ཆེན་བཅུ་ཕྲག་གསུམ་ཡོད།  །གསུང་སྙན་ཁུ་བྱུག་སྔོན་མོ།  །སྤང་ལྗོངས་གཟན་ཚོལ་བྱེད་ཅིང་།  །ལྗོན་ཤིང་རྩེ་རུ་ཕྱིན་ཏེ།  །གསུང་སྙན་སྒྲོགས་པ་བཞི་འབྱུང་།  །ནོར་བུ་ལག་ཏུ་ཐོགས་ནས།  །རྒྱ་མཚོའི་གཏིང་ནས་རྩལ་རྫོགས།  །ནམ་མཁའི་ཁམས་སུ་སླེབས་ཏེ།  །ས་གསུམ་སྐད་ཀྱིས་འགེངས་པའི།  །གཡུ་འབྲུག་སྔོན་མོ་བདུན་བྱུང་།  །དུག་ལ་ཁ་ཟས་བྱེད་ཅིང་།  །མདངས་ལྔ་འོད་དུ་འབར་བའི།  །རྨ་བྱ་མཛེས་ལྡན་བཅུ་དྲུག།  ལུས་མེད་མཁའ་འགྲོའི་མཛའ་ཡིན།  །སྲིད་པའི་འདམ་རྫབ་ཁྲོད་ནས།  །ནོར་བུ་རིན་ཆེན་རྙེད་དེ།  །བཀུར་སྟི་ཆེན་པོ་བྱེད་འབྲས།  །དབུལ་ཕོངས་འབྱོར་རྒུད་སེལ་བའི།  །ཕྱུག་པོ་ནོར་ལྡན་བརྒྱ་ཡོད།  །གསེར་གྱི་རྡོ་རྗེ་རྩེ་དགུ།  །ད་དུས་འཕྱར་བའི་དུས་མིན།  །ལྷོ་ཕྱོགས་བདུད་ཀྱི་ཕོ་ཉས།  །བདུད་ཀྱི་དཔུང་ཚོགས་བསགས་ཏེ།  །ཡུལ་མང་མི་བདེའི་ལ་ཡོག།  ལས་ཀ་དམག་འཁྲུག་གཡུལ་འགྱེད།  །འཚུབས་མ་བཞིན་དུ་ལངས་ཚེ།  །དུས་ལ་བབ་ལྟས་ངེས་པ།  །ཁར་སང་ཁྱོད་ཀྱིས་བྲིས་པའི།  །ཡི་གེ་གཞན་ལ་མ་སྟོན།  །ཝ་དང་སྤྲེའུའི་ཁྲོད་དུ།  །མི་ཡིས་ཀི་སྒྲ་མ་སྒྲོགས།  །ཀུན་གྱི་སྙིང་ལ་ཕོག་ནས།  །རིང་པའི་ཡུལ་དུ་བྲོས་འགྲོ།  དེ་ལྟར་སེམས་ལ་ཞོག་དང་།  །རིམ་གྱིས་མཐོ་སར་སླེབས་ཡོང་།  །ལུས་མེད་མཁའ་འགྲོའི་གླིང་འདི།  །ཡུལ་མེད་ཟང་ཐལ་ཆེན་པོར།  །མི་གནས་མི་འགགས་སྤྲོས་བྲལ།  །རྨི་ལམ་བཞིན་དུ་སད་འགྲོ།  །ཞེས་ཟེར་ཞིང་སྒྱུ་མའི་འཁྲུལ་འཁོར་ལྟ་བུར་ཞིག་སོང་།  ལོ་ཁྱིམ་དེའི་དབྱར་ཟླ་ཐ་ཆུང་གི་ཚེས་བཅུའི་ཉིན་གསེར་གྱི་བྲག་ལུང་ཐང་གི་ཆུ་འགྲམ་ན་མེ་ཏོག་རབ་ཏུ་རྒྱས་པའི་ཚལ་ཞིག་ཏུ་ཕྱིན་ནས་བསྡད་ཡོད་པའི་ཚེ་ཡིད་ལ་དགའ་བདེའི་ཉམས་བསམ་གྱིས་མི་ཁྱབ་པ་ཤར་བའི་སྐབས་དེར་སྦྲང་བུ་ཞིག་གིས་མེ་ཏོག་ལ་འཁོར་ཞིང་གླུ་འདི་ལེན་པའི་སྣང་བ་བྱུང་།  བཾ་བཾ།  སྤང་ལྗོངས་མེ་ཏོག་གི་ཚལ་དུ།  །གསེར་གྱི་སྦྲང་ཆུང་ངའི་སྐྱིད་པ།  །སྐྱིད་ཀྱང་ངེས་རྟག་རང་མི་འདུག།  སྟོན་གྱི་རྒྱལ་མོ་ཁོ་སླེབས་ཡོང་།  །རབ་རྒྱས་པད་ཚལ་ནི་ཡལ་འགྲོ།  །སྤང་རྒྱན་སྔོན་མོ་ཁོ་སླེབས་ཀྱང་།  །ནམ་ཕུག་ཐུབ་པར་ནི་མ་གནས།  །འབུ་སྲིན་སྔ་མ་ནི་ཡལ་འགྲོ།  །ཤ་སྦྲང་ནག་ཆུང་ཁོ་ལུས་ཀྱང་།  །ནམ་ཕུག་ཐུབ་པ་ནི་མི་འདུག།  སྔར་གྱི་མི་རྣམས་ནི་ཤི་སོང་།  །དྭ་ཕྲུག་ཁ་དམར་ཁྱོད་ལུས་ཀྱང་།  །ནམ་ཕུག་ཐུབ་པ་ནི་མི་འདུག།  ཁྲི་སྡེའི་རྒྱལ་ས་ལ་འཁོད་ཀྱང་།  །ཡུལ་གྱི་སྡུག་ཁུར་ཞིག་རེད་ན།  །བླ་ཆེན་ཐོབ་ཐང་ཞིག་བྱུང་ཡང་།  །འཁོར་བའི་ཁ་དཔོན་ཞིག་རེད་ན།  །ཕྱུག་པོ་ནོར་ལྡན་ཞིག་བྱུང་ཡང་།  །དཀའ་ཚེགས་བཟོད་མེད་ཞིག་རེད་ན།  །གཙོ་བོ་ཁ་མཁས་ཞིག་བྱུང་ཡང་།  །དལ་མེད་རྣམ་གཡེང་ཞིག་རེད་ན།  །སྤྲང་པོ་ནོར་མེད་ཞིག་བྱུང་ཡང་།  །བཀྲེས་སྐོམ་བཟོད་མེད་ཞིག་རེད་ན།  །ཟླ་གྲོགས་བུད་མེད་ལ་བྱས་ན།  །དགྲ་ཟླ་འཐབ་ཡ་ཞིག་རེད་ན།  །གཅེས་སྤྲས་བུ་ཕྲུག་ལ་བྱས་ན།  །ཇག་པ་ནོར་འཕྲོག་ཞིག་རེད་ན།  །ཆོས་པ་བྱར་མེད་ཞིག་བྱུང་ན།  །འདི་བདེ་ཕྱི་སྐྱིད་ཞིག་རེད་ན།  །གསེར་སྦྲང་སེར་པོ་ངས་བལྟས་ན།  །འདི་ལྟར་འཁོར་བ་ཡི་གྲོང་ཁྱེར།  །མི་རྟག་རྨི་ལམ་དང་འདྲ་མཚུངས།  །ང་ཡི་དགའ་གླུ་དང་རྨོངས་གླུ།  །གྲོགས་པོ་ཁྱོད་ཉིད་ལ་གདམས་ཡོད།  །ང་ནི་མཁའ་སྤྱོད་ལ་ཆས་འགྲོ།  །ངའི་རྗེས་ཁྱོད་ཀྱིས་ཀྱང་སྙོགས་མཛོད།  །ཅེས་ཟེར་ནས་རྒྱང་རིང་པོར་འཕུར་སོང་ངོ་།  །ལོ་ཁྱིམ་དེའི་ཧོར་ཟླ་བདུན་པའི་ཚེས་བཅོ་བརྒྱད་ཀྱི་ནུབ་མཁའ་སྤྱོད་བདེ་བ་ཆེན་པོའི་ཞིང་ཁམས་ཡིན་པར་སྐད་པའི་ཡུལ་ཕྱོགས་ཉམས་དགའ་བའི་ཚལ་དུ་མི་དཀར་པོ་མཛེས་སྡུག་བལྟ་བས་ཆོག་མི་ཤེས་པ་ཞིག་གིས་ཤ་བ་ཕོ་ཆེན་ལ་ཞོན་ཅིང་ཡུ་མོ་དར་གྱི་རྒྱན་ཆ་ཅན་ཞིག་རོལ་དུ་ཁྲིད་ནས་བུ་མོ་མཛེས་མ་རིན་པོ་ཆེས་བརྒྱན་པ་ཞིན་དང་བསྡེབས་ནས་དེར་སླེབས།  དེ་ནས་བདག་ལ་འདི་སྐད་ཟེར་གྱི།  འུ་ཅག་བསྡེབས་ནས་རྒྱ་ནག་རི་བོ་དེ་ཤན་གྱི་རྩེ་རུ་ལྟད་མོ་ལ་ཨེ་འགྲོ་ཟེར་བ་ལ།  བདག་གིས་འགྲོ་བྱས་ནས་ཕྱིན་པ་ན།  རི་བོ་གཅིག་ལ་རྩེ་མོ་ལྔ་ཡོད་པའི་དབུས་ཀྱི་རི་བོ་ཤིན་ཏུ་མཐོ་བའི་རྩེར་སླེབས་ཚེ་མི་དཀར་དེས་ན་རེ།  ཁྱོད་ཀྱིས་སྟེང་དུ་ལྟོས་དང་ཟེར་བ་བཞིན་བལྟས་པས་སྟེང་ཕྱོགས་ཐམས་ཅད་མེ་སྟག་དམར་པོའི་ཆར་པ་འབབས་པ་ལྟར་འདུག།  ཤར་དུ་ལྟོས་དང་ཟེར་པ་བཞིན་བལྟས་པས་མི་ལྤགས་ཀྱི་གུར་ལ་རྒྱུ་མའི་ཆོན་ཐག་ཅན་གྱི་གྲོང་ཁྱེར་ས་གཞི་ཐམས་ཅད་ཁྲག་གིས་དམར་གྱི་ལེ་ཡོད་པ་ཞིག་མཐོང་།  ལྷོ་རུ་ལྟོས་ཟེར་བ་བཞིན་བལྟས་པས་རི་དཀར་པོ་དུང་གི་མདོག་ཅན་གྱི་རྩ་བ་མཚོ་འོ་མ་ལྟ་བུས་བསྐོར་བའི་འགྲམ་ན་ངང་པ་ལ་སོགས་ཆུ་བྱ་སྣ་ཚོགས་རྩེ་ཞིང་མེ་ཏོག་དཀར་པོའི་ཚལ་རྒྱས་པ་རྩེ་མོ་འཇའི་ཁ་དོག་བཞིན་འོད་ལྔའི་ན་བུན་གྱིས་གཡོགས་པ་ཞིག་སྣང་།  ནུབ་ཏུ་ལྟོས་དང་ཟེར་བ་བཞིན་བལྟས་པས་རྒྱ་བོད་མིའི་གྲོང་ཁྱེར་སྣ་ཚོགས་པ་སྣང་།  བྱང་དུ་ལྟོས་དང་ཟེར་བ་བཞིན་བལྟས་པས་གཅན་གཟན་དང་དུག་སྦྲུལ་གྱི་ཚོགས་ལ་མི་སྐྲ་དང་སྨིན་མ་དམར་སེར་སྔོ་ལྗང་དཀར་བ་མང་པོས་ཤ་ཟས་སུ་སྦྱིན་ཅིང་ཁྲག་སྐོམ་དུ་བླུད་འདུག་པ་མཐོང་ངོ་།  །ཡང་ལག་ཏུ་དུང་དཀར་ཞིག་གཏད་ནས་ཕྱོགས་བཞིར་ཁ་ལྟོས་ལ་བུས་ཤིག་ཅེས་ཟེར་བ་བཞིན་བདག་གིས་དུང་བུས་པས།  ཤར་དུ་རླུང་གི་འཚུབས་མ་ལངས་ནས་སྒྲ་མ་འབྱིན།  ལྷོར་ཁ་བས་དུང་གང་ནས་སྒྲ་མ་འབྱིན།  ནུབ་ཏུ་སྒྲ་ཆེན་པོ་གྲགས་ནས་གང་སོང་།  །བྱང་དུ་སྒྲ་གྲགས་ཀྱང་བྲག་རི་མཐོན་པོས་སྒྲ་ཡི་ལམ་བཅད་ནས་བྲག་ཆ་རུ་སོང་བས་བདག་གིས་གཞོན་ནུ་ལ་འདིའི་དོན་གང་ཡིན།  །ཁྱེད་གཉིས་སུ་ཡིན་ཅེས་དྲིས་པས།  །མི་ཕོ་མོ་དེ་གཉིས་ཀས་དབྱངས་གཅིག་གིས་འདི་སྐད་ཟེར།  ཀྱཻ།  ཉོན་དང་གཞོན་ནུ་རིག་པ་ཅན།  །ང་ངོ་ཁྱོད་ཀྱིས་མ་ཤེས་ན།  །ང་ལྷ་ཕྲུག་དུང་གི་ཟུར་ཕུད་ཡིན།  །སྲིང་མོ་མི་མིན་ཟུ་ལེ་ཡིན།  །སྟེང་ན་མེ་སྟག་འཕྲོ་བ་འདི།  །མཁའ་འགྲོས་རྡུལ་སྤྲུགས་བྱེད་པ་རེད།  །སྲིད་པའི་བག་རྡུལ་སྤྲུགས་པར་གདའ།  །ཞལ་རས་རི་རབ་ལ་གཟིགས་ནས།  །དུས་ངན་རྒྱབ་ཏུ་བོར་བ་རེད།  །ཤར་གྱི་མི་སྡུག་གྲོང་ཁྱེར་འདི།  །ཀླ་ཀློ་སྡིག་པའི་གྲོང་ཁྱེར་རེད།  །ལུང་པ་མེ་ལ་བསྲེགས་པ་ནི།  །ཐར་པའི་ཞིང་ས་བསྲེགས་པ་རེད།  །ལྷོ་ཕྱོགས་དུང་རི་དཀར་པོ་ནི།  །རི་བོ་ཏ་ལ་བྱ་བ་རེད།  །རི་རྩར་བྱ་ཚོགས་འཚོགས་པ་ནི།  །དཔའ་བོ་དཔའ་མོ་འདུ་བ་རེད།  །མེ་ཏོག་པད་ཚལ་རྒྱས་པ་ནི།  །ཚུལ་ཁྲིམས་གཙང་མའི་འཁྲུངས་ས་ཡིན།  །རི་འགོ་སྤྲིན་གྱིས་གཡོགས་པ་ནི།  །སྒྲིབ་པ་ཅན་གྱིས་མཐོང་མིན་རྟགས།  །ནུབ་ཏུ་མི་ཡི་གྲོང་ཁྱེར་འདི།  །ཁྱོད་དང་མཐུན་པའི་གདུལ་བྱ་ཡིན།  །མུན་ནག་ཁྲོད་དུ་གོས་སྔོན་ཅན།  །རྒྱ་ཡུལ་མུན་པའི་གྲོང་ཁྱེར་རེད།  །བྱང་གི་མི་རིགས་མི་འདྲ་བ།  །བདུད་སྡེ་ཧ་ལའི་གྲོང་ཁྱེར་ཡིན།  །མི་སྲུན་ཤ་ཟན་སྲོག་ཆགས་ལ།  །ཤ་ཁྲག་ཟས་སྐོམ་སྦྱིན་པ་ནི།  །མི་སྲུན་ལྷ་འདྲེས་བློ་བསྒྱུར་ནས།  །མི་བློ་དབང་དུ་བསྒྱུར་བ་རེད།  །ཤར་གྱི་དུང་སྐད་རླུང་གིས་བཀག།  ཆོས་སྒྲ་བདུད་ཀྱིས་བཀག་པ་ཡིན།  །ལྷོ་ཡི་དུང་སྒྲ་ཁ་བས་བཅད།  །སྒྲིབ་གཉིས་བྲལ་བ་ཉུང་བའི་རྐྱེན།  །ཐར་བ་ཐོབ་པ་དཀོན་པའི་བརྡ།  །ནུབ་ཏུ་དུང་སྐད་འབྱིན་པ་ནི།  །ཁྱོད་ཀྱིས་སྙན་གྲགས་རྒྱས་པའི་རྟགས།  །ས་ཁུག་རེ་ལ་ཉི་འོད་རེ།  །སྣང་བ་ཁྱོད་ཀྱི་གདུལ་བྱ་སྟེ།  །བྱང་དུ་དུང་སྐད་ཅུང་གྲགས་པ།  །རེ་ཞིག་ཀླ་ཀློའི་ཁ་གནོན་རྟགས།  །ཁྱོད་ཀྱིས་གླུ་དེ་གོ་འམ་བུ།  །བདག་གིས་གོ་གོ་ལེགས་སོ་སྨྲས།  །ངེད་མིང་སྲིང་ནམ་མཁའི་དབྱིངས་སུ་འགྲོ།  མི་ཁྱོད་ཀྱང་སྲིད་པའི་ཡུལ་དུ་སོང་།  །ཁྱོད་བདེ་ཆེན་པདྨ་བཀོད་ཞིང་དུ།  །ངེད་མིང་སྲིང་བསུ་བར་སླེབས་ངེས་ཡིན།  །ཞེས་ཟེར་བའི་སྒྲས་གཉིད་སད་དོ།  །དེ་ནས་ལོ་གྲངས་ཉེར་གཉིས་ལ་བབས་པ་ཧོར་ཟླ་བདུན་པའི་ནང་དུ་སྦྱིན་བདག་མགོན་བསྟན་ཚང་གི་རྒན་མོ་ཞིག་ནད་ཀྱིས་བཏབ་པའི་རིམ་གྲོར་སྨན་བླ་ཞིག་བཏོན་པ་དེའི་གྲལ་ལ་བདག་ཕྱིན་ཏེ་ཡོད་པའི་སྐབས་ཚེས་བཅོ་ལྔའི་ནུབ་མཁའ་འགྲོ་མ་མཛེས་སྡུག་བལྟ་བས་ཆོག་མི་ཤེས་པ་ཞིག་གིས་རིན་པོ་ཆེ་བཻ་ཌཱུཪྻ་ལས་གྲུབ་པའི་མེ་ལོང་ཞིག་གི་སྟེང་དུ་ཡུངས་དཀར་འབྲུ་བཅུ་གསུམ་བླུགས་ཏེ་བདག་ལ་སྟེར་ཞིང་འདི་སྐད་ཟེར།  ཀྱཻ།  བུ་ཁྱོད་ང་ལ་ཉོན་དང་།  །མ་འོངས་ལོ་གྲངས་བཅོ་ལྔའི།  །དུས་ཚིགས་ཉིད་ལ་བབས་པ།  །ནས་བཟུང་སློབ་མ་རིམ་བཞིན།  །སྟོང་ཕྲག་མང་པོ་འཚོགས་ནས།  །གཏན་བདེའི་ས་ལ་བགྲོད་དེ།  །ཁྱད་པར་བུ་སློབ་མཆོག་གྱུར།  །ངེས་མེད་རི་ཁྲོད་འགྲིམ་ཞིང་།  །རལ་པའི་ལྕང་ལོ་འཆང་སྟེ།  །རྣལ་འབྱོར་ཆས་སུ་ཞུགས་པ།  །འཇའ་ལུས་སྒྱུ་མ་འགྲུབ་པའི།  །སྒྱུ་མའི་རྣལ་འབྱོར་བཅུ་གསུམ།  །དཔའ་བོ་ཁྱོད་ཀྱི་གྲོགས་ཡིན།  །རྟེན་འབྲེལ་བརྡ་ཡི་ཡུངས་དཀར།  །མཁའ་འགྲོའི་རིག་སྔགས་བཏབ་པ།  །མི་འབྲལ་རྟེན་དུ་ཟུངས་ཤིག།  ཅེས་དང་།  རིགས་ཀྱི་བུ་ཡུངས་དཀར་འདི་རུམ་དུ་ཆོངས་དང་མ་འོངས་པའི་དུས་ན་ཁྱོད་ལ་ཚེ་གཅིག་རྡོ་རྗེ་འཆང་གི་གོ་འཕང་དུ་གཤེགས་པའི་སློབ་མ་རལ་པའི་ཐོར་ཚུགས་ཅན་བཅུ་གསུམ་འབྱུང་ངེས་ཡིན།  མེ་ལོང་འདི་སྙིང་ལ་ཆོངས་དང་ཁྱོད་རང་རྟོགས་པ་ནམ་མཁའ་དང་མཉམ་པར་འགྱུར་བ་ཡིན།  ཞེས་ཟེར་ཞིང་བདག་གི་སྙིང་གར་ཐིམ་པས་བདེ་བ་དང་སྟོང་པའི་ཉམས་ཤིག་ཤར།  དེའི་ནང་པར་བླ་མ་ཀླུ་ཕྱུག་ལ་དེ་ཚུལ་ཞུས་པ་དང་བན་རྒན་བློ་ལྡན་ཟེར་བ་ཞིག་ཡོད་པ་དེ་ན་རེ།  ཁྱོད་ལ་དེ་འདྲའི་སློབ་མ་ཞིག་འབྱུང་རྒྱུ་ཡོད་ན་མ་ཀིའི་ཁྱི་རྒན་འདི་ལའང་སློབ་མ་ཞིག་ཅིས་མི་འབྱུང་ཟེར་བ་ལ།  བླ་མས་དེ་འདྲ་ཟེར་མི་རུང་རྨི་ལྟས་ཤིན་ཏུ་བཟང་ལུགས་ལ་ཚོད་མི་ཟིན་གསུངས་པ་ན།  བན་རྒན་གྱིས་འོ་ཧོ་ཧོ་ཟེར་ཞིང་ཞེ་ཁྲེལ་གཏོང་འདུག་གོ།  ཧོར་ཟླ་བཅུ་པའི་ཚེས་དགུའི་ནུབ་བུད་མེད་དམར་མོ་གཟུགས་བྱད་ཤིན་ཏུ་མཛེས་པ་ཞིག་བདག་གི་ཐད་དུ་ལྷགས་ནས་འདི་སྐད་ཟེར།  ཨེ་ཨཻ།  ཤར་ནས་བྱུང་བའི་མགྲོན་པོ།  །ཟུང་ཞིག་འདི་རུ་ལྷགས་ཚེ།  །མཚན་ལྡན་བླ་མའི་བཀའ་བཞིན།  །ཤར་གྱི་ཕྱོགས་སུ་སླེབས་ན།  །སྔོན་ནས་འདྲིས་པའི་མཛའ་གྲོགས།  །འབྲེལ་མེད་འབངས་སུ་འཁོར་ནས།  །མཐུན་རྐྱེན་ལེགས་པའི་དཔལ་ཡོན།  །ཚེས་གཅིག་ཟླ་བ་ཇི་བཞིན།  །གོང་ནས་གོང་དུ་འཕེལ་འོང་།  །ཐོབ་ནོར་ཟས་དང་ལོངས་སྤྱོད།  །དང་པོ་དཀོན་དཀོན་འདྲ་ཡང་།  །མཐའ་མ་ཕོངས་མེད་འདྲ་སྣང་།  །སྒྲུབ་དང་བསྐྱེད་རིམ་གནད་རྣམས།  །ཉི་མ་སྤྲིན་ལས་ཐོན་བཞིན།  །སེམས་ཉིད་ཀློང་ལས་བརྡོལ་ཚེ།  །ཕྱོགས་མེད་འགྲོ་དོན་འབྱུང་ངེས།  །ཉི་ཟླ་སྐར་ཆེན་ལྟ་བུའི།  །བུ་མཆོག་འགའ་རེ་འབྱུང་ནས།  །བསྟན་པའི་མདངས་ཆེན་གསལ་འོང་།  །སེམས་བསྐྱེད་བློ་དཔངས་མ་ཞན།  །སྔོན་ཚེ་བསོད་ནམས་བསགས་པའི།  །འབྲས་བུ་དུས་སུ་སྨིན་ནས།  །ལོངས་སྤྱོད་མངའ་ཐང་འཕེལ་འོང་།  །ཉམ་ཆུང་དབང་ཆེར་གྱུར་ཚེ།  །རང་ཚོད་ཟིན་པ་གལ་ཆེ།  །མི་ཕྱུག་ལོངས་སྤྱོད་རྒྱས་ཚེ།  །ཆོག་ཤེས་བསྟེན་པ་གལ་ཆེ།  །བུ་སློབ་སྐལ་ལྡན་འཚོགས་ཚེ།  །གདམས་ངག་སྟོན་པ་གལ་ཆེ།  །མི་མིན་མཁའ་འགྲོའི་ཡུལ་ན།  །བརྡ་དང་གླུ་རུ་གྱེར་ལས།  །མི་གཏམ་ལབ་པ་མི་སྲིད།  །ཁྱོད་ཉིད་ཤིན་ཏུ་བླུན་པས།  །མི་ཡི་ཚིག་གིས་བརྡ་བཀྲོལ།  །མ་བརྗེད་སེམས་ལ་ཞོག་དང་།  །དོ་གལ་ཆེན་པོ་ཡོད་དོ།  །ཞེས་དང་།  སང་ཕོད་ཧོར་ཟླ་དྲུག་པའི་ནང་དུ་གྲོགས་བཟང་པོ་ཞིག་འབྱུང་།  །དེ་ཚེ་དེ་དང་ལྷན་ཅིག་ཤར་མགོ་ལོག་གི་ཡུལ་དུ་སོང་དང་གདུལ་བྱ་བཟང་པོ་ཞིག་དེ་ན་ཡོད་ཅེས་ཟེར་བ་ལ།  ཨ་ནེ་ང་དེར་སོང་ན་གདུལ་བྱར་ཇ་ཁོར་ཇི་ཙམ་ལོན་སྨྲས་པས།  གདུལ་བྱ་ནི་དེ་མ་ཡིན་ཏེ་བུ་སློབ་སྙིང་དང་འདྲ་བ་མང་པོ་འབྱུང་ཞིང་འགྲོ་དོན་རྒྱ་ཆེར་འགྲུབ་བོ་སྨྲས་པ་ཡིན།  ཞེས་ཟེར་ཞིང་མི་སྣང་བར་ཡལ།  དེ་ནས་རང་ལོ་ཉེར་གསུམ་ལ་བབས་པའི་དབྱར་ཟླ་ཐ་ཆུང་གི་ནང་དུ།  རྒིས་ལི་དབང་ལི་ཞེས་བྱ་བ་དང་དེའི་ཚ་བོ་བློ་དར་གཉིས་མགོ་ལོག་ནས་གསེར་ཐལ་ཕྱོགས་སུ་ཚོང་བྱེད་དུ་བྱུང་བ་ལ་བླ་མ་གསང་སྔགས་སྒྲུབ་མཆོག་གིས་བཅོལ་གདམས་ལེགས་པར་བྱས།  དེ་གཉིས་དང་འགྲོགས་ནས་ཤར་མགོ་ལོག་ཕྱོགས་སུ་སོང་བས་སྨར་གྱི་གཞི་བདག་སྟག་གཡག་གི་འཕྲང་ཁར་སླེབས།  དེར་བག་མ་ཡར་འགྲོ་ཞིག་དང་འཕྲད་པས་དེའི་སྐྱེལ་མི་རྣམས་དང་བཅས་པ་རྟ་ལས་བབས་ཏེ་ཆང་ཕོར་པ་དོ་རེ་བླུད་བྱུང་།  བདག་གི་བསམ་པ་ལ་གཞི་བདག་འདི་གའི་ཚལ་དུ་བཏུང་བ་འདི་འདྲ་བྱུང་བ་ནི་རྟེན་འབྲེལ་ཤིན་ཏུ་ལེགས་བསམ་ཞིང་དགའ་བ་སྐྱེས།  དེ་ནུབ་མཁའ་འགྲོ་མ་ཟུ་ལེ་སྨན་ཡིན་ཟེར་བའི་བུ་མོ་ཞིག་གིས་ན་རེ།  ཨ་ཧོ།  དེ་རིང་བརྡ་དེ་ཨེ་གོ།  བུ་མོ་གོས་རྒྱན་མཛེས་པ།  །ཡར་བྱུང་མར་འགྲོ་འཕྲད་པ།  །མཚན་ལྡན་རིག་མར་འཕྲད་ལྟས།  །མཚན་ལྡན་རིག་མ་མེད་ན།  །ཤེས་རབ་རྩ་ཁ་མི་འབྱེད།  །དེ་མ་ཕྱེ་བའི་སྐྱོན་གྱིས།  །དགོངས་པའི་ཀློང་མཛོད་མི་བརྡོལ།  །དེ་ཡིས་ཡིག་རིས་མང་ཡང་།  །རྒྱུད་དང་མི་མཐུན་སྐྱོན་འབྱུང་།  །བདུད་རྩི་ཆང་འདྲེན་བྱུང་བ།  །མ་དག་སྙིགས་མའི་སྣང་བ།  །དྭངས་མ་ཉིད་དུ་འཕོ་བའི།  །ལྟས་དང་རྟེན་འབྲེལ་ལེགས་བྱུང་།  །ཟོ་དོར་སྟག་གཡག་བྱ་བ།  །གཟའ་དང་གནོད་སྦྱིན་ཟུང་གིས།  །བསྟན་པ་བསྲུང་བའི་ལྟས་ཡིན།  །ཡུལ་གྱི་དམེ་གྲིབ་ཕོག་པས།  །ཟླ་གཅིག་ཁམས་དུབ་འབྱུང་ཡང་།  །རིམ་བཞིན་ཁྲི་གདུགས་ཉི་ཟླ།  །སྤྲིན་ལས་ཐོན་བཞིན་ཡལ་འགྲོ།  ཞེས་དང་།  །དེ་རིང་གཞི་བདག་གིས་ཆང་འདྲེན་བཏང་བ་དེ་རྟེན་འབྲེལ་གྱི་ཐོག་མ་ཡིན་པས་ཤིན་ཏུ་ལེགས།  ད་ནི་ཁྱོད་མགོ་ནག་མི་ལས་མངོན་པར་མཐོ་པའི་སྣ་ཁ་ཟིན་པ་ཡིན་ཅེས་ཟེར་ཞིང་མི་སྣང་བར་ཡལ་སོང་།  སྦྱིན་བདག་དབང་ལི་ལ་ཚ་བོ་ངག་དབང་རྒྱ་མཚོ་ཞེས་བྱ་བའི་བན་ཆུང་ཞིག་ཡོད་པ་དེ་ལ་རྡོ་རྗེ་གྲོ་ལོད་ཀྱི་སྒྲུབ་ཐབས་ཤིག་བསྟན་ནས་ལུང་བྱིན།  དེ་ནས་སྐྱ་ཚེ་དོན་ཞེས་བྱ་བས་ཀློག་འདོན་ལ་འབོད་དུ་བྱུང་བས་དེར་སོང་ནས་ཟླ་བ་གཅིག་འདས་རྗེས་མཁའ་འགྲོ་གིང་ཆུང་མ་ཡིན་ཟེར་བའི་བུད་མེད་ཞིག་བདག་གི་ཐད་དུ་ལྷགས་ནས།  ཀྱཻ།  ཨ་མའི་བུ་ཆུང་ཉོན་དང་།  །གནས་ཚང་འདི་རུ་མ་འདུག།  དཀོར་བདག་རྒྱལ་པོ་བེ་ནག།  ཡུན་དུ་གཤེད་ལ་འབབ་ཡོང་།  །སྦྱིན་བདག་བློ་རྒྱ་ཆུང་བས།  །ཀློག་ཡོན་ཆུང་ལ་ལྟོས་དང་།  །སྦྱིན་བདག་རྒིས་ལི་ཚང་ནི།  །རེ་ཞིག་སྨོན་ལམ་སྟོབས་ཀྱིས།  །འབྲེལ་བའི་གནས་ཚང་ཡིན་ཏེ།  །ཤུད་བུ་དཔལ་གྱི་སེང་གེའི།  །སྤྲུལ་པ་ངག་དབང་རྒྱ་མཚོ།  །འབྲལ་མེད་གྲོགས་སུ་བསྟེན་མཛོད།  །སྨར་མདོ་བཀྲ་ཤིས་འཁྱིལ་དེར།  །སྔོན་གྱི་ལྷག་པའི་ལྷ་མཆོག།  དཔལ་ཆེན་རྡོ་རྗེ་གྲོ་ལོད།  །ཡི་དམ་མཆོག་ཏུ་ཟུངས་ཤིག།  རྣལ་འབྱོར་དབང་ཕྱུག་མཆོག་འབྱུང་།  །དེ་ལས་དབང་དང་ལུང་ནོད།  །ཡང་ཅིག་དེ་ལས་མི་རིང་།  །བསྙེན་ཚད་ལན་ལྔ་སོང་བའི།  །རྣལ་འབྱོར་རྒན་པོ་ཞིག་དང་།  །འཕྲད་ཚེ་སླར་ཡང་གོང་བཞིན།  །དབང་ལུང་ཡོངས་རྫོགས་ཞུས་ལ།  །རྟག་ཏུ་ཉམས་སུ་ལོངས་ཤིག།  སླར་ཡང་ལོ་གྲངས་འགའ་རྗེས།  །རྗེ་བཙུན་སྒྲོལ་བའི་མགོན་པོའི།  །སྐུ་ཕྲེང་བདུན་གྱི་ཐ་མ།  །སྤྲུལ་པའི་སྐུ་མཆོག་དམ་པ།  །དང་འཕྲད་དེ་ཉིད་ལས་ཀྱང་།  །དབང་ལུང་ཡོངས་རྫོགས་ལེན་མཛོད།  །ཟླ་བ་བཅུ་པའི་ནང་དུ།  །དམ་རྒྱས་ཟླ་སྒྲུབ་རེམ་མཛོད།  །དངོས་གྲུབ་ཕྲན་བུ་ཐོབ་ཅིང་།  །ཡེ་ཤེས་དབྱིངས་ཀྱི་མཁའ་འགྲོས།  །བྷནྡྷ་བདུད་རྩི་སྟོབ་པ།  །མཆོག་གི་དངོས་གྲུབ་ལྟས་ལགས།  །ཨེ་གོ་མ་བརྗེད་ཟུངས་ཤིག།  ཅེས་དང་།  འདི་རུ་མ་འདུག་པར་སོང་།  །སྦྱིན་བདག་འདི་ཚང་གིས་ཁྱོད་ལ་ལུག་ལྤགས་ཞིག་དང་མར་རྒྱ་གསུམ་བཞི་ཙམ་ལས་འབུལ་བ་ནི་མི་སྟེར་ངེས་པར་རེད་ཟེར་ཞིང་མི་སྣང་བར་ཡལ་ལོ།  །དེ་ནས་རང་ལོ་ཉེར་བཞི་ལ་བབས་པའི་དཔྱིད་ཟླ་ར་བའི་ཚེས་བཅུའི་ནུབ་འཕགས་མཆོག་ཐུགས་རྗེ་ཆེན་པོའི་ཞལ་མཇལ་ནས་ཞི་འདུས་དགོངས་པ་རང་གྲོལ་ཡིན་ཅེས་པའི་སྒྲུབ་ཐབས་དབང་ལུང་ཡོངས་སུ་རྫོགས་པ་གནང་སྟེ།  བུ་ཁྱོད་ཀྱིས་འདི་ཡི་གེར་ཕབ་ནུས་ན་འགྲོ་དོན་འགའ་འབྱུང་སྲིད་པས་དེ་དོན་སེམས་ལ་ཞོག་ཅེས་གསུངས་ཤིང་ཡལ།  དེ་རྗེས་ཡི་གེར་འབྲི་བར་བརྩམ་ཚེ་བརྡ་འགགས་ནས་ཕབ་མ་ནུས།  ཡང་ལོ་དེའི་དབྱར་ཟླ་ར་བའི་ཚེས་ཉེར་ལྔའི་ནུབ་རྒྱ་གར་གྱི་རིག་འཛིན་ཧཱུྃ་ཆེན་ཀཱ་རའི་ཞལ་མཇལ་བའི་ཚེ།  ཕྱག་མཐིལ་ལས་བརྡ་ཡིག་འདི་ཀ་བསྟན་ཏེ།  ༠༠༠༠༠བརྡ་ཡིག༨༧འདི་ཡི་གེར་ཕབ་ན་བསྟན་དགྲ་འདུལ་བའི་རྡོ་རྗེའི་ཐོག་མདའ་དང་འདྲ་པས་ན།  བུ་ཁྱོད་ལ་གནོད་སྦྱིན་ཤན་པ་དམར་ནག་གི་རྒྱུད་འདི་མཁོ་སྟེ་སྦྱིན་ནོ་གསུངས་ཤིང་།  ཤན་པ་དམར་ལེན་ཞེས་པའི་རྒྱུད་ཀྱི་དབང་ལུང་ཡོངས་རྫོགས་གནང་ནས་མི་སྣང་བར་གྱུར་ཏོ།  །དེ་ཡང་ཡི་གེར་ཕབ་པ་ལ་བརྩོན་པའི་ཚེ་ཧོར་ཁོག་ཕྱོགས་ནས་མགོ་ལོག་ཏུ་འོངས་པའི་རས་དཔོན་ཞེས་པའི་བླ་ཆུང་ཞིག་ཡོད་པ་དེས་འདིའི་གཏེར་ཆོས་ཐམས་ཅད་ཆོས་ལོག་ངེས་པར་རེད་ཟེར་བས་རྟེན་འབྲེལ་འཆུག་པར་གྱུར།  བདག་གིས་ཀྱང་དེ་ལ་ལོག་སྨོན་བཏབ་ཅིང་ཡི་གེ་མེ་ལ་བསྲེག།  ཡང་ལོ་ཁྱིམ་དེའི་དགུན་ཟླ་ར་བའི་ཚེས་བཅོ་ལྔ་ལ་བབས་པའི་དུས་ན་གྲོགས་ངག་དབང་རྒྱ་མཚོ་དང་ལྷན་ཅིག་ཏུ་རྡོ་རྗེ་གྲོ་ལོད་ཀྱི་སྒྲུབ་པ་ལ་ཞུགས་ཚེ།  དགུན་ཟླ་འབྲིང་པོའི་ཚེས་བཅུའི་ཉིན་མཁའ་འགྲོ་མ་དཀར་མོ་ཞིག་བདག་གི་ཐད་དུ་ལྷགས་ནས་འདི་སྐད་ཟེར།  ཨེ་མ།  དཔའ་བོ་ཁྱོད་ཀྱི་མཐུན་གྲོགས་སུ།  །གངས་སེང་ལྟ་བུ་ངག་གི་དབང་།  །རྒྱ་སྟག་ལྟ་བུ་བཀྲ་ཤིས་པ།  །རྡོ་རྗེའི་ལྷུམས་ཞུགས་དཔལ་ལྡན་པ།  །ལེགས་ན་འགྲོ་མགོན་ཀི་ལི་པ།  །ཉེས་ན་འཁོར་བའི་གཏིང་རྡོ་སྟེ།  །འདི་དག་རིམ་པ་བཞིན་དུ་ནི།  སྨོན་ལམ་སྟོབས་ལས་ཁྱོད་འཁོར་དུ།  །འབྱུང་སྟེ་བསྟན་ལ་ཕན་ཆེར་འདོག།  འདི་ནས་མི་ལོ་བཅོ་ལྔ་ཚུན།  །རྗེ་འབངས་སྤྲུལ་པ་ཤ་སྟག་ལས།  །ཕལ་གྱི་སེམས་ཅན་འབྱུང་མི་སྲིད།  །འདི་དག་མ་བརྗེད་ཡིད་ལ་ཟུངས།  །ཤར་ཕྱོགས་སྲིན་མོ་སྲོག་བདུད་མ།  །བདུད་པོ་ལྷར་བརྫུ་བིཪྻ་པ།  །ཡང་ཅིག་ཐོས་ཆུང་ཤྲཱི་པ།  །ལྷོ་རུ་དཀོར་བསྡུ་དྷརྨ་པ།  །ནུབ་ཏུ་ཤེས་ཞིབ་རིག་པའི་མིང་།  །གཞན་ཡང་ཁྱོད་ལ་གཤེ་སྐུར་པའི།  །སྨོན་ལམ་ལོག་པ་བཅུ་བདུན་འབྱུང་།  །དེ་ལ་བཟང་ངན་ཚིག་མ་བརྗོད།  །གྱོད་དང་ཁ་མཆུའི་ལ་ཡོག་འདེབས།  །དཀོར་ལ་བརྐུ་བའི་བདུད་སྤྲུལ་ནི།  །ཉེར་བརྒྱད་འབྱུང་སྟེ་བཀའི་སྲུང་མ།  །དཔུང་དུ་ཁུར་དང་ཉེས་ཕུང་མེད།  །མ་བརྗེད་སེམས་ལ་ཞོག་དང་བུ།  །ཐོག་མཐའ་བར་གསུམ་ཀུན་ཏུ་དགེ།  ཞེས་དང་།  བུ་ཁྱོད་ཀྱི་སློབ་བུར་ཧོར་གྱི་བནྡྷེ་ཕུན་ཚོགས་བཀྲ་ཤིས་ཞེས་བྱ་བ་ཞིག་འདིར་འབྱུང་ཚེ་དེ་ཉིད་འབྲལ་མེད་དུ་ཡི་གེ་པར་བསྟེན་དང་འགྲོ་དོན་རྒྱ་ཆེན་པོ་འབྱུང་འོང་།  ཞེས་ཟེར་ཞིང་མི་སྣང་བར་ཡལ་ལོ།  །དེའི་དགུན་ཟླ་ཐ་ཆུང་གི་ནང་དུ་ཧོར་གྱི་བནྡྷེ་དེ་ཉིད་བདག་གི་སར་བྱུང་བས་ཉེ་གྲོགས་སུ་བསྟེན་ཏེ་ཡི་གེ་པ་རུ་བསྐོས།  དེ་ནས་རང་ལོ་ཉེར་ལྔ་རུ་བབས་པ་ན་ཧོར་སྐོར་གྱི་ནང་དུ་གདུལ་བྱར་སོང་པའི་དུས་སུ་སྦྱིན་བདག་འགའ་ལ་སྒྲུབ་པ་རེ་བཏོན་སྐབས་དཀྱིལ་འཁོར་གྱི་ནང་དུ་དཔའ་བོ་དང་མཁའ་འགྲོ་མ་མང་པོ་འདུ་བ་མཐོང་ཞིང་།  ནད་པ་མང་པོ་ལ་ཕན་ཐོགས་པ་བྱུང་།  ལོ་དེའི་དབྱར་ཟླ་ར་བའི་ཚེས་བཅུར་ཚོགས་སྐོང་བརྒྱ་ཕྲག་བཏང་བའི་ནུབ་མཁའ་འགྲོ་མ་དམར་མོ་རས་དཀར་གྱི་ཨང་རག་གྱོན་པ་ཞིག་གིས་ན་རེ།  སྔོན་ཚེ་བསྐལ་པ་མང་པོའི་གོང་རོལ་ནས།  བསོད་ནམས་ཚོགས་དང་སྨོན་ལམ་སྟོབས་འཛོམ་པའི།  །སྐྱེས་བུ་ཁྱོད་ཉིད་ཕ་གཅིག་པད་འབྱུང་གི།  །ཕྲིན་ལས་དབང་བསྒྱུར་ཟབ་གཏེར་བདག་པོ་ལགས།  །སྨར་སྟོད་བྲག་དམར་སྒམ་ཆུང་འདྲ་བ་དེར།  །བཻ་རོའི་རྦ་མཁར་གཏེར་དུ་སྦས་པ་ཡི།  །མིང་ཟུར་ཆགས་པའི་རྦ་ཐེ་ཞེས་གྲགས་པ།  །དེ་རུ་སྐུ་གསུང་ཐུགས་ཀྱི་རྟེན་རྣམས་དང་།  །ཁ་བྱང་ཡང་བྱང་གཉིས་ཀྱི་བཞུགས་བྱང་ཡོད།  །དུས་ལ་བབ་པོ་ཕ་ནོར་མྱུར་དུ་ལོངས།  །ཞེས་ཟེར་བའི་ལན་དུ་འདི་སྐད་སྨྲས།  ཀྱཻ།  ཨ་ལྕམ་རྒྱལ་མོ་བཞིན་ལེགས་མ།  །གཏད་ཁུང་མེད་པའི་སྤྲང་པོ་ང་།  །ཕྱི་ན་ཐོས་པའི་ཤེས་རབ་མེད།  །ནང་ན་སྒོམ་པའི་ཡོན་ཏན་མེད།  །ནོར་དང་ལོངས་སྤྱོད་འབྱོར་པ་མེད།  །གོང་ན་སྐྱབས་ཀྱི་རྟེན་སོ་མེད།  །འོག་ན་བརྟེན་པའི་ཡར་འདེགས་མེད།  །བར་ན་ཉེ་བ་རྩ་ལག་མེད།  །ཕྲག་དོག་སྨ་ཕབ་བྱེད་པ་ལས།  །བཀུར་བསྟོད་བྱེད་པའི་ཕན་གྲོགས་མེད།  །ཉམ་ཐག་སྟོབས་མེད་སྤྲང་པོ་ལ།  །གཏེར་གྱི་སྐལ་པ་ཡོད་པ་དང་།  །ཡོད་ཀྱང་འགྲོ་དོན་འབྱུང་སྙམ་མེད།  །རང་རེ་ཕྱི་མར་མི་འཇིགས་པའི།  །བན་སྤྲང་བཟང་པོ་ཨེ་འོང་སྙམ།  །སྨོན་དོན་འགྲུབ་པར་བླ་མ་མཁྱེན།  །ཅེས་སྨྲས་པའི་ལན་དུ་མོ་ན་རེ།  ཀྱཻ།  བུ་ཁྱོད་སེམས་དཔངས་མ་ཞན་དང་།  །བུ་སློབ་སྐར་ཚོགས་ལྟ་བུ་འབྱུང་།  །དང་པོ་ཉམ་ཆུང་སྐྱབས་མེད་ཀྱང་།  །མཐའ་མ་གཞན་ལས་ཁྱད་འཕགས་འབྱུང་།  །ཀུན་གྱིས་བསྟོད་ཅིང་བཀུར་གནས་བྱེད།  །རང་གི་ལས་འབྲེལ་གདུལ་བྱ་ལ།  །ཕན་ཐོགས་ཐར་ལམ་ལ་འདྲོང་ངེས།  །ང་ཡིས་བསྒོས་པ་ཇི་བཞིན་མཛོད།  །ཁྱོད་ཀྱི་སྐྱིད་མགོ་ཚུགས་པ་ཡིན།  །ལོངས་སྤྱོད་ཡར་ངོའི་ཟླ་ལྟར་འཕེལ།  །འདོད་དོན་ལྷ་དང་སྲུང་མས་བསྒྲུབ།  །གྲོགས་ནི་མ་དང་མཁའ་འགྲོས་བྱེད།  །སེམས་ལ་ཞོག་ཅིག་སྐལ་ལྡན་བུ།  །ཞེས་ཟེར་ཞིང་།  དེ་ལྟར་སྨར་གྱི་རྦ་གཏེར་ཞེས་བྱ་བའི་བྲག་སྒམ་འདྲ་བ་ན་ས་ར་ཧའི་ཕྱག་ཕྲེང་དང་།  བྱེ་མ་ཨ་ཀྲོང་ལས་གྲུབ་པའི་སྒྲོལ་མའི་འདག་སྐུ་གཏེར་གྱི་ཁ་བྱང་དང་བཅས་པ་ཡོད་པས་མི་འགྱང་མྱུར་དུ་དེར་སོང་ཞིག་ཅེས་ལུང་བསྟན་པ་བཞིན་དབྱར་ཟླ་ཐ་ཆུང་གི་ཚེས་བཅུའི་ཉིན་རྦ་གཏེར་བྲག་གི་ཚལ་དུ་ཕྱིན་པས་སླེབས་པ་དང་བྲག་མཐོ་སྐོར་ཙམ་ཞིག་ཆད་ནས་བྱུང་།  དེའི་ཤུལ་དུ་བལྟས་པས་སྒྲོལ་མའི་འདག་སྐུ་དང་ལ་ཆའི་སྒྲོམ་བུ་ཕྲེང་བ་རྙིང་པ་ཡིད་དུ་མི་འོང་བ་ཞིག་བཅས་སོལ་ཕུང་ནང་ན་འདུག་པ་བཏོན་ཅིང་།  སྒྲོམ་དེའི་ནང་ན་ཤོག་དྲིལ་ཞིག་འདུག་པའི་ངོས་ལ་བལྟས་པས་དངུལ་རྒོད་ཞེས་བྱ་བའི་བྲག་བྱ་ཁྱུང་འདྲ་བའི་མགུལ་ན་ཁ་བྱང་ཡོད་ཅེས་བྲིས་པ་མཐོང་ཞིང་གནས་དེར་སོང་བས་སླེབས་མ་ཐག་ཏུ་ཉི་མ་སྤྲིན་ཆར་འདྲེས་པའི་ངང་ནས་འཇའ་ཚོན་འོད་ཀྱི་དྲྭ་བ་འཁྲིགས་པའི་དབུས་སུ་མི་ནག་པོ་སེང་གེའི་མགོ་ཅན་རྟ་ནག་རྟིང་དཀར་ལ་ཞོན་པ་ལག་ན་མདུང་དར་ཐོགས་པ་ཞིག་གིས་བྲག་ངོས་སུ་མདུང་དར་གྱིས་བརྡེག་པའི་མོད་ལ་བྲག་སྲུབ་གས་པའི་ནང་ན་ཤོག་དྲིལ་ཞིག་འདུག།  དེར་བལྟས་པས་དེའི་ངོས་སུ་ས་མོ་ལུག་གི་ལོ་དགུན་འབྲིང་པོའི་ཚེས་བཅུའི་ཉིན་གསེར་སྨད་རྡོ་རྗེ་བྲག་ནས་གཏེར་འབྱིན་པའི་དུས་དང་གཏེར་ཚབ་སྲུང་མ་ལ་གཏང་རག་གི་གཏོར་མ་དང་དཔའ་བོ་མཁའ་འགྲོ་ལ་ཚོགས་མཆོད་འབུལ་དགོས་ཚུལ་རྣམས་འདུག་པས།  དེ་ནང་བཞིན་དགུན་ཟླ་ར་བའི་ནང་དུ་ཕ་ཡུལ་ལ་སླེབས་པར་བྱས།  དགུན་འབྲིང་པོའི་ཚེས་དགུའི་ཉིན་གྲོགས་བདེ་ཆེན་ཞེས་བྱ་བ་ཁྲིད་དེ་བླ་མ་མཚན་བཟང་གི་མདུན་དུ་སོང་ནས་ང་རང་ལ་གཏེར་ཚབ་ཏུ་གཞུག་རྒྱུའི་བུམ་གཏེར་བཟང་པོ་ཞིག་གནང་བའི་བཀའ་དྲིན་ཞུ་ཞུས་པས།  བླ་མས་ཀྱང་གཏེར་བུམ་གྱི་རྫས་ཚུལ་བཞིན་དུ་བསྡུས་ཏེ་ཆུ་དར་སྔོན་པོ་ཞིག་གིས་དྲིལ་ནས་གནང་བྱུང་།  དེའི་ཕྱི་ཉིན་ཚེས་བཅུའི་ནང་མོ་གཏེར་ལེན་དུ་ཕྱིན་པ་ན་གསེར་སྨད་རྔ་ལ་སྟག་རྩེའི་རི་ངོགས་མཐོང་ཚེ་བྲག་རི་ནགས་ཚལ་ཐམས་ཅད་འཇའ་ཚོན་གྱིས་གཡོགས་ཏེ་ས་རྡོ་ཤིང་གི་རང་བཞིན་མི་སྣང་བ་ཙམ་དུ་གྱུར་ཅིང་དགའ་སྤྲོ་ཚད་མེད་པ་སྐྱེས་བཞིན་སོང་བས་ཤྭ་བྲག་རྡོ་རྗེ་ཞེས་བྱ་བའི་འདབས་སུ་སླེབས་པ་དང་།  གླ་བ་ཞིག་རྙིས་བཟུང་འདུག་པ་ལས་བཏོན་ཏེ་བཏང་བ་ན།  བདེ་ཆེན་ན་རེ།  འདི་རྟེན་འབྲེལ་ཅི་འདྲ་ཡིན།  ཅིའི་ལྟས་ལགས་ཟེར་བ་ལ།  རྟེན་འབྲེལ་ཤིན་ཏུ་ལེགས་ཏེ་མ་འོངས་པའི་དུས་སུ་གདུལ་བྱ་སྐལ་བ་དང་ལྡན་པ་རྣམས་རི་དྭགས་རྒྱ་ལས་གྲོལ་བ་ལྟར་འཁོར་བ་དང་ངན་སོང་གི་གནས་ལས་འདྲོངས་པའི་ལྟས་ལགས་པས།  ངའི་གཏེར་ཆོས་ཀྱིས་འགྲོ་དོན་རྒྱ་ཆེན་པོ་འབྱུང་ངེས་ཡིན་ནོ་ཞེས་སྨྲས།  དེ་ནས་ཚོགས་སྐོང་བརྒྱ་ཕྲག་དང་མཆོད་གསོལ་ཅི་མང་བཏོན་རྗེས་གྲོགས་ཉིད་བྲག་གི་རྩ་བར་འདུག་ཏུ་བཅུག་ནས་ཁྱོད་ཀྱིས་ཚིག་བདུན་གསོལ་འདེབས་རྒྱུན་མ་བཅད་པར་ཐོན་ཅིག་ཅེས་བསྒོས་ཏེ།  བདག་ཉིད་རིག་པ་དབྱིངས་སུ་གཏད་པའི་མོད་ལ།  བྲག་ཁང་པའི་སྒོ་ལྟ་བུ་ཞིག་གི་ནང་ནས་གཟུགས་མི་མཐོང་ཡང་མོ་སྐད་ཕྲ་ཞིང་གསེང་བ་ཞིག་གིས།  ཨེ་ཨེ་མ།  སླེབས་སླེབས་མགྲོན་པོ་སླེབས་བྱུང་།  །སྦྱིན་སྦྱིན་ཁྱོད་ལ་སྦྱིན་དང་།  །ཤ་དགོ་སྒང་རྒྱུད་བགྲོད་བཞིན།  །གང་དང་ཐུག་འཕྲད་མེད་པར།  །འགྲོ་བའི་ཐབས་ལ་མཁས་ན།  །རྟེན་འབྲེལ་མཆོག་ཏུ་ལེགས་འོང་།  །ལ་ནས་ལུང་དུ་བབས་ཚེ།  །ཁ་ཤོའི་མི་དང་འཕྲད་ན།  །ཁ་མཆུ་འབྱུང་བའི་ལྟས་ཡིན།  །ལྟ་བ་མི་ཤེས་གཏེར་སྟོན།  །རྟེན་འབྲེལ་འགྲིག་དུས་དཀོན་སྲིད།  །གསེང་སྨད་རྡོ་རྗེའི་བྲག་ལ།  །གཏེར་ཁ་མང་དུ་ཡོད་ཀྱང་།  །ཁྱོད་ལ་རིག་མ་མ་འབྱོར།  །སྐྱོན་དེས་ཕྱེད་ལས་མི་སྦྱིན།  །ཕྱེད་ཁ་ཙམ་འདི་ཁྱེར་ལ།  །གཏེར་ཚབ་བཟང་པོ་སྦོས་ཤིག།  ཅེས་ཟེར་ཞིང་སྒྲ་དེ་མི་སྣང་བར་གྱུར།  བདེ་ཆེན་ན་རེ།  མོ་སྐད་ཞིག་སི་ལི་ལི་གྲགས་སྣང་ཤར་བ་དེ་ཅི་ཡིན་ཟེར།  བདག་གིས་ང་ལ་གླུ་ལེན་གྱིན་འདུག་སྨྲས་ཏེ།  །རིམ་བཞིན་བྲག་གི་ཐེམ་པ་ལ་འཛེག་ནས་ཕྱིན་པ་ན་བདེ་ཞིང་འཇམ་པའི་སྣང་བས་མཐོ་དམན་གཞུ་འདོམས་ལྔ་ཙམ་གྱི་སར་སླེབས་པའི་ཚེ།  །བྲག་སྲུབ་ཟླ་གམ་པ་ཞིག་འདུག་པ་ལ་གཟོང་གིས་བརྒྱབ་ནས་སྒོ་ཕྱེས།  །དེའི་ནང་དུ་སོལ་བ་མང་དུ་སྤུངས་པའི་དཀྱིལ་ན་ཤུག་པ་དང་གྲོ་གའི་ཤུན་པའི་ནང་དུ་སྒྲོམ་བུ་མང་པོ་ཡོད་པ་མཐོང་ཡང་ལན་གསུམ་ལྷག་ལེན་མི་རུང་བའི་ཚུལ་ཁ་བྱང་ནས་བཤད་པ་ལྟར་ལན་གསུམ་དུ་བླངས་པས་སྒྲོམ་བུ་བདུན་ཕྲག་ཙམ་ལག་ཏུ་བྱུང་།  སྐུ་གསུང་ཐུགས་རྟེན་མང་དུ་མཐོང་ཡང་ཆོས་བདག་དང་རིག་མ་རྣམས་མ་འཛོམ་པའི་དབང་གིས་མ་ལེན།  །དེ་རྗེས་གཏེར་ཚབ་བཞག་ཅིང་སྔར་ཇི་ལྟ་བ་བཞིན་སྦས་རྒྱ་བྱས་ཏེ།  བྲག་གི་རྩ་བར་མར་སླེབས་པ་ན་ཕྱིར་བལྟས་བྱས་པས་ཐེམ་སྐས་རྣམས་ཀྱང་མི་སྣང་བར་གྱུར་ཏོ།  དེར་གྲོགས་བདེ་ཆེན་གྱིས་ཁོ་བོའི་མགོ་ཐོག་ཏུ་གཏེར་རྫས་རྣམས་ཞོག་ལ་སྨོན་ལམ་ཐོབ་ཅེས་ཟེར་བ་ལ་སྨོན་ལམ་བཏབ་ཅིང་།  དེ་ནས་ཕྱིར་ལོག་སྟེ་འོང་བའི་ལམ་ཁ་རུ་མི་ཁ་ཤོ་ཞིག་འགྲོ་བ་དང་འཕྲད་བྱུང་བ་ན།  བདེ་ཆེན་གྱིས་འདི་རྟེན་འབྲེལ་ཅི་འདྲ་ཟེར་བ་ལ།  རང་ཅག་གཉིས་མྱུར་དུ་ཞལ་ལྕེ་ཞིག་ལ་ཐུག་པའི་ལྟས་ཡིན་འདྲ་སྨྲས།  དེ་ནུབ་མཁའ་འགྲོ་མ་རུས་པའི་རྒྱན་དྲུག་གིས་སྤྲས་པ་ཞིག་བདག་གི་ཐད་དུ་བྱུང་བ་ལ།  ཁྱོད་སུ་ཡིན་དྲིས་པས་མོ་ན་རེ།  ང་ནི་བསིལ་བའི་ཚལ་གྱི་མཁའ་འགྲོ་ཀུན་རྒྱུ་མ་ཞེས་བྱ་བ་ཡིན།  ཁྱོད་ཀྱིས་ཅི་བསམ་འདུག་ཟེར་བ་ལ།  ཁར་སང་མི་ཁ་ཤོ་ཞིག་དང་འཕྲད་པ་དེ་ཅི་ཡིན་བསམ་འདུག་སྨྲས་པས།  མོ་ན་རེ།  །ཡཱཻ།  མགྱོགས་པའི་རྟ་ལ་ཞོན་པ་དེ།  །བདེ་ཆེན་མྱུར་ལམ་བགྲོད་པའི་ལྟས།  །རྒྱབ་ཏུ་སྨན་ཁུག་ཁུར་བ་ནི།  །འཁོར་བའི་གཅོང་ནད་སེལ་བའི་རྟགས།  །སྨོན་ལམ་གྱིས་འབྲེལ་སྐལ་ལྡན་ཀུན།  །གྲོལ་བའི་ལྟས་སུ་མིང་དེ་འཛིན།  །གཞོན་ནུའི་གྲོགས་དང་འགྲོགས་པ་ནི།  །རིག་པའི་གྲོགས་དང་འཕྲད་པའི་རྟགས།  །ཡ་ཁ་ཤོ་རུ་ཡོད་པ་ནི།  །ཁ་མཆུའི་ལ་ཡོག་འབྱུང་བའི་ལྟས།  །རྟེན་འབྲེལ་མི་ངན་རྟེན་འབྲེལ་བཟང་།  །བཟང་ལ་སྐྱོན་ཕྲན་དྲི་མ་ཙམ།  །རྣམ་རྟོག་ངན་པའི་སེལ་ཞུགས་པ།  །ལྟ་བ་དམན་པའི་ལྟས་མིན་ནམ།  །འཁོར་འདས་སྟོང་ཉིད་ཆེན་པོ་ལ།  །སྣང་བ་སྒྱུ་མའི་འཕྲུལ་སྣང་ཤར།  །དེ་དོན་ཤེས་ན་ཅི་ལ་གནོད།  །དེ་ལྟར་ཤེས་པ་གནད་དུ་ཟུངས།  །ཞེས་ཟེར་ཞིང་མི་སྣང་བར་ཡལ་སོང་།  །སྐབས་དེར་ཨ་བོ་ཆུང་ཡོས་མི་སྡེ་སྐྱ་སེར་ཀུན་ནས་དགུན་ལུག་ཟླའི་ནང་དུ་རི་ཐང་ཐམས་ཅད་འཇའ་ཡིས་གང་ལུགས་ལ་བལྟས་ན་ངེད་ཀྱི་གཞི་བདག་ལ་ཤིན་ཏུ་མ་ལེགས་པ་ཞིག་བྱས་ཡོད་ངེས་ཡིན་འདུག་པས་ཁྱོད་ཀྱིས་གཏེར་ནས་གང་བཏོན་ཐམས་ཅད་ངེད་ལ་མ་སྤྲད་ན་དམག་གི་ལས་ཀ་ཞིག་མི་བྱེད་རེ་ཟེར་བ་བྱུང་ཚེ།  ཨོ་རྒྱན་ཆེན་པོས།  ལས་འཕྲོ་ང་ཡི་གཏེར་དང་འཕྲད་པའི་ཚེ༔ རྒྱ་བོད་ལྷ་འདྲེ་མ་རུངས་ཐམས་ཅད་འཚོགས༔ ལེགས་པ་ལྟར་བསྟན་ཉེས་པ་སྣ་ཚོགས་གཏོང་༔ ཀི་སྒྲ་དི་རིར་ཧབ་ཤ་བྱེད་པ་འབྱུང་༔ གསུངས་པ་ལྟར་ལོས་ཡིན།  ཁྱོད་རང་ཚོས་དམག་དྲོང་ལ་ཤོག་དང་གཟོ་ཐབས་ལེགས་པོ་ཡོད་ཅེས་སྨྲས་ནས་རང་ས་བཟུང་བཞིན་བསྡད་པས་དམག་ཀྱང་མ་བྱུང་ལ་གྱོད་ཁ་རང་ཡལ་དུ་སོང་།  །དེ་རྗེས་ཤར་མགོ་ལོག་གི་ཡུལ་དུ་ཕར་ཕྱིན་པ་དང་ཆོས་བདག་ཕུན་ཚོགས་བཀྲ་ཤིས་དང་།  ངག་དབང་རྒྱ་མཚོ་གཉིས་ཀྱིས་ད་ནི་གཏེར་ཆོས་རྣམས་གཏན་ལ་འབེབས་དགོས་ཟེར་བ་ལ།  ད་དུང་མི་ལོ་དྲུག་གི་བར་དུ་བཀའ་རྒྱ་བྱེད་དགོས་སྨྲས་ཏེ་ཤོག་སེར་རེ་ཞིག་མ་ཕབ་པར་བཞག་གོ།  དེ་ནས་རང་ལོ་ཉེར་དྲུག་ལ་བབས་སྐབས་བུ་ཆུང་རྟ་ཤུལ་གྱི་ནང་དུ་རྙེད་ཚོལ་ལ་ཕྱིན་ཚེ་མཁའ་འགྲོའི་ལུང་བསྟན་མང་དུ་བྱུང་བ་ཐམས་ཅད་ཐོག་ཏུ་མི་ཁེལ་བ་གཅིག་ཀྱང་མ་བྱུང་།  བར་སྐབས་ཤིག་ཏུ།  སེ་ཕུང་ནག་པོ་ཞེས་བྱ་བ།  །ཨོ་རྒྱན་ཆེན་པོས་མ་ཐུལ་བའི།  །ལས་ངན་བདུད་རྗེ་ནག་པོ་འབྱུང་།  །ཧོར་སྡེ་མངའ་འོག་བསྡུས་ནས་སུ།  །ལ་ལུང་མང་པོ་མངའ་དབང་བྱེད།  བདུད་ཀྱི་བློ་ཡིད་སློང་བྱེད་པའི།  །བར་སྣང་གློག་མ་སྤྲིན་ཞེས་པ།  །སྨོན་ལམ་ལོག་པའི་སྐྱེས་བུ་ཡོད།  །རྨ་རྡོ་གསེར་ལ་རྒོལ་སེམས་དུས།  །སྟོད་ནས་ཁ་སྐྱ་མདའ་ལ་འབབས།  །སྨད་ནས་མཚོ་སྔོན་གྱེན་དུ་འཕྱུར།  །བདུད་བྲག་ནག་པོ་རྨང་ནས་བསྒྱེལ།  །སྟོད་སྨད་གཉིས་ལ་འགྲིམ་སྒོ་འབྱེད།  །ཅེས་མཁའ་འགྲོ་མ་ཀུན་ཏུ་སྣང་བྱེད་མས་སྨྲས་ཤིང་སོང་།  །རང་ལོ་ཉེར་བདུན་ལ་བབས་པ་ཆོ་འཕྲུལ་ཟླ་བའི་ཚེས་བཅུའི་ནུབ་མཁའ་འགྲོ་མ་སེར་མོ་མིག་ཟླུམ་ཞིང་མདོག་རྨ་བྱའི་སྒྲོ་ཐིག་ལྟ་བུ་གཡས་ན་རྦ་མཁར་དང་གཡོན་ན་བསེ་ཕོར་འཛིན་པ་ཞིག་བདག་གི་ཐད་དུ་བྱུང་ནས།  བུ་ཁྱོད་དང་ང་གཉིས་བསྡེབས་ནས་ལྷོ་ཕྱོགས་འདུ་བ་ཅན་གྱི་སྐྱེད་ཚལ་དུ་ཨེ་འགྲོ་ཟེར་བ་ལ།  བདག་གིས་འགྲོ་འགྲོ་སྨྲས་ནས་ཕྱིན་པའི་མོད།  །ས་གཞི་ཐམས་ཅད་འོད་དང་འཇའ་རིས་ཀྱིས་གང་ཞིང་ཁྱབ་པ།  ནམ་མཁའ་ལའང་འཇའ་དང་འོད་ཀྱི་དྲྭ་བ་མིག་མང་རིས་སུ་བྲེས་པ།  བར་སྣང་ནས་མེ་ཏོག་སྣ་ཚོགས་ཀྱི་ཆར་པ་སིལ་མར་འབབས་པའི་སྐྱེད་མོས་ཚལ་ཆེན་པོ་ཞིག་ན་རིན་པོ་ཆེའི་ཁྲི་དཔངས་མཐོ་བ་རེའི་སྟེང་དུ་བསྐལ་པ་བཟང་པོའི་སངས་རྒྱས་སྟོང་ཡིན་པར་སྐད་པའི་སྟོན་པ་སྤྲུལ་སྐུའི་ཆ་ལུགས་ཅན་རིགས་ལྔ་རང་རྟགས་ཀྱི་ཕྱག་རྒྱ་མཛད་པ་འཇའ་ཚོན་འོད་ལྔའི་ཀློང་ན་བཞུགས་པ་ཤ་སྟག་དང་མཇལ་བའི་ཚེ་དེ་དག་གི་དབྱངས་གཅིག་གིས་འདི་སྐད་གསུངས།  བུ་ཁྱོད་ཀྱིས་ལུང་འདི་ཉོན་ཅིག་གསུངས་ནས་ཕྱག་གཡོན་པ་རྣམས་ཀྱིས་པུསྟི་རེ་ཐོགས་པའི་ལུང་རྣམས་འུར་སྒྲ་དང་བཅས་ཏེ་གསུངས་ནས།  བདག་ཅག་གི་བཀའ་རྣམས་མ་ལུས་པ་རྫོགས་པ་ཡིན་ནོ།  །ཁྱོད་ཀྱིས་ཡིད་ཆེས་པར་མཛོད་ལ་འདི་དག་གི་སྙིང་པོ་བཅུད་དུ་དྲིལ་བའི་མན་ངག་རྣམས་གདུལ་བྱའི་དོན་དུ་ཡི་གེར་ཐོབ་ཅིག་ད་ནི་ཆོས་ཉིད་ནམ་མཁའ་མཛོད་ཀྱི་དགོངས་པ་ཀློང་ནས་བརྡོལ་བར་འགྱུར་རོ།  །ཞེས་གསུངས་ནས་རྟེན་དང་བརྟེན་པ་ཐམས་ཅད་བདག་ལ་ཐིམ་ནས་མི་སྣང་བར་གྱུར་ཏོ།  །དུས་དེ་ནས་བཟུང་སྟེ་འཁོར་འདས་ཀྱིས་བསྡུས་པའི་ཆོས་ཐམས་ཅད་རྒྱ་མཚོའི་ནང་གི་གཟའ་སྐར་ལྟ་བུར་བདག་གི་སྣང་བ་ཆེན་པོའི་དབྱིངས་སུ་འུབ་ཏུ་འདུས་ཤིང་ཡོངས་སུ་ཆུབ་པའི་ངང་མངོན་དུ་གྱུར་པ་དང་།  སེམས་ཀྱི་འདུན་པ་གང་ལ་གཏད་པ་ཙམ་གྱིས་གང་ལ་གང་དགོས་པའི་ཆོས་ཚིག་རྣམས་སྤར་གྱིས་བཏབ་པ་བཞིན་རང་བརྡོལ་བ་བྱུང་ངོ་།  །ལོ་ཁྱིམ་དེའི་དབྱར་འབྲིང་པོའི་ཚེས་བཅུ་བདུན་གྱི་ནུབ་རྨི་ལམ་དུ་བུད་མེད་དམར་མོ་ལྭ་བ་སྔོན་པོ་གྱོན་པ་ཞིག་བདག་གི་ཐད་དུ་བྱུང་ནས།  བུ་ཁྱོད་འགྲོ་ཟེར་བ་དང་ཆབ་གཅིག་ཕྱིན་པས་ཤིན་ཏུ་ཉམས་དགའ་ཞིང་ཡིད་གདུང་བའི་གནས་ཞིག་ཏུ་སླེབས།  དེ་ན་འཕགས་པ་ཀླུ་སྒྲུབ་ཡིན་སྐད་པའི་དགེ་སློང་གཟུགས་བྱད་རབ་ཏུ་མཛེས་པ་ཞིག་ལ་དགེ་སློང་སྟོང་དང་སུམ་བརྒྱས་བསྐོར་བ་ཀུན་གྱིས་ཕྱག་ན་ཡི་གེ་པུསྟི་རེ་ཐོགས་ཏེ་འདི་སྐད་གསུངས།  ཀྱཻ་ཧོ་སྐལ་ལྡན་རིགས་ཀྱི་བུ།  །གནས་འདི་རྒྱ་གར་རྡོ་རྗེ་གདན།  །བདག་ཅག་རྒྱལ་བའི་སྲས་མཆོག་སྟེ།  །ཁྱོད་ནི་རྒྱལ་བའི་རྒྱལ་ཚབ་ཡིན།  །ཚེ་རབས་ཐོག་མ་མེད་དུས་ནས།  །འདོད་ཡོན་ལྔ་ཡི་ཆོས་སོ་ཆོག།  བདག་ཏུ་མ་བཟུང་གཅིག་ཀྱང་མེད།  །དེ་དག་བློ་ཡིས་བླངས་ནས་སུ།  །ཆོས་ཀྱི་ཡོན་དུ་ཕུལ་མཛོད་དང་།  །སེམས་ཀྱི་ལོངས་སྤྱོད་མི་ཟད་གཏེར།  །འདི་ནི་བླ་མེད་མཎྜལ་མཆོག།  ཅེས་གསུངས་པས།  བདག་གིས་མཎྜལ་འབུལ་ཚིག་གང་ལགས་ཞུས་པའི་ལན་དུ་ཤླཽ་ཀ་འདི་གསུངས་སོ།  །ཨོཾ་ཨཱཿཧཱུྃ།  ཚེ་རབས་དུ་མར་སྣང་བའི་ཆོས་སོ་ཅོག།  རིན་ཆེན་རིན་ཐང་བྲལ་བའི་ལུས་སེམས་དང་།  །ལྷ་ཀླུ་མི་ཡི་ལོངས་སྤྱོད་བཀོད་པ་འདི།  །ཚོགས་གཉིས་རྫོགས་ཕྱིར་དཀོན་མཆོག་གསུམ་ལ་འབུལ།  །ཏྲཾ་གུ་རུ་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཨཱཿཧཱུྃ།  ཞེས་གསུངས་བཞིན་བདག་གིས་དེ་སྐད་ཕུལ།  སླར་ཡང་དེ་དག་གི་ཞལ་ནས་ཁྱོད་ཀྱིས་ཉོན་ཅིག་གསུངས་ཤིང་གླེགས་བམ་དེ་རྣམས་ཀྱི་ལུང་མགྲིན་གཅིག་ཏུ་གསུངས་མཐར་གཙོ་བོ་ཉིད་ཀྱི་ཞལ་ནས་ཚིགས་སུ་བཅད་པ་འདི་སྐད་དོ།  །ལུང་རྣམས་མ་ལུས་ཡོངས་སུ་རྫོགས་པ་ཡིན།  །མདོར་ན་བཀའ་དང་བསྟན་བཅོས་གྲངས་མང་ཡང་།  །རྣམ་མཁྱེན་ཤེས་རབ་ཕ་རོལ་ཕྱིན་ལ་འདུས།  །མངོན་བྱང་ཕྱིར་དུ་བསྐྱེད་དང་རྫོགས་པ་གཉིས།  །ཐབས་ཀྱི་མཇུག་སྒོ་དུ་མའི་ཚུལ་དུ་བསྟན།  །དཔེར་ན་ཡངས་པའི་གྲོང་ཁྱེར་ཆེན་པོ་ཡི།  །ཕྱོགས་མཚམས་ལམ་རྣམས་གང་ནས་ཕྱིན་གྱུར་ཀྱང་།  །གྲོང་ཁྱེར་ཆེན་པོ་དེ་རུ་སླེབས་པ་བཞིན།  །ཆོས་ཀུན་ཆོས་ཉིད་གཅིག་ཏུ་མདོར་འདུས་ཕྱིར།  །ཆོས་ཉིད་མི་ཟད་ནམ་མཁའ་མཛོད་དུ་གྲགས།  །དེ་ཕྱིར་འགྲོ་ཀུན་རྣམ་པར་གྲོལ་བའི་ཆོས།  །རྫོགས་པ་ཆེན་པོ་འབྲས་བུ་བླ་ན་མེད།  །མ་ཧཱ་ཡོ་གའི་མྱུར་ལམ་ཐབས་ཟབ་མོ།  །ཕྱོགས་ཀྱི་ཆུ་མིག་ཆུ་ཕྲན་གྲངས་མང་བ།  །རྒྱ་མཚོ་ཆེན་པོར་རོ་གཅིག་འདྲེས་པ་ལྟར།  །ཆོས་རྣམས་མ་ལུས་བདེན་པ་གཉིས་སུ་འདུས།  །བདེན་གཉིས་དབྱེར་མེད་རྫོགས་པ་ཆེན་པོར་འདུ།  །དེ་དོན་ཤེས་ན་ཆོས་ཉིད་བདེན་པ་མཐོང་།  །གནད་དེས་འབྲེལ་ཚད་རིག་འཛིན་ས་རུ་སྐྱེལ།  །དོན་དེ་གཞན་ལ་སྟོན་དང་འགྲོ་བའི་དོན།  །རླབས་ཆེན་གཞན་ན་མེད་དོ་ཤེས་པར་མཛོད།  །ཅེས་གསུངས་མ་ཐག་རྨི་ལམ་དབྱིངས་སུ་སད་པ་བཞིན་དུ་ཡལ་སོང་།  །འདི་ནས་ཆོས་ཉིད་ནམ་མཁའ་མཛོད་ཀྱི་ཀློང་བརྡོལ་ཞིང་བསྐྱེད་རྫོགས་ལམ་གྱི་རིམ་པ་ཇི་ལྟ་བ་བཞིན་ཁོང་དུ་ཆུབ་པར་གྱུར་ཏོ།  །དེ་ནས་རང་ལོ་ཉེར་བརྒྱད་ཁྱིའི་ལོ་ཁྱིམ་ལ་བབས་ཚེ་མཁའ་འགྲོ་མ་མེ་རི་འཛིན་བྱེད་ཡིན་ཟེར་བ་ཞིག་ན་རེ།  །ཁྱོད་འབྲོས་ཕུག་མཁའ་འགྲོའི་འདུ་ཁང་དུ་སྒྲུབ་པ་ལ་ཞུགས་ན་ཚེ་མཇུག་ཏུ་ལོངས་སྤྱོད་དང་མངའ་ཐང་རྒྱས་པར་འགྱུར།  ཞེས་ཟེར་ཞིང་ཡང་འདི་ལྟར།  ཨ་ཧོ།  ཉོན་དང་སྐལ་བཟང་སྐྱེས་བུ།  །འབྲོས་ཕུག་མཁའ་འགྲོའི་འདུ་གླིང་།  །རྡོ་རྗེ་མཁའ་འགྲོའི་འདུ་ས།  །ཞི་བའི་ཕྲིན་ལས་གྲུབ་པའི།  །གནས་བཟང་སྐྱིད་པའི་འབྱུང་གནས།  །དེ་རུ་སྒྲུབ་པ་བྱས་ན།  །ཉམས་རྟོགས་ཡོན་ཏན་འཁྲུངས་ཡོང་།  །ཐབས་ཤེས་ཟུང་དུ་འབྲེལ་བའི།  །རིག་འཛིན་སྔགས་པའི་སྒྲུབ་གནས།  །བཙུན་མོ་ཁྲི་ལ་འགྱིང་བ།  །ཕྱོགས་ནས་འབངས་ཀྱིས་བསྐོར་འདྲ།  །གྲྭ་འཁོར་འདུ་བའི་རྟེན་འབྲེལ།  །དུར་ཁྲོད་ལྷ་མོ་པུཎྱེ།  །རེ་ཞིག་ཕྱག་རྒྱར་བསྟེན་ན།  །གཅན་གཟན་ཀུན་གྱི་ཁྱུ་མཆོག།  གངས་སེང་དཀར་མོ་ལྟ་བུའི།  །བུ་མཆོག་དམ་པ་འབྱུང་སྲིད།  །དེ་བཞིན་སེངྒེའི་གྲོགས་པོ།  །རྒྱ་སྟག་ཁྲ་བོ་ལྟ་བུའི།  །བུ་གཅིག་ཡོས་བུས་ཁུར་ཡོང་།  །བྲག་བཙུན་སྲིད་པའི་མ་མོ།  །ལས་ཀྱི་ཕྱག་རྒྱར་བསྟེན་ན།  །ཤར་གྱི་ཉི་མ་གཞོན་ནུ།  །ལྷ་མཚམས་གཟི་བརྗིད་ཆེན་པོ།  །པ་ཝ་སངས་ལྟར་དཀར་བའི།  །བུ་འབྱུང་བསྟན་པ་འཛིན་ཡོང་།  །ནོར་རྒྱུན་བུ་མོར་འགྲོགས་ན།  །གསེར་གྱི་མཆོད་རྟེན་སེར་པོ།  །དུང་གི་ཟླ་རྒྱས་དཀར་པོ།  །གནམ་ལྕགས་རྡོ་རྗེ་འབར་བས།  །བསྟན་པའི་སྲོག་ཤིང་འཛིན་ཅིང་།  །ཡིད་བཞིན་ནོར་བུ་ལྟ་བུར།  །ཕྱོགས་ཀྱི་མགྲོན་པོ་ངོམས་པའི།  །རོ་བརྒྱའི་ཟས་མཆོག་སྟེར་སྲིད།  །གཞན་ཡང་གནམ་འཕང་གཅོད་པའི།  །མཁའ་ལྡིང་ག་རུ་ཆེན་པོས།  །ཁྱོད་ཀྱི་བསྟན་ལ་གདུང་བཞིན།  །ངེས་མེད་རི་སུལ་བགྲོད་དེ།  །ཕྱོགས་མེད་འགྲོ་དོན་འབྱུང་ཡོང་།  མ་ངའི་བརྡ་ཚིག་དེ་ཀ།  མ་བརྗེད་སེམས་ལ་ཞོག་དང་།  །ཆོས་སྲིད་མངའ་ཐང་རྒྱས་འོང་།  །ཞེས་ཟེར་ཞིང་མི་སྣང་བར་ཡལ་སོང་།  །དེ་ལྟར་ལུང་བསྟན་པ་བཞིན་དཔྱིད་ཟླ་ར་བའི་ནང་དུ་དེར་ཕྱིན་ནས་ཟླ་བ་གཅིག་ཙམ་ལ་སྒྲུབ་པ་བྱས་ཚེ་དགེ་ལེགས་ཡ་མཚན་གྱི་ལྟས་བཟང་མང་དུ་བྱུང་བ་ནི།  ཞག་བདུན་གྱི་ནུབ་མོ་བརྟན་མ་ཏིང་ལོ་སྨན་གྱིས་གླུ་འདི་ལེན་གྱི།  ཀྱཻ་ཧོ།  ང་ནི་སྲིད་པའི་ཨ་ཕྱི།  །བྱང་གི་ཏིང་རུའི་ས་འཛིན།  །ཏིང་ལོ་སྨན་ཅེས་གྲགས་ཏེ།  །སྔོན་ཚེ་འབྲོག་མིའི་སྐྱེས་བུ།  །ཁྱེའུ་ཆུང་ལོ་ཙཱ་ཁྱོད་ཡིན།  །ཡ་གིའི་བྲག་སྲུབ་རྐོས་དང་།  །སེར་བའི་འཇིགས་པ་བཟློག་པའི།  །སཱཙྪ་ནག་པོའི་ཆོ་ག།  རྫས་སྦྱོར་ཟབ་མོ་ཞིག་ཡོད།  །སང་ཕོད་གནས་འདིར་སླེབས་ཚེ།  །ཁྱོད་ལ་མཚམས་རྒྱག་ཞིག་འབྱུང་།  །དབྱར་དུས་དཀར་སློང་དང་ནི།  །དགུན་དུས་འབྲུ་སློང་མ་གཏོགས།  །དཀོར་ལ་རྟག་ཏུ་མ་འབྱམས།  །དེང་དུས་བསྐལ་པའི་ཐ་མར།  །མི་སྲུན་སྐྱེ་བོའི་ཚོགས་ཀྱིས།  །མཐོ་རློམ་གཏེར་སྟོན་ལ་བརྫུས།  །ཚེ་གཅིག་དཀོར་ལ་འབྱམས་ཏེ།  །ཟླ་གསུམ་མཚམས་སྒྲུབ་མི་བྱེད།  །དེ་འདྲའི་སྤྱོད་ངན་སྤོངས་ལ།  །ཨོ་རྒྱན་ཆེན་པོའི་རྒྱལ་ཚབ།  །འགྲོ་བའི་དོན་ལ་ཆས་པའི།  །གཏེར་ཆེན་གོང་མ་རྣམས་ཀྱིས།  །སྙིང་པོའི་སྒྲུབ་ལ་བརྩོན་ཏེ།  །དཀོར་བསྡུ་རྙེད་ཚོལ་སྤངས་ནས།  །འཆད་དང་ཡིག་རིས་ལྷུར་ལེན།  །སྐུ་ཚེའི་སྨད་ཆར་སླེབས་ཚེ།  །མངའ་ཐང་རྩོལ་མེད་འཕེལ་ཞིང་།  །བུ་སློབ་སྐལ་ལྡན་ཕོ་མོའི།  །འདུ་བ་ཕུན་སུམ་ཚོགས་བཞིན།  །ཁྱོད་ཀྱང་དེ་ལྟར་རིམ་བཞིན།  །ལག་ལེན་ཐོབ་དང་དེ་བཞིན།  །འདི་ཕྱིའི་དོན་ཆེན་འགྲུབ་ངེས།  །ཞེས་ཟེར་ནས་ཡལ།  ཡང་བདུན་ཞག་གསུམ་པའི་ནུབ་འཇའ་སྤྲིན་འོད་གུར་འཁྲིགས་པའི་ཀློང་ནས་ཨོ་རྒྱན་ཆོས་ཀྱི་རྒྱལ་པོ་མདུན་གྱི་ནམ་མཁར་བྱོན་ཏེ།  རིགས་ཀྱི་བུ་ཁྱོད་ཀྱི་ཚོགས་དང་སྐོང་བ་ལ་འབད་པ་གལ་ཆེ་ཞིང་།  །བཀའ་སྲུང་གཉན་པོ་ལ་གཏོར་མ་མང་དུ་གཏོང་བ་དང་།  ལོ་བཞིན་ཟླ་སྒྲུབ་དམ་རྒྱ་ཅན་ཆག་མེད་དུ་བྱ་བ་དེ་གསུམ་གནད་དུ་ཟུངས་ཤིག།  དངོས་གྲུབ་དམ་པ་འདི་ཉིད་ལྷག་མེད་དུ་རོལ་ཞིག།  ཅེས་གསུངས་ནས་བདུད་རྩི་ཐོད་པ་གང་གནང་བྱུང་བ་བདག་གིས་ལྷག་མེད་དུ་རོལ་པས་བདེ་བའི་ཉམས་བསམ་གྱིས་མི་ཁྱབ་པ་འབར་བྱུང་བའི་མོད་ལ་འདི་སྐད་ཞུས།  དུས་གསུམ་གྱི་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་རྫོགས་པའི་ངོ་བོར་གྱུར་པ་མཆོག་རིན་ཆེན་ཁྱོད་ལ་ཕྱག་འཚལ་ཞིང་སྐྱབས་སུ་མཆིའོ།  །ངས་སྤྱོད་ཚུལ་ཇི་ལྟར་བྱེད་ལགས་ཞུས་པས།  ཀྱཻ།  སྐྱེས་བུ་ཆེན་པོ་ཁྱོད་ཀྱིས་སྤྱོད་པ་སྔར་བཞིན་དུ་མི་གང་ལའང་ངོ་སྲུང་མེད་པར་སྨྱོན་པ་ལྟ་བུའི་སྤྱོད་པ་སྐྱོངས་ལ་ཀུན་གྱིས་བསྙེན་བཀུར་བྱེད་པའི་དུས་སུ་ཀུན་ལ་སྙོམས་པའི་ཞི་དུལ་ཚུལ་མཐུན་སྒྲུབས་ཤིང་གདམས་པ་སྟོན།  །འགྲོ་དོན་ཅི་ནུས་གྱིས་ཤིག།  ཅེས་གསུངས་མཐར་དབྱིངས་སུ་ཡལ་སོང་།  དེ་ནས་སྒྲུབ་པ་ཆེན་པོའི་དངོས་གྲུབ་ལེན་པ་ལ་ཐུག་པའི་ནུབ་རིག་འཛིན་བདུད་འདུལ་རྡོ་རྗེས་ལི་སྡེར་ཞིག་གི་ནང་དུ་ཆང་བླུགས་པ་ལ་ཨཱ་ལི་ཀཱ་ལི་གཟུགས་བརྙན་ཤར་བ་ལྟར་བཀྲ་ལམ་མེར་ཡོད་པ་འཇའ་ཚོན་སྣ་ལྔའི་རླངས་པ་ཕྱུར་བ་ཞིག་བདག་ལ་སྟེར་ནས།  ང་སྤྲུལ་ང་དང་གཉིས་སུ་མེད་པའི་བུ་ཁྱོད་ལ་མཁའ་འགྲོ་མ་རྡོ་རྗེ་ཕག་མོས་བསྐུར་བ་ཡིན་པས་གནས་གསུམ་དུ་གཏུགས་ཤིག།  ཅེས་གསུངས་ཤིང་བདག་ལ་ཐིམ་པ་དང་བདུད་རྩི་དེ་ཡང་བཏུང་བས་ཉམས་རྟོགས་ཁྱད་པར་ཅན་རྒྱུད་ལ་སྐྱེས་སོ།  །དབྱར་ཟླ་ར་པའི་ཚེས་བཅུའི་ནུབ་མཁའ་འགྲོ་མ་སྔོན་མོ་དར་དཀར་གྱི་ལྭ་བ་གཡང་ལུགས་སུ་གྱོན་པ་ཞིག་གིས།  བུ་ཁྱོད་དག་པ་འདོད་འབྱུང་ཞེས་བྱ་བའི་གནས་སུ་ལྟད་མོ་ལ་འགྲོ་ཟེར་བ་བྱུང་བས་དེ་དང་འགྲོགས་ནས་ཕྱིན་པས།  གནས་ཤིན་ཏུ་ཉམས་དགའ་བའི་སྐྱེད་ཚལ་འདོད་རྒུའི་ལོངས་སྤྱོད་ཐམས་ཅད་ན་བུན་འཐིབ་པ་བཞིན་དུ་རང་བྱུང་དུ་འཕྱོ་བའི་དབུས་སུ།  ཡེ་ཤེས་ལྔ་ལས་གྲུབ་པའི་གཞལ་ཡས་ཁང་དཀར་སེར་དམར་ལྗང་མཐིང་གའི་ཁ་དོག་ཉི་མ་དང་ཉི་འོད་ལྟར་འབར་བ།  དེའི་དབུས་སུ་རིན་པོ་ཆེའི་ཁྲི་པདྨ་དང་ཟླ་བ་ཉི་མའི་གདན་ལ་རིག་འཛིན་གྱི་རྒྱལ་པོ་ཧཱུྃ་ཆེན་ཀཱ་ར་ཞེས་བྱ་བ་སྐུ་མདོག་དཀར་ལ་དམར་བའི་མདངས་ཆགས་པ་སྐུ་བྱད་བལྟ་བས་ཆོག་མི་ཤེས་པ་ཞིག་གིས་ན་རེ།  །སྔར་གྱི་འབྲོས་ཕུག་དེ་རྡོ་རྗེ་མཁའ་འགྲོའི་འདུ་གནས་ཉམས་རྟོགས་ཡོན་ཏན་ཤུགས་ཀྱིས་འཁྲུངས་པའི་གནས་ཡིན་པས།  རེ་ཞིག་ཁྱོད་ཀྱི་སྡོད་གནས་དེ་རུ་གྱིས་ལ་སྙིང་པོའི་སྒྲུབ་པ་ལ་འབུངས་ཤིག།  ལོ་གཅིག་འདས་པའི་རྗེས་སུ་གསེར་གྱི་འཛི་ཆེན་ཤེས་ཤར་དུ་སོང་ལ་ཟླ་སྒྲུབ་གཉིས་ལ་བརྟེན་ནས་ཚོགས་སྐོང་སྟོང་ཕྲག་གཉིས་ཙམ་བཏང་ན་བསོད་ནམས་ཀྱི་འབྲས་བུ་ཆར་གྱིས་བསྐྱེད་པའི་མྱུ་གུ་ལྟར་འཕེལ་ཞིང་སྨིན་པར་གྱུར།  གནས་མཆོག་འབྲོས་ཕུག་མཁའ་འགྲོའི་འདུ་གླིང་དུ་སླེབས་པའི་དུས་སུ་ལས་ལྡན་གྱི་སློབ་བུ་འགའ་ཞིག་འབྱུང་བས་དེ་དག་ལ་རང་རང་གི་རྒྱུད་ཚོད་དང་བསྟུན་པའི་གདམས་པ་སྟོན་དང་ཐར་པ་ཆེན་པོའི་གྲོང་ཁྱེར་དུ་འདྲོང་ངེས་པ་ཡིན།  ཞེས་གསུངས་པའི་ལན་དུ།  བླ་མ་ལགས།  ངས་གདམས་ངག་སྣ་གཅིག་ཀྱང་འཆད་མི་ཤེས་པའི་ཚུལ་ནི་འདི་ལྟ་སྟེ།  ང་བྱིས་པ་སྐྱབས་མེད་མགོན་མེད།  །སྟེང་ན་སྐྱབས་མགོན་མི་མེད།  །འོག་ན་བརྟེན་པའི་མི་མེད།  །ཟུར་ན་སྐྱོར་མི་གཅིག་མེད།  །རང་སྣང་སྟོན་པའི་བཀའ་བཞིན།  །གཞན་ལ་འཆད་སྒྲོགས་བྱས་ཀྱང་།  །ཀུན་གྱིས་གཤེ་སྐུར་གནས་ལས།  །དང་ལེན་བྱེད་པ་མི་འོང་།  །ཟབ་གཏེར་འབྱིན་སྐལ་ལྡན་ཡང་།  །དུས་ངན་སྙིགས་མའི་མཐའ་འདིར།  །གདུལ་བྱའི་ཞིང་ས་མི་སྣང་།  །རྫུན་མེད་བདེན་པར་སྨྲས་ཀྱང་།  །ཀུན་གྱིས་རྫུན་དུ་གྱེར་འོང་།  །དད་ཅིང་དང་དུ་ལེན་པའི།  །བུ་སློབ་འབྱུང་སྙམ་མེད་ལགས།  །ཕ་གཅིག་ཐམས་ཅད་མཁྱེན་པ།  །བདག་རྒྱུད་ཡོངས་སུ་སྨིན་པར།  ད་ལྟ་ཉིད་དུ་བྱིན་རློབས།  །ཉམ་ཆུང་སྤྲང་པོ་བདག་ལ།  །མི་འཇིགས་དབུགས་ཆེན་འབྱིན་པར།  །ད་ལྟ་ཉིད་དུ་བྱིན་རློབས།  །ཞེས་ཞུས་པས།  སྒྲུབ་པ་ལྷུར་ལེན་བྱེད་པའི།  །ལས་དང་སྐལ་པ་མེད་ན།  །སངས་རྒྱས་དངོས་སུ་འབྱོན་ཡང་།  །རྒྱུད་ལ་ཕན་ཐོགས་མེད་ཚུལ།  །རྒྱལ་བ་ཤཱཀྱའི་དབང་པོ།  །འཇིག་རྟེན་ཁམས་སུ་བྱོན་ཀྱང་།  །འགྲོ་ཁམས་དོང་སྤྲུགས་མ་ནུས།  །ཁྱོད་ནི་སྨོན་ལམ་མཐུ་ཡིས།  །འགྲོ་བའི་དོན་ལ་ཆས་ཕྱིར།  །སྔོན་ནས་ལས་ཀྱིས་འབྲེལ་བའི།  །སྐལ་ལྡན་བུ་སློབ་འགའ་ཞིག།  རང་རང་ལས་དབང་བཙན་པས།  །གདུལ་བྱའི་ལྷག་མར་འདུག་པ།  །དེ་རྣམས་འདྲེན་པའི་དུས་བབ།  ཕྱི་རོལ་ཀླ་ཀློ་མཐའ་མིས།  །མི་ལོ་བརྒྱ་ཕྲག་ཙམ་ལས།  །ཆོས་ཀྱི་སྒྲ་ཙམ་མེད་བྱེད།  །མུན་པའི་བསྐལ་པར་ཐུག་པས།  །རྒྱ་ཆེ་གྲངས་མང་ཕབ་ཀྱང་།  །ངལ་བའི་རྒྱུ་ལས་མེད་པས།  །གདམས་པའི་ཡང་བཅུད་ཐམས་ཅད།  །ཡི་གེར་ཕོབ་ལ་སྤེལ་དང་།  །སྐལ་ལྡན་དག་ལ་ཕན་སྲིད།  །སེམས་ཀྱི་དཔངས་རྒྱ་བསྐྱེད་དང་།  །འདི་ཕྱིའི་དོན་ཆེན་འགྲུབ་འོང་།  །ཞེས་དང་།  ངའི་དགོངས་རྒྱུད་འཕོ་བ་དང་གདམས་ངག་ཆུ་ཀླུང་བཞིན་དུ་བརྡོལ་འོང་གསུངས་པས་རྨི་ལམ་དབྱིངས་སུ་སད།  དེ་ནས་སྔར་བཞིན་ཧོར་སྐོར་གྱི་རུ་ནང་དུ་སོང་སྟེ་རང་གི་དག་སྣང་སྐོར་ལས་བྱུང་བའི་རྡོ་རྗེ་གྲོ་ལོད་ཀྱི་སྒྲུབ་པ་མང་དུ་བྱས།  དབྱར་འབྲིང་པོའི་ནང་དུ་ཨ་གནམ་དབང་ཆེན་ཞེས་བྱ་བ་བྱུང་ནས་འདི་སྐད་ཟེར།  དུས་ཕྱིས་གཏེར་སྟོན་དང་གྲུབ་ཐོབ་ཡིན་པར་སྐད་པ་ཤིན་ཏུ་མང་བས་སུ་ལའང་ཡིད་ཆེས་བློ་ཐུབ་མེད་ཀྱང་འཇའ་བ་ཨ་ལགས་ནས་ཁྱོད་ཀྱིས་རྒིས་ལིའི་གཏེར་སྟོན་དེ་ལ་སྒྲུབ་པ་ཞིག་འདོན་དུ་ཆུག་དང་དེ་ཨོ་རྒྱན་པདྨའི་སྤྲུལ་པ་ཞིག་མིན་ཚེ་ངས་ཁྱོད་བསླུས་པ་ཡིན་གསུངས་པས་དེ་ལ་ཉན་ནས་ང་རང་ཁྱོད་འབོད་དུ་འོང་བ་ཡིན་ཟེར་བ་བྱུང་བས།  བདག་ཀྱང་དེར་ཕྱིན་ནས་རང་གི་གཏེར་བྱོན་རྡོ་རྗེ་གྲོ་ལོད་ཀྱི་སྒྲུབ་པ་ཞིག་བྱས།  །དེ་ཡང་འཇའ་བ་ཨ་ལགས་ཟེར་བ་ནི་འཇའ་བ་སྤྲུལ་པའི་སྐུ་རིན་པོ་ཆེ་མདོ་སྔགས་རྒྱ་མཚོ་ཞེས་མཁས་པའི་དབང་པོ་དེ་ཡིན་ནོ།  །དེ་ནས་དབྱར་ཟླ་ཐ་ཆུང་གི་ནང་རྒིས་ལིའི་ཁྱིམ་དུ་ཕྱིན།  སྐེ་བླ་ཆོས་འཕགས་ཞེས་པ་དེར་བྱུང་ནས།  ཁྱོད་གཏེར་སྟོན་འཁྲུལ་མེད་ཡིན་ན་ངས་ཁྱོད་ཀྱི་ཆོས་བདག་བྱེད་ཀྱི།  ཁོ་བོ་ལ་རྟ་མགྲིན་གྱི་སྒྲུབ་ཐབས་ཞིག་འབྲི་དགོས་ཟེར་བ་ལ།  བདག་གིས་ཟབ་ཆོས་དགོངས་པ་ཀློང་བརྡོལ་གྱི་སྐོར་ལས་བྱུང་བའི་རྟ་མགྲིན་གྱི་སྒྲུབ་ཐབས་ཞིག་གཏན་ལ་ཕབ་སྟེ་དབང་ལུང་བཏོན་ནས་གཏད་ཀྱང་ཁོས་ཐེ་ཚོམ་སྐྱེས་ཏེ།  དེ་སྐབས་ཀཿཐོག་ཕྱག་ཚ་སྤྲུལ་སྐུ་མགོ་ལོག་ཏུ་གྲྭ་ས་ཆོས་རྒྱུན་གྱི་ཕྱིར་དང་འབུལ་སྡུད་དུ་ཕེབས་ནས་བཞུགས་ཡོད་པ་དེའི་དབུ་སྔས་ཀྱི་ཞབས་སུ་བཅུག་ནས་དོ་ནུབ་གཏེར་ཆོས་གསར་པ་ཞིག་ཉིད་ཀྱི་གཟིམ་སྔས་སུ་བཞག་ཡོད་པས་དེ་ཅི་འདྲ་ཞིག་ཡིན་བཟང་ངན་གཉིས་ཀའི་ཐག་ཆོད་ངེས་ཞིག་ནང་སྔ་གསུང་རྒྱུའི་བཀའ་དྲིན་ཞུ་བྱས་ནས།  ནང་པར་མདང་སུམ་ཞུ་རྒྱུའི་བརྟག་བབས་དེ་ཅི་འདྲ་ལགས་ཞུས་པས།  བླ་མའི་ཞལ་ནས།  མདང་རྨི་ལམ་ལ་ཞིང་ས་བཟང་པོ་ཞིག་གི་ནང་དུ་འབྲས་དྲུག་རྒྱ་ཆེན་པོ་སྨིན་པ་ལ་ད་དུང་ཅུང་ཟད་བརྔ་མ་རན་ཡང་བརྔ་བ་རྨིས་པས།  གཏེར་ཆོས་སྤེལ་སྔ་བ་དང་།  ཚོགས་ཀྱི་འཁོར་ལོ་རྒྱ་ཆེན་པོ་མ་ཕུལ་ན་མཁའ་འགྲོ་མ་རྣམས་མི་དགྱེས།  དེ་མ་མཉེས་ན་བརྡ་ལ་ལྷག་ཆད་མང་པོ་འབྱུང་ངམ་སྙམ་གྱི་གཏེར་སྟོན་ཡང་དག་པ་ཞིག་ཡིན་པ་འདྲ་གསུངས།  དེ་ནས་ཡང་སྐྱིད་ལུང་ཐུགས་མཆོག་རྡོ་རྗེ་ལ་གཏེར་ཆོས་འདི་བཟང་ངན་ཅི་ཡིན་ཐག་ཆོད་པ་ཞིག་གསུང་དགོས་ཞུས་པས།  དེས་ཀྱང་གཏེར་སྟོན་རྣམ་དག་ཡིན་མིན་མཐའ་ལ་བརྟག་ན་གསལ་བར་འགྱུར་ཏེ།  ཉི་མ་སྤྲིན་ལས་གྲོལ་བ་བཞིན་དུ་ཇེ་གསལ་ཇེ་མཐོ་རུ་སོང་ན་ལེགས།  དེ་མིན་རྫུན་གྱི་མཇུག་མ་མར་འགྲིབ་ཏུ་འགྲོ་བ་ལས་འོས་མེད་པ་ཡིན་གསུངས།  ཡང་སྐབས་ཤིག་ན་བདག་གིས་ལུས་སྦྱིན་ཞིག་ཕབ་ཡོད་པ་དེ་གཞན་ཞིག་གིས་རས་དབོན་ལ་བསྟན་པས།  དེ་ན་རེ།  སེམས་འགྱུ་བའི་རང་གདངས་མཁའ་འགྲོ་མ།  ཟེར་བ་དེ་ཚོ་འདྲེ་མོ་འདྲ་ཡིན་ན་མ་གཏོགས་འགྱུ་བའི་གདངས་ན་ཡེ་ཤེས་མཁའ་འགྲོ་ཞིག་ཡོད་མི་སྲིད་དེ་ཧ་ཧ་ཚིག་གཅིག་པུ་འདིས་ཐག་ཆོད་ཐལ་ཟེར།  དེ་རྗེས་རས་དབོན་གྱིས་ཀཿཐོག་སྤྲུལ་སྐུ་དེ་ལ།  སྤྲུལ་སྐུ་ལགས་ཉིད་ཀྱིས་རྒིས་ལིའི་གཏེར་སྟོན་འདི་གཏེར་སྟོན་རྣམ་དག་ཅིག་རེད་གསུངས་པ་བདེན་ནམ་ཞུས་པ་ན།  བདག་རྨི་ལྟས་ཤིན་ཏུ་ལེགས་པ་ཞིག་བྱུང་གསུངས་པས།  ཁོ་ན་རེ།  སེམས་འགྱུ་བའི་རང་གདངས་མཁའ་འགྲོ་མ་ཟེར་ལུགས་ལ་བལྟས་ན་ཡང་ཕྱོགས་ཙམ་ཤེས་འདུག་ཟེར་བར།  སྤྲུལ་སྐུའི་ཞལ་ནས།  དེ་ལ་སྐྱོན་ཞིག་འབྱུང་ན་རྡོ་གྲུབ་ཆེན་གྱིས་ཀྱང་།  ཡིད་ཤེས་གྲོལ་འཁྲུལ་རླུང་འགྱུའི་སྒྱུ་འཕྲུལ་གར།  །ཞེས་གསུངས་པ་དེའང་དེ་དང་མཚུངས་ཏེ་དེ་ཡང་མི་རིགས་པ་ཞིག་ཡིན་ནམ་གསུངས་པ་དང་།  ཁོས་དེ་འདྲ་ཞིག་གསུངས་ཡོད་དམ་ཟེར་ཞིང་མགོ་འཕང་སྨད་ནས་ཚོགས་པ་མང་པོའི་ཁྲོད་དུ་ཅི་ཡང་མི་ཟེར་བར་འདུག།  དེ་ཚུལ་བདག་གིས་ཐོས་པ་ན་བདེན་བརྗོད་བྱས་ནས་དམོད་པ་བོར་ཞིང་ཡི་གེ་མེ་ལ་བསྲེགས་པས།  ཁོ་ལ་ཡང་དེ་ནས་བཟུང་སྟེ་རིམ་གྱིས་གྱོད་དང་ཁ་མཆུ་སོགས་མི་འདོད་པ་མང་དུ་བྱུང་ཞིང་ཇི་ཞིག་ན་དམག་གིས་བརླག་ནས་རྒྱུ་རྫས་ཀྱང་གཏོར།  ལུས་ལ་མཚོན་གྱིས་སྨས།  མཐར་ཁྱིམ་འཁོར་གཏིང་ལོག་ཏུ་སོང་འདུག་གོ།  དེ་ནས་སྟོན་ཟླ་ཐ་ཆུང་གི་ནང་དུ་གཅོད་སྨྱོན་གྲགས་པ་ཞེས་བྱ་བས་རྔ་དང་ཌཱ་མ་རུ་དང་མི་རྐང་གི་གླིང་བུ་དང་།  ཀློང་ཆེན་སྙིང་ཐིག་གི་པུསྟི་ཟུང་བཅས་ཕུལ་ནས།  མཁའ་འགྲོའི་གསང་མཛོད་ཞིག་ཡི་གེར་ཕོབ་དང་ང་རང་གི་ཉམས་ལེན་བྱེད་ཟེར་བ་བྱུང་།  དེ་ནུབ་མཁའ་འགྲོ་མ་རྔ་སྒྲའི་རྒྱལ་མོ་ཡིན་སྐད་པའི་བུད་མེད་སྔོ་སངས་ཞིག་བདག་གི་ཐད་དུ་སྣང་བ་ལ།  གཅོད་སྨྱོན་གྲགས་པ་འདི་བཟང་ངན་ཇི་འདྲ་ཡིན་དྲིས་པས།  ཧེ་ཧེ།  སྦས་པའི་རྣལ་འབྱོར་དམ་པ་དེ།  །ས་ཆེན་ཀུན་དགའ་རྒྱལ་མཚན་དང་།  །ཀོང་སྨྱོན་སྦས་པའི་རྣལ་འབྱོར་པ།  །སྒྲིབ་པའི་ལྷག་མ་སྐྱོང་བའི་ཕྱིར།  །དེང་དུས་འདི་འདྲའི་ལུས་བཟུང་སྟེ།  །མི་ཁྱོད་གཏེར་དང་འཕྲད་པ་ཡི།  །རྟེན་འབྲེལ་སྙིང་ཐིག་ཟབ་མོ་དང་།  །སྙན་གྲགས་ལྟས་སུ་རྔ་དྲིལ་བུ།  །གཅོད་ཀྱི་ལྟས་སུ་ཌཱ་མ་རུ།  །མིང་ལ་གྲགས་པ་གྲགས་པའི་ལྟས།  །ལྟས་བཟང་ལགས་ཏེ་འདི་འདྲ་དཀོན།  །ཞེས་ཟེར།  དེའི་ཕྱིར་ནུབ་རིག་འཛིན་འཇིགས་མེད་གླིང་པ་དང་ཀློང་ཆེན་རབ་འབྱམས།  པདྨ་འབྱུང་གནས་གསུམ་ཞལ་འཛོམ་པའི་སྐུ་བརྙན་ལྷན་ཅིག་ཏུ་འདུག་པ་དང་མཇལ་ཚེ་དེ་གསུམ་ཀས་གླེགས་བམ་གཉིས་པོ་བདག་གི་མགོ་ཐོག་ཏུ་བཞག་སྟེ།  བརྗོད་བྱ་ཚིག་གི་དབང་ལུང་།  བརྗོད་མེད་དོན་གྱི་དབང་ལུང་།  ཉེ་བརྒྱུད་ཆིག་རྫོགས་ཀྱི་དབང་ལུང་རྣམས་ཁྱོད་ལ་སྦྱིན་ནོ།  །ཐོབ་པར་ཤོག་ཅིག།  རྫོགས་པར་གྱུར་ཅིག།  ཅེས་གསུངས་ཤིང་སྐུ་དེ་རྣམས་ཤིག་ཤིག་ཏུ་མགུལ་བར་སྣང་།  དེར་བདག་གིས་དེ་འདྲའི་ས་སྐུ་ངོ་མཚར་ཅན་དེ་དག་ངོ་མཚར་རོ་སྨྲས་པ་ན།  མི་རྒན་ཞིག་ན་རེ།  མིག་མ་དག་པ་དེ་ཧ་ཧ།  ཡེ་ཤེས་སྒྱུ་མའི་སྐུ་ཡང་ས་སྐུ་རུ་མཐོང་བ་འདི་ཅི་འདྲ་འདྲ།  ཞེས་ཟེར་བ་དང་ཆབ་གཅིག་གཉིད་སད་སོང་།  དེ་ནས་དེ་ལ་མཁའ་འགྲོའི་གསང་མཛོད་ཡི་གེར་ཕབ་ཚེ་ཡིད་ཆེས་ཤིང་ངོ་མཚར་བའི་ལྟས་བཟང་པོ་འཇའ་འོད་ཀྱི་གུར་ཁང་འཁྲིགས་པ་དང་དུས་མཉམ་དུ་བྱ་རྒྱལ་རྒོད་ཀྱི་ཐུལ་ཕྲན་བབས།  དྲི་བཟང་གི་ན་བུན་ཐུལ།  རོལ་མོའི་རང་སྒྲ་གྲགས་པ་བྱུང་།  ཡང་དགུན་ཟླ་ར་བའི་ཚེས་བཅུའི་ཉིན་རྒྱལ་བ་ཚུལ་ཁྲིམས་ཞེས་བྱ་བས་ཀ་པཱ་ལ་མཚན་ཉིད་དང་ལྡན་པ་ཕུལ་ནས་བདུད་གཅོད་ཀྱི་གདམས་པ་ཉུང་བསྡུས་ཤིག་ཞུ་ཟེར་བ་ལ་དེ་ཕབ་ནས་ལུང་བྱིན།  རང་ལོ་ཉེར་དགུའི་ལོ་ཁྱིམ་དགུན་ཟླ་འབྲིང་པོའི་ཚེས་གཅིག་ལ་འབྲོས་ཕུག་ཏུ་ཕྱིན་ཏེ་ཚེས་བཅུའི་ཉིན་ནས་བཟུང་རང་གི་སློབ་བུ་གཉིས་དང་ལྷན་ཅིག་ཏུ་ཀློང་ཆེན་སྙིང་ཐིག་གི་རླུང་དང་གཏུམ་མོ་འཁྲུལ་འཁོར་རྣམས་ལོ་གཅིག་ཏུ་ཉམས་ལེན་བྱས་པས་དྲོད་རྟགས་བུམ་ཅན་རིལ་པ་ཞབས་ཚག་ཅན་མཐོང་བའི་ཡུལ་དུ་གྱུར་པ་དང་།  དགུན་གྱི་དུས་སུའང་ལུས་ལ་མེ་དྲོད་འབར་ཞིང་རས་རྐྱང་ཐུབ་པ་ཙམ་དུ་བྱུང་།  གཞན་ཡང་དུ་བ་ལྟ་བུའི་སྣང་ཉམས་དང་།  སྨིག་རྒྱུ་ལྟ་བུའི་སྣང་ཉམས་དང་།  རྒྱུ་སྐར་ལྟ་བུའི་སྣང་ཉམས་དང་།  སྣང་བའི་འོད་གསལ་དང་།  དཔེའི་འོད་གསལ་བསམ་གྱིས་མི་ཁྱབ་པ་ལ་བརྟེན་ནས་རིག་པའི་ཡེ་ཤེས་སྐྱོན་བྲལ་ཕྱིན་ཅི་མ་ལོག་པ་རྒྱུད་ལ་སྐྱེས་སོ།  །དགུན་འབྲིང་པོའི་ཚེས་བཅོ་ལྔའི་ཉིན་ཕ་ཡུལ་དུ་ཕྱིན་ཏེ་ཟླ་བ་ཕྱི་མའི་ཚེས་གཅིག་ལ་བདུད་འདུལ་རྡོ་རྗེའི་གཏེར་བྱོན་རྡོ་རྗེ་གྲོ་ལོད་ཀྱི་སྒྲུབ་ཐབས་ལ་བརྟེན་ནས་སྒྲུབ་གྲོགས་མཁྱེན་རབ་དང་།  ཀརྨ་དཀོན་མཆོག།  བླ་མ་བརྟན།  རིག་མཆོག་ཅེས་བྱ་བ་རྣམས་དང་ལྷན་ཅིག་ཏུ་ཟླ་བ་གཉིས་ཀྱི་བར་དུ་སྒྲུབ་པ་བྱས་སྐབས།  བནྡྷེ་མཁྱེན་རབ་དེ་ཉིད་རྒྱལ་འགོང་གདུག་པ་ཅན་ཞིག་གི་ནད་ཀྱིས་བཏབ་འདུག་པ་ལ་རྒྱལ་བསེན་དམ་ལ་བཏགས་པས་ནད་ལས་གྲོལ་བའི་ཚུལ་ནི།  སྒྲུབ་པ་ལ་ཞུགས་ནས་ཞག་བདུན་གྱི་རྨི་ལམ་ན་བུད་མེད་གསུམ་སྒོ་དྲུང་དུ་སླེབས་བྱུང་བར་བདག་གིས་མེ་ཡི་ཏིང་ངེ་འཛིན་བསྒོམས་པས་ཨ་ཚ་ཚ་ཞེས་སྐད་ཆེར་བཏོན་ནས་བྲོས་སོང་།  དེ་ནས་ཞག་ཉེར་གཅིག་གི་ནུབ་བྱི་ལ་དམར་པོ་ཞིག་སྒྲུབ་ཁང་དུ་བྱུང་བ་ལ་དབྱུག་པས་བསྣུན་པས་དེ་རྒྱལ་པོའི་ཆོ་འཕྲུལ་ཡིན་སྟབས་བདག་གི་ལག་གཡས་ཁར་བཅུག་ཅིང་སྤར་མོས་བཏབ་འདུག་པར་བྲེད་ཅིང་དངངས་ཏེ་རྡོ་རྗེ་གྲོ་ལོད་ཀྱི་བསྐྱེད་རིམ་དྲན་པར་བྱས་ནས་ལག་པ་གཡོན་པས་ཁོའི་རྐེ་ཙིར་གྱིས་བསྡམས་ཤིང་དམ་དུ་བཙིར་བའི་མོད་ལ་བནྡྷེ་གོས་ཧྲུལ་གྱོན་པ་ཞིག་ཏུ་གྱུར་ཏེ་ན་རེ།  ཨ་ཧ་བོ་ངའི་རྐེ་མ་སྡོམས་དང་ཡག་པོ་བཤད་རྒྱུ་ཡོད་ཟེར་བ་ལ།  སྐད་ཆའི་དགོས་པ་མེད་ཁས་ལོངས་ཞེས་སྨྲས་པས།  ཁོ་ན་རེ་ཁས་ཅི་ལེན་དགོས་ཤོད་ཟེར་ཕྱིན་ཆད་གནོད་པ་མི་བྱེད་པའི་ཁས་ལོངས་སྨྲས་པ་དང་།  ཁྱོད་དང་ཁྱོད་ཀྱི་འཁོར་ལ་གནོད་པ་བྱེད་རེ་ན་ར་ཀན།  བནྡྷེ་མཁྱེན་རབ་འདི་ལ་ཚིག་གསུམ་བཤད་དུ་མ་བཅུག་བར་དུ་མི་གཏོང་སྟེ་དེ་ནས་མི་གཏོང་རེ་ན་ར་ཀན་ཞེས་ཁས་བླངས།  དེ་ནས་མགོ་ལ་ལག་པ་བཞག་ཁ་རུ་དམ་ཆུ་བླུད་དེ།  དམ་ལ་བཞག་ནས་བཏང་།  མཐར་སྒྲུབ་པ་ཐེམས་ནས་ཞག་གསུམ་གྱི་ཉིན་རྒྱལ་པོ་བནྡྷེ་དེའི་ཁོག་ཏུ་ཞུགས་ནས་ཚུལ་དེ་དག་ཞིབ་ཏུ་སྨྲ་ཞིང་གཞན་ཡང་གཏམ་མང་པོ་ཞིག་བཤད་ནས་གནོད་པ་ཐམས་ཅད་ཡུལ་མེད་དུ་ཡལ་སོང་།  མཐར་ཡི་དམ་ལ་ཚོགས་སྐོང་སྟོང་ཕྲག་གཉིས་གྲངས་སུ་ལོངས་པར་བྱས་ནས་དངོས་གྲུབ་ལེན་ཁ་དེར་འཇའ་ཚོན་དཀར་པོ་ཞིག་གནས་ཁང་གི་སྟེང་དུ་ཟུག་སྟེ་མེ་ཏོག་གི་རྣམ་པའི་ཁ་བ་སིལ་མར་བབས་པ་སོགས་ལྟས་བཟང་ཤིན་ཏུ་དགེ་བ་བྱུང་།  དེ་ནས་རང་ལོ་སུམ་ཅུ་ལ་བབས་ཚེ་སླར་ཡང་འབྲོས་ཕུག་ཏུ་ཕར་ཕྱིན་ནས་བསྡད་པའི་སྐབས།  དབྱར་ཟླ་ར་བའི་ཚེས་བཅོ་བརྒྱད་ཀྱི་ནུབ་མཁའ་འགྲོ་མ་ལུས་ཀྱི་གཡས་ཕྱོགས་སྔོ་སང་ངེར་ཡོད་པ།  གཡོན་ཕྱོགས་དམར་བ།  བར་སེར་ཤར་རེ་བ་གསེར་སྐུད་སེར་པོ་དང་ཟངས་སྐུད་དམར་པོ་དང་ལྕགས་སྐུད་ནག་པོ་གསུམ་གྱི་སྐེ་རགས་བཅིངས་པ།  དར་ཚོན་སྣ་ལྔའི་ཤམ་ཐབས་གྱོན་པ་ཞིག་བདག་གི་ཐད་དུ་བྱུང་ནས་འདི་སྐད་ཅེས།  བུ་ཁྱོད་ལ་གྲུབ་པའི་རྟགས་དང་མཚན་མ་ཡོད་དམ་མེད།  ཡོད་ན་ང་ལ་སྨྲོས་ཤིག་ཟེར།  དེ་ལ་བདག་གིས།  ཁྱོད་སུ་ཡིན་ང་ལ་ཨོ་རྒྱན་ཆེན་པོས་གྲུབ་རྟགས་དང་རྫུ་འཕྲུལ་སུ་ལའང་བཤད་མི་རུང་།  རེ་ཞིག་སྦས་པའི་རྣལ་འབྱོར་པ་ཞིག་བྱུང་ན་སྒྲུབ་པ་ལ་བར་ཆད་མེད་ཅིང་ཆོས་བརྒྱད་ཀྱི་དབང་དུ་མི་འགྲོ་བའི་གནད་ཡོད་ཅེས་གསུངས་པས་བཤད་མི་ཉན་སྨྲས་པས།  མོ་ན་རེ།  ང་ནི་བཀའ་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞིའི་གསང་མཛོད་ཀྱི་བདག་མོ་ཀློང་ཡངས་སྨན་ཅེས་བྱ་བ་དེ་ཡིན།  མི་ལ་ངོམས་མ་སྔ་ན་ང་མི་མིན་མཁའ་འགྲོ་ལ་བཤད་པས་ནི་སྐྱོན་མེད་པས་སྨྲོས་དང་ཟེར་བ་ལ།  བདག་གིས་ཀྱང་དེ་བདེན་སྙམ་དུ་འདི་སྐད་སྨྲས།  ཨ་ཀྱང་ལགས་སོ།  །ང་རང་ལོ་བཅུ་དྲུག་ལ་བབས་དུས་སྦྱིན་བདག་མགོན་བསྟན་ཚང་ལ་ཀློག་འདོན་དུ་ཕྱིན་པ་དང་།  དེ་ན་རེ།  སྔར་ངེད་ཀྱི་དབྱར་ས་སེ་རའི་གཤོག་ལྟེབས་ཡིན་པ་ལ།  ལོ་གཅིག་ལ་ངེད་ཆུ་མིག་གི་མར་ངོས་སུ་བསྡད།  དོན་གྲུབ་ཚང་མར་ངོས་སུ་བསྡད་པས་ཆུ་མིག་དེ་ཉིད་སྐམ་སོང་།  དེ་ནས་བཟུང་ལོ་ལྔ་ཚུན་ཆད་ལ་ཆུ་མི་འདུག་སྟབས་དེར་བསྡད་ཐབས་མ་བྱུང་བས་གྱོང་ཆེ་ཡང་བྱ་ཐབས་བྲལ།  ད་རེས་ཁྱོད་བན་རྒན་གཞན་དང་མི་འདྲ་བའི་མངོན་ཤེས་ཅན་ཞིག་འདུག་པས་འདི་རུ་ཆུ་བརྡོལ་ཐབས་ཞིག་བྱུང་ན་གྲུབ་རྟགས་ངེས་པར་ཡིན་ཟེར་བ་ལ།  བདག་གིས་འདོད་དོན་ཨེ་འགྲུབ་རྨི་ལམ་བརྟགས་དགོས་བསམ་ནས་ཆུ་མིག་དེ་ཡིད་ལ་དྲན་བཞིན་གཉིད་དུ་སོང་བའི་རྨི་ལམ་ན།  ཁང་རལ་ཞིག་གི་ནང་དུ་སྦྲུལ་ནག་པོ་སྐེད་པ་མན་ཆད་སྐམ་ནས་ཉམ་ཐག་པ་ཞིག་ཉ་དང་སྦལ་པ་རྐང་ལག་སྐམ་པ་ཕྱི་དབུགས་དང་བྲལ་ཞིང་ནང་དབུགས་མ་ཆད་ཙམ་མང་པོས་བསྐོར་ནས་ཡོད་པའི་སར་སླེབས་འདུག་པས།  བདག་གིས་ཉམ་ཐག་པའི་སེམས་ཅན་འདི་རྣམས་སྙིང་རེ་རྗེ་འདི་ཅིས་ལན་པ་ཡིན་སྙམ་པས།  སྦྲུལ་དེ་ན་རེ།  ང་ནི་ཀླུའི་བུ་མོ་ནོར་འཛིན་མ་ཞེས་བྱ་བ་ཡིན།  སྔོན་དུས་བདག་གི་གནས་ཁང་གསེར་མཁར་གཡུའི་ཁ་བད་ཅན་ཞིག་ཡིན་ཏེ།  བདག་ཀྱང་སྟོབས་རྩལ་ལོངས་སྤྱོད་ཀྱི་དཔལ་དང་ལྡན་པ་ཞིག་ཡིན་ཀྱང་།  ཆུ་མིག་འདིའི་ནང་དུ་བུད་མེད་མང་པོས་རྐང་ལག་བཀྲུས་པའི་ཁུ་བ་སོང་བས་བདག་གི་སྟོབས་རྩལ་ཐམས་ཅད་ཉམས།  ལོངས་སྤྱོད་ཀྱང་དབུལ་མཁར་ཁྱིམ་ཞིག་ནས་ཉི་ཚན་དང་བྱེ་ཚན་གྱི་འཇིགས་པས་ཤིན་ཏུ་སྡུག་བསྔལ་ཞིང་ཉམ་ཐག་པ་ཡིན།  གྲུབ་པ་ཐོབ་པའི་གང་ཟག་ཞིག་གིས་ཆུ་སྦྱིན་བཏང་ན་ཕན་ལོས་ཐོགས་ཀྱང་ངའི་སྡུག་བསྔལ་མཐོང་བའི་སྐྱེས་བུ་མི་ཡོང་བས་ད་ཅི་བྱེད་ཟེར།  བདག་གིས་ཚུལ་དེ་སྦྱིན་བདག་དེ་ལ་བཤད་པས་ཁོས་ཀྱང་ཁྱེད་མ་འཆུག་དང་ཕན་ཐོགས་ངེས་རེད་ཟེར་འདུག་པས།  བདག་ཆུ་མིག་ཡོད་སར་ཕྱིན་ནས་ཆུ་སྦྱིན་མང་དུ་བཏང་ཞིང་འཕགས་པ་ཐུགས་རྗེ་ཆེན་པོ་མདུན་གྱི་ནམ་མཁར་བསྒོམ་ནས་དེའི་སྐུ་ལས་བདུད་རྩིའི་ཆུ་རྒྱུན་བབས་པས་ཀླུ་རྣམས་ན་བ་སོས།  ཤི་བ་གསོན།  མཁར་ཁྱིམ་དང་ལོངས་སྤྱོད་སྔར་བས་ཀྱང་དགུ་འགྱུར་གྱིས་ལྷག་པ་ཞིག་ཏུ་གྱུར་པར་བསམ་ཞིང་ཆུ་སྦྱིན་འབུམ་ཕྲག་གྲངས་སུ་ལོངས་ཁར་བུ་མོ་མཛེས་མ་ཞིག་མངོན་སུམ་དུ་བྱུང་ནས་ངེད་ལ་ཕྱག་འཚལ་ཏེ་ཁྱོད་བདག་ཅག་ལ་དྲིན་ཆེན་གྱི་གྲུབ་ཐོབ་དམ་པ་ཡིན།  ངེད་ཅག་ལ་ཉེས་པ་བྱེད་པའི་བུད་མེད་རྣམས་ལ་གནོད་ལན་ཐོངས་ངེས་ཞིག་མི་བྱེད་རེ་ཟེར་བ་ལ།  ངས་དེ་དག་མ་གསོད་མ་མནར་ཞིག་སྨྲས་པས།  བུ་མོ་དེས་ངེད་ཤི་བ་ཐམས་ཅད་གསོན།  ན་བ་སོས།  ལོངས་སྤྱོད་ཀྱི་དཔལ་ཀྱང་སྔར་བས་ལྷག་པར་འཕེལ།  མཁར་ཁྱིམ་ཡང་ཤིན་ཏུ་བཟང་པོར་གྱུར་གྱི།  ཁྱོད་ལ་དྲིན་ལན་དུ་ཀླུའི་ཕྱུགས་ཕུལ་ན་འབུ་སྲིན་དང་།  ནོར་བྱིན་ཀྱང་རྡོ་དང་ཤིང་ལ་སོགས་པར་འགྱུར་བས།  གསེར་གྱི་བྲག་ལུང་ནང་དུ་ཀླུ་མོ་གསེར་མདངས་མ་ལ་དུག་སྦྲུལ་གྱི་སྒོ་ང་ཞིག་ཡོད་དེ་ཕུལ་བ་ཡིན།  ཉར་ཚག་དམ་དུ་བྱོས་ལ་གཙང་སྦྲ་ལེགས་པར་བྱས་ན་ལོངས་སྤྱོད་ཕུན་སུམ་ཚོགས་པས་ཕྱུག་པར་འགྱུར།  ཉིད་ཀྱི་བཀའ་དང་འགལ་བར་མི་བགྱིད།  མི་སྲོག་དང་མི་ལ་མི་འབེབས།  ཞེས་ཟེར་གྱིན་ནམ་མཁར་སོང་བའི་མོད་ལ་སྤྲིན་ནག་པོ་དུམ་ཞིག་ཆད་པ་དེ་ཉིད་ཇེ་ཆེར་སོང་བའི་ཚུལ་སྦྱིན་བདག་ལ་སྨྲས་པ་དང་།  དེ་ན་རེ་ཁྱོད་ཀྱིས་འབུམ་ཞལ་ཕྱེ་ཞིག་མ་བྱས་ན་ཕོག་ཐུག་བཏང་ས་ངེད་ལོས་ཡིན་ཟེར་བ་བཞིན་ངས་ཀྱང་དེ་ལྟར་བྱས་མོད།  ཡུན་ཅིག་གི་ཚེ་སེར་རླུང་དྲག་པོ་བབས་པ་དང་ཆབ་གཅིག་ཐོག་ཕབ་པས་འབྲི་མ་བུ་ལྔ་བསད།  ཆུ་ཤུལ་ཆེན་པོ་བརྡོལ་བྱུང་།  དེ་གྲུབ་རྟགས་ཡིན་ནམ།  ཡང་སྦྱིན་བདག་དེ་ཚང་གི་མཛོ་མོ་ཞིག་ཤི་འདུག་པ་ལ་ངས་བདེན་པ་བརྡར་ནས་ཀླུ་མོ་དེ་ལ་དམ་བསྒྲགས་པས་ཡར་ལངས་ཏེ་སོང་བ་དང་།  ཡང་མགོན་བསྟན་ཚང་གི་ཁྱིམ་ནང་ཏེ་ལོ་ཞིག་ལྷག་ལྷག་དགོད་འདུག་པས་རྟ་དང་གནག་ལུག་ཐམས་ཅད་འདྲོག་སོང་ཚེ་ངས་བདེན་པ་བརྡར་ཞིང་དམ་བསྒྲགས་པའི་མོད་ལ་གཟུགས་མི་མཐོང་ཞིང་སྐད་ཚོར་བ་ཞིག་གིས་དེ་ལྟར་མ་ཟེར་ཅིག།  རྟ་ཕྱུགས་ཉེར་གཅིག་བླངས་ཀྱང་ལྔ་ཙམ་མ་གཏོགས་ཁྱོད་ཀྱི་ངོ་སྐལ་དུ་སྟེར་ཟེར་བ་བཟའ་མི་ཀུན་གྱིས་ཐོས་པ་དེ་ཚོ་གྲུབ་རྟགས་ཡིན་ནམ།  སྔར་ལོ་ཀཿཐོག་ཕྱག་ཚ་སྤྲུལ་སྐུའི་མདུན་ནས་རིག་འཛིན་བདུད་འདུལ་རྡོ་རྗེའི་གཏེར་བྱོན་ཆོས་སྐོར་གྱི་དབང་ལུང་རྣམས་ཞུས་སྐབས་ཉིན་གཅིག་ཚོགས་གྲལ་ལ་ཡོད་པའི་ཚེ།  བུ་མོ་ཞིག་གིས་འདིར་མ་འདུག་པར་སོང་ཞིག་ཟེར་བ་ལ།  བདག་ཁྲོས་པའི་ཚུལ་གྱིས་དེ་མ་ཐག་ཏུ་ཧོར་ཚང་གི་བླ་མ་ཞིག་རྒྱལ་པོར་གྱུར་པའི་རྒྱལ་ཁང་དུ་སྡོད་གནས་བཅས་ཡོད་པ་དེར་སོང་བ་ན་ལྡེ་མིག་གྲོགས་པོའི་ལག་ཏུ་ཡོད་སྟབས་སྒོ་ཕྱེ་མ་ཁོམ་པར་སྒོ་དྲུང་ནས་ཕར་བསམ་མནོ་མ་བཏང་བར་རྒྱུག་པས་ཁང་པ་ཟང་ཐལ་དུ་ཕུག་ནས་ནང་དུ་ཕྱིན་པ་དེ་ཚོ་གྲུབ་རྟགས་ཡིན་ནམ།  ཁང་པའི་ནང་དུ་སླེབས་མ་ཐག་རྒྱལ་པོ་དེའི་ཆོ་འཕྲུལ་བན་རྒན་ཞིག་གིས་བདག་གི་རྒྱབ་ལོགས་ནས་རྐང་ལག་བཞིས་བསྡམས་ནས་ཁྱོད་ལ་ད་སྟོབས་ཅི་འདྲ་ཡོད།  ང་རང་གི་སྟོབས་འདི་ཡིན་ཁྱོད་ངས་ཐུབ་པ་ཡིན་ཟེར་བས།  བདག་བྲེད་སྔངས་སྐྱེས་པའི་མོད་ལ་རང་ལུས་གུ་རུ་དྲག་པོ་གཏུམ་དྲག་དམར་ནག་ཞིག་ཏུ་བསྒོམ་ཞིང་མེ་དཔུང་འབར་བའི་དམིགས་པ་གསལ་བས།  ཁོས་ཨ་ཚ་ཚ་ཟེར་ནས་ས་ཐོག་ཏུ་ལྷུང་བ་ན་རྐང་པ་གཡས་ནས་བཟུང་སྟེ་ཀླད་ལ་ལན་གསུམ་བསྐོར་ཏེ་ས་ལ་བརྡབ་པས་ཁོ་རི་བོང་གི་རིལ་མ་ཞིག་ཏུ་གྱུར་པ་ཁུག་མའི་ནང་དུ་བཅུག་སྟེ་ཁ་བསྡམས་ཤིང་མལ་འོག་ཏུ་སྦས་ནས་བཞག།  ཞག་ཉེར་གཅིག་འདས་པའི་རྗེས་སུ་བན་རྒན་དེས་ང་ཐོངས་དང་ཁྱོད་ཀྱི་འཁོར་འབངས་འདིར་གནོད་པ་བྱེད་རེ་དྲི་མེད་ཞིང་སྐྱོང་མགོན་པོ་དཔང་ཟེར་བ་ལ།  བདག་གིས་དམ་ཉམས་མནའ་ཟའམ་སྨྲས་པ་ན།  ཨ་ཁ་ཁ་གནོད་པ་བྱེད་རེ་ན་ར་ཀན།  ཅེས་ཟེར་བས་ཁོ་བཏོན་ཏེ་བཏང་བ་ན་ཤིན་ཏུ་ཉམ་ཐག་པར་གྱུར་ཅིང་།  ཁང་འོག་ཏུ་ཡོད་པའི་སྐྱ་ཀ་བླ་མ་མིང་སྲིང་དང་སྟག་མཚལ་བླ་མ་རྣམས་ལ་ནི་ཅི་ཐུབ་ཞིག་མི་བྱེད་རེ་ཟེར་ནས་འགྲོ་གྲབ་བྱེད་འདུག་ཚེ།  བདག་གིས་ཁྱོད་གར་འགྲོ་དྲིས་པས་ཁོ་བོ་ལྷོ་བླ་ཨོ་རྒྱན་རྒྱ་མཚོའི་སར་འགྲོ་ཟེར་ནས་སོང་།  ཞག་ཉེར་གཅིག་པོ་དེའི་རིང་ལ་བླ་མའི་བསྙུན་དྭངས་ནས་ཡོད་པ་ལ་དེའི་ནུབ་མོ་རྒྱལ་པོ་དེས་ང་ནི་ཞག་གྲངས་ཉེར་གཅིག་གི་བར་དུ་བན་རྒོད་མི་སྲུན་པ་ཞིག་གིས་བཙོན་དུ་བཟུང་ནས་བཀྲེས་སྐོམ་གྱིས་གདུང་སྟེ་སྡུག་བསྔལ་མྱོང་མྱོང་མཐར་ད་འདིར་སླེབས་པ་ཡིན་ཟེར་བ་རྨིས་ཤིང་།  ཕྱིར་ཉིན་ནད་ཀྱང་ཇེ་ཐུར་སོང་ནས་གྲོང་སོང་བ་དེ་ཡང་གྲུབ་རྟགས་ཡིན་ནམ།  དེ་ནས་སྐྱ་ཀའི་སྲིང་མོ་ཡང་དེའི་ཉིན་ཕྱི་མར་སྨྱོས་སོང་།  བླ་མ་ལ་ཁྱོད་ཁྲོམ་འཚོགས་ནས་ཚོགས་འཁོར་འདོན་སྐབས་ལྐོག་ཏུ་བྲོས་ཏེ་རྒྱུག་ལ་ཟླ་བ་གཅིག་གི་བར་དུ་ཕུར་པའི་མཚམས་ལ་སྡོད་ཅེས་སྨྲས་ཀྱང་ངེད་ཀྱི་ངག་བཞིན་མ་བསྒྲུབ་པར་ཚོགས་གྱེས་པའི་རྗེས་སུ་སོང་བ་ན་ཟླ་བ་ཕྱི་མའི་ནང་དུ་ཤི་ཐལ།  སྟག་མཚལ་བླ་མ་ལ་ཁྱོད་ཀྱི་ཟོས་ལྷག་འཐུང་ལྷག་ཐམས་ཅད་ཀྱིས་གསུར་ཆེན་ཞིག་ཐོང་ལ་ཧོར་བླ་འདྲའི་མིང་ནས་ལན་གསུམ་བོས་མཐར་མིས་མ་ཚོར་བར་ལྐོག་ཏུ་བྲོས་སོང་ན་སྐྱོན་མེད་མ་གཏོགས་དེ་ལྟར་མ་བྱས་ན་གྲི་རུ་འཆི་ངེས་རེད་སྨྲས་ཀྱང་།  ཁོ་བོའི་ངག་བཞིན་མ་ཉན་པར་རང་ཁྱིམ་དུ་ཕྱིན་ཏེ་ཞག་གསུམ་བསྡད་རྗེས་གཡག་ཞིག་ཞོན་ནས་སྨར་མཐའ་མའི་ནང་དུ་སོང་བ་ན་གཡག་འདྲོགས་ནས་དེར་བསད་སོང་ཞེས་ཞུས་པས།  མོ་ན་རེ།  མངོན་ཤེས་དང་རྫུ་འཕྲུལ་དེ་ལས་ལྷག་པ་མི་དགོས་མོད།  གཞན་ལ་གསང་རྒྱ་དམ་དུ་བྱས་ནས་སྦས་པའི་རྣལ་འབྱོར་པ་ཞིག་བྱུང་ན་ལེགས།  བར་ཆད་མེད་ཅིང་ཆོས་ལ་གེགས་རྐྱེན་མི་འབྱུང་བའི་གནད་ཡོད།  ད་ཁྱོད་ཀྱི་གསང་ཚིག་རྣམས་སྨྲས་ཟིན།  ངས་ལུང་སྟོན་པ་ནི་འདི་ཡིན་ནོ།  །ཧེ་ཧེ།  མཁའ་སྤྱོད་ཨ་མའི་བུ་ཆུང་།  །སྙིགས་མ་ལུས་ཀྱི་དྭངས་མ།  །ཙིཏྟ་རིན་ཆེན་དབུས་ནས།  །སྡོང་པོ་རྩ་མཆོག་དྭངས་མའི།  །འབྲས་བུ་མཐོང་བྱེད་ཙཀྵུ།  །ཕྱི་འབྱུང་དབྱིངས་ཀྱི་འོད་ལྔ།  །ནང་འབྱུང་ཐིག་ལེ་ཟླུམ་འཁྱིལ།  །མཆེད་གཞི་ཤེས་རབ་རང་བྱུང་།  །སེམས་ཅན་ཡོངས་ལ་གནས་ཀྱང་།  །མངོན་སུམ་མ་གྱུར་དབང་གིས།  །སྲིད་པའི་འཁོར་ལོར་ཁ་འཁྱལ།  །མ་དག་ལས་ཀྱི་བསྐལ་པ།  །དག་དབྱིངས་དྭངས་མར་ཞིག་པའི།  །འོད་གསལ་ཆོས་ཉིད་རོལ་པར།  །ཞོག་དང་ས་ལམ་ཡོན་ཏན།  །མ་བཙལ་ངང་གིས་འབྱུང་ཡོང་།  །ཁྲེགས་ཆོད་ཆོས་ཉིད་བདེན་པ།  །ཁྱོད་ཀྱིས་མངོན་སུམ་མཐོང་ཡོད།  །མྱུར་ལམ་འཕོ་བ་ཆེན་པོའི།  །གདམས་པ་ཉམས་སུ་ལོངས་དང་།  །ང་ཉིད་དྭངས་མའི་འོད་གསལ།  །དྭངས་མར་བརྫུས་ཏེ་མ་བུ།  །དབྱེར་མེད་རོ་གཅིག་འདྲེས་འགྲོ།  །ཞེས་ཟེར་ནས་བདག་གི་སྙིང་གར་ཐིམ་པས་མྱུར་ལམ་ཐོད་རྒལ་གྱི་གནད་ཇི་ལྟ་བ་བཞིན་དུ་ངོ་འཕྲོད་པར་གྱུར་ཏོ།  །མི་མིན་ཡེ་ཤེས་ལུས་ཅན་མཁའ་འགྲོ་མས།  །དགོས་པའི་དབང་ངམ་ཇི་ལྟར་ཡིན་ཀྱང་རུང་།  །ཕལ་བ་བཞིན་དུ་ནན་གྱིས་འདྲི་བའི་དོན།  །ཇི་ལྟ་བ་བཞིན་མ་གབ་གསལ་བར་སྨྲས།  །དེས་ཀྱང་སྙན་པའི་གསུང་གིས་དབུགས་དབྱུང་བཅས།  །རང་བྱུང་གཉུག་མའི་རྩ་ཐིག་ངོ་སྤྲོད་ཅིང་།  །ཟབ་མོའི་གདམས་ངག་གནང་སྟེ་ཕྱི་ནང་གི།  །བརྡ་དོན་འོད་གསལ་ཡེ་ནས་དབྱེར་མེད་པ།  །མཚོན་ཕྱིར་བདག་དང་རོ་གཅིག་ཐིམ་པའི་མོད།  །མྱུར་ལམ་གསང་གནད་ཚུལ་བཞིན་རྟོགས་པར་གྱུར།  །དུས་དེ་ནས་བཟུང་སྟེ་འོད་གསལ་ཐོད་རྒལ་གྱི་ལམ་ལ་བརྟེན་ནས་ཁང་པའི་གསེང་དཀར་ལ་བལྟས་ཏེ་སེམས་ཏིང་ངེ་འཛིན་ལ་རྩེ་གཅིག་མཉམ་པར་བཞག་པའི་དུས་སུ་ཡུལ་ཡངས་པ་ཆེན་པོའི་ཞིང་ཁམས་བསམ་གྱིས་མི་ཁྱབ་པ་མཐོང་ནས་སངས་རྒྱས་ཡེ་ཤེས་ཉི་མ་ཞེས་བྱ་བས་འཁོར་བྱེ་བ་བརྒྱད་ལ་ཆོས་སྟོན་པ་དང་།  སངས་རྒྱས་མི་འགྱུར་ཞེས་བྱ་བས་གདུལ་བྱ་ཐེར་འབུམ་ལ་ཆོས་སྟོན་པ་སོགས་མཐོང་སྣང་བསམ་གྱིས་མི་ཁྱབ་པ་བྱུང་ངོ་།  །དེ་ནས་རང་ལོ་སུམ་ཅུ་སོ་གཅིག་ལ་བབས་པའི་དུས་སུ།  །ཉིན་གཅིག་མདུན་ཐད་ཀྱི་ནམ་མཁར་སངས་རྒྱས་གདོན་མི་ཟ་བའི་རྒྱལ་པོ་ཡིན་སྐད་པའི་ལོངས་སྤྱོད་རྫོགས་པའི་རྒྱན་སྣ་ཚོགས་ཀྱིས་བརྒྱན་པ་ཞིག་སྣང་སྟེ།  དེའི་སྐུའི་རྒྱན་ཕྲེང་དོ་ཤལ་གྱི་འབྲུ་རེ་རེའི་ནང་དུའང་སངས་རྒྱས་ཀྱི་ཞིང་ཁམས་རེ་རེ་སྣང་བ་དང་།  ཡང་དེ་དག་གི་རྒྱན་རེ་རེའི་ནང་དུའང་སངས་རྒྱས་ཀྱི་ཞིང་ཁམས་གྲངས་མང་བ་མཐོང་སྟེ།  དེ་ལྟར་རིམ་པ་བཞིན་དུ་སྣང་བའི་མོད་ལ་རིག་པ་བསམ་གྱིས་མི་ཁྱབ་པའི་འོད་གསལ་མངོན་དུ་གྱུར་ཏེ་ཞག་བདུན་གྱི་བར་དུ་འདི་སྣང་འགགས་པས་ཉེ་གནས་དང་རིག་མ་བུ་སློབ་ཐམས་ཅད་ཀྱིས་འཆི་ལྟས་ཨེ་ཡིན་སྙམ་ནས་ཡིད་མ་བདེ་བར་མྱ་ངན་བྱེད་དགོས་པ་བྱུང་།  དེར་བྱིའུ་དམར་པོ་ཞིག་ལྷགས་ནས།  བསྭོ་ལོ་ཀྱེ།  ཁྱེའུ་ཆུང་བསམ་དུ་མེད་པ།  །ང་ནི་འཕགས་པའི་ཡུལ་གྱི།  །མཁའ་འགྲོ་དགའ་རབ་མཚོ་ཡིན།  །ཚེ་འདིའི་སྣང་བ་ཐམས་ཅད།  །སྒྱུ་མ་རྨི་ལམ་ལྟ་བུར།  །བརྟན་གནས་མེད་ལ་ལྟོས་དང་།  །རང་དོན་བྱེད་དགོས་ལོས་དྲན།  །སྣ་ཚོགས་སྣང་བའི་ཆོས་ལ།  །ཤེས་རབ་མིག་གིས་ལྟོས་དང་།  །ཐམས་ཅད་ནམ་མཁའི་རང་བཞིན།  །ཀུན་གྱི་སྣང་གཞི་ནམ་མཁའ།  །མངོན་གྱུར་ཉིད་དུ་གོམས་པའི།  །གདིང་ཆེན་ཐོབ་པའི་སྐྱེས་བུ།  །རང་ཐོག་རང་སངས་རྒྱས་ལ།  །མི་རིང་ཉེ་ལམ་ངེས་པ།  །དེ་ཉིད་མངོན་གྱུར་ངང་དུ།  །མ་བཙལ་རང་སར་ཞོག་དང་།  །ཀུན་བཟང་རྒྱལ་ས་ཐོབ་འོང་།  །ཞེས་ཟེར་ཞིང་འཕུར་སོང་།  །ཡང་བྱིའུ་མདངས་དམར་ཞིག་གིས་ན་རེ།  །ཨཻ།  ཁྱེའུ་ཆུང་ནམ་མཁའི་ཡིད་ཅན།  །མ་ཡེངས་ང་ལ་ཉོན་དང་།  །འཁོར་བ་སྒྱུ་མའི་གྲོང་ཁྱེར།  །སྙིང་པོ་མེད་ལ་ལྟོས་དང་།  །སོ་སོའི་སྐྱེ་བོའི་སྡུག་བསྔལ།  །དེ་ལ་ཟད་མཐའ་མ་མཐོང་།  །འཁོར་འདས་སྣང་བའི་ཆོས་ཀུན།  །ཆོས་ཉིད་ཆེན་པོར་རིག་པའི།  །ཆོས་ཉིད་ནམ་མཁའི་རྣལ་འབྱོར།  །ཀུན་ཏུ་བཟང་པོའི་ས་ལ།  །མི་རིང་མྱུར་དུ་བགྲོད་པའི།  །སྐྱེས་བུ་ཆེན་པོའི་སྐྱིད་པ།  །བུ་ཁྱོད་འགྲོ་བའི་དོན་དུ།  །ཨོ་རྒྱན་ཀུན་བཟང་པདྨས།  །འདྲེན་སྟོན་ལས་ཀྱི་ཕོ་ཉར།  །མངགས་ཕྱིར་གཞན་དོན་དང་ལོངས།  །ཐོད་རྒལ་ལམ་མཆོག་ཟབ་མོ།  །ད་ཙམ་དེ་གར་ཞོག་ལ།  །བུ་སློབ་སྐྱོངས་ཤིག་ཨེ་གོ།  ཞེས་ཟེར་བ་བདག་གིས་རྗེས་ཟློས་བྱས་པས་ཉེ་གནས་ཇོ་རྒན་མ་ཡེ་ཤེས་སྒྲོན་གྱིས་ད་རེས་བྱིའུ་སྐད་སྙན་པོ་ཞིག་ཡུན་རིང་དུ་གྲགས་རྒྱུ་དེ་འདྲ་ཚོར་མ་མྱོང་།  མཚར་རེ་ཆེ་མི་ཞིག་གིས་ངག་བཀུག་ནས་གླུ་ལེན་པ་དང་འདྲ་ཟེར།  དེ་ལྟར་ཆོས་ཉིད་མངོན་སུམ་གྱི་དུས་སུ་བུམ་དབང་གི་ནུས་པ་ལུས་ཀྱི་གདོས་པ་ལ་ཐེབས་པས་ལུས་རྡོ་རྗེའི་སྐུ་རུ་སྨིན་པ་དང་།  གསང་དབང་གི་ནུས་པ་ངག་ལ་ཞུགས་པས་རྡོ་རྗེའི་གསུང་གི་རོལ་པར་སྨིན་ཅིང་།  ཤེར་དབང་གི་ནུས་པ་སེམས་ལ་ཐེབས་པས་སེམས་ཤེས་རབ་ཡེ་ཤེས་སུ་སྨིན་ཏེ་ཆོས་ཉིད་ནམ་མཁའ་མཛོད་ཀྱི་ཀློང་བརྡོལ།  །ཚིག་དབང་གི་ནུས་པ་སྣང་བ་ལ་ཐེབས་པས་སྣང་བ་ཐམས་ཅད་འཇའ་དང་ཐིག་ལེའི་རོལ་པར་གོ་འཕོས་པའི་རྟགས་རྣམས་མངོན་དུ་གྱུར་པ་ཡིན།  འདི་དུས་རིག་འཛིན་དགའ་རབ་རྡོ་རྗེ་ཡིན་སྐད་པའི་གཅེར་བུ་དར་དཀར་པོའི་ཨང་རག་གྱོན་པ་ཞིག་ན་རེ།  འཁོར་འདས་ཀྱི་སྣང་བ་ཐམས་ཅད།  །སྒྱུ་མ་དང་རྨི་ལམ་ཇི་བཞིན།  །གཞི་མེད་དང་རྩ་བྲལ་ཆེན་པོ།  །རང་སྣང་འདི་རང་བཞིན་མེད་དེ།  །རྒྱུ་རྐྱེན་ལ་རྟེན་འབྱུང་ངེས་པ།  །རང་རིག་འདི་གཞི་མེད་རྩ་བྲལ།  ཁྱབ་གདལ་དུ་ནམ་མཁའི་ཁོར་ཡུག།  རང་གཞི་ནི་སྤྲོས་དང་བྲལ་བའི།  །ཡུལ་མེད་དང་ཟང་ཐལ་ངེས་པ།  །ཀ་དག་ནི་གདལ་ཁྱབ་ཆེན་པོ།  །དྭངས་གསལ་དུ་རྙོག་མ་བྲལ་བའི།  །རང་གདངས་ལས་ལྷུན་གྲུབ་རོལ་པ།  །ཡེ་ཤེས་དང་ཡོན་ཏན་གཏེར་མཛོད།  །ཞིང་ཁམས་དང་སྐུ་ཡི་རོལ་པ།  །འབད་རྩོལ་གྱི་ལས་ཀར་མ་ལྟོས།  །མངོན་གྱུར་དུ་རང་ས་ཟུངས་དང་།  །རང་ཐོག་ཏུ་རང་སངས་རྒྱས་འོང་།  །ཞེས་གསུངས་པའི་ལན་དུ།  ཀྱཻ།  དུས་གསུམ་རྒྱལ་བའི་སྤྱི་གཟུགས།  །འགྲོ་བའི་བླ་མ་གསོན་དང་།  །བདག་ནི་ལས་ངན་དབང་གིས།  །སྙིགས་མའི་དུས་འདིར་སྐྱེས་ཏེ།  །སྤྱིར་ནི་རིགས་དམན་མིན་ཀྱང་།  །ཕ་མེས་མི་སྲུན་པ་ཚོས།  །སྔགས་ནག་ནུས་ལྡན་བདག་ལ།  །ཕོད་བཙུགས་དོ་བསྡོ་བྱས་པས།  །བྱད་དང་གཏད་མནན་དལ་ཁ།  །ཚོགས་ཤིང་དུས་ལ་བབས་པས།  །བུ་བརྒྱུད་ཕྱི་རབས་རིང་ལ།  །ཁས་ཉན་དབང་ཆུང་འབྱོར་ཉམས།  །གསོ་བའི་ཐབས་ཞིག་ཡོད་ན།  །རིག་འཛིན་མཁའ་འགྲོའི་སྙིང་ཐིག།  སྙིང་གི་དཀྱིལ་དུ་འཕོས་ཚེ།  །སྲོག་གི་གཏའ་རུ་ལོས་འཛིན།  །ཚེ་འདིར་མངོན་འཚང་རྒྱ་བར།  །བླ་མའི་བྱིན་གྱིས་རློབས་ལ།  །ཁྱེད་དང་སྐལ་བ་མཉམ་པར།  །ད་ལྟ་ཉིད་དུ་བྱིན་རློབས།  །ཞེས་བརྗོད་པ་དང་།  ནམ་མཁའི་དབྱིངས་སུ་འཇའ་ལྟར་ཡལ་སོང་།  ཡང་རེ་ཞིག་གི་ཚེ་སློབ་དཔོན་ཧཱུྃ་ཆེན་ཀཱ་ར་ཡིན་སྐད་པའི་རྣལ་འབྱོར་པ་དམར་ནག་ཧེ་རུ་ཀའི་ཆས་སུ་ཞུགས་པ་ཞིག་འཇའ་འོད་ཐིག་ལེའི་ཀློང་དུ་སྣང་ནས།  ཀྱཻ།  ང་ངོ་ཁྱོད་ཀྱིས་ཨེ་ཤེས།  །ང་ནི་རིག་འཛིན་རྒྱལ་པོ།  །ཧཱུྃ་ཆེན་ཀཱ་ར་དེ་ཡིན།  །བུ་ཁྱོད་ཉམས་སྣང་གོང་འཕེལ།  །སྣང་བ་རྒྱན་དུ་ཤར་བའི།  །ལྷ་དང་ཞིང་ཁམས་སྣང་བ།  །མ་ངེས་སྣ་ཚོགས་སྣང་ཡང་།  །སྒྱུ་མའི་ཉམས་ཀྱི་སྣང་བར།  །ཁོ་ཐག་ཆད་པར་གྱིས་དང་།  །གོལ་ཤོར་འཕྲང་ལས་གྲོལ་འོང་།  །མི་ལོ་བདུན་ཕྲག་གཅིག་ཏུ།  །བར་མེད་ཉམས་སུ་བླངས་ན།  །འཇའ་ལུས་ཆེན་པོར་འཚང་རྒྱ།  །ཕ་ཡི་ཐོབ་ནོར་ལོངས་ལ།  །གཞན་དོན་དང་དུ་ལེན་མཛོད།  །ཅེས་གསུངས་པའི་ལན་དུ།  གསོན་དང་རིག་འཛིན་རྒྱལ་པོ།  །སྨར་ཡུལ་མུན་པའི་ཁྲོད་ན།  །འགྲོ་དོན་བྱེད་ཡུལ་མི་འདུག།  བསམ་རྒྱུ་ཆོས་ལས་མེད་བཞིན།  །རང་དོན་དང་དུ་བླང་ཡང་།  །ལྟོ་གོས་སྲེད་ལེན་དབང་གིས།  །རྙེད་ཚོལ་མི་བྱེད་ཀ་མེད།  །སེམས་ཅན་ཀུན་གྱི་ཆོས་ཉིད།  །མཐུན་རྐྱེན་འབད་མེད་འབྱུང་བར།  །བླ་མས་བྱིན་གྱིས་རློབས་མཛོད།  །ཅེས་ཞུས་པས་བླ་མའི་ཞལ་ནས།  །ཀྱཻ།  ཁྱེའུ་ཆུང་བསམ་དུ་མེད་པ།  །པདྨའི་གཏེར་དང་འཕྲད་ཚེ།  །ཤེས་རབ་གཟུངས་མ་ལོས་བརྟེན།  །གཟུངས་མ་གྲོགས་སུ་བརྟེན་ན།  །འཁོར་བའི་ཁ་འཛིན་འགྱུར་དོགས།  །དེ་ཕྱིར་དེ་ཡི་ཚེ་ན།  །ཚེ་གཅིག་དཀོར་ལ་མ་འབྱམས།  །མི་ཚེའི་ལྷག་མར་ཐུག་ཚེ།  །སྒྲུབ་པ་ལྷུར་ལེན་རེམ་མཛོད།  །ཉམས་ལེན་ནུས་པ་མེད་པའི།  །སྐྱེས་བུ་མང་དུ་འབྱུང་ནས།  །འདོད་པ་ཁ་རུ་འདོན་ཚེ།  །བསྟན་བཅོས་མང་པོ་ཞོག་ལ།  །མངོན་སུམ་མངོན་དུ་གྱུར་པའི།  །ཆོས་ཉིད་དབྱིངས་སུ་ཆམ་ཞོག།  ཅེས་ཟེར་ཞིང་དབྱིངས་སུ་ཡལ་སོང་།  །དེ་ནས་རང་ལོ་སུམ་ཅུ་སོ་གཉིས་ལ་བབས་པ་ཧོར་ཟླ་དང་པོའི་ཚེས་གཅིག་གི་ནུབ་རྨི་ལམ་ན་བྱིས་པ་ཤ་མདོག་དཀར་པོ་དར་དཀར་གྱི་ཨང་རག་གྱོན་པ་ཞིག་བདག་གི་ཐད་དུ་བྱུང་ནས།  སྐྱེས་བུ་ཁྱོད་ཀྱིས་ཅི་འདོད་ཟེར་བའི་ལན་དུ་བདག་གིས་འདི་སྐད་ཅེས།  འཇིག་རྟེན་འདི་ན་དཀོན་པའི་ཆོས་མཆོག་ཟབ་མོ་བདུད་ཀྱི་གཅོད་ཡུལ་རྫོགས་པ་ཆེན་པོ་དང་འབྲེལ་བ་ཞིག་འདོད་པས་དེ་ཁྱོད་ཀྱིས་ཤེས་སམ་སྨྲས་པས།  ན་རེ།  ངས་མི་ཤེས་ཀྱང་ཡུལ་དགའ་བའི་ཚལ་བྱ་བ་ན་བླ་མ་འཇམ་དབྱངས་ཞེས་པའི་སྟོན་པ་མཆོག་གིས་རང་རྩལ་སྒྱུ་མའི་འཁོར་ལ་གང་འདོད་པའི་ཆོས་སྟོན་ཏོ།  །དེ་ནི་གདུལ་བྱའི་དོན་དུ་འཆད་ཉན་གྱི་ཚུལ་མཛད་པ་ཡིན་པས་དེར་ཨེ་འགྲོ་ཟེར་བ་ལ།  །བདག་གིས་འགྲོ་སྨྲས་ནས་ཕྱིན་པས་ཡུལ་མང་པོ་ཞིག་གི་ཕ་རོལ་ཏུ་སོང་སྟེ་ཤིན་ཏུ་སྐྱིད་པའི་དགའ་ཚལ་ཞིག་ན་འཇའ་རིས་ཀྱི་དྲྭ་བ་མིག་མང་རིས་སུ་ཤར་བའི་ར་བ་ཡངས་ཤིང་རྒྱ་ཆེ་བའི་དབུས་སུ་རིན་པོ་ཆེའི་ཁྲི་དཔངས་མཐོ་བའི་སྟེང་དུ་རང་གི་བླ་མ་དེ་ཉིད་སྔོན་མི་ཡུལ་དུ་བཞུགས་པའི་དུས་ཀྱི་སྐུའི་ཆ་བྱད་ལྟ་བུ་དར་དང་རིན་པོ་ཆེའི་རྒྱན་གྱིས་བརྒྱན་ནས་བཞུགས་སྣང་པའི་མདུན་སར་བདག་སླེབས་མ་ཐག་ཤིན་ཏུ་གུས་ཤིང་དད་པའི་ངང་ནས་ཕྱག་འཚལ་ཞིང་ཞབས་ལ་སྤྱི་བོས་གཏུག་སྟེ་སྨོན་ལམ་མང་པོ་བཏབ་ཅིང་མདུན་དུ་འཁོད་པའི་མོད།  །བྱིས་པ་དེ་ན་རེ།  །བླ་མ་ལགས་སྐྱེས་བུ་འདིས་བདུད་གཅོད་ཟབ་མོའི་གདམས་པ་འདོད་ཟེར་བས་དེ་ཚུལ་བཞིན་དུ་སྟོན་པར་ཞུ་ཟེར།  བླ་མ་མཆོག་གིས་ཡུན་ཅིག་ཅིའང་མི་གསུངས་པར་སྤྱན་ནམ་མཁར་གཟིགས་ནས་བཞུགས་སོ།  །རེ་ཞིག་གི་ཚེ་འདི་སྐད་དོ།  །ཀྱཻ་ཧོ།  རིགས་ཀྱི་བུ་གཅོད་ཅེས་བྱ་བ་ནི་བདག་འཛིན་གཞིག་པའི་མན་ངག་བདུད་བཞི་རང་མལ་དུ་གསོད་པའི་གདམས་པ།  ཐོས་པ་ཐམས་ཅད་ཀྱི་མཆོག།  སྒོམ་པ་ཀུན་གྱི་གེགས་སེལ།  ཆོས་རྣམས་ཀུན་གྱི་ཡང་བཅུད།  རྣལ་འབྱོར་ཡོངས་ཀྱི་ལམ་བཟང་།  རྣམ་མཁྱེན་ཐོབ་པའི་མྱུར་ལམ་ཀུན་གྱི་མདོ་ཆིངས།  རྐྱེན་ངན་ཐོག་བརྫིས་ཀྱིས་གཅོད་པའི་གདམས་པ།  །ལྟས་ངན་གཡང་དུ་ལེན་པའི་མན་ངག།  ན་ཚ་ལམ་དུ་སོང་བའི་ཟབ་ཆོས།  །ལྷ་འདྲེ་གྲོགས་སུ་བྱེད་པའི་ཐབས་མཆོག།  འཁོར་འདས་རང་སྣང་དུ་ཐག་གཅོད་པའི་ཐབས།  །འཕོ་བ་ནམ་མཁའ་གོ་འབྱེད།  བར་དོ་དབྱིངས་སུ་གཅོད་པའི་ཐོད་རྒལ།  ཉག་གཅིག་རང་ཐོག་ཏུ་གྲོལ་བའི་ལམ་བཟང་ཡིན་ཏེ།  །དེའི་དོན་ངས་བཤད་ཀྱི་ཉོན་ཅིག་གསུངས་ནས་རྒྱས་པར་བཀྲལ་ཏེ་གསུངས་མཐར།  ངས་བཤད་པ་དེ་དག་ཡིད་ལ་བཟུང་ཞིང་གཞན་ལ་སྟོན་ཅིག་དང་སྐལ་བ་དང་ལྡན་པའི་སློབ་བུ་མང་པོ་ནམ་མཁའ་གོ་འབྱེད་སྟོབས་ཀྱིས་ཆོས་ཉིད་རྒྱུ་འབྲས་ལས་འདས་པའི་དབྱིངས་སུ་མྱ་ངན་ལས་འདའ་བར་འགྱུར་རོ།  །ཞེས་གསུངས་ཤིང་རྟེན་དང་བརྟེན་པར་བཅས་པ་ཐམས་ཅད་རང་ལ་ཐིམ་པའི་སྣང་བ་འབྱུང་ངོ་།  །དེ་ནས་དབྱར་ཟླ་འབྲིང་པོའི་ཚེས་བདུན་གྱི་ནུབ་མཁའ་འགྲོ་རྡོ་རྗེ་ལྕམ་མོ་ཞེས་བྱ་བ་ཡིན་སྐད་པའི་བུད་མེད་སྔོ་སང་ངེ་བ་གཅེར་བུ་གོས་དང་རྒྱན་མེད་པ་ཞིག་བྱུང་ནས་བུ་ཁྱོད་རྔ་ཡབ་ཟངས་མདོག་དཔལ་རི་མཇལ་དུ་ཨེ་འགྲོ་ཟེར་བ་ལ།  བདག་གིས་འགྲོ་སྨྲས་པས།  ལག་པ་གཡས་པའི་སོར་མོ་ནས་བཟུང་སྟེ་སོང་བས་རི་བོ་ཆེན་པོ་ཁ་དོག་ནག་ལ་རྩེ་མོ་དགུང་ལ་བསྙེགས་པ་ཞིག་གི་རྩེ་མོར་ཕྱིན་པའི་མོད་མཁའ་འགྲོ་མ་དེ་ན་རེ།  བུ་ཁྱོད་ཀྱི་ལག་པ་གཉིས་བར་སྣང་གི་ཁམས་སུ་རྐྱོངས་ལ་ཕུང་པོ་ཤུགས་ཕྱུངས་ཏེ།  སྟངས་སྟབས་ཀྱིས་དང་རྨི་ལམ་གྱི་ལུས་རང་བཞིན་མ་གྲུབ་པས་འཕུར་འགྲོ་བ་ལ་ཐོགས་པ་མེད་དོ།  །ཞེས་ཟེར་བ་ལྟར་བདག་གིས་དེ་ལྟར་བྱས་ཏེ་བྱ་རྒྱལ་ནམ་མཁའ་ལ་ལྡིང་བ་ལྟར་འཕུར་ནས་ཕྱིན་པས་ཡུལ་གླིང་ཆེན་པོ་བརྒྱ་དང་དྲུག་ཅུ་རེ་ལྔ་བགྲོད་ཅིང་རྒྱ་མཚོ་བཅུ་བདུན་གྱི་ཕ་མཐར་སླེབས་ཚེ།  མཁའ་འགྲོ་མ་ན་རེ།  འདི་ནི་ལང་ཀ་ཤོད་ཅེས་བྱ་བ་སྲིན་པོ་མི་ཟན་གྱི་གླིང་ཡིན།  རྒྱ་མཚོ་ཆེན་པོ་འདིའི་ཕ་མཐར་ལང་ཀའི་ཡུལ་བཅོ་བརྒྱད་ཡོད་དེ་མཐའི་རྒྱ་མཚོའི་ཁུག་པའམ་བར་མཚམས་ཡིན་ཟེར།  བདག་གིས་ཟངས་མདོག་དཔལ་གྱི་རི་བོ་གང་དུ་མཆིས་ཞེས་དྲིས་པས།  ད་ནི་ཐག་ཤིན་ཏུ་ཉེ་བར་ཡོད་ཟེར།  སྲིན་པོའི་ཡུལ་གླིང་ཆེན་པོ་བཅོ་བརྒྱད་ཀྱི་ཕ་མཐར་བགྲོད་དགོས་པ་ཨེ་ཡིན་སྨྲས་པས།  དེ་ལྟར་མ་ཡིན་ཏེ་ཟངས་མདོག་དཔལ་གྱི་རི་བོ་ཞེས་བྱ་བ་ནི་རྒྱ་མཚོ་ཆེན་པོའི་སྙིང་པོ་ཡིན་པས་མཐའ་རྒྱ་མཚོས་བསྐོར་ནས་ཡོད་དོ་ཟེར།  དེ་ནས་ཅུང་ཟད་ཕྱིན་ཚེ་རི་བོ་ཆེན་པོ་རྩ་བ་སྔོ་ལ་སྐེད་པ་དཀར་བ་རྩེ་མོ་དམར་བ་ཞིག་མཐོང་བའི་མོད་བདག་གིས་ཕ་ཀིའི་རི་བོ་དེ་གང་ལགས་དྲིས་པས།  ཕ་ཀིའི་རི་འདི་ཟངས་མདོག་དཔལ་གྱི་རི་བོ་ཞེས་བྱ་བ་རེད་ཟེར།  དེ་ནས་རི་དེའི་ཉེ་འདབས་སུ་སླེབས་ཚེ་ཁོར་ཡུག་རྒྱ་མཚོ་ཆེན་པོས་བསྐོར་བའི་ཚུ་རི་ནས་བལྟས་པས་རི་བོ་དེའི་གཡས་ལོགས་ན་འཇའ་སྤྲིན་ཆེན་པོ་འཁྲིགས་པའི་ཀློང་ནས་སྐུ་ལུས་མི་མངོན་པར་མགྲིན་པ་ཡན་ཆད་ཐོན་པ་བརྒྱད་ཅུ་རྩ་བརྒྱད་དབུ་ལ་པཎ་ཞུ་གསོལ་བ་དང་ཐོར་ཚུགས་ཅན་སོགས་སྣ་ཚོགས་པ་ཞལ་འཛུམ་མཛད་པ་ཤ་སྟག་བརྩེ་བའི་ཉམས་ཀྱིས་བདག་ལ་གཟིགས་འདུག་པ་དེ་རྣམས་གང་ཡིན་མ་ཤེས་པས་མཁའ་འགྲོ་མ་དེ་ལ་ཕ་གིའི་མི་དེ་དག་གང་ལགས་དྲིས་པས།  མཁའ་འགྲོ་མ་ན་རེ།  གྲུབ་ཆེན་བརྒྱད་ཅུ་དང་རིག་འཛིན་ཆེན་པོ་བརྒྱད་ཀྱིས་ཞལ་གཟིགས་པ་ཡིན་ཟེར།  དེར་བདག་གིས་ཕྱག་བྱས་ནས་གསོལ་བ་བཏབ་པས་སྤྲིན་གྱི་གསེབ་ནས་བླ་མ་སྙིང་པོའི་བུམ་ཞྭ་ཅན་ཞིག་བྱུང་ནས་ཕྱག་གཉིས་བདག་གི་མགོ་ཐོག་ཏུ་བཞག་སྟེ་འདི་སྐད་དོ།  །ང་ནི་རིག་འཛིན་ཧཱུྃ་ཆེན་ཀཱ་ར་ཞེས་བྱ་བ་ཡིན།  ཁྱོད་ནི་ངའི་ཕྲིན་ལས་ཀྱི་སྤྲུལ་པ་ཡིན།  འགྱུར་བ་མེད་པ་སྐུ་བུམ་པའི་དབང་ཡོངས་སུ་རྫོགས་པ་ཐོབ་པར་གྱུར་ཅིག།  འགག་པ་མེད་པ་གསུང་གསང་བའི་དབང་ཡོངས་སུ་རྫོགས་པ་ཐོབ་པར་གྱུར་ཅིག།  འཁྲུལ་པ་མེད་པ་ཐུགས་ཤེས་རབ་ཡེ་ཤེས་ཀྱི་དབང་ཡོངས་སུ་རྫོགས་པ་ཐོབ་པར་གྱུར་ཅིག།  མཚན་མ་ཚིག་དང་བྲལ་བ་ལྷུན་གྲུབ་བདེ་བ་ཆེན་པོའི་དབང་ཡོངས་སུ་རྫོགས་པ་ཐོབ་པར་གྱུར་ཅིག།  ཉི་མ་དེ་རིང་ནས་བཟུང་སྟེ་ཁྱོད་དང་ང་གཉིས་ཐ་དད་མེད་པའི་དབང་དམ་པ་ཐོབ་པར་གྱུར་ཅིག།  ཅེས་གསུངས་ནས་བདག་ལ་ཐིམ་པའི་སྣང་བ་བྱུང་།  དེ་ནས་མཁའ་འགྲོ་མ་ཉི་འོད་འབར་མ་ཞེས་བྱ་བ་ཡིན་ཟེར་བའི་སྐུ་མདོག་དཀར་མོ་དར་དམར་པོའི་ཨང་རག་གྱོན་པ་གཡས་ཉི་ཟེར་བཟུང་ཞིང་གཡོན་པས་བརྡའི་མེ་ལོང་ཐོགས་པ་ཞིག་བདག་གི་ཐད་དུ་བྱུང་ནས་འདི་སྐད་ཅེས།  སྐྱེས་བུ་དམ་པ་ཁྱོད་ཀྱིས་ལྟོས།  །བརྡ་འདི་གོ་འམ་ལེགས་པར་དཔྱོད།  །མ་འོངས་འབྱུང་འགྱུར་ལེགས་ཉེས་པྲ།  །མི་ཤེས་པ་ན་ང་ཡིས་སྟོན།  །ཞེས་ཟེར་བ་ན།  བདག་གིས་མི་ཤེས་སྨྲས་པས།  བརྡ་དེ་བཀྲོལ་ནས་ཚུལ་བཞིན་དུ་བཤད་བྱུང་།  དེ་ནས་སྲིན་མོ་སྐྲ་དམར་ཞིང་མིག་ཟླུམ་པ་བཞིས་དར་གྱི་འདོ་ལེ་བཞི་ཁྲམ་དུ་བཟུང་ནས་ཁྱོད་འདིའི་སྟེང་དུ་སྡོད་ཟེར་བ་བཞིན་བདག་དར་གྱི་སྟེང་དུ་བསྡད་མ་ཐག་ཏུ་ནམ་མཁའི་ཁམས་ནས་ཕ་རི་ལ་སླེབས་པས།  རི་བོ་དེའི་འདབས་རྒྱ་མཚོའི་ཕ་མཐའ་དེ་ན་བྲག་དམར་མདའ་མདུང་རལ་གྲི་ཁ་ཊྭཱྃ་ཏྲི་ཤུལ་འབར་བའི་རྣམ་པས་ཁོར་ཡུག་ཏུ་བསྐོར་བའི་བར་མཚམས་ཞིག་ཏུ་གྲུ་འདོར་བའི་ལམ་ལ་ལྕགས་ཀྱི་ཐེམ་སྐས་བཙུག་པ་ཞིག་སྣང་།  རིའི་རྩ་བ་ཐང་ཆེན་པོས་བསྐོར་བའི་དཀྱིལ་དུ་དངུལ་གྱི་མཁར་དང་།  དེ་བཞིན་དུ་གསེར་ལས་བྱས་པ་དང་།  ཟངས་ལས་བྱས་པ་དང་།  ལྕགས་ལས་བྱས་པའི་མཁར་རྣམས་ལ་ལ་ནི་ཉིས་ཐོག།  ལ་ལ་ནི་གསུམ་ཐོག།  ལ་ལ་ནི་བཞི་ཐོག།  ལ་ལ་ནི་དགུ་ཐོག་གི་བར་བསམ་གྱིས་མི་ཁྱབ་པས་རི་དེ་ཡོངས་སུ་འཁོར་བ།  དེར་རིག་འཛིན་དྲང་སྲོང་གི་ཚོགས་བསམ་གྱིས་མི་ཁྱབ་པ་བཞུགས་པའི་དབུས་ན་མི་མགོ་སྐམ་རློན་བརྩིག་པའི་མཁར་དགུ་ཐོག་གི་སྟེང་ཁང་དུ་སྲིན་རྒྱལ་རཀྴ་ཐོད་ཕྲེང་ཞེས་བྱ་བ་ཁྲོ་བོ་ནག་པོ་དབུ་དགུ་ཕྱག་བཅོ་བརྒྱད་ཡོད་པ།  ཡུམ་སྲིན་མོ་དམར་མོ་འཇིགས་སུ་རུང་ཞིང་བལྟར་མི་བཟོད་པ་གཉིས་ལ།  བློན་རཀྴ་ཀ་ལ་དང་།  རཀྴ་རག་རོལ་དང་།  རཀྴ་དབུགས་ལེན་དང་།  རཀྴ་སྟོབས་ཆེན་དང་།  རཀྴ་ཉིན་མོ་རྒྱུ་དང་།  རཀྴ་མཚན་མོ་རྒྱུ་དང་།  རཀྴ་སྲིན་མོའི་སྤྱི་ཁྱོ་དང་།  རཀྴ་སྲིན་མོའི་གྲོང་རྒྱུ་དང་།  ལངྐ་ཤོད་དབང་དང་།  ལངྐ་ཤོད་འཛིན་དང་།  མི་ཡུལ་རྒྱུ་དང་།  མི་ཡུལ་དབང་བྱེད་དང་།  མི་རྣམས་ཡོངས་བདུད་ཅེས་བྱ་བ་ལ་སོགས་པའི་སྲིན་པོའི་འཁོར་ཚོགས་སྟོང་གིས་བཀའ་ཉན་ཅིང་ལས་བསྒྲུབ་པ།  དེ་དག་ཤར་ན་གནས་ཤིང་ཤར་གླིང་ལ་དབང་བསྒྱུར་བའོ།  །ལྷོ་རུ་དུང་གི་མཁར་དར་དཀར་གྱི་དབྱིབས་སུ་འདུག་པའི་ནང་དུ་སྲིན་རྒྱལ་རྡོ་རྗེ་དྲག་རྩལ་ཞེས་བྱ་བ་ཁྲོ་བོ་དཀར་པོ་འཇིགས་སུ་རུང་བ་ལ་འཁོར་སྟོང་གིས་བསྐོར་ནས་ལྷོ་གླིང་ལ་མངའ་དབང་མཛད་པ།  ནུབ་ཏུ་ལྕགས་མཁར་ནག་པོའི་ནང་དུ་སྲིན་རྒྱལ་རཀྴ་གདོང་དྲུག་ཞེས་བྱ་བ་ཁྲོ་བོ་སེར་ནག་འཇིགས་སུ་རུང་བ་ལ་འཁོར་སྟོང་ཕྲག་ལྔས་བསྐོར་ནས་ནུབ་གླིང་ལ་མངའ་དབང་མཛད་པ།  །བྱང་དུ་རིན་པོ་ཆེ་བཻ་ཌཱུཪྻ་ལས་གྲུབ་པའི་མཁར་རྒྱ་ཆེ་ལ་དཔངས་མཐོ་བའི་ནང་དུ་སྲིན་རྒྱལ་དྲག་ཁྲོས་ཐོད་ཕྲེང་ཞེས་བྱ་བ་ཁྲོ་བོ་ལྗང་སྔོན་འཇིགས་སུ་རུང་བ་ལ་འཁོར་སྟོང་ཕྲག་བརྒྱད་ཀྱིས་བསྐོར་ནས་བྱང་གླིང་ལ་མངའ་དབང་མཛད་པ།  དེ་དག་ཐམས་ཅད་ཀྱང་ཐུགས་ཞི་བ་ཆོས་ཀྱི་དབྱིངས་ལས་མ་གཡོས་བཞིན་དུ་སྐུ་རབ་འཇིགས་གཏུམ་ཞིང་རྔམས་པའི་ཆ་ལུགས་ཅན་ཤ་སྟག་གོ།  བདག་གིས་མཁའ་འགྲོ་སྔོན་མོ་དེ་ལ་གནས་འདི་གང་ལགས་ཅེས་དྲིས་པས།  དེ་ན་རེ།  གནས་འདི་ས་སྤྱོད་སྤྲུལ་པའི་ཞིང་ཁམས་ཡིན་ཏེ།  མི་དགེ་བཅུ་སྤངས་ནས་ཚོགས་དུ་མ་བསགས་ཤིང་སྨོན་ལམ་རྒྱ་ཆེན་པོ་བཏབ་པ་རྣམས་སྐྱེ་བའི་གནས་ཡིན།  ཕྱོགས་མཚམས་སུ་རིན་པོ་ཆེ་ཤེལ་ལས་གྲུབ་པའི་ཁང་བཟང་ན་གསེར་གྱི་ཁྲི་དར་གྱིས་བཀབ་པ་འདི་རྣམས་གཟོད་སྐྱེས་བུ་མང་པོ་འབྱོན་པར་གྱུར་བ་རྣམས་ཀྱི་བཞུགས་གདན་ཡིན་ཟེར།  དེ་ནས་རི་རྒྱལ་དེའི་རྩེ་མོ་ནས་དཔག་ཚད་གཅིག་འཕགས་པའི་སྟེང་གི་ནམ་མཁར་ཕྱིན་ཚེ་ས་གཞི་ཐམས་ཅད་འཇའ་རིས་ཀྱིས་གང་བ་ཟ་འོག་ཁ་ཕྱེས་པ་ལྟ་བུ་ལ།  སྨན་སྣ་ཚོགས་པའི་སྤངས་རིར་དྲི་བཟང་གི་ན་བུན་འཐུལ་ཞིང་ཁ་དོག་སྣ་ཚོགས་པའི་མེ་ཏོག་གིས་ཡོངས་སུ་ཁེབས་པ།  མནན་ན་ནེམ་ཞིང་བཏེགས་ན་འཕར་བ།  སའི་ངོས་ལ་རྐང་པའི་མཐིལ་གྱིས་རེག་པས་ལུས་ངག་ཡིད་གསུམ་བདེ་བས་མྱོས་པར་བྱེད་པ།  རྒྱ་ཁྱོན་ཚད་མེད་པའི་གནས་དེར་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་དཔའ་བོ་དང་མཁའ་འགྲོ་མའི་ཚོགས་ཀྱིས་བྲོ་གར་འཁྲབ་པ།  མཆོད་པའི་ལྷ་མོ་དཔག་ཏུ་མེད་པས་མཆོད་པའི་སྤྲིན་རྒྱ་མཚོ་རྒྱུན་མི་འཆད་པར་སྤྲོ་བའི་དབུས་སུ་རིག་འཛིན་གྲུབ་ཐོབ་རྒྱ་མཚོ་ལྟ་བུའི་དབུས་ན་རིན་པོ་ཆེ་སྣ་ཚོགས་ལས་གྲུབ་པའི་ཁྲི་རྒྱ་ཆེ་ལ་དཔངས་མཐོ་བའི་སྟེང་དུ་ཨོ་རྒྱན་ཆེན་པོ་པདྨ་འབྱུང་གནས་སྐུ་བྱད་བལྟ་བས་ཆོག་མི་ཤེས་པ།  དེ་ཉིད་ཀྱི་གཡས་སུ་དགའ་རབ་རྡོ་རྗེ།  གཡོན་དུ་བི་མ་ལ་མི་ཏྲ།  མདུན་གྲལ་དུ་རྗེ་འབངས་ཉི་ཤུ་རྩ་ལྔ་ལ་སོགས་པ་རྒྱ་བོད་ཀྱི་རིག་འཛིན་གྲུབ་ཐོབ་བསམ་གྱིས་མི་ཁྱབ་པ་ཐམས་ཅད་གནས་དེ་ཉིད་དུ་བཞུགས་སོ།  དེ་ནས་བར་ཁང་རིན་པོ་ཆེ་ཤེལ་ལས་གྲུབ་པའི་གཞལ་ཡས་ཁང་རྒྱ་ཆེ་ལ་ཁྱོན་ཡངས་པའི་ནང་དུ་པདྨ་དང་ཉི་ཟླའི་གདན་ལ་པདྨ་འཇིག་རྟེན་གསུམ་མགོན་ཞེས་བྱ་བ་སྐུ་མདོག་དཀར་གསལ་ཞལ་གཅིག་ཕྱག་བཞི་པ་མཚན་དཔེས་མཛེས་ཤིང་བལྟ་བས་ཆོག་མི་ཤེས་པ་ཞིག་ལ་བྱང་ཆུབ་སེམས་དཔའི་འཁོར་ཚོགས་རྒྱ་མཚོ་ལྟ་བུས་བསྐོར་བ་ལ་ཆོས་སྟོན་ཏེ།  །ཡང་སྟེང་ཁང་རིན་པོ་ཆེ་བཻ་ཌཱུརྱ་ལས་གྲུབ་པའི་གཞལ་ཡས་ཁང་ཡངས་པའི་ནང་དུ་རིན་པོ་ཆེ་པདྨ་རཱ་གའི་ཁྲི་པདྨ་དང་ཟླ་བའི་གདན་ལ་པདྨ་དྲི་མེད་འོད་སྣང་ཞེས་བྱ་བ་སྐུ་མདོག་དམར་པོ་མཚན་དང་དཔེ་བྱད་ཀྱིས་སྤྲས་པ་ཞིག་གིས་རང་སྣང་རིག་པའི་འཁོར་ལ་བརྡས་ཆོས་སྟོན་ནས་བཞུགས་པ་སྟེ།  སྐུ་གསུམ་གྱི་སྟོན་པ་དེ་དག་ལ་བདག་གིས་ཕྱག་འཚལ་ཞིང་བསྐོར་བ་བྱས་ནས་སྨོན་ལམ་རྒྱ་ཆེན་པོ་བཏབ་ཅིང་དབང་དང་གདམས་པས་རྒྱུད་སྨིན་པར་བྱས་སོ།  །རི་བོ་དེའི་སྐེད་དུ་ཤིང་མ་བུ་ན་ཞེས་བྱ་བ་ལ་དྲིལ་བུ་གཡེར་ཁ་ལ་སོགས་པ་སྒྲ་སྙན་པའི་སིལ་སྙན་མང་པོ་མེ་ཏོག་དང་འབྲས་བུའི་ཚུལ་དུ་སྐྱེས་པ།  གཞན་ཡང་ལྗོན་པའི་ཤིང་སྣ་ཚོགས་ལས་ཉེ་བར་སྤྱོད་པའི་མཆོད་པ་དཔག་ཏུ་མེད་པ་རྒྱུན་མི་འཆད་པར་འཕྲོ་བ་དང་།  ཤར་ན་རི་བོ་གསལ་ལྡན་ཞེས་བྱ་བ་དཀར་ལ་གསལ་བ་མེ་ལོང་ལྟ་བུའི་དྭངས་ཤེལ་ལས་གཟུགས་ཀྱི་འདོད་ཡོན་ཏུ་མ་འཕྲོ་བ།  རི་དེའི་རྩེ་རུ་ཨོ་རྒྱན་སྡུག་བསྔལ་ངེས་སེལ་ཞེས་བྱ་བ་ལ་འཁོར་ཚོགས་བསམ་གྱིས་མི་ཁྱབ་པས་བསྐོར་བ།  ལྷོ་ཕྱོགས་སུ་རི་བོ་འདོད་ལྡན་ཞེས་བྱ་བ་གསེར་ལས་གྲུབ་པ་ལས་འདོད་རྒུའི་དཔལ་ཡོན་ཕུན་སུམ་ཚོགས་པ་ན་བུན་ལྟར་སྤྲོ་བའི་རྩེ་རུ་ཨོ་རྒྱན་རིན་ཆེན་རྒྱལ་པོ་ཞེས་བྱ་བ་ལ་འཁོར་ཚོགས་བརྒྱད་ཁྲིས་བསྐོར་བ།  ནུབ་ཏུ་ཟངས་རི་དམར་པོ་དགུང་ལ་སྙེགས་པའི་ངོས་ནས་དྲི་བཟང་སྣ་ཚོགས་པའི་ན་བུན་འཐུལ་བའི་རྩེ་རུ་པདྨ་བདེ་བའི་འབྱུང་གནས་ཞེས་བྱ་བ་ལ་འཁོར་དཔག་ཏུ་མེད་པས་བསྐོར་བ།  བྱང་དུ་རི་བོ་འབིག་བྱེད་ཅེས་བྱ་བ་རིན་པོ་ཆེ་ལྕགས་ལས་གྲུབ་པ་ཟས་དང་གོས་ཀྱི་རིགས་སྣ་ཚོགས་ནམ་མཁའ་གང་བར་སྤྲོ་བའི་རྩེ་མོ་ན་ཨོ་རྒྱན་གཡུལ་ལས་རྣམ་པར་རྒྱལ་བ་ཞེས་བྱ་བ་ལ་འཁོར་ཚོགས་བྱེ་བ་འབུམ་གྱིས་བསྐོར་བ།  རི་བོ་དེ་དག་ལས་འཕྲོས་པའི་འདོད་ཡོན་མཆོད་པའི་སྤྲིན་སྣ་ཚོགས་པས་དབུས་ཀྱི་ཟངས་མདོག་དཔལ་གྱི་རི་བོ་ལ་ཁྱབ་པའོ།  །རྒྱ་མཚོའི་ཕྱི་རིམ་ཐང་ཆེན་པོས་བསྐོར་བའི་མཐའ་རྫ་རི་དང་ནགས་རི་མང་པོས་ཡོངས་སུ་བསྐོར་བའི་ཕྱི་རོལ་དུ་ཐང་དང་ལུང་པ་མང་པོ་ངམ་གྲོག་ཅན་གྱི་གནས་རྣམས་སུ་སྲིན་པོའི་གྲོང་ཁྱེར་བསམ་གྱིས་མི་ཁྱབ་པ་གནས་པ།  སྲིན་པོ་སྲིན་མོ་དེ་དག་ཀྱང་སྲོག་ཆགས་ཀྱི་རིགས་མཐོང་བ་ཐམས་ཅད་མགྱོགས་པའི་ཤུགས་ཀྱིས་བཟུང་ནས་ཤ་གསོན་མར་ཟ་བ་འཕར་སྤྱང་ལྟ་བུ་གཞན་ཡང་རཀྴི་ལི་ལ་ཞེས་བྱ་བའི་ཤིང་འབྲས་དང་།  བུ་ལང་ཁ་ཕ་ཞེས་བྱ་བའི་ས་བོན་ས་ལ་བཏབ་པའི་འབྲས་བུ་ལ་ཁ་ཟས་ཀྱི་མཆོག་ཏུ་ལོངས་སྤྱོད་པ་ཤ་སྟག་སྣང་ངོ་།  །དེ་ལྟར་དག་པའི་སྣང་བ་བསམ་གྱིས་མི་ཁྱབ་པ་ཤར་ཚེ་བདག་གིས་ཨོ་རྒྱན་ཆེན་པོ་ཞབས་ལ་ཕྱག་འཚལ་ནས་མགོ་བོས་གཏུག་སྟེ།  དཔལ་ཨོ་རྒྱན་ཆོས་ཀྱི་རྒྱལ་པོ་ཁྱེད་མཁྱེན་ནོ།  །ཐུགས་རྗེས་བཟུང་དུ་གསོལ།  དབང་བསྐུར་དུ་གསོལ།  བྱིན་གྱིས་བརླབ་ཏུ་གསོལ།  ལུང་བསྟན་དུ་གསོལ།  ཞེས་ཞུས་པས།  ཕྱག་གཉིས་བདག་གི་མགོ་ཐོག་ཏུ་བཞག་སྟེ།  བུ་ཁྱོད་ལ་སྨིན་བྱེད་ཀྱི་དབང་མཆོག་དམ་པ་ཡོངས་སུ་རྫོགས་པ་ཐོབ་པར་གྱུར་ཅིག།  དུས་གསུམ་གྱི་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་དངོས་གྲུབ་དམ་པ་ཡོངས་སུ་རྫོགས་པ་ཐོབ་པར་གྱུར་ཅིག།  སྒོ་གསུམ་རྡོ་རྗེ་གསུམ་གྱི་རོལ་པར་འཕོས་ཤིང་སྨིན་ཅིང་གྲོལ་ནས་ཁམས་གསུམ་ཆོས་ཀྱི་རྒྱལ་པོར་དབང་འབྱོར་ཏེ།  འབྲེལ་ཚད་རྣམ་པར་གྲོལ་བའི་ས་ལམ་ལ་སྦྱོར་ནུས་པར་ཤོག་ཅིག།  ད་ཁྱོད་འདིར་སྡོད་ལ་ལེགས་པར་ཉོན་ཅིག་དེང་སང་སྙིགས་མ་ལྔ་བདོ་བའི་དུས་ངན་ལ་ཐུག་པས་སྨོན་ལམ་ལས་ཀྱིས་འབྲེལ་བའི་སྐྱེས་བུ་རྣམས་ལ་གདམས་ངག་གི་ཡང་བཅུད་རྣམས་སྟོན་ལ་ཟབ་ཆོས་རྣམས་ཀྱི་དབང་ལུང་ཐམས་ཅད་རྫོགས་པར་གྱིས་ཤིག།  གཞི་ཁྲེགས་ཆོད་ཀྱི་ལྟ་བའི་གཏིང་དཔོག་ཅིང་ལ་བཟླ་བ་དང་།  ལམ་ཐོད་རྒལ་གྱི་གནད་དོན་དང་ལམ་རྟགས་ཀྱི་ཡོན་ཏན་ཐམས་ཅད་ཁོང་དུ་ཆུབ་པར་གྱིས་ཤིག།  གེགས་སེལ་བདུད་གཅོད་ཟབ་མོ་ཐེག་པ་ཆེན་པོའི་ལམ་དང་འབྲེལ་བའི་སྒོ་ནས་སྟོན་ཅིག།  དེ་ནི་རྐྱེན་ངན་ཐོག་བརྫིས་སུ་གཅོད་པའི་གདམས་པ།  ལྟས་ངན་གཡང་དུ་ལེན་པའི་མན་ངག།  ན་ཚ་ལམ་དུ་སློང་བའི་ཟབ་ཁྱད་ཡིན་ཏེ་འདིའི་གནད་དོན་ཚང་བར་ཤེས་པ་སྔོན་དུས་ཡོད་ཀྱང་དེང་དུས་ནི་མེད།  དེང་སང་གསང་སྔགས་ཐེག་པ་ཆེན་པོའི་བསྟན་པ་ཉམས་དམའ་བ་ནི་སེམས་ཅན་ལས་དང་བསོད་ནམས་དམན་པའི་སྟོབས་ཀྱིས་སློབ་དཔོན་རྣམས་ཐེག་པ་འོག་མའི་ལམ་བློ་ཡིད་རྣམ་པར་རྟོག་པ་མྱོང་ཞེན་ཅན་ལ་དགའ་ཞིང་དེ་མཆོག་ཏུ་འཛིན་ནས་གཞན་ལའང་དེ་ལྟར་སྟོན་པ་ཤ་སྟག་ལས་མེད་ལ་གདུལ་བྱ་བསོད་ནམ་དམན་པ་རྣམས་དེ་དང་འཕྲད་པ་ཡིན།  དེའི་ཕྱིར་ངས་ཁྱོད་ལ་ཚེ་གཅིག་མངོན་འཚང་རྒྱ་བའི་ལམ་བཟང་རྫོགས་པ་ཆེན་པོའི་གདམས་པ་ཟབ་མོ་འཆད་པར་བྱའོ།  །ཞེས་གསང་ཆེན་གཟུང་འཛིན་རང་གྲོལ་གྱི་རྒྱུད་ཆེན་ལུང་ལྟར་གསུངས་པ་བདག་གི་རྒྱུད་ལ་སྤར་གྱིས་བཏབ་པ་བཞིན་གསལ་ཞིང་བརྟན་པར་གྱུར་པ་དང་།  ཚེ་འདིར་མངོན་སངས་རྒྱས་པའི་ལམ་བཟང་མྱུར་ལམ་རྫོགས་པ་ཆེན་པོ་འདི་རང་གིས་ཉམས་སུ་ལོངས་ལ་གཞན་དག་ལ་ཡང་དག་པར་སྟོན་ཅིག།  ཅེས་གསུངས་པ་ན།  སླར་ཡང་འདི་སྐད་ཅེས་ཞུས་སོ།  །རྒྱལ་དང་རྒྱལ་སྲས་ཐམས་ཅད་ཀྱི་སྤྱི་གཟུགས་འགྲོ་བ་ཡོངས་ཀྱི་སྐྱབས་མགོན་རིན་པོ་ཆེ་བདག་གི་ཚེ་འདི་ལ་བསྟན་དང་འགྲོ་བའི་ལེགས་ཉེས་ཇི་ལྟ་བུ་ལགས་བསྟན་དུ་གསོལ།  ཞེས་ཞུས་པས།  ཨོ་རྒྱན་ཆེན་པོའི་ཞལ་ནས།  རིགས་ཀྱི་བུ་དེང་དུས་ངན་སྙིགས་མ་ལ་ཐུག་པ་དང་།  སྨོན་ལོག་བདུད་ཀྱི་མགོ་འཕང་མཐོ་རུ་འཕགས་པའི་དབང་གིས་ལེགས་པ་ཉུང་ཞིང་ཉེས་པ་ཤིན་ཏུ་མང་བ་ཡིན།  ཁྱོད་ཀྱི་ཚེ་སྟོད་འདིར་ཡུལ་ཉེས་ཆེན་པོ་ནི་མེད་དེ།  །ཚེའི་སྨད་ཆ་ལ་བབས་པའི་ཚེ་མཐའ་མིའི་རྫས་སྔགས་ཀྱི་རྐྱེན་ལས་ནད་མཚོན་མུ་གེའི་དུ་རུ་ཀ་དར་ནས་སྐྱི་ཟིང་ཟིང་པ་འབྱུང་།  འོན་ཀྱང་ཁྱོད་ཀྱི་ཚེ་འདི་མ་རྫོགས་ཀྱི་བར་དུ་མདོ་སྔགས་ཀྱི་བསྟན་པ་ལོག་ལམ་བདུད་ལ་མི་འཆོར་ངེས་པ་ཡིན།  རེ་ཞིག་ནས་ཡུལ་འདིར་མདོ་སྔགས་ཀྱི་བསྟན་པ་མེ་སྟག་ཙམ་ཡང་མི་གནས་ཤིང་བདུད་བསྟན་མཆེད་དེ་བདེ་བའི་སྐབས་ཏིལ་འབྲུ་ཙམ་ཡང་མི་འབྱུང་།  ཁྱོད་ཀྱི་ཚེ་སྨད་དུ་འདུ་བ་རྒྱས་ཤིང་བསྟན་པ་འཕེལ་རྒྱས་འདྲ་བ་འབྱུང་།  བདག་གི་གདུལ་བྱའི་ལྷག་མ་ལས་ལྡན་གྱི་སྐྱེས་བུ་མང་པོ་ཚེ་འདིར་རྣམ་པར་གྲོལ་བའི་ས་ལ་སྦྱོར་བའི་ཕྱིར་ཕྲིན་ལས་ཀྱི་བྱེད་པོར་ཁྱོད་འཇིག་རྟེན་ཁམས་སུ་བཏང་བ་ཡིན།  དེ་ཕྱིར་དེའི་ཚུལ་སོམས་ལ་གཞན་དོན་ཅི་ནུས་སུ་བསྒྲུབ་པ་ལ་སྐྱོ་ངལ་མེད་པར་མཛོད་ཅིག་ཅེས་གསུངས་སོ།  །དེ་ནས་སྔར་གྱི་མཁའ་འགྲོ་མ་དེས་ད་འགྲོ་ཟེར་བ་ལ།  བདག་གིས་འགྲོ་གྲབ་བྱས་པས།  མོ་ན་རེ།  ཀྱེ་ཧོ་སྐལ་ལྡན་རིགས་ཀྱི་བུ།  རྨི་ལམ་སྣང་བའི་རྫུན་རིས་འདིར།  །འགྲོ་སྡོད་གཉིས་ཀ་ཡོད་མ་ཡིན།  །སྣང་བ་གནས་སུ་འགྱུར་བ་སྟེ།  དབྱིངས་ལ་གཏོད་དང་དབྱིངས་སུ་སད།  །གོའམ་ཞེས་ཟེར་ནས་བདག་ལ་ཐིམ།  །དེ་ནས་བདག་གིས་རིག་པ་དབྱིངས་སུ་གཏད་པས་གཉིད་སད་དོ།  །ལོ་ཁྱིམ་དེའི་སྟོན་ཟླ་ཐ་ཆུང་གི་ནུབ་མཁའ་འགྲོ་མ་སེར་མོ་གསེར་བཙོ་མ་ལྟ་བུའི་འོད་འབར་བ་ལྭ་བ་ལྗང་ཁྲ་གྱོན་པ་ཞིག་གིས།  རི་བོ་གངས་མེད་རྣོ་རྩེ་ཞེས་པའི་རྩེ་རུ་ལྟད་མོ་ལ་ཨེ་འགྲོ་ཟེར་བ་ལ།  བདག་གིས་འགྲོ་ཞེས་སྨྲས་པས་དེ་མ་ཐག་ཏུ་ལག་པ་གཡས་པའི་སོར་མོ་ནས་བཟུང་སྟེ་སྟེང་ཕྱོགས་ཀྱི་ནམ་མཁའ་ལ་དཔག་ཚད་བདུན་དུ་འཕགས་པའི་གནས་སུ་ཕྱིན་ཚེ་རི་བོ་ཆེན་པོ་རྒྱ་ཆེ་ལ་དཔངས་མཐོ་བ་ཚད་ཀྱིས་གཞལ་མི་ནུས་པ་ཞིག་གི་རྩེ་མོར་སླེབས་ཏེ་བལྟས་པས།  ནུབ་བྱང་མཚམས་ན་མེ་འབར་ཞིང་འུར་སྒྲས་ས་གསུམ་གཡོ་ཞིང་འདར་བ་ཞིག་མཐོང་བ་དང་།  བདག་གིས་མཁའ་འགྲོ་མ་དེ་ལ་འདི་གང་ཡིན་དྲིས་པས།  དེ་ན་རེ།  འདི་ཨོ་རྒྱན་རང་བྱུང་གི་དུར་ཁྲོད་ཅེས་བྱ་བ་ཡིན་ཟེར།  དེར་ཨེ་འགྲོ་སྨྲས་པས།  འགྲོ་ཟེར་ནས་ཕྱིན་པས་ས་གཞི་ཐམས་ཅད་རུས་པ་སྐམ་པོ་སྤུངས་པའི་རི་བོ་དགུང་ལ་སྙེགས་པས་ཡོངས་སུ་འཁོར་བའི་དབུས་སུ་མི་ལྤགས་རློན་པའི་ཐང་ཆེན་པོ་ཚད་དང་རྒྱ་དཔག་ཏུ་མེད་པ།  གནས་དེའི་ཐོ་ཕྱི་ཉེ་འཁོར་ཀུན་ཏུ་རྩྭ་དང་ཤིང་ཐམས་ཅད་མདའ་མདུང་རལ་གྲིའི་ནགས་ཚལ་གྱི་རྣམ་པ།  ཁྲག་རྣག་ཆུ་སེར་གྱི་ཆར་བ་བབས་པ།  མེ་ལྕེ་དམར་ནག་གི་སྤྲིན་དཔུང་འཁྲིགས་པ།  ས་གཞི་ཐམས་ཅད་དུ་མི་རོའི་གྲམ་ཁྲོད་བརྡལ་བ།  ཁྲག་མཚོ་དམར་པོས་མཐའ་ནས་བསྐོར་བ།  ཐུན་དང་མཚོན་ཆའི་ཚོགས་སྐྱིན་ཐང་ལྟར་དུ་འཚུབས་པ།  སྒྲ་གྲགས་ཚད་ཐམས་ཅད་ཕཊ་ཕེཾ་བྷྱོ་ཟློག་གི་སྒྲ་འབྲུག་སྟོང་ལྡིར་བའི་ང་རོ་ལྟར་སྒྲོགས་པ།  གཅན་གཟན་གདུག་པ་ཅན་སྣ་ཚོགས་ཀྱིས་ངར་སྐད་སྒྲོགས་ཤིང་རྒྱུག་མཆོང་བྱེད་པའི་གནས་རབ་ཏུ་འཇིགས་ཤིང་སྐྱི་གཡའ་བའི་དབུས་ཀྱི་ཐང་པོ་ཆེ་དེར་མི་མགོ་སྐམ་པོས་ཁ་བད་བྱས་ཤིང་།  རྙིང་པས་རྩིག་པ་བྱས་པ།  རློན་པས་རྨང་བཏིང་བའི་གཞལ་ཡས་ཁང་ཡངས་ཤིང་རྒྱ་ཆེ་བའི་ལྟེ་བར་མི་རོ་གསར་རྙིང་མང་པོ་བརྩིགས་པའི་ཁྲིའི་སྟེང་དུ་པདྨ་དང་ཉི་མའི་གདན་ལ།  ཡེ་ཤེས་ཀྱི་མཁའ་འགྲོ་མ་རྡོ་རྗེ་ཕག་མོ་ཡིན་སྐད་པའི་མཁའ་འགྲོ་མཐིང་ནག་ཁྲོས་ཤིང་གཏུམ་པའི་སྤྱི་བོར་ཕག་ཞལ་ནག་པོ་གྱེན་དུ་ངུར་བས་དཔའ་བོ་དང་མཁའ་འགྲོ་མ་རྣམས་དབང་དུ་སྡུད་པ།  ཕྱག་གཡས་པས་གྲི་གུག་ནམ་མཁའ་ལ་ཕྱར་ཞིང་གཡོན་པས་ཐོད་ཁྲག་ཐུགས་ཀར་བསྣམས་པ།  སྐུ་གཅེར་བུ་མི་མགོའི་ཕྲེང་བས་དོ་ཤལ་བྱས་པ་འཇིགས་ཤིང་བལྟར་མི་བཟོད་པ་ཞིག་གི་གཡས་སུ་མཁའ་འགྲོ་མ་ཡེ་ཤེས་མཚོ་རྒྱལ་སྐུ་མདོག་དམར་ནག་ཤིན་ཏུ་ཁྲོས་པའི་ཉམས་ཅན་གཡས་ལྕགས་ཀྱུ་དང་གཡོན་པས་བྷནྡྷ་བསྣམས་པ།  གཡོན་དུ་བལ་མོ་ཤཱཀྱ་དྷེ་ཝ་ཁྲོ་མོ་ནག་མོ་ཐོད་དབྱུག་དང་ཐོད་ཁྲག་བསྣམས་པ།  དེ་མཐར་རིགས་ལྔ་དབྱིངས་ཀྱི་ཌཱཀྐིི་ཁྲོ་མོ་མི་སྲུན་འཇིགས་པའི་ཆ་ལུགས་ཅན་ལ་མཁའ་འགྲོ་མ་བྱེ་བ་འབུམ་གྱིས་བསྐོར་བ།  ལ་ལ་ནི་སྔོ་སང་།  ལ་ལ་དཀར་པོ།  ལ་ལ་སེར་མོ།  ལ་ལ་དམར་མོ།  ལ་ལ་ལྗང་མོ།  ལ་ལ་མཐིང་ནག་ལ་སོགས་པ་ཁ་དོག་དང་ཆ་ལུགས་མ་ངེས་པ།  སྤྲུལ་པ་སྣ་ཚོགས་ཀྱི་རོལ་གར་བསྒྱུར་བའོ།  །དེར་བདག་གིས་མཁའ་འགྲོ་མ་རྣམས་ལ་གུས་པས་ཕྱག་འཚལ་ཏེ་ཐལ་མོ་སྦྱར་ནས་འདི་སྐད་ཅེས་ཞུས་སོ།  །ཀྱཻ།  སྔོན་ནས་ལས་འབྲེལ་ལྷག་པའི་ལྷ།  །མཁའ་འགྲོའི་གཙོ་ལ་གུས་ཕྱག་འཚལ།  །བདག་རྒྱུད་བྱིན་གྱིས་བརླབ་ཏུ་གསོལ།  །ཡེ་ཤེས་མཁའ་འགྲོ་སྒྲུབ་ཐབས་ཀྱི།  །བསྐྱེད་རྫོགས་ཟབ་མོ་བསྟན་དུ་གསོལ།  །ཞེས་ཞུས་པའི་ལན་དུ།  མཁའ་འགྲོའི་གཙོ་མོ་གསུམ་གྱིས་དགོངས་པ་གཅིག་དང་དབྱངས་གཅིག་གིས་འདི་སྐད་ཅེས་གསུངས་སོ།  །ཀྱཻ་ཧོ་སྐལ་ལྡན་རིགས་ཀྱི་བུ།  །དེང་སང་འཇིག་རྟེན་བོད་ཡུལ་ན།  །གཏེར་སྟོན་སྐད་པ་མང་ལགས་ཏེ།  །མཐོ་ལ་རློམས་ཤིག་གཡོ་དང་སྒྱུས།  །བསམ་སྤྱོད་བརྩམ་ཆོས་མང་ལ་ལྟོས།  །འགྲོ་དོན་འབྱུང་བ་ཕར་ཞོག་དང་།  །རང་མགོ་རང་གིས་བསྐོར་ལ་ལྟོས།  །ལ་ལ་ལོག་པ་བདུད་ཀྱིས་བརླབ།  །ལ་ལ་སེམས་འཛིན་ཉམས་ཀྱིས་བསླུ།  །ལ་ལ་མཐོ་རློམ་ཆོ་ལེ་འདོམས།  །གཏེར་ཆོས་ཕབ་པའི་དགོས་པ་མེད།  །མཐའ་མི་དབུས་སུ་རྡིབ་པ་ཡིས།  །ལོག་པའི་ཆོས་ཀྱི་སྤྲིན་དཔུང་གིས།  །དམ་ཆོས་ཉི་ཞལ་བསྒྲིབ་ལ་ལྟོས།  །ངལ་བ་དོན་མེད་སྤྱོད་པ་སྤོངས།  །ཁྱོད་ཀྱང་གདུལ་བྱའི་ལྷག་སྡུད་ལས།  །བསྟན་པ་ཡུན་དུ་གནས་པ་ལ།  །བློ་ཐག་རིང་དུ་མ་བསྐྱེད་ཅིག།  སྤྲེལ་དམར་ཐལ་མོ་རྡེབ་པ་ལས།  །རཀྟ་དམར་པོའི་ཆར་པ་འབེབས།  །མེ་ཁྱུང་གཤོག་པ་གཡབ་པ་ལས།  །སྔོན་མོ་ལྕགས་ཀྱི་ཡོ་ལངས་གཡོ།  །གསེར་ཁྱི་སེར་པོའི་ངར་སྐད་ཀྱིས།  །ས་འོག་དབྱར་རྒྱུ་འདར་བ་དང་།  །གསེར་ཕག་ས་སློག་བྱེད་པ་ལས།  །དུག་སྦྲུལ་ནག་པོ་མལ་ནས་སློང་།  །ཞེས་སོགས་མང་དུ་གསུངས་པའི་མཐར།  །མཁའ་འགྲོ་འདུས་པ་གྲི་གུག་འབར་བའི་རྒྱུད་དང་།  །བདུད་གཅོད་ཟང་ཐལ་སྒོ་འབྱེད་རྣམས་གསུངས་ནས།  །བུ་ཁྱོད་ལ་ལས་ལྡན་གྱི་སློབ་བུ་མཆོག་བཅུ་དྲུག།  ཕྲན་བརྒྱ་ཕྲག་དང་།  ཐར་བའི་ས་བོན་ཐེབས་པ་སྟོང་དང་སུམ་ཅུ་རྩ་ལྔ་འབྱུང་།  གཏེར་ཆོས་ཡུན་རིང་པོར་གནས་པའི་དུས་མ་ཡིན་པས་ལས་ལྡན་གྱི་སློབ་མ་རྣམས་ལ་སྟོན་ལ་ཉམས་སུ་ལོངས་ཞེས་བསྒོས་ཤིག།  ད་ནི་ཀླ་ཀློའི་བསྟན་པ་མགྲོན་ཐབས་སུ་སླེབས་ནས་ཡུལ་ས་འཛིན་པའི་དུས་ལ་ཐུག་པས་བློ་ཐག་མ་རིང་ཞིག།  གཏེར་ཆོས་དང་བསྟན་ཆོས་ཀྱི་ཆེད་དུ་དཀའ་ཚེགས་བྱ་བ་བྱིས་པའི་རྩེད་མོ་ཙམ་དུ་ཟད་དོ།  །ཞེས་གསུངས་ཤིང་།  ཀྱཻ།  སེམས་མ་ཡེངས་རིག་པ་དབྱིངས་ལ་གཏོད།  །དབྱིངས་ལྷུན་གྲུབ་བདེ་ཆེན་ཁང་བཟང་ན།  །མ་མཁའ་འགྲོས་གར་བསྒྱུར་རོལ་པར་ལྟོས།  །དཔལ་རིགས་ལྔ་དགྱེས་པའི་ཞལ་རས་བཞད།  །མ་མཁའ་འགྲོའི་སུན་མ་གྲོགས་སུ་བསྡེབས།  །གནས་སྲིད་ལས་དབེན་པའི་ས་ལ་སླེབས།  །ཚུལ་དེ་ལྟར་མི་ལྡན་སྐལ་མེད་རྣམས།  །བདུད་སྲིན་པོའི་གྲལ་དུ་ལྷུང་ནས་སུ།  །ཡར་ཐར་བའི་ལམ་སྒོ་འགགས་ལ་ལྟོས།  །དོན་དེ་ཕྱིར་གདོད་མའི་མགོན་པོའི་ཀློང་།  །དུས་མི་འགྱང་མྱུང་དུ་སླེབས་པར་མཛོད།  །ཕཊ་ཕཊ་ཕཊ།  །ཅེས་སྒྲ་དྲག་པོས་གཉིད་སད་དོ།  །དེ་ནས་རང་ལོ་སུམ་ཅུ་སོ་གསུམ་ལ་བབས་པ་ཧོར་ཟླ་གཉིས་པའི་ཚེས་བདུན་གྱི་ནུབ་རྨི་ལམ་ན་བནྡྷེ་འཇིགས་སུ་རུང་བ་བལྟར་མི་བཟོད་པ་ཞིག་གིས་གྲི་རྩེ་རྣོ་བ་ཞིག་བདག་གི་སྙིང་གར་བཙུགས་ནས་ཁྱོད་དོ་ནུབ་ངས་གསོད་པའི་དུས་ལ་བབས་པ་ཡིན་ཟེར་བ་ལ།  བདག་གིས་འདི་སྐད་སྨྲས།  ང་སོད་དང་ངས་ཁྱོད་ལ་སྙིང་རྗེ་བསྒོམ་ཞེས་སྨྲས་པས།  ཁོ་ན་རེ།  སྙིང་རྗེ་དུད་འགྲོའི་རྒྱུད་ན་ཡོད།  །རང་གི་བུ་ལ་སྙིང་རྗེ་ཡོད།  །བུ་ཡིས་མ་སྲོག་གཅོད་དུ་ཡོད།  །ཁྱོད་ཀྱིས་ང་ལ་སྙིང་རྗེ་ཡང་།  །སྙིང་ནི་ཕར་རྗེ་ཚུར་རྗེ་ཡིན།  །བུ་མོ་འཇོ་རིས་འདིར་ཤོག་དང་།  །སྙིང་རྗེ་མཁན་འདིའི་ཤ་ཁྲག་ཟ།  །ཞེས་གླུ་རུ་གྱེར་བའི་མོད་ལ།  །བུད་མེད་མིག་ཆེ་ཞིང་སྐྲ་དམར་བ་མཆེ་བ་ཤིན་ཏུ་རིང་བ་ཞིག་འབྱུང་ནས་ནུ་མ་བདག་གི་ཕྲག་ལ་བཀལ།  །མཆེ་བ་ཀླད་ཁུང་དུ་བཙུགས་པས་བདག་ཤིན་ཏུ་བྲེད་ཅིང་དངངས་ནས་ཡོད་པའི་སྐབས་ཡུན་ཅིག་ན་རྨི་ལམ་དུ་ངོ་ཤེས་ཏེ་གླུ་འདི་སྐད་གྱེར།  ཧེ་ཧེ།  ཉོན་དང་བན་དྲེད་གདུག་པ་ཅན།  །བུད་མེད་མི་སྲུན་སྡུག་རོག་ཁྲིད།  །ཁྱོད་རྨི་ལམ་འཁྲུལ་པའི་རྫུན་རིས་ཏེ།  །ང་སྟོང་གཟུགས་ནམ་མཁའི་ལུས་ཅན་ལ།  །བསད་བྱ་གསོད་བྱེད་ག་ལ་ཡོད།  །ང་དང་ཁྱོད་གཉིས་རོ་གཅིག་སྟེ།  །བྱད་དང་མེ་ལོང་གཟུགས་བརྙན་བཞིན།  །སྣང་ཡང་སྣང་བ་སྣང་མཁན་བྲལ།  །ཐམས་ཅད་སྟོང་པའི་རང་བཞིན་ཏེ།  །སྟོང་པས་སྟོང་པ་གསོད་དུ་མེད།  །ང་ཉིད་སོད་དང་ཁྱོད་གཉིས་འཆི།  །འཆི་བ་མེད་དེ་འཆི་སྣང་ཙམ།  །འཇའ་ཚོན་ནམ་མཁའི་རི་མོ་སྟེ།  །ནམ་མཁའ་ནམ་མཁའ་ཉིད་དུ་ཡལ།  །ད་ཁྱོད་དང་ང་གཉིས་དབྱེར་མེད་པར།  །དབྱིངས་སྤྲོས་བྲལ་ནམ་མཁའ་རྣམ་དག་ཏུ།  །ངང་ཕྱམ་བརྡལ་ཆེན་པོར་ཨ་ཨ་ཕཊ།  །ཅེས་བརྗོད་པས་ཡང་དེ་ན་རེ།  །སྡུག་པོ་ཆེ་འདིས་སྒོམ་བཤད་པས་ང་སྙིང་གཟེར་གྱིན་འདུག།  ད་འགྲོ་འགྲོ་ཟེར་ནས་ཡལ་སོང་།  །ལོ་ཁྱིམ་དེའི་སྟོན་ཟླ་ར་བའི་ཚེས་ཉེར་གཅིག་གི་ཉིན་བྱིའུ་བདངས་དམར་ཞིག་གིས་ན་རེ།  ཨ་ཧོ་བུ་ལོ་ཉོན་དང་།  །སྐྱེས་མཆོག་དམ་པ་མང་པོ།  །མི་མངོན་དབྱིངས་སུ་གཤེགས་སོང་།  །སྙིགས་མའི་དྭ་ཕྲུག་ལུས་ཀྱང་།  །ནམ་ཕུག་ཐུབ་པར་མི་འདུག།  མེ་ཏོག་ཧ་ལོ་སྐམ་སོང་།  །སྤངས་རྒྱན་སྔོན་མོ་ལུས་ཀྱང་།  །དགུན་ཟླའི་གྲང་ངར་བཙན་པོས།  །ནམ་ཕུག་ཐུབ་པར་མི་འདུག།  མི་དབང་ས་སྐྱོང་རྒྱལ་པོ།  །འདི་ནས་ཕ་རོལ་གཤེགས་སོང་།  །རྒྱལ་ཕྲུག་དྭ་བུ་ལུས་ཀྱང་།  །ནམ་ཕུག་ཐུབ་པར་མི་འདུག།  མཁའ་ལྡིང་ཁྱུ་ཚོགས་གཤེགས་སོང་།  །བྱིའུ་ཉམ་ཆུང་ལུས་ཀྱང་།  །ནམ་ཕུག་ཐུབ་པར་མི་འདུག།  གཅན་གཟན་ཆེ་རྒུ་གཤེགས་སོང་།  །ཏེ་ལོ་ཀ་མ་ལུས་ཀྱང་།  །ནམ་ཕུག་ཐུབ་པར་མི་འདུག།  རྣལ་འབྱོར་མཆོག་རྣམས་གཤེགས་སོང་།  །ཆོས་བརྒྱད་བླ་གཟུགས་ལུས་ཀྱང་།  །ནམ་ཕུག་ཐུབ་པར་མི་འདུག།  རྒྱལ་པོའི་མཛོད་རྣམས་ཟད་སོང་།  །བྲན་ནོར་བསགས་པ་ལུས་ཀྱང་།  །ནམ་ཕུག་ཐུབ་པར་མི་འདུག།  རྩི་ཐོག་འབྲས་བུ་ཡལ་སོང་།  །བྲ་བས་བསགས་པ་ལུས་ཀྱང་།  །ནམ་ཕུག་ཐུབ་པ་མི་འདུག།  དབྱར་རྩ་སྔོན་པོ་སྐམ་སོང་།  །རྩ་རོ་སྐྱ་བོ་ལུས་ཀྱང་།  །ནམ་ཕུག་ཐུབ་པར་མི་འདུག།  འཁོར་བར་ཞེན་པའི་བླ་སྤྲུལ།  །མང་ཆེས་རོ་བུན་སྤྱོད་ནས།  །དོན་མེད་གསོག་འཇོག་མཁས་ཀྱང་།  །ནམ་ཕུག་ཐུབ་པར་མི་འདུག།  ཁེ་དྲག་སྡང་ཞེན་དཔོན་པོ།  །ཁྲིམས་ཆད་དྲག་ཤུལ་བྱེད་ཀྱང་།  །རྣམ་སྨིན་ཁུར་དང་འགྲོགས་ནས།  །ནམ་ཕུག་ཐུབ་པར་མི་འདུག།  གསོག་འཇོག་སྤྱོད་པས་འདའ་བའི།  །ཕྱུག་པོ་ནོར་ལྡན་ལོངས་སྤྱོད།  །རྨི་ལམ་སྒྱུ་མ་ཇི་བཞིན།  །ནམ་ཕུག་ཐུབ་པར་མི་འདུག།  མི་ལུས་གཙང་མ་ཐོབ་ཚེ།  །ཁ་ལག་བྱ་བར་མ་རེ།  །རང་སེམས་རང་ཐོག་གྲོལ་བའི།  །གདམས་ངག་ཟབ་མོ་བརྟེན་མཛོད།  །ཁ་ཡེངས་མིག་ཡེངས་སྤྱོད་པས།  །གྲོལ་བ་ཐོབ་འདོད་མ་རེ།  །མ་རྟོགས་ཁ་འབྱམས་ཐོས་པས།  །ཕྱི་མར་ཕན་ཐོགས་མ་རེ།  །མ་བསྒོམ་ཤེས་ཤེས་སྙམ་པས།  །ཐར་པ་ཐོབ་འདོད་མ་རེ།  །འོངས་འོངས་ཆོས་ཉིད་དབྱིངས་ལས།  །འགྲོ་འགྲོ་དེ་རུ་ལྡིང་འགྲོ།  །ཞེས་ཟེར་ཞིང་འཕུར་སོང་།  །ཡང་ལོ་ཁྱིམ་དེའི་དགུན་འབྲིང་པོའི་ཚེས་བཅུའི་ཉིན་འོད་གསལ་ཐོད་རྒལ་གྱི་དབྱིངས་སུ་གནས་ཚེ་བྱིའུ་ཞིག་བདག་གི་ཐད་དུ་བབས་ནས་འདི་སྐད་ཟེར།  ཀྱེ་ཀྱེ།  བྱང་ཐང་ནེའུ་སེང་ཁྲོད་དེ།  །སྲོག་ཆགས་ཀུན་གནས་མིན་ཀྱང་།  །ཁ་དཀར་རྐྱང་བུའི་གནས་ལགས།  །མ་བུའི་འཕེལ་ཁ་ཨེ་རིག།  རྫ་རི་སྨུག་པོའི་ཁྲོད་འདི།  །སྲོག་ཆགས་ཀུན་གནས་མིན་ཀྱང་།  །བྲེ་བཙན་འབྲོང་མོའི་གནས་ལགས།  །མ་བརྒྱ་བུ་བརྒྱ་ཨེ་རིག།  བྲག་རི་མཐོ་ལ་བཙན་པ།  །སྲོག་ཆགས་ཀུན་གནས་མིན་ཀྱང་།  །བྱ་རྒྱལ་རྒོད་པོའི་གནས་ལགས།  །ཐང་དཀར་མ་བུ་ཨེ་རིག།  ངེས་མེད་དབེན་པའི་རི་ཁྲོད།  །མི་རྣམས་ཀུན་གནས་མིན་ཀྱང་།  །བྱ་བཏང་མཆོག་གི་གནས་ལགས།  །འཁོར་སློབ་འདུ་བ་ཨེ་རིག།  ནམ་མཁར་སྐར་ཚོགས་མང་ཡང་།  །ཉི་ཟླ་གཉིས་པོ་དཀོན་འདུག།  ས་གཞིར་མེ་ཏོག་མང་ཡང་།  །ཨུ་དུམ་ཝ་ར་དཀོན་འདུག།  ཤིང་དང་ནགས་ཚལ་མང་ཡང་།  །དཔག་བསམ་ལྗོན་པ་དཀོན་འདུག།  གཅན་གཟན་ཁྱུ་ཚོགས་མང་ཡང་།  །སེང་ལྕམ་དཀར་མོ་དཀོན་འདུག།  མི་ལུས་ཐོབ་པ་མང་ཡང་།  །དོན་དང་ལྡན་པ་དཀོན་འདུག།  བླ་མར་སྐད་པ་མང་ཡང་།  །དོན་གྱི་བླ་མ་དཀོན་འདུག།  བན་བཙུན་གཟུགས་བརྙན་མང་ཡང་།  །ཚུལ་དང་ལྡན་པ་དཀོན་འདུག།  ཁ་བཤད་མཁས་པ་མང་ཡང་།  །རྒྱུད་ལ་སྦྱོར་བ་དཀོན་འདུག།  སྒོམ་ཅན་སྐད་པ་མང་ཡང་།  །སྟོང་ཉིད་རྟོགས་པ་དཀོན་འདུག།  གྲུབ་ཐོབ་སྐད་པ་མང་ཡང་།  །དོན་གྱི་གྲུབ་ཐོབ་དཀོན་འདུག།  གཏེར་སྟོན་སྐད་པ་མང་ཡང་།  །ཟོལ་མིན་གཏེར་སྟོན་དཀོན་འདུག།  གཏེར་སྟོན་ཨེ་ཡིན་མི་ཤེས།  །ལས་སྨོན་སྐལ་པ་བཟང་པོའི།  །སྐྱེས་བུ་དམ་པ་ཉོན་དང་།  །རང་སྣང་དྭངས་མའི་འོད་གསལ།  །ཟབ་ལམ་འཕོ་བ་ཆེན་པོ།  །རྩེ་གཅིག་ཉམས་སུ་ལོངས་དང་།  །ཚེ་འདིར་གྲོལ་བ་འཐོབ་ངེས།  །བུ་སློབ་མང་པོ་ཡོད་ཀྱང་།  །རི་ཁྲོད་ཐུབ་པ་དཀོན་འོང་།  །ཆོས་བདག་སྐད་པ་མང་ཡང་།  །གདམས་པའི་ཡང་བཅུད་སྐོར་གསུམ།  འཆད་སྤེལ་ནུས་པ་དཀོན་འོང་།  །ཆོས་ཉན་ཆོས་ཞུ་མང་ཡང་།  །ཉམས་ལེན་ནུས་པ་དཀོན་འོང་།  །དེ་ལྟར་སེམས་སུ་ཞོག་ལ།  །རང་ཐོག་བཙན་ས་ཟུངས་དང་།  །གཞན་དོན་ཞོར་ལ་འབྱུང་སྲིད།  །ཁྱབ་བདག་ཀུན་ཏུ་བཟང་པོའི།  །རྒྱལ་ས་རང་གི་གཞི་ཡིན།  །ཨེ་གོ་ཨེ་རིག་གྲོགས་པོ།  །བྱང་ཐང་ཡངས་པ་ཨེ་རིག།  ནམ་མཁའ་ཀློང་ཡངས་ཨེ་རིག།  བྱི་འུ་དེ་རུ་ཆས་འགྲོ།  །ཆོས་དབྱིངས་ཡངས་པའི་ཐང་ན།  །ནམ་མཁའ་མཛོད་ལ་སྤྱོད་པའི།  །བྱི་འུ་མ་བུའི་སྐྱིད་པ།  །ཞེས་ཟེར་ནས་འཕུར་སོང་ངོ་།  །དེ་ནས་ལོ་གྲངས་སུམ་ཅུ་སོ་བཞི་ལ་བབས་པའི་ཧོར་ཟླ་དང་པོའི་ཚེས་ཉེར་ལྔའི་ཉིན་མཁའ་འགྲོ་ཁྲོས་མ་ནག་མོའི་སྒྲུབ་སྐོར་ལ་བརྟེན་པའི་ཚོགས་ཀྱི་འཁོར་ལོ་བསྐོར་བའི་དུས་སུ་འཇའ་ཚོན་འོད་ཀྱི་དྲྭ་བ་འཁྲིགས།  བྱ་རྒྱལ་རྒོད་ཀྱི་ཐུལ་ཕྲན་བབས།  མི་མངོན་སྟོང་པའི་མཁའ་ལས་གླིང་བུ་དང་པི་ཝང་གི་སྒྲ་ཤིན་ཏུ་སྙན་པ་དེར་འདུས་པ་ཀུན་གྱིས་ཐོས་པ་བྱུང་།  དེ་ནུབ་མཁའ་འགྲོ་མ་དཀར་སེར་དམར་ལྗང་བཞིས་དར་གྱི་འདོ་ལེའི་ཐོག་ཏུ་རྣལ་འབྱོར་པ་སྐུ་བསྒྲེས་པོ་དབུ་སྐྲ་རིང་ཞིང་དཀར་བ།  ཟ་འོག་སྨུག་པོ་སྤྲིན་རིས་དང་འབྲུག་རིས་ཅན་གྱི་གོས་གྱོན་པ།  སྐེད་དུ་གྲི་མཛེས་ཤིང་ཡིད་དུ་འོང་བ་བརྟེན་པ།  དངུལ་དཀར་གྱི་གློ་ལུང་གི་རྒྱན་ཅན་ཤིན་ཏུ་གཟི་བརྗིད་འོད་ཕུང་འབར་བ་ཞིག་མཁའ་འགྲོ་མ་མཐིང་ནག་ཞིག་གི་ཕྱག་ནས་བཟུང་སྟེ་བདག་གི་ཐད་དུ་བྱུང་མ་ཐག་རྣལ་འབྱོར་པ་དེས་འདི་སྐད་ཟེར།  ཚེ་རབས་དུ་མའི་སྦྱངས་སྟོབས་ཅན།  །ཟབ་མོ་གཏེར་གྱི་སྒོ་འབྱེད་ཅིང་།  །འབྲེལ་ཚད་ཐར་པར་འདྲོངས་ནུས་པའི།  །སྐྱེས་བུ་ཁྱོད་ལ་ངས་ལུས་སློང་།  །སྔོན་ཆད་ཤིང་ཕོ་བྱི་བའི་ལོར།  །ངའི་བུ་ཕུན་ཚོགས་འབྱུང་བའི་གནས།  །མཁའ་འགྲོ་ཡེ་ཤེས་མཚོ་རྒྱལ་མས།  །ཤེལ་གྱི་མཆོད་རྟེན་དཀར་པོ་རུ།  །འཕྲུལ་ནས་ཁྱོད་ལ་གཏད་པ་ནི།  །གྲུབ་པ་ཐོབ་པའི་གདུང་བརྒྱུད་དུ།  །མངལ་གྲིབ་སྐྱོན་གྱིས་མི་གོས་ཕྱིར།  །ང་ཡིས་བསྒོས་པ་ཇི་བཞིན་དུ།  །ཁྱོད་ཀྱི་སྲས་སུ་འཁྲུངས་པ་ཡིན།  །ང་ཡང་ཁྱོད་ཀྱི་བུར་སྐྱེས་ཏེ།  །གདུལ་བྱའི་ལྷག་མ་སྐྱོང་སྡུད་ཕྱིར།  །མི་ཡི་ཡུལ་འདིར་སླེབས་དགོས་པས།  །དེ་ཕྱིར་ཁྱོད་ཚལ་དེ་རིང་སླེབས།  །ང་ནི་ཆོས་རྒྱལ་ཁྲི་སྲོང་ཡིན།  །མཁྱེན་བརྩེ་ཡེ་ཤེས་རྡོ་རྗེ་སྟེ།  །ཐེ་ཚོམ་ཆོད་དང་སྐྱེས་བུ་མཆོག།  མཐར་ཐུག་ཕ་བུ་དབྱེར་མེད་དུ།  །བདེ་ཆེན་ཞིང་གི་དཔལ་ཐོབ་འགྱུར།  །ཞེས་ཟེར་ཞིང་གསེར་གྱི་རྡོ་རྗེ་ཞིག་རུམ་ནས་ཕྱུངས་ཤིང་ཕྱག་ན་ཞྭ་ཞིག་བསྣམས་འདུག་པ་གཉིས་ཀ་བདག་གི་གཟན་གྱི་ཞབས་སུ་བཅུག་བྱུང་བ་ལ།  དེ་ལྟར་མ་བྱེད་ཁྱོད་ཀྱི་ཕྱག་མཚན་དང་དབུ་ཞྭ་ངའི་གོས་ཀྱི་ཞབས་སུ་མ་བཞག་སྨྲས་པས།  དེ་ན་རེ།  འུ་ཅག་གཉིས་གཅིག་ལས་གཉིས་སུ་མེད་དེ་སྐྱོན་མེད་ཟེར་ཞིང་བདག་ལ་ཐིམ་པའི་སྣང་བ་ཤར།  དེ་ནས་ཧོར་ཟླ་བཞི་པའི་ཚེས་ལྔའི་ནུབ་ཡུལ་ཡངས་པའི་གྲོང་ཁྱེར་ཆེན་པོ་ཞིག་ཏུ་སླེབས་འདུག་པ་དང་།  ཡུལ་དེར་དཔའ་བོ་མཁའ་འགྲོ་མང་པོ་ཚོགས་ཀྱི་འདུ་བ་ཆེན་པོ་འཚོགས་ནས་རོལ་མོ་སྣ་ཚོགས་པའི་སྒྲ་སྒྲོགས་ཤིང་ངག་ནས་འདི་སྐད་དོ།  །རིག་འཛིན་བླ་མ་འདུ་བར་གཤེགས།  །ཡི་དམ་ཞི་ཁྲོ་འདུ་བར་གཤེགས།  །མ་དང་མཁའ་འགྲོ་འདུ་བར་གཤེགས།  །བཀའ་སྲུང་ཆོས་སྐྱོང་འདུ་བར་གཤེགས།  །ཛཿཧཱུྃ་བཾ་ཧོཿ ས་མ་ཡ།  ཧེ་ཡ་ཕེཾ་ཕེཾ།  བླ་མ་རྒྱ་མཚོ་ཚོགས་ལ་རོལ།  །ཡི་དམ་རྒྱ་མཚོ་ཚོགས་ལ་རོལ།  །མ་དང་མཁའ་འགྲོ་ཚོགས་ལ་རོལ།  །བཀའ་སྲུང་ཆོས་སྐྱོང་ཚོགས་ལ་རོལ།  །ཞེས་ཟེར་ཞིང་ཚོགས་རྫས་ཀྱི་རྒྱུ་གང་ཡིན་ངོ་མི་ཤེས་ཤིང་ཁ་དོག་ཅི་ཡིན་མ་འཚལ་བའི་འོད་འབར་བ་དབྱིབས་ཕག་པའི་སྣ་འདྲ་བ་ཆུ་འགྲམ་གྱི་གྲམ་པ་ལྟར་དཔག་ཏུ་མེད་པས་ཡུལ་དེ་ཁྱབ་འདུག་གོ།  དེ་ན་བུམ་པ་དང་རྡོ་རྗེ་ཕུར་པ་མེ་ལོང་སོགས་ཤིན་ཏུ་མང་པོ་བཤམས་འདུག་པ་ལ།  བདག་གིས་འདི་དག་སུ་དང་གང་གི་རེད་ཅེས་དྲིས་པས།  བུད་མེད་ནག་མོ་ཞིག་གིས་ན་རེ།  འདི་རྣམས་ཁྱོད་ཀྱི་འབངས་ཡིན་ཟེར།  བུད་མེད་སྔོན་མོ་ཞིག་གིས་བུ་སློབ་ཀྱི་བརྡ་རུ་གདའ།  ཞེས་ཟེར་ཞིང་དབྱིངས་སུ་ཡལ་ལོ།  །དེ་ནས་ཧོར་ཟླ་ལྔ་པའི་ཚེས་གསུམ་གྱི་ནུབ་རྨི་ལམ་གྱི་སྣང་ཆ་ལ་ནམ་མཁའི་ཁམས་ནས་དཔའ་བོ་དང་མཁའ་འགྲོ་མའི་ཚོགས་དཔག་ཏུ་མེད་པ་པདྨ་རཱ་གའི་ཁ་དོག་ལྟར་དམར་ཞིང་འོད་འབར་བ།  དེ་དག་ཐམས་ཅད་ཀྱིས་རོལ་མོ་སྣ་ཚོགས་ཀྱི་སྒྲ་འུར་ཞིང་བྱུང་བས།  བདག་གིས་བུ་མོ་ཞིག་ལ་འདི་རྣམས་སུ་རེད་དྲིས་པས།  དེ་ན་རེ།  ཤར་རེ་གོང་གསེར་མོ་ལྗོངས་ཀྱི་རྣལ་འབྱོར་པ་རང་གྲོལ་ཞེས་བྱ་བའི་བསུ་བ་ཡིན།  དོ་ནུབ་འགྲོ་དགོས་ཟེར་བ་ལ།  བདག་གིས་ཞིང་ཁམས་གང་ཡིན་དྲིས་པས།  ཞིང་ཁམས་ཕ་ཀི་རེད་ཅེས་མཛུབ་སྟོན་བྱེད་པ་ལ་བདག་གིས་བལྟས་པ་ན།  མེ་ཏོག་དམར་པོས་བརྒྱན་པའི་ས་གཞི་ལ་དཔག་བསམ་ཤིང་གི་ནགས་ཚལ་ལྷུན་སྟུག་པ་ཞིག་གི་ནང་ནས་འོད་ཕུང་དམར་པོ་ཉི་འོད་ལྟ་བུས་ཕྱོགས་མཚམས་ཀུན་ཏུ་ཁྱབ་པ་མཐོང་ཚེ་ཡིད་རབ་ཏུ་གདུང་ཞིང་འགོག་ཏུ་མེད་པའི་ཞེན་ཆགས་སྐྱེ་བའི་སྐྱེད་མོས་ཚལ་བཀྲ་ལམ་མེ་བ་མཐོང་།  མཁའ་འགྲོ་མ་དེ་ལ་ཕ་ཀི་ཤིན་ཏུ་སྐྱིད་ཅིང་ཡིད་འཕྲོག་པའི་གནས་འདི་གང་ལགས་སྨྲས་པས།  ཡུལ་ཕ་ཀི་བདེ་བ་ཅན་ཞེས་བྱ་བ་སྟེ།  འོད་དེ་སངས་རྒྱས་འོད་མཐའ་ཡས་པའི་འོད་ཟེར་ཡིན་པས་སྨོན་ལམ་ཐོབ་དང་མ་འོངས་པ་ན་ཁྱོད་ཀྱང་དེར་འཕོ་བར་འགྱུར་རོ།  །ཞེས་ཟེར་བ་བཞིན་བདག་གིས་ཀྱང་ཕྱག་འཚལ་ཞིང་སྨོན་ལམ་བཏབ་མཐར།  བུ་མོ་ཀུན་ཤེས་མ།  བདེ་བ་ཅན་ཞེས་བྱ་བ་ཞིག་ཡོད་ཟེར་བ་ཀུན་རྫོབ་ཙམ་དུ་རང་སྣང་བ་མ་གཏོགས་དོན་ལ་མེད་པར་ཐག་བཅད་ནས་ཡོད་དེ།  ངེས་པར་རང་སྣང་མ་ཡིན་པའི་རང་རྒྱུད་པར་ཡོད་པ་དེ་ཡ་མཚན་ཞེས་སྨྲས་པས།  མོ་ན་རེ།  ཧ་ཧ་རང་སྣང་མ་གཏོགས་གཞན་རང་རྒྱུད་པ་ཞིག་སྔར་ཡང་མཐོང་མ་མྱོང་།  ཕྱིས་ཀྱང་མཐོང་མི་སྲིད།  ད་ལྟ་ཡང་རྨི་ལམ་གྱི་སྣང་བ་རང་སྣང་མིན་པར་སེམས་པ་འདི་མཚར་རེ་ཆེ།  ཞེས་ཟེར་བས་བདག་གཉིད་ལས་སད།  དེ་ནས་དགུན་ཟླ་ར་བའི་ཚེས་བཅོ་བརྒྱད་ཀྱི་ནུབ་མཁའ་འགྲོ་སེང་གེ་གདོང་པ་ཅན་གྱི་མདུན་སར་སླེབས་འདུག་པའི་མོད་ལ་མཁའ་འགྲོ་མས་གཡུའི་པད་ཕོར་དང་མུ་མེན་གྱི་སྒྲོམ་བུ་གཉིས་བཅས་བདག་ལ་གཏད་དེ།  བུ་ཁྱོད་ཀྱིས་འདི་གསུམ་ཀ་ཁྱུར་མིད་དུ་ཟོ་ཞིག།  ངའི་སྒོམ་བཟླས་རྣམས་སེམས་ལ་གསལ་ནས་འོང་།  ཁྱོད་ལ་བར་ཆད་ཀྱི་རྐྱེན་མང་སྟེ་མཁའ་འགྲོའི་སྙིང་ཁྲག་གི་དྭངས་མའི་སྲོག་ཏིག་ནག་པོ་འབྲུ་བཅུ་བཞི་པ་ཟུངས་ཤིག།  འདི་རྟག་ཏུ་བཟླས་ནས་བཟློག་པ་ལ་བརྩོན་ན་མི་མཐུན་པའི་ཕྱོགས་ངན་པ་ཐམས་ཅད་སེལ་བར་ངེས་སོ།  །ཞེས་གསུངས།  མཁའ་འགྲོ་རིགས་བཞིས་ཨ་རལླི་ཧེ་ཧ།  ཞེས་སྐད་ཆེར་ཕྱུངས་ནས་བསྒྲགས་པའི་སྒྲས་གཉིད་སད་དོ།  །དེ་ནས་ལོ་གྲངས་སུམ་ཅུ་སོ་ལྔ་ལ་བབས་པ་ཧོར་ཟླ་ལྔ་པའི་ཚེས་བཅོ་ལྔའི་ནུབ་རྨི་ལམ་ན་མཁའ་འགྲོ་གསེར་ཕྲེང་མ་ཡིན་སྐད་པའི་བུ་མོ་ཞིག་ན་རེ།  མ་འོངས་འབྱུང་འགྱུར་ལ་བལྟ་ཨེ་འགྲོ་ཞེས་ཟེར་བ་དང་འགྲོགས་ནས་ཕྱིན་ཚེ་ཡུལ་ངོ་མི་ཤེས་པ་ཞིག་ཏུ་སླེབས་པས་རི་ཆེན་པོ་ཞིག་གི་ངོས་ན་མཆོད་རྟེན་རྐང་པ་བཞིས་བཏེགས་པའི་འོག་ན་རྡོའི་ར་བ་སྒམ་འདྲ་བ་ཞིག་གི་ནང་ན་ཏིང་བདུན་བརྒྱ་ཕྲག་ལྷག་ཙམ་ཞིག་ཡོད་འདུགམཁའ་འགྲོ་མ་ན་རེ།  སྐྱེས་བུ་ཁྱོད་ཀྱིས་སྣོད་འདི་རྣམས་ཟུངས་ཤིག་ཟེར་བ་ལ་ངས་འདི་ལྟར་སྨྲས།  ཆག་གས་མེད་པ་བརྒྱ་ལྷག་ཙམ་འདུག་ཀྱང་ཆག་གྲུམ་ཅན་མང་བས་དགོས་པ་མེད།  མ་ཆག་པ་རྣམས་ལའང་བདག་པོ་ལོས་ཡོད།  མ་བྱིན་པ་བླངས་པ་ལ་དགོས་པ་མེད་སྨྲས་པས།  དེ་ན་རེ།  བདག་པོ་ནི་མེད།  ཆག་གྲུམ་ཅན་རྣམས་དམ་ཉམས་དང་སྣོད་མེད་རྣམས་ཡིན་ཀྱང་།  ཆག་གྲུམ་མེད་པ་རྣམས་བུ་སློབ་སྣོད་ལྡན་གྱི་བརྡ་རུ་འདུག་པས་ཟུངས་དང་རྟེན་འབྲེལ་གྱི་དགོས་ཆེད་བཟང་པོ་ཞིག་ཡོད་པ་ཡིན་ཟེར་བ་བཞིན་ཆག་གྲུམ་མེད་པ་རྣམས་རུམ་དུ་བཅུག་ནས།  ཕྱིར་ནུར་བྱས་ཏེ་བལྟས་པས་མཆོད་རྟེན་བདུན་འདུག།  མཆོད་རྟེན་ནི་རྡོས་བརྩིགས་ཏེ་སས་གཡོགས་པ་དང་།  ལ་ལ་ལྕི་བས་གཡོགས་པ་དག་ཏུ་འདུག།  བདག་གིས་བུ་མོ་དེ་ལ་ཁྱོད་རྟེན་འབྲེལ་ལ་མཁས་པ་ཡིན་ན་ས་དང་ལྕི་བས་གཡོགས་པ་འདི་དག་ཅི་ཡིན་དྲིས་པས།  འདི་དག་ནི་དགོན་སྡེ་དཀོར་ལ་འབག་པ་རྣམས་ཀྱི་བརྡ་རེད།  ཏིང་བདུན་དེ་རྣམས་ཁྱེད་ཡབ་སྲས་ཀྱི་གདུལ་བྱ་ཡིན།  ད་སོང་སོང་ཟེར་བས་བདག་འཕྲང་ལམ་དོག་ཅིང་རྩུབ་པ་ཞིག་ཏུ་ཞུགས་ནས་སོང་བའི་ལམ་ཁ་ན་མི་ཤ་མདོག་ནག་ལ་སྨ་ར་དམར་བ་འཇིགས་སུ་རུང་བ་ཞིག་གིས་བདག་གི་ལག་པ་གཡས་ནས་བཟུང་སྟེ་ཁར་བཅུག་པའི་མོད་ལ་བདག་དངངས་སྐྲག་བཟོད་མེད་སྐྱེས་མཐར།  སླར་ཡང་གཅོད་ཀྱི་ཐོག་བརྫིས་དྲན་ནས་ད་ཟོ་ཞིག་ཁྱེར་ཞིག་ཅེས་སྨྲས་ཏེ་ཁུ་ཚུར་ཁར་བརྫངས་པས་ཁོ་ཡུལ་མེད་དུ་ཡལ་སོང་།  དེར་བུད་མེད་དེས་ན་རེ།  དཀོར་བདག་རྒྱལ་པོ་ནི་ཐོག་བརྫིས་ཀྱིས་ཐུལ་སོང་།  །ད་ནི་བསྟན་དགོན་ལ་དབང་འབྱོར་བ་ཡིན།  ཡང་ཕྱོགས་ཀྱི་ནམ་མཁའ་ལ་ལྟོས་དང་ཟེར།  བལྟས་པས་སྤྲིན་ནག་པོ་ནས་སྐྱིན་ཐང་འབབ་ཅིང་འབྲུག་སྒྲ་དྲག་པོ་ལྡིར་བ་ཐོས།  དེ་ཅི་ཡིན་དྲིས་པས་ཀླ་ཀློ་དབུས་སུ་རྡིབ་པའི་ལྟས་རེད་ཟེར།  དེ་ནས་དཔག་ཚད་ཙམ་དུ་ཕྱིན་ཚེ་སྟག་ཁྲ་བོ་བལྟར་མི་བཟོད་པ་ཞིག་གིས་ཧོར་ཧོར་ཞེས་པའི་སྒྲ་ཆེན་པོ་བསྒྲགས་པས་གཉིད་ལས་སད་དོ།  །ལོ་ཁྱིམ་དེའི་དགུན་ཟླ་ཐ་ཆུང་གི་ཚེས་བཅུ་དགུའི་ནུབ་ཀྱི་རྨི་ལམ་ན་མཁའ་འགྲོ་དཔལ་གྱི་དགྱེས་སྡེ་མོ་ཡིན་སྐད་པའི་བུད་མེད་ལྗང་མོ་གཡུའི་ཁ་དོག་ཅན་ཞིག་བདག་གི་དྲུང་དུ་བྱུང་ནས་འདི་སྐད་ཟེར།  སྐྱེས་མཆོག་དམ་པ་ཁྱོད་ཉོན་དང་།  །སང་གི་ཉི་མའི་ཕྱི་དྲོའི་དུས།  །འདུལ་བ་འཛིན་པའི་སྐྱེས་བུ་ཞིག།  རྒྱལ་འགོང་གདུག་པས་རྒྱུད་བསླུས་ཏེ།  །སྨྱོ་ཞིང་རང་སྲོག་གཅོད་ལ་ཆས།  །དེ་འདུལ་ཕྱིར་ན་བདུད་གཅོད་ཀྱི།  །གདམས་པ་ཟབ་མོའི་གནད་མཆོག་གིས།  །བརྡེག་བརྡུང་འཁྲུལ་པའི་འཁོར་ལོ་བཤིག།  རྣམ་ཤེས་དབྱིངས་སུ་སྤར་བྱས་ཏེ།  །ཤ་ཁྲག་སྟོན་འགྱེད་བྱེད་པ་ཡི།  །གནད་དང་ལྡན་ན་དེ་ཐུལ་ཡང་།  །སློང་ཚད་རང་ཐོག་མ་ཆོད་ན།  །རང་ལ་འབབ་སྟེ་ཁེ་ཉེན་ཆེ།  །སྔ་ལྟས་དོ་ནུབ་འཆར་ལ་ལྟོས།  །སྙེམས་ཐག་ཆོད་ཅིག་སྐལ་ལྡན་བུ།  །བཟང་ངན་ལྟས་མཚན་གང་བྱུང་ཡང་།  །དེར་འཛིན་རེ་དོགས་ཞེན་པ་ཆོད།  །ཟབ་དོན་གཅོད་ཀྱི་ཉམས་ལེན་གནད།  །ཤེས་ནས་རྒྱུད་ལ་འདྲིས་པར་གྱིས།  །ཞེས་ཟེར་ནས་ཡལ།  །དེ་ནས་ཡུན་ཅིག་གི་ཚེ་བནྡྷེ་ན་ཡོལ་ཞིག་གི་ལག་པ་གཡོན་པས་བདག་གི་གོས་ཀྱི་གོང་བ་ནས་བཟུང་།  གཡས་པས་གྲི་རྩེ་ཤིན་ཏུ་རྣོ་བ་ཞིག་སྙིང་གར་བཙུགས་ནས་ད་མི་སྲུན་སྡིག་དྲེད་ཁྱོད་གསོད་པར་མི་བྱེད་རེ་ན་ར་ཀན།  ཟེར་བ་ལ་བདག་ཤིན་ཏུ་སྐྲག་ནས་སྐེད་གྲི་ཕྱུངས་ཏེ་ཁོའི་མགོ་ལ་བརྒྱབ་པས་མགོ་བོ་བཀས་ཏེ་འགྱེལ་སོང་བ་དང་ཆབ་གཅིག་ཏུ་བདག་གི་གྲི་ཡང་ཆག་སོང་།  དེ་ནས་ཁོའི་གྲི་བླངས་ཏེ་ལུས་ཚལ་པར་གཏུབ་པས་ཁྲག་ཐིག་ཞིག་སྙིང་གར་ཡར་བ་དེ་ལ་བཙོག་སྣང་ཞིག་ཤར།  དེའི་ཕྱིར་ཉིན་གླིང་ལྷ་མཆོག་ཞེས་བྱ་བས་ངེད་ཀྱི་མཐའ་བའི་དགེ་སློང་སྔོ་ལི་ཞེས་པ་སྨྱོ་རུ་ཡོད་དེ་ཁྱེད་མ་བྱོན་པའི་ཐབས་མེད་ཅེས་ཟེར་བ་ལ།  རྨི་ལམ་ཤིན་ཏུ་ངན་པ་ཞིག་རྨིས་པས་ང་མི་འགྲོ་སྨྲས་པས།  དེ་ན་རེ།  ཁྱེད་མ་བྱོན་ཚེ་ང་བསད་པ་དང་འདྲ་སྟེ་ཉལ་ནས་འདུག་རྒྱུ་ཡིན་ཟེར་བ་བཟློག་མ་ནུས་པར་དེ་དང་མཉམ་དུ་ཕྱིན་ནས་སྨྱོན་པའི་རྩར་སླེབ་མ་ཐག་ཏུ་གཡང་གཞིས་དྲག་ཏུ་བརྡུང་བའི་མོད་ལ་གཡང་གཞི་སྐེད་ནས་ཆད་སོང་ཚེ་མདང་གི་རྨི་ལམ་དྲན་ནས་འཁུ་འཕྲིག་འགོག་མི་བཏུབ་པ་ཞིག་སྐྱེས།  དེའི་ཕྱི་ཉིན་སྨྱོན་པ་ནད་ལས་གྲོལ་སོང་།  བདག་གི་སྙིང་འཕར་ཞིང་གཉིད་མ་བྱུང་བས་དེ་ལ་གླུད་བསྔོ་ཚོགས་བསྐང་ཇི་ལྟར་བྱས་ཀྱང་ཕན་པ་མ་བྱུང་།  དེ་ནས་ན་དགའ་ཤི་སྐྱིད་བསྒོམ་ཞིང་བྲག་འཇིགས་སུ་རུང་བ་ཆེས་གཉན་པ་ཞིག་གི་ཚལ་དུ་ཕྱིན་ནས་སྐེ་ལ་ཐག་པ་བཏགས་ཏེ་གཏད་བྱས་པས་ནད་ཡུལ་མེད་དུ་ཡལ་སོང་ངོ་།  །དེ་ནས་ལོ་གྲངས་སུམ་ཅུ་སོ་དྲུག་ལ་བབས་པ་ཧོར་ཟླ་བདུན་པའི་ཚེས་དགུའི་ནུབ་རྨི་ལམ་ན་མི་ནག་པོ་བལྟར་མི་བཟོད་པ་ཞིག་བྱུང་ནས་བདག་གི་རུམ་དུ་ལག་པ་བརྒྱབ་སྟེ་ང་ནི་གུར་གྱི་མགོན་པོའི་བློན་ཆེན་ཡིན།  ཁྱོད་ཀྱི་གློ་སྙིང་ལེན་དུ་བཏང་བ་ཡིན་ཟེར་བ་ལ།  བདག་གིས་འཁོར་འདས་སྟོང་ཉིད་ཀྱི་རོལ་པར་འུབ་ཆུབ་པའི་ཏིང་ངེ་འཛིན་ལ་བཞུགས་པས།  དེ་ན་རེ།  ཁོ་མ་ཐུབ་ཀྱང་ཁོའི་སློབ་མ་ལ་ཡ་ཡ་ཞེས་ཟེར་ཞིང་ཨམ་གཙིགས་བསྡམས་ནས་ཁ་ཕྱིར་གྱུ་བའི་ཚེ།  བདག་གི་སྐེད་གྲི་ཕྱུངས་ཏེ་ཁོའི་མགོ་ལ་བརྒྱབ་པས་ལུས་སྨྱུག་མ་བཀས་པ་ལྟར་གཡས་གཡོན་དུ་ལྷུང་སོང་།  དེ་དུས་གླིང་ལྷ་པ་ཞེས་བྱ་བ་བླ་མ་རྩང་པའི་མཐུས་གལ་ལ་ཐོག་པ་བཟློག་ཕྱིར་གདུགས་དཀར་ཀློག་འདོན་དུ་ཕྱིན་ཡོད་པ་ཞིག་སྨྱོས་ནས་བདག་གི་གམ་དུ་སླེབས་པ་ཡང་གཅོད་ཀྱི་གདམས་པ་ལ་བརྟེན་ནས་ནད་ལས་གྲོལ།  དེ་ནས་ཧོར་ཟླ་བཅུ་པའི་ནུབ་རྒྱལ་གདོན་འཇིགས་སུ་རུང་བ་བུད་མེད་ནག་མོ་བདུན་དང་འགྲོགས་པ་ཞིག་བྱུང་ནས་ངའི་རྐང་པ་གཡོན་ནས་དམ་པོར་བཟུང་སྟེ་ཤེད་བསྐྱེད་འདུག་པ་ལ།  བདག་གིས་དེའི་སྐྲ་ལ་བཟུང་སྟེ་གྲི་ཕྱུངས་ནས་ཁྱོད་གསོད་པར་མི་བྱེད་རེ་སྨྲས་པས།  ཁོ་ན་རེ།  ང་མ་བསད་དང་ཁྱོད་ཀྱིས་ཅི་བསྒོ་བ་དེ་ངས་བསྒྲུབ་ཟེར་བ་ལ།  བདག་གིས་སེམས་ཅན་ཐམས་ཅད་ལ་གནོད་པ་མི་བྱེད་པར་ཁས་ལོངས་ཤིག་སྨྲས་པས།  ཁོས་དེ་ལྟར་མི་ནུས་ཏེ་བདག་ཅག་མུ་གེས་ཤི་བ་ལས་འོས་མེད་པས་གཞན་ཞིག་བསྒོ་དང་དེ་བསྒྲུབ་ཟེར།  དེ་ལྟར་ན་ངའི་སློབ་བརྒྱུད་ལ་གནོད་པ་མི་བྱེད་པར་ཁས་ལོངས་བྱས་པས།  ཁྱོད་ཀྱི་བུ་སློབ་ཏུ་གྱུར་པ་ལ་གནོད་པ་བྱེད་རེ་ན་ར་ཀན།  ཅེས་ཟེར་ཏེ་ཁས་བླངས་ནས་སོང་།  དེ་ནས་ཧོར་ཟླ་བཅུ་གཅིག་པའི་ཚེས་བཅུའི་ཉིན་ནོར་བདག་ཆེན་པོ་ཨ་པ་རའི་སྒྲུབ་པ་ལ་ཞུགས་ཚེ་ཟླ་བ་ཕྱི་མའི་ཚེས་ལྔའི་ནུབ་ནོར་བདག་ཆེན་པོས་ཞལ་གཟིགས་ནས་འདི་སྐད་ཟེར།  ཁྱོད་ལ་ལོ་གྲངས་དགུ་ཚུན་ཆད་དུ་ནོར་སྟེར་རྒྱུ་མི་རྙེད་དེ།  དེ་ཕན་ཆད་ཅི་འདོད་པ་ཐམས་ཅད་སྟེར་འོང་།  སང་ཕོད་ཁྱོད་ཀྱི་སྲས་ཆེ་བ་དེ་བདག་པོ་ལ་ར་སྤྲོད་དང་བསྟན་པ་དང་འགྲོ་བ་ལ་ཕན་ཐོགས་པ་ཡོད།  སྲས་འབྲིང་བ་དེ་སྟེར་ཀྱང་རུང་ལ་མ་སྟེར་ཀྱང་རུང་།  སྲས་ཆུང་བ་དེ་སུ་ལའང་མ་སྟེར་དང་ཁྱོད་ཀྱིས་བསྟན་པ་ལ་ཕན་ཐོགས་ཆེན་པོ་འབྱུང་སྲིད།  ད་དུང་ཡང་སྲས་དྲུག་གམ་ལྔ་འབྱུང་བས་བསྟན་པ་དང་སེམས་ཅན་ལ་ཕན་ཐོགས་པ་ནི་དབུལ་ཕོངས་རྒུད་པ་སེལ་བ་ལ་ཡིད་བཞིན་དབང་གི་རྒྱལ་པོ་ལྟ་བུ་ཤ་སྟག་ཡིན་ཏེ་སྨོན་ལམ་གྱི་སྟོབས་ལས་སྐྱེས་པ་ཡིན།  ཁྱོད་ལ་བུ་སློབ་ནམ་མཁའི་སྐར་ཚོགས་ལྟ་བུ་འབྱུང་ལ་ཁྱད་པར་དུ་ཉི་ཟླ་སྐར་ཆེན་ལྟ་བུ་བཅུ་བདུན་འབྱུང་།  བསྟན་པ་ལ་ཕན་ཆེར་ཐོགས།  དེ་དག་ནི་ངེས་མེད་ཀྱི་རི་ཁྲོད་བསྟེན་ཞིང་སྙིང་པོའི་སྒྲུབ་པ་ལ་བརྩོན་པ་དང་།  ལོ་རེ་བཞིན་འཆི་མེད་ཚེའི་སྒྲུབ་པ་ལ་འབད་པ་གལ་ཤིན་ཏུ་ཆེ།  བདུད་གཅོད་ཟབ་མོའི་གདམས་པ་ལ་བརྟེན་ནས་ལུས་ཀྱི་གཅེས་འཛིན་བཏང་སྟེ་ཤ་ཁྲག་སྟོན་འགྱེད་བྱ་བ་ནི་བར་ཆད་ཐམས་ཅད་སེལ་བའི་གནད་མཆོག་ཡིན་ཏེ་མ་བརྗེད་སེམས་ལ་ཞོག་དང་ངས་བླ་སློབ་ཀུན་གྱི་མཐུན་རྐྱེན་ཅི་ནུས་སུ་བསྒྲུབ་འོང་།  ཞེས་ཟེར་ཞིང་མི་སྣང་བར་ཡལ།  ཧོར་ཟླ་བཅུ་གཉིས་པའི་ཚེས་གསུམ་གྱི་ནུབ་མཁའ་འགྲོ་མ་དབང་གི་རྒྱལ་མོ་ཡིན་ཟེར་བའི་བུད་མེད་དམར་མོ་ཞིག་གིས་ན་རེ།  ཀྱཻ།  སྐལ་པ་བཟང་པོའི་སྐྱེས་བུ་ཁྱོད།  །གནས་འདི་རྡོ་རྗེ་མཁའ་འགྲོའི་གནས།  །ཨོ་རྒྱན་དྷུ་མ་ཐ་ལ་དང་།  །མཉམ་པའི་ས་སྤྱོད་འོག་མིན་ཏེ།  །ཏིང་འཛིན་ཤུགས་ཀྱིས་སྐྱེ་བའི་གནས།  །ད་ནི་ཁྱོད་ཉིད་གནས་འཕོ་ཚད།  དངོས་གྲུབ་འགའ་རེ་ཐོབ་ནས་གདའ།  །ཉ་མང་ཞེས་བྱའི་ལུང་ཕྲན་དུ།  །ཡུན་ཅིག་སྡོད་ལ་མངོན་སྤྱོད་ཀྱི།  །ལས་ལ་བརྩོན་ན་བསྟན་དགྲ་ཐུལ།  །ཕུ་ལུང་གད་ཀྱི་ལ་ཐོག་ཏུ།  །གནོད་སྦྱིན་ཆེན་པོའི་བླ་གནས་ཡོད།  །དྲག་པོ་མཐུ་ཡི་གྲགས་པ་ཐོབ།  །རེ་ཞིག་དེ་རུ་གནས་མཛོད་ཅིག།  བུ་སློབ་བཟང་པོ་འགའ་ཞིག་འདུ།  །རིང་པོར་མི་ཐོགས་དེར་བཞུད་ཅིག།  ཅེས་ཟེར་ནས་ཡལ་ལོ།  །དེ་ནས་རང་ལོ་སུམ་ཅུ་སོ་བདུན་ལྕགས་ལུག་གི་ལོ་ཧོར་ཟླ་དང་པོའི་ཚེས་གཅིག་གི་ཉིན་སྨར་གྱི་ཉ་མང་ལུང་པར་ཕྱིན་ནས་ལྷ་ཆེན་དབང་ཕྱུག་ཆེན་པོའི་སྒྲུབ་པ་ལ་ཞུགས་ཏེ་ཟླ་བ་དང་པོའི་ཚེས་བཅོ་ལྔ་ནས་གཉིས་པའི་བཅོ་ལྔའི་བར་དུ་དམ་རྒྱས་བསྒྲུབ་ཚེ།  བདག་ལ་མིག་འབྱིན་ལྕགས་ཀྱུ་རྣོན་པོའི་སྔགས་ཡིན་ཟེར་བའི་སྔགས་འབྲུ་ལྔ་པ་ཞིག་ལྷ་ཆེན་གྱིས་དངོས་སུ་གནང་བ་ཞག་བཅུ་རུ་ལག་ལེན་ལ་བཏབ་པས་བསྟན་དགྲ་དེའི་མིག་ལོང་བར་གྱུར་ནས་མཐུའི་གྲགས་པ་ཐོབ།  དཔྱིད་ཐ་ཆུང་གི་ནང་ཕུག་ལུང་གད་ཐོག་ཏུ་ཁང་པ་ཞིག་རྒྱག་གྲབ་བྱེད་དུ་ཡོད་པའི་སྐབས།  ཚེས་བཅུའི་ནུབ་མཁའ་འགྲོ་ཀུན་ཏུ་རྒྱུ་བ་རིགས་ལྡན་མ་ཡིན་ཟེར་བའི་བུད་མེད་རྒན་མོ་ཞིག་གིས་ན་རེ།  སྐྱེས་བུ་མཆོག་ཁྱོད་ཚུར་ཉོན་དང་།  །སྟོན་ཟླ་འབྲིང་པོའི་ཚེས་གསུམ་ཉིན།  །ཁང་པ་བརྩིགས་པའི་གཟའ་སྐར་ལེགས།  །དུས་སྐབས་དེ་རུ་མ་ཐུག་བར།  །ཁང་པ་བརྩིགས་པའི་དུས་མ་ཡིན།  །དེ་བར་འདི་རུ་སྡོད་ཅིག་དང་།  །བཟང་ངན་རྐྱེན་སྣང་གང་ཡང་མེད།  །ཅེས་ཟེར་བ་ལ་ངས་འདི་ལྟར་སྨྲས།  །སྲིད་པའི་ཨ་ཕྱི་ཆེན་མོ་ལགས།  །སྨར་གྱི་ཕུག་ལུང་ལ་ཐོག་ཏུ།  །ང་ཡི་བསྟན་སྲིད་ཇི་ཙམ་གནས།  །མ་མ་ཁྱོད་ཀྱིས་བསྟན་དུ་གསོལ།  །ཞེས་སྨྲས་པའི་ལན་དུ།  དྲན་མེད་ཉིང་འཁྲུལ་མཁན་པོ་ཞིག།  བྱུང་ཚེ་རྟེན་འབྲེལ་བརྟག་དང་གསལ།  །དེ་རིང་ང་ལ་བཤད་དུ་མེད།  །ཁྱོད་ཀྱིས་ང་ཡི་ངག་བཞིན་ཉོན།  །དགྲ་གྱོད་ཁ་བ་བབས་བཞིན་དུ།  །འབྱུང་བ་སྔོན་གྱི་ལས་སུ་སོམས།  །ཨོ་རྒྱན་ཆེན་པོའི་ཞལ་ན་རེ།  །ང་ཡི་གཏེར་དང་འཕྲད་པའི་ཚེ།  །རྒྱ་བོད་ལྷ་འདྲེས་ཕྲག་དོག་ནས།  །ལེགས་ཉེས་གར་གྱི་རྣམ་འགྱུར་སྟོན།  །ཀི་སྒྲ་འདོན་ཅིང་ཧབ་ཤ་བྱེད།  །དེ་ཚེ་ང་ཡི་བུ་མཆོག་ལ།  །ཡ་ང་བག་ཚ་མ་མཆིས་ན།  །བདུད་ཀྱི་འཇུག་སྒོ་ག་ལ་ཡོད།  །ཅེས་གསུངས་བཀའ་བཙན་དྲན་པར་གྱིས།  །ཞེས་ཟེར་ཞིང་སྟོང་པར་ཡལ་ལོ།  །དེ་ནས་སྟོན་ཟླ་ར་བའི་ཚེས་གསུམ་ལ་བབས་པའི་ཉིན་ལས་མི་མང་པོ་བསྡུས་ནས་ཁང་པའི་རྨང་བཏིང་བའི་ཚེ་མགོན་ཁང་གི་རྨང་བརྐོ་དུས་རིན་པོ་ཆེ་གསེར་གཡུ་དུང་གསུམ་ཟངས་དངུལ་ལྕགས་གསུམ་མཆོང་དང་རཱ་ག་མུ་མེན་བྱུ་རུ་ལ་སོགས་པའི་རིན་པོ་ཆེ་ངོ་ཤེས་པ་དང་མི་ཤེས་པ་གཞོང་ཆུང་གང་ཙམ་བརྡོལ་བྱུང་བ་བསོད་ནམས་དང་ལོངས་སྤྱོད་འཕེལ་བའི་རྟེན་འབྲེལ་དུ་གོ།  གཉེར་ཁང་གི་རྨང་འོག་ནས་མི་རོ་ཆེ་ཆུང་གསུམ་གྱི་རུས་པ་དང་མུ་ཏིག་གི་ཕྲེང་བ་ཟངས་ཐག་ལ་བརྒྱུས་པ་རྣམས་བྱུང་བ་མགོན་ཁང་དུ་རྟེན་འབྲེལ་ལེགས་ཀྱང་ཁང་པའི་སྒབ་ཕྱོགས་སུ་ཁེལ་སྟབས་བཀོད་མི་བདེ་བས་མ་བྱས།  །ཁང་པ་གྲུབ་ཟིན་པ་ན་བན་སྨྱོན་ཞིག་སླེབས་བྱུང་བ་དེ་ལ་རྟེན་འབྲེལ་བརྟག་ཕྱིར་ཁྱོད་སོང་ལ་སྨར་ཆུའི་ནང་ནས་རྡོ་མི་འདྲ་བའི་རྟགས་ཅན་ཞིག་ཁྱེར་ཤོག་སྨྲས་པས་དེ་སོང་ནས་དགོང་མོ་དེར་ཆུ་རྡོ་སྨུག་པོ་མིའི་རྣ་བ་འདྲ་བ་ཞིག་ཁྱེར་བྱུང་།  བུ་སློབ་རྣམས་ཀྱིས་འདི་རྟེན་འབྲེལ་གང་ལགས་ཟེར་བ་ལ།  བདག་གིས་གནས་འདི་རུ་ཡུན་རིང་པོར་སྡོད་རྒྱུ་མི་འོང་སྟེ།  རྣ་བས་ཉན་ན་ཐོས་འདུག་པའི་ས་ཞིག་ཏུ་འགྲོ་དགོས་འབྱུང་བའི་ལྟས་ངེས་པར་རེད་ཅེས་སྨྲས།  དེ་ནས་དགུན་ཟླ་ར་བའི་ཚེས་གསུམ་གྱི་ཉིན་མདུན་གྱི་ནམ་མཁར་མཁའ་འགྲོ་མ་ལས་ཀྱི་དབང་མོ་ཆེ་ཡིན་སྐད་པའི་བུ་མོ་སེར་མོ་ཞིག་ན་རེ།  ཟླ་བ་འདིའི་ཚེས་བཅུ་ནས་བཅོ་ལྔའི་བར་དུ་ཚོགས་མཆོད་མང་པོ་ཞིག་གྱིས་དང་དགོན་པ་འདི་མི་རབས་གཉིས་ཙམ་བར་དུ་ཆོས་ཀྱི་དགོན་པར་འགྱུར་ཞིང་ཁྱོད་ཡུན་རིང་པོར་སྡོད་པའི་སྐལ་བ་མེད་ཀྱང་བྱས་པ་དོན་མེད་དུ་མི་འགྱུར་བའི་དགོས་པ་ཡོད་ཟེར་ནས་ཡལ་སོང་།  དེས་ཟེར་བ་བཞིན་རིག་འཛིན་བདུད་འདུལ་རྡོ་རྗེའི་གཏེར་བྱོན་དམ་ཆོས་སྤྲུལ་སྐུའི་སྙིང་ཐིག་གི་རྡོ་རྗེ་གྲོ་ལོད་ཀྱི་ཚོགས་སྐོང་རྒྱ་ཆེན་པོ་བྱས།  དགུན་ཟླ་འབྲིང་པོའི་ཚེས་བཅུའི་ནངས་པར་སློབ་བུ་དྷརྨ་པ་ཞེས་བྱ་བས་ང་ལ་མཁའ་འགྲོ་ཁྲོས་མ་ནག་མོའི་སྒྲུབ་ཐབས་ཞིག་ཕོབ་དང་ཉམས་ལེན་ལ་ཅི་ནུས་སུ་འབད་ངེས་ཟེར་བ་ལ།  བདག་གིས་དེའི་མཚན་དང་དབུ་བརྩམས་ནས་ཡོད་པའི་སྐབས་ཡུན་ཅིག་བཞག་ནས་རྨི་ལམ་བརྟག་པས།  དེ་ནུབ་མཁའ་འགྲོ་མ་ཡེ་ཤེས་མཚོ་རྒྱལ་མས་འདི་སྐད་ཅེས།  ང་ནི་མཁའ་འགྲོ་ཡེ་ཤེས་མཚོ་རྒྱལ་ཞེས་བྱ་བ་ཡིན་ཏེ་ཁྱོད་ཀྱིས་ལས་ཅི་བྱེད་དུ་ཡོད་ཟེར།  བདག་གིས་སློབ་བུ་འདིས་མཁའ་འགྲོ་ཁྲོས་མ་ནག་མོའི་སྒྲུབ་ཐབས་ཞིག་དགོས་ཞེས་ནན་དུ་བསྐུལ་འདུག་པས།  དེ་འབེབས་གྲབ་བྱས་ནས་དབུ་བཙུགས་ཡོད་དེ་ལེགས་སམ་མ་ལེགས་ཞེས་ཞུས་པས།  མཁའ་འགྲོ་མ་ན་རེ།  ད་ལྟའི་ཁྱོད་ཀྱི་བུ་སློབ་འདི།  །གཏེར་ཆེན་ཤེས་རབ་འོད་ཟེར་གྱི།  །སློབ་མ་སེངྒེ་རྒྱ་མཚོ་ཡིན།  །བླ་མའི་སྨོན་ལམ་མཐུ་ཡོད་ཀྱང་།  །སྔོན་གྱི་ལས་ཀྱི་ལེན་པ་ཡིས།  །ད་ལྟ་མི་རིགས་ངན་པར་སྐྱེས།  །ལོག་པ་བདུད་ཀྱིས་བློ་བསྒྱུར་ན།  །ཁྱོད་དང་འགལ་ཏེ་གཞན་འོག་འགྲོ།  །ཁྱོད་ཀྱི་བསྟན་ལ་ཕན་མི་ཐོགས།  །དེ་འདྲའི་བདུད་ཀྱིས་མ་བསླུས་ན།  །བསྟན་འགྲོའི་མགོན་པོ་མཆོག་གྱུར་ནས།  །ཁྱོད་ཀྱི་བསྟན་ལ་ཕན་ཆེར་ཐོགས།  །བདུད་ཀྱི་དབང་དུ་མ་སོང་བར།  །འོད་གསལ་ཐོད་རྒལ་ལ་སྤྱོད་ན།  །འཇའ་ལུས་རྡོ་རྗེའི་སྐུ་འཐོབ་འགྱུར།  །ཞེས་གསུངས་པའི་ལན་དུ་ངས་འདི་སྐད་སྨྲས།  ཨ་མ་ཐུགས་རྗེ་ཅན་འདི་ང་དང་འགལ་ཏེ་སློབ་དཔོན་གཞན་བརྟེན་ན་འཇམ་ལུས་ཨེ་ཐོབ་ཅེས་དྲིས་པས།  དེ་ན་རེ།  སྔོན་བདུད་འདུལ་རྡོ་རྗེའི་དུས་སུ་དེའི་སློབ་བུ་པདྨ་འོད་ཟེར་ཞེས་བྱ་བ་ཡིན་ཏེ།  བླ་མས་མ་འོངས་པའི་དུས་སུ་ངས་ལྕགས་མོ་བདུད་འཇོམས་གླིང་པའི་ལུས་བླངས་ནས་ཟབ་གཏེར་སྐོར་བཞི་ལ་དབང་བྱེད་པའི་དུས་སུ་ཁྱོད་ངའི་འབངས་སུ་གྱུར་ཟབ་ཆོས་ལ་སྤྱོད་ནས་འཇའ་ལུས་འཕོ་བ་ཆེན་པོར་སངས་རྒྱས་པར་གྱུར་ཅིག་ཅེས་པའི་སྨོན་ལམ་གྱི་སྟོབས་ཡོད་ཀྱང་།  དེར་མ་བསྟེན་ན་འཆི་ཁ་ཐ་མལ་དུ་ལུས་ནས་ཐར་ལམ་ཡང་དེ་ཙམ་མོ།  །བདུད་ཀྱི་ལམ་ལས་ལོག་ནས་ཁྲེགས་ཆོད་ཀྱི་ལྟ་བ་ལ་མཁས་པར་སྦྱངས་ནས་གཏན་ལ་ཕབ་སྟེ་མཐར་ལམ་ཐོད་རྒལ་ལ་བརྟེན་ན་གྲོལ་བ་ཐོབ་སྲིད་དེ།  སློབ་དཔོན་གཞན་དབང་དུ་གྱུར་པ་དང་རང་ཉམས་ལ་འཇིགས་ནས་ཉམས་སུ་ལེན་པའི་དུས་མེད་པར་གྱུར་ན་ནི་བདུད་དང་མཁའ་འགྲོ་མས་བསླུས་པ་ཡིན་ནོ།  །འོན་ཀྱང་ཟབ་ཆོས་ནི་ཡི་གེར་ཕབ་ན་ལེགས་ཏེ་ཁོས་ཉམས་སུ་མ་བླང་ཡང་ཆོས་བདག་སྐྱེས་བུ་སྣོད་དང་ལྡན་པ་མང་པོ་འདིའི་སྒོ་ནས་གྲོལ་བའི་སྐལ་བ་ཡོད་པས་དཀའ་ཚེགས་ལ་མ་འཛེམས་པར་མྱུར་དུ་ཕོབ་དང་ཀུན་ལ་ཁྱབ་པའི་རྟེན་འབྲེལ་གྱི་ལྟས་ཞིག་ཀྱང་འབྱུང་ཞིང་།  དངོས་གྲུབ་ཀྱི་པྲ་ལྟས་སློབ་བུའི་མཆོག་ཞིག་ལ་འབྱུང་ངེས་ཡིན།  ཞེས་གསུངས་ཤིང་མི་སྣང་བར་གྱུར་ཏོ།  །ཟླ་བ་ཕྱི་མའི་ཚེས་བརྒྱད་ཀྱི་ནུབ་རྨི་ལམ་ན་ཡུལ་ཡངས་པ་ཆེན་པོ་བྱང་ཐང་ནེའུ་སེང་མེ་ཏོག་གིས་གང་བའི་སྐྱེད་མོས་ཚལ་ན་དར་མཐིང་ནག་གི་གུར་ཆེན་པོ་ཞིག་གི་ནང་རིན་པོ་ཆེའི་ཁྲིའི་སྟེང་དུ་དར་ཟབ་འབོལ་བརྩེགས་ཀྱི་གདན་ལ་ངའི་བླ་མ་འཇམ་དབྱངས་དེ་ཉིད་སྐུ་མངོན་སུམ་པ་ལྟ་བུར་བཞུགས་འདུག་པས།  བདག་གིས་བླ་མ་མཇལ་བ་ཙམ་གྱིས་དད་གུས་དགའ་གདུང་ཚད་མེད་པ་སྐྱེས་ཤིང་མིག་ནས་མཆི་མ་བརྡོལ་བཞིན་དུ་འདི་སྐད་ཞུས།  ཚེ་རབས་གཏན་གྱི་མགོན་པོ་ཁྱོད་དང་ད་སྔོན་ལོ་གྲངས་མང་པོར་མཇལ་སྟབས་མ་འགྲིགས།  དེ་རིང་བདག་གིས་མཇལ་བ་འདི་སྐལ་བ་དང་ལྡན་པ་ལགས།  ཁྱེད་བཞུགས་པའི་གནས་འདི་གང་ལགས་ཞུས་པས།  བླ་མའི་ཞལ་ནས།  བདག་གིས་སྔོན་ནུབ་ཕྱོགས་བདེ་བ་ཅན་དུ་སྨོན་ལམ་བཏབ་ནས་འདུན་པ་གཏད་པ་ཡིན་ཀྱང་།  དེར་སྒོམ་བཟླས་ཀྱི་གནད་མ་ཐེངས་པས་དེའི་སྣང་བ་མ་མཆེད།  རྡོ་རྗེ་སེམས་དཔའི་སྒོམ་བཟླས་ཀྱི་གནད་ཐེངས་པས་བར་དོ་དང་པོའི་སྐབས་སུ་ཤར་ཕྱོགས་མངོན་པར་དགའ་བའི་ཞིང་ཁམས་དྲན་ནས་སྣང་བ་དེ་མཆེད་ཅིང་གནས་པ་ཡིན།  ཁྱོད་ལ་གཏེར་ཆོས་བབས་པ་ངོ་མཚར་ཆེ།  དེ་བབས་ལུགས་ཇི་ལྟ་བུ་ལགས་ང་ལ་སྨྲོས་ཞེས་གསུངས།  དེ་ལ་འདི་ལྟར་ཞུས།  བླ་མ་ཐུགས་རྗེ་ཅན་ཁྱེད་ངེས་པ་ལྔ་ལྡན་གྱི་ཞིང་ཁམས་ལ་དབང་བསྒྱུར་བའི་བྱང་ཆུབ་སེམས་དཔའ་ཆེན་པོས་ངའི་ཡིན་ལུགས་ལོས་མཁྱེན་ནའང་དགོས་པ་ཆེན་པོའི་ཕྱིར་དེ་ལྟར་གསུངས་པ་ལགས་མོད།  སྔོན་རང་ལོ་ཉེར་གསུམ་གྱི་དུས་ནུབ་གཅིག་གི་རྨི་ལམ་ན་མགོན་པོ་སྤྱན་རས་གཟིགས་ཡིན་སྐད་པའི་མི་དཀར་གསེར་གྱི་ཟུར་ཕུད་ཅན་ཞིག་གིས།  བུ་ཁྱོད་ནི་ཚེ་རབས་མང་པོ་གོང་རོལ་ནས་ལས་དང་བསོད་ནམས་བཟང་པོའི་སྟོབས་དང་སྨོན་ལམ་རྣམ་པར་དག་པའི་མཐུས་ས་དང་ལམ་གྱི་ཡོན་ཏན་རྫོགས་པའི་སྐལ་ལྡན་ཡིན་ཏེ།  ད་རེས་བསྟན་འགྲོ་ལ་ཕན་འགའ་ཙམ་ཐོགས་པའི་ལས་སྐལ་ཡོད།  དེ་ཕྱིར་སྒྲོམ་བུ་འདི་ཟོ་ཞེས་གསུངས་ཤིང་ཤེལ་གྱི་སྒྲོམ་བུ་མཐེ་བོང་ཙམ་གྱི་ངོས་སུ་མེ་ལོང་ལ་གཟུགས་བརྙན་ཤར་བ་ལྟར་ཡི་གེ་ཨོཾཿཧཱུྃཿཏྲཱཾཿཧྲཱིཿཨཱཿཞེས་ཁ་དོག་སྣ་ལྔ་སྣང་བ་ཞིག་གནང་མ་ཐག་ཏུ་བདག་གིས་ཁྱུར་མིད་དུ་བཏང་བ་དང་།  འཕགས་པའི་ཞལ་ནས་དེ་ཟབ་ཆོས་དགོངས་པ་ཀློང་རྡོལ་ཞེས་བྱ་བ་ཡིན་གསུངས་ནས་བདག་ལ་ཐིམ།  དེ་ནས་རེ་ཞིག་གི་ཚེ་འཇམ་དཔལ་སྨྲ་བའི་སེངྒེའི་སྒོམ་བཟླས་ལ་ཞུགས་པའི་ཕྱི་དྲོའི་དུས་ཞིག་ཏུ་དྲི་བཟང་གིས་གནས་ཁང་གང་བ་བྱུང་།  དེ་དུས་འཇམ་དཔལ་སྨྲ་བའི་སེངྒེའི་ཞལ་མངོན་སུམ་དུ་གཟིགས་ཤིང་ཕྱག་ནས་གསེར་གྱི་སྒྲོམ་བུ་བྱིའུའི་སྒོ་ང་ཙམ་ཞིག་བདག་ལ་གཏད་དེ་འདི་ཟོ་ཞིག་དང་གསུངས་པའི་མོད་ལ་བདག་གིས་ཁྱུར་མིད་དུ་ཟོས་པས།  འདི་ནི་དག་སྣང་ཡེ་ཤེས་དྲྭ་བ་ཞེས་བྱ་བ་ཡིན་ནོ་ཞེས་གསུངས་ནས་བདག་ལ་ཐིམ་པའི་སྣང་བ་བྱུང་།  ཡང་རེ་ཞིག་གི་ཚེ་དཔལ་ཆེན་ཕྱག་ན་རྡོ་རྗེ་ཡིན་སྐད་པའི་ཁྲོ་བོ་ཆེན་པོ་བལྟར་མི་བཟོད་པ་ཞིག་མཇལ་བའི་ཚེ་བདག་ཤིན་ཏུ་བྲེད་ཅིང་དངངས་ནས་ཡོད་པའི་སྐབས།  གསང་བའི་བདག་པོའི་ཞལ་ནས།  སྐྱེས་བུ་ཆེན་པོ་ཁྱོད་ང་ལ་མ་འཇིགས་མ་སྐྲག་མ་དངངས་པར་ཉོན་དང་།  ང་ནི་དུས་གསུམ་གྱི་རྒྱལ་བ་ཐམས་ཅད་ཀྱི་མཐུ་སྟོབས་གཅིག་ཏུ་བསྡུས་པའི་ངོ་བོ་བཀའ་སྲུང་དྲེགས་པ་ཡོངས་ཀྱི་འབྱུང་གནས་དཔལ་ཆེན་ཕྱག་ན་རྡོ་རྗེ་ཞེས་བྱ་བ་ཡིན།  ཁྱོད་ཀྱང་ངའི་ཐུགས་ཀྱི་སྤྲུལ་པ་ཡིན།  འགྲོ་བའི་དོན་བྱེད་པའི་ཕོ་ཉར་བསྔགས་སོ།  །ཞེས་གསུངས་ཤིང་གཡུའི་མཆོད་རྟེན་མཐེ་བོང་ཙམ་པ་ཞིག་གི་ནང་དུ་དབྱངས་གསལ་དང་རྟེན་འབྲེལ་སྙིང་པོའི་རི་མོ་ཤར་བ་ཞིག་གནང་ནས་འདི་ཟོ་ཞིག་གསུངས།  དེ་ལྟར་བདག་གིས་ཁར་བཅུག་པས་དངོས་མེད་དུ་གྱུར་ཀྱང་མིད་སྟངས་བྱས།  དེ་ཆོས་ཉིད་ནམ་མཁའི་ཀློང་མཛོད་ཅེས་བྱ་བ་ཡིན་གསུངས་ནས་བདག་ལ་ཐིམ།  དེ་ནས་བཟུང་སྟེ་དག་སྣང་སྐོར་གསུམ་པོ་བདག་གི་རྒྱུད་ལ་སྦར་གྱིས་བཏབ་པ་ལྟར་འཆར་བ་བྱུང་།  གཞན་ཡང་དཔལ་ཨོ་རྒྱན་མཚོ་སྐྱེས་རྡོ་རྗེའི་ཞལ་མཇལ་ནས་མདོ་སྔགས་རྒྱུད་སྟེ་རྒྱ་མཚོའི་སྨིན་བྱེད་ཀྱི་དབང་གྲོལ་བྱེད་ཀྱི་གདམས་པ་རྒྱབ་བརྟེན་གྱི་ལུང་རྣམས་ཡོངས་སུ་རྫོགས་པ་གནང་།  ཨ་མ་ཡེ་ཤེས་མཚོ་རྒྱལ་གྱི་ཞལ་མཇལ་ནས་འཁོར་འདས་སྟོང་ཉིད་ཆེན་པོར་ངོ་སྤྲད་ཅིང་རྟོགས་པ་སྐྱེས།  བར་སྐབས་སུ་རིག་འཛིན་བླ་མའི་ཚོགས་དང་བདེ་གཤེགས་རྒྱལ་བ་སྲས་བཅས་མང་པོའི་ཞལ་མཇལ་ཞིང་གསུང་གི་བདུད་རྩི་ནོད་ནས་རྒྱུད་བྱིན་གྱིས་བརླབས།  ཟབ་ཆོས་མཁའ་འགྲོའི་སྙིང་ཐིག་གི་ཁ་བྱང་ལོན་ཚུལ་ནི།  སྨར་གྱི་རྦ་གཏེར་བྲག་དང་།  བཙུན་མོ་དངུལ་རྒོད་བྲག་དང་།  སྨར་གྱི་པོ་ཙོང་མཆོད་རྟེན་དང་།  རྒྱས་བྲོའི་མཆོད་རྟེན་དང་།  བཀྲ་ཤིས་སྒོ་མང་དང་།  ལྕགས་རི་ཅན་རྣམས་ཀྱི་ནང་ནས་ཁ་བྱང་ཡང་བྱང་སོགས་རྡོ་དང་སྨྱུག་སྦུག་ས་དང་ལ་ཆ་ཤིང་རྣམས་ལས་བྱས་པའི་སྒྲོམ་བུ་དང་།  སྒྲོམ་བུ་མེད་པའི་ཤོག་དྲིལ་དང་།  སོལ་ཕུང་གི་ནང་ན་ཡོད་པ་རྣམས་རྙེད་པ་ཡིན།  ཞེས་ཞུས་པས།  བླ་མའི་ཞལ་ནས།  ཟབ་ཆོས་དག་སྣང་སྐོར་གསུམ་དེ་འཕགས་པ་རིགས་གསུམ་མགོན་པོའི་རྣམ་པར་འཕྲུལ་པ་དངོས་ཡིན་ལ་བསྟན་པའི་གནས་ཚད་ཐུང་བས་ནུས་པ་ཐམས་ཅད་དུས་གཅིག་ཏུ་བསྡོམས་པའི་ཚུལ་གྱིས་བྱིན་རླབས་ཤིན་ཏུ་ཆེ་ཞིང་མྱུར།  དེ་ཉམས་སུ་ལེན་པའི་སྐྱེས་བུ་རྣམས་རིང་པོར་མི་ཐོགས་པར་མྱུར་དུ་གྲོལ་བར་ཐེ་ཚོམ་མེད་གསུངས།  བདག་གིས་བླ་མ་ལགས།  བསྟན་པ་གནས་ཡུན་ཐུང་བ་ཅིས་ལན་པ་ཡིན་ཞུས་པས།  འབྱུང་འགྱུར་གྱི་ལུང་བསྟན་མང་དུ་གསུངས་ཏེ་དབྱིངས་སུ་ཡལ་སོང་ངོ་།  །རྒྱལ་བ་ཀུན་གྱི་མཁྱེན་བརྩེ་ནུས་པའི་དངོས།  །རིགས་གསུམ་མགོན་གྱི་སྐུ་གསུང་ཐུགས་ཀྱི་ནི།  །སྒྱུ་འཕྲུལ་གང་འཚམས་གང་འདུལ་དེར་སྣང་བ།  །བསམ་གྱིས་མི་ཁྱབ་རྡོ་རྗེའི་བརྡ་ཚིག་གི།  གནས་ལས་ཟབ་ཆོས་གསུམ་གྱི་དགའ་སྟོན་དེ།  །འདོད་རྒུར་འཇོ་བའི་ངོ་མཚར་འདི་ཅི་ཞིག།  གང་ཞིག་དེ་དང་འཕྲད་པའི་ལས་ཅན་ཡང་།  །སྐལ་བར་ལྡན་ཏེ་སྲིད་པ་ཐ་མ་ཡིན།  །རྨོངས་དང་ཁེངས་པས་ཡིད་དཀྲུགས་གཞན་དག་གིས།  །ཕྲག་དོག་བློ་ཡིས་ངན་སྨྲས་ཅི་སྒྲོགས་ཀྱང་།  །གདིང་ཐོབ་རྒན་པོ་བདག་ནི་བློ་རེ་བདེ།  །དེ་ནས་རང་ལོ་སོ་བརྒྱད་ཆུ་སྤྲེལ་གྱི་ལོ་ཁྱིམ་ལ་བབས་ཚེ་མཁའ་འགྲོ་ཁྲོས་མའི་སྒྲུབ་སྐོར་རྣམས་ཡི་གེར་ཕབ་པའི་སྐབས་རླུང་ཆེན་འཚུབས་མ་ཞིག་བྱུང་ནས་ཡིག་ལྡེབ་རྣམས་ཕྱོགས་ཐམས་ཅད་དུ་ཁྱེར་སོང་བ་ནི་ཡུལ་ཕྱོགས་ཀུན་ཏུ་ཁྱབ་པའི་ལྟས་སུ་གོ།  རི་ཐང་ཐམས་ཅད་བྱ་རྒྱལ་རྒོད་ཀྱིས་གང་བ་དང་།  མཁའ་འགྲོའི་བླ་བྱ་རྒོད་ཀྱི་ཐུལ་ཕྲན་གྱི་ཆར་པ་བབས།  སློབ་བུ་པདྨ་བཀྲ་ཤིས་ཀྱིས་རང་གི་ཉམས་སུ་ལེན་པའི་དམ་བཅའ་བྱས་ཏེ་ཡི་གེ་འབྲི་བའི་དབུ་བཙུགས་པའི་ཉིན་ནམ་མཁའ་སྟོང་པའི་དབྱིངས་ལས་འོ་མའི་རྒྱུན་རོ་བཅུད་ནུས་པ་དང་ལྡན་པ་ཕོར་པ་གང་ཙམ་བབས་པ་དེས་བཏུང་བས་ཞག་གསུམ་དུ་ལུས་སེམས་བདེ་བས་གང་ཞིང་རྟོགས་པ་གསར་དུ་འཁྲུངས།  མཐར་ཡང་གཞན་ལས་ཁྱད་དུ་འཕགས་པའི་རྟོགས་པ་དང་ལྡན་ཅིང་མཁས་པ་ཞིག་བྱུང་ལ།  ངེས་མེད་ཀྱི་རི་ཁྲོད་དུ་སྙིང་པོའི་སྒྲུབ་ཚུགས་ཟིན་ཅིང་ཡང་དག་རྫོགས་པའི་སངས་རྒྱས་ཀྱི་མྱུར་ལམ་ལ་མངའ་དབང་འབྱོར་པ་ཡིན་ནོ།  །དངོས་མེད་ཐོགས་བྲལ་མཁའ་ལས་དངོས་ཅན་གྱི།  །རྣམ་པ་བདུད་རྩི་འོ་མའི་རྒྱུན་བྱུང་བ།  །མན་ངག་ཆེས་ཟབ་སྒྲུབ་ཐབས་འདིར་བསྟེན་ན།  །སྟོང་དབྱིངས་ངོ་བོ་ཤེས་རབ་ཕག་མོ་ཡི།  །བྱིན་རླབས་ཐབས་སྣང་གྲུབ་གཉིས་འབད་མེད་དུ།  །འབྱུང་བའི་བརྡ་སྟེ་རྟོགས་ལྡན་བླ་མ་དང་།  །བྱིན་ཅན་གདམས་པ་སྐལ་བཟང་སློབ་མ་ཡི།  །རྒྱུ་རྐྱེན་འཛོམ་ཚེ་མཆོག་གི་དངོས་གྲུབ་ཀྱང་།  །ཚེགས་མེད་འགྲུབ་པ་རྟེན་འབྲེལ་ཆོས་ཉིད་ཡིན།  །སློབ་བུ་ཚེས་བཅུ་སྤྲོ་བའི་ཤུགས་ཀྱིས་རང་གི་ཉམས་སུ་ལེན་འདོད་ནས་ཡི་གེ་འབྲི་བའི་ཚེ་གནས་ཁང་གི་སྟེང་དུ་འཇའ་དར་ཡུག་འདྲ་བ་ལྔ་ཤར་བས་འཇའ་ལུས་སྒྱུ་མའི་སྐུར་གྲོལ་བའི་ལྟས་བྱུང་ཞིང་།  མཐར་ཡང་ལྷ་སའི་གླིང་དུ་མྱ་ངན་ལས་འདའ་བའི་ཚེ་འཇའ་འོད་ཀྱི་གུར་སོགས་རྟགས་མཚན་གཞན་ལས་ཁྱད་པར་འཕགས་པ་བྱུང་བས་བོད་དབུས་གཙང་ཐམས་ཅད་ངོ་མཚར་བར་གྱུར།  དེ་ནས་དགུན་ཟླ་འབྲིང་པོའི་ནང་དུ་མཁའ་འགྲོ་ཁྲོས་མའི་སྒྲུབ་པ་ལ་ཟླ་བ་གཅིག་ཏུ་བཞུགས་སྐབས་སྒྲུབ་པའི་གྲོགས་སློབ་མའི་མཆོག་ཚེས་བཅུ་དང་པདྨ་བཀྲ་ཤིས་ཨོ་རྒྱན་གསུམ་ལས་མི་མང་བ་ནི་དེ་དག་དམ་ལྡན་ངེས་པ་རུ་ཐག་ཆོད་པས་སོ།  །དེ་ཚེ་བྱ་རྒྱལ་རྒོད་ཀྱི་ཐུལ་ཕྲན་གྱི་ཆར་བབས།  དྲི་བཟང་གིས་ཁྱིམ་གང་བ་སོགས་ལྟས་མཚན་བཟང་པོ་བྱུང་ངོ་།  །སྔོན་བདག་ཧོར་ཚང་གི་ཁྱིམ་དུ་བསྡད་སྐབས་རྣུ་ཟོག་བླ་མ་མཁྱེན་རབ་ཀྱིས་ཁོ་བོ་འཇམ་དཔལ་གྱི་རྒྱུད་ཞིག་ཕོབ་ཟེར་བའི་ངོར་དགུན་ཟླ་འབྲིང་པོའི་ཚེས་བཅུ་ལ་དབུ་བརྩམས་པས་མཁའ་ལས་འབྲུག་སྒྲ་གྲགས་ཤིང་ཁུ་འཕང་ཐོར་ཐོར་བབས་པ་ལ།  བདག་གིས་རྟེན་འབྲེལ་ལེགས་སྙམ་ཤིན་ཏུ་དགའ་ནས་སྐྱིད་པ་ལ་ཞེས་སྨྲས་པས།  དེ་ན་རེ།  དགུན་དུས་འབྲུག་གྲགས་པ་འདི་ཐན་ཡིན་ནམ་ཟེར་བ་སོགས་ཀྱིས་རྟེན་འབྲེལ་དེ་ཙམ་མི་ལེགས་པར་མཐོང་ནས་ལྡེབ་གྲངས་ལྔའི་མཚམས་ནས་མ་ཕབ་པར་བཞག་གོ།  དེ་ནས་རང་ལོ་སུམ་ཅུ་སོ་དགུ་ལ་བབས་པ་དབྱར་ཟླ་འབྲིང་པོའི་ཚེས་དགུའི་ནུབ་མཁའ་འགྲོ་མ་ཞིག་གིས།  འདི་ཁྱོད་ལ་མཁོ་བའི་རྫས་ཞིག་ཡིན་ཟེར་ནས་ལྕགས་ཕུར་ཤིན་ཏུ་མཛེས་ཤིང་ཡིད་དུ་འོང་བ་ཞིག་ལ་དར་ནག་པོ་བཏགས་པའི་སྣེ་མོར་རྡོའི་ཕུར་པ་ཡིད་དུ་མི་འོང་བ་ཞིག་བཏགས་པ་གཏད་ནས་བུ་ཁྱོད་ལ་སྟེར་བ་ཡིན།  འདི་བླ་མ་བླུན་པོའི་ལག་བརྒྱུད་པའི་ལྟས་ཀྱིས་དར་ནག་པོ་བཏགས་པ་རེད།  དེ་དང་འབྲེལ་བའི་རྡོའི་ཕུར་པ་འདི་ཡང་གཞན་ལ་མཁོས་ཆུང་སྟེ་རང་གི་དོན་འགྲུབ་པ་ཞིག་ཡིན་པ་འདྲ་ཞེས་ཟེར།  ཕྱིར་ཉིན་ཚེས་བཅུའི་སྔ་དྲོ་མཆུ་གཙང་རྡོར་བཟང་དང་ལྷ་བཟོ་རྡོ་རྗེ་ཞེས་བྱ་བ་གཉིས་སླེབས་བྱུང་ཞེས་དགའ་སྟོན་ཚོགས་འཁོར་བྱས།  དེ་ནུབ་མཁའ་འགྲོ་མ་ཞིག་གིས་རྡོ་རྗེ་བཟང་པོ་འདི་མཁའ་འགྲོ་ཡེ་ཤེས་མཚོ་རྒྱལ་གྱི་སྤྲུལ་པ་ཡིན་པས་གདམས་པའི་ཡང་བཅུད་རྣམས་སྟོན་ཅིག་དང་།  འདིའི་བློ་ལོག་པའི་ལུང་ཞིག་གིས་བསྒྱུར་ཉེན་ཆེ་སྟེ་མ་བསྒྱུར་བར་ཁྱོད་ཀྱི་ངག་བཞིན་དུ་ཉན་ན་གདུལ་བྱ་གྲངས་མེད་པ་ཐར་བའི་ལམ་ལ་འགོད་ཅིང་མཐར་འཇའ་ལུས་འོད་ཕུང་དུ་གྲོལ་བ་ཐོབ་པར་འགྱུར་ཞེས་ཟེར་བ་ལ།  བདག་གིས།  མཁའ་འགྲོ་ཀུན་ཤེས་མ་འདིའི་བློ་གཞན་གྱི་ལོག་པའི་ལུང་བསྟན་གྱིས་བསྒྱུར་ན་ཇི་ལྟར་འགྱུར་ཞེས་དྲིས་པས།  དེ་ནི་བྱ་རྒྱལ་དུག་མཚོར་ལྷུང་བ་དང་འདྲ་སྟེ་ཚེ་ཐུང་བ་དང་།  མི་ཚེ་འདིས་འགྲོ་དོན་ཡང་མི་འབྱུང་།  གྲོགས་འདིས་འགྲོ་དོན་མི་འབྱུང་ཡང་རང་དོན་འགྲུབ།  འདི་ཟུང་གིས་རི་ཁྲོད་འཛིན་ཅིང་གནས་ངེས་མེད་དུ་འགྲིམ་པ་གལ་ཤིན་ཏུ་ཆེ་བ་ཡིན་ཞེས་ཟེར་ཞིང་མི་སྣང་བར་ཡལ་ལོ།  །དེ་ནས་དགུན་ཟླ་ར་བའི་ཚེས་བརྒྱད་ཀྱི་ནུབ་མཁའ་འགྲོ་སྒེག་མཛེས་མ་ཡིན་ཟེར་བའི་བུད་མེད་ཞིག་གིས།  སང་ཕོད་ཁྱོད་ལ་དགྲ་ཞིག་སྡང་འོང་བས།  དེ་ལ་གཟའ་རྒོད་ཁྱབ་འཇུག་ཆེན་པོ་གཉེན་པོར་ཐོངས་ཤིག།  ལོ་ཁྱིམ་མ་ཟད་གོང་དུ་གཟའ་ལ་གསོལ་མཆོད་ཐེམ་པ་གལ་ཤིན་ཏུ་ཆེ་བ་ཡིན།  ཨེ་མ་སྐལ་ལྡན་སྐྱེས་བུ་ཉོན།  །ས་འདི་ནམ་མཁའི་རང་བཞིན་ཏེ།  །ནམ་མཁའ་ས་རུ་སྣང་བ་ཡིན།  །ཆུ་རྣམས་ནམ་མཁའི་རང་བཞིན་ཏེ།  །ནམ་མཁའ་ཆུ་རུ་སྣང་བ་ཡིན།  །མེ་རྣམས་ནམ་མཁའི་རང་བཞིན་ཏེ།  །ནམ་མཁའ་མེ་རུ་སྣང་བ་ཡིན།  །རླུང་ཡང་ནམ་མཁའི་རང་བཞིན་ཏེ།  །ནམ་མཁའ་རླུང་དུ་སྣང་བ་ཡིན།  །འཇའ་ཚོན་ནམ་མཁའི་རང་བཞིན་ཏེ།  །ནམ་མཁའ་འཇའ་ཚོན་སྣང་བ་ཡིན།  །བདག་སྣང་ནམ་མཁའི་རང་བཞིན་ཏེ།  །ནམ་མཁའ་བདག་ཏུ་སྣང་བ་ཡིན།  །སྣོད་བཅུད་ནམ་མཁའི་རང་བཞིན་ཏེ།  །ནམ་མཁའ་སྣོད་བཅུད་རོལ་པར་སྣང་།  །དེ་དཔེ་རྨི་ལམ་སྣང་བར་ལྟོས།  །རྨི་ལམ་སྣང་བ་མཆེད་པའི་ཚེ།  །དངོས་པོ་ཐོགས་རེག་གཟུགས་སུ་སྣང་།  །དེ་ཡང་ཉིན་དུས་སྣང་མིན་ལྟར།  །ཉིན་སྣང་མཆེད་ཚེ་སྣོད་བཅུད་ཀུན།  །དངོས་པོ་ཐོགས་རེག་གཟུགས་སུ་སྣང་།  །རྨི་ལམ་སྣང་བ་མཆེད་པའི་ཚེ།  །དེ་ཡང་མི་སྣང་སྣང་མི་སྲིད།  །དེ་ལྟར་ཚུལ་བཞིན་དཔྱད་བཏང་ན།  །བདག་གཞན་ཀུན་ཀྱང་ནམ་མཁའ་སྟེ།  །ནམ་མཁའ་དྭངས་གསལ་རྙོག་པ་མེད།  །ནམ་མཁའ་སྐྱེ་དང་འགགས་པ་མེད།  །ཆོས་ཀུན་ནམ་མཁའ་དྲི་མ་མེད།  །བེམ་སྟོང་མ་ཡིན་ཆོས་ཀུན་ཤར།  །ནམ་མཁའ་ཆོས་ཉིད་སྤྲོས་མཐའ་བྲལ།  །དག་དང་མ་དག་ཆོས་སོ་ཅོག།  ནམ་མཁའ་ཉིད་དུ་དག་མཉམ་རོལ།  །ནམ་མཁའི་རང་བཞིན་རྟོགས་བྱས་ཏེ།  །ནམ་མཁའ་མངོན་དུ་གྱུར་པ་ནི།  །གྲོལ་བའི་ལམ་མཆོག་རྫོགས་པ་ཆེ།  །རྫོགས་ཆེན་བྱ་བ་གཞན་ན་མེད།  །ཐམས་ཅད་སྟོང་ཉིད་ནམ་མཁའི་ངང་།  །རྟོགས་པ་སྟོང་ཉིད་ལྟ་བ་ཡིན།  །སྟོང་ཉིད་བྱ་བ་ལོགས་ན་མེད།  །བཅོམ་ལྡན་འདས་ཀྱིས་དེ་དོན་གསུངས།  །རྣམ་གྲོལ་ལམ་གྱི་མཆོག་ཏུ་བསྔགས།  །བསྟན་ནོ་འཆད་དོ་ཡིད་ཆེས་མཛོད།  །ཅེས་ཟེར་ཞིང་བདག་ལ་ཐིམ་མོ།  །དེ་ནས་རང་ལོ་བཞི་བཅུ་ལ་བབས་པ་ཧོར་ཟླ་གཉིས་པའི་ཚེས་གསུམ་གྱི་ནུབ་རྨི་ལམ་ན།  ཤར་ན་ཉི་མ་ཤར་བ་དང་གནམ་མཐོང་ཟླ་གཞོན་ཤར་བ།  ལྷོ་ན་སྐར་ཆེན་ཤར་བ།  བྱང་ན་དུ་བ་མཇུག་རིང་རྣམས་ཤར་བ་རྨིས་ཚེ།  མཁའ་འགྲོ་མ་ཡེ་ཤེས་དབང་མོ་དེར་ལྷགས་པ་ལ།  བདག་གིས་གནམ་ཟླ་འདི་དག་དུས་གཅིག་ཏུ་ཤར་བ་འདི་ཅིའི་ལྟས་ལགས་དྲིས་པས།  དེ་ན་རེ།  ཀྱཻ།  ཉོན་དང་སྐལ་བཟང་སྐྱེས་བུ་ལགས།  །ཤར་དུ་ཉི་གཞོན་ཤར་བ་དེ།  །གནོད་སྦྱིན་ཤན་པ་དམར་ནག་ཡིན།  །ཉི་འོད་ས་གཞིར་ཁྱབ་པ་འདི།  །བརྒྱུད་འཛིན་རིས་མེད་སྐྱོང་བའི་བརྡ།  །གནམ་མཐོང་ཟླ་བ་ཤར་བ་དེ།  །ལྷ་ཆེན་དབང་ཕྱུག་ཆེན་པོ་ཡིན།  །ཟླ་འོད་ས་ལ་ཁྱབ་པ་འདི།  །བསྟན་པ་གཉན་ལ་གདུང་བའི་རྟགས།  །ལྷོ་རུ་སྐར་ཆེན་ཤར་བ་ནི།  །མ་མོས་བསྟན་པ་སྐྱོང་བའི་བརྡ།  །བྱང་དུ་འཇུག་རིང་ཤར་བ་ནི།  །ཕྲིན་ལས་གཟའ་ཡིས་བསྒྲུབ་པའི་རྟགས།  །དེ་དོན་ཤེས་ནས་བསྐང་གསོལ་འབུངས།  །ནམ་མཁའ་སྤྲིན་དང་བྲལ་བ་ནི།  །རྟོགས་ལྡན་བུ་སློབ་འབྱུང་བའི་ལྟས།  །ཤེས་པར་གྱིས་ཤིག་རིགས་ཀྱི་བུ།  །ཞེས་ཟེར་ནས་ཡལ།  ཡང་དབྱར་ཟླ་ར་བའི་ཚེས་བཅོ་ལྔའི་ནུབ་པཎ་ཆེན་བི་མ་ལ་མི་ཏྲ་ཡིན་ཟེར་བའི་རྣལ་འབྱོར་པ་ཞིག་བདག་གི་ཐད་དུ་སླེབས་བྱུང་བ་ལ།  བདག་གིས་ཁྱེད་འདིར་ཅིའི་ཕྱིར་བྱོན་པ་ཡིན་ཞེས་སྨྲས་པས།  དེ་ན་རེ།  ཁྱོད་ལ་གཏམ་མང་པོ་ཞིག་དྲི་རྒྱུ་ཡོད།  དེ་ལས་དོན་གཞན་མེད།  ཁྱོད་སྐྱེ་བ་སྔོན་མ་སུ་ཡིན།  རྗེ་འབངས་ཀྱི་དུས་སུ་གང་ཡིན།  དེ་གཉིས་ཤོད་དང་ཟེར།  བདག་གིས་འདི་སྐད་སྨྲས།  །ངའི་སྐྱེ་བ་སྔོན་མ་བདུད་འདུལ་རོལ་བ་རྩལ་ཞེས་བྱ་བ་ཡིན།  དེའི་སྔོན་དུ་བདུད་འདུལ་རྡོ་རྗེ་ཞེས་བྱ་བ་ཡིན།  རྗེ་འབངས་ནང་གི་གྲུབ་ཆེན་འབྲོག་བན་ཁྱེའུ་ཆུང་ལོ་ཙཱ་ཡིན།  དེ་ནས་བཟུང་སྟེ་གཏེར་སྟོན་བཅུ་ཙམ་གྱི་སྐྱེ་སྲིད་འབྱུང་བ་ཡིན་སྣང་གི་སྨྲས་པས།  ཡང་དེ་ན་རེ།  ཁྱོད་གང་དུ་སྐྱེས་པའི་མི་ཞིག་ཡིན་ཟེར།  ང་ནི་ཡུལ་གསེར་ཐལ་དུ་སྐྱེས་པ་ཡིན་སྨྲས།  ཁྱོད་མགོ་ལོག་ཏུ་ཅི་ལ་ཕེབས་ཟེར།  ང་རྒྱུ་རྫས་མེད་པ་ཞིག་ཡིན་པས་རྙེད་ཚོལ་དུ་འོང་བ་ཡིན་སྨྲས།  ཞལ་གཟིགས་དང་ལུང་བསྟན་ཅི་འདྲ་ཡོད་ཟེར།  དེ་ཤིན་ཏུ་མང་ཡང་ཕལ་ཆེར་བརྗེད་པར་ཡང་གྱུར་ལ་གྲངས་མང་བས་བརྗོད་ཀྱིས་མི་ལངས་སྨྲས།  ལྟ་སྒོམ་ངོ་སྤྲོད་པའི་བླ་མ་གང་ལགས་ཟེར།  ང་ལ་ལྟ་སྒོམ་ངོ་སྤྲོད་མཁན་འཇིག་རྟེན་མིའི་བླ་མ་ནི་གཅིག་ཀྱང་མེད་དེ།  རེས་འགའ་རང་སྟོབས་ཀྱིས་རྟོགས་པ་དང་།  རེས་འགའ་རིག་འཛིན་བླ་མ་རྣམས་དང་མ་དང་ཡེ་ཤེས་ཀྱི་མཁའ་འགྲོའི་ཚོགས་ཀྱིས་ཉམས་དང་རྨི་ལམ་དུ་ངོ་སྤྲོད་བྱེད་པ་ཡང་ཡང་བྱུང་ནས་འཁོར་འདས་རྫོགས་པ་ཆེན་པོའི་གནས་ལུགས་ཇི་ལྟ་བ་བཞིན་དུ་ཤེས་པ་ཡིན།  ཞེས་སྨྲས་པས།  དེ་ན་རེ།  ངས་ཁྱོད་ལ་འཁོར་འདས་འུབ་ཆུབ་ཀྱི་གདམས་པ་སྟོན་གྱི་ཉོན་ཅིག་གསུངས་ནས།  འཁོར་འདས་འུབ་ཆུབ་ཀྱི་གདམས་པ་གསུངས་པ་རྣམས་བདག་གིས་ཁོང་དུ་ཆུབ་པར་བྱས།  མཐར་ཁྱོད་འདི་ནས་ཚེ་འཕོས་ཚེ་མགོན་པོ་ངའི་དྲུང་དུ་ཤོག་ཅིག།  དེ་ཕྱིར་ང་དང་ངའི་ཞིང་ཁམས་ཡིད་ལ་རབ་ཏུ་གྱིས་ཤིག་ཅེས་གསུངས་པ་ལ།  ང་ནི་བདེ་བ་ཅན་དེ་རྣམ་དག་དབུགས་ཆེན་འབྱིན་པའི་ཞིང་གི་ནང་ནས་ཕྱིར་མི་ལྡོག་པའི་ས་ཡིན་པས་དེ་ལ་འདུན་པ་གཏད་ནས་སྨོན་ལམ་འདེབས་པ་ཡིན་ལགས།  ཅེས་ཞུས་པས་ཧ་ཧ་ཞེས་པའི་སྒྲ་ཡིས་གཉིད་སད་དོ།  །དེ་ནས་ལོ་ཁྱིམ་དེའི་དགུན་ཟླ་ར་བའི་ཚེས་དགུའི་ནུབ་ཀྱི་རྨི་ལམ་ན།  ངོ་མི་ཤེས་པའི་ཡུལ་ཤུག་པ་སོགས་ཤིང་ནགས་སྣ་ཚོགས་སྐྱེས་པ་ཞིག་ཏུ་སླེབས་འདུག།  དེར་བྲག་ཞིག་གི་རྩ་བ་ན་མི་རྒན་སྐྲ་དང་སྨ་ར་དང་སྨིན་མ་རབ་ཏུ་དཀར་བ་ཤ་མདོག་ནག་པ་གཉེར་མའི་ལྟེབ་ནས་དངུལ་ཆུའི་ཐིག་པ་ལྷུང་བ་ལག་ན་མཁར་བ་ཐོགས་པ་ཞིག་དང་འཕྲད་བྱུང་།  དེ་ལ་བདག་གིས་ཁྱོད་སུ་ཡིན་དྲིས་པས།  དེ་ན་རེ།  ང་ནི་མི་ཚེ་རིང་ལེགས་པའི་བློ་གྲོས་ཞེས་བྱ་བ་ཡིན།  ཁྱོད་སུ་ཡིན་ཟེར་བ་ལ།  ང་ནི་རྒིས་ལིའི་གཏེར་སྟོན་ཟེར་བ་དེ་ཡིན་སྨྲས་པས།  ཁྱོད་ལ་གཏེར་སྟོན་ཅི་ལ་ཐོགས།  གཏེར་སྟོན་ཡིན་ཟེར་བ་མང་འདུག་ཀྱང་གཏེར་སྟོན་འཁྲུལ་མེད་ཞིག་ནི་ཡོད་མི་ཡོང་ཨ་ཞེས་ཟེར་བ་ལ།  ངས་ཁྱོད་རྒད་པོ་ཞིག་ལ་གཏེར་གྱི་ལོ་རྒྱུས་བཤད་ཀྱང་མི་གོ་བས་དགོས་མེད་ཅེས་སྨྲས་པས།  ཧ་ཧ།  ང་སྲིད་པའི་མེས་པོ་ཞིག་ཡིན་ཏེ་སྲིད་པ་ཆགས་པའི་ལོ་རྒྱུས་དང་བསྐལ་པ་འཇིག་པའི་རྣམ་འགྱུར་ཐམས་ཅད་ངས་ཤེས།  ཁྱོད་ཀྱིས་ཞིབ་ཏུ་ཤོད་དང་ཟེར།  ངས་འོ་ན་ཁྱོད་ཀྱིས་ཤེས་ན་གཏེར་སྟོན་ཡིན་པར་སྐད་པ་དག་ཅི་འདྲ་ཡིན་ཞེས་དྲིས་པས།  འོ་ལ་ལ་ནི་བུད་མེད་ལ་ཆགས་ནས་གཏེར་སྟོན་ཡིན་སྐད་དེ་སེམས་ལ་གང་དྲན་ཡི་གེར་བྲི་འདུག་གི།  ལ་ལས་ནི་ཁོ་དམན་པ་མཐོ་ལ་བརྐམ་ནས་དེ་ལྟར་བྱེད་འདུག་གི།  ལ་ལས་ནི་དབུལ་ཕོངས་ལ་བྲེད་ཅིང་སུན་ནས་དེ་ལྟར་བྱེད་འདུག་གི།  གཏེར་སྟོན་ཡིན་ཀྱང་བུད་མེད་ཀྱིས་ཅི་མཁོ།  དེས་ཆོས་ནི་མི་ཤེས།  གཏེར་སྟོན་ཡིན་ཀྱང་མཐོ་ཐང་གིས་ཅི་བྱེད།  དེས་འབངས་སྡེ་མ་རྙེད་པ་ནི་མ་རེད།  གཏེར་སྟོན་ཡིན་ཀྱང་ཚེ་གཅིག་ཏུ་དཀོར་ལ་ཅིའི་ཕྱིར་འབྱམས།  དེ་དཀོར་བསླུ་བའི་ཕོ་ཉ་ནི་མ་རེད།  གཏེར་སྟོན་ཡིན་ཀྱང་འཁོར་བའི་བྱ་བ་ལ་སོས་དལ་མེད་པར་ཅི་ལ་འབྱམས།  དེ་ཕྱུགས་རྫིའི་གཡོག་པོ་ནི་མ་རེད།  ཅེས་ཟེར་བ་ལ།  ང་ཁོང་ཁྲོ་སྐྱེས་ནས།  ཁྱོད་དེ་ལྟར་བཤད་མི་ལ་སུས་བསྐོས་པ་ཡིན།  ངེད་ཅག་གཏེར་སྟོན་ཡིན་མིན་བཤད་དོན་ཅི་ཡོད་སྨྲས་པས།  ཧེ་ཧེ།  སྤྲོ་མ་ལང་དང་སྐད་ཆ་ཡག་པོ་ཡོད།  ཁྱོད་ཀྱིས་ཁོ་སྒོམ་ཅན་ཡིན་བསམ་འདུག་སྟེ།  སྒོམ་མེད་ཐག་ཆོད་རེད།  ཁྱོད་གཅིག་པུ་ལ་སྨད་པ་མིན་དང་།  གཏེར་སྟོན་མིན་ཐག་ཆོད་སོང་།  དེ་ཚོ་ང་མི་རྒན་གྱིས་ཁྱོད་ཀྱི་ཚོད་བརྟག་ནས་ཅི་འདྲ་ཡིན་བལྟས་པ་ཡིན།  གཏེར་འདྲ་བ་རེ་ཡོད་ཀྱང་འདྲེ་མི་མ་ཡིན་གྱི་ཆོ་འཕྲུལ་ཡིན་ཡང་སྲིད།  ལ་ལས་གོ་གོ་ཐོས་ཐོས་མང་བའི་གོམས་སྟོབས་ཀྱིས་བརྩམས་པ་ཡང་ཡོད།  ལ་ལས་བསྒོམ་བསྒོམ་ཉམས་ཀྱི་རྩལ་སྣང་ཤར་བ་ཡང་ཡོད།  །ལ་ལས་བློ་རྩིང་པས་རིག་པ་འུར་ཏེ་སྣ་ཚོགས་ཤར་བ་ཡང་ཡོད།  །ལ་ལས་རང་བཟོས་སེམས་རྣམ་རྟོག་གི་འཆར་ཆ་ཡི་གེར་ཕབ་པ་ཚོ་ཡོད་སྲིད་དེ།  ཁྱོད་ལ་གཏེར་ཆོས་ཅི་ཡོད།  གཏེར་གནས་གང་ཡིན་ཟེར་བ་ལ།  འདི་སྐད་སྨྲས།  ང་ལ་གཏེར་ཆོས་ཟབ་གསང་མཁའ་འགྲོའི་སྙིང་ཐིག་ཅེས་བྱ་བ་ས་གཏེར་བསྐོར་ཡིན་ཏེ།  གཏེར་གནས་སྨར་གྱི་རྦ་གཏེར་དང་དངུལ་རྒོད་གསེར་སྨད་རྔ་ལ་སྟག་རྩེ་རྣམས་ཡིན།  རིགས་གསུམ་མགོན་པོའི་བྱིན་གྱིས་བརླབས།  ཨོ་རྒྱན་ཆེན་པོས་རྗེས་སུ་བཟུང་།  རིག་འཛིན་གྲུབ་ཐོབ་རྣམས་ཀྱིས་གཏད་རྒྱ་སྨོན་ལམ་དབང་བསྐུར་རྣམས་ཐོབ་པས་དག་སྣང་སྐོར་གསུམ་སོགས་ཀྱི་ཆོས་སྡེ་བསམ་གྱིས་མི་ཁྱབ་པ་ཡོད་ཀྱང་འབྲི་མ་ནུས་སྨྲས་པས།  དེ་ན་རེ།  འབྲི་མི་ནུས་ན་དང་པོ་ནས་གཏེར་ལེན་དོན་ཅི་ཡོད།  ཁྱོད་ཀྱི་གཏེར་ཆོས་ལ་བྱིན་རླབས་ཀྱི་ལྟས་མཚན་མཐུ་དང་ནུས་རྩལ་ཡོད་དམ་མེད།  ཞིབ་ཏུ་ཤོད་དང་ང་རྒས་པོས་ཉན་སྤྲོ།  མི་རྒན་ཅི་དགའ་གཏམ་འཁྱལ་ལ་དགའ།  །གཞོན་ནུ་ཅི་དགའ་ན་ཆུང་ལ་དགའ།  །ཞེས་ཟེར་བའི་དཔེ་ཡིན།  ང་ནི་གཏམ་ལ་དགའ་ཟེར།  དེར་བདག་གིས་ངའི་གཏེར་བྱུང་ཡི་དམ་གྱི་སྒྲུབ་པ་ལ་ནི་དྲོད་རྟགས་བྱུང་བ་མ་གོ།  དེ་ཅིས་ལན་པ་ཡིན་མ་ཤེས།  བཀའ་སྲུང་དྲེགས་པ་ཅན་རྣམས་ཟླ་བ་གཅིག་གམ་གཉིས་གསུམ་ཙམ་ལ་བསྒྲུབ་པས་གྲུབ་ལྟས་མི་འབྱུང་བ་ཡོད་མ་མྱོང་།  རྫོགས་རིམ་གྱི་ཁྲིད་བཏབ་ནས་རྩེ་གཅིག་ཉམས་སུ་ལེན་པ་རྣམས་ལ་ས་ལམ་གྱི་རྟགས་མཚན་དང་།  ཁྱད་པར་ཐོད་རྒལ་ཉམས་སུ་བླངས་པའི་སྐྱེས་བུ་རྣམས་ལ་ཟླ་བ་བརྒྱད་ནས་རིག་འཛིན་དང་པོའི་ས་ལ་མི་སླེབས་པ་ཡོད་མ་མྱོང་།  མཐུའི་ལོ་རྒྱུས་བཤད་ན།  སྤྱིར་ངའི་འགལ་ཟླར་གྱུར་པ་ཐམས་ཅད་མི་ལོ་དགུ་ལྷག་མི་འགྱང་པར་ཕུང་བརླག་ཡལ་གསུམ་དུ་མི་འགྲོ་མི་སྲིད་དེ།  ཁྱད་པར་ཁྱོད་ལ་ཟུར་ཙམ་བཤད་ན།  སྔ་སོར་མཁའ་འགྲོ་མ་ཞིག་གིས་ཁྱོད་ལ་དགྲ་འབྱུང་གི་གཟའ་གསོལ་ལ་འབོད་ཟེར་བ་བྱུང་།  བདག་གིས་རང་གཏེར་གཟའ་ཁྲ་རྣོ་བའི་ཐོག་མདའ་ཞེས་བྱ་བ་ལ་བརྟེན་ནས་གསོལ་མཆོད་བྱས་པས།  སློབ་བུ་རྡོར་བཟང་དཔོན་སློབ་ཀྱི་རྟ་སྒ་སྲབ་དང་བཅས་པ་སྤོས་བསོ་ཞེས་བྱ་བ་དང་ཆོས་ཤུལ་རྡོར་ལི་དང་ཆོས་ཤུལ་དབང་པོ་ཞེས་པ་གསུམ་གྱིས་འཕྲོག་སོང་བ་བདག་གི་གམ་དུ་མུན་སྲིབ་ཀྱི་འཚམས་སུ་སླེབས་བྱུང་ནས།  ངེད་གཉིས་ཀྱི་འོག་རྟ་སྒ་མ་ཁྱེར་སོང་།  །ཁྱེད་ནི་དྲག་པོ་མངོན་སྤྱོད་ཀྱི་ལས་ལ་མངའ་དབང་བསྒྱུར་བ་ཞིག་ལོས་ཡིན།  སྔོན་གྱི་གཏེར་ཆེན་རྣམས་ཀྱང་དེ་ལྟར་ཡིན་པར་ཐོས་ཀྱི།  དགྲ་དེ་ལ་རྟགས་དོ་ནུབ་ཐོན་པ་ཞིག་སྐུ་མཁྱེན་ཞེས་ཟེར་བར།  དེ་མ་ཐག་ཏུ་བདག་གིས་བུ་སློབ་རྣམས་བསྡུས་ནས་གཟའ་གསོལ་སྟོང་བྱས་མཐར་བསྐུལ་ཏེ་རྦད་པས།  དགུན་ཟླ་འབྲིང་པོའི་ཚེས་ཉེར་དགུའི་ནུབ་རླུང་ཆེན་གཡོས་ཤིང་སེར་ཆེན་བབས་པ་དང་ཆབ་གཅིག་ཏུ་འབྲུག་སྒྲ་དྲག་པོ་བྱུང་།  ཇག་པ་དེ་དག་གི་སྟེང་དུ་གཟའི་ཆར་པ་བབས།  ཆོས་ཤུལ་རྡོར་ལི་ཞེས་བྱ་བའི་ཁ་འཐམས་ནས་ཟས་ཁ་རུ་མི་ཤོང་བ་བྱུང་།  དབང་པོ་སྙིང་ཁྲག་ཁ་ནས་སྐྱུག་ཏེ་ཤི།  དེ་ནས་རྟ་ཕྱིར་བཏང་།  དེའི་ཕྱིར་ལོའི་དགུན་ཐོག་སྤོས་བསོ་ན་རེ།  དེ་མཐུ་ག་ལ་ཡིན་སླར་ཡང་རྒིས་ལི་ཚང་ལ་བརྐུ་མི་འགྲོ་རེ་ཟེར་ནས་རྒིས་ལི་ཚང་གི་རྟ་ཕོ་རྒོད་གསུམ་བརྐུས་པ་ལས་གཉིས་ཀྱིས་རྐུན་ཐག་དྲུད་ནས་ཤོར་བྱུང་བ་ལ།  ཉེར་དགུའི་ཉིན་རྟ་རྐུན་ལ་དམིགས་ནས་རྐུན་ཐག་དེའི་སྟེང་དུ་ཟོར་བརྡབ་པས་ཕྱིར་ཉིན་གནམ་སྟོང་གི་ནངས་པར་རྐུན་ཐག་གི་རྩ་བར་འཕྱི་བ་ཞིག་གི་རོ་འདུག་སྟེ།  བདག་གིས་དེ་བནྡྷེ་ཞིག་ཤི་བའི་ལྟས་རེད་སྨྲས་པས།  དེའི་ནུ་བོ་འབྲུམ་ནད་ལས་ཐར་བ་ཞིག་ཡོད་པ་སླར་ཡང་འབྲུམ་ནད་ཀྱིས་ན་སྟེ་ཤི་བ་སོགས་མི་འདོད་པ་སྣ་ཚོགས་པས་བདེ་བའི་དུས་སྐབས་མ་བྱུང་།  བདག་གིས་ཁང་པ་བརྩིགས་ཏེ་དགོན་པ་བཏབ་ཚེ་སྐྱི་མོ་ལྷ་འབུམ་ཞེས་བྱ་བས་ཁོའི་དགུན་ས་འཕྲོག་སོང་བ་འདི་ཉེས་ཤིན་ཏུ་ཆེ་ཟེར་ནས་རྒོལ་བ་བྱུང་བས།  བདག་གིས་གནོད་སྦྱིན་ཤན་པ་དམར་ནག་རྦད་པས་ཁོ་མི་ཤི་ནོར་བརླག་ཏུ་སོང་།  གཞན་ཡང་བདག་གི་འགལ་ཟླ་མགོ་ལོག་ཕྱོགས་ཀྱི་དཔོན་མོ་དྲག་ཤོས་ཞིག་ཡོད་པའང་མིག་ལོང་ཞིང་ཁས་ཞན་དུ་སོང་ནས་ཤི།  དེ་ལྟར་ངའི་གཏེར་བྱུང་གི་སྲུང་མ་རྣམས་ནི་གཞན་གང་གིས་འགྲན་ཟླ་དང་བྲལ་བ་ཡིན།  ཞེས་སྨྲས་པས།  དེ་ན་རེ།  ཚིག་གིས་ཅི་བྱེད།  བྱིན་རླབས་དང་ནུས་པ་ལ་བརྟག་པས་ངེས་པར་གོ་བ་ཡིན།  ཡི་དམ་ནི་བསྐྱེད་རིམ་རང་རྒྱུད་པར་མི་གོལ་ཞིང་ངོ་བོ་བླ་མར་ཤེས་པ་དང་ལྷའི་ང་རྒྱལ་བརྟན་པོ་ཞིག་མེད་ན་འགྲུབ་མི་སྲིད།  ཁྱོད་གཅོད་པ་ཞིག་ཡིན་ན་སློང་ཚད་འདྲ་ཨེ་བྱུང་ཟེར།  སྔོན་ནང་འབའ་རའི་རྒྱ་གར་ཞེས་པའི་བུ་ཆུས་ཁྱེར་བའི་འཕོ་འདེབས་སུ་སོང་ཚེ་ནད་དྲག་པོ་ཞིག་གིས་བཏབ་པ་ལ་ཅིས་ཀྱང་ཕན་པ་མ་བྱུང་བས།  དེའི་ནུབ་མོ་མཐའ་གཏད་ཀྱི་དམིགས་པ་བྱས་པས་མི་ནག་པོ་སྐྲ་དང་སྨ་ར་དམར་བ་ཞིག་གིས་ང་ནི་རྫ་ཡུལ་གསེར་ཁྲབ་ཟེར་བ་དེ་ཡིན།  ཁྱོད་ཀྱི་ནད་འདི་ངས་འཇིབ།  ཁྱོད་ཀྱིས་ང་ལ་གཏོར་མ་མང་པོ་ཨེ་སྦྱིན་ཟེར་བ་ལ།  ངས་དེ་ལོས་སྦྱིན་བྱས་པས།  བདག་གི་མཁལ་མ་ལ་ཁ་གཏད་དེ་ཧུབ་ཀྱིས་བཏབ་པས་ནང་རོལ་ཐམས་ཅད་འཇིབ་སོང་བའི་སྣང་བ་བྱུང་།  དེའི་ནངས་པར་བདག་གི་ནད་རྣམས་རང་ཡལ་དུ་སོང་ནས་སོས་པར་གྱུར།  ལར་མཐའ་དག་ཇི་ལྟ་བ་བཞིན་དུ་བརྗོད་མི་ནུས་ལ།  ལན་བརྒྱ་ཕྲག་གཉིས་ཙམ་དུ་ཚར་སློང་ཆོད་གསུམ་གྱི་སྣང་བ་བྱུང་སྟེ་ད་ནི་འབྱུང་རྒྱུ་མི་འདུག།  རྒད་པོ་ཁྱོད་ཀྱིས་ང་ལ་ཡིད་ཨེ་ཆེས་སྨྲས་པས།  རྒད་པོ་ན་རེ།  ཆེས་ཆེས་ང་ཡི་གླུ་འདི་ཉོན།  །སྟོན་རྒྱས་སྤངས་རྒྱན་སྔོན་མོ་དེ།  །བཀྲག་མདངས་རྒྱས་ཤིང་གྲངས་མང་ཡང་།  །དགུན་གྱི་རྒྱལ་མོ་སླེབ་ཉེ་བས།  །ཟླ་ཞག་མང་པོར་རྒྱས་ལོང་མེད།  །ཚེ་སྟོད་འདས་པའི་མི་རྒན་པོའི།  །ཆེ་མཐོ་ཁེ་དྲག་ཐོབ་རློམས་ནས།  །དཀའ་སྤྱད་སྙིང་རུས་བྱས་བྱས་ཀྱང་།  །འཆི་བདག་གནས་སུ་ཆས་ཉེ་བས།  །ཡུན་དུ་འདུག་ཁོམས་མེད་ལ་ལྟོས།  །དེང་སང་སྙིགས་མའི་གཏེར་སྟོན་ཚོས།  །ལུས་སེམས་དལ་ཁོམ་མེད་པ་རུ།  །གཏེར་ཆོས་ཕབ་ལ་འབད་འབད་ནས།  །ཡུན་རིང་བསྟན་པ་གནས་རེ་ཡང་།  །ཀླ་ཀློའི་བསྟན་པ་སླེབས་ལ་ལྟོས།  །སྲིད་དང་ལྷན་སྐྱེས་མི་རྒན་ང་།  །འཇིག་རྟེན་བྱ་བར་གོམས་གོམས་ཡང་།  །གོམས་ཚུལ་གཞན་ལ་བཤད་དོན་མེད།  །ཡུན་རིང་སྡོད་ལོང་མ་མཆིས་པ།  །ལང་ཚོ་ཉམས་ལུགས་འདི་ལ་ལྟོས།  །ངས་ཁྱོད་ལ་སྨད་པས་ཅི་ཞིག་གནོད།  །དེས་ཁྱོད་ལ་གནོད་པ་འབྱུང་དུ་མེད།  །ང་ཡིད་ཆེས་ཀྱང་ཅི་ལ་ཕན།  །ཁྱོད་ལ་ཕན་པ་སྤུ་ཙམ་མེད།  །གཞན་གྱིས་ཚིག་ངན་བརྒྱ་སྨྲས་ཀྱང་།  །དེ་ལ་ཁོང་ཁྲོ་སྡང་སེམས་ཆོད།  །བསྟོད་ཅིང་བསྔགས་ཚིག་བརྗོད་བྱས་ཀྱང་།  །དེ་ཡིས་ཕན་པ་ཆེར་མི་ཐོགས།  །དགའ་མགུ་ཆགས་ཞེན་མ་བྱེད་ཅིག།  ལྟ་བ་ནམ་མཁའ་རྣམ་དག་ལ།  །སྒོམ་པ་བཅོས་བསྒྱུར་མེད་པར་ཞོག།  སྤྱོད་པ་བླང་དོར་མེད་པ་རུ།  །མ་བཅོས་གཡོ་འགུལ་བྲལ་བར་ཞོག།  བུ་སློབ་སྐལ་ལྡན་རེ་བྱུང་ན།  །གྲོལ་བྱེད་གདམས་པ་སྟོན་པར་གྱིས།  །ན་ཚོད་ཡོལ་བའི་དུས་བྱུང་ཚེ།  །རྙེད་ཚོལ་དཀོར་སྡུད་སྤྱོད་པ་སྤོངས།  །འཆི་བདག་སུན་མ་སླེབས་པའི་དུས།  །བློ་སེམས་བདེ་བ་ཞིག་ལ་རེམ།  །མི་རྒན་ལེགས་པའི་བློ་གྲོས་ང་།  །གཞན་གྱིས་མི་ཐུབ་བྲག་ལ་འགྲོ།  །ཁྱོད་ཀྱང་རྨི་ལམ་གྲོང་ཁྱེར་ནས།  །ཉིན་སྣང་ཡངས་པའི་ཡུལ་དུ་སོང་།  །ཞེས་ཟེར་ནས་བྲག་ལ་ཐིམ་སོང་མ་ཐག་གཉིད་སད།  ལོ་ཁྱིམ་དེའི་དགུན་ཟླ་འབྲིང་པོའི་ཚེས་གཅིག་ལ་བདུད་འདུལ་རྡོ་རྗེའི་གཏེར་བྱོན་རྡོ་རྗེ་གྲོ་ལོད་ཀྱི་ཟླ་སྒྲུབ་ལ་ཞུགས།  དགུན་ཐ་ཆུང་གི་ཚེས་ལྔ་ནས་བཅོ་ལྔའི་བར་ཁྲོས་མའི་སྒྲུབ་པ་ལ་ཞུགས་སོ།  །དེ་ནས་ལོ་གྲངས་བཞི་བཅུ་ཞེ་གཅིག་ལ་བབས་པ་ཧོར་ཟླ་ལྔ་པའི་ཚེས་བཅོ་བརྒྱད་ཀྱི་ནུབ་མཁའ་འགྲོ་མ་གསང་མཛོད་ཀྱི་བདག་མོ་ཡིན་ཟེར་བའི་བུ་མོ་ཞིག་གིས་བདག་ལ།  ཁྱོད་དབྱར་དཀར་བསོད་ལ་སོང་།  དགུན་ནས་བསོད་ལ་མ་འགྲོ་མཚམས་སྒྲུབ་ལ་རེམ་མཛོད་ཅེས་ཟེར་བ་ལ།  ལགས་ཟ་རྒྱུ་མི་རྙེད་པས་འགྲོ་དགོས་འབྱུང་གི་ཞེས་སྨྲས་པས།  བུད་མེད་དེ་ན་རེ།  ལ་ཐོག་འདི་རུ་ཞིང་རྨོས་ལ་ས་བོན་ཐོབ་དང་ཟ་རྒྱུ་དེ་ཡིན་ཟེར།  ཡང་གླུ་འདི་གྱེར་འདུག།  དམ་སྲི་སྤྲུལ་པས་རྒོལ་བ་ལ།  །དམ་སྲི་ལག་ཏུ་ལོན་པ་འབྱུང་།  །དམ་སྲི་ལག་ཏུ་ལོན་པའི་རྐྱེན།  །ལོངས་སྤྱོད་དཔལ་ལ་བདུད་ཀྱིས་རྒོལ།  །དེ་འབྲས་མི་བདེའི་ཟུག་རྔུ་སློང་།  །དེ་ཚེ་སྡོད་པའི་དུས་མ་ཡིན།  །འགྲོ་ཕྱོགས་ལྷོ་ནུབ་མཚམས་སུ་སོང་།  །ལུང་པ་ཡར་ཆེན་བླ་ཡི་ནང་།  །རེ་ཞིག་གནས་ན་དགེ་ལེགས་དང་།  །སྙན་གྲགས་རླུང་རྟའི་དཔལ་ཁ་བསྐྱེད།  །བུ་སློབ་སྐལ་ལྡན་མང་དུ་འབྱུང་།  །དེ་ལྟར་མ་བརྗེད་སེམས་ལ་ཞོག།  ཅེས་ཟེར་ནས་ཡལ་སོང་།  །དབྱར་ཐ་ཆུང་གི་ནུབ་གཅིག་རྨི་ལམ་ན་སྟེང་གི་ནམ་མཁར་སྤྲིན་ནག་པོ་བལྟར་མི་བཟོད་པ་ནག་ལ་ལྷུན་འཐུག་པའི་མཐའ་སྤྲིན་དམར་ནག་གིས་བསྐོར་བ་ཞིག་འཐིབ་བྱུང་བའི་ནང་ནས་བདག་གི་མདུན་དུ་ཐལ་ཕུང་ཞིག་ཡོད་པའི་སྟེང་དུ་སྟག་འཇིགས་སུ་རུང་བ་ཞིག་ལྷུང་བྱུང་།  ཡུན་གཅིག་གི་ཚེ་སྟག་དེ་སྐྱུགས་ཤིང་གྲེ་ལོག་བྱེད་པའི་ཁ་ནང་ནས་བུད་མེད་རྒན་མོ་ཞིག་ལྷུང་བྱུང་ནས།  ཡང་དར་གཅིག་གི་ཚེ་རྒན་མོ་དེ་ལ་བུ་གཅིག་བཙས་པ་པང་དུ་བླངས་འདུག་པའི་མོད།  བུ་དེ་ཡར་ལངས་ནས་ས་ཐོག་ཏུ་འདུག་སྟེ།  ཡ།  ཨ་མ་གནས་འདི་གང་ཞེས་བྱ་བ་ཡིན།  དགོན་པ་འདི་སུ་རེད།  འདི་སུས་བཏབ་པ་རེད་ཟེར་བ་ལ།  ཨ་མ་ན་རེ།  ཨེ་མ་གཅེས་པའི་བུ་ཁྱོད་ཉོན།  །ཡུལ་འདིའི་ཡུལ་ངོ་མ་ཤེས་ན།  །འབྲི་ཡུལ་བཙན་བདུད་འཇིགས་པའི་ཡུལ།  །ཡུལ་འདིའི་མི་ངོ་མ་ཤེས་ན།  །འདི་མགོ་ལོག་སྡིག་པའི་གྲོང་མི་ཡིན།  །དགོན་འདི་གང་ཡིན་མ་ཤེས་ན།  །འདི་མདང་སུམ་ཆགས་པའི་དགོན་པ་རེད།  །འདི་འདེབས་མི་བདུད་འཇོམས་རྡོ་རྗེ་རེད།  །ཡུལ་འདི་སྒྱུ་མའི་གྲོང་ཁྱེར་ཏེ།  །མི་འདི་ཚོང་འདུས་མགྲོན་པོ་རེད།  །དགོན་འདི་མགྲོན་པོའི་ས་ཚིགས་ཡིན།  །ཞེས་ཟེར་བ་ལ།  ཡང་བུ་དེས།  ཨ་མ་བསྐལ་པ་ཆགས་པའི་ལོ་རྒྱུས་དང་འགྲོ་བ་སེམས་ཅན་དང་བསྟན་པའི་བྱུང་ཚུལ་ཤོད་ཅེས་ཟེར་བའི་ལན་དུ་བསྐལ་པ་ཆགས་པའི་ལོ་རྒྱུས་ཞིབ་ཏུ་བཤད་ཅིང་།  ཡང་བུ་དེས་མ་འོངས་འབྱུང་འགྱུར་གྱི་ཚུལ་ཤོད་དང་ཟེར་བ་ལ།  དེ་ལྟར་ཞིབ་ཏུ་བཤད་པ་ཐོས་ཀྱང་ཡི་གེ་མང་བས་འཇིགས་ནས་མ་བྲིས་སོ།  །དེ་ནས་བུ་དེས་ངེད་མ་བུ་གང་དུ་འགྲོ་ཟེར་བ་ལ།  །རྒན་མོ་དེས།  ཡུལ་མི་གནས་ཟང་ཐལ་གྱི་གྲོང་ཁྱེར་དུ་འགྲོ་ཟེར་ཞིང་བུ་དེ་ཁྱུར་མིད་དུ་བཏང་སོང་།  །དེ་ནས་རྒན་མོ་ན་རེ།  ཨ་ལེ་བདུད་འཇོམས་ཁྱོད་གནས་འདིར་ཡུན་རིང་པོར་འདུག་པའི་སྐལ་པ་ནི་མེད་དོ།  །ཞེས་ཟེར་མ་ཐག་ཏུ་སྟག་དེས་རྒན་མོ་དེ་ཁྱུར་མིད་དུ་བཏང་ནས།  དེས་ཕི་ཕི་ལིང་ལིང་བསྟན་པའི་བདུད་དུ་འབབ་ལ་ཉེ་ཟེར་ཏེ་སྤྲིན་དང་འདྲེས་ནས་ཡལ་ལོ།  །དེ་ནས་ལོ་གྲངས་བཞི་བཅུ་ཞེ་གཉིས་ལ་བབས་པ་ཧོར་ཟླ་གསུམ་པའི་ཚེས་གཅིག་གི་ཉིན་ཕུག་ལུང་གད་ཐོག་ཏུ་ཞིང་རྨོས་བྱས་ཏེ་ནས་རྐྱལ་པ་གཉིས་བཏབ་པ་ལ་སྟོན་དུས་སུ་རྐྱལ་པ་ལྔ་བཅུ་རྩ་གཅིག་སྨིན་པ་བྱུང་།  སྟོན་ཟླ་ར་བའི་ཚེས་བཅུའི་ནུབ་རྨི་ལམ་ན་མཁའ་འགྲོ་མ་ཀུན་གསལ་རྒྱལ་མོ་ཡིན་ཟེར་བ་ཞིག་བདག་གི་ཐད་དུ་ལྷགས་ནས་འདི་སྐད་ཟེར།  ཨེ་ཨེ།  ལྷོ་མ་རུང་བདུད་པོ་སྨོན་ལོག་པས།  །ཡུལ་མི་བདེའི་ལ་ཡོག་འདོར་བ་ལས།  །སྟོད་བགེགས་ཀྱི་སྡེ་ཚོགས་མགྲོན་དུ་བཀུག།  ཀླུ་སྔོན་པོའི་རལ་པ་གཅོད་ཆས་ནས།  །གནས་རི་རབ་ཟོམ་གྱི་འབྱུང་དམག་འཁྲུགས།  །མཐའི་མི་སྡེ་མི་སྲུན་དབུས་སུ་འདྲེན།  །དེའི་རྐྱེན་གྱིས་བསྟན་འགྲོའི་བདེ་བ་འཇོམས།  །ཡུལ་འདི་ཡི་ནག་ཕྱོགས་འདུག་པའི་འཕྲུལ།  །དོམ་ནག་པོའི་ཤ་ལ་རྔམ་ཟས་བྱེད།  །དེས་ངར་སྒྲ་བཏོན་པའི་རྐྱེན་དབང་གིས།  །གངས་སེང་གེ་དཀར་མོས་མ་བཟོད་དེ།  །དཔུང་སྟག་གཟིག་མང་པོ་ཁྱུ་ཚོགས་ཀྱིས།  །ཡུལ་དྲི་ཟའི་གྲོང་ཁྱེར་བཞིན་ངོམས་པ།  །དོན་དེ་ཕྱིར་དབྱར་རྔ་སླེབས་པའི་ཚེ།  །ཡུལ་ཀ་ན་ཀ་རུ་ལ་འུར་ཆོས།  །དུས་རེ་ཞིག་བདེ་བའི་ཉི་ཞུར་མཐོང་།  །ཞེས་ཟེར་ཞིང་མི་སྣང་བར་ཡལ་ལོ།  །ཧོར་ཟླ་གསུམ་པའི་ཚེས་བཅོ་ལྔ་ལ་ཆོས་སྐོར་ལྷ་རོ་ཞེས་བྱ་བས་བདག་གི་མཛོ་མོ་གཅིག་བརྐུས་སོང་འདུག་པ་ན།  དེ་ལ་མཐུ་བྱེད་དགོས་ཟེར་བ་མང་པོ་བྱུང་ཡང་།  བདག་གིས་དེ་ལྟར་བྱ་མི་ཉན་མཐར་རྩད་ཆོད་འོང་སྲིད།  དེ་མི་བདེ་བའི་རྒྱུ་ཞིག་ཏུ་མི་འགྲོ་བའི་ཐབས་མེད་པ་རེད་ཅེས་སྨྲས་ཏེ་མ་བྱས་སོ།  །ཧོར་ཟླ་བརྒྱད་པའི་ཚེས་ལྔའི་ནུབ་མཁའ་འགྲོ་མ་སེར་མོ་གསེར་བཙོ་མའི་ཁ་དོག་འབར་བ་དར་དཀར་པོའི་ཨང་རག་གྱོན་པ་ཞིག་བདག་གི་ཐད་དུ་ལྷགས་ནས་ལྷོ་ཕྱོགས་རི་བོ་གྲུ་འཛིན་ལ་ལྟད་མོར་ཨེ་འགྲོ་ཞེས་ཟེར་བ་ལ།  ཁྱོད་སུ་ཡིན་དྲིས་པས།  དེ་ན་རེ།  ང་ནི་གནས་དེ་རུ་གནས་པའི་མཁའ་འགྲོ་ནོར་སྲུང་མཆེ་གཙིགས་ཆེན་མོ་ཞེས་བྱ་བ་ཡིན་ཏེ་སྔོན་གྱི་དུས་ནས་ལས་འབྲེལ་ཡོད་པ་དང་།  ཁྱོད་ཀྱི་རིག་མ་དེའང་ངའི་སྤྲུལ་པ་ཡིན་པས་ཁྱོད་གནས་དེར་འབོད་དུ་འོང་བ་ཡིན།  ཞེས་ཟེར་བས།  དེ་དང་ལྷན་ཅིག་ཏུ་བསྡེབས་ནས་ནམ་མཁའ་ལ་འཕུར་སྟབས་ཀྱིས་སོང་བས་རྒྱ་མཚོ་ཆེན་པོ་རྒྱ་ཆེ་ལ་གཏིང་ཟབ་པ་མདོག་སྔོ་ནག་ཏུ་འདུག་པ་ཞིག་གི་ཕ་མཐར་བགྲོད་ཚེ་དེ་ན་ཤར་ལྷོ་ནུབ་བྱང་ཕྱོགས་མཚམས་ཁོར་ཡུག་ཐམས་ཅད་ལུང་པ་མང་པོས་བསྐོར་བའི་མདོའི་ཆུ་རྣམས་རྒྱ་མཚོར་འབབ་པ།  ཆུ་ཐམས་ཅད་ཕྱོགས་གཅིག་ཏུ་འདུས་པ།  དེའི་དབུས་སུ་སྤང་ཐང་རྒྱ་ཁྱོན་དཔག་ཏུ་མེད་པའི་དབུས་ན་གསེང་མ་རྒྱ་ཆེ་ཞིང་ཁོད་སྙོམས་པའི་དབུས་ཆུ་མཚོས་འཁོར་བའི་ཚུལ་དུ་ཡོད་པའི་ནང་དུ་བྱ་ངང་པ་དང་།  ཁྲུང་ཁྲུང་དང་།  མཐིང་རིལ་དང་།  བྱ་དུང་དཀར་འདྲ་བ་དང་།  གསེར་ལྟར་སེར་བ།  བྱི་རུ་ལྟར་དམར་བ།  གཡུ་ལྟར་ལྗང་བ།  ཟ་འོག་ལྟར་ཁྲ་བོ་སྟེ།  དེ་ལ་སོགས་པའི་བྱ་ཚོགས་ཆེ་ཆུང་འབྲིང་བ་བསམ་གྱིས་མི་ཁྱབ་པར་གནས་པ།  མེ་ཏོག་སེར་པོ་དང་དམར་པོས་ཡོངས་སུ་ཁེབས་པ།  མཚོ་དེའི་འགྲམ་ན་ཀླུའི་བུ་དང་བུ་མོ།  །དྲི་ཟའི་བུ་དང་བུ་མོ།  །མིའམ་ཅིའི་བུ་དང་བུ་མོ་མང་པོས་བྱ་ཁྲུང་ཁྲུང་དཀར་མོ་མི་གཏམ་ཤེས་པ་ཞིག་ལ་ཆོས་ཉན་ནས་འདུག་གོ།  བདག་གིས་མཁའ་འགྲོ་དེ་ལ་ཕ་གིའི་ཁྲུང་ཁྲུང་འདི་ཅི་ཡིན་དྲིས་པས།  དེ་ན་རེ།  དྲང་སྲོང་ལེགས་པར་སྨྲ་བ་ཞེས་བྱ་བ་རེད་ཟེར།  བུ་དང་བུ་མོ་འདི་དག་ཀླུ་དང་དྲི་ཟ་མིའམ་ཅིའི་བུ་དང་བུ་མོ་ཡིན་ནོ།  །འདི་དག་གིས་བྱ་འདི་ལས་ཆོས་ཉན་པ་འདི་ཅིའི་ཕྱིར་ལགས་སྨྲས་པས།  འདི་དག་ནི་ཚོགས་མ་བསགས་པའི་སེམས་ཅན་མ་ཡིན།  མི་ཡུལ་ནས་འཕགས་པ་ལ་དད་ཅིང་གུས་པས་གསོལ་བ་བཏབ་སྟེ་ཞིང་དེར་སྨོན་ནས་ཡིག་དྲུག་དུང་ཕྱུར་མང་པོ་བགྲང་བ་རྣམས་ཞིང་ཁམས་དངོས་སུ་སྐྱེ་མ་ཐུབ་པ་གནས་འདིར་སྐྱེས་ཏེ་ཆོས་ཉན་ཅིང་ཚོགས་བསགས་ནས་མཐར་ཡེ་ཤེས་ཀྱི་སྤྱན་ཐོབ་ཚེ་དག་པའི་ཞིང་འཕགས་པའི་གྲོང་དུ་སྐྱེ་རྒྱུ་རེད་ཟེར།  དེ་ནས་མཚོ་ལྕགས་རི་ལྟ་བུའི་དབུས་ན་ཐང་ཆེན་པོས་འཁོར་བའི་ལྟེ་བར་རི་རྒྱལ་ཆེན་པོ་དབྱར་དགུན་མེད་པར་མེ་ཏོག་དཀར་པོས་ཡོངས་སུ་ཁེབས་ཤིང་རྩེ་མོ་དགུང་ལ་བསྙེགས་པ་ཞིག་འདུག་པའི་རྩེ་རུ་སླེབས་པའི་ཚེ།  ས་ལས་དཔག་ཚད་གཅིག་འཕགས་པའི་སྟེང་དུ་འོད་ཕུང་དཀར་པོ་ས་གཞིའི་རྣམ་པར་མཆེད་པའི་དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཡངས་པའི་ནང་དུ་དཔའ་བོ་དང་དཔའ་མོ་རྒྱ་མཚོ་ལྟ་བུའི་དབུས་ན་འཕགས་མཆོག་ཐུགས་རྗེ་ཆེན་པོ་ཞལ་གཅིག་ཕྱག་བཞི་པ།  ཞབས་རྡོ་རྗེ་སྐྱིལ་མོ་ཀྲུང་གིས་རིན་པོ་ཆེའི་ཁྲི་ལ་བཞུགས་ཤིང་ལོངས་སྤྱོད་རྫོགས་པའི་ཆས་ཀྱིས་རབ་ཏུ་བརྒྱན་ཏེ་ཡུམ་མཁའ་སྤྱོད་དབང་མོ་དམར་མོ་དང་གཉིས་མེད་འཁྲིལ་སྦྱོར་དུ་རོལ་པ་ཞིག་མཇལ་མ་ཐག་ཏུ་བདག་གིས་ཕྱག་འཚལ་ཏེ་གསོལ་བ་བཏབ་ནས་བདག་ལ་ཚེ་འདིར་རྣམ་པར་གྲོལ་བའི་གདམས་པ་ཞིག་སྩལ་དུ་གསོལ།  ཞེས་ཞུས་པས།  འཕགས་པའི་ཕྱག་ནས་ཡི་གེ་ཚན་པ་ཞིག་བདག་ལ་བསྟན་ཏེ།  ཞལ་ནས་སྡུག་བསྔལ་ངེས་པར་སེལ་བའི་གདམས་པ་འདི་ལ་ལྟོས་ཤིག་ཅེས་གསུངས་མ་ཐག་བདག་གི་རྒྱུད་ལ་སྤར་གྱིས་བཏབ་པ་ལྟར་ངེས་པར་གྱུར་ཏོ།  །ད་ཁྱོད་ལ་ང་སྒྲུབ་པའི་ཐབས་འདིའི་དབང་ལུང་སྦྱིན་གྱི་ཞེས་གསུངས་ཤིང་ཚར་གཅིག་གསུངས་ནས།  འོ་བུམ་པའི་དབང་གིས་ལུས་རྡོ་རྗེའི་སྐུ་རུ་སྨིན་པར་གྱུར་ཅིག།  གསང་དབང་གིས་ངག་རྡོ་རྗེའི་གསུང་དུ་སྨིན་པར་གྱུར་ཅིག།  ཤེར་དབང་གིས་ཡིད་རྡོ་རྗེའི་ཐུགས་སུ་སྨིན་པར་གྱུར་ཅིག།  ཚིག་དབང་གི་ནུས་པས་སྣང་སེམས་སྐུ་དང་ཡེ་ཤེས་ཀྱི་རོལ་པར་གོ་འཕོས་ཏེ་སྨིན་ཅིང་གྲོལ་བར་ཤོག་ཅིག།  ཅེས་གསུངས་མཐར་རིགས་ཀྱི་བུ་དེང་ལྔ་བརྒྱའི་སྙིགས་མ་ལ་ཐུག་པའི་དུས་འདིར་དོན་དམ་པའི་ཆོས་ལ་ཡིད་ཆེས་མི་ནི་དཀོན།  སྨོན་ལམ་གྱི་སྟོབས་ཀྱིས་ངའི་གདུལ་བྱར་མ་གྱུར་པའི་མི་མེད་དེ་ང་ཉིད་སྒྲུབ་པའི་ཐབས་ལ་བསྟེན་ཏེ་རྟག་ཏུ་ཡིད་ལ་བྱས་ནས་ཡི་གེ་དྲུག་མ་ལ་འབད་པ་དང་།  མཐར་བསྔོ་བ་སྨོན་ལམ་གྱིས་རྒྱས་བཏབ་ནས་ངའི་ཞིང་འདིར་སྨོན་ལམ་རྟག་ཏུ་འདེབས་པ་རྣམས་འདིར་སྐྱེ་སྟེ།  དེ་ཕྱིར་བསོད་ནམས་བསགས་པ་ནི་གནད་ཀྱི་དམ་པ་ཡིན།  ད་ཁྱོད་ཀྱིས་དུས་བཟང་ནམ་བྱུང་ལ་ཚོགས་འཁོར་རེ་བསྐོར་བ་གལ་ཤིན་ཏུ་ཆེ།  བུ་སློབ་ཐམས་ཅད་ཀྱིས་རི་ཁྲོད་བསྟེན་ནུས་ན་འཇའ་ལུས་ཐོབ་པའི་སྐྱེས་བུ་མང་པོ་འབྱུང་བར་ངས་ལུང་བསྟན་ཏོ།  །ཞེས་གསུངས།  དེར་བུ་མོ་དེས་འགྲོ་འགྲོ་ཞེས་ཟེར་ཞིང་བདག་གི་ལག་པ་ནས་འཐེན་བྱུང་བས་གཉིད་སད་དོ།  །དེ་རྗེས་དགུན་ཟླ་གསུམ་དུ་ཡི་དམ་གྱི་བསྒོམ་བཟླས་ལ་ཞུགས་ནས་དམ་རྒྱ་བྱས་སོ།  །དེ་ནས་ལོ་ཁྱིམ་བཞི་བཅུ་ཞེ་གསུམ་ལ་བབས་པ་ཧོར་ཟླ་བཞི་པའི་ཚེས་བཅུའི་ནུབ་མཁའ་འགྲོ་ཀུན་གསལ་མིག་ལྡན་མ་ཡིན་ཟེར་བ་ཞིག་ན་རེ།  བུ་ཁྱོད་ང་ཡི་ངག་ལ་ཉོན།  །ལྷོ་ཕྱོགས་ཕོ་ཉའི་ངག་བཞིན་དུ།  །སོང་ལ་སེང་ཆུང་གངས་རྩེར་སྐྱོལ།  །གཡུ་ཡི་རལ་པ་མཐའ་ནས་རྒྱས།  །གནས་སྡོང་རྫོང་བྲག་གི་རི་བོ་འདི།  །བཙན་མི་ཟན་དམར་པོའི་གནས་ཡིན་ཀྱང་།  །མ་མཁའ་འགྲོ་བདེ་བའི་འབྱུང་གནས་ལ།  །འཁོར་མཁའ་འགྲོ་བྱེ་བས་བསྐོར་ནས་ཡོད།  །གནས་དེ་རུ་སྒྲུབ་པས་འབྲེལ་འཇོག་ན།  །དམ་ཉམས་པའི་སྐྱེས་བུ་མ་གཏོགས་པ།  །ཀུན་དངོས་གྲུབ་ཕྲན་བུ་རེ་འཐོབ་སྲིད།  །དེ་མ་བརྗེད་ཟུངས་ཤིག་སྐལ་ལྡན་བུ།  །ཞེས་ཟེར་ནས་ཡལ།  དེ་ནས་དབྱར་ཟླ་འབྲིང་པོའི་ཚེས་གཅིག་ལ་ལམ་དུ་ཞུགས་ནས་རྡོའི་རྩང་ཆེན་དགོན་དུ་བུ་མཁྱེན་བརྩེའི་མྱུ་གུ་ཁྲི་ཁར་མངའ་གསོལ།  དེ་རྗེས་རྣུ་ཟོག་དགོན་དུ་ཕྱིན་པས་དེར་ཡང་ཁྲི་ཁར་མངའ་གསོལ་མཐར་སྟོན་འབྲིང་པོའི་ནང་དུ་སླར་རང་དགོན་དུ་སླེབས།  ལོ་ཁྱིམ་དེའི་དགུན་ཟླ་གསུམ་ལ་ཡི་དམ་གྱི་སྒྲུབ་མཚམས་སུ་ཞུགས།  དེའི་ཚེ་མཁའ་འགྲོ་མང་པོས་ཟས་ནོར་གོས་སོགས་ལོངས་སྤྱོད་གྱ་ནོམ་པ་སྣ་ཚོགས་ཕུལ་ནས་སྨོན་ལམ་འདེབས་ཤིང་དབང་བསྐུར་བ་ཉམས་དང་རྨི་ལམ་ལན་གསུམ་དུ་བྱུང་།  དེ་ནས་ལོ་གྲངས་བཞི་བཅུ་ཞེ་བཞི་ལ་བབས་པ་ཧོར་ཟླ་དང་པོའི་ཚེས་བཅུའི་ནུབ་མཁའ་འགྲོ་སྣང་སྲིད་དབང་མོ་ཞེས་བྱ་བ་ཡིན་སྐད་པའི་བུད་མེད་ལྗང་མོ་གཡུའི་ཁ་དོག་འཆང་བ་རུས་པའི་རྒྱན་དྲུག་གིས་སྤྲས་པ་ཞིག་གིས་ན་རེ།  བསྐལ་མང་ལས་སྨོན་རྟེན་འབྲེལ་གྱི།  །མཐུ་དང་ལྡན་པའི་སྐྱེས་བུ་ཉོན།  །ཕོ་ཉས་བསྐུལ་བ་དོན་ཡོད་ཀྱི།  །དགོས་པ་ཤིན་ཏུ་ཆེ་བའི་ཕྱིར།  །རྫ་རྒྱལ་དཔའ་བོའི་ཉེ་འདབས་སུ།  །སོང་ལ་ཡུན་ཅིག་དེར་བཞུགས་ཤིག།  རྨ་རྒྱལ་སྤོམ་རས་ལོངས་སྤྱོད་སྟེར།  །ཟླ་རྒྱལ་དཔའ་བོས་ཞབས་ཏོག་ཡོད།  །དེ་ནས་སྦྲུལ་གྱི་ལོ་ཁྱིམ་དུ།  །གསེར་གྱི་ལུང་པར་བཞུད་ལ་སོང་།  །སློབ་མའི་འདུ་བ་རྒྱས་པ་དང་།  །སྙན་དང་གྲགས་པའི་དཔལ་ཡང་ཡོད།  །གནས་འདིར་ཡུན་རིང་སྡོད་དྲག་ན།  །འཇིགས་པ་ཆེན་པོ་ཐོག་ཏུ་འབེབས།  །དེ་ཕྱིར་དེ་དོན་ཤེས་པར་གྱིས།  །ལོ་ཁྱིམ་འདི་ཟད་ཕྱི་མའི་དུས།  །ནག་པོ་བདུད་ཀྱི་རྒོལ་བ་ལས།  །སྲིད་པའི་བོང་བུ་ནག་པོ་རྙེད།  །ཕྱུགས་ལ་ཧབ་ཤ་བྱེད་པ་འབྱུང་།  །གཟའ་བདུད་ནག་པོ་ཆེན་པོ་དེ།  །བདུད་དཔུང་འཇོམས་པའི་ཕོ་ཉར་ཐོངས།  །ངན་པའི་རྐྱེན་གྱིས་འཚེངས་དུས་ཡོད།  །ཅེས་ཟེར་ནས་ཡལ།  དབྱར་ཟླ་འབྲིང་པོའི་ཚེས་གཅིག་གི་ཉིན་བྱང་རྫ་ཆུ་ཁར་བཤུལ་ལམ་ལ་ཞུགས་ནས་ཕྱིན་ཚེ་རྨ་སྟོད་ནས་འབྲོང་སུམ་བརྒྱ་ཙམ་ཞིག་བདག་ཅག་དང་ལྷན་ཅིག་འགྲོགས་པའི་ཚུལ་དུ་ཞག་གསུམ་གྱི་བར་ཉིན་མོ་སྔ་ལོགས་སུ་འགྲོ་ཞིང་མཚན་མོ་ཉེ་སེར་གནས་པར་བྱེད་པ་དེ་རྨ་རྒྱལ་གྱིས་བསུ་སྐྱེལ་དུ་གོ།  དེ་ནས་ནུབ་གཅིག་རྨི་ལམ་ན་ཞིང་སྐྱོང་ཀུན་དགའ་གཞོན་ནུས་ང་སྔོན་དུ་འགྲོ་ནས་མཚམས་སྤྲུལ་ལ་སྔ་ཞུས་བཏང་སྟེ་གནས་ཚང་ལེན་པར་བྱེད་དགོས་ཟེར་ནས་སོང་།  དེ་ནུབ་མཚམས་སྤྲུལ་པས་མདང་སུམ་མི་ནག་པོ་སེངྒེའི་མགོ་ཅན་བེར་ནག་གྱོན་ཞིང་རྟ་ནག་རྟིང་དཀར་ལ་ཞོན་པ་ཞིག་གིས་གནས་ཁང་ལ་མདུང་རྟིང་གིས་བརྒྱབ་ནས་ངེད་ལ་གནས་ཁང་ཕྱུངས་ཤིག་ཟེར་ནས་སོང་པས་གཏེར་སྟོན་རིན་པོ་ཆེ་དཔོན་སློབ་སང་ཉིན་འབྱོན་འོང་བ་འདྲ་བས་བཅའ་ལག་ཐམས་ཅད་སྦྲ་ནང་དུ་སྤོས་གསུངས་ནས་གནས་ཁང་ཕྱུངས།  དེ་ཉིན་མ་མོའི་དྲིལ་དཀར་དུ་ཞག་ས་བྱས་ཤིང་རྫ་རྒྱལ་དགོན་ནས་བསུ་མི་བཏང་བ་དང་འཕྲད།  ཕྱིར་ཉིན་རྫ་རྒྱལ་དགོན་དུ་སླེབས་ཚེ་སེར་ཕྲེང་གིས་བསུ་བ་དང་།  མཚམས་སྤྲུལ་དཔོན་སློབ་གསུམ་ཀྱང་བསུར་བྱུང་བ་དང་འཕྲད་དེ་བདག་གི་བུ་ཆུང་ཁྲི་རུ་མངའ་གསོལ་ཏེ་མཚམས་སྤྲུལ་རིན་པོ་ཆེའི་གཟིམ་ཁང་དུ་གནས་ཁང་བྱས་ནས་བསྡད།  དེར་ཞག་བདུན་ལ་བབས་པའི་ནུབ་ཀློང་ཆེན་རྡོ་རྗེ་གཟི་བརྗིད་ཀྱི་ཞལ་མཇལ་ནས་རྫོགས་པ་ཆེན་པོའི་གདམས་པ་ཡོངས་སུ་རྫོགས་པ་གནང་སྟེ་བཀའ་གཏད་དང་བཅས་པ་རྫོགས་པར་བྱས་ནས་ཡང་འདི་སྐད་གསུངས།  ཁྱོད་ཀྱི་བུ་འདི་ངའི་སྤྲུལ་པ་རིག་འཛིན་འཇིགས་མེད་གླིང་པ་ཞེས་བྱ་བ་ཡིན་ཏེ་མཚམས་སྒྲུབ་ལ་འབད་པ་ཐོན་ནས་རྟོགས་པ་ཕུལ་དུ་ཕྱིན་པ་ཞིག་འབྱུང་བར་གྱིས་ཤིག་དང་བསྟན་འགྲོ་ལ་ཕན་འགའ་ཐོགས་པར་འགྱུར་སྙམ་གྱི།  ཞེས་གསུངས་ཤིང་མི་སྣང་བར་ཡལ་ལོ།  །དེ་ནས་དབྱར་ཐ་ཆུང་གི་ཚེས་དགུའི་ནུབ་མཁའ་འགྲོ་མ་ཞིག་གིས་སང་ཉིན་དཔལ་སྤྲུལ་པའི་མདུན་དུ་བུ་ཆུང་ཁྲིད་སོང་ལ་བཤད་པ་འགའི་བཀའ་ལུང་ཞུས་ན་འཐོབ་པར་འགྱུར་ཟེར།  ཚེས་བཅུའི་ཉིན་དཔལ་སྤྲུལ་པའི་མདུན་དུ་སླེབས་ཚེ་ཚོགས་མཆོད་མཛད་ནས་དངོས་གྲུབ་ལེན་སྐབས་སུ་ཐུག་པས།  བླ་མའི་ཞལ་ནས་རྟེན་འབྲེལ་ཤིན་ཏུ་ལེགས་པས་དྲང་བ་དེ་འདི་གཉིས་ལ་བྱིན་གསུངས་བཞིན་དུ་མཁྱེན་སྤྲུལ་དང་ངེད་གཉིས་ཀྱིས་དྲང་བ་ཐོབ་པས་དགའ་སྤྲོ་དཔག་ཏུ་མེད་པ་བྱུང་།  སྤྲུལ་སྐུ་འདིར་བཞུགས་ན་ཆོས་ཁྲིད་རྣམས་འཐོབ་འོང་གསུངས་བཞིན་དེར་བསྡད་པས།  སྤྱོད་འཇུག་དང་།  མངོན་རྟོགས་རྒྱན།  དབུ་མ་འཇུག་པ།  གསང་བ་སྙིང་པོ་སོགས་ཁྲིད་ལུང་མང་ཞིག་གསུངས་པ་ཐོབ་བྱུང་།  དེ་ནས་མཁྱེན་སྤྲུལ་དཔོན་སློབ་དགོན་དེར་བཞུགས་ནས།  རང་ཅག་དཔོན་སློབ་ལྔ་ཙམ་དགུན་ཟླ་འབྲིང་པོའི་ཚེས་གསུམ་ཉིན་རང་ཡུལ་དུ་ཐེག་ཚེ་ཁ་བ་ཆེན་པོ་ཞིག་འབབ་གྲབ་བྱེད་པ་ལ་སྐྲག་ནས་འགྱོད་དུ་ཡོད་པའི་ནུབ།  གནོད་སྦྱིན་ཤན་པ་དམར་ནག་གིས་ཁྱེད་རྣམས་མ་འཇིགས་མ་སྡུག་དང་ཁ་བ་ངས་གཅོད་ཀྱི་སྔར་བབས་ཟིན་པ་དེ་ལས་མི་བཏང་ཟེར་བ་རྨིས།  དེ་ནས་བཟུང་དགུན་ཐོག་དེར་ཁ་བ་བབ་མ་བྱུང་།  དེ་ནས་ལོ་གྲངས་བཞི་བཅུ་ཞེ་ལྔ་ལ་བབས་པ་ཧོར་ཟླ་གཉིས་པའི་ཚེས་ལྔའི་ཉིན་ཆོས་སྐོར་ལྷ་བསྟེན་གྱི་རྟ་སྒ་མ་བླངས་ཁོ་བཙོན་དུ་བཟུང་སྟེ་མནར་གཅོད་མང་པོ་བྱས།  དེར་ཁ་མཆུ་བཤད་པའི་མི་དྲག་ཤོས་པ་འགའ་བྱུང་བས་གྱོད་བསྡུམ་ནས་ཁོང་རྣམས་རང་ཡུལ་ལ་སོང་།  དབྱར་ཟླ་ཐ་ཆུང་གི་ཚེས་བཅུ་གཉིས་ཀྱི་ཉིན་གནོད་ལན་དུ་ཕྱུགས་རྣམས་དེད་ནས་སོང་ཚེ་བདག་དཀར་བསོད་ལ་སོང་ནས་ཁྱིམ་ན་མེད་པའི་སྐབས་ཞིག་ལ་ཐུག་པས་འབོད་དུ་བྱུང་བས་རང་ཁྱིམ་དུ་སླེབས་པར་བྱས།  ཀུན་གྱིས་ད་ནི་མཐུ་བྱེད་དགོས་ཟེར་བ་ལ་བདག་གིས་ཟླ་བ་ཡར་འཕེལ་ལ་མཐུ་བྱས་ན་ཐུབ་པར་དཀའ་སྟེ་ཟླ་བ་མར་འགྲིབ་ལ་རྦད་དགོས་ཞེས་སྨྲས་ནས་ཚེས་བཅུ་བདུན་གྱི་མུན་དགུང་མཚམས་སུ་རང་གི་གཏེར་ཁའི་གཟའ་རྒོད་རྦད་པས་དེ་ནུབ་དགྲ་བོའི་ཁྱིམ་དུ་གཟའ་བབས།  དེའི་ཕྱིར་ཉིན་སྦྲ་ཐོག་ཏུ་སྤྲུལ་ནག་གདུང་མ་ཙམ་ཞིག་གིས་འཁྱིལ་འགྲོས་བྱས།  གནག་ཕྱུགས་མང་པོ་གཟའ་གྲིབ་ཀྱིས་ཤི།  དགྲ་བོ་དེ་དཔོན་གྱིས་བཙོན་ཁང་དུ་བཅུག་ནས་སྡུག་བསྔལ་མང་པོ་ཐོག་ཏུ་ཕབ།  དེ་ནས་བདག་གི་ཡི་དམ་གྱི་ཞལ་ཧོམ་འབུམ་ཕྲག་གྲངས་ལོངས་པར་བྱས་ཚེ་དགྲ་བོའི་ཞིང་གི་སྟེང་དུ་སེར་བ་དྲག་པོ་བབས་ནས་རི་ཆེན་པོ་བསྙིལ་བས་ཞིང་ར་ཉེ་ཞེས་བྱ་བ་དངུལ་རྡིལ་ཚད་གསུམ་གྱི་རིན་ཐང་ཅན་རྡོ་སྤུངས་བསལ་མི་ནུས་པས་བཀབ་སོང་།  གཞན་ཡང་ཡུལ་ཕྱོགས་དེ་དག་གི་ཞིང་རྣམས་སུ་སྟོན་འབྲས་ཕུལ་གང་ཙམ་ཡང་མ་ལུས་པར་བཅོམ་ནས་མུ་གེ་ཆེན་པོ་བྱུང་སྟེ།  ངའི་གནག་ཕྱུགས་རྣམས་སླར་གཏད་ནས་གྱོད་ཡག་པོ་བྱུང་།  ཡང་མཐར་དགྲ་བོ་ཕུང་བརླག་ཏུ་སོང་ནས་མཐུའི་གྲགས་པ་ཐོབ་སྟེ་སྔར་ཉེས་མཐར་འཚེངས་ཟེར་བའི་མཁའ་འགྲོའི་ལུང་བསྟན་ཐོག་ཏུ་ཕེབས་པ་བྱུང་ངོ་།  །དེ་ནས་རང་ལོ་བཞི་བཅུ་ཞེ་དྲུག་ལ་བབས་ཚེ་གསེར་སྟོད་བླ་མ་རོང་དུ་འགྲོ་སྙམ་ནས་ཕོ་ཉ་མི་གསུམ་སྔོན་དུ་བཏང་བས་སྨར་སྟོད་གཡུང་དྲུང་ལྕགས་རྩེས་ཀོ་ལོང་བསྡམས་ནས་རྟ་རྣམས་ཉལ་ཏེ་འགྲོ་མ་བཏུབ་པར་ཕྱིར་ལོག་ཚེ་རྟ་རྣམས་ལངས་ནས་སླར་སླེབས་བྱུང་།  དེར་གཞི་བདག་དེའི་མདུན་དུ་བསང་མཆོད་དང་དར་ཟབ་མང་པོ་ཕུལ་བས་ཁོ་མངོན་སུམ་དུ་འོང་ནས་ཁྱེད་ངེད་ཀྱི་གནས་འདི་ནས་མི་འཕོ་བར་སྐུ་མཁྱེན་ཞེས་ཟེར་བ་ལ།  ངས་ཁྱེད་དེ་སྐད་མ་ཟེར་ཅིག།  མཁའ་འགྲོས་ལུང་བསྟན་པ་བཞིན་མི་འགྲོ་ཐབས་མེད་ཡིན་སྨྲས་པས།  འོ་ན་ང་ཡང་ད་ལོ་འགྲོ་ཐབས་མེད་ཀྱང་སང་ཕོད་ཁྱོད་འགྲོ་ས་རུ་འགྲོ་དགོས་ཟེར།  བདག་གིས་སང་ཕོད་དབྱར་ཐ་ཆུང་གི་ནང་དུ་ཁྱོད་ཀྱིས་མིང་ནས་བོས་ཚེ་ནམ་མཁའ་སྤྲིན་གྱི་ནང་ནས་ཁུ་འཕང་འབེབས་ནུས་ན་ཁྱོད་སླེབས་པའི་ལྟས་ཡིན་ཏེ་མཆོད་གསོལ་ཀྱང་བྱེད་ཅེས་སྨྲས།  དེ་ནས་དབྱར་ར་བའི་ཚེས་བཅུ་གསུམ་ལ་ལམ་དུ་ཞུགས་ནས་གསེར་ཁོག་ཏུ་སོང་བའི་ཉིན་ཁོབ་ལེ་གཟི་ལྡན་ཡིན་ཟེར་བའི་མི་ནག་གཡག་ཁམ་པ་རྭ་མེད་ལ་ཞོན་པ་ཞིག་གིས།  ཁྱོད་མི་འདུག་ན་འདི་ཁྱེར་ཟེར་ནས་གཡག་ནག་པོ་ཞིག་ཁྲིད་ནས་བྲོས་སོང་བ་ལ།  བདག་གིས་འགུག་གཞུག་བྱེད་གྲབ་བྱས་ཚེ།  གནོད་སྦྱིན་ཆེན་པོ་ན་རེ།  མ་བྱེད་མ་བྱེད་སྐྱུར་ཐོངས་དང་ལེགས་ཞེས་ཟེར་བས་མ་བྱས།  དབྱར་ཟླ་འབྲིང་པོའི་ཚེས་གསུམ་ལ་གསེར་སྟོད་བླ་མ་རོང་དུ་སླེབས།  དེ་ན་ཀླུ་གདུག་པ་ཅན་ཞིག་གནས་པ་དེ་མི་གཅེར་བུ་ཞིག་ལ་ཞོན་ནས་བདག་གི་མདུན་དུ་འོངས་ཏེ་ཁྱོད་འདི་རུ་འདུག་མི་ཉན།  ངེད་ལ་ཤིན་ཏུ་གནོད་དོ་ཟེར་བ་ལ།  ངས་ཁྱོད་ལ་དཔལ་མཁར་ལབ་རྩེ་ཕུལ་དང་མི་སྐྱོན་སྨྲས་པས།  སྦྲུལ་ནག་པོ་ཞིག་གིས་ལྕག་བྱས་ནས་ང་ལ་བྲབ་པ་ན་ཁོའི་སྐེ་ནས་བཟུང་སྟེ་བཙིར་བས་ཁོ་བྲེད་ཅིང་དངངས་ནས་ཁྱོད་ཀྱིས་ང་ཐོང་དང་གནོད་པ་བྱེད་རེ་ན་ར་ཀ་དཔང་ཞེས་ཟེར་བས།  བདག་གིས་ཀློད་བཏང་བ་དང་ཆུ་མིག་ཏུ་མཆོང་ཐལ།  ལོ་ཁྱིམ་ཕྱི་མ་རང་ལོ་ཞེ་བདུན་ལ་བབས་པ་ཧོར་ཟླ་གསུམ་པའི་ཚེས་བཅུ་གསུམ་ལ་བུད་མེད་ནག་མོ་ནུ་མ་གཉིས་བསྣོལ་ནས་ཕྲག་ལ་བཀལ་བ།  སྐྲ་དམར་པོ་ས་ལ་སླེབས་པ་གཅེར་བུ་གོས་མེད་པ་ཞིག་གིས་བདག་ལ་མ་རུངས་མི་སྲུན་གདུག་པ་ཅན་ཁྱོད་འདིར་སྡོད་མི་ཆོག།  བདག་སྟོད་ཟླ་སྙིའི་གོང་བ་མན་ཆད་ནས་སྨད་ལི་རྩང་ཡན་ཆད་ཀྱི་ཕྱུགས་འཆི་ཁ་མ་དག་གི་སྲོག་དབུགས་ལ་དབང་བྱེད་པ་མོ་ཡིན།  ཁྱོད་ཀྱིས་ཅི་སྙམ་འདུག་གི་འགྲོ་ཐུབ་ན་སོང་ཟེར་བ་མངོན་སུམ་དུ་བྱུང་ནས་རེ་བ་ནག་པོའི་དར་གྱིས་ང་ལ་བརྒྱབ་པ་ན།  ངས་མོའི་ལག་པ་གཡས་ནས་བཟུང་སྟེ་རེ་དར་འཕྲོག་སྟེ་སྙིང་ལ་ཕུར་པ་འཛུག་གྲབ་བྱས་པས།  མོ་ན་རེ།  ང་ཐོངས་སྡིག་དྲེད་ཟེར་བ་ལ།  ངས་ཁྱོད་གསོད་པར་མི་བྱེད་རེ་སྨྲས་པས།  མ་གསོད་དང་ཁྱོད་ལ་གནོད་པ་བྱེད་རེ་ན་ར་ཀན།  ཅེས་ཟེར་ཞིང་ཁས་བླངས་པས་བཏང་།  དེ་ནི་གསེར་ལུང་འཛི་ཆེན་གྱི་ཐང་དེའི་སྨན་མོ་ཡིན་འདུག།  དེ་ནས་དབྱར་ཟླ་ཐ་ཆུང་གི་ཚེས་བཅུའི་ཉིན་རི་མཐོ་བའི་རྩེ་མོར་ཕྱིན་ནས་གཡུང་དྲུང་ལྕགས་རྩེ་ཞེས་ལན་གསུམ་དུ་བོས་པ་ན་ནམ་མཁའ་སྤྲིན་མེད་སྔོ་སང་ངེ་བའི་ནང་ནས་ཁུ་འཕངས་དཀར་པོ་གྲོ་བ་ཙམ་བབས་བྱུང་ནས་མི་ཀུན་ངོ་མཚར་བར་གྱུར་ཏོ།  །ཟླ་བ་དེའི་སྔ་སོར་མཁའ་འགྲོ་ཡེ་ཤེས་མཚོ་རྒྱལ་ཡིན་སྐད་པའི་བུ་མོ་ཟ་འོག་ཁ་དོག་སྣ་ལྔའི་གོས་རིང་ཐུང་བྱས་ནས་གྱོན་པ་རིན་པོ་ཆེ་སྣ་ཚོགས་ཀྱི་རྒྱན་ཕྲེང་གིས་བརྒྱན་པ་ཞིག་བདག་གི་ཐད་དུ་བྱུང་ནས།  སྐྱེས་བུ་དམ་པ་ཁྱོད་ལ་བཞི་བཅུ་ཞེ་བརྒྱད་ཀྱི་ལོར་ཚེ་གེགས་ཆེན་པོ་ཞིག་ཡོད་པས་དེ་སེལ་ཐབས་ལ་འབད་པ་གལ་ཆེ་ཞེས་ཟེར་བ་ལ།  བདག་གིས་ཐབས་ཅི་དགོས་སྨྲས་པས།  ཀྱཻ།  ཉོན་ཅིག་གསོན་ཅིག་རིགས་ཀྱི་བུ།  །སྡོང་གི་རིགས་སུ་སྐྱེས་པ་ཡི།  །བུ་མོ་སྒྲོན་གྱི་མིང་མཐའ་ཅན།  །སྔོན་གྱི་སྨོན་ལམ་མཐུ་ཡོད་ཕྱིར།  །དེ་ཉིད་ཕྱག་རྒྱར་བསྟེན་གྱུར་ན།  །ཚེ་ཡི་གེགས་སེལ་འབྱོར་པ་རྒྱས།  །ནོར་བུ་རིན་ཆེན་གསུམ་ཀྱང་རྙེད།  །ས་གསུམ་སྙན་དང་གྲགས་པས་ཁྱབ།  །ནོར་འཁྲུལ་མེད་པ་གནད་དུ་ཤེས།  །ནོར་ན་གནོད་པའི་རྒྱུ་རུ་འགྲོ།  །དེ་ལྟར་གནད་ཀྱིས་ཟིན་སྲིད་ན།  །བུ་སློབ་འདུ་བ་རྒྱས་པ་ཡིན།  །མཐའ་མིས་དམོད་པ་མཐུ་བཙན་པས།  །ཆོས་བདག་སྐྱེས་བུའི་སྐུ་ཚེར་གནོད།  །དེ་ལ་ཡི་དམ་ལྷ་བསྒོམ་ཞིང་།  །སྟོང་ཉིད་ལྟ་སྒོམ་ལྷུར་ལེན་གནད།  །ད་ནས་མི་ལོ་བརྒྱད་ཅུ་ལ།  །ཐུག་ཚེ་ཆོས་ཀྱི་བདུད་རྩི་ཡལ།  །ས་སྟེང་ཀླ་ཀློའི་བསྟན་པས་ཁྱབ།  བསྐལ་པ་མེ་བྱ་ནས་བཟུང་སྟེ།  །མི་རྣམས་དྲན་པ་ཉམས་པ་དང་།  །འཁྲུགས་དང་རྩོད་པའི་ལས་ཀར་འབད།  །རི་ཀླུང་ཇག་རྐུན་ཆོམ་པོས་གང་།  །བསྟན་འགྲོའི་བདེ་སྐྱིད་ཉི་མ་ནུབ།  །སྤྲུལ་ནག་ཆུ་རུ་འཁྱིལ་བའི་ཚེ།  །ལྷོ་མོན་ཕྱོགས་སུ་ཁྱོད་སླེབས་ན།  །སྦས་ཡུལ་གཉན་པོའི་སྒོ་འབྱེད་པའི།  །དུས་ཚིགས་ལགས་ཏེ་ཡོལ་མི་རུང་།  །དེ་ལྟར་གནད་དང་མི་ལྡན་ན།  །རྡོ་ཡུལ་སྟོད་ཀྱི་ས་ཆ་རུ།  །གདུལ་ཞིང་ཡོད་ཀྱི་ས་ཆགས་མཛོད།  །དབང་ཕྱུག་མ་ཧཱ་དཱེ་ཝ་ལ།  །བློ་ཕུག་གཏད་ན་རེ་ཞིག་དགེ།  ཚིག་དེ་སྙིང་གི་དཀྱིལ་དུ་ཟུངས།  །ཞེས་ཟེར་ནས་ཡལ་སོང་།  དེ་ལྟར་ཚུལ་བཞིན་ལག་ལེན་ལ་བཏབ་པས་ཚེའི་གེགས་འཕྲང་ཆེན་པོ་ལས་ཐར་སོང་།  དེ་ལྟར་མཁའ་འགྲོས་ལུང་ཇི་ལྟར་བསྟན་པ་བཞིན་རང་ལོ་ང་དགུ་པ་ཆུ་སྦྲུལ་ལོར་གནས་པདྨ་བཀོད་དུ་འགྲོ་གྲབ་བྱས་ཀྱང་གཞན་རྐྱེན་གྱིས་རྟེན་འབྲེལ་འཕྱུག་ནས་འགྲོ་སྟབས་མ་འགྲིགས།  དེ་རྗེས་བླ་མ་རོང་དུ་ཁང་པ་བརྩིགས་པ་ལ་སྨོན་ལམ་ལོག་པའི་བདུད་སྤྲུལ་འགས་བར་ཆད་བརྩམས་ནས་སྡོད་གནས་མ་ལེགས་པའི་ལྟས་འགའ་བྱུང་།  དེ་ནས་རང་ལོ་བཞི་བཅུ་ཞེ་བརྒྱད་ཀྱི་ལོ་ཁྱིམ་ལ་བབས་པའི་དགུན་དུས་སློབ་མའི་ཚོགས་བརྒྱ་ཕྲག་ཙམ་ལ་བདུད་གཅོད་དང་རྫོགས་པ་ཆེན་པོའི་ཁྲིད་བཏབ་ཚེ་དགུན་ཟླ་འབྲིང་པོའི་ཚེས་བཅུའི་ནུབ་མཁའ་འགྲོ་མ་ཀུན་ཏུ་རྒྱུ་བ་གསལ་བྱེད་མ་ཡིན་ཟེར་བའི་བུད་མེད་ཞིག་གིས་བདག་ལ་འདི་སྐད་ཟེར།  ཀྱཻ།  མ་ཡེངས་མཁའ་འགྲོའི་ངག་ལ་ཉོན།  །ཡུལ་འདིར་ཁྱོད་ཀྱི་བསྟན་འཛིན་པའི།  །སྐྱེས་མཆོག་པདྨའི་མིང་ཅན་དེ།  །ཉམས་ལེན་གནད་བསྣུན་ངེས་མེད་རྒྱུ།  །སྐྱེས་མཆོག་དོན་སེམས་མིང་ཅན་ནི།  །རྫོགས་ཆེན་དགོངས་པ་ཟང་ཐལ་གྱི།  །བཀའ་བབས་ངེས་མེད་རི་སུལ་འཛིན།  །ལོག་ལམ་བདུད་ཀྱིས་མ་བསླུས་ན།  །འཇའ་ལུས་ཆེན་པོར་མངོན་འཚང་རྒྱ།  །སྐྱེས་མཆོག་རྒྱ་མཚོའི་མང་ཅན་གྱིས།  །སྙིང་པོའི་སྒྲུབ་པ་ལྷུར་ལེན་ཅིང་།  །ཚེ་དང་སྒྲུབ་པ་མཉམ་བྱས་ན།  །ཡང་དག་རྫོགས་པའི་སངས་རྒྱས་འཐོབ།  །སྐྱེས་མཆོག་གྲོལ་གྱི་མིང་མཐའ་ཅན།  །ཆོས་བརྒྱད་ཡུལ་དུ་མ་འཁྱོལ་ན།  །འཇའ་ལུས་སྒྱུ་མའི་སྐུ་འགྲུབ་འགྱུར།  །སྐྱེས་མཆོག་རབ་ཀྱི་མིང་མཐའ་ཅན།  །ཆོས་བརྒྱད་རྐྱེན་གྱིས་མ་བསླུས་ན།  །འཇའ་ལུས་སྒྱུ་མའི་སྐུ་མཆོག་འགྲུབ།  །དེ་དག་སྣོད་ལྡན་བུ་སློབ་སྟེ།  །དུས་ངན་དམུ་རྒོད་སྐྱེས་བུ་ལ།  །གདམས་པ་འཆད་ན་མཁའ་འགྲོས་བསླུ།  །མི་འདོད་འཚུབས་མ་བཞིན་དུ་ལྡང་།  །དེ་ཕྱིར་གསང་བའི་རྒྱ་སྡོམ་མཛོད།  །ཅེས་ཟེར་ནས་ཡལ།  ཡང་ཧོར་ཟླ་བཅུ་གཉིས་པའི་ཚེས་བཅུ་དྲུག་གི་ཉིན་མཁའ་འགྲོ་མ་གསང་མཛོད་ཆེན་མོ་ཡིན་སྐད་པའི་བུད་མེད་ནག་མོ་ཞིག་གིས་ན་རེ།  ཀྱཻ།  གནས་འདི་མཁའ་འགྲོ་དཔལ་བཙུན་མ།  །པདྨ་མཁའ་འགྲོ་འདུ་བའི་གླིང་།  །ཕ་ཀི་ནགས་ཀྱི་ཁྲོད་དེ་རུ།  །འབྱུང་བ་ཤིང་གི་ལྷ་མོ་སྟེ།  །སྨན་མོ་ཤ་ཟ་སྲོག་འཕྲོག་མ།  །མི་སྲུན་སྨན་མོ་བཞི་དང་འགྲོགས།  །དེ་ནི་དྲག་པོས་མ་ཐུལ་ན།  །ཞི་བའི་ལས་ཀྱིས་བཀོལ་ནུས་མིན།  །དུས་ཚིགས་སྤྲེའུའི་ལོ་རུ་བབས།  །རྟགས་སུ་ཉམས་སད་བྱེད་དུ་འོང་།  །དྲག་ལས་མངོན་སྤྱོད་དག་ལ་རེམ།  །ཞེས་ཟེར་ནས་ཡལ།  དེ་ནས་རང་ལོ་བཞི་བཅུ་ཞེ་དགུ་ལ་བབས་པ་ཧོར་ཟླ་གསུམ་པའི་ཚེས་དྲུག་གི་ནུབ་མཁའ་འགྲོ་མ་དམར་མོ་ཟ་འོག་དམར་མོའི་ལའུ་གྱོན་པ་ཞིག་གིས་བདག་གི་ལག་པ་གཡས་ནས་བཟུང་སྟེ་རི་བོ་ལྕང་ལོ་ཅན་དུ་ལྟད་མོ་ལ་ཨེ་འགྲོ་ཟེར་བ་བཞིན།  སྟེང་ཕྱོགས་ཀྱི་ནམ་མཁར་དཔག་ཚད་བརྒྱད་དུ་འཕགས་པའི་མཁའ་ལ་འཕུར་ལྡིང་གིས་ཤར་གྱིས་སོང་བས་ལུང་པ་ཆེན་པོ་མདའ་ན་ནགས་ཚལ་དུ་ལྷུན་སྟུག་པ།  གཞུང་ན་ཙནྡན་དང་སྨྱུག་མ་རྦ་དང་རྩི་ཤིང་གིས་གང་བ།  ཕུ་ན་རི་བོ་སྔོ་སང་ངེ་བ་འོད་ནམ་མཁའ་ལ་འཕགས་པས་ཕྱོགས་ཐམས་ཅད་སྦྲེལ་བ།  དཔེར་ན་ཉི་མ་ལྟ་བུའི་འོད་ཟེར་རབ་ཏུ་འབར་བ་ཞིག་གི་རྩ་བར་མཚོ་ནག་ལ་གཏིང་ཟབ་པས་ཡོངས་སུ་འཁོར་བའི་ནང་དང་འགྲམ་ན་འབྱུང་པོ་དང་།  །རོ་ལངས་དང་།  ཤ་ཟ་དང་།  དབུགས་ལེན་གྱི་སྡེ་ཚོགས་གཟུགས་མི་སྡུག་པ་སྲིན་པོ་ལྟ་བུ་དང་།  མགོ་བརྙན་ཅན་སྣ་ཚོགས་ཀྱིས་ཀུ་ཅོ་དང་གད་རྒྱངས་ཀྱི་སྒྲས་སྣང་སྲིད་ཀྱི་ལྷ་འདྲེ་དབང་དུ་སྡུད་པ་དེ་ལྟ་བུས་ཡུལ་དེ་གང་བ་ཞིག་སྣང་།  རི་བོ་དེའི་རྩེ་མོར་ཐོད་པ་ར་རི་གསུམ་གྱི་རྩིག་པ་ལ་གནམ་ལྕགས་ཀྱི་གཟེར་གདབ་པར་ཁྲོ་ཆུ་ཞུན་མས་ཞལ་བ་བྱས་པའི་གཞལ་ཡས་ཁང་ཡངས་པའི་དབུས་སུ།  སྦལ་པ་དང་ཉ་བོ་ཆེ་དང་སྤྲུལ་ཆེན་བརྩེག་པའི་ཁྲིའི་ཁར་པདྨ་དང་ཉི་མའི་གདན་ལ་ཁྲོ་བོ་མཐིང་ནག་བལྟར་མི་བཟོད་པ་སྦྲུལ་དང་མི་མགོའི་ཕྲེང་བ་རྒྱན་དུ་འཆང་བ།  ཐལ་ཆེན་གྱི་ཚོམ་བུ་དང་།  རཀྟའི་ཐིག་ལེ།  ཞག་གི་ཟོ་རིས་རྣམས་ཆུ་ནང་དུ་གཟུགས་བརྙན་བཀྲ་བ་ལྟར་ཤར་ཡོད་པ།  ཞལ་གསུམ་ཕྱག་དྲུག་ཞབས་བཞི་དང་ལྡན་པ།  མེ་དཔུང་དམར་ནག་ཏུ་འབར་བ།  དབུ་སྐྲ་དམར་སེར་གྱེན་དུ་འབར་བའི་གསེབ་ནས་ཁྱུང་གི་ཚྭ་ཚྭ་མེ་སྟག་ལྟར་འཕྲོ་བ་ཞིག་ལ་འཁོར་ཁྲོ་བོའི་ཚོགས་བསམ་གྱིས་མི་ཁྱབ་པས་བསྐོར་ནས་འདུག་གོ།  དེ་ལ་བདག་གིས་ཕྱག་འཚལ་ཞིང་བསྐོར་བ་བྱས་ནས་ཞབས་ལ་མགོ་བོས་གཏུག་སྟེ་སྨོན་ལམ་བཏབ་པས།  ཁྲོ་བོ་དེས་ཕྱག་མཚན་རྣམས་བདག་གི་མགོ་ཐོག་ཏུ་བཞག་ནས།  ཁྱོད་ཉིད་དུས་གསུམ་གྱི་རྒྱལ་བ་རྣམས་ཀྱི་རྒྱལ་ཚབས་སུ་མངའ་གསོལ་ལོ།  །འཁོར་བ་ཡོངས་སུ་སྒྲོལ་བའི་དབང་བསྐུར་རོ།  །ཁམས་གསུམ་ཆོས་ཀྱི་རྒྱལ་པོའི་གོ་འཕང་དུ་གྲོལ་བ་ཐོབ་པར་དབུགས་དབྱུང་ངོ་།  །ངའི་སྤྲུལ་པ་གྲུབ་ཆེན་ས་ར་ཧ་པས་ཡུམ་ཁྲོས་མའི་གདམས་པ་བསྟན་པ་དེ་བུ་སློབ་རྣམས་ཀྱིས་ཉམས་སུ་ལེན་པ་ལ་འབད་ན་བར་ཆད་ཐམས་ཅད་ངང་གིས་སེལ་བར་འགྱུར་རོ།  །ཞེས་གསུངས།  དེ་ནས་ཞིང་དེའི་སྟེང་ཕྱོགས་དཔག་ཚད་གཅིག་འདས་པའི་ནམ་མཁའ་ན་ཞིང་ཁམས་ཀྱི་བཀོད་པ་ཡོངས་སུ་རྫོགས་པའི་དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཡངས་པའི་ལྟེ་བར་རིན་པོ་ཆེའི་ཁྲིའི་སྟེང་དུ་སྐུ་ཞི་བ་ཁ་དོག་མཐིང་ནག་མཚན་དང་དཔེ་བྱད་ཀྱིས་སྤྲས་པ་ལོངས་སྤྱོད་རྫོགས་པའི་རྒྱན་དུ་མས་བརྒྱན་པ་ཞིག་དང་མཇལ་ཚེ།  རབ་ཏུ་གུས་པས་ཕྱག་འཚལ་ཞིང་བསྐོར་བ་བྱས་ནས་ཞབས་ལ་མགོ་བོས་གཏུག་སྟེ་སྨོན་ལམ་བཏབ་པས།  བདག་གི་མགོ་ལ་རྡོ་རྗེས་རེག་ནས་ངའི་སྒྲུབ་ཐབས་ཀྱི་དབང་ལུང་ཡོངས་སུ་རྫོགས་པར་གྱུར་ཅིག།  ཅེས་གསུངས་མཐར་རིགས་ཀྱི་བུ་ཁྱོད་ཀྱིས་ཟབ་ཆོས་ཡི་གེར་ཕབ་གྱིན་ཨེ་ཡོད་གསུངས་པ་ལ།  བདག་གིས་འདི་སྐད་ཞུས།  ཡི་གེ་འགའ་ཕབ་ཀྱང་མཁས་པ་དཔྱོད་ལྡན་རྣམས་ན་རེ།  སངས་རྒྱས་ཀྱི་བཀའ་བསྟན་བཅོས་དང་རྒྱལ་བ་གོང་མ་རྣམས་ཀྱི་གསུངས་པ་དེས་ཆོག་ཟེར་བ་མང་བས་དེ་བདེན་འདུག་སྙམ་ནས་མང་པོ་ཕབ་པ་མེད་ལགས་ཞུས་པས།  འཕགས་པའི་ཞལ་ནས།  ཧ་ཧ།  དེ་རྣམས་མཁས་པ་དཔྱོད་ལྡན་མ་ཡིན་ཏེ།  མཐའ་དཔྱོད་བྱེད་པའི་ཤེས་རྒྱུ་མེད་པ་ཡིན།  སྔོན་རབས་མང་པོ་ལ་བརྒྱུད་རིམ་མང་དྲག་པས་བླ་སློབ་དམ་འགལ་གྱི་དབང་གིས་བརྒྱུད་པའི་ཟམ་པ་དང་དབང་ལུང་གི་རྒྱུན་ཆད།  བྱིན་རླབས་ཀྱི་ཆུ་བོ་ཉམས་སུ་འགྲོ་བ་ལ་དགོངས་ནས་ས་རྡོ་རི་བྲག་ཐམས་ཅད་གཏེར་གྱིས་བཀང་བ་ཡིན།  དེ་དོན་མ་ཤེས་པ་བླུན་པོའི་གཏམ་ངེས་པར་ཡིན་མོད།  སྔོན་བྱོན་རྒྱལ་བ་རྣམས་ཀྱིས་གསུངས་པའི་ཆོས་རྣམས་རང་ངོས་ནས་བྱིན་རླབས་ལ་ཉམས་པ་མེད་ཀྱང་གང་ཟག་གི་བྱེད་ལས་ཀྱིས་བྱིན་རླབས་མི་འབྱིན་པ་ཡིན།  དེ་ཕྱིར་དབང་ལུང་གི་བརྒྱུད་པ་མ་ཆད་ན་བྱིན་རླབས་དང་དངོས་གྲུབ་ཉེ་ཞིང་མྱུར་བ་ཡིན་པས་ཤེས་པར་གྱིས་ཤིག།  ཟབ་གཏེར་ཡི་གེར་ཕབ་པ་ཐམས་ཅད་མྱུར་དུ་སྣོད་ལྡན་གྱི་སློབ་མ་རྣམས་ལ་སྟོན་ལ་ཉམས་སུ་བླངས་ནས་གྲོལ་བའི་ས་ལ་སྦྱོར་དུ་ཆུག་ཅིག།  ཕྱི་རོལ་ཀླ་ཀློའི་བསྟན་པ་མཁའ་ལ་ནམ་ལངས་པ་བཞིན་དུ་ཉེར་རུ་འབྱུང་བས་བསྟན་པ་གནས་ཡུན་ཤིན་ཏུ་ཐུང་བས་ན་མྱུར་དུ་སྤེལ་ཅིག།  ཁྱོད་ནི་ང་དང་གཉིས་སུ་མེད་དེ་ངའི་སྔགས་རྣམས་རྟག་ཏུ་ཟུངས་ཤིག།  ད་ནི་དབང་ལུང་རྣམས་རྫོགས་པ་ཡིན།  གདམས་པ་ལ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྟོང་པ་ཉིད་ཀྱི་རོལ་པ་ལས་མ་འདས་པའི་ངང་ཚུལ་ཇི་བཞིན་དུ་ཤེས་པར་གྱིས་ཤིག།  སྟོང་ཉིད་ནི་ནམ་མཁའ་ལྟ་བུ་སྟེ།  བདག་སྣང་དང་གཞན་སྣང་ཐམས་ཅད་ནམ་མཁའ་གཅིག་གི་རོལ་པ་རུ་ཐག་ཆོད་པ་ཞིག་བྱུང་ན་ནམ་མཁའ་རྣམ་པར་དག་པ་ཞེས་བྱ་བ་ཡིན་ཏེ་ལྟ་བ་ཡིན།  དེའི་ངང་མངོན་དུ་གྱུར་པ་ནི་སྒོམ་པ་ནམ་མཁའ་ཀློང་ཡངས་ཞེས་བྱ་བ་ཡིན།  དེ་ལས་མི་འདའ་བ་ནི་སྤྱོད་པ་བྱུང་རྒྱལ་བྱ་བ་ཡིན་པས་ཤེས་པར་མཛོད།  གཞི་ཁྲེགས་ཆོད་ལ་བརྟེན་ནས་ལམ་ཐོད་རྒལ་ཞེས་བྱ་བ་ནི་འོད་གསལ་སྦུབས་འཇུག་གི་གདམས་པ་སྡིག་པོ་ཆེ་བཙན་ཐབས་སུ་འཚང་རྒྱ་བའི་མན་ངག་ཡིན་པས་ཁྱོད་ལོ་གྲངས་དྲུག་ཅུ་རེ་གཉིས་ཕན་ཆད་ལ་གནད་དུ་བསྣུན་ཏེ་ཉམས་སུ་ལོངས་ཤིག།  དེ་ལྟར་ཉམས་སུ་བླངས་ན་ཚེ་ལོ་བརྒྱད་ཅུར་འཕེན་སྲིད་དེ།  ཉམས་སུ་ལེན་པའི་གནད་དང་འཛོལ་ན་ཚེ་ལོ་དྲུག་ཅུ་རྩ་བདུན་ཙམ་ཚེ་ཚད་དུ་ངེས་སོ།  །ཞེས་གསུངས་མཐར་བུད་མེད་དེ་ན་རེ།  ད་འགྲོ་འགྲོ་གནམ་ལ་ལྟོས་ཤིག་ཟེར།  བལྟས་པས་གཉིད་ལས་སད་དོ།  །དེ་ནས་རང་ལོ་ལྔ་བཅུ་ལ་བབས་པའི་དུས་སུ།  སྤྱིར་ན་མི་མ་ཡིན་གྱི་རིགས་རྣམས་རང་གིས་ཁས་བླངས་པ་དེ་ལས་འདའ་མི་སྲིད་པ་ལྟ་བུ་ཡིན་ཀྱང་སྔར་བཞད་པའི་འཛི་ཆེན་གྱི་སྨན་མོ་དེ་ནི་དམ་ལོག་ཤིན་ཏུ་མ་རུངས་པ་ཞིག་ཡིན་པས་ཁས་བླངས་ལས་འདས་ནས།  ཧོར་ཟླ་དང་པོ་ནས་བཟུང་བཞི་པའི་ནང་ཚུན་ཆད་དུ་རིག་མ་དང་བུ་མོ་གཡོག་མོ་ཐམས་ཅད་ཀྱི་སྙིང་ལ་ཞུགས་ནས་སྨྱོ་བ་དང་བརྒྱལ་བ་ལ་སོགས་པ་བྱུང་བས་ཞི་དྲག་གི་ཐབས་ལ་ཇི་ལྟར་འབད་ཀྱང་ཕན་པ་མ་བྱུང་།  བདག་གིས་ལྷ་དཀོན་མཆོག་རྩ་གསུམ་དཔའ་བོ་མཁའ་འགྲོའི་ཚོགས་ལ་གསོལ་བ་བཏབ་ནས་ཉལ་བས།  རང་གི་བླ་མ་དམ་པ་འཇིགས་མེད་པས་ཞལ་གཟིགས་ནས།  ཁྱོད་ཀྱིས་ལྷ་ལ་འོ་དོད་འབོད་དོན་ཅི་ཡིན་ང་ལ་སྨྲོས་ཤིག་གསུངས་པ་ལ།  ཕྱག་འཚལ་ཞིང་གུས་པས་བཏུད་ནས།  བླ་མ་ཐུགས་རྗེ་ཅན་ཁྱོད་ཀྱིས་མཁྱེན་བཞིན་ལགས་ཏེ་བུད་མེད་དང་བུ་མོ་རྣམས་སྨྱོ་འབོག་གི་ནད་ཀྱིས་བཏབ་པ་ལ་རིམ་གྲོ་ཅི་བྱས་ཀྱང་ཕན་པ་མ་བྱུང་བ་འདི་ཅིས་ལན།  བགེགས་གང་རེད།  ཅི་བྱས་ན་ཕན་ཐོགས་ཞེས་ཞུས་པས།  འདི་སྐད་གསུངས།  སྔོན་མཁའ་འགྲོས་ལུང་བསྟན་པ་བཞིན་དྲག་པོ་མངོན་སྤྱོད་ཀྱི་ལས་ཀྱིས་འདུལ་བ་ལས་རིམ་གྲོ་ཇི་ཙམ་བྱས་ཀྱང་ཕན་པ་མེད་ཟེར་བའི་དོན་ཐོག་ཏུ་བབས་པ་ཡིན།  ཞེས་གསུངས་ཏེ་མི་སྣང་བར་ཡལ།  དེ་ནས་བཀའ་བཞིན་དུ་བདག་ནགས་ཁྲོད་དེར་སོང་ནས་ཐུན་གྱིས་བྲབ།  མེ་མདའ་མང་པོ་བརྒྱབ་སྟེ་བྲག་གཉན་བཤིག།  ཤིང་གཉན་བཅད།  རྫས་ངན་གྱིས་བདུག་སྟེ་འཁོར་གྱི་སྨན་མོ་གསུམ་བསྒྲལ་བ་ལས།  ཡང་མཁའ་འགྲོ་སྨ་ར་ཅན་ཟེར་བ་ཞིག་གིས།  གཅིག་བན་བསོས་འདུལ་སྐལ་ཡིན་ཟེར་བས་དེ་བཏང་སྟེ་མཁའ་འགྲོ་ཁྲོས་མའི་སྦྱིན་སྲེག་བླུགས་པས་ཐུལ་བའི་ལྟས་མངོན་སུམ་དུ་བྱུང་།  གཙོ་མོའི་མགོ་ལ་ཕུར་པ་དྲུག་ཅུ་བཙུག་པས་ཁྲོམ་གྱི་ལབ་རྩེ་དཀར་དྭངས་ནང་ལ་བྲོས་སོང་།  །ནད་པ་རྣམས་ནད་ལས་གྲོལ་ལོ།  །དེ་ནས་མཁའ་འགྲོ་གསང་བའི་མཛོད་འཛིན་མས་ད་ནི་རྡོ་ཡི་ངང་པའི་ལུང་པར་སོང་ཟེར་བ་བཞིན་དབྱར་ཟླ་འབྲིང་པོའི་ནང་དུ་དེར་སོང་ནས་བསྡད་པ་ན་སློབ་མ་བརྒྱ་ཕྲག་ཙམ་འདུས་པ་ལ་ཆོས་བཤད།  ཧོར་ཟླ་བརྒྱད་པའི་ཚེས་བཅུའི་ནུབ་མཁའ་འགྲོ་བདེ་བའི་འབྱུང་གནས་མ་ཡིན་ཟེར་བ་གོས་དཀར་གྱོན་ཅིང་ལག་ན་བམ་གྱི་དབྱུག་པ་ཐོགས་པ་ཞིག་གིས་འདི་སྐད་ཟེར།  ཀྱཻ།  སྐྱེས་མཆོག་དམ་པ་ཚུར་ཉོན་དང་།  །ང་ངོ་ཁྱོད་ཀྱིས་མ་ཤེས་ན།  །ང་ནི་བདེ་བའི་འབྱུང་གནས་ཡིན།  །གནས་འདི་ཁྱོད་ཀྱིས་མ་ཤེས་ན།  །བྱང་ཕྱོགས་རྒྱ་གྲམ་རྫོང་ཆེན་ཡིན།  །ཁྱེད་ནི་ཡུན་རིང་འདིར་གནས་ན།  །བསྟན་པ་རྒྱས་ཤིང་འདུ་སྒོ་ཚུགས།  །འགྲོ་དོན་རྒྱ་ཆེན་འབྱུང་སྲིད་དེ།  །ལས་དང་རྐྱེན་གྱིས་དབང་གྱུར་པས།  ཡུན་རིང་འདུག་སྐལ་ངས་མ་མཐོང་།  །གནས་འདིའི་ཤར་ཕྱོགས་ཐུགས་རྟེན་དྲུང་།  ལྷ་མོ་དུང་ལི་སྨན་ཞེས་བྱ།  །ཨོ་རྒྱན་ཆེན་པོའི་ཐུགས་གཏེར་མཛོད།  །དེ་ཡི་མིང་ནས་ལན་གསུམ་བོས།  །ཐུགས་ཀྱི་རྟེན་མཆོག་སྟེར་དུ་འོང་།  །སང་ཕོད་ནམ་མཁའི་སྙིང་པོ་ཉིད།  །ཁྱོད་ཀྱི་སྲས་སུ་འབྱུང་འགྱུར་གྱི།  །བསྟན་དང་འགྲོ་ལ་ཕན་ཐོགས་འབྱུང་།  །བདུད་ཕོ་མི་རིང་བརྙས་མཁས་པས།  །དམག་དང་མཚོན་གྱི་ཡོ་ལངས་འབེབས།  །དེ་ལ་ཞིང་སྐྱོང་མགོན་པོ་དང་།  །གནོད་སྦྱིན་དམར་ནག་གཉེན་པོར་ཐོངས།  །བདུད་ཀྱི་སྡེ་ཚོགས་སྨ་འབབ་བྱེད།  །མ་བརྗེད་སྙིང་གི་དཀྱིལ་དུ་ཟུངས།  །ཞེས་ཟེར་ནས་ཡལ།  ཧོར་ཟླ་དགུ་པའི་ཚེས་བཅུའི་ཉིན་གནས་དེའི་ཉེ་འགྲམ་གྱི་ཤར་དུ་ཚཱ་ཁང་ཞིག་ཡོད་པའི་སར་ཕྱིན་ནས་བལྟས་པས།  བྲག་ཞིག་གི་རྩ་བ་ན་ཤིང་སྡོང་ཞིག་འདུག་པའི་ངོས་ནས་དུ་བ་སྔོ་ཐུ་ལུ་ལུ་འཕྱུར་བ་མཐོང་བས་དེར་ཁ་ཕྱོགས་ནས་དུང་ལི་སྨན་ཞེས་ལན་མང་དུ་བོས་པས།  བུད་མེད་སྔོ་ལྗང་གི་ཁ་དོག་ཅན་ཞིག་འོང་ནས།  ཁྱོད་ཀྱིས་ང་ལ་ཅི་ཟེར་བ་ཡིན།  ཞེས་ཟེར་ཞིང་སླར་ཡང་ཨ་ཅང་ཀུ་རེ་ཡིན།  ཁྱོད་ཁྱེའུ་ཆུང་ལོ་ཙཱ་ཡིན་ཨང་ཟེར།  བདག་གིས་ཡིན་བྱས་པས།  ཨོ་དེ་དེ་ངས་ཤེས་ཟེར་ནས་ཕུར་པ་ཞིག་དང་གྲོ་གའི་ལྤགས་ཤུན་གྱི་ཐུམ་པོ་ཞིག་ཐོགས་པ་དེ་གཉིས་ང་ལ་གཏད་ནས།  འདི་ཨོ་རྒྱན་ཆེན་པོའི་མགུལ་ཕུར་བརྒྱ་རྩ་བརྒྱད་ཀྱི་ནང་ནས་གཅིག་ཡིན།  དེ་ཁྱོད་ལ་གཏད་རྒྱུ་བཞག་པ་ཡིན།  གྲོ་ལྤགས་ཀྱི་ཐུམ་འདི་སངས་རྒྱས་རབ་བདུན་གྱི་འཕེལ་གདུང་ཡིན་ཏེ་སྔོན་རོང་གཏེར་བདེ་ཆེན་གླིང་པ་ལ་གཏད་རྒྱུ་འདི་སོགས་མང་དུ་ཡོད་ཀྱང་ཁོང་གི་རྟེན་འབྲེལ་འཆུག་ནས་ལེན་དུ་མ་བྱུང་བས་ད་ཁྱོད་ལ་གཏད་ནས་གཏོང་ཟེར།  དེ་ནས་གནས་དེའི་ཡོན་ཏན་ཆ་ཚང་བར་བཤད་ནས་སྐུ་བླའི་བསང་ཞིག་ངག་ནས་འདོན་ཏེ།  འདི་ཡི་གེར་ཐོབ་ཅིག་ཟེར་ནས་ཤིང་ལ་ཐིམ་སོང་།  དེ་ནས་མི་མང་པོས་ཁྱོད་སླར་འོང་དགོས་ཞེས་མནའ་དང་ཆོས་ཚིག་གི་ནན་ཆེན་པོ་བཞག་ནས་དེར་མི་འོང་བའི་ཐབས་མ་བྱུང་སྟེ།  རང་ལོ་ལྔ་བཅུ་ང་གཅིག་ལ་བབས་པ་ཧོར་ཟླ་གསུམ་པའི་ཚེས་བཅོ་ལྔའི་ཉིན་སྒར་བཏེགས་ནས་སྟག་གི་འབྲང་ངུའི་མདའ་རུ་སྡོད་ས་བྱས་པའི་སྐབས།  ཧོར་ཡུལ་ནས་མི་མཛེ་བོ་ཞིག་སླེབས་བྱུང་བས་དེ་ལ་ཕན་པའི་ཐབས་ཤིག་བྱ་དགོས་སྙམ་དུ་ཡོད་ཚེ།  དབྱར་ཟླ་ར་བའི་ཚེས་བཅོ་ལྔའི་ཉིན་མཆོག་རྩང་གི་དམག་མི་བརྒྱ་ཕྲག་ཙམ་བྱུང་ནས་བདག་གི་སྦྲ་ལ་མེ་མདའ་ཉི་ཤུ་ཙམ་བརྒྱབ་ཀྱང་སྦྲ་མ་ཕིག་པར་མདེའུ་རྣམས་ཐང་ལ་ལྷུང་འདུག།  དེ་ལ་བདག་གིས་གཏེར་སྒྲོམ་ཐང་དུ་ལན་གསུམ་བརྡབ་ནས་དམོད་པ་བོར།  དེ་ནས་དམག་རྣམས་ཕྱིར་ལོག་ཚེ་ལྟས་ངན་འགའ་བྱུང་།  སྣ་འདྲེན་ནང་དབྱེན་མཁན་ཞིག་ཡོད་པ་དེ་ཟླ་བ་གཅིག་ལས་མི་འགྱང་བར་ཤི།  དམག་དཔོན་སྣ་འདྲེན་དམག་མི་རྣམས་ཀྱི་ནང་ནས་མང་པོ་ཞིག་ལོ་མ་འདས་པར་ཤི་སོང་།  རྐྱེན་དེ་དག་གིས་དེར་སྡོད་པའི་ཐབས་མ་བྱུང་བས་སླར་བླ་མ་རོང་དུ་སྐྱས་ཐེགས་པ་ཡིན།  དེ་ནས་སྟོན་ཐ་ཆུང་ནས་དགུན་འབྲིང་པོར་མ་ཐུག་བར་དུ་ཡི་དམ་གྱི་སྒྲུབ་པ་ལ་ཞུགས།  དེ་ཚེ་མཆུ་གཙང་གི་གཞི་བདག་ལྷ་ལུང་ཀླུ་མཁར་ཡིན་ཟེར་བའི་རྟ་མི་བཅུ་གཉིས་བདག་གི་སྟེང་དུ་ཀི་སྒྲ་ཧ་སྒྲ་དང་བཅས་ཏེ་བྱུང་ཚེ་བཀའ་སྲུང་གནོད་སྦྱིན་ཆེན་པོས་རལ་གྲི་གཡུག་པས་རྟ་མི་ལྔ་བསད་པའི་འཕྲོས་བདུན་པོ་རང་གནས་སུ་བྱིའུ་ཆུང་ཁྲས་དེད་པ་བཞིན་བསྐྲད་ནས་སོང་།  ལོ་ཁྱིམ་དེའི་དབྱར་འབྲིང་པོའི་ནང་དུ་བུ་གཅིག་སྐྱེས་པ་བཙས་ནས་ཞག་བཅུ་ཕྲག་གཉིས་ནས་མ་ལ་འབོད་པ་དང་ཡིག་འབྲུ་བཟླ་ཤེས་པ་ཞིག་བྱུང་བ་ལ་མིང་ལ་ལྷ་ཆེན་སྟོབས་ཀྱི་རྒྱལ་པོ་ཞེས་བཏགས།  དེ་ནས་རང་ལོ་ལྔ་བཅུ་ང་གཉིས་ལ་བབས་པ་ཧོར་ཟླ་ལྔ་པའི་ཚེས་བཅུ་གསུམ་གྱི་ནུབ་མཁའ་འགྲོ་མ་པད་ཕྲེང་ཞེས་བྱ་བ་ཡིན་ཟེར་བའི་བུད་མེད་དཀར་མོ་ཞིག་གིས་ཁྱོད་ཀྱིས་སད་བཀག་ན་ཟས་ཀྱི་དངོས་གྲུབ་ཡོད་དེ།  མཐར་བཙན་བདུད་མེ་སྟག་དམར་པོའི་སྤྲུལ་པ་ཞིག་གིས་གཞན་ལ་སྟེར་ནས་དེ་ཁྱོད་ཀྱིས་དྲག་ལས་ཀྱིས་གསོད་དགོས་པའི་གལ་ལ་ཐུག་འོང་གི་ཞེས་དང་།  གཞན་ཡང་མ་འོངས་ལུང་བསྟན་མང་དུ་སྨྲས་ནས་ཡལ་སོང་།  དེ་སྐབས་ཞིག་ན་ཝ་ཤུལ་དཔོན་ནས་འཛི་ཆེན་གྱི་ལྷ་མོ་དེ་ཀ་ངེད་ཀྱི་གཞི་བདག་དགའ་ཤོས་ཡིན་པས་ཁྱོད་ཀྱིས་ཡར་ལ་འབོད་དགོས་ཟེར་བས།  ཧོར་ཟླ་དྲུག་པའི་ཚེས་ཉེར་དྲུག་གི་ཉིན་གྲོགས་འགའ་ཞིག་དང་བཅས་སྔར་དེ་གནས་སའི་རི་བོ་དེའི་རྩེ་མོར་ཕྱིན་ནས།  བདག་གིས་འཛི་ཆེན་ཤིང་གི་ལྷ་མོ་ཁྱོད་ཡར་ཤོག་ཅེས་ལན་གསུམ་བོས་པ་ན།  དེ་འོང་བའི་ལྟས་སྒྲ་ཆེན་པོ་དང་བཅས་རླུང་ནག་འཚུབས་མ་ཞིག་ནམ་མཁའི་ཁམས་ན་གྱི་ལི་ལི་བྱུང་ནས་ནགས་ནང་དུ་བབས་སོང་བ་ཀུན་གྱིས་མཐོང་།  དེ་ནས་ཧོར་ཟླ་དགུ་པའི་ཚེས་བཅུའི་ཉིན་འོད་གསལ་ལ་མཉམ་པར་བཞག་ནས་ཡོད་པའི་དུས།  འོད་གསལ་ཉམས་ཀྱི་སྣང་ཆ་ལ་འཇའ་ཚོན་འོད་ཀྱི་དྲྭ་བ་འཁྲིགས་པའི་ཀློང་དུ་ཨོ་རྒྱན་གཏེར་བདག་རྒྱལ་པོ་ཡིན་སྐད་པ་སྐུ་མདོག་སེར་པོ་གཡས་གཏེར་བུམ་དང་གཡོན་ནེའུ་ལེ་བསྣམས་པ།  སྐུ་ལ་ཟབ་བེར་དང་ཆོས་གོས་རྣམ་གསུམ་གསོལ་བ་དབུ་ལ་པད་ཞུ་པདྨ་མཐོང་གྲོལ་གསོལ་བ།  ཞི་མ་ཁྲོ་འཛུམ་གྱི་ཉམས་དང་ལྡན་པ་ཞིག་གིས་ཞལ་གཟིགས་ཏེ།  བུ་ཁྱོད་ལ་ཅི་མཁོ་ཞེས་གསུངས་པ་ལ།  ང་ལ་ནོར་ལོངས་སྤྱོད་ཞིག་འདོད་ཀྱི།  ཞེས་ཞུས་པས།  སློབ་དཔོན་ཆེན་པོས་ཁྱོད་དེ་འདོད་ཀྱི་སྙམ་ནས་ང་འདིར་ལྷགས་པ་ཡིན།  ངས་ནོར་བདག་ཨ་པ་ར་ཙིཏྟ་ཞེས་བྱ་བ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་ཞལ་མི་གཉིས་པ་ནོར་གྱི་བདག་པོའི་ཚུལ་བཟུང་བ་ཞིག་ཡོད་པས།  དེའི་སྒྲུབ་ཐབས་ཟབ་མོ་ངས་བཤད་ཀྱི་ལེགས་པར་ཉོན་ལ་ཡིད་ལ་ཟུངས་ཤིག།  ཅེས་གསུངས་ཤིང་ཨ་པ་རའི་སྒྲུབ་ཐབས་ཀྱི་དབང་ལུང་ཡོངས་སུ་རྫོགས་པ་གནང་བ་བདག་གི་རྒྱུད་ལ་སྤར་གྱིས་བཏབ་པ་བཞིན་དུ་ངེས་པར་གྱུར།  སླར་ཡང་འདི་སྐད་གསུངས།  ཀྱཻ།  སྐྱེས་བུ་ཆེན་པོ་དེང་སང་གི་དུས་བཟླས་པ་ཁོ་ན་ལ་འབད་པ་ཙམ་གྱིས་ནི་དངོས་གྲུབ་འབྱུང་བའི་ཐབས་མེད་ལ།  དེ་བསྐྱེད་རིམ་མེད་པས་ལན་པ་ཡིན་པར་མི་ཤེས་པས་ལྷ་དང་གང་ཟག་ལ་ཡིད་ཆད་བྱེད་དུ་ཡོད་པས་དེ་ལྟར་མ་ཡིན་པར་སྒོམ་བཟླས་ཡ་མ་བྲལ་བས་ཉམས་སུ་ལོངས་ཤིག།  ཅེས་གསུངས་ཤིང་མི་སྣང་བར་ཡལ་ལོ།  །དེ་ནས་རང་ལོ་ལྔ་བཅུ་ང་གསུམ་ལ་བབས་ཚེ་ཆོས་ཁྲིད་ཆེན་པོ་བཙུགས་པའི་སྐབས་སུ་མཁའ་འགྲོ་འཁྲུགས་པའི་ལྟས་མང་དུ་བྱུང་བ་ན།  དེ་ཅིས་ལན་པ་ཡིན་སྙམ་པའི་སྐབས་དགུན་ཟླ་འབྲིང་པོའི་ཚེས་ཉེར་བཞིའི་ནུབ་ཀྱི་རྨི་ལམ་ན་བདག་གི་བླ་མ་འཇམ་དབྱངས་ཞེས་བྱ་བའི་ཞལ་མཇལ་ཚེ་འདི་ལྟར་ཞུས།  ཀྱཻ།  བླ་མ་དུས་གསུམ་མཁྱེན་པ་ཁྱོད་འཇིག་རྟེན་མི་ཡུལ་དུ་སྐུ་བཞུགས་པའི་དུས་སུ་ལུང་བསྟན་དང་མངོན་ཤེས་མི་གསུངས་ཀྱང་ད་ནི་ཁྱེད་ཡེ་ཤེས་སྒྱུ་མའི་སྐུས་མི་མཁྱེན་མི་གཟིགས་པ་ཅི་ལ་ཡོད།  དེང་བདག་གིས་ཆོས་མ་གཏོགས་པ་མཁའ་འགྲོ་མི་དགྱེས་པའི་ལས་ནི་བྱེད་དུ་མེད་ཀྱང་མཁའ་འགྲོ་འཁྲུགས་པའི་ལྟས་མང་དུ་འབྱུང་འདུག་པ་འདི་ཅིས་ལན་པ་ཡིན་ཞེས་ཞུས་པས།  བླ་མའི་ཞལ་ནས།  ཁྱོད་ཀྱིས་ཆོས་མིན་གྱི་བྱ་བ་མ་བྱས་པ་བདེན་ཡང་རྫོགས་པ་ཆེན་པོ་ནི་མ་དང་མཁའ་འགྲོ་ཐམས་ཅད་ཀྱི་སྙིང་གི་ཡང་ཐིག་དམ་པ་ཡིན་ཏེ།  དམ་ཉམས་དང་ཉམས་སུ་མི་ལེན་པ་དང་དོན་གོ་ལོག་ཏུ་འཛིན་པ་དང་ཡིད་མི་ཆེས་པ་རྣམས་ལ་འཆད་སྒྲོགས་བྱས་ན་མ་མོ་མཁའ་འགྲོ་འཁྲུགས་པའི་རྒྱུ་ཡིན་པ་ལས།  སེམས་ཅན་གྱིས་སྡིག་པ་མི་དགེ་བར་སྤྱོད་པ་ནི་ཀུན་གྱི་མཚན་ཉིད་ཡིན་པས་འཁྲུགས་དོན་ཅི་ལ་ཡོད།  དེ་ཕྱིར་ཡི་གེ་བརྒྱ་པ་དང་བཤགས་སྦྱོང་ལ་འབད་པ་གལ་ཆེ་བར་སོམས་ཤིག།  ད་ནི་བུ་སློབ་རྣམས་ཀྱིས་རབ་ངེས་མེད་རི་ཁྲོད་འཛིན་པ་དང་།  འབྲིང་ཚེ་གཅིག་གྲོང་བསྒོམ་བྱ་བ་དང་།  ཐ་ནའང་ལོ་རེ་བཞིན་ཟླ་རེར་བསྒོམ་དགོས།  དེ་ལྟར་བྱས་ན་འཆད་པ་པོས་བཤད་པ་དང་ཉན་པ་པོས་ཐོས་པ་དོན་ཡོད་པར་འགྱུར་བ་ཡིན་ཅེས་གསུངས་སོ།  །དེ་ནས་དེ་ལྟར་བཤགས་སྦྱངས་ལ་འབད་པས་ལྟས་རྣམས་ཡལ་སོང་ངོ་།  །དེ་ནས་རང་ལོ་ལྔ་བཅུ་ང་བཞི་ལ་བབས་པ་ཧོར་ཟླ་ལྔ་པའི་ཚེས་བཅུའི་ནུབ་ཀྱི་རྨི་ལམ་ན་མཁའ་འགྲོ་ཆོས་ཀྱི་སྤྱན་ལྡན་མ་ཡིན་སྐད་པའི་བུད་མེད་སྔོན་མོ་སྐུ་གཅེར་བུ་རུས་རྒྱན་གྱིས་སྤྲས་པ་ཞིག་བདག་གི་ཐད་དུ་བྱུང་ནས།  བུ་ཁྱོད་ཀྱིས་ཅི་སྙམ་ཅི་འདོད་ཅེས་ཟེར་བ་ལ།  ཁྱེད་ཀྱིས་ང་ལ་ལེགས་ཉེས་ལུང་བསྟན་ཞིག་གནང་བར་ཞུ་ཞུས་པས།  དེ་ན་རེ།  བུ་ཁྱོད་ཀྱིས་ང་ཡི་ངག་ལ་ཉོན།  །ཁྱེད་འདི་ནས་སྟོད་ཀྱི་ཕྱོགས་སུ་སོང་།  །བྱང་ཕྱོགས་རྡོ་ཡི་ས་ཆ་ན།  །ཁྱེད་ལ་གདུལ་བྱའི་ཞིང་ཞིག་ཡོད།  །ལོངས་སྤྱོད་དཔལ་ཀྱང་འགའ་ཞིག་ཡོད།  །བདེ་བའི་སྐབས་ཀྱང་ཅུང་ཞིག་ཡོད།  །རེ་ཞིག་ཡོད་པའི་སྐབས་ཙམ་ལས།  །ནམ་ཕུག་ཐུབ་པའི་བདེ་བ་ནི།  །འཛམ་བུའི་གླིང་ན་ཡོད་མི་འོང་།  །ཕྱི་རོལ་ཀླ་ཀློའི་རྫས་སྔགས་དང་།  །སྦྱོར་བ་ཏིང་ངེ་འཛིན་གྱི་མཐུས།  །མི་རྣམས་ཀུན་གྱི་རྒྱུད་བསླུས་ཏེ།  །ཇག་རྐུན་འཕྲོག་བཅོམ་ལས་ལ་འབད།  །ཕྱི་ནང་བར་གསུམ་ཐམས་ཅད་ཀུན།  །ཆེ་འཁྲུགས་ཆུང་འཁྲུགས་བར་པ་འཁྲུགས།  །དམག་འཁྲུགས་མཚོན་གྱི་ཡོ་ལངས་འགྱེད།  །མི་ཕྱུགས་ནད་ཀྱི་འཚུབས་མ་ལངས།  །མཐའ་མི་དབུས་སུ་རྡིབ་ལ་ཉེ།  །བསྟན་འགྲོའི་བདེ་སྐྱིད་ཉི་མ་སྒྲིབ།  །དེ་ཕྱིར་བདེ་བའི་གོ་སྐབས་མེད།  །གནས་སྐབས་བདེ་བ་དོན་གཉེར་ན།  །གནས་ནི་གར་བདེའི་ས་རུ་འཕོས།  །དེ་ནི་ལུང་བསྟན་མཆོག་ཏུ་ཟུངས།  །ཞེས་ཟེར་ནས་ཡལ།  ལོ་ཁྱིམ་དེའི་དབྱར་ཟླ་ཐ་ཆུང་གི་ཚེས་བཅུའི་ཉིན་ནས་བཟུང་བདག་བོ་ཆུང་རྟ་ཤུལ་གྱི་ནང་དུ་ཆོས་ཁྲིད་བཤད་སྐབས།  བདག་གི་གཞི་ཕྱྭ་བདེ་མོ་ཨེ་ཡིན་སྙམ་དུ་ཡོད་པའི་ནུབ་གཅིག་གི་རྨི་ལམ་ན་གནོད་སྦྱིན་ཤན་པ་དམར་ནག་གི་ནམ་མཁའ་བར་སྣང་ས་གཞིའི་ཁམས་ཐམས་ཅད་དུ་སྙིང་དང་ཁྲག་གི་ཆར་ཕབ།  ཧ་ཧེ་ཀྵ་ཞེས་པའི་སྒྲས་བར་སྣང་ཐམས་ཅད་བཀང་སྟེ་བདག་གི་ཐད་དུ་སླེབས་བྱུང་ནས།  ཁྱོད་ཀྱིས་མ་གོ་བ་དང་མ་ཤེས་པ་ཡོད་ན་ངས་བཤད་ཟེར།  དེ་ལ་བདག་གིས་ངའི་ཁྱིམ་ཚང་བདེ་མོ་ཨེ་རེད་ཅེས་དྲིས་པས།  ཁོ་ན་རེ།  བདེ་མོ་རེད།  ད་ལོ་དཔལ་དགེ་སྤྲུལ་སྐུ་ཡང་ཕེབས་འདུག་ཅེས་ཟེར་བ་ལ།  ངས་ཨ་དཔལ་དགེ་སྤྲུལ་སྐུ་འདས་སོང་ནས་མི་བཞུགས་སྨྲས་པས།  འདས་སོང་ནས་མི་བཞུགས་མོད།  སླར་དེ་བྱོན་ནས་སྟོན་ཟླ་ཐ་ཆུང་གི་ནང་དུ་མཇལ་འོང་ཟེར།  ཡང་ངའི་ཤ་མཛོད་སྟོང་པ་འདི་ཀར་ལྟོས་དང་ཟེར་ནས་ཁང་པ་སྟོང་པ་ཞིག་གི་ནང་ན་ཤ་ལག་པ་སྐམ་ལ་རུལ་པ་ཞིག་ལས་མེད་པར་མཐོང་།  འདི་ལ་ཇི་དགོས་དྲིས་པས།  ཁྱོད་ཀྱིས་ང་ལ་ཤ་མ་སྟེར་བས་ལན་པ་ཡིན་ཟེར།  དེ་ལ་མཁས་པ་རྣམས་ཀྱིས་ཤ་ཁྲག་མཆོད་རྫས་ལ་བཤམ་མི་རུང་ཟེར་བས་དེ་ཅི་ཡིན་དྲིས་པས།  ཧ་ཧ།  མགོན་པོ་ལེགས་ལྡན་མན་ཆད་ནས་ཐེའུ་རང་ཐལ་སྐྱ་ཡན་ཆད་ཤ་ལ་མི་དགྱེས་པ་ནི་མེད།  ཅིའི་ཕྱིར་ན་དུག་ལྔའི་རྒྱུད་དུ་འཁྲུལ་བའི་གང་ཟག་གིས་བཟུང་འཛིན་རང་རྒྱུད་པར་བསྒྲུབ་པའི་ལྷ་རྣམས་ནི་དུག་ལྔ་རང་རྒྱུད་པའི་བདག་ཉིད་ཅན་གྱི་ཚུལ་དུ་འདུག་པ་དེས་ན་ཟས་ཤ་ཁྲག་ལ་རྔམ་པ།  ལས་གསོད་གཅོད་ལ་དགའ་བ་ཤ་སྟག་ཡིན་ཏེ།  བསྟན་དགྲའི་སྲོག་གི་གཤེད་མར་གཟས་པའི་བཀའ་སྲུང་དུ་བཞག་པ་ཡིན་པས་ཤེས་པར་གྱིས་ཤིག།  བསྟན་དགྲ་ཐུལ་བའི་རྗེས་སུ་གཏང་རག་ལའང་རེ་ལྟོས་ཆེ་བ་ཡིན།  ཁྱེད་མིའི་བློ་ཡིད་ལས་སྐྱེས་པ་ངེད་ཅག་ཀྱང་ཁྱེད་ཀྱི་བཟའ་བཏུང་དུ་འོས་པ་ཐམས་ཅད་ལ་དགའ་སྟེ་རུང་ཞེས་ཟེར་ཡལ་སོང་ངོ་།  །དབང་ཆེན་རབ་ཁྲོས་གནོད་སྦྱིན་ཆེན་པོ་ཡིས།  །མངོན་པར་བཤད་པའི་ཚིག་འདི་དོན་ཟབ་སྟེ།  །དུག་ལྔས་ཀུན་ནས་རྒྱུད་འཁྲུགས་གང་ཟག་གིས།  །གཟུང་འཛིན་ཆོས་སུ་དངོས་པོར་ཞེན་པ་ཡིས།  །བསྒྲུབ་པའི་ལྷ་ནི་འཇིག་རྟེན་དྲེགས་པ་ཅན།  །དབྱིངས་དང་ཡེ་ཤེས་གཉིས་སུ་མེད་པ་ཡི།  །དག་པའི་གཟིགས་སྣང་ཡེ་ཤེས་ལྷ་རུ་ཤེས།  །འདིས་ཀྱང་ཨ་ཏིའི་གྲུབ་མཐའི་གསང་གནད་ཅིག།  སྟོན་ཏེ་རྟོག་གེ་ཕལ་གྱི་བློ་དང་ནི།  །མི་འཚམས་ཁབ་མིག་ཆུང་ངུར་མཁའ་མཐའ་བཞིན།  །དེས་ན་བརྒྱུད་ལྡན་བླ་མའི་མན་ངག་དང་།  །ལུང་རིག་དང་འབྲེལ་ནང་གི་ཉམས་མྱོང་གི།  སྟེང་ནས་མ་ནོར་གོ་དོན་འཚོལ་བ་གཅེས།  ལོ་ཁྱིམ་དེའི་ཚེས་བཅུ་དགུའི་ནུབ་ཀྱི་རྨི་ལམ་ན་བནྡྷེ་རྒན་སོང་ཞིག་གིས་ལག་ན་གྲི་རིང་ཐོགས་ནས།  ཁྱོད་འདི་རུ་འོངས་དོན་ཅི་ཡོད་ངས་ཁྱོད་གསོད་པར་མི་བྱེད་རེ།  ཞེས་ཟེར་ནས་མཆོང་རྒྱུག་བྱེད་འདུག་པ་ལ།  ངས་ཁྱོད་ལ་རྫུ་འཕྲུལ་ཅི་ཡོད་དྲིས་པས།  དེ་ན་རེ།  རྫུ་འཕྲུལ་ཨེ་རེད་ཟེར་ནས་སྟེང་གི་ནམ་མཁའ་སྤྲིན་གྱི་གོ་འཚམས་སུ་འཕུར།  ཡང་ཨེ་རེད་ཟེར་ནས་ཆུ་ཆེན་པོའི་ནང་དུ་ཉ་ལྟར་རྒྱུ།  ཡང་ཨེ་རེད་ཟེར་ནས་བྲག་དམར་པོའི་ཁུང་དུ་འཛུལ།  ལྕགས་ཀྱི་སེན་མོ་མཐོ་གང་བས་རྡོ་རྣམས་ཐལ་བར་ཕིག་པའི་མཐར།  ཁྱོད་སང་ཉིན་མ་སོང་ན་ངས་ཁྱོད་དོ་ནུབ་གསོད་ཟེར་བས།  བདག་གིས་མི་འགྲོ་ཐག་ཆོད་ཡིན།  ཁྱོད་ཀྱིས་ང་སོད་དང་ལྷ་འདྲེ་ཡིད་ཀྱི་གཟུགས་ཅན་གྱིས་རྨི་ལམ་ན་གསོད་པ་གོ་མ་མྱོང་སྨྲས་པ་དང་།  བདག་གི་ལག་པ་གཡས་པ་ལ་འཇུས་ཏེ་གྲི་ཐང་ལ་འཕངས་ནས་སེན་མོ་སྙིང་གར་འདེབས་སུ་བྱུང་ཚེ།  བདག་གིས་ཁོ་པང་པས་བཏབ་ནས་གན་རྐྱལ་དུ་བཟློག་སྟེ་མགོ་བཞི་ཁྲམ་དུ་བཀས་ནས་ཀླད་པ་ཟོས་པས།  ང་མ་གསོད་དང་གནོད་པ་བྱེད་རེ་ན་ར་ཀན་ཟེར།  དེ་ནས་དམིགས་པ་འདི་ལྟར་བྱས།  གནམ་ལྕགས་ཀྱི་རྡོ་རྗེ་ལས་གྲུབ་པའི་ལྕགས་ཐག་ཁོའི་རྐང་ལག་བཞི་ལ་བསྐོན་ནས་གནམ་ལྕགས་ཀྱི་ཕུར་པ་བཞི་རླུང་རི་ནག་པོ་རྡོ་རྗེ་རྒྱ་གྲམ་ལ་བཏབ་ནས་ཐར་ཤོར་མེད་པར་བསྒོམས་པས་དེ་ལྟར་གྲུབ་ཅིང་གྱུར་ཏོ།  །ཡང་རྟ་ཤུལ་གོང་མའི་བུམ་སྒྲུབ་བྱས་སྐབས་ནུབ་གཅིག་གི་རྨི་ལམ་ན་ཤར་ནས་སྤྲིན་ནག་པོ་ཞིག་འཁྲིགས་བྱུང་བའི་ནང་ནས་མི་དམར་རྟ་དམར་ཅན་ཞིག་གིས།  ཁྱོད་སོང་ཞིག་མ་སོང་ན་ངས་ཁྱོད་བསད་ནས་ཤ་ཟ།  ཁྲག་འཐུང་།  རུས་པ་མུར་ནས་ལྷག་མེད་དུ་གཏོང་བ་མིན་རེ་ཟེར་བ་ལ།  ངས་ཁྱོད་སུས་བཏང་བ་ཡིན་དྲིས་པས།  ཁོ་ན་རེ།  ང་སྐལ་བཟང་རྡོ་རྗེས་བཏང་བ་ཡིན།  དགོས་དོན་སྡེ་ཡུལ་འདིའི་བན་དྲེད་མི་སྲུན་པ་ཞིག་གིས་ཉེས་པ་ཆེན་པོ་བྱས་ཡོད་པས་དེའི་སྲོག་མ་ཆོད་ཀྱི་བར་དུ་འགྲོ་རྒྱུ་མིན་ཟེར་ནས་མདའ་བཀང་འདུག་པ་ལ།  གནོད་སྦྱིན་ཆེན་པོས་རལ་གྲི་གཡུག་པས་གཞུ་སྐེད་ནས་ཆག་སྟེ་ཁོ་ཐུར་ལ་ལྷུང་བྱུང་བ་དེ་བདག་གིས་བཟུང་ནས་ཁྱོད་ཀྱིས་ང་གསོད་རིང་ལ་ངས་ཁྱོད་མི་གསོད་རེ་སྨྲས་ནས་གྲི་སྙིང་གར་བཙུགས་པས།  ཨ་ཕ་ཕ་ང་ཐོངས་དང་ཁྱོད་ལ་གནོད་པ་བྱེད་རེ་ན་ར་ཀན་ཟེར་བ་ལ།  ངས་སྦྱིན་བདག་རྣམས་ལའང་གནོད་པ་བྱེད་མི་ཆོག་པས་དེ་ཁས་ལོངས་སྨྲས་པས།  ཁོས་རེ་ཞིག་གནོད་པ་བྱེད་རེ་ན་ར་ཀན་ཞེས་ཟེར།  དེ་ནས་གནོད་སྦྱིན་ཆེན་པོས།  ཧེ་ཧེ།  སྟེང་བྱ་ཁྱིམ་དུ་བབས་པ་ནི།  །བྱད་མའི་ལྷ་སྲུང་དབང་འདུས་ལྟས།  །བསད་ན་བྱད་ཁ་ཡུལ་མེད་འགྲོ།  །བཏང་ན་སླར་ཡང་ལན་གསུམ་འཁོར།  །ཡུལ་སྡེ་འདི་དག་ངའི་འབངས་སུ།  །འགྱུར་བ་ཉེ་སྟེ་ཕན་ཡང་གདག།  ཁྱོད་ཀྱང་གནས་འདིར་ས་བཟུང་ན།  །རེ་ཞིག་དགེ་ལེགས་གོང་འཕེལ་ཞིང་།  །སྔོན་གྱི་རྟེན་འབྲེལ་འཆུག་པས་ལན།  །བུ་སློབ་འགའ་ཞིག་དབྱིངས་ལ་གཤེགས།  །དེ་ཕྱིར་ཀུན་གྱིས་སྡོད་ས་ཟུངས།  །འོད་གསལ་སྦུབས་སུ་འཇུག་པ་གནད།  །ཞེས་ཟེར་ནས་ཡལ།  དེའི་ཕྱིར་ནུབ་བྱ་རྒོད་ཞིག་གཉེར་གུར་གྱི་ནང་དུ་བབས་པ་ན་བདག་གིས་དེ་སོད་ཟེར་མ་ནུས།  གཞན་རྣམས་ཀྱིས་མ་བསད་པར་ཕྱིར་བཏང་བས།  དེའི་ཕྱིར་ཉིན་ཡང་སྒོ་ཐད་དུ་འདུག།  མཐར་གར་སོང་ཆ་མེད་པར་གྱུར།  དེ་ནས་སྟོན་ཟླ་ར་བའི་ནང་དུ་རང་གི་སྡོད་གནས་བླ་རོང་དུ་སླེབས།  སྟོན་ཐ་ཆུང་གི་ནང་དུ་གཞི་ཆེན་དགོན་པའི་སྒྲུབ་ཆེན་གྱི་སློབ་དཔོན་དུ་སོང་ཚེ།  ནུབ་གཅིག་རྨི་ལམ་ན་བན་རྒན་མིག་གཡས་ཞར་བ་ཞིག་གིས་བདག་གི་རྒྱབ་ནས་པང་པས་བཏབ་སྟེ།  ངའི་ཟ་ཞིང་གཞི་ཆེན་ཚང་ལ་བབས་འདུག་ཡོད་དེ་ཁྱོད་འདིར་འོང་དོན་ཅི་ཡོད་ཁྱོད་དོ་ནུབ་མེད་པར་བྱེད་པའི་དུས་ཡིན་ཟེར་བས།  བདག་གིས་ཤེད་བསྐྱེད་ནས་ལང་གྲབ་བྱས་ཀྱང་ཁོས་བསྡམས་འདུག་པས་ལང་མ་ནུས།  ཁོ་ན་རེ།  ངས་རྡོ་རྗེ་འཇིགས་བྱེད་ཀྱི་བསྐྱེད་སྒོམ་གནད་ཟེང་།  བསྙེན་པ་དུང་ཕྱུར་བཟླས་པས་གཤིན་རྗེ་དངོས་སུ་གྱུར་པ་ཡིན་ཏེ་བླ་བཙུན་སྐྱེས་ཆེན་མང་པོའི་སྲོག་དབུགས་སྡུད་མྱོང་བ་ཡིན།  ཐུབ་ཐལ་ལས་ངན་ཟེར་ཚེ།  དེ་མ་ཐག་ཏུ་བདག་གི་སེམས་དང་ཁོའི་རྣམ་ཤེས་དབྱེར་མེད་དུ་བསྲེས་ཏེ་དབྱིངས་ནམ་མཁའ་རྣམ་དག་གི་ཀློང་དུ་ཕཊ་སྒྲ་གསུམ་གྱིས་བསྲེས་པས་ལྷོད་ཤིགས་སེ་ཡལ་སོང་།  གཞན་ཡང་ཡུལ་དེར་རྡོ་རྗེ་འཇིགས་བྱེད་བསྒྲུབ་ནས་ཁོ་ལ་གྲུབ་པ་ཐོབ་ཡོད་ཟེར་བའི་འདྲེ་མང་པོ་བྱུང་ཡང་གནོད་སྦྱིན་ཆེན་པོས་བསད་བཅད་དྲག་པོའི་སྒོ་ནས་ཚར་བཅད་དེ་བདག་ལ་གླགས་མ་རྙེད།  དེ་ནས་རང་ལོ་ལྔ་བཅུ་ང་ལྔ་གླང་གི་ལོ་ཁྱིམ་ལ་བབས་པ་ཧོར་ཟླ་གསུམ་པའི་ཚེས་བཞིའི་ནུབ་ཀྱི་རྨི་ལམ་ན་བུད་མེད་ནག་མོ་ཤིང་གི་ལོ་མ་གོས་སུ་གྱོན་པ་ཞིག་གིས་འདི་སྐད་ཟེར།  ཧོ།  ཉོན་ཅིག་སྐལ་བཟང་སྐྱེས་བུ་ཉོན།  །ཤར་ཕྱོགས་སྲིན་པོ་འཇིགས་རུང་གིས།  །ལྷོ་ཕྱོགས་སྲིན་པོའི་རལ་པ་བཅད།  །བན་བོན་མ་རུངས་གཤེད་དུ་ལྡང་།  །སྲིན་ཆེན་སྲོག་ལ་ཧུར་ཐུམ་གཏོང་།  །དེ་བཟློག་ཆེད་དུ་བོས་བྱུང་ན།  །ཤིན་ཏུ་ཡི་དམ་བསྒོམ་པར་འབད།  །གནད་དེས་རང་གི་རྐྱེན་བཟློག་ཅིང་།  །རེ་ཞིག་སྦྱིན་བདག་རྐྱེན་ཀྱང་བཟློག།  ཅེས་ཟེར་ནས་ཡལ།  སྟོན་ཟླ་ར་བའི་ནང་མགོ་ལོག་ཕྱོགས་ནས་འབོད་དུ་བྱུང་བས་དེར་ཕྱིན།  དེ་ནས་ལོ་གྲངས་ལྔ་བཅུ་ང་དྲུག་ལ་བབས་པ་ན།  ལིའི་བདར་ཚང་དུ་སྐལ་བཟང་དགོན་པ་བཏབ་པ་ཡིན།  ལོ་དེའི་དབྱར་ར་བའི་ཚེས་བརྒྱད་ལ་མཁའ་འགྲོ་མ་གསང་བ་ཡེ་ཤེས་ཀྱིས་ཞལ་གཟིགས་ནས།  སྐྱེས་མཆོག་ཁྱོད་ཀྱི་སློབ་བུ་དམ་པ་དེ་ཉིད་ཡོས་ཟླའི་ཚེས་ཉེར་གཅིག་གི་ནུབ་ཨོ་རྒྱན་མཁའ་འགྲོའི་གླིང་དུ་འཁྲུངས་ངེས་ཏེ།  ཡོས་བུའི་ལོ་མཇུག་ཏུ་མདོ་སྡེ་བསྐལ་པ་བཟང་པོའི་ཚལ་གྱི་དགོན་པ་དེར་སོང་ལ་གནས་ས་ཀྱིས་དང་རེ་ཞིག་དགེ་འོང་ཞེས་ཟེར་ནས།  ལོ་ཁྱིམ་དེའི་སྟོན་ཟླ་ཐ་ཆུང་གི་ཚེས་བཅུ་དགུ་ལ་མཁའ་འགྲོ་མ་ཡེ་ཤེས་མཚོ་རྒྱལ་མས་སང་ཕོད་དཔལ་ཕྱག་ན་རྡོ་རྗེའི་སྤྲུལ་པ་ཞིག་ཁྱོད་ཀྱི་སྲས་སུ་འཁྲུངས་འོང་ཞེས་དང་།  ཡུལ་དུས་ཀྱི་ལུང་བསྟན་མང་པོ་གསུངས་ཏེ་མི་སྣང་བར་ཡལ་ལོ།  །དེ་ནས་རང་ལོ་ལྔ་བཅུ་ང་བདུན་ལ་བབས་པ་ཧོར་ཟླ་དང་པོའི་ཚེས་ཉེར་གཅིག་གི་ཉིན་སློབ་བུ་དེ་གཤེགས་སོང་།  ཧོར་ཟླ་གཉིས་པའི་ཚེས་ལྔའི་ནུབ་མཁའ་འགྲོ་མ་ཟུ་ལེ་སྨན་ཞེས་བྱ་བས་བདག་ལ་འདི་སྐད་ཟེར།  ཀྱཻ་ཧོ།  ཉོན་དང་སྐལ་ལྡན་སྐྱེས་བུ་ཁྱོད།  །ང་ནི་མཁའ་འགྲོ་ཟུ་ལེ་སྨན།  །འོང་ནི་རྔ་ཡབ་གླིང་ནས་འོངས།  །ལོ་ཁྱིམ་འདི་ཡི་སྟོན་ར་བར།  །སྟོད་ནས་མི་གྲངས་འགའ་ཞིག་ནི།  །དཔལ་དགེ་སྤྲུལ་སྐུ་གདན་འདྲེན་པའི།  །ཕོ་ཉ་ལན་གཉིས་སླེབ་ཏུ་འོང་།  །གནམ་ལོ་ལུག་ལ་མ་སླེབས་བར།  །ཁྲི་རུ་འདོན་པའི་དུས་མ་ཡིན།  །དེ་བར་མ་དང་མཁའ་འགྲོས་བཤོལ།  །ཕོ་ཉས་ཇི་ལྟར་སྨྲས་པ་བཞིན།  །དོན་ཆེན་ཡོད་ཕྱིར་བཟློག་མ་བྱེད།  །ཁྲི་ཁར་མངའ་གསོལ་ཐབས་བྱུང་ན།  །འགྲོ་བའི་དོན་ཡང་བྱེད་ནུས་སོ།  །སྟོན་ཟླ་ཐ་ཆུང་ལ་ཐུག་ཚེ།  །གནས་འདིར་མ་འདུག་སྟོད་ཕྱོགས་སུ།  །སྐྱས་འདེགས་བྱས་ན་ཤིན་ཏུ་ལེགས།  །ཞེས་ཟེར་ནས་ཡལ།  དེ་ནས་སྟོན་ཟླ་ཐ་ཆུང་གི་ནང་སྐལ་བཟང་དགོན་དུ་སླེབས་པར་བྱས།  དེར་དགུན་ཐ་ཆུང་གི་ཚེས་བཅུའི་ཉིན་མཁའ་འགྲོ་རྡོ་རྗེ་གར་མཁན་མ་ཞེས་བྱ་བས་ཞལ་གཟིགས་ནས།  ཀྱེ་ཧོ་སྐལ་ལྡན་རིགས་ཀྱི་བུ།  །གནས་འདིར་ས་འཆགས་བྱེད་པ་ལ།  །ས་བདག་འཁྲུགས་པ་བཅོས་པ་དང་།  །སྒྲོལ་མ་འབུམ་དང་བསམ་ལྷུན་འབུམ།  །དཔུང་རྒྱན་དར་མང་བྲིས་ཏེ་ཕྱར།  །གུ་རུ་སིདྡྷི་བྱད་བཟློག་དང་།  །གཏོར་ཟློག་ཡང་ཡང་བསྐྱར་བ་དང་།  །ཕུར་པ་ལ་བརྟེན་ལོ་རེ་བཞིན།  །བྱུར་སྲི་མནན་པ་བསྐྱར་བ་གལ།  །མ་མོ་མཁའ་འགྲོའི་འཁྲུགས་སྐོང་དང་།  །བཤགས་སྦྱོང་ཆོ་གར་འབད་པ་གལ།  །བྱང་ཕྱོགས་དགྲ་ཡི་འགྲིམ་རྒྱུད་འདྲ།  །ལོ་བཞིན་སཱཙྪ་ཅི་མང་གདབ།  །དེ་ཡང་གཟུངས་གཞུག་ལྡན་པ་གནད།  །དེ་ལྟར་འགྲུབ་ན་རེ་ཞིག་དགེ།  ཞེས་ཟེར་ནས་ཡལ།  ཡང་མཁའ་འགྲོ་ཡེ་ཤེས་དབང་ལྡན་མས།  སྨར་མདོ་བཀྲ་ཤིས་དགའ་འཁྱིལ་ན།  །རེ་ཞིག་ཆོས་སྡེ་ཆགས་ནས་གདའ།  །སྔར་ནས་སྒྱུ་མའི་ཟློས་གར་བཞིན།  །གནས་འཕོ་བྱེད་པ་རྟེན་འབྲེལ་ལན།  །དེ་ལྟར་ཤེས་ནས་དོན་ལ་སོམས།  །ཞེས་ཟེར་ཞིང་ཡལ་ལོ།  །དེ་ནས་ལོ་ཁྱིམ་ལྔ་བཅུ་ང་བརྒྱད་ལ་བབས་པ་ཧོར་ཟླ་དང་པའི་ཚེས་གཅིག་གི་ནུབ་མཁའ་འགྲོ་རྡོ་རྗེ་ཞི་རྒྱལ་མས་ཞལ་གཟིགས་ནས།  ཁྱོད་མྱུར་དུ་འབོད་པ་ཞིག་བྱུང་ན་དེར་ཐོགས་པ་མེད་པར་སོང་ཞིག།  དེར་སོང་ན་ཁྱོད་ལ་མཁོ་བའི་རྒྱུ་རྫས་རེ་རྙེད་འོང་།  དེ་ནས་ཡང་དབྱར་ཟླ་ར་བའི་ནང་དུ་འབོད་པའི་ཕོ་ཉ་ཞིག་བྱུང་ན་དེར་སོང་ཞིག།  ད་ལོ་ཁྱོད་ཀྱི་ནོར་ཕྱུགས་རྣམས་བསགས་དགོས་པའི་དུས་ལ་བབས་པ་ཡིན།  ཞེས་ཟེར་ནས་ཡལ་སོང་།  དེར་ཧོར་ཟླ་བཞི་པའི་ནང་དུ་འབོད་མི་ཞིག་བྱུང་བས་སྟག་ཐོག་སྒབ་མའི་ནང་དུ་སོང་།  ནོར་ཕྱུགས་འགའི་འབུལ་བ་ཐོབ་སྟེ་རང་ཡུལ་དུ་སླེབས།  དབྱར་ཟླ་འབྲིང་པོའི་ནང་དུ་ཚ་ཆུར་ཉལ་དུ་སོང་།  སླར་སྟག་ཐོག་གོང་མ་ནས་འབོད་པའི་ཕོ་ཉ་བྱུང་བས་དེར་ཕྱིན་ནས་སྒྲུབ་ཆེན་གྱི་དབུ་བཙུགས་ཏེ་ཞག་བརྒྱད་དུ་སྒྲུབ་པ་བྱས།  དེ་ནས་ཞག་བརྒྱད་དུ་ཆོས་ཁྲིད་བཤད་ནས་ནོར་ཕྱུགས་མང་པོའི་འབུལ་བ་བྱུང་།  གྲྭ་འབུལ་དང་དགོན་པ་ཡང་འབུལ་ཟེར་བ་བྱུང་ཚེ་བདག་གི་རྨི་ལམ་ཞིག་བརྟག་པའི་མོད།  མཁའ་འགྲོ་ཡེ་ཤེས་དབང་མོ་ཞེས་བྱ་བས་འདི་སྐད་ཟེར།  ཨེ་ཨེ་སྐལ་བཟང་སྐྱེས་བུ་ཉོན།  །གནས་འདིར་ས་འཛིན་བྱེད་འདོད་ན།  །མི་དྲག་མང་པོ་འདྲེར་འཁྲུལ་ཏེ།  །ཕྱོགས་ཀྱི་རྒྱལ་གདོན་སྣ་འདྲེན་ནས།  །ཡུལ་ནི་རྨི་ལམ་ཡུལ་ལ་འགྲན།  །མཁར་ནི་བྲག་གི་བྱ་ཚང་འདྲ།  །མི་རྣམས་ཚོང་དུས་མགྲོན་ལ་འགྲན།  །བན་གཟུགས་སྤྱང་ཀུ་རྒྱབ་སེར་འདྲ།  །འདིར་འདུག་པའི་སྐལ་བ་ངས་མ་མཐོང་།  །དོན་དེ་ཕྱིར་ཡིད་ལ་ཞོག་དང་ཟེར།  །མཐར་བར་སྣང་སྟོང་པའི་དབྱིངས་སུ་ཡལ།  །དེ་ནས་བདག་ལ་གྲྭ་འབུལ་བྱས་པ་ལ་དགའ་ཁུལ་བྱས་ནས་སླར་རང་ཡུལ་དུ་སླེབས།  ཧོར་ཟླ་བཅུ་པའི་ཚེས་བརྒྱད་ཀྱི་ནུབ་རྨི་ལམ་ན་མཁའ་འགྲོ་མ་པདྨའི་ཕྲེང་བ་ཅན་གྱིས་བདག་ལ་འདི་སྐད་ཟེར།  ཁྱོད་དགུན་ཐོག་འདིར་ཟླ་སྒྲུབ་ཟབ་མོ་ཞིག་རེམ་མཛོད།  དེ་ལ་བརྟེན་ནས་བྱུར་སྲི་མནན་པ་གལ་ཆེ་བས་གཟབ་དགོས།  ཞེས་ཟེར་ཞིང་ཡང་ཡུལ་དུས་ཀྱི་ལུང་བསྟན་མང་པོ་ཞིག་གླུ་རུ་གྱེར་ནས་མི་སྣང་བར་ཡལ།  དེའི་ཚེས་བཅུ་ལ་མཁའ་འགྲོ་མ་གསལ་ཁྱབ་དབང་མོས་ལྟད་མོ་ལ་ཨེ་འགྲོ་ཟེར་བའི་མོད་བདག་དེ་དང་ལྷན་དུ་འདོམ་ལྔ་བཅུ་ཙམ་འཕགས་པའི་སྟེང་གི་ནམ་མཁའ་ནས་སོང་བས་རི་བོ་ཆེན་པོ་སྔོ་ལྗང་གི་ཁ་དོག་འབར་བ་ཞིག་གི་རྩེ་མོ་དཔག་ཚད་གཅིག་འདས་པ་ན།  འོད་གདངས་ལྗང་གུ་ལས་གྲུབ་པའི་ས་གཞི་རྒྱ་ཆེ་ལ་ཁྱོན་ཡངས་པའི་དབུས་སུ་རིན་པོ་ཆེ་ཨིནྡྲ་ནཱི་ལ་ལས་གྲུབ་པའི་གཞལ་ཡས་ཁང་ཡངས་ཤིང་རྒྱ་ཆེ་བའི་ནང་དུ་པདྨ་དང་ཟླ་བའི་གདན་ལ།  རྗེ་བཙུན་འཕགས་མ་སྒྲོལ་མ་སྐུ་མདོག་ལྗང་སྔོན་གཡས་བུམ་པ་དང་གཡོན་ཨུཏྤལ་བསྣམས་ཤིང་ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་པ།  ཞབས་གཉིས་བཙུན་མོ་རོལ་བའི་སྟབས་ཀྱིས་འཇའ་དང་འོད་ཕུང་འཁྲིགས་པའི་ཀློང་དུ་བཞུགས་པ།  ཞལ་ཤིན་ཏུ་མཛེས་ཤིང་ཡིད་འཕྲོག་པ་གཞོན་ནུ་ལོ་བརྒྱད་ལོན་པའི་ན་ཚོད་ཅན་འོད་ཟེར་རབ་ཏུ་འབར་བ་དེ་ལ་ལྷ་མོ་ཉི་ཤུ་དང་འཁོར་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་དང་མཇལ་ཚེ།  གུས་པས་ཕྱག་འཚལ་ཞིང་བསྐོར་བ་བྱས་ནས་མགོ་བོས་གཏུག་སྟེ།  རྒྱལ་བ་ཐམས་ཅད་བསྐྱེད་པའི་ཡུམ་ཆེན་མོ་ཁྱེད་ཀྱིས་བདག་དུས་ད་ནས་བཟུང་སྟེ་ཇི་སྲིད་རྣམ་མཁྱེན་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་བྱིན་གྱིས་བརླབས་ཤིང་རྗེས་སུ་འཛིན་པར་ཞུ་ཞེས་ཞུས་པས།  འཕགས་མའི་ཞལ་ནས།  ཁྱོད་ཀྱིས་ང་ཡིད་ལ་གྱིས་ལ་ངའི་བསྟོད་པ་དང་ཐུགས་ཡིད་བསྲེ་བ་ལ་རེམ་མཛོད།  ཅེས་དང་།  ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ།  །རྒྱལ་བ་ཀུན་གྱི་སྤྱན་སྔར་ཐུགས་བསྐྱེད་རྒྱལ་བའི་ཡུམ་གྱུར་ཅེས་པའི་བསྟོད་པ་ལན་གསུམ་བསྐྱར་ཟློས་བྱས་ནས་མཐར་སྨོན་ལམ་བཏབ་སྟེ།  པདྨ་ལྗང་གུ་ཞིག་གི་སྟེང་དུ་ཤེལ་གྱི་ཕྲེང་བ་ཤིན་ཏུ་དཀར་ཞིང་གསལ་བ་ཞིག་བདག་ལ་གནང་ནས།  འདི་ཁྱོད་ལ་སྟེར་གྱི་རུམ་དུ་ཆུག་ལ་སོང་ཞེས་གསུངས།  ཕཊ་ཕཊ་ཕཊ་ཅེས་བསྒྲགས་པའི་སྒྲས་གཉིད་སད་དོ།  །དེ་ནས་ཧོར་ཟླ་བཅུ་གཅིག་པའི་ཚེས་དགུའི་ཉིན་མཁའ་འགྲོ་མ་མེའི་ཕྲེང་ལྡན་མ་ན་རེ།  བུ་ཁྱོད་ལྷ་ཆེན་དབང་ཕྱུག་ཆེན་པོའི་སྒྲུབ་པ་ལ་ཞུགས་ནས་ཟླ་བ་གཅིག་གི་བར་བསྙེན་སྒྲུབ་ལ་འབད་དེ་རྟགས་ཐོན་པ་ཞིག་བྱེད་དགོས་ཏེ་མི་ཕྱུགས་གཉིས་ཀའི་རིམ་གྲོ་ལ་མཆོག་ཏུ་གལ་ཆེ་བ་ཡིན།  ཞེས་ཟེར་བ་བཞིན་ལྷ་ཆེན་གྱི་སྒྲུབ་པ་ལ་ཞུགས་ཚེ།  ཞག་ཉེར་གཅིག་འདས་པའི་ནུབ་རྨི་ལམ་ན་འོད་ཕུང་དམར་པོ་ལས་གྲུབ་པའི་གཞལ་ཡས་ཁང་གི་ནང་དུ་པདྨ་རཱ་ག་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ་པདྨ་དང་ཟླ་བ་ཉི་མའི་གདན་ལ་ལྷ་ཆེན་དབང་ཕྱུག་ཆེན་པོ་སྐུ་མདོག་པདྨ་རཱ་ག་ལྟར་དམར་ཞིང་འོད་ཕུང་བསྐལ་པ་དུས་མཐའི་མེ་ལྟར་འབར་བ།  ཞི་མ་ཁྲོ་འཛུམ་གྱི་ཉམས་དང་ལྡན་པ་ཞིག་ལ་ཡུམ་ཨུ་མ་དཱེ་ཝི་དང་དུས་བཞིའི་ལྷ་མོ་དཔལ་མགོན་དྲེགས་པའི་ཚོགས་ཀྱིས་བསྐོར་བ་དང་འཕྲད་ཚེ།  ཁོ་ན་རེ།  ཁྱོད་ཀྱིས་ང་བསྒྲུབ་མཆོད་ལ་འབད་ཀྱང་སྒྲུབ་གྲོགས་མི་ལེགས་པས་ད་རེས་དངོས་གྲུབ་འཐོབ་མི་འོང་།  ཕྱིས་དངོས་གྲུབ་ཕྲན་བུ་རེ་ཐོབ་འོང་ཟེར་ནས་ལྕགས་ཀྱུ་ཞིག་བདག་ལ་སྟེར་བྱུང་མཐར་མི་སྣང་བར་ཡལ་ལོ།  །དེ་ནས་རང་ལོ་ལྔ་བཅུ་ང་དགུ་ལ་བབས་པ་དཔྱིད་ཟླ་ར་བའི་ཚེས་གཅིག་གི་ནུབ་ནུབ་ཕྱོགས་པདྨ་མཁའ་འགྲོ་མ་ཡིན་ཟེར་བའི་བུད་མེད་དམར་མོ་མཛེས་སྡུག་ལྟ་བས་ཆོག་མི་ཤེས་པ་ཞིག་བདག་གི་ཐད་དུ་བྱུང་ནས་འདི་སྐད་ཟེར།  ང་ནི་ནུབ་ཕྱོགས་པདྨ་འོད་ནས་འོང་བ་ཡིན།  ང་ལ་འགྲོ་སྡོད་མེད་དེ་ཁྱོད་ཀྱི་ཤེས་རབ་ཀྱི་རྩལ་དུ་སྣང་བ་ཡིན།  དེ་བཞིན་དུ་གནས་ཡུལ་གྱི་མཁའ་འགྲོ་མ་ཐམས་ཅད་ལུང་སྟོན་དུ་སྣང་བ་རྣམས་ཀྱང་དེ་བཞིན་ནོ།  །ང་ཉིད་འདིར་ལྷགས་པའི་དགོས་ཆེད་ནི་འདི་ལྟ་སྟེ།  སྔོན་དགེ་སློང་བདེ་ལེགས་ཞེས་བྱ་བ་སྨོན་ལམ་ལོག་པའི་སྟོབས་ཀྱིས་ཀླ་ཀློའི་བསྟན་པ་རྒྱ་མཚོ་ཕྱུར་བ་ལྟར་འོང་སྟེ།  ལོ་ཁྱིམ་འདི་ཉིད་དུ་སྦས་ཡུལ་པདྨ་བཀོད་ཅེས་བྱ་བ་འདི་ནས་ནུབ་ཕྱོགས་ན་ཡོད་ཀྱི།  དེར་སོང་དང་ཀོང་སྨད་རྒྱ་ལ་སེང་འདམ་ཞེས་བྱ་བ་ན་བྲག་རི་ཕག་མགོ་གནམ་ལ་བལྟ་བ་ལྟ་བུ་ཞིག་ཡོད།  དེ་ན་ཁ་བྱང་དང་ལྡེ་མིག་གཏེར་དུ་སྦས་པ་ཡོད་པས་དེ་ལོངས་ལ་གསང་བའི་གནས་སྒོ་དེ་ཕྱེས་དང་།  སྦས་ལུང་དྲུག་ཅུ་རྩ་དགུའི་སྒོ་འབྱེད་ནུས་ཏེ་འགྲོ་དོན་རྒྱ་ཆེན་པོ་འབྱུང་ངེས་ཡིན།  ད་ལོའི་དུས་ཚིགས་འདི་ཡོལ་མི་རུང་བས་དེ་ལུགས་དོན་ཐོག་ཏུ་ཁེལ་བར་མཛོད།  ཧེ།  ཤིང་མོ་ལུག་གི་ལོ་ཁྱིམ་ནས།  །བཅུད་ཀྱི་དུག་ཆུས་མི་རྣམས་མྱོས།  །བརྗེད་རྐྱེན་དུག་ལྔ་མེ་ལྟར་འབར།  །རི་ཀླུང་མེད་པར་ཕྱོགས་ཀུན་ཏུ།  །ཨར་ཇག་རྐུན་མས་ལས་ལ་རྔམ།  །ཕྱི་འཁྲུགས་ནང་འཁྲུགས་རྩོད་པ་འགྱེད།  །དགེ་བའི་སྤྱོད་པ་རིམ་གྱིས་འགྲིབ།  །མི་རྟ་ཕལ་ཆེར་གྲི་རུ་འཆི།  །ནད་དུ་མ་ངེས་སྣ་ཚོགས་དར།  །གདོན་དུ་ལྷ་མིན་དྲེགས་པ་གནོད།  །ད་ནི་བདེ་བའི་སྐབས་མེད་པས།  །མྱུར་དུ་གནས་དེར་ལ་འུར་དེངས།  །ཞེས་ཟེར་ནས་ཡལ།  ལོ་ཁྱིམ་དེའི་དབྱར་ར་བའི་ཚེས་བཅུའི་ནུབ་ང་རང་གི་སློབ་བུ་ངག་དབང་རྒྱ་མཚོ་དེ་ཉིད་ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་ནས་སྤྲིན་དང་འཇའ་ཚོན་འདྲེས་པའི་ཀློང་ནས་བདག་ལ་ཕྱག་འཚལ་ཏེ།  ན་མོ།  སྐྱབས་རྗེ་བླ་མ་རིན་པོ་ཆེ།  །བདག་ནི་ཚེ་ཡི་མཐར་ཐུག་ནས།  །ལྔ་བཅུ་ང་གཉིས་ནས་འཕོས་ཏེ།  །མངོན་པར་དགའ་བའི་ཞིང་མངོན་གྱུར།  །ཉིད་ཀྱི་བུ་སློབ་ལས་ཅན་ཀུན།  །ཁྲེགས་ཆོད་ཐོད་རྒལ་ཟུང་ལམ་བསྟེན།  །ལས་ཅན་སྒྲུབ་ལ་སྙིང་རུས་ཅན།  །ལ་ལ་འཇའ་ལུས་ཆེན་པོར་གྲོལ།  །ལ་ལ་ཡེ་ཤེས་སྒྱུ་མར་གྲོལ།  །གྲོགས་མཆོག་ཕུན་ཚོགས་བཀྲ་ཤིས་ནི།  །ལོ་ཁྱིམ་འདི་ཡི་དགུན་འབྲིང་པོར།  །སྦས་ཡུལ་པདྨ་བཀོད་དུ་འཕོ།  །དཔའ་བོ་ཆེན་པོའི་ལུས་བཟུང་སྟེ།  །འཁོར་ཚོགས་འབུམ་གྱི་ཚོགས་དཔོན་བྱེད།  །སློབ་བུ་རིག་འཛིན་རྒྱ་མཚོ་ཡང་།  །གནས་དེར་སླེབས་ནས་དཔའ་བོར་འགྱུར།  །ངེད་ཅག་གཏན་དུ་བདེ་བའི་སར།  །སླེབས་པའི་ངག་སྙན་གླུ་ཡིས་མཆོད།  །བླ་མའི་སྐུ་ཚེ་བརྟན་གྱུར་ཅིག།  ཅེས་ཟེར་ནས་ཡལ།  དེ་ནས་སྟོན་ཟླ་ར་བའི་ཚེས་བཅུ་གསུམ་ལ་བུ་ཆུང་ལྷ་སྟོབས་དཔལ་རྒྱལ་བ་ཀཿཐོག་པའི་སྲོལ་འཛིན་ཆོས་སྡེ་ཆེན་པོ་སྟག་རྩེ་བསམ་འགྲུབ་དགོན་ནས་མཚུངས་མེད་གཞི་ཆེན་སྤྲུལ་པའི་སྐུ་རིན་པོ་ཆེའི་ཡང་སྤྲུལ་དུ་གསེར་ཁྲི་མངོན་པར་མཐོ་བ་ལ་མངའ་གསོལ།  མཐར་རང་ཡུལ་དུ་སླེབས་ནས་པདྨའི་ལུང་ཟིན་གྱི་སློབ་མ་ལ་དབང་ལུང་མང་ཞིག་རྫོགས་པར་བྱས།  ལོ་ཁྱིམ་དེའི་སྟོན་ཐ་ཆུང་གི་ཚེས་བཅུའི་ནུབ་མཁའ་འགྲོ་མ་བདེ་བྱེད་དབང་མོ་ཞེས་རིན་པོ་ཆེའི་རྒྱན་དུ་མས་སྤྲས་པ་ཞིག་བདག་གི་ཐད་དུ་བྱུང་ནས་འདི་སྐད་དོ།  །སྦས་ཡུལ་སྒོ་འབྱེད་དུས་ཚིགས་ཡོལ།  །ད་ནི་བུ་སློབ་ཕོ་མོ་ལ།  །འཕོ་བ་ཆེན་པོའི་ལམ་སྟོན་མཛོད།  །དཀར་མིན་དཀར་གྱི་སྡེ་ཚན་ནས།  །སྐྱེས་བུ་གསུམ་གྱིས་འཇའ་ལུས་འགྲུབ།  །རྒྱ་མིན་རྒྱ་ཡི་སྡེ་ཚན་ནས།  །སྐྱེས་བུ་ཟུང་གིས་འཕོ་ཆེན་འགྲུབ།  །བླ་མིན་བླ་ཡི་སྡེ་ཚན་ནས།  །སྐྱེས་བུ་གསུམ་གྱིས་འཇའ་ལུས་འགྲུབ།  །སྟག་མིན་སྟག་གི་སྡེ་ཚན་ནས།  །སྐྱེས་བུ་ཟུང་གིས་འཇའ་ལུས་འགྲུབ།  །རྟ་མིན་རྟ་ཡི་སྡེ་ཚན་ནས།  །སྐྱེས་བུ་ལྔ་ཡིས་འཇའ་ལུས་འགྲུབ།  །ཨ་མིན་ཨ་ཡི་སྡེ་ཚན་ནས།  །སྐྱེས་བུ་གསུམ་གྱིས་འཇའ་ལུས་འགྲུབ།  །སྟོང་མིན་སྟོང་གི་སྡེ་ཚན་ནས།  །སྐྱེས་བུ་གཅིག་གིས་འཇའ་ལུས་འགྲུབ།  །རྟུག་མིན་རྟུག་གི་སྡེ་ཚན་ནས།  །སྐྱེས་བུ་གཅིག་གིས་འཇའ་ལུས་འགྲུབ།  །གེ་མིན་གེ་ཡི་སྡེ་ཚན་ནས།  །སྐྱེས་བུ་བཞི་ཡིས་འཇའ་ལུས་འགྲུབ།  །དབང་མིན་དབང་གི་སྡེ་ཚན་ནས།  །སྐྱེས་བུ་ཟུང་གིས་འཇའ་ལུས་འགྲུབ།  །དེ་སོགས་ཁྱོད་ཀྱི་བུ་སློབ་རྣམས།  །ཆོས་བརྒྱད་ཡུལ་ལས་དབེན་པའི་སར།  །འཕོ་ཆེན་གདམས་པ་ཉམས་སུ་བླངས།  །རྩེ་གཅིག་སྙིང་པོའི་སྒྲུབ་གཞོལ་ན།  །སྐྱེས་བུ་ཕོ་མོ་བརྒྱ་ཕྲག་གིས།  །འཇའ་ལུས་འཕོ་ཆེན་ངེས་པར་འཐོབ།  །ཨེ་མ་དུས་ཀྱི་སྙིགས་མ་འདིར།  །ཨོ་རྒྱན་ཐུགས་ཀྱི་བསྟན་པ་མཆོག།  སྐྱེས་བུ་ཁྱོད་ཀྱི་མདུན་སར་གནས།  །འཆད་དང་སྒྲུབ་ལ་བརྩོན་པར་གྱིས།  །བདག་ནི་ཤིན་ཏུ་ངོ་མཚར་བའི།  །གཏམ་ཚིག་གླུ་ཡིས་ཁྱོད་ལ་མཆོད།  །ཅེས་ཟེར་ནས་ཡལ།  ལོ་ཁྱིམ་དེའི་དགུན་འབྲིང་པོའི་ཚེས་ཉེར་ལྔའི་ནུབ་འཕགས་པ་འཇིག་རྟེན་དབང་ཕྱུག་གིས་ཞལ་གཟིགས་ནས་འདི་སྐད་གསུངས།  བུ་ཁྱོད་ཀྱི་ལྟ་སྒོམ་ལ་གཤེ་སྐུར་སྨ་འབེབས་བྱེད་ཅིང་ཐེག་པ་འོག་མ་རུ་ཁ་འདྲོང་ཐབས་བྱེད་པའི་བཤེས་གཉེན་འགའ་རེ་འབྱུང་བ་ནི་ཁོང་རྣམས་བདུད་འབངས་སུ་སོང་བས་ཡིན།  དེར་ཁོང་ཁྲོ་ཞེ་སྡང་སྤོངས་ལ་སྙིང་རྗེའི་ཤུགས་བསྐྱེད་ཅིག།  ཉོན་དང་སྐལ་བཟང་སྐྱེས་བུ་མཆོག།  འོད་གསལ་རྫོགས་པ་ཆེན་པོ་ནི།  །སྐལ་དམན་སྐྱེས་བུའི་སྐལ་མིན་ཕྱིར།  །གཤེ་སྐུར་འདེབས་པ་ཨེ་གོ་བུ།  །གསང་སྔགས་ཐེག་མཆོག་རྫོགས་པ་ཆེ།  །སེམས་ཅན་ཀུན་གྱི་དབང་སྐལ་ཏེ།  །རིས་མེད་རང་ལ་རྫོགས་པ་འདྲ།  །ཆོས་དང་སྟོན་པར་འཕྲད་པ་ཡི།  །སྐྱེས་བུ་རྣམས་ཀྱི་དབང་སྐལ་ཡིན།  །དེ་ལྟར་མི་ཤེས་དམུས་ལོང་འགས།  །དེ་ལས་བཟློག་ནས་འོག་མར་འདྲེན།  །ཁ་བཤད་ཅ་ཅོའི་ལབ་མོ་ཡིས།  །ཐེག་ཆེན་བསྟན་ལ་རྒོལ་ནས་གནོད།  །བདུད་འབངས་ལོག་ལམ་སྟོན་པ་སྟེ།  །སེམས་ཅན་ལས་ངན་བསླུ་བ་ལ།  །ཆགས་སྡང་སྤོངས་ལ་རང་བསྟན་སྐྱོངས།  །ཐེག་ཆེན་བསྟན་པའི་ཉི་ཞལ་ནི།  །ནུབ་ལ་ཉེ་སྟེ་མུན་དགོངས་མཚམས།  །ཤེས་པར་གྱིས་ཤིག་བུ་སློབ་སྐྱོངས།  །ཞེས་ཟེར་ནས་ཡལ།  ཡང་ལོ་ཁྱིམ་དེའི་ཐ་ཆུང་གི་ཚེས་བརྒྱད་ཀྱི་ནུབ་མཁའ་འགྲོ་ལབ་ཀྱི་སྒྲོན་མ་བདག་གི་ཐད་དུ་བྱོན་ནས་འདི་སྐད་དོ།  །ཀྱཻ།  བུ་ཁྱོད་མ་ངའི་ངག་ལ་ཉོན།  །དུང་གི་མདའ་མོ་ནུབ་ཏུ་འཕང་།  །པདྨ་བཀོད་ཀྱི་སྒོ་རུ་བབས།  །སྨོན་ལམ་ལོག་པའི་སྐྱེས་བུ་འགས།  །འཁྲུགས་དང་འཕྲོག་བཅོམ་རྩོད་ལས་ཀྱི།  །རྐྱེན་གྱིས་དུག་མཚོ་ཁོལ་བ་ལས།  །དུང་མདའ་དཀར་པོ་དེ་རུ་ནུབ།  །ད་ནི་གནས་དེར་སླེབས་པ་ཡི།  །དབང་དང་སྐལ་བ་རེ་ཞིག་དབེན།  །བདུད་པོ་སེ་ཕུང་སྤྲུལ་པ་ཡི།  །ཀུ་ཀུ་ནག་པོས་རང་སྐད་སྒྲོགས།  །རིགས་མཐུན་མང་པོའི་བློ་ལས་ཀྱིས།  །གངས་རྩེའི་སེངྒེའི་དཀར་མོ་ཕབ།  །ངར་སྐད་དྲག་པོའི་ཤུགས་ཕྱུང་པས།  །ཀླུ་རྒྱལ་གཙུག་ན་རིན་ཆེན་བསླང་།  །དུག་མཚོ་ཁོལ་མ་གནམ་དུ་འཕྱུར།  །ཀླུ་བདུད་དམག་དཔུང་སྟོད་དུ་ཆས།  །བསྟན་པའི་སྒྲོན་མེ་རྣམ་བཞི་བསྣུབ།  །དུག་སྦྲུལ་ནག་པོའི་ཁ་རླངས་ཀྱིས།  །འཚོ་བྱེད་སྨན་གྱི་ནུས་པ་བཅོམ།  །ཀླ་ཀློའི་མེ་དཔུང་མཆེད་པ་ལས།  །བསྟན་འགྲོའི་བདེ་སྐྱིད་ཞིང་ས་བསྲེགས།  །ད་ནི་བདེ་བའི་སྐབས་མེད་དོ།  །མྱུར་དུ་ཆོས་བརྒྱད་ལས་དབེན་པར།  །སྙིང་པོའི་སྒྲུབ་པ་ལྷུར་ལེན་པ།  །གདམས་པའི་མཆོག་ཏུ་འདོམས་ཤིག་བུ།  །སྔོན་གྱི་སྨོན་ལམ་ལས་འབྲེལ་བའི།  །བུ་སློབ་སྐལ་ལྡན་རེ་བྱུང་ན།  །གདམས་ངག་ཟབ་མོའི་ཕ་ཕོག་སྤྲོད།  །ཁྱོད་ཀྱང་ཡུན་རིང་སྡོད་མིན་ཏེ།  །ཡང་དག་རྫོགས་ཆེན་བསྟན་པ་ཡང་།  །དེ་ཙམ་ཡིན་ནོ་ཤེས་པར་མཛོད།  །བརྡ་དེ་གོ་འམ་སྐལ་ལྡན་བུ།  །ཞེས་ཟེར་ནས་ཡལ།  དེ་ནས་རང་ལོ་དྲུག་ཅུ་ལ་བབས་པ་ཧོར་ཟླ་དང་པོའི་ཚེས་བཞིའི་ནུབ་མཁའ་འགྲོ་མ་ཐོད་པའི་ཕྲེང་ལྡན་མ་ཞེས་བྱ་བའི་བུ་མོ་ཁ་དོག་ལྗང་སྔོན་དར་སེར་ཁྲའི་སྟོད་གཡོགས་བྱས་པ་ཞིག་གིས་ན་རེ།  དབུས་ཕྱོགས་ལྷུན་གྲུབ་བཀོད་པའི་ཞིང་ནས་བླ་མ་འཇིགས་མེད་པས་ཁྱོད་འདིར་ཤོག་གསུངས་པས་ཨེ་འགྲོ་ཟེར།  བདག་གིས་འགྲོ་སྨྲས་པས།  ངའི་ལག་པ་གཡོན་ནས་བཟུང་སྟེ་སྟེང་གི་ནམ་མཁར་ཤར་གྱིས་སོང་བའི་མོད་ལ།  ཞིང་ཁམས་མཛེས་ཤིང་ཡིད་འཕྲོག་པའི་ཚལ་དུ་སླེབས།  དེ་ན་རིན་པོ་ཆེ་བཻ་ཌཱུཪྻ་ལས་གྲུབ་པའི་གནས་ཁང་ཡངས་པའི་ནང་དུ་རིན་པོ་ཆེའི་ཁྲིའི་སྟེང་དུ་པདྨ་དང་ཟླ་བའི་གདན་ལ་བླ་མ་དེ་ཉིད་སྐུ་མངོན་སུམ་ལྟར་བཞུགས་འདུག།  དེ་ལ་ཕྱག་འཚལ་ཞིང་མགོ་བོས་གཏུགས་ནས་བདག་ལ་དབང་མཆོག་ཟབ་མོ་ཞིག་གནང་དུ་གསོལ།  ཞེས་ཞུས་པས།  བླ་མ་ཉིད་ཀྱིས་བདག་ལ་རིག་པ་རྩལ་གྱི་དབང་ཆེན་བསྐུར་ཏེ།  བུ་ཁྱོད་ཀྱིས་སེམས་ཉིད་གདོད་ནས་དག་པ་ནམ་མཁའ་རྣམ་པར་དག་པའི་དབྱིངས་ཉིད་མངོན་དུ་གྱུར་པའི་ངང་དུ་བཅོས་སླད་སྤངས་བླང་མེད་པར་ཞོག་ལ་ངང་བརྟན་པར་གྱིས་ཤིག།  ཅེས་གསུངས་ཤིང་མི་སྣང་བར་ཡལ་ལོ།  །དེ་ནས་དགུན་ཟླ་ཐ་ཆུང་གི་ཚེས་ཉེར་བརྒྱད་ནུབ་ཀྱི་རྨི་ལམ་ན་སྨན་པ་འཚོ་བྱེད་གཞོན་ནུ་ཡིན་སྐད་པའི་མི་རྒན་སྐྲ་དང་སྨིན་མ་དཀར་ཞིང་བཞིན་རས་གཉེར་མས་གང་བ་ལག་ན་མཁར་བ་ཐོགས་པ་ཞིག་གིས་ན་རེ།  ད་ལོ་ཁྱེད་ཁང་པ་ཅན་རེད་དེ།  སང་ཕོད་སྦྲ་ནག་ཅན་ལོས་ཡིན།  ལར་འདིར་དགོན་པ་ཞིག་ཨེ་འོང་ངེས་པར་སྙམ་ན་ཆོས་ཀྱི་བཤད་པ་དང་སྒོམ་སྒྲུབ་ཀྱི་མཚམས་གྲྭ་ཞིག་ཡོད་དགོས་ཏེ།  གཞན་དུ་ཆོས་སྡེ་དང་དགོན་པའི་མིང་བཏགས་ཀྱང་དགོས་པ་ཆུང་།  སྡང་དགྲ་དང་རྐུན་ཇག་གི་འཇིགས་པ་གཞན་རེ་འགའ་ལ་ཡོད་ཀྱང་ཆོས་སྡེ་ལ་མེད་མོད།  དེང་སང་ལྔ་བརྒྱ་སྙིགས་མའི་མཐར་ཐུག་པའི་དུས་ཡིན་པས་དགྲ་ཇག་དང་ཆོམ་རྐུན་ཤིན་ཏུ་མང་སྟེ།  དེའི་གཉེན་པོར་སྔགས་སྲུང་ཨེ་ཀ་ཛ་ཊཱི་དང་གཟའ་བདུད་དུག་གི་སྤུ་གྲི་གཉིས་བསྒྲུབ་པ་ལ་འབད་ནས་གྲུབ་པ་ན་བསྐང་གསོལ་ལ་རྒྱུན་དུ་འབད་པ་དང་།  དགྲ་བྱུང་ཚེ་རྦད་བསྐུལ་བྱེད་པ་གལ་ཆེ་སྟེ།  དེང་སང་གི་བླ་བཙུན་རྣམས་ཀྱིས་ཟླ་གཅིག་ཙམ་ལའང་དམ་རྒྱས་བསྒྲུབ་པར་ནི་མི་ནུས།  རྒྱུན་གསོལ་ཁོ་ན་ཙམ་ཞིག་འདོན་མི་ཡོད་སྲིད་ཀྱང་དེས་ལྷ་གྲུབ་མི་སྲིད།  དེ་ནས་ལྷ་ལ་ཡིད་ཆད་དང་སྒྲུབ་ཐབས་ལ་ལོག་ལྟ་སྐྱེ་བ་རྣམས་ཀྱིས་རང་གི་སྐྱོན་རང་གིས་མི་རིག་པར་སྐྱོན་གཞན་ལ་འགེལ་བར་བྱེད་དེ་དེ་ཚོ་སྙིང་རེ་རྗེ་བསམ་གྱི།  ལར་ཁྱོད་ཚོ་ལ་སྔར་མཐུ་ཡོད་དེ་ད་ནི་མེད་འདུག་གི།  རང་ལན་པ་ནི་མི་གོ་བ་མཚར་རེ་ཆེ་ཞེས་ཞེ་ཁྲེལ་གཏོང་འདུག་པ་ལ་འདི་སྐད་སྨྲས།  རྒད་པོ་ཁྱོད་ཅི་ཟེར།  ལྷ་མ་ལན་པར་ངས་ལན་པ་ཅི་བཏང་ཁྱོད་ཀྱིས་ཤེས་ཡོད་ན་ཤོད།  མེད་ན་མི་རྒན་གྱིས་ཁ་བཤད་མང་དོན་ཅི་ཡོད་སྨྲས་པས།  འོ་རེད་རེད།  ངས་ཁ་བཤད་མང་བ་འདི་ཁྱོད་དང་རྟ་ཤུལ་གཉིས་ཀ་ལ་སྒོས་སུ་བཤད་པ་མིན།  རྒྱལ་ཁམས་སྤྱིའི་དགོན་པ་རྣམས་ལ་བཤད་པ་ཡིན།  ཁྱོད་མ་དགའ་ཡང་ཁྱོད་ལན་གྱི་ལྷ་ལ་ཁག་མེད།  ཇི་ལྟར་ལན་ཞེ་ན་ཁྱོད་ཀྱི་ལྷ་རྦད་བསྐུལ་དྲག་ཏུ་བྱས་ནས་དགྲ་ལ་མཐུ་རྟགས་ཐོན་དུས་ནོར་ཕྱུགས་ཕྱིར་བྱུང་ཚེ་དགའ་བ་དང་བཅས་རང་གིས་བླངས་ནས་སྤྱོད་པས་སྲུང་མ་སུན་ཏེ་ལས་བྱེད་མི་སྲིད།  ཁྱོད་ཚོ་དུས་ངན་གྱི་བླ་བཙུན་ནོར་ཟས་ལ་འཛིན་ཆགས་ཤིན་ཏུ་ཆེ་བ་ཀུན་གྱིས་དེ་ལྟར་བྱེད་པས་མཐར་སྲུང་མ་གཉན་པོ་ཁྲོས་ནས་སྒྲུབ་པ་པོ་ལ་ཆད་པ་གཅོད་ཡོང་།  མཐུ་ཡོད་མི་སྲིད་ལོ་ལོ་ཞེས་ཟེར།  དེ་ལ་བདག་གིས་ཁྱོད་བདེན་ཡང་སྲིད་ཀྱི།  ངས་ཀྱང་དེ་ལྟར་བསམ་འདུག།  ཁྱོད་ནི་སྨན་པ་ཕུལ་དུ་ཕྱིན་སོང་བ་ཞིག་ཡིན་ཟེར་བ་ཐོས་པས།  དེང་སང་གི་སྨན་པས་ནད་ངོས་མི་ཟིན་པ་དང་།  ཕན་མི་ཐོགས་པ་འདི་ཅིའི་ཕྱིར་ཡིན་ཞེས་སྨྲས་པས།  ཁོ་ན་རེ།  ཧ་ཧ།  དུས་ངན་སྙིགས་མའི་དུས་འདིར་སྔོན་བསྐལ་པ་བཟང་བོའི་དུས་ཀྱི་རྩྭ་དང་དེང་སང་གི་སྨན་བཟང་དྲུག་རྣམས་ལའང་ནུས་བཅུད་སྔོན་དུས་ཀྱི་རྩྭ་བཟང་བ་དང་།  སྔོན་གྱི་ཆུ་དང་དེང་སང་གི་འོ་མ་གཉིས་ལའང་སྔོན་དུས་ཀྱི་ཆུའི་རོ་ནུས་བཟང་བ་ལྟ་བུར་སོང་བས་ནད་ལ་སྨན་གྱིས་མི་ཕན་པའང་དེ་ལྟར་ཡིན།  མི་རྣམས་རྩོལ་བ་ཞན་པས་སྨན་དཔྱད་ལ་མི་མཁས་པ་དང་།  སྔོན་དུས་ཀྱི་ནད་དང་དེང་དུས་ཀྱི་ནད་མི་གཅིག་པས་ངོ་མི་ཤེས་པའང་དེ་གས་ཡིན།  ང་མི་རྒན་གྱིས་བཤད་པ་དང་།  ཁྱོད་མི་མཁོ་བའི་དྲི་བ་དེས་ཅི་བྱ།  ཞེས་ཟེར་བར།  ང་ལ་སྨན་དཔྱད་ཞིག་བསླབ་ན་ཨེ་ཤེས་སྙམ་ཞེས་དྲིས་པས།  ཁོ་ན་རེ།  ཁྱོད་ཚེ་སྟོད་ཟད་ནས་ཚེ་མཇུག་སྤྲིན་བར་གྱི་ཉི་ཞུར་ཙམ་འདིར་སྨན་དཔྱད་ལ་བསླབ་ཀྱང་རང་གཞན་གཉིས་ལ་ཕན་བཏགས་པའི་ལོང་ཡོད་པ་ངས་ནི་མ་མཐོང་ཟེར་ནས་ཡལ་སོང་།  དེ་ནས་ལོ་གྲངས་དྲུག་ཅུ་རེ་གཅིག་ལ་བབས་པའི་ཚེ།  བྱིས་པ་དཀར་པོ་ལྭ་བ་དཀར་པོ་གྱོན་པ་ཞིག་བདག་ལོ་བརྒྱད་ནས་སུམ་ཅུ་མ་བརྒལ་གྱི་བར་དུ་མཚན་མོ་རྨི་ལམ་ན་འབྲལ་མེད་དུ་འགྲོགས་པ་ལས།  ལོ་སུམ་ཅུ་སོ་གསུམ་ཟིན་ནས་ནུབ་གཅིག་འདི་སྐད་ཟེར།  འོ་ད་ནི་ཁྱོད་ཀྱི་ལྟ་བ་མདོ་ཙམ་ཤེས་འདུག་པ་ངའི་དྲིན་ཡིན་པས་ཤེས་པར་གྱིས།  ང་ནི་ལྷ་ཕྲུག་དུང་གི་རྣ་བ་ཅན་བྱ་བ་ཡིན།  འཕགས་མཆོག་ཐུགས་རྗེ་ཆེན་པོས་ཁྱོད་ཀྱི་ཟླ་གྲོགས་སུ་བཏང་བ་ཡིན།  ད་ནི་རེ་ཞིག་ང་དང་ཁྱོད་གཉིས་འཕྲད་མི་འོང་ཟེར་ནས་ཡལ་སོང་།  དེ་ནུབ་བྱུང་ནས་ན་རེ།  ཁྱོད་དེང་སང་ནི་དཔལ་དང་སྙན་གྲགས་ཀྱི་ཡོན་ཏན་ཐམས་ཅད་འཛོམ་པ་ལ་ང་དགའ་སྟེ་ད་དབྱར་ཟླ་གཉིས་པའི་ནང་དུ་སྦྲ་ཞིག་ཕུབ་ལ་དེའི་ནང་དུ་སྡོད་དང་སྦྲའི་མཐུན་རྐྱེན་ནི་འགྲུབ་སླ་ཞིང་དེ་ནས་གར་ཕྱིན་ཀྱང་ཚེགས་མེད་ཡིན་ཞེས་ཟེར་བ་ལ།  ངས་དགོན་པ་འདིར་འདུ་ཁང་ཆེན་པོ་ཞིག་བརྩིག་ཟེར་འདུག་པས་དེ་བདེན་ན་དེར་བདེ་བར་འདུག་སྙམ་གྱི་ཞེས་སྨྲས་པས།  དེ་ན་རེ།  ད་ལོ་བརྩིག་པར་བྱས་ན་འགྲུབ་འགྲུབ་འདྲ་སྟེ་མ་བྱུང་།  ད་ནི་རེ་ཞིག་ཐོག་ཏུ་ཁེལ་དུས་མི་འོང་།  སང་ཕོད་རྫ་རྒྱལ་དགོན་དུ་འགྲོ་རྒྱུ་འབྱུང་སྟེ་དམག་དང་འཁྲུག་པ་ཆེན་པོ་ཡུལ་འདིའི་ཉེ་ས་རུ་འབྱུང་སྙམ་ཡང་འདི་ག་ལ་ནི་སྐྱོན་ཆེར་མེད།  ཨེ་ཨེ།  ཆུང་ནས་ལྷན་ཅིག་སྐྱེས་པའི།  །གྲོགས་པོ་ང་ལ་ཉོན་དང་།  །སྣང་སྲིད་སྣོད་བཅུད་ཐམས་ཅད།  །རྨི་ལམ་སྒྱུ་མའི་གྲོང་ཁྱེར།  །བརྟན་གནས་མེད་པར་ཨེ་གོ།  འདུས་བྱས་ཆོས་རྣམས་ཐམས་ཅད།  །རང་སྣང་འཁྲུལ་པའི་སྣང་བ།  །གནས་འགྱུར་བྱེད་པར་ཨེ་གོ།  རྙེད་ཚོལ་གསོག་འཇོག་ཐམས་ཅད།  །བྱིས་པའི་རྩེད་མོ་བཞིན་དུ།  །སྙིང་པོ་མེད་པར་ཨེ་གོ།  བུ་དང་ཆུང་མའི་ཆེད་དུ།  །ཚེ་གཅིག་སྡིག་ལ་འབད་ཀྱང་།  །རྣམ་སྨིན་སྒོས་ཁུར་ཨེ་གོ།  ཡུལ་དང་ཁང་ཁྱིམ་ཟས་ནོར།  །གཏན་ལོངས་སྤྱོད་པར་རློམས་ཀྱང་།  །རྨི་སྣང་སད་པ་བཞིན་དུ།  །བརྟན་གནས་མེད་པར་ཨེ་གོ།  ཚེ་ཟད་མི་རྒན་དག་གིས།  །གཏན་དུ་སྡོད་གྲབ་བྱེད་ཀྱང་།  །སྡོད་ལོང་མེད་པར་ཨེ་གོ།  བྱས་བྱས་བྱ་བ་མང་པོ།  །ཆོག་ཤེས་མེད་པར་སྤྱོད་མོད།  །བྱ་བ་ཟིན་དུས་མེད་དེ།  །ཕ་རོལ་འགྲོ་བ་ཨེ་རིག།  འཁོར་བ་འདི་ལས་ཐར་ཐབས།  །འགྲུབ་པའི་སྐྱེས་བུ་མཆེས་ན།  །དོན་ལྡན་ཡིན་པར་ཨེ་གོ།  ཁ་ལག་དལ་དུ་མེད་པའི།  དགེ་སྦྱོར་བསགས་གྲངས་མང་ཡང་།  །འཁོར་བའི་སྣོན་པར་ཨེ་གོ།  རང་གཞི་ཀུན་ཏུ་བཟང་པོ།  །སྤྲོས་བྲལ་ནམ་མཁའི་ཁོད་ཡུག།  རང་ས་འཛིན་དགོས་ཨེ་གོ།  རང་ཐོག་རང་ས་བཟུང་ན།  །ཆོས་ཀྱི་དམ་པ་ཆོས་ཉིད།  །རང་དབང་ཐོབ་པར་ཨེ་གོ།  གཞི་སྣང་དག་པའི་འཁོར་མང་།  །མངོན་དུ་གྱུར་པ་ཉིད་ལས།  །ཞིང་ཁམས་མེད་པར་ཨེ་གོ།  །བསམ་དང་བརྗོད་པ་བྲལ་བའི།  །ཆོས་ཉིད་མངོན་དུ་བྱ་བ།  །ཐེག་པའི་ཡང་རྩེར་ཨེ་གོ།  གོ་ན་བྱར་མེད་ངང་ནས།  །ལྷུན་གྲུབ་དབྱིངས་ལ་ལྟོས་དང་།  །མ་དག་ལས་ཀྱི་བསྐལ་པ།  །དག་དབྱིངས་དྭངས་མར་འཕོ་འགྲོ།  །དག་དབྱིངས་དྭངས་མར་འཕོས་ཚེ།  །ཆོས་སྐུ་སྤྲོས་མཐའ་བྲལ་བར།  །མངོན་རྫོགས་སངས་རྒྱས་འཐོབ་འོང་།  །ང་འགྲོ་པོ་ཊ་ལ་རུ།  །ཕྱིར་མི་ལྡོག་པར་འགྲོ་སྟེ།  །འགྲོ་དང་འགྲོ་ཡུལ་བྲལ་བའི།  །ངང་ལ་ཕྱམ་བརྡལ་ཡན་གཏོང་།  །ཞེས་ཟེར་ནས་ཡལ།  སྟོན་ཟླ་ར་བའི་ནང་དུ་རྫ་རྒྱལ་དགོན་དུ་སྐྱས་བཏེགས་ནས་སོང་།  དེར་སེར་ཕྲེང་གིས་རོལ་བསུ་བྱུང་ནས་དཔལ་དགེ་སྤྲུལ་སྐུ་ཁྲི་ཁར་མངའ་གསོལ།  དགུན་ཟླ་འབྲིང་པོ་ནས་བཟུང་དཔྱིད་ཟླ་འབྲིང་པོའི་བར་དུ་ཆོས་ཁྲིད་བཤད་ནས།  དཔྱིད་འབྲིང་པོའི་སྨད་དུ་ཡང་སྒར་བཏེགས་ནས་ཁྲི་བར་མ་ཞེས་བྱ་བའི་ལུང་པར་འཕོས།  དེ་ནས་རང་ལོ་དྲུག་ཅུ་རེ་གཉིས་ལ་བབས་པ་ཧོར་ཟླ་བཞི་པའི་ཚེས་བརྒྱད་ཀྱི་ནུབ་རྨི་ལམ་ན།  བུ་མོ་ཞིག་གིས་ང་ནི་བཟང་པོ་སྐྱོང་མ་ཞེས་བྱ་བ་ཡིན།  གསེར་སྟོད་འབྲོང་རི་སྨུག་པོའི་ནང་དུ་ལྟད་མོ་ལ་ཨེ་འགྲོ་ཟེར།  དེ་ལ་འདི་སྐད་སྨྲས།  རི་བོ་ཞིག་ཡིན་པས་ལྟ་ས་ཅིའང་མེད་དམ་སྨྲས་པ་དང་།  མོ་ན་རེ།  ཕྱི་རི་བོ་ཡིན་ནའང་ནང་དུ་ཡུལ་ཆེན་པོ་ཞིག་ཡིན་ཟེར།  རི་བོ་ཆུང་ངུ་དེ་ལ་ཡུལ་ཆེན་པོ་ཞིག་ཤོང་མི་འོང་སྨྲས་པས།  རྨི་ལམ་གྱི་ཡུལ་ཁམས་ཆེན་པོ་དང་མི་མ་ཡིན་གྱི་གྲོང་ཁྱེར་འདྲ་མཉམ་ཡིན་ཟེར་བས།  དེ་བདེན་འདུག་བསམ་ནས་དེ་དང་ལྷན་དུ་སོང་བས་རི་བོ་དེའི་རྩ་བར་སླེབས་ཚེ་རི་བོ་མི་མཐོང་བར་མཁར་ཆེན་པོ་རྩེ་མོ་དགུང་ལ་སྙེགས་པ་ཞིག་གི་ཁ་བད་གསེར་ལས་བྱས་པ།  ཁྲོ་ཆུ་ཞུན་མས་སྐེད་བྱས་པ།  གཡུ་ཡིས་སྨད་དང་རྨང་བྱས་པ་ཞིག་གི་ནང་དུ་ཕྱིན་པ་ན་མཁར་ཐོག་བརྩེགས་ལྔ་པ་ཞིག་ཏུ་འདུག།  མ་མོ་ཤ་ཟ་རོ་ལང་ཐེའུ་རང་གི་སྡེ་ཚོགས་བསམ་གྱིས་མི་ཁྱབ་པ་འཚོགས་འདུག།  བདག་གིས་ཁྱེད་ཅག་འདིར་ཅི་ལ་འཚོགས་པ་ཡིན་དྲིས་པས།  མི་ནག་པོ་ཁ་སྤུ་ཡོད་པ་འགྲམ་པའི་གཡས་གཡོན་དུ་རྒྱ་ཁྲིད་པ་ཞིག་གིས་ངེད་འབྲོང་རི་སྨུག་པོའི་བྲན་གཡོག་གི་ཚོགས་ཡིན་ཟེར།  དེ་ནས་ཐོག་བརྩེགས་གཉིས་པའི་ནང་དུ་ཕྱིན་ཚེ་དེ་ན་བླ་མ་ཞིག་ཁྲི་ཆེན་ཁར་འདུག་པ་ལ་བནྡྷེ་དང་མོན་པ་ཨ་ཙ་ར་མང་པོས་བསྐོར་ནས་གང་འདུག།  དེ་དག་ལ་ཁྱེད་ཚོ་སུ་ཡིན་དྲིས་པས།  ངེད་ཅག་བླ་མཆོད་ཀྱི་སྡེ་ཡིན་ཟེར།  དེ་ནས་ཐོག་བརྩེགས་གསུམ་པའི་ནང་དུ་སོང་ཚེ་ཤ་མཁར་མང་པོས་གང་འདུག་པའི་ནང་ན་མི་སྔོ་ནག་སྨིན་མ་དམར་བ་དང་།  མི་དམར་ནག་སྨ་ར་དང་སྨིན་མ་ནག་པ་དང་།  མི་སེར་པོ་སྨ་ར་དང་སྨིན་མ་དམར་བ་གསུམ་གྱིས་ཤ་ལ་སྟྭ་རེས་གཅོད་འདུག།  དེ་དག་ལ་ཁྱེད་ཅག་སུ་ཡིན་དྲིས་པས།  མི་སེར་པོ་དེས་ངེད་ཚོ་གཞི་བདག་གི་ཤ་གཉེར་ཡིན་ཟེར།  དེ་ནས་ཐོག་བརྩེགས་བཞི་པའི་ནང་དུ་སླེབས་ཚེ་དེ་ནང་ཕྱོགས་མཚམས་ཁོར་ཡུག་ཏུ་ཁང་སྒོ་མང་པོས་བསྐོར་ནས་ཡོད་པའི་དབུས་སུ་དར་ཟབ་སྣ་ཚོགས་བརྩེགས་པའི་ཁྲིའི་སྟེང་དུ་བུད་མེད་སྔོ་ལྗང་འོད་ཟེར་འབར་བ་དར་སྣ་ཚོགས་པའི་གོས་ཀྱིས་ཀླུབ་ཅིང་རིན་པོ་ཆེའི་རྒྱན་རྫོགས་པ་ལ་བུད་མེད་མཛེས་མ་གཞོན་ནུ་མ་མང་པོས་བཀུར་སྟི་བྱེད་ཅིང་འདུག།  ཡང་ཁྱེད་ཅག་སུ་ཡིན་དྲིས་པས།  བུ་མོ་ཞིག་གིས་དབང་ཆེན་སའི་བདག་པོ།  འགྲོ་བ་མིའི་མགོན་པོ།  འཕགས་མཆོག་ཐུགས་རྗེའི་མངའ་བདག་དང་ཞལ་མི་གཉིས་པ་དཔལ་ལྡན་བྲག་ལྷ་མགོན་པོའི་བཙུན་མོ་གཡུ་ལྕམ་མ་ཤར་གཉན་པོ་གཡུ་རྩེའི་སྲས་མོ་འཕགས་མ་ཁྲོ་གཉེར་མའི་སྤྲུལ་པ་ཡིན་ཟེར།  དེ་ནས་ཐོག་བརྩེགས་ལྔ་པའི་ནང་དུ་ཕྱིན་ཚེ་སྤྲིན་དང་ན་བུན་འཇའ་འོད་འཁྲིགས་པའི་ཀློང་དུ་དར་མཐིང་གའི་ལྡིང་གུར་ཕུབ་པའི་དབུས་སུ་རིན་པོ་ཆེ་གསེར་གྱི་ཁྲིའི་ཁར་ཟ་འོག་འབོལ་བརྩེགས་མཐོ་བའི་སྟེང་དུ་མི་སྨུག་ནག་དར་དཀར་གྱི་ལ་ཐོད་གྱོན་པ་གོས་སུ་དར་ལེ་བརྒན་དང་མཐིང་གའི་ན་བཟའ་གསོལ་བ་ཞིག་འགྱིང་སྟབས་སུ་བཞུགས་འདུག།  དེ་ལ་འཁོར་གྱི་ཚོགས་ནི་བརྗོད་ཀྱིས་མི་ལང་ངོ་།  །མི་དེས་ན་རེ།  འོ་ཁྱོད་ཁྱེའུ་ཆུང་ལོ་ཙྭ་ཡིན་ཨང་ཟེར།  བདག་གི་ལགས་སོ་ཞེས་སྨྲས་པས།  འདི་ལ་སྟན་ཞིག་ཐིང་དང་གཏམ་ཞིག་བྱེད་ཟེར།  དེ་ནས་དགེ་ལེགས་རབ་བརྟན་གྱིས་བདག་ལ་འབོལ་དང་དར་ཟབ་ཀྱི་གདན་ཞིག་བཏིང་ནས་བྱུང་།  མི་ཆེན་དེས་ཁྱོད་དེ་སྟེང་དུ་ཡུད་ཙམ་ཞིག་སྡོད་དང་ཟེར།  བདག་དེ་རུ་བསྡད་ཚེ་ཁོ་ན་རེ།  ཁྱོད་གཏེར་སྟོན་ཞིག་ཡིན་སྐད་འདུག་གི་ཨ་ཟེར།  ཡིན་ལགས་སྨྲས་པས།  ཁྱེད་ལ་ཞལ་གཟིགས་ལུང་བསྟན་མང་པོ་ཡོད་དམ་མེད་ཟེར་པ་ལ།  བདག་གིས་འདི་སྐད་སྨྲས།  ང་དང་པོ་མ་ལས་སྐྱེས་ནས་བཟུང་རིག་འཛིན་དཔའ་བོ་མཁའ་འགྲོའི་ཞལ་མཐོང་བ་དང་དེ་དག་གིས་ལུང་བསྟན་པ་ལ་ཚད་མེད་དེ།  ཁྱད་པར་དུ་ཨོ་རྒྱན་ཆེན་པོས་རྗེས་སུ་བཟུང་ནས་སྐད་ཅིག་ཙམ་ཡང་འབྲལ་མ་མྱོང་།  ནུབ་ཕྱོགས་བདེ་བ་ཅན་དུ་སངས་རྒྱས་འོད་དཔག་མེད་དང་མཇལ་ནས་བདེ་ཆེན་ཞིང་གི་སྒྲུབ་ཐབས་ཀྱི་དབང་དང་ལུང་ནོད།  དེ་བཞིན་དུ་སངས་རྒྱས་སྨན་གྱི་བླ་དང་མཇལ་ནས་སྒྲུབ་ཐབས་གནང་།  རྡོ་རྗེ་འཆང་དང་མཇལ་ནས་གདམས་པའི་མན་ངག་གནང་།  རིག་འཛིན་བརྒྱད་དང་མཇལ་ཚེ་སྒྲུབ་སྡེ་བརྒྱད་ཀྱི་དབང་ལུང་གནང་།  ཟུར་པོ་ཆེ་ཤཱཀྱ་འབྱུང་གནས་དང་ཟུར་ཆུང་ཤེས་རབ་གྲགས་པའི་ཞལ་མཇལ་ནས་རྫོགས་པ་ཆེན་པོའི་སྐོར་གནང་།  ཀློང་ཆེན་རབ་འབྱམས་ཀྱི་ཞལ་ལན་གསུམ་དུ་མཇལ་ནས་རྫོགས་པ་ཆེན་པོའི་ལྟ་སྒོམ་ཡོངས་རྫོགས་གནང་།  ཕ་གཅིག་དམ་པ་རྒྱ་གར་གྱིས་སྟོང་ཉིད་ལྟ་བའི་གནད་དོན་ཚུལ་བཞིན་དུ་གསུངས།  མ་གཅིག་ལབ་སྒྲོན་དང་མཇལ་ནས་བདུད་གཅོད་ཟབ་མོའི་གདམས་པ་གནང་།  འཇམ་དཔལ་དབྱངས་དང་མཇལ་ནས་འཇམ་དཔལ་གསང་བ་འདུས་པའི་དབང་ལུང་གནང་།  སྤྱན་རས་གཟིགས་དང་མཇལ་ནས་སྒྲུབ་ཐབས་ཀྱི་དབང་ལུང་དང་ལྷ་ཆེན་མ་ཧཱ་དཱེ་ཝའི་སྒྲུབ་ཐབས་ཀྱི་དབང་ལུང་གནང་།  གསང་བདག་ཕྱག་ན་རྡོ་རྗེ་དང་མཇལ་ནས་གསང་བདག་རང་གི་སྒྲུབ་ཐབས་དང་གནོད་སྦྱིན་དམར་ནག་དང་གཟའ་བཙན་དམ་ཅན་རྡོ་རྗེ་ལེགས་པ་རྣམས་ཀྱི་སྒྲུབ་ཐབས་དབང་ལུང་ཡོངས་སུ་རྫོགས་པ་གནང་།  ཡང་འཇམ་དཔལ་སྨྲ་བའི་སེངྒེ་དང་མཇལ་ནས་འཕོ་བ་ཆེན་པོའི་གདམས་པ་རྣམས་གནང་བ་ཡིན།  གཞན་ཡང་ལྷ་དང་བླ་མ་ཡི་དམ་སྔགས་སྲུང་མ་མོ་རྣམས་ཀྱིས་ཞལ་གཟིགས་དང་ལུང་བསྟན་གྲངས་མང་པོ་ཐོབ་བྱུང་སྟེ་བརྗོད་ཚོད་མི་འདུག་ཅེས་སྨྲས་པ་དང་།  ད་ནི་ཕྱི་འཁྲུགས་ཁྲག་གི་ཆར་པ་འབབ་པས་བཟློག་ཐབས་དཀའ་སྙམ་ཟེར།  གསེར་ཐལ་འདི་ལ་ལེགས་ཉེས་ཅི་འདྲ་འོང་དྲིས་པས།  ངའི་བུ་དེས་ཁྲིམས་དྲང་པོར་སྲོང་འདུག་པས་ཡུལ་འཇིགས་པ་ཆེན་པོ་མེད་ཟེར།  འཁྲུགས་པ་ཆེན་པོ་ཨེ་ཡོད་དྲིས་པས།  བཤད་མི་དགོས་གོ་སླ་བར་ཐུག་ཡོད་ཟེར།  སྐྱེས་བུ་དམ་པ་ཁྱོད་ལ་ངས་འདི་འབུལ་ཟེར་ནས་རྡོའི་སྒྲོམ་བུ་གཅིག་གནང་བྱུང་སྟེ།  ཁྱོད་ལ་ཤར་གཉན་པོ་གཡུ་རྩེའི་ནོར་བུ་ཞིག་སྟེར་ཡོད་པ་འདི་རྒྱ་ནག་རྒྱ་མཚོའི་ནང་གི་ཀླུ་མོ་རིན་ཆེན་འཛམ་གླིང་དབང་མོའི་བཙུན་མོ་ལ་རྫོངས་སུ་བསྐུར་བ་ཡིན་ཏེ་བཀུར་སྟི་གྱིས་ཤིག།  གསེར་གྱི་ལུང་པ་འདི་ཁྱོད་ཀྱི་གདུང་བརྒྱུད་རྣམས་ཀྱིས་མ་དོར་དང་ཕྱི་ཕུག་ཀུན་ཏུ་དགེ་ཞིང་ལེགས་པ་འདྲ།  ད་ནི་ཡུན་རིང་པོར་མ་ཕྱི་བར་རང་ཡུལ་ལ་ཕེབས་ཤོག།  དམག་འཁྲུགས་ཀྱིས་ལམ་འགག་པ་འབྱུང་གི་ཞེས་ཟེར།  དེ་ནས་སྔར་གྱི་བུ་མོ་དེས་འགྲོ་རན་ཟེར་ནས་བཞིན་ལ་ཕུ་བཏབ་པའི་སྣང་བ་ཤར་བས་གཉིད་སད་ལ་ནམ་ཡང་ལངས་འདུག།  དེ་ནས་དཔྱིད་ཐ་ཆུང་གི་ཟད་མཚམས་སུ་རང་ཡུལ་དུ་ཆས་ཏེ་ལམ་དུ་ཞུགས་ཤིང་དབྱར་འབྲིང་པོའི་སྨད་དུ་རང་ཡུལ་ལ་སླེབས།  དབྱར་ཐ་ཆུང་ནང་དུ་དམག་འཁྲུག་ཆེན་པོ་འབྱུང་བའི་ལྟས་བྱུང་ཚེ།  གཞན་ཕལ་པ་ཐམས་ཅད་ཀྱིས་འབྲོས་དགོས་ཟེར་བས་བདག་གིས་ཀྱང་སྐྱས་འདེགས་དགོས་པ་འདྲ་སྙམ་ཚེ།  རྗེ་བཙུན་འཕགས་མ་སྒྲོལ་མས་ཞལ་གཟིགས་ནས་བུ་ཁྱོད་ད་ལོ་འབྲོས་མི་དགོས་དང་མིའི་དམག་འཇིགས་མི་འབྱུང་།  མཐའ་མི་ཀླ་ཀློའི་ཆོ་འཕྲུལ་གྱིས་འབྱུང་པོ་སྲོག་དབུགས་སྡུད་པའི་དམག་འབྱུང་ཡང་འབྲོས་པས་ནི་མི་ཐར།  ཞེས་གསུངས་ཤིང་མི་སྣང་བར་ཡལ།  དགུན་ཟླ་ར་བའི་ཚེས་བཅོ་བརྒྱད་ཀྱི་ནུབ་རྨི་ལམ་ན་རྒྱ་མི་མང་པོས་ས་སྟེང་ཁྱབ་བྱུང་བའི་སྣང་བ་ཤར་ཚེ་དམ་ཚིག་ལྷ་མོ་པྲ་མོ་ཧ་ཞེས་བྱ་བས་ནམ་མཁའི་མཐོངས་ནས་འདི་སྐད་ཟེར།  ནག་པོ་རྒྱ་ཡི་དམག་སྣ་དེ།  །སྨོན་ལོག་བདུད་ཀྱིས་འདྲེན་པ་ལ།  །སེང་གདོང་མ་ཡི་སྒོམ་བཟླས་དང་།  །བཟློག་པ་རྟག་ཏུ་བྱ་བ་དང་།  །དབང་ཕྱུག་ཆེན་པོའི་ཟླ་སྒྲུབ་ཀྱིས།  །རང་མགོ་འདོན་པའི་ཐབས་ལ་བརྩོན།  །ཞེས་ཟེར་ནས་ཡལ།  དེ་ནས་དགུན་ཟླ་ཐ་ཆུང་གི་ཚེས་བཅོ་ལྔའི་ནུབ་ཀྱི་རྨི་ལམ་ན་སྤྲིན་དང་འཇའ་ཚོན་འཁྲིགས་པའི་ཀློང་དུ་མཁའ་འགྲོ་ཡེ་ཤེས་མཚོ་རྒྱལ་གྱིས་སྐུ་སྟོད་ཡན་ཆད་ངོམས་ནས་འདི་སྐད་གསུངས།  ཀྱཻ།  བུ་ཁྱོད་ཉོན་དང་ཚིག་འགའ་གདམས།  །རྣམ་ཐར་ཡི་གེར་འགོད་པ་ནི།  །རྒྱལ་བ་གོང་མའི་ཕྱག་སྲོལ་ལགས།  །བུ་སློབ་སྐལ་པ་བཟང་པོ་ལ།  །མི་འགྱང་མྱུར་དུ་རྫོགས་ཐབས་མཛོད།  །རྒྱལ་སྲས་གཞན་ཕན་མཐའ་ཡས་དང་།  །རས་ཆུང་རྡོ་རྗེ་གྲགས་པ་ལ།  །ཡི་གེ་སྐྱོན་བསལ་བྱེད་དུ་ཆུག།  ད་ནི་ཅ་ཅོ་འ་འུར་གྱིས།  །ལུས་སེམས་གཟིང་བ་འབྱུང་ལ་ལྟོས།  །ཞེས་གསུངས་པ་ལ།  བདག་གིས།  རྒྱལ་སྲས་གཞན་ཕན་མཐའ་ཡས་ཞིང་ཁམས་སུ་གཤེགས་སོང་།  རྡོ་རྗེ་གྲགས་པའང་དེ་བཞིན་རྙེད་པར་མི་འགྱུར་བས།  ཁྱོད་ཀྱིས་ཅི་གསུངས་ཞེས་ཞུས་པ་དང་།  ཧེ་གོ་ན།  རྒྱལ་སྲས་གཞན་ཕན་མཐའ་ཡས་དེ།  །སྡོང་རིགས་ལུང་རྟོགས་རྒྱ་མཚོ་སྟེ།  །ཚེ་སྒྲུབ་ནན་དུ་མ་བསྐྱར་ན།  །ཡུན་དུ་མི་བཞུགས་དབྱིངས་ལ་ཆས།  །རས་ཆུང་རྡོ་རྗེ་གྲགས་པ་ནི།  །སྡོང་རིགས་མཁྱེན་རབ་རྒྱ་མཚོ་སྟེ།  །ངེས་མེད་རི་སུལ་མ་ཟིན་ན།  །ཡུན་རིང་བཞུགས་པའི་སྐལ་བ་མེད།  །དེ་ཕྱིར་ཡུན་རིང་མི་འགྱང་བར།  །མྱུར་དུ་ཕོབ་ལ་མཐར་ཕྱིན་མཛོད།  །ཡུན་རིང་འགྱང་ལོང་མེད་པའི་དོན།  །ལྕགས་ལ་དུག་གི་སྡོང་པོ་སྨིན།  །རྐྱེན་གྱི་རླུང་གིས་བསྐྱོད་པ་ལས།  །ལ་ལུང་མང་པོ་ཁ་ལོ་བསྒྱུར།  །བདུད་བློན་གདུག་པའི་སྨོན་ལོག་མཐུས།  །སྲིན་བྱ་རོག་པོ་གསུམ་འགྲོགས་ཏེ།  །ནུབ་ཕྱོགས་སྲིན་བྱའི་དམག་ཚོགས་བསྡུས།  །དུག་གི་སྡོང་པོ་སྟྭ་རེས་བཅད།  །རླུང་གི་འཚུབས་མ་གཡོ་བ་ལས།  །རེ་བ་ནག་པོ་འོག་ཏུ་མནན།  །ལན་གཉིས་སྟེང་དུ་རླུང་གིས་བསྐྱོད།  །ལྷོ་ནུབ་མཚམས་ཀྱི་བདུད་སྡེའི་ཚོགས།  །དམ་སྲི་ནག་པོས་བསླངས་པ་ལས།  །ཕྲག་དོག་གདུག་པས་རྒྱུད་བསླངས་ཏེ།  །མཚོན་གྱི་ཡོ་ལངས་འགྱེད་པ་དང་།  །མི་མགོའི་མེ་ཏོག་ལན་གཉིས་འཐོར།  །མཐའ་ཡི་བྱ་ཚོགས་དབུས་སུ་རྡིབ།  །དབུས་བྱ་རོག་པོ་སྡུག་ཏུ་བསྐྱུར།  །ལྕགས་ཀྱི་སྐྱི་སེར་གཡོ་བ་ལས།  །ཀླུ་རྒྱལ་འཇོག་པོའི་རལ་པ་བཅད།  །རྒྱ་མཚོ་གཏིང་ནས་འཁྲུགས་པ་ལས།  །རྦ་རླབས་ཕྱོགས་མཚམས་ཀུན་ཏུ་གཡོ།  །རླུང་གིས་ཤིང་བསྐྱོད་ཤིང་གིས་ཤིང་།  །དཀྲུགས་ཏེ་བོད་ཁམས་ཐམས་ཅད་དུ།  །སྣ་ཚོགས་མི་བདེའི་ཟུག་རྔུ་ལྡང་།  །ས་མིག་དབུས་ཀྱི་ལྟེ་བ་རུ།  །གནམ་ལྕགས་ཐོག་མདའ་མི་འབབ་ཀྱང་།  །དབྱར་རྔའི་ངར་སྒྲོགས་གློ་སྙིང་འདར།  །ཤར་ཕྱོགས་སྡིག་བྱའི་གྲོང་ཁྱེར་དུ།  །ཁྲག་གི་ཆར་པ་ལན་གསུམ་འབབ།  །ཕྱོགས་ཀྱི་བྱིའུ་ཁྲ་མོ་རྣམས།  །གནས་མི་བདེ་ཞིང་ཕྱོགས་སུ་འབྲོས།  །བྱ་ཕྲན་ཁྱུང་གི་སར་འཁོད་དེ།  །ཁྱུང་སྐད་སྒྲོགས་པ་མ་མཐོང་ངམ།  །ཤར་ཕྱོགས་སྲིན་གྱི་གྲོང་ཁྱེར་ནས།  །དམ་སྲི་མེ་སྟག་དམར་པོ་ཡི།  །ཕྱོགས་ཀྱི་ཕོ་ཉ་མགྲོན་དུ་འགུགས།  །ལོངས་སྤྱོད་ནོར་ལ་ཧབ་ཤ་བྱེད།  །མཐར་ནི་རང་ཕུང་རང་བརླག་འབྱུང་།  །མཁའ་ལྡིང་རྒྱལ་པོའི་གཤོག་ལྡེབ་ཏུ།  །མགོ་རྙན་ཅན་གྱི་ཁྱུ་ཚོགས་རྣམས།  །རི་རབ་ཟོམ་གྱི་འབྱུང་པོ་ཡི།  །དཔུང་དང་བཅས་པས་དབུས་སུ་རྒོལ།  །འཚོ་བྱེད་སྨན་ཡང་དུག་ཏུ་འགྱུར།  །བྱ་བྱེད་སྣ་ཚོགས་གསར་དུ་དར།  །དབང་ཐང་ནོར་བུ་གཞན་ལ་འཚོང་།  །ནགས་ཀྱི་བྱ་ཚོགས་བྱང་དུ་འབྲོས།  །བྱང་གི་བྱ་ཚོགས་ནགས་རི་འཛིན།  །བཀའ་སྲུང་དྲེགས་པ་ཐམས་ཅད་ཀྱིས།  །ལྕང་ལོ་ཅན་དུ་ཞལ་ཕྱོགས་ཏེ།  །ཕན་དང་བདེ་འགྲོའི་དབུ་འཕང་དམན།  །མ་དང་མཁའ་འགྲོ་ཐམས་ཅད་ཀྱིས།  །རི་རབ་ལྷུན་པོ་ལ་བརྩེ་ཞིང་།  །བསྟན་དང་འགྲོ་ལ་སྡང་མིག་བལྟ།  །མདོ་སྔགས་རྒྱུད་སྡེ་རྒྱ་མཚོ་ཡི།  །བརྒྱུད་ཟབ་དུག་གི་རླངས་པས་གཅོད།  །དེ་ཡང་སྨོན་ལོག་བདུད་ཀྱི་འཕྲུལ།  །དུས་འཁྲུགས་མཚོན་གྱི་ཡོ་ལངས་འདི།  །བདུད་འགོང་སེ་ཕུང་ནག་པོ་དང་།  །གནོད་སྦྱིན་རྒོད་མ་ཁ་ཡི་འཕྲུལ།  །དམ་སྲི་མེ་སྟག་དམར་པོ་དང་།  །བདུད་ཕོ་རོག་ཏི་ནག་པོ་ཡིས།  །ཤ་ཁྲག་སྲོག་དབུགས་སྡུད་པའི་ཕྱིར།  །དུས་ཀྱི་ཡོ་ལངས་ངན་པས་ན།  །ལན་མང་འདེབས་པ་དེ་ཨེ་གོ།  །བརྡ་དེ་གོའམ་སྐྱེས་བུ་ཁྱོད།  །མ་ནི་མི་མངོན་དབྱིངས་སུ་ཆས།  །དམ་ཚིག་ལྡན་པའི་སྐྱེས་བུ་རྣམས།  །གཏན་གྱི་བདེ་བ་འདོད་སྲིད་ན།  །སྲིད་པའི་བྱ་བ་བོར་ནས་སུ།  །ངེས་མེད་དབེན་པའི་རི་ལ་ཆོས།  །ཕུང་དང་ཉེས་པ་དེ་ན་མེད།  །གསལ་ཁྱབ་འབར་བའི་གདུགས་ཆེན་པོར།  །མ་དང་མཁའ་འགྲོས་རྒྱུད་བསྐུལ་ཏེ།  །ཡེ་ཤེས་ལྷ་ཞལ་ངང་གིས་སྟོན།  །མཁའ་སྤྱོད་དག་པའི་ཞིང་ཁམས་ནས།  །ཡུལ་བཞི་འཁོར་ནས་ང་ཡང་སླེབས།  །ང་དང་གཉིས་མེད་ཆེན་པོ་རུ།  །བཀོད་པ་ལྷུན་གྲུབ་གནས་སུ་འགྲོ།  །ཞེས་གསུངས་ཏེ་བདག་གི་མགོ་ལ་ཕྱག་བྱིལ་མཛད་ནས་མི་སྣང་བར་ཡལ་ལོ།  །དེ་ལྟར་ན་བརྗོད་འགྱུར་བཞིན་དད་ལྡན་གྱི་སློབ་མ་རྣམས་ཀྱི་ངོར་རང་ཉིད་ཀྱི་ལོ་རྒྱུས་ཡི་གེར་འགོད་པའི་ངལ་བ་ལྷུར་བླངས་པ་ལས་རེ་ཞིག་ཆོས་ཁྲིད་སོགས་བྱ་བ་གཞན་གྱིས་འགྱང་སོང་བ་ལ་མཁའ་འགྲོས་ཇི་ལྟར་ལུང་བསྟན་པ་བཞིན་མྱུར་དུ་རྫོགས་པར་གྲུབ་པར་བྱས་པ་སྟེ།  འོན་ཀྱང་དེ་ཙམ་གྱིས་ཟད་པ་ནི་མ་ལགས་ཀྱང་།  ཕལ་ཆེར་བརྗེད་སོང་པ་དང་།  ལོ་ཟླ་དང་ཚེས་གྲངས་མི་དྲན་པའི་རིགས་ཀྱང་མ་བྲིས་ཤིང་།  གལ་ཆེ་བ་རགས་རིམ་ཙམ་དེར་འདུས་སོ་སྙམ་དུ་བསམ་པའོ།  །ཞེས་པ་འདི་ཡང་སྔ་མོའི་དུས་ས་ཕོ་བྱི་བའི་ལོར་རང་སློབ་ལུང་ཟིན་གྱི་སྐྱེས་མཆོག་དམ་པ་བླ་མ་ཚེས་བཅུ་ནས་བཀྲ་ཤིས་པའི་ལྷ་རེག་གཅོད་ཌཱ་རིན་པོ་ཆེའི་ཕྲས་མཛེས་པ་ཁྱད་འཕགས་དང་།  མི་རྐང་གི་གླིང་བུ་མཚན་ལྡན་ཟུང་དང་བཅས་ཏེ་ཆེད་དུ་བསྐུལ་བ་དང་།  མི་ཕྱེད་པའི་དད་ལྡན་སློབ་བུ་འཇམ་དཔལ་ནས་ཀྱང་ཌཱར་འཕན་སེངྒེའི་རི་མོ་བཀྲ་བ་དང་དཔལ་བེའུས་མཚན་པའི་རས་ཁྲ་དང་གཡུ་བྱུར་བཅས་ནན་གྱིས་བསྐུལ་ཞིང་།  དེའི་རྗེས་སུ་གསེར་ལྗོངས་བླ་མ་རོང་ནས་སྐལ་བ་དང་ལྡན་པའི་བུ་སློབ་མཆེད་ལྕམ་མང་པོས་དུས་གཅིག་ཏུ་དངུལ་གོས་ཆེན་ཇ་བག་སོགས་ཟང་ཟིང་གི་མཆོད་པ་མང་པོ་དང་།  ཚེ་གཅིག་ཏུ་འཇིག་རྟེན་གྱི་བྱ་བ་དང་བྲལ་ནས་དབེན་གནས་བསྟེན་པ་དང་།  གཞན་ཡང་ལོ་གྲངས་བཅུ་གསུམ་དང་བཅོ་བརྒྱད་ལ་སོགས་པར་རང་རང་གིས་གང་ནུས་སུ་སྒོམ་སྒྲུབ་ལ་གཞོལ་བར་ཁས་བླངས་པ་སོགས་སྒྲུབ་པ་ཉམས་ལེན་གྱི་མཆོད་པ་རྒྱ་ཆེན་པོ་དང་བཅས་བསྐུལ་བའི་ངོར་འབྲི་བར་བརྩམས་ཤིང་།  ཉེ་ཆར་ཡང་སློབ་བུ་མང་པོས་ཡང་དང་ཡང་དུ་བསྐུལ་བ་ལས།  བདུད་འཇོམས་རྡོ་རྗེས་བཀོད་པ་ལ་ཡི་གེ་པ་ནི་མཁྱེན་རབ་རྒྱ་མཚོ་དང་དགེ་ལེགས་དཔལ་བཟང་སོགས་ཀྱིས་བགྱིས་ཤིང་།  མཁས་དབང་སྤྲུལ་པའི་སྐུ་པདྨ་ལུང་རྟོགས་རྒྱ་མཚོས་ཞུས་དག་ལེགས་པར་བྱས་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག།  ། ༈  སྨྲས་པ།  རིག་དབྱིངས་འགྱུར་མེད་དྲི་བྲལ་ཆེན་པོའི་ངང་།  །ལྷུན་རྫོགས་ཡོན་ཏན་རྒྱ་མཚོའི་གཏེར་འཛིན་པ།  །མ་ལུས་བདུད྄༵་སྡེའི་གཡུལ་འཇོམ྄༵ས་རྣལ་འབྱོར་དབང་།  །དཔལ་ལྡན་གྲུབ་པ་རྡ྄ོ༵་རྗ྄ེ༵་གཏན་གྱི་སྐྱབས།  །གང་དེའི་རྨད་བྱུང་རྣམ་པར་ཐར་པའི་ཚུལ།  །གཉིས་ལྷག་དྲུག་ཅུའི་བགྲང་བར་ཕེབས་ཚུན་གྱི།  །སྐུ་གསུང་ཐུགས་ཀྱི་མཛད་ཕྲིན་གསལ་བཀོད་པ།  །མཐོང་ཐོས་དྲན་རྣམས་སྨིན་ཅིང་གྲོལ་བྱེད་ཡིན།  །གསང་འཛིན་ཌཱ་ཀིའི་གཙོ་མོ་མཚོ་རྒྱལ་མས།  །རྗེས་བསྔགས་མེ་ཏོག་གསར་པའི་ལེགས་འབུལ་བཅས།  །བསྐུལ་བ་ཕྱིས་འབྱུང་བསྟན་འགྲོའི་དོན་ཆེན་དུ།  །འགྱུར་ངེས་རྡོ་རྗེའི་ཚིག་གིས་ལུང་བསྟན་ལགས།  །དགྲ་འདུལ་གཉེན་སྐྱོང་མི་དགེའི་སྤྱོད་པ་དང་།  །འགྲོ་འདུག་བྱེད་རྩོལ་ལུང་མ་བསྟན་གྱི་ལས།  །ཡི་གེར་འབྲི་བའི་ངལ་བ་ལྷུར་ལེན་ལ།  །རྣམ་ཐར་སྒོ་བཏགས་ཕལ་དང་འདི་མི་མཚུངས།  །བགྲང་ཡས་ལྷག་པའི་ལྷ་ཡིས་རྗེས་སུ་བཟུང་།  །སྒོམ་བྱུང་རྟོགས་པའི་ཀློང་ཆེན་ཤུགས་ཀྱིས་བརྡོལ།  །ཟབ་གཏེར་ཆོས་ཀྱི་བདུད་རྩི་རིས་མེད་སྤེལ།  །སྣ་ཚོགས་ཐབས་མཁས་མཛད་ཚུལ་བརྗོད་པར་སྟོན།  །གང་དག་ཡིད་སྲུབ་བྲན་དུ་མ་གྱུར་ཅིང་།  །ཕྱོགས་ཙམ་ཞིག་ཀྱང་གཟུ་བོར་གནས་པ་ཡི།  །རྣམ་ཐར་དཔྱོད་བློ་ཅུང་ཟད་མཆིས་ན་ཡང་།  །བསྔགས་འོས་ངོ་མཚར་གནས་སུ་ཅིས་མི་མཐོང་།  །ངེས་པའི་དོན་དུ་ཐོག་མའི་རྒྱལ་བ་ཡི།  །ཐུགས་རྗེས་ཡེ་སྤྲུལ་ཡོན་ཏན་བཀོད་པ་ཡང་།  །རྒྱལ་ཀུན་གསང་བ་གསུམ་དང་རོ་མཉམ་དུ།  །གྱུར་པ་ཐམས་ཅད་གཟིགས་པ་ཁོ་ནའི་ཡུལ།  །དེ་སླད་ཡི་གེར་བཀོད་ཟིན་འདི་དག་ཀྱང་།  །རྒྱ་མཚོ་ཆེ་ལས་ཆུ་ཡི་ཐིག་པ་བཞིན།  །ཆ་ཤས་ཙམ་ཞིག་ད་ལྟའི་ཐུན་མོང་གི།  གདུལ་བྱའི་བློ་དང་འཚམས་པར་བསྩལ་པ་ལགས།  །ཕྲག་དོག་རླུང་གིས་ཡིད་ནི་ཆེར་བསྐྱོད་ཅིང་།  །བློ་མིག་ཕྱོགས་འཛིན་རབ་རིབ་ཀྱིས་བསྒྲིབས་པའི།  །མཁས་རློམ་རྣམས་ཀྱི་སྙིང་གི་ཟུག་རྔུ་རུ།  །འགྱུར་ཡང་རང་གི་ལས་ཀྱིས་ནོངས་པ་ཡིན།  །གང་ལྟར་བརྗོད་པ་ཚུར་མཐོང་སྒོ་གསུམ་ལས།  །མ་ལགས་ཁྱད་འཕགས་ཡོན་ཏན་མང་མཆིས་ཏེ།  །རྗོད་བྱེད་ཚིག་ཀྱང་རྟོག་བཟོའི་སྒྲ་དོན་རྒྱན།  །ཙམ་མིན་སོ་སོ་རང་རིག་སྟོབས་ལས་བྱུང་།  །རབ་འབྱམས་ཕྱོགས་བཅུའི་ཞིང་བཞུགས་རྒྱལ་དེ་སྲས།  །གནས་གསུམ་དཔའ་བོ་ཌཱཀྐིའི་ཚོགས་རྣམས་དང་།  །ལྷ་དང་གྲུབ་པ་རིག་འཛིན་རྒྱ་མཚོ་ཡིས།  །དགྱེས་པའི་འཛུམ་ཞལ་སྟོན་ལ་སུ་ཞིག་བསྙོན།  །ཤིན་ཏུ་གསང་བའི་རྣམ་པར་ཐར་པ་འདི།  །སྐལ་མེད་ལོག་ལྟ་ཅན་ལ་སྦ་བ་དང་།  །སྐལ་ལྡན་སྐྱེ་བོའི་ཚོགས་ལ་དར་རྒྱས་སུ།  །འགྱུར་བའི་གཉེར་ཁ་བསྟན་སྲུང་རྒྱ་མཚོས་མཛོད།  །འདི་ལས་བྱུང་བའི་ལེགས་ཚོགས་ཅི་མཆིས་པས།  །ཡངས་པའི་ས་ཆེན་ཀུན་ཏུ་ནད་མུག་དང་།  །འཁྲུག་རྩོད་ལ་སོགས་དུས་ཀྱི་རྒུད་པ་ཞི།  །བདེ་སྐྱིད་དཔལ་གྱིས་རྟག་ཏུ་འཚོ་བར་ཤོག།  རིག་འཛིན་བླ་མ་མཆོག་དེའི་ཐུགས་བསྐྱེད་མཐུ།  །རང་གཞན་ཀུན་ལ་གེགས་མེད་འབྱོར་བ་དང་།  །རྒྱལ་བསྟན་སྤྱི་དང་གསང་ཆེན་ཟབ་མོའི་ཆོས།  །ཕྱོགས་དུས་ཀུན་ཏུ་དར་ཞིང་རྒྱས་གྱུར་ཅིག།  བྱ་རྩོལ་བློ་ལས་འདས་པའི་ཐེག་མཆོག་གིས།  །ཡིད་ཅན་མ་ལུས་གདོད་མའི་མགོན་པོ་ཡི།  །གོ་འཕང་མཆོག་ལ་མྱུར་དུ་རེག་གྱུར་ནས།  །འཁྲུལ་སྣང་འཁོར་བའི་གྲོང་ཁྱེར་སྟོང་གྱུར་ཅིག   །དེ་ལྟར་རྒྱལ་ཀུན་འདུས་པའི་སྤྱི་གཟུགས་གཏེར་ཆེན་ཆོས་ཀྱི་རྒྱལ་པོ་མཚན་བརྗོད་པར་དཀའ་བ་དོན་གྱི་སླད་དུ་ན་རིག་འཛིན་བདུད་འཇོམས་རྡོ་རྗེ་གྲོ་ལོད་རྩལ་གྱིས་ཞལ་སྔ་ནས་རྣམ་པར་ཐར་པ་དགུང་གྲངས་དྲུག་ཅུ་རེ་གཉིས་ལ་ཕེབས་པ་ཚུན་ཞལ་རྩོམ་དུ་གནང་བ་ལ།  མཇུག་རྩོམ་གྱི་ཚུལ་འདི་ཡང་གང་གི་བཀས་གནང་བ་ཐོབ་ཅིང་དམ་ལྡན་རྡོ་རྗེའི་མཆེད་པོ་མཁྱེན་རབ་རྒྱ་མཚོས་ཀྱང་བསྐུལ་ངོར།  གཏེར་ཆེན་རིན་པོ་ཆེ་དེ་ཉིད་ཀྱིས་ཐུགས་བརྩེ་བ་ཆེན་པོས་རྗེས་སུ་བཟུང་ཞིང་རྒྱུ་མཚན་ཤེས་ཏེ་མི་ཕྱེད་པའི་དད་པ་བརྟན་པོའི་སྒོ་ནས་ཞབས་རྡུལ་སྤྱི་བོས་ལེན་པ་གསར་རྙིང་རིས་མེད་ཀྱི་གཞུང་ལ་ཅུང་ཟད་སྦྱངས་པ་བྱས་རློམས་ཀྱི་སྐྱེས་མིང་འདུ་ཤེས་གསུམ་པ་པདྨ་ལུང་རྟོགས་རྒྱ་མཚོའམ་མིང་གཞན་བློ་བཟང་བསྟན་པའི་རྒྱལ་མཚན་དུ་འབོད་པས་བྲིས་པ་ཀུན་ནས་དགེ་བར་གྱུར་ཅིག།  །   ༈    ཨོཾ་སྭསྟི་སིདྡྷཾ།    མཐའ་ཡས་དབང་པོ་པདྨ་བདེ་བ་ཆེ།  །གདུལ་དཀའི་གཤེད་དུ་འཆོལ་བའི་གྲོ་བོ་ལོད།  །སླར་ཡང་བསམ་བཞིན་གཏེར་འབྱིན་རྫུར་ཞུགས་ནས།  །མི་སྲུན་བདུད་སྡེ་འཇོམ྄༵ས་དེར་ཡིད་རབ་དད།  ༡  །གང་གི་རྟོགས་བརྗོད་ངོ་མཚར་སྒྱུ་མའི་ཚུལ།  །རྒྱ་ཆེ་གཏིང་ཟབ་བྱིས་བློས་གཞལ་མི་སྤྱོད།  །བརྩེ་ཆེན་ཐུགས་ཀྱིས་ཆ་ཙམ་ལས་ཅན་ངོར།  །རྡ྄ོ༵་རྗ྄ེ༵འི་མགུར་གྱི་བུམ་བཟང་ལས་ཕྱུངས་པས།  ༢  །ངེས་གསང་གནས་སྟོན་སྲིད་ཞིའི་བདེན་འཛིན་བཤིག།  འཇིགས་མེད་སེངྒེའི་སྒྲ་ཆེན་ཡོངས་བསྒྲགས་སླད།  །བློ་དམན་དཔའ་བཀོང་དབང་རྣོན་རབ་དགའི་གནས།  །རྩོད་དུས་ཀུན་བཟང་ཐུགས་ཀྱི་བསྟན་བཙས་སུ།  ༣  །རྣམ་པར་དགོངས་ནས་གང་གི་དེ་མ་ཐག།  མཆོག་གི་སྤྲུལ་སྐུ་ཡེ་ཤེས་རྡོ་རྗེ་ཡིས།  །ཞུས་ཤིང་བྱིས་དོར་གཙང་བྱས་ཆོས་སྦྱིན་སྤར།  །རིས་མེད་གདུལ་བྱའི་དཔལ་དུ་ལེགས་པར་བསྐྲུན།  ༤  །འདི་དགེས་དཔལ་ལྡན་བླ་མ་སྲས་བཅས་ཀྱི།  །ཞབས་པད་རྟག་བརྟན་ཕྲིན་ལས་མཁའ་མཐར་བརྡལ།  །རིམ་དགུའི་རྩེ་རྒྱལ་ཨ་ཏིའི་རྫོགས་པ་ཆེའི།  །རིང་ལུགས་དྲི་མེད་ཕྱོགས་ཀྱི་ཐ་གྲུར་ཁྱབ།  ༥ །  རྣམ་ཐར་འདི་མཐོང་ཐོས་དང་དྲན་པ་ཀུན།  །གཟུང་འཛིན་རང་གྲོལ་ནམ་མཁའི་རྣལ་འབྱོར་ལམ།  །ཚེ་གཅིག་བཙན་ཆོད་ཟག་ཕུང་འཇའ་སྐུར་དེངས།  །འཁོར་བ་གཏིང་སྤྲུགས་བཀྲ་ཤིས་དཔལ་འབར་ཤོག  ༦  །ཅེས་པའང་ལེགས་བྱས་ཀྱི་འབྲེལ་ཐོགས་རྣམ་རྒྱལ་དཔལ་མོ་སོགས་སྦྱིན་པའི་བདག་པོ་རྣམས་ཀྱི་བསམ་པ་རྫོགས་པའི་སླད་དུ་འཁོར་ལོའི་དབང་ཕྱུག་འཇིགས་བྲལ་ཡེ་ཤེས་རྡོ་རྗེའི་བཀའ་སྩལ་རིན་པོ་ཆེ་སྤྱི་བོས་མཆོད་དེ།  ཀུ་ས་ལི་སངས་རྒྱས་རྡོ་རྗེས་འདུན་སྨོན་དུ་བྲིས་པ་སིདྡྷི་རསྟུ།།  །།}}
</onlyinclude>
{{TsagliCall}}
<headertabs/>