TTDL-ZABTER-12-NA-050

Previous Text Back to Volume PageNext Text

Wylie title	chos nyid nam mkha'i klong mdzod las: gu ru pad+ma drag po'i rtsa sgrub rgya mtsho 'khyil ba:
Location	bdud 'joms gling pa zab gter Volume 12, Text 50, Pages 299-301 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las gu ru pad+ma drag po'i rtsa sgrub rgya mtsho 'khyil ba. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 299-301. Thimphu, Bhutan: Lama Kuenzang Wangdue, 2004.
Side notes	Recto: rtsa sgrub   Verso: bdud 'joms gu ru drag po
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	gu ru pad+ma drag po
Colophon	ཞེས་པ་འདི་ཡང་འོད་གསལ་རྫོགས་པ་ཆེན་པོའི་རྣལ་འབྱོར་པ་ཁྲག་འཐུང་རྡོ་རྗེ་ཁྲོ་ལོད་རྩལ་གྱིས་ཡེ་ཤེས་མཁའ་འགྲོའི་ཀློང་བྱང་ལས་དག་པར་ཕབ་པ་སྟེ་ཡི་གེའི་རིས་བྱེད་རྣལ་འབྱོར་དབང་ཕྱུག་ཆོས་ཀྱི་རྡོ་རྗེའོ། །དགེའོ།།
	zhes pa 'di yang 'od gsal rdzogs pa chen po'i rnal 'byor pa khrag 'thung rdo rje khro lod rtsal gyis ye shes mkha' 'gro'i klong byang las dag par phab pa ste yi ge'i ris byed rnal 'byor dbang phyug chos kyi rdo rje'o/_/dge'o//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ གུ་རུ་པདྨ་དྲག་པོའི་རྩ་སྒྲུབ་རྒྱ་མཚོ་འཁྱིལ་བ་བཞུགས་སོ༔ ན་མོ་གུ་རུ་པདྨ་སིདྡྷི་ཧཱུྃ༔ (བརྡ་ཡིག་) བདག་ཉིད་པདྨ་ཐོད་ཕྲེང་ངས༔ བརྒྱུད་འཛིན་རྡོ་རྗེའི་གདིང་ཐོབ་ཕྱིར༔ མ་དག་འཁོར་བའི་སྒོ་གསུམ་པོ༔ དག་པ་གསང་གསུམ་རྡོ་རྗེ་ཡིས༔ གྲོང་འཕོ་གྲོང་འཇུག་གདམས་པ་བསྟན༔ བརྩོན་འགྲུས་སྙིང་རུས་སྟོབས་བསྐྱེད་ཅིག༔ ཐར་བ་དོན་དུ་གཉེར་བར་གྱིས༔ བསྒོམ་བཟླས་གནད་དུ་བསྣུན་པ་ནི༔ ཧཱུྃ༔ སྣང་ཞིང་སྲིད་པའི་འཇིག་རྟེན་ཁམས༔ དོན་གྱི་འོག་མིན་ཆེན་པོར་སངས༔ ལྷུན་གྲུབ་བདེ་ཆེན་གཞལ་ཡས་སུ༔ ཆོས་འབྱུང་དམར་ནག་གདེངས་པའི་ཀློང་༔ མ་ཆགས་སྐྱོན་བྲལ་པད་ཉིའི་སྟེང་༔ རང་རིག་རྒྱུ་ཡི་ཧཱུྃ་དམར་གསལ༔ སྤྲོ་བསྡུའི་སྦྱོར་བས་རང་བྱུང་བ༔ ཆེ་མཆོག་པདྨ་ཐོད་ཕྲེང་རྩལ༔ དམར་ནག་དབང་དྲག་རོལ་པའི་སྐུ༔ ཞལ་གཅིག་ཕྱག་གཉིས་གཡས་པ་ན༔ གནམ་ལྕགས་རྭ་གདེངས་རྡོ་རྗེ་དང་༔ གཡོན་པས་ལྕགས་སྡིག་མགོ་དགུ་བསྣམས༔ ཞལ་གདངས་ལྗགས་འདྲིལ་མཆེ་བ་གཙིགས༔ སྤྱན་གསུམ་དམར་ཟླུམ་ནམ་མཁར་གཟིགས༔ སྨ་ར་སྨིན་མ་དམར་སེར་འབར༔ དབུ་སྐྲ་སྲིད་པའི་རྩེ་མོར་འཁྱིལ༔ ཐོད་སྐམ་རིགས་ལྔས་དབུ་ལ་བརྒྱན༔ ཀོ་རློན་གཡང་གཞི་སྟག་ཤམ་གསོལ༔ ཐལ་ཚོམ་ཁྲག་ཐིག་ཟོ་རིས་དང་༔ ཐོད་ཕྲེང་སྤྲུལ་གྱི་ཆུན་པོས་བརྒྱན༔ ཞབས་གཉིས་གྱད་ཀྱི་འདོར་སྟབས་བསྒྲད༔ ཁམས་གསུམ་འཁོར་བའི་སྒོ་འཕར་གནོན༔ དཔལ་ཀྱི་ཆས་རྫོགས་མེ་དཔུང་འབར༔ སྐུ་ལ་རྒྱལ་བའི་དཀྱིལ་འཁོར་རྫོགས༔ ཆུ་ཟླ་འཇའ་འོད་གཟུགས་བརྙན་བཞིན༔ སྣང་ལ་རང་བཞིན་མེད་པར་བསྒོམ༔ སྒྱུ་མ་རྨི་ལམ་ཇི་བཞིན་དུ༔ གསལ་ལ་དེར་འཛིན་བྲལ་བ་ཡི༔ དཔྲལ་བར་ཨོཾ་དང་མགྲིན་པར་ཨཱཿཐུགས་ཀའི་ཧཱུྃ་ལས་འོད་འཕྲོས་པས༔ རང་སྣང་དོན་གྱི་འོག་མིན་ནས༔ རྟེན་དང་བརྟེན་པའི་དཀྱིལ་འཁོར་ལྷ༔ སྤྱན་དྲངས་དབྱེར་མེད་རོ་གཅིག་རོལ༔ དེ་ནས་སྤྱན་འདྲེན་པ་ནི༔ ཧཱུྃ༔ གཞི་དབྱིངས་བྱང་ཆུབ་སེམས་ཀྱི་ངང་༔ དུས་གསུམ་བཞུགས་དང་གཤེགས་འགྱུར་གྱིས༔ སྐུ་གསུམ་རྒྱལ་བ་རྒྱ་མཚོའི་ཚོགས༔ པདྨ་དྲག་པོའི་སྐུར་བཞེངས་ཏེ༔ སྐད་ཅིག་ཉིད་ལ་གཤེགས་སུ་གསོལ༔ དུས་གསུམ་འཕོ་འགྱུར་མེད་པའི་ངང་༔ གཉིས་མེད་རོལ་པར་རྟག་བཞུགས་གསོལ༔ བཛྲ་ས་མ་ཡ་ཛ་ཛ༔ ཕྱག་འཚལ་མཆོད་པ་འབུལ་བ་ནི༔ ཧཱུྃ༔ གདོད་ནས་ལྷན་ཅིག་སྐྱེས་པའི་ལྷ༔ རང་ངོར་རིག་པས་ཕྱག་འཚལ་ལོ༔ སྣང་སྲིད་བདེ་བ་ཆེན་པོའི་ངང་༔ རང་བྱུང་མཆོད་པའི་སྤྲིན་དུ་འབུལ༔ མ་ཧཱ་སརྦ་པཱུ་ཛ་ ཧོཿ དེ་ནས་བསྟོད་པ་བྱ་བ་ནི༔ ཧཱུྃ༔ གཞི་དབྱིངས་ཡུལ་མེད་ཟང་ཟལ་ཀློང་༔ ལྷུན་གྲུབ་དག་རྫོགས་རོལ་པའི་ལྷ༔ རྒྱུ་རྐྱེན་ཡུལ་དུ་མ་གྱུར་པའི༔ དུས་གསུམ་འཕོ་འགྱུར་མེད་པ་རུ༔ ལྷན་སྐྱེས་ཡེ་ཤེས་ཆེན་པོར་རིག༔ གཟུང་འཛིན་བྲལ་བས་ཕྱག་འཚལ་བསྟོད༔ དེ་ནས་འཛབ་དགོངས་ཟབ་མོ་ནི༔ ཧཱུྃ༔ རང་ཉིད་རང་གྲོལ་ཧེ་རུ་ཀའི༔ ཐུགས་གསང་གནམ་ལྕགས་རྡོ་རྗེའི་ལྟེར༔ རིག་པ་ཧཱུྃ་དམར་འོད་འབར་བའི༔ མཐའ་མར་སྔགས་ཀྱི་ཕྲེང་བས་བསྐོར༔ འོད་འཕྲོས་རྒྱལ་བ་སྲས་བཅས་མཆོད༔ གསང་བ་གསུམ་གྱི་དབང་བྱིན་དང་༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་ཐམས་ཅད་བཅུད་དུ་དྲིལ༔ བསྡུས་ཏེ་རྩ་བའི་སྔགས་ལ་བསྟིམ༔ འཁོར་འདས་ཡོངས་ཀྱི་སྲོག་ཐོབ་བསམ༔ ཨོཾ་ཨརྩིག་ནིརྩིག་ན་མོ་གྷ་ག་ཝ་ཏེ་ཧཱུྃ་ཧཱུྃ་ཕཊ༔ འབུམ་ཕྲག་བཅུ་གསུམ་གྲངས་རྫོགས་པར༔ གཞན་དུ་ཡེངས་པར་མ་གྱུར་ན༔ རྣམ་པར་སྨིན་པའི་རིག་འཛིན་ཐོབ༔ ལྷ་འདྲེ་མི་གསུམ་བྲན་དུ་ཁོལ༔ ཕྲིན་ལས་ཐམས་ཅད་ཐོགས་མེད་འགྲུབ༔ དྲང་སྲོང་གཟའ་བདུད་རྒྱལ་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་འོད་གསལ་རྫོགས་པ་ཆེན་པོའི་རྣལ་འབྱོར་པ་ཁྲག་འཐུང་རྡོ་རྗེ་ཁྲོ་ལོད་རྩལ་གྱིས་ཡེ་ཤེས་མཁའ་འགྲོའི་ཀློང་བྱང་ལས་དག་པར་ཕབ་པ་སྟེ་ཡི་གེའི་རིས་བྱེད་རྣལ་འབྱོར་དབང་ཕྱུག་ཆོས་ཀྱི་རྡོ་རྗེའོ། །དགེའོ།།