TTDL-ZABTER-15-BA-100

Previous Text Back to Volume PageNext Text

Wylie title	dag snang ye shes drwa ba las: yul lha gnyan po la rlung rta phul zhing rlung rta'i dpal bskyed pa'i las bcol:
Location	bdud 'joms gling pa zab gter Volume 15, Text 100, Pages 417-419 (Folios 1a1 to 2a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las yul lha gnyan po la rlung rta phul zhing rlung rta'i dpal bskyed pa'i las bcol. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 417-419. Thimphu, Bhutan: Lama Kuenzang Wangdue, 2004.
Side notes	Recto: rlung rta phul bcol   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Exhortations to Act - phrin bcol
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཞེས་པ་འདི་ཁྲོམ་དཔོན་ཀུན་བཟང་བསྟན་འཛིན་གྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའི་ཡི་གེ་པ་ནི་ངག་དབང་ཕྲིན་ལས་སོ། །དགེའོ།།
	zhes pa 'di khrom dpon kun bzang bstan 'dzin gyis nan du bskul ngor bdud 'joms rdo rjes dag snang ye shes drwa ba las bsgyur ba'i yi ge pa ni ngag dbang phrin las so/_/dge'o//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ ཡུལ་ལྷ་གཉན་པོ་ལ་རླུང་རྟ་ཕུལ་ཞིང་རླུང་རྟའི་དཔལ་བསྐྱེད་པའི་ལས་བཅོལ་བཞུགས་སོ༔ ན་མོ་གུ་རུ་ཧ་རི་ནི་ས་ཡེ༔ (བརྡ་ཡིག་) རླུང་རྟ་ཕུལ་ཞིང་བཅོལ་ལས་ལ༔ བཀྲ་ཤིས་རྟགས་བརྒྱད་རྒྱལ་སྲིད་བདུན༔ རྟ་མཆོག་ནོར་བུ་བཀལ་བ་དང་༔ སྟག་དང་སེང་གེ་ཁྱུང་དང་འབྲུག༔ བྲིས་ཏེ་ཕྱར་ནས་འདི་ལྟར་བསམ༔ འདོད་རྒུ་ལོངས་སྤྱོད་ཕུན་ཚོགས་པ༔ རྒྱུན་མི་ཆད་པར་འཕྲོ་བ་ཡི༔ དཔག་བསམ་ཤིང་དང་ཡིད་བཞིན་ནོར༔ ལྟ་བུར་གསལ་ཏེ་བརྗོད་པར་བྱ༔ ན་མོ་རཏྣ་ཏྲ་ཡ་ཡཱ༔ ཨོཾ་ཡེ་དྷརྨ་སོགས་ལན་བདུན་བརྗོད་མཐར༔ ན་མོ༔ བླ་ན་མེད་པའི་དཀོན་མཆོག་གསུམ༔ རྩ་གསུམ་དཔའ་བོ་མཁའ་འགྲོ་དང་༔ བཀའ་སྲུང་དམ་ཅན་རྒྱ་མཚོ་ལ༔ འདོད་རྒུའི་འབྱུང་གནས་རླུང་རྟ་འབུལ༔ བདག་གི་རླུང་རྟའི་དཔལ་བསྐྱེད་གསོལ༔ ཡུལ་འདིའི་གཞི་བདག་དྲེགས་པ་ཅན༔ ཆེ་གེ་མོ་ལ་སོགས་པ་ཡི༔ ཁ་འཛིན་སྡོང་གྲོགས་རྒྱབ་བརྟེན་དང་༔ དཔུང་གཉེན་འཇིགས་སྐྱོབ་ནུས་པ་ཅན༔ འཁོར་དང་བཅས་པ་ཐམས་ཅན་ལ༔ བཀྲ་ཤིས་རྟགས་བརྒྱད་འདི་འབུལ་ལོ༔ མཐུ་སྟོབས་ནུས་རྩལ་དྲག་ཤུལ་དང་༔ དཔལ་འབྱོར་ལོངས་སྤྱོད་རྒྱས་གྱུར་ཅིག༔ དེ་མཐུས་བདག་ཅག་འཁོར་བཅས་ལ༔ བཀྲ་ཤིས་དཔལ་འབར་དངོས་གྲུབ་སྩོལ༔ རིན་ཐང་བྲལ་བའི་རྒྱལ་སྲིད་བདུན༔ འབུལ་ལོ་འཁོར་ལོས་བསྒྱུར་རྒྱལ་བཞིན༔ སྣང་སྲིད་ཡོངས་ལ་དབང་བསྒྱུར་ཤོག༔ དེ་མཐུས་བདག་ཅག་འཁོར་བཅས་ལ༔ འདོད་རྒུ་དཔལ་གྱི་དངོས་གྲུབ་སྩོལ༔ རྟ་མཆོག་ནོར་བུས་བརྒྱན་པ་དང་༔ རྒྱ་སྟག་གཞོན་ནུ་ངར་མ་འབུལ༔ སེང་གེ་གཡུ་རལ་རྒྱས་པ་དང་༔ ཁྱུང་ཆེན་འཇིགས་རྔམས་ལྡན་པ་འབུལ༔ གཡུ་འབྲུག་ཁམས་གསུམ་སྒྲ་འབྱིན་དང་༔ མཐུ་སྟོབས་ནུས་རྩལ་བསྐྱེད་བྱེད་ཀྱི༔ རྫས་དང་ནོར་གྱི་མཆོད་པ་འབུལ༔ བདག་ཅག་ཡོན་མཆོད་འཁོར་བཅས་ཀྱི༔ རླུང་རྟ་དང་ནི་དགྲ་བླ་མཆོག༔ རྟ་དང་སྟག་སེང་ཁྱུང་དང་འབྲུག༔ གོང་ནས་གོང་དུ་འཕེལ་བསྐྱེད་དེ༔ དར་ཞིང་རྒྱས་པའི་ཕྲིན་ལས་མཛོད༔ དར་མཚོན་མཐིང་ག་འདི་འབུལ་གྱིས༔ ནམ་མཁའི་ཁམས་ཀྱི་རླུང་རྟ་བསྐྱེད༔ དཀར་པོ་དྲི་མེད་འདི་འབུལ་གྱིས༔ ཆུ་ཁམས་རླུང་རྟ་དར་རྒྱས་མཛོད༔ སེར་པོ་མདངས་ལྡན་འདི༴ ས་ཁམས་རླུང་རྟ་འཕེལ་རྒྱས་མཛོད༔ དམར་པོ་འོད་ལྡན་འདི༴ མེ་ཁམས་རླུང་རྟ་འཕེལ་རྒྱས་མཛོད༔ ལྗང་གསལ་མཛེས་ལྡན་འདི༴ རླུང་ཁམས་རླུང་རྟ་འཕེལ་རྒྱས་མཛོད༔ སྣ་ཚོགས་དར་ཟབ་འདི་འབུལ་ལོ༔ བདག་ཅག་ཡོན་མཆོད་འཁོར་བཅས་ཀྱི༔ ཚེ་བསོད་དཔལ་འབྱོར་མངའ་ཐང་དང་༔ སྲོག་ལུས་དབང་ཐང་རླུང་རྟ་དང་༔ བླ་གཟའ་སྙན་གྲགས་མཐུ་ནུས་སྟོབས༔ གོང་ནས་གོང་དུ་འཕེལ་རྒྱས་ཤིང་༔ མི་ནུབ་བསྟན་པའི་ཕྲིན་ལས་མཛོད༔ མི་ནད་ནོར་གྱིས་གོད་ཁ་དང་༔ དགྲ་ཇག་ཆོམ་རྐུན་འཚེ་བའི་རིགས༔ མདོར་ན་མི་མཐུན་ཕྱོགས་རྣམས་ཀུན༔ གསོད་གཅོད་བཟློག་བསྒྱུར་ཕྲིན་ལས་མཛོད༔ ཆོས་བོན་བརྒྱུད་པའི་བླ་མ་ཡི༔ བཀའ་བསྒོ་ཡིན་ནོ་བཀའ་བཅག༔ དམ་ཚིག་ཡིན་ནོ་དམ་མ་ཉམས༔ བཅོལ་བའི་ཕྲིན་ལས་གྲུབ་པར་མཛོད༔ དེ་མཐར་དཔའ་མཁར་སྟེང་དུ་གཟུག༔ གནད་དེས་དགེ་ལེགས་གོང་འཕེལ་ཞིང་༔ ལེགས་པའི་ཡོན་ཏན་ཕུན་ཚོགས་ཤིང་༔ ས་མ་ཡ༔ ཨྠིྀ༔ ཞེས་པ་འདི་ཁྲོམ་དཔོན་ཀུན་བཟང་བསྟན་འཛིན་གྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའི་ཡི་གེ་པ་ནི་ངག་དབང་ཕྲིན་ལས་སོ། །དགེའོ།། །།