TTDL-ZABTER-09-TA-031

Previous Text Back to Volume PageNext Text

Wylie title	zab gsang mkha' 'gro'i snying thig las: btsan rgod srog len dmar po'i sgrub pa dngos grub bang mdzod:
Location	bdud 'joms gling pa zab gter Volume 9, Text 31, Pages 219-225 (Folios 1a1 to 4a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las btsan rgod srog len dmar po'i sgrub pa dngos grub bang mdzod. In Sprul pa'i gter chen bdud 'joms gling pa'i zab gter gsang ba'i chos sde, Vol. 9: 219-225. Thimphu, Bhutan: Lama Kuenzang Wangdue, 2004.
Side notes	Recto: sgrub pa   Verso: bdud 'joms bka' srung btsan rgod skya bdun
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་སུམ་ཅུ་རྩ་གཅིག་བར་དུ་བཀའ་རྒྱ་བྱས་མཐར་སློབ་བུ་འཇིགས་མེད་དམ་ཆོས་ཀྱིས་ནན་དུ་བསྐུལ་ངོར་ཟབ་གསང་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་ཆོས་ཀྱི་བདག་པོ་མཁྱེན་རབ་རྒྱ་མཚོའོ། །དགེའོ། །དགེའོ། །དགེའོ། །ལེགས་སོ།།
	zhes pa 'di ni khrag 'thung bdud 'joms rdo rjes gter nas bton te mi lo sum cu rtsa gcig bar du bka' rgya byas mthar slob bu 'jigs med dam chos kyis nan du bskul ngor zab gsang mkha' 'gro'i brda ris las dag par phab pa'i yi ge pa ni chos kyi bdag po mkhyen rab rgya mtsho'o/_/dge'o/_/dge'o/_/dge'o/_/legs so//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བཙན་རྒོད་སྲོག་ལེན་དམར་པོའི་སྒྲུབ་པ་དངོས་གྲུབ་བང་མཛོད་བཞུགས༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) སྒྲུབ་རྫས་བླ་རྡོ་རྫས་ལྡན་དང་༔ བཤོས་བུ་དམར་ནག་བདུན་བསྐོར་དང་༔ བསྐང་དང་མཆོད་པའི་རྫས་མཆོག་ནི༔ མེད་མི་རུང་བ་ཤ་དང་ཁྲག༔ གཞན་ཡང་བཟའ་བཏུང་གང་འོས་བཤམས༔ མདའ་དར་མདུང་དར་དམར་པོ་བརྒྱར༔ ཤ་ཆེན་ཚིལ་ཆེན་བྱ་བ་དང་༔ ར་ཕོ་གཡག་གི་ཤ་ཚིལ་གསུར༔ རྒྱུན་མི་འཆད་པ་གནད་དུ་ཟུང༔ ཨོཾ་སྭ་བྷཱ་ཝ་སོགས༔ སྟོང་པ་ཉིད་དུ་གྱུར༔ སྟོང་པའི་ངང་ལས་མདུན་དུ་ཟངས་ཐང་དམར་པོ་འོད་དམར་རབ་ཏུ་འཁྲིགས་པའི་དབུས་སུ་ཟངས་མཁར་དམར་པོ་འོད་འབར་བ་རྩེ་མོ་མཐོ་ཞིང་དགུང་ལ་སྙེགས་པའི་ནང་དུ་ཁྲག་མཚོ་དམར་པོ་རྦ་ཀློང་འཁྲིགས་པའོ༔ ཁྲག་ལྦུའི་ཀློང་དུ་མི་རོ་རྟ་རོ་རྙིལ༔ དེ་སྟེང་ཙཿཏྲིཿརུཿཡིག་བརྩེགས་མར་བབས༔ འོད་ཟེར་ཡར་འཕྲོས་རྒྱལ་བ་མཆོད་པས་མཉེས༔ རྒྱལ་དང་རྒྱལ་སྲས་སྲུང་མར་བཅས་པ་ཀུན༔ འོད་དམར་རྣམ་པར་བསྡུས་ཏེ་ཡི་གེར་ཐིམ༔ མར་འཕྲོས་དགྲ་བགེགས་གནོད་བྱེད་མ་ལུས་བསྒྲལ༔ སྣོད་བཅུད་འབྱུང་བའི་ཚེ་བསོད་མཐུ་ནུས་ཀུན༔ ཚུར་འདུས་ཡི་གེ་གསུམ་ལ་ཐིམ་པ་ཡིས༔ ཙཿལས་ལུས་སྐྱེས་རུཿལས་ངག་སྐྱེས་ཏེ༔ ཏྲིཿལས་ཡིད་གྲུབ་གནོད་སྦྱིན་ཙི་མ་ར༔ དམར་ནག་ཁྲོ་གཏུམ་སྤྱན་གསུམ་སྡང་མིག་བསྒྲད༔ སྐུ་ལ་ཟངས་ཁྲབ་དབུ་ལ་ཟངས་རྨོག་གསོལ༔ ཕྱག་གཡས་བཙན་མདུང་གཡོན་པས་བཙན་ཞགས་བསྣམས༔ སྟག་རལ་དང་ནི་གཟིག་ཤུབ་སྐེད་ལ་བསྐོར༔ མེ་རྟ་དམར་པོ་ཆིབས་ཤིང་ཀུན་ཏུ་རྒྱུ༔ མི་དམར་སྔོན་རྒྱུག་བྱ་དམར་ཀླད་ན་ལྡིང་༔ ཁྱི་དམར་རྗེས་འབྲང་སྤྲུལ་པའི་ཕོ་ཉེར་འགྱེད༔ སྤྲུལ་པ་བཙན་རྒོད་རང་འདྲ་བདུན་གྱིས་བསྐོར༔ དེ་མཐར་བཀའ་ཡི་ལྷ་སྲིན་སྡེ་བརྒྱད་དང་༔ སྣང་སྲིད་དྲེགས་པའི་ཕོ་མོའི་ཚོགས་ཀྱིས་བསྐོར༔ གནས་གསུམ་ཡིག་འབྲུ་གསུམ་དང་ཐུགས་སྲོག་ལས༔ འོད་འཕྲོས་སྣང་སྲིད་དྲེགས་པ་སྤྱན་དྲངས་བསྟིམ༔ དེ་ནས་སྤྱན་འདྲེན་པ་ནི༔ ཀྱཻ༔ གནོད་སྦྱིན་རྒྱལ་པོ་ཙི་མ་ར༔ སྤྲུལ་པ་བཙན་ཆེན་རོལ་པ་བདུན༔ ཡུམ་དང་སྡེ་བརྒྱད་དྲེགས་པའི་ཚོགས༔ དད་དང་དམ་ཚིག་དབང་གིས་འབོད༔ གནོད་སྦྱིན་ཡུལ་ནས་གཤེགས་སུ་གསོལ༔ བཙན་གྱི་ཡུལ་ནས༴ འབྱུང་ལྔའི་དབྱིངས་ནས༴ བྷ་དྷ་ཧོར་ནས༴ ཤམ་བྷ་ལ་ནས༴ དཀོར་མཛོད་གླིང་ནས༴ དབུ་རུ་ཞྭ་སོགས་འཛམ་གླིང་གི༔ ཆོས་འཁོར་གཙུག་ལག་དབེན་གནས་དང་༔ སྒྲུབ་གནས་ཀུན་ནས་གཤེགས་སུ་གསོལ༔ ཤུ་ལ་ཏྲི་བཛྲ་ས་མ་ཡ་ཛ་ཛཿ དེ་ནས་བཞུགས་གསོལ་ཕྱག་འཚལ་མཆོད་འབུལ་ལ༔ ཀྱཻ༔ བསྒྲུབ་ཅིང་བརྟེན་པའི་གནས་མཆོག་འདིར༔ སྐྱེས་བུ་འཁོར་བཅས་བཞུགས་སུ་གསོལ༔ བསྟན་པ་བསྲུང་ཕྱིར་ཕྱག་ཀྱང་འཚལ༔ དངོས་འབྱོར་ཡིད་ཀྱིས་རྣམ་འཕྲུལ་པའི༔ ཕྱི་ནང་གསང་མཆོད་སྣ་ཚོགས་དང་༔ ཁྱད་པར་དགྲ་བོའི་ཤ་ཁྲག་རུས༔ སྲོག་དབུགས་དཀོར་དང་བཅས་པ་འབུལ༔ ལྷག་མ་མེད་པར་ཧབ་ཐོབ་རོལ༔ བདག་ལ་སྡང་བའི་དགྲ་དང་བགེགས༔ མ་ལུས་མི་འགྱང་རྡུལ་དུ་རློག༔ དམ་ལ་མ་འདའ་ས་མ་ཡ༔ ཤུ་ལ་ཏྲི་སརྦ་ས་པ་རི་ཝཱ་ར་མ་ཧཱ་ཨརྒྷཾ་པཱདྱཾ་པུཥྤེ༴ ཤཔྡ་པཱུ་ཛ་ཧོཿ སརྦ་རཱུ་པ་ཤཔྡ་གནྡྷེ་རཱ་ས་སྤཪྴེ་པྲ་ཏཱིཙྪ་པཱུ་ཛ་ཧོཿ བདག་ཅག་དཔོན་སློབ་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་གཟུགས་མེད་དགྲ་བགེགས་རྒྱལ་བསེན་ཐམས་ཅད་མངོན་སྤྱོད་དྲག་པོའི་ལས་ཀྱིས་ཚར་ཆོད་ལ་གནོད་བྱེད་དེ་དག་ཐམས་ཅད་ཀྱི་མཱཾ་ས་ལ་ཁཱ་ཧི༔ རཀྟ་ལ་ཁཱ་ཧི༔ ཙིཏྟ་ལ་ཁཱ་ཧི༔ བ་སུ་ཏ་ལ་ཁཱ་ཧི༔ གོ་རོ་ཙ་ན་ལ་ཁཱ་ཧི༔ ཀིཾ་ནི་རི་ཏི་ལ་ཁཱ་ཧི༔ རྗེས་ཤུལ་ལྷག་མ་མེད་པར་བཞེས་ཤིག་རོལ་ཞིག་ཁ་རཾ་ཁཱ་ཧི༔ དེ་ནས་བསྟོད་པ་བྱ་བ་ལ༔ ཧཱུྃ༔ འཁོར་འདས་དབང་བསྒྱུར་པདྨ་ཧེ་རུ་ཀའི༔ གང་འདུལ་ཐབས་ཀྱིས་གདུག་པ་འདུལ་བའི་ཕྱིར༔ མངོན་སྤྱོད་དྲག་པོའི་ཕྲིན་ལས་རོལ་པའི་གར༔ ཞིང་བཅུའི་སྲོག་གི་གཤེད་དུ་ལྷུན་གྱིས་གྲུབ༔ སྣང་སྲིད་འཇིག་རྟེན་ཁམས་ལ་མངའ་དབང་མཛད༔ རྒྱལ་བཙན་སྡེ་བརྒྱད་ཀུན་གྱི་རྒྱལ་པོ་སྟེ༔ གནོད་སྦྱིན་གཏེར་གྱི་བདག་པོ་འདོད་འབྱུང་གནས༔ སྐྱེས་བུ་རོལ་པ་སྐྱ་བདུན་ལས་ལ་འགྱེད༔ དབང་དྲག་དུས་ཀྱི་ཕོ་ཉ་དྲག་ཤུལ་ཅན༔ སྐྱེ་འགྲོའི་སྲོག་དབུགས་བདག་པོ་ཁྱོད་ལ་བསྟོད༔ སྐད་ཅིག་སྟོང་གསུམ་ཉུལ་ཞིང་ལས་ལ་རྒྱུ༔ དྲག་ཤུལ་སྟོབས་ཀྱིས་བསྟན་དགྲ་ཆོམ་ལ་འབེབས༔ ཀྭི་བསྭོ་ཆ་སྒྲས་སྣང་སྲིད་དྲེགས་པ་སྡུད༔ ལས་བྱེད་ཤན་པ་བསམ་ཡས་ལས་ལ་འགྱེད༔ གར་དམིགས་ཡུལ་ལ་སྐད་ཅིག་ཉིད་ལ་སླེབས༔ མྱུར་མགྱོགས་སྟོབས་ཀྱི་བདག་པོ་ཁྱོད་ལ་བསྟོད༔ བདག་དང་བདག་གི་ཉེ་འཁོར་ལོངས་སྤྱོད་དཀོར༔ ཆབ་སྲིད་བསྟན་པ་སྲུངས་ལ་དགྲ་འདྲེ་སྒྲོལ༔ རབ་འབྱམས་ཕྲིན་ལས་མ་ལུས་ཡོངས་འགྲུབ་མཛོད༔ བཀའ་དང་དམ་ལ་མ་འདའ་དམ་ཚིག་ཅན༔ ཞེས་མཐར་འབོད་སྔགས་འདི་གྲངས་མང་བརྗོད་ཅིང་དམིགས་གསལ་རྒྱུན་མི་འཆད་པར་བྱ་བ་གནད༔ ཙ་རུ་ཤུ་ལ་ཏྲི་བཛྲ་ས་མ་ཡ་ཛ་ཛཿབསྐང་གསོལ་གྲངས་མང་བརྗོད་ཅིང་སྐྱེམས་གཏོར་བཏང་༔ དེ་ལྟར་ཡིད་ལ་གསལ་བའི་ཏིང་འཛིན་གྱིས༔ རིང་པོར་མི་ཐོགས་བདུན་ཞག་བདུན་གྱིས་འགྲུབ༔ ནོར་འཕེལ་དབང་སྡུད་ཆེ་ཞིང་མཐུ་དཔལ་ཐོབ༔ ཡི་དམ་ལྷ་ཡི་བསྒོམ་བཟླས་གནད་ཐེབས་ན༔ གང་བསམ་ཅི་འདོད་རེ་བ་ཐམས་ཅད་སྐོངས༔ བཀའ་སྲུང་བཙན་རྒོད་འབར་བ་བདུན་ལ་གཏད༔ བཀའ་ལོག་དམ་ཉམས་ལག་ཏུ་མ་བཏང་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་སུམ་ཅུ་རྩ་གཅིག་བར་དུ་བཀའ་རྒྱ་བྱས་མཐར་སློབ་བུ་འཇིགས་མེད་དམ་ཆོས་ཀྱིས་ནན་དུ་བསྐུལ་ངོར་ཟབ་གསང་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་ཆོས་ཀྱི་བདག་པོ་མཁྱེན་རབ་རྒྱ་མཚོའོ། །དགེའོ། །དགེའོ། །དགེའོ། །ལེགས་སོ།། །།