TTDL-ZABTER-12-NA-054

Previous Text Back to Volume PageNext Text

Wylie title	chos nyid nam mkha'i klong mdzod las: che mchog rdo rje khro lod kyi rtsa sgrub gsang ba snying po:
Location	bdud 'joms gling pa zab gter Volume 12, Text 54, Pages 313-315 (Folios 1a1 to 2a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las che mchog rdo rje khro lod kyi rtsa sgrub gsang ba snying po. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 313-315. Thimphu, Bhutan: Lama Kuenzang Wangdue, 2004.
Side notes	Recto: rtsa sgrub   Verso: bdud 'joms bla ma 'chol ba gro lod
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Rdo rje gro lod
Colophon	ཞེས་པ་འདི་ཡང་རིག་འཛིན་རྨ་བན་རིན་ཆེན་གྱི་ཟློས་གར་སྦས་པའི་རྣལ་འབྱོར་བུདྡྷ་རསྨིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ།།
	zhes pa 'di yang rig 'dzin rma ban rin chen gyi zlos gar sbas pa'i rnal 'byor bud+d+ha rasmis bskul ngor khrag 'thung bdud 'joms rdo rjes chos nyid nam mkha'i mdzod las bsgyur ba'o/_/dge'o//

Tibetan Text

[edit]

ཕཻཾ༔ ཆོས་ཉིད་ནམ་མཁའི་ཀློང་མཛོད་ལས༔ ཆེ་མཆོག་རྡོ་རྗེ་ཁྲོ་ལོད་ཀྱི་རྩ་སྒྲུབ་གསང་བ་སྙིང་པོ་བཞུགས་སོ༔ ཕཻ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) པདྨའི་བརྒྱུད་འཛིན་སྐྱེས་བུ་ཡིས༔ སྒོ་གསུམ་རྡོ་རྗེའི་གྲོང་འཇུག་ཕྱིར༔ བསྐྱེད་རིམ་དམིགས་གསལ་གནད་ལྡན་ངང་༔ ཡང་གསང་བླ་མེད་སྒོར་འཇུག་བྱ༔ ས་མ་ཡ༔ དང་པོ་སྐྱབས་འགྲོ་སེམས་བསྐྱེད་ནི༔ ན་མོ༔ སྐྱབས་གནས་ཀུན་འདུས་བླ་མ་ལ༔ བྱང་ཆུབ་བར་དུ་སྐྱབས་སུ་མཆི༔ ཕ་མ་འགྲོ་དྲུག་སེམས་ཅན་ཀུན༔ བྱང་ཆུབ་ཆེན་པོར་ངེས་སྒྲོལ་བྱ༔ དེ་ནས་དངོས་གཞི་ལྷ་བསྐྱེད་ནི༔ ཨཱཿའཁོར་འདས་དག་མཉམ་ཆོས་སྐུའི་མཁར༔ ལྷུན་གྲུབ་བདེ་ཆེན་ཞིང་ཁམས་སུ༔ རང་གྲོལ་རོལ་པ་ཡེ་ཤེས་གར༔ ཆེ་མཆོག་རྡོ་རྗེ་ཁྲོ་བོ་ལོད༔ དམར་སྨུག་ཞལ་གཅིག་ཕྱག་གཉིས་པ༔ སྤྱན་གསུམ་སྡང་མིག་མཁའ་ལ་གཟིགས༔ རབ་ཁྲོས་གཏུམ་རྔམས་བརྗིད་པའི་ཞལ༔ སྨ་ར་སྨིན་མ་དམར་སེར་འབར༔ ཨམ་གཙིགས་བསྡམ་ཞིང་ཧཱུྃ་སྒྲ་སྒྲོགས༔ ཕྱག་གཡས་རྡོ་རྗེ་རྩེ་དགུ་གསོར༔ གཡོན་པས་གནམ་ལྕགས་ཕུར་པ་གཟིར༔ སྤྲུལ་པའི་ལྕགས་སྡིག་ཁྲ་ཐབས་འགྱེད༔ ཀླུ་གཉན་བརྒྱལ་བྱེད་དྲི་ངན་འཐུལ༔ ཟ་བེར་ཐང་ཤམ་ཆོས་གོས་གསོལ༔ ཐོད་རློན་ལྔ་བཅུའི་དོ་ཤལ་སྤྲས༔ དམར་སེར་དབུ་སྐྲ་གཡས་སུ་འཁྱིལ༔ སྙན་ཆ་དུང་གི་ཝང་མིག་མཛེས༔ སྒྲོལ་ཡུམ་སྟག་མོ་གྲུས་མའི་སྟེང་༔ འདོར་སྟབས་བསྒྲད་ཅིང་རབ་ཏུ་འགྱིང་༔ པད་ཉི་རྒྱལ་བསེན་གདན་དུ་བཏིང་༔ བསྐལ་བའི་མེ་འབར་ཁྲོ་ཆུང་འཕྲོ༔ སྐུ་ལ་རྒྱལ་བའི་དཀྱིལ་འཁོར་རྫོགས༔ ཁམས་གསུམ་མ་ལུས་དབང་བསྡུས་ཤིང་༔ སྲིད་གསུམ་ཟིལ་གྱིས་གནོན་པར་བསྐྱེད༔ དེ་ནས་འཛབ་བཟླ་བ་ནི༔ རང་ཉིད་དྲག་པོའི་ཐུགས་ཀ་རུ༔ ཡེ་ཤེས་སེམས་དཔའ་ཚོན་གང་བའི༔ ཐུགས་ཀར་རྡོ་རྗེའི་ལྟེ་བ་རུ༔ ཧཱུྃ་ལ་གསང་བའི་སྙིང་པོས་འཁོར༔ ཨོཾ་བཛྲ་གུ་རུ་ཁྲོ་བོ་ལོད་ལོ་ཀ་སརྦ་སིདྡྷི་ཧཱུྃ༔ དེ་ལས་འོད་ཟེར་རབ་འཕྲོས་པས༔ སྐུ་གསུམ་རྒྱལ་བ་ཐམས་ཅད་ཀྱི༔ ཐུགས་རྗེ་དཔལ་ཡོན་དབང་གཟི་བྱིན༔ བསྡུས་ཏེ་སྲོག་གི་སྙིང་པོར་བསྟིམ༔ ཨོཾ་བཛྲ་གུ་རུ་ཁྲོ་བོ་ལོད་ལོ་ཀ་སརྦ་སིདྡྷི་ཧཱུྃ༔ མངོན་སྤྱོད་དྲག་པོའི་ཕྲིན་ལས་ཀྱི༔ སྤྲུལ་པ་མེ་འོད་མཚོན་ཐུན་དང་༔ ཕོ་ཉ་ཁྲོ་ཚོགས་ཁྱུང་སྡིག་འཕྲོས༔ གནོད་བྱེད་གདུག་པ་ཚར་གཅོད་བསམ༔ ཨོཾ་བཛྲ་གུ་རུ་ཁྲོ་བོ་ལོད་ལོ་ཀ་སརྦ་སིདྡྷི་ཧཱུྃ༔ དམིགས་པ་གཞན་དུ་མ་ཡེངས་པར༔ གཟེར་བཞིའི་གནད་དང་ལྡན་པ་ཡིས༔ ཟླ་དྲུག་སྒྲུབ་ལ་གཞོལ་གྱུར་ན༔ རྡོ་རྗེ་འཆང་གི་ས་ཐོབ་འགྱུར༔ བཀའ་སྲུང་ཚོགས་ཀྱི་བདག་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རིག་འཛིན་རྨ་བན་རིན་ཆེན་གྱི་ཟློས་གར་སྦས་པའི་རྣལ་འབྱོར་བུདྡྷ་རསྨིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ།།