TTDL-ZABTER-08-NYA-007

Previous Text Back to Volume PageNext Text

Wylie title	zab gsang mkha' 'gro'i snying thig las: dbang phyug ma hA dA+e wa'i skye rgyud gsal byed sgron me:
Location	bdud 'joms gling pa'i zab gter Volume 8, Text 7, Pages 45-48 (Folios 1a1 to 2b5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las dbang phyug ma hA dA+e wa'i skye rgyud gsal byed sgron me. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 45-48. Thimphu, Bhutan: Lama Kuenzang Wangdue, 2004.
Side notes	Recto: skye rgyud   Verso: bdud 'joms bka' srung lha chen
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Past Life Narratives - skye rabs - 'khrungs rabs
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ དབང་ཕྱུག་མ་ཧཱ་དཱེ་ཝའི་སྐྱེ་རྒྱུད་གསལ་བྱེད་སྒྲོན་མེ་ཞེས་བྱ་བ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ཨཻཿ དཔལ་ལྡན་སངས་རྒྱས་རྡོ་རྗེའི་ལྕེ༔ མཁའ་ཁྱབ་མཁའ་ཀློང་ཡངས་པ་རུ༔ ཡེ་ཤེས་དབང་མོ་མཉམ་བརྡལ་ཡན༔ སྲིད་ཞི་མཉམ་ཉིད་དབྱིངས་མངོན་བྱ༔ གསང་ཆེན་རོལ་པའི་དུར་ཁྲོད་ནི༔ བདག་རྟོག་རོ་ཐང་བརྡལ་ཁྲོད་ནས༔ བདག་མེད་དབྱིངས་ཀྱི་སྤྱི་རྗེ་མོ༔ གང་འདུལ་སྣ་ཚོགས་ཐབས་དུ་མས༔ འཁོར་བ་རུ་ལོག་དེ་འདས་ཀྱི༔ དབྱིངས་བསྒྱུར་མཁའ་འགྲོ་སེང་གདོང་མའི༔ ཁམས་གསུམ་དབང་སྡུད་གད་རྒྱངས་ཀྱིས༔ དྲེགས་པ་དབང་དུ་སྡུད་པའི་ཚེ༔ ཁམས་གསུམ་དབང་ཕྱུག་ཆེན་པོ་དང་༔ དེ་ཡི་དགྱེས་བདེ་ཨུ་མ་གཉིས༔ དྲེགས་པའི་འཁོར་ཚོགས་དང་བཅས་པ༔ རང་དབང་མེད་པར་མདུན་དུ་བཀུག༔ ཡེ་ཤེས་མཁའ་འགྲོའི་ཞལ་ན་རེ༔ མཁྱེན་བཞིན་ཁྱོད་ཅག་སུ་ཡིན་གསུངས༔ དབང་ཕྱུག་ཆེན་པོས་འདི་སྐད་ཞུས༔ གསོན་ཅིག་ཡེ་ཤེས་མཁའ་འགྲོ་མ༔ ང་ནི་འཇིག་རྟེན་གསུམ་གྱི་བདག༔ ཁམས་གསུམ་ལྷ་ལ་དབང་བསྒྱུར་བའི༔ དབང་ཕྱུག་མ་ཧཱ་དཱེ་ཝ་ཡིན༔ འོག་ཕྱོགས་ས་བདག་ཀླུ་གཉན་ལ༔ མངའ་དབང་འཁོར་ལོའི་བསྒྱུར་རྒྱལ་ཏེ༔ ཤར་ཕྱོགས་སྲིད་པ་སྐྱེ་འགྲོ་ལ༔ དབང་མཛད་མ་ཧཱ་དཱེ་ཝ་དཀར༔ ཞི་བའི་ལས་ལ་མངའ་དབང་བསྒྱུར༔ ཐམས་ཅད་འགུགས་པའི་ཕྱག་རྒྱས་བསྒྱུར༔ ལྷོ་ཕྱོགས་སྲིད་པ་སྐྱེ་འགྲོའི་བདག༔ འདོད་དགུའི་དཔལ་སྟེར་དབང་ཕྱུག་སེར༔ འདོད་ཡོན་ཡུལ་དུ་ཐམས་ཅད་འཆིང་༔ ནུབ་ཕྱོགས་སྲིད་པ་སྐྱེ་འགྲོའི་བདག༔ ཁམས་གསུམ་དབང་བསྒྱུར་དམར་པོ་སྟེ༔ ཐམས་ཅད་ང་ཡི་ཀློང་དུ་བསྡོམ༔ བྱང་ཕྱོགས་སྲིད་པ་སྐྱེ་འགྲོའི་བདག༔ རབ་འབྱམས་ལས་ལ་མངའ་དབང་མཛད༔ དྲེགས་པའི་དབང་ཕྱུག་ཧེ་རུ་ཀ༔ ཐམས་ཅད་འཕྲུལ་དེ་ཐམས་ཅད་བསྒྲལ༔ དེ་བཞིན་ཤར་ལྷོའི་མཚམས་ཤེད་ན༔ ང་ནི་དགའ་བའི་དབང་པོ་ཡིན༔ ཐམས་ཅད་དགའ་བའི་ཡུལ་དུ་འགུག༔ རྣམ་པར་གཡེང་བའི་ལས་ལ་དགའ༔ ལྷོ་ནུབ་མཚམས་ཀྱི་འཇིག་རྟེན་ན༔ ང་ནི་འཕྲུལ་གྱི་དབང་ཕྱུག་ལགས༔ འདོད་ཡོན་སྣ་ཚོགས་དགའ་སྟོན་ངོམས༔ སྣང་བའི་ཡུལ་དུ་ཐམས་ཅད་འཆང་༔ ནུབ་བྱང་མཚམས་ཀྱི་འཇིག་རྟེན་ན༔ ང་ནི་འདོད་པའི་རྒྱལ་པོ་སྟེ༔ ཆགས་དང་ཞེན་པའི་ཡུལ་སྣང་འགྱེད༔ ཆགས་དང་བདེ་བའི་རྒྱས་འདེབས་ཤིང་༔ ཁམས་གསུམ་ཐམས་ཅད་རྨོངས་པར་བྱེད༔ བྱང་ཤར་མཚམས་ཀྱི་འཇིག་རྟེན་ན༔ ང་ནི་ལས་ཀྱི་དཔའ་བོ་སྟེ༔ སྣ་ཚོགས་ལས་བྱེད་འཕྲུལ་སྣང་སྟོན༔ ལས་ཀྱི་ལམ་ལ་ཐམས་ཅད་གཟུད༔ སྔོན་ཚེ་བསྐལ་པའི་དང་པོ་ལ༔ གདོད་མ་གཞི་ཡི་སངས་རྒྱས་ནི༔ ཀ་དག་ཀུན་བཟང་ཡབ་དང་ཡུམ༔ སྟོང་དང་གསལ་བའི་ཆ་ཉིད་ལས༔ ཀུན་ཏུ་གཟིགས་པའི་ཡེ་ཤེས་ཉིད༔ ཤེས་སྒྲིབ་ཕྲ་བས་སྦགས་པ་ལས༔ ཐུགས་རྗེ་སྤྱན་རས་གཟིགས་སུ་གྲགས༔ དེ་ཡང་དེ་ཉིད་ཅུང་བསྟན་པས༔ ང་ཉིད་འཇིག་རྟེན་དབང་པོར་ཤར༔ དེ་དག་ང་ཉིད་བསྒྲུབ་པ་ཡིས༔ གཞི་དང་བསྐྱེད་དང་དམིགས་གསལ་བའི༔ གཟུགས་མེད་གཟུགས་སུ་བཅོས་པ་དང་༔ ཡུལ་མེད་ཡུལ་ནས་འབོད་པའི་ཚུལ༔ མིང་མེད་མིང་དུ་བཟུང་ནས་སུ༔ བཟླས་བརྗོད་བྱེད་པའི་ལམ་བསྟན་པ༔ བདེན་པ་མེད་དེ་དངོས་མཚན་མེད༔ རྫུན་པ་མེད་དེ་འབྲས་བུ་སྣང་༔ ང་ལ་ཡེ་ཤེས་པ་དང་ནི༔ འཇིག་རྟེན་པ་རུ་འཛིན་བརྗོད་པ༔ གང་ཡང་མི་རྫུན་ཐམས་ཅད་བདེན༔ ཤེས་རབ་མིག་འབྲས་ཟུམ་པ་ཡིས༔ དམུས་ལོང་དག་གི་སྤྱོད་ཡུལ་དུ༔ ཀུན་ཤེས་ཀུན་ཏུ་གཟིགས་པ་ཡིས༔ ཡེ་ཤེས་སྤྱན་དང་ལྡན་པ་ལ༔ ཐམས་ཅད་རྫུན་ཅིང་བདེན་པ་མེད༔ ང་ནི་མི་གནས་ཡེ་ཤེས་ཏེ༔ ཁས་ལེན་བརྗོད་བྱའི་ཡུལ་ལས་འདས༔ བརྗོད་པ་མེད་ལ་རྗོད་བྱེད་ཅིང་༔ ཕྱོགས་མེད་ས་ལ་ཕྱོགས་འཛིན་པའི༔ མི་ཤེས་རྨོངས་ལ་ཤེས་རློམ་པའི༔ སྐྱེས་བུས་བཟང་ངན་ཚིག་བརྗོད་པ༔ བརྗོད་མེད་བརྗོད་པའི་ཚིག་འཛིན་སྒྲོག༔ མི་ཤེས་སྐྱེས་བུ་སྙིང་རྗེའི་གནས༔ ང་ནི་བྱུང་དང་གནས་དང་འགྲོ༔ གཟུགས་དང་ཁ་དོག་སྐྱེ་མཆེད་ཚོགས༔ ཅི་བཞིན་གྲུབ་པའི་ཚུལ་བཤད་ན༔ སྔོན་གྱི་བསྐལ་པའི་དང་པོ་ལ༔ གཏུམ་ཆེན་མུན་པ་ཕོ་མོ་གཉིས༔ མ་འཕྲད་ངང་གིས་སྦྱོར་བ་ལས༔ བདེ་དང་དྲོད་ཀྱིས་བཞིན་འབར་བའི༔ དེ་ཡི་དྭངས་མ་དཀར་དམར་གཉིས༔ ཟུང་འཇུག་རོལ་པའི་རྟེན་འབྲེལ་ལས༔ སྣང་ཞིང་གསལ་བའི་འོད་ལུས་ལ༔ ང་རུ་ཤེས་པས་བདག་ཏུ་བཟུང་༔ བདག་ལ་ང་ཡིས་གསོས་སུ་བཏབ༔ ང་ནི་སྒྱུ་མ་མཁན་པོ་སྟེ༔ རྟེན་འབྲེལ་རྫུ་འཕྲུལ་ཅིར་ཡང་སྟོན༔ དང་པོ་མ་བྱུང་བྱུང་བ་ལས༔