TTDL-ZABTER-03-GA-018

Previous Text Back to Volume PageNext Text

Wylie title	zab gsang mkha' 'gro'i snying thig las: rta mgrin yang khros nag po'i drag bskul rdo rje'i thog mda':
Location	bdud 'joms gling pa zab gter Volume 3, Text 18, Pages 221-234 (Folios 1a1 to 7b5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las rta mgrin yang khros nag po'i drag bskul rdo rje'i thog mda'. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 221-234. Thimphu, Bhutan: Lama Kuenzang Wangdue, 2004.
Side notes	Recto: drag bskul   Verso: bdud 'joms rta mgrin yang khros
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Invocations - bskul ba
Cycle	ཁྲོ་རྒྱལ་ཁམས་གསུམ་རོལ་པ་རྟ་མགྲིན་ཡང་ཁྲོས་ནག་པོ་ (khro rgyal khams gsum rol pa rta mgrin yang khros nag po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rta mgrin nag po
Colophon	ཞེས་པ་འདི་ས་མོ་ལུག་གི་ལོ་ཧོར་ཟླ་བཅུ་གཅིག་པའི་ཁྱིམ་དུ་གསེར་སྨད་རྔ་ལ་སྟག་རྩེའི་གཡས་ལོགས་ཤ་བྲག་རྡོ་རྗེ་ནས་སྤྲང་པོ་བདུད་འཇོམས་རྡོ་རྗེས་བཏོན་ཏེ་མི་ལོ་བཅུ་གསུམ་ལ་བཀའ་རྒྱ་བྱས་ཏེ་མཐར་སྨར་མདོ་བཀྲ་ཤིས་དགའ་འཁྱིལ་ནས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།།
	zhes pa 'di sa mo lug gi lo hor zla bcu gcig pa'i khyim du gser smad rnga la stag rtse'i g.yas logs sha brag rdo rje nas sprang po bdud 'joms rdo rjes bton te mi lo bcu gsum la bka' rgya byas te mthar smar mdo bkra shis dga' 'khyil nas dag par phab pa'i yi ge pa ni phun tshogs bkra shis so/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ རྟ་མགྲིན་ཡང་ཁྲོས་ནག་པོའི་དྲག་བསྐུལ་རྡོ་རྗེའི་ཐོག་མདའ་བཞུགས་སོ༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) མ་འོངས་དུས་ཀྱི་སྙིགས་མ་ལ༔ བདུད་དང་དམ་སྲི་ཁ་དར་ནས༔ སློབ་བུ་དམ་ལོག་གཉེན་ལ་རྒོལ༔ དབེན་གནས་ཆོས་སྡེར་ཆོམ་རྐུན་འཇིག༔ རྣལ་འབྱོར་འདུག་གནས་བདེ་མི་སྟེར༔ དེ་དུས་དྲག་བསྐུལ་ཐོག་མདའ་དགོས༔ དམ་ཚིག་ལྡན་པའི་རྣལ་འབྱོར་གྱིས༔ བསྟན་དང་འགྲོ་བའི་དོན་ཆེད་དུ༔ དམིགས་ནས་རྩ་གསུམ་ལྷ་ཚོགས་བསྐུལ༔ འདི་དུས་ལྷ་ཡི་ང་རྒྱལ་གྱིས༔ ཕུད་གཏོར་ཁྲག་གིས་རབ་བྲན་ནས༔ དྲག་ཅིང་སྡང་སེམས་ལྡན་པའི་ངང་༔ ཧཱུྃ་ཧཱུྃ་ཧཱུྃ༔ ཧྲཱིཿནུབ་ཕྱོགས་བདེ་ཆེན་དག་པའི་ཞིང་ཁམས་སུ༔ དབང་དྲག་རོལ་པའི་དུར་ཁྲོད་ཆེན་པོ་ནས༔ རྟ་མགྲིན་ཡང་ཁྲོས་ནག་པོ་སྐུར་བཞེངས་ཤིགཿབསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཆོས་སྐུ་སྐྱེ་མེད་དབྱིངས་ལས་མ་གཡོས་ཀྱང་༔ གཟུགས་སྐུས་འགྲོ་དོན་མཛད་པའི་དུས་ལ་བབ༔ འགྲོ་བའི་མགོན་པོའི་ཐུགས་དམ་རྒྱུད་བསྐུལ་གྱིས༔ རྣལ་འབྱོར་ཡིད་ལ་རེ་བའི་འདོད་དོན་སྒྲུབས༔ སངས་རྒྱས་བསྟན་དགྲ་རྣལ་འབྱོར་སྒོས་དགྲ་སོད༔ དམ་སྲི་རྒྱལ་བསེན་སྡེ་བརྒྱད་ལྷ་འདྲེ་དང་༔ མི་སྲུན་དམ་ལོག་དུས་མཐའི་འགོང་ནག་སོགས༔ མདོར་ན་གནོད་ཅིང་འཚེ་བའི་དགྲ་དང་བགེགས༔ མངོན་སྤྱོད་དྲག་པོས་མྱུར་སྒྲོལ་ཕྲིན་ལས་མཛོད༔ ཧཱུྃ་ཨོཾ༔ བདེ་ཆེན་འཁོར་ལོ་འོག་མིན་སྟུག་པོ་བཀོད༔ ཡེ་ཤེས་ལྔ་ཡི་གཞལ་ཡས་ཁང་ཆེན་དབུས༔ ཆོས་དབྱིངས་ཡེ་ཤེས་བུདྡྷ་ཧེ་རུ་ཀ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ གཏི་མུག་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ ཧཱུྃ་ཨཱཿལོངས་སྤྱོད་འཁོར་ལོ་བདེ་བ་ཆེན་པོའི་ཞིང་༔ དམར་ནག་ཟླ་གམ་གདེངས་པའི་གཞལ་ཡས་སུ༔ སོར་རྟོག་ཡེ་ཤེས་པདྨ་ཧེ་རུ་ཀ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ འདོད་ཆགས་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ ཧཱུྃ་ཧཱུྃ༔ ཆོས་ཀྱི་འཁོར་ལོ་མངོན་པར་དགའ་བའི་ཞིང་༔ ཞི་བ་ལྷུན་གྱིས་གྲུབ་པའི་གཞལ་ཡས་ནས༔ མེ་ལོང་ཡེ་ཤེས་བཛྲ་ཧེ་རུ་ཀ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ ཞེ་སྡང་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ ཧཱུྃ་སྭཱ༔ སྤྲུལ་པའི་འཁོར་ལོ་དཔལ་དང་ལྡན་པའི་ཞིང་༔ རྒྱས་པའི་ཕྲིན་ལས་ལྷུན་གྲུབ་གཞལ་ཡས་ནས༔ མཉམ་ཉིད་ཡེ་ཤེས་རཏྣ་ཧེ་རུ་ཀ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ ང་རྒྱལ་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ ཧཱུྃ་ཧཱ༔ བདེ་སྐྱོང་འཁོར་ལོ་ལས་རབ་རྫོགས་པའི་ཞིང་༔ དྲག་པོའི་ཕྲིན་ལས་ལྷུན་གྲུབ་གཞལ་ཡས་ནས༔ བྱ་གྲུབ་ཡེ་ཤེས་ཀརྨ་ཧེ་རུ་ཀ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ ཕྲག་དོག་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ འགྲོ་བའི་མགོན་པོའི་དགོངས་སྤྱོད་དབྱིངས་ནས་བཞེངས༔ ཧཱུྃ་ཛཿསྐུ་དང་ཡེ་ཤེས་རབ་རྫོགས་དབུ་མའི་སྦུབས༔ ཡ་མཱནྟ་ཀའི་ཐུགས་དམ་གནད་ནས་བསྐུལ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ གཏི་མུག་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ འགྲོ་བའི་མགོན་པོའི་དགོངས་སྤྱོད་དབྱིངས་ནས་བཞེངས༔ གསང་ཆེན་དབང་གི་དཀྱིལ་འཁོར་རོ་མའི་སྦུབས༔ ཧྱ་གྲཱི་ཝའི་ཐུགས་དམ་གནད་ནས་བསྐུལ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ འདོད་ཆགས་ལས་བྱུང་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ འགྲོ་བའི་མགོན་པོའི་དགོངས་སྤྱོད་དབྱིངས་ནས་བཞེངས༔ གཏུམ་དྲག་རྔམས་པའི་དུར་ཁྲོད་རྐྱང་མའི་སྦུབས༔ རྡོ་རྗེ་གཏུམ་པོའི་ཐུགས་དམ་གནད་ནས་བསྐུལ༔ རྟ་མགྲིན་ཡང་ཁྲོས་ནག་པོའི་སྐུར་བཞེངས་ཤིག༔ ཞེ་སྡང་ལས་གྱུར་དགྲ་བགེགས་གནོད་བྱེད་ཚོགས༔ མངོན་སྤྱོད་དྲག་པོའི་འགུགས་སྒྲོལ་ཕྲིན་ལས་མཛོད༔ ཐུགས་དམ་གནད་ནས་བསྐུལ་ལོ་ས་མ་ཡ༔ རྣལ་འབྱོར་ཡིད་ལ་རེ་བའི་འདོད་དོན་སྐོངས༔ འགྲོ་བའི་མགོན་པོའི་དགོངས་སྤྱོད་དབྱིངས་ནས་བཞེངས༔ ཧཱུྃ༔ ཤར་ཕྱོགས་ཞི་བ་ལྷུན་གྲུབ་ཕོ་བྲང་ནས༔ རྟ་མགྲིན་རྡོ་རྗེ་ཡང་ཁྲོས་ཐུགས་དམ་བསྐུལ༔ ཞེ་སྡང་རང་གཟུགས་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་སྒྲུབ་པ་པོ་ཡི་དཔུང་མཛོད་ཅིག༔ ཧཱུྃ༔ ལྷོ་ཕྱོགས་རྒྱས་པ་ལྷུན་གྲུབ་གཞལ་ཡས་ནས༔ རྟ་མགྲིན་རཏྣ་ཡང་ཁྲོས་ཐུགས་དམ་བསྐུལ༔ ང་རྒྱལ་རང་གཟུགས་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་སྒྲུབ་པ་པོ་ཡི་དཔུང་མཛོད་ཅིག༔ ཧཱུྃ༔ ནུབ་ཕྱོགས་དབང་སྡུད་ལྷུན་གྲུབ་ཕོ་བྲང་ནས༔ རྟ་མགྲིན་པདྨ་ཡང་ཁྲོས་ཐུགས་དམ་བསྐུལ༔ འདོད་ཆགས་རང་གཟུགས་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་སྒྲུབ་པ་པོ་ཡི་དཔུང་མཛོད་ཅིག༔ ཧཱུྃ༔ བྱང་ཕྱོགས་དྲག་པོ་ལྷུན་གྲུབ་ཕོ་བྲང་ནས༔ རྟ་མགྲིན་ཀརྨ་ཡང་ཁྲོས་ཐུགས་དམ་བསྐུལ༔ ཕྲག་དོག་རང་གཟུགས་དགྲ་བགེགས་གནོད་བྱེད་ཀུན༔ མངོན་སྤྱོད་དྲག་པོས་འགུགས་སྒྲོལ་ཕྲིན་ལས་མཛོད༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་སྒྲུབ་པ་པོ་ཡི་དཔུང་མཛོད་ཅིག༔ ཛཿསྙིང་རྗེའི་རང་གཟུགས་འགུགས་བྱེད་ལྕགས་ཀྱུ་མ༔ དམ་ཚིག་ཐུགས་དམ་ཆེན་པོའི་དུས་ལ་བབ༔ བསྐུལ་ལོ་རྡོ་རྗེའི་ཡུམ་ཆེན་ཀྲོ་དྷི་ཀ༔ བརྣག་པའི་དགྲ་བོ་འགུག་ཅིང་སྒྲོལ་མཛོད་ཅིག༔ ཧཱུྃ༔ བྱམས་པའི་རང་གཟུགས་འཆིང་བྱེད་ཞགས་པ་མ༔ དམ་ཚིག་ཐུགས་དམ་ཆེན་པོའི་དུས་ལ་བབ༔ བསྐུལ་ལོ་རཏྣའི་ཡུམ་ཆེན་ཀྲོ་དྷི་ཀ༔ བརྣག་པའི་དགྲ་བོ་འགུག་ཅིང་སྒྲོལ་མཛོད་ཅིག༔ བཾ༔ དགའ་བའི་རང་གཟུགས་སྡོམ་བྱེད་ལྕགས་སྒྲོག་མ༔ དམ་ཚིག་ཐུགས་དམ་ཆེན་པོའི་དུས་ལ་བབ༔ བསྐུལ་ལོ་པདྨའི་ཡུམ་ཆེན་ཀྲོ་དྷི་ཀ༔ བརྣག་པའི་དགྲ་བོ་འགུག་ཅིང་སྒྲོལ་མཛོད་ཅིག༔ ཧོཿ བཏང་སྙོམས་རང་གཟུགས་འབེབས་བྱེད་དྲིལ་བུ་མ༔ དམ་ཚིག་ཐུགས་དམ་ཆེན་པོའི་དུས་ལ་བབ༔ བསྐུལ་ལོ་ཀརྨའི་ཡུམ་ཆེན་ཀྲོ་དྷི་ཀ༔ བརྣག་པའི་དགྲ་བོ་འགུག་ཅིང་སྒྲོལ་མཛོད་ཅིག༔ ས་མ་ཡ༔ གདོད་ནས་ཡེ་སངས་རྒྱས་ཀྱང་འགྲོ་བའི་དོན༔ མི་སྲུན་རྔམས་ཁྲོས་གཟུགས་ཀྱིས་སྐུར་བཞེངས་པ༔ དྲེགས་པ་སྡེ་བརྒྱད་ཐུགས་དམ་གནད་ནས་བསྐུལ༔ དམ་ཚིག་ཐུགས་དམ་ཆེན་པོའི་དུས་ལ་བབ༔ བརྣག་པའི་དགྲ་བགེགས་འགུགས་སྒྲོལ་ཕྲིན་ལས་མཛོད༔ ཀྱཻ་ ཧོཿ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་བཀའ་སྲུང་དམ་ཅན་རྣམས༔ སྒྲུབ་མཆོག་བདག་ལ་དགོངས་སུ་གསོལ༔ མ་གཡེལ་ཐུགས་དམ་གནད་ནས་བསྐུལ༔ སངས་རྒྱས་བསྟན་ལ་དགྲ་དར་ཏེ༔ སྐྱེ་འགྲོའི་བདེ་སྐྱིད་ཉི་མ་བསྣུབས༔ རྣལ་འབྱོར་སྒྲུབ་པའི་འབྲས་བུ་བཅོམ༔ དགེ་བའི་བཤེས་གཉེན་ཁྲིམས་སུ་མནར༔ ཞིང་བཅུའི་བསྟན་དགྲས་ཕྱི་ནས་རྒོལ༔ དམ་ལོག་སློབ་མས་ནང་ནས་རྒོལ༔ བདུད་དང་དམ་སྲིས་གསང་ཐབས་རྒོལ༔ བསྟན་པ་ཆོས་ཁྲིམས་ཐབས་ཀྱིས་བཤིག༔ འདི་འདྲའི་ལས་ངན་སྐལ་ངན་ལ༔ རྒྱལ་བའི་སྤྱན་གྱིས་མི་གཟིགས་སམ༔ བརྩེ་ལྡན་ཐུགས་ཀྱིས་མི་དགོངས་སམ༔ བརྩེ་བའི་ཐུགས་རྗེས་འདོར་རམ་ཅི༔ མཛད་པའི་ཕྲིན་ལས་མ་མཆིས་སམ༔ སྐྱོབ་པའི་ནུས་མཐུ་གང་ན་བཞུགས༔ དམ་ཅན་དམ་ལས་འདའམ་ཅི༔ སྲུང་མ་གཉན་པོ་མེད་དམ་ཅི༔ བསྐུལ་ནི་ཆོས་ཀྱི་དབྱིངས་ནས་བསྐུལ༔ གཟུགས་སྐུའི་འགྲོ་དོན་དུས་ལ་བབ༔ ཐུགས་རྗེའི་བརྒྱུད་འཛིན་སྐྱོང་རེ་རན༔ བསྟན་པ་འདི་ལ་ད་དགོངས་འཚལ༔ ངེད་ཅག་རྒྱལ་བའི་བརྒྱུད་འཛིན་ལ༔ ཐུགས་རྗེའི་དཔུང་གཉེན་མ་མཆིས་ན༔ རིམ་གཉིས་སྒྲུབ་པ་དོན་རེ་ཆུང་༔ ལྷ་དང་སྲུང་མ་དགོངས་སུ་གསོལ༔ ཐུགས་རྗེ་ཆེན་པོས་བདག་སྐྱོང་གསོལ༔ ཕྲིན་ལས་རྣམ་བཞི་གང་འདུལ་གྱིས༔ བདག་ཅག་སྒྲུབ་པའི་གྲོགས་ལ་བྱོན༔ ཁྲོ་གཏུམ་རོལ་པའི་སྐུར་བཞེངས་ལ༔ མངོན་སྤྱོད་དྲག་པོས་དགྲ་བགེགས་སྒྲོལ༔ ཛཿཛཿཡེ་ཤེས་ལས་དང་འཇིག་རྟེན་གྱི༔ ཕོ་ཉ་ལས་མཁན་བཀའ་སྡོད་རྣམས༔ དམ་ཚིག་གཉན་གྱིས་ཐུགས་དམ་བསྐུལ༔ དམ་ཉམས་སྡང་བའི་དགྲ་བགེགས་འདི༔ ལོ་དང་ཟླ་བར་མ་བཞག་པར༔ ད་ལྟ་ཉིད་དུ་ཁུག་ལ་སྒྲོལ༔ ཧཱུྃ༔ སྔོན་ཚེ་མ་ལ་ཡ་ཡི་རྩེར༔ བདུད་པོ་མ་ཏྲཾ་བསྒྲལ་བའི་ཚེ༔ སྤྱི་དཔལ་པདྨ་དབང་ཆེན་གྱི༔ སྤྱན་སྔར་ཁས་བླངས་དམ་བཅས་པའི༔ བཀའ་སྲུང་ཆོས་སྐྱོང་དམ་ཅན་རྣམས༔ བསྐུལ་ལོ་དམ་ཚིག་དེ་ཡིས་བསྐུལ༔ བདག་གིས་ཡིད་ལ་བརྣག་པ་ཡི༔ དམ་ཉམས་སྡང་བའི་དགྲ་དང་བགེགས༔ ལྷ་ཡང་རུང་སྟེ་ཁུག་ལ་སྒྲོལ༔ གཟུགས་མིང་དམིགས་རྟེན་འདི་ལ་ཁུག༔ ལུས་ངག་ཡིད་གསུམ་རྡུལ་དུ་རློགས༔ ཛཿཛཿཡེ་ཤེས་དབྱིངས་ཀྱི་ལྷ་རྣམས་བསྐུལ༔ དྲག་པོའི་ཕྲིན་ལས་དུས་ལ་བབ༔ འཁོར་འདས་གཉིས་སྐྱོང་སྲུང་མ་བསྐུལ༔ དམ་ཚིག་ཐུགས་དམ་དུས་ལ་བབ༔ དྲག་པོའི་ཕྲིན་ལས་དུས་ལ་བབ༔ འཇིག་རྟེན་སྲུང་མ་དམ་ཅན་བསྐུལ༔ དེ་ཡང་དམ་ཚིག་གཉན་གྱིས་བསྐུལ༔ དྲག་པོའི་ཕྲིན་ལས་དུས་ལ་བབ༔ སྡང་བའི་དགྲ་བགེགས་སྡིག་ཅན་འདི༔ རི་བོའི་རྩེ་དང་རྒྱ་མཚོའི་གཏིང་༔ ཉི་ཟླའི་གོ་བར་སྤྲིན་གྱི་ཀློང་༔ དཀོན་མཆོག་སྐྱབས་འོག་སྔགས་པའི་ཁྱིམ༔ ས་འོག་ས་སྟེང་ས་བླ་དང་༔ སྡེ་བརྒྱད་མི་མིན་སུའི་སྐྱབས་འོག༔ གང་ན་ཡོད་ཀྱང་ཁུག་ལ་སྒྲོལ༔ སྲུང་གུར་རྡོ་རྗེའི་མཚོན་གྱིས་ཤིགས༔ ལྷ་དང་སྲུང་མ་བདུད་དུ་ཕོབས༔ སྐྱབས་དང་དཔུང་གཉེན་གཤེད་དུ་ཕོབས༔ ཀུན་བཟང་པདྨའི་ཐུགས་དམ་བསྐུལ༔ རྟ་མགྲིན་ཡང་ཁྲོས་ནག་པོ་བསྐུལ༔ རིགས་བཞིའི་ཧྱ་གྲཱི་ཝ༴ ཡེ་ཤེས་ཁྲོས་མ་སྡེ་ལྔ༴ ཨེ་ཀ་ཛ་ཊཱི་སྤུན་དྲུག༴ སྤྲུལ་པའི་ཁྱུང་ཆེན་རིགས་ལྔ༴ སྒོ་སྐྱོང་ལས་ཀྱི་མ་མོ༴ གནོད་སྦྱིན་ཤན་པ་དམར་ནག༴ དྲེགས་པ་ལྷ་སྲིན་སྡེ་བརྒྱད༴ དྲེགས་ཆེན་གཟའ་བདུད་རྒྱལ་པོ༴ ངས་ནི་དད་པ་དྲག་པོས་བསྐུལ༔ ཚིག་ནི་རང་དམ་དཔང་དུ་བཙུགས༔ བསྐུལ་ཡང་རྡོ་རྗེ་ཚིག་གིས་བསྐུལ༔ དམ་ཚིག་དབང་གིས་སྐུར་བཞེངས་ལ༔ སྡང་བའི་དགྲ་བགེགས་སྟོབས་ཀྱིས་སྒྲོལ༔ ཛ་ཛཿབཛྲ་ས་མ་ཡ༔ སངས་རྒྱས་བསྟན་པ་བཤིག་པ་དང་༔ དཀོན་མཆོག་དབུ་འཕང་སྨད་པ་དང་༔ མཚན་ལྡན་བླ་མའི་སྐུ་དགྲ་དང་༔ ལྟ་བ་ལོག་པའི་བསྟན་དགྲ་དང་༔ སྨོན་ལམ་ལོག་པའི་བདུད་རིགས་དང་༔ བར་ཆད་བྱེད་པའི་གདོན་བགེགས་དང་༔ རང་རྒྱུད་གོལ་འཁྲུལ་རྒྱལ་བསེན་ཚོགས༔ མ་ལུས་འགུགས་སྒྲོལ་ཕྲིན་ལས་མཛོད༔ མ་ཤོར་གཟུགས་མིང་ལིང་གར་ཕོབས༔ ང་ཡི་དབང་དུ་གྱུར་ནས་ནི༔ མཐུ་དང་ནུས་སྟོབས་མེད་པར་མཛོད༔ མངོན་སྤྱོད་ཕྲིན་ལས་དུས་ལ་བབ༔ མ་གཡེལ་ལྷ་དང་སྲུང་མ་རྣམས༔ བཅོལ་བའི་ཕྲིན་ལས་མྱུར་དུ་སྒྲུབས༔ ས་མ་ཡ༔ རྒྱ་རྒྱ་རྒྱ༔ འདི་ཡིས་དགྲ་བགེགས་མ་ལུས་འཇོམས༔ ཉམས་ལེན་སྔོན་དུ་མཐར་ཕྱིན་པའི༔ སྐལ་ལྡན་སྐྱེས་བུ་དམ་ལྡན་གྱིས༔ འདིར་བརྩོན་ཕྲིན་ལས་ཐོགས་མེད་འགྲུབ༔ མཐུ་དང་དྲག་རྩལ་སྙན་གྲགས་ཐོབ༔ དོན་གཉིས་འགྲུབ་པའི་གནད་ཡང་ཡོད༔ བསྟན་པའི་ཆོས་སྡེར་ཕན་ཆེད་བཞག༔ པདྨ་ང་དང་སྐལ་བ་མཉམ༔ ཁ་ལྟ་སྟོང་སྐད་མ་ཡིན་ཏེ༔ དོན་གྱི་རྣལ་འབྱོར་དམ་པ་མཛོད༔ གངས་ཅན་བོད་ཀྱི་ལྗོངས་འདི་རུ༔ རྟ་མགྲིན་སྒྲུབ་ཐབས་མང་སྦས་ཀྱང་༔ འདི་ཉིད་སྙིང་པོའི་ཡང་ཞུན་ཏེ༔ ཉམས་སུ་ལེན་ཀུན་ངེས་གྲོལ་བྱེད༔ ཡེ་ཤེས་མཁའ་འགྲོ་མཚོ་རྒྱལ་ཁྱོད༔ གདམས་ངག་བརྡ་ཡི་རིས་སུ་ཐོབས༔ ཁམས་ཀྱི་དབྱར་རྔ་བྲག་ལ་སྦོས༔ བཀའ་སྲུང་གནོད་སྦྱིན་གཟའ་ཡིས་སྲུངས༔ དམ་ཉམས་སྨོན་ལོག་སྲོག་རྩ་ཆོད༔ ང་ཡི་བུ་མཆོག་དམ་པ་ནི༔ རྡོ་རྗེ་ཁྲོ་ལོད་རྩལ་ལ་སྤྲོད༔ བཀའ་དང་ཐ་ཚིག་གཉན་པོའི་རྒྱ༔ དེ་ལྟར་བཀའ་བསྒོ་བྱེད་པའི་ཚེ༔ མངའ་བདག་ཁྲི་སྲོང་ལྡེའུ་བཙན་གྱིས༔ ཀྱཻ་ཧོཿ དུས་གསུམ་སངས་རྒྱས་བླ་མ་རྗེ༔ སྙིང་ཐིག་ཟབ་མོ་འདི་ཉིད་ནི༔ འབྱིན་དུས་གདུལ་བྱ་ནམ་ཞིག་ཡིན༔ བཏོན་པའི་གྲུབ་ཆེན་སུ་ཞིག་མཆི༔ དུས་ཚོད་རྟགས་ཚད་ཇི་ལྟར་གདའ༔ མ་ཧཱ་གུ་རུས་བསྟན་དུ་གསོལ༔ ཞེས་ཞུས་གུ་རུའི་ཞལ་སྔ་ནས༔ ཉོན་ཅིག་མངའ་བདག་ཆོས་ཀྱི་རྒྱལ༔ སྙིང་ཐིག་འདི་ཉིད་འབྱིན་པའི་དུས༔ སུམ་ཅུ་ཁ་རལ་ཉི་ཤུར་ཉེ༔ གདུལ་བྱ་སྙིགས་མའི་དུས་སུ་མཆི༔ ད་ལྟའི་འབྲོག་བན་ཁྱེའུ་ཆུང་༔ སྐྱེ་ཕྲེང་བཅུ་གསུམ་བརྒྱུད་པའི་མཐར༔ ཁམས་ཀྱི་གསེར་ལྡན་ལུང་པ་རུ༔ སྦས་པའི་རྣལ་འབྱོར་རིག་འཛིན་མཆོག༔ རྡོ་རྗེ་མིང་འཛིན་ཆེན་པོ་འབྱུང་༔ མངའ་བདག་ཡབ་སྲས་ལ་སོགས་པའི༔ ངའི་སློབ་རྗེ་འབངས་བརྒྱད་ཀྱི་བསྐོར༔ ང་དང་ད་ལྟར་དངོས་འབྲེལ་གྱི༔ སྐལ་ལྡན་སྐྱེས་མཆོག་སུམ་ཅུའི་འཁོར༔ སྨོན་ལོག་བདུད་སྤྲུལ་བདུན་གྱིས་སྡང་༔ དེ་བཟློག་གནོད་སྦྱིན་དམར་ནག་བྲན༔ དུས་ཚོད་དུས་ཀྱི་དམར་གཤམ་དུས༔ སྐྱབས་གནས་ཟོག་ལ་བྱེད་ཅིང་བཀུར༔ མཆོག་ཏུ་ཁུར་དང་དུག་ཏུ་སྤྱོད༔ ལྕི་དང་ཧ་ལ་ཟས་སུ་བསྟེན༔ རྣལ་འབྱོར་ཅན་ལ་བཀྱོན་ཕབ་གཤེ༔ རྟགས་ནི་ཡུལ་འདིའི་ས་སྲིན་ལང་༔ དམ་སྲི་ནག་པོས་རྩེ་འཇོ་རོལ༔ དེ་དུས་ས་ཐེལ་སྤྲུལ་པ་ཡིས༔ རྗེ་བྱེད་གཙུག་ཏུ་བྱ་སྤུས་བརྒྱན༔ དེ་ཡིས་སྡིག་པའི་རླུང་སྤྲིན་གཏིབས༔ སེར་པོའི་གོང་བཟང་འཆང་བའི་རིགས༔ མཚོན་གྱི་ཆོ་ག་བྱེད་པ་དང་༔ ཡོན་ཏན་མཆོག་ཏུ་སྡིག་པ་ཁུར༔ ཡང་ཡང་ཐུབ་བསྟན་པུཥྤེ་གྲོངས༔ ལྕགས་ཀྱི་སེར་རླུང་འཚུབས་མས་བཅོམ༔ དཀར་པོའི་ཁ་དོག་ཕྱི་རུ་བཀྲ༔ ནག་པོའི་གཏིང་བསྒྱུར་གནས་སུ་མཆི༔ ཁམས་གསུམ་སེ་ཕུང་ནག་པོ་ཡི༔ སྤྲུལ་པའི་སྨོན་ལོག་དྲུག་འབྱུང་ནས༔ དམག་འཁྲུགས་མཚོན་གྱི་ཡོ་ལང་འགྱེད༔ མི་ཕྱུགས་གོད་ཡམས་མ་མོས་སྦྱིན༔ གནམ་ལ་དུ་བ་མཇུག་རིང་ཤར༔ བར་སྣང་ཆུ་འཛིན་ཁྲག་མདོག་འཆར༔ ས་གཞིར་བཙའ་སད་སེར་གསུམ་འབྱུང་༔ དེ་དུས་འདི་འབྱིན་དུས་ཚིགས་ཡིན༔ མངའ་བདག་རྒྱལ་པོ་དགྱེས་པར་འགྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གཉན་རྒྱ༔ བརྡ་ཐིམ༔ ཞེས་པ་འདི་ས་མོ་ལུག་གི་ལོ་ཧོར་ཟླ་བཅུ་གཅིག་པའི་ཁྱིམ་དུ་གསེར་སྨད་རྔ་ལ་སྟག་རྩེའི་གཡས་ལོགས་ཤ་བྲག་རྡོ་རྗེ་ནས་སྤྲང་པོ་བདུད་འཇོམས་རྡོ་རྗེས་བཏོན་ཏེ་མི་ལོ་བཅུ་གསུམ་ལ་བཀའ་རྒྱ་བྱས་ཏེ་མཐར་སྨར་མདོ་བཀྲ་ཤིས་དགའ་འཁྱིལ་ནས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།། །།