TTDL-ZABTER-07-JA-044

Previous Text Back to Volume PageNext Text

Wylie title	zab gsang mkha' 'gro'i snying thig las: rje btsun sgrol ma'i dbang chog dngos grub 'byung gnas:
Location	bdud 'joms gling pa zab gter Volume 7, Text 44, Pages 557-561 (Folios 1a1 to 3a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las rje btsun sgrol ma'i dbang chog dngos grub 'byung gnas. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: 557-561. Thimphu, Bhutan: Lama Kuenzang Wangdue, 2004.
Side notes	Recto: dbang chog   Verso: bdud 'joms sgrol ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	sgrol ma
Colophon	ཞེས་པ་འདི་ཉིད་ཞེ་ཆེན་སྤྲུལ་སྐུ་བསྟན་པའི་རྒྱལ་མཚན་གྱིས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་ངག་དབང་ཕྲིན་ལས་སོ༔ དགེའོ། །ལེགས་སོ། །སརྦ་མངྒ་ལཾ།།
	zhes pa 'di nyid zhe chen sprul sku bstan pa'i rgyal mtshan gyis nan du bskul ngor khrag 'thung bdud 'joms rdo rjes ye shes mkha' 'gro'i brda ris las dag par phab pa'i yi ge pa ni ngag dbang phrin las so:_dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ རྗེ་བཙུན་སྒྲོལ་མའི་དབང་ཆོག་དངོས་གྲུབ་འབྱུང་གནས་བཞུགས་སོ༔ ཐྂ༎༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) རྗེ་བཙུན་སྒྲོལ་མ་སྒྲུབ་པ་ཡི༔ རྣལ་འབྱོར་ཕོ་མོ་སུ་ཡང་རུང་༔ དང་པོ་དབང་གིས་སྨིན་པ་གནད༔ དེ་ཕྱིར་དབང་བསྐུར་བྱ་བ་ལ༔ བུམ་གསང་ཤེས་རབ་ཡེ་ཤེས་དང་༔ ཚིག་དབང་རྫས་རྣམས་ལེགས་བསྒྲུབ་ནས༔ དང་པོ་སྒྲུབ་པའི་དལ་ཞལ་ཕྱེ༔ བསྒོམ་བཟླས་གནད་ཀྱིས་ཐེབས་བྱས་མཐར༔ སློབ་མ་གྲལ་དུ་འཁོད་བྱས་ཏེ༔ ཁྲུས་བྱས་བགེགས་བསྐྲད་སྲུང་འཁོར་བསྒོམ༔ མཎྜལ་ཕུལ་ཏེ་གསོལ་འདེབས་ནི༔ ཀྱཻ་ཧོཿ དཀྱིལ་འཁོར་གཙོ་མཆོག་བླ་མ་རྗེ༔ བདག་ཅག་སྐལ་ལྡན་སློབ་བུ་ལ༔ རྗེ་བཙུན་འཕགས་མ་སྒྲོལ་མ་ཡི༔ རྩ་དབང་ཡོངས་རྫོགས་བསྐུལ་དུ་གསོལ༔ ལན་གསུམ་མཐར་བླ་མས༔ ཧོཿ སྐལ་ལྡན་རིགས་ཀྱི་བུ་ཁྱོད་ཀྱིས༔ ཚུལ་བཞིན་ཉམས་སུ་ལེན་པ་དང་༔ དམ་ཚིག་གཉན་པོ་བསྲུང་ནུས་ན༔ དབང་མཆོག་ཡོངས་རྫོགས་བསྐུར་བར་བགྱི༔ དེ་ནས་སྐྱབས་སེམས་ཕོག་བྱས་ནས༔ དམ་ཆུ་ལྕེ་ལ་བཞག་བྱས་ཏེ༔ ཧོཿ འདི་ནི་དམ་ཚིག་རྡོ་རྗེའི་ཆུ༔ བསྲུང་ན་ཚེ་འདིར་དངོས་གྲུབ་ཐོབ༔ ཉམས་ན་སྲོག་གི་གཤེད་མར་བྱེད༔ དེ་ཕྱིར་དམ་ཚིག་བསྲུང་སྡོམ་ཟུངས༔ ས་མ་ཡ་ན་ར་ཀན༔ དེ་ནས་སློབ་མ་ལྷར་བསྐྱེད་ལ༔ ཨོཾ་མ་ཧཱ་ཤུ་ནྱ་སོགས༔ སྐད་ཅིག་གིས་སེམས་དང་སྣང་བ་ཐམས་ཅད་ཆོས་ཀྱི་དབྱིངས་ཀྱི་རང་བཞིན་དུ་ཞིག་པར་བསམ༔ སྟོང་པའི་ངང་ལས༔ ཆུ་ལས་ཆུ་ལྦུར་རྡོལ་བཞིན་དུ༔ ལྷར་བསྐྱེད་ཡེ་ཤེས་པ་དབབ་སྟེ་མེ་ཏོག་དོར་ཞིང༔ བཛྲ་པུཥྤེ་པྲ་ཏཱིཙྪ་ཧོཿ དེ་ནས་མིག་དར་བསལ་ལ༔ ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ དེ་ནས་སློབ་མ་རྗེ་བཙུན་སྒྲོལ་མ་དངོས་སུ་གསལ་ལ༔ དང་པོ་བུམ་པ་ཡེ་ཤེས་ལྷའི་རྟེན་དང་བརྟེན་པ་ཡོངས་རྫོགས་ཀྱི་ངོ་བོར་གསལ་གདབ་ལ༔ བུམ་པ་ལྷུན་གྲུབ་གཞལ་ཡས་ཁང་༔ ནང་ན་འཕགས་མའི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ བུམ་དབང་ཡོངས་སུ་རྫོགས་ཐོབ་ཤོག༔ རྩ་སྔགས༔ སརྦ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་དཀྱིལ་འཁོར་ལས་རིམ་པ་བཞིན་དུ་དེ་འདྲ་བ་རེ་འཕྲོས་ནས་སློབ་མ་ལ་ཐིམ་པས་ལྷ་སོ་སོའི་དཔལ་ཡོན་ལ་དབང་འབྱོར་བར་བསམ་ལ༔ རྗེ་བཙུན་སྒྲོལ་མའི་སྐུ་གཏད་ལ༔ ཧོཿ སྐལ་ལྡན་རིགས་ཀྱི་བུ་ཁྱོད་ལ༔ འཕགས་མ་སྒྲོལ་མའི་དབང་བསྐུར་རོ༔ སྒྲིབ་གཉིས་བག་ཆགས་ཀུན་དག་ནས༔ རྡོ་རྗེ་སྐུ་རུ་སྨིན་གྲོལ་ཤོག༔ ཨོཾ་ཏཱ་རེ་ཏཱཾ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ཞི་མཛད་དཀར་མོའི་སྐུ་གཏད་ལ༔ ཧོཿ སྐལ་ལྡན་རིགས་ཀྱི་བུ་ཁྱོད་ལ༔ དབྱངས་ཅན་མ་ཡི་དབང་བསྐུར་རོ༔ མ་དག་འཁྲུལ་པའི་ཕུང་པོ་འདི༔ མེ་ལོང་ཡེ་ཤེས་སྐུ་ཐོབ་ཤོག༔ ཧྲཱིཾ་ཧྲཱིཾ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འོད་ཟེར་འབར་མའི་སྐུ་གཏད་ལ༔ ཧོཿ སྐལ་ལྡན་རིགས་ཀྱི་བུ་ཁྱོད་ལ༔ འོད་ཟེར་འབར་མའི་དབང་བསྐུར་རོ༔ ཚེ་བསོད་ཡེ་ཤེས་རབ་རྒྱས་ཏེ༔ མཉམ་ཉིད་ཡེ་ཤེས་སྐུ་ཐོབ་ཤོག༔ ཨཱཪྻ་མ་རི་ཙྱཻ་མཾ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རིག་བྱེད་དབང་མོའི་སྐུ་གཏད་ལ༔ ཧོཿ སྐལ་ལྡན་རིགས་ཀྱི་བུ་ཁྱོད་ལ༔ རིག་བྱེད་དབང་མོའི་དབང་བསྐུར་རོ༔ འཁོར་འདས་དབང་དུ་འདུ་བ་དང་༔ སོར་རྟོག་ཡེ་ཤེས་སྐུ་ཐོབ་ཤོག༔ ཨོཾ་ཀུ་རུ་ཀུལླེ་ཧྲཱིཾ་ཧྲཱིཾ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་ནོར་རྒྱུན་མའི་སྐུ་གཏད་ལ༔ ཧོཿ སྐལ་ལྡན་རིགས་ཀྱི་བུ་ཁྱོད་ལ༔ ནོར་རྒྱུན་མ་ཡི་དབང་བསྐུར་རོ༔ དགྲ་བགེགས་མ་ལུས་ཚར་གཅོད་ཅིང་༔ བྱ་གྲུབ་ཡེ་ཤེས་སྐུ་ཐོབ་ཤོག༔ བ་སུ་དྷ་རི་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་སྒོ་མ་བཞི་ཡི་སྐུ་གཏད་ལ༔ ཧོཿ སྐལ་ལྡན་རིགས་ཀྱི་བུ་ཁྱོད་ལ༔ སྒོ་མ་བཞི་ཡི་དབང་བསྐུར་བས༔ ཕྲིན་ལས་རྣམ་བཞི་ལྷུན་གྲུབ་ཅིང་༔ ཚད་མེད་བཞི་ལྡན་སྐུ་ཐོབ་ཤོག༔ ཛཿཧཱུྃ་བཾ་ཧོཿ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བྷནྡྷ་བདུད་རྩི་ཐོགས་ལ༔ ཧོཿ ཡེ་ཤེས་དབྱིངས་ཀྱི་ཀ་པཱ་ལར༔ གསང་ཆེན་བཅུད་ཀྱི་བདུད་རྩི་འཁྱིལ༔ སྐལ་ལྡན་ཁྱོད་ཀྱི་ངག་ཏུ་བླུད༔ ངག་དང་རླུང་གི་སྒྲིབ་པ་དག༔ གསང་བ་གསུང་གི་དབང་ཐོབ་ནས༔ གསུང་གི་རྡོ་རྗེར་སྨིན་གྲོལ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ་ཨཱཿདེ་ནས་མེ་ལོང་ཐོགས་ལ༔ ཧོཿ མེ་ལོང་ཡེ་ཤེས་གསལ་བའི་སྒོ༔ སྐལ་ལྡན་བུ་ལ་དབང་བསྐུར་བས༔ ཡིད་སྒྲིབ་དག་ནས་ཤེར་དབང་ཐོབ༔ རྡོ་རྗེའི་ཐུགས་སུ་སྨིན་གྲོལ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཤེས་རྡོ་ཐོགས་ལ༔ ཧོཿ འཇའ་ཤེལ་འོད་ཐིག་གསལ་བའི་སྒོ༔ སྐལ་ལྡན་བུ་ལ་དབང་བསྐུར་བས༔ སྐུ་གསུམ་ལྷུན་གྲུབ་མངོན་གྱུར་ཏེ༔ སྣང་བ་བཞི་ཡི་ས་ལམ་བརྒལ༔ གཞོན་ནུ་བུམ་སྐུར་སངས་རྒྱས་ཤོག༔ རྩ་སྔགས༔ སརྦ་ཨ་བྷི་ཥིཉྩ་ཧྲཱིཿདེ་ནས་གཏོར་མ་ཐོགས་ལ༔ ཧཱུྃ༔ དཀྱིལ་འཁོར་ཡོངས་རྫོགས་གཏོར་མ་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ དཀྱིལ་འཁོར་ཡོངས་ལ་དབང་ཐོབ་ནས༔ རྫོགས་སངས་རྒྱས་དབང་ཐོབ་པར་ཤོག༔ རྩ་སྔགས༔ སརྦ་ཀཱ་ཡ་ཝཱཀ་ཙིཏྟ་བ་ལིཾ་ཏ་ཨ་བྷི་ཥིཉྩ་ཡེ་སྭཱ་ཧཱ༔ དེ་ནས་བཀྲ་ཤིས་རྫས་རྟགས་གཏད༔ ཤིས་པ་བརྗོད་ཅིང་མེ་ཏོག་འཐོར༔ བསྔོ་བ་སྨོན་ལམ་རྒྱ་ཡིས་གདབ༔ དབང་འདི་ཐོབ་ནས་སྒྲུབ་པ་ཡི༔ རྣལ་འབྱོར་ཕོ་མོ་མངོན་སངས་རྒྱས༔ དམ་ཚིག་སྲོག་གི་གཏའ་རུ་ཟུངས༔ བསྒྲུབ་པའི་གནད་ཐིག་དེ་ཁོ་ན༔ བཀའ་སྲུང་ཁྱབ་འཇུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ཞེས་པ་འདི་ཉིད་ཞེ་ཆེན་སྤྲུལ་སྐུ་བསྟན་པའི་རྒྱལ་མཚན་གྱིས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་ངག་དབང་ཕྲིན་ལས་སོ༔ དགེའོ། །ལེགས་སོ། །སརྦ་མངྒ་ལཾ།།