TTDL-ZABTER-13-PA-056

Previous Text Back to Volume PageNext Text

Wylie title	chos nyid nam mkha'i klong mdzod las: gza' bdud rgyal po drag bskul spu gri'i 'khor lo:
Location	bdud 'joms gling pa zab gter Volume 13, Text 56, Pages 215-217 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las gza' bdud rgyal po drag bskul spu gri'i 'khor lo. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 215-217. Thimphu, Bhutan: Lama Kuenzang Wangdue, 2004.
Side notes	Recto: drag bskul   Verso: bdud 'joms srung ma gza' bdud
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Invocations - bskul ba
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Gza' bdud
Colophon	ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེས་ཡིག་མེད་མཁའ་འགྲོའི་བརྡའ་རིས་ལས་དག་པར་ཕབ་པའི་ཡི་གེ་པ་ནི་ཆོས་དབྱིངས་སྐྱེ་མེད་རྡོ་རྗེའོ། །དགེའོ། །དགེའོ། །དགེའོ། །བསྟན་དགྲ་མ་ལུས་ཚར་གཅོད་ནུས་ཐོབ་ཤོག །མངྒ་ལཾ།།
	zhes pa 'di yang sprang ma nus bdud 'joms rdo rjes yig med mkha' 'gro'i brda' ris las dag par phab pa'i yi ge pa ni chos dbyings skye med rdo rje'o/_/dge'o/_/dge'o/_/dge'o/_/bstan dgra ma lus tshar gcod nus thob shog_/mang+ga laM//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ གཟའ་བདུད་རྒྱལ་པོ་དྲག་བསྐུལ་སྤུ་གྲིའི་འཁོར་ལོ་བཞུགས་སོ༔ (བརྡ་ཡིག་) ཤ་ཁྲག་གཏོར་མ་སྐྱེམས་བཤོས་བཤམས༔ ཨོཾ་ཨཱཿཧཱུྃ་དང་ཧ་ཧོ་ཧྲཱིཿ འབྲུ་གསུམ་ནུས་པས་བྱིན་རླབས་ནས༔ རང་ཉིད་ལྷ་ཡི་ང་རྒྱལ་གྱིས༔ ཛཿསྟེང་ཕྱོགས་ནམ་མཁའི་དཀྱིལ་ཡངས་ནས༔ ཚངས་པའི་ཡུལ་ལ་མངའ་དབང་བསྒྱུར༔ དུར་ཁྲོད་མེ་འབར་གཞལ་ཡས་ནས༔ སྐྱེ་འགྲོའི་སྲོག་ལ་མངའ་དབང་བསྒྱུར༔ ཕྱག་ན་རྡོ་རྗེའི་བཀའ་ཉན་ཅན༔ ཁྲོས་མ་ནག་མོའི་ཕོ་ཉ་བ༔ ཨེ་ཀ་ཙ་ཏིའི་ལས་མཁན་ཆེ༔ དུག་ཁྲག་འདྲེས་པའི་རྒྱ་མཚོ་ན༔ དྲང་སྲོང་གཟའ་བདུད་རཱ་ཧུ་ལ༔ རོ་སྟོད་མི་ལ་རོ་སྨད་སྦྲུལ༔ དབུ་དགུའི་སྟེང་དུ་བྱ་རོག་གདོང་༔ དུད་ཁ་མགོ་ལུས་མིག་གིས་ཁེངས༔ ཕྱག་བཞི་མདའ་གཞུ་ཆུ་སྲིན་ཞགས༔ ལྟོ་བའི་ཞལ་གྱིས་སྟོང་གསུམ་ཟ༔ སྤྲུལ་པ་གཟའ་བརྒྱད་ལས་ལ་འགྱེད༔ གདོང་མོ་མཆེད་བཞིས་དགྱེས་པ་སྐོང་༔ ལྷ་སྲིན་སྡེ་བརྒྱད་ཕོ་ཉར་འགྱེད༔ རྒྱུ་སྐར་ཉེར་བརྒྱད་བྲན་དུ་བཀོལ༔ སྲོག་གཅོད་ལས་ཀྱི་ཤན་པ་འགྱེད༔ སྨོན་ལམ་སྟོབས་ཀྱི་མཐུ་རྩལ་ཅན༔ རྡོ་རྗེ་ཐེག་པའི་བསྟན་སྲུང་བ༔ ཁྱོད་ནི་དམ་ཚིག་སྲོག་འཛིན་པ༔ ནམ་མཁའ་ལྷ་ཡི་ཁམས་ནས་བསྐུལ༔ བར་སྣང་གཉན་གྱི་ཁམས་ནས་བསྐུལ༔ ས་གཞི་ཀླུ་ཡི་ཁམས་ནས༴ དུར་ཁྲོད་ཆེན་པོ་བརྒྱད་ནས༴ ཡབ་ནི་གདོང་དམར་སྲིན་པོ༴ ཡུམ་ནི་གཏུམ་འབར་ཀླུ་མོ༴ སྲས་ནི་གཟའ་མཆོག་ཆེན་པོ༴ སྤྲུལ་པའི་གཟའ་བརྒྱད་འཁོར་བཅས༴ སྡོང་ཟླ་གདོང་མོ་མཆེད་བཞི༴ ཡང་སྤྲུལ་ལྷ་སྲིན་སྡེ་བརྒྱད༴ འཁོར་གྱི་རྒྱུ་སྐར་ཉེར་བརྒྱད༴ དཔལ་ཆེན་ཧེ་རུའི་བཀའ་ཡིས༴ རྡོ་རྗེ་ཅན་གྱི་ཐ་ཚིག༴ རིག་འཛིན་པདྨའི་དམ་གྱིས་བསྐུལ༔ དགུ་ལྡན་བླ་མའི་བཀའ་དམ་གྱིས༔ བསྐུལ་ལོ་བདག་ཀྱང་དེའི་རྗེས་ཟིན༔ ད་ལྟ་མངོན་སྤྱོད་ལས་ལ་བསྐུལ༔ བདག་དང་དམ་ཚིག་རྗེས་དགོངས་ལ༔ མྱུར་མགྱོགས་དྲག་རྩལ་སྟོབས་ཤུགས་ཕྱུངས༔ ཐ་ཚིག་དཔང་དུ་མི་འཇོག་རྒྱུ༔ བརྒྱུད་པ་གོང་མའི་ཁྲིམས་ལམ་བཞིན༔ སྲུང་མ་གཉན་པོ་མི་བསྐུལ་རྒྱུ༔ དཔུང་གཉེན་དཀོན་མཆོག་གསུམ་པོ་ཁུར༔ ལས་ཀ་མཐུ་ལ་མི་བརྩོན་རྒྱུ༔ སྔགས་ཀྱི་རྣལ་འབྱོར་ལས་སུ་བསྔགས༔ དེ་རིང་སྲུང་མ་མི་བསྐུལ་རྒྱུ༔ མ་ཉེས་རྣལ་འབྱོར་ཆད་པས་མནར༔ སྡང་བའི་དགྲ་བོས་ཕོད་བཙུགས་ཀྱི༔ ར་མདར་དྲང་སྲོང་ཆེན་པོ་སྦྲན༔ ནམ་མཁར་ཁྲག་སྤྲིན་དམར་པོ་སྡུད༔ བར་སྣང་གློག་དམར་འཁྱུགས་འཁྱུགས་སོང་༔ ས་གཞིར་ཐོག་ལྟར་ཕོབ་ལ་སོང་༔ སྒྲ་འོད་མེ་དུད་གཡོ་ཞིང་སོང་༔ དུག་རླུང་ནད་རླུང་འཚུབས་ཤིང་སོང་༔ དགྲ་བོའི་གནས་ཡུལ་འོད་ཀྱིས་ཁོངས༔ མི་ནོར་སྒོ་ཁྱི་བཅས་པ་ཀུན༔ ཁ་རླངས་དུག་གི་སྤུ་གྲིས་སོད༔ མ་ཐུབ་བར་དུ་ཚིམས་མ་བྱེད༔ མ་ཟད་བར་དུ་ཡིད་མ་མགུ༔ མ་སྟོངས་བར་དུ་སླར་མ་འོངས༔ ནུས་མཐུ་དྲག་ཁྲོ་ཚུར་མ་སྟོན༔ གདུག་པའི་དབལ་ཁ་སླར་མ་ལྡོག༔ སྡུག་ཡུས་ཕྱིར་མིག་མ་ལྟ་ཞིག༔ བཀའ་དང་དམ་ཚིག་དཔང་ལ་ཡོད༔ རྡོ་རྗེ་ཅན་ལ་བརྙས་མ་བཙུག༔ ནཱ་ག་རཀྴ་ཧ་ལ་ཀ་ལ་རཱ་ཧུ་ལ་བཛྲ་ས་མ་ཡ༔ དགྲ་བོ་ཆེ་གེ་མོར་ཆོ་ཆོ་རྒྱུག་རྒྱུག་རྦད་རྦད་བྷྱོ་བྷྱོ་ནན༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ མ་འོངས་ལས་ཅན་སྐལ་ལྡན་ལ༔ ཕ་ལམ་རྡོ་རྗེའི་དུག་མདའ་འདི༔ བགོ་སྐལ་ས་ར་ཧ་པས་བཞག༔ གང་ལ་བྱས་ཀྱང་ཐོག་དང་འདྲ༔ རྣལ་འབྱོར་རང་གི་དཔུང་ལས་མིན༔ དམ་ཉམས་ལག་ཏུ་ཤོར་ར་རེ༔ གཟའ་བདུན་དུག་གི་སྤུ་གྲིས་སྲུངས༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེས་ཡིག་མེད་མཁའ་འགྲོའི་བརྡའ་རིས་ལས་དག་པར་ཕབ་པའི་ཡི་གེ་པ་ནི་ཆོས་དབྱིངས་སྐྱེ་མེད་རྡོ་རྗེའོ། །དགེའོ། །དགེའོ། །དགེའོ། །བསྟན་དགྲ་མ་ལུས་ཚར་གཅོད་ནུས་ཐོབ་ཤོག །མངྒ་ལཾ།། །།