DUDJOM-THROMA-041

Previous Text Back to Volume PageNext Text

Wylie title	chos nyid nam mkha'i klong mdzod las: gza' bdud rgyal po'i drag bskul spu gri'i 'khor lo:
Location	khros ma'i sgrub skor Volume 1, Text 41, Pages 317-321 (Folios 1a1 to 3a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las gza' bdud rgyal po'i drag bskul spu gri'i 'khor lo. In Khros ma'i sgrub skor: 317-321. Kalimpong: Mani Dorji, 1979.
Side notes	Recto: gza' bskul   Verso: khros ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Invocations - bskul ba
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	gza' bdud
Colophon	ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེས་ཡིག་མེད་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེའི་རིས་བྱེད་ཆོས་ཉིད་སྐྱེ་མེད་རྡོ་རྗེའོ། །དགེའོ།།
	zhes pa 'di yang sprang ma nus bdud 'joms rdo rjes yig med mkha' 'gro'i brda ris las dag par phab pa'i yi ge'i ris byed chos nyid skye med rdo rje'o/_/dge'o//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ གཟའ་བདུད་རྒྱལ་པོའི་དྲག་བསྐུལ་སྤུ་གྲིའི་འཁོར་ལོ་བཞུགས་སོ༔

ཕྚ༔ ཤ་ཁྲག་གཏོར་མ་སྐྱེམས་བཤོས་བཤམ༔ འབྲུ་གསུམ་ནུས་པས་བྱིན་བརླབས་ནས༔ རང་ཉིད་ལྷ་ཡི་ང་རྒྱལ་གྱིས༔ ཧཱུྃ༔ སྟེང་ཕྱོགས་ནམ་མཁའི་དཀྱིལ་ཡངས་ནས༔ ཚངས་པའི་ཡུལ་ལ་མངའ་དབང་བསྒྱུར༔ དུར་ཁྲོད་མེ་འབར་གཞལ་ཡས་ནས༔ སྐྱེ་འགྲོའི་སྲོག་ལ་མངོན་དབང་བསྒྱུར༔ ཕྱག་ན་རྡོ་རྗེའི་བཀའ་ཉན་ཅིང་༔ ཁྲོས་མ་ནག་མོའི་ཕོ་ཉ་བ༔ ཨེ་ཀ་ཛ་ཊཱིའི་ལས་མཁན་ཆེ༔ དུག་ཁྲག་འདྲེས་པའི་རྒྱ་མཚོ་ན༔ དྲང་སྲོང་གཟའ་བདུད་རཱ་ཧུ་ལ༔ རོ་སྟོད་མི་ལ་རོ་སྨད་སྦྲུལ༔ དབུ་དགུའི་སྟེང་དུ་བྱ་རོག་གདོང་༔ དུད་ཁ་མགོ་ལུས་མིག་གིས་གང་༔ ཕྱག་བཞི་མདའ་གཞུ་ཆུ་སྲིན་ཞགས༔ ལྟོ་བའི་ཞལ་གྱིས་སྟོང་གསུམ་ཟ༔ སྤྲུལ་པ་གཟའ་བརྒྱད་ལས་ལ་འགྱེད༔ གདོང་མོ་མཆེད་བཞིས་དགྱེས་པ་སྐོང་༔ ལྷ་སྲིན་སྡེ་བརྒྱད་ཕོ་ཉར་འགྱེད༔ རྒྱུ་སྐར་ཉེར་བརྒྱད་བྲན་དུ་བཀོལ༔ སྲོག་གཅོད་ལས་ཀྱི་ཤན་པ་འགྱེད༔ སྨོན་ལམ་སྟོབས་ཀྱིས་མཐུ་རྩལ་ཅན༔ རྡོ་རྗེ་ཐེག་པའི་བསྟན་སྲུང་བ༔ ཁྱེད་ནི་དམ་ཚིག་སྲོག་འཛིན་པ༔ ནམ་མཁའ་ལྷ་ཡི་ཁམས་ནས་བསྐུལ༔ བར་སྣང་གཉན་གྱི་ཁམས་ནས་བསྐུལ༔ ས་གཞི་ཀླུ་ཡི་ཁམས་ནས་བསྐུལ༔ དུར་ཁྲོད་ཆེན་པོ་བརྒྱད་ནས་བསྐུལ༔ ཡབ་ནི་གདོང་དམར་སྲིན་པོ་བསྐུལ༔ ཡུམ་ནི་གཏུམ་འབར་ཀླུ་མོ་བསྐུལ༔ སྲས་ནི་གཟའ་མཆོག་ཆེན་པོ་བསྐུལ༔ སྤྲུལ་པའི་གཟའ་བརྒྱད་འཁོར་བཅས་བསྐུལ༔ བསྡོང་ཟླ་གདོང་མོ་མཆེད་བཞི་བསྐུལ༔ ཡང་སྤྲུལ་ལྷ་སྲིན་སྡེ་བརྒྱད་བསྐུལ༔ འཁོར་གྱི་རྒྱུ་སྐར་ཉེར་བརྒྱད་བསྐུལ༔ དཔལ་ཆེན་ཧེ་རུ་ཀ་ཡིས་བསྐུལ༔ རྡོ་རྗེ་ཅན་གྱི་ཐ་ཚིག་བསྐུལ༔ རིག་འཛིན་པདྨའི་དམ་གྱིས་བསྐུལ༔ དགུ་ལྡན་བླ་མའི་བཀའ་དམ་གྱིས༔ བསྐུལ་ལོ་བདག་ཀྱང་དེ་རྗེས་ཟིན༔ ད་ལྟ་མངོན་སྤྱོད་ལས་ལ་བསྐུལ༔ བདག་དང་དམ་ཚིག་རྗེས་དགོངས་ལ༔ མྱུར་མགྱོགས་དྲག་རྩལ་སྟོབས་ཤུགས་ཕྱུང་༔ ཐ་ཚིག་དཔང་དུ་མི་འཇོག་རྒྱུ༔ བརྒྱུད་པ་གོང་མའི་ཁྲིམས་ལམ་བཞིན༔ སྲུང་མ་གཉན་པོ་མི་བསྐུལ་རྒྱུ༔ དཔུང་མཉེན་དཀོན་མཆོག་གསུམ་པོ་ཁུར༔ ལས་ཀ་མཐུ་ལ་མི་བརྩོན་རྒྱུ༔ སྔགས་ཀྱི་རྣལ་འབྱོར་ལས་སུ་བསྔགས༔ དེ་རིང་སྲུང་མ་མི་བསྐུལ་རྒྱུ༔ མ་ཉེས་རྣལ་འབྱོར་ཆད་པས་མནར༔ སྡང་བའི་དགྲ་བོས་ཕོད་བཙུགས་ཀྱི༔ ར་མདའ་དྲང་སྲོང་ཆེན་པོ་སྦྲན༔ ནམ་མཁར་ཁྲག་སྤྲིན་དམར་པོ་སྡུས༔ བར་སྣང་གློག་དམར་ཁྱུགས་ཁྱུགས་སོང་༔ ས་གཞིར་ཐོག་སེར་ཕོབ་ལ་སོང་༔ སྒྲ་འོད་མེ་དུད་གཡོ་ཞིང་སོང་༔ དུག་རླངས་ནད་རླུང་འཚུབས་ཤིང་སོང་༔ དགྲ་བོའི་གནས་ཡུལ་འོད་ཀྱིས་ཁེངས༔ མི་ནོར་སྒོ་ཁྱི་བཅས་པ་ཀུན༔ ཁ་རླངས་དུག་གི་སྤུ་གྲིས་སོད༔ མ་ཐུབ་བར་དུ་ཚིམ་མ་བྱེད༔ མ་ཟད་བར་དུ་ཡིད་མ་མགུ༔ མ་སྟོང་བར་དུ་སླར་མ་འོང་༔ ནུས་མཐུ་དྲག་ཁྲོ་ཚུར་མ་སྟོན༔ གདུག་པའི་དབལ་ཁ་སླར་མ་ལྡོག༔ སྡུག་ཡུས་ཕྱི་མིག་མ་ལྟ་ཞིག༔ བཀའ་དང་དམ་ཚིག་དཔག་ལ་ཡོད༔ རྡོ་རྗེ་ཅན་ལ་བརྙས་མ་བཙུག༔ ནཱ་ག་རཀྴ་ཧ་ལ་ཀ་ལ་རཱ་ཧུ་ལ་བཛྲ་ས་མ་ཡ༔ དགྲ་བོ་ཆེ་གེ་མོར་ཆོ་ཆོ་རྒྱུག་རྒྱུག་རྦད་རྦད་བྷྱོ་བྷྱོ་ནན༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ མ་འོངས་ལས་ཅན་སྐལ་ལྡན་ལ༔ ཕ་ལམ་རྡོ་རྗེའི་དུག་མདའ་འདི༔ བགོ་སྐལ་ས་ར་ཧ་པས་བཞག༔ གང་ལ་བྱས་ཀྱང་ཐོག་དང་འདྲ༔ རྣལ་འབྱོར་རང་གི་དཔུང་ལས་མིན༔ དམ་ཉམས་ལག་ཏུ་ཤོར་ར་རེ༔ གཟའ་བདུད་དུག་གི་སྤུ་གྲིས་སྲུངས༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེས་ཡིག་མེད་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེའི་རིས་བྱེད་ཆོས་ཉིད་སྐྱེ་མེད་རྡོ་རྗེའོ། །དགེའོ།། །།