TTDL-ZABTER-05-CA-036

Previous Text Back to Volume PageNext Text

Wylie title	zab gsang mkha' 'gro'i snying thig las: dpal chen rdo rje gzhon nu'i sgrub pa gsang chen snying gi yang thig:
Location	bdud 'joms gling pa zab gter Volume 5, Text 36, Pages 307-325 (Folios 1a1 to 10a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las dpal chen rdo rje gzhon nu'i sgrub pa gsang chen snying gi yang thig. In Sprul pa'i gter chen bdud 'joms gling pa'i zab gter gsang ba'i chos sde, Vol. 5: 307-325. Thimphu, Bhutan: Lama Kuenzang Wangdue, 2004.
Side notes	Recto: bskyed rdzogs   Verso: bdud 'joms phur pa
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Generation Stage - bskyed rim  ·  Completion Stage - rdzogs rim
Cycle	ཟབ་ལམ་མཁའ་འགྲོའི་ཐུགས་ཐིག་ (zab gsang mkha' 'gro'i snying thig)
Deity	rdo rje phur pa
Colophon	ཞེས་པ་འདི་སྤྲང་དྲེད་པོ་བདུད་འཇོམས་གླིང་བས་གསེར་སྨད་རྔ་ལ་སྟག་རྩེའི་གཡས་ཕྱོགས་ཤྭ་བྲག་སེང་གེ་འདྲ་བའི་མགུལ་ནས་གདན་དྲངས་པའོ། །ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།།
	zhes pa 'di sprang dred po bdud 'joms gling bas gser smad rnga la stag rtse'i g.yas phyogs shwa brag seng ge 'dra ba'i mgul nas gdan drangs pa'o/ /yi ge pa ni phun tshogs bkra shis so/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ དཔལ་ཆེན་རྡོ་རྗེ་གཞོན་ནུའི་སྒྲུབ་པ་གསང་ཆེན་སྙིང་གི་ཡང་ཐིག་ཅེས་བྱ་བ་བཞུགས་སོ༔

ཐྂ༎༔ ན་མོ་གུ་རུ་དྷེ་ཝ་ཌཱཀྐི་ནཱི༔ དཔལ་ཆེན་རྡོ་རྗེ་གཞོན་ནུའི་སྒྲུབ་པ་གསང་ཆེན་སྙིང་གི་ཡང་ཐིག་འདི་ནི༔ བདག་འདྲ་པདྨ་ཐོད་ཕྲེང་ངས༔ མ་འོངས་ལས་ཅན་དོན་ཆེད་དུ༔ གསང་བའི་ཡང་ཐིག་ཟབ་མོ་འདི༔ མང་པོར་སྤེལ་བའི་སྐལ་མེད་ཀྱང་༔ བཀའ་ཡིས་རྒྱས་བཏབ་གཏེར་དུ་སྦས༔ སྐལ་ལྡན་རེ་འགའ་མ་གཏོགས་པའི༔ སྐལ་མེད་ལེ་ལོ་ཅན་རྣམས་ལ༔ རླུང་ཕྱོགས་ཙམ་ཡང་སྤེལ་མི་རུང་༔ གསང་བའི་ནང་ནས་ཡང་གསང་འདི༔ སྒོ་འཆོལ་དག་ལ་སྤེལ་མི་རུང་༔ མྱུར་དུ་མཁའ་འགྲོའི་བཀའ་ཆད་འོང་༔ སྐལ་ལྡན་བུ་ཡིས་ཉམས་བླངས་ཀྱང་༔ ཚེ་གཅིག་གསང་རྒྱས་ཐོབ་པར་འགྱུར༔ པདྨའི་བཀའ་ཡིས་འགྲོ་བ་བསླུ་མི་འགྱུར༔ ས་མ་ཡ༔ མེ་ཏོག་ནང་ནས་ཨུ་དུམ་ཝར༔ སྐར་ཚོགས་ནང་ནས་ཉི་ཟླ་འདྲ༔ འདབ་ཆགས་ནང་ནས་ཁྱུང་ཆེན་འདྲ༔ སྡེར་ཆགས་ནང་ནས་སེང་གེ་འདྲ༔ དུད་འགྲོའི་ནང་ནས་གླང་པོ་རིན་ཆེན་ལྟར༔ གང་བསྒྲུབ་རིག་འཛིན་ཐོབ་པའི་གདམས་ངག་ཡིན༔ ཉམས་སུ་ལོངས་ཤིག་ང་ཡི་རྗེས་འཇུག་ཀུན༔ ས་མ་ཡ༔ གུ་ཧྱ༔ དེ་ནས་སྐྱབས་འགྲོ་ནི༔ ན་མོ༔ འཁོར་འདས་གཉིས་མེད་ཀ་དག་ཆོས་ཀྱི་དབྱིངས༔ གཞིར་བཞེངས་རང་གྲོལ་རང་བཞིན་ལྷ་ལ་སྐྱབས༔ སྣང་སྲིད་འཁོར་འདས་ཀ་ནས་དག་པ་ལ༔ ཀུན་བཏགས་གོམས་པའི་དབང་གིས་འདི་ཀ་བྱས༔ རྒྱུ་ནི་རང་བྱས་ལས་ཀྱི་རྣམ་སྨིན་ལ༔ རྐྱེན་ནི་ངར་འཛིན་གཞན་སྣང་གཉིས་སུ་བཟུང་༔ ཡེ་ནས་སྣང་སྲིད་ལྷ་ཡི་རོལ་བ་ལ༔ དྲན་རིག་ཕྱིར་མི་ལྡོག་པའི་དམ་བཅའ་བཟུང་༔ སེམས་བསྐྱེད་པ་ནི༔ ཧོཿ རང་བཞིན་སྣང་སྲིད་གཞིར་བཞེངས་གཉིས་སུ་མེད༔ མ་རྟོགས་ལོག་ལམ་སྣང་བའི་སེམས་ཅན་དོན་དུའོ༔ ཡེ་ནས་འཁོར་བ་དང་འདས་པ་ཐམས་ཅད་སྣང་སྲིད་བཞིར་བཞེངས་ཆེན་པོ་ལ་ངང་འཛིན་དང་ང་ཁྱོད་ཅེས་མེད་པ་ལ་མ་རིག་གཉིས་སུ་འཛིན་པའི་རྐྱེན་སྣང་ཉོན་འཁྲུལ་གྱི་སེམས་ཅན་ཐམས་ཅད་སྐྱེ་མེད་ཆོས་ཀྱི་དབྱིངས་སུ་འཁྲུལ་མེད་ཀུན་བཟང་ཡངས་པ་ཆེན་པོའི་ཀློང་དུ་མོས་སོ༔ དེ་ནས་ཏིང་འཛིན་རྣམ་གསུམ་ནི༔ ཨཱཿབདག་སྣང་ཐམས་ཅད་ཆོས་དབྱིངས་སྟོང་པ་ཉིད༔ སྙིང་རྗེའི་རོ་མཉམ་ཉེ་རིང་མེད་པར་བརྡལ༔ སྐྱེ་མེད་རྩ་བྲལ་དོན་འདུས་ཡི་གེ་ཧཱུྃ༔ ཨོཾ་ཨཱཿཧཱུྃ༔ ངོ་བོ་ཡེ་ནས་སྤྲོས་མེད་ནམ་མཁའ་གཡའ་ཆད་པ་ལྟ་བུར་རྒྱ་མ་ཆད་ཕྱོགས་མ་ལྷུང་བ་གཏད་མེད་ཡེངས་མེད་བསྒོམ་མེད་ཅེས་པ་རྒྱུས་མེད་ཀྱི་ཡུལ་དྲིས་པ་ལྟ་བུའོ༔ སྙིང་རྗེ་ཕྱོགས་བྲལ་ཉེ་རིང་ལས་འདས་པ་མཁའ་ལ་ཉི་མ་ཤར་བ་ལྟ་བུ་ཡིད་ཅེས་བརྗོད་པ་རང་བཞིན་ཉོན་འཁྲུལ་གྱིས་བར་མ་ཆད་པ་ཤར་བ་འགགས་པ་མེད་པར་གྲོལ་བ་དེར་འཛིན་མེད་པའོ༔ སྐྱེ་མེད་འགགས་མེད་ཡོད་མིན་མེད་མིན་གྱི་རྩལ་ཐུགས་རྗེ་ཕྱོགས་མེད་ཀྱི་ཧཱུྃ་ཡིག་རྒྱུ་རུ་ཨཱཿས་མ་ཡ༔ གུ་ཧྱ༔ དེ་ནས་སྣང་སྲིད་ཐམས་ཅད་སེམས་ལ་དབང་བསྒྱུར་བའི་ཕྱིར༔ རྫོགས་པའི་ཀློང་དུ་བསྐྱེད་པ་མི་འཚལ་ཡང་༔ རང་སེམས་རང་དབང་ཐོབ་ཕྱིར་རང་གཞིར་ལྷུན་གྲུབ་ཀྱི་ཡེ་ཤེས་རྗེན་ནེར་གསལ་བ་ནི༔ མ་རིག་ཉོན་མོངས་པའི་སྟོབས་ཀྱིས་ལྷན་སྐྱེས་ཡེ་ཤེས་མ་མངོན་པ་དེ་མཐོང་ཕྱིར་ཡེ་ཤེས་ལྷ་ལ་འབྲེལ་བཞག་ན་ཡི་དམ་ལྷ་ཡི་ཐུགས་རྒྱུད་རང་ལ་དབབ་ནས་རྒྱུད་སྨིན་གྲོལ་གྱི་དགོས་པ་ཡོད༔ ས་མ་ཡ༔ གུ་ཧྱ༔ འཕྲོ་འདུ་སྦྱོར་བའི་ཡེ་ཤེས་གཞལ་ཡས་དབུས༔ མ་སྐྱེས་ལྷུན་གྲུབ་རྡོ་རྗེ་གཞོན་ནུ་ཆེ༔ སྐུ་བཞིའི་བདག་ཉིད་ཞལ་བཞི་ཕྱོགས་བཞིར་གཟིགས༔ ཆོས་སྐུ་སྐྱེ་མེད་གཡས་ཞལ་དཀར་ལ་བཞད༔ ལོངས་སྐུ་འགགས་མེད་གཡོན་ཞལ་དམར་པོ་རྔམས༔ སྤྲུལ་སྐུ་འཁྲུལ་མེད་དབུས་ཞལ་མཐིང་ནག་འབར༔ ངོ་བོ་ཉིད་མཚོན་རྒྱབ་ཞལ་ལྗང་ལ་འཇིགས༔ ཚོགས་བརྒྱད་རང་གྲོལ་ཕྱག་བརྒྱད་གཡས་གསུམ་ན༔ རྡོ་རྗེ་རྩེ་དགུ་རྩེ་ལྔ་དགྲ་སྟྭ་དང་༔ གཡོན་གསུམ་ཁ་ཊྭཱྃ་མེ་དཔུང་རྒྱ་གྲམ་བསྣམས༔ མཐའ་གཉིས་རི་རབ་ཕུར་པ་དགྲ་ལ་འདྲིལ༔ ཞལ་གདངས་ལྗགས་འདྲིལ་རྣོ་དབལ་མཆེ་བ་གཙིགས༔ དབུ་སྐྲ་དམར་སེར་སྲིད་པའི་རྩེ་མོར་འབར༔ ཡེ་ཤེས་ལྔ་རྫོགས་ཐོད་སྐམ་དབུ་རྒྱན་དང་༔ སྤྱན་ནི་འཇིགས་པའི་སྡང་མིག་ཕྱོགས་བཞིར་གཟིགས༔ ཧ་ཧཱུྃ་བྷྱོ་ཕཊ་ནམ་མཁའི་འབྲུག་ལྟར་སྒྲོགས༔ ཁམས་གསུམ་རྣམ་རྒྱལ་རྒྱབ་གཞོང་གཤོག་གཉིས་གདེངས༔ དུར་ཁྲོད་ཆས་བརྒྱད་དཔལ་ཆས་གར་དགུར་ལྡན༔ པད་ཉི་བདུད་བཞི་བསྣོལ་བའི་གདན་སྟེངས་སུ༔ ཞབས་བཞི་གྱད་ཀྱི་འདོར་སྟབས་ཚུལ་དུ་བསྒྲད༔ སྐུ་ཆེ་མཐའ་བྲལ་ཆོས་ཉིད་དབྱིངས་སུ་བརྡལ༔ དབྱིངས་ཀྱི་ཡུམ་མཆོག་འཁོར་ལོ་རྒྱས་འདེབས་མ༔ སྔོ་སྐྱ་ཞལ་གཅིག་ཕྱག་གཉིས་དྲག་ཁྲོས་འབར༔ ཕྱག་གཡས་དུག་གསུམ་གཅོད་པའི་ཁ་ཊྭཱྃ་དང་༔ གཡོན་པས་ཁམས་གསུམ་ཁྲག་རོལ་ཐོད་ཁྲག་སྟོབ༔ གཟིག་ཤམ་རུས་རྒྱན་མི་འཇིགས་རྡོ་རྗེའི་ཆས༔ མ་ཆགས་ཞབས་གཡོན་ཡབ་ཀྱི་སྐེད་ལ་འཁྲིལ༔ གཡས་པས་མོ་གདོན་དམ་སྲི་མ་ལུས་གནོན༔ ནང་རྩལ་ཕྱི་རུ་ཤར་བའི་ཁྲོ་རྒྱལ་དང་༔ དུག་ལྔ་དབྱིངས་སུ་སྒྲོལ་བའི་ཀཱི་ལ་བཞི༔ མི་དགེ་དགེ་བར་སྦྱོར་བའི་ཁྲོ་རྒྱལ་བཅུ༔ འཁྲུལ་རྟོག་རང་སར་གྲོལ་བའི་ཕུར་པ་སྲས༔ རོལ་རྩལ་སྣ་ཚོགས་མ་ངེས་ཕུར་སྲུང་ཚོགས༔ ཡེ་ཤེས་འོད་ཟེར་བ་སྤུའི་ཁོང་བུ་རུ༔ སྙིང་པོ་བུམ་པའི་སྐུ་རུ་ལྷུན་གྲུབ་རྫོགས༔ གནས་གསུམ་འོད་འཕྲོས་མཁའ་ཁྱབ་ཞིང་ཀུན་གྱི༔ སངས་རྒྱས་བྱང་སེམས་དག་པ་རབ་འབྱམས་ལྷ༔ ཡེ་ནས་གཞིར་བཞེངས་རང་ལ་རྫོགས་པ་བཞིན༔ རང་གྲོལ་ཀློང་ལས་སྤྱན་དྲངས་རང་ལ་བསྟིམ༔ གཟི་བརྗིད་འོད་འབར་ཡེ་ཤེས་མེ་དཔུང་ཀློང་༔ གཏུམ་དྲག་རྔམས་བརྗིད་མི་འཇིགས་འཇིགས་པའི་སྐུ༔ དམ་ཡེ་དབྱེར་མེད་ཐུགས་ཀར་ཡེ་ཤེས་སེམས༔ ཚོན་གང་ཙམ་གྱི་ཐུགས་ཀར་རྡོ་རྗེའི་ལྟེར༔ ཉི་ཟླ་ཁ་སྦྱོར་དྭངས་མ་ལྔ་ལྡན་དབུས༔ ཐུགས་སྲོག་ཧཱུྃ་སྔོན་སྤུ་ཤད་ཙམ་གྱི་མཐར༔ རིག་པ་ལུག་རྒྱུད་གཡས་སུ་འཁོར་བ་ལས༔ རང་ཟེར་མདངས་ལྔས་སྣང་བའི་ཞིང་ལ་ཁྱབ༔ དག་པ་རབ་འབྱམས་རྒྱལ་བའི་དཀྱིལ་འཁོར་ལ༔ མ་དག་འཁྲུལ་རྟོག་བྱ་བའི་མིང་ཡང་མེད༔ ཕྱོགས་བྲལ་བྱམས་དང་སྙིང་རྗེའི་ངང་ཉིད་ལས༔ གསལ་སྟོང་འབྱམས་ཀླས་ཀློང་ལས་དྲག་སྔགས་སྒྲོགས༔ འཁོར་འདས་རང་འགྱུར་ངང་ནས་འགྲོ་དོན་བྱ༔ གཏད་མེད་རྒྱ་ཡན་རྐྱེན་ཐུབ་ངང་གྱུར་ནས༔ བླ་མེད་རྡོ་རྗེའི་ཀློང་དུ་བདེ་བླག་རྙེད༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཅེས་འཕེན་པ་སྐར་མདའ་ལྟ་བུའི་དམིགས་པའི་གཟེར་དང་༔ སྦྱང་བ་མེ་ལོང་གཡའ་བྲལ་བ་ལྟ་བུའི་དམིགས་པའི་གཟེར་དང་༔ བསྡུ་བ་ཆུ་ལ་ཆུ་འདྲེས་པ་ལྟ་བུའི་དམིགས་པའི་གཟེར་དང་༔ སྦྱོར་བ་གློག་འོད་ནམ་མཁའ་ལ་ཐིམ་པ་ལྟ་བུའི་དམིགས་པའི་གཟེར་དང་བཞི༔ འཕེན་པ་ཞེས་བྱ་བ་ནི་རང་བྱུང་རིག་པའི་འོད་ཟེར་ཕར་འཕྲོས་པས་འཁོར་འདས་ཐམས་ཅད་ཁྱབ༔ སྦྱོང་བ་ཞེས་བྱ་བ་ནི་མཐའ་མེད་འཁོར་བའི་སེམས་ཅན་ཐམས་ཅད་ཀྱི་ལས་སྒྲིབ་སྦྱོངས༔ བསྡུ་བ་ཞེས་བྱ་བ་ནི་རབ་འབྱམས་རྒྱལ་བའི་ཞིང་གི་རྒྱལ་དང་རྒྱལ་སྲས་ཡོངས་ལ་མཉེས་མཆོད་འབུལ༔ བདེ་སྟོང་ཡེ་ཤེས་དཔག་ཏུ་མེད་པ་བསྐྱེད༔ ཐུགས་རྗེ་བྱིན་རླབས་ཐམས་ཅད་རང་གི་འོད་དང་འདྲེས༔ སྦྱོར་བ་ཞེས་བྱ་བ་ནི་རང་འོད་དང་རྒྱལ་བའི་ཐུགས་རྗེ་ཐམས་ཅད་འདྲེས༔ རང་ཡང་སྣང་སྟོང་སྒྱུ་མ་ལྟ་བུའི་ཡེ་ཤེས་ལ་ཐིམ་པ་ནི་གློག་འོད་ནམ་མཁའ་ལ་ཐིམ་པ་ལྟ་བུའོ༔ རང་ལ་ཡང་བདེ་སྟོང་གི་ཡེ་ཤེས་སྐྱེད༔ ལས་ཉོན་བག་ཆགས་དག༔ རྒྱལ་ཀུན་ཕྲིན་ལས་ཀྱི་བདག་ཉིད་ཤ་སྟག་ཏུའོ༔ ས་མ་ཡ༔ ཨོཾ་ཤྲཱི་མ་ཧཱ་བཛྲ་ཀུ་མཱ་ར་སརྦ་ཙིཏྟ་སིདྡྷི་ཧཱུྃ་ཧྲཱིཿཛཿཧཱུྃ་ཨ༔ སྣང་སྲིད་ཐམས་ཅད་དག་པ་ལྷའི་དཀྱིལ་འཁོར་ཆེན་པོར་གསལ་ཞིང་རང་གིས་དྲག་སྔགས་བསྒྲགས་པ་ཙམ་གྱིས་འཁོར་འདས་གཉིས་ལྟོས་ཀྱི་སངས་རྒྱས་དང་སེམས་ཅན་ཐམས་ཅད་ལུས་ལྷ་རུ་བསྒོམ༔ ངག་སྔགས་སྒྲ་སྒྲོགས༔ ཡིད་དྲག་རྟོག་ཐམས་ཅད་ཆོས་ཉིད་རོལ་པ་ཆེན་པོ་ལས་སྣང་སྲིད་ཐམས་ཅད་འུར་ཆེམ་ཆེམ་དུ་བྱེད་པར་བསྒོམ༔ སྣང་སྲིད་ཐམས་ཅད་ལ་སྔགས་སྒྲས་འུར་ཆེམ་སྒྲོགས༔ ཡེ་ཤེས་ཀྱི་འོད་ཕུང་འཁྲིགས༔ བྱིན་རླབས་ཀྱི་ན་བུན་འཐིབས༔ དངོས་གྲུབ་ཆར་ལྟར་དུ་འབེབས་པར་བསམ་ཞིང་བཟླས་སོ༔ ཨོཾ་བཛྲ་ཀཱི་ལི་རཀྵ་སརྦ་ས་མ་ཡ་དུ་ཏྲི་ར་ཙ་སརྦ་ཤ་ཏྲུཾ་མཱ་ར་ཕཊ༔ ཅེས་བཟླས་ཚེ་རང་ཉིད་དྲག་པོའི་ཐུགས་ཀ་དང་བུ་ག་ནས་དྲག་སྔགས་དང་ཐོག་སེར་མེ་རླུང་མཚོན་འཁོར་ལྕགས་ཕུར་ཁྲོ་ཆུང་སྡིག་ནག་གྲངས་མེད་ཆར་ལྟར་དུ་འབེབ་ཅིང་ན་བུན་ལྟར་དུ་འཐིབས་པས༔ གནོད་བྱེད་བདུད་བགེགས་དམ་སྲི་རྒྱ་འདྲེ་རྒྱལ་བསེན་ཐམས་ཅད་གཅིག་ཀྱང་མ་ལུས་པ་ཁོ་རང་གི་བསྒོམ་བཟླས་བྱས་པ་ཐམས་ཅད་ཁོ་རང་ལ་རང་གཤེད་རང་ལ་དབབ་སྟེ་སྐད་ཅིག་ཀྱང་འདའ་བའི་གནས་མེད་པ་ཐལ་བ་རླུང་གིས་གཏོར་བཞིན་དུ་མཚོན་ཆ་སྣ་ཚོགས་ཀྱིས་གཏུབ༔ ཁྲོ་ཚོགས་མང་པོས་ཟོས༔ མེ་དཔུང་འབར་བས་བསྲེགས༔ སྤུ་གྲིའི་རླུང་གིས་གཏོར༔ རྣམ་པར་ཤེས་པ་འཁྲུལ་མེད་ཀུན་ཏུ་བཟང་པོའི་ཀློང་དུ་བསྒྲལ་ཏེ་གཡོ་མེད་ཀུན་ཏུ་འོད་ཀྱི་ཆོས་སྐུ་ཐོབ་པར་བསམ་པའོ༔ ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡེ༔ ཛ་ཡེ་བི་ཛ་ཡེ༔ ཨ་ཛི་ཏེ༔ ཨ་པ་རཱ་ཛི་ཏེ༔ མཱ་ར་སེ་ན༔ པྲ་མར་ཏ་ན་ཡེ༔ སརྦ་བིགྷྣཱན་བཾ་ཧཱུྃ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ༔ མ་རཀྨོ་ཡཀྨོ༔ ཀ་ལ་རུ་པ༔ ཆེ་གེ་མོའི་སྙིང་རྩ་ལ་ཡཾ་ཡཾ༔ སྲོག་རྩ་ལ་ཡཾ་ཡཾ༔ སྙིང་རྩ་ལ་ཕྲིལ་ཕྲིལ༔ སྲོག་རྩ་ལ་ཆོམ་ཆོམ༔ ཙིཏྟ་སྲོག་ལ་དུང་དུང་༔ སྙིང་ཁྲག་ཤད་ཛ༔ ཐུམ་རི་ལི་ལི༔ སྙིང་རྩིགས་རྩིགས༔ འུར་འུར༔ ཤིག་ཤིག༔ མགུལ་མགུལ༔ མྱོག་མྱོག༔ སོད་སོད༔ དྷ་ཏི་མ་མ་ཤཱི་ཀྲཾ་ཀརྨ་ཀ་ར་ཡེ༔ མཱ་ར་ས་ན༔ པྲ་མར་ཏ་ན་ཡེ༔ སརྦ་བིགྷྣཱན་བཾ་ཧཱུྃ་ཕཊ༔ ས་མ་ཡ༔ (བརྡ་ཡིག་) ས་མ་ཡ༔ གུ་ཧྱ༔ ཡི་དམ་ལྷའི་ཕྱག་རྒྱ་ལ་འབྲལ་མེད་ཟངས་ལྕགས་ཀྱི་ཕུར་པ་མདུན་བསྐྱེད་དམིགས་པའི་རྟེན་ཕུར་རབ་གྲུ་དོ༔ འབྲིང་གྲུ་གང་བའམ་ཆགས་གང་༔ ཐ་མ་སོར་བརྒྱད་ཀྱི་དཔྲལ་བར་འདི་དག་དངུལ་ལམ་དུང་གིས་བྲིས་ཏེ་འཛུག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བཛྲ་བིདྱ་དྷ་ར་ན་སརྦ་བུདྡྷཱ་ཀཱ་ཡ་སརྦ་ས་མ་ཡ་བུདྡྷཱ་བཛྲ་རཏྣ་པདྨ་ཀརྨ་ས་མ་ཡ་ཛ་ཛ་ས་མ་ཡ་སྟྭཾ་སརྦ་ཀཱ་ཡ་སིདྡྷི་ཨོཾ༔ མགྲིན་པར་མཚལ་ལམ་ལི་ཁྲིས་སྔགས་འདི་བྲིས་ལ་བཙུག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ སརྦ་ས་མ་ཡ་ཝཱཀ་ས་མ་ཡ་ཛ་ཛ་ཨ་བྷི་ཥིཉྩ་སྟྭཾ་ཨཱཿཨ་ལི་ཀ་ལི་རྟེན་སྙིང་བྲིས༔ ཐུགས་ཀར་མཐིང་ངམ་སྣག་ཚས་སྔགས་འདི་བྲིས་ཏེ་འཇུག༔ ཧཱུྃ་ཤྲཱི་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཨོཾ་ཤྲཱི་མ་ཧཱ་བཛྲ་ཀུ་མཱ་ར་སརྦ་སིདྡྷི་ཕ་ལ་ཧཱུྃ་ཧྲཱིཿཛ་ཧཱུྃ་ཨཱཿཙིཏྟ་སིདྡྷི་ཧཱུྃ་ཧཱུྃ༔ ཨ་བྷི་ཥིཉྩ་ཧཱུྃ་ཧཱུྃ༔ རྒྱ་མདུད་འོག་མ་ལ་རིན་ཆེན་སྣ་ཚོགས་ཀྱིས་སྔགས་འདི་བྲིས་ལ་འཇུག༔ ཨོཾ་བཛྲ་ཀཱི་ལི་ཀཱི་ལ་ཡ་རཀྟ་སརྦ་དྷརྨ་པཱ་ལ་ཀྵེ་ཊ་པཱ་ལ་ས་མ་ཡ་ཛ་ཛཿས་མ་ཡ་སྟྭཾ༔ ཀ་ཏཾ་ཀ་ཡེ་སོགས༔ མ་མ་རཀྨོ་ཡཀྨོ་སོགས་བྲིས་ལ་འཇུག་གོ༔ དཔྲལ་བར་དམ་རྫས་རྟེན་འདུས་དང་བཟང་པོ་དྲུག༔ མགྲིན་པར་གསུང་རྟེན་ལ་ཁྲུས་བྱས་པའི་ཆུ་དང་གུར་གུམ༔ སྙིང་གར་རིན་ཆེན་སྣ་བཞི་དང་རིན་ཆེན་སྣ་ལྔ༔ ཙན་དན་དཀར་དམར་བྱང་སེམས་དཀར་དམར་ཡུང་བ་ཆུ་དག༔ རྒྱ་མདུད་འོག་མ་ལ་ཟངས་ལྕགས་རྡོ་ཡི་ཕྱེ༔ ཀེ་ཚེ་ཤངས་མཚེ༔ ཡུངས་དཀར་ནག༔ རཀྟ་མཚེ་དང་ཧ་ལ་བླུག༔ དར་ལྗང་གུའམ་མཐིང་གས་དྲིལ༔ གཞན་གྱིས་མི་མཐོང་བར་གསང་ཕུར་སྐེད་དུ་བརྟེན་ནོ༔ རྒྱུན་དུ་མདུན་བསྐྱེད་ཕྱི་ལྟར་བདག་བསྐྱེད་ནང་ལྟར་དེའི་སྤྱི་བོར་ཕུར་པའི་རིག་འཛིན་རྒྱ་མཚོ་དང་ཞི་བའི་དཀྱིལ་འཁོར་ཐམས་ཅད་བསྐྱེད༔ ཐུགས་ཀར་རྡོ་རྗེ་གཞོན་ནུ་ཁྲོ་རྒྱལ་རིགས་བཞི་ཀཱི་ལ་རིགས་བཞི་ཁྲོ་བཅུ་ཁྲ་ཐབས་སྒོ་སྐྱོང་དང་བཅས་པ་བསྐྱེད༔ རྒྱ་མདུད་འོག་མ་ལ་ཕུར་སྲུང་དམ་ཅན་རྒྱ་མཚོ་བསྐྱེད༔ བར་སྐབས་སུ་རང་དྲག་པོའི་གནས་ཐམས་ཅད་ནས་ཉེར་སྤྱོད་འདོད་ཡོན་གསང་མཆོད་བཀྲ་ཤིས་རྫས་རྟགས་རྒྱལ་སྲིད་རིན་ཆེན་ཐོགས་པ་དང་༔ གཞན་ཡང་མཆོད་པའི་ལྷ་མོ་གྲངས་མེད་བསམ་གྱིས་མི་ཁྱབ་པ་ནམ་མཁའ་བར་སྣང་ས་གཞི་ཐམས་ཅད་ལ་ཁྱབ་པར་སྤྲོས་པས༔ མདུན་བསྐྱེད་ཀྱི་ལྷ་རེ་རེའི་སྤྱན་ལམ་དུ་གྲངས་མེད་བསམ་གྱིས་མི་ཁྱབ་པ་ཡོངས་སུ་རྫོགས་པ་རེ་རེ་འཕྲོས་ཏེ་སྐུ་གསུང་ཐུགས་ལ་མཉེས་པའི་མཆོད་པ་རྒྱ་ཆེན་པོ་ཕུལ་ཏེ་སྐུའི་གཟི་མདངས་བསྐྱེད༔ གསུང་གི་ནུས་པ་བསྐྱེད༔ ཐུགས་ཀྱི་དགྱེས་པ་བསྐང་༔ ལྷ་མོ་རྣམས་གཟུགས་མ་སྤྱན་ལ་ཐིམ༔ སྒྲ་མ་སྙན་ལ་ཐིམ༔ དྲི་མ་ཤངས་ལ་ཐིམ༔ རོ་མ་ལྗགས་ལ་ཐིམ༔ རེག་མ་སྐུ་ལ་ཐིམ༔ ཆོས་མ་ཐུགས་ལ་ཐིམ༔ གཞན་ཡང་ལྷ་མོ་རྣམས་གནས་སོ་སོར་ཐིམ་པས་བདེ་སྟོང་གི་ཡེ་ཤེས་རྒྱ་ཆེན་པོ་དཔག་ཏུ་མེད་པ་བསྐྱེད་པར་བསམ༔ མདུན་བསྐྱེད་ཀྱི་གནས་ནས་མཆོད་པའི་ལྷ་མོ་གྲངས་མེད་པ་སྤྲོས་ཏེ༔ བདག་བསྐྱེད་ཀྱི་ལྷ་རྣམས་ལ་མཉེས་མཆོད་ཕུལ་ཞིང་གནས་སོ་སོར་ཐིམ་པས་བདེ་སྟོང་གི་ཡེ་ཤེས་དཔག་ཏུ་མེད་པ་བསྐྱེད་པར་བསམ་མོ༔ ས་མ་ཡ༔ གུ་ཧྱ༔ (བརྡ་ཡིག་) ཡང་བསྟོད་པའི་སྐབས་སུ་རང་གི་གནས་ཐམས་ཅད་ནས་མཆོད་པའི་ལྷ་མོ་གྲངས་མེད་པ་སྤྲོས་ཏེ་སྐུས་གར་འཆམ་ཞིང་ཕྱག་ནས་རོལ་མོ་དཀྲོལ་ངག་ནས་ཚངས་པའི་དབྱངས་ཀྱིས་ཡི་དམ་གྱི་ལྷ་ལ་བསྟོད་པར་བསམ་མོ༔ གཞན་ཡང་ཡི་དམ་ལྷའི་སྐུའི་དམ་ཚིག་ལ༔ དབང་ལུང་མན་ངག་གནང་བའི་བླ་མའི་སྐུ་གསུང་ཐུགས་མཉེས་པར་བྱེད་པ་དང་༔ རང་ལུས་ཀྱི་སྐྲ་དང་ཁ་སྤུ་མི་བྲེག༔ ཁ་དང་ལག་པ་མི་བཀྲུའོ༔ གསུང་གི་དམ་ཚིག་སྔགས་བཟླས་པའི་དུས་སུ་སྒྲ་གཞན་གྱིས་མི་ཐོས་པར་ཡིད་ཀྱིས་བཟླས༔ ཕྲེང་བ་འདྲེན་ཡང་གཞན་གྱིས་མི་མཐོང་བར་བྱ་བ་དང་༔ བརྟེན་པའི་ཡི་དམ་དེ་གཞན་ལ་རླུང་ཕྱོགས་ཙམ་ཡང་མི་བསྒྲགས་པ་ནི་གནད༔ ས་མ་ཡ༔ གུ་ཧྱ༔ ཐུགས་ཀྱི་དམ་ཚིག་ལ་ཡི་དམ་གྱི་ལྷ་ལ་ལྟ་ལོག་མི་བྱེད་པ་དང་༔ འགྲུབ་པའི་རྟགས་མཚན་ལ་མི་རེ་བ་ནི་གནད༔ གཞན་ཡང་ཡི་དམ་ལྷའི་ང་རྒྱལ་ལྟ་བའི་གདིང་ཞེས་བྱ་བ་བསྐྱེད༔ ཕྱི་ལྟར་ན་ཕྱི་སྣོད་ཀྱི་འཇིག་རྟེན་ཐམས་ཅད་འོག་མིན་ཆོས་ཀྱི་དབྱིངས་ཀྱི་ཕོ་བྲང་དང་༔ བཅུད་ཀྱི་སེམས་ཅན་ཐམས་ཅད་ལྷ་དང་ལྷ་མོའི་རང་བཞིན༔ སྒྲ་གྲགས་སྟོང་ཀཱི་ལ་ཡའི་སྔགས་སྒྲར་གསལ་བ་དང་༔ ནང་རང་གི་ལུས་ལྷའི་དཀྱིལ་འཁོར༔ ངག་སྔགས་ཀྱི་དཀྱིལ་འཁོར༔ ཡིད་ཏིང་ངེ་འཛིན་གྱི་དཀྱིལ་འཁོར་དུ་གསལ༔ གསང་བ་ནི་ལྷ་ཡང་ཡེ་ནས་རང་ངོར་རྫོགས་པ་ལ་རང་ངོ་རང་ཞལ་མཐོང་སྟེ་ཆོས་ཉིད་རང་ཀློང་དུ་སད་པ་དང་༔ ཡེ་ནས་ཀ་དག་ཆེན་པོའི་ངང་ལ་མ་ཡེངས་པ་ཡེངས་མེད་འཛིན་མེད་གཏད་མེད་བསྒོམ་མེད་ཆེན་པོའི་ངང་ནས་ངོ་བོ་སྐྱེ་མེད་ཀྱི་ཀློང་ལ་ལྟ་ཞིང་ཤིག་གེར་བཞག་སྟེ་ཅེར་གྱིས་ལྟའོ༔ དེ་ཡང་རྣམ་རྟོག་གི་རྗེས་སུ་མི་འབྲང་ཞིང་དྲན་རིག་དབྱེར་མེད་ཀྱི་ངང་ནས་ལྷོད་ཀྱིས་གློད་ཅིང་སྐྱེས་བུའི་ཁོང་སྙིང་ཕྱུང་པའམ་ཡུལ་རྒྱུས་མེད་ཀྱི་ས་ཡི་རྒྱུས་མི་དཔོན་ནམ་བླ་མ་དྲག་ཤུལ་ཅན་གྱིས་དྲིས་པ་ལྟ་བུར་སྨྲ་བསམ་བརྗོད་མེད་ཀྱི་ངང་ལ་ཧྲིག་གེར་བཞག་སྟེ་འདས་མ་འོངས་པའི་འགྱུ་དྲན་ཉོན་འཁྲུལ་ཀྱི་རྟོག་ཚོགས་ཐམས་ཅད་བཤིག་སྟེ༔ དེས་ནམ་མཁའ་གཡའ་ཆད་པའི་ངོར་ཉི་མ་ཤར་བས་སྐར་ཚོགས་ཕྲ་མོ་ཟིལ་གྱིས་གནོན་པ་ལྟ་བུར༔ རིག་པའི་ཡེ་ཤེས་ཀྱིས་མ་རིག་པའི་རྟོག་ཚོགས་ཐམས་ཅད་ཟིལ་གྱིས་གནོན་པ་ནི་ངོ་བོ་སྐྱེ་མེད་ཀྱི་དབྱིངས་སུ་སང་ངེར་ལྟའོ༔ དོན་ལ་བལྟ་བྱ་ལྟ་བྱེད་མེད་པར་ཡོད་མིན་སྟོང་སང་ངེ་བ་རྒྱ་མ་ཆད་ཕྱོགས་མ་ལྷུང་བ་མཐའ་དང་གཏིང་མེད་པའོ༔ རྗེས་དཔྱོད་དང་ཡིད་དཔྱོད་དང་རྣམ་རྟོག་གི་རྗེས་འབྲང་དང་འདས་པ་དང་མ་འོངས་པ་རྣམས་ལ་བསམ་མནོ་ཅི་ཡང་མི་བཏང་བར་རང་བཞིན་རྫོགས་པ་ཆེན་པོའི་ངང་ལ་སང་ངེར་བཞག༔ ཡེ་ནས་སྣང་སྲིད་ཐམས་ཅད་རང་གཞིར་རྫོགས་པ་ལ་ཅི་ཡང་བསྒོམ་མེད་དུ་བཞག་གོ༔ སྒོམ་རྒྱུ་བྱུང་ན་སེམས་དུམ་བུར་ཆད་ནས་རྒྱུན་ཆད་པ་ཡིན་ཏེ༔ བསྒོམ་མེད་རྫོགས་པ་ཆེན་པོ་ནི༔ རྒྱ་མ་ཆད་པ་ནམ་མཁས་གར་ཁྱབ་ཁྱབ་སྟེ་རྒྱ་མ་ཆད་ཕྱོགས་མ་ལྷུང་ངོ་༔ རྣམ་རྟོག་གི་རྗེས་དེད་བྱུང་ན་སྔོན་ཆད་སྐྱེ་བ་ཐོག་མེད་ནས་ད་བར་དུ་རྣམ་རྟོག་ཤར་བ་ཐམས་ཅད་ད་ལྟ་ཅི་ལ་རྙེད༔ གོལ་ས་དང་ནོར་ས་དང་ཤོར་ས་རུ་ཤོར་ཉན་ཡང་སྲིད་པས༔ 'སྔོན་ནས་བསུ་མ་མི་བྱེད་ཅིང་༔ རྗེས་སུ་དཔྱོད་པ་མི་བཏང་ངོ་༔ བློ་ཡིས་བཟོ་བཅོས་ཡིད་དཔྱོད་མིན༔ སྣང་སྲིད་གཞིར་བཞེངས་རྫོགས་པ་ཆེ༔ ཞེས་ལྷར་གསལ་བ་ཡང་གསལ་ཉམས་ཙམ་ཡིན་ཏེ་གསལ་ལ་དེར་འཛིན་མེད་པ་ཉམས་ལ་དེར་དོགས་མེད་པ་གཅེས་སོ༔ སྔགས་སྒྲ་སྒྲོགས་པ་ཡང་དོན་ལ་སྒྲ་གྲགས་སྟོང་པ་སེམས་ཀྱི་ཆོས་ཞེས་ཡིན་པའི་བློ་གཏོད་བྱེད་པའི་ཐབས་ཏེ༔ དོན་ལ་རང་སེམས་མིན་པའི་ཆོས་མེད་དེ་ཚེ་གཅིག་སངས་རྒྱས་ཐོབ་པའི་ལམ་ལ་ཡང་༔ འདི་ཉིད་མ་གཏོགས་པའི་ལམ་མེད་ངེས་སོ༔ ཡང་ཤར་བ་ལ་བཟང་ངན་མེད་དེ་ཡེངས་མེད་ཆོས་ཉིད་སྐྱེ་བ་མེད་པའི་ཀློང་དུ་བཟང་ངན་གང་ཤར་ཐམས་ཅད་དུས་གཅིག་ཏུ་གྲོལ་བ་གཅེས་སོ༔ ཤར་བའི་ཚེ་ན་མཉམ་ཤར་བཟང་ངན་མེད༔ གྲོལ་བའི་ཚེ་ན་མཉམ་གྲོལ་བཟང་ངན་མེད༔ ཤར་གྲོལ་དུས་མཉམ་ཆོས་ཉིད་གྲོལ་བའི་ཀློང་༔ ཡེངས་མེད་ཆུ་བོའི་རྒྱུན་གྱི་རྣལ་འབྱོར་བ༔ ཞེས་ཉིན་སྣང་དང་མཚན་སྣང་ཡང་འདྲེས་ཏེ་བཟང་ངན་རེ་དོགས་ཨ་འཐས་དང་ཐེར་ཟུག་ང་ཁྱོད་དང་གཉིས་སྣང་མེད་པར་སྣང་སྟོང་སྒྱུ་མ་ལྟ་བུར་སྔོན་ཆད་ཀྱི་འཁྲུལ་རྟོག་ཐམས་ཅད་རྨི་ལམ་ལས་སད་པ་བཞིན་དུ་ཆོས་ཉིད་སྐྱེ་མེད་ཀྱི་ཀློང་དུ་འབྱམས་ཀླས་སུ་བྲག་ཆ་མཁའ་ལ་ཐིམ་པ་བཞིན་དུ་འགྱུ་དྲན་མ་ཡི་ཀློང་དུ་སྤྲོས་བརྒྱད་མཐའ་གྲོལ་ཆེན་པོ་གློག་འོད་ནམ་མཁའ་ལ་ཐིམ་པ་བཞིན་དུ་གཏད་མེད་དུ་ཨ་ཨ་ཨཱཿཞེས༔ ང་ལ་ཁས་ལེན་མེད་པས་ན༔ ང་ནི་སྐྱོན་མེད་ཁོ་ནའོ༔ གཅིག་དང་སོ་སོ་འགལ་འདུ་དང་༔ ཡོད་མེད་དྲི་མའི་སྐྱོན་མ་གོས༔ ས་མ་ཡ༔ གུ་ཧྱ༔ (བརྡ་ཡིག་) ཞེས་སེམས་ནི་སངས་རྒྱས་ཡིན་ཏེ་རྩ་གསུམ་གཞན་ན་མི་གནས་རང་སེམས་ལ་གནས་ངེས་སོ་གནས་ཀྱང་༔ ལམ་མ་རིག་པ་ཡི་དགྲ་བོ་དེས༔ ནོར་ལྷན་ཅིག་སྐྱེས་པའི་ཡེ་ཤེས་འཕྲོག༔ ཡེ་འཁོར་བ་ཐོག་མཐའ་མེད་པ་ནས༔ ངེད་མ་བུ་རང་ངོ་མ་མཇལ་འགལ༔ ངེད་དྭངས་གསལ་རྒྱ་འབྱམས་ཆེན་པོ་ལ༔ བུ་འགྱུ་འཕྲིག་མ་རིག་སྤྲིན་དུ་ཤར༔ ལམ་བདེ་བ་འདོད་པའི་སོ་ནམས་ཀྱིས༔ ངེད་མ་རིག་དུ༔ ཁའི་འདམ་དུ་ཚུད༔ ངེད་མ་བུ་འཕྲོག་བའི་བདེ་བླག་རྙེད༔ གནས་མ་བུའི་རང་གདངས་གཞལ་ཡས་ན༔ སྐུ་རང་བྱུང་དཔའ་བོ་ཏིལ་འབྲུ་ཙམ༔ འོད་དྭངས་མའི་དབུས་སུ་བུམ་པར་གྲུབ༔ མདངས་རང་བྱུང་ཡེ་ཤེས་རིགས་ལྔ་སྤྲུལ༔ ངེད་རང་གྲོལ་ཀློང་དུ་ཨེ་མ་ ཧོཿ ཞེས་པ་རང་གི་གདངས་སུ་རང་ངོར་མཇལ་ཏེ་འབྲས་བུ་སྐྱེ་འགག་འགྱུར་བ་མེད་པའི་ཆོས་སྐུ་ཐོབ་བོ༔ རྫོགས་པ་ཆེན་པོ་ལ་ལམ་མེད་དེ་ལམ་མ་ཡེངས་པའི་ངང་ནས་ངོ་བོ་ལ་ལྟོས༔ མདུད་རྒྱ་མང་པོའི་སྣེ་བཞིན་དུ༔ གཅིག་གྲོལ་ཐམས་ཅད་གྲོལ་བཞིན་དུ༔ འགྱུ་དྲན་རྩ་བ་ངོ་བོ་སྟེ༔ ངོ་བོ་ནི་གཞི་མེད་རྩ་བྲལ་ཡིན༔ དེ་ངོ་བོ་མཐོང་བས་སྤྲུལ་པ་ཡང་སྤྲུལ་ཉིང་སྤྲུལ་དང་བཅས་ལྷན་གཅིག་ཏུ་གྲོལ་ལོ༔ རྨི་ལམ་ལས་སད་པ་བཞིན་རང་ཀློང་དུ་སད་པས་ད་ཡན་ཆད་ཀྱི་འཁྲུལ་པ་ཐམས་ཅད་རྨི་ལམ་མོ༔ སྒྱུ་མའོ༔ མིག་ཡོར་ལྟ་བུའོ༔ དཔེར་ན་རྨི་ལམ་གྱི་ངོ་ལ་རིན་པོ་ཆེ་དང་བང་མཛོད་དང་ཡུལ་མཁར་འབངས་འཁོར་དང་བཅས་པ་རྒྱལ་པོ་ཆེན་པོས་རང་ལ་སྟེར་ཞིང་རང་དབུལ་པོས་རྙེད་དེ་དགའ་ཞིང་ཡི་རང་སྟེ་ལོངས་སྤྱོད་དེ་སོ་ནམས་དང་ལས་ཀ་ལ་བརྩོན་པའི་དཀའ་ཞིང་དཀའ་བ་ལ་མི་འཛེམ་པར་ཡོད་པ་དེ་གཉིད་ལས་སད་དེ༔ འོ་རྨི་ལམ་མོ༔ རྫུན་ནོ༔ སྒྱུ་མའོ༔ ཞེས་སེམས་པ་ལྟར་ཆོས་ཉིད་ཀྱི་ཀློང་དུ་སད་པས་འཁོར་བའི་བྱ་བ་ཐམས་ཅད་འཁྲུལ་བའི་དབང་གིས་མ་དག་པའི་ཆོས་དང་དུ་བླང་༔ འཁོར་བའི་མཚང་ལོན་པས་མི་བདེན་པར་རྟག་འཛིན་རྒྱབ་ཏུ་བོར༔ རྨི་ལམ་དུ་ཤེས༔ སྒྱུ་མ་རུ་ཤེས༔ མིག་ཡོར་དུ་ཤེས༔ སྨིག་རྒྱུ་རུ་ཤེས༔ འཁོར་བ་ལ་བློ་ཕྱིར་མི་ལྡོག་པའི་གདིང་རྙེད༔ ས་མ་ཡ༔ གུ་ཧྱ༔ (བརྡ་ཡིག་) གསང་ཆེན་ཐེག་དགུའི་ཡང་རྩེ་དམ་པ་རུ༔ དགོས་འདོད་ནོར་བུ་བསམ་འཕེལ་ལྟ་བུའི་ཏོག༔ པད་འབྱུང་བདག་གི་སྙིང་ཐིག་ཟབ་མོ་ལ༔ མ་འོངས་རྩུབ་འགྱུར་བསྐལ་བའི་ཐ་མ་ལ༔ འདུལ་ཁྲིམས་མེད་པའི་འདུལ་བ་ཁས་ལེན་པའི༔ སྨྲ་མཁས་སེམས་མེད་གསོབ་པོས་གྲུབ་མཐའ་རྩོད༔ ཝ་དང་སྤྲེའུས་སེང་གེའི་རྩལ་ལ་འགྲན༔ པད་འབྱུང་བདག་ལ་བདུད་ཀྱི་གླེང་བསླང་བྱེད༔ གཏེར་མིན་གཏེར་འདྲས་ཟབ་ཆོས་བསྟན་པ་བསྣུབས༔ ཆེ་འདོད་སྡུད་ཆགས་དོན་དུ་གྲུབ་ཐོབ་མང་༔ ཟང་ཟིང་ནོར་ལ་རེ་བའི་གཏེར་སྟོན་དང་༔ གྲགས་འདོད་རང་རྒྱལ་དོན་དུ་གྲུབ་ཐོབ་སྟེ༔ བསྟན་པའི་བླ་བཙོངས་དཀོན་མཆོག་རྐག་འདྲེན་པོ༔ ས་སྟེང་འདི་རུ་ལྷག་ན་དབང་པོ་སྣུབས༔ ས་མ་ཡ༔ གུ་ཧྱ༔ (བརྡ་ཡིག་) དམུ་རྒོད་སེམས་ཅན་ང་ལ་དྲིན་མི་དྲན༔ བུད་མེད་འཁོར་བའི་སྒྲོག་དང་འདམ་རྫབ་ཡིན༔ སྙན་གྲགས་བདུད་ཀྱིས་བསླུ་མ་ཡིན་པར་ངེས༔ ལོངས་སྤྱོད་བསྙེན་བཀུར་རྣམ་རྟོག་བསྐྱེད་པའི་རྒྱུ༔ ངན་སྨྲ་གྲགས་ངན་དངོས་གྲུབ་སྔ་ལྟས་ཡིན༔ སྙིང་གི་ཐིག་པ་གཏད་དོ་གཉེར་ཆེན་པོ༔ ཁེ་འདོད་དྲེགས་འདོད་མ་ཆེ་བདུད་འཇོམས་གླིང་༔ ངོམས་པ་སྔ་ན་བདུད་ཀྱི་བར་ཆད་འབྱུང་༔ སྐལ་ལྡན་མ་གཏོགས་ཀུན་ལ་སྣོད་མ་ཡོད༔ ས་མ་ཡ༔ བཀའ་འདི་ཕུར་སྲུང་རྒྱ་མཚོའི་ཚོགས་ཀྱིས་སྲུངས༔ དམ་ཉམས་ལྟ་ལོག་བྱུང་ན་སྙིང་ཁྲག་རོལ༔ དམ་ལྡན་རྣམས་ལ་བསྒྲུབ་པའི་གྲོགས་མཛོད་ཅིག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ གཉན་རྒྱ༔ གསང་རྒྱ༔ བཀའ་རྒྱ༔ དགོངས་རྒྱ༔ བརྡ་ཐིམ༔ ཞེས་པ་འདི་སྤྲང་དྲེད་པོ་བདུད་འཇོམས་གླིང་བས་གསེར་སྨད་རྔ་ལ་སྟག་རྩེའི་གཡས་ཕྱོགས་ཤྭ་བྲག་སེང་གེ་འདྲ་བའི་མགུལ་ནས་གདན་དྲངས་པའོ། །ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།། །།