DJYD-KABUM-11-DA-004: Difference between revisions

From Dudjom Wiki
DJYD-KABUM-11-DA-004
No edit summary
m (Text replacement - "༈" to " ༈ ")
 
(8 intermediate revisions by the same user not shown)
Line 2: Line 2:
|classification=Tibetan Publications
|classification=Tibetan Publications
|subclass=Tibetan Texts
|subclass=Tibetan Texts
|fulltitletib=དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན།
|fulltitle=dpal rdo rje phur bu bdud 'joms gnam lcags spu gri'i stod las byang chub sgrub pa'i man ngag gsal bar byas pa dngos grub rgya mtsho'i dga' ston
|citation=[[Dudjom Rinpoche]] 'Jigs bral ye shes rdo rje. ''Dpal rdo rje phur bu bdud 'joms gnam lcags spu gri'i stod las byang chub sgrub pa'i man ngag gsal bar byas pa dngos grub rgya mtsho'i dga' ston''. In ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 11: 71-177. Kalimpong: Dupjung Lama, 1979-1985.
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|collectiontitle=bdud 'joms rin po che bka' 'bum
|collectiontitle=bdud 'joms rin po che bka' 'bum
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|totalvolumes=25
|author=Dudjom Rinpoche
|author=Dudjom Rinpoche
|authortib=བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
|sourcerevealer=bdud 'joms gling pa
|citation=[[Dudjom Rinpoche]] 'Jigs bral ye shes rdo rje. ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod''. Kalimpong: Dupjung Lama, 1979-1985.
|tibgenre=Recitation Manual - bsnyen yig
|terma=Yes
|deity=rdo rje phur pa
|cycle=dpal rdo rje phur bu bdud 'joms gnam lcags spu gri
|cycletib=དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲི་
|parentcycle=thugs sgrub gsang ba rgya can
|parentcycletib=ཐུགས་སྒྲུབ་གསང་བ་རྒྱ་ཅན་
|language=Tibetan
|language=Tibetan
|pagestatus=Temporary stub only
|volumenumber=11
|volumenumber=11
|volumeLetter=DA
|volnumtib=༡༡
|volyigtib=ད
|totalvolumes=25
|textnuminvol=004
|textnuminvol=004
|pagenumbers=71-177
|totalpages=107
|beginfolioline=1a1
|endfolioline=54a6
|totalfolios=54
|multivolumework=No
|rectonotes=stod las bsnyen yig
|versonotes=gnam lcags spu gri
|colophontib=།དེ་ལྟར་དཔལ་རྡོ་རྗེ་ཕུར་བུ་བདུདའཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ་འདི་ནི།  ལྷག་པའི་ལྷ་འདི་ཉིད་ལས་དངོས་གྲུབ་བརྙེས་པ་བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུའི་སྡེའི་གསུང་གིས་བསྐུལ་བ་བཞིན་རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས།  རྩ་བའི་གཞུང་གི་དགོངས་དོན་ལ་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་མན་ངག་ལེགས་བཤད་ཀྱིས་རྣམ་པར་སྤྲས་ཏེ།  རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་ཐམ་པའི་ཐོག་ཏུ་སོན་པ་དཔལ་གདོང་གི་ལོ་ས་ག་ཉ་བའི་ཤེས་རབ་ཀྱི་ཆའི་རྫོགས་པ་དང་པོ་ཆུ་ཤེལ་གྱི་དབང་པོ་གྲོ་བཞིན་གྱི་དགའ་མ་དང་རྩེ་བའི་འགྲུབ་སྦྱོར་བཟང་པོ་ལ།  ཨེ་ཝཾ་བདེ་ཆེན་ཆོས་འཁོར་གླིང་གི་ཉེ་འདབས་ཕུན་ཚོགས་དགའ་ཚལ་གྱི་བསྟི་གནས་སུ་ལེགས་པར་གྲུབ་པར་བགྱིས་པ་སྟེ།  འདིས་ཀྱང་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་པ་དང༌།  འགྲོ་བ་ཐམས་ཅད་བཅོམ་ལྡན་འདས་དཔལ་ཧེ་རུ་ཀའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག    །སརྦ་དཱ་མངྒལཾ།།
|colophonwylie=de ltar dpal rdo rje phur bu bduda'ajoms gnam lcags spu gri'i stod las byang chub sgrub pa'i man ngag gsal bar byas pa dngos grub rgya mtsho'i dga' ston ces bya ba 'di ni/___lhag pa'i lha 'di nyid las dngos grub brnyes pa bka' babs kyi chos bdag sprul pa'i sku 'jigs med chos dbyings nor bu'i sde'i gsung gis bskul ba bzhin rang gzhan mang po la sman pa'i bsam pa nye bar bskyed nas/___rtsa ba'i gzhung gi dgongs don la mkhas shing grub pa brnyes pa'i rdo rje'i slob dpon chen po rnams kyis ji ltar bkral ba'i man ngag legs bshad kyis rnam par spras te/___rig pa 'dzin pa'i myu gu 'jigs bral ye shes rdo rjes rang lo sum cu tham pa'i thog tu son pa dpal gdong gi lo sa ga nya ba'i shes rab kyi cha'i rdzogs pa dang po chu shel gyi dbang po gro bzhin gyi dga' ma dang rtse ba'i 'grub sbyor bzang po la/___e waM bde chen chos 'khor gling gi nye 'dabs phun tshogs dga' tshal gyi bsti gnas su legs par grub par bgyis pa ste/___'dis kyang zab lam gyi phrin las phyogs dus kun tu dar zhing rgyas pa dang /___'gro ba thams cad bcom ldan 'das dpal he ru ka'i go 'phang la myur du reg pa'i rgyur gyur cig____/sarba dA mang+galaM//
|pdflink=File:DJYD-KABUM-11-DA-004.pdf
|pdflink=File:DJYD-KABUM-11-DA-004.pdf
|authortib=བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
|sourcerevealertib=བདུད་འཇོམས་གླིང་པ་
|volumeLetter=DA
|InitCategories=Dudjom Tersar Project; DJYD-KABUM-Volume-11-DA
|InitCategories=Dudjom Tersar Project; DJYD-KABUM-Volume-11-DA
}}
}}
<h1>Tibetan Text</h1>
<h1>Tibetan Text</h1>
<onlyinclude>
<onlyinclude>
{{TibP|༄༅།  །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་
{{TibP|༄༅།  །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ་བཞུགས་སོ།   །
གསལ་བར་བྱས་པ་དངོས་གྲུབ་རྒྱ་མཚོའི་
 
དགའ་སྟོན་ཅེས་བྱ་བ་བཞུགས་སོ།   །


(1བ) དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ།   བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་ཧེ་རུ་ཀ་ལ་ཕྱག་འཚལ་ལོ།  །སྟོང་ཉིད་རྡོ་རྗེ་ཁྲོས་པའི་གར་གྱིས་ཞེ་སྡང་མཚན་རྟོག་དབྱིངས་སུ་གཅོད།  །སྙིང་རྗེའི་མཚོན་ཆེན་རབ་ཏུ་འབར་བས་ཕུང་པོ་རྡོ་རྗེའི་དབྱིག་གིས་གཏམས།  །ཟུང་འཇུག་སྲིད་པ་ཕུར་བུའི་ཕྱག་རྒྱས་བརྟན་གཡོའི་སྲོག་རྩ་ཐལ་བར་འབྱིན།  །བླ་མ་ཧེ་རུ་ཀ་དཔལ་དཔའ་བོས་དངོས་གྲུབ་གནས་ལ་དབུགས་འབྱིན་མཛོད།  །རིག་མཆོག་འབུམ་སྡེའི་བཅུད་ཐིག་ཀཱི་ལ་ཡ།  །(2ན) བདུད་འཇོམས་སྤུ་གྲིར་འབྲེལ་བའི་ཕྲིན་ལས་གཞུང༌།  །ཚུལ་བཞིན་བསྙེན་ཅིང་སྒྲུབ་ལས་མཆོག་ཐུན་གྱི།  །དངོས་གྲུབ་རྒྱ་མཚོའི་དཔལ་གྱི་དགའ་སྟོན་སྤྲོ།  །དེ་ལ་འདིར་རྒྱུད་ཐམས་ཅད་ཀྱི་རྒྱལ་པོ།  ལུང་ཐམས་ཅད་ཀྱི་བླ་མ།  མན་ངག་ཐམས་ཅད་ཀྱི་ངེས་པའི་དོན།  དུས་གསུམ་རྒྱལ་བ་ཐམས་ཅད་ཀྱི་ཐུགས་ཀྱི་བརྣག་པ།  རྒྱ་བོད་མཁས་གྲུབ་ཐམས་ཅད་ཀྱི་གཅེས་པའི་དབྱིག    །བྱང་ཆུབ་སྒྲུབ་པ་ལ་མེད་དུ་མི་རུང་བའི་ཆ་རྐྱེན་ཕྲིན་ལས་ཀྱི་ལྷ་མཆོག་རྡོ་རྗེ་ཕུར་པའི་དཀྱིལ་འཁོར་གྱི་འཁོར་ལོ་བསྒྲུབ་པར་བྱ་བ་ལ།  སྤྱིར་རྡོ་རྗེ་ཕུར་པ་ལ་རྒྱུད་ཀྱི་བསྡུ་ཐབས་གཉིས།  བཤད་ཐབས་གསུམ།   (2བ)ཁོག་དོན་དྲུག    །ཐེམ་སྦྱོར་བཅུ།  གནད་ཐོ་བཅུ་གཉིས།  གསང་ཐེམ་ཉེར་གཅིག་ལ་སོགས་པར་གསུངས་པ་རྣམས་ཧྲིལ་གྱིས་དྲིལ་ན་ཕུར་བུའི་རྒྱུ་བཞིས་གང་ཟག་རྣམ་པ་བཞི་མཐར་དབྱུང་བ་སྟེ།  ཕུར་བུ་ངན་སྔགས་གཙུག་ལག་གི་རྒྱུད་ལས།  ཕུར་བུ་རྣམ་བཞིའི་དགོངས་པ་ཡིས།  །གང་ཟག་རྣམ་བཞི་མཐར་དབྱུང་ངོ༌།  །རིག་པ་ཡེ་ཤེས་ཕུར་བུ་ནི།  །ཆོས་ཀྱི་དབྱིངས་ཀྱི་ཀློང་དུ་གདབ།  །ཐུགས་རྗེ་སྤྲུལ་པའི་ཕུར་བུ་ནི།  །ཁམས་གསུམ་སེམས་ཅན་ལ་གདབ་པའོ།  །གསང་བ་བྱང་སེམས་ཕུར་བུ་ནི།  །ཡུམ་གྱི་མཁའ་ཀློང་ཡངས་པར་གདབ།  །མཚན་མ་རྫས་ཀྱི་ཕུར་བུ་ནི།  །དགྲ་དང་བགེགས་ལ་གདབ་པའོ།  །ཞེས་གསུངས།  དེ་ལྟར་ཕུར་བུ་ཐལ་འབྱིན་གྱི་དགོངས་པ་རྣམ་པ་བཞི་ལས།  སྔ་མ་གསུམ་བྱང་ཆུབ་ལམ་གྱི་སྒྲོན་མ་ཞེས་བྱ་བ་སྟོད་ལས་དང༌།  ཕྱི་མས་སྨད་ལས་དགྲ་བགེགས་སྒྲོལ་བའི་ལས་རིམ་སྟོན་པ་ལས།  འདིར་སྐབས་སུ་བབས་པ་ཐུགས་རྗེ་སྤྲུལ་པའི་ཕུར་བུ་ཁམས་གསུམ་སེམས་ཅན་གྱི་ཡུལ་ལ་གདབ་པའི་རིམ་པ་སྟོད་ལས་བྱང་ཆུབ་སྒྲུབ་པའི་ལམ་རིམ་གྱི་སྙིང་པོ་དཔལ་ཆེན་ཚོམ་བུའི་ལྷ་ཚོགས་རྣམས་བསྙེན་ཐབས་ཀྱི་མན་ངག་མདོ་ཙམ་ཞིག་འཆད་པ་ལ་སྤྱི་དོན་རྣམ་པ་གཉིས་ཏེ།  ཤེས་པར་བྱ་བའི་རྣམ་བཞག་སྤྱིར་བསྟན་པ་དང༌།   (3ན)བསྙེན་ཐབས་ཀྱི་ལག་ལེན་བྱེ་བྲག་ཏུ་བཤད་པའོ།  །དང་པོ་ལ་གསུམ།  དམིགས་པར་བྱ་བའི་ཡུལ།  སྒྲུབ་པར་བྱེད་པའི་ཐབས།  དེ་ཉིད་གྲུབ་པའི་འབྲས་བུའོ།  །དང་པོ་ནི།  རྒྱུད་འདིར་རང་བཞིན་དམིགས་པར་བྱ་བའི་ཡུལ་དུ་གྲགས་པ་སྟེ།  སྦྱངས་གཞི་འགྲོ་བ་ཡོངས་ལ་ཀུན་ཁྱབ་བདེ་བར་གཤེགས་པའི་སྙིང་པོ་རང་བཞིན་གྱིས་རྣམ་པར་དག་པ་ལྷའི་བདག་ཉིད་ཆེན་པོར་གདོད་ནས་ལྷུན་གྲུབ་ཏུ་གནས་པ་ཉིད་གློ་བུར་གྱི་དྲི་མ་དང་འབྲེལ་བས་གནས་ལུགས་ཀྱི་ཡོན་ཏན་མངོན་དུ་མ་གྱུར་པ་དེ་མངོན་དུ་འགྱུར་བར་བྱ་བ་ལ་དམིགས་ནས།  སྦྱོང་བྱེད་དེའི་རྣམ་པ་ལམ་བྱེད་སྣོད་བཅུད་སྣང་བ་འདི་དག་རྟེན་དང་བརྟེན་པར་བཅས་པའི་དཀྱིལ་འཁོར་གྱི་རྣམ་པ་དམ་ཚིག་སེམས་དཔར་བསྒོམ་པ་དང༌།  འབྲས་བུ་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡིན་པས།  དེའི་རྣམ་པ་ལམ་བྱེད་ཆོས་སྐུ་ཉིད་ཡེ་ཤེས་སེམས་དཔའ་གང་འདུལ་གྱི་རོལ་པ་ཞི་ཁྲོའི་རྣམ་པར་སྤྱན་འདྲེན་པ་དང༌།  གཞི་འབྲས་གཉིས་གདོད་མ་ནས་རང་བཞིན་དབྱེར་མེད་དུ་བཞུགས་པས།  དེའི་རྣམ་པ་ལམ་བྱེད་ཡེ་ཤེས་པ་དམ་ཚིག་པར་བསྟིམས་ཏེ་དམ་ཡེ་དབྱེར་མེད་དུ་ཉམས་སུ་བླངས་པ་ལས།  སྦྱངས་འབྲས་གཞི་ལ་བཞུགས་པའི་དཔལ་ཆེན་པོ་ཉིད་མངོན་དུ་གྱུར་པ་ལ་འབྲས་(3བ)བུའམ་མཆོག་ཐོབ་ཅེས་བརྡར་བཏགས་པའོ།  །དེས་ན་བསྒྲུབ་གཞིའི་ལྷ་དེ་རང་ལ་གནས་པས།  ལམ་རྐྱེན་དང་འཕྲད་ན་འབྲས་བུའི་ཡོན་ཏན་འབྱུང་རུང་དུ་ངེས་པ་རྙེད་དེ་ཐོབ་བྱའི་འབྲས་བུ་མཚན་ཉིད་པ་འཇིག་རྟེན་ལས་འདས་པ་མཆོག་དང༌།  བཏགས་པ་འཇིག་རྟེན་པ་དང་ཐུན་མོང་བ་སྟེ།  དངོས་གྲུབ་རྣམ་པ་གཉིས་ཀྱི་ཡོན་ཏན་ལ་བྲོད་པ་བསྐྱེད་ནས་ལམ་ལ་བསླབ་དགོས་པའི་ཕྱིར་དམིགས་ཡུལ་གྱི་གཙོ་བོ་ནི་ཕྱག་རྒྱའི་དངོས་གྲུབ་བོ།  །གཉིས་སྒྲུབ་པའི་ཐབས་ལ་ལྔ་སྟེ།  གང་གིས་སྒྲུབ་པའི་གང་ཟག    །གང་དུ་སྒྲུབ་པའི་གནས།  གང་གི་ཚེ་སྒྲུབ་པའི་དུས།  གང་ལ་བསྟེན་ནས་སྒྲུབ་པའི་ཡོ་བྱད།  ཇི་ལྟར་སྒྲུབ་པའི་ཚུལ་ལོ།  །དང་པོ་ནི།  ཐུན་མོང་བ་དལ་འབྱོར་རྙེད་དཀའ་ལ་ངེས་པ་རྙེད།  འཆི་བ་མི་རྟག་པས་རྒྱུད་འཁུལ།  ལས་འབྲས་བསླུ་མེད་ལ་ཡིད་ཆེས་སྐྱེས།  འཁོར་བའི་ཉེས་དམིགས་ཀྱིས་ངེས་འབྱུང་གི་གཞི་ཚུགས་ཏེ།  ཐུན་མོང་མ་ཡིན་པ་ཐེག་པ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་ཞིང་བྱང་ཆུབ་ཏུ་སེམས་བསྐྱེད།  འགལ་རྐྱེན་སྡིག་སྒྲིབ་སྦྱང་ཞིང་མཐུན་རྐྱེན་ཚོགས་བསགས།  བྱིན་རླབས་མྱུར་འཇུག་བླ་མའི་རྣལ་འབྱོར་ལ་མྱོང་བ་ཐོན་པའི་གང་ཟག་ལ།  ཆུ་བོ་བཞི་འདུས་ཀྱི་སྒོ་ནས་བཤད་ཅིང་ཉམས་(4ན) སུ་ལེན་དགོས་པ་ལས།  སྨིན་བྱེད་དབང་གི་ཆུ་བོ་སྐུར་བྱེད་ངོ་སྤྲོད་དང་བཅས་པས་རྒྱུད་སྨིན་ཅིང་དམ་ཚིག་དང་སྡོམ་པ་ལ་གནས་པ།  གཞུང་བཤད་ཆུ་བོ་འགྲེལ་ཊཱིཀ་གཏོང་ཐུན་དང་བཅས་པས་བསྒོམ་བྱ་གཏན་ལ་ཕེབས་པ།  གདམས་པ་ཉམས་ལེན་གྱི་ཆུ་བོ་ལག་ལེན་མངོན་རྟོགས་དང་བཅས་པ་ལ།  མན་ངག་གནད་ཀྱི་ཆུ་བོ་དྲིས་ལན་གེགས་སེལ་དང་བཅས་པས་ཕུ་ཐག་ལེགས་པར་བཅད་ཟིན་པ་གཞིར་བཞག་ནས།  དངོས་གྲུབ་ཐོབ་པ་ལ་དེའི་སྟེང་དུ་རྒྱུ་རྐྱེན་ཕུན་སུམ་ཚོགས་པ་གཉིས་ཚང་དགོས་ཏེ།  རྒྱུ་ནི་བསྒྲུབ་བྱའི་དངོས་གྲུབ་ལ་ཡིད་རྟོན་པས་དོན་གཉིས་སྒྲུབ་པའི་ལྷག་བསམ་དང་ལྡན་པ།  རྐྱེན་ནི་ཡིད་ཆེས་དང་འདོད་པ་དང་རབ་ཏུ་དང་བའི་དད་པ་གསུམ་གྱིས་ཀུན་ནས་བསླངས་ཏེ་བསྙེན་སྒྲུབ་ལ་ཐང་ལྷོད་མེད་པར་འབད་པའི་བརྩོན་འགྲུས་དང༌།  དག་བྱ་དག་བྱེད་ཀྱི་གནད་རྟོགས་པའི་ཤེས་རབ་དང་ལྡན་ཞིང༌།  འདུ་འཛིས་མི་འཕྲོག་པ་ལ་སོགས་པའི་ཡོན་ཏན་ཚང་བ་རི་བོ་ལྟ་བུའི་གང་ཟག་གིས་སོ།  །གཉིས་པ་གནས་ནི།  གྲུབ་ཐོབ་གོང་མས་བྱིན་གྱིས་བརླབས་པ་དང༌།  སའི་དཔྱད་སྤྱིར་ལེགས་ཤིང་ཁྱད་པར་གསང་རྒྱུད་ལས།  མེ་ཏོག་མང་པོའི་གླིང་ཡོད་དང༌།  །རི་ནི་རིན་ཆེན་སྤུངས་པ་འདྲ།  །སྐྱེད་མོས་ཚལ་དང་དཔག་བསམ་ཤིང༌།  །ངང་(4བ)པ་བུང་བའི་སྒྲ་སྒྲོགས་ཤིང༌།  །སྐད་སྙན་བྱ་ནི་སྣ་ཚོགས་སྒྲོགས།  །གནམ་ནི་འཁོར་ལོ་རྩིབས་བརྒྱད་འདྲ།  །ས་ནི་པདྨ་འདབ་བརྒྱད་འབྲང་།  །གནས་ཀྱི་དབྱིབས་ལེགས་ཁ་ཤར་བལྟས།  །ཞེས་སོགས་ཀྱི་མཚན་ཉིད་ཚང་བ་དང༌།  བྱེ་བྲག་ཕྲིན་ལས་མངོན་སྤྱོད་སྒྲུབ་པའི་གནས་ནི།  མྱང་འདས་ལས།  དྲག་པོའི་གནས་ཀྱི་དམ་པ་ནི།  །དུར་ཁྲོད་ཤིང་གཅིག་རྒྱ་གྲམ་ལམ།  །གཅན་གཟན་མང་པོའི་རྒྱུ་སྲང་དང༌།  །གནམ་ནི་གྲི་འདྲ་ས་གྲུ་གསུམ།  །ལོགས་ལ་ཚེར་མ་ཅན་གྱི་ཤིང༌།  །དེ་ནི་དྲག་པོའི་སྒྲུབ་གནས་སོ།  །ཞེས་སོགས་ཀྱི་མཚན་ཉིད་ཚང་བའི་གནས་ཆེད་དུ་བསྔགས་སོ།  །དེ་ལྟ་ནའང་རྒྱུན་གྱི་ཉམས་ལེན་དང་བསྙེན་པ་ཙམ་གྱི་གནས་ལ་ཁྱད་པར་དེ་དག་མ་ཚང་ཡང་ཆོག་སྟེ།  རང་གི་ཡིད་དང་མཐུན་ཅིང་བར་དུ་གཅོད་པའི་མི་དང་ལྷ་འདྲེས་བདག་ཏུ་མ་བཟུང་བ་དང་དགྲ་རྐུན་སོགས་ཀྱི་ཉེར་འཚེ་མེད་པའི་གནས་དབེན་པར་ཉམས་སུ་བླང་དུ་རུང་ངོ༌།  །གསུམ་པ་དུས་ནི།  སྤྱིར་བྱང་ཆུབ་སྒྲུབ་པ་ལ་ཤིས་པའི་དུས་རྣམས་དང་ཁྱད་པར་གསང་རྒྱུད་ལས།  ར་བ་བཞི་ལ་བསྙེན་པའི་དུས།  །འབྲིང་པོ་བཞི་ལ་སྒྲུབ་པའི་དུས།  །ཐ་ཆུང་བཞི་ལ་ལས་སྦྱོར་བྱ།  །ཞེས་ཟླ་བའི་ཁྱད་པར་དང༌།  སྒྱུ་འཕྲུལ་རྒྱས་པ་ལས།  ཚེས་གྲངས་ཡར་གྱི་བརྒྱད་ལ་བརྩམ།  །ཤིན་(5ན)ཏུ་སྐར་མ་རྒྱལ་རྣམས་ལ།  །ཞེས་དང༌།  འཇོམས་བྱེད་ལས།  ཟླ་བ་སྐྱེ་དུས་གཟའ་ཕུར་བུ།  །དར་ཚེ་སྒྲུབ་པ་མཆོག་ཏུ་ཤིས།  །ཞེས་ཚེས་གྲངས་དང་གཟའ་སྐར་གྱི་ཁྱད་པར་དམིགས་བསལ་དུ་བཤད་པ་དག་དང་འགྲིག་ན་རབ།  གཞན་དུ་ཚེས་གྲངས་དགེ་ཞིང་མགོ་ཕུར་འཛོམ་པ་ལྟ་བུའི་གཟའ་སྐར་འཕྲོད་སྦྱོར་བཟང་བའི་ཉི་མ་ཕྱེད་ཡོལ་གྱི་དུས་སུ་འཇུག་གོ  །བཞི་པ་ཡོ་བྱད་ནི།  །ལམ་རིམ་ལས།  གོས་རྒྱན་གཟའ་བཏུང་གསང་བ་དང༌།  སྒྲུབ་པའི་ཡོ་བྱད་ལྔ་རྣམས་དང༌།  །དཀྱིལ་འཁོར་ཡོ་བྱད་མཆོད་པའི་རྫས།  །དངོས་གྲུབ་རྟེན་དང་བར་ཆད་ཟློག    །ཡོ་བྱད་དག་པ་བསྡུ་བྱ་སྟེ།  །ཞེས་གསུངས་པ་ལྟར།  སྤྱིར་འཚོ་བ་ཟས།  རྐྱེན་ཟློག་མཚོན།  ནད་ཟློག་སྨན་སོགས་མཐུན་རྐྱེན་གྱི་དངོས་པོས་མ་ཤོལ་བ་དང༌།  ཁྱད་པར་རྟེན་སྒྲུབ་མཆོད་པའི་དམ་རྫས་སུ་འོས་པའི་ཡོ་བྱད་རྣམས་གཞུང་བཞིན་ཚོགས་པར་བྱའོ།  །ལྔ་པ་ཇི་ལྟར་སྒྲུབ་པའི་ཚུལ་ལ་གསུམ་སྟེ།  དཀྱིལ་འཁོར་རྣམ་པ་གསུམ་སྔོན་དུ་འགྲོ་བ་དང་བཅས་དོན་གྱི་ཁོག་དབུབ།  ཁམས་གསུམ་གྱི་སྲོག་ལ་དབང་བསྐུར་ཏེ་སྲོག་གི་ཡེ་ཤེས་སེམས་དཔས་སྲོག་ལ་དབང་བསྐུར།  ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་མཆོད་(5བ)ཅིང་བསྙེན་པས་དངོས་གྲུབ་ཀྱི་བཅུད་བླང་བའོ།  །དང་པོ་ལ་གཉིས།  སྔོན་དུ་འགྲོ་བའི་རིམ་པ་དང༌།  དཀྱིལ་འཁོར་དངོས་བཤད་པའོ།  །དང་པོ་ནི།  འདི་དག་ལ་ལས་བྱང་གི་འབྲུ་གཉེར་བའི་སྒོ་ནས་སྤྲོས་ན་ཧ་ཅང་མང་བས་སྨོས་སུ་མ་ལོང་མོད།  སྒོམ་དོན་སྙིང་པོ་ཙམ་ཞིག་འཆད་ན།  སྐྱབས་སེམས་ཚོགས་བསགས་རྣམས་ཀྱི་དམིགས་པ་གོ་སླ་ཞིང༌།  བཀའ་བསྒོ་བ་ལ།  བདག་ཉིད་དཔལ་ཆེན་པོའི་སྙེམ་པས་གདུག་པ་ཅན་གྱི་འབྱུང་པོ་རྣམས་བྱིན་གྱིས་བརླབས་པའི་གཏོར་མས་བརྔན་ཅིང་བདེན་པས་བཀྲོལ་ནས་སྒྲུབ་པ་ལ་བར་ཆད་མི་བྱེད་པར་བཀའ་བསྒོས་པས་བགེགས་རྣམས་གཏོར་མས་ཚིམས་ཤིང་ཚིག་དེ་སྐད་ཐོས་པ་ཙམ་གྱིས་རབ་ཏུ་སྐྲག་ནས་སྟོང་གསུམ་ཡུལ་ཁམས་གཞན་དུ་དེངས་པར་བསམ།  གལ་ཏེ་མི་ཉན་པའི་རིགས་གདུག་པ་ཅན་ཡོད་སྲིད་པ་ལ་རང་ཉིད་ཧེ་རུ་ཀའི་སྐུ་གསུང་ཐུགས་ལས་སྤྲུལ་པའི་ཁྲོ་ཚོགས་མཚོན་ཆ་སྣ་ཚོགས་ཐོགས་པ་གྲངས་མེད་པར་འཕྲོས་པ་རྣམས་ཀྱི་ཞལ་ནས་དྲག་སྔགས་རྡོ་རྗེའི་གད་མོ་འབྲུག་ལྟར་སྒྲོགས་ཤིང་མཚོན་ཆས་གཟིར།  རོལ་པའི་སྟངས་སྟབས་ས་གསུམ་གཡོ་བའི་ཉམས་དང་བཅས་ཏེ་བགེགས་རྣམས་འཇིག་རྟེན་(6ན)གྱི་ཁམས་མང་པོ་བརྒལ་བའི་ཕ་རོལ་ལྕགས་རི་ཆེན་པོའི་རྒྱབ་ཏུ་བསྐྲད།  སྤྲུལ་པའི་ཁྲོ་ཚོགས་ཚུར་འདུས་ནས་སྟེང་འོག་ཕྱོགས་མཚམས་རྣམས་དང་བདག་གི་བ་སྤུའི་བུ་ག་ཀུན་ནས་ཞལ་ཕྱིར་ཕྱོགས་པས་གཏམས་ཤིང་དྲག་པོའི་ཧཱུཾ་སྒྲ་དང་བཅས་ཏེ་ཚམ་རྔམས་ཆེན་པོས་རོལ་པར་བསམ།  མཚམས་བཅད་པ་ལ་གསུམ་གྱི།  དང་པོ་ཕྱི་མཚོན་ཆ་ལྔ་དང་འབར་བའི་གུར་ཁང་གི་མཚམས་ནི།  བདག་ཉིད་དཔལ་ཆེན་པོའི་སྐུའི་གནས་ལྔར་ཨོཾ་ཨཱཿཧཱུཾ་སྭཱ་ཧཱས་མཚན་པའི་ཐུགས་ཀའི་ཧཱུཾ་ལས་འོད་ཟེར་སྔོན་པོ་ཤར་དུ་སོང་བ་ལས་བྱུང་བའི་རྡོ་རྗེ་སྔོན་པོ་རྩེ་དགུ་པར་གྱུར།  དེ་ལས་རྡོ་རྗེ་དེ་འདྲ་བ་རིམ་པར་མཆེད་དེ་རྡོ་རྗེའི་གུར་དུ་གྱུར་པ་ནི།  འོག་ཐམས་ཅད་རྡོ་རྗེའི་ས་གཞི་རྒྱ་གྲམ་དུ་བརྡལ་བ།  ཁོར་ཡུག་ཐམས་ཅད་རྡོ་རྗེ་གྱེན་དུ་ལངས་པའི་ར་བ་ཟླུམ་པོར་བསྐོར་བའི་ཕྱི་ནས་རྡོ་རྗེའི་ཕྲེང་བས་བསྡམས་པ།  སྟེང་ཐམས་ཅད་རྡོ་རྗེའི་གུར་རྒྱ་ཕུབ་ཀྱི་རྣམ་པ་ལྟར་ཕུབ་པ་ལ་རྡོ་རྗེ་རྩེ་ལྔའི་ཏོག་གིས་སྤྲས་པ།  གུར་འདབས་ར་བའི་ཕྱིར་འཕྱང་བ་ལ་རྡོ་རྗེའི་དྲྭ་བ་དང་དྲྭ་བ་ཕྱེད་པ་ཐུར་དུ་འཕྱང་བ།  ནང་དུ་རྡོ་རྗེའི་བླ་བྲེ་ཐད་ཀར་བརྒྱངས་ཤིང་གདུགས་ལྟར་ཕུབ་པ།  དེ་དག་གི་བར་མཚམས་རྣམས་སུ་རྡོ་རྗེ་རྩེ་ལྔ་དང་རྩེ་གསུམ་(6བ)པས་གོ་སྐབས་མེད་པར་གཏམས་པ།  དེའི་རྒྱབ་ཏུ་དཔྲལ་བའི་ཨོཾ་ལས་འོད་ཟེར་དཀར་པོ་སྟེང་དུ་སོང་བ་མཆེད་པ་ལས་བྱུང་བའི་འཁོར་ལོ་རྩིབས་གསུམ་པ་ནས་བརྒྱད་པ་སོགས་དང་བཅུ་གཉིས་པའི་བར་དུ་གང་ཡང་ཡོད་པ་གསོར་ལྟར་འཁོར་བའི་གུར་ཁང༌།  དེའི་རྒྱབ་ཏུ་ལྟེ་བའི་སྭཱ་ལས་འོད་ཟེར་སེར་པོ་ལྷོ་རུ་སོང་བ་མཆེད་པ་ལས་བྱུང་བའི་རྩེ་མོ་ཕྱིར་གཟིང་བ་ཅན་གྱི་རལ་གྲིའི་གུར་ཁང༌།  དེའི་རྒྱབ་ཏུ་མགྲིན་པའི་ཨཱཿ་ལས་འོད་ཟེར་དམར་པོ་ནུབ་ཏུ་སོང་བ་མཆེད་པ་ལས་བྱུང་བའི་རྡོ་རྗེའི་ཐོད་དབྱུག་ཕྱིར་གདེངས་པ་ཅན་གྱི་གུར་ཁང༌།  དེའི་རྒྱབ་ཏུ་གསང་བའི་ཧཱ་ལས་འོད་ཟེར་ལྗང་གུ་བྱང་དུ་སོང་བ་མཆེད་པ་ལས་བྱུང་བའི་རྒྱ་གྲམ་མི་གཡོ་བར་གནས་པའི་གུར་ཁང་སྟེ།  དེ་རྣམས་ཕྱི་ནང་རིམ་པར་དཀྲིགས་པས་སྲིད་པའི་རླུང་ཡང་འགྱུ་བའི་སྐབས་མེད་ཅིང་ཆུ་ཡང་འཛག་པ་མེད་པའི་རང་བཞིན་ཅན།  གུར་ཁང་དེ་དག་རེ་རེའི་བར་བར་དུ་ནམ་མཁའ་སྟོང་པར་གནས་པ་ལ་སོ་སོའི་རིགས་ཀྱི་ཁྲོ་ཆུང་མང་པོ་ལག་ན་རང་རྟགས་ཀྱི་མཚོན་ཆ་ཐོགས་ཏེ་ཞལ་ཕྱིར་བལྟ་བས་བར་མཚམས་མེད་པར་གཏམས་པས་སྲུང་བ།  ཀུན་གྱི་ཕྱི་རོལ་སྟེང་འོག་ཕྱོགས་མཚམས་ཐམས་ཅད་དུ་རཾ་ལས་ཡེ་ཤེས་ཀྱི་མེ་དཔུང་ཆེན་པོ་མཐའ་མེད་(7ན)པར་འབར་བའི་མེ་ལྕེ་ཕྱིར་བསྟན་པ་སྟོང་གསུམ་གྱི་མཐར་ཁྱབ་ཅིང༌།  གྱེན་དུ་འབར་བ་སྲིད་པའི་རྩེ་མོ་བརྒལ་བ།  འབར་ཞིང་འཁྲུགས་པའི་སྒྲ་འབྲུག་སྟོང་ལྟར་ལྡིར་བ་ལ་ཟེག་མ་ཁྲོ་ཆུང་གི་ཚྭ་ཚྭ་ཐོག་ལྟར་འབེབས་པ།  འཇིག་རྟེན་པའི་བགེགས་དང་འབྱུང་པོས་ལྟ་ཅི་སྨོས་ཏེ་ཡེ་ཤེས་པས་ཀྱང་བལྟར་མི་བཟོད་པའི་གུར་ཆེན་པོར་གྱུར་པར་བསམ་མོ།  །གཉིས་པ་ནང་ཁྲོ་བོ་རོལ་པའི་མཚམས་ནི།  དེ་ལྟར་འབར་བའི་མེ་དང་མཚོན་ཆ་ལྔའི་གུར་གྱི་ནང་དུ་གནམ་ལྕགས་ཀྱི་འཁོར་ལོ་ཕྱོགས་བཞི་མཚམས་བརྒྱད་སྟེང་འོག་གཉིས་ཏེ་རྩིབས་བཅུ་རྒྱ་ཕོར་ཁ་སྦྱོར་ལྟ་བུ་བར་མཚམས་སྲུབས་གསེང་མེད་པའི་ནང་སྦུབས་སྟོང་ཡངས་ཤིང་རྒྱ་ཆེ་བའི་རྩིབས་སོ་སོར་པད་ཉི་ཕྱོགས་སྐྱོང་གི་གདན་ལ་བདག་གི་ཐུགས་ཀ་ནས་འབར་བའི་ཧཱུཾ་ཡིག་བཅུ་འཕྲོས་ཏེ་བབས་པ་ཡོངས་སུ་གྱུར་པ་ལས་ཁྲོ་བོ་བཅུར་གྱུར་པ་ནི།  སྟེང་དུ་ཧཱུཾ་མཛད།  ཤར་དུ་རྣམ་རྒྱལ།  ཤར་ལྷོར་དབྱུག་སྔོན།  ལྷོ་རུ་གཤིན་རྗེ།  ལྷོ་ནུབ་ཏུ་མི་གཡོ།  ནུབ་ཏུ་རྟ་མགྲིན།  ནུབ་བྱང་འདོད་རྒྱལ།  བྱང་དུ་བདུད་རྩི།  བྱང་ཤར་གསུམ་རྒྱལ།  འོག་ཏུ་སྟོབས་ཆེན་ཏེ།  ཀུན་ཀྱང་ཞལ་གསུམ་ཕྱག་དྲུག    །དང་པོས་རྡོ་རྗེ་དང་དུང་ཁྲག    །བར་པས་རང་རྟགས་(7བ)ཀྱི་ཕྱག་མཚན།  ཐ་མས་ཕུར་བུ་འདྲིལ་བ།  རང་རང་གི་ཡུམ་དང་མཉམ་པར་སྦྱོར་ཞིང་འབར་བའི་ཆས་ཀུན་རྫོགས་པ།  ཞབས་བཞི་འདོར་སྟབས་ཀྱིས་ཕྱོགས་སྐྱོང་གདོན་ཚོགས་ཕོ་མོ་བརྫིས་ཤིང་རོལ་པ།  སོ་སོའི་གཡས་གཡོན་དུ་སྤྲུལ་པའི་ཟ་གསོད་ཕོ་མོ་རང་རྟགས་ཀྱི་མཚོན་ཆ་ཐོགས་པས་བགེགས་རྣམས་སྲུང་ཟློག་གི་ལས་ལ་བརྩོན་པ།  ཀུན་ཀྱང་འབར་བ་ཆེན་པོའི་ཀློང་ན་རྡོ་རྗེའི་གར་གྱིས་རོལ་པའི་སྦྱོར་མཚམས་ནས་རང་འདྲ་བའི་ཁྲོ་བོ་དང་ཡང་སྤྲུལ་གྱི་ཁྲོ་ཆུང་གྲངས་མེད་པ་མེ་ལྟར་འབར་ཞིང་རླུང་ལྟར་འཚུབས་པས་མཚམས་དང་གོ་སྐབས་མེད་པར་གཏམས་པ།  དེའི་ནང་དུ་ཐབས་ཤེས་ཉི་ཟླའི་གུར་ཁང་ཞེས་འོད་ཟེར་དཀར་པོ་གསལ་བྱེད་ཀྱི་ཕྲེང་བ་དང་དམར་པོ་དབྱངས་ཡིག་གི་ཕྲེང་བས་མཚན་པའི་གུར་ཁང་ཉིས་རིམ་དུ་ཡོད་པ་དབྱིངས་དང་ཡེ་ཤེས་ཀྱི་རང་བཞིན་ཅན་ཏེ།  སྤྱན་དྲངས་པ་རྣམས་མ་གཏོགས་ཡེ་ཤེས་དང་འཇིག་རྟེན་པ་གང་གིས་ཀྱང་གླགས་མི་རྙེད་ཅིང་འབིགས་སུ་མེད་པར་གྱུར་པ།  མདོར་ན་སྲ་ཞིང་བརྟན་ལ་རབ་ཏུ་འཇིགས་པའི་སྲུང་འཁོར་ཆེན་པོ་རྒྱ་ཁྱོན་ནམ་མཁའི་མཐའ་དང་མཉམ་པ་ཙམ་དུ་བལྟའོ།  །གསུམ་པ་གསང་བ་ལྟ་བའི་མཚམས་ནི།  བར་དུ་བཅད་བྱ་གཅོད་བྱེད་ཐམས་(8ན) ཅད་ཀྱང་གཟུང་འཛིན་སེམས་ཀྱི་རྣམ་པར་རྟོག་པའི་ངོར་སྣང་བ་ཙམ་སྟེ།  སེམས་ཉིད་ཡེ་ནས་སྟོང་གསལ་ཆོས་ཀྱི་དབྱིངས་སུ་རོ་གཅིག་པའི་ངོ་བོ་ལ་བར་ཆད་ཀྱི་མཚན་མ་ནམ་ཡང་གྲུབ་པ་མེད་པས་ན་སྲིད་ཞི་མཉམ་ཉིད་དུ་རིག་པ་ནི་མི་ཤིགས་རྡོ་རྗེའི་མཚམས་གཅོད་བླ་ན་མེད་པའོ།  །བཤགས་པ་བྱ་བ་ནི།  བླ་མ་རིག་འཛིན་རྡོ་རྗེ་ཕུར་བུའི་དཀྱིལ་འཁོར་གྱི་ལྷ་ཚོགས་མཁའ་ཁྱབ་ཏུ་སད་པར་མོས་ལ།  དེ་དག་གི་སྤྱན་སྔར་ཉེས་བྱས་ལ་འགྱོད་ཚངས་ཀྱི་བསམ་པ་དྲག་པོས་སྨྲེ་ངག་གདུང་བའི་ཤུགས་ཀྱིས་མཐོལ་བཤགས་ཕུལ་བས་སྡིག་སྒྲིབ་བག་ཆགས་ཐམས་ཅད་བྱང་ཞིང་དག་ནས་སོར་ཆུད་པར་བསམ་པ་དང༌།  དོན་དམ་པར་ཆོས་ཐམས་ཅད་གདོད་ནས་མ་བྱུང་མ་སྐྱེས་པ་གནས་ལུགས་ཀ་དག་འཆིང་གྲོལ་ལས།  འདས་པའི་ཀློང་དུ་ལ་བཟླའོ།  །བརྡ་སྒོ་དབྱེ་བ་ནི།  སྣང་སྲིད་ཀ་ནས་དག་པ་ལྷུན་འབྱམས་བརྡལ་བ་ཆེན་པོའི་ཀློང་ན་རང་བཞིན་ལྷུན་གྱིས་གྲུབ་པའི་ཡེ་ཤེས་རིག་པ་རྡོ་རྗེ་ཕུར་པའི་བདག་ཉིད་ཆེན་པོར་གདོད་མ་ཉིད་ནས་བཞུགས་པ་གློ་བུར་ལྷན་སྐྱེས་ཀྱི་དྲི་མས་བསྒྲིབས་ནས་ཡོད་པ་ཉིད་ཐབས་དང་བརྡས་མཚོན་ནས་སྐད་ཅིག་ཙམ་ལ་རང་སྣང་གི་འཆར་སྒོ་མཁའ་ཁྱབ་ཏུ་(8བ)ཕྱེས་པར་བསམ་མོ།  །བརྡ་ཕྱག་འཚལ་བ་ནི།  དེ་ལྟར་རང་བཞིན་ཡེ་ཀློང་ཆེན་པོར་རང་རིག་ཡེ་ཤེས་ཀྱི་ལྷ་རང་གསལ་འདུ་འབྲལ་མེད་པར་བཞུགས་པ་ཉིད་སྒྲིབ་མེད་མངོན་སུམ་རང་ཞལ་མཇལ་བ་ལ་ངོ་མཚར་ཞིང་ཡིད་ཆེས་པའི་སྒོ་ནས་བརྡ་ཕྱག་འཚལ་བ་སྟེ་དོན་དམ་མ་རྟོགས་པ་རྣམས་ལ་ཀུན་རྫོབ་ཀྱི་ཚུལ་མཚོན་པའོ།  །དམ་བཅའ་བ་ནི།  ལྷན་སྐྱེས་ཀྱི་རིག་པ་རྡོ་རྗེ་གཞོན་ནུའི་ངོ་བོ་ཉིད་ཡེ་ནས་བྲི་གད་མེད་པར་རང་ཆས་སུ་བཞུགས་ཀྱང་གློ་བུར་རྟོག་པས་བསྒྲིབས་ནས་མཐུ་རྩལ་མངོན་དུ་མ་འབྱིན་པ་དེ་སྒྲིབ་པའི་སྦུབས་ལས་འཐོན་ཏེ་རྡོ་རྗེ་གསུམ་གྱི་དངོས་གྲུབ་དང་མཐུ་རྩལ་མངོན་དུ་མ་གྱུར་གྱི་བར་ཐུགས་དམ་འདི་ལས་ནམ་ཡང་མི་འདའོ་སྙམ་དུ་དམ་བཅའ་བཟུང་ངོ༌།  བྱིན་དབབ་པ་ནི།  ཆོས་སྐུ་སྤྲོས་མཐའ་དང་བྲལ་བའི་ཀློང་ནས་བླ་མ་རིག་འཛིན་དཔལ་ཆེན་ཕུར་བུའི་དཀྱིལ་འཁོར་གྱི་ལྷ་ཚོགས་ཐུགས་རྗེ་ལོངས་སྤྱོད་རྫོགས་པའི་སྐུའི་རྣམ་པར་བཞེངས་ཏེ་རྣམ་འཕྲུལ་བསམ་གྱིས་མི་ཁྱབ་པའི་བཀོད་པ་དང་བཅས་ནམ་མཁའ་ལ་སྤྲིན་ཕུང་གཏིབས་པ་ལྟར་བྱོན་ནས་སྣོད་བཅུད་ཐམས་ཅད་དག་པ་རབ་འབྱམས་ཡེ་ཤེས་ཀྱི་རོལ་པ་ཆེན་པོར་བྱིན་གྱིས་བརླབས་ནས།  མཐར་ལྷ་ཚོགས་དེ་དག་ཐམས་ཅད་ཀྱང་སྒྲུབ་པའི་ཡོ་བྱད་རྣམས་ལ་ཐིམ་(9ན)པར་བསམ་མོ།  །མཆོད་རྫས་བརླབ་པ་ནི།  ཕྱི་ནང་གསང་བའི་མཆོད་པའི་ཡོ་བྱད་ཐམས་ཅད་སྦྱངས་སྤེལ་བསྒྱུར་གསུམ་གྱི་སྒོ་ནས་ཟག་པ་མེད་པའི་འདོད་ཡོན་གྱི་རོལ་མོས་ནམ་མཁའ་རབ་འབྱམས་ཡོངས་སུ་གང་བར་བལྟའོ།  །དེ་དག་ནི་སྔོན་འགྲོའི་ལས་རིམ་མོ།  །གཉིས་པ་དཀྱིལ་འཁོར་རྣམ་པ་གསུམ་གྱི་སྒོ་ནས་དོན་གྱི་ཁོག་དབུབ་པ་ལ།  དེའང་བློ་བརྟན་ཅིང་མི་འགྱུར་བ་རི་བོ་ལྟ་བུའི་གང་ཟག་གིས།  ཐུགས་རྗེ་ལྷ་སྐུ་ཕྱག་རྒྱར་སྤྲུལ་པའི་ཕུར་པ།  སྣོད་བཅུད་ཐ་མལ་དུ་བཟུང་བའི་ཡུལ་ལ།  ལྷ་དང་གཞལ་ཡས་སུ་ཤེས་པའི་ཐབས་ཀྱིས་སྣང་ལ་རང་བཞིན་མེད་པ་མེ་ལོང་ལ་གཟུགས་བརྙན་གྱི་ཚུལ་དུ་གདབ་པས།  ལྷར་སྣང་རང་རྒྱུད་པས་རུ་དྲར་གོལ་བའི་ཉེས་སྐྱོན་ལས་གྲོལ་ཏེ་འཁྲུལ་སྣང་ལྷར་ཤར་བའི་གདིང་ཚད་དང་ལྡན་པས་འབྲས་བུ་སྤྲུལ་པའི་སྐུ་ཐོབ་པར་བྱེད་པ་སྟེ།  དེ་ལ་གསུམ།  གཞི་ཏིང་ངེ་འཛིན་གྱི་འཕྲོ་འདུ།  རྟེན་གཞལ་ཡས་ཁང༌།  བརྟེན་པ་ལྷ་བསྐྱེད་པའོ།  །དང་པོ་ལ་གསུམ་གྱི།  དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི།  སྤྱིར་གོ་དོན་གྱི་དབང་དུ་བྱས་ན།  གང་ཁྲོས་ན།  གནས་ལུགས་སྤྲོས་བྲལ་སྟོང་པ་ཉིད་ཀྱི་རང་བཞིན་སྐྱེ་མེད་དོན་གྱི་རྡོ་རྗེ་ཉིད།  གང་ལ་ཁྲོས་ན།   (9བ)མཚན་མའི་རྣམ་པར་རྟོག་པ་གཟུང་འཛིན་བདག་རྟོག་གི་གྲོང་ཁྱེར་ལ།  ཚུལ་ཇི་ལྟར་ཁྲོས་ན།  ཞེ་སྡང་རང་རྒྱུད་པས་མི་གཤིས་ངན་དགྲ་ལ་ཁྲོས་པ་ལྟ་བུ་མ་ཡིན་པར་ཉི་མ་འཆར་བའི་གཟི་བརྗིད་ཀྱིས་མུན་པའི་སྨག་རུམ་མདུན་ན་མི་གནས་པ་ལྟར་སྟོང་ཉིད་རྟོགས་པའི་ཡུལ་ན་དངོས་འཛིན་མཚན་མའི་སྤྲོས་པ་ཐམས་ཅད་མི་གནས་པའི་ཚུལ་གྱིས་ཁྲོས་པས།  སྲིད་རྩའི་ཞེ་སྡང་སོགས་དུག་ལྔའི་རྣམ་རྟོག་མ་ལུས་པ་དབྱིངས་སུ་གཅོད་པ་ཀ་དག་ནམ་མཁའི་རང་བཞིན་ཏེ།  དེའང་གདོད་ནས་སྐྱེ་བ་མེད་པའི་སེམས་ཉིད་སྤྲོས་པའི་མཐའ་ཐམས་ཅད་དང་བྲལ་བ་ལ་གནས་པ་གཞིའི་རྡོ་རྗེ་གཞོན་ནུ་ཞེས་བྱ་ཞིང༌།  ཐབས་ཤེས་གཉིས་ཀྱི་སྒོ་ནས་སྐུ་གསུམ་ཡེ་ཤེས་ལྔ་རྣམ་པ་ལྷའི་འཁོར་ལོར་གསལ་བ་ནི་བགྲོད་པ་ལམ་གྱི་རྡོ་རྗེ་གཞོན་ནུ་ཉིད་ཡིན་ལ།  སངས་རྒྱས་ཀྱི་ཐུགས་གཉིས་སུ་མེད་པའི་ཡེ་ཤེས་སྤྲོས་པ་ཐམས་ཅད་དང་བྲལ་བའི་དེ་ཁོ་ན་ཉིད་མངོན་དུ་གྱུར་པ་ལ་རྟོགས་པ་འབྲས་བུའི་རྡོ་རྗེ་གཞོན་ནུ་ཞེས་བརྗོད་དེ།  རྩ་རྒྱུད་རྡོ་རྗེ་ཁྲོས་པ་ལས།  རང་སེམས་གཞི་ཡི་རྡོ་རྗེ་གཞོན་ནུ་ནི།  །ས་བོན་ཀུན་ཁྱབ་ཏིལ་མར་འདྲ།  །རྟོགས་ན་སངས་རྒྱས་ངོ་མཚར་ཆེ།  །བགྲོད་པ་ལམ་གྱི་རྡོ་རྗེ་གཞོན་ནུ་ནི།  །ཐབས་ཤེས་སྐུ་གསུམ་(10ན)ཡེ་ཤེས་ལྔ།  །ཆུ་བོའི་རྒྱུན་གྱི་རྣལ་འབྱོར་བྱ།  །རྟོགས་པ་འབྲས་བུའི་རྡོ་རྗེ་གཞོན་ནུ་ནི།  །སྐུ་ལྔ་ཡེ་ཤེས་དགུ་ལྡན་ཏེ།  །མ་འཁྲུལ་རྟོགས་པ་མངོན་གྱུར་བྱ།  །གཞི་ལམ་འབྲས་བུ་རྟོགས་གྱུར་ན།  །ཆོས་སྐུ་སྤྲོས་བྲལ་མངོན་དུ་འགྱུར།  །ཞེས་དང༌།  ངང་ཉིད་རྡོ་རྗེ་ཆོས་དབྱིངས་ལས།  །འབར་བའི་ཁྲོ་བོ་མི་བཟད་པ།  །ཞེས་པས།  རིག་པའི་རྩལ་མ་འགགས་པར་སྣ་ཚོགས་སུ་ཤར་བའི་སྣང་བ་འདི་རྣམས་ཡེ་ཤེས་ཡིན་པས་རྟགས་ལྷའི་དཀྱིལ་འཁོར་དུ་རྫོགས།  སྣང་བའི་དུས་ནས་ངོ་བོས་སྟོང་པས་དོན་ཆོས་ཀྱི་དབྱིངས་སྤྲོས་པ་དང་བྲལ་བར་གནས།  དེ་གཉིས་དབྱེར་མེ་ཕྱེད་པའི་སྲས་བདེ་ཆེན་བྱང་ཆུབ་སེམས་ཀྱི་རང་བཞིན་དུ་གནས་པ་དབྱིངས་དང་ཡེ་ཤེས་དབྱེར་མེད་པའི་ལྟ་བ་སྟེ།  སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཟབ་གསལ་དབྱེར་མེད་ཀུན་ཁྱབ་མཉམ་པའི་རང་བཞིན་དངོས་པོ་མེད་ལ་དངོས་པོ་ཀུན་གྱི་རྒྱུར་གྱུར་པ་གང་ཞིག    །དཔེརས་ན་མཚོན་རྣོན་པོ་ལྕུག་ཕྲན་གྱི་ཡལ་ག་ལ་ཐེབས་པ་ན་གཅོད་པར་བྱེད་པའི་ཚུལ་དང་མཐུན་པར།  སྣོད་བཅུད་དངོས་པོར་ཞེན་པའི་རྩ་བ་གཅོད་ཅིང་དག་མཉམ་ལྷའི་འཁོར་ལོར་སྦྱོར་བར་བྱེད་པའི་ཆ་ནས་མཚོན་(10བ)ཆ་དང༌།  ཆོས་ཉིད་འགྱུར་བ་མེད་པས་ན་སྔོན་པོའི་སྒྲས་བསྟན་ཏེ།  སོ་སོ་རང་རིག་པའི་ཡེ་ཤེས་ཀྱི་རོལ་པར་འབར་བའི་ཟུང་འཇུག་ཆོས་སྐུའི་ངོ་བོ་དེ་ཉིད་སྤྲོས་པ་ཀུན་བྲལ་ཆོས་ཉིད་ནམ་མཁའི་ཀློང་ནས་མཉམ་ཡངས་བརྡལ་བ་ཆེན་པོའི་དོན་ཐོག་ཏུ་ཕེབས་པའི་ཐིག་ལེའམ་ཐིག་པར་རང་ཤར་བའི་ཚུལ་རྟོགས་པ་ནི་སྤྱིར་ཤེས་པར་བྱ་བ་ཡིན་ལ།  བྱེ་བྲག་སྒོམ་དོན་གྱི་དབང་དུ་བྱས་ན།  དེ་ལྟར་གཉིས་མེད་ཟུང་འཇུག་ཡེ་ཤེས་ཀྱི་ཕྱག་རྒྱས་བརྟན་གཡོའི་དངོས་པོ་ཀུན་ལ་རྒྱས་བཏབ་ནས་དག་མཉམ་ཆེན་པོའི་ཀློང་དུ་འུབ་ཆུབ་པར་བྱ་བའི་དོན་འདི་སྲོག་གི་སྒོའམ་སྙིང་གི་དཀྱིལ་དུ་བསྒོམ་པར་བྱ་བའི་དམ་ཚིག་ཉིད་ཡིན་པས་ན།  ལྟ་བས་ཐག་བཅད་པའི་དབྱིངས་དང་ཡེ་ཤེས་དབྱེར་མེད་བདེ་བ་ཆེན་པོའི་ངང་དུ་ཅི་ལའང་མི་རྟོག    །གང་དུའང་མི་འཛིན།  ཅིར་ཡང་མི་དམིགས་པར་རང་གྲོལ་འཛིན་མེད་དུ་མཉམ་པར་བཞག་གོ  །གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི།  དེ་ལྟར་རྡོ་རྗེ་ལྟ་བུའི་སྟོང་ཉིད་ཀྱི་ཡེ་ཤེས་ལས་སྒྱུ་མ་ལྟ་བུའི་དམིགས་མེད་ཀྱི་སྙིང་རྗེ་རང་ཤུགས་སུ་སྐྱེ་བས་མ་རྟོགས་པའི་འགྲོ་བ་ཐམས་ཅད་སྒྲོལ་བ་སྟེ།  དེའང་དངོས་འཛིན་རང་རྒྱུད་པས་མནར་གཅོད་(11ན) དྲག་ཤུལ་གྱི་ལས་ཐབས་ཞེ་སྡང་གིས་བསད་ཅིང་གཏི་མུག་གིས་མནན་པ་ལྟ་བུ་མ་ཡིན་པར།  　ཕུང་ཁམས་སྐྱེ་མཆེད་ཐམས་ཅད་གདོད་ནས་རྡོ་རྗེ་མི་ཕྱེད་པའི་བདག་ཉིད་ཆེན་པོར་གནས་པ་ལ་དབྱེར་མེད་དག་མཉམ་དགོངས་པའི་གཟེར་གྱིས་གདབ་ནས་རྣམ་པར་ཤེས་པ་ཆོས་སྐུ་རང་བྱུང་གི་ཡེ་ཤེས་རྡོ་རྗེ་གཞོན་ནུའི་རོལ་པར་བསྒོམ་པ་ནི་སྤྱིར་ཤེས་པར་བྱས་ནས།  　སྒོམ་དོན་དུ།  　དེ་བཞིན་ཉིད་ཀྱི་ཏིང་འཛིན་དེ་ལས་ཚད་མེད་པའི་སྙིང་རྗེས་འགྲོ་བ་རྣམས་བདེ་ཆེན་རྒྱལ་བའི་ས་ལ་འགོད་པར་བྱ་བའི་ཕྱིར་བདག་ལུས་འཇིགས་བྲལ་རྡོ་རྗེ་གཞོན་ནུའི་སྐུ་གསུང་ཐུགས་སུ་གཏམས་ཏེ་རྣམ་པར་ཤེས་པ་ཆོས་སྐུ་ཡེ་ཤེས་རྡོ་རྗེ་མངོན་དུ་བྱའོ་སྙམ་པའི་དམ་བཅའི་བློ་རྗེས་སུ་སྒྲུབ་པའི་སླད།  　སྙིང་རྗེའི་རང་མདངས་ཉི་མ་སྤྲིན་བྲལ་འབུམ་དུས་གཅིག་ལ་ཤར་བ་ལྟ་བུའི་འོད་ཟེར་ཆེན་པོས་འཇིག་རྟེན་གྱི་ཁམས་ཐམས་ཅད་ཁྱབ་པ་ལས་ཕུར་པ་གྲུབ་པའི་རིག་འཛིན་རྣམས་ཀྱི་ཐུགས་དམ་བསྐུལ།  　དེ་རྣམས་ཀྱིས་སྲིད་པ་ཕུར་བུ་མྱུར་དུ་འགྲུབ་པར་བསྐུལ།  དེས་ཀྱང་ཡེ་ཤེས་ཁྲོ་བོ་བདག་ལ་ཉེ་བར་བསྐུལ་བའི་སྒྲ་བྲག་ཆ་ལྟ་བུར་སད་པར་བསྒོམ་མོ།  །གསུམ་པ་རྒྱུའི་ཏིང་ངེ་འཛིན་ནི།  ཆོས་(11བ)ཀྱི་དབྱིངས་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་གཟུགས་ཀྱི་སྐུ་གང་འདུལ་གྱི་རོལ་པར་འཆར་བའི་གཞིའམ་རྒྱུ་ནི་ས་བོན་གྱི་ཡི་གེ་ཁོ་ན་ལ་བརྟེན་པ་ཉིད་སྤྱིར་ཤེས་པར་བྱས་ནས།  སྒོམ་དོན་དུ།  སྙིང་རྗེའི་རང་མདངས་འགགས་མེད་དུ་ཤར་བ་ཀུན་སྣང་གི་འོད་ཟེར་དེ་དག་ཚུར་འདུས་པ་ལས་བྱུང་བའི་རྒྱུའི་ས་བོན་ཧཱུཾ་ཡིག་སྔོན་པོ་ཡེ་ཤེས་ལྔའི་འོད་ཟེར་རབ་ཏུ་འབར་བ་ཞིག་ནམ་མཁའ་ལ་ཐོལ་གྱིས་ཤར་བར་བསྒོམ་མོ།  །དེ་ལྟར་དེ་ཏིང་བསྒོམ་པས་འཆི་བ་སྦྱོང་ཞིང་ཆོས་སྐུ་ལམ་དུ་བྱེད།  ཀུན་ཏིང་གིས་བར་དོ་སྦྱོང་ཞིང་ལོངས་སྐུ་ལམ་དུ་བྱེད།  རྒྱུ་ཏིང་འབྲས་བུ་ལམ་གྱི་འཁོར་ལོ་དང་བཅས་པས་སྐྱེ་སྲིང་དང་ལས་སྣ་ཚོགས་ཀྱི་བྱེད་པ་སྦྱོང་ཞིང་སྤྲུལ་སྐུའི་མཛད་པ་དང་བཅས་པ་ལམ་དུ་བྱེད་པ་ཡིན་ནོ།  །གཉིས་པ་རྟེན་གཞལ་ཡས་ཁང་བསྒོམ་པ་ནི།  སྔར་བསྒོམས་པའི་ཐུན་མོང་གི་སྲུང་འཁོར་ཆེན་པོ་དེའི་ནང་དུ་རྒྱུའི་ཡི་གེ་ཧཱུཾ་མཐིང་ནག་དེ་ལས་འོད་ཟེར་འཕྲོ་འདུས་སྔར་བས་གཟི་བརྗིད་ཆེ་བར་གྱུར་ཏེ་གནས་པ་ལས།  འབྱུང་བའི་ས་བོན་ཨེ་མཐིང་ག    །ཡཾ་ལྗང་གུ  །ར་དམར་ནག    །སུཾ་སེར་ནག    །ཀེཾ་དཀར་པོ།  རཾ་ལེ་བརྒན་རྣམས་རིམ་པར་ཆད་པ་ཡོངས་སུ་གྱུར་པ་ལས།  ཐོག་མར་ཨེ་ལས་ནམ་མཁའ་ཆོས་ཀྱི་འབྱུང་(12ན)གནས་གདེངས་ཀ་གྱེན་ལ་བསྟན་པས་སྲུང་འཁོར་གྱི་ནང་ཕྱེད་མན་ཆད་ཁྱབ་པ།  རྩ་བ་ཕྲ་བའི་ཟུར་འོག་ཕྱོགས་སྲུང་འཁོར་རྡོ་རྗེའི་ས་གཞིའི་ལྟེ་བ་ལ་ཟུག་པར་བསྒོམ།  དེའི་ཀློང་དུ་རིམ་པར་ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ།  ར་ལས་རཀྟའི་རྒྱ་མཚོ་དམར་པོ་ཟླུམ་པོ།  སུཾ་ལས་ཤ་ཆེན་གྱི་ས་གཞི་སེར་ནག་གྲུ་བཞི།  ཀེཾ་ལས་ཀེང་རུས་ཀྱི་རི་རབ་གྲུ་གསུམ་དཀར་པོ་བང་རིམ་བཞི་ལྡན་འོག་མ་ལས་གོང་མའི་འཕེལ་ཀ་ཇེ་ཆེར་རྒྱས་པ་རྣམས་བརྩེགས་མར་གནས་པ།  དེའི་སྟེང་དུ་རྡོ་རྗེའི་བྲག་ཆེན་པོས་གཏམས་པའི་ཕྱི་ལ་རཾ་ལས་བསྐལ་པའི་མེ་དཔུང་ཆེན་པོ་རབ་ཏུ་འབར་བའི་ནང་དུ་རྡོ་རྗེའི་ར་བས་ཟླུམ་པོར་བསྐོར་བ་དེ་གཉིས་ཀྱིས་སྲིད་དུ་ནང་གི་དཀྱིལ་འཁོར་གྱི་སུམ་ཆ་གཅིག་ཙམ་གྱི་བར་དུ་སླེབ་པ།  རྡོ་རའི་ནང་དུ་སྣ་ཚོགས་པདྨ་འདབ་སྟོང་བརྡལ་བའི་ལྟེ་བར་ཨིནྡྲ་ནཱི་ལའི་ས་གཞི་ལ་ཕྱོགས་མཚམས་བརྒྱད་དུ་རཱུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད།  དེ་དག་ཏུ་ཤིང་བརྒྱད།  དེའི་རྩ་བ་ལ་གནས་པའི་ཕྱོགས་སྐྱོང་བརྒྱད།  ཡལ་ག་ལ་བརྟེན་པའི་ཞིང་སྐྱོང་བརྒྱད།  ཆུ་བརྒྱད།  དེ་ལ་རོལ་བའི་ཀླུ་བརྒྱད།  གཞན་ཡང་མེ་དང༌།  ཆུ་དང༌།  སྤྲིན་དང༌།  རི་དང༌།  མཆོད་རྟེན་རྣམས་ཀྱང་བརྒྱད་བརྒྱད།  ཐམས་ཅད་དུ་གྲུབ་པ་དང་(12བ)རིག་འཛིན་དཔའ་བོ་རྣལ་འབྱོར་མའི་ཚོགས་དང༌།  རོ་ལངས་དང་ཤ་ཟ་འབྱུང་པོའི་ཚོགས་རྣམས་ཧ་ཧར་རྒོད་ཅིང་གར་རྩེབ།  བྱ་དང་གཅན་གཟན་གཏུམ་པོ་མང་པོ་ལང་ལོང་དུ་རྒྱུ་ཞིང༌།  ཀེང་རུས་དང༌།  རོ་བམ་པ་དང༌།  དུམ་བུ་དང༌།  ཚིག་པ་དང༌།  མ་ཚིག་པ་དང༌།  འཐོར་བ་ལ་སོགས་པའི་ཤ་རུས་གསར་རྙིང་སྣ་ཚོགས་པ་གཅལ་དུ་བཀྲམ་ཞིང་ཕུང་པོར་སྤུངས་པས་ཡོངས་སུ་གང་བ།  དེའི་དབུས་སུ་བཻ་ཌཱུརྻའི་བྲག་རི་གྱེན་དུ་ཅུང་ཟད་འཕགས་པའི་སྟེང་ན་སྣ་ཚོགས་རྡོ་རྗེར་བཅུ་གཉིས་པ་ལྟེ་བ་གྲུ་བཞི་པར་ཡོད་པའི་སྟེང་དུ།  རྒྱུའི་ས་བོན་ལས་བྷྲཱུཾ་ཁ་དོག་ལྔ་ལྡན་ཆད་པ་ཡོངས་སུ་གྱུར་པ་ལས།  ཕོ་བྲང་ཕྱི་མ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ།  ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པའི་སྟེང་ན།  རིན་པོ་ཆེའི་ཕ་གུ་སེར་པོར་རིན་པོ་ཆེ་སྣ་ཚོགས་པས་བཀྲ་བ་འཕྱར་ཐབས་སུ་བཀོད་པའི་མཐར་མུ་ཏིག་གི་མགུལ་འཁོར་འཕྱང་བ།  དེའི་སྟེང་དུ་བྲེ་ཕུལ་གྱི་སྣམ་བུ་ལ་གསེར་གྱི་སྐ་རགས་བཞིའི་ཕྱི་ངོས་སུ་མ་ཀ་རའི་ཁ་ནས་རིན་པོ་ཆེའི་དྲྭ་བ་དང་དྲྭ་བ་ཕྱེད་པ།  དར་དང་རྔ་ཡབ།  དྲིལ་བུ་དང་མེ་ལོང་ཟླ་བ་རླུང་གིས་བསྐྱོད་པ་ལ་སོགས་པས་མཛེས་པ།  དེའི་ཕྱི་ངོས་སུ་བྱ་འདབ་(13ན)ལས་འཕྱང་བའི་རིན་པོ་ཆེའི་ཤར་བུ།  སྟེང་ངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན།  དེ་དག་གི་བར་བར་དུ་བུམ་པ་ལ་གནས་པའི་རྒྱལ་མཚན་དང་བ་དན་བརྒྱད་བརྒྱད་དང༌།  ཟུར་བཞིར་རྣམ་པར་བཀྲ་བའི་གདུགས་ཀྱིས་བརྒྱན་པ།  རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུགས་རྡོ་རྗེ་མ་སོགས་ལྷ་མོ་རྣམས་ཀྱིས་མཆོད་པའི་སྤྲིན་རབ་འབྱམས་སྤྲོ་བ།  སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་ནོར་བུས་བརྒྱན་པ།  སྒོ་ལོགས་ཀྱི་ཕྱི་ཟུར་ནས་བུམ་པ་ལ་གནས་པའི་ཀ་བས་བཏེགས་པའི་རྟ་བབས་སྣམ་བུ་བཞི་པ་བསིལ་ཁང་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་གཡས་གཡོན་དུ་རི་དྭགས་ཕོ་མོ་དང་བཅས་པ།  གཞན་ཡང་གདུགས་རྒྱལ་མཚན་བ་དན་སྣ་ཚོགས་པ་དང༌།  གསེར་གྱི་དྲིལ་བུ་ལ་སོགས་པས་བརྒྱན་པ།  སྒོའི་གཡས་གཡོན་གྱི་གཞི་ལ་ཏ་ལའི་ལྗོན་པ་དང༌།  དཔག་བསམ་གྱི་ཤིང་ལ་བཀྲ་ཤིས་པའི་བྱ་སྙན་པར་སྒྲོགས་པ་སྣ་ཚོགས་གནས་པ།  ཤིང་དེ་དག་ཀྱང་གསེར་གྱི་ཐ་གུས་བྲེས་ཤིང་དྲིལ་བུ་དང་གཡེར་ཁ་ཆོས་ཀྱི་སྒྲ་སྙན་པར་སྒྲོགས་པས་མཛེས་པ།  ཡན་ལག་བརྒྱད་དང་ལྡན་(13བ)པའི་ཁྲུས་ཀྱི་རྫིང་བུ་ལ་ལྷ་མོ་སྣ་ཚོགས་བདེ་བར་རྩེ་བ།  རིན་པོ་ཆེའི་ཕུང་པོ་འོད་འབར་བ་རེ་རེ་སྟེ་བརྒྱད་དང༌།  གཞན་ཡང་རིན་པོ་ཆེ་སྣ་བདུན་དང་བཀྲ་ཤིས་པའི་རྫས་བརྒྱད་སོགས་འདོད་པའི་ཡོན་ཏན་ཐམས་ཅད་ཀྱིས་མཛེས་པར་གང་བ།  གཞལ་ཡས་ཁང་དེའི་བར་ཁྱམས་གྲུ་བཞི་པས་ཀུན་ནས་བསྐོར་བའི་ནང་དུ།  ཕོ་བྲང་ནང་མ་དུར་ཁྲོད་ཀྱི་གཞལ་ཡས་ཁང་ཐོད་པ་སྐམ་རློན་རྙིང་པའི་རྩིག་པ་སུམ་རིམ་གནམ་ལྕགས་ཀྱི་གཟེར་གྱིས་བཏབ་ཅིང་ཁྲག་ཞག་ཤ་ཆེན་གྱིས་འཇིམ་ཞལ་བྱས་པ།  སྒོ་ཁྱུད་སྤངས་པའི་སྒོ་བཞི་སྦྲུལ་ནག་གི་རེ་གཞི་ལ།  རུས་སྦལ་གྱི་མ་ཐེམ།  ནམ་མཁའ་ལྡིང་གི་ཡ་ཐེམ།  ཆུ་སྲིན་གྱི་ལྕིབ་ཁུང༌།  ཞིང་གི་སྒོ་གླེགས་རྣམས་ཀྱིས་སྤྲས་པ།  ཕྱོགས་བཞིར་ཞིང་ཆེན་གྱི་རྒྱལ་མཚན་དང༌།  གཡང་གཞི་རློན་པའི་བ་དན་ལ་སོགས་པ་གཡོ་བ།  ནང་ས་བདག་ཕོ་མོའི་ཀ་གདན་ལ་བརྟེན་པའི་ལྷ་ཆེན་པོ་བརྒྱད་ཀྱི་ཀ་བ་ལ།  ཀླུ་ཆེན་པོ་བརྒྱད་ཀྱི་གདུང་མ་ཚངས་པའི་གདུང་བཞི་མིག་མང་རིས་སུ་བྲེས་པ།  གཟའ་ཆེན་པོ་བརྒྱད་ཀྱི་ཕྱམ་ལ་རྒྱུ་སྐར་ཉི་ཤུ་རྩ་བརྒྱད་ཀྱི་དྲལ་མ་གྲབ་ཅིང་རཱུ་དྲ་ཕོ་མོའི་ལྤགས་པས་ཐོག་ཕུབ་པ།  ཞིང་ལྤགས་ཀྱི་བླ་བྲེ།  རྒྱུ་རློན་གྱི་ལྡ་ལྡི།  དོན་སྙིང་དང་ཡན་ལག་གི་འཕྱང་(14ན)འཕྲུལ།  ཀེང་རུས་དང་ཐོད་ཚལ་གྱི་དྲྭ་བ་དང་དྲྭ་བ་ཕྱེད་པ་སོགས་འཇིགས་པའི་རྒྱན་སྣ་ཚོགས་པས་བཀྲ་བ།  ཉི་མ་དང་ཟླ་བའི་མཐོང་སྐར་ཅན༌།  ཕོ་བྲང་ཕྱི་ནང་གཉིས་ཀའི་སྟེང་ཐོག་སྙོམས་པའི་དབུས་རྒྱ་ཕུབ་ཀྱི་རྣམ་པ་ལྟར་ཕྱུར་བུར་གྱུར་པའི་ནང་ལྷ་ཆེན་པོའི་ཐོད་པས་ཟླུམ་པོར་ཕུབ་པའི་རྩེ་མོར་ཙིཏྟའི་མེ་ཏོག་གིས་མཚན་པའི་ཕྱི་རིན་པོ་ཆེའི་རང་བཞིན་ཅན་གྱི་བུམ་པ་སུལ་བརྒྱད་བྲེ་ཆོས་འཁོར་གདུགས་ཏོག་དང་བཅས་པ་འོད་ཟེར་མཐའ་ཡས་པར་སྤྲོ་བས་མཛེས་པ།  ནང་དང་སྟེང་འོག་གི་གཞི་རྣམས་ཤར་དཀར།  ལྷོ་སེར།  ནུབ་དམར།  བྱང་ལྗང།  དབུས་སྔོ་བ།  ནང་གི་དབུས་གྲུ་གསུམ་མཐིང་ནག་ཟླ་གམ་དམར་པོ་ཐོད་པ་ཕྱིར་བལྟས་ཀྱི་ར་བས་བསྡམས་པའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་བཞི་པ་དང་རྩིབས་བཅུ་པའི་རྩིབས་རྟེན་མུ་ཁྱུད་ཐོད་སྐམ་གྱི་ཕྲེང་བས་བསྐོར་བ་དང་ཟླ་གམ་ཉེར་གཅིག་གིས་མཚན་པའི་མུ་ཁྱུད་དང་བཅས་པ་རྣམས་རིམ་བཞིན་ཁྱད་པར་དུ་གྱུར་པས་དཔག་པ།  ཕོ་བྲང་ཕྱི་ནང་གི་བར་ཁྱམས་སུ་ཁྲག་གི་རྒྱ་མཚོ་འཁྲུགས་པའི་ཕྱོགས་མཚམས་སུ་འཁོར་ལོ་རྩིབས་བཅུ་གཉིས་ཀྱིས་མཚན་པ།  ཐམས་ཅད་དུའང་འབར་བའི་ཕྲེང་བ་རབ་ཏུ་འཁྲུག་ཅིང་དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ་སྟེ།  མདོར་ན་ཡེ་ཤེས་ (14བ) རང་སྣང་གི་བཀོད་པ་སྣོད་ཀྱི་འཇིག་རྟེན་སོགས་རྣམ་པར་དག་པའི་ངོ་བོ་རང་བྱུང་ལྷུན་གྲུབ་ཀྱི་ཕོ་བྲང་ཆེན་པོ་མཚན་ཉིད་ཐམས་ཅད་ཡོངས་སུ་རྫོགས་པའི་རང་བཞིན་ཅན་དུ་གསལ་གདབ་བོ།  འཁོར་ལོ་འདི་རྣམས་གུར་ཐབས་སུ་མ་ཡིན་པར་གདན་ཐབས་ལེ་བཞད་ཅན་ཁོ་ནའོ།  །གསུམ་པ་བརྟེན་པ་ལྷའི་དཀྱིལ་འཁོར་བསྒོམ་པ་ལ་གསུམ།  ཆོས་སྐུའི་ངོ་བོ་བདག་ཉིད་རྩ་བའི་དཀྱིལ་འཁོར།  ལོངས་སྐུའི་ངོ་བོ་ཕྱོགས་བཅུ་ཁྲོ་བོའི་དཀྱིལ་འཁོར།  སྤྲུལ་སྐུའི་ངོ་བོ་ཕུར་པ་རྫས་ཀྱི་དཀྱིལ་འཁོར་བསྐྱེད་པའོ།  །དང་པོ་ནི།  དབུས་ཀྱི་མཐིང་ནག་ཨེ་དབྱིངས་འབར་བར་སྣ་ཚོགས་པདྨ་དང་ཟླ་བ་ཉི་མ་རྣམས་བརྩེགས་པའི་སྟེང་དུ་བདུད་བཞི་རྒྱལ་བསེན་དྲེགས་པ་ལྷ་ཆེན་ཕོ་མོ་རྣམས་བྱི་ཆིངས་སུ་བསྣོལ་བའི་གདན་ལ་སྔར་བསྒོམས་པའི་རྒྱུའི་ཧཱུཾ་དེ་སྐར་མདའ་ལྟུང་བ་ལྟར་བབས།  དེ་ལས་འོད་ཟེར་དཔག་ཏུ་མེད་པ་འཕྲོས་རྒྱལ་ཁ་རྣམས་མཆོད་ཅིང་ཐུགས་དམ་བསྐུལ།  སེམས་ཅན་གྱི་དོན་བྱས།  འཁོར་འདས་ཀྱི་དྭངས་བཅུད་བསྡུས་ཏེ་འོད་ཟེར་སླར་འདུས་ཧཱུཾ་ལ་ཐིམ།  དེ་ཡོངས་སུ་གྱུར་པ་ལས་གནམ་ལྕགས་ཀྱི་རྡོ་རྗེ་རྩེ་དགུ་པ་ལྟེ་བར་ཧཱུཾ་གིས་མཚན་པ་ཡེ་ཤེས་ལྔའི་འོད་ཟེར་འབར་བར་གྱུར།  སླར་ཡང་དེ་ལས་འོད་ཟེར་འཕྲོ་འདུས་གཅིག་ཏུ་གྱུར་པ་ལས་（15ན）ཚོགས་གཉིས་ཡོངས་སུ་རྫོགས་པའི་དཔལ་ཆེན་པོའི་སྐུར་གྱུར་པ་ནི།   སྐུ་མདོག་མཐིང་ནག་བསྐལ་པའི་མེ་ལྟར་འབར་བའི་གཟི་བརྗིད་ཅན།  དབུ་གསུམ་གྱི་རྩ་ཞལ་མཐིང་ག་གཏུམ་ལ་རྔམས་པ།  གཡས་ཞལ་དཀར་པོ་སྒེག་ཅིང་བཞད་པ།  གཡོན་ཞལ་དམར་པོ་ཁྲོ་ཞིང་ཆགས་པ།  ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་སྡང་མིག་ཏུ་འཁྱིལ་བ།  རྣམ་པར་འགྱུར་བའི་ཞལ་གདངས་ཤིང་མཆེ་བ་གཙིགས་པ།  གློག་ལྟར་འཁྱུག་པའི་ལྗགས་འདྲིལ་ཞིང་རྡོ་རྗེའི་གད་མོ་ཧ་ཧ་དང་ཧཱུཾ་ཕཊ་འབྲུག་སྟོང་ལྟར་སྒྲོགས་པས་ས་གསུམ་གཡོ་བ།  ཁྲོ་གཉེར་བསྡུས་པའི་ཤངས་ནས་མི་བཟད་པའི་རླུང་སྒྲ་འབྱིན་པ།  སྨར་དང་སྨིན་མར་མེ་ཡི་ཚྭ་ཚྭ་འཕྲོ་ཞིང་དབུ་སྐྲ་དམར་སེར་དུས་ཀྱི་མེ་ལྕེ་ལྟར་བསྐྱོད་པ་སྲིད་པའི་རྩེ་མོར་བརྫིས་པ།  སྐུ་ཆེ་ཞིང་ཡན་ལག་རགས་པ་ལང་ཚོ་རྒྱས་པའི་འགྱུར་བག་ཅན།  ཕྱག་དྲུག་གི་གཡས་དང་པོས་གནམ་ལྕགས་ཀྱི་རྡོ་རྗེ་རྩེ་དགུ་པ་དང༌།  བར་པས་རྡོ་རྗེ་རྩེ་ལྔ་པ།  གཡོན་གྱི་དང་པོས་སྡིགས་མཛུབ་ཀྱི་རྩེ་ལས་མེ་དཔུང་དང༌།  བར་པས་ཁ་ཊྭཱཾ་ཀ་རྩེ་གསུམ་པ་བཅས་གདེངས་ཐབས་སུ་འཛིན་པ།  ཐ་མ་གཉིས་ཐུགས་ཀར་རི་རབ་ཀྱི་ཕུར་བུ་འདྲིལ་བ།  གཡས་ཀྱི་（15བ）དང་རུ་རྡོ་རྗེ་རྩེ་དགུ་པ་ལ་སྤུ་གྲི་འབར་བའི་གཤོག་པར་མེ་ཞགས་འཕྲོ་ཞིང༌།   གཡོན་གྱི་དང་རུ་རིན་པོ་ཆེ་འབར་བ་ལ་རལ་གྲིའི་སྒྲོ་གཤོག་གི་གསེབ་ལས་རྡོ་རྗེའི་སེར་ཆེན་འབེབས་པ།  ཞབས་བཞི་གཡས་བསྐུམ་ཞིང་གཡོན་བརྐྱང་པའི་གྱད་ཆེན་པོའི་སྟབས་ཀྱིས་དྲེགས་པ་ཕོ་མོའི་མགོ་བོ་དང་ནུ་མ་ནས་བརྫིས་པ།  ཐོད་པ་སྐམ་པོ་རིན་པོ་ཆེའི་རྩེ་བྲན་ཁྲག་འཐུང་རིགས་ལྔའི་ཅོད་པན་ཅན་གྱིས་དབུ་ལ་བརྒྱན་པ།  དཔྲལ་བར་ཐལ་ཆེན་གྱི་ཚོམ་བུ།  མཁུར་ཚོས་ལ་རཀྟའི་ཐིག་ལེ།  ཨོལ་ཀོ་ལ་ཞག་གི་ཟོ་རིས་ཏེ་བྱུག་པའི་རྫས་གསུམ།  སྐུ་སྟོད་ལ་གླང་པོ་ཆེའི་ཀོ་རློན།  སྐེད་པར་མི་ལྤགས་ཀྱི་གཡང་གཞི།  སྐུ་སྨད་ལ་སྟག་ལྤགས་ཀྱི་ཤམ་ཐབས་ཏེ་བགོ་བའི་གོས་གསུམ།  ཐོད་པ་སྐམ་རློན་རྙིང་པའི་ཕྲེང་བ་རྒྱུ་རློན་ལ་བརྒྱུས་པའི་དོ་ཤལ།  སྦྲུལ་རྒྱལ་རིགས་དཀར་པོའི་དབུ་རྒྱན།  རྗེ་རིགས་དམར་པོའི་སྙན་རྒྱན།  བྲམ་ཟེ་སེར་པོའི་གདུ་བུ།  གདོལ་པ་ནག་པོའི་སེ་རལ་ཁ།  སྦྲུལ་རིགས་ལྔའི་ཆུན་པོའི་སྐ་རགས་དང༌།  རུས་པའི་འཁོར་ལོ།  རྣ་ཆ།  མགུལ་རྒྱན།  ཕྱག་ཞབས་ཀྱི་གདུ་བུ།  སྐ་རགས་རྣམས་ཏེ་རུས་པའི་ཕྱག་རྒྱ་ལྔ་བཅས་འདོགས་པའི་རྒྱན་གསུམ་སྟེ།  དུར་ཁྲོད་ཀྱི་ཆས་དགུས་བརྒྱན་ཅིང༌།  སྒེག་པ།  དཔའ་བ།  འཇིགས་（16ན）སུ་རུང་བ་སྟེ་སྐུའི་གར་གསུམ།   དགོད་པ།  གཤེ་བ།  དྲག་ཤུལ་ཏེ་གསུང་གི་གར་གསུམ།  སྙིང་རྗེ།  རྔམས་པ།  ཞི་བ་སྟེ་ཐུགས་ཀྱི་གར་གསུམ་བཅས་གར་གྱི་ཉམས་དགུས་རྣམ་པར་བརྗིད་པ།  དེའི་པང་དུ་སྦྱོར་ཡུམ་འཁོར་ལོ་རྒྱས་འདེབས་མ་སྐུ་མདོག་མཐིང་སྐྱ་གཅེར་བུ་སྐྲ་གྲོལ་ཞིང་ལང་ཚོས་སྒེག་པ།  གཡས་ཁ་ཊྭཱཾ་འཛིན་པས་ཡབ་ཀྱི་མགུལ་ནས་འཁྱུད་ཅིང་གཡོན་པས་དུང་ཁྲག་ཞལ་དུ་སྟོབ་པ།  ཞབས་གཡོན་བསྐུམ་པས་ཡབ་ཀྱི་སྐེད་ལ་འཁྲིལ་ཞིང་གཡས་བརྐྱང་པའི་སྟབས་ཀྱིས་སྙོམས་པར་འཇུག་པ།  གཟིག་ཤམ་དང་རུས་པའི་ཕྱག་རྒྱ་ལྔས་སྤྲས་པ།  གཉིས་ཀའང་བདེ་སྟོང་གཉིས་མེད་བཟོད་པར་དཀའ་བའི་གཟི་བྱིན་ཉི་མ་འབུམ་གྱི་འོད་ཟེར་ལྟར་འབར་ཞིང་ཡེ་ཤེས་ཀྱི་མེ་དཔུང་ཆེན་པོའི་ཀློང་ན་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་ཡོངས་སུ་རྫོགས་པའི་བདག་ཉིད་ཅན་དུ་གསལ་བའི་ཡབ་ཀྱི་ཐུགས་ཙིཏྟ་རིན་པོ་ཆེ་ཟུར་བརྒྱད་མཆོང་གི་གུར་ཕུབ་པ་ལྟ་བུའི་དབུས་སུ་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་རྡོར་སེམས་མཐིང་གསལ་ཚོན་གང་བ།  ཞལ་གཅིག་ཕྱག་གཉིས་ཀྱི་གཡས་རྡོ་རྗེ་རྩེ་ལྔ་པ་ཐུགས་ཀར་གསོར་ཞིང་གཡོན་དྲིལ་བུ་དཀུར་བརྟེན་པ།  ཞབས་གཡས་བསྐུམ་གཡོན་（16བ）བརྐྱང་སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་ཤིང༌།   དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་རྣམ་པར་སྤྲས་ཏེ་རང་འོད་ཀྱི་ཀློང་ན་མཚན་དཔེའི་གཟི་བྱིན་མཆོག་ཏུ་འབར་བཞིན་བཞུགས་པ།  དེའི་ཐུགས་ཀར་སྲན་མ་བཀས་པ་ཙམ་གྱི་ཉི་མ་ལ་གནས་པའི་རྡོ་རྗེ་སྔོན་པོ་རྩེ་དགུ་པ་ནས་འབྲུ་ཙམ་གྱི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་སྲོག་གི་སྙིང་པོ་ཧཱུཾ་ཡིག་མཐིང་ག་ཡུངས་འབྲུ་ཙམ་དུ་ཕྲ་ཞིང་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་འབྲུ་དགུ་བཻ་ཌཱུརྱ་ཞུན་མའི་མདངས་ཅན་སྤུས་བྲིས་པ་ལྟ་བུས་གཡས་སུ་བསྐོར་བའི་ཙིཏྟའི་རྩ་སྦུབས་ཀྱི་སྒོ་སྲུང་རྟ་མགྲིན་དམར་པོ་ཡུངས་འབྲུ་ཙམ་པདྨ་བྷཉྫ་འཛིན་པ་ཡུམ་དང་བཅས་པས་བསྲུང་བར་བསྒོམ།  གཙོ་བོའི་གཡོན་དུ་པད་ཉི་དགྲ་བགེགས་ཀྱི་གདན་ལ་སྒྲོལ་ཡུམ་ཨེ་ཀ་ཛ་ཊཱི་སྐུ་མདོག་སྨུག་ནག་གཡས་དགྲ་སྙིང་དྲོན་མོ་ཟ་ཞིང་གཡོན་སྡིགས་མཛུབ་ཀྱི་རྩེ་ལས་ལྕགས་སྤྱང་ཁྲ་ཐབས་སུ་འགྱེད་པ།  ཞལ་རབ་ཏུ་གདངས་ཤིང་ཟླ་ཚེས་ལྟ་བུའི་མཆེ་བ་གཅིག་ཐུར་དུ་གཙིགས་པ།  དཔྲལ་བར་ཡེ་ཤེས་ཀྱི་སྤྱན་གཅིག་དམར་ཟླུམ་ཕྱོགས་བཅུར་གཟིགས་པ།  དབུ་སྐྲ་ཁམ་ནག་ཐུར་དུ་གྲོལ་བའི་དབུས་ན་ལྕགས་ཀྱི་རལ་པ་ཉག་གཅིག་གྱེན་དུ་གཟིངས་(17ན)པ།  བྲང་ན་དགྲ་ལ་རིམས་ནད་འབེབས་པའི་ཁྲག་གི་རྒྱུན་འཛག་པའི་ནུ་མ་གཅིག་འཕྱང་བ།  གཅེར་མོ་ཕྱག་རྒྱ་ལྔས་བརྒྱན་ཅིང་འཇའ་སྤྲིན་གྱི་གོས་ཅན།  ཞབས་གཉིས་གཡས་བསྐུམ་གཡོན་བརྐྱང་པའི་གར་སྟབས་ཀྱིས་མེ་དཔུང་གི་ཀློང་དུ་བཞུགས་པ།  གཙོ་བོའི་སྤྱི་བོར་འཇིགས་བྱེད་ག་རུ་ཌ་མཐིང་ནག་གནམ་ལྕགས་རྡོ་རྗེའི་རྭ་དང་མཆུ་སྡེར་ཅན་གྱི་རྭ་བར་རིགས་བདག་ཀུན་ཏུ་བཟང་པོ་མཐིང་གསལ་མཉམ་བཞག་སྐྱིལ་ཀྲུང་ཅན་ཡུམ་བཟང་མོ་དཀར་མོས་འཁྱུད་པ་གཉིས་ཀའང་གཅེར་བུ་མཚན་དཔེའི་གཟི་བྱིན་འབར་བ་ཡེ་ཤེས་འོད་ལྔ་འཁྲིགས་པའི་ཀློང་དུ་བཞུགས་པར་བསམ།  གཙོ་བོའི་གཡས་དང་ཕྱི་རོལ་གྱི་རྩིབས་བཞི་ལ་པད་ཉི་དགྲ་བགེགས་ཕོ་མོ་བསྣོལ་བའི་སྟེང་དུ་གཙོ་བོའི་ཐུགས་ཡེ་ཤེས་ལྔའི་སྒྱུ་འཕྲུལ་ལས་རང་ཤར་བ་ཁྲོ་རྒྱལ་ཀཱི་ལ་རིགས་ལྔ་ཐམས་ཅད་ཀྱང་སྐུ་སྟོད་ཞལ་གསུམ་ཕྱག་དྲུག་པ་སྐེད་པ་ཆུ་སྲིན་གྱི་ཁ་ལས་འཐོན་པའི་སྐུ་སྨད་ཕུར་བུ་འབར་བའི་དབལ་ཅན།  ཕྲིན་ལས་སོ་སོའི་རིགས་དང་བསྟུན་པའི་སྐུ་མདོག་ཕྱག་མཚན་རྒྱན་ཆ་ལུགས་རྣམས་གཞུང་ཚིག་ལྟར་གསལ་གདབ་བོ།  །གཉིས་པ་ནི།  དེའི་ཕྱི་རོལ་གྱི་འཁོར་ལོ་རྩིབས་བཅུ་པའི་དབུས་(17བ)སུ་པདྨ་ཉི་ཟླ་འབར་བར་ཕྱོགས་སྐྱོང་བཅུ་ཆུང་མར་བཅས་པ་བཀུག་ནས་གདན་དུ་བཏིང་བའི་སྟེང་དུ་བདག་ཉིད་གཙོ་བོ་ཡབ་ཡུམ་སྙོམས་པར་ཞུགས་པའི་མཁའ་གསང་ནས་བདེ་ཆེན་བྱང་ཆུབ་སེམས་ཀྱི་རང་བཞིན་ཧཱུཾ་ཡིག་སྦྲེལ་མ་བཅུ་སོ་སོའི་གནས་སུ་བབས་པ་ལས་སྟེང་གི་ཁྲོ་བོ་ཤར་སྟོད་དང༌།  འོག་གི་ཁྲོ་བོ་ནུབ་སྨད་དུ་བྱས་པའི་ཁྲོ་བོ་བཅུ་ཡབ་ཡུམ་སྤྲུལ་པའི་ཕྲ་མེན་ཟ་གསོད་དང་བཅས་པ་རྒྱན་ཆ་ལུགས་ཡོངས་སུ་རྫོགས་པར་གསལ་གདབ་བོ།  །གསུམ་པ་ནི།  དེའི་ཕྱི་རོལ་ཟླ་གམ་དམར་ནག་ཉེར་གཅིག་ལ་གནས་པའི་པད་ཉི་དགྲ་བགེགས་ཀྱི་གདན་ལ་གཙོ་བོ་ཡབ་ཡུམ་སྙོམས་པར་ཞུགས་པའི་བྱང་སེམས་འོད་ཀྱི་གོང་བུ་ཧཱུཾ་ཡིག་གི་རང་བཞིན་ཅན་སྤྲོས་ཏེ་འཁོད་པ་ལས་བྱུང་བའི་འོད་ཟེར་གྱི་རྩེ་ལས་ཕུར་བུ་ཕྲ་མོ་དཔག་ཏུ་མེད་པ་འཕྲོས།  ཁམས་གསུམ་སེམས་ཅན་ཐམས་ཅད་ཀྱི་སྒོ་གསུམ་དང་རིགས་དྲུག་གི་བག་ཆགས་སྣང་ཞེན་ཐམས་ཅད་བསྲེག་ཅིང་སྦྱངས།  ཐམས་ཅད་དཔལ་ཆེན་པོའི་རང་བཞིན་དུ་གྱུར།  སླར་འདུས་ཧཱུཾ་ཡིག་རྣམས་ལ་ཐིམ་སྟེ་ཡོངས་སུ་གྱུར་པ་ལས་སྲས་མཆོག་ཉེར་གཅིག་འབར་བའི་ཆ་ལུགས་ཡོངས་སུ་རྫོགས་པ་དང༌།  སླར་ཡང་གཙོ་བོ་ཡབ་ཡུམ་སྙོམས་(18ན) པར་ཞུགས་པའི་བྱང་སེམས་འོད་ཀྱི་གོང་བུ་ལས་ཛཿཧཱུཾ་བཾ་ཧོ་བཞི་སྤྲོས་ཏེ་ནང་སྒོ་བཞིར་འཁོད་པ་ལས་ཡེ་ཤེས་ཀྱི་སྒོ་མ་བཞི།  དཀྱིལ་འཁོར་བར་ཁྱམས་འཁོར་ལོ་རྩིབས་བཅུ་གཉིས་ཀྱི་ཕྱོགས་བཞིའི་རྩིབས་དབུས་བཞིར་ཤྭ་ན་མ་བཞི།  རྩིབས་སྟོད་བཞིར་རེ་ཏཱི་མཆེད་བཞི།  རྩིབས་སྨད་བཞིར་ས་བདག་མ་བཞི།  ཕྱི་སྒོ་བཞིར་སྐྱེས་བུ་གིང་བཞི།  ཕྱི་རོལ་དུར་ཁྲོད་ཀྱི་ནང་རྡོ་རྗེའི་བྲག་རིའི་སྟེང་གི་ཁོར་ཡུག་ལ་དབང་ཕྱུག་ཉེར་བརྒྱད་མ་སྲིང་མཁའ་འགྲོའི་ཚོགས་རྣམས་ཀྱང་རྗེ་ལས་འབངས་དང་ཉི་མ་ལས་ཟེར་བཞིན་རང་བཞིན་གྱིས་གནས་པར་བསྒོམ་མོ།  །གཉིས་པ་ཁམས་གསུམ་གྱི་སྲོག་ལ་དབང་བསྐུར་ཞིང་སྲོག་གི་ཡེ་ཤེས་སེམས་དཔས་སྲོག་ལ་དབང་བསྐུར་བ་ནི།  དཀྱིལ་འཁོར་ལྷ་ཚོགས་རྣམས་ཀྱི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུཾ་སྔོན་པོ་རེ་རེས་མཚན་པར་བསམ་ལ་གསོལ་བ་བཏབ་པས།  འབྲུ་གསུམ་ལས་འོད་ཟེར་དཔག་ཏུ་མེད་པ་འཕྲོས་ཕྱོགས་བཅུའི་རྒྱལ་བ་རྣམས་ལ་མཉེས་པའི་མཆོད་པ་ཕུལ།  སྐུ་གསུང་ཐུགས་ཀྱི་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་བསྡུས་ཏེ་གནས་གསུམ་གྱི་ས་བོན་ལ་ཐིམ་པས་ལུས་ངག་ཡིད་གསུམ་གྱི་གཟི་བྱིན་ནུས་པ་མཐུ་སྟོབས་མཆོག་ཏུ་འབར།   (18བ)བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་ཉིད་དུ་གྱུར་པར་བསམ།  སླར་ཡང་ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས།  རྒྱལ་བ་སྐུ་ལྔའི་བདག་ཉིད་འཁོར་དང་བཅས་པ་རྣམས་ལ་ཕོག་པས་ཐུགས་རྒྱུད་བསྐུལ།  བདེ་བར་གཤེགས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་དཔའ་བོ་འབྲུ་ལྔའི་རང་བཞིན་ཆར་ལྟར་བབས་པ་མགོ་བའི་གནས་ལྔར་འདུས་ཏེ་ཞུ་བ་ལས་བྱུང་བའི་ཧཱུཾ་ཨོཾ་སྭཱ་ཨཱཾ་ཧཱ།  མཱུཾ་ལཱཾ་མཱཾ་པཱཾ་ཏཱཾ་རྣམས་སུ་གྱུར།  དེ་དག་ལས་ཀརྨ་ཧེ་རུ་ཀ་གཙོ་བོར་གྱུར་པའི་རིགས་ལྔ་ཡབ་ཡུམ་གྱི་སྐུར་གྱུར་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་ལུས་ཀྱི་ནང་གང༌།  ཁྲག་འཐུང་ཡབ་ཡུམ་རྣམས་ཐོད་པའི་ཁང་བུར་བཞུགས་པས་དབུ་བརྒྱན་ཏེ་ཡེ་ཤེས་ལྔའི་དབང་བསྐུར་ཡོངས་རྫོགས་པར་བསྒོམ།  ཡང་ཐུགས་སྲོག་འོད་ཀྱིས་ཁམས་གསུམ་ལ་ཕོག་པས་རིགས་དྲུག་པོ་ཨ་ནྲྀ་སུ་ཏྲི་པྲེ་དུཿར་གྱུར།  དེ་འབྱུང་བའི་ཡི་གེ་རྃ་ཡྃ་ཁྃ་གིས་བསྲེག་གཏོར་སྦྱངས་པས་ཐམས་ཅད་དཀྱིལ་འཁོར་གསུམ་གྱི་ལྷར་གྱུར་པ་ནི་ཁམས་གསུམ་ལ་དབང་བསྐུར་བ།  དེ་རྣམས་འོད་ཟེར་དང་བཅས་པ་ཚུར་འདུས་སྙིང་གའི་རྟ་མགྲིན་ལ་ཐིམ་པས་བཀྲག་དང་གཟི་བརྗིད་ཀྱི་དཔལ་དུ་འབར་བར་གྱུར་པ་ནི་བདག་(19ན)གི་སྲོག་ལ་དབང་བསྐུར་བ།  དེའི་རྐྱེན་གྱིས་རྟ་མགྲིན་ཡབ་ཡུམ་ཟག་མེད་བདེ་ཆེན་གྱི་རོལ་པའི་བྱང་སེམས་ཡེ་ཤེས་སེམས་དཔའ་ལ་ཐིམ་པས་དེ་ཉིད་བཀྲག་དང་ལྡན་པར་བྱུང་བའི་གཟི་བརྗིད་ཡེ་ཤེས་ཀྱི་བཅུད་ཐམས་ཅད་རྡོ་རྗེའི་ལྟེ་བའི་ཐུགས་སྲོག་རྣམ་པར་མི་རྟོག་པའི་ཡེ་ཤེས་ཧཱུཾ་ཡིག་ལ་ཕོག་པས་བཀྲག་དང་གཟི་མདངས་འོད་དུ་འབར་བ་ནི་ཡེ་ཤེས་སེམས་དཔས་སྲོག་ལ་དབང་བསྐུར་བ་སྟེ།  སྟོང་སྲོག་ཆོས་སྐུའི་ཀློང་ཆེན་པོར་འཕོ་འགྱུར་གཞོམ་གཞིག་མེད་པ་གཉུག་མ་དོན་གྱི་སྲོག་རྩ་གྲུབ་པར་བལྟའོ།  །ཙིཏྟའི་སྒོ་སྲུང་རྟ་མགྲིན་དུ་བསྐྱེད་པ་འདི་རྒྱུད་དོན་ཤིན་ཏུ་གསང་བའི་དབང་གིས་བཀའ་གཏེར་ཕུར་གཞུང་ཕལ་མོ་ཆེར་མན་ངག་ཏུ་གབ་པ་བཞིན་འདིར་ཡང་ལྷ་བསྐྱེད་སྔགས་དམིགས་སོགས་ཀྱི་སྐབས་སུ་སྒྲོས་ཙམ་ཡང་མ་བསྟན་པ་སྨད་ལས་ཀྱི་དམར་བྱང་དུ།  དབང་ཆེན་གསང་བའི་ཧེ་རུ་ཀ༔  ཞེས་མན་ངག་གབ་དོན་དུ་བསྟན་པར་མཛད་པ་སྟེ།  གསང་བ་འདི་ནི་དེང་དུས་ཀྱི་ཕུར་པ་མཁན་པོ་ཕལ་ཆེར་ཞིག་གིས་ཐོས་པའི་ཡུལ་ཙམ་དུའང་མ་གྱུར་པར་སྣང་ངོ༌།  །གསུམ་པ་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་མཆོད་ཅིང་བསྙེན་པས་དངོས་གྲུབ་ཀྱི་བཅུད་བླང་བ་ལ་གསུམ།  སྤྱན་འདྲེན་པ་སོགས་ཆོ་ག་རྫོགས་པའི་ལས་རིམ།  བསྙེན་(19བ)པའི་མན་ངག    །རྗེས་ཀྱི་བྱ་བའོ།  །དང་པོ་ལ།  སྤྱན་འདྲེན་པ་ནི།  རང་ཉིད་དམ་ཚིག་པའི་ཐུགས་ཀའི་འོད་ཟེར་གྱིས་བསྐུལ་བས་རྒྱལ་བ་རྣམས་ཆོས་ཀྱི་དབྱིངས་སྤྲོས་པ་དང་བྲལ་བའི་ངང་ལས་གཟུགས་ཀྱི་སྐུ་འབར་བའི་ཕྱག་རྒྱ་རྡོ་རྗེ་གཞོན་ནུའི་ལྷ་ཚོགས་ཀྱི་སྐུར་བཞེངས་ནས་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་བྱོན་པར་བསམ།  བཞུགས་སུ་གསོལ་བ་ནི།  དེ་ལྟར་སྤྱན་དྲངས་པའི་རང་བཞིན་ཡེ་ཤེས་ཀྱི་འཁོར་ལོ་ཉིད་ཏིང་ངེ་འཛིན་གྱི་དཀྱིལ་འཁོར་ལ་གཉིས་སུ་མེད་པར་ཐིམ་སྟེ་དངོས་གྲུབ་མ་ཐོབ་ཀྱི་བར་དུ་བརྟན་པར་བཞུགས་པར་མོས།  ཕྱག་འཚལ་བ་ནི།  ཡེ་ཤེས་ཀྱི་དཀྱིལ་འཁོར་ཆེན་པོ་མངོན་སུམ་དུ་མཇལ་བ་ལ་ཤིན་ཏུ་སྤྲོ་ཞིང་རང་བཞིན་གཉིས་མེད་དུ་རྟོགས་པའི་ཚུལ་གྱིས་སོ།  །མཆོད་པ་འབུལ་བ་ནི།  ཐུན་མོང་ཉེར་སྤྱོད་འདོད་ཡོན་གྱི་མཆོད་པ་ལ་འཕྲུལ་དགའི་ལོངས་སྤྱོད་དང་མཚུངས་པར་རང་གི་ཐུགས་ཀ་ནས་སྤྲོས་པའི་ལྷ་མོ་བསམ་གྱིས་མི་ཁྱབ་པས་གོང་དུ་བྱིན་གྱིས་བརླབས་པའི་མཆོད་རྫས་དལ་གྱི་བར་ཁྱམས་ཁོར་ཡུག་རྣམས་སུ་གནས་པ་དག་ལས་འཛད་མེད་དུ་བླངས་ཏེ་ལྷ་ཚོགས་རྣམས་ལ་མཆོད་པའི་སྤྲིན་ཆེན་པོ་སྟོབ་པ་དང༌།  ཐུན་མིན་གདུག་ཅན་བསྒྲལ་བའི་ཕུང་པོ་རང་བྱུང་གི་ཉེ་བར་སྤྱོད་པའི་དམ་རྫས་ལ་རོལ་པས་དགྱེས་པ་ཆེན་པོ་བསྐྱེད།   (20ན) པར་བསམ།  བདུད་རྩི་འབུལ་བ་ལ།  སྨན་གྱི་ཞལ་བུ་ལག་གཡས་སུ་ཐོགས་ཏེ།  རང་བྱུང་བྷཉྫ་འབར་བར་འཆི་མེད་མཆོག་གི་བདུད་རྩིས་གཏམས་པའི་དབུས་སུ་ཨོཾ་ཨཱཿཧཱུཾ་གསུམ་བརྩེགས་མར་གནས་པར་བསམ་ལ་སྨན་གྱི་ཆེ་བ་བརྗོད་ཅིང༌།  ལག་པ་གཡོན་པའི་མཐེབ་སྲིན་མ་དང་ཨ་ལས་ཉི་ཟླའི་གའུ་འབྲུ་བཅུས་མཚན་པར་གྱུར་པའི་སྐྱོགས་ཀྱིས་བདུད་རྩི་ནས་བླངས་ཏེ་ལྷ་ཚོགས་རྣམས་ལ་ཕུལ་བས་བདུད་རྩི་མུ་ཏིག་དཀར་པོ་དྲི་མ་མེད་པ་ལྟ་བུའི་རང་བཞིན་དུ་འཕྲོས་ནས་ལྷ་ཚོགས་རྣམས་ཀྱི་ལྗགས་ལ་ཐིམ་པར་བསམ།  ཐོག་མར་སྟེང་གི་ནམ་མཁར་འཇའ་འོད་ཐིག་ལེའི་ཀློང་ན་སློབ་དཔོན་ཆེན་པོ་པདྨ་ཐོད་ཕྲེང་རྩལ་ལ་བརྒྱུད་པ་དགུ་ལྡན་གྱི་བླ་མ་རིག་འཛིན་རྣམས་སྤྲིན་ཕུང་གཏིབས་པ་ལྟར་བཞུགས་པར་མོས་ལ་འབུལ།  དེ་ནས་ཡི་དམ་བཀའ་སྲུང་དང་བཅས་པ་ལ་ཕུལ་བས་དགྱེས་པ་མཆོག་ཏུ་བསྐྱེད།  ཁམས་གསུམ་གྱི་གཏི་མུག་ཐམས་ཅད་བཅོམ་པར་བསམ་ཞིང༌།  མཐར་མཉེས་ནས་སྐྱེས་ལན་གྱི་ཚུལ་དུ་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་གནས་ནས་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་ཆར་བཞིན་བབས་ཏེ་བྷཉྫའི་ནང་གི་ས་བོན་གསུམ་ལ་ཐིམ་པས་ཡིད་བཞིན་གྱི་ནོར་བུ་རིན་པོ་ཆེ་ལྟར་དངོས་གྲུབ་རྩོལ་མེད་དུ་འབྱུང་བའི་རང་བཞིན་ཅན་(20བ)དུ་གྱུར་པ་དེ་ཉིད་མཐེབ་སྲིན་ཉི་ཟླའི་གའུས་བླངས་ཏེ་རང་གི་གནས་གསུམ་དུ་བཞག་པ་ཙམ་གྱིས་སྐུ་གསུང་ཐུགས་ཀྱི་དངོས་གྲུབ་ཐོབ།  མཐར་ལྕེ་པདྨའི་འདབ་མར་རྡོ་རྗེ་རྩེ་གསུམ་པ་ཉལ་སྟབས་སུ་གནས་པའི་ར་དབུས་མའི་ཁོང་གསེང་གི་རྩེ་མོ་ཧཱུཾ་གིས་མཚན་པ་ལས་བདུད་རྩི་བརྒྱུད་དེ་ལུས་ཀྱི་ནང་ཐམས་ཅད་གང་བས་མཆོག་ཐུན་མོང་གི་དངོས་གྲུབ་མ་ལུས་པ་ཐོབ་པར་བསམ་ལ་བདུད་རྩི་མྱང་ངོ༌།  །གཏོར་མ་འབུལ་བ་ལ།  སྣང་སྲིད་དམ་རྫས་གཏོར་མའི་རང་བཞིན་དུ་གྱུར་པ་དང་དངོས་སུ་བཤམས་པའི་གཏོར་མ་འདོད་ཡོན་གྱི་ཕུང་པོར་སྤེལ་བ་ཕུལ་བས་དགྱེས་ཤིང་ཚིམས་ནས་དངོས་གྲུབ་གང་འདོད་རྩོལ་མེད་དུ་ཐོབ།  ཁམས་གསུམ་གྱི་ཞེ་སྡང་ཐམས་ཅད་བཅོམ་པར་བསམ།  རཀྟ་འབུལ་བ་ལ།  མདུན་དུ་གནོད་ཅིང་འཚེ་བའི་དགྲ་བགེགས་ཀྱི་རྣམ་པར་ཤེས་པའི་ངོ་བོ་ཐིག་ལེ་དམར་པོ་ནྲྀ་དང་ཏྲི་ཡིག་གིས་མཚན་པ་ཞིག་ཏུ་ཧྲིལ་ཧྲིལ་འདུག་པ་དེ་ལས་འོད་འཕྲོས་པས་གནོད་བྱེད་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་བཀུག་ནས་ཐིམ་སྟེ་ཡོངས་སུ་གྱུར་པ་ལས་ཁྲག་གི་གྲོད་ཐུམ་རི་རབ་ཙམ་པ་ཞིག་ཏུ་གྱུར་པར་བསམ་ལ་སྲས་མཆོག་གི་ཕུར་རུ་འདྲིལ་ཞིང༌།  ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཤ་ཏྲུཾ་མཱ་ར་ཡ་ཧཱུཾ་ཕཊ༔  ཅེས་བརྗོད་དེ་ཕུར་པ་བཏབ་པས་དེ་རྡོལ་བ་ལས་བྱུང་བའི་(21ན)ཁྲག་རྒྱུན་སྔར་བྱིན་གྱིས་བརླབས་པའི་རཀྟ་དང་འདྲེས་ནས་སྟོང་གསུམ་ཁྲག་གི་རྒྱ་མཚོར་འཁྱིལ་བ་ལས་རཀྟའི་ལྷ་མོ་འཕྲོ་བས་དཀྱིལ་འཁོར་པ་མཆོད་པས་རབ་ཏུ་མཉེས་པ་ཆེན་པོར་གྱུར།  ཁམས་གསུམ་གྱི་འདོད་ཆགས་ཐམས་ཅད་ཟད་པར་མཛད་པར་བསམ།  བསྒྲལ་བའི་མཆོད་པ་ལ།  བདག་གི་ཐུགས་ཀ་ནས་ལས་བྱེད་ཕོ་ཉ་གྲངས་མེད་པ་ཕྱོགས་བཅུར་འཕྲོས་པས་ཞིང་བཅུ་ཚང་བའི་དགྲ་བགེགས་ཐམས་ཅད་བཀུག་ཅིང་བསྒྲལ་ཏེ་རྣམ་ཤེས་ཆོས་ཀྱི་དབྱིངས་སུ་སྤར།  ཤ་ཁྲག་རུས་པ་ལྷ་ཚོགས་རྣམས་ཀྱི་ཞལ་དུ་བསྟབ་པས་རོལ་པ་ཆེན་པོའི་དགའ་སྟོན་གྱིས་ཚིམས་ཤིང་དུག་གསུམ་རང་གནས་སུ་དག་ནས་བསྒྲལ་བྱའི་ཚོགས་གཉིས་ལྷུན་གྱིས་རྫོགས་པར་མོས།  སྦྱོར་སྒྲོལ་གྱི་མཆོད་པ་ལ།  རང་ལས་སྤྲུལ་པའི་རིག་མ་སྒེག་མཛེས་ཆགས་པའི་ཉམས་ལྡན་འཁོར་ལོའི་གྲངས་དང་མཉམ་པར་སྤྲོས་ནས་ཐབས་ལ་ཤེས་རབ་ཀྱི་རྣམ་པར།  ཤེས་རབ་ལ་ཐབས་ཀྱི་རྣམ་པར་གྱུར་ནས་རྗེས་ཆགས་ཀྱིས་སྙོམས་པར་ཞུགས་པས་དབྱིངས་དང་ཡེ་ཤེས་གཏན་གཏུན་གྱི་སྦྱོར་བས་གཟུང་འཛིན་གྱི་དགྲ་བགེགས་རྣམས་བསྒྲལ་ཞིང་བཅོམ་སྟེ་རྟོག་ཚོགས་བདེ་བ་ཆེན་པོའི་དབྱིངས་སུ་སྦྱོར་བས་བདེ་སྟོང་དགའ་བ་བཞིའི་རོས་ཚིམས་པར་བསམ།   (21བ)འདིར་ལྷ་ཞལ་གསུམ་པའི་རིགས་ལ་བདུད་རྩི་གཡས་ཞལ།  རཀྟ་གཡོན་ཞལ།  གཏོར་མ་དང་བསྒྲལ་བའི་ཤ་ཁྲག་དབུས་ཞལ་དུ་སྟོབ་པར་དམིགས་ཤིང་དཔའ་བོ་གཅིག་པ་ལ་ནི་དབྱེ་བ་མེད་དོ།  །མཐར་མཆོད་པའི་ལྷ་མོ་རྣམས་རང་ལ་བསྡུས་ཏེ་དོན་དམ་པར་མཆོད་བྱ་མཆོད་བྱེད་མཆོད་ཡུལ་དུ་འཛིན་པའི་སྤྲོས་པ་ཐམས་ཅད་དང་བྲལ་བ་བློ་འདས་བདེ་བ་ཆེན་པོ་ཆོས་ཉིད་བསམ་གྱིས་མི་ཁྱབ་པའི་ཡེ་ཤེས་སུ་རོ་མཉམ་པར་བལྟ་བ་ནི་དོན་གྱི་མཆོད་པ་བླ་ན་མེད་པའོ།  །བསྟོད་པ་ནི།  རང་གི་སྙིང་ག་ནས་ཤེས་པ་ཆ་གཉིས་སུ་ཕྱེ་བའི་ཆ་གཅིག་འཁོར་བ་ན་ཆེ་བ་ཚངས་པ་དང་བརྒྱ་བྱིན་དབང་ཕྱུག་ཆེན་པོ་སོགས་དང༌།  ཆ་གཅིག་འདས་པ་ན་ཆེ་བ་འཇམ་དཔལ་དབྱངས་དང་འཇིག་རྟེན་དབང་ཕྱུག་གསང་བའི་བདག་པོ་ལ་སོགས་པར་སྤྲུལ་ནས་དཀྱིལ་འཁོར་གྱི་བར་ཁྱམས་ཁོར་ཡུག་རྣམས་སུ་ལྷགས་ཏེ།  དེ་རེ་རེ་ལའང་ཡང་སྤྲུལ་གྱི་འཁོར་ཚོགས་བསམ་གྱིས་མི་ཁྱབ་པས་བསྐོར་ནས་རོལ་མོའི་བྱེ་བྲག་དཔག་ཏུ་མེད་པའི་སྒྲ་ལས་དྲངས་ནས་ལྷ་ཚོགས་རྣམས་ཀྱི་ཆེ་བའི་ཡོན་ཏན་མཐའ་ཡས་པ་ལ་བརྗོད་བྱར་བྱས་པའི་བརྗོད་བྱེད་ཀྱི་གླུ་དབྱངས་སྙན་ཅིང་བར་བརྗིད་ལ་ཟིལ་ཆགས་པས་མངོན་པར་བསྟོད་པར་བསམ་ཞིང༌།  བསྟོད་པའི་རྐྱེན་གྱིས་ལྷ་ཚོགས་རྣམས་ཀྱི་ཆེ་བ་བསྐྱེད་ཅིང་གཟི་བྱིན་མཆོག་ཏུ་འབར་ཏེ་(22ན)འཁོར་འདས་ཀྱི་ཞིང་ན་འགྲན་པའི་ཟླ་དང་བྲལ་བར་མོས་ལ་མཐར་བསྟོད་བྱེད་ཀྱི་ལྷ་རྣམས་རང་ལ་བསྡུ།  དེ་ལྟར་མཆོད་ཅིང་བསྟོད་པ་ལས་བྱུང་བའི་འབྲས་བུ་མཆོག་གི་དངོས་གྲུབ་ལ་ཡིད་རབ་ཏུ་གདུང་བའི་སྒོ་ནས་གསོལ་བ་བཏབ་པས་སྐུ་གསུང་ཐུགས་ཀྱི་དམ་ཚིག་གི་ཕྱག་རྒྱ་དང་གཉིས་སུ་མེད་པར་བྱིན་གྱིས་བརླབས་པར་མོས།  ནོངས་བཤགས་ནི།  ཆོ་གའི་ཡན་ལག་མ་ཚང་བ་སོགས་ཉམས་ཆག་ཏུ་གྱུར་པའི་ཚོགས་ལ་གནོང་འགྱོད་དྲག་པོས་བཟོད་པར་གསོལ་བས་དག་ཚངས་སུ་གྱུར་པར་བསམ་མོ།  །གཉིས་པ་བསྙེན་པའི་མན་ངག་ལ་གཉིས་ཀྱི།  དང་པོ་ཐུགས་དམ་བསྐུལ་བ་ནི།  དཀྱིལ་འཁོར་གསུམ་གྱི་ལྷ་ཚོགས་ཐམས་ཅད་བསྙེན་སྒྲུབ་ཛཔྲ་ཀྱི་རིམ་པ་ལ་ཐུགས་དམ་བསྐུལ་བས་ཏིང་ངེ་འཛིན་གྱི་འཕྲོ་འདུ་ལ་དགོངས་པ་མངོན་དུ་ཕྱོགས་པར་བསམ།  གཉིས་པ་མན་ངག་དངོས་ལ་ལྔ་ལས།  དང་པོ་སྐུ་ཕྱག་རྒྱ་ལ་དམིགས་པའི་ཛཔྲ་དགོངས་ལའང་གསུམ།  རྣམ་པ་གསལ་བ།  ང་རྒྱལ་བརྟན་པ།  རྣམ་དག་དྲན་པའོ།  །དང་པོ་ནི།  རྟེན་འབྱུང་བ་རིམ་བརྩེགས་དུར་ཁྲོད་གཞལ་ཡས་ཁང་ལྷའི་གདན་དང་བཅས་པ་ནས་བརྟེན་པ་ལྷ་ཚོགས་རྣམས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་དང་བཅས་པའི་བར་རེས་ནང་ནས་ཕྱི།  རེས་(22བ)ཕྱི་ནས་ནང༌།  ཐོག་མར་ཕྲ་བ་རེ་རེ།  དེ་ནས་རགས་པ་སྤྱི།  མཐར་ཕྲ་རགས་གཅིག་ཅར་དུ་གསལ་མ་ཐེབས་ཀྱི་བར་དུ་བསྒོམ།  དེའང་ལས་དང་པོ་པས་ཐོག་མ་ནས་ཡིད་ཡུལ་དུ་གསལ་ཐེབས་དཀའ་ན་དམིགས་རྟེན་བྲིས་སྐུ་མཚན་ཉིད་དང་ལྡན་པ་བཀྲམ་ལ་མིག་ཅེ་རེ་མི་གཡོ་བར་བལྟ།  དེས་མིག་ལ་ལྷ་སྐུའི་གསལ་སྣང་ལྷག་ལྷག་འཆར་ན་ཧ་ཅང་འཆར་ཟིན་མི་བྱེད་པར་དེ་ཀའི་གསལ་སྣང་མ་འགགས་པའི་ངང་ལ་ཤིག་གེར་མཉམ་པར་བཞག    །རེ་ཞིག་བྱིངས་ཉམས་བྱུང་ནའང་མི་གསེངས།  དེ་ལྟར་བསྐྱངས་པས་ཇི་ཞིག་ན་མི་རྟོག་པའི་ངང་ལས་ལྷ་སྐུའི་གསལ་སྣང་རང་ཤུགས་སུ་འདྲེན་ནུས་པ་འབྱུང༌།  དེ་ཙ་ན་དམིགས་རྟེན་མི་དམིགས་པར་སྦྱངས་ཏེ་ཡིད་རྩེ་གཅིག་ཏུ་མཉམ་པར་བཞག་བཞིན་པས་ཀཱི་ལ་ཡ་ཡིད་ཀྱིས་བཟླ་ཞིང་སྐྱོ་ན་ངག་བཟླས་ཀྱང་བྱ།  དེ་ལྟར་ཡང་ཡང་བསྒོམ་པས་དང་པོ་ཡིད་ཡུལ་དུ་ལྷའི་རྣམ་པ་ཝལ་ཝལ་གསལ།  དེ་ནས་མཐོང་རེག་གི་མཚན་མ་ཡོད་པ་ལྟར་དབང་པོའི་མངོན་སུམ་དུ་གསལ།  དེ་ནས་ཀྱང་འབད་པས་ལུས་ཀྱི་ཡུལ་དུ་གསལ་བ་ཞེས་བྱ་སྟེ།  རང་ལུས་ཀྱིས་མཚོན་པའི་མ་དག་པའི་སྣང་བ་གཞན་ཀུན་ནུབ་ནས་ལྷ་སྐུའི་གསལ་སྣང་ལ་རྩེ་གཅིག་ཏུ་གནས་ཤིང་ལྷའི་ང་རྒྱལ་བརྟན་(23ན)པོ་འབྱུང༌།  དེ་ལྟར་ཡུལ་གསུམ་གསལ་ནས་སྐུའི་ཆ་ཤས་དང་རྒྱན་ཕྲ་མོ་རེ་རེ་ནས་ཀྱང་གསལ་སྣང་འདོན་ཅིང༌།  ལྷ་སྐུ་ཆེ་ཆུང་དང་མང་ཉུང་དང་རྒྱང་ཉེ་རིང་སོགས་མ་ངེས་པ་ལ་རྩལ་སྦྱངས་པས་ལྷ་གྱད་དུ་གྱུར་པ་ཞེས་བྱ་སྟེ་ཇི་ལྟར་བསྒོམ་ཀྱང་བདེ་བར་འགྱུར་རོ།  །གཉིས་པ་ནི།  རང་གི་མིང་རུས་དངོས་མཚན་ཐ་མལ་དུ་འཛིན་པ་ཆེད་ཀྱིས་སྤངས་ནས།  བདག་ནི་དཔལ་ཆེན་པོ་རྡོ་རྗེ་གཞོན་ནུ་དངོས་ཡིན།  དེའི་ཡོན་ཏན་མཛད་པ་ཕྲིན་ལས་དང་བཅས་པ་ཚང་ངོ་སྙམ་པའི་ང་རྒྱལ་ཤིན་ཏུ་བརྟན་པོ་ལ་བསླབ་བོ།  །གསུམ་པ་ནི།  རྟེན་སྣོད་ཀྱི་རྣམ་དག་ལ།  བགེགས་ཀྱིས་མི་ཚུགས་པའི་སྲུང་འཁོར།  ཆོས་ཀྱི་དབྱིངས་ལས་རང་བྱུང་བའི་ཆོས་འབྱུང༌།  ཡུམ་བཞིའི་མཁའ་ལ་གནས་པའི་འབྱུང་བ་རིམ་བརྩེགས།  ཀུན་གཞི་གནས་སུ་དག་པའི་ཀེང་རུས་ཀྱི་རི་རབ།  ཉོན་མོངས་པའི་རྣམ་རྟོག་དང་བག་ཆགས་བསྲེག་པའི་མེ་དཔུང༌།  གང་གིས་ཀྱང་གཞོམ་དུ་མེད་པའི་རྡོ་ར།  བག་ཆགས་ཀྱི་དྲི་མས་མ་གོས་པའི་པདྨའི་ཕྲེང་བ།  རྣམ་ཤེས་ཚོགས་བརྒྱད་དག་པའི་དུར་ཁྲོད།  ཆོས་ཀྱི་དབྱིངས་ལ་མཚན་འཛིན་གྱི་རྟོག་པས་མི་ཕྱེད་པའི་བཻ་ཌཱུརྱའི་བྲག་རི།  འཁོར་འདས་མཉམ་པར་བརྡལ་བའི་གཞལ་ཡས་ཁང་(24བ)གྲུ་བཞི་པ།  ཡེ་ཤེས་ལྔའི་རྩིག་པ།  དྲན་པ་ཉེ་བར་བཞག་པ་བཞིའི་སྒོ་བཞི།  ཡང་དག་པར་སྤོང་བ་བཞིའི་རྟ་བབ།  རྫུ་འཕྲུལ་གྱི་རྐང་པ་བཞིའི་ཆོས་འཁོར།  རྟོག་ཚོགས་དག་པའི་རི་དྭགས་ཆོས་ཉན།  འདོད་ཡོན་མ་སྤངས་རྒྱན་དུ་རོལ་པའི་འདོད་སྣམ།  ཆོས་ཐམས་ཅད་མཉམ་ཉིད་དུ་རྫོགས་པའི་ཕ་གུ  །ཆོས་ཀྱི་སྐུ་ལ་དྲི་མས་མ་གོས་ཤིང་རྩལ་མ་འགགས་པའི་དྲྭ་བ་དང་དྲྭ་ཕྱེད།  ཐུགས་རྗེ་མི་འགགས་པའི་ཤར་བུ།  ཡེ་ཤེས་ཀུན་ལ་ཁྱབ་པའི་མདའ་ཡབ།  འཕགས་པའི་ལམ་ཡན་ལག་བརྒྱད་ཀྱི་ཀ་གདན།  ཐེག་པ་བརྒྱད་ཀྱི་ཀ་བ།  འབྲས་བུ་བརྒྱད་ཀྱི་གདུང་མ།  ཆོས་ཕུང་བརྒྱད་ཁྲིའི་དྲལ་ཁེབས།  དགོས་འདོད་ཡིད་བཞིན་དུ་སྐོང་བའི་རྒྱན་སྣ་ཚོགས།  ཐབས་དང་ཤེས་རབ་གཉིས་སུ་མཚོན་པའི་ཕོ་བྲང་ཕྱི་ནང་གཉིས།  སྐུ་གསུམ་མཚོན་པའི་ཐོད་པ་སྐམ་རྙིང་རློན་པའི་རྩིགས་པ་སུམ་རིམ།  སྐྱེ་མེད་སྟོན་པའི་གནམ་ལྕགས་ཀྱི་གཟེར།  དུག་གསུམ་དག་པའི་ཤ་ཆེན་ཁྲག་ཞག་གི་ཞལ་བ།  ལྷ་ཀླུ་གཟའ་དང་རྒྱུ་སྐར་རྣམས་དབང་དུ་སྡུད་པའི་དེ་དག་གི་ཀ་གདུང་དྲལ་ཕྱམ།  བདག་འཛིན་གྱི་སྤྲོས་པ་གཅོད་པའི་དུར་ཁྲོད་ཀྱི་རྒྱན་སྣ་ཚོགས།  གང་ལའང་ཞེན་པ་བྲལ་བའི་ཙིཏྟ།  བདེ་སྟོང་གཉིས་སུ་(24ན)མེད་པའི་བུམ་པ།  ས་ལམ་གཅིག་ཅར་རྫོགས་པའི་བྲེ།  སྤྲུལ་པས་དོན་གང་འདུལ་དུ་མཛད་པའི་ཆོས་འཁོར།  ལོངས་སྤྱོད་རྫོགས་པའི་སྐུར་ལྷུན་གྱིས་གྲུབ་པའི་གདུགས།  ཆོས་སྐུ་ཐིག་ལེ་ཉག་གཅིག་གི་ཏོག་ཏེ།  མདོར་ན་འཁོར་བ་མ་སྤངས་པར་སངས་རྒྱས་པའི་བརྡ་དོན་རྟེན་གྱི་བཀོད་པ་དང༌།  བརྟེན་པ་ལྷའི་རྣམ་དག་ལ།  ལྷན་སྐྱེས་ཀྱི་རིག་པ་ཡེ་ཤེས་རྡོ་རྗེ་གཞོན་ནུའི་ངོ་བོ་ཉིད་གང་ཞིག    །ཆོས་ཉིད་འགྱུར་བ་མེད་པས་སྐུ་མདོག་མཐིང་ནག  །  དབྱིངས་དང་ཡེ་ཤེས་འདུ་འབྲལ་མེད་པས་ཡབ་ཡུམ་མཉམ་པར་སྦྱོར་བ།  སྐུ་གསུམ་རྣམ་ཐར་གསུམ་གྱི་དབུ་གསུམ།  ཕར་ཕྱིན་དྲུག་གི་ངོ་བོ་ཕྱག་དྲུག    །རྫུ་འཕྲུལ་གྱི་རྐང་པ་བཞིའི་ཞབས་བཞི།  ཕྱག་མཚན་ཐེག་པ་རིམ་དགུ་མཚོན་པའི་རྡོ་རྗེ་རྩེ་དགུ  །ཡེ་ཤེས་ལྔ་མཚོན་པའི་རྩེ་ལྔ།  ཉོན་མོངས་པ་བསྲེག་པའི་མེ་དཔུང༌།  དུག་གསུམ་གཅོད་པའི་ཁ་ཊྭཱཾ་རྩེ་གསུམ།  གདུག་པ་ཅན་རྣམས་འབིགས་པའི་རི་རབ་ཕུར་བུ།  ཆོས་སྐུ་མཚོན་པ་ཐལ་ཆེན་གྱི་ཚོམ་བུ།  ལོངས་སྐུ་མཚོན་པ་རཀྟའི་ཐིག་ལེ།  སྤྲུལ་སྐུ་མཚོན་པ་ཞག་གི་ཟོ་རིས།  གཏི་མུག་འཇོམས་པ་ཐེག་མཆོག་གླང་པོ་ཆེའི་ཀོ་རློན།  འདོད་ཆགས་འཇོམས་པ་མ་ཉམས་བྱང་སེམས་ཞིང་གི་གཡང་གཞི།  ང་(24བ)རྒྱལ་འཇོམས་པ་དཔའ་གཏུམ་ཟ་བྱེད་སྟག་གི་ཤམ་ཐབས།  ཞེ་སྡང་འཇོམས་པ་མཉེན་ལྕུག་འཁྲིལ་ལྡེམ་སྦྲུལ་གྱི་ཆུན་པོ།  ཕྲག་དོག་འཇོམས་པ་ཚར་གསུམ་ཐོད་པའི་ཕྲེང་བའི་ག་ཤ  ཕ་རོལ་བུ་ཕྱིན་པ་དྲུག་གི་རུས་རྒྱན།  གཞི་ལམ་འབྲས་བུའི་ཡོན་ཏན་མཐའ་དག་མཚོན་པའི་གར་གྱི་ཉམས་དགུ་ལ་སོགས་པས་ཁྱད་པར་དུ་བྱས་པས།  གདུལ་བྱ་ཁམས་གསུམ་གྱི་དྲེགས་པ་ཅན་གྱི་བདུད་དང་རཱུ་དྲ་མ་ལུས་པ་འདུལ་བའི་ཆེད་དུ་ཐུགས་ཞི་བ་ཆོས་ཉིད་ཀྱི་ངང་ལས་གཡོ་བ་མེད་པར་ཐུགས་རྗེའི་རྩལ་འབར་བ་ཆེན་པོའི་སྐུར་སྟོན་པས་ཁྲོ་བོ་ཀུན་གྱི་རྗེ་བཙན་དམ་པར་སྣང་བ་དང༌།  དེའི་ཐུགས་རྗེ་ཡེ་ཤེས་ཀྱི་སྒྱུ་འཕྲུལ་ལས་ཤེས་རབ་དབྱིངས་ཀྱི་ཐིག་ལེ་ཟུང་འཇུག་ཕྱག་རྒྱའི་གཟུགས་སུ་སྣང་བའི་སྒྲོལ་ཡུམ་རལ་གཅིག་མ།  སྐུ་ལྔ་ཡེ་ཤེས་ལྔའི་ངོ་བོ་ཀཱི་ལ་རིགས་ལྔ།  སྤང་བྱ་མི་དགེ་བ་བཅུ་དག་ཅིང་གདུལ་བྱ་ཕྱོགས་སྐྱོང་བཅུ་འདུལ་བ་དང་ལམ་ཕར་ཕྱིན་བཅུ་བགྲོད་ནས་འབྲས་བུ་སྟོབས་བཅུ་ལ་མངའ་མཛད་པའི་ཕྱིར་ཁྲོ་བཅུ་ཡབ་ཡུབ་ཟ་གསོད།  སྐུ་གསུང་ཐུགས་ཀྱི་སྤྲུལ་པ་མི་འགགས་པའི་སྲས་མཆོག    །ཚད་མེད་བཞིའི་སྒོ་སྐྱོང༌།  མཚན་མའི་རྟོག་པ་གང་གང་འདུལ་བ་ལ་འདུལ་བྱེད་ཀྱི་བཀོད་པ་དེ་དེར་སྣང་བའི་སྲུང་(25ན)མ་བཀའ་སྡོད་སོགས་རང་ཤར་བ་སྟེ།  མདོར་ན་མཚན་གཞི་རང་སེམས་དེ་བཞིན་ཉིད་གཞིའི་རྡོ་རྗེ་གཞོན་ནུ་ཉིད།  མཚོན་བྱ་འབྲས་བུ་དག་པ་གཉིས་ལྡན་གྱི་རྡོ་རྗེ་གཞོན་ནུའི་ཡོན་ཏན་གྱི་ཁྱད་པར་ཐམས་ཅད།  མཚོན་བྱེད་ལམ་གྱི་རྡོ་རྗེ་གཞོན་ནུའི་སྐུ་མདོག་ཕྱག་མཚན་གཙོ་འཁོར་རྟགས་ཀྱི་ཁྱད་པར་དུ་ཤར་བར་ཐག་བཅད་དེ་བསྒོམ་མོ།  །གཉིས་པ་གསུང་ཡི་གེ་ལ་དམིགས་པའི་ཛཔྲ་དགོངས་ལ་གཉིས།  དམིགས་པའི་འཕྲོ་འདུ་དང༌།  བཟླ་ཐབས་སོ།  །དང་པོ་ལ་གསུམ།  ཡེ་ཤེས་ཀྱི་ལྷ་ཉེ་བར་བསྙེན་པ།  དམ་ཅན་ཉེ་བར་བསྙེན་པ།  ངན་སྔགས་ཉེ་བར་བསྙེན་པའོ།  །དང་པོ་ལ་ལྔ་ལས།  དང་པོ་མགལ་མེ་ཀླད་སྐོར་གྱི་ཚུལ་ནི།  སྔར་གྱི་གསལ་སྣང་བརྟན་པ་གཞིར་བྱས་ནས།  བདག་རྩ་བའི་དཀྱིལ་འཁོར་སེམས་དཔའ་སུམ་བརྩེགས་ཀྱི་ཏིང་ངེ་འཛིན་སེམས་དཔའ་ཧཱུཾ་ཡིག་གི་མཐར་ཀཱི་ལ་ཡ་འབྲུ་དགུ་སྤུས་བྲིས་པ་ཙམ་གཡས་སྐོར་དུ་འཁོད་པ་དེ་ལས་འོད་ཉི་ཟེར་ལྟ་བུ་དཔག་ཏུ་མེད་པ་འཕྲོས།  ཁྲོ་བཅུ་སྲས་མཆོག་སོགས་ཕྱོགས་དུས་ཀྱི་རྒྱལ་བ་སྲས་བཅས་ལ་མཉེས་མཆོད་ཕུལ་ཞིང་ཐུགས་དམ་གྱི་རྒྱུད་བསྐུལ།  རིགས་དྲུག་གི་སེམས་ཅན་ལ་ཕོག་པས་ལས་ཉོན་རྣམ་སྨིན་གྱི་སྒྲིབ་པ་སྦྱངས་ནས་བདེ་ཆེན་གྱི་(25བ)ཞིང་ལ་བཀོད།  དམ་ཅན་སྲུང་མའི་ཚོགས་ལ་ཕོག་པས་སྔོན་གྱི་ཐ་ཚིག་བསྐུལ་ཏེ་ལས་ལ་བཙུད།  རིག་འཛིན་བླ་མ་མཆེད་ལྕམ་རྣམས་ལ་ཕོག་པས་ཐུགས་དམ་དབྱིངས་སུ་བསྐང༌།  དགྲ་བགེགས་ཐམས་ཅད་ལ་ཕོག་པས་གནོད་འཚེའི་གདུག་རྩུབ་ཚར་བཅད།  འོད་ཟེར་སླར་འདུས་ཏེ་དཀྱིལ་འཁོར་གསུམ་ལ་ཐིམ་པས་མཐུ་བསྐྱེད་དབང་ཐོབ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་པ་ཐོབ་པར་བསམ་ཞིང༌།  སྔགས་ཕྲེང་མི་གཡོ་བར་གནས་པ་ལ་སེམས་གཏད་དེ་བཟླ་བ་ནི་བསྙེན་པའི་ཡན་ལག    །ཡང་ཐུགས་ཀའི་སྔགས་ཕྲེང་བར་མ་ཆད་པ་འོད་ཟེར་ལྕགས་སྒྲོག་སྦྲེལ་བ་ལྟ་བུ་ཤད་ཀྱིས་བྱུང་བ་ཡེ་ཤེས་སེམས་དཔའི་ཞལ་བརྒྱུད་རང་གི་ཞལ་ནས་ཐོན།  ཡུམ་གྱི་ཞལ་ནས་སྐུའི་དབྱིབས་བརྒྱུད་གསང་བའི་པདྨོ་ནས་རྡོ་རྗེའི་སྦུབས་བརྒྱུད་སྙིང་གའི་དྭངས་སྲོག་ལ་ཐིམ་པས་བདེ་སྟོང་གི་ཡེ་ཤེས་མཆོག་ཏུ་འབར་པར་བསམ།  ཡང་དེའི་རྐྱེན་གྱིས་སྔགས་ཕྲེང་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས་སངས་རྒྱས་ཀྱི་ཞིང་ཐམས་ཅད་ཁྱབ།  རྒྱལ་བ་སྲས་དང་བཅས་པ་མཆོད་ཅིང་དེ་(26ན)ངག་གི་དབང་བྱིན་དངོས་གྲུབ།  སྣང་སྲིད་ཁམས་ཀྱི་དྲེགས་པ་ཅན་རྣམས་ཀྱི་ཚེ་བསོད་དཔལ་འབྱོར་མངའ་ཐང༌།  འབྱུང་བ་ལྔའི་དྭངས་བཅུད་བཀྲག་མདངས།  སྣོད་བཅུད་ཀྱི་དགེ་མཚན་དཔལ་ཡོན་མ་ལུས་པ་ཐམས་ཅད་འོད་ཟེར་ཁ་དོག་སྣ་ཚོགས་སྤྲིན་ཕུང་ལྟ་བུའི་རྣམ་པར་བསྡུས་ཏེ་དྭངས་སྲོག་ལ་ཐིམ་པས་མཐུ་རྩལ་གཟི་བྱིན་ནུས་པ་མཆོག་ཏུ་འབར་བར་བསམ་ཞིང་སྔགས་ཕྲེང་རྒྱུན་མི་འཆད་པར་མགལ་མེ་ལྟར་འཁོར་བ་ལ་སེམས་གཏད་དེ་བཟླ་བ་ནི་ཉེ་བར་བསྙེན་པའི་ཡན་ལག་གོ  །གཉིས་པ་བུང་བ་ཚང་ཞིག་གི་ཚུལ་ནི།  བདག་གི་ཞལ་གསུམ་ཀ་ནས་ཀཱི་ལ་ཡ་བཟླས་པས་དབུ་རྒྱན་གྱི་ཁྲག་འཐུང་རིགས་ལྔ།  བ་སྤུ་བུ་གའི་ཁྲོ་ཆུང་རྣམས་དང༌།  ཁྲོ་བཅུ་ཡབ་ཡུམ་ཟ་གསོད་སྒོ་སྐྱོང་དམ་ཅན་བཀའ་སྡོད་སོགས་ལྷར་གསལ་བ་ཐམས་ཅད་ཀྱིས་དུས་གཅིག་ཏུ་སྔགས་བཟླ་ཞིང༌།  དེ་བཞིན་དུ་མདུན་གྱི་ནམ་མཁར་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བཞུགས་པ་རྣམས་དང༌།  ཁམས་གསུམ་སེམས་ཅན་ཐམས་ཅད་ཡི་དམ་གྱི་སྐུར་གྱུར་པས་སྔགས་སྒྲ་དི་རི་རི་སྒྲོགས་པར་བསམ།  དེར་མ་ཟད་འབྱུང་བའི་སྒྲ་སྐད་ཐམས་ཅད་ཀྱང་ཀཱི་ལ་ཡའི་རང་སྒྲར་གྲགས་པར་བསམ་ལ་བཟླ་བ་ནི་སྒྲུབ་པའི་ཡན་ལག་གོ  །གསུམ་པ་མགར་(26བ)གྱི་ཚྭ་ཚྭ་སྤྲོ་བ་ལྟ་བུའི་ཚུལ་ནི།  དཀྱིལ་འཁོར་གསུམ་གྱི་ལྷ་ཚོགས་རྣམས་ལས་སྤྲུལ་པ་ཁྲོ་ཆུང་མཚོན་ཐུན་གྱི་ཚོགས་དྲག་ཅིང་ཚལ་རྩུབ་པ་དཔག་ཏུ་མེད་པ་སེར་ཐུན་དང་ཐོག་རྒོད་བབས་པ་ལྟར་འཕྲོས་ཤིང་སྔགས་སྒྲ་འབྲུག་སྟོང་དུས་གཅིག་ལྡིར་བ་ལྟར་སྒྲོགས་པ་དང༌།  སྔགས་ཀྱི་འོད་ཟེར་མེའི་ཚྭ་ཚྭ་ལྟར་འཕྲོས་པས་ལོག་པར་འདྲེན་པའི་བདུད་བགེགས་དང་འབྱུང་པོ་ཐམས་ཅད་ཐུལ་ཐུལ་བསྲེགས་ཏེ་ཐལ་བའི་རྡུལ་ཕྲན་བཞིན་བརླག་པར་བསམ་ཞིང་དྲག་སྔགས་བཟླ་བ་ནི་མངོན་སྤྱོད་སྒྲུབ་པའི་ཡན་ལག་གོ  །བཞི་པ་གྲུབ་མཐའ་ལམ་ལོངས་ཀྱི་ཚུལ་དུ་བཟླ་བ་ནི།  གཟུགས་སུ་སྣང་བ་ཐམས་ཅད་སྣང་སྟོང་དབྱེར་མེད་དཔལ་ཆེན་ཧེ་རུ་ཀའི་སྐུའི་རང་བཞིན།  སྒྲར་གྲགས་པ་ཐམས་ཅད་གྲགས་སྟོང་འགགས་མེད་ཀཱི་ལ་ཡའི་རང་སྒྲ།  དྲན་རྟོག་ཐམས་ཅད་རང་ཤར་རང་གྲོལ་ཆོས་ཉིད་ཡེ་ཤེས་ཀྱི་རོལ་པ་ཆེན་པོར་ཤེས་པའི་ངང་ནས་འཛིན་མེད་དུ་བཟླ་བ་ནི་སྒྲུབ་པ་ཆེན་པོའི་ཡན་ལག་གོ  །ལྔ་པ་ཤེས་པ་གསུམ་ལྡན་གྱི་གནད་ནི།  སྔགས་ཀྱི་འོད་ཟེར་དཔག་ཏུ་མེད་པ་རེ་རེ་བཞིན་ཡང་རྡོ་རྗེ་གཞོན་ནུ་བསམ་གྱིས་མི་ཁྱབ་པར་གྱུར།  དེ་རེ་རེའི་ཞལ་ནས་ཀྱང་དེ་འདྲ་བའི་སྔགས་དང་སྤྲུལ་པ་སྤྲོས་པས་སྣང་སྲིད་ཐམས་ཅད་ཁྲོ་བོ་ཁྲོ་མོས་(27ན)ཁེངས་པར་བསམ་པ་ནི་ཀཱི་ལ་ཡ་ལྷར་ཤེས་པ།  སྔགས་ཀྱི་འོད་ཟེར་གྱིས་བདག་དང་སེམས་ཅན་ཐམས་ཅད་ཀྱི་སྒྲིབ་པ་མཐའ་དག་སྦྱངས་ཉོན་མོངས་པ་ཆོས་ཉིད་དུ་ལྷན་ལྷན་སོང༌།  བདག་གཞན་ཐ་དད་དུ་འཛིན་པའི་ཞེན་རྟོག་དག    །ཆོས་ཐམས་ཅད་ཆོས་ཉིད་རང་བཞིན་གྱིས་རྣམ་པར་དག་ཅིང་དབྱེར་མེད་པར་ཤེས་པ་ནི་ཀཱི་ལ་ཡ་ཆོས་ཉིད་དུ་ཤེས་པ།  སྟོད་ལས་དང་དམིགས་བསལ་ཚེ་སྒྲུབ་པའི་སྐབས་སུ།  སྔགས་ཀྱི་འོད་ཟེར་ལས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་ཚོགས་ཉི་ཟེར་གྱི་རྡུལ་ལྟར་འཕྲོས།  ཕྱོགས་སྐྱོང་སྡེ་བརྒྱད་ཀྱི་ལག་ནས་རང་གཞན་གྱི་བླ་ཚེ་བརྐུས་པ་འཕྲོག་པ་ཡར་བ་རྣམས་དང༌།  རྒྱལ་བ་སྲས་དང་བཅས་པའི་སྐུ་ཚེའི་དངོས་གྲུབ།  དྲང་སྲོང་རིག་འཛིན་འཇིག་རྟེན་ཆེ་རྒུ་རྣམས་ཀྱི་ཚེ་དང་བསོད་ནམས།  བརྟན་གཡོའི་བཅུད་ཀྱི་དྭངས་མ་ཐམས་ཅད་འུབ་ཀྱི་བསྡུས་ནས་རང་དང་བསྲུང་བྱ་ལ་ཐིམ་པས་གཞོམ་གཞིག་དང་བྲལ་བའི་རྡོ་རྗེའི་ཚེ་ཐོབ་པར་བསམ་པ་དང༌།  སྨད་ལས་ངན་སྔགས་དང་འབྲེལ་བའི་སྐབས།  དགྲ་བོའི་སྙིང་གི་ཁྲག་སྦལ་ནང་ནས་རྣམ་པར་ཤེས་པ་ནྲྀ་དང༌།  བགེགས་ཀྱི་ཤེས་པ་ཏྲི་ཡིག་གི་རྣམ་པས་བཀུག་ནས་ལིང་ག་ལ་བསྟིམས་པ་སྔགས་ཀྱི་མཐུ་དང་(27བ)དབལ་ཟེར་གྱིས་གཞོབ་རོ་རྡོག་པས་བརྫིས་པའམ་གྲོད་ལྐོག་མེ་ལ་བཤུར་བ་ལྟར་སྐུམ་ཧྲི་ལེར་སོང་བར་བསམ་པ་ནི་ཀཱི་ལ་ཡ་འགུགས་གཞུག་ཏུ་ཤེས་པའོ།  །འདི་དག་གི་སྐབས་སུ་བཟླ་བྱའི་སྔགས་ནི།  ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ།  ཅེས་སྲོག་སྔགས་འབྲུ་དགུ་དང༌།  སརྦ་བིགྷྣཱན་བཾ་ཞེས་ལས་སྔགས་འབྲུ་ལྔ་དང༌།  ཛཿཧཱུཾ་ཨཱཿ ཞེས་མཁའ་འགྲོའི་འཕྱོང་སྔགས་འབྲུ་གསུམ་སྟེ།  དེ་རྣམས་སྦྲེལ་བའི་འབྲུ་བཅུ་བདུན་པ་ཁོ་ན་ཆིག་དྲིལ་དུ་བཟླའོ།  །གཉིས་པ་དམ་ཅན་ཉེ་བར་བསྙེན་པ་ལ།  རྩ་བ་དང༌།  ལས་སྦྱོར་གཉིས་ཀྱི།  དང་པོ་ནི།  བདག་དང་སྲས་མཆོག་གི་ཐུགས་ཀར་དམ་ཅན་འདུས་པའི་སྔགས་ཀྱིས་བསྐོར་བར་བསམ།  བཟླས་པ་བྱས་པས་སྔགས་ལས་འོད་ཟེར་དམར་པོ་ཛཿཡིག་གི་རྣམ་པ་ཕྱོགས་བཅུར་འཕྲོས།  དམ་ཅན་རྣམས་རང་རང་གི་གནས་ནས་ལྕགས་ཀྱུའི་རྡུལ་གྱིས་རང་དབང་མེད་པར་བཀུགས་ཤིང་ཤ་རུལ་ལ་སྦྲང་མ་འདུ་བ་ལྟར་ཐིབས་ཀྱིས་འདུས་ཏེ།  ཐམས་ཅད་ཀྱིས་བདག་གིས་ཅི་བགྱི་དཔའ་བོ་ཆེན་པོས་བཀའ་སྩོལ་ཅིག    །ཅེས་ཟེར་ནས་བཀའ་ཉན་ཅིང་ལས་བྱེད་པའི་ཚུལ་དུ་འདུག་པར་བསྒོམ།  གཉིས་པ་ནི།  ཐུན་མཐར་དེ་དག་ལས་ལ་རྔམས་པའི་ཚུལ་དུ་འདུག་པ་ལ་ཐུགས་ཀའི་འོད་ཟེར་རྩུབ་ཅིང་གདུང་(28ན)བས་བསྐུལ།  དེ་མ་ཐག་ཏུ་རི་དྭགས་ལ་ཤ་ཁྱི་བཀྱེས་པ་ལྟར་རྔམས་ཤིང་འཁྲུགས་ནས་ཧབ་དི་རི་རི་སོང་སྟེ་དམིགས་བྱ་གང་ཡིན་པའི་དགྲ་བགེགས་རྣམས་ལྕགས་ཀྱུས་བཟུང༌།  མཚོན་ཆས་བཏབ།  ལ་ལས་ཤ་ཟོས།  ལ་ལས་ཁྲག་འཐུང༌།  ལ་ལས་རུས་པ་འཆའ།  ཕུང་པོ་ལྷག་མ་མེད་པར་བརླག་པར་བསམ་ལ་བཞི་སྙིང་གཅིག་དྲིལ་བཟླའོ།  །གསུམ་པ་ངན་སྔགས་ཉེ་བར་བསྙེན་པ་ནི།  ཐུན་མོང་དུ་མགར་གྱི་ཚྭ་ཚྭ་སྤྲོ་བ་ལྟ་བུའི་དམིགས་གནད་དང་བཅས་བསྙེན་སྔགས་ལ་སྤུ་གྲིའི་དྲག་སྔགས་བརྒྱད་ཅུ་རྩ་བཞི་པ་ཉིད་སྦྲེལ་ཏེ་བཟླ་ཞིང༌།  ཁྱད་པར་ཕྲིན་ལས་ལ་དམིགས་པའི་ཛཔྲ་དགོངས་དང་འབྲེལ་བར་གབ་པའི་སྔགས་དྲུག་བཟླ་བའི་ཚུལ་ནི་སྨད་ལས་ངན་སྔགས་སྒྲུབ་པའི་མན་ངག་ལས་ཤེས་སོ།  །གཉིས་པ་ཇི་ལྟར་བཟླ་བའི་ཚུལ་ལ།  ལུས་ངག་ཡིད་ཀྱི་གནད་གསུམ་ལས།  དང་པོ་ལུས་ཀྱིས་བཟླ་ཚུལ་ལ།  གང་ལ་ཟླ་ན་ཕྲེང་བ་སྟེ།  དེའི་རྒྱུ་ནི།  སྤྱིར་ལས་བཞི་སོགས་ཀྱི་ངེས་པས་དབྱེ་བ་མང་ཡང་བསྡུ་ན།  སྔགས་སྒྲུབ་མན་ངག་རིན་ཆེན་ཕྲེང་བ་ལས།  ཕྲེང་བའི་བྱེ་བྲག་བོ་དྷི་ཙེ་བཟང་པོ།  །ཀུན་ལ་ཤིས་པས་སྤྱི་ཡི་བཟླས་པ་ནི།  །རུ་རཀྴ་ནི་ཁྲོ་བོའི་བཟླས་པའམ།  །དྲག་པོའི་ལས་ལ་རབ་(28བ) ཏུ་བསྔགས་པར་བཤད།  །ཅེས་སོགས་གསུངས་པས་སྤྱིར་བོ་དྷི་ཙེ་ལས་ཐམས་ཅད་ལ་བསྔགས་པར་བཤད་དེ།  རྒྱུད་གཞན་ལས་ཀྱང༌།  བོ་དྷི་ཙེ་ཡིས་གྲངས་མེད་འགྱུར།  །ཞེས་གསུངས།  བྱེ་བྲག་འདིར་ནི་དྲག་པོའི་ཕྲིན་ལས་ཀྱི་དབང་གིས་རུ་རཀྴ་དང་ཐོད་པའི་ཕྲེང་བ་མཆོག་ཏུ་ཤིས་ཏེ།  རཀྴ་ཐོད་པ་མཆོག་དུ་བསྔགས།  །ཞེས་སོ།  །གང་ཡང་གཞན་གྱིས་ལོངས་མ་སྤྱད་པ་ཉིད་གཞོན་ནུ་མས་བཀལ་བའི་སྲད་བུ་ཡེ་ཤེས་དགུ་དང་རིགས་ལྔ་སྐུ་གསུམ་སོགས་མཚོན་པའི་དགུ་བསྒྲིལ་ལྔ་བསྒྲིལ་སུམ་བསྒྲིལ་རྣམས་ཇི་ལྟར་འཚམས་པ་ལ་བརྒྱུས་ཤིང༌།  ཇི་སྐད་དུ།  ཕྲེང་བ་ཀུན་གྱི་དགྲ་བཅོམ་པ།  །མཆོད་རྟེན་ཆོས་ཀྱི་ཕུང་པོའི་ཕྱིར།  །ཞེས་དང༌།  སྟེང་དུ་ཡང་ནི་ཆོས་ཀྱི་དབྱིངས།  །ཞེས་སྐུ་གཉིས་མཚོན་པའི་མདོ་འཛིན་ཉིས་བརྩེགས་སུ་ཡོད་པར་བྱས་ཏེ།  བསང་སྦྱངས་ལྷར་བསྐྱེད་བསྟིམ་ནས་ཕྲེང་བའི་རྣམ་པར་བསྒྱུར་བ་རུ་ཙི་ར་སོགས་ཀྱི་སྔགས་བཟླས་པས་བྱིན་གྱིས་བརླབས་པའོ།  །གང་གིས་བཟླ་ན་ལག་པའི་སོར་མོས་སོ།  །ཇི་ལྟར་བཟླ་ན།  དེ་ལས།  ཀུན་ཀྱང་མཐེབ་མཛུབ་གཉིས་ཀྱིས་འཛིན་པར་བསྔགས།  །དྲག་པོ་གཡས་པའི་མཐེབ་སྲིན་གཉིས་ཀྱིས་བགྲང༌།  །ཞེས་པས་དྲག་པོའི་ལས་ལ་གཡས་མཐེབ་སྲིན་སྦྱར་བའི་ཆོས་འབྱུང་གི་(29ན) རྒྱས་འདྲེན་པར་བཤད་ཅིང༌།  ལས་གཞན་རྣམས་ལ་གཡོན་པས་བགྲང་བར་བྱ་སྟེ།  འདྲེན་ཚུལ་སོར་མོ་བཞི་སྦྱར་བའི་མཛུབ་མོའི་སྟེང་དུ་ཕྲེང་བ་བཞག་ནས་མཐེ་བོང་རྡོ་རྗེ་ལྕགས་ཀྱུའི་རྣམ་པས་སོ།  །ཡང་དམིགས་བསལ་དུ།  ཞི་བ་ལ་མཐེབ་མཛུབ་ཀྱིས་སྙིང་གར།  རྒྱས་པ་ལ་གོང་མོའི་ཁར་ལྟེ་བར།  དབང་ལ་སྲིན་ལག་སྟེང་གསང་བར།  དྲག་པོ་ལ་མཐེའུ་ཆུང་ཁར་པུས་སྟེང་རྣམས་སུ་བགྲང་ཞིང༌།  བཟློག་བསང་སོགས་སྐབས་འགར་མཐེ་བོང་སྟྭ་གྲི་དང་མཛུབ་མོ་ལྕགས་གཏན་ཕྲེང་རྡོག་བྱད་མའི་མགོ་བོར་དམིགས་པས་ཕྲེང་བ་ཕྱིར་བསྣུར་ཏེ་སྐེ་བཅད་པའི་དམིགས་པ་སོགས་སྐབས་ཐོབ་ཤེས་དགོས་པའོ།  །གཉིས་པ་ངག་གི་བཟླ་ཚུལ་ལ།  གང་བཟླ་ན།  ལྷའི་སྙིང་པོ་བསྙེན་པའི་སྔགས་རྣམས་སོ།  །གང་གིས་བཟླ་ན།  སྔགས་ཀྱི་སྒྲར་སྣང་བའི་ཚུལ་དུ་ཡིད་ཀྱིས་སམ་སྒྲར་གྲགས་པའི་ཚུལ་དུ་ལྕེ་རྐན་འཕྲད་པའི་རྩོལ་བས་སོ།  །ཇི་ལྟར་བཟླ་ན།  སྒྲ་ཧ་ཅང་ཆེ་བ་དང༌།  ཆུང་བ་དང༌།  ཡི་གེ་ཐུང་བ་རྣམས་དལ་བུར་འདོན་པ་དང༌།  རིང་བ་རྣམས་མྱུར་པོར་འདོན་པ་དང༌།  ཧ་ཅང་གསལ་ཆེས་པའམ་མི་གསལ་བ་དང༌།  ཐུན་སྒང་དུ་མི་དང་གཏམ་འདྲེས་པའི་སྔགས་དང་འདོན་པ་གཞན་བྱེད་པ་(29བ) སོགས་ཚིག་གཞན་གྱིས་བར་ཆོད་པ་དང༌།  སེམས་གཞན་དུ་ཡེངས་པ་སོགས་ཀྱི་སྐྱོན་སྤངས་ནས་བཟླ་སྟེ།  རྔམས་གློག་ལས།  སྒྲ་ཆེན་མ་ཡིན་ཆུང་བ་མིན།  །མགྱོགས་པར་མ་ཡིན་བུལ་བ་མིན།  །དྲག་པར་མ་ཡིན་ཞན་པ་མིན།  །ཡིག་འབྲུ་ཡན་ལག་ཉམས་པ་མིན།  །ཡེངས་པས་མ་ཡིན་སྨྲ་བཞིན་མིན།  །གླལ་སོགས་བར་དུ་ཆོད་པས་མིན།  །ཞེས་དང༌།  མཚོ་རྒྱལ་ཞུས་ལན་ལས།  སྐྱོན་ལྔ་སྤངས་ཏེ།  དག་པ་གཙང་བ་སི་ལི་ལི་བཟླའོ༔  སྐྱོན་ལྔ་གང་ཞེ་ན༔  མྱུར་ཏེ་སྒྲ་འདྲེས་ན་འབྱམས་ཏེ་འབྲུ་འདྲེས་པའི་སྐྱོན་ཡོད༔  བུལ་ཞིང་འཆལ་ན་བྱེར་བའི་སྐྱོན་ཡོད༔  དྲག་ཅིང་སྒྲ་ཆེ་ན་ཕོག་ཐུག་འོང་ཞིང་བྱིན་རླབས་ཡལ༔  ཞན་ཅིང་སྒྲ་ཆུང་ན་ནུས་པ་མི་ཐོན༔  ལྷག་ཆད་མེད་པར་སྒྲ་དག་ཟུར་ཐོན་མ་འདྲེས་གསལ་དག་ཏུ་བཟླ་བར་བྱའོ༔  ཞེས་གསུངས་པ་ལྟར་སྐྱོན་རྣམས་སྤངས་ནས།  སྤྱིར་བཟླས་པ་ཡིད་བཟླས།  བྱེ་བྲག་ལས་གང་ལ་མཐུན་པའི་ཚུལ་གྱིས་བཟླ་བ་སྟེ།  ཞི་བར་ཤུབ་བུར་གོང་བས་ཐོས་ཙམ་དུ་བཟླ།  རྒྱས་པར་རྐང་པས་ཐོས་ཙམ་དུ་བཟླ།  དབང་ལ་གྲོགས་པོར་སྙིང་གཏམ་འཆད་པ་ལྟར་གཞན་གྱིས་ཐོས་ཙམ་དུ་བཟླ།  དྲག་པོར་གནམ་ལྕགས་ཀྱི་ཐོག་(30ན)བབས་པ་ལྟར་ཁོངས་ཤུགས་བསྐྱེད་དེ་བཟླའོ།  །གསུམ་པ་ཡིད་ཀྱི་བཟླ་ཚུལ་ལ།  གང་བཟླ་ན་ཏིང་ངེ་འཛིན་ནོ།  །གང་གིས་བཟླ་ན་སེམས་རྩེ་གཅིག་པའི་དྲན་པས་སོ།  །ཇི་ལྟར་བཟླ་ན་དྲན་པ་དེས་སེམས་ཏིང་ངེ་འཛིན་ལས་གཞན་དུ་མི་གཏོང་བར་རྩེ་གཅིག་ཏུ་འཛིན་པ་སྟེ།  དེ་ཡང་ཡང་བསྐྱར་བས་བཟླས་པའོ།  །དེ་ཡང་སྲོག་སྡོམ་གཟེར་བཞིའི་གནད་ལ་གཅུན་པར་བྱེད་པ་སྟེ།  རྒྱུད་ལས།  ཏིང་འཛིན་གཟེར་དང་སྙིང་པོའི་གཟེར།  །དགོངས་པའི་གཟེར་དང་འཕྲོ་འདུའི་གཟེར།  །ཞེས་བཞིར་གསུངས་པའི་དང་པོ་ནི།  ཏིང་འཛིན་གཟེར་ནི་ཐོད་སྐུ་ལ།  །རྩེ་གཅིག་སེམས་བཟུང་ཡེངས་མི་བྱ།  །ཞེས་དང༌།  གཉིས་པ་ནི།  སྙིང་པོ་སྔགས་གཟེར་ཡོངས་རྫོགས་ཀྱི།  །གཙོ་བོའི་སྔགས་དང་སེལ་མེད་བཟླ།  །ཞེས་དང༌།  གསུམ་པ་ནི།  དགོངས་པའི་གཟེར་ནི་ཞི་ཁྲོའི་ལྷ།  །ཡོངས་རྫོགས་དཔལ་ཆེན་རང་སེམས་ལས།  །གུང་ན་མེད་ཅིང་རཱུ་དྲ་ཡང༌།  །ལོག་ན་མེད་དོ་རང་གི་སེམས།  །སེམས་ཉིད་སྟོང་པ་ཆོས་ཀྱི་སྐུ།  །ཞེས་སོགས་དང༌།  བཞི་པ་ནི།  འཕྲོ་འདུའི་གཟེར་ནི་དམིགས་པ་ཡིས།  །བསྒྱུར་ཁ་ཤེས་ན་འདོད་རྒུར་འགྱུར།  །ཞེས་སོ།  །གསུམ་པ་ཐུགས་ཆོས་ཉིད་ལ་དམིགས་པའི་ཛཔྲ་དགོངས་ནི།  ཡིད་ལ་དྲན་རྟོག་ཅི་འགྱུ་ཡང་ཆེད་(30བ)དུ་མི་སྤང་ཆེད་དུ་མི་སྒྲུབ་པར་གང་ཤར་དེ་ཀའི་ངང་ལ་ཅེ་རེ་བལྟས་པས།  སྣང་རིག་ངོས་བཟུང་མེད་པར་རྗེན་ནེ་བ་དམིགས་མེད་བསམ་བརྗོད་དང་བྲལ་བའི་སྟོང་པ་ཉིད།  མདངས་བདེ་བ་ཆེན་པོའི་རོལ་པར་མ་འགགས་ཤིང༌།  རྩལ་ཅིར་ཡང་འཆར་བའི་ཟུང་འཇུག་འདི་ཀ་དངོས་པོའི་གནས་ལུགས་ཏེ་གདོད་མ་ནས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་ལྷུན་རྫོགས་ཐིག་ལེ་ཆེན་པོར་ངོ་ཤེས་པར་བྱ་ཞིང༌།  དེ་ལྟར་མ་རྟོགས་པ་ལ་སྙིང་རྗེ་བསྐྱེད།  སྙིང་རྗེའི་རང་མདངས་འགགས་མེད་དུ་གསལ་བ་སྤྲོས་བྲལ་ངོས་བཟུང་མེད་པའི་གཤིས་ལུགས་སུ་ལ་བཟླ་སྟེ།  ཡུལ་མེད་རང་གསལ་རྗེན་པར་བསྐྱང་བའོ།  །དེའང་ཇི་སྐད་དུ་རྩ་གཞུང་ལས།  སྐུ་གསུམ་རྡོ་རྗེ་ཕུར་པ་ནི༔  དུག་གསུམ་བསྒྲལ་བའི་ཀློང་ནས་ལངས༔  ངོ་བོ་ཁྱབ་བརྡལ་མཐའ་བྲལ་ཉིད༔  སྟོང་པའི་ཡེ་ཤེས་ཆོས་ཀྱི་དབྱིངས༔  ཁྱབ་བརྡལ་ཆོས་སྐུའི་ཕུར་པའོ༔  རང་བཞིན་འགགས་མེད་རྩལ་སྣང་བ༔  གསལ་བའི་ཡེ་ཤེས་སོ་སོར་གསལ༔  ཞེན་མེད་འཛིན་མེད་རང་སར་ཀློད༔  མ་འགགས་ལོངས་སྐུའི་ཕུར་པའོ༔  ཐུགས་རྗེ་ཕྱོགས་མེད་རང་གྲོལ་གྱི༔  ཀུན་ཁྱབ་ཡེ་ཤེས་གཟུགས་སྐུར་ཤར༔  དྲན་ཙམ་རང་ངོར་རྫོགས་ལ་ལྟོས༔  ཕྱོགས་མེད་སྤྲུལ་སྐུའི་ཕུར་པའོ༔  སྐད་ཅིག་འཁོར་བའི་(31ན)འཁོར་ལོ་རྫོགས༔  སྐད་ཅིག་རྒྱལ་ཀུན་དཀྱིལ་འཁོར་རྫོགས༔  རང་སྣང་ཞིང་ལ་རང་རིག་ལྷ༔  ཤར་གྲོལ་འཁོར་གྱི་རོལ་པའོ༔  སྟོང་ཉིད་ཆོས་དབྱིངས་ཕུར་པ་སྟེ༔  གསལ་བ་བཛྲ་ཀཱི་ལ་ཡ༔  མཉམ་ཤར་རཏྣ་ཀཱི་ལ་ཡ༔  སོ་སོར་རྟོག་པ་པདྨའི་སྐུ༔  ཤར་གྲོལ་དབང་ཐོབ་ལས་ཀྱི་བདག༔  དོན་ལ་རིག་པའི་རང་ངོར་རྫོགས༔  རིག་པ་ཁྱབ་བདག་རྡོ་རྗེ་འཆང་༔  རིག་པ་སྒྱུ་འཕྲུལ་སྣ་ཚོགས་བདག༔  རིག་པ་འཁོར་འདས་དབང་ཕྱུག་གོ༔  རིག་པ་འདོད་དགུའི་འབྱུང་གནས་སོ༔  མ་རིག་སངས་པའི་རིག་པ་ནི༔  གྲོལ་བྱེད་རང་དབང་རང་ལ་འབྱོར༔  སྐད་ཅིག་གཅིག་གི་བྱེ་བྲག་གིས༔  སྐད་ཅིག་རྫོགས་པའི་སངས་རྒྱས་ལམ༔  གཞན་དུ་འཚོལ་བས་ལྷ་མི་རྙེད༔  རང་ཉིད་ལྷ་ལ་ལྷ་ཉིད་རང་༔  སྣང་བ་རྣམ་དག་ཞིང་གི་མཆོག༔  རིག་པ་ལྷ་ཡི་ལྷ་མཆོག་ཡིན༔  མ་བཅོས་མ་བཙལ་རང་བྱུང་བའི༔  ལྷན་སྐྱེས་རིག་པའི་ཡེ་ཤེས་ཉིད༔  གདོད་ནས་ཡེ་གནས་མངོན་གྱུར་བ༔  ལྟ་བ་གྱད་ཀྱི་ལྷ་ཉིད་དོ༔  ཞེས་གསུངས་སོ།  །བཞི་པ་ཡོན་ཏན་དབང་དང་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི།  འོག་ཏུ་བསྙེན་པའི་ལག་ལེན་གྱི་སྐབས་སུ་འཆད་པར་འགྱུར་ཞིང༌།  ལྔ་པ་ཕྲིན་ལས་ལ་དམིགས་པའི་སྤུ་གྲིའི་འཕྲུལ་(31བ) འཁོར་བསྐོར་བའི་ཚུལ་ནི་གཞན་དུ་ཤེས་སོ།  །དེ་ལྟར་བཟླས་པའི་སྐབས་སུ་བསྙེན་པ་སྟོང་སྟོང་ཚང་བའམ་ཐུན་མཚམས་རྣམས་སུ་ཐུགས་དམ་བསྐུལ་བའི་དོན་དུ་སྨན་རཀ་གཏོར་མ་ལ་སོགས་པས་མཆོད་ཅིང་བསྟོད་ནས་མངོན་པར་འདོད་པའི་དངོས་གྲུབ་རྒྱུན་དུ་བསྐུལ་ཞིང༌།  བསྙེན་པ་གྲུབ་ནས་དུས་ཀྱི་དངོས་གྲུབ་ཆེད་དུ་བསྐུལ་ཏེ་བླང་བར་བྱའོ།  །གསུམ་པ་རྗེས་ཀྱི་བྱ་བ་ལ།  ཐོག་མར་ཚོགས་ཀྱི་མཆོད་པ་ནི།  ཚོགས་གཞོང་རིན་པོ་ཆེའི་མཆོད་སྡོང་པདྨ་འདབ་མ་སྟོང་ལྡན་གྱི་སྙིང་པོར་ཚོགས་རྫས་རྣམས་ཉི་ཟླ་པདྨའི་དཀྱིལ་འཁོར་ལ་གནས་པའི་ཧཱུཾ་མཐིང་ནག་འབར་བར་གྱུར།  ཧཱུཾ་ལས་རཾ་ཡཾ་ཁཾ་བྱུང་བས་ཡེ་ཤེས་ཀྱི་མེ་རླུང་ཆུས་མ་དག་པའི་དངོས་པོ་ཐམས་ཅད་བསྲེག་གཏོར་བཀྲུས།  ཚོགས་རྫས་ཤ་ལྔ་བདུད་རྩི་ལྔས་མཚན་པར་ཧཱུཾ་མཱུཾ།  ཨོཾ་ལཱཾ།  སྭཱ་མཱཾ།  ཨཱཾ་པཱཾ།  ཧཱ་ཏཱཾ་རྣམས་ལས་རིགས་ལྔ་ཡབ་ཡུམ་སྙོམས་པར་ཞུགས་པའི་མཁའ་གསང་བྱང་སེམས་བདུད་རྩིའི་རྒྱུན་གྱི་ཟེར་རླངས་ལས་ཕྱོགས་དུས་སངས་རྒྱས་ཐམས་ཅད་ཀྱི་བྱིན་རླབས་མ་ལུས་པ་ཡིག་འབྲུ་གསུམ་གྱི་རྣམ་པར་བསྡུས་ཏེ་ཐིམ།  རིགས་ལྔ་ཡབ་ཡུམ་ཀྱང་འོད་དུ་ཞུ་ཞིང་འདྲེས་པ་ལས་དམ་ཚིག་གི་བདུད་རྩི་ཡེ་ཤེས་ཆེན་པོའི་རང་བཞིན་འདོད་ཡོན་གྱི་རྣམ་པ་ཅིང་ཡང་འཆར་བར་བསམ།  (32ན)  ཚོགས་ཞིང་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བྱོན་པ་རྣམས་སྔར་གྱི་དཀྱིལ་འཁོར་དང་དབྱེར་མེད་དུ་བཞུགས་པར་མོས་ལ།  ཚོགས་རྫས་འདོད་ཡོན་གྱི་ལྷ་མོ་གྲངས་མེད་པར་འཕྲོ་བས་དགྱེས་པ་བསྐྱེད་པར་བསམ་ཞིང་འདོད་ཡོན་གྱི་ལྷ་མོས་སྤྱིར་མཆོད་ཅིང༌།  བྱེ་བྲག་ཚོགས་ཕུད་ཆ་དང་པོ་ཞལ་ཟས་འདོད་ཡོན་ལོངས་སྤྱོད་ཀྱི་རང་བཞིན་མཆོད་པའི་ཚུལ་དུ་འབུལ།  ཆ་བར་པ་བདུད་རྩིའི་ཐོད་ཞལ་དུ་མས་ཉམས་ཆག་བཤགས་པའི་ཆེད་དུ་འབུལ།  ཚོགས་ཐ་མ་གདབ་ལས་དྲིལ་ཐུན་དང་འབྲེལ་བར་སྟོབ་པའི་ལས་རིམ་ལ།  བདག་ཉིད་དཔལ་ཆེན་པོའི་ཐུགས་ཀ་ནས་སྤྲུལ་པའི་ཁྲོ་ཚོགས་ཕོ་ཉ་གྲངས་མེད་པ་སྟོང་ཁམས་གང་བར་འཕྲོས་པས་དམིགས་བྱ་རང་དབང་མེད་པར་བཀུག་སྟེ་མདུན་གྱི་ལིང་ག་ལ་བསྟིམ་པར་བསམ་ཞིང༌།  བདེན་སྟོབས་བརྗོད་པས་བཀུག་ཅིང་བསྟིམས་ནས་ཕོ་ཉ་བསྐུལ།  ཨོཾ་ལཾ་ཧཱུཾ་ལཾ་སོགས་ཀྱི་སྐབས་སྲས་མཆོག་གི་ཕུར་བུ་འདྲིལ་ཞིང༌།  ཚེ་ཁྲུས་ཀྱི་ལུང་མདོར་བསྡུས་ནི།  བདག་དབལ་ཆེན་པོ།  ཕུར་བུ་སྲས་མཆོག    །ལིང་ག་དགྲ་བགེགས་དངོས་སུ་གསལ་ལ།  སྲས་མཆོག་གི་སྤྱི་བོར་ཧཱུཾ་ཀཱ་ར།  དེའི་སྤྱི་བོར་ཨ་དཀར་པོ།  ཨ་འོད་དུ་ཞུ་ནས་ཧཱུཾ་ཀཱར་ལ་ཐིམ།  དེ་འོད་དུ་ཞུ་ནས་ཕུར་བུ་(32བ)ལ་ཐིམ།  ཕུར་བུ་ལས་འོད་ཟེར་དཀར་པོ་ཕྱོགས་བཅུར་འཕྲོས་པས་རྒྱལ་བ་མཆོད་ཅིང་སེམས་ཅན་གྱི་སྒྲིབ་པ་སྦྱངས།  བྱིན་རླབས་དང་ཚེ་བཅུད་ཀྱི་དྭངས་མ་ཐམས་ཅད་བསྡུས་ཏེ་ཕུར་བུ་ལ་ཐིམ་པས་གཟི་བྱིན་མཆོག་ཏུ་འབར།  དེ་ཉིད་དམིགས་བྱའི་སྙིང་དཀར་ནག་མཚམས་སུ་གཏད་དེ་བསྒྲིལ་བས་ཕུར་བུ་ལས་འབར་བའི་འོད་ཟེར་གྱིས་ཁོའི་སྡིག་སྒྲིབ་ཐམས་ཅད་བསྲེག    །ཚེ་བསོད་བཀྲག་མདངས་ཀྱི་དྭངས་མ་ཐམས་ཅད་བསྡུས་ནས་ཧཱུཾ་དུ་གྱུར་པ་དེ་ཕུར་བུ་ལ་ཐིམ།  ཕུར་བུ་རང་གི་སྙིང་གར་གཏུགས་པས་ཁོའི་ཚེ་བསོད་རང་ལ་འདུས་པས་བདག་གི་རྡོ་རྗེའི་ཚེ་སྲོག་བརྟན་པར་བྱས།  སླར་ཡང་ཕུར་བུ་ཁོའི་སྙིང་གར་གཟིར་བས་སྒོ་ལྔའི་རྣམ་ཤེས་ཀུན་གཞི་ལ་འུབ་ཀྱིས་འདུས་ནས་ཧཱུཾ་དུ་གནས་གྱུར་ཏེ་ཕུར་བུ་ལ་ཐིམ་པས་ཁོ་བྱུང་ཚོར་གྱི་རྟོག་པ་འགག་ནས་ནག་ཐིབས་ཀྱིས་སོང༌།  རྣམ་ཤེས་ནྲྀ་རུ་གནས་པ་དེ་ཕུར་བུས་ཙན་གྱིས་བླངས་ཏེ་ཨ་ཧཱུཾ་དུ་བྱིན་གྱིས་བརླབས་ནས་ཕཊ་ཀྱིས་འོག་མིན་དུ་རྡོར་སེམས་ཡབ་ཡུམ་གྱི་སྦྱོར་མཚམས་སུ་སྤར་བས་རྡོར་སེམས་ཀྱི་སྲས་སུ་གྱུར་ཏེ་སངས་རྒྱས་པར་བསམ་པ་ནི་བརྟེན་པ་དབྱིངས་སུ་བསྒྲལ་བའོ།  །སླར་ཡང་བག་ཆགས་ཀྱི་རྟེན་གཞི་བསྒྲལ་བའི་ཕྱིར་ལས་ཕུར་གནས་སོ་སོར་གདབ་ཅིང་ཐུན་རྫས་སྣ་(33ན)ཚོགས་པས་ཀྱང་བྲབ།  མཚོན་ཆས་ཆར་དབབ་པར་བསམ་ཞིང་རལ་གྲིས་དུམ་བུར་གཏུབས།  ཐོ་གཏུན་མཁའ་གསང་དབྱིངས་རིག་གི་སྦྱོར་བས་གཟུགས་ཕུང་ཟག་མེད་དུ་བཅོམ་པར་བསམ་ལ་ཐོ་བས་བརྡུང་མཐར།  སྙིགས་མའི་ལུས་བདུད་རྩིར་སྦར་བ་ལྷ་ཚོགས་རྣམས་ཀྱི་ཞལ་དུ་བསྟབས་པས་དགྱེས་པར་རོལ་ཏེ་ཧ་ཧ་ཧ་ཞེས་བཞད།  ཧཱུཾ་ཧཱུཾ་ཧཱུཾ་ཞེས་དངོས་གྲུབ་སྩལ་ནས་འོད་གསལ་དུ་ཞུ།  ཕཊ་ཕཊ་ཕཊ་ཅེས་དེ་ལས་སད་བའི་སྣང་ཆ་ཆོས་ཉིད་ཀྱི་བདེན་པའི་ངང་བསྐྱང་ངོ༌།  །དེ་ནས་བདག་རྩ་བའི་དཀྱིལ་འཁོར་རྩ་བ་གསུམ་འདུས་སུ་གསལ་བཏབ་སྟེ།  བདུད་རྩིའི་ལོངས་སྤྱོད་ཐ་མལ་གྱི་ཞེན་ཆགས་དང་བྲལ་བས་བདེ་བ་ཆེན་པོར་རོལ་ཞིང་སྦྱང༌།  ལྷག་མ་བཏང་བ་ལ།  དཔལ་གྱི་མཆོད་གཏོར་ནས་ཐེབ་ཀྱུ་གཅིག་བླངས་ཏེ་ལྷག་མའི་སྟེང་དུ་ཕམ་ཕབ་བཞག    །རྟོགས་དགོངས་དང་ལྡན་པས་དམ་ཚིག་གི་ཁ་ཕྲུ་དངོས་སུ་གདབ་པའམ།  མི་ནུས་ན་ལག་གཉིས་མཁའ་དབྱིངས་ཀྱི་ཕྱག་རྒྱ་དང་བཅས་ལྷའི་ང་རྒྱལ་ལ་གནས་པས།  རང་གི་ཡ་རྐན་ཧེ་རུ་ཀ་ཡབ་ལྔ།  མ་རྐན་ཡུམ་ལྔར་གསལ་བའི་སྙོམས་འཇུག་གི་བྱང་སེམས་ལྷག་མའི་སྟེང་དུ་ལན་གསུམ་ཕབ་པས་དང་པོས་འབག་བཙོག་བཅོམ།  གཉིས་པས་བདུད་རྩིར་བསྒྱུར།  གསུམ་(33བ)པས་མགྲོན་རྣམས་དགྱེས་པ་སྐོང་བའི་སྤྲིན་ཆེན་པོར་གྱུར་པར་མོས་ལ་སྔགས་བརྗོད་ཅིང་ཕྱག་རྒྱ་ལྷག་མའི་སྟེང་དུ་སྦུབས་ལ་བདུད་རྩི་དབབ།  དེ་ཉིད་དལ་གྱི་ལྷོ་ནུབ་ཞིང་ཆེན་བཀྲམ་པའི་གདན་ལ་བཀོད་དེ་སླར་ཡང་སྨར་རཀ་བྲན་ཅིང་བྱིན་གྱིས་བརླབས།  བདག་གི་ཐུགས་ཀའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཤྭ་ན་བདག་ཉིད་ས་བདག་སྐྱེས་བུ་གིང་དང་དགེ་བསྙེན་དབང་ཕྱུག་བརྟན་མ་ལ་སོགས་པ་ལྷག་མའི་མགྲོན་རྣམས་སྐད་ཅིག་གིས་ལྷགས་པར་བསམ་ཞིང་ཨེ་ཨ་རལླིས་བཀུག་ནས་ཉེར་སྤྱོད་ལྔས་མཆོད།  མགྲོན་རྣམས་ཧེ་རུ་ཀའི་ཟིལ་མ་བཟོད་པའི་ཚུལ་གྱིས་གུས་པའི་ཞེ་སར་བཅས་ཏེ་མདུན་དུ་འཁོད་པར་མོས་ལ་ལྷག་མ་བསྔོ།  བསྙེན་སྒྲུབ་ཀྱི་སྐབས་སུ་དམ་ཅན་རྣམས་ཕྲིན་ལས་སྒྲུབ་པ་ལ་ཉེ་བའི་ཕྱིར་སྒྲུབ་པ་མ་གྲོལ་གྱི་བར་དུ་ལྷག་གཏོར་གཏར་འཛིན་ཅིང་མཐར་ཕྱི་རོལ་ཟ་ལམ་དུ་བསྐྱལ་ལོ།  །བསྐུལ་བ་ལ།  ལྷ་ཚོགས་ཐམས་ཅད་སྔོན་གྱི་ཐུགས་དམ་རྗེས་སུ་བསྐུལ་བས་ཕྲིན་ལས་གཉན་པོ་མཛད་པར་དགོངས་པ་མངོན་དུ་ཕྱོགས་ཏེ་ལས་ལ་ཆས་པར་བསམ།  ཆད་མདོའི་སྐབས་སྤྲོ་ན་བར་ཆད་བྱེད་པའི་དགྲ་བགེགས་བཀུག་བསྟིམས་བསྒྲལ་བའི་ཤ་ཁྲག་བདུད་རྩིར་བརླབས།  འགུགས་བསྟིམ་མེད་ཀྱང་རུང་སྟེ།   (34ན)གཏོར་མ་རྣམ་པ་དགྲ་བགེགས་ཀྱི་ཤ་ཁྲག་རུས་གསུམ་བཟའ་བའི་གཏོར་ཆེན་མཁའ་དབྱིངས་གང་བ་ལ།  ངོ་བོ་ཟག་མེད་ཡེ་ཤེས་ཀྱི་བདུད་རྩི་བཀའི་སྲུང་མ་འཁོར་དང་བཅས་པའི་ཐུགས་དམ་དགྱེས་པ་སྐོང་བའི་དམ་རྫས་ཆེན་པོར་གྱུར་པར་བསམ།  ཐུགས་ཀའི་འོད་ཟེར་ལྕགས་ཀྱུས་དཔལ་ཆེན་རྡོ་རྗེ་སྲིན་པོ་སོགས་གྲུབ་པའི་རིག་འཛིན་ཐམས་ཅད་ཀྱི་སྤྱན་སྔར་དཀྱིལ་འཁོར་གཉན་པོའི་སྲུང་མར་ཞལ་གྱིས་བཞེས་པའི་ཆད་མདོ་ཅན་གྱི་སྲུང་མ་དམ་ཅན་རྒྱ་མཚོའི་ཚོགས་ཐམས་ཅད་བཀུག་སྟེ་དབྱར་གྱི་ན་བུན་ལྟར་ལྷགས་པའི་ལྗགས་ལ་དམ་ཚིག་གི་བདུད་རྩི་བྱིན་པར་མོས།  དཔལ་ཆེན་པོའི་གཟི་བརྗིད་མ་བཟོད་པའི་ཚུལ་གྱིས་མདུན་དུ་འོད་ཟེར་དཀར་པོ་དར་དཀར་གྱི་ཡོལ་བ་ཙམ་གྱིས་བར་བཅད་པའི་ཕྱི་རོལ་དུ་འཁོད་པ་ལ་སྔོན་གྱི་ཐ་ཚིག་བསྒྲག་ཅིང་ཆད་མདོ་རྗེས་སུ་དྲན་པར་བྱས་ཏེ་གཏོར་མ་འབུལ།  དགོས་པ་དམིགས་བསལ་གྱི་སྐབས་ཟོར་དུ་བསྐུལ་ན་སྲུང་མ་རྣམས་ཀྱིས་བཞེས་པའི་ལྷག་མ་གཏོར་མའི་ཕུང་པོ་ཉིད་ནད་དུག་མཚོན་ཆའི་རང་བཞིན་དུ་གྱུར་པ་སྤྲུལ་པའི་དམག་ཚོགས་དཔག་ཏུ་མེད་པ་རྣམས་ཀྱིས་ཆར་ལྟར་ཕབ་པས་དགྲ་བགེགས་རྣམས་ཁ་ཕུང་རྗེས་མེད་དུ་བརླག་པར་བསམ།  བརྟན་མ་ལ།  ཆད་མདོའི་གཏོར་གཞོང་(34བ)སྨན་ཕུད་ཀྱིས་བཤལ་བ་བརྟན་མ
༄༅།  །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ།   བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་ཧེ་རུ་ཀ་ལ་ཕྱག་འཚལ་ལོ།  །སྟོང་ཉིད་རྡོ་རྗེ་ཁྲོས་པའི་གར་གྱིས་ཞེ་སྡང་མཚན་རྟོག་དབྱིངས་སུ་གཅོད།  །སྙིང་རྗེའི་མཚོན་ཆེན་རབ་ཏུ་འབར་བས་ཕུང་པོ་རྡོ་རྗེའི་དབྱིག་གིས་གཏམས།  །ཟུང་འཇུག་སྲིད་པ་ཕུར་བུའི་ཕྱག་རྒྱས་བརྟན་གཡོའི་སྲོག་རྩ་ཐལ་བར་འབྱིན།  །བླ་མ་ཧེ་རུ་ཀ་དཔལ་དཔའ་བོས་དངོས་གྲུབ་གནས་ལ་དབུགས་འབྱིན་མཛོད།  །རིག་མཆོག་འབུམ་སྡེའི་བཅུད་ཐིག་ཀཱི་ལ་ཡ།  ། {{TibChung|[2a]}}  བདུད་འཇོམས་སྤུ་གྲིར་འབྲེལ་བའི་ཕྲིན་ལས་གཞུང༌།  །ཚུལ་བཞིན་བསྙེན་ཅིང་སྒྲུབ་ལས་མཆོག་ཐུན་གྱི།  །དངོས་གྲུབ་རྒྱ་མཚོའི་དཔལ་གྱི་དགའ་སྟོན་སྤྲོ།  །དེ་ལ་འདིར་རྒྱུད་ཐམས་ཅད་ཀྱི་རྒྱལ་པོ།  ལུང་ཐམས་ཅད་ཀྱི་བླ་མ།  མན་ངག་ཐམས་ཅད་ཀྱི་ངེས་པའི་དོན།  དུས་གསུམ་རྒྱལ་བ་ཐམས་ཅད་ཀྱི་ཐུགས་ཀྱི་བརྣག་པ།  རྒྱ་བོད་མཁས་གྲུབ་ཐམས་ཅད་ཀྱི་གཅེས་པའི་དབྱིག    །བྱང་ཆུབ་སྒྲུབ་པ་ལ་མེད་དུ་མི་རུང་བའི་ཆ་རྐྱེན་ཕྲིན་ལས་ཀྱི་ལྷ་མཆོག་རྡོ་རྗེ་ཕུར་པའི་དཀྱིལ་འཁོར་གྱི་འཁོར་ལོ་བསྒྲུབ་པར་བྱ་བ་ལ།  སྤྱིར་རྡོ་རྗེ་ཕུར་པ་ལ་རྒྱུད་ཀྱི་བསྡུ་ཐབས་གཉིས།  བཤད་ཐབས་གསུམ།   {{TibChung|[2b]}} ཁོག་དོན་དྲུག    །ཐེམ་སྦྱོར་བཅུ།  གནད་ཐོ་བཅུ་གཉིས།  གསང་ཐེམ་ཉེར་གཅིག་ལ་སོགས་པར་གསུངས་པ་རྣམས་ཧྲིལ་གྱིས་དྲིལ་ན་ཕུར་བུའི་རྒྱུ་བཞིས་གང་ཟག་རྣམ་པ་བཞི་མཐར་དབྱུང་བ་སྟེ།  ཕུར་བུ་ངན་སྔགས་གཙུག་ལག་གི་རྒྱུད་ལས།  ཕུར་བུ་རྣམ་བཞིའི་དགོངས་པ་ཡིས།  །གང་ཟག་རྣམ་བཞི་མཐར་དབྱུང་ངོ༌།  །རིག་པ་ཡེ་ཤེས་ཕུར་བུ་ནི།  །ཆོས་ཀྱི་དབྱིངས་ཀྱི་ཀློང་དུ་གདབ།  །ཐུགས་རྗེ་སྤྲུལ་པའི་ཕུར་བུ་ནི།  །ཁམས་གསུམ་སེམས་ཅན་ལ་གདབ་པའོ།  །གསང་བ་བྱང་སེམས་ཕུར་བུ་ནི།  །ཡུམ་གྱི་མཁའ་ཀློང་ཡངས་པར་གདབ།  །མཚན་མ་རྫས་ཀྱི་ཕུར་བུ་ནི།  །དགྲ་དང་བགེགས་ལ་གདབ་པའོ།  །ཞེས་གསུངས།  དེ་ལྟར་ཕུར་བུ་ཐལ་འབྱིན་གྱི་དགོངས་པ་རྣམ་པ་བཞི་ལས།  སྔ་མ་གསུམ་བྱང་ཆུབ་ལམ་གྱི་སྒྲོན་མ་ཞེས་བྱ་བ་སྟོད་ལས་དང༌།  ཕྱི་མས་སྨད་ལས་དགྲ་བགེགས་སྒྲོལ་བའི་ལས་རིམ་སྟོན་པ་ལས།  འདིར་སྐབས་སུ་བབས་པ་ཐུགས་རྗེ་སྤྲུལ་པའི་ཕུར་བུ་ཁམས་གསུམ་སེམས་ཅན་གྱི་ཡུལ་ལ་གདབ་པའི་རིམ་པ་སྟོད་ལས་བྱང་ཆུབ་སྒྲུབ་པའི་ལམ་རིམ་གྱི་སྙིང་པོ་དཔལ་ཆེན་ཚོམ་བུའི་ལྷ་ཚོགས་རྣམས་བསྙེན་ཐབས་ཀྱི་མན་ངག་མདོ་ཙམ་ཞིག་འཆད་པ་ལ་སྤྱི་དོན་རྣམ་པ་གཉིས་ཏེ།  ཤེས་པར་བྱ་བའི་རྣམ་བཞག་སྤྱིར་བསྟན་པ་དང༌།   {{TibChung|[3a]}} བསྙེན་ཐབས་ཀྱི་ལག་ལེན་བྱེ་བྲག་ཏུ་བཤད་པའོ།  །དང་པོ་ལ་གསུམ།  དམིགས་པར་བྱ་བའི་ཡུལ།  སྒྲུབ་པར་བྱེད་པའི་ཐབས།  དེ་ཉིད་གྲུབ་པའི་འབྲས་བུའོ།  །དང་པོ་ནི།  རྒྱུད་འདིར་རང་བཞིན་དམིགས་པར་བྱ་བའི་ཡུལ་དུ་གྲགས་པ་སྟེ།  སྦྱངས་གཞི་འགྲོ་བ་ཡོངས་ལ་ཀུན་ཁྱབ་བདེ་བར་གཤེགས་པའི་སྙིང་པོ་རང་བཞིན་གྱིས་རྣམ་པར་དག་པ་ལྷའི་བདག་ཉིད་ཆེན་པོར་གདོད་ནས་ལྷུན་གྲུབ་ཏུ་གནས་པ་ཉིད་གློ་བུར་གྱི་དྲི་མ་དང་འབྲེལ་བས་གནས་ལུགས་ཀྱི་ཡོན་ཏན་མངོན་དུ་མ་གྱུར་པ་དེ་མངོན་དུ་འགྱུར་བར་བྱ་བ་ལ་དམིགས་ནས།  སྦྱོང་བྱེད་དེའི་རྣམ་པ་ལམ་བྱེད་སྣོད་བཅུད་སྣང་བ་འདི་དག་རྟེན་དང་བརྟེན་པར་བཅས་པའི་དཀྱིལ་འཁོར་གྱི་རྣམ་པ་དམ་ཚིག་སེམས་དཔར་བསྒོམ་པ་དང༌།  འབྲས་བུ་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡིན་པས།  དེའི་རྣམ་པ་ལམ་བྱེད་ཆོས་སྐུ་ཉིད་ཡེ་ཤེས་སེམས་དཔའ་གང་འདུལ་གྱི་རོལ་པ་ཞི་ཁྲོའི་རྣམ་པར་སྤྱན་འདྲེན་པ་དང༌།  གཞི་འབྲས་གཉིས་གདོད་མ་ནས་རང་བཞིན་དབྱེར་མེད་དུ་བཞུགས་པས།  དེའི་རྣམ་པ་ལམ་བྱེད་ཡེ་ཤེས་པ་དམ་ཚིག་པར་བསྟིམས་ཏེ་དམ་ཡེ་དབྱེར་མེད་དུ་ཉམས་སུ་བླངས་པ་ལས།  སྦྱངས་འབྲས་གཞི་ལ་བཞུགས་པའི་དཔལ་ཆེན་པོ་ཉིད་མངོན་དུ་གྱུར་པ་ལ་འབྲས་ {{TibChung|[3b]}} བུའམ་མཆོག་ཐོབ་ཅེས་བརྡར་བཏགས་པའོ།  །དེས་ན་བསྒྲུབ་གཞིའི་ལྷ་དེ་རང་ལ་གནས་པས།  ལམ་རྐྱེན་དང་འཕྲད་ན་འབྲས་བུའི་ཡོན་ཏན་འབྱུང་རུང་དུ་ངེས་པ་རྙེད་དེ་ཐོབ་བྱའི་འབྲས་བུ་མཚན་ཉིད་པ་འཇིག་རྟེན་ལས་འདས་པ་མཆོག་དང༌།  བཏགས་པ་འཇིག་རྟེན་པ་དང་ཐུན་མོང་བ་སྟེ།  དངོས་གྲུབ་རྣམ་པ་གཉིས་ཀྱི་ཡོན་ཏན་ལ་བྲོད་པ་བསྐྱེད་ནས་ལམ་ལ་བསླབ་དགོས་པའི་ཕྱིར་དམིགས་ཡུལ་གྱི་གཙོ་བོ་ནི་ཕྱག་རྒྱའི་དངོས་གྲུབ་བོ།  །གཉིས་སྒྲུབ་པའི་ཐབས་ལ་ལྔ་སྟེ།  གང་གིས་སྒྲུབ་པའི་གང་ཟག    །གང་དུ་སྒྲུབ་པའི་གནས།  གང་གི་ཚེ་སྒྲུབ་པའི་དུས།  གང་ལ་བསྟེན་ནས་སྒྲུབ་པའི་ཡོ་བྱད།  ཇི་ལྟར་སྒྲུབ་པའི་ཚུལ་ལོ།  །དང་པོ་ནི།  ཐུན་མོང་བ་དལ་འབྱོར་རྙེད་དཀའ་ལ་ངེས་པ་རྙེད།  འཆི་བ་མི་རྟག་པས་རྒྱུད་འཁུལ།  ལས་འབྲས་བསླུ་མེད་ལ་ཡིད་ཆེས་སྐྱེས།  འཁོར་བའི་ཉེས་དམིགས་ཀྱིས་ངེས་འབྱུང་གི་གཞི་ཚུགས་ཏེ།  ཐུན་མོང་མ་ཡིན་པ་ཐེག་པ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་ཞིང་བྱང་ཆུབ་ཏུ་སེམས་བསྐྱེད།  འགལ་རྐྱེན་སྡིག་སྒྲིབ་སྦྱང་ཞིང་མཐུན་རྐྱེན་ཚོགས་བསགས།  བྱིན་རླབས་མྱུར་འཇུག་བླ་མའི་རྣལ་འབྱོར་ལ་མྱོང་བ་ཐོན་པའི་གང་ཟག་ལ།  ཆུ་བོ་བཞི་འདུས་ཀྱི་སྒོ་ནས་བཤད་ཅིང་ཉམས་ {{TibChung|[4a]}}  སུ་ལེན་དགོས་པ་ལས།  སྨིན་བྱེད་དབང་གི་ཆུ་བོ་སྐུར་བྱེད་ངོ་སྤྲོད་དང་བཅས་པས་རྒྱུད་སྨིན་ཅིང་དམ་ཚིག་དང་སྡོམ་པ་ལ་གནས་པ།  གཞུང་བཤད་ཆུ་བོ་འགྲེལ་ཊཱིཀ་གཏོང་ཐུན་དང་བཅས་པས་བསྒོམ་བྱ་གཏན་ལ་ཕེབས་པ།  གདམས་པ་ཉམས་ལེན་གྱི་ཆུ་བོ་ལག་ལེན་མངོན་རྟོགས་དང་བཅས་པ་ལ།  མན་ངག་གནད་ཀྱི་ཆུ་བོ་དྲིས་ལན་གེགས་སེལ་དང་བཅས་པས་ཕུ་ཐག་ལེགས་པར་བཅད་ཟིན་པ་གཞིར་བཞག་ནས།  དངོས་གྲུབ་ཐོབ་པ་ལ་དེའི་སྟེང་དུ་རྒྱུ་རྐྱེན་ཕུན་སུམ་ཚོགས་པ་གཉིས་ཚང་དགོས་ཏེ།  རྒྱུ་ནི་བསྒྲུབ་བྱའི་དངོས་གྲུབ་ལ་ཡིད་རྟོན་པས་དོན་གཉིས་སྒྲུབ་པའི་ལྷག་བསམ་དང་ལྡན་པ།  རྐྱེན་ནི་ཡིད་ཆེས་དང་འདོད་པ་དང་རབ་ཏུ་དང་བའི་དད་པ་གསུམ་གྱིས་ཀུན་ནས་བསླངས་ཏེ་བསྙེན་སྒྲུབ་ལ་ཐང་ལྷོད་མེད་པར་འབད་པའི་བརྩོན་འགྲུས་དང༌།  དག་བྱ་དག་བྱེད་ཀྱི་གནད་རྟོགས་པའི་ཤེས་རབ་དང་ལྡན་ཞིང༌།  འདུ་འཛིས་མི་འཕྲོག་པ་ལ་སོགས་པའི་ཡོན་ཏན་ཚང་བ་རི་བོ་ལྟ་བུའི་གང་ཟག་གིས་སོ།  །གཉིས་པ་གནས་ནི།  གྲུབ་ཐོབ་གོང་མས་བྱིན་གྱིས་བརླབས་པ་དང༌།  སའི་དཔྱད་སྤྱིར་ལེགས་ཤིང་ཁྱད་པར་གསང་རྒྱུད་ལས།  མེ་ཏོག་མང་པོའི་གླིང་ཡོད་དང༌།  །རི་ནི་རིན་ཆེན་སྤུངས་པ་འདྲ།  །སྐྱེད་མོས་ཚལ་དང་དཔག་བསམ་ཤིང༌།  །ངང་ {{TibChung|[4b]}} པ་བུང་བའི་སྒྲ་སྒྲོགས་ཤིང༌།  །སྐད་སྙན་བྱ་ནི་སྣ་ཚོགས་སྒྲོགས།  །གནམ་ནི་འཁོར་ལོ་རྩིབས་བརྒྱད་འདྲ།  །ས་ནི་པདྨ་འདབ་བརྒྱད་འབྲང་།  །གནས་ཀྱི་དབྱིབས་ལེགས་ཁ་ཤར་བལྟས།  །ཞེས་སོགས་ཀྱི་མཚན་ཉིད་ཚང་བ་དང༌།  བྱེ་བྲག་ཕྲིན་ལས་མངོན་སྤྱོད་སྒྲུབ་པའི་གནས་ནི།  མྱང་འདས་ལས།  དྲག་པོའི་གནས་ཀྱི་དམ་པ་ནི།  །དུར་ཁྲོད་ཤིང་གཅིག་རྒྱ་གྲམ་ལམ།  །གཅན་གཟན་མང་པོའི་རྒྱུ་སྲང་དང༌།  །གནམ་ནི་གྲི་འདྲ་ས་གྲུ་གསུམ།  །ལོགས་ལ་ཚེར་མ་ཅན་གྱི་ཤིང༌།  །དེ་ནི་དྲག་པོའི་སྒྲུབ་གནས་སོ།  །ཞེས་སོགས་ཀྱི་མཚན་ཉིད་ཚང་བའི་གནས་ཆེད་དུ་བསྔགས་སོ།  །དེ་ལྟ་ནའང་རྒྱུན་གྱི་ཉམས་ལེན་དང་བསྙེན་པ་ཙམ་གྱི་གནས་ལ་ཁྱད་པར་དེ་དག་མ་ཚང་ཡང་ཆོག་སྟེ།  རང་གི་ཡིད་དང་མཐུན་ཅིང་བར་དུ་གཅོད་པའི་མི་དང་ལྷ་འདྲེས་བདག་ཏུ་མ་བཟུང་བ་དང་དགྲ་རྐུན་སོགས་ཀྱི་ཉེར་འཚེ་མེད་པའི་གནས་དབེན་པར་ཉམས་སུ་བླང་དུ་རུང་ངོ༌།  །གསུམ་པ་དུས་ནི།  སྤྱིར་བྱང་ཆུབ་སྒྲུབ་པ་ལ་ཤིས་པའི་དུས་རྣམས་དང་ཁྱད་པར་གསང་རྒྱུད་ལས།  ར་བ་བཞི་ལ་བསྙེན་པའི་དུས།  །འབྲིང་པོ་བཞི་ལ་སྒྲུབ་པའི་དུས།  །ཐ་ཆུང་བཞི་ལ་ལས་སྦྱོར་བྱ།  །ཞེས་ཟླ་བའི་ཁྱད་པར་དང༌།  སྒྱུ་འཕྲུལ་རྒྱས་པ་ལས།  ཚེས་གྲངས་ཡར་གྱི་བརྒྱད་ལ་བརྩམ།  །ཤིན་ {{TibChung|[5a]}} ཏུ་སྐར་མ་རྒྱལ་རྣམས་ལ།  །ཞེས་དང༌།  འཇོམས་བྱེད་ལས།  ཟླ་བ་སྐྱེ་དུས་གཟའ་ཕུར་བུ།  །དར་ཚེ་སྒྲུབ་པ་མཆོག་ཏུ་ཤིས།  །ཞེས་ཚེས་གྲངས་དང་གཟའ་སྐར་གྱི་ཁྱད་པར་དམིགས་བསལ་དུ་བཤད་པ་དག་དང་འགྲིག་ན་རབ།  གཞན་དུ་ཚེས་གྲངས་དགེ་ཞིང་མགོ་ཕུར་འཛོམ་པ་ལྟ་བུའི་གཟའ་སྐར་འཕྲོད་སྦྱོར་བཟང་བའི་ཉི་མ་ཕྱེད་ཡོལ་གྱི་དུས་སུ་འཇུག་གོ  །བཞི་པ་ཡོ་བྱད་ནི།  །ལམ་རིམ་ལས།  གོས་རྒྱན་གཟའ་བཏུང་གསང་བ་དང༌།  སྒྲུབ་པའི་ཡོ་བྱད་ལྔ་རྣམས་དང༌།  །དཀྱིལ་འཁོར་ཡོ་བྱད་མཆོད་པའི་རྫས།  །དངོས་གྲུབ་རྟེན་དང་བར་ཆད་ཟློག    །ཡོ་བྱད་དག་པ་བསྡུ་བྱ་སྟེ།  །ཞེས་གསུངས་པ་ལྟར།  སྤྱིར་འཚོ་བ་ཟས།  རྐྱེན་ཟློག་མཚོན།  ནད་ཟློག་སྨན་སོགས་མཐུན་རྐྱེན་གྱི་དངོས་པོས་མ་ཤོལ་བ་དང༌།  ཁྱད་པར་རྟེན་སྒྲུབ་མཆོད་པའི་དམ་རྫས་སུ་འོས་པའི་ཡོ་བྱད་རྣམས་གཞུང་བཞིན་ཚོགས་པར་བྱའོ།  །ལྔ་པ་ཇི་ལྟར་སྒྲུབ་པའི་ཚུལ་ལ་གསུམ་སྟེ།  དཀྱིལ་འཁོར་རྣམ་པ་གསུམ་སྔོན་དུ་འགྲོ་བ་དང་བཅས་དོན་གྱི་ཁོག་དབུབ།  ཁམས་གསུམ་གྱི་སྲོག་ལ་དབང་བསྐུར་ཏེ་སྲོག་གི་ཡེ་ཤེས་སེམས་དཔས་སྲོག་ལ་དབང་བསྐུར།  ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་མཆོད་ {{TibChung|[5b]}} ཅིང་བསྙེན་པས་དངོས་གྲུབ་ཀྱི་བཅུད་བླང་བའོ།  །དང་པོ་ལ་གཉིས།  སྔོན་དུ་འགྲོ་བའི་རིམ་པ་དང༌།  དཀྱིལ་འཁོར་དངོས་བཤད་པའོ།  །དང་པོ་ནི།  འདི་དག་ལ་ལས་བྱང་གི་འབྲུ་གཉེར་བའི་སྒོ་ནས་སྤྲོས་ན་ཧ་ཅང་མང་བས་སྨོས་སུ་མ་ལོང་མོད།  སྒོམ་དོན་སྙིང་པོ་ཙམ་ཞིག་འཆད་ན།  སྐྱབས་སེམས་ཚོགས་བསགས་རྣམས་ཀྱི་དམིགས་པ་གོ་སླ་ཞིང༌།  བཀའ་བསྒོ་བ་ལ།  བདག་ཉིད་དཔལ་ཆེན་པོའི་སྙེམ་པས་གདུག་པ་ཅན་གྱི་འབྱུང་པོ་རྣམས་བྱིན་གྱིས་བརླབས་པའི་གཏོར་མས་བརྔན་ཅིང་བདེན་པས་བཀྲོལ་ནས་སྒྲུབ་པ་ལ་བར་ཆད་མི་བྱེད་པར་བཀའ་བསྒོས་པས་བགེགས་རྣམས་གཏོར་མས་ཚིམས་ཤིང་ཚིག་དེ་སྐད་ཐོས་པ་ཙམ་གྱིས་རབ་ཏུ་སྐྲག་ནས་སྟོང་གསུམ་ཡུལ་ཁམས་གཞན་དུ་དེངས་པར་བསམ།  གལ་ཏེ་མི་ཉན་པའི་རིགས་གདུག་པ་ཅན་ཡོད་སྲིད་པ་ལ་རང་ཉིད་ཧེ་རུ་ཀའི་སྐུ་གསུང་ཐུགས་ལས་སྤྲུལ་པའི་ཁྲོ་ཚོགས་མཚོན་ཆ་སྣ་ཚོགས་ཐོགས་པ་གྲངས་མེད་པར་འཕྲོས་པ་རྣམས་ཀྱི་ཞལ་ནས་དྲག་སྔགས་རྡོ་རྗེའི་གད་མོ་འབྲུག་ལྟར་སྒྲོགས་ཤིང་མཚོན་ཆས་གཟིར།  རོལ་པའི་སྟངས་སྟབས་ས་གསུམ་གཡོ་བའི་ཉམས་དང་བཅས་ཏེ་བགེགས་རྣམས་འཇིག་རྟེན་ {{TibChung|[6a]}} གྱི་ཁམས་མང་པོ་བརྒལ་བའི་ཕ་རོལ་ལྕགས་རི་ཆེན་པོའི་རྒྱབ་ཏུ་བསྐྲད།  སྤྲུལ་པའི་ཁྲོ་ཚོགས་ཚུར་འདུས་ནས་སྟེང་འོག་ཕྱོགས་མཚམས་རྣམས་དང་བདག་གི་བ་སྤུའི་བུ་ག་ཀུན་ནས་ཞལ་ཕྱིར་ཕྱོགས་པས་གཏམས་ཤིང་དྲག་པོའི་ཧཱུཾ་སྒྲ་དང་བཅས་ཏེ་ཚམ་རྔམས་ཆེན་པོས་རོལ་པར་བསམ།  མཚམས་བཅད་པ་ལ་གསུམ་གྱི།  དང་པོ་ཕྱི་མཚོན་ཆ་ལྔ་དང་འབར་བའི་གུར་ཁང་གི་མཚམས་ནི།  བདག་ཉིད་དཔལ་ཆེན་པོའི་སྐུའི་གནས་ལྔར་ཨོཾ་ཨཱཿཧཱུཾ་སྭཱ་ཧཱས་མཚན་པའི་ཐུགས་ཀའི་ཧཱུཾ་ལས་འོད་ཟེར་སྔོན་པོ་ཤར་དུ་སོང་བ་ལས་བྱུང་བའི་རྡོ་རྗེ་སྔོན་པོ་རྩེ་དགུ་པར་གྱུར།  དེ་ལས་རྡོ་རྗེ་དེ་འདྲ་བ་རིམ་པར་མཆེད་དེ་རྡོ་རྗེའི་གུར་དུ་གྱུར་པ་ནི།  འོག་ཐམས་ཅད་རྡོ་རྗེའི་ས་གཞི་རྒྱ་གྲམ་དུ་བརྡལ་བ།  ཁོར་ཡུག་ཐམས་ཅད་རྡོ་རྗེ་གྱེན་དུ་ལངས་པའི་ར་བ་ཟླུམ་པོར་བསྐོར་བའི་ཕྱི་ནས་རྡོ་རྗེའི་ཕྲེང་བས་བསྡམས་པ།  སྟེང་ཐམས་ཅད་རྡོ་རྗེའི་གུར་རྒྱ་ཕུབ་ཀྱི་རྣམ་པ་ལྟར་ཕུབ་པ་ལ་རྡོ་རྗེ་རྩེ་ལྔའི་ཏོག་གིས་སྤྲས་པ།  གུར་འདབས་ར་བའི་ཕྱིར་འཕྱང་བ་ལ་རྡོ་རྗེའི་དྲྭ་བ་དང་དྲྭ་བ་ཕྱེད་པ་ཐུར་དུ་འཕྱང་བ།  ནང་དུ་རྡོ་རྗེའི་བླ་བྲེ་ཐད་ཀར་བརྒྱངས་ཤིང་གདུགས་ལྟར་ཕུབ་པ།  དེ་དག་གི་བར་མཚམས་རྣམས་སུ་རྡོ་རྗེ་རྩེ་ལྔ་དང་རྩེ་གསུམ་ {{TibChung|[6b]}} པས་གོ་སྐབས་མེད་པར་གཏམས་པ།  དེའི་རྒྱབ་ཏུ་དཔྲལ་བའི་ཨོཾ་ལས་འོད་ཟེར་དཀར་པོ་སྟེང་དུ་སོང་བ་མཆེད་པ་ལས་བྱུང་བའི་འཁོར་ལོ་རྩིབས་གསུམ་པ་ནས་བརྒྱད་པ་སོགས་དང་བཅུ་གཉིས་པའི་བར་དུ་གང་ཡང་ཡོད་པ་གསོར་ལྟར་འཁོར་བའི་གུར་ཁང༌།  དེའི་རྒྱབ་ཏུ་ལྟེ་བའི་སྭཱ་ལས་འོད་ཟེར་སེར་པོ་ལྷོ་རུ་སོང་བ་མཆེད་པ་ལས་བྱུང་བའི་རྩེ་མོ་ཕྱིར་གཟིང་བ་ཅན་གྱི་རལ་གྲིའི་གུར་ཁང༌།  དེའི་རྒྱབ་ཏུ་མགྲིན་པའི་ཨཱཿ་ལས་འོད་ཟེར་དམར་པོ་ནུབ་ཏུ་སོང་བ་མཆེད་པ་ལས་བྱུང་བའི་རྡོ་རྗེའི་ཐོད་དབྱུག་ཕྱིར་གདེངས་པ་ཅན་གྱི་གུར་ཁང༌།  དེའི་རྒྱབ་ཏུ་གསང་བའི་ཧཱ་ལས་འོད་ཟེར་ལྗང་གུ་བྱང་དུ་སོང་བ་མཆེད་པ་ལས་བྱུང་བའི་རྒྱ་གྲམ་མི་གཡོ་བར་གནས་པའི་གུར་ཁང་སྟེ།  དེ་རྣམས་ཕྱི་ནང་རིམ་པར་དཀྲིགས་པས་སྲིད་པའི་རླུང་ཡང་འགྱུ་བའི་སྐབས་མེད་ཅིང་ཆུ་ཡང་འཛག་པ་མེད་པའི་རང་བཞིན་ཅན།  གུར་ཁང་དེ་དག་རེ་རེའི་བར་བར་དུ་ནམ་མཁའ་སྟོང་པར་གནས་པ་ལ་སོ་སོའི་རིགས་ཀྱི་ཁྲོ་ཆུང་མང་པོ་ལག་ན་རང་རྟགས་ཀྱི་མཚོན་ཆ་ཐོགས་ཏེ་ཞལ་ཕྱིར་བལྟ་བས་བར་མཚམས་མེད་པར་གཏམས་པས་སྲུང་བ།  ཀུན་གྱི་ཕྱི་རོལ་སྟེང་འོག་ཕྱོགས་མཚམས་ཐམས་ཅད་དུ་རཾ་ལས་ཡེ་ཤེས་ཀྱི་མེ་དཔུང་ཆེན་པོ་མཐའ་མེད་ {{TibChung|[7a]}} པར་འབར་བའི་མེ་ལྕེ་ཕྱིར་བསྟན་པ་སྟོང་གསུམ་གྱི་མཐར་ཁྱབ་ཅིང༌།  གྱེན་དུ་འབར་བ་སྲིད་པའི་རྩེ་མོ་བརྒལ་བ།  འབར་ཞིང་འཁྲུགས་པའི་སྒྲ་འབྲུག་སྟོང་ལྟར་ལྡིར་བ་ལ་ཟེག་མ་ཁྲོ་ཆུང་གི་ཚྭ་ཚྭ་ཐོག་ལྟར་འབེབས་པ།  འཇིག་རྟེན་པའི་བགེགས་དང་འབྱུང་པོས་ལྟ་ཅི་སྨོས་ཏེ་ཡེ་ཤེས་པས་ཀྱང་བལྟར་མི་བཟོད་པའི་གུར་ཆེན་པོར་གྱུར་པར་བསམ་མོ།  །གཉིས་པ་ནང་ཁྲོ་བོ་རོལ་པའི་མཚམས་ནི།  དེ་ལྟར་འབར་བའི་མེ་དང་མཚོན་ཆ་ལྔའི་གུར་གྱི་ནང་དུ་གནམ་ལྕགས་ཀྱི་འཁོར་ལོ་ཕྱོགས་བཞི་མཚམས་བརྒྱད་སྟེང་འོག་གཉིས་ཏེ་རྩིབས་བཅུ་རྒྱ་ཕོར་ཁ་སྦྱོར་ལྟ་བུ་བར་མཚམས་སྲུབས་གསེང་མེད་པའི་ནང་སྦུབས་སྟོང་ཡངས་ཤིང་རྒྱ་ཆེ་བའི་རྩིབས་སོ་སོར་པད་ཉི་ཕྱོགས་སྐྱོང་གི་གདན་ལ་བདག་གི་ཐུགས་ཀ་ནས་འབར་བའི་ཧཱུཾ་ཡིག་བཅུ་འཕྲོས་ཏེ་བབས་པ་ཡོངས་སུ་གྱུར་པ་ལས་ཁྲོ་བོ་བཅུར་གྱུར་པ་ནི།  སྟེང་དུ་ཧཱུཾ་མཛད།  ཤར་དུ་རྣམ་རྒྱལ།  ཤར་ལྷོར་དབྱུག་སྔོན།  ལྷོ་རུ་གཤིན་རྗེ།  ལྷོ་ནུབ་ཏུ་མི་གཡོ།  ནུབ་ཏུ་རྟ་མགྲིན།  ནུབ་བྱང་འདོད་རྒྱལ།  བྱང་དུ་བདུད་རྩི།  བྱང་ཤར་གསུམ་རྒྱལ།  འོག་ཏུ་སྟོབས་ཆེན་ཏེ།  ཀུན་ཀྱང་ཞལ་གསུམ་ཕྱག་དྲུག    །དང་པོས་རྡོ་རྗེ་དང་དུང་ཁྲག    །བར་པས་རང་རྟགས་ {{TibChung|[7b]}} ཀྱི་ཕྱག་མཚན།  ཐ་མས་ཕུར་བུ་འདྲིལ་བ།  རང་རང་གི་ཡུམ་དང་མཉམ་པར་སྦྱོར་ཞིང་འབར་བའི་ཆས་ཀུན་རྫོགས་པ།  ཞབས་བཞི་འདོར་སྟབས་ཀྱིས་ཕྱོགས་སྐྱོང་གདོན་ཚོགས་ཕོ་མོ་བརྫིས་ཤིང་རོལ་པ།  སོ་སོའི་གཡས་གཡོན་དུ་སྤྲུལ་པའི་ཟ་གསོད་ཕོ་མོ་རང་རྟགས་ཀྱི་མཚོན་ཆ་ཐོགས་པས་བགེགས་རྣམས་སྲུང་ཟློག་གི་ལས་ལ་བརྩོན་པ།  ཀུན་ཀྱང་འབར་བ་ཆེན་པོའི་ཀློང་ན་རྡོ་རྗེའི་གར་གྱིས་རོལ་པའི་སྦྱོར་མཚམས་ནས་རང་འདྲ་བའི་ཁྲོ་བོ་དང་ཡང་སྤྲུལ་གྱི་ཁྲོ་ཆུང་གྲངས་མེད་པ་མེ་ལྟར་འབར་ཞིང་རླུང་ལྟར་འཚུབས་པས་མཚམས་དང་གོ་སྐབས་མེད་པར་གཏམས་པ།  དེའི་ནང་དུ་ཐབས་ཤེས་ཉི་ཟླའི་གུར་ཁང་ཞེས་འོད་ཟེར་དཀར་པོ་གསལ་བྱེད་ཀྱི་ཕྲེང་བ་དང་དམར་པོ་དབྱངས་ཡིག་གི་ཕྲེང་བས་མཚན་པའི་གུར་ཁང་ཉིས་རིམ་དུ་ཡོད་པ་དབྱིངས་དང་ཡེ་ཤེས་ཀྱི་རང་བཞིན་ཅན་ཏེ།  སྤྱན་དྲངས་པ་རྣམས་མ་གཏོགས་ཡེ་ཤེས་དང་འཇིག་རྟེན་པ་གང་གིས་ཀྱང་གླགས་མི་རྙེད་ཅིང་འབིགས་སུ་མེད་པར་གྱུར་པ།  མདོར་ན་སྲ་ཞིང་བརྟན་ལ་རབ་ཏུ་འཇིགས་པའི་སྲུང་འཁོར་ཆེན་པོ་རྒྱ་ཁྱོན་ནམ་མཁའི་མཐའ་དང་མཉམ་པ་ཙམ་དུ་བལྟའོ།  །གསུམ་པ་གསང་བ་ལྟ་བའི་མཚམས་ནི།  བར་དུ་བཅད་བྱ་གཅོད་བྱེད་ཐམས་ {{TibChung|[8a]}}  ཅད་ཀྱང་གཟུང་འཛིན་སེམས་ཀྱི་རྣམ་པར་རྟོག་པའི་ངོར་སྣང་བ་ཙམ་སྟེ།  སེམས་ཉིད་ཡེ་ནས་སྟོང་གསལ་ཆོས་ཀྱི་དབྱིངས་སུ་རོ་གཅིག་པའི་ངོ་བོ་ལ་བར་ཆད་ཀྱི་མཚན་མ་ནམ་ཡང་གྲུབ་པ་མེད་པས་ན་སྲིད་ཞི་མཉམ་ཉིད་དུ་རིག་པ་ནི་མི་ཤིགས་རྡོ་རྗེའི་མཚམས་གཅོད་བླ་ན་མེད་པའོ།  །བཤགས་པ་བྱ་བ་ནི།  བླ་མ་རིག་འཛིན་རྡོ་རྗེ་ཕུར་བུའི་དཀྱིལ་འཁོར་གྱི་ལྷ་ཚོགས་མཁའ་ཁྱབ་ཏུ་སད་པར་མོས་ལ།  དེ་དག་གི་སྤྱན་སྔར་ཉེས་བྱས་ལ་འགྱོད་ཚངས་ཀྱི་བསམ་པ་དྲག་པོས་སྨྲེ་ངག་གདུང་བའི་ཤུགས་ཀྱིས་མཐོལ་བཤགས་ཕུལ་བས་སྡིག་སྒྲིབ་བག་ཆགས་ཐམས་ཅད་བྱང་ཞིང་དག་ནས་སོར་ཆུད་པར་བསམ་པ་དང༌།  དོན་དམ་པར་ཆོས་ཐམས་ཅད་གདོད་ནས་མ་བྱུང་མ་སྐྱེས་པ་གནས་ལུགས་ཀ་དག་འཆིང་གྲོལ་ལས།  འདས་པའི་ཀློང་དུ་ལ་བཟླའོ།  །བརྡ་སྒོ་དབྱེ་བ་ནི།  སྣང་སྲིད་ཀ་ནས་དག་པ་ལྷུན་འབྱམས་བརྡལ་བ་ཆེན་པོའི་ཀློང་ན་རང་བཞིན་ལྷུན་གྱིས་གྲུབ་པའི་ཡེ་ཤེས་རིག་པ་རྡོ་རྗེ་ཕུར་པའི་བདག་ཉིད་ཆེན་པོར་གདོད་མ་ཉིད་ནས་བཞུགས་པ་གློ་བུར་ལྷན་སྐྱེས་ཀྱི་དྲི་མས་བསྒྲིབས་ནས་ཡོད་པ་ཉིད་ཐབས་དང་བརྡས་མཚོན་ནས་སྐད་ཅིག་ཙམ་ལ་རང་སྣང་གི་འཆར་སྒོ་མཁའ་ཁྱབ་ཏུ་ {{TibChung|[8b]}} ཕྱེས་པར་བསམ་མོ།  །བརྡ་ཕྱག་འཚལ་བ་ནི།  དེ་ལྟར་རང་བཞིན་ཡེ་ཀློང་ཆེན་པོར་རང་རིག་ཡེ་ཤེས་ཀྱི་ལྷ་རང་གསལ་འདུ་འབྲལ་མེད་པར་བཞུགས་པ་ཉིད་སྒྲིབ་མེད་མངོན་སུམ་རང་ཞལ་མཇལ་བ་ལ་ངོ་མཚར་ཞིང་ཡིད་ཆེས་པའི་སྒོ་ནས་བརྡ་ཕྱག་འཚལ་བ་སྟེ་དོན་དམ་མ་རྟོགས་པ་རྣམས་ལ་ཀུན་རྫོབ་ཀྱི་ཚུལ་མཚོན་པའོ།  །དམ་བཅའ་བ་ནི།  ལྷན་སྐྱེས་ཀྱི་རིག་པ་རྡོ་རྗེ་གཞོན་ནུའི་ངོ་བོ་ཉིད་ཡེ་ནས་བྲི་གད་མེད་པར་རང་ཆས་སུ་བཞུགས་ཀྱང་གློ་བུར་རྟོག་པས་བསྒྲིབས་ནས་མཐུ་རྩལ་མངོན་དུ་མ་འབྱིན་པ་དེ་སྒྲིབ་པའི་སྦུབས་ལས་འཐོན་ཏེ་རྡོ་རྗེ་གསུམ་གྱི་དངོས་གྲུབ་དང་མཐུ་རྩལ་མངོན་དུ་མ་གྱུར་གྱི་བར་ཐུགས་དམ་འདི་ལས་ནམ་ཡང་མི་འདའོ་སྙམ་དུ་དམ་བཅའ་བཟུང་ངོ༌།  བྱིན་དབབ་པ་ནི།  ཆོས་སྐུ་སྤྲོས་མཐའ་དང་བྲལ་བའི་ཀློང་ནས་བླ་མ་རིག་འཛིན་དཔལ་ཆེན་ཕུར་བུའི་དཀྱིལ་འཁོར་གྱི་ལྷ་ཚོགས་ཐུགས་རྗེ་ལོངས་སྤྱོད་རྫོགས་པའི་སྐུའི་རྣམ་པར་བཞེངས་ཏེ་རྣམ་འཕྲུལ་བསམ་གྱིས་མི་ཁྱབ་པའི་བཀོད་པ་དང་བཅས་ནམ་མཁའ་ལ་སྤྲིན་ཕུང་གཏིབས་པ་ལྟར་བྱོན་ནས་སྣོད་བཅུད་ཐམས་ཅད་དག་པ་རབ་འབྱམས་ཡེ་ཤེས་ཀྱི་རོལ་པ་ཆེན་པོར་བྱིན་གྱིས་བརླབས་ནས།  མཐར་ལྷ་ཚོགས་དེ་དག་ཐམས་ཅད་ཀྱང་སྒྲུབ་པའི་ཡོ་བྱད་རྣམས་ལ་ཐིམ་ {{TibChung|[9a]}} པར་བསམ་མོ།  །མཆོད་རྫས་བརླབ་པ་ནི།  ཕྱི་ནང་གསང་བའི་མཆོད་པའི་ཡོ་བྱད་ཐམས་ཅད་སྦྱངས་སྤེལ་བསྒྱུར་གསུམ་གྱི་སྒོ་ནས་ཟག་པ་མེད་པའི་འདོད་ཡོན་གྱི་རོལ་མོས་ནམ་མཁའ་རབ་འབྱམས་ཡོངས་སུ་གང་བར་བལྟའོ།  །དེ་དག་ནི་སྔོན་འགྲོའི་ལས་རིམ་མོ།  །གཉིས་པ་དཀྱིལ་འཁོར་རྣམ་པ་གསུམ་གྱི་སྒོ་ནས་དོན་གྱི་ཁོག་དབུབ་པ་ལ།  དེའང་བློ་བརྟན་ཅིང་མི་འགྱུར་བ་རི་བོ་ལྟ་བུའི་གང་ཟག་གིས།  ཐུགས་རྗེ་ལྷ་སྐུ་ཕྱག་རྒྱར་སྤྲུལ་པའི་ཕུར་པ།  སྣོད་བཅུད་ཐ་མལ་དུ་བཟུང་བའི་ཡུལ་ལ།  ལྷ་དང་གཞལ་ཡས་སུ་ཤེས་པའི་ཐབས་ཀྱིས་སྣང་ལ་རང་བཞིན་མེད་པ་མེ་ལོང་ལ་གཟུགས་བརྙན་གྱི་ཚུལ་དུ་གདབ་པས།  ལྷར་སྣང་རང་རྒྱུད་པས་རུ་དྲར་གོལ་བའི་ཉེས་སྐྱོན་ལས་གྲོལ་ཏེ་འཁྲུལ་སྣང་ལྷར་ཤར་བའི་གདིང་ཚད་དང་ལྡན་པས་འབྲས་བུ་སྤྲུལ་པའི་སྐུ་ཐོབ་པར་བྱེད་པ་སྟེ།  དེ་ལ་གསུམ།  གཞི་ཏིང་ངེ་འཛིན་གྱི་འཕྲོ་འདུ།  རྟེན་གཞལ་ཡས་ཁང༌།  བརྟེན་པ་ལྷ་བསྐྱེད་པའོ།  །དང་པོ་ལ་གསུམ་གྱི།  དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི།  སྤྱིར་གོ་དོན་གྱི་དབང་དུ་བྱས་ན།  གང་ཁྲོས་ན།  གནས་ལུགས་སྤྲོས་བྲལ་སྟོང་པ་ཉིད་ཀྱི་རང་བཞིན་སྐྱེ་མེད་དོན་གྱི་རྡོ་རྗེ་ཉིད།  གང་ལ་ཁྲོས་ན།   {{TibChung|[9b]}} མཚན་མའི་རྣམ་པར་རྟོག་པ་གཟུང་འཛིན་བདག་རྟོག་གི་གྲོང་ཁྱེར་ལ།  ཚུལ་ཇི་ལྟར་ཁྲོས་ན།  ཞེ་སྡང་རང་རྒྱུད་པས་མི་གཤིས་ངན་དགྲ་ལ་ཁྲོས་པ་ལྟ་བུ་མ་ཡིན་པར་ཉི་མ་འཆར་བའི་གཟི་བརྗིད་ཀྱིས་མུན་པའི་སྨག་རུམ་མདུན་ན་མི་གནས་པ་ལྟར་སྟོང་ཉིད་རྟོགས་པའི་ཡུལ་ན་དངོས་འཛིན་མཚན་མའི་སྤྲོས་པ་ཐམས་ཅད་མི་གནས་པའི་ཚུལ་གྱིས་ཁྲོས་པས།  སྲིད་རྩའི་ཞེ་སྡང་སོགས་དུག་ལྔའི་རྣམ་རྟོག་མ་ལུས་པ་དབྱིངས་སུ་གཅོད་པ་ཀ་དག་ནམ་མཁའི་རང་བཞིན་ཏེ།  དེའང་གདོད་ནས་སྐྱེ་བ་མེད་པའི་སེམས་ཉིད་སྤྲོས་པའི་མཐའ་ཐམས་ཅད་དང་བྲལ་བ་ལ་གནས་པ་གཞིའི་རྡོ་རྗེ་གཞོན་ནུ་ཞེས་བྱ་ཞིང༌།  ཐབས་ཤེས་གཉིས་ཀྱི་སྒོ་ནས་སྐུ་གསུམ་ཡེ་ཤེས་ལྔ་རྣམ་པ་ལྷའི་འཁོར་ལོར་གསལ་བ་ནི་བགྲོད་པ་ལམ་གྱི་རྡོ་རྗེ་གཞོན་ནུ་ཉིད་ཡིན་ལ།  སངས་རྒྱས་ཀྱི་ཐུགས་གཉིས་སུ་མེད་པའི་ཡེ་ཤེས་སྤྲོས་པ་ཐམས་ཅད་དང་བྲལ་བའི་དེ་ཁོ་ན་ཉིད་མངོན་དུ་གྱུར་པ་ལ་རྟོགས་པ་འབྲས་བུའི་རྡོ་རྗེ་གཞོན་ནུ་ཞེས་བརྗོད་དེ།  རྩ་རྒྱུད་རྡོ་རྗེ་ཁྲོས་པ་ལས།  རང་སེམས་གཞི་ཡི་རྡོ་རྗེ་གཞོན་ནུ་ནི།  །ས་བོན་ཀུན་ཁྱབ་ཏིལ་མར་འདྲ།  །རྟོགས་ན་སངས་རྒྱས་ངོ་མཚར་ཆེ།  །བགྲོད་པ་ལམ་གྱི་རྡོ་རྗེ་གཞོན་ནུ་ནི།  །ཐབས་ཤེས་སྐུ་གསུམ་ {{TibChung|[10a]}} ཡེ་ཤེས་ལྔ།  །ཆུ་བོའི་རྒྱུན་གྱི་རྣལ་འབྱོར་བྱ།  །རྟོགས་པ་འབྲས་བུའི་རྡོ་རྗེ་གཞོན་ནུ་ནི།  །སྐུ་ལྔ་ཡེ་ཤེས་དགུ་ལྡན་ཏེ།  །མ་འཁྲུལ་རྟོགས་པ་མངོན་གྱུར་བྱ།  །གཞི་ལམ་འབྲས་བུ་རྟོགས་གྱུར་ན།  །ཆོས་སྐུ་སྤྲོས་བྲལ་མངོན་དུ་འགྱུར།  །ཞེས་དང༌།  ངང་ཉིད་རྡོ་རྗེ་ཆོས་དབྱིངས་ལས།  །འབར་བའི་ཁྲོ་བོ་མི་བཟད་པ།  །ཞེས་པས།  རིག་པའི་རྩལ་མ་འགགས་པར་སྣ་ཚོགས་སུ་ཤར་བའི་སྣང་བ་འདི་རྣམས་ཡེ་ཤེས་ཡིན་པས་རྟགས་ལྷའི་དཀྱིལ་འཁོར་དུ་རྫོགས།  སྣང་བའི་དུས་ནས་ངོ་བོས་སྟོང་པས་དོན་ཆོས་ཀྱི་དབྱིངས་སྤྲོས་པ་དང་བྲལ་བར་གནས།  དེ་གཉིས་དབྱེར་མེ་ཕྱེད་པའི་སྲས་བདེ་ཆེན་བྱང་ཆུབ་སེམས་ཀྱི་རང་བཞིན་དུ་གནས་པ་དབྱིངས་དང་ཡེ་ཤེས་དབྱེར་མེད་པའི་ལྟ་བ་སྟེ།  སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཟབ་གསལ་དབྱེར་མེད་ཀུན་ཁྱབ་མཉམ་པའི་རང་བཞིན་དངོས་པོ་མེད་ལ་དངོས་པོ་ཀུན་གྱི་རྒྱུར་གྱུར་པ་གང་ཞིག    །དཔེརས་ན་མཚོན་རྣོན་པོ་ལྕུག་ཕྲན་གྱི་ཡལ་ག་ལ་ཐེབས་པ་ན་གཅོད་པར་བྱེད་པའི་ཚུལ་དང་མཐུན་པར།  སྣོད་བཅུད་དངོས་པོར་ཞེན་པའི་རྩ་བ་གཅོད་ཅིང་དག་མཉམ་ལྷའི་འཁོར་ལོར་སྦྱོར་བར་བྱེད་པའི་ཆ་ནས་མཚོན་ {{TibChung|[10b]}} ཆ་དང༌།  ཆོས་ཉིད་འགྱུར་བ་མེད་པས་ན་སྔོན་པོའི་སྒྲས་བསྟན་ཏེ།  སོ་སོ་རང་རིག་པའི་ཡེ་ཤེས་ཀྱི་རོལ་པར་འབར་བའི་ཟུང་འཇུག་ཆོས་སྐུའི་ངོ་བོ་དེ་ཉིད་སྤྲོས་པ་ཀུན་བྲལ་ཆོས་ཉིད་ནམ་མཁའི་ཀློང་ནས་མཉམ་ཡངས་བརྡལ་བ་ཆེན་པོའི་དོན་ཐོག་ཏུ་ཕེབས་པའི་ཐིག་ལེའམ་ཐིག་པར་རང་ཤར་བའི་ཚུལ་རྟོགས་པ་ནི་སྤྱིར་ཤེས་པར་བྱ་བ་ཡིན་ལ།  བྱེ་བྲག་སྒོམ་དོན་གྱི་དབང་དུ་བྱས་ན།  དེ་ལྟར་གཉིས་མེད་ཟུང་འཇུག་ཡེ་ཤེས་ཀྱི་ཕྱག་རྒྱས་བརྟན་གཡོའི་དངོས་པོ་ཀུན་ལ་རྒྱས་བཏབ་ནས་དག་མཉམ་ཆེན་པོའི་ཀློང་དུ་འུབ་ཆུབ་པར་བྱ་བའི་དོན་འདི་སྲོག་གི་སྒོའམ་སྙིང་གི་དཀྱིལ་དུ་བསྒོམ་པར་བྱ་བའི་དམ་ཚིག་ཉིད་ཡིན་པས་ན།  ལྟ་བས་ཐག་བཅད་པའི་དབྱིངས་དང་ཡེ་ཤེས་དབྱེར་མེད་བདེ་བ་ཆེན་པོའི་ངང་དུ་ཅི་ལའང་མི་རྟོག    །གང་དུའང་མི་འཛིན།  ཅིར་ཡང་མི་དམིགས་པར་རང་གྲོལ་འཛིན་མེད་དུ་མཉམ་པར་བཞག་གོ  །གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི།  དེ་ལྟར་རྡོ་རྗེ་ལྟ་བུའི་སྟོང་ཉིད་ཀྱི་ཡེ་ཤེས་ལས་སྒྱུ་མ་ལྟ་བུའི་དམིགས་མེད་ཀྱི་སྙིང་རྗེ་རང་ཤུགས་སུ་སྐྱེ་བས་མ་རྟོགས་པའི་འགྲོ་བ་ཐམས་ཅད་སྒྲོལ་བ་སྟེ།  དེའང་དངོས་འཛིན་རང་རྒྱུད་པས་མནར་གཅོད་ {{TibChung|[11a]}}  དྲག་ཤུལ་གྱི་ལས་ཐབས་ཞེ་སྡང་གིས་བསད་ཅིང་གཏི་མུག་གིས་མནན་པ་ལྟ་བུ་མ་ཡིན་པར།  　ཕུང་ཁམས་སྐྱེ་མཆེད་ཐམས་ཅད་གདོད་ནས་རྡོ་རྗེ་མི་ཕྱེད་པའི་བདག་ཉིད་ཆེན་པོར་གནས་པ་ལ་དབྱེར་མེད་དག་མཉམ་དགོངས་པའི་གཟེར་གྱིས་གདབ་ནས་རྣམ་པར་ཤེས་པ་ཆོས་སྐུ་རང་བྱུང་གི་ཡེ་ཤེས་རྡོ་རྗེ་གཞོན་ནུའི་རོལ་པར་བསྒོམ་པ་ནི་སྤྱིར་ཤེས་པར་བྱས་ནས།  　སྒོམ་དོན་དུ།  　དེ་བཞིན་ཉིད་ཀྱི་ཏིང་འཛིན་དེ་ལས་ཚད་མེད་པའི་སྙིང་རྗེས་འགྲོ་བ་རྣམས་བདེ་ཆེན་རྒྱལ་བའི་ས་ལ་འགོད་པར་བྱ་བའི་ཕྱིར་བདག་ལུས་འཇིགས་བྲལ་རྡོ་རྗེ་གཞོན་ནུའི་སྐུ་གསུང་ཐུགས་སུ་གཏམས་ཏེ་རྣམ་པར་ཤེས་པ་ཆོས་སྐུ་ཡེ་ཤེས་རྡོ་རྗེ་མངོན་དུ་བྱའོ་སྙམ་པའི་དམ་བཅའི་བློ་རྗེས་སུ་སྒྲུབ་པའི་སླད།  　སྙིང་རྗེའི་རང་མདངས་ཉི་མ་སྤྲིན་བྲལ་འབུམ་དུས་གཅིག་ལ་ཤར་བ་ལྟ་བུའི་འོད་ཟེར་ཆེན་པོས་འཇིག་རྟེན་གྱི་ཁམས་ཐམས་ཅད་ཁྱབ་པ་ལས་ཕུར་པ་གྲུབ་པའི་རིག་འཛིན་རྣམས་ཀྱི་ཐུགས་དམ་བསྐུལ།  　དེ་རྣམས་ཀྱིས་སྲིད་པ་ཕུར་བུ་མྱུར་དུ་འགྲུབ་པར་བསྐུལ།  དེས་ཀྱང་ཡེ་ཤེས་ཁྲོ་བོ་བདག་ལ་ཉེ་བར་བསྐུལ་བའི་སྒྲ་བྲག་ཆ་ལྟ་བུར་སད་པར་བསྒོམ་མོ།  །གསུམ་པ་རྒྱུའི་ཏིང་ངེ་འཛིན་ནི།  ཆོས་ {{TibChung|[11b]}} ཀྱི་དབྱིངས་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་གཟུགས་ཀྱི་སྐུ་གང་འདུལ་གྱི་རོལ་པར་འཆར་བའི་གཞིའམ་རྒྱུ་ནི་ས་བོན་གྱི་ཡི་གེ་ཁོ་ན་ལ་བརྟེན་པ་ཉིད་སྤྱིར་ཤེས་པར་བྱས་ནས།  སྒོམ་དོན་དུ།  སྙིང་རྗེའི་རང་མདངས་འགགས་མེད་དུ་ཤར་བ་ཀུན་སྣང་གི་འོད་ཟེར་དེ་དག་ཚུར་འདུས་པ་ལས་བྱུང་བའི་རྒྱུའི་ས་བོན་ཧཱུཾ་ཡིག་སྔོན་པོ་ཡེ་ཤེས་ལྔའི་འོད་ཟེར་རབ་ཏུ་འབར་བ་ཞིག་ནམ་མཁའ་ལ་ཐོལ་གྱིས་ཤར་བར་བསྒོམ་མོ།  །དེ་ལྟར་དེ་ཏིང་བསྒོམ་པས་འཆི་བ་སྦྱོང་ཞིང་ཆོས་སྐུ་ལམ་དུ་བྱེད།  ཀུན་ཏིང་གིས་བར་དོ་སྦྱོང་ཞིང་ལོངས་སྐུ་ལམ་དུ་བྱེད།  རྒྱུ་ཏིང་འབྲས་བུ་ལམ་གྱི་འཁོར་ལོ་དང་བཅས་པས་སྐྱེ་སྲིང་དང་ལས་སྣ་ཚོགས་ཀྱི་བྱེད་པ་སྦྱོང་ཞིང་སྤྲུལ་སྐུའི་མཛད་པ་དང་བཅས་པ་ལམ་དུ་བྱེད་པ་ཡིན་ནོ།  །གཉིས་པ་རྟེན་གཞལ་ཡས་ཁང་བསྒོམ་པ་ནི།  སྔར་བསྒོམས་པའི་ཐུན་མོང་གི་སྲུང་འཁོར་ཆེན་པོ་དེའི་ནང་དུ་རྒྱུའི་ཡི་གེ་ཧཱུཾ་མཐིང་ནག་དེ་ལས་འོད་ཟེར་འཕྲོ་འདུས་སྔར་བས་གཟི་བརྗིད་ཆེ་བར་གྱུར་ཏེ་གནས་པ་ལས།  འབྱུང་བའི་ས་བོན་ཨེ་མཐིང་ག    །ཡཾ་ལྗང་གུ  །ར་དམར་ནག    །སུཾ་སེར་ནག    །ཀེཾ་དཀར་པོ།  རཾ་ལེ་བརྒན་རྣམས་རིམ་པར་ཆད་པ་ཡོངས་སུ་གྱུར་པ་ལས།  ཐོག་མར་ཨེ་ལས་ནམ་མཁའ་ཆོས་ཀྱི་འབྱུང་ {{TibChung|[12a]}} གནས་གདེངས་ཀ་གྱེན་ལ་བསྟན་པས་སྲུང་འཁོར་གྱི་ནང་ཕྱེད་མན་ཆད་ཁྱབ་པ།  རྩ་བ་ཕྲ་བའི་ཟུར་འོག་ཕྱོགས་སྲུང་འཁོར་རྡོ་རྗེའི་ས་གཞིའི་ལྟེ་བ་ལ་ཟུག་པར་བསྒོམ།  དེའི་ཀློང་དུ་རིམ་པར་ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ།  ར་ལས་རཀྟའི་རྒྱ་མཚོ་དམར་པོ་ཟླུམ་པོ།  སུཾ་ལས་ཤ་ཆེན་གྱི་ས་གཞི་སེར་ནག་གྲུ་བཞི།  ཀེཾ་ལས་ཀེང་རུས་ཀྱི་རི་རབ་གྲུ་གསུམ་དཀར་པོ་བང་རིམ་བཞི་ལྡན་འོག་མ་ལས་གོང་མའི་འཕེལ་ཀ་ཇེ་ཆེར་རྒྱས་པ་རྣམས་བརྩེགས་མར་གནས་པ།  དེའི་སྟེང་དུ་རྡོ་རྗེའི་བྲག་ཆེན་པོས་གཏམས་པའི་ཕྱི་ལ་རཾ་ལས་བསྐལ་པའི་མེ་དཔུང་ཆེན་པོ་རབ་ཏུ་འབར་བའི་ནང་དུ་རྡོ་རྗེའི་ར་བས་ཟླུམ་པོར་བསྐོར་བ་དེ་གཉིས་ཀྱིས་སྲིད་དུ་ནང་གི་དཀྱིལ་འཁོར་གྱི་སུམ་ཆ་གཅིག་ཙམ་གྱི་བར་དུ་སླེབ་པ།  རྡོ་རའི་ནང་དུ་སྣ་ཚོགས་པདྨ་འདབ་སྟོང་བརྡལ་བའི་ལྟེ་བར་ཨིནྡྲ་ནཱི་ལའི་ས་གཞི་ལ་ཕྱོགས་མཚམས་བརྒྱད་དུ་རཱུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད།  དེ་དག་ཏུ་ཤིང་བརྒྱད།  དེའི་རྩ་བ་ལ་གནས་པའི་ཕྱོགས་སྐྱོང་བརྒྱད།  ཡལ་ག་ལ་བརྟེན་པའི་ཞིང་སྐྱོང་བརྒྱད།  ཆུ་བརྒྱད།  དེ་ལ་རོལ་བའི་ཀླུ་བརྒྱད།  གཞན་ཡང་མེ་དང༌།  ཆུ་དང༌།  སྤྲིན་དང༌།  རི་དང༌།  མཆོད་རྟེན་རྣམས་ཀྱང་བརྒྱད་བརྒྱད།  ཐམས་ཅད་དུ་གྲུབ་པ་དང་ {{TibChung|[12b]}} རིག་འཛིན་དཔའ་བོ་རྣལ་འབྱོར་མའི་ཚོགས་དང༌།  རོ་ལངས་དང་ཤ་ཟ་འབྱུང་པོའི་ཚོགས་རྣམས་ཧ་ཧར་རྒོད་ཅིང་གར་རྩེབ།  བྱ་དང་གཅན་གཟན་གཏུམ་པོ་མང་པོ་ལང་ལོང་དུ་རྒྱུ་ཞིང༌།  ཀེང་རུས་དང༌།  རོ་བམ་པ་དང༌།  དུམ་བུ་དང༌།  ཚིག་པ་དང༌།  མ་ཚིག་པ་དང༌།  འཐོར་བ་ལ་སོགས་པའི་ཤ་རུས་གསར་རྙིང་སྣ་ཚོགས་པ་གཅལ་དུ་བཀྲམ་ཞིང་ཕུང་པོར་སྤུངས་པས་ཡོངས་སུ་གང་བ།  དེའི་དབུས་སུ་བཻ་ཌཱུརྻའི་བྲག་རི་གྱེན་དུ་ཅུང་ཟད་འཕགས་པའི་སྟེང་ན་སྣ་ཚོགས་རྡོ་རྗེར་བཅུ་གཉིས་པ་ལྟེ་བ་གྲུ་བཞི་པར་ཡོད་པའི་སྟེང་དུ།  རྒྱུའི་ས་བོན་ལས་བྷྲཱུཾ་ཁ་དོག་ལྔ་ལྡན་ཆད་པ་ཡོངས་སུ་གྱུར་པ་ལས།  ཕོ་བྲང་ཕྱི་མ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ།  ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པའི་སྟེང་ན།  རིན་པོ་ཆེའི་ཕ་གུ་སེར་པོར་རིན་པོ་ཆེ་སྣ་ཚོགས་པས་བཀྲ་བ་འཕྱར་ཐབས་སུ་བཀོད་པའི་མཐར་མུ་ཏིག་གི་མགུལ་འཁོར་འཕྱང་བ།  དེའི་སྟེང་དུ་བྲེ་ཕུལ་གྱི་སྣམ་བུ་ལ་གསེར་གྱི་སྐ་རགས་བཞིའི་ཕྱི་ངོས་སུ་མ་ཀ་རའི་ཁ་ནས་རིན་པོ་ཆེའི་དྲྭ་བ་དང་དྲྭ་བ་ཕྱེད་པ།  དར་དང་རྔ་ཡབ།  དྲིལ་བུ་དང་མེ་ལོང་ཟླ་བ་རླུང་གིས་བསྐྱོད་པ་ལ་སོགས་པས་མཛེས་པ།  དེའི་ཕྱི་ངོས་སུ་བྱ་འདབ་ {{TibChung|[13a]}} ལས་འཕྱང་བའི་རིན་པོ་ཆེའི་ཤར་བུ།  སྟེང་ངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན།  དེ་དག་གི་བར་བར་དུ་བུམ་པ་ལ་གནས་པའི་རྒྱལ་མཚན་དང་བ་དན་བརྒྱད་བརྒྱད་དང༌།  ཟུར་བཞིར་རྣམ་པར་བཀྲ་བའི་གདུགས་ཀྱིས་བརྒྱན་པ།  རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུགས་རྡོ་རྗེ་མ་སོགས་ལྷ་མོ་རྣམས་ཀྱིས་མཆོད་པའི་སྤྲིན་རབ་འབྱམས་སྤྲོ་བ།  སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་ནོར་བུས་བརྒྱན་པ།  སྒོ་ལོགས་ཀྱི་ཕྱི་ཟུར་ནས་བུམ་པ་ལ་གནས་པའི་ཀ་བས་བཏེགས་པའི་རྟ་བབས་སྣམ་བུ་བཞི་པ་བསིལ་ཁང་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་གཡས་གཡོན་དུ་རི་དྭགས་ཕོ་མོ་དང་བཅས་པ།  གཞན་ཡང་གདུགས་རྒྱལ་མཚན་བ་དན་སྣ་ཚོགས་པ་དང༌།  གསེར་གྱི་དྲིལ་བུ་ལ་སོགས་པས་བརྒྱན་པ།  སྒོའི་གཡས་གཡོན་གྱི་གཞི་ལ་ཏ་ལའི་ལྗོན་པ་དང༌།  དཔག་བསམ་གྱི་ཤིང་ལ་བཀྲ་ཤིས་པའི་བྱ་སྙན་པར་སྒྲོགས་པ་སྣ་ཚོགས་གནས་པ།  ཤིང་དེ་དག་ཀྱང་གསེར་གྱི་ཐ་གུས་བྲེས་ཤིང་དྲིལ་བུ་དང་གཡེར་ཁ་ཆོས་ཀྱི་སྒྲ་སྙན་པར་སྒྲོགས་པས་མཛེས་པ།  ཡན་ལག་བརྒྱད་དང་ལྡན་ {{TibChung|[13b]}} པའི་ཁྲུས་ཀྱི་རྫིང་བུ་ལ་ལྷ་མོ་སྣ་ཚོགས་བདེ་བར་རྩེ་བ།  རིན་པོ་ཆེའི་ཕུང་པོ་འོད་འབར་བ་རེ་རེ་སྟེ་བརྒྱད་དང༌།  གཞན་ཡང་རིན་པོ་ཆེ་སྣ་བདུན་དང་བཀྲ་ཤིས་པའི་རྫས་བརྒྱད་སོགས་འདོད་པའི་ཡོན་ཏན་ཐམས་ཅད་ཀྱིས་མཛེས་པར་གང་བ།  གཞལ་ཡས་ཁང་དེའི་བར་ཁྱམས་གྲུ་བཞི་པས་ཀུན་ནས་བསྐོར་བའི་ནང་དུ།  ཕོ་བྲང་ནང་མ་དུར་ཁྲོད་ཀྱི་གཞལ་ཡས་ཁང་ཐོད་པ་སྐམ་རློན་རྙིང་པའི་རྩིག་པ་སུམ་རིམ་གནམ་ལྕགས་ཀྱི་གཟེར་གྱིས་བཏབ་ཅིང་ཁྲག་ཞག་ཤ་ཆེན་གྱིས་འཇིམ་ཞལ་བྱས་པ།  སྒོ་ཁྱུད་སྤངས་པའི་སྒོ་བཞི་སྦྲུལ་ནག་གི་རེ་གཞི་ལ།  རུས་སྦལ་གྱི་མ་ཐེམ།  ནམ་མཁའ་ལྡིང་གི་ཡ་ཐེམ།  ཆུ་སྲིན་གྱི་ལྕིབ་ཁུང༌།  ཞིང་གི་སྒོ་གླེགས་རྣམས་ཀྱིས་སྤྲས་པ།  ཕྱོགས་བཞིར་ཞིང་ཆེན་གྱི་རྒྱལ་མཚན་དང༌།  གཡང་གཞི་རློན་པའི་བ་དན་ལ་སོགས་པ་གཡོ་བ།  ནང་ས་བདག་ཕོ་མོའི་ཀ་གདན་ལ་བརྟེན་པའི་ལྷ་ཆེན་པོ་བརྒྱད་ཀྱི་ཀ་བ་ལ།  ཀླུ་ཆེན་པོ་བརྒྱད་ཀྱི་གདུང་མ་ཚངས་པའི་གདུང་བཞི་མིག་མང་རིས་སུ་བྲེས་པ།  གཟའ་ཆེན་པོ་བརྒྱད་ཀྱི་ཕྱམ་ལ་རྒྱུ་སྐར་ཉི་ཤུ་རྩ་བརྒྱད་ཀྱི་དྲལ་མ་གྲབ་ཅིང་རཱུ་དྲ་ཕོ་མོའི་ལྤགས་པས་ཐོག་ཕུབ་པ།  ཞིང་ལྤགས་ཀྱི་བླ་བྲེ།  རྒྱུ་རློན་གྱི་ལྡ་ལྡི།  དོན་སྙིང་དང་ཡན་ལག་གི་འཕྱང་ {{TibChung|[14a]}} འཕྲུལ།  ཀེང་རུས་དང་ཐོད་ཚལ་གྱི་དྲྭ་བ་དང་དྲྭ་བ་ཕྱེད་པ་སོགས་འཇིགས་པའི་རྒྱན་སྣ་ཚོགས་པས་བཀྲ་བ།  ཉི་མ་དང་ཟླ་བའི་མཐོང་སྐར་ཅན༌།  ཕོ་བྲང་ཕྱི་ནང་གཉིས་ཀའི་སྟེང་ཐོག་སྙོམས་པའི་དབུས་རྒྱ་ཕུབ་ཀྱི་རྣམ་པ་ལྟར་ཕྱུར་བུར་གྱུར་པའི་ནང་ལྷ་ཆེན་པོའི་ཐོད་པས་ཟླུམ་པོར་ཕུབ་པའི་རྩེ་མོར་ཙིཏྟའི་མེ་ཏོག་གིས་མཚན་པའི་ཕྱི་རིན་པོ་ཆེའི་རང་བཞིན་ཅན་གྱི་བུམ་པ་སུལ་བརྒྱད་བྲེ་ཆོས་འཁོར་གདུགས་ཏོག་དང་བཅས་པ་འོད་ཟེར་མཐའ་ཡས་པར་སྤྲོ་བས་མཛེས་པ།  ནང་དང་སྟེང་འོག་གི་གཞི་རྣམས་ཤར་དཀར།  ལྷོ་སེར།  ནུབ་དམར།  བྱང་ལྗང།  དབུས་སྔོ་བ།  ནང་གི་དབུས་གྲུ་གསུམ་མཐིང་ནག་ཟླ་གམ་དམར་པོ་ཐོད་པ་ཕྱིར་བལྟས་ཀྱི་ར་བས་བསྡམས་པའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་བཞི་པ་དང་རྩིབས་བཅུ་པའི་རྩིབས་རྟེན་མུ་ཁྱུད་ཐོད་སྐམ་གྱི་ཕྲེང་བས་བསྐོར་བ་དང་ཟླ་གམ་ཉེར་གཅིག་གིས་མཚན་པའི་མུ་ཁྱུད་དང་བཅས་པ་རྣམས་རིམ་བཞིན་ཁྱད་པར་དུ་གྱུར་པས་དཔག་པ།  ཕོ་བྲང་ཕྱི་ནང་གི་བར་ཁྱམས་སུ་ཁྲག་གི་རྒྱ་མཚོ་འཁྲུགས་པའི་ཕྱོགས་མཚམས་སུ་འཁོར་ལོ་རྩིབས་བཅུ་གཉིས་ཀྱིས་མཚན་པ།  ཐམས་ཅད་དུའང་འབར་བའི་ཕྲེང་བ་རབ་ཏུ་འཁྲུག་ཅིང་དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ་སྟེ།  མདོར་ན་ཡེ་ཤེས་ {{TibChung|[14b]}}  རང་སྣང་གི་བཀོད་པ་སྣོད་ཀྱི་འཇིག་རྟེན་སོགས་རྣམ་པར་དག་པའི་ངོ་བོ་རང་བྱུང་ལྷུན་གྲུབ་ཀྱི་ཕོ་བྲང་ཆེན་པོ་མཚན་ཉིད་ཐམས་ཅད་ཡོངས་སུ་རྫོགས་པའི་རང་བཞིན་ཅན་དུ་གསལ་གདབ་བོ།  འཁོར་ལོ་འདི་རྣམས་གུར་ཐབས་སུ་མ་ཡིན་པར་གདན་ཐབས་ལེ་བཞད་ཅན་ཁོ་ནའོ།  །གསུམ་པ་བརྟེན་པ་ལྷའི་དཀྱིལ་འཁོར་བསྒོམ་པ་ལ་གསུམ།  ཆོས་སྐུའི་ངོ་བོ་བདག་ཉིད་རྩ་བའི་དཀྱིལ་འཁོར།  ལོངས་སྐུའི་ངོ་བོ་ཕྱོགས་བཅུ་ཁྲོ་བོའི་དཀྱིལ་འཁོར།  སྤྲུལ་སྐུའི་ངོ་བོ་ཕུར་པ་རྫས་ཀྱི་དཀྱིལ་འཁོར་བསྐྱེད་པའོ།  །དང་པོ་ནི།  དབུས་ཀྱི་མཐིང་ནག་ཨེ་དབྱིངས་འབར་བར་སྣ་ཚོགས་པདྨ་དང་ཟླ་བ་ཉི་མ་རྣམས་བརྩེགས་པའི་སྟེང་དུ་བདུད་བཞི་རྒྱལ་བསེན་དྲེགས་པ་ལྷ་ཆེན་ཕོ་མོ་རྣམས་བྱི་ཆིངས་སུ་བསྣོལ་བའི་གདན་ལ་སྔར་བསྒོམས་པའི་རྒྱུའི་ཧཱུཾ་དེ་སྐར་མདའ་ལྟུང་བ་ལྟར་བབས།  དེ་ལས་འོད་ཟེར་དཔག་ཏུ་མེད་པ་འཕྲོས་རྒྱལ་ཁ་རྣམས་མཆོད་ཅིང་ཐུགས་དམ་བསྐུལ།  སེམས་ཅན་གྱི་དོན་བྱས།  འཁོར་འདས་ཀྱི་དྭངས་བཅུད་བསྡུས་ཏེ་འོད་ཟེར་སླར་འདུས་ཧཱུཾ་ལ་ཐིམ།  དེ་ཡོངས་སུ་གྱུར་པ་ལས་གནམ་ལྕགས་ཀྱི་རྡོ་རྗེ་རྩེ་དགུ་པ་ལྟེ་བར་ཧཱུཾ་གིས་མཚན་པ་ཡེ་ཤེས་ལྔའི་འོད་ཟེར་འབར་བར་གྱུར།  སླར་ཡང་དེ་ལས་འོད་ཟེར་འཕྲོ་འདུས་གཅིག་ཏུ་གྱུར་པ་ལས་ {{TibChung|[15a]}} ཚོགས་གཉིས་ཡོངས་སུ་རྫོགས་པའི་དཔལ་ཆེན་པོའི་སྐུར་གྱུར་པ་ནི།   སྐུ་མདོག་མཐིང་ནག་བསྐལ་པའི་མེ་ལྟར་འབར་བའི་གཟི་བརྗིད་ཅན།  དབུ་གསུམ་གྱི་རྩ་ཞལ་མཐིང་ག་གཏུམ་ལ་རྔམས་པ།  གཡས་ཞལ་དཀར་པོ་སྒེག་ཅིང་བཞད་པ།  གཡོན་ཞལ་དམར་པོ་ཁྲོ་ཞིང་ཆགས་པ།  ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་སྡང་མིག་ཏུ་འཁྱིལ་བ།  རྣམ་པར་འགྱུར་བའི་ཞལ་གདངས་ཤིང་མཆེ་བ་གཙིགས་པ།  གློག་ལྟར་འཁྱུག་པའི་ལྗགས་འདྲིལ་ཞིང་རྡོ་རྗེའི་གད་མོ་ཧ་ཧ་དང་ཧཱུཾ་ཕཊ་འབྲུག་སྟོང་ལྟར་སྒྲོགས་པས་ས་གསུམ་གཡོ་བ།  ཁྲོ་གཉེར་བསྡུས་པའི་ཤངས་ནས་མི་བཟད་པའི་རླུང་སྒྲ་འབྱིན་པ།  སྨར་དང་སྨིན་མར་མེ་ཡི་ཚྭ་ཚྭ་འཕྲོ་ཞིང་དབུ་སྐྲ་དམར་སེར་དུས་ཀྱི་མེ་ལྕེ་ལྟར་བསྐྱོད་པ་སྲིད་པའི་རྩེ་མོར་བརྫིས་པ།  སྐུ་ཆེ་ཞིང་ཡན་ལག་རགས་པ་ལང་ཚོ་རྒྱས་པའི་འགྱུར་བག་ཅན།  ཕྱག་དྲུག་གི་གཡས་དང་པོས་གནམ་ལྕགས་ཀྱི་རྡོ་རྗེ་རྩེ་དགུ་པ་དང༌།  བར་པས་རྡོ་རྗེ་རྩེ་ལྔ་པ།  གཡོན་གྱི་དང་པོས་སྡིགས་མཛུབ་ཀྱི་རྩེ་ལས་མེ་དཔུང་དང༌།  བར་པས་ཁ་ཊྭཱཾ་ཀ་རྩེ་གསུམ་པ་བཅས་གདེངས་ཐབས་སུ་འཛིན་པ།  ཐ་མ་གཉིས་ཐུགས་ཀར་རི་རབ་ཀྱི་ཕུར་བུ་འདྲིལ་བ།  གཡས་ཀྱི་ {{TibChung|[15b]}} དང་རུ་རྡོ་རྗེ་རྩེ་དགུ་པ་ལ་སྤུ་གྲི་འབར་བའི་གཤོག་པར་མེ་ཞགས་འཕྲོ་ཞིང༌།   གཡོན་གྱི་དང་རུ་རིན་པོ་ཆེ་འབར་བ་ལ་རལ་གྲིའི་སྒྲོ་གཤོག་གི་གསེབ་ལས་རྡོ་རྗེའི་སེར་ཆེན་འབེབས་པ།  ཞབས་བཞི་གཡས་བསྐུམ་ཞིང་གཡོན་བརྐྱང་པའི་གྱད་ཆེན་པོའི་སྟབས་ཀྱིས་དྲེགས་པ་ཕོ་མོའི་མགོ་བོ་དང་ནུ་མ་ནས་བརྫིས་པ།  ཐོད་པ་སྐམ་པོ་རིན་པོ་ཆེའི་རྩེ་བྲན་ཁྲག་འཐུང་རིགས་ལྔའི་ཅོད་པན་ཅན་གྱིས་དབུ་ལ་བརྒྱན་པ།  དཔྲལ་བར་ཐལ་ཆེན་གྱི་ཚོམ་བུ།  མཁུར་ཚོས་ལ་རཀྟའི་ཐིག་ལེ།  ཨོལ་ཀོ་ལ་ཞག་གི་ཟོ་རིས་ཏེ་བྱུག་པའི་རྫས་གསུམ།  སྐུ་སྟོད་ལ་གླང་པོ་ཆེའི་ཀོ་རློན།  སྐེད་པར་མི་ལྤགས་ཀྱི་གཡང་གཞི།  སྐུ་སྨད་ལ་སྟག་ལྤགས་ཀྱི་ཤམ་ཐབས་ཏེ་བགོ་བའི་གོས་གསུམ།  ཐོད་པ་སྐམ་རློན་རྙིང་པའི་ཕྲེང་བ་རྒྱུ་རློན་ལ་བརྒྱུས་པའི་དོ་ཤལ།  སྦྲུལ་རྒྱལ་རིགས་དཀར་པོའི་དབུ་རྒྱན།  རྗེ་རིགས་དམར་པོའི་སྙན་རྒྱན།  བྲམ་ཟེ་སེར་པོའི་གདུ་བུ།  གདོལ་པ་ནག་པོའི་སེ་རལ་ཁ།  སྦྲུལ་རིགས་ལྔའི་ཆུན་པོའི་སྐ་རགས་དང༌།  རུས་པའི་འཁོར་ལོ།  རྣ་ཆ།  མགུལ་རྒྱན།  ཕྱག་ཞབས་ཀྱི་གདུ་བུ།  སྐ་རགས་རྣམས་ཏེ་རུས་པའི་ཕྱག་རྒྱ་ལྔ་བཅས་འདོགས་པའི་རྒྱན་གསུམ་སྟེ།  དུར་ཁྲོད་ཀྱི་ཆས་དགུས་བརྒྱན་ཅིང༌།  སྒེག་པ།  དཔའ་བ།  འཇིགས་ {{TibChung|[16a]}} སུ་རུང་བ་སྟེ་སྐུའི་གར་གསུམ།   དགོད་པ།  གཤེ་བ།  དྲག་ཤུལ་ཏེ་གསུང་གི་གར་གསུམ།  སྙིང་རྗེ།  རྔམས་པ།  ཞི་བ་སྟེ་ཐུགས་ཀྱི་གར་གསུམ་བཅས་གར་གྱི་ཉམས་དགུས་རྣམ་པར་བརྗིད་པ།  དེའི་པང་དུ་སྦྱོར་ཡུམ་འཁོར་ལོ་རྒྱས་འདེབས་མ་སྐུ་མདོག་མཐིང་སྐྱ་གཅེར་བུ་སྐྲ་གྲོལ་ཞིང་ལང་ཚོས་སྒེག་པ།  གཡས་ཁ་ཊྭཱཾ་འཛིན་པས་ཡབ་ཀྱི་མགུལ་ནས་འཁྱུད་ཅིང་གཡོན་པས་དུང་ཁྲག་ཞལ་དུ་སྟོབ་པ།  ཞབས་གཡོན་བསྐུམ་པས་ཡབ་ཀྱི་སྐེད་ལ་འཁྲིལ་ཞིང་གཡས་བརྐྱང་པའི་སྟབས་ཀྱིས་སྙོམས་པར་འཇུག་པ།  གཟིག་ཤམ་དང་རུས་པའི་ཕྱག་རྒྱ་ལྔས་སྤྲས་པ།  གཉིས་ཀའང་བདེ་སྟོང་གཉིས་མེད་བཟོད་པར་དཀའ་བའི་གཟི་བྱིན་ཉི་མ་འབུམ་གྱི་འོད་ཟེར་ལྟར་འབར་ཞིང་ཡེ་ཤེས་ཀྱི་མེ་དཔུང་ཆེན་པོའི་ཀློང་ན་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་ཡོངས་སུ་རྫོགས་པའི་བདག་ཉིད་ཅན་དུ་གསལ་བའི་ཡབ་ཀྱི་ཐུགས་ཙིཏྟ་རིན་པོ་ཆེ་ཟུར་བརྒྱད་མཆོང་གི་གུར་ཕུབ་པ་ལྟ་བུའི་དབུས་སུ་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་རྡོར་སེམས་མཐིང་གསལ་ཚོན་གང་བ།  ཞལ་གཅིག་ཕྱག་གཉིས་ཀྱི་གཡས་རྡོ་རྗེ་རྩེ་ལྔ་པ་ཐུགས་ཀར་གསོར་ཞིང་གཡོན་དྲིལ་བུ་དཀུར་བརྟེན་པ།  ཞབས་གཡས་བསྐུམ་གཡོན་ {{TibChung|[16b]}} བརྐྱང་སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་ཤིང༌།   དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་རྣམ་པར་སྤྲས་ཏེ་རང་འོད་ཀྱི་ཀློང་ན་མཚན་དཔེའི་གཟི་བྱིན་མཆོག་ཏུ་འབར་བཞིན་བཞུགས་པ།  དེའི་ཐུགས་ཀར་སྲན་མ་བཀས་པ་ཙམ་གྱི་ཉི་མ་ལ་གནས་པའི་རྡོ་རྗེ་སྔོན་པོ་རྩེ་དགུ་པ་ནས་འབྲུ་ཙམ་གྱི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་སྲོག་གི་སྙིང་པོ་ཧཱུཾ་ཡིག་མཐིང་ག་ཡུངས་འབྲུ་ཙམ་དུ་ཕྲ་ཞིང་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་འབྲུ་དགུ་བཻ་ཌཱུརྱ་ཞུན་མའི་མདངས་ཅན་སྤུས་བྲིས་པ་ལྟ་བུས་གཡས་སུ་བསྐོར་བའི་ཙིཏྟའི་རྩ་སྦུབས་ཀྱི་སྒོ་སྲུང་རྟ་མགྲིན་དམར་པོ་ཡུངས་འབྲུ་ཙམ་པདྨ་བྷཉྫ་འཛིན་པ་ཡུམ་དང་བཅས་པས་བསྲུང་བར་བསྒོམ།  གཙོ་བོའི་གཡོན་དུ་པད་ཉི་དགྲ་བགེགས་ཀྱི་གདན་ལ་སྒྲོལ་ཡུམ་ཨེ་ཀ་ཛ་ཊཱི་སྐུ་མདོག་སྨུག་ནག་གཡས་དགྲ་སྙིང་དྲོན་མོ་ཟ་ཞིང་གཡོན་སྡིགས་མཛུབ་ཀྱི་རྩེ་ལས་ལྕགས་སྤྱང་ཁྲ་ཐབས་སུ་འགྱེད་པ།  ཞལ་རབ་ཏུ་གདངས་ཤིང་ཟླ་ཚེས་ལྟ་བུའི་མཆེ་བ་གཅིག་ཐུར་དུ་གཙིགས་པ།  དཔྲལ་བར་ཡེ་ཤེས་ཀྱི་སྤྱན་གཅིག་དམར་ཟླུམ་ཕྱོགས་བཅུར་གཟིགས་པ།  དབུ་སྐྲ་ཁམ་ནག་ཐུར་དུ་གྲོལ་བའི་དབུས་ན་ལྕགས་ཀྱི་རལ་པ་ཉག་གཅིག་གྱེན་དུ་གཟིངས་ {{TibChung|[17a]}} པ།  བྲང་ན་དགྲ་ལ་རིམས་ནད་འབེབས་པའི་ཁྲག་གི་རྒྱུན་འཛག་པའི་ནུ་མ་གཅིག་འཕྱང་བ།  གཅེར་མོ་ཕྱག་རྒྱ་ལྔས་བརྒྱན་ཅིང་འཇའ་སྤྲིན་གྱི་གོས་ཅན།  ཞབས་གཉིས་གཡས་བསྐུམ་གཡོན་བརྐྱང་པའི་གར་སྟབས་ཀྱིས་མེ་དཔུང་གི་ཀློང་དུ་བཞུགས་པ།  གཙོ་བོའི་སྤྱི་བོར་འཇིགས་བྱེད་ག་རུ་ཌ་མཐིང་ནག་གནམ་ལྕགས་རྡོ་རྗེའི་རྭ་དང་མཆུ་སྡེར་ཅན་གྱི་རྭ་བར་རིགས་བདག་ཀུན་ཏུ་བཟང་པོ་མཐིང་གསལ་མཉམ་བཞག་སྐྱིལ་ཀྲུང་ཅན་ཡུམ་བཟང་མོ་དཀར་མོས་འཁྱུད་པ་གཉིས་ཀའང་གཅེར་བུ་མཚན་དཔེའི་གཟི་བྱིན་འབར་བ་ཡེ་ཤེས་འོད་ལྔ་འཁྲིགས་པའི་ཀློང་དུ་བཞུགས་པར་བསམ།  གཙོ་བོའི་གཡས་དང་ཕྱི་རོལ་གྱི་རྩིབས་བཞི་ལ་པད་ཉི་དགྲ་བགེགས་ཕོ་མོ་བསྣོལ་བའི་སྟེང་དུ་གཙོ་བོའི་ཐུགས་ཡེ་ཤེས་ལྔའི་སྒྱུ་འཕྲུལ་ལས་རང་ཤར་བ་ཁྲོ་རྒྱལ་ཀཱི་ལ་རིགས་ལྔ་ཐམས་ཅད་ཀྱང་སྐུ་སྟོད་ཞལ་གསུམ་ཕྱག་དྲུག་པ་སྐེད་པ་ཆུ་སྲིན་གྱི་ཁ་ལས་འཐོན་པའི་སྐུ་སྨད་ཕུར་བུ་འབར་བའི་དབལ་ཅན།  ཕྲིན་ལས་སོ་སོའི་རིགས་དང་བསྟུན་པའི་སྐུ་མདོག་ཕྱག་མཚན་རྒྱན་ཆ་ལུགས་རྣམས་གཞུང་ཚིག་ལྟར་གསལ་གདབ་བོ།  །གཉིས་པ་ནི།  དེའི་ཕྱི་རོལ་གྱི་འཁོར་ལོ་རྩིབས་བཅུ་པའི་དབུས་ {{TibChung|[17b]}} སུ་པདྨ་ཉི་ཟླ་འབར་བར་ཕྱོགས་སྐྱོང་བཅུ་ཆུང་མར་བཅས་པ་བཀུག་ནས་གདན་དུ་བཏིང་བའི་སྟེང་དུ་བདག་ཉིད་གཙོ་བོ་ཡབ་ཡུམ་སྙོམས་པར་ཞུགས་པའི་མཁའ་གསང་ནས་བདེ་ཆེན་བྱང་ཆུབ་སེམས་ཀྱི་རང་བཞིན་ཧཱུཾ་ཡིག་སྦྲེལ་མ་བཅུ་སོ་སོའི་གནས་སུ་བབས་པ་ལས་སྟེང་གི་ཁྲོ་བོ་ཤར་སྟོད་དང༌།  འོག་གི་ཁྲོ་བོ་ནུབ་སྨད་དུ་བྱས་པའི་ཁྲོ་བོ་བཅུ་ཡབ་ཡུམ་སྤྲུལ་པའི་ཕྲ་མེན་ཟ་གསོད་དང་བཅས་པ་རྒྱན་ཆ་ལུགས་ཡོངས་སུ་རྫོགས་པར་གསལ་གདབ་བོ།  །གསུམ་པ་ནི།  དེའི་ཕྱི་རོལ་ཟླ་གམ་དམར་ནག་ཉེར་གཅིག་ལ་གནས་པའི་པད་ཉི་དགྲ་བགེགས་ཀྱི་གདན་ལ་གཙོ་བོ་ཡབ་ཡུམ་སྙོམས་པར་ཞུགས་པའི་བྱང་སེམས་འོད་ཀྱི་གོང་བུ་ཧཱུཾ་ཡིག་གི་རང་བཞིན་ཅན་སྤྲོས་ཏེ་འཁོད་པ་ལས་བྱུང་བའི་འོད་ཟེར་གྱི་རྩེ་ལས་ཕུར་བུ་ཕྲ་མོ་དཔག་ཏུ་མེད་པ་འཕྲོས།  ཁམས་གསུམ་སེམས་ཅན་ཐམས་ཅད་ཀྱི་སྒོ་གསུམ་དང་རིགས་དྲུག་གི་བག་ཆགས་སྣང་ཞེན་ཐམས་ཅད་བསྲེག་ཅིང་སྦྱངས།  ཐམས་ཅད་དཔལ་ཆེན་པོའི་རང་བཞིན་དུ་གྱུར།  སླར་འདུས་ཧཱུཾ་ཡིག་རྣམས་ལ་ཐིམ་སྟེ་ཡོངས་སུ་གྱུར་པ་ལས་སྲས་མཆོག་ཉེར་གཅིག་འབར་བའི་ཆ་ལུགས་ཡོངས་སུ་རྫོགས་པ་དང༌།  སླར་ཡང་གཙོ་བོ་ཡབ་ཡུམ་སྙོམས་ {{TibChung|[18a]}}  པར་ཞུགས་པའི་བྱང་སེམས་འོད་ཀྱི་གོང་བུ་ལས་ཛཿཧཱུཾ་བཾ་ཧོ་བཞི་སྤྲོས་ཏེ་ནང་སྒོ་བཞིར་འཁོད་པ་ལས་ཡེ་ཤེས་ཀྱི་སྒོ་མ་བཞི།  དཀྱིལ་འཁོར་བར་ཁྱམས་འཁོར་ལོ་རྩིབས་བཅུ་གཉིས་ཀྱི་ཕྱོགས་བཞིའི་རྩིབས་དབུས་བཞིར་ཤྭ་ན་མ་བཞི།  རྩིབས་སྟོད་བཞིར་རེ་ཏཱི་མཆེད་བཞི།  རྩིབས་སྨད་བཞིར་ས་བདག་མ་བཞི།  ཕྱི་སྒོ་བཞིར་སྐྱེས་བུ་གིང་བཞི།  ཕྱི་རོལ་དུར་ཁྲོད་ཀྱི་ནང་རྡོ་རྗེའི་བྲག་རིའི་སྟེང་གི་ཁོར་ཡུག་ལ་དབང་ཕྱུག་ཉེར་བརྒྱད་མ་སྲིང་མཁའ་འགྲོའི་ཚོགས་རྣམས་ཀྱང་རྗེ་ལས་འབངས་དང་ཉི་མ་ལས་ཟེར་བཞིན་རང་བཞིན་གྱིས་གནས་པར་བསྒོམ་མོ།  །གཉིས་པ་ཁམས་གསུམ་གྱི་སྲོག་ལ་དབང་བསྐུར་ཞིང་སྲོག་གི་ཡེ་ཤེས་སེམས་དཔས་སྲོག་ལ་དབང་བསྐུར་བ་ནི།  དཀྱིལ་འཁོར་ལྷ་ཚོགས་རྣམས་ཀྱི་དཔྲལ་བར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུཾ་སྔོན་པོ་རེ་རེས་མཚན་པར་བསམ་ལ་གསོལ་བ་བཏབ་པས།  འབྲུ་གསུམ་ལས་འོད་ཟེར་དཔག་ཏུ་མེད་པ་འཕྲོས་ཕྱོགས་བཅུའི་རྒྱལ་བ་རྣམས་ལ་མཉེས་པའི་མཆོད་པ་ཕུལ།  སྐུ་གསུང་ཐུགས་ཀྱི་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་བསྡུས་ཏེ་གནས་གསུམ་གྱི་ས་བོན་ལ་ཐིམ་པས་ལུས་ངག་ཡིད་གསུམ་གྱི་གཟི་བྱིན་ནུས་པ་མཐུ་སྟོབས་མཆོག་ཏུ་འབར།   {{TibChung|[18b]}} བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་ཉིད་དུ་གྱུར་པར་བསམ།  སླར་ཡང་ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས།  རྒྱལ་བ་སྐུ་ལྔའི་བདག་ཉིད་འཁོར་དང་བཅས་པ་རྣམས་ལ་ཕོག་པས་ཐུགས་རྒྱུད་བསྐུལ།  བདེ་བར་གཤེགས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་དཔའ་བོ་འབྲུ་ལྔའི་རང་བཞིན་ཆར་ལྟར་བབས་པ་མགོ་བའི་གནས་ལྔར་འདུས་ཏེ་ཞུ་བ་ལས་བྱུང་བའི་ཧཱུཾ་ཨོཾ་སྭཱ་ཨཱཾ་ཧཱ།  མཱུཾ་ལཱཾ་མཱཾ་པཱཾ་ཏཱཾ་རྣམས་སུ་གྱུར།  དེ་དག་ལས་ཀརྨ་ཧེ་རུ་ཀ་གཙོ་བོར་གྱུར་པའི་རིགས་ལྔ་ཡབ་ཡུམ་གྱི་སྐུར་གྱུར་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་ལུས་ཀྱི་ནང་གང༌།  ཁྲག་འཐུང་ཡབ་ཡུམ་རྣམས་ཐོད་པའི་ཁང་བུར་བཞུགས་པས་དབུ་བརྒྱན་ཏེ་ཡེ་ཤེས་ལྔའི་དབང་བསྐུར་ཡོངས་རྫོགས་པར་བསྒོམ།  ཡང་ཐུགས་སྲོག་འོད་ཀྱིས་ཁམས་གསུམ་ལ་ཕོག་པས་རིགས་དྲུག་པོ་ཨ་ནྲྀ་སུ་ཏྲི་པྲེ་དུཿར་གྱུར།  དེ་འབྱུང་བའི་ཡི་གེ་རྃ་ཡྃ་ཁྃ་གིས་བསྲེག་གཏོར་སྦྱངས་པས་ཐམས་ཅད་དཀྱིལ་འཁོར་གསུམ་གྱི་ལྷར་གྱུར་པ་ནི་ཁམས་གསུམ་ལ་དབང་བསྐུར་བ།  དེ་རྣམས་འོད་ཟེར་དང་བཅས་པ་ཚུར་འདུས་སྙིང་གའི་རྟ་མགྲིན་ལ་ཐིམ་པས་བཀྲག་དང་གཟི་བརྗིད་ཀྱི་དཔལ་དུ་འབར་བར་གྱུར་པ་ནི་བདག་ {{TibChung|[19a]}} གི་སྲོག་ལ་དབང་བསྐུར་བ།  དེའི་རྐྱེན་གྱིས་རྟ་མགྲིན་ཡབ་ཡུམ་ཟག་མེད་བདེ་ཆེན་གྱི་རོལ་པའི་བྱང་སེམས་ཡེ་ཤེས་སེམས་དཔའ་ལ་ཐིམ་པས་དེ་ཉིད་བཀྲག་དང་ལྡན་པར་བྱུང་བའི་གཟི་བརྗིད་ཡེ་ཤེས་ཀྱི་བཅུད་ཐམས་ཅད་རྡོ་རྗེའི་ལྟེ་བའི་ཐུགས་སྲོག་རྣམ་པར་མི་རྟོག་པའི་ཡེ་ཤེས་ཧཱུཾ་ཡིག་ལ་ཕོག་པས་བཀྲག་དང་གཟི་མདངས་འོད་དུ་འབར་བ་ནི་ཡེ་ཤེས་སེམས་དཔས་སྲོག་ལ་དབང་བསྐུར་བ་སྟེ།  སྟོང་སྲོག་ཆོས་སྐུའི་ཀློང་ཆེན་པོར་འཕོ་འགྱུར་གཞོམ་གཞིག་མེད་པ་གཉུག་མ་དོན་གྱི་སྲོག་རྩ་གྲུབ་པར་བལྟའོ།  །ཙིཏྟའི་སྒོ་སྲུང་རྟ་མགྲིན་དུ་བསྐྱེད་པ་འདི་རྒྱུད་དོན་ཤིན་ཏུ་གསང་བའི་དབང་གིས་བཀའ་གཏེར་ཕུར་གཞུང་ཕལ་མོ་ཆེར་མན་ངག་ཏུ་གབ་པ་བཞིན་འདིར་ཡང་ལྷ་བསྐྱེད་སྔགས་དམིགས་སོགས་ཀྱི་སྐབས་སུ་སྒྲོས་ཙམ་ཡང་མ་བསྟན་པ་སྨད་ལས་ཀྱི་དམར་བྱང་དུ།  དབང་ཆེན་གསང་བའི་ཧེ་རུ་ཀ༔  ཞེས་མན་ངག་གབ་དོན་དུ་བསྟན་པར་མཛད་པ་སྟེ།  གསང་བ་འདི་ནི་དེང་དུས་ཀྱི་ཕུར་པ་མཁན་པོ་ཕལ་ཆེར་ཞིག་གིས་ཐོས་པའི་ཡུལ་ཙམ་དུའང་མ་གྱུར་པར་སྣང་ངོ༌།  །གསུམ་པ་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་མཆོད་ཅིང་བསྙེན་པས་དངོས་གྲུབ་ཀྱི་བཅུད་བླང་བ་ལ་གསུམ།  སྤྱན་འདྲེན་པ་སོགས་ཆོ་ག་རྫོགས་པའི་ལས་རིམ།  བསྙེན་ {{TibChung|[19b]}} པའི་མན་ངག    །རྗེས་ཀྱི་བྱ་བའོ།  །དང་པོ་ལ།  སྤྱན་འདྲེན་པ་ནི།  རང་ཉིད་དམ་ཚིག་པའི་ཐུགས་ཀའི་འོད་ཟེར་གྱིས་བསྐུལ་བས་རྒྱལ་བ་རྣམས་ཆོས་ཀྱི་དབྱིངས་སྤྲོས་པ་དང་བྲལ་བའི་ངང་ལས་གཟུགས་ཀྱི་སྐུ་འབར་བའི་ཕྱག་རྒྱ་རྡོ་རྗེ་གཞོན་ནུའི་ལྷ་ཚོགས་ཀྱི་སྐུར་བཞེངས་ནས་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་བྱོན་པར་བསམ།  བཞུགས་སུ་གསོལ་བ་ནི།  དེ་ལྟར་སྤྱན་དྲངས་པའི་རང་བཞིན་ཡེ་ཤེས་ཀྱི་འཁོར་ལོ་ཉིད་ཏིང་ངེ་འཛིན་གྱི་དཀྱིལ་འཁོར་ལ་གཉིས་སུ་མེད་པར་ཐིམ་སྟེ་དངོས་གྲུབ་མ་ཐོབ་ཀྱི་བར་དུ་བརྟན་པར་བཞུགས་པར་མོས།  ཕྱག་འཚལ་བ་ནི།  ཡེ་ཤེས་ཀྱི་དཀྱིལ་འཁོར་ཆེན་པོ་མངོན་སུམ་དུ་མཇལ་བ་ལ་ཤིན་ཏུ་སྤྲོ་ཞིང་རང་བཞིན་གཉིས་མེད་དུ་རྟོགས་པའི་ཚུལ་གྱིས་སོ།  །མཆོད་པ་འབུལ་བ་ནི།  ཐུན་མོང་ཉེར་སྤྱོད་འདོད་ཡོན་གྱི་མཆོད་པ་ལ་འཕྲུལ་དགའི་ལོངས་སྤྱོད་དང་མཚུངས་པར་རང་གི་ཐུགས་ཀ་ནས་སྤྲོས་པའི་ལྷ་མོ་བསམ་གྱིས་མི་ཁྱབ་པས་གོང་དུ་བྱིན་གྱིས་བརླབས་པའི་མཆོད་རྫས་དལ་གྱི་བར་ཁྱམས་ཁོར་ཡུག་རྣམས་སུ་གནས་པ་དག་ལས་འཛད་མེད་དུ་བླངས་ཏེ་ལྷ་ཚོགས་རྣམས་ལ་མཆོད་པའི་སྤྲིན་ཆེན་པོ་སྟོབ་པ་དང༌།  ཐུན་མིན་གདུག་ཅན་བསྒྲལ་བའི་ཕུང་པོ་རང་བྱུང་གི་ཉེ་བར་སྤྱོད་པའི་དམ་རྫས་ལ་རོལ་པས་དགྱེས་པ་ཆེན་པོ་བསྐྱེད།   {{TibChung|[20a]}}  པར་བསམ།  བདུད་རྩི་འབུལ་བ་ལ།  སྨན་གྱི་ཞལ་བུ་ལག་གཡས་སུ་ཐོགས་ཏེ།  རང་བྱུང་བྷཉྫ་འབར་བར་འཆི་མེད་མཆོག་གི་བདུད་རྩིས་གཏམས་པའི་དབུས་སུ་ཨོཾ་ཨཱཿཧཱུཾ་གསུམ་བརྩེགས་མར་གནས་པར་བསམ་ལ་སྨན་གྱི་ཆེ་བ་བརྗོད་ཅིང༌།  ལག་པ་གཡོན་པའི་མཐེབ་སྲིན་མ་དང་ཨ་ལས་ཉི་ཟླའི་གའུ་འབྲུ་བཅུས་མཚན་པར་གྱུར་པའི་སྐྱོགས་ཀྱིས་བདུད་རྩི་ནས་བླངས་ཏེ་ལྷ་ཚོགས་རྣམས་ལ་ཕུལ་བས་བདུད་རྩི་མུ་ཏིག་དཀར་པོ་དྲི་མ་མེད་པ་ལྟ་བུའི་རང་བཞིན་དུ་འཕྲོས་ནས་ལྷ་ཚོགས་རྣམས་ཀྱི་ལྗགས་ལ་ཐིམ་པར་བསམ།  ཐོག་མར་སྟེང་གི་ནམ་མཁར་འཇའ་འོད་ཐིག་ལེའི་ཀློང་ན་སློབ་དཔོན་ཆེན་པོ་པདྨ་ཐོད་ཕྲེང་རྩལ་ལ་བརྒྱུད་པ་དགུ་ལྡན་གྱི་བླ་མ་རིག་འཛིན་རྣམས་སྤྲིན་ཕུང་གཏིབས་པ་ལྟར་བཞུགས་པར་མོས་ལ་འབུལ།  དེ་ནས་ཡི་དམ་བཀའ་སྲུང་དང་བཅས་པ་ལ་ཕུལ་བས་དགྱེས་པ་མཆོག་ཏུ་བསྐྱེད།  ཁམས་གསུམ་གྱི་གཏི་མུག་ཐམས་ཅད་བཅོམ་པར་བསམ་ཞིང༌།  མཐར་མཉེས་ནས་སྐྱེས་ལན་གྱི་ཚུལ་དུ་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་གནས་ནས་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་ཆར་བཞིན་བབས་ཏེ་བྷཉྫའི་ནང་གི་ས་བོན་གསུམ་ལ་ཐིམ་པས་ཡིད་བཞིན་གྱི་ནོར་བུ་རིན་པོ་ཆེ་ལྟར་དངོས་གྲུབ་རྩོལ་མེད་དུ་འབྱུང་བའི་རང་བཞིན་ཅན་ {{TibChung|[20b]}} དུ་གྱུར་པ་དེ་ཉིད་མཐེབ་སྲིན་ཉི་ཟླའི་གའུས་བླངས་ཏེ་རང་གི་གནས་གསུམ་དུ་བཞག་པ་ཙམ་གྱིས་སྐུ་གསུང་ཐུགས་ཀྱི་དངོས་གྲུབ་ཐོབ།  མཐར་ལྕེ་པདྨའི་འདབ་མར་རྡོ་རྗེ་རྩེ་གསུམ་པ་ཉལ་སྟབས་སུ་གནས་པའི་ར་དབུས་མའི་ཁོང་གསེང་གི་རྩེ་མོ་ཧཱུཾ་གིས་མཚན་པ་ལས་བདུད་རྩི་བརྒྱུད་དེ་ལུས་ཀྱི་ནང་ཐམས་ཅད་གང་བས་མཆོག་ཐུན་མོང་གི་དངོས་གྲུབ་མ་ལུས་པ་ཐོབ་པར་བསམ་ལ་བདུད་རྩི་མྱང་ངོ༌།  །གཏོར་མ་འབུལ་བ་ལ།  སྣང་སྲིད་དམ་རྫས་གཏོར་མའི་རང་བཞིན་དུ་གྱུར་པ་དང་དངོས་སུ་བཤམས་པའི་གཏོར་མ་འདོད་ཡོན་གྱི་ཕུང་པོར་སྤེལ་བ་ཕུལ་བས་དགྱེས་ཤིང་ཚིམས་ནས་དངོས་གྲུབ་གང་འདོད་རྩོལ་མེད་དུ་ཐོབ།  ཁམས་གསུམ་གྱི་ཞེ་སྡང་ཐམས་ཅད་བཅོམ་པར་བསམ།  རཀྟ་འབུལ་བ་ལ།  མདུན་དུ་གནོད་ཅིང་འཚེ་བའི་དགྲ་བགེགས་ཀྱི་རྣམ་པར་ཤེས་པའི་ངོ་བོ་ཐིག་ལེ་དམར་པོ་ནྲྀ་དང་ཏྲི་ཡིག་གིས་མཚན་པ་ཞིག་ཏུ་ཧྲིལ་ཧྲིལ་འདུག་པ་དེ་ལས་འོད་འཕྲོས་པས་གནོད་བྱེད་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་བཀུག་ནས་ཐིམ་སྟེ་ཡོངས་སུ་གྱུར་པ་ལས་ཁྲག་གི་གྲོད་ཐུམ་རི་རབ་ཙམ་པ་ཞིག་ཏུ་གྱུར་པར་བསམ་ལ་སྲས་མཆོག་གི་ཕུར་རུ་འདྲིལ་ཞིང༌།  ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཤ་ཏྲུཾ་མཱ་ར་ཡ་ཧཱུཾ་ཕཊ༔  ཅེས་བརྗོད་དེ་ཕུར་པ་བཏབ་པས་དེ་རྡོལ་བ་ལས་བྱུང་བའི་ {{TibChung|[21a]}} ཁྲག་རྒྱུན་སྔར་བྱིན་གྱིས་བརླབས་པའི་རཀྟ་དང་འདྲེས་ནས་སྟོང་གསུམ་ཁྲག་གི་རྒྱ་མཚོར་འཁྱིལ་བ་ལས་རཀྟའི་ལྷ་མོ་འཕྲོ་བས་དཀྱིལ་འཁོར་པ་མཆོད་པས་རབ་ཏུ་མཉེས་པ་ཆེན་པོར་གྱུར།  ཁམས་གསུམ་གྱི་འདོད་ཆགས་ཐམས་ཅད་ཟད་པར་མཛད་པར་བསམ།  བསྒྲལ་བའི་མཆོད་པ་ལ།  བདག་གི་ཐུགས་ཀ་ནས་ལས་བྱེད་ཕོ་ཉ་གྲངས་མེད་པ་ཕྱོགས་བཅུར་འཕྲོས་པས་ཞིང་བཅུ་ཚང་བའི་དགྲ་བགེགས་ཐམས་ཅད་བཀུག་ཅིང་བསྒྲལ་ཏེ་རྣམ་ཤེས་ཆོས་ཀྱི་དབྱིངས་སུ་སྤར།  ཤ་ཁྲག་རུས་པ་ལྷ་ཚོགས་རྣམས་ཀྱི་ཞལ་དུ་བསྟབ་པས་རོལ་པ་ཆེན་པོའི་དགའ་སྟོན་གྱིས་ཚིམས་ཤིང་དུག་གསུམ་རང་གནས་སུ་དག་ནས་བསྒྲལ་བྱའི་ཚོགས་གཉིས་ལྷུན་གྱིས་རྫོགས་པར་མོས།  སྦྱོར་སྒྲོལ་གྱི་མཆོད་པ་ལ།  རང་ལས་སྤྲུལ་པའི་རིག་མ་སྒེག་མཛེས་ཆགས་པའི་ཉམས་ལྡན་འཁོར་ལོའི་གྲངས་དང་མཉམ་པར་སྤྲོས་ནས་ཐབས་ལ་ཤེས་རབ་ཀྱི་རྣམ་པར།  ཤེས་རབ་ལ་ཐབས་ཀྱི་རྣམ་པར་གྱུར་ནས་རྗེས་ཆགས་ཀྱིས་སྙོམས་པར་ཞུགས་པས་དབྱིངས་དང་ཡེ་ཤེས་གཏན་གཏུན་གྱི་སྦྱོར་བས་གཟུང་འཛིན་གྱི་དགྲ་བགེགས་རྣམས་བསྒྲལ་ཞིང་བཅོམ་སྟེ་རྟོག་ཚོགས་བདེ་བ་ཆེན་པོའི་དབྱིངས་སུ་སྦྱོར་བས་བདེ་སྟོང་དགའ་བ་བཞིའི་རོས་ཚིམས་པར་བསམ།   {{TibChung|[21b]}} འདིར་ལྷ་ཞལ་གསུམ་པའི་རིགས་ལ་བདུད་རྩི་གཡས་ཞལ།  རཀྟ་གཡོན་ཞལ།  གཏོར་མ་དང་བསྒྲལ་བའི་ཤ་ཁྲག་དབུས་ཞལ་དུ་སྟོབ་པར་དམིགས་ཤིང་དཔའ་བོ་གཅིག་པ་ལ་ནི་དབྱེ་བ་མེད་དོ།  །མཐར་མཆོད་པའི་ལྷ་མོ་རྣམས་རང་ལ་བསྡུས་ཏེ་དོན་དམ་པར་མཆོད་བྱ་མཆོད་བྱེད་མཆོད་ཡུལ་དུ་འཛིན་པའི་སྤྲོས་པ་ཐམས་ཅད་དང་བྲལ་བ་བློ་འདས་བདེ་བ་ཆེན་པོ་ཆོས་ཉིད་བསམ་གྱིས་མི་ཁྱབ་པའི་ཡེ་ཤེས་སུ་རོ་མཉམ་པར་བལྟ་བ་ནི་དོན་གྱི་མཆོད་པ་བླ་ན་མེད་པའོ།  །བསྟོད་པ་ནི།  རང་གི་སྙིང་ག་ནས་ཤེས་པ་ཆ་གཉིས་སུ་ཕྱེ་བའི་ཆ་གཅིག་འཁོར་བ་ན་ཆེ་བ་ཚངས་པ་དང་བརྒྱ་བྱིན་དབང་ཕྱུག་ཆེན་པོ་སོགས་དང༌།  ཆ་གཅིག་འདས་པ་ན་ཆེ་བ་འཇམ་དཔལ་དབྱངས་དང་འཇིག་རྟེན་དབང་ཕྱུག་གསང་བའི་བདག་པོ་ལ་སོགས་པར་སྤྲུལ་ནས་དཀྱིལ་འཁོར་གྱི་བར་ཁྱམས་ཁོར་ཡུག་རྣམས་སུ་ལྷགས་ཏེ།  དེ་རེ་རེ་ལའང་ཡང་སྤྲུལ་གྱི་འཁོར་ཚོགས་བསམ་གྱིས་མི་ཁྱབ་པས་བསྐོར་ནས་རོལ་མོའི་བྱེ་བྲག་དཔག་ཏུ་མེད་པའི་སྒྲ་ལས་དྲངས་ནས་ལྷ་ཚོགས་རྣམས་ཀྱི་ཆེ་བའི་ཡོན་ཏན་མཐའ་ཡས་པ་ལ་བརྗོད་བྱར་བྱས་པའི་བརྗོད་བྱེད་ཀྱི་གླུ་དབྱངས་སྙན་ཅིང་བར་བརྗིད་ལ་ཟིལ་ཆགས་པས་མངོན་པར་བསྟོད་པར་བསམ་ཞིང༌།  བསྟོད་པའི་རྐྱེན་གྱིས་ལྷ་ཚོགས་རྣམས་ཀྱི་ཆེ་བ་བསྐྱེད་ཅིང་གཟི་བྱིན་མཆོག་ཏུ་འབར་ཏེ་ {{TibChung|[22a]}} འཁོར་འདས་ཀྱི་ཞིང་ན་འགྲན་པའི་ཟླ་དང་བྲལ་བར་མོས་ལ་མཐར་བསྟོད་བྱེད་ཀྱི་ལྷ་རྣམས་རང་ལ་བསྡུ།  དེ་ལྟར་མཆོད་ཅིང་བསྟོད་པ་ལས་བྱུང་བའི་འབྲས་བུ་མཆོག་གི་དངོས་གྲུབ་ལ་ཡིད་རབ་ཏུ་གདུང་བའི་སྒོ་ནས་གསོལ་བ་བཏབ་པས་སྐུ་གསུང་ཐུགས་ཀྱི་དམ་ཚིག་གི་ཕྱག་རྒྱ་དང་གཉིས་སུ་མེད་པར་བྱིན་གྱིས་བརླབས་པར་མོས།  ནོངས་བཤགས་ནི།  ཆོ་གའི་ཡན་ལག་མ་ཚང་བ་སོགས་ཉམས་ཆག་ཏུ་གྱུར་པའི་ཚོགས་ལ་གནོང་འགྱོད་དྲག་པོས་བཟོད་པར་གསོལ་བས་དག་ཚངས་སུ་གྱུར་པར་བསམ་མོ།  །གཉིས་པ་བསྙེན་པའི་མན་ངག་ལ་གཉིས་ཀྱི།  དང་པོ་ཐུགས་དམ་བསྐུལ་བ་ནི།  དཀྱིལ་འཁོར་གསུམ་གྱི་ལྷ་ཚོགས་ཐམས་ཅད་བསྙེན་སྒྲུབ་ཛཔྲ་ཀྱི་རིམ་པ་ལ་ཐུགས་དམ་བསྐུལ་བས་ཏིང་ངེ་འཛིན་གྱི་འཕྲོ་འདུ་ལ་དགོངས་པ་མངོན་དུ་ཕྱོགས་པར་བསམ།  གཉིས་པ་མན་ངག་དངོས་ལ་ལྔ་ལས།  དང་པོ་སྐུ་ཕྱག་རྒྱ་ལ་དམིགས་པའི་ཛཔྲ་དགོངས་ལའང་གསུམ།  རྣམ་པ་གསལ་བ།  ང་རྒྱལ་བརྟན་པ།  རྣམ་དག་དྲན་པའོ།  །དང་པོ་ནི།  རྟེན་འབྱུང་བ་རིམ་བརྩེགས་དུར་ཁྲོད་གཞལ་ཡས་ཁང་ལྷའི་གདན་དང་བཅས་པ་ནས་བརྟེན་པ་ལྷ་ཚོགས་རྣམས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་དང་བཅས་པའི་བར་རེས་ནང་ནས་ཕྱི།  རེས་ {{TibChung|[22b]}} ཕྱི་ནས་ནང༌།  ཐོག་མར་ཕྲ་བ་རེ་རེ།  དེ་ནས་རགས་པ་སྤྱི།  མཐར་ཕྲ་རགས་གཅིག་ཅར་དུ་གསལ་མ་ཐེབས་ཀྱི་བར་དུ་བསྒོམ།  དེའང་ལས་དང་པོ་པས་ཐོག་མ་ནས་ཡིད་ཡུལ་དུ་གསལ་ཐེབས་དཀའ་ན་དམིགས་རྟེན་བྲིས་སྐུ་མཚན་ཉིད་དང་ལྡན་པ་བཀྲམ་ལ་མིག་ཅེ་རེ་མི་གཡོ་བར་བལྟ།  དེས་མིག་ལ་ལྷ་སྐུའི་གསལ་སྣང་ལྷག་ལྷག་འཆར་ན་ཧ་ཅང་འཆར་ཟིན་མི་བྱེད་པར་དེ་ཀའི་གསལ་སྣང་མ་འགགས་པའི་ངང་ལ་ཤིག་གེར་མཉམ་པར་བཞག    །རེ་ཞིག་བྱིངས་ཉམས་བྱུང་ནའང་མི་གསེངས།  དེ་ལྟར་བསྐྱངས་པས་ཇི་ཞིག་ན་མི་རྟོག་པའི་ངང་ལས་ལྷ་སྐུའི་གསལ་སྣང་རང་ཤུགས་སུ་འདྲེན་ནུས་པ་འབྱུང༌།  དེ་ཙ་ན་དམིགས་རྟེན་མི་དམིགས་པར་སྦྱངས་ཏེ་ཡིད་རྩེ་གཅིག་ཏུ་མཉམ་པར་བཞག་བཞིན་པས་ཀཱི་ལ་ཡ་ཡིད་ཀྱིས་བཟླ་ཞིང་སྐྱོ་ན་ངག་བཟླས་ཀྱང་བྱ།  དེ་ལྟར་ཡང་ཡང་བསྒོམ་པས་དང་པོ་ཡིད་ཡུལ་དུ་ལྷའི་རྣམ་པ་ཝལ་ཝལ་གསལ།  དེ་ནས་མཐོང་རེག་གི་མཚན་མ་ཡོད་པ་ལྟར་དབང་པོའི་མངོན་སུམ་དུ་གསལ།  དེ་ནས་ཀྱང་འབད་པས་ལུས་ཀྱི་ཡུལ་དུ་གསལ་བ་ཞེས་བྱ་སྟེ།  རང་ལུས་ཀྱིས་མཚོན་པའི་མ་དག་པའི་སྣང་བ་གཞན་ཀུན་ནུབ་ནས་ལྷ་སྐུའི་གསལ་སྣང་ལ་རྩེ་གཅིག་ཏུ་གནས་ཤིང་ལྷའི་ང་རྒྱལ་བརྟན་ {{TibChung|[23a]}} པོ་འབྱུང༌།  དེ་ལྟར་ཡུལ་གསུམ་གསལ་ནས་སྐུའི་ཆ་ཤས་དང་རྒྱན་ཕྲ་མོ་རེ་རེ་ནས་ཀྱང་གསལ་སྣང་འདོན་ཅིང༌།  ལྷ་སྐུ་ཆེ་ཆུང་དང་མང་ཉུང་དང་རྒྱང་ཉེ་རིང་སོགས་མ་ངེས་པ་ལ་རྩལ་སྦྱངས་པས་ལྷ་གྱད་དུ་གྱུར་པ་ཞེས་བྱ་སྟེ་ཇི་ལྟར་བསྒོམ་ཀྱང་བདེ་བར་འགྱུར་རོ།  །གཉིས་པ་ནི།  རང་གི་མིང་རུས་དངོས་མཚན་ཐ་མལ་དུ་འཛིན་པ་ཆེད་ཀྱིས་སྤངས་ནས།  བདག་ནི་དཔལ་ཆེན་པོ་རྡོ་རྗེ་གཞོན་ནུ་དངོས་ཡིན།  དེའི་ཡོན་ཏན་མཛད་པ་ཕྲིན་ལས་དང་བཅས་པ་ཚང་ངོ་སྙམ་པའི་ང་རྒྱལ་ཤིན་ཏུ་བརྟན་པོ་ལ་བསླབ་བོ།  །གསུམ་པ་ནི།  རྟེན་སྣོད་ཀྱི་རྣམ་དག་ལ།  བགེགས་ཀྱིས་མི་ཚུགས་པའི་སྲུང་འཁོར།  ཆོས་ཀྱི་དབྱིངས་ལས་རང་བྱུང་བའི་ཆོས་འབྱུང༌།  ཡུམ་བཞིའི་མཁའ་ལ་གནས་པའི་འབྱུང་བ་རིམ་བརྩེགས།  ཀུན་གཞི་གནས་སུ་དག་པའི་ཀེང་རུས་ཀྱི་རི་རབ།  ཉོན་མོངས་པའི་རྣམ་རྟོག་དང་བག་ཆགས་བསྲེག་པའི་མེ་དཔུང༌།  གང་གིས་ཀྱང་གཞོམ་དུ་མེད་པའི་རྡོ་ར།  བག་ཆགས་ཀྱི་དྲི་མས་མ་གོས་པའི་པདྨའི་ཕྲེང་བ།  རྣམ་ཤེས་ཚོགས་བརྒྱད་དག་པའི་དུར་ཁྲོད།  ཆོས་ཀྱི་དབྱིངས་ལ་མཚན་འཛིན་གྱི་རྟོག་པས་མི་ཕྱེད་པའི་བཻ་ཌཱུརྱའི་བྲག་རི།  འཁོར་འདས་མཉམ་པར་བརྡལ་བའི་གཞལ་ཡས་ཁང་ {{TibChung|[24b]}} གྲུ་བཞི་པ།  ཡེ་ཤེས་ལྔའི་རྩིག་པ།  དྲན་པ་ཉེ་བར་བཞག་པ་བཞིའི་སྒོ་བཞི།  ཡང་དག་པར་སྤོང་བ་བཞིའི་རྟ་བབ།  རྫུ་འཕྲུལ་གྱི་རྐང་པ་བཞིའི་ཆོས་འཁོར།  རྟོག་ཚོགས་དག་པའི་རི་དྭགས་ཆོས་ཉན།  འདོད་ཡོན་མ་སྤངས་རྒྱན་དུ་རོལ་པའི་འདོད་སྣམ།  ཆོས་ཐམས་ཅད་མཉམ་ཉིད་དུ་རྫོགས་པའི་ཕ་གུ  །ཆོས་ཀྱི་སྐུ་ལ་དྲི་མས་མ་གོས་ཤིང་རྩལ་མ་འགགས་པའི་དྲྭ་བ་དང་དྲྭ་ཕྱེད།  ཐུགས་རྗེ་མི་འགགས་པའི་ཤར་བུ།  ཡེ་ཤེས་ཀུན་ལ་ཁྱབ་པའི་མདའ་ཡབ།  འཕགས་པའི་ལམ་ཡན་ལག་བརྒྱད་ཀྱི་ཀ་གདན།  ཐེག་པ་བརྒྱད་ཀྱི་ཀ་བ།  འབྲས་བུ་བརྒྱད་ཀྱི་གདུང་མ།  ཆོས་ཕུང་བརྒྱད་ཁྲིའི་དྲལ་ཁེབས།  དགོས་འདོད་ཡིད་བཞིན་དུ་སྐོང་བའི་རྒྱན་སྣ་ཚོགས།  ཐབས་དང་ཤེས་རབ་གཉིས་སུ་མཚོན་པའི་ཕོ་བྲང་ཕྱི་ནང་གཉིས།  སྐུ་གསུམ་མཚོན་པའི་ཐོད་པ་སྐམ་རྙིང་རློན་པའི་རྩིགས་པ་སུམ་རིམ།  སྐྱེ་མེད་སྟོན་པའི་གནམ་ལྕགས་ཀྱི་གཟེར།  དུག་གསུམ་དག་པའི་ཤ་ཆེན་ཁྲག་ཞག་གི་ཞལ་བ།  ལྷ་ཀླུ་གཟའ་དང་རྒྱུ་སྐར་རྣམས་དབང་དུ་སྡུད་པའི་དེ་དག་གི་ཀ་གདུང་དྲལ་ཕྱམ།  བདག་འཛིན་གྱི་སྤྲོས་པ་གཅོད་པའི་དུར་ཁྲོད་ཀྱི་རྒྱན་སྣ་ཚོགས།  གང་ལའང་ཞེན་པ་བྲལ་བའི་ཙིཏྟ།  བདེ་སྟོང་གཉིས་སུ་ {{TibChung|[24a]}} མེད་པའི་བུམ་པ།  ས་ལམ་གཅིག་ཅར་རྫོགས་པའི་བྲེ།  སྤྲུལ་པས་དོན་གང་འདུལ་དུ་མཛད་པའི་ཆོས་འཁོར།  ལོངས་སྤྱོད་རྫོགས་པའི་སྐུར་ལྷུན་གྱིས་གྲུབ་པའི་གདུགས།  ཆོས་སྐུ་ཐིག་ལེ་ཉག་གཅིག་གི་ཏོག་ཏེ།  མདོར་ན་འཁོར་བ་མ་སྤངས་པར་སངས་རྒྱས་པའི་བརྡ་དོན་རྟེན་གྱི་བཀོད་པ་དང༌།  བརྟེན་པ་ལྷའི་རྣམ་དག་ལ།  ལྷན་སྐྱེས་ཀྱི་རིག་པ་ཡེ་ཤེས་རྡོ་རྗེ་གཞོན་ནུའི་ངོ་བོ་ཉིད་གང་ཞིག    །ཆོས་ཉིད་འགྱུར་བ་མེད་པས་སྐུ་མདོག་མཐིང་ནག  །  དབྱིངས་དང་ཡེ་ཤེས་འདུ་འབྲལ་མེད་པས་ཡབ་ཡུམ་མཉམ་པར་སྦྱོར་བ།  སྐུ་གསུམ་རྣམ་ཐར་གསུམ་གྱི་དབུ་གསུམ།  ཕར་ཕྱིན་དྲུག་གི་ངོ་བོ་ཕྱག་དྲུག    །རྫུ་འཕྲུལ་གྱི་རྐང་པ་བཞིའི་ཞབས་བཞི།  ཕྱག་མཚན་ཐེག་པ་རིམ་དགུ་མཚོན་པའི་རྡོ་རྗེ་རྩེ་དགུ  །ཡེ་ཤེས་ལྔ་མཚོན་པའི་རྩེ་ལྔ།  ཉོན་མོངས་པ་བསྲེག་པའི་མེ་དཔུང༌།  དུག་གསུམ་གཅོད་པའི་ཁ་ཊྭཱཾ་རྩེ་གསུམ།  གདུག་པ་ཅན་རྣམས་འབིགས་པའི་རི་རབ་ཕུར་བུ།  ཆོས་སྐུ་མཚོན་པ་ཐལ་ཆེན་གྱི་ཚོམ་བུ།  ལོངས་སྐུ་མཚོན་པ་རཀྟའི་ཐིག་ལེ།  སྤྲུལ་སྐུ་མཚོན་པ་ཞག་གི་ཟོ་རིས།  གཏི་མུག་འཇོམས་པ་ཐེག་མཆོག་གླང་པོ་ཆེའི་ཀོ་རློན།  འདོད་ཆགས་འཇོམས་པ་མ་ཉམས་བྱང་སེམས་ཞིང་གི་གཡང་གཞི།  ང་ {{TibChung|[24b]}} རྒྱལ་འཇོམས་པ་དཔའ་གཏུམ་ཟ་བྱེད་སྟག་གི་ཤམ་ཐབས།  ཞེ་སྡང་འཇོམས་པ་མཉེན་ལྕུག་འཁྲིལ་ལྡེམ་སྦྲུལ་གྱི་ཆུན་པོ།  ཕྲག་དོག་འཇོམས་པ་ཚར་གསུམ་ཐོད་པའི་ཕྲེང་བའི་ག་ཤ  ཕ་རོལ་བུ་ཕྱིན་པ་དྲུག་གི་རུས་རྒྱན།  གཞི་ལམ་འབྲས་བུའི་ཡོན་ཏན་མཐའ་དག་མཚོན་པའི་གར་གྱི་ཉམས་དགུ་ལ་སོགས་པས་ཁྱད་པར་དུ་བྱས་པས།  གདུལ་བྱ་ཁམས་གསུམ་གྱི་དྲེགས་པ་ཅན་གྱི་བདུད་དང་རཱུ་དྲ་མ་ལུས་པ་འདུལ་བའི་ཆེད་དུ་ཐུགས་ཞི་བ་ཆོས་ཉིད་ཀྱི་ངང་ལས་གཡོ་བ་མེད་པར་ཐུགས་རྗེའི་རྩལ་འབར་བ་ཆེན་པོའི་སྐུར་སྟོན་པས་ཁྲོ་བོ་ཀུན་གྱི་རྗེ་བཙན་དམ་པར་སྣང་བ་དང༌།  དེའི་ཐུགས་རྗེ་ཡེ་ཤེས་ཀྱི་སྒྱུ་འཕྲུལ་ལས་ཤེས་རབ་དབྱིངས་ཀྱི་ཐིག་ལེ་ཟུང་འཇུག་ཕྱག་རྒྱའི་གཟུགས་སུ་སྣང་བའི་སྒྲོལ་ཡུམ་རལ་གཅིག་མ།  སྐུ་ལྔ་ཡེ་ཤེས་ལྔའི་ངོ་བོ་ཀཱི་ལ་རིགས་ལྔ།  སྤང་བྱ་མི་དགེ་བ་བཅུ་དག་ཅིང་གདུལ་བྱ་ཕྱོགས་སྐྱོང་བཅུ་འདུལ་བ་དང་ལམ་ཕར་ཕྱིན་བཅུ་བགྲོད་ནས་འབྲས་བུ་སྟོབས་བཅུ་ལ་མངའ་མཛད་པའི་ཕྱིར་ཁྲོ་བཅུ་ཡབ་ཡུབ་ཟ་གསོད།  སྐུ་གསུང་ཐུགས་ཀྱི་སྤྲུལ་པ་མི་འགགས་པའི་སྲས་མཆོག    །ཚད་མེད་བཞིའི་སྒོ་སྐྱོང༌།  མཚན་མའི་རྟོག་པ་གང་གང་འདུལ་བ་ལ་འདུལ་བྱེད་ཀྱི་བཀོད་པ་དེ་དེར་སྣང་བའི་སྲུང་ {{TibChung|[25a]}} མ་བཀའ་སྡོད་སོགས་རང་ཤར་བ་སྟེ།  མདོར་ན་མཚན་གཞི་རང་སེམས་དེ་བཞིན་ཉིད་གཞིའི་རྡོ་རྗེ་གཞོན་ནུ་ཉིད།  མཚོན་བྱ་འབྲས་བུ་དག་པ་གཉིས་ལྡན་གྱི་རྡོ་རྗེ་གཞོན་ནུའི་ཡོན་ཏན་གྱི་ཁྱད་པར་ཐམས་ཅད།  མཚོན་བྱེད་ལམ་གྱི་རྡོ་རྗེ་གཞོན་ནུའི་སྐུ་མདོག་ཕྱག་མཚན་གཙོ་འཁོར་རྟགས་ཀྱི་ཁྱད་པར་དུ་ཤར་བར་ཐག་བཅད་དེ་བསྒོམ་མོ།  །གཉིས་པ་གསུང་ཡི་གེ་ལ་དམིགས་པའི་ཛཔྲ་དགོངས་ལ་གཉིས།  དམིགས་པའི་འཕྲོ་འདུ་དང༌།  བཟླ་ཐབས་སོ།  །དང་པོ་ལ་གསུམ།  ཡེ་ཤེས་ཀྱི་ལྷ་ཉེ་བར་བསྙེན་པ།  དམ་ཅན་ཉེ་བར་བསྙེན་པ།  ངན་སྔགས་ཉེ་བར་བསྙེན་པའོ།  །དང་པོ་ལ་ལྔ་ལས།  དང་པོ་མགལ་མེ་ཀླད་སྐོར་གྱི་ཚུལ་ནི།  སྔར་གྱི་གསལ་སྣང་བརྟན་པ་གཞིར་བྱས་ནས།  བདག་རྩ་བའི་དཀྱིལ་འཁོར་སེམས་དཔའ་སུམ་བརྩེགས་ཀྱི་ཏིང་ངེ་འཛིན་སེམས་དཔའ་ཧཱུཾ་ཡིག་གི་མཐར་ཀཱི་ལ་ཡ་འབྲུ་དགུ་སྤུས་བྲིས་པ་ཙམ་གཡས་སྐོར་དུ་འཁོད་པ་དེ་ལས་འོད་ཉི་ཟེར་ལྟ་བུ་དཔག་ཏུ་མེད་པ་འཕྲོས།  ཁྲོ་བཅུ་སྲས་མཆོག་སོགས་ཕྱོགས་དུས་ཀྱི་རྒྱལ་བ་སྲས་བཅས་ལ་མཉེས་མཆོད་ཕུལ་ཞིང་ཐུགས་དམ་གྱི་རྒྱུད་བསྐུལ།  རིགས་དྲུག་གི་སེམས་ཅན་ལ་ཕོག་པས་ལས་ཉོན་རྣམ་སྨིན་གྱི་སྒྲིབ་པ་སྦྱངས་ནས་བདེ་ཆེན་གྱི་ {{TibChung|[25b]}} ཞིང་ལ་བཀོད།  དམ་ཅན་སྲུང་མའི་ཚོགས་ལ་ཕོག་པས་སྔོན་གྱི་ཐ་ཚིག་བསྐུལ་ཏེ་ལས་ལ་བཙུད།  རིག་འཛིན་བླ་མ་མཆེད་ལྕམ་རྣམས་ལ་ཕོག་པས་ཐུགས་དམ་དབྱིངས་སུ་བསྐང༌།  དགྲ་བགེགས་ཐམས་ཅད་ལ་ཕོག་པས་གནོད་འཚེའི་གདུག་རྩུབ་ཚར་བཅད།  འོད་ཟེར་སླར་འདུས་ཏེ་དཀྱིལ་འཁོར་གསུམ་ལ་ཐིམ་པས་མཐུ་བསྐྱེད་དབང་ཐོབ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་པ་ཐོབ་པར་བསམ་ཞིང༌།  སྔགས་ཕྲེང་མི་གཡོ་བར་གནས་པ་ལ་སེམས་གཏད་དེ་བཟླ་བ་ནི་བསྙེན་པའི་ཡན་ལག    །ཡང་ཐུགས་ཀའི་སྔགས་ཕྲེང་བར་མ་ཆད་པ་འོད་ཟེར་ལྕགས་སྒྲོག་སྦྲེལ་བ་ལྟ་བུ་ཤད་ཀྱིས་བྱུང་བ་ཡེ་ཤེས་སེམས་དཔའི་ཞལ་བརྒྱུད་རང་གི་ཞལ་ནས་ཐོན།  ཡུམ་གྱི་ཞལ་ནས་སྐུའི་དབྱིབས་བརྒྱུད་གསང་བའི་པདྨོ་ནས་རྡོ་རྗེའི་སྦུབས་བརྒྱུད་སྙིང་གའི་དྭངས་སྲོག་ལ་ཐིམ་པས་བདེ་སྟོང་གི་ཡེ་ཤེས་མཆོག་ཏུ་འབར་པར་བསམ།  ཡང་དེའི་རྐྱེན་གྱིས་སྔགས་ཕྲེང་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས་སངས་རྒྱས་ཀྱི་ཞིང་ཐམས་ཅད་ཁྱབ།  རྒྱལ་བ་སྲས་དང་བཅས་པ་མཆོད་ཅིང་དེ་ {{TibChung|[26a]}} ངག་གི་དབང་བྱིན་དངོས་གྲུབ།  སྣང་སྲིད་ཁམས་ཀྱི་དྲེགས་པ་ཅན་རྣམས་ཀྱི་ཚེ་བསོད་དཔལ་འབྱོར་མངའ་ཐང༌།  འབྱུང་བ་ལྔའི་དྭངས་བཅུད་བཀྲག་མདངས།  སྣོད་བཅུད་ཀྱི་དགེ་མཚན་དཔལ་ཡོན་མ་ལུས་པ་ཐམས་ཅད་འོད་ཟེར་ཁ་དོག་སྣ་ཚོགས་སྤྲིན་ཕུང་ལྟ་བུའི་རྣམ་པར་བསྡུས་ཏེ་དྭངས་སྲོག་ལ་ཐིམ་པས་མཐུ་རྩལ་གཟི་བྱིན་ནུས་པ་མཆོག་ཏུ་འབར་བར་བསམ་ཞིང་སྔགས་ཕྲེང་རྒྱུན་མི་འཆད་པར་མགལ་མེ་ལྟར་འཁོར་བ་ལ་སེམས་གཏད་དེ་བཟླ་བ་ནི་ཉེ་བར་བསྙེན་པའི་ཡན་ལག་གོ  །གཉིས་པ་བུང་བ་ཚང་ཞིག་གི་ཚུལ་ནི།  བདག་གི་ཞལ་གསུམ་ཀ་ནས་ཀཱི་ལ་ཡ་བཟླས་པས་དབུ་རྒྱན་གྱི་ཁྲག་འཐུང་རིགས་ལྔ།  བ་སྤུ་བུ་གའི་ཁྲོ་ཆུང་རྣམས་དང༌།  ཁྲོ་བཅུ་ཡབ་ཡུམ་ཟ་གསོད་སྒོ་སྐྱོང་དམ་ཅན་བཀའ་སྡོད་སོགས་ལྷར་གསལ་བ་ཐམས་ཅད་ཀྱིས་དུས་གཅིག་ཏུ་སྔགས་བཟླ་ཞིང༌།  དེ་བཞིན་དུ་མདུན་གྱི་ནམ་མཁར་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བཞུགས་པ་རྣམས་དང༌།  ཁམས་གསུམ་སེམས་ཅན་ཐམས་ཅད་ཡི་དམ་གྱི་སྐུར་གྱུར་པས་སྔགས་སྒྲ་དི་རི་རི་སྒྲོགས་པར་བསམ།  དེར་མ་ཟད་འབྱུང་བའི་སྒྲ་སྐད་ཐམས་ཅད་ཀྱང་ཀཱི་ལ་ཡའི་རང་སྒྲར་གྲགས་པར་བསམ་ལ་བཟླ་བ་ནི་སྒྲུབ་པའི་ཡན་ལག་གོ  །གསུམ་པ་མགར་ {{TibChung|[26b]}} གྱི་ཚྭ་ཚྭ་སྤྲོ་བ་ལྟ་བུའི་ཚུལ་ནི།  དཀྱིལ་འཁོར་གསུམ་གྱི་ལྷ་ཚོགས་རྣམས་ལས་སྤྲུལ་པ་ཁྲོ་ཆུང་མཚོན་ཐུན་གྱི་ཚོགས་དྲག་ཅིང་ཚལ་རྩུབ་པ་དཔག་ཏུ་མེད་པ་སེར་ཐུན་དང་ཐོག་རྒོད་བབས་པ་ལྟར་འཕྲོས་ཤིང་སྔགས་སྒྲ་འབྲུག་སྟོང་དུས་གཅིག་ལྡིར་བ་ལྟར་སྒྲོགས་པ་དང༌།  སྔགས་ཀྱི་འོད་ཟེར་མེའི་ཚྭ་ཚྭ་ལྟར་འཕྲོས་པས་ལོག་པར་འདྲེན་པའི་བདུད་བགེགས་དང་འབྱུང་པོ་ཐམས་ཅད་ཐུལ་ཐུལ་བསྲེགས་ཏེ་ཐལ་བའི་རྡུལ་ཕྲན་བཞིན་བརླག་པར་བསམ་ཞིང་དྲག་སྔགས་བཟླ་བ་ནི་མངོན་སྤྱོད་སྒྲུབ་པའི་ཡན་ལག་གོ  །བཞི་པ་གྲུབ་མཐའ་ལམ་ལོངས་ཀྱི་ཚུལ་དུ་བཟླ་བ་ནི།  གཟུགས་སུ་སྣང་བ་ཐམས་ཅད་སྣང་སྟོང་དབྱེར་མེད་དཔལ་ཆེན་ཧེ་རུ་ཀའི་སྐུའི་རང་བཞིན།  སྒྲར་གྲགས་པ་ཐམས་ཅད་གྲགས་སྟོང་འགགས་མེད་ཀཱི་ལ་ཡའི་རང་སྒྲ།  དྲན་རྟོག་ཐམས་ཅད་རང་ཤར་རང་གྲོལ་ཆོས་ཉིད་ཡེ་ཤེས་ཀྱི་རོལ་པ་ཆེན་པོར་ཤེས་པའི་ངང་ནས་འཛིན་མེད་དུ་བཟླ་བ་ནི་སྒྲུབ་པ་ཆེན་པོའི་ཡན་ལག་གོ  །ལྔ་པ་ཤེས་པ་གསུམ་ལྡན་གྱི་གནད་ནི།  སྔགས་ཀྱི་འོད་ཟེར་དཔག་ཏུ་མེད་པ་རེ་རེ་བཞིན་ཡང་རྡོ་རྗེ་གཞོན་ནུ་བསམ་གྱིས་མི་ཁྱབ་པར་གྱུར།  དེ་རེ་རེའི་ཞལ་ནས་ཀྱང་དེ་འདྲ་བའི་སྔགས་དང་སྤྲུལ་པ་སྤྲོས་པས་སྣང་སྲིད་ཐམས་ཅད་ཁྲོ་བོ་ཁྲོ་མོས་ {{TibChung|[27a]}} ཁེངས་པར་བསམ་པ་ནི་ཀཱི་ལ་ཡ་ལྷར་ཤེས་པ།  སྔགས་ཀྱི་འོད་ཟེར་གྱིས་བདག་དང་སེམས་ཅན་ཐམས་ཅད་ཀྱི་སྒྲིབ་པ་མཐའ་དག་སྦྱངས་ཉོན་མོངས་པ་ཆོས་ཉིད་དུ་ལྷན་ལྷན་སོང༌།  བདག་གཞན་ཐ་དད་དུ་འཛིན་པའི་ཞེན་རྟོག་དག    །ཆོས་ཐམས་ཅད་ཆོས་ཉིད་རང་བཞིན་གྱིས་རྣམ་པར་དག་ཅིང་དབྱེར་མེད་པར་ཤེས་པ་ནི་ཀཱི་ལ་ཡ་ཆོས་ཉིད་དུ་ཤེས་པ།  སྟོད་ལས་དང་དམིགས་བསལ་ཚེ་སྒྲུབ་པའི་སྐབས་སུ།  སྔགས་ཀྱི་འོད་ཟེར་ལས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་ཚོགས་ཉི་ཟེར་གྱི་རྡུལ་ལྟར་འཕྲོས།  ཕྱོགས་སྐྱོང་སྡེ་བརྒྱད་ཀྱི་ལག་ནས་རང་གཞན་གྱི་བླ་ཚེ་བརྐུས་པ་འཕྲོག་པ་ཡར་བ་རྣམས་དང༌།  རྒྱལ་བ་སྲས་དང་བཅས་པའི་སྐུ་ཚེའི་དངོས་གྲུབ།  དྲང་སྲོང་རིག་འཛིན་འཇིག་རྟེན་ཆེ་རྒུ་རྣམས་ཀྱི་ཚེ་དང་བསོད་ནམས།  བརྟན་གཡོའི་བཅུད་ཀྱི་དྭངས་མ་ཐམས་ཅད་འུབ་ཀྱི་བསྡུས་ནས་རང་དང་བསྲུང་བྱ་ལ་ཐིམ་པས་གཞོམ་གཞིག་དང་བྲལ་བའི་རྡོ་རྗེའི་ཚེ་ཐོབ་པར་བསམ་པ་དང༌།  སྨད་ལས་ངན་སྔགས་དང་འབྲེལ་བའི་སྐབས།  དགྲ་བོའི་སྙིང་གི་ཁྲག་སྦལ་ནང་ནས་རྣམ་པར་ཤེས་པ་ནྲྀ་དང༌།  བགེགས་ཀྱི་ཤེས་པ་ཏྲི་ཡིག་གི་རྣམ་པས་བཀུག་ནས་ལིང་ག་ལ་བསྟིམས་པ་སྔགས་ཀྱི་མཐུ་དང་ {{TibChung|[27b]}} དབལ་ཟེར་གྱིས་གཞོབ་རོ་རྡོག་པས་བརྫིས་པའམ་གྲོད་ལྐོག་མེ་ལ་བཤུར་བ་ལྟར་སྐུམ་ཧྲི་ལེར་སོང་བར་བསམ་པ་ནི་ཀཱི་ལ་ཡ་འགུགས་གཞུག་ཏུ་ཤེས་པའོ།  །འདི་དག་གི་སྐབས་སུ་བཟླ་བྱའི་སྔགས་ནི།  ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ།  ཅེས་སྲོག་སྔགས་འབྲུ་དགུ་དང༌།  སརྦ་བིགྷྣཱན་བཾ་ཞེས་ལས་སྔགས་འབྲུ་ལྔ་དང༌།  ཛཿཧཱུཾ་ཨཱཿ ཞེས་མཁའ་འགྲོའི་འཕྱོང་སྔགས་འབྲུ་གསུམ་སྟེ།  དེ་རྣམས་སྦྲེལ་བའི་འབྲུ་བཅུ་བདུན་པ་ཁོ་ན་ཆིག་དྲིལ་དུ་བཟླའོ།  །གཉིས་པ་དམ་ཅན་ཉེ་བར་བསྙེན་པ་ལ།  རྩ་བ་དང༌།  ལས་སྦྱོར་གཉིས་ཀྱི།  དང་པོ་ནི།  བདག་དང་སྲས་མཆོག་གི་ཐུགས་ཀར་དམ་ཅན་འདུས་པའི་སྔགས་ཀྱིས་བསྐོར་བར་བསམ།  བཟླས་པ་བྱས་པས་སྔགས་ལས་འོད་ཟེར་དམར་པོ་ཛཿཡིག་གི་རྣམ་པ་ཕྱོགས་བཅུར་འཕྲོས།  དམ་ཅན་རྣམས་རང་རང་གི་གནས་ནས་ལྕགས་ཀྱུའི་རྡུལ་གྱིས་རང་དབང་མེད་པར་བཀུགས་ཤིང་ཤ་རུལ་ལ་སྦྲང་མ་འདུ་བ་ལྟར་ཐིབས་ཀྱིས་འདུས་ཏེ།  ཐམས་ཅད་ཀྱིས་བདག་གིས་ཅི་བགྱི་དཔའ་བོ་ཆེན་པོས་བཀའ་སྩོལ་ཅིག    །ཅེས་ཟེར་ནས་བཀའ་ཉན་ཅིང་ལས་བྱེད་པའི་ཚུལ་དུ་འདུག་པར་བསྒོམ།  གཉིས་པ་ནི།  ཐུན་མཐར་དེ་དག་ལས་ལ་རྔམས་པའི་ཚུལ་དུ་འདུག་པ་ལ་ཐུགས་ཀའི་འོད་ཟེར་རྩུབ་ཅིང་གདུང་ {{TibChung|[28a]}} བས་བསྐུལ།  དེ་མ་ཐག་ཏུ་རི་དྭགས་ལ་ཤ་ཁྱི་བཀྱེས་པ་ལྟར་རྔམས་ཤིང་འཁྲུགས་ནས་ཧབ་དི་རི་རི་སོང་སྟེ་དམིགས་བྱ་གང་ཡིན་པའི་དགྲ་བགེགས་རྣམས་ལྕགས་ཀྱུས་བཟུང༌།  མཚོན་ཆས་བཏབ།  ལ་ལས་ཤ་ཟོས།  ལ་ལས་ཁྲག་འཐུང༌།  ལ་ལས་རུས་པ་འཆའ།  ཕུང་པོ་ལྷག་མ་མེད་པར་བརླག་པར་བསམ་ལ་བཞི་སྙིང་གཅིག་དྲིལ་བཟླའོ།  །གསུམ་པ་ངན་སྔགས་ཉེ་བར་བསྙེན་པ་ནི།  ཐུན་མོང་དུ་མགར་གྱི་ཚྭ་ཚྭ་སྤྲོ་བ་ལྟ་བུའི་དམིགས་གནད་དང་བཅས་བསྙེན་སྔགས་ལ་སྤུ་གྲིའི་དྲག་སྔགས་བརྒྱད་ཅུ་རྩ་བཞི་པ་ཉིད་སྦྲེལ་ཏེ་བཟླ་ཞིང༌།  ཁྱད་པར་ཕྲིན་ལས་ལ་དམིགས་པའི་ཛཔྲ་དགོངས་དང་འབྲེལ་བར་གབ་པའི་སྔགས་དྲུག་བཟླ་བའི་ཚུལ་ནི་སྨད་ལས་ངན་སྔགས་སྒྲུབ་པའི་མན་ངག་ལས་ཤེས་སོ།  །གཉིས་པ་ཇི་ལྟར་བཟླ་བའི་ཚུལ་ལ།  ལུས་ངག་ཡིད་ཀྱི་གནད་གསུམ་ལས།  དང་པོ་ལུས་ཀྱིས་བཟླ་ཚུལ་ལ།  གང་ལ་ཟླ་ན་ཕྲེང་བ་སྟེ།  དེའི་རྒྱུ་ནི།  སྤྱིར་ལས་བཞི་སོགས་ཀྱི་ངེས་པས་དབྱེ་བ་མང་ཡང་བསྡུ་ན།  སྔགས་སྒྲུབ་མན་ངག་རིན་ཆེན་ཕྲེང་བ་ལས།  ཕྲེང་བའི་བྱེ་བྲག་བོ་དྷི་ཙེ་བཟང་པོ།  །ཀུན་ལ་ཤིས་པས་སྤྱི་ཡི་བཟླས་པ་ནི།  །རུ་རཀྴ་ནི་ཁྲོ་བོའི་བཟླས་པའམ།  །དྲག་པོའི་ལས་ལ་རབ་ {{TibChung|[28b]}}  ཏུ་བསྔགས་པར་བཤད།  །ཅེས་སོགས་གསུངས་པས་སྤྱིར་བོ་དྷི་ཙེ་ལས་ཐམས་ཅད་ལ་བསྔགས་པར་བཤད་དེ།  རྒྱུད་གཞན་ལས་ཀྱང༌།  བོ་དྷི་ཙེ་ཡིས་གྲངས་མེད་འགྱུར།  །ཞེས་གསུངས།  བྱེ་བྲག་འདིར་ནི་དྲག་པོའི་ཕྲིན་ལས་ཀྱི་དབང་གིས་རུ་རཀྴ་དང་ཐོད་པའི་ཕྲེང་བ་མཆོག་ཏུ་ཤིས་ཏེ།  རཀྴ་ཐོད་པ་མཆོག་དུ་བསྔགས།  །ཞེས་སོ།  །གང་ཡང་གཞན་གྱིས་ལོངས་མ་སྤྱད་པ་ཉིད་གཞོན་ནུ་མས་བཀལ་བའི་སྲད་བུ་ཡེ་ཤེས་དགུ་དང་རིགས་ལྔ་སྐུ་གསུམ་སོགས་མཚོན་པའི་དགུ་བསྒྲིལ་ལྔ་བསྒྲིལ་སུམ་བསྒྲིལ་རྣམས་ཇི་ལྟར་འཚམས་པ་ལ་བརྒྱུས་ཤིང༌།  ཇི་སྐད་དུ།  ཕྲེང་བ་ཀུན་གྱི་དགྲ་བཅོམ་པ།  །མཆོད་རྟེན་ཆོས་ཀྱི་ཕུང་པོའི་ཕྱིར།  །ཞེས་དང༌།  སྟེང་དུ་ཡང་ནི་ཆོས་ཀྱི་དབྱིངས།  །ཞེས་སྐུ་གཉིས་མཚོན་པའི་མདོ་འཛིན་ཉིས་བརྩེགས་སུ་ཡོད་པར་བྱས་ཏེ།  བསང་སྦྱངས་ལྷར་བསྐྱེད་བསྟིམ་ནས་ཕྲེང་བའི་རྣམ་པར་བསྒྱུར་བ་རུ་ཙི་ར་སོགས་ཀྱི་སྔགས་བཟླས་པས་བྱིན་གྱིས་བརླབས་པའོ།  །གང་གིས་བཟླ་ན་ལག་པའི་སོར་མོས་སོ།  །ཇི་ལྟར་བཟླ་ན།  དེ་ལས།  ཀུན་ཀྱང་མཐེབ་མཛུབ་གཉིས་ཀྱིས་འཛིན་པར་བསྔགས།  །དྲག་པོ་གཡས་པའི་མཐེབ་སྲིན་གཉིས་ཀྱིས་བགྲང༌།  །ཞེས་པས་དྲག་པོའི་ལས་ལ་གཡས་མཐེབ་སྲིན་སྦྱར་བའི་ཆོས་འབྱུང་གི་ {{TibChung|[29a]}}  རྒྱས་འདྲེན་པར་བཤད་ཅིང༌།  ལས་གཞན་རྣམས་ལ་གཡོན་པས་བགྲང་བར་བྱ་སྟེ།  འདྲེན་ཚུལ་སོར་མོ་བཞི་སྦྱར་བའི་མཛུབ་མོའི་སྟེང་དུ་ཕྲེང་བ་བཞག་ནས་མཐེ་བོང་རྡོ་རྗེ་ལྕགས་ཀྱུའི་རྣམ་པས་སོ།  །ཡང་དམིགས་བསལ་དུ།  ཞི་བ་ལ་མཐེབ་མཛུབ་ཀྱིས་སྙིང་གར།  རྒྱས་པ་ལ་གོང་མོའི་ཁར་ལྟེ་བར།  དབང་ལ་སྲིན་ལག་སྟེང་གསང་བར།  དྲག་པོ་ལ་མཐེའུ་ཆུང་ཁར་པུས་སྟེང་རྣམས་སུ་བགྲང་ཞིང༌།  བཟློག་བསང་སོགས་སྐབས་འགར་མཐེ་བོང་སྟྭ་གྲི་དང་མཛུབ་མོ་ལྕགས་གཏན་ཕྲེང་རྡོག་བྱད་མའི་མགོ་བོར་དམིགས་པས་ཕྲེང་བ་ཕྱིར་བསྣུར་ཏེ་སྐེ་བཅད་པའི་དམིགས་པ་སོགས་སྐབས་ཐོབ་ཤེས་དགོས་པའོ།  །གཉིས་པ་ངག་གི་བཟླ་ཚུལ་ལ།  གང་བཟླ་ན།  ལྷའི་སྙིང་པོ་བསྙེན་པའི་སྔགས་རྣམས་སོ།  །གང་གིས་བཟླ་ན།  སྔགས་ཀྱི་སྒྲར་སྣང་བའི་ཚུལ་དུ་ཡིད་ཀྱིས་སམ་སྒྲར་གྲགས་པའི་ཚུལ་དུ་ལྕེ་རྐན་འཕྲད་པའི་རྩོལ་བས་སོ།  །ཇི་ལྟར་བཟླ་ན།  སྒྲ་ཧ་ཅང་ཆེ་བ་དང༌།  ཆུང་བ་དང༌།  ཡི་གེ་ཐུང་བ་རྣམས་དལ་བུར་འདོན་པ་དང༌།  རིང་བ་རྣམས་མྱུར་པོར་འདོན་པ་དང༌།  ཧ་ཅང་གསལ་ཆེས་པའམ་མི་གསལ་བ་དང༌།  ཐུན་སྒང་དུ་མི་དང་གཏམ་འདྲེས་པའི་སྔགས་དང་འདོན་པ་གཞན་བྱེད་པ་ {{TibChung|[29b]}}  སོགས་ཚིག་གཞན་གྱིས་བར་ཆོད་པ་དང༌།  སེམས་གཞན་དུ་ཡེངས་པ་སོགས་ཀྱི་སྐྱོན་སྤངས་ནས་བཟླ་སྟེ།  རྔམས་གློག་ལས།  སྒྲ་ཆེན་མ་ཡིན་ཆུང་བ་མིན།  །མགྱོགས་པར་མ་ཡིན་བུལ་བ་མིན།  །དྲག་པར་མ་ཡིན་ཞན་པ་མིན།  །ཡིག་འབྲུ་ཡན་ལག་ཉམས་པ་མིན།  །ཡེངས་པས་མ་ཡིན་སྨྲ་བཞིན་མིན།  །གླལ་སོགས་བར་དུ་ཆོད་པས་མིན།  །ཞེས་དང༌།  མཚོ་རྒྱལ་ཞུས་ལན་ལས།  སྐྱོན་ལྔ་སྤངས་ཏེ།  དག་པ་གཙང་བ་སི་ལི་ལི་བཟླའོ༔  སྐྱོན་ལྔ་གང་ཞེ་ན༔  མྱུར་ཏེ་སྒྲ་འདྲེས་ན་འབྱམས་ཏེ་འབྲུ་འདྲེས་པའི་སྐྱོན་ཡོད༔  བུལ་ཞིང་འཆལ་ན་བྱེར་བའི་སྐྱོན་ཡོད༔  དྲག་ཅིང་སྒྲ་ཆེ་ན་ཕོག་ཐུག་འོང་ཞིང་བྱིན་རླབས་ཡལ༔  ཞན་ཅིང་སྒྲ་ཆུང་ན་ནུས་པ་མི་ཐོན༔  ལྷག་ཆད་མེད་པར་སྒྲ་དག་ཟུར་ཐོན་མ་འདྲེས་གསལ་དག་ཏུ་བཟླ་བར་བྱའོ༔  ཞེས་གསུངས་པ་ལྟར་སྐྱོན་རྣམས་སྤངས་ནས།  སྤྱིར་བཟླས་པ་ཡིད་བཟླས།  བྱེ་བྲག་ལས་གང་ལ་མཐུན་པའི་ཚུལ་གྱིས་བཟླ་བ་སྟེ།  ཞི་བར་ཤུབ་བུར་གོང་བས་ཐོས་ཙམ་དུ་བཟླ།  རྒྱས་པར་རྐང་པས་ཐོས་ཙམ་དུ་བཟླ།  དབང་ལ་གྲོགས་པོར་སྙིང་གཏམ་འཆད་པ་ལྟར་གཞན་གྱིས་ཐོས་ཙམ་དུ་བཟླ།  དྲག་པོར་གནམ་ལྕགས་ཀྱི་ཐོག་ {{TibChung|[30a]}} བབས་པ་ལྟར་ཁོངས་ཤུགས་བསྐྱེད་དེ་བཟླའོ།  །གསུམ་པ་ཡིད་ཀྱི་བཟླ་ཚུལ་ལ།  གང་བཟླ་ན་ཏིང་ངེ་འཛིན་ནོ།  །གང་གིས་བཟླ་ན་སེམས་རྩེ་གཅིག་པའི་དྲན་པས་སོ།  །ཇི་ལྟར་བཟླ་ན་དྲན་པ་དེས་སེམས་ཏིང་ངེ་འཛིན་ལས་གཞན་དུ་མི་གཏོང་བར་རྩེ་གཅིག་ཏུ་འཛིན་པ་སྟེ།  དེ་ཡང་ཡང་བསྐྱར་བས་བཟླས་པའོ།  །དེ་ཡང་སྲོག་སྡོམ་གཟེར་བཞིའི་གནད་ལ་གཅུན་པར་བྱེད་པ་སྟེ།  རྒྱུད་ལས།  ཏིང་འཛིན་གཟེར་དང་སྙིང་པོའི་གཟེར།  །དགོངས་པའི་གཟེར་དང་འཕྲོ་འདུའི་གཟེར།  །ཞེས་བཞིར་གསུངས་པའི་དང་པོ་ནི།  ཏིང་འཛིན་གཟེར་ནི་ཐོད་སྐུ་ལ།  །རྩེ་གཅིག་སེམས་བཟུང་ཡེངས་མི་བྱ།  །ཞེས་དང༌།  གཉིས་པ་ནི།  སྙིང་པོ་སྔགས་གཟེར་ཡོངས་རྫོགས་ཀྱི།  །གཙོ་བོའི་སྔགས་དང་སེལ་མེད་བཟླ།  །ཞེས་དང༌།  གསུམ་པ་ནི།  དགོངས་པའི་གཟེར་ནི་ཞི་ཁྲོའི་ལྷ།  །ཡོངས་རྫོགས་དཔལ་ཆེན་རང་སེམས་ལས།  །གུང་ན་མེད་ཅིང་རཱུ་དྲ་ཡང༌།  །ལོག་ན་མེད་དོ་རང་གི་སེམས།  །སེམས་ཉིད་སྟོང་པ་ཆོས་ཀྱི་སྐུ།  །ཞེས་སོགས་དང༌།  བཞི་པ་ནི།  འཕྲོ་འདུའི་གཟེར་ནི་དམིགས་པ་ཡིས།  །བསྒྱུར་ཁ་ཤེས་ན་འདོད་རྒུར་འགྱུར།  །ཞེས་སོ།  །གསུམ་པ་ཐུགས་ཆོས་ཉིད་ལ་དམིགས་པའི་ཛཔྲ་དགོངས་ནི།  ཡིད་ལ་དྲན་རྟོག་ཅི་འགྱུ་ཡང་ཆེད་ {{TibChung|[30b]}} དུ་མི་སྤང་ཆེད་དུ་མི་སྒྲུབ་པར་གང་ཤར་དེ་ཀའི་ངང་ལ་ཅེ་རེ་བལྟས་པས།  སྣང་རིག་ངོས་བཟུང་མེད་པར་རྗེན་ནེ་བ་དམིགས་མེད་བསམ་བརྗོད་དང་བྲལ་བའི་སྟོང་པ་ཉིད།  མདངས་བདེ་བ་ཆེན་པོའི་རོལ་པར་མ་འགགས་ཤིང༌།  རྩལ་ཅིར་ཡང་འཆར་བའི་ཟུང་འཇུག་འདི་ཀ་དངོས་པོའི་གནས་ལུགས་ཏེ་གདོད་མ་ནས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་ལྷུན་རྫོགས་ཐིག་ལེ་ཆེན་པོར་ངོ་ཤེས་པར་བྱ་ཞིང༌།  དེ་ལྟར་མ་རྟོགས་པ་ལ་སྙིང་རྗེ་བསྐྱེད།  སྙིང་རྗེའི་རང་མདངས་འགགས་མེད་དུ་གསལ་བ་སྤྲོས་བྲལ་ངོས་བཟུང་མེད་པའི་གཤིས་ལུགས་སུ་ལ་བཟླ་སྟེ།  ཡུལ་མེད་རང་གསལ་རྗེན་པར་བསྐྱང་བའོ།  །དེའང་ཇི་སྐད་དུ་རྩ་གཞུང་ལས།  སྐུ་གསུམ་རྡོ་རྗེ་ཕུར་པ་ནི༔  དུག་གསུམ་བསྒྲལ་བའི་ཀློང་ནས་ལངས༔  ངོ་བོ་ཁྱབ་བརྡལ་མཐའ་བྲལ་ཉིད༔  སྟོང་པའི་ཡེ་ཤེས་ཆོས་ཀྱི་དབྱིངས༔  ཁྱབ་བརྡལ་ཆོས་སྐུའི་ཕུར་པའོ༔  རང་བཞིན་འགགས་མེད་རྩལ་སྣང་བ༔  གསལ་བའི་ཡེ་ཤེས་སོ་སོར་གསལ༔  ཞེན་མེད་འཛིན་མེད་རང་སར་ཀློད༔  མ་འགགས་ལོངས་སྐུའི་ཕུར་པའོ༔  ཐུགས་རྗེ་ཕྱོགས་མེད་རང་གྲོལ་གྱི༔  ཀུན་ཁྱབ་ཡེ་ཤེས་གཟུགས་སྐུར་ཤར༔  དྲན་ཙམ་རང་ངོར་རྫོགས་ལ་ལྟོས༔  ཕྱོགས་མེད་སྤྲུལ་སྐུའི་ཕུར་པའོ༔  སྐད་ཅིག་འཁོར་བའི་ {{TibChung|[31a]}} འཁོར་ལོ་རྫོགས༔  སྐད་ཅིག་རྒྱལ་ཀུན་དཀྱིལ་འཁོར་རྫོགས༔  རང་སྣང་ཞིང་ལ་རང་རིག་ལྷ༔  ཤར་གྲོལ་འཁོར་གྱི་རོལ་པའོ༔  སྟོང་ཉིད་ཆོས་དབྱིངས་ཕུར་པ་སྟེ༔  གསལ་བ་བཛྲ་ཀཱི་ལ་ཡ༔  མཉམ་ཤར་རཏྣ་ཀཱི་ལ་ཡ༔  སོ་སོར་རྟོག་པ་པདྨའི་སྐུ༔  ཤར་གྲོལ་དབང་ཐོབ་ལས་ཀྱི་བདག༔  དོན་ལ་རིག་པའི་རང་ངོར་རྫོགས༔  རིག་པ་ཁྱབ་བདག་རྡོ་རྗེ་འཆང་༔  རིག་པ་སྒྱུ་འཕྲུལ་སྣ་ཚོགས་བདག༔  རིག་པ་འཁོར་འདས་དབང་ཕྱུག་གོ༔  རིག་པ་འདོད་དགུའི་འབྱུང་གནས་སོ༔  མ་རིག་སངས་པའི་རིག་པ་ནི༔  གྲོལ་བྱེད་རང་དབང་རང་ལ་འབྱོར༔  སྐད་ཅིག་གཅིག་གི་བྱེ་བྲག་གིས༔  སྐད་ཅིག་རྫོགས་པའི་སངས་རྒྱས་ལམ༔  གཞན་དུ་འཚོལ་བས་ལྷ་མི་རྙེད༔  རང་ཉིད་ལྷ་ལ་ལྷ་ཉིད་རང་༔  སྣང་བ་རྣམ་དག་ཞིང་གི་མཆོག༔  རིག་པ་ལྷ་ཡི་ལྷ་མཆོག་ཡིན༔  མ་བཅོས་མ་བཙལ་རང་བྱུང་བའི༔  ལྷན་སྐྱེས་རིག་པའི་ཡེ་ཤེས་ཉིད༔  གདོད་ནས་ཡེ་གནས་མངོན་གྱུར་བ༔  ལྟ་བ་གྱད་ཀྱི་ལྷ་ཉིད་དོ༔  ཞེས་གསུངས་སོ།  །བཞི་པ་ཡོན་ཏན་དབང་དང་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི།  འོག་ཏུ་བསྙེན་པའི་ལག་ལེན་གྱི་སྐབས་སུ་འཆད་པར་འགྱུར་ཞིང༌།  ལྔ་པ་ཕྲིན་ལས་ལ་དམིགས་པའི་སྤུ་གྲིའི་འཕྲུལ་ {{TibChung|[31b]}}  འཁོར་བསྐོར་བའི་ཚུལ་ནི་གཞན་དུ་ཤེས་སོ།  །དེ་ལྟར་བཟླས་པའི་སྐབས་སུ་བསྙེན་པ་སྟོང་སྟོང་ཚང་བའམ་ཐུན་མཚམས་རྣམས་སུ་ཐུགས་དམ་བསྐུལ་བའི་དོན་དུ་སྨན་རཀ་གཏོར་མ་ལ་སོགས་པས་མཆོད་ཅིང་བསྟོད་ནས་མངོན་པར་འདོད་པའི་དངོས་གྲུབ་རྒྱུན་དུ་བསྐུལ་ཞིང༌།  བསྙེན་པ་གྲུབ་ནས་དུས་ཀྱི་དངོས་གྲུབ་ཆེད་དུ་བསྐུལ་ཏེ་བླང་བར་བྱའོ།  །གསུམ་པ་རྗེས་ཀྱི་བྱ་བ་ལ།  ཐོག་མར་ཚོགས་ཀྱི་མཆོད་པ་ནི།  ཚོགས་གཞོང་རིན་པོ་ཆེའི་མཆོད་སྡོང་པདྨ་འདབ་མ་སྟོང་ལྡན་གྱི་སྙིང་པོར་ཚོགས་རྫས་རྣམས་ཉི་ཟླ་པདྨའི་དཀྱིལ་འཁོར་ལ་གནས་པའི་ཧཱུཾ་མཐིང་ནག་འབར་བར་གྱུར།  ཧཱུཾ་ལས་རཾ་ཡཾ་ཁཾ་བྱུང་བས་ཡེ་ཤེས་ཀྱི་མེ་རླུང་ཆུས་མ་དག་པའི་དངོས་པོ་ཐམས་ཅད་བསྲེག་གཏོར་བཀྲུས།  ཚོགས་རྫས་ཤ་ལྔ་བདུད་རྩི་ལྔས་མཚན་པར་ཧཱུཾ་མཱུཾ།  ཨོཾ་ལཱཾ།  སྭཱ་མཱཾ།  ཨཱཾ་པཱཾ།  ཧཱ་ཏཱཾ་རྣམས་ལས་རིགས་ལྔ་ཡབ་ཡུམ་སྙོམས་པར་ཞུགས་པའི་མཁའ་གསང་བྱང་སེམས་བདུད་རྩིའི་རྒྱུན་གྱི་ཟེར་རླངས་ལས་ཕྱོགས་དུས་སངས་རྒྱས་ཐམས་ཅད་ཀྱི་བྱིན་རླབས་མ་ལུས་པ་ཡིག་འབྲུ་གསུམ་གྱི་རྣམ་པར་བསྡུས་ཏེ་ཐིམ།  རིགས་ལྔ་ཡབ་ཡུམ་ཀྱང་འོད་དུ་ཞུ་ཞིང་འདྲེས་པ་ལས་དམ་ཚིག་གི་བདུད་རྩི་ཡེ་ཤེས་ཆེན་པོའི་རང་བཞིན་འདོད་ཡོན་གྱི་རྣམ་པ་ཅིང་ཡང་འཆར་བར་བསམ།   {{TibChung|[32a]}}   ཚོགས་ཞིང་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བྱོན་པ་རྣམས་སྔར་གྱི་དཀྱིལ་འཁོར་དང་དབྱེར་མེད་དུ་བཞུགས་པར་མོས་ལ།  ཚོགས་རྫས་འདོད་ཡོན་གྱི་ལྷ་མོ་གྲངས་མེད་པར་འཕྲོ་བས་དགྱེས་པ་བསྐྱེད་པར་བསམ་ཞིང་འདོད་ཡོན་གྱི་ལྷ་མོས་སྤྱིར་མཆོད་ཅིང༌།  བྱེ་བྲག་ཚོགས་ཕུད་ཆ་དང་པོ་ཞལ་ཟས་འདོད་ཡོན་ལོངས་སྤྱོད་ཀྱི་རང་བཞིན་མཆོད་པའི་ཚུལ་དུ་འབུལ།  ཆ་བར་པ་བདུད་རྩིའི་ཐོད་ཞལ་དུ་མས་ཉམས་ཆག་བཤགས་པའི་ཆེད་དུ་འབུལ།  ཚོགས་ཐ་མ་གདབ་ལས་དྲིལ་ཐུན་དང་འབྲེལ་བར་སྟོབ་པའི་ལས་རིམ་ལ།  བདག་ཉིད་དཔལ་ཆེན་པོའི་ཐུགས་ཀ་ནས་སྤྲུལ་པའི་ཁྲོ་ཚོགས་ཕོ་ཉ་གྲངས་མེད་པ་སྟོང་ཁམས་གང་བར་འཕྲོས་པས་དམིགས་བྱ་རང་དབང་མེད་པར་བཀུག་སྟེ་མདུན་གྱི་ལིང་ག་ལ་བསྟིམ་པར་བསམ་ཞིང༌།  བདེན་སྟོབས་བརྗོད་པས་བཀུག་ཅིང་བསྟིམས་ནས་ཕོ་ཉ་བསྐུལ།  ཨོཾ་ལཾ་ཧཱུཾ་ལཾ་སོགས་ཀྱི་སྐབས་སྲས་མཆོག་གི་ཕུར་བུ་འདྲིལ་ཞིང༌།  ཚེ་ཁྲུས་ཀྱི་ལུང་མདོར་བསྡུས་ནི།  བདག་དབལ་ཆེན་པོ།  ཕུར་བུ་སྲས་མཆོག    །ལིང་ག་དགྲ་བགེགས་དངོས་སུ་གསལ་ལ།  སྲས་མཆོག་གི་སྤྱི་བོར་ཧཱུཾ་ཀཱ་ར།  དེའི་སྤྱི་བོར་ཨ་དཀར་པོ།  ཨ་འོད་དུ་ཞུ་ནས་ཧཱུཾ་ཀཱར་ལ་ཐིམ།  དེ་འོད་དུ་ཞུ་ནས་ཕུར་བུ་ {{TibChung|[32b]}} ལ་ཐིམ།  ཕུར་བུ་ལས་འོད་ཟེར་དཀར་པོ་ཕྱོགས་བཅུར་འཕྲོས་པས་རྒྱལ་བ་མཆོད་ཅིང་སེམས་ཅན་གྱི་སྒྲིབ་པ་སྦྱངས།  བྱིན་རླབས་དང་ཚེ་བཅུད་ཀྱི་དྭངས་མ་ཐམས་ཅད་བསྡུས་ཏེ་ཕུར་བུ་ལ་ཐིམ་པས་གཟི་བྱིན་མཆོག་ཏུ་འབར།  དེ་ཉིད་དམིགས་བྱའི་སྙིང་དཀར་ནག་མཚམས་སུ་གཏད་དེ་བསྒྲིལ་བས་ཕུར་བུ་ལས་འབར་བའི་འོད་ཟེར་གྱིས་ཁོའི་སྡིག་སྒྲིབ་ཐམས་ཅད་བསྲེག    །ཚེ་བསོད་བཀྲག་མདངས་ཀྱི་དྭངས་མ་ཐམས་ཅད་བསྡུས་ནས་ཧཱུཾ་དུ་གྱུར་པ་དེ་ཕུར་བུ་ལ་ཐིམ།  ཕུར་བུ་རང་གི་སྙིང་གར་གཏུགས་པས་ཁོའི་ཚེ་བསོད་རང་ལ་འདུས་པས་བདག་གི་རྡོ་རྗེའི་ཚེ་སྲོག་བརྟན་པར་བྱས།  སླར་ཡང་ཕུར་བུ་ཁོའི་སྙིང་གར་གཟིར་བས་སྒོ་ལྔའི་རྣམ་ཤེས་ཀུན་གཞི་ལ་འུབ་ཀྱིས་འདུས་ནས་ཧཱུཾ་དུ་གནས་གྱུར་ཏེ་ཕུར་བུ་ལ་ཐིམ་པས་ཁོ་བྱུང་ཚོར་གྱི་རྟོག་པ་འགག་ནས་ནག་ཐིབས་ཀྱིས་སོང༌།  རྣམ་ཤེས་ནྲྀ་རུ་གནས་པ་དེ་ཕུར་བུས་ཙན་གྱིས་བླངས་ཏེ་ཨ་ཧཱུཾ་དུ་བྱིན་གྱིས་བརླབས་ནས་ཕཊ་ཀྱིས་འོག་མིན་དུ་རྡོར་སེམས་ཡབ་ཡུམ་གྱི་སྦྱོར་མཚམས་སུ་སྤར་བས་རྡོར་སེམས་ཀྱི་སྲས་སུ་གྱུར་ཏེ་སངས་རྒྱས་པར་བསམ་པ་ནི་བརྟེན་པ་དབྱིངས་སུ་བསྒྲལ་བའོ།  །སླར་ཡང་བག་ཆགས་ཀྱི་རྟེན་གཞི་བསྒྲལ་བའི་ཕྱིར་ལས་ཕུར་གནས་སོ་སོར་གདབ་ཅིང་ཐུན་རྫས་སྣ་ {{TibChung|[33a]}} ཚོགས་པས་ཀྱང་བྲབ།  མཚོན་ཆས་ཆར་དབབ་པར་བསམ་ཞིང་རལ་གྲིས་དུམ་བུར་གཏུབས།  ཐོ་གཏུན་མཁའ་གསང་དབྱིངས་རིག་གི་སྦྱོར་བས་གཟུགས་ཕུང་ཟག་མེད་དུ་བཅོམ་པར་བསམ་ལ་ཐོ་བས་བརྡུང་མཐར།  སྙིགས་མའི་ལུས་བདུད་རྩིར་སྦར་བ་ལྷ་ཚོགས་རྣམས་ཀྱི་ཞལ་དུ་བསྟབས་པས་དགྱེས་པར་རོལ་ཏེ་ཧ་ཧ་ཧ་ཞེས་བཞད།  ཧཱུཾ་ཧཱུཾ་ཧཱུཾ་ཞེས་དངོས་གྲུབ་སྩལ་ནས་འོད་གསལ་དུ་ཞུ།  ཕཊ་ཕཊ་ཕཊ་ཅེས་དེ་ལས་སད་བའི་སྣང་ཆ་ཆོས་ཉིད་ཀྱི་བདེན་པའི་ངང་བསྐྱང་ངོ༌།  །དེ་ནས་བདག་རྩ་བའི་དཀྱིལ་འཁོར་རྩ་བ་གསུམ་འདུས་སུ་གསལ་བཏབ་སྟེ།  བདུད་རྩིའི་ལོངས་སྤྱོད་ཐ་མལ་གྱི་ཞེན་ཆགས་དང་བྲལ་བས་བདེ་བ་ཆེན་པོར་རོལ་ཞིང་སྦྱང༌།  ལྷག་མ་བཏང་བ་ལ།  དཔལ་གྱི་མཆོད་གཏོར་ནས་ཐེབ་ཀྱུ་གཅིག་བླངས་ཏེ་ལྷག་མའི་སྟེང་དུ་ཕམ་ཕབ་བཞག    །རྟོགས་དགོངས་དང་ལྡན་པས་དམ་ཚིག་གི་ཁ་ཕྲུ་དངོས་སུ་གདབ་པའམ།  མི་ནུས་ན་ལག་གཉིས་མཁའ་དབྱིངས་ཀྱི་ཕྱག་རྒྱ་དང་བཅས་ལྷའི་ང་རྒྱལ་ལ་གནས་པས།  རང་གི་ཡ་རྐན་ཧེ་རུ་ཀ་ཡབ་ལྔ།  མ་རྐན་ཡུམ་ལྔར་གསལ་བའི་སྙོམས་འཇུག་གི་བྱང་སེམས་ལྷག་མའི་སྟེང་དུ་ལན་གསུམ་ཕབ་པས་དང་པོས་འབག་བཙོག་བཅོམ།  གཉིས་པས་བདུད་རྩིར་བསྒྱུར།  གསུམ་ {{TibChung|[33b]}} པས་མགྲོན་རྣམས་དགྱེས་པ་སྐོང་བའི་སྤྲིན་ཆེན་པོར་གྱུར་པར་མོས་ལ་སྔགས་བརྗོད་ཅིང་ཕྱག་རྒྱ་ལྷག་མའི་སྟེང་དུ་སྦུབས་ལ་བདུད་རྩི་དབབ།  དེ་ཉིད་དལ་གྱི་ལྷོ་ནུབ་ཞིང་ཆེན་བཀྲམ་པའི་གདན་ལ་བཀོད་དེ་སླར་ཡང་སྨར་རཀ་བྲན་ཅིང་བྱིན་གྱིས་བརླབས།  བདག་གི་ཐུགས་ཀའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཤྭ་ན་བདག་ཉིད་ས་བདག་སྐྱེས་བུ་གིང་དང་དགེ་བསྙེན་དབང་ཕྱུག་བརྟན་མ་ལ་སོགས་པ་ལྷག་མའི་མགྲོན་རྣམས་སྐད་ཅིག་གིས་ལྷགས་པར་བསམ་ཞིང་ཨེ་ཨ་རལླིས་བཀུག་ནས་ཉེར་སྤྱོད་ལྔས་མཆོད།  མགྲོན་རྣམས་ཧེ་རུ་ཀའི་ཟིལ་མ་བཟོད་པའི་ཚུལ་གྱིས་གུས་པའི་ཞེ་སར་བཅས་ཏེ་མདུན་དུ་འཁོད་པར་མོས་ལ་ལྷག་མ་བསྔོ།  བསྙེན་སྒྲུབ་ཀྱི་སྐབས་སུ་དམ་ཅན་རྣམས་ཕྲིན་ལས་སྒྲུབ་པ་ལ་ཉེ་བའི་ཕྱིར་སྒྲུབ་པ་མ་གྲོལ་གྱི་བར་དུ་ལྷག་གཏོར་གཏར་འཛིན་ཅིང་མཐར་ཕྱི་རོལ་ཟ་ལམ་དུ་བསྐྱལ་ལོ།  །བསྐུལ་བ་ལ།  ལྷ་ཚོགས་ཐམས་ཅད་སྔོན་གྱི་ཐུགས་དམ་རྗེས་སུ་བསྐུལ་བས་ཕྲིན་ལས་གཉན་པོ་མཛད་པར་དགོངས་པ་མངོན་དུ་ཕྱོགས་ཏེ་ལས་ལ་ཆས་པར་བསམ།  ཆད་མདོའི་སྐབས་སྤྲོ་ན་བར་ཆད་བྱེད་པའི་དགྲ་བགེགས་བཀུག་བསྟིམས་བསྒྲལ་བའི་ཤ་ཁྲག་བདུད་རྩིར་བརླབས།  འགུགས་བསྟིམ་མེད་ཀྱང་རུང་སྟེ།   {{TibChung|[34a]}} གཏོར་མ་རྣམ་པ་དགྲ་བགེགས་ཀྱི་ཤ་ཁྲག་རུས་གསུམ་བཟའ་བའི་གཏོར་ཆེན་མཁའ་དབྱིངས་གང་བ་ལ།  ངོ་བོ་ཟག་མེད་ཡེ་ཤེས་ཀྱི་བདུད་རྩི་བཀའི་སྲུང་མ་འཁོར་དང་བཅས་པའི་ཐུགས་དམ་དགྱེས་པ་སྐོང་བའི་དམ་རྫས་ཆེན་པོར་གྱུར་པར་བསམ།  ཐུགས་ཀའི་འོད་ཟེར་ལྕགས་ཀྱུས་དཔལ་ཆེན་རྡོ་རྗེ་སྲིན་པོ་སོགས་གྲུབ་པའི་རིག་འཛིན་ཐམས་ཅད་ཀྱི་སྤྱན་སྔར་དཀྱིལ་འཁོར་གཉན་པོའི་སྲུང་མར་ཞལ་གྱིས་བཞེས་པའི་ཆད་མདོ་ཅན་གྱི་སྲུང་མ་དམ་ཅན་རྒྱ་མཚོའི་ཚོགས་ཐམས་ཅད་བཀུག་སྟེ་དབྱར་གྱི་ན་བུན་ལྟར་ལྷགས་པའི་ལྗགས་ལ་དམ་ཚིག་གི་བདུད་རྩི་བྱིན་པར་མོས།  དཔལ་ཆེན་པོའི་གཟི་བརྗིད་མ་བཟོད་པའི་ཚུལ་གྱིས་མདུན་དུ་འོད་ཟེར་དཀར་པོ་དར་དཀར་གྱི་ཡོལ་བ་ཙམ་གྱིས་བར་བཅད་པའི་ཕྱི་རོལ་དུ་འཁོད་པ་ལ་སྔོན་གྱི་ཐ་ཚིག་བསྒྲག་ཅིང་ཆད་མདོ་རྗེས་སུ་དྲན་པར་བྱས་ཏེ་གཏོར་མ་འབུལ།  དགོས་པ་དམིགས་བསལ་གྱི་སྐབས་ཟོར་དུ་བསྐུལ་ན་སྲུང་མ་རྣམས་ཀྱིས་བཞེས་པའི་ལྷག་མ་གཏོར་མའི་ཕུང་པོ་ཉིད་ནད་དུག་མཚོན་ཆའི་རང་བཞིན་དུ་གྱུར་པ་སྤྲུལ་པའི་དམག་ཚོགས་དཔག་ཏུ་མེད་པ་རྣམས་ཀྱིས་ཆར་ལྟར་ཕབ་པས་དགྲ་བགེགས་རྣམས་ཁ་ཕུང་རྗེས་མེད་དུ་བརླག་པར་བསམ།  བརྟན་མ་ལ།  ཆད་མདོའི་གཏོར་གཞོང་ {{TibChung|[34b]}} སྨན་ཕུད་ཀྱིས་བཤལ་བ་བརྟན་མའི་གཏོར་མར་བླུག་ནས་ཨོཾ་ཨཱཿཧཱུཾ་གིས་ཤེལ་གྱི་གུར་ཁང་རིན་པོ་ཆེའི་མཆོད་སྡོང་ཟག་མེད་ཀྱི་བདུད་རྩི་མཐའ་ཡས་པར་སྤེལ།   བརྟན་མ་འཁོར་བཅས་མདུན་དུ་སྔར་བཞིན་གནས་པ་ལ་གཏོར་མ་ཕུལ་བས་དེ་རྣམས་སོ་སོའི་འཁོར་གཡོག་བསམ་གྱིས་མི་ཁྱབ་པ་དང་བཅས་ཏེ་གུས་པའི་ཚུལ་གྱིས་དབུ་སྨད་བཞིན་དགྱེས་པ་ཆེན་པོས་གཏོར་མ་བླངས་པ་གསོལ་ཏེ་ཅི་བཅོལ་བའི་ཕྲིན་ལས་བསྒྲུབ་པར་ཁས་བླངས་ནས་རང་གནས་སུ་གཤེགས་པར་བསམ།  བྲོ་བརྡུང་ལ།  སྒྲུབ་པ་ཟབ་མོ་ལ་བར་དུ་གཅོད་པའི་དགྲ་བགེགས་དམ་སྲི་སྒབ་འདྲེ་ཐམས་ཅད་གསེར་གྱི་ས་གཞི་ལ་གཏིང་ཐུག་པའི་ཨེ་གྲུ་གསུམ་གྱི་ནང་དུ་རང་དབང་མེད་པར་བཀུག་པའི་སྟེང་དུ།  གཏོར་གཞོང་རི་རབ་འབར་བས་མནན་པའི་སྟེང་རྒྱ་གྲམ་བརྩེགས་པས་དམིགས་བྱ་རྣམས་བསྐལ་པའི་བར་དུ་འགུལ་མི་ནུས་པ།  དེའི་སྟེང་དུ་དཔལ་ཆེན་པོའི་ཕོ་བྲང་བཏབ་པར་ཁྲོ་བོའི་ཚོགས་འཁོར་དང་བཅས་པས་རྡོ་རྗེའི་གླུ་བླངས་ཤིང་བྲོ་བརྡུངས་པས་སྲིད་པ་གསུམ་པོ་ཡོམ་ཡོམ་ཤིག་ཤིག་ཏུ་གཡོས་ཧེ་རུ་ཀའི་སྟོབས་ཀྱིས་མཐའ་བཀྲོལ་དུ་མེད་པར་བསམ།  རྗེས་ཀྱི་མཆོད་བསྟོད་ནོངས་བཤགས་ཁ་སྐོང་རྣམས་ཀྱི་དམིགས་པ་གོང་བཞིན་དང༌།  བདག་བསྐྱེད་ཀྱི་ཡེ་ཤེས་པ་ནི་ཇི་སྲིད་བྱང་ཆུབ་ {{TibChung|[35a]}} མ་ཐོབ་ཀྱི་བར་དུ་མི་གཤེགས་ཤིང༌།  མདུན་གྱི་སྲས་མཆོག་དང༌།  སྒྲུབ་ཕུར་སྐུ་འབག་རས་བྲིས་སོགས་ཀྱི་ཡེ་ཤེས་པ་རྣམས་རྟེན་དེ་ཉིད་ལ་བརྟན་བཞུགས་བྱ།  ཏིང་ངེ་འཛིན་གྱི་དཀྱིལ་འཁོར་རྟེན་དང་བརྟེན་པའི་སྣང་ཆ་ཐམས་ཅད་རིམ་བཞིན་བསྡུས་ནས་ན་དཱ་མི་དམིགས་སྟོང་ཉིད་དུ་ཡལ་བར་བསམ་ལ་བསྒོམ་བྱ་སྒོམ་བྱེད་ཀྱི་བློ་རྟོག་འཛིན་རྩོལ་ལས་འདས་པ་རིག་སྟོང་འོད་གསལ་བདེ་བ་ཆེན་པོའི་ངང་ལ་ཅི་གནས་སུ་མཉམ་པར་བཞག    །དེ་ལས་ལྡང་བ་ན་འགྲོ་བའི་དོན་དུ་ཡེ་ཤེས་སྒྱུ་མའི་སྐུར་བཞེངས་པར་བྱའོ་སྙམ་པས།  སླར་ཡང་སྐད་ཅིག་གིས་རང་ཉིད་རྡོ་རྗེ་གཞོན་ནུ་ཡབ་ཡུམ་གྱི་སྐུར་གསལ་བའི་གནས་གསུམ་འབྲུ་གསུམ་གྱིས་མཚན་པ་དང༌།  སྣོད་བཅུད་ཐམས་ཅད་དཀྱིལ་འཁོར་གསུམ་གྱི་རང་བཞིན་དུ་མོས་ལ་ཀཱི་ལ་ཡའི་སྔགས་ཀྱིས་སྐུ་གསུང་ཐུགས་གསོ།  ལུས་ལ་རྡོ་རྗེའི་གོ་ཆས་ཞུ་ལུགས་སུ་གཡོགས་ཤིང་མཚོན་ཆ་ལྔ་དང་མེ་དཔུང་གི་ཀློང་ན་བཞུགས་པས་བར་ཆད་གང་གིས་ཀྱང་གླགས་མི་རྙེད་པར་བསམ།  དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོས་ལ་སྨོན་ལམ་ནན་ཏན་དུ་གདབ།  ཤིས་པ་བརྗོད་པས་མཐའ་བརྒྱན་ཏེ་སྣང་གྲགས་རྟོགས་ཚོགས་ལྷ་སྔགས་ཆོས་ཉིད་ཀྱི་རོལ་པར་ལམ་དུ་ཁྱེར་བས་སྒོ་གསུམ་དོན་ཡོད་པར་བྱའོ།  ། {{TibChung|[35b]}} དེ་དག་ནི་བསྐྱེད་པའི་རིམ་པའི་རྣལ་འབྱོར་གྱི་རྩ་བ་ལས་བྱང་གི་སྒོམ་དོན་སྙིང་པོ་ཙམ་ཞིག་སྟེ།  རྟགས་མཚན་དུས་དང་གྲངས་ཚད་སོགས་འོག་ཏུ་འཆད་པར་འགྱུར་ལ།  བསྲུང་བའི་དམ་ཚིག་འབུམ་ནག་ལས་བཤད་པ་བཞིན་ཐུན་མོང་སྤྱི།  སྒྲུབ་པ་ཁྱད་པར།  སྤྱོད་པ་རྒྱུན།  གལ་མདོ་ངེས་པའི་དམ་ཚིག་སོགས་ལ་ནན་ཏན་དུ་བསླབ་བོ།  །དེ་ལྟར་གཉེན་པོ་རྒྱུ།  ཁྱད་པར་ལས།  སྒོམ་སྒྲུབ་སྤྱོད་པའི་སྒོ་ནས་ཐུགས་རྗེའི་ཕུར་པ་ཁམས་གསུམ་སེམས་ཅན་ལ་གདབ་པ་སྟོད་ཀྱི་ལས།  ལས་ཀྱི་གཟེར་ཁ་དྲུག་གི་སྒོ་ནས་མཚན་མའི་ཕུར་པ་དགྲ་བགེགས་ལ་གདབ་པ་སྨད་ཀྱི་ལས་གཉིས་ཀྱི་སྒོ་ནས་རིམ་པ་དང་པོ་བསྐྱེད་པའི་ལམ་ཡོངས་སུ་རྫོགས་པ་དང༌།  རིམ་པ་གཉིས་པ་རྫོགས་རིམ་ལ་འཇུག་པ་ན།  སྟེང་སྒོ་འཁོར་ལོ་ལྔ་པ་འབར་འཛག་བཟུང་བཟློག་ལ་བརྟེན་ཅིང༌།  འོག་སྒོ་ཁམས་གསུམ་རོལ་པ་བསྙེན་སྒྲུབ་ཡན་ལག་བཞི་ལ་བརྟེན་ནས་བྱང་ཆུབ་སེམས་ཀྱི་ཕུར་པ་ཡུམ་གྱི་མཁའ་ལ་གདབ་པ་ཐུན་མོང་པའི་གདམས་ངག་དང༌།  ལྟ་བས་ཐག་བཅད།  སྒོམ་པས་ཉམས་སུ་བླང༌།  སྤྱོད་པས་བོགས་དབྱུང་བ་གསུམ་གྱི་སྒོ་ནས་རིག་པ་ཡེ་ཤེས་ཀྱི་ཕུར་པ་ཆོས་ཀྱི་དབྱིངས་སུ་གདབ་པ་ཐུན་མོང་མ་ཡིན་པ་དང༌།  ཁྱད་པར་གྱི་རྫོགས་རིམ་ཨ་ཏིའི་མན་ངག་ལྷུན་ {{TibChung|[36a]}} གྲུབ་ཐོད་རྒལ་གྱི་རྣལ་འབྱོར་ལ་ཉམས་ལེན་མཐར་ཕྱིན་པར་བྱའོ།  །གསུམ་པ་གྲུབ་པ་འབྲས་བུའི་རྣམ་བཞག་ལ་གཉིས།  གནས་སྐབས་དང་མཐར་ཐུག་གོ  །དང་པོ་ལ་ཉམས་དང་དྲོད་ཚད་རྟགས་དང་ཡོན་ཏན་རྣམས་ལས།  ཉམས་ནི།  བསྐྱེད་རྫོགས་གང་ལ་བསླབ་ཀྱང་འདྲ་སྟེ།  དེ་དང་དེའི་ཏིང་ངེ་འཛིན་ལ་གཡོ་ཐོབ་གོམས་བརྟན་མཐར་ཕྱིན་པའི་ཉམས་ལྔ་རིམ་པར་སྐྱེ་བའོ།  །དྲོད་ལ།  ཕྱིའི་དྲོད་ལུས་ཡོད་དུ་མི་ཚོར་བ།  ནང་གི་དྲོད་དབུགས་ཀྱི་འགྱུ་བ་མི་ཚོར་བ།  གསང་བའི་དྲོད་བདེ་བ་ཁོངས་ནས་འཆར་བའོ།  །ཡང་ན་ལུས་བདེ།  ངག་གསལ།  སེམས་མི་རྟོག་པའི་དྲོད་དོ།  །ཚད་ལ།  མར་མེ་རླུང་གིས་མ་བསྐྱོད་པ་ལྟར་གསལ་བ།  རྒྱ་མཚོའི་གཏིང་ལྟར་མི་གཡོ་བ།  ཤིང་བལ་གྱི་འདབ་མ་ལྟར་ཡང་ཞིང་འཇམ་པའོ།  །རྟགས་ལ།  རབ་ལྷའི་ཞལ་མཐོང་བ།  འབྲིང་ལུང་སྟོན་པ།  ཐ་མ་མ་མོ་དང་མཁའ་འགྲོ་འདུ་བ་སོགས་དངོས་ཉམས་རྨི་ལམ་ཅི་རིགས་པར་འབྱུང་བ་དང༌།  ལུས་དྲི་ཞིམ་ཞིང་སྲོག་ཆགས་མི་འབྱུང་བ་སོགས་སོ།  །ཁྱད་པར་བསྙེན་སྒྲུབ་ཀྱི་དུས་སུ་སྒྲུབ་རྫས་ཀྱི་ལྷ་སྐུ་བཞད་ཅིང༌།  ཕུར་པ་འཁྲབ་པ།  སྨན་རཀ་ཁོལ་བ།  མར་མེ་འབར་བ་སོགས་དང༌།  གཞན་ཡང་སྨིག་རྒྱུ་ལ་སོགས་པའི་མཐོང་ཉམས་ {{TibChung|[36b]}} དང༌།  སྣང་བ་སྒྱུ་མ་ལྟར་ཤེས་ཤིང་སྣང་གྲགས་འགྱུ་གསུམ་ལྷ་སྔགས་འོད་གསལ་གྱི་འཁོར་ལོར་འཆར་བ་དང༌།  ཐ་ནའང་རྨི་ལམ་དུ་རི་བོར་འཛེག་པ།  ཆུ་ཆེན་བརྒལ་བ།  ཉི་ཟླ་ཤར་བ་སོགས་སྤྱི་དང་མཐུན་པར་འབྱུང་བའོ།  །ཡོན་ཏན་ལ།  ཐུན་མོང་གི་ལས་ཕྲན་ཚེགས་རྣམས་ནི་བསྐྱེད་རིམ་ལྷའི་དམིགས་པ་ལ་ཡིད་ཤུགས་དྲག་པོ་དང་ལྡན་ན་སྔོན་དུ་བསྙེན་པ་མ་སོང་ཡང་འགྲུབ་པར་བཤད་ཅིང༌།  གཞན་དུ་ཐུན་མོང་བ་འཇིག་རྟེན་པའི་དངོས་གྲུབ་རྣམས་ནི་བསྐྱེད་རིམ་མཐར་ཕྱིན་པའི་ཚོགས་སྒྲུབ་ཀྱི་སྤྱོད་པའི་ཉེ་རྒྱུ་ལ་བརྟེན་ནས་ཐོབ་ལ།  དེ་ལའང་དམན་པ་ཞི་རྒྱས་དབང་སོགས་ལས་སྣ་ཚོགས་དང༌།  མཆོག་མཁའ་སྤྱོད་དང་ས་སྤྱོད་རྐང་མགྱོགས་ལ་སོགས་པ་འགྲུབ་ཅིང༌།  ཚར་གཅོད་རྗེས་འཛིན་གྱི་སྒོ་ནས་འགྲོ་དོན་ཐོགས་པ་མེད་པར་བྱེད་པའོ།  །གཉིས་པ་མཐར་ཐུག་གི་འབྲས་བུ་ནི།  ཟུང་འཇུག་གི་རྣལ་འབྱོར་ལ་གོམས་པའི་མཐུས་དགྲ་གསུམ་པོ་སོད་དེ།  ང་བདག་གི་ཞེན་པ་ལོག་པས་གསང་དགྲ་གསད།  དེས་ཕུང་པོར་ཞེན་པ་བཅོམ་སྟེ་ནང་དགྲ་གསད།  དེ་ཙ་ན་རྩོལ་བ་མེད་པའི་ཕྲིན་ལས་དྲག་པོས་ཕྱིའི་དགྲ་གསོད་པའོ།  །དེ་ལྟར་དགྲ་གསུམ་སོད་པས་བདུད་བཞི་ཡང་ཆོམས་ཏེ།  ཕུང་ལྔ་ལྷར་དག་ {{TibChung|[37a]}} པས་ཕུང་པོའི་བདུད་བཅོམ།  རང་རིག་པའི་རྩལ་གྱིས་ཉོན་མོངས་པ་ལྔ་ཡེ་ཤེས་ལྔར་དག་པས་ཉོན་མོངས་པའི་བདུད་བཅོམ།  དེ་ལ་འདོད་ལྷའི་བར་ཆད་ཀྱིས་མི་ཚུགས་ཤིང་སེམས་ཉིད་སྐྱེ་ཤི་ལས་གྲོལ་བས་ལྷའི་བུའི་བདུད་དང་འཆི་བདག་གི་བདུད་བཅོམ།  དུས་དེར་འགྲོ་དྲུག་གི་སྡུག་བསྔལ་ཡང་རང་སེམས་ཀྱི་ཆོ་འཕྲུལ་དུ་རྟོགས་པས་འགྲོ་དྲུག་གི་གཡངས་ཆོད་ཅིང༌།  རིག་རྩལ་འབྱོངས་པས་མཚན་མ་ཐམས་ཅད་ཟིལ་གྱིས་ནོན་ཏེ་རྣམ་པར་མི་རྟོག་པའི་ཡེ་ཤེས་ལ་དབང་བསྒྱུར།  ས་ལམ་གྱི་སྤངས་རྟོགས་མཐར་ཕྱིན་པ་སྐུ་ལྔ་ཡེ་ཤེས་ལྔའི་བདག་ཉིད་ཟུང་འཇུག་གི་སྐུ་མངོན་དུ་བྱེད་པ་སྟེ།  མདོར་ན་བཤད་རྒྱུད་ལས།  །རྡོ་རྗེ་ཁྲག་འཐུང་ང་ཉིད་ཀྱི།  །ཡི་གེ་ཧཱུཾ་ཙམ་བཟླས་པ་ལའང༌།  །བར་ཆད་ཀུན་གྱི་ས་མི་ཚུགས་ཤིང༌།  །མཚན་མ་འགྲུབ་པར་ཐེ་ཚོམ་མེད།  །རྡོ་རྗེ་ཅན་གྱི་ཞིང་དུ་སྐྱེ།  །ལྷ་ཀླུ་ཀུན་ལ་དབང་བྱེད་འགྱུར།  །འདི་སྒྲུབ་པ་ཡི་གང་ཟག་རྣམས།  །སྔར་ནས་སྦྱངས་པར་ཐེ་ཚོམ་མེད།  །རྩེ་གཅིག་འདི་ལ་བརྩོན་ལྡན་པས།  །འཁོར་བར་མི་ལྡོག་མངོན་འཚང་རྒྱ།  །ཞེས་དང༌།  རྩ་རྒྱུད་རྡོ་རྗེ་ཁྲོས་པ་ལས།  ཚད་མེད་སྙིང་རྗེའི་ཕུར་པ་ནི།  །བྱམས་དང་སྙིང་རྗེ་ཆེན་པོས་གདབ།  །འབྲས་བུ་སྤྲུལ་པའི་སྐུ་ཡང་འཐོབ།  །མ་ཐེབས་རཱུ་དྲ་སྲིན་པོར་གོལ།  །ཞེས་དང༌།  མཚོ་རྒྱལ་གྱིས།  འདི་ལྟར་ {{TibChung|[37b]}}  བསྙེན་སྒྲུབ་ལས་སྦྱོར་གསུམ་སྒྲུབ་ཚད་ཐེམས་ནས་ནི༔  ཚེ་འདིར་ཕྲིན་ལས་རྣམ་པ་བཞི་གང་ལ་བརྩམ་པ་འགྲུབ་པ་དང་༔  མཆོག་གི་དངོས་གྲུབ་ཡི་དམ་ལྷ་དང་སྐལ་བ་མཉམ་སྟེ༔  བར་དོ་གསུམ་ལ་ལྷའི་སྣང་བ་ཐོབ་སྟེ༔  ལོངས་སྤྱོད་རྫོགས་པའི་སྐུ་རྡོ་རྗེ་གཞོན་ནུའི་གོ་འཕང་འཐོབ་པར་ཐེ་ཚོམ་མེད་དོ༔  བདག་འདྲ་མཁར་ཆེན་བཟས་མི་བསླུ་བའི་དོན་གྱི་ཐ་ཚིག་གོ༔  ཞེས་གསུངས་པ་ལྟར་རོ།  །དེ་དག་གིས་ཤེས་པར་བྱ་བའི་རྣམ་བཞག་སྤྱིར་བསྟན་པ་མདོ་ཙམ་བཤད་ཟིན་ཏོ།  །   ༈   རྩ་བའི་གཉིས་པ་བསྙེན་ཐབས་ཀྱི་ལག་ལེན་བྱེ་བྲག་ཏུ་བཤད་པ་ལ་གསུམ།  བསྙེན་པ།  སྒྲུབ་པ།  ལས་སྦྱོར་རོ།  །དང་པོ་ནི།  བསྙེན་པ་ལ་འཇུག་པའི་སྔ་རོལ་དུ་དཀོན་མཆོག་གི་རྟེན་མཆོད་པ།  གསུང་རབ་བཀླག་པ།  དགེ་འདུན་བསྙེན་བཀུར།  སྭཱཙྪ་གདབ་པ།  སྲོག་བསླུ་བ།  ཉེའུ་འདོན་པ།  ལམ་འཕྲང་བཟོ་བ།  ཆུ་གཏོར་སྦྱིན་གཏོང་སོགས་རང་ཉིད་ཀྱིས་སམ་མ་ལྕོགས་ན་གྲོགས་གཞན་ལ་བཅོལ་ཀྱང་རུང་སྟེ།  རྒྱུད་འབྱོངས་ཤིང་བར་ཆད་མི་འབྱུང་བ་དང༌།  དངོས་གྲུབ་ཀྱི་མཚན་མ་མྱུར་དུ་ཐོབ་པའི་དགོས་པ་ཡོད་པས་རྒྱབ་རིམ་གྱི་དཔུང་ཅི་འགྲུབ་ཏུ་བྱ།  དེ་ནས་ཐོག་མར་གནས་ཁང་གསར་པ་ཡིན་ན་ས་ཆོག་རྒྱས་པར་བྱ་དགོས་མོད།  འདིར་རྙིང་པའི་དབང་དུ་བྱས་ཏེ་གནས་ཁང་ཕྱགས་བདར་སོགས་ཀྱིས་ {{TibChung|[38a]}} ཡིད་དུ་འོང་བར་བྱས་ལ།  གོང་དུ་སྨོས་པ་བཞིན་དུས་ཚོད་དགེ་ཞིང་ཤིས་པའི་ཉིན་དབུ་བརྩམས་ཏེ།  དགོང་ཐུན་ལ་བདག་བསྐྱེད་ཕྱག་རྒྱ་གཅིག་པའི་རྣལ་འབྱོར་བསྒོམ་ནས་བཟླས་པ་བརྒྱ་རྩ་ཙམ་གྱི་མཐར་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལངས་ཏེ།  ཞིང་སྐྱོང་སྡེ་བརྒྱད་གཞི་བདག་སོགས་དཀར་ཕྱོགས་པ་ལ་གཏོར་མ་ཕུལ་ནས་ཕྲིན་ལས་བཅོལ།  ནག་ཕྱོགས་པ་རྣམས་ལ་བགེགས་གཏོར་བཏང་ནས་རྡོ་རྗེ་སྲིན་པོའི་ང་རྒྱལ་གྱིས་བཀའ་བསྒོ་ཞིང་དྲག་སྔགས་ཡུངས་ཐུན་གུ་གུལ་གྱིས་བདུག་པ་སོགས་ཚམ་རྔམས་དང་བཅས་བགེགས་བསྐྲད་ནན་ཏན་དུ་བྱས་རྗེས།  སྒོ་དྲུང་དུ་ཐོ་བརྩིགས་པ་ལ་རྒྱལ་ཆེན་བཞིའི་སྐུ་དང་སྔགས་བྱང་བཙུགས།  མདུན་དུ་མཆོད་གཏོར་བཤམས་པ་སྒྲུབ་ཁོག་ལྟར་བྱིན་བརླབ།  རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས་པར་བསམ་ལ།  ཧཱུཾ།  གསང་བདག་སྤྱན་སྔར་དམ་མནོས་ཤིང༌།  །བསྟན་པ་སྲུང་བར་ཞལ་བཞེས་པ།  །རྒྱལ་པོ་ཆེན་པོ་སྡེ་བཞི་པོ།  །འདིར་གཤེགས་རྟེན་ལ་བརྟན་པར་བཞུགས།  །བཛྲ་ས་མཱ་ཛཿས་སྤྱན་དྲངས།  ཛཿཧཱུཾ་བཾ་ཧོཿ ས་གཉིས་སུ་མེད་པར་བསྟིམ།   ཨོཾ་མ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་ནས།  ཤཔྡ་པྲ་ཏཱིཙྪ་སྭཱ་ཧཱའི་བར་ {{TibChung|[38b]}} གྱིས་མཆོད།  ཨོཾ་དྷྲྀཥྚ་རཱཥྚ་ཡ་སྭཱ་ཧཱ།  ཨོཾ་བཻ་རུ་ཌྷ་ཀཱ་ཡ་སྭཱ་ཧཱ།  ཨོཾ་བི་རུ་པཱཀྵ་ཡ་སྭཱ་ཧཱ།  ཨོཾ་བཻ་ཤྲཱ་མ་ཎ་ཡེ་སྭཱ་ཧཱ།  ཞེས་སྔགས་སོ་སོའི་མཐར།  ཨེ་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།  ཞེས་ལན་གསུམ་གྱིས་གཏོར་མ་ཕུལ་ལ།  ཧཱུཾ།  ཟབ་ཅིང་རྒྱ་ཆེ་གཟིགས་པ་པོ།  །ཡུལ་འཁོར་སྲུང་དང་འཕགས་སྐྱེས་པོ།  །སྤྱན་མི་བཟང་དང་རྣམ་ཐོས་སྲས།  །རྒྱལ་ཆེན་བཞི་ལ་ཕྱག་འཚལ་བསྟོད།  །རྒྱལ་པོ་ཆེན་པོ་འཁོར་བཅས་ཀྱིས།  །སྔོན་གྱི་ཐ་ཚིག་ཇི་བཞིན་དུ།  །མཆོད་སྦྱིན་གཏོར་མ་འདི་བཞེས་ལ།  །སྒྲུབ་པའི་བར་ཆད་ཀུན་སྲུངས་ཤིག    །ཅེས་བསྟོད་ཅིང་ཕྲིན་ལས་བཅོལ།  ཏིཥྛ་བཛྲ།  ཞེས་བརྟན་བཞུགས་བྱས་པས་སྒྲུབ་ཁང་གི་ཕྱོགས་སོ་སོ་ནས་རྒྱལ་ཆེན་སྡེ་བཞི་རང་རང་གི་རྒྱལ་ཐབས་ཀྱི་དཔུང་དང་བཅས་པས་བསྲུང་བར་བསམ།  དེ་ནས་ལས་བྱང་གི་མཚམས་གཅོད་བཞིན་ཕྱི་ནང་གསང་བའི་སྲུང་འཁོར་བརྟན་པོར་བསྒོམ།  དེ་ལྟར་མཚམས་བཅད་ཕྱིན་ཆད་སྔར་དམིགས་འོག་ཏུ་མ་ཆུད་པའི་ངོ་གསར་དང་མི་འཕྲད་ཅིང་ཆས་ཀའི་གཏོང་ལེན་ཀྱང་སྤང༌།  ཕྱི་རོལ་པས་རང་ཉིད་མཐོང་ན་གསང་སྒོ་རྡོལ་བ་དང༌།  རང་གིས་ཕྱི་རོལ་དུ་བལྟ་བས་གཡེང་ཤོར་ན་གསང་སྒོ་ཤོར་བ་ཞེས་བྱ་སྟེ།  དོན་ལ་དམ་ཚིག་ལས་འགལ་བས་སྒྲུབ་པའི་འབྲས་བུ་མི་འབྱིན་པས་ན་སྒྲུབ་པ་པོའི་ལུས་ངག་ཕྱི་རོལ་པས་ {{TibChung|[39a]}} མཐོང་ཚོར་མི་བྱ།  སྲུང་འཁོར་འདི་དག་མཚམས་གྲོལ་རྒྱུའི་ཐུན་ཐ་མའི་མཐར་མ་གཏོགས་མི་བསྡུ་ཞིང༌།  ཐུན་མགོ་ཐམས་ཅད་དུའང་བར་ཆད་མི་འཇུག་པའི་ཕྱིར་གསལ་འདེབས་བསྐྱར་མ་རེ་བྱའོ།  །དེ་ནས་བཅས་བཤམ་བྱ་བ་ནི།  རང་གི་མདུན་ངོས་སུ་དམ་ཚིག་གི་བྲིས་སྐུ་རབ་གནས་ཅན་བཀྲམ།  དེའི་མདུན་དུ་བིངྱོ་ཏ་མ་ལས།  གླིང་བཞི་པ་ཡི་བྷཉྫ་ལ།  འཁོར་ལོ་རྩིབས་བརྒྱད་ཨེ་དང་བཅས།  །ཕུར་བུ་སྤུངས་ལ་བསྙེན་པ་བྱ།  །ཞེས་གསུངས་པ་ལྟར།  སྟེགས་བུ་བདུད་རྩི་ལྔས་ཆག་ཆག་བཏབ་པ་ལ།  ཐིག་ཚོན་བྱིན་རླབས་དང་ལྡན་པས་དཀྱིལ་འཁོར་མཚན་ཉིད་རྫོགས་པར་བྲིས་པའམ།  རས་བྲིས་དགྲམ་པ་གང་བདེ་བྱ་ཞིང༌།  ཡང་ན་བསྙེན་པའི་སྐབས་འདིར་དཀྱིལ་འཁོར་མ་འགྲུབ་ནའང་ཆད་སྐྱོན་མེད།  གང་ལྟར་ཡང་དཀྱིལ་འཁོར་བཤམ་ན།  དེའི་ལྟེ་བའི་གྲུ་གསུམ་མཐིང་ནག་གི་སྟེང་དུའམ།  དཀྱིལ་འཁོར་མི་བཤམ་པའི་ཕྱོགས་ལ་སྟེགས་བུ་ཁེབས་ལྡན་བཀོད་ལེགས་པའི་སྟེང་དུ།  ཐོད་པ་གླིང་བཞི་པ་ལ་ཆུ་ཚོན་གྱིས་འཁོར་ལོ་སེར་པོ་རྩིབས་བརྒྱད་པ་བྲིས་པའི་ནང་འབྲུ་ནག་གིས་བཀང་བ་ལ།  བྱུགས་བདུག་བྲབ་གསུམ་གྱིས་གཟི་བྱིན་བསྐྱེད་པ་སོགས་ཚུལ་བཞིན་དུ་འདུ་བྱས་པའི་ཕུར་བུ་འབྱོར་ན་ལྷ་ཕུར་ཚང་བ་སྦམས་ {{TibChung|[39b]}} ཏེའམ།  མ་འབྱོར་ན་གཙོ་ཕུར་ཉིད་བཙུགས་པ་བཀོད།  དེའི་མདུན་རྒྱབ་གང་བདེར་མཉྫི་ལ་སྙིང་པོའི་གཏའ་གཏོར་སྐུ་རྟེན་དར་གདུགས་ཀྱིས་སྤྲས་པ་དང༌།  གཡས་གཡོན་དུ་སྟེགས་བུ་ཅུང་ཟད་དམའ་བར་ཡི་དམ་གྱི་མཆོད་གཏོར་དང༌།  ཕུར་སྲུང་སོགས་སྤྱི་བྱེ་བྲག་གི་སྲུང་མའི་གཏོར་མ་རྣམས་ཀྱང་བཤམས་པའི་གཡས་སུ་སྨན་ཕུད།  གཡོན་དུ་རཀྟ།  མཐའ་སྐོར་དུ་ཕྱི་ནང་གི་མཆོད་པའི་ཡོ་བྱད་སོགས་ལག་ལེན་ལྟར་བཀོད་ལེགས་པར་བཤམས།  རང་ཉིད་རྟེན་དང་ཞལ་སྤྲོད་ཀྱི་ཚུལ་དུ་སྟན་ནང་ཚངས་ཅན་འཇམ་ཞིང་བདེ་བའི་འོག་ཏུ་འབྲས་སམས་དཀར་གྱིས་གཡུང་དྲུང་ཆོས་བསྐོར་དུ་བྲི།  མདུན་དུ་རྡོར་དྲིལ་ཌཱ་མ་རུ་ནང་མཆོད་འཐོར་ནས་རྣམས་བཞག    །གཞན་ཡང་ཚོགས་རྫས་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ནས།  དེ་ནུབ་དཀོན་མཆོག་ལ་མཆོད་པ་རྒྱ་ཆེར་ཕུལ་ཏེ་ཚོགས་བསགས།  ཉམས་ཆག་ལ་འགྱོད་སྡོམ་གྱི་བསམ་པ་དྲག་པོས་བཤགས་པ་བྱ།  བླ་མ་དང་ཡི་དམ་གྱི་ལྷ་ལ་མོས་གུས་ཆེན་པོས་བསྙེན་སྒྲུབ་ལ་བར་ཆད་མི་འབྱུང་བ་དང་དངོས་གྲུབ་མྱུར་དུ་ཐོབ་པའི་གསོལ་བ་བཏབ་ནས་ཉལ་བའི་རྣལ་འབྱོར་ལ་འཇུག་གོ  །དེ་ནས་བསྙེན་པ་དངོས་གཞི་ནི།  འདིར་སྔ་ཐུན་ནས་མགོ་འཛིན་པར་གསུངས་པས་སང་ཞོག་ལྡང་ {{TibChung|[40a]}} བའི་རྣལ་འབྱོར་གྱིས་ལངས་ནས།  ནམ་ལངས་པ་དང་བདེ་བའི་སྟན་ལ་བསམ་གཏན་གྱི་འདུག་སྟངས་ཀྱིས་འཁོད་དེ་བརྒྱུད་འདེབས་དང་སྐྱབས་སེམས་ཚོགས་བསགས་སྔོན་དུ་འགྲོ་བས།  གཞི་བགེགས་ཀྱི་གཏོར་མ་བསྔོ་བ་རྒྱུད་དུ་མི་དགོས་པས་བགེགས་བསྐྲད་སྐབས་ལས་ཀྱི་ལན་ཆགས་ཞེས་པའི་ཚིག་གཅིག་བསྐྱུར་ལ་བཀའ་བསྒོ་ནས་བརྩམ་སྔོན་འགྲོའི་ལས་རིམ་རྣམས་དང༌།  དངོས་གཞི་ཏིང་འཛིན་གསུམ་ནས་བསྟོད་པའི་བར་ལས་བྱང་གི་གཞུང་བསྲང་རྗེས།  བཟླས་པ་བྱ་བའི་ཐོག་མར་བགྲང་ཕྲེང་བྱིན་གྱིས་བརླབ་པ་ནི།  ཕྲེང་བ་ལག་གཡོན་པའི་སྙིམ་པར་བསྐྱིལ་བའི་མདོ་འཛིན་སྟེང་དུ་གནས་པར་བྱས་ལ་བསང་སྦྱང༌།  སྟོང་པའི་ངང་ལས་ཧཱུཾ་ཡིག་ལས་སྐྱེས་པའི་ཕྲེང་བ་དཔལ་ཆེན་རྡོ་རྗེ་གཞོན་ནུ་གཙོ་འཁོར་ཡོངས་སུ་རྫོགས་པ་སྐད་ཅིག་གིས་གསལ་བར་གྱུར།  དེའི་གནས་གསུམ་གྱི་ས་བོན་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས།  ཛཿཧཱུཾ་བཾ་ཧོཿ ་ས་གཉིས་སུ་མེད་པར་བསྟིམ།   ལག་གཡས་སུ་མེ་ཏོག་ཐོགས་ལ་ལྷའི་རྩ་སྔགས་དང་དབྱངས་གསལ་རྣམས་ཚར་བདུན་བཟླ།  ཁྱད་པར་བཟླས་པའི་རྐྱེན་གྱིས་བསྐུལ་བའི་འོད་ཟེར་གྱིས་སེམས་ཅན་ཐམས་ཅད་ཀྱི་ངག་གི་སྒྲིབ་པ་སྦྱངས།  བདེ་བར་ {{TibChung|[40b]}} གཤགས་པ་ཐམས་ཅད་ཀྱི་གསུང་གི་བདུད་རྩི་སྔགས་ཀྱི་ཡིག་འབྲུ་ཁ་དོག་ལྔའི་རང་བཞིན་ཆར་ལྟར་བབས་ནས་ཕྲེང་བའི་ལྷ་ལ་ཐིམ་པར་བསམ་ནས་ཕྲེང་བ་བདུད་རྩིར་རློབ་པའི་སྙིང་པོ།  ཨོཾ་རུ་ཙི་པྲ་མརྟ་ན་ཡེ་རཏྣ་མ་ཎི་དྷར་ཛྙཱ་ན་དེ་ཝ་ཨ་བྷི་ཥིཉྩ་ཧཱུཾ་སྭཱ་ཧཱ།  ཞེས་བརྒྱ་རྩ་བརྒྱད་བཟླས་པའི་མཐར་ལྷ་རྣམས་འོད་དུ་ཞུ་ནས་མགོ་བོ་རློན་པ་ཁྲག་འཛག་པའི་ཕྲེང་བར་གྱུར་པར་བསམ།  རྟེན་འབྲེལ་སྙིང་པོ་བདུན་གྱིས་མེ་ཏོགའཐོར་ལ་ཤིས་པའང་བརྗོད།  སླར་ཨོཾ་ཨཱཿཧཱུཾ་བརྒྱ་རྩ་དང༌།  དབྱངས་གསལ།  རྟེན་སྙིང༌།  ཨོཾ་རུ་ཙི་ར་མ་ཎི་པྲ་བརྡྷཡེ་ཧཱུཾ་ཕཊ་རྣམས་ཉེར་གཅིག་བཟླས་ལ་ཧུས་འདེབས།  དེ་ལྟར་བྱིན་གྱིས་བརླབས་པའི་ཕྲེང་བ་དེ་མི་ལག་མི་འགྲིམས་ཤིང་མོ་དང་གྲངས་རྩིས་ས་རྗེན་དང་ནམ་མཁར་འཕང་བ་སོགས་སྤང༌།  ཁྱི་དང་བྱི་ལ་བུད་མེད་སོགས་ཀྱིས་འགོང་དུ་མི་འཇུག་པར་ལུས་ཀྱི་དྲོད་དང་མི་འབྲལ་བར་བཅད་དོ།  དེ་ནས་ལས་བྱང་བཞིན་ཛཔྲ་བསྐུལ་སྔོན་དུ་འགྲོ་བས་སྐུ་གསུང་ཐུགས་ལ་དམིགས་པའི་ཛཔྲ་དགོངས་གསུམ་པོ་རེ་རེ་ལ་ཐུན་གྱི་སུམ་ཆ་རེ་ཙམ་ཆ་རྩིས་གསལ་བཏབ་ལ།  མགལ་མེ་ཀླད་སྐོར་གྱི་འཕྲོ་འདུ་ཉིད་རྩ་བར་བཟུང་ནས་བཟླས་པའི་སྐྱོན་རྣམས་སྤངས་ཏེ་སེམས་རྩེ་གཅིག་པའི་ཏིང་ངེ་འཛིན་གྱིས་འབྲུ་བཅུ་བདུན་པ་ཁོ་ན་ཆིག་དྲིལ་དུ་ {{TibChung|[41a]}} བཟླ།  ཐུན་མཐར་ཐབས་ཀྱི་ཡི་གེ་ཀ་ལི་ལན་གསུམ་གྱིས་སྐུ་བསྐྱེད་རིམ་མ་གསལ་བ།  སྒོམ་ཚུལ་མ་ཤེས་པ།  བརྡ་དོན་རྟགས་གསུམ་མ་འཕྲོད་པ་ལ་སོགས་པ་དང༌།  ཤེས་རབ་ཀྱི་ཡི་གེ་ཨ་ལི་ལན་གསུམ་གྱིས་གསུང་བཟླས་བརྗོད་སྔགས་ཀྱི་སྒྲ་མ་དག་པ།  གྲངས་མ་ཚང་བ།  གོ་རིམ་ནོར་ཞིང་སྔགས་དོན་མ་ཤེས་པ།  བཟླས་པའི་སྐྱོན་དུ་གྱུར་པ་ལ་སོགས་པ་དང༌།  ཞི་ཁྲོ་ཀུན་འདུས་ཀྱི་སྙིང་པོ་ཡིག་བརྒྱ་ལན་གསུམ་གྱིས་ཐུགས་ཏིང་ངེ་འཛིན་གྱི་འཕྲོ་འདུའི་རིམ་པ་ནོར་འཁྲུལ་ཡེངས་པ་དང་མ་གསལ་བ་སོགས་འགལ་ཉམས་ཀྱི་ལྷག་ཆད་ཁ་བསྐང་ཞིང༌།  ཡེ་དྷརྨཱས་ནུས་པ་བརྟན་པར་བྱས་ལ།  གཞུང་བཞིན་སྟོང་ཚིག་མཆོད་བསྟོད་ཀྱིས་ཐུགས་དམ་བསྐུལ་མཐར།  སྲུང་འཁོར་མི་བསྡུ་བར་སྦྲ་ཕུབ་པ་ལྟར་བཞག་ནས་རྟེན་དང་བརྟེན་པའི་དཀྱིལ་འཁོར་སྣང་ཆ་ཐམས་ཅད་མི་དམིགས་པའི་དབྱིངས་སུ་བསྡུས་ཏེ་མཉམ་པར་འཇོག    །སླར་ཡང་ཐུན་མཚམས་ཀྱི་ལྷར་ལངས་ཏེ་གོ་བགོས་ལ་སྣོད་བཅུད་ཐམས་ཅད་ལྷ་སྔགས་འོད་གསལ་གྱི་འཁོར་ལོས་རྒྱས་བཏབ་ནས་ཟུང་འཇུག་གི་ཏིང་ངེ་འཛིན་ཆུ་བོའི་རྒྱུན་ལྟ་བུ་ལ་སྦྱར་རོ།  །དེ་ནས་དགོང་ཐུན་དང་སྲོད་ཐུན་ལ་སྲུང་འཁོར་གསལ་འདེབས་ཙམ་བྱས་རྗེས་ཏིང་ངེ་འཛིན་ {{TibChung|[41b]}} གསུམ་ལ་འཇུག་པས་ཆོག་ཅིང༌།  ཕྲེང་བ་བྱིན་རླབས་ཀྱང་དོར།  སྲོད་ཐུན་གྱི་མཐར་ཆོས་སྐྱོང་སྤྱི་དང་བྱེ་བྲག་ཕུར་སྲུང་དམ་ཅན་གྱི་གཏོར་འབུལ་རྒྱས་བསྡུས་གང་འགྲུབ་བྱ།  ཕྱིར་ནང་ཐོར་ཐུན་གྱི་མགོར་སྔོན་འགྲོ་རྣམས་དང་ཕྲེང་བ་བྱིན་རླབས་སོགས་སྦྱར།  སྔ་ཐུན་མན་ཆད་སྔ་ཉིན་ཕྱི་ཐུན་དང་འདྲ།  ཚོགས་མཆོད་འབྱོར་ན་སྲོད་ཐུན་ལ་མ་ཆགས་པར་བྱ་དགོས་ཀྱང་མི་འགྲུབ་ན་བསྙེན་པ་ཚུགས་པའི་ཐུན་དང་པོ་དང༌།  གྲོལ་བའི་ཐུན་ཕྱི་མ།  ཡར་མར་གྱི་ཚེས་བཅུ་ཉ་སྟོང་བརྒྱད་གསུམ་ལ་ངེས་པར་ཆག་ཏུ་མི་རུང༌།  མཉམ་བཞག་གི་དུས་སུ་ཆོས་ཉིད་ངོ་བོ་ཀ་ནས་དག་ཀྱང༌།  རྗེས་ཐོབ་ཏུ་སྣང་གྲགས་རིག་གསུམ་ཐམས་ཅད་བདེ་བ་ཆེན་པོའི་རྣམ་རོལ་འབའ་ཞིག་ཏུ་འཆར་བ་ལ་སློབ་ཅིང༌།  ལེ་ལོ་དང་སྙོམས་ལས་ཀྱི་དབང་དུ་མི་གཏོང་བར་བརྩོན་འགྲུས་དང་འདུན་པ་དྲག་པོས་རིག་པ་དྭངས་སྙིགས་ཕྱེད་པར་བྱས་ཏེ་དྲན་པའི་བྱ་ར་དང་མ་བྲལ་བའི་སྒོ་ནས་བསགས་སྦྱོང་སོགས་བསྒྲིགས་ཆགས་ཀྱི་དགེ་སྦྱོར་གཞན་བྱེད་སྤྲོ་ནའང་ཐུན་མཚམས་ངལ་གསོའི་སྐབས་གང་བདེར་བྱས་པས་ཆོག་ཅིང༌།  གཞན་དུ་ན་ཐུན་མཚམས་སུའང་ལྷའི་གསལ་སྣང་དང་མ་བྲལ་བའི་ངང་ནས་བཟླས་པ་བྱ་ཞིང་གྲངས་ཚད་ལ་མི་བརྩི།  ཁམས་གསེང་ལ་འགྲོ་བ་སོགས་སྟན་ལས་འཕགས་ {{TibChung|[42a]}} དུས་ཕྲེང་བ་ལ་རྡོ་རྗེའི་མདུད་པ་བྱས་པ་ཁྲོ་ཞལ་དུ་དམིགས་ནས་གདན་ཁར་བཞག་པས་སྟན་བསྲུང༌།  གཞན་འགྲོ་འཆག་མང་པོ་སྤངས་ཏེ་སྟན་གྱི་དྲོད་མ་ཡལ་བར་སྡོད་ཚུགས་པ་གལ་ཆེ།  སྲོད་ལ་སྒྱུ་ལུས་མཆོད་སྦྱིན་དང་ཕྱིར་ཟློག་སོགས་སྦྱོར་སྤྲོ་ནའང་ལེགས་ཤིང༌།  ཉལ་ཁར་ཉིན་རེའི་བསྙེན་པའི་བསྲུང་མཚམས་ལས་ཕྲ་མོ་ཞིག་འགལ་བ་བྱུང་ཡང་ཞག་ཏུ་མི་འགྲོགས་པར་རྩ་བ་གསུམ་ལ་བཤགས་པ་བྱས་ཏེ་ཚེ་འདིའི་རྐྱེན་དང་ཕྱི་མའི་སྒྲིབ་པར་མི་འགྱུར་བར་གསོལ་བ་དྲག་ཏུ་གདབ།  རྣམ་དཀར་གྱི་ཕྱོགས་རྣམས་རློམ་སེམས་དང་བྲལ་བའི་རྫོགས་བྱང་དུ་བསྔོས་ཏེ་གནས་ལུགས་འཛིན་མེད་ཀྱི་རང་ངོ་བསྐྱང༌།  འདིར་ངེས་པར་གལ་ཆེ་བ་མཉམ་པར་མ་བཞག་པའི་རྣལ་འབྱོར་ཞེས་གཞུང་རྣམས་ལས་མང་དུ་འབྱུང་བའི་དོན་བསྡུ་ན།  བིདྱོཏྟ་མ་ལས།  བཟའ་བཏུང་གོས་རྒྱན་རིམ་པ་དང༌།  །འགྲོ་ཉལ་འདུག་ལྡང་རྒྱུན་རིང་བྱ།  །ཞེས་གསུངས་པ་ལྟར།  དགོང་མོ་ཉལ་བའི་དུས་སུ།  ཨོཾ་བཛྲ་ཀཱི་ལི་ཀཱི་ལ་ཡ་ཤུ་ནྱ་ཏ་ཧཱུཾ།  ཞེས་བརྗོད་ལ་རང་རྡོ་རྗེ་གཞོན་ནུར་གསལ་བའི་ངང་ནས་སེང་གེའི་ཉལ་སྟབས་ཀྱིས་ཆོས་དབྱིངས་ཀྱི་ངང་དུ་ཉལ།  ཐོ་རངས་ལྡང་བའི་དུས་སུ།  ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱཀ་ཙིཏྟ་ས་མ་ཡ་ཧཱུཾ།  ཞེས་བརྗོད་ {{TibChung|[42b]}} པས་ཆོས་ཉིད་སྐྱེ་བ་མེད་པ་ལས་ལངས་ཏེ།  འགག་པ་མེད་པ་དཔལ་རྡོ་རྗེ་གཞོན་ནུའི་སྐུར་བཞེངས་པར་བསམ།  འགྲོ་བའི་དུས་སུ།  ཨོཾ་བཛྲ་ཀཱི་ལི་ཀཱི་ལ་ཡ་ཨེ་ཝཾ་མ་ཡ་དྷརྨ་ཀཱ་ཡ་ཧཱུཾ།  ཞེས་བརྗོད་ཅིང་འགྲོ་བ་འདྲེན་པའི་དོན་དུ་འགྲོ་བར་བསམ།  འདུག་པའི་དུས་སུ།  རང་ཉིད་ལྷའི་ང་རྒྱལ་ལ་གནས་པའི་ངང་ནས་གང་དུ་གནས་པའི་ཁང་པ་དེ་ཡེ་ཤེས་ཀྱི་གཞལ་ཡས་ཁང་དུ་བསྒོམ་ཞིང་འཁོར་དང་ཉེ་གནས་ཐམས་ཅད་སྤྲུལ་པའི་འཁོར་དུ་བསམ་ལ།  ཨོཾ་བཛྲ་ཀཱི་ལི་ཀཱི་ལ་ཡ་མཎྜལ་ཧཱུཾ་ཧཱུཾ།  ཞེས་བརྗོད།  ཁ་ཟས་ཟ་བའི་དུས་སུ།  ཨོཾ་ཨཱཿཧཱུཾ་གིས་ཁ་ཟས་བདུད་རྩིར་བྱིན་གྱིས་བརླབས་ནས་ལྷ་མཆོད་པའི་ཚུལ་དུ་རེལ་ཞིང་མཁའ་འགྲོ་མ་རྣམས་ལ་ལྷག་མའི་གཏོར་མ་སྔགས་ཙམ་གྱིས་སྦྱིན།  བཏུང་བ་སྤྱི་དང་བྱེ་བྲག་ཛ་གད་བཏུང་བ་ལ།  ཛ་གད་དེ་ཉིད་ཏྲཾ་ལས་ཡེ་ཤེས་ཀྱི་བདུད་རྩིར་བསམ་ཞིང༌།  ཨོཾ་ན་མོ་གུ་རུ་བཛྲ་ཀཱི་ལི་ཀཱི་ལ་ཡ་དྷ་ཏི་མ་མ་ཀརྨ་ཛ་གད་པྲ་བ་ཁ་རཾ་ཁཱཧི།  ཞེས་ལྷ་དང་བླ་མ་མཁའ་འགྲོའི་ཚོགས་ལ་གཡོན་པའི་མཐེབ་སྲིན་གྱིས་དབུལ།  ཨོཾ་ཨཱཿ་ཧཱུཾ་གིས་དངོས་གྲུབ་བསྡུས་ནས་ལྷ་ལ་ལྷ་མཆོད་པའི་ཚུལ་དུ་རོལ་པར་བཤད་དོ།  །གཙོ་བོར་རང་ཉིད་ལྷག་པའི་ལྷ་རྡོ་རྗེ་གཞོན་ནུའི་ང་རྒྱལ་དང་མི་འབྲལ་བ་དང༌།  ངག་ ཀཱི་ལ་ཡའི་སྒྲ་དང་མི་ {{TibChung|[43a]}} འབྲལ་བ་དང༌།  ཡིད་ཆོས་ཉིད་བྱང་ཆུབ་སེམས་ཀྱི་ཕུར་བུ་རྩེ་གཅིག་པ་གསལ་སྟོང་དབྱེར་མེད་པ་དང་མི་འབྲལ་བ་སྟེ།  མི་འབྲལ་བ་རྣམ་པ་གསུམ་ལ་དྲན་པ་རྒྱུན་ཆད་མེད་པར་བྱས་ཏེ་སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རོལ་པར་ལམ་དུ་ཁྱེར།  གཞན་ཡང་བསྙེན་སྒྲུབ་ཀྱི་སྐབས་སུ།  གདན་མི་སྤྲུག་ཅིང་དྲོད་མི་ཡལ་བར་བྱེད།  སྔས་བླ་མར་མོས་ལ་མི་འགོང༌།  སྐྲ་སེན་དང་ཁ་སྤུ་མི་འདྲེག    །མཚོན་རྩེ་ཁ་ལ་མི་འཇུག་ཅིང་ལུས་ཀྱི་ཆ་ཤས་གང་དུའང་མཚོན་ཁ་མི་བཏབ།  ཁ་བཤལ་བ་སོགས་ཁྲུས་མི་བྱ།  སྔགས་ནུས་འཇོམས་པའི་ཟས་ཀྱི་སྤང་བྱ་ནི།  དུག་རིགས་འདྲེས་པའི་བཟའ་བཏུང༌།  ཉམས་གྲིབ་དང་འདྲེ་ཅན་གྱི་ཁ་ཟས།  སྒོག་བཙོང་དང༌།  ལ་ཕུག    །ལྒ་གཡེར།  དམར་ཚྭ།  ཟྭ་ཐུག    །ཁུར་བ།  ལྕེའི་དབང་པོ།  ཤ་ཆང་སོགས་ཀྱིས་ནུས་པ་འགྱང་བར་བཤད།  འོན་ཀྱང་བག་མེད་མ་ཡིན་པར་བྱིན་གྱིས་བརླབས་ནས་ཤ་ཆང་སོགས་ཁ་ཟས་བཅུད་ཅན་བསྟེན་དགོས་ཏེ།  དེའི་དགོས་པ་གང་ཞེ་ན།  ལྷ་སྔགས་ཡེ་ཤེས་ཀྱི་རྣལ་འབྱོར་ལ་འཇུག་པའི་སྐབས་འདིར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ལ་རྗེས་ཆགས་བདེ་བ་ཆེན་པོས་རྒྱས་ཐེབས་པ་དགོས་ཤིང༌།   {{TibChung|[43b]}} མཉམ་རྗེས་ཐམས་ཅད་དུ་བདེ་སྟོང་གི་དར་གདངས་ཤིག་མེད་ཐབས་མེད་པས།  དེ་སྐྱེ་བའི་རྒྱུ་ཀུན་རྫོབ་རྒྱུའི་ཐིག་ལེའི་འཕེལ་འགྲིབ་ལ་ལྟོས་ནས་རྗེས་སུ་འགྲོ་དགོས་པས་ན།  རྒྱུད་ལས་ཀྱང༌།  དེ་ལ་ག་བུར་རྒྱུ་ཡི་ཕྱིར།  །ཤ་ནི་བཟའ་བ་ཉིད་དུ་བྱ།  །ཁྱད་པར་དུ་ཡང་ཆང་ཉིད་དོ།  །ཞེས་གསུངས་པ་སོགས་ཤ་ཆང་ལོངས་སྤྱོད་པ་ལ་ཉེས་པ་མེད་པ་མ་ཡིན་ཀྱང༌།  གསང་སྔགས་ཀྱི་ཉམས་ལེན་གཙོ་བོ་མཐར་ཐུག་པ་བདེ་སྟོང་གི་ཡེ་ཤེས་ལ་རང་བྱན་ཚུད་དགོས་པས།  དེ་ལ་རེ་ནས་ཤ་ཆང་བླང་བྱ་དང༌།  ཐིག་ལེ་ཉམས་པའི་སྐྱོན་ཐམས་ཅད་སྤང་བྱར་གསུངས་པས་དེ་བས་ན་ཐིག་ལེ་ཉམས་པ་ཁྱད་དུ་མི་གསོད་པའི་ཁར་རྨི་ལམ་བག་ཆགས་སོགས་སུ་འཕོ་བའི་རིགས་བྱུང་ནའང་རྫས་སྲུང་མན་ངག་སོགས་ལས་འབྱུང་བ་བཞིན་བསྲུང་ཐབས་བྱས་ལ་འཕོ་མེད་དུ་འཆིང་བ་གལ་ཆེ།  ཐུན་ཚུགས་ནས་བསྡུ་རིམ་མ་གྲུབ་ཀྱི་བར་དུ་ཁམས་གསེང་ལ་འགྲོ་བ་སོགས་ཀྱིས་མཚོན་ལྡང་བའི་རིགས་གཏན་ནས་མི་བྱེད།  བཟླ་དུས་མིད་པ་རྒྱུན་གཅོད་ངེས་པར་དགོས་ནའང་གང་ཟག་ཁྲག་རླུང་ཤས་ཆེ་བའི་རིགས་ལ་མིད་པ་འཇུར་བས་རླུང་སྟོད་དུ་འཚང་ཞིང་གྲེ་བ་སྐམ་ནས་བསྐྱེད་བཟླས་བྱེད་དུ་མི་སྟེར་བའི་ཚེ་བཏུང་བ་སོགས་ལོངས་ {{TibChung|[44a]}} སྤྱད་དགོས་པ་བྱུང་ན།  སྤྱད་བྱའི་བཟའ་བཏུང་གང་ཡིན་དེ་བདུད་རྩིར་བྱིན་གྱིས་བརླབས།  སྤྱོད་ཡུལ་གྱི་དཀྱིལ་འཁོར་ལེགས་པར་གསལ་བཏབ།  སྔགས་བཟླ་འཕྲོས་སྣ་བུག་ཏུ་ཕུས་བཏབ་ནས་སྣ་སྒོའི་རླུང་ལས་སྔགས་ཀྱི་སྒྲ་དི་རི་རི་སྒྲོག་པར་མོས་ལ།  འཕྲེང་བ་འཁོར་མཚམས་ནས་བཟའ་བཏུང་བདུད་རྩིའི་ཚོགས་མཆོད་ཕུལ་ཏེ།  དེ་འཕྲལ་བཟླས་པར་འཇུག་པ་ལས་བག་མེད་དུ་བཟའ་བཏུང་གང་དགར་མི་སྤྱོད།  སྔགས་བཟླ་འཕྲོ་བཞག་ནས་དཔེ་ཆ་བལྟ་བ་དང་ཡི་གེ་འབྲི་བས་མཚོན་ལུས་ངག་ཡིད་གསུམ་གྱི་གཡེང་ཤོར་བའི་རིགས་མི་བྱེད།  འོག་སྒོ་ནས་དྲི་ངན་ཤོར་ན་ཐུན་དེའི་སྔ་རོལ་བཟླས་པ་ཇི་ཙམ་སོང་ཡང་གྲངས་ལ་མི་གཏོང༌།  ཧ་སྦྲིད་དང་སྦྲེག་པ་ཤོར་ན་ཕྲེང་བའི་འཁོར་མཚམས་གང་སླེབས་གྲངས་སུ་མི་གཏོང་བར་དོར་ནས་སླར་མདུད་འཛིན་བསུས་ཏེ་འདྲེན།  བཟླས་པའི་མཚམས་སུ་ཅིས་ཀྱང་མི་ལ་ངག་གཏོང་དགོས་པ་བྱུང་ན་ཕ་རོལ་པོ་དེ་ཡི་དམ་གྱི་སྐུར་གསལ་བ་ལ་རང་གི་སྨྲ་བརྗོད་ཐམས་ཅད་སྔགས་ཀྱི་རྣམ་པར་འཕྲོས་ནས་ཐིམ་པར་བསམ་པས་སྔགས་ནུས་མི་ཉམས་པར་བཤད།  ཐུན་མཚམས་སུ་གསུར་དང་གཏོར་མ་སོགས་གཏོང་ནའང་རང་ཉིད་ལས་ཀྱི་ཧེ་རུ་ཀ་གནས་གྱུར་པ་ལས་ཐུགས་རྗེ་ཆེན་པོ་སོགས་ {{TibChung|[44b]}} སུ་བསྐྱེད་པའི་ལས་བྱེད་པར་བསམ་ལ་བསྔོ།  སྤྱིར་ལྷ་ཞི་ཁྲོ་གང་བསྐྱེད་ཀྱང་སྣང་སྟོང་འཇའ་ཚོན་ལྟ་བུར་གསལ་བས་གང་ལ་གང་འདུལ་གྱི་སྤྲུལ་བསྒྱུར་བྱ་བ་ལས།  ཕྱི་གཟུགས་ཡུལ་ཆས་གོས་ཆ་ལུགས་སོགས་ལ་རག་མ་ལུས་ཀྱང༌།  ལ་ལ་དག་གཏོར་མ་དང་ལུས་སྦྱིན་སོགས་གཏོང་བའི་སྐབས་རང་གི་གདོང་དམར་པོ་དེས་ཡི་དྭགས་རྣམས་འཇིགས་སྐྲག་གི་ཉེས་པ་སྒྲིབ་ཕྱིར་ཞྭ་དང་དོམ་ར་གྱོན་པ་སོགས་བྱེད་དགོས་པར་སྐད་མོད།  དེ་ཙ་ན་རང་ཉིད་ཐུགས་རྗེ་ཆེན་པོ་སོགས་སུ་བསྐྱེད་པའི་དགོས་པ་མ་བྱུང་བས་བླུན་པོའི་ངག་རྗེས་སུ་མི་འབྲང་བར་ཁུང་ཐུབ་བརྒྱུད་པའི་གསུང་དང་མཐུན་པ་ཞིག་གལ་ཆེ།  དགོང་མོ་མུན་པའི་སྐབས་ཚོགས་ལྷག་དང་ཆད་མདོ་སོགས་ཕུལ་དུས་དཔལ་འབར་མེད་ན་ཤ་ཟ་ཤུགས་འགྲོ་སྡེ་བརྒྱད་མ་རུང་བས་ལས་ཀྱི་རྡོ་རྗེའི་སྲོག་ལ་འཚེ་བའི་ཕྱིར་དཔལ་འབར་ངེས་པར་དགོས་ཤིང༌།  གསང་སྤྱོད་སོགས་ཀྱི་སྐབས་སུ་མར་མེའི་འོད་ལ་འབྱུང་པོ་རྣམས་འཁོར་མི་ནུས་པས་མཚོན་ཉིན་མོ་ལ་ནི་དཔལ་འབར་སོགས་ཀྱི་སྣང་བ་མི་དགོས།  ལྷ་གཞན་གྱི་རྒྱུན་ཁྱེར་དམ་ཚིག་གི་བཟླས་པ་བྱེད་པར་འདོད་ན་རང་ལྷར་གསལ་བའི་ཐུགས་ཀའི་འོད་ཀྱིས་བསྐུ་་ཏེ་ལྷ་གང་དང་གང་གི་སྐུའི་རྣམ་པར་བྱོན་ཏེ་རང་ལ་ཐིམ་པར་བསམ་ཤིང་ {{TibChung|[45a]}} སྔགས་བརྒྱའམ་ཉེར་གཅིག་བདུན་སོགས་བཟླས་པས་འགྲུབ།  དེ་ཡང་ལྷའི་སྣང་ཆ་གསལ་མ་ཐེབས་ན་བསྐྱེད་རིམ་གྱིས་གོ་མི་ཆོད།  ང་རྒྱལ་མེད་ན་ཐ་མལ་གྱི་སྣང་ཞེན་མི་ལྡོག    །དག་དྲན་མེད་ན་ལྷ་ཞི་བ་བསྒོམ་ཀྱང་རྒྱལ་འགོང་དང༌།  དྲག་པོ་བསྒོམ་ན་རཱུ་དྲར་གོལ་བར་འགྱུར་བས་ན་གསལ་བརྟན་དག་གསུམ་གྱི་གནང་ལ་འབད།  གཞན་ཡང་བདུད་ཀྱིས་ལྷར་བརྫུས་ནས་བར་གཅོང་འབྱུང་བའང་སྲིད་པས་རྟགས་དང་ཆོ་འཕྲུལ་འཚུབས་ལྷོང་སོགས་བཟང་ངན་གྱི་མཚན་མ་ཇི་ལྟར་བྱུང་ཡང་དགག་སྒྲུབ་རེ་དོགས་ཀྱི་བློས་མ་བཅིངས་པར་གདོད་མའི་གནས་ལུགས་དབྱིངས་དང་ཡེ་ཤེས་གཉིས་སུ་མེད་པའི་ཀློང་ཆེན་པོར་ལ་བཟླ་བར་བྱ་སྟེ།  དེ་ལྟར་ཡང་འོ་སྐོལ་གྱི་སློབ་དཔོན་སངས་རྒྱས་གཉིས་པའི་ཞལ་ནས།  འགྲོ་འདུག་ཉལ་དང་སྤྱོད་ལམ་ཐམས་ཅད་ཀུན།  །དེ་ལྟར་ལྟ་བའི་བྱ་ར་མ་ཡེངས་ན།  །ང་ཉིད་པདྨ་འབྱུང་གནས་ཐུགས་ཀྱི་སྲས།  །མཆོག་དང་ཐུན་མོང་དངོས་གྲུབ་མྱུར་དུ་ཐོབ།  །ཕྱི་ནང་ཟས་ནོར་མི་དང་ལྷ་འདྲེ་འདུ།  །བླ་མེད་བྱང་ཆུབ་གོ་འཕང་མྱུར་དུ་ཐོབ།  །ལྟ་བས་མ་ཟིན་བསྒྲུབ་ཀྱང་དོན་མེད་པས།  །ལྟ་བའི་བྱ་ར་གཅེས་སོ་རིགས་ཀྱི་བུ།  ཞེས་གསུངས།  གཞན་ཡང་བསྙེན་པའི་བསླབ་བྱ་ཁྱད་པར་གནད་ཀྱི་ཞལ་ཤེས་ནི།   {{TibChung|[45b]}} བསྙེན་སྒྲུབ་ལ་རྟགས་མ་ཐོན་བར་དུ༔  དང་པོ་ནས་རྣལ་འབྱོར་པ་རེ་དོགས་ཅན་གྱིས་ལྷ་མི་བསྲེལ་ཏེ༔  གང་ཞེ་ན༔  གདོན་ཆེན་པོ་ལ་བྱིན་རླབས་མི་བྱ༔  སྲིའུ་མི་གསོ༔  སེར་རྒོད་མི་བཟློག༔  གཞན་གྱི་ཟས་གོས་གྲིབ་ཅན་ལ་མི་འབག་གོ༔  བྱས་ན་སྒྲུབ་པ་པོ་ཟག་ལ་འགྲོ་བས་རྟགས་མི་འབྱིན༔  རྟགས་མཚན་མི་ལ་མི་བཤད༔  རེ་དོགས་དང་འཁུ་འཁྲིག་མི་བྱ་སྟེ༔  རྟགས་བཟང་བ་ལ་དགའ་མི་བྲོད༔  ངན་པ་ལ་དོགས་མི་འཚེར༔  ཐམས་ཅད་རྒྱུ་འབྲས་དང་རྟེན་འབྲེལ་དུ་ཤེས་པས་ལྟ་བའི་གདིང་བསྐྱེད་དོ༔  ཞེས་གསུངས་པ་ལྟར་དང༌།  བསྙེན་པ་མ་རྫོགས་པར་གནས་སྤོས་ན་དངོས་གྲུབ་བོ་ཟག་དོན་མེད་དུ་འགྱུར་བས་གནས་མི་སྤོ༔  ཞེས་ཆོས་དབང་གི་གཞུང་ལས་གསུངས་པ་ལྟར་སྤང་བླང་ཚུལ་བཞིན་དུ་བྱ།  སྤྱིར་ལམ་ཟབ་མོ་ཉམས་སུ་ལེན་པའི་སྐབས་འདིར་འཚེ་བའི་རྐྱེན་མང་བས་ལུས་ལ་འབྱུང་བཞིའི་ནད་དྲག་པོས་བཏབ་ནས་གློ་བུར་དུ་སྨན་པ་དང་གྲོགས་སོགས་མཚམས་ནང་དུ་འབོད་དགོས་པའམ་སྲིད་པས།  དེས་ན་བྱ་བྱེད་སྤྲོ་བསྡུ་གང་ཡང་རྣམ་རྟོག་གི་རྗེས་སུ་འབྲང་བས་དང་པོར་མཚམས་ལ་འཇུག་སྐབས་ནས་ཞེ་མཐུན་གྱི་སྨན་པ་དང་གྲོགས་འཁོར་དངོས་ཆས་སོགས་ཀྱང་དགོས་འབྱུང་ན་ཇི་སྙེད་ཅིག་གཏོང་ལེན་བྱེད་སྙམ་པའི་དམིགས་འོག་ {{TibChung|[46a]}} ཏུ་ཆུག་པ་དགོས།  ཕྱིས་དེ་དག་གཏོང་དགོས་བྱུང་ཚེ་མཚམས་ལ་ཧར་གྱིས་གྲོལ་བའི་བར་ཆད་མི་འཇུག་པའི་དགོས་པ་ཡོད་པས་སོ།  །དེ་ལྟར་ཐུན་བཞིའི་རིམ་པས་དུས་གྲངས་རྟགས་ཀྱི་བསྙེན་པ་གསུམ་གང་རུང་བྱ་སྟེ།  དེ་ལ་དུས་ནི་དགོངས་རྒྱུད་ལས།  ཡུན་ནི་ལོ་ཟླ་ཙམ་དུ་བསྲིང་༔  ཞེས་པས་རང་གི་ནུས་པ་དང་སྦྱར་ཏེ་ལོའམ་ཟླ་བའི་གྲངས་འདི་ཙམ་ཞིག་བྱའོ་ཞེས་ཇི་ལྟར་དམ་བཅས་པ་ལས་མི་འདའ་བར་བྱ་ཞིང༌།  གཞན་ཡང་ཇི་སྐད་དུ།  ཞག་ནི་སུམ་ཅུ་ཕྲག་དྲུག་གམ༔  ཞེས་པས་བསྙེན་སྒྲུབ་སོ་སོར་ཟླ་བ་དྲུག་རེ་སྟེ་ཁྱོན་ལོ་གཅིག་ཡན་ཆད་དམ།  ཡང་ན་བསྙེན་སྒྲུབ་སྤྱིར་ཟླ་བ་དྲུག་གི་དབང་དུ་བྱས་ཏེ།  འདིར་བསྙེན་པ་ལ་དེའི་ཕྱེད་ཆ་ཟླ་བ་གསུམ་ཡན་ཆད་དོ།  །གྲངས་ཀྱི་བསྙེན་པ་ནི།  དགོངས་རྒྱུད་ལས།  བསྙེན་སྒྲུབ་ཆོ་ག་ཚང་བྱས་ནས༔  ཛཔྲ་གྲངས་བདུན་འབུམ་ཉི་ཁྲི་འདོན༔  ཞེས་པ་ལྟར་གྲངས་ཚད་བདུན་འབུམ་ཉི་ཁྲི་ཡན་ཆད་སྤྱིར་བཏང་ཡིན་ལ།  དམིགས་བསལ་དུ་དབང་པོ་རབ་ཀྱིས་འབྲུ་འབུམ།  འབྲིང་གིས་དེ་ཉིས་འགྱུར།  ཐ་མས་སུམ་འགྱུར་གྱིས་ངེས་པར་འགྲུབ་པར་གསུངས།  གྲངས་བསྙེན་ཚད་དུ་མ་འཁྱོལ་ཡང་བརྩོན་འགྲུས་དང་སྦྱར་བའི་བཟླས་པ་གང་འགྲུབ་ཙམ་བྱས་པས་ཀྱང་བསྙེན་སྒྲུབ་ཀྱི་འབྲེལ་བ་ཐོགས་པ་ཡིན་ཏེ།  གསང་བ་ {{TibChung|[46b]}} སྙིང་པོ་ཕྲིན་ལས་ཀྱི་རྒྱུད་ལས།  འབྲུ་འབུམ་བདུན་འབུམ་ཉི་ཁྲི་ཙམ༔  སྟན་དྲོད་མ་ཡལ་རྩེ་གཅིག་བཟླ༔  ཞེས་སོགས་འབྱུང་ངོ༌།  །ད་ལྟའི་དུས་དང་སྦྱར་ན།  རྩ་བསྙེན་བྱེ་བ་ཕྲག་གསུམ་དང་འབུམ་ཕྲག་བཞི།  ལས་སྦྱོར་འབུམ་གསུམ་དང་ཁྲི་ཚོ་བཞི་བཟླས་ན་འགྲུབ་པར་ཞུས་ལན་ཉིད་དུ་གསལ་ལོ།  །འོན་ཀྱང་གང་ཟག་སྦྱངས་པ་སྔོན་སོང་བསྙེན་སྒྲུབ་ཀྱི་ལས་འཕྲོ་ཅན་ལ་ནི་དུས་གྲངས་མི་ངེས་ཏེ།  གཞུང་ལྟར་རྟགས་དང་མཚན་མ་ཞག་གཅིག་ནས་ཐོན་ནའང་བསྙེན་པ་རྫོགས་པ་སྟེ་གང་དགོས་ལས་ལ་སྦྱར་བས་འགྲུབ་པ་ཡིན་ནོ།  །རྟགས་སམ་མཚན་མའི་བསྙེན་པ་ནི།  རྣལ་འབྱོར་པ་རབ་ལ་སྐུ་གསུང་ཐུགས་ཀྱི་རྟགས་བདུན་གསུམ་ཉེར་གཅིག་མངོན་སུམ་འབྱུང༌།  འབྲིང་ལ་དེ་དག་ཉམས་སྣང་དུ་བྱུང༌།  ཐ་མ་རྣམས་ལའང་གཞུང་ལས།  སེམས་རྩེ་གཅིག་ཏུ་ཏིང་ངེ་འཛིན་ལ་གནས་ཤིང་གསལ་བ་དང་༔  བླ་མ་ལ་མོས་གུས༔  ཡི་དམ་ལ་དག་སྣང་༔  སྒྲུབ་པ་ལ་སྤྲོ་ཞིང་བློ་དཔའ་བ་དང་གདིང་ཡོད་པ༔  རྨི་ལམ་དུ་མཆོད་རྟེན་དང་རི་མགོ་རྩེར་འདུག་པ༔  རྔ་བརྡུང་༔  དར་འཕྱར༔  དུང་འབུད༔  ཉི་ཟླའི་སྟེང་དུ་འདུག་པ༔  ལྷའི་ཞལ་མཇལ༔  སྒྲུབ་ཕུར་རྣམས་ལས་འོད་འཕྲོ༔  འཕར་ལྡིང་བཞད་པ་ལྷ་མོའི་གཟུགས་སྟོན་པ༔  དབང་བསྐུར་ཆོས་བཤད་ཁྲི་ཆེན་ལ་འདུག་ལ༔  གྲུ་ཆེན་ལ་འདུག་ {{TibChung|[47a]}}  པ༔  གྲུ་པ་མཉན་པ་སྡེ་དཔོན༔  ཁྲོམ་གྱི་ཁ་ལོ་བསྒྱུར་བ་འབྱུང་ངོ་༔  ཞེས་གསུངས་པ་ལས་སྐུ་གསུང་ཐུགས་ཀྱི་རྟགས་སྣ་གསུམ་རྫོགས་ན་བསྙེན་ཚད་རྫོགས་པའི་རྟགས་སུ་གསུངས་སོ།  །སྐབས་འདིར་སྔོན་ལས་ཀྱི་དབང་གིས་ཇི་ལྟར་བསྒྲུབས་ཀྱང་བར་ཆད་ན་ཚ་སོགས་མི་ཤིས་པ་མང་ཞིང་རྟགས་མཚན་གང་ཡང་མ་མཐོང་བའམ་ལོག་པར་མཐོང་ན་སྔོན་གྱི་ལས་འཕྲོ་མེད་པའམ།  དམ་ཚིག་ཉམས་པ་དང༌།  ཆོ་ག་ཕྱག་ལེན་འཁྲུགས་པ།  སྔགས་དང་བཟླས་བརྗོད་མ་དག་པ།  བརྒྱུད་པ་ལ་སེལ་ཞུགས་པ།  སྒྲུབ་རྫས་མ་ཚང་བ།  དམིགས་པ་ཏིང་ངེ་འཛིན་མ་གསལ་བ།  གཡེང་བ་ལ་སོགས་པའི་སྐྱོན་ཅན་ཡིན་པས།  དེ་ལ་བསོད་ནམས་ཚོགས་ཀྱི་དཔུང་བསྐྱེད།  བཤགས་པ་དང་ཡིག་བརྒྱ་མང་དུ་བཟླ།  བདག་ཉིད་དང་སྒྲུབ་རྫས་ལག་ཆ་རྣམས་རྡོ་རྗེ་རྣམ་འཇོམས་ཀྱི་ཁྲུས་ནས་དབྱུང༌།  རབ་གནས་བསྐྱར་བླ་མ་བརྒྱུད་པ་མཚན་ཉིད་དང་ལྡན་པ་ལས་དབང་ལུང་ལག་ལེན་ཐམས་ཅད་བསྐྱར་ནས་ཞུ་ཞིང་ཞུན་ཐར་བཅད།  ཡི་དམ་ལ་ཚོགས་དང་བསྐང་གསོལ་བྱ།  ཡན་ལག་བདུན་པ་དང་མཎྜལ་མང་དུ་ཕུལ་ཞིང་གསོལ་བ་གདབ་ལ་དངོས་གྲུབ་ཞུ།  ཚེ་འདིའི་ཆེད་གཉེར་ཆགས་ཞེན་གྱི་བློ་སྣ་རིང་དུ་དོར།  སྟོང་པ་ཉིད་ཀྱི་ {{TibChung|[47b]}} གདིང་བཅའ།  བྱམས་སྙིང་རྗེ་བྱང་ཆུབ་ཀྱི་སེམས་དཔང་དུ་བཙུགས་ཏེ་བརྩོན་འགྲུས་དྲག་པོས་བསྒྲུབ་བོ།  །དེས་ཀྱང་མ་འགྲུབ་ན་སྒྲུབ་པ་ལན་གསུམ་མམ་ལྔའམ་བདུན་སོགས་སྤོགས་ན་ལས་འཕྲོ་ཇི་ལྟར་ངན་ཀྱང་འགྲུབ་པར་གསུངས་སོ།  །གཉིས་པ་སྒྲུབ་པ་ནི།  ཕྱི་ནང་གི་མཚམས་གཅོད་སོགས་བསྙེན་སྒྲུབ་སྦྲེལ་བའི་སྐབས་འདིར་སྔར་སོང་བས་འཐུས་པར་མཛད།  ཆག་ཆག་གདབ་པ།  ཐིག་ཚོན་བྱིན་རླབས་ལྡན་པས་དཀྱིལ་འཁོར་བྲི་བ།  ཕུར་བུ་བྱིན་གྱིས་བརླབས་ཏེ་དགོད་པ།  རྒྱན་རྫས་དགྲམ་པ་རྣམས་གཞན་དོན་ཚོམ་བུའི་སྒྲུབ་གཞུང་ལྟར་བྱ་བ་ཡིན་མོད།  དེ་ཙམ་མ་ལྕོགས་ན།  སྔར་བསྙེན་དུས་དཀྱིལ་འཁོར་བཤམས་ཚེ་དེ་ཀའི་སྟེང་དུ་སྦམ་ཕུར་བཀོད་པས་གོ་བཅད།  གལ་ཏེ་སྔར་ཐོད་དཀྱིལ་ཁོ་ནར་བསྟེན་པ་ཡིན་ན།  འདིར་དཀྱིལ་འཁོར་རས་བྲིས་བཀྲམ་པའི་སྟེང་སྔར་གྱི་ཐོད་པའི་དཀྱིལ་འཁོར་ལ་ལྷ་ཕུར་ཚང་མ་སྦམས་ཏེ་བཙུགས་པ་ཉིད་བཀོད།  སྔར་གཙོ་ཕུར་ལས་མེད་ན་སྐབས་འདིར་ལྷ་ཕུར་ཚང་མའམ།  མ་འབྱོར་ན་དཀྱིལ་འཁོར་གྱི་ལྷ་གནས་སོ་སོར་ཚོན་སྤུངས་སམ་ཕྱག་མཚན་ནམ་འབྲུའི་ཚོམ་བུ་བཀོད།  སྒྲུབ་གཏོར་དང་ཆོས་སྲུང་གི་གཏོར་མ་སྨན་རཀ་རྣམས་སྔར་གྱི་དེ་ཀ་གསོལ་པས་ཆོག    །སྐབས་འདིར་ཕྱི་ནང་གི་མཆོད་པ་ {{TibChung|[48a]}} དང་དཀྱིལ་འཁོར་གྱི་རྒྱན་ཅི་འབྱོར་བཀྲམ།  དེ་ལྟར་གྲབ་ཤོམ་ཚར་བའི་ནུབ་རྒྱུན་བསྙེན་མ་ཆག་ཙམ་བཟླས་རྗེས་ཉལ།  སང་ཉིན་ཞོག་ཐུན་ནས་བརྩམས་ཏེ་སྐྱབས་སེམས་བཀའ་བསྒོ་སོགས་སྔོན་འགྲོའི་རིགས་གྲུབ་ནས།  ཏིང་འཛིན་རྣམ་གསུམ་ནས་བཟུང་རང་དང་མདུན་གྱི་དཀྱིལ་འཁོར་སྒྲུབ་རྟེན་ཕུར་བུ་དང་བཅས་པ་དམ་ཚིག་གི་འཁོར་ལོར་དབྱེར་མེད་དུ་བསྐྱེད་པའི་ཁྱད་པར་ཙམ་མ་གཏོགས་གཞན་བསྟོད་པའི་བར་བསྙེན་པ་ལྟར་ལས་གཞུང་བསྲང་ཞིང༌།  སྐུ་གསུང་ཐུགས་ཀྱི་ཛཔྲ་དགོངས་གསུམ་བསྙེན་དུས་ལྟར་ལ་བུང་བ་ཚང་ཞིག་གི་ཚུལ་ཁྱད་པར་དུ་བྱས་པའི་བཟླས་པ་སྔོན་དུ་བཏང་རྗེས།  འདིར་ཡོན་ཏན་ལ་དམིགས་པའི་ཛཔྲ་དགོངས་གཙོ་བོར་བྱ་སྟེ།  དེའི་དམིགས་པ་ནི།  བདག་ཉིད་ལས་མདུན་རྟེན་གྱི་དཀྱིལ་འཁོར་ཕཊ་ཛཿས་ཕྱེས་པ་མདུན་གྱི་ནམ་མཁར་བཞུགས་པར་མོས།  བདག་ཉིད་ཀྱི་ཐུགས་ཀའི་སེམས་དཔའ་སུམ་བརྩེགས་ལས་འོད་ཟེར་དཔག་ཏུ་མེད་པ་འཕྲོས།  ཕྱོགས་བཅུའི་བདེ་གཤེགས་ཐམས་ཅད་དང༌།  གཙོ་བོ་ཁྲོ་ཚོགས་སྲས་མཆོག་སྒོ་མ་དམ་ཅན་གྱི་ཕུར་བུ་ཐམས་ཅད་ཀྱི་ཐུགས་ཀར་ཐིམ།  དགྱེས་པ་བསྐྱེད།  ཐུགས་དམ་བསྐུལ།  སྐུ་གསུང་ཐུགས་ཀྱི་དངོས་གྲུབ་ཐམས་ཅད་ {{TibChung|[48b]}}  སྔགས་ཕྲེང་དམར་པོའི་རྣམ་པར་ལྷ་སོ་སོའི་ལྟེ་བ་ནས་བྱུང༌།  བདག་གི་ལྟེ་བར་ཞུགས།  ཐུགས་ཀའི་ས་བོན་ལ་ཐིམ།  སླར་ཐུགས་ཀ་ནས་སྔར་བཞིན་སྤྲོས་པ་འགལ་མེ་ལྟར་འཁོར་བར་དམིགས་ནས་ཛཔྲ་བཟླ་ཞིང་ཐུན་མཐར་མཆོད་ཅིང་བསྟོད།  ཐུན་བཞིའི་གཅོང་ཚུལ་དང་སྔོན་འགྲོ་རྒྱས་བསྡུས་ཀྱི་འདོར་ལེན་སོགས་སྔར་བསྙེན་པ་ལྟར་ལས།  འདིར་སྲོལ་ཐུན་ལྟ་བུའི་ཐུན་གཅིག་ལ་ཚོགས་གཏོར་ཀྱང་ཅི་འགྲུབ་བྱ་ཞིང་ལྷག་མ་བཙོན་དུ་འཛིན་པ་སོགས་སྤྱི་ལྟར་རོ།  །ཚུལ་དེས་སྒྲུབ་པ་རྫོགས་པར་ཉེ་བའི་མཐའི་ཞག་བདུན་གསུམ་ཙམ་གྱི་རིང་སྔར་བཞིན་སྐུ་གསུང་ཐུགས་ཡོན་ཏན་བཞིའི་ཛཔྲ་དགོངས་དང་ལྡན་པས་ཛཔྲ་བཟླས་མཐར་དམིགས་པ་འདི་ཉིད་བསྣན་ཏེ།  སླར་ཡང་འོད་ཟེར་འཕྲོས་པས་སྣོད་བཅུད་ཀྱི་འཇིག་རྟེན་ཐམས་ཅད་ཁྱབ།  འབྱུང་བཞི་རིན་ཆེན་སྨན་རྫས་ཐམས་ཅད་ཀྱི་ཚེ་རིང་ནད་མེད་གདོན་སེལ་བྱེད་ཀྱི་བཅུད་ཐམས་ཅད་བསྡུས་ཏེ་བདག་ལ་ཐིམ་པས་ཚེ་བསོད་དཔལ་གྲགས་གཟི་མདངས་བསྐྱེད།  ཁྱད་པར་འཆི་མེད་ཚེའི་རིག་འཛིན་ཐོབ་པར་གྱུར།  བཅུད་ཀྱི་སེམས་ཅན་ཐམས་ཅད་ལ་འཕྲོས་པས་ལས་ཉོན་མ་རིག་པའི་བག་ཆགས་སྦྱངས།  རྡོ་རྗེ་གཞོན་ནུའི་རང་བཞིན་དུ་གྱུར།  དཀྱིལ་འཁོར་ {{TibChung|[49a]}} གྱི་ལྷ་ཚོགས་དང་ཕྱོགས་བཅུའི་སངས་རྒྱས་ཐམས་ཅད་ལ་འཕྲོས།  མཉེས་མཆོད་ཕུལ།  དགྱེས་པ་བསྐྱེད།  ཐུགས་དམ་བསྐུལ།  སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཨོཾ་ཨཱཿཧཱུཾ་གི་རྣམ་པར་བསྡུས་ནས་བདག་ལ་ཐིམ་པས་ལས་ཉོན་བག་ཆགས་དང་བཅས་པ་སྦྱངས།  རྡོ་རྗེ་གཞོན་ནུའི་རང་བཞིན་དུ་གྱུར།  སྐུ་གསུང་ཐུགས་ཡོན་ཏན་ཕྲིན་ལས་ཡོངས་རྫོགས་ཀྱི་དངོས་གྲུབ་ཐོབ་པར་བསམ།  ཡང་འབྲུ་གསུམ་གྱི་རྣམ་པར་བསྡུས་ནས་རྟེན་རྫས་ཐམས་ཅད་ལ་ཐིམ་པས་འབར་འཁྲབ་ཁོལ་ཞིང་དྲི་བཟང་དང་དུ་བ་སོགས་བྱུང་བར་བསམ་ལ་འབྲུ་བཅུ་བདུན་པ་ཉིད་བཟླའོ།  །དེའང་རྩ་སྒྲུབ་ལས།  དེ་ལྟར་འོད་ཟེར་སྤྲོ་བསྡུ་མ་ཡེངས་པར་ཞག་སུམ་ཅུ་ཕྲག་གསུམ་མམ་མཚན་རྟགས་མ་བྱུང་གི་བར་འབད་པས༔  རྟགས་དང་ཡོན་ཏན་བསམ་གྱིས་མི་ཁྱབ་པ་འབྱུང་སྟེ༔  རབ་རྣམ་སྨིན་གྱི་ལུས་འདི་ལྷར་འགྱུར་བའམ༔  འབྲིང་དུ་ཞལ་མཐོང་ལུང་སྟོན་གསུང་དང་ཆོས་སྟོན་པ༔  ངག་བདེན་པ་འགྲུབ་པ་རྣམས་འབྱུང་༔  ཐ་མ་རྨི་ལམ་དུ་ཞལ་མཇལ༔  དགྲ་བགེགས་ཚར་བཅད་ཕྲིན་ལས་ཐོགས་མེད་དུ་འགྲུབ་པར་འགྱུར་རོ༔  དེ་ཚེ་སྒྲུབ་ཕུར་རྣམས་སྤྱི་བོ་མགྲིན་པ་སྙིང་ག་གསུམ་དུ་གཏུགས་ {{TibChung|[49b]}} ཏེ༔  སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་ཐོབ་པར་བསམ༔  ཐོབ་ཀྱང་ངེས་པར་འཐོབ་པ་ཡིན་ནོ༔  ཞེས་གསུངས་པ་དང༌།  དེར་མ་ཟད་གྲུབ་པའི་རྟགས་ཕུར་བུ་འབར་ཞིང་མེ་ལྟར་འབར་ན་རིག་འཛིན་གྱི་རྒྱལ་པོར་འགྱུར་བ་དང༌།  སངས་རྒྱས་ཀྱི་ཞལ་མཐོང་བ་སོགས་འགྱུར།  འབྲིང་དུ་བ་བྱུང་ན་མི་སྣང་བ་སོགས་དང༌།  དྲོ་བར་གྱུར་ན་རྐང་མགྱོགས་སོགས་ཀྱི་དངོས་གྲུབ་ཐོབ་པར་གསུངས་མོད།  དེ་ལྟར་མ་འགྲུབ་ནའང་།  ཐ་མ་ཞི་རྒྱས་སོགས་ལས་ཕྲན་ཚེགས་རྣམས་བཏབ་པ་ཙམ་གྱིས་འགྲུབ་པར་འགྱུར་རོ།  །དུས་བཤད་མ་ཐག་པ་ལྟར་ལ།  གྲངས་བདུན་འབུམ་ཉི་ཁྲི་གཙོར་བཟུང་ངོ༌།  །གསུམ་པ་ལས་སྦྱོར་ནི།  སྒྲུབ་པ་ཆེན་པོའི་ཡན་ལག་དངོས་གྲུབ་ལེན་པ་སྟེ།  དེའང་གྲུབ་པའི་མཚན་མ་མཐོང་བའམ་དུས་གྲངས་རྫོགས་ནས་དངོས་གྲུབ་ཀྱི་རྫས་བསགས་པ་ནི།  མཆོད་གཏོར་བཟང་དུ་བཤམ།  གཏའ་གཏོར་རྙིང་པ་ཁ་གསོ།  བྷཉྫ་མཚན་ལྡན་དུ་ཆང་བཟང་པོ་ལ་ཨ་མྲྀ་ཏ་མངར་གསུམ་བཏབ་པ་ཨོཾ་ཨཱཿཧཱུཾ་གིས་བདུད་རྩིར་བྱིན་གྱིས་བརླབས་ལ་བཞག    །སྣོད་བཟང་པོར་ཕྱེ་མར་ཨ་མྲྀ་ཏ་དང་སྤོད་ཀྱིས་བྲན་པ་ལས་དངོས་གྲུབ་ཀྱི་རྫས་དབུས་སུ་རིན་ {{TibChung|[50a]}} ཆེན་འབར་བའི་ནང་དུ་འདོད་དོན་གྱི་གསོལ་བྱང་བཅུག་པ།  དེའི་ཤར་དུ་འབྲང་རྒྱས་ཟླུམ་པོ།  ལྷོར་གྲུ་བཞི།  ནུབ་ཏུ་ཟླ་གམ།  བྱང་དུ་ཟུར་གསུམ་རྣམས་བཀོད།  རིལ་བུ་དང་བདར་བུ་ཅི་རིགས་པས་ཟླུམ་ཐབས་སུ་བསྐོར་ཞིང༌།  ཚེ་འབྲང་དང་ཚེ་ཆང་ཡང་བཤམས།  ནུབ་ཐ་མའི་ཐོར་ཐུན་ལ་སྔོན་འགྲོ་ནས་བརྩམས་བཟླས་པའི་བར་སྔར་གྱི་དཀྱུས་བཞིན་དང༌།  ཚོགས་བསྒྲལ་བསྟབ་ཀྱི་བར་ལས་གཞུང་བསྲང་རྗེས།  ཡོན་ཏན་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི།  བདག་དཔལ་ཆེན་པོ་ཡབ་ཡུམ་དུ་གསལ་བའི་ཡབ་ཀྱི་གསང་གནས་ཟླ་བ་ལ་རྡོ་རྗེ་རྩེ་ལྔ་པ།  སྡུད་བྱེད་ཀྱི་སྙིང་པོ་བུ་གར་ཨོཾ་དཀར་པོས་མཚན་པ།  ཡུམ་གྱི་མཁའ་པདྨ་འདབ་བརྒྱད་ཀྱི་ལྟེ་བར་ཨེ་གྲུ་གསུམ་གྱི་དབུས་སུ་འབེབས་བྱེད་ཀྱི་སྙིང་པོ་ཨེ་དམར་པོས་མཚན་པར་བསམ་ལ།  མཁའ་གསང་སྦྱར་ཏེ་སྙོམས་པར་ཞུགས་པས་ཡུམ་གྱི་དུང་ཁང་ན་ཁྲག་འཐུང་རིགས་ལྔ་ཡབ་ཡུམ་ཚོན་གང་བ་བཞུགས་པ་རྣམས་བསྐུལ།  སྙོམས་པར་ཞུགས་པས་ཡབ་ལྔའི་བྱང་སེམས་མུ་ཏིག་དཀར་པོ།  ཡུམ་ལྔའི་དྭངས་མ་མཚལ་ལྟ་བུ་རྩ་དབུ་མ་ནས་བྱུང༌།  ཡུམ་གྱི་མཁར་བབས་དཀར་དམར་འདྲེས་ནས་དངོས་གྲུབ་ཀྱི་རང་བཞིན་དུ་བསྐྱིལ་བ་དེ་ཨོཾ་ཨཱཿཧཱུཾ་གསུམ་དུ་ {{TibChung|[50b]}} གྱུར་པ་བདག་ཉིད་ཀྱི་རྡོ་རྗེའི་ནང་དུ་རྔུབས་ཏེ་ཐུགས་སྲོག་ཧཱུཾ་ལ་ཐིམ།  ཐུན་མོང་གི་ཚེ་བསོད་དཔལ་གྲགས་རྒྱས།  སྣང་བ་དབང་དུ་འདུས།  གཟི་བརྗིད་འོད་དུ་འབར།  ལོ་བཅུ་དྲུག་གི་ན་ཚོད་དུ་གྱུར།  མཆོག་གི་དངོ ཧཱུཾ་སརྦ་སིདྡྷི་ཨཱཿཞེས་བཏགས་པ་བརྒྱ་སྟོང་སོགས་དྲག་ཏུ་བཟླ།  མཐར་ཕྲེང་བ་ལག་གཡས་སུ་ཐོགས།  གཡོན་པའི་མཛུབ་མོ་དང་མཐེའུ་ཆུང་བསྒྲེང༌།  གུང་སྲིན་མཐེ་བོང་སྦྱར་བ་རྟ་མགོའི་ཕྱག་རྒྱ་བྱས་ཏེ།  ཐུགས་སྲོག་འོད་ཟེར་གྱིས་བསྐུལ་བས་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་དངོས་གྲུབ་ཐམས་ཅད་དང༌།  ཁྱད་པར་དུ་དཀྱིལ་འཁོར་ལྷ་ཚོགས་རྣམས་ཀྱི་བྱིན་རླབས་མཆོག་དང་ཐུན་མོང་ཡིད་ལ་ཅི་འདོད་པ་ཐམས་ཅད་དངོས་གྲུབ་ཀྱི་རྫས་ལ་དྲག་ཏུ་ཐིམ་པས་རྫས་རྣམས་འདོད་རྒུ་འབྱུང་བའི་རྒྱ་མཚོ་ཆེན་པོར་གྱུར་པར་བསམ་ལ།  ཨོཾ་བཛྲ་ཀཱི་ལི་ཀཱི་ལ་ཡ༔  ཛཿཧཱུཾ་བཾ་ཧོཿ ཀཱ་ཡ་སིདྡྷི་ཨོཾ༔  ཝཱཀ་སིདྡྷི་ཨཱཿཙིཏྟ་སིདྡྷི་ཧཱུཾ༔   སརྦ་སིདྡྷི་ཧྲཱིཿ ཞེས་བཟླས་པས་རྫས་རྣམས་ལ་རབ་འོད་འབར།  འབྲིང་ཁོལ།  ཐ་མ་རླངས་སམ་དྲི་བྱུང་བའམ།  གལ་ཏེ་དེ་ཙམ་མ་བྱུང་ནའང་ཐོར་ {{TibChung|[51a]}}  ཐུན་གྱི་མཐའི་སྐྱ་རེངས་ཤར་བ་དང་དངོས་གྲུབ་བླང་སྟེ།  ཀ་པཱ་ལ་མཚན་ལྡན་དུ་ཁྲག་ཆང་ཨ་མྲྀ་ཏ་དང་མངར་གསུམ་སྦྱར་བ་ཨོཾ་ཨཱཿཧཱུཾ་གིས་བདུད་རྩིར་སྦར་བ་ཐོགས་ཏེ།  ཧཱུཾ།  འཆི་མེད་བདུད་རྩི་སྨན་གྱི་བཅུད༔  ཉོན་མོངས་གདུང་བ་སེལ་བའི་མཆོག༔  ཛ་གད་རཀྟའི་མཆོད་པ་འདི༔  དཀྱིལ་འཁོར་ལྷ་ཚོགས་རྣམས་ལ་འབུལ༔  ཞེས་ཁྲག་ཆང་མཐེབ་སྲིན་གྱིས་འཐོར་ཞིང་སོ་སོའི་མཚན་སྔགས་མཐར།  མ་ཧཱ་པཉྩ་ཨ་མྲྀ་ཏ་ཁཱ་ཧི།  མ་ཧཱ་རཀྟ་ཁཱ་ཧི།  ཞེས་བཏགས་པས་མཆོད།  དངོས་གྲུབ་ཀྱི་རྫས་ཐོགས་ལ།  ཧཱུཾ༔  དགོངས་ཤིག་རྡོ་རྗེ་ཕུར་པའི་ལྷ༔  རིག་འཛིན་མཁའ་འགྲོ་དམ་ཅན་ཚོགས༔  དཔང་གྱུར་ཐམས་ཅད་དགོངས་སུ་གསོལ༔  དང་པོ་བསྙེན་ཅིང་བར་དུ་བསྒྲུབ༔  བསྐྱེད་རྫོགས་གཉིས་ཀྱི་ལས་གཞུང་བསྲང་༔  སྨིན་གྲོལ་གཉིས་ཀྱིས་རྒྱུད་ཀྱང་སྦྱངས༔  ཞག་དུས་གྲངས་དང་རྟགས་ཀྱང་ཐེམས༔  དེང་སང་སྐྱ་རེངས་དང་པོ་ཤར༔  རྡོ་རྗེ་སྲིན་པོའི་ནམ་ལངས་ཉེ༔  འདོད་རྒུའི་དངོས་གྲུབ་རིན་ཆེན་གཏེར༔  ད་ནི་འབྱུང་བའི་དུས་ལ་བབ༔  རྡོ་རྗེ་ཕུར་པའི་ལྷ་ཚོགས་རྣམས༔  ཐབས་ཀྱི་སྤྱོད་པས་འགྲོ་དོན་དུ༔  བྱམས་དང་སྙིང་རྗེ་གང་འདུལ་བའི༔  སངས་རྒྱས་ཕྲིན་ལས་རྫོགས་མཛད་ནས༔  སྐུ་གསུང་ཐུགས་ཡོདནཕྲིན་ལས་ཀྱི༔  དབང་ {{TibChung|[51b]}} དང་དངོས་གྲུབ་བདག་ལ་སྩོལ༔  ལྷ་དང་སྐལ་བ་མཉམ་པར་ཤོག༔  ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་སརྦ་སིདྡྷི་ཕལ་ ཧོཿ    ཞེས་བརྗོད་ལ་སྒྲུབ་རྟེན་གནས་གསུམ་དུ་གཏུག་ཅིང་དམ་རྫས་རྣམས་ལ་ལོངས་སྤྱད་ནས།  ལྷ་དང་དངོས་གྲུབ་འོད་དུ་ཞུ་བ་བདག་གི་ཐུགས་སྲོག་ལ་ཐིམ་པས་དབྱེར་མེད་དུ་གྱུར་པར་བསམ།  དེའི་ཚེ་སྒྲུབ་རྟེན་ཕུར་བུ་རྣམས་འཕར་ཞིང་འབར་བ་དང་དུ་བ་སོགས་ཀྱི་རྟགས་བྱུང་ན་ཐེ་ཚོམ་མེད་པར་ལྷ་ལ་ཕྱག་བྱས་ནས་གཡས་པས་བླངས་ཏེ་དངོས་གྲུབ་བླང་པ་ཡིན་མོད་ཀྱི།  རྟགས་མཚན་མངོན་དུ་མ་བྱུང་ནའང་འདིར་རང་གི་གནས་གསུམ་དུ་གཏུག་ཅིང་རྡོ་རྗེ་གསུམ་དུ་ལྷུན་གྱིས་གྲུབ་པར་གསོལ་བ་བཏབ།  སྒྲུབ་གཏོར་ལྷར་གསལ་བའང་གནས་གསུམ་དུ་རེག་ཅིང་དབང་བླངས་ནས་ལྷ་ཞུ་བའི་གཏོར་རྫས་བདུད་རྩིར་མོས་ཏེ་མྱང་བས་རྩ་ཁམས་ཐམས་ཅད་ཡེ་ཤེས་ཀྱིས་ཁྱབ་པར་བསམ།  དངོས་གྲུབ་ཀྱི་རྫས་ཆ་བཞིར་བགོས་པའི་གཅིག་བླ་མ་དང༌།  གཅིག་རིག་འཛིན་ལ་འབུལ།  གཅིག་བདག་གིས་རོལ།  གཅིག་སྒྲུབ་གྲོགས་ལ་སྟེར།  དེ་ནས་ནམ་ལངས་པ་དང་རང་གཞུང་གི་རྒྱུན་གཏོར་དང་སྲུང་མའི་གཏོར་ཆོག་རྣམས་རྒྱས་པར་བྱ་ཞིང༌།  དེ་ཉིན་ལྷག་ཆོག་དང་སྦྲེལ་ཏེ་སྔར་གྱི་ལྷག་མ་རྣམས་ཀྱང་ཕྱི་རོལ་དུ་བཏང་ལ་ {{TibChung|[52a]}} སྨོན་ལམ་དང་བཟོད་གསོལ་བྱ།  སྒྲུབ་གཏོར་ཆ་གསུམ་དུ་བགོས་པའི་ཆ་གཅིག་སྒྲུབ་ཁང་གི་འོག་ཏུ་སྒྲུབ་གཞུང་ལྟར་གཏེར་དུ་སྦ།  ཆ་གཅིག་སྦྱིན་སྲེག་གི་དུས་རྫས་ལ་འབུལ།  ཆ་གཅིག་གཏོར་མ་གཞན་རྣམས་དང་བསྡེབ་ནས་ཕྱིར་བསྣུར་ཏེ་ཐ་ཚིག་གི་ཆད་མདོ་བསྒྲག་ཅིང་གཏོར་ཟོར་འཕང༌།  བརྟན་མ་བསྐྱངས་ལ་དཔལ་གྱི་བྲོ་བརྡུང༌།  ཚེ་འགུགས་བྱ།  དེ་ནས་དཀྱིལ་འཁོར་པ་ལ་གཏང་རག་གི་མཆོད་བསྟོད་རྒྱས་པར་བྱས་མཐར་རྡུལ་ཚོན་ཡིན་ན་ཡེ་ཤེས་པ་གཤེགས་སུ་གསོལ།  རས་བྲིས་ཡིན་ན་བརྟན་བཞུགས་བྱ།  དམ་ཚིག་པ་སྲུང་འཁོར་དང་བཅས་པ་བསྡུ་ཞིང་ཐུན་མཚམས་ཀྱི་ལྷར་ལངས་པས་རྟག་ཆད་ཀྱི་མཐའ་བསལ་ནས་བསྔོ་སྨོན་དང་ཤིས་པ་བརྗོད་པས་མཐའ་བརྒྱན།  བསྙེན་མཚམས་ཀྱི་ཁོངས་དེ་གར་ཞི་བའི་སྲེགས་བླུགས་ཀྱང་བསྙེན་པའི་བཅུ་ཆའི་གྲངས་ལོངས་སུ་བསགས་དགོས་པ་ལས།  དེའི་ཆོ་ག་རྒྱས་པ་ལོགས་སུ་ཤེས་ལ།  འདིར་ཁ་སྐོང་འཇུག་པ་དེའི་མེ་མཆོད་སྤྲོས་པ་བསྡུ་བར་འདོད་ན།  མདུན་དུ་ཞི་བའི་ཐབ་དཀྱིལ་སྤྱི་ལྟར་རམ་མེ་སྣོད་སོལ་མེས་བཀང་བས་ཀྱང་རུང༌།  ཡམ་ཤིང༌།  མར་ཁུ།  ཏིལ་དང་ཡུངས་དཀར་མེ་ཏོག་འབྲུ་སྣ་དཀར་པོའི་ {{TibChung|[52b]}} རིགས་འདུ་བྱ།  རྫས་རྣམས་འབྲུ་གསུམ་ཞུ་བ་ལས་བྱུང་བའི་ཟག་མེད་ཀྱི་བདུད་རྩིར་གྱུར་པར་བསམ་ལ།  ཨོཾ་ཨཱཿཧཱུཾ་ལན་བདུན་གྱིས་རློབ།   མེ་ཐབ་བསང་སྦྱང༌།  སྟོང་པའི་ངང་ལས་མདུན་དུ་ཧཱུཾ་ཡིག་ལས་ཞི་བའི་ཐབ་ཁུང་ཟླུམ་པོ་དཀར་པོ་མཚན་ཉིད་ཐམས་ཅད་ཡོངས་སུ་རྫོགས་པར་གསལ་གདབ།  ཨགྣེ་ཛྭ་ལ་རཾ་གྱིས་མེ་དུ་བ་མེད་པར་འབར་བ་ཐབ་ཏུ་བཞག་ནས།  མེའི་དབུས་སུ་དཔལ་ཆེན་རྡོ་རྗེ་གཞོན་ནུ་རང་རྩལ་སྤྲུལ་པའི་འཁོར་ཚོགས་དང་བཅས་པ་སྐད་ཅིག་གིས་སད་པར་མོས།  གཙོ་འཁོར་ཐམས་ཅད་ཀྱི་བ་སྤུའི་ཁུང་བུ་ནས་འོད་ཟེར་དཀར་པོ་ཟླ་བའི་བདུད་རྩི་ལྟ་བུ་མཁའ་ཁྱབ་ཏུ་སྤྲོ་བ་དང་བསྡུ་བའི་སྒོ་ནས་ཞི་བའི་ལས་རབ་འབྱམས་བསྒྲུབ་པར་བསམ་ལ།  རྩ་སྔགས་འབྲུ་བཅུ་བཞི་པའི་ཤམ་དུ།  ཛྭ་ལ་རཾ་སརྦ་ཀརྨ་ཀུ་རུ་ཧོཿ ཞེས་བཏགས་པ་ཁོ་ནས་བརྒྱ་སྟོང་སོགས་འབུལ་ཞིང༌།  མཚམས་སུ།  རྣལ་འབྱོར་པ་བདག་གི་ནད་གདོན་སྡིག་སྒྲིབ་སྔགས་ཀྱི་ལྷག་ཆད་ལ་སོགས་པ་མི་མཐུན་པའི་ཉེས་པ་ཐམས་ཅད་ཤཱིནྟཾ་ཀུ་རུ་སྭཱ་ཧཱ།  ཞེས་སྤེལ།  མཐར་རླུང་ནང་དུ་འཇུག་པ་དང་ལྷན་ཅིག་མེ་ལྷ་རང་གི་སྙིང་གར་བསྡུ།  ཚུལ་དེ་ལྟ་བུས་ཁ་སྐོང་གྲངས་རྫོགས་པ་ན།  རྒྱལ་ཐོ་ལ་མཆོད་བསྟོད་སྔར་བཞིན་ཕུལ་ནས་གཤེགས་སུ་གསོལ་ལ་ཐོ་ {{TibChung|[53a]}}  འགྲོལ།  དེ་ནས་སྒྲུབ་ཁང་དུ་ཉེ་འཁོར་མཆེད་གྲོགས་སོགས་དམ་ལྡན་དང་འཕྲད་དེ་རིམ་གྱིས་ཕྱི་རོལ་དུ་བག་གསེང་ཞིང༌།  ཞག་ཁ་ཡར་ཐག་རིང་དུ་མི་འགྲོ་བར་གནས་སྲུང་བ་བཅས་ཀྱིས་ལེགས་པར་གྲུབ་བོ།  །འདི་ནི་ནང་སྤྲོས་བསྡུས་དཔའ་བོ་གཅིག་སྒྲུབ་ཀྱི་ཚུལ་ཉིད་ཡིན་ནོ།  །གཞན་དུ་གསང་བ་སྤྲོས་མེད་ཏིང་ངེ་འཛིན་སེམས་ཀྱི་སྒྲུབ་པ་ནི།  བསྙེན་པ་བདག་བསྐྱེད་ལུས་དཀྱིལ་ལ་བརྟེན་པ་ཡིན་པས་སྤྲོས་པ་གཞན་མི་དགོས་ཤིང༌།  བསྙེན་སྒྲུབ་སྦྲེལ་མར་འདོད་ན་རས་བྲིས་སམ་ཚོམ་བུའི་དཀྱིལ་འཁོར་གྱི་དབུས་སུ་གཙོ་ཕུར་ཙམ་བཀོད།  མཆོད་གཏོར་སོགས་གང་འབྱོར་བཤམས།  སྔོན་རྗེས་ཀྱི་ལས་རིམ་མདོར་བསྡུས་ལས་བྱང་གིས་ཁོག་ཕུབ་ལ།  ཕྲིན་ལས་རྒྱུན་གྱི་རྣལ་འབྱོར་བཞིན་ཉམས་སུ་ལེན།  སྤྲོས་བསྡུས་སྤྲོས་མེད་གང་གི་སྐབས་སུའང་བསྙེན་སྒྲུབ་ཀྱི་མཐར་ལས་བཞིའི་དམིགས་བཟླས་ཁྱད་པར་དུ་བྱ་བར་འདོད་ནའང་སྤྱི་ལྟར་སྦྱོར་ཞིང༌།  རྗེས་ཀྱི་བྱ་བ་ནི་གོང་གི་འགྲོས་ཀྱིས་ཤེས་སོ།  །འདི་དག་ནི་བདག་དོན་བྱང་ཆུབ་ནར་མའི་སྒྲུབ་པ་གང་ཟག་གཅིག་གིས་ཉམས་སུ་ལེན་པར་བྱ་བ་ཁོ་ན་སྟེ།  གཞན་དུ་ཕྱི་ལྟར་སྤྲོས་བཅས་ཚོམ་བུ་ཚོགས་སུ་སྒྲུབ་པའི་ཚུལ་ནི་དེ་ཉིད་ཀྱི་ཁོག་ {{TibChung|[53b]}} དབུབ་ལོགས་སུ་བཤད་པ་ལྟར་རོ།  །དེ་རྣམས་ནི་སྟོད་ལས་བྱང་ཆུབ་སྒྲུབ་པའི་རིམ་པའོ།  །ཡང་བདག་གཞན་ཐུན་མོང་དུ་བྱང་ཆུབ་སྒྲུབ་ཅིང་བར་ཆད་འདུལ་ཕྱིར་སྟོད་ལས་སྨད་ལས་སྦྲེལ་ནས་བསྙེན་སྒྲུབ་ལས་གསུམ་ཡོངས་རྫོགས་ཀྱི་ལུགས་དང༌།  གདུག་པ་ཅན་བསྒྲལ་ཕྱིར་གློ་བུར་ཅོག་རྡུང་རལ་གྲི་ཕྱུངས་རྡེག་ཏུ་སྒྲུབ་པ་དང༌།  ཤིན་ཏུ་བསྡུས་པ་བསྙེན་སྒྲུབ་ཆིག་ཆོད་དུ་བྱེད་པར་འདོད་ནའང་མན་ངག་གི་ངེས་པ་ཁོངས་སུ་ཆུད་པས་བློའི་རིམ་པ་དང་འཚམས་པར་ཉམས་སུ་བླང་བར་གཅེས་སོ།  །དེ་དག་གིས་ནི་བསྙེན་ཐབས་ཀྱི་ལག་ལེན་དམར་ཁྲིད་བྱེ་བྲག་ཏུ་བཤད་པ་མདོ་ཙམ་བསྟན་ཟིན་ཏོ།  །རབ་འབྱམས་རྒྱལ་ཀུན་ཕྲིན་ལས་ནུས་པའི་སྟོབས།  །འབར་བའི་ཕྱག་རྒྱར་ཡོངས་སྣང་དཀྱིལ་འཁོར་ཆེ།  །བསྙེན་ཅིང་སྒྲུབ་པའི་མན་ངག་ལག་ལེན་ཁྲིགས།  །དངོས་གྲུབ་རྒྱ་མཚོའི་དགའ་སྟོན་བླ་ན་མེད།  །འདི་བརྗོད་དགེ་བས་འཁོར་དང་འདས་པའི་ཆོས།  །ཐལ་འབྱིན་དགོངས་པས་སྐུ་གསུམ་རོ་མཉམ་པ།  །དཔལ་ཆེན་ཁྲག་འཐུང་ཚོམ་བུར་རབ་སྨིན་ཅིང༌།  །ལམ་བཟང་འདིས་ཀྱང་ས་ཆེན་ཀུན་ཁྱབ་ཤོག    །དེ་ལྟར་དཔལ་རྡོ་རྗེ་ཕུར་བུ་བདུདའཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་ {{TibChung|[54a]}} དགའ་སྟོན་ཅེས་བྱ་བ་འདི་ནི།  ལྷག་པའི་ལྷ་འདི་ཉིད་ལས་དངོས་གྲུབ་བརྙེས་པ་བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུའི་སྡེའི་གསུང་གིས་བསྐུལ་བ་བཞིན་རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས།  རྩ་བའི་གཞུང་གི་དགོངས་དོན་ལ་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་མན་ངག་ལེགས་བཤད་ཀྱིས་རྣམ་པར་སྤྲས་ཏེ།  རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་ཐམ་པའི་ཐོག་ཏུ་སོན་པ་དཔལ་གདོང་གི་ལོ་ས་ག་ཉ་བའི་ཤེས་རབ་ཀྱི་ཆའི་རྫོགས་པ་དང་པོ་ཆུ་ཤེལ་གྱི་དབང་པོ་གྲོ་བཞིན་གྱི་དགའ་མ་དང་རྩེ་བའི་འགྲུབ་སྦྱོར་བཟང་པོ་ལ།  ཨེ་ཝཾ་བདེ་ཆེན་ཆོས་འཁོར་གླིང་གི་ཉེ་འདབས་ཕུན་ཚོགས་དགའ་ཚལ་གྱི་བསྟི་གནས་སུ་ལེགས་པར་གྲུབ་པར་བགྱིས་པ་སྟེ།  འདིས་ཀྱང་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་པ་དང༌།  འགྲོ་བ་ཐམས་ཅད་བཅོམ་ལྡན་འདས་དཔལ་ཧེ་རུ་ཀའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག    །སརྦ་དཱ་མངྒལཾ།།  །།}}
འི་གཏོར་མར་བླུག་ནས་ཨོཾ་ཨཱཿཧཱུཾ་གིས་ཤེལ་གྱི་གུར་ཁང་རིན་པོ་ཆེའི་མཆོད་སྡོང་ཟག་མེད་ཀྱི་བདུད་རྩི་མཐའ་ཡས་པར་སྤེལ།   བརྟན་མ་འཁོར་བཅས་མདུན་དུ་སྔར་བཞིན་གནས་པ་ལ་གཏོར་མ་ཕུལ་བས་དེ་རྣམས་སོ་སོའི་འཁོར་གཡོག་བསམ་གྱིས་མི་ཁྱབ་པ་དང་བཅས་ཏེ་གུས་པའི་ཚུལ་གྱིས་དབུ་སྨད་བཞིན་དགྱེས་པ་ཆེན་པོས་གཏོར་མ་བླངས་པ་གསོལ་ཏེ་ཅི་བཅོལ་བའི་ཕྲིན་ལས་བསྒྲུབ་པར་ཁས་བླངས་ནས་རང་གནས་སུ་གཤེགས་པར་བསམ།  བྲོ་བརྡུང་ལ།  སྒྲུབ་པ་ཟབ་མོ་ལ་བར་དུ་གཅོད་པའི་དགྲ་བགེགས་དམ་སྲི་སྒབ་འདྲེ་ཐམས་ཅད་གསེར་གྱི་ས་གཞི་ལ་གཏིང་ཐུག་པའི་ཨེ་གྲུ་གསུམ་གྱི་ནང་དུ་རང་དབང་མེད་པར་བཀུག་པའི་སྟེང་དུ།  གཏོར་གཞོང་རི་རབ་འབར་བས་མནན་པའི་སྟེང་རྒྱ་གྲམ་བརྩེགས་པས་དམིགས་བྱ་རྣམས་བསྐལ་པའི་བར་དུ་འགུལ་མི་ནུས་པ།  དེའི་སྟེང་དུ་དཔལ་ཆེན་པོའི་ཕོ་བྲང་བཏབ་པར་ཁྲོ་བོའི་ཚོགས་འཁོར་དང་བཅས་པས་རྡོ་རྗེའི་གླུ་བླངས་ཤིང་བྲོ་བརྡུངས་པས་སྲིད་པ་གསུམ་པོ་ཡོམ་ཡོམ་ཤིག་ཤིག་ཏུ་གཡོས་ཧེ་རུ་ཀའི་སྟོབས་ཀྱིས་མཐའ་བཀྲོལ་དུ་མེད་པར་བསམ།  རྗེས་ཀྱི་མཆོད་བསྟོད་ནོངས་བཤགས་ཁ་སྐོང་རྣམས་ཀྱི་དམིགས་པ་གོང་བཞིན་དང༌།  བདག་བསྐྱེད་ཀྱི་ཡེ་ཤེས་པ་ནི་ཇི་སྲིད་བྱང་ཆུབ་(35ན)མ་ཐོབ་ཀྱི་བར་དུ་མི་གཤེགས་ཤིང༌།  མདུན་གྱི་སྲས་མཆོག་དང༌།  སྒྲུབ་ཕུར་སྐུ་འབག་རས་བྲིས་སོགས་ཀྱི་ཡེ་ཤེས་པ་རྣམས་རྟེན་དེ་ཉིད་ལ་བརྟན་བཞུགས་བྱ།  ཏིང་ངེ་འཛིན་གྱི་དཀྱིལ་འཁོར་རྟེན་དང་བརྟེན་པའི་སྣང་ཆ་ཐམས་ཅད་རིམ་བཞིན་བསྡུས་ནས་ན་དཱ་མི་དམིགས་སྟོང་ཉིད་དུ་ཡལ་བར་བསམ་ལ་བསྒོམ་བྱ་སྒོམ་བྱེད་ཀྱི་བློ་རྟོག་འཛིན་རྩོལ་ལས་འདས་པ་རིག་སྟོང་འོད་གསལ་བདེ་བ་ཆེན་པོའི་ངང་ལ་ཅི་གནས་སུ་མཉམ་པར་བཞག    །དེ་ལས་ལྡང་བ་ན་འགྲོ་བའི་དོན་དུ་ཡེ་ཤེས་སྒྱུ་མའི་སྐུར་བཞེངས་པར་བྱའོ་སྙམ་པས།  སླར་ཡང་སྐད་ཅིག་གིས་རང་ཉིད་རྡོ་རྗེ་གཞོན་ནུ་ཡབ་ཡུམ་གྱི་སྐུར་གསལ་བའི་གནས་གསུམ་འབྲུ་གསུམ་གྱིས་མཚན་པ་དང༌།  སྣོད་བཅུད་ཐམས་ཅད་དཀྱིལ་འཁོར་གསུམ་གྱི་རང་བཞིན་དུ་མོས་ལ་ཀཱི་ལ་ཡའི་སྔགས་ཀྱིས་སྐུ་གསུང་ཐུགས་གསོ།  ལུས་ལ་རྡོ་རྗེའི་གོ་ཆས་ཞུ་ལུགས་སུ་གཡོགས་ཤིང་མཚོན་ཆ་ལྔ་དང་མེ་དཔུང་གི་ཀློང་ན་བཞུགས་པས་བར་ཆད་གང་གིས་ཀྱང་གླགས་མི་རྙེད་པར་བསམ།  དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོས་ལ་སྨོན་ལམ་ནན་ཏན་དུ་གདབ།  ཤིས་པ་བརྗོད་པས་མཐའ་བརྒྱན་ཏེ་སྣང་གྲགས་རྟོགས་ཚོགས་ལྷ་སྔགས་ཆོས་ཉིད་ཀྱི་རོལ་པར་ལམ་དུ་ཁྱེར་བས་སྒོ་གསུམ་དོན་ཡོད་པར་བྱའོ།  །(35བ)དེ་དག་ནི་བསྐྱེད་པའི་རིམ་པའི་རྣལ་འབྱོར་གྱི་རྩ་བ་ལས་བྱང་གི་སྒོམ་དོན་སྙིང་པོ་ཙམ་ཞིག་སྟེ།  རྟགས་མཚན་དུས་དང་གྲངས་ཚད་སོགས་འོག་ཏུ་འཆད་པར་འགྱུར་ལ།  བསྲུང་བའི་དམ་ཚིག་འབུམ་ནག་ལས་བཤད་པ་བཞིན་ཐུན་མོང་སྤྱི།  སྒྲུབ་པ་ཁྱད་པར།  སྤྱོད་པ་རྒྱུན།  གལ་མདོ་ངེས་པའི་དམ་ཚིག་སོགས་ལ་ནན་ཏན་དུ་བསླབ་བོ།  །དེ་ལྟར་གཉེན་པོ་རྒྱུ།  ཁྱད་པར་ལས།  སྒོམ་སྒྲུབ་སྤྱོད་པའི་སྒོ་ནས་ཐུགས་རྗེའི་ཕུར་པ་ཁམས་གསུམ་སེམས་ཅན་ལ་གདབ་པ་སྟོད་ཀྱི་ལས།  ལས་ཀྱི་གཟེར་ཁ་དྲུག་གི་སྒོ་ནས་མཚན་མའི་ཕུར་པ་དགྲ་བགེགས་ལ་གདབ་པ་སྨད་ཀྱི་ལས་གཉིས་ཀྱི་སྒོ་ནས་རིམ་པ་དང་པོ་བསྐྱེད་པའི་ལམ་ཡོངས་སུ་རྫོགས་པ་དང༌།  རིམ་པ་གཉིས་པ་རྫོགས་རིམ་ལ་འཇུག་པ་ན།  སྟེང་སྒོ་འཁོར་ལོ་ལྔ་པ་འབར་འཛག་བཟུང་བཟློག་ལ་བརྟེན་ཅིང༌།  འོག་སྒོ་ཁམས་གསུམ་རོལ་པ་བསྙེན་སྒྲུབ་ཡན་ལག་བཞི་ལ་བརྟེན་ནས་བྱང་ཆུབ་སེམས་ཀྱི་ཕུར་པ་ཡུམ་གྱི་མཁའ་ལ་གདབ་པ་ཐུན་མོང་པའི་གདམས་ངག་དང༌།  ལྟ་བས་ཐག་བཅད།  སྒོམ་པས་ཉམས་སུ་བླང༌།  སྤྱོད་པས་བོགས་དབྱུང་བ་གསུམ་གྱི་སྒོ་ནས་རིག་པ་ཡེ་ཤེས་ཀྱི་ཕུར་པ་ཆོས་ཀྱི་དབྱིངས་སུ་གདབ་པ་ཐུན་མོང་མ་ཡིན་པ་དང༌།  ཁྱད་པར་གྱི་རྫོགས་རིམ་ཨ་ཏིའི་མན་ངག་ལྷུན་(36ན)གྲུབ་ཐོད་རྒལ་གྱི་རྣལ་འབྱོར་ལ་ཉམས་ལེན་མཐར་ཕྱིན་པར་བྱའོ།  །གསུམ་པ་གྲུབ་པ་འབྲས་བུའི་རྣམ་བཞག་ལ་གཉིས།  གནས་སྐབས་དང་མཐར་ཐུག་གོ  །དང་པོ་ལ་ཉམས་དང་དྲོད་ཚད་རྟགས་དང་ཡོན་ཏན་རྣམས་ལས།  ཉམས་ནི།  བསྐྱེད་རྫོགས་གང་ལ་བསླབ་ཀྱང་འདྲ་སྟེ།  དེ་དང་དེའི་ཏིང་ངེ་འཛིན་ལ་གཡོ་ཐོབ་གོམས་བརྟན་མཐར་ཕྱིན་པའི་ཉམས་ལྔ་རིམ་པར་སྐྱེ་བའོ།  །དྲོད་ལ།  ཕྱིའི་དྲོད་ལུས་ཡོད་དུ་མི་ཚོར་བ།  ནང་གི་དྲོད་དབུགས་ཀྱི་འགྱུ་བ་མི་ཚོར་བ།  གསང་བའི་དྲོད་བདེ་བ་ཁོངས་ནས་འཆར་བའོ།  །ཡང་ན་ལུས་བདེ།  ངག་གསལ།  སེམས་མི་རྟོག་པའི་དྲོད་དོ།  །ཚད་ལ།  མར་མེ་རླུང་གིས་མ་བསྐྱོད་པ་ལྟར་གསལ་བ།  རྒྱ་མཚོའི་གཏིང་ལྟར་མི་གཡོ་བ།  ཤིང་བལ་གྱི་འདབ་མ་ལྟར་ཡང་ཞིང་འཇམ་པའོ།  །རྟགས་ལ།  རབ་ལྷའི་ཞལ་མཐོང་བ།  འབྲིང་ལུང་སྟོན་པ།  ཐ་མ་མ་མོ་དང་མཁའ་འགྲོ་འདུ་བ་སོགས་དངོས་ཉམས་རྨི་ལམ་ཅི་རིགས་པར་འབྱུང་བ་དང༌།  ལུས་དྲི་ཞིམ་ཞིང་སྲོག་ཆགས་མི་འབྱུང་བ་སོགས་སོ།  །ཁྱད་པར་བསྙེན་སྒྲུབ་ཀྱི་དུས་སུ་སྒྲུབ་རྫས་ཀྱི་ལྷ་སྐུ་བཞད་ཅིང༌།  ཕུར་པ་འཁྲབ་པ།  སྨན་རཀ་ཁོལ་བ།  མར་མེ་འབར་བ་སོགས་དང༌།  གཞན་ཡང་སྨིག་རྒྱུ་ལ་སོགས་པའི་མཐོང་ཉམས་(36བ)དང༌།  སྣང་བ་སྒྱུ་མ་ལྟར་ཤེས་ཤིང་སྣང་གྲགས་འགྱུ་གསུམ་ལྷ་སྔགས་འོད་གསལ་གྱི་འཁོར་ལོར་འཆར་བ་དང༌།  ཐ་ནའང་རྨི་ལམ་དུ་རི་བོར་འཛེག་པ།  ཆུ་ཆེན་བརྒལ་བ།  ཉི་ཟླ་ཤར་བ་སོགས་སྤྱི་དང་མཐུན་པར་འབྱུང་བའོ།  །ཡོན་ཏན་ལ།  ཐུན་མོང་གི་ལས་ཕྲན་ཚེགས་རྣམས་ནི་བསྐྱེད་རིམ་ལྷའི་དམིགས་པ་ལ་ཡིད་ཤུགས་དྲག་པོ་དང་ལྡན་ན་སྔོན་དུ་བསྙེན་པ་མ་སོང་ཡང་འགྲུབ་པར་བཤད་ཅིང༌།  གཞན་དུ་ཐུན་མོང་བ་འཇིག་རྟེན་པའི་དངོས་གྲུབ་རྣམས་ནི་བསྐྱེད་རིམ་མཐར་ཕྱིན་པའི་ཚོགས་སྒྲུབ་ཀྱི་སྤྱོད་པའི་ཉེ་རྒྱུ་ལ་བརྟེན་ནས་ཐོབ་ལ།  དེ་ལའང་དམན་པ་ཞི་རྒྱས་དབང་སོགས་ལས་སྣ་ཚོགས་དང༌།  མཆོག་མཁའ་སྤྱོད་དང་ས་སྤྱོད་རྐང་མགྱོགས་ལ་སོགས་པ་འགྲུབ་ཅིང༌།  ཚར་གཅོད་རྗེས་འཛིན་གྱི་སྒོ་ནས་འགྲོ་དོན་ཐོགས་པ་མེད་པར་བྱེད་པའོ།  །གཉིས་པ་མཐར་ཐུག་གི་འབྲས་བུ་ནི།  ཟུང་འཇུག་གི་རྣལ་འབྱོར་ལ་གོམས་པའི་མཐུས་དགྲ་གསུམ་པོ་སོད་དེ།  ང་བདག་གི་ཞེན་པ་ལོག་པས་གསང་དགྲ་གསད།  དེས་ཕུང་པོར་ཞེན་པ་བཅོམ་སྟེ་ནང་དགྲ་གསད།  དེ་ཙ་ན་རྩོལ་བ་མེད་པའི་ཕྲིན་ལས་དྲག་པོས་ཕྱིའི་དགྲ་གསོད་པའོ།  །དེ་ལྟར་དགྲ་གསུམ་སོད་པས་བདུད་བཞི་ཡང་ཆོམས་ཏེ།  ཕུང་ལྔ་ལྷར་དག་(37ན)པས་ཕུང་པོའི་བདུད་བཅོམ།  རང་རིག་པའི་རྩལ་གྱིས་ཉོན་མོངས་པ་ལྔ་ཡེ་ཤེས་ལྔར་དག་པས་ཉོན་མོངས་པའི་བདུད་བཅོམ།  དེ་ལ་འདོད་ལྷའི་བར་ཆད་ཀྱིས་མི་ཚུགས་ཤིང་སེམས་ཉིད་སྐྱེ་ཤི་ལས་གྲོལ་བས་ལྷའི་བུའི་བདུད་དང་འཆི་བདག་གི་བདུད་བཅོམ།  དུས་དེར་འགྲོ་དྲུག་གི་སྡུག་བསྔལ་ཡང་རང་སེམས་ཀྱི་ཆོ་འཕྲུལ་དུ་རྟོགས་པས་འགྲོ་དྲུག་གི་གཡངས་ཆོད་ཅིང༌།  རིག་རྩལ་འབྱོངས་པས་མཚན་མ་ཐམས་ཅད་ཟིལ་གྱིས་ནོན་ཏེ་རྣམ་པར་མི་རྟོག་པའི་ཡེ་ཤེས་ལ་དབང་བསྒྱུར།  ས་ལམ་གྱི་སྤངས་རྟོགས་མཐར་ཕྱིན་པ་སྐུ་ལྔ་ཡེ་ཤེས་ལྔའི་བདག་ཉིད་ཟུང་འཇུག་གི་སྐུ་མངོན་དུ་བྱེད་པ་སྟེ།  མདོར་ན་བཤད་རྒྱུད་ལས།  །རྡོ་རྗེ་ཁྲག་འཐུང་ང་ཉིད་ཀྱི།  །ཡི་གེ་ཧཱུཾ་ཙམ་བཟླས་པ་ལའང༌།  །བར་ཆད་ཀུན་གྱི་ས་མི་ཚུགས་ཤིང༌།  །མཚན་མ་འགྲུབ་པར་ཐེ་ཚོམ་མེད།  །རྡོ་རྗེ་ཅན་གྱི་ཞིང་དུ་སྐྱེ།  །ལྷ་ཀླུ་ཀུན་ལ་དབང་བྱེད་འགྱུར།  །འདི་སྒྲུབ་པ་ཡི་གང་ཟག་རྣམས།  །སྔར་ནས་སྦྱངས་པར་ཐེ་ཚོམ་མེད།  །རྩེ་གཅིག་འདི་ལ་བརྩོན་ལྡན་པས།  །འཁོར་བར་མི་ལྡོག་མངོན་འཚང་རྒྱ།  །ཞེས་དང༌།  རྩ་རྒྱུད་རྡོ་རྗེ་ཁྲོས་པ་ལས།  ཚད་མེད་སྙིང་རྗེའི་ཕུར་པ་ནི།  །བྱམས་དང་སྙིང་རྗེ་ཆེན་པོས་གདབ།  །འབྲས་བུ་སྤྲུལ་པའི་སྐུ་ཡང་འཐོབ།  །མ་ཐེབས་རཱུ་དྲ་སྲིན་པོར་གོལ།  །ཞེས་དང༌།  མཚོ་རྒྱལ་གྱིས།  འདི་ལྟར་(37བ) བསྙེན་སྒྲུབ་ལས་སྦྱོར་གསུམ་སྒྲུབ་ཚད་ཐེམས་ནས་ནི༔  ཚེ་འདིར་ཕྲིན་ལས་རྣམ་པ་བཞི་གང་ལ་བརྩམ་པ་འགྲུབ་པ་དང་༔  མཆོག་གི་དངོས་གྲུབ་ཡི་དམ་ལྷ་དང་སྐལ་བ་མཉམ་སྟེ༔  བར་དོ་གསུམ་ལ་ལྷའི་སྣང་བ་ཐོབ་སྟེ༔  ལོངས་སྤྱོད་རྫོགས་པའི་སྐུ་རྡོ་རྗེ་གཞོན་ནུའི་གོ་འཕང་འཐོབ་པར་ཐེ་ཚོམ་མེད་དོ༔  བདག་འདྲ་མཁར་ཆེན་བཟས་མི་བསླུ་བའི་དོན་གྱི་ཐ་ཚིག་གོ༔  ཞེས་གསུངས་པ་ལྟར་རོ།  །དེ་དག་གིས་ཤེས་པར་བྱ་བའི་རྣམ་བཞག་སྤྱིར་བསྟན་པ་མདོ་ཙམ་བཤད་ཟིན་ཏོ།  །
༈ རྩ་བའི་གཉིས་པ་བསྙེན་ཐབས་ཀྱི་ལག་ལེན་བྱེ་བྲག་ཏུ་བཤད་པ་ལ་གསུམ།  བསྙེན་པ།  སྒྲུབ་པ།  ལས་སྦྱོར་རོ།  །དང་པོ་ནི།  བསྙེན་པ་ལ་འཇུག་པའི་སྔ་རོལ་དུ་དཀོན་མཆོག་གི་རྟེན་མཆོད་པ།  གསུང་རབ་བཀླག་པ།  དགེ་འདུན་བསྙེན་བཀུར།  སྭཱཙྪ་གདབ་པ།  སྲོག་བསླུ་བ།  ཉེའུ་འདོན་པ།  ལམ་འཕྲང་བཟོ་བ།  ཆུ་གཏོར་སྦྱིན་གཏོང་སོགས་རང་ཉིད་ཀྱིས་སམ་མ་ལྕོགས་ན་གྲོགས་གཞན་ལ་བཅོལ་ཀྱང་རུང་སྟེ།  རྒྱུད་འབྱོངས་ཤིང་བར་ཆད་མི་འབྱུང་བ་དང༌།  དངོས་གྲུབ་ཀྱི་མཚན་མ་མྱུར་དུ་ཐོབ་པའི་དགོས་པ་ཡོད་པས་རྒྱབ་རིམ་གྱི་དཔུང་ཅི་འགྲུབ་ཏུ་བྱ།  དེ་ནས་ཐོག་མར་གནས་ཁང་གསར་པ་ཡིན་ན་ས་ཆོག་རྒྱས་པར་བྱ་དགོས་མོད།  འདིར་རྙིང་པའི་དབང་དུ་བྱས་ཏེ་གནས་ཁང་ཕྱགས་བདར་སོགས་ཀྱིས་(38ན)ཡིད་དུ་འོང་བར་བྱས་ལ།  གོང་དུ་སྨོས་པ་བཞིན་དུས་ཚོད་དགེ་ཞིང་ཤིས་པའི་ཉིན་དབུ་བརྩམས་ཏེ།  དགོང་ཐུན་ལ་བདག་བསྐྱེད་ཕྱག་རྒྱ་གཅིག་པའི་རྣལ་འབྱོར་བསྒོམ་ནས་བཟླས་པ་བརྒྱ་རྩ་ཙམ་གྱི་མཐར་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལངས་ཏེ།  ཞིང་སྐྱོང་སྡེ་བརྒྱད་གཞི་བདག་སོགས་དཀར་ཕྱོགས་པ་ལ་གཏོར་མ་ཕུལ་ནས་ཕྲིན་ལས་བཅོལ།  ནག་ཕྱོགས་པ་རྣམས་ལ་བགེགས་གཏོར་བཏང་ནས་རྡོ་རྗེ་སྲིན་པོའི་ང་རྒྱལ་གྱིས་བཀའ་བསྒོ་ཞིང་དྲག་སྔགས་ཡུངས་ཐུན་གུ་གུལ་གྱིས་བདུག་པ་སོགས་ཚམ་རྔམས་དང་བཅས་བགེགས་བསྐྲད་ནན་ཏན་དུ་བྱས་རྗེས།  སྒོ་དྲུང་དུ་ཐོ་བརྩིགས་པ་ལ་རྒྱལ་ཆེན་བཞིའི་སྐུ་དང་སྔགས་བྱང་བཙུགས།  མདུན་དུ་མཆོད་གཏོར་བཤམས་པ་སྒྲུབ་ཁོག་ལྟར་བྱིན་བརླབ།  རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས་པར་བསམ་ལ།  ཧཱུཾ།  གསང་བདག་སྤྱན་སྔར་དམ་མནོས་ཤིང༌།  །བསྟན་པ་སྲུང་བར་ཞལ་བཞེས་པ།  །རྒྱལ་པོ་ཆེན་པོ་སྡེ་བཞི་པོ།  །འདིར་གཤེགས་རྟེན་ལ་བརྟན་པར་བཞུགས།  །བཛྲ་ས་མཱ་ཛཿས་སྤྱན་དྲངས།  ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ།   ཨོཾ་མ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་ནས།  ཤཔྡ་པྲ་ཏཱིཙྪ་སྭཱ་ཧཱའི་བར་(38བ)གྱིས་མཆོད།  ཨོཾ་དྷྲྀཥྚ་རཱཥྚ་ཡ་སྭཱ་ཧཱ།  ཨོཾ་བཻ་རུ་ཌྷ་ཀཱ་ཡ་སྭཱ་ཧཱ།  ཨོཾ་བི་རུ་པཱཀྵ་ཡ་སྭཱ་ཧཱ།  ཨོཾ་བཻ་ཤྲཱ་མ་ཎ་ཡེ་སྭཱ་ཧཱ།  ཞེས་སྔགས་སོ་སོའི་མཐར།  ཨེ་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།  ཞེས་ལན་གསུམ་གྱིས་གཏོར་མ་ཕུལ་ལ།  ཧཱུཾ།  ཟབ་ཅིང་རྒྱ་ཆེ་གཟིགས་པ་པོ།  །ཡུལ་འཁོར་སྲུང་དང་འཕགས་སྐྱེས་པོ།  །སྤྱན་མི་བཟང་དང་རྣམ་ཐོས་སྲས།  །རྒྱལ་ཆེན་བཞི་ལ་ཕྱག་འཚལ་བསྟོད།  །རྒྱལ་པོ་ཆེན་པོ་འཁོར་བཅས་ཀྱིས།  །སྔོན་གྱི་ཐ་ཚིག་ཇི་བཞིན་དུ།  །མཆོད་སྦྱིན་གཏོར་མ་འདི་བཞེས་ལ།  །སྒྲུབ་པའི་བར་ཆད་ཀུན་སྲུངས་ཤིག    །ཅེས་བསྟོད་ཅིང་ཕྲིན་ལས་བཅོལ།  ཏིཥྛ་བཛྲ།  ཞེས་བརྟན་བཞུགས་བྱས་པས་སྒྲུབ་ཁང་གི་ཕྱོགས་སོ་སོ་ནས་རྒྱལ་ཆེན་སྡེ་བཞི་རང་རང་གི་རྒྱལ་ཐབས་ཀྱི་དཔུང་དང་བཅས་པས་བསྲུང་བར་བསམ།  དེ་ནས་ལས་བྱང་གི་མཚམས་གཅོད་བཞིན་ཕྱི་ནང་གསང་བའི་སྲུང་འཁོར་བརྟན་པོར་བསྒོམ།  དེ་ལྟར་མཚམས་བཅད་ཕྱིན་ཆད་སྔར་དམིགས་འོག་ཏུ་མ་ཆུད་པའི་ངོ་གསར་དང་མི་འཕྲད་ཅིང་ཆས་ཀའི་གཏོང་ལེན་ཀྱང་སྤང༌།  ཕྱི་རོལ་པས་རང་ཉིད་མཐོང་ན་གསང་སྒོ་རྡོལ་བ་དང༌།  རང་གིས་ཕྱི་རོལ་དུ་བལྟ་བས་གཡེང་ཤོར་ན་གསང་སྒོ་ཤོར་བ་ཞེས་བྱ་སྟེ།  དོན་ལ་དམ་ཚིག་ལས་འགལ་བས་སྒྲུབ་པའི་འབྲས་བུ་མི་འབྱིན་པས་ན་སྒྲུབ་པ་པོའི་ལུས་ངག་ཕྱི་རོལ་པས་(39ན)མཐོང་ཚོར་མི་བྱ།  སྲུང་འཁོར་འདི་དག་མཚམས་གྲོལ་རྒྱུའི་ཐུན་ཐ་མའི་མཐར་མ་གཏོགས་མི་བསྡུ་ཞིང༌།  ཐུན་མགོ་ཐམས་ཅད་དུའང་བར་ཆད་མི་འཇུག་པའི་ཕྱིར་གསལ་འདེབས་བསྐྱར་མ་རེ་བྱའོ།  །དེ་ནས་བཅས་བཤམ་བྱ་བ་ནི།  རང་གི་མདུན་ངོས་སུ་དམ་ཚིག་གི་བྲིས་སྐུ་རབ་གནས་ཅན་བཀྲམ།  དེའི་མདུན་དུ་བིངྱོ་ཏ་མ་ལས།  གླིང་བཞི་པ་ཡི་བྷཉྫ་ལ།  འཁོར་ལོ་རྩིབས་བརྒྱད་ཨེ་དང་བཅས།  །ཕུར་བུ་སྤུངས་ལ་བསྙེན་པ་བྱ།  །ཞེས་གསུངས་པ་ལྟར།  སྟེགས་བུ་བདུད་རྩི་ལྔས་ཆག་ཆག་བཏབ་པ་ལ།  ཐིག་ཚོན་བྱིན་རླབས་དང་ལྡན་པས་དཀྱིལ་འཁོར་མཚན་ཉིད་རྫོགས་པར་བྲིས་པའམ།  རས་བྲིས་དགྲམ་པ་གང་བདེ་བྱ་ཞིང༌།  ཡང་ན་བསྙེན་པའི་སྐབས་འདིར་དཀྱིལ་འཁོར་མ་འགྲུབ་ནའང་ཆད་སྐྱོན་མེད།  གང་ལྟར་ཡང་དཀྱིལ་འཁོར་བཤམ་ན།  དེའི་ལྟེ་བའི་གྲུ་གསུམ་མཐིང་ནག་གི་སྟེང་དུའམ།  དཀྱིལ་འཁོར་མི་བཤམ་པའི་ཕྱོགས་ལ་སྟེགས་བུ་ཁེབས་ལྡན་བཀོད་ལེགས་པའི་སྟེང་དུ།  ཐོད་པ་གླིང་བཞི་པ་ལ་ཆུ་ཚོན་གྱིས་འཁོར་ལོ་སེར་པོ་རྩིབས་བརྒྱད་པ་བྲིས་པའི་ནང་འབྲུ་ནག་གིས་བཀང་བ་ལ།  བྱུགས་བདུག་བྲབ་གསུམ་གྱིས་གཟི་བྱིན་བསྐྱེད་པ་སོགས་ཚུལ་བཞིན་དུ་འདུ་བྱས་པའི་ཕུར་བུ་འབྱོར་ན་ལྷ་ཕུར་ཚང་བ་སྦམས་(39བ)ཏེའམ།  མ་འབྱོར་ན་གཙོ་ཕུར་ཉིད་བཙུགས་པ་བཀོད།  དེའི་མདུན་རྒྱབ་གང་བདེར་མཉྫི་ལ་སྙིང་པོའི་གཏའ་གཏོར་སྐུ་རྟེན་དར་གདུགས་ཀྱིས་སྤྲས་པ་དང༌།  གཡས་གཡོན་དུ་སྟེགས་བུ་ཅུང་ཟད་དམའ་བར་ཡི་དམ་གྱི་མཆོད་གཏོར་དང༌།  ཕུར་སྲུང་སོགས་སྤྱི་བྱེ་བྲག་གི་སྲུང་མའི་གཏོར་མ་རྣམས་ཀྱང་བཤམས་པའི་གཡས་སུ་སྨན་ཕུད།  གཡོན་དུ་རཀྟ།  མཐའ་སྐོར་དུ་ཕྱི་ནང་གི་མཆོད་པའི་ཡོ་བྱད་སོགས་ལག་ལེན་ལྟར་བཀོད་ལེགས་པར་བཤམས།  རང་ཉིད་རྟེན་དང་ཞལ་སྤྲོད་ཀྱི་ཚུལ་དུ་སྟན་ནང་ཚངས་ཅན་འཇམ་ཞིང་བདེ་བའི་འོག་ཏུ་འབྲས་སམས་དཀར་གྱིས་གཡུང་དྲུང་ཆོས་བསྐོར་དུ་བྲི།  མདུན་དུ་རྡོར་དྲིལ་ཌཱ་མ་རུ་ནང་མཆོད་འཐོར་ནས་རྣམས་བཞག    །གཞན་ཡང་ཚོགས་རྫས་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ནས།  དེ་ནུབ་དཀོན་མཆོག་ལ་མཆོད་པ་རྒྱ་ཆེར་ཕུལ་ཏེ་ཚོགས་བསགས།  ཉམས་ཆག་ལ་འགྱོད་སྡོམ་གྱི་བསམ་པ་དྲག་པོས་བཤགས་པ་བྱ།  བླ་མ་དང་ཡི་དམ་གྱི་ལྷ་ལ་མོས་གུས་ཆེན་པོས་བསྙེན་སྒྲུབ་ལ་བར་ཆད་མི་འབྱུང་བ་དང་དངོས་གྲུབ་མྱུར་དུ་ཐོབ་པའི་གསོལ་བ་བཏབ་ནས་ཉལ་བའི་རྣལ་འབྱོར་ལ་འཇུག་གོ  །དེ་ནས་བསྙེན་པ་དངོས་གཞི་ནི།  འདིར་སྔ་ཐུན་ནས་མགོ་འཛིན་པར་གསུངས་པས་སང་ཞོག་ལྡང་(40ན)བའི་རྣལ་འབྱོར་གྱིས་ལངས་ནས།  ནམ་ལངས་པ་དང་བདེ་བའི་སྟན་ལ་བསམ་གཏན་གྱི་འདུག་སྟངས་ཀྱིས་འཁོད་དེ་བརྒྱུད་འདེབས་དང་སྐྱབས་སེམས་ཚོགས་བསགས་སྔོན་དུ་འགྲོ་བས།  གཞི་བགེགས་ཀྱི་གཏོར་མ་བསྔོ་བ་རྒྱུད་དུ་མི་དགོས་པས་བགེགས་བསྐྲད་སྐབས་ལས་ཀྱི་ལན་ཆགས་ཞེས་པའི་ཚིག་གཅིག་བསྐྱུར་ལ་བཀའ་བསྒོ་ནས་བརྩམ་སྔོན་འགྲོའི་ལས་རིམ་རྣམས་དང༌།  དངོས་གཞི་ཏིང་འཛིན་གསུམ་ནས་བསྟོད་པའི་བར་ལས་བྱང་གི་གཞུང་བསྲང་རྗེས།  བཟླས་པ་བྱ་བའི་ཐོག་མར་བགྲང་ཕྲེང་བྱིན་གྱིས་བརླབ་པ་ནི།  ཕྲེང་བ་ལག་གཡོན་པའི་སྙིམ་པར་བསྐྱིལ་བའི་མདོ་འཛིན་སྟེང་དུ་གནས་པར་བྱས་ལ་བསང་སྦྱང༌།  སྟོང་པའི་ངང་ལས་ཧཱུཾ་ཡིག་ལས་སྐྱེས་པའི་ཕྲེང་བ་དཔལ་ཆེན་རྡོ་རྗེ་གཞོན་ནུ་གཙོ་འཁོར་ཡོངས་སུ་རྫོགས་པ་སྐད་ཅིག་གིས་གསལ་བར་གྱུར།  དེའི་གནས་གསུམ་གྱི་ས་བོན་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས།  ཛཿཧཱུཾ་བཾ་ཧོཿ་ས་གཉིས་སུ་མེད་པར་བསྟིམ།   ལག་གཡས་སུ་མེ་ཏོག་ཐོགས་ལ་ལྷའི་རྩ་སྔགས་དང་དབྱངས་གསལ་རྣམས་ཚར་བདུན་བཟླ།  ཁྱད་པར་བཟླས་པའི་རྐྱེན་གྱིས་བསྐུལ་བའི་འོད་ཟེར་གྱིས་སེམས་ཅན་ཐམས་ཅད་ཀྱི་ངག་གི་སྒྲིབ་པ་སྦྱངས།  བདེ་བར་(40བ)གཤགས་པ་ཐམས་ཅད་ཀྱི་གསུང་གི་བདུད་རྩི་སྔགས་ཀྱི་ཡིག་འབྲུ་ཁ་དོག་ལྔའི་རང་བཞིན་ཆར་ལྟར་བབས་ནས་ཕྲེང་བའི་ལྷ་ལ་ཐིམ་པར་བསམ་ནས་ཕྲེང་བ་བདུད་རྩིར་རློབ་པའི་སྙིང་པོ།  ཨོཾ་རུ་ཙི་པྲ་མརྟ་ན་ཡེ་རཏྣ་མ་ཎི་དྷར་ཛྙཱ་ན་དེ་ཝ་ཨ་བྷི་ཥིཉྩ་ཧཱུཾ་སྭཱ་ཧཱ།  ཞེས་བརྒྱ་རྩ་བརྒྱད་བཟླས་པའི་མཐར་ལྷ་རྣམས་འོད་དུ་ཞུ་ནས་མགོ་བོ་རློན་པ་ཁྲག་འཛག་པའི་ཕྲེང་བར་གྱུར་པར་བསམ།  རྟེན་འབྲེལ་སྙིང་པོ་བདུན་གྱིས་མེ་ཏོགའཐོར་ལ་ཤིས་པའང་བརྗོད།  སླར་ཨོཾ་ཨཱཿཧཱུཾ་བརྒྱ་རྩ་དང༌།  དབྱངས་གསལ།  རྟེན་སྙིང༌།  ཨོཾ་རུ་ཙི་ར་མ་ཎི་པྲ་བརྡྷཡེ་ཧཱུཾ་ཕཊ་རྣམས་ཉེར་གཅིག་བཟླས་ལ་ཧུས་འདེབས།  དེ་ལྟར་བྱིན་གྱིས་བརླབས་པའི་ཕྲེང་བ་དེ་མི་ལག་མི་འགྲིམས་ཤིང་མོ་དང་གྲངས་རྩིས་ས་རྗེན་དང་ནམ་མཁར་འཕང་བ་སོགས་སྤང༌།  ཁྱི་དང་བྱི་ལ་བུད་མེད་སོགས་ཀྱིས་འགོང་དུ་མི་འཇུག་པར་ལུས་ཀྱི་དྲོད་དང་མི་འབྲལ་བར་བཅད་དོ།  དེ་ནས་ལས་བྱང་བཞིན་ཛཔྲ་བསྐུལ་སྔོན་དུ་འགྲོ་བས་སྐུ་གསུང་ཐུགས་ལ་དམིགས་པའི་ཛཔྲ་དགོངས་གསུམ་པོ་རེ་རེ་ལ་ཐུན་གྱི་སུམ་ཆ་རེ་ཙམ་ཆ་རྩིས་གསལ་བཏབ་ལ།  མགལ་མེ་ཀླད་སྐོར་གྱི་འཕྲོ་འདུ་ཉིད་རྩ་བར་བཟུང་ནས་བཟླས་པའི་སྐྱོན་རྣམས་སྤངས་ཏེ་སེམས་རྩེ་གཅིག་པའི་ཏིང་ངེ་འཛིན་གྱིས་འབྲུ་བཅུ་བདུན་པ་ཁོ་ན་ཆིག་དྲིལ་དུ་(41ན)བཟླ།  ཐུན་མཐར་ཐབས་ཀྱི་ཡི་གེ་ཀ་ལི་ལན་གསུམ་གྱིས་སྐུ་བསྐྱེད་རིམ་མ་གསལ་བ།  སྒོམ་ཚུལ་མ་ཤེས་པ།  བརྡ་དོན་རྟགས་གསུམ་མ་འཕྲོད་པ་ལ་སོགས་པ་དང༌།  ཤེས་རབ་ཀྱི་ཡི་གེ་ཨ་ལི་ལན་གསུམ་གྱིས་གསུང་བཟླས་བརྗོད་སྔགས་ཀྱི་སྒྲ་མ་དག་པ།  གྲངས་མ་ཚང་བ།  གོ་རིམ་ནོར་ཞིང་སྔགས་དོན་མ་ཤེས་པ།  བཟླས་པའི་སྐྱོན་དུ་གྱུར་པ་ལ་སོགས་པ་དང༌།  ཞི་ཁྲོ་ཀུན་འདུས་ཀྱི་སྙིང་པོ་ཡིག་བརྒྱ་ལན་གསུམ་གྱིས་ཐུགས་ཏིང་ངེ་འཛིན་གྱི་འཕྲོ་འདུའི་རིམ་པ་ནོར་འཁྲུལ་ཡེངས་པ་དང་མ་གསལ་བ་སོགས་འགལ་ཉམས་ཀྱི་ལྷག་ཆད་ཁ་བསྐང་ཞིང༌།  ཡེ་དྷརྨཱས་ནུས་པ་བརྟན་པར་བྱས་ལ།  གཞུང་བཞིན་སྟོང་ཚིག་མཆོད་བསྟོད་ཀྱིས་ཐུགས་དམ་བསྐུལ་མཐར།  སྲུང་འཁོར་མི་བསྡུ་བར་སྦྲ་ཕུབ་པ་ལྟར་བཞག་ནས་རྟེན་དང་བརྟེན་པའི་དཀྱིལ་འཁོར་སྣང་ཆ་ཐམས་ཅད་མི་དམིགས་པའི་དབྱིངས་སུ་བསྡུས་ཏེ་མཉམ་པར་འཇོག    །སླར་ཡང་ཐུན་མཚམས་ཀྱི་ལྷར་ལངས་ཏེ་གོ་བགོས་ལ་སྣོད་བཅུད་ཐམས་ཅད་ལྷ་སྔགས་འོད་གསལ་གྱི་འཁོར་ལོས་རྒྱས་བཏབ་ནས་ཟུང་འཇུག་གི་ཏིང་ངེ་འཛིན་ཆུ་བོའི་རྒྱུན་ལྟ་བུ་ལ་སྦྱར་རོ།  །དེ་ནས་དགོང་ཐུན་དང་སྲོད་ཐུན་ལ་སྲུང་འཁོར་གསལ་འདེབས་ཙམ་བྱས་རྗེས་ཏིང་ངེ་འཛིན་(41བ)གསུམ་ལ་འཇུག་པས་ཆོག་ཅིང༌།  ཕྲེང་བ་བྱིན་རླབས་ཀྱང་དོར།  སྲོད་ཐུན་གྱི་མཐར་ཆོས་སྐྱོང་སྤྱི་དང་བྱེ་བྲག་ཕུར་སྲུང་དམ་ཅན་གྱི་གཏོར་འབུལ་རྒྱས་བསྡུས་གང་འགྲུབ་བྱ།  ཕྱིར་ནང་ཐོར་ཐུན་གྱི་མགོར་སྔོན་འགྲོ་རྣམས་དང་ཕྲེང་བ་བྱིན་རླབས་སོགས་སྦྱར།  སྔ་ཐུན་མན་ཆད་སྔ་ཉིན་ཕྱི་ཐུན་དང་འདྲ།  ཚོགས་མཆོད་འབྱོར་ན་སྲོད་ཐུན་ལ་མ་ཆགས་པར་བྱ་དགོས་ཀྱང་མི་འགྲུབ་ན་བསྙེན་པ་ཚུགས་པའི་ཐུན་དང་པོ་དང༌།  གྲོལ་བའི་ཐུན་ཕྱི་མ།  ཡར་མར་གྱི་ཚེས་བཅུ་ཉ་སྟོང་བརྒྱད་གསུམ་ལ་ངེས་པར་ཆག་ཏུ་མི་རུང༌།  མཉམ་བཞག་གི་དུས་སུ་ཆོས་ཉིད་ངོ་བོ་ཀ་ནས་དག་ཀྱང༌།  རྗེས་ཐོབ་ཏུ་སྣང་གྲགས་རིག་གསུམ་ཐམས་ཅད་བདེ་བ་ཆེན་པོའི་རྣམ་རོལ་འབའ་ཞིག་ཏུ་འཆར་བ་ལ་སློབ་ཅིང༌།  ལེ་ལོ་དང་སྙོམས་ལས་ཀྱི་དབང་དུ་མི་གཏོང་བར་བརྩོན་འགྲུས་དང་འདུན་པ་དྲག་པོས་རིག་པ་དྭངས་སྙིགས་ཕྱེད་པར་བྱས་ཏེ་དྲན་པའི་བྱ་ར་དང་མ་བྲལ་བའི་སྒོ་ནས་བསགས་སྦྱོང་སོགས་བསྒྲིགས་ཆགས་ཀྱི་དགེ་སྦྱོར་གཞན་བྱེད་སྤྲོ་ནའང་ཐུན་མཚམས་ངལ་གསོའི་སྐབས་གང་བདེར་བྱས་པས་ཆོག་ཅིང༌།  གཞན་དུ་ན་ཐུན་མཚམས་སུའང་ལྷའི་གསལ་སྣང་དང་མ་བྲལ་བའི་ངང་ནས་བཟླས་པ་བྱ་ཞིང་གྲངས་ཚད་ལ་མི་བརྩི།  ཁམས་གསེང་ལ་འགྲོ་བ་སོགས་སྟན་ལས་འཕགས་(42ན)དུས་ཕྲེང་བ་ལ་རྡོ་རྗེའི་མདུད་པ་བྱས་པ་ཁྲོ་ཞལ་དུ་དམིགས་ནས་གདན་ཁར་བཞག་པས་སྟན་བསྲུང༌།  གཞན་འགྲོ་འཆག་མང་པོ་སྤངས་ཏེ་སྟན་གྱི་དྲོད་མ་ཡལ་བར་སྡོད་ཚུགས་པ་གལ་ཆེ།  སྲོད་ལ་སྒྱུ་ལུས་མཆོད་སྦྱིན་དང་ཕྱིར་ཟློག་སོགས་སྦྱོར་སྤྲོ་ནའང་ལེགས་ཤིང༌།  ཉལ་ཁར་ཉིན་རེའི་བསྙེན་པའི་བསྲུང་མཚམས་ལས་ཕྲ་མོ་ཞིག་འགལ་བ་བྱུང་ཡང་ཞག་ཏུ་མི་འགྲོགས་པར་རྩ་བ་གསུམ་ལ་བཤགས་པ་བྱས་ཏེ་ཚེ་འདིའི་རྐྱེན་དང་ཕྱི་མའི་སྒྲིབ་པར་མི་འགྱུར་བར་གསོལ་བ་དྲག་ཏུ་གདབ།  རྣམ་དཀར་གྱི་ཕྱོགས་རྣམས་རློམ་སེམས་དང་བྲལ་བའི་རྫོགས་བྱང་དུ་བསྔོས་ཏེ་གནས་ལུགས་འཛིན་མེད་ཀྱི་རང་ངོ་བསྐྱང༌།  འདིར་ངེས་པར་གལ་ཆེ་བ་མཉམ་པར་མ་བཞག་པའི་རྣལ་འབྱོར་ཞེས་གཞུང་རྣམས་ལས་མང་དུ་འབྱུང་བའི་དོན་བསྡུ་ན།  བིདྱོཏྟ་མ་ལས།  བཟའ་བཏུང་གོས་རྒྱན་རིམ་པ་དང༌།  །འགྲོ་ཉལ་འདུག་ལྡང་རྒྱུན་རིང་བྱ།  །ཞེས་གསུངས་པ་ལྟར།  དགོང་མོ་ཉལ་བའི་དུས་སུ།  ཨོཾ་བཛྲ་ཀཱི་ལི་ཀཱི་ལ་ཡ་ཤུ་ནྱ་ཏ་ཧཱུཾ།  ཞེས་བརྗོད་ལ་རང་རྡོ་རྗེ་གཞོན་ནུར་གསལ་བའི་ངང་ནས་སེང་གེའི་ཉལ་སྟབས་ཀྱིས་ཆོས་དབྱིངས་ཀྱི་ངང་དུ་ཉལ།  ཐོ་རངས་ལྡང་བའི་དུས་སུ།  ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱཀ་ཙིཏྟ་ས་མ་ཡ་ཧཱུཾ།  ཞེས་བརྗོད་(42བ)པས་ཆོས་ཉིད་སྐྱེ་བ་མེད་པ་ལས་ལངས་ཏེ།  འགག་པ་མེད་པ་དཔལ་རྡོ་རྗེ་གཞོན་ནུའི་སྐུར་བཞེངས་པར་བསམ།  འགྲོ་བའི་དུས་སུ།  ཨོཾ་བཛྲ་ཀཱི་ལི་ཀཱི་ལ་ཡ་ཨེ་ཝཾ་མ་ཡ་དྷརྨ་ཀཱ་ཡ་ཧཱུཾ།  ཞེས་བརྗོད་ཅིང་འགྲོ་བ་འདྲེན་པའི་དོན་དུ་འགྲོ་བར་བསམ།  འདུག་པའི་དུས་སུ།  རང་ཉིད་ལྷའི་ང་རྒྱལ་ལ་གནས་པའི་ངང་ནས་གང་དུ་གནས་པའི་ཁང་པ་དེ་ཡེ་ཤེས་ཀྱི་གཞལ་ཡས་ཁང་དུ་བསྒོམ་ཞིང་འཁོར་དང་ཉེ་གནས་ཐམས་ཅད་སྤྲུལ་པའི་འཁོར་དུ་བསམ་ལ།  ཨོཾ་བཛྲ་ཀཱི་ལི་ཀཱི་ལ་ཡ་མཎྜལ་ཧཱུཾ་ཧཱུཾ།  ཞེས་བརྗོད།  ཁ་ཟས་ཟ་བའི་དུས་སུ།  ཨོཾ་ཨཱཿཧཱུཾ་གིས་ཁ་ཟས་བདུད་རྩིར་བྱིན་གྱིས་བརླབས་ནས་ལྷ་མཆོད་པའི་ཚུལ་དུ་རེལ་ཞིང་མཁའ་འགྲོ་མ་རྣམས་ལ་ལྷག་མའི་གཏོར་མ་སྔགས་ཙམ་གྱིས་སྦྱིན།  བཏུང་བ་སྤྱི་དང་བྱེ་བྲག་ཛ་གད་བཏུང་བ་ལ།  ཛ་གད་དེ་ཉིད་ཏྲཾ་ལས་ཡེ་ཤེས་ཀྱི་བདུད་རྩིར་བསམ་ཞིང༌།  ཨོཾ་ན་མོ་གུ་རུ་བཛྲ་ཀཱི་ལི་ཀཱི་ལ་ཡ་དྷ་ཏི་མ་མ་ཀརྨ་ཛ་གད་པྲ་བ་ཁ་རཾ་ཁཱཧི།  ཞེས་ལྷ་དང་བླ་མ་མཁའ་འགྲོའི་ཚོགས་ལ་གཡོན་པའི་མཐེབ་སྲིན་གྱིས་དབུལ།  ཨོཾ་ཨཱཿ་ཧཱུཾ་གིས་དངོས་གྲུབ་བསྡུས་ནས་ལྷ་ལ་ལྷ་མཆོད་པའི་ཚུལ་དུ་རོལ་པར་བཤད་དོ།  །གཙོ་བོར་རང་ཉིད་ལྷག་པའི་ལྷ་རྡོ་རྗེ་གཞོན་ནུའི་ང་རྒྱལ་དང་མི་འབྲལ་བ་དང༌།  ངག་ ཀཱི་ལ་ཡའི་སྒྲ་དང་མི་(43ན)འབྲལ་བ་དང༌།  ཡིད་ཆོས་ཉིད་བྱང་ཆུབ་སེམས་ཀྱི་ཕུར་བུ་རྩེ་གཅིག་པ་གསལ་སྟོང་དབྱེར་མེད་པ་དང་མི་འབྲལ་བ་སྟེ།  མི་འབྲལ་བ་རྣམ་པ་གསུམ་ལ་དྲན་པ་རྒྱུན་ཆད་མེད་པར་བྱས་ཏེ་སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རོལ་པར་ལམ་དུ་ཁྱེར།  གཞན་ཡང་བསྙེན་སྒྲུབ་ཀྱི་སྐབས་སུ།  གདན་མི་སྤྲུག་ཅིང་དྲོད་མི་ཡལ་བར་བྱེད།  སྔས་བླ་མར་མོས་ལ་མི་འགོང༌།  སྐྲ་སེན་དང་ཁ་སྤུ་མི་འདྲེག    །མཚོན་རྩེ་ཁ་ལ་མི་འཇུག་ཅིང་ལུས་ཀྱི་ཆ་ཤས་གང་དུའང་མཚོན་ཁ་མི་བཏབ།  ཁ་བཤལ་བ་སོགས་ཁྲུས་མི་བྱ།  སྔགས་ནུས་འཇོམས་པའི་ཟས་ཀྱི་སྤང་བྱ་ནི།  དུག་རིགས་འདྲེས་པའི་བཟའ་བཏུང༌།  ཉམས་གྲིབ་དང་འདྲེ་ཅན་གྱི་ཁ་ཟས།  སྒོག་བཙོང་དང༌།  ལ་ཕུག    །ལྒ་གཡེར།  དམར་ཚྭ།  ཟྭ་ཐུག    །ཁུར་བ།  ལྕེའི་དབང་པོ།  ཤ་ཆང་སོགས་ཀྱིས་ནུས་པ་འགྱང་བར་བཤད།  འོན་ཀྱང་བག་མེད་མ་ཡིན་པར་བྱིན་གྱིས་བརླབས་ནས་ཤ་ཆང་སོགས་ཁ་ཟས་བཅུད་ཅན་བསྟེན་དགོས་ཏེ།  དེའི་དགོས་པ་གང་ཞེ་ན།  ལྷ་སྔགས་ཡེ་ཤེས་ཀྱི་རྣལ་འབྱོར་ལ་འཇུག་པའི་སྐབས་འདིར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ལ་རྗེས་ཆགས་བདེ་བ་ཆེན་པོས་རྒྱས་ཐེབས་པ་དགོས་ཤིང༌།   (43བ)མཉམ་རྗེས་ཐམས་ཅད་དུ་བདེ་སྟོང་གི་དར་གདངས་ཤིག་མེད་ཐབས་མེད་པས།  དེ་སྐྱེ་བའི་རྒྱུ་ཀུན་རྫོབ་རྒྱུའི་ཐིག་ལེའི་འཕེལ་འགྲིབ་ལ་ལྟོས་ནས་རྗེས་སུ་འགྲོ་དགོས་པས་ན།  རྒྱུད་ལས་ཀྱང༌།  དེ་ལ་ག་བུར་རྒྱུ་ཡི་ཕྱིར།  །ཤ་ནི་བཟའ་བ་ཉིད་དུ་བྱ།  །ཁྱད་པར་དུ་ཡང་ཆང་ཉིད་དོ།  །ཞེས་གསུངས་པ་སོགས་ཤ་ཆང་ལོངས་སྤྱོད་པ་ལ་ཉེས་པ་མེད་པ་མ་ཡིན་ཀྱང༌།  གསང་སྔགས་ཀྱི་ཉམས་ལེན་གཙོ་བོ་མཐར་ཐུག་པ་བདེ་སྟོང་གི་ཡེ་ཤེས་ལ་རང་བྱན་ཚུད་དགོས་པས།  དེ་ལ་རེ་ནས་ཤ་ཆང་བླང་བྱ་དང༌།  ཐིག་ལེ་ཉམས་པའི་སྐྱོན་ཐམས་ཅད་སྤང་བྱར་གསུངས་པས་དེ་བས་ན་ཐིག་ལེ་ཉམས་པ་ཁྱད་དུ་མི་གསོད་པའི་ཁར་རྨི་ལམ་བག་ཆགས་སོགས་སུ་འཕོ་བའི་རིགས་བྱུང་ནའང་རྫས་སྲུང་མན་ངག་སོགས་ལས་འབྱུང་བ་བཞིན་བསྲུང་ཐབས་བྱས་ལ་འཕོ་མེད་དུ་འཆིང་བ་གལ་ཆེ།  ཐུན་ཚུགས་ནས་བསྡུ་རིམ་མ་གྲུབ་ཀྱི་བར་དུ་ཁམས་གསེང་ལ་འགྲོ་བ་སོགས་ཀྱིས་མཚོན་ལྡང་བའི་རིགས་གཏན་ནས་མི་བྱེད།  བཟླ་དུས་མིད་པ་རྒྱུན་གཅོད་ངེས་པར་དགོས་ནའང་གང་ཟག་ཁྲག་རླུང་ཤས་ཆེ་བའི་རིགས་ལ་མིད་པ་འཇུར་བས་རླུང་སྟོད་དུ་འཚང་ཞིང་གྲེ་བ་སྐམ་ནས་བསྐྱེད་བཟླས་བྱེད་དུ་མི་སྟེར་བའི་ཚེ་བཏུང་བ་སོགས་ལོངས་(44ན)སྤྱད་དགོས་པ་བྱུང་ན།  སྤྱད་བྱའི་བཟའ་བཏུང་གང་ཡིན་དེ་བདུད་རྩིར་བྱིན་གྱིས་བརླབས།  སྤྱོད་ཡུལ་གྱི་དཀྱིལ་འཁོར་ལེགས་པར་གསལ་བཏབ།  སྔགས་བཟླ་འཕྲོས་སྣ་བུག་ཏུ་ཕུས་བཏབ་ནས་སྣ་སྒོའི་རླུང་ལས་སྔགས་ཀྱི་སྒྲ་དི་རི་རི་སྒྲོག་པར་མོས་ལ།  འཕྲེང་བ་འཁོར་མཚམས་ནས་བཟའ་བཏུང་བདུད་རྩིའི་ཚོགས་མཆོད་ཕུལ་ཏེ།  དེ་འཕྲལ་བཟླས་པར་འཇུག་པ་ལས་བག་མེད་དུ་བཟའ་བཏུང་གང་དགར་མི་སྤྱོད།  སྔགས་བཟླ་འཕྲོ་བཞག་ནས་དཔེ་ཆ་བལྟ་བ་དང་ཡི་གེ་འབྲི་བས་མཚོན་ལུས་ངག་ཡིད་གསུམ་གྱི་གཡེང་ཤོར་བའི་རིགས་མི་བྱེད།  འོག་སྒོ་ནས་དྲི་ངན་ཤོར་ན་ཐུན་དེའི་སྔ་རོལ་བཟླས་པ་ཇི་ཙམ་སོང་ཡང་གྲངས་ལ་མི་གཏོང༌།  ཧ་སྦྲིད་དང་སྦྲེག་པ་ཤོར་ན་ཕྲེང་བའི་འཁོར་མཚམས་གང་སླེབས་གྲངས་སུ་མི་གཏོང་བར་དོར་ནས་སླར་མདུད་འཛིན་བསུས་ཏེ་འདྲེན།  བཟླས་པའི་མཚམས་སུ་ཅིས་ཀྱང་མི་ལ་ངག་གཏོང་དགོས་པ་བྱུང་ན་ཕ་རོལ་པོ་དེ་ཡི་དམ་གྱི་སྐུར་གསལ་བ་ལ་རང་གི་སྨྲ་བརྗོད་ཐམས་ཅད་སྔགས་ཀྱི་རྣམ་པར་འཕྲོས་ནས་ཐིམ་པར་བསམ་པས་སྔགས་ནུས་མི་ཉམས་པར་བཤད།  ཐུན་མཚམས་སུ་གསུར་དང་གཏོར་མ་སོགས་གཏོང་ནའང་རང་ཉིད་ལས་ཀྱི་ཧེ་རུ་ཀ་གནས་གྱུར་པ་ལས་ཐུགས་རྗེ་ཆེན་པོ་སོགས་(44བ)སུ་བསྐྱེད་པའི་ལས་བྱེད་པར་བསམ་ལ་བསྔོ།  སྤྱིར་ལྷ་ཞི་ཁྲོ་གང་བསྐྱེད་ཀྱང་སྣང་སྟོང་འཇའ་ཚོན་ལྟ་བུར་གསལ་བས་གང་ལ་གང་འདུལ་གྱི་སྤྲུལ་བསྒྱུར་བྱ་བ་ལས།  ཕྱི་གཟུགས་ཡུལ་ཆས་གོས་ཆ་ལུགས་སོགས་ལ་རག་མ་ལུས་ཀྱང༌།  ལ་ལ་དག་གཏོར་མ་དང་ལུས་སྦྱིན་སོགས་གཏོང་བའི་སྐབས་རང་གི་གདོང་དམར་པོ་དེས་ཡི་དྭགས་རྣམས་འཇིགས་སྐྲག་གི་ཉེས་པ་སྒྲིབ་ཕྱིར་ཞྭ་དང་དོམ་ར་གྱོན་པ་སོགས་བྱེད་དགོས་པར་སྐད་མོད།  དེ་ཙ་ན་རང་ཉིད་ཐུགས་རྗེ་ཆེན་པོ་སོགས་སུ་བསྐྱེད་པའི་དགོས་པ་མ་བྱུང་བས་བླུན་པོའི་ངག་རྗེས་སུ་མི་འབྲང་བར་ཁུང་ཐུབ་བརྒྱུད་པའི་གསུང་དང་མཐུན་པ་ཞིག་གལ་ཆེ།  དགོང་མོ་མུན་པའི་སྐབས་ཚོགས་ལྷག་དང་ཆད་མདོ་སོགས་ཕུལ་དུས་དཔལ་འབར་མེད་ན་ཤ་ཟ་ཤུགས་འགྲོ་སྡེ་བརྒྱད་མ་རུང་བས་ལས་ཀྱི་རྡོ་རྗེའི་སྲོག་ལ་འཚེ་བའི་ཕྱིར་དཔལ་འབར་ངེས་པར་དགོས་ཤིང༌།  གསང་སྤྱོད་སོགས་ཀྱི་སྐབས་སུ་མར་མེའི་འོད་ལ་འབྱུང་པོ་རྣམས་འཁོར་མི་ནུས་པས་མཚོན་ཉིན་མོ་ལ་ནི་དཔལ་འབར་སོགས་ཀྱི་སྣང་བ་མི་དགོས།  ལྷ་གཞན་གྱི་རྒྱུན་ཁྱེར་དམ་ཚིག་གི་བཟླས་པ་བྱེད་པར་འདོད་ན་རང་ལྷར་གསལ་བའི་ཐུགས་ཀའི་འོད་ཀྱིས་བསྐུ་་ཏེ་ལྷ་གང་དང་གང་གི་སྐུའི་རྣམ་པར་བྱོན་ཏེ་རང་ལ་ཐིམ་པར་བསམ་ཤིང་(45ན)སྔགས་བརྒྱའམ་ཉེར་གཅིག་བདུན་སོགས་བཟླས་པས་འགྲུབ།  དེ་ཡང་ལྷའི་སྣང་ཆ་གསལ་མ་ཐེབས་ན་བསྐྱེད་རིམ་གྱིས་གོ་མི་ཆོད།  ང་རྒྱལ་མེད་ན་ཐ་མལ་གྱི་སྣང་ཞེན་མི་ལྡོག    །དག་དྲན་མེད་ན་ལྷ་ཞི་བ་བསྒོམ་ཀྱང་རྒྱལ་འགོང་དང༌།  དྲག་པོ་བསྒོམ་ན་རཱུ་དྲར་གོལ་བར་འགྱུར་བས་ན་གསལ་བརྟན་དག་གསུམ་གྱི་གནང་ལ་འབད།  གཞན་ཡང་བདུད་ཀྱིས་ལྷར་བརྫུས་ནས་བར་གཅོང་འབྱུང་བའང་སྲིད་པས་རྟགས་དང་ཆོ་འཕྲུལ་འཚུབས་ལྷོང་སོགས་བཟང་ངན་གྱི་མཚན་མ་ཇི་ལྟར་བྱུང་ཡང་དགག་སྒྲུབ་རེ་དོགས་ཀྱི་བློས་མ་བཅིངས་པར་གདོད་མའི་གནས་ལུགས་དབྱིངས་དང་ཡེ་ཤེས་གཉིས་སུ་མེད་པའི་ཀློང་ཆེན་པོར་ལ་བཟླ་བར་བྱ་སྟེ།  དེ་ལྟར་ཡང་འོ་སྐོལ་གྱི་སློབ་དཔོན་སངས་རྒྱས་གཉིས་པའི་ཞལ་ནས།  འགྲོ་འདུག་ཉལ་དང་སྤྱོད་ལམ་ཐམས་ཅད་ཀུན།  །དེ་ལྟར་ལྟ་བའི་བྱ་ར་མ་ཡེངས་ན།  །ང་ཉིད་པདྨ་འབྱུང་གནས་ཐུགས་ཀྱི་སྲས།  །མཆོག་དང་ཐུན་མོང་དངོས་གྲུབ་མྱུར་དུ་ཐོབ།  །ཕྱི་ནང་ཟས་ནོར་མི་དང་ལྷ་འདྲེ་འདུ།  །བླ་མེད་བྱང་ཆུབ་གོ་འཕང་མྱུར་དུ་ཐོབ།  །ལྟ་བས་མ་ཟིན་བསྒྲུབ་ཀྱང་དོན་མེད་པས།  །ལྟ་བའི་བྱ་ར་གཅེས་སོ་རིགས་ཀྱི་བུ།  ཞེས་གསུངས།  གཞན་ཡང་བསྙེན་པའི་བསླབ་བྱ་ཁྱད་པར་གནད་ཀྱི་ཞལ་ཤེས་ནི།   (45བ)བསྙེན་སྒྲུབ་ལ་རྟགས་མ་ཐོན་བར་དུ༔  དང་པོ་ནས་རྣལ་འབྱོར་པ་རེ་དོགས་ཅན་གྱིས་ལྷ་མི་བསྲེལ་ཏེ༔  གང་ཞེ་ན༔  གདོན་ཆེན་པོ་ལ་བྱིན་རླབས་མི་བྱ༔  སྲིའུ་མི་གསོ༔  སེར་རྒོད་མི་བཟློག༔  གཞན་གྱི་ཟས་གོས་གྲིབ་ཅན་ལ་མི་འབག་གོ༔  བྱས་ན་སྒྲུབ་པ་པོ་ཟག་ལ་འགྲོ་བས་རྟགས་མི་འབྱིན༔  རྟགས་མཚན་མི་ལ་མི་བཤད༔  རེ་དོགས་དང་འཁུ་འཁྲིག་མི་བྱ་སྟེ༔  རྟགས་བཟང་བ་ལ་དགའ་མི་བྲོད༔  ངན་པ་ལ་དོགས་མི་འཚེར༔  ཐམས་ཅད་རྒྱུ་འབྲས་དང་རྟེན་འབྲེལ་དུ་ཤེས་པས་ལྟ་བའི་གདིང་བསྐྱེད་དོ༔  ཞེས་གསུངས་པ་ལྟར་དང༌།  བསྙེན་པ་མ་རྫོགས་པར་གནས་སྤོས་ན་དངོས་གྲུབ་བོ་ཟག་དོན་མེད་དུ་འགྱུར་བས་གནས་མི་སྤོ༔  ཞེས་ཆོས་དབང་གི་གཞུང་ལས་གསུངས་པ་ལྟར་སྤང་བླང་ཚུལ་བཞིན་དུ་བྱ།  སྤྱིར་ལམ་ཟབ་མོ་ཉམས་སུ་ལེན་པའི་སྐབས་འདིར་འཚེ་བའི་རྐྱེན་མང་བས་ལུས་ལ་འབྱུང་བཞིའི་ནད་དྲག་པོས་བཏབ་ནས་གློ་བུར་དུ་སྨན་པ་དང་གྲོགས་སོགས་མཚམས་ནང་དུ་འབོད་དགོས་པའམ་སྲིད་པས།  དེས་ན་བྱ་བྱེད་སྤྲོ་བསྡུ་གང་ཡང་རྣམ་རྟོག་གི་རྗེས་སུ་འབྲང་བས་དང་པོར་མཚམས་ལ་འཇུག་སྐབས་ནས་ཞེ་མཐུན་གྱི་སྨན་པ་དང་གྲོགས་འཁོར་དངོས་ཆས་སོགས་ཀྱང་དགོས་འབྱུང་ན་ཇི་སྙེད་ཅིག་གཏོང་ལེན་བྱེད་སྙམ་པའི་དམིགས་འོག་(46ན)ཏུ་ཆུག་པ་དགོས།  ཕྱིས་དེ་དག་གཏོང་དགོས་བྱུང་ཚེ་མཚམས་ལ་ཧར་གྱིས་གྲོལ་བའི་བར་ཆད་མི་འཇུག་པའི་དགོས་པ་ཡོད་པས་སོ།  །དེ་ལྟར་ཐུན་བཞིའི་རིམ་པས་དུས་གྲངས་རྟགས་ཀྱི་བསྙེན་པ་གསུམ་གང་རུང་བྱ་སྟེ།  དེ་ལ་དུས་ནི་དགོངས་རྒྱུད་ལས།  ཡུན་ནི་ལོ་ཟླ་ཙམ་དུ་བསྲིང་༔  ཞེས་པས་རང་གི་ནུས་པ་དང་སྦྱར་ཏེ་ལོའམ་ཟླ་བའི་གྲངས་འདི་ཙམ་ཞིག་བྱའོ་ཞེས་ཇི་ལྟར་དམ་བཅས་པ་ལས་མི་འདའ་བར་བྱ་ཞིང༌།  གཞན་ཡང་ཇི་སྐད་དུ།  ཞག་ནི་སུམ་ཅུ་ཕྲག་དྲུག་གམ༔  ཞེས་པས་བསྙེན་སྒྲུབ་སོ་སོར་ཟླ་བ་དྲུག་རེ་སྟེ་ཁྱོན་ལོ་གཅིག་ཡན་ཆད་དམ།  ཡང་ན་བསྙེན་སྒྲུབ་སྤྱིར་ཟླ་བ་དྲུག་གི་དབང་དུ་བྱས་ཏེ།  འདིར་བསྙེན་པ་ལ་དེའི་ཕྱེད་ཆ་ཟླ་བ་གསུམ་ཡན་ཆད་དོ།  །གྲངས་ཀྱི་བསྙེན་པ་ནི།  དགོངས་རྒྱུད་ལས།  བསྙེན་སྒྲུབ་ཆོ་ག་ཚང་བྱས་ནས༔  ཛཔྲ་གྲངས་བདུན་འབུམ་ཉི་ཁྲི་འདོན༔  ཞེས་པ་ལྟར་གྲངས་ཚད་བདུན་འབུམ་ཉི་ཁྲི་ཡན་ཆད་སྤྱིར་བཏང་ཡིན་ལ།  དམིགས་བསལ་དུ་དབང་པོ་རབ་ཀྱིས་འབྲུ་འབུམ།  འབྲིང་གིས་དེ་ཉིས་འགྱུར།  ཐ་མས་སུམ་འགྱུར་གྱིས་ངེས་པར་འགྲུབ་པར་གསུངས།  གྲངས་བསྙེན་ཚད་དུ་མ་འཁྱོལ་ཡང་བརྩོན་འགྲུས་དང་སྦྱར་བའི་བཟླས་པ་གང་འགྲུབ་ཙམ་བྱས་པས་ཀྱང་བསྙེན་སྒྲུབ་ཀྱི་འབྲེལ་བ་ཐོགས་པ་ཡིན་ཏེ།  གསང་བ་(46བ)སྙིང་པོ་ཕྲིན་ལས་ཀྱི་རྒྱུད་ལས།  འབྲུ་འབུམ་བདུན་འབུམ་ཉི་ཁྲི་ཙམ༔  སྟན་དྲོད་མ་ཡལ་རྩེ་གཅིག་བཟླ༔  ཞེས་སོགས་འབྱུང་ངོ༌།  །ད་ལྟའི་དུས་དང་སྦྱར་ན།  རྩ་བསྙེན་བྱེ་བ་ཕྲག་གསུམ་དང་འབུམ་ཕྲག་བཞི།  ལས་སྦྱོར་འབུམ་གསུམ་དང་ཁྲི་ཚོ་བཞི་བཟླས་ན་འགྲུབ་པར་ཞུས་ལན་ཉིད་དུ་གསལ་ལོ།  །འོན་ཀྱང་གང་ཟག་སྦྱངས་པ་སྔོན་སོང་བསྙེན་སྒྲུབ་ཀྱི་ལས་འཕྲོ་ཅན་ལ་ནི་དུས་གྲངས་མི་ངེས་ཏེ།  གཞུང་ལྟར་རྟགས་དང་མཚན་མ་ཞག་གཅིག་ནས་ཐོན་ནའང་བསྙེན་པ་རྫོགས་པ་སྟེ་གང་དགོས་ལས་ལ་སྦྱར་བས་འགྲུབ་པ་ཡིན་ནོ།  །རྟགས་སམ་མཚན་མའི་བསྙེན་པ་ནི།  རྣལ་འབྱོར་པ་རབ་ལ་སྐུ་གསུང་ཐུགས་ཀྱི་རྟགས་བདུན་གསུམ་ཉེར་གཅིག་མངོན་སུམ་འབྱུང༌།  འབྲིང་ལ་དེ་དག་ཉམས་སྣང་དུ་བྱུང༌།  ཐ་མ་རྣམས་ལའང་གཞུང་ལས།  སེམས་རྩེ་གཅིག་ཏུ་ཏིང་ངེ་འཛིན་ལ་གནས་ཤིང་གསལ་བ་དང་༔  བླ་མ་ལ་མོས་གུས༔  ཡི་དམ་ལ་དག་སྣང་༔  སྒྲུབ་པ་ལ་སྤྲོ་ཞིང་བློ་དཔའ་བ་དང་གདིང་ཡོད་པ༔  རྨི་ལམ་དུ་མཆོད་རྟེན་དང་རི་མགོ་རྩེར་འདུག་པ༔  རྔ་བརྡུང་༔  དར་འཕྱར༔  དུང་འབུད༔  ཉི་ཟླའི་སྟེང་དུ་འདུག་པ༔  ལྷའི་ཞལ་མཇལ༔  སྒྲུབ་ཕུར་རྣམས་ལས་འོད་འཕྲོ༔  འཕར་ལྡིང་བཞད་པ་ལྷ་མོའི་གཟུགས་སྟོན་པ༔  དབང་བསྐུར་ཆོས་བཤད་ཁྲི་ཆེན་ལ་འདུག་ལ༔  གྲུ་ཆེན་ལ་འདུག་ (47ན) པ༔  གྲུ་པ་མཉན་པ་སྡེ་དཔོན༔  ཁྲོམ་གྱི་ཁ་ལོ་བསྒྱུར་བ་འབྱུང་ངོ་༔  ཞེས་གསུངས་པ་ལས་སྐུ་གསུང་ཐུགས་ཀྱི་རྟགས་སྣ་གསུམ་རྫོགས་ན་བསྙེན་ཚད་རྫོགས་པའི་རྟགས་སུ་གསུངས་སོ།  །སྐབས་འདིར་སྔོན་ལས་ཀྱི་དབང་གིས་ཇི་ལྟར་བསྒྲུབས་ཀྱང་བར་ཆད་ན་ཚ་སོགས་མི་ཤིས་པ་མང་ཞིང་རྟགས་མཚན་གང་ཡང་མ་མཐོང་བའམ་ལོག་པར་མཐོང་ན་སྔོན་གྱི་ལས་འཕྲོ་མེད་པའམ།  དམ་ཚིག་ཉམས་པ་དང༌།  ཆོ་ག་ཕྱག་ལེན་འཁྲུགས་པ།  སྔགས་དང་བཟླས་བརྗོད་མ་དག་པ།  བརྒྱུད་པ་ལ་སེལ་ཞུགས་པ།  སྒྲུབ་རྫས་མ་ཚང་བ།  དམིགས་པ་ཏིང་ངེ་འཛིན་མ་གསལ་བ།  གཡེང་བ་ལ་སོགས་པའི་སྐྱོན་ཅན་ཡིན་པས།  དེ་ལ་བསོད་ནམས་ཚོགས་ཀྱི་དཔུང་བསྐྱེད།  བཤགས་པ་དང་ཡིག་བརྒྱ་མང་དུ་བཟླ།  བདག་ཉིད་དང་སྒྲུབ་རྫས་ལག་ཆ་རྣམས་རྡོ་རྗེ་རྣམ་འཇོམས་ཀྱི་ཁྲུས་ནས་དབྱུང༌།  རབ་གནས་བསྐྱར་བླ་མ་བརྒྱུད་པ་མཚན་ཉིད་དང་ལྡན་པ་ལས་དབང་ལུང་ལག་ལེན་ཐམས་ཅད་བསྐྱར་ནས་ཞུ་ཞིང་ཞུན་ཐར་བཅད།  ཡི་དམ་ལ་ཚོགས་དང་བསྐང་གསོལ་བྱ།  ཡན་ལག་བདུན་པ་དང་མཎྜལ་མང་དུ་ཕུལ་ཞིང་གསོལ་བ་གདབ་ལ་དངོས་གྲུབ་ཞུ།  ཚེ་འདིའི་ཆེད་གཉེར་ཆགས་ཞེན་གྱི་བློ་སྣ་རིང་དུ་དོར།  སྟོང་པ་ཉིད་ཀྱི་(47བ)གདིང་བཅའ།  བྱམས་སྙིང་རྗེ་བྱང་ཆུབ་ཀྱི་སེམས་དཔང་དུ་བཙུགས་ཏེ་བརྩོན་འགྲུས་དྲག་པོས་བསྒྲུབ་བོ།  །དེས་ཀྱང་མ་འགྲུབ་ན་སྒྲུབ་པ་ལན་གསུམ་མམ་ལྔའམ་བདུན་སོགས་སྤོགས་ན་ལས་འཕྲོ་ཇི་ལྟར་ངན་ཀྱང་འགྲུབ་པར་གསུངས་སོ།  །གཉིས་པ་སྒྲུབ་པ་ནི།  ཕྱི་ནང་གི་མཚམས་གཅོད་སོགས་བསྙེན་སྒྲུབ་སྦྲེལ་བའི་སྐབས་འདིར་སྔར་སོང་བས་འཐུས་པར་མཛད།  ཆག་ཆག་གདབ་པ།  ཐིག་ཚོན་བྱིན་རླབས་ལྡན་པས་དཀྱིལ་འཁོར་བྲི་བ།  ཕུར་བུ་བྱིན་གྱིས་བརླབས་ཏེ་དགོད་པ།  རྒྱན་རྫས་དགྲམ་པ་རྣམས་གཞན་དོན་ཚོམ་བུའི་སྒྲུབ་གཞུང་ལྟར་བྱ་བ་ཡིན་མོད།  དེ་ཙམ་མ་ལྕོགས་ན།  སྔར་བསྙེན་དུས་དཀྱིལ་འཁོར་བཤམས་ཚེ་དེ་ཀའི་སྟེང་དུ་སྦམ་ཕུར་བཀོད་པས་གོ་བཅད།  གལ་ཏེ་སྔར་ཐོད་དཀྱིལ་ཁོ་ནར་བསྟེན་པ་ཡིན་ན།  འདིར་དཀྱིལ་འཁོར་རས་བྲིས་བཀྲམ་པའི་སྟེང་སྔར་གྱི་ཐོད་པའི་དཀྱིལ་འཁོར་ལ་ལྷ་ཕུར་ཚང་མ་སྦམས་ཏེ་བཙུགས་པ་ཉིད་བཀོད།  སྔར་གཙོ་ཕུར་ལས་མེད་ན་སྐབས་འདིར་ལྷ་ཕུར་ཚང་མའམ།  མ་འབྱོར་ན་དཀྱིལ་འཁོར་གྱི་ལྷ་གནས་སོ་སོར་ཚོན་སྤུངས་སམ་ཕྱག་མཚན་ནམ་འབྲུའི་ཚོམ་བུ་བཀོད།  སྒྲུབ་གཏོར་དང་ཆོས་སྲུང་གི་གཏོར་མ་སྨན་རཀ་རྣམས་སྔར་གྱི་དེ་ཀ་གསོལ་པས་ཆོག    །སྐབས་འདིར་ཕྱི་ནང་གི་མཆོད་པ་(48ན)དང་དཀྱིལ་འཁོར་གྱི་རྒྱན་ཅི་འབྱོར་བཀྲམ།  དེ་ལྟར་གྲབ་ཤོམ་ཚར་བའི་ནུབ་རྒྱུན་བསྙེན་མ་ཆག་ཙམ་བཟླས་རྗེས་ཉལ།  སང་ཉིན་ཞོག་ཐུན་ནས་བརྩམས་ཏེ་སྐྱབས་སེམས་བཀའ་བསྒོ་སོགས་སྔོན་འགྲོའི་རིགས་གྲུབ་ནས།  ཏིང་འཛིན་རྣམ་གསུམ་ནས་བཟུང་རང་དང་མདུན་གྱི་དཀྱིལ་འཁོར་སྒྲུབ་རྟེན་ཕུར་བུ་དང་བཅས་པ་དམ་ཚིག་གི་འཁོར་ལོར་དབྱེར་མེད་དུ་བསྐྱེད་པའི་ཁྱད་པར་ཙམ་མ་གཏོགས་གཞན་བསྟོད་པའི་བར་བསྙེན་པ་ལྟར་ལས་གཞུང་བསྲང་ཞིང༌།  སྐུ་གསུང་ཐུགས་ཀྱི་ཛཔྲ་དགོངས་གསུམ་བསྙེན་དུས་ལྟར་ལ་བུང་བ་ཚང་ཞིག་གི་ཚུལ་ཁྱད་པར་དུ་བྱས་པའི་བཟླས་པ་སྔོན་དུ་བཏང་རྗེས།  འདིར་ཡོན་ཏན་ལ་དམིགས་པའི་ཛཔྲ་དགོངས་གཙོ་བོར་བྱ་སྟེ།  དེའི་དམིགས་པ་ནི།  བདག་ཉིད་ལས་མདུན་རྟེན་གྱི་དཀྱིལ་འཁོར་ཕཊ་ཛཿས་ཕྱེས་པ་མདུན་གྱི་ནམ་མཁར་བཞུགས་པར་མོས།  བདག་ཉིད་ཀྱི་ཐུགས་ཀའི་སེམས་དཔའ་སུམ་བརྩེགས་ལས་འོད་ཟེར་དཔག་ཏུ་མེད་པ་འཕྲོས།  ཕྱོགས་བཅུའི་བདེ་གཤེགས་ཐམས་ཅད་དང༌།  གཙོ་བོ་ཁྲོ་ཚོགས་སྲས་མཆོག་སྒོ་མ་དམ་ཅན་གྱི་ཕུར་བུ་ཐམས་ཅད་ཀྱི་ཐུགས་ཀར་ཐིམ།  དགྱེས་པ་བསྐྱེད།  ཐུགས་དམ་བསྐུལ།  སྐུ་གསུང་ཐུགས་ཀྱི་དངོས་གྲུབ་ཐམས་ཅད་(48བ) སྔགས་ཕྲེང་དམར་པོའི་རྣམ་པར་ལྷ་སོ་སོའི་ལྟེ་བ་ནས་བྱུང༌།  བདག་གི་ལྟེ་བར་ཞུགས།  ཐུགས་ཀའི་ས་བོན་ལ་ཐིམ།  སླར་ཐུགས་ཀ་ནས་སྔར་བཞིན་སྤྲོས་པ་འགལ་མེ་ལྟར་འཁོར་བར་དམིགས་ནས་ཛཔྲ་བཟླ་ཞིང་ཐུན་མཐར་མཆོད་ཅིང་བསྟོད།  ཐུན་བཞིའི་གཅོང་ཚུལ་དང་སྔོན་འགྲོ་རྒྱས་བསྡུས་ཀྱི་འདོར་ལེན་སོགས་སྔར་བསྙེན་པ་ལྟར་ལས།  འདིར་སྲོལ་ཐུན་ལྟ་བུའི་ཐུན་གཅིག་ལ་ཚོགས་གཏོར་ཀྱང་ཅི་འགྲུབ་བྱ་ཞིང་ལྷག་མ་བཙོན་དུ་འཛིན་པ་སོགས་སྤྱི་ལྟར་རོ།  །ཚུལ་དེས་སྒྲུབ་པ་རྫོགས་པར་ཉེ་བའི་མཐའི་ཞག་བདུན་གསུམ་ཙམ་གྱི་རིང་སྔར་བཞིན་སྐུ་གསུང་ཐུགས་ཡོན་ཏན་བཞིའི་ཛཔྲ་དགོངས་དང་ལྡན་པས་ཛཔྲ་བཟླས་མཐར་དམིགས་པ་འདི་ཉིད་བསྣན་ཏེ།  སླར་ཡང་འོད་ཟེར་འཕྲོས་པས་སྣོད་བཅུད་ཀྱི་འཇིག་རྟེན་ཐམས་ཅད་ཁྱབ།  འབྱུང་བཞི་རིན་ཆེན་སྨན་རྫས་ཐམས་ཅད་ཀྱི་ཚེ་རིང་ནད་མེད་གདོན་སེལ་བྱེད་ཀྱི་བཅུད་ཐམས་ཅད་བསྡུས་ཏེ་བདག་ལ་ཐིམ་པས་ཚེ་བསོད་དཔལ་གྲགས་གཟི་མདངས་བསྐྱེད།  ཁྱད་པར་འཆི་མེད་ཚེའི་རིག་འཛིན་ཐོབ་པར་གྱུར།  བཅུད་ཀྱི་སེམས་ཅན་ཐམས་ཅད་ལ་འཕྲོས་པས་ལས་ཉོན་མ་རིག་པའི་བག་ཆགས་སྦྱངས།  རྡོ་རྗེ་གཞོན་ནུའི་རང་བཞིན་དུ་གྱུར།  དཀྱིལ་འཁོར་(49ན)གྱི་ལྷ་ཚོགས་དང་ཕྱོགས་བཅུའི་སངས་རྒྱས་ཐམས་ཅད་ལ་འཕྲོས།  མཉེས་མཆོད་ཕུལ།  དགྱེས་པ་བསྐྱེད།  ཐུགས་དམ་བསྐུལ།  སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཨོཾ་ཨཱཿཧཱུཾ་གི་རྣམ་པར་བསྡུས་ནས་བདག་ལ་ཐིམ་པས་ལས་ཉོན་བག་ཆགས་དང་བཅས་པ་སྦྱངས།  རྡོ་རྗེ་གཞོན་ནུའི་རང་བཞིན་དུ་གྱུར།  སྐུ་གསུང་ཐུགས་ཡོན་ཏན་ཕྲིན་ལས་ཡོངས་རྫོགས་ཀྱི་དངོས་གྲུབ་ཐོབ་པར་བསམ།  ཡང་འབྲུ་གསུམ་གྱི་རྣམ་པར་བསྡུས་ནས་རྟེན་རྫས་ཐམས་ཅད་ལ་ཐིམ་པས་འབར་འཁྲབ་ཁོལ་ཞིང་དྲི་བཟང་དང་དུ་བ་སོགས་བྱུང་བར་བསམ་ལ་འབྲུ་བཅུ་བདུན་པ་ཉིད་བཟླའོ།  །དེའང་རྩ་སྒྲུབ་ལས།  དེ་ལྟར་འོད་ཟེར་སྤྲོ་བསྡུ་མ་ཡེངས་པར་ཞག་སུམ་ཅུ་ཕྲག་གསུམ་མམ་མཚན་རྟགས་མ་བྱུང་གི་བར་འབད་པས༔  རྟགས་དང་ཡོན་ཏན་བསམ་གྱིས་མི་ཁྱབ་པ་འབྱུང་སྟེ༔  རབ་རྣམ་སྨིན་གྱི་ལུས་འདི་ལྷར་འགྱུར་བའམ༔  འབྲིང་དུ་ཞལ་མཐོང་ལུང་སྟོན་གསུང་དང་ཆོས་སྟོན་པ༔  ངག་བདེན་པ་འགྲུབ་པ་རྣམས་འབྱུང་༔  ཐ་མ་རྨི་ལམ་དུ་ཞལ་མཇལ༔  དགྲ་བགེགས་ཚར་བཅད་ཕྲིན་ལས་ཐོགས་མེད་དུ་འགྲུབ་པར་འགྱུར་རོ༔  དེ་ཚེ་སྒྲུབ་ཕུར་རྣམས་སྤྱི་བོ་མགྲིན་པ་སྙིང་ག་གསུམ་དུ་གཏུགས་(49བ)ཏེ༔  སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་ཐོབ་པར་བསམ༔  ཐོབ་ཀྱང་ངེས་པར་འཐོབ་པ་ཡིན་ནོ༔  ཞེས་གསུངས་པ་དང༌།  དེར་མ་ཟད་གྲུབ་པའི་རྟགས་ཕུར་བུ་འབར་ཞིང་མེ་ལྟར་འབར་ན་རིག་འཛིན་གྱི་རྒྱལ་པོར་འགྱུར་བ་དང༌།  སངས་རྒྱས་ཀྱི་ཞལ་མཐོང་བ་སོགས་འགྱུར།  འབྲིང་དུ་བ་བྱུང་ན་མི་སྣང་བ་སོགས་དང༌།  དྲོ་བར་གྱུར་ན་རྐང་མགྱོགས་སོགས་ཀྱི་དངོས་གྲུབ་ཐོབ་པར་གསུངས་མོད།  དེ་ལྟར་མ་འགྲུབ་ནའང་།  ཐ་མ་ཞི་རྒྱས་སོགས་ལས་ཕྲན་ཚེགས་རྣམས་བཏབ་པ་ཙམ་གྱིས་འགྲུབ་པར་འགྱུར་རོ།  །དུས་བཤད་མ་ཐག་པ་ལྟར་ལ།  གྲངས་བདུན་འབུམ་ཉི་ཁྲི་གཙོར་བཟུང་ངོ༌།  །གསུམ་པ་ལས་སྦྱོར་ནི།  སྒྲུབ་པ་ཆེན་པོའི་ཡན་ལག་དངོས་གྲུབ་ལེན་པ་སྟེ།  དེའང་གྲུབ་པའི་མཚན་མ་མཐོང་བའམ་དུས་གྲངས་རྫོགས་ནས་དངོས་གྲུབ་ཀྱི་རྫས་བསགས་པ་ནི།  མཆོད་གཏོར་བཟང་དུ་བཤམ།  གཏའ་གཏོར་རྙིང་པ་ཁ་གསོ།  བྷཉྫ་མཚན་ལྡན་དུ་ཆང་བཟང་པོ་ལ་ཨ་མྲྀ་ཏ་མངར་གསུམ་བཏབ་པ་ཨོཾ་ཨཱཿཧཱུཾ་གིས་བདུད་རྩིར་བྱིན་གྱིས་བརླབས་ལ་བཞག    །སྣོད་བཟང་པོར་ཕྱེ་མར་ཨ་མྲྀ་ཏ་དང་སྤོད་ཀྱིས་བྲན་པ་ལས་དངོས་གྲུབ་ཀྱི་རྫས་དབུས་སུ་རིན་(50ན)ཆེན་འབར་བའི་ནང་དུ་འདོད་དོན་གྱི་གསོལ་བྱང་བཅུག་པ།  དེའི་ཤར་དུ་འབྲང་རྒྱས་ཟླུམ་པོ།  ལྷོར་གྲུ་བཞི།  ནུབ་ཏུ་ཟླ་གམ།  བྱང་དུ་ཟུར་གསུམ་རྣམས་བཀོད།  རིལ་བུ་དང་བདར་བུ་ཅི་རིགས་པས་ཟླུམ་ཐབས་སུ་བསྐོར་ཞིང༌།  ཚེ་འབྲང་དང་ཚེ་ཆང་ཡང་བཤམས།  ནུབ་ཐ་མའི་ཐོར་ཐུན་ལ་སྔོན་འགྲོ་ནས་བརྩམས་བཟླས་པའི་བར་སྔར་གྱི་དཀྱུས་བཞིན་དང༌།  ཚོགས་བསྒྲལ་བསྟབ་ཀྱི་བར་ལས་གཞུང་བསྲང་རྗེས།  ཡོན་ཏན་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི།  བདག་དཔལ་ཆེན་པོ་ཡབ་ཡུམ་དུ་གསལ་བའི་ཡབ་ཀྱི་གསང་གནས་ཟླ་བ་ལ་རྡོ་རྗེ་རྩེ་ལྔ་པ།  སྡུད་བྱེད་ཀྱི་སྙིང་པོ་བུ་གར་ཨོཾ་དཀར་པོས་མཚན་པ།  ཡུམ་གྱི་མཁའ་པདྨ་འདབ་བརྒྱད་ཀྱི་ལྟེ་བར་ཨེ་གྲུ་གསུམ་གྱི་དབུས་སུ་འབེབས་བྱེད་ཀྱི་སྙིང་པོ་ཨེ་དམར་པོས་མཚན་པར་བསམ་ལ།  མཁའ་གསང་སྦྱར་ཏེ་སྙོམས་པར་ཞུགས་པས་ཡུམ་གྱི་དུང་ཁང་ན་ཁྲག་འཐུང་རིགས་ལྔ་ཡབ་ཡུམ་ཚོན་གང་བ་བཞུགས་པ་རྣམས་བསྐུལ།  སྙོམས་པར་ཞུགས་པས་ཡབ་ལྔའི་བྱང་སེམས་མུ་ཏིག་དཀར་པོ།  ཡུམ་ལྔའི་དྭངས་མ་མཚལ་ལྟ་བུ་རྩ་དབུ་མ་ནས་བྱུང༌།  ཡུམ་གྱི་མཁར་བབས་དཀར་དམར་འདྲེས་ནས་དངོས་གྲུབ་ཀྱི་རང་བཞིན་དུ་བསྐྱིལ་བ་དེ་ཨོཾ་ཨཱཿཧཱུཾ་གསུམ་དུ་(50བ)གྱུར་པ་བདག་ཉིད་ཀྱི་རྡོ་རྗེའི་ནང་དུ་རྔུབས་ཏེ་ཐུགས་སྲོག་ཧཱུཾ་ལ་ཐིམ།  ཐུན་མོང་གི་ཚེ་བསོད་དཔལ་གྲགས་རྒྱས།  སྣང་བ་དབང་དུ་འདུས།  གཟི་བརྗིད་འོད་དུ་འབར།  ལོ་བཅུ་དྲུག་གི་ན་ཚོད་དུ་གྱུར།  མཆོག་གི་དངོ ཧཱུཾ་སརྦ་སིདྡྷི་ཨཱཿཞེས་བཏགས་པ་བརྒྱ་སྟོང་སོགས་དྲག་ཏུ་བཟླ།  མཐར་ཕྲེང་བ་ལག་གཡས་སུ་ཐོགས།  གཡོན་པའི་མཛུབ་མོ་དང་མཐེའུ་ཆུང་བསྒྲེང༌།  གུང་སྲིན་མཐེ་བོང་སྦྱར་བ་རྟ་མགོའི་ཕྱག་རྒྱ་བྱས་ཏེ།  ཐུགས་སྲོག་འོད་ཟེར་གྱིས་བསྐུལ་བས་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་དངོས་གྲུབ་ཐམས་ཅད་དང༌།  ཁྱད་པར་དུ་དཀྱིལ་འཁོར་ལྷ་ཚོགས་རྣམས་ཀྱི་བྱིན་རླབས་མཆོག་དང་ཐུན་མོང་ཡིད་ལ་ཅི་འདོད་པ་ཐམས་ཅད་དངོས་གྲུབ་ཀྱི་རྫས་ལ་དྲག་ཏུ་ཐིམ་པས་རྫས་རྣམས་འདོད་རྒུ་འབྱུང་བའི་རྒྱ་མཚོ་ཆེན་པོར་གྱུར་པར་བསམ་ལ།  ཨོཾ་བཛྲ་ཀཱི་ལི་ཀཱི་ལ་ཡ༔  ཛཿཧཱུཾ་བཾ་ཧོཿ ཀཱ་ཡ་སིདྡྷི་ཨོཾ༔  ཝཱཀ་སིདྡྷི་ཨཱ༔  ཙིཏྟ་སིདྡྷི་ཧཱུཾ༔   སརྦ་སིདྡྷི་ཧྲཱིཿ ཞེས་བཟླས་པས་རྫས་རྣམས་ལ་རབ་འོད་འབར།  འབྲིང་ཁོལ།  ཐ་མ་རླངས་སམ་དྲི་བྱུང་བའམ།  གལ་ཏེ་དེ་ཙམ་མ་བྱུང་ནའང་ཐོར་(51ན) ཐུན་གྱི་མཐའི་སྐྱ་རེངས་ཤར་བ་དང་དངོས་གྲུབ་བླང་སྟེ།  ཀ་པཱ་ལ་མཚན་ལྡན་དུ་ཁྲག་ཆང་ཨ་མྲྀ་ཏ་དང་མངར་གསུམ་སྦྱར་བ་ཨོཾ་ཨཱཿཧཱུཾ་གིས་བདུད་རྩིར་སྦར་བ་ཐོགས་ཏེ།  ཧཱུཾ།  འཆི་མེད་བདུད་རྩི་སྨན་གྱི་བཅུད༔  ཉོན་མོངས་གདུང་བ་སེལ་བའི་མཆོག༔  ཛ་གད་རཀྟའི་མཆོད་པ་འདི༔  དཀྱིལ་འཁོར་ལྷ་ཚོགས་རྣམས་ལ་འབུལ༔  ཞེས་ཁྲག་ཆང་མཐེབ་སྲིན་གྱིས་འཐོར་ཞིང་སོ་སོའི་མཚན་སྔགས་མཐར།  མ་ཧཱ་པཉྩ་ཨ་མྲྀ་ཏ་ཁཱ་ཧི།  མ་ཧཱ་རཀྟ་ཁཱ་ཧི།  ཞེས་བཏགས་པས་མཆོད།  དངོས་གྲུབ་ཀྱི་རྫས་ཐོགས་ལ།  ཧཱུཾ༔  དགོངས་ཤིག་རྡོ་རྗེ་ཕུར་པའི་ལྷ༔  རིག་འཛིན་མཁའ་འགྲོ་དམ་ཅན་ཚོགས༔  དཔང་གྱུར་ཐམས་ཅད་དགོངས་སུ་གསོལ༔  དང་པོ་བསྙེན་ཅིང་བར་དུ་བསྒྲུབ༔  བསྐྱེད་རྫོགས་གཉིས་ཀྱི་ལས་གཞུང་བསྲང་༔  སྨིན་གྲོལ་གཉིས་ཀྱིས་རྒྱུད་ཀྱང་སྦྱངས༔  ཞག་དུས་གྲངས་དང་རྟགས་ཀྱང་ཐེམས༔  དེང་སང་སྐྱ་རེངས་དང་པོ་ཤར༔  རྡོ་རྗེ་སྲིན་པོའི་ནམ་ལངས་ཉེ༔  འདོད་རྒུའི་དངོས་གྲུབ་རིན་ཆེན་གཏེར༔  ད་ནི་འབྱུང་བའི་དུས་ལ་བབ༔  རྡོ་རྗེ་ཕུར་པའི་ལྷ་ཚོགས་རྣམས༔  ཐབས་ཀྱི་སྤྱོད་པས་འགྲོ་དོན་དུ༔  བྱམས་དང་སྙིང་རྗེ་གང་འདུལ་བའི༔  སངས་རྒྱས་ཕྲིན་ལས་རྫོགས་མཛད་ནས༔  སྐུ་གསུང་ཐུགས་ཡོདནཕྲིན་ལས་ཀྱི༔  དབང་(51བ)དང་དངོས་གྲུབ་བདག་ལ་སྩོལ༔  ལྷ་དང་སྐལ་བ་མཉམ་པར་ཤོག༔  ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་སརྦ་སིདྡྷི་ཕལ་ཧོ༔  ཞེས་བརྗོད་ལ་སྒྲུབ་རྟེན་གནས་གསུམ་དུ་གཏུག་ཅིང་དམ་རྫས་རྣམས་ལ་ལོངས་སྤྱད་ནས།  ལྷ་དང་དངོས་གྲུབ་འོད་དུ་ཞུ་བ་བདག་གི་ཐུགས་སྲོག་ལ་ཐིམ་པས་དབྱེར་མེད་དུ་གྱུར་པར་བསམ།  དེའི་ཚེ་སྒྲུབ་རྟེན་ཕུར་བུ་རྣམས་འཕར་ཞིང་འབར་བ་དང་དུ་བ་སོགས་ཀྱི་རྟགས་བྱུང་ན་ཐེ་ཚོམ་མེད་པར་ལྷ་ལ་ཕྱག་བྱས་ནས་གཡས་པས་བླངས་ཏེ་དངོས་གྲུབ་བླང་པ་ཡིན་མོད་ཀྱི།  རྟགས་མཚན་མངོན་དུ་མ་བྱུང་ནའང་འདིར་རང་གི་གནས་གསུམ་དུ་གཏུག་ཅིང་རྡོ་རྗེ་གསུམ་དུ་ལྷུན་གྱིས་གྲུབ་པར་གསོལ་བ་བཏབ།  སྒྲུབ་གཏོར་ལྷར་གསལ་བའང་གནས་གསུམ་དུ་རེག་ཅིང་དབང་བླངས་ནས་ལྷ་ཞུ་བའི་གཏོར་རྫས་བདུད་རྩིར་མོས་ཏེ་མྱང་བས་རྩ་ཁམས་ཐམས་ཅད་ཡེ་ཤེས་ཀྱིས་ཁྱབ་པར་བསམ།  དངོས་གྲུབ་ཀྱི་རྫས་ཆ་བཞིར་བགོས་པའི་གཅིག་བླ་མ་དང༌།  གཅིག་རིག་འཛིན་ལ་འབུལ།  གཅིག་བདག་གིས་རོལ།  གཅིག་སྒྲུབ་གྲོགས་ལ་སྟེར།  དེ་ནས་ནམ་ལངས་པ་དང་རང་གཞུང་གི་རྒྱུན་གཏོར་དང་སྲུང་མའི་གཏོར་ཆོག་རྣམས་རྒྱས་པར་བྱ་ཞིང༌།  དེ་ཉིན་ལྷག་ཆོག་དང་སྦྲེལ་ཏེ་སྔར་གྱི་ལྷག་མ་རྣམས་ཀྱང་ཕྱི་རོལ་དུ་བཏང་ལ་(52ན)སྨོན་ལམ་དང་བཟོད་གསོལ་བྱ།  སྒྲུབ་གཏོར་ཆ་གསུམ་དུ་བགོས་པའི་ཆ་གཅིག་སྒྲུབ་ཁང་གི་འོག་ཏུ་སྒྲུབ་གཞུང་ལྟར་གཏེར་དུ་སྦ།  ཆ་གཅིག་སྦྱིན་སྲེག་གི་དུས་རྫས་ལ་འབུལ།  ཆ་གཅིག་གཏོར་མ་གཞན་རྣམས་དང་བསྡེབ་ནས་ཕྱིར་བསྣུར་ཏེ་ཐ་ཚིག་གི་ཆད་མདོ་བསྒྲག་ཅིང་གཏོར་ཟོར་འཕང༌།  བརྟན་མ་བསྐྱངས་ལ་དཔལ་གྱི་བྲོ་བརྡུང༌།  ཚེ་འགུགས་བྱ།  དེ་ནས་དཀྱིལ་འཁོར་པ་ལ་གཏང་རག་གི་མཆོད་བསྟོད་རྒྱས་པར་བྱས་མཐར་རྡུལ་ཚོན་ཡིན་ན་ཡེ་ཤེས་པ་གཤེགས་སུ་གསོལ།  རས་བྲིས་ཡིན་ན་བརྟན་བཞུགས་བྱ།  དམ་ཚིག་པ་སྲུང་འཁོར་དང་བཅས་པ་བསྡུ་ཞིང་ཐུན་མཚམས་ཀྱི་ལྷར་ལངས་པས་རྟག་ཆད་ཀྱི་མཐའ་བསལ་ནས་བསྔོ་སྨོན་དང་ཤིས་པ་བརྗོད་པས་མཐའ་བརྒྱན།  བསྙེན་མཚམས་ཀྱི་ཁོངས་དེ་གར་ཞི་བའི་སྲེགས་བླུགས་ཀྱང་བསྙེན་པའི་བཅུ་ཆའི་གྲངས་ལོངས་སུ་བསགས་དགོས་པ་ལས།  དེའི་ཆོ་ག་རྒྱས་པ་ལོགས་སུ་ཤེས་ལ།  འདིར་ཁ་སྐོང་འཇུག་པ་དེའི་མེ་མཆོད་སྤྲོས་པ་བསྡུ་བར་འདོད་ན།  མདུན་དུ་ཞི་བའི་ཐབ་དཀྱིལ་སྤྱི་ལྟར་རམ་མེ་སྣོད་སོལ་མེས་བཀང་བས་ཀྱང་རུང༌།  ཡམ་ཤིང༌།  མར་ཁུ།  ཏིལ་དང་ཡུངས་དཀར་མེ་ཏོག་འབྲུ་སྣ་དཀར་པོའི་(52བ)རིགས་འདུ་བྱ།  རྫས་རྣམས་འབྲུ་གསུམ་ཞུ་བ་ལས་བྱུང་བའི་ཟག་མེད་ཀྱི་བདུད་རྩིར་གྱུར་པར་བསམ་ལ།  ཨོཾ་ཨཱ༔  ཧཱུཾ་ལན་བདུན་གྱིས་རློབ།   མེ་ཐབ་བསང་སྦྱང༌།  སྟོང་པའི་ངང་ལས་མདུན་དུ་ཧཱུཾ་ཡིག་ལས་ཞི་བའི་ཐབ་ཁུང་ཟླུམ་པོ་དཀར་པོ་མཚན་ཉིད་ཐམས་ཅད་ཡོངས་སུ་རྫོགས་པར་གསལ་གདབ།  ཨགྣེ་ཛྭ་ལ་རཾ་གྱིས་མེ་དུ་བ་མེད་པར་འབར་བ་ཐབ་ཏུ་བཞག་ནས།  མེའི་དབུས་སུ་དཔལ་ཆེན་རྡོ་རྗེ་གཞོན་ནུ་རང་རྩལ་སྤྲུལ་པའི་འཁོར་ཚོགས་དང་བཅས་པ་སྐད་ཅིག་གིས་སད་པར་མོས།  གཙོ་འཁོར་ཐམས་ཅད་ཀྱི་བ་སྤུའི་ཁུང་བུ་ནས་འོད་ཟེར་དཀར་པོ་ཟླ་བའི་བདུད་རྩི་ལྟ་བུ་མཁའ་ཁྱབ་ཏུ་སྤྲོ་བ་དང་བསྡུ་བའི་སྒོ་ནས་ཞི་བའི་ལས་རབ་འབྱམས་བསྒྲུབ་པར་བསམ་ལ།  རྩ་སྔགས་འབྲུ་བཅུ་བཞི་པའི་ཤམ་དུ།  ཛྭ་ལ་རཾ་སརྦ་ཀརྨ་ཀུ་རུ་ཧོཿ ཞེས་བཏགས་པ་ཁོ་ནས་བརྒྱ་སྟོང་སོགས་འབུལ་ཞིང༌།  མཚམས་སུ།  རྣལ་འབྱོར་པ་བདག་གི་ནད་གདོན་སྡིག་སྒྲིབ་སྔགས་ཀྱི་ལྷག་ཆད་ལ་སོགས་པ་མི་མཐུན་པའི་ཉེས་པ་ཐམས་ཅད་ཤཱིནྟཾ་ཀུ་རུ་སྭཱ་ཧཱ།  ཞེས་སྤེལ།  མཐར་རླུང་ནང་དུ་འཇུག་པ་དང་ལྷན་ཅིག་མེ་ལྷ་རང་གི་སྙིང་གར་བསྡུ།  ཚུལ་དེ་ལྟ་བུས་ཁ་སྐོང་གྲངས་རྫོགས་པ་ན།  རྒྱལ་ཐོ་ལ་མཆོད་བསྟོད་སྔར་བཞིན་ཕུལ་ནས་གཤེགས་སུ་གསོལ་ལ་ཐོ་(53ན) འགྲོལ།  དེ་ནས་སྒྲུབ་ཁང་དུ་ཉེ་འཁོར་མཆེད་གྲོགས་སོགས་དམ་ལྡན་དང་འཕྲད་དེ་རིམ་གྱིས་ཕྱི་རོལ་དུ་བག་གསེང་ཞིང༌།  ཞག་ཁ་ཡར་ཐག་རིང་དུ་མི་འགྲོ་བར་གནས་སྲུང་བ་བཅས་ཀྱིས་ལེགས་པར་གྲུབ་བོ།  །འདི་ནི་ནང་སྤྲོས་བསྡུས་དཔའ་བོ་གཅིག་སྒྲུབ་ཀྱི་ཚུལ་ཉིད་ཡིན་ནོ།  །གཞན་དུ་གསང་བ་སྤྲོས་མེད་ཏིང་ངེ་འཛིན་སེམས་ཀྱི་སྒྲུབ་པ་ནི།  བསྙེན་པ་བདག་བསྐྱེད་ལུས་དཀྱིལ་ལ་བརྟེན་པ་ཡིན་པས་སྤྲོས་པ་གཞན་མི་དགོས་ཤིང༌།  བསྙེན་སྒྲུབ་སྦྲེལ་མར་འདོད་ན་རས་བྲིས་སམ་ཚོམ་བུའི་དཀྱིལ་འཁོར་གྱི་དབུས་སུ་གཙོ་ཕུར་ཙམ་བཀོད།  མཆོད་གཏོར་སོགས་གང་འབྱོར་བཤམས།  སྔོན་རྗེས་ཀྱི་ལས་རིམ་མདོར་བསྡུས་ལས་བྱང་གིས་ཁོག་ཕུབ་ལ།  ཕྲིན་ལས་རྒྱུན་གྱི་རྣལ་འབྱོར་བཞིན་ཉམས་སུ་ལེན།  སྤྲོས་བསྡུས་སྤྲོས་མེད་གང་གི་སྐབས་སུའང་བསྙེན་སྒྲུབ་ཀྱི་མཐར་ལས་བཞིའི་དམིགས་བཟླས་ཁྱད་པར་དུ་བྱ་བར་འདོད་ནའང་སྤྱི་ལྟར་སྦྱོར་ཞིང༌།  རྗེས་ཀྱི་བྱ་བ་ནི་གོང་གི་འགྲོས་ཀྱིས་ཤེས་སོ།  །འདི་དག་ནི་བདག་དོན་བྱང་ཆུབ་ནར་མའི་སྒྲུབ་པ་གང་ཟག་གཅིག་གིས་ཉམས་སུ་ལེན་པར་བྱ་བ་ཁོ་ན་སྟེ།  གཞན་དུ་ཕྱི་ལྟར་སྤྲོས་བཅས་ཚོམ་བུ་ཚོགས་སུ་སྒྲུབ་པའི་ཚུལ་ནི་དེ་ཉིད་ཀྱི་ཁོག་(53བ)དབུབ་ལོགས་སུ་བཤད་པ་ལྟར་རོ།  །དེ་རྣམས་ནི་སྟོད་ལས་བྱང་ཆུབ་སྒྲུབ་པའི་རིམ་པའོ།  །ཡང་བདག་གཞན་ཐུན་མོང་དུ་བྱང་ཆུབ་སྒྲུབ་ཅིང་བར་ཆད་འདུལ་ཕྱིར་སྟོད་ལས་སྨད་ལས་སྦྲེལ་ནས་བསྙེན་སྒྲུབ་ལས་གསུམ་ཡོངས་རྫོགས་ཀྱི་ལུགས་དང༌།  གདུག་པ་ཅན་བསྒྲལ་ཕྱིར་གློ་བུར་ཅོག་རྡུང་རལ་གྲི་ཕྱུངས་རྡེག་ཏུ་སྒྲུབ་པ་དང༌།  ཤིན་ཏུ་བསྡུས་པ་བསྙེན་སྒྲུབ་ཆིག་ཆོད་དུ་བྱེད་པར་འདོད་ནའང་མན་ངག་གི་ངེས་པ་ཁོངས་སུ་ཆུད་པས་བློའི་རིམ་པ་དང་འཚམས་པར་ཉམས་སུ་བླང་བར་གཅེས་སོ།  །དེ་དག་གིས་ནི་བསྙེན་ཐབས་ཀྱི་ལག་ལེན་དམར་ཁྲིད་བྱེ་བྲག་ཏུ་བཤད་པ་མདོ་ཙམ་བསྟན་ཟིན་ཏོ།  །རབ་འབྱམས་རྒྱལ་ཀུན་ཕྲིན་ལས་ནུས་པའི་སྟོབས།  །འབར་བའི་ཕྱག་རྒྱར་ཡོངས་སྣང་དཀྱིལ་འཁོར་ཆེ།  །བསྙེན་ཅིང་སྒྲུབ་པའི་མན་ངག་ལག་ལེན་ཁྲིགས།  །དངོས་གྲུབ་རྒྱ་མཚོའི་དགའ་སྟོན་བླ་ན་མེད།  །འདི་བརྗོད་དགེ་བས་འཁོར་དང་འདས་པའི་ཆོས།  །ཐལ་འབྱིན་དགོངས་པས་སྐུ་གསུམ་རོ་མཉམ་པ།  །དཔལ་ཆེན་ཁྲག་འཐུང་ཚོམ་བུར་རབ་སྨིན་ཅིང༌།  །ལམ་བཟང་འདིས་ཀྱང་ས་ཆེན་ཀུན་ཁྱབ་ཤོག    །དེ་ལྟར་དཔལ་རྡོ་རྗེ་ཕུར་བུ་བདུདའཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་(54ན)དགའ་སྟོན་ཅེས་བྱ་བ་འདི་ནི།  ལྷག་པའི་ལྷ་འདི་ཉིད་ལས་དངོས་གྲུབ་བརྙེས་པ་བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུའི་སྡེའི་གསུང་གིས་བསྐུལ་བ་བཞིན་རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས།  རྩ་བའི་གཞུང་གི་དགོངས་དོན་ལ་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་མན་ངག་ལེགས་བཤད་ཀྱིས་རྣམ་པར་སྤྲས་ཏེ།  རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་ཐམ་པའི་ཐོག་ཏུ་སོན་པ་དཔལ་གདོང་གི་ལོ་ས་ག་ཉ་བའི་ཤེས་རབ་ཀྱི་ཆའི་རྫོགས་པ་དང་པོ་ཆུ་ཤེལ་གྱི་དབང་པོ་གྲོ་བཞིན་གྱི་དགའ་མ་དང་རྩེ་བའི་འགྲུབ་སྦྱོར་བཟང་པོ་ལ།  ཨེ་ཝཾ་བདེ་ཆེན་ཆོས་འཁོར་གླིང་གི་ཉེ་འདབས་ཕུན་ཚོགས་དགའ་ཚལ་གྱི་བསྟི་གནས་སུ་ལེགས་པར་གྲུབ་པར་བགྱིས་པ་སྟེ།  འདིས་ཀྱང་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་པ་དང༌།  འགྲོ་བ་ཐམས་ཅད་བཅོམ་ལྡན་འདས་དཔལ་ཧེ་རུ་ཀའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག    །སརྦ་དཱ་མངྒལཾ།།  །།}}
</onlyinclude>
</onlyinclude>
{{TsagliCall}}
{{TsagliCall}}
<headertabs/>
<headertabs/>

Latest revision as of 16:41, 23 December 2025

Previous Text Back to Volume PageNext Text
Wylie title dpal rdo rje phur bu bdud 'joms gnam lcags spu gri'i stod las byang chub sgrub pa'i man ngag gsal bar byas pa dngos grub rgya mtsho'i dga' ston DJYD-KABUM-11-DA-004.pdf
Location bdud 'joms rin po che bka' 'bum
Volume 11, Text 4, Pages 71-177 (Folios 1a1 to 54a6)
Author བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation Dudjom Rinpoche 'Jigs bral ye shes rdo rje. Dpal rdo rje phur bu bdud 'joms gnam lcags spu gri'i stod las byang chub sgrub pa'i man ngag gsal bar byas pa dngos grub rgya mtsho'i dga' ston. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 11: 71-177. Kalimpong: Dupjung Lama, 1979-1985.
Side notes Recto: stod las bsnyen yig   Verso: gnam lcags spu gri
More details More details
Tertön བདུད་འཇོམས་གླིང་པ་ (bdud 'joms gling pa)
Genre Recitation Manual - bsnyen yig
Cycle དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲི་ (dpal rdo rje phur bu bdud 'joms gnam lcags spu gri)
Parent Cycle ཐུགས་སྒྲུབ་གསང་བ་རྒྱ་ཅན་ (thugs sgrub gsang ba rgya can)
Deity rdo rje phur pa
Colophon

།དེ་ལྟར་དཔལ་རྡོ་རྗེ་ཕུར་བུ་བདུདའཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ་འདི་ནི། ལྷག་པའི་ལྷ་འདི་ཉིད་ལས་དངོས་གྲུབ་བརྙེས་པ་བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུའི་སྡེའི་གསུང་གིས་བསྐུལ་བ་བཞིན་རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས། རྩ་བའི་གཞུང་གི་དགོངས་དོན་ལ་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་མན་ངག་ལེགས་བཤད་ཀྱིས་རྣམ་པར་སྤྲས་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་ཐམ་པའི་ཐོག་ཏུ་སོན་པ་དཔལ་གདོང་གི་ལོ་ས་ག་ཉ་བའི་ཤེས་རབ་ཀྱི་ཆའི་རྫོགས་པ་དང་པོ་ཆུ་ཤེལ་གྱི་དབང་པོ་གྲོ་བཞིན་གྱི་དགའ་མ་དང་རྩེ་བའི་འགྲུབ་སྦྱོར་བཟང་པོ་ལ། ཨེ་ཝཾ་བདེ་ཆེན་ཆོས་འཁོར་གླིང་གི་ཉེ་འདབས་ཕུན་ཚོགས་དགའ་ཚལ་གྱི་བསྟི་གནས་སུ་ལེགས་པར་གྲུབ་པར་བགྱིས་པ་སྟེ། འདིས་ཀྱང་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་པ་དང༌། འགྲོ་བ་ཐམས་ཅད་བཅོམ་ལྡན་འདས་དཔལ་ཧེ་རུ་ཀའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱ་མངྒལཾ།།

de ltar dpal rdo rje phur bu bduda'ajoms gnam lcags spu gri'i stod las byang chub sgrub pa'i man ngag gsal bar byas pa dngos grub rgya mtsho'i dga' ston ces bya ba 'di ni/___lhag pa'i lha 'di nyid las dngos grub brnyes pa bka' babs kyi chos bdag sprul pa'i sku 'jigs med chos dbyings nor bu'i sde'i gsung gis bskul ba bzhin rang gzhan mang po la sman pa'i bsam pa nye bar bskyed nas/___rtsa ba'i gzhung gi dgongs don la mkhas shing grub pa brnyes pa'i rdo rje'i slob dpon chen po rnams kyis ji ltar bkral ba'i man ngag legs bshad kyis rnam par spras te/___rig pa 'dzin pa'i myu gu 'jigs bral ye shes rdo rjes rang lo sum cu tham pa'i thog tu son pa dpal gdong gi lo sa ga nya ba'i shes rab kyi cha'i rdzogs pa dang po chu shel gyi dbang po gro bzhin gyi dga' ma dang rtse ba'i 'grub sbyor bzang po la/___e waM bde chen chos 'khor gling gi nye 'dabs phun tshogs dga' tshal gyi bsti gnas su legs par grub par bgyis pa ste/___'dis kyang zab lam gyi phrin las phyogs dus kun tu dar zhing rgyas pa dang /___'gro ba thams cad bcom ldan 'das dpal he ru ka'i go 'phang la myur du reg pa'i rgyur gyur cig____/sarba dA mang+galaM//

[edit]
༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ་བཞུགས་སོ། །


༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ། བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་ཧེ་རུ་ཀ་ལ་ཕྱག་འཚལ་ལོ། །སྟོང་ཉིད་རྡོ་རྗེ་ཁྲོས་པའི་གར་གྱིས་ཞེ་སྡང་མཚན་རྟོག་དབྱིངས་སུ་གཅོད། །སྙིང་རྗེའི་མཚོན་ཆེན་རབ་ཏུ་འབར་བས་ཕུང་པོ་རྡོ་རྗེའི་དབྱིག་གིས་གཏམས། །ཟུང་འཇུག་སྲིད་པ་ཕུར་བུའི་ཕྱག་རྒྱས་བརྟན་གཡོའི་སྲོག་རྩ་ཐལ་བར་འབྱིན། །བླ་མ་ཧེ་རུ་ཀ་དཔལ་དཔའ་བོས་དངོས་གྲུབ་གནས་ལ་དབུགས་འབྱིན་མཛོད། །རིག་མཆོག་འབུམ་སྡེའི་བཅུད་ཐིག་ཀཱི་ལ་ཡ། ། [2a] བདུད་འཇོམས་སྤུ་གྲིར་འབྲེལ་བའི་ཕྲིན་ལས་གཞུང༌། །ཚུལ་བཞིན་བསྙེན་ཅིང་སྒྲུབ་ལས་མཆོག་ཐུན་གྱི། །དངོས་གྲུབ་རྒྱ་མཚོའི་དཔལ་གྱི་དགའ་སྟོན་སྤྲོ། །དེ་ལ་འདིར་རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་བླ་མ། མན་ངག་ཐམས་ཅད་ཀྱི་ངེས་པའི་དོན། དུས་གསུམ་རྒྱལ་བ་ཐམས་ཅད་ཀྱི་ཐུགས་ཀྱི་བརྣག་པ། རྒྱ་བོད་མཁས་གྲུབ་ཐམས་ཅད་ཀྱི་གཅེས་པའི་དབྱིག །བྱང་ཆུབ་སྒྲུབ་པ་ལ་མེད་དུ་མི་རུང་བའི་ཆ་རྐྱེན་ཕྲིན་ལས་ཀྱི་ལྷ་མཆོག་རྡོ་རྗེ་ཕུར་པའི་དཀྱིལ་འཁོར་གྱི་འཁོར་ལོ་བསྒྲུབ་པར་བྱ་བ་ལ། སྤྱིར་རྡོ་རྗེ་ཕུར་པ་ལ་རྒྱུད་ཀྱི་བསྡུ་ཐབས་གཉིས། བཤད་ཐབས་གསུམ། [2b] ཁོག་དོན་དྲུག །ཐེམ་སྦྱོར་བཅུ། གནད་ཐོ་བཅུ་གཉིས། གསང་ཐེམ་ཉེར་གཅིག་ལ་སོགས་པར་གསུངས་པ་རྣམས་ཧྲིལ་གྱིས་དྲིལ་ན་ཕུར་བུའི་རྒྱུ་བཞིས་གང་ཟག་རྣམ་པ་བཞི་མཐར་དབྱུང་བ་སྟེ། ཕུར་བུ་ངན་སྔགས་གཙུག་ལག་གི་རྒྱུད་ལས། ཕུར་བུ་རྣམ་བཞིའི་དགོངས་པ་ཡིས། །གང་ཟག་རྣམ་བཞི་མཐར་དབྱུང་ངོ༌། །རིག་པ་ཡེ་ཤེས་ཕུར་བུ་ནི། །ཆོས་ཀྱི་དབྱིངས་ཀྱི་ཀློང་དུ་གདབ། །ཐུགས་རྗེ་སྤྲུལ་པའི་ཕུར་བུ་ནི། །ཁམས་གསུམ་སེམས་ཅན་ལ་གདབ་པའོ། །གསང་བ་བྱང་སེམས་ཕུར་བུ་ནི། །ཡུམ་གྱི་མཁའ་ཀློང་ཡངས་པར་གདབ། །མཚན་མ་རྫས་ཀྱི་ཕུར་བུ་ནི། །དགྲ་དང་བགེགས་ལ་གདབ་པའོ། །ཞེས་གསུངས། དེ་ལྟར་ཕུར་བུ་ཐལ་འབྱིན་གྱི་དགོངས་པ་རྣམ་པ་བཞི་ལས། སྔ་མ་གསུམ་བྱང་ཆུབ་ལམ་གྱི་སྒྲོན་མ་ཞེས་བྱ་བ་སྟོད་ལས་དང༌། ཕྱི་མས་སྨད་ལས་དགྲ་བགེགས་སྒྲོལ་བའི་ལས་རིམ་སྟོན་པ་ལས། འདིར་སྐབས་སུ་བབས་པ་ཐུགས་རྗེ་སྤྲུལ་པའི་ཕུར་བུ་ཁམས་གསུམ་སེམས་ཅན་གྱི་ཡུལ་ལ་གདབ་པའི་རིམ་པ་སྟོད་ལས་བྱང་ཆུབ་སྒྲུབ་པའི་ལམ་རིམ་གྱི་སྙིང་པོ་དཔལ་ཆེན་ཚོམ་བུའི་ལྷ་ཚོགས་རྣམས་བསྙེན་ཐབས་ཀྱི་མན་ངག་མདོ་ཙམ་ཞིག་འཆད་པ་ལ་སྤྱི་དོན་རྣམ་པ་གཉིས་ཏེ། ཤེས་པར་བྱ་བའི་རྣམ་བཞག་སྤྱིར་བསྟན་པ་དང༌། [3a] བསྙེན་ཐབས་ཀྱི་ལག་ལེན་བྱེ་བྲག་ཏུ་བཤད་པའོ། །དང་པོ་ལ་གསུམ། དམིགས་པར་བྱ་བའི་ཡུལ། སྒྲུབ་པར་བྱེད་པའི་ཐབས། དེ་ཉིད་གྲུབ་པའི་འབྲས་བུའོ། །དང་པོ་ནི། རྒྱུད་འདིར་རང་བཞིན་དམིགས་པར་བྱ་བའི་ཡུལ་དུ་གྲགས་པ་སྟེ། སྦྱངས་གཞི་འགྲོ་བ་ཡོངས་ལ་ཀུན་ཁྱབ་བདེ་བར་གཤེགས་པའི་སྙིང་པོ་རང་བཞིན་གྱིས་རྣམ་པར་དག་པ་ལྷའི་བདག་ཉིད་ཆེན་པོར་གདོད་ནས་ལྷུན་གྲུབ་ཏུ་གནས་པ་ཉིད་གློ་བུར་གྱི་དྲི་མ་དང་འབྲེལ་བས་གནས་ལུགས་ཀྱི་ཡོན་ཏན་མངོན་དུ་མ་གྱུར་པ་དེ་མངོན་དུ་འགྱུར་བར་བྱ་བ་ལ་དམིགས་ནས། སྦྱོང་བྱེད་དེའི་རྣམ་པ་ལམ་བྱེད་སྣོད་བཅུད་སྣང་བ་འདི་དག་རྟེན་དང་བརྟེན་པར་བཅས་པའི་དཀྱིལ་འཁོར་གྱི་རྣམ་པ་དམ་ཚིག་སེམས་དཔར་བསྒོམ་པ་དང༌། འབྲས་བུ་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡིན་པས། དེའི་རྣམ་པ་ལམ་བྱེད་ཆོས་སྐུ་ཉིད་ཡེ་ཤེས་སེམས་དཔའ་གང་འདུལ་གྱི་རོལ་པ་ཞི་ཁྲོའི་རྣམ་པར་སྤྱན་འདྲེན་པ་དང༌། གཞི་འབྲས་གཉིས་གདོད་མ་ནས་རང་བཞིན་དབྱེར་མེད་དུ་བཞུགས་པས། དེའི་རྣམ་པ་ལམ་བྱེད་ཡེ་ཤེས་པ་དམ་ཚིག་པར་བསྟིམས་ཏེ་དམ་ཡེ་དབྱེར་མེད་དུ་ཉམས་སུ་བླངས་པ་ལས། སྦྱངས་འབྲས་གཞི་ལ་བཞུགས་པའི་དཔལ་ཆེན་པོ་ཉིད་མངོན་དུ་གྱུར་པ་ལ་འབྲས་ [3b] བུའམ་མཆོག་ཐོབ་ཅེས་བརྡར་བཏགས་པའོ། །དེས་ན་བསྒྲུབ་གཞིའི་ལྷ་དེ་རང་ལ་གནས་པས། ལམ་རྐྱེན་དང་འཕྲད་ན་འབྲས་བུའི་ཡོན་ཏན་འབྱུང་རུང་དུ་ངེས་པ་རྙེད་དེ་ཐོབ་བྱའི་འབྲས་བུ་མཚན་ཉིད་པ་འཇིག་རྟེན་ལས་འདས་པ་མཆོག་དང༌། བཏགས་པ་འཇིག་རྟེན་པ་དང་ཐུན་མོང་བ་སྟེ། དངོས་གྲུབ་རྣམ་པ་གཉིས་ཀྱི་ཡོན་ཏན་ལ་བྲོད་པ་བསྐྱེད་ནས་ལམ་ལ་བསླབ་དགོས་པའི་ཕྱིར་དམིགས་ཡུལ་གྱི་གཙོ་བོ་ནི་ཕྱག་རྒྱའི་དངོས་གྲུབ་བོ། །གཉིས་སྒྲུབ་པའི་ཐབས་ལ་ལྔ་སྟེ། གང་གིས་སྒྲུབ་པའི་གང་ཟག །གང་དུ་སྒྲུབ་པའི་གནས། གང་གི་ཚེ་སྒྲུབ་པའི་དུས། གང་ལ་བསྟེན་ནས་སྒྲུབ་པའི་ཡོ་བྱད། ཇི་ལྟར་སྒྲུབ་པའི་ཚུལ་ལོ། །དང་པོ་ནི། ཐུན་མོང་བ་དལ་འབྱོར་རྙེད་དཀའ་ལ་ངེས་པ་རྙེད། འཆི་བ་མི་རྟག་པས་རྒྱུད་འཁུལ། ལས་འབྲས་བསླུ་མེད་ལ་ཡིད་ཆེས་སྐྱེས། འཁོར་བའི་ཉེས་དམིགས་ཀྱིས་ངེས་འབྱུང་གི་གཞི་ཚུགས་ཏེ། ཐུན་མོང་མ་ཡིན་པ་ཐེག་པ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་ཞིང་བྱང་ཆུབ་ཏུ་སེམས་བསྐྱེད། འགལ་རྐྱེན་སྡིག་སྒྲིབ་སྦྱང་ཞིང་མཐུན་རྐྱེན་ཚོགས་བསགས། བྱིན་རླབས་མྱུར་འཇུག་བླ་མའི་རྣལ་འབྱོར་ལ་མྱོང་བ་ཐོན་པའི་གང་ཟག་ལ། ཆུ་བོ་བཞི་འདུས་ཀྱི་སྒོ་ནས་བཤད་ཅིང་ཉམས་ [4a] སུ་ལེན་དགོས་པ་ལས། སྨིན་བྱེད་དབང་གི་ཆུ་བོ་སྐུར་བྱེད་ངོ་སྤྲོད་དང་བཅས་པས་རྒྱུད་སྨིན་ཅིང་དམ་ཚིག་དང་སྡོམ་པ་ལ་གནས་པ། གཞུང་བཤད་ཆུ་བོ་འགྲེལ་ཊཱིཀ་གཏོང་ཐུན་དང་བཅས་པས་བསྒོམ་བྱ་གཏན་ལ་ཕེབས་པ། གདམས་པ་ཉམས་ལེན་གྱི་ཆུ་བོ་ལག་ལེན་མངོན་རྟོགས་དང་བཅས་པ་ལ། མན་ངག་གནད་ཀྱི་ཆུ་བོ་དྲིས་ལན་གེགས་སེལ་དང་བཅས་པས་ཕུ་ཐག་ལེགས་པར་བཅད་ཟིན་པ་གཞིར་བཞག་ནས། དངོས་གྲུབ་ཐོབ་པ་ལ་དེའི་སྟེང་དུ་རྒྱུ་རྐྱེན་ཕུན་སུམ་ཚོགས་པ་གཉིས་ཚང་དགོས་ཏེ། རྒྱུ་ནི་བསྒྲུབ་བྱའི་དངོས་གྲུབ་ལ་ཡིད་རྟོན་པས་དོན་གཉིས་སྒྲུབ་པའི་ལྷག་བསམ་དང་ལྡན་པ། རྐྱེན་ནི་ཡིད་ཆེས་དང་འདོད་པ་དང་རབ་ཏུ་དང་བའི་དད་པ་གསུམ་གྱིས་ཀུན་ནས་བསླངས་ཏེ་བསྙེན་སྒྲུབ་ལ་ཐང་ལྷོད་མེད་པར་འབད་པའི་བརྩོན་འགྲུས་དང༌། དག་བྱ་དག་བྱེད་ཀྱི་གནད་རྟོགས་པའི་ཤེས་རབ་དང་ལྡན་ཞིང༌། འདུ་འཛིས་མི་འཕྲོག་པ་ལ་སོགས་པའི་ཡོན་ཏན་ཚང་བ་རི་བོ་ལྟ་བུའི་གང་ཟག་གིས་སོ། །གཉིས་པ་གནས་ནི། གྲུབ་ཐོབ་གོང་མས་བྱིན་གྱིས་བརླབས་པ་དང༌། སའི་དཔྱད་སྤྱིར་ལེགས་ཤིང་ཁྱད་པར་གསང་རྒྱུད་ལས། མེ་ཏོག་མང་པོའི་གླིང་ཡོད་དང༌། །རི་ནི་རིན་ཆེན་སྤུངས་པ་འདྲ། །སྐྱེད་མོས་ཚལ་དང་དཔག་བསམ་ཤིང༌། །ངང་ [4b] པ་བུང་བའི་སྒྲ་སྒྲོགས་ཤིང༌། །སྐད་སྙན་བྱ་ནི་སྣ་ཚོགས་སྒྲོགས། །གནམ་ནི་འཁོར་ལོ་རྩིབས་བརྒྱད་འདྲ། །ས་ནི་པདྨ་འདབ་བརྒྱད་འབྲང་། །གནས་ཀྱི་དབྱིབས་ལེགས་ཁ་ཤར་བལྟས། །ཞེས་སོགས་ཀྱི་མཚན་ཉིད་ཚང་བ་དང༌། བྱེ་བྲག་ཕྲིན་ལས་མངོན་སྤྱོད་སྒྲུབ་པའི་གནས་ནི། མྱང་འདས་ལས། དྲག་པོའི་གནས་ཀྱི་དམ་པ་ནི། །དུར་ཁྲོད་ཤིང་གཅིག་རྒྱ་གྲམ་ལམ། །གཅན་གཟན་མང་པོའི་རྒྱུ་སྲང་དང༌། །གནམ་ནི་གྲི་འདྲ་ས་གྲུ་གསུམ། །ལོགས་ལ་ཚེར་མ་ཅན་གྱི་ཤིང༌། །དེ་ནི་དྲག་པོའི་སྒྲུབ་གནས་སོ། །ཞེས་སོགས་ཀྱི་མཚན་ཉིད་ཚང་བའི་གནས་ཆེད་དུ་བསྔགས་སོ། །དེ་ལྟ་ནའང་རྒྱུན་གྱི་ཉམས་ལེན་དང་བསྙེན་པ་ཙམ་གྱི་གནས་ལ་ཁྱད་པར་དེ་དག་མ་ཚང་ཡང་ཆོག་སྟེ། རང་གི་ཡིད་དང་མཐུན་ཅིང་བར་དུ་གཅོད་པའི་མི་དང་ལྷ་འདྲེས་བདག་ཏུ་མ་བཟུང་བ་དང་དགྲ་རྐུན་སོགས་ཀྱི་ཉེར་འཚེ་མེད་པའི་གནས་དབེན་པར་ཉམས་སུ་བླང་དུ་རུང་ངོ༌། །གསུམ་པ་དུས་ནི། སྤྱིར་བྱང་ཆུབ་སྒྲུབ་པ་ལ་ཤིས་པའི་དུས་རྣམས་དང་ཁྱད་པར་གསང་རྒྱུད་ལས། ར་བ་བཞི་ལ་བསྙེན་པའི་དུས། །འབྲིང་པོ་བཞི་ལ་སྒྲུབ་པའི་དུས། །ཐ་ཆུང་བཞི་ལ་ལས་སྦྱོར་བྱ། །ཞེས་ཟླ་བའི་ཁྱད་པར་དང༌། སྒྱུ་འཕྲུལ་རྒྱས་པ་ལས། ཚེས་གྲངས་ཡར་གྱི་བརྒྱད་ལ་བརྩམ། །ཤིན་ [5a] ཏུ་སྐར་མ་རྒྱལ་རྣམས་ལ། །ཞེས་དང༌། འཇོམས་བྱེད་ལས། ཟླ་བ་སྐྱེ་དུས་གཟའ་ཕུར་བུ། །དར་ཚེ་སྒྲུབ་པ་མཆོག་ཏུ་ཤིས། །ཞེས་ཚེས་གྲངས་དང་གཟའ་སྐར་གྱི་ཁྱད་པར་དམིགས་བསལ་དུ་བཤད་པ་དག་དང་འགྲིག་ན་རབ། གཞན་དུ་ཚེས་གྲངས་དགེ་ཞིང་མགོ་ཕུར་འཛོམ་པ་ལྟ་བུའི་གཟའ་སྐར་འཕྲོད་སྦྱོར་བཟང་བའི་ཉི་མ་ཕྱེད་ཡོལ་གྱི་དུས་སུ་འཇུག་གོ །བཞི་པ་ཡོ་བྱད་ནི། །ལམ་རིམ་ལས། གོས་རྒྱན་གཟའ་བཏུང་གསང་བ་དང༌། སྒྲུབ་པའི་ཡོ་བྱད་ལྔ་རྣམས་དང༌། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་རྟེན་དང་བར་ཆད་ཟློག །ཡོ་བྱད་དག་པ་བསྡུ་བྱ་སྟེ། །ཞེས་གསུངས་པ་ལྟར། སྤྱིར་འཚོ་བ་ཟས། རྐྱེན་ཟློག་མཚོན། ནད་ཟློག་སྨན་སོགས་མཐུན་རྐྱེན་གྱི་དངོས་པོས་མ་ཤོལ་བ་དང༌། ཁྱད་པར་རྟེན་སྒྲུབ་མཆོད་པའི་དམ་རྫས་སུ་འོས་པའི་ཡོ་བྱད་རྣམས་གཞུང་བཞིན་ཚོགས་པར་བྱའོ། །ལྔ་པ་ཇི་ལྟར་སྒྲུབ་པའི་ཚུལ་ལ་གསུམ་སྟེ། དཀྱིལ་འཁོར་རྣམ་པ་གསུམ་སྔོན་དུ་འགྲོ་བ་དང་བཅས་དོན་གྱི་ཁོག་དབུབ། ཁམས་གསུམ་གྱི་སྲོག་ལ་དབང་བསྐུར་ཏེ་སྲོག་གི་ཡེ་ཤེས་སེམས་དཔས་སྲོག་ལ་དབང་བསྐུར། ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་མཆོད་ [5b] ཅིང་བསྙེན་པས་དངོས་གྲུབ་ཀྱི་བཅུད་བླང་བའོ། །དང་པོ་ལ་གཉིས། སྔོན་དུ་འགྲོ་བའི་རིམ་པ་དང༌། དཀྱིལ་འཁོར་དངོས་བཤད་པའོ། །དང་པོ་ནི། འདི་དག་ལ་ལས་བྱང་གི་འབྲུ་གཉེར་བའི་སྒོ་ནས་སྤྲོས་ན་ཧ་ཅང་མང་བས་སྨོས་སུ་མ་ལོང་མོད། སྒོམ་དོན་སྙིང་པོ་ཙམ་ཞིག་འཆད་ན། སྐྱབས་སེམས་ཚོགས་བསགས་རྣམས་ཀྱི་དམིགས་པ་གོ་སླ་ཞིང༌། བཀའ་བསྒོ་བ་ལ། བདག་ཉིད་དཔལ་ཆེན་པོའི་སྙེམ་པས་གདུག་པ་ཅན་གྱི་འབྱུང་པོ་རྣམས་བྱིན་གྱིས་བརླབས་པའི་གཏོར་མས་བརྔན་ཅིང་བདེན་པས་བཀྲོལ་ནས་སྒྲུབ་པ་ལ་བར་ཆད་མི་བྱེད་པར་བཀའ་བསྒོས་པས་བགེགས་རྣམས་གཏོར་མས་ཚིམས་ཤིང་ཚིག་དེ་སྐད་ཐོས་པ་ཙམ་གྱིས་རབ་ཏུ་སྐྲག་ནས་སྟོང་གསུམ་ཡུལ་ཁམས་གཞན་དུ་དེངས་པར་བསམ། གལ་ཏེ་མི་ཉན་པའི་རིགས་གདུག་པ་ཅན་ཡོད་སྲིད་པ་ལ་རང་ཉིད་ཧེ་རུ་ཀའི་སྐུ་གསུང་ཐུགས་ལས་སྤྲུལ་པའི་ཁྲོ་ཚོགས་མཚོན་ཆ་སྣ་ཚོགས་ཐོགས་པ་གྲངས་མེད་པར་འཕྲོས་པ་རྣམས་ཀྱི་ཞལ་ནས་དྲག་སྔགས་རྡོ་རྗེའི་གད་མོ་འབྲུག་ལྟར་སྒྲོགས་ཤིང་མཚོན་ཆས་གཟིར། རོལ་པའི་སྟངས་སྟབས་ས་གསུམ་གཡོ་བའི་ཉམས་དང་བཅས་ཏེ་བགེགས་རྣམས་འཇིག་རྟེན་ [6a] གྱི་ཁམས་མང་པོ་བརྒལ་བའི་ཕ་རོལ་ལྕགས་རི་ཆེན་པོའི་རྒྱབ་ཏུ་བསྐྲད། སྤྲུལ་པའི་ཁྲོ་ཚོགས་ཚུར་འདུས་ནས་སྟེང་འོག་ཕྱོགས་མཚམས་རྣམས་དང་བདག་གི་བ་སྤུའི་བུ་ག་ཀུན་ནས་ཞལ་ཕྱིར་ཕྱོགས་པས་གཏམས་ཤིང་དྲག་པོའི་ཧཱུཾ་སྒྲ་དང་བཅས་ཏེ་ཚམ་རྔམས་ཆེན་པོས་རོལ་པར་བསམ། མཚམས་བཅད་པ་ལ་གསུམ་གྱི། དང་པོ་ཕྱི་མཚོན་ཆ་ལྔ་དང་འབར་བའི་གུར་ཁང་གི་མཚམས་ནི། བདག་ཉིད་དཔལ་ཆེན་པོའི་སྐུའི་གནས་ལྔར་ཨོཾ་ཨཱཿཧཱུཾ་སྭཱ་ཧཱས་མཚན་པའི་ཐུགས་ཀའི་ཧཱུཾ་ལས་འོད་ཟེར་སྔོན་པོ་ཤར་དུ་སོང་བ་ལས་བྱུང་བའི་རྡོ་རྗེ་སྔོན་པོ་རྩེ་དགུ་པར་གྱུར། དེ་ལས་རྡོ་རྗེ་དེ་འདྲ་བ་རིམ་པར་མཆེད་དེ་རྡོ་རྗེའི་གུར་དུ་གྱུར་པ་ནི། འོག་ཐམས་ཅད་རྡོ་རྗེའི་ས་གཞི་རྒྱ་གྲམ་དུ་བརྡལ་བ། ཁོར་ཡུག་ཐམས་ཅད་རྡོ་རྗེ་གྱེན་དུ་ལངས་པའི་ར་བ་ཟླུམ་པོར་བསྐོར་བའི་ཕྱི་ནས་རྡོ་རྗེའི་ཕྲེང་བས་བསྡམས་པ། སྟེང་ཐམས་ཅད་རྡོ་རྗེའི་གུར་རྒྱ་ཕུབ་ཀྱི་རྣམ་པ་ལྟར་ཕུབ་པ་ལ་རྡོ་རྗེ་རྩེ་ལྔའི་ཏོག་གིས་སྤྲས་པ། གུར་འདབས་ར་བའི་ཕྱིར་འཕྱང་བ་ལ་རྡོ་རྗེའི་དྲྭ་བ་དང་དྲྭ་བ་ཕྱེད་པ་ཐུར་དུ་འཕྱང་བ། ནང་དུ་རྡོ་རྗེའི་བླ་བྲེ་ཐད་ཀར་བརྒྱངས་ཤིང་གདུགས་ལྟར་ཕུབ་པ། དེ་དག་གི་བར་མཚམས་རྣམས་སུ་རྡོ་རྗེ་རྩེ་ལྔ་དང་རྩེ་གསུམ་ [6b] པས་གོ་སྐབས་མེད་པར་གཏམས་པ། དེའི་རྒྱབ་ཏུ་དཔྲལ་བའི་ཨོཾ་ལས་འོད་ཟེར་དཀར་པོ་སྟེང་དུ་སོང་བ་མཆེད་པ་ལས་བྱུང་བའི་འཁོར་ལོ་རྩིབས་གསུམ་པ་ནས་བརྒྱད་པ་སོགས་དང་བཅུ་གཉིས་པའི་བར་དུ་གང་ཡང་ཡོད་པ་གསོར་ལྟར་འཁོར་བའི་གུར་ཁང༌། དེའི་རྒྱབ་ཏུ་ལྟེ་བའི་སྭཱ་ལས་འོད་ཟེར་སེར་པོ་ལྷོ་རུ་སོང་བ་མཆེད་པ་ལས་བྱུང་བའི་རྩེ་མོ་ཕྱིར་གཟིང་བ་ཅན་གྱི་རལ་གྲིའི་གུར་ཁང༌། དེའི་རྒྱབ་ཏུ་མགྲིན་པའི་ཨཱཿ་ལས་འོད་ཟེར་དམར་པོ་ནུབ་ཏུ་སོང་བ་མཆེད་པ་ལས་བྱུང་བའི་རྡོ་རྗེའི་ཐོད་དབྱུག་ཕྱིར་གདེངས་པ་ཅན་གྱི་གུར་ཁང༌། དེའི་རྒྱབ་ཏུ་གསང་བའི་ཧཱ་ལས་འོད་ཟེར་ལྗང་གུ་བྱང་དུ་སོང་བ་མཆེད་པ་ལས་བྱུང་བའི་རྒྱ་གྲམ་མི་གཡོ་བར་གནས་པའི་གུར་ཁང་སྟེ། དེ་རྣམས་ཕྱི་ནང་རིམ་པར་དཀྲིགས་པས་སྲིད་པའི་རླུང་ཡང་འགྱུ་བའི་སྐབས་མེད་ཅིང་ཆུ་ཡང་འཛག་པ་མེད་པའི་རང་བཞིན་ཅན། གུར་ཁང་དེ་དག་རེ་རེའི་བར་བར་དུ་ནམ་མཁའ་སྟོང་པར་གནས་པ་ལ་སོ་སོའི་རིགས་ཀྱི་ཁྲོ་ཆུང་མང་པོ་ལག་ན་རང་རྟགས་ཀྱི་མཚོན་ཆ་ཐོགས་ཏེ་ཞལ་ཕྱིར་བལྟ་བས་བར་མཚམས་མེད་པར་གཏམས་པས་སྲུང་བ། ཀུན་གྱི་ཕྱི་རོལ་སྟེང་འོག་ཕྱོགས་མཚམས་ཐམས་ཅད་དུ་རཾ་ལས་ཡེ་ཤེས་ཀྱི་མེ་དཔུང་ཆེན་པོ་མཐའ་མེད་ [7a] པར་འབར་བའི་མེ་ལྕེ་ཕྱིར་བསྟན་པ་སྟོང་གསུམ་གྱི་མཐར་ཁྱབ་ཅིང༌། གྱེན་དུ་འབར་བ་སྲིད་པའི་རྩེ་མོ་བརྒལ་བ། འབར་ཞིང་འཁྲུགས་པའི་སྒྲ་འབྲུག་སྟོང་ལྟར་ལྡིར་བ་ལ་ཟེག་མ་ཁྲོ་ཆུང་གི་ཚྭ་ཚྭ་ཐོག་ལྟར་འབེབས་པ། འཇིག་རྟེན་པའི་བགེགས་དང་འབྱུང་པོས་ལྟ་ཅི་སྨོས་ཏེ་ཡེ་ཤེས་པས་ཀྱང་བལྟར་མི་བཟོད་པའི་གུར་ཆེན་པོར་གྱུར་པར་བསམ་མོ། །གཉིས་པ་ནང་ཁྲོ་བོ་རོལ་པའི་མཚམས་ནི། དེ་ལྟར་འབར་བའི་མེ་དང་མཚོན་ཆ་ལྔའི་གུར་གྱི་ནང་དུ་གནམ་ལྕགས་ཀྱི་འཁོར་ལོ་ཕྱོགས་བཞི་མཚམས་བརྒྱད་སྟེང་འོག་གཉིས་ཏེ་རྩིབས་བཅུ་རྒྱ་ཕོར་ཁ་སྦྱོར་ལྟ་བུ་བར་མཚམས་སྲུབས་གསེང་མེད་པའི་ནང་སྦུབས་སྟོང་ཡངས་ཤིང་རྒྱ་ཆེ་བའི་རྩིབས་སོ་སོར་པད་ཉི་ཕྱོགས་སྐྱོང་གི་གདན་ལ་བདག་གི་ཐུགས་ཀ་ནས་འབར་བའི་ཧཱུཾ་ཡིག་བཅུ་འཕྲོས་ཏེ་བབས་པ་ཡོངས་སུ་གྱུར་པ་ལས་ཁྲོ་བོ་བཅུར་གྱུར་པ་ནི། སྟེང་དུ་ཧཱུཾ་མཛད། ཤར་དུ་རྣམ་རྒྱལ། ཤར་ལྷོར་དབྱུག་སྔོན། ལྷོ་རུ་གཤིན་རྗེ། ལྷོ་ནུབ་ཏུ་མི་གཡོ། ནུབ་ཏུ་རྟ་མགྲིན། ནུབ་བྱང་འདོད་རྒྱལ། བྱང་དུ་བདུད་རྩི། བྱང་ཤར་གསུམ་རྒྱལ། འོག་ཏུ་སྟོབས་ཆེན་ཏེ། ཀུན་ཀྱང་ཞལ་གསུམ་ཕྱག་དྲུག །དང་པོས་རྡོ་རྗེ་དང་དུང་ཁྲག །བར་པས་རང་རྟགས་ [7b] ཀྱི་ཕྱག་མཚན། ཐ་མས་ཕུར་བུ་འདྲིལ་བ། རང་རང་གི་ཡུམ་དང་མཉམ་པར་སྦྱོར་ཞིང་འབར་བའི་ཆས་ཀུན་རྫོགས་པ། ཞབས་བཞི་འདོར་སྟབས་ཀྱིས་ཕྱོགས་སྐྱོང་གདོན་ཚོགས་ཕོ་མོ་བརྫིས་ཤིང་རོལ་པ། སོ་སོའི་གཡས་གཡོན་དུ་སྤྲུལ་པའི་ཟ་གསོད་ཕོ་མོ་རང་རྟགས་ཀྱི་མཚོན་ཆ་ཐོགས་པས་བགེགས་རྣམས་སྲུང་ཟློག་གི་ལས་ལ་བརྩོན་པ། ཀུན་ཀྱང་འབར་བ་ཆེན་པོའི་ཀློང་ན་རྡོ་རྗེའི་གར་གྱིས་རོལ་པའི་སྦྱོར་མཚམས་ནས་རང་འདྲ་བའི་ཁྲོ་བོ་དང་ཡང་སྤྲུལ་གྱི་ཁྲོ་ཆུང་གྲངས་མེད་པ་མེ་ལྟར་འབར་ཞིང་རླུང་ལྟར་འཚུབས་པས་མཚམས་དང་གོ་སྐབས་མེད་པར་གཏམས་པ། དེའི་ནང་དུ་ཐབས་ཤེས་ཉི་ཟླའི་གུར་ཁང་ཞེས་འོད་ཟེར་དཀར་པོ་གསལ་བྱེད་ཀྱི་ཕྲེང་བ་དང་དམར་པོ་དབྱངས་ཡིག་གི་ཕྲེང་བས་མཚན་པའི་གུར་ཁང་ཉིས་རིམ་དུ་ཡོད་པ་དབྱིངས་དང་ཡེ་ཤེས་ཀྱི་རང་བཞིན་ཅན་ཏེ། སྤྱན་དྲངས་པ་རྣམས་མ་གཏོགས་ཡེ་ཤེས་དང་འཇིག་རྟེན་པ་གང་གིས་ཀྱང་གླགས་མི་རྙེད་ཅིང་འབིགས་སུ་མེད་པར་གྱུར་པ། མདོར་ན་སྲ་ཞིང་བརྟན་ལ་རབ་ཏུ་འཇིགས་པའི་སྲུང་འཁོར་ཆེན་པོ་རྒྱ་ཁྱོན་ནམ་མཁའི་མཐའ་དང་མཉམ་པ་ཙམ་དུ་བལྟའོ། །གསུམ་པ་གསང་བ་ལྟ་བའི་མཚམས་ནི། བར་དུ་བཅད་བྱ་གཅོད་བྱེད་ཐམས་ [8a] ཅད་ཀྱང་གཟུང་འཛིན་སེམས་ཀྱི་རྣམ་པར་རྟོག་པའི་ངོར་སྣང་བ་ཙམ་སྟེ། སེམས་ཉིད་ཡེ་ནས་སྟོང་གསལ་ཆོས་ཀྱི་དབྱིངས་སུ་རོ་གཅིག་པའི་ངོ་བོ་ལ་བར་ཆད་ཀྱི་མཚན་མ་ནམ་ཡང་གྲུབ་པ་མེད་པས་ན་སྲིད་ཞི་མཉམ་ཉིད་དུ་རིག་པ་ནི་མི་ཤིགས་རྡོ་རྗེའི་མཚམས་གཅོད་བླ་ན་མེད་པའོ། །བཤགས་པ་བྱ་བ་ནི། བླ་མ་རིག་འཛིན་རྡོ་རྗེ་ཕུར་བུའི་དཀྱིལ་འཁོར་གྱི་ལྷ་ཚོགས་མཁའ་ཁྱབ་ཏུ་སད་པར་མོས་ལ། དེ་དག་གི་སྤྱན་སྔར་ཉེས་བྱས་ལ་འགྱོད་ཚངས་ཀྱི་བསམ་པ་དྲག་པོས་སྨྲེ་ངག་གདུང་བའི་ཤུགས་ཀྱིས་མཐོལ་བཤགས་ཕུལ་བས་སྡིག་སྒྲིབ་བག་ཆགས་ཐམས་ཅད་བྱང་ཞིང་དག་ནས་སོར་ཆུད་པར་བསམ་པ་དང༌། དོན་དམ་པར་ཆོས་ཐམས་ཅད་གདོད་ནས་མ་བྱུང་མ་སྐྱེས་པ་གནས་ལུགས་ཀ་དག་འཆིང་གྲོལ་ལས། འདས་པའི་ཀློང་དུ་ལ་བཟླའོ། །བརྡ་སྒོ་དབྱེ་བ་ནི། སྣང་སྲིད་ཀ་ནས་དག་པ་ལྷུན་འབྱམས་བརྡལ་བ་ཆེན་པོའི་ཀློང་ན་རང་བཞིན་ལྷུན་གྱིས་གྲུབ་པའི་ཡེ་ཤེས་རིག་པ་རྡོ་རྗེ་ཕུར་པའི་བདག་ཉིད་ཆེན་པོར་གདོད་མ་ཉིད་ནས་བཞུགས་པ་གློ་བུར་ལྷན་སྐྱེས་ཀྱི་དྲི་མས་བསྒྲིབས་ནས་ཡོད་པ་ཉིད་ཐབས་དང་བརྡས་མཚོན་ནས་སྐད་ཅིག་ཙམ་ལ་རང་སྣང་གི་འཆར་སྒོ་མཁའ་ཁྱབ་ཏུ་ [8b] ཕྱེས་པར་བསམ་མོ། །བརྡ་ཕྱག་འཚལ་བ་ནི། དེ་ལྟར་རང་བཞིན་ཡེ་ཀློང་ཆེན་པོར་རང་རིག་ཡེ་ཤེས་ཀྱི་ལྷ་རང་གསལ་འདུ་འབྲལ་མེད་པར་བཞུགས་པ་ཉིད་སྒྲིབ་མེད་མངོན་སུམ་རང་ཞལ་མཇལ་བ་ལ་ངོ་མཚར་ཞིང་ཡིད་ཆེས་པའི་སྒོ་ནས་བརྡ་ཕྱག་འཚལ་བ་སྟེ་དོན་དམ་མ་རྟོགས་པ་རྣམས་ལ་ཀུན་རྫོབ་ཀྱི་ཚུལ་མཚོན་པའོ། །དམ་བཅའ་བ་ནི། ལྷན་སྐྱེས་ཀྱི་རིག་པ་རྡོ་རྗེ་གཞོན་ནུའི་ངོ་བོ་ཉིད་ཡེ་ནས་བྲི་གད་མེད་པར་རང་ཆས་སུ་བཞུགས་ཀྱང་གློ་བུར་རྟོག་པས་བསྒྲིབས་ནས་མཐུ་རྩལ་མངོན་དུ་མ་འབྱིན་པ་དེ་སྒྲིབ་པའི་སྦུབས་ལས་འཐོན་ཏེ་རྡོ་རྗེ་གསུམ་གྱི་དངོས་གྲུབ་དང་མཐུ་རྩལ་མངོན་དུ་མ་གྱུར་གྱི་བར་ཐུགས་དམ་འདི་ལས་ནམ་ཡང་མི་འདའོ་སྙམ་དུ་དམ་བཅའ་བཟུང་ངོ༌། བྱིན་དབབ་པ་ནི། ཆོས་སྐུ་སྤྲོས་མཐའ་དང་བྲལ་བའི་ཀློང་ནས་བླ་མ་རིག་འཛིན་དཔལ་ཆེན་ཕུར་བུའི་དཀྱིལ་འཁོར་གྱི་ལྷ་ཚོགས་ཐུགས་རྗེ་ལོངས་སྤྱོད་རྫོགས་པའི་སྐུའི་རྣམ་པར་བཞེངས་ཏེ་རྣམ་འཕྲུལ་བསམ་གྱིས་མི་ཁྱབ་པའི་བཀོད་པ་དང་བཅས་ནམ་མཁའ་ལ་སྤྲིན་ཕུང་གཏིབས་པ་ལྟར་བྱོན་ནས་སྣོད་བཅུད་ཐམས་ཅད་དག་པ་རབ་འབྱམས་ཡེ་ཤེས་ཀྱི་རོལ་པ་ཆེན་པོར་བྱིན་གྱིས་བརླབས་ནས། མཐར་ལྷ་ཚོགས་དེ་དག་ཐམས་ཅད་ཀྱང་སྒྲུབ་པའི་ཡོ་བྱད་རྣམས་ལ་ཐིམ་ [9a] པར་བསམ་མོ། །མཆོད་རྫས་བརླབ་པ་ནི། ཕྱི་ནང་གསང་བའི་མཆོད་པའི་ཡོ་བྱད་ཐམས་ཅད་སྦྱངས་སྤེལ་བསྒྱུར་གསུམ་གྱི་སྒོ་ནས་ཟག་པ་མེད་པའི་འདོད་ཡོན་གྱི་རོལ་མོས་ནམ་མཁའ་རབ་འབྱམས་ཡོངས་སུ་གང་བར་བལྟའོ། །དེ་དག་ནི་སྔོན་འགྲོའི་ལས་རིམ་མོ། །གཉིས་པ་དཀྱིལ་འཁོར་རྣམ་པ་གསུམ་གྱི་སྒོ་ནས་དོན་གྱི་ཁོག་དབུབ་པ་ལ། དེའང་བློ་བརྟན་ཅིང་མི་འགྱུར་བ་རི་བོ་ལྟ་བུའི་གང་ཟག་གིས། ཐུགས་རྗེ་ལྷ་སྐུ་ཕྱག་རྒྱར་སྤྲུལ་པའི་ཕུར་པ། སྣོད་བཅུད་ཐ་མལ་དུ་བཟུང་བའི་ཡུལ་ལ། ལྷ་དང་གཞལ་ཡས་སུ་ཤེས་པའི་ཐབས་ཀྱིས་སྣང་ལ་རང་བཞིན་མེད་པ་མེ་ལོང་ལ་གཟུགས་བརྙན་གྱི་ཚུལ་དུ་གདབ་པས། ལྷར་སྣང་རང་རྒྱུད་པས་རུ་དྲར་གོལ་བའི་ཉེས་སྐྱོན་ལས་གྲོལ་ཏེ་འཁྲུལ་སྣང་ལྷར་ཤར་བའི་གདིང་ཚད་དང་ལྡན་པས་འབྲས་བུ་སྤྲུལ་པའི་སྐུ་ཐོབ་པར་བྱེད་པ་སྟེ། དེ་ལ་གསུམ། གཞི་ཏིང་ངེ་འཛིན་གྱི་འཕྲོ་འདུ། རྟེན་གཞལ་ཡས་ཁང༌། བརྟེན་པ་ལྷ་བསྐྱེད་པའོ། །དང་པོ་ལ་གསུམ་གྱི། དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། སྤྱིར་གོ་དོན་གྱི་དབང་དུ་བྱས་ན། གང་ཁྲོས་ན། གནས་ལུགས་སྤྲོས་བྲལ་སྟོང་པ་ཉིད་ཀྱི་རང་བཞིན་སྐྱེ་མེད་དོན་གྱི་རྡོ་རྗེ་ཉིད། གང་ལ་ཁྲོས་ན། [9b] མཚན་མའི་རྣམ་པར་རྟོག་པ་གཟུང་འཛིན་བདག་རྟོག་གི་གྲོང་ཁྱེར་ལ། ཚུལ་ཇི་ལྟར་ཁྲོས་ན། ཞེ་སྡང་རང་རྒྱུད་པས་མི་གཤིས་ངན་དགྲ་ལ་ཁྲོས་པ་ལྟ་བུ་མ་ཡིན་པར་ཉི་མ་འཆར་བའི་གཟི་བརྗིད་ཀྱིས་མུན་པའི་སྨག་རུམ་མདུན་ན་མི་གནས་པ་ལྟར་སྟོང་ཉིད་རྟོགས་པའི་ཡུལ་ན་དངོས་འཛིན་མཚན་མའི་སྤྲོས་པ་ཐམས་ཅད་མི་གནས་པའི་ཚུལ་གྱིས་ཁྲོས་པས། སྲིད་རྩའི་ཞེ་སྡང་སོགས་དུག་ལྔའི་རྣམ་རྟོག་མ་ལུས་པ་དབྱིངས་སུ་གཅོད་པ་ཀ་དག་ནམ་མཁའི་རང་བཞིན་ཏེ། དེའང་གདོད་ནས་སྐྱེ་བ་མེད་པའི་སེམས་ཉིད་སྤྲོས་པའི་མཐའ་ཐམས་ཅད་དང་བྲལ་བ་ལ་གནས་པ་གཞིའི་རྡོ་རྗེ་གཞོན་ནུ་ཞེས་བྱ་ཞིང༌། ཐབས་ཤེས་གཉིས་ཀྱི་སྒོ་ནས་སྐུ་གསུམ་ཡེ་ཤེས་ལྔ་རྣམ་པ་ལྷའི་འཁོར་ལོར་གསལ་བ་ནི་བགྲོད་པ་ལམ་གྱི་རྡོ་རྗེ་གཞོན་ནུ་ཉིད་ཡིན་ལ། སངས་རྒྱས་ཀྱི་ཐུགས་གཉིས་སུ་མེད་པའི་ཡེ་ཤེས་སྤྲོས་པ་ཐམས་ཅད་དང་བྲལ་བའི་དེ་ཁོ་ན་ཉིད་མངོན་དུ་གྱུར་པ་ལ་རྟོགས་པ་འབྲས་བུའི་རྡོ་རྗེ་གཞོན་ནུ་ཞེས་བརྗོད་དེ། རྩ་རྒྱུད་རྡོ་རྗེ་ཁྲོས་པ་ལས། རང་སེམས་གཞི་ཡི་རྡོ་རྗེ་གཞོན་ནུ་ནི། །ས་བོན་ཀུན་ཁྱབ་ཏིལ་མར་འདྲ། །རྟོགས་ན་སངས་རྒྱས་ངོ་མཚར་ཆེ། །བགྲོད་པ་ལམ་གྱི་རྡོ་རྗེ་གཞོན་ནུ་ནི། །ཐབས་ཤེས་སྐུ་གསུམ་ [10a] ཡེ་ཤེས་ལྔ། །ཆུ་བོའི་རྒྱུན་གྱི་རྣལ་འབྱོར་བྱ། །རྟོགས་པ་འབྲས་བུའི་རྡོ་རྗེ་གཞོན་ནུ་ནི། །སྐུ་ལྔ་ཡེ་ཤེས་དགུ་ལྡན་ཏེ། །མ་འཁྲུལ་རྟོགས་པ་མངོན་གྱུར་བྱ། །གཞི་ལམ་འབྲས་བུ་རྟོགས་གྱུར་ན། །ཆོས་སྐུ་སྤྲོས་བྲལ་མངོན་དུ་འགྱུར། །ཞེས་དང༌། ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་བཟད་པ། །ཞེས་པས། རིག་པའི་རྩལ་མ་འགགས་པར་སྣ་ཚོགས་སུ་ཤར་བའི་སྣང་བ་འདི་རྣམས་ཡེ་ཤེས་ཡིན་པས་རྟགས་ལྷའི་དཀྱིལ་འཁོར་དུ་རྫོགས། སྣང་བའི་དུས་ནས་ངོ་བོས་སྟོང་པས་དོན་ཆོས་ཀྱི་དབྱིངས་སྤྲོས་པ་དང་བྲལ་བར་གནས། དེ་གཉིས་དབྱེར་མེ་ཕྱེད་པའི་སྲས་བདེ་ཆེན་བྱང་ཆུབ་སེམས་ཀྱི་རང་བཞིན་དུ་གནས་པ་དབྱིངས་དང་ཡེ་ཤེས་དབྱེར་མེད་པའི་ལྟ་བ་སྟེ། སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཟབ་གསལ་དབྱེར་མེད་ཀུན་ཁྱབ་མཉམ་པའི་རང་བཞིན་དངོས་པོ་མེད་ལ་དངོས་པོ་ཀུན་གྱི་རྒྱུར་གྱུར་པ་གང་ཞིག །དཔེརས་ན་མཚོན་རྣོན་པོ་ལྕུག་ཕྲན་གྱི་ཡལ་ག་ལ་ཐེབས་པ་ན་གཅོད་པར་བྱེད་པའི་ཚུལ་དང་མཐུན་པར། སྣོད་བཅུད་དངོས་པོར་ཞེན་པའི་རྩ་བ་གཅོད་ཅིང་དག་མཉམ་ལྷའི་འཁོར་ལོར་སྦྱོར་བར་བྱེད་པའི་ཆ་ནས་མཚོན་ [10b] ཆ་དང༌། ཆོས་ཉིད་འགྱུར་བ་མེད་པས་ན་སྔོན་པོའི་སྒྲས་བསྟན་ཏེ། སོ་སོ་རང་རིག་པའི་ཡེ་ཤེས་ཀྱི་རོལ་པར་འབར་བའི་ཟུང་འཇུག་ཆོས་སྐུའི་ངོ་བོ་དེ་ཉིད་སྤྲོས་པ་ཀུན་བྲལ་ཆོས་ཉིད་ནམ་མཁའི་ཀློང་ནས་མཉམ་ཡངས་བརྡལ་བ་ཆེན་པོའི་དོན་ཐོག་ཏུ་ཕེབས་པའི་ཐིག་ལེའམ་ཐིག་པར་རང་ཤར་བའི་ཚུལ་རྟོགས་པ་ནི་སྤྱིར་ཤེས་པར་བྱ་བ་ཡིན་ལ། བྱེ་བྲག་སྒོམ་དོན་གྱི་དབང་དུ་བྱས་ན། དེ་ལྟར་གཉིས་མེད་ཟུང་འཇུག་ཡེ་ཤེས་ཀྱི་ཕྱག་རྒྱས་བརྟན་གཡོའི་དངོས་པོ་ཀུན་ལ་རྒྱས་བཏབ་ནས་དག་མཉམ་ཆེན་པོའི་ཀློང་དུ་འུབ་ཆུབ་པར་བྱ་བའི་དོན་འདི་སྲོག་གི་སྒོའམ་སྙིང་གི་དཀྱིལ་དུ་བསྒོམ་པར་བྱ་བའི་དམ་ཚིག་ཉིད་ཡིན་པས་ན། ལྟ་བས་ཐག་བཅད་པའི་དབྱིངས་དང་ཡེ་ཤེས་དབྱེར་མེད་བདེ་བ་ཆེན་པོའི་ངང་དུ་ཅི་ལའང་མི་རྟོག །གང་དུའང་མི་འཛིན། ཅིར་ཡང་མི་དམིགས་པར་རང་གྲོལ་འཛིན་མེད་དུ་མཉམ་པར་བཞག་གོ །གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི། དེ་ལྟར་རྡོ་རྗེ་ལྟ་བུའི་སྟོང་ཉིད་ཀྱི་ཡེ་ཤེས་ལས་སྒྱུ་མ་ལྟ་བུའི་དམིགས་མེད་ཀྱི་སྙིང་རྗེ་རང་ཤུགས་སུ་སྐྱེ་བས་མ་རྟོགས་པའི་འགྲོ་བ་ཐམས་ཅད་སྒྲོལ་བ་སྟེ། དེའང་དངོས་འཛིན་རང་རྒྱུད་པས་མནར་གཅོད་ [11a] དྲག་ཤུལ་གྱི་ལས་ཐབས་ཞེ་སྡང་གིས་བསད་ཅིང་གཏི་མུག་གིས་མནན་པ་ལྟ་བུ་མ་ཡིན་པར། 　ཕུང་ཁམས་སྐྱེ་མཆེད་ཐམས་ཅད་གདོད་ནས་རྡོ་རྗེ་མི་ཕྱེད་པའི་བདག་ཉིད་ཆེན་པོར་གནས་པ་ལ་དབྱེར་མེད་དག་མཉམ་དགོངས་པའི་གཟེར་གྱིས་གདབ་ནས་རྣམ་པར་ཤེས་པ་ཆོས་སྐུ་རང་བྱུང་གི་ཡེ་ཤེས་རྡོ་རྗེ་གཞོན་ནུའི་རོལ་པར་བསྒོམ་པ་ནི་སྤྱིར་ཤེས་པར་བྱས་ནས། 　སྒོམ་དོན་དུ། 　དེ་བཞིན་ཉིད་ཀྱི་ཏིང་འཛིན་དེ་ལས་ཚད་མེད་པའི་སྙིང་རྗེས་འགྲོ་བ་རྣམས་བདེ་ཆེན་རྒྱལ་བའི་ས་ལ་འགོད་པར་བྱ་བའི་ཕྱིར་བདག་ལུས་འཇིགས་བྲལ་རྡོ་རྗེ་གཞོན་ནུའི་སྐུ་གསུང་ཐུགས་སུ་གཏམས་ཏེ་རྣམ་པར་ཤེས་པ་ཆོས་སྐུ་ཡེ་ཤེས་རྡོ་རྗེ་མངོན་དུ་བྱའོ་སྙམ་པའི་དམ་བཅའི་བློ་རྗེས་སུ་སྒྲུབ་པའི་སླད། 　སྙིང་རྗེའི་རང་མདངས་ཉི་མ་སྤྲིན་བྲལ་འབུམ་དུས་གཅིག་ལ་ཤར་བ་ལྟ་བུའི་འོད་ཟེར་ཆེན་པོས་འཇིག་རྟེན་གྱི་ཁམས་ཐམས་ཅད་ཁྱབ་པ་ལས་ཕུར་པ་གྲུབ་པའི་རིག་འཛིན་རྣམས་ཀྱི་ཐུགས་དམ་བསྐུལ། 　དེ་རྣམས་ཀྱིས་སྲིད་པ་ཕུར་བུ་མྱུར་དུ་འགྲུབ་པར་བསྐུལ། དེས་ཀྱང་ཡེ་ཤེས་ཁྲོ་བོ་བདག་ལ་ཉེ་བར་བསྐུལ་བའི་སྒྲ་བྲག་ཆ་ལྟ་བུར་སད་པར་བསྒོམ་མོ། །གསུམ་པ་རྒྱུའི་ཏིང་ངེ་འཛིན་ནི། ཆོས་ [11b] ཀྱི་དབྱིངས་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་གཟུགས་ཀྱི་སྐུ་གང་འདུལ་གྱི་རོལ་པར་འཆར་བའི་གཞིའམ་རྒྱུ་ནི་ས་བོན་གྱི་ཡི་གེ་ཁོ་ན་ལ་བརྟེན་པ་ཉིད་སྤྱིར་ཤེས་པར་བྱས་ནས། སྒོམ་དོན་དུ། སྙིང་རྗེའི་རང་མདངས་འགགས་མེད་དུ་ཤར་བ་ཀུན་སྣང་གི་འོད་ཟེར་དེ་དག་ཚུར་འདུས་པ་ལས་བྱུང་བའི་རྒྱུའི་ས་བོན་ཧཱུཾ་ཡིག་སྔོན་པོ་ཡེ་ཤེས་ལྔའི་འོད་ཟེར་རབ་ཏུ་འབར་བ་ཞིག་ནམ་མཁའ་ལ་ཐོལ་གྱིས་ཤར་བར་བསྒོམ་མོ། །དེ་ལྟར་དེ་ཏིང་བསྒོམ་པས་འཆི་བ་སྦྱོང་ཞིང་ཆོས་སྐུ་ལམ་དུ་བྱེད། ཀུན་ཏིང་གིས་བར་དོ་སྦྱོང་ཞིང་ལོངས་སྐུ་ལམ་དུ་བྱེད། རྒྱུ་ཏིང་འབྲས་བུ་ལམ་གྱི་འཁོར་ལོ་དང་བཅས་པས་སྐྱེ་སྲིང་དང་ལས་སྣ་ཚོགས་ཀྱི་བྱེད་པ་སྦྱོང་ཞིང་སྤྲུལ་སྐུའི་མཛད་པ་དང་བཅས་པ་ལམ་དུ་བྱེད་པ་ཡིན་ནོ། །གཉིས་པ་རྟེན་གཞལ་ཡས་ཁང་བསྒོམ་པ་ནི། སྔར་བསྒོམས་པའི་ཐུན་མོང་གི་སྲུང་འཁོར་ཆེན་པོ་དེའི་ནང་དུ་རྒྱུའི་ཡི་གེ་ཧཱུཾ་མཐིང་ནག་དེ་ལས་འོད་ཟེར་འཕྲོ་འདུས་སྔར་བས་གཟི་བརྗིད་ཆེ་བར་གྱུར་ཏེ་གནས་པ་ལས། འབྱུང་བའི་ས་བོན་ཨེ་མཐིང་ག །ཡཾ་ལྗང་གུ །ར་དམར་ནག །སུཾ་སེར་ནག །ཀེཾ་དཀར་པོ། རཾ་ལེ་བརྒན་རྣམས་རིམ་པར་ཆད་པ་ཡོངས་སུ་གྱུར་པ་ལས། ཐོག་མར་ཨེ་ལས་ནམ་མཁའ་ཆོས་ཀྱི་འབྱུང་ [12a] གནས་གདེངས་ཀ་གྱེན་ལ་བསྟན་པས་སྲུང་འཁོར་གྱི་ནང་ཕྱེད་མན་ཆད་ཁྱབ་པ། རྩ་བ་ཕྲ་བའི་ཟུར་འོག་ཕྱོགས་སྲུང་འཁོར་རྡོ་རྗེའི་ས་གཞིའི་ལྟེ་བ་ལ་ཟུག་པར་བསྒོམ། དེའི་ཀློང་དུ་རིམ་པར་ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ། ར་ལས་རཀྟའི་རྒྱ་མཚོ་དམར་པོ་ཟླུམ་པོ། སུཾ་ལས་ཤ་ཆེན་གྱི་ས་གཞི་སེར་ནག་གྲུ་བཞི། ཀེཾ་ལས་ཀེང་རུས་ཀྱི་རི་རབ་གྲུ་གསུམ་དཀར་པོ་བང་རིམ་བཞི་ལྡན་འོག་མ་ལས་གོང་མའི་འཕེལ་ཀ་ཇེ་ཆེར་རྒྱས་པ་རྣམས་བརྩེགས་མར་གནས་པ། དེའི་སྟེང་དུ་རྡོ་རྗེའི་བྲག་ཆེན་པོས་གཏམས་པའི་ཕྱི་ལ་རཾ་ལས་བསྐལ་པའི་མེ་དཔུང་ཆེན་པོ་རབ་ཏུ་འབར་བའི་ནང་དུ་རྡོ་རྗེའི་ར་བས་ཟླུམ་པོར་བསྐོར་བ་དེ་གཉིས་ཀྱིས་སྲིད་དུ་ནང་གི་དཀྱིལ་འཁོར་གྱི་སུམ་ཆ་གཅིག་ཙམ་གྱི་བར་དུ་སླེབ་པ། རྡོ་རའི་ནང་དུ་སྣ་ཚོགས་པདྨ་འདབ་སྟོང་བརྡལ་བའི་ལྟེ་བར་ཨིནྡྲ་ནཱི་ལའི་ས་གཞི་ལ་ཕྱོགས་མཚམས་བརྒྱད་དུ་རཱུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད། དེ་དག་ཏུ་ཤིང་བརྒྱད། དེའི་རྩ་བ་ལ་གནས་པའི་ཕྱོགས་སྐྱོང་བརྒྱད། ཡལ་ག་ལ་བརྟེན་པའི་ཞིང་སྐྱོང་བརྒྱད། ཆུ་བརྒྱད། དེ་ལ་རོལ་བའི་ཀླུ་བརྒྱད། གཞན་ཡང་མེ་དང༌། ཆུ་དང༌། སྤྲིན་དང༌། རི་དང༌། མཆོད་རྟེན་རྣམས་ཀྱང་བརྒྱད་བརྒྱད། ཐམས་ཅད་དུ་གྲུབ་པ་དང་ [12b] རིག་འཛིན་དཔའ་བོ་རྣལ་འབྱོར་མའི་ཚོགས་དང༌། རོ་ལངས་དང་ཤ་ཟ་འབྱུང་པོའི་ཚོགས་རྣམས་ཧ་ཧར་རྒོད་ཅིང་གར་རྩེབ། བྱ་དང་གཅན་གཟན་གཏུམ་པོ་མང་པོ་ལང་ལོང་དུ་རྒྱུ་ཞིང༌། ཀེང་རུས་དང༌། རོ་བམ་པ་དང༌། དུམ་བུ་དང༌། ཚིག་པ་དང༌། མ་ཚིག་པ་དང༌། འཐོར་བ་ལ་སོགས་པའི་ཤ་རུས་གསར་རྙིང་སྣ་ཚོགས་པ་གཅལ་དུ་བཀྲམ་ཞིང་ཕུང་པོར་སྤུངས་པས་ཡོངས་སུ་གང་བ། དེའི་དབུས་སུ་བཻ་ཌཱུརྻའི་བྲག་རི་གྱེན་དུ་ཅུང་ཟད་འཕགས་པའི་སྟེང་ན་སྣ་ཚོགས་རྡོ་རྗེར་བཅུ་གཉིས་པ་ལྟེ་བ་གྲུ་བཞི་པར་ཡོད་པའི་སྟེང་དུ། རྒྱུའི་ས་བོན་ལས་བྷྲཱུཾ་ཁ་དོག་ལྔ་ལྡན་ཆད་པ་ཡོངས་སུ་གྱུར་པ་ལས། ཕོ་བྲང་ཕྱི་མ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པའི་སྟེང་ན། རིན་པོ་ཆེའི་ཕ་གུ་སེར་པོར་རིན་པོ་ཆེ་སྣ་ཚོགས་པས་བཀྲ་བ་འཕྱར་ཐབས་སུ་བཀོད་པའི་མཐར་མུ་ཏིག་གི་མགུལ་འཁོར་འཕྱང་བ། དེའི་སྟེང་དུ་བྲེ་ཕུལ་གྱི་སྣམ་བུ་ལ་གསེར་གྱི་སྐ་རགས་བཞིའི་ཕྱི་ངོས་སུ་མ་ཀ་རའི་ཁ་ནས་རིན་པོ་ཆེའི་དྲྭ་བ་དང་དྲྭ་བ་ཕྱེད་པ། དར་དང་རྔ་ཡབ། དྲིལ་བུ་དང་མེ་ལོང་ཟླ་བ་རླུང་གིས་བསྐྱོད་པ་ལ་སོགས་པས་མཛེས་པ། དེའི་ཕྱི་ངོས་སུ་བྱ་འདབ་ [13a] ལས་འཕྱང་བའི་རིན་པོ་ཆེའི་ཤར་བུ། སྟེང་ངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན། དེ་དག་གི་བར་བར་དུ་བུམ་པ་ལ་གནས་པའི་རྒྱལ་མཚན་དང་བ་དན་བརྒྱད་བརྒྱད་དང༌། ཟུར་བཞིར་རྣམ་པར་བཀྲ་བའི་གདུགས་ཀྱིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུགས་རྡོ་རྗེ་མ་སོགས་ལྷ་མོ་རྣམས་ཀྱིས་མཆོད་པའི་སྤྲིན་རབ་འབྱམས་སྤྲོ་བ། སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་ནོར་བུས་བརྒྱན་པ། སྒོ་ལོགས་ཀྱི་ཕྱི་ཟུར་ནས་བུམ་པ་ལ་གནས་པའི་ཀ་བས་བཏེགས་པའི་རྟ་བབས་སྣམ་བུ་བཞི་པ་བསིལ་ཁང་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་གཡས་གཡོན་དུ་རི་དྭགས་ཕོ་མོ་དང་བཅས་པ། གཞན་ཡང་གདུགས་རྒྱལ་མཚན་བ་དན་སྣ་ཚོགས་པ་དང༌། གསེར་གྱི་དྲིལ་བུ་ལ་སོགས་པས་བརྒྱན་པ། སྒོའི་གཡས་གཡོན་གྱི་གཞི་ལ་ཏ་ལའི་ལྗོན་པ་དང༌། དཔག་བསམ་གྱི་ཤིང་ལ་བཀྲ་ཤིས་པའི་བྱ་སྙན་པར་སྒྲོགས་པ་སྣ་ཚོགས་གནས་པ། ཤིང་དེ་དག་ཀྱང་གསེར་གྱི་ཐ་གུས་བྲེས་ཤིང་དྲིལ་བུ་དང་གཡེར་ཁ་ཆོས་ཀྱི་སྒྲ་སྙན་པར་སྒྲོགས་པས་མཛེས་པ། ཡན་ལག་བརྒྱད་དང་ལྡན་ [13b] པའི་ཁྲུས་ཀྱི་རྫིང་བུ་ལ་ལྷ་མོ་སྣ་ཚོགས་བདེ་བར་རྩེ་བ། རིན་པོ་ཆེའི་ཕུང་པོ་འོད་འབར་བ་རེ་རེ་སྟེ་བརྒྱད་དང༌། གཞན་ཡང་རིན་པོ་ཆེ་སྣ་བདུན་དང་བཀྲ་ཤིས་པའི་རྫས་བརྒྱད་སོགས་འདོད་པའི་ཡོན་ཏན་ཐམས་ཅད་ཀྱིས་མཛེས་པར་གང་བ། གཞལ་ཡས་ཁང་དེའི་བར་ཁྱམས་གྲུ་བཞི་པས་ཀུན་ནས་བསྐོར་བའི་ནང་དུ། ཕོ་བྲང་ནང་མ་དུར་ཁྲོད་ཀྱི་གཞལ་ཡས་ཁང་ཐོད་པ་སྐམ་རློན་རྙིང་པའི་རྩིག་པ་སུམ་རིམ་གནམ་ལྕགས་ཀྱི་གཟེར་གྱིས་བཏབ་ཅིང་ཁྲག་ཞག་ཤ་ཆེན་གྱིས་འཇིམ་ཞལ་བྱས་པ། སྒོ་ཁྱུད་སྤངས་པའི་སྒོ་བཞི་སྦྲུལ་ནག་གི་རེ་གཞི་ལ། རུས་སྦལ་གྱི་མ་ཐེམ། ནམ་མཁའ་ལྡིང་གི་ཡ་ཐེམ། ཆུ་སྲིན་གྱི་ལྕིབ་ཁུང༌། ཞིང་གི་སྒོ་གླེགས་རྣམས་ཀྱིས་སྤྲས་པ། ཕྱོགས་བཞིར་ཞིང་ཆེན་གྱི་རྒྱལ་མཚན་དང༌། གཡང་གཞི་རློན་པའི་བ་དན་ལ་སོགས་པ་གཡོ་བ། ནང་ས་བདག་ཕོ་མོའི་ཀ་གདན་ལ་བརྟེན་པའི་ལྷ་ཆེན་པོ་བརྒྱད་ཀྱི་ཀ་བ་ལ། ཀླུ་ཆེན་པོ་བརྒྱད་ཀྱི་གདུང་མ་ཚངས་པའི་གདུང་བཞི་མིག་མང་རིས་སུ་བྲེས་པ། གཟའ་ཆེན་པོ་བརྒྱད་ཀྱི་ཕྱམ་ལ་རྒྱུ་སྐར་ཉི་ཤུ་རྩ་བརྒྱད་ཀྱི་དྲལ་མ་གྲབ་ཅིང་རཱུ་དྲ་ཕོ་མོའི་ལྤགས་པས་ཐོག་ཕུབ་པ། ཞིང་ལྤགས་ཀྱི་བླ་བྲེ། རྒྱུ་རློན་གྱི་ལྡ་ལྡི། དོན་སྙིང་དང་ཡན་ལག་གི་འཕྱང་ [14a] འཕྲུལ། ཀེང་རུས་དང་ཐོད་ཚལ་གྱི་དྲྭ་བ་དང་དྲྭ་བ་ཕྱེད་པ་སོགས་འཇིགས་པའི་རྒྱན་སྣ་ཚོགས་པས་བཀྲ་བ། ཉི་མ་དང་ཟླ་བའི་མཐོང་སྐར་ཅན༌། ཕོ་བྲང་ཕྱི་ནང་གཉིས་ཀའི་སྟེང་ཐོག་སྙོམས་པའི་དབུས་རྒྱ་ཕུབ་ཀྱི་རྣམ་པ་ལྟར་ཕྱུར་བུར་གྱུར་པའི་ནང་ལྷ་ཆེན་པོའི་ཐོད་པས་ཟླུམ་པོར་ཕུབ་པའི་རྩེ་མོར་ཙིཏྟའི་མེ་ཏོག་གིས་མཚན་པའི་ཕྱི་རིན་པོ་ཆེའི་རང་བཞིན་ཅན་གྱི་བུམ་པ་སུལ་བརྒྱད་བྲེ་ཆོས་འཁོར་གདུགས་ཏོག་དང་བཅས་པ་འོད་ཟེར་མཐའ་ཡས་པར་སྤྲོ་བས་མཛེས་པ། ནང་དང་སྟེང་འོག་གི་གཞི་རྣམས་ཤར་དཀར། ལྷོ་སེར། ནུབ་དམར། བྱང་ལྗང། དབུས་སྔོ་བ། ནང་གི་དབུས་གྲུ་གསུམ་མཐིང་ནག་ཟླ་གམ་དམར་པོ་ཐོད་པ་ཕྱིར་བལྟས་ཀྱི་ར་བས་བསྡམས་པའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་བཞི་པ་དང་རྩིབས་བཅུ་པའི་རྩིབས་རྟེན་མུ་ཁྱུད་ཐོད་སྐམ་གྱི་ཕྲེང་བས་བསྐོར་བ་དང་ཟླ་གམ་ཉེར་གཅིག་གིས་མཚན་པའི་མུ་ཁྱུད་དང་བཅས་པ་རྣམས་རིམ་བཞིན་ཁྱད་པར་དུ་གྱུར་པས་དཔག་པ། ཕོ་བྲང་ཕྱི་ནང་གི་བར་ཁྱམས་སུ་ཁྲག་གི་རྒྱ་མཚོ་འཁྲུགས་པའི་ཕྱོགས་མཚམས་སུ་འཁོར་ལོ་རྩིབས་བཅུ་གཉིས་ཀྱིས་མཚན་པ། ཐམས་ཅད་དུའང་འབར་བའི་ཕྲེང་བ་རབ་ཏུ་འཁྲུག་ཅིང་དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ་སྟེ། མདོར་ན་ཡེ་ཤེས་ [14b] རང་སྣང་གི་བཀོད་པ་སྣོད་ཀྱི་འཇིག་རྟེན་སོགས་རྣམ་པར་དག་པའི་ངོ་བོ་རང་བྱུང་ལྷུན་གྲུབ་ཀྱི་ཕོ་བྲང་ཆེན་པོ་མཚན་ཉིད་ཐམས་ཅད་ཡོངས་སུ་རྫོགས་པའི་རང་བཞིན་ཅན་དུ་གསལ་གདབ་བོ། འཁོར་ལོ་འདི་རྣམས་གུར་ཐབས་སུ་མ་ཡིན་པར་གདན་ཐབས་ལེ་བཞད་ཅན་ཁོ་ནའོ། །གསུམ་པ་བརྟེན་པ་ལྷའི་དཀྱིལ་འཁོར་བསྒོམ་པ་ལ་གསུམ། ཆོས་སྐུའི་ངོ་བོ་བདག་ཉིད་རྩ་བའི་དཀྱིལ་འཁོར། ལོངས་སྐུའི་ངོ་བོ་ཕྱོགས་བཅུ་ཁྲོ་བོའི་དཀྱིལ་འཁོར། སྤྲུལ་སྐུའི་ངོ་བོ་ཕུར་པ་རྫས་ཀྱི་དཀྱིལ་འཁོར་བསྐྱེད་པའོ། །དང་པོ་ནི། དབུས་ཀྱི་མཐིང་ནག་ཨེ་དབྱིངས་འབར་བར་སྣ་ཚོགས་པདྨ་དང་ཟླ་བ་ཉི་མ་རྣམས་བརྩེགས་པའི་སྟེང་དུ་བདུད་བཞི་རྒྱལ་བསེན་དྲེགས་པ་ལྷ་ཆེན་ཕོ་མོ་རྣམས་བྱི་ཆིངས་སུ་བསྣོལ་བའི་གདན་ལ་སྔར་བསྒོམས་པའི་རྒྱུའི་ཧཱུཾ་དེ་སྐར་མདའ་ལྟུང་བ་ལྟར་བབས། དེ་ལས་འོད་ཟེར་དཔག་ཏུ་མེད་པ་འཕྲོས་རྒྱལ་ཁ་རྣམས་མཆོད་ཅིང་ཐུགས་དམ་བསྐུལ། སེམས་ཅན་གྱི་དོན་བྱས། འཁོར་འདས་ཀྱི་དྭངས་བཅུད་བསྡུས་ཏེ་འོད་ཟེར་སླར་འདུས་ཧཱུཾ་ལ་ཐིམ། དེ་ཡོངས་སུ་གྱུར་པ་ལས་གནམ་ལྕགས་ཀྱི་རྡོ་རྗེ་རྩེ་དགུ་པ་ལྟེ་བར་ཧཱུཾ་གིས་མཚན་པ་ཡེ་ཤེས་ལྔའི་འོད་ཟེར་འབར་བར་གྱུར། སླར་ཡང་དེ་ལས་འོད་ཟེར་འཕྲོ་འདུས་གཅིག་ཏུ་གྱུར་པ་ལས་ [15a] ཚོགས་གཉིས་ཡོངས་སུ་རྫོགས་པའི་དཔལ་ཆེན་པོའི་སྐུར་གྱུར་པ་ནི། སྐུ་མདོག་མཐིང་ནག་བསྐལ་པའི་མེ་ལྟར་འབར་བའི་གཟི་བརྗིད་ཅན། དབུ་གསུམ་གྱི་རྩ་ཞལ་མཐིང་ག་གཏུམ་ལ་རྔམས་པ། གཡས་ཞལ་དཀར་པོ་སྒེག་ཅིང་བཞད་པ། གཡོན་ཞལ་དམར་པོ་ཁྲོ་ཞིང་ཆགས་པ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་སྡང་མིག་ཏུ་འཁྱིལ་བ། རྣམ་པར་འགྱུར་བའི་ཞལ་གདངས་ཤིང་མཆེ་བ་གཙིགས་པ། གློག་ལྟར་འཁྱུག་པའི་ལྗགས་འདྲིལ་ཞིང་རྡོ་རྗེའི་གད་མོ་ཧ་ཧ་དང་ཧཱུཾ་ཕཊ་འབྲུག་སྟོང་ལྟར་སྒྲོགས་པས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་རླུང་སྒྲ་འབྱིན་པ། སྨར་དང་སྨིན་མར་མེ་ཡི་ཚྭ་ཚྭ་འཕྲོ་ཞིང་དབུ་སྐྲ་དམར་སེར་དུས་ཀྱི་མེ་ལྕེ་ལྟར་བསྐྱོད་པ་སྲིད་པའི་རྩེ་མོར་བརྫིས་པ། སྐུ་ཆེ་ཞིང་ཡན་ལག་རགས་པ་ལང་ཚོ་རྒྱས་པའི་འགྱུར་བག་ཅན། ཕྱག་དྲུག་གི་གཡས་དང་པོས་གནམ་ལྕགས་ཀྱི་རྡོ་རྗེ་རྩེ་དགུ་པ་དང༌། བར་པས་རྡོ་རྗེ་རྩེ་ལྔ་པ། གཡོན་གྱི་དང་པོས་སྡིགས་མཛུབ་ཀྱི་རྩེ་ལས་མེ་དཔུང་དང༌། བར་པས་ཁ་ཊྭཱཾ་ཀ་རྩེ་གསུམ་པ་བཅས་གདེངས་ཐབས་སུ་འཛིན་པ། ཐ་མ་གཉིས་ཐུགས་ཀར་རི་རབ་ཀྱི་ཕུར་བུ་འདྲིལ་བ། གཡས་ཀྱི་ [15b] དང་རུ་རྡོ་རྗེ་རྩེ་དགུ་པ་ལ་སྤུ་གྲི་འབར་བའི་གཤོག་པར་མེ་ཞགས་འཕྲོ་ཞིང༌། གཡོན་གྱི་དང་རུ་རིན་པོ་ཆེ་འབར་བ་ལ་རལ་གྲིའི་སྒྲོ་གཤོག་གི་གསེབ་ལས་རྡོ་རྗེའི་སེར་ཆེན་འབེབས་པ། ཞབས་བཞི་གཡས་བསྐུམ་ཞིང་གཡོན་བརྐྱང་པའི་གྱད་ཆེན་པོའི་སྟབས་ཀྱིས་དྲེགས་པ་ཕོ་མོའི་མགོ་བོ་དང་ནུ་མ་ནས་བརྫིས་པ། ཐོད་པ་སྐམ་པོ་རིན་པོ་ཆེའི་རྩེ་བྲན་ཁྲག་འཐུང་རིགས་ལྔའི་ཅོད་པན་ཅན་གྱིས་དབུ་ལ་བརྒྱན་པ། དཔྲལ་བར་ཐལ་ཆེན་གྱི་ཚོམ་བུ། མཁུར་ཚོས་ལ་རཀྟའི་ཐིག་ལེ། ཨོལ་ཀོ་ལ་ཞག་གི་ཟོ་རིས་ཏེ་བྱུག་པའི་རྫས་གསུམ། སྐུ་སྟོད་ལ་གླང་པོ་ཆེའི་ཀོ་རློན། སྐེད་པར་མི་ལྤགས་ཀྱི་གཡང་གཞི། སྐུ་སྨད་ལ་སྟག་ལྤགས་ཀྱི་ཤམ་ཐབས་ཏེ་བགོ་བའི་གོས་གསུམ། ཐོད་པ་སྐམ་རློན་རྙིང་པའི་ཕྲེང་བ་རྒྱུ་རློན་ལ་བརྒྱུས་པའི་དོ་ཤལ། སྦྲུལ་རྒྱལ་རིགས་དཀར་པོའི་དབུ་རྒྱན། རྗེ་རིགས་དམར་པོའི་སྙན་རྒྱན། བྲམ་ཟེ་སེར་པོའི་གདུ་བུ། གདོལ་པ་ནག་པོའི་སེ་རལ་ཁ། སྦྲུལ་རིགས་ལྔའི་ཆུན་པོའི་སྐ་རགས་དང༌། རུས་པའི་འཁོར་ལོ། རྣ་ཆ། མགུལ་རྒྱན། ཕྱག་ཞབས་ཀྱི་གདུ་བུ། སྐ་རགས་རྣམས་ཏེ་རུས་པའི་ཕྱག་རྒྱ་ལྔ་བཅས་འདོགས་པའི་རྒྱན་གསུམ་སྟེ། དུར་ཁྲོད་ཀྱི་ཆས་དགུས་བརྒྱན་ཅིང༌། སྒེག་པ། དཔའ་བ། འཇིགས་ [16a] སུ་རུང་བ་སྟེ་སྐུའི་གར་གསུམ། དགོད་པ། གཤེ་བ། དྲག་ཤུལ་ཏེ་གསུང་གི་གར་གསུམ། སྙིང་རྗེ། རྔམས་པ། ཞི་བ་སྟེ་ཐུགས་ཀྱི་གར་གསུམ་བཅས་གར་གྱི་ཉམས་དགུས་རྣམ་པར་བརྗིད་པ། དེའི་པང་དུ་སྦྱོར་ཡུམ་འཁོར་ལོ་རྒྱས་འདེབས་མ་སྐུ་མདོག་མཐིང་སྐྱ་གཅེར་བུ་སྐྲ་གྲོལ་ཞིང་ལང་ཚོས་སྒེག་པ། གཡས་ཁ་ཊྭཱཾ་འཛིན་པས་ཡབ་ཀྱི་མགུལ་ནས་འཁྱུད་ཅིང་གཡོན་པས་དུང་ཁྲག་ཞལ་དུ་སྟོབ་པ། ཞབས་གཡོན་བསྐུམ་པས་ཡབ་ཀྱི་སྐེད་ལ་འཁྲིལ་ཞིང་གཡས་བརྐྱང་པའི་སྟབས་ཀྱིས་སྙོམས་པར་འཇུག་པ། གཟིག་ཤམ་དང་རུས་པའི་ཕྱག་རྒྱ་ལྔས་སྤྲས་པ། གཉིས་ཀའང་བདེ་སྟོང་གཉིས་མེད་བཟོད་པར་དཀའ་བའི་གཟི་བྱིན་ཉི་མ་འབུམ་གྱི་འོད་ཟེར་ལྟར་འབར་ཞིང་ཡེ་ཤེས་ཀྱི་མེ་དཔུང་ཆེན་པོའི་ཀློང་ན་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་ཡོངས་སུ་རྫོགས་པའི་བདག་ཉིད་ཅན་དུ་གསལ་བའི་ཡབ་ཀྱི་ཐུགས་ཙིཏྟ་རིན་པོ་ཆེ་ཟུར་བརྒྱད་མཆོང་གི་གུར་ཕུབ་པ་ལྟ་བུའི་དབུས་སུ་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་རྡོར་སེམས་མཐིང་གསལ་ཚོན་གང་བ། ཞལ་གཅིག་ཕྱག་གཉིས་ཀྱི་གཡས་རྡོ་རྗེ་རྩེ་ལྔ་པ་ཐུགས་ཀར་གསོར་ཞིང་གཡོན་དྲིལ་བུ་དཀུར་བརྟེན་པ། ཞབས་གཡས་བསྐུམ་གཡོན་ [16b] བརྐྱང་སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་ཤིང༌། དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་རྣམ་པར་སྤྲས་ཏེ་རང་འོད་ཀྱི་ཀློང་ན་མཚན་དཔེའི་གཟི་བྱིན་མཆོག་ཏུ་འབར་བཞིན་བཞུགས་པ། དེའི་ཐུགས་ཀར་སྲན་མ་བཀས་པ་ཙམ་གྱི་ཉི་མ་ལ་གནས་པའི་རྡོ་རྗེ་སྔོན་པོ་རྩེ་དགུ་པ་ནས་འབྲུ་ཙམ་གྱི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་སྲོག་གི་སྙིང་པོ་ཧཱུཾ་ཡིག་མཐིང་ག་ཡུངས་འབྲུ་ཙམ་དུ་ཕྲ་ཞིང་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་འབྲུ་དགུ་བཻ་ཌཱུརྱ་ཞུན་མའི་མདངས་ཅན་སྤུས་བྲིས་པ་ལྟ་བུས་གཡས་སུ་བསྐོར་བའི་ཙིཏྟའི་རྩ་སྦུབས་ཀྱི་སྒོ་སྲུང་རྟ་མགྲིན་དམར་པོ་ཡུངས་འབྲུ་ཙམ་པདྨ་བྷཉྫ་འཛིན་པ་ཡུམ་དང་བཅས་པས་བསྲུང་བར་བསྒོམ། གཙོ་བོའི་གཡོན་དུ་པད་ཉི་དགྲ་བགེགས་ཀྱི་གདན་ལ་སྒྲོལ་ཡུམ་ཨེ་ཀ་ཛ་ཊཱི་སྐུ་མདོག་སྨུག་ནག་གཡས་དགྲ་སྙིང་དྲོན་མོ་ཟ་ཞིང་གཡོན་སྡིགས་མཛུབ་ཀྱི་རྩེ་ལས་ལྕགས་སྤྱང་ཁྲ་ཐབས་སུ་འགྱེད་པ། ཞལ་རབ་ཏུ་གདངས་ཤིང་ཟླ་ཚེས་ལྟ་བུའི་མཆེ་བ་གཅིག་ཐུར་དུ་གཙིགས་པ། དཔྲལ་བར་ཡེ་ཤེས་ཀྱི་སྤྱན་གཅིག་དམར་ཟླུམ་ཕྱོགས་བཅུར་གཟིགས་པ། དབུ་སྐྲ་ཁམ་ནག་ཐུར་དུ་གྲོལ་བའི་དབུས་ན་ལྕགས་ཀྱི་རལ་པ་ཉག་གཅིག་གྱེན་དུ་གཟིངས་ [17a] པ། བྲང་ན་དགྲ་ལ་རིམས་ནད་འབེབས་པའི་ཁྲག་གི་རྒྱུན་འཛག་པའི་ནུ་མ་གཅིག་འཕྱང་བ། གཅེར་མོ་ཕྱག་རྒྱ་ལྔས་བརྒྱན་ཅིང་འཇའ་སྤྲིན་གྱི་གོས་ཅན། ཞབས་གཉིས་གཡས་བསྐུམ་གཡོན་བརྐྱང་པའི་གར་སྟབས་ཀྱིས་མེ་དཔུང་གི་ཀློང་དུ་བཞུགས་པ། གཙོ་བོའི་སྤྱི་བོར་འཇིགས་བྱེད་ག་རུ་ཌ་མཐིང་ནག་གནམ་ལྕགས་རྡོ་རྗེའི་རྭ་དང་མཆུ་སྡེར་ཅན་གྱི་རྭ་བར་རིགས་བདག་ཀུན་ཏུ་བཟང་པོ་མཐིང་གསལ་མཉམ་བཞག་སྐྱིལ་ཀྲུང་ཅན་ཡུམ་བཟང་མོ་དཀར་མོས་འཁྱུད་པ་གཉིས་ཀའང་གཅེར་བུ་མཚན་དཔེའི་གཟི་བྱིན་འབར་བ་ཡེ་ཤེས་འོད་ལྔ་འཁྲིགས་པའི་ཀློང་དུ་བཞུགས་པར་བསམ། གཙོ་བོའི་གཡས་དང་ཕྱི་རོལ་གྱི་རྩིབས་བཞི་ལ་པད་ཉི་དགྲ་བགེགས་ཕོ་མོ་བསྣོལ་བའི་སྟེང་དུ་གཙོ་བོའི་ཐུགས་ཡེ་ཤེས་ལྔའི་སྒྱུ་འཕྲུལ་ལས་རང་ཤར་བ་ཁྲོ་རྒྱལ་ཀཱི་ལ་རིགས་ལྔ་ཐམས་ཅད་ཀྱང་སྐུ་སྟོད་ཞལ་གསུམ་ཕྱག་དྲུག་པ་སྐེད་པ་ཆུ་སྲིན་གྱི་ཁ་ལས་འཐོན་པའི་སྐུ་སྨད་ཕུར་བུ་འབར་བའི་དབལ་ཅན། ཕྲིན་ལས་སོ་སོའི་རིགས་དང་བསྟུན་པའི་སྐུ་མདོག་ཕྱག་མཚན་རྒྱན་ཆ་ལུགས་རྣམས་གཞུང་ཚིག་ལྟར་གསལ་གདབ་བོ། །གཉིས་པ་ནི། དེའི་ཕྱི་རོལ་གྱི་འཁོར་ལོ་རྩིབས་བཅུ་པའི་དབུས་ [17b] སུ་པདྨ་ཉི་ཟླ་འབར་བར་ཕྱོགས་སྐྱོང་བཅུ་ཆུང་མར་བཅས་པ་བཀུག་ནས་གདན་དུ་བཏིང་བའི་སྟེང་དུ་བདག་ཉིད་གཙོ་བོ་ཡབ་ཡུམ་སྙོམས་པར་ཞུགས་པའི་མཁའ་གསང་ནས་བདེ་ཆེན་བྱང་ཆུབ་སེམས་ཀྱི་རང་བཞིན་ཧཱུཾ་ཡིག་སྦྲེལ་མ་བཅུ་སོ་སོའི་གནས་སུ་བབས་པ་ལས་སྟེང་གི་ཁྲོ་བོ་ཤར་སྟོད་དང༌། འོག་གི་ཁྲོ་བོ་ནུབ་སྨད་དུ་བྱས་པའི་ཁྲོ་བོ་བཅུ་ཡབ་ཡུམ་སྤྲུལ་པའི་ཕྲ་མེན་ཟ་གསོད་དང་བཅས་པ་རྒྱན་ཆ་ལུགས་ཡོངས་སུ་རྫོགས་པར་གསལ་གདབ་བོ། །གསུམ་པ་ནི། དེའི་ཕྱི་རོལ་ཟླ་གམ་དམར་ནག་ཉེར་གཅིག་ལ་གནས་པའི་པད་ཉི་དགྲ་བགེགས་ཀྱི་གདན་ལ་གཙོ་བོ་ཡབ་ཡུམ་སྙོམས་པར་ཞུགས་པའི་བྱང་སེམས་འོད་ཀྱི་གོང་བུ་ཧཱུཾ་ཡིག་གི་རང་བཞིན་ཅན་སྤྲོས་ཏེ་འཁོད་པ་ལས་བྱུང་བའི་འོད་ཟེར་གྱི་རྩེ་ལས་ཕུར་བུ་ཕྲ་མོ་དཔག་ཏུ་མེད་པ་འཕྲོས། ཁམས་གསུམ་སེམས་ཅན་ཐམས་ཅད་ཀྱི་སྒོ་གསུམ་དང་རིགས་དྲུག་གི་བག་ཆགས་སྣང་ཞེན་ཐམས་ཅད་བསྲེག་ཅིང་སྦྱངས། ཐམས་ཅད་དཔལ་ཆེན་པོའི་རང་བཞིན་དུ་གྱུར། སླར་འདུས་ཧཱུཾ་ཡིག་རྣམས་ལ་ཐིམ་སྟེ་ཡོངས་སུ་གྱུར་པ་ལས་སྲས་མཆོག་ཉེར་གཅིག་འབར་བའི་ཆ་ལུགས་ཡོངས་སུ་རྫོགས་པ་དང༌། སླར་ཡང་གཙོ་བོ་ཡབ་ཡུམ་སྙོམས་ [18a] པར་ཞུགས་པའི་བྱང་སེམས་འོད་ཀྱི་གོང་བུ་ལས་ཛཿཧཱུཾ་བཾ་ཧོ་བཞི་སྤྲོས་ཏེ་ནང་སྒོ་བཞིར་འཁོད་པ་ལས་ཡེ་ཤེས་ཀྱི་སྒོ་མ་བཞི། དཀྱིལ་འཁོར་བར་ཁྱམས་འཁོར་ལོ་རྩིབས་བཅུ་གཉིས་ཀྱི་ཕྱོགས་བཞིའི་རྩིབས་དབུས་བཞིར་ཤྭ་ན་མ་བཞི། རྩིབས་སྟོད་བཞིར་རེ་ཏཱི་མཆེད་བཞི། རྩིབས་སྨད་བཞིར་ས་བདག་མ་བཞི། ཕྱི་སྒོ་བཞིར་སྐྱེས་བུ་གིང་བཞི། ཕྱི་རོལ་དུར་ཁྲོད་ཀྱི་ནང་རྡོ་རྗེའི་བྲག་རིའི་སྟེང་གི་ཁོར་ཡུག་ལ་དབང་ཕྱུག་ཉེར་བརྒྱད་མ་སྲིང་མཁའ་འགྲོའི་ཚོགས་རྣམས་ཀྱང་རྗེ་ལས་འབངས་དང་ཉི་མ་ལས་ཟེར་བཞིན་རང་བཞིན་གྱིས་གནས་པར་བསྒོམ་མོ། །གཉིས་པ་ཁམས་གསུམ་གྱི་སྲོག་ལ་དབང་བསྐུར་ཞིང་སྲོག་གི་ཡེ་ཤེས་སེམས་དཔས་སྲོག་ལ་དབང་བསྐུར་བ་ནི། དཀྱིལ་འཁོར་ལྷ་ཚོགས་རྣམས་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ་རེ་རེས་མཚན་པར་བསམ་ལ་གསོལ་བ་བཏབ་པས། འབྲུ་གསུམ་ལས་འོད་ཟེར་དཔག་ཏུ་མེད་པ་འཕྲོས་ཕྱོགས་བཅུའི་རྒྱལ་བ་རྣམས་ལ་མཉེས་པའི་མཆོད་པ་ཕུལ། སྐུ་གསུང་ཐུགས་ཀྱི་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་བསྡུས་ཏེ་གནས་གསུམ་གྱི་ས་བོན་ལ་ཐིམ་པས་ལུས་ངག་ཡིད་གསུམ་གྱི་གཟི་བྱིན་ནུས་པ་མཐུ་སྟོབས་མཆོག་ཏུ་འབར། [18b] བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་ཉིད་དུ་གྱུར་པར་བསམ། སླར་ཡང་ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས། རྒྱལ་བ་སྐུ་ལྔའི་བདག་ཉིད་འཁོར་དང་བཅས་པ་རྣམས་ལ་ཕོག་པས་ཐུགས་རྒྱུད་བསྐུལ། བདེ་བར་གཤེགས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་དཔའ་བོ་འབྲུ་ལྔའི་རང་བཞིན་ཆར་ལྟར་བབས་པ་མགོ་བའི་གནས་ལྔར་འདུས་ཏེ་ཞུ་བ་ལས་བྱུང་བའི་ཧཱུཾ་ཨོཾ་སྭཱ་ཨཱཾ་ཧཱ། མཱུཾ་ལཱཾ་མཱཾ་པཱཾ་ཏཱཾ་རྣམས་སུ་གྱུར། དེ་དག་ལས་ཀརྨ་ཧེ་རུ་ཀ་གཙོ་བོར་གྱུར་པའི་རིགས་ལྔ་ཡབ་ཡུམ་གྱི་སྐུར་གྱུར་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་ལུས་ཀྱི་ནང་གང༌། ཁྲག་འཐུང་ཡབ་ཡུམ་རྣམས་ཐོད་པའི་ཁང་བུར་བཞུགས་པས་དབུ་བརྒྱན་ཏེ་ཡེ་ཤེས་ལྔའི་དབང་བསྐུར་ཡོངས་རྫོགས་པར་བསྒོམ། ཡང་ཐུགས་སྲོག་འོད་ཀྱིས་ཁམས་གསུམ་ལ་ཕོག་པས་རིགས་དྲུག་པོ་ཨ་ནྲྀ་སུ་ཏྲི་པྲེ་དུཿར་གྱུར། དེ་འབྱུང་བའི་ཡི་གེ་རྃ་ཡྃ་ཁྃ་གིས་བསྲེག་གཏོར་སྦྱངས་པས་ཐམས་ཅད་དཀྱིལ་འཁོར་གསུམ་གྱི་ལྷར་གྱུར་པ་ནི་ཁམས་གསུམ་ལ་དབང་བསྐུར་བ། དེ་རྣམས་འོད་ཟེར་དང་བཅས་པ་ཚུར་འདུས་སྙིང་གའི་རྟ་མགྲིན་ལ་ཐིམ་པས་བཀྲག་དང་གཟི་བརྗིད་ཀྱི་དཔལ་དུ་འབར་བར་གྱུར་པ་ནི་བདག་ [19a] གི་སྲོག་ལ་དབང་བསྐུར་བ། དེའི་རྐྱེན་གྱིས་རྟ་མགྲིན་ཡབ་ཡུམ་ཟག་མེད་བདེ་ཆེན་གྱི་རོལ་པའི་བྱང་སེམས་ཡེ་ཤེས་སེམས་དཔའ་ལ་ཐིམ་པས་དེ་ཉིད་བཀྲག་དང་ལྡན་པར་བྱུང་བའི་གཟི་བརྗིད་ཡེ་ཤེས་ཀྱི་བཅུད་ཐམས་ཅད་རྡོ་རྗེའི་ལྟེ་བའི་ཐུགས་སྲོག་རྣམ་པར་མི་རྟོག་པའི་ཡེ་ཤེས་ཧཱུཾ་ཡིག་ལ་ཕོག་པས་བཀྲག་དང་གཟི་མདངས་འོད་དུ་འབར་བ་ནི་ཡེ་ཤེས་སེམས་དཔས་སྲོག་ལ་དབང་བསྐུར་བ་སྟེ། སྟོང་སྲོག་ཆོས་སྐུའི་ཀློང་ཆེན་པོར་འཕོ་འགྱུར་གཞོམ་གཞིག་མེད་པ་གཉུག་མ་དོན་གྱི་སྲོག་རྩ་གྲུབ་པར་བལྟའོ། །ཙིཏྟའི་སྒོ་སྲུང་རྟ་མགྲིན་དུ་བསྐྱེད་པ་འདི་རྒྱུད་དོན་ཤིན་ཏུ་གསང་བའི་དབང་གིས་བཀའ་གཏེར་ཕུར་གཞུང་ཕལ་མོ་ཆེར་མན་ངག་ཏུ་གབ་པ་བཞིན་འདིར་ཡང་ལྷ་བསྐྱེད་སྔགས་དམིགས་སོགས་ཀྱི་སྐབས་སུ་སྒྲོས་ཙམ་ཡང་མ་བསྟན་པ་སྨད་ལས་ཀྱི་དམར་བྱང་དུ། དབང་ཆེན་གསང་བའི་ཧེ་རུ་ཀ༔ ཞེས་མན་ངག་གབ་དོན་དུ་བསྟན་པར་མཛད་པ་སྟེ། གསང་བ་འདི་ནི་དེང་དུས་ཀྱི་ཕུར་པ་མཁན་པོ་ཕལ་ཆེར་ཞིག་གིས་ཐོས་པའི་ཡུལ་ཙམ་དུའང་མ་གྱུར་པར་སྣང་ངོ༌། །གསུམ་པ་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་མཆོད་ཅིང་བསྙེན་པས་དངོས་གྲུབ་ཀྱི་བཅུད་བླང་བ་ལ་གསུམ། སྤྱན་འདྲེན་པ་སོགས་ཆོ་ག་རྫོགས་པའི་ལས་རིམ། བསྙེན་ [19b] པའི་མན་ངག །རྗེས་ཀྱི་བྱ་བའོ། །དང་པོ་ལ། སྤྱན་འདྲེན་པ་ནི། རང་ཉིད་དམ་ཚིག་པའི་ཐུགས་ཀའི་འོད་ཟེར་གྱིས་བསྐུལ་བས་རྒྱལ་བ་རྣམས་ཆོས་ཀྱི་དབྱིངས་སྤྲོས་པ་དང་བྲལ་བའི་ངང་ལས་གཟུགས་ཀྱི་སྐུ་འབར་བའི་ཕྱག་རྒྱ་རྡོ་རྗེ་གཞོན་ནུའི་ལྷ་ཚོགས་ཀྱི་སྐུར་བཞེངས་ནས་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་བྱོན་པར་བསམ། བཞུགས་སུ་གསོལ་བ་ནི། དེ་ལྟར་སྤྱན་དྲངས་པའི་རང་བཞིན་ཡེ་ཤེས་ཀྱི་འཁོར་ལོ་ཉིད་ཏིང་ངེ་འཛིན་གྱི་དཀྱིལ་འཁོར་ལ་གཉིས་སུ་མེད་པར་ཐིམ་སྟེ་དངོས་གྲུབ་མ་ཐོབ་ཀྱི་བར་དུ་བརྟན་པར་བཞུགས་པར་མོས། ཕྱག་འཚལ་བ་ནི། ཡེ་ཤེས་ཀྱི་དཀྱིལ་འཁོར་ཆེན་པོ་མངོན་སུམ་དུ་མཇལ་བ་ལ་ཤིན་ཏུ་སྤྲོ་ཞིང་རང་བཞིན་གཉིས་མེད་དུ་རྟོགས་པའི་ཚུལ་གྱིས་སོ། །མཆོད་པ་འབུལ་བ་ནི། ཐུན་མོང་ཉེར་སྤྱོད་འདོད་ཡོན་གྱི་མཆོད་པ་ལ་འཕྲུལ་དགའི་ལོངས་སྤྱོད་དང་མཚུངས་པར་རང་གི་ཐུགས་ཀ་ནས་སྤྲོས་པའི་ལྷ་མོ་བསམ་གྱིས་མི་ཁྱབ་པས་གོང་དུ་བྱིན་གྱིས་བརླབས་པའི་མཆོད་རྫས་དལ་གྱི་བར་ཁྱམས་ཁོར་ཡུག་རྣམས་སུ་གནས་པ་དག་ལས་འཛད་མེད་དུ་བླངས་ཏེ་ལྷ་ཚོགས་རྣམས་ལ་མཆོད་པའི་སྤྲིན་ཆེན་པོ་སྟོབ་པ་དང༌། ཐུན་མིན་གདུག་ཅན་བསྒྲལ་བའི་ཕུང་པོ་རང་བྱུང་གི་ཉེ་བར་སྤྱོད་པའི་དམ་རྫས་ལ་རོལ་པས་དགྱེས་པ་ཆེན་པོ་བསྐྱེད། [20a] པར་བསམ། བདུད་རྩི་འབུལ་བ་ལ། སྨན་གྱི་ཞལ་བུ་ལག་གཡས་སུ་ཐོགས་ཏེ། རང་བྱུང་བྷཉྫ་འབར་བར་འཆི་མེད་མཆོག་གི་བདུད་རྩིས་གཏམས་པའི་དབུས་སུ་ཨོཾ་ཨཱཿཧཱུཾ་གསུམ་བརྩེགས་མར་གནས་པར་བསམ་ལ་སྨན་གྱི་ཆེ་བ་བརྗོད་ཅིང༌། ལག་པ་གཡོན་པའི་མཐེབ་སྲིན་མ་དང་ཨ་ལས་ཉི་ཟླའི་གའུ་འབྲུ་བཅུས་མཚན་པར་གྱུར་པའི་སྐྱོགས་ཀྱིས་བདུད་རྩི་ནས་བླངས་ཏེ་ལྷ་ཚོགས་རྣམས་ལ་ཕུལ་བས་བདུད་རྩི་མུ་ཏིག་དཀར་པོ་དྲི་མ་མེད་པ་ལྟ་བུའི་རང་བཞིན་དུ་འཕྲོས་ནས་ལྷ་ཚོགས་རྣམས་ཀྱི་ལྗགས་ལ་ཐིམ་པར་བསམ། ཐོག་མར་སྟེང་གི་ནམ་མཁར་འཇའ་འོད་ཐིག་ལེའི་ཀློང་ན་སློབ་དཔོན་ཆེན་པོ་པདྨ་ཐོད་ཕྲེང་རྩལ་ལ་བརྒྱུད་པ་དགུ་ལྡན་གྱི་བླ་མ་རིག་འཛིན་རྣམས་སྤྲིན་ཕུང་གཏིབས་པ་ལྟར་བཞུགས་པར་མོས་ལ་འབུལ། དེ་ནས་ཡི་དམ་བཀའ་སྲུང་དང་བཅས་པ་ལ་ཕུལ་བས་དགྱེས་པ་མཆོག་ཏུ་བསྐྱེད། ཁམས་གསུམ་གྱི་གཏི་མུག་ཐམས་ཅད་བཅོམ་པར་བསམ་ཞིང༌། མཐར་མཉེས་ནས་སྐྱེས་ལན་གྱི་ཚུལ་དུ་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་གནས་ནས་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་ཆར་བཞིན་བབས་ཏེ་བྷཉྫའི་ནང་གི་ས་བོན་གསུམ་ལ་ཐིམ་པས་ཡིད་བཞིན་གྱི་ནོར་བུ་རིན་པོ་ཆེ་ལྟར་དངོས་གྲུབ་རྩོལ་མེད་དུ་འབྱུང་བའི་རང་བཞིན་ཅན་ [20b] དུ་གྱུར་པ་དེ་ཉིད་མཐེབ་སྲིན་ཉི་ཟླའི་གའུས་བླངས་ཏེ་རང་གི་གནས་གསུམ་དུ་བཞག་པ་ཙམ་གྱིས་སྐུ་གསུང་ཐུགས་ཀྱི་དངོས་གྲུབ་ཐོབ། མཐར་ལྕེ་པདྨའི་འདབ་མར་རྡོ་རྗེ་རྩེ་གསུམ་པ་ཉལ་སྟབས་སུ་གནས་པའི་ར་དབུས་མའི་ཁོང་གསེང་གི་རྩེ་མོ་ཧཱུཾ་གིས་མཚན་པ་ལས་བདུད་རྩི་བརྒྱུད་དེ་ལུས་ཀྱི་ནང་ཐམས་ཅད་གང་བས་མཆོག་ཐུན་མོང་གི་དངོས་གྲུབ་མ་ལུས་པ་ཐོབ་པར་བསམ་ལ་བདུད་རྩི་མྱང་ངོ༌། །གཏོར་མ་འབུལ་བ་ལ། སྣང་སྲིད་དམ་རྫས་གཏོར་མའི་རང་བཞིན་དུ་གྱུར་པ་དང་དངོས་སུ་བཤམས་པའི་གཏོར་མ་འདོད་ཡོན་གྱི་ཕུང་པོར་སྤེལ་བ་ཕུལ་བས་དགྱེས་ཤིང་ཚིམས་ནས་དངོས་གྲུབ་གང་འདོད་རྩོལ་མེད་དུ་ཐོབ། ཁམས་གསུམ་གྱི་ཞེ་སྡང་ཐམས་ཅད་བཅོམ་པར་བསམ། རཀྟ་འབུལ་བ་ལ། མདུན་དུ་གནོད་ཅིང་འཚེ་བའི་དགྲ་བགེགས་ཀྱི་རྣམ་པར་ཤེས་པའི་ངོ་བོ་ཐིག་ལེ་དམར་པོ་ནྲྀ་དང་ཏྲི་ཡིག་གིས་མཚན་པ་ཞིག་ཏུ་ཧྲིལ་ཧྲིལ་འདུག་པ་དེ་ལས་འོད་འཕྲོས་པས་གནོད་བྱེད་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་བཀུག་ནས་ཐིམ་སྟེ་ཡོངས་སུ་གྱུར་པ་ལས་ཁྲག་གི་གྲོད་ཐུམ་རི་རབ་ཙམ་པ་ཞིག་ཏུ་གྱུར་པར་བསམ་ལ་སྲས་མཆོག་གི་ཕུར་རུ་འདྲིལ་ཞིང༌། ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཤ་ཏྲུཾ་མཱ་ར་ཡ་ཧཱུཾ་ཕཊ༔ ཅེས་བརྗོད་དེ་ཕུར་པ་བཏབ་པས་དེ་རྡོལ་བ་ལས་བྱུང་བའི་ [21a] ཁྲག་རྒྱུན་སྔར་བྱིན་གྱིས་བརླབས་པའི་རཀྟ་དང་འདྲེས་ནས་སྟོང་གསུམ་ཁྲག་གི་རྒྱ་མཚོར་འཁྱིལ་བ་ལས་རཀྟའི་ལྷ་མོ་འཕྲོ་བས་དཀྱིལ་འཁོར་པ་མཆོད་པས་རབ་ཏུ་མཉེས་པ་ཆེན་པོར་གྱུར། ཁམས་གསུམ་གྱི་འདོད་ཆགས་ཐམས་ཅད་ཟད་པར་མཛད་པར་བསམ། བསྒྲལ་བའི་མཆོད་པ་ལ། བདག་གི་ཐུགས་ཀ་ནས་ལས་བྱེད་ཕོ་ཉ་གྲངས་མེད་པ་ཕྱོགས་བཅུར་འཕྲོས་པས་ཞིང་བཅུ་ཚང་བའི་དགྲ་བགེགས་ཐམས་ཅད་བཀུག་ཅིང་བསྒྲལ་ཏེ་རྣམ་ཤེས་ཆོས་ཀྱི་དབྱིངས་སུ་སྤར། ཤ་ཁྲག་རུས་པ་ལྷ་ཚོགས་རྣམས་ཀྱི་ཞལ་དུ་བསྟབ་པས་རོལ་པ་ཆེན་པོའི་དགའ་སྟོན་གྱིས་ཚིམས་ཤིང་དུག་གསུམ་རང་གནས་སུ་དག་ནས་བསྒྲལ་བྱའི་ཚོགས་གཉིས་ལྷུན་གྱིས་རྫོགས་པར་མོས། སྦྱོར་སྒྲོལ་གྱི་མཆོད་པ་ལ། རང་ལས་སྤྲུལ་པའི་རིག་མ་སྒེག་མཛེས་ཆགས་པའི་ཉམས་ལྡན་འཁོར་ལོའི་གྲངས་དང་མཉམ་པར་སྤྲོས་ནས་ཐབས་ལ་ཤེས་རབ་ཀྱི་རྣམ་པར། ཤེས་རབ་ལ་ཐབས་ཀྱི་རྣམ་པར་གྱུར་ནས་རྗེས་ཆགས་ཀྱིས་སྙོམས་པར་ཞུགས་པས་དབྱིངས་དང་ཡེ་ཤེས་གཏན་གཏུན་གྱི་སྦྱོར་བས་གཟུང་འཛིན་གྱི་དགྲ་བགེགས་རྣམས་བསྒྲལ་ཞིང་བཅོམ་སྟེ་རྟོག་ཚོགས་བདེ་བ་ཆེན་པོའི་དབྱིངས་སུ་སྦྱོར་བས་བདེ་སྟོང་དགའ་བ་བཞིའི་རོས་ཚིམས་པར་བསམ། [21b] འདིར་ལྷ་ཞལ་གསུམ་པའི་རིགས་ལ་བདུད་རྩི་གཡས་ཞལ། རཀྟ་གཡོན་ཞལ། གཏོར་མ་དང་བསྒྲལ་བའི་ཤ་ཁྲག་དབུས་ཞལ་དུ་སྟོབ་པར་དམིགས་ཤིང་དཔའ་བོ་གཅིག་པ་ལ་ནི་དབྱེ་བ་མེད་དོ། །མཐར་མཆོད་པའི་ལྷ་མོ་རྣམས་རང་ལ་བསྡུས་ཏེ་དོན་དམ་པར་མཆོད་བྱ་མཆོད་བྱེད་མཆོད་ཡུལ་དུ་འཛིན་པའི་སྤྲོས་པ་ཐམས་ཅད་དང་བྲལ་བ་བློ་འདས་བདེ་བ་ཆེན་པོ་ཆོས་ཉིད་བསམ་གྱིས་མི་ཁྱབ་པའི་ཡེ་ཤེས་སུ་རོ་མཉམ་པར་བལྟ་བ་ནི་དོན་གྱི་མཆོད་པ་བླ་ན་མེད་པའོ། །བསྟོད་པ་ནི། རང་གི་སྙིང་ག་ནས་ཤེས་པ་ཆ་གཉིས་སུ་ཕྱེ་བའི་ཆ་གཅིག་འཁོར་བ་ན་ཆེ་བ་ཚངས་པ་དང་བརྒྱ་བྱིན་དབང་ཕྱུག་ཆེན་པོ་སོགས་དང༌། ཆ་གཅིག་འདས་པ་ན་ཆེ་བ་འཇམ་དཔལ་དབྱངས་དང་འཇིག་རྟེན་དབང་ཕྱུག་གསང་བའི་བདག་པོ་ལ་སོགས་པར་སྤྲུལ་ནས་དཀྱིལ་འཁོར་གྱི་བར་ཁྱམས་ཁོར་ཡུག་རྣམས་སུ་ལྷགས་ཏེ། དེ་རེ་རེ་ལའང་ཡང་སྤྲུལ་གྱི་འཁོར་ཚོགས་བསམ་གྱིས་མི་ཁྱབ་པས་བསྐོར་ནས་རོལ་མོའི་བྱེ་བྲག་དཔག་ཏུ་མེད་པའི་སྒྲ་ལས་དྲངས་ནས་ལྷ་ཚོགས་རྣམས་ཀྱི་ཆེ་བའི་ཡོན་ཏན་མཐའ་ཡས་པ་ལ་བརྗོད་བྱར་བྱས་པའི་བརྗོད་བྱེད་ཀྱི་གླུ་དབྱངས་སྙན་ཅིང་བར་བརྗིད་ལ་ཟིལ་ཆགས་པས་མངོན་པར་བསྟོད་པར་བསམ་ཞིང༌། བསྟོད་པའི་རྐྱེན་གྱིས་ལྷ་ཚོགས་རྣམས་ཀྱི་ཆེ་བ་བསྐྱེད་ཅིང་གཟི་བྱིན་མཆོག་ཏུ་འབར་ཏེ་ [22a] འཁོར་འདས་ཀྱི་ཞིང་ན་འགྲན་པའི་ཟླ་དང་བྲལ་བར་མོས་ལ་མཐར་བསྟོད་བྱེད་ཀྱི་ལྷ་རྣམས་རང་ལ་བསྡུ། དེ་ལྟར་མཆོད་ཅིང་བསྟོད་པ་ལས་བྱུང་བའི་འབྲས་བུ་མཆོག་གི་དངོས་གྲུབ་ལ་ཡིད་རབ་ཏུ་གདུང་བའི་སྒོ་ནས་གསོལ་བ་བཏབ་པས་སྐུ་གསུང་ཐུགས་ཀྱི་དམ་ཚིག་གི་ཕྱག་རྒྱ་དང་གཉིས་སུ་མེད་པར་བྱིན་གྱིས་བརླབས་པར་མོས། ནོངས་བཤགས་ནི། ཆོ་གའི་ཡན་ལག་མ་ཚང་བ་སོགས་ཉམས་ཆག་ཏུ་གྱུར་པའི་ཚོགས་ལ་གནོང་འགྱོད་དྲག་པོས་བཟོད་པར་གསོལ་བས་དག་ཚངས་སུ་གྱུར་པར་བསམ་མོ། །གཉིས་པ་བསྙེན་པའི་མན་ངག་ལ་གཉིས་ཀྱི། དང་པོ་ཐུགས་དམ་བསྐུལ་བ་ནི། དཀྱིལ་འཁོར་གསུམ་གྱི་ལྷ་ཚོགས་ཐམས་ཅད་བསྙེན་སྒྲུབ་ཛཔྲ་ཀྱི་རིམ་པ་ལ་ཐུགས་དམ་བསྐུལ་བས་ཏིང་ངེ་འཛིན་གྱི་འཕྲོ་འདུ་ལ་དགོངས་པ་མངོན་དུ་ཕྱོགས་པར་བསམ། གཉིས་པ་མན་ངག་དངོས་ལ་ལྔ་ལས། དང་པོ་སྐུ་ཕྱག་རྒྱ་ལ་དམིགས་པའི་ཛཔྲ་དགོངས་ལའང་གསུམ། རྣམ་པ་གསལ་བ། ང་རྒྱལ་བརྟན་པ། རྣམ་དག་དྲན་པའོ། །དང་པོ་ནི། རྟེན་འབྱུང་བ་རིམ་བརྩེགས་དུར་ཁྲོད་གཞལ་ཡས་ཁང་ལྷའི་གདན་དང་བཅས་པ་ནས་བརྟེན་པ་ལྷ་ཚོགས་རྣམས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་དང་བཅས་པའི་བར་རེས་ནང་ནས་ཕྱི། རེས་ [22b] ཕྱི་ནས་ནང༌། ཐོག་མར་ཕྲ་བ་རེ་རེ། དེ་ནས་རགས་པ་སྤྱི། མཐར་ཕྲ་རགས་གཅིག་ཅར་དུ་གསལ་མ་ཐེབས་ཀྱི་བར་དུ་བསྒོམ། དེའང་ལས་དང་པོ་པས་ཐོག་མ་ནས་ཡིད་ཡུལ་དུ་གསལ་ཐེབས་དཀའ་ན་དམིགས་རྟེན་བྲིས་སྐུ་མཚན་ཉིད་དང་ལྡན་པ་བཀྲམ་ལ་མིག་ཅེ་རེ་མི་གཡོ་བར་བལྟ། དེས་མིག་ལ་ལྷ་སྐུའི་གསལ་སྣང་ལྷག་ལྷག་འཆར་ན་ཧ་ཅང་འཆར་ཟིན་མི་བྱེད་པར་དེ་ཀའི་གསལ་སྣང་མ་འགགས་པའི་ངང་ལ་ཤིག་གེར་མཉམ་པར་བཞག །རེ་ཞིག་བྱིངས་ཉམས་བྱུང་ནའང་མི་གསེངས། དེ་ལྟར་བསྐྱངས་པས་ཇི་ཞིག་ན་མི་རྟོག་པའི་ངང་ལས་ལྷ་སྐུའི་གསལ་སྣང་རང་ཤུགས་སུ་འདྲེན་ནུས་པ་འབྱུང༌། དེ་ཙ་ན་དམིགས་རྟེན་མི་དམིགས་པར་སྦྱངས་ཏེ་ཡིད་རྩེ་གཅིག་ཏུ་མཉམ་པར་བཞག་བཞིན་པས་ཀཱི་ལ་ཡ་ཡིད་ཀྱིས་བཟླ་ཞིང་སྐྱོ་ན་ངག་བཟླས་ཀྱང་བྱ། དེ་ལྟར་ཡང་ཡང་བསྒོམ་པས་དང་པོ་ཡིད་ཡུལ་དུ་ལྷའི་རྣམ་པ་ཝལ་ཝལ་གསལ། དེ་ནས་མཐོང་རེག་གི་མཚན་མ་ཡོད་པ་ལྟར་དབང་པོའི་མངོན་སུམ་དུ་གསལ། དེ་ནས་ཀྱང་འབད་པས་ལུས་ཀྱི་ཡུལ་དུ་གསལ་བ་ཞེས་བྱ་སྟེ། རང་ལུས་ཀྱིས་མཚོན་པའི་མ་དག་པའི་སྣང་བ་གཞན་ཀུན་ནུབ་ནས་ལྷ་སྐུའི་གསལ་སྣང་ལ་རྩེ་གཅིག་ཏུ་གནས་ཤིང་ལྷའི་ང་རྒྱལ་བརྟན་ [23a] པོ་འབྱུང༌། དེ་ལྟར་ཡུལ་གསུམ་གསལ་ནས་སྐུའི་ཆ་ཤས་དང་རྒྱན་ཕྲ་མོ་རེ་རེ་ནས་ཀྱང་གསལ་སྣང་འདོན་ཅིང༌། ལྷ་སྐུ་ཆེ་ཆུང་དང་མང་ཉུང་དང་རྒྱང་ཉེ་རིང་སོགས་མ་ངེས་པ་ལ་རྩལ་སྦྱངས་པས་ལྷ་གྱད་དུ་གྱུར་པ་ཞེས་བྱ་སྟེ་ཇི་ལྟར་བསྒོམ་ཀྱང་བདེ་བར་འགྱུར་རོ། །གཉིས་པ་ནི། རང་གི་མིང་རུས་དངོས་མཚན་ཐ་མལ་དུ་འཛིན་པ་ཆེད་ཀྱིས་སྤངས་ནས། བདག་ནི་དཔལ་ཆེན་པོ་རྡོ་རྗེ་གཞོན་ནུ་དངོས་ཡིན། དེའི་ཡོན་ཏན་མཛད་པ་ཕྲིན་ལས་དང་བཅས་པ་ཚང་ངོ་སྙམ་པའི་ང་རྒྱལ་ཤིན་ཏུ་བརྟན་པོ་ལ་བསླབ་བོ། །གསུམ་པ་ནི། རྟེན་སྣོད་ཀྱི་རྣམ་དག་ལ། བགེགས་ཀྱིས་མི་ཚུགས་པའི་སྲུང་འཁོར། ཆོས་ཀྱི་དབྱིངས་ལས་རང་བྱུང་བའི་ཆོས་འབྱུང༌། ཡུམ་བཞིའི་མཁའ་ལ་གནས་པའི་འབྱུང་བ་རིམ་བརྩེགས། ཀུན་གཞི་གནས་སུ་དག་པའི་ཀེང་རུས་ཀྱི་རི་རབ། ཉོན་མོངས་པའི་རྣམ་རྟོག་དང་བག་ཆགས་བསྲེག་པའི་མེ་དཔུང༌། གང་གིས་ཀྱང་གཞོམ་དུ་མེད་པའི་རྡོ་ར། བག་ཆགས་ཀྱི་དྲི་མས་མ་གོས་པའི་པདྨའི་ཕྲེང་བ། རྣམ་ཤེས་ཚོགས་བརྒྱད་དག་པའི་དུར་ཁྲོད། ཆོས་ཀྱི་དབྱིངས་ལ་མཚན་འཛིན་གྱི་རྟོག་པས་མི་ཕྱེད་པའི་བཻ་ཌཱུརྱའི་བྲག་རི། འཁོར་འདས་མཉམ་པར་བརྡལ་བའི་གཞལ་ཡས་ཁང་ [24b] གྲུ་བཞི་པ། ཡེ་ཤེས་ལྔའི་རྩིག་པ། དྲན་པ་ཉེ་བར་བཞག་པ་བཞིའི་སྒོ་བཞི། ཡང་དག་པར་སྤོང་བ་བཞིའི་རྟ་བབ། རྫུ་འཕྲུལ་གྱི་རྐང་པ་བཞིའི་ཆོས་འཁོར། རྟོག་ཚོགས་དག་པའི་རི་དྭགས་ཆོས་ཉན། འདོད་ཡོན་མ་སྤངས་རྒྱན་དུ་རོལ་པའི་འདོད་སྣམ། ཆོས་ཐམས་ཅད་མཉམ་ཉིད་དུ་རྫོགས་པའི་ཕ་གུ །ཆོས་ཀྱི་སྐུ་ལ་དྲི་མས་མ་གོས་ཤིང་རྩལ་མ་འགགས་པའི་དྲྭ་བ་དང་དྲྭ་ཕྱེད། ཐུགས་རྗེ་མི་འགགས་པའི་ཤར་བུ། ཡེ་ཤེས་ཀུན་ལ་ཁྱབ་པའི་མདའ་ཡབ། འཕགས་པའི་ལམ་ཡན་ལག་བརྒྱད་ཀྱི་ཀ་གདན། ཐེག་པ་བརྒྱད་ཀྱི་ཀ་བ། འབྲས་བུ་བརྒྱད་ཀྱི་གདུང་མ། ཆོས་ཕུང་བརྒྱད་ཁྲིའི་དྲལ་ཁེབས། དགོས་འདོད་ཡིད་བཞིན་དུ་སྐོང་བའི་རྒྱན་སྣ་ཚོགས། ཐབས་དང་ཤེས་རབ་གཉིས་སུ་མཚོན་པའི་ཕོ་བྲང་ཕྱི་ནང་གཉིས། སྐུ་གསུམ་མཚོན་པའི་ཐོད་པ་སྐམ་རྙིང་རློན་པའི་རྩིགས་པ་སུམ་རིམ། སྐྱེ་མེད་སྟོན་པའི་གནམ་ལྕགས་ཀྱི་གཟེར། དུག་གསུམ་དག་པའི་ཤ་ཆེན་ཁྲག་ཞག་གི་ཞལ་བ། ལྷ་ཀླུ་གཟའ་དང་རྒྱུ་སྐར་རྣམས་དབང་དུ་སྡུད་པའི་དེ་དག་གི་ཀ་གདུང་དྲལ་ཕྱམ། བདག་འཛིན་གྱི་སྤྲོས་པ་གཅོད་པའི་དུར་ཁྲོད་ཀྱི་རྒྱན་སྣ་ཚོགས། གང་ལའང་ཞེན་པ་བྲལ་བའི་ཙིཏྟ། བདེ་སྟོང་གཉིས་སུ་ [24a] མེད་པའི་བུམ་པ། ས་ལམ་གཅིག་ཅར་རྫོགས་པའི་བྲེ། སྤྲུལ་པས་དོན་གང་འདུལ་དུ་མཛད་པའི་ཆོས་འཁོར། ལོངས་སྤྱོད་རྫོགས་པའི་སྐུར་ལྷུན་གྱིས་གྲུབ་པའི་གདུགས། ཆོས་སྐུ་ཐིག་ལེ་ཉག་གཅིག་གི་ཏོག་ཏེ། མདོར་ན་འཁོར་བ་མ་སྤངས་པར་སངས་རྒྱས་པའི་བརྡ་དོན་རྟེན་གྱི་བཀོད་པ་དང༌། བརྟེན་པ་ལྷའི་རྣམ་དག་ལ། ལྷན་སྐྱེས་ཀྱི་རིག་པ་ཡེ་ཤེས་རྡོ་རྗེ་གཞོན་ནུའི་ངོ་བོ་ཉིད་གང་ཞིག །ཆོས་ཉིད་འགྱུར་བ་མེད་པས་སྐུ་མདོག་མཐིང་ནག ། དབྱིངས་དང་ཡེ་ཤེས་འདུ་འབྲལ་མེད་པས་ཡབ་ཡུམ་མཉམ་པར་སྦྱོར་བ། སྐུ་གསུམ་རྣམ་ཐར་གསུམ་གྱི་དབུ་གསུམ། ཕར་ཕྱིན་དྲུག་གི་ངོ་བོ་ཕྱག་དྲུག །རྫུ་འཕྲུལ་གྱི་རྐང་པ་བཞིའི་ཞབས་བཞི། ཕྱག་མཚན་ཐེག་པ་རིམ་དགུ་མཚོན་པའི་རྡོ་རྗེ་རྩེ་དགུ །ཡེ་ཤེས་ལྔ་མཚོན་པའི་རྩེ་ལྔ། ཉོན་མོངས་པ་བསྲེག་པའི་མེ་དཔུང༌། དུག་གསུམ་གཅོད་པའི་ཁ་ཊྭཱཾ་རྩེ་གསུམ། གདུག་པ་ཅན་རྣམས་འབིགས་པའི་རི་རབ་ཕུར་བུ། ཆོས་སྐུ་མཚོན་པ་ཐལ་ཆེན་གྱི་ཚོམ་བུ། ལོངས་སྐུ་མཚོན་པ་རཀྟའི་ཐིག་ལེ། སྤྲུལ་སྐུ་མཚོན་པ་ཞག་གི་ཟོ་རིས། གཏི་མུག་འཇོམས་པ་ཐེག་མཆོག་གླང་པོ་ཆེའི་ཀོ་རློན། འདོད་ཆགས་འཇོམས་པ་མ་ཉམས་བྱང་སེམས་ཞིང་གི་གཡང་གཞི། ང་ [24b] རྒྱལ་འཇོམས་པ་དཔའ་གཏུམ་ཟ་བྱེད་སྟག་གི་ཤམ་ཐབས། ཞེ་སྡང་འཇོམས་པ་མཉེན་ལྕུག་འཁྲིལ་ལྡེམ་སྦྲུལ་གྱི་ཆུན་པོ། ཕྲག་དོག་འཇོམས་པ་ཚར་གསུམ་ཐོད་པའི་ཕྲེང་བའི་ག་ཤ ཕ་རོལ་བུ་ཕྱིན་པ་དྲུག་གི་རུས་རྒྱན། གཞི་ལམ་འབྲས་བུའི་ཡོན་ཏན་མཐའ་དག་མཚོན་པའི་གར་གྱི་ཉམས་དགུ་ལ་སོགས་པས་ཁྱད་པར་དུ་བྱས་པས། གདུལ་བྱ་ཁམས་གསུམ་གྱི་དྲེགས་པ་ཅན་གྱི་བདུད་དང་རཱུ་དྲ་མ་ལུས་པ་འདུལ་བའི་ཆེད་དུ་ཐུགས་ཞི་བ་ཆོས་ཉིད་ཀྱི་ངང་ལས་གཡོ་བ་མེད་པར་ཐུགས་རྗེའི་རྩལ་འབར་བ་ཆེན་པོའི་སྐུར་སྟོན་པས་ཁྲོ་བོ་ཀུན་གྱི་རྗེ་བཙན་དམ་པར་སྣང་བ་དང༌། དེའི་ཐུགས་རྗེ་ཡེ་ཤེས་ཀྱི་སྒྱུ་འཕྲུལ་ལས་ཤེས་རབ་དབྱིངས་ཀྱི་ཐིག་ལེ་ཟུང་འཇུག་ཕྱག་རྒྱའི་གཟུགས་སུ་སྣང་བའི་སྒྲོལ་ཡུམ་རལ་གཅིག་མ། སྐུ་ལྔ་ཡེ་ཤེས་ལྔའི་ངོ་བོ་ཀཱི་ལ་རིགས་ལྔ། སྤང་བྱ་མི་དགེ་བ་བཅུ་དག་ཅིང་གདུལ་བྱ་ཕྱོགས་སྐྱོང་བཅུ་འདུལ་བ་དང་ལམ་ཕར་ཕྱིན་བཅུ་བགྲོད་ནས་འབྲས་བུ་སྟོབས་བཅུ་ལ་མངའ་མཛད་པའི་ཕྱིར་ཁྲོ་བཅུ་ཡབ་ཡུབ་ཟ་གསོད། སྐུ་གསུང་ཐུགས་ཀྱི་སྤྲུལ་པ་མི་འགགས་པའི་སྲས་མཆོག །ཚད་མེད་བཞིའི་སྒོ་སྐྱོང༌། མཚན་མའི་རྟོག་པ་གང་གང་འདུལ་བ་ལ་འདུལ་བྱེད་ཀྱི་བཀོད་པ་དེ་དེར་སྣང་བའི་སྲུང་ [25a] མ་བཀའ་སྡོད་སོགས་རང་ཤར་བ་སྟེ། མདོར་ན་མཚན་གཞི་རང་སེམས་དེ་བཞིན་ཉིད་གཞིའི་རྡོ་རྗེ་གཞོན་ནུ་ཉིད། མཚོན་བྱ་འབྲས་བུ་དག་པ་གཉིས་ལྡན་གྱི་རྡོ་རྗེ་གཞོན་ནུའི་ཡོན་ཏན་གྱི་ཁྱད་པར་ཐམས་ཅད། མཚོན་བྱེད་ལམ་གྱི་རྡོ་རྗེ་གཞོན་ནུའི་སྐུ་མདོག་ཕྱག་མཚན་གཙོ་འཁོར་རྟགས་ཀྱི་ཁྱད་པར་དུ་ཤར་བར་ཐག་བཅད་དེ་བསྒོམ་མོ། །གཉིས་པ་གསུང་ཡི་གེ་ལ་དམིགས་པའི་ཛཔྲ་དགོངས་ལ་གཉིས། དམིགས་པའི་འཕྲོ་འདུ་དང༌། བཟླ་ཐབས་སོ། །དང་པོ་ལ་གསུམ། ཡེ་ཤེས་ཀྱི་ལྷ་ཉེ་བར་བསྙེན་པ། དམ་ཅན་ཉེ་བར་བསྙེན་པ། ངན་སྔགས་ཉེ་བར་བསྙེན་པའོ། །དང་པོ་ལ་ལྔ་ལས། དང་པོ་མགལ་མེ་ཀླད་སྐོར་གྱི་ཚུལ་ནི། སྔར་གྱི་གསལ་སྣང་བརྟན་པ་གཞིར་བྱས་ནས། བདག་རྩ་བའི་དཀྱིལ་འཁོར་སེམས་དཔའ་སུམ་བརྩེགས་ཀྱི་ཏིང་ངེ་འཛིན་སེམས་དཔའ་ཧཱུཾ་ཡིག་གི་མཐར་ཀཱི་ལ་ཡ་འབྲུ་དགུ་སྤུས་བྲིས་པ་ཙམ་གཡས་སྐོར་དུ་འཁོད་པ་དེ་ལས་འོད་ཉི་ཟེར་ལྟ་བུ་དཔག་ཏུ་མེད་པ་འཕྲོས། ཁྲོ་བཅུ་སྲས་མཆོག་སོགས་ཕྱོགས་དུས་ཀྱི་རྒྱལ་བ་སྲས་བཅས་ལ་མཉེས་མཆོད་ཕུལ་ཞིང་ཐུགས་དམ་གྱི་རྒྱུད་བསྐུལ། རིགས་དྲུག་གི་སེམས་ཅན་ལ་ཕོག་པས་ལས་ཉོན་རྣམ་སྨིན་གྱི་སྒྲིབ་པ་སྦྱངས་ནས་བདེ་ཆེན་གྱི་ [25b] ཞིང་ལ་བཀོད། དམ་ཅན་སྲུང་མའི་ཚོགས་ལ་ཕོག་པས་སྔོན་གྱི་ཐ་ཚིག་བསྐུལ་ཏེ་ལས་ལ་བཙུད། རིག་འཛིན་བླ་མ་མཆེད་ལྕམ་རྣམས་ལ་ཕོག་པས་ཐུགས་དམ་དབྱིངས་སུ་བསྐང༌། དགྲ་བགེགས་ཐམས་ཅད་ལ་ཕོག་པས་གནོད་འཚེའི་གདུག་རྩུབ་ཚར་བཅད། འོད་ཟེར་སླར་འདུས་ཏེ་དཀྱིལ་འཁོར་གསུམ་ལ་ཐིམ་པས་མཐུ་བསྐྱེད་དབང་ཐོབ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་པ་ཐོབ་པར་བསམ་ཞིང༌། སྔགས་ཕྲེང་མི་གཡོ་བར་གནས་པ་ལ་སེམས་གཏད་དེ་བཟླ་བ་ནི་བསྙེན་པའི་ཡན་ལག །ཡང་ཐུགས་ཀའི་སྔགས་ཕྲེང་བར་མ་ཆད་པ་འོད་ཟེར་ལྕགས་སྒྲོག་སྦྲེལ་བ་ལྟ་བུ་ཤད་ཀྱིས་བྱུང་བ་ཡེ་ཤེས་སེམས་དཔའི་ཞལ་བརྒྱུད་རང་གི་ཞལ་ནས་ཐོན། ཡུམ་གྱི་ཞལ་ནས་སྐུའི་དབྱིབས་བརྒྱུད་གསང་བའི་པདྨོ་ནས་རྡོ་རྗེའི་སྦུབས་བརྒྱུད་སྙིང་གའི་དྭངས་སྲོག་ལ་ཐིམ་པས་བདེ་སྟོང་གི་ཡེ་ཤེས་མཆོག་ཏུ་འབར་པར་བསམ། ཡང་དེའི་རྐྱེན་གྱིས་སྔགས་ཕྲེང་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས་སངས་རྒྱས་ཀྱི་ཞིང་ཐམས་ཅད་ཁྱབ། རྒྱལ་བ་སྲས་དང་བཅས་པ་མཆོད་ཅིང་དེ་ [26a] ངག་གི་དབང་བྱིན་དངོས་གྲུབ། སྣང་སྲིད་ཁམས་ཀྱི་དྲེགས་པ་ཅན་རྣམས་ཀྱི་ཚེ་བསོད་དཔལ་འབྱོར་མངའ་ཐང༌། འབྱུང་བ་ལྔའི་དྭངས་བཅུད་བཀྲག་མདངས། སྣོད་བཅུད་ཀྱི་དགེ་མཚན་དཔལ་ཡོན་མ་ལུས་པ་ཐམས་ཅད་འོད་ཟེར་ཁ་དོག་སྣ་ཚོགས་སྤྲིན་ཕུང་ལྟ་བུའི་རྣམ་པར་བསྡུས་ཏེ་དྭངས་སྲོག་ལ་ཐིམ་པས་མཐུ་རྩལ་གཟི་བྱིན་ནུས་པ་མཆོག་ཏུ་འབར་བར་བསམ་ཞིང་སྔགས་ཕྲེང་རྒྱུན་མི་འཆད་པར་མགལ་མེ་ལྟར་འཁོར་བ་ལ་སེམས་གཏད་དེ་བཟླ་བ་ནི་ཉེ་བར་བསྙེན་པའི་ཡན་ལག་གོ །གཉིས་པ་བུང་བ་ཚང་ཞིག་གི་ཚུལ་ནི། བདག་གི་ཞལ་གསུམ་ཀ་ནས་ཀཱི་ལ་ཡ་བཟླས་པས་དབུ་རྒྱན་གྱི་ཁྲག་འཐུང་རིགས་ལྔ། བ་སྤུ་བུ་གའི་ཁྲོ་ཆུང་རྣམས་དང༌། ཁྲོ་བཅུ་ཡབ་ཡུམ་ཟ་གསོད་སྒོ་སྐྱོང་དམ་ཅན་བཀའ་སྡོད་སོགས་ལྷར་གསལ་བ་ཐམས་ཅད་ཀྱིས་དུས་གཅིག་ཏུ་སྔགས་བཟླ་ཞིང༌། དེ་བཞིན་དུ་མདུན་གྱི་ནམ་མཁར་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བཞུགས་པ་རྣམས་དང༌། ཁམས་གསུམ་སེམས་ཅན་ཐམས་ཅད་ཡི་དམ་གྱི་སྐུར་གྱུར་པས་སྔགས་སྒྲ་དི་རི་རི་སྒྲོགས་པར་བསམ། དེར་མ་ཟད་འབྱུང་བའི་སྒྲ་སྐད་ཐམས་ཅད་ཀྱང་ཀཱི་ལ་ཡའི་རང་སྒྲར་གྲགས་པར་བསམ་ལ་བཟླ་བ་ནི་སྒྲུབ་པའི་ཡན་ལག་གོ །གསུམ་པ་མགར་ [26b] གྱི་ཚྭ་ཚྭ་སྤྲོ་བ་ལྟ་བུའི་ཚུལ་ནི། དཀྱིལ་འཁོར་གསུམ་གྱི་ལྷ་ཚོགས་རྣམས་ལས་སྤྲུལ་པ་ཁྲོ་ཆུང་མཚོན་ཐུན་གྱི་ཚོགས་དྲག་ཅིང་ཚལ་རྩུབ་པ་དཔག་ཏུ་མེད་པ་སེར་ཐུན་དང་ཐོག་རྒོད་བབས་པ་ལྟར་འཕྲོས་ཤིང་སྔགས་སྒྲ་འབྲུག་སྟོང་དུས་གཅིག་ལྡིར་བ་ལྟར་སྒྲོགས་པ་དང༌། སྔགས་ཀྱི་འོད་ཟེར་མེའི་ཚྭ་ཚྭ་ལྟར་འཕྲོས་པས་ལོག་པར་འདྲེན་པའི་བདུད་བགེགས་དང་འབྱུང་པོ་ཐམས་ཅད་ཐུལ་ཐུལ་བསྲེགས་ཏེ་ཐལ་བའི་རྡུལ་ཕྲན་བཞིན་བརླག་པར་བསམ་ཞིང་དྲག་སྔགས་བཟླ་བ་ནི་མངོན་སྤྱོད་སྒྲུབ་པའི་ཡན་ལག་གོ །བཞི་པ་གྲུབ་མཐའ་ལམ་ལོངས་ཀྱི་ཚུལ་དུ་བཟླ་བ་ནི། གཟུགས་སུ་སྣང་བ་ཐམས་ཅད་སྣང་སྟོང་དབྱེར་མེད་དཔལ་ཆེན་ཧེ་རུ་ཀའི་སྐུའི་རང་བཞིན། སྒྲར་གྲགས་པ་ཐམས་ཅད་གྲགས་སྟོང་འགགས་མེད་ཀཱི་ལ་ཡའི་རང་སྒྲ། དྲན་རྟོག་ཐམས་ཅད་རང་ཤར་རང་གྲོལ་ཆོས་ཉིད་ཡེ་ཤེས་ཀྱི་རོལ་པ་ཆེན་པོར་ཤེས་པའི་ངང་ནས་འཛིན་མེད་དུ་བཟླ་བ་ནི་སྒྲུབ་པ་ཆེན་པོའི་ཡན་ལག་གོ །ལྔ་པ་ཤེས་པ་གསུམ་ལྡན་གྱི་གནད་ནི། སྔགས་ཀྱི་འོད་ཟེར་དཔག་ཏུ་མེད་པ་རེ་རེ་བཞིན་ཡང་རྡོ་རྗེ་གཞོན་ནུ་བསམ་གྱིས་མི་ཁྱབ་པར་གྱུར། དེ་རེ་རེའི་ཞལ་ནས་ཀྱང་དེ་འདྲ་བའི་སྔགས་དང་སྤྲུལ་པ་སྤྲོས་པས་སྣང་སྲིད་ཐམས་ཅད་ཁྲོ་བོ་ཁྲོ་མོས་ [27a] ཁེངས་པར་བསམ་པ་ནི་ཀཱི་ལ་ཡ་ལྷར་ཤེས་པ། སྔགས་ཀྱི་འོད་ཟེར་གྱིས་བདག་དང་སེམས་ཅན་ཐམས་ཅད་ཀྱི་སྒྲིབ་པ་མཐའ་དག་སྦྱངས་ཉོན་མོངས་པ་ཆོས་ཉིད་དུ་ལྷན་ལྷན་སོང༌། བདག་གཞན་ཐ་དད་དུ་འཛིན་པའི་ཞེན་རྟོག་དག །ཆོས་ཐམས་ཅད་ཆོས་ཉིད་རང་བཞིན་གྱིས་རྣམ་པར་དག་ཅིང་དབྱེར་མེད་པར་ཤེས་པ་ནི་ཀཱི་ལ་ཡ་ཆོས་ཉིད་དུ་ཤེས་པ། སྟོད་ལས་དང་དམིགས་བསལ་ཚེ་སྒྲུབ་པའི་སྐབས་སུ། སྔགས་ཀྱི་འོད་ཟེར་ལས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་ཚོགས་ཉི་ཟེར་གྱི་རྡུལ་ལྟར་འཕྲོས། ཕྱོགས་སྐྱོང་སྡེ་བརྒྱད་ཀྱི་ལག་ནས་རང་གཞན་གྱི་བླ་ཚེ་བརྐུས་པ་འཕྲོག་པ་ཡར་བ་རྣམས་དང༌། རྒྱལ་བ་སྲས་དང་བཅས་པའི་སྐུ་ཚེའི་དངོས་གྲུབ། དྲང་སྲོང་རིག་འཛིན་འཇིག་རྟེན་ཆེ་རྒུ་རྣམས་ཀྱི་ཚེ་དང་བསོད་ནམས། བརྟན་གཡོའི་བཅུད་ཀྱི་དྭངས་མ་ཐམས་ཅད་འུབ་ཀྱི་བསྡུས་ནས་རང་དང་བསྲུང་བྱ་ལ་ཐིམ་པས་གཞོམ་གཞིག་དང་བྲལ་བའི་རྡོ་རྗེའི་ཚེ་ཐོབ་པར་བསམ་པ་དང༌། སྨད་ལས་ངན་སྔགས་དང་འབྲེལ་བའི་སྐབས། དགྲ་བོའི་སྙིང་གི་ཁྲག་སྦལ་ནང་ནས་རྣམ་པར་ཤེས་པ་ནྲྀ་དང༌། བགེགས་ཀྱི་ཤེས་པ་ཏྲི་ཡིག་གི་རྣམ་པས་བཀུག་ནས་ལིང་ག་ལ་བསྟིམས་པ་སྔགས་ཀྱི་མཐུ་དང་ [27b] དབལ་ཟེར་གྱིས་གཞོབ་རོ་རྡོག་པས་བརྫིས་པའམ་གྲོད་ལྐོག་མེ་ལ་བཤུར་བ་ལྟར་སྐུམ་ཧྲི་ལེར་སོང་བར་བསམ་པ་ནི་ཀཱི་ལ་ཡ་འགུགས་གཞུག་ཏུ་ཤེས་པའོ། །འདི་དག་གི་སྐབས་སུ་བཟླ་བྱའི་སྔགས་ནི། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ། ཅེས་སྲོག་སྔགས་འབྲུ་དགུ་དང༌། སརྦ་བིགྷྣཱན་བཾ་ཞེས་ལས་སྔགས་འབྲུ་ལྔ་དང༌། ཛཿཧཱུཾ་ཨཱཿ ཞེས་མཁའ་འགྲོའི་འཕྱོང་སྔགས་འབྲུ་གསུམ་སྟེ། དེ་རྣམས་སྦྲེལ་བའི་འབྲུ་བཅུ་བདུན་པ་ཁོ་ན་ཆིག་དྲིལ་དུ་བཟླའོ། །གཉིས་པ་དམ་ཅན་ཉེ་བར་བསྙེན་པ་ལ། རྩ་བ་དང༌། ལས་སྦྱོར་གཉིས་ཀྱི། དང་པོ་ནི། བདག་དང་སྲས་མཆོག་གི་ཐུགས་ཀར་དམ་ཅན་འདུས་པའི་སྔགས་ཀྱིས་བསྐོར་བར་བསམ། བཟླས་པ་བྱས་པས་སྔགས་ལས་འོད་ཟེར་དམར་པོ་ཛཿཡིག་གི་རྣམ་པ་ཕྱོགས་བཅུར་འཕྲོས། དམ་ཅན་རྣམས་རང་རང་གི་གནས་ནས་ལྕགས་ཀྱུའི་རྡུལ་གྱིས་རང་དབང་མེད་པར་བཀུགས་ཤིང་ཤ་རུལ་ལ་སྦྲང་མ་འདུ་བ་ལྟར་ཐིབས་ཀྱིས་འདུས་ཏེ། ཐམས་ཅད་ཀྱིས་བདག་གིས་ཅི་བགྱི་དཔའ་བོ་ཆེན་པོས་བཀའ་སྩོལ་ཅིག །ཅེས་ཟེར་ནས་བཀའ་ཉན་ཅིང་ལས་བྱེད་པའི་ཚུལ་དུ་འདུག་པར་བསྒོམ། གཉིས་པ་ནི། ཐུན་མཐར་དེ་དག་ལས་ལ་རྔམས་པའི་ཚུལ་དུ་འདུག་པ་ལ་ཐུགས་ཀའི་འོད་ཟེར་རྩུབ་ཅིང་གདུང་ [28a] བས་བསྐུལ། དེ་མ་ཐག་ཏུ་རི་དྭགས་ལ་ཤ་ཁྱི་བཀྱེས་པ་ལྟར་རྔམས་ཤིང་འཁྲུགས་ནས་ཧབ་དི་རི་རི་སོང་སྟེ་དམིགས་བྱ་གང་ཡིན་པའི་དགྲ་བགེགས་རྣམས་ལྕགས་ཀྱུས་བཟུང༌། མཚོན་ཆས་བཏབ། ལ་ལས་ཤ་ཟོས། ལ་ལས་ཁྲག་འཐུང༌། ལ་ལས་རུས་པ་འཆའ། ཕུང་པོ་ལྷག་མ་མེད་པར་བརླག་པར་བསམ་ལ་བཞི་སྙིང་གཅིག་དྲིལ་བཟླའོ། །གསུམ་པ་ངན་སྔགས་ཉེ་བར་བསྙེན་པ་ནི། ཐུན་མོང་དུ་མགར་གྱི་ཚྭ་ཚྭ་སྤྲོ་བ་ལྟ་བུའི་དམིགས་གནད་དང་བཅས་བསྙེན་སྔགས་ལ་སྤུ་གྲིའི་དྲག་སྔགས་བརྒྱད་ཅུ་རྩ་བཞི་པ་ཉིད་སྦྲེལ་ཏེ་བཟླ་ཞིང༌། ཁྱད་པར་ཕྲིན་ལས་ལ་དམིགས་པའི་ཛཔྲ་དགོངས་དང་འབྲེལ་བར་གབ་པའི་སྔགས་དྲུག་བཟླ་བའི་ཚུལ་ནི་སྨད་ལས་ངན་སྔགས་སྒྲུབ་པའི་མན་ངག་ལས་ཤེས་སོ། །གཉིས་པ་ཇི་ལྟར་བཟླ་བའི་ཚུལ་ལ། ལུས་ངག་ཡིད་ཀྱི་གནད་གསུམ་ལས། དང་པོ་ལུས་ཀྱིས་བཟླ་ཚུལ་ལ། གང་ལ་ཟླ་ན་ཕྲེང་བ་སྟེ། དེའི་རྒྱུ་ནི། སྤྱིར་ལས་བཞི་སོགས་ཀྱི་ངེས་པས་དབྱེ་བ་མང་ཡང་བསྡུ་ན། སྔགས་སྒྲུབ་མན་ངག་རིན་ཆེན་ཕྲེང་བ་ལས། ཕྲེང་བའི་བྱེ་བྲག་བོ་དྷི་ཙེ་བཟང་པོ། །ཀུན་ལ་ཤིས་པས་སྤྱི་ཡི་བཟླས་པ་ནི། །རུ་རཀྴ་ནི་ཁྲོ་བོའི་བཟླས་པའམ། །དྲག་པོའི་ལས་ལ་རབ་ [28b] ཏུ་བསྔགས་པར་བཤད། །ཅེས་སོགས་གསུངས་པས་སྤྱིར་བོ་དྷི་ཙེ་ལས་ཐམས་ཅད་ལ་བསྔགས་པར་བཤད་དེ། རྒྱུད་གཞན་ལས་ཀྱང༌། བོ་དྷི་ཙེ་ཡིས་གྲངས་མེད་འགྱུར། །ཞེས་གསུངས། བྱེ་བྲག་འདིར་ནི་དྲག་པོའི་ཕྲིན་ལས་ཀྱི་དབང་གིས་རུ་རཀྴ་དང་ཐོད་པའི་ཕྲེང་བ་མཆོག་ཏུ་ཤིས་ཏེ། རཀྴ་ཐོད་པ་མཆོག་དུ་བསྔགས། །ཞེས་སོ། །གང་ཡང་གཞན་གྱིས་ལོངས་མ་སྤྱད་པ་ཉིད་གཞོན་ནུ་མས་བཀལ་བའི་སྲད་བུ་ཡེ་ཤེས་དགུ་དང་རིགས་ལྔ་སྐུ་གསུམ་སོགས་མཚོན་པའི་དགུ་བསྒྲིལ་ལྔ་བསྒྲིལ་སུམ་བསྒྲིལ་རྣམས་ཇི་ལྟར་འཚམས་པ་ལ་བརྒྱུས་ཤིང༌། ཇི་སྐད་དུ། ཕྲེང་བ་ཀུན་གྱི་དགྲ་བཅོམ་པ། །མཆོད་རྟེན་ཆོས་ཀྱི་ཕུང་པོའི་ཕྱིར། །ཞེས་དང༌། སྟེང་དུ་ཡང་ནི་ཆོས་ཀྱི་དབྱིངས། །ཞེས་སྐུ་གཉིས་མཚོན་པའི་མདོ་འཛིན་ཉིས་བརྩེགས་སུ་ཡོད་པར་བྱས་ཏེ། བསང་སྦྱངས་ལྷར་བསྐྱེད་བསྟིམ་ནས་ཕྲེང་བའི་རྣམ་པར་བསྒྱུར་བ་རུ་ཙི་ར་སོགས་ཀྱི་སྔགས་བཟླས་པས་བྱིན་གྱིས་བརླབས་པའོ། །གང་གིས་བཟླ་ན་ལག་པའི་སོར་མོས་སོ། །ཇི་ལྟར་བཟླ་ན། དེ་ལས། ཀུན་ཀྱང་མཐེབ་མཛུབ་གཉིས་ཀྱིས་འཛིན་པར་བསྔགས། །དྲག་པོ་གཡས་པའི་མཐེབ་སྲིན་གཉིས་ཀྱིས་བགྲང༌། །ཞེས་པས་དྲག་པོའི་ལས་ལ་གཡས་མཐེབ་སྲིན་སྦྱར་བའི་ཆོས་འབྱུང་གི་ [29a] རྒྱས་འདྲེན་པར་བཤད་ཅིང༌། ལས་གཞན་རྣམས་ལ་གཡོན་པས་བགྲང་བར་བྱ་སྟེ། འདྲེན་ཚུལ་སོར་མོ་བཞི་སྦྱར་བའི་མཛུབ་མོའི་སྟེང་དུ་ཕྲེང་བ་བཞག་ནས་མཐེ་བོང་རྡོ་རྗེ་ལྕགས་ཀྱུའི་རྣམ་པས་སོ། །ཡང་དམིགས་བསལ་དུ། ཞི་བ་ལ་མཐེབ་མཛུབ་ཀྱིས་སྙིང་གར། རྒྱས་པ་ལ་གོང་མོའི་ཁར་ལྟེ་བར། དབང་ལ་སྲིན་ལག་སྟེང་གསང་བར། དྲག་པོ་ལ་མཐེའུ་ཆུང་ཁར་པུས་སྟེང་རྣམས་སུ་བགྲང་ཞིང༌། བཟློག་བསང་སོགས་སྐབས་འགར་མཐེ་བོང་སྟྭ་གྲི་དང་མཛུབ་མོ་ལྕགས་གཏན་ཕྲེང་རྡོག་བྱད་མའི་མགོ་བོར་དམིགས་པས་ཕྲེང་བ་ཕྱིར་བསྣུར་ཏེ་སྐེ་བཅད་པའི་དམིགས་པ་སོགས་སྐབས་ཐོབ་ཤེས་དགོས་པའོ། །གཉིས་པ་ངག་གི་བཟླ་ཚུལ་ལ། གང་བཟླ་ན། ལྷའི་སྙིང་པོ་བསྙེན་པའི་སྔགས་རྣམས་སོ། །གང་གིས་བཟླ་ན། སྔགས་ཀྱི་སྒྲར་སྣང་བའི་ཚུལ་དུ་ཡིད་ཀྱིས་སམ་སྒྲར་གྲགས་པའི་ཚུལ་དུ་ལྕེ་རྐན་འཕྲད་པའི་རྩོལ་བས་སོ། །ཇི་ལྟར་བཟླ་ན། སྒྲ་ཧ་ཅང་ཆེ་བ་དང༌། ཆུང་བ་དང༌། ཡི་གེ་ཐུང་བ་རྣམས་དལ་བུར་འདོན་པ་དང༌། རིང་བ་རྣམས་མྱུར་པོར་འདོན་པ་དང༌། ཧ་ཅང་གསལ་ཆེས་པའམ་མི་གསལ་བ་དང༌། ཐུན་སྒང་དུ་མི་དང་གཏམ་འདྲེས་པའི་སྔགས་དང་འདོན་པ་གཞན་བྱེད་པ་ [29b] སོགས་ཚིག་གཞན་གྱིས་བར་ཆོད་པ་དང༌། སེམས་གཞན་དུ་ཡེངས་པ་སོགས་ཀྱི་སྐྱོན་སྤངས་ནས་བཟླ་སྟེ། རྔམས་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བ་མིན། །དྲག་པར་མ་ཡིན་ཞན་པ་མིན། །ཡིག་འབྲུ་ཡན་ལག་ཉམས་པ་མིན། །ཡེངས་པས་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་དང༌། མཚོ་རྒྱལ་ཞུས་ལན་ལས། སྐྱོན་ལྔ་སྤངས་ཏེ། དག་པ་གཙང་བ་སི་ལི་ལི་བཟླའོ༔ སྐྱོན་ལྔ་གང་ཞེ་ན༔ མྱུར་ཏེ་སྒྲ་འདྲེས་ན་འབྱམས་ཏེ་འབྲུ་འདྲེས་པའི་སྐྱོན་ཡོད༔ བུལ་ཞིང་འཆལ་ན་བྱེར་བའི་སྐྱོན་ཡོད༔ དྲག་ཅིང་སྒྲ་ཆེ་ན་ཕོག་ཐུག་འོང་ཞིང་བྱིན་རླབས་ཡལ༔ ཞན་ཅིང་སྒྲ་ཆུང་ན་ནུས་པ་མི་ཐོན༔ ལྷག་ཆད་མེད་པར་སྒྲ་དག་ཟུར་ཐོན་མ་འདྲེས་གསལ་དག་ཏུ་བཟླ་བར་བྱའོ༔ ཞེས་གསུངས་པ་ལྟར་སྐྱོན་རྣམས་སྤངས་ནས། སྤྱིར་བཟླས་པ་ཡིད་བཟླས། བྱེ་བྲག་ལས་གང་ལ་མཐུན་པའི་ཚུལ་གྱིས་བཟླ་བ་སྟེ། ཞི་བར་ཤུབ་བུར་གོང་བས་ཐོས་ཙམ་དུ་བཟླ། རྒྱས་པར་རྐང་པས་ཐོས་ཙམ་དུ་བཟླ། དབང་ལ་གྲོགས་པོར་སྙིང་གཏམ་འཆད་པ་ལྟར་གཞན་གྱིས་ཐོས་ཙམ་དུ་བཟླ། དྲག་པོར་གནམ་ལྕགས་ཀྱི་ཐོག་ [30a] བབས་པ་ལྟར་ཁོངས་ཤུགས་བསྐྱེད་དེ་བཟླའོ། །གསུམ་པ་ཡིད་ཀྱི་བཟླ་ཚུལ་ལ། གང་བཟླ་ན་ཏིང་ངེ་འཛིན་ནོ། །གང་གིས་བཟླ་ན་སེམས་རྩེ་གཅིག་པའི་དྲན་པས་སོ། །ཇི་ལྟར་བཟླ་ན་དྲན་པ་དེས་སེམས་ཏིང་ངེ་འཛིན་ལས་གཞན་དུ་མི་གཏོང་བར་རྩེ་གཅིག་ཏུ་འཛིན་པ་སྟེ། དེ་ཡང་ཡང་བསྐྱར་བས་བཟླས་པའོ། །དེ་ཡང་སྲོག་སྡོམ་གཟེར་བཞིའི་གནད་ལ་གཅུན་པར་བྱེད་པ་སྟེ། རྒྱུད་ལས། ཏིང་འཛིན་གཟེར་དང་སྙིང་པོའི་གཟེར། །དགོངས་པའི་གཟེར་དང་འཕྲོ་འདུའི་གཟེར། །ཞེས་བཞིར་གསུངས་པའི་དང་པོ་ནི། ཏིང་འཛིན་གཟེར་ནི་ཐོད་སྐུ་ལ། །རྩེ་གཅིག་སེམས་བཟུང་ཡེངས་མི་བྱ། །ཞེས་དང༌། གཉིས་པ་ནི། སྙིང་པོ་སྔགས་གཟེར་ཡོངས་རྫོགས་ཀྱི། །གཙོ་བོའི་སྔགས་དང་སེལ་མེད་བཟླ། །ཞེས་དང༌། གསུམ་པ་ནི། དགོངས་པའི་གཟེར་ནི་ཞི་ཁྲོའི་ལྷ། །ཡོངས་རྫོགས་དཔལ་ཆེན་རང་སེམས་ལས། །གུང་ན་མེད་ཅིང་རཱུ་དྲ་ཡང༌། །ལོག་ན་མེད་དོ་རང་གི་སེམས། །སེམས་ཉིད་སྟོང་པ་ཆོས་ཀྱི་སྐུ། །ཞེས་སོགས་དང༌། བཞི་པ་ནི། འཕྲོ་འདུའི་གཟེར་ནི་དམིགས་པ་ཡིས། །བསྒྱུར་ཁ་ཤེས་ན་འདོད་རྒུར་འགྱུར། །ཞེས་སོ། །གསུམ་པ་ཐུགས་ཆོས་ཉིད་ལ་དམིགས་པའི་ཛཔྲ་དགོངས་ནི། ཡིད་ལ་དྲན་རྟོག་ཅི་འགྱུ་ཡང་ཆེད་ [30b] དུ་མི་སྤང་ཆེད་དུ་མི་སྒྲུབ་པར་གང་ཤར་དེ་ཀའི་ངང་ལ་ཅེ་རེ་བལྟས་པས། སྣང་རིག་ངོས་བཟུང་མེད་པར་རྗེན་ནེ་བ་དམིགས་མེད་བསམ་བརྗོད་དང་བྲལ་བའི་སྟོང་པ་ཉིད། མདངས་བདེ་བ་ཆེན་པོའི་རོལ་པར་མ་འགགས་ཤིང༌། རྩལ་ཅིར་ཡང་འཆར་བའི་ཟུང་འཇུག་འདི་ཀ་དངོས་པོའི་གནས་ལུགས་ཏེ་གདོད་མ་ནས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་ལྷུན་རྫོགས་ཐིག་ལེ་ཆེན་པོར་ངོ་ཤེས་པར་བྱ་ཞིང༌། དེ་ལྟར་མ་རྟོགས་པ་ལ་སྙིང་རྗེ་བསྐྱེད། སྙིང་རྗེའི་རང་མདངས་འགགས་མེད་དུ་གསལ་བ་སྤྲོས་བྲལ་ངོས་བཟུང་མེད་པའི་གཤིས་ལུགས་སུ་ལ་བཟླ་སྟེ། ཡུལ་མེད་རང་གསལ་རྗེན་པར་བསྐྱང་བའོ། །དེའང་ཇི་སྐད་དུ་རྩ་གཞུང་ལས། སྐུ་གསུམ་རྡོ་རྗེ་ཕུར་པ་ནི༔ དུག་གསུམ་བསྒྲལ་བའི་ཀློང་ནས་ལངས༔ ངོ་བོ་ཁྱབ་བརྡལ་མཐའ་བྲལ་ཉིད༔ སྟོང་པའི་ཡེ་ཤེས་ཆོས་ཀྱི་དབྱིངས༔ ཁྱབ་བརྡལ་ཆོས་སྐུའི་ཕུར་པའོ༔ རང་བཞིན་འགགས་མེད་རྩལ་སྣང་བ༔ གསལ་བའི་ཡེ་ཤེས་སོ་སོར་གསལ༔ ཞེན་མེད་འཛིན་མེད་རང་སར་ཀློད༔ མ་འགགས་ལོངས་སྐུའི་ཕུར་པའོ༔ ཐུགས་རྗེ་ཕྱོགས་མེད་རང་གྲོལ་གྱི༔ ཀུན་ཁྱབ་ཡེ་ཤེས་གཟུགས་སྐུར་ཤར༔ དྲན་ཙམ་རང་ངོར་རྫོགས་ལ་ལྟོས༔ ཕྱོགས་མེད་སྤྲུལ་སྐུའི་ཕུར་པའོ༔ སྐད་ཅིག་འཁོར་བའི་ [31a] འཁོར་ལོ་རྫོགས༔ སྐད་ཅིག་རྒྱལ་ཀུན་དཀྱིལ་འཁོར་རྫོགས༔ རང་སྣང་ཞིང་ལ་རང་རིག་ལྷ༔ ཤར་གྲོལ་འཁོར་གྱི་རོལ་པའོ༔ སྟོང་ཉིད་ཆོས་དབྱིངས་ཕུར་པ་སྟེ༔ གསལ་བ་བཛྲ་ཀཱི་ལ་ཡ༔ མཉམ་ཤར་རཏྣ་ཀཱི་ལ་ཡ༔ སོ་སོར་རྟོག་པ་པདྨའི་སྐུ༔ ཤར་གྲོལ་དབང་ཐོབ་ལས་ཀྱི་བདག༔ དོན་ལ་རིག་པའི་རང་ངོར་རྫོགས༔ རིག་པ་ཁྱབ་བདག་རྡོ་རྗེ་འཆང་༔ རིག་པ་སྒྱུ་འཕྲུལ་སྣ་ཚོགས་བདག༔ རིག་པ་འཁོར་འདས་དབང་ཕྱུག་གོ༔ རིག་པ་འདོད་དགུའི་འབྱུང་གནས་སོ༔ མ་རིག་སངས་པའི་རིག་པ་ནི༔ གྲོལ་བྱེད་རང་དབང་རང་ལ་འབྱོར༔ སྐད་ཅིག་གཅིག་གི་བྱེ་བྲག་གིས༔ སྐད་ཅིག་རྫོགས་པའི་སངས་རྒྱས་ལམ༔ གཞན་དུ་འཚོལ་བས་ལྷ་མི་རྙེད༔ རང་ཉིད་ལྷ་ལ་ལྷ་ཉིད་རང་༔ སྣང་བ་རྣམ་དག་ཞིང་གི་མཆོག༔ རིག་པ་ལྷ་ཡི་ལྷ་མཆོག་ཡིན༔ མ་བཅོས་མ་བཙལ་རང་བྱུང་བའི༔ ལྷན་སྐྱེས་རིག་པའི་ཡེ་ཤེས་ཉིད༔ གདོད་ནས་ཡེ་གནས་མངོན་གྱུར་བ༔ ལྟ་བ་གྱད་ཀྱི་ལྷ་ཉིད་དོ༔ ཞེས་གསུངས་སོ། །བཞི་པ་ཡོན་ཏན་དབང་དང་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི། འོག་ཏུ་བསྙེན་པའི་ལག་ལེན་གྱི་སྐབས་སུ་འཆད་པར་འགྱུར་ཞིང༌། ལྔ་པ་ཕྲིན་ལས་ལ་དམིགས་པའི་སྤུ་གྲིའི་འཕྲུལ་ [31b] འཁོར་བསྐོར་བའི་ཚུལ་ནི་གཞན་དུ་ཤེས་སོ། །དེ་ལྟར་བཟླས་པའི་སྐབས་སུ་བསྙེན་པ་སྟོང་སྟོང་ཚང་བའམ་ཐུན་མཚམས་རྣམས་སུ་ཐུགས་དམ་བསྐུལ་བའི་དོན་དུ་སྨན་རཀ་གཏོར་མ་ལ་སོགས་པས་མཆོད་ཅིང་བསྟོད་ནས་མངོན་པར་འདོད་པའི་དངོས་གྲུབ་རྒྱུན་དུ་བསྐུལ་ཞིང༌། བསྙེན་པ་གྲུབ་ནས་དུས་ཀྱི་དངོས་གྲུབ་ཆེད་དུ་བསྐུལ་ཏེ་བླང་བར་བྱའོ། །གསུམ་པ་རྗེས་ཀྱི་བྱ་བ་ལ། ཐོག་མར་ཚོགས་ཀྱི་མཆོད་པ་ནི། ཚོགས་གཞོང་རིན་པོ་ཆེའི་མཆོད་སྡོང་པདྨ་འདབ་མ་སྟོང་ལྡན་གྱི་སྙིང་པོར་ཚོགས་རྫས་རྣམས་ཉི་ཟླ་པདྨའི་དཀྱིལ་འཁོར་ལ་གནས་པའི་ཧཱུཾ་མཐིང་ནག་འབར་བར་གྱུར། ཧཱུཾ་ལས་རཾ་ཡཾ་ཁཾ་བྱུང་བས་ཡེ་ཤེས་ཀྱི་མེ་རླུང་ཆུས་མ་དག་པའི་དངོས་པོ་ཐམས་ཅད་བསྲེག་གཏོར་བཀྲུས། ཚོགས་རྫས་ཤ་ལྔ་བདུད་རྩི་ལྔས་མཚན་པར་ཧཱུཾ་མཱུཾ། ཨོཾ་ལཱཾ། སྭཱ་མཱཾ། ཨཱཾ་པཱཾ། ཧཱ་ཏཱཾ་རྣམས་ལས་རིགས་ལྔ་ཡབ་ཡུམ་སྙོམས་པར་ཞུགས་པའི་མཁའ་གསང་བྱང་སེམས་བདུད་རྩིའི་རྒྱུན་གྱི་ཟེར་རླངས་ལས་ཕྱོགས་དུས་སངས་རྒྱས་ཐམས་ཅད་ཀྱི་བྱིན་རླབས་མ་ལུས་པ་ཡིག་འབྲུ་གསུམ་གྱི་རྣམ་པར་བསྡུས་ཏེ་ཐིམ། རིགས་ལྔ་ཡབ་ཡུམ་ཀྱང་འོད་དུ་ཞུ་ཞིང་འདྲེས་པ་ལས་དམ་ཚིག་གི་བདུད་རྩི་ཡེ་ཤེས་ཆེན་པོའི་རང་བཞིན་འདོད་ཡོན་གྱི་རྣམ་པ་ཅིང་ཡང་འཆར་བར་བསམ། [32a] ཚོགས་ཞིང་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བྱོན་པ་རྣམས་སྔར་གྱི་དཀྱིལ་འཁོར་དང་དབྱེར་མེད་དུ་བཞུགས་པར་མོས་ལ། ཚོགས་རྫས་འདོད་ཡོན་གྱི་ལྷ་མོ་གྲངས་མེད་པར་འཕྲོ་བས་དགྱེས་པ་བསྐྱེད་པར་བསམ་ཞིང་འདོད་ཡོན་གྱི་ལྷ་མོས་སྤྱིར་མཆོད་ཅིང༌། བྱེ་བྲག་ཚོགས་ཕུད་ཆ་དང་པོ་ཞལ་ཟས་འདོད་ཡོན་ལོངས་སྤྱོད་ཀྱི་རང་བཞིན་མཆོད་པའི་ཚུལ་དུ་འབུལ། ཆ་བར་པ་བདུད་རྩིའི་ཐོད་ཞལ་དུ་མས་ཉམས་ཆག་བཤགས་པའི་ཆེད་དུ་འབུལ། ཚོགས་ཐ་མ་གདབ་ལས་དྲིལ་ཐུན་དང་འབྲེལ་བར་སྟོབ་པའི་ལས་རིམ་ལ། བདག་ཉིད་དཔལ་ཆེན་པོའི་ཐུགས་ཀ་ནས་སྤྲུལ་པའི་ཁྲོ་ཚོགས་ཕོ་ཉ་གྲངས་མེད་པ་སྟོང་ཁམས་གང་བར་འཕྲོས་པས་དམིགས་བྱ་རང་དབང་མེད་པར་བཀུག་སྟེ་མདུན་གྱི་ལིང་ག་ལ་བསྟིམ་པར་བསམ་ཞིང༌། བདེན་སྟོབས་བརྗོད་པས་བཀུག་ཅིང་བསྟིམས་ནས་ཕོ་ཉ་བསྐུལ། ཨོཾ་ལཾ་ཧཱུཾ་ལཾ་སོགས་ཀྱི་སྐབས་སྲས་མཆོག་གི་ཕུར་བུ་འདྲིལ་ཞིང༌། ཚེ་ཁྲུས་ཀྱི་ལུང་མདོར་བསྡུས་ནི། བདག་དབལ་ཆེན་པོ། ཕུར་བུ་སྲས་མཆོག །ལིང་ག་དགྲ་བགེགས་དངོས་སུ་གསལ་ལ། སྲས་མཆོག་གི་སྤྱི་བོར་ཧཱུཾ་ཀཱ་ར། དེའི་སྤྱི་བོར་ཨ་དཀར་པོ། ཨ་འོད་དུ་ཞུ་ནས་ཧཱུཾ་ཀཱར་ལ་ཐིམ། དེ་འོད་དུ་ཞུ་ནས་ཕུར་བུ་ [32b] ལ་ཐིམ། ཕུར་བུ་ལས་འོད་ཟེར་དཀར་པོ་ཕྱོགས་བཅུར་འཕྲོས་པས་རྒྱལ་བ་མཆོད་ཅིང་སེམས་ཅན་གྱི་སྒྲིབ་པ་སྦྱངས། བྱིན་རླབས་དང་ཚེ་བཅུད་ཀྱི་དྭངས་མ་ཐམས་ཅད་བསྡུས་ཏེ་ཕུར་བུ་ལ་ཐིམ་པས་གཟི་བྱིན་མཆོག་ཏུ་འབར། དེ་ཉིད་དམིགས་བྱའི་སྙིང་དཀར་ནག་མཚམས་སུ་གཏད་དེ་བསྒྲིལ་བས་ཕུར་བུ་ལས་འབར་བའི་འོད་ཟེར་གྱིས་ཁོའི་སྡིག་སྒྲིབ་ཐམས་ཅད་བསྲེག །ཚེ་བསོད་བཀྲག་མདངས་ཀྱི་དྭངས་མ་ཐམས་ཅད་བསྡུས་ནས་ཧཱུཾ་དུ་གྱུར་པ་དེ་ཕུར་བུ་ལ་ཐིམ། ཕུར་བུ་རང་གི་སྙིང་གར་གཏུགས་པས་ཁོའི་ཚེ་བསོད་རང་ལ་འདུས་པས་བདག་གི་རྡོ་རྗེའི་ཚེ་སྲོག་བརྟན་པར་བྱས། སླར་ཡང་ཕུར་བུ་ཁོའི་སྙིང་གར་གཟིར་བས་སྒོ་ལྔའི་རྣམ་ཤེས་ཀུན་གཞི་ལ་འུབ་ཀྱིས་འདུས་ནས་ཧཱུཾ་དུ་གནས་གྱུར་ཏེ་ཕུར་བུ་ལ་ཐིམ་པས་ཁོ་བྱུང་ཚོར་གྱི་རྟོག་པ་འགག་ནས་ནག་ཐིབས་ཀྱིས་སོང༌། རྣམ་ཤེས་ནྲྀ་རུ་གནས་པ་དེ་ཕུར་བུས་ཙན་གྱིས་བླངས་ཏེ་ཨ་ཧཱུཾ་དུ་བྱིན་གྱིས་བརླབས་ནས་ཕཊ་ཀྱིས་འོག་མིན་དུ་རྡོར་སེམས་ཡབ་ཡུམ་གྱི་སྦྱོར་མཚམས་སུ་སྤར་བས་རྡོར་སེམས་ཀྱི་སྲས་སུ་གྱུར་ཏེ་སངས་རྒྱས་པར་བསམ་པ་ནི་བརྟེན་པ་དབྱིངས་སུ་བསྒྲལ་བའོ། །སླར་ཡང་བག་ཆགས་ཀྱི་རྟེན་གཞི་བསྒྲལ་བའི་ཕྱིར་ལས་ཕུར་གནས་སོ་སོར་གདབ་ཅིང་ཐུན་རྫས་སྣ་ [33a] ཚོགས་པས་ཀྱང་བྲབ། མཚོན་ཆས་ཆར་དབབ་པར་བསམ་ཞིང་རལ་གྲིས་དུམ་བུར་གཏུབས། ཐོ་གཏུན་མཁའ་གསང་དབྱིངས་རིག་གི་སྦྱོར་བས་གཟུགས་ཕུང་ཟག་མེད་དུ་བཅོམ་པར་བསམ་ལ་ཐོ་བས་བརྡུང་མཐར། སྙིགས་མའི་ལུས་བདུད་རྩིར་སྦར་བ་ལྷ་ཚོགས་རྣམས་ཀྱི་ཞལ་དུ་བསྟབས་པས་དགྱེས་པར་རོལ་ཏེ་ཧ་ཧ་ཧ་ཞེས་བཞད། ཧཱུཾ་ཧཱུཾ་ཧཱུཾ་ཞེས་དངོས་གྲུབ་སྩལ་ནས་འོད་གསལ་དུ་ཞུ། ཕཊ་ཕཊ་ཕཊ་ཅེས་དེ་ལས་སད་བའི་སྣང་ཆ་ཆོས་ཉིད་ཀྱི་བདེན་པའི་ངང་བསྐྱང་ངོ༌། །དེ་ནས་བདག་རྩ་བའི་དཀྱིལ་འཁོར་རྩ་བ་གསུམ་འདུས་སུ་གསལ་བཏབ་སྟེ། བདུད་རྩིའི་ལོངས་སྤྱོད་ཐ་མལ་གྱི་ཞེན་ཆགས་དང་བྲལ་བས་བདེ་བ་ཆེན་པོར་རོལ་ཞིང་སྦྱང༌། ལྷག་མ་བཏང་བ་ལ། དཔལ་གྱི་མཆོད་གཏོར་ནས་ཐེབ་ཀྱུ་གཅིག་བླངས་ཏེ་ལྷག་མའི་སྟེང་དུ་ཕམ་ཕབ་བཞག །རྟོགས་དགོངས་དང་ལྡན་པས་དམ་ཚིག་གི་ཁ་ཕྲུ་དངོས་སུ་གདབ་པའམ། མི་ནུས་ན་ལག་གཉིས་མཁའ་དབྱིངས་ཀྱི་ཕྱག་རྒྱ་དང་བཅས་ལྷའི་ང་རྒྱལ་ལ་གནས་པས། རང་གི་ཡ་རྐན་ཧེ་རུ་ཀ་ཡབ་ལྔ། མ་རྐན་ཡུམ་ལྔར་གསལ་བའི་སྙོམས་འཇུག་གི་བྱང་སེམས་ལྷག་མའི་སྟེང་དུ་ལན་གསུམ་ཕབ་པས་དང་པོས་འབག་བཙོག་བཅོམ། གཉིས་པས་བདུད་རྩིར་བསྒྱུར། གསུམ་ [33b] པས་མགྲོན་རྣམས་དགྱེས་པ་སྐོང་བའི་སྤྲིན་ཆེན་པོར་གྱུར་པར་མོས་ལ་སྔགས་བརྗོད་ཅིང་ཕྱག་རྒྱ་ལྷག་མའི་སྟེང་དུ་སྦུབས་ལ་བདུད་རྩི་དབབ། དེ་ཉིད་དལ་གྱི་ལྷོ་ནུབ་ཞིང་ཆེན་བཀྲམ་པའི་གདན་ལ་བཀོད་དེ་སླར་ཡང་སྨར་རཀ་བྲན་ཅིང་བྱིན་གྱིས་བརླབས། བདག་གི་ཐུགས་ཀའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཤྭ་ན་བདག་ཉིད་ས་བདག་སྐྱེས་བུ་གིང་དང་དགེ་བསྙེན་དབང་ཕྱུག་བརྟན་མ་ལ་སོགས་པ་ལྷག་མའི་མགྲོན་རྣམས་སྐད་ཅིག་གིས་ལྷགས་པར་བསམ་ཞིང་ཨེ་ཨ་རལླིས་བཀུག་ནས་ཉེར་སྤྱོད་ལྔས་མཆོད། མགྲོན་རྣམས་ཧེ་རུ་ཀའི་ཟིལ་མ་བཟོད་པའི་ཚུལ་གྱིས་གུས་པའི་ཞེ་སར་བཅས་ཏེ་མདུན་དུ་འཁོད་པར་མོས་ལ་ལྷག་མ་བསྔོ། བསྙེན་སྒྲུབ་ཀྱི་སྐབས་སུ་དམ་ཅན་རྣམས་ཕྲིན་ལས་སྒྲུབ་པ་ལ་ཉེ་བའི་ཕྱིར་སྒྲུབ་པ་མ་གྲོལ་གྱི་བར་དུ་ལྷག་གཏོར་གཏར་འཛིན་ཅིང་མཐར་ཕྱི་རོལ་ཟ་ལམ་དུ་བསྐྱལ་ལོ། །བསྐུལ་བ་ལ། ལྷ་ཚོགས་ཐམས་ཅད་སྔོན་གྱི་ཐུགས་དམ་རྗེས་སུ་བསྐུལ་བས་ཕྲིན་ལས་གཉན་པོ་མཛད་པར་དགོངས་པ་མངོན་དུ་ཕྱོགས་ཏེ་ལས་ལ་ཆས་པར་བསམ། ཆད་མདོའི་སྐབས་སྤྲོ་ན་བར་ཆད་བྱེད་པའི་དགྲ་བགེགས་བཀུག་བསྟིམས་བསྒྲལ་བའི་ཤ་ཁྲག་བདུད་རྩིར་བརླབས། འགུགས་བསྟིམ་མེད་ཀྱང་རུང་སྟེ། [34a] གཏོར་མ་རྣམ་པ་དགྲ་བགེགས་ཀྱི་ཤ་ཁྲག་རུས་གསུམ་བཟའ་བའི་གཏོར་ཆེན་མཁའ་དབྱིངས་གང་བ་ལ། ངོ་བོ་ཟག་མེད་ཡེ་ཤེས་ཀྱི་བདུད་རྩི་བཀའི་སྲུང་མ་འཁོར་དང་བཅས་པའི་ཐུགས་དམ་དགྱེས་པ་སྐོང་བའི་དམ་རྫས་ཆེན་པོར་གྱུར་པར་བསམ། ཐུགས་ཀའི་འོད་ཟེར་ལྕགས་ཀྱུས་དཔལ་ཆེན་རྡོ་རྗེ་སྲིན་པོ་སོགས་གྲུབ་པའི་རིག་འཛིན་ཐམས་ཅད་ཀྱི་སྤྱན་སྔར་དཀྱིལ་འཁོར་གཉན་པོའི་སྲུང་མར་ཞལ་གྱིས་བཞེས་པའི་ཆད་མདོ་ཅན་གྱི་སྲུང་མ་དམ་ཅན་རྒྱ་མཚོའི་ཚོགས་ཐམས་ཅད་བཀུག་སྟེ་དབྱར་གྱི་ན་བུན་ལྟར་ལྷགས་པའི་ལྗགས་ལ་དམ་ཚིག་གི་བདུད་རྩི་བྱིན་པར་མོས། དཔལ་ཆེན་པོའི་གཟི་བརྗིད་མ་བཟོད་པའི་ཚུལ་གྱིས་མདུན་དུ་འོད་ཟེར་དཀར་པོ་དར་དཀར་གྱི་ཡོལ་བ་ཙམ་གྱིས་བར་བཅད་པའི་ཕྱི་རོལ་དུ་འཁོད་པ་ལ་སྔོན་གྱི་ཐ་ཚིག་བསྒྲག་ཅིང་ཆད་མདོ་རྗེས་སུ་དྲན་པར་བྱས་ཏེ་གཏོར་མ་འབུལ། དགོས་པ་དམིགས་བསལ་གྱི་སྐབས་ཟོར་དུ་བསྐུལ་ན་སྲུང་མ་རྣམས་ཀྱིས་བཞེས་པའི་ལྷག་མ་གཏོར་མའི་ཕུང་པོ་ཉིད་ནད་དུག་མཚོན་ཆའི་རང་བཞིན་དུ་གྱུར་པ་སྤྲུལ་པའི་དམག་ཚོགས་དཔག་ཏུ་མེད་པ་རྣམས་ཀྱིས་ཆར་ལྟར་ཕབ་པས་དགྲ་བགེགས་རྣམས་ཁ་ཕུང་རྗེས་མེད་དུ་བརླག་པར་བསམ། བརྟན་མ་ལ། ཆད་མདོའི་གཏོར་གཞོང་ [34b] སྨན་ཕུད་ཀྱིས་བཤལ་བ་བརྟན་མའི་གཏོར་མར་བླུག་ནས་ཨོཾ་ཨཱཿཧཱུཾ་གིས་ཤེལ་གྱི་གུར་ཁང་རིན་པོ་ཆེའི་མཆོད་སྡོང་ཟག་མེད་ཀྱི་བདུད་རྩི་མཐའ་ཡས་པར་སྤེལ། བརྟན་མ་འཁོར་བཅས་མདུན་དུ་སྔར་བཞིན་གནས་པ་ལ་གཏོར་མ་ཕུལ་བས་དེ་རྣམས་སོ་སོའི་འཁོར་གཡོག་བསམ་གྱིས་མི་ཁྱབ་པ་དང་བཅས་ཏེ་གུས་པའི་ཚུལ་གྱིས་དབུ་སྨད་བཞིན་དགྱེས་པ་ཆེན་པོས་གཏོར་མ་བླངས་པ་གསོལ་ཏེ་ཅི་བཅོལ་བའི་ཕྲིན་ལས་བསྒྲུབ་པར་ཁས་བླངས་ནས་རང་གནས་སུ་གཤེགས་པར་བསམ། བྲོ་བརྡུང་ལ། སྒྲུབ་པ་ཟབ་མོ་ལ་བར་དུ་གཅོད་པའི་དགྲ་བགེགས་དམ་སྲི་སྒབ་འདྲེ་ཐམས་ཅད་གསེར་གྱི་ས་གཞི་ལ་གཏིང་ཐུག་པའི་ཨེ་གྲུ་གསུམ་གྱི་ནང་དུ་རང་དབང་མེད་པར་བཀུག་པའི་སྟེང་དུ། གཏོར་གཞོང་རི་རབ་འབར་བས་མནན་པའི་སྟེང་རྒྱ་གྲམ་བརྩེགས་པས་དམིགས་བྱ་རྣམས་བསྐལ་པའི་བར་དུ་འགུལ་མི་ནུས་པ། དེའི་སྟེང་དུ་དཔལ་ཆེན་པོའི་ཕོ་བྲང་བཏབ་པར་ཁྲོ་བོའི་ཚོགས་འཁོར་དང་བཅས་པས་རྡོ་རྗེའི་གླུ་བླངས་ཤིང་བྲོ་བརྡུངས་པས་སྲིད་པ་གསུམ་པོ་ཡོམ་ཡོམ་ཤིག་ཤིག་ཏུ་གཡོས་ཧེ་རུ་ཀའི་སྟོབས་ཀྱིས་མཐའ་བཀྲོལ་དུ་མེད་པར་བསམ། རྗེས་ཀྱི་མཆོད་བསྟོད་ནོངས་བཤགས་ཁ་སྐོང་རྣམས་ཀྱི་དམིགས་པ་གོང་བཞིན་དང༌། བདག་བསྐྱེད་ཀྱི་ཡེ་ཤེས་པ་ནི་ཇི་སྲིད་བྱང་ཆུབ་ [35a] མ་ཐོབ་ཀྱི་བར་དུ་མི་གཤེགས་ཤིང༌། མདུན་གྱི་སྲས་མཆོག་དང༌། སྒྲུབ་ཕུར་སྐུ་འབག་རས་བྲིས་སོགས་ཀྱི་ཡེ་ཤེས་པ་རྣམས་རྟེན་དེ་ཉིད་ལ་བརྟན་བཞུགས་བྱ། ཏིང་ངེ་འཛིན་གྱི་དཀྱིལ་འཁོར་རྟེན་དང་བརྟེན་པའི་སྣང་ཆ་ཐམས་ཅད་རིམ་བཞིན་བསྡུས་ནས་ན་དཱ་མི་དམིགས་སྟོང་ཉིད་དུ་ཡལ་བར་བསམ་ལ་བསྒོམ་བྱ་སྒོམ་བྱེད་ཀྱི་བློ་རྟོག་འཛིན་རྩོལ་ལས་འདས་པ་རིག་སྟོང་འོད་གསལ་བདེ་བ་ཆེན་པོའི་ངང་ལ་ཅི་གནས་སུ་མཉམ་པར་བཞག །དེ་ལས་ལྡང་བ་ན་འགྲོ་བའི་དོན་དུ་ཡེ་ཤེས་སྒྱུ་མའི་སྐུར་བཞེངས་པར་བྱའོ་སྙམ་པས། སླར་ཡང་སྐད་ཅིག་གིས་རང་ཉིད་རྡོ་རྗེ་གཞོན་ནུ་ཡབ་ཡུམ་གྱི་སྐུར་གསལ་བའི་གནས་གསུམ་འབྲུ་གསུམ་གྱིས་མཚན་པ་དང༌། སྣོད་བཅུད་ཐམས་ཅད་དཀྱིལ་འཁོར་གསུམ་གྱི་རང་བཞིན་དུ་མོས་ལ་ཀཱི་ལ་ཡའི་སྔགས་ཀྱིས་སྐུ་གསུང་ཐུགས་གསོ། ལུས་ལ་རྡོ་རྗེའི་གོ་ཆས་ཞུ་ལུགས་སུ་གཡོགས་ཤིང་མཚོན་ཆ་ལྔ་དང་མེ་དཔུང་གི་ཀློང་ན་བཞུགས་པས་བར་ཆད་གང་གིས་ཀྱང་གླགས་མི་རྙེད་པར་བསམ། དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོས་ལ་སྨོན་ལམ་ནན་ཏན་དུ་གདབ། ཤིས་པ་བརྗོད་པས་མཐའ་བརྒྱན་ཏེ་སྣང་གྲགས་རྟོགས་ཚོགས་ལྷ་སྔགས་ཆོས་ཉིད་ཀྱི་རོལ་པར་ལམ་དུ་ཁྱེར་བས་སྒོ་གསུམ་དོན་ཡོད་པར་བྱའོ། ། [35b] དེ་དག་ནི་བསྐྱེད་པའི་རིམ་པའི་རྣལ་འབྱོར་གྱི་རྩ་བ་ལས་བྱང་གི་སྒོམ་དོན་སྙིང་པོ་ཙམ་ཞིག་སྟེ། རྟགས་མཚན་དུས་དང་གྲངས་ཚད་སོགས་འོག་ཏུ་འཆད་པར་འགྱུར་ལ། བསྲུང་བའི་དམ་ཚིག་འབུམ་ནག་ལས་བཤད་པ་བཞིན་ཐུན་མོང་སྤྱི། སྒྲུབ་པ་ཁྱད་པར། སྤྱོད་པ་རྒྱུན། གལ་མདོ་ངེས་པའི་དམ་ཚིག་སོགས་ལ་ནན་ཏན་དུ་བསླབ་བོ། །དེ་ལྟར་གཉེན་པོ་རྒྱུ། ཁྱད་པར་ལས། སྒོམ་སྒྲུབ་སྤྱོད་པའི་སྒོ་ནས་ཐུགས་རྗེའི་ཕུར་པ་ཁམས་གསུམ་སེམས་ཅན་ལ་གདབ་པ་སྟོད་ཀྱི་ལས། ལས་ཀྱི་གཟེར་ཁ་དྲུག་གི་སྒོ་ནས་མཚན་མའི་ཕུར་པ་དགྲ་བགེགས་ལ་གདབ་པ་སྨད་ཀྱི་ལས་གཉིས་ཀྱི་སྒོ་ནས་རིམ་པ་དང་པོ་བསྐྱེད་པའི་ལམ་ཡོངས་སུ་རྫོགས་པ་དང༌། རིམ་པ་གཉིས་པ་རྫོགས་རིམ་ལ་འཇུག་པ་ན། སྟེང་སྒོ་འཁོར་ལོ་ལྔ་པ་འབར་འཛག་བཟུང་བཟློག་ལ་བརྟེན་ཅིང༌། འོག་སྒོ་ཁམས་གསུམ་རོལ་པ་བསྙེན་སྒྲུབ་ཡན་ལག་བཞི་ལ་བརྟེན་ནས་བྱང་ཆུབ་སེམས་ཀྱི་ཕུར་པ་ཡུམ་གྱི་མཁའ་ལ་གདབ་པ་ཐུན་མོང་པའི་གདམས་ངག་དང༌། ལྟ་བས་ཐག་བཅད། སྒོམ་པས་ཉམས་སུ་བླང༌། སྤྱོད་པས་བོགས་དབྱུང་བ་གསུམ་གྱི་སྒོ་ནས་རིག་པ་ཡེ་ཤེས་ཀྱི་ཕུར་པ་ཆོས་ཀྱི་དབྱིངས་སུ་གདབ་པ་ཐུན་མོང་མ་ཡིན་པ་དང༌། ཁྱད་པར་གྱི་རྫོགས་རིམ་ཨ་ཏིའི་མན་ངག་ལྷུན་ [36a] གྲུབ་ཐོད་རྒལ་གྱི་རྣལ་འབྱོར་ལ་ཉམས་ལེན་མཐར་ཕྱིན་པར་བྱའོ། །གསུམ་པ་གྲུབ་པ་འབྲས་བུའི་རྣམ་བཞག་ལ་གཉིས། གནས་སྐབས་དང་མཐར་ཐུག་གོ །དང་པོ་ལ་ཉམས་དང་དྲོད་ཚད་རྟགས་དང་ཡོན་ཏན་རྣམས་ལས། ཉམས་ནི། བསྐྱེད་རྫོགས་གང་ལ་བསླབ་ཀྱང་འདྲ་སྟེ། དེ་དང་དེའི་ཏིང་ངེ་འཛིན་ལ་གཡོ་ཐོབ་གོམས་བརྟན་མཐར་ཕྱིན་པའི་ཉམས་ལྔ་རིམ་པར་སྐྱེ་བའོ། །དྲོད་ལ། ཕྱིའི་དྲོད་ལུས་ཡོད་དུ་མི་ཚོར་བ། ནང་གི་དྲོད་དབུགས་ཀྱི་འགྱུ་བ་མི་ཚོར་བ། གསང་བའི་དྲོད་བདེ་བ་ཁོངས་ནས་འཆར་བའོ། །ཡང་ན་ལུས་བདེ། ངག་གསལ། སེམས་མི་རྟོག་པའི་དྲོད་དོ། །ཚད་ལ། མར་མེ་རླུང་གིས་མ་བསྐྱོད་པ་ལྟར་གསལ་བ། རྒྱ་མཚོའི་གཏིང་ལྟར་མི་གཡོ་བ། ཤིང་བལ་གྱི་འདབ་མ་ལྟར་ཡང་ཞིང་འཇམ་པའོ། །རྟགས་ལ། རབ་ལྷའི་ཞལ་མཐོང་བ། འབྲིང་ལུང་སྟོན་པ། ཐ་མ་མ་མོ་དང་མཁའ་འགྲོ་འདུ་བ་སོགས་དངོས་ཉམས་རྨི་ལམ་ཅི་རིགས་པར་འབྱུང་བ་དང༌། ལུས་དྲི་ཞིམ་ཞིང་སྲོག་ཆགས་མི་འབྱུང་བ་སོགས་སོ། །ཁྱད་པར་བསྙེན་སྒྲུབ་ཀྱི་དུས་སུ་སྒྲུབ་རྫས་ཀྱི་ལྷ་སྐུ་བཞད་ཅིང༌། ཕུར་པ་འཁྲབ་པ། སྨན་རཀ་ཁོལ་བ། མར་མེ་འབར་བ་སོགས་དང༌། གཞན་ཡང་སྨིག་རྒྱུ་ལ་སོགས་པའི་མཐོང་ཉམས་ [36b] དང༌། སྣང་བ་སྒྱུ་མ་ལྟར་ཤེས་ཤིང་སྣང་གྲགས་འགྱུ་གསུམ་ལྷ་སྔགས་འོད་གསལ་གྱི་འཁོར་ལོར་འཆར་བ་དང༌། ཐ་ནའང་རྨི་ལམ་དུ་རི་བོར་འཛེག་པ། ཆུ་ཆེན་བརྒལ་བ། ཉི་ཟླ་ཤར་བ་སོགས་སྤྱི་དང་མཐུན་པར་འབྱུང་བའོ། །ཡོན་ཏན་ལ། ཐུན་མོང་གི་ལས་ཕྲན་ཚེགས་རྣམས་ནི་བསྐྱེད་རིམ་ལྷའི་དམིགས་པ་ལ་ཡིད་ཤུགས་དྲག་པོ་དང་ལྡན་ན་སྔོན་དུ་བསྙེན་པ་མ་སོང་ཡང་འགྲུབ་པར་བཤད་ཅིང༌། གཞན་དུ་ཐུན་མོང་བ་འཇིག་རྟེན་པའི་དངོས་གྲུབ་རྣམས་ནི་བསྐྱེད་རིམ་མཐར་ཕྱིན་པའི་ཚོགས་སྒྲུབ་ཀྱི་སྤྱོད་པའི་ཉེ་རྒྱུ་ལ་བརྟེན་ནས་ཐོབ་ལ། དེ་ལའང་དམན་པ་ཞི་རྒྱས་དབང་སོགས་ལས་སྣ་ཚོགས་དང༌། མཆོག་མཁའ་སྤྱོད་དང་ས་སྤྱོད་རྐང་མགྱོགས་ལ་སོགས་པ་འགྲུབ་ཅིང༌། ཚར་གཅོད་རྗེས་འཛིན་གྱི་སྒོ་ནས་འགྲོ་དོན་ཐོགས་པ་མེད་པར་བྱེད་པའོ། །གཉིས་པ་མཐར་ཐུག་གི་འབྲས་བུ་ནི། ཟུང་འཇུག་གི་རྣལ་འབྱོར་ལ་གོམས་པའི་མཐུས་དགྲ་གསུམ་པོ་སོད་དེ། ང་བདག་གི་ཞེན་པ་ལོག་པས་གསང་དགྲ་གསད། དེས་ཕུང་པོར་ཞེན་པ་བཅོམ་སྟེ་ནང་དགྲ་གསད། དེ་ཙ་ན་རྩོལ་བ་མེད་པའི་ཕྲིན་ལས་དྲག་པོས་ཕྱིའི་དགྲ་གསོད་པའོ། །དེ་ལྟར་དགྲ་གསུམ་སོད་པས་བདུད་བཞི་ཡང་ཆོམས་ཏེ། ཕུང་ལྔ་ལྷར་དག་ [37a] པས་ཕུང་པོའི་བདུད་བཅོམ། རང་རིག་པའི་རྩལ་གྱིས་ཉོན་མོངས་པ་ལྔ་ཡེ་ཤེས་ལྔར་དག་པས་ཉོན་མོངས་པའི་བདུད་བཅོམ། དེ་ལ་འདོད་ལྷའི་བར་ཆད་ཀྱིས་མི་ཚུགས་ཤིང་སེམས་ཉིད་སྐྱེ་ཤི་ལས་གྲོལ་བས་ལྷའི་བུའི་བདུད་དང་འཆི་བདག་གི་བདུད་བཅོམ། དུས་དེར་འགྲོ་དྲུག་གི་སྡུག་བསྔལ་ཡང་རང་སེམས་ཀྱི་ཆོ་འཕྲུལ་དུ་རྟོགས་པས་འགྲོ་དྲུག་གི་གཡངས་ཆོད་ཅིང༌། རིག་རྩལ་འབྱོངས་པས་མཚན་མ་ཐམས་ཅད་ཟིལ་གྱིས་ནོན་ཏེ་རྣམ་པར་མི་རྟོག་པའི་ཡེ་ཤེས་ལ་དབང་བསྒྱུར། ས་ལམ་གྱི་སྤངས་རྟོགས་མཐར་ཕྱིན་པ་སྐུ་ལྔ་ཡེ་ཤེས་ལྔའི་བདག་ཉིད་ཟུང་འཇུག་གི་སྐུ་མངོན་དུ་བྱེད་པ་སྟེ། མདོར་ན་བཤད་རྒྱུད་ལས། །རྡོ་རྗེ་ཁྲག་འཐུང་ང་ཉིད་ཀྱི། །ཡི་གེ་ཧཱུཾ་ཙམ་བཟླས་པ་ལའང༌། །བར་ཆད་ཀུན་གྱི་ས་མི་ཚུགས་ཤིང༌། །མཚན་མ་འགྲུབ་པར་ཐེ་ཚོམ་མེད། །རྡོ་རྗེ་ཅན་གྱི་ཞིང་དུ་སྐྱེ། །ལྷ་ཀླུ་ཀུན་ལ་དབང་བྱེད་འགྱུར། །འདི་སྒྲུབ་པ་ཡི་གང་ཟག་རྣམས། །སྔར་ནས་སྦྱངས་པར་ཐེ་ཚོམ་མེད། །རྩེ་གཅིག་འདི་ལ་བརྩོན་ལྡན་པས། །འཁོར་བར་མི་ལྡོག་མངོན་འཚང་རྒྱ། །ཞེས་དང༌། རྩ་རྒྱུད་རྡོ་རྗེ་ཁྲོས་པ་ལས། ཚད་མེད་སྙིང་རྗེའི་ཕུར་པ་ནི། །བྱམས་དང་སྙིང་རྗེ་ཆེན་པོས་གདབ། །འབྲས་བུ་སྤྲུལ་པའི་སྐུ་ཡང་འཐོབ། །མ་ཐེབས་རཱུ་དྲ་སྲིན་པོར་གོལ། །ཞེས་དང༌། མཚོ་རྒྱལ་གྱིས། འདི་ལྟར་ [37b] བསྙེན་སྒྲུབ་ལས་སྦྱོར་གསུམ་སྒྲུབ་ཚད་ཐེམས་ནས་ནི༔ ཚེ་འདིར་ཕྲིན་ལས་རྣམ་པ་བཞི་གང་ལ་བརྩམ་པ་འགྲུབ་པ་དང་༔ མཆོག་གི་དངོས་གྲུབ་ཡི་དམ་ལྷ་དང་སྐལ་བ་མཉམ་སྟེ༔ བར་དོ་གསུམ་ལ་ལྷའི་སྣང་བ་ཐོབ་སྟེ༔ ལོངས་སྤྱོད་རྫོགས་པའི་སྐུ་རྡོ་རྗེ་གཞོན་ནུའི་གོ་འཕང་འཐོབ་པར་ཐེ་ཚོམ་མེད་དོ༔ བདག་འདྲ་མཁར་ཆེན་བཟས་མི་བསླུ་བའི་དོན་གྱི་ཐ་ཚིག་གོ༔ ཞེས་གསུངས་པ་ལྟར་རོ། །དེ་དག་གིས་ཤེས་པར་བྱ་བའི་རྣམ་བཞག་སྤྱིར་བསྟན་པ་མདོ་ཙམ་བཤད་ཟིན་ཏོ། ། ༈ རྩ་བའི་གཉིས་པ་བསྙེན་ཐབས་ཀྱི་ལག་ལེན་བྱེ་བྲག་ཏུ་བཤད་པ་ལ་གསུམ། བསྙེན་པ། སྒྲུབ་པ། ལས་སྦྱོར་རོ། །དང་པོ་ནི། བསྙེན་པ་ལ་འཇུག་པའི་སྔ་རོལ་དུ་དཀོན་མཆོག་གི་རྟེན་མཆོད་པ། གསུང་རབ་བཀླག་པ། དགེ་འདུན་བསྙེན་བཀུར། སྭཱཙྪ་གདབ་པ། སྲོག་བསླུ་བ། ཉེའུ་འདོན་པ། ལམ་འཕྲང་བཟོ་བ། ཆུ་གཏོར་སྦྱིན་གཏོང་སོགས་རང་ཉིད་ཀྱིས་སམ་མ་ལྕོགས་ན་གྲོགས་གཞན་ལ་བཅོལ་ཀྱང་རུང་སྟེ། རྒྱུད་འབྱོངས་ཤིང་བར་ཆད་མི་འབྱུང་བ་དང༌། དངོས་གྲུབ་ཀྱི་མཚན་མ་མྱུར་དུ་ཐོབ་པའི་དགོས་པ་ཡོད་པས་རྒྱབ་རིམ་གྱི་དཔུང་ཅི་འགྲུབ་ཏུ་བྱ། དེ་ནས་ཐོག་མར་གནས་ཁང་གསར་པ་ཡིན་ན་ས་ཆོག་རྒྱས་པར་བྱ་དགོས་མོད། འདིར་རྙིང་པའི་དབང་དུ་བྱས་ཏེ་གནས་ཁང་ཕྱགས་བདར་སོགས་ཀྱིས་ [38a] ཡིད་དུ་འོང་བར་བྱས་ལ། གོང་དུ་སྨོས་པ་བཞིན་དུས་ཚོད་དགེ་ཞིང་ཤིས་པའི་ཉིན་དབུ་བརྩམས་ཏེ། དགོང་ཐུན་ལ་བདག་བསྐྱེད་ཕྱག་རྒྱ་གཅིག་པའི་རྣལ་འབྱོར་བསྒོམ་ནས་བཟླས་པ་བརྒྱ་རྩ་ཙམ་གྱི་མཐར་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལངས་ཏེ། ཞིང་སྐྱོང་སྡེ་བརྒྱད་གཞི་བདག་སོགས་དཀར་ཕྱོགས་པ་ལ་གཏོར་མ་ཕུལ་ནས་ཕྲིན་ལས་བཅོལ། ནག་ཕྱོགས་པ་རྣམས་ལ་བགེགས་གཏོར་བཏང་ནས་རྡོ་རྗེ་སྲིན་པོའི་ང་རྒྱལ་གྱིས་བཀའ་བསྒོ་ཞིང་དྲག་སྔགས་ཡུངས་ཐུན་གུ་གུལ་གྱིས་བདུག་པ་སོགས་ཚམ་རྔམས་དང་བཅས་བགེགས་བསྐྲད་ནན་ཏན་དུ་བྱས་རྗེས། སྒོ་དྲུང་དུ་ཐོ་བརྩིགས་པ་ལ་རྒྱལ་ཆེན་བཞིའི་སྐུ་དང་སྔགས་བྱང་བཙུགས། མདུན་དུ་མཆོད་གཏོར་བཤམས་པ་སྒྲུབ་ཁོག་ལྟར་བྱིན་བརླབ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས་པར་བསམ་ལ། ཧཱུཾ། གསང་བདག་སྤྱན་སྔར་དམ་མནོས་ཤིང༌། །བསྟན་པ་སྲུང་བར་ཞལ་བཞེས་པ། །རྒྱལ་པོ་ཆེན་པོ་སྡེ་བཞི་པོ། །འདིར་གཤེགས་རྟེན་ལ་བརྟན་པར་བཞུགས། །བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿ ས་གཉིས་སུ་མེད་པར་བསྟིམ། ཨོཾ་མ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་ནས། ཤཔྡ་པྲ་ཏཱིཙྪ་སྭཱ་ཧཱའི་བར་ [38b] གྱིས་མཆོད། ཨོཾ་དྷྲྀཥྚ་རཱཥྚ་ཡ་སྭཱ་ཧཱ། ཨོཾ་བཻ་རུ་ཌྷ་ཀཱ་ཡ་སྭཱ་ཧཱ། ཨོཾ་བི་རུ་པཱཀྵ་ཡ་སྭཱ་ཧཱ། ཨོཾ་བཻ་ཤྲཱ་མ་ཎ་ཡེ་སྭཱ་ཧཱ། ཞེས་སྔགས་སོ་སོའི་མཐར། ཨེ་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་གཏོར་མ་ཕུལ་ལ། ཧཱུཾ། ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ལ་ཕྱག་འཚལ་བསྟོད། །རྒྱལ་པོ་ཆེན་པོ་འཁོར་བཅས་ཀྱིས། །སྔོན་གྱི་ཐ་ཚིག་ཇི་བཞིན་དུ། །མཆོད་སྦྱིན་གཏོར་མ་འདི་བཞེས་ལ། །སྒྲུབ་པའི་བར་ཆད་ཀུན་སྲུངས་ཤིག །ཅེས་བསྟོད་ཅིང་ཕྲིན་ལས་བཅོལ། ཏིཥྛ་བཛྲ། ཞེས་བརྟན་བཞུགས་བྱས་པས་སྒྲུབ་ཁང་གི་ཕྱོགས་སོ་སོ་ནས་རྒྱལ་ཆེན་སྡེ་བཞི་རང་རང་གི་རྒྱལ་ཐབས་ཀྱི་དཔུང་དང་བཅས་པས་བསྲུང་བར་བསམ། དེ་ནས་ལས་བྱང་གི་མཚམས་གཅོད་བཞིན་ཕྱི་ནང་གསང་བའི་སྲུང་འཁོར་བརྟན་པོར་བསྒོམ། དེ་ལྟར་མཚམས་བཅད་ཕྱིན་ཆད་སྔར་དམིགས་འོག་ཏུ་མ་ཆུད་པའི་ངོ་གསར་དང་མི་འཕྲད་ཅིང་ཆས་ཀའི་གཏོང་ལེན་ཀྱང་སྤང༌། ཕྱི་རོལ་པས་རང་ཉིད་མཐོང་ན་གསང་སྒོ་རྡོལ་བ་དང༌། རང་གིས་ཕྱི་རོལ་དུ་བལྟ་བས་གཡེང་ཤོར་ན་གསང་སྒོ་ཤོར་བ་ཞེས་བྱ་སྟེ། དོན་ལ་དམ་ཚིག་ལས་འགལ་བས་སྒྲུབ་པའི་འབྲས་བུ་མི་འབྱིན་པས་ན་སྒྲུབ་པ་པོའི་ལུས་ངག་ཕྱི་རོལ་པས་ [39a] མཐོང་ཚོར་མི་བྱ། སྲུང་འཁོར་འདི་དག་མཚམས་གྲོལ་རྒྱུའི་ཐུན་ཐ་མའི་མཐར་མ་གཏོགས་མི་བསྡུ་ཞིང༌། ཐུན་མགོ་ཐམས་ཅད་དུའང་བར་ཆད་མི་འཇུག་པའི་ཕྱིར་གསལ་འདེབས་བསྐྱར་མ་རེ་བྱའོ། །དེ་ནས་བཅས་བཤམ་བྱ་བ་ནི། རང་གི་མདུན་ངོས་སུ་དམ་ཚིག་གི་བྲིས་སྐུ་རབ་གནས་ཅན་བཀྲམ། དེའི་མདུན་དུ་བིངྱོ་ཏ་མ་ལས། གླིང་བཞི་པ་ཡི་བྷཉྫ་ལ། འཁོར་ལོ་རྩིབས་བརྒྱད་ཨེ་དང་བཅས། །ཕུར་བུ་སྤུངས་ལ་བསྙེན་པ་བྱ། །ཞེས་གསུངས་པ་ལྟར། སྟེགས་བུ་བདུད་རྩི་ལྔས་ཆག་ཆག་བཏབ་པ་ལ། ཐིག་ཚོན་བྱིན་རླབས་དང་ལྡན་པས་དཀྱིལ་འཁོར་མཚན་ཉིད་རྫོགས་པར་བྲིས་པའམ། རས་བྲིས་དགྲམ་པ་གང་བདེ་བྱ་ཞིང༌། ཡང་ན་བསྙེན་པའི་སྐབས་འདིར་དཀྱིལ་འཁོར་མ་འགྲུབ་ནའང་ཆད་སྐྱོན་མེད། གང་ལྟར་ཡང་དཀྱིལ་འཁོར་བཤམ་ན། དེའི་ལྟེ་བའི་གྲུ་གསུམ་མཐིང་ནག་གི་སྟེང་དུའམ། དཀྱིལ་འཁོར་མི་བཤམ་པའི་ཕྱོགས་ལ་སྟེགས་བུ་ཁེབས་ལྡན་བཀོད་ལེགས་པའི་སྟེང་དུ། ཐོད་པ་གླིང་བཞི་པ་ལ་ཆུ་ཚོན་གྱིས་འཁོར་ལོ་སེར་པོ་རྩིབས་བརྒྱད་པ་བྲིས་པའི་ནང་འབྲུ་ནག་གིས་བཀང་བ་ལ། བྱུགས་བདུག་བྲབ་གསུམ་གྱིས་གཟི་བྱིན་བསྐྱེད་པ་སོགས་ཚུལ་བཞིན་དུ་འདུ་བྱས་པའི་ཕུར་བུ་འབྱོར་ན་ལྷ་ཕུར་ཚང་བ་སྦམས་ [39b] ཏེའམ། མ་འབྱོར་ན་གཙོ་ཕུར་ཉིད་བཙུགས་པ་བཀོད། དེའི་མདུན་རྒྱབ་གང་བདེར་མཉྫི་ལ་སྙིང་པོའི་གཏའ་གཏོར་སྐུ་རྟེན་དར་གདུགས་ཀྱིས་སྤྲས་པ་དང༌། གཡས་གཡོན་དུ་སྟེགས་བུ་ཅུང་ཟད་དམའ་བར་ཡི་དམ་གྱི་མཆོད་གཏོར་དང༌། ཕུར་སྲུང་སོགས་སྤྱི་བྱེ་བྲག་གི་སྲུང་མའི་གཏོར་མ་རྣམས་ཀྱང་བཤམས་པའི་གཡས་སུ་སྨན་ཕུད། གཡོན་དུ་རཀྟ། མཐའ་སྐོར་དུ་ཕྱི་ནང་གི་མཆོད་པའི་ཡོ་བྱད་སོགས་ལག་ལེན་ལྟར་བཀོད་ལེགས་པར་བཤམས། རང་ཉིད་རྟེན་དང་ཞལ་སྤྲོད་ཀྱི་ཚུལ་དུ་སྟན་ནང་ཚངས་ཅན་འཇམ་ཞིང་བདེ་བའི་འོག་ཏུ་འབྲས་སམས་དཀར་གྱིས་གཡུང་དྲུང་ཆོས་བསྐོར་དུ་བྲི། མདུན་དུ་རྡོར་དྲིལ་ཌཱ་མ་རུ་ནང་མཆོད་འཐོར་ནས་རྣམས་བཞག །གཞན་ཡང་ཚོགས་རྫས་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ནས། དེ་ནུབ་དཀོན་མཆོག་ལ་མཆོད་པ་རྒྱ་ཆེར་ཕུལ་ཏེ་ཚོགས་བསགས། ཉམས་ཆག་ལ་འགྱོད་སྡོམ་གྱི་བསམ་པ་དྲག་པོས་བཤགས་པ་བྱ། བླ་མ་དང་ཡི་དམ་གྱི་ལྷ་ལ་མོས་གུས་ཆེན་པོས་བསྙེན་སྒྲུབ་ལ་བར་ཆད་མི་འབྱུང་བ་དང་དངོས་གྲུབ་མྱུར་དུ་ཐོབ་པའི་གསོལ་བ་བཏབ་ནས་ཉལ་བའི་རྣལ་འབྱོར་ལ་འཇུག་གོ །དེ་ནས་བསྙེན་པ་དངོས་གཞི་ནི། འདིར་སྔ་ཐུན་ནས་མགོ་འཛིན་པར་གསུངས་པས་སང་ཞོག་ལྡང་ [40a] བའི་རྣལ་འབྱོར་གྱིས་ལངས་ནས། ནམ་ལངས་པ་དང་བདེ་བའི་སྟན་ལ་བསམ་གཏན་གྱི་འདུག་སྟངས་ཀྱིས་འཁོད་དེ་བརྒྱུད་འདེབས་དང་སྐྱབས་སེམས་ཚོགས་བསགས་སྔོན་དུ་འགྲོ་བས། གཞི་བགེགས་ཀྱི་གཏོར་མ་བསྔོ་བ་རྒྱུད་དུ་མི་དགོས་པས་བགེགས་བསྐྲད་སྐབས་ལས་ཀྱི་ལན་ཆགས་ཞེས་པའི་ཚིག་གཅིག་བསྐྱུར་ལ་བཀའ་བསྒོ་ནས་བརྩམ་སྔོན་འགྲོའི་ལས་རིམ་རྣམས་དང༌། དངོས་གཞི་ཏིང་འཛིན་གསུམ་ནས་བསྟོད་པའི་བར་ལས་བྱང་གི་གཞུང་བསྲང་རྗེས། བཟླས་པ་བྱ་བའི་ཐོག་མར་བགྲང་ཕྲེང་བྱིན་གྱིས་བརླབ་པ་ནི། ཕྲེང་བ་ལག་གཡོན་པའི་སྙིམ་པར་བསྐྱིལ་བའི་མདོ་འཛིན་སྟེང་དུ་གནས་པར་བྱས་ལ་བསང་སྦྱང༌། སྟོང་པའི་ངང་ལས་ཧཱུཾ་ཡིག་ལས་སྐྱེས་པའི་ཕྲེང་བ་དཔལ་ཆེན་རྡོ་རྗེ་གཞོན་ནུ་གཙོ་འཁོར་ཡོངས་སུ་རྫོགས་པ་སྐད་ཅིག་གིས་གསལ་བར་གྱུར། དེའི་གནས་གསུམ་གྱི་ས་བོན་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿ ་ས་གཉིས་སུ་མེད་པར་བསྟིམ། ལག་གཡས་སུ་མེ་ཏོག་ཐོགས་ལ་ལྷའི་རྩ་སྔགས་དང་དབྱངས་གསལ་རྣམས་ཚར་བདུན་བཟླ། ཁྱད་པར་བཟླས་པའི་རྐྱེན་གྱིས་བསྐུལ་བའི་འོད་ཟེར་གྱིས་སེམས་ཅན་ཐམས་ཅད་ཀྱི་ངག་གི་སྒྲིབ་པ་སྦྱངས། བདེ་བར་ [40b] གཤགས་པ་ཐམས་ཅད་ཀྱི་གསུང་གི་བདུད་རྩི་སྔགས་ཀྱི་ཡིག་འབྲུ་ཁ་དོག་ལྔའི་རང་བཞིན་ཆར་ལྟར་བབས་ནས་ཕྲེང་བའི་ལྷ་ལ་ཐིམ་པར་བསམ་ནས་ཕྲེང་བ་བདུད་རྩིར་རློབ་པའི་སྙིང་པོ། ཨོཾ་རུ་ཙི་པྲ་མརྟ་ན་ཡེ་རཏྣ་མ་ཎི་དྷར་ཛྙཱ་ན་དེ་ཝ་ཨ་བྷི་ཥིཉྩ་ཧཱུཾ་སྭཱ་ཧཱ། ཞེས་བརྒྱ་རྩ་བརྒྱད་བཟླས་པའི་མཐར་ལྷ་རྣམས་འོད་དུ་ཞུ་ནས་མགོ་བོ་རློན་པ་ཁྲག་འཛག་པའི་ཕྲེང་བར་གྱུར་པར་བསམ། རྟེན་འབྲེལ་སྙིང་པོ་བདུན་གྱིས་མེ་ཏོགའཐོར་ལ་ཤིས་པའང་བརྗོད། སླར་ཨོཾ་ཨཱཿཧཱུཾ་བརྒྱ་རྩ་དང༌། དབྱངས་གསལ། རྟེན་སྙིང༌། ཨོཾ་རུ་ཙི་ར་མ་ཎི་པྲ་བརྡྷཡེ་ཧཱུཾ་ཕཊ་རྣམས་ཉེར་གཅིག་བཟླས་ལ་ཧུས་འདེབས། དེ་ལྟར་བྱིན་གྱིས་བརླབས་པའི་ཕྲེང་བ་དེ་མི་ལག་མི་འགྲིམས་ཤིང་མོ་དང་གྲངས་རྩིས་ས་རྗེན་དང་ནམ་མཁར་འཕང་བ་སོགས་སྤང༌། ཁྱི་དང་བྱི་ལ་བུད་མེད་སོགས་ཀྱིས་འགོང་དུ་མི་འཇུག་པར་ལུས་ཀྱི་དྲོད་དང་མི་འབྲལ་བར་བཅད་དོ། དེ་ནས་ལས་བྱང་བཞིན་ཛཔྲ་བསྐུལ་སྔོན་དུ་འགྲོ་བས་སྐུ་གསུང་ཐུགས་ལ་དམིགས་པའི་ཛཔྲ་དགོངས་གསུམ་པོ་རེ་རེ་ལ་ཐུན་གྱི་སུམ་ཆ་རེ་ཙམ་ཆ་རྩིས་གསལ་བཏབ་ལ། མགལ་མེ་ཀླད་སྐོར་གྱི་འཕྲོ་འདུ་ཉིད་རྩ་བར་བཟུང་ནས་བཟླས་པའི་སྐྱོན་རྣམས་སྤངས་ཏེ་སེམས་རྩེ་གཅིག་པའི་ཏིང་ངེ་འཛིན་གྱིས་འབྲུ་བཅུ་བདུན་པ་ཁོ་ན་ཆིག་དྲིལ་དུ་ [41a] བཟླ། ཐུན་མཐར་ཐབས་ཀྱི་ཡི་གེ་ཀ་ལི་ལན་གསུམ་གྱིས་སྐུ་བསྐྱེད་རིམ་མ་གསལ་བ། སྒོམ་ཚུལ་མ་ཤེས་པ། བརྡ་དོན་རྟགས་གསུམ་མ་འཕྲོད་པ་ལ་སོགས་པ་དང༌། ཤེས་རབ་ཀྱི་ཡི་གེ་ཨ་ལི་ལན་གསུམ་གྱིས་གསུང་བཟླས་བརྗོད་སྔགས་ཀྱི་སྒྲ་མ་དག་པ། གྲངས་མ་ཚང་བ། གོ་རིམ་ནོར་ཞིང་སྔགས་དོན་མ་ཤེས་པ། བཟླས་པའི་སྐྱོན་དུ་གྱུར་པ་ལ་སོགས་པ་དང༌། ཞི་ཁྲོ་ཀུན་འདུས་ཀྱི་སྙིང་པོ་ཡིག་བརྒྱ་ལན་གསུམ་གྱིས་ཐུགས་ཏིང་ངེ་འཛིན་གྱི་འཕྲོ་འདུའི་རིམ་པ་ནོར་འཁྲུལ་ཡེངས་པ་དང་མ་གསལ་བ་སོགས་འགལ་ཉམས་ཀྱི་ལྷག་ཆད་ཁ་བསྐང་ཞིང༌། ཡེ་དྷརྨཱས་ནུས་པ་བརྟན་པར་བྱས་ལ། གཞུང་བཞིན་སྟོང་ཚིག་མཆོད་བསྟོད་ཀྱིས་ཐུགས་དམ་བསྐུལ་མཐར། སྲུང་འཁོར་མི་བསྡུ་བར་སྦྲ་ཕུབ་པ་ལྟར་བཞག་ནས་རྟེན་དང་བརྟེན་པའི་དཀྱིལ་འཁོར་སྣང་ཆ་ཐམས་ཅད་མི་དམིགས་པའི་དབྱིངས་སུ་བསྡུས་ཏེ་མཉམ་པར་འཇོག །སླར་ཡང་ཐུན་མཚམས་ཀྱི་ལྷར་ལངས་ཏེ་གོ་བགོས་ལ་སྣོད་བཅུད་ཐམས་ཅད་ལྷ་སྔགས་འོད་གསལ་གྱི་འཁོར་ལོས་རྒྱས་བཏབ་ནས་ཟུང་འཇུག་གི་ཏིང་ངེ་འཛིན་ཆུ་བོའི་རྒྱུན་ལྟ་བུ་ལ་སྦྱར་རོ། །དེ་ནས་དགོང་ཐུན་དང་སྲོད་ཐུན་ལ་སྲུང་འཁོར་གསལ་འདེབས་ཙམ་བྱས་རྗེས་ཏིང་ངེ་འཛིན་ [41b] གསུམ་ལ་འཇུག་པས་ཆོག་ཅིང༌། ཕྲེང་བ་བྱིན་རླབས་ཀྱང་དོར། སྲོད་ཐུན་གྱི་མཐར་ཆོས་སྐྱོང་སྤྱི་དང་བྱེ་བྲག་ཕུར་སྲུང་དམ་ཅན་གྱི་གཏོར་འབུལ་རྒྱས་བསྡུས་གང་འགྲུབ་བྱ། ཕྱིར་ནང་ཐོར་ཐུན་གྱི་མགོར་སྔོན་འགྲོ་རྣམས་དང་ཕྲེང་བ་བྱིན་རླབས་སོགས་སྦྱར། སྔ་ཐུན་མན་ཆད་སྔ་ཉིན་ཕྱི་ཐུན་དང་འདྲ། ཚོགས་མཆོད་འབྱོར་ན་སྲོད་ཐུན་ལ་མ་ཆགས་པར་བྱ་དགོས་ཀྱང་མི་འགྲུབ་ན་བསྙེན་པ་ཚུགས་པའི་ཐུན་དང་པོ་དང༌། གྲོལ་བའི་ཐུན་ཕྱི་མ། ཡར་མར་གྱི་ཚེས་བཅུ་ཉ་སྟོང་བརྒྱད་གསུམ་ལ་ངེས་པར་ཆག་ཏུ་མི་རུང༌། མཉམ་བཞག་གི་དུས་སུ་ཆོས་ཉིད་ངོ་བོ་ཀ་ནས་དག་ཀྱང༌། རྗེས་ཐོབ་ཏུ་སྣང་གྲགས་རིག་གསུམ་ཐམས་ཅད་བདེ་བ་ཆེན་པོའི་རྣམ་རོལ་འབའ་ཞིག་ཏུ་འཆར་བ་ལ་སློབ་ཅིང༌། ལེ་ལོ་དང་སྙོམས་ལས་ཀྱི་དབང་དུ་མི་གཏོང་བར་བརྩོན་འགྲུས་དང་འདུན་པ་དྲག་པོས་རིག་པ་དྭངས་སྙིགས་ཕྱེད་པར་བྱས་ཏེ་དྲན་པའི་བྱ་ར་དང་མ་བྲལ་བའི་སྒོ་ནས་བསགས་སྦྱོང་སོགས་བསྒྲིགས་ཆགས་ཀྱི་དགེ་སྦྱོར་གཞན་བྱེད་སྤྲོ་ནའང་ཐུན་མཚམས་ངལ་གསོའི་སྐབས་གང་བདེར་བྱས་པས་ཆོག་ཅིང༌། གཞན་དུ་ན་ཐུན་མཚམས་སུའང་ལྷའི་གསལ་སྣང་དང་མ་བྲལ་བའི་ངང་ནས་བཟླས་པ་བྱ་ཞིང་གྲངས་ཚད་ལ་མི་བརྩི། ཁམས་གསེང་ལ་འགྲོ་བ་སོགས་སྟན་ལས་འཕགས་ [42a] དུས་ཕྲེང་བ་ལ་རྡོ་རྗེའི་མདུད་པ་བྱས་པ་ཁྲོ་ཞལ་དུ་དམིགས་ནས་གདན་ཁར་བཞག་པས་སྟན་བསྲུང༌། གཞན་འགྲོ་འཆག་མང་པོ་སྤངས་ཏེ་སྟན་གྱི་དྲོད་མ་ཡལ་བར་སྡོད་ཚུགས་པ་གལ་ཆེ། སྲོད་ལ་སྒྱུ་ལུས་མཆོད་སྦྱིན་དང་ཕྱིར་ཟློག་སོགས་སྦྱོར་སྤྲོ་ནའང་ལེགས་ཤིང༌། ཉལ་ཁར་ཉིན་རེའི་བསྙེན་པའི་བསྲུང་མཚམས་ལས་ཕྲ་མོ་ཞིག་འགལ་བ་བྱུང་ཡང་ཞག་ཏུ་མི་འགྲོགས་པར་རྩ་བ་གསུམ་ལ་བཤགས་པ་བྱས་ཏེ་ཚེ་འདིའི་རྐྱེན་དང་ཕྱི་མའི་སྒྲིབ་པར་མི་འགྱུར་བར་གསོལ་བ་དྲག་ཏུ་གདབ། རྣམ་དཀར་གྱི་ཕྱོགས་རྣམས་རློམ་སེམས་དང་བྲལ་བའི་རྫོགས་བྱང་དུ་བསྔོས་ཏེ་གནས་ལུགས་འཛིན་མེད་ཀྱི་རང་ངོ་བསྐྱང༌། འདིར་ངེས་པར་གལ་ཆེ་བ་མཉམ་པར་མ་བཞག་པའི་རྣལ་འབྱོར་ཞེས་གཞུང་རྣམས་ལས་མང་དུ་འབྱུང་བའི་དོན་བསྡུ་ན། བིདྱོཏྟ་མ་ལས། བཟའ་བཏུང་གོས་རྒྱན་རིམ་པ་དང༌། །འགྲོ་ཉལ་འདུག་ལྡང་རྒྱུན་རིང་བྱ། །ཞེས་གསུངས་པ་ལྟར། དགོང་མོ་ཉལ་བའི་དུས་སུ། ཨོཾ་བཛྲ་ཀཱི་ལི་ཀཱི་ལ་ཡ་ཤུ་ནྱ་ཏ་ཧཱུཾ། ཞེས་བརྗོད་ལ་རང་རྡོ་རྗེ་གཞོན་ནུར་གསལ་བའི་ངང་ནས་སེང་གེའི་ཉལ་སྟབས་ཀྱིས་ཆོས་དབྱིངས་ཀྱི་ངང་དུ་ཉལ། ཐོ་རངས་ལྡང་བའི་དུས་སུ། ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱཀ་ཙིཏྟ་ས་མ་ཡ་ཧཱུཾ། ཞེས་བརྗོད་ [42b] པས་ཆོས་ཉིད་སྐྱེ་བ་མེད་པ་ལས་ལངས་ཏེ། འགག་པ་མེད་པ་དཔལ་རྡོ་རྗེ་གཞོན་ནུའི་སྐུར་བཞེངས་པར་བསམ། འགྲོ་བའི་དུས་སུ། ཨོཾ་བཛྲ་ཀཱི་ལི་ཀཱི་ལ་ཡ་ཨེ་ཝཾ་མ་ཡ་དྷརྨ་ཀཱ་ཡ་ཧཱུཾ། ཞེས་བརྗོད་ཅིང་འགྲོ་བ་འདྲེན་པའི་དོན་དུ་འགྲོ་བར་བསམ། འདུག་པའི་དུས་སུ། རང་ཉིད་ལྷའི་ང་རྒྱལ་ལ་གནས་པའི་ངང་ནས་གང་དུ་གནས་པའི་ཁང་པ་དེ་ཡེ་ཤེས་ཀྱི་གཞལ་ཡས་ཁང་དུ་བསྒོམ་ཞིང་འཁོར་དང་ཉེ་གནས་ཐམས་ཅད་སྤྲུལ་པའི་འཁོར་དུ་བསམ་ལ། ཨོཾ་བཛྲ་ཀཱི་ལི་ཀཱི་ལ་ཡ་མཎྜལ་ཧཱུཾ་ཧཱུཾ། ཞེས་བརྗོད། ཁ་ཟས་ཟ་བའི་དུས་སུ། ཨོཾ་ཨཱཿཧཱུཾ་གིས་ཁ་ཟས་བདུད་རྩིར་བྱིན་གྱིས་བརླབས་ནས་ལྷ་མཆོད་པའི་ཚུལ་དུ་རེལ་ཞིང་མཁའ་འགྲོ་མ་རྣམས་ལ་ལྷག་མའི་གཏོར་མ་སྔགས་ཙམ་གྱིས་སྦྱིན། བཏུང་བ་སྤྱི་དང་བྱེ་བྲག་ཛ་གད་བཏུང་བ་ལ། ཛ་གད་དེ་ཉིད་ཏྲཾ་ལས་ཡེ་ཤེས་ཀྱི་བདུད་རྩིར་བསམ་ཞིང༌། ཨོཾ་ན་མོ་གུ་རུ་བཛྲ་ཀཱི་ལི་ཀཱི་ལ་ཡ་དྷ་ཏི་མ་མ་ཀརྨ་ཛ་གད་པྲ་བ་ཁ་རཾ་ཁཱཧི། ཞེས་ལྷ་དང་བླ་མ་མཁའ་འགྲོའི་ཚོགས་ལ་གཡོན་པའི་མཐེབ་སྲིན་གྱིས་དབུལ། ཨོཾ་ཨཱཿ་ཧཱུཾ་གིས་དངོས་གྲུབ་བསྡུས་ནས་ལྷ་ལ་ལྷ་མཆོད་པའི་ཚུལ་དུ་རོལ་པར་བཤད་དོ། །གཙོ་བོར་རང་ཉིད་ལྷག་པའི་ལྷ་རྡོ་རྗེ་གཞོན་ནུའི་ང་རྒྱལ་དང་མི་འབྲལ་བ་དང༌། ངག་ ཀཱི་ལ་ཡའི་སྒྲ་དང་མི་ [43a] འབྲལ་བ་དང༌། ཡིད་ཆོས་ཉིད་བྱང་ཆུབ་སེམས་ཀྱི་ཕུར་བུ་རྩེ་གཅིག་པ་གསལ་སྟོང་དབྱེར་མེད་པ་དང་མི་འབྲལ་བ་སྟེ། མི་འབྲལ་བ་རྣམ་པ་གསུམ་ལ་དྲན་པ་རྒྱུན་ཆད་མེད་པར་བྱས་ཏེ་སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རོལ་པར་ལམ་དུ་ཁྱེར། གཞན་ཡང་བསྙེན་སྒྲུབ་ཀྱི་སྐབས་སུ། གདན་མི་སྤྲུག་ཅིང་དྲོད་མི་ཡལ་བར་བྱེད། སྔས་བླ་མར་མོས་ལ་མི་འགོང༌། སྐྲ་སེན་དང་ཁ་སྤུ་མི་འདྲེག །མཚོན་རྩེ་ཁ་ལ་མི་འཇུག་ཅིང་ལུས་ཀྱི་ཆ་ཤས་གང་དུའང་མཚོན་ཁ་མི་བཏབ། ཁ་བཤལ་བ་སོགས་ཁྲུས་མི་བྱ། སྔགས་ནུས་འཇོམས་པའི་ཟས་ཀྱི་སྤང་བྱ་ནི། དུག་རིགས་འདྲེས་པའི་བཟའ་བཏུང༌། ཉམས་གྲིབ་དང་འདྲེ་ཅན་གྱི་ཁ་ཟས། སྒོག་བཙོང་དང༌། ལ་ཕུག །ལྒ་གཡེར། དམར་ཚྭ། ཟྭ་ཐུག །ཁུར་བ། ལྕེའི་དབང་པོ། ཤ་ཆང་སོགས་ཀྱིས་ནུས་པ་འགྱང་བར་བཤད། འོན་ཀྱང་བག་མེད་མ་ཡིན་པར་བྱིན་གྱིས་བརླབས་ནས་ཤ་ཆང་སོགས་ཁ་ཟས་བཅུད་ཅན་བསྟེན་དགོས་ཏེ། དེའི་དགོས་པ་གང་ཞེ་ན། ལྷ་སྔགས་ཡེ་ཤེས་ཀྱི་རྣལ་འབྱོར་ལ་འཇུག་པའི་སྐབས་འདིར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ལ་རྗེས་ཆགས་བདེ་བ་ཆེན་པོས་རྒྱས་ཐེབས་པ་དགོས་ཤིང༌། [43b] མཉམ་རྗེས་ཐམས་ཅད་དུ་བདེ་སྟོང་གི་དར་གདངས་ཤིག་མེད་ཐབས་མེད་པས། དེ་སྐྱེ་བའི་རྒྱུ་ཀུན་རྫོབ་རྒྱུའི་ཐིག་ལེའི་འཕེལ་འགྲིབ་ལ་ལྟོས་ནས་རྗེས་སུ་འགྲོ་དགོས་པས་ན། རྒྱུད་ལས་ཀྱང༌། དེ་ལ་ག་བུར་རྒྱུ་ཡི་ཕྱིར། །ཤ་ནི་བཟའ་བ་ཉིད་དུ་བྱ། །ཁྱད་པར་དུ་ཡང་ཆང་ཉིད་དོ། །ཞེས་གསུངས་པ་སོགས་ཤ་ཆང་ལོངས་སྤྱོད་པ་ལ་ཉེས་པ་མེད་པ་མ་ཡིན་ཀྱང༌། གསང་སྔགས་ཀྱི་ཉམས་ལེན་གཙོ་བོ་མཐར་ཐུག་པ་བདེ་སྟོང་གི་ཡེ་ཤེས་ལ་རང་བྱན་ཚུད་དགོས་པས། དེ་ལ་རེ་ནས་ཤ་ཆང་བླང་བྱ་དང༌། ཐིག་ལེ་ཉམས་པའི་སྐྱོན་ཐམས་ཅད་སྤང་བྱར་གསུངས་པས་དེ་བས་ན་ཐིག་ལེ་ཉམས་པ་ཁྱད་དུ་མི་གསོད་པའི་ཁར་རྨི་ལམ་བག་ཆགས་སོགས་སུ་འཕོ་བའི་རིགས་བྱུང་ནའང་རྫས་སྲུང་མན་ངག་སོགས་ལས་འབྱུང་བ་བཞིན་བསྲུང་ཐབས་བྱས་ལ་འཕོ་མེད་དུ་འཆིང་བ་གལ་ཆེ། ཐུན་ཚུགས་ནས་བསྡུ་རིམ་མ་གྲུབ་ཀྱི་བར་དུ་ཁམས་གསེང་ལ་འགྲོ་བ་སོགས་ཀྱིས་མཚོན་ལྡང་བའི་རིགས་གཏན་ནས་མི་བྱེད། བཟླ་དུས་མིད་པ་རྒྱུན་གཅོད་ངེས་པར་དགོས་ནའང་གང་ཟག་ཁྲག་རླུང་ཤས་ཆེ་བའི་རིགས་ལ་མིད་པ་འཇུར་བས་རླུང་སྟོད་དུ་འཚང་ཞིང་གྲེ་བ་སྐམ་ནས་བསྐྱེད་བཟླས་བྱེད་དུ་མི་སྟེར་བའི་ཚེ་བཏུང་བ་སོགས་ལོངས་ [44a] སྤྱད་དགོས་པ་བྱུང་ན། སྤྱད་བྱའི་བཟའ་བཏུང་གང་ཡིན་དེ་བདུད་རྩིར་བྱིན་གྱིས་བརླབས། སྤྱོད་ཡུལ་གྱི་དཀྱིལ་འཁོར་ལེགས་པར་གསལ་བཏབ། སྔགས་བཟླ་འཕྲོས་སྣ་བུག་ཏུ་ཕུས་བཏབ་ནས་སྣ་སྒོའི་རླུང་ལས་སྔགས་ཀྱི་སྒྲ་དི་རི་རི་སྒྲོག་པར་མོས་ལ། འཕྲེང་བ་འཁོར་མཚམས་ནས་བཟའ་བཏུང་བདུད་རྩིའི་ཚོགས་མཆོད་ཕུལ་ཏེ། དེ་འཕྲལ་བཟླས་པར་འཇུག་པ་ལས་བག་མེད་དུ་བཟའ་བཏུང་གང་དགར་མི་སྤྱོད། སྔགས་བཟླ་འཕྲོ་བཞག་ནས་དཔེ་ཆ་བལྟ་བ་དང་ཡི་གེ་འབྲི་བས་མཚོན་ལུས་ངག་ཡིད་གསུམ་གྱི་གཡེང་ཤོར་བའི་རིགས་མི་བྱེད། འོག་སྒོ་ནས་དྲི་ངན་ཤོར་ན་ཐུན་དེའི་སྔ་རོལ་བཟླས་པ་ཇི་ཙམ་སོང་ཡང་གྲངས་ལ་མི་གཏོང༌། ཧ་སྦྲིད་དང་སྦྲེག་པ་ཤོར་ན་ཕྲེང་བའི་འཁོར་མཚམས་གང་སླེབས་གྲངས་སུ་མི་གཏོང་བར་དོར་ནས་སླར་མདུད་འཛིན་བསུས་ཏེ་འདྲེན། བཟླས་པའི་མཚམས་སུ་ཅིས་ཀྱང་མི་ལ་ངག་གཏོང་དགོས་པ་བྱུང་ན་ཕ་རོལ་པོ་དེ་ཡི་དམ་གྱི་སྐུར་གསལ་བ་ལ་རང་གི་སྨྲ་བརྗོད་ཐམས་ཅད་སྔགས་ཀྱི་རྣམ་པར་འཕྲོས་ནས་ཐིམ་པར་བསམ་པས་སྔགས་ནུས་མི་ཉམས་པར་བཤད། ཐུན་མཚམས་སུ་གསུར་དང་གཏོར་མ་སོགས་གཏོང་ནའང་རང་ཉིད་ལས་ཀྱི་ཧེ་རུ་ཀ་གནས་གྱུར་པ་ལས་ཐུགས་རྗེ་ཆེན་པོ་སོགས་ [44b] སུ་བསྐྱེད་པའི་ལས་བྱེད་པར་བསམ་ལ་བསྔོ། སྤྱིར་ལྷ་ཞི་ཁྲོ་གང་བསྐྱེད་ཀྱང་སྣང་སྟོང་འཇའ་ཚོན་ལྟ་བུར་གསལ་བས་གང་ལ་གང་འདུལ་གྱི་སྤྲུལ་བསྒྱུར་བྱ་བ་ལས། ཕྱི་གཟུགས་ཡུལ་ཆས་གོས་ཆ་ལུགས་སོགས་ལ་རག་མ་ལུས་ཀྱང༌། ལ་ལ་དག་གཏོར་མ་དང་ལུས་སྦྱིན་སོགས་གཏོང་བའི་སྐབས་རང་གི་གདོང་དམར་པོ་དེས་ཡི་དྭགས་རྣམས་འཇིགས་སྐྲག་གི་ཉེས་པ་སྒྲིབ་ཕྱིར་ཞྭ་དང་དོམ་ར་གྱོན་པ་སོགས་བྱེད་དགོས་པར་སྐད་མོད། དེ་ཙ་ན་རང་ཉིད་ཐུགས་རྗེ་ཆེན་པོ་སོགས་སུ་བསྐྱེད་པའི་དགོས་པ་མ་བྱུང་བས་བླུན་པོའི་ངག་རྗེས་སུ་མི་འབྲང་བར་ཁུང་ཐུབ་བརྒྱུད་པའི་གསུང་དང་མཐུན་པ་ཞིག་གལ་ཆེ། དགོང་མོ་མུན་པའི་སྐབས་ཚོགས་ལྷག་དང་ཆད་མདོ་སོགས་ཕུལ་དུས་དཔལ་འབར་མེད་ན་ཤ་ཟ་ཤུགས་འགྲོ་སྡེ་བརྒྱད་མ་རུང་བས་ལས་ཀྱི་རྡོ་རྗེའི་སྲོག་ལ་འཚེ་བའི་ཕྱིར་དཔལ་འབར་ངེས་པར་དགོས་ཤིང༌། གསང་སྤྱོད་སོགས་ཀྱི་སྐབས་སུ་མར་མེའི་འོད་ལ་འབྱུང་པོ་རྣམས་འཁོར་མི་ནུས་པས་མཚོན་ཉིན་མོ་ལ་ནི་དཔལ་འབར་སོགས་ཀྱི་སྣང་བ་མི་དགོས། ལྷ་གཞན་གྱི་རྒྱུན་ཁྱེར་དམ་ཚིག་གི་བཟླས་པ་བྱེད་པར་འདོད་ན་རང་ལྷར་གསལ་བའི་ཐུགས་ཀའི་འོད་ཀྱིས་བསྐུ་་ཏེ་ལྷ་གང་དང་གང་གི་སྐུའི་རྣམ་པར་བྱོན་ཏེ་རང་ལ་ཐིམ་པར་བསམ་ཤིང་ [45a] སྔགས་བརྒྱའམ་ཉེར་གཅིག་བདུན་སོགས་བཟླས་པས་འགྲུབ། དེ་ཡང་ལྷའི་སྣང་ཆ་གསལ་མ་ཐེབས་ན་བསྐྱེད་རིམ་གྱིས་གོ་མི་ཆོད། ང་རྒྱལ་མེད་ན་ཐ་མལ་གྱི་སྣང་ཞེན་མི་ལྡོག །དག་དྲན་མེད་ན་ལྷ་ཞི་བ་བསྒོམ་ཀྱང་རྒྱལ་འགོང་དང༌། དྲག་པོ་བསྒོམ་ན་རཱུ་དྲར་གོལ་བར་འགྱུར་བས་ན་གསལ་བརྟན་དག་གསུམ་གྱི་གནང་ལ་འབད། གཞན་ཡང་བདུད་ཀྱིས་ལྷར་བརྫུས་ནས་བར་གཅོང་འབྱུང་བའང་སྲིད་པས་རྟགས་དང་ཆོ་འཕྲུལ་འཚུབས་ལྷོང་སོགས་བཟང་ངན་གྱི་མཚན་མ་ཇི་ལྟར་བྱུང་ཡང་དགག་སྒྲུབ་རེ་དོགས་ཀྱི་བློས་མ་བཅིངས་པར་གདོད་མའི་གནས་ལུགས་དབྱིངས་དང་ཡེ་ཤེས་གཉིས་སུ་མེད་པའི་ཀློང་ཆེན་པོར་ལ་བཟླ་བར་བྱ་སྟེ། དེ་ལྟར་ཡང་འོ་སྐོལ་གྱི་སློབ་དཔོན་སངས་རྒྱས་གཉིས་པའི་ཞལ་ནས། འགྲོ་འདུག་ཉལ་དང་སྤྱོད་ལམ་ཐམས་ཅད་ཀུན། །དེ་ལྟར་ལྟ་བའི་བྱ་ར་མ་ཡེངས་ན། །ང་ཉིད་པདྨ་འབྱུང་གནས་ཐུགས་ཀྱི་སྲས། །མཆོག་དང་ཐུན་མོང་དངོས་གྲུབ་མྱུར་དུ་ཐོབ། །ཕྱི་ནང་ཟས་ནོར་མི་དང་ལྷ་འདྲེ་འདུ། །བླ་མེད་བྱང་ཆུབ་གོ་འཕང་མྱུར་དུ་ཐོབ། །ལྟ་བས་མ་ཟིན་བསྒྲུབ་ཀྱང་དོན་མེད་པས། །ལྟ་བའི་བྱ་ར་གཅེས་སོ་རིགས་ཀྱི་བུ། ཞེས་གསུངས། གཞན་ཡང་བསྙེན་པའི་བསླབ་བྱ་ཁྱད་པར་གནད་ཀྱི་ཞལ་ཤེས་ནི། [45b] བསྙེན་སྒྲུབ་ལ་རྟགས་མ་ཐོན་བར་དུ༔ དང་པོ་ནས་རྣལ་འབྱོར་པ་རེ་དོགས་ཅན་གྱིས་ལྷ་མི་བསྲེལ་ཏེ༔ གང་ཞེ་ན༔ གདོན་ཆེན་པོ་ལ་བྱིན་རླབས་མི་བྱ༔ སྲིའུ་མི་གསོ༔ སེར་རྒོད་མི་བཟློག༔ གཞན་གྱི་ཟས་གོས་གྲིབ་ཅན་ལ་མི་འབག་གོ༔ བྱས་ན་སྒྲུབ་པ་པོ་ཟག་ལ་འགྲོ་བས་རྟགས་མི་འབྱིན༔ རྟགས་མཚན་མི་ལ་མི་བཤད༔ རེ་དོགས་དང་འཁུ་འཁྲིག་མི་བྱ་སྟེ༔ རྟགས་བཟང་བ་ལ་དགའ་མི་བྲོད༔ ངན་པ་ལ་དོགས་མི་འཚེར༔ ཐམས་ཅད་རྒྱུ་འབྲས་དང་རྟེན་འབྲེལ་དུ་ཤེས་པས་ལྟ་བའི་གདིང་བསྐྱེད་དོ༔ ཞེས་གསུངས་པ་ལྟར་དང༌། བསྙེན་པ་མ་རྫོགས་པར་གནས་སྤོས་ན་དངོས་གྲུབ་བོ་ཟག་དོན་མེད་དུ་འགྱུར་བས་གནས་མི་སྤོ༔ ཞེས་ཆོས་དབང་གི་གཞུང་ལས་གསུངས་པ་ལྟར་སྤང་བླང་ཚུལ་བཞིན་དུ་བྱ། སྤྱིར་ལམ་ཟབ་མོ་ཉམས་སུ་ལེན་པའི་སྐབས་འདིར་འཚེ་བའི་རྐྱེན་མང་བས་ལུས་ལ་འབྱུང་བཞིའི་ནད་དྲག་པོས་བཏབ་ནས་གློ་བུར་དུ་སྨན་པ་དང་གྲོགས་སོགས་མཚམས་ནང་དུ་འབོད་དགོས་པའམ་སྲིད་པས། དེས་ན་བྱ་བྱེད་སྤྲོ་བསྡུ་གང་ཡང་རྣམ་རྟོག་གི་རྗེས་སུ་འབྲང་བས་དང་པོར་མཚམས་ལ་འཇུག་སྐབས་ནས་ཞེ་མཐུན་གྱི་སྨན་པ་དང་གྲོགས་འཁོར་དངོས་ཆས་སོགས་ཀྱང་དགོས་འབྱུང་ན་ཇི་སྙེད་ཅིག་གཏོང་ལེན་བྱེད་སྙམ་པའི་དམིགས་འོག་ [46a] ཏུ་ཆུག་པ་དགོས། ཕྱིས་དེ་དག་གཏོང་དགོས་བྱུང་ཚེ་མཚམས་ལ་ཧར་གྱིས་གྲོལ་བའི་བར་ཆད་མི་འཇུག་པའི་དགོས་པ་ཡོད་པས་སོ། །དེ་ལྟར་ཐུན་བཞིའི་རིམ་པས་དུས་གྲངས་རྟགས་ཀྱི་བསྙེན་པ་གསུམ་གང་རུང་བྱ་སྟེ། དེ་ལ་དུས་ནི་དགོངས་རྒྱུད་ལས། ཡུན་ནི་ལོ་ཟླ་ཙམ་དུ་བསྲིང་༔ ཞེས་པས་རང་གི་ནུས་པ་དང་སྦྱར་ཏེ་ལོའམ་ཟླ་བའི་གྲངས་འདི་ཙམ་ཞིག་བྱའོ་ཞེས་ཇི་ལྟར་དམ་བཅས་པ་ལས་མི་འདའ་བར་བྱ་ཞིང༌། གཞན་ཡང་ཇི་སྐད་དུ། ཞག་ནི་སུམ་ཅུ་ཕྲག་དྲུག་གམ༔ ཞེས་པས་བསྙེན་སྒྲུབ་སོ་སོར་ཟླ་བ་དྲུག་རེ་སྟེ་ཁྱོན་ལོ་གཅིག་ཡན་ཆད་དམ། ཡང་ན་བསྙེན་སྒྲུབ་སྤྱིར་ཟླ་བ་དྲུག་གི་དབང་དུ་བྱས་ཏེ། འདིར་བསྙེན་པ་ལ་དེའི་ཕྱེད་ཆ་ཟླ་བ་གསུམ་ཡན་ཆད་དོ། །གྲངས་ཀྱི་བསྙེན་པ་ནི། དགོངས་རྒྱུད་ལས། བསྙེན་སྒྲུབ་ཆོ་ག་ཚང་བྱས་ནས༔ ཛཔྲ་གྲངས་བདུན་འབུམ་ཉི་ཁྲི་འདོན༔ ཞེས་པ་ལྟར་གྲངས་ཚད་བདུན་འབུམ་ཉི་ཁྲི་ཡན་ཆད་སྤྱིར་བཏང་ཡིན་ལ། དམིགས་བསལ་དུ་དབང་པོ་རབ་ཀྱིས་འབྲུ་འབུམ། འབྲིང་གིས་དེ་ཉིས་འགྱུར། ཐ་མས་སུམ་འགྱུར་གྱིས་ངེས་པར་འགྲུབ་པར་གསུངས། གྲངས་བསྙེན་ཚད་དུ་མ་འཁྱོལ་ཡང་བརྩོན་འགྲུས་དང་སྦྱར་བའི་བཟླས་པ་གང་འགྲུབ་ཙམ་བྱས་པས་ཀྱང་བསྙེན་སྒྲུབ་ཀྱི་འབྲེལ་བ་ཐོགས་པ་ཡིན་ཏེ། གསང་བ་ [46b] སྙིང་པོ་ཕྲིན་ལས་ཀྱི་རྒྱུད་ལས། འབྲུ་འབུམ་བདུན་འབུམ་ཉི་ཁྲི་ཙམ༔ སྟན་དྲོད་མ་ཡལ་རྩེ་གཅིག་བཟླ༔ ཞེས་སོགས་འབྱུང་ངོ༌། །ད་ལྟའི་དུས་དང་སྦྱར་ན། རྩ་བསྙེན་བྱེ་བ་ཕྲག་གསུམ་དང་འབུམ་ཕྲག་བཞི། ལས་སྦྱོར་འབུམ་གསུམ་དང་ཁྲི་ཚོ་བཞི་བཟླས་ན་འགྲུབ་པར་ཞུས་ལན་ཉིད་དུ་གསལ་ལོ། །འོན་ཀྱང་གང་ཟག་སྦྱངས་པ་སྔོན་སོང་བསྙེན་སྒྲུབ་ཀྱི་ལས་འཕྲོ་ཅན་ལ་ནི་དུས་གྲངས་མི་ངེས་ཏེ། གཞུང་ལྟར་རྟགས་དང་མཚན་མ་ཞག་གཅིག་ནས་ཐོན་ནའང་བསྙེན་པ་རྫོགས་པ་སྟེ་གང་དགོས་ལས་ལ་སྦྱར་བས་འགྲུབ་པ་ཡིན་ནོ། །རྟགས་སམ་མཚན་མའི་བསྙེན་པ་ནི། རྣལ་འབྱོར་པ་རབ་ལ་སྐུ་གསུང་ཐུགས་ཀྱི་རྟགས་བདུན་གསུམ་ཉེར་གཅིག་མངོན་སུམ་འབྱུང༌། འབྲིང་ལ་དེ་དག་ཉམས་སྣང་དུ་བྱུང༌། ཐ་མ་རྣམས་ལའང་གཞུང་ལས། སེམས་རྩེ་གཅིག་ཏུ་ཏིང་ངེ་འཛིན་ལ་གནས་ཤིང་གསལ་བ་དང་༔ བླ་མ་ལ་མོས་གུས༔ ཡི་དམ་ལ་དག་སྣང་༔ སྒྲུབ་པ་ལ་སྤྲོ་ཞིང་བློ་དཔའ་བ་དང་གདིང་ཡོད་པ༔ རྨི་ལམ་དུ་མཆོད་རྟེན་དང་རི་མགོ་རྩེར་འདུག་པ༔ རྔ་བརྡུང་༔ དར་འཕྱར༔ དུང་འབུད༔ ཉི་ཟླའི་སྟེང་དུ་འདུག་པ༔ ལྷའི་ཞལ་མཇལ༔ སྒྲུབ་ཕུར་རྣམས་ལས་འོད་འཕྲོ༔ འཕར་ལྡིང་བཞད་པ་ལྷ་མོའི་གཟུགས་སྟོན་པ༔ དབང་བསྐུར་ཆོས་བཤད་ཁྲི་ཆེན་ལ་འདུག་ལ༔ གྲུ་ཆེན་ལ་འདུག་ [47a] པ༔ གྲུ་པ་མཉན་པ་སྡེ་དཔོན༔ ཁྲོམ་གྱི་ཁ་ལོ་བསྒྱུར་བ་འབྱུང་ངོ་༔ ཞེས་གསུངས་པ་ལས་སྐུ་གསུང་ཐུགས་ཀྱི་རྟགས་སྣ་གསུམ་རྫོགས་ན་བསྙེན་ཚད་རྫོགས་པའི་རྟགས་སུ་གསུངས་སོ། །སྐབས་འདིར་སྔོན་ལས་ཀྱི་དབང་གིས་ཇི་ལྟར་བསྒྲུབས་ཀྱང་བར་ཆད་ན་ཚ་སོགས་མི་ཤིས་པ་མང་ཞིང་རྟགས་མཚན་གང་ཡང་མ་མཐོང་བའམ་ལོག་པར་མཐོང་ན་སྔོན་གྱི་ལས་འཕྲོ་མེད་པའམ། དམ་ཚིག་ཉམས་པ་དང༌། ཆོ་ག་ཕྱག་ལེན་འཁྲུགས་པ། སྔགས་དང་བཟླས་བརྗོད་མ་དག་པ། བརྒྱུད་པ་ལ་སེལ་ཞུགས་པ། སྒྲུབ་རྫས་མ་ཚང་བ། དམིགས་པ་ཏིང་ངེ་འཛིན་མ་གསལ་བ། གཡེང་བ་ལ་སོགས་པའི་སྐྱོན་ཅན་ཡིན་པས། དེ་ལ་བསོད་ནམས་ཚོགས་ཀྱི་དཔུང་བསྐྱེད། བཤགས་པ་དང་ཡིག་བརྒྱ་མང་དུ་བཟླ། བདག་ཉིད་དང་སྒྲུབ་རྫས་ལག་ཆ་རྣམས་རྡོ་རྗེ་རྣམ་འཇོམས་ཀྱི་ཁྲུས་ནས་དབྱུང༌། རབ་གནས་བསྐྱར་བླ་མ་བརྒྱུད་པ་མཚན་ཉིད་དང་ལྡན་པ་ལས་དབང་ལུང་ལག་ལེན་ཐམས་ཅད་བསྐྱར་ནས་ཞུ་ཞིང་ཞུན་ཐར་བཅད། ཡི་དམ་ལ་ཚོགས་དང་བསྐང་གསོལ་བྱ། ཡན་ལག་བདུན་པ་དང་མཎྜལ་མང་དུ་ཕུལ་ཞིང་གསོལ་བ་གདབ་ལ་དངོས་གྲུབ་ཞུ། ཚེ་འདིའི་ཆེད་གཉེར་ཆགས་ཞེན་གྱི་བློ་སྣ་རིང་དུ་དོར། སྟོང་པ་ཉིད་ཀྱི་ [47b] གདིང་བཅའ། བྱམས་སྙིང་རྗེ་བྱང་ཆུབ་ཀྱི་སེམས་དཔང་དུ་བཙུགས་ཏེ་བརྩོན་འགྲུས་དྲག་པོས་བསྒྲུབ་བོ། །དེས་ཀྱང་མ་འགྲུབ་ན་སྒྲུབ་པ་ལན་གསུམ་མམ་ལྔའམ་བདུན་སོགས་སྤོགས་ན་ལས་འཕྲོ་ཇི་ལྟར་ངན་ཀྱང་འགྲུབ་པར་གསུངས་སོ། །གཉིས་པ་སྒྲུབ་པ་ནི། ཕྱི་ནང་གི་མཚམས་གཅོད་སོགས་བསྙེན་སྒྲུབ་སྦྲེལ་བའི་སྐབས་འདིར་སྔར་སོང་བས་འཐུས་པར་མཛད། ཆག་ཆག་གདབ་པ། ཐིག་ཚོན་བྱིན་རླབས་ལྡན་པས་དཀྱིལ་འཁོར་བྲི་བ། ཕུར་བུ་བྱིན་གྱིས་བརླབས་ཏེ་དགོད་པ། རྒྱན་རྫས་དགྲམ་པ་རྣམས་གཞན་དོན་ཚོམ་བུའི་སྒྲུབ་གཞུང་ལྟར་བྱ་བ་ཡིན་མོད། དེ་ཙམ་མ་ལྕོགས་ན། སྔར་བསྙེན་དུས་དཀྱིལ་འཁོར་བཤམས་ཚེ་དེ་ཀའི་སྟེང་དུ་སྦམ་ཕུར་བཀོད་པས་གོ་བཅད། གལ་ཏེ་སྔར་ཐོད་དཀྱིལ་ཁོ་ནར་བསྟེན་པ་ཡིན་ན། འདིར་དཀྱིལ་འཁོར་རས་བྲིས་བཀྲམ་པའི་སྟེང་སྔར་གྱི་ཐོད་པའི་དཀྱིལ་འཁོར་ལ་ལྷ་ཕུར་ཚང་མ་སྦམས་ཏེ་བཙུགས་པ་ཉིད་བཀོད། སྔར་གཙོ་ཕུར་ལས་མེད་ན་སྐབས་འདིར་ལྷ་ཕུར་ཚང་མའམ། མ་འབྱོར་ན་དཀྱིལ་འཁོར་གྱི་ལྷ་གནས་སོ་སོར་ཚོན་སྤུངས་སམ་ཕྱག་མཚན་ནམ་འབྲུའི་ཚོམ་བུ་བཀོད། སྒྲུབ་གཏོར་དང་ཆོས་སྲུང་གི་གཏོར་མ་སྨན་རཀ་རྣམས་སྔར་གྱི་དེ་ཀ་གསོལ་པས་ཆོག །སྐབས་འདིར་ཕྱི་ནང་གི་མཆོད་པ་ [48a] དང་དཀྱིལ་འཁོར་གྱི་རྒྱན་ཅི་འབྱོར་བཀྲམ། དེ་ལྟར་གྲབ་ཤོམ་ཚར་བའི་ནུབ་རྒྱུན་བསྙེན་མ་ཆག་ཙམ་བཟླས་རྗེས་ཉལ། སང་ཉིན་ཞོག་ཐུན་ནས་བརྩམས་ཏེ་སྐྱབས་སེམས་བཀའ་བསྒོ་སོགས་སྔོན་འགྲོའི་རིགས་གྲུབ་ནས། ཏིང་འཛིན་རྣམ་གསུམ་ནས་བཟུང་རང་དང་མདུན་གྱི་དཀྱིལ་འཁོར་སྒྲུབ་རྟེན་ཕུར་བུ་དང་བཅས་པ་དམ་ཚིག་གི་འཁོར་ལོར་དབྱེར་མེད་དུ་བསྐྱེད་པའི་ཁྱད་པར་ཙམ་མ་གཏོགས་གཞན་བསྟོད་པའི་བར་བསྙེན་པ་ལྟར་ལས་གཞུང་བསྲང་ཞིང༌། སྐུ་གསུང་ཐུགས་ཀྱི་ཛཔྲ་དགོངས་གསུམ་བསྙེན་དུས་ལྟར་ལ་བུང་བ་ཚང་ཞིག་གི་ཚུལ་ཁྱད་པར་དུ་བྱས་པའི་བཟླས་པ་སྔོན་དུ་བཏང་རྗེས། འདིར་ཡོན་ཏན་ལ་དམིགས་པའི་ཛཔྲ་དགོངས་གཙོ་བོར་བྱ་སྟེ། དེའི་དམིགས་པ་ནི། བདག་ཉིད་ལས་མདུན་རྟེན་གྱི་དཀྱིལ་འཁོར་ཕཊ་ཛཿས་ཕྱེས་པ་མདུན་གྱི་ནམ་མཁར་བཞུགས་པར་མོས། བདག་ཉིད་ཀྱི་ཐུགས་ཀའི་སེམས་དཔའ་སུམ་བརྩེགས་ལས་འོད་ཟེར་དཔག་ཏུ་མེད་པ་འཕྲོས། ཕྱོགས་བཅུའི་བདེ་གཤེགས་ཐམས་ཅད་དང༌། གཙོ་བོ་ཁྲོ་ཚོགས་སྲས་མཆོག་སྒོ་མ་དམ་ཅན་གྱི་ཕུར་བུ་ཐམས་ཅད་ཀྱི་ཐུགས་ཀར་ཐིམ། དགྱེས་པ་བསྐྱེད། ཐུགས་དམ་བསྐུལ། སྐུ་གསུང་ཐུགས་ཀྱི་དངོས་གྲུབ་ཐམས་ཅད་ [48b] སྔགས་ཕྲེང་དམར་པོའི་རྣམ་པར་ལྷ་སོ་སོའི་ལྟེ་བ་ནས་བྱུང༌། བདག་གི་ལྟེ་བར་ཞུགས། ཐུགས་ཀའི་ས་བོན་ལ་ཐིམ། སླར་ཐུགས་ཀ་ནས་སྔར་བཞིན་སྤྲོས་པ་འགལ་མེ་ལྟར་འཁོར་བར་དམིགས་ནས་ཛཔྲ་བཟླ་ཞིང་ཐུན་མཐར་མཆོད་ཅིང་བསྟོད། ཐུན་བཞིའི་གཅོང་ཚུལ་དང་སྔོན་འགྲོ་རྒྱས་བསྡུས་ཀྱི་འདོར་ལེན་སོགས་སྔར་བསྙེན་པ་ལྟར་ལས། འདིར་སྲོལ་ཐུན་ལྟ་བུའི་ཐུན་གཅིག་ལ་ཚོགས་གཏོར་ཀྱང་ཅི་འགྲུབ་བྱ་ཞིང་ལྷག་མ་བཙོན་དུ་འཛིན་པ་སོགས་སྤྱི་ལྟར་རོ། །ཚུལ་དེས་སྒྲུབ་པ་རྫོགས་པར་ཉེ་བའི་མཐའི་ཞག་བདུན་གསུམ་ཙམ་གྱི་རིང་སྔར་བཞིན་སྐུ་གསུང་ཐུགས་ཡོན་ཏན་བཞིའི་ཛཔྲ་དགོངས་དང་ལྡན་པས་ཛཔྲ་བཟླས་མཐར་དམིགས་པ་འདི་ཉིད་བསྣན་ཏེ། སླར་ཡང་འོད་ཟེར་འཕྲོས་པས་སྣོད་བཅུད་ཀྱི་འཇིག་རྟེན་ཐམས་ཅད་ཁྱབ། འབྱུང་བཞི་རིན་ཆེན་སྨན་རྫས་ཐམས་ཅད་ཀྱི་ཚེ་རིང་ནད་མེད་གདོན་སེལ་བྱེད་ཀྱི་བཅུད་ཐམས་ཅད་བསྡུས་ཏེ་བདག་ལ་ཐིམ་པས་ཚེ་བསོད་དཔལ་གྲགས་གཟི་མདངས་བསྐྱེད། ཁྱད་པར་འཆི་མེད་ཚེའི་རིག་འཛིན་ཐོབ་པར་གྱུར། བཅུད་ཀྱི་སེམས་ཅན་ཐམས་ཅད་ལ་འཕྲོས་པས་ལས་ཉོན་མ་རིག་པའི་བག་ཆགས་སྦྱངས། རྡོ་རྗེ་གཞོན་ནུའི་རང་བཞིན་དུ་གྱུར། དཀྱིལ་འཁོར་ [49a] གྱི་ལྷ་ཚོགས་དང་ཕྱོགས་བཅུའི་སངས་རྒྱས་ཐམས་ཅད་ལ་འཕྲོས། མཉེས་མཆོད་ཕུལ། དགྱེས་པ་བསྐྱེད། ཐུགས་དམ་བསྐུལ། སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཨོཾ་ཨཱཿཧཱུཾ་གི་རྣམ་པར་བསྡུས་ནས་བདག་ལ་ཐིམ་པས་ལས་ཉོན་བག་ཆགས་དང་བཅས་པ་སྦྱངས། རྡོ་རྗེ་གཞོན་ནུའི་རང་བཞིན་དུ་གྱུར། སྐུ་གསུང་ཐུགས་ཡོན་ཏན་ཕྲིན་ལས་ཡོངས་རྫོགས་ཀྱི་དངོས་གྲུབ་ཐོབ་པར་བསམ། ཡང་འབྲུ་གསུམ་གྱི་རྣམ་པར་བསྡུས་ནས་རྟེན་རྫས་ཐམས་ཅད་ལ་ཐིམ་པས་འབར་འཁྲབ་ཁོལ་ཞིང་དྲི་བཟང་དང་དུ་བ་སོགས་བྱུང་བར་བསམ་ལ་འབྲུ་བཅུ་བདུན་པ་ཉིད་བཟླའོ། །དེའང་རྩ་སྒྲུབ་ལས། དེ་ལྟར་འོད་ཟེར་སྤྲོ་བསྡུ་མ་ཡེངས་པར་ཞག་སུམ་ཅུ་ཕྲག་གསུམ་མམ་མཚན་རྟགས་མ་བྱུང་གི་བར་འབད་པས༔ རྟགས་དང་ཡོན་ཏན་བསམ་གྱིས་མི་ཁྱབ་པ་འབྱུང་སྟེ༔ རབ་རྣམ་སྨིན་གྱི་ལུས་འདི་ལྷར་འགྱུར་བའམ༔ འབྲིང་དུ་ཞལ་མཐོང་ལུང་སྟོན་གསུང་དང་ཆོས་སྟོན་པ༔ ངག་བདེན་པ་འགྲུབ་པ་རྣམས་འབྱུང་༔ ཐ་མ་རྨི་ལམ་དུ་ཞལ་མཇལ༔ དགྲ་བགེགས་ཚར་བཅད་ཕྲིན་ལས་ཐོགས་མེད་དུ་འགྲུབ་པར་འགྱུར་རོ༔ དེ་ཚེ་སྒྲུབ་ཕུར་རྣམས་སྤྱི་བོ་མགྲིན་པ་སྙིང་ག་གསུམ་དུ་གཏུགས་ [49b] ཏེ༔ སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་ཐོབ་པར་བསམ༔ ཐོབ་ཀྱང་ངེས་པར་འཐོབ་པ་ཡིན་ནོ༔ ཞེས་གསུངས་པ་དང༌། དེར་མ་ཟད་གྲུབ་པའི་རྟགས་ཕུར་བུ་འབར་ཞིང་མེ་ལྟར་འབར་ན་རིག་འཛིན་གྱི་རྒྱལ་པོར་འགྱུར་བ་དང༌། སངས་རྒྱས་ཀྱི་ཞལ་མཐོང་བ་སོགས་འགྱུར། འབྲིང་དུ་བ་བྱུང་ན་མི་སྣང་བ་སོགས་དང༌། དྲོ་བར་གྱུར་ན་རྐང་མགྱོགས་སོགས་ཀྱི་དངོས་གྲུབ་ཐོབ་པར་གསུངས་མོད། དེ་ལྟར་མ་འགྲུབ་ནའང་། ཐ་མ་ཞི་རྒྱས་སོགས་ལས་ཕྲན་ཚེགས་རྣམས་བཏབ་པ་ཙམ་གྱིས་འགྲུབ་པར་འགྱུར་རོ། །དུས་བཤད་མ་ཐག་པ་ལྟར་ལ། གྲངས་བདུན་འབུམ་ཉི་ཁྲི་གཙོར་བཟུང་ངོ༌། །གསུམ་པ་ལས་སྦྱོར་ནི། སྒྲུབ་པ་ཆེན་པོའི་ཡན་ལག་དངོས་གྲུབ་ལེན་པ་སྟེ། དེའང་གྲུབ་པའི་མཚན་མ་མཐོང་བའམ་དུས་གྲངས་རྫོགས་ནས་དངོས་གྲུབ་ཀྱི་རྫས་བསགས་པ་ནི། མཆོད་གཏོར་བཟང་དུ་བཤམ། གཏའ་གཏོར་རྙིང་པ་ཁ་གསོ། བྷཉྫ་མཚན་ལྡན་དུ་ཆང་བཟང་པོ་ལ་ཨ་མྲྀ་ཏ་མངར་གསུམ་བཏབ་པ་ཨོཾ་ཨཱཿཧཱུཾ་གིས་བདུད་རྩིར་བྱིན་གྱིས་བརླབས་ལ་བཞག །སྣོད་བཟང་པོར་ཕྱེ་མར་ཨ་མྲྀ་ཏ་དང་སྤོད་ཀྱིས་བྲན་པ་ལས་དངོས་གྲུབ་ཀྱི་རྫས་དབུས་སུ་རིན་ [50a] ཆེན་འབར་བའི་ནང་དུ་འདོད་དོན་གྱི་གསོལ་བྱང་བཅུག་པ། དེའི་ཤར་དུ་འབྲང་རྒྱས་ཟླུམ་པོ། ལྷོར་གྲུ་བཞི། ནུབ་ཏུ་ཟླ་གམ། བྱང་དུ་ཟུར་གསུམ་རྣམས་བཀོད། རིལ་བུ་དང་བདར་བུ་ཅི་རིགས་པས་ཟླུམ་ཐབས་སུ་བསྐོར་ཞིང༌། ཚེ་འབྲང་དང་ཚེ་ཆང་ཡང་བཤམས། ནུབ་ཐ་མའི་ཐོར་ཐུན་ལ་སྔོན་འགྲོ་ནས་བརྩམས་བཟླས་པའི་བར་སྔར་གྱི་དཀྱུས་བཞིན་དང༌། ཚོགས་བསྒྲལ་བསྟབ་ཀྱི་བར་ལས་གཞུང་བསྲང་རྗེས། ཡོན་ཏན་དངོས་གྲུབ་བླང་བ་ལ་དམིགས་པའི་ཛཔྲ་དགོངས་ནི། བདག་དཔལ་ཆེན་པོ་ཡབ་ཡུམ་དུ་གསལ་བའི་ཡབ་ཀྱི་གསང་གནས་ཟླ་བ་ལ་རྡོ་རྗེ་རྩེ་ལྔ་པ། སྡུད་བྱེད་ཀྱི་སྙིང་པོ་བུ་གར་ཨོཾ་དཀར་པོས་མཚན་པ། ཡུམ་གྱི་མཁའ་པདྨ་འདབ་བརྒྱད་ཀྱི་ལྟེ་བར་ཨེ་གྲུ་གསུམ་གྱི་དབུས་སུ་འབེབས་བྱེད་ཀྱི་སྙིང་པོ་ཨེ་དམར་པོས་མཚན་པར་བསམ་ལ། མཁའ་གསང་སྦྱར་ཏེ་སྙོམས་པར་ཞུགས་པས་ཡུམ་གྱི་དུང་ཁང་ན་ཁྲག་འཐུང་རིགས་ལྔ་ཡབ་ཡུམ་ཚོན་གང་བ་བཞུགས་པ་རྣམས་བསྐུལ། སྙོམས་པར་ཞུགས་པས་ཡབ་ལྔའི་བྱང་སེམས་མུ་ཏིག་དཀར་པོ། ཡུམ་ལྔའི་དྭངས་མ་མཚལ་ལྟ་བུ་རྩ་དབུ་མ་ནས་བྱུང༌། ཡུམ་གྱི་མཁར་བབས་དཀར་དམར་འདྲེས་ནས་དངོས་གྲུབ་ཀྱི་རང་བཞིན་དུ་བསྐྱིལ་བ་དེ་ཨོཾ་ཨཱཿཧཱུཾ་གསུམ་དུ་ [50b] གྱུར་པ་བདག་ཉིད་ཀྱི་རྡོ་རྗེའི་ནང་དུ་རྔུབས་ཏེ་ཐུགས་སྲོག་ཧཱུཾ་ལ་ཐིམ། ཐུན་མོང་གི་ཚེ་བསོད་དཔལ་གྲགས་རྒྱས། སྣང་བ་དབང་དུ་འདུས། གཟི་བརྗིད་འོད་དུ་འབར། ལོ་བཅུ་དྲུག་གི་ན་ཚོད་དུ་གྱུར། མཆོག་གི་དངོ ཧཱུཾ་སརྦ་སིདྡྷི་ཨཱཿཞེས་བཏགས་པ་བརྒྱ་སྟོང་སོགས་དྲག་ཏུ་བཟླ། མཐར་ཕྲེང་བ་ལག་གཡས་སུ་ཐོགས། གཡོན་པའི་མཛུབ་མོ་དང་མཐེའུ་ཆུང་བསྒྲེང༌། གུང་སྲིན་མཐེ་བོང་སྦྱར་བ་རྟ་མགོའི་ཕྱག་རྒྱ་བྱས་ཏེ། ཐུགས་སྲོག་འོད་ཟེར་གྱིས་བསྐུལ་བས་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་དངོས་གྲུབ་ཐམས་ཅད་དང༌། ཁྱད་པར་དུ་དཀྱིལ་འཁོར་ལྷ་ཚོགས་རྣམས་ཀྱི་བྱིན་རླབས་མཆོག་དང་ཐུན་མོང་ཡིད་ལ་ཅི་འདོད་པ་ཐམས་ཅད་དངོས་གྲུབ་ཀྱི་རྫས་ལ་དྲག་ཏུ་ཐིམ་པས་རྫས་རྣམས་འདོད་རྒུ་འབྱུང་བའི་རྒྱ་མཚོ་ཆེན་པོར་གྱུར་པར་བསམ་ལ། ཨོཾ་བཛྲ་ཀཱི་ལི་ཀཱི་ལ་ཡ༔ ཛཿཧཱུཾ་བཾ་ཧོཿ ཀཱ་ཡ་སིདྡྷི་ཨོཾ༔ ཝཱཀ་སིདྡྷི་ཨཱཿཙིཏྟ་སིདྡྷི་ཧཱུཾ༔ སརྦ་སིདྡྷི་ཧྲཱིཿ ཞེས་བཟླས་པས་རྫས་རྣམས་ལ་རབ་འོད་འབར། འབྲིང་ཁོལ། ཐ་མ་རླངས་སམ་དྲི་བྱུང་བའམ། གལ་ཏེ་དེ་ཙམ་མ་བྱུང་ནའང་ཐོར་ [51a] ཐུན་གྱི་མཐའི་སྐྱ་རེངས་ཤར་བ་དང་དངོས་གྲུབ་བླང་སྟེ། ཀ་པཱ་ལ་མཚན་ལྡན་དུ་ཁྲག་ཆང་ཨ་མྲྀ་ཏ་དང་མངར་གསུམ་སྦྱར་བ་ཨོཾ་ཨཱཿཧཱུཾ་གིས་བདུད་རྩིར་སྦར་བ་ཐོགས་ཏེ། ཧཱུཾ། འཆི་མེད་བདུད་རྩི་སྨན་གྱི་བཅུད༔ ཉོན་མོངས་གདུང་བ་སེལ་བའི་མཆོག༔ ཛ་གད་རཀྟའི་མཆོད་པ་འདི༔ དཀྱིལ་འཁོར་ལྷ་ཚོགས་རྣམས་ལ་འབུལ༔ ཞེས་ཁྲག་ཆང་མཐེབ་སྲིན་གྱིས་འཐོར་ཞིང་སོ་སོའི་མཚན་སྔགས་མཐར། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། ཞེས་བཏགས་པས་མཆོད། དངོས་གྲུབ་ཀྱི་རྫས་ཐོགས་ལ། ཧཱུཾ༔ དགོངས་ཤིག་རྡོ་རྗེ་ཕུར་པའི་ལྷ༔ རིག་འཛིན་མཁའ་འགྲོ་དམ་ཅན་ཚོགས༔ དཔང་གྱུར་ཐམས་ཅད་དགོངས་སུ་གསོལ༔ དང་པོ་བསྙེན་ཅིང་བར་དུ་བསྒྲུབ༔ བསྐྱེད་རྫོགས་གཉིས་ཀྱི་ལས་གཞུང་བསྲང་༔ སྨིན་གྲོལ་གཉིས་ཀྱིས་རྒྱུད་ཀྱང་སྦྱངས༔ ཞག་དུས་གྲངས་དང་རྟགས་ཀྱང་ཐེམས༔ དེང་སང་སྐྱ་རེངས་དང་པོ་ཤར༔ རྡོ་རྗེ་སྲིན་པོའི་ནམ་ལངས་ཉེ༔ འདོད་རྒུའི་དངོས་གྲུབ་རིན་ཆེན་གཏེར༔ ད་ནི་འབྱུང་བའི་དུས་ལ་བབ༔ རྡོ་རྗེ་ཕུར་པའི་ལྷ་ཚོགས་རྣམས༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེ་གང་འདུལ་བའི༔ སངས་རྒྱས་ཕྲིན་ལས་རྫོགས་མཛད་ནས༔ སྐུ་གསུང་ཐུགས་ཡོདནཕྲིན་ལས་ཀྱི༔ དབང་ [51b] དང་དངོས་གྲུབ་བདག་ལ་སྩོལ༔ ལྷ་དང་སྐལ་བ་མཉམ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་སརྦ་སིདྡྷི་ཕལ་ ཧོཿ ཞེས་བརྗོད་ལ་སྒྲུབ་རྟེན་གནས་གསུམ་དུ་གཏུག་ཅིང་དམ་རྫས་རྣམས་ལ་ལོངས་སྤྱད་ནས། ལྷ་དང་དངོས་གྲུབ་འོད་དུ་ཞུ་བ་བདག་གི་ཐུགས་སྲོག་ལ་ཐིམ་པས་དབྱེར་མེད་དུ་གྱུར་པར་བསམ། དེའི་ཚེ་སྒྲུབ་རྟེན་ཕུར་བུ་རྣམས་འཕར་ཞིང་འབར་བ་དང་དུ་བ་སོགས་ཀྱི་རྟགས་བྱུང་ན་ཐེ་ཚོམ་མེད་པར་ལྷ་ལ་ཕྱག་བྱས་ནས་གཡས་པས་བླངས་ཏེ་དངོས་གྲུབ་བླང་པ་ཡིན་མོད་ཀྱི། རྟགས་མཚན་མངོན་དུ་མ་བྱུང་ནའང་འདིར་རང་གི་གནས་གསུམ་དུ་གཏུག་ཅིང་རྡོ་རྗེ་གསུམ་དུ་ལྷུན་གྱིས་གྲུབ་པར་གསོལ་བ་བཏབ། སྒྲུབ་གཏོར་ལྷར་གསལ་བའང་གནས་གསུམ་དུ་རེག་ཅིང་དབང་བླངས་ནས་ལྷ་ཞུ་བའི་གཏོར་རྫས་བདུད་རྩིར་མོས་ཏེ་མྱང་བས་རྩ་ཁམས་ཐམས་ཅད་ཡེ་ཤེས་ཀྱིས་ཁྱབ་པར་བསམ། དངོས་གྲུབ་ཀྱི་རྫས་ཆ་བཞིར་བགོས་པའི་གཅིག་བླ་མ་དང༌། གཅིག་རིག་འཛིན་ལ་འབུལ། གཅིག་བདག་གིས་རོལ། གཅིག་སྒྲུབ་གྲོགས་ལ་སྟེར། དེ་ནས་ནམ་ལངས་པ་དང་རང་གཞུང་གི་རྒྱུན་གཏོར་དང་སྲུང་མའི་གཏོར་ཆོག་རྣམས་རྒྱས་པར་བྱ་ཞིང༌། དེ་ཉིན་ལྷག་ཆོག་དང་སྦྲེལ་ཏེ་སྔར་གྱི་ལྷག་མ་རྣམས་ཀྱང་ཕྱི་རོལ་དུ་བཏང་ལ་ [52a] སྨོན་ལམ་དང་བཟོད་གསོལ་བྱ། སྒྲུབ་གཏོར་ཆ་གསུམ་དུ་བགོས་པའི་ཆ་གཅིག་སྒྲུབ་ཁང་གི་འོག་ཏུ་སྒྲུབ་གཞུང་ལྟར་གཏེར་དུ་སྦ། ཆ་གཅིག་སྦྱིན་སྲེག་གི་དུས་རྫས་ལ་འབུལ། ཆ་གཅིག་གཏོར་མ་གཞན་རྣམས་དང་བསྡེབ་ནས་ཕྱིར་བསྣུར་ཏེ་ཐ་ཚིག་གི་ཆད་མདོ་བསྒྲག་ཅིང་གཏོར་ཟོར་འཕང༌། བརྟན་མ་བསྐྱངས་ལ་དཔལ་གྱི་བྲོ་བརྡུང༌། ཚེ་འགུགས་བྱ། དེ་ནས་དཀྱིལ་འཁོར་པ་ལ་གཏང་རག་གི་མཆོད་བསྟོད་རྒྱས་པར་བྱས་མཐར་རྡུལ་ཚོན་ཡིན་ན་ཡེ་ཤེས་པ་གཤེགས་སུ་གསོལ། རས་བྲིས་ཡིན་ན་བརྟན་བཞུགས་བྱ། དམ་ཚིག་པ་སྲུང་འཁོར་དང་བཅས་པ་བསྡུ་ཞིང་ཐུན་མཚམས་ཀྱི་ལྷར་ལངས་པས་རྟག་ཆད་ཀྱི་མཐའ་བསལ་ནས་བསྔོ་སྨོན་དང་ཤིས་པ་བརྗོད་པས་མཐའ་བརྒྱན། བསྙེན་མཚམས་ཀྱི་ཁོངས་དེ་གར་ཞི་བའི་སྲེགས་བླུགས་ཀྱང་བསྙེན་པའི་བཅུ་ཆའི་གྲངས་ལོངས་སུ་བསགས་དགོས་པ་ལས། དེའི་ཆོ་ག་རྒྱས་པ་ལོགས་སུ་ཤེས་ལ། འདིར་ཁ་སྐོང་འཇུག་པ་དེའི་མེ་མཆོད་སྤྲོས་པ་བསྡུ་བར་འདོད་ན། མདུན་དུ་ཞི་བའི་ཐབ་དཀྱིལ་སྤྱི་ལྟར་རམ་མེ་སྣོད་སོལ་མེས་བཀང་བས་ཀྱང་རུང༌། ཡམ་ཤིང༌། མར་ཁུ། ཏིལ་དང་ཡུངས་དཀར་མེ་ཏོག་འབྲུ་སྣ་དཀར་པོའི་ [52b] རིགས་འདུ་བྱ། རྫས་རྣམས་འབྲུ་གསུམ་ཞུ་བ་ལས་བྱུང་བའི་ཟག་མེད་ཀྱི་བདུད་རྩིར་གྱུར་པར་བསམ་ལ། ཨོཾ་ཨཱཿཧཱུཾ་ལན་བདུན་གྱིས་རློབ། མེ་ཐབ་བསང་སྦྱང༌། སྟོང་པའི་ངང་ལས་མདུན་དུ་ཧཱུཾ་ཡིག་ལས་ཞི་བའི་ཐབ་ཁུང་ཟླུམ་པོ་དཀར་པོ་མཚན་ཉིད་ཐམས་ཅད་ཡོངས་སུ་རྫོགས་པར་གསལ་གདབ། ཨགྣེ་ཛྭ་ལ་རཾ་གྱིས་མེ་དུ་བ་མེད་པར་འབར་བ་ཐབ་ཏུ་བཞག་ནས། མེའི་དབུས་སུ་དཔལ་ཆེན་རྡོ་རྗེ་གཞོན་ནུ་རང་རྩལ་སྤྲུལ་པའི་འཁོར་ཚོགས་དང་བཅས་པ་སྐད་ཅིག་གིས་སད་པར་མོས། གཙོ་འཁོར་ཐམས་ཅད་ཀྱི་བ་སྤུའི་ཁུང་བུ་ནས་འོད་ཟེར་དཀར་པོ་ཟླ་བའི་བདུད་རྩི་ལྟ་བུ་མཁའ་ཁྱབ་ཏུ་སྤྲོ་བ་དང་བསྡུ་བའི་སྒོ་ནས་ཞི་བའི་ལས་རབ་འབྱམས་བསྒྲུབ་པར་བསམ་ལ། རྩ་སྔགས་འབྲུ་བཅུ་བཞི་པའི་ཤམ་དུ། ཛྭ་ལ་རཾ་སརྦ་ཀརྨ་ཀུ་རུ་ཧོཿ ཞེས་བཏགས་པ་ཁོ་ནས་བརྒྱ་སྟོང་སོགས་འབུལ་ཞིང༌། མཚམས་སུ། རྣལ་འབྱོར་པ་བདག་གི་ནད་གདོན་སྡིག་སྒྲིབ་སྔགས་ཀྱི་ལྷག་ཆད་ལ་སོགས་པ་མི་མཐུན་པའི་ཉེས་པ་ཐམས་ཅད་ཤཱིནྟཾ་ཀུ་རུ་སྭཱ་ཧཱ། ཞེས་སྤེལ། མཐར་རླུང་ནང་དུ་འཇུག་པ་དང་ལྷན་ཅིག་མེ་ལྷ་རང་གི་སྙིང་གར་བསྡུ། ཚུལ་དེ་ལྟ་བུས་ཁ་སྐོང་གྲངས་རྫོགས་པ་ན། རྒྱལ་ཐོ་ལ་མཆོད་བསྟོད་སྔར་བཞིན་ཕུལ་ནས་གཤེགས་སུ་གསོལ་ལ་ཐོ་ [53a] འགྲོལ། དེ་ནས་སྒྲུབ་ཁང་དུ་ཉེ་འཁོར་མཆེད་གྲོགས་སོགས་དམ་ལྡན་དང་འཕྲད་དེ་རིམ་གྱིས་ཕྱི་རོལ་དུ་བག་གསེང་ཞིང༌། ཞག་ཁ་ཡར་ཐག་རིང་དུ་མི་འགྲོ་བར་གནས་སྲུང་བ་བཅས་ཀྱིས་ལེགས་པར་གྲུབ་བོ། །འདི་ནི་ནང་སྤྲོས་བསྡུས་དཔའ་བོ་གཅིག་སྒྲུབ་ཀྱི་ཚུལ་ཉིད་ཡིན་ནོ། །གཞན་དུ་གསང་བ་སྤྲོས་མེད་ཏིང་ངེ་འཛིན་སེམས་ཀྱི་སྒྲུབ་པ་ནི། བསྙེན་པ་བདག་བསྐྱེད་ལུས་དཀྱིལ་ལ་བརྟེན་པ་ཡིན་པས་སྤྲོས་པ་གཞན་མི་དགོས་ཤིང༌། བསྙེན་སྒྲུབ་སྦྲེལ་མར་འདོད་ན་རས་བྲིས་སམ་ཚོམ་བུའི་དཀྱིལ་འཁོར་གྱི་དབུས་སུ་གཙོ་ཕུར་ཙམ་བཀོད། མཆོད་གཏོར་སོགས་གང་འབྱོར་བཤམས། སྔོན་རྗེས་ཀྱི་ལས་རིམ་མདོར་བསྡུས་ལས་བྱང་གིས་ཁོག་ཕུབ་ལ། ཕྲིན་ལས་རྒྱུན་གྱི་རྣལ་འབྱོར་བཞིན་ཉམས་སུ་ལེན། སྤྲོས་བསྡུས་སྤྲོས་མེད་གང་གི་སྐབས་སུའང་བསྙེན་སྒྲུབ་ཀྱི་མཐར་ལས་བཞིའི་དམིགས་བཟླས་ཁྱད་པར་དུ་བྱ་བར་འདོད་ནའང་སྤྱི་ལྟར་སྦྱོར་ཞིང༌། རྗེས་ཀྱི་བྱ་བ་ནི་གོང་གི་འགྲོས་ཀྱིས་ཤེས་སོ། །འདི་དག་ནི་བདག་དོན་བྱང་ཆུབ་ནར་མའི་སྒྲུབ་པ་གང་ཟག་གཅིག་གིས་ཉམས་སུ་ལེན་པར་བྱ་བ་ཁོ་ན་སྟེ། གཞན་དུ་ཕྱི་ལྟར་སྤྲོས་བཅས་ཚོམ་བུ་ཚོགས་སུ་སྒྲུབ་པའི་ཚུལ་ནི་དེ་ཉིད་ཀྱི་ཁོག་ [53b] དབུབ་ལོགས་སུ་བཤད་པ་ལྟར་རོ། །དེ་རྣམས་ནི་སྟོད་ལས་བྱང་ཆུབ་སྒྲུབ་པའི་རིམ་པའོ། །ཡང་བདག་གཞན་ཐུན་མོང་དུ་བྱང་ཆུབ་སྒྲུབ་ཅིང་བར་ཆད་འདུལ་ཕྱིར་སྟོད་ལས་སྨད་ལས་སྦྲེལ་ནས་བསྙེན་སྒྲུབ་ལས་གསུམ་ཡོངས་རྫོགས་ཀྱི་ལུགས་དང༌། གདུག་པ་ཅན་བསྒྲལ་ཕྱིར་གློ་བུར་ཅོག་རྡུང་རལ་གྲི་ཕྱུངས་རྡེག་ཏུ་སྒྲུབ་པ་དང༌། ཤིན་ཏུ་བསྡུས་པ་བསྙེན་སྒྲུབ་ཆིག་ཆོད་དུ་བྱེད་པར་འདོད་ནའང་མན་ངག་གི་ངེས་པ་ཁོངས་སུ་ཆུད་པས་བློའི་རིམ་པ་དང་འཚམས་པར་ཉམས་སུ་བླང་བར་གཅེས་སོ། །དེ་དག་གིས་ནི་བསྙེན་ཐབས་ཀྱི་ལག་ལེན་དམར་ཁྲིད་བྱེ་བྲག་ཏུ་བཤད་པ་མདོ་ཙམ་བསྟན་ཟིན་ཏོ། །རབ་འབྱམས་རྒྱལ་ཀུན་ཕྲིན་ལས་ནུས་པའི་སྟོབས། །འབར་བའི་ཕྱག་རྒྱར་ཡོངས་སྣང་དཀྱིལ་འཁོར་ཆེ། །བསྙེན་ཅིང་སྒྲུབ་པའི་མན་ངག་ལག་ལེན་ཁྲིགས། །དངོས་གྲུབ་རྒྱ་མཚོའི་དགའ་སྟོན་བླ་ན་མེད། །འདི་བརྗོད་དགེ་བས་འཁོར་དང་འདས་པའི་ཆོས། །ཐལ་འབྱིན་དགོངས་པས་སྐུ་གསུམ་རོ་མཉམ་པ། །དཔལ་ཆེན་ཁྲག་འཐུང་ཚོམ་བུར་རབ་སྨིན་ཅིང༌། །ལམ་བཟང་འདིས་ཀྱང་ས་ཆེན་ཀུན་ཁྱབ་ཤོག །དེ་ལྟར་དཔལ་རྡོ་རྗེ་ཕུར་བུ་བདུདའཇོམས་གནམ་ལྕགས་སྤུ་གྲིའི་སྟོད་ལས་བྱང་ཆུབ་སྒྲུབ་པའི་མན་ངག་གསལ་བར་བྱས་པ་དངོས་གྲུབ་རྒྱ་མཚོའི་ [54a] དགའ་སྟོན་ཅེས་བྱ་བ་འདི་ནི། ལྷག་པའི་ལྷ་འདི་ཉིད་ལས་དངོས་གྲུབ་བརྙེས་པ་བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུའི་སྡེའི་གསུང་གིས་བསྐུལ་བ་བཞིན་རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས། རྩ་བའི་གཞུང་གི་དགོངས་དོན་ལ་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་མན་ངག་ལེགས་བཤད་ཀྱིས་རྣམ་པར་སྤྲས་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་ཐམ་པའི་ཐོག་ཏུ་སོན་པ་དཔལ་གདོང་གི་ལོ་ས་ག་ཉ་བའི་ཤེས་རབ་ཀྱི་ཆའི་རྫོགས་པ་དང་པོ་ཆུ་ཤེལ་གྱི་དབང་པོ་གྲོ་བཞིན་གྱི་དགའ་མ་དང་རྩེ་བའི་འགྲུབ་སྦྱོར་བཟང་པོ་ལ། ཨེ་ཝཾ་བདེ་ཆེན་ཆོས་འཁོར་གླིང་གི་ཉེ་འདབས་ཕུན་ཚོགས་དགའ་ཚལ་གྱི་བསྟི་གནས་སུ་ལེགས་པར་གྲུབ་པར་བགྱིས་པ་སྟེ། འདིས་ཀྱང་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་པ་དང༌། འགྲོ་བ་ཐམས་ཅད་བཅོམ་ལྡན་འདས་དཔལ་ཧེ་རུ་ཀའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱ་མངྒལཾ།། །།


Retrieved from "https://dudjom.tsadra.org/index.php?title=DJYD-KABUM-11-DA-004&oldid=18398"
Dudjom Tersar
Collected Works of the Masters
A Tsadra Foundation initiative designed to house the writings and revelations of the masters of the Dudjom lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Bodhicitta
Khyentse Lineage
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Dudjom Tersar Project, a Tsadra Foundation initiative designed to house the writings and revelations of the masters of the Dudjom lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.