DJYD-KABUM-11-DA-006

Previous Text Back to Volume PageNext Text

Wylie title	dpal rdo rje phur bu bdud 'joms gnam lcags spu gri'i thun mong gi rdzogs rim rtsa rlung thig le'i man ngag snying por dril ba bde chen 'dod 'jo'i dga' ston
Location	bdud 'joms rin po che bka' 'bum Volume 11, Text 6, Pages 229-278 (Folios 1a1 to 25b2)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Dpal rdo rje phur bu bdud 'joms gnam lcags spu gri'i thun mong gi rdzogs rim rtsa rlung thig le'i man ngag snying por dril ba bde chen 'dod 'jo'i dga' ston. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 11: 229-278. Kalimpong: Dupjung Lama, 1979-1985.
Side notes	Recto: rtsa rlung   Verso: gnam lcags spu gri
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Completion Stage - rdzogs rim
Cycle	དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲི་ (dpal rdo rje phur bu bdud 'joms gnam lcags spu gri)
Parent Cycle	ཐུགས་སྒྲུབ་གསང་བ་རྒྱ་ཅན་ (thugs sgrub gsang ba rgya can)
Deity	rdo rje phur pa
Colophon	།དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ཐུན་མོང་གི་རྫོགས་རིམ་རྩ་རླུང་ཐིག་ལེའི་མན་ངག་སྙིང་པོར་དྲིལ་བ་བདེ་ཆེན་འདོད་འཇོའི་དགའ་སྟོན་ཅེས་བྱ་བ་འདི་ནི། བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུ་དོན་ཐམས་ཅད་གྲུབ་པའི་སྡེའི་གསུང་གིས་ཡང་དང་ཡང་དུ་བསྐུལ་བ་ལས། སྐལ་བ་ཅན་གྱི་གང་ཟག་རྣམས་ལ་ཕན་པ་ཆེན་པོའི་སྒོར་འགྱུར་བར་ཤེས་ནས། སྔགས་ཀྱི་བནྡྷེ་སྙོམས་ལས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་རྩ་གཉིས་པའི་ཐོག་ཏུ་སོན་པ་ན་ཚོད་ལྡན་གྱི་ལོ་དབོ་ཉ་བའི་ཤེས་རབ་ཀྱི་ཆའི་དགའ་བ་དང་པོ་ལ་མཁན་ལྗོངས་ཕུན་ཚོགས་དགའ་ཚལ་གྱི་བསྟི་གནས་སུ་གྲུབ་པར་བགྱིས་པ་སྟེ། འདིས་ཀྱང་འགྲོ་བ་ཐམས་ཅད་ཟུང་འཇུག་བདེ་ཆེན་རྡོ་རྗེ་གཞོན་ནུའི་གོ་འཕང་མཆོག་ལ་མྱུར་དུ་རེག་པའི་རྒྱུར་གྱུར་ཅིག། །། སརྦ་དཱ་མངྒ་ལཾ། །ཛ་ཡནྟུ།
	de ltar dpal rdo rje phur bu bdud 'joms gnam lcags spu gri'i thun mong gi rdzogs rim rtsa rlung thig le'i man ngag snying por dril ba bde chen 'dod 'jo'i dga' ston ces bya ba 'di ni/___bka' babs kyi chos bdag sprul pa'i sku 'jigs med chos dbyings nor bu don thams cad grub pa'i sde'i gsung gis yang dang yang du bskul ba las/___skal ba can gyi gang zag rnams la phan pa chen po'i sgor 'gyur bar shes nas/___sngags kyi ban+d+he snyoms las pa 'jigs bral ye shes rdo rjes rang lo sum cu rtsa gnyis pa'i thog tu son pa na tshod ldan gyi lo dbo nya ba'i shes rab kyi cha'i dga' ba dang po la mkhan ljongs phun tshogs dga' tshal gyi bsti gnas su grub par bgyis pa ste/___'dis kyang 'gro ba thams cad zung 'jug bde chen rdo rje gzhon nu'i go 'phang mchog la myur du reg pa'i rgyur gyur cig/___//sarba dA mang+ga laM/___/dza yan+tu/

Tibetan Text

[edit]

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ཐུན་མོང་གི་རྫོགས་རིམ་རྩ་རླུང་ཐིག་ལེའི་མན་ངག་སྙིང་པོར་དྲིལ་བ་བདེ་ཆེན་འདོད་འཇོའི་དགའ་སྟོན་ཅེས་བྱ་བ་བཞུགས་སོ། །

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ཐུན་མོང་གི་རྫོགས་རིམ་རྩ་རླུང་ཐིག་ལེའི་མན་ངག་སྙིང་པོར་དྲིལ་བ་བདེ་ཆེན་འདོད་འཇོའི་དགའ་སྟོན་ཅེས་བྱ་བ། ཁྱབ་བདག་བླ་མ་ཟུང་འཇུག་རྡོ་རྗེ་གཞོན་ནུའི་ངོ་བོ་ཉིད་ལ་ཕྱག་འཚལ་ལོ། །རྣམ་པ་ཀུན་གྱི་མཆོག་དང་རབ་ལྡན་ཨེ་དབྱིངས་འཁོར་ལོ་རྒྱས་འདེབས་མཁར། །མི་འགྱུར་ལྷན་སྐྱེས་སྙིང་རྗེའི་ཡེ་ཤེས་ཝཾ་ཡིག་རྡོ་རྗེ་གཞོན་ནུའི་དཔལ། །འདུ་འབྲལ་མི་མངའ་རྟག་ཏུ་རོལ་ལས་དངོས་ཀུན་བདེ་བ་ཆེར་སྡོམ་པ། །སེམས་ཉིད་གདོད་མའི་ཧེ་རུ་ཀ་དེ་བླ་མའི་ངོ་བོར་རྒྱལ་གྱུར་ཅིག །གསང་ཆེན་མྱུར་བདེའི་ལམ་གྱི་ཡང་བཅུད་ནི། །སྲོག་རྩོལ་རྒྱུ་བ་ [2a] དྷཱུ་ཏིར་བཅིངས་པ་ལས། །འཕོ་བ་བཀག་པའི་མན་ངག་ཟབ་མོའི་ཚུལ། །བདེ་ཆེན་འདོད་པ་འཇོ་བའི་དགའ་སྟོན་སྤྲོ། །དེ་ལ་འདིར་ཕུར་བུ་ཐལ་འབྱིན་གྱི་དགོངས་པ་རྣམ་པ་བཞི་ལས་བྱང་ཆུབ་སེམས་ཀྱི་ཕུར་བུ་ཡུམ་གྱི་མཁའ་ལ་གདབ་པའི་རིམ་པ་རྩ་རླུང་ཐིག་ལེའི་རྣལ་འབྱོར་གྱི་མན་ངག་ཟབ་མོ་སྟོན་པ་ལ་གཉིས་ཏེ། ཟབ་ལམ་བསྒོམ་པའི་ལམ་གྱི་གཞི་འདིང་བ་དང༌། ཟབ་ལམ་བསྒོམ་པ་དངོས་ལ་འཇུག་པའོ། །དང་པོ་ལ་གཉིས། སྤྱི་དང༌། ཁྱད་པར་རོ། །དང་པོ་ནི། དེ་ཡང་རྟེན་གྱི་གང་ཟག་ཐུན་མོང་བློ་སྦྱོང་གིས་རང་རྒྱུད་དུལ་ཞིང་ཐུན་མིན་བསགས་སྦྱོང་གིས་ལམ་གྱི་གཞི་ཚུགས་པར་བྱས་ནས། [2b] དངོས་གཞི་སྨིན་བྱེད་ཟབ་མོས་རྒྱུད་སྨིན་པར་བྱས་ཏེ་བསྐྱེད་རིམ་ལ་གསལ་དག་བརྟན་པ་ཚགས་སུ་ཚུད་ཅིང་ཁྲེགས་ཆོད་ཀྱི་གནས་ལུགས་ཕྱོགས་ཙམ་རྟོགས་པ་ཞིག་གིས་ལམ་གྱི་ཆ་རྐྱེན་དུ་སྦྱོར་བ་སྟེ། དེ་རྣམས་ནི་སོ་སོའི་རིམ་པ་བཞིན་ཤེས་པར་བྱའོ། །གཉིས་པ་ཁྱད་པར་མཐུན་པའི་རྐྱེན་གྱིས་གཞི་བཟུང་བ་ལ་གསུམ། ཕྱི་གནས་ཀྱི། ནང་ཟས་ཀྱི། གསང་བ་གྲོགས་ཀྱི་མཚན་ཉིད་དོ། །དང་པོ་ནི། གངས་ཁྲོད་དང་རི་རྩེ་ཆུ་ངོགས་སོགས་མཐོ་ལ་བསིལ་བ་དང༌། གནམ་ས་ཆོས་འབྱུང་གི་དབྱིབས་སུ་གྲུབ་པ་ཉིད་དམིགས་ཀྱིས་བསྔགས། མདོར་ན་དབེན་ཅིང་བྱིན་ཆགས་པ། མཐུན་རྐྱེན་འཛོམ་ཞིང་བཀྲ་ཤིས་ཉམས་དགའ་བའི་ས་ཕྱོགས་སུ་གནས་བཅའོ། །གཉིས་པ་ནི། ཟབ་མོའི་ལམ་འདི་ཆེ་བ་རྒྱལ་པོ་ལྟ་བུའི་ཆོས་ཡིན་པས། ཚོགས་འཁོར་གྱི་ཡོ་བྱད། བཅུད་ལྡན་གྱི་ཁ་ཟས། འབོལ་འཇམ་གྱི་མལ་སྟན་སོགས་བསམ་གཏན་གྱི་གྲོགས་སུ་འགྲོ་བ་རྣམས་བསགས་ཤིང༌། དངོས་གཞིའི་སྐབས་སུ་མཐུན་རྐྱེན་གྱིས་བྲེལ་མི་དགོས་པར་བྱའོ། །གསུམ་པ་ནི། ཟབ་ལམ་ལ་མོས་པའི་རིགས་བློ་ཆོས་ཕྱོགས་སུ་སོང་ཞིང་གསང་བ་ཐུབ་བ་དང༌། རང་དང་ལྟ་སྤྱོད་མཐུན་ཅིང་དམ་ཚིག་ལ་སེལ་བསླད་མེད་པའི་གྲོགས་ཡིད་དུ་འོང་བ་བརྟེན་ནོ། །གཉིས་པ་ཟབ་ལམ་སྒོམ་པ་དངོས་གཞིའི་ཁྲིད་ལ་གཉིས། རྟེན་རྡོ་རྗེ་ལུས་ཀྱི་གནས་ཚུལ་ [3a] སྤྱིར་བཤད། བརྟེན་པ་རྩ་རླུང་ཐིག་ལེའི་རྣལ་འབྱོར་བྱེ་བྲག་ཏུ་བཤད་པའོ། །དང་པོ་ནི། རྡོ་རྗེ་ཕུང་པོའི་གྲོང་ཁྱེར་གྱི༔ རྩ་རླུང་ཐིག་ལེ་དག་སྦྱོར་ཕྱིར༔ རྡོ་རྗེ་ལུས་ཀྱི་རྣལ་འབྱོར་བསྟན༔ ཅེས་གསུངས་ཏེ། དེའང་རྟེན་རྡོ་རྗེའི་ལུས་དང་བརྟེན་པ་རྩ་རླུང་ཐིག་ལེའི་གནད་འཆིང་བ་རྫོགས་པ་ཨ་ནུ་ཡོ་ག་ཞེས་རྗེས་སུ་རྣལ་འབྱོར་གྱི་ལུང་དང་འབྲེལ་བའི་ལམ་ཟབ་མོའི་བསྐྱེད་རིམ་སྟེ། ཐོག་མར་རྩ་རླུང་ཐིག་ལེའི་ཁམས་རྣམས་གྲུབ་ཙམ་ཉིད་ནས་རང་བྱུང་སྣོད་བཅུད་དཀྱིལ་འཁོར་གྱི་རང་བཞིན་ཤུགས་ཀྱིས་གྲུབ་པས། རྣམ་པར་རྟོག་པས་གསར་དུ་སྒྲོ་བཏགས་ནས་བཅོས་མར་བྱས་པ་མ་ཡིན་པར་ལྷུན་གྲུབ་ལུས་ཀྱི་དཀྱིལ་འཁོར་ཆེན་པོ་ཉིད་དུ་ཡེ་ནས་རྫོགས་པས་ཁྱད་པར་དུ་འཕགས་ཏེ། བང་མཛོད་འཕྲུལ་ལྡེ་ལས། རྫོགས་པ་ཨ་ནུ་ཡོ་ག་ནི། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དཀྱིལ་འཁོར་དུ། །མ་བསྐྱེད་རྫོགས་པའི་ཚུལ་དུ་འདོད། །ཅེས་དང༌། དྲིལ་བུ་པས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་གསུངས་པ་ལྟར་རོ། །དེས་ན་མ་བཅོས་རང་བྱུང་གི་དཀྱིལ་འཁོར་དེ་ཉིད་ཇི་ལྟར་ན། འབྱུང་བཞི་རིམ་བརྩེགས་ཆོས་འབྱུང་དང་བཅས་པ་ནི་ཐོག་མར་ཕ་མའི་འདུ་འཕྲོད་ཀྱི་རྐྱེན་ལས་མངལ་ [3b] དུ་འབྱུང་བཞིའི་ཚོགས་པ་ལ་རླུང་སེམས་ཀྱི་རྟོག་པས་བདག་ཏུ་བཟུང་བའི་རྟེན་ཨེ་དབྱིངས་ཡུམ་གྱི་བྷ་ག་རུ། གཟུགས་ཀྱི་ཕུང་པོ་རགས་པར་གྲུབ་པ་གཞལ་མེད་ཀྱི་ཁང་པ་ཆེན་པོ་སྟེ། དེའང་ལུས་འདོམ་གང་གྲུ་བཞི་གཞལ་ཡས་ཁང༌། ཡན་ལག་བཞི་ཀ་བ་བཞི། མིག་ཉི་ཟླའི་སྐར་ཁུང༌། རྣ་བ། སྣ། ཁ། འོག་སྒོ་བཞི་པོ་སྒོ་བཞི། ཤ་དཀྱིལ་འཁོར་གྱི་གཞི། ཁྲག་མཚོ་རྫིང༌། དྲོད་མེ་དཔུང༌། དབུགས་འཇའ་འོད། སྙིང་ནོར་བུའམ་ཙིཏྟའི་ཕོང་ཏོ། རྒྱུ་མ་དྲྭ་བ་དྲྭ་ཕྱེད། སོར་མོ་རྣམས་ཟླ་ཕྱེད་མེ་ལོང༌། སོ་མདའ་ཡབ། ལྕེ་པུ་ཤུ། བུ་ག་བརྒྱད་དུར་ཁྲོད། སྐྲ་དང་ལྤགས་པ་རུས་ཚིག་སྲུང་འཁོར་སོགས་རང་བྱུང་གི་རྒྱན་དང་བཀོད་པ་གཟི་བརྗིད་ཀྱི་དཔལ་དུ་འབར་བའི་རྟེན་གཞལ་ཡས་ཁང་དུ་ལྷུན་གྱིས་གྲུབ་པ་དང༌། ནང་གི་རྩ་གཡས་རོ་མ་ཐབས་དཔའ་བོ། གཡོན་རྐྱང་མ་ཤེས་རབ་དཔའ་མོ། དབུ་མ་ཧེ་རུ་ཀ་སྤྱི་དཔལ་ཆེན་པོ། འཁོར་ལོའི་གནས་ལྔའི་སྤྱི་བོ་སངས་རྒྱས། མགྲིན་པ་པདྨ། སྙིང་ག་རྡོ་རྗེ། ལྟེ་བ་རིན་ཆེན། གསང་བ་ལས་ཏེ་རིགས་མཆོག་རྣམ་པ་ལྔ། དེ་དག་གི་རྩ་འདབ་ཐམས་ཅད་རིགས་ཆུང་རྣམས་ཀྱི་ཚོམ་བུའི་དཀྱིལ་འཁོར་ཡབ་ཡུམ་བརྟེན་པ་ལྷའི་དཀྱིལ་འཁོར་དུ་ལྷུན་གྱིས་ [4a] གྲུབ་པ་དང༌། ཕྱི་ལུས་ཀྱི་ཕུང་པོ་དམ་ཚིག་སེམས་དཔའ། ནང་དྭངས་མའི་ཐིག་ལེ་ཏིང་འཛིན་སེམས་དཔའ། དེའི་ཁྱབ་བྱེད་རིག་པ་ཡེ་ཤེས་སེམས་དཔའ་གསུམ་པོ་གདོད་ནས་དབྱེར་མེད་དུ་གྲུབ་པ་ཡིན་པ་ལ་ཡིན་པར་ཤེས་པའི་ང་རྒྱལ་གྱིས། རྫོགས་བྱེད་ཡན་ལག་སྒོ་ལྔའི་ཡུལ་དུ་འདོད་ཡོན་གྱི་ལོངས་སྤྱོད་ཇི་ལྟར་སྣང་བ་ཐམས་ཅད་བདེ་བ་ཆེན་པོའི་མཆོད་པའི་སྤྲིན་ཕུང་དུ་ཤེས་པ་ལ་སྤང་བླང་མེད་པར་རོལ་པ་དང༌། གཞན་གྱིས་ཆེ་བའི་ཡོན་ཏན་བསྒྲགས་ནས་བསྔགས་པ་ཐམས་ཅད་བསྟོད་པའི་གླུ་དང༌། བསྒུལ་བསྐྱོད་བྱེད་པ་ཕྱག་རྒྱ་དང༌། འགྲོ་འདུག་ཐམས་ཅད་རྡོ་རྗེའི་གར་བསྒྱུར་བ་དང༌། སྲོག་དང་རྩོལ་བའི་རླུང་འབྱུང་འཇུག་གནས་གསུམ་པོ་རྡོ་རྗེའི་བཟླས་པར་ངང་གིས་གྲུབ་པས་ཉིན་མཚན་རྟག་ཏུ་རྒྱུན་མི་འཆད་པ་དང༌། བཟའ་བཅའ་བཏུང་བའི་རིགས་གྱུར་ནང་གི་གཏོར་མ་དང་ཚོགས་འཁོར་ལ་རྟག་ཏུ་རོལ་པ་དང༌། སྙོམས་པར་འཇུག་པའི་ཚེ་གནས་བཞིར་དགའ་བཞིའི་བདེ་བས་རྒྱུད་ཚིམས་པའི་འོད་གསལ་ཡེ་ཤེས་ཀྱི་ལྷ་བཅུ་དྲུག་ཕྱེད་ཕྱེད་ཀྱི་ཐིག་ལེ་ལས་རིམ་པར་བཞེངས་ཏེ་ལྷན་ཅིག་སྐྱེས་པ་མི་ཤིགས་པའི་ནཱ་ད་སྟོང་བཞིའི་མཐར་ཐུག་པར་ཡལ་བས་རྣམ་བཅས་ཀྱི་བསྐྱེད་རིམ་ཡན་ལག་དང་བཅས་པ་དེ་དག་བསམ་གྱིས་མི་ཁྱབ་ [4b] པའི་རྫོགས་རིམ་དུ་ཞུགས། སྟོང་ཉིད་དེའི་ངང་ལས་གཟུགས་སྣང་སྒྲ་གྲགས་འགྱུ་དྲན་གྱི་རྟོག་ཚོགས་ཀུན་ཀྱང་སྐུ་གསུང་ཐུགས་རྡོ་རྗེ་གསུམ་གྱི་མཆོག་ཏུ་དབྱེར་མེད་པར་ལྷུན་གྱིས་གྲུབ་པའོ། །དེ་ལྟར་ཡང་ཀུན་འདུས་རིག་པའི་མདོ་ལས། ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །ཞེས་སོགས་འབྱུང་བ་ལྟར་རོ། །གཉིས་པ་བརྟེན་པ་རྩ་རླུང་ཐིག་ལེའི་རྣལ་འབྱོར་བྱེ་བྲག་ཏུ་བཤད་པ་ལ་གཉིས། རྩ་བའི་ཉམས་ལེན་དངོས་དང༌། དེའི་གེགས་སེལ་བོགས་དབྱུང་ངོ༌། །དང་པོ་ལ་གསུམ། བཀོད་པ་རྩ། གཡོ་བ་རླུང༌། ཐིག་ལེ་བྱང་ཆུབ་ཀྱི་སེམས་སྦྱོང་བའོ། །དང་པོ་ལའང༌། ཕྱི་ལུས་ཀྱི་སྟོང་ར་དང༌། ནང་རྩའི་སྟོང་ར་སྒོམ་པ་གཉིས་ཀྱི། དང་པོ་ནི། ཐོག་མར་རྣམ་སྣང་ཆོས་བདུན་གྱི༔ ལུས་གནད་བཅའ་བ་ཀུན་ལ་ཤིས༔ རང་ཉིད་རྡོ་རྗེ་གཞོན་ནུར་གསལ༔ ཞེས་པས། དེའང་ལུས་གྲོང་ཁྱེར། རླུང་རྟ་ལོང་བ། རྣམ་ཤེས་མི་ཞ་བོ་འདྲ་བར་ཁ་ལོ་སྒྱུར་བས་བྱེད་པ་མ་འཆིངས་ན་མིས་ཞོན་པའི་རྟ་དེ་སྲང་བར་ནས་ཕྱིར་ཤོར་བ་དང་འདྲ་ཞིང༌། འཆིང་ན་སྲང་སྒོ་ཁེགས་ནས་མི་རྟ་ནང་དུ་ཚུད་དེ་འགྲོར་མི་ཐུབ་པ་དང་འདྲ་བས་རྣམ་རྟོག་གི་བཞོན་པ་རླུང་འཆིང་བ་ལ། ཐོག་མར་ [5a] ལུས་ཀྱི་གནད་འཆིང་བ་གལ་ཆེ་བས་ན། འབོལ་ཞིང་བདེ་བའི་སྟན་ལ་ལུས་གནད་རྣམ་སྣང་ཆོས་བདུན་བཅའ་སྟེ། རྐང་གཡོན་ནང་དང་གཡས་ཕྱི་ནས་བསྡམས་པའི་རྡོ་རྗེའི་སྐྱིལ་ཀྲུང་བྱ། ལག་གཉིས་རྡོ་རྗེའི་ཁུ་ཚུར་བརླ་སྟེང་དུ་བཞག །རྒལ་ཚིགས་མདའ་ལྟར་བསྲང༌། དཔུང་པ་རྒོད་གཤོག་བཞིན་བརྐྱང༌། མགྲིན་པ་གཞུ་མཆོག་ལྟར་བཀུག །ལྕེ་ཡ་རྐན་ལ་སྦྱར། མིག་སྣ་རྩེར་ཕབ་ནས་མི་གཡོ་བར་གནས་པར་བྱའོ། །དེ་ལྟར་ལུས་གནད་ལས་མ་འགྱུར་བས་རླུང་རང་ལུགས་སུ་རྒྱུ། རླུང་དལ་བས་སེམས་རྟོག་ཉུང༌། དེའང་ལུས་ཀྱི་ཕྱི་གྲིམ། ནང་ལྷོད་པས་སྟེང་འོག་གི་རླུང་ཐམས་ཅད་ཆུན། ཟག་མེད་ཀྱི་དྲོད་བསྐྱེད་པར་བྱེད་དོ། །དེ་ནས་སེམས་ཀྱི་གནད་ལ་རང་ལུས་ཐ་མལ་དུ་འཛིན་པས་མཚོན་སྣོད་བཅུད་ཀྱི་དངོས་པོར་སྣང་བའི་ཆོས་ཐམས་ཅད་དབྱིངས་སུ་ཡལ་ཏེ་རྣམ་པར་མི་རྟོག་པའི་ངང་ལས། ངོ་བོ་བདེ་སྟོང་གི་རང་བཞིན་རྣམ་པ་རང་ལུས་ཡི་དམ་ལྷའི་སྐུར་གྱུར་པ་ནི། འཁོར་འདས་ཡོངས་ཀྱི་ཁྱབ་བདག་དཔལ་ཆེན་རྡོ་རྗེ་གཞོན་ནུ་མཐིང་ནག་ཞལ་གཅིག་ཕྱག་གཉིས་པ། གཡས་གནམ་ལྕགས་ཀྱི་རྡོ་རྗེ་རྩེ་དགུ་པ་གདེངས་ཤིང༌། གཡོན་དྲག་པོའི་ཕུར་བུ་འདྲིལ་བ། ཞབས་གཉིས་པདྨ་ [5b] ཉི་ཟླ་རཱུ་དྲ་ཕོ་མོའི་གདན་ལ་གྱད་ཀྱི་འདོར་སྟབས་སུ་བཞུགས་པ། ཡུམ་འཁོར་ལོ་རྒྱས་འདེབས་མ་མཐིང་སྐྱ་ཨུཏྤལ་དུང་ཁྲག་འཛིན་པ་དང་མཉམ་པར་སྦྱོར་བ། དཔལ་དང་དུར་ཁྲོད་ཀྱི་ཆས་རྣམས་རྫོགས་ཤིང༌། གཏུམ་རྔམས་སྒེག་ཅིང་དཔའ་བའི་ལང་ཚོ་ཅན། ཡེ་ཤེས་ཀྱི་མེ་དཔུང་ཆེན་པོའི་ཀློང་དུ་རྣམ་འགྱུར་དྭངས་གསལ་རྙོགས་པ་མེད་པ་ཆུ་ཟླའི་རོལ་གར་དང༌། སྒྲིབ་ཐོགས་བྲལ་བ་ནམ་མཁར་འཇའ་ཚོན་ཤར་བ་ལྟ་བུའི་སྐུར་གསལ་བ་ལ་སེམས་གཏད་དེ་གསལ་བརྟན་གྱི་ངེས་པ་བརྟན་པོ་མ་རྙེད་ཀྱི་བར་དུ་བསྒོམ་མོ། །གཉིས་པ་ནང་རྩའི་སྟོང་ར་བསྒོམ་པ་ནི། མ་དག་སྙིགས་མའི་རྩ་སྦྱོང་ཕྱིར༔ དྭངས་མ་སྐུ་གསུམ་རྩ་བསྒོམ་བྱ༔ ཞེས་པས། དེ་ལྟར་གསལ་བའི་ལུས་ཀྱི་དབུས་དྲང་པོར་རྩ་དབུ་མ་ཡར་སྣ་སྤྱི་གཙུག་ཚངས་བུག་ལ་རེག་ཅིང༌། མར་སྣ་ལྟེ་འོག་སོར་བཞིའི་ཐད་དུ་གནས་པ། ཕྱི་དཀར་ལ་ནང་དམར་ཞིང་བར་མཐིང་ཞུན་གྱི་མདངས་འོད་འཚེར་བ། དེའང་ཆུ་ཤིང་གི་སྡོང་པོ་ལྟར་དྲང་བ། ཏིལ་གྱི་མར་མེ་ལྟར་གསལ་བ། རྒྱ་སྐྱེགས་ཀྱི་ཁུ་བ་ལྟར་སྣུམ་པ། པདྨའི་འདབ་མ་ལྟར་སྲབ་པ་སྟེ། མཚན་ཉིད་བཞི་ལྡན་དུ་གསལ་གདབ། དང་པོ་ཤིན་ཏུ་ཕྲ་བ་ལ་སེམས་བཟུང༌། དེ་ནས་རིམ་གྱིས་རྟ་རྔ་ཙམ་དང༌། གྲོ་སོག་ཙམ། མདའ་སྨྱུག །རྦ་ [6a] ལྕག །རང་ལུས། ཁང་ཁྱིམ། ཡུལ་ཁམས་སོགས་ནས་མཐར་ནམ་མཁས་གར་ཁྱབ་དབུ་མས་ཁྱབ། དབུ་མ་དང་སེམས་ཉིད་ནམ་མཁའ་གསུམ་དབྱེར་མེད་ཀྱི་ངང་ལ་བཞག །སླར་ཚུར་འདུས་ཇེ་ཕྲ་ལ་སོང་སྟེ་རྦ་ལྕག་འབྲིང་པོ་ཙམ་དུ་གསལ། དེའི་གཡས་སུ་རོ་མ་དམར་མོ་དང༌། གཡོན་དུ་རྐྱང་མ་དཀར་མོ་གཉིས་དབུ་མ་ལས་བཞི་འགྱུར་གྱིས་ཕྲ་བ། ཡར་རྩེ་གུག་པ་རྣ་ལྟག་ནས་སྣ་བུག་གཉིས་ལ་ཟུག་ཅིང༌། དེ་གཉིས་དབུ་མ་དང་ལྷན་ཅིག་སུམ་གཤིབས་སུ་སོང་བའི་མར་སྣ་གཉིས་དབུ་མ་ལས་ཅུང་ཟད་རིང་བ་མར་སོང་སྟེ་ཡི་གེ་ཆའི་འཕོང་དབྱིབས་ཀྱིས་དབུ་མའི་ནང་དུ་ཚུད་པ། བུད་མེད་ལ་རོ་རྐྱང་གཉིས་གོ་ལྡོག་ཏུ་གནས་པར་བཤད། དབུ་མ་ཉིད་ལས་འཁོར་ལོའི་རྩ་འདབ་རྣམས་སྦུ་གུ་སང་ངེ་བའི་རྣམ་པ་ཅན་སྐྱེས་་སྟེ། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སུམ་ཅུ་གཉིས། །མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག །སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི། གསང་གནས་བདེ་སྐྱོང་གི་འཁོར་ལོ་རྩ་འདབ་བརྒྱད་དེ། དེ་རྣམས་གདུགས་ཀྱི་རྩིབས་མ་ལྟར་སྤྱི་བོའི་རྩ་འཁོར་ཐུར། མགྲིན་པ་གྱེན། སྙིང་ག་ཐུར། ལྟེ་བ་དང་གསང་གནས་གཉིས་གྱེན་དུ་ཕྱོགས་པའི་ [6b] རྣམ་པ་ཅན། ཐམས་ཅད་ཀྱང་དབུ་མའི་མཚན་ཉིད་ལྟ་བུ་དྭངས་གསལ་སྦུབས་སྟོང་གི་རང་བཞིན་དུ་ཡོད་པར་བསམ། འདི་ལ་གསལ་མ་ཐེབས་ཀྱི་བར་བུ་བསྒོམ་མོ། །གཉིས་པ་གཡོ་བ་རླུང་གི་རྣལ་འབྱོར་ལ་གཉིས། ཐུན་གྱི་ཉམས་ལེན་དང༌། ཐུན་མཚམས་ཀྱི་ཉམས་ལེན་ནོ། །དང་པོ་ནི། མ་དག་སྙིགས་མའི་རླུང་བསལ་ཕྱིར༔ སྙིགས་མ་ལས་རླུང་ལན་དགུར་བསལ༔ དུས་གསུམ་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་པའི་བཅུད་རྣམས་དང་༔ དབང་བྱིན་དངོས་གྲུབ་མ་ལུས་པ༔ མཐིང་གསལ་ན་བུན་འཐིབ་པ་བཞིན༔ སྣ་རྩེའི་ཐད་ཀྱི་ནམ་མཁར་གསལ༔ སྣ་བུག་གཉིས་ནས་ཡེ་ཤེས་རླུང་༔ སྤོས་རེང་དུང་པ་བཞིན་དྲངས་ཏེ༔ རོ་རྐྱང་ལམ་ནས་དབུ་མར་ཞུགས༔ ཕྲུ་མ་ཕུ་ཡིས་བཏབ་པ་ལྟར༔ དབུ་མ་བརྒྱངས་ཤིང་ནང་དུ་བསྐྱིལ༔ དལ་གྱིས་རྔུབ་ཅིང་ཕོ་བ་དགང་༔ གཡས་གཡོན་གསུམ་གསུམ་ཤུགས་ཀྱིས་གཞིལ༔ མདའ་ལྟར་དལ་གྱིས་དབྱུང་བའི་ཚེ༔ དྭངས་མ་ལྟེ་བའི་འོག་ཏུ་མནན༔ སྙིགས་མ་ཕྱི་རུ་དབྱུང་བར་བྱ༔ ཞེས་པས། ཐོག་མར་རྩའི་ལམ་བསལ་རླུང་གི་དུག་དབྱུང་བ་ལ། ལུས་གནད་ཚུགས་མ་ཤོར་བར་ལག་གཉིས་རྡོ་རྗེའི་ཁུ་ཚུར་བརླ་ནས་པུས་མོའི་བར་ [7a] གྱེན་བསྟན་དང༌། དེ་ནས་སྒང་བསྟན་གྱིས་ལུས་བྱིང་བརྒྱུད་དེ་ནུ་སྟེང་ནས་གདོང་ཐད་ཀྱི་ནམ་མཁར་འཕང་སྟེ། ལག་གཡོན་གཞུ་རྒྱུད་འཐེན་ཚུལ་གྱིས་བཀུག་ནས་མཆན་རྡེབ་དང་བཅས་མཛུབ་མོ་བསྒྲེང་བའི་ཁུ་ཚུར་ནང་བསྐོར་གྱིས་སྣ་བུག་གཡོན་པ་བཀག་པ་དང་ཆབ་གཅིག་ལག་གཡས་ཁུ་ཚུར་པུས་མོ་གཡས་སྟེང་དུ་བཞག །ཚེ་རབས་ནས་བསགས་པའི་ཉོན་མོངས་པ་ཞེ་སྡང་གིས་ཀུན་ནས་བསླངས་པའི་སྡིག་སྒྲིབ་ནད་གདོན་བག་ཆགས་ཐམས་ཅད་རླུང་ཁམ་ནག་གི་རྣམ་པས་ཕྱིར་སངས་ཀྱིས་སོང་བར་བསམ་ལ་སྣ་བུག་གཡས་ནས་ཕྱིར་འབུད་དྲག་པོ་གསུམ་དང༌། དེ་བཞིན་ལག་སྟབས་དང་སྣ་བུག་གཡས་གཡོན་གོ་བརྗེས་ཏེ་ཉོན་མོངས་པ་འདོད་ཆགས་ཀྱི་སྒོ་ནས་བསགས་པའི་སྡིག་སྒྲིབ་ནད་གདོན་བག་ཆགས་ཐམས་ཅད་རླུང་དམར་ནག་གི་རྣམ་པས་སོང་བར་བསམ་ལ་ཕྱིར་འབུད་ལན་གསུམ། ལག་གཉིས་ཁུ་ཚུར་བསྐོར་རྒྱང་གིས་པུས་སྟེང་དུ་བཞག་ལ་སྣ་བུག་གཉིས་མཉམ་ནས་ཉོན་མོངས་པ་གཏི་མུག་གི་སྒོ་ནས་བསགསཔའི་སྡིག་སྒྲིབ་ནད་གདོན་བག་ཆགས་ཐམས་ཅད་རླུང་སྔོ་ནག་གི་རྣམ་པས་སོང་བར་བསམ་ཞིང་ཕྱིར་འབུད་ལན་གསུམ་བྱ་སྟེ། དེ་ལྟར་རླུང་རོ་དགུ་ཕྲུགས་སུ་བསལ་མཐར་ལག་གཉིས་ཁུ་ཚུར་ [7b] སྙིང་གར་བསྣོལ་ལ་ངག་ནས་ཧ་ཧ་ཞེས་བརྗོད་པ་དང་ཆབ་གཅིག་ལག་པའི་རྒྱ་དང་རྐང་པའི་སྐྱིལ་ཀྲུང་ཐར་གྱིས་བཤིགས་པས་སྡིག་སྒྲིབ་གདོས་བཅས་ཀྱི་ཕུང་པོ་དང་བཅས་པ་རྡུལ་ཕྲན་ནམ་མཁའ་ལ་དེངས་པ་ལྟར་ཡལ་བར་བསམ་ལ་སྟོང་ཉིད་ཀྱི་ངང་དུ་ཅུང་ཟད་བཞག །དེ་ནས་རླུང་སྦྱོང་བ་དངོས་ལ། སྔར་བཞིན་ལུས་གནད་དང་ལྡན་པས་ལྷ་སྐུ་རྩའི་སྟོང་ར་གསལ་བཏབ་ལ། རང་གི་སྣ་རྩེའི་ཐད་ཀྱི་ནམ་མཁར་དུས་གསུམ་རྒྱལ་བ་སྲས་དང་བཅས་པའི་མཁྱེན་བརྩེ་ནུས་བཅུད་དབང་བྱིན་དངོས་གྲུབ་ཐམས་ཅད་འདུས་པའི་ངོ་བོ་འོད་མཐིང་རླུང་གི་རང་བཞིན་ན་བུན་འཐིབས་པ་ལྟར་ཡོད་པ་དེ་ཉིད་སྣ་བུག་གཉིས་ནས་རོ་རྐྱང་གི་ལམ་བརྒྱུད་དེ་སོང་བ་ལྟེ་འོག་ནས་དབུ་མའི་ནང་དུ་ཞུགས་པར་མོས་ལ། སྟེང་རླུང་རན་པར་རྔུབ་ཅིང་འོག་རླུང་ཅུང་ཟད་བསྐུམ་ལ་ལྟེ་འོག་ཏུ་ཁ་སྦྱོར་དུ་བསྐྱིལ་བ་བུམ་པ་ལྟར་དགང༌། མི་ནོན་པའི་ཚེ་གཡས་གཡོན་འཐེན་གནོན་དང་ཕྱི་ནང་དུ་གཞིལ། མི་ཐུབ་པ་ན་རླུང་གི་དྭངས་མ་དབུ་མར་ཚུད་པའི་སྙིགས་མ་ཕྱིར་སོང་བར་བསམ་ཞིང་སྣ་བུག་གཉིས་ནས་དལ་བུས་སྤུ་མི་འགུལ་བའི་ཚོད་ཙམ་དུ་སང་གིས་འཕང༌། དེ་ལྟ་བུའི་སྦྱོར་བ་བཞི་ལྡན་གྱི་རླུང་སྦྱོར་གཅིག་ལ་ཁུག་པ་གཅིག་ཏུ་བརྩིས་ཏེ་བརྒྱ་ལ་སོགས་པ་རྩོལ་ [8a] བ་རིམ་གྱིས་ཇེ་དྲག་ཏུ་བསྐྱེད་པས་བུམ་ཅན་རབ་འབྲིང་ཐ་མའི་ཚད་ལྡན་དུ་འགྲུབ་པ་སྟེ། ལག་པའི་ཐལ་མོས་པུས་མོ་ལ་ལན་རེ་བསྐོར་ཏེ་སེ་གོལ་གཅིག་གཏོགས་པའི་ཡུན་ཚད་སུམ་ཅུ་རྩ་དྲུག་གི་བུམ་པ་ཅན་ཆུང་ངུ༌། བདུན་ཅུ་དོན་གཉིས་འབྲིང༌། བརྒྱ་རྩ་བརྒྱད་ཁེགས་པ་ཆེན་པོའི་ཚད་དུ་བཞེད། དེ་ལྟར་རླུང་བུམ་པ་ཅན་གྲུབ་པའི་ཡོན་ཏན་ཀྱང་ལུས་མཉེན་ལྕུག་ཐོབ་པས་བདེ་བ། ངག་རང་དབང་དུ་གྱུར་པས་སྙན་པ། སེམས་ཏིང་ངེ་འཛིན་ལ་གཡོ་མེད་དུ་གནས་པ་དང༌། བུམ་ཆེན་གཅིག་གིས་ཞག་བདུན་གྱི་འཆི་བ་ཟློག་ཅིང༌། རྒྱུན་དུ་བརྩོན་པས་འཆི་བ་མེད་པའི་བཅུད་ལེན་འགྲུབ་པར་འགྱུར་ཏེ། སྡོམ་འབྱུང་ལས། ཡང་ན་བུམ་པ་ཅན་སྦྱོར་བས། །ཐམས་ཅད་དུ་ནི་འཆི་ལས་རྒྱལ། །ཅེས་གསུངས་སོ། །གཉིས་པ་ཐུན་མཚམས་ཀྱི་ཉམས་ལེན་ནི། རྟག་ཏུ་བར་རླུང་བརྟེན་པ་དང་༔ རྡོ་རྗེའི་བཟླས་པ་ལམ་དུ་ཁྱེར༔ ཞེས་པས། སྤྱོད་ལམ་རྣམ་བཞི་གང་གི་ཚེ་ནའང་རུང་སྟེ། འོག་རླུང་ཅུང་ཟད་འཐེན་ཏེ་བསྐུམ། སྟེང་རླུང་རྔུབས་ཏེ་ལྟེ་འོག་ཏུ་ཆིལ་གྱིས་མནན། བར་རླུང་ལྟེ་བའི་ཐད་ཀར་བརྒྱངས་ཏེ་འཛིན་པ་ནི་གསང་བ་ཡེ་ཤེས་ཆེན་པོའི་རླུང་སྦྱོར་རམ་འཇམ་རླུང་བུམ་པ་ཅན་ཏེ། བསྐྱེད་རིམ་བཟླས་བརྗོད་ཏིང་ [8b] འཛིན་སྒོམ་པ་སོགས་གང་གི་ཡང་གྲོགས་སུ་འགྲོ་ཞིང༌། འབྱོངས་ན་རྩོལ་བ་མི་དགོས་པར་བར་རླུང་རང་སར་གནས་པས་རླུང་སེམས་ཀྱི་རྟོག་པ་ཕྲ་རགས་དབྱིངས་སུ་དེངས་ཤིང་ཤེས་པ་རྣལ་དུ་ཕེབས་པར་འགྱུར་པ་དང༌། བར་སྐབས་རྣམས་སུ་དབུགས་རང་བབས་ཀྱི་འཇུག་གནས་ལྡང་གསུམ་ལ་སེམས་གཏད་དེ། ནང་དུ་འཇུག་པ་ཨོཾ། གནས་པ་ཨཱཿ ཕྱིར་ལྡང་བ་ཧཱུཾ་གི་སྒྲ་གདངས་སུ་ཤེས་པའི་སྒོ་ནས་མ་ཡེངས་པར་བཟླས་པས་བོགས་ཆེན་པོ་འབྱིན་ཅིང༌། འདི་ལ་གོམས་ན་རྒྱུན་གྱི་རླུང་གི་འགྲོ་འོང་ཐམས་ཅད་འབྲུ་གསུམ་རང་བཞིན་དུ་གནས་པ་ལ་རང་བྱན་ཚུད་དེ་རྡོ་རྗེའི་བཟླས་པ་རྒྱུན་མི་འཆད་པ་ཉིད་དུ་འབྱུང་ངོ༌། །གསུམ་པ་ཐིག་ལེ་བྱང་ཆུབ་ཀྱི་སེམས་སྦྱོང་བ་ལ་གསུམ། གཏུམ་མོ་སྦར་བ། ཞུ་བདེ་སྒྲུབ་པ། ཀ་དག་ཏུ་བསྲེ་བའོ། །དང་པོ་ལ་གཉིས། ཐུན་དངོས་དང༌། ཐུན་མཚམས་ཀྱི་ཉམས་ལེན་ནོ། །དང་པོ་ནི། ལྟེ་བར་ཤེས་རབ་ཨ་ཤད་མེ༔ སྤྱི་བོར་ཐིག་ལེ་ཧཾ་དཀར་གསལ༔ གཏུམ་མོ་སྦར་བས་བདེ་དྲོད་བསྐྱེད༔ ཅེས་པས། རླུང་གི་སྦྱོར་བ་ལ་གོམས་པ་ཐོབ་ནས་གཏུམ་མོའི་རྣལ་འབྱོར་ལ་འཇུག་པ་ན། ཐོག་མར་བདེ་དྲོད་ཀྱི་གཞི་བཅའ་བའི་སླད་དུ། རླུང་རོ་བསལ་ཏེ། ལྟེ་འོག་རྩ་གསུམ་གྱི་འདུས་མདོར་ཉི་མའི་ [9a] དཀྱིལ་འཁོར་གྱི་སྟེང་དུ་མེའི་ས་བོན་ཨ་ཐུང་ཤད་ཀྱི་རྣམ་པ་ཅན། རྩ་བ་ཉི་གདན་ལ་ཟུག་པ་ལྟར་བརྟན་ཅིང་རྩེ་མོ་རྣོ་བ། རེག་བྱ་ཚ་བ། ངོ་བོ་བདེ་བའི་ཡེ་ཤེས་ལ་རྣམ་པ་མེའི་རང་བཞིན་དུ་གསལ་ཞིང་འབར་བར་བསྒོམ། ཡང་སྤྱི་བོའི་འཁོར་ལོའི་སྟེང་རྩ་དབུ་མའི་ཡས་སྣེའི་ནང་དུ་ངོ་བོ་བདེ་བ་ཆེན་པོའི་ཡེ་ཤེས་ལ་རྣམ་པ་ཀུན་རྫོབ་རྒྱུའི་ཐིག་ལེ་ཟླ་བ་ཧཾ་ཡིག་དཀར་པོ་མགོ་ཐུར་བསྟན་དུ་གནས་པ་དངུལ་ཆུའི་ཐིག་པ་ལྟར་འཛག་ལ་ཁད་དུ་ཡོད་པར་བསྒོམ། དེ་ལྟར་དམིགས་པ་གསལ་ཐེབས་པ་ན་བྱིན་རླབས་ཀྱི་གཞི་སྒྲུབ་པ་ལ། སྙིང་གའི་འཁོར་ལོའི་དབུས་སུ་པདྨ་དང་ཉི་ཟླའི་གདན་ལ་རྩ་བརྒྱུད་ཀྱི་བླ་མ་རིག་འཛིན་རྩ་གསུམ་མ་ལུས་པ་འདུས་པའི་ངོ་བོ་གུ་རུ་པདྨ་ཐོད་ཕྲེང་རྩལ་སྐུ་མདོག་དཀར་གསལ་ཁྲོ་འཛུམ་རྗེས་སུ་ཆགས་པའི་ལང་ཚོ་ཅན། གཡས་གསེར་གྱི་རྡོ་རྗེ་དང་གཡོན་བྷནྡྷ་ཚེ་བུམ་འཛིན་པ། ཞབས་རྒྱལ་པོ་རོལ་སྟབས་ཀྱིས་བཞུགས་པའི་པང་དུ་ཡུམ་མཚོ་རྒྱལ་རྣལ་འབྱོར་མ་དམར་གསལ་གྲི་ཐོད་འཛིན་པས་མགུལ་ནས་འཁྱུད་པ་དང་མཉམ་པར་སྦྱོར་བ། གཉིས་ཀའང་གཅེར་བུ་རུས་པ་དང་རིན་པོ་ཆེའི་རྒྱན་གྱིས་སྤྲས་ཤིང་མཚན་དཔེའི་གཟི་བརྗིད་མཆོག་ཏུ་འབར་བ། བདེ་དྲོད་འོད་ཕུང་འཁྲིགས་པའི་ [9b] ཀློང་ན་སྣང་སྟོང་སྒྱུ་མའི་ཕྱག་རྒྱར་མངོན་སུམ་དུ་སང་པར་མོས་ལ། མོས་གུས་ཀྱི་ཤུགས་བསྐྱེད་དེ། འགྱུར་མེད་དབྱིངས་ཀྱི་མགོན་པོ་ཀུན་ཏུ་བཟང༌། །རང་བྱུང་སྒྱུ་འཕྲུལ་རིགས་ལྔ་ཧེ་རུ་ཀ ། ལོངས་སྤྱོད་ཡོངས་རྫོགས་རྡོ་རྗེ་སེམས་དཔའ་ལ། །གསོལ་བ་འདེབས་སོ་བདེ་དྲོད་ཡེ་ཤེས་སྤོར། །ཞེས་སོགས་ནས། མཁའ་འགྲོ་དམ་ཅན་གཏེར་སྲུང་བཅས་རྣམས་ལ། །གསོལ་བ་འདེབས་སོ་བདེ་དྲོད་ཡེ་ཤེས་སྤོར། །འཆིང་བྱེད་རྩ་ཡི་མདུད་པ་རང་སར་གྲོལ། །འགྲོ་འོང་རླུང་གི་རྒྱུ་བ་དྷཱུ་ཏིར་དག །འཕོ་བཅས་ཐིག་ལེ་ཟག་མེད་བདེ་བར་སྨིན། །ཟུང་འཇུག་ཧེ་རུ་ཀ་དཔལ་གནས་ཐོབ་ཤོག །ཅེས་གསོལ་བ་དྲག་ཏུ་བཏབ་པས་གུ་རུ་ཡབ་ཡུམ་རྗེས་ཆགས་བདེ་བ་ཆེན་པོའི་ངོ་བོར་འོད་དུ་ཞུ་སྟེ་ཐིག་ལེ་དཀར་དམར་གཉིས་སུ་གྱུར་པ་དཀར་ཆ་སྤྱི་བོའི་ཧཾ་དང༌། དམར་ཆ་ལྟེ་བའི་ཨ་ཤད་ལ་ཐིམ་པས་ཐབས་ཤེས་བདེ་སྟོང་གི་ཡེ་ཤེས་ལྷག་པར་བསྐྱེད་པར་མོས་ཏེ། རླུང་ཤར་གྱིས་དྲངས་ལ་ལྟེ་འོག་ཏུ་བསྐྱུར་ཐབས་སུ་མནན། དེ་དང་མཉམ་དུ་འོག་རླུང་དྲག་ཏུ་དྲངས་ཏེ་ལྟེ་བར་ཁ་སྦྱོར་དུ་བཟུང༌། ཅུང་ཟད་མི་བདེ་ཚེ་སླར་རྔུབ་ཆུང་བྱས་ཏེ་ལྟེ་བའི་གནས་སུ་གཡས་གཡོན་དབུས་གསུམ་དུ་འཐེན་གནོན་བྱས་ནས་བཟུང༌། མི་ཐུབ་པ་ན་དལ་བུས་ཕྲ་ལ་ [10a] རིང་བའི་ཤུགས་ཀྱིས་ཕྱིར་འཕང༌། དེ་མ་ཐག་རྔུབ་སྟེ། རླུང་མ་གོམས་བར་བུམ་ཅན་སྦྱོར་བ་བཞི་ལྡན་དེ་དང་འདྲ་བ་ཚར་བཞིའམ་བརྒྱད་ལྟ་བུ་བཏུད་མར་བསྒོམས་ནས། བཞི་ཚན་གཅིག་གཉིས་གསུམ་བཞི་སོགས་ཀྱི་མཚམས་རྣམས་སུ་ངལ་གསོ་བ་ལས་གང་འདོད་དུ་མི་བཞག །ངལ་གསོའང་ཡུན་རིང་ན་དྲོད་མི་སྐྱེ་བས་ཐུང་བར་བྱ། དམིགས་པ་ནི། སྔར་བཞིན་སྣ་རྩེའི་ཐད་དུ་བྱིན་རླབས་ཡེ་ཤེས་ཀྱི་རླུང་གསལ་བ་དེ་ཉིད་རྔུབས་པ་སྣ་སྒོ་ནས་ཞུགས། རོ་རྐྱང་གི་ལམ་བརྒྱུད་ནས་ལྟེ་འོག་རྩ་གསུམ་འདུས་མདོར་སླེབ། འོག་རླུང་བསྐུམས་པས་བཤང་སྒོ་ནས་རླུང་མདུང་ཚུགས་སུ་ལངས་པ་དབུ་མའི་སྣར་ཚུད་དེ། རོ་རྐྱང་ཐུར་སེལ་གྱི་རླུང་གསུམ་འདུས་པ་ལྟེ་བའི་ཨ་ཐུང་ལ་ཕོག །སོལ་མེ་ངར་མ་ཕུས་བཏབ་པ་ལྟར་མེ་ལྕེ་ཤིན་ཏུ་ཕྲ་ཞིང་རྣོ་བ། འཚེར་བ། མཁྲང་པ། རྩེ་མོ་འབར་ཞིང་འཁྱུག་པ། རིང་ཐུང་སོར་གང་ནས་སོར་བཞི་ཙམ་གྱི་བར་ཇེ་རིང་དུ་འབར་བ་ལ་སེམས་གཏད་དེ། སྤྲོས་པ་གཞན་སྤངས་ནས་འདི་ཁོ་ན་རྩེ་གཅིག་ཏུ་བསྒོམ། དེ་ལ་དམིགས་པ་བརྟན་པར་གྱུར་པ་ན། མེ་ལྕེའི་འོད་དེས་གསང་གནས་ཀྱི་རྩ་འཁོར་ཐམས་ཅད་གང་བས་ལྟེ་བ་མན་ཆད་ལུས་ནང་དམར་ལྷག་ལྷག་དང་ཚ་འུར་འུར་ [10b] བྱུང་བར་བསམ། དེ་བཞིན་དུ་མེ་དེ་ལྟེ་བའི་རྩ་འཁོར་དང་དབུ་མའི་ནང་ནས་ཡར་ཁྱུར་གྱིས་ཞུགས་ཏེ། སྙིང་ག་དང༌། མགྲིན་པ་དང༌། སྤྱི་བོའི་རྩ་འཁོར་ཐམས་ཅད་ཁེངས་པར་བསམ་ཞིང༌། དེར་མ་ཟད་འཁོར་ལོ་ལྔའི་འོད་ཀྱིས་བ་སྤུའི་ཁུང་བུའི་བར་ཐམས་ཅད་ཀྱང་གང་སྟེ་དམར་ལྷག་གིས་ཁྱབ་པས་ལུས་ནང་ཚ་འུར་གྱིས་བྱུང་བར་བསམ། རེས་མེ་ལྕེ་ཕྲ་ཞིང་དྭངས་པ་ཟགས་ཁབ་ལྟ་བུ་དམར་ཕྲེང་གིས་འབར་བ་ལ་ཤེས་པ་གཏད་དེ་བརྩོན་འགྲུས་དྲག་པོས་བསྒོམ་མོ། །གཉིས་པ་ཐུན་མཚམས་ཀྱི་ཉམས་ལེན་ནི། རྟག་ཏུ་དབུ་མ་ཨ་ཤད་མེ༔ བསྒོམ་ཞིང་རླུང་གི་བཅུད་ལ་རོལ༔ ཞེས་པས། ཐུན་མཚམས་རྣམས་སུའང་ལྟེ་བའི་མེ་དམིགས་ལ་ཤེས་པ་རྩེ་གཅིག་ཏུ་གཏད་ཅིང་འཇམ་རླུང་བུམ་པ་ཅན་བཟུང༌། མཚན་མོ་ཉལ་དུས་རབ་སྐྱིལ་ཀྲུང༌། འབྲིང་ཙོག་པུ། ཐ་མ་སྔས་མཐོ་བར་བྱས་ལ་གློ་གཡས་འོག་ཏུ་བཅུག་ནས་པུས་བྲང་སྦྱར་བའི་ལུས་སུམ་ལྟབ་ཏུ་ཉལ། དེ་གསུམ་གང་བྱས་ཀྱང་པུས་འཁྱུད་ཀྱིས་མི་གཡོ་བར་བསྡམ། ལག་པ་མདུན་གྱི་ནང་དུ་བསྣོལ་ནས་མཐིལ་གཉིས་མཁལ་ཁུང་གཡས་གཡོན་ལ་བཀབ། ལྟེ་བའི་ཨ་ཐུང་མེ་འབར་བ་ལ་སེམས་གཏད་པའི་ངང་ནས་གཉིད་དུ་འགྲོ་བར་བྱ། འདིས་གཉིད་ཀྱི་འོད་གསལ་ཟིན་པ་དང༌། [11a] ཉིན་པར་གཏུམ་མོ་སྒོམ་པའི་རྒྱུན་མཚན་མོར་བསྲེས་པས་དྲོད་མི་ཡལ་བའི་དགོས་པ་ཡོད། ལུས་ལ་རྔུལ་བྱུང་ན་དྲོད་འཆོར་བས། གོས་སྲབ་ཏུ་གཏོང༌། དེས་ཀྱང་མ་ཕན་ན་ཐོ་རངས་ཀྱི་དྲི་ཆུ་རྫ་སོ་མར་གྲང་དུ་བཅུག་པས་ལུས་བཀྲུ་ཞིང་གཅི་ཐལ་འཇམ་པོས་ཀྱང་བྱུག །དམིགས་པ་ཕྱིར་ཤོར་བ་དང༌། ངལ་གསོ་ཡུན་རིང་བ། ཁམས་ཉམས་པ། མེ་དང་ཉི་མ་འདེབ། གོས་འཐུག་པ། ཟས་ལན་ཚྭ་ཆེས་པ། ཉིན་མོ་གཉིད་དང་ཉལ་བ་རྣམས་སྤང་ཞིང༌། རྩོལ་བ་ཞན་ན་འབྱོངས་དུས་མི་འོང་བས་བརྩོན་འགྲུས་དྲག་པོས་བསྒོམ། ཐོག་མར་དྲོད་སྙིང་ག་དང་སྤྱི་བོར་བྱུང་ན་ངན་པས་སྲིན་ཞལ་འབྱེད་འཛུམ་མང་པོ་དང༌། ལྟེ་བར་ཁ་སྦྱོར་དྲག་པོ་བསྒོམས་པས་དྲོད་གནས་སུ་སྡུད་ཅིང་ཕེབས་པར་འགྱུར། དེ་ལྟར་ཡང་ཡང་སྦྱངས་པས་ལུས་ལ་གོས་མི་དགོས་པ་སོགས་ཕྱིའི་དྲོད་དང༌། བདེ་གསལ་མི་རྟོག་པ་ནང་གི་དྲོད། བདེ་བ་ཆེན་པོའི་ཡེ་ཤེས་གསང་བའི་དྲོད་རྣམས་ཐོབ་པར་འགྱུར་རོ། །གཉིས་པ་ཞུ་བདེ་སྒྲུབ་པ་ལ་གཉིས། སྟེང་སྒོ་འཇུ་འདུལ་གྱི་མན་ངག་དང༌། འོག་སྒོ་མཁས་གསུམ་རོལ་པའི་མན་ངག་གོ །དང་པོ་ལ་གསུམ། བདེ་བ་དབབ་པ། དེ་རྩོལ་མེད་དུ་གནས་པའི་ཐབས། འཛག་མེད་དུ་ [11b] སྒྲུབ་པའོ། །དང་པོ་ནི། གཏུམ་མོ་མས་འབར་བདེ་དྲོད་ཀྱིས༔ ཐིག་ལེ་ཡས་འཛག་དྭངས་མར་བཞུ༔ རྩ་ཁམས་ལྷ་ལ་དགྱེས་མཆོད་འབུལ༔ དབང་ཐོབ་དགའ་བཞིའི་ཡེ་ཤེས་བསྐྱེད༔ ཅེས་པས། གཏུམ་མོས་དྲོད་སྐྱེས་པ་ན་རྩ་འཁོར་ཨ་ཧཾ་རྣམས་སྔར་ལས་ཀྱང་གསལ་བར་བསྒོམ་ལ། བུམ་ཅན་དྲག་པོ་བཞི་སྦྱོར་གྱིས་གཅུན་པས་ལྟེ་བའི་ཨ་ཐུང་སྦར་བའི་མེས་རྩ་འཁོར་རྣམས་ཁྱབ་པའི་མཐར་སྤྱི་བོའི་ཧཾ་ལ་རེག་པས་ཐབས་ཤེས་འཕྲད་པའི་ཆོ་འཕྲུལ་ལས་བྱང་སེམས་ཧཾ་ཡིག་བཞུས་པའི་དྭངས་མ་མུ་ཏིག་གི་རྒྱུན་ལྟར་བདེ་ཕྲི་ལེར་བབས་པས་སྤྱི་བོའི་རྩ་འཁོར་ཐམས་ཅད་ཁེངས། བདེ་གཤེགས་སྐུའི་དཀྱིལ་འཁོར་ལ་མཉེས་པའི་མཆོད་པ་ཕུལ། ཚོགས་རྫོགས། སྒྲིབ་པ་བྱང༌། དམ་ཚིག་ཉམས་ཆག་ཐམས་ཅད་དག །བུམ་པའི་དབང་ཐོབ། དགའ་བའི་ཡེ་ཤེས་རྒྱུད་ལ་སྐྱེས། རིམ་པར་མེ་ལྕེ་དང་བྱང་སེམས་འབྲོས་འདེད་ཀྱིས་མགྲིན་པའི་རྩ་འཁོར་རྣམས་གང་ཞིང་འཁྱིལ་བས། བདེ་གཤེགས་གསུང་གི་དཀྱིལ་འཁོར་ལ་མཆོད་ཚུལ་སོགས་སྔར་དང་འདྲ། གསང་བའི་དབང་ཐོབ། མཆོག་ཏུ་དགའ་བའི་ཡེ་ཤེས་སྐྱེས། ཡང་མར་བབས་སྙིང་གའི་རྩ་འཁོར་ཐམས་ཅད་གང༌། བདེ་གཤེགས་ཐུགས་ཀྱི་དཀྱིལ་འཁོར་ལ་མཆོད་ཚུལ་སོགས་ [12a] འདྲ། ཤེས་རབ་ཡེ་ཤེས་ཀྱི་དབང་ཐོབ། ཁྱད་པར་གྱི་དགའ་བའི་ཡེ་ཤེས་སྐྱེས། ཡང་མར་བབས་ལྟེ་བའི་རྩ་འཁོར་ཐམས་ཅད་གང༌། བདེ་གཤེགས་ཡོན་ཏན་གྱི་དཀྱིལ་འཁོར་ལ་མཆོད་ཚུལ་སོགས་འདྲ། ཚིག་དབང་ཐོབ། ལྷན་སྐྱེས་ཀྱི་དགའ་བའི་ཡེ་ཤེས་སྐྱེས། ཡང་མར་བབས་གསང་གནས་ཀྱི་རྩ་འཁོར་ཐམས་ཅད་གང༌། བདེ་གཤེགས་ཕྲིན་ལས་ཀྱི་དཀྱིལ་འཁོར་ལ་མཆོད་ཚུལ་སོགས་འདྲ། རིག་པའི་རྩལ་དབང་ཐོབ། བསམ་གྱིས་མི་ཁྱབ་པའི་དགའ་བ་རྒྱུད་ལ་སྐྱེས་པར་བསམ་ཞིང༌། སྤྱི་བོ་མན་ཆད་ལུས་མགོ་མཇུག་མེད་པར་དྭངས་མས་གང་བའི་བདེ་བ་ལ་མཉམ་པར་བཞག་གོ །གཉིས་པ་དེ་ཉིད་རྩོལ་མེད་དུ་གནས་པའི་ཐབས་ནི། ཆེར་མཆེད་རྩ་རླུང་ཐིག་ལེའི་ཁམས༔ དག་སྦྱོར་ཡེ་ཤེས་འཁོར་ལོར་འཕོ༔ ཞེས་པས། དེ་ལྟར་བྱིན་རླབས་ཡེ་ཤེས་ཀྱི་རླུང༌། གཏུམ་མོ་ཡེ་ཤེས་ཀྱི་མེ། བདེ་ཆེན་ཡེ་ཤེས་ཀྱི་བདུད་རྩི་གསུམ་དབྱེར་མེད་གཅིག་ཏུ་འདྲེས་པའི་དྭངས་མས་གང་བའི་བདེ་བ་རང་ཤར་བའི་ཚེ། དེ་ཉིད་རྩོལ་མེད་ཡུན་དུ་གནས་པའི་ཐབས་སུ་རང་ལུས་སྣོད་བཅུད་སྣང་བའི་ཆོས་ཐམས་ཅད་མི་དམིགས་པར་སྦྱངས་ཏེ་ནམ་མཁས་གར་ཁྱབ་དབུ་མ་མེ་རླུང་ཐིག་ལེའི་རང་བཞིན་གྱིས་ཁྱབ་པར་བསམ་པ་དང༌། [12b] ཡང་དེ་ཉིད་ཇེ་ཕྲར་གྱུར་ཏེ་སྔར་བཞིན་བདེ་བའི་ངང་མདངས་ལ་སེམས་རྩེ་གཅིག་ཏུ་བཟུང་ནས་རེས་མོས་སུ་རྩལ་སྦྱང་ངོ༌། །གསུམ་པ་བདེ་བ་འཛག་མེད་དུ་སྒྲུབ་པ་ནི། སླར་ཡང་ཧཱུཾ་འདྲེན་དྲག་པོ་ཡིས༔ གྱེན་དུ་དྲངས་ལ་དགྲམ་པར་བྱ༔ ཞེས་པས། བྱང་སེམས་དྭངས་མ་ཐེམ་མེར་བབས་པ་ན་བདེ་བ་ངང་གིས་སྐྱེ་བར་འགྱུར་བས། དེའི་ཚེ་བདེ་བ་རྒྱས་པས་བྱང་སེམས་འཕོ་བ་འདྲ་ན། རྒྱ་མཚོ་རི་རབ་ལ་གཅེར། གླིང་བཞི་མཐའ་ནས་བསྡུ། དར་དམར་གནས་སུ་སྦྱར། ཉི་ཟླ་གྱེན་དུ་ལྡོག །ཧཱུཾ་དྲག་པོ་རིང་དུ་དྲང༌། འོག་སྒོ་དྲག་ཏུ་ཀློད་ཅིང་སྲོག་ཕྱིར་བསལ། བར་རླུང་ཤུགས་དང་ལྡན་པས་བཟུང་ལྡོག་གཉིས་ཀ་བྱེད་པར་འགྱུར་ལ། དེ་ལྟར་དྲངས་པས་རྡོ་རྗེ་བརྟན་པར་གྱུར་ཅིང་ལུས་རྡུལ་བ་དང་དྲོད་འབར་ན་གྱེན་དུ་འདྲོངས་པའི་རྟགས་ཡིན་པས། དེ་རྩ་མིག་ཏུ་སེང་གེ་རྣམ་རོལ་གྱིས་ཁྱབ་པར་དགྲམ། མཐར་བུམ་པ་ཅན་བདུན་ཙམ་གྱིས་རླུང་དང་བསྲེ་ཞིང༌། འོག་ནས་འབྱུང་བ་ལྟར་ཀ་དག་གི་ཀློང་དུ་བསྲེ་བས་རླུང་གི་ཡོན་ཏན་སེམས་ལ་བསྟིམ་པར་བྱའོ། །གཉིས་པ་འོག་སྒོ་ཁམས་གསུམ་རོལ་པའི་མན་ངག་ལ་བསླབ་པ་ནི། དེ་ཉིད་གོམས་ནས་ཤེས་རབ་ལ༔ མཉམ་པར་སྦྱོར་བའི་བདེ་བ་བསྟེན༔ ཞེས་པས། དེའང་བློ་ཆགས་པ་དང་བཅས [13a] པ་བྱ་ཀ་ལནྟ་ཀ་ལྟ་བུའི་གང་ཟག་གིས། བྱིན་གྱིས་བརླབས་པའི་རྡོ་རྗེ་དགའ་བ་བཅུ་དྲུག་གི་ཐིག་ལེ་བུམ་པའི་དབང་བསྐུར་རྫོགས་པའི་ཕུར་པ། རང་བྱུང་གི་ཆོས་འབྱུང་ཡིག་འབྲུ་དང་བཅས་པའི་པདྨའི་ཡུལ་ལ། འདུ་ཤེས་གསུམ་དང་ལྡན་པའི་ཐབས་ཀྱིས་འཁྲུལ་འཁོར་རླུང་གི་གནད་ལས་ཐིག་ལེ་འཕོ་མེད་ཆུ་སྲིན་གྱི་གྲེ་བར་རིན་པོ་ཆེ་ཚུད་པའི་ཚུལ་དུ་གདབ་ལས། ཆགས་པ་རང་རྒྱུད་པས་མངལ་གྱི་སྲིན་བུར་སྐྱེ་བའི་སྐྱོན་ལས་གྲོལ་ཏེ་རྟོག་ཚོགས་ལྷན་སྐྱེས་བདེ་ཆེན་དུ་ཤར་བའི་གདིང་ཚད་དང་ལྡན་པས་འབྲས་བུ་ལོངས་སྐུ་ཐོབ་པར་བྱེད་པ་སྟེ། དེ་ལ་སྔོན་དུ་རང་ལུས་ཐབས་ལྡན་ཡིད་རིག་ཡེ་ཤེས་ཀྱི་ཕྱག་རྒྱ་ལ་སློབ་ཅིང་། གོམས་པ་ཐོབ་ནས་དངོས་རིག་ལས་ཀྱི་ཕྱག་རྒྱ་ལ་བརྟེན་ཏེ་བདེ་བའི་ཡེ་ཤེས་རྩལ་སྦྱོང་བར་བྱེད་པ་ཡིན་ལ། གང་ཡང་རང་དང་རིག་མ་རྡོ་རྗེ་གཞོན་ནུ་ཡབ་ཡུམ་དུ་གསལ་བའི་མཁའ་གསང་བྱིནགྱིས་བརླབ། སྙོམས་འཇུག་གི་བརྔ་བཞིས་བསྣོལ་མར་བསྐུལ། འདུ་ཤེས་གསུམ་ལྡན་གྱི་སྒོ་ནས་ཕྱག་རྒྱ་བཞིས་མཉམ་པར་སྦྱར་ཏེ། རྗེས་ཆགས་ཀྱི་མེས་ཀུནྡ་བཞུ་བའི་བྱང་སེམས་ཀྱི་རྒྱུན། དང་པོ་དབབ་པ་ལ་མཁས་པ་དལ་བུ་རུ་སྦལ་གྱི་འགྲོས་ལྟ་བུ། བར་ [13b] དུ་བཟུང་བ་ལ་མཁས་པ་རྫ་སྣོད་ཐེམ་བུས་བཀག་པ་བཞིན་དང༌། དེ་ལས་ལྡོག་པ་ལ་མཁས་པ་སྐྱེན་པོའི་མདའ་ལྟར་རང་གནས་སུ་འཕང་ཞིང༌། མཐར་འགྲེམས་པ་ལ་མཁས་པ་ཞིང་པས་ཡུར་བ་ལ་ཆུ་དྲངས་པ་ལྟ་བུའི་ཚུལ་གྱིས། འཁོར་ལོའི་གནས་བཞིར་ལུགས་འབྱུང་དང་ལུགས་ལྡོག་གི་དགའ་བཞི་རིམ་པར་མྱོང་བའི་མཐར་བྱང་སེམས་སྤྱི་བོར་བརྟན་པ་ན་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་བསྟར་བ་སྟེ། རྩ་རྒྱུད་ལས། ལྷག་པ་བྱང་སེམས་ཕུར་པ་དེ། །ཡུམ་གྱི་མཁའ་ཀློང་དག་པར་གདབ། །བདེ་བ་དངོས་མེད་ཐེབས་པའི་ཚད། །འབྲས་བུ་ལོངས་སྐུ་བདེ་ཆེན་ཐོབ། །མ་ཐེབས་འཁོར་བའི་འགྲམ་རྡོ་བྱེད། །ཅེས་གསུངས་སོ། དེས་ན་འདི་ནི་དེང་སང་དཀྱུས་ཀྱི་ཕྱག་བཞེས་སུ་སློབ་མ་ཕལ་ལ་ཁྱབ་བརྡལ་དུ་མི་གནང་ཞིང་ཚུལ་བཞིན་ཉམས་སུ་ལོན་པའང་ཤིན་ཏུ་དཀོན་པས་འདིར་ཞིབ་པར་མ་སྤྲོས་ལ། འོག་སྒོའི་གདམས་ངག་གི་སྣོད་དུ་གྱུར་པའི་སྐལ་ལྡན་རྣམས་ཀྱིས་འདིར་འཇུག་པར་འདོད་ན་ཟབ་པའི་གནད་བླ་མ་དང་དམ་པ་ཉམས་མྱོང་ཅན་གྱི་ཞལ་ལས་བླང་ཞིང་མན་ངག་གི་ཚུལ་གཞན་ལས་ཀྱང་ཤེས་པར་བྱ་བ་ཡིན་ནོ། །གསུམ་པ་ཀ་དག་ཏུ་བསྲེ་བ་ནི། ཤེས་པ་གཏད་མེད་ནམ་མཁའི་ངང་༔ མ་བཅོས་དེ་བཞིན་ [14a] ཉིད་དུ་བཞག༔ ཅེས་པས། སྔར་དྲོད་སྐྱེད་དམ་ཚིག་གི་ལོག་གཏུམ་མོ་དང༌། བདེ་བ་ཆོས་ཀྱི་གཏུམ་མོ་སོགས་ཉམས་སུ་བླངས་པའི་ཚེ་བ་དེ་དྲོད་ཀྱི་ཉམས་སྐྱེས་པ་ནི། དེ་ཀའི་རང་ངོ་ལ་ཆེ་རེ་བལྟས་པས། བདེ་དྲོད་ཀྱི་གདངས་མ་འགག་ལ། རང་བཞིན་གང་དུའང་ངོས་བཟུང་བྲལ་བ། བློ་འདས་རིག་སྟོང་ཀ་དག་ནམ་མཁའ་ལྟ་བུའི་ངང་ལས་ནམ་ཡང་མ་གཡོས་པས། གནས་ལུགས་དེ་བཞིན་ཉིད་ཀྱི་ཀློང་དུ་མཉམ་པར་བཞག་པ་ལས། གཏུམ་མོ་ལ་ཡེ་ཤེས་ཀྱི་རྒྱས་ཐེབས་ཤིང་རླུང་གི་ཡོན་ཏན་སེམས་ལ་སྨིན་པས་བདེ་སྟོང་གི་ཡེ་ཤེས་ཆེན་པོར་ལ་ཟློ་བར་འགྱུར་རོ། །དོན་གཉིས་པ་གེགས་བསལ་ཞིང་བོགས་དབྱུང་བ་ལ་གཉིས། རྡོ་རྗེའི་འཁྲུལ་འཁོར་བྱ་བ་དང༌། སྤྱོད་ལམ་གྱི་རྣལ་འབྱོར་རོ། །དང་པོ་ལ་གཉིས། སྔོན་འགྲོ་ཡན་ལག་ལྔ་སྦྱོང་དང༌། དངོས་གཞི་གཙོ་འཁོར་སོ་སོའི་འཁྲུལ་འཁོར་རོ། །དང་པོ་ནི། རླུང་ལོག་རང་མལ་གསོད་པ་དང་༔ རྩ་ཡི་མདུད་རྒྱ་བཀྲོལ་བ་དང་༔ བར་ཆད་རྐྱེན་གེགས་མ་ལུས་པ༔ བཙན་ཐབས་ཉིད་དུ་གཞོམ་པའི་ཕྱིར༔ རྡོ་རྗེ་ལུས་ཀྱི་འཁྲུལ་འཁོར་བྱ༔ ཞེས་པས། དེ་ལྟར་རྩ་རླུང་ཐིག་ལེའི་རྣལ་འབྱོར་ཟབ་མོ་ལ་བརྩོན་པའི་ཚེ་རླུང་ལོག་གི་གེགས་བསལ་བ་དང༌། ལུས་ཀྱི་རྩ་མདུད་བཀྲོལ་ [14b] བ་སོགས་ཕྱི་ནང་གི་རྐྱེན་གེགས་ཞི་ཞིང་ལམ་གྱི་བོགས་དབྱུང་བའི་ཕྱིར་སྐབས་སྐབས་སུ་ལུས་སྦྱོང་འཁྲུལ་འཁོར་རྣམས་ལ་བརྩོན་པ་ཤིན་ཏུ་གཅེས་པས། །དེ་ལ་ལུས་གནད་ཆོས་བདུན་སྔར་ལྟར་ལས། བུམ་ཅན་དྲག་ཏུ་འཆིང༌། སྟེང་རླུང་རྔུབ་ཆུང་གིས་མནན་པ་དང་བསྟུན་རླུང་གི་ཁུག་པ་རེ་ལ་འཁྲུལ་འཁོར་རེ་རྫོགས་པ་བྱ་སྟེ། ཐོག་མར་རྩ་བའི་ལུས་སྦྱོང་ཡན་ལག་ལྔ་ལས། དང་པོ་ནི། སྣང་སྲིད་སྟུག་པོ་བཀོད་དང་ནི༔ རང་ཉིད་རྣམ་སྣང་སྐུར་བསྒོམ་སྟེ༔ ལུས་གནད་རྡོ་རྗེའི་ཆོས་བདུན་བྱ༔ ལག་གཉིས་ཁུ་ཚུར་པུས་སྟེང་ནས༔ སྟ་ཟུར་གཡས་གཡོན་ནས་ཤད་དེ༔ ནུ་སྟེང་ཐད་དུ་ལན་གསུམ་འཕེན༔ སྙིང་གར་བྱང་ཆུབ་ཕྱག་རྒྱ་བྱ༔ དེ་ལྟར་ལན་གསུམ་བསྐྱར་བ་ཡིན༔ ཅེས་སོ། །གཉིས་པ་ནི། སྣོད་བཅུད་མངོན་པར་དགའ་བའི་ཞིང་༔ རང་ཉིད་རྡོ་རྗེ་སེམས་དཔར་བསྒོམ༔ ཁུ་ཚུར་པུས་སྟེང་གཡས་གཡོན་ནས༔ སྟ་ཟུར་ཤད་དེ་སྙིང་གར་བསྣོལ༔ ཕྱི་རུ་འཕེན་དང་ཆབ་གཅིག་ཏུ༔ སྐྱིལ་ཀྲུང་ཐར་གྱིས་བཤིགས་བྱས་ཏེ༔ རྐང་པའི་མཐིལ་སྤྲད་པུས་མོ་བསྒྲད༔ ལག་གཉིས་མདུན་མཁར་འཕང་བྱས་ནས༔ བསྐོར་བསྣོལ་མཛུབ་རྩེ་སྤྲད་བྱས་ཏེ༔ ལག་གཉིས་ཕྱིར་བརྐྱང་རྐང་པ་བསྒྲེང་༔ སླར་ཡང་སྔར་བཞིན་རྡོ་རྗེའི་རྒྱ༔ དེ་ལྟར་ལན་གསུམ་བསྐྱར་ [15a] བར་བྱ༔ ཞེས་སོ། །གསུམ་པ་ནི། སྣོད་བཅུད་དཔལ་དང་ལྡན་པའི་ཞིང་༔ རང་ཉིད་རིན་ཆེན་འབྱུང་ལྡན་བསྐྱེད༔ ལག་གཉིས་ཁུ་ཚུར་པུས་སྟེང་ནས༔ ཆུན་བཙལ་བྲང་ནས་ཕྱི་རུ་འཕང་༔ མཆན་འོག་ཏུ་བཅུག་ལུས་གཡས་གཅུ༔ ཁུ་ཚུར་འཕང་ནས་ཡང་སྔར་བཞིན༔ གཡོན་དུ་ལན་གསུམ་གཅུས་བྱས་མཐར༔ ལག་གཉིས་མཉམ་བཞག་མཆོག་སྦྱིན་གྱི༔ ཕྱག་རྒྱ་བྱ་སྟེ་ལུས་ཡར་བསྲང་༔ རྩ་མདུད་ཁྲོལ་མར་ཞིག་པར་བསམ༔ ཞེས་སོ། །བཞི་པ་ནི། སྣང་སྲིད་བདེ་ཆེན་ཞིང་དུ་གསལ༔ རང་ཉིད་སྣང་བ་མཐའ་ཡས་ཀྱི༔ ལག་མཐིལ་ཉི་མའི་དཀྱིལ་འཁོར་བསྒོམ༔ རེག་པའི་གནད་ཀྱིས་གྲང་བ་དང་༔ ཆུ་སེར་རྒྱས་པ་ཐམས་ཅད་ཀུན༔ བ་མོར་ཉི་ཟེར་ཕོག་པ་ལྟར༔ བཅོམ་ཞིང་མེ་ཡི་རང་བཞིན་དུ༔ བསྒྱུར་བྱེད་ནུས་པ་དང་ལྡན་བསམ༔ ཁུ་ཚུར་སྟ་ཟུར་ནས་ཤད་དེ༔ གདོང་ཐད་ནམ་མཁར་འཕང་བྱས་ནས༔ ཐལ་མོ་དྲག་ཏུ་མཉེ་ཞིང་བསྐོར༔ པད་སྐོར་བྱས་ཏེ་ཕོ་བ་མཉེ༔ སླར་ཡང་པད་སྐོར་བྱས་ནས་སུ༔ སྟོད་དང་མཆན་ཁུང་རེས་མོས་འཕུར༔ ལུས་དང་མགོ་བོ་ཁྱད་པར་འཕུར༔ ལག་གཡས་མཐིལ་གྱིས་གཡོན་པ་དང་༔ གཡོན་པས་དེ་བཞིན་གཡས་པ་རུ༔ འཕུར་ཞིང་ཁྱད་པར་ཤད་པར་བྱ༔ དེ་ནས་ [15b] བརླ་ཡང་གཡས་གཡོན་འཕུར༔ ཁུ་ཚུར་ནུ་སྟེང་ནས་བསྒྲེང་བཞིན༔ འཕར་གྱིས་རྐང་གཡས་བསྒྲེང་བྱས་ཏེ༔ མར་བྱུག་ཡར་ཤད་ལན་གསུམ་བྱ༔ དེ་བཞིན་རྐང་གཡོན་ལ་ཡང་བྱ༔ ཞེས་སོ། །ལྔ་པ་ནི། སྣང་སྲིད་ལས་རབ་རྫོགས་པའི་ཞིང་༔ རང་ཉིད་དོན་ཡོད་གྲུབ་པར་བསྒོམ༔ ཁུ་ཚུར་གདོང་ཐད་ལན་གསུམ་འཕེན༔ དེར་སྦྲག་པད་སྐོར་བྱ་བ་དང་༔ ཆབ་གཅིག་སྐྱབས་སྦྱིན་མཉམ་བཞག་བྱ༔ དཀྱིལ་འཁོར་ལུས་ནི་ལན་གསུམ་སྤྲུགས༔ དེ་མཐར་འབེབ་ཆུང་གསུམ་དང་ནི༔ དེ་བཞིན་བར་འབེབ་ལན་གསུམ་དང་༔ འབེབ་ཆེན་གསུམ་གྱིས་རྫོགས་པར་བྱ༔ ཞེས་སོ། །གཉིས་པ་དངོས་གཞི་གཙོ་འཁོར་སོ་སོའི་འཁྲུལ་འཁོར་ལ་རྣམ་གྲངས་ཉི་ཤུ་ཐམ་པ་ལས། དང་པོ་ནི། སྣང་ཞིང་སྲིད་པ་ཐམས་ཅད་ཀུན༔ འོག་མིན་མེ་རི་འབར་བར་བསྒོམ༔ རང་ཉིད་རྡོ་རྗེ་གཞོན་ནུར་གསལ༔ སྣ་ཚོགས་གར་གྱི་རྣམ་འགྱུར་གྱིས༔ ལུས་ཀྱི་རྩ་མདུད་མ་ལུས་པ༔ ཁྲལ་མ་ཁྲོལ་མར་ཞིག་པར་བསམ༔ དེ་ནས་རྐང་མཐིལ་ས་ལ་ཕབ༔ པུས་བྲང་སྦྱར་ཏེ་ཁུ་ཚུར་གྱིས༔ སྟ་ཟུར་ཤད་དེ་ལུས་ཡར་འཐེན༔ རྐང་པ་གྱད་ཀྱི་འདོར་སྟབས་ལ༔ ཁུ་ཚུར་གཡས་སུ་ཤུགས་ཀྱིས་འཕེན༔ གཡོན་པས་འདོམ་གང་ཚུལ་དུ་ [16a] འཐེན༔ དེ་ལྟར་ལན་གསུམ་བསྐྱར་བྱས་ནས༔ སླར་ཡང་ལང་སྟབས་པུས་བྲང་བསྲང་༔ སྡིགས་མཛུབ་སྟེང་གི་ནམ་མཁར་འཕེན༔ ལན་གསུམ་བསྐྱར་ཏེ་སླར་ཡང་ནི༔ རྐང་པ་གྱད་ཀྱི་འདོར་སྟབས་བསྒྲད༔ ལག་གཉིས་ནང་བསྐོར་ནུ་སྟེང་ནས༔ གཡས་གཡོན་ནམ་མཁར་ལན་གསུམ་འཕེན༔ ནང་བསྐོར་སྙིང་གར་ཐལ་མོ་སྦྱར༔ ལན་གསུམ་བསྐྱར་ཏེ་འབེབ་ཆེན་གསུམ༔ བརྡབ་ཚེ་མ་དག་སྙིགས་མའི་ལུས༔ དྭངས་མ་འོད་ཀྱི་རང་བཞིན་དུ༔ ཞིག་པར་བསམ་ལ་མཉམ་པར་བཞག༔ ཅེས་སོ། །གཉིས་པ་ནི། སྣང་སྲིད་དག་པ་མཁའ་སྤྱོད་ཞིང་༔ རང་ཉིད་དབྱིངས་ཀྱི་རྗེ་མོར་བསྒོམ༔ ཧར་གྱིས་ལངས་ཏེ་ཁུ་ཚུར་གཉིས༔ ཤད་བསྐྱེད་སྦུབས་ལ་ལུས་ཡང་བསྲང་༔ རྐང་པའི་བྲང་བ་སོ་སོ་ནས༔ ཤད་དེ་མཁའ་ལ་ལན་གསུམ་འཕེན༔ རྐང་པ་གཡས་བསྐུམ་གཡོན་བརྐྱང་པའི༔ གར་སྟབས་ལག་གཡས་སྡིགས་མཛུབ་ནི༔ གཡས་ཕྱོགས་ནམ་མཁར་ལན་གསུམ་འཕང་༔ དེ་བཞིན་གཡོན་བསྐུམ་གཡས་བརྐྱང་སྟེ༔ སྡིགས་མཛུབ་གཡོན་ཕྱོགས་མཁའ་རུ་འཕེན༔ རྩ་མདུད་ཐམས་ཅད་ཁྲལ་ཁྲོལ་དུ༔ ཞིག་པར་བསམ་ལ་རྒུར་འཐེན་ནས༔ འབེབ་གསུམ་བརྡབ་སྟེ་མཉམ་ [16b] པར་བཞག༔ ཅེས་སོ། །གསུམ་པ་ནི། སྣང་སྲིད་ཞི་བ་ལྷུན་གྲུབ་དལ༔ རང་ཉིད་བཛྲ་ཀཱི་ལར་གསལ༔ ཞེ་སྡང་འཁྲུལ་པ་བཤིག་པའི་གར༔ བསྒྱུར་བས་སྙིང་གའི་རྩ་མདུད་གྲོལ༔ མེ་ལོང་ཡེ་ཤེས་མངོན་གྱུར་བསམ༔ ལངས་ཏེ་སྟ་ཟུར་གཡས་གཡོན་ནས༔ རྡོ་རྗེའི་ཁུ་ཚུར་གྱིས་ཤད་དེ༔ གཡས་གཡོན་ཟུར་དུ་ལན་གསུམ་འཕེན༔ དེ་ནས་རྡོ་རྗེའི་ལུས་རྒྱ་བྱ༔ རྐང་པ་གྱད་ཀྱི་འདོར་སྟབས་བསྒྲད༔ ལྟ་སྟངས་གཡས་ཀྱི་ནམ་མཁའ་རུ༔ སྡང་མིག་བསྒྲད་ཅིང་ལག་གཡས་ཀྱི༔ སྡིགས་མཛུབ་ནམ་མཁར་ལན་གསུམ་འཕེན༔ གཡོན་དུའང་དེ་བཞིན་འཕང་བར་བྱ༔ འཕར་སྟངས་དང་ནི་བསྐོར་སྟངས་ཀྱི༔ རྣམ་འགྱུར་མཛེས་ཤིང་རྔམས་པ་བྱ༔ ཆོས་ཀྱི་འཁོར་ལོར་ཧཱུཾ་ཞིག་བསྒོམ༔ མི་བསྐྱོད་རྡོ་རྗེའི་ངོ་བོར་གསལ༔ མེ་ལས་མེ་སྟག་འཕྲོ་བ་བཞིན༔ འོད་ཀྱིས་སྙིང་གའི་རྩ་འདབ་གང་༔ རྩ་ཡི་མདུད་པ་ཐམས་ཅད་ཀུན༔ བཙན་ཐབས་ཉིད་དུ་ཞིག་པར་བསམ༔ ལུས་ཀུན་འཐེན་སྟངས་གསུམ་གྱི་མཐར༔ རྡོ་རྗེ་གཅུས་འབེབ་ལན་གསུམ་བརྡབ༔ ཅེས་སོ། །བཞི་པ་ནི། སྣང་སྲིད་རྒྱས་པ་ལྷུན་གྲུབ་དལ༔ རང་ཉིད་རཏྣ་ཀཱི་ལར་གསལ༔ ང་རྒྱལ་འཁྲུལ་པ་བཤིག་པའི་ [17a] གར༔ བསྒྱུར་བས་ལྟེ་བའི་རྩ་མདུད་གྲོལ༔ མཉམ་ཉིད་ཡེ་ཤེས་མངོན་གྱུར་བསམ༔ སླར་ཡང་རྩ་རླུང་ཐིག་ལེའི་ཁམས༔ ཨོཾ་དཀར་ཨཱཿདམར་ཧཱུཾ་མཐིང་ནག༔ རྣམས་སུ་གནས་འགྱུར་གོ་འཕོས་ཏེ༔ གསང་གསུམ་འཁོར་ལོར་གནས་དག་བསམ༔ ལངས་ཏེ་སྡིགས་མཛུབ་ནམ་མཁའ་རུ༔ ཤེས་བསྐྱེད་ལན་གསུམ་འཕང་བྱས་ཏེ༔ ནོར་བུའི་ཕྱག་རྒྱ་གནས་ལྔར་གཏུག༔ དེ་ནས་ཁུ་ཚུར་མཆན་ཁུང་གཏད༔ ལུས་ནི་གཡས་གཡོན་གསུམ་གསུམ་གཅུ༔ དེ་ནས་ཁུ་ཚུར་བོལ་གོང་དུ༔ དལ་གྱིས་རྒུ་བཞིན་ཧ་ཡི་སྒྲས༔ རླུང་དུག་ཕྱི་རུ་དབྱུང་བྱས་ཏེ༔ ཧཱུཾ་ཞེས་བརྗོད་པས་ཡེ་ཤེས་རླུང༔ དལ་གྱིས་རྔུབས་བཞིན་ཁུ་ཚུར་བསྒྲིལ༔ རྐང་པའི་བར་ནས་ཡར་བརྒྱུད་དེ༔ བྲང་གི་སྟེང་ནས་ནམ་མཁའ་རུ༔ འཕེན་དང་ཆབ་གཅིག་དམིགས་པ་ནི༔ རྩ་ཆེན་རྩ་ཆུང་རྩ་ཕྲན་ཀུན༔ དབུ་མ་ཉིད་དུ་སྡུས་བསམ་ཞིང་༔ ཧཾ་ཞེས་སྟོང་འདྲེན་དྲག་པོ་ཡིས༔ རྩ་རླུང་ནང་དུ་ཤུགས་ཀྱིས་འཐེན༔ ལན་གསུམ་བསྐྱར་ཏེ་འཕར་སྟངས་ཀྱིས༔ བསྒྲད་ཆེན་ལན་གསུམ་བརྡབ་པར་བྱ༔ ཞེས་སོ། །ལྔ་པ་ནི། སྣང་སྲིད་དབང་ཆེན་ལྷུན་གྲུབ་དལ༔ རང་ཉིད་པདྨ་ཀཱི་ལར་གསལ༔ འདོད་ཆགས་འཁྲུལ་པ་བཤིག་པའི་གར༔ བསྒྱུར་བས་མགྲིན་པའི་རྩ་མདུད་གྲོལ༔ [17b] སོར་རྟོག་ཡེ་ཤེས་མངོན་གྱུར་བསམ༔ སྙིང་གར་རྩ་མཆོག་དབུ་མའི་སྦུབས༔ ཡི་གེ་ཨོཾ་དཀར་ཨཱཿདམར་པོ༔ ཧཱུཾ་ཡིག་མཐིང་ནག་དང་བཅས་པ༔ བརྩེགས་མར་གནས་པའི་འོད་ཟེར་ནི༔ མེ་ལས་མེ་སྟག་ཆད་པ་ལྟར༔ རྩ་ཆེན་རྩ་ཆུང་རྩ་ཕྲན་ཀུན༔ རཾ་ཡིག་དམར་པོ་རྡུལ་ཕྲན་ཙམ༔ ཏིལ་གོང་ཕྱུར་བཞིན་གང་བར་བསྒོམ༔ སྣ་བུག་གཉིས་ནས་རླུང་རྔུབས་པས༔ རྩ་གནས་རཾ་ཡིག་ཀུན་ལ་ཕོག༔ མེ་རླུང་འཐབ་པའི་བྱེད་ལས་ཀྱིས༔ མ་དག་སྙིགས་མའི་རྩ་རླུང་ཐིག༔ དྭངས་མ་འོད་ཕུང་དཀར་དམར་མཐིང་༔ ཡེ་ཤེས་གསུམ་གྱི་རོལ་པར་བསྲེགས༔ རང་ལུས་འོད་ཀྱི་ཕུང་པོ་ལ༔ ཡེ་ཤེས་མེ་དཔུང་འབར་བར་བསྐྱེད༔ སྣ་ཚོགས་གར་གྱི་རྣམ་རོལ་ལས༔ ཁམས་གསུམ་གནས་པའི་སེམས་ཅན་གྱི༔ སེམས་དང་སྣང་བ་དབང་བསྒྱུར་ཏེ༔ ཟག་མེད་ས་ལ་སྦྱོར་བར་དམིགས༔ ལངས་ཏེ་ཁུ་ཚུར་བསྐོར་རྒྱང་གིས༔ ལག་གཉིས་སྙིང་གར་བསྣོལ་བྱས་ཏེ༔ རྐང་པའི་མཐིལ་སྤྲད་པུས་མོ་བསྒྲད༔ གཡས་དང་གཡོན་དུ་ལན་གསུམ་རྒུ༔ འཕར་སྟངས་ཀྱིས་ནི་འདོར་སྟབས་བསྒྲད༔ སྡིགས་མཛུབ་ནམ་མཁར་ལན་གསུམ་འཕེན༔ སླར་ཡང་འཕར་སྟངས་དང་སྦྲགས་ཏེ༔ རྐང་པ་གཉིས་པོ་ལངས་སྟབས་བསྡུས༔ དེ་བཞིན་འཕར་སྟངས་དང་བཅས་ཏེ༔ སྔར་བཞིན་འདོར་སྟབས་ [18a] བསྒྲད་བྱས་ནས༔ སྡིགས་མཛུབ་བར་སྣང་ཁམས་སུ་འཕང་༔ པད་སྐོར་གྱིས་བསྐུམ་སྙིང་ག་རུ༔ ཐལ་མོ་ལན་གསུམ་སྦྱར་བྱས་ལ༔ རྒུར་ཏེ་མདུན་དུ་འགྲོ་སྟབས་ཀྱིས༔ ཕྱིར་ལ་རྒུར་ཆུང་འབེབ་གསུམ་བརྡབ༔ ཨོཾ་ཡིག་འོད་དཀར་རྩ་རུ་ཐིམ༔ ཨཱཿཡིག་འོད་དམར་རླུང་ལ་ཐིམ༔ ཧཱུཾ་ཡིག་འོད་མཐིང་ཐིག་ལེར་ཐིམ༔ རླུང་ལོག་རང་མལ་གསོད་པར་བསམ༔ མཆོག་གསུམ་སྐུ་གསུམ་རྩ་གསུམ་གྱི༔ རོལ་པ་ཆིག་རྫོགས་ཉིད་དུ་གསལ༔ ཞེས་སོ། །སྣང་སྲིད་དྲག་པོ་ལྷུན་གྲུབ་དལ༔ རང་ཉིད་ཀརྨ་ཀཱི་ལར་གསལ༔ ཕྲག་དོག་འཁྲུལ་པ་བཤིག་པའི་གར༔ བསྒྱུར་བས་གསང་བའི་རྩ་མདུད་གྲོལ༔ བྱ་གྲུབ་ཡེ་ཤེས་མངོན་གྱུར་བསམ༔ སྙིང་དབུས་རྩ་མཆོག་དབུ་མའི་སྦུབས༔ ཨོཾ་མཐར་ཧཱུཾ་ཏྲཱཾ་ཧྲཱིཿཨཱཿརྣམས༔ དབུས་མཐིང་ཤར་དཀར་ལྷོ་སེར་པོ༔ ནུབ་དམར་བྱང་ལྗང་ཁ་དོག་ཅན༔ གསལ་འཚེར་འོད་འབར་སྣུམ་ལ་འདྲིལ༔ དེ་ལས་འོད་ཕུང་ལྔ་མཆེད་པས༔ མ་དག་ལས་ཀྱི་རྩ་རླུང་ཐིག༔ དག་དབྱིངས་དྭངས་མའི་ངོ་བོར་སྨིན༔ ཡི་གེ་ལས་ནི་ཡི་གེ་མཆེད༔ དབུས་དང་མདུན་རྒྱབ་གཡས་གཡོན་གྱི༔ རྩ་ཁམས་ཡི་གེའི་འཁོར་ལོ་དག༔ ཨོཾ་གྱིས་རྔུབ་ཅིང་ཨཱཿཡིས་དགང་༔ ཧཱུཾ་གིས་རྩ་ཁམས་ [18b] རྣམས་སུ་གཞིལ༔ རྡོ་རྗེའི་བཟླས་པ་ལན་དགུ་བསྐྱར༔ གཡས་སུ་ཉལ་ཏེ་རྩ་རྣམས་ཀྱི༔ མདུད་པ་ཁྲོལ་མར་ཞིག་བསམ་ཞིང་༔ རྐང་ལག་གཡོན་ཟུང་ཤུགས་ཀྱིས་འཕེན༔ གཡོན་དུ་ཉལ་ཏེ་གཡས་ཕྱོགས་ཀྱི༔ རྩ་མདུད་དེ་བཞིན་གྲོལ་བསམ་འཕེན༔ དེ་ནས་རྐང་མཐིལ་ཁ་སྦྱོར་འདུག༔ ལག་གཉིས་པུས་མོའི་སྟེང་དུ་བཞག༔ ཧཾ་སྒྲས་ལུས་ཀྱི་ནང་རོལ་རྣམས༔ ལན་གསུམ་ཤུགས་ཀྱིས་འཐེན་པར་བྱ༔ སླར་ཡང་ལངས་བཞིན་ལུས་བསྲངས་ཏེ༔ གཡས་སུ་ཕུར་པ་འདྲིལ་ཚུལ་དང་༔ གཡོན་དང་མདུན་དུ་ཡང་དེ་བཞིན༔ ས་ལ་གདབ་དང་སྟེང་དུ་ཕྱར༔ ཁུ་ཚུར་འཕེན་དང་ལྷན་ཅིག་ཏུ༔ འཕར་སྟངས་རྡོ་རྗེའི་ལུས་རྒྱ་བྱ༔ ལུས་ཀུན་ཤུགས་ཀྱིས་ལན་གསུམ་འཐེན༔ རྡོ་རྗེ་ཐོག་འབེབ་ལན་གསུམ་བསྐྱར༔ ཞེས་སོ། །བདུན་པ་ནི། སྣང་སྲིད་བདེ་ཆེན་ལྷུན་གྲུབ་དལ༔ རང་ཉིད་བུདྡྷ་ཀཱི་ལར་གསལ༔ གཏི་མུག་འཁྲུལ་པ་བཤིག་པའི་གར༔ བསྒྱུར་བས་སྤྱི་བོའི་རྩ་མདུད་གྲོལ༔ ཆོས་དབྱིངས་ཡེ་ཤེས་མངོན་གྱུར་བསམ༔ སྤྱི་བོ་བདེ་ཆེན་འཁོར་ལོ་རུ༔ ཆོས་ཀྱི་འཁོར་ལོ་རྩིབས་བརྒྱད་པའི༔ ལྟེ་བར་ཐིག་ལེ་དཀར་པོ་ལས༔ ཐིག་ལེ་བཅུ་དྲུག་མགྲིན་པར་བབས༔ རླུང་ཁུག་གསུམ་གྱིས་དེའི་ཕྱེད་ཆ༔ སྙིང་ག་ [19a] ཆོས་ཀྱི་འཁོར་ལོར་བབས༔ དེ་བཞིན་རླུང་ཁུག་གསུམ་གྱིས་ནི༔ དེ་ཡི་ཕྱེད་ཆ་ལྟེ་བར་དང་༔ གོང་བཞིན་རླུང་ཁུག་ལན་གསུམ་གྱིས༔ དེ་ཡི་ཕྱེད་ཆ་གསང་བར་བབས༔ གཅིག་ཆ་ཨ་ཤད་ལ་ཕོག་པས༔ མེ་ཡི་ཤུགས་ཀྱིས་ལུགས་ལྡོག་སྟེ༔ སྤྲུལ་པའི་འཁོར་ལོར་ཡར་ལྡོག་པས༔ དགའ་བའི་ཡེ་ཤེས་སྐྱེས་པར་བསམ༔ ཆོས་ཀྱི་འཁོར་ལོར་ལྡོག་པ་ཡིས༔ མཆོག་ཏུ་དགའ་བའི་ཡེ་ཤེས་སྐྱེས༔ ལོངས་སྤྱོད་འཁོར་ལོར་ཡར་ལྡོག་པས༔ ཁྱད་པར་དགའ་བའི་ཡེ་ཤེས་སྐྱེས༔ བདེ་ཆེན་འཁོར་ལོའི་ཐིག་ལེར་ཐིམ༔ ལྷན་ཅིག་སྐྱེས་དགའི་ཡེ་ཤེས་སྐྱེས༔ དེ་ནས་མེ་དང་ཐིག་ལེ་ཟུང་༔ ཆེར་མཆེད་སྒོ་གསུམ་ཡོངས་ཁྱབ་སྟེ༔ བདེ་སྟོང་ཟག་པ་མེད་པ་ཡི༔ ཡེ་ཤེས་ཉམས་སུ་མྱོང་བསམ་ཞིང་༔ ལངས་ཏེ་ཁུ་ཚུར་སྐོར་རྒྱང་གིས༔ མདུན་མཁར་འཕེན་དང་ཆབ་གཅིག་ཏུ༔ ཐལ་བརྡབ་འཁོར་ལོའི་རྒྱ་བྱས་ཏེ༔ གཡས་གཡོན་ཕྲག་པར་ལན་གསུམ་བསྐོར༔ རྐང་པ་མདུན་དུ་འཕང་ནས་སུ༔ སྡིགས་མཛུབ་ས་ལ་ལན་གསུམ་གཟིར༔ ཉོན་མོངས་བརྒྱད་ཁྲི་བཞི་སྟོང་གིས༔ ཀུན་ནས་བསླངས་པའི་བགེགས་གནོད་བྱེད༔ སྤྱན་མའི་མཁའ་རུ་ཕཊ་ཀྱིས་བཤིགས༔ བསྒྲད་ [19b] ཆུང་གསུམ་དང་སྐོར་འབེབ་བརྡབ༔ ཅེས་སོ། །བརྒྱད་པ་ནི། རང་ཉིད་ཧཱུཾ་མཛད་མཐིང་གར་གསལ༔ རྡོ་རྗེའི་ཁུ་ཚུར་སྐོར་རྒྱང་གིས༔ སྡིགས་མཛུབ་ནམ་མཁར་འཕང་ནས་སུ༔ ཧཱུཾ་ཞེས་རླུང་ནི་ལྟེ་འོག་མནན༔ སྡིགས་མཛུབ་སྦུབས་ཏེ་སར་གཏད་ཅིང་༔ ཧུ་ཞེས་སྟོང་འདྲེན་དང་བཅས་པའི༔ སྡིགས་མཛུབ་ནམ་མཁར་ལན་གསུམ་འཕེན༔ ཤེད་བསྐྱེད་མདའ་གཞུ་འགེངས་ཚུལ་བྱ༔ ལྷ་གདོན་འཁྲུལ་འཁོར་བཤིག་པར་བསམ༔ དེ་མཐར་བསྒྲད་ཆེན་གསུམ་བཏུད་བྱ༔ ཞེས་སོ། །དགུ་པ་ནི། རང་ཉིད་རྣམ་རྒྱལ་དཀར་པོར་གསལ༔ ལངས་ཏེ་རྡོ་རྗེའི་ཁུ་ཚུར་གཉིས༔ སྦུབས་རྒྱང་ལན་གསུམ་འཕང་ནས་སུ༔ ཏྲི་ཤུལ་ཕྱག་རྒྱ་ཐུགས་ཀར་བསྣོལ༔ དྲི་ཟའི་འཁྲུལ་འཁོར་བཤིག་པར་བསམ༔ ལན་གསུམ་བསྐྱར་མཐར་འབེབ་ཆེན་གསུམ༔ ཞེས་སོ། །བཅུ་པ་ནི། རང་ཉིད་གཤིན་རྗེ་མཐིང་སེར་གསལ༔ ལག་གཉིས་ཁུ་ཚུར་རྐང་པ་ཡི༔ བྲང་ནས་ཤད་དེ་ལན་གསུམ་འཕེན༔ སྡིགས་མཛུབ་སྤྱི་བོར་བསྣོལ་བྱས་ཏེ༔ གཡས་གཡོན་སེ་གོལ་ལན་གསུམ་གཏོགས༔ སྡིགས་མཛུབ་གཡས་པ་ནམ་མཁར་བསྒྲེངས༔ གཡོན་པ་ས་རུ་གཟིར་བྱས་ཏེ༔ རྐང་པ་གཡོན་བརྐྱང་འགྱིང་སྟབས་ཀྱིས༔ ལྟ་ [20a] སྟངས་གཡོན་གྱི་ཕྱོགས་སུ་གཟིར༔ གཤིན་རྗེའི་འཁྲུལ་འཁོར་བཤིག་པར་བསམ༔ དེ་མཐར་རྒུར་འབེབ་ལན་གསུམ་བརྡབ༔ ཅེས་སོ། །བཅུ་གཅིག་པ་ནི། རང་ཉིད་རྟ་མགྲིན་དམར་པོར་བསྒོམ༔ ལངས་ཏེ་རྡོ་རྗེའི་ཁུ་ཚུར་གཉིས༔ སྟ་ཟུར་དུ་འཕང་མདུན་རྒྱབ་ཏུ༔ དགྱེ་རྒུ་ལན་གསུམ་སྤེལ་བའི་མཐར༔ མགོ་བོ་གཡས་སུ་ལན་གསུམ་བསྐོར༔ དེ་བཞིན་གཡོན་དུ་སྤེལ་བྱས་ཏེ༔ ཁུ་ཚུར་མཆན་རྡེབ་མདུན་མཁར་འཕེན༔ རྟ་རྒྱ་སྤྱི་བོར་བཞག་བྱས་ནས༔ ཨི་ཧིའི་སྒྲ་སྐད་དྲག་པོ་བསྒྲག༔ ཆུ་ལྷའི་འཁྲུལ་འཁོར་བཤིག་པར་བསམ༔ མཐར་ནི་རྒལ་འབེབ་ལན་གསུམ་བྱ༔ ཞེས་སོ། །བཅུ་གཉིས་པ་ནི། རང་ཉིད་བདུད་རྩི་ལྗང་ནག་བསྒོམ༔ ཧར་གྱིས་ལངས་ཏེ་ལུས་བསྲང་ཞིང་༔ ཁུ་ཚུར་གདོང་རྒྱང་ནམ་མཁར་འཕང་༔ རྐང་གཡས་བརླ་གཡོན་སྟེང་དུ་བསྣོལ༔ ལག་གཉིས་རྡོ་རྗེའི་རྒྱ་བསྣོལ་ཏེ༔ གཡས་གཡོན་རྒྱབ་ཏུ་ཤུགས་ཀྱིས་བརྐྱང་༔ གནོད་སྦྱིན་འཁྲུལ་འཁོར་བཤིག་པར་བསམ༔ ལན་གསུམ་བསྐྱར་མཐར་རྡོར་འབེབ་གསུམ༔ ཞེས་སོ། །བཅུ་གསུམ་པ་ནི། རང་ཉིད་དབྱུག་པ་སྔོན་པོར་གསལ༔ ལག་གཉིས་ཁུ་ཚུར་སྐོར་རྒྱང་གིས༔ མཆན་ཚག་བརྡབ་ཅིང་ནམ་མཁར་འཕེན༔ [20b] རྐང་པ་གྱད་ཀྱི་འདོར་སྟབས་ལ༔ སྡིགས་མཛུབ་གཡས་གཡོན་མཁའ་རུ་འཕེན༔ ལུས་ཀྱི་སྟ་ཟུར་གཡས་གཡོན་ནས༔ ཤེད་བསྐྱེད་ལན་གསུམ་གྱེན་དུ་ཤད༔ ཁུ་ཚུར་སྟེང་གི་ནམ་མཁར་འཕང་༔ མེ་ལྷའི་འཁྲུལ་འཁོར་བཤིག་པར་བསམ༔ བསྒྲད་ཆུང་གསུམ་བརྡབ་ཕཊ་གསུམ་བརྗོད༔ ཅེས་སོ། །བཅུ་བཞི་པ་ནི༔ རང་ཉིད་མི་གཡོ་ལྗང་ནག་གསལ༔ ལག་གཉིས་ཁུ་ཚུར་སྦུབས་རྒྱང་གིས༔ སྟ་ཟུར་གཡས་དང་གཡོན་དུ་བརྐྱང་༔ ལག་གཡས་སྡིགས་མཛུབ་བསྒྲེང་བ་དང་༔ ལྷན་ཅིག་རྐང་གཡས་པུས་མོ་ནི༔ སར་བཙུག་རྐང་གཡོན་མདུན་དུ་བརྐྱང་༔ སྡིགས་མཛུབ་གཡས་གཡོན་ནམ་མཁར་འཕང་༔ སྲིན་པོའི་འཁྲུལ་འཁོར་བཤིག་པར་བསམ༔ དེ་ལྟར་གསུམ་བསྐྱར་བར་འབེབ་གསུམ༔ ཞེས་སོ། །བཅོ་ལྔ་པ་ནི། རང་ཉིད་འདོད་རྒྱལ་དམར་པོར་བསྒོམ༔ ལངས་ཏེ་ལུས་བསྲངས་ཁུ་ཚུར་གཉིས༔ མདུན་དང་རྒྱབ་ཏུ་ལན་གསུམ་འཕེན༔ རྐང་པ་འདོར་སྟབས་བྱས་ནས་སུ༔ སྡིགས་མཛུབ་དཔུང་མགོ་གཡོན་པ་ནས༔ བསྐོར་ཏེ་རྒྱབ་ཀྱི་ཕྱོགས་སུ་གཟེར༔ འཕར་སྟངས་དང་བཅས་རྐང་ལག་གཡོན༔ གོང་བཞིན་ལན་གསུམ་བསྐྱར་བྱས་པས༔ རླུང་ [21a] ལྷའི་འཁྲུལ་འཁོར་བཤིག་པར་བསམ༔ ཁུ་ཚུར་བསྐོར་རྒྱང་འབེབ་ཆེན་གསུམ༔ ཞེས་སོ། །བཅུ་དྲུག་པ་ནི། རང་ཉིད་ཁམས་གསུམ་རྣམ་རྒྱལ་བསྒོམ༔ ལངས་བཞིན་ཁུ་ཚུར་གདོང་རྒྱང་གིས༔ ལངས་འདུག་ལན་གསུམ་སྤེལ་བའི་མཐར༔ སྡིགས་མཛུབ་སྟེང་དུ་འཕེན་པ་དང་༔ ཆབ་གཅིག་སྟན་ལས་འཕར་སྟངས་བྱ༔ སྡིགས་མཛུབ་བར་སྣང་འཕེན་པ་དང་༔ ཆབ་གཅིག་གྱད་ཀྱི་འདོར་སྟབས་བསྒྲད༔ སྡིགས་མཛུབ་ཐུར་དུ་འཕེན་པ་དང་༔ ཆབ་གཅིག་ལུས་ཀུན་ཤུགས་ཀྱིས་འཐེན༔ དབང་ལྡན་འཁྲུལ་འཁོར་བཤིག་པར་བསམ༔ དེ་མཐར་འབེབ་ཆེན་ལན་གསུམ་བརྡབ༔ ཅེས་སོ། །བཅུ་བདུན་པ་ནི། རང་ཉིད་སྟོབས་ཆེན་ནག་པོར་གསལ༔ རྐང་པ་རྡོ་རྗེ་སྐྱིལ་ཀྲུང་དང་༔ གཡོན་དུ་སྡིགས་མཛུབ་འཕེན་བཞིན་དུ༔ ལྟ་སྟངས་ཀྱིས་ནི་གཟིར་བར་བྱ༔ དེ་བཞིན་གོ་ལྡོག་གཡས་ཕྱོགས་སུ༔ སྡིགས་མཛུབ་འཕེན་དང་ལྟ་སྟངས་གཟིར༔ ཁུ་ཚུར་པུས་སྟེང་བཞག་བྱས་ཏེ༔ མདུན་དུ་སྟོང་འདྲེན་དྲག་པོ་ཡིས༔ ལྟེ་བའི་རླུང་ནི་ཤུགས་ཀྱིས་འཐེན༔ སྟེང་གི་ནམ་མཁར་ལྟ་སྟངས་བྱ༔ ལན་གསུམ་བསྐྱར་མཐར་ཐལ་མོ་གཡས༔ གཡས་ཀྱི་ས་ལ་ལན་གསུམ་བརྡབ་ [21b] དེ་བཞིན་གཡོན་དུ་ལན་གསུམ་བརྡབ༔ ས་བདག་འཁྲུལ་འཁོར་བཤིག་པར་བསམ༔ འབེབ་ཆུང་གསུམ་དང་བར་འབེབ་གསུམ༔ འབེབ་ཆེན་དྲག་པོ་གསུམ་བཅས་བརྡབ༔ ཅེས་སོ། །བཅོ་བརྒྱད་པ་ནི། རང་ཉིད་རྡོ་རྗེ་ཕག་མོར་གསལ༔ ཁམས་གསུམ་སྣང་ཞིང་སྲིད་པ་ཀུན༔ འཇའ་ཚོན་མཁའ་རུ་སྡུད་པ་བཞིན༔ ཐུགས་གསང་ཆོས་ཉིད་ཆེན་པོ་རུ༔ འུབ་ཀྱིས་འདུས་ཤིང་ཞིག་པར་བསྒོམ༔ རྐང་པ་གོམས་སྟབས་དོར་བྱས་ཏེ༔ གྲི་གུག་ཐོད་འཛིན་ཕྱག་རྒྱ་བྱ༔ ཡང་ཅིག་སྡིགས་མཛུབ་བསྐོར་བྱས་ཏེ༔ མདུན་དུ་ལན་གསུམ་འཕེན་ཅིང་སྡུད༔ ཐོད་འཛིན་ཕྱག་རྒྱ་དཔུང་མགོ་ནས༔ མདུན་ཕྱོགས་བསྐོར་ཞིང་གཡོན་དུ་བཟེད༔ རྩིབས་ལོགས་གཡོན་དུ་གཏུག་ནས་སུ༔ རྐང་ལག་གཡས་གཡོན་ས་རུ་བརྡབ༔ གཡས་དང་གཡོན་དུ་རྒུ་བ་དང་༔ ཕག་ཞལ་རྒྱ་དང་ཕག་སྐད་བསྒྲག༔ དགྱེ་དགུ་བྱ་ཞིང་འཐེན་སྟངས་ཚུལ༔ བྱས་མཐར་བསྒྲད་ཆུང་གསུམ་བརྡབ་བྱ༔ ཞེས་སོ། །བཅུ་དགུ་པ་ནི། སྣོད་བཅུད་འོག་མིན་ཆོས་དབྱིངས་དལ༔ རང་ཉིད་འཁོར་ལོ་རྒྱས་འདེབས་གསལ༔ རྩ་གསུམ་འཁོར་ལོ་ལྔ་ལྡན་ལ༔ རིགས་ལྔ་དབྱིངས་ཀྱི་ཡུམ་ལྔ་ཡི༔ སྐུ་དབྱིངས་དྭངས་གསལ་ཆེན་པོའི་མཁར༔ ཞིང་ཁམས་ལྔ་ཡི་བཀོད་པ་རྣམས༔ མཚོ་ [22a] ལ་གཟའ་སྐར་བཀྲ་བཞིན་གསལ༔ ཁམས་གསུམ་བརྟན་གཡོ་ཐམས་ཅད་ཀུན༔ ཡེ་ཤེས་ལྔ་རུ་སྡུད་བསམ་ཞིང༔ ལངས་ཏེ་ཁུ་ཚུར་བསྐོར་རྒྱང་མཐར༔ རྐང་གཡས་གར་སྟབས་གསང་བར་གཏད༔ གཡོན་པ་ས་ལ་བརྫིས་བྱས་ཏེ༔ ལག་གཡས་སྡིགས་མཛུབ་ནམ་མཁར་བསྒྲེང་༔ གོུན་པས་ཐུགས་ཀར་ཐོད་འཛིན་གྱི༔ ཚུལ་བྱ་ལྟ་སྟངས་ནམ་མཁར་བལྟ༔ གཡོན་པས་དེ་ལྟར་ལན་གསུམ་བསྐྱར༔ མཐར་ནི་འཁོར་ལོའི་རྒྱ་བྱས་ཏེ༔ སྤྱི་བོར་གཏུག་ཅིང་འཕར་སྟངས་ཀྱིས༔ བཤིགས་ཏེ་པདྨའི་ཕྱག་རྒྱ་བྱ༔ མགྲིན་པར་གཏུག་སྟེ་ཕྱིར་བཤིགས་ཤིང་༔ རྡོ་རྗེའི་རྒྱ་བྱས་སྙིང་གར་བཞག༔ སླར་ཡང་ནོར་བུའི་རྒྱ་བྱས་ཏེ༔ ལྟེ་བར་ལན་གསུམ་གཏད་ཅིང་བཤིགས༔ དེ་ནས་རྒྱ་གྲམ་རྒྱ་བྱས་ཏེ༔ གསང་བར་ལན་གསུམ་གཏུག་བྱས་མཐར༔ ལག་གཉིས་སྟ་ཟུར་ལ་བརྐྱང་སྟེ༔ མདུན་དུ་རྒུ་ཞིང་རྒྱབ་ཏུ་དགྱེ༔ ལན་གསུམ་བསྐྱར་ཏེ་གན་རྐྱལ་ལོག༔ རྐང་ལག་རྣམ་བཞི་ཤུགས་ཀྱིས་བསྒྲེང་༔ དེ་ནས་རྡོ་རྗེ་སྐྱིལ་ཀྲུང་གིས༔ རྡོ་རྗེ་སྐྱིལ་ཀྲུང་སུམ་རྡབ་བརྡབ༔ འབེབ་ཆུང་གསུམ་མཐར་ཧ་སྤྲུགས་བྱ༔ ཞེས་སོ། །ཉི་ཤུ་པ་ནི། སླར་ཡང་གཙོ་འཁོར་གཅིག་དྲིལ་གྱི༔ ངོ་བོ་རྡོ་རྗེ་གཞོན་ནུར་བསྒོམ༔ ཤར་ཕྱོགས་རྡོ་རྗེ་རིགས་ཀྱི་དལ༔ [22b] སྤྲིན་ཕུང་དཀར་པོ་འཐིབ་བཞིན་བསྡུས༔ ལུས་ལ་གོས་དཀར་གྱོན་པ་ལྟར༔ རྡོ་རྗེའི་གྲོ་ཁྲབ་དཀར་པོ་ལ༔ རྡོ་རྗེའི་ཚྭ་ཚྭ་འཕྲོ་བར་བསྒོམ༔ དེ་བཞིན་འོད་ཟེར་ལྷོ་རུ་འཕྲོས༔ རིན་ཆེན་རིགས་ཀྱི་རྟེན་བརྟེན་པ༔ འོད་ཕུང་སེར་པོའི་རྣམ་པར་བསྡུས༔ རིན་ཆེན་གོ་ཁྲབ་སེར་པོར་གྱུར༔ དུར་ཕག་མགོ་དགུའི་ཚྭ་ཚྭ་འཕྲོ༔ དེ་བཞིན་འོད་ཟེར་ནུབ་ཏུ་འཕྲོས༔ པདྨ་རིགས་ཀྱི་རྟེན་བརྟེན་པ༔ འོད་ཕུང་དམར་པོའི་རྣམ་པར་བསྡུས༔ པདྨའི་གོ་ཁྲབ་དམར་པོར་གྱུར༔ མེ་ཁྱུང་དམར་པོའི་ཚྭ་ཚྭ་འཕྲོ༔ དེ་བཞིན་འོད་ཟེར་བྱང་དུ་འཕྲོས༔ ལས་ཀྱི་རིགས་ཀྱི་རྟེན་བརྟེན་པ༔ འོད་ཕུང་ལྗང་ནག་རྣམ་པར་བསྡུས༔ རྒྱ་གྲམ་ལྗང་གུའི་གོ་ཁྲབ་ལ༔ ལྕགས་སྡིག་ཚྭ་ཚྭ་འཕྲོ་བར་བསྒོམ༔ དེ་བཞིན་འོད་ཟེར་སྟེང་དུ་འཕྲོས༔ སངས་རྒྱས་རིགས་ཀྱི་རྟེན་བརྟེན་པ༔ འོད་ཕུང་མཐིང་ནག་རྣམ་པར་བསྡུས༔ ལུས་ཀུན་ཁྱབ་སྟེ་བརྡལ་བ་ལས༔ འཁོར་ལོའི་གོ་ཁྲབ་སྔོན་པོར་གྱུར༔ མེ་ལས་མེ་སྟག་འཕྲོ་བ་བཞིན༔ ཁྲོ་ཆུང་མཚོན་ཐོགས་སྐར་ལྟར་འཁྲིགས༔ དཔག་ཚད་རྒྱང་གྲགས་ཚུན་ཆད་དུ༔ གླག་ལྟ་བར་གཅོད་ཐམས་ཅད་ཀུན༔ ཉེ་ཞིང་རྒྱུ་བའི་གནས་མེད་བསམ༔ ཤར་དུ་ལྕགས་ཀྱུའི་ཕྱག་རྒྱ་བྱ༔ སྣང་སྲིད་བྲན་དུ་འགུགས་བསམ་ཞིང་༔ ཛ༔ [23a] ཞེས་ལྟ་སྟངས་དྲག་པོས་གཟིར༔ ལྕགས་ཀྱུ་དཀར་མོའི་ཀློང་རྒྱས་གདབ༔ ལྷོ་རུ་ཞགས་པའི་ཕྱག་རྒྱ་བྱ༔ སྣང་ཞིང་སྲིད་པ་མ་ལུས་པ༔ བྲན་དུ་བཅིང་ཞིང་འཁོར་དུ་བཀོལ༔ ཧཱུཾ་ཞེས་འཆིང་བར་བྱེད་པའི་སྒྲས༔ ཞགས་པ་སེར་མོའི་ཀློང་རྒྱས་གདབ༔ ནུབ་ཏུ་ལྕགས་སྒྲོག་ཕྱག་རྒྱ་བྱ༔ ཁམས་གསུམ་སྲིད་པ་ཐམས་ཅད་ཀུན༔ སྡང་མེད་དཔའ་བཀོད་བློ་ཡིད་ཀུན་བཾ་གྱི་སྒྲ་ཡིས་རྨོངས་པར་བྱས༔ ལྕགས་སྒྲོག་དམར་མོའི་ཀློང་རྒྱས་གདབ༔ བྱང་དུ་དྲིལ་བུའི་ཕྱག་རྒྱ་བྱ༔ ཁམས་གསུམ་སྲིད་པ་ཐམས་ཅད་ཀུན༔ བྲན་དུ་བཀོལ་ཏེ་གནོད་གདུག་དང་༔ དྲག་ཤུལ་རྒོལ་བའི་སྡང་སྟོབས་ཤུགས༔ བསམ་སྤྱོད་ཐམས་ཅད་མྱོས་པར་བྱས༔ མྱོས་བྱེད་ཧོཿ ཡི་སྒྲ་བསྒྲགས་པས༔ དྲིལ་བུ་ལྗང་མོའི་ཀློང་རྒྱས་གདབ༔ མཐར་ནི་རྡོ་རྗེ་ཐོགའབེབ་གསུམ༔ བཤིགས་དང་ཆབ་གཅིག་ཧ་ཧེ་ ཧོཿ བརྗོད་དེ་ལུས་སྤྲུགས་རྩ་འདར་བྱ༔ དེ་མཐར་བསྔོ་བ་སྨོན་ལམ་གྱིས༔ རྒྱས་གདབ་པ་ཡིས་རྫོགས་པའོ༔ ཞེས་པ་ལྟར་རོ། །དེ་ལྟར་འཁྲུལ་འཁོར་རྣམས་ཀྱི་སྐབས་སུ་རླུང་དང་འཁྲུལ་འཁོར་དམིགས་པ་གསུམ་པོ་ཡ་བྲལ་དུ་མ་སོང་བའི་སྒོ་ནས། ལུས་གནད་རྡོ་རྗེའི་ཁུ་ཚུར་ཡན་ཆད་ལ་ཆུན་ཐོན་པར་ཆ་ཆ་ནས་བསྒྲིམས་ཏེ་གནད་དུ་གཅུན་ [23b] པ་གལ་ཆེའོ། །གཉིས་པ་སྤྱོད་ལམ་གྱི་གེགས་སེལ་ནི། སྤྱིར་རླུང་འཛིན་པ་ལ། རླུང་འཚུབས་ཆེན་པོ་དང༌། དུ་བ་འཐིབས་ས་དང༌། གཉིད་བྲོ་ཞིང་ཁམས་ཉོག་པ་དང༌། སྣ་བུག་གཡས་ནས་རྒྱུ་བའི་ཚེ་ཉོན་མོངས་པའི་རླུང་སྟེ། འདི་དུས་གནད་དུ་བསྣུན་ན་རླུང་ལོག་སོགས་ཀྱི་གེགས་འབྱུང་བས་རྩོལ་བ་མི་བསྐྱེད། སྣ་བུག་གཡོན་ནས་རྒྱུ་བའི་ཚེ་ཡེ་ཤེས་ཀྱི་རླུང་འགྱུ་བས་འདི་དུས་རྩོལ་བ་བསྐྱེད་ན་རིག་པ་དྭངས་ཤིང་ཉམས་ཏོགས་འཕེལ་བའི་ཡོན་ཏན་འབྱུང༌། གཉིས་མཉམ་ནས་ཟུང་འཇུག་གི་རླུང་རྒྱུ་བས་འདི་དུས་གནད་དུ་བསྣུན་ན་རླུང་སེམས་དབུ་མར་འཇུག་པའི་དགོས་པ་ཡོད། དེའང་གཏུམ་མོ་བསྒོམ་པ་ཕལ་ཆེར་ལ་ལུས་གནད་མ་བསྡམས་ཤིང་རླུང་བསྐྱིལ་དྲག་པ་དང༌། འཕངས་པ་ཤེད་ཆེ་བས་ལ་བརྒལ་བ་དང༌། འོག་རླུང་མ་བསྡམས་པ་སོགས་ཀྱིས་རླུང་ལོག་གི་གེགས་འབྱུང་བ་ཤས་ཆེ་བས་བསལ་བར་བྱ་སྟེ། དེ་ལ་སྟོད་གེགས་ནི་ཤེས་པ་འཕྱོ་བ། སྙིང་མི་དགའ་བ། རོ་སྟོད་ན་བ། མགོ་ལ་ཟུག་གཟེར་སྐྱེ་བ་སོགས་བྱུང་ན། རང་ལུས་སྟོང་སང་ངེ་བར་གསལ་བཏབ་སྟེ་རླུང་ཐེང་གཅིག་གཉིས་ཞིག་བསྒོམས་རྗེས། གང་ན་སའི་ལུས་ཀྱི་ཐད་ཀའི་མདུན་རྒྱབ་ཏུ་བུ་ག་ཧ་རེ་དོད་པ་ལས་ནད་རྣམས་ཉི་ཟེར་གྱི་རྡུལ་བཞིན་དུ་བུན་བུན་ཐོན་པས་ལུས་ནང་སྟོང་སང་ [24a] སང་སོང་བར་མོས་པ། ལག་གཉིས་ཁུ་ཚུར་མདུན་དུ་བརྐྱང་རྗེས་ཁུ་ཚུར་གྱི་རྒྱབ་ནུ་སྟེང་དང་ལག་ངར་རྩིབས་ལོགས་ལ་ཐེབས་པར་རྡེག་པ་དང་མཉམ་དུ་ཧ་ཐུང་དྲག་ཏུ་འདོན་ནོ། །སྨད་ཀུནྡའི་གེགས་ནི་ཆགས་སྲེད་བག་ཆགས་ཀྱི་རྒྱུ་ལས་བྱུང་བ་ཡིན་ན་དགག་སྒྲུབ་དང་བྲལ་བའི་བློས་སེལ། གྲིབ་དང་དམ་སེལ་གྱིས་འཛག་ན་དབང་ཞུ་ཞིང་ཚོགས་འཁོར་བྱ། གང་བས་འཛག་པ་དང་ནད་ཀྱིས་འཛག་ན་འཛིན་ལྡོག་དགྲམ་པའི་དམིགས་པ་དང་འཁྲུལ་འཁོར་གྱིས་བསལ། གཞན་ཡང་བྱང་སེམས་ཉམས་པའི་སྐྱོན། ཧ་ཅང་ལུས་བྲེལ་བ་དང༌། ཧ་ཅང་ཚ་བ་དང་ཧ་ཅང་འཁྱགས་པར་མི་བྱ། གལ་ཏེ་བཤང་གཅིའི་ཁྲོད་ལ་འཛག་ན་དོར་བའི་ཚེ། རྐང་ལག་གི་སོར་མོ་བསྐུམ། ལྟ་སྟངས་གྱེན་དུ་བལྟ། ལྕེ་རྐན་ལ་སྦྱར། ལྟེ་བར་བུམ་ཅན་ཅི་ནུས་བཟུང་རྗེས་བཤང་གཅི་དོར་བས་ཕན་པར་གྱུར། རྨི་ལམ་དུ་འཛག་ན། ཉལ་ཁར་རང་དབང་ཕྱུག་ཆེན་པོ་སྐུ་མདོག་ནག་པོར་རལ་པའི་ཐོར་ཚུགས་ཅན། ལུས་ཐམས་ཅད་ཐལ་བས་བྱུགས་པ། ལིངྒ་གྱེན་དུ་སྒྲེང་བ། ཕྱག་གཡས་རྨ་བྱའི་སྒྲོ་ཆུན་བཟུང་ནས་རང་གི་མཚན་མ་ལ་ནང་རོལ་དུ་བྱབ་པར་བྱེད་པའི་སྐུར་བསྒོམས་ལ། ཨོཾ་ཧ་རི་ནི་སར་རཀྟ་ཚུ་ཀ་ཚུ་ཀ་སྭཱ་ཧཱ། །ཞེས་ཅི་ [24b] ནུས་བཟླས་ཏེ། རང་གི་རྡོ་རྗེ་ལྤགས་པས་མགོ་བཏུམས་ལ་ཁོང་པར་སྦས་པས་རྟིང་པ་གཡས་གཡོན་གང་རིགས་ཀྱིས་མནན་ཅིང༌། རྐང་པ་ཅིག་ཤོས་བརྐྱངས་ནས་ཉལ་བས་སེལ་ཏེ་ཤིན་ཏུ་ཟབ། སྤྱིར་གེགས་སྐྱོན་ཆེ་ཆུང་གང་བྱུང་ཡང་བླ་མ་ལ་གསོལ་བ་འདེབས་པ་དང༌། མཁའ་འགྲོ་ལ་ཚོགས་གཏོར་བཏང་ཞིང༌། ཁྱད་པར་ཤེས་པ་ཀ་དག་གི་ངང་ལ་བཞག་པས་རྩ་རླུང་ཐིག་ལེའི་སྐྱོན་ཐམས་ཅད་ལས་གྲོལ་བར་འགྱུར་རོ། །དེ་ལྟར་ཟབ་ལམ་འདི་ཉིད་བླ་མེད་རྡོ་རྗེ་ཐེག་པའི་རྒྱུད་གཞུང་གི་བསྟན་དོན་གཙོ་བོ་ཡིན་པས་ཇི་སྐད་བཤད་པའི་ཉམས་ལེན་ལ་གོམས་འདྲིས་བརྟན་པ་ཐོབ་པར་བྱས་པའི་ཡོན་ཏན་ཀྱང༌། གནས་སྐབས་སུ་ལུས་ལ་བདེ་བ་འཕེལ། ནད་དཀོན་ཅིང་ཚེ་རིང༌། སྐྲ་དཀར་དང་གཉེར་མ་མི་འབྱུང༌། ལྷ་འདྲེའི་གནོད་པས་མི་ཚུགས། འབྱུང་བ་ལ་རང་དབང་སྒྱུར། ངག་བདེན་ཚིག་འགྲུབ། ཆོས་ཚིག་ཀློང་བརྡོལ། ཡིད་ལ་ཏིང་ཏེ་འཛིན་དང་རྟོགས་པའི་ཡོན་ཏན་སྐྱེ། འཁྲུལ་རྟོག་དག་ནས་ཟག་མེད་ཀྱི་ཡེ་ཤེས་མཐོང༌། མཐར་ཐུག་ཟུང་འཇུག་གི་གོ་འཕང་མངོན་དུ་བརྙེས་ནས་འཁོར་བ་ཇི་སྲིད་བར་ཕྲིན་ལས་ལྷུན་གྲུབ་ཏུ་འབྱུང་བར་འགྱུར་བ་སྟེ། ཚུལ་བཞིན་གནད་དུ་བསྣུན་གྱུར་ན༔ གེགས་དང་གོལ་ས་མ་ལུས་གཅོད༔ [25a] ལམ་རྟགས་ཡོན་ཏན་བསམ་མི་ཁྱབ༔ གྲུབ་པ་བརྒྱད་ལ་མངའ་དབང་འབྱོར༔ མཐར་ཐུག་ཡེ་ཤེས་འཁོར་ལོ་རུ༔ ཡང་དག་རྫོགས་པའི་སངས་རྒྱས་འགྱུར༔ ཞེས་གསུངས་པ་ལྟར་རོ། །གསང་ཆེན་གསང་བའི་ལམ་གྱི་མཐར་ཐུག་ཆེ། །བདེ་བས་བདེ་སྟོང་ཡེ་ཤེས་ལ་སྦྱོར་བ། །ཐབས་མཆོག་ཐབས་ལམ་མན་ངག་བདུད་རྩིའི་སྐྱེས། །སྐལ་ལྡན་སྐལ་བར་བསྐྱིལ་འདི་སྙིང་གི་གསོས། །འཁྲུལ་རྟོག་རླུང་སེམས་དྷཱུ་ཏིའི་སྦུབས་སུ་དག །ནང་གི་ས་ལམ་མིག་འཕྲུལ་བཞིན་དུ་བགྲོད། །སྒོ་གསུམ་རྡོ་རྗེ་གསུམ་དངོས་གྲུབ་པ་ཡི། །བརྟུལ་ཞུགས་སྤྱོད་པས་ཕྱོགས་ལས་རྣམ་རྒྱལ་ཤོག །དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ཐུན་མོང་གི་རྫོགས་རིམ་རྩ་རླུང་ཐིག་ལེའི་མན་ངག་སྙིང་པོར་དྲིལ་བ་བདེ་ཆེན་འདོད་འཇོའི་དགའ་སྟོན་ཅེས་བྱ་བ་འདི་ནི། བཀའ་བབས་ཀྱི་ཆོས་བདག་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུ་དོན་ཐམས་ཅད་གྲུབ་པའི་སྡེའི་གསུང་གིས་ཡང་དང་ཡང་དུ་བསྐུལ་བ་ལས། སྐལ་བ་ཅན་གྱི་གང་ཟག་རྣམས་ལ་ཕན་པ་ཆེན་པོའི་སྒོར་འགྱུར་བར་ཤེས་ནས། སྔགས་ཀྱི་བནྡྷེ་སྙོམས་ལས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་རྩ་གཉིས་པའི་ཐོག་ཏུ་སོན་པ་ན་ཚོད་ལྡན་གྱི་ལོ་དབོ་ཉ་བའི་ཤེས་རབ་ཀྱི་ཆའི་དགའ་བ་དང་པོ་ལ་མཁན་ལྗོངས་ཕུན་ [25b] ཚོགས་དགའ་ཚལ་གྱི་བསྟི་གནས་སུ་གྲུབ་པར་བགྱིས་པ་སྟེ། འདིས་ཀྱང་འགྲོ་བ་ཐམས་ཅད་ཟུང་འཇུག་བདེ་ཆེན་རྡོ་རྗེ་གཞོན་ནུའི་གོ་འཕང་མཆོག་ལ་མྱུར་དུ་རེག་པའི་རྒྱུར་གྱུར་ཅིག། །། སརྦ་དཱ་མངྒ་ལཾ།། ཛ་ཡནྟུ།།