TNR-SUNGBUM-01-OM-001

First text in volume. Back to Volume PageNext Text

Wylie title	rtsom pa po'i lo rgyus mdor bsdus
Location	phrin las nor bu'i gsung 'bum Volume 1, Text 1, Pages 1-9 (Folios 1a1 to 5a3)
Author	ཕྲིན་ལས་ནོར་བུ་
Citation	Thinley Norbu. Rtsom pa po'i lo rgyus mdor bsdus. In Phrin las nor bu'i gsung 'bum, Vol. 1: 1-9.
Side notes	Recto: rtsom pa po'i lo rgyus mdor bsdus
More details More details
Genre	History Texts - lo rgyus  ·  Synopsis - mdor bsdus - bsdus don

Tibetan Text

[edit]

༄༅། །མཁྱེན་བརྩེའི་བདག་ཉིད་བླ་མ་དཔལ་རྡོར་ནས་ཕྲན་པ་དཔེ་དེབ་རྩོམ་པ་པོའི་ལོ་རྒྱུས་བསྡུས་ཙམ་ཞིག་བྲི་དགོས་ཞེས་གསུངས་པའི་གསུང་ངོ་མ་ལྡོག་ཙམ་དུ་ལོ་རྒྱུས་ཐུང་ཙམ་ཞིག་ཞུ་ན། ཇི་སྐད་དུ་ལུགས་ཀྱི་བསྟན་བཅོས་ལས། རང་གི་ཡོན་ཏན་བརྗོད་པ་ནི། །ལྷ་དབང་ཡིན་ཡང་བཙུན་མ་ལགས། །ཞེས་འབྱུང་བ་དང་། ལྷག་པར་རང་ཉིད་ཐད་ཉེ་ཉོན་ཉི་ཤུའི་ཡ་གྱལ་བརྗེད་ངས་ཀྱི་གདོན་གྱིས་ཟིན་པས་རང་ཉིད་གང་དུ་བཙས་པའི་ས་ཡི་ལྟེ་བ། དུས་ཀྱི་ཆུ་ཚོད་ཆུ་སྲང་སོགས་འདི་གར་ཞིབ་ཅིང་ཕྲ་བ་ཞུ་རྔོ་མ་ཐོགས། རེ་ཞིག་འཁྲུལ་སྣང་གི་བྲག་ཆ་སྒྲ་འཛིན་གྱི་བུ་གར་གྲགས་པ་ལ་གཞིགས་ན། བོད་ཀྱི་ཡུལ་དབུས་ཆོས་རྒྱལ་སྲོང་བཙན་སྒམ་པོའི་སྐུ་དུས་རྒྱ་བཟའ་ཀོང་ཇོའི་རྟེན་སྐལ་ལ་བྱོན་པར་གྲགས་པའི་ཇོ་བོ་ཤཱཀྱ་མུ་ནེའི་བཞུགས་གནས་ལྷ་ས་ར་ས་འཕྲུལ་སྣང་གི་གཙུག་ལག་ཁང་དང་། བལ་བཟའ་ཁྲི་བཙུན་གྱི་རྟེན་སྐལ་དུ་བྱོན་པ་ཇོ་བོ་མི་བསྐྱོད་རྡོ་རྗེའི་བཞུགས་གནས་ར་མོའི་ཆེའི་ལྷ་ཁང་གི་བར་ན་རྒྱལ་འབུམ་སྒང་ཞེས་པར་ཞི་ཁྲོའི་ལྷ་ཁང་ཆུང་ངུ་ཞིག་ཡོད་པ་དེའི་ཉེ་འདབ་ཏུ་བདག་གི་ཡབ་ཡུམ་གཉིས་ལ་གནས་སྐབས་རིང་གི་བཞུགས་གནས་ཞིག་ཡོད་འདུག་པ་དེར་བདག་ཉིད་ཀྱི་རྣམ་པ་རིག་བྱེད་གཟུགས་ཀྱི་ཕུང་པོའི་རྟེན་མངོན་པར་སྣང་བར་གྱུར་ཏོ་ཞེས་ཐོས། བདག་གི་ཕ་ཡབ་ཀྱི་སྐུ་རིགས་ནི་བོད་ཀྱི་རྒྱལ་པོ་བྱ་ཁྲིའི་བརྒྱུད་པ་སྤུ་བོ་ཀཿ གནམ་རྒྱལ་པོའི་མི་ངོ་ཟུར་ཐོན་སྒམ་པ་དཔོན་ཚང་གི་སྲས་ཀཿ ཐོག་སྤྲུལ་སྐུ་ནོར་བུ་བསྟན་འཛིན་དང་། ཡབ་རྗེའི་ཡུམ་གཏེར་ཆེན་རཏྣ་གླིང་པའི་གདུང་བརྒྱུད་ལས་མཆེད་པ་ལྷོ་མོན་ཡོན་ཕུ་ཆོས་རྗེའི་བརྒྱུད་པ་རྣམ་རྒྱལ་སྒྲོལ་མ། བདག་ཉིད་རང་གི་སྐྱེས་མ་སྔོན་དུས་བོད་དབུས་གཙང་གཉིས་ཀའི་སྒེར་པའི་ཆར་གཏོགས་པ་གཞིས་ཀ་རྩེའི་སྒེར་པ་རྡོ་མཁར་ཟུར་པའི་མི་རྒྱུད་ཅིག་ཡིན་པར་བཤད། ཡབ་རྗེ་རིན་པོ་ཆེ་ནས་བདག་ཉིད་ཀྱི་མིང་ལ་འཇིགས་མེད་ཚེ་དབང་ཕྲིན་ལས་ནོར་བུ་ཞེས་གནང་། ལོ་ངོ་བརྒྱད་ཙམ་བར་དུ་ཡབ་ཡུམ་གཉིས་དང་ལྷན་ཅིག་འབྲལ་མེད་དུ་འགྲོགས། ལོ་ངོ་དགུ་ཙམ་ལོན་དུས་བོད་ཡུལ་ལྷོ་ཁ་གྲ་ཕྱི་ཨོ་རྒྱན་སྨིན་གྲོལ་གླིང་ཞེས་ལོ་ཆེན་བཻ་རོ་ཙ་ན་དུས་བབ་གཏེར་ཆེན་གྱི་རྣམ་པར་བྱོན་པ་རིག་འཛིན་འགྱུར་མེད་རྡོ་རྗེའི་གདན་ས་ག་ལ་བར་ཆོས་སྒོར་ཞུགས་ནས་རང་ལོ་བཅུ་བདུན་ལོན་པའི་བར་བསྡད། དེ་ཡང་ཀུན་མཁྱེན་འཇིགས་མེད་གླིང་པའི་རྣམ་ཐར་དོ་ཧའི་རྒྱན་ལས། རྩ་བ་བཞི་ཙམ་མ་ལགས་པ། །བླང་འདས་ཤེས་པའང་ཡོད་མིན་ན། །ཁྲིམས་ཀྱི་བསླབ་པ་ག་ལ་ཆགས། །ལེགས་སྨོན་འབའ་ཞིག་དོན་གཉེར་ལ། །ཉེས་སྤྱོད་སྡོམ་པ་ཡིན་སྙམ་ནས། །དཀོར་ལ་བག་མེད་སྤྱོད་པ་ཡི། །བཙུན་གཟུགས་རྣམ་ཐར་སྤྱི་མཐུན་བསྐྱངས། །ཞེས་གཞན་གྱི་དོན་དུ་ལྡེམ་པོར་དགོངས་པས་ཤིན་ཏུ་ཁེངས་སྐྱུང་བའི་གསུང་དུ་བྱོན་པ་དེ་དག་ལ་རང་ཉིད་ནས་སྤྱི་བརྟོལ་བསྐྱེད་དེ་དོན་ཐོག་ཏུ་ཁེལ་བར་ཉམས་སུ་བླངས། དེ་སྐབས་སྨིན་གླིང་དགོན་གྱི་དབུ་འཛིན་གཅུང་རིན་པོ་ཆེ་ངག་དབང་ཆོས་གྲགས་བཞུགས་པས་གྲྭ་ཚང་གི་དབུ་མཛད་ཁྲི་པ་བློ་གྲོས་རྒྱ་མཚོ་ལ་ཕྲན་པའི་སློབ་སྦྱོང་ཐད་ལ་འགན་འཁུར་དགོས་ཚུལ་བཀའ་ཕབས་པས་ཁོང་ནས་ཆོས་སྤྱོད་གསོལ་འདེབས་སྨོན་ལམ་རིགས་དང་། པདྨ་བཀའ་ཐང་སོགས་ལ་སྦྱོར་ཀློག་འབྲུ་འབྲེལ་ཚིག་སྡུད་སོགས་དཔྱིས་ཕྱིན་པར་བསླབས། རིགས་གནས་སྤྱི་དང་ཁྱད་པར་གསོ་བའི་རིག་པ་ལ་ཤིན་ཏུ་བྱང་ཆུབ་པས་སྡུག་བསྔལ་གྱི་ཆུ་བོ་གསུམ་པའི་རབས་ལ་འབོགས་པའི་སྐྱེ་བོ་མང་པོ་འཆི་གསོས་སྨན་གྱིས་འཚོ་བར་མཛད་པ་རྡོར་འཛིན་བདེ་ཆེན་ཆོས་འཛིན་མདུན་ནས་ལེགས་སྦྱར་བོད་ཀྱི་ཡིག་གཟུགས་ལ་སྒྲ་གདངས་ཀློག་ཐབས་ཐོན་པ་སྔགས་ཀྱི་ཀློག་ཐབས་ལ་ཅུང་ཟད་སྦྱངས། རྩ་རྒྱུད་གསང་སྙིང་རྩ་བ་དང་། སྡོམ་གསུམ་རྣམ་ངེས་ཀྱི་གཞུང་རྩ་བ་བློ་འཛིན་བགྱིས་ཏེ་རྒྱུགས་སྤྲོད་རྡོར་འཛིན་ཚེ་བརྟན་ལགས་སུ་ཕུལ་ཞིང་། དེ་བྱིང་ཆོས་སྤྱོད་གསོལ་འདེབས་སྨོན་ལམ་རིགས་དང་། ལོ་རེའི་རྩ་གསུམ་སྒྲུབ་མཆོད་མི་འདྲ་བ་ཁག་ལ་ཞལ་འདོན་གནང་རྒྱུའི་སྒྲུབ་ཐབས་ལས་བྱང་སྒྲུབ་ཁོག་དང་བཅས་པ་མང་ཙམ་ཡོད་པ་དེ་དག་བློ་འཛིན་བྱས་ཏེ། སྨིན་གླིང་དགོན་པའི་སྒྲིག་ལམ་རྣམ་པ་རིག་བྱེད་ཀྱི་རྣམ་བཞག་རྟག་ཏུ་གཙང་བས་ཟས་ཟ་བའི་སྡེའི་ཁོངས་སུ་སྟོན་པས་ཇི་ལྟར་བཀས་བཅས་པ་བཞིན་གྲྭ་ཚང་དམངས་ནས་སོས་པའམ་གསོལ་ཇ་ལ་སོགས་ཚ་བ་གསོལ་རེས་ཀྱི་སྐབས་སུ།བཅའ་བར་བྱ་བ་ལ་རྐན་སྒྲ་རྡེབ་པ་དང་། བཏུང་བར་བྱ་བ་ལ་ཧུབ་སྒྲ་འབྱིན་པ་ལ་སོགས་མེད་པར་སྨྲ་བ་བཅད་པ་ལྟ་བུའི་སྒོ་ནས་གསོལ་བའི་རིང་ལ་འདུས་སྡེ་ཡོངས་ཀྱི་སྙན་ལ་གསལ་བར་གསན་དུ་ཡོད་པའི་སྒྲ་དག་གསལ་བའི་སྒོ་ནས་བློ་འཛིན་གང་བྱས་རྒྱུགས་སྤྲོད་སྙན་སྒྲོན་དགོས་པ་སྔར་སྲོལ་ལམ་ལུགས་ལྟར་རྒྱུགས་ཕུལ། ལོ་ངོ་བཅུ་བདུན་མཚམས་སུ་སྨིན་གྲོལ་གླིང་ནས་དགོངས་པ་ཞུས་ཏེ་ལྷ་སར་ཡབ་ཡུམ་སར་རེ་ཞིག་བསྡད། དེ་ནས་ཡབ་ཀྱི་གདན་ས་ཆོས་རྒྱལ་སྲོང་བཙན་སྒམ་པོའི་སྐུ་དུས་སུ་བཞེངས་པ་མཐའ་འདུལ་དང་ཡང་འདུལ་གྱི་གཙུག་ལག་ཁང་མང་དུ་ཡོད་པར་གྲགས་པ་ལས་ཡང་འདུལ་ལྷ་ཁང་གི་གྲས་སུ་གཏོགས་པ་ཀོང་པོ་བུ་ཆུ་གཏེར་གྱི་ལྷ་ཁང་དང་ཉེ་བའི་ཆར། བདེ་ཆེན་སྟེང་ཞེས་འབོད་པའི་ས་ཡི་ཆར་ཡབ་རྗེ་རིག་འཛིན་ཆེན་པོའི་གདན་ས་བཅགས་པ་དེར་བརྟོལ་ནས་བསྡད། དུས་དེ་དག་གི་སྐབས་སུ་ཡབ་རྗེའི་ཞབས་སར། དབུས་གཙང་མདོ་ཁམས་དྭགས་ཀོང་སྤུ་བོ་ལྷོ་འབྲུག་ལ་དྭགས་རྒྱ་བལ་ལ་སོགས་པ་ཡུལ་གྲུ་གཞན་ནས་དད་ཅན་གྱི་སློབ་མ་མང་པོ་རིམ་དང་རིམ་མིན་དུས་དང་དུས་སོ་སོར་འདུས་པ་ལ་བཀའ་གཏེར་གྱི་དབང་ལུང་མང་པོ་གནང་བའི་སྐབས་ན་རང་ཉིད་ལའང་སྐལ་བ་དང་འཚམས་པའི་ཆོས་ཀྱི་སྦྱིན་པ་ཡང་ཡང་འཐོབས། གཞན་ཡང་ཡབ་རྗེ་རིན་པོ་ཆེ་ནས་མཁན་ཆེན་ངག་གི་དབང་པོའི་ཐུགས་སྲས་ཀྱི་གྲས་སུ་བཞུགས་པ་བླ་མ་ཨོ་རྒྱན་རིག་འཛིན། ཀུན་སྤངས་ཁྲོ་རྒྱལ་རྡོ་རྗེ། རྣལ་འབྱོར་པ་ཆེན་པོ་དགེ་འདུན་རྒྱ་མཚོ་ལ་སོགས་མཁས་གྲུབ་གཉིས་ལྡན་གྱི་བླ་མ་མང་པོར་བསྐུལ་མ་མཛད་པའི་བདག་རྐྱེན་ལ་བརྟེན་ནས་སྐྱེ་བོ་མཆོག་དམན་མང་པོ་ཆོས་ཀྱི་སྦྱིན་པ་ལ་ལོངས་སུ་སྤྱོད་པའི་སྐབས་ནའང་བདག་ཉིད་ལའང་ཆོས་ཀྱི་འབྲེལ་པ་ཐོབ། རང་ཉིད་ནས་ཞལ་མཇལ་གསུང་ཐོས་མྱོང་བའི་བླ་མ་ཐམས་ཅད་ངོ་མཚར་དང་བཀའ་དྲིན་ཆེ་བ་འབའ་ཞིག་ཏུ་འཁུམས། གནས་དུས་རྟེན་འབྲེལ་རྒྱུ་རྐྱེན་ལ་བརྟེན་ཏེ་བསམས་ཚེ་ཡབ་རྗེ་རིག་འཛིན་ཆེན་པོ་འཇིགས་བྲལ་ཡེ་ཤེས་རྡོ་རྗེ་དང་། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། དིལ་མགོ་མཁྱེན་བརྩེ་ཐེག་མཆོག་བསྟན་པའི་རྒྱལ་མཚན། རྡོ་གྲུབ་ཆེན་རིན་པོ་ཆེ་ཐུབ་བསྟན་ཕྲིན་ལས་དཔལ་འབར། སྤོ་ལོ་མཁན་ཆེན་དམ་པ་རྡོ་རྗེ་སོགས་ལས་དབང་ཁྲིད་ལུང་གསུམ་མང་བ་འཐོབས། འོན་ཏེ་ཆོས་དང་བླ་མ་བཟང་པོར་དངོས་པོར་ཨ་འཐས་སུ་ཞེན་པས་འཇིག་རྟེན་ཆོས་བརྒྱད་ཀྱི་གཟི་བརྗིད་བསྒྲུབ་པའི་སླད་དུ་བླ་མའི་མཚན་དྲིལ་བསྒྲགས་བྱེད་པ་འོས་སུ་མཆིས་པ་མི་འདུག་སྙམ་སྟེ་སྙེམས་པ་སྐྱུང་བའི་ཐབས་ལ་གཙིགས་སུ་བྱས། གོ་བ་ལྷན་པ་འདྲ་བ་ལ་གཞི་བཅོལ་ནས་ཆོས་ལ་ཐོས་བསམ་རྒྱ་ཆེན་པོ་བྱས་ཚུལ་གྱི་སྤྱི་བརྟོལ་བསྐྱེད་དེ་མཁས་པའི་གྲགས་པ་འདོན་པའི་བརྟུན་པའང་ཆེར་མ་བསྐྱེད། ལོ་གསུམ་བཅད་རྒྱར་ཡང་ཡང་བསྡད་པའི་སྒྲུབ་ཡུས་དང་། གྲུབ་རྟགས་གཞན་ལ་ངོམས་སུ་ཆོག་པའང་ཅང་མ་བདོག །འོན་ཏེ་ཀོང་པོ་དང་ལྷོ་མོན་འབྲུག་ལ་སོགས་པར་གནས་དུས་སོ་སོར་ཉིན་ཞག་བདུན་ཕྲག་རེ་ཤས་དང་། ཟླ་ངོ་རེ་ཤས་གང་ལྕོགས་འཕྱི་བ་དགུན་དུས་ས་ཁུང་ན་ཡིབས་ནས་སྡོད་པ་ལྟ་བུའི་མཚམས་སད་སུད་རེ་ལ་བསྡད་པའི་ཁུལ་བྱས། ཀུན་རྟོག་པིར་གྱིས་བྲིས་པའི་འཁྲུལ་སྣང་གི་གཟུགས་བརྙན་ཟིན་བྲིས་སུ་བཏབ་པ་ནི། ཁྲག་འཐུང་བདུད་འཇོམས་གླིང་པའི་གཏེར་གསར་སྔོན་འགྲོ་ཤིན་ཏུ་བསྡུས་པའི་འགྲེལ་པ་གོ་བདེ་ཆུ་འབབ་ཀྱི་ཚུལ་དུ་བྲིས་པ། ཡབ་རྗེ་རིན་པོ་ཆེའི་གསུང་བླ་མ་རྒྱང་འབོད་ཤིན་ཏུ་བསྡུས་པའི་འགྲེལཔ་དྲི་ཟའི་བུ་མོའི་ཏམྦུ་རའི་སྒྲ་དབྱངས། ཡབ་རྗེ་རིན་པོ་ཆེའི་གསང་གསོལ་འདེབས་རྒྱལ་ཀུན་ཐུགས་རྗེ་གཅིག་བསྡུས་མའི་འགྲེལ་པ་ཉི་གཞོན་བྱིན་རླབས་འོད་ཟེར་སྟོང་ལྡན། ཡབ་རྗེ་རིན་པོ་ཆེའི་གསུམ་སྐུ་ཕྲེང་གསོལ་འདེབས་མུཀྟི་ཀའི་དོ་ཤལ་གྱི་འགྲེལ་པ་རིག་འཛིན་མཁའ་འགྲོ་དགྱེས་པའི་མགུལ་རྒྱན་པདྨ་རཱ་གའི་དོ་ཤལ། ཡབ་རྗེ་རིན་པོ་ཆེའི་གསུར་མཁའ་འགྲོ་བདེ་ཆེན་རྒྱལ་མོའི་ཚོགས་བསྐང་གི་འགྲེལ་པ་ཉི་མ་གཞོན་ནུའི་འོད་ཟེར། ལྷོ་ལྗོངས་དབྱར་རྔའི་སྒྲ་ལྡན་དུ་བཞེངས་པའི་བདུད་འདུལ་མཆོད་རྟེན་གྱི་དཀར་ཆག་ནོར་བུ་བཻ་ཌཱུརྱའི་དོ་ཤལ། གནས་མཆོག་སྤ་གྲོ་སྟག་ཚང་ལ་སྲི་ཞུ་བསྒྲུབས་པའི་ཕན་ཡོན་སོགས་སོ། །དབྱིན་ཡིག་ཐོག་ཆོས་གཏམ་འགའ་ཤས་བྲིས་པ་གསེར་གྱི་ལྡེའུ་མིག་ཆུང་ངུ་། (The Small Golden Key) ཡང་ཆོས་གཏམ་སྣ་ཚོགས་པའི་གཏམ་གྱི་བྲག་ཅ། (Echoes) སྔར་གྱི་ལོ་རྒྱུས་སྒྲུང་གཏམ་ཐོར་བུ་འགའ་ཤས། (Gypsy Gossip) ཤར་ཕྱོགས་གངས་རིའི་བརྒྱུད་ཀྱི་མི་རིགས་ཤིག་གི་གཏམ་རྒྱུས་ཟེར་བ་རང་ཉིད་ཀྱི་སྒྲུང་གཏམ་རགས་བསྡུས། (Fantasy History of a Himalayan) ལྟ་བ་མི་འདྲ་བའི་སྐོར་རགས་ཙམ་བརྗོད་པ་བ་དན་དཀར་པོ་ཅན་གྱི་གྲུ་གཟིངས། (White Sail: Crossing the Waves of Ocean Mind to the Serene Continent of the Triple Gems) ཕྱི་ནང་འབྱུང་ལྔའི་རྟེན་འབྲེལ་གྱི་བཤད་པ་རགས་བསྡུས་སྒྱུ་མའི་ཟློས་གར། (Magic Dance: The Display of the Self-Nature of the Five Wisdom Dakinis) ཕྱི་རྒྱལ་འགའ་ཞིག་རང་གི་རིགས་དང་ཤེས་རིགས་ལ་ཞེན་གོག་ཧ་ཅང་ཐལ་ཆེས་པས་ནང་པའི་ཆོས་དང་གང་ཟག་ལ་དམའ་འབེབས་སྐྱོན་བརྗོད་བྱེད་པའི་དཔེ་དེབ་འགའ་ལ་ལན་དུ་བརྗོད་པ་མཁའ་འགྲོ་མའི་ཕྲིན་ཡིག་དུས་ཀྱི་ཕོ་ཉ་དང་། (Welcoming Flowers: From Across the Cleansed Threshold of Hope. An Answer to the Pope's Criticism of Buddhism) བཅས་པའོ། །མཐའ་བསྡོམས་སུ་དཔལ་སྤྲུལ་རིན་པོ་ཆེ་ནས།གང་ཡང་ཡིན་ཏེ་སྣང་ཙམ་ཀུན་ཏུ་བདེན། །གང་ཡང་མིན་ཏེ་གཤིས་ལ་བསམ་བརྗོད་བྲལ། །ཡིན་མིན་མེད་དེ་ཁས་ལེན་མཁན་པོ་སྟོར། །རྟོགས་དང་མ་རྟོགས་ཡེ་ནས་ཡོད་མ་ཡིན། །སུས་ཀྱང་མ་བསྟན་གང་གིས་བཟུང་མིན་པ། །མཁའ་མཉམ་རྣམ་གྲོལ་རྫོགས་པ་ཆེན་པོ་ནི། །སྒྲ་ཚིག་ལས་འདས་ལམ་དང་ཡི་གེ་མེད། །ནམ་མཁའ་བཞིན་དུ་ཡེ་ནས་རང་བཞིན་སྣང་། །ཞེས་གསུངས་པ་ལ་རྗེས་སུ་ཡི་རངས་ཏེ་མངོན་པར་བསྟོད་དོ་ཞེས་ནེ་ཙོའི་ལད་མོ་བཞིན་དུ་བཟློས་ཏེ་ཕུལ་ལོ།། །།