TTDL-ZABTER-12-NA-030

Previous Text Back to Volume PageNext Text

Wylie title	rdzogs pa chen po'i zab chos dgongs pa klong rdol las: zab chos gcod kyi bsgom rim phung po tshogs su sbyin pa ngar 'dzin rtsad nas gcod pa:
Location	bdud 'joms gling pa zab gter Volume 12, Text 30, Pages 139-146 (Folios 1a1 to 4b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Rdzogs pa chen po'i zab chos dgongs pa klong rdol las zab chos gcod kyi bsgom rim phung po tshogs su sbyin pa ngar 'dzin rtsad nas gcod pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 139-146. Thimphu, Bhutan: Lama Kuenzang Wangdue, 2004.
Side notes	Recto: lus sbyin   Verso: bdud 'joms gcod kyi bsgom rim
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Severance Texts - gcod gzhung  ·  Stages of Meditation - bsgom rim
Cycle	མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ (ma ha a ti yo ga'i zab chos dgongs pa klong rdol)
Colophon	ཞེས་པ་འདི་དྲེད་པོ་ལྷ་བཙུན་བདུད་འཇོམས་རྡོ་རྗེས་ཁམས་ཡུལ་ཨ་ཤྭའི་སྨོན་འགྲུབ་མཆོད་རྟེན་ནས་རྟ་ལོ་དགུན་ཟླ་འབྲིང་པོའི་ཉེར་བརྒྱད་སྐར་མ་ལྷ་མཚམས་ཤར་བའི་ཉིན་དུ་སྤྱན་དྲངས་པའི་ཤོག་སེར་ལས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་ཀྱིས་བགྱིས་པའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di dred po lha btsun bdud 'joms rdo rjes khams yul a shwa'i smon 'grub mchod rten nas rta lo dgun zla 'bring po'i nyer brgyad skar ma lha mtshams shar ba'i nyin du spyan drangs pa'i shog ser las dag par phab pa'i yi ge pa ni phun tshogs bkra shis kyis bgyis pa'o/_/dge'o/_/dge'o/_/sarba mang+ga laM//

Tibetan Text

[edit]

སྱྃ༔ རྫོགས་པ་ཆེན་པོའི་ཟབ་ཆོས་དགོངས་པ་ཀློང་རྡོལ་ལས༔ ཟབ་ཆོས་གཅོད་ཀྱི་བསྒོམ་རིམ་ཕུང་པོ་ཚོགས་སུ་སྦྱིན་པ་ངར་འཛིན་རྩད་ནས་གཅོད་པ་ཞེས་བྱ་བ་བཞུགས་སོ༔

སྱྃ༔ ན་མོ་གུ་རུ་ཌཱཀྐི་ནཱི༔ (བརྡ་ཡིག་) ཕཊ༔ ང་བདག་གི་གཟུང་འཛིན་ལྷ་འདྲེ་རྣམས༔ བདག་མེད་ཀྱི་དོན་དམ་གཉན་སར་འདུས༔ ཕཊ༔ གཞི་གྲོལ་གྱི་རྡོ་རྗེ་རྣལ་འབྱོར་མས༔ རྒྱུ་དབང་བསྡུས་རྐྱེན་སྣང་ཟིལ་གྱིས་གནོན༔ ཕཊ༔ བདག་ཉིད་ཀྱི་མ་བཙལ་ནམ་མཁའ་ལ༔ མཆོག་གསུམ་དང་རྩ་གསུམ་ལྷ་ཚོགས་རྣམས༔ འོད་སྤྲིན་དཔུང་ཐིབས་སེ་བཞུགས་པར་བསམ༔ འོད་འཕྲོས་པས་ཡེ་ཤེས་སྤྱན་དྲངས་བསྟིམ༔ ཕཊ་ཕཊ་ཕཊ༔ ན་མོ༔ བདག་དང་གཉིས་སྣང་ལྷ་འདྲེའི་ཚོགས༔ སྐྱབས་ཡུལ་གྱི་ལྷ་ལ་སྐྱབས་སུ་མཆི༔ མར་གྱུར་གྱི་སེམས་ཅན་མ་ལུས་པ༔ སངས་རྒྱས་ཀྱི་ལམ་ཐོབ་སེམས་བསྐྱེད་དོ༔ ཕཊ༔ གཞི་སྟོང་ཉིད་ཀྱི་གདངས་ཆེན་ས་གཞི་ལ༔ ལམ་ཆོས་ཉིད་ཀྱི་སྤྲིན་དཔུང་མཎྜལ་བཀོད༔ ཡུལ་ཀ་དག་གི་རང་རྩལ་ལྷ་ལ་འབུལ༔ འབྲས་མ་རྣམས་སྐུ་གསུམ་ཐོབ་པར་ཤོག༔ ཕཊ༔ དྲིན་མཚུངས་མེད་རྩ་བའི་བླ་མ་ནི༔ འབད་རྩོལ་བྲལ་དབྱིངས་ཀྱི་མཁའ་ལ་ཤར༔ དོན་སྤངས་བླང་བྲལ་བས་གསོལ་བ་འདེབས༔ གདངས་སྐུ་གསུམ་ཐོབ་པར་བྱིན་གྱིས་རློབས༔ ཕཊ༔ གནས་སྤྱི་བོའི་གཙུག་གི་ནམ་མཁའ་ལ༔ མདངས་འཇའ་ཟེར་འོད་ཁྱིམ་འཁྲིགས་པའི་དབུས༔ མ་གསང་བ་ཡེ་ཤེས་མཁའ་འགྲོ་མ༔ ཕྱག་གྲི་ཐོད་གར་སྟབས་རྒྱན་རྣམས་རྫོགས༔ ཕཊ༔ རང་ལུས་འོད་ཀྱི་སྲོག་ཤིང་དབུ་མ་ནི༔ ཧད་པོར་གྱི་སྤྱི་བོར་ཟུག་པར་བསམ༔ རང་སེམས་ཀྱི་ཐིག་ལེ་ཉག་གཅིག་འདི༔ མ་ཅིག་གི་མཁའ་ཀློང་ཡངས་པར་འཕོ༔ ཕཊ་ཕཊ༔ རང་བྱུང་གི་ཡེ་ཤེས་མཁའ་འགྲོ་མས༔ གཡས་གྲི་གུག་བེམ་པོར་ཚད་ཙམ་གྱིས༔ འབྱུང་ལུས་ཀྱི་མགོ་བྲེག་བྷན་དམར་བྱས༔ སྐུ་གསུམ་མཚོན་མི་མགོའི་སྒྱེད་པུར་བཞག༔ ཕཊ༔ གཟུགས་ཕུང་པོ་བྷནྡྷའི་སྣོད་དུ་བཤིག༔ སྔགས་ཨོཾ་ཨཱཿཧཱུྃ་གིས་བྱིན་གྱིས་རློབས༔ ཟག་མེད་ཀྱི་བདུད་རྩིས་འཁོར་འདས་ཁྱབ༔ མཆོད་ཡུལ་གྱི་ལྷ་རྣམས་སྤྱན་དྲངས་གྱུར༔ ཕཊ་ཕཊ་ཕཊ༔ རང་རིག་པའི་ཆོ་རོལ་མཁའ་འགྲོ་མ༔ གྲངས་མེད་ཀྱི་གཡས་པས་གསེར་སྐྱོགས་དང་༔ གཡོན་པ་ཡིས་རོལ་བྱེད་བྷན་དམར་འཛིན༔ གསེར་སྐྱོག་གིས་བདུད་རྩི་རྒྱ་མཚོ་གཅུས༔ བྷན་དམར་ལས་འདོད་ཡོན་སྤྲིན་དཔུང་འཁྲིགས༔ ཕཊ༔ འབད་རྩོལ་བྲལ་སྤྲོས་བྲལ་ནམ་མཁའ་ལ༔ ཐུགས་ཕྱོགས་ལྷུང་བྲལ་བའི་མཆོག་གསུམ་ལ༔ སེམས་ངར་འཛིན་བྲལ་བས་མཆོད་པ་འབུལ༔ མ་སེམས་ཅན་ཚོགས་རྫོགས་སངས་རྒྱས་ཤོག༔ ཕཊ་ཕཊ་ཕཊ༔ བརྒྱུད་གསུམ་གྱི་བླ་མ་རིག་འཛིན་མཆོད༔ ཐེག་དགུ་འབྲེལ་ཡི་དམ་ལྷ་ཚོགས་མཆོད༔ གནས་གསུམ་གྱི་དཔའ་བོ་མཁའ་འགྲོ་མཆོད༔ ཚོགས་གཉིས་རྫོགས་བདག་འཛིན་ཆོད་པར་ཤོག༔ ཕཊ་ཕཊ་ཕཊ༔ ཡེ་ཤེས་དང་འཇིག་རྟེན་ཕོ་རྒྱུད་དམ་ཅན་སྤྱི༔ ནང་ཕྱི་གསང་མོ་རྒྱུད་བསྟན་སྲུང་མ་ལུས་ལ༔ རང་རང་གི་ཐུགས་མཐུན་འདོད་ཡོན་རྒྱ་མཚོ་མཆོད༔ རྐྱེན་བར་ཆད་ཀུན་སེལ་ལས་བཞིའི་ཕྲིན་ལས་མཛོད༔ ཕཊ་ཕཊ་ཕཊ༔ ལྷན་སྐྱེས་པའི་འབྱུང་ལུས་ཕུང་པོ་རོའི༔ ལྤགས་བཤུས་ནས་གསེར་གྱི་ས་གཞིར་ཁེབས༔ ལུས་ཤ་ཁྲག་ཞིང་ལྤགས་གཞི་རུ་ཞིག༔ ཟག་མེད་ཀྱི་འདོད་ཡོན་རྒྱ་མཚོར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿལན་གསུམ༔ ཕཊ༔ རང་ཆོ་རོལ་ལས་བྱེད་གནས་འགྱུར་ནས༔ དབུ་གླང་ཆེན་རྟ་མཆོག་རྨ་བྱ་དང་༔ ཕག་ཁྱི་ཡི་གདོང་ཅན་གྲངས་མེད་ཀྱིས༔ གཡས་ལྕགས་གཟར་གཡོན་པས་བྷན་ཐོད་འཛིན༔ ཕཊ༔ ངར་འཛིན་བྲལ་བའི་རྣལ་འབྱོར་པས༔ གཅེས་འཛིན་ཕུང་པོ་ཚོགས་སུ་སྤེལ༔ ཁམས་གསུམ་སེམས་ཅན་མ་རུ་ཤེས༔ ལན་ཆགས་འཇལ་བའི་འཁོར་ལོ་བསྐོར༔ ཕཊ༔ རྒྱལ་པོ་པེ་ཧར་མན་ཆད་ནས༔ ཐེའུ་རང་རྐང་གཅིག་ཡན་ཆད་ཀྱི༔ སྣང་སྲིད་ལྷ་སྲིན་ཐམས་ཅད་ལ༔ རང་རང་མཉེས་པའི་མཆོད་པ་ཕུལ༔ ཕཊ༔ དྲི་ཟའི་རྒྱལ་པོ་མན་ཆད་ནས༔ འཕྲོག་མ་མ་བུ་ཡན་ཆད་ཀྱི༔ སྣང་ཞིང་སྲིད་པའི་ལྷ་འདྲེ་ལ༔ རང་རང་ཡིད་མཐུན་འདོད་ཡོན་བསྔོ༔ བུ་ལོན་ལན་ཆགས་བྱང་གྱུར་ཅིག༔ ཕཊ་ཕཊ་ཕཊ༔ འཇིག་རྟེན་བདུན་གྱི་ཕ་མ་ལ༔ མ་སོད་ལན་ཆགས་བུ་ལོན་དང་༔ སྡུག་བསྔལ་སེལ་བའི་བདུད་རྩི་འབུལ༔ འཁོར་བ་འདས་པའི་དང་པོར་གྱུར༔ ཕཊ་ཕཊ་ཕཊ༔ སྟོང་གསུམ་ཁྱོན་གྱི་ཀ་པཱ་ལར༔ ལྷག་མའི་གཏོར་མ་ཀུན་ཁྱབ་བརྡལ༔ ཞ་ལོང་འོན་ལྐུག་ཁས་ཉན་དང་༔ དབང་ཆུང་རིགས་ངན་ཐམས་ཅད་ལ༔ བག་ཆགས་སྦྱངས་པའི་ཆུ་རྒྱུན་དང་༔ འདོད་པ་ཚིམས་པའི་ལོངས་སྤྱོད་འབུལ༔ འབད་རྩོལ་མི་དགོས་ཐོབ་གྱུར་ནས༔ སྡུག་བྲལ་བདེ་མཆོག་མཉེས་གྱུར་ཅིག༔ ཕཊ་ཕཊ་ཕཊ༔ འདི་དང་དུས་གསུམ་དགེ་ཚོགས་རྣམས༔ གཟུང་འཛིན་འཁྲུལ་པའི་མ་ལ་བསྔོ༔ བསྔོ་བ་བྱ་བྱེད་ཡུལ་དང་བཅས༔ སྒྱུ་མ་ལྟ་བུའི་ཀློང་དུ་ཕཊ༔ ཕཊ༔ རྒྱལ་དང་རྒྱལ་སྲས་བདེན་པ་དང་༔ བདག་གིས་ལྷག་བསམ་རྣམ་དག་མཐུས༔ ཟབ་ལམ་སྟོར་བའི་མ་རྒན་རྣམས༔ རང་ཐོག་བཙན་ས་ཟིན་པར་ཤོག༔ ཕཊ༔ ཀུན་རྫོབ་སྒྱུ་མ་ལྟ་བུའི་གདངས༔ གཏིང་མཐའ་བྲལ་བ་སེམས་ཀྱི་ཚོགས༔ མཐོང་མྱོང་རེག་པས་གཉིས་འཛིན་འདྲེ༔ རང་གདངས་ཀློང་གསུམ་སད་གྱུར་ཅིག༔ ཕཊ༔ རྐྱེན་སྣང་ཉོན་འཁྲུལ་ལྷ་འདྲེའི་ཚོགས༔ གཏིང་བྲལ་ཀློང་ལས་རང་ངོ་མཇལ༔ གཞི་གྲོལ་སྐུ་གསུམ་ཀློང་རྡོལ་ནས༔ ཀ་དག་ཁྱབ་བརྡལ་དབྱིངས་སུ་ལྷུག༔ ཕཊ་ཕཊ་ཕཊ༔ མ་བཙལ་ཡོངས་གྲུབ་སྲི་ཞུའི་མགྲོན༔ རིག་པའི་གར་བསྒྱུར་ལས་བྱེད་ཚོགས༔ མིག་འཕྲུལ་བཞིན་དུ་རང་ལ་དྲིལ༔ རང་ཉིད་སྤྲོས་བྲལ་མཁའ་འགྲོ་མ༔ ང་མེད་ང་ཡིས་འཁོར་འདས་ཁྱབ༔ རྟག་ཆད་གཉིས་མེད་རིག་རྩལ་རྒྱས༔ གཞི་གྲོལ་ནམ་མཁའ་གཡའ་དག་ལྟར༔ ཁྱབ་བརྡལ་རྫོགས་པ་ཆེན་པོའི་དོན༔ སྤྲུལ་བསྒྱུར་གཞན་དོན་བྱེད་པའི་ལམ༔ ཐུགས་རྗེ་ཕྱོགས་མེད་ཁྱབ་བརྡལ་འབྲས༔ གདངས་གསུམ་ཕྱོགས་ལྷུང་བྲལ་བའི་ས༔ སྨྲ་བསམ་བརྗོད་བྲལ་རྒྱལ་བའི་ཡུམ༔ ཀློང་ཆེན་ཡངས་པའི་མཁའ་ཀློང་དུ༔ ཆོས་ཉིད་སྤྲིན་དཔུང་ལྷུན་ཆགས་པ༔ རྒྱལ་ཀུན་ཞིང་རྣམས་ལྷན་ནེར་རྫོགས༔ གཏད་མེད་རྒྱ་ཡན་ངང་དུ་བཞག༔ ཕཊ་ཕཊ་ཕཊ༔ ས་མ་ཡ༔ རྒྱ་རྒྱ་རྒྱ༔ (བརྡ་ཡིག་) ཕྱི་རབས་ལས་ཅན་སྐལ་ལྡན་རྣམས༔ སྦྱིན་པ་མཐར་ཕྱིན་གདམས་ངག་འདི༔ བྱམས་དང་སྙིང་རྗེ་དབྱེར་མེད་ངང་༔ ལན་གཅིག་ཙམ་ཡང་བསྒོམ་པ་ནི༔ འཕོ་བ་བརྒྱ་ཡི་དོ་ཟླ་མིན༔ ཚོགས་གཉིས་ཡོངས་སུ་རྫོགས་པར་འགྱུར༔ ཉམས་ཆག་སྡིག་སྒྲིབ་ཐམས་ཅད་འདག༔ རང་དོན་གཞན་དོན་གང་ལ་ཡང་༔ འདི་ཉིད་ལན་གཅིག་བསྒོམ་པ་ནི༔ དེ་རིང་འཆི་ངེས་མི་ཡིན་ཀྱང་༔ ཞག་བདུན་ཚེ་བསྲིང་ཐེ་ཚོམ་མེད༔ འདི་ལས་ལྷག་པའི་སྒྲིབ་སྦྱངས་ནི༔ སྟོང་གསུམ་གང་ལ་བཙལ་ཀྱང་མེད༔ སློབ་དཔོན་པདྨ་ཐོད་ཕྲེང་ངས༔ སྙིང་ཐིག་ཀུན་རྫོབ་ཤོག་བུར་བཀོད༔ མཁའ་འགྲོ་འབུམ་གྱི་ཁ་རླངས་བཏབ༔ ཆོས་སྐྱོང་རྣམས་ལ་བྱ་ར་བཅོལ༔ བཀའ་དང་ཐ་ཚིག་རྒྱས་བཏབ་ནས༔ ཕྱི་རབས་ལས་ཅན་དོན་དུ་སྦས༔ སྙིང་ལ་འཆོང་ཤིག་ཕྱི་རབས་རྣམས༔ སློབ་མ་འབྲོག་བན་ལོ་ཙཱ་ཁྱོད༔ བཀའ་འདི་ཨ་ཤྭའི་སྨོན་འགྲུབ་མཆོད་རྟེན་སྦོས༔ ཉེ་མགོན་ཆེན་པོ་སེང་གདོང་ཁྱོད་ལ་གཏད༔ ཐུབ་པར་སྲུངས་ཤིག་བཀའ་དང་ཐ་ཚིག་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ བཀའ་རྒྱ༔ དགོངས་རྒྱ༔ ཟབ་རྒྱ༔ གཉན་རྒྱ༔ ཁ་ཐམ༔ གུ་ཧྱ༔ ས་མ་ཡ༔ བརྡ་ཐིམ༔ ཞེས་པ་འདི་དྲེད་པོ་ལྷ་བཙུན་བདུད་འཇོམས་རྡོ་རྗེས་ཁམས་ཡུལ་ཨ་ཤྭའི་སྨོན་འགྲུབ་མཆོད་རྟེན་ནས་རྟ་ལོ་དགུན་ཟླ་འབྲིང་པོའི་ཉེར་བརྒྱད་སྐར་མ་ལྷ་མཚམས་ཤར་བའི་ཉིན་དུ་སྤྱན་དྲངས་པའི་ཤོག་སེར་ལས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་ཀྱིས་བགྱིས་པའོ། །དགེའོ། །དགེའོ། །སརྦ་མངྒ་ལཾ།།