TTDL-ZABTER-12-NA-061

Previous Text Back to Volume PageNext Text

Wylie title	chos nyid nam mkha'i klong mdzod las: 'jigs byed nA ga rak+sha'i sgrub pa klu gnyan gdug pa tshar gcod:
Location	bdud 'joms gling pa zab gter Volume 12, Text 61, Pages 361-370 (Folios 1a1 to 5b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las 'jigs byed nA ga rak+sha'i sgrub pa klu gnyan gdug pa tshar gcod. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 361-370. Thimphu, Bhutan: Lama Kuenzang Wangdue, 2004.
Side notes	Recto: sgrub pa   Verso: bdud 'joms nA ga rak+sha
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	'jigs byed nA ga rak+sha
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang khrag 'thung bdud 'joms rdo rjes chos nyid nam mkha'i mdzod las bsgyur ba'o/ /dge'o/ /legs so/ /sarba mang+ga laM//

Tibetan Text

[edit]

ཅྂ།༔ ཆོས་ཉིད་ནམ་མཁའི་ཀློང་མཛོད་ལས༔ འཇིགས་བྱེད་ནཱ་ག་རཀྴའི་སྒྲུབ་པ་ཀླུ་གཉན་གདུག་པ་ཚར་གཅོད་བཞུགས་སོ༔

ཅྂ།༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ལྔ་བརྒྱ་དུས་ཀྱི་ཐ་མ་ལ༔ གཏི་མུག་ཀླུ་གཉན་གདུག་པ་དར༔ ནད་རིགས་མི་གཅིག་སྣ་ཚོགས་གཏོང་༔ མི་རྣམས་ཕལ་ཆེར་དེ་ཡིས་འཆི༔ ཁྱད་པར་མཛེ་ཤུ་པགས་ནད་དང་༔ བད་ཀན་ལས་གྱུར་སྣ་ཚོགས་པ༔ མ་ངེས་སྐྱི་སེར་བཞིན་དུ་འཚུབས༔ མཐའ་ཡི་འབྱུང་པོ་སྨོན་ལོག་པས༔ རྫས་སྔགས་དམོད་པའི་ཆོ་འཕྲུལ་སྟོན༔ སྐྱེ་འགྲོའི་ཤེས་རྒྱུད་བསླད་ཅིང་བསླུས༔ མི་དགེ་སྡིག་པའི་ལས་ལ་སྤྱོད༔ དཀོན་མཆོག་དབུ་འཕང་སྨད་ཅིང་འཕེན༔ བསྟན་འཛིན་སྐྱེས་བུ་དག་ལ་འཚེ༔ དེ་ཚེ་བདུད་ཀྱི་མགོ་ནོན་ཅིང་༔ ཀླུ་གཉན་གདུག་པའི་སྲོག་གཅོད་པ༔ འཇིགས་བྱེད་ནཱ་ག་རཀྴ་འདི༔ སྒྲུབ་པ་བྱེད་པའི་སྐྱེས་བུ་རྣམས༔ སྲིད་པ་གསུམ་ལས་རྣམ་པར་རྒྱལ༔ སྒྲུབ་གནས་རབ་དབེན་སྐྱེད་ཚུལ་དུ༔ དཀྱིལ་འཁོར་བཀོད་ལེགས་མཛེས་ལྡན་དུ༔ སྒྲུབ་དང་མཆོད་རྫས་ཡོ་བྱད་བཤམས༔ དཀར་ཕྱོགས་སྲུང་མར་དཀར་གཏོར་འབུལ༔ ནག་ཕྱོགས་རིགས་ལ་དམར་གཏོར་བཏང་༔ བགེགས་རིགས་གླུད་ཀྱིས་མཉེས་པར་བྱ༔ དང་པོ་སྐྱབས་སུ་འགྲོ་བ་ལ༔ ན་མོ༔ བླ་མེད་བླ་མ་དཀོན་མཆོག་གསུམ༔ རྩ་གསུམ་དམ་ཅན་རྒྱ་མཚོ་དང་༔ རིག་པ་སྐུ་བཞིའི་བདག་ཉིད་ལ༔ བྱང་ཆུབ་བར་དུ་སྐྱབས་སུ་མཆི༔ དེ་ནས་སེམས་བསྐྱེད་བྱ་བ་ལ༔ ཀྱཻ༔ མ་རིག་མུན་པའི་ཁྲི་མུན་དུ༔ སྡུག་བསྔལ་གསུམ་གྱིས་གདུང་བ་ཡི༔ སེམས་ཅན་ཐམས་ཅད་རབ་སྒྲོལ་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ དེ་ནས་བཀའ་བསྒོ་བགེགས་བསྐྲད་ལ༔ ཧཱུྃ༔ ང་ནི་མ་བཅོས་དོན་གྱི་ལྷ༔ འཇིགས་བྱེད་ནཱ་ག་རཀྴ་ཆེ༔ ཉོན་ཅིག་ལོག་འདྲེན་བགེགས་ཀྱི་ཚོགས༔ གཏོར་མ་ལོངས་ལ་ཕྱིར་དེངས་ཤིག༔ ཧཱུྃ་བཞིའི་སྔགས་བརྗོད་ཐུན་གྱིས་བྲབ༔ དེ་ནས་སྲུང་འཁོར་བསྒོམ་པ་ལ༔ ཧཱུྃ༔ དྲག་པོའི་སྒྱུ་འཕྲུལ་རོལ་པའི་གར༔ ཡེ་ཤེས་མཚོན་ཐུན་མེ་རླུང་ཆུའི༔ གུར་དང་ར་བ་ལྷུན་གྱིས་གྲུབ༔ གཞོམ་མེད་རྡོ་རྗེའི་རྒྱ་ཡིས་བཏབ༔ ཧཱུྃ་བཛྲ་རཀྵ་རཀྵ་ཧཱུྃ་བྷྲཱུྃ༔ དེ་ནས་བྱིན་ཆེན་དབབ་པ་ནི༔ ཧཱུྃ༔ བདེ་གཤེགས་སྙིང་པོ་ཆོས་ཀྱི་སྐུ༔ ལྷུན་གྲུབ་རོལ་པ་ལོངས་སྤྱོད་རྫོགས༔ ཀུན་ཁྱབ་ཐུགས་རྗེ་སྤྲུལ་པའི་སྐུ༔ དབྱིངས་ནས་སྐུར་བཞེངས་དབང་བྱིན་ཕོབ༔ ན་མོ་དྷརྨ་ཀཱ་ཡ༔ སམྦྷོ་ཀཱ་ཡ༔ ནིརྨ་ཀཱ་ཡ༔ བཛྲ་ས་མ་ཡ་ཛ་ཛ་ཨ་ཝེ་ཤ་ཡ་ཨ་ཨ༔ དེ་ནས་མཆོད་རྫས་བྱིན་བརླབ་ལ༔ ཧཱུྃ༔ ཡུལ་དྲུག་ཀློང་ཆེན་ཡངས་པའི་མཁར༔ འདོད་ཡོན་སྣང་བ་ནམ་མཁའ་མཛོད༔ ཤེས་རིག་སྒྱུ་འཕྲུལ་རོལ་པས་བརླབ༔ ཕྱི་ནང་གསང་མཆོད་རྒྱན་དུ་སྤེལ༔ ཨོཾ་ཨཱཿཧཱུྃ་མ་ཧཱ་སརྦ་ག་ཎ་པཱུ་ཛ་ཧོཿ གཞན་ཡང་མཆོད་པའི་སྔགས་རྣམས་བརྗོད༔ དེ་ནས་ཏིང་འཛིན་རྣམ་གསུམ་ལ༔ ཨཱཿསྣང་ཞིང་སྲིད་པའི་ཆོས་རྣམས་ཀུན༔ རྨི་ལམ་དབྱིངས་སུ་སད་པ་ལྟར༔ ཁྱབ་བརྡལ་སྟོང་ཉིད་ཆེན་པོར་ཞིག༔ མཁྱེན་གཟིགས་ཡེ་ཤེས་མངོན་དུ་བྱ༔ ཀུན་ཁྱབ་ཀུན་གཟིགས་ཀུན་ཏུ་སྣང་༔ མཁའ་ལ་འཇའ་ཚོན་ཤར་བ་ལྟར༔ རང་རིག་ཧཱུྃ་གི་ཡི་གེ་ཤར༔ འོད་འཕྲོས་རབ་འཇིགས་དྲག་པོའི་ཞིང་༔ བསྐལ་པའི་མེ་དཔུང་འབར་བའི་ཀློང་༔ གནམ་ལྕགས་འཁོར་ལོ་རྩིབས་བརྒྱད་དབུས༔ ཀླུ་འབུམ་གཉན་ཁྲི་ས་བདག་སྟོང་༔ བསྣོལ་ཞིང་བརྩེགས་པའི་ཁྲི་སྟེངས་སུ༔ པདྨ་ཉི་སྟེང་ཧཱུྃ་བབ་པའི༔ འོད་འཕྲོས་འཁོར་འདས་གཟི་བྱིན་བསྡུས༔ ཡོངས་གྱུར་གཤིན་རྗེའི་གཤེད་ཆེན་པོ༔ ཁྲོ་མཆོག་ནཱ་ག་རཀྴ་ནི༔ མཐིང་ནག་དབུ་དགུ་ཕྱག་བཅོ་བརྒྱད༔ ཞལ་གདངས་ལྗགས་འདྲིལ་མཆེ་བ་གཙིགས༔ རྩ་བདུན་སྤྱན་གདངས་ཁྲོ་གཉེར་བསྡུས༔ སྨ་ར་སྨིན་མར་མེ་སྟག་འཕྲོ༔ སྦྲུལ་མགོ་དགུ་ཡིས་ཐོད་གདེངས་བྱས༔ རིན་པོ་ཆེ་ཡིས་པྲོག་ཞུ་གསོལ༔ དམར་ནག་རལ་པ་སྲིད་རྩེར་སླེབ༔ རྩ་བའི་ཕྱག་གཉིས་ཐུགས་ཀ་རུ༔ གྲི་གུག་འབར་བས་སྦྲུལ་གཏུབ་རོལ༔ གཡས་ཕྱག་བརྒྱད་ཀྱིས་གྲི་གུག་གིས༔ རྒྱ་མཚོའི་གཏིང་ནས་ཀླུ་རྣམས་བཀུག༔ གཡོན་བརྒྱད་ཀྱིས་བསྡམ་ཆེམ་ཆེམ་རོལ༔ སྦྲུལ་དང་མི་མགོའི་དོ་ཤལ་བྱས༔ ཡན་ལག་སྦྲུལ་ལྔའི་ཆུན་པོས་བརྒྱན༔ སྐུ་སྨད་སྦྲུལ་མཇུག་དུག་རླངས་འཕྱོ༔ བཙན་དུག་ངད་རླངས་ནུས་ལྡན་པའི༔ མེ་དཔུང་འབར་བའི་ཀློང་དུ་བསྐྱེད༔ སྤྱི་བོར་བདེ་ཆེན་འཁོར་ལོ་རུ༔ ཀླུ་གཤེད་བྱ་ཁྱུང་ནག་པོ་ལས༔ སྤྲུལ་པ་ཡང་སྤྲུལ་སྐར་ལྟར་འཁྲིགས༔ མགྲིན་པར་རྟ་མགྲིན་དམར་ནག་རྔམས༔ རལ་གྲི་སྦྲུལ་འཛིན་འདོར་སྟབས་བསྒྲད༔ ཐུགས་ཀར་གསང་བདག་ཁྲོ་གཏུམ་མཐིང་༔ རྡོ་རྗེ་སྦྲུལ་འཛིན་འདོར་སྟབས་བསྒྲད༔ ཀུན་ཀྱང་ཡེ་ཤེས་མེ་དཔུང་ཀློང་༔ དུར་ཁྲོད་ཆས་རྫོགས་ཁྲོ་ཆུང་འགྱེད༔ ཤར་དུ་གཤིན་རྗེ་གསོད་བྱེད་མཐིང་༔ སྡིག་གདོང་འབར་བས་རྒྱལ་འགོང་འཇོམས༔ ལྷོ་རུ་གཤིན་རྗེ་འཇོམས་བྱེད་ནག༔ ཕག་གདོང་འབར་བས་གཉན་རིགས་འཇོམས༔ ནུབ་ཏུ་གཤིན་རྗེ་ཟ་བྱེད་དམར༔ ཁྱུང་གདོང་འབར་བས་ཀླུ་གདོན་འཇོམས༔ བྱང་དུ་གཤིན་རྗེ་སྒྲོལ་བྱེད་ལྗང་༔ གླང་གདོང་འབར་བས་ས་བདག་འཇོམས༔ ཀུན་ཀྱང་གཡས་པས་དགྲ་སྟྭ་དང་༔ གཡོན་པས་འགུགས་བྱེད་ལྕགས་ཀྱུ་བསྣམས༔ སྟེང་ཕྱོགས་རྒྱལ་རིགས་འཇོམས་པའི་ཁྱུང་༔ མཐིང་ནག་མེ་ཡི་གཤོག་པ་ཅན༔ ཤར་ལྷོ་རྗེ་རིགས་འཇོམས་པའི་ཁྱུང་༔ དཀར་པོ་རལ་གྲིའི་གཤོག་པ་ཅན༔ ལྷོ་ནུབ་དམངས་རིགས་འཇོམས་པའི་ཁྱུང་༔ སེར་པོ་སྤུ་གྲིའི་གཤོག་པ་ཅན༔ ནུབ་བྱང་བྲམ་ཟེ་འཇོམས་པའི་ཁྱུང་༔ དམར་ནག་རླུང་གི་གཤོག་པ་ཅན༔ བྱང་ཤར་གདོལ་བ་འཇོམས་པའི་ཁྱུང་༔ ལྗང་ནག་མེ་ཡི་གཤོག་པ་ཅན༔ ཀུན་ཀྱང་རྐང་པས་ཀླུ་གཉན་གནོན༔ ལག་པས་དོན་སྙིང་འདྲེན་ཞིང་ཟ༔ རྭ་ཡིས་སྟེང་གི་ལྷ་གདོན་འབིགས༔ གཤོག་པས་བར་སྣང་སྡེ་བརྒྱད་འདུལ༔ རང་འདྲའི་སྦྲུལ་པ་དཔག་མེད་ཀྱིས༔ ཉོན་མོངས་བརྒྱད་ཁྲིའི་རང་གཟུགས་ཀྱི༔ གདོན་བགེགས་མ་ལུས་ཚར་བཅོད་བསམ༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དུས་གསུམ་སངས་རྒྱས་ཀྱི༔ སྐུ་གསུང་ཐུགས་ཡོན་ཕྲིན་ལས་ཀུན༔ དབྱིངས་ནས་སྤྱན་དྲངས་གཉིས་མེད་བསྟིམ༔ དེ་ནས་སྤྱན་འདྲེན་པ་ནི༔ ཧཱུྃ༔ འོག་མིན་བརྡལ་ཁྱབ་ཆེན་པོ་ནས༔ ལྷུན་གྲུབ་སྒྱུ་འཕྲུལ་རོལ་པའི་གདངས༔ གང་འདུལ་ཐབས་ཀྱི་སྐུར་སྟོན་པའི༔ རྒྱལ་བ་སྲས་བཅས་གཤེགས་སུ་གསོལ༔ བཛྲ་ས་མ་ཡ་ཛ་ཛ༔ དེ་ནས་བཞུགས་སུ་གསོལ་བ་ནི༔ ཧཱུྃ༔ གདོད་ནས་རང་སྣང་བཀོད་པ་ཀུན༔ དཀྱིལ་འཁོར་གསུམ་དུ་ལྷུན་གྱིས་གྲུབ༔ གཉིས་མེད་རང་བྱུང་རོལ་པ་ཆེ༔ མངོན་གྱུར་ཆེན་པོར་བཞུགས་སུ་གསོལ༔ བཛྲ་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ལ༔ ཧཱུྃ༔ མཚན་མ་ཚིག་དང་བྲལ་བའི་མཁར༔ ཤེས་རབ་ཡེ་ཤེས་ཉི་གཞོན་ཤར༔ མ་རིག་ཉོན་མོངས་བདུད་འཇོམས་པའི༔ བཅོམ་ལྡན་འདས་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ ཧོཿ དེ་ནས་མཆོད་པ་འབུལ་བ་ལ༔ ཧཱུྃ༔ ཡུལ་དྲུག་འདོད་ཡོན་སྣང་བའི་ཆོས༔ ཕྱི་ནང་གསང་མཆོད་རྒྱན་དུ་ཤར༔ ཡེ་ཤེས་རོལ་པའི་སྟོབས་ཀྱིས་བརླབས༔ མི་ཟད་ནམ་མཁའ་མཛོད་དུ་སྤེལ༔ རྒྱལ་བའི་དཀྱིལ་འཁོར་དགྱེས་ཕྱིར་འབུལ༔ བསོད་ནམས་ཚོགས་གཉིས་རྫོགས་གྱུར་ཅིག༔ ཨོཾ་བཛྲ་ཨརྒྷཾ་པཱདྱཾ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝིདྱ་ཤཔྡ་པཱུ་ཛ་ཧོཿ རཱུ་པ་ཤཔྡ་གནྡྷེ་རཱ་ས་སྤཪྴེ་སརྦ་པཱུ་ཛ་ཧོཿ མ་ཧཱ་སརྦ་པཉྩ་རཀྟ་བ་ལིཾ་ཏ་བོ་དྷི་ཙིཏྟ་ཏ་ན་ག་ན་སརྦ་པཱུ་ཛ་ཧོཿ དེ་ནས་བསྟོད་པ་བྱ་བ་ནི༔ ཧཱུྃ༔ རྫོགས་པའི་སངས་རྒྱས་བཅོམ་ལྡན་འདས༔ གདུལ་བྱ་འདུལ་མཛད་ཆུ་ཟླའི་གར༔ གཏི་མུག་གཟུགས་ཀྱིས་མ་རིག་འཇོམས༔ ཁྲོ་རྒྱལ་ཁྱོད་ལ་ཕྱག་འཚལ་བསྟོད༔ ཡེ་ཤེས་ཁྱུང་ཆེན་སྐུ་ཡི་དབྱིངས༔ པདྨ་དབང་ཆེན་གསུང་གི་དབྱིངས༔ རྡོ་རྗེ་གཏུམ་པོ་ཐུགས་ཀྱི་དབྱིངས༔ ཡོངས་འདུས་དཔལ་ལ་ཕྱག་འཚལ་བསྟོད༔ ཡེ་ཤེས་རང་གདངས་འཁོར་དུ་ངོམས༔ མཐུ་སྟོབས་ནུས་པའི་རང་གཟུགས་ཀྱིས༔ ལས་མཁན་ཕོ་ཉ་དྲག་ཤུལ་ཅན༔ སྒྱུ་འཕྲུལ་འཁོར་གྱི་རོལ་པར་བསྟོད༔ དེ་ནས་བཤགས་པ་བྱ་བ་ནི༔ ཧཱུྃ༔ བདག་ནི་ཚེ་རབས་ཐོག་མེད་ནས༔ གཟུང་འཛིན་འཁྲུལ་བའི་དབང་གྱུར་ཏེ༔ ཡེ་ཤེས་རང་ཞལ་སྒྲིབ་པའི་སེམས༔ འཁོར་འདས་དག་མཉམ་ཆེན་པོར་བཤགས༔ ཨོཾ་བཛྲ་སཏྭ་ས་མ་ཡ༔ སོགས་ཡི་གེ་བརྒྱ་པ་བརྗོད༔ དེ་ནས་སྔགས་ཀྱི་དམིགས་གནད་ནི༔ ཧཱུྃ༔ བདག་ཉིད་གཤིན་རྗེ་གཤེད་ཆེན་པོའི༔ ཐུགས་གསང་ཉི་ཟླའི་གྭའུའི་ནང་༔ ཧཱུྃ་མཐིང་ཉིད་ལ་སྔགས་ཀྱིས་བསྐོར༔ ཡིག་འབྲུ་རང་ལས་རང་གི་སྒྲ༔ འབྲུག་སྟོང་དུས་གཅིག་ལྡིར་བ་བཞིན༔ སྣོད་བཅུད་འབར་འཁྲུགས་ཤིག་ཤིག་འགུལ༔ འོད་ཟེར་མེ་སྟག་ལྟ་བུ་ཡིས༔ ཀླུ་གཉན་ས་བདག་གདོན་གྱི་རིགས༔ ནད་དག་ཆུ་སེར་གྲིབ་དང་བཅས༔ སྦུར་མ་མེ་ལ་བསྲེགས་བཞིན་བསྒོམ༔ ཨོཾ་ཕེ་ལཾ་ཧཱུྃ༔ དྲག་ཤུལ་ཕྲིན་ལས་སྔགས་དམིགས་ལ༔ ཧཱུྃ༔ རང་ཉིད་དྲག་པོའི་ཐུགས་ཀ་རུ༔ མེ་དཔུང་དྲི་ངན་བཙན་དུག་གི༔ འབར་འཁྲིགས་རབ་འཐུལ་འུར་ཆེམ་སྒྲ༔ བསྐལ་པ་དུས་མཐའི་མེ་ལྟ་བུས༔ གཏི་མུག་ཀླུ་གཉན་ས་བདག་གདོན༔ རྩྭ་སྐམ་དག་ལ་མེ་མཆེད་བཞིན༔ རྗེས་ལྷག་མེད་པར་བསྲེག་པར་བསྒོམ༔ ནག་པོ་ཏི་པ་ཙ་པ་ནཱ་ག་རཱ་ཙ་ཧཱུྃ་ཕཊ༔ བསྐྱེད་དང་དམིགས་པའི་གནད་ལྡན་ན༔ མཆོག་ཐུན་དངོས་གྲུབ་མྱུར་ཐོབ་ཅིང་༔ སྲིད་པ་གསུམ་ལས་རྣམ་པར་རྒྱལ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །ལེགས་སོ། །སརྦ་མངྒ་ལཾ།།