DJYD-KABUM-06-CHA-011: Difference between revisions

From Dudjom Wiki
DJYD-KABUM-06-CHA-011
No edit summary
m (Text replacement - "༴" to "༴ ")
 
(5 intermediate revisions by the same user not shown)
Line 2: Line 2:
|classification=Tibetan Publications
|classification=Tibetan Publications
|subclass=Tibetan Texts
|subclass=Tibetan Texts
|fulltitletib=དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ།
|fulltitle=dpal ye shes kyi mgon po ma ning 'khor bcas kyi las byang las bzhi myur 'grub
|citation=[[Gter bdag gling pa 'gyur med rdo rje]]. ''Dpal ye shes kyi mgon po ma ning 'khor bcas kyi las byang las bzhi myur 'grub''. ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 6: 351-403. Kalimpong: Dupjung Lama, 1979-1985.
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|collectiontitle=bdud 'joms rin po che bka' 'bum
|collectiontitle=bdud 'joms rin po che bka' 'bum
|collectiontitletib=བདུད་འཇོམས་རིན་པོ་ཆེ་བཀའ་འབུམ།
|totalvolumes=25
|author=gter bdag gling pa 'gyur med rdo rje
|author=gter bdag gling pa 'gyur med rdo rje
|authortib=གཏེར་བདག་གླིང་པ་འགྱུར་མེད་རྡོ་རྗེ་
|sourcerevealertib=པདྨ་གླིང་པ་
|sourcerevealer=pad+ma gling pa
|sourcerevealer=pad+ma gling pa
|citation=[[author=Gter bdag gling pa 'gyur med rdo rje]]. ''''. ''Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod'', Vol. 6: . Kalimpong: Dupjung Lama, 1979-1985.
|editor=Dudjom Rinpoche
|tibgenre=Activity Manual - las byang
|tibgenre=Activity Manual - las byang
|terma=No
|deity=ma ning
|deity=ma ning
|cycle=dpal ye shes kyi mgon po ma ning 'khor bcas
|cycle=dpal ye shes kyi mgon po ma ning 'khor bcas
|cycletib=དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་
|cycletib=དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་
|language=Tibetan
|language=Tibetan
|volumenumber=06
|volnumtib=༦
|volnumtib=༦
|volyigtib=ཆ
|volyigtib=ཆ
|volumenumber=06
|totalvolumes=25
|volumeLetter=CHA
|textnuminvol=011
|textnuminvol=011
|pagenumbers=351-403
|totalpages=53
|beginfolioline=1a1
|endfolioline=27a6
|totalfolios=27
|multivolumework=No
|rectonotes=ma ning
|versonotes=pad gling mgon po
|colophontib=།དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་འདི་ནི་སྔན་ལུང་གསང་སྔགས་ཆོས་གླིང་ནས་རྒྱལ་སྲས་སྤྲུལ་པའི་སྐུ་བསྟན་འཛིན་ལེགས་པ་དོན་གྲུབ་ཀྱི་བཀའ་ལུང་བཞིན་གང་གི་ཞབས་རིམ་པ་ཨོ་རྒྱན་བསྟན་འཛིན་ཕུན་ཚོགས་པས་གསེར་གྱི་མེ་ཏོག་དང་བཅས་པས་བསྐུལ་བ་ལས་གཏེར་གཞུང་རྩ་བའི་སྙིང་བོ་རྣམས་སྲོག་ཏུ་བཟུང་།  ཡིག་རྙིང་བརྗོད་བདེ་བ་རྣམས་ཁྲིགས་སུ་བསྡེབས།  ཁ་སྐོང་འགའ་ཞིག་གསར་དུའང་སྤེལ་ཏེ།  སྙོམས་ལས་པ་འགྱུར་མེད་རྡོ་རྗེས་གཡོ་རུ་ཁྲ་འབྲུག་གི་གཙུག་ལག་ཁང་ཆེན་པོའི་འདབས་གསང་སྔགས་ཕོ་བྲང་དུ་ཡི་གེར་སྤེལ་བའོ།།
|colophonwylie=dpal ye shes kyi mgon po ma ning 'khor bcas kyi las byang las bzhi myur 'grub ces bya ba 'di ni sngan lung gsang sngags chos gling nas rgyal sras sprul pa'i sku bstan 'dzin legs pa don grub kyi bka' lung bzhin gang gi zhabs rim pa o rgyan bstan 'dzin phun tshogs pas gser gyi me tog dang bcas pas bskul ba las gter gzhung rtsa ba'i snying bo rnams srog tu bzung /___yig rnying brjod bde ba rnams khrigs su bsdebs/___kha skong 'ga' zhig gsar du'ang spel te/___snyoms las pa 'gyur med rdo rjes g.yo ru khra 'brug gi gtsug lag khang chen po'i 'dabs gsang sngags pho brang du yi ger spel ba'o//
|pdflink=File:DJYD-KABUM-06-CHA-011.pdf
|pdflink=File:DJYD-KABUM-06-CHA-011.pdf
|volumeLetter=CHA
|InitCategories=Dudjom Tersar Project; DJYD-KABUM-Volume-06-CHA
|InitCategories=Dudjom Tersar Project; DJYD-KABUM-Volume-06-CHA
}}
}}
Line 25: Line 41:
{{TibP|༄༅།  །དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་བཞུགས་སོ།  །
{{TibP|༄༅།  །དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་བཞུགས་སོ།  །


(1བ)ཨོཾ་སྭསྟི།   དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ།  བླ་མ་ཧེ་རུ་ཀ་ལ་ཕྱག་འཚལ་ལོ།  །ཁྱབ་བདག་དྲིན་ཅན་བླ་མ་གསང་བའི་བདག  །དཀྱིལ་འཁོར་རྒྱ་མཚོར་ཞི་དང་ཁྲོ་བོ་ཡི།  །རྣམ་རོལ་བསམ་མི་ཁྱབ་སྟོན་ལྷག་པའི་ལྷར།  །གུས་པས་བདུད་དོ་བརྩེ་བས་མཆོག་སྦྱིན་མཛོད།  །ཆེ་མཆོག་ཧེ་རུ་ཀ་དཔལ་གདུལ་དཀའི་འགྲོ།  །འདུལ་ཕྱིར་གཏུམ་དྲག་འབར་བའི་སྐུར་བཞེངས་ལ།  །འཆོལ་བའི་ཁྲོ་རྒྱལ་མ་ནིང་ནག་པོ་ཆེ།  །འཁོར་བཅས་མཆོད་པའི་ཕྲིན་ལས་འདིར་གསལ་བྱ།  །(དེ་ལ་དང་(2ན)པོར་དབང་ཐོབ་ཅིང་སྤྱི་དང་བྱེ་བྲག་གི་དམ་ཚིག་ལ་གནས་པའི་སྔགས་པས།  དོན་གཉིས་ཀྱི་བསམ་པ་མྱུར་དུ་འགྲུབ་པའི་ཆེད་དུ་དཔལ་མགོན་འཁོར་བཅས་ལེགས་པར་བསྟེན་ནས་མཆོད་ཅིང་ཐུགས་དམ་བསྐང་བའི་ཕྲིན་ལས་ཀྱི་རིམ་པ་ཚུལ་བཞིན་དུ་བསྒྲུབ་པ་ལ་གཉིས་ཏེ།  སྦྱོར་བ་ཡོ་བྱད་ཀྱི་གཤོམ་དང་།  དངོས་གཞི་ཆོ་གའི་རིམ་པ་གཉིས་ལས།  དང་པོ་ནི།  ཉི་ཤུ་དགུ་ལ་སོགས་པ་དུས་ཁྱད་པར་ཅན་ལ་ཡིད་དང་མཐུན་ཞིང་ཤིས་པའི་གནས་ཁང་གི་སྟེང་ལོགས་རྣམས་མཛེས་ཤིང་བརྗིད་པའི་སྤྱན་གཟིགས་སྣ་ཚོགས་ཀྱིས་བརྒྱན།  དམ་ཚིག་གི་བྲིས་སྐུ་སོགས་རྟེན་བཤམས་པའི་མདུན་དུ་རིན་པོ་ཆེའམ་ཐོད་པ་ལ་སོགས་པའི་སྣོད་དུ་གཙང་ཞིང་བཟང་བའི་རྒྱུ་དམ་རྫས་དང་བཅས་པ་ལས་དང་པོར་བླ་མ་ཡི་དམ་གྱི་གཏོར་མ་དཔལ་བཤོས་ཟླུམ་བརྗིད་(2བ)ཅན་དང་།  མགོན་པོ་འཁོར་བཅས་ལ་རྒྱས་པར་སྡེ་དགུའི་ལྷ་གྲངས་མཉམ་པའི་གཙོ་བོ་དགུ་ལ་སོ་སོའི་འཁོར་གྱིས་བསྐོར་བའི་བཤོས་བུ་ཅན་དང་བསྡུ་ན་བཤོས་བུ་གྲུ་གསུམ་ཆེ་བ་གཅིག་ལ་འཁོར་རྣམས་སྤྱི་སྤུངས་སུ་བསྐོར་བས་ཀྱང་ཆོག་ལ།  གང་ལྟར་ཡང་མཐའ་མ་མཐེབ་ཀྱུས་བསྐོར།  མདའ་བྱ་རྒོད་མདར་ནག་གི་ཅོད་པན་ཅན་བཙུགས།  ཤ་ཁྲག་ཆང་ཕུད་ལ་དུ་ལ་ཕུག་ཁུར་བ་ཆན་སྒོག་བཙོང་སོགས་ཁ་ཟས་བཟང་པོ་སྣ་ཚོགས་ཀྱིས་བརྒྱན་པ་དང་།  གཞན་ཡང་ཆོས་སྐྱོང་ཡེ་ཤེས་པ་དང་འཇིག་རྟེན་པའི་རིགས་སོགས་གང་བརྟེན་དང་།  གཞི་བདག་གཏོར་མའི་བར་རིམ་པ་མ་འཆོལ་བར་བཤམ།  དེ་དག་གི་གཡས་སུ་བདུད་རྩི།  གཡོན་དུ་རཀྟ།  མདུན་དུ་མཆོད་ཡོན་སོགས་གཙང་མར་སྤེལ་བ་ཕྱིའི་མཆོད་པ་དང་།  དབང་པོའི་མེ་ཏོག་སོགས་ཁྱད་པར་དམ་རྫས་དང་འབྲེལ་བའི་མཆོད་པ་རྣམས་ཕྲེང་ཚར་དུ་བཀོད།  གཞན་ཡང་ཕྱི་ནང་གསང་བའི་མཐུན་རྫས་རྟེན་རྫས་སྐོང་རྫས་སོགས་ཅི་འབྱོར་དང་།  རྡོར་དྲིལ་རྔ་སིལ་གཡབ་དར་སོགས་དམ་རྫས་ཀྱི་རྣམ་གྲངས་ཐམས་ཅད་མཐོང་བརྒྱུད་ཀྱི་ལག་ལེན་བཞིན་ཚོགས་པར་བཤམ་མོ།  །གཉིས་པ་དངོས་གཞི་ཆོ་གའི་རིམ་པ་ལ་ཡང་སྔོན་འགྲོ་དང་དངོས་གཞི་རྗེས་ཀྱི་བྱ་བ་དང་གསུམ་ལས།  དང་པོ་སྔོན་འགྲོ་ལ་གསུམ་གྱི།  དང་པོ་བདག་བསྐྱེད་ཀྱི་རྣལ་འབྱོར་ནི།  སྤྱིར་ཡི་དམ་ཞི་ཁྲོ་གང་ལ་བརྟེན་ཀྱང་རུང་མོད་ཁྱད་པར་སྒྲུབ་པ་བཀའ་བརྒྱད་ལྟ་བུ་ལ་བརྟེན་ན་ཤིན་ཏུ་འབྲེལ་ཆགས་ཤིང་དེ་ཡང་ཉིན་ཞག་དེ་ཉིད་ཁོ་ནར་བདག་བསྐྱེད་གཞན་སྔོན་དུ་སོང་ན་སྐབས་འདིར་སྙིང་པོ་ངག་ཏུ་བརྗོད་པའི་སྒོ་ནས་ཐུན་མཚམས་ཀྱི་ལྷར་སྐད་ཅིག་གིས་གསལ་བཏབ་པས་ཆོག་ལ་དེ་(3ན)ལྟར་མ་སོང་ན་བདག་བསྐྱེད་རྒྱས་འབྲིང་བསྡུས་གསུམ་གང་རུང་ཞིག་སྐབས་འདིར་བྱའོ།  །དེ་ཡང་མདོར་བསྡུས་ལ་མོས་ན་ཆེ་མཆོག་གཙོ་རྐྱང་གི་མངོན་རྟོགས་དངོས་གྲུབ་རོལ་མཚོར་སྨོས་པ་དེའམ།  འདིའི་སྲོག་དབང་སོགས་ཕྱག་རྡོར་གྱི་རྣལ་འབྱོར་བསྒོམ་པའི་དབང་དུ་བྱེད་ན།)  འགྲོ་རྣམས་བསྒྲལ་འདོད་བསམ་པ་ཡིས།  །སངས་རྒྱས་ཆོས་དང་དགེ་འདུན་ལ།  །བྱང་ཆུབ་སྙིང་པོར་མཆིས་ཀྱི་བར།  །རྟག་པར་བདག་ནི་སྐྱབས་སུ་མཆི།  །ཤེས་རབ་སྙིང་བརྩེ་དང་བཅས་པས།  །བརྩོན་པས་སེམས་ཅན་དོན་དུ་བདག  །སངས་རྒྱས་མདུན་དུ་གནས་བཅས་ཏེ།  །རྫོགས་པའི་སངས་རྒྱས་ཐོབ་པར་བགྱི།  །སེམས་ཅན་བདེ་དང་ལྡན་གྱུར་ཅིག  །སྡུག་བསྔལ་ཀུན་དང་བྲལ་བར་ཤོག  །བདེ་དང་རྟག་ཏུ་མི་འབྲལ་ཞིང་།  །ཆོས་ཀུན་མཉམ་ཉིད་རྟོགས་པར་ཤོག  །(ཅེས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས།)  ཨོཾ་སྭ་བྷཱ་ཝ་སོགས།  འཁོར་འདས་ཀྱི་ཆོས་ཐམས་ཅད་འོད་གསལ་གྱི་རང་མདངས་རྡོ་རྗེ་སྲུང་བའི་འཁོར་ལོ་ཆེན་པོར་དག་པའི་དབུས།  པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་ཧཱུྃ་གིས་མཚན་པ་ཡེ་ཤེས་ལྔའི་འོད་ཟེར་མཆོག་ཏུ་འབར་བ་ཡོངས་སུ་གྱུར་པ་ལས་རང་ཉིད་གསང་བའི་བདག་པོ་ཕྱག་ན་རྡོ་རྗེ་སྐུ་(3བ)མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ།  དབུ་སྐྲ་དང་སྨར་སྨིན་མེ་འབར་ཞིང་མཆེ་བ་གཙིགས་པ།  ཕྱག་གཡས་རྡོ་རྗེ་རྩེ་ལྔ་པ་འཕྱར་ཞིང་གསོར་བ།  གཡོན་སྡིགས་མཛུབ་ཐུགས་ཀར་མཛད་པ།  གར་དགུའི་ཉམས་ཅན་ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་འགྱིང་བ།  ཐོད་སྐམ་ལྔའི་དབུ་རྒྱན་ཐོད་རློན་ལྔ་བཅུའི་དོ་ཤལ།  སེང་གླང་གི་པགས་པ་དང་སྔོན་པོས་སྟོད་གཡོགས་ཤིང་མི་ལྤགས་ཀྱི་སྐེད་དཀྲིས་དང་སྟག་ལྤགས་ཀྱི་ཤམ་ཐབས་འཕྱང་བ།  ཀླུ་རིགས་ལྔའི་སྦྲུལ་ཆུན་དང་ཁྲག་ཞག་ཐལ་བས་མཚན་པ།  བ་སྤུ་ཧཱུྃ་ལས་རྡོ་རྗེ་མེའི་འོད་ཟེར་འབར་ཞིང་བསྐལ་པའི་མེ་དཔུང་འབར་བའི་དབུས་ན་བཞུགས་པའོ།  །དེའི་སྤྱི་བོར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་མཐིང་ག  །ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་བསམ་གྱིས་མི་ཁྱབ་པའི་ཚོགས་བཛྲ་ས་མཱ་ཛཿ(ས་སྤྱན་དྲངས།  ཨརྒྷཾ་ལ་སོགས་པས་མཆོད།)  ཛཿཧཱུྃ་བྃ་ཧོཿགཉིས་སུ་མེད་པར་གྱུར།   སླར་ཡང་རང་གི་ཐུགས་ཀའི་ཧཱུྃ་གི་འོད་ཟེར་གྱིས་དབང་གི་ལྷ་རིགས་ལྔ་འཁོར་བཅས་བཛྲ་ས་མཱ་ཛཿ(ས་སྤྱན་དྲངས།)  ཨརྒྷཾ་(སོགས་ཀྱིས་མཆོད།)   (4ན)དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བསྩལ་དུ་གསོལ།  ཞེས་གསོལ་བ་བཏབ་པས།  ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེས་ས་མ་ཡ་ཤྲཱི་ཧཱུྃ།  ཞེས་གསུང་ཞིང་བུམ་པ་བཟང་པོ་ལས་བྱུང་བའི་བདུད་རྩིའི་ཆུས་སྤྱི་བོ་ནས་དབང་བསྐུར།  སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་མི་བསྐྱོད་པ་ཅོད་པན་གྱི་སྙིང་པོ་ལ་བཞུགས་པར་གྱུར་(པར་བསམ་ཞིང་།  སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་མི་ཟད་པ་རྒྱན་གྱི་འཁོར་ལོའི་བདག་ཉིད་དུ་སྙེམས་པ་བརྟན་པོ་བྱ་ཞིང་།  དེ་ནས།)  ཐུགས་ཀར་ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་ཡིག་གི་མཐར་སྔགས་ཀྱི་ཕྲེང་བས་གཡས་སུ་འཁོར་བ་ལ་(དམིགས་ཏེ།  སྤྲོ་བསྡུའི་དམིགས་པ་རྒྱ་ཆེན་པོ་དང་སྦྱར་ནས།)  ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔  (ཅེས་ཅི་ནུས་སུ།  བཟླ་བ་ནི་བདག་ཉིད་རྣལ་འབྱོར་རོ།  །གཉིས་པ་མཆོད་རྫས་རྣམས་བྱིན་གྱིས་བརླབ་པ་ནི།)  ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔  (ཀྱིས་བསང་།)  ཨོཾ་སྭཱ་བྷཱ་ཝ(ས་སྦྱང་)སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་མེད་ཁང་ཕུན་སུམ་ཚོགས་པར་ཨ་ལས་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་མཆོད་ཡོན།  ཞབས་བསིལ།  མེ་ཏོག  །བདུག་(4བ)སྤོས།  མར་མེ།  དྲི་ཆབ།  ཞལ་ཟས།  རོལ་མོ་ལ་སོགས་པ་མཆོད་པའི་དངོས་པོ་རྣམས་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ནམ་མཁའི་མཐའ་ཀླས་པར་གང་བར་གྱུར།  ཨོཾ་བཛྲ་ཨརྒྷཾ་ཨཱཿཧཱུྃ༔  (ནས་)ཤཔྡ(འི་བར་གྱི་བྱིན་གྱིས་བརླབ།  བདུད་རྩི་བསང་སྦྱང་།)  སྟོང་པའི་ངང་ལས་ཡྃ་ལས་རླུང་རྃ་ལས་མེ་ཀྃ་ལས་མི་མགོའི་སྒྱེད་བུ་གསུམ་ལ་བསྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ་བཅུད་ཐམས་ཅད་ཧཱུྃ་ཨོཾ་སྭཱ་ཨཱོཾ་ཧཱཿ  མཱུྃ་ལཱྃ་མཱྃ་པཱྃ་ཏཱྃ་ལས་བདུད་རྩི་ལྔ་དང་སྒྲོན་མ་ལྔར་གྱུར་པ་སོ་སོའི་ས་བོན་གྱིས་མཚན་པ་དང་བཅས་པའི་འོག་གི་རླུང་གཡོས་མེ་སྤར་རྫས་ཐམས་ཅད་ཞུ་ཞིང་འདྲེས་པའི་སྟེང་གི་ནམ་མཁའ་ལ་ཨོཾ་ཨཱ༔  ཧཱུྃ་གི་ཡི་གེ་གསུམ་གནས་པ་ལས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག   །ཡི་གེ་གསུམ་ལ་ཐིམ་སྟེ་རིམ་པར་ཞུ་བ་ལས་དམ་ཚིག་གི་རྫས་དང་རོ་གཅིག་ཏུ་གྱུར་(པར་བསམ་ལ།)  ཨོཾ་ཨཱ༔  ཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ (ལན་གསུམ།  རཀྟ་བསང་སྦྱང་།)  སྟོང་པའི་ངང་ལས་ཨ་ལས་བྱུང་བའི་པདྨ་འབར་བའི་སྣོད་དུ་ར་ལས་ཆགས་མེད་རཀྟའི་རྒྱ་(5ན)མཚོ་རྦ་རླབས་མཁའ་ལ་འཕྱོ་ཞིང་འཁྲུགས་པ་ཟེགས་མ་ལས་འདོད་ཡོན་གྱི་ལྷ་མོ་འཕྲོ་བར་གྱུར།  ཨོཾ་ཨཱ༔  ཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ༔ (ལན་གསུམ།  གཏོར་མ་བསང་སྦྱང་།)  སྟོང་པའི་ངང་ལས་རླུང་མེ་ཐོད་པའི་སྒྱེད་བུ་གསུམ་ལ་གནས་པའི་ཡེ་ཤེས་ཀྱི་ཀ་པཱ་ལ་སྟོང་གསུམ་དང་མཉམ་པའི་ནང་དུ་ཤ་ལྔ་བདུད་རྩི་ལྔ་གཙོ་བོར་གྱུར་པའི་བཟའ་བཅའ་བལྡག་ཞི་བ་འདོད་ཡོན་ལྔའི་ཕུང་པོ་ཟད་མི་ཤེས་པར་གྱུར།  ཨོཾ་ཨཱ༔  ཧཱུྃ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུཧྱ་ས་མ་ཡ་ཧཱུྃ་ཧྲཱིཿཋཱ༔ (ལན་གསུམ་གྱིས་བྱིན་གྱིས་བརླབ།  གསུམ་པ་བླ་མ་ཡི་དམ་གྱི་གཏོར་འབུལ་ནི།  བདག་བསྐྱེད་ལས་གཞུང་རྒྱས་པ་དང་འབྲེལ་ནས་བྱས་ཀྱང་རུང་ཞིང་།  དཀྱུས་ཀྱི་བདག་བསྐྱེད་ཙམ་ལ་བརྟེན་པ་ཡིན་ན།)  རང་གི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་ཕྱོགས་བཅུར་བཞུགས་པའི་བླ་མ་རིག་འཛིན་རྒྱལ་བ་རྒྱ་མཚོའི་དཀྱིལ་འཁོར་གྱི་ལྷ་ཚོགས་ཐམས་ཅད་མཁའ་ཁྱབ་ཀྱི་འཁོར་ལོར་སང་པར་(བསམ་ཞིང་།)  ཧཱུྃ།  དམིགས་མེད་མཁའ་ལྟར་ཁྱབ་ཅིང་དག་པའི་སྐུ།  །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་།  །ཐུགས་རྗེའི་ངང་ཉིད་ཆོས་སྐུར་དག་པ་ལས།  །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ།  །ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་(5བ)ཎི་ཀ་དྲྀ་ཥྱ་ཧོཿ ས་མ་ཡ་ཧོཿ ས་མ་ཡ་སྟྭྃ།  ཛཿ་ཧཱུྃ་བྃ་ཧོཿ(ཞེས་པས་སྤྱན་དྲངས།)  ཧཱུྃ།  བླ་མེད་མཆོག་གི་མཆོད་པ་དམ་པ་ནི།  །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ།  །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ།  །དམ་ཚིག་བཞིན་ལས་ཅི་བདེར་བཞེས་སུ་གསོལ།  །ཨོཾ་ཨཱ༔  ཧཱུྃ་གུ་རུ་མཎྜལ་དེ་བ་ག་ཎ་ས་པ་རི་ཝཱ་རེ་བྷྱཿབཛྲ་ཨརྒྷཾ་པྲ་ཏཱིཙྪ་སྭཱཧཱ། (ནས་ཤཔྡའི་བར་གྱི་ཕྱི་མཆོད་དང་།)  བཛྲ་པཉྩ་ཨ་མྲྀ་ཏ་ཁ་རཾ་ཁཱ་ཧི།  མ་ཧཱ་རཀྟ་ཁ་རཾ་ཁཱ་ཧི།  (ཞེས་སྨན་རཀ་སྟོབ།  རྡོ་རྗེའི་ཐལ་མོ་གྱེན་དུ་བཀྱེལ།)  ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་(བསམ་ཞིང་།  སྔགས་སྔ་མའི་མཐར།)  ཨི་དཾ་བ་ལིཾ་ཏ་གྲྀ་ཧྞནྟུ་མ་མ་སརྦ་སིདྡྷི་མྨེ་པྲ་ཡཙྪ།  (ཞེས་གཏོར་མ་ཕུལ།  བསྟོད་པ་ནི།)  གང་གི་དྲིན་གྱིས་བདེ་ཆེན་ཉིད།  །སྐད་ཅིག་ཉིད་ལ་འཆར་བ་གང་།  །བླ་མ་རིན་ཆེན་ལྟ་བུའི་སྐུ།  །རྡོ་རྗེ་ཅན་ཞབས་པད་ལ་འདུད།  །བཅོམ་ལྡན་ཁྲོ་བོའི་རྒྱལ་པོ་ནི།  །སངས་རྒྱས་ཀུན་གྱི་འཁོར་ལོས་སྒྱུར།  །གདུལ་དཀའ་མ་ལུས་འདུལ་བ་པོ།  །ཁྲོ་བོའི་རྒྱལ་ལ་ཕྱག་འཚལ་ལོ།  །ཕྱག་རྒྱར་འོས་པ་ཐམས་ཅད་ལ།  །ཞིང་རྡུལ་ཀུན་གྱི་གྲངས་སྙེད་ཀྱིས།  །ལུས་བཏུད་པ་ཡི་རྣམ་ཀུན་ཏུ།  །མཆོག་(6ན)ཏུ་དད་པས་ཕྱག་འཚལ་ལོ།  །(ཞེས་བསྟོད་ཅིང་འདོད་དོན་གསོལ་ནས་མགྲོན་རྣམས་གཤེགས་སུ་གསོལ་བའམ་བསྟིམ་པ་གང་བདེ་བྱ་སྟེ་སྔོན་འགྲོའི་བྱ་བའོ།  །གཉིས་པ་དངོས་གཞིའི་ཆོ་ག་ལ་རྒྱུན་གྱི་ཕྲིན་ལ་སུ་བྱ་བ་དང་།  ཁྱད་པར་སྐབས་ཀྱི་ཕྲིན་ལས་སུ་བྱ་བ་གཉིས།  དང་པོ་ལ་དགུ་ལས།  དང་པོ་མདུན་བསྐྱེད་གསལ་འདེབས་པ་ནི།)  ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ།  སྟོང་པ་ཉིད་ཀྱི་ངང་ལས་མདུན་གྱི་ནམ་མཁར་དུར་ཁྲོད་ཀྱི་ས་གཞི་འཇིགས་སུ་རུང་བ་རོ་གསར་རྙིང་སྣ་ཚོགས་གཅལ་དུ་བཀྲམ་ཞིང་ཕུང་པོར་སྤུངས་པ་ཁྲག་གིས་སྦགས་པའི་རོ་ལང་རྣམས་དགོད་ཅིང་གར་རྩེ་བ།  ལས་ཀྱི་ཤན་པ་འབུམ་ཀུན་ཏུ་རྒྱུ་ཞིང་ཉམས་པ་རྣམས་འགུགས་འཆིང་གསོད་གཅོད་ཀྱི་ལས་བྱེད་པ།  མ་རུངས་པའི་སྲོག་ཆགས་གདུག་པ་ཅན་རྣམས་ངུ་འབོད་ཀྱི་སྒྲ་དང་བཅས་པས་ཤ་ཟ་ཞིང་ལང་ལོང་དུ་འཕྱོ་བ་ཕྱོགས་ཐམས་ཅད་དུ་མེ་རླུང་དམར་ནག་དྲག་ཏུ་འབར་ཞིང་འཁྲུགས་པའི་དབུས་སུ་བྷྲཱུྃ་ལས་དུར་ཁྲོད་འབར་བའི་གཞལ་མེད་ཁང་ཆེན་པོ་གྲུ་བཞི་སྒོ་ཁང་རྟ་བབས་དང་བཅས་པ།  དྲག་པོའི་རྒྱན་དང་བཀོད་པ་ཕུན་སུམ་ཚོགས་པས་སྤྲས་པ།  ནང་ཁྲག་ཞག་གི་རྒྱ་མཚོར་འཁྱིལ་བའི་དབུས་(6བ)སུ་མཐིང་ནག་གྲུ་གསུམ་འབར་བའི་དཀྱིལ་འཁོར་བསྣོལ་མ་གནམ་ལྕགས་ཀྱི་འཁོར་ལོས་ཡོངས་སུ་བསྐོར་བའི་ལྟེ་བར་པདྨ་དང་ཉི་མ་རུ་དྲ་ཕོ་མོ་བསྣོལ་བའི་སྟེང་དུ་ཧཱུྃ་མཐིང་ནག་ཡོངས་སུ་གྱུར་པ་ལས་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་སྐུ་མདོག་མཐིང་ནག་གཏུམ་ཞིང་ཁྲོས་པའི་ཉམས་ཅན།  ཞལ་གཅིག་ཕྱག་གཉིས་པ་གཡས་འབར་བའི་རུ་མཚོན་རྣོན་པོ་གནམ་དུ་འཕྱར་ཞིང་གཡོན་གདུག་པ་ཅན་གྱི་སྙིང་དང་ཞགས་པ་འཛིན་པ།  སྤྱན་གསུམ་དམར་ལ་ཟླུམ་པ་ཞལ་མཆེ་བ་གཙིགས་ཤིང་ལྗགས་འདྲིལ་བ།  སྦྲུལ་ནག་པོའི་རལ་པ་མཐུར་དུ་འཕྱང་ཞིང་ཐོད་པ་སྐམ་པོ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན།  སྙིང་ཕྲེང་དང་སྦྲུལ་གྱི་ཆུན་པོས་བརྒྱན་པ།  དར་ནག་གི་འཇོལ་བེར་བརྩེགས་མར་གསོལ་ཞིང་གསེར་སྐེད་དང་མི་ལྤགས་རློན་པའི་སྐ་རགས་ཅན།  ཙནྡན་གྱི་བིང་ཆེན་སྐེད་ལ་བཙུགས་པའི་སྒོ་གསུམ་ནས་སྤྲུལ་པའི་དམག་དཔུང་འགྱེད་པ།  ཁ་དོག་སྣ་ཚོགས་པའི་ཅོད་པན་ལྷབ་ལྷུབ་དང་འཇིགས་པའི་རྒྱན་ཐམས་ཅད་ཀྱིས་ཀླུབས་པ།  སག་ཏིའི་ལྷྭམ་ཡུ་རིང་གསོལ་ནས་གཡོན་བརྐྱང་བའི་དོར་སྟབས་ཀྱིས་བསྐལ་པའི་མེ་ཕུང་འབར་ཞིང་འཁྲུགས་(7ན)པའི་དབུས་ན་བཞུགས་པའོ།  །དེའི་ཕྱི་རོལ་ཆོས་འབྱུང་གི་ཟུར་དྲུག་ལ་གཙོ་བོའི་གཡོན་ཟུར་ནས་བརྩམས་ཏེ་རིམ་པ་བཞིན།  ཡུམ་དཔལ་འབར་མ་དཀར་མོ་གཡས་ཤེལ་གྲི་འཕྱར་ཞིང་གཡོན་ཐོད་ཁྲག་གཙོ་ལ་སྟོབས་པ་མ་མོའི་ཆས་ཅན་རོལ་པའི་སྟབས་ཀྱིས་འགྱིང་བ།  སྐུའི་མགོན་པོ་སྟ་གཞོན་ནག་པོ་གཡས་ཙནྡན་གྱི་བེང་གསོར།  (མགོན་པོ་ལྔ་དང་ཡུམ་བཅས་གནམ་ལྕགས་ཕུར་གཅིག་མར་ཕྱིར་འགོད་པར་གསུངས་ཀྱང་།  རྒྱུད་ལས་འཁོར་གྱི་གཙོ་བོར་གསུངས་པ་དང་ངོ་བོ་གཙོ་བོ་ཉིད་དང་དབྱེར་མེད་ཅིང་ཁྱད་པར་སྲོག་དབང་དུ་ཡང་གསུངས་པ་བཅས་འདི་ལྟར་རོ།  །)  ཞིང་།  གཡོན་བདུད་ཀྱི་ཞགས་པ་ཐོགས་ནས་དཔའ་གཏུམ་སྟག་ལ་ཞོན་པ།  གསུང་གི་མགོན་པོ་བེང་དམར་སྨུག་གཡས་ཙནྡན་གྱི་བེང་འཕྱར་ཞིང་གཡོན་བདུད་རྩིའི་ལྕགས་པར་འཛིན་པ།  ཐུགས་ཀྱི་མགོན་པོ་གྲི་གུག་མཐིང་ནག་གཡས་གྲི་གུག་མཁའ་ལ་འཕྱར་ཞིང་གཡོན་ཐོད་ཁྲག་འཛིན་པ།  ཡོན་ཏན་གྱི་མགོན་པོ་ལེགས་ལྡན་ནག་པོ་གཡས་རིན་པོ་ཆེ་དང་གཡོན་ཐོད་ཁྲག་འཛིན་པ་སེང་གེ་ལ་ཞོན་པ།  ཕྲིན་ལས་ཀྱི་མགོན་པོ་ཏྲཀྴད་མཐིང་ནག་གཡས་བེང་གསོར་ཞིང་གཡོན་དགྲ་སྙིང་བསྣམས་པ་བྲ་ནག་རྟིང་དཀར་ལ་ཆིབས་པ།  ལྔ་ཀའང་མི་བཟད་པའི་ཁྲོ་(7བ)བོ་གཏུམ་དྲག་འཇིགས་པའི་ཉམས་ཅན་དར་ནག་གི་འཇོལ་བེར་དང་དུར་ཁྲོད་རོལ་པའི་ཆས་ཐམས་ཅད་ཀྱིས་བརྒྱན་ཏེ་བམ་གྱི་ཁར་བཞུགས་པའོ།  །དེའི་ཕྱི་རོལ་འཁོར་ལོ་རྩིབས་བརྒྱད་ཀྱི་ཤར་དུ་དུ་ལས་ལས་ཀྱི་མགོན་པོ་སྲོག་བདུད་ནག་པོ་དུས་མཐའི་སྤྲིན་དང་མཚུངས་པ།  ཞལ་གཅིག་ཕྱག་གཉིས་པ་གྲི་གུག་དང་ལྕགས་པར་བཟུང་ནས་མདའ་གཞུ་འགེངས་ཤིང་ཁ་ཊྭཱྃ་གྲུ་མོར་(ངོ་བོ་གཙོ་བོ་ཉིད་དང་དབྱེར་མེད་ཅིང་སྐུའི་རྣམ་འགྱུར་ཐ་དད་པ་ཙམ་ཡིན་པས་འདིར་བྱས།)  བཀལ་བ།  སྐུ་ལ་དར་ནག་གི་བེར་གསོལ་ཞིང་གསེར་གྱི་སྐེ་རགས་བཅིངས་པ།  སྤྱན་མིག་ཁྲག་ལྟར་གཡོ་ཞིང་ཁ་རླངས་མེར་འབར་བ།  སྟག་རལ་དང་གཟིག་ཤུབ་བཏགས་ནས་བྲ་ནག་རྟིང་དཀར་ལ་ཆིབས་པ།  འཇིགས་པའི་སྤྱན་གསུམ་བྲང་ལ་ཤར་ཞིང་ལྷུ་ཚིགས་བཞིའི་སྤྱན་ལས་དམག་དཔོན་བཞི་འགྱེད་པ།  བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད་ལྕགས་ཀྱི་བྱ་ཁྲར་སྤྲུལ་ནས་སྔོན་ལ་ལྡིང་ཞིང་སྔ་དགྲ་འདུལ་བ།  ལྷོ་ཕྱོགས་ཀྱི་གཤིན་རྗེ་ཆེན་པོ་བརྒྱད་སྟག་གཟིག་དོམ་དྲེད་འཕར་སྤྱང་རྣམས་སུ་སྤྲུལ་ནས་ཕྱི་བཞིན་འབྲེང་བས་ཕྱི་དགྲ་སེམས་པ་རྡུལ་དུ་རློག་པ།  གཞན་ཡང་ལས་བྱེད་ཀྱི་དམག་ཚོགས་(8ན)དུ་མས་བསྐོར་བ།  ལྷོར་ཨེ་ལས་མ་མོ་སྔགས་ཀྱི་སྲུང་མ་སྐུ་མདོག་སྨུག་ནག་ཞལ་གཅིག་ཕྱག་གཉིས་པ།  ཁྲོ་གཏུམ་མི་བཟད་པའི་གཟུགས་ཅན་དཔྲལ་བའི་དབྱིངས་ན་ཡེ་ཤེས་ཀྱི་སྤྱན་གཅིག་འབར་བ།  ཞལ་གདངས་ཤིང་མཆེ་བ་གཅིག་མཐུར་དུ་གཙིགས་པ།  ལྗགས་འདྲིལ་བ།  རལ་པ་ཁམ་ནག་མཐུར་དུ་གྲོལ་བའི་དབུས་ན་ལྕགས་རལ་ཉག་གཅིག་གྱེན་དུ་གཟེངས་པ།  ཐུགས་ཀ་ན་ནུ་མ་གཅིག་འཕྱང་བ།  ཕྱག་གཡས་ཞིང་དབྱུག་ཀླད་ལ་འཕྱར་ཞིང་གཡོན་དགྲ་སྙིང་དང་ལྕགས་སྤྱང་ཁྲ་ཐབས་སུ་འགྱེད་པ།  ཐོད་སྐམ་གྱི་ཅོད་པན་དང་དོ་ཤལ་སོགས་འཇིགས་པའི་ཆས་ཀྱིས་བརྒྱན་ཏེ་གཡོན་བརྐྱང་བའི་སྟབས་ཀྱིས་རོའི་སྟན་ལ་རོལ་པ།  འཁོར་སྤྲུལ་པའི་མ་མོ་རྣམ་གསུམ།  སྦྱོར་སྒྲོལ་སྲོག་གཅོད་ཀྱི་གིང་གསུམ།  ཡེ་ཤེས་ཀྱི་མ་མོ་ལྔ།  རྗེ་མོ་བཅུ་བཞི།  སྨན་མོ་ལྔ་བཅུ་རྩ་བརྒྱད་སོགས་སྣང་སྲིད་མ་མོའི་ཚོགས་ཀྱིས་བསྐོར་བ།  ནུབ་ཏུ་ར་ལས་གཟའ་བདུད་རཱ་ཧུ་ལ་སྨུག་ནག་མགོ་བོ་དགུ་པ་ཕྱག་བཞིའི་དང་པོ་གཉིས་ཆུ་སྲིན་གྱི་རྒྱལ་མཚན་དང་སྦྲུལ་ཞགས།  འོག་མ་གཉིས་མདའ་གཞུས་དགྲ་སྙིང་གཟིར་བ།  ལུས་(8བ)ཀུན་མིག་གིས་གང་ཞིང་རོ་སྨད་སྦྲུལ་དུ་འཁྱིལ་བ།  དུར་ཁྲོད་འཇིགས་པའི་ཆས་ཅན་གཟའ་དང་གདོང་མོ་རྒྱུ་སྐར་སོགས་འཇིགས་བྱེད་དྲེགས་པའི་ཚོགས་ཀྱིས་བསྐོར་བ།  བྱང་དུ་བྷྱོ་ལས་བཤན་པ་སྲོག་སྒྲུབ་ནག་མོ་རྔམས་ཤིང་ཁྲོས་པ།  གཡས་དགྲ་སྙིང་ཟ་ཞིང་གཡོན་ནད་རྐྱལ་ཐོགས་པ།  མི་ལྤགས་ཀྱི་གོས་དང་ཐོད་རུས་སྦྲུལ་གྱིས་བརྒྱན་ཅིང་སྲིད་པའི་རླུང་ནག་ཞོན་པ།  གཡས་ན་ཅེ་སྤྱང་གདོང་མ།  གཡོན་ན་ཝ་གདོང་མ།  མདུན་ན་འུག་གདོང་མ་སོགས་ཤ་ཟ་དང་མ་མོ་འབུམ་སྡེས་བསྐོར་བ།  ཤར་ལྷོར་ར་ལས་པེ་ཧར་དགྲ་ལྷ་དམར་གསལ་ཞལ་གཅིག་ཕྱག་གཉིས་སྤྱན་གསུམ་པ་ཁྲོ་འཛུམ་བཞད་པའི་ཉམས་ཅན།  གཡས་གསེར་གྱི་གསེག་ཤང་དང་གཡོན་དངུལ་གྱི་པར་བུ་བསྣམས་པ་དབུ་ལ་དར་ནག་གི་འཐིབས་ཞུ་གསོལ་ཞིང་།  ཟ་འོག་གི་བེར་དང་མན་ཏྲིའི་ཆོས་གོས་གྱོན་པ།  མགུལ་དུ་ཤེལ་ཕྲེང་འཕྱང་ཞིང་སེང་གེ་དཀར་མོ་ལ་ཞོན་པ།  ཡུམ་ཤཱནྟི་རོ་ཟན་མས་འདུད་ཅིང་ལས་མཁན་པུ་ཏྲ་ནག་པོ་སོགས་གར་མཁན་སྐྱོ་སངས་རུ་འདྲེན་སྡེ་བཞི་སོགས་ལྷ་མ་སྲིན་དྲེགས་པའི་ཚོགས་ཀྱིས་བསྐོར་བ།  ལྷོ་ནུབ་ཏུ་དུ་ལས་གནོད་སྦྱིན་བཤན་པ་དམར་(9ན)ནག་ཞལ་གཅིག་ཕྱག་བཞི་པ།  གཡས་གཉིས་རལ་གྲི་དང་གྲི་གུག་གཡོན་གཉིས་ཐོད་ཁྲག་དང་སྦྲུལ་ཞགས་འཛིན་པ།  དར་དམར་གྱི་བེར་དང་དུར་ཁྲོད་ཀྱི་ཆས་ཅན་ཟངས་ཀྱི་མཁའ་ལྡིང་ལ་ཞོན་པ།  ལས་བྱེད་ཕོ་ཉ་སྡེ་བརྒྱད་སོགས་ཤ་ཟ་བཤན་པའི་ཚོགས་ཀྱིས་བསྐོར་བ།  ནུབ་བྱང་དུ་ཏྲི་ལས་སྐྱེས་མཆོག་རྡོ་རྗེ་ལེགས་པ་དམར་པོ་ཕྱག་གཡས་རྡོ་རྗེས་དགྲ་མགོ་གཟིར་ཞིང་གཡོན་མི་སྙིང་འཛིན་པ།  དར་དཀར་གྱི་བེར་དང་བརྗིད་པའི་ཆས་ཅན་ར་སྐྱེས་ཁམ་པ་ལ་ཞོན་པ།  འཁོར་གིང་ཆེན་སྡེ་བཞི་ལྷ་བཙན་བདུད་ཀྱི་དགེ་བསྙེན་སུམ་བརྒྱ་དྲུག་ཅུ་དགྱེས་སྡེ་མོ་བཅུ་གཉིས་ཟ་བྱེད་མཆེ་བ་ཅན་སོགས་འཇིགས་བྱེད་དྲེགས་པའི་ཚོགས་ཀྱིས་བསྐོར་བ།  བྱང་ཤར་དུ་མ་ལས་འདོད་ཁམས་དབང་ཕྱུག་རེ་མ་ཏི་ནག་མོ་སྐེམ་ཞིང་སྦེག་ལ་གཏུམ་པའི་གཟུགས་ཅན་ཞལ་གཅིག་ཕྱག་བཞི་པ།  གཡས་གཉིས་གྲི་གུག་དང་རལ་གྲི་གཡོན་གཉིས་ཐོད་དབྱུག་དང་ནད་རྐྱལ་ཐོགས་པ།  མ་མོའི་ཆས་བརྒྱད་ཀྱིས་སྤྲས་ཏེ་རྫུ་འཕྲུལ་དྲེལ་རྟའི་སྟེང་ན་བཙན་འཁྱིལ་གྱིས་(གཉིས་པ་གཡས་ཁྲམ་ཤིང་འཕྱར་ཞིང་གཡོན་བྷཉྫ་བཟུང་བའི་མཆན་ན་ནད་རྐྱལ་ཐོགས་པ་གཞན་འདྲའོ།  །རྒྱུད་ལས་འདི་ལྟར་རོ།  །)   (9བ)བཞུགས་པ་སྣང་སྲིད་མ་མོའི་ཚོགས་ཀྱིས་བསྐོར་བ།  གཞན་ཡང་དེ་དག་གི་ཕྱི་རོལ་དུ་རུ་འདྲེན་གྱི་དམག་དཔོན་སྡེ་བཞི།  བཀའ་སྡོད་དྲེགས་པ་སྡེ་བརྒྱད།  བདུད་དམག་ཉི་ཁྲི་ཆིག་སྟོང་།  ལྷ་དམག་འབུམ་སྡེ་ལ་སོགས་པ་ཡེ་ཤེས་དང་ལས་ལ་གྲུབ་པའི་དྲེགས་པ་ཕོ་རྒྱུད་མོ་རྒྱུད་ཕོ་ཉ་ལས་བྱེད་བསམ་གྱིས་མི་ཁྱབ་པའི་ཚོགས་ཀྱིས་བསྐོར་བ་ཐམས་ཅད་ཀྱང་འཇིགས་ཤིང་རྔམས་པའི་གཟུགས་འཆང་ཞིང་ཕྲིན་ལས་འདོད་རྒུར་སྒྱུར་བས་སྒྲུབ་པ་པོའི་རེ་འདོད་ཡིད་བཞིན་དུ་སྐོང་བའི་ཚུལ་གྱིས་བཞུགས་པའོ།  །(གཉིས་པ་སྤྱན་འདྲེན་པ་ནི།)  གཙོ་འཁོར་ཐམས་ཅད་ཀྱི་དཔྲལ་བར་ཨོཾ།  མགྲིན་པར་ཨཱཿ ཐུགས་ཀར་ཧཱུྃ།  ཧཱུྃ་ལས་འོད་ཟེར་འཕྲོས་པས་འོག་མིན་ཆོས་ཀྱི་དབྱིངས་ཀྱི་ཕོ་བྲང་།  མ་ལ་ཡ་གནམ་ལྕགས་འབར་བ།  རྡོ་རྗེ་གདན།  ན་ལེནྡྲ།  བསིལ་བ་ཚལ་དང་ཨུ་ཙ་ལའི་དུར་ཁྲོད་ཆེན་པོ་སོགས་རང་བཞིན་གར་བཞུགས་ཀྱི་གནས་ནས་མགོན་པོ་འཁོར་དང་བཅས་པ་ཐམས་ཅད་བཛྲ་ས་མཱ་ཛཿ(ས་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་བྱོན་པར་བསམ་ཞིང་།)  རྐང་གླིང་གིས་དྲངས་པའི་རྔ་བོ་ཆེ་སོགས་སྙན་པའི་རོལ་མོ་དང་སྦྱར་སྤོས་ཀྱི་དུད་སྤྲིན།  དབྱངས་ཀྱི་འགྱུར་བ་དང་བཅས་པས།  ཧཱུྃ།  དད་པ་དང་ནི་དམ་ཚིག་གིས།  །ཚུར་(10བ)གཤེགས་ཚུར་གཤེགས་ལྷ་ཆེན་པོ།  །མ་ཧཱ་ཀཱ་ལ་མཐུ་བོ་ཆེ།  །གསང་བའི་ཁྲོ་རྒྱལ་སྟོབས་པོ་ཆེ།  །གནས་འདིར་སྤྱན་འདྲེན་གཤེགས་སུ་གསོལ།  །འོག་མིན་གནས་མཆོག་དམ་པ་དང་།  །གསང་ཆེན་ལྷུན་གྲུབ་གཙུག་ལག་ཁང་།  །དུར་ཁྲོད་རབ་འཇིགས་གཞལ་ཡས་ནས།  །ཐུགས་དམ་དབང་གིས་གཤེགས་སུ་གསོལ།  །ལྷ་ཆེན་དཔལ་འབར་གཤེགས་སུ༴   །ལེགས་ལྡན་ནག་པོ༴   །ཚོགས་བདག་ཆེན་པོ༴   །མ་ནིང་ནག་པོ༴   །སྲོག་བདུད་ཆེན་པོ༴   །མཁའ་འགྲོའི་གཙོ་མོ༴   །མགོན་པོ་སྡེ་ལྔ༴   །སྲིང་གཅིག་ཆེན་མོ༴   །མཐུ་ཆེན་སྡེ་བརྒྱད༴   །བདུད་འདུལ་དམག་ཚོགས༴   །ཡེ་ཤེས་མགོན་པོ་འཁོར་དང་བཅས།  །བསྟན་པ་བསྲུང་ཕྱིར་གཤེགས་སུ་གསོལ།  །(ཞེས་པ་ཙམ་མམ།)  སྤྲོ་ན།  ཧཱུྃ།  ཨུ་ཙ་ལ་ནས་ལས་ཀྱི་མགོན།  །སྲོག་བདུད་ནག་པོ་གཤེགས་སུ་གསོལ།  །བདེ་ཆེན་དབྱིངས་ནས་ཀུན་བཟང་ཡུམ།  །ཨེ་ཀ་ཛྰ་ཊི་གཤེགས་སུ་གསོལ།  །བར་སྣང་ཁམས་ནས་འཇིགས་བྱེད་གཙོ།  །ཁྱབ་འཇུག་ཆེན་པོ་གཤེགས༴   །དུར་ཁྲོད་གནས་ནས་མཁའ་འགྲོ་མ།  །མི་བསྲུན་བཤན་པ༴   །ཧེ་ཆེན་བརྡལ་ནས་སྒྲོལ་བའི་གིང་།  །(10བ)གནོད་སྦྱིན་ཆེན་པོ༴   །དམ་ཚིག་གནས་ནས་ཐིག་ལེ་རྩལ།  །རྡོ་རྗེ་ལེགས་པ༴   །བྱང་ཤར་མཚམས་ནས་རེ་མ་ཏཱི།  །འདོད་ཁམས་བདག་མོ༴   །གཙུག་ལག་ཆོས་འཁོར་ལྷ་ཁང་ནས།  །པེ་ཧར་དགྲ་ལྷ༴   །བསྟན་པ་སྐྱོང་བའི་དམ་ཅན་ཚོགས།  །སོ་སོའི་མངག་གཞུག་ཕོ་ཉར་བཅས།  །དམ་ཚིག་གནས་འདིར་སྤྱན་འདྲེན་གྱིས།  །ཕྲིན་ལས་སྒྲུབ་ཕྱིར་གཤེགས་སུ་གསོལ།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨེ་ཧྱེ་ཧི་བཛྲ་ས་མཱ་ཛཿཛཿཧཱུྃ།  (ཞེས་པས་སྤྱན་དྲང་ངོ་།  །གསུམ་པ་བཞུགས་སུ་གསོལ་བ་ནི།)  ཧཱུྃ།  དུར་ཁྲོད་རབ་འཇིགས་གཞལ་ཡས་དམ་པ་འདིར།  །སྣ་ཚོགས་པདྨ་ཉི་ཟླ་བརྩེགས་པའི་སྟེང་།  །རུ་ཏྲ་ཕོ་མོ་བསྣོལ་བའི་གདན་ཁྲི་ལ།  །ཁྲོ་རྒྱལ་མ་ནིང་འཁོར་བཅས་བཞུགས་སུ་གསོལ།  །ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་ས་པ་རི་ཝཱ་ར་ས་མ་ཡ་ཏིཥྛ་ལྷན།  (ཞེས་བཞུགས་སུ་གསོལ།  བཞི་པ་དམ་ལ་བཞག་པ་ནི།  དམ་ཚིག་གི་རྒྱ་བཅིངས་ཏེ་རྡོ་རྗེ་སྤྱི་བོར་བཞག་བདུད་རྩི་ལྗགས་ལ་བྱིན་པར་མོས་ཏེ།)  ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ།  དཔལ་རྡོ་རྗེ་ནག་པོ་ཆེན་པོ་ལེགས་ལྡན་མ་ནིང་ནག་པོ་ལྕམ་དྲལ་འཁོར་དང་བཅས་པ་རྣམས་ཀྱིས་ཀུན་བཟང་ཧེ་རུ་ཀ་དཔལ།  གསང་བདག་ཕྱག་ན་རྡོ་རྗེ།  སློབ་དཔོན་པདྨ་ཐོད་ཕྲེང་།  རིག་འཛིན་པདྨ(11ན)གླིང་པ་ནས་འཁོར་ལོའི་མགོན་པོའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས།  དཀོན་མཆོག་གི་དབུ་འཕང་བསྟོད།  དགེ་འདུན་དང་ཆོས་ཀྱི་རྒྱལ་སྲིད་སྐྱོངས།  འཇིག་རྟེན་གྱི་རྒུད་པ་སོལ།  སེམས་ཅན་གྱི་ཕན་བདེ་སྤེལ།  རྣལ་འབྱོར་པ་རྣམས་ཀྱི་སྟོང་གྲོགས་མཛོད།  སྔགས་འཆང་རྣམས་ཀྱི་ཕྲིན་ལས་སྒྲུབས སྡང་བའི་དགྲ་ཐུལ།  གནོད་པའི་བགེགས་ཆོམས།  ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་།  མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་།  མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག  །ཨོཾ་བཛྲ་ས་མ་ཡ་རཀྵ་ནྟུ་པཉྩ་ཨ་མྲྀ་ཏོ་ད་ཀ་ཋ་ཋ་ཋ་ཧཱུྃ།  (ཞེས་དམ་ལ་བཞག་བས་ཅི་བསྒོ་བའི་ལས་ཐམས་ཅད་སྒྲུབ་ཅིང་བཀའ་ནོད་པར་བསམ།  ལྔ་པ་ཕྱག་བྱ་བ་ནི།)  ཧཱུྃ།  ཆོས་དབྱིངས་སྐྱེ་བ་མེད་པའི་ཕོ་བྲང་ནས།  །སྐྱེ་བའི་ཆོ་འཕྲུལ་ཁྲོ་རྒྱལ་མ་ནིང་སྐུ།  །མཉམ་མེད་མཐུ་མངའ་གཏུམ་ཆེན་མེ་ལྟར་འབར།  །རུ་དྲ་འཇོམས་མཛད་(11བ)བདུད་དཔུང་ཐལ་བར་རློག  །མཐར་བྱེད་གཞོན་ནུ་འཇིགས་པའི་གད་རྒྱངས་ཅན།  །མ་ཧཱ་ཀཱ་ལ་ཁྱོད་ལ་ཕྱག་འཚལ་ལོ།  །ཨོཾ་ཤྲཱི་མ་ཧཱ་ཀཱ་ལ་ག་ཎ་གུཧྱ་ཨ་ཏི་པུ་ཧོཿ   པྲ་ཏཱིཙྪ་ཧོཿ(ཞེས་ཕྱག་བྱའོ།  །)  དྲུག་པ་མཆོད་པའང་དྲུག་ལས།  ཕྱི་མཆོད་ནི།  ཧཱུྃ ཡན་ལག་བརྒྱད་ལྡན་ཡིད་འོང་མཆོད་ཡོན་སྦྲེང་།  །རབ་གཙང་དྭངས་པའི་ཞབས་བསིལ་རྒྱ་མཚོར་བསྐྱིལ།  །སྣ་ཚོགས་ལྟ་སྡུག་ཆུ་སྐྱེས་ལང་ཚོ་བཞད།  །གྲུབ་དང་སྦྱར་བའི་བདུག་པ་སྤྲིན་ལྟར་གཏིབས།  །མུན་སྣང་མཐར་བྱེད་སྒྲོན་མེས་ཉིན་མོར་བྱེད།  །ཡིད་འོང་བྱུག་པ་ལྷ་ཡི་ཆུ་བོའི་རྒྱུན།  །རོ་བཅུད་ཕུན་ཚོགས་ཞལ་ཟས་ལྷུན་པོར་སྤུངས།  །སྙན་བརྗིད་རོལ་མོ་སྒྲ་དབྱངས་དང་བཅས་པའི།  །ཕྱི་ཡི་མཆོད་སྤྲིན་འདོད་ཡོན་འཛད་མེད་གཏེར།  །འབུལ་གྱིས་ཚིམ་ཞིང་དགྱེས་ནས་དངོས་གྲུབ་སྩོལ།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་(ནས་)ཤཔྡའི་(བར་དང་།)  པཉྩ་ཀཱ་མ་གུ་ཎ་པྲ་ཏཱིཙྪ་སྭཱཧཱ།  (ནང་གི་མཆོད་པ་ནི།)  ཧཱུྃ།  གདུག་པའི་སྙིང་ཁྲག་མཆོད་ཡོན་མཚོ་ལྟར་བསྐྱིལ།  །མྱོས་བྱེད་དུག་ཁྲག་ཞབས་བསིལ་རྔམས་ཤིང་བརྗིད།  །དབང་པོ་རྣམ་ལྔའི་མེ་ཏོག་ཚར་དུ་དངར།  །ཤ་ཆེན་དུད་པའི་སྤྲིན་ཕུང་ལང་ལོང་གཡོ།  །ཞུན་(12ན)ཆེན་མར་མེ་བསྐལ་པའི་མེ་ལྟར་འབར།  །ཁྲག་ཞག་བདུད་རྩིའི་དྲི་ཆབ་རླབས་ཕྲེང་གཡོ།  །ཤ་ཁྲག་རུས་པའི་ཞལ་ཟས་ཆེ་བརྗིད་རྔམས།  །དྲག་པོའི་རོལ་མོས་ས་གསུམ་འདར་ཞིང་གཡོ།  །དུར་ཁྲོད་ནང་གི་མཆོད་སྤྲིན་བསམ་མི་ཁྱབ།  །འབུལ་གྱིས་ཚིམ་ཞིང་དགྱེས་ནས་དངོས་གྲུབ་སྩོལ།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་ཤྨ་ཤ་ན་པཱུ་ཛ་ཨརྒྷཾ་(ནས་)ཤཔྡའི་(ར་བརྗོད།  གསང་བའི་མཆོད་པ་ནི།)  ཧཱུྃ།  སྒྲིབ་པའི་དྲི་མ་ཀུན་སྤངས་ཤིང་།  །རྟོག་པ་ཀུན་ལས་ངེས་གྲོལ་བ།  །བླ་ན་མེད་པའི་བྱང་ཆུབ་སེམས།  །བདེ་བ་ཆེན་པོས་མཉེས་གྱུར་ཅིག  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་ཨ་ནུ་རཱ་ག་པྲ་ཏཱིཙྪ་སྭཱཧཱ།  (སྨན་མཆོད་ནི།)  ཧཱུྃ།  དམན་པའི་ཡུལ་ལས་རབ་འདས་ཤིང་།  །རྒྱལ་བ་ཀུན་གྱི་དམ་ཚིག་མཆོག  །དངོས་གྲུབ་ཀུན་གྱི་གཞིར་གྱུར་པ།  །བདུད་རྩི་མཆོག་གིས་མཆོད་པར་བགྱི།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི།  (རཀྟའི་མཆོད་པ་ནི།)  སྟོང་གསུམ་བྷཉྫའི་སྣོད་ཡངས་སུ།  །དམ་ཉམས་བསྒྲལ་བའི་མཱཾ་ས་དང་།  །རཀྟའི་རྒྱ་མཚོ་ཆེན་པོར་བསྐྱིལ།  །བསད་ཁྲག་རྦ་ཀློང་འཁྲུགས་པས་མཆོད།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་(12བ)ཝཱ་ར་མ་ཧཱ་རཀྟ་ཁཱ་ཧི།  (གཏོར་མའི་མཆོད་པ་ནི།)  ཧཱུྃ།  དཔལ་མགོན་མ་ནིང་ནག་པོ་འཁོར་བཅས་དགོངས།  །ཁྱེད་ལ་དགྱེས་པའི་མཆོད་པ་འབུལ་བ་ནི།  །ཐོད་ཆེན་བྷཉྫ་རློན་པའི་སྣོད་མཆོག་ཏུ།  །བ་ལིཾ་གཏོར་མའི་མཆོད་པ་རོངས་སེ་རོང་།  །བདུད་རྩི་སྨན་གྱི་མཆོད་པ་བྲེངས་སེ་བྲེང་།  །རཀྟ་དམར་གྱི་ཨརྒྷཾ་ཆི་ལི་ལི།  །ཛ་གད་གསེར་སྐྱེམས་བཏུང་བ་མེ་རེ་རེ།  །མཱཾ་ས་ཤ་ཆེན་གསུར་དུད་ཐུ་ལུ་ལུ།  །བྷཉྫ་རུས་པའི་ཚོགས་ནི་ཁྲ་ལ་ལ།  །བཟའ་དང་བཅའ་དང་བཏུང་བའི་བྱེ་བྲག་དང་།  །གཟུགས་སྒྲ་དྲི་རོ་རེག་བྱ་ཆོས་ལ་སོགས།  །འདོད་ཡོན་ལྔ་ལྡན་མཆོད་པ་སྣ་ཚོགས་ཀུན།  །དཔལ་མགོན་མ་ནིང་ནག་པོ་འཁོར་བཅས་ལ།  །འབུལ་ལོ་དགྱེས་པར་དགོངས་ཏེ་བཞེས་སུ་གསོལ།  །ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུཾ་ཕཊ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།  (ཞེས་སྤྱིར་ཕུལ་ནས།  བྱེ་བྲག་ཏུ་འབུལ་བ་ནི།)  ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བས་བདེ་བ་ཆེན་པོའི་རང་བཞིན་དུ་དགྱེས་ཤིང་ཚིམས་པར་(བསམ་ཞིང་རྡོ་རྗེའི་ཐལ་མོ་གྱེན་ཁ་ཕྱེས་ལྷ་སོ་སོའི་སྙིང་པོའི་མཐར།)  ས་པ་རི་ཝཱ་ར་ཨི་དཾ་བ་ལིཾ་ཏ་(སོགས་གཏོར་སྔགས་(13ན)བཏགས་པ་ལན་གསུམ་མམ་བདུན་གྱིས་འབུལ་ལ།)  དཔལ་མ་ཧཱ་ཀཱ་ལ་ཁྲག་འཐུང་གི་རྒྱལ་པོ།  གཙུག་ལག་ཁང་དང་དཀྱིལ་འཁོར་གྱི་སྲུང་མ།  དུག་གསུམ་ནད་ཀྱི་སྨན་པ།  རྣལ་འབྱོར་ཡོངས་ཀྱི་དགྲ་ལྷ།  བདུད་དཔུང་སྒྲོལ་བའི་དཔའ་བོ།  བསྟན་པའི་བཀའ་སྲུང་ཆེན་པོ།  ལེགས་ལྡན་ཡེ་ཤེས་ཀྱི་མགོན་པོ་མ་ནིང་ནག་པོ།  ཡུམ་དཔལ་འབར་ཀླུ་མོ།  ཡེ་ཤེས་ཀྱི་མགོན་པོ་སྡེ་ལྔ།  ལས་མགོན་སྲོག་བདུད་ཆེན་པོ་ལ་སོགས་ཏེ་དམ་པ་ཆོས་སྐྱོང་བའི་སྲུང་མ་བཀའ་སྡོད་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས།  (ཞེས་པ་ནས།)  ཕྲིན་ལས་མཛོད་ཅིག  །(ཅེས་པའི་བར་གྱི་འདོད་དོན་གསོལ།  བདུན་པ་བསྟོད་པ་བྱ་བ་ནི།)  ཧཱུཾ།  འཇིག་རྟེན་འདས་པའི་དུས་ན་སྔོན་བྱུང་བ།  །ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས།  །སྲིད་རྩའི་བདག་འཛིན་རུ་དྲ་སྡེ་གསུམ་འདུལ།  །རྩལ་ཆེན་ཕྲིན་ལས་མཛད་ལ་ཕྱག་འཚལ་བསྟོད།  །དཔལ་ཆེན་མངོན་སྤྲུལ་ནག་པོ་ཆེན་པོའི་སྐུ།  །འཆོལ་བའི་ཁྲོ་རྒྱལ་མ་ནིང་དགྲ་བགེགས་གཤེད།  །ལྷ་ཆེན་དཔལ་འབར་ཆོས་སྐྱོང་ཡོངས་ཀྱི་རྗེ།  །(13བ)དམག་དཔོན་ཆེན་པོའི་སྐུ་ལ་ཕྱག་འཚལ་བསྟོད།  །དུར་ཁྲོད་ཐོར་མཁར་མེ་རླུང་འཚུབས་དཀྱིལ་ན།  །རྣལ་འབྱོར་དཔལ་མགོན་ཁྱོད་ཀྱི་ཆ་ལུགས་ནི།  །སྐུ་མདོག་མཐིང་ནག་ཞག་གཅིག་ཕྱག་གཉིས་པ།  །སྐུ་གསུམ་ལྡན་ཕྱིར་སྤྱན་གསུམ་གྱེན་ཐུར་གཟིགས།  །རབ་བརྗིད་ཁྲོ་གཉེར་གསུམ་ལྡན་གཏུམ་ལ་རྔམས།  །ཞལ་གདངས་མཆེ་གཙིགས་དྲག་པོའི་རྐན་སྒྲ་རྡེབ།  །རིན་ཆེན་ཐོད་སྐམ་ལྔ་ཡིས་དབུ་ལ་བརྒྱན།  །སྦྲུལ་ནག་རལ་པ་ནག་པོས་ས་གཞི་ཁྱབ།  །གཡས་པ་རུ་མཚོན་གཡོན་པ་སྙིང་ཞགས་བསྣམས།  །ཙནྡན་བིང་ཆེན་སྐེད་བཙུགས་ལྷ་དམག་འགྱེད།  །ཐོད་པ་སྐམ་རློན་སྙིང་ཕྲེང་སྦྲུལ་ཆུན་སྤྲས།  །དར་ནག་བེར་གསོལ་གསེར་སྐེད་མི་ལྤགས་བཅིངས།  །ལེགས་ལྡན་ནག་པོའི་སྐུ་ལ་ཕྱག་འཚལ་བསྟོད།  ཧཱུཾ།  ལས་ལ་ཆས་ཚེ་སྲོག་བདུད་ཆ་ལུགས་འཛིན།  །སྲིད་གསུམ་གཟིགས་ཕྱིར་སྤྱན་གསུམ་བྲང་ལ་ཤར།  །དམག་དཔོན་བཞི་འགྱེད་སྤྱན་བཞིས་ལྷུ་ཚིགས་བརྒྱན།  །སྟག་རལ་གཟིག་ཤུབ་བཏགས་ནས་རྟ་ནག་ཞོན།  བདུད་མདས་དགྲ་སྙིང་གཟེར་འདེབས་གླིང་བཞིར་རྒྱུག  །(14ན)སྤྱན་ནས་ཁྲག་འཛག་མེ་ཡི་ཁ་རླངས་འབར།  །ཁ་ཊྭྰཾ་གྲི་གུག་ལྕགས་པར་ཐོགས་ནས་སུ།  །སྣང་སྲིད་ཕོ་རྒྱུད་ཐམས་ཅད་ཕོ་ཉར་འགྱེད།  །ཅི་བཅོལ་ལས་རྣམས་སྐད་ཅིག་ཡུད་ལ་སྒྲུབ།  །རྟག་ཏུ་གྲོགས་མཛད་མགོན་པོ་ནག་པོ་ཆེ།  །མ་བསྐུལ་བར་ཡང་བརྣག་པའི་དགྲ་བགེགས་སྒྲོལ།  །ལྟག་ན་སྤྱན་གཅིག་མ་ཚོགས་དབང་དུ་སྡུད།  །གར་བསྐུལ་ས་རུ་མི་རོ་རགས་སུ་འཚེར།  །བཟློག་པས་མི་བཟློག་སྔགས་ཟློག་མཁན་གྱི་གཤེད།  །གཙུག་ལག་ཁང་སྲུང་དཀོར་རྐུན་རྩད་ནས་གཅོད།  །བསྟན་པ་གཉན་སྲུང་བཀའ་ཡི་བྱ་ར་བ།  །དྲེགས་པ་ཀུན་འདུས་ཁྱོད་ལ་ཕྱག་འཚལ་བསྟོད།  །བྷྱོ།  མཁའ་ལ་དབང་སྒྱུར་ཡིད་བཞིན་སྤྲུལ་པའི་སྐུ།  །ཡ་མཚན་རྨད་བྱུང་ལུས་ལ་ཏིལ་མར་བྱུགས།  །དཔལ་ལྡན་ལྷ་མོ་གསང་བའི་མཁའ་འགྲོ་མ།  །མ་མོ་འབུམ་སྡེའི་གཙོ་ལ་ཕྱག་འཚལ་བསྟོད།  །དཔལ་ལྡན་མགོན་པོའི་སྐུ་གསུང་ཐུགས་ཡོན་ཏན།  །ཕྲིན་ལས་རྣམ་རོལ་འགག་མེད་ཅིར་ཡང་སྟོན།  །གདུག་ཅན་ཚར་གཅོད་བསྟན་པ་རྗེས་སྐྱོང་བ།  །མགོན་པོ་སྡེ་ལྔའི་སྐུ་ལ་ཕྱག་འཚལ་བསྟོད།  །དཔལ་ལྡན་གཙོ་མོ་ཨེ་ཀ་ཛྰ་ཊི་མ།  །ཞལ་གཅིག་ཕྱག་གཉིས་རུ་ལུའི་སྒྲ་(14བ)སྐད་སྒྲོག  །ཀུན་ཏུ་བཟང་མོ་དབྱིངས་ཀྱི་མ་མོ་མཆོག  །ལས་དང་ཡེ་ཤེས་ཚོགས་ཀྱི་རྗེ་ལ་བསྟོད།  །བཤན་པ་ནག་མོ་མི་ལྤགས་གཡང་གཞི་གསོལ།  །ཕྱག་ན་སྙིང་དང་ནད་ཀྱི་རྐྱལ་པ་བསྣམས།  །ལས་བྱེད་མཁའ་འགྲོ་བྱེ་བའི་ཚོགས་ཀྱིས་བསྐོར།  །ནམ་གྲུ་ནག་མོ་འཇིགས་པའི་ཚོགས་ལ་བསྟོད།  །དྲང་སྲོང་ཆེན་པོ་གཟའ་མཆོག་རཱ་ཧུ་ལ།  །སྐུ་མདོག་དུད་ཀ་དབུ་དགུ་སྤྱན་སྟོང་འབར།  །ཕྱག་བཞི་མདའ་གཞུ་རལ་གྲི་རྒྱལ་མཚན་བསྣམས།  །སྲིང་བཞི་སྡེ་བརྒྱད་འཁོར་དང་བཅས་ལ་བསྟོད།  །གནོད་སྦྱིན་དམར་ནག་ཟངས་ཀྱི་ཁྱུང་དམར་ཆིབས།  །ཞལ་གཅིག་ཕྱག་བཞི་གྲི་གུག་ཐོད་ཁྲག་དང་།  །རལ་གྲི་དགྲ་སྙིང་སྦྲུལ་ནག་ཞགས་པ་བསྣམས།  །དྲག་གཏུམ་ཆེན་པོ་འཁོར་དང་བཅས་ལ་བསྟོད།  །དམ་ཅན་ཆེན་པོ་དམར་ནག་ཐིག་ལེ་རྩལ།  །ཞལ་གཅིག་ཕྱག་གཉིས་རྡོ་རྗེ་དགྲ་སྙིང་བསྣམས།  །ཐོད་ཕྲེང་གཡང་གཞི་སྟག་གི་ཤམ་ཐབས་ཅན།  །སུམ་བརྒྱ་དྲུག་ཅུའི་འཁོར་དང་བཅས་ལ་བསྟོད།  །ཤིན་ཏུ་མི་བསྲུན་བདུད་མོ་རེ་མ་ཏཱི།  །ནམ་མཁའི་མ་དོག་ཅན་དྲེལ་རྟ་རྐང་གསུམ་ཆིབས།  །སྟོད་ཁམས་མྱུལ་ཞིང་སྐྱེ་འགྲོའི་སྲོག་དབུགས་ལེན།  །བསྟན་(15ན)པ་སྲུང་མཛད་མ་ལ་ཕྱག་འཚལ་བསྟོད།  །འགྱུར་མེད་དབྱིངས་ལས་འབར་བའི་སྐུར་སྟོན་པ།  །འགྲོ་བའི་དོན་མཛད་ཐུགས་རྗེ་ཉི་མ་འདྲ།  །དམ་ཉམས་རྩད་གཅོད་ལེགས་ཉེས་གཉེར་ཁ་འཛིན།  །པེ་ཧར་དགྲ་ལྷ་འཁོར་དང་བཅས་ལ་བསྟོད།  །སྔོན་ཚེ་རྒྱལ་བའི་སྤྱན་སྔར་རང་རང་གི།  །སྲོག་སྙིང་ཕུལ་ནས་ཁས་བླངས་དམ་བཅས་ལྟར།  །ཕྲིན་ལས་རྣམ་བཞིས་བསྟན་པ་རྗེས་སྐྱོང་བའི།  །དམ་ཅན་འཁོར་དང་བཅས་ལ་ཕྱག་འཚལ་བསྟོད།  །(ཅེས་པའམ།  །སྤྲོ་ན།)  ཧཱུྃ།  ཆོས་སྐུ་སྐྱེ་མེད་ཀུན་ཏུ་བཟང་།  །ལོངས་སྐུ་ཆེ་མཆོག་ཧེ་རུ་ཀ  །སྤྲུལ་སྐུ་མ་ནིང་ཁྲོ་བོའི་རྒྱལ།  །གསང་བདག་ཆེན་པོ་སྟོབས་པོ་ཆེ།  །འཆོལ་བའི་ཁྲོ་རྒྱལ་སྲོག་གི་བདུད།  །ལྷ་རྣམས་བསོད་ནས་རྒྱས་མཛད་པའི།  །ལྷ་ཆེན་དཔལ་འབར་ཁྱོད་ལ་བསྟོད།  །ལྷ་མིན་དམག་དཔུང་འཇོམས་མཛད་པའི།  །དམག་དཔོན་ཆེན་པོའི་སྐུ་ལ་བསྟོད།  །སངས་རྒྱས་བསྟན་པ་སྐྱོང་མཛད་པའི།  །སྡེ་དཔོན་ཆེན་པོའི་སྐུ་ལ་བསྟོད།  །(ཅེས་དང་།)  དཔལ་ལྡན་ལས་ཀྱི་མགོན་པོ་ནི།  །མཐིང་ནག་གྲི་གུག་ལྕགས་པར་ཐོགས།  །(15བ)ཁ་ཊྭཱྃ་བདུད་མདངས་དགྲ་སྙིང་གཟེར།  །རྟ་ནག་ཞོན་ནས་རྒྱུག་ལ་བསྟོད།  །མ་གཅིག་ལྷ་མོ་དཔལ་འབར་མ།  །སྤུ་གྲི་འཕྱར་ཞིང་ཀླད་ཁྲག་ལྡགས།  །མི་ལྤགས་གོས་གྱོན་ཐོད་ཕྲེང་འཕྱང་།  །ཨུ་མ་དེ་བཱིའི་སྐུ་ལ་བསྟོད།  །སྐུ་ལས་སྤྲུལ་པའི་མགོན་པོ་ནི།  །ནག་པོ་སྟག་ཞོན་མི་བཟད་པ།  །ཙནྡན་བེང་གསོར་བདུད་ཞགས་འཕེན།  །གཏུམ་པོ་འཇིགས་བྱེད་ཁྱོད་ལ་བསྟོད།  །མ་འགགས་གསུང་གི་རོལ་པའི་རྩལ།  །བིང་ཆེན་དམར་སྨུག་ཁྲོས་པའི་ཞལ།  །ཙནྡན་བེང་དང་ལྕགས་པར་འཛིན།  །བདུད་འདུལ་མཐུ་ཆེན་ཁྱོད་ལ་བསྟོད།  །ཐུགས་ཀྱི་སྒྱུ་མ་ཆེན་པོའི་འཕྲུལ།  །ལྷ་མིན་གཡུལ་ཟློག་ནག་པོ་ཆེ།  །ཕྱག་ན་གྲི་གུག་ཐོད་ཁྲག་བསྣམས།  །ཁྲག་འཐུང་དཔའ་བོ་ཁྱོད་ལ་བསྟོད།  །ཡོན་ཏན་མགོན་པོ་ལེགས་ལྡན་ཆེ།  །གཏུམ་དྲག་བཟོད་དཀའི་གཟི་བརྗིད་ཅན།  །མཐིང་ནག་རིན་ཆེན་ཐོད་ཁྲག་འཛིན།  །གདུག་པ་འདུལ་མཛད་ཁྱོད་ལ་བསྟོད།  །ཕྲིན་ལས་དྲག་ཤུལ་ཆེན་པོའི་རྩལ།  །ཏྲག་ཤད་བདུད་མགོན་མ་རུངས་པ།  །ཙནྡན་བེང་དང་དགྲ་སྙིང་འཛིན།  །དགྲ་བགེགས་གཤེད་མ་ཁྱོད་ལ་བསྟོད།  །སྨུག་ནག་ཁྲོས་མ་རལ་(16ན)གཅིག་མ།  །ཞིང་དབྱུག་འཕྱར་ཞིང་དགྲ་སྙིང་ཟ།  །འཇའ་སྤྲིན་གོས་གྱོན་མི་ལྤགས་འཕྱང་།  །སྔགས་སྲུང་ཆེན་མོ་ཁྱོད་ལ་བསྟོད།  །དཔལ་ལྡན་བཤན་པ་མི་བསྲུན་མ།  །གཅེར་མོ་དོན་སྙིང་ཟ་ཞིང་རྒྱུག  །དགྲ་བགེགས་མྱོས་བྱེད་རིམས་ནད་འབེབས།  །ནམ་གྲུ་ནག་མོ་ཁྱོད་ལ་བསྟོད།  །གཏུམ་ཆེན་གཟའ་བདུད་སྲིན་པོའི་གཟུགས།  །མགོ་དགུ་རྒྱལ་མཚན་སྦྲུལ་ཞགས་དང་།  །མདའ་གཞུ་འགེང་ཞིང་ཐོག་སེར་འབེབས།  །སྡེ་བརྒྱད་དམག་དཔོན་ཁྱོད་ལ་བསྟོད།  །སྒྲོལ་གིང་བཤན་པ་དམར་ནག་ནི།  །གྲི་ཐོད་འཛིན་ཞིང་རལ་གྲི་གདེངས།  །བསྟན་དགྲའི་སྙིང་འབྱིན་སྤྲུལ་ཞགས་འཕེན།  །གནོད་སྦྱིན་ཆེན་པོ་ཁྱོད་ལ་བསྟོད།  །དམ་ཅན་སྐྱེས་བུ་གིང་གི་བདག  །དམར་ནག་རྡོ་རྗེ་དགྲ་སྙིང་འཛིན།  །ཟ་འོག་བེར་གྱོན་ར་སྐྱེས་ཞོན།  །མཐུ་ཆེན་དྲེགས་པ་ཁྱོད་ལ་བསྟོད།  །འདོད་ཁམས་དབང་ཕྱུག་རེ་མ་ཏཱི།  །ལག་ན་ཁྲམ་ཤིང་ཐོད་པ་འཛིན།  །དྲེལ་རྟ་ཞོན་ནས་སྟོང་གསུམ་མྱུལ།  །ནག་མོ་སྟོང་གི་གཙོ་ལ་བསྟོད།  །སྤྲུལ་པའི་ལས་མཁན་གིང་གི་གཙོ།  །བདུད་ཞགས་དགྲ་འཆིངས་སྤུ་གྲིས་གཅོད།  །(16བ)སེང་གེ་ཞོན་ནས་སྟོང་གསུམ་ཉུལ།  །བེ་ཧར་དགྲ་ལྷ་ཁྱེད་ལ་བསྟོད།  །ཧེ་རུ་ཀ་དཔལ་སྤྱན་སྔ་རུ།  །དམ་བཅས་ཇི་བཞིན་ད་ལྟ་འདིར།  །བསྟན་པ་སྲུང་ཞིང་སྐྱོང་མཛད་པའི།  །དམ་ཅན་ཀུན་ལ་བསྟོད་པར་བགྱི།  །(ཞེས་བསྟོད་པར་བྱའོ།  །ཆོས་སྐྱོང་གཞན་འགའ་ཞིག་གི་མཆོད་གཏོར་བྱ་བར་འདོད་ན་ཡེ་ཤེས་པའི་རིགས་རྣམས་སྔོན་དང་དེའི་རྗེས་ལ་འཇིག་རྟེན་པའི་རིགས་རྣམས་དང་གཏེར་བདག་སྤྱི་གཏོར་དང་གཞི་བདག་སྤྱི་གཏོར་གྱི་བར་རིམ་པ་བཞིན་སྐབས་འདིར་བྱའོ།  །བརྒྱད་པ་བཟླས་པ་བྱ་བ་ནི།)  མགོན་པོ་འཁོར་བཅས་ཀྱི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་ལ་སོགས་པའི་མཐར་རང་རང་གི་སྲོག་སྔགས་རིགས་ཀྱི་ཁ་དོག་ཅན་གྱིས་བསྐོར་བ།  བདག་བསྐྱེད་ཀྱི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་ཀྱི་རྒྱུད་རབ་ཏུ་བསྐུལ་བས་ཅི་འདོད་བའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་(མོས་ལ་གོང་གནོན་གྱི་ཡི་དམ་གྱི་བཟླས་པ་སྔོན་དུ་འགྲོ་བས་བཟླ་བྱའི་སྔགས་ནི།)  ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུཾ་ཕཊཿ(ཅེས་གཙོ་བོའི་སྙིང་པོའོ།  །)  ཨོཾ་ཤྲཱི་མ་ཧཱ་ཀཱ་ལ་རཱུ་པ་ཏྲི་ཡཾ་ཧཱུྃ་ཛཿ(སྐུ་མགོན་ནོ།  །)  ཨོཾ་ཤྲཱི་མཧཱ་ཀཱ་ལ་རཀྵ་དུ་བེང་ནི་ཛཿ(གསུང་མགོན་ནོ།  །)  ཨོཾ་ཤྲཱི་མ་ཧཱ་ཀཱ་ལ་ཀྵེ་ཏྲ་ཧ་ན་ཧཱུྃ་ཕཊ༔  (ཐུགས་མགོན་ནོ།  །)  ཨོཾ་ཤྲཱི་མ་ཧཱ་ཀཱ་ལ་སི་ཧཾ་རཾ་ཧཱུྃ་ཕཊ༔  (ཡོན་ཏན་མགོན་པོའོ།  །)  ཨོཾ་(17ན)ཤྲཱི་མ་ཧཱ་ཀཱ་ལ་ཏྲ་ཀྴད་ཧཱུྃ་ཛཿ(ཕྲིན་ལས་མགོན་པོའོ།  །)  ཨོཾ་ཤྲཱི་མ་ཧཱ་ཀཱ་ལ་ཏྲི་ཡཾ་རུ་དྲ་ནག་པོ་ཛཿ  ཏྲི་ལིང་གིང་ཀ་ར་རཱ་ཛ་སུ་ཏྲི་ཛཿཛཿ(སྲོག་བདུད་དོ།  །)  ཨོཾ་མ་མ་ཨེ་ཀ་ཛྰ་ཊི་ཏྲག་རཀྴ་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཧྰུྃཿ(སྔགས་སྲུང་མའོ།  །)  ཨོཾ་ཁྱི་ཁ་ལེ་ནག་མོ་སོད་སྲོག་མ་ཏི་སོད༔  (སྲོག་སྒྲུབ་མའོ།  །)  ཧྲཱི་ཤག་རུ་རག་རཾན་གེ་ཙིཏྟ་ཏྲཾ་མ་མ་ཡོ་ཟ་གྲ་མ་ཧ་ཧི་ཡེ་གེ་ཤ་ལ་ཛ་ཛཿ(ཞེས་གཟའ་བདུད་དོ།  །)  ཨེ་རྨེ་རུ་ཙེ་གུ་ཎ་ཧྲཱི་ཏྲི་གྷྲཾ་བྷྱོཿ(ཞེས་གནོད་སྦྱིན་ནོ།  །)  ཨོཾ་བཛྲ་སྰ་དྷུ་ས་མ་ཡ་ཛཿཛཿ(ཞེས་དམ་ཅན་དང་།)  ཨོཾ་མ་མ་ཏྲག་རཀྨོ་རཀྴ་རུ་ཏི་ཧཱུྃ་ཧཱུྃ་ཕཊ་སྭཱ་ཧཱ།  (རེ་ཏིའོ།  །)  ཨོཾ་རཱ་ཛ་ཨ་ཧོ་བྷྲཱུྃ་རྦད༔  ཙིཏྟ་ཐིབས་ཐིབས་ཛཿ  མ་དུ་ཏྲི་མ་ཧོ་ཛཿསརྦ་རཱ་ཛ་ས་མ་ཡ་ཐིབས་ཐིབས་ཛ༔  (པེ་ཧར་གྱིའོ།  །དེ་ལྟར་གཙོ་འཁོར་རྣམས་ཀྱི་སྔགས་རྣམས་སྐབས་དང་སྦྱར་ནས་ཅི་ཙམ་མ་ནུས་བ་བཟླ་ཞིང་།  གཙོ་སྔགས་ནི་རྒྱུད་ལས།  བྱེ་བ་ཐེམས་ན་ལས་ཀུན་འགྲུབ།  །ཅེས་གསུངས་པ་དང་།  ལས་སྦྱོར་གྱི་སྔགས་ནི་མན་ངག་གི་གནད་ཤེས་པས་གཞན་དུ་འབྱུང་བ་བཞིན་བཟླའོ།  །བཟླས་པ་རྫོགས་པའི་མཐར།)  ཨོཾ་ཤྲཱི་བཛྲ་དྷརྨ་པཱ་ལ་ས་པརི་ཝཱ་ར་ཨརྒྷཾ་(ནས་)ཤཔྡའི་(བར་གྱིས་མཆོད་ཅིང་འདོད་པའི་དོན་ལ་གསོལ་བ་གདབ།  དགུ་པ་ཚོགས་ཀྱི་མཆོད་པ་ནི།  བདག་བསྐྱེད་གང་ལ་བརྟེན་པ་དེའི་གཞུང་བཞིན་སྦྱར་བར་བྱའོ།  །གཉིས་པ་ཁྱད་པར་སྐབས་ཀྱི་ཕྲིན་ལས་སྒྲུབ་(17བ)པ་ལ་སྐོང་བཤགས་དང་།  དྲག་ལས་བསྒྲུབ་པ་གཉིས་ལས།  དང་པོ་ལ་གསུམ་ལས།  སྐོང་བ་ནི།  སྐོང་རྫས་རྣམས་)ཨ་མྲྀ་ཏ(ས་བསང་།)  སྭ་བྷཱ་ཝ(ས་སྦྱང་།)  སྟོང་པའི་ངང་ལས་བྷྲྰུྃ་ལས་གནས་ཁང་དུར་ཁྲོད་དྲག་པོའི་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱི་རྣམ་པ་མཁོ་དགུ་ཚང་བ།  བཟང་དགུས་འབྱོར་བ།  མཛེས་དགུས་བརྒྱན་པ།  ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་གང་བར་གྱུར།  ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ།  བཛྲ་སྥ་ར་ཎ་ཁཾ།  (ཞེས་པས་བྱིན་གྱིས་བརླབ་ཅིང་ཟད་མི་ཤེས་པར་སྤེལ་ལ།  སྙན་པའི་རོལ་མོ་དབྱངས་ཀྱི་འགྱུར་བ་དང་བཅས་པས།)  ཧཱུྃ།  བདག་ནི་རིག་འཛིན་སྒྲུབ་པ་པོ།  །(གཏེར་གཞུང་ལས་བྱང་བཞིན་ལ་ཚིག་དངོས་བཅོས་མེད་ལས་ཅུང་ཟད་བསྡུས་པའོ།  །)  བདག་ནི་རྣལ་འབྱོར་དམ་ཚིག་ཅན།  །དམ་ལ་གནས་ཤིང་ལྷ་ལ་ཕྲེང་།  །ཁྱོད་ནི་སྲུང་མ་ཐུགས་དམ་ཅན།  །ཁྱོད་ནི་མཐུ་རྩལ་དྲག་ཤུལ་ཅན།  །དགོངས་ཤིག་ལེགས་ལྡན་ནག་པོའི་ཚོགས།  །སྔོན་ཚེ་(18ན)དཔལ་ཆེན་སྤྱན་སྔ་རུ།  །བསྟན་པ་བསྲུང་བར་ཞལ་བཞེས་པ།  །ཁྱོད་ཀྱི་དམ་བཅའ་གཉན་པོ་དེ།  །ད་ལྟ་རྣལ་འབྱོར་བདག་བསྐུལ་ན།  །བསྒྲུབ་ཅིང་བསྐུལ་ཕྱིར་གཤེགས་སུ་གསོལ།  །མ་ཧཱ་ཀཱ་ལ་གནས་འདིར་བྱོན།  །ལྷ་ཆེན་དཔལ་འབར་གནས་འདིར།  །ཆོས་སྐྱོང་ཆེན་པོ་གནས།  །ལེགས་ལྡན་ནག་པོ།  །རིག་འཛིན་སྲུང་མ།  །མ་ནིང་ནག་པོ།  །སྲོག་བདུད་ཆེན་པོ།  །བདུད་རྒྱལ་ཐོད་ཕྲེང་།  །སྲིང་གཅིག་ལྷ་མོ།  །འདོད་ཁམས་གཙོ་མོ།  །འཁོར་ཚོགས་རྒྱ་མཚོ་གནས་འདིར་བྱོན།  །ཀྱཻ།  གསོན་དང་མ་ཧཱ་ཀཱ་ལའི་ཚོགས།  །ཉོན་དང་ཆོས་སྐྱོང་ནག་པོ་ཆེ།  །ཉོན་དང་མགོན་པོ་ཐོད་ཕྲེང་ཅན།  །རྒྱལ་བའི་བཀའ་ལ་མི་བདེན་མེད།  །ཟབ་མོའི་དོན་ལ་མི་སེམས་མེད།  །མནའ་དང་ཁྲིམས་ལ་མི་བརྟེན་མེད།  །ཟས་དང་སྐོམ་ལ་མི་ཆགས་མེད།  །ནག་པོ་འཁོར་བཅས་དགོངས་སུ་གསོལ།  །དོ་ནུབ་ཁྱོད་ཀྱི་ཐུགས་དམ་བསྐང་།  །དོ་ནུབ་ཉམས་ཆག་མ་ལུས་བསྐང་།  །དོ་ནུབ་ཞིག་རལ་མ་ལུས་གསོ།  །དོ་ནུབ་གནོང་འགྱོད་མ་ལུས་བཤགས།  །དོ་ནུབ་ལྷ་ལ་སེམས་(18བ)འཁོན་སྦྱོང་།  །དོ་ནུབ་མཉེས་པའི་མཆོད་པ་འབུལ།  །ཁྱེད་ཀྱི་ཐུགས་དམ་བསྐང་བ་ནི།  །བཤོས་ནག་རྒྱན་ལྡན་གཏོར་མས་བསྐང་།  །རཀྟ་དམར་གྱི་ཨརྒྷས་བསྐང་།  །བདུད་རྩི་སྨན་གྱི་མཆོད་པས་བསྐང་།  །མཚན་ལྡན་ཤེལ་སྒོང་འབྲས་བུས་བསྐང་།  །སྣང་གསལ་མདངས་ལྡན་མར་མེས་བསྐང་།  །ཞལ་ཟས་ཚོགས་མཆོད་མང་པོས་བསྐང་།  །ལུག་ནག་སྤྱི་དཀར་འདི་ཡིས་བསྐང་།  །ཁྱི་ནག་གསེར་མིག་འདི་ཡིས་བསྐང་།  །རྟེན་རྫས་འཕྱར་དར་ནག་པོས་བསྐང་།  །མདའ་ནག་རྒོད་སྒྲོ་སྐུ་ཡི་རྟེན།  །རཀྟ་དམར་པོ་གསུང་གི་རྟེན།  །ཙིཏྟ་སྙིང་ཆེན་ཐུགས་དམ།  །འབོད་པའི་དམ་རྫས་ཡིན་པའི་ཕྱིར།  །གཡབ་དར་ནག་པོས།  །དམ་ཚིག་གཉན་པོ་བསྲེ་བའི་ཕྱིར།  །བདུད་རྩི་སྨན་གྱིས།  །དགྱེས་པའི་དམ་རྫས་ཡིན་པའི་ཕྱིར།  །ཁྱི་ནག་སྙིང་གིས།  །མཱྃ་ས་ཟས་སུ་ཟ་བའི་ཕྱིར།  །ཙིཏྟ་སྙིང་གིས།  །མྱོས་བྱེད་སྐོམ་དུ་འཐུང་བའི་ཕྱིར།  །ཛ་གད་(19ན)ཕུད་ཀྱིས།  །ཤངས་ཀྱི་དབང་པོ་ཚིམ་པའི་ཕྱིར།  །གསུར་ཆེན་དུད་པས།  །ལྗགས་ཀྱི་དབང་པོ་ཚིམ་པའི་ཕྱིར།  །དམར་ནག་བཤོས་བུས།  །སྤྱན་གྱི་དབང་པོ་ཚིམ་པའི་ཕྱིར།  །སྣང་གསལ་མར་མེས།  །སྙན་གྱི་དབང་པོ་ཚིམ་པའི་ཕྱིར།  །རོལ་མོ་སྒྲ་ཡིས།  །རྟག་ཏུ་མི་འབྲལ་འགྲོགས་པའི་ཕྱིར།  །གཏའ་གཏོར་ཆེན་པོས།  །རྒྱུན་དུ་ཕྲིན་ལས་བཅོལ་བའི་ཕྱིར།  །རྒྱུན་གཏོར་ནར་མས།  །མཐུན་པའི་དམ་རྫས་ཡིན་པའི་ཕྱིར།  །ལུག་ནག་སྤྱི་དཀར།  །སྒྲུབ་པའི་དམ་རྫས་ཡིན་པའི་ཕྱིར།  །གྲི་རྒོད་སྙིང་གིས།  །གཞན་ཡང་དཔལ་གྱི་གཏོར་མ་ལ།  །ཡེ་ཤེས་ལྔ་ཡི་རྒྱན་གྱིས་བརྒྱན།  །རྣལ་འབྱོར་ཡོངས་ཀྱི་གླུད་དུ་འབུལ།  །གཉིས་མེད་དོན་གྱི་ཞངས་པ་སྩོལ།  །མདའ་ནག་སྟོང་དམར་བཅུ་གསུམ་ལ།  །རྡོ་རྗེ་བོ་ཅོན་གྲི་གུག་རིས།  །ཕྱག་མཚན་མང་པོས་བརྒྱན་བྱས་ནས།  །ལེགས་ལྡན་ནག་པོའི་སྐུ་གསུང་ཐུགས།  །རྣལ་འབྱོར་ལུས་ངག་ཡིད་ཀྱི་གླུད།  །ཐབས་ཀྱི་རང་བཞིན་མདའ་ནག་དང་།  །ཤེས་རབ་རང་བཞིན་རྒྱལ་མཚན་གཉིས།  །གཉིས་མེད་དོན་(19བ)རྟོགས་ཆོས་ཀྱི་སྐུ།  །གཉིས་སུ་མེད་པར་ཐུགས་དམ་བསྐང་།  །ཡང་གཅིག་མགོན་པོའི་ཐུགས་དམ།  །ཆོས་སྐྱོང་ཆེན་པོའི།  །མ་ནིང་ནག་པོའི།  །མགོན་པོ་སྡེ་ལྔའི་མ་གཅིག་ལྷ་མོའི༴   །སྲོག་བདུད་ཆེན་པོའི།  །སྒྲོལ་གིང་ཆེན་པོའི།  །དམ་ཅན་ཆེན་པོའི།  །རེ་ཏཱི་ཆེན་པོའི།  །པེ་ཧར་དགྲ་ལྷའི།  །བདུད་ཁ་དགྲ་ལ་བསྒྱུར་བའི་ཕྱིར།  །དཔལ་ལྡན་ནག་པོའི་ཐུགས་དམ་བསྐང་།  །དགྲ་བགེགས་གནས་ནས་འགུགས་པའི་ཕྱིར།  །ཕྱག་བརྙན་ཆེན་པོའི།  །དགྲ་བོ་ཆམ་ལ་དབབ་པའི་ཕྱིར།  །བདུད་ཀྱི་དམག་ཚོགས།  །དགྲ་བོའི་སྲོག་རྩ་གཅོད་པའི་ཕྱིར།  །མོན་པ་ཚོགས་ཀྱི།  །སྔོན་གྱི་ལམ་སྣ་འདྲེན་པའི་ཕྱིར།  །མོན་པའི་བརྒྱད་ཀྱི།  །གཡས་ཀྱི་རུ་སྣ་དྲང་བའི་ཕྱིར།  །གཤིན་རྗེ་བརྒྱད་ཀྱི།  །གཡོན་གྱི་རུ་སྣ་དྲང་བའི་ཕྱིར།  །གནོད་སྦྱིན་བརྒྱད་ཀྱི།  །སླད་ཀྱི་རྗེས་ཤུལ་འབྲང་བའི་ཕྱིར།  །ནད་གཏོང་མ་མོའི།  །དམག་གི་རུ་མཚོན་འཕྱར་བའི་ཕྱིར།  །ལྷ་དམག་འབུམ་གྱི།  །ཕྱོགས་སྐྱོང་བཅུ་ཡི་ཐུགས་དམ༴   །(རྒྱལ་ཆེན་བཞི་ཡི༴   །ལྷ་ཆེན་བརྒྱད་ཀྱི༴   །གཟའ་ཆེན་བརྒྱད་ཀྱི༴   །)   (20ན)རྒྱུ་སྐར་ཉེར་བརྒྱད༴   །འཇིགས་བྱེད་དགུ་ཡི༴   །ཐུགས་དམ་གཉན་པོ་བསྐང་བ་ཡིས།  །ལྷ་དང་མི་འབྲལ་གྲིབ་ལྟར་འགྲོགས།  །རྣལ་འབྱོར་བདག་དང་བདག་གི་འཁོར།  །ཐུབ་པར་སྲུངས་ཤིག་ཐུགས་དམ་ཅན།  །ཐུགས་དམ་སྐོང་ལ་གཡར་དམ་སྩོལ།  །(ཞེས་དང་།  གཞན་ཡང་།)  ཧཱུྃ།  རྣམ་དག་དབྱིངས་ལས་མ་གཡོས་ཀྱང་།  །ཐུགས་རྗེས་ཁྲོ་བོའི་སྐུར་སྟོན་ཅིང་།  །བདུད་དཔུང་འཇོམས་མཛད་ཧེ་རུ་ཀ  །མཐུ་ཆེན་དཔའ་བོའི་ཐུགས་དམ་བསྐང་།  །མིག་སྨན་མདངས་ཅན་རྟ་མཆོག་སོགས།  །ཕྱི་ཡི་རྟེན་གྱིས་ཐུགས་དམ༴   །འདོད་ཡོན་བྱ་རོག་རྒྱལ་མཚན་བཅས།  །ནང་གི་རྟེན་གྱིས།  །གྲི་སྙིང་སྲོག་གི་འཁོར་ལོ་སོགས།  །གསང་བའི་རྟེན་གྱིས༴   །འབོད་པའི་དམ་རྫས་ཡིན་པའི་ཕྱིར།  །གཡབ་དར་ནག་པོས།  །གཤེགས་པའི་དམ་རྫས་ཡིན་པའི་ཕྱིར།  །དབྱངས་རྔ་རོལ་མོས།  །གནས་ཀྱི་དམ་རྫས་ཡིན་པའི་ཕྱིར།  །ཐོད་མཁར་འབར་བས།  །བཞུགས་པའི་དམ་རྫས་ཡིན་པའི་ཕྱིར།  །པད་ཉི་རོ་ཡིས༴   །རྒྱན་གྱི་དམ་རྫས་ཡིན་པའི་ཕྱིར།  །དུར་ཁྲོད་ཆས་ཀྱིས།  །དགྱེས་པའི་དམ་རྫས་ཡིན་པའི་ཕྱིར།  །བདུད་(20བ)རྩི་སྨན་གྱིས༴   །ངོམས་པའི་དམ་རྫས་ཡིན་པའི་ཕྱིར།  །དམར་ཆེན་རཀྟས༴   །ཚིམ་པའི་དམ་རྫས་ཡིན་པའི་ཕྱིར།  །དཔལ་གྱི་གཏོར་མས༴   །མཐུན་པའི་དམ་རྫས་ཡིན་པའི་ཕྱིར།  །སྣ་ཚོགས་ནོར་གྱིས༴   །བརྟེན་པའི་དམ་རྫས་ཡིན་པའི་ཕྱིར།  །གཟུགས་རྟེན་བླ་རྡོས༴   །བཟའ་བའི་དམ་རྫས་ཡིན་པའི་ཕྱིར།  །ཤ་ཆེན་སྣ་ལྔས༴   །བཏུང་བའི་དམ་རྫས་ཡིན་པའི་ཕྱིར།  །བདུད་རྩི་སྣ་ལྔས༴   །མཆོད་པའི་དམ་རྫས་ཡིན་པའི་ཕྱིར།  །སྲིད་ཞིའི་འབྱོར་པས༴   །སྐུ་ཡི་ཐུགས་དམ་བསྐང་བའི་ཕྱིར།  །ཕྱག་རྒྱ་གསལ་རྫོགས༴   །གསུང་གི་ཐུགས་དམ་བསྐང་བའི་ཕྱིར།  །རླུང་སྔགས་བཟླས་པས༴   །ཐུགས་ཀྱི་ཐུགས་དམ་བསྐང་བའི་ཕྱིར།  །གསལ་བརྟན་ཏིང་འཛིན༴   །ཡོན་ཏན་ཐུགས་དམ་བསྐང་བའི་ཕྱིར།  །འདོད་ཡོན་མཁོ་རྒུས༴   །ཕྲིན་ལས་ཐུགས་དམ་བསྐང་བའི་ཕྱིར།  །ལས་སྦྱོར་འབད་བས༴   །བསྐང་ངོ་གསོལ་ལོ་ཐུགས་དམ་བསྐང་།  །དཔལ་འབར་མ་ཧཱ་ཀཱ་ལ་དང་།  །སྤྲུལ་པ་རྣམ་ལྔ་མཐུ་ཆེན་བརྒྱད།  །འཁོར་དང་བཅས་པས་ཐུགས་དམ་བསྐང་།  །ཐུགས་དམ་གཉན་སྐོང་དངོས་གྲུབ་སྩོལ།  །(ཞེས་བསྐང་ཞིང་གོང་དུ་མཆོད་གཏོར་ཕུལ་བའི་ཆོས་སྐྱོང་གཞན་གྱི་སྐོང་གསོ་བྱེད་དགོས་ན་ཡང་སྔར་གྱི་རིམ་པ་(21ན)བཞིན་སྐབས་འདིར་སྦྲེལ་ལོ།  །གཉིས་པ་བཤགས་པ་བྱ་བ་ནི།)  ཧོཿརང་བཞིན་ཆོས་ཀྱི་དབྱིངས་ལས་མ་གཡོས་ཀྱང་།   །ཐུགས་རྗེའི་དབང་གིས་འབར་བའི་སྐུར་བཞེངས་པ།  །རྒྱལ་བའི་བསྟན་སྲུང་དམ་ཅན་རྒྱ་མཚོའི་ཚོགས།  །འཁོར་བཅས་བདག་ལ་གསན་ཅིང་དགོངས་སུ་གསོལ།  །བདག་ཅག་བླུན་རྨོངས་མ་རིག་འཁྲུལ་པའི་ཡིད།  །ལས་དང་ཉོན་མོངས་བག་ཆགས་ཀྱིས་དཀྲུགས་པས།  །ལྷ་ཁྱོད་བསྙེན་ཅིང་བསྒྲུབ་པར་དམ་བཅས་ཀྱང་།  །སྐུ་ཡི་ཕྱག་རྒྱ་མ་གསལ་དོན་མ་རྟོགས།  །སྔགས་ཀྱི་བཟླས་བརྗོད་མ་དག་ལྷག་ཆད་འཁྲུགས།  །ཡིད་ཀྱི་ཏིང་འཛིན་བྱིང་རྒོད་རྟོག་པས་བསླད།  །དམ་རྫས་མ་ཚང་རྟེན་རྫས་མ་ཚོགས་དང་།  །རྒྱུ་ཆུང་ཕུད་ཉམས་འབག་བཙོག་དྲི་མས་གོས།  །དུས་ཀྱི་མཆོད་གཏོར་འགྱངས་ཤིང་ཆག་པ་དང་།  །བསྙེན་སྒྲུབ་གཡེལ་ཞིང་ལས་སྦྱོར་ལོག་པ་སོགས།  །རྩ་བ་ཡན་ལག་དམ་ཚིག་ཉམས་པ་ཀུན།  །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས།  །མཐོལ་བཤགས་བཟོད་པ་དང་དུ་བཞེས་ནས་ཀྱང་།  །ཉམས་ཆག་སྒྲིབ་པའི་ཚོགས་རྣམས་ཀུན་བྱང་སྟེ།  །འགྱུར་མེད་ཚངས་པ་མཆོག་གི་(21བ)དངོས་གྲུབ་སྩོལ།  །(ཞེས་དང་འཁོན་གཅུགས་སྦྱོང་བའི་དམིགས་པ་དང་སྦྱར་ཏེ་ཡི་གེ་བརྒྱ་པ་ལན་གསུམ་སོགས་བཟླས་པས་བཤགས་པར་བྱའོ།  །གསུམ་པ་ཕྲིན་ལས་གསོལ་བ་ནི།)  ཧཱུྃ།  རྒྱལ་བའི་བསྟན་སྲུང་རྡོ་རྗེ་ནག་པོ་ཆེ།  །ལྕམ་དྲལ་བཀའ་སྡོད་འཁོར་དང་བཅས་རྣམས་ལ།  །ཕྲིན་ལས་རབ་འབྱམས་གསོལ་དང་བསྐུལ་བའི་ཕྱིར།  །མཆོད་སྤྲིན་རྒྱ་མཚོ་བསྟབས་པས་དགྱེས་གྱུར་ཏེ།  །ཀུན་བཟང་ཧེ་རུ་ཀ་དཔལ་དཔའ་བོ་ཆེ།  །དཀྱིལ་འཁོར་རྒྱ་མཚོའི་ཁྱབ་བདག་པདྨ་འབྱུང་།  །མཆོག་གི་ས་བརྙེས་རྡོ་རྗེའི་རིག་འཛིན་ཚོགས།  །རིམ་པར་བྱོན་པའི་རྩ་བརྒྱུད་བླ་མ་ཡིས།  །རྒྱུད་གསུམ་དམ་ཅན་དྲེགས་པའི་དཔུང་ཚོགས་རྣམས།  །ཕྱི་ནང་གསང་བའི་འདོད་ཡོན་རྒྱ་མཚོས་མཆོད།  །བསྙེན་ཅིང་བསྒྲུབས་ནས་དབང་བསྐུར་དམ་བཞག་པའི།  །ཞལ་བཞེས་ཐུགས་དམ་གཡེལ་བར་མ་མཛད་པར།  །སྲིད་ཞིའི་ཕུན་སུམ་ཚོགས་ཀུན་འབྱུང་བའི་གཞི།  །རྒྱལ་བའི་བསྟན་པ་ཕྱོགས་བཅུར་རྒྱས་པ་དང་།  །དེ་འཛིན་ལུང་རྟོགས་བཤད་སྒྲུབ་ཀྱིས་འཚོ་བའི།  །བསྟན་འཛིན་ཡར་ངོའི་ཟླ་ལྟར་འཕེལ་བར་མཛོད།  །མཁའ་མཉམ་འགྲོ་བའི་ཉེར་འཚེ་ཀུན་ཞི་ཞིང་།  །དགེ་བཅུའི་འབྱོར་པ་རྒྱ་མཚོས་(22ན)འཚོ་བ་དང་།  །འཇིག་རྟེན་ཁམས་ཀྱི་སྣོད་བཅུད་ལེགས་ཚོགས་ཀུན།  །རབ་འཕེལ་རྫོགས་ལྡན་དཔལ་གྱིས་མཐོ་བར་མཛོད།  །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི།  །ནད་གདོན་བགེགས་དང་བར་དུ་གཅོད་པ་སོགས།  །ཕྱི་ནང་མི་མཐུན་རྒུད་པ་ཀུན་ཞི་ཞིང་།  །བདུད་སྡེའི་གཡུལ་ལས་རྣམ་པར་རྒྱལ་བར་མཛོད།  །ཚེ་དང་བསོད་ནམས་དཔལ་འབྱོར་ལོངས་སྤྱོད་སྟོབས།  །ཐོས་བསམ་སྒོམ་པ་འཕེལ་ཞིང་རྒྱས་པ་དང་།  །ས་གསུམ་འགྲོ་བ་རྣམས་དང་དེ་དག་གིས།  །ཕུན་ཚོགས་དཔལ་ཀུན་དབང་དུ་བསྡུ་བར་མཛོད།  །མི་བསྲུན་ལོག་བར་སེམས་པའི་དགྲ་དང་བགེགས།  །ནག་ཕྱོགས་བདུད་སྡེའི་དཔུང་དང་བཅས་པ་རྣམས།  །ཕྲིན་ལས་དྲག་པོ་ཤིན་ཏུ་མི་བཟད་པས།  །ཡེ་ཤེས་དབྱིངས་སུ་སྒྲོལ་བའི་ཕྲིན་ལས་མཛོད།  །སེམས་ཉིད་གདོད་མའི་བསྟན་སྲུང་རོ་དོགས་དྲིས།  །བསླད་མིན་མཐའ་བྲལ་བདེ་ཆེན་མངོན་གྱུར་ནས།  །ཕྲིན་ལས་རྣམ་བཞིས་འགྲོ་བའི་རེ་སྐོང་བའི།  །དངོས་གྲུབ་རྒྱ་མཚོའི་དཔལ་གྱིས་འབྱོར་བར་མཛོད།  །(ཅེས་ལས་ཀྱི་གཉེར་གཏད་ཅིང་མངོན་པར་འདོད་པའི་ཕྲིན་ལས་གསོལ་ལོ།  །(22བ)གཉིས་པ་དྲག་པོའི་ཕྲིན་ལས་སྒྲུབ་པ་ལ་བཞི་ལས།  དང་པོ་གཤོམ་ནི།  ཐུན་གྱི་གཏོར་མ་གྲུ་གསུམ་གཙོ་འཁོར་གྱི་གྲངས་དང་མཉམ་པ་ཤ་ཁྲག་གིས་བརྒྱན་པ་མཉྫིའི་སྟེང་ལ་བཀོད།  འབྱོར་ན་ཁྲག་སྐྱེམས་སོགས་དམ་རྫས་དང་འབྲེལ་བའི་ཁྱད་པར་གྱི་མཆོད་པའང་བཤམས་པ་འབྲུ་གསུམ་གྱི་བྱིན་གྱིས་བརླབས་ནས།  གཉིས་པ་དྲག་བཟླས་ནི།  རང་ཉིད་ཡི་དམ་གྱི་སྙེམས་པ་མཆོག་ཏུ་བརྟན་པོས་གོང་གནོན་གྱི་བཟླས་པ་ཅུང་ཟད་བྱས་ནས།  མདུན་བསྐྱེད་སྔར་ཡོད་ཀྱང་བསྐྱར་དུ་གསལ་བཏབ་ལ།)  རང་གི་ཐུགས་ཀའི་ཧཱུྃ་ལས་འོད་ཟེར་མེའི་ཕུང་པོ་ལྟ་བུ་འཕྲོས་མགོན་པོའི་ཐུགས་རྒྱུད་བསྐུལ་བས་དེ་ཉིད་ཁྲོས་འཁྲུགས་རྔམས་པར་བཞེངས་ནས་འཁོར་རྣམས་བསྐུལ།  དེ་རྣམས་ཀྱིས་ཀྱང་སྤྲུལ་པའི་ཕོ་ཉ་མཚོན་ཆ་ཅན་དཔག་མེད་བུ་ཡུག་འཚུབས་པ་ལྟར་སྤྲོས་པས་དགྲ་བགེགས་ཐམས་ཅད་བསད་བཅད་ཚར་གཅོད་པའི་ལས་མཛད་པར་(བསམས་ལ།  མགོན་པོའི་སྲོག་སྔགས་ཀྱི་མཐར།)  ཏྲི་ཡཾ་རུ་དྲ་ཧཱུྃ་བྷྱོཿ  མུན་ཤཾ་བྷྱོཿ  མུན་ནག་ཤི་བྷྱོ༔  རུ་དྲ་ནག་པོ་དགྲ་བོའི་སྙིང་ལ་སུ་ཏྲི་རྦད༔  སུ་ནྲྀ་མཱ་ར་ཡ་རྦད༔  (ཅེས་གཙོ་བོའི་དྲག་སྔགས་དང་།)  ཨོྃ་མ་ཧཱ་ཀཱ་ལ་ཏྲི་ཡཾ་རུ་དྲ་ནག་པོ་ཛཿ  ཏྲི་ལིང་གིང་ཀ་ར༔  རཱ་ཛ་སུ་ཏྲི་ཛཿཛཿ(ཞེས་ལས་མགོན་གྱི་སྔགས་ཏེ་དམིགས་པ་ཤུགས་དྲག་བོས་ཅི་ནུས་སུ་བཟླ་ཞིང་།  ལས་གལ་ཆེན།  འདིའི་རྦད་བསད་ཀྱི་སྔགས་རྣམས་དང་འཁོར་(23ན)གཞན་རྣམས་ཀྱི་དྲག་སྔགས་ཀྱང་ཅི་ནུས་བཟླས་ནས།  གསུམ་པ་དམིགས་བྱ་དགུག་བསྟིམ་ནི།  ཐུན་གཏོར་ལ་རཀྟ་བྲན་ཏེ།)  སླར་ཡང་རང་གི་ཐུགས་ཀ་ནས་ཚ་ཞིང་རྩུབ་པའི་འོད་ཟེར་འཕྲོས་པས་མགོན་པོ་འཁོར་བཅས་ཀྱི་རྒྱུད་བསྐུལ་སྤྲུལ་པའི་ཕོ་ཉ་རྣམས་ཀྱིས་དམིགས་བྱ་རང་དབང་མེད་པར་བཀུག་ནས་གཏོར་མ་ལ་བསྟིམ་པར་(བསམ་ཞིང་།)  ན་མོ།  རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་།  སངས་རྒྱས་ཀྱི་བཀའ༴   ཆོས་ཀྱི༴   དགེ་འདུན་གྱི༴   གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་ཏིང་ངེ་འཛིན་གྱི་བདེན་པ་དང་།  ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་།  ཁྱད་པར་དུ་ཡང་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་ལྕམ་དྲལ་བྲན་གཡོག་འཁོར་དང་བཅས་པ་རྣམས་ཀྱི་བདེན་པ་དང་།  བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ།  ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ།  ཕྱི་དགྲ་ཡིད་ལ་སེམས་པ།  ད་དགྲ་ཐད་དུ་འཛུགས་(23ན)པའི་གཟུགས་ཅན་སྡང་བའི་དགྲ་དང་།  གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག  །(སྙིང་པོ་རྣམས་ཀྱི་མཐར།)  ཨོཾ་བཛྲ་ཨཱ་ཀརྵ་ཡ་ཛ༔  ཛཿཧཱུྃ་བྃ་ཧོཿ(ཞེས་ལན་གསུམ་ལ་སོགས་པས་དགུག་བསྟིམ་བྱས་ལ།  སླར་ཡང་བདུད་རྩིས་བྲན་ཏེ།)  རྃ་ཡྃ་ཁྃ་(གིས་བསང་སྦྱང་།)  སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤའི་རི་བོ།  ཁྲག་གི་རྒྱ་མཚོ།  རུས་པའི་ཕུང་པོ།  ཀླད་ཞག་གི་ལྦུ་ཕྲེང་འཁྲིགས་པ་དམ་ཚིག་ཏུ་འོས་པའི་འདོད་ཡོན་གྱི་རྣམ་པ་མ་ཚང་བ་མེད་པ་ནམ་མཁའ་དང་མཉམ་པར་གང་བ་ངོ་བོ་ཟག་པ་མེད་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་(པར་བསམ་ལ།)  ཨོཾ་ཨཱཿཧཱུྃ་ཧོཿ(ཞེས་པས་བྱིན་གྱིས་བརླབས་ནས་མགོན་པོ་འཁོར་བཅས་ཀྱིས་རོལ་པར་བསམ་ལ།  མགོན་པོའི་སྔགས་མཐར།)  ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིཿ(ཞེས་བཏགས་པ་བརྒྱའམ་ཉེར་གཅིག་སོགས་ཀྱིས་ཕུལ།  དེ་བཞིན་དུ་འཁོར་སྔགས་ལ་གཏོར་སྔགས་བཏགས་པ་ཉེར་གཅིག་དང་བདུན་ལ་སོགས་པ་ཅི་རིགས་པར་ཕུལ་བའི་མཐར་འདོད་དོན་ཕྲིན་ལས་སུ་གསོལ་ལོ།  །(24ན)བཞི་བ་ཐུགས་དམ་བསྐུལ་བ་ནི།  སྨན་རཀ་ཕུད་ཀྱིས་མཆོད་ཅིང་གསུར་ཆེན་གྱི་དུད་པ་དང་དར་ནག་གི་གཡབ་མོར་བཅས་བས་འདི་ལྟར་བསྐུལ་ལོ།  །)  ཧཱུྃ་བྷྱོ།  སེམས་ཉིད་ཀློང་གསལ་འབར་བའི་དུར་ཁྲོད་ནས།  །ཐོད་མཁར་སུམ་བརྩེགས་འབར་བའི་གཞལ་ཡས་ནས།  །བདུད་པོ་བདུད་མོས་གཏམས་པའི་དུར་ཁྲོད་ནས།  །བཤན་པ་ཕོ་མོ་ཚོགས་པའི་གྲོང་ཁྱེར་ནས།  །མེ་རླུང་འཚུབས་མར་འཁྱིལ་བའི་དུར་ཁྲོད་ནས།  །རྟོག་མེད་ངང་ལས་ལྷ་ཆེན་སྐུར་སྟོན་པ།  །ལྷ་ཆེན་མགོན་པོ་དཔལ་འབར་གཤེགས་སུ་གསོལ།  །ལེགས་ལྡན་ནག་པོ་གཤེགས།  བྷ་ག་ནག་པོ་གཤེགས་སུ༴   །ཚོགས་བདག་ཆེན་པོ༴   །ཛམ་ལ་ནག་པོ༴   །ནག་པོ་ཐོད་ཕྲེང་༴   །ཆོས་སྐྱོང་ཆེན་པོ༴   །དགྲ་བོའི་གཤེད་མ༴   །བགེགས་ཀྱི་གཉེན་པོ༴   །བདག་གི་གྲོགས་པོ༴   །དམ་ཅན་ཆེན་པོ༴   །ཆོས་སྐྱོང་འཁོར་བཅས་བསྐྱོད་པའི་ཚེ།  །ནག་པོ་གཟི་མདངས་ཡ་ལ་ལ།  །སྲིན་མོ་མ་ཚོགས་ཐིབས་སེ་ཐིབ།  །ལིང་པ་མདའ་འཕེན་བྲེངས་སེ་བྲེང་།  །བྱ་རོག་ཤ་ཐོགས་ལིངས་སེ་ལིང་།  །གཡབ་དར་ནག་པོ་ལྷབས་སེ་ལྷབ།  །ཉི་མ་ཟླ་བ་ཏ་ལ་ལ།  །མེ་སྟག་འཚུབས་མ་འཁྱིལ་ལི་ལི།  །དོམ་ནག་ཁྱི་(24བ)ནག་ང་ར་ར།  །ལྕགས་སྤྱང་ཅེ་སྤྱང་འདུ་རུ་རུ།  །དུག་སྤྲུལ་ནག་པོ་ཁྱུགས་སེ་ཁྱུག  །རྟ་ནག་མང་པོ་ཙེ་རེ་རེ།  །དུག་མཚོ་ཁོལ་མ་ཁྱི་ལི་ལི།  །འུག་པ་རྐན་སྒྲ་ཆེམས་སེ་ཆེམ།  ཐུན་གྱི་སེར་བ་ཤར་ར།  །འགོང་པོ་ངུ་སྐད་ལྷངས་སེ་ལྷང་།  །འདྲེ་ངན་སྐད་ངན་ཙེ་རེ་རེ།  །རྒྱལ་བསེ་ན་སྨྱོས་སྒྲ་དི་རི་རི།  །ཆོས་སྐྱོང་འཁོར་བཅས་ཐིབས་སེ་ཐིབ།  །ཚུར་གཤེགས་ཚུར་བྱོན་དམ་ལ་འདུ།  །ཤ་ཁྲག་གཏོར་མ་འདི་བཞེས་ལ།  །བཅོལ་བའི་ཕྲིན་ལས་སྒྲུབ་པར་མཛོད།  །བྷྱོ།  དོ་ནུབ་ནམ་གྱི་གུང་ཐུན་ལ།  །བླ་རྐུན་ཇག་པ་ལས་ལ་ཆོ།  །ཟས་སུ་དགྲ་བོའི་ཤ་ལ་ཟོ།  །སྐོམ་དུ་དགྲ་བོའི་ཁྲག་ལ་འཐུང་།  །ལས་སུ་གནོད་བྱེད་དགྲ་བགེགས་སྒྲོལ།  །བཅོལ་བའི་ལས་རྣམས་སྒྲུབ་པར་མཛོད།  །(ཅེས་དང་།)  ཧཱུྃ།  ཀུན་བཟང་རྡོ་རྗེ་འཆང་ཆེན་དང་།  །དཔལ་ཆེན་ཁྲག་འཐུང་གསང་བའི་བདག  །སློབ་དཔོན་ཤཱནྟིང་གརྦྷ་དང་།  །སློབ་དཔོན་པདྨ་འབྱུང་གནས་ཀྱིས།  །དམ་ལ་བཏགས་ནས་བསྟན་བསྲུང་ཞིང་།  །རིག་འཛིན་སྐྱོང་བར་ཁས་བླངས་པའི།  །དམ་བཅའ་གཉན་པོ་བཅས་པ་རྣམས།  །ད་ལྟ་རྣལ་འབྱོར་བདག་བསྐུལ་ལོ།  །མཆོད་(25ན)སྦྱིན་གཏོར་མ་འདི་བཞེས་ལ།  །ཞི་རྒྱས་དབང་དྲག་མངོན་སྤྱོད་ཀྱི།  །ཕྲིན་ལས་རྣམ་བཞིའི་དངོས་གྲུབ་སྩོལ།  །ལོག་ལྟ་གནོད་བྱེད་དགྲ་བགེགས་སྒྲོལ།  །མཐུ་དང་རྫུ་འཕྲུལ་ད་ཕྱུངས་ལ།  །བསྟན་པ་འཇིག་པའི་དགྲ་བོ་འདི།  །ལོ་དང་ཟླ་བ་མ་བཞག་པར།  །ཞག་དང་ཟ་མ་ཁོ་ན་ལ།  །ཐུགས་དམ་མ་གཡེལ་སོད་ལ་ཤོག  །བདག་གིས་བཅོལ་བའི་ཕྲིན་ལས་མཛོད།  །(ཅེས་བསྐུལ་ཞིང་རྦད་བསད་ཀྱི་སྔགས་རྣམས་དྲག་ཏུ་བཟླ།  རོལ་མོ་སྣ་ཚོགས་པའི་སྒྲ་དང་བཅས་པས་དམོད་མོ་བྱ་ཞིང་གཏོར་མ་དགྲ་ཕྱོགས་སུ་འཕངས་པས་སྲུང་མ་འཁོར་བཅས་དཔའ་པའི་ངར་སྒྲ་དང་བཅས་ཏེ་བསྐྱོད་པས་དགྲ་བོའི་གནས་ལུས་ལོངས་སྤྱོད་ཐམས་ཅད་རྗེས་མེད་རྡུལ་ཕྲན་བཞིན་དུ་བརླག་པར་བསམ།  ཐུན་མོང་མ་ཡིན་པའི་དྲག་ལས་བསྒྲུབ་པར་འདོད་པས་ནི།  འབོད་རྦད་བསད་གསུམ་གྱིས་གཞི་བཟུང་ནས་མཐར་སྡུད་གསུམ་གྱིས་ལས་ལ་སྦྱོར་ཚུལ་རྣམས་གཏེར་གཞུང་གི་མན་ངག་བླ་མའི་ཕྱག་བཞེས་ཀྱིས་བརྒྱན་ཏེ་ལག་ཏུ་བླང་བར་བྱའོ།  །གསུམ་པ་རྗེས་ཀྱི་བྱ་བ་ལ་ལྔ་ལས།  དང་པོ་གཏོར་མ་བསྟབ་པ་ནི།  ཆོ་ག་ཉིན་ཞག་སྦྲེལ་མར་བྱེད་པའི་སྐབས་འབུལ་གཏོར་ཟུར་དུ་བཅས་པ་དང་།  ཉིན་ཐ་མའི་ཚེ་ན་བླ་མ་ཡི་དམ་གྱི་གཏོར་མ་མ་གཏོགས་གཏོར་མ་གཞན་རྣམས་ལ་དཔལ་འབར་བཙུགས།  སྤོས་དང་རོལ་མོ་གསེར་སྐྱེམས་ཀྱིས་མཚོན་པར་སྒྲུབ་ཁང་གི་ཡང་ཐོག་སོགས་གང་དུ་གཏོང་བའི་སར་ཁྱེར་ནས་(25བ)སྟེགས་ལ་བཀོད་རཀྟས་བྲན་ལ་དམིགས་བྱ་དགུག་གཞུག་བྱ།)  ཨོཾ་ཨཱཿཧཱུྃ་ཧོཿ(སླར་ཡང་བྱིན་གྱིས་བརླབ།  རྩ་སྔགས་ལ་གཏོར་སྔགས་བཏགས་པ་གསུམ་མམ་བདུན་གྱིས་ཕུལ་ལ།)  ཧཱུྃ།  ཆོས་ཀྱི་དབྱིངས་ནས་འབར་བའི་སྐུར་བཞེངས་པ།  །མཐུ་སྟོབས་དབང་ཕྱུག་རྡོ་རྗེ་ནག་པོ་ཆེ།  །ལྕམ་དྲལ་བཀའ་སྡོད་དམ་ཅན་རྒྱ་མཚོའི་ཚོགས།  །འཁོར་བཅས་ཐུགས་དམ་དབང་གིས་འདིར་གཤེགས་ཤིག  །ཕྱི་ནང་གསང་མཆོད་སྨན་རཀ་བ་ལིཾ་ཏ།  །དགྲ་བགེགས་ཤ་ཁྲག་ལ་སོགས་མཁོ་དགུའི་རྫས།  །སོ་སོའི་ཐུགས་ལ་ཅི་བཞེད་དེར་འཆར་བའི།  །རྨད་བྱུང་དགྱེས་པའི་མཆོད་སྤྲིན་ཆེན་པོ་འདི།  །སྔར་མཛད་ལེགས་པའི་ལས་ཀྱི་གཏང་རག་དང་།  །སླད་ནས་གཡེལ་བ་མེད་པའི་ཕྲིན་ལས་བཞིའི།  །འདོད་པའི་དངོས་གྲུབ་སྩོལ་སླད་འབུལ་ལགས་ན།  །དགྱེས་པ་ཆེན་པོས་བཞེས་ཤིང་རོལ་ནས་ཀྱང་།  །བསྟན་དང་འགྲོ་བའི་ཕན་བདེ་ཀུན་སྤེལ་ཞིང་།  །ཁྱད་པར་བདག་ཅག་དཔོན་སློབ་འཁོར་བཅས་ལ།  །ནད་མེད་པ་དང་མི་འགྱུར་ཚེ་སྲོག་དཔལ།  །གྲགས་དང་འབྱོར་པ་རྒྱ་མཚོས་མཐོ་བ་དང་།  །མ་རུངས་བདུད་དགྲའི་རྒོལ་བ་ཀུན་ཞི་ཞིང་།  །རྣམ་མང་ཕྲིན་ལས་རྒྱ་མཚོ་ཡིད་བཞིན་སྒྲུབས།  །ཕྱོགས་ལས་རྣམ་པར་རྒྱལ་བའི་རུ་(26ན)མཚོན་ཕྱོར།  །བྱང་ཆུབ་བར་དུ་བསྲུང་ཞིང་སྐྱོང་བར་མཛོད།  །(ཅེས་གཏོར་མ་ཕུལ།  རྒྱབ་ཆོག་ལས་གཞུང་གཞན་དང་འབྲེལ་ན་བརྟན་སྐྱོང་ཡོད་པ་ཤས་ཆེ་བས་དེས་ཁྱབ་ལ་གཞན་དུ་བརྟན་སྐྱོང་རྒྱས་བསྡུས་གང་རུང་རེ་བྱ་ན་ཤིན་ཏུ་ལེགས་པར་འགྱུར་རོ།  །གཉིས་པ་གཏང་རག་གི་མཆོད་པ་ནི།  སླར་ཡང་ཅུང་ཟད་མཆོད་ནས།)  ཧེ་རུ་ཀ་དཔལ་སྤྱན་སྔ་རུ།  །དམ་བཅས་ཇི་བཞིན་ད་ལྟ་འདིར།  །བསྟན་པ་བསྲུང་ཞིང་སྐྱོང་མཛད་པའི།  །དམ་ཅན་ཀུན་ལ་བསྟོད་པར་བགྱི།  །(ཞེས་བསྟོད།  གསུམ་པ་ནོངས་པ་བཤགས་པ་ནི།)  མ་རྙེད་ཡོངས་སུ་མ་ཚང་དང་།  །གང་ཡང་ནུས་པ་མ་མཆིས་པས།  །འདིར་ནི་བགྱི་བ་གང་ནོངས་པ།  །དེ་ཀུན་ཁྱོད་ཀྱིས་བཟོད་མཛད་རིགས།  །(ཞེས་དང་ཡི་གེ་བརྒྱབ་ལན་གསུམ་ལ་སོགས་པར་བཟླ།  བཞི་པ་རྗེས་བསྡུ་ནི།  ཡེ་ཤེས་པ་རྟེན་ཡོད་རྣམས།)  འདིར་ནི་གཟུགས་དང་ལྷན་ཅིག་ཏུ།  །འཁོར་བ་སྲིད་དུ་བཞུགས་ནས་ཀྱང་།  །ནད་མེད་ཚེ་དང་དབང་ཕྱུག་དང་།  །མཆོག་རྣམས་ལེགས་པར་སྩལ་དུ་གསོལ།  །ཨོཾ་སུ་པྲ་ཏིཥྠ་བཛྲ་ཡེ་སྭཱཧཱ།  (ཞེས་བརྟན་བཞུགས་བྱ།  རྟེན་མེད་པ་རྣམས།)  ཨོཾ།  ཁྱེད་ཀྱིས་སེམས་ཅན་དོན་ཀུན་མཛད།  །རྗེས་སུ་མཐུན་པའི་དངོས་གྲུབ་སྩོལ།  །སངས་རྒྱས་ཡུལ་དུ་གཤེགས་ནས་ཀྱང་།  །སླར་ཡང་འབྱོན་པར་མཛད་དུ་(26བ)གསོལ།  །བཛྲ་མུཿ(ས་ཡེ་ཤེས་པ་གཤེགས་དམ་ཚིག་བ་རང་ལ་བསྟིམ་ནས།)  སྤྱི་བོར་ཨོཾ།  མགྲིན་པར་ཨཱཿ  སྙིང་ཁར་ཧཱུྃ།  (ཞེས་པས་བདག་བསྲུང་།  འཇིག་རྟེན་པའི་འཁོར་རྣམས།)  གཙྪ་གཙྪ་སྭ་བྷཱ་ཝ་ནྰཾ།  (ཞེས་རང་གནས་སུ་གཏང་།  དགེ་བ་རྫོགས་བྱང་དུ་བསྔོ་བ་རྣམས་བྱའོ།  །ལྔ་པ་ཤིས་བརྗོད་ནི།)  རབ་འབྱམས་དཀྱིལ་འཁོར་རྒྱ་མཚོའི་འཁོར་ལོའི་མགོན།  །གསང་གསུམ་འགྱུར་མེད་བདེ་ཆེན་རྡོ་རྗེའི་སེམས།  །འགྲོ་ལ་ཕན་བདེའི་མཆོག་སྩོལ་དཔག་བསམ་ཤིང་།  །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག  །ཆོས་སྐུའི་མཁའ་ལ་གྲངས་མེད་གཟུགས་སྐུའི་སྤྲིན།  །ཞི་ཁྲོ་ཉམས་བརྒྱའི་རོལ་པར་འཆར་བ་ལས།  །དངོས་གྲུབ་འདོད་རྒུ་ཆར་དུ་བསྙིལ་མཛད་པའི།  །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག  །ཧེ་རུ་ཀ་དཔལ་སྙིང་རྗེའི་རོལ་གར་ནི།  །གཏུམ་ཆེན་བཟོད་པར་དཀའ་བའི་གཟི་བརྗིད་ཀྱིས།  །ནག་པོའི་རྩ་ལག་སྡེར་བཅས་མཐར་མཛད་པའི།  །དཔལ་འབར་མ་ཧཱ་ཀཱ་ལའི་བཀྲ་ཤིས་ཤོག  །རྒྱལ་བའི་བཀའ་སྡོད་མི་བཟད་དྲག་ཤུལ་ཅན།  །བདུད་དཔུང་ཚར་གཅོད་སྒྲུབ་མཆོག་བུ་བཞིན་སྐྱོང་།  །ཕྲིན་ལས་རྣམ་བཞིས་བསྟན་པ་སྲུང་མཛད་པའི།  །དམ་ཅན་རྒྱ་མཚོའི་ཚོགས་ཀྱི་བཀྲ་ཤིས་ཤོག  །(27ན)(ཅེས་སོགས་བཀྲ་ཤིས་ཀྱི་ཚིགས་སུ་བཅད་པ་དུ་མས་བདེ་ལེགས་སུ་ཁྱབ་པར་བྱའོ།  །ཕྱི་རོལ་ཞིང་ཀུན་ཁྱབ་པར་རྒྱུད་གསུམ་གྱི།  དྲེགས་པ་ཡོངས་ཀྱི་རྗེར་གྱུར་ནག་པོ་ཆེ།  །ནང་དུ་རྡོ་རྗེ་ལུས་ཀྱི་ཕོ་བྲང་དུ།  །རྩ་རླུང་ཐིག་ལེ་ཡོངས་ཤར་ཡེ་ཤེས་མགོན།  །གསང་བ་རང་སེམས་གསལ་སྟོང་ཟུང་འཇུག་ཏུ།  །ཡང་དག་གདོད་མའི་བསྟན་སྲུང་ཧེ་རུ་ཀ  །འཁོར་བཅས་བསྙེན་ཅིང་མཆོད་པའི་ཕྲིན་ལས་གཞུང་།  །ལེགས་པར་བསྡེབས་ལ་དབྱིངས་ནས་ཅིས་མི་དགྱེས།  །དེ་ཕྱིར་རྒྱལ་བསྟན་གཡེལ་བ་མེད་སྐྱོང་ཞིང་།  །རང་གཞན་འདོད་པའི་ཕྲིན་ལས་ཐོགས་མེད་དུ།  །ཡོངས་གྲུབ་བདུད་ལས་རྣམ་རྒྱལ་ཧེ་རུ་ཀའི།  །གོ་འཕང་མྱུར་དུ་ཐོབ་པའི་རྒྱུར་གྱུར་ཅིག  །དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་འདི་ནི་སྔན་ལུང་གསང་སྔགས་ཆོས་གླིང་ནས་རྒྱལ་སྲས་སྤྲུལ་པའི་སྐུ་བསྟན་འཛིན་ལེགས་པ་དོན་གྲུབ་ཀྱི་བཀའ་ལུང་བཞིན་གང་གི་ཞབས་རིམ་པ་ཨོ་རྒྱན་བསྟན་འཛིན་ཕུན་ཚོགས་པས་གསེར་གྱི་མེ་ཏོག་དང་བཅས་པས་བསྐུལ་བ་ལས་གཏེར་གཞུང་རྩ་བའི་སྙིང་བོ་རྣམས་སྲོག་ཏུ་བཟུང་།  ཡིག་རྙིང་བརྗོད་བདེ་བ་རྣམས་ཁྲིགས་སུ་བསྡེབས།  ཁ་སྐོང་འགའ་ཞིག་གསར་དུའང་སྤེལ་ཏེ།  སྙོམས་ལས་པ་འགྱུར་མེད་རྡོ་རྗེས་གཡོ་རུ་ཁྲ་འབྲུག་གི་གཙུག་ལག་ཁང་ཆེན་པོའི་འདབས་གསང་སྔགས་ཕོ་བྲང་དུ་ཡི་གེར་སྤེལ་བའོ།།  །།}}
 
༄༅།  །ཨོཾ་སྭསྟི།   དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ།  བླ་མ་ཧེ་རུ་ཀ་ལ་ཕྱག་འཚལ་ལོ།  །ཁྱབ་བདག་དྲིན་ཅན་བླ་མ་གསང་བའི་བདག  །དཀྱིལ་འཁོར་རྒྱ་མཚོར་ཞི་དང་ཁྲོ་བོ་ཡི།  །རྣམ་རོལ་བསམ་མི་ཁྱབ་སྟོན་ལྷག་པའི་ལྷར།  །གུས་པས་བདུད་དོ་བརྩེ་བས་མཆོག་སྦྱིན་མཛོད།  །ཆེ་མཆོག་ཧེ་རུ་ཀ་དཔལ་གདུལ་དཀའི་འགྲོ།  །འདུལ་ཕྱིར་གཏུམ་དྲག་འབར་བའི་སྐུར་བཞེངས་ལ།  །འཆོལ་བའི་ཁྲོ་རྒྱལ་མ་ནིང་ནག་པོ་ཆེ།  །འཁོར་བཅས་མཆོད་པའི་ཕྲིན་ལས་འདིར་གསལ་བྱ།  །{{TibChung|དེ་ལ་དང་ {{TibChung|[2a]}} པོར་དབང་ཐོབ་ཅིང་སྤྱི་དང་བྱེ་བྲག་གི་དམ་ཚིག་ལ་གནས་པའི་སྔགས་པས།  དོན་གཉིས་ཀྱི་བསམ་པ་མྱུར་དུ་འགྲུབ་པའི་ཆེད་དུ་དཔལ་མགོན་འཁོར་བཅས་ལེགས་པར་བསྟེན་ནས་མཆོད་ཅིང་ཐུགས་དམ་བསྐང་བའི་ཕྲིན་ལས་ཀྱི་རིམ་པ་ཚུལ་བཞིན་དུ་བསྒྲུབ་པ་ལ་གཉིས་ཏེ།  སྦྱོར་བ་ཡོ་བྱད་ཀྱི་གཤོམ་དང་།  དངོས་གཞི་ཆོ་གའི་རིམ་པ་གཉིས་ལས།  དང་པོ་ནི།  ཉི་ཤུ་དགུ་ལ་སོགས་པ་དུས་ཁྱད་པར་ཅན་ལ་ཡིད་དང་མཐུན་ཞིང་ཤིས་པའི་གནས་ཁང་གི་སྟེང་ལོགས་རྣམས་མཛེས་ཤིང་བརྗིད་པའི་སྤྱན་གཟིགས་སྣ་ཚོགས་ཀྱིས་བརྒྱན།  དམ་ཚིག་གི་བྲིས་སྐུ་སོགས་རྟེན་བཤམས་པའི་མདུན་དུ་རིན་པོ་ཆེའམ་ཐོད་པ་ལ་སོགས་པའི་སྣོད་དུ་གཙང་ཞིང་བཟང་བའི་རྒྱུ་དམ་རྫས་དང་བཅས་པ་ལས་དང་པོར་བླ་མ་ཡི་དམ་གྱི་གཏོར་མ་དཔལ་བཤོས་ཟླུམ་བརྗིད་ {{TibChung|[2b]}} ཅན་དང་།  མགོན་པོ་འཁོར་བཅས་ལ་རྒྱས་པར་སྡེ་དགུའི་ལྷ་གྲངས་མཉམ་པའི་གཙོ་བོ་དགུ་ལ་སོ་སོའི་འཁོར་གྱིས་བསྐོར་བའི་བཤོས་བུ་ཅན་དང་བསྡུ་ན་བཤོས་བུ་གྲུ་གསུམ་ཆེ་བ་གཅིག་ལ་འཁོར་རྣམས་སྤྱི་སྤུངས་སུ་བསྐོར་བས་ཀྱང་ཆོག་ལ།  གང་ལྟར་ཡང་མཐའ་མ་མཐེབ་ཀྱུས་བསྐོར།  མདའ་བྱ་རྒོད་མདར་ནག་གི་ཅོད་པན་ཅན་བཙུགས།  ཤ་ཁྲག་ཆང་ཕུད་ལ་དུ་ལ་ཕུག་ཁུར་བ་ཆན་སྒོག་བཙོང་སོགས་ཁ་ཟས་བཟང་པོ་སྣ་ཚོགས་ཀྱིས་བརྒྱན་པ་དང་།  གཞན་ཡང་ཆོས་སྐྱོང་ཡེ་ཤེས་པ་དང་འཇིག་རྟེན་པའི་རིགས་སོགས་གང་བརྟེན་དང་།  གཞི་བདག་གཏོར་མའི་བར་རིམ་པ་མ་འཆོལ་བར་བཤམ།  དེ་དག་གི་གཡས་སུ་བདུད་རྩི།  གཡོན་དུ་རཀྟ།  མདུན་དུ་མཆོད་ཡོན་སོགས་གཙང་མར་སྤེལ་བ་ཕྱིའི་མཆོད་པ་དང་།  དབང་པོའི་མེ་ཏོག་སོགས་ཁྱད་པར་དམ་རྫས་དང་འབྲེལ་བའི་མཆོད་པ་རྣམས་ཕྲེང་ཚར་དུ་བཀོད།  གཞན་ཡང་ཕྱི་ནང་གསང་བའི་མཐུན་རྫས་རྟེན་རྫས་སྐོང་རྫས་སོགས་ཅི་འབྱོར་དང་།  རྡོར་དྲིལ་རྔ་སིལ་གཡབ་དར་སོགས་དམ་རྫས་ཀྱི་རྣམ་གྲངས་ཐམས་ཅད་མཐོང་བརྒྱུད་ཀྱི་ལག་ལེན་བཞིན་ཚོགས་པར་བཤམ་མོ།  །གཉིས་པ་དངོས་གཞི་ཆོ་གའི་རིམ་པ་ལ་ཡང་སྔོན་འགྲོ་དང་དངོས་གཞི་རྗེས་ཀྱི་བྱ་བ་དང་གསུམ་ལས།  དང་པོ་སྔོན་འགྲོ་ལ་གསུམ་གྱི།  དང་པོ་བདག་བསྐྱེད་ཀྱི་རྣལ་འབྱོར་ནི།  སྤྱིར་ཡི་དམ་ཞི་ཁྲོ་གང་ལ་བརྟེན་ཀྱང་རུང་མོད་ཁྱད་པར་སྒྲུབ་པ་བཀའ་བརྒྱད་ལྟ་བུ་ལ་བརྟེན་ན་ཤིན་ཏུ་འབྲེལ་ཆགས་ཤིང་དེ་ཡང་ཉིན་ཞག་དེ་ཉིད་ཁོ་ནར་བདག་བསྐྱེད་གཞན་སྔོན་དུ་སོང་ན་སྐབས་འདིར་སྙིང་པོ་ངག་ཏུ་བརྗོད་པའི་སྒོ་ནས་ཐུན་མཚམས་ཀྱི་ལྷར་སྐད་ཅིག་གིས་གསལ་བཏབ་པས་ཆོག་ལ་དེ་ {{TibChung|[3a]}} ལྟར་མ་སོང་ན་བདག་བསྐྱེད་རྒྱས་འབྲིང་བསྡུས་གསུམ་གང་རུང་ཞིག་སྐབས་འདིར་བྱའོ།  །དེ་ཡང་མདོར་བསྡུས་ལ་མོས་ན་ཆེ་མཆོག་གཙོ་རྐྱང་གི་མངོན་རྟོགས་དངོས་གྲུབ་རོལ་མཚོར་སྨོས་པ་དེའམ།  འདིའི་སྲོག་དབང་སོགས་ཕྱག་རྡོར་གྱི་རྣལ་འབྱོར་བསྒོམ་པའི་དབང་དུ་བྱེད་ན།}}  འགྲོ་རྣམས་བསྒྲལ་འདོད་བསམ་པ་ཡིས།  །སངས་རྒྱས་ཆོས་དང་དགེ་འདུན་ལ།  །བྱང་ཆུབ་སྙིང་པོར་མཆིས་ཀྱི་བར།  །རྟག་པར་བདག་ནི་སྐྱབས་སུ་མཆི།  །ཤེས་རབ་སྙིང་བརྩེ་དང་བཅས་པས།  །བརྩོན་པས་སེམས་ཅན་དོན་དུ་བདག  །སངས་རྒྱས་མདུན་དུ་གནས་བཅས་ཏེ།  །རྫོགས་པའི་སངས་རྒྱས་ཐོབ་པར་བགྱི།  །སེམས་ཅན་བདེ་དང་ལྡན་གྱུར་ཅིག  །སྡུག་བསྔལ་ཀུན་དང་བྲལ་བར་ཤོག  །བདེ་དང་རྟག་ཏུ་མི་འབྲལ་ཞིང་།  །ཆོས་ཀུན་མཉམ་ཉིད་རྟོགས་པར་ཤོག  །{{TibChung|ཅེས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས།}}  ཨོཾ་སྭ་བྷཱ་ཝ་སོགས།  འཁོར་འདས་ཀྱི་ཆོས་ཐམས་ཅད་འོད་གསལ་གྱི་རང་མདངས་རྡོ་རྗེ་སྲུང་བའི་འཁོར་ལོ་ཆེན་པོར་དག་པའི་དབུས།  པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་ཧཱུྃ་གིས་མཚན་པ་ཡེ་ཤེས་ལྔའི་འོད་ཟེར་མཆོག་ཏུ་འབར་བ་ཡོངས་སུ་གྱུར་པ་ལས་རང་ཉིད་གསང་བའི་བདག་པོ་ཕྱག་ན་རྡོ་རྗེ་སྐུ་ {{TibChung|[3b]}} མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ།  དབུ་སྐྲ་དང་སྨར་སྨིན་མེ་འབར་ཞིང་མཆེ་བ་གཙིགས་པ།  ཕྱག་གཡས་རྡོ་རྗེ་རྩེ་ལྔ་པ་འཕྱར་ཞིང་གསོར་བ།  གཡོན་སྡིགས་མཛུབ་ཐུགས་ཀར་མཛད་པ།  གར་དགུའི་ཉམས་ཅན་ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་འགྱིང་བ།  ཐོད་སྐམ་ལྔའི་དབུ་རྒྱན་ཐོད་རློན་ལྔ་བཅུའི་དོ་ཤལ།  སེང་གླང་གི་པགས་པ་དང་སྔོན་པོས་སྟོད་གཡོགས་ཤིང་མི་ལྤགས་ཀྱི་སྐེད་དཀྲིས་དང་སྟག་ལྤགས་ཀྱི་ཤམ་ཐབས་འཕྱང་བ།  ཀླུ་རིགས་ལྔའི་སྦྲུལ་ཆུན་དང་ཁྲག་ཞག་ཐལ་བས་མཚན་པ།  བ་སྤུ་ཧཱུྃ་ལས་རྡོ་རྗེ་མེའི་འོད་ཟེར་འབར་ཞིང་བསྐལ་པའི་མེ་དཔུང་འབར་བའི་དབུས་ན་བཞུགས་པའོ།  །དེའི་སྤྱི་བོར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་མཐིང་ག  །ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་བསམ་གྱིས་མི་ཁྱབ་པའི་ཚོགས་བཛྲ་ས་མཱ་ཛཿ{{TibChung|ས་སྤྱན་དྲངས།  ཨརྒྷཾ་ལ་སོགས་པས་མཆོད།}}  ཛཿཧཱུྃ་བྃ་ཧོཿ གཉིས་སུ་མེད་པར་གྱུར།   སླར་ཡང་རང་གི་ཐུགས་ཀའི་ཧཱུྃ་གི་འོད་ཟེར་གྱིས་དབང་གི་ལྷ་རིགས་ལྔ་འཁོར་བཅས་བཛྲ་ས་མཱ་ཛཿ{{TibChung|ས་སྤྱན་དྲངས།}}  ཨརྒྷཾ་{{TibChung|སོགས་ཀྱིས་མཆོད།}}   {{TibChung|[4a]}} དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བསྩལ་དུ་གསོལ།  ཞེས་གསོལ་བ་བཏབ་པས།  ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེས་ས་མ་ཡ་ཤྲཱི་ཧཱུྃ།  ཞེས་གསུང་ཞིང་བུམ་པ་བཟང་པོ་ལས་བྱུང་བའི་བདུད་རྩིའི་ཆུས་སྤྱི་བོ་ནས་དབང་བསྐུར།  སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་མི་བསྐྱོད་པ་ཅོད་པན་གྱི་སྙིང་པོ་ལ་བཞུགས་པར་གྱུར་{{TibChung|པར་བསམ་ཞིང་།  སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་མི་ཟད་པ་རྒྱན་གྱི་འཁོར་ལོའི་བདག་ཉིད་དུ་སྙེམས་པ་བརྟན་པོ་བྱ་ཞིང་།  དེ་ནས།}}  ཐུགས་ཀར་ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་ཡིག་གི་མཐར་སྔགས་ཀྱི་ཕྲེང་བས་གཡས་སུ་འཁོར་བ་ལ་{{TibChung|དམིགས་ཏེ།  སྤྲོ་བསྡུའི་དམིགས་པ་རྒྱ་ཆེན་པོ་དང་སྦྱར་ནས།}}  ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔  {{TibChung|ཅེས་ཅི་ནུས་སུ།  བཟླ་བ་ནི་བདག་ཉིད་རྣལ་འབྱོར་རོ།  །གཉིས་པ་མཆོད་རྫས་རྣམས་བྱིན་གྱིས་བརླབ་པ་ནི།}}  ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔  {{TibChung|ཀྱིས་བསང་།}}  ཨོཾ་སྭཱ་བྷཱ་ཝ{{TibChung|ས་སྦྱང་}}སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་མེད་ཁང་ཕུན་སུམ་ཚོགས་པར་ཨ་ལས་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་མཆོད་ཡོན།  ཞབས་བསིལ།  མེ་ཏོག  །བདུག་ {{TibChung|[4b]}} སྤོས།  མར་མེ།  དྲི་ཆབ།  ཞལ་ཟས།  རོལ་མོ་ལ་སོགས་པ་མཆོད་པའི་དངོས་པོ་རྣམས་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ནམ་མཁའི་མཐའ་ཀླས་པར་གང་བར་གྱུར།  ཨོཾ་བཛྲ་ཨརྒྷཾ་ཨཱཿཧཱུྃ༔  {{TibChung|ནས་}}ཤཔྡ{{TibChung|འི་བར་གྱི་བྱིན་གྱིས་བརླབ།  བདུད་རྩི་བསང་སྦྱང་།}}  སྟོང་པའི་ངང་ལས་ཡྃ་ལས་རླུང་རྃ་ལས་མེ་ཀྃ་ལས་མི་མགོའི་སྒྱེད་བུ་གསུམ་ལ་བསྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ་བཅུད་ཐམས་ཅད་ཧཱུྃ་ཨོཾ་སྭཱ་ཨཱོཾ་ཧཱཿ  མཱུྃ་ལཱྃ་མཱྃ་པཱྃ་ཏཱྃ་ལས་བདུད་རྩི་ལྔ་དང་སྒྲོན་མ་ལྔར་གྱུར་པ་སོ་སོའི་ས་བོན་གྱིས་མཚན་པ་དང་བཅས་པའི་འོག་གི་རླུང་གཡོས་མེ་སྤར་རྫས་ཐམས་ཅད་ཞུ་ཞིང་འདྲེས་པའི་སྟེང་གི་ནམ་མཁའ་ལ་ཨོཾ་ཨཱཿཧཱུྃ་གི་ཡི་གེ་གསུམ་གནས་པ་ལས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག   །ཡི་གེ་གསུམ་ལ་ཐིམ་སྟེ་རིམ་པར་ཞུ་བ་ལས་དམ་ཚིག་གི་རྫས་དང་རོ་གཅིག་ཏུ་གྱུར་{{TibChung|པར་བསམ་ལ།}}  ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ {{TibChung|ལན་གསུམ།  རཀྟ་བསང་སྦྱང་།}}  སྟོང་པའི་ངང་ལས་ཨ་ལས་བྱུང་བའི་པདྨ་འབར་བའི་སྣོད་དུ་ར་ལས་ཆགས་མེད་རཀྟའི་རྒྱ་ {{TibChung|[5a]}} མཚོ་རྦ་རླབས་མཁའ་ལ་འཕྱོ་ཞིང་འཁྲུགས་པ་ཟེགས་མ་ལས་འདོད་ཡོན་གྱི་ལྷ་མོ་འཕྲོ་བར་གྱུར།  ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ༔ {{TibChung|ལན་གསུམ།  གཏོར་མ་བསང་སྦྱང་།}}  སྟོང་པའི་ངང་ལས་རླུང་མེ་ཐོད་པའི་སྒྱེད་བུ་གསུམ་ལ་གནས་པའི་ཡེ་ཤེས་ཀྱི་ཀ་པཱ་ལ་སྟོང་གསུམ་དང་མཉམ་པའི་ནང་དུ་ཤ་ལྔ་བདུད་རྩི་ལྔ་གཙོ་བོར་གྱུར་པའི་བཟའ་བཅའ་བལྡག་ཞི་བ་འདོད་ཡོན་ལྔའི་ཕུང་པོ་ཟད་མི་ཤེས་པར་གྱུར།  ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུཧྱ་ས་མ་ཡ་ཧཱུྃ་ཧྲཱིཿཋཱ༔ {{TibChung|ལན་གསུམ་གྱིས་བྱིན་གྱིས་བརླབ།  གསུམ་པ་བླ་མ་ཡི་དམ་གྱི་གཏོར་འབུལ་ནི།  བདག་བསྐྱེད་ལས་གཞུང་རྒྱས་པ་དང་འབྲེལ་ནས་བྱས་ཀྱང་རུང་ཞིང་།  དཀྱུས་ཀྱི་བདག་བསྐྱེད་ཙམ་ལ་བརྟེན་པ་ཡིན་ན།}}  རང་གི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་ཕྱོགས་བཅུར་བཞུགས་པའི་བླ་མ་རིག་འཛིན་རྒྱལ་བ་རྒྱ་མཚོའི་དཀྱིལ་འཁོར་གྱི་ལྷ་ཚོགས་ཐམས་ཅད་མཁའ་ཁྱབ་ཀྱི་འཁོར་ལོར་སང་པར་{{TibChung|བསམ་ཞིང་།}}  ཧཱུྃ།  དམིགས་མེད་མཁའ་ལྟར་ཁྱབ་ཅིང་དག་པའི་སྐུ།  །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་།  །ཐུགས་རྗེའི་ངང་ཉིད་ཆོས་སྐུར་དག་པ་ལས།  །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ།  །ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ {{TibChung|[5b]}} ཎི་ཀ་དྲྀ་ཥྱ་ཧོཿ ས་མ་ཡ་ཧོཿ ས་མ་ཡ་སྟྭྃ།  ཛཿ་ཧཱུྃ་བྃ་ཧོཿ {{TibChung|ཞེས་པས་སྤྱན་དྲངས།}}  ཧཱུྃ།  བླ་མེད་མཆོག་གི་མཆོད་པ་དམ་པ་ནི།  །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ།  །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ།  །དམ་ཚིག་བཞིན་ལས་ཅི་བདེར་བཞེས་སུ་གསོལ།  །ཨོཾ་ཨཱཿཧཱུྃ་གུ་རུ་མཎྜལ་དེ་བ་ག་ཎ་ས་པ་རི་ཝཱ་རེ་བྷྱཿབཛྲ་ཨརྒྷཾ་པྲ་ཏཱིཙྪ་སྭཱཧཱ། {{TibChung|ནས་ཤཔྡའི་བར་གྱི་ཕྱི་མཆོད་དང་།}}  བཛྲ་པཉྩ་ཨ་མྲྀ་ཏ་ཁ་རཾ་ཁཱ་ཧི།  མ་ཧཱ་རཀྟ་ཁ་རཾ་ཁཱ་ཧི།  {{TibChung|ཞེས་སྨན་རཀ་སྟོབ།  རྡོ་རྗེའི་ཐལ་མོ་གྱེན་དུ་བཀྱེལ།}}  ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་{{TibChung|བསམ་ཞིང་།  སྔགས་སྔ་མའི་མཐར།}}  ཨི་དཾ་བ་ལིཾ་ཏ་གྲྀ་ཧྞནྟུ་མ་མ་སརྦ་སིདྡྷི་མྨེ་པྲ་ཡཙྪ།  {{TibChung|ཞེས་གཏོར་མ་ཕུལ།  བསྟོད་པ་ནི།}}  གང་གི་དྲིན་གྱིས་བདེ་ཆེན་ཉིད།  །སྐད་ཅིག་ཉིད་ལ་འཆར་བ་གང་།  །བླ་མ་རིན་ཆེན་ལྟ་བུའི་སྐུ།  །རྡོ་རྗེ་ཅན་ཞབས་པད་ལ་འདུད།  །བཅོམ་ལྡན་ཁྲོ་བོའི་རྒྱལ་པོ་ནི།  །སངས་རྒྱས་ཀུན་གྱི་འཁོར་ལོས་སྒྱུར།  །གདུལ་དཀའ་མ་ལུས་འདུལ་བ་པོ།  །ཁྲོ་བོའི་རྒྱལ་ལ་ཕྱག་འཚལ་ལོ།  །ཕྱག་རྒྱར་འོས་པ་ཐམས་ཅད་ལ།  །ཞིང་རྡུལ་ཀུན་གྱི་གྲངས་སྙེད་ཀྱིས།  །ལུས་བཏུད་པ་ཡི་རྣམ་ཀུན་ཏུ།  །མཆོག་ {{TibChung|[6a]}} ཏུ་དད་པས་ཕྱག་འཚལ་ལོ།  །{{TibChung|ཞེས་བསྟོད་ཅིང་འདོད་དོན་གསོལ་ནས་མགྲོན་རྣམས་གཤེགས་སུ་གསོལ་བའམ་བསྟིམ་པ་གང་བདེ་བྱ་སྟེ་སྔོན་འགྲོའི་བྱ་བའོ།  །གཉིས་པ་དངོས་གཞིའི་ཆོ་ག་ལ་རྒྱུན་གྱི་ཕྲིན་ལ་སུ་བྱ་བ་དང་།  ཁྱད་པར་སྐབས་ཀྱི་ཕྲིན་ལས་སུ་བྱ་བ་གཉིས།  དང་པོ་ལ་དགུ་ལས།  དང་པོ་མདུན་བསྐྱེད་གསལ་འདེབས་པ་ནི།}}  ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ།  སྟོང་པ་ཉིད་ཀྱི་ངང་ལས་མདུན་གྱི་ནམ་མཁར་དུར་ཁྲོད་ཀྱི་ས་གཞི་འཇིགས་སུ་རུང་བ་རོ་གསར་རྙིང་སྣ་ཚོགས་གཅལ་དུ་བཀྲམ་ཞིང་ཕུང་པོར་སྤུངས་པ་ཁྲག་གིས་སྦགས་པའི་རོ་ལང་རྣམས་དགོད་ཅིང་གར་རྩེ་བ།  ལས་ཀྱི་ཤན་པ་འབུམ་ཀུན་ཏུ་རྒྱུ་ཞིང་ཉམས་པ་རྣམས་འགུགས་འཆིང་གསོད་གཅོད་ཀྱི་ལས་བྱེད་པ།  མ་རུངས་པའི་སྲོག་ཆགས་གདུག་པ་ཅན་རྣམས་ངུ་འབོད་ཀྱི་སྒྲ་དང་བཅས་པས་ཤ་ཟ་ཞིང་ལང་ལོང་དུ་འཕྱོ་བ་ཕྱོགས་ཐམས་ཅད་དུ་མེ་རླུང་དམར་ནག་དྲག་ཏུ་འབར་ཞིང་འཁྲུགས་པའི་དབུས་སུ་བྷྲཱུྃ་ལས་དུར་ཁྲོད་འབར་བའི་གཞལ་མེད་ཁང་ཆེན་པོ་གྲུ་བཞི་སྒོ་ཁང་རྟ་བབས་དང་བཅས་པ།  དྲག་པོའི་རྒྱན་དང་བཀོད་པ་ཕུན་སུམ་ཚོགས་པས་སྤྲས་པ།  ནང་ཁྲག་ཞག་གི་རྒྱ་མཚོར་འཁྱིལ་བའི་དབུས་ {{TibChung|[6b]}} སུ་མཐིང་ནག་གྲུ་གསུམ་འབར་བའི་དཀྱིལ་འཁོར་བསྣོལ་མ་གནམ་ལྕགས་ཀྱི་འཁོར་ལོས་ཡོངས་སུ་བསྐོར་བའི་ལྟེ་བར་པདྨ་དང་ཉི་མ་རུ་དྲ་ཕོ་མོ་བསྣོལ་བའི་སྟེང་དུ་ཧཱུྃ་མཐིང་ནག་ཡོངས་སུ་གྱུར་པ་ལས་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་སྐུ་མདོག་མཐིང་ནག་གཏུམ་ཞིང་ཁྲོས་པའི་ཉམས་ཅན།  ཞལ་གཅིག་ཕྱག་གཉིས་པ་གཡས་འབར་བའི་རུ་མཚོན་རྣོན་པོ་གནམ་དུ་འཕྱར་ཞིང་གཡོན་གདུག་པ་ཅན་གྱི་སྙིང་དང་ཞགས་པ་འཛིན་པ།  སྤྱན་གསུམ་དམར་ལ་ཟླུམ་པ་ཞལ་མཆེ་བ་གཙིགས་ཤིང་ལྗགས་འདྲིལ་བ།  སྦྲུལ་ནག་པོའི་རལ་པ་མཐུར་དུ་འཕྱང་ཞིང་ཐོད་པ་སྐམ་པོ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན།  སྙིང་ཕྲེང་དང་སྦྲུལ་གྱི་ཆུན་པོས་བརྒྱན་པ།  དར་ནག་གི་འཇོལ་བེར་བརྩེགས་མར་གསོལ་ཞིང་གསེར་སྐེད་དང་མི་ལྤགས་རློན་པའི་སྐ་རགས་ཅན།  ཙནྡན་གྱི་བིང་ཆེན་སྐེད་ལ་བཙུགས་པའི་སྒོ་གསུམ་ནས་སྤྲུལ་པའི་དམག་དཔུང་འགྱེད་པ།  ཁ་དོག་སྣ་ཚོགས་པའི་ཅོད་པན་ལྷབ་ལྷུབ་དང་འཇིགས་པའི་རྒྱན་ཐམས་ཅད་ཀྱིས་ཀླུབས་པ།  སག་ཏིའི་ལྷྭམ་ཡུ་རིང་གསོལ་ནས་གཡོན་བརྐྱང་བའི་དོར་སྟབས་ཀྱིས་བསྐལ་པའི་མེ་ཕུང་འབར་ཞིང་འཁྲུགས་ {{TibChung|[7a]}} པའི་དབུས་ན་བཞུགས་པའོ།  །དེའི་ཕྱི་རོལ་ཆོས་འབྱུང་གི་ཟུར་དྲུག་ལ་གཙོ་བོའི་གཡོན་ཟུར་ནས་བརྩམས་ཏེ་རིམ་པ་བཞིན།  ཡུམ་དཔལ་འབར་མ་དཀར་མོ་གཡས་ཤེལ་གྲི་འཕྱར་ཞིང་གཡོན་ཐོད་ཁྲག་གཙོ་ལ་སྟོབས་པ་མ་མོའི་ཆས་ཅན་རོལ་པའི་སྟབས་ཀྱིས་འགྱིང་བ།  སྐུའི་མགོན་པོ་སྟ་གཞོན་ནག་པོ་གཡས་ཙནྡན་གྱི་བེང་གསོར།  {{TibChung|མགོན་པོ་ལྔ་དང་ཡུམ་བཅས་གནམ་ལྕགས་ཕུར་གཅིག་མར་ཕྱིར་འགོད་པར་གསུངས་ཀྱང་།  རྒྱུད་ལས་འཁོར་གྱི་གཙོ་བོར་གསུངས་པ་དང་ངོ་བོ་གཙོ་བོ་ཉིད་དང་དབྱེར་མེད་ཅིང་ཁྱད་པར་སྲོག་དབང་དུ་ཡང་གསུངས་པ་བཅས་འདི་ལྟར་རོ།  །}}  ཞིང་།  གཡོན་བདུད་ཀྱི་ཞགས་པ་ཐོགས་ནས་དཔའ་གཏུམ་སྟག་ལ་ཞོན་པ།  གསུང་གི་མགོན་པོ་བེང་དམར་སྨུག་གཡས་ཙནྡན་གྱི་བེང་འཕྱར་ཞིང་གཡོན་བདུད་རྩིའི་ལྕགས་པར་འཛིན་པ།  ཐུགས་ཀྱི་མགོན་པོ་གྲི་གུག་མཐིང་ནག་གཡས་གྲི་གུག་མཁའ་ལ་འཕྱར་ཞིང་གཡོན་ཐོད་ཁྲག་འཛིན་པ།  ཡོན་ཏན་གྱི་མགོན་པོ་ལེགས་ལྡན་ནག་པོ་གཡས་རིན་པོ་ཆེ་དང་གཡོན་ཐོད་ཁྲག་འཛིན་པ་སེང་གེ་ལ་ཞོན་པ།  ཕྲིན་ལས་ཀྱི་མགོན་པོ་ཏྲཀྴད་མཐིང་ནག་གཡས་བེང་གསོར་ཞིང་གཡོན་དགྲ་སྙིང་བསྣམས་པ་བྲ་ནག་རྟིང་དཀར་ལ་ཆིབས་པ།  ལྔ་ཀའང་མི་བཟད་པའི་ཁྲོ་ {{TibChung|[7b]}} བོ་གཏུམ་དྲག་འཇིགས་པའི་ཉམས་ཅན་དར་ནག་གི་འཇོལ་བེར་དང་དུར་ཁྲོད་རོལ་པའི་ཆས་ཐམས་ཅད་ཀྱིས་བརྒྱན་ཏེ་བམ་གྱི་ཁར་བཞུགས་པའོ།  །དེའི་ཕྱི་རོལ་འཁོར་ལོ་རྩིབས་བརྒྱད་ཀྱི་ཤར་དུ་དུ་ལས་ལས་ཀྱི་མགོན་པོ་སྲོག་བདུད་ནག་པོ་དུས་མཐའི་སྤྲིན་དང་མཚུངས་པ།  ཞལ་གཅིག་ཕྱག་གཉིས་པ་གྲི་གུག་དང་ལྕགས་པར་བཟུང་ནས་མདའ་གཞུ་འགེངས་ཤིང་ཁ་ཊྭཱྃ་གྲུ་མོར་{{TibChung|ངོ་བོ་གཙོ་བོ་ཉིད་དང་དབྱེར་མེད་ཅིང་སྐུའི་རྣམ་འགྱུར་ཐ་དད་པ་ཙམ་ཡིན་པས་འདིར་བྱས།}}  བཀལ་བ།  སྐུ་ལ་དར་ནག་གི་བེར་གསོལ་ཞིང་གསེར་གྱི་སྐེ་རགས་བཅིངས་པ།  སྤྱན་མིག་ཁྲག་ལྟར་གཡོ་ཞིང་ཁ་རླངས་མེར་འབར་བ།  སྟག་རལ་དང་གཟིག་ཤུབ་བཏགས་ནས་བྲ་ནག་རྟིང་དཀར་ལ་ཆིབས་པ།  འཇིགས་པའི་སྤྱན་གསུམ་བྲང་ལ་ཤར་ཞིང་ལྷུ་ཚིགས་བཞིའི་སྤྱན་ལས་དམག་དཔོན་བཞི་འགྱེད་པ།  བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད་ལྕགས་ཀྱི་བྱ་ཁྲར་སྤྲུལ་ནས་སྔོན་ལ་ལྡིང་ཞིང་སྔ་དགྲ་འདུལ་བ།  ལྷོ་ཕྱོགས་ཀྱི་གཤིན་རྗེ་ཆེན་པོ་བརྒྱད་སྟག་གཟིག་དོམ་དྲེད་འཕར་སྤྱང་རྣམས་སུ་སྤྲུལ་ནས་ཕྱི་བཞིན་འབྲེང་བས་ཕྱི་དགྲ་སེམས་པ་རྡུལ་དུ་རློག་པ།  གཞན་ཡང་ལས་བྱེད་ཀྱི་དམག་ཚོགས་ {{TibChung|[8a]}} དུ་མས་བསྐོར་བ།  ལྷོར་ཨེ་ལས་མ་མོ་སྔགས་ཀྱི་སྲུང་མ་སྐུ་མདོག་སྨུག་ནག་ཞལ་གཅིག་ཕྱག་གཉིས་པ།  ཁྲོ་གཏུམ་མི་བཟད་པའི་གཟུགས་ཅན་དཔྲལ་བའི་དབྱིངས་ན་ཡེ་ཤེས་ཀྱི་སྤྱན་གཅིག་འབར་བ།  ཞལ་གདངས་ཤིང་མཆེ་བ་གཅིག་མཐུར་དུ་གཙིགས་པ།  ལྗགས་འདྲིལ་བ།  རལ་པ་ཁམ་ནག་མཐུར་དུ་གྲོལ་བའི་དབུས་ན་ལྕགས་རལ་ཉག་གཅིག་གྱེན་དུ་གཟེངས་པ།  ཐུགས་ཀ་ན་ནུ་མ་གཅིག་འཕྱང་བ།  ཕྱག་གཡས་ཞིང་དབྱུག་ཀླད་ལ་འཕྱར་ཞིང་གཡོན་དགྲ་སྙིང་དང་ལྕགས་སྤྱང་ཁྲ་ཐབས་སུ་འགྱེད་པ།  ཐོད་སྐམ་གྱི་ཅོད་པན་དང་དོ་ཤལ་སོགས་འཇིགས་པའི་ཆས་ཀྱིས་བརྒྱན་ཏེ་གཡོན་བརྐྱང་བའི་སྟབས་ཀྱིས་རོའི་སྟན་ལ་རོལ་པ།  འཁོར་སྤྲུལ་པའི་མ་མོ་རྣམ་གསུམ།  སྦྱོར་སྒྲོལ་སྲོག་གཅོད་ཀྱི་གིང་གསུམ།  ཡེ་ཤེས་ཀྱི་མ་མོ་ལྔ།  རྗེ་མོ་བཅུ་བཞི།  སྨན་མོ་ལྔ་བཅུ་རྩ་བརྒྱད་སོགས་སྣང་སྲིད་མ་མོའི་ཚོགས་ཀྱིས་བསྐོར་བ།  ནུབ་ཏུ་ར་ལས་གཟའ་བདུད་རཱ་ཧུ་ལ་སྨུག་ནག་མགོ་བོ་དགུ་པ་ཕྱག་བཞིའི་དང་པོ་གཉིས་ཆུ་སྲིན་གྱི་རྒྱལ་མཚན་དང་སྦྲུལ་ཞགས།  འོག་མ་གཉིས་མདའ་གཞུས་དགྲ་སྙིང་གཟིར་བ།  ལུས་ {{TibChung|[8b]}} ཀུན་མིག་གིས་གང་ཞིང་རོ་སྨད་སྦྲུལ་དུ་འཁྱིལ་བ།  དུར་ཁྲོད་འཇིགས་པའི་ཆས་ཅན་གཟའ་དང་གདོང་མོ་རྒྱུ་སྐར་སོགས་འཇིགས་བྱེད་དྲེགས་པའི་ཚོགས་ཀྱིས་བསྐོར་བ།  བྱང་དུ་བྷྱོ་ལས་བཤན་པ་སྲོག་སྒྲུབ་ནག་མོ་རྔམས་ཤིང་ཁྲོས་པ།  གཡས་དགྲ་སྙིང་ཟ་ཞིང་གཡོན་ནད་རྐྱལ་ཐོགས་པ།  མི་ལྤགས་ཀྱི་གོས་དང་ཐོད་རུས་སྦྲུལ་གྱིས་བརྒྱན་ཅིང་སྲིད་པའི་རླུང་ནག་ཞོན་པ།  གཡས་ན་ཅེ་སྤྱང་གདོང་མ།  གཡོན་ན་ཝ་གདོང་མ།  མདུན་ན་འུག་གདོང་མ་སོགས་ཤ་ཟ་དང་མ་མོ་འབུམ་སྡེས་བསྐོར་བ།  ཤར་ལྷོར་ར་ལས་པེ་ཧར་དགྲ་ལྷ་དམར་གསལ་ཞལ་གཅིག་ཕྱག་གཉིས་སྤྱན་གསུམ་པ་ཁྲོ་འཛུམ་བཞད་པའི་ཉམས་ཅན།  གཡས་གསེར་གྱི་གསེག་ཤང་དང་གཡོན་དངུལ་གྱི་པར་བུ་བསྣམས་པ་དབུ་ལ་དར་ནག་གི་འཐིབས་ཞུ་གསོལ་ཞིང་།  ཟ་འོག་གི་བེར་དང་མན་ཏྲིའི་ཆོས་གོས་གྱོན་པ།  མགུལ་དུ་ཤེལ་ཕྲེང་འཕྱང་ཞིང་སེང་གེ་དཀར་མོ་ལ་ཞོན་པ།  ཡུམ་ཤཱནྟི་རོ་ཟན་མས་འདུད་ཅིང་ལས་མཁན་པུ་ཏྲ་ནག་པོ་སོགས་གར་མཁན་སྐྱོ་སངས་རུ་འདྲེན་སྡེ་བཞི་སོགས་ལྷ་མ་སྲིན་དྲེགས་པའི་ཚོགས་ཀྱིས་བསྐོར་བ།  ལྷོ་ནུབ་ཏུ་དུ་ལས་གནོད་སྦྱིན་བཤན་པ་དམར་ {{TibChung|[9a]}} ནག་ཞལ་གཅིག་ཕྱག་བཞི་པ།  གཡས་གཉིས་རལ་གྲི་དང་གྲི་གུག་གཡོན་གཉིས་ཐོད་ཁྲག་དང་སྦྲུལ་ཞགས་འཛིན་པ།  དར་དམར་གྱི་བེར་དང་དུར་ཁྲོད་ཀྱི་ཆས་ཅན་ཟངས་ཀྱི་མཁའ་ལྡིང་ལ་ཞོན་པ།  ལས་བྱེད་ཕོ་ཉ་སྡེ་བརྒྱད་སོགས་ཤ་ཟ་བཤན་པའི་ཚོགས་ཀྱིས་བསྐོར་བ།  ནུབ་བྱང་དུ་ཏྲི་ལས་སྐྱེས་མཆོག་རྡོ་རྗེ་ལེགས་པ་དམར་པོ་ཕྱག་གཡས་རྡོ་རྗེས་དགྲ་མགོ་གཟིར་ཞིང་གཡོན་མི་སྙིང་འཛིན་པ།  དར་དཀར་གྱི་བེར་དང་བརྗིད་པའི་ཆས་ཅན་ར་སྐྱེས་ཁམ་པ་ལ་ཞོན་པ།  འཁོར་གིང་ཆེན་སྡེ་བཞི་ལྷ་བཙན་བདུད་ཀྱི་དགེ་བསྙེན་སུམ་བརྒྱ་དྲུག་ཅུ་དགྱེས་སྡེ་མོ་བཅུ་གཉིས་ཟ་བྱེད་མཆེ་བ་ཅན་སོགས་འཇིགས་བྱེད་དྲེགས་པའི་ཚོགས་ཀྱིས་བསྐོར་བ།  བྱང་ཤར་དུ་མ་ལས་འདོད་ཁམས་དབང་ཕྱུག་རེ་མ་ཏི་ནག་མོ་སྐེམ་ཞིང་སྦེག་ལ་གཏུམ་པའི་གཟུགས་ཅན་ཞལ་གཅིག་ཕྱག་བཞི་པ།  གཡས་གཉིས་གྲི་གུག་དང་རལ་གྲི་གཡོན་གཉིས་ཐོད་དབྱུག་དང་ནད་རྐྱལ་ཐོགས་པ།  མ་མོའི་ཆས་བརྒྱད་ཀྱིས་སྤྲས་ཏེ་རྫུ་འཕྲུལ་དྲེལ་རྟའི་སྟེང་ན་བཙན་འཁྱིལ་གྱིས་{{TibChung|གཉིས་པ་གཡས་ཁྲམ་ཤིང་འཕྱར་ཞིང་གཡོན་བྷཉྫ་བཟུང་བའི་མཆན་ན་ནད་རྐྱལ་ཐོགས་པ་གཞན་འདྲའོ།  །རྒྱུད་ལས་འདི་ལྟར་རོ།  །}}   {{TibChung|[9b]}} བཞུགས་པ་སྣང་སྲིད་མ་མོའི་ཚོགས་ཀྱིས་བསྐོར་བ།  གཞན་ཡང་དེ་དག་གི་ཕྱི་རོལ་དུ་རུ་འདྲེན་གྱི་དམག་དཔོན་སྡེ་བཞི།  བཀའ་སྡོད་དྲེགས་པ་སྡེ་བརྒྱད།  བདུད་དམག་ཉི་ཁྲི་ཆིག་སྟོང་།  ལྷ་དམག་འབུམ་སྡེ་ལ་སོགས་པ་ཡེ་ཤེས་དང་ལས་ལ་གྲུབ་པའི་དྲེགས་པ་ཕོ་རྒྱུད་མོ་རྒྱུད་ཕོ་ཉ་ལས་བྱེད་བསམ་གྱིས་མི་ཁྱབ་པའི་ཚོགས་ཀྱིས་བསྐོར་བ་ཐམས་ཅད་ཀྱང་འཇིགས་ཤིང་རྔམས་པའི་གཟུགས་འཆང་ཞིང་ཕྲིན་ལས་འདོད་རྒུར་སྒྱུར་བས་སྒྲུབ་པ་པོའི་རེ་འདོད་ཡིད་བཞིན་དུ་སྐོང་བའི་ཚུལ་གྱིས་བཞུགས་པའོ།  །{{TibChung|གཉིས་པ་སྤྱན་འདྲེན་པ་ནི།}}  གཙོ་འཁོར་ཐམས་ཅད་ཀྱི་དཔྲལ་བར་ཨོཾ།  མགྲིན་པར་ཨཱཿ ཐུགས་ཀར་ཧཱུྃ།  ཧཱུྃ་ལས་འོད་ཟེར་འཕྲོས་པས་འོག་མིན་ཆོས་ཀྱི་དབྱིངས་ཀྱི་ཕོ་བྲང་།  མ་ལ་ཡ་གནམ་ལྕགས་འབར་བ།  རྡོ་རྗེ་གདན།  ན་ལེནྡྲ།  བསིལ་བ་ཚལ་དང་ཨུ་ཙ་ལའི་དུར་ཁྲོད་ཆེན་པོ་སོགས་རང་བཞིན་གར་བཞུགས་ཀྱི་གནས་ནས་མགོན་པོ་འཁོར་དང་བཅས་པ་ཐམས་ཅད་བཛྲ་ས་མཱ་ཛཿ{{TibChung|ས་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་བྱོན་པར་བསམ་ཞིང་།}}  རྐང་གླིང་གིས་དྲངས་པའི་རྔ་བོ་ཆེ་སོགས་སྙན་པའི་རོལ་མོ་དང་སྦྱར་སྤོས་ཀྱི་དུད་སྤྲིན།  དབྱངས་ཀྱི་འགྱུར་བ་དང་བཅས་པས།  ཧཱུྃ།  དད་པ་དང་ནི་དམ་ཚིག་གིས།  །ཚུར་ {{TibChung|[10b]}} གཤེགས་ཚུར་གཤེགས་ལྷ་ཆེན་པོ།  །མ་ཧཱ་ཀཱ་ལ་མཐུ་བོ་ཆེ།  །གསང་བའི་ཁྲོ་རྒྱལ་སྟོབས་པོ་ཆེ།  །གནས་འདིར་སྤྱན་འདྲེན་གཤེགས་སུ་གསོལ།  །འོག་མིན་གནས་མཆོག་དམ་པ་དང་།  །གསང་ཆེན་ལྷུན་གྲུབ་གཙུག་ལག་ཁང་།  །དུར་ཁྲོད་རབ་འཇིགས་གཞལ་ཡས་ནས།  །ཐུགས་དམ་དབང་གིས་གཤེགས་སུ་གསོལ།  །ལྷ་ཆེན་དཔལ་འབར་གཤེགས་སུ༴   །ལེགས་ལྡན་ནག་པོ༴   །ཚོགས་བདག་ཆེན་པོ༴   །མ་ནིང་ནག་པོ༴   །སྲོག་བདུད་ཆེན་པོ༴   །མཁའ་འགྲོའི་གཙོ་མོ༴   །མགོན་པོ་སྡེ་ལྔ༴   །སྲིང་གཅིག་ཆེན་མོ༴   །མཐུ་ཆེན་སྡེ་བརྒྱད༴   །བདུད་འདུལ་དམག་ཚོགས༴   །ཡེ་ཤེས་མགོན་པོ་འཁོར་དང་བཅས།  །བསྟན་པ་བསྲུང་ཕྱིར་གཤེགས་སུ་གསོལ།  །{{TibChung|ཞེས་པ་ཙམ་མམ།}}  སྤྲོ་ན།  ཧཱུྃ།  ཨུ་ཙ་ལ་ནས་ལས་ཀྱི་མགོན།  །སྲོག་བདུད་ནག་པོ་གཤེགས་སུ་གསོལ།  །བདེ་ཆེན་དབྱིངས་ནས་ཀུན་བཟང་ཡུམ།  །ཨེ་ཀ་ཛྰ་ཊི་གཤེགས་སུ་གསོལ།  །བར་སྣང་ཁམས་ནས་འཇིགས་བྱེད་གཙོ།  །ཁྱབ་འཇུག་ཆེན་པོ་གཤེགས༴   །དུར་ཁྲོད་གནས་ནས་མཁའ་འགྲོ་མ།  །མི་བསྲུན་བཤན་པ༴   །ཧེ་ཆེན་བརྡལ་ནས་སྒྲོལ་བའི་གིང་།  ། {{TibChung|[10b]}} གནོད་སྦྱིན་ཆེན་པོ༴   །དམ་ཚིག་གནས་ནས་ཐིག་ལེ་རྩལ།  །རྡོ་རྗེ་ལེགས་པ༴   །བྱང་ཤར་མཚམས་ནས་རེ་མ་ཏཱི།  །འདོད་ཁམས་བདག་མོ༴   །གཙུག་ལག་ཆོས་འཁོར་ལྷ་ཁང་ནས།  །པེ་ཧར་དགྲ་ལྷ༴   །བསྟན་པ་སྐྱོང་བའི་དམ་ཅན་ཚོགས།  །སོ་སོའི་མངག་གཞུག་ཕོ་ཉར་བཅས།  །དམ་ཚིག་གནས་འདིར་སྤྱན་འདྲེན་གྱིས།  །ཕྲིན་ལས་སྒྲུབ་ཕྱིར་གཤེགས་སུ་གསོལ།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨེ་ཧྱེ་ཧི་བཛྲ་ས་མཱ་ཛཿཛཿཧཱུྃ།  {{TibChung|ཞེས་པས་སྤྱན་དྲང་ངོ་།  །གསུམ་པ་བཞུགས་སུ་གསོལ་བ་ནི།}}  ཧཱུྃ།  དུར་ཁྲོད་རབ་འཇིགས་གཞལ་ཡས་དམ་པ་འདིར།  །སྣ་ཚོགས་པདྨ་ཉི་ཟླ་བརྩེགས་པའི་སྟེང་།  །རུ་ཏྲ་ཕོ་མོ་བསྣོལ་བའི་གདན་ཁྲི་ལ།  །ཁྲོ་རྒྱལ་མ་ནིང་འཁོར་བཅས་བཞུགས་སུ་གསོལ།  །ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་ས་པ་རི་ཝཱ་ར་ས་མ་ཡ་ཏིཥྛ་ལྷན།  {{TibChung|ཞེས་བཞུགས་སུ་གསོལ།  བཞི་པ་དམ་ལ་བཞག་པ་ནི།  དམ་ཚིག་གི་རྒྱ་བཅིངས་ཏེ་རྡོ་རྗེ་སྤྱི་བོར་བཞག་བདུད་རྩི་ལྗགས་ལ་བྱིན་པར་མོས་ཏེ།}}  ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ།  དཔལ་རྡོ་རྗེ་ནག་པོ་ཆེན་པོ་ལེགས་ལྡན་མ་ནིང་ནག་པོ་ལྕམ་དྲལ་འཁོར་དང་བཅས་པ་རྣམས་ཀྱིས་ཀུན་བཟང་ཧེ་རུ་ཀ་དཔལ།  གསང་བདག་ཕྱག་ན་རྡོ་རྗེ།  སློབ་དཔོན་པདྨ་ཐོད་ཕྲེང་།  རིག་འཛིན་པདྨ {{TibChung|[11a]}} གླིང་པ་ནས་འཁོར་ལོའི་མགོན་པོའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས།  དཀོན་མཆོག་གི་དབུ་འཕང་བསྟོད།  དགེ་འདུན་དང་ཆོས་ཀྱི་རྒྱལ་སྲིད་སྐྱོངས།  འཇིག་རྟེན་གྱི་རྒུད་པ་སོལ།  སེམས་ཅན་གྱི་ཕན་བདེ་སྤེལ།  རྣལ་འབྱོར་པ་རྣམས་ཀྱི་སྟོང་གྲོགས་མཛོད།  སྔགས་འཆང་རྣམས་ཀྱི་ཕྲིན་ལས་སྒྲུབས སྡང་བའི་དགྲ་ཐུལ།  གནོད་པའི་བགེགས་ཆོམས།  ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་།  མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་།  མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག  །ཨོཾ་བཛྲ་ས་མ་ཡ་རཀྵ་ནྟུ་པཉྩ་ཨ་མྲྀ་ཏོ་ད་ཀ་ཋ་ཋ་ཋ་ཧཱུྃ།  {{TibChung|ཞེས་དམ་ལ་བཞག་བས་ཅི་བསྒོ་བའི་ལས་ཐམས་ཅད་སྒྲུབ་ཅིང་བཀའ་ནོད་པར་བསམ།  ལྔ་པ་ཕྱག་བྱ་བ་ནི།}}  ཧཱུྃ།  ཆོས་དབྱིངས་སྐྱེ་བ་མེད་པའི་ཕོ་བྲང་ནས།  །སྐྱེ་བའི་ཆོ་འཕྲུལ་ཁྲོ་རྒྱལ་མ་ནིང་སྐུ།  །མཉམ་མེད་མཐུ་མངའ་གཏུམ་ཆེན་མེ་ལྟར་འབར།  །རུ་དྲ་འཇོམས་མཛད་ {{TibChung|[11b]}} བདུད་དཔུང་ཐལ་བར་རློག  །མཐར་བྱེད་གཞོན་ནུ་འཇིགས་པའི་གད་རྒྱངས་ཅན།  །མ་ཧཱ་ཀཱ་ལ་ཁྱོད་ལ་ཕྱག་འཚལ་ལོ།  །ཨོཾ་ཤྲཱི་མ་ཧཱ་ཀཱ་ལ་ག་ཎ་གུཧྱ་ཨ་ཏི་པུ་ཧོཿ   པྲ་ཏཱིཙྪ་ཧོཿ {{TibChung|ཞེས་ཕྱག་བྱའོ།  །}}  དྲུག་པ་མཆོད་པའང་དྲུག་ལས།  ཕྱི་མཆོད་ནི།  ཧཱུྃ ཡན་ལག་བརྒྱད་ལྡན་ཡིད་འོང་མཆོད་ཡོན་སྦྲེང་།  །རབ་གཙང་དྭངས་པའི་ཞབས་བསིལ་རྒྱ་མཚོར་བསྐྱིལ།  །སྣ་ཚོགས་ལྟ་སྡུག་ཆུ་སྐྱེས་ལང་ཚོ་བཞད།  །གྲུབ་དང་སྦྱར་བའི་བདུག་པ་སྤྲིན་ལྟར་གཏིབས།  །མུན་སྣང་མཐར་བྱེད་སྒྲོན་མེས་ཉིན་མོར་བྱེད།  །ཡིད་འོང་བྱུག་པ་ལྷ་ཡི་ཆུ་བོའི་རྒྱུན།  །རོ་བཅུད་ཕུན་ཚོགས་ཞལ་ཟས་ལྷུན་པོར་སྤུངས།  །སྙན་བརྗིད་རོལ་མོ་སྒྲ་དབྱངས་དང་བཅས་པའི།  །ཕྱི་ཡི་མཆོད་སྤྲིན་འདོད་ཡོན་འཛད་མེད་གཏེར།  །འབུལ་གྱིས་ཚིམ་ཞིང་དགྱེས་ནས་དངོས་གྲུབ་སྩོལ།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་{{TibChung|ནས་}}ཤཔྡའི་{{TibChung|བར་དང་།}}  པཉྩ་ཀཱ་མ་གུ་ཎ་པྲ་ཏཱིཙྪ་སྭཱཧཱ།  {{TibChung|ནང་གི་མཆོད་པ་ནི།}}  ཧཱུྃ།  གདུག་པའི་སྙིང་ཁྲག་མཆོད་ཡོན་མཚོ་ལྟར་བསྐྱིལ།  །མྱོས་བྱེད་དུག་ཁྲག་ཞབས་བསིལ་རྔམས་ཤིང་བརྗིད།  །དབང་པོ་རྣམ་ལྔའི་མེ་ཏོག་ཚར་དུ་དངར།  །ཤ་ཆེན་དུད་པའི་སྤྲིན་ཕུང་ལང་ལོང་གཡོ།  །ཞུན་ {{TibChung|[12a]}} ཆེན་མར་མེ་བསྐལ་པའི་མེ་ལྟར་འབར།  །ཁྲག་ཞག་བདུད་རྩིའི་དྲི་ཆབ་རླབས་ཕྲེང་གཡོ།  །ཤ་ཁྲག་རུས་པའི་ཞལ་ཟས་ཆེ་བརྗིད་རྔམས།  །དྲག་པོའི་རོལ་མོས་ས་གསུམ་འདར་ཞིང་གཡོ།  །དུར་ཁྲོད་ནང་གི་མཆོད་སྤྲིན་བསམ་མི་ཁྱབ།  །འབུལ་གྱིས་ཚིམ་ཞིང་དགྱེས་ནས་དངོས་གྲུབ་སྩོལ།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་ཤྨ་ཤ་ན་པཱུ་ཛ་ཨརྒྷཾ་{{TibChung|ནས་}}ཤཔྡའི་{{TibChung|ར་བརྗོད།  གསང་བའི་མཆོད་པ་ནི།}}  ཧཱུྃ།  སྒྲིབ་པའི་དྲི་མ་ཀུན་སྤངས་ཤིང་།  །རྟོག་པ་ཀུན་ལས་ངེས་གྲོལ་བ།  །བླ་ན་མེད་པའི་བྱང་ཆུབ་སེམས།  །བདེ་བ་ཆེན་པོས་མཉེས་གྱུར་ཅིག  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་ཨ་ནུ་རཱ་ག་པྲ་ཏཱིཙྪ་སྭཱཧཱ།  {{TibChung|སྨན་མཆོད་ནི།}}  ཧཱུྃ།  དམན་པའི་ཡུལ་ལས་རབ་འདས་ཤིང་།  །རྒྱལ་བ་ཀུན་གྱི་དམ་ཚིག་མཆོག  །དངོས་གྲུབ་ཀུན་གྱི་གཞིར་གྱུར་པ།  །བདུད་རྩི་མཆོག་གིས་མཆོད་པར་བགྱི།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི།  {{TibChung|རཀྟའི་མཆོད་པ་ནི།}}  སྟོང་གསུམ་བྷཉྫའི་སྣོད་ཡངས་སུ།  །དམ་ཉམས་བསྒྲལ་བའི་མཱཾ་ས་དང་།  །རཀྟའི་རྒྱ་མཚོ་ཆེན་པོར་བསྐྱིལ།  །བསད་ཁྲག་རྦ་ཀློང་འཁྲུགས་པས་མཆོད།  །ཨོཾ་ཤྲཱི་མ་ཧཱ་ཀཱ་ལ་ས་པ་རི་ {{TibChung|[12b]}} ཝཱ་ར་མ་ཧཱ་རཀྟ་ཁཱ་ཧི།  {{TibChung|གཏོར་མའི་མཆོད་པ་ནི།}}  ཧཱུྃ།  དཔལ་མགོན་མ་ནིང་ནག་པོ་འཁོར་བཅས་དགོངས།  །ཁྱེད་ལ་དགྱེས་པའི་མཆོད་པ་འབུལ་བ་ནི།  །ཐོད་ཆེན་བྷཉྫ་རློན་པའི་སྣོད་མཆོག་ཏུ།  །བ་ལིཾ་གཏོར་མའི་མཆོད་པ་རོངས་སེ་རོང་།  །བདུད་རྩི་སྨན་གྱི་མཆོད་པ་བྲེངས་སེ་བྲེང་།  །རཀྟ་དམར་གྱི་ཨརྒྷཾ་ཆི་ལི་ལི།  །ཛ་གད་གསེར་སྐྱེམས་བཏུང་བ་མེ་རེ་རེ།  །མཱཾ་ས་ཤ་ཆེན་གསུར་དུད་ཐུ་ལུ་ལུ།  །བྷཉྫ་རུས་པའི་ཚོགས་ནི་ཁྲ་ལ་ལ།  །བཟའ་དང་བཅའ་དང་བཏུང་བའི་བྱེ་བྲག་དང་།  །གཟུགས་སྒྲ་དྲི་རོ་རེག་བྱ་ཆོས་ལ་སོགས།  །འདོད་ཡོན་ལྔ་ལྡན་མཆོད་པ་སྣ་ཚོགས་ཀུན།  །དཔལ་མགོན་མ་ནིང་ནག་པོ་འཁོར་བཅས་ལ།  །འབུལ་ལོ་དགྱེས་པར་དགོངས་ཏེ་བཞེས་སུ་གསོལ།  །ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུཾ་ཕཊ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།  {{TibChung|ཞེས་སྤྱིར་ཕུལ་ནས།  བྱེ་བྲག་ཏུ་འབུལ་བ་ནི།}}  ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བས་བདེ་བ་ཆེན་པོའི་རང་བཞིན་དུ་དགྱེས་ཤིང་ཚིམས་པར་{{TibChung|བསམ་ཞིང་རྡོ་རྗེའི་ཐལ་མོ་གྱེན་ཁ་ཕྱེས་ལྷ་སོ་སོའི་སྙིང་པོའི་མཐར།}}  ས་པ་རི་ཝཱ་ར་ཨི་དཾ་བ་ལིཾ་ཏ་{{TibChung|སོགས་གཏོར་སྔགས་ {{TibChung|[13a]}} བཏགས་པ་ལན་གསུམ་མམ་བདུན་གྱིས་འབུལ་ལ།}}  དཔལ་མ་ཧཱ་ཀཱ་ལ་ཁྲག་འཐུང་གི་རྒྱལ་པོ།  གཙུག་ལག་ཁང་དང་དཀྱིལ་འཁོར་གྱི་སྲུང་མ།  དུག་གསུམ་ནད་ཀྱི་སྨན་པ།  རྣལ་འབྱོར་ཡོངས་ཀྱི་དགྲ་ལྷ།  བདུད་དཔུང་སྒྲོལ་བའི་དཔའ་བོ།  བསྟན་པའི་བཀའ་སྲུང་ཆེན་པོ།  ལེགས་ལྡན་ཡེ་ཤེས་ཀྱི་མགོན་པོ་མ་ནིང་ནག་པོ།  ཡུམ་དཔལ་འབར་ཀླུ་མོ།  ཡེ་ཤེས་ཀྱི་མགོན་པོ་སྡེ་ལྔ།  ལས་མགོན་སྲོག་བདུད་ཆེན་པོ་ལ་སོགས་ཏེ་དམ་པ་ཆོས་སྐྱོང་བའི་སྲུང་མ་བཀའ་སྡོད་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས།  {{TibChung|ཞེས་པ་ནས།}}  ཕྲིན་ལས་མཛོད་ཅིག  །{{TibChung|ཅེས་པའི་བར་གྱི་འདོད་དོན་གསོལ།  བདུན་པ་བསྟོད་པ་བྱ་བ་ནི།}}  ཧཱུཾ།  འཇིག་རྟེན་འདས་པའི་དུས་ན་སྔོན་བྱུང་བ།  །ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས།  །སྲིད་རྩའི་བདག་འཛིན་རུ་དྲ་སྡེ་གསུམ་འདུལ།  །རྩལ་ཆེན་ཕྲིན་ལས་མཛད་ལ་ཕྱག་འཚལ་བསྟོད།  །དཔལ་ཆེན་མངོན་སྤྲུལ་ནག་པོ་ཆེན་པོའི་སྐུ།  །འཆོལ་བའི་ཁྲོ་རྒྱལ་མ་ནིང་དགྲ་བགེགས་གཤེད།  །ལྷ་ཆེན་དཔལ་འབར་ཆོས་སྐྱོང་ཡོངས་ཀྱི་རྗེ།  ། {{TibChung|[13b]}} དམག་དཔོན་ཆེན་པོའི་སྐུ་ལ་ཕྱག་འཚལ་བསྟོད།  །དུར་ཁྲོད་ཐོར་མཁར་མེ་རླུང་འཚུབས་དཀྱིལ་ན།  །རྣལ་འབྱོར་དཔལ་མགོན་ཁྱོད་ཀྱི་ཆ་ལུགས་ནི།  །སྐུ་མདོག་མཐིང་ནག་ཞག་གཅིག་ཕྱག་གཉིས་པ།  །སྐུ་གསུམ་ལྡན་ཕྱིར་སྤྱན་གསུམ་གྱེན་ཐུར་གཟིགས།  །རབ་བརྗིད་ཁྲོ་གཉེར་གསུམ་ལྡན་གཏུམ་ལ་རྔམས།  །ཞལ་གདངས་མཆེ་གཙིགས་དྲག་པོའི་རྐན་སྒྲ་རྡེབ།  །རིན་ཆེན་ཐོད་སྐམ་ལྔ་ཡིས་དབུ་ལ་བརྒྱན།  །སྦྲུལ་ནག་རལ་པ་ནག་པོས་ས་གཞི་ཁྱབ།  །གཡས་པ་རུ་མཚོན་གཡོན་པ་སྙིང་ཞགས་བསྣམས།  །ཙནྡན་བིང་ཆེན་སྐེད་བཙུགས་ལྷ་དམག་འགྱེད།  །ཐོད་པ་སྐམ་རློན་སྙིང་ཕྲེང་སྦྲུལ་ཆུན་སྤྲས།  །དར་ནག་བེར་གསོལ་གསེར་སྐེད་མི་ལྤགས་བཅིངས།  །ལེགས་ལྡན་ནག་པོའི་སྐུ་ལ་ཕྱག་འཚལ་བསྟོད།  ཧཱུཾ།  ལས་ལ་ཆས་ཚེ་སྲོག་བདུད་ཆ་ལུགས་འཛིན།  །སྲིད་གསུམ་གཟིགས་ཕྱིར་སྤྱན་གསུམ་བྲང་ལ་ཤར།  །དམག་དཔོན་བཞི་འགྱེད་སྤྱན་བཞིས་ལྷུ་ཚིགས་བརྒྱན།  །སྟག་རལ་གཟིག་ཤུབ་བཏགས་ནས་རྟ་ནག་ཞོན།  བདུད་མདས་དགྲ་སྙིང་གཟེར་འདེབས་གླིང་བཞིར་རྒྱུག  ། {{TibChung|[14a]}} སྤྱན་ནས་ཁྲག་འཛག་མེ་ཡི་ཁ་རླངས་འབར།  །ཁ་ཊྭྰཾ་གྲི་གུག་ལྕགས་པར་ཐོགས་ནས་སུ།  །སྣང་སྲིད་ཕོ་རྒྱུད་ཐམས་ཅད་ཕོ་ཉར་འགྱེད།  །ཅི་བཅོལ་ལས་རྣམས་སྐད་ཅིག་ཡུད་ལ་སྒྲུབ།  །རྟག་ཏུ་གྲོགས་མཛད་མགོན་པོ་ནག་པོ་ཆེ།  །མ་བསྐུལ་བར་ཡང་བརྣག་པའི་དགྲ་བགེགས་སྒྲོལ།  །ལྟག་ན་སྤྱན་གཅིག་མ་ཚོགས་དབང་དུ་སྡུད།  །གར་བསྐུལ་ས་རུ་མི་རོ་རགས་སུ་འཚེར།  །བཟློག་པས་མི་བཟློག་སྔགས་ཟློག་མཁན་གྱི་གཤེད།  །གཙུག་ལག་ཁང་སྲུང་དཀོར་རྐུན་རྩད་ནས་གཅོད།  །བསྟན་པ་གཉན་སྲུང་བཀའ་ཡི་བྱ་ར་བ།  །དྲེགས་པ་ཀུན་འདུས་ཁྱོད་ལ་ཕྱག་འཚལ་བསྟོད།  །བྷྱོ།  མཁའ་ལ་དབང་སྒྱུར་ཡིད་བཞིན་སྤྲུལ་པའི་སྐུ།  །ཡ་མཚན་རྨད་བྱུང་ལུས་ལ་ཏིལ་མར་བྱུགས།  །དཔལ་ལྡན་ལྷ་མོ་གསང་བའི་མཁའ་འགྲོ་མ།  །མ་མོ་འབུམ་སྡེའི་གཙོ་ལ་ཕྱག་འཚལ་བསྟོད།  །དཔལ་ལྡན་མགོན་པོའི་སྐུ་གསུང་ཐུགས་ཡོན་ཏན།  །ཕྲིན་ལས་རྣམ་རོལ་འགག་མེད་ཅིར་ཡང་སྟོན།  །གདུག་ཅན་ཚར་གཅོད་བསྟན་པ་རྗེས་སྐྱོང་བ།  །མགོན་པོ་སྡེ་ལྔའི་སྐུ་ལ་ཕྱག་འཚལ་བསྟོད།  །དཔལ་ལྡན་གཙོ་མོ་ཨེ་ཀ་ཛྰ་ཊི་མ།  །ཞལ་གཅིག་ཕྱག་གཉིས་རུ་ལུའི་སྒྲ་ {{TibChung|[14b]}} སྐད་སྒྲོག  །ཀུན་ཏུ་བཟང་མོ་དབྱིངས་ཀྱི་མ་མོ་མཆོག  །ལས་དང་ཡེ་ཤེས་ཚོགས་ཀྱི་རྗེ་ལ་བསྟོད།  །བཤན་པ་ནག་མོ་མི་ལྤགས་གཡང་གཞི་གསོལ།  །ཕྱག་ན་སྙིང་དང་ནད་ཀྱི་རྐྱལ་པ་བསྣམས།  །ལས་བྱེད་མཁའ་འགྲོ་བྱེ་བའི་ཚོགས་ཀྱིས་བསྐོར།  །ནམ་གྲུ་ནག་མོ་འཇིགས་པའི་ཚོགས་ལ་བསྟོད།  །དྲང་སྲོང་ཆེན་པོ་གཟའ་མཆོག་རཱ་ཧུ་ལ།  །སྐུ་མདོག་དུད་ཀ་དབུ་དགུ་སྤྱན་སྟོང་འབར།  །ཕྱག་བཞི་མདའ་གཞུ་རལ་གྲི་རྒྱལ་མཚན་བསྣམས།  །སྲིང་བཞི་སྡེ་བརྒྱད་འཁོར་དང་བཅས་ལ་བསྟོད།  །གནོད་སྦྱིན་དམར་ནག་ཟངས་ཀྱི་ཁྱུང་དམར་ཆིབས།  །ཞལ་གཅིག་ཕྱག་བཞི་གྲི་གུག་ཐོད་ཁྲག་དང་།  །རལ་གྲི་དགྲ་སྙིང་སྦྲུལ་ནག་ཞགས་པ་བསྣམས།  །དྲག་གཏུམ་ཆེན་པོ་འཁོར་དང་བཅས་ལ་བསྟོད།  །དམ་ཅན་ཆེན་པོ་དམར་ནག་ཐིག་ལེ་རྩལ།  །ཞལ་གཅིག་ཕྱག་གཉིས་རྡོ་རྗེ་དགྲ་སྙིང་བསྣམས།  །ཐོད་ཕྲེང་གཡང་གཞི་སྟག་གི་ཤམ་ཐབས་ཅན།  །སུམ་བརྒྱ་དྲུག་ཅུའི་འཁོར་དང་བཅས་ལ་བསྟོད།  །ཤིན་ཏུ་མི་བསྲུན་བདུད་མོ་རེ་མ་ཏཱི།  །ནམ་མཁའི་མ་དོག་ཅན་དྲེལ་རྟ་རྐང་གསུམ་ཆིབས།  །སྟོད་ཁམས་མྱུལ་ཞིང་སྐྱེ་འགྲོའི་སྲོག་དབུགས་ལེན།  །བསྟན་ {{TibChung|[15a]}} པ་སྲུང་མཛད་མ་ལ་ཕྱག་འཚལ་བསྟོད།  །འགྱུར་མེད་དབྱིངས་ལས་འབར་བའི་སྐུར་སྟོན་པ།  །འགྲོ་བའི་དོན་མཛད་ཐུགས་རྗེ་ཉི་མ་འདྲ།  །དམ་ཉམས་རྩད་གཅོད་ལེགས་ཉེས་གཉེར་ཁ་འཛིན།  །པེ་ཧར་དགྲ་ལྷ་འཁོར་དང་བཅས་ལ་བསྟོད།  །སྔོན་ཚེ་རྒྱལ་བའི་སྤྱན་སྔར་རང་རང་གི།  །སྲོག་སྙིང་ཕུལ་ནས་ཁས་བླངས་དམ་བཅས་ལྟར།  །ཕྲིན་ལས་རྣམ་བཞིས་བསྟན་པ་རྗེས་སྐྱོང་བའི།  །དམ་ཅན་འཁོར་དང་བཅས་ལ་ཕྱག་འཚལ་བསྟོད།  །{{TibChung|ཅེས་པའམ།  །སྤྲོ་ན།}}  ཧཱུྃ།  ཆོས་སྐུ་སྐྱེ་མེད་ཀུན་ཏུ་བཟང་།  །ལོངས་སྐུ་ཆེ་མཆོག་ཧེ་རུ་ཀ  །སྤྲུལ་སྐུ་མ་ནིང་ཁྲོ་བོའི་རྒྱལ།  །གསང་བདག་ཆེན་པོ་སྟོབས་པོ་ཆེ།  །འཆོལ་བའི་ཁྲོ་རྒྱལ་སྲོག་གི་བདུད།  །ལྷ་རྣམས་བསོད་ནས་རྒྱས་མཛད་པའི།  །ལྷ་ཆེན་དཔལ་འབར་ཁྱོད་ལ་བསྟོད།  །ལྷ་མིན་དམག་དཔུང་འཇོམས་མཛད་པའི།  །དམག་དཔོན་ཆེན་པོའི་སྐུ་ལ་བསྟོད།  །སངས་རྒྱས་བསྟན་པ་སྐྱོང་མཛད་པའི།  །སྡེ་དཔོན་ཆེན་པོའི་སྐུ་ལ་བསྟོད།  །{{TibChung|ཅེས་དང་།}}  དཔལ་ལྡན་ལས་ཀྱི་མགོན་པོ་ནི།  །མཐིང་ནག་གྲི་གུག་ལྕགས་པར་ཐོགས།  ། {{TibChung|[15b]}} ཁ་ཊྭཱྃ་བདུད་མདངས་དགྲ་སྙིང་གཟེར།  །རྟ་ནག་ཞོན་ནས་རྒྱུག་ལ་བསྟོད།  །མ་གཅིག་ལྷ་མོ་དཔལ་འབར་མ།  །སྤུ་གྲི་འཕྱར་ཞིང་ཀླད་ཁྲག་ལྡགས།  །མི་ལྤགས་གོས་གྱོན་ཐོད་ཕྲེང་འཕྱང་།  །ཨུ་མ་དེ་བཱིའི་སྐུ་ལ་བསྟོད།  །སྐུ་ལས་སྤྲུལ་པའི་མགོན་པོ་ནི།  །ནག་པོ་སྟག་ཞོན་མི་བཟད་པ།  །ཙནྡན་བེང་གསོར་བདུད་ཞགས་འཕེན།  །གཏུམ་པོ་འཇིགས་བྱེད་ཁྱོད་ལ་བསྟོད།  །མ་འགགས་གསུང་གི་རོལ་པའི་རྩལ།  །བིང་ཆེན་དམར་སྨུག་ཁྲོས་པའི་ཞལ།  །ཙནྡན་བེང་དང་ལྕགས་པར་འཛིན།  །བདུད་འདུལ་མཐུ་ཆེན་ཁྱོད་ལ་བསྟོད།  །ཐུགས་ཀྱི་སྒྱུ་མ་ཆེན་པོའི་འཕྲུལ།  །ལྷ་མིན་གཡུལ་ཟློག་ནག་པོ་ཆེ།  །ཕྱག་ན་གྲི་གུག་ཐོད་ཁྲག་བསྣམས།  །ཁྲག་འཐུང་དཔའ་བོ་ཁྱོད་ལ་བསྟོད།  །ཡོན་ཏན་མགོན་པོ་ལེགས་ལྡན་ཆེ།  །གཏུམ་དྲག་བཟོད་དཀའི་གཟི་བརྗིད་ཅན།  །མཐིང་ནག་རིན་ཆེན་ཐོད་ཁྲག་འཛིན།  །གདུག་པ་འདུལ་མཛད་ཁྱོད་ལ་བསྟོད།  །ཕྲིན་ལས་དྲག་ཤུལ་ཆེན་པོའི་རྩལ།  །ཏྲག་ཤད་བདུད་མགོན་མ་རུངས་པ།  །ཙནྡན་བེང་དང་དགྲ་སྙིང་འཛིན།  །དགྲ་བགེགས་གཤེད་མ་ཁྱོད་ལ་བསྟོད།  །སྨུག་ནག་ཁྲོས་མ་རལ་ {{TibChung|[16a]}} གཅིག་མ།  །ཞིང་དབྱུག་འཕྱར་ཞིང་དགྲ་སྙིང་ཟ།  །འཇའ་སྤྲིན་གོས་གྱོན་མི་ལྤགས་འཕྱང་།  །སྔགས་སྲུང་ཆེན་མོ་ཁྱོད་ལ་བསྟོད།  །དཔལ་ལྡན་བཤན་པ་མི་བསྲུན་མ།  །གཅེར་མོ་དོན་སྙིང་ཟ་ཞིང་རྒྱུག  །དགྲ་བགེགས་མྱོས་བྱེད་རིམས་ནད་འབེབས།  །ནམ་གྲུ་ནག་མོ་ཁྱོད་ལ་བསྟོད།  །གཏུམ་ཆེན་གཟའ་བདུད་སྲིན་པོའི་གཟུགས།  །མགོ་དགུ་རྒྱལ་མཚན་སྦྲུལ་ཞགས་དང་།  །མདའ་གཞུ་འགེང་ཞིང་ཐོག་སེར་འབེབས།  །སྡེ་བརྒྱད་དམག་དཔོན་ཁྱོད་ལ་བསྟོད།  །སྒྲོལ་གིང་བཤན་པ་དམར་ནག་ནི།  །གྲི་ཐོད་འཛིན་ཞིང་རལ་གྲི་གདེངས།  །བསྟན་དགྲའི་སྙིང་འབྱིན་སྤྲུལ་ཞགས་འཕེན།  །གནོད་སྦྱིན་ཆེན་པོ་ཁྱོད་ལ་བསྟོད།  །དམ་ཅན་སྐྱེས་བུ་གིང་གི་བདག  །དམར་ནག་རྡོ་རྗེ་དགྲ་སྙིང་འཛིན།  །ཟ་འོག་བེར་གྱོན་ར་སྐྱེས་ཞོན།  །མཐུ་ཆེན་དྲེགས་པ་ཁྱོད་ལ་བསྟོད།  །འདོད་ཁམས་དབང་ཕྱུག་རེ་མ་ཏཱི།  །ལག་ན་ཁྲམ་ཤིང་ཐོད་པ་འཛིན།  །དྲེལ་རྟ་ཞོན་ནས་སྟོང་གསུམ་མྱུལ།  །ནག་མོ་སྟོང་གི་གཙོ་ལ་བསྟོད།  །སྤྲུལ་པའི་ལས་མཁན་གིང་གི་གཙོ།  །བདུད་ཞགས་དགྲ་འཆིངས་སྤུ་གྲིས་གཅོད།  ། {{TibChung|[16b]}} སེང་གེ་ཞོན་ནས་སྟོང་གསུམ་ཉུལ།  །བེ་ཧར་དགྲ་ལྷ་ཁྱེད་ལ་བསྟོད།  །ཧེ་རུ་ཀ་དཔལ་སྤྱན་སྔ་རུ།  །དམ་བཅས་ཇི་བཞིན་ད་ལྟ་འདིར།  །བསྟན་པ་སྲུང་ཞིང་སྐྱོང་མཛད་པའི།  །དམ་ཅན་ཀུན་ལ་བསྟོད་པར་བགྱི།  །{{TibChung|ཞེས་བསྟོད་པར་བྱའོ།  །ཆོས་སྐྱོང་གཞན་འགའ་ཞིག་གི་མཆོད་གཏོར་བྱ་བར་འདོད་ན་ཡེ་ཤེས་པའི་རིགས་རྣམས་སྔོན་དང་དེའི་རྗེས་ལ་འཇིག་རྟེན་པའི་རིགས་རྣམས་དང་གཏེར་བདག་སྤྱི་གཏོར་དང་གཞི་བདག་སྤྱི་གཏོར་གྱི་བར་རིམ་པ་བཞིན་སྐབས་འདིར་བྱའོ།  །བརྒྱད་པ་བཟླས་པ་བྱ་བ་ནི།}}  མགོན་པོ་འཁོར་བཅས་ཀྱི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་ལ་སོགས་པའི་མཐར་རང་རང་གི་སྲོག་སྔགས་རིགས་ཀྱི་ཁ་དོག་ཅན་གྱིས་བསྐོར་བ།  བདག་བསྐྱེད་ཀྱི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་ཀྱི་རྒྱུད་རབ་ཏུ་བསྐུལ་བས་ཅི་འདོད་བའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་{{TibChung|མོས་ལ་གོང་གནོན་གྱི་ཡི་དམ་གྱི་བཟླས་པ་སྔོན་དུ་འགྲོ་བས་བཟླ་བྱའི་སྔགས་ནི།}}  ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུཾ་ཕཊཿ{{TibChung|ཅེས་གཙོ་བོའི་སྙིང་པོའོ།  །}}  ཨོཾ་ཤྲཱི་མ་ཧཱ་ཀཱ་ལ་རཱུ་པ་ཏྲི་ཡཾ་ཧཱུྃ་ཛཿ{{TibChung|སྐུ་མགོན་ནོ།  །}}  ཨོཾ་ཤྲཱི་མཧཱ་ཀཱ་ལ་རཀྵ་དུ་བེང་ནི་ཛཿ{{TibChung|གསུང་མགོན་ནོ།  །}}  ཨོཾ་ཤྲཱི་མ་ཧཱ་ཀཱ་ལ་ཀྵེ་ཏྲ་ཧ་ན་ཧཱུྃ་ཕཊ༔  {{TibChung|ཐུགས་མགོན་ནོ།  །}}  ཨོཾ་ཤྲཱི་མ་ཧཱ་ཀཱ་ལ་སི་ཧཾ་རཾ་ཧཱུྃ་ཕཊ༔  {{TibChung|ཡོན་ཏན་མགོན་པོའོ།  །}}  ཨོཾ་ {{TibChung|[17a]}} ཤྲཱི་མ་ཧཱ་ཀཱ་ལ་ཏྲ་ཀྴད་ཧཱུྃ་ཛཿ{{TibChung|ཕྲིན་ལས་མགོན་པོའོ།  །}}  ཨོཾ་ཤྲཱི་མ་ཧཱ་ཀཱ་ལ་ཏྲི་ཡཾ་རུ་དྲ་ནག་པོ་ཛཿ  ཏྲི་ལིང་གིང་ཀ་ར་རཱ་ཛ་སུ་ཏྲི་ཛཿཛཿ{{TibChung|སྲོག་བདུད་དོ།  །}}  ཨོཾ་མ་མ་ཨེ་ཀ་ཛྰ་ཊི་ཏྲག་རཀྴ་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཧྰུྃཿ{{TibChung|སྔགས་སྲུང་མའོ།  །}}  ཨོཾ་ཁྱི་ཁ་ལེ་ནག་མོ་སོད་སྲོག་མ་ཏི་སོད༔  {{TibChung|སྲོག་སྒྲུབ་མའོ།  །}}  ཧྲཱི་ཤག་རུ་རག་རཾན་གེ་ཙིཏྟ་ཏྲཾ་མ་མ་ཡོ་ཟ་གྲ་མ་ཧ་ཧི་ཡེ་གེ་ཤ་ལ་ཛ་ཛཿ{{TibChung|ཞེས་གཟའ་བདུད་དོ།  །}}  ཨེ་རྨེ་རུ་ཙེ་གུ་ཎ་ཧྲཱི་ཏྲི་གྷྲཾ་བྷྱོཿ{{TibChung|ཞེས་གནོད་སྦྱིན་ནོ།  །}}  ཨོཾ་བཛྲ་སྰ་དྷུ་ས་མ་ཡ་ཛཿཛཿ{{TibChung|ཞེས་དམ་ཅན་དང་།}}  ཨོཾ་མ་མ་ཏྲག་རཀྨོ་རཀྴ་རུ་ཏི་ཧཱུྃ་ཧཱུྃ་ཕཊ་སྭཱ་ཧཱ།  {{TibChung|རེ་ཏིའོ།  །}}  ཨོཾ་རཱ་ཛ་ཨ་ཧོ་བྷྲཱུྃ་རྦད༔  ཙིཏྟ་ཐིབས་ཐིབས་ཛཿ  མ་དུ་ཏྲི་མ་ཧོ་ཛཿསརྦ་རཱ་ཛ་ས་མ་ཡ་ཐིབས་ཐིབས་ཛ༔  {{TibChung|པེ་ཧར་གྱིའོ།  །དེ་ལྟར་གཙོ་འཁོར་རྣམས་ཀྱི་སྔགས་རྣམས་སྐབས་དང་སྦྱར་ནས་ཅི་ཙམ་མ་ནུས་བ་བཟླ་ཞིང་།  གཙོ་སྔགས་ནི་རྒྱུད་ལས།  བྱེ་བ་ཐེམས་ན་ལས་ཀུན་འགྲུབ།  །ཅེས་གསུངས་པ་དང་།  ལས་སྦྱོར་གྱི་སྔགས་ནི་མན་ངག་གི་གནད་ཤེས་པས་གཞན་དུ་འབྱུང་བ་བཞིན་བཟླའོ།  །བཟླས་པ་རྫོགས་པའི་མཐར།}}  ཨོཾ་ཤྲཱི་བཛྲ་དྷརྨ་པཱ་ལ་ས་པརི་ཝཱ་ར་ཨརྒྷཾ་{{TibChung|ནས་}}ཤཔྡའི་{{TibChung|བར་གྱིས་མཆོད་ཅིང་འདོད་པའི་དོན་ལ་གསོལ་བ་གདབ།  དགུ་པ་ཚོགས་ཀྱི་མཆོད་པ་ནི།  བདག་བསྐྱེད་གང་ལ་བརྟེན་པ་དེའི་གཞུང་བཞིན་སྦྱར་བར་བྱའོ།  །གཉིས་པ་ཁྱད་པར་སྐབས་ཀྱི་ཕྲིན་ལས་སྒྲུབ་ {{TibChung|[17b]}} པ་ལ་སྐོང་བཤགས་དང་།  དྲག་ལས་བསྒྲུབ་པ་གཉིས་ལས།  དང་པོ་ལ་གསུམ་ལས།  སྐོང་བ་ནི།  སྐོང་རྫས་རྣམས་}}ཨ་མྲྀ་ཏ{{TibChung|ས་བསང་།}}  སྭ་བྷཱ་ཝ{{TibChung|ས་སྦྱང་།}}  སྟོང་པའི་ངང་ལས་བྷྲྰུྃ་ལས་གནས་ཁང་དུར་ཁྲོད་དྲག་པོའི་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱི་རྣམ་པ་མཁོ་དགུ་ཚང་བ།  བཟང་དགུས་འབྱོར་བ།  མཛེས་དགུས་བརྒྱན་པ།  ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་གང་བར་གྱུར།  ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ།  བཛྲ་སྥ་ར་ཎ་ཁཾ།  {{TibChung|ཞེས་པས་བྱིན་གྱིས་བརླབ་ཅིང་ཟད་མི་ཤེས་པར་སྤེལ་ལ།  སྙན་པའི་རོལ་མོ་དབྱངས་ཀྱི་འགྱུར་བ་དང་བཅས་པས།}}  ཧཱུྃ།  བདག་ནི་རིག་འཛིན་སྒྲུབ་པ་པོ།  །{{TibChung|གཏེར་གཞུང་ལས་བྱང་བཞིན་ལ་ཚིག་དངོས་བཅོས་མེད་ལས་ཅུང་ཟད་བསྡུས་པའོ།  །}}  བདག་ནི་རྣལ་འབྱོར་དམ་ཚིག་ཅན།  །དམ་ལ་གནས་ཤིང་ལྷ་ལ་ཕྲེང་།  །ཁྱོད་ནི་སྲུང་མ་ཐུགས་དམ་ཅན།  །ཁྱོད་ནི་མཐུ་རྩལ་དྲག་ཤུལ་ཅན།  །དགོངས་ཤིག་ལེགས་ལྡན་ནག་པོའི་ཚོགས།  །སྔོན་ཚེ་ {{TibChung|[18a]}} དཔལ་ཆེན་སྤྱན་སྔ་རུ།  །བསྟན་པ་བསྲུང་བར་ཞལ་བཞེས་པ།  །ཁྱོད་ཀྱི་དམ་བཅའ་གཉན་པོ་དེ།  །ད་ལྟ་རྣལ་འབྱོར་བདག་བསྐུལ་ན།  །བསྒྲུབ་ཅིང་བསྐུལ་ཕྱིར་གཤེགས་སུ་གསོལ།  །མ་ཧཱ་ཀཱ་ལ་གནས་འདིར་བྱོན།  །ལྷ་ཆེན་དཔལ་འབར་གནས་འདིར།  །ཆོས་སྐྱོང་ཆེན་པོ་གནས།  །ལེགས་ལྡན་ནག་པོ།  །རིག་འཛིན་སྲུང་མ།  །མ་ནིང་ནག་པོ།  །སྲོག་བདུད་ཆེན་པོ།  །བདུད་རྒྱལ་ཐོད་ཕྲེང་།  །སྲིང་གཅིག་ལྷ་མོ།  །འདོད་ཁམས་གཙོ་མོ།  །འཁོར་ཚོགས་རྒྱ་མཚོ་གནས་འདིར་བྱོན།  །ཀྱཻ།  གསོན་དང་མ་ཧཱ་ཀཱ་ལའི་ཚོགས།  །ཉོན་དང་ཆོས་སྐྱོང་ནག་པོ་ཆེ།  །ཉོན་དང་མགོན་པོ་ཐོད་ཕྲེང་ཅན།  །རྒྱལ་བའི་བཀའ་ལ་མི་བདེན་མེད།  །ཟབ་མོའི་དོན་ལ་མི་སེམས་མེད།  །མནའ་དང་ཁྲིམས་ལ་མི་བརྟེན་མེད།  །ཟས་དང་སྐོམ་ལ་མི་ཆགས་མེད།  །ནག་པོ་འཁོར་བཅས་དགོངས་སུ་གསོལ།  །དོ་ནུབ་ཁྱོད་ཀྱི་ཐུགས་དམ་བསྐང་།  །དོ་ནུབ་ཉམས་ཆག་མ་ལུས་བསྐང་།  །དོ་ནུབ་ཞིག་རལ་མ་ལུས་གསོ།  །དོ་ནུབ་གནོང་འགྱོད་མ་ལུས་བཤགས།  །དོ་ནུབ་ལྷ་ལ་སེམས་ {{TibChung|[18b]}} འཁོན་སྦྱོང་།  །དོ་ནུབ་མཉེས་པའི་མཆོད་པ་འབུལ།  །ཁྱེད་ཀྱི་ཐུགས་དམ་བསྐང་བ་ནི།  །བཤོས་ནག་རྒྱན་ལྡན་གཏོར་མས་བསྐང་།  །རཀྟ་དམར་གྱི་ཨརྒྷས་བསྐང་།  །བདུད་རྩི་སྨན་གྱི་མཆོད་པས་བསྐང་།  །མཚན་ལྡན་ཤེལ་སྒོང་འབྲས་བུས་བསྐང་།  །སྣང་གསལ་མདངས་ལྡན་མར་མེས་བསྐང་།  །ཞལ་ཟས་ཚོགས་མཆོད་མང་པོས་བསྐང་།  །ལུག་ནག་སྤྱི་དཀར་འདི་ཡིས་བསྐང་།  །ཁྱི་ནག་གསེར་མིག་འདི་ཡིས་བསྐང་།  །རྟེན་རྫས་འཕྱར་དར་ནག་པོས་བསྐང་།  །མདའ་ནག་རྒོད་སྒྲོ་སྐུ་ཡི་རྟེན།  །རཀྟ་དམར་པོ་གསུང་གི་རྟེན།  །ཙིཏྟ་སྙིང་ཆེན་ཐུགས་དམ།  །འབོད་པའི་དམ་རྫས་ཡིན་པའི་ཕྱིར།  །གཡབ་དར་ནག་པོས།  །དམ་ཚིག་གཉན་པོ་བསྲེ་བའི་ཕྱིར།  །བདུད་རྩི་སྨན་གྱིས།  །དགྱེས་པའི་དམ་རྫས་ཡིན་པའི་ཕྱིར།  །ཁྱི་ནག་སྙིང་གིས།  །མཱྃ་ས་ཟས་སུ་ཟ་བའི་ཕྱིར།  །ཙིཏྟ་སྙིང་གིས།  །མྱོས་བྱེད་སྐོམ་དུ་འཐུང་བའི་ཕྱིར།  །ཛ་གད་ {{TibChung|[19a]}} ཕུད་ཀྱིས།  །ཤངས་ཀྱི་དབང་པོ་ཚིམ་པའི་ཕྱིར།  །གསུར་ཆེན་དུད་པས།  །ལྗགས་ཀྱི་དབང་པོ་ཚིམ་པའི་ཕྱིར།  །དམར་ནག་བཤོས་བུས།  །སྤྱན་གྱི་དབང་པོ་ཚིམ་པའི་ཕྱིར།  །སྣང་གསལ་མར་མེས།  །སྙན་གྱི་དབང་པོ་ཚིམ་པའི་ཕྱིར།  །རོལ་མོ་སྒྲ་ཡིས།  །རྟག་ཏུ་མི་འབྲལ་འགྲོགས་པའི་ཕྱིར།  །གཏའ་གཏོར་ཆེན་པོས།  །རྒྱུན་དུ་ཕྲིན་ལས་བཅོལ་བའི་ཕྱིར།  །རྒྱུན་གཏོར་ནར་མས།  །མཐུན་པའི་དམ་རྫས་ཡིན་པའི་ཕྱིར།  །ལུག་ནག་སྤྱི་དཀར།  །སྒྲུབ་པའི་དམ་རྫས་ཡིན་པའི་ཕྱིར།  །གྲི་རྒོད་སྙིང་གིས།  །གཞན་ཡང་དཔལ་གྱི་གཏོར་མ་ལ།  །ཡེ་ཤེས་ལྔ་ཡི་རྒྱན་གྱིས་བརྒྱན།  །རྣལ་འབྱོར་ཡོངས་ཀྱི་གླུད་དུ་འབུལ།  །གཉིས་མེད་དོན་གྱི་ཞངས་པ་སྩོལ།  །མདའ་ནག་སྟོང་དམར་བཅུ་གསུམ་ལ།  །རྡོ་རྗེ་བོ་ཅོན་གྲི་གུག་རིས།  །ཕྱག་མཚན་མང་པོས་བརྒྱན་བྱས་ནས།  །ལེགས་ལྡན་ནག་པོའི་སྐུ་གསུང་ཐུགས།  །རྣལ་འབྱོར་ལུས་ངག་ཡིད་ཀྱི་གླུད།  །ཐབས་ཀྱི་རང་བཞིན་མདའ་ནག་དང་།  །ཤེས་རབ་རང་བཞིན་རྒྱལ་མཚན་གཉིས།  །གཉིས་མེད་དོན་ {{TibChung|[19b]}} རྟོགས་ཆོས་ཀྱི་སྐུ།  །གཉིས་སུ་མེད་པར་ཐུགས་དམ་བསྐང་།  །ཡང་གཅིག་མགོན་པོའི་ཐུགས་དམ།  །ཆོས་སྐྱོང་ཆེན་པོའི།  །མ་ནིང་ནག་པོའི།  །མགོན་པོ་སྡེ་ལྔའི་མ་གཅིག་ལྷ་མོའི༴   །སྲོག་བདུད་ཆེན་པོའི།  །སྒྲོལ་གིང་ཆེན་པོའི།  །དམ་ཅན་ཆེན་པོའི།  །རེ་ཏཱི་ཆེན་པོའི།  །པེ་ཧར་དགྲ་ལྷའི།  །བདུད་ཁ་དགྲ་ལ་བསྒྱུར་བའི་ཕྱིར།  །དཔལ་ལྡན་ནག་པོའི་ཐུགས་དམ་བསྐང་།  །དགྲ་བགེགས་གནས་ནས་འགུགས་པའི་ཕྱིར།  །ཕྱག་བརྙན་ཆེན་པོའི།  །དགྲ་བོ་ཆམ་ལ་དབབ་པའི་ཕྱིར།  །བདུད་ཀྱི་དམག་ཚོགས།  །དགྲ་བོའི་སྲོག་རྩ་གཅོད་པའི་ཕྱིར།  །མོན་པ་ཚོགས་ཀྱི།  །སྔོན་གྱི་ལམ་སྣ་འདྲེན་པའི་ཕྱིར།  །མོན་པའི་བརྒྱད་ཀྱི།  །གཡས་ཀྱི་རུ་སྣ་དྲང་བའི་ཕྱིར།  །གཤིན་རྗེ་བརྒྱད་ཀྱི།  །གཡོན་གྱི་རུ་སྣ་དྲང་བའི་ཕྱིར།  །གནོད་སྦྱིན་བརྒྱད་ཀྱི།  །སླད་ཀྱི་རྗེས་ཤུལ་འབྲང་བའི་ཕྱིར།  །ནད་གཏོང་མ་མོའི།  །དམག་གི་རུ་མཚོན་འཕྱར་བའི་ཕྱིར།  །ལྷ་དམག་འབུམ་གྱི།  །ཕྱོགས་སྐྱོང་བཅུ་ཡི་ཐུགས་དམ༴   །{{TibChung|རྒྱལ་ཆེན་བཞི་ཡི༴   །ལྷ་ཆེན་བརྒྱད་ཀྱི༴   །གཟའ་ཆེན་བརྒྱད་ཀྱི༴   །}}   {{TibChung|[20a]}} རྒྱུ་སྐར་ཉེར་བརྒྱད༴   །འཇིགས་བྱེད་དགུ་ཡི༴   །ཐུགས་དམ་གཉན་པོ་བསྐང་བ་ཡིས།  །ལྷ་དང་མི་འབྲལ་གྲིབ་ལྟར་འགྲོགས།  །རྣལ་འབྱོར་བདག་དང་བདག་གི་འཁོར།  །ཐུབ་པར་སྲུངས་ཤིག་ཐུགས་དམ་ཅན།  །ཐུགས་དམ་སྐོང་ལ་གཡར་དམ་སྩོལ།  །{{TibChung|ཞེས་དང་།  གཞན་ཡང་།}}  ཧཱུྃ།  རྣམ་དག་དབྱིངས་ལས་མ་གཡོས་ཀྱང་།  །ཐུགས་རྗེས་ཁྲོ་བོའི་སྐུར་སྟོན་ཅིང་།  །བདུད་དཔུང་འཇོམས་མཛད་ཧེ་རུ་ཀ  །མཐུ་ཆེན་དཔའ་བོའི་ཐུགས་དམ་བསྐང་།  །མིག་སྨན་མདངས་ཅན་རྟ་མཆོག་སོགས།  །ཕྱི་ཡི་རྟེན་གྱིས་ཐུགས་དམ༴   །འདོད་ཡོན་བྱ་རོག་རྒྱལ་མཚན་བཅས།  །ནང་གི་རྟེན་གྱིས།  །གྲི་སྙིང་སྲོག་གི་འཁོར་ལོ་སོགས།  །གསང་བའི་རྟེན་གྱིས༴   །འབོད་པའི་དམ་རྫས་ཡིན་པའི་ཕྱིར།  །གཡབ་དར་ནག་པོས།  །གཤེགས་པའི་དམ་རྫས་ཡིན་པའི་ཕྱིར།  །དབྱངས་རྔ་རོལ་མོས།  །གནས་ཀྱི་དམ་རྫས་ཡིན་པའི་ཕྱིར།  །ཐོད་མཁར་འབར་བས།  །བཞུགས་པའི་དམ་རྫས་ཡིན་པའི་ཕྱིར།  །པད་ཉི་རོ་ཡིས༴   །རྒྱན་གྱི་དམ་རྫས་ཡིན་པའི་ཕྱིར།  །དུར་ཁྲོད་ཆས་ཀྱིས།  །དགྱེས་པའི་དམ་རྫས་ཡིན་པའི་ཕྱིར།  །བདུད་ {{TibChung|[20b]}} རྩི་སྨན་གྱིས༴   །ངོམས་པའི་དམ་རྫས་ཡིན་པའི་ཕྱིར།  །དམར་ཆེན་རཀྟས༴   །ཚིམ་པའི་དམ་རྫས་ཡིན་པའི་ཕྱིར།  །དཔལ་གྱི་གཏོར་མས༴   །མཐུན་པའི་དམ་རྫས་ཡིན་པའི་ཕྱིར།  །སྣ་ཚོགས་ནོར་གྱིས༴   །བརྟེན་པའི་དམ་རྫས་ཡིན་པའི་ཕྱིར།  །གཟུགས་རྟེན་བླ་རྡོས༴   །བཟའ་བའི་དམ་རྫས་ཡིན་པའི་ཕྱིར།  །ཤ་ཆེན་སྣ་ལྔས༴   །བཏུང་བའི་དམ་རྫས་ཡིན་པའི་ཕྱིར།  །བདུད་རྩི་སྣ་ལྔས༴   །མཆོད་པའི་དམ་རྫས་ཡིན་པའི་ཕྱིར།  །སྲིད་ཞིའི་འབྱོར་པས༴   །སྐུ་ཡི་ཐུགས་དམ་བསྐང་བའི་ཕྱིར།  །ཕྱག་རྒྱ་གསལ་རྫོགས༴   །གསུང་གི་ཐུགས་དམ་བསྐང་བའི་ཕྱིར།  །རླུང་སྔགས་བཟླས་པས༴   །ཐུགས་ཀྱི་ཐུགས་དམ་བསྐང་བའི་ཕྱིར།  །གསལ་བརྟན་ཏིང་འཛིན༴   །ཡོན་ཏན་ཐུགས་དམ་བསྐང་བའི་ཕྱིར།  །འདོད་ཡོན་མཁོ་རྒུས༴   །ཕྲིན་ལས་ཐུགས་དམ་བསྐང་བའི་ཕྱིར།  །ལས་སྦྱོར་འབད་བས༴   །བསྐང་ངོ་གསོལ་ལོ་ཐུགས་དམ་བསྐང་།  །དཔལ་འབར་མ་ཧཱ་ཀཱ་ལ་དང་།  །སྤྲུལ་པ་རྣམ་ལྔ་མཐུ་ཆེན་བརྒྱད།  །འཁོར་དང་བཅས་པས་ཐུགས་དམ་བསྐང་།  །ཐུགས་དམ་གཉན་སྐོང་དངོས་གྲུབ་སྩོལ།  །{{TibChung|ཞེས་བསྐང་ཞིང་གོང་དུ་མཆོད་གཏོར་ཕུལ་བའི་ཆོས་སྐྱོང་གཞན་གྱི་སྐོང་གསོ་བྱེད་དགོས་ན་ཡང་སྔར་གྱི་རིམ་པ་ {{TibChung|[21a]}} བཞིན་སྐབས་འདིར་སྦྲེལ་ལོ།  །གཉིས་པ་བཤགས་པ་བྱ་བ་ནི།}}  ཧོཿ རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་།   །ཐུགས་རྗེའི་དབང་གིས་འབར་བའི་སྐུར་བཞེངས་པ།  །རྒྱལ་བའི་བསྟན་སྲུང་དམ་ཅན་རྒྱ་མཚོའི་ཚོགས།  །འཁོར་བཅས་བདག་ལ་གསན་ཅིང་དགོངས་སུ་གསོལ།  །བདག་ཅག་བླུན་རྨོངས་མ་རིག་འཁྲུལ་པའི་ཡིད།  །ལས་དང་ཉོན་མོངས་བག་ཆགས་ཀྱིས་དཀྲུགས་པས།  །ལྷ་ཁྱོད་བསྙེན་ཅིང་བསྒྲུབ་པར་དམ་བཅས་ཀྱང་།  །སྐུ་ཡི་ཕྱག་རྒྱ་མ་གསལ་དོན་མ་རྟོགས།  །སྔགས་ཀྱི་བཟླས་བརྗོད་མ་དག་ལྷག་ཆད་འཁྲུགས།  །ཡིད་ཀྱི་ཏིང་འཛིན་བྱིང་རྒོད་རྟོག་པས་བསླད།  །དམ་རྫས་མ་ཚང་རྟེན་རྫས་མ་ཚོགས་དང་།  །རྒྱུ་ཆུང་ཕུད་ཉམས་འབག་བཙོག་དྲི་མས་གོས།  །དུས་ཀྱི་མཆོད་གཏོར་འགྱངས་ཤིང་ཆག་པ་དང་།  །བསྙེན་སྒྲུབ་གཡེལ་ཞིང་ལས་སྦྱོར་ལོག་པ་སོགས།  །རྩ་བ་ཡན་ལག་དམ་ཚིག་ཉམས་པ་ཀུན།  །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས།  །མཐོལ་བཤགས་བཟོད་པ་དང་དུ་བཞེས་ནས་ཀྱང་།  །ཉམས་ཆག་སྒྲིབ་པའི་ཚོགས་རྣམས་ཀུན་བྱང་སྟེ།  །འགྱུར་མེད་ཚངས་པ་མཆོག་གི་ {{TibChung|[21b]}} དངོས་གྲུབ་སྩོལ།  །{{TibChung|ཞེས་དང་འཁོན་གཅུགས་སྦྱོང་བའི་དམིགས་པ་དང་སྦྱར་ཏེ་ཡི་གེ་བརྒྱ་པ་ལན་གསུམ་སོགས་བཟླས་པས་བཤགས་པར་བྱའོ།  །གསུམ་པ་ཕྲིན་ལས་གསོལ་བ་ནི།}}  ཧཱུྃ།  རྒྱལ་བའི་བསྟན་སྲུང་རྡོ་རྗེ་ནག་པོ་ཆེ།  །ལྕམ་དྲལ་བཀའ་སྡོད་འཁོར་དང་བཅས་རྣམས་ལ།  །ཕྲིན་ལས་རབ་འབྱམས་གསོལ་དང་བསྐུལ་བའི་ཕྱིར།  །མཆོད་སྤྲིན་རྒྱ་མཚོ་བསྟབས་པས་དགྱེས་གྱུར་ཏེ།  །ཀུན་བཟང་ཧེ་རུ་ཀ་དཔལ་དཔའ་བོ་ཆེ།  །དཀྱིལ་འཁོར་རྒྱ་མཚོའི་ཁྱབ་བདག་པདྨ་འབྱུང་།  །མཆོག་གི་ས་བརྙེས་རྡོ་རྗེའི་རིག་འཛིན་ཚོགས།  །རིམ་པར་བྱོན་པའི་རྩ་བརྒྱུད་བླ་མ་ཡིས།  །རྒྱུད་གསུམ་དམ་ཅན་དྲེགས་པའི་དཔུང་ཚོགས་རྣམས།  །ཕྱི་ནང་གསང་བའི་འདོད་ཡོན་རྒྱ་མཚོས་མཆོད།  །བསྙེན་ཅིང་བསྒྲུབས་ནས་དབང་བསྐུར་དམ་བཞག་པའི།  །ཞལ་བཞེས་ཐུགས་དམ་གཡེལ་བར་མ་མཛད་པར།  །སྲིད་ཞིའི་ཕུན་སུམ་ཚོགས་ཀུན་འབྱུང་བའི་གཞི།  །རྒྱལ་བའི་བསྟན་པ་ཕྱོགས་བཅུར་རྒྱས་པ་དང་།  །དེ་འཛིན་ལུང་རྟོགས་བཤད་སྒྲུབ་ཀྱིས་འཚོ་བའི།  །བསྟན་འཛིན་ཡར་ངོའི་ཟླ་ལྟར་འཕེལ་བར་མཛོད།  །མཁའ་མཉམ་འགྲོ་བའི་ཉེར་འཚེ་ཀུན་ཞི་ཞིང་།  །དགེ་བཅུའི་འབྱོར་པ་རྒྱ་མཚོས་ {{TibChung|[22a]}} འཚོ་བ་དང་།  །འཇིག་རྟེན་ཁམས་ཀྱི་སྣོད་བཅུད་ལེགས་ཚོགས་ཀུན།  །རབ་འཕེལ་རྫོགས་ལྡན་དཔལ་གྱིས་མཐོ་བར་མཛོད།  །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི།  །ནད་གདོན་བགེགས་དང་བར་དུ་གཅོད་པ་སོགས།  །ཕྱི་ནང་མི་མཐུན་རྒུད་པ་ཀུན་ཞི་ཞིང་།  །བདུད་སྡེའི་གཡུལ་ལས་རྣམ་པར་རྒྱལ་བར་མཛོད།  །ཚེ་དང་བསོད་ནམས་དཔལ་འབྱོར་ལོངས་སྤྱོད་སྟོབས།  །ཐོས་བསམ་སྒོམ་པ་འཕེལ་ཞིང་རྒྱས་པ་དང་།  །ས་གསུམ་འགྲོ་བ་རྣམས་དང་དེ་དག་གིས།  །ཕུན་ཚོགས་དཔལ་ཀུན་དབང་དུ་བསྡུ་བར་མཛོད།  །མི་བསྲུན་ལོག་བར་སེམས་པའི་དགྲ་དང་བགེགས།  །ནག་ཕྱོགས་བདུད་སྡེའི་དཔུང་དང་བཅས་པ་རྣམས།  །ཕྲིན་ལས་དྲག་པོ་ཤིན་ཏུ་མི་བཟད་པས།  །ཡེ་ཤེས་དབྱིངས་སུ་སྒྲོལ་བའི་ཕྲིན་ལས་མཛོད།  །སེམས་ཉིད་གདོད་མའི་བསྟན་སྲུང་རོ་དོགས་དྲིས།  །བསླད་མིན་མཐའ་བྲལ་བདེ་ཆེན་མངོན་གྱུར་ནས།  །ཕྲིན་ལས་རྣམ་བཞིས་འགྲོ་བའི་རེ་སྐོང་བའི།  །དངོས་གྲུབ་རྒྱ་མཚོའི་དཔལ་གྱིས་འབྱོར་བར་མཛོད།  །{{TibChung|ཅེས་ལས་ཀྱི་གཉེར་གཏད་ཅིང་མངོན་པར་འདོད་པའི་ཕྲིན་ལས་གསོལ་ལོ།  ། {{TibChung|[22b]}} གཉིས་པ་དྲག་པོའི་ཕྲིན་ལས་སྒྲུབ་པ་ལ་བཞི་ལས།  དང་པོ་གཤོམ་ནི།  ཐུན་གྱི་གཏོར་མ་གྲུ་གསུམ་གཙོ་འཁོར་གྱི་གྲངས་དང་མཉམ་པ་ཤ་ཁྲག་གིས་བརྒྱན་པ་མཉྫིའི་སྟེང་ལ་བཀོད།  འབྱོར་ན་ཁྲག་སྐྱེམས་སོགས་དམ་རྫས་དང་འབྲེལ་བའི་ཁྱད་པར་གྱི་མཆོད་པའང་བཤམས་པ་འབྲུ་གསུམ་གྱི་བྱིན་གྱིས་བརླབས་ནས།  གཉིས་པ་དྲག་བཟླས་ནི།  རང་ཉིད་ཡི་དམ་གྱི་སྙེམས་པ་མཆོག་ཏུ་བརྟན་པོས་གོང་གནོན་གྱི་བཟླས་པ་ཅུང་ཟད་བྱས་ནས།  མདུན་བསྐྱེད་སྔར་ཡོད་ཀྱང་བསྐྱར་དུ་གསལ་བཏབ་ལ།}}  རང་གི་ཐུགས་ཀའི་ཧཱུྃ་ལས་འོད་ཟེར་མེའི་ཕུང་པོ་ལྟ་བུ་འཕྲོས་མགོན་པོའི་ཐུགས་རྒྱུད་བསྐུལ་བས་དེ་ཉིད་ཁྲོས་འཁྲུགས་རྔམས་པར་བཞེངས་ནས་འཁོར་རྣམས་བསྐུལ།  དེ་རྣམས་ཀྱིས་ཀྱང་སྤྲུལ་པའི་ཕོ་ཉ་མཚོན་ཆ་ཅན་དཔག་མེད་བུ་ཡུག་འཚུབས་པ་ལྟར་སྤྲོས་པས་དགྲ་བགེགས་ཐམས་ཅད་བསད་བཅད་ཚར་གཅོད་པའི་ལས་མཛད་པར་{{TibChung|བསམས་ལ།  མགོན་པོའི་སྲོག་སྔགས་ཀྱི་མཐར།}}  ཏྲི་ཡཾ་རུ་དྲ་ཧཱུྃ་བྷྱོཿ  མུན་ཤཾ་བྷྱོཿ  མུན་ནག་ཤི་བྷྱོ༔  རུ་དྲ་ནག་པོ་དགྲ་བོའི་སྙིང་ལ་སུ་ཏྲི་རྦད༔  སུ་ནྲྀ་མཱ་ར་ཡ་རྦད༔  {{TibChung|ཅེས་གཙོ་བོའི་དྲག་སྔགས་དང་།}}  ཨོྃ་མ་ཧཱ་ཀཱ་ལ་ཏྲི་ཡཾ་རུ་དྲ་ནག་པོ་ཛཿ  ཏྲི་ལིང་གིང་ཀ་ར༔  རཱ་ཛ་སུ་ཏྲི་ཛཿཛཿ{{TibChung|ཞེས་ལས་མགོན་གྱི་སྔགས་ཏེ་དམིགས་པ་ཤུགས་དྲག་བོས་ཅི་ནུས་སུ་བཟླ་ཞིང་།  ལས་གལ་ཆེན།  འདིའི་རྦད་བསད་ཀྱི་སྔགས་རྣམས་དང་འཁོར་ {{TibChung|[23a]}} གཞན་རྣམས་ཀྱི་དྲག་སྔགས་ཀྱང་ཅི་ནུས་བཟླས་ནས།  གསུམ་པ་དམིགས་བྱ་དགུག་བསྟིམ་ནི།  ཐུན་གཏོར་ལ་རཀྟ་བྲན་ཏེ།}}  སླར་ཡང་རང་གི་ཐུགས་ཀ་ནས་ཚ་ཞིང་རྩུབ་པའི་འོད་ཟེར་འཕྲོས་པས་མགོན་པོ་འཁོར་བཅས་ཀྱི་རྒྱུད་བསྐུལ་སྤྲུལ་པའི་ཕོ་ཉ་རྣམས་ཀྱིས་དམིགས་བྱ་རང་དབང་མེད་པར་བཀུག་ནས་གཏོར་མ་ལ་བསྟིམ་པར་{{TibChung|བསམ་ཞིང་།}}  ན་མོ།  རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་།  སངས་རྒྱས་ཀྱི་བཀའ༴   ཆོས་ཀྱི༴   དགེ་འདུན་གྱི༴   གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་ཏིང་ངེ་འཛིན་གྱི་བདེན་པ་དང་།  ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་།  ཁྱད་པར་དུ་ཡང་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་ལྕམ་དྲལ་བྲན་གཡོག་འཁོར་དང་བཅས་པ་རྣམས་ཀྱི་བདེན་པ་དང་།  བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ།  ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ།  ཕྱི་དགྲ་ཡིད་ལ་སེམས་པ།  ད་དགྲ་ཐད་དུ་འཛུགས་ {{TibChung|[23a]}} པའི་གཟུགས་ཅན་སྡང་བའི་དགྲ་དང་།  གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག  །{{TibChung|སྙིང་པོ་རྣམས་ཀྱི་མཐར།}}  ཨོཾ་བཛྲ་ཨཱ་ཀརྵ་ཡ་ཛ༔  ཛཿཧཱུྃ་བྃ་ཧོཿ {{TibChung|ཞེས་ལན་གསུམ་ལ་སོགས་པས་དགུག་བསྟིམ་བྱས་ལ།  སླར་ཡང་བདུད་རྩིས་བྲན་ཏེ།}}  རྃ་ཡྃ་ཁྃ་{{TibChung|གིས་བསང་སྦྱང་།}}  སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤའི་རི་བོ།  ཁྲག་གི་རྒྱ་མཚོ།  རུས་པའི་ཕུང་པོ།  ཀླད་ཞག་གི་ལྦུ་ཕྲེང་འཁྲིགས་པ་དམ་ཚིག་ཏུ་འོས་པའི་འདོད་ཡོན་གྱི་རྣམ་པ་མ་ཚང་བ་མེད་པ་ནམ་མཁའ་དང་མཉམ་པར་གང་བ་ངོ་བོ་ཟག་པ་མེད་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་{{TibChung|པར་བསམ་ལ།}}  ཨོཾ་ཨཱཿཧཱུྃ་ཧོཿ {{TibChung|ཞེས་པས་བྱིན་གྱིས་བརླབས་ནས་མགོན་པོ་འཁོར་བཅས་ཀྱིས་རོལ་པར་བསམ་ལ།  མགོན་པོའི་སྔགས་མཐར།}}  ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིཿ{{TibChung|ཞེས་བཏགས་པ་བརྒྱའམ་ཉེར་གཅིག་སོགས་ཀྱིས་ཕུལ།  དེ་བཞིན་དུ་འཁོར་སྔགས་ལ་གཏོར་སྔགས་བཏགས་པ་ཉེར་གཅིག་དང་བདུན་ལ་སོགས་པ་ཅི་རིགས་པར་ཕུལ་བའི་མཐར་འདོད་དོན་ཕྲིན་ལས་སུ་གསོལ་ལོ།  ། {{TibChung|[24a]}} བཞི་བ་ཐུགས་དམ་བསྐུལ་བ་ནི།  སྨན་རཀ་ཕུད་ཀྱིས་མཆོད་ཅིང་གསུར་ཆེན་གྱི་དུད་པ་དང་དར་ནག་གི་གཡབ་མོར་བཅས་བས་འདི་ལྟར་བསྐུལ་ལོ།  །}}  ཧཱུྃ་བྷྱོ།  སེམས་ཉིད་ཀློང་གསལ་འབར་བའི་དུར་ཁྲོད་ནས།  །ཐོད་མཁར་སུམ་བརྩེགས་འབར་བའི་གཞལ་ཡས་ནས།  །བདུད་པོ་བདུད་མོས་གཏམས་པའི་དུར་ཁྲོད་ནས།  །བཤན་པ་ཕོ་མོ་ཚོགས་པའི་གྲོང་ཁྱེར་ནས།  །མེ་རླུང་འཚུབས་མར་འཁྱིལ་བའི་དུར་ཁྲོད་ནས།  །རྟོག་མེད་ངང་ལས་ལྷ་ཆེན་སྐུར་སྟོན་པ།  །ལྷ་ཆེན་མགོན་པོ་དཔལ་འབར་གཤེགས་སུ་གསོལ།  །ལེགས་ལྡན་ནག་པོ་གཤེགས།  བྷ་ག་ནག་པོ་གཤེགས་སུ༴   །ཚོགས་བདག་ཆེན་པོ༴   །ཛམ་ལ་ནག་པོ༴   །ནག་པོ་ཐོད་ཕྲེང་༴   །ཆོས་སྐྱོང་ཆེན་པོ༴   །དགྲ་བོའི་གཤེད་མ༴   །བགེགས་ཀྱི་གཉེན་པོ༴   །བདག་གི་གྲོགས་པོ༴   །དམ་ཅན་ཆེན་པོ༴   །ཆོས་སྐྱོང་འཁོར་བཅས་བསྐྱོད་པའི་ཚེ།  །ནག་པོ་གཟི་མདངས་ཡ་ལ་ལ།  །སྲིན་མོ་མ་ཚོགས་ཐིབས་སེ་ཐིབ།  །ལིང་པ་མདའ་འཕེན་བྲེངས་སེ་བྲེང་།  །བྱ་རོག་ཤ་ཐོགས་ལིངས་སེ་ལིང་།  །གཡབ་དར་ནག་པོ་ལྷབས་སེ་ལྷབ།  །ཉི་མ་ཟླ་བ་ཏ་ལ་ལ།  །མེ་སྟག་འཚུབས་མ་འཁྱིལ་ལི་ལི།  །དོམ་ནག་ཁྱི་ {{TibChung|[24b]}} ནག་ང་ར་ར།  །ལྕགས་སྤྱང་ཅེ་སྤྱང་འདུ་རུ་རུ།  །དུག་སྤྲུལ་ནག་པོ་ཁྱུགས་སེ་ཁྱུག  །རྟ་ནག་མང་པོ་ཙེ་རེ་རེ།  །དུག་མཚོ་ཁོལ་མ་ཁྱི་ལི་ལི།  །འུག་པ་རྐན་སྒྲ་ཆེམས་སེ་ཆེམ།  ཐུན་གྱི་སེར་བ་ཤར་ར།  །འགོང་པོ་ངུ་སྐད་ལྷངས་སེ་ལྷང་།  །འདྲེ་ངན་སྐད་ངན་ཙེ་རེ་རེ།  །རྒྱལ་བསེ་ན་སྨྱོས་སྒྲ་དི་རི་རི།  །ཆོས་སྐྱོང་འཁོར་བཅས་ཐིབས་སེ་ཐིབ།  །ཚུར་གཤེགས་ཚུར་བྱོན་དམ་ལ་འདུ།  །ཤ་ཁྲག་གཏོར་མ་འདི་བཞེས་ལ།  །བཅོལ་བའི་ཕྲིན་ལས་སྒྲུབ་པར་མཛོད།  །བྷྱོ།  དོ་ནུབ་ནམ་གྱི་གུང་ཐུན་ལ།  །བླ་རྐུན་ཇག་པ་ལས་ལ་ཆོ།  །ཟས་སུ་དགྲ་བོའི་ཤ་ལ་ཟོ།  །སྐོམ་དུ་དགྲ་བོའི་ཁྲག་ལ་འཐུང་།  །ལས་སུ་གནོད་བྱེད་དགྲ་བགེགས་སྒྲོལ།  །བཅོལ་བའི་ལས་རྣམས་སྒྲུབ་པར་མཛོད།  །{{TibChung|ཅེས་དང་།}}  ཧཱུྃ།  ཀུན་བཟང་རྡོ་རྗེ་འཆང་ཆེན་དང་།  །དཔལ་ཆེན་ཁྲག་འཐུང་གསང་བའི་བདག  །སློབ་དཔོན་ཤཱནྟིང་གརྦྷ་དང་།  །སློབ་དཔོན་པདྨ་འབྱུང་གནས་ཀྱིས།  །དམ་ལ་བཏགས་ནས་བསྟན་བསྲུང་ཞིང་།  །རིག་འཛིན་སྐྱོང་བར་ཁས་བླངས་པའི།  །དམ་བཅའ་གཉན་པོ་བཅས་པ་རྣམས།  །ད་ལྟ་རྣལ་འབྱོར་བདག་བསྐུལ་ལོ།  །མཆོད་ {{TibChung|[25a]}} སྦྱིན་གཏོར་མ་འདི་བཞེས་ལ།  །ཞི་རྒྱས་དབང་དྲག་མངོན་སྤྱོད་ཀྱི།  །ཕྲིན་ལས་རྣམ་བཞིའི་དངོས་གྲུབ་སྩོལ།  །ལོག་ལྟ་གནོད་བྱེད་དགྲ་བགེགས་སྒྲོལ།  །མཐུ་དང་རྫུ་འཕྲུལ་ད་ཕྱུངས་ལ།  །བསྟན་པ་འཇིག་པའི་དགྲ་བོ་འདི།  །ལོ་དང་ཟླ་བ་མ་བཞག་པར།  །ཞག་དང་ཟ་མ་ཁོ་ན་ལ།  །ཐུགས་དམ་མ་གཡེལ་སོད་ལ་ཤོག  །བདག་གིས་བཅོལ་བའི་ཕྲིན་ལས་མཛོད།  །{{TibChung|ཅེས་བསྐུལ་ཞིང་རྦད་བསད་ཀྱི་སྔགས་རྣམས་དྲག་ཏུ་བཟླ།  རོལ་མོ་སྣ་ཚོགས་པའི་སྒྲ་དང་བཅས་པས་དམོད་མོ་བྱ་ཞིང་གཏོར་མ་དགྲ་ཕྱོགས་སུ་འཕངས་པས་སྲུང་མ་འཁོར་བཅས་དཔའ་པའི་ངར་སྒྲ་དང་བཅས་ཏེ་བསྐྱོད་པས་དགྲ་བོའི་གནས་ལུས་ལོངས་སྤྱོད་ཐམས་ཅད་རྗེས་མེད་རྡུལ་ཕྲན་བཞིན་དུ་བརླག་པར་བསམ།  ཐུན་མོང་མ་ཡིན་པའི་དྲག་ལས་བསྒྲུབ་པར་འདོད་པས་ནི།  འབོད་རྦད་བསད་གསུམ་གྱིས་གཞི་བཟུང་ནས་མཐར་སྡུད་གསུམ་གྱིས་ལས་ལ་སྦྱོར་ཚུལ་རྣམས་གཏེར་གཞུང་གི་མན་ངག་བླ་མའི་ཕྱག་བཞེས་ཀྱིས་བརྒྱན་ཏེ་ལག་ཏུ་བླང་བར་བྱའོ།  །གསུམ་པ་རྗེས་ཀྱི་བྱ་བ་ལ་ལྔ་ལས།  དང་པོ་གཏོར་མ་བསྟབ་པ་ནི།  ཆོ་ག་ཉིན་ཞག་སྦྲེལ་མར་བྱེད་པའི་སྐབས་འབུལ་གཏོར་ཟུར་དུ་བཅས་པ་དང་།  ཉིན་ཐ་མའི་ཚེ་ན་བླ་མ་ཡི་དམ་གྱི་གཏོར་མ་མ་གཏོགས་གཏོར་མ་གཞན་རྣམས་ལ་དཔལ་འབར་བཙུགས།  སྤོས་དང་རོལ་མོ་གསེར་སྐྱེམས་ཀྱིས་མཚོན་པར་སྒྲུབ་ཁང་གི་ཡང་ཐོག་སོགས་གང་དུ་གཏོང་བའི་སར་ཁྱེར་ནས་ {{TibChung|[25b]}} སྟེགས་ལ་བཀོད་རཀྟས་བྲན་ལ་དམིགས་བྱ་དགུག་གཞུག་བྱ།}}  ཨོཾ་ཨཱཿཧཱུྃ་ཧོཿ {{TibChung|སླར་ཡང་བྱིན་གྱིས་བརླབ།  རྩ་སྔགས་ལ་གཏོར་སྔགས་བཏགས་པ་གསུམ་མམ་བདུན་གྱིས་ཕུལ་ལ།}}  ཧཱུྃ།  ཆོས་ཀྱི་དབྱིངས་ནས་འབར་བའི་སྐུར་བཞེངས་པ།  །མཐུ་སྟོབས་དབང་ཕྱུག་རྡོ་རྗེ་ནག་པོ་ཆེ།  །ལྕམ་དྲལ་བཀའ་སྡོད་དམ་ཅན་རྒྱ་མཚོའི་ཚོགས།  །འཁོར་བཅས་ཐུགས་དམ་དབང་གིས་འདིར་གཤེགས་ཤིག  །ཕྱི་ནང་གསང་མཆོད་སྨན་རཀ་བ་ལིཾ་ཏ།  །དགྲ་བགེགས་ཤ་ཁྲག་ལ་སོགས་མཁོ་དགུའི་རྫས།  །སོ་སོའི་ཐུགས་ལ་ཅི་བཞེད་དེར་འཆར་བའི།  །རྨད་བྱུང་དགྱེས་པའི་མཆོད་སྤྲིན་ཆེན་པོ་འདི།  །སྔར་མཛད་ལེགས་པའི་ལས་ཀྱི་གཏང་རག་དང་།  །སླད་ནས་གཡེལ་བ་མེད་པའི་ཕྲིན་ལས་བཞིའི།  །འདོད་པའི་དངོས་གྲུབ་སྩོལ་སླད་འབུལ་ལགས་ན།  །དགྱེས་པ་ཆེན་པོས་བཞེས་ཤིང་རོལ་ནས་ཀྱང་།  །བསྟན་དང་འགྲོ་བའི་ཕན་བདེ་ཀུན་སྤེལ་ཞིང་།  །ཁྱད་པར་བདག་ཅག་དཔོན་སློབ་འཁོར་བཅས་ལ།  །ནད་མེད་པ་དང་མི་འགྱུར་ཚེ་སྲོག་དཔལ།  །གྲགས་དང་འབྱོར་པ་རྒྱ་མཚོས་མཐོ་བ་དང་།  །མ་རུངས་བདུད་དགྲའི་རྒོལ་བ་ཀུན་ཞི་ཞིང་།  །རྣམ་མང་ཕྲིན་ལས་རྒྱ་མཚོ་ཡིད་བཞིན་སྒྲུབས།  །ཕྱོགས་ལས་རྣམ་པར་རྒྱལ་བའི་རུ་ {{TibChung|[26a]}} མཚོན་ཕྱོར།  །བྱང་ཆུབ་བར་དུ་བསྲུང་ཞིང་སྐྱོང་བར་མཛོད།  །{{TibChung|ཅེས་གཏོར་མ་ཕུལ།  རྒྱབ་ཆོག་ལས་གཞུང་གཞན་དང་འབྲེལ་ན་བརྟན་སྐྱོང་ཡོད་པ་ཤས་ཆེ་བས་དེས་ཁྱབ་ལ་གཞན་དུ་བརྟན་སྐྱོང་རྒྱས་བསྡུས་གང་རུང་རེ་བྱ་ན་ཤིན་ཏུ་ལེགས་པར་འགྱུར་རོ།  །གཉིས་པ་གཏང་རག་གི་མཆོད་པ་ནི།  སླར་ཡང་ཅུང་ཟད་མཆོད་ནས།}}  ཧེ་རུ་ཀ་དཔལ་སྤྱན་སྔ་རུ།  །དམ་བཅས་ཇི་བཞིན་ད་ལྟ་འདིར།  །བསྟན་པ་བསྲུང་ཞིང་སྐྱོང་མཛད་པའི།  །དམ་ཅན་ཀུན་ལ་བསྟོད་པར་བགྱི།  །{{TibChung|ཞེས་བསྟོད།  གསུམ་པ་ནོངས་པ་བཤགས་པ་ནི།}}  མ་རྙེད་ཡོངས་སུ་མ་ཚང་དང་།  །གང་ཡང་ནུས་པ་མ་མཆིས་པས།  །འདིར་ནི་བགྱི་བ་གང་ནོངས་པ།  །དེ་ཀུན་ཁྱོད་ཀྱིས་བཟོད་མཛད་རིགས།  །{{TibChung|ཞེས་དང་ཡི་གེ་བརྒྱབ་ལན་གསུམ་ལ་སོགས་པར་བཟླ།  བཞི་པ་རྗེས་བསྡུ་ནི།  ཡེ་ཤེས་པ་རྟེན་ཡོད་རྣམས།}}  འདིར་ནི་གཟུགས་དང་ལྷན་ཅིག་ཏུ།  །འཁོར་བ་སྲིད་དུ་བཞུགས་ནས་ཀྱང་།  །ནད་མེད་ཚེ་དང་དབང་ཕྱུག་དང་།  །མཆོག་རྣམས་ལེགས་པར་སྩལ་དུ་གསོལ།  །ཨོཾ་སུ་པྲ་ཏིཥྠ་བཛྲ་ཡེ་སྭཱཧཱ།  {{TibChung|ཞེས་བརྟན་བཞུགས་བྱ།  རྟེན་མེད་པ་རྣམས།}}  ཨོཾ།  ཁྱེད་ཀྱིས་སེམས་ཅན་དོན་ཀུན་མཛད།  །རྗེས་སུ་མཐུན་པའི་དངོས་གྲུབ་སྩོལ།  །སངས་རྒྱས་ཡུལ་དུ་གཤེགས་ནས་ཀྱང་།  །སླར་ཡང་འབྱོན་པར་མཛད་དུ་ {{TibChung|[26b]}} གསོལ།  །བཛྲ་མུཿ{{TibChung|ས་ཡེ་ཤེས་པ་གཤེགས་དམ་ཚིག་བ་རང་ལ་བསྟིམ་ནས།}}  སྤྱི་བོར་ཨོཾ།  མགྲིན་པར་ཨཱཿ  སྙིང་ཁར་ཧཱུྃ།  {{TibChung|ཞེས་པས་བདག་བསྲུང་།  འཇིག་རྟེན་པའི་འཁོར་རྣམས།}}  གཙྪ་གཙྪ་སྭ་བྷཱ་ཝ་ནྰཾ།  {{TibChung|ཞེས་རང་གནས་སུ་གཏང་།  དགེ་བ་རྫོགས་བྱང་དུ་བསྔོ་བ་རྣམས་བྱའོ།  །ལྔ་པ་ཤིས་བརྗོད་ནི།}}  རབ་འབྱམས་དཀྱིལ་འཁོར་རྒྱ་མཚོའི་འཁོར་ལོའི་མགོན།  །གསང་གསུམ་འགྱུར་མེད་བདེ་ཆེན་རྡོ་རྗེའི་སེམས།  །འགྲོ་ལ་ཕན་བདེའི་མཆོག་སྩོལ་དཔག་བསམ་ཤིང་།  །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག  །ཆོས་སྐུའི་མཁའ་ལ་གྲངས་མེད་གཟུགས་སྐུའི་སྤྲིན།  །ཞི་ཁྲོ་ཉམས་བརྒྱའི་རོལ་པར་འཆར་བ་ལས།  །དངོས་གྲུབ་འདོད་རྒུ་ཆར་དུ་བསྙིལ་མཛད་པའི།  །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག  །ཧེ་རུ་ཀ་དཔལ་སྙིང་རྗེའི་རོལ་གར་ནི།  །གཏུམ་ཆེན་བཟོད་པར་དཀའ་བའི་གཟི་བརྗིད་ཀྱིས།  །ནག་པོའི་རྩ་ལག་སྡེར་བཅས་མཐར་མཛད་པའི།  །དཔལ་འབར་མ་ཧཱ་ཀཱ་ལའི་བཀྲ་ཤིས་ཤོག  །རྒྱལ་བའི་བཀའ་སྡོད་མི་བཟད་དྲག་ཤུལ་ཅན།  །བདུད་དཔུང་ཚར་གཅོད་སྒྲུབ་མཆོག་བུ་བཞིན་སྐྱོང་།  །ཕྲིན་ལས་རྣམ་བཞིས་བསྟན་པ་སྲུང་མཛད་པའི།  །དམ་ཅན་རྒྱ་མཚོའི་ཚོགས་ཀྱི་བཀྲ་ཤིས་ཤོག  །{{TibChung|[27a]}} {{TibChung|ཅེས་སོགས་བཀྲ་ཤིས་ཀྱི་ཚིགས་སུ་བཅད་པ་དུ་མས་བདེ་ལེགས་སུ་ཁྱབ་པར་བྱའོ།  །ཕྱི་རོལ་ཞིང་ཀུན་ཁྱབ་པར་རྒྱུད་གསུམ་གྱི།  དྲེགས་པ་ཡོངས་ཀྱི་རྗེར་གྱུར་ནག་པོ་ཆེ།  །ནང་དུ་རྡོ་རྗེ་ལུས་ཀྱི་ཕོ་བྲང་དུ།  །རྩ་རླུང་ཐིག་ལེ་ཡོངས་ཤར་ཡེ་ཤེས་མགོན།  །གསང་བ་རང་སེམས་གསལ་སྟོང་ཟུང་འཇུག་ཏུ།  །ཡང་དག་གདོད་མའི་བསྟན་སྲུང་ཧེ་རུ་ཀ  །འཁོར་བཅས་བསྙེན་ཅིང་མཆོད་པའི་ཕྲིན་ལས་གཞུང་།  །ལེགས་པར་བསྡེབས་ལ་དབྱིངས་ནས་ཅིས་མི་དགྱེས།  །དེ་ཕྱིར་རྒྱལ་བསྟན་གཡེལ་བ་མེད་སྐྱོང་ཞིང་།  །རང་གཞན་འདོད་པའི་ཕྲིན་ལས་ཐོགས་མེད་དུ།  །ཡོངས་གྲུབ་བདུད་ལས་རྣམ་རྒྱལ་ཧེ་རུ་ཀའི།  །གོ་འཕང་མྱུར་དུ་ཐོབ་པའི་རྒྱུར་གྱུར་ཅིག  །དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་འདི་ནི་སྔན་ལུང་གསང་སྔགས་ཆོས་གླིང་ནས་རྒྱལ་སྲས་སྤྲུལ་པའི་སྐུ་བསྟན་འཛིན་ལེགས་པ་དོན་གྲུབ་ཀྱི་བཀའ་ལུང་བཞིན་གང་གི་ཞབས་རིམ་པ་ཨོ་རྒྱན་བསྟན་འཛིན་ཕུན་ཚོགས་པས་གསེར་གྱི་མེ་ཏོག་དང་བཅས་པས་བསྐུལ་བ་ལས་གཏེར་གཞུང་རྩ་བའི་སྙིང་བོ་རྣམས་སྲོག་ཏུ་བཟུང་།  ཡིག་རྙིང་བརྗོད་བདེ་བ་རྣམས་ཁྲིགས་སུ་བསྡེབས།  ཁ་སྐོང་འགའ་ཞིག་གསར་དུའང་སྤེལ་ཏེ།  སྙོམས་ལས་པ་འགྱུར་མེད་རྡོ་རྗེས་གཡོ་རུ་ཁྲ་འབྲུག་གི་གཙུག་ལག་ཁང་ཆེན་པོའི་འདབས་གསང་སྔགས་ཕོ་བྲང་དུ་ཡི་གེར་སྤེལ་བའོ།།  །།}}  }}
</onlyinclude>
</onlyinclude>
{{TsagliCall}}
{{TsagliCall}}
<headertabs/>
<headertabs/>

Latest revision as of 10:00, 4 September 2025

Previous Text Back to Volume PageNext Text
Wylie title dpal ye shes kyi mgon po ma ning 'khor bcas kyi las byang las bzhi myur 'grub DJYD-KABUM-06-CHA-011.pdf
Location bdud 'joms rin po che bka' 'bum
Volume 6, Text 11, Pages 351-403 (Folios 1a1 to 27a6)
Author གཏེར་བདག་གླིང་པ་འགྱུར་མེད་རྡོ་རྗེ་
Citation Gter bdag gling pa 'gyur med rdo rje. Dpal ye shes kyi mgon po ma ning 'khor bcas kyi las byang las bzhi myur 'grub. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 6: 351-403. Kalimpong: Dupjung Lama, 1979-1985.
Side notes Recto: ma ning   Verso: pad gling mgon po
More details More details
Tertön པདྨ་གླིང་པ་ (pad+ma gling pa)
Genre Activity Manual - las byang
Cycle དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ (dpal ye shes kyi mgon po ma ning 'khor bcas)
Deity ma ning
Colophon

།དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་འདི་ནི་སྔན་ལུང་གསང་སྔགས་ཆོས་གླིང་ནས་རྒྱལ་སྲས་སྤྲུལ་པའི་སྐུ་བསྟན་འཛིན་ལེགས་པ་དོན་གྲུབ་ཀྱི་བཀའ་ལུང་བཞིན་གང་གི་ཞབས་རིམ་པ་ཨོ་རྒྱན་བསྟན་འཛིན་ཕུན་ཚོགས་པས་གསེར་གྱི་མེ་ཏོག་དང་བཅས་པས་བསྐུལ་བ་ལས་གཏེར་གཞུང་རྩ་བའི་སྙིང་བོ་རྣམས་སྲོག་ཏུ་བཟུང་། ཡིག་རྙིང་བརྗོད་བདེ་བ་རྣམས་ཁྲིགས་སུ་བསྡེབས། ཁ་སྐོང་འགའ་ཞིག་གསར་དུའང་སྤེལ་ཏེ། སྙོམས་ལས་པ་འགྱུར་མེད་རྡོ་རྗེས་གཡོ་རུ་ཁྲ་འབྲུག་གི་གཙུག་ལག་ཁང་ཆེན་པོའི་འདབས་གསང་སྔགས་ཕོ་བྲང་དུ་ཡི་གེར་སྤེལ་བའོ།།

dpal ye shes kyi mgon po ma ning 'khor bcas kyi las byang las bzhi myur 'grub ces bya ba 'di ni sngan lung gsang sngags chos gling nas rgyal sras sprul pa'i sku bstan 'dzin legs pa don grub kyi bka' lung bzhin gang gi zhabs rim pa o rgyan bstan 'dzin phun tshogs pas gser gyi me tog dang bcas pas bskul ba las gter gzhung rtsa ba'i snying bo rnams srog tu bzung /___yig rnying brjod bde ba rnams khrigs su bsdebs/___kha skong 'ga' zhig gsar du'ang spel te/___snyoms las pa 'gyur med rdo rjes g.yo ru khra 'brug gi gtsug lag khang chen po'i 'dabs gsang sngags pho brang du yi ger spel ba'o//

[edit]
༄༅། །དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་བཞུགས་སོ། །


༄༅། །ཨོཾ་སྭསྟི། དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ། བླ་མ་ཧེ་རུ་ཀ་ལ་ཕྱག་འཚལ་ལོ། །ཁྱབ་བདག་དྲིན་ཅན་བླ་མ་གསང་བའི་བདག །དཀྱིལ་འཁོར་རྒྱ་མཚོར་ཞི་དང་ཁྲོ་བོ་ཡི། །རྣམ་རོལ་བསམ་མི་ཁྱབ་སྟོན་ལྷག་པའི་ལྷར། །གུས་པས་བདུད་དོ་བརྩེ་བས་མཆོག་སྦྱིན་མཛོད། །ཆེ་མཆོག་ཧེ་རུ་ཀ་དཔལ་གདུལ་དཀའི་འགྲོ། །འདུལ་ཕྱིར་གཏུམ་དྲག་འབར་བའི་སྐུར་བཞེངས་ལ། །འཆོལ་བའི་ཁྲོ་རྒྱལ་མ་ནིང་ནག་པོ་ཆེ། །འཁོར་བཅས་མཆོད་པའི་ཕྲིན་ལས་འདིར་གསལ་བྱ། །དེ་ལ་དང་ [2a] པོར་དབང་ཐོབ་ཅིང་སྤྱི་དང་བྱེ་བྲག་གི་དམ་ཚིག་ལ་གནས་པའི་སྔགས་པས། དོན་གཉིས་ཀྱི་བསམ་པ་མྱུར་དུ་འགྲུབ་པའི་ཆེད་དུ་དཔལ་མགོན་འཁོར་བཅས་ལེགས་པར་བསྟེན་ནས་མཆོད་ཅིང་ཐུགས་དམ་བསྐང་བའི་ཕྲིན་ལས་ཀྱི་རིམ་པ་ཚུལ་བཞིན་དུ་བསྒྲུབ་པ་ལ་གཉིས་ཏེ། སྦྱོར་བ་ཡོ་བྱད་ཀྱི་གཤོམ་དང་། དངོས་གཞི་ཆོ་གའི་རིམ་པ་གཉིས་ལས། དང་པོ་ནི། ཉི་ཤུ་དགུ་ལ་སོགས་པ་དུས་ཁྱད་པར་ཅན་ལ་ཡིད་དང་མཐུན་ཞིང་ཤིས་པའི་གནས་ཁང་གི་སྟེང་ལོགས་རྣམས་མཛེས་ཤིང་བརྗིད་པའི་སྤྱན་གཟིགས་སྣ་ཚོགས་ཀྱིས་བརྒྱན། དམ་ཚིག་གི་བྲིས་སྐུ་སོགས་རྟེན་བཤམས་པའི་མདུན་དུ་རིན་པོ་ཆེའམ་ཐོད་པ་ལ་སོགས་པའི་སྣོད་དུ་གཙང་ཞིང་བཟང་བའི་རྒྱུ་དམ་རྫས་དང་བཅས་པ་ལས་དང་པོར་བླ་མ་ཡི་དམ་གྱི་གཏོར་མ་དཔལ་བཤོས་ཟླུམ་བརྗིད་ [2b] ཅན་དང་། མགོན་པོ་འཁོར་བཅས་ལ་རྒྱས་པར་སྡེ་དགུའི་ལྷ་གྲངས་མཉམ་པའི་གཙོ་བོ་དགུ་ལ་སོ་སོའི་འཁོར་གྱིས་བསྐོར་བའི་བཤོས་བུ་ཅན་དང་བསྡུ་ན་བཤོས་བུ་གྲུ་གསུམ་ཆེ་བ་གཅིག་ལ་འཁོར་རྣམས་སྤྱི་སྤུངས་སུ་བསྐོར་བས་ཀྱང་ཆོག་ལ། གང་ལྟར་ཡང་མཐའ་མ་མཐེབ་ཀྱུས་བསྐོར། མདའ་བྱ་རྒོད་མདར་ནག་གི་ཅོད་པན་ཅན་བཙུགས། ཤ་ཁྲག་ཆང་ཕུད་ལ་དུ་ལ་ཕུག་ཁུར་བ་ཆན་སྒོག་བཙོང་སོགས་ཁ་ཟས་བཟང་པོ་སྣ་ཚོགས་ཀྱིས་བརྒྱན་པ་དང་། གཞན་ཡང་ཆོས་སྐྱོང་ཡེ་ཤེས་པ་དང་འཇིག་རྟེན་པའི་རིགས་སོགས་གང་བརྟེན་དང་། གཞི་བདག་གཏོར་མའི་བར་རིམ་པ་མ་འཆོལ་བར་བཤམ། དེ་དག་གི་གཡས་སུ་བདུད་རྩི། གཡོན་དུ་རཀྟ། མདུན་དུ་མཆོད་ཡོན་སོགས་གཙང་མར་སྤེལ་བ་ཕྱིའི་མཆོད་པ་དང་། དབང་པོའི་མེ་ཏོག་སོགས་ཁྱད་པར་དམ་རྫས་དང་འབྲེལ་བའི་མཆོད་པ་རྣམས་ཕྲེང་ཚར་དུ་བཀོད། གཞན་ཡང་ཕྱི་ནང་གསང་བའི་མཐུན་རྫས་རྟེན་རྫས་སྐོང་རྫས་སོགས་ཅི་འབྱོར་དང་། རྡོར་དྲིལ་རྔ་སིལ་གཡབ་དར་སོགས་དམ་རྫས་ཀྱི་རྣམ་གྲངས་ཐམས་ཅད་མཐོང་བརྒྱུད་ཀྱི་ལག་ལེན་བཞིན་ཚོགས་པར་བཤམ་མོ། །གཉིས་པ་དངོས་གཞི་ཆོ་གའི་རིམ་པ་ལ་ཡང་སྔོན་འགྲོ་དང་དངོས་གཞི་རྗེས་ཀྱི་བྱ་བ་དང་གསུམ་ལས། དང་པོ་སྔོན་འགྲོ་ལ་གསུམ་གྱི། དང་པོ་བདག་བསྐྱེད་ཀྱི་རྣལ་འབྱོར་ནི། སྤྱིར་ཡི་དམ་ཞི་ཁྲོ་གང་ལ་བརྟེན་ཀྱང་རུང་མོད་ཁྱད་པར་སྒྲུབ་པ་བཀའ་བརྒྱད་ལྟ་བུ་ལ་བརྟེན་ན་ཤིན་ཏུ་འབྲེལ་ཆགས་ཤིང་དེ་ཡང་ཉིན་ཞག་དེ་ཉིད་ཁོ་ནར་བདག་བསྐྱེད་གཞན་སྔོན་དུ་སོང་ན་སྐབས་འདིར་སྙིང་པོ་ངག་ཏུ་བརྗོད་པའི་སྒོ་ནས་ཐུན་མཚམས་ཀྱི་ལྷར་སྐད་ཅིག་གིས་གསལ་བཏབ་པས་ཆོག་ལ་དེ་ [3a] ལྟར་མ་སོང་ན་བདག་བསྐྱེད་རྒྱས་འབྲིང་བསྡུས་གསུམ་གང་རུང་ཞིག་སྐབས་འདིར་བྱའོ། །དེ་ཡང་མདོར་བསྡུས་ལ་མོས་ན་ཆེ་མཆོག་གཙོ་རྐྱང་གི་མངོན་རྟོགས་དངོས་གྲུབ་རོལ་མཚོར་སྨོས་པ་དེའམ། འདིའི་སྲོག་དབང་སོགས་ཕྱག་རྡོར་གྱི་རྣལ་འབྱོར་བསྒོམ་པའི་དབང་དུ་བྱེད་ན། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་བརྩེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་སངས་རྒྱས་ཐོབ་པར་བགྱི། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། ཨོཾ་སྭ་བྷཱ་ཝ་སོགས། འཁོར་འདས་ཀྱི་ཆོས་ཐམས་ཅད་འོད་གསལ་གྱི་རང་མདངས་རྡོ་རྗེ་སྲུང་བའི་འཁོར་ལོ་ཆེན་པོར་དག་པའི་དབུས། པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་ཧཱུྃ་གིས་མཚན་པ་ཡེ་ཤེས་ལྔའི་འོད་ཟེར་མཆོག་ཏུ་འབར་བ་ཡོངས་སུ་གྱུར་པ་ལས་རང་ཉིད་གསང་བའི་བདག་པོ་ཕྱག་ན་རྡོ་རྗེ་སྐུ་ [3b] མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། དབུ་སྐྲ་དང་སྨར་སྨིན་མེ་འབར་ཞིང་མཆེ་བ་གཙིགས་པ། ཕྱག་གཡས་རྡོ་རྗེ་རྩེ་ལྔ་པ་འཕྱར་ཞིང་གསོར་བ། གཡོན་སྡིགས་མཛུབ་ཐུགས་ཀར་མཛད་པ། གར་དགུའི་ཉམས་ཅན་ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་འགྱིང་བ། ཐོད་སྐམ་ལྔའི་དབུ་རྒྱན་ཐོད་རློན་ལྔ་བཅུའི་དོ་ཤལ། སེང་གླང་གི་པགས་པ་དང་སྔོན་པོས་སྟོད་གཡོགས་ཤིང་མི་ལྤགས་ཀྱི་སྐེད་དཀྲིས་དང་སྟག་ལྤགས་ཀྱི་ཤམ་ཐབས་འཕྱང་བ། ཀླུ་རིགས་ལྔའི་སྦྲུལ་ཆུན་དང་ཁྲག་ཞག་ཐལ་བས་མཚན་པ། བ་སྤུ་ཧཱུྃ་ལས་རྡོ་རྗེ་མེའི་འོད་ཟེར་འབར་ཞིང་བསྐལ་པའི་མེ་དཔུང་འབར་བའི་དབུས་ན་བཞུགས་པའོ། །དེའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་ག །ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་བསམ་གྱིས་མི་ཁྱབ་པའི་ཚོགས་བཛྲ་ས་མཱ་ཛཿས་སྤྱན་དྲངས། ཨརྒྷཾ་ལ་སོགས་པས་མཆོད། ཛཿཧཱུྃ་བྃ་ཧོཿ གཉིས་སུ་མེད་པར་གྱུར། སླར་ཡང་རང་གི་ཐུགས་ཀའི་ཧཱུྃ་གི་འོད་ཟེར་གྱིས་དབང་གི་ལྷ་རིགས་ལྔ་འཁོར་བཅས་བཛྲ་ས་མཱ་ཛཿས་སྤྱན་དྲངས། ཨརྒྷཾ་སོགས་ཀྱིས་མཆོད། [4a] དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བསྩལ་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེས་ས་མ་ཡ་ཤྲཱི་ཧཱུྃ། ཞེས་གསུང་ཞིང་བུམ་པ་བཟང་པོ་ལས་བྱུང་བའི་བདུད་རྩིའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་མི་བསྐྱོད་པ་ཅོད་པན་གྱི་སྙིང་པོ་ལ་བཞུགས་པར་གྱུར་པར་བསམ་ཞིང་། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་མི་ཟད་པ་རྒྱན་གྱི་འཁོར་ལོའི་བདག་ཉིད་དུ་སྙེམས་པ་བརྟན་པོ་བྱ་ཞིང་། དེ་ནས། ཐུགས་ཀར་ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་ཡིག་གི་མཐར་སྔགས་ཀྱི་ཕྲེང་བས་གཡས་སུ་འཁོར་བ་ལ་དམིགས་ཏེ། སྤྲོ་བསྡུའི་དམིགས་པ་རྒྱ་ཆེན་པོ་དང་སྦྱར་ནས། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ཅེས་ཅི་ནུས་སུ། བཟླ་བ་ནི་བདག་ཉིད་རྣལ་འབྱོར་རོ། །གཉིས་པ་མཆོད་རྫས་རྣམས་བྱིན་གྱིས་བརླབ་པ་ནི། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ ཀྱིས་བསང་། ཨོཾ་སྭཱ་བྷཱ་ཝས་སྦྱང་སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་མེད་ཁང་ཕུན་སུམ་ཚོགས་པར་ཨ་ལས་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་ [4b] སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་པའི་དངོས་པོ་རྣམས་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ནམ་མཁའི་མཐའ་ཀླས་པར་གང་བར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ༔ ནས་ཤཔྡའི་བར་གྱི་བྱིན་གྱིས་བརླབ། བདུད་རྩི་བསང་སྦྱང་། སྟོང་པའི་ངང་ལས་ཡྃ་ལས་རླུང་རྃ་ལས་མེ་ཀྃ་ལས་མི་མགོའི་སྒྱེད་བུ་གསུམ་ལ་བསྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ་བཅུད་ཐམས་ཅད་ཧཱུྃ་ཨོཾ་སྭཱ་ཨཱོཾ་ཧཱཿ མཱུྃ་ལཱྃ་མཱྃ་པཱྃ་ཏཱྃ་ལས་བདུད་རྩི་ལྔ་དང་སྒྲོན་མ་ལྔར་གྱུར་པ་སོ་སོའི་ས་བོན་གྱིས་མཚན་པ་དང་བཅས་པའི་འོག་གི་རླུང་གཡོས་མེ་སྤར་རྫས་ཐམས་ཅད་ཞུ་ཞིང་འདྲེས་པའི་སྟེང་གི་ནམ་མཁའ་ལ་ཨོཾ་ཨཱཿཧཱུྃ་གི་ཡི་གེ་གསུམ་གནས་པ་ལས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག །ཡི་གེ་གསུམ་ལ་ཐིམ་སྟེ་རིམ་པར་ཞུ་བ་ལས་དམ་ཚིག་གི་རྫས་དང་རོ་གཅིག་ཏུ་གྱུར་པར་བསམ་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ལན་གསུམ། རཀྟ་བསང་སྦྱང་། སྟོང་པའི་ངང་ལས་ཨ་ལས་བྱུང་བའི་པདྨ་འབར་བའི་སྣོད་དུ་ར་ལས་ཆགས་མེད་རཀྟའི་རྒྱ་ [5a] མཚོ་རྦ་རླབས་མཁའ་ལ་འཕྱོ་ཞིང་འཁྲུགས་པ་ཟེགས་མ་ལས་འདོད་ཡོན་གྱི་ལྷ་མོ་འཕྲོ་བར་གྱུར། ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ༔ ལན་གསུམ། གཏོར་མ་བསང་སྦྱང་། སྟོང་པའི་ངང་ལས་རླུང་མེ་ཐོད་པའི་སྒྱེད་བུ་གསུམ་ལ་གནས་པའི་ཡེ་ཤེས་ཀྱི་ཀ་པཱ་ལ་སྟོང་གསུམ་དང་མཉམ་པའི་ནང་དུ་ཤ་ལྔ་བདུད་རྩི་ལྔ་གཙོ་བོར་གྱུར་པའི་བཟའ་བཅའ་བལྡག་ཞི་བ་འདོད་ཡོན་ལྔའི་ཕུང་པོ་ཟད་མི་ཤེས་པར་གྱུར། ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུཧྱ་ས་མ་ཡ་ཧཱུྃ་ཧྲཱིཿཋཱ༔ ལན་གསུམ་གྱིས་བྱིན་གྱིས་བརླབ། གསུམ་པ་བླ་མ་ཡི་དམ་གྱི་གཏོར་འབུལ་ནི། བདག་བསྐྱེད་ལས་གཞུང་རྒྱས་པ་དང་འབྲེལ་ནས་བྱས་ཀྱང་རུང་ཞིང་། དཀྱུས་ཀྱི་བདག་བསྐྱེད་ཙམ་ལ་བརྟེན་པ་ཡིན་ན། རང་གི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་ཕྱོགས་བཅུར་བཞུགས་པའི་བླ་མ་རིག་འཛིན་རྒྱལ་བ་རྒྱ་མཚོའི་དཀྱིལ་འཁོར་གྱི་ལྷ་ཚོགས་ཐམས་ཅད་མཁའ་ཁྱབ་ཀྱི་འཁོར་ལོར་སང་པར་བསམ་ཞིང་། ཧཱུྃ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ [5b] ཎི་ཀ་དྲྀ་ཥྱ་ཧོཿ ས་མ་ཡ་ཧོཿ ས་མ་ཡ་སྟྭྃ། ཛཿ་ཧཱུྃ་བྃ་ཧོཿ ཞེས་པས་སྤྱན་དྲངས། ཧཱུྃ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཨོཾ་ཨཱཿཧཱུྃ་གུ་རུ་མཎྜལ་དེ་བ་ག་ཎ་ས་པ་རི་ཝཱ་རེ་བྷྱཿབཛྲ་ཨརྒྷཾ་པྲ་ཏཱིཙྪ་སྭཱཧཱ། ནས་ཤཔྡའི་བར་གྱི་ཕྱི་མཆོད་དང་། བཛྲ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། ཞེས་སྨན་རཀ་སྟོབ། རྡོ་རྗེའི་ཐལ་མོ་གྱེན་དུ་བཀྱེལ། ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་བསམ་ཞིང་། སྔགས་སྔ་མའི་མཐར། ཨི་དཾ་བ་ལིཾ་ཏ་གྲྀ་ཧྞནྟུ་མ་མ་སརྦ་སིདྡྷི་མྨེ་པྲ་ཡཙྪ། ཞེས་གཏོར་མ་ཕུལ། བསྟོད་པ་ནི། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །བཅོམ་ལྡན་ཁྲོ་བོའི་རྒྱལ་པོ་ནི། །སངས་རྒྱས་ཀུན་གྱི་འཁོར་ལོས་སྒྱུར། །གདུལ་དཀའ་མ་ལུས་འདུལ་བ་པོ། །ཁྲོ་བོའི་རྒྱལ་ལ་ཕྱག་འཚལ་ལོ། །ཕྱག་རྒྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡི་རྣམ་ཀུན་ཏུ། །མཆོག་ [6a] ཏུ་དད་པས་ཕྱག་འཚལ་ལོ། །ཞེས་བསྟོད་ཅིང་འདོད་དོན་གསོལ་ནས་མགྲོན་རྣམས་གཤེགས་སུ་གསོལ་བའམ་བསྟིམ་པ་གང་བདེ་བྱ་སྟེ་སྔོན་འགྲོའི་བྱ་བའོ། །གཉིས་པ་དངོས་གཞིའི་ཆོ་ག་ལ་རྒྱུན་གྱི་ཕྲིན་ལ་སུ་བྱ་བ་དང་། ཁྱད་པར་སྐབས་ཀྱི་ཕྲིན་ལས་སུ་བྱ་བ་གཉིས། དང་པོ་ལ་དགུ་ལས། དང་པོ་མདུན་བསྐྱེད་གསལ་འདེབས་པ་ནི། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། སྟོང་པ་ཉིད་ཀྱི་ངང་ལས་མདུན་གྱི་ནམ་མཁར་དུར་ཁྲོད་ཀྱི་ས་གཞི་འཇིགས་སུ་རུང་བ་རོ་གསར་རྙིང་སྣ་ཚོགས་གཅལ་དུ་བཀྲམ་ཞིང་ཕུང་པོར་སྤུངས་པ་ཁྲག་གིས་སྦགས་པའི་རོ་ལང་རྣམས་དགོད་ཅིང་གར་རྩེ་བ། ལས་ཀྱི་ཤན་པ་འབུམ་ཀུན་ཏུ་རྒྱུ་ཞིང་ཉམས་པ་རྣམས་འགུགས་འཆིང་གསོད་གཅོད་ཀྱི་ལས་བྱེད་པ། མ་རུངས་པའི་སྲོག་ཆགས་གདུག་པ་ཅན་རྣམས་ངུ་འབོད་ཀྱི་སྒྲ་དང་བཅས་པས་ཤ་ཟ་ཞིང་ལང་ལོང་དུ་འཕྱོ་བ་ཕྱོགས་ཐམས་ཅད་དུ་མེ་རླུང་དམར་ནག་དྲག་ཏུ་འབར་ཞིང་འཁྲུགས་པའི་དབུས་སུ་བྷྲཱུྃ་ལས་དུར་ཁྲོད་འབར་བའི་གཞལ་མེད་ཁང་ཆེན་པོ་གྲུ་བཞི་སྒོ་ཁང་རྟ་བབས་དང་བཅས་པ། དྲག་པོའི་རྒྱན་དང་བཀོད་པ་ཕུན་སུམ་ཚོགས་པས་སྤྲས་པ། ནང་ཁྲག་ཞག་གི་རྒྱ་མཚོར་འཁྱིལ་བའི་དབུས་ [6b] སུ་མཐིང་ནག་གྲུ་གསུམ་འབར་བའི་དཀྱིལ་འཁོར་བསྣོལ་མ་གནམ་ལྕགས་ཀྱི་འཁོར་ལོས་ཡོངས་སུ་བསྐོར་བའི་ལྟེ་བར་པདྨ་དང་ཉི་མ་རུ་དྲ་ཕོ་མོ་བསྣོལ་བའི་སྟེང་དུ་ཧཱུྃ་མཐིང་ནག་ཡོངས་སུ་གྱུར་པ་ལས་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་སྐུ་མདོག་མཐིང་ནག་གཏུམ་ཞིང་ཁྲོས་པའི་ཉམས་ཅན། ཞལ་གཅིག་ཕྱག་གཉིས་པ་གཡས་འབར་བའི་རུ་མཚོན་རྣོན་པོ་གནམ་དུ་འཕྱར་ཞིང་གཡོན་གདུག་པ་ཅན་གྱི་སྙིང་དང་ཞགས་པ་འཛིན་པ། སྤྱན་གསུམ་དམར་ལ་ཟླུམ་པ་ཞལ་མཆེ་བ་གཙིགས་ཤིང་ལྗགས་འདྲིལ་བ། སྦྲུལ་ནག་པོའི་རལ་པ་མཐུར་དུ་འཕྱང་ཞིང་ཐོད་པ་སྐམ་པོ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན། སྙིང་ཕྲེང་དང་སྦྲུལ་གྱི་ཆུན་པོས་བརྒྱན་པ། དར་ནག་གི་འཇོལ་བེར་བརྩེགས་མར་གསོལ་ཞིང་གསེར་སྐེད་དང་མི་ལྤགས་རློན་པའི་སྐ་རགས་ཅན། ཙནྡན་གྱི་བིང་ཆེན་སྐེད་ལ་བཙུགས་པའི་སྒོ་གསུམ་ནས་སྤྲུལ་པའི་དམག་དཔུང་འགྱེད་པ། ཁ་དོག་སྣ་ཚོགས་པའི་ཅོད་པན་ལྷབ་ལྷུབ་དང་འཇིགས་པའི་རྒྱན་ཐམས་ཅད་ཀྱིས་ཀླུབས་པ། སག་ཏིའི་ལྷྭམ་ཡུ་རིང་གསོལ་ནས་གཡོན་བརྐྱང་བའི་དོར་སྟབས་ཀྱིས་བསྐལ་པའི་མེ་ཕུང་འབར་ཞིང་འཁྲུགས་ [7a] པའི་དབུས་ན་བཞུགས་པའོ། །དེའི་ཕྱི་རོལ་ཆོས་འབྱུང་གི་ཟུར་དྲུག་ལ་གཙོ་བོའི་གཡོན་ཟུར་ནས་བརྩམས་ཏེ་རིམ་པ་བཞིན། ཡུམ་དཔལ་འབར་མ་དཀར་མོ་གཡས་ཤེལ་གྲི་འཕྱར་ཞིང་གཡོན་ཐོད་ཁྲག་གཙོ་ལ་སྟོབས་པ་མ་མོའི་ཆས་ཅན་རོལ་པའི་སྟབས་ཀྱིས་འགྱིང་བ། སྐུའི་མགོན་པོ་སྟ་གཞོན་ནག་པོ་གཡས་ཙནྡན་གྱི་བེང་གསོར། མགོན་པོ་ལྔ་དང་ཡུམ་བཅས་གནམ་ལྕགས་ཕུར་གཅིག་མར་ཕྱིར་འགོད་པར་གསུངས་ཀྱང་། རྒྱུད་ལས་འཁོར་གྱི་གཙོ་བོར་གསུངས་པ་དང་ངོ་བོ་གཙོ་བོ་ཉིད་དང་དབྱེར་མེད་ཅིང་ཁྱད་པར་སྲོག་དབང་དུ་ཡང་གསུངས་པ་བཅས་འདི་ལྟར་རོ། ། ཞིང་། གཡོན་བདུད་ཀྱི་ཞགས་པ་ཐོགས་ནས་དཔའ་གཏུམ་སྟག་ལ་ཞོན་པ། གསུང་གི་མགོན་པོ་བེང་དམར་སྨུག་གཡས་ཙནྡན་གྱི་བེང་འཕྱར་ཞིང་གཡོན་བདུད་རྩིའི་ལྕགས་པར་འཛིན་པ། ཐུགས་ཀྱི་མགོན་པོ་གྲི་གུག་མཐིང་ནག་གཡས་གྲི་གུག་མཁའ་ལ་འཕྱར་ཞིང་གཡོན་ཐོད་ཁྲག་འཛིན་པ། ཡོན་ཏན་གྱི་མགོན་པོ་ལེགས་ལྡན་ནག་པོ་གཡས་རིན་པོ་ཆེ་དང་གཡོན་ཐོད་ཁྲག་འཛིན་པ་སེང་གེ་ལ་ཞོན་པ། ཕྲིན་ལས་ཀྱི་མགོན་པོ་ཏྲཀྴད་མཐིང་ནག་གཡས་བེང་གསོར་ཞིང་གཡོན་དགྲ་སྙིང་བསྣམས་པ་བྲ་ནག་རྟིང་དཀར་ལ་ཆིབས་པ། ལྔ་ཀའང་མི་བཟད་པའི་ཁྲོ་ [7b] བོ་གཏུམ་དྲག་འཇིགས་པའི་ཉམས་ཅན་དར་ནག་གི་འཇོལ་བེར་དང་དུར་ཁྲོད་རོལ་པའི་ཆས་ཐམས་ཅད་ཀྱིས་བརྒྱན་ཏེ་བམ་གྱི་ཁར་བཞུགས་པའོ། །དེའི་ཕྱི་རོལ་འཁོར་ལོ་རྩིབས་བརྒྱད་ཀྱི་ཤར་དུ་དུ་ལས་ལས་ཀྱི་མགོན་པོ་སྲོག་བདུད་ནག་པོ་དུས་མཐའི་སྤྲིན་དང་མཚུངས་པ། ཞལ་གཅིག་ཕྱག་གཉིས་པ་གྲི་གུག་དང་ལྕགས་པར་བཟུང་ནས་མདའ་གཞུ་འགེངས་ཤིང་ཁ་ཊྭཱྃ་གྲུ་མོར་ངོ་བོ་གཙོ་བོ་ཉིད་དང་དབྱེར་མེད་ཅིང་སྐུའི་རྣམ་འགྱུར་ཐ་དད་པ་ཙམ་ཡིན་པས་འདིར་བྱས། བཀལ་བ། སྐུ་ལ་དར་ནག་གི་བེར་གསོལ་ཞིང་གསེར་གྱི་སྐེ་རགས་བཅིངས་པ། སྤྱན་མིག་ཁྲག་ལྟར་གཡོ་ཞིང་ཁ་རླངས་མེར་འབར་བ། སྟག་རལ་དང་གཟིག་ཤུབ་བཏགས་ནས་བྲ་ནག་རྟིང་དཀར་ལ་ཆིབས་པ། འཇིགས་པའི་སྤྱན་གསུམ་བྲང་ལ་ཤར་ཞིང་ལྷུ་ཚིགས་བཞིའི་སྤྱན་ལས་དམག་དཔོན་བཞི་འགྱེད་པ། བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད་ལྕགས་ཀྱི་བྱ་ཁྲར་སྤྲུལ་ནས་སྔོན་ལ་ལྡིང་ཞིང་སྔ་དགྲ་འདུལ་བ། ལྷོ་ཕྱོགས་ཀྱི་གཤིན་རྗེ་ཆེན་པོ་བརྒྱད་སྟག་གཟིག་དོམ་དྲེད་འཕར་སྤྱང་རྣམས་སུ་སྤྲུལ་ནས་ཕྱི་བཞིན་འབྲེང་བས་ཕྱི་དགྲ་སེམས་པ་རྡུལ་དུ་རློག་པ། གཞན་ཡང་ལས་བྱེད་ཀྱི་དམག་ཚོགས་ [8a] དུ་མས་བསྐོར་བ། ལྷོར་ཨེ་ལས་མ་མོ་སྔགས་ཀྱི་སྲུང་མ་སྐུ་མདོག་སྨུག་ནག་ཞལ་གཅིག་ཕྱག་གཉིས་པ། ཁྲོ་གཏུམ་མི་བཟད་པའི་གཟུགས་ཅན་དཔྲལ་བའི་དབྱིངས་ན་ཡེ་ཤེས་ཀྱི་སྤྱན་གཅིག་འབར་བ། ཞལ་གདངས་ཤིང་མཆེ་བ་གཅིག་མཐུར་དུ་གཙིགས་པ། ལྗགས་འདྲིལ་བ། རལ་པ་ཁམ་ནག་མཐུར་དུ་གྲོལ་བའི་དབུས་ན་ལྕགས་རལ་ཉག་གཅིག་གྱེན་དུ་གཟེངས་པ། ཐུགས་ཀ་ན་ནུ་མ་གཅིག་འཕྱང་བ། ཕྱག་གཡས་ཞིང་དབྱུག་ཀླད་ལ་འཕྱར་ཞིང་གཡོན་དགྲ་སྙིང་དང་ལྕགས་སྤྱང་ཁྲ་ཐབས་སུ་འགྱེད་པ། ཐོད་སྐམ་གྱི་ཅོད་པན་དང་དོ་ཤལ་སོགས་འཇིགས་པའི་ཆས་ཀྱིས་བརྒྱན་ཏེ་གཡོན་བརྐྱང་བའི་སྟབས་ཀྱིས་རོའི་སྟན་ལ་རོལ་པ། འཁོར་སྤྲུལ་པའི་མ་མོ་རྣམ་གསུམ། སྦྱོར་སྒྲོལ་སྲོག་གཅོད་ཀྱི་གིང་གསུམ། ཡེ་ཤེས་ཀྱི་མ་མོ་ལྔ། རྗེ་མོ་བཅུ་བཞི། སྨན་མོ་ལྔ་བཅུ་རྩ་བརྒྱད་སོགས་སྣང་སྲིད་མ་མོའི་ཚོགས་ཀྱིས་བསྐོར་བ། ནུབ་ཏུ་ར་ལས་གཟའ་བདུད་རཱ་ཧུ་ལ་སྨུག་ནག་མགོ་བོ་དགུ་པ་ཕྱག་བཞིའི་དང་པོ་གཉིས་ཆུ་སྲིན་གྱི་རྒྱལ་མཚན་དང་སྦྲུལ་ཞགས། འོག་མ་གཉིས་མདའ་གཞུས་དགྲ་སྙིང་གཟིར་བ། ལུས་ [8b] ཀུན་མིག་གིས་གང་ཞིང་རོ་སྨད་སྦྲུལ་དུ་འཁྱིལ་བ། དུར་ཁྲོད་འཇིགས་པའི་ཆས་ཅན་གཟའ་དང་གདོང་མོ་རྒྱུ་སྐར་སོགས་འཇིགས་བྱེད་དྲེགས་པའི་ཚོགས་ཀྱིས་བསྐོར་བ། བྱང་དུ་བྷྱོ་ལས་བཤན་པ་སྲོག་སྒྲུབ་ནག་མོ་རྔམས་ཤིང་ཁྲོས་པ། གཡས་དགྲ་སྙིང་ཟ་ཞིང་གཡོན་ནད་རྐྱལ་ཐོགས་པ། མི་ལྤགས་ཀྱི་གོས་དང་ཐོད་རུས་སྦྲུལ་གྱིས་བརྒྱན་ཅིང་སྲིད་པའི་རླུང་ནག་ཞོན་པ། གཡས་ན་ཅེ་སྤྱང་གདོང་མ། གཡོན་ན་ཝ་གདོང་མ། མདུན་ན་འུག་གདོང་མ་སོགས་ཤ་ཟ་དང་མ་མོ་འབུམ་སྡེས་བསྐོར་བ། ཤར་ལྷོར་ར་ལས་པེ་ཧར་དགྲ་ལྷ་དམར་གསལ་ཞལ་གཅིག་ཕྱག་གཉིས་སྤྱན་གསུམ་པ་ཁྲོ་འཛུམ་བཞད་པའི་ཉམས་ཅན། གཡས་གསེར་གྱི་གསེག་ཤང་དང་གཡོན་དངུལ་གྱི་པར་བུ་བསྣམས་པ་དབུ་ལ་དར་ནག་གི་འཐིབས་ཞུ་གསོལ་ཞིང་། ཟ་འོག་གི་བེར་དང་མན་ཏྲིའི་ཆོས་གོས་གྱོན་པ། མགུལ་དུ་ཤེལ་ཕྲེང་འཕྱང་ཞིང་སེང་གེ་དཀར་མོ་ལ་ཞོན་པ། ཡུམ་ཤཱནྟི་རོ་ཟན་མས་འདུད་ཅིང་ལས་མཁན་པུ་ཏྲ་ནག་པོ་སོགས་གར་མཁན་སྐྱོ་སངས་རུ་འདྲེན་སྡེ་བཞི་སོགས་ལྷ་མ་སྲིན་དྲེགས་པའི་ཚོགས་ཀྱིས་བསྐོར་བ། ལྷོ་ནུབ་ཏུ་དུ་ལས་གནོད་སྦྱིན་བཤན་པ་དམར་ [9a] ནག་ཞལ་གཅིག་ཕྱག་བཞི་པ། གཡས་གཉིས་རལ་གྲི་དང་གྲི་གུག་གཡོན་གཉིས་ཐོད་ཁྲག་དང་སྦྲུལ་ཞགས་འཛིན་པ། དར་དམར་གྱི་བེར་དང་དུར་ཁྲོད་ཀྱི་ཆས་ཅན་ཟངས་ཀྱི་མཁའ་ལྡིང་ལ་ཞོན་པ། ལས་བྱེད་ཕོ་ཉ་སྡེ་བརྒྱད་སོགས་ཤ་ཟ་བཤན་པའི་ཚོགས་ཀྱིས་བསྐོར་བ། ནུབ་བྱང་དུ་ཏྲི་ལས་སྐྱེས་མཆོག་རྡོ་རྗེ་ལེགས་པ་དམར་པོ་ཕྱག་གཡས་རྡོ་རྗེས་དགྲ་མགོ་གཟིར་ཞིང་གཡོན་མི་སྙིང་འཛིན་པ། དར་དཀར་གྱི་བེར་དང་བརྗིད་པའི་ཆས་ཅན་ར་སྐྱེས་ཁམ་པ་ལ་ཞོན་པ། འཁོར་གིང་ཆེན་སྡེ་བཞི་ལྷ་བཙན་བདུད་ཀྱི་དགེ་བསྙེན་སུམ་བརྒྱ་དྲུག་ཅུ་དགྱེས་སྡེ་མོ་བཅུ་གཉིས་ཟ་བྱེད་མཆེ་བ་ཅན་སོགས་འཇིགས་བྱེད་དྲེགས་པའི་ཚོགས་ཀྱིས་བསྐོར་བ། བྱང་ཤར་དུ་མ་ལས་འདོད་ཁམས་དབང་ཕྱུག་རེ་མ་ཏི་ནག་མོ་སྐེམ་ཞིང་སྦེག་ལ་གཏུམ་པའི་གཟུགས་ཅན་ཞལ་གཅིག་ཕྱག་བཞི་པ། གཡས་གཉིས་གྲི་གུག་དང་རལ་གྲི་གཡོན་གཉིས་ཐོད་དབྱུག་དང་ནད་རྐྱལ་ཐོགས་པ། མ་མོའི་ཆས་བརྒྱད་ཀྱིས་སྤྲས་ཏེ་རྫུ་འཕྲུལ་དྲེལ་རྟའི་སྟེང་ན་བཙན་འཁྱིལ་གྱིས་གཉིས་པ་གཡས་ཁྲམ་ཤིང་འཕྱར་ཞིང་གཡོན་བྷཉྫ་བཟུང་བའི་མཆན་ན་ནད་རྐྱལ་ཐོགས་པ་གཞན་འདྲའོ། །རྒྱུད་ལས་འདི་ལྟར་རོ། ། [9b] བཞུགས་པ་སྣང་སྲིད་མ་མོའི་ཚོགས་ཀྱིས་བསྐོར་བ། གཞན་ཡང་དེ་དག་གི་ཕྱི་རོལ་དུ་རུ་འདྲེན་གྱི་དམག་དཔོན་སྡེ་བཞི། བཀའ་སྡོད་དྲེགས་པ་སྡེ་བརྒྱད། བདུད་དམག་ཉི་ཁྲི་ཆིག་སྟོང་། ལྷ་དམག་འབུམ་སྡེ་ལ་སོགས་པ་ཡེ་ཤེས་དང་ལས་ལ་གྲུབ་པའི་དྲེགས་པ་ཕོ་རྒྱུད་མོ་རྒྱུད་ཕོ་ཉ་ལས་བྱེད་བསམ་གྱིས་མི་ཁྱབ་པའི་ཚོགས་ཀྱིས་བསྐོར་བ་ཐམས་ཅད་ཀྱང་འཇིགས་ཤིང་རྔམས་པའི་གཟུགས་འཆང་ཞིང་ཕྲིན་ལས་འདོད་རྒུར་སྒྱུར་བས་སྒྲུབ་པ་པོའི་རེ་འདོད་ཡིད་བཞིན་དུ་སྐོང་བའི་ཚུལ་གྱིས་བཞུགས་པའོ། །གཉིས་པ་སྤྱན་འདྲེན་པ་ནི། གཙོ་འཁོར་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་འོག་མིན་ཆོས་ཀྱི་དབྱིངས་ཀྱི་ཕོ་བྲང་། མ་ལ་ཡ་གནམ་ལྕགས་འབར་བ། རྡོ་རྗེ་གདན། ན་ལེནྡྲ། བསིལ་བ་ཚལ་དང་ཨུ་ཙ་ལའི་དུར་ཁྲོད་ཆེན་པོ་སོགས་རང་བཞིན་གར་བཞུགས་ཀྱི་གནས་ནས་མགོན་པོ་འཁོར་དང་བཅས་པ་ཐམས་ཅད་བཛྲ་ས་མཱ་ཛཿས་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་བྱོན་པར་བསམ་ཞིང་། རྐང་གླིང་གིས་དྲངས་པའི་རྔ་བོ་ཆེ་སོགས་སྙན་པའི་རོལ་མོ་དང་སྦྱར་སྤོས་ཀྱི་དུད་སྤྲིན། དབྱངས་ཀྱི་འགྱུར་བ་དང་བཅས་པས། ཧཱུྃ། དད་པ་དང་ནི་དམ་ཚིག་གིས། །ཚུར་ [10b] གཤེགས་ཚུར་གཤེགས་ལྷ་ཆེན་པོ། །མ་ཧཱ་ཀཱ་ལ་མཐུ་བོ་ཆེ། །གསང་བའི་ཁྲོ་རྒྱལ་སྟོབས་པོ་ཆེ། །གནས་འདིར་སྤྱན་འདྲེན་གཤེགས་སུ་གསོལ། །འོག་མིན་གནས་མཆོག་དམ་པ་དང་། །གསང་ཆེན་ལྷུན་གྲུབ་གཙུག་ལག་ཁང་། །དུར་ཁྲོད་རབ་འཇིགས་གཞལ་ཡས་ནས། །ཐུགས་དམ་དབང་གིས་གཤེགས་སུ་གསོལ། །ལྷ་ཆེན་དཔལ་འབར་གཤེགས་སུ༴ །ལེགས་ལྡན་ནག་པོ༴ །ཚོགས་བདག་ཆེན་པོ༴ །མ་ནིང་ནག་པོ༴ །སྲོག་བདུད་ཆེན་པོ༴ །མཁའ་འགྲོའི་གཙོ་མོ༴ །མགོན་པོ་སྡེ་ལྔ༴ །སྲིང་གཅིག་ཆེན་མོ༴ །མཐུ་ཆེན་སྡེ་བརྒྱད༴ །བདུད་འདུལ་དམག་ཚོགས༴ །ཡེ་ཤེས་མགོན་པོ་འཁོར་དང་བཅས། །བསྟན་པ་བསྲུང་ཕྱིར་གཤེགས་སུ་གསོལ། །ཞེས་པ་ཙམ་མམ། སྤྲོ་ན། ཧཱུྃ། ཨུ་ཙ་ལ་ནས་ལས་ཀྱི་མགོན། །སྲོག་བདུད་ནག་པོ་གཤེགས་སུ་གསོལ། །བདེ་ཆེན་དབྱིངས་ནས་ཀུན་བཟང་ཡུམ། །ཨེ་ཀ་ཛྰ་ཊི་གཤེགས་སུ་གསོལ། །བར་སྣང་ཁམས་ནས་འཇིགས་བྱེད་གཙོ། །ཁྱབ་འཇུག་ཆེན་པོ་གཤེགས༴ །དུར་ཁྲོད་གནས་ནས་མཁའ་འགྲོ་མ། །མི་བསྲུན་བཤན་པ༴ །ཧེ་ཆེན་བརྡལ་ནས་སྒྲོལ་བའི་གིང་། ། [10b] གནོད་སྦྱིན་ཆེན་པོ༴ །དམ་ཚིག་གནས་ནས་ཐིག་ལེ་རྩལ། །རྡོ་རྗེ་ལེགས་པ༴ །བྱང་ཤར་མཚམས་ནས་རེ་མ་ཏཱི། །འདོད་ཁམས་བདག་མོ༴ །གཙུག་ལག་ཆོས་འཁོར་ལྷ་ཁང་ནས། །པེ་ཧར་དགྲ་ལྷ༴ །བསྟན་པ་སྐྱོང་བའི་དམ་ཅན་ཚོགས། །སོ་སོའི་མངག་གཞུག་ཕོ་ཉར་བཅས། །དམ་ཚིག་གནས་འདིར་སྤྱན་འདྲེན་གྱིས། །ཕྲིན་ལས་སྒྲུབ་ཕྱིར་གཤེགས་སུ་གསོལ། །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨེ་ཧྱེ་ཧི་བཛྲ་ས་མཱ་ཛཿཛཿཧཱུྃ། ཞེས་པས་སྤྱན་དྲང་ངོ་། །གསུམ་པ་བཞུགས་སུ་གསོལ་བ་ནི། ཧཱུྃ། དུར་ཁྲོད་རབ་འཇིགས་གཞལ་ཡས་དམ་པ་འདིར། །སྣ་ཚོགས་པདྨ་ཉི་ཟླ་བརྩེགས་པའི་སྟེང་། །རུ་ཏྲ་ཕོ་མོ་བསྣོལ་བའི་གདན་ཁྲི་ལ། །ཁྲོ་རྒྱལ་མ་ནིང་འཁོར་བཅས་བཞུགས་སུ་གསོལ། །ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་ས་པ་རི་ཝཱ་ར་ས་མ་ཡ་ཏིཥྛ་ལྷན། ཞེས་བཞུགས་སུ་གསོལ། བཞི་པ་དམ་ལ་བཞག་པ་ནི། དམ་ཚིག་གི་རྒྱ་བཅིངས་ཏེ་རྡོ་རྗེ་སྤྱི་བོར་བཞག་བདུད་རྩི་ལྗགས་ལ་བྱིན་པར་མོས་ཏེ། ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ། དཔལ་རྡོ་རྗེ་ནག་པོ་ཆེན་པོ་ལེགས་ལྡན་མ་ནིང་ནག་པོ་ལྕམ་དྲལ་འཁོར་དང་བཅས་པ་རྣམས་ཀྱིས་ཀུན་བཟང་ཧེ་རུ་ཀ་དཔལ། གསང་བདག་ཕྱག་ན་རྡོ་རྗེ། སློབ་དཔོན་པདྨ་ཐོད་ཕྲེང་། རིག་འཛིན་པདྨ [11a] གླིང་པ་ནས་འཁོར་ལོའི་མགོན་པོའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས སྡང་བའི་དགྲ་ཐུལ། གནོད་པའི་བགེགས་ཆོམས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག །ཨོཾ་བཛྲ་ས་མ་ཡ་རཀྵ་ནྟུ་པཉྩ་ཨ་མྲྀ་ཏོ་ད་ཀ་ཋ་ཋ་ཋ་ཧཱུྃ། ཞེས་དམ་ལ་བཞག་བས་ཅི་བསྒོ་བའི་ལས་ཐམས་ཅད་སྒྲུབ་ཅིང་བཀའ་ནོད་པར་བསམ། ལྔ་པ་ཕྱག་བྱ་བ་ནི། ཧཱུྃ། ཆོས་དབྱིངས་སྐྱེ་བ་མེད་པའི་ཕོ་བྲང་ནས། །སྐྱེ་བའི་ཆོ་འཕྲུལ་ཁྲོ་རྒྱལ་མ་ནིང་སྐུ། །མཉམ་མེད་མཐུ་མངའ་གཏུམ་ཆེན་མེ་ལྟར་འབར། །རུ་དྲ་འཇོམས་མཛད་ [11b] བདུད་དཔུང་ཐལ་བར་རློག །མཐར་བྱེད་གཞོན་ནུ་འཇིགས་པའི་གད་རྒྱངས་ཅན། །མ་ཧཱ་ཀཱ་ལ་ཁྱོད་ལ་ཕྱག་འཚལ་ལོ། །ཨོཾ་ཤྲཱི་མ་ཧཱ་ཀཱ་ལ་ག་ཎ་གུཧྱ་ཨ་ཏི་པུ་ཧོཿ པྲ་ཏཱིཙྪ་ཧོཿ ཞེས་ཕྱག་བྱའོ། ། དྲུག་པ་མཆོད་པའང་དྲུག་ལས། ཕྱི་མཆོད་ནི། ཧཱུྃ ཡན་ལག་བརྒྱད་ལྡན་ཡིད་འོང་མཆོད་ཡོན་སྦྲེང་། །རབ་གཙང་དྭངས་པའི་ཞབས་བསིལ་རྒྱ་མཚོར་བསྐྱིལ། །སྣ་ཚོགས་ལྟ་སྡུག་ཆུ་སྐྱེས་ལང་ཚོ་བཞད། །གྲུབ་དང་སྦྱར་བའི་བདུག་པ་སྤྲིན་ལྟར་གཏིབས། །མུན་སྣང་མཐར་བྱེད་སྒྲོན་མེས་ཉིན་མོར་བྱེད། །ཡིད་འོང་བྱུག་པ་ལྷ་ཡི་ཆུ་བོའི་རྒྱུན། །རོ་བཅུད་ཕུན་ཚོགས་ཞལ་ཟས་ལྷུན་པོར་སྤུངས། །སྙན་བརྗིད་རོལ་མོ་སྒྲ་དབྱངས་དང་བཅས་པའི། །ཕྱི་ཡི་མཆོད་སྤྲིན་འདོད་ཡོན་འཛད་མེད་གཏེར། །འབུལ་གྱིས་ཚིམ་ཞིང་དགྱེས་ནས་དངོས་གྲུབ་སྩོལ། །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་ནས་ཤཔྡའི་བར་དང་། པཉྩ་ཀཱ་མ་གུ་ཎ་པྲ་ཏཱིཙྪ་སྭཱཧཱ། ནང་གི་མཆོད་པ་ནི། ཧཱུྃ། གདུག་པའི་སྙིང་ཁྲག་མཆོད་ཡོན་མཚོ་ལྟར་བསྐྱིལ། །མྱོས་བྱེད་དུག་ཁྲག་ཞབས་བསིལ་རྔམས་ཤིང་བརྗིད། །དབང་པོ་རྣམ་ལྔའི་མེ་ཏོག་ཚར་དུ་དངར། །ཤ་ཆེན་དུད་པའི་སྤྲིན་ཕུང་ལང་ལོང་གཡོ། །ཞུན་ [12a] ཆེན་མར་མེ་བསྐལ་པའི་མེ་ལྟར་འབར། །ཁྲག་ཞག་བདུད་རྩིའི་དྲི་ཆབ་རླབས་ཕྲེང་གཡོ། །ཤ་ཁྲག་རུས་པའི་ཞལ་ཟས་ཆེ་བརྗིད་རྔམས། །དྲག་པོའི་རོལ་མོས་ས་གསུམ་འདར་ཞིང་གཡོ། །དུར་ཁྲོད་ནང་གི་མཆོད་སྤྲིན་བསམ་མི་ཁྱབ། །འབུལ་གྱིས་ཚིམ་ཞིང་དགྱེས་ནས་དངོས་གྲུབ་སྩོལ། །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་ཤྨ་ཤ་ན་པཱུ་ཛ་ཨརྒྷཾ་ནས་ཤཔྡའི་ར་བརྗོད། གསང་བའི་མཆོད་པ་ནི། ཧཱུྃ། སྒྲིབ་པའི་དྲི་མ་ཀུན་སྤངས་ཤིང་། །རྟོག་པ་ཀུན་ལས་ངེས་གྲོལ་བ། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་ཨ་ནུ་རཱ་ག་པྲ་ཏཱིཙྪ་སྭཱཧཱ། སྨན་མཆོད་ནི། ཧཱུྃ། དམན་པའི་ཡུལ་ལས་རབ་འདས་ཤིང་། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་པར་བགྱི། །ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རཀྟའི་མཆོད་པ་ནི། སྟོང་གསུམ་བྷཉྫའི་སྣོད་ཡངས་སུ། །དམ་ཉམས་བསྒྲལ་བའི་མཱཾ་ས་དང་། །རཀྟའི་རྒྱ་མཚོ་ཆེན་པོར་བསྐྱིལ། །བསད་ཁྲག་རྦ་ཀློང་འཁྲུགས་པས་མཆོད། །ཨོཾ་ཤྲཱི་མ་ཧཱ་ཀཱ་ལ་ས་པ་རི་ [12b] ཝཱ་ར་མ་ཧཱ་རཀྟ་ཁཱ་ཧི། གཏོར་མའི་མཆོད་པ་ནི། ཧཱུྃ། དཔལ་མགོན་མ་ནིང་ནག་པོ་འཁོར་བཅས་དགོངས། །ཁྱེད་ལ་དགྱེས་པའི་མཆོད་པ་འབུལ་བ་ནི། །ཐོད་ཆེན་བྷཉྫ་རློན་པའི་སྣོད་མཆོག་ཏུ། །བ་ལིཾ་གཏོར་མའི་མཆོད་པ་རོངས་སེ་རོང་། །བདུད་རྩི་སྨན་གྱི་མཆོད་པ་བྲེངས་སེ་བྲེང་། །རཀྟ་དམར་གྱི་ཨརྒྷཾ་ཆི་ལི་ལི། །ཛ་གད་གསེར་སྐྱེམས་བཏུང་བ་མེ་རེ་རེ། །མཱཾ་ས་ཤ་ཆེན་གསུར་དུད་ཐུ་ལུ་ལུ། །བྷཉྫ་རུས་པའི་ཚོགས་ནི་ཁྲ་ལ་ལ། །བཟའ་དང་བཅའ་དང་བཏུང་བའི་བྱེ་བྲག་དང་། །གཟུགས་སྒྲ་དྲི་རོ་རེག་བྱ་ཆོས་ལ་སོགས། །འདོད་ཡོན་ལྔ་ལྡན་མཆོད་པ་སྣ་ཚོགས་ཀུན། །དཔལ་མགོན་མ་ནིང་ནག་པོ་འཁོར་བཅས་ལ། །འབུལ་ལོ་དགྱེས་པར་དགོངས་ཏེ་བཞེས་སུ་གསོལ། །ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུཾ་ཕཊ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་སྤྱིར་ཕུལ་ནས། བྱེ་བྲག་ཏུ་འབུལ་བ་ནི། ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བས་བདེ་བ་ཆེན་པོའི་རང་བཞིན་དུ་དགྱེས་ཤིང་ཚིམས་པར་བསམ་ཞིང་རྡོ་རྗེའི་ཐལ་མོ་གྱེན་ཁ་ཕྱེས་ལྷ་སོ་སོའི་སྙིང་པོའི་མཐར། ས་པ་རི་ཝཱ་ར་ཨི་དཾ་བ་ལིཾ་ཏ་སོགས་གཏོར་སྔགས་ [13a] བཏགས་པ་ལན་གསུམ་མམ་བདུན་གྱིས་འབུལ་ལ། དཔལ་མ་ཧཱ་ཀཱ་ལ་ཁྲག་འཐུང་གི་རྒྱལ་པོ། གཙུག་ལག་ཁང་དང་དཀྱིལ་འཁོར་གྱི་སྲུང་མ། དུག་གསུམ་ནད་ཀྱི་སྨན་པ། རྣལ་འབྱོར་ཡོངས་ཀྱི་དགྲ་ལྷ། བདུད་དཔུང་སྒྲོལ་བའི་དཔའ་བོ། བསྟན་པའི་བཀའ་སྲུང་ཆེན་པོ། ལེགས་ལྡན་ཡེ་ཤེས་ཀྱི་མགོན་པོ་མ་ནིང་ནག་པོ། ཡུམ་དཔལ་འབར་ཀླུ་མོ། ཡེ་ཤེས་ཀྱི་མགོན་པོ་སྡེ་ལྔ། ལས་མགོན་སྲོག་བདུད་ཆེན་པོ་ལ་སོགས་ཏེ་དམ་པ་ཆོས་སྐྱོང་བའི་སྲུང་མ་བཀའ་སྡོད་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས། ཞེས་པ་ནས། ཕྲིན་ལས་མཛོད་ཅིག །ཅེས་པའི་བར་གྱི་འདོད་དོན་གསོལ། བདུན་པ་བསྟོད་པ་བྱ་བ་ནི། ཧཱུཾ། འཇིག་རྟེན་འདས་པའི་དུས་ན་སྔོན་བྱུང་བ། །ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས། །སྲིད་རྩའི་བདག་འཛིན་རུ་དྲ་སྡེ་གསུམ་འདུལ། །རྩལ་ཆེན་ཕྲིན་ལས་མཛད་ལ་ཕྱག་འཚལ་བསྟོད། །དཔལ་ཆེན་མངོན་སྤྲུལ་ནག་པོ་ཆེན་པོའི་སྐུ། །འཆོལ་བའི་ཁྲོ་རྒྱལ་མ་ནིང་དགྲ་བགེགས་གཤེད། །ལྷ་ཆེན་དཔལ་འབར་ཆོས་སྐྱོང་ཡོངས་ཀྱི་རྗེ། ། [13b] དམག་དཔོན་ཆེན་པོའི་སྐུ་ལ་ཕྱག་འཚལ་བསྟོད། །དུར་ཁྲོད་ཐོར་མཁར་མེ་རླུང་འཚུབས་དཀྱིལ་ན། །རྣལ་འབྱོར་དཔལ་མགོན་ཁྱོད་ཀྱི་ཆ་ལུགས་ནི། །སྐུ་མདོག་མཐིང་ནག་ཞག་གཅིག་ཕྱག་གཉིས་པ། །སྐུ་གསུམ་ལྡན་ཕྱིར་སྤྱན་གསུམ་གྱེན་ཐུར་གཟིགས། །རབ་བརྗིད་ཁྲོ་གཉེར་གསུམ་ལྡན་གཏུམ་ལ་རྔམས། །ཞལ་གདངས་མཆེ་གཙིགས་དྲག་པོའི་རྐན་སྒྲ་རྡེབ། །རིན་ཆེན་ཐོད་སྐམ་ལྔ་ཡིས་དབུ་ལ་བརྒྱན། །སྦྲུལ་ནག་རལ་པ་ནག་པོས་ས་གཞི་ཁྱབ། །གཡས་པ་རུ་མཚོན་གཡོན་པ་སྙིང་ཞགས་བསྣམས། །ཙནྡན་བིང་ཆེན་སྐེད་བཙུགས་ལྷ་དམག་འགྱེད། །ཐོད་པ་སྐམ་རློན་སྙིང་ཕྲེང་སྦྲུལ་ཆུན་སྤྲས། །དར་ནག་བེར་གསོལ་གསེར་སྐེད་མི་ལྤགས་བཅིངས། །ལེགས་ལྡན་ནག་པོའི་སྐུ་ལ་ཕྱག་འཚལ་བསྟོད། ཧཱུཾ། ལས་ལ་ཆས་ཚེ་སྲོག་བདུད་ཆ་ལུགས་འཛིན། །སྲིད་གསུམ་གཟིགས་ཕྱིར་སྤྱན་གསུམ་བྲང་ལ་ཤར། །དམག་དཔོན་བཞི་འགྱེད་སྤྱན་བཞིས་ལྷུ་ཚིགས་བརྒྱན། །སྟག་རལ་གཟིག་ཤུབ་བཏགས་ནས་རྟ་ནག་ཞོན། བདུད་མདས་དགྲ་སྙིང་གཟེར་འདེབས་གླིང་བཞིར་རྒྱུག ། [14a] སྤྱན་ནས་ཁྲག་འཛག་མེ་ཡི་ཁ་རླངས་འབར། །ཁ་ཊྭྰཾ་གྲི་གུག་ལྕགས་པར་ཐོགས་ནས་སུ། །སྣང་སྲིད་ཕོ་རྒྱུད་ཐམས་ཅད་ཕོ་ཉར་འགྱེད། །ཅི་བཅོལ་ལས་རྣམས་སྐད་ཅིག་ཡུད་ལ་སྒྲུབ། །རྟག་ཏུ་གྲོགས་མཛད་མགོན་པོ་ནག་པོ་ཆེ། །མ་བསྐུལ་བར་ཡང་བརྣག་པའི་དགྲ་བགེགས་སྒྲོལ། །ལྟག་ན་སྤྱན་གཅིག་མ་ཚོགས་དབང་དུ་སྡུད། །གར་བསྐུལ་ས་རུ་མི་རོ་རགས་སུ་འཚེར། །བཟློག་པས་མི་བཟློག་སྔགས་ཟློག་མཁན་གྱི་གཤེད། །གཙུག་ལག་ཁང་སྲུང་དཀོར་རྐུན་རྩད་ནས་གཅོད། །བསྟན་པ་གཉན་སྲུང་བཀའ་ཡི་བྱ་ར་བ། །དྲེགས་པ་ཀུན་འདུས་ཁྱོད་ལ་ཕྱག་འཚལ་བསྟོད། །བྷྱོ། མཁའ་ལ་དབང་སྒྱུར་ཡིད་བཞིན་སྤྲུལ་པའི་སྐུ། །ཡ་མཚན་རྨད་བྱུང་ལུས་ལ་ཏིལ་མར་བྱུགས། །དཔལ་ལྡན་ལྷ་མོ་གསང་བའི་མཁའ་འགྲོ་མ། །མ་མོ་འབུམ་སྡེའི་གཙོ་ལ་ཕྱག་འཚལ་བསྟོད། །དཔལ་ལྡན་མགོན་པོའི་སྐུ་གསུང་ཐུགས་ཡོན་ཏན། །ཕྲིན་ལས་རྣམ་རོལ་འགག་མེད་ཅིར་ཡང་སྟོན། །གདུག་ཅན་ཚར་གཅོད་བསྟན་པ་རྗེས་སྐྱོང་བ། །མགོན་པོ་སྡེ་ལྔའི་སྐུ་ལ་ཕྱག་འཚལ་བསྟོད། །དཔལ་ལྡན་གཙོ་མོ་ཨེ་ཀ་ཛྰ་ཊི་མ། །ཞལ་གཅིག་ཕྱག་གཉིས་རུ་ལུའི་སྒྲ་ [14b] སྐད་སྒྲོག །ཀུན་ཏུ་བཟང་མོ་དབྱིངས་ཀྱི་མ་མོ་མཆོག །ལས་དང་ཡེ་ཤེས་ཚོགས་ཀྱི་རྗེ་ལ་བསྟོད། །བཤན་པ་ནག་མོ་མི་ལྤགས་གཡང་གཞི་གསོལ། །ཕྱག་ན་སྙིང་དང་ནད་ཀྱི་རྐྱལ་པ་བསྣམས། །ལས་བྱེད་མཁའ་འགྲོ་བྱེ་བའི་ཚོགས་ཀྱིས་བསྐོར། །ནམ་གྲུ་ནག་མོ་འཇིགས་པའི་ཚོགས་ལ་བསྟོད། །དྲང་སྲོང་ཆེན་པོ་གཟའ་མཆོག་རཱ་ཧུ་ལ། །སྐུ་མདོག་དུད་ཀ་དབུ་དགུ་སྤྱན་སྟོང་འབར། །ཕྱག་བཞི་མདའ་གཞུ་རལ་གྲི་རྒྱལ་མཚན་བསྣམས། །སྲིང་བཞི་སྡེ་བརྒྱད་འཁོར་དང་བཅས་ལ་བསྟོད། །གནོད་སྦྱིན་དམར་ནག་ཟངས་ཀྱི་ཁྱུང་དམར་ཆིབས། །ཞལ་གཅིག་ཕྱག་བཞི་གྲི་གུག་ཐོད་ཁྲག་དང་། །རལ་གྲི་དགྲ་སྙིང་སྦྲུལ་ནག་ཞགས་པ་བསྣམས། །དྲག་གཏུམ་ཆེན་པོ་འཁོར་དང་བཅས་ལ་བསྟོད། །དམ་ཅན་ཆེན་པོ་དམར་ནག་ཐིག་ལེ་རྩལ། །ཞལ་གཅིག་ཕྱག་གཉིས་རྡོ་རྗེ་དགྲ་སྙིང་བསྣམས། །ཐོད་ཕྲེང་གཡང་གཞི་སྟག་གི་ཤམ་ཐབས་ཅན། །སུམ་བརྒྱ་དྲུག་ཅུའི་འཁོར་དང་བཅས་ལ་བསྟོད། །ཤིན་ཏུ་མི་བསྲུན་བདུད་མོ་རེ་མ་ཏཱི། །ནམ་མཁའི་མ་དོག་ཅན་དྲེལ་རྟ་རྐང་གསུམ་ཆིབས། །སྟོད་ཁམས་མྱུལ་ཞིང་སྐྱེ་འགྲོའི་སྲོག་དབུགས་ལེན། །བསྟན་ [15a] པ་སྲུང་མཛད་མ་ལ་ཕྱག་འཚལ་བསྟོད། །འགྱུར་མེད་དབྱིངས་ལས་འབར་བའི་སྐུར་སྟོན་པ། །འགྲོ་བའི་དོན་མཛད་ཐུགས་རྗེ་ཉི་མ་འདྲ། །དམ་ཉམས་རྩད་གཅོད་ལེགས་ཉེས་གཉེར་ཁ་འཛིན། །པེ་ཧར་དགྲ་ལྷ་འཁོར་དང་བཅས་ལ་བསྟོད། །སྔོན་ཚེ་རྒྱལ་བའི་སྤྱན་སྔར་རང་རང་གི། །སྲོག་སྙིང་ཕུལ་ནས་ཁས་བླངས་དམ་བཅས་ལྟར། །ཕྲིན་ལས་རྣམ་བཞིས་བསྟན་པ་རྗེས་སྐྱོང་བའི། །དམ་ཅན་འཁོར་དང་བཅས་ལ་ཕྱག་འཚལ་བསྟོད། །ཅེས་པའམ། །སྤྲོ་ན། ཧཱུྃ། ཆོས་སྐུ་སྐྱེ་མེད་ཀུན་ཏུ་བཟང་། །ལོངས་སྐུ་ཆེ་མཆོག་ཧེ་རུ་ཀ །སྤྲུལ་སྐུ་མ་ནིང་ཁྲོ་བོའི་རྒྱལ། །གསང་བདག་ཆེན་པོ་སྟོབས་པོ་ཆེ། །འཆོལ་བའི་ཁྲོ་རྒྱལ་སྲོག་གི་བདུད། །ལྷ་རྣམས་བསོད་ནས་རྒྱས་མཛད་པའི། །ལྷ་ཆེན་དཔལ་འབར་ཁྱོད་ལ་བསྟོད། །ལྷ་མིན་དམག་དཔུང་འཇོམས་མཛད་པའི། །དམག་དཔོན་ཆེན་པོའི་སྐུ་ལ་བསྟོད། །སངས་རྒྱས་བསྟན་པ་སྐྱོང་མཛད་པའི། །སྡེ་དཔོན་ཆེན་པོའི་སྐུ་ལ་བསྟོད། །ཅེས་དང་། དཔལ་ལྡན་ལས་ཀྱི་མགོན་པོ་ནི། །མཐིང་ནག་གྲི་གུག་ལྕགས་པར་ཐོགས། ། [15b] ཁ་ཊྭཱྃ་བདུད་མདངས་དགྲ་སྙིང་གཟེར། །རྟ་ནག་ཞོན་ནས་རྒྱུག་ལ་བསྟོད། །མ་གཅིག་ལྷ་མོ་དཔལ་འབར་མ། །སྤུ་གྲི་འཕྱར་ཞིང་ཀླད་ཁྲག་ལྡགས། །མི་ལྤགས་གོས་གྱོན་ཐོད་ཕྲེང་འཕྱང་། །ཨུ་མ་དེ་བཱིའི་སྐུ་ལ་བསྟོད། །སྐུ་ལས་སྤྲུལ་པའི་མགོན་པོ་ནི། །ནག་པོ་སྟག་ཞོན་མི་བཟད་པ། །ཙནྡན་བེང་གསོར་བདུད་ཞགས་འཕེན། །གཏུམ་པོ་འཇིགས་བྱེད་ཁྱོད་ལ་བསྟོད། །མ་འགགས་གསུང་གི་རོལ་པའི་རྩལ། །བིང་ཆེན་དམར་སྨུག་ཁྲོས་པའི་ཞལ། །ཙནྡན་བེང་དང་ལྕགས་པར་འཛིན། །བདུད་འདུལ་མཐུ་ཆེན་ཁྱོད་ལ་བསྟོད། །ཐུགས་ཀྱི་སྒྱུ་མ་ཆེན་པོའི་འཕྲུལ། །ལྷ་མིན་གཡུལ་ཟློག་ནག་པོ་ཆེ། །ཕྱག་ན་གྲི་གུག་ཐོད་ཁྲག་བསྣམས། །ཁྲག་འཐུང་དཔའ་བོ་ཁྱོད་ལ་བསྟོད། །ཡོན་ཏན་མགོན་པོ་ལེགས་ལྡན་ཆེ། །གཏུམ་དྲག་བཟོད་དཀའི་གཟི་བརྗིད་ཅན། །མཐིང་ནག་རིན་ཆེན་ཐོད་ཁྲག་འཛིན། །གདུག་པ་འདུལ་མཛད་ཁྱོད་ལ་བསྟོད། །ཕྲིན་ལས་དྲག་ཤུལ་ཆེན་པོའི་རྩལ། །ཏྲག་ཤད་བདུད་མགོན་མ་རུངས་པ། །ཙནྡན་བེང་དང་དགྲ་སྙིང་འཛིན། །དགྲ་བགེགས་གཤེད་མ་ཁྱོད་ལ་བསྟོད། །སྨུག་ནག་ཁྲོས་མ་རལ་ [16a] གཅིག་མ། །ཞིང་དབྱུག་འཕྱར་ཞིང་དགྲ་སྙིང་ཟ། །འཇའ་སྤྲིན་གོས་གྱོན་མི་ལྤགས་འཕྱང་། །སྔགས་སྲུང་ཆེན་མོ་ཁྱོད་ལ་བསྟོད། །དཔལ་ལྡན་བཤན་པ་མི་བསྲུན་མ། །གཅེར་མོ་དོན་སྙིང་ཟ་ཞིང་རྒྱུག །དགྲ་བགེགས་མྱོས་བྱེད་རིམས་ནད་འབེབས། །ནམ་གྲུ་ནག་མོ་ཁྱོད་ལ་བསྟོད། །གཏུམ་ཆེན་གཟའ་བདུད་སྲིན་པོའི་གཟུགས། །མགོ་དགུ་རྒྱལ་མཚན་སྦྲུལ་ཞགས་དང་། །མདའ་གཞུ་འགེང་ཞིང་ཐོག་སེར་འབེབས། །སྡེ་བརྒྱད་དམག་དཔོན་ཁྱོད་ལ་བསྟོད། །སྒྲོལ་གིང་བཤན་པ་དམར་ནག་ནི། །གྲི་ཐོད་འཛིན་ཞིང་རལ་གྲི་གདེངས། །བསྟན་དགྲའི་སྙིང་འབྱིན་སྤྲུལ་ཞགས་འཕེན། །གནོད་སྦྱིན་ཆེན་པོ་ཁྱོད་ལ་བསྟོད། །དམ་ཅན་སྐྱེས་བུ་གིང་གི་བདག །དམར་ནག་རྡོ་རྗེ་དགྲ་སྙིང་འཛིན། །ཟ་འོག་བེར་གྱོན་ར་སྐྱེས་ཞོན། །མཐུ་ཆེན་དྲེགས་པ་ཁྱོད་ལ་བསྟོད། །འདོད་ཁམས་དབང་ཕྱུག་རེ་མ་ཏཱི། །ལག་ན་ཁྲམ་ཤིང་ཐོད་པ་འཛིན། །དྲེལ་རྟ་ཞོན་ནས་སྟོང་གསུམ་མྱུལ། །ནག་མོ་སྟོང་གི་གཙོ་ལ་བསྟོད། །སྤྲུལ་པའི་ལས་མཁན་གིང་གི་གཙོ། །བདུད་ཞགས་དགྲ་འཆིངས་སྤུ་གྲིས་གཅོད། ། [16b] སེང་གེ་ཞོན་ནས་སྟོང་གསུམ་ཉུལ། །བེ་ཧར་དགྲ་ལྷ་ཁྱེད་ལ་བསྟོད། །ཧེ་རུ་ཀ་དཔལ་སྤྱན་སྔ་རུ། །དམ་བཅས་ཇི་བཞིན་ད་ལྟ་འདིར། །བསྟན་པ་སྲུང་ཞིང་སྐྱོང་མཛད་པའི། །དམ་ཅན་ཀུན་ལ་བསྟོད་པར་བགྱི། །ཞེས་བསྟོད་པར་བྱའོ། །ཆོས་སྐྱོང་གཞན་འགའ་ཞིག་གི་མཆོད་གཏོར་བྱ་བར་འདོད་ན་ཡེ་ཤེས་པའི་རིགས་རྣམས་སྔོན་དང་དེའི་རྗེས་ལ་འཇིག་རྟེན་པའི་རིགས་རྣམས་དང་གཏེར་བདག་སྤྱི་གཏོར་དང་གཞི་བདག་སྤྱི་གཏོར་གྱི་བར་རིམ་པ་བཞིན་སྐབས་འདིར་བྱའོ། །བརྒྱད་པ་བཟླས་པ་བྱ་བ་ནི། མགོན་པོ་འཁོར་བཅས་ཀྱི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་ལ་སོགས་པའི་མཐར་རང་རང་གི་སྲོག་སྔགས་རིགས་ཀྱི་ཁ་དོག་ཅན་གྱིས་བསྐོར་བ། བདག་བསྐྱེད་ཀྱི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་ཀྱི་རྒྱུད་རབ་ཏུ་བསྐུལ་བས་ཅི་འདོད་བའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་མོས་ལ་གོང་གནོན་གྱི་ཡི་དམ་གྱི་བཟླས་པ་སྔོན་དུ་འགྲོ་བས་བཟླ་བྱའི་སྔགས་ནི། ཨོཾ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུཾ་ཕཊཿཅེས་གཙོ་བོའི་སྙིང་པོའོ། ། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཏྲི་ཡཾ་ཧཱུྃ་ཛཿསྐུ་མགོན་ནོ། ། ཨོཾ་ཤྲཱི་མཧཱ་ཀཱ་ལ་རཀྵ་དུ་བེང་ནི་ཛཿགསུང་མགོན་ནོ། ། ཨོཾ་ཤྲཱི་མ་ཧཱ་ཀཱ་ལ་ཀྵེ་ཏྲ་ཧ་ན་ཧཱུྃ་ཕཊ༔ ཐུགས་མགོན་ནོ། ། ཨོཾ་ཤྲཱི་མ་ཧཱ་ཀཱ་ལ་སི་ཧཾ་རཾ་ཧཱུྃ་ཕཊ༔ ཡོན་ཏན་མགོན་པོའོ། ། ཨོཾ་ [17a] ཤྲཱི་མ་ཧཱ་ཀཱ་ལ་ཏྲ་ཀྴད་ཧཱུྃ་ཛཿཕྲིན་ལས་མགོན་པོའོ། ། ཨོཾ་ཤྲཱི་མ་ཧཱ་ཀཱ་ལ་ཏྲི་ཡཾ་རུ་དྲ་ནག་པོ་ཛཿ ཏྲི་ལིང་གིང་ཀ་ར་རཱ་ཛ་སུ་ཏྲི་ཛཿཛཿསྲོག་བདུད་དོ། ། ཨོཾ་མ་མ་ཨེ་ཀ་ཛྰ་ཊི་ཏྲག་རཀྴ་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཧྰུྃཿསྔགས་སྲུང་མའོ། ། ཨོཾ་ཁྱི་ཁ་ལེ་ནག་མོ་སོད་སྲོག་མ་ཏི་སོད༔ སྲོག་སྒྲུབ་མའོ། ། ཧྲཱི་ཤག་རུ་རག་རཾན་གེ་ཙིཏྟ་ཏྲཾ་མ་མ་ཡོ་ཟ་གྲ་མ་ཧ་ཧི་ཡེ་གེ་ཤ་ལ་ཛ་ཛཿཞེས་གཟའ་བདུད་དོ། ། ཨེ་རྨེ་རུ་ཙེ་གུ་ཎ་ཧྲཱི་ཏྲི་གྷྲཾ་བྷྱོཿཞེས་གནོད་སྦྱིན་ནོ། ། ཨོཾ་བཛྲ་སྰ་དྷུ་ས་མ་ཡ་ཛཿཛཿཞེས་དམ་ཅན་དང་། ཨོཾ་མ་མ་ཏྲག་རཀྨོ་རཀྴ་རུ་ཏི་ཧཱུྃ་ཧཱུྃ་ཕཊ་སྭཱ་ཧཱ། རེ་ཏིའོ། ། ཨོཾ་རཱ་ཛ་ཨ་ཧོ་བྷྲཱུྃ་རྦད༔ ཙིཏྟ་ཐིབས་ཐིབས་ཛཿ མ་དུ་ཏྲི་མ་ཧོ་ཛཿསརྦ་རཱ་ཛ་ས་མ་ཡ་ཐིབས་ཐིབས་ཛ༔ པེ་ཧར་གྱིའོ། །དེ་ལྟར་གཙོ་འཁོར་རྣམས་ཀྱི་སྔགས་རྣམས་སྐབས་དང་སྦྱར་ནས་ཅི་ཙམ་མ་ནུས་བ་བཟླ་ཞིང་། གཙོ་སྔགས་ནི་རྒྱུད་ལས། བྱེ་བ་ཐེམས་ན་ལས་ཀུན་འགྲུབ། །ཅེས་གསུངས་པ་དང་། ལས་སྦྱོར་གྱི་སྔགས་ནི་མན་ངག་གི་གནད་ཤེས་པས་གཞན་དུ་འབྱུང་བ་བཞིན་བཟླའོ། །བཟླས་པ་རྫོགས་པའི་མཐར། ཨོཾ་ཤྲཱི་བཛྲ་དྷརྨ་པཱ་ལ་ས་པརི་ཝཱ་ར་ཨརྒྷཾ་ནས་ཤཔྡའི་བར་གྱིས་མཆོད་ཅིང་འདོད་པའི་དོན་ལ་གསོལ་བ་གདབ། དགུ་པ་ཚོགས་ཀྱི་མཆོད་པ་ནི། བདག་བསྐྱེད་གང་ལ་བརྟེན་པ་དེའི་གཞུང་བཞིན་སྦྱར་བར་བྱའོ། །གཉིས་པ་ཁྱད་པར་སྐབས་ཀྱི་ཕྲིན་ལས་སྒྲུབ་ [17b] པ་ལ་སྐོང་བཤགས་དང་། དྲག་ལས་བསྒྲུབ་པ་གཉིས་ལས། དང་པོ་ལ་གསུམ་ལས། སྐོང་བ་ནི། སྐོང་རྫས་རྣམས་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷྲྰུྃ་ལས་གནས་ཁང་དུར་ཁྲོད་དྲག་པོའི་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱི་རྣམ་པ་མཁོ་དགུ་ཚང་བ། བཟང་དགུས་འབྱོར་བ། མཛེས་དགུས་བརྒྱན་པ། ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་གང་བར་གྱུར། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། བཛྲ་སྥ་ར་ཎ་ཁཾ། ཞེས་པས་བྱིན་གྱིས་བརླབ་ཅིང་ཟད་མི་ཤེས་པར་སྤེལ་ལ། སྙན་པའི་རོལ་མོ་དབྱངས་ཀྱི་འགྱུར་བ་དང་བཅས་པས། ཧཱུྃ། བདག་ནི་རིག་འཛིན་སྒྲུབ་པ་པོ། །གཏེར་གཞུང་ལས་བྱང་བཞིན་ལ་ཚིག་དངོས་བཅོས་མེད་ལས་ཅུང་ཟད་བསྡུས་པའོ། ། བདག་ནི་རྣལ་འབྱོར་དམ་ཚིག་ཅན། །དམ་ལ་གནས་ཤིང་ལྷ་ལ་ཕྲེང་། །ཁྱོད་ནི་སྲུང་མ་ཐུགས་དམ་ཅན། །ཁྱོད་ནི་མཐུ་རྩལ་དྲག་ཤུལ་ཅན། །དགོངས་ཤིག་ལེགས་ལྡན་ནག་པོའི་ཚོགས། །སྔོན་ཚེ་ [18a] དཔལ་ཆེན་སྤྱན་སྔ་རུ། །བསྟན་པ་བསྲུང་བར་ཞལ་བཞེས་པ། །ཁྱོད་ཀྱི་དམ་བཅའ་གཉན་པོ་དེ། །ད་ལྟ་རྣལ་འབྱོར་བདག་བསྐུལ་ན། །བསྒྲུབ་ཅིང་བསྐུལ་ཕྱིར་གཤེགས་སུ་གསོལ། །མ་ཧཱ་ཀཱ་ལ་གནས་འདིར་བྱོན། །ལྷ་ཆེན་དཔལ་འབར་གནས་འདིར། །ཆོས་སྐྱོང་ཆེན་པོ་གནས། །ལེགས་ལྡན་ནག་པོ། །རིག་འཛིན་སྲུང་མ། །མ་ནིང་ནག་པོ། །སྲོག་བདུད་ཆེན་པོ། །བདུད་རྒྱལ་ཐོད་ཕྲེང་། །སྲིང་གཅིག་ལྷ་མོ། །འདོད་ཁམས་གཙོ་མོ། །འཁོར་ཚོགས་རྒྱ་མཚོ་གནས་འདིར་བྱོན། །ཀྱཻ། གསོན་དང་མ་ཧཱ་ཀཱ་ལའི་ཚོགས། །ཉོན་དང་ཆོས་སྐྱོང་ནག་པོ་ཆེ། །ཉོན་དང་མགོན་པོ་ཐོད་ཕྲེང་ཅན། །རྒྱལ་བའི་བཀའ་ལ་མི་བདེན་མེད། །ཟབ་མོའི་དོན་ལ་མི་སེམས་མེད། །མནའ་དང་ཁྲིམས་ལ་མི་བརྟེན་མེད། །ཟས་དང་སྐོམ་ལ་མི་ཆགས་མེད། །ནག་པོ་འཁོར་བཅས་དགོངས་སུ་གསོལ། །དོ་ནུབ་ཁྱོད་ཀྱི་ཐུགས་དམ་བསྐང་། །དོ་ནུབ་ཉམས་ཆག་མ་ལུས་བསྐང་། །དོ་ནུབ་ཞིག་རལ་མ་ལུས་གསོ། །དོ་ནུབ་གནོང་འགྱོད་མ་ལུས་བཤགས། །དོ་ནུབ་ལྷ་ལ་སེམས་ [18b] འཁོན་སྦྱོང་། །དོ་ནུབ་མཉེས་པའི་མཆོད་པ་འབུལ། །ཁྱེད་ཀྱི་ཐུགས་དམ་བསྐང་བ་ནི། །བཤོས་ནག་རྒྱན་ལྡན་གཏོར་མས་བསྐང་། །རཀྟ་དམར་གྱི་ཨརྒྷས་བསྐང་། །བདུད་རྩི་སྨན་གྱི་མཆོད་པས་བསྐང་། །མཚན་ལྡན་ཤེལ་སྒོང་འབྲས་བུས་བསྐང་། །སྣང་གསལ་མདངས་ལྡན་མར་མེས་བསྐང་། །ཞལ་ཟས་ཚོགས་མཆོད་མང་པོས་བསྐང་། །ལུག་ནག་སྤྱི་དཀར་འདི་ཡིས་བསྐང་། །ཁྱི་ནག་གསེར་མིག་འདི་ཡིས་བསྐང་། །རྟེན་རྫས་འཕྱར་དར་ནག་པོས་བསྐང་། །མདའ་ནག་རྒོད་སྒྲོ་སྐུ་ཡི་རྟེན། །རཀྟ་དམར་པོ་གསུང་གི་རྟེན། །ཙིཏྟ་སྙིང་ཆེན་ཐུགས་དམ། །འབོད་པའི་དམ་རྫས་ཡིན་པའི་ཕྱིར། །གཡབ་དར་ནག་པོས། །དམ་ཚིག་གཉན་པོ་བསྲེ་བའི་ཕྱིར། །བདུད་རྩི་སྨན་གྱིས། །དགྱེས་པའི་དམ་རྫས་ཡིན་པའི་ཕྱིར། །ཁྱི་ནག་སྙིང་གིས། །མཱྃ་ས་ཟས་སུ་ཟ་བའི་ཕྱིར། །ཙིཏྟ་སྙིང་གིས། །མྱོས་བྱེད་སྐོམ་དུ་འཐུང་བའི་ཕྱིར། །ཛ་གད་ [19a] ཕུད་ཀྱིས། །ཤངས་ཀྱི་དབང་པོ་ཚིམ་པའི་ཕྱིར། །གསུར་ཆེན་དུད་པས། །ལྗགས་ཀྱི་དབང་པོ་ཚིམ་པའི་ཕྱིར། །དམར་ནག་བཤོས་བུས། །སྤྱན་གྱི་དབང་པོ་ཚིམ་པའི་ཕྱིར། །སྣང་གསལ་མར་མེས། །སྙན་གྱི་དབང་པོ་ཚིམ་པའི་ཕྱིར། །རོལ་མོ་སྒྲ་ཡིས། །རྟག་ཏུ་མི་འབྲལ་འགྲོགས་པའི་ཕྱིར། །གཏའ་གཏོར་ཆེན་པོས། །རྒྱུན་དུ་ཕྲིན་ལས་བཅོལ་བའི་ཕྱིར། །རྒྱུན་གཏོར་ནར་མས། །མཐུན་པའི་དམ་རྫས་ཡིན་པའི་ཕྱིར། །ལུག་ནག་སྤྱི་དཀར། །སྒྲུབ་པའི་དམ་རྫས་ཡིན་པའི་ཕྱིར། །གྲི་རྒོད་སྙིང་གིས། །གཞན་ཡང་དཔལ་གྱི་གཏོར་མ་ལ། །ཡེ་ཤེས་ལྔ་ཡི་རྒྱན་གྱིས་བརྒྱན། །རྣལ་འབྱོར་ཡོངས་ཀྱི་གླུད་དུ་འབུལ། །གཉིས་མེད་དོན་གྱི་ཞངས་པ་སྩོལ། །མདའ་ནག་སྟོང་དམར་བཅུ་གསུམ་ལ། །རྡོ་རྗེ་བོ་ཅོན་གྲི་གུག་རིས། །ཕྱག་མཚན་མང་པོས་བརྒྱན་བྱས་ནས། །ལེགས་ལྡན་ནག་པོའི་སྐུ་གསུང་ཐུགས། །རྣལ་འབྱོར་ལུས་ངག་ཡིད་ཀྱི་གླུད། །ཐབས་ཀྱི་རང་བཞིན་མདའ་ནག་དང་། །ཤེས་རབ་རང་བཞིན་རྒྱལ་མཚན་གཉིས། །གཉིས་མེད་དོན་ [19b] རྟོགས་ཆོས་ཀྱི་སྐུ། །གཉིས་སུ་མེད་པར་ཐུགས་དམ་བསྐང་། །ཡང་གཅིག་མགོན་པོའི་ཐུགས་དམ། །ཆོས་སྐྱོང་ཆེན་པོའི། །མ་ནིང་ནག་པོའི། །མགོན་པོ་སྡེ་ལྔའི་མ་གཅིག་ལྷ་མོའི༴ །སྲོག་བདུད་ཆེན་པོའི། །སྒྲོལ་གིང་ཆེན་པོའི། །དམ་ཅན་ཆེན་པོའི། །རེ་ཏཱི་ཆེན་པོའི། །པེ་ཧར་དགྲ་ལྷའི། །བདུད་ཁ་དགྲ་ལ་བསྒྱུར་བའི་ཕྱིར། །དཔལ་ལྡན་ནག་པོའི་ཐུགས་དམ་བསྐང་། །དགྲ་བགེགས་གནས་ནས་འགུགས་པའི་ཕྱིར། །ཕྱག་བརྙན་ཆེན་པོའི། །དགྲ་བོ་ཆམ་ལ་དབབ་པའི་ཕྱིར། །བདུད་ཀྱི་དམག་ཚོགས། །དགྲ་བོའི་སྲོག་རྩ་གཅོད་པའི་ཕྱིར། །མོན་པ་ཚོགས་ཀྱི། །སྔོན་གྱི་ལམ་སྣ་འདྲེན་པའི་ཕྱིར། །མོན་པའི་བརྒྱད་ཀྱི། །གཡས་ཀྱི་རུ་སྣ་དྲང་བའི་ཕྱིར། །གཤིན་རྗེ་བརྒྱད་ཀྱི། །གཡོན་གྱི་རུ་སྣ་དྲང་བའི་ཕྱིར། །གནོད་སྦྱིན་བརྒྱད་ཀྱི། །སླད་ཀྱི་རྗེས་ཤུལ་འབྲང་བའི་ཕྱིར། །ནད་གཏོང་མ་མོའི། །དམག་གི་རུ་མཚོན་འཕྱར་བའི་ཕྱིར། །ལྷ་དམག་འབུམ་གྱི། །ཕྱོགས་སྐྱོང་བཅུ་ཡི་ཐུགས་དམ༴ །རྒྱལ་ཆེན་བཞི་ཡི༴ །ལྷ་ཆེན་བརྒྱད་ཀྱི༴ །གཟའ་ཆེན་བརྒྱད་ཀྱི༴ ། [20a] རྒྱུ་སྐར་ཉེར་བརྒྱད༴ །འཇིགས་བྱེད་དགུ་ཡི༴ །ཐུགས་དམ་གཉན་པོ་བསྐང་བ་ཡིས། །ལྷ་དང་མི་འབྲལ་གྲིབ་ལྟར་འགྲོགས། །རྣལ་འབྱོར་བདག་དང་བདག་གི་འཁོར། །ཐུབ་པར་སྲུངས་ཤིག་ཐུགས་དམ་ཅན། །ཐུགས་དམ་སྐོང་ལ་གཡར་དམ་སྩོལ། །ཞེས་དང་། གཞན་ཡང་། ཧཱུྃ། རྣམ་དག་དབྱིངས་ལས་མ་གཡོས་ཀྱང་། །ཐུགས་རྗེས་ཁྲོ་བོའི་སྐུར་སྟོན་ཅིང་། །བདུད་དཔུང་འཇོམས་མཛད་ཧེ་རུ་ཀ །མཐུ་ཆེན་དཔའ་བོའི་ཐུགས་དམ་བསྐང་། །མིག་སྨན་མདངས་ཅན་རྟ་མཆོག་སོགས། །ཕྱི་ཡི་རྟེན་གྱིས་ཐུགས་དམ༴ །འདོད་ཡོན་བྱ་རོག་རྒྱལ་མཚན་བཅས། །ནང་གི་རྟེན་གྱིས། །གྲི་སྙིང་སྲོག་གི་འཁོར་ལོ་སོགས། །གསང་བའི་རྟེན་གྱིས༴ །འབོད་པའི་དམ་རྫས་ཡིན་པའི་ཕྱིར། །གཡབ་དར་ནག་པོས། །གཤེགས་པའི་དམ་རྫས་ཡིན་པའི་ཕྱིར། །དབྱངས་རྔ་རོལ་མོས། །གནས་ཀྱི་དམ་རྫས་ཡིན་པའི་ཕྱིར། །ཐོད་མཁར་འབར་བས། །བཞུགས་པའི་དམ་རྫས་ཡིན་པའི་ཕྱིར། །པད་ཉི་རོ་ཡིས༴ །རྒྱན་གྱི་དམ་རྫས་ཡིན་པའི་ཕྱིར། །དུར་ཁྲོད་ཆས་ཀྱིས། །དགྱེས་པའི་དམ་རྫས་ཡིན་པའི་ཕྱིར། །བདུད་ [20b] རྩི་སྨན་གྱིས༴ །ངོམས་པའི་དམ་རྫས་ཡིན་པའི་ཕྱིར། །དམར་ཆེན་རཀྟས༴ །ཚིམ་པའི་དམ་རྫས་ཡིན་པའི་ཕྱིར། །དཔལ་གྱི་གཏོར་མས༴ །མཐུན་པའི་དམ་རྫས་ཡིན་པའི་ཕྱིར། །སྣ་ཚོགས་ནོར་གྱིས༴ །བརྟེན་པའི་དམ་རྫས་ཡིན་པའི་ཕྱིར། །གཟུགས་རྟེན་བླ་རྡོས༴ །བཟའ་བའི་དམ་རྫས་ཡིན་པའི་ཕྱིར། །ཤ་ཆེན་སྣ་ལྔས༴ །བཏུང་བའི་དམ་རྫས་ཡིན་པའི་ཕྱིར། །བདུད་རྩི་སྣ་ལྔས༴ །མཆོད་པའི་དམ་རྫས་ཡིན་པའི་ཕྱིར། །སྲིད་ཞིའི་འབྱོར་པས༴ །སྐུ་ཡི་ཐུགས་དམ་བསྐང་བའི་ཕྱིར། །ཕྱག་རྒྱ་གསལ་རྫོགས༴ །གསུང་གི་ཐུགས་དམ་བསྐང་བའི་ཕྱིར། །རླུང་སྔགས་བཟླས་པས༴ །ཐུགས་ཀྱི་ཐུགས་དམ་བསྐང་བའི་ཕྱིར། །གསལ་བརྟན་ཏིང་འཛིན༴ །ཡོན་ཏན་ཐུགས་དམ་བསྐང་བའི་ཕྱིར། །འདོད་ཡོན་མཁོ་རྒུས༴ །ཕྲིན་ལས་ཐུགས་དམ་བསྐང་བའི་ཕྱིར། །ལས་སྦྱོར་འབད་བས༴ །བསྐང་ངོ་གསོལ་ལོ་ཐུགས་དམ་བསྐང་། །དཔལ་འབར་མ་ཧཱ་ཀཱ་ལ་དང་། །སྤྲུལ་པ་རྣམ་ལྔ་མཐུ་ཆེན་བརྒྱད། །འཁོར་དང་བཅས་པས་ཐུགས་དམ་བསྐང་། །ཐུགས་དམ་གཉན་སྐོང་དངོས་གྲུབ་སྩོལ། །ཞེས་བསྐང་ཞིང་གོང་དུ་མཆོད་གཏོར་ཕུལ་བའི་ཆོས་སྐྱོང་གཞན་གྱི་སྐོང་གསོ་བྱེད་དགོས་ན་ཡང་སྔར་གྱི་རིམ་པ་ [21a] བཞིན་སྐབས་འདིར་སྦྲེལ་ལོ། །གཉིས་པ་བཤགས་པ་བྱ་བ་ནི། ཧོཿ རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེའི་དབང་གིས་འབར་བའི་སྐུར་བཞེངས་པ། །རྒྱལ་བའི་བསྟན་སྲུང་དམ་ཅན་རྒྱ་མཚོའི་ཚོགས། །འཁོར་བཅས་བདག་ལ་གསན་ཅིང་དགོངས་སུ་གསོལ། །བདག་ཅག་བླུན་རྨོངས་མ་རིག་འཁྲུལ་པའི་ཡིད། །ལས་དང་ཉོན་མོངས་བག་ཆགས་ཀྱིས་དཀྲུགས་པས། །ལྷ་ཁྱོད་བསྙེན་ཅིང་བསྒྲུབ་པར་དམ་བཅས་ཀྱང་། །སྐུ་ཡི་ཕྱག་རྒྱ་མ་གསལ་དོན་མ་རྟོགས། །སྔགས་ཀྱི་བཟླས་བརྗོད་མ་དག་ལྷག་ཆད་འཁྲུགས། །ཡིད་ཀྱི་ཏིང་འཛིན་བྱིང་རྒོད་རྟོག་པས་བསླད། །དམ་རྫས་མ་ཚང་རྟེན་རྫས་མ་ཚོགས་དང་། །རྒྱུ་ཆུང་ཕུད་ཉམས་འབག་བཙོག་དྲི་མས་གོས། །དུས་ཀྱི་མཆོད་གཏོར་འགྱངས་ཤིང་ཆག་པ་དང་། །བསྙེན་སྒྲུབ་གཡེལ་ཞིང་ལས་སྦྱོར་ལོག་པ་སོགས། །རྩ་བ་ཡན་ལག་དམ་ཚིག་ཉམས་པ་ཀུན། །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས། །མཐོལ་བཤགས་བཟོད་པ་དང་དུ་བཞེས་ནས་ཀྱང་། །ཉམས་ཆག་སྒྲིབ་པའི་ཚོགས་རྣམས་ཀུན་བྱང་སྟེ། །འགྱུར་མེད་ཚངས་པ་མཆོག་གི་ [21b] དངོས་གྲུབ་སྩོལ། །ཞེས་དང་འཁོན་གཅུགས་སྦྱོང་བའི་དམིགས་པ་དང་སྦྱར་ཏེ་ཡི་གེ་བརྒྱ་པ་ལན་གསུམ་སོགས་བཟླས་པས་བཤགས་པར་བྱའོ། །གསུམ་པ་ཕྲིན་ལས་གསོལ་བ་ནི། ཧཱུྃ། རྒྱལ་བའི་བསྟན་སྲུང་རྡོ་རྗེ་ནག་པོ་ཆེ། །ལྕམ་དྲལ་བཀའ་སྡོད་འཁོར་དང་བཅས་རྣམས་ལ། །ཕྲིན་ལས་རབ་འབྱམས་གསོལ་དང་བསྐུལ་བའི་ཕྱིར། །མཆོད་སྤྲིན་རྒྱ་མཚོ་བསྟབས་པས་དགྱེས་གྱུར་ཏེ། །ཀུན་བཟང་ཧེ་རུ་ཀ་དཔལ་དཔའ་བོ་ཆེ། །དཀྱིལ་འཁོར་རྒྱ་མཚོའི་ཁྱབ་བདག་པདྨ་འབྱུང་། །མཆོག་གི་ས་བརྙེས་རྡོ་རྗེའི་རིག་འཛིན་ཚོགས། །རིམ་པར་བྱོན་པའི་རྩ་བརྒྱུད་བླ་མ་ཡིས། །རྒྱུད་གསུམ་དམ་ཅན་དྲེགས་པའི་དཔུང་ཚོགས་རྣམས། །ཕྱི་ནང་གསང་བའི་འདོད་ཡོན་རྒྱ་མཚོས་མཆོད། །བསྙེན་ཅིང་བསྒྲུབས་ནས་དབང་བསྐུར་དམ་བཞག་པའི། །ཞལ་བཞེས་ཐུགས་དམ་གཡེལ་བར་མ་མཛད་པར། །སྲིད་ཞིའི་ཕུན་སུམ་ཚོགས་ཀུན་འབྱུང་བའི་གཞི། །རྒྱལ་བའི་བསྟན་པ་ཕྱོགས་བཅུར་རྒྱས་པ་དང་། །དེ་འཛིན་ལུང་རྟོགས་བཤད་སྒྲུབ་ཀྱིས་འཚོ་བའི། །བསྟན་འཛིན་ཡར་ངོའི་ཟླ་ལྟར་འཕེལ་བར་མཛོད། །མཁའ་མཉམ་འགྲོ་བའི་ཉེར་འཚེ་ཀུན་ཞི་ཞིང་། །དགེ་བཅུའི་འབྱོར་པ་རྒྱ་མཚོས་ [22a] འཚོ་བ་དང་། །འཇིག་རྟེན་ཁམས་ཀྱི་སྣོད་བཅུད་ལེགས་ཚོགས་ཀུན། །རབ་འཕེལ་རྫོགས་ལྡན་དཔལ་གྱིས་མཐོ་བར་མཛོད། །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །ནད་གདོན་བགེགས་དང་བར་དུ་གཅོད་པ་སོགས། །ཕྱི་ནང་མི་མཐུན་རྒུད་པ་ཀུན་ཞི་ཞིང་། །བདུད་སྡེའི་གཡུལ་ལས་རྣམ་པར་རྒྱལ་བར་མཛོད། །ཚེ་དང་བསོད་ནམས་དཔལ་འབྱོར་ལོངས་སྤྱོད་སྟོབས། །ཐོས་བསམ་སྒོམ་པ་འཕེལ་ཞིང་རྒྱས་པ་དང་། །ས་གསུམ་འགྲོ་བ་རྣམས་དང་དེ་དག་གིས། །ཕུན་ཚོགས་དཔལ་ཀུན་དབང་དུ་བསྡུ་བར་མཛོད། །མི་བསྲུན་ལོག་བར་སེམས་པའི་དགྲ་དང་བགེགས། །ནག་ཕྱོགས་བདུད་སྡེའི་དཔུང་དང་བཅས་པ་རྣམས། །ཕྲིན་ལས་དྲག་པོ་ཤིན་ཏུ་མི་བཟད་པས། །ཡེ་ཤེས་དབྱིངས་སུ་སྒྲོལ་བའི་ཕྲིན་ལས་མཛོད། །སེམས་ཉིད་གདོད་མའི་བསྟན་སྲུང་རོ་དོགས་དྲིས། །བསླད་མིན་མཐའ་བྲལ་བདེ་ཆེན་མངོན་གྱུར་ནས། །ཕྲིན་ལས་རྣམ་བཞིས་འགྲོ་བའི་རེ་སྐོང་བའི། །དངོས་གྲུབ་རྒྱ་མཚོའི་དཔལ་གྱིས་འབྱོར་བར་མཛོད། །ཅེས་ལས་ཀྱི་གཉེར་གཏད་ཅིང་མངོན་པར་འདོད་པའི་ཕྲིན་ལས་གསོལ་ལོ། ། [22b] གཉིས་པ་དྲག་པོའི་ཕྲིན་ལས་སྒྲུབ་པ་ལ་བཞི་ལས། དང་པོ་གཤོམ་ནི། ཐུན་གྱི་གཏོར་མ་གྲུ་གསུམ་གཙོ་འཁོར་གྱི་གྲངས་དང་མཉམ་པ་ཤ་ཁྲག་གིས་བརྒྱན་པ་མཉྫིའི་སྟེང་ལ་བཀོད། འབྱོར་ན་ཁྲག་སྐྱེམས་སོགས་དམ་རྫས་དང་འབྲེལ་བའི་ཁྱད་པར་གྱི་མཆོད་པའང་བཤམས་པ་འབྲུ་གསུམ་གྱི་བྱིན་གྱིས་བརླབས་ནས། གཉིས་པ་དྲག་བཟླས་ནི། རང་ཉིད་ཡི་དམ་གྱི་སྙེམས་པ་མཆོག་ཏུ་བརྟན་པོས་གོང་གནོན་གྱི་བཟླས་པ་ཅུང་ཟད་བྱས་ནས། མདུན་བསྐྱེད་སྔར་ཡོད་ཀྱང་བསྐྱར་དུ་གསལ་བཏབ་ལ། རང་གི་ཐུགས་ཀའི་ཧཱུྃ་ལས་འོད་ཟེར་མེའི་ཕུང་པོ་ལྟ་བུ་འཕྲོས་མགོན་པོའི་ཐུགས་རྒྱུད་བསྐུལ་བས་དེ་ཉིད་ཁྲོས་འཁྲུགས་རྔམས་པར་བཞེངས་ནས་འཁོར་རྣམས་བསྐུལ། དེ་རྣམས་ཀྱིས་ཀྱང་སྤྲུལ་པའི་ཕོ་ཉ་མཚོན་ཆ་ཅན་དཔག་མེད་བུ་ཡུག་འཚུབས་པ་ལྟར་སྤྲོས་པས་དགྲ་བགེགས་ཐམས་ཅད་བསད་བཅད་ཚར་གཅོད་པའི་ལས་མཛད་པར་བསམས་ལ། མགོན་པོའི་སྲོག་སྔགས་ཀྱི་མཐར། ཏྲི་ཡཾ་རུ་དྲ་ཧཱུྃ་བྷྱོཿ མུན་ཤཾ་བྷྱོཿ མུན་ནག་ཤི་བྷྱོ༔ རུ་དྲ་ནག་པོ་དགྲ་བོའི་སྙིང་ལ་སུ་ཏྲི་རྦད༔ སུ་ནྲྀ་མཱ་ར་ཡ་རྦད༔ ཅེས་གཙོ་བོའི་དྲག་སྔགས་དང་། ཨོྃ་མ་ཧཱ་ཀཱ་ལ་ཏྲི་ཡཾ་རུ་དྲ་ནག་པོ་ཛཿ ཏྲི་ལིང་གིང་ཀ་ར༔ རཱ་ཛ་སུ་ཏྲི་ཛཿཛཿཞེས་ལས་མགོན་གྱི་སྔགས་ཏེ་དམིགས་པ་ཤུགས་དྲག་བོས་ཅི་ནུས་སུ་བཟླ་ཞིང་། ལས་གལ་ཆེན། འདིའི་རྦད་བསད་ཀྱི་སྔགས་རྣམས་དང་འཁོར་ [23a] གཞན་རྣམས་ཀྱི་དྲག་སྔགས་ཀྱང་ཅི་ནུས་བཟླས་ནས། གསུམ་པ་དམིགས་བྱ་དགུག་བསྟིམ་ནི། ཐུན་གཏོར་ལ་རཀྟ་བྲན་ཏེ། སླར་ཡང་རང་གི་ཐུགས་ཀ་ནས་ཚ་ཞིང་རྩུབ་པའི་འོད་ཟེར་འཕྲོས་པས་མགོན་པོ་འཁོར་བཅས་ཀྱི་རྒྱུད་བསྐུལ་སྤྲུལ་པའི་ཕོ་ཉ་རྣམས་ཀྱིས་དམིགས་བྱ་རང་དབང་མེད་པར་བཀུག་ནས་གཏོར་མ་ལ་བསྟིམ་པར་བསམ་ཞིང་། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ༴ ཆོས་ཀྱི༴ དགེ་འདུན་གྱི༴ གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་ཡང་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་ལྕམ་དྲལ་བྲན་གཡོག་འཁོར་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུགས་ [23a] པའི་གཟུགས་ཅན་སྡང་བའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག །སྙིང་པོ་རྣམས་ཀྱི་མཐར། ཨོཾ་བཛྲ་ཨཱ་ཀརྵ་ཡ་ཛ༔ ཛཿཧཱུྃ་བྃ་ཧོཿ ཞེས་ལན་གསུམ་ལ་སོགས་པས་དགུག་བསྟིམ་བྱས་ལ། སླར་ཡང་བདུད་རྩིས་བྲན་ཏེ། རྃ་ཡྃ་ཁྃ་གིས་བསང་སྦྱང་། སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤའི་རི་བོ། ཁྲག་གི་རྒྱ་མཚོ། རུས་པའི་ཕུང་པོ། ཀླད་ཞག་གི་ལྦུ་ཕྲེང་འཁྲིགས་པ་དམ་ཚིག་ཏུ་འོས་པའི་འདོད་ཡོན་གྱི་རྣམ་པ་མ་ཚང་བ་མེད་པ་ནམ་མཁའ་དང་མཉམ་པར་གང་བ་ངོ་བོ་ཟག་པ་མེད་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། ཨོཾ་ཨཱཿཧཱུྃ་ཧོཿ ཞེས་པས་བྱིན་གྱིས་བརླབས་ནས་མགོན་པོ་འཁོར་བཅས་ཀྱིས་རོལ་པར་བསམ་ལ། མགོན་པོའི་སྔགས་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིཿཞེས་བཏགས་པ་བརྒྱའམ་ཉེར་གཅིག་སོགས་ཀྱིས་ཕུལ། དེ་བཞིན་དུ་འཁོར་སྔགས་ལ་གཏོར་སྔགས་བཏགས་པ་ཉེར་གཅིག་དང་བདུན་ལ་སོགས་པ་ཅི་རིགས་པར་ཕུལ་བའི་མཐར་འདོད་དོན་ཕྲིན་ལས་སུ་གསོལ་ལོ། ། [24a] བཞི་བ་ཐུགས་དམ་བསྐུལ་བ་ནི། སྨན་རཀ་ཕུད་ཀྱིས་མཆོད་ཅིང་གསུར་ཆེན་གྱི་དུད་པ་དང་དར་ནག་གི་གཡབ་མོར་བཅས་བས་འདི་ལྟར་བསྐུལ་ལོ། ། ཧཱུྃ་བྷྱོ། སེམས་ཉིད་ཀློང་གསལ་འབར་བའི་དུར་ཁྲོད་ནས། །ཐོད་མཁར་སུམ་བརྩེགས་འབར་བའི་གཞལ་ཡས་ནས། །བདུད་པོ་བདུད་མོས་གཏམས་པའི་དུར་ཁྲོད་ནས། །བཤན་པ་ཕོ་མོ་ཚོགས་པའི་གྲོང་ཁྱེར་ནས། །མེ་རླུང་འཚུབས་མར་འཁྱིལ་བའི་དུར་ཁྲོད་ནས། །རྟོག་མེད་ངང་ལས་ལྷ་ཆེན་སྐུར་སྟོན་པ། །ལྷ་ཆེན་མགོན་པོ་དཔལ་འབར་གཤེགས་སུ་གསོལ། །ལེགས་ལྡན་ནག་པོ་གཤེགས། བྷ་ག་ནག་པོ་གཤེགས་སུ༴ །ཚོགས་བདག་ཆེན་པོ༴ །ཛམ་ལ་ནག་པོ༴ །ནག་པོ་ཐོད་ཕྲེང་༴ །ཆོས་སྐྱོང་ཆེན་པོ༴ །དགྲ་བོའི་གཤེད་མ༴ །བགེགས་ཀྱི་གཉེན་པོ༴ །བདག་གི་གྲོགས་པོ༴ །དམ་ཅན་ཆེན་པོ༴ །ཆོས་སྐྱོང་འཁོར་བཅས་བསྐྱོད་པའི་ཚེ། །ནག་པོ་གཟི་མདངས་ཡ་ལ་ལ། །སྲིན་མོ་མ་ཚོགས་ཐིབས་སེ་ཐིབ། །ལིང་པ་མདའ་འཕེན་བྲེངས་སེ་བྲེང་། །བྱ་རོག་ཤ་ཐོགས་ལིངས་སེ་ལིང་། །གཡབ་དར་ནག་པོ་ལྷབས་སེ་ལྷབ། །ཉི་མ་ཟླ་བ་ཏ་ལ་ལ། །མེ་སྟག་འཚུབས་མ་འཁྱིལ་ལི་ལི། །དོམ་ནག་ཁྱི་ [24b] ནག་ང་ར་ར། །ལྕགས་སྤྱང་ཅེ་སྤྱང་འདུ་རུ་རུ། །དུག་སྤྲུལ་ནག་པོ་ཁྱུགས་སེ་ཁྱུག །རྟ་ནག་མང་པོ་ཙེ་རེ་རེ། །དུག་མཚོ་ཁོལ་མ་ཁྱི་ལི་ལི། །འུག་པ་རྐན་སྒྲ་ཆེམས་སེ་ཆེམ། ཐུན་གྱི་སེར་བ་ཤར་ར། །འགོང་པོ་ངུ་སྐད་ལྷངས་སེ་ལྷང་། །འདྲེ་ངན་སྐད་ངན་ཙེ་རེ་རེ། །རྒྱལ་བསེ་ན་སྨྱོས་སྒྲ་དི་རི་རི། །ཆོས་སྐྱོང་འཁོར་བཅས་ཐིབས་སེ་ཐིབ། །ཚུར་གཤེགས་ཚུར་བྱོན་དམ་ལ་འདུ། །ཤ་ཁྲག་གཏོར་མ་འདི་བཞེས་ལ། །བཅོལ་བའི་ཕྲིན་ལས་སྒྲུབ་པར་མཛོད། །བྷྱོ། དོ་ནུབ་ནམ་གྱི་གུང་ཐུན་ལ། །བླ་རྐུན་ཇག་པ་ལས་ལ་ཆོ། །ཟས་སུ་དགྲ་བོའི་ཤ་ལ་ཟོ། །སྐོམ་དུ་དགྲ་བོའི་ཁྲག་ལ་འཐུང་། །ལས་སུ་གནོད་བྱེད་དགྲ་བགེགས་སྒྲོལ། །བཅོལ་བའི་ལས་རྣམས་སྒྲུབ་པར་མཛོད། །ཅེས་དང་། ཧཱུྃ། ཀུན་བཟང་རྡོ་རྗེ་འཆང་ཆེན་དང་། །དཔལ་ཆེན་ཁྲག་འཐུང་གསང་བའི་བདག །སློབ་དཔོན་ཤཱནྟིང་གརྦྷ་དང་། །སློབ་དཔོན་པདྨ་འབྱུང་གནས་ཀྱིས། །དམ་ལ་བཏགས་ནས་བསྟན་བསྲུང་ཞིང་། །རིག་འཛིན་སྐྱོང་བར་ཁས་བླངས་པའི། །དམ་བཅའ་གཉན་པོ་བཅས་པ་རྣམས། །ད་ལྟ་རྣལ་འབྱོར་བདག་བསྐུལ་ལོ། །མཆོད་ [25a] སྦྱིན་གཏོར་མ་འདི་བཞེས་ལ། །ཞི་རྒྱས་དབང་དྲག་མངོན་སྤྱོད་ཀྱི། །ཕྲིན་ལས་རྣམ་བཞིའི་དངོས་གྲུབ་སྩོལ། །ལོག་ལྟ་གནོད་བྱེད་དགྲ་བགེགས་སྒྲོལ། །མཐུ་དང་རྫུ་འཕྲུལ་ད་ཕྱུངས་ལ། །བསྟན་པ་འཇིག་པའི་དགྲ་བོ་འདི། །ལོ་དང་ཟླ་བ་མ་བཞག་པར། །ཞག་དང་ཟ་མ་ཁོ་ན་ལ། །ཐུགས་དམ་མ་གཡེལ་སོད་ལ་ཤོག །བདག་གིས་བཅོལ་བའི་ཕྲིན་ལས་མཛོད། །ཅེས་བསྐུལ་ཞིང་རྦད་བསད་ཀྱི་སྔགས་རྣམས་དྲག་ཏུ་བཟླ། རོལ་མོ་སྣ་ཚོགས་པའི་སྒྲ་དང་བཅས་པས་དམོད་མོ་བྱ་ཞིང་གཏོར་མ་དགྲ་ཕྱོགས་སུ་འཕངས་པས་སྲུང་མ་འཁོར་བཅས་དཔའ་པའི་ངར་སྒྲ་དང་བཅས་ཏེ་བསྐྱོད་པས་དགྲ་བོའི་གནས་ལུས་ལོངས་སྤྱོད་ཐམས་ཅད་རྗེས་མེད་རྡུལ་ཕྲན་བཞིན་དུ་བརླག་པར་བསམ། ཐུན་མོང་མ་ཡིན་པའི་དྲག་ལས་བསྒྲུབ་པར་འདོད་པས་ནི། འབོད་རྦད་བསད་གསུམ་གྱིས་གཞི་བཟུང་ནས་མཐར་སྡུད་གསུམ་གྱིས་ལས་ལ་སྦྱོར་ཚུལ་རྣམས་གཏེར་གཞུང་གི་མན་ངག་བླ་མའི་ཕྱག་བཞེས་ཀྱིས་བརྒྱན་ཏེ་ལག་ཏུ་བླང་བར་བྱའོ། །གསུམ་པ་རྗེས་ཀྱི་བྱ་བ་ལ་ལྔ་ལས། དང་པོ་གཏོར་མ་བསྟབ་པ་ནི། ཆོ་ག་ཉིན་ཞག་སྦྲེལ་མར་བྱེད་པའི་སྐབས་འབུལ་གཏོར་ཟུར་དུ་བཅས་པ་དང་། ཉིན་ཐ་མའི་ཚེ་ན་བླ་མ་ཡི་དམ་གྱི་གཏོར་མ་མ་གཏོགས་གཏོར་མ་གཞན་རྣམས་ལ་དཔལ་འབར་བཙུགས། སྤོས་དང་རོལ་མོ་གསེར་སྐྱེམས་ཀྱིས་མཚོན་པར་སྒྲུབ་ཁང་གི་ཡང་ཐོག་སོགས་གང་དུ་གཏོང་བའི་སར་ཁྱེར་ནས་ [25b] སྟེགས་ལ་བཀོད་རཀྟས་བྲན་ལ་དམིགས་བྱ་དགུག་གཞུག་བྱ། ཨོཾ་ཨཱཿཧཱུྃ་ཧོཿ སླར་ཡང་བྱིན་གྱིས་བརླབ། རྩ་སྔགས་ལ་གཏོར་སྔགས་བཏགས་པ་གསུམ་མམ་བདུན་གྱིས་ཕུལ་ལ། ཧཱུྃ། ཆོས་ཀྱི་དབྱིངས་ནས་འབར་བའི་སྐུར་བཞེངས་པ། །མཐུ་སྟོབས་དབང་ཕྱུག་རྡོ་རྗེ་ནག་པོ་ཆེ། །ལྕམ་དྲལ་བཀའ་སྡོད་དམ་ཅན་རྒྱ་མཚོའི་ཚོགས། །འཁོར་བཅས་ཐུགས་དམ་དབང་གིས་འདིར་གཤེགས་ཤིག །ཕྱི་ནང་གསང་མཆོད་སྨན་རཀ་བ་ལིཾ་ཏ། །དགྲ་བགེགས་ཤ་ཁྲག་ལ་སོགས་མཁོ་དགུའི་རྫས། །སོ་སོའི་ཐུགས་ལ་ཅི་བཞེད་དེར་འཆར་བའི། །རྨད་བྱུང་དགྱེས་པའི་མཆོད་སྤྲིན་ཆེན་པོ་འདི། །སྔར་མཛད་ལེགས་པའི་ལས་ཀྱི་གཏང་རག་དང་། །སླད་ནས་གཡེལ་བ་མེད་པའི་ཕྲིན་ལས་བཞིའི། །འདོད་པའི་དངོས་གྲུབ་སྩོལ་སླད་འབུལ་ལགས་ན། །དགྱེས་པ་ཆེན་པོས་བཞེས་ཤིང་རོལ་ནས་ཀྱང་། །བསྟན་དང་འགྲོ་བའི་ཕན་བདེ་ཀུན་སྤེལ་ཞིང་། །ཁྱད་པར་བདག་ཅག་དཔོན་སློབ་འཁོར་བཅས་ལ། །ནད་མེད་པ་དང་མི་འགྱུར་ཚེ་སྲོག་དཔལ། །གྲགས་དང་འབྱོར་པ་རྒྱ་མཚོས་མཐོ་བ་དང་། །མ་རུངས་བདུད་དགྲའི་རྒོལ་བ་ཀུན་ཞི་ཞིང་། །རྣམ་མང་ཕྲིན་ལས་རྒྱ་མཚོ་ཡིད་བཞིན་སྒྲུབས། །ཕྱོགས་ལས་རྣམ་པར་རྒྱལ་བའི་རུ་ [26a] མཚོན་ཕྱོར། །བྱང་ཆུབ་བར་དུ་བསྲུང་ཞིང་སྐྱོང་བར་མཛོད། །ཅེས་གཏོར་མ་ཕུལ། རྒྱབ་ཆོག་ལས་གཞུང་གཞན་དང་འབྲེལ་ན་བརྟན་སྐྱོང་ཡོད་པ་ཤས་ཆེ་བས་དེས་ཁྱབ་ལ་གཞན་དུ་བརྟན་སྐྱོང་རྒྱས་བསྡུས་གང་རུང་རེ་བྱ་ན་ཤིན་ཏུ་ལེགས་པར་འགྱུར་རོ། །གཉིས་པ་གཏང་རག་གི་མཆོད་པ་ནི། སླར་ཡང་ཅུང་ཟད་མཆོད་ནས། ཧེ་རུ་ཀ་དཔལ་སྤྱན་སྔ་རུ། །དམ་བཅས་ཇི་བཞིན་ད་ལྟ་འདིར། །བསྟན་པ་བསྲུང་ཞིང་སྐྱོང་མཛད་པའི། །དམ་ཅན་ཀུན་ལ་བསྟོད་པར་བགྱི། །ཞེས་བསྟོད། གསུམ་པ་ནོངས་པ་བཤགས་པ་ནི། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་དང་ཡི་གེ་བརྒྱབ་ལན་གསུམ་ལ་སོགས་པར་བཟླ། བཞི་པ་རྗེས་བསྡུ་ནི། ཡེ་ཤེས་པ་རྟེན་ཡོད་རྣམས། འདིར་ནི་གཟུགས་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྠ་བཛྲ་ཡེ་སྭཱཧཱ། ཞེས་བརྟན་བཞུགས་བྱ། རྟེན་མེད་པ་རྣམས། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་ [26b] གསོལ། །བཛྲ་མུཿས་ཡེ་ཤེས་པ་གཤེགས་དམ་ཚིག་བ་རང་ལ་བསྟིམ་ནས། སྤྱི་བོར་ཨོཾ། མགྲིན་པར་ཨཱཿ སྙིང་ཁར་ཧཱུྃ། ཞེས་པས་བདག་བསྲུང་། འཇིག་རྟེན་པའི་འཁོར་རྣམས། གཙྪ་གཙྪ་སྭ་བྷཱ་ཝ་ནྰཾ། ཞེས་རང་གནས་སུ་གཏང་། དགེ་བ་རྫོགས་བྱང་དུ་བསྔོ་བ་རྣམས་བྱའོ། །ལྔ་པ་ཤིས་བརྗོད་ནི། རབ་འབྱམས་དཀྱིལ་འཁོར་རྒྱ་མཚོའི་འཁོར་ལོའི་མགོན། །གསང་གསུམ་འགྱུར་མེད་བདེ་ཆེན་རྡོ་རྗེའི་སེམས། །འགྲོ་ལ་ཕན་བདེའི་མཆོག་སྩོལ་དཔག་བསམ་ཤིང་། །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །ཆོས་སྐུའི་མཁའ་ལ་གྲངས་མེད་གཟུགས་སྐུའི་སྤྲིན། །ཞི་ཁྲོ་ཉམས་བརྒྱའི་རོལ་པར་འཆར་བ་ལས། །དངོས་གྲུབ་འདོད་རྒུ་ཆར་དུ་བསྙིལ་མཛད་པའི། །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །ཧེ་རུ་ཀ་དཔལ་སྙིང་རྗེའི་རོལ་གར་ནི། །གཏུམ་ཆེན་བཟོད་པར་དཀའ་བའི་གཟི་བརྗིད་ཀྱིས། །ནག་པོའི་རྩ་ལག་སྡེར་བཅས་མཐར་མཛད་པའི། །དཔལ་འབར་མ་ཧཱ་ཀཱ་ལའི་བཀྲ་ཤིས་ཤོག །རྒྱལ་བའི་བཀའ་སྡོད་མི་བཟད་དྲག་ཤུལ་ཅན། །བདུད་དཔུང་ཚར་གཅོད་སྒྲུབ་མཆོག་བུ་བཞིན་སྐྱོང་། །ཕྲིན་ལས་རྣམ་བཞིས་བསྟན་པ་སྲུང་མཛད་པའི། །དམ་ཅན་རྒྱ་མཚོའི་ཚོགས་ཀྱི་བཀྲ་ཤིས་ཤོག །[27a] ཅེས་སོགས་བཀྲ་ཤིས་ཀྱི་ཚིགས་སུ་བཅད་པ་དུ་མས་བདེ་ལེགས་སུ་ཁྱབ་པར་བྱའོ། །ཕྱི་རོལ་ཞིང་ཀུན་ཁྱབ་པར་རྒྱུད་གསུམ་གྱི། དྲེགས་པ་ཡོངས་ཀྱི་རྗེར་གྱུར་ནག་པོ་ཆེ། །ནང་དུ་རྡོ་རྗེ་ལུས་ཀྱི་ཕོ་བྲང་དུ། །རྩ་རླུང་ཐིག་ལེ་ཡོངས་ཤར་ཡེ་ཤེས་མགོན། །གསང་བ་རང་སེམས་གསལ་སྟོང་ཟུང་འཇུག་ཏུ། །ཡང་དག་གདོད་མའི་བསྟན་སྲུང་ཧེ་རུ་ཀ །འཁོར་བཅས་བསྙེན་ཅིང་མཆོད་པའི་ཕྲིན་ལས་གཞུང་། །ལེགས་པར་བསྡེབས་ལ་དབྱིངས་ནས་ཅིས་མི་དགྱེས། །དེ་ཕྱིར་རྒྱལ་བསྟན་གཡེལ་བ་མེད་སྐྱོང་ཞིང་། །རང་གཞན་འདོད་པའི་ཕྲིན་ལས་ཐོགས་མེད་དུ། །ཡོངས་གྲུབ་བདུད་ལས་རྣམ་རྒྱལ་ཧེ་རུ་ཀའི། །གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །དཔལ་ཡེ་ཤེས་ཀྱི་མགོན་པོ་མ་ནིང་འཁོར་བཅས་ཀྱི་ལས་བྱང་ལས་བཞི་མྱུར་འགྲུབ་ཅེས་བྱ་བ་འདི་ནི་སྔན་ལུང་གསང་སྔགས་ཆོས་གླིང་ནས་རྒྱལ་སྲས་སྤྲུལ་པའི་སྐུ་བསྟན་འཛིན་ལེགས་པ་དོན་གྲུབ་ཀྱི་བཀའ་ལུང་བཞིན་གང་གི་ཞབས་རིམ་པ་ཨོ་རྒྱན་བསྟན་འཛིན་ཕུན་ཚོགས་པས་གསེར་གྱི་མེ་ཏོག་དང་བཅས་པས་བསྐུལ་བ་ལས་གཏེར་གཞུང་རྩ་བའི་སྙིང་བོ་རྣམས་སྲོག་ཏུ་བཟུང་། ཡིག་རྙིང་བརྗོད་བདེ་བ་རྣམས་ཁྲིགས་སུ་བསྡེབས། ཁ་སྐོང་འགའ་ཞིག་གསར་དུའང་སྤེལ་ཏེ། སྙོམས་ལས་པ་འགྱུར་མེད་རྡོ་རྗེས་གཡོ་རུ་ཁྲ་འབྲུག་གི་གཙུག་ལག་ཁང་ཆེན་པོའི་འདབས་གསང་སྔགས་ཕོ་བྲང་དུ་ཡི་གེར་སྤེལ་བའོ།། །།


Retrieved from "https://dudjom.tsadra.org/index.php?title=DJYD-KABUM-06-CHA-011&oldid=16739"
Dudjom Tersar
Collected Works of the Masters
A Tsadra Foundation initiative designed to house the writings and revelations of the masters of the Dudjom lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Bodhicitta
Khyentse Lineage
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Dudjom Tersar Project, a Tsadra Foundation initiative designed to house the writings and revelations of the masters of the Dudjom lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.