TTDL-ZABTER-01-KA-025

Previous Text Back to Volume PageNext Text

Wylie title	zab gsang mkha' 'gro'i snying thig las: bla ma drag po bde chen rgyal po'i byin 'bebs dngos grub bang mdzod:
Location	bdud 'joms gling pa zab gter Volume 1, Text 25, Pages 233-235 (Folios 1a1 to 2a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bla ma drag po bde chen rgyal po'i byin 'bebs dngos grub bang mdzod. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: 233-235. Thimphu, Bhutan: Lama Kuenzang Wangdue, 2004.
Side notes	Recto: byin 'bebs   Verso: bdud 'joms gu ru drag po
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Descent of Blessings - byin 'bebs
Cycle	བླ་མ་དྲག་པོ་བདེ་ཆེན་རྒྱལ་པོ་ (bla ma drag po bde chen rgyal po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་རིག་འཛིན་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཡེ་ཤེས་ཉི་མ་མཐའ་རྒྱས་སོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang rig 'dzin bdud 'joms rdo rjes gter nas bton te dag par phab pa'i yi ge pa ni ye shes nyi ma mtha' rgyas so/_/dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བླ་མ་དྲག་པོ་བདེ་ཆེན་རྒྱལ་པོའི་བྱིན་འབེབས་དངོས་གྲུབ་བང་མཛོད་བཞུགས་སོ༔ ན་མོ་གུ་རུ་དྷེ་ཝ་ཌཱ་ཀི་ནཱི་ཡེ༔ (བརྡ་ཡིག་) སྒྲུབ་ལ་རྩེ་གཅིག་གཞོལ་བའི་དུས༔ དད་གུས་མོས་པའི་གདུང་ཤུགས་བསྐྱེད༔ རང་གི་སྙིང་གའི་འོད་ཟེར་གྱིས༔ དབྱིངས་ལས་དབྱིངས་བཞུགས་ཡེ་ཤེས་པ༔ དམ་ཚིག་ཐུགས་རྗེའི་རྒྱུད་བསྐུལ་ནས༔ གསང་གསུམ་རྡོ་རྗེའི་ངོ་བོ་ལ༔ ཕྱག་རྒྱ་དང་ནི་ཡིག་འབྲུ་དང་༔ འོད་ཕུང་འཇའ་ཐིག་རྣམ་པ་རུ༔ རང་དང་སྒྲུབ་པའི་དཀྱིལ་འཁོར་ལ༔ མཚོ་ལ་ཁ་ཆར་བབས་པ་ལྟར༔ གཉིས་སུ་མེད་པར་ཐིམ་པ་ཡིས༔ ཞིང་དང་གཞལ་ཡས་ཡེ་ཤེས་ལྷའི༔ རོལ་པ་ཆེན་པོར་གྱུར་བསམ་སྟེ༔ ཧཱུྃ་ཧྲཱིཿ ཀ་དག་ཁྱབ་བརྡལ་སྤྲོས་པའི་མཐའ་དང་བྲལ༔ ཆོས་སྐུ་གདོད་མའི་མགོན་པོས་བྱིན་ཆེན་ཕོབ༔ ལྷུན་གྲུབ་འགགས་མེད་རོལ་པ་ཅིར་ཡང་སྣང་༔ ལོངས་སྐུ་རིགས་ལྔ་གངས་ཆེན་བྱིན་ཆེན་ཕོབ༔ སྣ་ཚོགས་གར་གྱིས་གདུལ་དཀའ་མ་ལུས་འདུལ༔ འགྲོ་འདུལ་སྤྲུལ་པའི་སྐུ་ཡིས་བྱིན་ཆེན་ཕོབ༔ མཚན་ཐོས་ཙམ་གྱིས་འགྲོ་ཀུན་སྲིད་ལས་སྒྲོལ༔ མགོན་པོ་འོད་དཔག་མེད་པས་བྱིན་ཆེན་ཕོབ༔ མཁྱེན་བརྩེའི་ནུས་པའི་རྩལ་གྱིས་འགྲོ་བ་འདུལ༔ འགྲོ་འདུལ་རིགས་གསུམ་མགོན་པོས་བྱིན་ཆེན་ཕོབ༔ གདུལ་བྱའི་དཔལ་དུ་རང་སྣང་སྟོན་པར་ཤར༔ བརྒྱུད་གསུམ་རིག་འཛིན་བླ་མས་བྱིན་ཆེན་ཕོབ༔ དཔལ་རི་པདྨ་འོད་ཀྱི་གཞལ་ཡས་ནས༔ རྗེ་བཙུན་པད་འབྱུང་སྟོན་འཁོར་བྱིན་ཆེན་ཕོབ༔ བདེ་ཆེན་དབང་དྲག་རོལ་པའི་དཀྱིལ་འཁོར་ནས༔ བླ་མ་དྲག་པོ་བདེ་ཆེན་རྒྱལ་པོ་དང་༔ སྤྲུལ་པ་ཁྲག་འཐུང་རིགས་བཞིས་བྱིན་ཆེན་ཕོབ༔ སྒྲུབ་སྡེ་བརྒྱད་ཀྱི་གྲུབ་པ་མངོན་གྱུར་པའི༔ སྤྱི་དཔལ་རིག་འཛིན་བརྒྱད་ཀྱིས་བྱིན་ཆེན་ཕོབ༔ ཕྱོགས་བཅུའི་ཕྱོགས་སྐྱོང་ཕོ་མོ་ཟིལ་གནོན་པའི༔ ཡེ་ཤེས་ཁྲོ་བོ་བཅུ་ཡིས་བྱིན་ཆེན་ཕོབ༔ ཕྲིན་ལས་རྣམ་བཞིས་འགྲོ་ཀུན་གནས་ནས་འདྲེན༔ ཡེ་ཤེས་སྒོ་མ་བཞི་ཡིས་བྱིན་ཆེན་ཕོབ༔ འགལ་རྐྱེན་ཟློག་ཅིང་སྒྲུབ་མཆོག་བུ་བཞིན་སྐྱོངས༔ བཀའ་སྲུང་དྲེགས་པ་ཕོ་མོས་བྱིན་ཆེན་ཕོབ༔ རྩ་གསུམ་དཔའ་བོ་མཁའ་འགྲོ་སྲུང་མར་བཅས༔ ཆོས་ཀྱི་དབྱིངས་ལས་གཟུགས་ཀྱི་སྐུར་བཞེངས་ལ༔ རྣལ་འབྱོར་ལུས་ངག་ཡིད་གསུམ་བྱིན་གྱིས་རློབས༔ སྒྲུབ་རྫས་དཀྱིལ་འཁོར་འདི་ལ་བྱིན་ཆེན་ཕོབ༔ ཨོཾ་ཨཱཿཧཱུྃ༔ བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་དྷརྨ་པཱ་ལ་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ ཨ་ཝེ་ཤ་ཡ་ཨ་ཨ༔ ཞེས་སྤོས་བསྲེག་རོལ་མོ་སྣ་ཚོགས་དཀྲོལ་ལ༔ གདུང་བའི་དབྱངས་ཀྱིས་དུས་བཞིར་འདི་ལ་ནན་དུ་བརྩོན་ཅིང་བསྐྱར་བར་བྱའོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་རིག་འཛིན་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཡེ་ཤེས་ཉི་མ་མཐའ་རྒྱས་སོ། །དགེའོ། །ལེགས་སོ། །སརྦ་མངྒ་ལཾ།། །།