TTDL-ZABTER-16-MA-002

Previous Text Back to Volume PageNext Text

Wylie title	ngang ba ri lha mo'i lto ba'i gnas bdud 'dul mchod rten gyi dkar chag
Location	bdud 'joms gling pa zab gter Volume 16, Text 2, Pages 7-9 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Ngang ba ri lha mo'i lto ba'i gnas bdud 'dul mchod rten gyi dkar chag. In Sprul pa'i gter chen bdud 'joms gling pa'i zab gter gsang ba'i chos sde, Vol. 16: 7-9. Thimphu, Bhutan: Lama Kuenzang Wangdue, 2004.
Side notes	Recto: mchod rten dkar chag   Verso: bdud 'joms zab gter
More details More details
Genre	Catalogue of Contents - dkar chag
Colophon	ཞེས་བདུད་འཇོམས་རྡོ་རྗེའི་དག་པའི་སྣང་བའོ།།
	zhes bdud 'joms rdo rje'i dag pa'i snang ba'o//

Tibetan Text

[edit]

༄༅། །ངང་བ་རི་ལྷ་མོའི་ལྟོ་བའི་གནས་བདུད་འདུལ་མཆོད་རྟེན་གྱི་དཀར་ཆག་ནི།བྱ་ལོ་བྱ་ཡི་ཟླ་བའི་ཚེས་བཅུའི་ནུབ། །མཁའ་འགྲོ་ཡེ་ཤེས་མཚོ་རྒྱལ་མས། །ས་སྤྱོད་འོག་མིན་ཆེན་པོ་ནི། །བསྒྲུབ་པ་བྱེད་པའི་གནས་སུ་ལེགས། །དོན་ལ་བཀོད་པ་ལྷུན་གྲུབ་དངོས། །བདུད་འདུལ་རང་བྱུང་མཆོད་རྟེན་ནི། །བསོད་ནམས་བསགས་པའི་གནས་སུ་ལེགས། །བསྒྲུབ་དང་བསོད་ནམས་བསགས་ལ་འབད། །གནས་འབྲེལ་ཙམ་གྱིས་ཐར་ལམ་འཐོབ། །དུས་ལ་བབ་པོ་སྐལ་བཟང་རྣམས། །གསུངས་པའི་ལན་དུ་ངས་སྨྲས་པ། །ཨེ་མ་ཡེ་ཤེས་མཁའ་འགྲོ་ལགས། །ས་སྤྱོད་འོག་མིན་གནས་དེ་དང་། །བདུད་འདུལ་རང་བྱུང་མཆོད་རྟེན་གཉིས། །གང་ཡིན་ང་ལ་རྒྱུས་མེད་པས། །མངོན་སུམ་ཚིག་གིས་བསྟན་དུ་གསོལ། །ཞུས་པའི་ལན་དུ་མཁའ་འགྲོ་མས། །ཀྱེ་ཧོ་གསོན་དང་སྐལ་བཟང་བུ། །ཙ་རི་ཙ་ཀོང་ཙ་འདྲ་དང་། །པདྨ་བཀོད་དང་པདྨ་ཆུང་། །དུར་ཁྲོད་བརྒྱད་དང་གནས་ཉེར་བཞི། །ཧེ་རུའི་གནས་བཅུ་ཡུལ་སོ་གཉིས། །སྙིང་པོའི་བཅུད་དྲིལ་ཞིང་གི་མཆོག།བྱིན་རླབས་དངོས་གྲུབ་ཐམས་ཅད་འདུ། །དཔའ་བོ་དང་ནི་རྣལ་འབྱོར་མ། །མ་ལུས་གནས་མཆོག་འདི་རུ་རྫོགས། །ཁྱད་པར་སྒྲུབ་པ་བཀའ་བརྒྱད་ཀྱི༔ རྟེན་དང་བརྟེན་པའི་དཀྱིལ་འཁོར་རྫོགས༔ ཡོངས་གྲགས་བཀྲ་ཤིས་རྫོང་ཞེས་གྲགས། །འདི་རུ་སྒྲུབ་པ་བྱེད་པའི་མི། །ཚེ་འདིར་གྲོལ་གྱུར་ཐེ་ཚོམ་མེད། །བདུད་འདུལ་རང་བྱུང་མཆོད་རྟེན་ནི། །ངང་བའི་ལྷ་མོ་བཞིན་བཟང་མས། །ལྟོ་བ་མར་འདས་མཁའ་གསང་ན། །གནས་ཞེས་ཡོངས་སུ་གྲགས་པ་དེ། །སྔོན་ཚེ་ཆོས་རྒྱལ་མྱ་ངན་མེད། །སངས་རྒྱས་ལུང་བསྟན་རྒྱལ་པོ་དེས། །ཐུགས་བསྐྱེད་སྨོན་ལམ་རྣམ་དག་མཐུས། །འཛམ་གླིང་ས་གནས་བྱེ་བ་རུ། །ནུབ་གཅིག་མཆོད་རྟེན་བྱེ་བ་གཅིག །འབྱུང་བའི་སྨོན་ལམ་བཏབ་བཞིན་གྲུབ། །དེ་ལས་བདུད་འདུལ་མཆོད་རྟེན་འདིར། །རྫོགས་པའི་སངས་རྒྱས་རབ་བདུན་གྱི། །རིང་བསྲེལ་བྲེ་གང་ཐུགས་ཀྱི་རྟེན། །རྒྱལ་ཀུན་ཡང་སྙིང་ཡི་གེ་རུ། །བཀོད་ནས་སྒྲོམ་བཅུག་གསུང་གི་རྟེན། །དུས་གསུམ་སངས་རྒྱས་རིགས་གསུམ་མགོན། །རྡོ་སྐུ་རང་བྱོན་སྐུ་ཡི་རྟེན། །ཤཱནྟིཾ་གརྦྷའི་མགུལ་ཕུར་བཅས། །གནམ་ལྕགས་འབར་བའི་ཁང་བཟང་དུ། །བཀོད་ནས་བུམ་མཐིལ་གཏེར་དུ་བཞག།མཁའ་འགྲོ་ལས་ཀྱི་དབང་མོ་ཆེས། །བསྒྲུབ་པ་མཛད་ཅིང་རབ་གནས་བྱས། །དཔལ་ལྡན་ལྷ་མོ་ལྷ་ཡི་ལྕམ། །གཡུ་སྒྲོན་དུང་ཕྲེང་ཀླུ་ཡི་ལྕམ། །གནས་ཀྱི་སྲུང་མ་མཆོག་ཏུ་བསྐོས། །མཚོ་སྨན་ཏིང་ཏིང་གཉེར་དུ་བསྐོས། །ལྟ་བ་རྟོགས་པའི་རྣལ་འབྱོར་གྱིས། །རང་སྣང་དོན་གྱི་འོག་མིན་དུ། །ཤེས་ནས་བསྐོར་བ་གཅིག་བྱས་ན། །བཀའ་དང་བསྟན་བཅོས་ཆོས་སོ་ཅོག།དུས་གཅིག་ཀློག་དང་བསོད་ནམས་མཉམ། །སེམས་བསྐྱེད་འགྲོ་ཀུན་ཕན་བདེའི་ཕྱིར། །ལན་གཅིག་བསྐོར་ན་ཡིག་དྲུག་པ། །དུང་ཕྱུར་བཟླས་དང་བསོད་ནམས་མཉམ། །སྐྱེས་པ་ཕོ་མོས་དད་གུས་ཀྱིས། །བསྐོར་བ་ཁྲི་གཅིག་བྱས་པ་ན། །ཡིག་དྲུག་དུང་ཕྱུར་བསྒྲང་དང་མཉམ། །ཕྱི་ནང་གསང་བའི་བར་ཆད་སེལ། །ནད་ཞི་གདོན་བགེགས་ཀུན་དང་བྲལ། །རིམ་གྲོ་ཕལ་གྱི་དོ་ཟླ་མིན། །དངོས་གྲུབ་པྲ་ལྟས་མངོན་དུ་འབྱུང་། །དེ་ཕྱིར་ཕྱག་མཆོད་བསྐོར་བ་ལ། །འབད་ཅིག་ཡུལ་འདིར་སྐྱེས་པའི་མི། །གང་འདོད་དོན་ལ་གསོལ་བ་ཐོབ། །དངོས་གྲུབ་འབྱུང་བར་གདོན་མི་ཟ། །དུས་བབ་མཁའ་འགྲོའི་ལུང་བསྟན་ཡིན། །ཡལ་བར་མ་དོར་ཡུལ་མི་རྣམས། །ཞེས་གསུངས་ཆོས་ཉིད་མཁའ་ལ་ཐིམ། །ཞེས་བདུད་འཇོམས་རྡོ་རྗེའི་དག་པའི་སྣང་བའོ།།