DJYD-KABUM-23-A-025

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 23, Text 25, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །ཁྲོ་རྒྱལ་སྨེ་བ་བརྩེགས་པའི་སྒོ་ནས་གྲིབ་སེལ་ཁྲུས་ཀྱི་

ཆོ་ག་དག་བྱེད་གངྒཱའི་རྒྱུན་བཟང་ ཞེས་བྱ་བ་བཞུགས་སོ། །

（1བ）ཨོཾ་སྭསྟི། བླ་མ་མཆོག་དང་ཐ་དད་དུ། །མི་དམིགས་ཁྲོ་རྒྱལ་སྨེ་བརྩེགས་ལ། །བཏུད་ནས་གྲིབ་ཅན་གསུང་སེལ་དུ། །བཀྲུ་བྱབ་སྲུང་བའི་མན་ངག་སྤྲོ། །（འདི་ལ་གསུམ། སྦྱོར་བ། དངོས་གཞི། རྗེས་སོ། །） （དང་པོ་སྦྱོར་བའི་ཆོས་ནི། གཙང་ཞིང་དགེ་བའི་གནས་སུ་སྟེགས་བུའི་ཁར་བུམ་གདན་པདྨ་འདབ་བརྒྱད་ཀྱི་དབུས་ཚོམ་བུའི་སྟེང་དུ་རིན་པོ་ཆེའི་བུམ་པ་ཆུ་གཙང་དྲི་བཟང་བུམ་རྫས་ཉེར་ལྔ་སྦགས་པས་བཀང་ལ། ཁ་རྒྱན་མགུལ་ཆིངས་དུང་ཆུ་གཟུངས་རྡོར་དང་བཅས་པ་འགོད། མདུན་དུ་གཏོར་ཟླུམ་དཀར་པོ་དང་། ཆུ་གཉིས་ཉེར་སྤྱོད་ལྔ་བསྐོར་བཤམ་མམ་ཕྲེང་ཚར་གང་བདེ། （2ན）ནད་པའི་མདུན་དུ་གྲིབ་གླུད་ནག་པོ་མཐོ་གང་ལས་མི་ཆུང་བ་ལ་གླུད་ཕྲན་འབྲུ་སྨན་རིན་པོ་ཆེ་དང་གོས་དུ་མ་ཟས་སྣ་སོགས་ཀྱིས་བསྐོར་བ་དང་། སྣོད་གཅིག་ཏུ་ཆངས་རིལ་བདུན་ནམ་ཉེར་གཅིག་རེ་བླུགས་པ་མང་ཉུང་དོ་གལ་དང་བསྟུན་ཏེ་བཀོད། རང་གི་མདུན་དུ་རྡོ་དྲིལ། གུལ་ཡུངས། མེ་ཏོག་གི་སྣོད་སོགས་ཉེར་མཁོའི་ཡོ་བྱད་རྣམས་འདུ་བྱས་ཏེ། ཐོག་མར་སྒྲུབ་པ་ལ། བདག་གི་རྣལ་འབྱོར་ནི།） ན་མོ། བླ་མ་མཆོག་གསུམ་ཡི་དམ་ལྷར། །གུས་པས་སྐྱབས་མཆི་མཁའ་མཉམ་འགྲོ། །བླ་མེད་བྱང་ཆུབ་མཆོག་ཐོབ་ཕྱིར། །སྨེ་བ་བརྩེགས་པ་བསྒོམ་པར་བགྱི། །（ཞེས་ལན་གསུམ་（2བ）གྱིས་སྐྱབས་སེམས་དང་།） སེམས་ཅན་བདེ་དང་ལྡན་གྱུར་ཅིག ། སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །（ཅེས་ཚད་མེད་བཞི་བསྒོམ།） ཨོཾ་སྭ་བྷཱ་ཝ（ས་འཁོར་འདས་ཀྱི་ཆོས་ཐམས་ཅད་སྟོང་པར་སྦྱང་།） སྟོང་པའི་ངང་ལས་པདྨ་དང་ཉི་མའི་སྟེང་དུ་རང་སེམས་ཧཱུྃ་ལས་ཁྲོ་བོའི་རྒྱལ་པོ་སྨྲེ་བ་བརྩེགས་པ་སྐུ་མདོག་མཐིང་ནག་སྦོམ་ཞིང་ཐུང་ལ་གསུས་ཁྱིམ་ཆེ་བ་ཞལ་གཅིག་ཕྱག་གཉིས་པ། ཕྱག་གཡས་སྣ་ཚོགས་རྡོ་རྗེ་དང་། གཡོན་སྡིགས་མཛུབ་བསྒྲེང་བའི་རྩེ་ལས་ཡེ་ཤེས་ཀྱི་མེ་འབར་བ། ཞལ་གདངས་ཤིང་མཆེ་བ་གཙིགས་པ། དབུ་སྐྲ་དམར་སེར་གྱེན་དུ་འབར་ཞིང་ཡན་ལག་སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབ་ཅན། ཞབས་གཉིས་སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་པའོ། །དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿ（ས་སྤྱན་དྲངས） ཨརྒྷཾ་（སོགས་ཀྱིས་མཆོད།） ཛཿཧཱུྃ་བྃ་ཧོཿ（ས་གཉིས་སུ་མེད་པར་བསྟིམ།） སླར་ཡང་སྙིང་གའི་འོད་ཟེར་གྱིས་（3ན）དབང་གི་ལྷ་རིགས་ལྔ་སྲས་དང་བཅས་པ་བཛྲ་ས་མཱ་ཛཿ（ས་སྤྱན་དྲང་།） ཨརྒྷཾ་（སོགས་ཀྱིས་མཆོད།） ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། （ཞེས་གསོལ་བ་བཏབ་པས་དེ་རྣམས་ཀྱིས་བུམ་པའི་ཆུས་དབང་བསྐུར། སྐུ་གང་། དྲི་མ་དག ། ཆུའི་ལྷག་མ་སྤྱི་བོར་འཁྱིལ་བ་ལས་རིགས་བདག་རྡོ་རྗེ་སེམས་དཔས་དབུ་བརྒྱན་པར་བསམ། སྙིང་གར་ཉི་མའི་སྟེང་དུ་ཧཱུྃ་ཡིག་གི་མཐར་སྔགས་ཕྲེང་འཁོར་བ་ལས་འོད་ཟེར་འཕྲོས། ཉམས་གྲིབ་མི་གཙང་བ་ཐམས་ཅད་སྦྱངས། བྱང་སེམས་ཡེ་ཤེས་ཀྱི་བདུད་རྩིས་ལུས་གང་བར་（བསམ་ལ།） ཨོཾ་བྷཱུར་ཀུཾ་མ་ཧཱ་པྲ་མཱ་ཎ་ཡེ་བྷུརྩི་བྷུརྐི་བི་མ་ལེ་ཨུ་ཙུཥྨ་ཀྲོ་ངྷ་ཧཱུྃ་ཕཊ༔ （ཅེས་བརྒྱ་རྩ་ལ་སོགས་པ་བཟླ། དེ་ནས་མཆོད་རྫས་རྣམས་）རྃ་ཡྃ་ཁྃ་（གིས་བསང་སྦྱང་།） རྣམ་དག་ཆསོ་དབྱིངས་ངང་ཉིད་ལས༔ རང་བྱུང་མཆོད་པའི་ཕུང་པོ་ནི༔ ཀུན་བཟང་མཆོད་པའི་སྤྲིན་ལྟ་བུ༔ དཔག་ཡས་ནམ་མཁའ་གང་བར་གྱུར༔ ཨོཾ་བཛྲ་ཨརྒྷཾ་（ནས།） ཤཔྡ་ཨཱཿཧཱུྃ（གི་བར་གྱིས་བྱིན་བརླབ།） བུམ་པ་ཨ་མྲྀ་ཏ（ས་བསང་།） སྭ་བྷཱ་ཝ（ས་སྦྱང་།） སྟོང་པའི་ངང་ལས་བྷྲཱུྃ་ཡོངས་སུ་གྱུར་པ་ལས་རིན་པོ་ཆེའི་བུམ་པ་（3བ）ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷའི་གོས་ཀྱིས་མགུལ་བཅིངས་པ། དཔག་བསམ་ཤིང་གི་ཁ་རྒྱན་ཅན། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་དབུས་སུ་པདྨ་དང་ཉི་མའི་སྟེང་དུ་ཧཱུྃ་ལས་ཁྲོ་བོའི་རྒྱལ་པོ་སྨེ་བ་བརྩེགས་པ་（སོགས་ནས།） བཛྲ་ས་མཱ་ཛཿའི་（བར་སྔར་བཞིན་ལས།） ཧཱུྃ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བ་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། ཡེ་ཤེས་སྒྱུ་མར་རོལ་ཞིང་གཤེགས་སུ་གསོལ། །ཨེ་ཧྱེ་ཧི་བྷ་ག་བཱན་མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོཿ （ཞེས་དང་།） ཛཿཧཱུྃ་བྃ་ཧོཿ སླར་ཡང་སྙིང་གའི་（སོགས་ནས།） རིགས་བདག་རྡོ་རྗེ་སེམས་དཔས་དབུ་བརྒྱན་པའི་བར་（སྔར་བཞིན་མཐར།） རབ་འབྱམས་རྒྱ་མཚོ་དཔག་མེད་（སོགས་སྤྱི་ལྟར་གྱིས་མཆོད།） བདག་མེད་ལྟ་བའི་ཧེ་རུ་ཀས། །བདག་ལྟའི་འབྱུང་པོ་བསྒྲལ་བའི་ཚེ། །སྣམ་ནས་ཁྲོ་བོའི་རྒྱལ་པོ་བྱུང་། །གདུལ་དཀའ་འདུལ་མཛད་ཉིད་ལ་བསྟོད། །བསྟོད་པར་འོས་པ་（སོགས་ཀྱིས་ཀྱང་བསྟོད། དེ་ནས།） བདག་གི་ཐུགས་ཀ་ནས་སྔགས་ཀྱི་ཕྲེང་（4ན）བ་ཐོན། གཟུངས་ཐག་ལ་འཁྲིལ་ཏེ་བུམ་པའི་ནང་དུ་སོང་བས་བུམ་ལྷའི་ཐུགས་རྒྱུད་བསྐུལ། ཐུགས་ཀ་དང་སྐུའི་ཆ་ཐམས་ཅད་ནས་ཡེ་ཤེས་ཀྱི་བདུད་རྩིའི་རྒྱུན་བབས་པས་བུམ་པ་ཡོངས་སུ་གང་བར་གྱུར་པར་（བསམ་ཞིང་། གཟུངས་ཐག་ལ་འཇུས་ཏེ་གོང་གི་བཟླས་པ་བརྒྱ་རྩ་སོགས་བྱས་མཐར།） ཨོཾ་ཨཱཿཧཱུྃ་（གིས་དུང་ཆོས་ཀྱི་ཆུས་མཆོད་ཡོན་དུ་ཕུལ་བས།） ལྷ་ཉིད་འོད་དུ་ཞུ་ནས་བུམ་ཆུ་དང་རོ་གཅིག་ཏུ་འདྲེས་པར་（མོས། དེ་ནས་གཏོར་མ་）རྃ་ཡྃ་ཁྃ་（གིས་བསང་སྦྱང་།） སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་བཅུད་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་（གིས་བྱིན་གྱིས་བརླབ།） རང་གི་སྙིང་ག་ནས་འོད་ཟེར་འཕྲོས་པས་ཁྲོ་བོའི་རྒྱལ་པོ་མདུན་གྱི་ནམ་མཁར་བཛྲ་ས་མཱ་ཛཿ（ས་གཏོར་མའི་མགྲོན་དུ་སྤྱན་དྲངས།） ལྷའི་ལྗགས་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་གྱུར། ཨོཾ་བྷུ་རྐུཾ་མ་ཧཱ་པྲ་མཱ་ཎ་ཡེ་བྷུརྩི་བྷུརྐི་བི་མ་ལེ་ཨུ་ཙུཥྨ་ཀྲོ་དྷ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། （ཞེས་ལན་བདུན་ནམ་གསུམ་གྱིས་གཏོར་མ་ཕུལ་ནས། དྲིལ་བུ་བཅད་གཏུབ་ཏུ་དཀྲོལ་ཞིང་།） ཁྲོ་བོའི་རྒྱལ་པོ་འཁོར་བཅས་ཀྱིས། །མཆོད་（4བ）སྦྱིན་གཏོར་མ་འདི་བཞེས་ལ། །（ཞེས་སོགས་ནས།） ཡིད་ལ་འདོད་པ་ཀུན་འགྲུབ་མཛོད། །（ཅེས་པའི་བར་གྱིས་ཕྲིན་ལས་བཅོལ་ལ།） བཛྲ་མུཿ（ས་གཏོར་མགྲོན་རྣམས་རང་བཞིན་གྱི་གནས་སུགཤེགས་སུ་གསོལ་ལོ། །） （གཉིས་པ་ཁྲུས་དངོས་ལ། བཀྲུ་བ། བྱབ་པ། ལན་གཏོར་གཏོང་བ། བསྲུང་བ་དང་བཞི་ལས།） （དང་པོ་ནི།） དེའང་ཁྱེད་རང་གི་ལུས་ངག་ཡིད་གསུམ་ལ་གྲིབ་དང་མི་གཙང་བའི་དྲི་མས་གོས་པ་དེ་ཐམས་ཅད་སློབ་དཔོན་ཁྲོ་རྒྱལ་སྨེ་བ་བརྩེགས་པའི་ཕྱག་གི་བུམ་པའི་ཆུས་བཀྲུས་པས་ལུས་ཀྱི་ཆ་ཐམས་ཅད་ནས་ནག་འདུར་གྱིས་ཐོན་ནས་ལུས་གཙང་ཞིང་དག་པར་གྱུར་པའི་མོས་པ་མཛོད་（བྱས་ནས། བུམ་པ་ཐོགས་ལ།） ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །（བུམ་ཆུ་སྤྱི་བོར་སྦྲེང་བཞིན་རྩ་སྔགས་མཐར།） ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩོལ་བར་མཛོད། །（རྩ་སྔགས་མཐར།） ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། རིན་ཆེན་ཤེལ་བུམ་（5ན）དྲི་མེད་ནང་། །མེ་ལོང་ཡེ་ཤེས་ཆུ་ཡིས་བཀང་། །སྐལ་ལྡན་བུ་ཡི་ལུས་བཀྲུས་པས། །ཞེ་སྡང་ལས་གྱུར་ནད་གདོན་བགེགས། །ཉམས་གྲིབ་མི་གཙང་དག་གྱུར་ཅིག །（སྔགས་གོང་བཞིན།） རིན་ཆེན་གསེར་བུམ༴ མཉམ་ཉིད་ཡེ་ཤེས༴ སྐལ་ལྡན་བུ་ཡིས༴ ང་རྒྱལ་ལས་གྱུར༴ ཉམས་གྲིབ་མི་གཙང་༴ （སྔགས།） རིན་ཆེན་ཟངས་བུམ༴ སོར་རྟོག་ཡེ་ཤེས༴ སྐལ་ལྡན་བུ་ཡིས༴ འདོད་ཆགས་ལས་གྱུར༴ ཉམས་གྲིབ་མི་གཙང་༴ （སྔགས།） རིན་ཆེན་དངུལ་བུམ༴ བྱ་གྲུབ་ཡེ་ཤེས༴ སྐལ་ལྡན༴ ཕྲག་དོག་ལས་གྱུར༴ ཉམས་གྲིབ༴ （སྔགས། རིན་ཆེན་མཐིང་བུམ༴ ཆོས་དབྱིངས་ཡེ་ཤེས༴ སྐལ་ལྡན༴ གཏི་མུག་ལས་གྱུར༴ ཉམས་གྲིབ༴ སྔགས། གཞན་ཡང་སྤྲོ་ན་ཕར་ཕྱིན་དྲུག་གི་ཁྲུས་སོགས་བྱ།） དེས་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་སྦྱངས་ནས་སྐུ་གསུང་ཐུགས་ཀྱི་དབང་དང་བྱིན་རླབས་ཐོབ་པའི་མོས་པ་མཛོད། （ཅེས་བཀྲུའོ། །） （གཉིས་པ་བྱབ་པ་ནི། རྡོ་རྗེ་དང་བཅས་པའི་རྨ་བྱའི་སྒྲོ་མདོངས་བཟུང་（5བ）ནས།） རྨ་བྱའི་མདོངས་འདི་ཉིད་ཀྱི་དབུས་སུ་ཟླ་བའི་གདན་ལ་ཧཱུྃ་མཐིང་ནག་འོད་ཟེར་འཕྲོ་བའི་མཐར་སྔགས་ཀྱིས་བསྐོར་བ་དེའི་འོད་ཟེར་གྱིས་ཁྱེད་རང་གི་ལུས་ངག་ཡིད་གསུམ་ལ་གནས་པའི་དྲི་མ་ཐམས་ཅད་སྦུར་མ་རླུང་གིས་བདས་པ་བཞིན་བྱབ་ནས་མདུན་གྱི་གླུད་ལ་ཐིམ་པའི་མོས་པ་མཛོད། （བསྒྲུབ་བྱ་ལ་དེས་བྱབ་བཞིན་དུ། ཆེ་གེ་མོའི་）ནད་དང་། གདོན་དང་། སྡིག་པ་དང་། སྒྲིབ་པ་དང་། ཉམས་ཆག་དང་། གྲིབ་དང་། མི་གཙང་བ་དང་། རྐྱེན་ངན་པ་དང་། བར་དུ་གཅོད་པ་མི་མཐུན་པའི་ཕྱོགས་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ་ཀུ་རུ་སྭཱ་ཧཱ། ནད་ཀྱི་རིགས་སུ་གྱུར་པ། ལྷ་ནད་མྱོས་པ། བདུད་ནད་འཐིབས་པ། རྒྱལ་ནད་སྨྱོ་འབོགས། གཟའ་ནད་ཀུ་རེ། བཙན་ནད་གཟེར་ཐེབས། མ་མོའི་དལ་ཡམས། ཀླུ་ནད་གདུག་པ། དམུ་ནད་རྨུག་པ། རྒྱ་ནད་མིག་སེར། བལ་ནད་འབྲུམ་བུ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ་ཀུ་རུ་སྭཱ་ཧཱ། རླུང་དང་། མཁྲིས་པ་དང་། བད་ཀན་དང་། འདུས་པའི་ནད་བཞི་བརྒྱ་རྩ་བཞིའི་ནད་ཐམས་ཅད་བྱང་ཞིང་དག་པར་གྱུར་ཅིག ། ཤཱནྟིཾ༴ གདོན་གྱི་（6ན）རིགས་སུ་གྱུར་པ་བགེགས་རིགས་སྟོང་ཕྲག་བརྒྱད་ཅུ། བདུད་རིགས་སུམ་བརྒྱ་དྲུག་ཅུ། ཕུང་འདྲེ་གདོན་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། གདོན་ཕལ་པ་བཞི། ལྷ། ཀླུ། བདུད། བཙན། རྒྱལ་པོ། མ་མོ། གཤིན་རྗེས་ལ་སོགས་གདོན་གྱི་རིགས་སུ་གྱུར་པ་ཐམས་ཅད་ཀྱི་གནོད་པ་བྱང་ཞིང་དག་པར་གྱུར་ཅིག །ཤཱནྟིཾ༴ སྡིག་པའི་རིགས་སུ་གྱུར་པ་མི་དགེ་བ་བཅུ། མཚམས་མེད་པ་ལྔ། དེ་དང་ཉེ་བ་ལྔ། ལྕི་བ་བཞི། ལོག་པ་བརྒྱད། ཁ་ན་མ་ཐོ་བ་སོགས་ངན་སོང་དང་འཁོར་བའི་རྒྱུ་བསགས་པ་ཐམས་ཅད་བྱང་ཞིང་དག་པར་གྱུར་ཅིག ། ཤཱནྟིཾ༴ སྒྲིབ་པའི་རིགས་སུ་གྱུར་པ་ལས་ཀྱི་སྒྲིབ་པ། ཉོན་མོངས་པའི་སྒྲིབ་པ། བག་ལ་ཞ་བའི་སྒྲིབ་པ། ཤེས་བྱའི་སྒྲིབ་པ། ལྟ་བ་དམན་པའི་སྒྲིབ་པ། ཆོས་སྤངས་པའི་སྒྲིབ་པ་ལ་སོགས་པ་མཐོ་རིས་དང་ཐར་པའི་གེགས་སུ་གྱུར་པ་ཅི་མཆིས་པ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ༴ ཉམས་ཆག་གི་རིགས་སུ་གྱུར་པ་མི་ནག་གི་མནའ་དང་། ཁྲེལ་དང་། ང་ཚོ་ཉམས་པ་དང་། ཉན་ཐོས་སོ་སོར་ཐར་པའི་རིགས་（6བ）བདུན་གྱི་སྡོམ་པ་ཉམས་པ་དང་། བྱང་ཆུབ་སེམས་དཔའི་བསླབ་བྱ་སྨོན་འཇུག་གི་སེམས་བསྐྱེད་ཉམས་པ་དང་། གསང་སྔགས་ཀྱི་རྩ་ལྟུང་སྐུ་གསུང་ཐུགས་ཀྱི་དམ་ཚིག་ལ་སོགས་པ་ས་མ་ཡ་འབུམ་སྡེ་ཉམས་པ་དང་། བླ་མ་དཀོན་མཆོག་གི་དཀོར་དང་སྐུ་གླུད་ལ་འབག་པ་དང་། དམ་ཚིག་ཉམས་པ་དང་། སྐུར་པ་བཏབ་པ་དང་། ལོག་པར་བལྟས་པ་དང་། ཡི་དམ་ལྷ་ཚོགས། དཔའ་བོ་ཌཱ་ཀི ། ཆོས་སྐྱོང་སྲུང་མ། ཆོས་མཛད་དཔོན་སློབ། ཡོན་མཆོད་མཆེད་ལྕམ། ཕ་མ་ཕུ་ནུ་བཞི་བཅས་ལ་བསྲུང་སྡོམ་ཉམས་པ་དང་། ལོག་པར་བལྟས་ཤིང་སྐུར་པ་བཏབ་པ་དང་། མ་རིག་མུན་པར་འཐིབ་པ། དུག་ལྔ་རང་གར་ཤོར་བས་ཆགས་སྡང་རྨོངས་གསུམ་གྱི་ཕུང་པོར་སོང་བ། མི་དགེ་བའི་ལམ་དུ་ཚུད་པ། དེ་ལྟར་སྤྱོད་པ་རྣམས་དང་འགྲོགས་པ། ལུས་ངག་ཡིད་གསུམ་འདྲེས་པ། དེ་རྣམས་ཀྱི་གནས་སུ་བསྡད་པ། ཟས་ཟོས་ཤིང་གོས་གྱོན་པ། དངོས་པོ་འདྲེས་པ་ལ་སོགས་པ་རྣམས་བྱང་ཞིང་དག་པར་གྱུར་ཅིག །ཤཱནྟིཾ༴ གྲིབ་ཀྱི་རིགས་སུ་གྱུར་པ་ཕྱི་ཡུལ་ལ་སྣང་བ་ཨ་འཐས་ཀྱི་（7ན）གྲིབ། ནང་དུག་ལྔ་འདོད་ཞེན་གྱི་གྲིབ། བར་གཅོད་བློ་འབྲིད་ཀྱི་གྲིབ། གསང་བ་མ་རིག་པས་ཟིན་པ་ཁ་ཆོས་གཏིང་འབྱམས་ཀྱི་གྲིབ། ཐོ་ཅོ་སྤྱོད་རྩིང་གི་གྲིབ། འདོད་བློ་སྡང་སེམས་ཀྱི་གྲིབ། བདག་བསྟོད་གཞན་སྨོད་ཀྱི་གྲིབ། ཞེན་འདོད་སྔོན་བསུའི་གྲིབ། འདོད་པ་ཕྱོགས་མེད་ཀྱི་གྲིབ། མི་ཤེས་ཤེས་བརྫུའི་གྲིབ། དམ་བཅའ་རེ་འདོད་ཞན་པའི་གྲིབ། ཁ་ལྟ་སྟོང་འབྱམས་ཀྱི་གྲིབ། མ་རྟོགས་ལོག་རྟོག་ཕྱོགས་རྟོགས་ཀྱི་གྲིབ། ཁ་འཛིན་ཆོས་སྤང་གི་གྲིབ། སྡོམ་ཉམས་སྡིག་ཅན་གྱི་གྲིབ། ཕྱྭ་དང་མོ་མ་ལ་སོགས་པ་གྲིབ་ཀྱི་རིགས་སུ་གྱུར་པ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ༴ འཁོན་གྱི་རིགས་སུ་གྱུར་པ་བླ་མ་དཀོན་མཆོག་ལ་འཁོན་པ་དང་། ཆོས་མཛད་གོང་མ་དང་། གཟུངས་མ་དང་། མཆེད་གྲོགས་དང་། དཔོན་སློབ་དང་། གྲོགས་པོ་རྣམས་དང་འཁོན་པ་དང་། ཕ་མ་སྤུན་ཟླ་ཉེ་འབྲེལ་དང་འཁོན་པ་དང་། ཡུལ་མི་ཁྱིམ་མཚེས་དང་འཁོན་པ་དང་། ལྷ་འཁོན་དང་། ཀླུ་འཁོན་དང་། ལྷ་མ་སྲིན་སྡེ་བརྒྱད་དང་འཁོན་པ་དང་། （7བ）འཁོན་གསེབ་ཏུ་ཕྱིན་པ་དང་། སྤྱོད་པ་འདྲེས་པ་ལ་སོགས་པ་འཁོན་གྱི་རིགས་སུ་གྱུར་པ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ༴ མི་གཙང་བའི་རིགས་སུ་གྱུར་པ་མཛེ་ཕོ་དང་། ཡུགས་ས་དང་། དམེ་ཕོ་དང་། བཀན་པ་དང་། མནོལ་དང་། བཙོག་དང་། བཙུན་པ་དང་། མནའ་ཁང་དང་། གོས་སྟན་དང་། སྣོད་དང་། སྐྱོར་དང་། རོ་བཙོག་ལ་སོགས་པ་མི་གཙང་བའི་རིགས་སུ་གྱུར་པ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ༴ རྐྱེན་ངན་བར་ཆད་ཀྱི་རིགས་སུ་གྱུར་པ། ཕྱིའི་རྐྱེན་འཚོ་བ་ལོངས་སྤྱོད་ཉམས་པ། གནས་དང་འཁོར་ངན་པ། སྔ་དགྲ་དར་བ། ཕྱི་དགྲ་སེམས་པ། ད་དགྲ་རྩོམ་པ། ཁ་སྨྲས་དང་གླེང་གཞི་རྩོད་པ། མི་ཁ་དང་སྨྲ་མཆུ་ལྡང་བ། བསམ་པ་ངན་པ། སྦྱོར་བ་རྩུབ་པར་བྱེད་པ་ལ་སོགས་པ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ༴ ནང་གི་རྐྱེན་དམ་པའི་ཆོས་སྒྲུབ་པ་ལ་བར་དུ་གཅོད་པ། ཐར་པ་དང་ཐམས་ཅད་མཁྱེན་པ་ལ་བར་དུ་གཅོད་པ། བསམ་པ་དང་ཚེ་སྲོག་ལ་བར་དུ་གཅོད་པ། གཞན་ཡང་དམ་ཉམས་དང་（8ན）འགྲོགས་པ། ཟས་ཟོས་གོས་གྱོན་སྤྱོད་པ་འདྲེས་པ། གནས་ཀྱི་གྲིབ། སྟན་གྱི་གྲིབ། བཙོག་གི་གྲིབ། རོའི་གྲིབ། འགལ་རྐྱེན་ཉི་ཁྲི་བཞི་སྟོང་། ཡེ་འདྲོག་སུམ་བརྒྱ་དྲུག་ཅུ། གློ་བུར་བརྒྱད་ཅུ་རྩ་གཅིག །དུས་མིན་འཆི་བ་བཅོ་བརྒྱད་ལ་སོགས་པ་ཐམས་ཅད་བྱང་ཞིང་དག་པར་གྱུར་ཅིག །ཤཱནྟིཾ་ཀུ་རུ་སྭཱ་ཧཱ། ཧཱུྃ་པྲ་མ་ཡ་ཧཱུྃ། ཞེས་བྱབས་པས། མི་མཐུན་པའི་ཕྱོགས་ངན་པ་ཐམས་ཅད་བྱང་ཞིང་དག་ནས་ལུས་ཤེལ་གོང་ལྟར་དྭངས་པར་གྱུར་པར་（བསམ་མོ། །） （གསུམ་པ་གླུད་གཏོར་གཏོང་བ་ནི། གླུད་དང་ཆངས་རིལ་རྣམས་ལ་བསང་ཆུ་འཐོར་ཞིང་།） རྃ་ཡྃ་ཁྃ་（གིས་བསང་སྦྱང་།） སྟོང་པའི་ངང་ལས་གླུད་གཏོར་ཕུང་ཁམས་སྐྱེ་མཆེད་ཐམས་ཅད་ཚང་ཞིང་མཛེས་པ་འདོད་རྒུའི་འབྱོར་པ་བསམ་མི་ཁྱབ་པར་བཅས་པ་དང་། ཆངས་རིལ་གཏོར་མ་རྣམས་ཁ་དོག་དྲི་རོ་ནུས་བཅུད་ཕུན་སུམ་ཚོགས་པ་ནད་བདག་གྲིབ་བདག་ལན་ཆགས་ཀྱི་མགྲོན་རྣམས་ངོམས་ཤིང་ཚིམ་པར་བྱེད་ནུས་པའི་བདག་ཉིད་ཅན་གྱིས་ས་དང་བར་སྣང་ཐམས་ཅད་གང་བར་（བསམ་ཞིང་།） ན་མཿསརྦ་ཏ་ཐཱ་ག་ཏེ་（8བ） བྷྱོ་བི་ཤྭ་མུ་ཁེ་བྷྱཿསརྦ་ཐ་ཁཾ་ཨུཏྒ་ཏེ་སྥར་ཎ་ཨི་མཾ་ག་ག་ན་ཁཾ་སྭཱ་ཧཱ། （ཞེས་ནམ་མཁའ་མཛོད་ཀྱི་སྔགས་རྒྱ་ལན་བདུན་དང་།） ཨོཾ་ཨཱཿཧཱུྃ་（གིས་བྱིན་བརླབ།） དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པའི་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །（ཞེས་དང་།） ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། （ཞེས་གྲངས་བདུན་ནམ་ཉེར་གཅིག་སོགས་བརྗོད་བཞིན་ཆངས་རིལ་ནད་པ་ལ་གཡས་སུ་བསྐོར་ནས་གླུད་ཀྱི་ནང་དུ་བླུགས་ལ།） ཧཱུྃ། ངར་གྱི་གླུད་བཟང་རིན་ཆེན་འདི། །ལུས་ངག་ཡིད་གསུམ་འདི་ལ་ཚང་། །སྐྱེ་མཆེད་བཅུ་གཉིས་འདི་ལ་ཚང་། །ཕུང་པོ་ལྔ་པོ་འདི་ལ་ཚང་། རྣམ་ཤེས་ཚོགས་བརྒྱད་འདི་ལ་ཚང་། །མི་བས་གླུད་བཟང་ཡ་ལ་ལ། །བཟའ་བས་ཁ་གྲོ་ཐིབས་སེ་ཐིབ། །རྣལ་འབྱོར་བསྲུང་བྱ་འཁོར་བཅས་ཀྱི། །ཚེ་སྲོག་གླུད་དུ་འདི་འབུལ་གྱི། །བཟུངས་པ་དང་ནི་བཅིངས་པ་དང་། །བསྡམས་པ་རྣམས་ནི་（9ན）གྲོལ་བར་མཛོད། །ཚེ་སྲོག་བར་ཆད་མ་བྱེད་ཅིག །གནོད་ཅིང་འགལ་བར་མ་བྱེད་པར། །བྱང་ཆུབ་སྒྲུབ་པའི་གྲོགས་མཛོད་ཅིག །ཀྱེ། གྲིབ་བདག་གླུད་བདག་ཕོ་མོ་རྣམས། །གྲིབ་གླུད་རྒྱན་ལྡན་འདི་ལོངས་ལ། །བཟུངས་པ་ཐོང་ལ་བཅིངས་པ་ཁྲོལ། །བདག་དང་རྒྱུ་སྦྱོར་འཁོར་བཅས་ལ། །གནོད་ཅིང་སྡིག་པར་མ་བྱེད་ཅིག །（ཅེས་བསྔོ། ལོ་གྲངས་སམ་བརྒྱ་རྩ་སོགས་གྲངས་གསོག་ན་གོང་གི་དེ་བཞིན་གཤེགས་པ་བཞིའི་མཚན་སྔགས་ནས་འདིའི་བར་དུ་གྲངས་འཛིན། མཐར་གྲངས་རྫོགས་ནས་གླུད་གཏོར་ཁ་ཕྱིར་བསྒྱུར་ལ།） ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་ཁྲོ་བོའི་རྒྱལ་པོ་སྨེ་བ་བརྩེགས་པའི་བཀའ་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས་བསྲུང་བྱ་ཆེ་གེ་མོ་འདིའི་ལུས་ངག་ཡིད་གསུམ་ལ་གནོད་ཅིང་གདུག་པའི་སེམས་འཆང་བའི་གྲིབ་བདག་འབྱུང་པོ་གདུག་པ་ཅན་ཐམས་ཅད་གླུད་ཀྱི་གཏོར་（9བ）མ་འདིས་ཚིམ་པར་གྱིས་ལ། འདིར་མ་འདུག་པར་སོ་སོ་རང་རང་གི་གནས་སུ་བདེ་བར་དེངས་ཤིག །གལ་ཏེ་མི་འགྲོ་ན་ཁྲོ་བོའི་སྤྲིན་རབ་འབྱམས་ཀྱིས་ཁྱེད་རྣམས་ཀྱི་ལུས་ངག་ཡིད་གསུམ་རྡུལ་ཕྲན་བཞིན་དུ་བརླག་པར་འགྱུར་ཏ་རེ། （ཞེས་དང་། གུ་གུལ་བདུག་ཅིང་ཡུངས་ཐུན་བྲབ་པ་དང་བཅས། རྩ་སྔགས་མཐར་）སུཾ་བྷ་ནི་（སྦྲེལ་བས་བསྐྲད་ལ། གླུད་གཏོར་འདྲེ་ལྔ་གནས་པའི་ཕྱོགས་སམ་ཆུ་བོ་ཆེན་པོའི་གཞུང་སོགས་ཕྱི་རོལ་དུ་བསྐྱལ་ལོ། །） （བཞི་པ་བསྲུང་བ་ནི།） ཁྱེད་རང་སྐད་ཅིག་གིས་ལས་ཀྱི་ཁྲོ་བོ་ཞལ་གཅིག་ཕྱག་གཉིས་པ་སྐུ་མདོག་མཐིང་ནག་གཡས་རྒྱ་གྲམ་བསྣམས་ཤིང་གཡོན་སྡིགས་མཛུབ་ཕྱར་བ་ལས་མེ་འབར་བ། འཇིགས་པའི་ཆས་ཀྱིས་བརྒྱན་པ། དེའི་སྤྱི་བོར་འཁོར་ལོ་དཀར་པོ་རྩིབས་བཞི་པའི་ལྟེ་བར་ཨོཾ་དཀར་པོ། མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར་ཨཱཿདམར་པོ། ཐུགས་ཀར་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་སྔོན་པོས་མཚན་པ། སློབ་དཔོན་གྱི་གནས་གསུམ་ལས་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པར་འཕྲོས། ཁྱེད་རང་གི་གནས་གསུམ་གྱི་ཡིག་འབྲུ་གསུམ་（10ན）ལ་ཐིམ་པས་སྒོ་གསུམ་རྡོ་རྗེ་གསུམ་གྱི་རང་བཞིན་དུ་བྱིན་གྱིས་བརླབ་པའི་མོས་པ་མཛོད། （ཨོཾ་ཨཱཿཧཱུྃ་གིས་རྡོ་རྗེ་གནས་གསུམ་དུ་བཞག་ཅིང་། གོ་བགོ་བའི་སླད་དུ།） སླར་ཡང་སློབ་དཔོན་གྱི་ཕྱག་གི་རྡོ་རྗེ་ལས་རྡོ་རྗེ་དེ་འདྲ་བ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་ལུས་ལ་རྡོ་རྗེའི་གོ་ཁྲབ་ཞུ་བླུགས་སུ་གྱུར་ཏེ་ཕྱིན་ཆད་ནད་གདོན་ཉེར་འཚེ་གང་གིས་ཀྱང་གླགས་མི་རྙེད་པར་བསྲུང་བར་བྱས་པའི་མོས་པ་མཛོད། ཨོཾ་བཛྲ་རཀྵ་ཧཱུྃ། （ཞེས་བརྗོད་བཞིན་དུ། སྤྱི་བོ། དཔྲལ་བ། མགྲིན་པ། རྒྱབ། སྙིང་ཁ། ནུ་མ་གཉིས། ལྟེ་བ། སུམ་མདོ་རྣམས་སུ་རྡོ་རྗེ་རྒྱ་གྲམ་དུ་བཞག་ཅིང་མཐར་ལུས་ཀྱི་ཕྱི་ནས་གཡས་སུ་བསྐོར་ལ། །）རྒྱལ་བ་སྲས་བཅས་བདེན་པའི་བྱིན་རླབས་དང་། །ཁྲོ་རྒྱལ་སྨེ་བ་བརྩེགས་པའི་ནུས་མཐུ་ཡིས། །འགྲོ་བ་འདི་དག་བདག་གིས་བསྲུངས་ཟིན་གྱིས། །ཕྱིན་ཆད་སུས་ཀྱང་གནོད་པ་མ་བྱེད་ཅིག །（ཅེས་བརྗོད། མཐའ་རྟེན་ཤིས་པར་བྱ་བའི་སླད་དུ།） བླ་མ་དང་གཉིས་སུ་མེད་པའི་ཁྲོ་བོའི་རྒྱལ་པོ་སྨེ་བ་བརྩེགས་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ལྷ་དང་དྲང་སྟོང་བདེན་ཚིག་གྲུབ་པའི་ཚོགས་ཀྱི་བསྐོར་ཏེ། ཤིས་པ་（10བ）བརྗོད་པའི་གླུ་དབྱངས་དི་རི་རི་སྒྲོག་ཅིང་མེ་ཏོག་མནྡ་རའི་ཆར་ཆེན་པོ་ཕབས་པས་དགེ་ལེགས་ཀྱི་སྣང་བས་ས་གསུམ་ཀུན་ཏུ་ཁྱབ་པར་བྱས་པའི་མོས་པ་མཛོད། （རྟེན་འབྲེལ་སྙིང་པོས་ཐོག་དྲངས་ཏེ།） མི་འགྱུར་ལྷུན་པོ་（སོགས་དང་།） བགེགས་རིགས་སྟོང་ཕྲག་（སོགས།） ཉིན་མོ་བདེ་ལེགས་（སོགས་བརྗོད་བཞིན་པས་མེ་ཏོག་འཐོར་རོ། །）

（གསུམ་པ་རྗེས་ཀྱི་བྱ་བ་ནི། བདག་གི་རྣལ་འབྱོར་བསྡུ་བ་ལ། རང་ཉིད་ཁྲོ་བོའི་རྒྱལ་པོར་གསལ་བ་འོད་དུ་ཞུ་སྟེ་མི་དམིགས་འོད་གསལ་སྟོང་པ་ཉིད་ཀྱི་ངང་དུ་མཉམ་པར་བཞག་ཅིང་། སླར་ཡང་ཁྲོ་རྒྱལ་སྣང་སྟོང་ཆེན་པོའི་སྐུར་ཤར་བའི་གཟི་བྱིན་གྱིས་མི་མཐུན་པའི་ཕྱོགས་ཐམས་ཅད་བསྲུང་བར་གྱུར། ཨོཾ་བཛྲ་རཀྴ་རཀྴ་ཧཱུྃ། （ཞེས་བསྡུ་ལྡང་བྱ།） དགེ་བའི་འདི་ཡིས་མྱུར་དུ་བདག །སྨེ་བ་བརྩེགས་པ་འགྲུབ་གྱུར་ན། འགྲོ་བ་གཅིག་ཀྱང་མ་ལུས་པ། །དེ་ཡིས་ལ་འགོད་པར་ཤོག །（ཅེས་བསྔོ་སྨོན་དང་། ཤིས་བརྗོད་ཇི་ལྟར་རིགས་པ་སྤེལ་བས་ལེགས་པར་གྲུབ་བོ། །ཡང་སྐབས་འགའ་ཞིག་ཏུ་བདག་མདུན་མཆོད་གཏོར་གླུད་བསྔོ་སོགས་ཀྱི་སྤྲོས་པ་བསྡུ་བར་འདོད་ན། བཟླས་སྔགས་ཚར་གཅིག་བརྗོད་པས། སློབ་དཔོན་རང་ཉིད་སྐད་ཅིག་གིས་སྨེ་བ་བརྩེགས་པ་གསལ་ཞིང་། བུམ་ཆུ་（11ན）རྡོ་རྗེའི་སྔགས་ཀྱི་རང་བཞིན་དུ་བྱིན་བརླབས་ནས།） དེ་ཡང་ཁྱེད་རང་གི་ལུས་ངག་ཡིད་གསུམ་ལ་（སོགས་ནས་བཀྲུ་བྱབས་བསྲུང་གསུམ་གོང་ལྟར་ལ། འདོན་བྱའི་ཚིག་མང་ཉུང་རྒྱས་བསྡུས་སྐབས་དང་བསྟུན་པས་ཀྱང་འཐུས་ཏེ་རིག་སྔགས་ཀྱི་ནུས་པས་ཕན་ཡོན་ཅི་རིགས་པ་འབྱུང་བར་ངེས་སོ། །གྲིབ་གདོན་ཉེས་པའི་དྲི་མ་ཀུན། །རིགས་སྔགས་ཟླ་ཟེར་རྒྱུན་གྱིས་སྦྱངས། །ལུས་སེམས་སྡུག་བསྔལ་གདུང་ཞི་ནས། །ཕན་བདེའི་ལང་ཚོ་རྒྱས་བྱེད་ཤོག །ཅེས་པའང་གློ་བུར་གྲིབ་གདོན་གྱིས་གཙེས་ཏེ་ཚོར་བ་སྡུག་བསྔལ་གྱིས་ཉམ་ཐག་པར་བྱས་པ་རྣམས་ལ་གདུང་སེལ་འདོད་པ་འཇོ་བོའི་ཆ་རྐྱེན་དུ། གཏེར་བྱོན་སྨེ་བརྩེགས་མན་ངག་རྣམས་ཀྱི་བཅུད་བསྡུས་ནས་འཇུག་པ་བདེ་བའི་ངག་ཁྲིགས་སུ་བསྡེབས་པ་པོ་ནི་རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེ་སྟེ། འདིས་ཀྱང་གཞན་ལ་ཕན་པ་ཆེན་པོ་འབྱུང་བའི་གཞིར་གྱུར་ཅིག །སརྦ་དཱ་མངྒ་ལཾ།། །།）