TTDL-ZABTER-08-NYA-063

Previous Text Back to Volume PageNext Text

Wylie title	zab gsang mkha' 'gro'i snying thig las: gnod sbyin gter gyi bdag po'i gter bum sgrub thabs dngos grub char 'bebs:
Location	bdud 'joms gling pa zab gter Volume 8, Text 63, Pages 539-542 (Folios 1a1 to 2b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las gnod sbyin gter gyi bdag po'i gter bum sgrub thabs dngos grub char 'bebs. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 539-542. Thimphu, Bhutan: Lama Kuenzang Wangdue, 2004.
Side notes	Recto: thod sgrub   Verso: bdud 'joms bka' srung shan pa nang sgrub
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Kapala Consecration - thod sgrub
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཉིད་རང་རིག་གིས་ནན་དུ་བསྐུལ་ངོར་བདུད་འཇོམས་རྡོ་རྗེས་གཏན་ལ་ཕབ་པའི་ཡི་གེ་པ་ནི་རིགས་སྲས་དྲི་མེད་འོད་ཟེར་གྱིས་བགྱིས་སོ། །དགེའོ།།
	zhes pa 'di nyid rang rig gis nan du bskul ngor bdud 'joms rdo rjes gtan la phab pa'i yi ge pa ni rigs sras dri med 'od zer gyis bgyis so/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་གཏེར་གྱི་བདག་པོའི་གཏེར་བུམ་སྒྲུབ་ཐབས་དངོས་གྲུབ་ཆར་འབེབས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) དབུལ་ཕོངས་འབྱོར་རྒུད་སེལ་བ་དང་༔ ལོངས་སྤྱོད་གཏེར་ལ་དབང་བསྒྱུར་ཕྱིར༔ གནོད་སྦྱིན་གཏེར་བདག་ལ་བརྟེན་ནས༔ ས་བཅུད་གཏེར་བུམ་སྒྲུབ་ཐབས་བསྟན༔ ནོར་བུ་ཀུན་གྱི་མཆོག་གྱུར་པ༔ བདེ་སྐྱོང་ཡངས་པ་རབ་འབྲིང་ཐ༔ གསུམ་དུ་དབྱེ་བའི་རྣམ་གྲངས་རྣམས༔ མ་ནོར་མཚན་ཉིད་ལྡན་པ་བརྟེན༔ རྡོ་རྗེ་ནོར་བུ་པདྨའི་དབྱིབས༔ ཞི་རྒྱས་དབང་གི་ཕྲིན་ལས་འགྲུབ༔ ཁྱད་པར་ནོར་བུའི་དབྱིབས་ལྟ་བུ༔ མདུན་ཟུར་མཐོ་ལ་ལྟག་པ་དམའ༔ ལྷ་བའི་ཟམ་པ་མ་ཆད་ཅིང་༔ རང་ས་འཐུག་ཅིང་ཕྱི་ས་སྲབ༔ ཚངས་པའི་བུ་ག་ཕྱེ་བ་དང་༔ མཆེ་རྒྱན་མ་ཉམས་ཡིད་དུ་འོང་༔ སྲོག་གི་ཀ་བ་འཇམ་ལ་རིང་༔ ནོར་གཞོང་མར་ཞག་རྗེས་དང་ལྡན༔ ཟ་ལམ་ཟབ་ཅིང་སྲིན་དོང་མེད༔ ཤིང་ལོའི་ཡུ་བ་གཡས་གཡོན་ནས༔ འདབ་དང་ཡལ་ག་སྔོན་དུ་ཕྱོགས༔ གཞོན་ནུའི་ཤིང་ལོ་རབ་ཏུ་རྒྱས༔ དེ་ཡང་འབྲས་བུ་ལྡན་པ་དགོས༔ གཅིག་པ་ཚེ་དང་གཉིས་པ་ཟས༔ གསུམ་པ་ནོར་དང་བཞི་པ་ནི༔ མ་མོའི་སྒྲུབ་པའི་རྟེན་རྫས་མཆོག༔ འདིར་ནི་དུམ་གསུམ་གཙོ་བོར་བཤད༔ བཙོས་ནས་ལྷ་བ་མ་བཏོན་ཅིང་༔ ཀླད་པའི་ཤུན་པ་མ་ཉམསས་པ༔ ཤིན་ཏུ་ཡིད་འོང་རང་བྱུང་གི༔ སྣོད་དུ་མཚལ་ལམ་སྣག་ཚ་ལ༔ བཟང་པོ་དྲུག་བཏབ་ཁུ་བས་ནི༔ དབུས་སུ་པདྨ་འདབ་བཞི་བཀོད༔ ལྟེ་བར་ཧཱུྃ་དང་ཏྲིཿཡིག་བྲི༔ འདབ་མ་བཞི་ལ་གཡས་བསྐོར་ཚུལ༔ ཨོཾ་ཡཀྴ་རྨ་རུ་རྩེ་སརྦ་སིདྡྷི་ཧཱུྃ༔ ཨོཾ་མ་མ་ཁ་ཤི་བཾ་སྭཱ་ཧཱ༔ ཨོཾ་ཙིཏྟ་ནྲྀ་འགུལ་འགུལ་རྒྱུགས་རྒྱུགས་བྲེང་བྲེང་དུང་དུང་སྭཱ་ཧཱ༔ ཨོཾ་མ་མ་ཧ་རི་ནི་ས་རཏྣ་སིདྡྷི་བྷྲཱུྃ་སྭཱ་ཧཱ༔ དེ་ཡི་ཕྱི་རིམ་མུ་ཁྱུད་ལ༔ འབོད་སྔགས་ཙིཏྟ་འགུལ་སྔགས་དང་༔ མཁའ་འགྲོ་གནད་དབབ་སྔགས་ཀྱི་མཐར༔ སརྦ་རཏྣ་སིདྡྷི་བ་སུ་སིདྡྷི་ཁ་དྷེ་སིདྡྷི་བྷྲཱུྃ་སྭཱ་ཧཱ༔ ལྷ་འདྲེ་མི་གསུམ་འགྲོ་བ་ཕོ་མོ་ཟས་ནོར་ལོངས་སྤྱོད་ཐམས་ཅད་ཝཱ་ཤཾ་ཀུ་རུ་ཡེ་སྭཱ་ཧཱ༔ དེའི་ཕྱི་རིམ་མུ་ཁྱུད་གསུམ་པ་ལ༔ རྟེན་སྙིང་དབྱངས་གསལ་ལས་བཞིའི་ཤམ༔ བྲི་ཞིང་མཐའ་མར་པ་ཏྲས་བསྐོར༔ ཞིང་ས་བཟང་པོ་དགུའི་ས་སྣ༔ དེ་སྟེང་ནོར་བདག་སྐུ་གཟུགས་འཇོག༔ འབྲུ་སྨན་དར་ཟབ་གཡང་ཅན་གྱི༔ སྐྲ་གོས་ཐབ་ས་ཕྱུགས་ཀྱི་སྤུ༔ རིན་ཆེན་གཡང་རྫས་སྣ་ཚོགས་ཀྱིས༔ ཕྱུར་བུར་བཀང་ཞིང་སྣ་ལྔ་ཡིས༔ ཕྱི་ནང་རིམ་པར་མ་འཆོལ་དཀྲིས༔ དཀྱིལ་འཁོར་དབུས་གཞུག་གཏེར་བདག་གི༔ ལས་གཞུང་བསྲང་ནས་འབོད་པའི་སྐབས༔ གཡང་ཅན་སྤུ་ཡི་གཟུངས་ཐག་ལ༔ བཟུང་ནས་སྤྲོས་བསྡུས་དམིགས་པར་འབད༔ དེ་ནས་དམིགས་འབྱེད་བྱེ་བྲག་ནི༔ ཨོཾ་ཡཀྴ་ཨ་པ་ར་ཙིཏྟ་ཀ་པཱ་ལ་སརྦ་སིདྡྷི་བྷྲཱུྃ་འདུས་སྭཱ་ཧཱ༔ དེ་ནས་ཙིཏྟ་འགུལ་སྔགས་དང་༔ མཁའ་འགྲོ་གནད་ནས་བསྐུལ་བའི་སྔགས་རྣམས་བརྗོད༔ ཐུན་མཚམས་སུ་གཡང་འགུགས་ཅི་འགྲུབ་མཐར༔ རྒྱས་གདབ་པ་ནི༔ ཧཱུྃ༔ བདེ་ཆེན་ཡེ་ཤེས་མི་འགྱུར་དབྱིངས༔ ཆོས་རྣམས་མ་ལུས་འབྱུང་བའི་གནས༔ རང་རྟགས་དར་ཚོན་རིགས་ལྔའི་མཚོན༔ སྣོད་བཅུད་དཔལ་འབྱོར་ཕྱྭ་དང་གཡང་༔ ནུབ་མེད་རྟག་ཁྱབ་ཆེན་པོ་རུ༔ དམིགས་མེད་ལྟ་བའི་རྒྱས་བཏབ་བོ༔ རྒྱུ་སྦྱོར་ཡོན་གྱི་བདག་པོ་ཡི༔ ལོངས་སྤྱོད་དཔལ་འབྱོར་གོང་འཕེལ་རྒྱས༔ རྣམ་ཐོས་བུ་བཞིན་ཕྱུག་པར་ཤོག༔ སརྦ་རཏྣ་སིདྡྷི་མངྒ་ལཾ༔ དེ་ནས་འདོད་དོན་གསོལ་བ་གདབ་པ་ནི༔ ཧོཿ ནོར་ལྷ་གཏེར་བདག་རྒྱ་མཚོའི་ཚོགས༔ རྟེན་མཆོག་འདི་དང་དབྱེར་མེད་དུ༔ བཞུགས་ནས་རྣལ་འབྱོར་བདག་ཅག་གི༔ ཚེ་བསོད་དཔལ་འབྱོར་ཡོན་ཏན་སྤེལ༔ ཟས་ནོར་ལོངས་སྤྱོད་ཆར་བཞིན་བབས༔ མི་ནུབ་རྒྱལ་མཚན་བཞིན་དུ་བརྟན༔ འཁོར་འདས་ཕྱྭ་གཡང་དྭངས་བཅུད་བསྡུས༔ གནས་ཁང་ཕྱི་ནང་ཐོ་ཕྱི་ཀུན༔ ཡིད་བཞིན་འདོད་འབྱུང་གནས་བྱིན་རློབས༔ དབུལ་ཕོངས་བཀྲེས་ཤིང་ཕོངས་པ་རྣམས༔ འབྱོར་རྒུད་འདུ་འབྲལ་ལས་སྐྱོབ་པས༔ ཚོགས་བསགས་བསོད་ནམས་དཔལ་གྱི་ཞིང་༔ ཡིད་བཞིན་ནོར་ལྟར་བདག་གྱུར་ཅིག༔ ཨོཾ་ཡེ་དྷརྨ་སོགས་བཀྲ་ཤིས་ཚེ་རིང་བརྗོད༔ བདུན་ཞག་སོགས་ཅི་འགྲུབ་པར་སྒྲུབ་རྗེས༔ མཆོད་པའི་རྟེན་དུ་བཞག་ཅིང་མཆོད་འབུལ་ཚོགས་བསགས་རྒྱ་ཆེན་བྱ༔ གསུར་དང་ཆུ་གཏོར་སྦྱིན་གཏོང་སོགས་ཅི་འགྲུབ་བྱེད་ཅིང་༔ རྒྱུན་དུ་གཞན་ལ་གནོད་སེམས་སྤང་ཞིང་བྱམས་སྙིང་རྗེ་བསྒོམ༔ ཁྱད་པར་དུ་དགུན་དུས་སུ་བྱ་སྦྱིན་བྱེད་པ་ནི་སྦྱིན་པ་ཀུན་གྱི་མཆོག་ཡིན་ནོ༔ དེ་ནས་རིམ་བཞིན་དུ་ལོངས་སྤྱོད་གཏེར་བཞིན་རྡོལ་ནས་འོང་ངོ་༔ འདི་ནི་ནོར་སྒྲུབ་ཀུན་གྱི་མཐར་ཐུག་པ་ཡིན་ནོ༔ བཀའ་སྲུང་གནོད་སྦྱིན་ཆེན་པོར་གཉེར༔ ཐུབ་པར་སྲུངས་ཤིག་ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཉིད་རང་རིག་གིས་ནན་དུ་བསྐུལ་ངོར་བདུད་འཇོམས་རྡོ་རྗེས་གཏན་ལ་ཕབ་པའི་ཡི་གེ་པ་ནི་རིགས་སྲས་དྲི་མེད་འོད་ཟེར་གྱིས་བགྱིས་སོ། །དགེའོ།། །།