TTDL-ZABTER-12-NA-038

Previous Text Back to Volume PageNext Text

Wylie title	chos nyid nam mkha'i klong mdzod las: bla sgrub dngos grub char 'bebs:
Location	bdud 'joms gling pa zab gter Volume 12, Text 38, Pages 223-229 (Folios 1a1 to 4a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las bla sgrub dngos grub char 'bebs. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 223-229. Thimphu, Bhutan: Lama Kuenzang Wangdue, 2004.
Side notes	Recto: bla sgrub   Verso: bdud 'joms bdud 'joms bla sgrub
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Guru Yoga Texts - bla ma'i rnal 'byor
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Colophon	ཞེས་པ་འདི་སློབ་བུ་བློ་གྲོས་ཀྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di slob bu blo gros kyis nan du bskul ngor bdud 'joms rdo rjes chos nyid nam mkha'i mdzod las bsgyur ba'o/_/dge'o/_/legs so/_/sarba mang+ga laM//

Tibetan Text

[edit]

སྱྃ༔ ཆོས་ཉིད་ནམ་མཁའི་ཀློང་མཛོད་ལས༔ བླ་སྒྲུབ་དངོས་གྲུབ་ཆར་འབེབས་བཞུགས་སོ༔

སྱྃ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) དུས་གསུམ་སངས་རྒྱས་བསྒོམ་བསྒྲུབ་ལས༔ རྡོ་རྗེ་བླ་མ་སྒྲུབ་པ་མཆོག༔ དངོས་གྲུབ་ཀུན་གྱི་འབྱུང་གནས་ཡིན༔ བསྐྱེད་རིམ་གནད་ཀྱི་ཡང་ཐིག་ཡིན༔ ཤེས་པར་གྱིས་ཤིག་སྐལ་ལྡན་རྣམས༔ དང་པོ་སྐྱབས་འགྲོ་སེམས་བསྐྱེད་ལ༔ ན་མོ༔ བླ་མ་སྐུ་བཞིའི་བདག་ཉིད་ལ༔ བྱང་ཆུབ་བར་དུ་སྐྱབས་སུ་མཆི༔ སྒོ་གསུམ་རྡོ་རྗེའི་གྲོང་ཞུགས་ཏེ༔ འགྲོ་ཀུན་བསྒྲལ་བར་དམ་བཅའོ༔ དེ་ནས་བགེགས་བསྐྲད་མཚམས་གཅོད་ལ༔ ཧཱུྃ༔ ང་ནི་རང་བྱུང་ཡེ་ཤེས་ལྷ༔ ཉོན་མོངས་བདུད་བགེགས་དབྱིངས་སུ་བསྐྲད༔ འཁོར་འདས་དག་མཉམ་ཆེན་པོ་ལ༔ བགེགས་དང་ལོག་འདྲེན་མིང་ཡང་མེད༔ སརྦ་ཤ་ཏྲུཾ་མཱ་ར་ཡ་ཕཊ༔ བཛྲ་རཀྵ་རཀྵ་ཧཱུྃ༔ དེ་ནས་བྱིན་འབེབས་དང་མཆོད་རྫས་བྱིན་རླབས་ལ༔ ཧཱུྃ༔ སྐུ་གསུམ་རྒྱལ་བ་སྲས་བཅས་ཀྱི༔ དབང་དང་དངོས་གྲུབ་བྱིན་ཆེན་ཕོབ༔ ཁམས་གསུམ་སྣོད་བཅུད་འདོད་ཡོན་ཆོས༔ ཕྱི་ནང་གསང་མཆོད་སྤྲིན་དུ་སྤེལ༔ གུ་རུ་ཧ་རི་ནི་ས་བཛྲ་ས་མ་ཡ་ཛ༔ ཨ་བེ་ཤ་ཡ་ ཧོཿ ཨོཾ་ཨཱཿཧཱུྃ་སརྦ་པཉྩ་པཱུ་ཛ་ག་ཎ་ཙཀྲ་ ཧོཿ དེ་ནས་རྟེན་དང་བརྟེན་པ་བསྐྱེད་པ་ལ༔ ཨཱཿསྣ་ཚོགས་སྣང་བའི་ཆོས་རྣམས་ཀུན༔ སྒྱུ་མའི་འཁྲུལ་འཁོར་ཞིག་པ་ལྟར༔ ཁྱབ་བརྡལ་སྟོང་ཉིད་ཆེན་པོར་བརྡལ༔ སྐད་ཅིག་རྨི་སྣང་མཆེད་པ་ལྟར༔ དོན་གྱི་འོག་མིན་ཆེན་པོའི་དབྱིངས༔ ལྷུན་གྲུབ་བདེ་ཆེན་གཞལ་ཡས་སུ༔ པདྨ་ཉི་ཟླའི་གདན་གྱི་སྟེང་༔ རང་ཉིད་རྡོ་རྗེའི་བླ་མ་ནི༔ དཀར་དམར་དམངས་ལྡན་ཞི་མ་ཁྲོ༔ དབུ་སྐྲ་གཙུག་ཕུད་གླེགས་བམ་བཅིངས༔ དར་སྣ་ལྔ་ཡི་རྒྱ་ཆིངས་གདབ༔ ཕྱག་གཡས་གནམ་ལྕགས་རྡོ་རྗེ་ཕྱར༔ གཡོན་པས་ཕུར་པ་ས་ལ་གཟིར༔ གསང་ཡུམ་སྦས་ཚུལ་ཁ་ཊྭཱྃ་བརྟེན༔ ནང་གོས་སྨུག་ལ་ཤམ་ཐབས་མཐིང་༔ དྲི་མེད་རས་གཟན་དཀར་པོ་གསོལ༔ རིན་ཆེན་དུང་གི་སྙན་རྒྱན་མཛེས༔ སྐེད་པར་ཤེས་རབ་རལ་གྲི་བརྟེན༔ རྒྱལ་པོ་རོལ་པའི་སྟབས་སུ་འགྱིང་༔ ཡེ་ཤེས་འཇའ་ཚོན་འོད་ལྔའི་ཀློང་༔ འཇའ་ལུས་སྒྱུ་མའི་སྐུ་རུ་བསྒོམ༔ ཤར་དུ་རྡོ་རྗེ་མཁའ་འགྲོ་དཀར༔ ལྷོ་རུ་རིན་ཆེན་མཁའ་འགྲོ་སེར༔ ནུབ་ཏུ་པདྨ་མཁའ་འགྲོ་དམར༔ བྱང་དུ་ལས་ཀྱི་མཁའ་འགྲོ་ལྗང་༔ ཀུན་ཀྱང་གྲི་ཐོད་ཁ་ཊྭཱྃ་བསྣམས༔ གར་སྟབས་རུས་རྒྱན་འོད་ཕུང་འབར༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་བརྒྱུད་གསུམ་བླ་མ་དང་༔ སངས་རྒྱས་བྱང་སེམས་མཁའ་འགྲོའི་ཚོགས༔ སྤྱན་དྲངས་གཉིས་སུ་མེད་པར་བསྟིམས༔ དེ་ནས་སྤྱན་དྲངས་པ་ནི༔ ཧཱུྃ༔ རང་སྣང་དོན་གྱི་འོག་མིན་ནས༔ དུས་གསུམ་རྒྱལ་བའི་སྤྱི་གཟུགས་མཆོག༔ རྡོ་རྗེའི་བླ་མ་རིན་པོ་ཆེ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཛྲ་ས་མ་ཡ་ཛ་ཛཿདེ་ནས་བཞུགས་སུ་གསོལ་བ་ནི༔ ཧཱུྃ༔ རིག་འཛིན་བླ་མའི་སྐུ་གསུང་ཐུགས༔ རྡོ་རྗེ་གསུམ་གྱི་རང་བཞིན་ཏེ༔ གདན་གསུམ་ཚང་བའི་ངོ་བོ་རུ༔ མི་འབྲལ་རྟག་ཏུ་བརྟན་བཞུགས་གསོལ༔ བཛྲ་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧཱུྃ༔ གདོད་ནས་རང་རིག་སྐུ་གསུམ་ཞལ༔ ཡོངས་གྲུབ་དོན་གྱི་བླ་མ་ལ༔ རང་ཞལ་མཇལ་ཕྱིར་ཕྱག་འཚལ་ལོ༔ སྐུ་དང་ཡེ་ཤེས་རང་ཞལ་སྤྲོད༔ ཨ་ཏི་པཱུ་ཧོཿཔྲ་ཏཱིཙྪ་ ཧོཿ དེ་ནས་མཆོད་པ་འབུལ་བ་ནི༔ ཨོཾ་ཨཱཿཧཱུྃ༔ ཡུལ་དྲུག་འདོད་ཡོན་སྣང་བའི་ཆོས༔ ཕྱི་ནང་གསང་མཆོད་རྒྱན་དུ་ཤར༔ རིགས་འདུས་བླ་མ་དགྱེས་ཕྱིར་འབུལ༔ བཞེས་ནས་དབང་དང་དངོས་གྲུབ་སྩོལ༔ མ་ཧཱ་སརྦ་ག་ན་པཱུ་ཛ་ ཧོཿ དེ་ནས་བསྟོད་པ་བྱ་བ་ལ༔ ཧཱུྃ༔ ཀ་དག་སྐྱེ་མེད་སྤྲོས་པའི་མཐའ་དང་བྲལ༔ རང་བཞིན་མ་འགགས་སྐུ་དང་ཡེ་ཤེས་དཔལ༔ ཐུགས་རྗེའི་སྤྲུལ་སྐུ་འགྲོ་བའི་དཔལ་དུ་ཤར༔ སྐུ་གསུམ་དབྱེར་མེད་རྗེ་ལ་ཕྱག་འཚལ་བསྟོད༔ དེ་ནས་འཛབ་བཟླ་བ་ནི༔ རང་ཉིད་བླ་མའི་ཐུགས་ཀ་རུ༔ ཀུན་བཟང་མཐིང་ནག་མཉམ་བཞག་ཅན༔ དེ་ཡི་ཐུགས་ཀར་འོད་ལྔའི་ཀློང་༔ ཉི་ཟླའི་གྭའུ་ཁ་སྦྱོར་ནང་༔ ཧཱུྃ་ལ་སྔགས་ཀྱི་ཕྲེང་པས་བསྐོར༔ འོད་དང་འོད་ཟེར་རབ་འཕྲོས་པས༔ བརྒྱུད་གསུམ་བླ་མ་རིག་འཛིན་ཚོགས༔ འཇའ་སྤྲིན་ལྟ་བུའི་རྣམ་པ་རུ༔ བསྡུས་ཏེ་སྲོག་གི་སྙིང་པོར་བསྟིམས༔ ཨོཾ་ཨཱཿཧཱུྃ་བཛྲ་གུ་རུ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ༔ དེ་ནས་སྒྲུབ་པ་ནི༔ ཐུགས་སྲོག་སྔགས་ལས་འོད་འཕྲོས་པས༔ དུས་གསུམ་རྒྱལ་བ་རྟེན་བརྟེན་པ༔ འོད་ཀྱི་རྣམ་པར་སྤྱན་དྲངས་ཏེ༔ རྡོ་རྗེ་གསུམ་གྱི་སྙིང་པོར་དྲིལ༔ རྩ་སྔགས༔ སླར་ཡང་སྔགས་ཕྲེང་བཀོད་པ་ལས༔ འོད་ཟེར་དྲག་ཅིང་ཚ་རྩུབ་པ༔ མགར་གྱི་ཚྭ་ཚྭ་ལྟར་འཕྲོས་པས༔ ལོག་པར་འདྲེན་པའི་གནོད་བྱེད་ཀུན༔ སྦུར་མ་མེ་ལ་བསྲེག་བཞིན་དུ༔ རྗེས་ཤུལ་མེད་པར་བརླག་པར་བསམ༔ ཨོཾ་ཨཱཿཧཱུྃ་བཛྲ་གུ་རུ་ཧ་རི་ནི་ས་སརྦ་སིདྡྷི་ཕ་ལ་ ཧོཿ བསྙེན་པ་འབུམ་ཕྲག་བཅུ་དྲུག་ལ༔ དུས་ཀྱི་བསྙེན་པ་དེའི་བཞི་འགྱུར༔ བསྒྲུབ་སྔགས་བརྒྱད་དང་ལས་སྦྱོར་བཞིའི༔ དམིགས་པའི་གནད་ཀྱིས་ཟིན་གྱུར་ན༔ དངོས་གྲུབ་ཐོབ་པར་གདོན་མི་ཟ༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདི་སློབ་བུ་བློ་གྲོས་ཀྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །ལེགས་སོ། །སརྦ་མངྒ་ལཾ།། །།