TTDL-ZABTER-15-BA-048

Previous Text Back to Volume PageNext Text

Wylie title	dag snang ye shes drwa ba las: dkar gtor 'dod don kun 'byung:
Location	bdud 'joms gling pa'i zab gter Volume 15, Text 48, Pages 225-226 (Folios 1a1 to 1b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las dkar gtor 'dod don kun 'byung. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 225-226. Thimphu, Bhutan: Lama Kuenzang Wangdue, 2004.
Side notes	Recto: dkar gtor   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Torma-offering Rituals - gtor chog
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཞེས་པ་འདི་ཡང་སྐྱེས་བུ་དམ་པ་ཆེ་མཆོག་གིས་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བ་དགེ་བར་གྱུར་ཅིག །དགེའོ། །དགེའོ། །དགེའོ། །མངྒ་ལཾ།།
	zhes pa 'di yang skyes bu dam pa che mchog gis bskul ngor bdud 'joms rdo rjes dag snang ye shes drwa ba las bsgyur ba dge bar gyur cig_/dge'o/_/dge'o/_/dge'o/_/mang+ga laM//

Tibetan Text

[edit]

༼བྷྂ༽༔ དག་སྣང་ཡེ་ཤེས་དྲྭ་བ་ལས༔ དཀར་གཏོར་འདོད་དོན་ཀུན་འབྱུང་བཞུགས་སོ༔ ན་མོ་གུ་རུ་མཱུ་ཁྱོ་པདྨ་ཀ་ར་ཡེ༔ གསང་སྔགས་སྒྲུབ་པ་ཟབ་མོ་ཡི༔ གེགས་སེལ་དྲེགས་པ་ཅན་རྣམས་ལ༔ གཏོར་སྐྱེམས་ཕུལ་ཞིང་གྲོགས་སུ་བཀོལ༔ འདོད་དོན་བསྒྲུབ་པའི་ལས་ལ་ཁོལ༔ དེ་ཕྱིར་དཀར་གཏོར་ཕུད་རྒོད་བཤམས༔ སྭ་བྷཱ་ཝ་ཡིས་སྟོང་པར་སྦྱངས༔ ཨ་ཀཱ་རོ་ཡིས་འདོད་རྒུར་སྤེལ༔ རང་ཉིད་ལྷ་ཡི་ང་རྒྱལ་དང་༔ ལྡན་པས་ཡེ་ཤེས་འཇིག་རྟེན་གྱི༔ ལྷ་དང་སྲུང་མ་ཐམས་ཅད་ཀུན༔ མགྲོན་དུ་བསྐུལ་ཞིང་འདོད་རྒུས་མཆོད༔ ལས་རྣམས་འགྲུབ་པའི་གཉེར་བཅོལ་བྱ༔ ཀྱཻ༔ མགོན་པོ་ཕོ་རྒྱུད་ལྷ་མོ་མོ་རྒྱུད་དང་༔ ཡེ་ཤེས་ལས་གྲུབ་བཀའ་སྲུང་དྲེགས་པའི་སྡེ༔ སྲིད་པའི་དབང་ཕྱུག་དཔལ་མགོན་བདུན་ཅུ་དང་༔ ལྷ་སྲིན་སྟེ་བརྒྱད་སྟོང་གསུམ་ཡུལ་གཞི་བདག༔ ཕྱོགས་བཅུ་དྲེགས་དཔོན་བརྟན་མར་བཅས་པ་ཀུན༔ འདིར་གཤེགས་གཏོར་མ་འདོད་རྒུའི་དཔལ་ལ་རོལ༔ དུས་གསུམ་རྒྱལ་བ་སྲས་དང་བཅས་རྣམས་ཀྱི༔ བཀའ་དང་དམ་ཚིག་གཉན་པོ་དཔང་བཙུགས་ཏེ༔ དམ་ཅན་ཁྱེད་ལ་ཕྲིན་ལས་བཅོལ་བ་ནི༔ སངས་རྒྱས་བསྟན་བསྲུང་དཀོན་མཆོག་དབུ་འཕང་བསྟོད༔ དགེ་འདུན་སྡེ་དང་ཆོས་སྲིད་མངའ་ཐང་སྐྱོང་༔ ཁྱད་པར་སྒྲུབ་པའི་རྣལ་འབྱོར་བདག་ཅག་གི༔ མཐུན་རྐྱེན་ལེགས་ཚོགས་ཇི་སྙེད་མཆིས་པ་ཀུན༔ འབད་མེད་ལྷུན་གྱིས་གྲུབ་པར་མཛད་དུ་གསོལ༔ སྨོན་ལོག་སྟོབས་དང་སྔོན་ལས་འཕྲལ་རྐྱེན་གྱིས༔ རྒྱུ་རྐྱེན་རྟེན་འབྲེལ་ལས་གྱུར་དགྲ་དང་བགེགས༔ རྗེས་ཤུལ་ལྷག་མ་མེད་པར་རྡུལ་དུ་རློག༔ བཀའ་དང་དམ་ལ་མ་འདའ་ས་མ་ཡ༔ ཞེས་གཏོར་སྐྱེམས་ཕྱི་རོལ་དུ་དོར༔ དེ་ལྟར་བྱས་པའི་ཡོན་ཏན་གྱིས༔ ཕྱི་ནང་བར་ཆད་གེགས་སེལ་ཞིང་༔ རབ་འབྱམས་ཕྲིན་ལས་ཡོངས་འགྲུབ་གྱུར༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་སྐྱེས་བུ་དམ་པ་ཆེ་མཆོག་གིས་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བ་དགེ་བར་གྱུར་ཅིག །དགེའོ། །དགེའོ། །དགེའོ། །མངྒ་ལཾ།། །།