TTDL-ZABTER-15-BA-062

Previous Text Back to Volume PageNext Text

Wylie title	dag snang ye shes drwa ba las: sngags srung dbyings kyi rje mo'i sgrub thams yid bzhin dbang rgyal:
Location	bdud 'joms gling pa zab gter Volume 15, Text 62, Pages 281-283 (Folios 1a1 to 2a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las sngags srung dbyings kyi rje mo'i sgrub thams yid bzhin dbang rgyal. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 281-283. Thimphu, Bhutan: Lama Kuenzang Wangdue, 2004.
Side notes	Recto: sgrub thabs   Verso: bdud 'joms srung ma sngags srung
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Deity	E ka dzA Ti
Colophon	ཞེས་པ་འདི་ནི་རང་སློབ་གར་གྱི་དབང་ཕྱུག་དང་། ཨ་བྷྱ་དྷརྨ་གཉིས་ཀྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནས་མཁའི་མཛོད་ལས་བསྒྱུར་བའོ། །དགོའོ།། ལེགས་སོ།། །སརྦ་མངྒ་ལཾ།།
	zhes pa 'di ni rang slob gar gyi dbang phyug dang /_a b+h+ya d+harma gnyis kyis bskul ngor khrag 'thung bdud 'joms rdo rjes chos nyid nas mkha'i mdzod las bsgyur ba'o/_/dgo'o//__legs so//__/sarba mang+ga laM//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ སྔགས་སྲུང་དབྱིངས་ཀྱི་རྗེ་མོའི་སྒྲུབ་ཐམས་ཡིད་བཞིན་དབང་རྒྱལ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) རང་ཉིད་ལྷ་རུ་གསལ་བ་ཡི་མདུན་མཁར་སྔགས་ཀྱི་སྲུང་མ་ནི༔ ཚིག་བཞིན་དོན་མ་འཛོལ་བར་བསྐྱེད༔ མཆོད་རྫས་འབྱོར་ཚོགས་བཤམས་ཏེ་འབུལ༔ ཧཱུྃ༔ རང་ཉིད་སྐད་ཅིག་གིས་ཡི་དམ་དྲག་པོ་ཧེ་རུ་ཀའི་མདུན་དུ་སྒྲོལ་བའི་ཡུམ་ཆེན་ཨེ་ཀ་ཙ་ཏི་སྐུ་མདོག་མཐིང་ནག་ཞལ་གཅིག་ཕྱག་གཉིས་ཤིན་ཏུ་ཁྲོས་པའི་ཉམས་དང་ལྡན་ཞིང་༔ སྤྱན་གཅིག་དབྱིངས་ལ་གཟིགས་ཤིང་མཆེ་གཅིག་མདུན་དུ་གཙིགས་པ༔ རལ་པ་འབྲུ་གཅིག་གནམ་ལ་གཟིངས་ཤིང་ཁྲོ་གཉེར་ཆགས་པ༔ ཕྱག་གཡས་པས་དགྲ་སྙིང་དམར་རློན་ཞལ་དུ་ཁྱེར་ཞིང་གཡོན་པས་སྡིགས་འཛུབ་ཀྱི་རྩེ་ནས་ལྕགས་སྤྱང་གི་ཚྭ་ཚྭ་བགྱེད་པ༔ ནུ་མ་གཡས་ལས་བདུད་རྩི་དཀར་པོ་འབེབས་ཤིང་སྒྲུབ་ལ་དངོས་གྲུབ་སྟེར་བ༔ གཡོན་པར་ཁྲག་ཆར་འཕྲོས་པས་དགྲ་ལ་དལ་ཡམས་གཏོང་བ༔ ཞབས་གཉིས་གར་སྟབས་མཛད་པའི་གཡས་རྟིང་བྷ་གར་གཏད་ཅིང་༔ གཡོན་པས་བསྟན་དགྲའི་སྙིང་གར་བརྫིས་པ༔ སྐུ་ལ་སྦྲུལ་ཆུན་དང་མགོ་ཕྲང་དང་སོར་ཕྲེང་གིས་བརྒྱན་པ༔ དཔྲལ་བར་མེ་ཏོག་མནྡ་ར་བ་བཞད་ཅིང་༔ བསྐལ་པའི་མེ་རླུང་འཚུབས་མའི་ཀློང་དུ་སྲིད་པ་མ་མོའི་དཀྱིལ་འཁོར་དུ་བཞེངས་པར་གྱུར༔ ཧོཿ དགོངས་སུ་གསོལ་ལོ༔ ལན་གསུམ་བརྗོད༔ དཔལ་ལྡན་སྔགས་ཀྱི་སྲུང་མ་ཨེ་ཀ་ཙ་ཏི་སྤུན་དྲུག༔ བྲན་མོ་ཆེན་མོ་བཅུ་བཞི༔ གཡོག་མོ་ལྔ་བཅུ་རྩ་བརྒྱད༔ ཡང་གཡོག་འབུམ་ཁྲི་འབུམ་སྟོང་༔ མདོར་ན་སྲིད་པ་མ་མོའི་དཀྱིལ་འཁོར་མ་ལུས་ཤིང་ལུས་པ་མེད་པ་དད་པས་དྲན་ནོ༔ དམ་ཚིག་གིས་འབོད་དོ༔ རྩེ་གཅིག་དུ་བརྟེན་ནོ༔ རྟག་ཏུ་མཆོད་ཀྱིས༔ སྒྲུབ་པའི་གནས་འདིར་བཞེངས་ཤིག༔ གཤེགས་ཤིག༔ བྱོན་ཅིག༔ བཛྲ་ས་མ་ཡ་ཛ་ཛ༔ མ་བྷྱོ་ཛ་ཧྲཱིཾ་ཧྲཱིཾ་ཕེཾ་ཕེཾ༔ སྤྱན་འདྲེན་པ་ནི༔ མ་བྷྱོ༔ བདག་མེད་ཤེས་རབ་རོལ་པའི་དབྱིངས་༔ མ་འགགས་བདེ་བ་ཆེན་པོ་ནས༔ ཀུན་ཟླུམ་ཐིག་ལེ་ཨེ་ཀ་ཛ༔ སྒྱུ་འཕྲུལ་དང་བཅས་གཤེགས་སུ་གསོལ༔ དེ་ནས་བཞུགས་གསོལ་ཕྱག་འཚལ་མཆོད་འབུལ་ནི༔ བྷྱོ༔ ལྷན་སྐྱེས་ཡེ་ཤེས་ཆེན་པོ་རུ༔ དབྱིངས་ཀྱི་རྗེ་མོ་བཞུགས་སུ་གསོལ༔ སྒོ་གསུམ་གུས་པས་ཕྱག་འཚལ་ལོ༔ དངོས་འབྱོར་ཡིད་སྤྲུལ་མཆོད་པ་འབུལ༔ དེ་ནས་བསྟོད་པ་ནི༔ བྷྱོ༔ སྣང་སྲིད་འཁོར་འདས་ཐམས་ཅད་ཀུན༔ བྱང་ཆུབ་ཆེན་པོར་རོལ་པ་མོ༔ དབྱིངས་ཀྱི་དབྱིངས་ཕྱུག་ཤེས་རབ་ཆེ༔ རྗེ་མོ་ཨེ་ཀ་ཙ་ཏིར་བསྟོད༔ དབྱིངས་ལ་ཐ་དད་མི་མངའ་ཡང་༔ སྣ་ཚོགས་ཐབས་དང་ཐུགས་རྗེའི་འཕྲུལ༔ གདུལ་བྱའི་མོས་ངོར་ཆུ་ཟླ་ལྟར༔ སྣང་བའི་འབུམ་ཕྲག་མཁའ་འགྲོར་བསྟོད༔ འཛབ་དམིགས་ནི༔ དབྱིངས་ཀྱི་རྗེ་མོའི་ཐུགས་ཀ་རུ༔ ཉི་སྟེང་དྭངས་མའི་ཐིག་ལེའི་ཀློང་༔ མ་མཐིང་ཉིད་ལ་སྔགས་ཀྱིས་བསྐོར༔ བཟླས་པས་དངོས་གྲུབ་ཀུན་སྩོལ་དམིགས༔ མ་མ་ཨེ་ཀ་ཙ་ཏི་བཾ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ༔ ལས་ལ་སྦྱོར་བའི་སྔགས༔ མ་མ་ཨེ་ཀ་ཙ་ཏི་ཏྲག་རཀྵ་རུ་ལུ་རུ་ལུ་སརྦ་ས་མ་ཡ་སརྦ་ཤ་ཏྲུཾ་མཱ་ར་ཡ་རྦད་སོད༔ འདི་ཡིས་དབྱེར་མེད་འགྲུབ་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ནི་རང་སློབ་གར་གྱི་དབང་ཕྱུག་དང་། ཨ་བྷྱ་དྷརྨ་གཉིས་ཀྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནས་མཁའི་མཛོད་ལས་བསྒྱུར་བའོ། །དགོའོ།། ལེགས་སོ།། །སརྦ་མངྒ་ལཾ།། །།