DUDJOM-THROMA-091

Previous Text Back to Volume PageNext Text

Wylie title
Location	khros ma'i sgrub skor Volume 1, Text 90, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

དབུ་ཁྲིད་༠༠༠༠༠༠བརྡ་ཡིག ༧༩ ཆོས་ཉིད་ནམ་མཁའི་ཀློང་མཛོད་ལས༔ རྣལ་འབྱོར་རལ་པའི་ཅོད་པན་ལ་དབང་བའི་དབང་བསྐུར་བྱིན་གྱིས་བརླབ་པའི་ཆོ་ག་བྱིན་རླབས་ཡེ་ཤེས་ཀྱི་ཀློང་མཛོད་ཟབ་མོ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠༠༠༠༠༠༠བརྡ་ཡིག ༨༠ ཐེག་དགུའི་ཡང་རྩེ་སྔགས་ཀྱི་གསེང་ལམ་ལ༔ འཇུག་པའི་ཐེག་ཆེན་རྣལ་འབྱོར་དམ་པ་རྣམས༔ རྒྱན་གྱི་མཆོག་གྱུར་རལ་པ་ལྕང་ལོ་མཆོག༔ འབྲལ་མེད་ས་བོན་ལྷན་ཅིག་སྐྱེས་པ་སྟེ༔ བྱིན་གྱིས་བརླབས་དང་མ་བརླབ་བྱེ་བྲག་གིས༔ ཐ་མལ་མགོ་རེག་ཕོ་མོའི་ཟླ་འཆང་བ༔ དེ་དག་འཇིག་རྟེན་ཐ་མལ་ལུགས་ཡིན་ཏེ༔ དེ་ལས་ཁྱད་འཕགས་རལ་པའི་ཅོན་པན་ནི༔ རལ་པ་མ་བཅོས་ལྕང་ལོར་བཞག་པ་དང་༔ སྤྱོད་ལམ་མ་བཅོས་བརྟུལ་ཞུགས་སྤྱོད་པ་ཆེ༔ སེམས་ཉིད་མ་བཅོས་གཉུག་མའི་ངང་དུ་བཞག༔ མ་བཅོས་རྣམ་གསུམ་རང་གར་སོར་བཞག་ལ༔ འདི་དག་རྡོ་རྗེ་འཆང་དང་ལོངས་སྐུའི་ལུགས༔ དབང་དང་བྱིན་རླབས་གནད་ཀྱིས་ཐེབས་པ་ཡི༔ སྐྲ་ལོ་རྡོ་རྗེ་འཆང་གི་བཀའ་ལུགས་བཞིན༔ བཞག་ནས་དབང་ཐོབ་བྱིན་རླབས་དབང་བསྐུར་ན༔ གསང་སྔགས་རྡོ་རྗེ་ཐེག་པའི་གྲུབ་མཐར་ངེས༔ དེ་ཕྱིར་སྔགས་པའི་སྐྲ་ལོ་བྱིན་རླབས་དང་༔ དབང་བསྐུར་བྱེད་པའི་ཚུལ་ནི་འདི་ལྟ་སྟེ༔ དང་པོ་སྐྲ་དྲེག་བུལ་ཏོག་ཆུས་བཀྲུས་ཏེ༔ ཤིན་ཏུ་སྐྲ་དྲེག་བུལ་ཏོག་ཆུས་བཀྲུས་ཏེ༔ ཤིན་ཏུ་སྐྲ་དྲེག་དྲི་མ་དང་བྲལ་མཐར༔ རིགས་འདུས་བླ་མ་རྡོ་རྗེ་སློབ་དཔོན་གྱིས༔ ཁྲུས་བྱ་བགེགས་བསྐྲད་སྲུང་བའི་འཁོར་ལོར་བསྒོམ༔ དེ་ནས་སློབ་མས་ཐལ་སྦྱར་གུས་བཏུད་དེ༔ དངོས་ཡིད་མཎྜལ་མཉེས་བྱེད་ལེགས་འབུལ་ཞིང་༔ རྡོ་རྗེ་བླ་མར་གསོལ་བ་འདི་ལྟར་གདབ༔ ཀྱཻ༔ དུས་གསུམ་སངས་རྒྱས་ཐམས་ཅད་ཀྱི༔ ངོ་བོ་བླ་མ་རྡོ་རྗེ་འཆང་༔ བདག་ནི་བྱང་ཆུབ་མ་ཐོབ་བར༔ གསང་སྔགས་ཐེག་ཆེན་སྒོར་ཞུགས་ཏེ༔ ཁྱོད་ཀྱི་བཀའ་བཞིན་གསང་སྔགས་ཀྱི༔ ལྟ་སྤྱོད་ཇི་ལྟར་ཉམས་ལེན་བྱ༔ ཕཿ ལས་ཕོ་ནི་ཐབས་ཀྱི་ཆ༔ མཿ ལས་མོ་ནི་བྱང་ཆུབ་སེམས༔ ཐབས་ཤེས་ཟུང་འཇུག་སྤྱོད་པ་ལ༔ སྤྱོད་ནས་རྣམ་གྲོལ་སངས་རྒྱས་ལམ༔ དེ་རིང་ཉིད་ནས་མི་བགྲོད་རེ༔ དེ་ཕྱིར་ལོངས་སྐུའི་ཆས་ཀྱི་མཆོག༔ རལ་པ་དང་ནི་ཤེས་རབ་མར༔ བདེ་སྟོང་ཟུང་དུ་འཇུག་པ་ཡི༔ གནང་བ་སྩོལ་ཞིག་བཀའ་དྲིན་ཅན༔ ཞེས་ལན་གསུམ༔ དེ་ནས་བླ་མས༔ ཀྱཻ༔ ང་ནི་སངས་རྒྱས་ང་ནི་ཆོས༔ ང་ནི་དགེ་འདུན་དཀོན་མཆོག་གསུམ༔ ང་ནི་བླ་མ་ཡི་དམ་དང་༔ ང་ནི་མཁའ་འགྲོ་ཆོས་སྐྱོང་ཀུན༔ ཡོངས་འདུས་བླ་མར་གྲགས་པ་ཡིན༔ ང་ཡིས་ཇི་ལྟར་བསྒོ་བ་བཞིན༔ ཁྱོད་ཀྱིས་དེ་ལྟར་བསྒྲུབ་དགོས་སོ༔ དེ་ནས་སློབ་མས༔ ཀྱཻ༔ ལེགས་སོ་བླ་མ་རྡོ་རྗེ་འཆང་༔ བདག་ནི་ཇི་སྲིད་འཚོ་ཡི་བར༔ རྡོ་རྗེ་དམ་ཚིག་མི་འདའ་བསྲུང་༔ ཉམས་ན་དོང་སྤྲུགས་བཤགས་པས་སྦྱོང་༔ ཞེས་ཁས་བླངས་མཐར༔ བླ་མས་ཕྱག་ན་རྡོ་རྗེ་དང་༔ རྡོ་རྗེ་ཁྲོ་བོ་གནོད་སྦྱིན་གཉིས་སྤྱན་དྲངས་ཏེ༔ དམ་ཆུར་བསྟིམ་ལ་སྦྱིན་པ་ནི༔ ཧོཿ འདི་ནི་དམ་ཚིག་རྡོ་རྗེའི་ཆུ༔ སློབ་མ་ཁྱོད་ཀྱི་ལྕེ་ལ་བཞག༔ བསྲུང་ན་ཚེ་འདིར་སངས་རྒྱས་ཐོབ༔ ཉམས་ན་བཤགས་སྡོམ་གྱིས་སྦྱང་མཛོད༔ ཅེས་དམ་ཆུ་དེ་སློབ་མའི་ལྕེ་ལ་བཞག༔ སློབ་མ་རྣམས་འདི་ལྟར་བརྗོད༔ ས་མ་ཡ་ན་ར་ཀན༔ ཅེས་བརྗོད་དེ་བཏུང་ངོ་༔ དེ་ནས་སློབ་མ་ལྷར་གསལ་བ་ལ༔ ཨོཾ་མ་ཧཱ་ཤུ་ནྱ་སོགས སློབ་མའི་ཕུང་ཁམས་སྐྱེ་མཆེད་ཐམས་ཅད་སྟོང་པ་ཉིད་དུ་གྱུར༔ སྟོང་པའི་ངང་ལས༔ སྐད་ཅིག་སློབ་མའི་རིག་པ་ནི༔ ཧཱུྃ་ཡིག་མཐིང་ནག་འོད་འབར་ལས༔ མ་ཅིག་ཁྲོས་མ་ནག་མོ་ནི༔ དབུ་རེག་ཕྱག་གཉིས་གྲི་ཐོད་ཅན༔ གཅེར་བུ་རུས་པའི་རྒྱན་དྲུག་སྤྲས༔ གུས་པའི་ཚུལ་གྱིས་འདུད་པར་བསྒོམ༔ གནས་གསུམ་འོད་ཟེར་རབ་འཕྲོས་པས༔ ཡེ་ཤེས་དབྱིངས་ཀྱི་མཁའ་འགྲོ་མ༔ ཁ་བ་དང་ནི་ཉི་རྡུལ་བཞིན༔ སྤྱན་དྲངས་གཉིས་མེད་རོ་གཅིག་གྱུར༔ ཨོཾ་བཛྲ་ས་མ་ཡ་ཛཿ དེ་ནས་སྤྱན་འདྲེན་པ་ལ༔ ཧཱུྃ༔ ཆོས་སྐུ་ཡུམ་ཆེན་ཀུན་བཟང་མོ༔ ལོངས་སྐུ་ཕག་ཁྲོས་སེང་གེའི་གདོང་༔ རྡོ་རྗེ་རྣལ་འབྱོར་མཁའ་སྤྱོད་མ༔ སྤྲུལ་སྐུ་རིགས་ལྔའི་མཁའ་འགྲོ་རྣམས༔ དམ་ཚིག་ཐུགས་དམ་བརྒྱུད་བསྐུལ་གྱིས༔ གནས་འདིར་སྤྱན་འདྲེན་གཤེགས་སུ་གསོལ༔ གཞན་ཡང་སྐུ་གསུམ་ཞིང་བཞུགས་པའི༔ དཔའ་བོ་དང་ནི་རྣལ་འབྱོར་མ༔ མ་ལུས་ལུས་པ་མེད་པ་རུ༔ ཆོས་ཀྱི་དབྱིངས་ལས་སྐུར་བཞེངས་ལ༔ གནས་འདིར་སྤྱན་འདྲེན་བྱིན་ཆེན་ཕོབས༔ སྐལ་ལྡན་སྐྱེས་བུ་དམ་པ་འདིའི༔ ལུས་ངག་ཡིད་གསུམ་བྱིན་བརླབས་ཤིང་༔ འབྲལ་མེད་རྗེས་སུ་བཟུང་བའི་ཕྱིར༔ སྐད་ཅིག་ཉིད་དུ་གཤེགས་སུ་གསོལ༔ ད་ལྟ་ཉིད་དུ་བྱིན་གྱིས་རློབས༔ ཨོཾ་ཧྲཱིཿ མ་ཧཱ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛཿ བཛྲ་ཨ་བེ་ཤ་ཡ་ཨ་ཨ༔ བཛྲ་ས་མ་ཡ་ཛ་ཛ་སྟྭཾ༔ ཏིཥྛ་བཛྲཿ གྱིས་བརྟན་པར་བྱ༔ དེ་ནས་བུམ་དབང་བསྐུར་བ་ལ༔ རང་གི་སྙིང་ག་ནས་འོད་དང་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིག་འཛིན་དཔའ་བོ་རྒྱ་མཚོའི་རྣམ་པར་བཞེངས་ཏེ་མཚོ་ཆེན་པོ་ལ་ཁ་ཆར་བབ་པ་ལྟར༔ སློབ་མ་ལྷར་གསལ་བའི་མགོ་སྐྲའི་བ་སྤུའི་བུ་ག་ནས་ཐིམ་པས༔ སྐྲ་ཐམས་ཅད་དཔའ་བོའི་རང་བཞིན་དུ་གྱུར་ཏེ་རབ་ཏུ་སྨིན་ཏེ་རྒྱས་པར་གྱུར༔ དེ་ནས་བུམ་པ་ཐོགས་ལ༔ ཧོཿ དུས་གསུམ་སངས་རྒྱས་ཐམས་ཅད་ཀྱི༔ བུམ་པ་སྐུ་ཡི་དབང་རྫོགས་པའི༔ སྐྲ་རྣམས་དཔའ་བོ་རྒྱ་མཚོ་ཡི༔ དབང་དང་བྱིན་རླབས་ཡོངས་ཐོབ་ཤོག༔ བཛྲ་གུ་རུ་སཾ་བྷོ་ཀཱ་ཡ་ཨ་བྷི་ཥིཉྩ་ཨོཾཿ དེ་ནས་གསང་དབང་བསྐུར་བ་ལ༔ ཡང་རང་གི་སྙིང་ག་ནས་འོད་དང་འོད་ཟེར་འཕྲོས་པས་དུས་གསུམ་གྱི་རྒྱལ་བ་རྣམས་ཀྱི་གསུང་གསང་ཨཱ་ལི་ཀཱ་ལིའི་རྣམ་པར་བཞེངས་ཏེ་དཔའ་བོ་རྣམས་ཀྱི་མགྲིན་པར་ཐིམ་པས་གསུང་གྲགས་སྟོང་སྔགས་ཀྱི་རང་སྒྲ་རྒྱུན་མི་འཆད་པར་བསྒོམ་ལ༔ དེ་ནས་བྷནྡྷ་བདུད་རྩི་ཐོགས་ལ༔ ཧོཿ དུས་གསུམ་རྒྱལ་བ་ཐམས་ཅད་ཀྱི༔ གསུང་གསང་འདུས་པའི་འོད་དམར་པོ༔ དཔའ་བོ་རྣམས་ཀྱི་མགྲིན་པར་ཞུགས༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་ཀྱི་དབང་ཐོབ་ཤོག༔ བཛྲ་གུ་རུ་བོ་དྷི་ཙིཏྟ་རུ་ལུ་རུ་ལུ་ཝཱཀ་ཨ་བྷི་ཥིཉྩ་ཨཱཿ དེ་ནས་ཤེར་དབང་བསྐུར་བ་ལ༔ སླར་ཡང་རང་གི་སྙིང་ག་ནས་འོད་ཟེར་འཕྲོས་པས༔ དུས་གསུམ་གྱི་རྒྱལ་བ་ཞི་ཁྲོ་རབ་འབྱམས་ཀྱི་ཐུགས་གསང་ཆོས་ཉིད་ཀྱི་རོལ་པ་ཡེ་ཤེས་དབྱིངས་ཀྱི་ཌཱ་ཀི་རྣམས༔ རྡོ་རྗེ་རྣལ་འབྱོར་མ་ཤ་སྟག་གི་རྣམ་པར་བྱུང་ནས་དཔའ་བོ་རྣམས་ཀྱི་སྐུ་ལ་གཉིས་མེད་དུ་སྦྱོར་བས་ཐུགས་ཤེས་རབ་ཡེ་ཤེས་ཀྱི་དབང་ཐོབ་ནས༔ ཐབས་ཤེས་ཟུང་དུ་འཇུག་པའི་དབང་རྫོགས་པར་བསམ་ལ༔ དེ་ནས་རིག་ཙཀ་ཐོགས་ལ༔ ཧོཿ དུས་གསུམ་རྒྱལ་བ་ཐམས་ཅད་ཀྱི༔ ཐུགས་གསང་མཁའ་འགྲོ་རྣལ་འབྱོར་མ༔ བདེ་ཆེན་སྦྱོར་བའི་མཛའ་ན་མོར༔ ཟུང་འཇུག་སྦྱོར་བའི་དབང་ཐོབ་ཤོག༔ བཛྲ་གུ་རུ་པྲཛྙཱ་ཛྙཱ་ན་སུ་ཁ་སིདྡྷི་ཨ་བྷི་ཥིཉྩ་ཧཱུྃཿ དེ་མཐར་སྐྱེམས་དྲངས༔ དེ་ནས་ཚིག་དབང་བསྐུར་བ་ལ་སློབ་དཔོན་གྱིས༔ རང་གི་ཐུགས་ཀ་ནས་འོད་ཟེར་འཕྲོས་པས་ཞི་ཁྲོ་རྡོ་རྗེ་དབྱིངས་ཀྱི་དཀྱིལ་འཁོར་ཐམས་ཅད་མ་ལུས་ཤིང་ལུས་པ་མེད་པར་འོད་ཕུང་ཁ་དོག་ལྔ་ལྡན་གྱི་རྣམ་པར༔ སྐྲ་དཔའ་བོ་དང་དཔའ་མོར་གཉིས་མེད་དུ་སྦྱོར་བའི་གནས་ལྔར་ཐིམ་པས་ཚིག་དབང་རིན་པོ་ཆེ་ཐོབ༔ སྐུ་བཞི་ཡེ་ཤེས་ལྔ་ཡི་བདག་ཉིད་དུ་བྱིན་གྱིས་བརླབས་པར་གྱུར༔ དེ་ནས་ཤེལ་རྡོ་ཐོགས་ལ༔ ཧོཿ དུས་གསུམ་རྒྱལ་བ་ཞི་ཁྲོ་ཡི༔ དཔའ་བོ་དང་ནི་རྣལ་འབྱོར་མ༔ ཡེ་ཤེས་འོད་ལྔའི་རྣམ་པ་རུ༔ དཔའ་བོ་དཔའ་མོ་ཁྱོད་ལ་བསྟིམ༔ མཚན་མ་ཚིག་བྲལ་དབང་ཐོབ་ཤོག༔ བཛྲ་གུ་རུ་སརྦ་ཛྙཱ་ན་རསྨི་ཨ་བྷི་ཥིཉྩ་ཧཱུྃ༔ དེ་ནས་སྤྲོ་ན་སྒྲུབ་རྫས་གཏོར་མ་ཐོགས་ལ༔ ཧོཿ དཔའ་བོ་དཔའ་མོ་ཁྱོད་རྣམས་ལ༔ འགྲོ་བའི་དོན་ལས་གཞན་མ་མཆི༔ སྔགས་ཀྱི་རྣལ་འབྱོར་འདི་དག་གི༔ འདོད་པའི་དོན་རྣམས་བསྒྲུབ་པའི་ཕྱིར༔ ནོར་ལྷ་གཏེར་བདག་ལྷ་སྲུང་མ༔ དངོས་གྲུབ་འཛད་མེད་ཆུ་རྒྱུན་བཞིན༔ བསམ་དོན་འབད་མེད་ལྷུན་གྲུབ་མཛོད༔ བཛྲ་ས་མ་ཡ་བ་ལིཾ་ཏ་སིདྡྷི་ཕ་ལ་ཨ་བྷི་ཥིཉྩ་ཧཱུྃ༔ དེ་ལྟར་སྤྲོ་ན་བུམ་དབང་ལ་བུམ་པ༔ གསང་དབང་ལ་བྷནྡྷ༔ ཤེར་དབང་ལ་རིག་ཙཀ༔ ཚིག་དབང་ལ་ཐིག་ལེའམ་ཤེལ་རྡོ༔ དེ་མཐར་མཐའ་རྟེན་རྣམས་ལག་ལེན་དང་༔ སྤྲོས་པ་མེད་ན་སློབ་དཔོན་གྱིས་བསྐྱེད་བསྒོམ་ཁོ་ནས་ཆོག་པ་ཡིན༔ མཐར་ས་ལས་མྱུ་གུ་སྨིན་པ་བཞིན་དུ་སྐྲ་རྣམས་སྨིན་རིང་བཀྲག་མདངས་འོད་དང་ལྡན་པར་བསམ་སྟེ༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཞེས་ལན་གསུམ་གྱིས་བརྟན་པར་བྱ་སྟེ་ཤིས་པ་བརྗོད་པས་རྫོགས་པའོ༔ འདི་ལྟར་སྐྲ་དབང་ཟབ་མོ་དེ༔ ཐོབ་ནས་སྐྲ་འབྲེག་བྱེད་མི་རུང་༔ བྱས་ན་དཔའ་བོ་དཔའ་མོ་འབུམ༔ བསད་པའི་ཉེས་པ་འབྱུང་བ་དང་༔ སྐྲ་སྲུང་མ་བཅོས་རང་བབས་སུ༔ བཞག་ཅིང་དཔའ་བོ་དཔའ་མོ་དང་༔ དངོས་གྲུབ་ཀུན་གྱི་འབྱུང་གནས་སུ༔ བསྒྲུབ་པས་གང་བསམ་འདོད་དོན་གྲུབ༔ ལྷ་དང་སྲུང་མའི་བླ་རྡོ་ཡིན༔ ཐ་མལ་སྡིག་སྤྱོད་ཕོ་མོ་ཡི༔ རལ་ཁུར་དག་དང་འདི་མི་འདྲ༔ རྡོ་རྗེ་འཆང་ནས་རིམ་བཞིན་དུ༔ སྔགས་ཀྱི་རྣལ་འབྱོར་རྒྱན་དུ་ཆས༔ བཀའ་སྲུང་དྲེགས་པའི་ཚོགས་ཀྱིས་སྲུངས༔ སྔགས་མིན་སྔགས་བརྫུ་རལ་འཆང་བའི༔ རིགས་ལ་ཨ་ཐམ་གསང་རྒྱའོ༔ ས་མ་ཡ༔ རྒྱ་རྒྱ་རྒྱ༔ གསང་བ་སྐུ་གསུང་ཐུགས་ཀྱི་རྒྱ༔ སྔགས་སྤྱོད་སྔགས་པའི་རིགས་རྣམས་ལ༔ ཕ་མ་བུ་ཚ་བཞིན་དུ་སྐྱོངས༔ གཤེ་སྐུར་སྨྲ་དབབ་བྱེད་པ་དང་༔ རྒོལ་ཞིང་གནོད་པའི་བདུད་རིགས་ཀྱི༔ དོན་སྙིང་ཕྱུང་ལ་སྙིང་ཁྲག་རོལ༔ རེམས་ཤིག་སྔགས་ཀྱི་སྲུང་མ་རྣམས༔ དམ་ལ་མ་འདའ་ས་མ་ཡ༔ གུ་ཧྱ༔ ཞེས་པ་འདི་ཉིད་རེ་ཀོང་གྲུབ་པའི་འདུས་སྡེ་སྟོང་གི་གཙུག་རྒྱན་ཁྱུང་དགོན་སྤྲུལ་སྐུ་གསང་བའི་བདག་པོས་ནན་དུ་བསྐུལ་ངོར་གང་དགར་ཉལ་བའི་མི་རྒན་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་བའི་ཡི་གེ་པ་ནི་ཨ་སྤོ་སྡོང་གི་རིགས་ལས་སྐྱེས་པའི་རང་སློབ་དམ་པ་ངག་དབང་ཕྲིན་ལས་ཀྱིས་བགྱིས་པའི་དགེ་བས་སྔ་འགྱུར་སྔགས་ཀྱི་རིང་ལུགས་རྒྱལ་དབང་མཚོ་སྐྱེས་བླ་མའི་དགོངས་པ་ཇི་བཞིན་རྙེད་པའི་གྲུབ་བརྙེས་རལ་ཁུར་འཆང་བས་ས་སྟེང་ཁྱབ་པའི་རྒྱུར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ།། །།