TTDL-ZABTER-05-CA-009

Previous Text Back to Volume PageNext Text

Wylie title	zab gsang mkha' 'gro'i snying thig las: thugs sgrub gsang ba'i rgya can: dpal chen phrin las kyi sgrub pa: rdo rje gzhon nu'i tshogs mchod: dngos grub bang mdzod kyi lde mig:
Location	bdud 'joms gling pa zab gter Volume 5, Text 9, Pages 95-117 (Folios 1a1 to 12a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las thugs sgrub gsang ba'i rgya can dpal chen phrin las kyi sgrub pa rdo rje gzhon nu'i tshogs mchod dngos grub bang mdzod kyi lde mig. In Sprul pa'i gter chen bdud 'joms gling pa'i zab gter gsang ba'i chos sde, Vol. 5: 95-117. Thimphu, Bhutan: Lama Kuenzang Wangdue, 2004.
Side notes	Recto: tshogs mchod   Verso: bdud 'joms phur pa gnam lcags spu gri
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Feast Offering - tshogs mchod - tshogs kyi 'khor lo
Cycle	ཐུགས་སྒྲུབ་གསང་བ་རྒྱ་ཅན་ (thugs sgrub gsang ba rgya can)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rdo rje phur pa
Colophon	།ཅེས་པ་འདི་ཡང་གླིང་བ་བདུད་འཇོམས་རྡོ་རྗེ་གར་གྱི་དབང་ཕྱུག་རྩལ་གྱིས་གསེར་ཤོད་རྡོ་རྗེའི་མིང་གི་ཤྭ་བྲག་ནས་བཏོན་ཏེ་མི་ལོ་བརྒྱད་ལ་བཀའ་རྒྱས་བཏབ་ནས་མཐར་སྨར་སྟོད་འབྲོས་ཕུག་དབེན་པའི་གནས་སུ་ཞལ་བཤུས་ཏེ་དག་པར་ཕབ་པའི་དུས་སུ་སྒྲ་དང་ས་གཡོ་ལ་སོགས་ནག་ཕྱོགས་ཐུལ་བའི་རྟགས་མང་པོ་བྱུང་བ་རྟེན་འབྲེལ་མཆོག་ཏུ་གྱུར་བ་ཤིང་མོ་ཀྲོ་ཏིའི་ཁྱིམས་སུ་ཡི་གེ་རིས་བྱེད་ལས་སྨོན་གྱི་དབང་གིས་སྐྱེ་ཕྲེང་བདུན་དུ་འགྲོགས་པའི་གྲོགས་པོ་ཕུན་ཚོགས་བཀྲ་ཤིས་པས་བགྱིས་པའོ། །དགེའོ། །སརྦ་མངྒ་ལཾ།།
	/ces pa 'di yang gling ba bdud 'joms rdo rje gar gyi dbang phyug rtsal gyis gser shod rdo rje'i ming gi shwa brag nas bton te mi lo brgyad la bka' rgyas btab nas mthar smar stod 'bros phug dben pa'i gnas su zhal bshus te dag par phab pa'i dus su sgra dang sa g.yo la sogs nag phyogs thul ba'i rtags mang po byung ba rten 'brel mchog tu gyur ba shing mo kro ti'i khyims su yi ge ris byed las smon gyi dbang gis skye phreng bdun du 'grogs pa'i grogs po phun tshogs bkra shis pas bgyis pa'o/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ཐུགས་སྒྲུབ་གསང་བའི་རྒྱ་ཅན༔ དཔལ་ཆེན་ཕྲིན་ལས་ཀྱི་སྒྲུབ་པ༔ རྡོ་རྗེ་གཞོན་ནུའི་ཚོགས་མཆོད༔ དངོས་གྲུབ་བང་མཛོད་ཀྱི་ལྡེ་མིག་བཞུགས་སོ༔ ཐྂ༎༔ ན་མོ་གུ་རུ་དྷེ་ཝ་ཌཱ་ཀི་ནཱི་ཧ་རི་ནི་ས་ན་མ་ ཧོཿ (བརྡ་ཡིག་) ཕུར་པ་སྒྲུབ་པའི་རིག་འཛིན་ལ༔ ཚོགས་མཆོད་དངོས་གྲུབ་ལྡེ་མིག་གཅེས༔ མ་འོངས་དུས་ཀྱི་སྐལ་ལྡན་རྣམས༔ ཉམས་ཆག་བསྐང་ཕྱིར་ཚོགས་མཆོད་བརྩོན༔ འབྱོར་ཚོགས་འདོད་ཡོན་སྣ་ཚོགས་བཀོད༔ ཚེ་རབས་འཁོར་བ་ཐོག་མེད་ནས༔ ད་ལྟའི་དུས་ལ་ཐུག་གི་བར༔ སྣོད་བཅུད་སྣང་སྲིད་ཁམས་ཀུན་ཏུ༔ བདག་གིས་བདག་ཏུ་མ་བཟུང་བའི༔ དངོས་པོ་ཏིལ་འབྲུ་ཙམ་མེད་ཕྱིར༔ ཚེ་རབས་བསགས་པའི་ལུས་ལོངས་སྤྱོད༔ མ་ལུས་བསྡུས་ཏེ་འགྲོ་ཀུན་གྱི༔ ཚོགས་གཉིས་ཡོངས་སུ་རྫོགས་ནས་ཀྱང་༔ སྒྲིབ་གཉིས་བག་ཆགས་སྦྱང་བ་དང་༔ འདུས་པའི་མཆེད་ལྕམ་མ་ལུས་པའི༔ ཉེས་བྱས་ཉམས་ཆག་བསྐང་བའི་ཕྱིར༔ ཚོགས་ཀྱི་འཁོར་ལོ་བསྐོར་བར་བྱ༔ བསམ་ཞིང་བསང་སྦྱང་རྟོག་སྒྲིབ་བསང་༔ ཧ་ཧོ་ཧྲཱིཿཡིས་འདོད་ཡོན་ལྔས༔ ཇི་སྲིད་འཁོར་བ་མ་སྟོང་བར༔ སངས་རྒྱས་ཞིང་ཁམས་ཐམས་ཅད་དུ༔ རྒྱུན་མི་ཆད་པའི་སྤྲིན་འཕྲོས་བསམ༔ དེས་ནི་ཚོགས་འཁོར་རྒྱ་ཆེན་འགྱུར༔ ས་མ་ཡ༔ བརྡ་ཐིམ༔ བརྡ་ཐིམ༔ བརྡ་ཐིམ༔ རཾ་ཡཾ་ཁཾ༔ རྣམ་རྟོག་མཚན་མའི་བག་ཆགས་སྦྱངས༔ དག་པ་རབ་འབྱམས་མཆོད་པའི་སྤྲིན༔ ཨོཾ་ཨཱཿཧཱུྃ་དང་ཧ་ཧོ་ཧྲཱིཿས༔ བདེ་སྟོང་ཡེ་ཤེས་བདུད་རྩིའི་དངོས༔ རྣམ་པ་ཚོགས་ཀྱི་རོལ་པར་ཤར༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཛྙཱ་ན་པཉྩ་ཨ་མྲྀ་ཏ་པཉྩ་སྭཱ་ཧཱ༔ མ་ཧཱ་གྷ་ཎ་ཙཀྲ་ཨོཾ་ཨཱཿཧཱུྃ་སྭཱ་ཧཱ༔ མཱུཾཿལཱཾཿམཱཾཿཔཱཾཿཏཱཾ༔ རིགས་ལྔ་ཡབ་ཡུམ་སྙོམས་འཇུག་མཁར༔ བྱང་ཆུབ་སེམས་ཀྱི་སྤྲིན་ཆེན་པོས༔ ལྷ་ཚོགས་མཉེས་པའི་རྫས་སུ་བསྒྱུར༔ ཉམས་ཆག་བསྐང་བའི་རྫས་སུ་གྱུར༔ ཨོཾ་ཨཱཿཧཱུྃ༔ ལན་གསུམ༔ དེ་ནས་སྤྱན་འདྲེན་པ་ནི༔ ཧཱུྃ༔ བླ་མ་རིག་འཛིན་དཔའ་བོ་དཔའ་མོའི་ཚོགས༔ རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་༔ གང་ཟག་སྙན་བརྒྱུད་ཤོག་སེར་ཚིག་བརྒྱུད་དང་༔ བཀའ་བབས་དོན་གྱི་བརྒྱུད་པ་ལ་སོགས་ཏེ༔ བརྒྱུད་པ་དགུ་ལྡན་བླ་མ་དམ་པ་རྣམས༔ གནས་འདིར་ཚོགས་ལ་སྤྱན་འདྲེན་གཤེགས་སུ་གསོལ༔ གྲུ་གསུམ་མཐིང་ནག་འབར་བའི་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་དང་༔ ཀཱི་ལ་རིགས་བཞི་ཁྲོ་བཅུ་ཁྲ་ཐབས་དང་༔ སྒོ་སྲུང་མ་བཞི་བཀའ་སྡོད་སྲུང་མར་བཅས༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ ཡེ་ཤེས་དབྱིངས་དང་མཁའ་སྤྱོད་གནས་ཡུལ་དང་༔ དུར་ཁྲོད་གནས་དང་སྦས་ཡུལ་ཐམས་ཅད་དུ༔ སྣ་ཚོགས་གར་བསྒྱུར་མ་ངེས་ཚུལ་སྟོན་པའི༔ ཡེ་ཤེས་འཇིག་རྟེན་མཁའ་འགྲོ་རྒྱ་མཚོའི་ཚོགས༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ གཞལ་ཡས་ཁང་པ་འདི་ལ་བྱིན་ཕོབ་ཅིག༔ དཀྱིལ་འཁོར་གཉན་པོ་འདི་ལ་མདངས་ཕྱུངས་ཤིག༔ ཚོགས་རྫས་མཆོད་རྫས་འདི་ལ་བཅུད་ཅིག་ཕོབ༔ རྣལ་འབྱོར་སྒྲུབ་པ་པོ་ལ་དབང་བྱིན་སྩོལ༔ ཛཿཧཱུྃ་བཾ་ ཧོཿ དེ་ནས་ཚོགས་ཕུད་འབུལ་བ་ནི༔ ཧཱུྃ༔ རྩ་བརྒྱུད་བླ་མ་རིག་འཛིན་རྒྱ་མཚོ་དང་༔ ཡི་དམ་དཀྱིལ་འཁོར་ལྷ་ཚོགས་མ་ལུས་ལ༔ ཞལ་ཟས་ཚོགས་ཀྱི་མཆོད་པ་དམ་པ་འབུལ༔ གཟི་བྱིན་དབང་དང་དངོས་གྲུབ་སྩལ་དུ་གསོལ༔ གུ་རུ་དྷེ་ཝ་ཌཱ་ཀི་ནཱི་སརྦ་མ་ཧཱ་གྷ་ཎ་ཙཀྲ་པཱུ་ཛ་ལ་ཁཱ་ཧི༔ དེ་ནས་བར་པ་བཤགས་པ་བྱ་བ་ནི༔ ཧཱུྃ༔ བླ་མ་ཡི་དམ་མཁའ་འགྲོའི་དཀྱིལ་འཁོར་དུ༔ ཉེས་བྱས་ཉམས་ཆག་རྟོག་སྒྲིབ་བག་ཆགས་དང་༔ འགལ་འཁྲུལ་ནོངས་པ་ཅི་མཆིས་མ་ལུས་པ༔ ཞལ་ཟས་ཚོགས་ཀྱིས་བསྐང་ཞིང་བཤགས་པར་བགྱི༔ ཡེ་ཤེས་ལྷ་ལ་རྣམ་རྟོག་མི་མངའ་ཡང་༔ ཁྱེད་ཀྱི་འཁོར་དུ་གཏོགས་པའི་ལྷ་སྲིན་རྣམས༔ མི་ཡི་སྐྱོན་མཐོང་ཙམ་གྱིས་བར་ཆད་རྩོམ༔ དེ་བས་མི་འཆབ་མི་སྦེད་མཐོལ་ཞིང་བཤགས༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཨོཾ་གྷ་ཎ་ཙཀྲ་སཏྭ་ས་མ་ཡ་སོགས༔ དེ་ནས་དགྲ་བགེགས་བསྒྲལ་བ་ནི༔ ཧཱུྃ༔ རྡོ་རྗེ་སྲིན་པོའི་སྟོབས་རྩལ་གྱིས༔ དགྲ་བགེགས་ལོག་འདྲེན་འབྱུང་པོའི་ཚོགས༔ རིངས་པར་ཁུག་ལ་མྱུར་དུ་སྒྲོལ༔ ཛཿདམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ དགྲ་བགེགས་དམ་ཉམས་རཱུ་དྲའི་ཚོགས༔ འགུགས་ཤིང་སྒྲོལ་བའི་དུས་ལ་བབ༔ ཡིད་ལ་བརྣག་པའི་དགྲ་བགེགས་ཀྱི༔ ལུས་ངག་ཡིད་གསུམ་རྡུལ་དུ་རློག༔ རྣམ་ཤེས་ཆོས་ཀྱི་དབྱིངས་སུ་སྦོར༔ སྤུ་གྲིའི་སྔགས་ཤམ་དུ༔ དགྲ་བགེགས་སརྦ་ཤ་ཏྲུཾ་མཱ་ར་ཡ་རྦད་རྦད་ཏ་ཐ་ཡ་ཏ་ཐ་ཡ་ཕྱེ་མ་ཕྱེ་མ་ཐུཾ་རི་ལི་ལི་རྦད་ནན༔ དེ་ནས་ཞལ་དུ་བསྟབ་པ་ནི༔ ཧཱུྃ༔ བསྐལ་པ་མེ་ལྟར་འབར་བའི་ཀློང་དཀྱིལ་ནས༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་དང་༔ སྲས་དང་སྤྲུལ་པ་བཀའ་སྡོད་བཅས་པ་རྣམས༔ ནམ་མཁའ་བར་སྣང་ལྟ་བུའི་ཞལ་ཕྱེས་ཤིག༔ དགྲ་བགེགས་ལོག་འདྲེན་བསྒྲུལ་བའི་ལྔ་ཕུང་འདི༔ མཉམ་ཉིད་ཧོམ་ཁུང་ཡངས་པའི་ཞལ་དུ་བསྟབ༔ འགགས་མེད་རོལ་པ་ཆེན་པོའི་མགྲིན་པར་བསྟིམ༔ ཁྱབ་གདལ་ཀ་དག་ལྷུན་འབྱམས་ལྟོ་བར་བསྐྱིལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བཾ་ཧཱུྃ་ཕཊ༔ དགྲ་བགེགས་ལོག་འདྲེན་མཐའ་དམག་དུས་འཁྲུགས་གཡུལ་འགྱེད་མཁན་དང་རྒྱ་འདྲེ་མེ་ཞོན་འབྱུང་པོ་རླུང་ཞོན་རྣམས་ཀྱི་རྣམ་ཤེས་ཚོགས་བརྒྱད་ལ་ཁཱ་ཧི༔ ཁམས་ཆེན་བཅོ་བརྒྱད་ལ་ཁཱ་ཧི༔ ཕུང་པོ་རྣམ་ལྔ་ལ་ཁཱ་ཧི༔ མ་ཧཱ་མཱཾ་ས་རཀྟ་ཀེཾ་ནི་རི་ཏི་བ་སུ་ཏ་ལ་ཁཱ་ཧི༔ ལྷག་མ་རྗེས་ཤུལ་དང་བཅས་པ་ལ་ཁཱ་ཧི༔ ཧབ་ཧབ་ཧུབ་ཧུབ་མྱོག་མྱོག་ཁ་རཾ་ཁཱ་ཧི༔ དེ་ནས་བདག་འཛིན་གདུག་པའི་རཱུ་དྲ་བསྒྲལ་བ་ནི༔ ཧཱུྃ༔ ཆོས་དབྱིངས་ཀློང་ལས་སྒྱུ་མའི་སྐུ༔ གཞོམ་བྲལ་རྡོ་རྗེ་ཕུར་པའི་ལྷ༔ བཞེངས་ཤིག་སྒྱུ་འཕྲུལ་གར་བསྒྱུར་མཛོད༔ ཛཿདམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་བབ༔ ཤྭ་ན་མུ་ཁའི་དུས་ལ་བབ༔ ཁྱེད་ཀྱི་དམ་ཚིག་དུས་ལ་བབ༔ གཟུང་འཛིན་འཁྲུལ་བའི་རྣམ་རྟོག་དང་༔ ཉོན་མོངས་དུག་ལྔ་གདོན་དུ་ལངས༔ བདག་འཛིན་རཱུ་དྲ་ནད་དུ་ཆེ༔ ནད་གདོན་བར་ཆད་རྐྱེན་བགེགས་འདི༔ མྱུར་དུ་བསྒྲལ་མཛོད་ཀཱི་ལ་ཡ༔ ངོ་བོ་སྐྱེ་མེད་ཀློང་ཡངས་ནས༔ ཐིག་ལེ་ཉག་གཅིག་ཆོས་ཀྱི་སྐུ༔ བཞེངས་ཤིག་གཏི་མུག་དགྲ་བགེགས་སྒྲོལ༔ རང་བཞིན་འགགས་མེད་ཡེ་ཤེས་ལས༔ རྡོ་རྗེ་གཞོན་ནུ་ལོངས་སྤྱོད་རྫོགས༔ བཞེངས་ཤིག་འདོད་ཆགས་དགྲ་བགེགས་སྒྲོལ༔ ཐུགས་རྗེ་ཕྱོགས་མེད་ཡེ་ཤེས་ལས༔ ཀཱི་ལ་རིགས་བཞི་སྤྲུལ་པའི་སྐུ༔ བཞེངས་ཤིག་ཞེ་སྡང་རཱུ་དྲ་ཐུལ༔ ཛཿསྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེར་གཏམས་བྱས་ཏེ༔ རྣམ་པར་ཤེས་པ་རྡོ་རྗེར་བསྒོམ༔ འཁྲུལ་སྣང་ལམ་གྱི་རཱུ་དྲ་དེ༔ ངོ་བོ་སྐྱེ་མེད་ཀློང་དུ་སྒྲོལ༔ སྐུ་གསུམ་ལྷུན་གྲུབ་ཆེན་པོར་སངས༔ དེ་ནས་ལྷག་མ་འབུལ་བ་ནི༔ ཧཱུྃ་བྷྱོ༔ དཔལ་གྱི་བཀའ་ཉན་ལྷག་སྐྱོང་ཚོགས༔ དུར་ཁྲོད་འགྲིམ་ཞིང་ཚོགས་ཁང་ཉུལ༔ ཞིང་ལྤགས་ཀླུབ་ཅིང་མཁའ་ལ་རྒྱུ༔ ཟས་སུ་ཤ་དང་ཁྲག་ལ་དགྱེས༔ ལས་སུ་བསྟན་དགྲ་སྒྲོལ་བར་བརྩོན༔ ལེགས་ཉེས་གཉིས་ཀྱི་སྟངས་འཛིན་ཅིང་༔ དམ་ཚིག་ཅན་ལ་དངོས་གྲུབ་སྟེར༔ ཁྱེད་ཅག་བཀའ་དང་ཐ་ཚིག་ཅན༔ སྔོན་ཚེ་དཔལ་ཆེན་ཁྲག་འཐུང་དང་༔ རིག་འཛིན་རྡོ་རྗེ་ཐོད་ཕྲེང་གིས༔ ཇི་ལྟར་བཀའ་བསྒོས་དམ་ཚིག་བཞིན༔ བཀའ་ཡི་ཕམ་ཕབ་ལྷག་གཏོར་བཞེས༔ བསྟན་པའི་རཱུ་དྲ་བསྒྲལ་བ་དང་༔ སྒྲུབ་ལ་དངོས་གྲུབ་སྩོལ་བ་དང་༔ ཕྲིན་ལས་རྣམ་བཞི་ལྷུན་གྲུབ་ཀྱི༔ དྲག་པོ་མཐུ་ཡི་དངོས་གྲུབ་སྩོལ༔ ཨོཾ་བཛྲ་ཌཱ་ཀི་རཏྣ་ཌཱ་ཀི་པདྨ་ཌཱ་ཀི་ཀརྨ་ཌཱ་ཀི་སརྦ་ཌཱཀི་ནཱི་སརྦ་དྷརྨ་ལཱ་ལ་སརྦ་ཀྵེ་ཊ་པཱ་ལ་སརྦ་ལོ་ཀ་པཱ་ལ་སརྦ་ས་མ་ཡ་ཨུཙྪིཥྚ་བ་ལིངྟ་ཁཱ་ཧི༔ ཆད་མདོ་བཏང་བ་ནི༔ རིན་པོ་ཆེའི་སྣོད་དུ་གཏོར་མ་ཤ་ཁྲག་གིས་བརྒྱན་པ་བཞག་སྟེ༔ འགུགས་འཆིང་སྡོམ་མྱོས་དབྱེ་ཕྲལ་བསྒྲ་ལ་སྤོར་སོགས་ཀྱི་རྗེས་སུ༔ ཤ་རི་ཁྲག་མཚོ་རུས་གྲམ་ཚིལ་ཞུན་གྱི་རྒྱ་མཚོ་ངོ་བོ་ཟག་མེད་ཡེ་ཤེས་ཀྱི་བདུད་རྩིར་བྱིན་གྱིས་བརླབ་ལ༔ ཛཿསློབ་དཔོན་པདྨའི་སྤྱན་སྔ་རུ༔ ཁས་བླངས་དམ་བཅས་སྲུང་མའི་ཚོགས༔ འདིར་གཤེགས་དམ་ལ་དགྱེས་དགོངས་འཚལ༔ ས་མ་ཡ་ཡི་དུས་ལ་བབ༔ འབུལ་བ་ནི༔ ཧཱུྃ༔ སྔོན་ཚེ་འདས་དུས་བསྐལ་བའི་དང་པོ་ལ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ༔ བཅོམ་ལྡན་དཔལ་ཆེན་བཛྲ་ཀུ་མཱ་རས༔ ཆོས་ཀྱི་དབྱིངས་ནས་ཀཱི་ལའི་སྒྲ་བསྒྲགས་ཚེ༔ མ་མོ་མཁའ་འགྲོ་བཀའ་ཡི་ལས་མཁན་དང་༔ ཆོས་སྐྱོང་སྲུང་མ་དམ་ཅན་རྒྱ་མཚོ་ཡིས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་བའི་ཕྲིན་ལས་བསྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདབ་བར༔ ཕྲིན་ལས་རྣམ་བཞི་ལྷུན་གྱིས་འགྲུབ་པ་དང་༔ བཅོལ་པའི་ཕྲིན་ལས་མྱུར་དུ་སྒྲུབ་པར་མཛོད༔ དེ་འོག་བར་གྱི་དུས་ཚིགས་གཉིས་པ་ལ༔ བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ༔ རིག་འཛིན་ཆེན་པོ་པདྨ་ཐོད་ཕྲེང་དང་༔ པཎ་གྲུབ་ཆེན་པོ་བི་མ་མི་ཏྲ་དང་༔ བ་སུ་དྷ་ར་ཤཱཀྱ་དྷེ་ཝ་སོགས༔ སྒྲུབ་པའི་རྣལ་འབྱོར་རིག་པ་འཛིན་རྣམས་ཀྱིས༔ རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་ཚེ༔ མ་མོ་མཁའ་འགྲོ་དབང་ཕྱུག་ཉེར་བརྒྱད་སོགས༔ ཕུར་སྲུང་དམ་ཅན་རྒྱ་མཚོ་ཐམས་ཅད་ཀྱིས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་བའི་ཕྲིན་ལས་བསྒྲུབ་བར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཕྲིན་ལས་རྣམ་བཞི་ལྷུན་གྱིས་འགྲུབ་པ་དང་༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔ དེ་འོག་བར་གྱི་དུས་ཚིགས་གསུམ་པ་ལ༔ མོན་ཁ་ནེའུ་རིང་སེངྒེའི་རྫོང་གསུམ་དུ༔ སློབ་དཔོན་ཆེན་པོ་པདྨ་འབྱུང་གནས་དང་༔ ཡེ་ཤེས་མཚོ་རྒྱལ་ནམ་མཁའི་སྙིང་པོ་དང་༔ རླངས་ཆེན་དཔལ་སེང་རྡོ་རྗེ་བདུད་འཇོམས་ཀྱིས༔ རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་ཚེ༔ ཤྭ་ན་ས་བདག་བདག་ཉིད་རེ་མ་ཏཱི༔ བསྭེ་ལྕགས་གིང་དང་སྲུང་མ་ཐམས་ཅད་ཀྱིས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་བའི་ཕྲིན་ལས་བསྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཕྲིན་ལས་རྣམ་བཞི་ལྷུན་གྱིས་འགྲུབ་པ་དང་༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔ དེ་འོག་དུས་ཚིགས་བཞི་པ་སྙིགས་མའི་དུས༔ རང་སྣང་ཀ་དག་ཆོས་དབྱིངས་ཕོ་བྲང་དུ༔ ཚེ་དབང་རིག་འཛིན་རྡོ་རྗེ་ཁྲོ་ལོད་དང་༔ སྨོན་ལམ་ལས་སད་བདུད་འཇོམས་གླིང་པ་ཡིས༔ ལྷག་པའི་ལྷ་མཆོག་ཕུར་པའི་ཞལ་ཕྱེས་ཚེ༔ སྒྲུབ་པའི་རྣལ་འབྱོར་སྐྱོང་བར་ཞལ་བཞེས་པའི༔ དམ་ཅན་སྲུང་མ་བཀའ་ཡི་མངགས་གཞུག་ཚོགས༔ མཐུ་རྩལ་མྱུར་མགྱོགས་ལས་མཁན་ཕོ་ཉ་རྣམས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་པའི་ཕྲིན་ལས་བསྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཕྲིན་ལས་རྣམ་བཞི་ལྷུན་གྱིས་འགྲུབ་པ་དང་༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔ བཛྲ་བཛྲ་བཛྲ༔ ས་མ་ཡ་ ཧོཿ དེ་ནས་གཏོར་མ་ཁྲག་སྐྱེམས་དུག་ཆབ་ཀྱིས་བྲན་ཏེ་ཐུན་མཚོན་གྱི་རང་བཞིན་དུ་ཤེས་ཤིང་ཚྭ་ཚྭ་སྐར་ལྟར་འཁྲུགས་པས་དགྲ་བགེགས་ཀྱི་ལུས་ངག་ཡིད་གསུམ་ལ་ཐོག་ལྟར་བབ་ཅིང་ཕོག་པས་ཐལ་བའི་རྡུལ་དུ་བརླག་པར་བསམ༔ ཟོར་ལས་ནི༔ ཧཱུྃ༔ ང་ནི་དཔལ་ཆེན་རྡོ་རྗེ་གཞོན་ནུ་ཆེ༔ ང་ནི་འཁོར་འདས་ཡོངས་ཀྱི་དབང་ཕྱུག་ཆེ༔ ང་ལས་ཆེ་བཙན་འགྲན་ཟླ་སུ་ཡང་མེད༔ ངས་ནི་དྲག་པོའི་གཏོར་ཟོར་འཕེན༔ ཕྱོགས་མཚམས་སྟེང་འོག་གནས་རྒྱུ་བའི༔ སྡེ་བརྒྱད་ལྷ་ཀླུ་གཞི་བདག་རྣམས༔ གཏོར་ཆེན་མཚོན་ཐུན་ཟེར་འཕྲོས་པས༔ ལུས་སེམས་མ་ལུས་བརླག་པར་མཆིས༔ ང་ནི་མ་ཉེས་དགྲ་བགེགས་ཉེས༔ ཟོར་ལམ་ཕྱེས་ལ་སྐུ་བཟུར་ཅིག༔ བརྣག་པའི་དགྲ་བགེགས་མ་གཏོགས་པ༔ ཉེས་མེད་རྣམས་ལ་ཟོར་མི་འཕེན༔ ཀུན་ཀྱང་གྲོགས་མཛོད་དམག་དཔུང་བསྐྱེད༔ དམག་དཔུང་བསྐྱེད་ལ་རུ་མཚོན་ཕྱོར༔ ཉམས་པའི་དམ་ཉམས་དགྲ་བགེགས་འདི༔ རྡུལ་ཕྲན་བཞིན་དུ་བརླག་པར་མཛོད༔ ཕུར་པའི་དབལ་ཟོར་ཐོག་ལྟར་འཕེན༔ ཡུངས་དཀར་རྦབ་རྒོད་སེར་ལྟར་བསྒྲིལ༔ ཁྲག་ཐུན་དམར་པོ་ཆར་ལྟར་འབེབས༔ མཚེ་མདའ་དྲག་པོ་རླུང་ལྟར་འཚུབས༔ དུག་ཐུན་དྲག་པོ་མུན་ལྟར་གཏིབས༔ མཚོན་ཆའི་བུ་ཡུག་སྐར་ལྟར་འཁྲིགས༔ མདའ་ཐུན་དྲག་པོ་བུན་ལྟར་འཕྲོ༔ རྡོ་ཐུན་ཆར་པ་རྡུལ་ལྟར་འབེབས༔ དམར་གྱི་གཏོར་མ་རྫ་ལྟར་ཉིལ༔ ཕོ་ཉ་ལས་མཁན་ཟ་གསོད་ཚོགས༔ ཕོ་རྒྱུད་ཟོར་འཕེན་ཤ་ར་ར༔ མོ་རྒྱུད་ཐུན་འདེབས་ཉི་ལི་ལི༔ ཟ་བའི་འདྲེ་ལ་ཐུན་ཟོར་རྒྱོབ༔ ཕུང་བའི་སྲི་ལ་ཐུན་ཟོར་རྒྱོབ༔ སྡང་བའི་དགྲ་ལ་ཐུན་ཟོར་རྒྱོབ༔ གནོད་པའི་བགེགས་ལ་ཐུན་ཟོར་རྒྱོབ༔ སྨོན་ལོག་ལྟ་ལོག་སྲོག་ལ་ཕོབ༔ ཨོཾ་བཛྲ་ཙཎྜ་སརྦ་དུཥྚན་ཨེ་ཛཿབྷྱོ་ཧཱུྃ༔ གནོད་བྱེད་ཀཱ་ལ་རཱུ་པ་སརྦ་ཤ་ཏྲཱུཾ་མཱ་ར་ཡ་རྦད་ཕོབ་ཛ༔ སྔགས་བརྗོད་དམིགས་པས་གཟིར༔ དམོད་པ་བོར་ནས་གཏོར་ཟོར་དགྲ་ཕྱོགས་སུ་བོར༔ བརྟན་མ་སྐྱོང་མཛད་རྣམས་ལ་ཆད་དོན་གཏོར་མ་འབུལ་བ་ནི༔ གོང་ལྟར་འགུགས་བསྒྲལ་གཏོར་མ་རྣམ་པ་དགྲ་བགེགས་ཀྱི་ཤ་ཁྲག་ལ་ངོ་བོ་ཟག་མེད་བདུད་རྩིར་བྱིན་གྱིས་བརླབ༔ ཧཱུྃ་བྷྱོ༔ སྔོན་ཚེ་ཨོ་རྒྱན་ཆེན་པོའི་སྤྱན་སྔ་རུ༔ སངས་རྒྱས་བསྟན་པ་གཉན་པོ་བསྲུང་བ་དང་༔ འཇིག་རྟེན་བོད་ཁམས་སྐྱོང་བར་ཁས་བླངས་པའི༔ གནོད་སྦྱིན་དཔལ་གནས་མ་དང་ཡང་དག་ཤེས༔ ཀོང་བཙུན་དེ་མོ་གཡུ་བུན་ཁྱུང་བཙུན་མ༔ དམག་གི་རྒྱལ་མོ་ཟླ་འོད་བྱང་རྒྱལ་མ༔ གསེར་མོ་གསེར་ཐང་མ་དང་ཤཱནྟིཾ་དཔལ༔ ར་མོ་སྨན་དང་ཀླུ་མོ་གཟི་འབར་མ༔ ཁྱེད་རྣམས་སྔོན་གྱི་བཀའ་ཉན་དམ་ཚིག་ཅན༔ བལ་ཡུལ་ཁ་ལ་ཤོད་ཀྱི་ས་མཚམས་དང་༔ བོད་ཡུལ་རང་གནས་དབེན་རྩ་སོ་སོ་རུ༔ སློབ་དཔོན་ཆེན་པོ་པདྨ་ཐོད་ཕྲེང་དང་༔ སློབ་མ་མཐུ་ཆེན་རླངས་ཆེན་དཔལ་སེང་གིས༔ དཀྱིལ་འཁོར་མཐའ་རུ་ཞིང་ཆེན་གདན་ལ་བཞག༔ དབང་བསྐུར་དམ་བཏགས་ལྕེ་ལ་བདུད་རྩི་བླུད༔ དབང་རྟགས་ཅོད་པན་སྤྱི་བོའི་གཙུག་ཏུ་བཏགས༔ ལག་ཏུ་རྡོ་རྗེ་ཕུར་པ་གཏད་ནས་ཀྱང་༔ གསང་སྔགས་རྡོ་རྗེ་ཕུར་བའི་སྲུང་མར་བསྐོས༔ མ་འོངས་ཐར་བ་ཐོབ་པར་ལུང་དུ་བསྟན༔ གཙོ་འཁོར་གཡོག་དང་ཡང་གཡོག་སྨན་ཕྲན་འབུམ༔ དར་སྣའི་ཅོད་པན་དར་དཔྱངས་པུ་རུ་རུ༔ རྒྱན་དང་སིལ་སྙན་མང་པོ་སི་ལི་ལི༔ བསྟན་པའི་དགྲ་བགེགས་སྒྲོལ་བའི་ལས་ལ་བརྩོན༔ ད་རུང་ཁྱེད་རྣམས་འཇིག་རྟེན་མ་འདས་པས༔ ཇི་སྲིད་ཐར་བ་ཆེན་པོ་མ་ཐོབ་བར༔ སྔོན་ཚེ་ཞལ་བཞེས་དམ་ལས་མ་འདའ་བར༔ བཤལ་ཆུ་དམར་གྱི་གཏོར་མ་འདི་ལོངས་ལ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ མ་གཡེལ་མ་འགྱངས་མ་མོ་བརྟན་མའི་ཚོགས༔ རྣལ་འབྱོར་བུ་བཞིན་སྐྱོངས་ཤིང་དགྲ་བགེགས་སྒྲོལ༔ བཀའ་དང་དམ་ལས་མ་འདའ་ས་མ་ཡ༔ མ་མ་ཧྲཱིཾ་ཧྲཱིཾ་བཛྲ་ལི་ལ་མ་ཨེ་དམ་བ་ལིཾ་ཏ་ཁ་ཁ་ཁཱ་ཧི༔ ཕྲིན་ལས་བསྒྲུབ་པར་དམ་བཅས་ཤིང་མནའ་བོར་བར་བསམ༔ རྟ་བྲོ་བརྡུང་བ་ནི༔ ཧཱུྃ༔ སྟོང་གསུམ་སྟོང་གི་གཏོར་གཞོང་གྲུ་གསུམ་དུ༔ དགྲ་བགེགས་དམ་སྲི་འགོང་པོ་ཆུང་སྲི་བྲུབ༔ སྲ་བརྟན་རི་རབ་འབར་བས་སྟེང་ནས་གནོན༔ དེ་སྟེང་རྡོ་རྗེ་གཞོན་ནུའི་ཕོ་བྲང་བཏབ༔ རྡོ་རྗེ་ཁྲོ་ཆེན་ཚོགས་ཀྱིས་བྲོ་བརྡུང་བས༔ སྡང་དགྲ་གདོན་བགེགས་འབྱུང་པོ་ཐམས་ཅད་དང་༔ སྒབ་འདྲེ་ཆུང་སྲི་འགོང་ཚོགས་འདུལ་བའི་བྲོ༔ བར་ཆད་དམ་སྲི་གདོན་ཚོགས་འདུལ་བའི་བྲོ༔ ཐེའུ་རང་སྲི་རྐུན་གནོད་བྱེད་འདུལ་བའི་བྲོ༔ རྣམ་ཀུན་བར་ཆད་མེད་པར་བརྡུང་བར་བྱ༔ འཁོར་བ་མ་སྟོང་བར་དུ་མནན་པ་སྟེ༔ མ་ཤོར་ཐེག་པ་རིམ་པ་དགུ་ཡི་རྒྱ༔ ཨོཾ་ལཾ༔ ཧཱུྃ་ལཾ༔ ཏྲཱྃ་ལཾ༔ ཧྲཱིཿལཾ༔ ཨཱཿལཾ༔ སྟྭཾ་བྷ་ཡ་ནན་ནན༔ ཡ་མ་དམ་སྲི་ཡ་མ་སྟྭཾ་བྷ་ཡ་ནན་ནན༔ ཞེས་པའི་ཚེ་འབྱུང་ལྔའི་གདང་ཁ་གྲུ་གསུམ་དུ་ཕྱེས་པའི་ཀློང་དུ་དགྲ་བགེགས་འུབ་ཀྱིས་བཀུག་སྟེ་རྔུབ་ནས་འབྱུང་ལྔ་མ་ཟད་ཀྱི་བར་དུ་བརྒྱལ་བས་བདེ་སྡུག་མྱོང་ཚོར་ནུས་སྟོབས་མེད་པར་བསམ༔ རྡོ་རྗེ་སྐུ་གསུང་ཐུགས་ཀྱི་རྒྱ་ཡིས་བཏབ་པས་རྡོ་རྗེ་གསུམ་གྱི་ཀློང་དུ་མ་གྲོལ་བར་དུ་ལྡང་མི་ནུས་པར་བསམ༔ ཡོན་ཏན་དང་ཕྲིན་ལས་ཐེག་དགུ་རྣམས་ཀྱི་རྒྱ་ཡིས་བཏབ་པས༔ བག་ཆགས་སྨོན་ལོག་གི་ལས་མ་ཟད་བར་དུ་བྲོས་ཡུལ་ཐར་དུས་ནུས་སྟོབས་བདེ་སྡུག་ཅི་ཡང་མེད་པའི་ངང་དུ་བརྒྱལ་བར་བསམ༔ དེ་ནས་ཉམས་ཆག་དང་སྡིག་སྒྲིབ་བཤགས་ཤིང་བཟོད་པར་གསོལ་བ་ནི༔ ཧོཿ དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་མ་ལུས་ཤིང་ལུས་པ་མེད་པ་བདག་ལ་དགོངས་སུ་གསོལ༔ ཏ་ན་སྒྲོལ་བ་གནས་སུ་མ་སྟོབ་པ་དང་༔ ག་ན་སྦྱོར་བ་བྱིན་གྱིས་མ་བརླབ་པ་དང་༔ མཆོད་སྔགས་དང་ཏིང་ངེ་འཛིན་མ་དག་ཅིང་ཉམས་པ་དང་༔ དགེ་བ་བཅུ་དང་དུ་མ་ལོན་པ་དང་༔ མི་དགེ་བ་བཅུ་རྩད་ནས་མ་ཆོད་པ་དང་༔ བཀའ་བཞིན་དུ་གཞུང་མ་བསྲང་བ་དང་༔ དམ་ཚིག་རྩ་བ་དང་ཡན་ལག་ཉམས་ཆག་ཏུ་གྱུར་པ་ཅི་མཆིས་པ་དེ་དག་ཐམས་ཅད་མཐོལ་ལོ་བཤགས་སོ༔ བཟོད་པ་དམ་པ་མཛད་དུ་གསོལ༔ ཚེ་འདིའི་རྐྱེན་དང་ཕྱི་མའི་སྒྲིབ་པར་མི་འགྱུར་བའི་ཚངས་པ་སྩལ་དུ་གསོལ༔ ཡི་གེ་བརྒྱ་བ་དབྱངས་གསལ་རྟེན་འབྲེལ་སྙིང་པོ་རྣམས་ཅི་ནུས་སུ་བརྗོད་ཅིང༔ རྩ་གསུམ་ལྷ་ཚོགས་མདུན་གྱི་ནམ་མཁར་དཔང་དུ་བཙུག་སྟེ༔ འགྱོད་སྡོམ་གྱི་བསམ་པ་དྲག་པོའི་སྒོ་ནས་བཤགས་པར་བྱའོ༔ དེ་ནས་དཀྱིལ་འཁོར་བསྡུ་རིམ་ནི༔ ཧཱུྃ༔ སྣང་སྟོང་རྡོ་རྗེ་ཆོས་སྐུའི་ཞལ༔ སྤྲོས་བཅས་སྤྲོས་མེད་ཆེན་པོར་སངས༔ སྒོམ་འཛིན་དམིགས་བྱ་ཆོས་ཉིད་ངང་༔ རེ་དོགས་ཡུལ་ཞེན་ཀ་དག་ཀློང་༔ ཨ་ཨ་ཨ་ཕཊ༔ རྗེས་ཐོབ་ཏུ༔ ཧཱུྃ་ཧཱུྃ་ཧཱུྃ༔ ཧཱུྃ༔ ཡེ་གཞི་ཀ་དག་ཆོས་སྐུའི་ཞལ༔ སྐྱེ་འགགས་འགྱུར་མེད་གཞོམ་གཞིག་བྲལ༔ ཐིག་ལེ་ཉག་གཅིག་ཡེ་ཤེས་སྐུ༔ སྣང་སྟོང་ནམ་མཁའི་རྡོ་རྗེའོ༔ ཧཱུྃ་ཕཊ་ཕཊ་ཕཊ༔ ཅེས་ཐིག་ལེ་ཉག་གཅིག་ཏུ་སྐད་ཅིག་གིས་གསལ་ལ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ལན་བདུན་བརྗོད་པས་རྡོ་རྗེའི་སྐུ་འགྱུར་བ་མེད་པར་བསམ༔ ཡང་ལན་བདུན་བརྗོད་པས་རྡོ་རྗེའི་གསུང་འགགས་མེད་རང་སྒྲར་གསལ༔ ཡང་ལན་བདུན་བརྗོད་པས་རྡོ་རྗེའི་ཐུགས་ཆོས་ཉིད་རོལ་བ་ཆེན་པོར་གསལ་བར་བྱའོ༔ སྤྱོད་ལམ་ཐམས་ཅད་དུ་རང་ཉིད་ལྷ་ལྷ་ཉིད་རང་གཉིས་སུ་མེད་པར་གདོད་ནས་ལྷུན་གྲུབ་ཏུ་ཤེས་ཤིང་གསལ་བའི་གདིང་ལྷའི་ང་རྒྱལ་དང་མ་བྲལ་བའི་ངང་ནས་སྤྱོད་པར་བྱའོ༔ རྟག་པར་རྒྱུན་དུ་རྟག་ཆད་ཀྱི་མཐར་བསལ་བ་ཤིན་ཏུ་གནད་མཆོག་ཏུ་གཅེས་སོ༔ པདྨ་བདག་གི་བརྒྱུད་འཛིན་རྣམས༔ བསྐྱེད་རིམ་ཐབས་ལམ་བསྒོམ་པའི་ཚེ༔ རྟག་ཆད་འཛིན་ཞེན་ཨ་འཐས་དང་༔ བྱིང་རྨུག་རེ་དོགས་འཕྲང་ལ་གཟོབ༔ བསྒོམ་མཐར་མི་བསྒོམ་ངང་དུ་ལྷོད༔ རིག་པའི་རང་གདངས་ཀྱིས༔ ཧཱུྃ་ཧཱུྃ་བཛྲ་ཀཱ་ཝཱ་ཙི་ཧཱུྃ༔ ཧཱུྃ༔ འཁོར་འདས་གཞི་རུ་ལྷུན་རྫོགས་པའི༔ རེ་དོགས་རང་ངོར་སངས་པ་ཡི༔ ཁྱབ་བདག་རྡོ་རྗེའི་གོ་ཁྲབ་མཁྲེགས༔ རྒྱུ་གྲོལ་རྐྱེན་སྣང་མ་བཅོས་ཟད༔ ཅེས་པའི་ཚེ་གོ་ཁྲབ་ཞུ་ལུགས་སུ་གསོལ་བར་བསམ༔ ཨོཾ་བཛྲ་ཙཀྲ་ཏིཀྵྞ་ཀརྨ་ཀཱི་ལ་ཡ་ཛྭ་ལ་རཾ་ཧཱུྃ་ཕཊ༔ ཧཱུྃ༔ ཕུང་ཁམས་སྐྱེ་མཆེད་ཉོན་མོངས་ལྔ༔ ཡེ་ཤེས་ལྔ་དང་བདེ་གཤེགས་ལྔར༔ ལྷུན་གྲུབ་རྫོགས་པ་མཚོན་མེའི་གུར༔ གླགས་ལྟ་བར་ཆད་དབྱིངས་སུ་སྒྲོལ༔ ཧཱུྃ་ཧཱུྃ་ཧཱུྃ༔ བཛྲ་ཙཀྲ་རཀྵ་ཨཱཿསྨོན་ལམ་གདབ་པ་ནི༔ ཧོཿ དགོངས་སུ་གསོལ༔ ཆོས་ཉིད་ཀྱི་བདེན་པའོ༔ གསང་སྔགས་ཀྱི་བྱིན་གྱིས་བརླབས་པའོ༔ སངས་རྒྱས་ཀྱི་མཐུའོ༔ ཨ་བྷི་ཙཱཪྻའི་དུས་ལ་བབས་པའི་བརྣག་པ་དེ་ཁོ་ནའོ༔ དེ་ལྟར་གསང་སྔགས་ཀྱི་སྤྱོད་པ་བླ་ན་མེད་པ་རྨད་དུ་བྱུང་བ་རླབས་པོ་ཆེ་སྤྱོད་པའི་མཐུ་བྱིན་གྱིས༔ བདག་དང་སེམས་ཅན་ཐམས་ཅད་བཅོམ་ལྡན་འདས་དཔལ་ཆེན་པོ་བཛྲ་ཀུ་མཱ་རའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལ་ལོངས་སྤྱོད་པའི་སྐལ་བ་དང་མཉམ་པར་གྱུར་ཅིག༔ ཅེས་པས་རང་རང་གིས་འདི་དང་དུས་གསུམ་དུ་བསགས་པའི་དགེ་རྩ༔ ཐམས་ཅད་འཁོར་གསུམ་ཡོངས་སུ་དག་པར་བསྔོ༔ འགྲོ་ཀུན་ཚོམ་བུ་གཅིག་ཏུ་སངས་རྒྱས་པའི་ཕྱིར་དུ་དམིགས་ནས་སྨོན་ལམ་རྣམ་དག་གདབ༔ སླར་ཡང་བཀྲ་ཤིས་བརྗོད་པ་ནི༔ ཨོཾ༔ གདོད་ནས་ཀ་དག་ཆོས་སྐུའི་ངང་༔ ཨཱཿའགགས་མེད་ལོངས་སྤྱོད་རྫོགས་པའི་དབྱིངས༔ ཧཱུྃ་གང་འདུལ་སྤྲུལ་སྐུས་འགྲོ་བ་འདྲེན༔ སྭཱ༔ གཉིས་མེད་ལྷུན་གྲུབ་རྫོགས་པའི་ལྷ༔ ཧཱ་གཞོམ་བྲལ་རྡོ་རྗེ་ཕུང་བའི་སྐུ༔ སྐུ་ལྔ་ཡོངས་རྫོགས་བཀྲ་ཤིས་ཤོག༔ ཅེས་བརྗོད་པས་སངས་རྒྱས་བྱང་སེམས་དཔའ་བོ་དཔའ་མོའི་ཚོགས་རྣམས་ཀྱིས་བཀྲ་ཤིས་ཚིག་གི་གླུ་དབྱངས་སྒྲོགས་ཤིང་སྐུ་ཡིས་གར་འཁྱུག༔ ཕྱག་ནས་མེ་ཏོག་གི་ཆར་ཆེན་པོ་འབེབས་པར་བསམ་ལ༔ ཨཱ༔ སངས་རྒྱས་བསྟན་པ་དར་བ་དང་༔ དམ་ཆོས་མི་ནུབ་རྟག་ཏུ་རྒྱས༔ དགེ་འདུན་རྒྱ་མཚོས་ས་སྟེང་ཁྱབ༔ སྐྱེ་འགྲོ་ཡོངས་ལ་བདེ་ལེགས་འཕེལ༔ ལེགས་པའི་ཡོན་ཏན་ཡིད་བཞིན་ནོར༔ དགོས་འདོད་འབྱུང་བའི་བཀྲ་ཤིས་ཤོག༔ སྐྱེ་མེད་དབྱིངས་སུ་ཀུན་ཏུ་བཟང་༔ འགགས་མེད་རོལ་བ་རྡོ་རྗེའི་སྐུ༔ ཕྱོགས་མེད་ཀུན་ཁྱབ་སྤྲུལ་པའི་སྐུ༔ ལྷུན་གྲུབ་རྡོ་རྗེ་ཕུར་པ་ཡི༔ ཐབས་ཤེས་སྦྱོར་བའི་དཀྱིལ་འཁོར་དུ༔ འགྲོ་ཀུན་སྨིན་གྲོལ་བཀྲ་ཤིས་ཤོག༔ ས་མ་ཡ༔ མ་འོངས་བསྐལ་བའི་མར་གཤམ་སྙིགས་མའི་དུས༔ པདྨ་ང་དང་ལས་འབྲེལ་སད་པ་ཡི༔ སྐལ་ལྡན་ལས་ཅན་སྦྱངས་བ་སྔོན་བསགས་ཅན༔ ཁྱོད་ཅག་སྐལ་བར་བསྔགས་པའི་སྒྲུབ་པ་འདི༔ དབེན་པའི་གནས་སུ་ཚེ་སྒྲུབ་མཉམ་པར་གྱིས༔ གངས་ཅན་བོད་ཀྱི་ས་གནས་ཐམས་ཅད་དུ༔ ཕུར་རྒྱུད་འདྲ་མིན་བརྒྱ་ཙམ་གཏེར་དུ་སྦས༔ སྙིང་པོའི་ཡང་ཞུན་བཅུད་དུ་དྲིལ་བ་ཡི༔ གདམས་པའི་མཆོག་གྱུར་ཡིད་བཞིན་བསམ་འཕེལ་འདི༔ ཉམས་སུ་ལེན་པའི་ལས་ཅན་སྐལ་ལྡན་རྣམས༔ འབྲེལ་བ་ཙམ་གྱིས་རིག་འཛིན་གྲལ་དུ་འཁོད༔ ཨེ་མ༔ ལས་སྨོན་རྟེན་འབྲེལ་ལྡན་པའི་སྐལ་ལྡན་རྣམས༔ བསྐྱེད་རྫོགས་གཉིས་ལྡན་ཐབས་ཤེས་ཟུང་འཇུག་མཆོག༔ གསང་སྔགས་རྡོ་རྗེ་ཐེག་པའི་དགོངས་བཅུད་ཡིན༔ ཡ་བྲལ་ཐབས་ལམ་བསྒོམ་ཡང་གོལ་སྒྲིབ་བསལ༔ ཐོས་བསམ་མཐར་ཕྱིན་ཤེས་རབ་ལྡེ་མིག་གནད༔ ཟུང་འཇུག་མེད་པས་སྒྲུབ་པ་ལྷུར་ལེན་ཀྱང་༔ དེ་ཡང་ཤེས་རབ་ལམ་གྱིས་མ་གྲོལ་ན༔ བསྐྱེད་རིམ་མ་གསལ་བསྒྲུབ་པས་སྨིན་མི་སྲིད༔ དེ་ཕྱིར་སྒྲུབ་ལ་གཞོལ་བའི་སྐལ་ལྡན་རྣམས༔ བསྒྲུབ་དུས་བསྐྱེད་རྫོགས་ཟུང་འཇུག་གནད་དུ་ཆེ༔ གདོད་ནས་ཡེ་གཞི་ཀ་དག་ཆེན་པོ་ཉིད༔ དཔལ་ཆེན་རྡོ་རྗེ་གཞོན་ནུར་ལྷུན་གྲུབ་རྫོགས༔ བསྒྲུབ་བྱ་གཞི་སྟེ་སྒྲུབ་བྱེད་ལམ་དུ་མཆོག༔ སྒྲུབ་འབྲས་གཞི་ལམ་དབྱེར་མེད་སྨིན་པ་ཡིས༔ ས་ལམ་ཡོངས་རྫོགས་རང་རིག་སངས་རྒྱས་ཏེ༔ བསྒྲུབ་ཀྱང་གང་ནས་འོང་དང་མཐོང་བ་མེད༔ རང་སེམས་སངས་རྒྱས་སྨིན་པ་གྲུབ་པའི་མཆོག༔ ཕྱི་རུ་སྣང་བའི་སྣོད་བཅུད་རང་བཞིན་མེད༔ བར་དུ་དྲན་བསམ་མི་འཇིགས་ཡེ་སྟོང་ངང་༔ ནང་དུ་སེམས་གཞི་འོད་གསལ་སྟོང་པ་ཉིད༔ ཡུལ་རྐྱེན་འཛིན་པ་གཉིས་མེད་སྟོང་པ་ཉིད༔ གཅིག་ཏུ་མི་སེམས་སྣ་ཚོགས་བྱེད་པའི་གཞི༔ སོ་སོར་མི་སེམས་བདེ་སྡུག་ཉེར་ལེན་མཁན༔ གང་ལྟར་གྲུབ་པའི་མཐའ་ལ་མི་གནས་པའི༔ མི་གནས་ཡེ་ཤེས་ཆེན་པོར་ལྷུན་གྲུབ་རྫོགས༔ སྔོན་འདས་འཁྲུལ་པའི་རྣམ་རྟོག་རྗེས་མི་གཅོད༔ མ་འོངས་རྣམ་པར་རྟོག་པའི་སྒོ་མི་དགག༔ འགོག་སེམས་ཙམ་ནས་ཤོར་བའི་མཚང་ཨི་གོ༔ བསྒོམ་ཞེས་གྲོལ་བ་ཐོབ་སྙམ་ཐོབ་སེམས་ཅན༔ ཡོངས་སུ་དོགས་པའི་འཛིན་ཆགས་དམ་འཆིང་ཅན༔ རྣམ་རྟོག་རྗེས་དཔྱོད་ཤོར་ཕང་ཕྱི་མ་འགྱོད༔ མི་གཅིག་ཚེ་གཅིག་སྡུག་ལ་ཟད་པར་ཐལ༔ ངེས་གསང་ཡང་དག་མཆོག་གི་ལམ་ཞུགས་རྣམས༔ དང་པོ་བརྟག་དཔྱད་ས་ལམ་མིག་ཏུ་གནད༔ བར་དུ་ཉམས་ཚད་རྫོགས་པ་ས་ལམ་རྒྱན༔ ཐ་མ་གྲོལ་བ་ཐོབ་པ་ས་ལམ་དངོས༔ ས་ལམ་མེད་པའི་ས་ལམ་གཅིག་རྫོགས་པ༔ རང་རིག་རང་ངོར་སངས་པ་དེ་ཀའོ༔ སངས་རྒྱས་ཐམས་ཅད་ཡེ་ཤེས་ཀློང་དུ་གཅིག༔ རང་རིག་རང་ངོར་སངས་པ་སངས་རྒྱས་ཡིན༔ འཁོར་བ་འདས་པར་སྦྱོར་བའི་བརྟུལ་ཞུགས་ཀྱང་༔ སེམས་ཉིད་རང་གཞིའི་ལྷུམས་སུ་ཞུགས་པ་ཉིད༔ མ་བཙལ་ལྷུན་གྲུབ་རྫོགས་པའི་སངས་རྒྱས་ཀྱང་༔ ཡེ་གཞི་ཀ་དག་སྐྱོན་ལས་འདས་པ་ཉིད༔ འཛིན་པའི་ཆིངས་ཀྱིས་མི་འཆིང་ཞིང་༔ རེ་དོགས་མདུད་རྒྱས་མི་གདབ་སྟེ༔ རྣམ་རྟོག་རྐུན་ཕུར་མི་ཤོར་བ༔ གོལ་སྒྲིབ་མལ་དུ་མི་འཛོལ་བའི༔ འོད་གསལ་རྒྱུན་ཆགས་ལམ་གྱི་མཆོག༔ རིག་པ་རང་ངོར་སངས་པ་ཡི༔ འཁོར་འདས་རིག་པ་རྗེན་པར་ཤར༔ ཐ་མལ་གཟུང་འཛིན་དྲྭ་བ་ཞིག༔ སླད་ཀྱིས་འཁོར་བར་མི་འཇུག་པའི༔ ཉོན་མོངས་གནས་སུ་དག་པ་ཡི༔ ཡེ་ཤེས་ལས་ནི་མི་ལྡོག་པའི༔ གདིང་ནི་གྲོལ་བ་ཐོབ་པ་དངོས༔ འདི་ལས་གཞན་དུ་འགྱུར་ན་འཁྲུལ༔ ཕྱི་ཡི་འོད་གསལ་དབྱིངས་དང་ཐིག༔ ནང་གི་འོད་གསལ་བྱང་ཆུབ་སེམས༔ བར་དུ་གཉིས་མེད་ཡེ་ཤེས་གབ༔ དངོས་པོ་རྒྱུ་རྐྱེན་རྟེན་འབྲེལ་ཚུལ༔ བར་དུ་འཕེལ་ཞིང་རབ་ཏུ་སྨིན༔ ཐ་མ་ཟད་ཅིང་འཁོར་བ་འདས༔ ཆོས་ཉིད་ཆོས་སྐུའི་ཀློང་དུ་ཐིམ༔ ས་མ་ཡ༔ ཤེས་རབ་ཡུམ་ཆེན་མཁའ་འགྲོ་མཚོ་རྒྱལ་མ༔ སྙིང་གི་ཐིག་ལེ་སྒྱུ་མའི་བརྡ་རུ་བསྒྱུར༔ ཆོས་ཉིད་འོད་གསལ་ཀློང་དུ་སྦས་རྒྱར་ཐོབས༔ ཕུར་སྲུང་དམ་ཅན་རྒྱ་མཚོར་གཉེར་གཏད་དོ༔ ལྟ་ལོག་ངན་སྨྲ་མཁན་གྱི་དབང་པོ་སྣུབ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ གསང་རྒྱ༔ བརྡ་ཐིམ༔ དྷརྨ་བཱ་ལ་རཀྵ༔ ༈ ཕ་གཅིག་ཨོ་རྒྱན་ཆེན་པོའི་སྙིང་ཐིག་མཆོག། རྒྱལ་ཀུན་གསང་བཅུད་འདུས་པ་བདུད་རྩིའི་ཐིག །བུ་གཅིག་བདུད་འཇོམས་རྡོ་རྗེ་བདག་གིས་སྤྱོད། །མཁས་རློམས་ཆོས་ལ་རྐུན་ཇག་བྱེད་དུ་མེད། །ཟོག་པོས་ཆེ་དྲག་འདོད་མཚོ་གཡོ་མིན་ཀྱང་། །ཆེ་དྲག་ཐོབ་དབང་མི་ལ་སྨྲ་དོན་མེད། །བཙན་སའི་བྲག་སྐྱིབ་འཕྱང་ཧྲུལ་གོས་སུ་ཀླུབ། མི་ཚེ་ཡུད་ཙམ་ཅི་བདེ་བློ་བདེར་གནས། །སུ་མ་མགུ་ཡང་མགུ་བཏེགས་བྱེད་དོན་མེད། །ཐོས་བསམ་མིག་ཟུམ་མཁས་ཁྱད་གཟུགས་མི་མཐོང་། །རྫོགས་སངས་རྒྱས་ཀྱིས་འགྲོ་ཁམས་མི་སྟོངས་ན། །མེ་ཁྱེར་བདག་འདྲས་གཞན་དོན་འབྱུང་སྙམ་མེད། །བསམ་ཞིང་ཅི་དགར་ཉལ་ཡང་མཁའ་འགྲོས་བསྐུལ། །དམ་ཚིག་གཉན་པོའི་བཀའ་ཁྲིམས་བསླུ་མ་སྤོབས། །སྙིང་ཐིག་རྒྱ་ཆེ་ཚང་བར་བསྒྱུར་མ་ནུས། །གཅེས་བསྡུས་མདོ་ཙམ་བསྒྱུར་ཏེ་ཡི་གེར་བཀོད། །བསྐལ་བ་མ་སྟོང་བར་དུ་འགྲོ་ཀུན་གྱིས། །གསང་སྔགས་འདིར་སྤྱོད་འཁོར་བ་དོང་སྤྲུགས་ཤོག །ཅེས་པ་འདི་ཡང་གླིང་བ་བདུད་འཇོམས་རྡོ་རྗེ་གར་གྱི་དབང་ཕྱུག་རྩལ་གྱིས་གསེར་ཤོད་རྡོ་རྗེའི་མིང་གི་ཤྭ་བྲག་ནས་བཏོན་ཏེ་མི་ལོ་བརྒྱད་ལ་བཀའ་རྒྱས་བཏབ་ནས་མཐར་སྨར་སྟོད་འབྲོས་ཕུག་དབེན་པའི་གནས་སུ་ཞལ་བཤུས་ཏེ་དག་པར་ཕབ་པའི་དུས་སུ་སྒྲ་དང་ས་གཡོ་ལ་སོགས་ནག་ཕྱོགས་ཐུལ་བའི་རྟགས་མང་པོ་བྱུང་བ་རྟེན་འབྲེལ་མཆོག་ཏུ་གྱུར་བ་ཤིང་མོ་ཀྲོ་ཏིའི་ཁྱིམས་སུ་ཡི་གེ་རིས་བྱེད་ལས་སྨོན་གྱི་དབང་གིས་སྐྱེ་ཕྲེང་བདུན་དུ་འགྲོགས་པའི་གྲོགས་པོ་ཕུན་ཚོགས་བཀྲ་ཤིས་པས་བགྱིས་པའོ། །དགེའོ། །སརྦ་མངྒ་ལཾ།། །།