TTDL-ZABTER-08-NYA-051

Previous Text Back to Volume PageNext Text

Wylie title	zab gsang mkha' 'gro'i snying thig las: gnod sbyin shan pa dmar nag gi las byang bstan dgra'i srog 'dren lcags kyu 'bar ba:
Location	bdud 'joms gling pa zab gter Volume 8, Text 51, Pages 465-473 (Folios 1a1 to 5a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las gnod sbyin shan pa dmar nag gi las byang bstan dgra'i srog 'dren lcags kyu 'bar ba. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 465-473. Thimphu, Bhutan: Lama Kuenzang Wangdue, 2004.
Side notes	Recto: las byang   Verso: bdud 'joms bka' srung shan pa
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Manual - las byang
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	རྣལ་འབྱོར་དབང་ཕྱུག་ནུས་ལྡན་རྡོ་རྗེ་རྩལ། །གར་དབང་བདུད་འཇོམས་རྡོ་རྗེའི་གཏེར་མའོ། །མཁས་ཆེད་ཡིག་བྲིས་བདག་ལ་བྱེད་བློ་མེད། །པདྨའི་བཀའ་བཞིན་རྣམ་དཀར་ཤོག་གུར་བསྒྱུར། །ཡི་གེའི་རིས་བྱེད་ཕུན་ཚོགས་བཀྲ་ཤིས་སོ། །དགེའོ། །བཀྲ་ཤིས། ཨྠིྀ།།
	rnal 'byor dbang phyug nus ldan rdo rje rtsal/_/gar dbang bdud 'joms rdo rje'i gter ma'o/_/mkhas ched yig bris bdag la byed blo med/_/pad+ma'i bka' bzhin rnam dkar shog gur bsgyur/_/yi ge'i ris byed phun tshogs bkra shis so/_/dge'o/_/bkra shis/__a+thi+-i//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་དམར་ནག་གི་ལས་བྱང་བསྟན་དགྲའི་སྲོག་འདྲེན་ལྕགས་ཀྱུ་འབར་བ་བཞུགས་སོ༔

ཐྂ༎༔ པདྨ་དྲག་པོ་རྩལ་ལ་ཕྱག་འཚལ་ལོ༔ (བརྡ་ཡིག་) བདག་འདྲ་པདྨ་ཐོད་ཕྲེང་ངས༔ ཟབ་ཆོས་གསང་བ་སྐོར་གསུམ་ཆ་རྐྱེན་དུ༔ བསྟན་སྲུང་ཆེན་པོའི་བསྒྲུབ་པ་བསྟན་པར་བྱ༔ མ་འོངས་ང་ཡི་བརྒྱུད་འཛིན་གང་ཟག་རྣམས༔ གྲོགས་སུ་དམ་ཅན་སྲུང་མ་བསྟེན༔ ལས་སུ་བསྒྲུབ་ན་དཀྱིལ་འཁོར་ཉམས་སུ་ལོངས༔ བློ་ཕུག་རྩ་བ་གསུམ་ལ་རྒྱུན་དུ་གཏོད༔ འདི་ནི་ལས་ལ་མྱུར་བའི་སྲུང་མ་མཆོག༔ འདི་ཕྱི་མཐུན་རྐྱེན་ཐམས་ཅད་འབྱུང་བའི་གནས༔ དམ་ཚིག་ཅན་ལ་བུ་ལྟར་བརྩེ་བ་དང་༔ དམ་ཉམས་སྲོག་གི་གཤེད་དམར་བསྔགས་པ་སྟེ༔ ཉམས་སུ་ལེན་པའི་གང་ཟག་སྐལ་པ་རུ༔ ང་ཡིས་གསང་མཛོད་སྒོ་ཕྱེས་བསྟན་པ་ཡིན༔ སྙིང་ཐིག་ཉམས་སུ་ལེན་རྣམས་འདི་ལ་བརྩོན༔ ཟང་ཟིང་ཟས་ནོར་འདོད་ཀྱང་འདིས་ཐོབ་ཅིང་༔ ཟག་མེད་དགེ་བའི་བར་ཆད་ཀུན་སེལ་འགྱུར༔ དེ་ཕྱིར་འདི་ཉིད་ཉམས་སུ་ལེན་པར་གྱིས༔ འདི་ཉིད་ལག་ཏུ་ལེན་པའི་རིམ་པ་ནི༔ དང་པོ་ཡི་དམ་ལྷ་བསྒོམ་སྔགས་བཟླས་ཏེ༔ དེ་ནས་སྒྲུབ་རྫས་མཆོད་རྫས་གཞུང་བཞིན་བཤམས༔ རང་ཉིད་ཡི་དམ་ལྷ་ཡི་ང་རྒྱལ་གྱིས༔ ཨོཾ་སྭ་བྷཱ་ཝ་སོགས་སྟོང་པའི་ངང་ལས་རང་ཉིད་དཔལ་ཆེན་པོ་ཡི་དམ་ལྷ་ཡི་ང་རྒྱལ་དང་ལྡན་པའི་མདུན་དུ༔ མེ་རླུང་འཚུབས་མ་འཁྱིལ་བའི་ཀློང་དུ་བྷྲུྃ་ལས་གཞལ་ཡས་ཁང་ཡངས་ཤིང་རྒྱ་ཆེ་བའི་དབུས་སུ༔ པདྨ་དང་ཉི་མའི་གདན་ལ་ཧཱུྃ་ཡིག་དམར་ནག་མེ་འབར་བ་གཅིག་ཡོངས་སུ་གྱུར་པ་ལས༔ དབང་དྲག་ཆེན་པོ་གནོད་སྦྱིན་ཤན་པ་དམར་ནག་ཞལ་གཅིག་ཕྱག་བཞི་པ༔ གཡས་ཀྱི་དང་པོ་ན་སྣང་སྲིད་དབང་སྡུད་ཀྱི་གྲི་གུག་དང་༔ གཡོན་གྱི་དང་པོ་ན་ཁམས་གསུམ་ཁྲག་ཏུ་རོལ་པའི་ཐོད་ཁྲག་ཐུགས་ཀར་བསྣམས་པ༔ ཕྱག་འོག་མ་གཉིས་ཀྱིས་རལ་གྲི་དང་དགྲ་སྙིང་དམར་རློན་བསྣམས་པ༔ སྐུ་སྟོད་ལ་གླང་ཆེན་གྱི་ཀོ་རློན་དང་རྐེད་པ་ལ་མི་ལྤགས་ཀྱི་གཡང་གཞི་སྨད་ལ་སྟག་ལྤགས་ཀྱི་ཤམ་ཐབས་གསོལ་བ༔ ཐོད་སྐམ་གྱི་དབུ་རྒྱན་ཐོད་རློན་གྱི་ཕྲེང་བ་གདོལ་པའི་དོ་ཤལ་སྦྲུལ་ནག་གི་གདུ་བུ་དང་སྤྱི་བོར་ཐལ་ཆེན་གྱི་ཚོམ་བུ༔ མཁུར་ཚོས་ལ་རཀྟའི་ཐིག་ལེ༔ ཞལ་ལ་ཞག་གི་ཟོ་རིས༔ རིན་པོ་ཆེའི་སྙན་ཆས་བརྒྱན་པ༔ དབུ་སྐྲ་དང་སྨ་ར་སྨིན་མར་མེ་ཡི་ཚྭ་ཚྭ་འཕྲོ་བ༔ སྤྱན་གསུམ་དམར་ཟླུམ་གློག་ལྟར་འཁྱིལ་བ༔ ཁྲོ་གཏུམ་རྔམས་ཤིང་བརྗིད་པ༔ མཆེ་བ་ཟླ་ལྟར་མན་དུ་གཙིགས་པ་མེ་ཁྱུང་དམར་པོའི་སྟེང་དུ་ཞབས་གཉིས་གྱད་ཀྱི་འདོར་སྟབས་སུ་བགྲད་པ་བསྐལ་པའི་མེ་དཔུང་དམར་ནག་འབར་བའི་ཀློང་དུ་བསྐྱེད་དོ༔ དེའི་མདུན་དུ་རྒྱལ་པོ་རྣམ་ཐོས་སྲས་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་ཞི་འཛུམ་གྱི་མདངས་དང་ལྡན་པ་རྒྱལ་མཚན་དང་ནེའུ་ལེ་བསྣམས་ཤིང་གོ་ཁྲབ་དང་བསེ་རྨོག་གསོལ་བ་སེང་གེ་དཀར་མོའི་སྟེང་དུ་ཕྱེད་འགྱིང་གིས་བཞུགས་པར་བསྒོམ༔ གཡས་སུ་དྲང་སྲོང་གཟའ་བདུད་མིག་དམར་སྐུ་མདོག་དམར་ནག་ཕྱག་གཡས་མདུང་ཐུང་གཡོན་པས་སྦྲུལ་ཞགས་བསྣམས་པ་བེར་ནག་གསོལ་ཞིང་ཁྲོ་གཏུམ་རྔམས་བརྗིད་ཀྱི་ཉམས་ཅན་བདུད་རྟ་ནག་པོ་ལ་ཆིབས་པར་བསྒོམ༔ གཡོན་དུ་བྷྱོཿལས་དབྱིངས་ཀྱི་ཡུམ་མཆོག་གསོད་བྱེད་མ་དམར་མོ་ཞལ་གཅིག་ཕྱག་གཉིས་གཡས་སྤུ་གྲི་དང་གཡོན་པས་དགྲ་སྙིང་དམར་རློན་གསོལ་བ་རྟ་དམར་ལ་ཆིབས་ཤིང་ཁྲོ་གཏུམ་རྔམས་བརྗིད་ཀྱི་ཉམས་དང་ལྡན་པ་ཞིག་ཏུ་བསྐྱེད་དོ༔ དེའི་ཕྱི་རིམ་དུ་སྤྲུལ་པའི་འཁོར་བརྒྱད་དང་མངགས་གཞུག་སྡེ་བརྒྱད་ཀྱི་ཚོགས་དང་བཅས་པ་ལྷ་མིའི་ཁྲོམ་ཚོགས་པ་བཞིན་དུ་བསྐྱེད་དོ༔ དེ་རྣམས་ཀྱི་ཐུགས་ཀར་རང་རང་གི་མིང་ཡིག་དང་པོ་ལས་འོད་ཟེར་འཕྲོས་པས་ཡེ་ཤེས་དབྱིངས་དང་འཇིག་རྟེན་གྱི་གནས་ནས་གནོད་སྦྱིན་ཆེན་པོ་ཤན་པ་དམར་ནག་སྤྲུལ་པ་དང་ཡང་སྤྲུལ་བཀའ་སྡོད་དང་བཅས་པ་སྤྱན་དྲངས་ལ་བསྟིམ་མོ༔ ཨོཾ་མ་ཧཱ་ཀྲོ་ཏ་དམའ་རུ་རྩེ་གུ་ཎ་ཧྲཱིཿད་སརྦ་དྷརྨ་པཱ་ལ་ཀྵེ་ཊ་པཱ་ལ་སརྦ་ལོ་ཀ་པཱ་ལ་བཛྲ་ས་མ་ཡ་ཛ་ཛཿ ཛཿ ཧཱུྃ་བཾ་ཧོཿ དེ་ནས་སྤྱན་འདྲེན་པ་ནི༔ ཧཱུྃ་ཛཿཧེ་ཆེན་བརྡལ་བའི་དུར་ཁྲོད་ནས༔ གནོད་སྦྱིན་ཆེན་པོ་གཤེགས་སུ་གསོལ༔ བྱང་ཕྱོགས་གཏེར་གྱི་གཞལ་ཡས་ནས༔ རྒྱལ་ཆེན་རྣམ་སྲས་གཤེགས་སུ་གསོལ༔ ནམ་མཁའ་ཡངས་པའི་ཀློང་དཀྱིལ་ནས༔ གཟའ་བདུད་མིག་དམར་གཤེགས་སུ་གསོལ༔ ན་ལེན་ཤིང་ལེན་གནས་མཆོག་ནས༔ གསོད་བྱེད་དམར་མོ་གཤེགས་སུ་གསོལ༔ ཤར་ཕྱོགས་སྟག་འདུ་ལྷ་ཁང་ནས༔ སྟག་གི་གདོང་ཅན་གཤེགས་སུ་གསོལ༔ འུབ་ཆུམ་ལྡན་པའི་བྲག་རི་ནས༔ གཟིག་གི་གདོང་ཅན་གཤེགས་སུ་གསོལ༔ བྲག་དམར་ལྡེམ་ལྡེམ་ཁྱུང་ཚང་ནས༔ དོམ་གྱི་མགོ་ཅན་གཤེགས་སུ་གསོལ༔ བྲག་ནག་མུ་ལའི་ཏ་ཀ་ནས༔ གཡག་གི་མགོ་ཅན་གཤེགས་སུ་གསོལ༔ རོལ་པ་སྟེང་གི་མཚོ་ནག་ནས༔ རྨ་བྱའི་གདོང་ཅན་གཤེགས་སུ་གསོལ༔ ཕུང་བྱའི་གྲོང་ཁྱེར་ནག་པོ་ནས༔ ནེ་ཙོའི་གདོང་ཅན་གཤེགས་སུ་གསོལ༔ ཡངས་པ་རིམ་གྱི་ལུང་པ་ནས༔ ཤང་ཤང་གདོང་ཅན་གཤེགས་སུ་གསོལ༔ གཏིང་སེ་མཛོད་ཀྱི་ནང་ཤེད་ནས༔ ཉ་མོའི་གདོང་ཅན་གཤེགས་སུ་གསོལ༔ བཀའ་དང་དམ་ཚིག་གཞལ་ཡས་ནས༔ ལྷ་སྲིན་སྡེ་བརྒྱད་གཤེགས་སུ་གསོལ༔ དད་པ་དང་ནི་དམ་ཚིག་གི༔ གདུང་བའི་ང་རོས་ཁྱོད་འབོད་དོ༔ དམ་ཚིག་དབང་གིས་གཤེགས་སུ་གསོལ༔ བརྩེ་བའི་ཐུགས་ཀྱིས་ཕྲིན་ལས་སྒྲུབ༔ བཛྲ་ས་མ་ཡ་ཛ་ཛཿཛཿཧཱུྃ་བཾ་ཧོཿ དེ་ནས་བཞུགས་སུ་གསོལ་བ་ནི༔ ཧཱུྃ༔ དབང་དྲག་ཆེན་པོ་དམའ་རུ་རྩེ༔ སྤྲུལ་འཁོར་བྱེ་བ་འབུམ་སྡེ་བཅས༔ རང་རང་དགྱེས་པའི་གདན་སྟེངས་སུ༔ ཕྲིན་ལས་བསྒྲུབ་ཕྱིར་བཞུགས་སུ་གསོལ༔ བཛྲ་ས་མ་ཡ་ཛ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧཱུྃ༔ ཆོས་ཀྱི་དབྱིངས་ལས་མ་གཡོས་ཀྱང་༔ མ་རུངས་གདུག་པ་འདུལ་མཛད་ཕྱིར༔ འཇིགས་བྱེད་ཆེན་པོའི་སྐུར་སྟོན་པ༔ གནོད་སྦྱིན་དམར་ནག་འཁོར་བཅས་ལ༔ བསྟན་པ་བསྲུང་ཕྱིར་ཕྱག་འཚལ་ལོ༔ ཨ་ཏི་པཱུ་ ཧོཿ པྲ་ཏཱིཙྪ་ཧོཿ དེ་ནས་མཆོད་པ་འབུལ་བ་ནི༔ ཧཱུྃ༔ ཆོས་ཀྱི་དབྱིངས་ལས་གཟུགས་སྐུར་སྟོན༔ མ་རུངས་འདུལ་མཛད་དྲག་པོའི་སྐུ༔ གནོད་སྦྱིན་ཆེན་པོ་འཁོར་བཅས་ལ༔ ཕྱི་ནང་གསང་གསུམ་མཆོད་པ་འབུལ༔ གཟུགས་སྒྲ་དྲི་རོ་རེག་བྱ་སོགས༔ འདོད་ཡོན་ལྔ་ཡི་མཆོད་པ་འབུལ༔ བདུད་རྩི་སྨན་གཏོར་རཀྟ་སོགས༔ གསང་བའི་མཆོད་པ་དམ་པ་འབུལ༔ གསེར་དངུལ་ཟངས་ལྕགས་བཻཌཱུཪྻ༔ རིན་ཆེན་ལྔ་ཡི་མཆོད་པ་འབུལ༔ ཕྲིན་ལས་རྣམ་བཞི་ལྷུན་གྲུབ་ཅིང་༔ དགྲ་བགེགས་མ་ལུས་རྡུལ་དུ་རློག༔ ཨོཾ་མ་ཧཱ་ཨརྒྷཾ་སོགས་ཤཔྟ་རཱུ་པ་སོགས་མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་སརྦ་པཱུ་ཛ་ཧོཿ དེ་ནས་བསྟོད་པ་ནི༔ ཧཱུྃ༔ གསང་སྔགས་བསྟན་སྲུང་རྫུ་འཕྲུལ་ཅན༔ ཆོས་ཀྱི་དབྱིངས་ལས་གཟུགས་སྐུར་སྟོན༔ གདོད་ནས་ཀུན་བཟང་རོལ་པ་ལས༔ མ་རུངས་འདུལ་ཕྱིར་དྲག་པོའི་སྐུ༔ འཁོར་འདས་ཡོངས་ལ་དབང་བསྒྱུར་ཕྱིར༔ སྤྲུལ་དང་ཡང་སྤྲུལ་དཔག་ཡས་འགྱེད༔ སྣང་སྲིད་སྐད་ཅིག་དབང་བསྒྱུར་ཕྱིར༔ སྤྲུལ་པའི་མེ་ཁྱུང་དམར་པོ་ཆིབས༔ བསྟན་སྲུང་ཆེན་པོ་ཁྱོད་ལ་བསྟོད༔ དབང་དང་དྲག་པོའི་ཕྲིན་ལས་ལ༔ ཐོགས་མེད་བསྒྱུར་ཕྱིར་དམར་ནག་འབར༔ ཕྲིན་ལས་ལྷུན་གྲུབ་ཕྱག་བཞི་པ༔ སྣང་སྲིད་དབང་སྡུད་གྲི་གུག་དང་༔ ཁམས་གསུམ་ཁྲག་རོལ་ཐོད་ཁྲག་བསྣམས༔ མ་རིག་རྩད་གཅོད་ཤེས་རབ་མཚོན༔ བསྟན་དགྲའི་སྲོག་གི་ཙིཏྟ་བསྣམས༔ བསྟན་སྲུང་རྒྱལ་པོ་ཁྱོད་ལ་བསྟོད༔ ཡེ་ཤེས་རང་མདངས་མེ་འོད་ཀློང་༔ རབ་འཇིགས་དུར་ཁྲོད་ཆས་ཀྱིས་བརྒྱན༔ འཇིགས་བྱེད་དབང་གི་རྒྱལ་པོ་ཆེ༔ གནོད་སྦྱིན་ཆེན་པོའི་ཆོ་འབྲང་འཚལ༔ བསྟན་སྲུང་ཁྱོད་ལ་ཕྱག་འཚལ་བསྟོད༔ ཡིད་བཞིན་ནོར་ལ་དབང་མཛད་བདག༔ རྣམ་ཐོས་སྲས་ལ་ཕྱག་འཚལ་བསྟོད༔ སྣང་སྲིད་ཁམས་ལ་དབང་མཛད་པ༔ གཟའ་བདུད་རྒྱལ་པོའི་སྐུ་ལ་བསྟོད༔ གནས་ཡུལ་དུར་ཁྲོད་ཀུན་གྱི་བདག༔ སྙིང་འབྱིན་དམར་མོར་ཕྱག་འཚལ་བསྟོད༔ དགྲ་བགེགས་སྲོག་གི་གཤེད་མ་ཆེ༔ སྤྲུལ་འཁོར་ཡོངས་རྫོགས་ཚོགས་ལ་བསྟོད༔ ས་མ་ཡ༔ རྒྱ་རྒྱ་རྒྱ༔ འདི་ཉིད་བསྒྲུབ་པའི་གང་ཟག་རྣམས༔ ཕྲིན་ལས་ཐོགས་མེད་བར་ཆད་སེལ༔ འདོད་དོན་བསམ་བཞིན་འགྲུབ་འགྱུར་རོ༔ བུད་མེད་ཡེ་ཤེས་མཚོ་རྒྱལ་ངས༔ ཀུན་བཟང་པདྨའི་བཀའ་བཞིན་བྲིས༔ མ་འོངས་དོན་དུ་གཏེར་དུ་སྦས༔ མ་མོ་སྲིད་པའི་རྒྱལ་མོར་བཅོལ༔ ཐུབ་པར་སྲུངས་ཤིག་ས་མ་ཡ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ས་མ་ཡ༔ རྒྱ་རྒྱ་རྒྱ༔ རྣལ་འབྱོར་དབང་ཕྱུག་ནུས་ལྡན་རྡོ་རྗེ་རྩལ། །གར་དབང་བདུད་འཇོམས་རྡོ་རྗེའི་གཏེར་མའོ། །མཁས་ཆེད་ཡིག་བྲིས་བདག་ལ་བྱེད་བློ་མེད། །པདྨའི་བཀའ་བཞིན་རྣམ་དཀར་ཤོག་གུར་བསྒྱུར། །ཡི་གེའི་རིས་བྱེད་ཕུན་ཚོགས་བཀྲ་ཤིས་སོ། །དགེའོ། །བཀྲ་ཤིས། ཨྠིྀ།། །།