DJYD-KABUM-16-MA-056

First text in volume.Last text in volume.

Wylie title	bla ma drag po rta phur zung 'jug gi dril sgrub zab mo
Location	bdud 'joms rin po che bka' 'bum Volume 16, Text 56, Pages 569-571 (Folios 1a1 to 2a4)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bla ma drag po rta phur zung 'jug gi dril sgrub zab mo. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 569-571. Kalimpong: Dupjung Lama, 1979-1985.
Side notes	Recto: dril sgrub   Verso: mtsho skyes thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Sadhanas - Evocation Ritual - sgrub thabs
Cycle	ཟབ་ལམ་མཚོ་སྐྱེས་ཐུགས་ཐིག་ (zab lam mtsho skyes thugs thig)
Deity	Rta mgrin,\ Rdo rje phur pa
Colophon	First colophon: ཞེས་པའང་སྐལ་ལྡན་པདྨ་ཀློང་གྲོལ་གྱིས་བསྐུལ་བའི་རྐྱེན་ལས། འཇིགས་བྲལ་དཔའ་བོ་འགྲོ་འདུལ་གླིང་པས་ཐོལ་བྱུང་དུ་བྲིས་པའོ། Second colophon: ཛྙཱ་ནས་སོ༎
	First colophon: zhes pa'ang skal ldan pad+ma klong grol gyis bskul ba'i rkyen las/___'jigs bral dpa' bo 'gro 'dul gling pas thol byung du bris pa'o/ Second colophon: dz+nyA nas so//

Tibetan Text

[edit]

༄༅། །བླ་མ་དྲག་པོ་རྟ་ཕུར་ཟུང་འཇུག་གི་དྲིལ་སྒྲུབ་ཟབ་མོ་ཨྠིྀ༔ ཕྱི་ནང་བར་ཆད་དཔུང་ལས་རྣམ་རྒྱལ་ཏེ༔ མཐུ་རྩལ་ཡོན་ཏན་དངོས་གྲུབ་ཐོབ་འདོད་ན༔ རང་ཉིད་དབང་དྲག་རྟ་མཆོག་ཀཱི་ལར་བསྒྲུབ༔ ཨ༔ བློ་འདས་བརྗོད་བྲལ་སྟོང་དབྱིངས་ཀ་དག་ངང་༔ འགག་མེད་སྒྱུ་མ་སྙིང་རྗེ་ཆེན་པོའི་སྤྲིན༔ རིག་པ་རྒྱུ་ཡི་ཧཱུྃ་ཡིག་འཕྲོ་འདུ་ལས༔ བདག་ཉིད་དབང་དྲག་རྟ་མཆོག་ཀཱི་ལ་ཡ༔ སྨུག་ནག་དམར་མཐིང་དབུ་གསུམ་ཕྱག་དྲུག་པ༔ དང་པོའི་ཕྱག་གཉིས་རལ་གྲི་སྦྲུལ་ཞགས་གདེངས༔ གཟའ་ཀླུ་གདུག་ཅན་འབྱུང་པོ་ཕྱེ་མར་འཐག༔ བར་པས་རྡོ་རྗེ་ལྕགས་སྡིག་འབར་བ་འཛིན༔ རྒྱལ་བསེན་ཀླད་འགེམ་སྙིང་ཁྲག་ཧུབ་ཀྱིས་འདྲེན༔ ཐ་གཉིས་རི་རབ་ཕུར་བུ་འདྲིལ་ཞིང་འདེབས༔ དམ་སྲི་སྲི་གདོན་སྲོག་སྙིང་ཐལ་བར་འབྱིན༔ དབུ་གཙུག་རྟ་ཞལ་རྡོ་རྗེའི་དབྱངས་སུ་མཚེར༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ ཕག་མོ་མཐིང་ནག་གྲི་ཐོད་འཛིན་དང་སྦྱོར༔ ཞབས་གཉིས་རབ་བགྲད་པད་ཉིར་བདུད་བཞི་བརྫིས༔ ཁྲོ་གཏུམ་མི་བཟད་གར་དགུའི་ཉམས་འགྱུར་འབར༔ དུར་ཁྲོད་ཆས་རྫོགས་བསྐལ་མེའི་ཀློང་དུ་རོལ༔ སྤྱི་བོར་ཡེ་ཤེས་ཁྱུང་དམར་འཕུར་ལྡིང་གཡོ༔ རིགས་བདག་པདྨ་ཚེ་དཔག་མེད་ཡབ་ཡུམ༔ རོལ་རྩལ་རྩ་གསུམ་རྒྱལ་བའི་སྤྲིན་ཕུང་འཕྲོ༔ སྣང་གྲགས་དབང་དྲག་འབར་བའི་དཀྱིལ་འཁོར་ཆེ༔ གདོད་ནས་དམ་ཚིག་ཡེ་ཤེས་གཉིས་སུ་མེད༔ ཐུགས་དབུས་ཡེ་ཤེས་སེམས་དཔའ་རྡོ་རྗེའི་ལྟེར༔ ཏིང་འཛིན་སེམས་དཔའ་ཧཱུྃ་དམར་མཐའ་སྐོར་དུ༔ སྔགས་ཕྲེང་ལྕགས་སྲེག་མདོག་ཅན་སྒྲར་བཅས་འཁོར༔ དེ་ལས་འོད་ཟེར་ཚྭ་ཚྭ་འབར་ཞིང་འཁྲུགས༔ རང་ལུས་ནད་གདོན་སྡིག་སྒྲིབ་མ་ལུས་སྦྱང་༔ འཕགས་མཆོད་འགྲོ་བའི་སྒྲིབ་བསལ་ལོག་འདྲེན་བརླག༔ འཁོར་འདས་དྭངས་བཅུད་ནུས་མཐུ་འོད་དམར་ཚུལ༔ རབ་བསྡུས་བདག་ཐིམ་ཆེ་བའི་གཟི་བྱིན་བསྐྱེད༔ མི་ཤིགས་རྡོ་རྗེ་གསུམ་གྱི་ཕྱག་རྒྱར་སད༔ ཨོཾ་ཨཱཿཧཱུྃ༔ ཨ་རྩིག་ནི་རྩིག་ན་མོ་བྷ་ག་ཝ་ཏེ་ཧ་ཡ་གྲི་ཝ་བཛྲ་ཀཱི་ལི་ཀཱི་ལ་ཡ་སརྦ་བིགྷྞན་བཾ་ཧཱུྃ་ཕཊ༔ ཅེས་བཟླ་རིག་པ་གཏད་མེད་ངང་དུ་བཞག༔ ཡེ་ཡིན་པདྨ་ཁྲག་འཐུང་ཀཱི་ལ་ཡ༔ རང་བྱུང་གདོད་མའི་དབྱིངས་སུ་ལ་བཟླས་པས༔ གཉིས་སྣང་འགལ་རྐྱེན་གཡུལ་ལས་རབ་རྒྱལ་ངེས༔ ས་མ་ཡ་གུ་ཧྱ༔ ཞེས་པའང་སྐལ་ལྡན་པདྨ་ཀློང་གྲོལ་གྱིས་བསྐུལ་བའི་རྐྱེན་ལས། འཇིགས་བྲལ་དཔའ་བོ་འགྲོ་འདུལ་གླིང་པས་ཐོལ་བྱུང་དུ་བྲིས་པའོ།། ༎

༄༅། །སྐྱབས་སེམས་ནི། རང་རིག་དོན་གྱི་དབང་ཆེན་ཧེ་རུ་ཀ ། ཡེ་ཡིན་ལྷུན་གྲུབ་ངང་ནས་སྐྱབས་སུ་བཟུང་། །གཉིས་རྟོག་དུག་ལྔའི་རང་གཟུགས་གདོན་བགེགས་དཔུང་། །རང་གྲོལ་བདེ་ཆེན་ཀློང་དུ་སྒྲོལ་སེམས་བསྐྱེད། །བསྡུ་ལྡང་བསྔོ་སྨོན་ནི། སྣང་སྲིད་ལྷ་སྔགས་དག་པ་རབ་འབྱམས་ངང་། །ཆོས་ཉིད་བྱ་རྩོལ་བྲལ་བའི་ངང་དུ་ཨ། །རིག་རྩལ་མ་འགག་ཧེ་རུ་ཀ་ཡི་སྐུ། །མི་གཡོ་མི་ཤིགས་རྡོ་རྗེ་གསུམ་དུ་སད། །བདག་གིས་དབང་ཆེན་དྲག་པོ་ཀཱི་ལ་ཡའི། །རྣལ་འབྱོར་ཟབ་དོན་ལ་བརྩོན་དགེ་ཚོགས་ཀྱིས། །འགྲོ་ཀུན་ཡི་དམ་དྲག་པོའི་སྐུར་སྨིན་ནས། །བར་ཆད་བདུད་ལས་རྣམ་རྒྱལ་དཔལ་ཐོབ་ཤོག །ཛྙཱ་ནས་སོ༎ ༎