TTDL-ZABTER-14-PHA-005

Previous Text Back to Volume PageNext Text

Wylie title	chos nyid nam mkha'i klong mdzod las: zab lam 'pho ba'i gdams pa rang grol gsang lam:
Location	bdud 'joms gling pa zab gter Volume 14, Text 5, Pages 13-15 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las zab lam 'pho ba'i gdams pa rang grol gsang lam. In Sprul pa'i gter chen bdud 'joms gling pa'i zab gter gsang ba'i chos sde, Vol. 14: 13-15. Thimphu, Bhutan: Lama Kuenzang Wangdue, 2004.
Side notes	Recto: 'pho ba   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Transference of Consciousness - 'pho ba
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཆོས་ཉིད་ནམ་མཁའི་ཀློང་མཛོད་ལས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ།།
	zhes pa 'di yang khrag 'thung bdud 'joms rdo rje khro lod rtsal gyis chos nyid nam mkha'i klong mdzod las dag par phab pa'i yi ge pa ni phun tshogs bkra shis so/_/dge'o/_/dge'o/_/dge'o//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ ཟབ་ལམ་འཕོ་བའི་གདམས་པ་རང་གྲོལ་གསང་ལམ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ འཕོ་བ་རང་གྲོལ་གསང་ལམ་ནི༔ དད་བརྩོན་མོས་གུས་ལྡན་པ་ཡིས༔ སྐལ་ལྡན་སྐལ་བར་བསྔགས་པ་དེ༔ ཉམས་སུ་ལེན་ཀུན་ངེས་གྲོལ་བྱེད༔ ས་མ་ཡ༔ (བརྡ་ཡིག་) ཨེ་མ་ཧོཿ རང་སྣང་ལྷུན་གྲུབ་དོན་གྱི་འོག་མིན་མཁར༔ ཆགས་བྲལ་པདྨ་ཟླ་རྒྱས་གདན་སྟེང་དུ༔ རང་ལུས་མཁའ་སྤྱོད་གཙོ་མོ་རྣལ་འབྱོར་མ༔ དཀར་གསལ་མདངས་ལྡན་བཅུ་དྲུག་ལང་ཚོས་མཛེས༔ ཕྱག་གཡས་གྲི་གུག་གཡོན་པས་བྷན་ཐོད་འཛིན༔ སྣ་ཚོགས་རཏྣ་རུས་པའི་རྒྱན་གྱིས་སྤྲས༔ སྤྱན་གསུམ་མཁར་གཟིགས་དབུ་སྐྲས་སྐུ་རྒྱབ་ཁེབས༔ མཚན་དཔེས་རབ་འཁྱུད་ཞབས་གཉིས་དོར་སྟབས་མཛད༔ ཡེ་ཤེས་འཇའ་སྐུ་སྟོང་རའི་གུར་ཁྱིམ་དབུས༔ ཨ་ཝ་དྷུ་ཏི་མདའ་སྨྱུག་འབྲིང་པོ་ཙམ༔ ཕྱི་དཀར་ནང་དམར་བར་སྔོ་གསལ་འཚེར་སྣུམ༔ མར་སྣ་ལྟེ་བར་ཚིགས་ཀྱིས་འགགས་པ་ལས༔ ཡར་སྣ་བདེ་ཆེན་ཚངས་པའི་བུ་གར་ཕྱེས༔ ཁྲུ་གང་སྟེང་དུ་འཕགས་པའི་གནས་མཆོག་ཏུ༔ སྣ་ཚོགས་པདྨ་ཟླ་རྒྱས་ལྟེ་བ་རུ༔ རྩ་བའི་བླ་མ་མགོན་པོ་འོད་དཔག་མེད༔ དམར་གསལ་ཉི་མ་འབུམ་བརྡལ་འོད་ཕུང་འབར༔ ཞབས་གཉིས་སྐྱིལ་ཀྲུང་ཕྱག་གཉིས་མཉམ་བཞག་མཛད༔ ཞི་འཛུམ་མཚན་དཔེ་རབ་རྫོགས་གཞོན་ཚུལ་མཛེས༔ ཆོས་གོས་རྣམ་གསུམ་གསོལ་ཞིང་ལྷུང་བཟེད་བསྣམས༔ མཐའ་བསྐོར་སངས་རྒྱས་བྱང་སེམས་རིག་འཛིན་ཚོགས༔ ཉི་མ་དང་ནི་འོད་ཟེར་ཇི་བཞིན་པར༔ ཡེ་ཤེས་སྒྱུ་འཕྲུལ་རོལ་པའི་འཁོར་ལོར་བསྒོམ༔ སྙིང་གར་པདྨ་ཟླ་རྒྱས་ལྟེ་བ་རུ༔ རྣམ་ཤེས་ངོ་བོ་དྭངས་མའི་ཐིག་ལེ་ནི༔ གསལ་འཚེར་སྣུམ་དྲིལ་མ་སར་སྒོ་ང་ཙམ༔ དབུ་མའི་ལམ་ནས་དཔག་ཆེན་མདའ་ལྟར་འཕང་༔ སྣང་བ་མཐའ་ཡས་ཐུགས་དང་དབྱེར་མེད་བསྲེ༔ ཕཊ༔ ཕཊ༔ ཕཊ༔ དེ་ནས་གསོལ་བ་འདེབས་ཤིང་ཡང་ཡང་བསྲེ་འཕོ་བྱ་བ་འདི་ཡང་མཆོག༔ ཨེ་མ་ཧོཿ བླ་མ་དཀོན་མཆོག་གསུམ་དང་རྩ་བ་གསུམ༔ སྐུ་གསུམ་ཡོངས་འདུས་མགོན་པོ་འོད་དཔག་མེད༔ མཁྱེན་བརྩེ་ནུས་པའི་བདག་ཉིད་རིགས་གསུམ་མགོན༔ བརྒྱུད་གསུམ་ཆུ་བོ་གཅིག་འདྲེས་པདྨ་འབྱུང་༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ ཟབ་ལམ་འཕོ་བ་འབྱོངས་པར་བྱིན་གྱིས་རློབས༔ ཕཊ་ཕཊ་ཕཊ༔ ཡང་ཡང་སྦྱང་བའི་མཐར་སྨོན་ལམ་གདབ་པ་ནི༔ དུས་གསུམ་གཤེགས་པའི་རྒྱལ་བ་སྲས་བཅས་ཀྱི༔ ཐུགས་རྗེ་བྱིན་རླབས་ནུས་སྟོབས་བདེན་པའི་མཐུས༔ བདག་དང་འབྲེལ་ཐོགས་སེམས་ཅན་མ་ལུས་པ༔ ཚེ་འདིའི་སྣང་བ་ནུབ་པར་གྱུར་མ་ཐག༔ རྣམ་དག་དབུགས་ཆེན་འབྱིན་པའི་ཞིང་ཁམས་སུ༔ དབང་བསྒྱུར་འཁོར་བ་དོང་སྤྲུགས་དཔལ་ཐོབ་ཤོག༔ ལན་གསུམ་བརྗོད་མཐར༔ ལམ་སྦྱོང་དུས་སུ་འདི་ལྟར་བཞག་པར་བྱ༔ ཧོཿ རིགས་བདག་བླ་མ་སངས་རྒྱས་བྱང་སེམས་ཀུན༔ འོད་དམར་རྣམ་པར་དབུ་མའི་ལམ་ནས་བབ༔ སྙིང་དབུས་མི་ཤིགས་ཐིག་ལེར་རོ་གཅིག་འདྲེས༔ སྒོ་གསུམ་རྡོ་རྗེ་གསུམ་དང་དག་མཉམ་རོལ༔ ཞེས་བཞག༔ ལས་ལ་སྦྱར་ཚེ་ལྟ་བས་རྒྱས་འདེབས་ནི༔ ཧོཿ མ་དག་གཟུང་འཛིན་ལུགས་འབྱུང་སྣང་སེམས་ཆོས༔ ཡུལ་མེད་ཟང་ཐལ་ཆེན་པོར་ཧར་སངས་ཏེ༔ འཕོ་བྱ་འཕོ་བྱེད་བྲལ་བའི་བྱ་བཏང་གིས༔ ཉག་གཅིག་བྱང་ཆུབ་ཆེན་པོར་འུབ་ཆུབ་བོ༔ འདི་ལྟར་རྟག་ཏུ་ཉམས་ལེན་པའི༔ སྐལ་ལྡན་ལས་ཅན་སྐྱེས་བུ་ཀུན༔ སྤྲུལ་པའི་སྐུ་རུ་སངས་རྒྱས་ཏེ༔ གཞན་དོན་རླབས་ཆེན་འགྲུབ་གྱུར་རོ༔ བདག་འདྲ་པདྨ་འབྱུང་གནས་ངས༔ གདུལ་བྱ་རྗེས་སུ་བཟུང་བའི་ཕྱིར༔ ཡང་ཟབ་མ་བསྒོམ་འཕོ་བའི་ལམ༔ སྙིང་གི་བུ་ལ་གཏད་དོ་རྒྱ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཆོས་ཉིད་ནམ་མཁའི་ཀློང་མཛོད་ལས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ།། །།