TTDL-ZABTER-06-CHA-011

Previous Text Back to Volume PageNext Text

Wylie title	zab gsang mkha' 'gro'i snying thig las: bde gshegs gsang ba 'dus pa'i gsang sgrub chu gter 'dus pa'i smad las 'khor ba yongs sgrol:
Location	bdud 'joms gling pa zab gter Volume 6, Text 11, Pages 121-133 (Folios 1a1 to 7a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bde gshegs gsang ba 'dus pa'i gsang sgrub chu gter 'dus pa'i smad las 'khor ba yongs sgrol. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: 121-133. Thimphu, Bhutan: Lama Kuenzang Wangdue, 2004.
Side notes	Recto: smad las   Verso: bdud 'joms bka' brgyad chu 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Practices - las tshogs
Cycle	བཀའ་བརྒྱད་བདེ་གཤེགས་ཆུ་གཏེར་འདུས་པ་ (bka' brgyad bde gshegs chu gter 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad
Colophon	ཞེས་པ་འདི་ཉིད་སྐྱེས་ཕྲེང་དུ་མར་སྨོན་ལམ་ལས་ཀྱིས་འབྲེལ་བའི་སྐྱེས་བུ་ཀློང་ཆེན་རྡོ་རྗེས་རིན་ཆེན་གཉིས་པའི་སྐྱེས་བཅས་ཡང་ཡང་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཤོག་སེར་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་རིགས་སྲས་དྲི་མེད་འོད་ཟེར་གྱིས་བགྱིས་པའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di nyid skyes phreng du mar smon lam las kyis 'brel ba'i skyes bu klong chen rdo rjes rin chen gnyis pa'i skyes bcas yang yang bskul ngor khrag 'thung bdud 'joms rdo rjes shog ser las zhal bshus te dag par phab pa'i yi ge pa ni rigs sras dri med 'od zer gyis bgyis pa'o/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བདེ་གཤེགས་གསང་བ་འདུས་པའི་གསང་སྒྲུབ་ཆུ་གཏེར་འདུས་པའི་སྨད་ལས་འཁོར་བ་ཡོངས་སྒྲོལ་བཞུགས་སོ༔

ཐྂ༎༔ (བརྡ་ཡིག་) ན་མོ་གུ་རུ་པདྨ་ཀ་ར་ཡེ༔ ཆོས་རྣམས་ཀུན་གྱི་འབྱུང་གནས་མཆོག༔ དབྱིངས་དང་ཡེ་ཤེས་དབྱེར་མེད་པ༔ བདེ་གཤེགས་འདུས་པའི་དཀྱིལ་འཁོར་ལ༔ རང་བྱུང་ངང་ནས་ཕྱག་བགྱིའོ༔ གཉིས་སྣང་འཁྲུལ་པའི་བག་ཆགས་མཐུ༔ འཐས་པའི་གཟུང་འཛིན་དགྲ་གདོན་ལྡང་༔ སྒྲོལ་བྱེད་རྡོ་རྗེ་ཕུར་པ་ཆེ༔ བདེ་གཤེགས་འདུས་པའི་ལྷ་རུ་ཤར༔ ཀུན་སྣང་ལྷ་ཡི་ཕྱག་རྒྱར་བཞེངས༔ སྣང་སྲིད་དཀྱིལ་འཁོར་གསུམ་དུ་བསྒྲུབ༔ རྣམ་ཐར་ཨེ་ཡི་མཁའ་ཀློང་ཡངས༔ བདག་རྟོག་རཱུ་ཏྲའི་མིང་གཟུགས་བཀོད༔ འབར་བའི་ཕྱག་རྒྱའི་ཐུན་མཚོན་ཆར༔ ཕབ་ནས་འཁོར་བ་འོད་སྐུར་སྦྱོར༔ ས་མ་ཡ༔ དང་པོ་གསེར་སྐྱེམས་བཤམས་ལ༔ རཾ་ཡཾ་ཁཾ༔ གསེར་སྐྱེམས་གཏོར་མ་ཟག་པ་མེད་པ་ཡེ་ཤེས་ཀྱི་བདུད་རྩིའི་རོལ་པ་ཆེན་པོར་གྱུར༔ ཨོཾ་ཨཱཿཧཱུྃ༔ ཧཱུྃ༔ སྐུ་གསུམ་བརྒྱུད་གསུམ་རིག་འཛིན་བླ་མ་དང་༔ ཡི་དམ་ཞི་ཁྲོ་བཀའ་དགོངས་ཕུར་གསུམ་དང་༔ གནས་གསུམ་དཔའ་བོ་མཁའ་འགྲོ་རྒྱ་མཚོའི་ཚོགས༔ ཡེ་ཤེས་འཇིག་རྟེན་སྲུང་མ་ཐམས་ཅད་ཀུན༔ བདུད་རྩི་གསེར་སྐྱེམས་མཆོད་པ་འདི་བཞེས་ལ༔ རྣལ་འབྱོར་བདག་གི་དཔུང་གྲོགས་གཉན་པོ་མཛོད༔ ཞིང་བཅུ་དགྲ་ལ་བཀའ་ཡིས་ཆད་པ་ཆོད༔ ཐུགས་དམ་དུས་ལ་བབ་བོ་ས་མ་ཡ༔ དེ་ནས་གཟུ་དཔང་ནི༔ ཧཱུྃ༔ ཆོས་ཉིད་ཞི་བའི་ངང་ལས་མ་གཡོས་ཀྱང་༔ ལྷུན་གྲུབ་སྒྱུ་འཕྲུལ་ཞི་དང་ཁྲོ་བོར་ཤར༔ ཡེ་ཤེས་ལྷ་ཚོགས་ཐུགས་དམ་གནད་ནས་བསྐུལ༔ བདག་ཅག་རྗེས་འཇུག་ཐུགས་རྗེས་མི་འདོར་བར༔ གཟུ་དང་དཔང་བཙུག་བཞུགས་ཤིང་མཁྱེན་པར་མཛོད༔ བདག་ནི་ཡང་དག་དགེ་ལ་རབ་ཞུགས་ཤིང་༔ མི་དགེ་སྡིག་པའི་ལས་རྣམས་རྒྱབ་ཏུ་བོར༔ ཐར་པ་བྱང་ཆུབ་སྒྲུབ་ལ་བརྩོན་བྱས་ཀྱང་༔ ཉེས་བྱེད་དགྲ་དང་བགེགས་ཀྱིས་སྒྲུབ་མ་སྟེར༔ མི་དགེ་སྡིག་པའི་གནས་སུ་ཐབས་ཀྱིས་སྦྱོར༔ ཐར་པ་རྣམ་མཁྱེན་འབྲས་བུ་རླུང་ལ་བསྐུར༔ མཐའ་མེད་འཁོར་བའི་འདམ་དུ་བྱིང་བར་བྱེད༔ སྐྱབས་མཆོག་ཐུགས་རྗེ་ཆེ་རྣམས་ཐུགས་མ་གཡེལ༔ གཟུ་དཔང་ཤན་འབྱེད་རྣལ་འབྱོར་ར་མདར་བཟློག༔ དམ་ཉམས་དགྲ་ལ་བཀའ་ཡིས་ཆད་པ་ཆོད༔ དྲག་པོའི་ཕྲིན་ལས་མྱུར་དུ་འགྲུབ་པར་མཛོད༔ ཐུགས་དམ་དུས་ལ་བབ་བོ་ས་མ་ཡ༔ དེ་ནས་མཁྱེན་དཔང་ནི༔ ཧཱུྃ༔ སངས་རྒྱས་ཆོས་དང་དགེ་འདུན་དཀོན་མཆོག་གསུམ༔ སྐུ་གསུམ་རྩ་གསུམ་བསྒྲུབ་པ་བཀའ་བརྒྱད་ལྷ༔ བདག་ཅག་རྗེས་འཇུག་ཐུགས་རྗེས་འདོར་རམ་ཅི༔ རང་ཉིད་མ་ཉེས་རང་ཁར་འདུག་པ་ལ༔ ཉེས་བྱེད་དགྲ་དང་བགེགས་ཀྱིས་འཚེ་བྱུང་ནས༔ བྱང་ཆུབ་སྒྲུབ་པའི་ལམ་ལ་བར་དུ་གཅོད༔ སྡུག་བསྔལ་མཚོ་རྡོལ་དུག་ལྔ་མེ་བཞིན་སྦར༔ ཡོན་མཆོད་དགོན་གནས་དཀྲུག་ཅིང་ཕུང་ལ་སྦྱོར༔ སྒྲུབ་པོ་ཁས་དམན་ཁྲེལ་མེད་ལང་དུ་ཤོར༔ སངས་རྒྱས་བསྟན་ཤིག་དཀོན་མཆོག་དབུ་འཕང་སྨད༔ རྒྱུ་འབྲས་ཁྱད་བསད་གསང་སྔགས་རྫུན་དུ་འཁྱེར༔ ཡེ་ཤེས་སྤྱན་ལྡན་མཁྱེན་པའི་དགོངས་མཛོད་ལ༔ ཞིང་བཅུ་ཚང་ཞིང་ཉམས་པ་བདུན་ལྡན་དགྲ༔ འདི་ལ་བཀའ་ཡི་ཆད་པ་དྲག་ཕོབ་ལ༔ སྐད་ཅིག་མྱུར་དུ་བསྒྲལ་བར་མ་བྱས་ན༔ ཁྱེད་ཅག་ཡེ་སངས་རྒྱས་པ་དོན་མེད་དེ༔ དེ་བས་བརྒྱུད་འཛིན་ཡལ་བར་མི་དོར་བར༔ བརྔན་དུ་ཤ་ཁྲག་དམར་གཏོར་ཁྲག་སྐྱེམས་བཞེས༔ དགྲ་བགེགས་མྱུར་སྒྲོལ་ཐལ་བའི་རྡུལ་བཞིན་རློག༔ ཐུགས་བསྐྱེད་དམ་བཅའ་མ་འདོར་ས་མ་ཡ༔ དེ་ནས་བཙོན་དམིགས་བསྐྱེད་པ་ནི༔ ཨེ་ཛཿརང་མདུན་དུག་གི་མུན་པ་ནག་པོའི་ཀློང་དུ་ཨེ་ཡིག་དམར་ནག་ཡོངས་སུ་གྱུར་པ་ལས༔ གནམ་ལྕགས་ལས་གྲུབ་པའི་བཙོན་ཁང་ཁ་དོག་ལ་གཏིང་ཡངས་པ༔ ཕྱི་གྲུ་གསུམ་དམར་ནག་ཏུ་འདུག་ཅིང་༔ ཕྱི་ན་ཞེ་སྡང་གི་མེ་འབར་བ༔ ནང་ན་གཏི་མུག་གི་མུན་པ་འཐིབ་ཅིང་ཞབས་ན་འདོད་ཆགས་ཀྱི་ཁྲག་མཚོ་ཁོལ་བ༔ ཟུར་ན་ང་རྒྱལ་གྱི་བྲག་རི་རྙིལ་བ༔ ཕྱི་ནང་ཀུན་ཏུ་ཕྲག་དོག་གི་རླུང་དམར་འཚུབ་ཅིང་༔ ནང་དུ་ཚུད་པ་ཙམ་གྱིས་ཕྱི་རུ་ཐར་བའི་ཡུལ་མེད་པ༔ ཤིན་ཏུ་སྐྱི་གཡའ་ཞིང་ཡ་ང་བའི་ནང་དུ་ཡི་གེ་ནྲྀཿདང་ཏྲིཿཡོངས་སུ་གྱུར་པ་ལས༔ དམ་ཉམས་པའི་དགྲ་བགེགས་གནོད་བྱེད་ཐམས་ཅད་འདུས་པའི་ངོ་བོ་རཱུ་པ་ཁ་ངུ་བ༔ མིག་ཤི་མིག༔ ལག་པ་མྱ་ངན་གྱི་ཕྱག་རྒྱ་ཅན༔ རྐང་ལག་ལྕགས་སུ་བཅུག་ཅིང་བུ་ག་དགུ་ནས་ཁྲག་འཛག་པ་མདོག་སྔོ་ལ་མདངས་ཉམས་པ༔ ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པ་ཞིག་ཏུ་གྱུར༔ དེའི་སྙིང་གའི་ནྲྀཿདང་ཏྲིཿལས་འོད་འཕྲོས་པས་དགྲ་བགེགས་གནོད་བྱེད་ཐམས་ཅད་ཉ་རྒྱས་ཉ་ཚོགས་སྡུད་པ་བཞིན་དུ་བསྡུས་ནས་ལིངྒ་ལ་ཐིམ་པར་གྱུར༔ བདག་མདུན་ལས་སྤྲུལ་པའི་ཕོ་ཉ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཅན་དཔག་ཏུ་མེད་པ་འཕྲོས་ནས་དགྲ་བགེགས་གནོད་བྱེད་ཐམས་ཅད་བཀུག་ནས་ལིངྒ་ལ་བསྟིམ་པར་བསམ༔ དེ་ནས་འགུགས་པ་ནི༔ ན་མོ༔ དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་༔ སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ བཀའ་གསང་སྔགས་རིག་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་གྱི་བཀའ་བདེན་པ་དང་༔ ལྷ་ལས་ཁྱད་པར་དུ་འཇམ་དཔལ་སྐུ༔ པདྨ་གསུང༔ ཡང་དག་ཐུགས༔ ཆེ་མཆོག་ཡོན་ཏན༔ ཕུར་པ་ཕྲིན་ལས༔ མ་མོ་རྦོད་གཏོང་༔ རིག་འཛིན་སློབ་དཔོན༔ འཇིག་རྟེན་མཆོད་བསྟོད༔ དམོད་པ་དྲག་སྔགས༔ དཔལ་གྱི་བཀའ་སྡོད་བསྟན་སྲུང་དམ་ཅན་རྒྱ་མཚོའི་བཀའ་བདེན་པས༔ རྣལ་འབྱོར་པ་བདག་ཅག་དཔོན་སློབ་ཡོན་མཆོད་མི་ནོར་འཁོར་དང་བཅས་པ་རྣམས་ལ་ཉི་མ་ཕྱོགས་བཞི་མཚམས་བརྒྱད་སྟེང་འོག་བར་གསུམ་ནས་གནོད་ཅིང་འཚེ་བར་བྱེད་པའི་དགྲ་བགེགས་གནོད་བྱེད་ཐམས་ཅད་གཟུགས་ལིངྒ་འདི་ལ་ཁུག་ཅིག༔ བསྟིམ་ཅིག༔ བཛྲ་ཨཾ་ཀུ་ཤ་ཛ༔ རཏྣ་པཱ་ཤ་ཧཱུྃ༔ པདྨ་སྥོ་ཊ་བཾ༔ ཀརྨ་གྷཎྜེ་ ཧོཿ དེ་ལྟར་འགུགས་རྟགས་མ་བྱུང་བར་དུ་བརྗོད་པར་བྱའོ༔ དེ་ནས་འགུགས་པའི་ལས་ནི༔ ཧཱུྃ༔ དཔལ་ཆེན་སྒྲུབ་སྡེ་དགུ་ཡི་དཀྱིལ་འཁོར་ལྷ༔ ཐུགས་དམ་བསྐུལ་ལོ་དམ་ཚིག་དུས་ལ་བབ༔ གཟུགས་ཅན་གཟུགས་མེད་དགྲ་གདོན་བགེགས་ཚོགས་རྣམས༔ མིང་གཟུགས་ལིངྒ་འདི་ལ་མྱུར་དུ་ཁུག༔ རྩ་སྔགས་མཐར༔ དགྲ་བགེགས་གནོད་བྱེད་ཨཾ་ཀུ་ཤ་ཡ་ཛ་ཛ༔ དེ་ནས་དབྱེ་བའི་ལས་ནི༔ ཧཱུྃ༔ དཔལ་ཆེན་སྒྲུབ་སྡེ་དགུ་ཡི་དཀྱིལ་འཁོར་ལྷ༔ ཐུགས་དམ་བསྐུལ་ལོ་དམ་ཚིག་དུས་ལ་བབ༔ བདག་ལ་སྡང་བའི་དགྲ་བོ་སྡིག་ཅན་འདི༔ མགོན་སྐྱོབ་བྱེད་པའི་ལྷ་སྲུང་ཀུན་དང་ཕྲོལ༔ རྩ་སྔགས་མཐར༔ ཨ་ནྲྀ་ཏྲག་རཀྴ་མཱ་ར་ཡ་ཕྱེས་ཕྱེས༔ མ་མ་ཏྲག་རཀྴ་མཱ་ར་ཡ་ཕྱེས་ཕྱེས༔ དགྲ་བགེགས་སྐྱོབ་བྱེད་ཀྱི་ལྷ་དང་ཕྱེས་ཕྱེས༔ བཛྲ་པྲ་ཝེ་ཤ་ཡཱ་ཕཊ༔ དེ་ནས་སྨྱོ་རུ་གཞུག་པ་ནི༔ ཧཱུྃ༔ དཔལ་ཆེན་སྒྲུབ་སྡེ་དགུ་ཡི་དཀྱིལ་འཁོར་ལྷ༔ ཐུགས་དམ་བསྐུལ་ལོ་དམ་ཚིག་དུས་ལ་བབ༔ བདག་ལ་སྡང་བའི་དགྲ་བོ་སྡིག་ཅན་འདི༔ སྨྱོ་འབོག་བརྒྱལ་ནས་ཞ་གྲུམ་རེངས་སུ་ཆུག༔ རྩ་སྔགས་མཐར༔ དགྲ་བགེགས་ཛྭ་ལ་པ་ཡ་ཛྭ་ལ་པ་ཡ་ཐུམ་རི་ལི་ལི་ཨེ་ཧུར་ཐུམ་ཛ་མཱ་ར་ཡ་རྦད་སོད༔ དེ་ནས་བྱད་དུ་བཅུག་པ་ནི༔ ཧཱུྃ༔ དཔལ་ཆེན་སྒྲུབ་སྡེ་དགུ་ཡི་དཀྱིལ་འཁོར་ལྷ༔ ཐུགས་དམ་བསྐུལ་ལོ་དམ་ཚིག་དུས་ལ་བབ༔ བདག་ལ་སྡང་བའི་དགྲ་བོའི་སྡིག་ཅན་འདིའི༔ ལུས་ངག་ཡིད་གསུམ་གྲུ་གུ་ཐུལ་དུ་ཆིངས༔ རྩ་སྔགས་མཐར༔ དགྲ་བགེགས་ནྲྀ་ཏྲི་ཨ་པ་ན་ཡེ་ཧཱུྃ་བྷྱོ་ཧཱུྃ་ཕཊ༔ ཕུར་པའི་གུད་སྦས་གཞན་དུ་ཤེས་སོ༔ དེ་ནས་ཐུན་གདབ་ནི༔ དང་པོ་ཕུར་ཐུན་ཐོགས་ལ༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ ཕུར་པའི་དབལ་ཟོར་དགྲ་དང་བགེགས་ལ་ཕོབ༔ དུག་གསུམ་རྟོག་པ་སྐུ་གསུམ་ངང་དུ་སྒྲོལ༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ གཉིས་པ་ཡུངས་ཐུན་གདབ་པ་ནི༔ ཧཱུྃ་བྷྱོཿཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང༔ ཉུང་ཐུན་དབལ་ཟོར་དགྲ་དང་བགེགས་ལ་ཕོབ༔ ཉོན་མོངས་བརྒྱད་ཁྲིའི་འཁྲུལ་འཁོར་དབྱིངས་སུ་ཤིག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ གསུམ་པ་ཁྲག་ཐུན་གདབ་པ་ནི༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ ཁྲག་ཐུན་དམར་པོ་དགྲ་དང་བགེགས་ལ་ཕོབ༔ མ་རིག་རྒྱུ་རྐྱེན་ཆོས་ཉིད་དབྱིངས་སུ་ཤིག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ བཞི་པ་མཚེ་ཐུན་གདབ་པ་ནི༔ ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ མཚེ་མདའ་དྲག་པོ་དགྲ་དང་བགེགས་ལ་ཕོབ༔ གཟུང་འཛིན་རྟོག་པ་འོད་གསལ་ངང་དུ་སོད༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ ལྔ་པ་དུག་ཐུན་གདབ་པ་ནི༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང༔ དུག་ཐུན་དྲག་པོ་དགྲ་དང་བགེགས་ལ་ཕོབ༔ དུག་ལྔ་ཡེ་ཤེས་ལྔ་ཡི་ཀློང་དུ་ཤིག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ དྲུག་པ་མཚོན་ཐུན་གདབ་པ་ནི༔ ཧཱུྃ་བྷྱོཿཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ མཚོན་ཐུན་དྲག་པོ་དགྲ་གདོན་བགེགས་ལ་ཕོབ༔ བདག་རྟོག་འཁྲུལ་པའི་འཁོར་ལོ་དབྱིངས་སུ་ཤིག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛཿབདུན་པ་མདའ་ཐུན་གདབ་པ་ནི༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་བོ་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ མདའ་ཐུན་དྲག་པོ་དགྲ་དང་བགེགས་ལ་ཕོབ༔ འཁོར་བའི་སྲོག་སྙིང་ཐལ་བའི་རྡུལ་བཞིན་རློག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ བརྒྱད་པ་རྡོ་ཐུན་གདབ་པ་ནི༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ རྡོ་ཐུན་དྲག་པོ་དགྲ་དང་བགེགས་ལ་ཕོབ༔ སྲིད་པའི་རི་བོ་ཆོམ་ལ་རྡུལ་དུ་རློག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ དགུ་པ་གཏོར་ཐུན་གདབ་པ་ནི༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ བདེ་གཤེགས་སྒྲུབ་སྡེ་དགུ་ཡི་མཐུ་རྩལ་བྱུང་༔ གཏོར་ཐུན་དྲག་པོ་དགྲ་དང་བགེགས་ལ་ཕོབ༔ མིང་ཙམ་མེད་པར་ཐལ་བའི་རྡུལ་བཞིན་རློག༔ དྲག་སྔགས་མཐར༔ དགྲ་བགེགས་གདུག་པ་ཅན་གྱི་བླ་ཚེ་སྲོག་གི་སྟེང་དུ་མཱ་ར་ཡ་ཕོབ་ཛ་ཕོབ་ཛ༔ དེ་ནས་གཏུན་དུ་བརྡུང་བ་ནི༔ ཧཱུྃ་བྷྱོ༔ དབྱིངས་ལས་རང་བྱུང་ཡེ་ཤེས་གྲུབ་པའི་ལྷ༔ ཐབས་ཤེས་ཟུང་འཇུག་བདེ་ཆེན་མཁའ་གསང་དུ༔ གཟུང་འཛིན་རཱུ་ཏྲའི་ཕུང་ཁམས་དབྱིངས་སུ་ཤིག༔ དུག་གསུམ་འཇོམས་བྱེད་ཤ་ཁྲག་རུས་པར་བཅས༔ དུང་ཆེན་སྣོད་དུ་རང་བྱུང་རྫས་སུ་ཤར༔ རྩ་སྔགས་མཐར༔ དགྲ་བགེགས་ཏ་ཐ་ཡ་ཏ་ཐ་ཡ་ཧཱུྃ་ཕཊ༔ དེ་ནས་ཞལ་དུ་བསྟབ་པ་ནི༔ ཧཱུྃ༔ དཔལ་ཆེན་ཆེ་མཆོག་ལྷ་ཚོགས་ཞལ་ཕྱེས་ཤིག༔ དགྲ་བགེགས་ཤ་ཁྲག་ཕུང་ཁམས་སྐྱེ་མཆེད་བཅས༔ ཞལ་དུ་བསྟབ་བོ་བཞེས་ཤིག་ཁ་རཾ་ཁཱ་ཧི༔ རྣམ་ཤེས་ཀ་དག་ཆོས་དབྱིངས་ཀློང་དུ་ཨ༔ རྩ་སྔགས་མཐར༔ དགྲ་བགེགས་ཀྱི་མ་ཧཱ་མཱཾ་ས་ལ་ཁཱ་ཧི༔ རཀྟ་ལ་ཁཱ་ཧི༔ ཙིཏྟ་ལ་ཁཱ་ཧི༔ ཀེཾ་ནི་རི་ཏི་ལ་ཁཱ་ཧི༔ བ་སུ་ཏ་ལ་ཁཱ་ཧི༔ གདབ་ཕུར་འབེན་གསུམ་གནད་ལྡན་པའི༔ ངང་ནས་ཚེ་ཁྲུས་གནས་གསུམ་གྱི༔ དགོངས་པས་ཞིང་བཅུ་ཚར་བཅད་ནས༔ འཚེང་བ་ལྔ་ལྡན་འབྱུང་བ་དང་༔ སྦྱོར་སྒྲོལ་གཉིས་ལ་རང་དབང་ཐོབ༔ དགྲ་བགེགས་གནོད་བྱེད་བསྒྲལ་ནས་ཀྱང་༔ རབ་འབྱམས་ཕྲིན་ལས་ཐོགས་མེད་འགྲུབ༔ མཐུ་ཡི་གྲགས་པས་ས་སྟེང་ཁྱབ༔ གཟུང་འཛིན་དགྲ་གདོན་བགེགས་ཀྱི་ཚོགས༔ རང་སྣང་འཁྲུལ་པའི་བག་ཆགས་ལས༔ དངོས་པོར་གྲུབ་པ་རྡུལ་ཙམ་མེད༔ དེ་གསོད་མཚོན་ནི་བྱང་ཆུབ་སེམས༔ ཤེས་རབ་ཆེན་པོའི་རྣམ་པར་ཤར༔ སྒྲོལ་བྱ་སྒྲོལ་བྱེད་མཁན་པོ་སྟོང་༔ བདག་མེད་རྟོགས་པའི་ངང་མཐོང་ན༔ ཕྱི་ནང་གསང་བའི་བར་ཆད་ཞི༔ བཀྲ་ཤིས་དགེ་ལེགས་དཔལ་ཡོན་ཐོབ༔ བཀའ་འདི་བརྡའ་ཡི་རིས་སུ་ཐོབས༔ བདུན་བརྒྱ་ཉེར་ལྔའི་སྲུང་མར་གཉེར༔ ད་ལྟ་སྤེལ་བའི་གནས་མིན་པས༔ ཁམས་ཀྱི་རྡོ་རྗེའི་བྲག་ལ་སྦོས༔ མ་འོངས་སྙིགས་མ་ལྔ་བདོའི་དུས༔ འབྲོག་བན་དངོས་སུ་བོད་དུ་འབྱུང་༔ ཁྲག་འཐུང་བདུད་འཇོམས་ཁྲོ་ལོད་རྩལ༔ སྐྱེས་བུ་དེ་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཉིད་སྐྱེས་ཕྲེང་དུ་མར་སྨོན་ལམ་ལས་ཀྱིས་འབྲེལ་བའི་སྐྱེས་བུ་ཀློང་ཆེན་རྡོ་རྗེས་རིན་ཆེན་གཉིས་པའི་སྐྱེས་བཅས་ཡང་ཡང་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཤོག་སེར་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་རིགས་སྲས་དྲི་མེད་འོད་ཟེར་གྱིས་བགྱིས་པའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།