TTDL-ZABTER-06-CHA-013

Previous Text Back to Volume PageNext Text

Wylie title	zab gsang mkha' 'gro'i snying thig las: bka' brgyad chu gter 'dus pa'i cha lag bsgral las gab pa don bdun spu gri ka ma la:
Location	bdud 'joms gling pa zab gter Volume 6, Text 13, Pages 139-143 (Folios 1a1 to 3a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bka' brgyad chu gter 'dus pa'i cha lag bsgral las gab pa don bdun spu gri ka ma la. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: 139-143. Thimphu, Bhutan: Lama Kuenzang Wangdue, 2004.
Side notes	Recto: bsgral las   Verso: bdud 'joms bka' brgyad chu 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Practices - las tshogs
Cycle	བཀའ་བརྒྱད་བདེ་གཤེགས་ཆུ་གཏེར་འདུས་པ་ (bka' brgyad bde gshegs chu gter 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad
Colophon	ཞེས་པ་འདི་ཡང་སྨོན་ལམ་ལས་ཀྱིས་འབྲེལ་བའི་ཆོས་བདག་རིག་པའི་རྡོ་རྗེས་ཡང་ཡང་བསྐུལ་ངོར་བདག་འདྲ་དཔའ་བོ་བདུད་འཇོམས་གླིང་པས་ཟབ་གསང་མཁའ་འགྲོའི་གསང་བརྡ་དག་པར་ཕབ་པའི་ཡི་གེ་པ་ནི་ལུང་ཟིན་ཕུན་ཚོགས་བཀྲ་ཤིས་སོ། །སརྦ་མངྒ་ལཾ།།
	zhes pa 'di yang smon lam las kyis 'brel ba'i chos bdag rig pa'i rdo rjes yang yang bskul ngor bdag 'dra dpa' bo bdud 'joms gling pas zab gsang mkha' 'gro'i gsang brda dag par phab pa'i yi ge pa ni lung zin phun tshogs bkra shis so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བཀའ་བརྒྱད་ཆུ་གཏེར་འདུས་པའི་ཆ་ལག་བསྒྲལ་ལས་གབ་པ་དོན་བདུན་སྤུ་གྲི་ཀ་མ་ལ་ཞེས་བྱ་བ་བཞུགས་སོ༔ ན་མོ་གུ་རུ་ཤྲཱི་ཀྲོ་ཏ་རཱ་ཛ་ཡེ༔ (བརྡ་ཡིག་) ཨོ་རྒྱན་རིག་འཛིན་རྡོ་རྗེ་གཤོག་རྒོད་ངས༔ མ་འོངས་སྐལ་པ་བཟང་པོའི་བགོ་སྐལ་དུ༔ ཤིན་ཏུ་ཟབ་པ་སྒྲུབ་སྡེ་དགུ་ཡི་དཔལ༔ རྨད་བྱུང་ཆུ་གཏེར་འདུས་པ་འཆད་བགྱིའོ༔ ས་མ་ཡ༔ བདུད་དང་དམ་སྲི་གདུག་ལྔ་འཇོམས་པའི་ཕྱིར༔ བསྒྲལ་ལས་འཁོར་བ་ཡོངས་སྒྲོལ་མཚོན་འཁོར་ལོའི༔ ཆ་ལག་གབ་པ་དོན་བདུན་རྣོ་མདེའུ༔ སྤུ་གྲི་ཀ་མ་ལ་ཞེས་བྱ་བ་བསྟན༔ ས་མ་ཡ༔ འདི་ལ་སྤྱི་དོན་རྣམ་པ་བདུན༔ དང་པོ་ཕུར་བསྐུལ་བྱ་བ་ནི༔ ཧཱུྃ༔ དམིགས་མེད་མཁའ་ལྟར་དག་པའི་དབྱིངས་ཉིད་ལས༔ ཁྲོ་རྒྱལ་ཡོངས་འདུས་དཔལ་ཆེན་ཧེ་རུ་ཀ༔ ཤིན་ཏུ་མི་བཟད་གཏུམ་ཆེན་རྔམས་པའི་སྐུ༔ གདུག་པ་དམ་སྲི་འདུལ་བའི་ལས་ལ་བཞེངས༔ ཧཱུྃ༔ ང་ནི་ཆེ་མཆོག་ཧེ་རུ་ཀ༔ ཡང་དག་འཇམ་དཔལ་གཤིན་རྗེ་གཤེད་དབང་ཆེན་རྡོ་རྗེ་གཞོན་ནུ་སྟེ་བླ་མེད་རིག་འཛིན་ཐོད་པ་རྩལ་དྲེགས་པ་ཀུན་འདུལ་ཏེ་སྟོབས་ལྡན་ནག་པོའི་སྐུ་དཔལ་གྱི་བཀའ་སྲུང་སྟེ་ཞེས་ཁ་བསྒྱུར།ལས་མཛད་སྲས་དང་སྤྲུལ་པ་འབུམ༔ ཀུན་ཀྱང་འཇིགས་གཟུགས་རྔམས་པའི་སྐུ༔ གཡས་ཀྱི་ཕྱག་ན་ལྕགས་ཕུར་འདྲིལ༔ གཡོན་གྱིས་འབར་བའི་ལྕགས་ཀྱུ་འཛིན༔ བསྒྲལ་འདྲེན་ལྕེ་སྤྱང་ཕོ་ཉ་འཁྲིགས༔ གནོད་བྱེད་བདུད་དང་དམ་སྲི་ཡི༔ སྙིང་ནས་ལྕགས་ཀྱུ་འབར་བས་ཟུངས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཀཱི་ལ་ཡ་ཡི་ལས་མཛོད་ཅིག༔ ཨོཾ་བཛྲ་མ་ཧཱ་ཀྲོ་ཏ་པདྨ་ཀྲོ་ཏི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྴ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་སརྦ་ཤ་ཏྲུཾ་མཱ་ར་ཡ་ཕཊ༔ གཉིས་པ་མཚོན་ལས་བྱ་བ་ནི༔ ཧཱུྃ༔ དཔལ་ཆེན་ཆེ་མཆོག་ཧེ་རུ་ཀའི༔ ཡང་དག་འཇམ་དཔལ་དབང་ཆེན་རྡོ་རྗེ་གཞོན་ནུ་ཡི་བླ་མེད་རིག་འཛིན་ཐོད་ཕྲེང་རྩལ་དྲེགས་པ་ཀུན་འདུལ་གྱི་སྟོབས་ལྡན་ནག་པོ་ཡི་ལས་མཛད་བཀའ་ཡི་སྲུང་མ་ཡི་སྐུ་ལས་སྤྲུལ་པའི་ཕོ་ཉ་ནི༔ ལས་མཛད་ཤན་པ་འབུམ་འབུམ་འགྱེད༔ ཕྱག་ན་རྣོ་མཉེན་སྤུ་གྲི་བསྣམས༔ སྒྲོལ་བྱེད་མཚོན་ཆ་འབར་བ་ཡིས༔ དགྲ་བགེགས་དམ་སྲིའི་ཕུང་པོ་གཏུབས༔ མིང་ཙམ་མེད་པའི་ཕྲིན་ལས་མཛོད༔ སརྦ་རཱུ་དྲ་ཨ་མུ་ཀ་མཱ་ར་ཡ་ཕཊ༔ གསུམ་པ་དམར་སྦྲེང་འབུལ་བ་ནི༔ ཧཱུྃ༔ ལྕང་ལོ་བཅས་པའི་བྷནྡྷ་རུ༔ རཱུ་དྲ་བསྒྲལ་བའི་ཁྲག་གིས་བཀང་༔ ཆེ་མཆོག་ཡོན་ཏན་ལྷ་ལ་བསྟབས༔ ཡང་དག་ཐུགས་ཀྱི་འཇམ་དཔལ་སྐུ་ཡི་པདྨ་གསུང་གི་ཕུར་པ་ཕྲིན་ལས་མ་མོ་རྦོད་གཏོང་རིག་འཛིན་སློབ་དཔོན་འཇིག་རྟེན་མཆོད་བསྟོད་དམོད་པ་དྲག་སྔགས་དཔལ་གྱི་བཀའ་སྲུང་འཁོར་བ་དབྱིངས་སུ་སྟོང་གྱུར་ཅིག༔ ཨོཾ་མ་ཧཱ་རཀྟ་ཁཱ་ཧི༔ བཞི་པ་བསྟབས་ལས་བྱ་བ་ནི༔ ཧཱུྃ༔ ཆེ་མཆོག་ཡོན་ཏན་ལྷ་ཚོགས་ཀྱི༔ ཡང་དག་ཐུགས་ཀྱི་འཇམ་དཔལ་སྐུ་ཡི་པདྨ་གསུང་གི་ཕུར་པ་ཕྲིན་ལས་མ་མོ་རྦོད་གཏོང་རིག་འཛིན་སློབ་དཔོན་འཇིག་རྟེན་མཆོད་བསྟོད་དམོད་པ་དྲག་སྔགས་དཔལ་གྱི་བཀའ་སྲུང་ཆོས་ཉིད་ཡངས་པའི་ཞལ་ཧོམ་དུ༔ རཱུ་དྲ་བསྒྲལ་བའི་ཕུང་ཁམས་བསྟབས༔ འགགས་མེད་ཟང་ཐལ་མགྲིན་པར་དྲོངས༔ འཁྲུལ་བྲལ་ཆོས་སྐུའི་ཀློང་དུ་བྲུབ༔ ཨོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ མ་ཧཱ་མཱཾ་ས་རཀྟ་ཙིཏྟ་བ་སུ་ཏ་གོ་རོ་ཙ་ན་ཀིཾ་ནི་རི་ཏི་ལ་ཁ་རཾ་ཁཱ་ཧི༔ ལྔ་པ་བཅོལ་གཏད་བྱ་བ་ནི༔ ཧཱུྃ༔ ཆེ་མཆོག་ཡོན་ཏན་ལྷ་ཚོགས་དང་༔ ཡང་དག་ཐུགས་ཀྱི་འཇམ་དཔལ་སྐུ་ཡི་པདྨ་གསུང་གི་ཕུར་པ་ཕྲིན་ལས་མ་མོ་རྦོད་གཏོང་རིག་འཛིན་སློབ་དཔོན་འཇིག་རྟེན་མཆོད་བསྟོད་དམོད་པ་དྲག་སྔགས་དཔལ་གྱི་བཀའ་སྲུང་བཀའ་ཉན་ཕོ་ཉའི་ཚོགས་བཅས་ལ༔ རཱུ་དྲ་བསྒྲལ་བའི་ཤ་རུས་དང་༔ ཕུང་ཁམས་སྐྱེ་མཆེད་དོན་སྙིང་དང་༔ ཉེ་བ་ཕུ་ནུ་འཁོར་འབངས་བཅས༔ བཅོལ་ལོ་གཏད་དོ་གཉེར་དུ་བཞེས༔ འཁྲུལ་མི་ཤེས་པའི་ས་ཐོབ་ཤོག༔ དྲུག་པ་གཏོར་མ་འབུལ་བ་ནི༔ ཧཱུྃ༔ དམ་རྫས་རྨད་བྱུང་གཏོར་ཆེན་པོ༔ འདོད་ཡོན་ལྔ་ཡིས་བརྒྱན་པ་འདི༔ དཔལ་ཆེན་ཆེ་མཆོག་ལྷ་ལ་འབུལ༔ ཡང་དག་འཇམ་དཔལ་དབང་ཆེན་ཕུར་པའི་བླ་མེད་རིག་འཛིན་མཆོད་བསྟོད་དྲག་སྔགས་བཀའ་སྲུང་ཡོན་ཏན་ལྷ་ཚོགས་དགྱེས་བསྐང་ནས༔ ཐུགས་ཀྱི་སྐུ་ཡི་གསུང་གི་ཕྲིན་ལས་རྦོད་གཏོང་སློབ་དཔོན་དྲེགས་འདུལ་སྟོབས་ལྡན་ཕོ་ཉའི་མངོན་སྤྱོད་ཕྲིན་ལས་འགྲུབ་པར་མཛོད༔ བདུན་པ་བྷྱོ་གདབ་བྱ་བ་ནི༔ ཧཱུྃ༔ ང་ནི་བཟློག་བྱེད་རྒྱལ་པོ་སྟེ༔ སྟོང་གསུམ་སྲིད་པའི་སྲོག་ལ་དབང་༔ རྟེན་འབྲེལ་ཐབས་དང་ཤེས་རབ་ཀྱིས༔ སྦྱོར་བ་ངན་པ་བཟློག་པར་བྱེད༔ བྷྱོ༔ ནམ་མཁའ་ལྷ་ཡི་བྱད་སྣ་ཡང་༔ ཉམས་པའི་དགྲ་བོ་འདི་ལ་བྷྱོ༔ བར་སྣང་སྡེ་བརྒྱད་བྱད་ཟོར་རྣམས༔ ཉམས་པའི༴ ས་གཞི་ཀླུ་ཡི་བྱད་ཕུར་ཡང་༔ ཉམས་པའི༴ བན་གྱི་དམོད་སྦྱོར་ངན་པ་ཡང་༔ ཉམས་པའི༴ བོན་གྱི་ལོག་སྦྱོར་བརྩམས་པ་ཡང་༔ ཉམས་པའི༴ ཕྲ་མེན་མུ་སྟེགས་བསམ་སྦྱོར་ངན༔ ཉམས་པའི༴ འབྱུང་ལྔའི་བརྡ་བསྣོལ་འཁྲུགས་པ་ཡང་༔ ཉམས་པའི༴ ཐན་ལྟས་ངན་པ་མཐའ་དག་ཀུན༔ ཉམས་པའི༴ བྷྱོ་བྷྱོ་སྡང་བའི་དགྲ་ལ་བྷྱོ༔ བྷྱོ་བྷྱོ་གནོད་པའི་བགེགས་ལ་བྷྱོ༔ བྷྱོ་བྷྱོ་བྱད་མའི་སྟེང་དུ་བྷྱོ༔ དྲག་རོལ་བྱ་ཞིང་ཐལ་མོ་རྡེབ༔ རལ་པ་སྤྲུག་ལ་དམོད་པ་བོར༔ གནད་དེས་དགྲ་དཔུང་རྡུལ་བརླག་འགྱུར༔ ཐེ་ཚོམ་མེད་དོ་ས་མ་ཡ༔ རྒྱལ་དབང་པདྨ་སཾ་བྷ་ཝའི༔ ཐུགས་བཅུད་མན་ངག་རྨད་བྱུང་བ༔ འབྲོག་མི་ལོ་ཙྭ་ཁྱོད་ལ་སྦྱིན༔ ད་དུང་མ་སྤེལ་བརྡ་ལ་བསྟིམ༔ འགྱུར་མེད་རྡོ་རྗེའི་བྲག་ལ་སྦོས༔ མ་འོངས་སྙིགས་མ་ལྔ་ཡི་དུས༔ དཔལ་ཆེན་རྡོ་རྗེ་ཁྲོ་བོ་ལོད༔ བདུད་འདུལ་མི་ཡི་ཟོལ་ཚུལ་འཛིན༔ གང་གི་བགོ་སྐལ་དམ་པ་སྟེ༔ ཀློང་ཆེན་རྡོ་རྗེའི་ཐུགས་བརྒྱུད་ནས༔ དྲག་སྔགས་ནུས་ལྡན་རྡོ་རྗེར་བསྟིམས༔ བསྟན་པའི་དཔལ་དུ་ཨེ་མ་ ཧོཿ ས་མ་ཡ༔ རྒྱ་རྒྱ་རྒྱ༔ དྲག་པོ་སྲོག་བདག་སྡེ་ལྔ་དང་༔ ཞིང་སྐྱོང་མ་མོ་ལྔ་བཅུ་ཡིས༔ ཐུབ་པར་སྲུངས་ཤིག་ཨྠིྀ་རྒྱ༔ ཞིང་པདྨ་འོད་དུ་ཙིཏྟར་རྒྱ༔ གཏེར་རྒྱ༔ སྙིང་པོ་རྒྱ༔ སྦས་རྒྱ༔ གབ་རྒྱ༔ གཏད་རྒྱ༔ གུ་ཧྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་སྨོན་ལམ་ལས་ཀྱིས་འབྲེལ་བའི་ཆོས་བདག་རིག་པའི་རྡོ་རྗེས་ཡང་ཡང་བསྐུལ་ངོར་བདག་འདྲ་དཔའ་བོ་བདུད་འཇོམས་གླིང་པས་ཟབ་གསང་མཁའ་འགྲོའི་གསང་བརྡ་དག་པར་ཕབ་པའི་ཡི་གེ་པ་ནི་ལུང་ཟིན་ཕུན་ཚོགས་བཀྲ་ཤིས་སོ། །སརྦ་མངྒ་ལཾ།། །།