TTDL-ZABTER-12-NA-042

Previous Text Back to Volume PageNext Text

Wylie title	chos nyid nam mkha'i klong mdzod las: mgon po tshe dpag med kyi phyag rgya 'chi med bum bzang:
Location	bdud 'joms gling pa zab gter Volume 12, Text 42, Pages 245-249 (Folios 1a1 to 3a1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las mgon po tshe dpag med kyi phyag rgya 'chi med bum bzang. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 245-249. Thimphu, Bhutan: Lama Kuenzang Wangdue, 2004.
Side notes	Recto: sgrub dbang   Verso: bdud 'joms tshe dpag med
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur  ·  Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Tshe dpag med
Colophon	ཞེས་པ་འདིའང་རིག་འཛིན་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་ཡེ་ཤེས་ཉི་མ་མཐའ་རྒྱས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di'ang rig 'dzin bdud 'joms rdo rjes chos nyid nam mkha'i mdzod las bsgyur ba'i yi ge pa ni ye shes nyi ma mtha' rgyas so/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ མགོན་པོ་ཚེ་དཔག་མེད་ཀྱི་ཕྱག་རྒྱ་འཆི་མེད་བུམ་བཟང་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ཨཱཿ གཟུང་དང་འཛིན་པས་བསྡུས་པ་ཡིས༔ ཆོས་ཀུན་ཆོས་ཉིད་མཁའ་རུ་ཞིག༔ སྒྱུ་མའི་འཕྲུལ་སྣང་བཀོད་པ་ལྟར༔ རང་སྣང་དོན་གྱི་འོག་མིན་དབུས༔ བདེ་ཆེན་འབར་བའི་གཞལ་ཡས་སུ༔ རྨ་བྱ་བརྒྱད་ཀྱིས་བཏེགས་པའི་ཁྲིར༔ པདྨ་ཉི་མའི་གདན་སྟེང་དུ༔ རང་ཉིད་བཅོམ་ལྡན་ཚེ་དཔག་མེད༔ དམར་གསལ་ཞི་འཛུམ་མཚན་དཔེས་སྤྲས༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ཕྱག་གཉིས་མཉམ་བཞག་ཚེ་བུམ་བསྣམས༔ བཅུ་དྲུག་གཞོན་ནུའི་ལང་ཚོས་མཛེས༔ རིན་པོ་ཆེ་ཡི་དབུ་རྒྱན་དང་༔ མགུལ་རྒྱན་ཕྲེང་བ་དོ་ཤལ་དང་༔ སྙན་ཆ་གདུ་བུ་རྒྱན་དུ་འཆང་༔ ཅོད་པན་སྟོད་གཡོགས་སྨད་དཀྲིས་དང་༔ ཤམ་ཐབས་སྐུ་རེག་ལ་སོགས་པའི༔ ལོངས་སྤྱོད་རྫོགས་པའི་ཆས་རྣམས་རྫོགས༔ ཡུམ་མཆོག་གསང་བ་ཡེ་ཤེས་མ༔ དམར་གསལ་མདའ་དར་ཚེ་བུམ་བསྣམས༔ ཡབ་ལ་འཁྲིལ་ཞིང་གཉིས་མེད་སྦྱོར༔ གཞོན་ཚུལ་མཚན་དཔེའི་ལང་ཚོ་ཅན༔ དར་དང་རཏྣའི་ཆས་ཀྱིས་བརྒྱན༔ ཡེ་ཤེས་འཇའ་འོད་ཐིག་ལེའི་ཀློང་༔ འཇའ་ལུས་སྒྱུ་མའི་ཕུང་པོར་གསལ༔ སྤྱི་བོར་ཨོཾ་དང་མགྲིན་པར་ཨཱཿཐུགས་ཀར་ཨོཾ་དང་ཧྲཱིཿཡིག་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམས༔ དེ་ནས་སྤྱན་འདྲེན་པ་ནི༔ ཧཱུྃ་ཧྲཱིཿརང་སྣང་དོན་གྱི་འོག་མིན་ཞིང་༔ ལྷུན་གྲུབ་བདེ་ཆེན་གཞལ་ཡས་ནས༔ འཆི་མེད་མགོན་པོ་ཚེ་མཐའ་ཡས༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཛྲ་ས་མ་ཡ་ཛ་ཛ༔ དེ་ནས་བཞུགས་གསོལ་ཕྱག་འཚལ་ལ༔ ཧྲཱིཿཡེ་ཤེས་དབྱིངས་ནས་དྲངས་པའི་ལྷ༔ དམ་ཚིག་རྡོ་རྗེའི་དཀྱིལ་འཁོར་དུ༔ གཉིས་མེད་རོལ་པར་བརྟན་བཞུགས་གསོལ༔ རྣམ་གསུམ་དད་པས་ཕྱག་འཚལ་ལོ༔ ཏིཥྛ་བཛྲ་ན་མོ་ན་མ་ ཧོཿ དེ་ནས་མཆོད་པ་འབུལ་བ་ནི༔ ཧཱུྃ༔ ཁམས་གསུམ་སྣང་ཞིང་སྲིད་པའི་ཆོས༔ ཕྱི་ནང་གསང་བའི་མཆོད་སྤྲིན་དུ༔ ཡིད་ཀྱིས་སྤྲུལ་ཏེ་བློ་ཡིས་བླངས༔ གུས་པས་འབུལ་ལོ་བཞེས་ཏེ་རོལ༔ ཨོཾ་བཛྲ་ཨརྒྷཾ༴ ནས་ཉེར་སྤྱོད་འདོད་ཡོན་སྨན་གཏོར་རཀྟའི་སྔགས་ཀྱིས་ཕུལ༔ དེ་ནས་བསྟོད་པ་ལ༔ ཧཱུྃ་ཧྲཱིཿམི་འགྱུར་མི་ཤིགས་ཐིག་ལེའི་མཁར༔ མི་གནས་ཡེ་ཤེས་གསང་བ་མཆོག༔ འཆི་མེད་མགོན་པོ་ཚེ་དཔག་མེད༔ རིགས་དང་དཀྱིལ་འཁོར་ཐམས་ཅད་ཀྱི༔ ཁྱབ་བདག་མཆོག་ལ་ཕྱག་འཚལ་ལོ༔ དེ་ནས་འཛབ་སྔགས་བཟླ་བ་ལ༔ ཧྲཱིཿའཆི་མེད་མགོན་པོའི་ཐུགས་ཀ་རུ༔ པདྨ་དང་ནི་ཟླ་རྒྱས་སྟེང་༔ རཱ་གའི་བུམ་པ་ཚོན་གང་བའི༔ ལྟེ་བར་ཧྲཱིཿཡིག་དམར་པོ་ལ༔ སྔགས་ཕྲེང་འཁོར་བའི་འོད་ཟེར་གྱིས༔ དུས་གསུམ་རྒྱལ་བ་སྲས་བཅས་དང་༔ སྣོད་བཅུད་འབྱུང་བའི་ཚེ་དཔལ་བཅུད༔ བསྡུས་ཏེ་སྲོག་གི་སྙིང་པོར་བསྟིམ༔ འཆི་མེད་རིག་འཛིན་འགྲུབ་པར་བསྒོམ༔ ཨོཾ་ཨ་མི་དྷེ་ཝ་ཨ་ཡུ་སིདྡྷི་ཧཱུྃ་ཧྲཱིཿབསྒྲུབ་དང་ལས་སྦྱོར་དམིགས་པས་ཕྱེས༔ དེ་ནས་དབང་མཆོག་བསྐུར་བ་ལ༔ བུམ་པ་སྐུ་དང་བདུད་རྩི་གསུང་༔ ཚེ་རིལ་ཐུགས་ལ་ཚེ་བུམ་ནི༔ བཞི་པའི་དབང་སྟེ་ཚང་བར་བྱ༔ སློབ་མ་གྲལ་འཁོད་ཁྲུས་བྱ་ཞིང་༔ བགེགས་བསྐྲད་བསྲུང་བའི་འཁོར་ལོ་བསྒོམ༔ སྐྱབས་སེམས་ཕོག་སྟེ་མཎྜལ་ཕུལ༔ དེ་ནས་གསོལ་བ་གདབ་པ་ལ༔ ཀྱེ༔ བླ་མ་མགོན་པོ་ཚེ་མཐའ་ཡས༔ བདག་ནི་སྲོག་གི་འཇིགས་པ་ལ༔ སྐྲག་སྟེ་འཆི་མེད་ཚེ་བསྒྲུབ་བྱ༔ སྨིན་བྱེད་དབང་མཆོག་དམ་པ་སྩོལ༔ ལན་གསུམ༔ དེ་ནས་བླ་མས༔ ཀྱཻ་ཧོ་སྐལ་ལྡན་རིགས་ཀྱི་བུ༔ དམ་ཚིག་སྲོག་གི་གཏའ་རུ་ཟུངས༔ སྒོ་གསུམ་རྡོ་རྗེའི་གྲོང་འཇུག་པའི༔ གདམས་པ་ཟབ་མོའི་དབང་བསྐུར་བྱ༔ དེ་ནས་བུམ་པ་ཐོགས་ལ༔ ཧཱུྃ༔ བུམ་པ་ལྷུན་གྲུབ་གཞལ་ཡས་ཁང་༔ འཆི་མེད་བདུད་རྩི་བཅུད་དུ་འཁྱིལ༔ སྐལ་ལྡན་བུ་ལ་དབང་བསྐུར་བས༔ རྡོ་རྗེའི་སྐུ་ཡི་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བྷནྡྷ་བདུད་རྩི་ཐོགས་ལ༔ ཧྲཱིཿཆོས་དབྱིངས་ཡངས་པའི་བྷནྡྷ་རུ༔ རྡོ་རྗེའི་གསུང་བཅུད་བདུད་རྩི་འདི༔ སྐལ་ལྡན་བུ་ལ་དབང་བསྐུར་བས༔ རྡོ་རྗེའི་གསུང་གི་དབང་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་ཚེ་རིལ་གཏད་ལ༔ ཧྲཱིཿརབ་འབྱམས་རྒྱལ་བའི་ཚེ་བཅུད་དང་༔ འབྱུང་བའི་བཅུད་བསྡུས་རིལ་བུ་འདི༔ སྐལ་ལྡན་བུ་ལ་གཏད་པ་ཡིས༔ རྡོ་རྗེའི་ཐུགས་ཀྱི་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཨཱཿདེ་ནས་ཚེ་བུམ་གཏད་ལ༔ ཧྲཱིཿའཆི་མེད་མགོན་པོའི་ཡེ་ཤེས་དང་༔ ཡོན་ཏན་ཕྲིན་ལས་མ་ལུས་པ༔ ཡོངས་རྫོགས་ཚེ་ཡི་བུམ་པ་འདི༔ སྐལ་ལྡན་བུ་ལ་གཏད་པ་ཡིས༔ མཚན་མ་ཚིག་བྲལ་དབང་ཐོབ་སྟེ༔ འཆི་མེད་རྡོ་རྗེའི་སྲོག་འགྲུབ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཏྲཱཾ༔ དེ་ལྟར་ཚེ་ཡི་དབང་ཐོབ་ནས༔ སྒྲུབ་ལ་བརྩོན་པའི་སྐྱེས་བུ་རྣམས༔ འཆི་བ་མེད་པའི་བཅུད་ལེན་ཏེ༔ བདེ་ཆེན་ཞིང་གི་དཔལ་ཐོབ་འགྱུར༔ ཞིང་སྐྱོང་ཀུན་དགའ་གཞོན་ནུས་སྲུངས༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཨྠིྀ༔ ཞེས་པ་འདིའང་རིག་འཛིན་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་ཡེ་ཤེས་ཉི་མ་མཐའ་རྒྱས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།