DJYD-KABUM-17-TSA-022

Previous Text Back to Volume PageNext Text

Wylie title	shan dmar nang sgrub kyi cha lag sgab 'dre mnan pa'i man ngag
Location	bdud 'joms rin po che'i bka' 'bum Volume 17, Text 22, Pages 309-314 (Folios 1a1 to 3b6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Shan dmar nang sgrub kyi cha lag sgab 'dre mnan pa'i man ngag. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 17: 309-314. Kalimpong: Dupjung Lama, 1979-1985.
Side notes	Recto: mnan pa   Verso: bdud 'joms shan pa
More details More details
Genre	Activity Practices - las tshogs
Colophon	།ཞེས་པའང་ཉེ་བར་མཁོ་བའི་ཡན་ལག་ཏུ་འཇིགས་བྲལ་ཡེ་ཤེས་རྡོ་རྗེས་ཚད་ལྡན་གྱི་གཞུང་ལ་བརྟེན་ནས་འཇུག་པ་བདེ་བའི་གསལ་བྱེད་དུ་སྦྱར་བ་ཛ་ཡནྟུ།།
	zhes pa'ang nye bar mkho ba'i yan lag tu 'jigs bral ye shes rdo rjes tshad ldan gyi gzhung la brten nas 'jug pa bde ba'i gsal byed du sbyar ba dza yan+tu//

Tibetan Text

[edit]

༄༅། །ཤན་དམར་ནང་སྒྲུབ་ཀྱི་ཆ་ལག་སྒབ་འདྲེ་མནན་པའི་མན་ངག་བཞུགས་སོ། །ན་མོ་པདྨ་མ་ཧཱ་ཀྲོ་དྷ་ཡ། དེའང་དམ་ཚིག་དང་ལྡན་ཅིང་ཡི་དམ་གྱི་བསྙེན་པ་སྔོན་དུ་ཐེམས་པའི་སྔགས་པས། གནོད་སྦྱིན་གཏེར་བདག་ཆེན་པོ་སྒྲུབ་པ་དང་ལས་ལ་སྦྱོར་བའི་སྔ་རོལ་དུ་གེགས་བྱེད་དམ་སྲི་མནན་པ་ཤིན་ཏུ་གལ་ཆེ་བས། དེའི་ཚུལ་བཤད་པ་ལ། སྦྱོར་བ་དུག་ཤོག་གཙང་མ་ཁ་རླངས་དང་ལག་དྲིས་མ་གོས་པ་བྲེ་ཞབས་ཙམ་པར་ར་ཁྲག་དང་སྣག་ཚ་བསྲེས་པས་དམ་སྲི་སྤུན་བཞི་ལས་བླ་རྐུན་བྱིས་པའི་གཟུགས། བསེ་རག་རི་བོང་གི་མགོ། གོད་འདྲེ་དོམ་གྱི་མགོ། སྲིན་མོ་མི་མོའི་གཟུགས་རྣམས་མགོ་རུབ་བཞི་ཚོམས་སུ་བྲིས་པ་མགུལ་དང་ཡན་ལག་ལྕགས་སྒྲོག་གིས་བཅིངས་པའི་ཡན་ལག་བཞིར། ཛཿཧཱུཾ་བཾ་ ཧོཿ མགོ་ལ་ཏྲིག་ནན། སྙིང་གར་ཛ་ཁ་སྤྲོད་ཀྱི་བར་དུ་ཏྲི། སྲོག་ཡིག་སྟེང་ནས་ཡིག་མགོ་ཕྱིར་བསྟན་གཡས་བསྐོར་གྱིས་ལྟོ་བའི་ནང་དུ། བྱིས་པའི་གཟུགས་ཅན་གྱི་ལྟོ་བར། མི་ནཾ་ཀུ་རུ་དུ་ཏྲི་ཛཿ ཀཱ་ཡ་ཤ་ཏྲི་གནོད་བྱེད་འབྱུང་པོ་སྟྭ་བྷ་ཡ་ནན༔ ཧུར་ཐུཾ་ཛཿམཱ་ར་ཡ་རྦད་ནན༔ ཞེས་ཡིག་མཇུག་ནང་དུ་བཅུག་སྟེ་བྲིས་པ་དང་། དེ་བཞིན་རི་བོང་མགོ་ཅན་ལ། བསེ་རག་ཤན་ཏི་དུ་ཛཿ དོམ་མགོ་ཅན་ལ། གོད་འདྲེ་ཙཀ་ཤ་ཛ༔ མི་མོའི་གཟུགས་ལ། བསེན་མོ་རུ་ཏྲི་ཛ༔ རེ་རེ་བཞིན་གྱི་མཐར། ཀཱ་ཡ་ཤ་ཏྲི༴ སོགས་གཟིར་མནན་གྱི་སྔགས་གོང་ལྟར་བྲི། ཐམས་ཅད་ཀྱི་ཕྱི་ནས་ཛ་ [1b] ཁྲམ་གྱིས་བསྐོར། སྦྱོང་ཁྲུས་ཀྱིས་དག་པར་བྱས་པ་ཚོན་སྐུད་དང་ཁྱི་རའི་སྤུ་སྐུར་ཕྱིར་ལོག་ཏུ་བཀལ་བས་མཐའ་ནས་བཅིངས་པ་ལྕགས་སླང་ངམ་བྲུབ་ཁུང་དུ་བཅུག །གཟིར་མནན་གྱི་རྫས་ཀེ་ཤང་། ཡུངས་དཀར་ནག །ལྕགས་ཟངས་རག་རྡོའི་ཕྱེ་རྣམས་བསྲེས་པའི་སྐམ་ཐུན་དང་། དུག་སྣ་བཏབ་པའི་ཁྲག་སྟེ་རློན་ཐུན་ཀྱང་བཤམ། རོ་གཡམ་གྱི་ངོས་གཅིག་ལ་རྡོ་རྗེ་རྒྱ་གྲམ་དང་། ངོས་གཅིག་ལ་རི་གླིང་བྲིས་པ། ཚོན་སྐུད་སྔོ་དམར། ཤི་སྐྲའི་སྐུད་པ། ཕུང་རེའི་ཚལ་བུ། སཱཙྪ་རྙིང་པར་གང་རིགས། མནན་སྣོད་རི་བོང་གི་ཐོད་པ་སྐྱོན་མེད་སོགས་འོག་ཏུ་དགོས་པའི་ཡོ་བྱད་རྣམས་ཉེར་བསྡོག་བྱས་ལ། དངོས་གཞི་རང་ཉིད་ཡི་དམ་གྱི་གསལ་སྣང་བརྟན་པོ་ལ་གནས་པའི་ངང་ནས། གསེར་སྐྱེམས་བཤམས་པ། རཾ་ཡཾ་ཁཾ། ཨོཾ་ཨཱཿཧཱུྃ་གིས་བྱིན་བརླབ། ཧོ་དགོངས་སུ་གསོལ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་དང་། མདོ་སྔགས་ཐེག་རིམ་རྒྱུད་སྡེ་བཞིའི་ཡི་དམ་ཞི་ཁྲོའི་ལྷ་ཚོགས། དམ་པ་ཆོས་སྐྱོང་བའི་སྲུང་མ་ཕོ་རྒྱུད་མོ་རྒྱུད་སྤྱི་དང་། ཁྱད་པར་ཁམས་གསུམ་དབང་མཛད་གནོད་སྦྱིན་གཏེར་གྱི་བདག་པོ་ཆེན་པོ་ནོར་ལྷ་བྱེ་བའི་ཚོགས་དང་བཅས་པ་རྣམས་ལ་གསེར་སྐྱེམས་བདུད་རྩིའི་ཕུད་ཀྱི་མཆོད་པ་འདི་འབུལ་ལོ། །དགྱེས་པར་བཞེས་ལ་རིག་འཛིན་སྔགས་འཆང་བདག་གི་སྒྲུབ་པ་ལ་བར་དུ་གཅོད་ [2a] ཅིང་། ཚེ་ནོར་ལོངས་སྤྱོད་བསོད་ནམས་དབང་ཐང་ལ་འཁུ་བའི་དམ་སྲི་འབྱུང་པོ་མནན་ཅིང་འཆིང་བར་བྱ་ཡི། ཁྱེད་རྣམས་ཡེ་ཤེས་ཀྱི་སྤྱན་ཕྱེས། ལེགས་ཉེས་ཀྱི་སྟངས་ཆོད། བདེན་རྫུན་གྱི་ཤན་ཕྱེས་ལ། བར་གཅོད་དམ་སྲི་འདུལ་བའི་ར་མདའ་མ་གཡེལ་བར་ཕྲིན་ལས་གཉན་པོ་སྒྲུབ་པའི་སྡོང་གྲོགས་མཛད་དུ་གསོལ། ཅེས་གསེར་སྐྱེམས་དབུལ། དམིགས་བྱ་བསྐྱེད་པ་ནི། ཨེ་ལས་བྱུང་བའི་གནམ་ལྕགས་ཀྱི་ཁང་སྒྲོམ་དྲག་པོའི་བཙོན་ཁང་འཇིགས་ཤིང་སྐྱི་གཡའ་བ། ནད་དང་དུག་གི་རླངས་པ་སྔོ་དམར་དུ་འཁྲིགས་ཤིང་མཚོན་ཆའི་ཆར་འབེབས་པ། མུན་ཁང་རབ་ཏུ་གཏིབས་པའི་དབུས་ན་ཏྲི་ལས་གནོད་བྱེད་བསེ་རག་ལུས་གཅེར་བུ་རིད་པ། ཡན་ལག་ལྕགས་སྒྲོག་གིས་བསྡམས་པ། སྨྲེ་ངག་གི་འོ་དོད་སྒྲོགས་ཤིང་ཤིན་ཏུ་ཉམ་ཐག་པའི་རྣམ་པ་ཅན་དུ་གྱུར། བདག་མདུན་གྱི་ཐུགས་ལས་འགུགས་འཆིང་སྡོམ་མྱོས་ཀྱི་ཕོ་ཉ་ཉི་ཟེར་གྱི་རྡུལ་ལྟར་སྤྲོས་པས་གེགས་བྱེད་ཀྱི་དམ་སྲི་རྣམས་ཁམས་གསུམ་གར་གནས་ཀྱང་དབང་མེད་དུ་གཟུགས་ལ་བསྟིམ་པའི་དམིགས་གནད་དང་བཅས། ན་མོ་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། ཁྲག་འཐུང་དབང་དྲག་འབར་བའི་ལྷ་ [2b] ཚོགས་རྣམས་ཀྱི་བཀའ༴ དམ་པ་ཆོས་སྐྱོང་བའི་སྲུང་མ་ཕོ་རྒྱུད་མོ་རྒྱུད་རྣམས་ཀྱི༴ ཁྱད་པར་དབང་མཛད་གནོད་སྦྱིན་གཏེར་གྱི་བདག་པོ་ལས་བྱེད་མངགས་གཞུག་དང་བཅས་པ་རྣམས་ཀྱི༴ ཆོས་ཉིད་གདོད་ནས་དག་ཅིང་ཆོས་ཅན་རྟེན་འབྲེལ་བསླུ་བ་མེད་པའི༴ བདེན་པ་ཆེན་པོའི་མཐུ་ལ་བརྟེན་ནས། རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པའི་གསང་བ་ཟབ་མོའི་དངོས་གྲུབ་སྒྲུབ་པ་ལ་བར་དུ་གཅོད་ཅིང་། ཚེ་དང་ནོར་དང་བསོད་ནམས་དབང་ཐང་ལ་གནོད་ཅིང་འཁུ་བར་བྱེད་པའི་བསེ་རག་དམ་སྲི་འབྱུང་པོ་སྣ་འདྲེན་རྒྱབ་བརྟེན་དང་བཅས་པ་ཐམས་ཅད་མཚན་མ་གཟུགས་ཀྱི་རྟེན་འདི་ལ་ཁུག་ཅིག །བཛྲ་ཨངྐུ་ཤ་ཛཿ ཞེས་བརྒྱའམ་ལྔ་བཅུ་ཉེར་གཅིག་སོགས་ལོང་བསྟུན་གྱིས་ཡིད་ཆེས་པར་བཀུག་ནས། ཛཿཧཱུཾ་བཾ་ཧོཿ ས་རྟེན་དང་གཉིས་མེད་དུ་མོས། རང་ཡི་དམ་གྱི་སྐུ་ལས་མེ་རླུང་ནད་མཚོན་ཁྲོ་བོའི་ཚོགས་སྤྲོས་པས་དམིགས་བྱའི་སྒོ་གསུམ་རྨོངས་རེངས་བཅིངས་ཤིང་བསད་བཅད་གཏུབ་སོགས་སྣ་ཚོགས་པའི་ཕྲིན་ལས་ཀྱི་སྦྱོར་བས་རྡུལ་བཞིན་དུ་བརླག་པས་དམིགས་ལ། ཡི་དམ་གྱི་སྔགས་ཤམ་དུ། མི་ནཾ་ཀུ་རུ་དུ་ཏྲི་ཛཿ བསེ་རག་ཤན་ཏྲི་དུ་ཛཿ གོད་འདྲེ་ཙཀ་ཤ་ཛཿ བསེན་མོ་དུ་ཏྲི་ཛཿ ཀཱ་ཡ་ཤ་ཏྲི་གནོད་བྱེད་འབྱུང་པོ་སྟྭཾ་བྷཱ་ཡ་ནནཿ ཧུར་ཐུཾ་ཛཿ མཱ་ར་ཡ་རྦད་ནནཿ ཅེས་ [3a] དྲག་ཏུ་བཟླ་ཞིང་ཐུན་གཉིས་པ་ཡང་བསྔགས་ནས་སྐབས་སུ་བྲབ། དེ་ནས་ཕུང་རེས་སྟེང་ནས་བཀབ། དུར་གཡམ་རི་གླིང་སྟེང་དང་རྡོར་རྒྱམ་འོག་ཏུ་བལྟ་བས་མནན་པའི་ཁར་སཱཙྪ་བཞག །དམིགས་པ། རང་གི་ཐུགས་ཀ་ནས་ལཾ་ཡིག་གསེར་གྱི་མདོག་ཅན་ཞིག་འཕྲོས་པ་དམིགས་བྱའི་གཟུགས་སྟེང་དུ་གནས་གྱུར་པ་ལས་གསེར་གྱི་རི་རབ་བང་རིམ་བཞི་པ་ལྕི་ཞིང་འཐས་པའི་ཞབས་སུ་འབྱུང་ལྔའི་རང་བཞིན་གྱི་རྡོ་རྗེ་རྒྱ་གྲམ་ལྟེ་བ་ནམ་མཁའི་རང་བཞིན་གྲུ་བཞི་སྔོན་པོ། ཤར་གྱི་རྭ་གསུམ་སའི་རང་བཞིན་སེར་པོ། ལྷོའི་རྭ་གསུམ་མེའི་རང་བཞིན་དམར་པོ། ནུབ་ཀྱི་རྭ་གསུམ་ཆུའི་རང་བཞིན་དཀར་པོ། བྱང་གི་རྭ་གསུམ་རླུང་གི་རང་བཞིན་ལྗང་གུའི་བདག་ཉིད་དུ་གྱུར་ནས་མནན་ཅིང་། རི་རབ་ཀྱི་རྩེ་ནས་རང་ཉིད་དབང་དྲག་འབར་བའི་དབུ་སྲིད་པའི་རྩེ་མོར་སླེབས་ཤིང་ཞབས་དབང་ཆེན་གསེར་གཞིའི་གཏིང་དུ་ནོན་པའི་སྐུ་བོང་དང་གཟི་བརྗིད་དཔག་པར་དཀའ་བའི་ཞབས་ཀྱིས་མནན་པས་ཁོའི་གཟི་བྱིན་ནུས་སྟོབས་གཅིག་ཅར་དུ་ཟད་པས་ནམ་ཡང་ལྡང་བའི་མཐུ་མེད་པར་བསམ་ལ། གོང་གི་སྔགས་ཉིད་གཟིར་མནན་ཆིག་དྲིལ་ཡིན་པས་དེ་ཉིད་དྲག་ཏུ་བཟླ། དེ་ལྟར་ཐུན་དུ་བཅད་པའི་ཐུན་མཚམས་སུའང་རྩ་གསུམ་དམ་ཅན་ལ་ར་མདའ་སྦྲན་ཅིང་གོང་བཤད་ཀྱི་གསེར་སྐྱེམས་ཕུལ་ལ་ཕྲིན་ལས་བཅོལ་མཐར་དམིགས་མེད་ཀྱི་ལྟ་བས་རྒྱས་གདབ་ཅིང་། ནམ་མཁའ་མེད་པར་གྱུར་ན་ཡང་། །སོགས་ཀྱི་ཆེ་བ་བརྗོད་ལ་རིག་སྔགས་ཀྱི་མཐུར་ངེས་ཤེས་བསྐྱེད། དེ་ལྟར་ཞག་བདུན་སོགས་སྒོས་དང་ཞར་སྒྲུབ་ཅི་རིགས་ཐུན་དུ་བཅད་ལ། [3b] དང་པོའི་ཆར་དགུག་གཞུག །བར་དུ་གཟིར་སྔགས། ཐ་མར་མནན་དམིགས་རྣམས་རྟགས་བསྟུན་ནན་ཆེར་བསྒྲུབ། རྗེས་ལས་མཇུག་བསྡུ་བ་ལ། རློན་ཐུན་དུག་ཁྲག་གི་ཆུ་ཤིན་ཏུ་སླ་བས་ཡི་གེ་རྣམས་མ་ནོགས་པར་བྱུགས། ཕྱོགས་བཞི་ནས་ལིང་ག་ཐམས་ཅད་ཁ་སྙིང་སྤྲད། མཐར་ཞབས་ནས་དྲིལ་བས་ལྟེ་ལྟེབ་བྱ། ཚོན་སྐུད་སོགས་སྐུད་སྣ་ཐམས་ཅད་ཀྱིས་དམ་པོར་བཅིངས་ཏེ་མནན་ཐོད་རི་བོང་གི་ལྟག་ཁུང་དུ་བཅུག །ཐུན་རྫས་ཀྱིས་ལྟེམ། ཕྱི་ནས་ཕུང་རེས་དྲིལ་ལ་ཚོན་སྐུད་རྩད་ཚེར་གྱིས་རྒྱ་གྲམ་དུ་བཅིང་ཞིང་གཟེར། ལ་ཐིམ་གྱི་རྒྱས་གདབ་བྱ། དེ་ནས་ལམ་གྱི་བཞི་མདོའམ་མཛོད་ཀྱི་ཐེམ་འོག །མཆོད་རྟེན་རྙིང་པའི་འོག་སོགས་སུ་དོང་གྲུ་གསུམ་བྲུས་ལ་གཞན་གྱིས་གླགས་མི་རྙེད་པའི་གནད་ཟབ་མི་ཁའི་རྫས་སྣ་ཚོགས་དང་ལྷན་ཅིག་ཏུ་བཅུག །རོ་གཡམ་གྱིས་ཁ་བཅད་ལ་འབྱུང་ལྔའི་རྒྱས་འདེབས་དང་རྟ་བྲོ་སོགས་མནན་དམིགས་ནན་ཆེར་བྱ་བ་ཡིན་ནོ། །འདི་ཉིད་གལ་ཆེ་བའི་རྒྱུ་མཚན་ཡང་ཇི་སྐད་དུ། སྒབ་འདྲེ་མ་མནན་པར་སྒྲུབ་པ་བྱས་ན༔ འདྲེ་ལྟར་བརྫུས་ནས་བྲིད་ཅིང་བསླུ་བ་དང་༔ ཚེ་སྲོག་འཕྲོག་པ་དང་༔ མི་ནོར་ལ་གོད་ཀ་དང་༔ གཏམ་ངན་དང་༔ མི་ཁས་འགེངས་པ་སོགས་བར་ཆད་ཀྱི་དབང་དུ་འགྲོ་བས༔ འདི་ཉིད་བྱ་བ་ཤིན་ཏུ་གཅེས་སོ༔ ཞེས་གསུངས་པ་ལྟར་རོ། །ཞེས་པའང་ཉེ་བར་མཁོ་བའི་ཡན་ལག་ཏུ་འཇིགས་བྲལ་ཡེ་ཤེས་རྡོ་རྗེས་ཚད་ལྡན་གྱི་གཞུང་ལ་བརྟེན་ནས་འཇུག་པ་བདེ་བའི་གསལ་བྱེད་དུ་སྦྱར་བ་ཛ་ཡནྟུ།། །།