TTDL-ZABTER-01-KA-067

Previous Text Back to Volume PageNext Text

Wylie title	tshogs kyi bskang ba 'dod yon kun khyab:
Location	bdud 'joms gling pa'i zab gter Volume 1, Text 67, Pages 611-613 (Folios 1a1 to 2a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Tshogs kyi bskang ba 'dod yon kun khyab. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: 611-613. Thimphu, Bhutan: Lama Kuenzang Wangdue, 2004.
Side notes	Recto: bskang ba   Verso: bdud 'joms rtsa gsum
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mending Rituals - bskang chog
Cycle	རྩ་གསུམ་དྲིལ་སྒྲུབ་དངོས་གྲུབ་གཏེར་མཛོད་ (rtsa gsum dril sgrub dngos grub gter mdzod)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་བདུད་འཇོམས་རྡོ་རྗེས་ནམ་མཁའ་མཛོད་ལས་བསྒྱུར་བའོ།།
	zhes pa 'di yang bdud 'joms rdo rjes nam mkha' mdzod las bsgyur ba'o//

Tibetan Text

[edit]

ཐྂ༎༔ ཚོགས་ཀྱི་བསྐང་བ་འདོད་ཡོན་ཀུན་ཁྱབ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ རྩ་གསུམ་ཐུགས་དམ་བསྐང་བ་ལ༔ ཚོགས་ཀྱི་ལོངས་སྤྱོད་ཕུད་དུ་བཤམས༔ ཨོཾ་ཨཱཿཧཱུྃ་གིས་བདུད་རྩིར་བསྒྱུར༔ ཧ་ཧོ་ཧྲཱིཿཡིས་འདོད་རྒུར་སྤེལ༔ དེ་ནས་བསྐང་མཆོད་རིམ་པ་ལ༔ ཧཱུྃ་ཧྲཱིཿ ཆོས་དབྱིངས་སྤྲོས་པ་བྲལ་བའི་གཞལ་ཡས་ནས༔ ཆོས་སྐུའི་དཀྱིལ་འཁོར་རྒྱ་མཚོའི་ཐུགས་དམ་བསྐང་༔ གཞི་དང་སྙིང་པོ་མེ་ཏོག་བརྒྱན་ཞིང་ནས༔ ལོངས་སྐུའི་དཀྱིལ་འཁོར་རྒྱ་མཚོའི་ཐུགས་དམ་བསྐང་༔ སྟོང་གསུམ་མི་མཇེད་སྤྲུལ་པའི་ཞིང་ཁམས་ནས༔ སྤྲུལ་སྐུའི་དཀྱིལ་འཁོར་ཡོངས་ཀྱི་ཐུགས་དམ་བསྐང་༔ སྐུ་དང་ཡེ་ཤེས་རབ་རྫོགས་གཞལ་ཡས་ནས༔ དུས་གསུམ་སངས་རྒྱས་རྣམས་ཀྱི་ཐུགས་དམ་བསྐང་༔ མ་དག་སྣང་བ་དག་དབྱིངས་དྭངས་མ་རུ༔ སྦྱོང་མཛད་དམ་པའི་ཆོས་ཀྱི་ཐུགས་དམ་བསྐང་༔ ལུང་དང་རྟོགས་པའི་ཡོན་ཏན་གྱིས་བརྒྱན་པའི༔ འཕགས་པའི་དགེ་འདུན་རྣམས་ཀྱི་ཐུགས་དམ་བསྐང་༔ རང་སྣང་དོན་གྱི་འོག་མིན་གཞལ་ཡས་ནས༔ བརྒྱུད་གསུམ་རིག་འཛིན་བླ་མའི་ཐུགས་དམ་བསྐང་༔ བདག་ལྟའི་རཱུ་ཏྲ་བསྒྲལ་བའི་དུར་ཁྲོད་ནས༔ ཡི་དམ་རྒྱལ་བའི་དཀྱིལ་འཁོར་ཐུགས་དམ་བསྐང་༔ གནས་མཆོག་ཉེར་བཞི་ཡུལ་ཆེན་སོ་གཉིས་དང་༔ ཧེ་རུའི་གནས་བཅུ་དུར་ཁྲོད་གནས་བརྒྱད་ན༔ བཞུགས་པའི་དཔའ་བོ་དང་ནི་རྣལ་འབྱོར་མ༔ ཆོས་སྐྱོང་ཞིང་སྐྱོང་རྒྱ་མཚོའི་ཐུགས་དམ་བསྐང་༔ ཡེ་ཤེས་དབྱིངས་དང་དབྱིངས་སུ་བཞུགས་པ་ཡི༔ སྔགས་སྲུང་དབྱིངས་ཀྱི་རྗེ་མོ་ཨེ་ཀ་ཛཿསྤྲུལ་པ་ཡང་སྤྲུལ་བཅས་པའི་ཐུགས་དམ་བསྐང་༔ དཔལ་ལྡན་སྔགས་ཀྱི་བདག་མོ་རེ་མ་ཏཱི༔ སྲིད་པ་མ་མོའི་ཚོགས་ཀྱི་ཐུགས་དམ་བསྐང་༔ ཡེ་ཤེས་འཇིག་རྟེན་བཀའ་སྲུང་དྲེགས་པ་ཅན༔ ནོར་ལྷ་གཏེར་བདག་རྣམས་ཀྱི་ཐུགས་དམ་བསྐང་༔ སྣང་སྲིད་ཁམས་ལ་དབང་མཛད་ཆོ་འཕྲུལ་བདག༔ སྟོང་གསུམ་ཡུལ་ལྷ་གཞི་བདག་ཐུགས་དམ་བསྐང་༔ ཚེ་རབས་ལས་དང་ད་ལྟ་སྐྱོབ་པའི་ལྷ༔ བསྒྲུབ་དང་རང་འཁོར་སྲུང་མའི་ཐུགས་དམ་བསྐང་༔ འགྲོ་བ་རིགས་དྲུག་སྣང་སྲིད་ལྷ་འདྲེ་དང་༔ ལན་ཆགས་བདག་པོ་བདག་མོའི་ཐུགས་དམ་བསྐང་༔ ཀུན་ཀྱང་ཞལ་ཟས་རོ་བརྒྱའི་ཚོགས་ལ་རོལ༔ ཟག་མེད་བདེ་སྟོང་བདུད་རྩིའི་ཚོགས་ལ་རོལ༔ ཤ་ཁྲག་དམར་གྱིས་བརྒྱན་པའི་ཚོགས་ལ་རོལ༔ དཀར་གསུམ་མངར་གསུམ་བདུད་རྩིའི་ཚོགས་ལ་རོལ༔ ཡིད་བཞིན་འདོད་པ་འཇོ་བའི་ཚོགས་མཆོད་འདིས༔ འཁོར་འདས་ཡོངས་ཀྱི་དགྱེས་པ་བསྐང་གྱུར་ཅིག༔ ཡེ་ཤེས་འཇིག་རྟེན་བཀའ་སྲུང་དམ་ཅན་རྣམས༔ དམ་རྫས་བདུད་རྩིའི་ཚོགས་མཆོད་འདི་བཞེས་ལ༔ སྒྲུབ་ལ་བར་དུ་གཅོད་པའི་དགྲ་འདྲེ་དང་༔ སྔོན་ལས་འཕྲལ་རྐྱེན་ལས་བྱུང་གནོད་བྱེད་ཀུན༔ མ་ལུས་ཐལ་བའི་རྡུལ་བཞིན་བརླག་པར་མཛོད༔ གང་བསམ་འདོད་དོན་འབད་མེད་ལྷུན་གྲུབ་ཅིང་༔ ཚེ་སྒྲུབ་མཐར་ཕྱིན་ཡང་དག་ས་རུ་སྐྱོལ༔ བཀའ་དང་དམ་ཚིག་གཉན་ལ་མ་འདའ་བར༔ བཅོལ་བའི་ཕྲིན་ལས་མྱུར་དུ་འགྲུབ་པར་མཛོད༔ ཅེས་གཙང་ཕུད་ཕྱི་རོལ་དུ་དོར༔ ས་མ་ཡ༔ ཨྠིྀ༔ ཞེས་པ་འདི་ཡང་བདུད་འཇོམས་རྡོ་རྗེས་ནམ་མཁའ་མཛོད་ལས་བསྒྱུར་བའོ།།