TTDL-ZABTER-15-BA-010

Previous Text Back to Volume PageNext Text

Wylie title	chos nyid nam mkha'i klong mdzod las: 'jam dpal smra ba'i seng ge'i rjes gnang sgo gsum rdo rje'i grong 'jug:
Location	bdud 'joms gling pa'i zab gter Volume 15, Text 10, Pages 45-47 (Folios 1a1 to 2a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las 'jam dpal smra ba'i seng ge'i rjes gnang sgo gsum rdo rje'i grong 'jug. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 45-47. Thimphu, Bhutan: Lama Kuenzang Wangdue, 2004.
Side notes	Recto: rjes gnang   Verso: bdud 'joms 'jam dpal smra seng
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Permission to Invoke (anujñā) - rjes gnang
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	'jam dpal smra ba'i seng+ge
Colophon	ཞེས་པ་འདི་ཡང་རིགས་སྲས་དྲི་མེད་འོད་ཟེར་གྱིས་བསྐུལ་ངོར། རིག་འཛིན་བདུད་འཇོམས་རྡོ་རྗེས་གཏན་ལ་ཕབ་བའི་ཡི་གེ་པ་ནི་ངག་དབང་ཕྲིན་ལས་གྱིས་བྲིས་པའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang rigs sras dri med 'od zer gyis bskul ngor/_rig 'dzin bdud 'joms rdo rjes gtan la phab ba'i yi ge pa ni ngag dbang phrin las gyis bris pa'o/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ འཇམ་དཔལ་སྨྲ་བའི་སེང་གེའི་རྗེས་གནང་སྒོ་གསུམ་རྡོ་རྗེའི་གྲོང་འཇུག་བཞུགས༔ ན་མོ་གུ་རུ་པདྨ་ཀ་ར་ཡེ༔ སྒྲུབ་པའི་གཞུང་བསྲང་བསྙེན་སྒྲུབ་མཐར༔ ཁྲུས་བྱ་བགེགས་བསྐྲད་སྲུང་གུར་དང་༔ སྐྱབས་འགྲོ་སེམས་བསྐྱེད་ཞུ་གནང་སོགས༔ གཞན་དང་མཐུན་པ་ཉིད་དུ་བྱ༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་སོགས༔ གཟུང་འཛིན་གཉིས་སྣང་གི་ཆོས་ཐམས་ཅད་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་མ་ཆགས་པདྨ་འདབ་བརྒྱད་ཉི་ཟླ་སེང་གེའི་ཁྲི་ཡི་སྟེང་དུ༔ མངོན་རྟོགས་བསྐྱེད་ཆོག་ཇི་བཞིན་བྱ༔ དེ་ལྟར་ལྷར་གསལ་བའི་གནས་གསུམ་འབྲུ་གསུམ་ལས་འོད་ཟེར་འཕྲོས་པས་ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་འཇམ་དཔལ་སྨྲ་བའི་སེང་གེ་ཡབ་ཡུམ་གྱི་སྐུར་བཞེངས་ཏེ་རྒྱ་མཚོ་ཆེན་པོ་ལ་ཁ་ཆར་བབས་པ་ལྟར་སློབ་མ་ལྷར་གསལ་བ་ལ་གཉིས་སུ་མེད་པར་ཐིམ་པར་གྱུར༔ ན་མོ་མཉྫུ་ཤཱྀ་ཛྙཱ་ན་ས་པ་རི་ཝཱ་ར་བཛྲ་ས་མ་ཡ་ཛ་ཛ༔ ཏི་ཥྠ་བཛྲ་གྱིས་བརྟན་པར་བྱ༔ དེ་ནས་བུམ་དབང་བསྐུར་བ་ནི༔ བུམ་པ་ཐོགས་ལ༔ ཧཱུྃ༔ བུམ་པ་ཆོས་ཉིད་གཞལ་ཡས་ཁང་༔ ལྷུན་གྲུབ་རོལ་པའི་དཀྱིལ་འཁོར་རྫོགས༔ སྐལ་ལྡན་བུ་ལ་དབང་བསྐུར་བས༔ བུམ་དབང་ཡོངས་སུ་རྫོགས་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འཇམ་དཔལ་གྱི་སྐུ་གཏད་ལ༔ ཧཱུྃཿདུས་གསུམ་རྒྱལ་བ་ཐམས་ཅད་ཀྱི༔ ཡེ་ཤེས་ཡོན་ཏན་རྫོགས་པའི་དཔལ༔ འཇམ་དཔལ་སྨྲ་བའི་སེང་གེ་ཡི༔ སྐུ་ཡི་དབང་བསྐུར་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་དབྱངས་ཅན་མའི་སྐུ་གཏད་ལ༔ ཧཱུྃ་འཁོར་འདས་སྟོང་ཆེན་དབྱིངས་ཀྱི་མཁར༔ བདེ་བ་ཆེན་པོས་རྒྱས་འདེབས་མ༔ དབྱངས་ཅན་ལྷ་མོའི་དབང་བསྐུར་རོ༔ ཐབས་ཤེས་ཟུང་འཇུག་དབང་ཐོབ་ཤོག༔ རྩ་སྔགས་མཐརཿཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གསང་དབང་བསྐུར་བ་ལ༔ བྷནྡྷ་བདུད་རྩི་ཐོགས་ཏེ༔ ཧཱུྃཿབྷནྡྷ་བདུད་རྩིའི་དམ་རྫས་དང་༔ ཨཱ་ལི་ཀཱ་ལི་རང་བྱུང་སྒྲས༔ སྐལ་ལྡན་བུ་ལ་དབང་བསྐུར་རོ༔ བཟླས་པ་སྔགས་ཀྱི་དབང་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱ༔ དེ་ནས་ཤེར་དབང་བསྐུར་པ་ལ༔ རལ་གྲི་ཧྲཱིཿ ས་མཚན་ཅན་གཏད་ལ༔ ཧཱུྃ༔ ཤེས་རབ་ཡེ་ཤེས་ངོ་བོ་ཉིད༔ རལ་གྲི་ཧྲཱིཿ ས་མཚན་ཐུགས་ཀྱི་རྟགས༔ སྐལ་ལྡན་ཁྱོད་ཀྱི་སྙིང་གར་བཞག༔ མཁྱེན་གཟིགས་ཤེས་རབ་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཚིག་དབང་བསྐུར་བ་ལ༔ ཤེལ་རྡོ་ཐོགས་ཏེ༔ ཧཱུྃ༔ ཤེལ་དཀར་དྲི་མ་མེད་པ་འདི༔ སྐལ་ལྡན་ཁྱོད་ལ་གཏད་པ་ཡིས༔ སྐུ་དང་ཡེ་ཤེས་མངོན་གྱུར་བས༔ མཚན་མ་ཚིགས་བྲལ་དབང་ཐོབ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཧྲཱིཿ དེ་ནས་བདེན་པ་བརྡར་ཞིང་དབང་བཞི་ཡོངས་སུ་རྫོགས་པའི་སྨོན་ལམ་རྒྱས་གདབ་བོ༔ བསྐྱེད་དང་དམིགས་པའི་གནད་ལྡན་པས༔ དབང་འདི་ཐོབ་མཐར་སྨྲ་བཅད་ཀྱི༔ གནད་དང་ལྡན་པས་བསྒྲུབ་བརྩོན་ན༔ ཤེས་རབ་མེ་ལྟར་འབར་བ་དང་༔ མཐར་ཐུག་མངོན་སངས་རྒྱས་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རིགས་སྲས་དྲི་མེད་འོད་ཟེར་གྱིས་བསྐུལ་ངོར། རིག་འཛིན་བདུད་འཇོམས་རྡོ་རྗེས་གཏན་ལ་ཕབ་བའི་ཡི་གེ་པ་ནི་ངག་དབང་ཕྲིན་ལས་གྱིས་བྲིས་པའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།