TTDL-ZABTER-05-CA-012

Previous Text Back to Volume PageNext Text

Wylie title
Location	bdud 'joms gling pa zab gter Volume 5, Text 12, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠༠༠བརྡ་ཡིག༡༢༩ཟབ་གསང་མཁའ་འགྲོའི་སྙིང་ཐིག་ལས༔ ཐུགས་སྒྲུབ་གསང་བའི་རྒྱ་ཅན་གྱི་སྐོར༔ དཔལ་ཆེན་རྡོ་རྗེ་གཞོན་ནུའི་བསྐུལ་བ་ཚངས་པའི་སྒྲ་དབྱངས་བཞུགས་སོ༔ ༠༠༠༠༠༠བརྡ་ཡིག༡༢༩ན་མོ་གུ་རུ་དྷེ་ཝ་ཝེ༔ ༠༠༠༠༠༠བརྡ་ཡིག༡༢༩ཕུར་པ་བསྒྲུབ་པའི་རིག་འཛིན་ལ༔ བསྐུལ་བ་ཚངས་པའི་སྒྲ་དབྱངས་གཅེས༔ དམར་གཏོར་ཁྲག་སྐྱེམས་དྲན་བྱས་ཏེ༔ ཧཱུྃ་ཧཱུྃ༔ གྲུ་གསུམ་མཐིང་ནག་འབར་བའི་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་སྐུ་བཞེངས་ཤིག༔ སྐྱེ་མེད་རྣམ་དག་ཆོས་ཀྱི་དབྱིངས་ཉིད་ལས༔ ཡུམ་མཆོག་འཁོར་ལོ་རྒྱས་འདེབས་སྐུ་བཞེངས་ཤིག༔ ཡེ་ཤེས་མེ་རི་འབར་བའི་ཀློང་དཀྱིལ་ནས༔ ཁྲོ་རྒྱལ་ཀཱི་ལ་རིགས་ལྔ་སྐུ་བཞེངས་ཤིག༔ གནམ་ལྕགས་འཁོར་ལོ་འབར་བའི་རྩིབས་སྟེང་ནས༔ ཡེ་ཤེས་ཁྲོ་བཅུ་ཡབ་ཡུམ་སྐུ་བཞེངས་ཤིག༔ གྲུ་གསུམ་ཟླ་གམ་དམར་པོའི་ཨེ་སྟེང་ནས༔ སྲས་མཆོག་ཁྲ་ཐབས་ཉེར་གཅིག་སྐུ་བཞེངས་ཤིག༔ ཕྲིན་ལས་ལྷུན་གྲུབ་ཕྱོགས་བཞིའི་སྒོ་བཞི་ནས༔ ཡེ་ཤེས་སྒོ་མ་རྣམ་བཞི་སྐུ་བཞེངས་ཤིག༔ བཀའ་དང་དམ་ཚིག་གཉན་པོའི་ཕོ་བྲང་ནས༔ ཕུར་སྲུང་དམ་ཅན་རྒྱ་མཚོ་སྐུ་བཞེངས་ཤིག༔ མ་གཡེལ་མ་གཡེལ་དམ་ཚིག་གཉན་གྱིས་བསྐུལ༔ ཤ་ཁྲག་དམར་གྱི་ཨརྒྷཾ་འདི་བཞེས་ལ༔ ནག་ཕྱོགས་རྗེ་བོ་དམག་འཁྲུགས་གཡུལ་འགྱེད་མཁན༔ སྡོང་ཟླ་བདུད་དམག་འགོང་ནག་དྲག་རྔམས་ཅན༔ མཐའ་ཁོབ་ཀླ་ཀློས་ཆོས་ཁྲིམས་འཇིག་ཆས་སོགས༔ སངས་རྒྱས་བསྟན་བཤིག་སྐྱེ་འགྲོའི་བདེ་བཅོམ་པའི༔ གཟུགས་ཅན་དགྲ་དང་གཟུགས་མེད་མི་མིན་ཚོགས༔ ལོངས་ཡོད་ལོ་ཟླར་འགྱངས་སུ་མ་ཤོར་བར༔ ནམ་མཁའི་གློག་ཞགས་འཕེན་སྡུད་ལས་མྱུར་བར༔ སྲོག་གི་མེ་སོད་སྙིང་གི་ཁྲག་དྲོངས་ཤིག༔ རླུང་གི་རྒྱུ་འགྲུལ་གློ་བའི་མདོ་ནས་ཆོད༔ དཔུང་ཚོགས་སྔོན་རྒྱུག་རྗེས་འབྲངས་སྐྱོབ་གྲོགས་བཅས༔ ལྷ་ཡང་རུང་སྟེ་ཐལ་བའི་རྡུལ་དུ་རློག༔ དམ་ལས་མ་འདའ་བཛྲ་ས་མ་ཡ༔ དམ་ཚིག་དབང་གིས་མཐའ་དམག་དུས་འཁྲུགས་ཟློག༔ བདག་ཅག་སྐུ་རྗེ་བོད་ཀྱི་རྒྱལ་ཁམས་སུ༔ ལོ་ལེགས་འབྲུ་འཕེལ་སངས་རྒྱས་བསྟན་པ་དར༔ དགེ་ལེགས་ཡར་འཕེལ་འདོད་རྒུ་རབ་རྒྱས་ནས༔ འཁྲུགས་དང་འཐབ་དང་རྩོད་པ་མེད་པར་མཛོད༔ དམོད་བྱང་འཆི་བདག་ནག་པོའི་ཧུབ་སྒྲ་ནི༔ ཧོཿདགོངས་སུ་གསོལ་ལོ༔ ཧོཿདགོངས་སུ་གསོལ་ལོ༔ ཧོཿདགོངས་སུ་གསོལ་ལོ༔ བཀའ་བརྒྱུད་རིག་འཛིན་བླ་མ༔ ཡི་དམ་རྒྱུད་སྡེའི་ལྷ་ཚོགས༔ མ་སྲིང་མཁའ་འགྲོ་རྒྱ་མཚོ༔ བསྟན་སྲུང་དམ་ཅན་རྒྱ་མཚོའི་ཚོགས་མ་ལུས་པ་བདག་ལ་དགོངས་སུ་གསོལ་ལོ༔ ཁྱེད་རྣམས་ལ་ཐུགས་རྗེ་མཐུ་སྟོབས་ནུས་རྩལ་མངའ་འམ༔ མངའ་ཞེས་བདེན་པར་ངེས་སྲིད་དམ༔ སྲིད་ན་ད་དུས་འདི་ལ་ཐུགས་རྗེའི་ཤུགས་ཕྱུང་༔ མཐུ་དང་རྩལ་བསྐྱེད༔ ནུས་པའི་སྟོབས་བསྐྱེད༔ དམ་ཚིག་ལ་དགོངས་འཚལ་ལོ༔ དམ་ཚིག་དང་སྤྲུལ་པ་ཆེན་པོའི་དུས་ལ་བབ་བོ༔ ཕྲིན་ལས་སུ་བཅོལ་བ་ནི་ཉི་མ་ཕྱོགས་བཞི་མཚམས་བརྒྱད་སྟེང་འོག་ནས༔ སངས་རྒྱས་ཀྱི་བསྟན་པ་བཤིག་པའི་ལག་དམར༔ དཀོན་མཆོག་དབུ་འཕང་སྨད་པའི་བསྟན་བཤིག༔ སྐྱེ་འགྲོའི་བདེ་བ་བཅོམ་པའི་བདུད་པོ༔ དམག་འཁྲུགས་གཡུལ་མཚོན་འགྱེད་པའི་སྡིག་རྗེ༔ ཡུལ་སྡེ་དགོན་གནས་འཇིག་པའི་ནག་ཕྱོགས༔ བསྟན་པའི་ཆོས་ཁྲིམས་བཤིག་པའི་རཱུ་དྲ༔ ཕྱོགས་བཞིའི་བདུད་སྤྲུལ་དམ་ལོག་གསང་སྔགས་རྡོ་རྗེ་ཐེག་པ་ལ་ལོག་པར་ལྟ་བ་དེ་དག་ཐམས་ཅད༔ དབང་ཕྱུག་ཆེན་པོའི་སྐྱབས་འོག་མན་ཆད༔ ཨ་བ་གླང་མགོའི་བཙོན་ར་ཡན་ཆད༔ འབྱུང་བ་ཟད་པའི་ཕ་མཐའ་ཚུད་ཆད་གང་ན་གནས་ཀྱང་༔ ལོ་དང་ཟླ་ཞག་ཏུ་མ་བཞག༔ ནམ་མཁའ་སྟོང་པ་ལ་ཚད་མ་འཛུག༔ མི་ཚེ་ཕྱི་མ་ལ་དུས་མ་བཏབ༔ སྐྱེ་འཆི་གཉིས་ལ་ཁུངས་མ་བཙལ༔ ཕྱག་དང་ཞུ་བ་བྱེད་དུ་བྱུང་ཡང་བརྩེ་མ་ཤོར་བར་དུས་ད་ལྟ་ཞག་དོ་ནུབ་མོ་འདི་ལས་འདས་སུ་མ་བཞག་པར༔ སྙིང་ཁྲག་དམར་པོ་ཐང་ལ་ཕོས་ཤིག༔ སྲོག་རྩ་རྒལ་ནས་ཆོད་ཅིག༔ མིག་འབྲས་ཐང་ལ་འཕོངས་ཤིག༔ རྒྱུ་མ་ལམ་དུ་གནོར་ཞིག༔ ཁ་ཟས་མིད་དུ་མ་ཤོར༔ ཚིག་གི་མཇུག་མ་རྫོགས་པར༔ སོད་ཅིག་སྒྲོལ་ཅིག༔ ཕོ་རྒྱུད་ཀྱི་རྩ་བ་རྩད་ནས་ཆོད་ཅིག༔ མོ་རྒྱུད་ཀྱི་རྩ་བ་མངལ་ནས་སྐོམ་ཞིག༔ ལྷག་མ་རྗེས་ཤུལ་མཐའ་རྩ་སྐྱེ་བརྒྱུད་དང་བཅས་པ་ལས་ཀྱི་གཤིན་རྗེ་ནག་པོའི་ཁ་རུ་སྟོབ་ཅིག༔ ཤ་ཁྲག་དམར་གྱི་གཏོར་མ་འདི་དང་མཉམ་དུ་བཞེས་བཞེས་རོལ་རོལ༔ ཨོཾ་བཛྲ་ས་མ་ཡ༔ ཨཱཿབཛྲ་ས་མ་ཡ༔ ཧཱུྃ་བཛྲ་ས་མ་ཡ༔ ཨ་བྷི་ཙཱཪྻའི་དུས་ལ་བབ་བོ༔ བརྣག་པ་དེ་ཁོ་ནའོ༔ ཨོཾ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་ས་མ་ཡ་དགྲ་བགེགས་ལོག་འདྲེན་མཐའ་དམག་དུས་འཁྲུགས་དུས་མཐའི་འགོང་ནག་སངས་རྒྱས་བསྟན་བཤིག་ལོག་འདྲེན་རྒྱལ་འགོང་གདུག་པའི་སེམས་དང་ལྡན་པ་ཐམས་ཅད་མཱ་ར་ཡ་རྦད་ནན་བྷྱོ་ཟློག༔ ཛྭ་ལ་པ་ཡ་ཛྭ་ལ་པ་ཡ་ཏ་ཐ་ཡ་ཏ་ཐ་ཡ་རྦད་བྷྱོ༔ ས་མ་ཡ༔ དྲག་པོ་འཇིགས་བྱེད་སྲོག་བདག་སྡེ་ལྔའི་རྦད་བསྐུལ་ལས༔ རྡོ་རྗེ་ལེགས་པའི་རྦད་བསྐུལ་ནི༔ ཧཱུྃ་ཛཿགསང་བདག་ཕྱག་ན་རྡོ་རྗེ་ཡི༔ བཀའ་ཉན་བསྟན་སྲུང་དམ་ཚིག་ཅན༔ སངས་རྒྱས་ཤཱཀྱ་ཐུབ་པ་དང་༔ རྒྱལ་དབང་པདྨ་ཐོད་ཕྲེང་གིས༔ བཀའ་བསྒོས་བསྟན་པའི་སྲུང་མ་ཆེ༔ རྡོ་རྗེ་ལེགས་པ་རྫུ་འཕྲུལ་ཅན༔ མཐུ་དང་ཟེར་གྱིས་སྣ་ལ་རྒྱུག༔ སྤྲུལ་འཁོར་བཀའ་སྡོད་བཅས་པ་རྣམས༔ བསྐུལ་ལོ་དམ་ཚིག་གཉན་གྱིས་བསྐུལ༔ ཧཱུྃ་ཛཿཕ་ནི་མོན་པ་ནག་པོ་བསྐུལ༔ དགྲ་བགེགས་སྲོག་སྙིང་རྩད་ནས་འབྱིན༔ མ་ནི་མོན་མོ་ནག་མོ་བསྐུལ༔ དགྲ་སྲོག་དབང་པོ་རྣམ་ལྔ་བསྣུབ༔ སྲས་མཆོག་རྡོ་རྗེ་ལེགས་པ་བསྐུལ༔ ཆོ་ཆོ་དགྲ་བགེགས་ཐལ་བར་རློག༔ སྤྲུལ་པ་ཆེན་པོའི་དུས་ལ་བབ༔ སེང་ཞོན་དམག་ཚོགས་ནམ་མཁར་རྒྱུག༔ དགྲ་བོའི་གནམ་གྱི་དམུ་ཐག་ཆོད༔ བྱ་ཞོན་དམག་ཚོགས་བར་སྣང་རྒྱུག༔ དགྲ་བོའི་སྲོག་སྙིང་སྐད་ཅིག་ལོངས༔ ར་ཞོན་དམག་ཚོགས་ས་གཞིར་རྒྱུག༔ དགྲ་བོའི་ས་ཡི་བརྟེན་ཕུར་ཕུད༔ ཤ་ཟའི་དམག་ཚོགས་ཤ་ལ་རོལ༔ ཁྲག་འཐུང་དམག་ཚོགས་ཁྲག་ལ་རོལ༔ རུས་འཆའི་དམག་ཚོགས་རུས་པ་མུར༔ སྲོག་གཅོད་དམག་གིས་སྲོག་དབུགས་བསྡུས༔ དམ་ཅན་དམ་ལས་མ་འདའ་ཞིག༔ སྡང་དགྲ་གདུག་པའི་དཔུང་ཚོགས་རྣམས༔ སྐད་ཅིག་ཉིད་ལ་ད་སྒྲོལ་ཅིག༔ ཁྱོད་ཀྱི་དམ་ཚིག་དུས་ལ་བབ༔ བསྐུལ་ལོ་དྲག་པོའི་ཕྲིན་ལས་མཛོད༔ ཨོཾ་བཛྲ་ས་དྷུ་ས་མ་ཡ་ཛ་ཛ༔ ཆོ་ཆོ་རྒྱུག་རྒྱུག་དགྲ་ལ་རྦད་བྷྱོ༔ དེ་ནས་བདུད་མགོན་ནག་པོའི་རྦད་བསྐུལ་ནི༔ ཧཱུྃ་ཧཱུྃ་ཧཱུྃ༔ ང་ནི་རྡོ་རྗེ་གྲོ་བོ་ལོད༔ ང་ནི་བཛྲ་ཀཱི་ལ་ཡ༔ འབོད་དོ་བསྐུལ་ལོ་བསྟན་སྲུང་ཆེ༔ ཕོ་བྲང་མཁའ་སྤྱོད་ཙ་རི་ནས༔ མི་སྲུན་རབ་འཇིགས་རྔམས་པའི་སྐུ༔ བདུད་མགོན་སེང་གདོང་ཡབ་ཡུམ་ལ༔ ནག་པོ་སྟོང་དང་ཤ་ཟ་འབུམ༔ མ་མོ་བྱེ་བའི་ཚོགས་ཀྱིས་བསྐོར༔ ཛཿབྱོན་ཅིག་གཤེགས་ཤིག་བསྟན་སྲུང་ཆེ༔ བསྐུལ་ལོ་དམ་ཚིག་གཉན་གྱིས་བསྐུལ༔ འབོད་དོ་དམ་ཚིག་གཉན་གྱིས་འབོད༔ བསྟན་པ་གཉན་ལ་དགྲ་དར་ན༔ བསྟན་སྲུང་གཉན་པོ་མེད་དམ་ཅི༔ བཅོལ་བའི་ལས་འདི་མ་བྱས་ན༔ དུས་གསུམ་རྒྱལ་བའི་བཀའ་བསླུས་ཤིང་༔ རིག་འཛིན་བརྒྱུད་པའི་དམ་ལས་འདས༔ རྣལ་འབྱོར་བདག་གི་དམ་ཡང་འགལ༔ དོ་ནུབ་བསྐུལ་བའི་ལས་ལ་རྒྱུག༔ དོ་ནུབ་སྡང་བའི་དགྲ་བོ་སོད༔ བསྟན་བཤིགས་རཱུ་དྲའི་དམག་ཚོགས་འདི༔ ལོ་ཟླར་བཞག་པའི་ལོངས་མེད་ཀྱི༔ ད་ལྟ་ཉིད་དུ་བརླག་པར་མཛོད༔ གཡུལ་འགྱེད་མཚོན་གྱི་ལས་བྱེད་པའི༔ བདུད་རྒྱལ་བློན་འབངས་བཅས་པ་རྣམས༔ རྗེས་ཤུལ་མིང་ཙམ་མ་ལུས་པ༔ ཐལ་བ་རླུང་གིས་གཏོར་བཞིན་རློག༔ སྙིང་ཁྲག་དམར་པོ་ཧུབ་ཀྱིས་འཐུང་༔ སྲོག་གི་མར་མེ་ཐིབ་ཀྱིས་སོད༔ དབུགས་ཀྱི་འབྱུང་འཇུག་རྩད་ནས་ཆོད༔ ཨོཾབཛྲ་མ་ཧཱ་ཀཱ་ལ་སེང་ཧ་མུ་ཁ་ས་མ་ཡ་དགྲ་྄ལ་རྦད་བྷྱོ༔ གནོད་སྦྱིན་ཆེན་པོའི་རྦད་བསྐུལ་ནི༔ ཧེ་ཀྵ༔ ཧེ་ཆེན་བརྡལ་བའི་དུར་ཁྲོད་ནས༔ འཇིགས་བྱེད་དྲག་པོའི་སྐུར་སྟོན་པ༔ གནོད་སྦྱིན་ཤན་པ་དམར་ནག་དང་༔ ཡུམ་མཆོག་སྙིང་འབྱིན་དམར་མོ་དང་༔ སྤྲུལ་འཁོར་བརྒྱད་དང་ཡང་འཁོར་ནི༔ བྱེ་བ་དུང་ཕྱུར་ལྷ་སྲིན་ཚོགས༔ མ་གཡེལ་མ་འགྱངས་ལས་ལ་བསྐུལ༔ ས་མ་ཡ་ཡིས་འབོད་ཅིང་བསྐུལ༔ དམ་ཚིག་དབང་གིས་གཤེགས་སུ་གསོལ༔ གསང་བདག་ཕྱག་ན་རྡོ་རྗེ་དང་༔ ཕུང་བྱེད་ཤཱནྟིཾ་གྷརྦྷ་དང་༔ རིག་འཛིན་རྡོ་རྗེ་གཤོག་རྒོད་ཀྱིས༔ ཇི་ལྟར་བཀའ་བསྒོས་ཐ་ཚིག་བཞིན༔ བསྟན་པ་གཉན་ལ་དགྲ་དར་ན༔ བསྟན་སྲུང་གཉན་པོ་མེད་དམ་ཅི༔ མུ་སྟེགས་ལོག་ལྟ་ཆོས་ཁྲིམས་བཤིག༔ བསྟན་གནས་ཡུལ་དགོན་མཚོན་གྱིས་འགེང་༔ སློབ་བུ་དམ་ལོག་བླ་མར་གཤེ༔ བདུད་སྤྲུལ་སྡིག་རྗེས་སྐྱེ་འགྲོར་བསྡིག༔ སྟོན་པ་རྡོ་རྗེ་རྒྱལ་པོ་ཡང་༔ བདུད་ཀྱི་དམངས་སུ་བབ་ལ་རེ༔ དམ་ཅན་རྒྱ་མཚོ་གང་ན་བཞུགས༔ མ་གཡེལ་བཀའ་ཡི་སྲུང་མ་ཆེ༔ བསྐུལ་ལོ་ཐུགས་དམ་གནད་ནས་བསྐུལ༔ བཀའ་དང་དམ་ལ་མ་འདའ་བར༔ དམ་ཉམས་བསྟན་པའི་རཱུ་དྲ་དང་༔ མཐའ་མི་རྒྱ་སོག་བྷནྡྷེ་ཧོར༔ མུ་སྟེགས་ཀླ་ཀློ་ལོག་ལྟའི་རིགས༔ སྟོད་ཧོར་ཇིང་འདུར་སྡིག་པའི་སྡེ༔ དམག་འཁྲུགས་གསོད་གཅོད་ལས་བརྩོན་པའི༔ ཡིད་ལ་བརྣག་པའི་དགྲ་བོ་འདི༔ ལོ་ཟླ་རིང་དུ་མ་འགྱང་བར༔ ད་ལྟ་སྐད་ཅིག་ཡུད་ཙམ་གྱིས༔ ལོ་ཐོག་སེར་བས་བཅོམ་བཞིན་ཐོངས༔ དཔུང་ཚོགས་སྐྱབས་དང་བརྟེན་བཅས་པ༔ ཐལ་བ་རླུང་གིས་གཏོར་བཞིན་རློག༔ བསྐྱོད་པའི་རྐག་ལག་སྡོང་པོ་བཞི༔ གནམ་ལྕགས་རྡོ་རྗེའི་ཐོག་གིས་ཤིག༔ བཀྲ་བ་དབང་པོའི་མེ་ཏོག་བསྣུབ༔ འབྱུང་འཇུག་རླུང་གི་རྒྱུ་འགྲུལ་ཆོད༔ སྲོག་གི་མར་མེ་ཐིབ་ཀྱིས་སོད༔ ཕུང་ཁམས་སྐྱེ་མཆེད་རྔམས་པར་རོལ༔ རྗེས་ཤུལ་མིང་ཙམ་མེད་པར་མཛོད༔ དྲག་པོའི་མངོན་སྤྱོད་ཕྲིན་ལས་མཛོད༔ རྒྱལ་ཁམས་ཀུན་དུ་བདེ་ལེགས་སྩོལ༔ བཅོལ་བའི་ཕྲིན་ལས་སྒྲུབ་པར་མཛོད༔ ཨེ་ཧེ་མ་རུ་ཙེ་གུ་ཎ་ཧྲཱི་ད་སརྦ་ས་མ་ཡ་ཛ་ཛཿདགྲ་བགེགས་ལོག་འདྲེན་ཐམས་ཅད་མཱ་ར་ཡ་ཟློག་ཟློག༔ ཧེ་ཧེ་ཧཱུྃ་ཀྵ་བྷྱོ་ཛཿགཟའ་བདུད་ནག་པོའི་རྦད་བསྐུལ་བ་ནི༔ ཧཱུྃ་ཧཱུྃ་ཧཱུྃ༔ ང་ནི་སྤྱི་དཔལ་ཆེན་པོ་སྟེ༔ ང་ནི་རྡོ་རྗེ་གཏུམ་པོ་ཆེ༔ ང་ནི་བཛྲ་ཀཱི་ལ་ཡ༔ འཁོར་འདས་ཡོངས་ཀྱི་དབང་ཕྱུག་ཆེ༔ ཧཱུྃ་ཛཿདུར་ཁྲོད་རབ་འཇིགས་རྩུབ་འགྱུར་ཚལ༔ འཇིགས་རུང་རྔམས་འཁྲིགས་དྲག་པོའི་གནས༔ ཁྲག་ཞག་རྦ་ཀློང་འཁྲིགས་པའི་མཚོར༔ དྲང་སྲོང་གཟའ་བདུད་རཱ་ཧུ་ལ༔ ཡབ་ཡུམ་ཀླུ་སྲིན་གཏུམ་དྲག་རྔམས༔ སྤྲུལ་པ་གཟའ་མཆོག་ཆེན་པོ་བརྒྱད༔ སྡོང་ཟླ་གདོང་མོ་མཆེད་བཞི་དང་༔ བཀའ་སྡོད་ལྷ་སྲིན་སྡེ་བརྒྱད་དང་༔ རྒྱུ་སྐར་ཉེར་བརྒྱད་དང་བཅས་པ༔ ནམ་མཁའ་ཡངས་པའི་ཀློང་ནས་གཤེགས༔ དམ་ཚིག་གཉན་གྱི་གདན་ལ་བཞུགས༔ མཐུན་རྫས་འདོད་ཡོན་འདི་བཞེས་ལ༔ དམ་ཚིག་གཉན་ལས་མ་འདའ་ཞིག༔ བསྟན་པ་གཉན་ལ་དགྲ་དར་ན༔ མ་གཡེལ་མ་འགྱངས་དུས་ལ་བབ༔ གཡར་དམ་གཉན་གྱིས་ཐུགས་དམ་བསྐུལ༔ ཐ་ཚིག་དབང་གིས་ཕྲིན་ལས་སྒྲུབ༔ སངས་རྒྱས་བསྟན་པ་བཤིག་པ་དང་༔ སྐྱེ་འགྲོའི་བདེ་བ་བཅོམ་པ་ཡི༔ དམ་ཉམས་ཞིང་བཅུའི་དམག་ཚོགས་འདི༔ མགོ་འཛིན་དོན་གཉེར་བྱེད་པ་ཡི༔ རྗེ་བློན་འབངས་དང་བཅས་པ་ལ༔ ཁྱབ་འཇུག་ཆེན་པོའི་དུག་གིས་ཐོབ༔ གཟའ་ཆེན་བརྒྱད་ཀྱིས་ཧུར་ཐུམ་རྦད༔ རྒྱུ་སྐར་དམག་གིས་ནད་མཚོན་ཐོངས༔ གདོང་མོ་བཞི་ཡིས་རང་འབྱོར་གྱི༔ ནད་མཚོན་ཐོག་སེར་ཆར་ཕོབ་ཅིག༔ སྤྲུལ་འཁོར་ལྷ་སྲིན་སྡེ་བརྒྱད་ཀྱིས༔ ཐལ་བའི་རྡུལ་དུ་བརླག་པར་མཛོད༔ རྗེས་ཤུལ་མིང་ཙམ་མ་ལུས་པ༔ བ་མོ་ཉི་ཟེར་ཕོག་ལྟར་ཐོངས༔ བཅོལ་བའི་ལས་འདི་གཉེར་གཏད་པས༔ གསང་བདག་ཕྱག་ན་རྡོ་རྗེའི་བཀའ༔ རིག་འཛིན་པདྨ་འབྱུང་གནས་བཀའ༔ ད་ལྟ་རྣལ་འབྱོར་བདག་གི་བཀའ༔ བཀའ་ལས་མ་འདའ་ཐ་ཚིག་ཅན༔ དམ་ལས་མ་འདའ་ས་མ་ཡ༔ བཅོལ་བའི་ཕྲིན་ལས་མྱུར་དུ་བསྒྲུབ༔ ཨོཾ་རཱ་ཧུ་ལ་སརྦ་ས་པ་རི་ཝཱ་ར་བཛྲ་ས་མ་ཡ་ཆོ་ཆོ་རྒྱུག་རྒྱུག་ཛ་ཛཿབྷྱོ་བྷྱོ་སྡང་བའི་དགྲ་ལ་རྦད་རྦད་ཧ་ལ་ཧ་ལ་དགྲ་བོ་ཐིབ་ཐིབ་ཐུམ་རི་ལི་ལི་མཱ་ར་ཡ་རྦད་ཟློག་བྷྱོ༔ བཙན་དམར་ཤན་པའི་རྦད་བསྐུལ་ནི༔ ཙ༔ ལྗོན་ཤིང་བྲག་རི་གཏམས་པའི་ཚལ༔ རྔམས་པའི་སྒྲ་འབྱིན་ཕོ་བྲང་ནས༔ བཙན་རྒོད་ཤན་པ་ཀུ་འདེབས་ཁྱོད༔ མ་ཐོགས་གནས་འདིར་གཤེགས་སུ་གསོལ༔ ཤ་ཁྲག་དམར་མཆོད་འདི་བཞེས་ལ༔ བཅོལ་བའི་ལས་ལ་མ་གཡེལ་རེམ༔ བསྐུལ་ལོ་ཐུགས་དམ་གནད་ནས་བསྐུལ༔ བསྟན་པ་གཉན་ལ་དགྲ་དར་ན༔ མ་གཡེལ་སྲུང་མ་མཐུ་རྩལ་ཅན༔ བསྐུལ་ལོ་དམ་ཚིག་གཉན་གྱིས་བསྐུལ༔ འདས་ན་མགོ་འགས་རྟག་ཏུ་མནར༔ དེ་བས་དམ་ལ་ད་དགོངས་འཚལ༔ ཀི་བསྭོ་ཆའོ་དམག་ལ་ཆོས༔ རེམ་ཅིག་སྲུང་མ་མཐུ་རྩལ་ཅན༔ ཡིད་ལ་བརྣག་པའི་དགྲ་བོ་འདི༔ ལོ་ཟླ་འགྱངས་སུ་མ་ཤོར་བར༔ ད་ལྟ་བསྒྲལ་བའི་དུས་ལ་བབ༔ དམ་ཉམས་དགྲ་བོ་ལས་ངན་གྱི༔ དཔུང་ཚོགས་བྲན་དང་བུ་སྨད་བཅས༔ དམ་ཅན་སྐྱོད་ལ་གཉེར་དུ་གཏད༔ མཐུ་དང་རྫུ་འཕྲུལ་རྩལ་མ་ཞན༔ དགྲ་བོ་དམ་ཉམས་ལས་ངན་གྱི༔ མི་ནོར་བང་མཛོད་དཔུང་བཅས་ལ༔ ཁ་མ་ཆུང་ལ་ཚིམ་མ་སླ༔ ངུ་སྒྲས་རྔམས་ཤིང་ཧམ་པར་རོལ༔ རྗེས་ཤུལ་ཙམ་ཡང་མེད་པར་གྱིས༔ ཨོཾ་ནཱ་ག་ཙནྟྲི་ཡཀྴ་ཡཀྴ་ས་མ་ཡ༔ དགྲ་ལ་རྦད་རྦད༔ རྒྱུག་རྒྱུག༔ བྷྱོ་བྷྱོ༔ ཆོ་ཆོ་ཛཿདེ་ནས་འཇིགས་བྱེད་སྡེ་ལྔའི་དམག་བསྐུལ་དགྲ་བོའི་གྲོང་འཇིག་རེག་ཕུང་སྤུ་གྲི་ནི༔ ཧཱུྃ་ཧཱུྃ་ཧཱུྃ༔ ང་ནི་འཁོར་འདས་དབང་བསྒྱུར་བ༔ ཡེ་ཤེས་སྒྱུ་འཕྲུལ་འཁོར་ལོའི་བདག༔ རིགས་དང་དཀྱིལ་འཁོར་ཀུན་གྱི་དཔལ༔ སྣང་སྲིད་འདི་ན་དྲེགས་པོའི་ཚོགས༔ ཐམས་ཅད་བསྒོ་བའི་བཀའ་ལ་ཉོན༔ ཀྵཿཧེ་ཆེན་བརྡལ་བའི་དུར་ཁྲོད་ཆེན་པོ་ནས༔ དབང་ཆེན་ཐུགས་ཀྱི་སྲས་མཆོག་དབང་གི་སྐུ༔ འཇིགས་བྱེད་གནོད་སྦྱིན་ཤན་པ་དམར་ནག་དང་༔ ཡུམ་མཆོག་སྙིང་འབྱིན་དམར་མོ་སྐུ་བཞེངས་ཤིག༔ སྤྲུལ་པའི་འཁོར་བརྒྱད་འཁོར་བཅས་སྐུ་བཞེངས་ཤིག༔ མ་གཡེལ་མ་འགྱངས་དམ་ཚིག་གཉན་ལ་དགོངས༔ ཧཱུྃ་བྷྱོ༔ ཕོ་བྲང་མཁའ་སྤྱོད་ཙ་རིའི་གཞལ་ཡས་ནས༔ བདུད་མགོན་སེང་གདོང་ཡབ་ཡུམ་སྐུ་བཞེངས་ཤིག༔ སྲས་འཁོར་བམ་རོ་ཕོ་མོ་སྐུ་བཞེངས་ཤིག༔ བཀའ་སྡོད་ལྷ་སྲིན་སྡེ་བརྒྱད་སྐུ་བཞེངས་ཤིག༔ ཡང་འཁོར་ནག་པོ་སྟོང་དང་ཤ་ཟ་འབུམ༔ མ་མོ་བྱེ་བ་གནོད་སྦྱིན་ཁྲི་དང་བཅས༔ བཞེངས་ཤིག་བསྟན་འགྲོའི་དོན་དུ་སྐུ་བཞེངས་ཤིག༔ བསྟན་དགྲ་དམ་ཉམས་འདུལ་བའི་དུས་ལ་བབ༔ ཧཱུྃ་ཛཿབསིལ་བ་ཚལ་གྱི་དུར་ཁྲོད་ཆེན་པོ་ནས༔ དམ་ཅན་རྡོ་རྗེ་ལེགས་པ་སྐུ་བཞེངས་ཤིག༔ ཡབ་ཡུམ་མོན་པ་མོན་མོ་སྐུ་བཞེངས་ཤིག༔ ཡུམ་མཆོག་ཀོང་བཙུན་དེ་མོ་སྐུ་བཞེངས་ཤིག༔ སྤྲུལ་འཁོར་བྱེ་བ་འབུམ་བཅས་སྐུ་བཞེངས་ཤིག༔ མ་གཡེལ་བཅོལ་བའི་ཕྲིན་ལས་གྲུབ་པར་མཛོད༔ ཛཿསྟེང་ཕྱོགས་ནམ་མཁའ་ཡངས་པའི་ཀློང་དཀྱིལ་ནས༔ དྲང་སྲོང་གཟའ་བདུད་ཆེན་པོ་སྐུ་བཞེངས་ཤིག༔ སྤྲུལ་པ་གཟའ་བརྒྱད་འཁོར་བཅས་སྐུ་བཞེངས་ཤིག༔ རྒྱུ་སྐར་ཉེར་བརྒྱད་ལྷ་སྲིན་དྲེགས་པའི་ཚོགས༔ བཞེངས་ཤིག་བསྟན་པ་སྲུང་བའི་དུས་ལ་བབ༔ ཙ༔ བཙན་རྒོད་ཤན་པ་ཆེན་པོ་སྐུ་བཞེངས་ཤིག༔ སྤྲུལ་འཁོར་བཀའ་སྡོད་ཡུམ་བཅས་སྐུ་བཞེངས་ཤིག༔ དམ་ཉམས་དགྲ་བགེགས་བསྒྲལ་བའི་དུས་ལ་བབ༔ ཛ་ཛ་བྷྱོ༔ དམ་ཅན་བཀའ་ཡི་སྲུང་མ་མ་ལུས་པ༔ བཞེངས་ཤིག་དམ་ཚིག་ཐུགས་དམ་དུས་ལ་བབ༔ མ་གཡེལ་མ་གཡེལ་བཀའ་ཡི་སྲུང་མ་རྣམས༔ རེམ་ཅིག་བསྟན་པ་བསྲུང་བའི་དུས་ལ་བབ༔ ཛཿསྤྲུལ་པ་ཆེན་པོའི་དུས་ལ་བབ༔ ཁྱེད་ཅག་དམ་ཚིག་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ འཁོར་ཚོགས་སྡུད་པའི་དུས་ལ་བབ༔ བསྟན་དགྲ་འདུལ་བའི་དུས་ལ་བབ༔ ཆད་དོན་གཉེར་བའི་དུས་ལ་བབ༔ ཛཿབཀའ་ཡི་བསྟན་སྲུང་ཁྱེད་རྣམས་ཀྱིས༔ འབོད་པའི་དུས་སུ་སྙན་མ་སྲ༔ བསྟེན་པའི་དུས་སུ་རྒྱང་མ་རིང་༔ གཡབ་པའི་དུས་སུ་སྤྱན་མ་རྟུལ༔ བསྐུལ་བའི་ལས་ལ་མཐུ་མ་ཆུང་༔ རྦད་པའི་ལས་ལ་རྩལ་མ་ཞན༔ མངགས་པའི་ལས་ལ་གཡེལ་མ་མཛད༔ གཉེར་བའི་ལས་ལ་བང་མ་བུལ༔ བཅོལ་བའི་ལས་ལ་དུས་མ་འགྱང་༔ དགྲ་བགེགས་ཤ་རི་ཁྲག་མཚོ་དང་༔ མཐུན་རྫས་དམར་གྱི་གཏོར་མ་བཞེས༔ མཆོག་གསུམ་སྐུ་གསུམ་རྩ་གསུམ་དང་༔ དུས་གསུམ་རྒྱལ་བ་རྒྱ་མཚོ་དང་༔ གཟུ་དང་དཔང་དུ་དགོངས་སུ་གསོལ༔ བཀའ་ཡི་བསྟན་སྲུང་མཐུ་རྩལ་ཅན༔ གནོད་སྦྱིན་ཆེན་པོ་འཁོར་དང་བཅས༔ མ་ལུས་བདག་གི་ར་མདར་རྒྱུག༔ མ་འགྱངས་མྱུར་དུ་དམག་ལ་ཆོས༔ ཀུན་དགའ་གཞོན་ནུ་ཡབ་ཡུམ་དང་༔ སྤྲུལ་འཁོར་བཀའ་སྡོད་བཅས་པ་རྣམས༔ མྱུར་བར་སྡང་བའི་དགྲ་ལ་རྒྱུག༔ མ་འགྱངས་མྱུར་དུ་དམག་ལ་ཆོས༔ བསྭོ༔ དམ་ཅན་རྡོ་རྗེ་ལེགས་པ་དང་༔ མཆེད་འཁོར་སུམ་བརྒྱ་དྲུག་ཅུར་བཅས༔ མྱུར་དུ་བསྟན་དགྲའི་སྟེང་དུ་རྒྱུག༔ ཆོས་ཤིག་ད་ལྟ་དམག་ལ་ཆོས༔ ཛཿདྲང་སྲོང་གཟའ་བདུད་རཱ་ཧུ་ལ༔ ཡུམ་སྲས་སྡོང་ཟླ་སྤྲུལ་འཁོར་བཅས༔ ཆོ་ཆོ་སྡང་བའི་དགྲ་ལ་རྒྱུག༔ ད་ལྟ་མྱུར་དུ་དམག་ལ་ཆོས༔ བསྭོ༔ བཙན་རྒྱལ་ཤན་པ་ཀུ་འདེབས་དང་༔ ཡུམ་སྲས་སྤྲུལ་འཁོར་དྲེགས་པའི་སྡེ༔ མ་འགྱངས་དགྲ་བོའི་སྟེང་དུ་རྒྱུག༔ མ་གཡེལ་འཁོར་བཅས་དམག་ལ་ཆོས༔ བསྟན་སྲུང་གཉན་པོ་ཁྱེད་རྣམས་ཀྱིས༔ ཤ་ཁྲག་དམར་གཏོར་འདི་བཞེས་ལ༔ མྱུར་དུ་དཔུང་བསྐྱེད་དམག་ལ་ཆོས༔ ཅིའི་ཕྱིར་བདག་གིས་མི་བསྐུལ་རྒྱུ༔ བསྟན་པ་གཉན་ལ་དགྲ་དར་ནས༔ བསྟན་དགྲ་ཡན་པར་ཤོར་ར་རེ༔ དེ་ཕྱིར་བདག་གིས་མི་བཟོད་ཀྱིས༔ བསྐུལ་ལོ་དམ་ཚིག་གཉན་གྱིས་བསྐུལ༔ མཛོད་ཅིག་བསྟན་པའི་དགྲ་བོ་སྒྲོལ༔ རྣལ་འབྱོར་བདག་ལ་དགོངས་སོ་འཚལ༔ ཕྱོགས་བཞིའི་ནག་ཕྱོགས་ཁ་ཡང་དར༔ བདུད་པོ་དམ་སྲི་ཞེ་རེ་རྔམས༔ སྡིག་རྒྱལ་ནག་པོས་ཁྲིམས་ལོག་འཇུག༔ མཐའ་དམག་མཚོན་གྱི་བསྐལ་པ་ལང་༔ ཕྱི་ནང་འཁྲུགས་རྩོད་འཐབ་ར་འཆའ༔ རྡོ་རྗེ་རྒྱལ་པོ་དམངས་སུ་ཕབ༔ བསྟན་གནས་ཡུལ་དགོན་ཐམས་ཅད་བཤིག༔ སྐྱེ་འགྲོ་མི་ཡི་བདེ་བ་བཅོམ༔ མུ་སྟེགས་ལོག་ལྟས་ཆོས་ལ་རྒོལ༔ དེ་འདྲའི་བསྐལ་པ་ཤར་དུས་འདིར༔ བསྟན་སྲུང་གཉན་པོ་མེད་དམ་ཅི༔ མཐུ་རྩལ་རྫུ་འཕྲུལ་གང་ན་བཞུགས༔ ས་མ་ཡ་ཡི་དུས་ལ་བབ༔ ཁྱེད་ལ་ཕྲིན་ལས་བཅོལ་བ་ནི༔ མུ་སྟེགས་ལྟ་ལོག་ཀླ་ཀློའི་སྟེ༔ སྟོད་ཧོར་མཐའ་མི་རྒྱ་སོག་དང་༔ རྒྱ་མི་ཇིང་འདུར་མཐའ་ཧོར་སོགས༔ མཐའ་དམག་དུས་འཁྲུགས་ཤོམ་པའི་བདུད་དཔུང་གི༔ རྗེ་བློན་འབངས་འཁོར་བྲན་གཡོག་བཅས་པ་དང་༔ ཁྱད་པར་དམ་ཉམས་དགྲ་བོ་ཆེ་གེ་ཡི༔ ཚེ་སྲོག་ཁ་རྗེ་དབང་ཐང་ལས་མཐའ་བསྡུས༔ མགོ་བོ་ཆོད་ལ་དོན་སྙིང་དམར་པོ་ཕྱུང་༔ སྙིང་ཁྲག་ཧུབ་རོལ་སྲོག་རྩ་སྒལ་ནས་ཆོད༔ དབང་པོ་བསྣུབས་ལ་རྗེས་ཤུལ་མེད་པར་མཛོད༔ ནད་མཚོན་དུག་རིགས་ཐོག་གི་ཆར་པ་ཕོབ༔ གློ་བུར་ཧུར་ཐུམ་མཚོན་གྱི་ཆར་ཕོབ་ཅིག༔ འགྲོ་འོང་བསྣུབས་ལ་ཕ་འོང་ཁྲོ་ལྟར་ཐོངས༔ བསམ་དོན་གཉེར་ལ་འགུལ་བསྐྱོད་མི་དབང་བར༔ གསལ་བའི་མར་མེ་རླུང་གིས་བསད་ལྟར་སོད༔ དཔུང་ཚོགས་གྲངས་མང་ལམ་དུ་ཆས་བྱུང་ཡང་༔ ལོ་ཐོག་སེར་བས་བཅོམ་པ་བཞིན་དུ་ཐོངས༔ རི་ཐང་མེད་པར་དམག་གིས་ཁྱབ་གྱུར་ཀྱང་༔ བ་མོ་ཉི་མའི་ཟེར་གྱིས་འཇོམས་ལྟར་ཐོངས༔ བདུད་སྤྲུལ་སྨོན་ལོག་སྡིག་རྗེ་བློན་དང་བཅས༔ མ་ལུས་ལུས་པ་མེད་པར་དུས་མྱུར་དུ༔ ལོ་ཟླ་ཞག་གི་དུས་སུ་མ་འགྱངས་པར༔ ཐལ་བའི་རྡུལ་ཕྲན་བཞིན་དུ་བརླག་པར་མཛོད༔ བཀའ་དང་དམ་ཚིག་གཉན་ལས་མ་འདའ་བར༔ བཅོལ་བའི་ལས་དེ་མྱུར་དུ་འགྲུབ་པར་མཛོད༔ གཏོར་ཟོར་དགྲ་ཕྱོགས་སུ་བཏེགས་ལ༔ ཨེ་ཧེ་མ་རུ་ཙེ་གུ་ཎ་ཧྲཱི་ད་ཧཱུྃ་ཕཊ༔ མ་ཧཱ་ཀཱ་ལ་སེང་ཧ་མུ་ཁ་སི་ན་ར་མ་ཧཱུྃ་ཕཊ༔ བཛྲ་ས་དྷུ་ས་མ་ཡ༔ ཧ་ལ་ཀཱ་ལ་རཱ་ཧུ་ལ་ཧཱུྃ༔ ནཱ་ག་ཙནྟྲི་ཡཀྴ་ཧཱུྃ༔ སརྦ་དྷརྨ་པཱ་ལ༔ སརྦ་ཀྵེ་ཊ་པཱ་ལ༔ སརྦ་ལོ་ཀ་པཱ་ལ༔ སརྦ་ས་མ་ཡ་ཛ་ཛཿབསྭོ་བསྭོ༔ ཆོ་ཆོ༔ རྒྱུག་རྒྱུག༔ བྷྱོ་བྷྱོ༔ ཟློག་ཟློག༔ དགྲ་བོ་དམ་ཉམས་ཀྱི་སྟེང་དུ་དམག་སྣ་དྲོངས་ཤིག༔ རྒྱུག་ཅིག་དགྲ་བོའི་ཆེ་བརྒྱུད་ལ་བབ་ན་འབྲུ་དྲུག་སེར་བས་བཅོམ་པ་བཞིན་དུ་ཐོངས་ཤིག༔ དགྲ་བོའི་ཆུང་བརྒྱུད་ལ་བབ་ན་མེ་ཏོག་སད་ཀྱིས་ཁྱེར་བ་བཞིན་དུ་ཐོངས་ཤིག༔ དགྲ་བོའི་དཔུང་ཚོགས་ལ་བབ་ན་ཐལ་བ་རླུང་གིས་གཏོར་བ་བཞིན་དུ་ཐོངས་ཤིག༔ དགྲ་བོའི་ཡུལ་མཁར་ལ་བབ་ན་སྲན་ཕུང་ལ་བེར་ཀས་བརྒྱབ་པ་བཞིན་དུ་ཐོངས་ཤིག༔ བདག་ལ་མ་ཉེས་ཁ་ཡོག་དང་གླེང་འདེབས་པ༔ དྲང་པོར་སྨྲས་ཀྱང་རྫུན་དུ་གྱེར་བ༔ བདེ་བར་འདུག་ཀྱང་སྡུག་ཏུ་འཇུག་པ༔ ཆོས་ལྟར་བསྒྲུབ་ཀྱང་འཕྲོག་བཅོམ་བྱེད་པ༔ ཉེས་མེད་པ་ལ་ཆད་པས་གཅོད་པར་བྱེད་པའི་དགྲ་བོ་དམ་ཉམས་འདི་ལ་ཕོབ་ཅིག༔ རྒྱོབ་ཅིག༔ སོད་ཅིག༔ ཐུལ་ཞིག༔ དཀོན་མཆོག་གསུམ་གྱི་བདེན་པས་དྲང་སྲོང་རཱ་ཧུ་ལའི་བདེན་ཚིག་བཞིན་དུ་དགྲ་བོ་འདི་ལ་བདེན་པའི་མཐུ་དང་ནུས་པའི་སྟོབས་ཀྱིས༔ དམོད་བསྐུལ་མདོས་ཟོར་གྱི་དབལ་ཁ་ཕོབ་ཅིག༔ སོད་སོད༔ ཨོཾ་བཛྲ་མ་ཧཱ་ཀྲོ་དྷཱ་པདྨ་ཀྲོ་དྷཱི་ཤྭ་རཱི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྴ་ཀཱ་ལ་རཱུ་པ་ཀརྨ་རཾ་རཾ༔ ཛྭ་ལ་རཾ་རཾཿཧཱུྃ་ཕཊ༔ གནོད་བྱེད་དགྲ་བགེགས་ལོག་འདྲེན་མཐའ་དམག་དུས་འཁྲུགས་ཞིང་བཅུའི་བསྟན་དགྲ་ཐམས་ཅད་མཱ་ར་ཡ་བྷྱོ་ཟློག༔ ཅེས་བོར་རོ༔ ས་མ་ཡ༔ རྒྱ་རྒྱ་རྒྱ༔ མཐའ་དམག་དུས་འཁྲུགས་མ་རུངས་ཁ་དར་དུས༔ རྦད་བསྐུལ་འདི་ལ་རབ་ཏུ་བརྩོན་པ་གཅེས༔ གལ་ཆེན་དགྲ་བོ་མ་གཏོགས་བསྐུལ་མི་རུང་༔ འདི་ཡིས་དགྲ་བགེགས་མཐའ་དམག་དུས་འཁྲུགས་རྣམས༔ ཐལ་བ་རླུང་གིས་གཏོར་བཞིན་བརླག་པར་འགྱུར༔ མ་འོངས་ང་ཡི་བརྒྱུད་འཛིན་སྡུག་པའི་དུས༔ ཤིན་ཏུ་བརྩེ་བའི་རྣོ་མཚོན་བཞག་པ་འདི༔ ཕྱི་རབས་སྐལ་ལྡན་རྣམས་ཀྱིས་གཅེས་པར་ཟུངས༔ སྔགས་པའི་ལས་ཀ་འདི་མིན་གཞན་མ་ཡིན༔ དམོད་བསྐུལ་འདི་ལ་ཚུལ་བཞིན་བརྩོན་པས་ན༔ སྟོང་གསུམ་ཡོ་ལོག་བྱུང་ཡང་འཇིགས་མི་འགྱུར༔ མི་བསླུ་ངེས་པ་པད་འབྱུང་བཀའ་ཡིན་གྱི༔ མཐའ་དམག་དུས་འཁྲུགས་རྒྱལ་པོའི་ཆད་པ་དང་༔ མ་ཉེས་ཁ་ཡོག་སྲོག་ལ་བབ་དུས་བརྩོན༔ ལན་ཅིག་བྱས་པས་བརླག་པའི་ཐེ་ཚོམ་མེད༔ འཇིགས་བྱེད་སྡེ་ལྔ་གྲོགས་སུ་བསྟེན་པར་མཛོད༔ ཕ་རོལ་འཇིག་རྟེན་དག་ལ་སྨོས་ཅི་དགོས༔ སྣང་སྲིད་ལྷ་སྲིན་ཡོངས་ཀྱི་སྲོག་སྙིང་འདུ༔ ས་མ་ཡ༔ བཀའ་འདི་མ་མོ་བཅུ་གཉིས་ཉེར་བརྒྱད་དང་༔ གནོད་སྦྱིན་དམར་ནག་ཀུན་དགའ་གཞོན་ནུ་སོགས༔ བསྟན་སྲུང་དམ་ཅན་རྒྱ་མཚོའི་ཚོགས་ལ་གཉེར༔ ལྟ་ལོག་ལོག་སྤྱོད་སྒྲོ་སྐུར་གླེང་མོ་མཁན༔ ས་སྟེང་འདི་རུ་བྱུང་ན་སྙིང་ཁྲག་ཕོས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ཨ་ཐམ་རྒྱ༔ ཞེས་པ་འདི་ཡང་ཟབ་གསང་རྫོགས་པ་ཆེན་པོ་འོད་གསལ་སྒྱུ་མའི་རྣལ་འབྱོར་པ་རིག་འཛིན་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་ཤྭ་བྲག་རྡོ་རྗེའི་མིང་ནས་བཏོན་ཏེ་མི་ལོ་བདུན་ལ་བཀའ་རྒྱས་བཏབ་ནས་མཐར་སྨར་སྟོད་འབྲོས་ཕུག་ཅེས་བྱ་བ་རྡོ་རྗེ་མཁའ་འགྲོའི་གསང་ཕུག་ནས་དག་པར་ཕབ་པའི་ཡི་གེ་པ་ནི་སྔོན་སྨོན་ལས་ཀྱིས་འབྲེལ་བའི་རང་སློབ་ཕུན་ཚོགས་བཀྲ་ཤིས་ཞེས་བྱ་བས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།